% Text title            : jayamangala
% File name             : jayamangala.itx
% Category              : major\_works, mangala
% Location              : doc\_z\_misc\_major\_works
% Transliterated by     : Dhaval Patel drdhaval2785 at gmail.com
% Proofread by          : Dhaval Patel drdhaval2785 at gmail.com
% Latest update         : September 15, 2014
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. sAMkhyasaptatiTIkA jayama~NgalA  ..}##
\itxtitle{.. sA~NkhyasaptatiTIkA jayama~NgalA ..}##\endtitles ##


kArikA 1


adhigatatattvAlokaM lokottaravAdinaM praNamya munim |
kriyate saptatikAyAShTIkA jayama~NgalA nAma ||
prekShAvanto.anukte prayojane na kvachitpravartanta iti prayojanamuchyate
tattvaj~nAnAnmokShaH tattvAni pa~nchaviMshatiH | tathA choktam \-
pa~nchaviMshatitattvaj~no yatra kutrAshrame rataH |
jaTI muNDI shikhI vApi muchyate nAtra saMshayaH || iti ||
teShu cha ShaShTitantrAdikhyAteShviti | vistaratvAt ShaShTitantrasya
saMkShiptaruchisattvAnugrahArthaM saptatikArambhaH | vakShyati cha
'etadAryAbhiH saMkShiptam' iti | mokSheNa kiM phalamiti chedduHkhanivR^ittiH |
atattvaj~no duHkhairabhihanyamAnassaMsarannAste | tattvaj~nAnAttu
kaivalyamApnoti, na duHkhairabhihanyate | hanyamAnena ko heturjij~nAsitavya
ityatrAha\-

|| duHkhatrayAbhighAtAjjij~nAsA tadavaghAtake hetau |
     dR^iShTe sApArthA chennaikAntAtyantato.abhAvAt || 1 || ||

'duHkhatrayAbhighAtAjjij~nAsA' ityAdi | duHkhAnAM trayaM duHkhatrayam |
AdhyAtmikam, Adhibhautikam, AdhidaivikaM cheti | AtmanyadhyAtmam,
tatra yadbhavati tadAdhyAtmikam | shArIraM mAnasaM cheti | tatra
vAtapittashleShmaNAM vaiShamyeNa jvarAdiduHkham, tachCharIre bhavatIti
shArIram | yatkAmakrodhashokAdibhiH manasi duHkhaM tanmAnasam |
yanmAnuShapashumR^igapakShisarIsR^ipasthAvarAnyadhikR^itya  bhavati
tadAdhibhautikam | yachCharIre grahAveshAdIni daivAnyadhikR^itya bhavati
tadAdhidaivikamiti | etadduHkhatrayam | tenAbhighAtAtpIDanAddhetorjij~nAsA
j~nAtumichChA bhavati ||
kasmin viShaya ityAha\- 'tadavaghAtake hetau'
iti | avaghAtayatyapanayatItyavaghAtakaH | tasya
duHkhatrayasyAvaghAtakastadavaghAtakaH | tR^ijakAbhyAM
ShaShThIsamAsapratiShedhaH, 'tatprayojako hetushcha' iti na bhavati |
kena khalvimAni duHkhAnyutpadyanta iti tadavaghAtako heturjij~nAsyo
bhavati | duHkhavAnahametatpratIkAramanveShayAmIti prAyovAdaH | sa cha
pa~nchaviMshatitattvaj~nAnAnnAnya iti manasi vartate ||
'dR^iShTe sA.apArthA chet' iti | syAdetat yadi dR^iShTastadavaghAtako
heturna syAt | yAvadAdhyAtmikasya shArIraduHkhasyApanayane
chikitsAshAstravihita evopAyo.asti, mAnasasyApi saMkhyAnabalaM
ramyAshcha shabdAdayo viShayAH | AdhibhautikAdhidaivikayorapi,
avaghAtaheturanuShThIyamAno loka eva dR^ishyate, tayoH satpratipakShatvAt |
tatrAdhidaivikasya sAmadAmabhedadaNDopAyaghaTitArambhAH | AdhibhautikasyApi
nipAtapratipAtasaMvR^itapradeshAshrayaNAdayaH ||
tatashcha dR^iShTe hetau sati jij~nAsA.asmin viShaye nirarthaketyAsha~NkyAha\-
'naikAntAtyantato.abhAvAt' iti | nA.apArthA, sArthikaiva | kutaH\- ekAntataH
ekAntAtyantato.abhAvAdapi | ekAntenAtyantena cha duHkhAbhAvasyAbhAvAdityarthaH |
dR^iShTe hyupAye kriyamANe.api keShAMchidduHkhatrayaM bhavatyeveti
naikAntenopashamaH | kathaMchidupashame punarutpAdanAt nAtyantenopashamaH |
tasmAdaikAntikAtyantikaduHkhopashamAya jij~nAsA yukteti || 1||


kArikA 2

yadyevamaikAntikAtyantikaduHkhopashamaheturvavedavihito.asti | tathA chAha\-
aNama somamamR^itA abhUmAganma jyotiravidAma devAn |
kimasmAn kR^iNavadarAtiH kimu dhUrttiramR^itamartyasya || iti ||
asyAyamarthaH\- indro devanAmapaNDitAnAha 'divyAH kimanyatsukhamasti' iti |
te tamAhuH 'nAsti' iti | somamapAma, somaM pItavanto vayam | tato.amR^itA
abhUma, vyapagatamR^ityavo jAtAH | 'aganma jyotiH' iti | jyotiH svargo.ayam,
taM prAptA vayam | 'avidAma devAn' iti | iyanto devA asmin svarga iti
j~nAtavantaH j~nAnamasmAkamutpannamityarthaH | 'kimasmAn kR^iNavat' iti |
kR^iNavanmR^ityuruchyate | asmAn somapAnAn kiM mR^ityuH kariShyate | arAtiH
vyAdhiH so.api, dhUratirjarA sApi chAsmAkaM kiM kariShyati | 'amR^itamartyasya'
iti | tasmAt somapAnAdduHkhopashamaheturastItyasmin pUrvapakShe \-

|| dR^iShTavadAnushravikaH sa hyavishuddhikShayAtishayayuktaH
tadviparItaH shreyAn vyaktAvyaktaj~navij~nAnAt || 2 || ||

'dR^iShTavadAnushravikaH' ityAdi | anushrUyate pAramparyeNetyanushravo
vedaH shruvaH 'R^idorap' | tatra  bhavo heturAnushravikaH | adhyAtmAdiH |
dR^iShTena tulyo dR^iShTavat | tasyApi doShadarshanAt ||
yadAha \- 'sa hyavishuddhikShayAtishayayuktaH' iti | yasmAdAnushraviko
heturavishuddhyAdibhistribhirdoShairyuktaH | tatrAgnihotrAdau pashuvyApAdanAt
somapAnAdavishuddhiyuktaH | karmakShayAt svargachyutiriti kShayayuktaH |
tathA chAhuH \- 'bahUnIndrasahasrANi vyatItAni yuge yuge' iti | 'sa hi
deveShvapi devo daridrAti' iti | 'IshvaraM dR^iShTvA mahad duHkhamutpadyate'
ityatishayayuktaH | tathAhi\- yaH kratushatena yajate tasya mahadaishvaryam, yo
dvAbhyAM tribhirvA tasyAlpamiti | tasmAdAnushraviko.api dR^iShTavatparityAjyaH
||
kastarhi shreyAnityAha\- 'tadviparItaH shreyAn' iti | dR^iShTAnushravikadvArA
yo viparItaH tattvaj~nAnAkhyaH sa shreyAn | tasya akaivalyaprApakatvAt |
tatraikAntAtyantato.abhAvAddR^iShTAchChreyAn | sharIrahAnAddhi
shuddhaphalaH, prakR^itihAnAdakShayaphalaH, anuttaratvAchcha niratishayaphala
ityAnushravikAchChreyAn ||
sa kathaM prochyata ityatrAha 'vyaktAvyaktaj~navij~nAnAt' iti |
rAshitrayeNa pa~nchaviMshatitattvAni kathyante | tatra mahadAdibhUtaparyantaM
trayoviMshatiprakAraM vyaktamuchyate, tena rUpeNa pradhAnasya vyaktatvAt |
avyaktaM pradhAnam, kenachidrUpeNAvyaktatvAt | jAnAtIti j~naH puruShaH |
teShu yadvij~nAnaM svarUpaparichChedaH, tasmAt prApyata ityarthaH | tanvAdi hi
parichChidya tadabhyAsAduttarakAlaM prakR^itipuruShAntaraj~nAnamutpadyate,
tatashcha kaivalyamiti | asyA AryAyA vakShyamANA yAH, sarvA evArthena
bhAShyasthAnIyA draShTavyAH || 2||


kArikA 3


tatraiShAM vyaktAdInAmutpAdAbhyAM svarUpamAha\-
|| mUlaprakR^itiravikR^itirmahadAdyAH prakR^itivikR^itayaH sapta |
ShoDashakastu vikAro, na prakR^itirna vikR^itiH puruShaH || 3 ||

'mUlaprakR^itiH' ityAdi | prakR^itiH pradhAnam | prakriyata utpadyate pradhAnAt
asyA iti prakR^itiH | mUlaM cha tatprakR^itishcheti mUlaprakR^itiH | saptAnAM
prakR^itInAM mUlamAdyaM kAraNamityarthaH ||
'avikR^itiH' iti | na vikriyata ityavikR^itiH | na kutashchidutpAdyata
ityarthaH | etatprathamaM tattvam ||
'mahadAdyAH prakR^itivikR^itayaH sapta' iti | mahAn buddhissa Adyo
yAsAM prakR^itInAM tAstathoktAH | prakR^itayashcha vikR^itayashcheti
prakR^itivikR^itayaH | tatra mahAnaha~NkAraM janayan prakR^itiH, mahata
utpadyamAno vikR^itiH | tanmAtrANi shabdasparsharUparasagandhAH pa~ncha
yathAkramamAkAshavAyvagnyudakapR^ithivyAkhyAni bhUtAni janayantaH prakR^itayaH,
aha~NkArAdutpadyamAnA vikR^itayaH | ityetAni sapta tattvAni ||
'ShoDashakashcha vikAraH' iti | ShoDasha parimANamasyeti ShoDashakaH |
pa~ncha buddhIndriyANi, pa~ncha karmendriyANi, manashchetyekAdashendriyANi,
pa~ncha mahAbhUtAnItyayaM ShoDashako gaNaH | chakAra evakArArthaH | vikAro
vikR^itireva | (nAsmAt ki~nchidutpadyata ityarthaH | etAni ShoDasha tattvAni) |
'na prakR^itirna vikR^itiH puruShaH' iti | puraM sharIraM tasmin vasatIti
puruShaH | nairukto.atravidhiH | tasmAnna ki~nchidutpadyata iti na prakR^itiH,
niShkriyatvAt | nApyayaM kutashchidutpadyata iti na vikR^itiH, anAditvAt || 3||


kArikA 4


eShAM vyaktAdInAM siddhau pramANAnyAha\-
|| dR^iShTamanumAnamAptavachanaM cha, sarvapramANasiddhatvAt |
trividhaM pramANamiShTaM, prameyasiddhiH pramANAddhi || 4 || ||

'dR^iShTam' ityAdi | dR^iShTaM pratyakSham | anumIyate yena tadanumAnam |
AptaH kShINadoShastena yaduchyate tadAptavachanam | AgamaH | etat trividhaM
pramANamiShTam ||
nanu chAnyAnyapi pratibhAdIni pramANAni santi tadyathA\-
pratibhaupamyamaitihAsamabhAvassambhavastathA |
arthApattiritImAni pramANAnyapare jaguH || iti ||
asmin pUrvapakSha Aha\- 'sarvapramANasiddhatvAt' iti | sarveShAM
pratibhAdInAM pramANAnAM siddhatvAt, trividha evAntarbhAvAdityarthaH |
tatra grAme nagare vA vartata iti pratibhotpannA | tatra yadA
kShINadoShasya, tadAbhij~naprAptatvAt pratyakShameva | tasyAkShINadoShasya
vitathatvAdapramANam | yApyarthAvisaMvAdinI kAdAchitkA, sApi kAdAchitkAdeva
nimittAdutpadyamAnAnumAnameva na pramANAntaram | 'gauriva gavayaH'
ityaupamyam | tatra gavayamajAnAnaH kashchidAptaM pR^ichChati 'kIdR^isho
gavayaH', iti | sa tamAha\- 'yAdR^isho gaustAdR^isho gavayaH' iti |
tadetadAptavachanameva na pramANAntaram | yadApi labdhopadesho gavayaM
pashyati, tadApi gavi dR^iShTenaiva viShANAdinA li~Ngena gavayasya
vyavahAraM pravartayatItyanumAnameva na pramANAntaram | 'itiha vai
vaishravaNaH' ityaitihyam | etadAptavachanameva na pramANAntaram | 'itiha'
iti nipAtasamudAya upadeshapAramparye vartete | itiha evaitihyam | svArthe
ya~n | 'nAstIha ghaTo.anupalambhAt' ityabhAvaH | tatra ghaTashUnyapradesha
eva ghaTAbhAvaH, sa cha pratyakShapramANasiddhatvAnna pramANAntaram |
'mAShaH prastha ityukte chatvAraH kuDapA itIdamapi sambhavati' ityayaM
sambhavaH | tatra samudAyali~NgAvayavali~NginaH parichChedAdanumAnameva |
avayavaissamudAyasyArabdhatvAt kAryakAraNalakShaNaH sambandhaH |
'devadatto divA na bhu~Nkte balavAMshchetyukta arthAdrAtrau bhu~Nkte'
ityarthApattiH | tata eva rAtrau tasya pratItiranumAnAnna bhidyate | idameva
chAnyathAnupapattirityuchyate ||
kiM pramANatrayalakShaNe prayojanamiti chedAha\- 'prameyasiddhiH
pramANAddhi' iti | yasmAt prameyasyArthasya siddhiH pramANAt, anyathA kathaM
tatprAptiparihArau syAtAm || 4||


kArikA 5


dR^iShTAdipramANAnAM lakShaNamAha\-
|| prativiShayAdhyavasAyo dR^iShTaM, trividhamanumAnamAkhyAtam |
talli~Ngali~NgipUrvakam, AptashrutirAptavachanaM cha || 5 || ||

'prativiShayAdhyavasAyaH' ityAdi | viShayaM viShayaM prativiShayam,
prativiShayamadhyavasAyaH prativiShayAdhyavasAyaH | viShayAH shabdAdayaH,
adhyavasAyo buddhiH | shabdasparsharUparasagandheShu yathAkramaM
shrotratvakchakShurjihvAghrANendriyadvAreNa visheShAvadhAraNapradhAnA yA
buddhirutpadyate tad dR^iShTam, shuddhatvAtpramANamashuddhatvAdapramANam |
tachchaturvidham\- savyapadesham, savikalpam, arthavyatirekIndriyavyatirekI
cheti | tatra dUrAt kvachidAgachChantaM dR^iShTvA devadattasArUpyaM
vyapadishati devadatto.ayamiti yA buddhirutpadyate tatsavikalpam,
saMshayitatvAdapramANam | taimirikasya dvichandradarshanaM tadarthavyatireki,
dvitIyachandrAbhAvAt | yatsvapnadarshanaM tadindriyavyatireki,
nidropaplutatvAdindriyANAm ||
'trividhamanumAnamAkhyAtam' iti | ShaShTitantre vyAkhyAtam\- pUrvavat,
sheShavat, sAmAnyatodR^iShTamiti | atItAnAgatavarttamAnAstrayaH padArthAH |
tatra bhaviShyadarthasAdhanAya pUrvavadanumAnam | pUrvaM li~NgamasyAstIti
pUrvavat | yathonnatajaladharaM dR^iShTvA vR^iShTirbhaviShyatItyanumIyate |
atItArthasAdhanAya sheShavat\- sheShaM li~NgamasyAstIti | yathAsyA
nadyA upari vR^iShTirbhUtA, yasyAH kaluShodakaM sheShaM li~Ngamiti |
varttamAnArthasAdhanAya sAmAnyatodR^iShTam\- sAmAnyena li~Ngali~NgidR^iShTatvAt |
yathA devadattasya gatipUrvikA deshAntaraprAptirdR^iShTA, tathA sUryAdInAM
sAmAnyena deshAntaraprAptyA gatiranumIyate ||
'talli~Ngali~NgipUrvakam' iti | trividhamanumAnam | kadAchilli~NgapUrvakaM
kadAchilli~NgipUrvakaM loke dR^ishyate | tadyathA\- shrAvyeNa virutena
kadAchitkokilo.anumIyate, kadAchitkokilaM li~NginaM dR^iShTvA shrAvyeNApi
virutenAsya bhavitavyamiti tayorgamyagamakatvaM sati sambandhe | sambandhAshcha
sapta\- tatra svasvAmibhAvasambandho yathA rAjapuruShayoH kadAchitpuruSheNa
rAjA rAj~nA vA puruShaH | evaM prakR^itivikArasambandho yathA yavasaktoH |
kAryakAraNasambandho yathA dhenuvatsayoH | pAtrapAtrikasambandho yathA
parivR^iTtriviShTabdhayoH | sAhacharyasambandho yathA chakravAkayoH |
pratidvandvisambandho yathA shItoShNayoH | tatraikasya bhAve.anyAbhAvaH
pratIyate | nimittanaimittikasambandho yathA bhojyabhojakayoriti |
ebhissambandhaistrividhamanumAnaM pramANanna lupyate ||
'AptashrutirAptavachanaM cha' iti | AptaH kShINadoShaH | yachchAhuH\-
svakarmaNyabhiyukto yo rAgadveShavivarjitaH |
nirvairaH pUjitaH sadbhirApto j~neyaH sa tAdR^ishaH || iti ||
Aptebhyo yA shrutiparamparayA shrutirAgatA Aptavachanam, tairdR^iShTo.anumito
vArthaH, paratra svabodhasadR^ishabodhAntarotpattaye shabdenopadishyate |
yadanyavachanaM so na plavate (?) | chashabdo.anumAnena
tulyakakShyatvakhyApanArthaH | yathA trikAlamaviShayamanmAnaM
tathAptavananamapIti || 5||


kArikA 6


eShAM trayANAM kaH kasya viShaya ityata Aha\-
|| sAmAnyatastu dR^iShTAdatIndriyANAmpratItiranumAnAt |
tasmAdapi chAsiddhaM parokShamAptAgamAt siddham || 6 || ||

'sAmAnyatastu' ityAdi | trividhaM prameyam\- pratyakShm, parokSham,
atyantaparokShaM cheti | tatra yatsAmAnyatodR^iShTamanumAnaM tasmAdatIndriyANAM
parokShANAM prasiddhirasti | tannishchayaH, teShAM pratyakShaviShayatvAt |
pUrvavachCheShavatostvamanumAnayorbhaviShyadbhUtArthavR^ittitvAdvarttamAneShvatIndriyeShu
cha pravR^ittyasambhavaH ||
'tasmAdapi chAsiddham' iti | sAmAnyatodR^iShTAdanumAnAdyadasiddhaM parokSham,
tadatyantaparokShatvAdAgamAtsiddham | yathA svargApavargAviti | pratyakShe
tu prameye dR^iShTameva vyApriyata ityarthAduktam || 6||


kArikA 7


nanu cha 'vyaktAvyaktaj~navij~nAnAt', vyaktaM
tAvat pratyakShAnumAnAbhyAM siddham, pradhAnapuruShayostu
sarvadAnupalambhAt kathaM siddhirnastayoriti nAnupalabdhimAtreNAsattvam |
yatashchaturbhiH prakAraiH satAmapi padArthAnAmupalabdhirbhavati |
deshadoShAdindriyadoShAdviShayadoShAdarthAntaradoShAchcha | tAneva bhedena
darshayannAha\-
|| atidUrAtsAmIpyAdindriyaghAtAnmano.anavasthAnAt |
saukShmyAdvyavadhAnAdabhibhavAtsamAnAbhihArAchcha || 7 || ||

'atidUrAt' ityAdi | yathA dUramutpatitasya pakShiNo nopalabdhiH ||
'sAmIpyAt' iti | atishabdo.atrApi yojanIyaH | atisAmIpyAditi | yathA
chakShuHsthasyA~njanasya | ubhayatrApi deshadoShakR^itAnupalabdhiH ||
'indriyaghAtAt' iti | shrotrAdInAM buddhIndriyANAM
doShAdyogyadeshAvasthitAnAmapi shabdAdInAmanupalabdhiH ||
'mano.anavasthAnAt' iti | manaso.anavasthAnamasamAhitatA,
viShayAntarapravR^ittatvAt | tatashchAnupahatendriye.api sannihitaM viShayaM
nopalabhate | ubhayatrApIndriyadoShAdanupalabdhiH | manaso.apIndriyatvAd
bhedenopAdAnaM tu manasaH prAdhAnyArtham ||
'saukShmyAt' iti | viShayadoShAt | viShaya eva paramANvAdistathA,
yenAvyagramanasA.apyanupahatendriyeNa nopalabhyate ||
'vyavadhAnAt' iti | yavanikAdibhistirodhAnAt sthUlA apyavikR^iShTA ghaTAdayo
nopalabhyante ||
'abhibhavAt' iti | AdityaprabhAbhibhUtatvAt divA tArakA nopalabhyante ||
'samAnAbhihArAchcha' iti | sadR^ishAnAM rAshIkaraNAt dhAnyarAshau hyeko
dhAnyaguDakaH prakShipto na dR^ishyate | triShvapyarthAntaradoShAdanupalabdhiH |
natveta anupalabhyamAnA na santi || 7||


kArikA 8


yadyevaM kena prakAreNa satorapi pradhAnapuruShayoranupalabdhirityAha\-
|| saukShmyAttadanupalabdhirnAbhAvAt kAryatastadupalabdheH |
mahadAdi tachcha kAryaM prakR^itisarUpaM virUpaM cha || 8 || ||

'saukShmyAttadanupalabdhiH' ityAdi | prakArAntarAbhAvAt sUkShmatvAtsatorapi
tayoranupalabdhiH | nanvabhAvAdeva kasmAdanupalabdhirna bhavati | yathA
ghaTasyotpatteH prAk mR^it sharAdiShu || tasya pradhvaMsAbhAvAt,
gavi vAshvatvasyAshvatve vA gotvasyetaretarAbhAvAt, vandhyAsutasya
vAtyantAbhAvAdityAha\- 'nAbhAvAt' iti | chaturvidhAdityarthaH ||
yadyevaM kathaM tau sta iti gamyata ityAha\- 'kAryatastadupalabdheH' iti |
yadyapyatrobhayaM prakrAntaM tathApi tachChabdena pradhAnaM nirdishyate |
pradhAnasyAstitvapratipattiH kAryAdityarthaH | puruShasyAstitvapratipattau
hetuM vakShyati ||
kiM tatkAryamityAha\- 'mahadAdi tachcha kAryam' iti | mahAn buddhiH sa
Adiryasya tanmahadAdibhUtaparyantaM kAryamasti | tat pradhAnam, yasyedaM
mahadAdikAryaM vyaktam, akAraNasya kAryasyAnutpAdAt ||
'prakR^itisarUpaM virUpaM cha' iti | tadvyaktaM prakR^iteH pradhAnasya
sadR^ishamasadR^ishaM chetyarthaH | etaduttaratra yojayiShyate || 8||


kArikA 9


tatkAryaM kAraNAdutpadyamAnaM sadutpadyate, kimasat, kiM vA sadasaditi? tatra
viruddhadharmAdhyAsitatvAtsadasannopapadyate | asaditi vaisheShikAH |
atra dUShaNamAha\-
|| asadakaraNAdupAdAnagrahaNAt sarvasambhavAbhAvAt |
shktasya shakyakaraNAt, kAraNabhAvAchcha satkAryam || 9 || ||

'asadakaraNAt' ityAdi | iha loke asataH karaNaM nAsti, yathA shashaviShANAdInAm |
yadeva sat ghaTAdidravyaM tadeva mR^itpiNDAdinA kAraNavisheSheNa kriyate,
nAsat ||
'upAdAnagrahaNAt' iti | iha yadarthaM yadupAdIyate tasya tadupAdAnaM kAraNam,
yathA tailasya tilAH, dadhnaH kShIram | atra tailaM dadhi cha yadi na syAt
kathaM tasyopAdAnasya grahaNaM tadarthibhiH kriyate | tasmAdupAdAnasaMgrahAt
sadeva kAryam | anyathA sikatAsalilayorapi grahaNaM syAt ||
'sarvasambhavAbhAvAt' iti | yadyasatkAryaM bhavet tadA sarvasya sarvatra
sambhavaH syAt | na chaivam | tasmAtsadeva kAryam ||
'shaktasya shakyakaraNAt' iti shaktaM kAraNaM nAshaktamityevamapyavagantavyam |
anyathopahatashaktarbIjA~Nkurotpattiprasa~NgaH | shaktashcha ko
bhavitumarhati, yaH shaktimAn | tasya shaktimataH shakyasya karaNAt,
shakanIyasya kAryasyotpAdanAdityarthaH | evaM cha tachChakanIyaM yadi kAraNe
shaktirUpeNAvasthitaM syAt | tasmAtsadevotpadyate nAsat ||
'kAraNabhAvAchcha' iti | kAraNasya sattvAdityarthaH | yadyasatkAryamutpadyate
kimiti kAraNabhAvena kAryasya bhAvo bhavati | bhavati cha |
tasmAchChaktirUpeNAvasthitamiti gamyate | athavA\- kAraNabhAvAditi
kAraNasvabhAvAt | yatsvabhAvaM kAraNaM tatsvabhAvaM kAryam, yathA
snigdhasvabhAvastilebhyaH snigdhameva tailam, mR^ito mR^itsvabhAvo ghaTaH |
yadyasatkAryaM syAt, asatsvabhAvebhyo hyutpAdyetetyevaM sAMkhyAnAM
sadevotpadyata iti siddhAntaH || 9||


kArikA 10


evaM mahadAdikAryaM sadevotpadyata iti vyavasthApya prakR^itevirUpaM sarUpaM
cha darshayati | tatra prakR^itervirUpamadhikR^ityAha\-
|| hetumadanityamavyApi sakriyamanekamAshritaM li~Ngam |
sAvayavaM paratantraM vyaktaM, viparItamavyaktam || 10 || ||

'hetumat' ityAdi | vyaktaM mahadAdibhUtaparyantam | avyaktaM pradhAnaM
tatra vyaktaM hetumat, yathAsvaM kAraNebhya utpadyamAnatvAt |
tatra pradhAnAdutpadyamAno mahAn hetumAn, mahato.aha~NkAro hetumAn,
aha~NkArAttanmAtrANyekAdashendriyANyutpadyamAnAni hetumanti cha,
tanmAtrebhyashcha mahAbhUtAni hetumanti | viparItamavyaktamahetumadityarthaH,
tasyAnyataH kutashchidanutpAdAt | nahi pradhAnAkiMchidaparamasti
yatastadutpadyate ||
anityaM vyaktam, kAraNebhya utpannatvAt ghaTAdivat | kAraNAni cha prAguktAnyeva |
viparItamavyaktaM nityamityarthaH, kutashchidanutpannatvAt ||
avyApi vyaktaM prAdeshikamityarthaH | daivaM mAnuShaM tairyagyonaM cha,
tadAnImanyatrAvartamAnatvAt | sarvagataM viparItamavyaktaM vyApItyarthaH,
devAdiShu triShu lokeShu sarvadA vartamAnatvAt |
'sakriyam' iti | kriyAshabdenAtra saMsaraNamabhipretam, na kriyAmAtram |
mahadAdisUkShmaparyantaM vyaktaM devAdi saMsaratItyarthaH | viparItamavyaktam,
asaMsAri | triShu lokeShu sthitatvAnna saMsarati | na punaH kriyaiva nAstIti
niShkriyam, tasya jagatkartR^itvAt ||
anekaM vyaktam, mahadAdibhUtaparyantatAyAstrayoviMshatiprakAratvAt | viparItaM
vyaktam, trayANAM lokAnAM tasyaikasya kAraNatvAt ||
'Ashritam' iti | yadyasmAdutpannaM mahadAdi vyaktaM tadeva tadAshritaM
nAnyat | utpannamanyadAshritamiti darshanArthaM vachanam, anyathA
hetumadityanenaivAshritaM siddhameva | viparItamavyaktam, anAshritam |
tato.anyasya kAraNasyAbhAvAt ||
'li~Ngam' iti | li~Ngyate.anenAvyaktamiti li~Ngam | viparItamavyaktam,
na li~Ngyate ki~nchidaneneti | athavA layaM gachChatIti li~Ngam |
pralayakAle hyAkAshAdayaH pa~ncha yathAkramaM shabdAditanmAtreShu lIyante,
tanmAtrANIndriyANi chAha~NkAre, aha~NkAro mahati, mahAnpradhAna iti |
viparItamavyaktam, na kutrachididaM lIyate, ahetutvAt ||
'sAvayavam' iti | shabdAdayo.avayavA uchyante | tairAdhyAtmikaM bAhyaM cha
vyaktaM yuktam | viparItamavyaktam, tairayuktatvAt ||
paratantram | na svatantram | yadasmAdutpadyate tadevAnuruddhya svakAryaM
janayati na tadvyatirekeNeti darshanArtham | anyathA hetumadityanenaiva
paratantratvaM prasiddhameva | viparItamavyaktam, svatantraM na
kiMchidapekShate || 10||


kArikA 11


sArUpyamadhikR^ityAha\-
|| triguNamaviveki viShayaH sAmAnyamachetanamprasavadharmi |
vyaktaM, tathA pradhAnam, tadviparItastathA cha pumAn || 11 || ||

'triguNam' ityAdi | trayassattvAdayo guNA yasya tattriguNaM vyaktam | tathA
pradhAnamapi triguNaM tatsvabhAvatvAt ||
'aviveki' iti | avivechanashIlaM vyaktam, achetanatvAt | yadvA guNebhyastasya
pR^ithaktvAbhAvAdaviveki | tathA pradhAnamapi ||
sAmAnyaM vyaktam, sarvapuruShopabhogyatvAnmalladAsIvat | tathA pradhAnamapi ||
achetanaM vyaktam, sukhaduHkhamohAnna vedayatItyarthaH | tathA pradhAnamapi ||
'prasavadharmi' iti | prasavo dharmo.asyAstIti prasavadharmi vyaktam |
tathA pradhAnamapi | dvayorapi prasavadharmitvam ||
tathA cha pradhAnAnmahAn, mahato.a~NkAra ityAdinA
svakAryotpAdanadharmatvAdyathA vyaktAvyaktayorvairUpyaM sArUpyaM cha,
tathA kiM puruShasya vApItyAha\- 'tadviparItastathA cha pumAn' iti |
vyaktAvyaktAbhyAM kaishchiddharmairvilakShaNa ityarthaH ||
atra pUrvasyA AryAyA artho yojyate | hetumadvyaktam, ahetumadavyaktam |
puruSho.apyahetumAn, tasya kutashchidanutpAdAt ||
anityaM vyaktam, nityamavyaktam | puruSho nityaH, kutashchidanutpannatvAt ||
avyApi vyaktam, vyApyavyaktam | puruSho.api vyApI yadA prakR^ityA muktaH |
yuktashchet, vyaktena sadR^isho na pradhAnena | hi sarvadA devAdiShu
pravartate ||
sakriyaM vyaktam, niShkriyamavyaktam, asaMsAritvAt | puruSho.api niShkriyaH,
kartR^itvAbhAvAt ||
anekaM vyaktam, ekamavyaktam | puruSho.aneko bahutvAt | tasya bahutvaM
pratipAdayiShyati | pradhAnenAtra vaisAdR^ishyaM tasyaikatvAt ||
AshritaM vyaktam, anAshritamavyaktam | puruSho.apyanAshritaH
kutashchidanutpannatvAt ||
li~NgaM vyaktam, ali~Ngamavyaktam | puruSho.apyali~NgaH | na kiMchidanena
li~Ngyate na vAyaM kadAchillIyate.anutpannatvAt ||
sAvayavaM vyaktam, niravayavamavyaktam | puruSho.api niravayavaH
shabdAdibhirayuktatvAt .
paratantraM vyaktam, svatantramavyaktam | puruSho.api svatantraH,
kutashchidanutpannatvAt ||
dvitIyasyA AryAyA artho yojyate\-
triguNaM vyaktamavyaktaM cha | nirguNaH puruShaH, guNAnAM tatrAbhAvAt ||
aviveki vyaktamavyaktaM cha | vivekI puruShashchetanatvAt | vivikto vA
nirguNatvAt ||
viShayo vyaktamavyaktaM cha | puruSho nirviShayaH, bhoktR^itvAt, na bhogyaH ||
sAmAnyaM vyaktamavyaktaM cha | puruSho.asAmAnyaH, aviShayatvAt ||
achetanaM vyaktamavyaktaM cha | chetanaH puruShaH sukhAdivedanatvAt ||
prasavadharmi vyaktamavyaktaM cha | puruSho.aprasavadharmI, akartR^itvAt |
ityuktam || 11||


kArikA 12


trayANAmapi vairUpyaM sArUpyaM cheti triguNamityukte, ke ke trayo guNAH
kimAtmakA ityAha\-

|| prItyaprItiviShAdAtmakAH prakAshapravR^ittiniyamArthAH |
anyo.anyAbhibhavAshrayajananamithunavR^ittayashcha guNAH || 12 || ||

'prItyaprItiviShAdAtmakAH' ityAdi | prItyAdaya AtmAno yeShAM guNAnAM te
tathoktAH sattvarajastamAMsi trayo guNAH | tatra prItyAtmakaM sukhAtmakaM
sattvam, aprItyAtmakaM duHkhAtmakaM rajaH, viShAdAtmakaM mohAtmakaM tamaH |
guNA hyatIndriyatvAtpariNatyA sukhAdinAnumIyamAnAstadAtmakA iti vyapadishyante
||
kiM punareShAM prayojanamityAha\- 'prakAshapravR^ittiniyamArthAH' iti |
prakAshArthaM sattvaM prakAshakatvAt, pravR^ittyarthaM rajashchalatvAt,
niyamArthaM tamaH stimitatvAt ||
kimiti te guNAH parasparasavyapekShAH kiM vA netyAha\-
'anyo.anyAbhibhavAshrayajananamithunavR^ittayashcha guNAH' iti |
anyo.anyashabdaH pratyekamabhisambaddhyate | abhibhavatItyabhibhavaH |
pachAdyach | anyo.anyasyAbhibhavA anyo.anyAbhibhavAH | tadyathA deveShu
sattvamudriktaM rajastamasI abhibhavati, manuShyeShu rajaH sattvatamasI,
tiryakShu (tamaH sattvarajasI) | AshrIyanta ityAshrayAH | karmaNyaN |
anyo.anyasyAshrayAH, tridaNDavat | nAshrayAntarameShAm, anAshrayAshcha
kartAraH | janayantIti jananAH | 'kR^ityalyuTo bahulam' iti kartari
lyuT | anekArthatvAt cha dhAtUnAM bodhanArthA draShTavyAH | anyo.anyasya
prabodhakA ityarthaH | sarvaM hi vyaktamutpadyamAnaM triguNAtmakamutpadyate |
tatra yadA sattvamutkaTaM tadA rajastamasI nyakkR^itashaktike |
prabodhyAyaskAnto lohavaduktam (?) | satvanyatkR^itena guNena vyaktaM
janayati (?) evaM rajastamashcha yojyam | yadA guNadvayamudbhUtashakti tadA
dvayamapItaradabhibhavati, prabodhayatItyarthaH | anyo.anyamithunA iti |
anyo.anyasya sahAyA ityarthaH | tathA choktaM viShNugItAyAm\-
rajaso mithunaM sattvaM sattvasya mithunaM rajaH |
ubhayoH sattvarajasormithunaM tama uchyate ||
ekasyAM vyaktau trayANAmabhibhavaprabodhanAnuktau vyaktam, itare tu tau
eva pravR^ittiM janayanta iti darshayannAha\- anyo.anyavR^ittaya iti |
vR^ittiH sukhAdirUpeNa pariNatiH | vR^itihetutvAd vR^ittaya uchyante |
anyonyavR^ittihetava ityarthaH | tadyathA kAchidyoShidrUpashIladatyantaguNA
(!) sitatvAtsAttvikI sA bharttuH sukhamutpAdayati sapatnInAM
kAsAMchidduHkhaM kAsAMchidviShAdamityatra sattvamAtmano dvayoshcha
vR^ittihetuH | kasyachitprabhoratyantashUratvAd bhR^ityA rAjasAH,
pareShAM yudhyamAnAnAM prahArairduHkhaM janayanti, palAyamAnAnAM
viShAdam, svAminashcha tuShTimityatra raja Atmano dvayoscha vR^ittihetuH |
meghAMshchAmbugu ||.vAniShAndhakArIkR^ityonnatatvAt (?) tAmasAH, te
varShantaH proShitabhartR^ikANAM viShAdaM janayanti, pathikAnAM duHkham
kR^iShIvalAnAM tuShTimityatra tama Atmano dvayoshcha vR^ittihetuH || 12||


kArikA 13


eShAM durlakShaNAnAM lakShaNAntaramAha\-
|| sattvaM laghu prakAshakamupaShTambhakaM chalaM cha rajaH |
guru varaNakameva tamaH, pradIpavachchArthato vR^ittiH || 13 || ||

'sattvam' ityAdi | iShTaM sAMkhyAchAryANAM sattvaM laghusvabhAvaM prakAshaM cha |
yasyodrekAchCharIreM.ashAni laghUni bhavanti, viShayaprakAshanasamarthAni
chendriyANi | bAhyAni cha dravyANi laghUni prakAshAtmakAni nirmalAni
bhavanti ||
'upaShTambhakaM chalaM cha rajaH' iti | upaShTambhayatItyupaShTambhakam |
yasyodrekAd devadatto vyavasyati, chalachittashcha bhavati | bAhyAni chalAni
bhavantIti ||
'guru varaNakameva tamaH' iti | vR^iNoti pidhatta iti | 'kR^ityalyuTo bahulam'
iti kartari lyuT, karaNe vA | pashchAt svArthe kan | yasyodrekAd gurUNya~NgAni
bhavanti, indriyANi cha tamasaivAttAni bhavanti | bAhyAni cha gurUNyanirmalAni
cha bhavanti ||
udAharaNadigiyamanyAnyapi vij~neyAni bhavanti | tathA
chAhuH\- prItiprIti(?)svAbhiSha~NgalAghavAni prasAdaharShau
cha, stambhauddhatyadveShachalanashoShaNatApabhedAshcha,
varaNApadhvaMsanasAdanagauravadainyabhItayashchaitAni sattvarajastamasAM
krameNa j~nAtavyAni li~NgAni ||
nanu chaite parasparavilakShaNA guNA viruddhatvAt kathaM sambhUyaikatra
vartanta ityAha\- 'pradIpavachchArthato vR^ittiH' iti | pradIpasyeva
pradIpavat | tailavarttyagnisamudAyaH pradIpaH | yadA samudAyAtma
||.parasparavilakShaNAnAmapi pradIpabhA ||.pravR^itiH, tamasi sthitA
ghaTAdayo devadattasya prakAshayitavyA iti, tathA sattvarajastamasAM
puruShArthahetunA pravR^ittiH, puruShArthashabdopalabdhishcheti || 13||


kArikA 14


nanu cha 'triguNamaviveki viShayaH sAmAnyamachetanaM prasavadharmi vyaktam',
tatra sukhaduHkamohopalabdhestraiguNyaM vyaktaM siddham, avivekyAdayo dharmAH
prasavaparyantAH kathaM siddhyantItyAha\-

|| avivekyAdissiddhastraiguNyAttadviparyayAbhAvAt |
kAraNaguNAtmakatvAtkAryasyAvyaktamapi siddham || 14 || ||

'avivekyAdiH siddhaH' ityAdi | guNidvAreNa guNAbhidhAnam |
avivekyAdiguNassiddhaH | vyakta iti vAkyasheShaH ||
kutaH? traiguNyAt | kathaM? yasmAdguNA evAvivekino bhogyAssAmAnyA achetanA
prasavadharmiNashcha, te cha vyakte siddhA iti siddho guNaH ||
'tadviparyayAbhAvAt' iti | (traiguNyasyAbhAvAditi) |
traiguNyasyAbhAve.avivekyAdayorabhAvAt | na hi nirguNasya puruShasyAvivekyAdiH
sambhavati | tasmAttraiguNyAdevAvivekyAdissiddhaH ||
evaM cha sati, pradhAnamapi traiguNyAttathAvidhaM siddham | yadAha\-
'kAraNaguNAtmakatvAtkAryasyAvyaktamapi siddham' iti | kAraNasya yo guNaH sa
AtmA svabhAvo yasya tattathoktam | tasya svabhAvastattvam | tasmAdiha loke
kAraNaguNakaM kAryaM dR^iShTam | shuklaiH kR^iShNairvA tantubhirArabdhaH
paTaH shuklaH kR^iShNo vA bhavati | yadyavyaktaM tathAvidhaM na syAt, kathaM
vyaktaM tathAvidhaM bhavet || 14||


kArikA 15


nanu cha sati dharmiNi dharmAshchintyante, pradhAnasyaiva
dharmiNo.alabdhasiddhitvAt kathamavivekyAdItyAha\-

|| bhedAnAM parimANAt samanvayAchChaktitaH pravR^itteshcha |
kAraNakAryavibhAgAdavibhAgAdvaishvarUpyasya || 15 || ||

'bhedAnAm' ityAdi | kAryatastadupalabdhermahadAdi tachcha kAryamityanenaiva
sAdhite.asmin yathAvadadhigate punardArDhyArthaM samanantaropAdAnam | bhidyanta
iti bhedAH kAryavisheShAsteShAM (ekassaMsargI dR^iShTaH) parimANAchcha |
bhedAnAM parimitatvAdityarthaH | yena cha parimitAsteShAmekaH saMsargI
dR^iShTaH | yathA mUlA~NkurapatrakANDaprasavapuShpataNDulakaNAnAM
bhedAnAM vrIhiH tavibAhyAdhyAtmikabhedAH | parimitabAhyA
brahmAdistambaparyantAshchaturdasha | AdhyAtmikAshcha
mahadaha~NkAratanmAtrendriyabhUtAkhyAstrayoviMshatiH | tasmAdeteShAmekena
saMsargiNA bhavitavyam | yatraiShAM saMsargastadavyaktaM kAraNamastIti
sAmAnyatodR^iShTamanumAnam ||
'samanvayAt' bhedAnAmiti vartate | samanvayo.anugamaH |
ekajAtyanugamAdityarthaH | ya ekajAtyanugatA bhedAsteShAmekameva
tathAbhUtaM kAraNaM dR^iShTam | yathA kaTakakeyUrAdInAM suvarNapiNDaH,
yathA vA sharAvAdInAM mR^itpiNDaH | evameShAmapi bAhyAdhyAtmikAnAM
sukhaduHkhamohAnugatatvAdekena tathAvidhena bhavitavyam | ya eShAM
samudAyastatpradhAnamiti sAmAnyatodR^iShTam |
'shaktitaH pravR^itteshcha' iti | iha kulAlAdishaktipUrvikA ghaTAdInAM
pravR^ittirdR^iShTA nAshaktipUrvikA | eShAmapi bAhyAdhyAtmikAnAM
pravR^ittirdR^ishyate | tatashcha prAk cha pravR^itterjanitayA shaktyA
bhavitavyam | yAsau shaktiH saivAvyaktabhAvamApadyata iti sAmAnyatodR^iShTam ||
'kAraNakAryavibhAgAt' iti | kAraNasya pUrvabhAvitvAt pUrvanipAtaH |
alpAchtarasya pUrvanipAtasyAnityatvam | yata utpadyate tatkAraNam,
yachchotpadyate tatkAryam | yathA mR^itpiNDaghaTayorjanyajanakatvena
pR^ithagarthakriyAkaraNAchcha vibhAgo dR^iShTaH | anyathA
ghaTAsyodakAharaNakriyA yA na sA mR^itpiNDasya, yA mR^itpiNDasya na sA ghaTasya |
evaM vyaktasya mahadAdeH kAryatvAtpR^ithagarthakriyAkaraNAchcha vibhAgaH |
tasmAdasya kAraNena bhavitavyam | tachchAvyaktAtkimanyat syAditi ||
asmin vyAkhyAne 'kAryatastadupalabdhermahadAdi tachcha kAryam' ityanenaiva
siddhatvAdanyairanyathA vyAkhyAyate | yadupakaroti taktAraNam, yadupakriyate
tatkAryaM tayorvibhAgAt, upakAryopakArakabhAvAdityarthaH | tatra kArya
||.vyAdIni sharIrasthAni sthAnasAdhanA ||.vabhogaiH kAraNAnyupakurvanti |
kAraNAni cha vR^iddhikShatasaMrohaNapAlanaiH kAryANi | bAhyAni cha kAraNAni
pR^ithivyA dhR^itisa~NgrahapattivyUhanAvakAshadAnaiH parasparamupakurvanti |
tathA daivamAnuShatairyagyonAni parasparopakArINi | tatra daivam,
yathAkAlaM shItoShNavarShAgamaH, mAnuShatairyagyonAnyupakaroti |
mAnuShamijyAyAgastutibhirdaivaM rakShati, poShaNabheShajyaishAha
tairyagyonamupakaroti | yathAdhyAtmikAnAM bAhyAnAM chopakAryopakArakabhAvo
buddhikR^ita iva dR^ishyate tadasya kashchidvyavasthApitA syAt, kuto.ayaM
vibhAga ityanyathAnupapatteH ||
'avibhAgAdvaishvarUpyasya' iti | na vidyate vibhAgo.asyetyavibhAgaH |
avibhaktAdityarthaH | tasmAdvaishvarUpyasyopalabdheriti sheShaH | iha
loke.avibhaktAdekasmAdikShudravyAdrasaphANitaguDakhaNDasharkarAdivaishvarUpyaM
nAnAtvaM dR^ishyate,
tathaikasmAddugdhAddadhimastunavanItaghR^itAdivaishvarUpyamupalabhyate |
evamAdhyAtmikAnAM bAhyAnAM cha vaishvarUpyam | tasmAdeShAmavibhaktenaiva
bhavitavyamiti sAmAnyatodR^iShTam ||
anyastvAha\- 'avibhAge vaishvarUpyasya' iti | avibhAgo layaH,
vaishvarUpyaM jagat nAnArUpatvAt | pralayakAle vaishvarUpyaM kva lIyate
sthityutpattipralayAjjagata iti | na cheshvare layanaM sambhavati, tasya
nirguNatvenAbhyupagamAt | tasmAdanyathAnupapattyAsti tadekamiti | tathA
chAhuH\-
pradhAnAdAnupUrvyeNa sR^iShTirlokasya saMsaraH |
pra ||prAtilomyena punastatraiva sa~ncharaH || iti || 15||


kArikA 16


eShAM hetUnAM pravartanArthamAha\-

|| kAraNamastyavyaktam, pravartate triguNataH samudayAchcha |
pariNAmataH salilavat, pratipratiguNAshrayavisheShAt || 16 || ||

'kAraNamasti' ityAdi ||
yadi kAraNamastyavyaktaM tatkathaM pravartata ityAha\-
'triguNatassamudayAchcha' iti | yadA prakR^itisthA guNAssAmyena pravartante
tadA (trInevAdhikR^itya pravarante naikaikamityarthaH | yadA vaiShamyeNa
pravartante tadA) kAryaM kAraNArabdhatvAt samudayAt pravartate | samantAdudayo
yasya guNasya tamadhikR^ityetyarthaH, sheShanyakkR^itashaktikatvAt | yadi
samudayAdavyaktaM pravartate tasmAdutpannaM tadavya ||.smAnna bhavati ||
shuklebhyaH kR^iShNebhyo vA tantubhyaH shuklaH kR^iShNo vA paTo bhavatItyAha\-
'pariNAmataH' ityAdi | pUrvasyAmavasthAyAmavasthAntaraM pariNAmaH, tasmAddhetoH
pravartate | yathA kaNikAyAH sUkShmAyA mUlakaH shAkhAprashAkhAdipravR^iddho
mahAnvanaspatirvyakto bhavati, evamavyaktAdvyaktaM pariNamati ||
yadyevamekarUpAdutpannasya trailokyasya kathamanekarUpatvamityAha\-
'salilavatpratipratiguNAshrayavisheShAt' iti | salilena tulyaM vartata iti
salilavat | ekaikaM prati guNAH pratipratiguNAH | ta evAshrayAsteShAM yo
visheShastasmAddhetoH pravartante | yathA salilamantarikShAdekarasamapi
tadekasya kaTvamlAderguNasyAshrayabhUtasya visheShAnnAnArasaM vartate
evamavyaktamapIti guNAtmakatvAdekaikaguNAshrayavisheShAnnAnArUpaM
pravartate | tatra sattvasya kR^iterAshrayasya visheShAddevabhAvena
vartanam, rajasa Ashrayasya visheShAnmAnuShabhAvena, tamasa Ashrayasya
visheShAttiryagyonibhAveneti || 16||


kArikA 17


evamavyaktasyAstitvaM pravR^ittiM cha prasAdhya puruShAstitvaM
prasAdhayitumAha\-
|| saMghAtaparArthatvAt triguNAdiviparyayAdadhiShThAnAt |
puruSho.asti bhoktR^ibhAvAtkaivalyArthaM pravR^itteshcha || 17 || ||

'saMghAtaparArthatvAt' ityAdi | saMhanyata iti saMghAtaH | saMghAtashchAsau
parArthashcheti saMghAtaparArthaH | saMghAtatvaM hetuH parArthatvaM sAdhyam |
iha loke saMghAtabAhyAH shayanAsanAdayo ye te parArthA dR^iShTAH |
te hi devadattasya parasyArthaM kurvanti na svArtham | ete.apyAdhyAtmikA
mahadAdayaH sharIrasaMj~nakAH saMghAtAH, taiH parArthairbhavitavyam | na
cha puruShavyatirikto.anyaH paro.asti, puruSha eva para i ||nyatodR^iShTam ||
nanu mahadAdibhUtaparyantaM sharIrameva puruSho nAnyaH kashchidityatrAha\-
'triguNAdiviparyayAt' iti | AdishabdenAvivekyAdayaH pa~ncha dharmA dR^ishyante |
tathA hi tadviparItaH pumAnityuktam | tatashcha tadviparItatvAtpuMsaH
kathaM mahadAdimAtrameva puruShaH | tasmAdvyatiriktaH puruSho yasyArthakA
ime saMghAtAH ||
'adhiShThAnAt' iti | adhitiShThatyasminnityadhiShThAnam |
mahadAdibhUtaparyantaM sharIramiha loke yadadhiShThAnaM tatparAdhiShThitaM
dR^iShTam, yathA rathAdi | dR^ishyate chAdhiShThAnaM sharIram |
tasmAdasyAdhiShThAtrA bhavitavyam | yo.asAvadhiShThAtA sa puruShaH,
nAntaHkaraNamadhiShThAtR^i, tasyAchetanatvAditi sAmAnyatodR^iShTam ||
'bhoktR^ibhAvAt' iti | bhoktR^itvAdityarthaH | iha loke bhogyaM dR^iShTvA
bhoktAnumIyate | dR^ishyate mahadAdiparyantaM bhogyam, tasmAdasyApi
bhoktrA bhavitavyamiti sAmAnyatodR^iShTam | na chAntaHkaraNaM bhoktR^i,
tasyAchetanatvAdbhogyatvAchcha | yashcha bhoktA sa eva puruShaH
sAtmakaM jIvachCharIraM prANAdimattvAt | asmin dedhe yo.ayamAtmA
samAnajAtIyAnekavastvantarasahAyaH, pratiniyatairjanmAdibhiryujyamAnatvAt
manovat ||
'kaivalyArthaM pravR^itteshcha' iti | kaivalyaM mokShaH |
tadanyArthapradhAnasyaiShA pravR^ittiH | tathAhi\- pradhAnaM buddhyAtmanA
pariNamati | buddheshchAShTAdashAni | teShu cha j~nAnaM kaivalyam | tatra yadi
puruSho na syAttadA tadarthA pravR^ittirna bhavet | tasmAdanyathAnupapattyA
puruSho.asti ||
tatra siddhe puMsi vivAdAH | eka evAyaM puruShaH sarvasharIreShu sthita
ityeke | sarve kAya upanatAnekAtmAnassAtmakatvAt, yogisharIravR^iMda ||
pratisharIramanekaH puruSha ityapare | eka eva purANaH puruShaH, tasmAdagnesa
||viShphuli~NgAH pratisharIraM puruShA AbirbhUtA iti vedAntavAdinaH || 17||


kArikA 18

atrAha\-
||jananamaraNakaraNAnAM pratiniyamAdayugapatpravR^itteshcha |
puruShabahutvaM siddhaM traiguNyaviparyayAchchaiva || 18 || ||

'jananamaraNakaraNAnAm' ityAdi | karaNaM chakShurAdIndriyam
dehendriyAderadhiShThAnasyotpattivinAshau | tadyogAtpuruShaH jananamaraNe.api
vyavasthApyete | svataH puruShasya te na sambhavataH | kutaH ? \- nityatAt
tatra yadyekaH puruShaH syAttadaikasmin jAyamAne mriyamANe vA sarveShAM
jananamaraNe syAtAm | tathaikasmiMshchakShuShmati shrotravati vA sarve.andhA
(badhirA vA, pashyeyuH shruNuyurvA | ekasminnandhe) badhire vA tathA syuH |
na chaivam, jananAdInAM pratiniyamAt | tasmAdanyathAnupapattyA puruShabahutvaM
siddham ||
'ayugapatpravR^itteshcha' iti | yadyekaH puruShaH syAttadaikenAdhiShThAtrA
tiShThati dehe, dharmAdharmayorarthAnarthayoH sukhaduHkhayorvA pravR^itte,
sarva eva yugapatpravartteran | na chaivamityanyathAnupapattiH ||
'traiguNyaviparyayAchcha' iti | traya eva guNAstraiguNyam | tad
viparyayo.anyathAtvam | adhiShThAnasya triguNAtmakatvAttadyogAtpuruSho.api
triguNAtmaka ityuchyate | tatra yadyekaH puruShaH syAttadaikasmin sAttvike
rAjase tAmase vA, sarva eva tathAvidhAH syuH | na chaivam, guNAnaM
viparyayadarshanadityanyathAnupapattiH ||
purANapuruShAdagneriva viShphuli~NgAH pratisharIraM puruShA ityasminnapi
darshane puruShabahutvamastyeva | teShAM parasparavilakShaNatvAt te
purANapuruShAdabhinnA bhinnA veti darshanadvayam | tadanyatra vivAritatvAdiha
granthagauravabhayAnnopanyastamasmAbhiriti || 18||


kArikA 19


evaM puruShabahutvaM prasAddhya taddharmAn kathayitumAha\-
|| tasmAchcha viparyAsAtsiddhaM sAkShitvamasya puruShasya |
kaivalyammAdhyasthaM draShTR^itvamakartR^ibhAvashcha || 19 || ||

'tasmAchcha viparyAsAt' ityAdi | yaH prAgukto viparyayaH\- triguNamaviveki
viShayaH \- ityAdinA, tasmAtsAkShitvAdayo dharmAH puruShasya siddhAH |
tatra nirguNasya puruShasyAprasavadharmitvAdakartR^itvam | yashchAkartA sa
bhavatyudAsInaH | saptavidhaM chAsyaudAsInyam | tathA choktam \-
pashyati shR^iNoti sarvama karoti sthitiM prasa~NgaM cha nApi |
svato na parato ||.nobhayatashchApyudAsInaH || iti ||
yashchodAsInaH sa sAkShyapi bhavati pradhAnasambandhinaH kriyAkalApasya
nirguNatvAt ||
kaivalyaM kevalabhAvAt chetanatvAchcha draShTR^itvamiti ||
nanu cha yadyakartA tatkathaM\- bhoktR^ibhAvAdasti puruShaH\- ? tathA chAhuH\-
bAlahutAshanataravaH svayamakR^itAnAM yathA hi bhoktAraH |
puruSho.api viShayaphalAnAM svayamakR^itAnAM tathApi bhoktA || iti ||
ityuktamakarturapi bhoktR^itvamasyeti || 19||


kArikA 20


nanu cha yadyachetanamavyaktaM kathaM dehendriyasaMj~namadhiShThAnaM
dharmAdharmAdiShu pravarttate, tasyAchetanatvAdityAha\-
|| tasmAttatsaMyogAdachetanaM chetanAvadiva li~Ngam |
guNakartR^itve.api tathA karteva bhavatyudAsInaH || 20 || ||

'tasmAttatsaMyogAt' ityAdi | tena puruSheNa yaH saMyogastasmAdachetanaM
chetanAvadiva bhavati | yathAgnisaMyogAllohamaNirityuchyate | li~NgaM
mahadAdisUkShmaparyantaM vakShyati ||
yadi tadeva triguNAtmakaM kartR^i na pumAn, kathaM puruSho gachChatItyuchyata
ityAha\- 'guNakartR^itve.api tathA karteva bhavatyudAsInaH' iti |
guNAnAM kartR^itvaM na puruShasya | yathA puruShasaMyogAdachetanaM li~NgaM
chetanAvadiva bhavati, tathA guNAtmakali~NgasaMyogAdakartApi san karteva
bhavati | udAsInaH | yathA svAmI svayamayoddhApi yaudhabhR^ityasaMyogAd
yoddheti vyapadishyate, tathA puruSho.apyupachAreNa karteti |
tathA choktam \-
pravarttamAnAn prakR^iterimAn guNAMstamo.abhibhUto viparItadarshanaH |
ahaM karomItyabudho.abhimanyate tR^iNasya kubjIkaraNe.apyanIshvaraH ||
iti || 20||


kArikA 21


nanu pradhAnapuruShayoH kiM (kartR^itvaM) chaitanyArthameva saMyogaH,
kiM vAnyArthamapItyAha\-
|| puruShasya darshanArthaM kaivalyArthaM tathA pradhAnasya |
paMgvandhavadubhayorapi saMyogastatkR^itaH sargaH || 21 || ||

'puruShasya' ityAdi | puruShasyArtho dvividhaH, viShayopabhogaH kaivalyaM cha |
tadubhayaM pradhAnena sampAdyam | viShayopabhogashcha pradhAnavibhUtimantareNa
na sambhavati, iti darshanArthaM puruShaH pradhAnena saMyujyate | mAnaM
svAM vibhUtiM darshayitumasamarthAtpuruSheNa saMyujyate (?) | dR^iShTvA sa
sarvAM vibhUtimanubhUya virasatvAd viraktaH puruShaH pradhAnena tyajyate |
tyaktasya kaivalyamityato darshanArthaM kaivalyArthaM cha dvayorapi saMyogo
matsyodakavadudumbaramashakashcha ||
'paMgvandhavat' iti | dR^iShTAntaH | pa~NguH sachakShuH pashyati
panthAnaM na saMcharati, andho.api saMcharati na pashyati panthAnam |
tayoH svArthabhraShTayorgrAmaprAptyarthaH sambandho bhUtaH | tatra
pa~NgurandhaskandhamAruhya gatimAn, andho.api draShTradhiShThAnAddR^iShTimAn
jAtaH | grAmaprAptayoshcha tayorviyogaH | evaM puruSho niShkriyaH
pradhAnena saMyujya tadvibhUtidarshanAya devAdiShu saMcharati | pradhAnaM
nishchetanamapi puruShAdhiShThAnAchchetanAvadiva dvayamapi sampAdayati |
tasmAtpaMgvandhavadubhayorapi saMyogaH ||
nanu cha saMyogamAtreNa kathaM darshanaM kaivalyaM chetyAha\- 'tatkR^itaH
sargaH' iti | saMyogakR^ito mahadAdigrAmotpAda ityarthaH || 21||


kArikA 22


tameva darshayannAha\-
|| prakR^itermahAMstato.aha~NkArastasmAdgaNashcha ShoDashakaH |
tasmAdapi ShoDashakAtpa~nchabhyaH pa~ncha bhUtAni || 22 || ||

'prakR^itermahAn' ityAdi | prakR^itiH pradhAnaM kAraNamavyaktaM guNasAmyaM
tamobahulamavyAkR^itamiti prakR^itiparyAyAH | tato mahAnutpadyate sa tu
tamobahulaH | mahAn buddhirmatiH pratyaya upalabdhiriti buddhiparyAyAH |
tato.aha~NkAra utpadyate | sa tu rajastamobahulaH | aha~NkAraH
suparNapaNi(!)statpuruSha ityaha~NkAraparyAyAH ||
'tasmAdgaNashcha ShoDashakaH' iti | tasmAdaha~NkArAt ShoDashako gaNa utpadyate |
ekAdashendriyANi pa~ncha tanmAtrANItyarthaH | tAni hR^iShIkANIndriyANIti
paryAyAH | sUkShmA atishayA aNavaH (viShA) iti tanmAtraparyAyAH ||
'tasmAdapi ShoDashakAt pa~nchabhyaH pa~ncha bhUtAni' iti | ShoDashAd
gaNAdyAni pa~ncha tanmAtrANi tebhya ekottaravR^iddhyA pa~ncha mahAbhUtAni
bhavanti | tatra shabdatanmAtrAdAkAshamekaguNam | shabdatanmAtrapratisaMhitAt
sparshatanmAtrAddviguNo vAyuH | tAbhyAM pratisaMhitAdrUpatanmAtrAt triguNaM
tejaH | taiH pratisaMhitAdrasatanmAtrAt chaturguNA ApaH | chaturbhiH
pratisaMhitAdgandhatanmAtrAt pa~nchaguNA pR^ithivIti | etairekAdashAdayaH
sthUlA visheShA uchyante, yeShvavasitAni chaturviMshatitattvAni || 22||


kArikA 23


buddherlakShaNamAha\-
|| adhyavasAyo buddhirdharmo j~nAnaM virAga aishvaryam |
sAttvikametadrUpaM tAmasamasmAdviparyastam || 23 || ||

'adhyavasAyaH' ityAdi | shabdAdiShu viShaye.adhyavasAyashabdo.ayaM yAvat
gandho.ayamiti subuddherlakShaNam (?) | tasyAshchAShTau rUpANi ||
'dharmo j~nAnaM virAga aishvaryam' iti | tatra
yo.ayamaniviShayamanuShThAnAtmako.adhavasAyassa dharmaH |
yamAH pa~ncha niyamAshcha | yathoktaM sAMkhyapravachane
'ahiMsAsatyAsteyabrahmacharyAparigrahA yamAH' |
'shauchasantoShatapassvAdhyAyeshvarapraNidhAnAni niyamAH' iti |
tatra santoShassanihitasAdhanAbhyAshAdadhikasyAnupAditsA | tapo
jighatsApipAsAshItoShNasthAnasAdhanAjayaH kAShThamaunAkAramaune, vratAni cha
kR^ichChrachAndrAyaNAdIni | svAdhyAyo mokShashAstrAdhyayanaM praNavajapo vA |
IshvarapraNidhAnaM vishiShTadevatArAdhanam | asaMsAribhistulyavR^ittitvAditi |
tadviparItAnuShThAnamadharmaH | pa~nchaviMshatitattvAnAM
svasaMj~nAlAkShaNyakatvaprayojanAvadhAraNaM j~nAnam, guNapuruShAntaraj~nAnam |
sheShamaj~nAnam | viShayasharIrendriyebhyo doShadarshanAdvaimukhyaM virAgaH |
teShvabhilASho rAgaH | aishvaryamaShTaguNam\- aNimA, mahimA, laghimA, prAptiH,
prAkAmyam, IshitvaM, vashitvam, yatrakAmAvasAyitvaM cheti | tatrANimANutvam,
yena guNena sUkShmo bhUtvA vicharati | kArye kAraNopachArAdaNimetyuchyate |
uttaratrApyevaM yojyam | laghimA laghutvam,  yena vAyuvallaghutaro bhavati |
mahimA mahattvam, yena bhuvaneShu dharmAdiprAptiH, yena guNeneShitasya
prApaNam | prAkAmyaM prachurakAmitA yenaikamanekaM prAkAmyate.anekaM chaikam |
IshitvaM prabhutA (yena sthAvarAdIni bhUtAni sandeshakArINi bhavanti |
vashitvaM vashitA) yena svatantrashcharati | yatrakAmAvashAyitvaM
(kAmenechChayAvashetuM shIlaM yasya sa yatrakAmAvashAyI | tasya bhAvaH
yatrakAmAvashAyitvam) | anekArthatvAddhAtUnAM 'shI' tiShThatau varttate |
yena guNena divyantarikShe bhUmau vAvasthAyitvamityarthaH |
'sAttvikametadrUpam' iti | sattvatamobahulatvAt | buddheryadA sattvamutkaTaM
bhavati tadaitachchatuShTayaM bhavatItyarthaH |
'tAmasamasmAdviparyastam' iti | utkaTalakShaNAt dharmAdichatuShTayAdviparItaM
tamasyudrikte bhavatItyarthaH | adharmo.aj~nAnamavairAgyamanaishvaryaM cheti
|| 23||


kArikA 24


aha~NkAralakShaNamAha\-
|| abhimAno.aha~NkAraH, tasmAddvividhaH pravarttate sargaH |
ekAdashashcha gaNastanmAtrapa~nchakashchaiva || 24 || ||

'abhimAnaH' ityAdi | abhimatirabhimAnaH | rUpAdiShu viShayeShvabhimAno
rUpavAnaham, mamaite viShayAH, ityahya~NkAralakShaNam ||
tasmAdabhimAnalakShaNAdaha~NkArAt 'dvividhaH pravarttate sargaH' iti |
sR^ijyata iti sargaH ||
tameva dvividhaM darshayitumAha\- 'ekAdashakashcha gaNaH' iti | ekAdasha
parimANamasyetyekAdashaH shrotrAdirgaNaH ||
'tanmAtrApa~nchakaM cha' iti | tanmAtrashabdAdisvarUpamAtra
ityarthaH | tanmAtrANi shabdasparsharUparasagandhAH | mAtrAgrahaNaM
bhUtasaMshleShanivR^ittyartham | bhUteShvapi shabdAdisambhavAt || 24||


kArikA 25


sa chAha~NkArastrividha iti darshayannAha\-
|| sAttvika ekAdashakaH pravarttate vaikR^itAdaha~NkArAt |
bhUtAdestanmAtraH sa tAmasaH, taijasAdubhayam || 25 || ||

'sAttvikaH' ityAdi | yadA sattvamudriktaM tadAha~NkAro vaikR^itAbhimAno
bhavati, rajashchodriktaM taijasaH, tamashchodriktaM bhUtAdiriti | tatra
vaikR^itAdekAdashako gaNaH pravarttate	| sa cha sAttvikaH sattvabahulaH,
svaviShayagrahaNatvAt ||
bhUtAdestAmasAdaha~NkArAttanmAtraH sa tAmasaH, tamobahulatvAt |
tatastAmasAttanmAtrAt gaNAt tAmaso bhUtagaNaH pravarttate ||
('taijasAdubhayam' iti | etadAshayaH\- pa~nchaka~nchaitadubhayamapi
pravarttate) | AdikAla ubhayatrApyasya sahAyatvAt | vaikR^itabhUtAdi dvAvapi
prakAshasthitishIlatvAt na kriyAshIle | tatastaijasamaha~NkAraM kriyAshIlaM
sahAyamapekShyaikAdashakaM pa~nchakaM cha malAjanayata (?) iti || 25||


kArikA 26


kaH punarekAdasha ityAha\-
|| buddhIndriyANi chakShuHshrotraghrANarasanatvagAkhyAni |
vAkpANipAdapAyUpasthAn karmendriyANyAhuH || 26 || ||

'buddhIndriyANi' ityAdi | dvividhamindriyam | tatra chakShuryena dR^ishyate |
shrotraM yena shrUyate | tvagyayA spR^ishyate | rasanaM yena rasyate | nAsikA
yayA ghrAyate | tA AkhyA yeShAmindriyANAmiti shabdapradhAno nirdeshaH | tAni
chakShuHshrotratvagrasanAnAsikAkhyAni pa~ncha | buddhipUrvakaparyAlochanamiti
buddhIndriyANyAhuH sAMkhyAchAryAH | shabdavashAdatrAkramaH kR^itaH | kramastu
shrotratvakchakShuriti ||
'vAkpANipAdapAyUpasthAn' iti | karmendriyANi karmAbhinirvartanAt | asmAdeva
prayogAdupasthashabdaH puMli~Ngo.apyastIti j~nAyate | sa cha straiNaH
pauruSheyashcha | tatra vAgindriyaM kaNThastham | anyAni prasiddhAnyeva || 26||


kArikA 27


ekAdashakamindriyaM darshayannAha\-
|| ubhayAtmakamatra manaH, sa~NkalpakamindriyaM cha sAdharmyAt |
guNapariNAmavisheShAnnAnAtvaM bAhyabhedAshcha || 27 || ||

'ubhayAtmakamatra manaH' ityAdi | atretyasminnindriyavashe mana
ubhayAtmakamubhayasvabhAvam | buddhIndriyANAM karmendriyANAM cha
svasvaviShayagrahaNakAle buddhIndriyaM karmendriyaM chetyarthaH |
ubhayatrApyasya vyApArAditi lakShaNaM tadityAha\- sa~NkalpayatIti sa~Nkalpakam,
idaM nedamiti ||
kathamindriyamityAha\- 'indriyaM cha sAdharmyAt' ityAdi |
indriyaistulyatvAdityarthaH | yathAnyadindrali~NgaM tathA mano.apItyarthaH ||
tatraikasmAdaha~NkArAdutpannAnAM kathaM svarUpabhedaH ? |
yachChrotrAdibuddhIndriyam, tat pratiniyataviShayaM netaraviShayamapi |
yadyAgAdi karmendriyaM tat pratiniyatakarma, netarakarmApi |
manashchobhayAtmakam, naikAtmakamityAha\- 'guNapariNAmavisheShAnnAnAtvam'
iti | aha~NkArasthA ye guNAH sattvAdayasteShAmanyo.anyAbhibhavAshrayA
(dvidvAreNa yaH pariNAmavisheShastata evaiShAM nAnAtvam | ta eva
hi guNAH pari)NAmavishiShTA indriyavyapadeshabhAjo nAnAviShayA
bhavanti | kathaM deshaniyamo vR^ittiniyamashcha ? tatra tvagindriyaM
sarvasharIrasthitabAhyAbhyantaravR^itti, chakShuHshrotraghrANarasanAni
shirasi bahiH pR^ithak pR^ithagavasthitAni bAhyavR^ittIni | vAgAsye sthitA |
pANyAdayashcha bAhoradhastAt pR^ithak pR^ithagavasthitA bahiHkarmaviShayAH ||
ityatAha\- 'bAhyabhedAshcha' iti | ye chAnye viShayabhedA
deshaniyamavR^itiniyamAbhyAM te.api guNapariNAmavisheShAdeva | nAtrAntarA
kAraNamasti || 27||


kArikA 28


eShAmindriyANAM kasya kA vR^ittirityAha\-
|| shabdAdiShu pa~nchAnAmAlochanamAtramiShyate vR^ittiH |
vachanAdAnaviharaNotsargAnandAshcha pa~nchAnAm || 28 || ||

'shabdAdiShu' ityAdi | Adishabdena shabdasparsharUparasagandhAH |
teShu yathAkramaM pa~nchAnAM shrotrAdInAM buddhIndriyANAmAlochanamAtraM
vR^ittiriShyate sAMkhyAchAryaiH | shrotrAdIni hi viShayasya prakAshanamAtraM
kurvanti, nishchayaM tu buddhiH | tathA hi buddhyavasitamarthaM
puruShaH chetayata iti siddhAntaH | karmendriyANAmapi vAgAdInAM
yathAkramaM vasanAdAnAdIni vR^ittayaH karmANi | tatra vAgindriyasya
nAnAvidhavarNochchAraNaM karma, AdeyasyAdAnaM pANyoH, viharaNaM
deshAntaragamanaM pAdayoH, utsarga AhAramalasyotsarjanaM pAyoH, AnandanamAnado
hlAdaH shukravisR^iShTisaMsR^iShTisukhaM tadupasthendriyavR^ittiH || 28||


kArikA 29


buddhyaha~NkAramanasAM kA vR^ittirityAha\-
|| svAlakShaNyaM vR^ittistrayasya saiShA bhavatyasAmAnyA |
sAmAnyakaraNavR^itiH prANAdyA vAyavaH pa~ncha || 29 || ||

'svAlakShaNyaM vR^ittiH' ityAdi | svAtmIyaM lakShaNaM yasya tat svalakShaNam |
tasya bhAvaH svAlakShaNyam | tadeva vR^ittiH ||
'trayasya' iti | buddhyaha~NkAramanasAmityarthaH | adhyavasAyo
buddheH, abhimAno.aha~NkArasya, sa~Nkalpo manasaH | ta
evAdhyavasAyAbhimAnasa~NkalpAstrayasya vR^ittiH | eShAM cha buddhyAdInAM
trayodashAnAM chaturvidhA vR^ittiH, asAmAnyAyugapatkramashcheti (?)||
tatra sAmAnyAM darshayitumAha\- 'saiShA' iti | yeyamuktA vR^ittiH saiShA
bhavatyasAmAnyA | yA yasya sA tasyaiva nAnyeShAmapItyarthaH | shrotrasya
yachChabdaprakAshanaM tachChrotrasyaiva, nAnyeShAM tvagAdInAM dvAdashAnAm |
evaM sarvatra yojyam ||
sAmAnyAmAha\- 'sAmAnyakaraNavR^ittiH' iti sAmAnyA chAsau karaNavR^ittishcheti
sAmAnyakaraNavR^ittiH ||
'prANAdyA vAyavaH pa~ncha' iti | prANA AdyA yeShAM vAyUnAM te prANAdyAH |
prANApAnavyAnodAnasamAnA iti pa~ncha vAyavaH | tatra prANo yo mukhanAsikAbhyAM
nirgachChati | yo nAbheradhaH sthitaH so.apAnaH | yena kAye.agnirdIpita
AhAraM cha pachati sa samAnaH | yo nAbhideshAdudyatashirogatirnAdaM janayati
sa udAnaH | yaH sarvasharIraM vyApya sthitaM sa vyAnaH | ete trayodashAnAmapi
karaNAnAM sAmAnyavR^ittiH || 29||


kArikA 30


karaNaprabhAvikatvAdvAyUnAM yugapatkramasho vR^ittimAha\-

|| yugapachchatuShTayasya tu vR^ittiH kramashashcha nirdiShTA |
dR^iShTe tathApyadR^iShTe trayasya tatpUrvikA vR^ittiH || 30 || ||

'yugapat' ityAdi | 'chatuShTayasya tu' iti | tushabdo visheShaNArthaH |
buddhiraha~NkAro manashchakShurityetasya chatuShTayasyaikasmin rUpe
yugapadvR^ittiH | yathAndhakAre vidyutsampAte kR^iShNasarpasandarshane
yugapadAlochanAdhyavasAyAbhimAnasa~NkalpanAni bhavanti | tathA hi
chakShuShAlochitaM buddhyAdhyavasitamaha~NkAreNAtmIkR^itaM manasA
sa~Nkalpitamiti ||
'kramashashcha tasya' iti | chatuShTasyasya krameNa kadAchidvR^ittiriShTA |
mandaprakAshe sthANupuruShochitAmUrdhvatAM dR^iShTavataH kiM sthANuH puruSha
iti vikalpaH | tatrAku~nchapanaprasAraNAt puruSha ityadhyavasAyaH | tata
AtmIkaraNAdabhimAna iti ||
yeya(mubhaya)thAvR^ittiH sA kasmin viShaya ityAha \- 'dR^iShTe' iti |
adR^iShTe tarha nAstItyAha \- 'tathApyadR^iShTe' iti | tathA ||.ShTe
dR^iShTe.api vR^ittiH ||
kintu na chatuShTayasya tarhItyAha\- 'trayasya' iti |
buddhyaha~NkAramanasAmityarthaH | tatrApi tatpUrvikA shrotrAdipUrviketyarthaH |
yathA smartavyamanusmarataH sa~NkalpAbhimAnAdhyavasAyA bhavanti || 30||


kArikA 31


atha yadetachchatuShTayaM tatkiM yugapat parasparasavyapekShaM svAM svAM
vR^itiM pratipadyate kiM vA nirapekShamityAha\-
|| svAM svAM pratipadyante parasparAkUtahaitukIM vR^ittim |
puruShArtha eva heturna kenachitkAryate karaNam || 31 || ||

'svAM svAm' ityAdi | AtmIyAtmIyAM vR^ittim ||
'parasparAkUtahaitukIm' iti | parasparasya yadAkUtaM svavR^ittibhogastadeva
hetuH | tatra bhUtAM parasparAkUtahaitukIM vR^ittiM chatvAri karaNAni
pratipadyante | tatra chakShurbuddhyAditrayasyAkUtaM j~nAtvA prakAshanaM
pratipadyate | evaM buddhiraha~NkAro manashcha trayANAmAkUtaM
j~nAtvA.adhyavasAyamabhimAnaM sa~NkalpanaM cha pratipadyante |
kramashashcha parasparAkUtahaitukIm | kintu pUrvapUrvahaitukI draShTavyA |
yathA kasyachidupanimantraNaM shrutavataH shrotravR^ittiM j~nAtvA,
buddhirgamanAyAdhyavasitA | tadvR^ittiM j~nAtvA.aha~NkAro modakAnahaM
bhakShayiShyAmIti manyate | tadvR^ittiM j~nAtvA manaH, prachuraM ghR^itaM
prApayiShyAmIti kiM stokamiti, sa~NkalpayatIti | evaM bAhyAnyapi karaNAni
svAM svAM vR^ittiM parasparAkUtahaitukIM pratipadyante ||
etAni kimAtmArthaM svAM svAM vR^ittiM pratipadyante, kimanyArthamityAha\-
'puruShArtha eva hetuH' iti | puruShasyArtho viShayopabhogaH kaivalyaM cha,
sa vR^ittihetuH ||
nanvIshvaraH kartA jagataH, sa eva buddhyAdikalApaM sR^iShTavAn yena
puruShasyArthaH sampadyate | tathA choktam\-
'Ishvaraprerito gachChetsvargaM vA shvabhrameva vA' | iti
tatrAha \- 'na kenachitkAryate karaNam' iti | pradhAnavyatirekeNa na
kashchidbuddhyAdikaraNaM svAM svAM vR^ittiM kArayatItyarthaH | yadi kartA syAt,
kimiti prakR^itimapekShate | nApi seshvaravAdinA prakR^itirabhyupagataiva,
nishchetanatvAt prakR^iteH sachetano.adhiShThAtA kartA.aparo gaveShyata iti
chet, puruSha evAdhiShThAtA | achetanA prakR^itiH | etaduktameva prAk || 31||


kArikA 32


katividhamantaHkaraNamityAha\-
|| karaNaM trayodashavidham, tadAharaNadhAraNaprakAshakaram |
kAryaM cha tasya dashadhA, hAryaM dhAryaM prakAshyaM cha || 32 || ||

'karaNaM trayodashavidham' ityAdi | pa~ncha buddhIndriyANi, pa~ncha
karmendriyANi, buddhyaha~NkAramanAMsi cha trINi | etat trayodashavidham |
karaNaM karotIti | 'kR^ityalyuTo bahulam' iti kartari lyuT ||
tatra kasya kA kriyA yadapekShayA karaNamityAha\-
'tadAharaNadhAraNaprakAshakaram' | iti tatkaraNamAharaNAdIni karotIti |
tatra karmendriyANyAharaNaM kurvanti, buddhyaha~NkAramanAMsi dhAraNam,
buddhIndriyANi prakAshamiti ||
kiM tatkAryaM yasyAharaNaM kurvantItyAha\- 'kAryam' iti | tasya
karaNasya dashavidhaM kAryam | tatra shabdasparsharUparasagandhAH pa~ncha
vachanAdAnaviharaNotsargAnandAH pa~ncheti dashadhA | pUrve dvividhAH\-
sUkShmAstanmAtralakShaNAH sukhaikasvabhAvatvAddivyAH, sthUlA AkAshAdayaH
sukhaduHkhamohatmakatvAdadivyA iti | etatkAryaM buddhIndriyANAM prakAshyam |
vAgAdInAmuktyAdAnAdikarmakartR^itvAt kAryam (?) | tatra vAchA shabdasya,
pANibhyAmAdeyasyAhriyamANatvAdubhayamapyAhAryam || vihAryaM viharaNasthAnam,
pUrvAvayavanyAsenottarAvayavAkramaNena cha pAdAbhyAmAhriyamANatvAdAhAryam |
anyathA kathamutsargAnandau syAtAm | ubhayamapi karmendriyAviShayam |
buddhyaha~NkAramanasAM dhAryam, tairantaH svavR^ittyAvadhAryamANatvAt || 32||


kArikA 33


tadeva trayodashavidhaM karaNaM bAhyAntarabhedAddvividhamiti darshayannAha\-
|| antaHkaraNaM trividhaM dashadhA bAhyaM trayasya viShayAkhyam |
sAmpratakAlaM bAhyaM trikAlamAbhyantaraM karaNam || 33 || ||

'antaHkaraNam' ityAdi | karaNaM dvividham\- bAhyamAbhyantaraM cha | tatra
sharIrasyAntaHsthitatvAdantaHkaraNaM trividham\- buddhiraha~NkAromanashcheti ||
'dashadhA bAhyam' iti | dashaprakAram | pa~ncha buddhIndriyANi, pa~ncha
karmendiyANi | tadbuddhirbhavati ||
tadbAhyaM 'trayasya viShayAkhyam' iti | tryavayavasyAntaHkaraNasya bAhyaM
viShaya ityAkhyAyate, taddvAreNa viShayAvagAhanAt | tenAntaHkaraNasya
dvividho viShayaH\- dvAraM bhogyaM cheti | chatuShTayasya dR^iShTervartamAne
trayasyAdR^iShTe vR^ittiruktA ||
tatrAtItAnAgatayorapi viShayayoH kiM vR^ittirasti, netyAha\- 'sAmpratakAlaM
bAhyam' iti | kalyata iti kAlaH viShaya evAtIto.anAgato vartamAnoshchochyate |
na tadvyatirekeNa kAlo.asti | mA bhUt ShaDviMshatitattvaprasa~Nga iti |
tatra sAmprato vartamAnaH kAlo yasya bAhyasya taddhi bAhyam | shrotrAdi
vartamAnameva shabdAdikaM prakAshayati, nAtItAnAgate | vAgAdi cha
vartamAnamevoktyAdAnaviharaNotsargAnandAn karoti, nAtItAnAgatAn ||
'trikAlamAbhyantaram' iti | trayaH kAlA yasya tat trikAlam | yathA
buddhirvartamAnamadhyavasyati | tathAtItAnAgatAvapi | mAndhAtAsIt kalkI rAjA
bhaviShyatIti | yathAha~NkAro vartamAnamabhimanyate tathAtItAnAgatAvapi |
mamaivamAsIt, mamaivaM bhaviShyatIti | yathA cha mano vartamAnaM
sa~NkalpayatIti tathAtItAnAgatAvapi | tatra kimidaM bhUtaM syAt, na mameti |
kimidaM bhaviShyati, netIti || 33||


kArikA 34


nanu cha yadi sthUlAH pR^ithivyAdayaste visheShAH | bAhyaM bAhyakaraNaM
svaviShayaM pratipadyate | pR^ithivyAdayastarhi bhedena pratipattavyA ityAha\-
|| buddhIndriyANi teShAM pa~ncha visheShAvisheShaviShayINi |
vAgbhavati shabdaviShayA sheShANi tu pa~nchaviShayINi || 34 || ||

'buddhIndriyANi' ityAdi | teShAmapi trayodashAnAM karaNAnAM yAni
pa~ncha buddhIndriyANi, tAni visheShAvisheShaviShayINi | shabdAdayaH
pa~ncha viShayA dvividhAH \- visheShA avisheShAshcha | tatra ye
sUkShmAstanmAtralakShaNAste.avisheShAH | ye sthUlAH pR^ithivyAdayaste visheShAH |
visheShAshchAvisheShAshcheti dvaMdvaH | ta eva viShayA vidyante yeShAmiti
matvarthopaH | vishiShTAnavishiShTAMshcha viShayAn gR^ihyantItyarthaH |
tatra shrotraM sthUlAn nAnAshabdAnavikalAn gR^ihNAti, shabdatanmAtraM cha |
nAsikA sthUlAn surabhyAdigandhAn, tanmAtraM cha gR^ihNAtIti ||
'vAgbhavati' | kevalaH shabdo viShayo yasyAH, na viShayAntaramityarthaH
|| sheShANi pANyAdIni chatvAri, pa~ncha viShayINi | pa~ncha viShayA
eShAmiti | tatra pANiH shabdasparsharUparasavantaM ghaTAdikamAdatte |
pAdau shabdAdimatyAM bhUmau viharataH | pAyurupasthashcha shabdAdimadeva
malaM shukraM cha visR^ijati | anena dvAreNa tu sarvaM bAhyaM karaNaM
pa~nchaviShayameva draShTavyam | yaM hi yadevamAshritya (?) sphItaM tasya
shabdasparsharUparasagandhavattvAt, 'bAhyaM trayasya viShayAkhyam' ityuktam
|| 34||


kArikA 35


tatkathaM tasya viShaya ityAha\-
|| sAntaHkaraNA buddhiH sarvaM viShayamavagAhate yasmAt |
tasmAt trividhaM karaNaM dvAri, dvArANi sheShANi || 35 || ||

'sAntaHkaraNA' ityAdi | buddherupAttatvAchCheShamaha~NkAro manashchAntaHkaraNam |
tAbhyAM yuktA buddhiH ||
'sarvam' iti | triShvapi kAleShu vyavasthitaM viShayamavagAhate gR^ihNAti
yasmAt , tasmAt trividhamantaHkaraNaM buddhyAdi dvAri bhavati | dvArANyasya
santIti kR^itvA | sheShANi tu buddhIyakarmendriyANi (?) dvArANi |
ebhirdvArabhUtairantaHkaraNaM viShayAn gR^ihNAti || 35||


kArikA 36


nanu cha yadyantaHkaraNaM bAhyakaraNadvAreNa sarvaM viShayamavagAhate,
tasmin kiM lakShaNamityAha\-
|| ete pradIpakalpAH parasparavilakShaNA guNavisheShAH |
kR^itsnaM puruShasyArthaM prakAshya buddhau prayachChanti || 36 || ||

'ete' ityAdi | shrotrAdayo vAgAdayo buddhyAdayashchetyete trayodasha
guNavisheShAH, traya eva guNA anyo.anyAbhibhavadvAreNa pariNatAH
shrotrAdivyapadeshabhAja ityarthaH | pradIpakalpAH, svavR^ittyA viShayasya
prakAshakatvAt | parasparavilakShaNAH | ekasya yA vR^ittiH svarUpaM cha,
na taditareShAmapi yadi syAdetenaiva viShayAvagAhanaM siddhaM kimanyena ||
'kR^itsnam' iti | trailokyagataM puruShasyArthaM sUkShmasthUlaviShayalakShaNaM
prakAshyAbhivyaktiM nItvA pashchAdaha~NkArAdayo dvAdasha buddhau prayachChanti,
sthApayantItyarthaH | avagAhanaphalametat | tasyAM cha viShayopadhAnoparaktyAM
buddhau puruSha upalabhate | tatredamuchyate \- buddhyAdhyavasitamarthaM
puruSha ||.ta iti || 36||


kArikA 37


nanu cha tulye karaNatve kimityaha~NkArAdayo buddhau prayachChanti |
prAdhAnyAttadeva darshayannAha \-
|| sarvaM pratyupabhogaM yasmAtpuruShasya sAdhayati buddhiH |
saiva cha vishinaShTi punaH pradhAnapuruShAntaraM sUkShmam || 37 || ||

'sarvam' ityAdi | upabhogamupabhogaM prati pratyupabhogam |
devamanuShyatiryagyonishu yo viShayasyopabhogastaM prati sarvaM
trailokyagataviShayaM puruShasya sAdhayati, sampAdayati | yasmAdbuddhiH
pradhAnabhUtA satI nAnyaH kashchit, tasmAt tAni karaNAni buddhau prayachChanti |
(yathA grAme hiraNyAdipratyayaM kuTumbinaH pradhAnAya prayachChanti) |
pradhAno.apyAsannavarttitvAdbhogapataya iti ||
'saiva cha vishinaShTi' iti | yadA tamasvatI buddhirbhavati tadA
sarvamupanItaM sampAdayati | yadA sattvAdhikA buddhirbhavati, tadA
j~nAnasa~NgatA pradhAnapuruShAntaraM vishinaShTi | pradhAnapuruShayorvibhAgaM
karotItyarthaH | anyat pradhAnamanyaH puruSha iti ||
'sUkShmam' | sAMsArikaj~nAnasyAviShayatvAt || 37||


kArikA 38


visheShAvisheShaviShayiNItyuktam, tatra ke visheShAH
ke.avisheShAshchetyatrAha\-
|| tanmAtrANyavisheShAH, tebhyo bhUtAni pa~ncha pa~nchabhyaH |
ete smR^itA visheShAH, shAntA ghorAshcha mUDhAshcha || 38 || ||

'tanmAtrANi' ityAdi | sUkShmaviShayAstanmAtrANItyuchyante | tairna
kashchidvishiShyata ityavisheShAH | yathA sUkShmatR^iNAgrAvasthitaM tejo na
lakShyate, na cha ki~nchit prakAshayati, tadvat te.apyavisheShAH ||
'tebhyo bhUtAni pa~ncha pa~nchabhyaH' iti | tanmAtrebhyaH pa~ncha
mahAbhUtAnyutpadyante ||
'ete smR^itA visheShAH' iti | shabdatanmAtrAdekaguNamAkAshamutpadyate |
evaM sparshAditanmAtrAd dvitrichatuHpa~nchaguNA vAyvAdaya utpadyante |
taishcha tanmAtrANi | vishiShyanta iti visheShAH ||
te cha kiMsvarUpA ityAha\- 'shAntA ghorAshcha mUDhAshcha' iti | shAntAH
sukhapradAha ghorA duHkhapradAH, mUDhA mohapradA iti  || 38||


kArikA 39


kimetAvanta eva viSheShA utAnye.apItyAha\-
|| sUkShmA mAtApitR^ijAH, saha prabhUtaistridhA visheShAH syuH |
sUkShmAsteShAM niyatA, mAtApitR^ijA nivartante || 39 || ||

'sUkShmAH' ityAdi | ye sUkShmAstanmAtralakShaNAH saMsAriNaH sharIrasyAshrayatAM
gatAste.api visheShAH, sUkShmasharIrasyArabdhatvAt ||
'mAtApitR^ijAH' iti | mAtApitR^ijAH ShaT | tatra mAtR^ito lomalohitamAMsAni
pitR^itaH snAyvasthimajjAnaH | te.api visheShAH, taiH sthUlasharIrasya
ShaTkoshikasyArabdhatvAt | ete dvividhA visheShA AdhyAtmikAH ||
'sahaprabhUtaiH' iti | yAni mahAbhUtAni bAhyAni shAntaghoramUDhAnyuktAni
tAni sthUlasharIrasyAvakAshavyUhanapattikledanadhAraNakartR^itvena
prakR^iShTabhUtAnyuchynte | taiH saha trayo visheShAH ||
'sUkShmAsteShAM niyatA mAtApitR^ijA nivartante' iti | sUkShmasharIraniyataM
j~nAnaprApteH prAk, tasya sAMsarikatvAt | sthUlasharIraniyataM tu nivartate,
tasya pratimaraNaM patitasya rasabhasmaniShThAntatvAt || 39||


kArikA 40


yadetat sUkShmasharIraM tatkathamutpannamityAha\-
|| pUrvotpannamasaktaM niyatammahadAdisUkShmaparyantam |
saMsarati nirupabhogaM bhAvairadhivAsitaM li~Ngam || 40 || ||

'pUrvotpannam' ityAdi | pradhAnenAdisarge pratipuruShamutpAditatvAt
pUrvotpannam | asaktamapyAha | tanna kvachidvihanyate, parvatamapi bhittvA
gachChati ||
'niyatam' | nityam, j~nAnotpatteH prAgityarthaH ||
kiMparimANamidamityAha\- 'mahadAdisUkShmaparyantam' iti | buddhirAdiryasya tat,
mahadAdisUkShmaviShayAstanmAtralakShaNAH paryantaM yasya tat sUkShmaparyantam |
buddhiraha~NkAra ekAdashendriyANi pa~ncha tanmAtrANItyetatparimANamityarthaH ||
'saMsarati' | triShu lokeShu ||
'nirupabhogam' iti | bAhyena sthUlasharIreNa vikalatvAdviShayabhogasamarthaM
na bhavatItyarthaH ||
'bhAvairadhivAsitam' iti | dharmAdibhiruparaktamityarthaH ||
'li~Ngam' itu | pralayakAle layaM gachChatIti kR^itvA || 40||


kArikA 41


nanu karaNamAtrameva saMsarati, kiM sUkShmasharIreNetyAha\-
|| chitraM yathAshrayamR^ite sthANvAdibhyo vinA yathA chChAyA |
tadvadvinA.avisheShairna tiShThati nirAshrayaM li~Ngam || 41 || ||

'chitram' ityAdi | yathA kuDyAdikamAshrayamR^ite chitraM na tiShThati ||
'sthANvAdibhyaH' iti | Adishabdena vR^ikShastambAdayaH |
'pR^ithagvinAnAnAbhistR^itIyAnyatarasyAm' iti pa~nchamyapi bhavati | tairvinA
yathA chChAyA snigdhA paruShA vA na tiShThati ||
'tadvadvinA.avisheShairna tiShThati nirAshrayaM li~Ngam' iti |
avisheShAstanmAtrANi | li~NgaM trayodashavidhaM karaNamiha gR^ihyate | na
tiShThati nirAshrayatvAt | (tairhi sUkShmasharIramArabdham, tadabhAvAttadapi
nAstIti nirAshrayatvAt) | na saMsarati | na cha nirAdhAreNa karaNena puruShasya
saMyogaH sambhavati | puruSho.api niShkriyatvAnna saMsarati || 41||


kArikA 42


tadeva sUkShmasharIraM kimarthaM saMsaratItyAha\-
|| puruShArthahetukamidaM nimittanaimittikaprasa~Ngena |
prakR^itervibhutvayogAnnaTavadvyavatiShThate li~Ngam || 42 || ||

'puruShArthahetukam' ityAdi | puruShArtho dvividha uktaH | sa heturyasyeti |
samAsAntaH kap ||
'idam' iti | mahadAdi sUkShmaparyantaM li~Ngamuktam, tannaTavadavatiShThate |
yathaika eva naTastaM taM visheShamAsthAya yavanikAnto nirgatya
rAjAmAtyaviduShakAdibhAvenAnuviddho.avatiShThate, tathA li~Ngamapi taM taM
dehamAsthAya devamanuShyatiryagbhAvena vyavatiShThate ||
tadeva kathaM bhavatItyAha\- 'nimittanaimittikaprasa~Ngena' iti | nimittaM
dharmAdharmAdi, naimittikamUrdhvAdhogamanAdi | vakShyati cha | tayoH
prasa~Ngeneti ||
kimetatsarvamIshvarAt kiM vA svabhAvAdityatrAha\- 'prakR^iteH vibhutvayogAt'
iti | prakR^itiH pradhAnam, tasyA vibhutvaM jagatkartR^itvam | tadyogAt
naTavadvyavatiShThate | pradhAnenaiva hi puruShasyArthaH kartavya iti
mahadAdisUkShmaparyantaM li~NgamutpAdya dharmAdibhiradhivAsayati |
tadadhivAsitaM cha naTavat vyavatiShThate | neshvarAnna svabhAvAditi
bhAvairadhivAsitamityuktam || 42||


kArikA 43


te punaH kiyantaH kimAshritA ityAha\-
|| sAMsiddhikAshcha bhAvAH prAkR^itikA vaikR^itAshcha dharmAdyAH |
dR^iShTA karaNAshrayiNaH kAryAshrayiNaH kalalAdyAH || 43 || ||

'sAMsiddhikAshcha' ityAdi | ye prAkR^itasvabhAvAste sAMsiddhikA uchyante |
te cha kapilasyaiva mahAmunernAnyasya | tasya hyutpadyamAnasyaivAdisarge
sahotpannA dharmaj~nAnavairAgyaishvaryasaMj~nakAshchatvAro bhAvAH | ye
tvAdisargAduttarakAlamutpannakAryakAraNAnAmasmadvidhAnAM prayatnapUrvakA
utpadyante, te vaikR^itAH ||
te cha dvividhAH | yadAha\- 'dharmAdyA dR^iShTAH karaNAshrayiNaH
kAryAshrayiNashcha kalalAdyAH' iti | dharmAdayashchatvAraH,
viparItAshchAdharmAdayashchatvAra ityaShTau | ete trayodashavidhaM
karaNamAshritya pravartante | kAryaM pa~ncha, kukShisthasyAsya nichChuritasya
tu kaumArayauvanavArddhakAni trayaH, ityaShTau bhAvAH | tatra vaikR^ite
dharmAdibhiradhivAsitaM saMsaratIti j~neyam || 43||


kArikA 44


nimittanaimittikaprasa~Ngenetyuktam | tadubhayamapi darshayitumAha\-
|| dharmeNa gamanamUrdhvaM, gamanamadhastAdbhavatyadharmeNa |
j~nAnena chApavargo, viparyayAdiShyate bandhaH || 44 || ||

'dharmeNa' ityAdi | dharmAdinimittamUrdhvagamanAdi naimittikam | tatra
dharmeNa yamaniyamalakShaNena gamanamUrdhvamiti, sUkShmasharIrasya
devAdivyavasthitirityarthaH ||
'gamanamadhastAdbhavayadharmeNa' iti | tiryagyoniShu sthitiH |
mishrAnmanuShyaloke sthitirityarthoktam ||
'j~nAnena chApavargaH' iti | pradhAnapuruShAntaraj~nAnAkhyena j~nAnena
li~NgaM nivartate | tataH kevalaH puruSho bhavati ||
'viparyayAdiShyate bandhaH' iti | j~nAnaviparyayAdaj~nAnAt
saMsArachakrabandhaH, punaH punarAvartanam | sa cha triprakAraH
\- prakR^itibandhaH, dakShiNAbandhaH, vikArabandhashcheti | yeShAM
prakR^itireva paratattvaM nAnyat, teShAM prakR^itivAdinAM prAkR^itiko bandhaH |
yeShAmiShTApUrtabhAvina eva divyAdivyamAnuShabhogAH puruShArtha iti, teShAM
karmavAdinAM dakShiNAbandhaH | iShTApUrtaM dakShiNeti | tathA choktam\-
agnihotraM tapaH satyaM devAnAM paripAlanam |
atithirvaishvadevaM cha iShTamityabhidhIyate ||
puShkariNyaH sabhA vApyo devatAyatanAni cha |
annapradAnamArAmaH pUrtamityabhidhIyate ||
yeShAM vikAra evaishvaryalakShaNaH puruShArtha iti, teShAM vikAratvavAdinAM
vaikAriko bandhaH || 44||


kArikA 45


|| vairAgyAt prakR^itilayaH, saMsAro bhavati rAjasAdrAgAt |
aishvaryAdavighAto viparyayAttadviparyAsaH || 45 || ||

'vairAgyAt" ityAdi | yo viShayAdidarshanAdvirakto yamaniyamaparisthito
na j~nAnaM paryeShate, tasya mR^itasya vairAgyAdaShTAsyu prakR^itiShu
pradhAnAditanmAtraparyantAsu layaH, sthUlasharIreNa viShayopabhoganimittena
yogaH | tallInashchAtmAnaM muktamiva manyate na tu muktam, sargakAle punaH
saMsaraNAt | yadA tu j~nAnaM paryeShyate tadA muchyata eva | tathA choktam\-
j~nAnAdatha virAgAchcha tathA kR^itsnasya saMkShayAt |
ityevaM jAyate mokSho mukta Atmastha uchyate || iti ||
'saMsAro bhavati rAjasAdrAgAt' iti | vairAgyaviShayo.ashubhaviShayAbhiShva~Ngo
rAjaso rAgaH, tasya shubhAshubhakarmAkShepakatvAt | tasmAddevAdiShvayaM
janAdyajibhAvena (?) saMsarati ||
'aishvaryAdavighAtaH' iti | anaishvaryAttadviparyAsa iti | avighAtaviparyAso
vighAtaH, prArthitAnAmaprAptirityarthaha | muktistu durotsAritaiva || 45||


kArikA 46


eShAmaShTAnAM buddhirUpANAmekena mokShaH saptabhirbandhaH saMsAra iti
yadetannimittanaimittikaM ShoDashamuktaM tatsaMkShepeNa chaturvidhamAha \-
|| eSha pratyayasargo viparyayAshaktituShTisiddhyAkhyaH |
guNavaiShamyavimardena tasya bhedAstu pa~nchAshat || 46 || ||

'eShaH' ityAdi | pratyayashabdena buddhiruchyate | tasya sargo
yaH ShoDashavidha uktaH, eSha viparyayAshaktituShTisiddhyAkhyaH |
viparyayAdInAmAkhyA yasya pratyayasargasya sa tathoktaH | tatra
viparyayamaj~nAnam, ashaktirj~nAnAdhigamAsAmarthyaM satyAmapyadhijigAMsAyAm,
tuShTirmokShopAyeShu vaimukhyam, siddhirj~nAnaprAptiH ||
tasya chatuvidhasya punaH pa~nchAshat bhedA bhavanti | kena prakAreNetyAha\-
'guNavaiShamyavimardena' ityAdi | sattvarajastamasAmanyo.anyAbhibhavadvAreNa
vaiShamyaM viShamabhAvaH, ekasya dvayorvAdhikye.anyasyAnAdhikyam |
ekadvitriyogena ShaDvidhaM vaiShamyam | tena dvayorvimardaH parasparakShobhaH |
tena hetunA bhavatItyarthaH || 46||


kArikA 47


tAn bhedAn darshayannAha\-
|| pa~ncha viparyayabhedA bhavantyashaktishcha karaNavaikalyAt |
aShTAviMshatibhedA tuShTirnavadhA.aShTadhAsiddhiH || 47 || ||

'pa~ncha viparyayabhedAH' ityAdi | aj~nAnAkhyasya sargasya bhedAH pa~ncha\-
tamo moho mahAmohastAmisro.andhatAmisrashcheti | ata eva sAMkhyapravachane
kleshA uchyante | 'avidyAsmitArAgadveShAbhiniveshAH kleshAH' iti |
tatrAvidyAkShetramuttareShAm ||
'ashaktishcha' iti | ashaktyAkhyaH sargaH ||
'karaNavaikalyAt' iti | karaNaM bAhyamAbhyantaraM cha |
tayorvaikalyAdaShTAviMshatibhedA yasyAH ashakteH sA bhavatIti
vibhaktipariNAmena yojyam | karaNavaikalyaM cha guNavaiShamyavimardena
bhavati ||
'tuShTirnavadhA.aShTadhA siddhiH' | iti tuShTisargo navaprakAraH,
siddhisargo.aShTaprakAro bhavatItyarthaH | etaiH samudAyena pa~nchAshadbhedA
iti || 47||


kArikA 48


tAnavAntarabhedasahitAn darshayannAha\-
< bhedastamaso.aShTavidho mohasya cha, dashavidho mahAmohaH |
tAmisro.aShTAdashadhA, tathA bhavatyandhatAmisraH || 48 || ||

'bhedastamasaH' ityAdi | tama ityavidyochyate | sA chottareShAM prasavabhUmiH |
sA cha prakR^itiH | tattvavedinAM satyapi vairAgye nApavarga iti,
j~nAnasyAbhAvAt | tatashcha teShAmaShTAsveva prakR^itiShu layo bhavatIti
aShTavidhA avidyA, viShayasyAShTavidhatvAt ||
mohasya chetishabdenAShTavidho bheda ityanuvartate | moha ityasmitochyate |
devA api vinAshino.api, aShTaguNamaishvaryamAshritA AtmAnamavinAshinaM
manyante | tatashcha teShAmaShTavidho mohaH, aishvaryasyAShTavidhatvAt ||
'dashavidho mahAmohaH' iti sukhAnushayo rAgo mahAmoha ityuchyate |
sa cha divyAdivyaviShayeShu vartamAno dashavidho bhavati | tatra
sUkShmAstanmAtralakShaNAH pa~ncha, sukhaikasvabhAvatvAddvivyAH | sthUlAH
pR^ithivyAdayaH pa~ncha, sukhaduHkhamohAtmakatvAdadivyAH ||
'tAmisro.aShTAdashadhA' iti | duHkhAnushayo dveShastAmisra ityuchyate |
sa chAShTaguNaishvarye dashavidhe cha viShaye pratibhavatItyaShTAdashavidhaH ||
'tathA bhavatyandhatAmisraH' iti | yathA tAmisro.aShTAdashadhA
tathA.ayamapItyarthaH | maraNatrAso.andhatAmisra uchyate | sa
chAShTaguNaishvarye dashavidhe cha viShaye pratibhavatItyaShTAdashavidhaH ||
'tathA bhavatyandhatAmisraH' iti | yathA tAmisro.aShTAdashadhA
tathA.ayamapItyarthaH | maraNatrAso.andhatAmisra uchyate |
sa chAShTaguNaishvarye dashavidhe viShaya eva bhavatIti | evaM
dviShaShTibhedamaj~nAnamuktam || 48||


kArikA 49


ashaktiH karaNavaikalyAdityuktam, tasyA bhedAn darshayitumAha\-
|| ekAdashendriyavadhaH saha buddhivadhairashaktirupadiShTA |
saptadashadhA cha buddherviparyayAstuShTisiddhinAm || 49 || ||

'ekAdasha' ityAdi | ekAdashAnAmindriyANAmekAdashaivopaghAtAH |
shrotrachakShurghrANAnAM bAdhiryAndhatvAghrAtR^itvAni, vAcho mUkatvam,
jihvAyA jADyam, manasa unmAdaH, pANipAdopasthAnAM kauNyapa~NgutvaklaibyAni,
tvagindriyasya kuShThaH, pAyorudAvarta iti |
bAdhiryamAndhyAghrAtR^itve mUkatA jaDatA tathA |
unmAdakauNyakuShThAni klaibyodAvartapa~NgutAH || iti ||
ata indriyavadhA ashaktirityupadiShTAH sAMkhyAchAryaiH ||
'saha buddhivadhaiH' iti | buddherapi vadhA ashaktirupadiShTA || te kiyanta
ityAha\- 'saptadashadhA cha buddhervupayayAstuShTisiddhInAm' iti | tuShTayo
nava, siddhayashchAShTau | vakShyamANAmbhasAM ye viparyayAste saptadashavidhA
buddherj~neyAH | evamashaktiraShTAviMshatibhedA yayA kramasvashakto bhavati ||
nanu pratyayasarga ityuktam, nAyamindriyavadhaH pratyayasargaH
ki~nchidaha~NkArasarga iti satyam, aha~NkArasya pratyayasargatvAt tatsargo.api
pratyayasarga uchyate | dharmo vA pratyayaH sargaH || 49||


kArikA 50


tuShTibhedAnAha\-
|| AdhyAtmikAshchatasraH prakR^ityupAdAnakAlabhAgyAkhyAH |
bAhyA viShayoparamAt pa~ncha, nava tuShTayo.abhimatAH || 50 || ||

'AdhyAtmikAH' ityAdinA | prakR^ityAdInyAkhyA yAsAM tuShTInAM tAstathoktAH |
tatra prakR^itiH pradhAnam | saiva vyaktAtmanA pariNamya bandhamokShau kuruta
ityetAvanmAtropadeshAt tuShTo bhavati yastasya prakR^ityAkhyA tuShTirambha
ityuchyate ||
upAdIyate prApyate mokSho.anenetyupAdAnam | pravrajyAli~NgaM chAtra
daNDAdi | na prakR^itij~nAnamAtreNa muktiH | 'upAdAnena chApare'
ityasmAdadvitIyAdupadeshAdihaiva muktiH prAptavyeti parituShTaH pravrajito.ayaM
tasya dvitIyA upAdAnAkhyA tuShTiH salilamuchyate ||
kalyata iti kAlA | mahadAdisUkShmaparyantena li~Ngena saMsaratA.apareNa
mokSho na prakR^ityupAdAnamAtrAdihaiva janmanIti tasmAttR^itIyAdupadeshAt
tuShTo yaH kAlApekShI sthitastasya kAlAkhyA tuShTirodha ityuchyate ||
yasyAparaM bhAgyamasti tasya mokShaH, prakR^ityupAdAnakAlamAtreNa na,
kashchidviparItabhAgadheyo.astIti tasmAchchaturthAdupadeshAt tuShTo yo
bhAgyApekShI sthitastasya chaturthI vR^iShTirityuchyate | etAshchatasra
AtmAnamadhikR^itya bhavantItyAdhyAtmikAH AtmanA moktavyamiti kR^itvA ||
'bAhyaviShayoparamAchcha' iti | shabdAdibhyo vyAvR^ittiruparamaNaM pa~nchadhA
bhavati | ArjanarakShaNakShayasa~NgahiMsAdoShadarshanAt | tatra viShayArjane
mahadduHkhaM tadalpaviShayebhya ityArjanadoShadarshanAnnivR^ittasya tuShTiriyaM
pa~nchamI sutAramityuchyate ||
viShayA ArjituM shakyAH, rakShaNaM tu duHkhaM bahubhiH tajjanyamAnAnAM
(?) syAditi rakShaNadarshanAnnivR^itasya tuShTiriyaM ShaShThI supAramityuchyate
||
viShayA ArjituM rakShituM kShaye cha pratividhAtuM shakyAH,
kintUpabhujyamAnA mahatImAtmasaktiM kurvanti, tadaprAptau cha mahadduHkhamiti
sa~NgadoShadarshanAduparastasyAShTamI tuShTiranuttamAmbha ityuchyate ||
sarvaM shakyaM kintvanupahatya bhUtAni na bhogaH sambhavati |
bhUtopaghAtAnmahadaniShTaphalamiti hiMsAdoShadarshanAduparatasya tuShTiriyaM
navamI uttamAmbha ityuchyate | etAH pa~ncha viShayadvAreNeti bhavantIti bAhyAH |
tatpUrvikAshchAdhyAtmikAH, viShaye tatparasyAdhyAtmikatuShTyasambhavAt ||
tatra prakR^ityupAdAnakAlA na mokShopAyA ityupadiShTamapi yo vaimukhyAnna
pratipadyate tasyAdhyAtmikAshchatasraH, viShayoparamAchcha bAhyAH pa~ncheti
nava tuShTayaH | tA buddhivadhA ityuchante | teShAM shakterantarbhavati [?] |
tAsAM chatuShShaShTInAM mahatprabhR^itayo viparyayeNa saMj~nA | tadubhayamapi
buddhAvantarbhUtaM tatsargatvAt || 50||


kArikA 51


katibhedA j~nAnAj~nAnalakShaNA siddhirityAha\-
|| UhaH shabdo.adhyayanaM duHkhavighAtAstrayaH suhR^itprAptiH |
dAnaM cha siddhayo.aShTau, siddheH pUrvo.a~NkushastrividhaH || 51 || ||

'UhaH shabdo.adhyayanam' ityAdi | siddhirj~nAnaprAptiH, tasyA bhedA upAyabhedAt |
Uha iti | janmAntarasaMskR^itadhiyo yasya bandhamokShakAraNamutprekShamANasya
pradhAnapuruShAntaraj~nAnamutpadyate tasya siddhirUhahetukA prathamA
tAramityuchyate ||
yasya sAMkhyashAstrapAThamanyadIyamAkarNya tattvaj~nAnamutpadyate, sA siddhiH
shabdahetukA dvitIyA sutAramityuchyate ||
yasya shiShyAchAryasambandhena sAMkhyashAstraM shabdato.arthatashchAdhItya
j~nAnamutpadyate, tasyAdhyayanahetukA | adhyayanena hi tatparij~nAnAt |
eShA tR^itIyA tAravi ityuchyate ||
'duHkhavighAtAstrayaH' iti | yo.apyAdhyAtmikenAdhibhautikenAdhidaivikena vA
bhAvitastadvighAtArthaM j~nAnaM paryeShyati, Uhena shabdenAdhyayanena vA,
tasya tadvighAtahetukAH pramAdapramuditamodanAkhyAstisraH, upAyasya tritvAditi |
pUrvA yAstisraH siddhyayastA na duHkhahetukA iti boddhavyAH ||
'suhR^itprAptiH' iti | yo.adhigatatattvaH suhR^idaM prApya
j~nAnamadhigachChati, tasya suhR^itprAptipUrvikA | mitraM hi snehAt j~nAnaM
prakAshayati | iyaM saptamI ramyakamityuchyate ||
dAnaM cha siddhihetuH | dAnena hyArAdhito j~nAnI j~nAnaM prayachChati |
iyamaShTamI sadApramuditamityuchyate ||
tadviparItA asiddhayaH | mandabuddhitvAnnohate yastasyAnUhahetukA asiddhiH |
yaH shakto.api sAMkhyashAstraM shR^iNvannapi buddhidaurbalyAnna buddhyati tasya
shabdahetukA asiddhiH | buddhidoSha evAyam | yasya gurupUrvakaM nAdhyayanaM
buddhidoShAdeva tasyAnadhyayanahetukA asiddhiH | na yatra mitrasaMgraho na cha
dAnamityaShTAvasiddhayo buddhivadhA ashaktAvantarbhUtAH | tAsAM chAsiddhInAM
moShamuShNAmAnoramityAdyAH [?] saMj~nAH | buddhAvantarbhUtaM tatsargatvAt ||
'siddheH pUrvo.a~NkushastrividhaH' iti | tasyA aShTavidhAyAH siddheryaH
pUrvo viparyayAshaktituShTyAkhyastrividha uktaH so.a~Nkusha ivetya~Nkusha
uktaH | tena hyasvatantrIkR^ito lokaH saMsArachakre.avatiShThate | tatra
viparyayAdiShyate bandha iti vachanAt pa~nchavidhamaj~nAnama~NkushaH | ashaktiH
karaNavaikalyam, tato hi j~nAnAprAptiritya~NkushaH | tuShTirapya~NkushaH |
tadA prakR^ityupAdAnakAlabhAgyA mokShopAyA iti, viShayoparamAchcha mukta
ityetAvanmAtrAdupadeshAt tuShTo na j~nAnaM paryeShyati | yadA tu paryeShyati
tadA.ana~Nkusha ityarthaH | ete pratyayasargabhedAH pa~nchAshat padArthAH,
astitvAdayashcha dasha | te chAsyAmeva saptatyAM nirdiShTAH | tathA chAha
saMgrahakAraH\-
astitvamekatvamathArthavattvaM pArArthyamanyatvamakartR^ibhAvaH |
yogo viyogo bahavaH pumAMsaH sthitiH sharIrasya cha sheShavR^ittiH || iti ||
ekatvamarthavattvaM pArArthyaM cheti pradhAnamadhikR^ityoktam |
anyatvamakartR^itvaM bahutvaM cheti puruShamadhikR^itya | astitvaM yogo
viyogashchetyubhayamadhikR^itya | sthitirmUlasUkShmamadhikR^itya | vakShyati\-
'tiShThati saMskAravashAt' iti | ete ShaShTi padArthAH, tadarthaM shAstraM
ShaShTitantramityuchyate || 51||


kArikA 52


pUrvotpannaM li~NgaM bhAvairadhivAsitaM saMsaratItyuktam, tatra kiM bhAvA
api pUrvamutpannAH kiM li~NgamevetyatrAha\-
|| na vinA bhAvairli~Ngam, na vinA li~Ngena bhAvaniShpattiH |
li~NgAkhyo bhAvAkhyastasmAddvividhaH pravartate sargaH || 52 || ||

'na vinA' ityAdi | yadi bhAvA na pUrvotpannAstairvinA li~Ngamapi nAsti |
saMsaraNArthaM li~NgaM saMsAranimittaM cha bhAvAH ||
'na vinA li~Ngena bhAvaniShpattiH' iti | li~NgaM vinA na bhAvAniShpattiH,
li~NgAshritatvAdbhAvAnAm | yasmAdevaM tasmAt li~NgAkhyo bhAvAkhyashcha
dviprakAraH pradhAnatvAt sargo bhavatIti | sR^ijyata iti sargaH || 52||


kArikA 53


yathA dvAvetau pUrvotpannau tatha bhUtasargo.apIti darshayannAha\-
|| aShTavikalpa daivastairyagyonyashcha pa~nchadhA bhavati |
mAnuShyachaikavidhaH, samAsato bhautikaH sargaH || 53 || ||

'aShTavikalpaH' ityAdi | devAnAmayaM daivaH | so.aShTavidhaH | tadyathA
brAhmaH, prAjApatyaH, sauraH, AsuraH, gAndharvaH, yAkShaH, rAkShasaH,
paishAchashcheti ||
'tairyagyonyashcha pa~nchadhA bhavati' iti | tiryagyonInAmayaM tairyagyonyaH |
pashumR^igapakShisarIsR^ipasthAvarabhedAt pa~nchavidhaH | tatra gavAdyA
rAsabhAntAH pashavaH | siMhAdyA biDAlAntA mR^igAH | haMsAdyA mashakAntAH
pakShiNaH | sarpAdayaH kR^imyantAH sarIsR^ipAH | vR^ikShAdayaH sthUNAntAH
sthAvarA iti ||
'mAnuShyashchaikavidhaH' iti | manuShyANAmayaM mAnuShyaH |
evaMvidhasaMsthAnasyaikavidhatvAt | brAhmAdibhedo.api sattvarajastamasAM
vikalpAt kAlavyavahAranimittam ||
'samAsataH' iti | saMkShepeNa | vistaram ||.tastasyaiva (?) \-
jarAyujANDajoShmajodbhijjAkhyAshchatvAro bhedAH shAstrAntare draShTavyAH |
udbhijjAH sthAvarAH ||
'bhautikaH sargaH' iti | bhUteShu bhavo bhautikaH, lokotpAda ityarthaH |
sa cha dvividhaH || 53||


kArikA 53


sthUlasharIre sattvayi kashchideva kvachidadhikyena vartata iti darshayannAha\-
|| UrdhvaM sattvavishAlastamovishAlashcha mUlataH sargaH |
madhye rajovishAlo, brahmAdistambaparyantaH || 54 || ||

'Urdhvam' ityAdi | brahmA Adiryasya sargasya stambashcha tR^iNaviTapaparyantaH,
sa brahmAdistambaparyantaH sargaH | sa UrdhvaH sattvavishAlaH | UrdhvaM
devalokastasyotkR^iShTatvAt tatra sAttvika ityarthaH | devalokasya
sattvabahulatvAt ||
'tamovishAlashcha mUlataH sargaH' iti | tairyagyono mUlam, tasyAdhamatvAt |
tasmin mUle tamo.adhikaM tamobahulatvAt ||
'madhye rajovishAlaH' iti | manuShyaloke madhye | uttarAdharabhAvAt tatra
duHkhabahulatvAt || 54||


kArikA 55


yadi triShu lokeShu li~NgaM saMsarati, tadeva tarhi sAMsArikaM sukhaM duHkhaM
vApnoti, tasyaiva sAMsArikatvAdityAha\-
|| tatra jarAmaraNakR^itaM duHkhaM prApnoti chetanaH puruShaH |
li~NgasyAvinivR^ittestasmAd duHkhaM svabhAvena || 55 || ||

'tatra' ityAdi | teShu lokeShu jarAmaraNakR^itamiti chaturduHkhopalakShaNArtham |
garbhaduHkham, janmaduHkham, jarAduHkham, maraNaduHkhamiti | tatra
mAtuH kukShau andhatamasIva praviShTasya sa~NkuchanaprasAraNaduHkhaM
garbhaduHkham | jAyamAnasya mAturudarAnnirgachChato janmaduHkham | va
||.pAlataskhalanAdiduHkhaM jarAduHkham | maraNAvasthAyAM sthUlasharIraM
tyajato maraNaduHkham | etattvAdhyAtmikaM duHkhe.antarbhUtamaprItaduHkhaM
buddhyAdhyavasitaM puruShaH prApnoti tasya chetanatvAt, na tu
li~NgamachetanatvAditi bhAvaH ||
kiyantaM kAlamityAha\- 'li~NgasyAvinivR^itteH' iti |
yAvalli~NgasyAvinivR^ittistAvadityarthaH | tasya cha nivR^ittiH
pradhAnapuruShAntaraj~nAnAt | yatashchaivaM tasmAdduHkhaM svabhAvena |
li~NgagarbhAdyavasthAsu svabhAvato duHkhamityarthaH | lokatraye sukhamapi
prApnoti, tannoktaM tasyAniyatatvAt | jarAdiduHkhaM tu niyatamiti || 55||


kArikA 56


yo.ayaM bhAvali~NgabhUtatatsargaH sa kimIshvarAt, yathochyate\-
Ishvaraprerito gachChet svargaM vA shvabhrameva vA |
iti, kiM vA puruShAt, yathochyate\-
puruSha evedaM sarvaM yadbhUtaM yachcha bhavyam |
iti, kiM vA svabhAvAt, yathochyate\-
svabhAvikamevedaM sarvaM jagannahi marudAdayaH kenachit kriyante |
ityatrAha\-
|| ityeSha prakR^itikR^ito mahadAdivisheShabhUtaparyantaH |
pratipuruShavimokShArthaM svArtha iva parArtha ArambhaH || 56 || ||

'ityeSha prakR^itikR^itaH' ityAdi | Arabhyata ityArambhaH | prakR^itikR^ita
iti pradhAnakR^itaH, neshvarAdikR^ita ityarthaH | lokatrayaM triguNAtmakaM
bhavati, tachcha triguNAyA eva prakR^iterutpadyate | napai svabhAvikam,
viparItaguNadoShaprasa~NgAddeshAniyamayogAchcha ||
sa kiMsvarUpa ityAha\- 'mahadAdivisheShabhUtaparyantaH' iti |
buddhirAdiryasyArambhasya | bhUtAni lokatraye yAnyabhinnasaMsthAnAni
sthUlasharIrAkhyAni | viShayAshcha | bAhyAshcha viShayAH sUkShmAH sthUlAH |
te paryante.avasAne yasya sa tathoktaH | anena bhAvali~NgabhUtasargAkhyAstraya
AkhyAtAH ||
kimarthamayaM pradhAnasyArambha ityatrAha\- 'pratipuruShavimokShArtham'
iti | ekaikasya puruShasya puruShasya vimuktyarthamArambhaH, puruShANAM
bahutvAt | bhAvasarge bhUtasarge chAneka iti darshayati | tathAhi mokShArthaM
viShayopabhogArthaM chAyamArambha iti draShTavyam | pradhAnena hi puruShArthaH
kartavyaH | sa cha dvividhaH | viShayopabhogaH kaivalyaM cha | tadubhayaM
kR^itvA nivartata iti ||
'svArthaH' iti | yaH kashchit devadattasvArtha eva parArtho rahititaM
pravartate na parastapastakaroti (?) tathA pradhAnamapItyarthaH || 56||


kArikA 57


nanu cha sachetanasya buddhipUrvikA pravR^ittirbhavati,
pradhAnasyAchetanatvAtkathaM lokatraye puruShaM viShayaiH saMyojya dhyAnena
vipramochya nivarteta | kathamevaMvidhA pravR^ittiH | nAyaM niyamaH,
achetanAnAmapi loke pravR^ittidarshanAt | yadAha\-
|| vatsavivR^iddhinimittaM kShIrasya yathA pravR^ittiraj~nasya |
puruShavimokShanimittaM tathA pravR^ittiH pradhAnasya || 57 || ||

'vatsavivR^iddhinimittam' ityAdi | vatsasya vivR^iddhiH puShTiH | tasyA
nimittam ||
'kShIrasya yathA pravR^ittiraj~nasya' iti | achetanasya | yathA
tR^iNadikamachetanaM gavAshitaM pItaM cha, vatsasya puShTiH kartavyeti,
kShIrAtmanA pariNamati kR^itArthaM cha nivartata iti || 57||


kArikA 58


yadi puruShavimokShArthaM pradhAnasya pravR^ittiH, pravR^itteH prAk puruShasya
kaivalyaM sthitameva, tat kiM tena pravR^ittena? tathA chAhuH \-
madhvarthaM prasthitaH kashchid grAmAbhyAshe tu mAkShikam |
akke chenmadhu vindeta kimarthaM parvataM vrajet || iti ||
atrAha\-
|| autsukyanivR^ittyarthaM yathA kriyAsu pravartate lokaH |
puruShasya vimokShArthaM pravartate tadvadavyaktam || 58 || ||

'autsukyam' ityAdi | yathautsukyanivR^ittyarthamabhimatakriyAsu lokaH
pravartate, tadvat pralayAvasthAyAM puruSho.api mokShanimittaM yadautsukyaM
tannivR^ittaye pravartayetpradhAnamiti || 58||


kArikA 59


udAharaNAntaramAha\-
|| ra~Ngasya darshayitvA nivartate narttakI yathA nR^ittAt |
puruShasya tathA.a.atmAnaM prakAshya vinivartate prakR^itiH || 59 || ||

'ra~Ngasya' ityAdi | nR^ityatIti narttakI | sA tathA ra~Ngasya nR^ittaM
darshayitvA tasmAnnR^ittAnnivartate viramati, dR^iShTAhamaneneti
kR^itaprayojanA satI, tathA puruShasyAtmAnaM samprakAshya devAdibhAvarUpaM
gatA nivartate prakR^itiH pradhAnamityarthaH || 59||


kArikA 60


nanu cha naTI ra~NgAt svArthaM sAdhayati, prakR^itestu puruShArthaH svArtho
yenaivamAcharayatItyAha\-
|| nAnAvidhairupAyairupakAriNyanupakAriNaH puMsaH |
guNavatyaguNasya satastasyArthamapArthakaM charati || 60 || ||

'nAnAvidhaiH' ityAdi | pUrvaM saptabhirdharmAdibhirupAyaistriShu
viShayeShvAtmanaM prakAshayatyupakAriNI, tadanantaramekena j~nAnAkhyena
kaivalyaM kurvANopakAriNI bhavati ||
'anapakAriNaH puMsaH' iti | na pumAMstAM pratyupakaroti, ahamanayopakR^ita
iti | punassA tamupakaroti ||
nAsau tAmityAha \- ' guNavatyaguNasya sataH' iti | guNasattvAtprakR^itiH
sakriyA, nirguNatvAt puruSho niShkriya iti | tasyArthamapArthakaM charati |
tasya puMso.artho dvividhaH\- viShayopabhogaH kaivalyaM cha | tannirarthakaM
karoti, yatastasyAH prayojanAbhAvaH | vyaktAtmanA.a.atmAnaM darshayati
natvavyaktAtmanA || 60||


kArikA 61


tathAhi \- guNAnAM sAmyAvasthA prakR^itiH | kutashcha sA na
sarvAtmanA.a.atmAnaM prakAshayati, pumAnapi na sarvathA pashyati ? tathA
chAhuH\-
guNAnAM paramaM rUpaM na dR^iShTipathamR^ichChati |
yattu dR^iShTipathaM prAptaM tanmAyAvastu tuchChakam || iti | atrAha \-
|| prakR^iteH sukumArataraM na ki~nchidastIti me matirbhavati |
yA dR^iShTAsmIti punarna darshanamupaiti puruShasya || 61 || ||

'prakR^iteH' ityAdi | sukumArataramiti sUkShmataramitarat | etaduktaM bhavati\-
prAgvyaktAtmanA prakAshayati na tvavyaktAtmanApi, yena j~nAnAvasthAyAM
prakR^itermatirbhavati mama sUkShmataraM na ki~nchidaparamasti yaddraShTavyaM
puruSheNa ||
('yA dR^iShTA.asmi' iti | sA prakR^itirvyaktAtmanA cha) dR^iShTAhamaneneti
na punardarshanamupaiti puruShasya, draShTavyAbhAvAt | tatashchaivaM sarvathA
prakR^itirAtmAnaM prakAshayati, puruShashchaitAM sarvathA pashyati || 61||


kArikA 62


tasmAnna puruShasya bandho nApi saMsaraNaM mokSho vetyAha\-
|| tasmAnna badhyate.addhA na muchyate nApi saMsarati kashchit |
saMsarati badhyate muchyate cha nAnAshrayA prakR^itiH || 62 || ||

'tasmAnna badhyate' ityAdi | bandhAbhAvAnna badhyate | puruShasyApi
kAryatvAdbandho nAsti | na vimuchyate tasyA bandhanAt | nApi saMsarati
niShkriyatvAt | kashchiditi puruSha ityarthaH ||
kasya tarhi bandhAdaya ityAha\- saMsarati badhyate muchyate cha prakR^itiriti |
nanu cha tasyAH sukumAratvAdbandhAdayo na sambhavantyevetyatrAha\-
nAnAshrayeShurabhivajyate (?) | tatrAshrayAH bhAvali~NgabhUtAssargAH |
te prakR^itipuruShavannAnAvidhAH || 62||


kArikA 63


tatashcha nAnAshrayatvAdeva darshayannAha\-
|| rUpaiH saptabhireva tu badhnAtyAtmAnamAtmanA prakR^itiH |
saiva cha puruShArthamprati vimochayatyekarUpeNa || 63 || ||

'rUpaiH' ityAdi | dharmAdayo buddhe rUpAnyuktAni | 'saptabhiH' | j~nAnaM
tyaktvA te cha prakR^iterAtmabhUtAH | saivAtmanaiva puruShArthaM pratyAtmAnaM
mahadAdisUkShmaparyantaM li~NgaM badhnAti | bandhashcha trividhaH | tachcha
li~NgaM bhAvAdibhiradhivAsitamarthameva | saMsaratIti | prakR^itireva
saMsarati ||
'saiva cha' iti | prakR^itiH puruShArthaM prati kaivalyArthaM
vimochayatyAtmAnam ||
'ekarUpeNa' iti | ekaM cha tadrUpaM cheti | j~nAnAkhyena rUpeNetyarthaH | yaM
puruShamapekShya j~nAnamutpAdayati taM pratyavyaktamAtmAnaM saMharatItyarthaH |
nahi dharmAdayaH puruShadharmA yastairbadhyate | nApi saMsarati,
ali~NgabhAvatvAt | nApi muchyate, tasya bandhanatvAt || 63||


kArikA 64


tadevaM j~nAnaM kathamutpadyate yena mochayatItyAha\-
|| evaM tattvAbhyAsAnnAsmi na me nAhamityaparisheSham |
aviparyayAdvishuddhaM kevalamutpadyate j~nAnam || 64 || ||

'evaM tattvAbhyAsAt' ityAdi | evamiti vakShyamANe yojyam | tattvAni
pa~nchaviMshatiH | teShAM punaH punaH svarUpeNAbhyasanamabhyAsaH | yadetat
sUkShmasharIraM bhautikaM cha tasminna bhavAmi, api tu prakR^itiH ||
'na me' ityAdi | na mamedamapi tu prakR^iteH ||
nAhamiti | nApyahaM prakR^itirityevaM tattvAbhyAsAt | kiMvishiShTAt \-
aviparyayAdahamityamAnasaMshayAt j~nAnamutpadyate ||
IdR^ishamityAha\- 'aparisheSham' iti | paripUrNaM vishuddham saMsAramalApagamAt
kevalamekamityarthaH || 64||


kArikA 65


nanu j~nAnena puruShaH kiM pashyatItyAha\-
|| tena nivR^ittaprasavAmarthavashAt saptarUpavinivR^ittAm |
prakR^itiM pashyati puruShaH prekShakavadavasthitaH svasthaH || 65 || ||

'tena' ityAdi | yat prakR^itij~nAnamutpadyate taM prati nivR^itaH prasavo
li~NgabhUtasargAkhyo yasyAH prakR^iteH sa tathoktA | prasavanivR^ittyA vA
yo viShayo viShayebhyo nivartate tadvashAt, saptabhyo rUpebhyo dharmAdibhyo
nivR^ittA prakR^itirbhavati | bhAvasaMsargo.api yasyA nivartata ityarthaH |
tAmevaMvidhAmavyaktarUpAM pashyati puruShaH ||
'prekShakavadavasthitaH' iti | yathA prekShakaH
pravarttitanR^ittamupasaMhR^itanR^ittAM cha narttakIM pashyati, tathA
puruSho.api pravartitasargAmupasaMhR^itasargAM cheti ||
'svasthaH' iti | Atmani sthito na prakR^itisthaH, tataH prakR^iternivR^ittatvAt
|| 65||


kArikA 66


nanu cha yadi prakR^itirgarbhabhUHpuruShaM prati nivR^ittaprasavA, tasyAshcha
prakR^itestadAnIM sarvagatatvAdastyeva saMyogastatkimiti punaH sharIrotpattirna
bhavatItyAha \-
|| dR^iShTA mayetyupekShaka eko dR^iShTA.ahamityuparamatyanyA |
sati saMyoge.api tayoH prayojanaM nAsti sargasya || 66 || ||

'dR^iShTA mayA' ityAdi | tayordvayorekaH puruSha upekShakaH, sarvathA ||.tvAt |
yathA prekShako naTImupekShate nivR^ittAbhilAShatvAt ||
'dR^iShTA.ahamityuparatA.anyA' iti | aparA prakR^itiruparatA nivR^ittaprasavA |
sarvathA.ahamanena dR^iShTeti ||
tatashcha saMyoge.api tayoH prayojanaM nAsti sargasya | viShayopabhogArthaH
sargaH | tasminneva charitArthatvAt na punaH sargamArabhate | nahi naTI
ra~Nge prekShakairnirAkAMkShitaM punarnR^ittamArabhate || 66||


kArikA 67


yadyAtmaj~nAnAt kaivalyaprAptiH, tadanantarameva sharIraM kasmAnna nivartata
ityAha\-
|| samyagj~nAnAdhigamAt dharmAdInAmakAraNaprAptau .
tiShThati saMskAravashAt, chakrabhramavaddhR^itasharIraH || 67 || ||

'samyak j~nAnAdhigamAt' ityAdi | samyak j~nAnamAtmaj~nAnam |
tasyAdhigamAdAtmaj~nAnaprApterityarthaH ||
'dharmAdInAmakAraNaprAptau' iti | na kAraNamakAraNam,
tasyAmakAraNaprAptAveva taduktaM bhavati | samyak j~nAnAdhigamAtteShAM
dharmAdInAmagnidagdhabIjavadashaktatvAt ||
janmAntarasaMskAravashAddhR^itasharIraH pumAMstiShThati | katham\-
chakrabhramavat | yathA kulAlavyApAre nivR^itte.api vegavashAt kiyantamapi
kAlaM chakrabhramastiShThati tathA sharIramapItyarthaH || 67||


kArikA 68


kadA sa mokSho bhavatItyatra\-
|| prApte sharIrabhede charitArthatvAt pradhAnavinivR^ittau |
aikAntikamAtyantikamubhayaM kaivalyamApnoti || 68 || ||

'prApte sharIrabhede' ityAdi | li~NgabhautikasharIre pR^ithagbhUte yathA
saMbhUte layaM gati teShvityarthaH (?)||
'charitArthatvAt pradhAnavinivR^ittau' iti | pradhAnaM li~NgAtmanA pariNataM
nivartate | nivR^ittAvubhayaM kaivalyamApnoti ||
'aikAntikamAtyantikaM cha' iti | tatrAtmaj~nAnotpAdAdavashyaMbhAvi
kaivalyamityaikAntikam | satyapi tayoH saMyoge prayojanAbhAvAnna punaH sarga
ityAtyantikamiti || 68||


kArikA 69


saptatyAM vishuddhiM darshayannAha\-
|| puruShArthaj~nAnamidaM guhyaM paramarShiNA samAkhyAtam |
sthityutpattipralayAshchintyante yatra bhUtAnAm || 69||

'puruShArthaj~nAnam' ityAdi | puruShArthaM j~nAnaM cheti puruShArthaj~nAnam |
yadidaM pa~nchaviMshatitattvaj~nAnaM tatpradhAnam, puruShArthamokSho.anena
prApyata iti kR^itvA | guhyamidamaprakAshyam | sAdhujanAdanyasmai na
deyamityarthaH ||
'paramarShiNA samAkhyAtam' iti | kapilamuninA prakAshitam ||
'sthityutpattipralayAshchintyante yatra bhUtAnAm' iti | yatra j~nAne
bhUtAnAM brahmAdistambaparyantAnAM sthityAdayo vyavasthApyante |
tatrotpannAnAM prabandhenAvasthAnaM sthitiH | sA cha triShu sthAneShu
daivamAnuShatairyagyoneShu utpattiH sR^iShTapradhAnAt yAvat tanmAtrebhyaH
pa~nchamahAbhUtAni | sR^iShTyupasaMhAre mahApralayaH, sarvo.apyutkrameNa |
tadyathA pR^ithivyAdayastanmAtrAdiShu lIyante yAvatpradhAnamiti | tena
pa~nchaviMshatitattvavyatiriktaM nAstItyetaduktam || 69||


kArikA 70


muninA samAkhyAtamiti kuto j~nAyata ityAha\-
|| etat pavitramagryaM munirAsuraye.anukampayA pradadau |
Asurirapi pa~nchashikhAya, tena cha bahudhA kR^itaM tantram || 70||

'etat' ityAdi | 'pavitram' iti | duHkhatrayametat punAtIti kR^itvA |
sarvabhedAnAmagrebhavatvAdagryam ||
'munirAsuraye.anukampayA pradadau' iti | kapilasya mahAmuneH
sahotpannAshchatvAro dharmAdayaH | tatra j~nAnAkhyena bhAvenAndhe tamasi
vartamAnaM jagat dR^iShTavato muneH karuNotpannA | tayA cha preryamANa
AsuriM sagotrabrAhmaNaM varShasahasrayAtinamAgatyovAcha | 'Asure ramase
tvaM gR^ihasthadharmeNa' iti | sa tamAha\- 'bhagavan na rame.aham' iti |
punarvarShasahasre pUrNe taM gatvA tathovAcha | so.api 'bhagavan na
rame.aham' ityuvAcha | tato muninA 'yadi viraktastvam, ehi brahmacharyaM
chara' ityasAvuktaH | sa tu pradipadya gR^ihasthadharmaM tyaktvA pravrajitaH |
tasmai shiShyAyAnukampayA saMkShipya dattavAn | 'tama eva khalvidamAsIt' |
tasmiMstamasi kShetraj~na eva prathamaH | tamaH pradhAnam, kShetraj~naH puruSha
uchyate | Asurirapi tadeva  saMkShiptaM pa~nchashikhAya svashiShyAyAnukampayA
pradadau ||
'tena' iti | pa~nchashikhena muninA bahudhA kR^itaM tantram |
ShaShTitantrAkhyaM ShaShTikhaNDaM kR^itamiti | tatraiva hi ShaShTirarthA
vyAkhyAtAH || 70||


kArikA 71


nanu cha ShaShTitantramevAstu kiM saptatyeti svashAstrakaraNaprayojanamAha\-
|| shiShyaparamparayA.a.agatamIshvarakR^iShNena chaitadAryAbhiH |
saMkShipyAryamatinA samyagvij~nAya siddhAntam || 71 || ||

'shiShyaparamparayA' ityAdi | munerAsureH pa~nchashikhastathA
gargagautamaprabhR^itirNarAmataMgramyA (?) IshvarakR^iShNanAmAnaM
parivrAjakamityanayA shiShyaparamparayA | iti j~nAnamayarUpeNAgataM
siddhAntaM ShaShTitantram | samyagvij~nAya saMkShiptaM ShaShTitantram,
pa~nchaviMshatitattvAkhyaM j~nAnamityarthaH ||
AryamatiH, adhigatatattvaj~nAnatayAryamatiH ||
'AryAbhiH' iti | saptatyetyarthaH | 'duHkhatrayAbhighAtAt' 'etat pavitram'
iti saptatyAbhihitam || 71||


kArikA 72


atra ShaShTitantre bahavo.arthAH, te.atra noktA ityAha\-
|| saptatyAM kila ye.arathAste.arthAH kR^itsnasya ShaShTitantrasya |
AkhyAyikAvirahitAH paravAdavivarjitAshchApi || 72||

'saptatyAm' ityAdi | 'eSha pratyayasargo viparyayAshaktituShTisiddhyAkhyaH'
ityAdinA granthena ya uktAste kR^itsnasya ShaShTitantrasyApi ||
kintu 'AkhyAyikAvirahitAH paravAdavivarjitAH shuddhAH' iti | AkhyAyikA
AkhyAnam, tadvirahitAH | parachodyaM tena vivarjitAH | shuddhAH kevalAH | paraM
bandhamokShopayogino.arthAH darshitA iti tasmAt sampUrNeyaM saptatiriti || 72||



|| iti shrImatparamahaMsaparivrAjakAchAryashrIgovindabhagavatpUjyapAdashiShyeNa
shrIsha~NkarabhagavatA kR^itA sAMkhyasaptatiTIkA samAptA ||





##
Encoded and proofread by Dhaval Patel drdhaval2785 at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}