% Text title            : karuNAlaharI
% File name             : karuNAlaharI.itx
% Category              : laharI, major\_works, jagannAthapaNDita, vishhnu, vishnu
% Location              : doc\_z\_misc\_major\_works
% Author                : Jagannathapandita
% Proofread by          : PSA Easwaran psawaswaran
% Description/comments  : Edited by S. V. Radhakrishna Shastriji
% Acknowledge-Permission: Mahaperiaval Trust
% Latest update         : April 12, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. karuNAlaharI ..}##
\itxtitle{.. karuNAlaharI athavA viShNulaharI ..}##\endtitles ##

viShIdatA nAtha viShAnalopame viShAdabhUmau bhavasAgare vibho |
paraM pratIkAramapashyatAdhunA mayAyamAtmA bhavate niveditaH || 1||
bhavAnalajvAlaviluptachetanaH sharaNya te.a~NghriM sharaNaM bhayAdayAm |
vibhAvya bhUyo.api dayAsudhAmbuje vidhehi me mAtha yathA yathechChasi || 2||
vihAya saMsAramahAmarusthalImalIkadehAdimilanmarIchikAm |
manomR^igo me karuNAmR^itAmbudhe vigADhumIsha tvayi gADhamIhate || 3||
tvada~NghriphullAmbujamadhyanirgalanmarandaniHsyandanitAntalampaTaH |
manomilindo mama muktachApalastvadanyamIshAna tR^iNAya manyate || 4||
jagattrayatrANavidhau dhR^itaddhataM tavA~NghrirAjIvamapAsya ye janAH |
sharaNyamanyabhyugayanti yAnti te nitAntamIshAna kR^itAntadehalIm || 5||
ramAmukhAmbhojavikAsanakShamo jagattrayodbodhavidhAnadIkShitaH |
kadA madaj~nAnavibhAvarIM hare hAriShyati tvannayanAruNodayaH || 6||
surAsurasvAntachakorachumbitA samastasantApachayApanodinI |
mahAnishIthe mama mAnase kadA sphuriShyati ttvanmukhachandrachandrikA || 7||
suyauvanApANDuragaNDamaNDalapratisphuratkuNDalatANDavAdbhutam |
gadAgraja tvanmukhaphullapa~NkajaM kadA madakShNoratithIbhavimayati || 8||
surApagAtu~Ngatara~NgachAlitAM surAsurAnIkalalATalAlitAm |
kadA dadhe deva dayAbhR^itodadhe bhavatpadAmbhoruhadhUlidhoraNIm || 9||
mahAjavAshChinnAvevekarashmayo madoddhatA deva madakShavAjinaH |
hare samAsAdya tavA~NghrimandurAmapAstavegAM dadhatAM sushIlatAm || 10||
purAtanAnAM vachasAmagocharaM maheshitAraM puruShottamaM patim |
apAsya taM tvAM nirapatrapA satI satI matirme kathamanyameShyati || 11||
na jAgratA svapragatena vA mayA samIhitaM te karuNAlavAdR^ite |
girammadIyAM yadi vetsi tAttvikIM tadA jagannAyaka mAmurIkuru || 12||
ayi dInataraM dayAnidhe duravasthaM sakalaiH samujjhitam |
adhunApi na mAM nibhAlayan bhajase hA kathamashmachittatAm || 13||
sumahanti jaganti bibhratastava yo nAvirabhUnmanAgapi |
sa kathaM paramAptadehinAM paramANomarma vAraNe shramaH || 14||
nitarAM vinayena pR^ichChate suvichAryottaramatra yachCha me |
karito girito.apyahaM gurustvarito noddharase yadadya mAm || 15||
na dhanaM na cha rAjyasampado na hi vidyAmidamekamarthaye |
mayi dhehi manAgapi prabho karuNAbha~Ngitara~NgitAM dR^isham || 16||
ayamatyadhamo.api nirguNo dayanIyo bhavatA dayAnidhe |
vamatAM phaNinAM viShAnalaM kimu nAnandayitA hi chandanaH || 17||
kShudhitasya na hi trapAsti me pratirathyaM pratigR^ihNataH kaNAn |
akala~NkayashaskaraM na te bhavadIyo.api yadanyamR^ichChati || 18||
nitarAM narake.api sIdataH kimu hInaM galitatrapasya me |
bhagavankuru sUkShmamIkShaNaM paratastvAM janatA kimAlapet || 19||
narake nijakarmakalpitA bhajato me mahatIrapi vyathAH |
idamekamasahyamIkShakA yadanAthaM nigadanti mAM vibho || 20||
mR^igadantimukhAnmayA saha pratiruddhAn bhavajAlabandhane |
tava mAmapahAya mu~nchataH karuNA kiM na bhinatti mAnasam || 21||
nirupAdhijanArtihAriNaM bhagavaMstvAmavagatya tattvataH |
kR^itapuNyachayAvahelanaM kathamabjekShaNa mAmupekShase || 22||
satataM nigameShu shR^iNvatA varada tvAM patitAnupAvanam |
puru pApamupAsyate.anishaM tvayi vishvAsadhiyA mayA vibho || 23||
sukR^itaM na kR^itaM purA kadApyatha sarvaM kR^itameva duShkR^itam |
adhunA galitahriyA mayA bhagavaMstvAM prati ki nigadyatAm || 24||
madakAmavimohamatsarA ripavastvatpura eva vihvalam |
dhR^itashAr~NgagadArinandaka pratikarShanti kathaM na lajjase || 25||
ayi gartamukhe gataH shishuH pathikenApi nivAryate javAt |
janakena patanbhavArNave na | nivAryo bhavatA kathaM vibho || 26||
sukR^itapriya mA.anyathAstu te sukR^itibhyaH sukhadasya suprathA |
api pApamabibhratastu mAM tava vishvambharanAma durlabham || 27||
vachanaiH paruShairiha prabho yadi roShaM samupAgato.asi me |
mukharaM kR^itakoTikalmaShaM karuNAbdhe jagato.apasAraya || 28||
yadi vIkShya dadAsi matkR^itiM na mayaiva pratigR^ihyate tadA |
atha chennijamAshayaM prabho parituShTaH shirasA vahAmi tat || 29||
patito.apyatidurgato.api sannakR^itaj~no nikhilAgasAM padam |
bhavadIya itIrayaMstvayA dayanIyastrapayaiva kevalam || 30||
sukR^itaprakR^itA jane tvayA kR^itayA kiM kR^ipayA kR^ipAnidhe |
yadi mAdR^ishi sA vidhIyate tava kIrtirvada kIdR^ishI tadA || 31||
ayi shaishavalAlitaH shishuH pratibuddho janakena tADyate |
na kadApi cha lAlitastvayA kimu tADyo bhagavankukarmabhiH || 32||
ahameva hi doShadUShito bhagavaMstvAM samupAlabhe mudhA |
ramaNIvirahajvarajvalannamR^itAMshuM kumatirvinindati || 33||
karuNAkara durdashAkulaM patitAlambana pApapa~njaram |
amR^itAmbunidhe mahAjvaraM na hi jahyA jagadIsha jAtu mAm || 34||
kaTujalpanamalpakasya me na hi te kalpayatu krudhaM vibho |
kupitAturabAlabhAShitaM kimu gR^ihNanti manA~NmahAshayAH || 35||
bhujagAhitakalpitadhvajaM spuradAshAbhujagAlivellitam |
jaTilajvaraku~njarA~NkushajvarajuShTaM na jahIhi jAtu mAm || 36||
na vadAmi na duShkR^itaM mayA kR^itamityuktimimAM tu me shR^iNu |
mama bhItimanInashadvibho patitoddhAraka nAma tAvakam || 37||
api sharvapitAmahAdibhirbhajanIyaH puruShottamo hi yaH |
tamupAlabhamAnamuddhataM dhigimaM mAM dhigimAM dhiyaM mama || 38||
atha sarvamidaM mayojjhitaM bhavato.anyanna hi ki~nchidarthaye |
mama mAnasagocharIbhavatvaravindAkSha tavAdbhutaM vapuH || 39||
harinIlamayAvanItale varavR^indAvipine vilAsini |
maNimaNDapamadhyavisphuradvibudhakShmAruhamUlamAshritam || 40||
shikhipichChamahAmaNisphuranmukuTAku~nchitakAntakuntalam |
kamanIyatarAlakAvalibhramaNabhrAjilalATasundaram || 41||
sharadindusahodarAnanaM daladambhojapalAshalochanam |
aruNAdharakAntidanturasphuTadantAMshuvikAsitAmbaram || 42||
darapANDuragaNDamaNDalapratisarpatkamanIyakuNDalam |
maNimauktikama~njuma~njarImahanIyadyutira~njitashruti || 43||
pR^ithuvartulamauktiskAvalIsuShamAvellitakAntakandharam |
harinIlagiridyutidruhA kamalAmandiravakShasA~nchitam || 44||
charaNAbjanakhAvalambinIM bhujagAkArabhujAntarAgatAm |
nibiDAbhramiva kShaNaprabhAM vR^ihadutphullavanAmalasrajam || 45||
maNika~NkaNakAntimAMsalaM daraphullAmbujasundaradyuti |
patitoddharaNe dR^iDhavataM kamanIyaM karayoryugaM dadhat || 46||
vararatnamayA~NgulIyakAvalishobhAmilitA~NgulIgaNaiH |
muhurAkulitena veNunA vashayatprANabhR^itAM manaHshrutIH || 47||
udaradyutinimnagochChalallaharIrUpakaromarAjikam |
pashupAlavilAsinIlasannayanAkarShaNanAbhinimnitam || 48||
kanakadravagauramambaraM dadhatorudvitayena sundaram |
udayanmaNinUpuraprabhAsaraNishreNijaTAlajAnukam || 49||
arigIrNagajendragopane dadhatA jA~NghikatAmalaukikIm |
trijaganmahanIyamUrtinA varaja~NghAyugalena shobhitam || 50||
kulishA~NkushakambusAmbujadhvachakrAdyabhirAmalakShmaNA |
aruNAruNakomalatviShA kamanIyena talena rAjitam || 51||
vidhisharvamukhAmarasphuranmukuTonnidramaNiprabhAkulam |
nakhachandramayUkhamUrchChitAkhilatApaM padayoryugaM dadhat || 52||
sarataH saraNau sato bahiH svapato vA.a.alapato gR^ihAntare |
vapurIdR^ishamIsha tAvakaM hR^idayAlambanamastu me sadA || 53||
navanIradanIlimadyutirnamanIyo nigamairnirantaram |
niraye nipatantamAshu mAM nayanenApi sanAthayedvibhuH || 54||
praNipatya hare bhavantamaddhA vinibaddhA~njalirekameva yAche |
janirastu kule kR^iShIvalAnAmapi govindapadAravindabhAvaH |
vAchA nirmalayA sudhAmadhurayA yAM nAtha shikShAmadAH
tAM svapne.api na saMsmarAmyahamahambhAvAvR^ito nistrapaH |
ityAgaHshatashAlinaM punarapi svIyeShu mA bibhrataH
tvatto nAsti dayAnidhiryadupate matto na mattaH paraH |
pAtAlaM vraja yAhi vA surapurImAroha meroH shiraH
pArAvAraparamparAM tara tathApyAshA na shAntA tava |
AdhivyAdhijarAparAhata yadi kShemaM nijaM vA~nChasi
shrIkR^iShNeti rasAyanaM rasaya re shUnyaiH kimanyaiH shramaiH |
vajraM pApamahIbhR^itAM bhavagadodrekasya siddhyauShadhaM
mithyAj~nAnanishAvishAlatamasastigmAMshubimbodayaH |
krUrakleshamahIruhAmurutarajvAlAjaTAlaH shikhI
dvAraM nirvR^itisadmano vijayate kR^iShNeti varNaddhayam || 58||
vishAlaviShayATavIvalayalagnadAvAnala
prasR^itvarashikhAvalIvikalitaM madIyaM manaH |
amandamiladindire nikhilamAdhurImandire
mukundamuravachandire chiramidaM chakorAyatAm || 59||
surasrotasvinyAH pulinamadhitiShThannayanayoH
vidhAyAntarmudrAmatha sapadi vidrAvya viShayAn |
vidhUtAntardhvAnto madhuramadhurAyAM chiti kadA
nimagnaH syAM kasyA~nchana navanabhasyAmbudaruchi || 60||

iti shrIjagannAthapaNDitakR^itA karuNAlaharI samAptA |

##
Proofread by PSA Easwaran

Reference as Vishnulahari in Karunakahari published in a Marathi
Journal Aryamitra from Pune.  It was published in 1953 by Shri
D. G. Padhye.

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}