% Text title            : raghuvansha 4
% File name             : raghuvansha4.itx
% Category              : major\_works, svara, kAlidAsa
% Location              : doc\_z\_misc\_major\_works
% Author                : kalidasa
% Transliterated by     : Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : May 11, 2005
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Raghuvansha by Kalidas Chapter 4 ..}##
\itxtitle{.. raghuva.nshaM sargaH 4 kAlidAsakR^itam ..}##\endtitles ##

sa rAjya.n guruNA datta.n pratipadyAdhika.n babhau |
dinAnte nihita.n tejaH savitreva hutAshanaH || 4\-1||
dilIpAnantara.n rAjye ta.n nishamya pratiShThitam |
pUrva.n pradhUmito rAj~nA.n hR^idaye.agnirivotthitaH || 4\-2||
puruhUtadhvajasyeva tasyoonnayanapa~NktayaH |
navAbhyutthAnadarshinyo nananduH saprajAH prajAH || 4\-3||
samameva samAkrAnta.n dvaya.n dviradagAminA |
tena si.nhAsana.n pitryamakhila.n cArimaNDalam || 4\-4||
ChAyAmaNDalalakShyeNa tamadR^ishyA kila svayam |
padmA padmAtapatreNa bheje sAmrAjyadIkShitam || 4\-5||
parikalpitasA.nnidhyA kAle kAle ca bandiShu |
stutya.n stutibhirarthyAbhirupatasthe sarasvatI || 4\-6||
manuprabhutirmAnyairbhuktA yadyapi rAjabhiH |
tathApyananyapUrveva tasminnAsIdvasu.ndharA || 4\-7||
sa hi sarvasya lokasya yuktadaNDatayA manaH |
Adade nAtishItoShNo nabhasvAniva dakShiNaH || 4\-8||
mandotkaNThAH kR^itAstena guNAdhikatayA gurau |
phalena sahakArasya puShpodgama iva prajAH || 4\-9||
nayavidbhirnave rAj~ni sadasaccopadarshitam |
pUrva evAbhavatpakShastasminnAbhavaduttaraH || 4\-10||
pa~nchAnAmapi bhUtAnAmutkarSha.n pupuShurguNAH |
nave tasminmahIpAle sarva.n navamivAbhavat || 4\-11||
yathA prahlAdanAchchandraH pratApAttapano yathA |
tathaiva so.abhUdanvartho rAjA prakR^itira~njanAt || 4\-12||
kAma.n karNAntavishrAnte vishAle tasya lochane |
chakShuShmattA tu shAstreNa sUkShmakAryArthadarshinA || 4\-13||
labdhaprashamanasvasthamathaina.n samupasthitA |
pArthivashrIrdvitIyeva sharatpa~NkajalakShaNA || 4\-14||
nirvR^iShTalaghubhirmeghairmuktavartmA suduHsahaH |
pratApastasya bhAnoshcha yugapadvyAnashe dishaH || 4\-15||
vArShika.n sa.njahArendro dhanurjaitra.n raghurdadhau |
prajArthasAdhane tau hi paryAyodyatakArmukau || 4\-16||
puNDarIkAtapatrasta.n vikasatkAshacAmaraH |
R^iturviDambayAmAsa na punaH prApa tacChriyam || 4\-17||
prasAdasumukhe tasmi.nshcandre ca vishadaprabhe |
tadA cakShuShmatA.n prItirAsItsamarasA dvayoH || 4\-18||
ha.nsashreNIShu tArAsu kumudvatsu ca vAriShu |
vibhUtayastadIyAnA.n paryastA yashasAmiva || 4\-19||
ikShucChAyaniShAdinyastasya gopturguNodayam |
AkumArakathoddhAta.n shAligopyo jaguryashaH || 4\-20||
prasasAdodayAdambhaH kumbhayonermahaujasaH |
raghorabhibhavAsha~Nki cukShubhe dviShatA.n manaH|| 4\-21||
madodagrAH kakudmantaH saritA.n kUlamudrujAH |
lIlAkhelamanuprApurmahokShAstasya vikramam|| 4\-22||
prasavaiH saptaparNAnA.n madagandhibhirAhatAH |
asUyayeva tannAgAH saptadhaiva prasusruvuH|| 4\-23||
saritaH kurvatI gAdhAH pathashcAshyAnakardamAn |
yAtrAyai codayAmAsa ta.n shakteH prathama.n sharat|| 4\-24||
tasmai samyagghuto vahnirvAjinIrAjanAvidhau |
pradakShiNArcirvyAjena hasteneva jaya.n dadau|| 4\-25||
sa guptamUlapratyantaH shuddhapArShNirayAnvitaH |
ShaDvidha.n balamAdAya pratasthe digjigIShayA|| 4\-26||
avAkiranvayovR^iddhAsta.n lAjaiH paurayoShitaH |
pR^iShatairmandaroddhUtaiH kShIrormaya ivAcyutam|| 4\-27||
sa yayau prathama.n prAcI.n tulyaH prAcInabarhiShA |
ahitAnaniloddhUtaistarjayanniva ketubhiH|| 4\-28||
rajobhiH syandanoddhUtairgajaishca ghanasa.nnibhaiH |
bhuvastalamiva vyoma kurvanvyomeva bhUtalam|| 4\-29||
pratApo.agre tataH shabdaH parAgastadanantaram |
yayau pashcAdrathAdIti catuHskandheva sA camUH|| 4\-30||
marupR^iShThAnyudambhA.nsi nAvyAH supratarA nadIH |
vipinAni prakAshAni shaktimattvAccakAra saH|| 4\-31||
sa senA.n mahatI.n karShanpUrvasAgaragAminIm |
babhau harajaTAbhraShTA.n ga~NgAmiva bhagIrathaH|| 4\-32||
tyAjitaiH phalamutkhAtairbhagnaishca bahudhA nR^ipaiH |
tasyAsIdulbaNo mArgaH pAdapairiva dantinaH|| 4\-33||
paurastyAnevamAkrAma.nstA.nstA~njanapadA~njayI |
prApa tAlIvanashyAmamupakaNTha.n mahodadheH|| 4\-34||
anamrANA.n samuddhartustasmAtsindhurayAdiva |
AtmA sa.nrakShitaH suhmairvR^ittimAshritya vaitasIm|| 4\-35||
va~NgAnutkhAya tarasA netA nausAdhanodyatAn |
nicakhAna jayastambhAnga~NgAsrotontareShu saH|| 4\-36||
ApAdapadmapraNatAH kalamA iva te raghum |
phalaiH sa.nvardhayAmAsurutkhAtapratiropitAH|| 4\-37||
sa tIrtvA kapishA.n sainyairbaddhadviradasetubhiH |
utkalAdarshitapathaH kali~NgAbhimukho yayau|| 4\-38||
sa pratApa.n mahendrasya mUrdhni tIkShNa.n nyaveshayat |
a~Nkusha.n dviradasyeva yantA gambhIravedinaH|| 4\-39||
pratijagrAha kAli~NgastamastrairgajasAdhanaH |
pakShacChedodyata.n shakra.n shilAvarShIva parvataH|| 4\-40||
dviShA.n viShahya kAkutsthastatra nArAcadurdinam |
sanma~NgalasnAta iva pratipede jayashriyam || 4\-41||
tAmbUlInA.n dalaistatra racitApAnabhUmayaH |
nArikelAsava.n yodhAH shAtrava.n ca papuryashaH || 4\-42||
gR^ihItapratimuktasya sa dharmavijayI nR^ipaH |
shriya.n mahendranAthasya jahAra na tu medinIm || 4\-43||
tato velAtaTenaiva phalavatpUgamAlinA |
agastyAcaritAmAshAmanAshAsyajayo yayau || 4\-44||
sa sainyaparibhogeNa gajadAnasugandhinA |
kAverI.n saritA.n patyuH sha~NkanIyAmivAkarot || 4\-45||
balairadhyuShitAstasya vijigIShorgatadhvanaH |
mArIcodbhrAntahArItA malayAdrerupatyakAH || 4\-46||
sasa~njurashvakShuNNAnamelAnAmutpatiShNavaH |
tulyagandhiShu mattebhakaTeShu phalareNavaH || 4\-47||
bhogiveShTanamArgeShu candanAnA.n samarpitam |
nAsrasatkariNA.n graiva.n tripadIcChedinAmapi || 4\-48||
dishi mandAyate tejo dakShiNasyA.n raverapi |
tasyAmeva raghoH pANDyAH pratApa.n na viShehire || 4\-49||
tAmraparNIsametasya muktAsAra.n mahodadheH |
te nipatya dadustasmai yashaH svamiva sa.ncitam || 4\-50||
sa nirvishya yathAkAma.n taTeShvAlInacandanau |
stanAviva dishastasyAH shailau malayadardurau || 4\-51||
asahyavikramaH sahya.n dUrAnmuktamudanvatA |
nitambamiva medinyAH srastA.nshukamala~Nghayat || 4\-52||
tasyAnIkairvisarpadbhiraparAntajayodyataiH |
rAmAstrotsArito.apyAsItsahyalagna ivArNavaH || 4\-53||
bhayotsR^iShTavibhUShANA.n tena keralayoShitAm |
alakeShu camUreNushcUrNapratinidhIkR^itaH || 4\-54||
muralAmArutoddhUtamagamatkaitaka.n rajaH |
tadyodhavArabANAnAmayatnapaTavAsatAm || 4\-55||
abhyabhUyata vAhAnA.n caratA.n gAtrashi~njitaiH |
varmabhiH pavanoddhUtarAjatAlIvanadhvaniH || 4\-56||
kharjUrIskandhanaddhAnA.n madodgArasugandhiShu |
kaTeShu kariNA.n petuH pu.nnAgebhyaH shilImukhAH || 4\-57||
avakAsha.n kilodanvAn rAmAyAbhyarthito dadau |
aparAntamahIpAlavyAjena raghave karam || 4\-58||
mattebharadanotkIrNavyaktavikramalakShaNam |
trikUTameva tatrocchairjayastambha.n cakAra saH || 4\-59||
pArasIkA.nstato jetu.n pratasthe sthalavartmanA |
indriyAkhyAniva ripU.nstattvaj~nAnena sa.nyamI || 4\-60||
yavanImukhapadmAnA.n sehe madhumada.n na saH |
bAlAtapamivAbjAnAmakAlajaladodayaH  || 4\-61||
sa~NgrAmastumulastasya pAshcAtyairashvasAdhanaiH |
shAr~NgakUjitavij~neyapratiyodhe rajasyabhUt || 4\-62||
bhallApavarjitaisteShA.n shirobhiH shmashrulairmahIm |
tastAra saraghAvyAptaiH sa kShaudrapaTalairiva || 4\-63||
apanItashirastrANAH sheShAsta.n sharaNa.n yayuH |
praNipAtapratIkAraH sa.nrambho hi mahAtmanAm || 4\-64||
vinayante sma tadyodhA madhubhirvijayashramam |
AstIrNAjinaratnAsu drAkShAvalayabhUmiShu || 4\-65||
tataH pratasthe kauberI.n bhAsvAniva raghurdisham |
sharairusrairivodIcyAnuddhariShyan rasAniva || 4\-66||
vinItAdhvashramAstasya sindhutIraviceShTanaiH |
dudhuvurvAjinaH skandhA{\m+}llagnaku~NkumakesarAn || 4\-67||
tatra hUNAvarodhAnA.n bhartR^iShu vyaktavikramam |
kapolapATalAdeshi babhUva raghuceShTitam || 4\-68||
kAmbojAH samare soDhu.n tasya vIryamanIshvarAH |
gajAlAnaparikliShTairakShoTaiH sArdhamAnatAH || 4\-69||
teShA.n sadashvabhUyiShThAstu~NgA draviNarAshayaH |
upadA vivishuH shashvannotsekAH kosaleshvaram || 4\-70||
tato gaurIguru.n shailamArurohAshvasAdhanaH |
vardhayanniva tatkUTAnuddhUtairdhAtureNubhiH || 4\-71||
shasha.nsa tulyasattvAnA.n sainyaghoShe.apyasa.nbhramam |
guhAshayAnA.n si.nhAnA.n parivR^ityAvalokitam || 4\-72||
bhUrjeShu marmarIbhUtAH kIcakadhvanihetavaH |
ga~NgAshIkariNo mArge marutasta.n siShevire || 4\-73||
vishashramurnamerUNA.n ChAyAsvadhyAsya sainikAH |
dR^iShado vAsitotsa~NgA niShaNNamR^iganAbhibhiH || 4\-74||
saralAsaktamAta~NgagraiveyasphuritatviShaH |
AsannoShadhayo neturnaktamasnehadIpikAH || 4\-75||
tasyotsR^iShTanivAseShu kaNTharajjukShatatvacaH |
gajavarShma kirAtebhyaH shasha.nsurdevadAravaH || 4\-76||
tatra janya.n raghorghora.n parvatIyairgaNairabhUt |
nArAcakShepaNIyAshmaniShpeShotpatitAnalam || 4\-77||
sharairutsavasa.nketAnsa kR^itvA viratotsavAn |
jayodAharaNa.n bAhvorgApayAmAsa ki.nnarAn || 4\-78||
paraspareNa vij~nAtasteShUpAyanapANiShu |
rAj~nA himavataH sAro rAj~naH sAro himAdriNA || 4\-79||
tatrAkShobhya.n yashorAshi.n niveshyAvaruroha saH |
paulastyatulitasyAdrerAdadhAna iva hriyam || 4\-80||
cakampe tIrNalauhitye tasminprAgjyotiSheshvaraH |
tadgajAlAnatA.n prAptaiH saha kAlAgurudrumaiH || 4\-81||
na prasehe sa ruddhArkamadhArAvarShadurdinam |
rathavartmarajo.apyasya kuta eva patAkinIm || 4\-82||
tamIshaH kAmarUpANAmatyAkhaNDalavikramam |
bheje bhinnakaTairnAgairanyAnuparurodha yaiH || 4\-83||
kAmarUpeshvarastasya hemapIThAdhidevatAm |
ratnapuShpopahAreNa ChAyamAnarca pAdayoH || 4\-84||
iti jitvA disho jiShNurnyavartata rathoddhatam |
rajo vishrAmayanrAj~nA.n ChatrashUnyeShu mauliShu || 4\-85||
sa vishvajitamAjahre yaj~na.n sarvasvadakShiNam |
AdAna.n hi visargAya satA.n vArimucAmiva || 4\-86||
satrAnte sacivasakhaH puraskriyAbhi-
rgurvIbhiH shamitaparAjayavyalIkAn |
kAkutsthashciravirahotsukAvarodhAn
rAjanyAnsvapuranivR^ittaye.anumene || 4\-87||
te rekhAkulishAtapatrachihna.n
samrAjashcaraNayuga.n prasAdalabhyam |
prasthAnapraNatibhira~NgulIShu cakru-
rmaulisrakcyutamakarandareNugauram || 4\-88||

iti shrIraghuva.nshe mahAkAvye kavishrIkAlidAsakR^itau
raghudigvijayo nAma caturthaH sargaH ||
##
\medskip\hrule\medskip
Encoded and proofread by Arvind Kolhatkar akolhatkar at rogers.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}