% Text title            : raghuvansha8
% File name             : raghuvansha8.itx
% Category              : major\_works, kAlidAsa
% Location              : doc\_z\_misc\_major\_works
% Author                : kalidasa
% Transliterated by     : Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : April 28, 2005
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Raghuvansha by Kalidas Chapter 8 ..}##
\itxtitle{.. raghuva.nshaM sargaH 8 kAlidAsakR^itam ..}##\endtitles ##

atha tasya vivAhakautuka.n lalita.n bibhrata eva pArthivaH |
vasudhAmapi hastagAminImakarodindumatImivAparAm || 8\-1||
duritairapi kartumAtmasAtprayatante nR^ipasUnavo hi yat |
tadupasthitamagrahIdajaH piturAdnyeti na bhogatR^iShNayA || 8\-2||
anubhUya vasiShThasa.nbhR^itaiH salilaistena sahAbhiShecanam |
vishadocChvasitena medinI  kathayAmAsa kR^itArthatAmiva || 8\-3||
sa babhUva durAsadaH parairguruNA.atharvavidA kR^itakriyaH |
pavanAgnisamAgamo hyaya.n sahita.n brahma yadastratejasA || 8\-4||
raghumeva nivR^ittayauvana.n tamamanyanta naveshvara.n prajAH |
sa hi tasya na kevalA.n shriya.n pratipede sakalAnguNAnapi || 8\-5||
adhika.n shushubhe shubha.nyunA dvitayena dvayameva sa.ngatam |
padamR^iddhamajena paitR^ika.n vinayenAsya nava.n ca yauvanam || 8\-6||
sadaya.n bubhuje mahAbhujaH sahasodvegamiya.n vrajediti |
aciropanatA.n sa medinI.n navapANigrahaNA.n vadhUmiva || 8\-7||
ahameva mato mahIpateriti sarvaH prakR^itiShvacintayat |
udadheriva nimnagAshateShvabhavannAsya vimAnanA kvacit || 8\-8||
na kharo na ca bhUyasA mR^iduH pavamAnaH pR^ithivIruhAniva |
sa puraskR^itamadhyamakramo namayAmAsa nR^ipAnanuddharan || 8\-9||
atha vIkShya raghuH pratiShThita.n prakR^itiShvAtmajamAtmavattayA |
viShayeShu vinAshadharmasu tridivastheShvapi niHspR^iho.abhavat || 8\-10||
guNavatsutaropitashriyaH pariNAme hi dilIpava.nshajAH |
padavI.n taruvalkavAsasA.n prayatAH sa.nyaminA.n prapedire || 8\-11||
tamaraNyasamAshrayonmukha.n shirasA veShTanashobhinA sutaH |
pitara.n praNipatya pAdayoraparityAgamayAcatAtmanaH || 8\-12||
raghurashrumukhasya tasya tatkR^itavAnIpsitamAtmajapriyaH |
na tu sarpa iva tvaca.n punaH pratipede vyapavarjitA.n shriyam || 8\-13||
sa kilAshramamantyamAshrito nivasannAvasathe purAdbahiH |
samupAsyata putrabhogyayA snuShayevAvikR^itendriyaH shriyA || 8\-14||
prashamasthitapUrvapArthiva.n kulamabhyadyatanUtaneshvaram |
nabhasA nibhR^itendunA tulAmuditArkeNa samAruroha tat || 8\-15||
yatipArthivali~NgadhAriNau dadR^ishAte raghurAghavau janaiH |
apavargamahodayArthayorbhuvama.nshAviva dharmayorgatau || 8\-16||
ajitAdhigamAya mantribhiryuyuje nItivishAradairajaH |
anupAyipadopaprAptaye raghurAptaiH samiyAya yogibhiH || 8\-17||
nR^ipatiH prakR^itIravekShitu.n vyavahArAsanamAdade yuvA |
paricetumupA.nshu dhAraNA.n kushapUta.n pravayAstu viShTaram || 8\-18||
anayatprabhushaktisa.npadA vashameko nR^ipatInanantarAn |
aparaH praNidhAnayogyayA marutaH pa~nca sharIragocarAn || 8\-19||
akarodacireshvaraH kShitau dviShadArambhaphalAni bhasmasAt |
itaro dahane svakarmaNA.n vavR^ite dnyAnamayena vahninA || 8\-20||
paNabandhamukhAnguNAnajaH ShaDupAyu~Nkta samIkShya tatphalam |
raghurapyajayatguNatraya.n prakR^itistha.n samaloShTakA~ncanaH || 8\-21||
na navaH prabhurA phalodayAtsthirakarmA virarAma karmaNaH |
na ca yogavidhernavetaraH sthiradhIrA paramAtmadarshanAt || 8\-22||
iti shatruShu cendriyeShu ca pratiShiddhaprasareShu jAgratau |
prasitAvudayApavargayorubhayI.n siddhimubhAvavApatuH || 8\-23||
atha kAshcidajavyapekShayA gamayitvA samadarshanaH samAH |
tamasaH paramApadavyaya.n puruSha.n yogasamAdhinA raghuH || 8\-24||
shrutadehavisarjanaH pitushciramashrUNi vimucya rAghavaH |
vidadhe vidhimasya naiShThika.n yatibhiH sArdhamanagniragnicit || 8\-25||
akarotsa tadaurdhvadaihika.n pitR^ibhaktyA pitR^ikAryakalpavit |
na hi tena pathA tanutyajastanayAvarjitapiNDakA~NkShiNaH || 8\-26||
sa parArdhyagaterashocyatA.n pituruddishya sadarthavedibhiH |
shamitAdhiradhijyakArmukaH kR^itavAnapratishAsana.n jagat || 8\-27||
kShitirindumatI ca bhAminI patimAsAdya tamagryapauruSham |
prathamA bahuratnasUrabhUdaparA vIramajIjanatsutam || 8\-28||
dasharashmishatopamadyuti.n yashasA dikShu dashasvapi shrutam |
dashapUrvaratha.n yamAkhyayA dashakaNThAriguru.n vidurbudhAH || 8\-29||
R^iShidevagaNasvadhAbhujA.n shrutayAgaprasavaiH sa pArthivaH |
anR^iNatvamupeyivAnbabhau paridhermukta ivoShNadIdhitiH || 8\-30||
balamArtabhayopashAntaye viduShA.n satkR^itaye bahu shrutam |
vasu tasya vibhorna kevala.n guNavattApi paraprayojanA || 8\-31||
sa kadAcidavekShitaprajaH saha devyA vijahAra suprajAH |
nagaropavane shacIsakho marutA.n pAlayiteva nandane || 8\-32||
atha rodhasi dakShiNAdadheH shritagokarNaniketamIshvaram |
upavINayitu.n yayau raverudayAvR^ittipathena nAradaH || 8\-33||
kusumairgrathitAmapArthivaiH srajamAtodyashironiveshitAm |
aharatkila tasya vegavAnadhivAsaspR^ihayeva mArutaH || 8\-34||
bhramaraiH kusumAnusAribhiH parikIrNA parivAdinI muneH |
dadR^ishe pavanApalepaja.n sR^ijatI bAShpamivA~njanAvilam || 8\-35||
abhibhUya vibhUtimArtavI.n madhugandhAtishayena vIrudhAm |
nR^ipateramarasragApa sA dayitorustanakoTisusthitIm || 8\-36||
kShaNamAtrasakhI.n sujAtayoH stanayostAmavalokya vihvalA |
nimimIla narottamapriyA hR^itacandrA tamaseva kaumudI || 8\-37||
vapuShA karaNojjhitena sA nipatantI patimapyapAtayat |
nanu tailaniShekabindunA saha dIpArcirupaiti medinIm || 8\-38||
ubhayorapi pArshvavartinA.n tumulenArtaraveNa vejitAH |
vihagAH kamalAkarAlayAH samaduHkhA iva tatra cukrushuH || 8\-39||
nR^ipatervyajanAdibhistamo nunude sA tu tathaiva sa.nsthitA |
pratikAravidhAnamAyuShaH sati sheShe hi phalAya kalpate || 8\-40||
pratiyojayitavyavallakIsamavasthAmatha sattvaviplavAt |
sa ninAya nitAntavatsalaH parigR^ihyocitama~Nkama~NganAm || 8\-41||
patira~NkaniShaNNayA tayA karaNApAyavibhinnavarNayA |
samalakShyata bibhradAvilA.n mR^igalekhAmuShasIva candramAH || 8\-42||
vilalApa sa bAShpagadgada.n sahajAmapyapahAya dhIratAm |
abhitaptamayo.api mArdava.n bhajate kaiva kathA sharIriShu || 8\-43||
kusumAnyapi gAtrasa.ngamAtprabhavantyAyurapohitu.n yadi |
na bhaviShyati hanta sAdhana.n kimivAnyatprahariShyato vidheH || 8\-44||
athavA mR^idu vastu hi.nsitu.n mR^idunaivArabhate prajAntakaH |
himasekavipattiratra me nalinI pUrvanidarshana.n matA || 8\-45||
sragiya.n yadi jIvitApahA hR^idaye ki.n nihitA na hanti mAm |
viShamapyamR^ita.n kvacidbhavedamR^ita.n vA viShamIshvarecChayA || 8\-46||
athavA mama bhAgyaviplavAdashaniH kalpita eva vedhasA |
yadanena tarurna pAtitaH kShapitA tadviTapAshritA latA || 8\-47||
kR^itavatyasi nAvadhIraNAmaparAddhe.api yadA cira.n mayi |
kathamekapade nirAgasa.n janamAbhAShyamima.n na manyase || 8\-48||
dhruvamasmi shaThaH shucismite viditaH kaitavavatsalastava |
paralokamasa.nnivR^ittaye yadanApR^icChya gatAsi mAmitaH || 8\-49||
dayitA.n yadi tAvadanvagAdvinivR^itta.n kimida.n tayA vinA |
sahatA.n hatajIvita.n mama prabalAmAtmakR^itena vedanAm || 8\-50||
suratashramasa.nbhR^ito mukhe dhriyate svedalavodgamo.api te |
atha cAstamitA tvamAtmanA dhigimA.n dehabhR^itAmasAratAm || 8\-51||
manasApi na vipriya.n mayA kR^itapUrva.n tava ki.n jahAsi mAm |
nanu shabdapatiH kShiteraha.n tvayi me bhAvanibandhanA ratiH || 8\-52||
kusumotkhacitAnvalIbhR^itashcalayanbhR^i~NgarucastavAlakAn |
karabhoru karoti mArutastvadupAvartanasha~Nki me manaH || 8\-53||
tadapohitumarhasi priye pratibodhena viShAdamAshu me |
jvalitena guhAgata.n tamastuhinAdreriva naktamoShadhiH || 8\-54||
idamucChvasitAlaka.n mukha.n tava  vishrAntakatha.n dunoti mAm |
nishi suptamivaikapa~Nkaja.n viratAbhyantaraShaTpadasvanam || 8\-55||
shashina.n punareti sharvarI dayitA dvandvacara.n patatriNam |
iti tau virahAntarakShamau kathamatyantagatA na mA.n daheH || 8\-56||
navapallavasa.nstare.api te mR^idu dUyeta yada~Ngamarpitam |
tadida.n viShahiShyate katha.n vada vAmoru citAdhirohaNam || 8\-57||
iyamapratibodhashAyinI.n rashanA tvA.n prathamA rahaHsakhI |
gativibhramasAdanIravA na shucA nAnu mR^iteva lakShyate || 8\-58||
kalamanyabhR^itAsu bhAsita.n kalaha.nsIShu madAlasa.n gatam |
pR^iShatIShu vilolamIkShita.n pavanAdhUtalatAsu vibhramAH || 8\-59||
tridivotsukayApyavekShya mA.n nihitAH satyamamI guNAstvayA |
virahe tava me guruvyatha.n hR^idaya.n na tvavalambitu.n kShamAH || 8\-60||
mithuna.n parikalpita.n tvayA sahakAraH phalinI ca nanvimau |
avidhAya vivAhasatkriyAmanayorgamyata ityasA.npratam || 8\-61||
kusuma.n kR^itadohadastvayA yadashoko.ayamudIrayiShyati |
alakAbharaNa.n katha.n nu tattava neShyAmi nivApamAlyatAm || 8\-62||
smarateva sashabdanUpura.n caraNAnugrahamanyadurlabham |
amunA kusumAshruvarShiNA tvamashokena sugAtri shocyase || 8\-63||
tava niHshvasitAnukAribhirbakulairardhacitA.n sama.n mayA |
asamApya vilAsamekhalA.n kimida.n kinnarakaNThi supyate || 8\-64||
samaduHkhasukhaH sakhIjanaH pratipaccandranibho.ayamAtmajaH |
ahamekarasastathApi te vyavasAyaH pratipattiniShThuraH || 8\-65||
dhR^itirastamitA ratishcyutA virata.n geyamR^iturnirutsavaH |
gatamAbharaNaprayojana.n parishUnya.n shayanIyamadya me || 8\-66||
gR^ihiNI sacivaH sakhI mithaH priyashiShyA lalite kalAvidhau |
karuNAvimukhena mR^ityunA haratA tvA.n vada ki.n na me hR^itam || 8\-67||
madirAkShi madAnanArpita.n madhu pItvA rasavatkatha.n nu me |
anupAsyasi bAShpadUShita.n paralokopanata.n jalA~njalim || 8\-68||
vibhave.api sati tvayA vinA sukhametAvadajasya gaNyatAm |
ahR^itasya vilobhanAntarairmama sarve viShayAstvadAshrayAH || 8\-69||
vilapanniti kosalAdhipaH karuNArthagrathita.n priyA.n prati |
akarotpR^ithivIruhAnapi srutashAkhArasabAShpadUShitAn || 8\-70||
atha tasya katha.ncida~NkataH svajanastAmapanIya sundarIm |
visasarja tadantyamaNDanAmanalAyAguruchandanaidhase || 8\-71||
pramadAmanu sa.nsthitaH shucA nR^ipatiH sanniti vAcyadarshanAt |
na cakAra sharIramagnisAtsaha devyA na tu jIvitAshayA || 8\-72||
atha tena dashAhataH pare guNasheShAmapadishya bhAminIm |
viduShA vidhayo maharddhayaH pura evopavane samApitAH || 8\-73||
sa vivesha purI.n tayA vinA kShaNadApAyashashA~NkadarshanaH |
parivAhamivAvalokayansvashucaH pauravadhUmukhAshruShu || 8\-74||
atha ta.n savanAya dIkShitaH praNidhAnAdgururAshramasthitaH |
abhiSha~NgajaDa.n vijadnyivAniti shiShyeNa kilAnvabodhayat || 8\-75||
asamAptavidhiryato munistava vidvAnapi tApakAraNam |
na bhavantamupasthitaH svaya.n prakR^itau sthApayitu.n pathashcyutam || 8\-76||
mayi tasya suvR^itta vartate laghusa.ndeshapadA sarasvatI |
shruNu vishrutasattvasAra tA.n hR^idi cainAmapadhAtumarhasi || 8\-77||
puruShasya padeShvajanmanaH samatIta.n ca bhavacca bhAvi ca |
sa hi niShpratighena cakShuShA tritaya.n dnyAnamayena pashyati || 8\-78||
carataH kila dushcara.n tapastR^iNabindoH parisha~NkitaH purA |
prajighAya samAdhibhedinI.n harirasmai hariNI.n surA~NganAm || 8\-79||
sa tapaHpratibandhamanyunA pramukhAviShkR^itacAruvibhramam |
ashapadbhava mAnuShIti tA.n shamavelApralayormiNA bhuvi || 8\-80||
bhagavanparavAnaya.n janaH pratikUlAcarita.n kShamasva me |
iti copanatA.n kShitispR^isha.n kR^itavAnA surapuShpadarshanAt || 8\-81||
krathakaishikava.nshasa.nbhavA tava bhUtvA mahiShI cirAya sA |
upalabdhavatI divashcyuta.n vivashA shApanivR^ittikAraNam || 8\-82||
tadala.n tadapAyacintayA vipadutpattimatAmupasthitA |
vasudheyamavekShyatA.n tvayA vasumatyA hi nR^ipAH kalatriNaH || 8\-83||
udaye madavAcyamujjhatA shrutamAviShkR^itamAtmavattvayA |
manasastadupasthite jvare punaraklIbatayA prakAshyatAm || 8\-84||
rudatA kuta eva sA punarbhavatA nAnumR^itApi labhyate |
paralokajuShA.n svakarmabhirgatayo bhinnapathA hi dehinAm || 8\-85||
apashokamanAH kuTumbinImanugR^ihNIShva nivApadattibhiH |
svajanAshru kilAtisa.ntata.n dahati pretamiti pracakShate || 8\-86||
maraNa.n prakR^itiH sharIriNA.n vikR^itirjIvitamuchyate budhaiH |
kShaNamapyavatiShThate shvasanyadi janturnanu lAbhavAnasau || 8\-87||
avagacChati mUDhacetanaH priyanAsha.n hR^idi shalyamarpitam |
sthiradhIstu tadeva manyate kushaladvAratayA samuddhR^itam || 8\-88||
svasharIrasharIriNAvapi shrutasa.nyogaviparyayau yadA |
virahaH kimivAnutApayedvada bAhyairviShayairvipashcitam || 8\-89||
na pR^ithagjanavacChucho vasha.n vashinAmuttama gantumarhasi |
drumasAnumatA.n kimantara.n yadi vAyau dvitaye.api te calAH || 8\-90||
sa tatheti vineturudAramateH pratigR^Ihya vaco visasarja munim |
tadalabdhapada.n hR^idi shokaghane pratiyAtamivAntikamasya guroH || 8\-91||
tenAShTau parigamitAH samAH katha.ncidbAlatvAdavitathasUnR^itena sUnoH |
sAdR^ishyapratikR^itidarshanaiH priyAyAH svapneShu kShaNikasamAgamotsavaishca || 8\-92||
tasya prasahya hR^idaya.n kila shokasha~NkuH
plakShapraroha iva saudhatala.n bibheda |
prANAntahetumapi ta.n bhiShajAmasAdhya.n
lAbha.n priyAnugamane tvarayA sa mene || 8\-93||
samyagvinItamatha varmahara.n kumAra\-
mAdishya rakShaNavidhau vidhivatprajAnAm |
rogopasR^iShTatanudurvasati.n mumukShuH
prAyopaveshanamatirnR^ipatirbabhUva || 8\-94||
tIrthe toyavyatikarabhave jahnukanyAsarayvo\-
rdehatyAgAdamaragaNanAlekhyamAsAdya sadyaH |
pUrvAkArAdhikatararucA sa.ngataH kAntayAsau
lIlAgAreShvaramata punarnandanAbhyantareShu || 8\-95||

iti shrIraghuva.nshe mahAkAvye kavishrIkAlidAsa\-
kR^itAvajavilApo nAmAShTamaH sargaH ||
##
\medskip\hrule\medskip
Encoded and Proofread by Arvind Kolhatkar akolhatkar at rogers.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}