% Text title            : raghuvansha9
% File name             : raghuvansha9.itx
% Category              : major\_works, kAlidAsa
% Location              : doc\_z\_misc\_major\_works
% Author                : kalidasa
% Transliterated by     : Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : May 12, 2005
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Raghuvansha by Kalidas Chapter 9 ..}##
\itxtitle{.. raghuva.nshaM sargaH 9 kAlidAsakR^itam ..}##\endtitles ##

pituranantaramuttarakosalAnsamadhigamya samAdhijitendriyaH |
dasharathaH prashashAsa mahAratho yamavatAmavatA.n ca dhuri sthitaH || 9\ -1||
adhigata.n vidhivadyadapAlayatprakR^itimaNDalamAtmakulocitam |
abhavadasya tato guNavattara.n sanagara.n nagarandhrakaraujasaH || 9\ -2||
ubhayameva vadanti manIShiNaH samayavarShitayA kR^itakarmaNAm|
balaniShUdanamarthapati.n ca ta.n shramanuda.n manudaNDadharAnvayam || 9\ -3||
janapade na gadaH padamAdadhAvabhibhavaH kuta eva sapatnajaH |
kShitirabhUtphalavatyajanandane shamarate.amaratejasi pArthive || 9\ -4||
dashadigantajitA raghuNA yathA shriyamapuShyadajena tataH param |
tamadhigamya tathaiva punarbabhau na na mahInamahInaparAkramam || 9\ -5||
samatayA vasuvR^iShTivisarjanainiyamanAdasatA.n ca narAdhipaH |
anuyayau yamapuNyajaneshvarau savaruNAvaruNAgrasara.n rucA || 9\ -6||
na mR^igayAbhiratirna durodara.n na ca shashipratimAbharaNa.n madhu |
tamudayAya na vA navayauvanA priyatamA yatamAnamapAharat || 9\ -7||
na kR^ipaNA prabhavatyapi vAsave na vitathA parihAsakathAsvapi |
na ca sapatnajaneShvapi tena vAgaparuShA paruShAkSharamIritA || 9\ -8||
uadayamastamaya.n ca raghUdvahAdubhayamAnashire vasudhAdhipAH |
sa hi nideshamala~NghayatAmabhUtsuhR^idayohR^idayaH pratigarjatAm || 9\ -9||
ajayadekarathena sa medinImudadhinemimadhijyasharAsanaH |
jayamaghoShayadasya tu kevala.n gajavatI javatIvrahayA camUH || 9\ -10||
avanimekarathena varUthinA jitavataH kila tasya dhanurbhR^itaH |
vijayadundubhitA.n yayurarNavA ghanaravA naravAhanasa.npadaH || 9\ -11||
shamitapakShabalaH shatakoTinA shikhariNA.n kulishena pura.ndaraH |
sa sharavR^iShTimucA dhanuShA dviShA.n svanavatA navatAmarasAnanaH || 9\ -12||
caraNayornakharAgasamR^iddhibhirmukuTaratnamarIcibhiraspR^ishan |
nR^ipatayaH shatasho maruto yathA shatamakha.n tamakhaNDitapauruSham || 9\ -13||
nivavR^ite sa mahArNavarodhasaH sacivakAritabAlasutA~njalIn |
samanukampya sapatnaparigrahAnanalakAnalakAnavamA.n purIm || 9\ -14||
upagato.api ca maNDalanAbhitAmanuditAnyasitAtapavAraNaH |
shriyamavekShya sa randhracalAmabhUdanalaso.analasomasamadyutiH || 9\ -15||
tamapahAya kakutsthakulodbhava.n puruShamAtmabhava.n ca pativratA |
nR^ipatimanyamasevata devatA sakamalA kamalAghavamarthiShu || 9\ -16||
tamalabhanta pati.n patidevatAH shikhariNAmiva sAgaramApagAH |
magadhakosalakekayashAsinA.n duhitaro.ahitaropitamArgaNam || 9\ -17||
priyatamAbhirasau tisR^ibhirbabhau tisR^ibhireva bhuva.n saha shaktibhiH |
upagato vininIShuriva prajA harihayo.arihayogavicakShaNaH || 9\ -18||
sa kila sa.nyugamUrdhni sahAyatA.n maghavataH pratipadya mahArathaH |
svabhujavIryamagApayaducChrita.n suravadhUravadhUtabhayAH sharaiH || 9\ -19||
kratuShu tena visarjitamaulinA bhujasamAhR^itadigvasunA kR^itAH |
kanakayUpasamucChrayashobhino vitamasA tamasAsarayUtaTAH || 9\ -20||
ajinadaNDabhR^ita.n kushamekhalA.n yatagira.n mR^igashR^i~NgaparigrahAm |
adhivasa.nstanumadhvaradIkShitAmasamabhAsamabhAsayadIshvaraH || 9\ -21||
avabhR^ithaprayato niyatendriyaH surasamAjasamAkramaNocitaH |
namayati sma sa kevalamunnata.n vanamuce namuceraraye shiraH || 9\ -22||
asakR^idekarathena tarasvinA harihayAgrasareNa dhanurbhR^itA |
dinakarAbhimukhA raNareNavo rurudhire rudhireNa suradviShAm || 9\ -23||
atha samAvavR^ite kusumairnavaistamiva sevitumekanarAdhipam |
yamakuberajaleshvaravajriNA.n samadhura.n madhura~ncitavikramam || 9\ -24||
jigamiShurdhanadAdhyuShitA.n disha.n rathayujA parivartitavAhanaH |
dinamukhAni ravirhimanigrahairvimalayanmalaya.n nagamatyajat || 9\ -25||
kusumajanma tato navapallavAstadanu ShaTpadakokilakUjitam |
iti yathAkramamAvirabhUnmadhurdrumavatImavatIrya vanasthalIm || 9\ -26||
nayaguNopacitAmiva bhUpateH sadupakAraphalA.n shriyamarthinaH |
abhiyayuH saraso madhusa.nbhR^itA.n kamalinImalinIrapatatriNaH || 9\ -27||
kusumameva na kevalamArtava.n navamashokataroH smaradIpanam |
kisalayaprasavo.api vilAsinA.n madayitA dayitAshravaNArpitaH || 9\ -28||
viracitA madhunopavanashriyAmabhinavA iva patravisheShakAH |
madhulihA.n madhudAnavishAradAH kurabakA ravakAraNatA.n yayuH || 9\ -29||
suvadanAvadanAsavasa.nbhR^itastadanuvAdiguNaH kusumodgamaH |
madhukarairakaronmadhulolupairbakulamAkulamAyatapa~NktibhiH || 9\ -30||
upahita.n shishirApagamashriyA mukulajAlamashobhata ki.nshuke |
praNayinIva nakhakShatamaNDana.n pramadayA madayApitalajjayA || 9\ -31||
vraNagurupramadAdharaduHsaha.n jaghananirviShayIkR^itamekhalam |
na khalu tAvadasheShamapohitu.n ravirala.n virala.n kR^itavAnhimam || 9\ -32||
abhinayAnparicetumivodyatA malayamArutakampitapallavA |
amadayatsahakAralatA manaH sakalikA kalikAmajitAmapi || 9\ -33||
prathamamanyabhR^itAbhirudIritAH praviralA iva mugdhavadhUkathAH |
surabhigandhiShu shushruvire giraH kusumitAsu mitA vanarAjiShu || 9\ -34||
shrutisukhabhramarasvanagItayaH kusumakomaladantaruco babhuH |
upavanAntalatAH pavanAhataiH kisalayaiH salayairiva pANibhiH || 9\ -35||
lalitavibhramabandhavicekShaNa.n surabhigandhaparAjitakesaram |
patiShu nirvivishurmadhuma~NganAH smarasakha.n rasakhaNDanavarjitam || 9\ -36||
shushubhire smitacArutarAnanAH striya iva shlathashi~njitamekhalAH |
vikacatAmarasA gR^ihadIrghikA madakalodakalolaviha.ngamAH || 9\ -37||
upayayau tanutA.n madhukhaNDitA himakarodayapANDumukhacChaviH |
sadR^ishamiShTasamAgamanirvR^iti.n vanitayAnitayA rajanIvadhUH || 9\ -38||
apatuShAratayA vishadaprabhaiH suratasa~NgaparishramanodibhiH |
kusumacApamatejayada.nshubhirhimakaro makarorjitaketanam || 9\ -39||
hutahutAshanadIpti vanashriyaH pratinidhiH kanakAbharaNasya yat |
yuvatayaH kusumaM dadhurAhita.n tadalake dalakesarapeshalam || 9\ -40||
alibhira~njanabindumanoharaiH kusumapa~NktinipAtibhira~NkitaH |
na khalu shobhayati sma vanasthalI.n na tilakastilakaH pramadAmiva || 9\ -41||
amadayanmadhugandhasanAthayA kisalayAdharasa.ngatayA manaH |
kusumasa.nbhR^itayA navamallikA smitarucA tarucAruvilAsinI || 9\ -42||
aruNarAganiShedhibhira.nshukaiH shravaNalabdhapadaishca yavA~NkuraiH |
parabhR^itAvirutaishca vilAsinaH smarabalairabalaikarasAH kR^itAH || 9\ -43||
upacitAvayavA shucibhiH kaNairalikadambakayogamupeyuShI |
sadR^ishakAntirakShyata ma~njarI tilakajAlakajAlakamauktikaiH || 9\ -44||
dhvajapaTa.n madanasya dhanurbhR^itashChavikara.n mukhacUrNamR^itushriyaH |
kusumakesarareNumalivrajAH sapavanopavanotthitamanvayuH || 9\ -45||
anubhavannavadolamR^itUtsava.n paTurapi priyakaNThajighR^ikShayA |
anayadAsanarajjuparigrahe bhujalatA.n jalatAmabalAjanaH || 9\ -46||
tyajata mAnamala.n bata vigrahairna punareti gata.n catura.n vayaH |
parabhR^itAbhiritIva nivedite smaramate ramate sma vadhUjanaH || 9\ -47||
atha yathAsukhamArtavamutsava.n samanubhUya vilAsavatIsakhaH |
narapatishcakame mR^igayArati.n sa madhumanmadhumanmathasa.nnibhaH || 9\ -48||
paricaya.n calalakShyanipAtane bhayarucoshca tadi~Ngitabodhanam |
shramajayAtpraguNA.n ca karotyasau tanumato.anumataH sacivairyayau || 9\ -49||
mR^igavanopagamakShamaveShabhR^idvipulakaNThaniShaktasharAsanaH |
gaganamashvakhuroddhatareNubhirnR^isavitA sa vitAnamivAkarot || 9\ -50||
grathitamaulirasau vanamAlayA tarupalAshasavarNatanucChadaH |
turagavalganaca~ncalakuNDalo viruruce ruruceShTitabhUmiShu || 9\ -51||
tanulatAviniveshitavigrahA bhramarasa.nkramitekShaNavR^ittayaH |
dadR^ishuradhvani ta.n vanadevatAH sunayana.n nayananditakosalam || 9\ -52||
shvagaNivAgurikaiH prathamAsthita.n vyapagatAnaladasyu vivesha saH |
sthiratura.ngamabhUmi nipAnavanmR^igavayogavayopacita.n vanam || 9\ -53||
atha nabhasya iva tridashAyudha.n kanakapi~NgataDidguNasa.nyutam |
dhanuradhijyamanAdhirupAdade naravaro ravaroShitakesarI || 9\ -54||
tasya stanapraNayibhirmuhureNashAvai\-
rvyAhanyamAnahariNIgamana.n purastAt |
AvirbabhUva kushagarbhamukha.n mR^igANA.n
yUtha.n tadagrasaragarvitakR^iShNasAram || 9\ -55||
tatprArthita.n javanavAjigatena rAdnyA
tUNImukhoddhR^itashareNa vishIrNapa~Nkti |
shyAmIcakAra vanamAkuladR^iShTipAtai\-
rvAteritotpaladalaprakarairivArdraiH || 9\ -56||
lakShyIkR^itasya hariNasya hariprabhAvaH
prekShya sthitA.n sahacarI.n vyavadhAya deham |
AkarNakR^iShTamapi kAmitayA sa dhanvI
bANa.n kR^ipAmR^idumanAH pratisa.njahAra || 9\ -57||
tasyApareShvapi mR^igeShu sharAnmumukShoH
karNAntametya bibhide nibiDo.api muShTiH |
trAsAtimAtracaTulaiH smarataH sunetraiH
prauDhapriyAnayanavibhramaceShTitAni || 9\ -58||
uttasthuShaH sapadi palvalapa~NkamadhyA\-
nmustAprarohakavalAvayavAnukIrNam |
jagrAha sa drutavarAhakulasya mArga.n
suvyaktamArdrapadapa~NktibhirAyatAbhiH || 9\ -59||
ta.n vAhanAdavanatottarakAyamISha\-
dvidhyantamuddhR^itasaTAH pratihantumIShuH |
nAtmAnamasya vividuH sahasA varAhA
vR^ikSheShu viddhamiShubhirjaghanAshrayeShu || 9\ -60||
tenAbhighAtarabhasasya vikR^iShya patrI
vanyasya netravivare mahiShasya muktaH |
nirbhidya vigrahamashoNitaliptapu~Nkha\-
sta.n pAtayA.n prathamamAsa papAta pashcAt || 9\ -61||
prAyo viShANaparimokShalaghUttamA~NgA\-
nkhaDgA.nshcakAra nR^ipatirnishitaiH kShurapraiH |
shR^i~Nga.n sa dR^iptavinayAdhikR^itaH pareShA\-
matyucChrita.n na mamR^iShe na tu dIrghamAyuH || 9\ -62||
vyAghrAnabhIrabhimukhotpatitAnguhAbhyaH
phullAsanAgraviTapAniva vAyurugNAn |
shikShAvisheShalaghuhastatayA nimeShA\-
ttUNIcakAra sharapUritavaktrarandhrAn || 9\ -63||
nirghAtograiH ku~njalInA~njighA.nsurjyAnirghoShaiH kShobhayAmAsa si.nhAn |
nUna.n teShAmabhyasUyAparo.abhUdvIryodagre rAjashabdo mR^igeShu || 9\ -64||
tAnhatvA gajakulabaddhatIvravairAnkAkutsthaH kuTilanakhAgralagnamuktAn |
AtmAna.n raNakR^itakarmaNA.n gajAnAmAnR^iNya.n gatamiva mArgaNairama.nsta || 9\ -65||
camarAnparitaH pravartitAshvaH kvacidAkarNavikR^iShTabhallavarShI |
nR^ipatIniva tAnviyojya sadyaH sitabAlavyajanairjagAma shantim || 9\ -66||
api turagasamIpAdutpatanta.n mayUra.n
na sa rucirakalApa.n bANalakShyIcakAra |
sapadi gatamanaskashcitramAlyAnukIrNe
rativigalitabandhe keshapAshe priyAyAH || 9\ -67||
tasya karkashavihArasa.nbhava.n svedamAnanavilagnajAlakam |
AcacAma satuShArashIkaro bhinnapallavapuTo vanAnilaH || 9\ -68||
iti vismR^itAnyakaraNIyamAtmanaH sacivAvalambidhura.n dharAdhipam |
parivR^iddharAgamanubandhasevayA mR^igayA jahAra catureva kAminI || 9\ -69||
sa lalitakusumapravAlashayyA.n jvalitamahauShadhidIpikAsanAthAm |
narapatirativAhayA.nbabhUva kvacidasametaparicChadastriyAmAm || 9\ -70||
uShasi sa gajayUthakarNatAlaiH paTupaTahadhvanibhirvinItanidraH |
aramata madhurANi tatra shR^iNvanvihagavikUcitabandima~NgalAni || 9\ -71||
atha jAtu rurorgR^ihItavartmA vipine pArshvacarairalakShyamANaH |
shramaphenamucA tapasvigADhA.n tamasA.n prApa nadI.n tura.ngameNa || 9\ -72||
kumbhapUraNabhavaH paTuruccairuccacAra ninado.ambhasi tasyAH |
tatra sa dviradabR^i.nhitasha~NkI shabdapAtinamiShu.n visasarja || 9\ -73||
nR^ipateH pratiShiddhameva tatkR^itavAnpa~Nktiratho vila~Nghya yat |
apathe padamarpayanti hi shrutavanto.api rajonimIlitAH || 9\ -74||
hA tAteti kranditamAkarNya viShaNNa\-
stasyAnviShyanvetasagUDha.n prabhava.n saH |
shalyaprota.n prekShya sakumbha.n muniputra.n
tApAdantaHshalya ivAsItkShitipo.api || 9\ -75||
tenAvatIrya turagAtprathitAnvayena
pR^iShTAnvayaH sa jalakumbhaniShaNNadehaH |
tasmai dvijetaratapasvisuta.n skhaladbhi\-
rAtmAnamakSharapadaiH kathayA.nbabhUva || 9\ -76||
taccoditaH sa tamanuddhR^itashalyameva pitroH sakAshamavasannadR^ishorninAya |
tAbhyA.n tathAgatamupetya tamekaputramadnyAnataH svacarita.n nR^ipatiH shasha.nsa || 9\ -77||
tau da.npatI bahu vilapya shishoH prahartrA
shalya.n nikhAtamudahArayatAmurastaH |
so.abhUtparAsuratha bhUmipati.n shashApa
hastArpitairnayanavAribhireva vR^iddhaH || 9\ -78||
diShTAntamApsyati bhavAnapi putrashokA\-
dantye vayasyahamiveti tamuktavantam |
AkrAntapUrvamiva muktaviSha.n bhuja.nga.n
provAca kosalapatiH prathamAparAddhaH || 9\ -79||
shApo.apyadR^iShTatanayAnanapadmashobhe
sAnugraho bhagavatA mayi pAtito.ayam |
kR^iShyA.n dahannapi khalu kShitimindhaneddho
bIjaprarohajananI.n jvalanaH karoti || 9\ -80||
ittha.n gate gataghR^iNaH kimaya.n vidhattA.n vadhyastavetyabhihito vasudhAdhipena |
edhAnhutAshanavataH sa muniryayAce putra.n parAsumanugantumanAH sadAraH || 9\ -81||
prAptAnugaH sapadi shAsanamasya rAjA
sa.npAdya pAtakaviluptadhR^itirnivR^ittaH |
antarniviShTapadamAtmavinAshahetu.n
shApa.n dadhajjvalanamaurvamivAmburAshiH || 9\ -82||

iti shrIraghuva.nshe mahAkAvye kavishrIkAlidAsakR^itau
mR^igayAvarNano nAma navamaH sargaH ||
##
\medskip\hrule\medskip
Encoded and Proofread by Arvind Kolhatkar akolhatkar at rogers.com


\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}