% Text title            : sAMkhyasUtravivaraNam
% File name             : sAMkhyasUtravivaraNam.itx
% Category              : sUtra, major\_works
% Location              : doc\_z\_misc\_major\_works
% Transliterated by     : Dhaval Patel drdhaval2785 at gmail.com
% Proofread by          : Dhaval Patel drdhaval2785 at gmail.com
% Source                : sAnkhyasaNgrahaH 1918
% Latest update         : August 28, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. sAMkhyasUtravivaraNam ..}##
\itxtitle{.. sA~NkhyasUtravivaraNam ..}##\endtitles ##

shrIkapilAya namaH |
prakR^itiM puruShaM natvA sAMkhyasUtre vidhIyate |
saMkShepato vivaraNamavivekApanuttaye ||
iha khalu bhagavAn kapilo munirAsuraye.anukampayA
pa~nchaviMshatitattvAnyupadishya sUtrayAmAsa | aShTau prakR^itaya ityAdi |
kAH punastA ityuchyante | pradhAnaM mahAnahaMkArastanmAtrANi cha |
pradhAnaM prakR^itiravyaktamavyAkR^itaM chetyanarthAntaram | mahAn
mahattatvaM buddhiradhyavasAyalakShaNam | ahaMkAro.abhimAnalakShaNo
vaikR^itikastaijaso bhUtAdishcheti trividhaH | tanmAtrANi tu pa~ncha
shabdatanmAtramAkAshahetuH | sparshatanmAtraM vAyuyoniH | rUpatanmAtraM
tejoyoniH | rasatanmAtramapprakR^itiH | gandhatanmAtraM pR^ithivIhetuH |
iti pa~nchatanmAtrANi ityaShTau prakR^itayaH |
ke punarvikArAH kati | ShoDashavikArAH | ekAdashendriyANi pa~ncha
mahAbhUtAni cha | tatra shrotratvakchakShUrasanaghrANAkhyAni
buddhIndriyANi shabdasparsharUparasagandhAlochanavR^ittIni |
vAkpANipAdapAyUpasthAni karmendriyANi vachanAdAnaviharaNotsargAnandavR^ittIni |
j~nAnakriyAshaktidvayAtmakaM sa~NkalpavikalpalakShaNaM mana ityekAdashendriyANi |
bhUtAni chAkAshavAyutejaHsalilapR^ithivIlakShaNAni pa~ncheti ShoDashavikArAH
||
atha kaH puruShaH ityuchyate | puruSho.anekastriguNarahito vivekI
aviShayo.asAdhAraNo.aprasavadharmA chetanaH sAkShI kevalo madhyastho
draShTA.akartA cha ||
atha ke punastrayo guNA ityuchyante | traiguNyaM sattvaM
rajastama iti | traya eva guNAstraiguNyam | sattvaM nAma
pATavamArdavalAghavaprasannatAbhisa~NgaprItituShTyanIhAsantoShAdilakShaNamanantabhedaM
samAsataH sukhAvaham | rajo nAma
shokatApakhedastambhodgamodvegaroShamAnAdilakShaNamanantabhedaM
samAsato duHkhAvaham | tamo
nAmAchChAdanAvaraNabIbhatsadainyagauravAlasyanidrApramAdAdilakShaNamanantabhedaM
samAsato mohAtmakaM etat traiguNyaM vyAkhyAtam ||
sattvaM prakAshakaM vindyAdrajo vindyAt pravartakam |
vinAshakaM tamo vindyAt traiguNyaM nAma sa~nj~nitam ||
atrAha kaH sa~ncharaH pratisa~ncharashcheti | uchyate | utpattiH sa~ncharaH |
pralayaH pratisa~ncharaH | tatrotpattirnAmAvyaktAt samupadiShTAt sarvajagataH
pareNa rUpeNAdhiShThAnAtmakAt mahAn mahato.ahaMkAraH | sa cha trividhaH |
vaikR^itiko bhUtAdistaijasashcheti | tatra vaikR^itAdindriyANyutpadyante
bhUtAdestanmAtrANi taijasAdubhayam indriyANi tanmAtrANi cheti |
tanmAtrebhyo bhUtAni | ayaM sa~ncharaH | pratisa~ncharo nAma bhUtAni
tanmAtreShu lIyante | tanmAtrANIndriyANi chAhaMkAre | ahaMkAro buddhau |
buddhiravyakte | tato.avyaktaM tu kvachinna lIyate kasmAt anutpannatvAt |
ityevaM pratisa~ncharaH | evametau sa~ncharapratisa~ncharau vyAkhyAtau ||
atrAha kiMvidhamadhyAtmamadhibhUtamadhidaivataM cha | atrochyate |
buddhiradhyAtmam | bodhayitavyamadhibhUtam | brahmA tatrAdidaivatam |
ahaMkAro.adhyAtmam | abhimantavyamadhibhUtam | rudrastatrAdhidaivatam |
manodhyAtmaM saMkalpamadhibhUtam | chandrastatrAdidaivatam | shrotramadhyAtmam |
sparshayitavyamadhibhUtam | vAyustatrAdhidaivatam | chakShuradhyAtmam |
darshayitavyamadhibhUtam | sUryastatrAdidaivatam | jihvAdhyAtmam |
rasayitavyamadhibhUtam | varuNastatrAdhidaivatam | nAsAdhyAtmam |
ghrAtavyamadhibhUtam | pR^ithivI tatrAdhidaivatam | vAgadhyAtmam |
vaktavyamadhibhUtam | agnistatrAdhidaivatam | pANiradhyAtmam |
AdAtavyamadhibhUtam | indrastatrAdhidaivatam | pAdAvadhyAtmam |
gantavyamadhibhUtam | viShNustatrAdhidaivatam | pAyuradhyAtmam |
utsraShTAvyamadhibhUtam | mitrastatrAdhidaivatam | upasthamadhyAtmam |
AnandayitavyamadhibhUtam | prajApatistatrAdhidaivatam | evameva
trayodashakaraNasyAdhyAtmamadhibhUtamadhidaivaM cha vyAkhyAtam | kAni
chatvArItyata Aha cheti | trINi guNarUpANi chaturthamadhidaivatamityarthaH ||
chatvAri yo vedayate yathAvad
guNasvarUpANyadhidaivataM cha |
vimuktapApmA gatadoShasa~Ngo
guNAMstu bhu~Nkte na guNaiH sa bhujyate ||
atha kAstA abhibuddhaya ityuchyante | pa~nchAbhibuddhayaH | buddhirabhimAna
ichChA kartavyaM tatkriyA cheti | abhimukhI buddhirabhibuddhiH | idaM
karaNIyametyetadadhyavasAyo buddhiH kriyAtmaparAmarshasvarUpapratyayaH |
abhimukho mAno.ahaM karomItyahaMkAro.abhimAnaH | buddhikriyA ichChA
vA~nChA | kartavyaM saMkalpo manaso vR^ittiH | kriyA etadvastusvarUpamiti
kartavyAlochanaM yadbuddhIndriyANAM sA kriyA | itthametat kartavyamiti
yatpravR^ittiH karmendriyANAM sA kriyeti | evametAha pa~nchAbhibuddhayo
vyAkhyAtAH ||
atha kAH pa~nchakarmayonayaH uchyante | dhR^itiH shraddhA sukhA avividiShA
vividiShA cheti pa~ncha karmayonayaH |
vAchi karmaNi kAye cha pratItiryAbhirajyate |
tanniShThastatpratiShThashcha dhR^iteretaddhi lakShaNam ||
anasUyA brahmacharyaM yajanaM yAjanaM tapaH |
pratigraho.atrahomashcha shraddhAyA lakShaNaM smR^itam ||
sukhArthI yastu seveta vidyAkarmatapAMsi cha |
prAyashchittaparo nityaM sukheyaM parikIrtitA ||
viShadhUmamUrChitavadavividiShA | vividiShA dhyAyinAM praj~nAyoniH |
ekatvaM cha pR^ithaktvaM cha nityaM chedamachetanam |
sUkShmaM satkAryamakShobhyaM j~neyA vividiShA hi sA ||
kAryakAraNakShamakarA vividiShA prAkR^itikA vR^ittiH | dhR^itiH shraddhA sukhA
avividiShA chatasro bandhAya vividiShaikA mokShAya iti pa~ncha karmayonayo
vyAkhyAtAH ||
atrAha ke te pa~nchavAyavaH | uchyante |
prANo.apAnaH samAnashcha udAno vyAna eva cha |
ityete vAyavaH pa~ncha sharIreShu sharIriNAm ||
tatra prANo nAma vAyuryo.ayaM mukhanAsikAdhiShThAnaprANanAt
krameNAnanAt prANa ityabhidhIyate | apAno nAma vAyurnAbheradhiShThAtA
apanayanAdadhogamanAchchApAna ityabhidhIyate | samAno nAma
vAyurhR^idadhiShThAtA samanAt samagamanAchcha samAna ityabhidhIyate | udAno
nAma vAyuH kaNThAdhiShThAtA UrdhvaM gamanAchcha udAna ityabhidhIyate | vyAno
nAma vAyuH sandhyadhiShThAtA prANAdijR^imbhaNAchcha vyAna ityabhidhIyate |
iti pa~nchavAyavo vyAkhyAtAH ||
Aha ke te pa~nchakarmAtmAnaH uchyante | vaikArikastaijaso bhUtAdishcha
sAnumAno niranumAnashcheti | tatra vaikArikaH shubhakarmakartA |
taijaso.ashubhakarmakartA | bhUtAdirmUDhakarmakartA | sAnumAnaH
shubhamUDhakarmakartA | niranumAno.ashubhamUDhakarmakartA | ityete
pa~nchakarmakartAro vyAkhyAtAH ||
Aha kA sA pa~nchaparvAvidyeti | uchyate | tamo moho
mahAmohastAmisro.andhatAmisrashcheti | tatra tamomohAvubhAvetAvaShTAtmAkau |
mahAmoho dashAtmakaH | tAmisrAndhatAmisrau chAShTAdashAtmAkau | tatra tamo
nAmAShTAsu prakR^itiShvavyaktabuddhyahaMkArapa~nchatanmAtrasa~nj~nitAsu
anAtmasvAtmaj~nAnAbhimAnastama ityabhidhIyate | moho
nAmANimAdyaShTAguNaishvaryaprAptaye yobhimAna utpadyate sa moha
ityabhidhIyate | mahAmoho nAma dR^iShTAnushravikeShu viShayeShu dashasu
nivR^itteShu mukto.ahamiti manyate sa mahAmoha ityabhidhIyate | tAmisro
nAma aShTaguNaishvarye.aNimAdye dashavidhe cha viShaye pratihatasya
duHkhamutpadyate.asau tAmisra ityabhidhIyate | andhatAmisro nAma
aNimAdyaShTaguNaishvarye dashavidhe cha viShaye siddhe maraNakAle cha
yo viShAdaH pratyapadyate so.andhatAmisra ityabhidhIyate | evameShA
pa~nchaparvA.avidyA dviShaShTibhedA vyAkhyAtA ||
atrAha kAShTAviMshatidhAshaktiH | atrochyate | ekAdashendriyavadhAH
saptadashabuddhivadhAH | eShAShTAviMshatidhAshaktiH | tatrendriyavadhAstAvat |
badhirastvakbadhiraH andhaH jaDajihvaH ajighraH mUkaH kuNiH pa~NguH napuMsakaH
UrdhvavAyuyuktaH amanAH | taduktam |
bAdhiryaM kuShThitAndhastvaM jaDatA.ajighratA tathA |
mUkatA kauNyapa~NgutvaM klaibyodAvartamattatAH ||
etedindriyadvArA buddhereva vadhAH | sAkShAdbuddhivadhA yathA |
navavidhatuShTivaikalyAt aShTavidhAsiddhavaikalyAchcha saptadashabuddhivadhA
ityaShTAviMshatidhAshaktiH ||
kA punarnavadhA tuShTiH uchyate | chatasra AdyAtmikyastuShTayaH bAhyAH
pa~ncha | AdyAH prakR^ityupAdAnakAlabhAgyAkhyAH | prakR^ityaiva muktiH
kiM punaH sAdhanairiti tuShTiH prakR^ityAkhyA ambho nAma | sAdhanaiH
saMnyAsAdibhirupAttaistuShTiH sAdhAnAkhyA salilaM nAma | kAlenaiva muktyAdikaM
setsyati kiM duHkhaiH saMnyAsAdisAdhanairiti tuShTiH kAlAkhyA.agho nAma |
yA tu bhAgyAdeva sarvaM setsyati kiM sAdhanAdidhyAnAdikleshairiti sA
bhAgyAkhyA tuShTirnAma | bAhyAH shabdAdiviShayavairAgyAstuShTayaH
arjanarakShaNakShayabhogahiMsAdoShadarshanaM vairAgyahetuH
pa~nchavidhastadbhedena pa~nchatuShTayaH ||
atha kAH siddhayaH uchyante | aShTau siddhayaH | uchyante | adhyayanaM tAraM
nAma siddhiH | tato.arthaj~nAnaM sutAraM nAma | tatastarkeNArthaparIkShaNaM
tAratAraM nAma siddhiH | tataH parIkShakasaMvAdanaM ramyakaM nAma |
tato vivekakhyAtiH sadAmuditaM nAma | etAH pa~ncha gauNyaH siddhayaH |
duHkhatrayavighAtAstAstrayo mukhyAH siddhayaH | pramodamuditamodanAmAkhyAH
phalamityaShTau siddhayaH | tuShTisiddhInAM viparyayAt saptadashadhA
vuddhivadhAH ||
ke punarmaulikArthAH katidhA uchyante | dashadhA maulikArthAha |
ekatvamarthavattvaM pArArthyaM pradhAnasya | anyatvamakartR^itvaM bahutvaM
puruShasya | astitvaM yogo viyogashchetyubhayayoH | sheShavR^ittiH
parishiShTatvaM pralaye tadubhayayoH | taduktam
pradhAnAstitvamekatvamarthavattvaM yathArthatA |
pArArthyaM cha tathA naikyaM viyogo yoga eva cha ||
sheShavR^ittirakartR^itvaM maulikArthAH smR^itA dasha || iti |
atrAha ko.anugrahasargaH | anugR^ihNAti pratyayabhUtAdisargaM yaH sargaH
so.anugrahasargaH | tanmAtrasarga evAsau visheShAparanAmA |
ke visheShAH kiyantashcha | uchyante | li~NgadehAha sthUladehAH
sthUlabhUtAni cha | tatra li~NgaM sthUladehAt pUrvamutpannamavyAhataM
sthUlanAshe.apyanashvaram | mahadahaMkArendriyatanmAtrAtmakam |
dharmAdharmaj~nAnAj~nAnavairAgyAvairAgyaishvaryAnaishvaryAkhyabhAvavAsitaM
saMsarati | sthUlabhUtAni tu bhUgolasamudravahnishishumArabrahmANDavirATAdIni |
sthUladehAH ke katividhAshcheti uchyate || chaturdashavidho bhUtasargaH |
tatrAShTAvikalpo daivastairyagyonaH pa~nchadhA mAnuShya ekavidhaH brAhmaH
prAjApatyaH paitre gAndharvo yAkSho rAkShasaH paishAchAshcha daivasargaH
pashumR^igasarIsR^ipasthAvarAH tirashchAM sargaH | brAhmaNAdijAtibhede.api
saMsthAne visheShAbhAvAt ekavidho mAnuShya iti chaturdashavidhAH
sthUladehAH | kaha punarbandhaH katidhA cha | trividho bandhaH |
kAH punastA vidhA uchyante | prAkR^itiko vaikR^itiko dAkShaNikashcha
bandhaH | prakR^itimAtmAnaM j~nAtvA tachchintanAt prAkR^itikaH atrochyate
pUrNavarShasahasraM tu tiShThantyavyaktachintakA iti | mahadAdInAtmatvena
j~nAtvA tachchintanAdvaikArikaH | atrochyate |
dashamanvantarANIha tiShThantIndriyachintakAH |
bhautikAstu shataM pUrNaM sahasraM chAbhimAnikAH ||
bauddhA dashasahasrANi tiShThanti vigatajvarAH |
amI videhAH |
iShTApUrttI dakShiNA tannimitto dAkShaNikaH atrochyate |
svargasthA narakaM yAnti nArakAshcha triviShTapamiti |
gatAgataM kAmakAmA labhanta iti cha | ata eva hi triShvapi bandheShu ekaikApAye
tatastato mokSha iti |
trividho mokShaH | karmaNo vikArAt prAkR^itashcha mokShaH | yaduktam |
prAkR^itena cha bandhena tathA vaikArikeNa cha |
dakShiNAbhistR^itIyena vR^iddho nAnyena muchyate || iti |
atha kutastyAnAM tattvAnAM siddhiH | pramANAditi brUmaH | tatra pramANaM
kiM katividhama vA uchyate trividhaM pramANam | tisro vidhA yasyeti
trividham | kAstA vidhAH | uchyate | dR^iShTamanumAnamAptavachanaM cha |
arthasannikR^iShTendriyajo nishchayo dR^iShTam | indriyANi pa~ncha
chakShurAdIni manashcha | vyAptipakShadharmatAj~nAnapUrvakamanumAnam |
tachcha trividham | pUrvavat sheShavat sAmAnyato dR^iShTaM
cha | pUrvavadyathA kardamena pUrvavR^ittavR^iShTyanumAnam |
sheShavadyathA | samudrAtapalamudakaM(?) kShAramupalabhya
sheShasyApi kShAratvAnumAnam | sAmAnyato dR^iShTAM cha yathA |
rUpAdyupalabhya tadupalabdheH kAraNasyAnumAnam | rUpAdyupalabdhayaH
karaNasAdhyAH kriyatvAt ChidikriyAvat | AptashrutirAptavachanaM cha |
yathArthavAkyajArthaviShayodhyavasAya iti yAvat | prAvAdukodbhAvitAnAM tu
upamAnArthApattisambhavAbhAvaitihyapratibhAnAmityukteShvevAntarbhAvaH |
yat tadyathA gaurgavayastatheti vAkyam | tadj~nAnanidhIrAgama
eva | gavayepi gosadR^ishasya gavayashabdo vAchaka iti pratyayaH
soyamanumAnametatsa~NketagraharUpatvAt | yad gavayasya
chakShuHsannikR^iShTagosAdR^ishyaj~nAnaM tatpratyakShameva |
ata eva smaryamANAyAM gavi sAdR^ishyaj~nAnaM pratyakSham |
gogavayayoH sAdR^ishyasya gavayAntaravarttibhUyovayavasAmAnyarUpasya
yogarUpasyaikatvAdityupamAnaM na mAnAntaram | jIvato gR^ihAbhAvadarshanena
bahirbhAvakalpanAdityarthApattiranumAnameva | sambhavo.api khAryAdau
droNADhakaprasthAdyavagamarUpo.anumAnameva | iha bhUtale ghaTo
nAstItyAdirabhAvAvagamo.api pratyakShameveti nAbhAvaH pR^ithak pramANam |
anirdiShTapravaktR^ikaM pravAdamAtramaitihyamapIha vaTe yakShaH
prativasatItyapramANameva | AptamUlatve tvAgama eva | dvAravatI puNyabhUmiriti
shruteH tatra vasataH shreyAMsastatra gamane puNyaM bhavatItyAdibuddhirjAyamAnA
pratibhA | yatrochyate | anuktamapyUhati paNDito jana iti | sA tu prAyeNa
pramANameva | ArShaM tu darshanaM pratyakShameva | yA pratibhA sApyanumAnameva ||
trayoviMshatisUtrairhi sarvashAstrArthasaMgrahaH |
kR^ito munivareNAtra yathAmati sachIvR^itaH(?)||

iti sAMkhyasUtravivaraNAkhyA kApilasUtravR^ittiH samAptA ||

Encoded and proofread by Dhaval Patel drdhaval2785 at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}