% Text title            : sAMkhyatattvakaumudI
% File name             : sAMkhyatattvakaumudI.itx
% Category              : major\_works
% Location              : doc\_z\_misc\_major\_works
% Transliterated by     : Dhaval Patel drdhaval2785 at gmail.com
% Proofread by          : Dhaval Patel drdhaval2785 at gmail.com
% Source                : sAnkhyasaNgrahaH 1918
% Latest update         : September 15, 2014
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. sA~NkhyatattvakaumudI ..}##
\itxtitle{.. sA~NkhyatattvakaumudI ..}##\endtitles ##

Tattvakaumudi with sanskrit notes rajeshvara shastri

kArikA 1


ajAmekAM lohitashuklakR^iShNAM
bahvIH prajAH sR^ijamAnAM namAmaH |
ajA ye tAM juShamANAM bhajante
jahatyenAM bhuktabhogAM numastAn || 1||
kapilAya mahAmunaye munaye shiShyAya tasya chAsuraye |
pa~nchashikhAya tatheshvarakR^iShNAyaite namasyAmaH || 2||
iha khalu pratipitsitamarthaM pratipAdayan pratipAdayitA.avadheyavachano
bhavati prekShAvatAm | apratipitsitamarthaM tu pratipAdayan 'nAyaM
laukiko nApi parIkShakaH' iti prekShAvadbhirunmattavadupekShyeta | sa
chaiShAM pratipitsito.artho, yo j~nAtaH san paramapuruShArthAya kalpate,
iti prAripsitashAsraviShayaj~nAnasya paramapuruShArthasAdhanahetutvAt
tadviShayajij~nAsAmavatArayati\-

|| duHkhatrayAbhighAtAjjij~nAsA tadaghAtake hetau |
dR^iShTe sApArthA chet naikAntAtyantato.abhAvAt || 1 || ||

 evaM hi shAstraviShayo na jij~nAsyeta yadi duHkhaM nAma jagati na syAt,
 sadvA na jihAsitam, jihAsitaM vA ashakyasamuchChedam | ashakyasamuchChedatA
 cha dvedhA\- duHkhasya nityatvAt, taduchChedopAyAparij~nAnAdvA |
 shakyasamuchChedatve.api cha shAstraviShayasya j~nAnasyAnupAyabhUtatvAdvA,
 sukarasyopAyAntarasya sadbhAvAdvA ||
tatra na tAvad duHkhaM nAsti, nApyajihAsitamityuktam\- "duHkhatrayAbhighAtAd"
iti | duHkhAnAM trayaM duHkhatrayam | tat khalu AdhyAtmikam, Adhibhautikam,
Adhidaivika~ncha |
tatrAdhyAtmikaM dvividham, shArIraM mAnasaM cha | shArIraM vAtapittashleShmaNAM
vaiShamyanimittam |
mAnasaM kAmakrodhalobhamohabhayerShyAviShAdaviShayavisheShAdarshananibandhanam |
sarva~nchaitadAntaropAyasAdhyatvAdAdhyAtmikaM duHkham |
bAhyopAyasAdhyaM duHkhaM dvedhA, Adhibhautikam, Adhidaivika~ncha |
tatrAdhibhautikaM mAnuShapashusarIsR^ipasthAvaranimittam, AdhidaivikaM tu \-
yakSharAkShasavinAyakagrahAdyAveshanibandhanam ||
tadetat pratyAtmavedanIyaM duHkhaM rajaHpariNAmabhedo na
shakyate pratyAkhyAtum | tadanena duHkhatrayeNAntaHkaraNavartinA
chetanAshakteH pratikUlavedanIyatayA.abhisaMbandho.abhighAta iti | etAvatA
pratikUlavedanIyatvaM jihAsAheturuktaH | yadyapi na sannirudhyate duHkhaM,
tathApi tadabhibhavaH shakyaH kartumityupariShTAdupapAdayiShyate |
tasmAdupapannam "tadapaghAteke hetau" iti | tasya duHkhatrayasya apaghAtakaH
tadapaghAtakaH | upasarjanasyApi buddhyA sannikR^iShTasya tadA parAmarshaH |
apaghAtakashcha hetuH shAstrapratipAdyo, nAnya ityAshayaH ||
atra sha~Nkate\- "dR^iShTe sA.apArthA chet" iti.
ayamarthaH | astu tarhi duHkhatrayaM, jihAsitaM cha tad bhavatu, bhavatu
cha tachChakyahAnaM, sahatAM cha shAstragamya upAyastaduchChettum |
tathApyatra prekShAvatAM jij~nAsA na yuktA, dR^iShTasyaivopAyasya
taduchChedakasya sukarasya vidyamAnatvAt,  tachChakyahAnam, sahatAM cha
shAsragamya upAyastaduchChettum | tathA.apyatra prekShAvatAM jij~nAsA na
yuktA, dR^iShTasyaivopAyasya taduchChedakasya sukarasya vidyamAnatvAt |
tattvaj~nAnasya tu anekajanmAbhyAsaparamparA.a.ayAsasAdhyatayA.atiduShkaratvAt
|
tathA cha laukikAnAmAbhANakaH\-
'akke chenmadhu vindeta kimarthaM parvataM vrajet ||
iShTasyArthasya saMsiddhau ki vidvAn yatnamAcharet' || iti |
santi chopAyAH shatashaH shArIraduHkhapratIkArAyeShatkarA
bhiShajAM varairupadiShTAH | mAnasasyApi santApasya pratIkArAya
manoj~nastrIpAnabhojanavilepanavastrAla~NkArAdiviShayasamprAptirupAyaH
sukaraH | evamAdhibhautikasyApi duHkhasya
nItishAstrAbhyAsakushalatAniratyayasthAnAdhyAsanAdiH pratIkAraheturIShatkaraH |
tathA.adhidaivikasyApi maNimantrauShadhAdyupayogaH sukaraH pratIkAropAya iti ||
nirAkaroti\- "na" iti | kutaH ? "ekAntAtyantato.abhAvAt" | ekAnto \-
duHkhanivR^itteravashyambhAvaH, atyanto \- nivR^ittasya duHkhasya
punarutpAdaH, tayorekAntAtyantayorabhAva ekAntAtyantato.abhAvaH |
ShaShThIsthAne sArvavibhaktikastasiH |
etaduktaM bhavati yathAvidhi
rasAyanAdikAminInItishAstrAbhyAsamantrAdyupayoge.api tasya
tasyAdhyAtmikAderduHkhasya nivR^itteradarshanAd anaikAntikatvam,
nivR^ittasyApi punarutpattidarshanAd anAtyantikatvam, iti sukaro.api
aikAntikAtyantikaduHkhanivR^itterna dR^iShTa upAya iti nApArthA
jij~nAsetyarthaH ||
yadyapi duHkhamama~Ngalam, tathApi tatparihArArthatvena tadapaghAto
ma~Ngalameveti yuktaM shAstrAdau tatkIrtanamiti || 1||


kArikA 2


syAdetat | mA bhUd dR^iShTa upAyaH, vaidikastu jyotiShTomAdiH
sahasrasaMvatsaraparyantaH karmakalApastApatrayamekAntamatyanta~nchApaneShyati |
shrutishcha\- "svargakAmo yajeta" iti | svargashcha\-
"yanna duHkhena sambhinnaM na cha grastamanantaram |
abhilAShopanItaM cha tat sukhaM svaHpadAspadam || iti |
(tantravArtikam)
duHkhavirodhI sukhavisheShashcha svargaH | sa cha
svasattayA samUlaghAtamapahanti duHkham | na chaiSha
kShayI | tathA hi shrUyate\- 'apAma somamamR^itA abhUma"
iti | tatkShaye kuto.asyAmR^itatvasambhavaH ? tasmAdvaidikasyopAyasya
tApatrayapratIkArahetormuhUrtayAmAhorAtramAsasaMvatsaranirvartanIyasyAnekajanmaparamparAyAsasampAdanIyAt
vivekaj~nAnAd IShatkaratvAt punarapi vyarthA jij~nAsA ityAsha~NkyAha\-

|| dR^iShTavadAnushravikaH, sa hyavishuddhikShayAtishayayuktaH |
tadviparItaH shreyAn vyaktAvyaktaj~navij~nAnAt || 2 || ||

"dR^iShTa" iti | gurupAThAdanushrUyate ityanushravo vedaH | etaduktaM bhavati\-
'shrUyata eva paraM na kenApi kriyate' iti | tatra bhava AnushravikaH |
tatra prApto j~nAta iti yAvat | Anushraviko.api karmakalApo dR^iShTena tulyo
vartate, aikAntikAtyantikaduHkhapratIkArAnupAyatvasyobhayatrApi tulyatvAt |
yadyapi cha "AnushravikaH" iti sAmAnyAbhidhAnam, tathApi karmakalApAbhiprAyaM
draShTavyam, vivekaj~nAnasyApyAnushravikatvAt | tathA cha shrUyate\-
"AtmA vA.are j~nAtavyaH prakR^itito vivektavyaH" (bR^ihadAraNyaka 2.4.5),
"na sa punarAvartate" (ChAndogya 8.15) iti ||
asyAM pratij~nAyAM hetumAha\- "sa hyavishuddhikShayAtishayayuktaH" iti |
"avishuddhiH" somAdiyAgasya pashubIjAdivadhasAdhanatA | yathA.a.aha
sma bhagavAn pa~nchashikhAchAryaH\- "svalpaH sa~NkaraH saparihAraH
sapratyavamarShaH" iti | 'svalpaH sa~Nkaro' jyotiShTAmAdijanmanaH
pradhAnApUrvasya svalpena pashuhiMsAdijanmanA.anarthahetunA.apUrveNa sa~NkaraH |
'saparihAraH' kiyatA.api prAyashchittena parihartuM shakyaH |
atha cha pramAdataH prAyashchittamapi nAcharitam, pradhAnakarmavipAkasamaye
sa pachyate | tathA.api yAvadasAvanarthaM sUte tAvat pratyavamarSheNa
sahiShNutayA saha vartata iti "sapratyavamarShaH" | mR^iShyante hi
puNyasambhAropanItasvargasudhAmahAhR^idAvagAhinaH kushalAH pApamAtropasAditAM
duHkhavahnikaNikAm ||
na cha\- "mA hiMsyAt sarvA bhUtAni" iti sAmAnyashAstraM visheShashAstreNa
"agnIShomIyaM pashumAlabheta" ityanena bAdhyate\- iti yuktam, virodhAbhAvAt |
virodhe hi balIyasA durbalo bAdhyate | na chehAsti kashchidvirodhaH,
bhinnaviShayatvAt |
tathA hi\- "na hiMsyAd" iti niShedhena hiMsAyA anarthahetubhAvo j~nApyate, na
tvakratvarthatvamapi, "agnIShomIyaM pashumAlabheta" ityanena tu pashuhiMsAyAH
kratvarthamuchyate, nAnarthahetutvAbhAvaH, tathA sati vAkyabhedaprasa~NgAt |
na chAnarthahetutvakratUpakArakatvayoH kashchidvirodho.asti | hiMsA hi
puruShasya doShamAvakShyati, kratoshchopakariShyatIti |
kShayAtishayau cha phalagatAvapyupAye upacharitau | kShayitvaM cha svargAdeH
'sattve sati kAryatvAt' anumitam | jyotiShTomAdayaH svargamAtrasya sAdhanam,
vAjapeyAdayastu svArAjyasyetyatishayayuktatvam | parasampadutkarSho hi
hInasampadaM puruShaM duHkhAkaroti ||
"apAma somamamR^itA abhUma" iti chAmR^itatvAbhidhAnam
chirasthemAnamupalakShayati | yadAhuH\-

"AbhUtasamplavaM sthAnamamR^itatvaM hi bhAShyate" iti ||

ata eva cha shrutiH\-
"na karmaNA na prajayA dhanena tyAgenaikenAmR^itatvamAnashuH |
pareNa nAkaM nihitaM guhAyAM vibhrAjate yadyatayo vishanti" iti (mahAnArAyaNa,
10.5) |
 tathA "karmaNA mR^ityumR^iShayo niSheduH prajAvanto draviNamIhamAnAH |
tathA pare R^iShayo ye manIShiNaH paraM karmabhyo.amR^itatvamAnashuH" iti
cha ||
tadetat sarvamabhipretyAha\- "tadviparItaH shreyAn, vyaktAvyaktaj~navij~nAnAt"
iti | tasmAt \- AnushravikAt duHkhapaghAtakopAyAt somapAnAderavishuddhAd
anityasAtishayaphalAt viparItaH vishuddhaH hiMsAdisa~NkarAbhAvAt,
nityaniratishayaphalaH, asakR^it punarAvR^ittishruteH | na cha
kAryatvenAnityatA phalasya yuktA, bhAvakAryasya tathAtvAt, duHkhapradhvaMsasya
tu kAryasyApi tadvaiparItyAt | na cha duHkhAntarotpAdaH, kAraNApravR^ittau
kAryasyAnutpAdAt, vivekaj~nAnopajananaparyantatvAchcha kAraNapravR^itteH |
etachchopariShTAdupapAdayiShyate ||
akSharArthastu\- tasmAt \- AnushravikAt duHkhApaghAtakAd hetoH, viparItaH \-
sattvapuruShAnyatApratyayaH sAkShAtkAro duHkhApaghAtako hetuH, ata eva shreyAn |
Anushraviko hi vedavihitatvAt mAtrayA duHkhApaghAtakatvAchcha prashasyaH |
sattvapuruShAnyatApratyayo.api prashasyaH | tadanayoH prashasyayormadhye
sattvapuruShAnyatApratyayaH shreyAn ||
kutaH punarasyotpattiH ? ityata Aha\- "vyaktAvyaktaj~navij~nAnAt" iti |
vyaktaM cha avyaktaM cha j~nashcha vyaktAvyaktaj~nAH, teShAM vij~nAnaM
vivekena j~nAnam, vyaktAvyaktaj~navij~nAnam | vyaktaj~nAnapUrvakamavyaktasya
tatkAraNasya j~nAnam | tayoH pArArthyenAtmA paro j~nAyate, iti
j~nAnakrameNAbhidhAnam |
etaduktaM bhavati\- shrutismR^itItihAsapurANebhyo vyaktAdIn vivekena shrutvA,
shAstrayuktyA cha vyavasthApya, dIrghakAlAdaranairantaryasatkArasevitAt
bhAvanAmayAt vij~nAnamiti | tathA cha vakShyati\-
evaM tattvAbhyAsAnnAsmi na me nAhamityaparisheSham |
aviparyayAdvishuddhaM kevalamutpadyate j~nAnam || iti			(kArikA
64) || 2||


kArikA 3


tadevaM prekShAvadapekShitArthatvena shAstrArambhaM samAdhAya
shAstramArabhamANaH shrotR^ibuddhisamavadhAnAya tadarthaM saMkShepataH
pratijAnIte\-

|| mUlaprakR^itiravikR^itirmahadAdyAH prakR^itivikR^itayaH sapta |
ShoDashakastu vikAro, na prakR^itirna vikR^itiH puruShaH || 3 || ||

saMkShepato hi shAstrArthasya chatasro vidhAH | kashchidarthaH prakR^itireva,
kashchidartho vikR^itireva, kashchitprakR^itivikR^itiH, kashchidanubhayarUpaH |
tatra kA prakR^itiH ? ityuktam\- "mUlaprakR^itiravikR^itiH" iti |
prakarotIti prakR^itiH pradhAnam, sattvarajastamasAM sAmyAvasthA, sA
avikR^itiH, prakR^itirevetyarthaH | kutaH ? ityuktam, "mUleti" mUla~nchAsau
prakR^itishcheti mUlaprakR^itiH | vishvasya kAryasa~NghAtasya sA mUlam, na
tvasyA mUlAntaramasti, anavasthAprasa~NgAt | na chAnavasthAyAM pramANamastIti
bhAvaH ||
katamAH punaH prakR^itivikR^itayaH, kiyatyashcha ? ityata uktam\- "mahadAdyAH
prakR^itivikR^itayaH sapta" iti | prakR^itayashcha vikR^itayashcha tA iti
prakR^itivikR^itayaH sapta |
tathA hi\- mahattattvamaha~NkArasya prakR^itiH, vikR^itishcha mUlaprakR^iteH |
evamaha~NkAratattvaM tanmAtrANAmindriyANAM cha prakR^itiH vikR^itishcha
mahataH | evaM pa~nchatanmAtrANi tattvAni bhUtAnAmAkAshAdInAM prakR^itayo
vikR^itayashchAha~NkArasya ||
atha kA vikR^itireva, kiyatI chetyata uktam\- "ShoDashakastu vikAraH"
iti | ShoDashasaMkhyAparimito gaNaH ShoDashakaH | tushabdo.avadhAraNe
bhinnakramashcha | pa~nchamahAbhUtAni ekAdasha indriyANi cheti ShoDashako gaNo
vikAra eva, na prakR^itiriti | yadyapi cha pR^ithivyAdInAM goghaTavR^ikShAdayo
vikArAH, evaM tadvikArabhedAnAM payobIjAdInAM dadhya~NkurAdayaH, tathA.api
gavAdayo bIjAdayo vA na pR^ithivyAdibhyastattvAntaram | 'tattvAntaropAdAnatvaM
cha prakR^ititvam' ihAbhipretamiti na doShaH | sarveShAM goghaTAdInAM
sthUlatendriyagrAhyatA cha sameti na tattvAntaratvam |
anubhayarUpamuktaM, tadAha \- "na prakR^itirna vikR^itiH puruShaH" iti |
etachcha sarvamupariShTAdupapAdayiShyate || 3||


kArikA 4


tamimamarthaM prAmANikaM kartumabhimatAH pramANabhedA lakShaNIyAH | na cha
sAmAnyalakShaNamantareNa shakyate visheShalakShaNaM kartumiti pramANasAmAnyaM
tAvallakShayati\-

|| dR^iShTamanumAnamAptavachanaM cha, sarvapramANasiddhatvAt |
trividhaM pramANamiShTaM prameyasiddhiH pramANAddhi || 4 || ||

atra cha 'pramANam' iti samAkhyayA lakShyapadam | tannirvachanaM cha
lakShaNam | pramIyate.aneneti nirvachanAt pramAM prati karaNatvamavagamyate |
     asandigdhAviparItAnadhigataviShayA chittavR^ittiH |  bodhashcha
pauruSheyaH phalaM pramA |  tatsAdhanaM pramANamiti | etena
saMshayaviparyayasmR^itisAdhaneShvapramANeShvaprasa~NgaH ||
saMkhyAvipratipattiM nirAkaroti\- "trividham" iti | tisro vidhA asya
pramANasAmAnyasya tat trividhaM, na nyUnaM, nApyadhikamityarthaH |
visheShalakShaNAnantaraM chaitadupapAdayiShyAmaH |
katamAH punastA vidhA ? ityata Aha\- "dR^iShTamanumAnamAptavachanaM cha"
iti | etachcha laukikapramANAbhiprAyam, lokavyutpAdanArthatvAchChAstrasya,
tasyaivAtrAdhikArAt | ArShaM tu vij~nAnaM yoginAmUrdhvasrotasAM na
lokavyutpAdanAyAlamiti sadapi nAbhihitam, anadhikArAt ||
syAdetat \- mA bhUnnyUnam, adhikaM tu kasmAnna bhavati, sa~Ngirante hi
prativAdina upamAnAdInyapi pramANAni, ityata Aha\- "sarvapramANasiddhatvAt"
iti | eShveva dR^iShTAnumAnAptavachaneShu sarveShAM pramANAnAM siddhatvAt\-
antarbhAvAdityarthaH | etachchopapAdayiShyata ityuktam |
atha prameyavyutpAdanAya pravR^ittaM shAstraM kasmAt pramANaM sAmAnyato
visheShatashcha lakShayati ? ityata Aha\- "prameyasiddhiH pramANAddhi" iti |
siddhiH pratItiH |
seyamAryA.arthakramAnurodhena pAThakramamanAdR^ityaiva vyAkhyAtA || 4||


kArikA 5


samprati pramANavisheShalakShaNAvasare pratyakShasya pramANeShu jyeShThatvAt
tadadhInatvAchchAnumAnAdInAM, sarvavAdinAmavipratipatteshcha, tadeva
tAvallakShayati\-
|| prativiShayAdhyavasAyo dR^iShTaM, trividhamanumAnamAkhyAtam |
talli~Ngali~NgipUrvakamAptashrutirAptavachanaM tu || 5 || ||

 "prativiShayAdhyavasAyo dR^iShTam" iti | atra "dR^iShTam" iti
 lakShyanirdeshaH, parishiShTaM tu lakShaNam | samAnAsamAnajAtIyavyavachChedo
 lakShaNArthaH ||
avayavArthastu\- visinvanti viShayiNamanubadhnanti svena rUpeNa
nirUpaNIyaM kurvantIti yAvat | "viShayAH" pR^ithivyAdayaH sukhAdayashcha,
asmadAdInAmaviShayAH tanmAtralakShaNAH yoginAmUrdhvasrotasAM cha viShayAH,
viShayaM viShayaM prati vartata iti prativiShayam | vR^ittishcha sannikarShaH |
arthasannikR^iShTamindriyamityarthaH | tasmin adhyavasAyaH, tadAshrita
ityarthaH | adhyavasAyashcha buddhivyApAro j~nAnam, upAttaviShayANAmindriyANAM
vR^ittau satyAM buddhestamo.abhibhave sati yaH sattvasamudrekaH,
so.adhyavasAya iti vR^ittiriti j~nAnamiti chAkhyAyate | idaM tat pramANam |
anena yashchetanAshakteranugrahastatphalaM, pramA bodhaH |
buddhitattvaM hi prAkR^itatvAdachetanamiti tadIyo.adhyavasAyo.apyachetanaH
ghaTAdivat | evaM buddhitattvasya sukhAdayo.api pariNAmabhedA achetanAH |
puruShastu sukhAdyananuSha~NgI chetanaH | so.ayaM buddhitattvavartinA
j~nAnasukhAdinA tatpratibimbitastachChAyApattyA j~nAnasukhAdimAniva
bhavatIti chetano.anugR^ihyate | chitichChAyApattyA chAchetanA.api
buddhistadadhyavasAyo.apyachetanashchetanavad bhavatIti | tathA cha vakShyati\-
tasmAttatsaMyogAdachetanaM chetanAvadiva li~Ngam |
guNakartR^itve.api tathA karteva bhavatyudAsInaH || (kA0 21) iti |
atrAdhyavasAyagrahaNena saMshayaM vyavachChinatti,
saMshayasyAnavasthitagrahaNenAnishchitarUpatvAt | nishchayo.adhyavasAya
iti chAnarthAntaram | viShayagrahaNena chAsadviShayaM viparyayamapAkaroti |
pratigrahaNena chendriyArthasannikarShasUchanAdanumAnasmR^ityAdayaH parAkR^itA
bhavanti .
tadevaM samAnAsamAnajAtIyavyavachChedakatvAt "prativiShayAdhyavasAyaH" iti
dR^iShTasya sampUrNaM lakShaNam | tantrAntareShu lakShaNAntarANi tairthikAnAM
na dUShitAni, vistarabhayAditi |
'nAnumAnaM pramANam'iti vadatA lokAyatikenApratipannaH sandigdho viparyasto vA
puruShaH kathaM pratipadyeta ? na cha puruShAntaragatA aj~nAnasandehaviparyayAH
shakyA arvAgdR^ishA pratyakSheNa pratipattum | nApi pramANAntareNa,
anabhyupagamAt | anavadhR^itAj~nAnasaMshayaviparyayastu yaM ka~nchana puruShaM
prati vartamAno.anavadheyavachanatayA prekShAvadbhirunmattavadupekShyeta |
tadanenAj~nAnAdayaH parapuruShavartino.abhiprAyabhedAdvachanabhedAd vA
li~NgAdanumAtavyAH, ityakAmenApyanumAnaM pramANamabhyupeyam |
tatra pratyakShakAryatvAdanumAnaM pratyakShAnantaraM lakShaNIyam |
tatrApi sAmAnyalakShaNapUrvakatvAdvisheShalakShaNasyetyanumAnasAmAnyaM
tAvallakShayati\- "talli~Ngali~NgipUrvakam" iti | li~NgaM vyApyaM, li~Ngi
vyApakam | sha~NkitasamAropitopAdhinirAkaraNena cha vastusvabhAvapratibaddhaM
vyApyam, yena cha pratibaddhaM, tadvyApakam | li~Ngali~NgigrahaNena
cha viShayavAchinA viShayiNaM pratyayamupalakShayati | 'dhUmAdirvyApyo
vahnyAdirvyApakaH' iti yaH pratyayastatpUrvakam | li~NgigrahaNaM chAvartanIyam |
tena cha  li~NgamasyAstIti pakShadharmatAj~nAnamapi darshitaM bhavati | tat
'vyApyavyApakabhAvapakShadharmatAj~nAnapUrvakamanumAnam'iti\- anumAnasAmAnyaM
lakShitam |
anumAnavisheShAn tantrAntaralakShitAn abhimatAn smArayati\-
"trividhamanumAnamAkhyAtam" iti, tat sAmAnyato lakShitamanumAnaM
visheShatastrividhaM, pUrvavat, sheShavat, sAmAnyato dR^iShTa~ncheti |
tatra prathamaM tAvat dvividhaM\- vItamavItaM cha | anvayamukhena pravartamAnaM
vidhAyakaM vItam, vyatirekamukhena pravartamAnaM niShedhakamavItam |
tatrAvItaM sheShavat | shiShyate parishiShyA iti sheShaH, sa eva viShayatayA
yasyAstyanumAnaj~nAnasya tachCheShavat | yadAhuH\- 'prasaktapratiShedhe,
anyatrAprasa~NgAt shiShyamANe sampratyayaH parisheShaH' iti (nyAyabhAShyam) |
asya chAvItasya vyatirekiNa udAharaNamagre.abhidhAsyate |
vItaM cha dvedhA\- pUrvavat, sAmAnyato dR^iShTaM cha | tatraikaM
dR^iShTasvalakShaNasAmAnyaviShayaM yat tatpUrvavat, pUrvaM prasiddhaM
dR^iShTasvalakShaNasAmAnyamiti yAvat, tadasya viShayatvenAstyanumAnasyeti
pUrvavat | yathA dhUmAt vahnitvasAmAnyavisheShaH parvate.anumIyate, tasya
vahnitvasAmAnyavisheShasya svalakShaNaM vahnivisheSho dR^iShTo rasavatthAm |
aparaM cha vItaM sAmAnyato dR^iShTam\- adR^iShTasvalakShaNasAmAnyaviShayam |
yathendriyaviShayamanumAnam | atra hi rUpAdivij~nAnAnAM kriyAtvena
karaNavattvamanumIyate | yadyapi karaNatvasAmAnyasya ChidAdau
vAsyAdi svalakShaNamupalabdham, tathA.api yajjAtIyaM rUpAdij~nAne
karaNavattvamanumIyate tajjAtIyasya karaNasya na dR^iShTaM svalakShaNaM
pratyakSheNa | indriyajAtIyaM hi tatkaraNam, nachendriyatvasAmAnyasya
svalakShaNamindriyavisheShaH pratyakShagocharo.arvAgdR^ishAm, yathA
vahnitvasAmAnyasya svalakShaNaM vahniH | so.ayaM pUrvavataH sAmAnyatodR^iShTAt
satyapi vItatvena tulyatve visheShaH | atra cha dR^iShTaM darshanam,
sAmAnyata iti sAmAnyasya, sArvavibhaktikastasiH | adR^iShTasvalakShaNasya
sAmAnyavisheShasya darshanaM sAmAnyatodR^iShTamanumAnamityarthaH |
sarvaM chaitadasmAbhirnyAyavArtikatAtparyaTIkAyAM vyutpAditamiti nehoktaM
vistarabhayAt |
prayojakavR^iddhashabdashravaNasamanantaraM
prayojyavR^iddhapravR^ittihetuj~nAnAnumAnapUrvakatvAchChabdArthasambandhagrahaNasya,
svArthasambandhaj~nAnasahakAriNashcha
shabdasyArthapratyAyakatvAdanumAnapUrvakatvamityanumAnAntaraM
shabdaM lakShayati\- "AptashrutirAptavachanaM tu" iti | Aptavachanamiti
lakShyanirdeshaH, parishiShTaM lakShaNam | AptA prAptA yukteti yAvat | AptA
chAsau shrutishcheti AptashrutiH | shrutiH\- vAkyajanitaM vAkyArthaj~nAnam |
tachcha svataHpramANam | apauruSheyavedavAkyajanitatvena
sakaladoShAsha~NkAvinirmukteryuktaM bhavati | evaM
vedamUlasmR^itItihAsapurANavAkyajanitamapi j~nAnaM yuktaM bhavati |
AdividuShashcha kapilasya kalpAdau kalpAntarAdhItashrutivismaraNasambhavaH,
suptaprabuddhasyeva pUrvedyuravagatAnAmarthAnAmaparedyuH |
tathA cha AvaTyajaigIShavyasaMvAde bhagavAn jaigIShavyo
dashamahAkalpavartijanmasmaraNamAtmana uvAcha " dashasu mahAkalpeShu
viparivartamAnena mayA" ityAdinA granthasandarbheNa |
AptagrahaNenAyuktAH shAkyabhikShunirgranthakasaMsAramochakAdinAmAgamAbhAsAH
parihR^itA bhavanti | ayuktatvaM chaiteShAM vigAnAt vichChinnamUlatvAt
pramANaviruddhArthAbhidhAnAchcha, kaishchideva mlechChAdibhiH puruShApasadaiH
pashuprAyaiH parigrahAdboddhavyam |
tushabdenAnumAnAdvyavachChinatti | vAkyArtho hi prameyaH, na
tu taddharmo vAkyam, yena tatra li~NgaM bhavet | na cha vAkyaM
vAkyArthaM bodhayat sambandhagrahaNamapekShate, abhinavakavirachitasya
vAkyasyAdR^iShTapUrvasyAnanubhUtacharavAkyArthabodhakatvAditi |
evaM pramANasAmAnyalakShaNeShu tadvisheShalakShaNeShu cha satsu, yAni
pramANAntarANyupamAnAdIni prativAdibhirabhyupeyante tAnyuktalakShaNeShveva
pramANeShvantarbhavanti |
tathA hi \- upamAnaM tAvat 'yathA gaustathA gavayaH' iti vAkyam | tajjanitA
dhIrAgama eva | yo.apyayaM 'gavayashabdo gosadR^ishasya vAchakaH' iti
pratyayaH, so.apyanumAnameva | yo hi shabdo yatra vR^iddhaiH prayujyate,
so.asati vR^ittyantare, tasya vAchakaH, yathA goshabdo gotvasya |
prayujyate chaivaM gavayashabdo gosadR^ishe, iti tasyaiva vAchaka
iti tat j~nAnamanumAnameva | yattu gavayasya chakShuHsannikR^iShTasya
gosAdR^ishyaj~nAnaM tat pratyakShameva | ata eva smaryamANAyAM gavi
gavayasAdR^ishyaj~nAnaM pratyakSham | na tvanyadgavi sAdR^ishyam |
anyachcha gavaye | bhUyo.avayavasAmAnyayogo hi jAtyantaravartI jAtyantare
sAdR^ishyamuchyate | sAmAnyayogashchaikaH | sa chedgavaye pratyakShaH,
gavyapi tatheti nopamAnasya prameyAntaramasti, yatra pramANAntaramupamAnaM
bhavet, iti na pramANAntaramupamAnam |
evamarthApattirapi na pramANAntaram |
tathA hi\- jIvatashchaitrasya gR^ihAbhAvadarshanena bahirbhAvasyAdR^iShTasya
kalpanamarthApattirabhimatA vR^iddhAnAm | sA.apyanumAnameva | yadA
khalvavyApakaH sannekatra nAsti tadA.anyannAsti | yadA.avyApaka ekatrAsti
tadA.anyatra nAsti, iti sukaraH svasharIre vyAptigrahaH | tathA cha
sato gR^ihAbhAvadarshanena li~Ngena bahirbhAvadarshanamanumAnameva |
na cha chaitrasya kvachitsattvena gR^ihAbhAvaH shakyo.apahnotum,
yenAsiddho gR^ihAbhAvo bahirbhAve na hetuH syAt | na cha gR^ihAbhAvena vA
sattvamapahnUyate, yena sattvamevAnupapadyamAnamAtmAnaM na bahiravasthApayet |
tathA hi\- chaitrasya gR^ihAsattvena sattvamAtraM virudhyate, gR^ihasattvaM
vA ? na tAvadyatra kvachana sattvasyAsti virodho gR^ihAsattvena,
bhinnaviShayatvAt | deshasAmAnyena gR^ihavisheShAkShepi.api pAkShika iti
sAmAnyaviShayatayA virodha iti chet, pramANavinishchitasya gR^ihe.asattvasya
pAkShikatayA sAMshayikena gR^ihasattvena pratikShapAyogAt | nApi
pramANanishchito gR^ihAbhAvaH pAkShikamasya gR^ihasattvaM pratikShipan
sattvamapi pratikSheptuM sAMshayikatvaM cha vyapaneturmahatIti yuktam |
gR^ihAvachChinnena chaitrAbhAvena gR^ihasattvaM viruddhyate, na tu
sattvamAtram, tasya tatraudAsInyAt | tasmAdgR^ihAbhAvena li~Ngena siddhena
sato bahirbhAvo.anumIyata iti yuktam |
etena\- 'viruddhayoH
pramANayorviShayavyavasthayA.avirodhApAdanamarthApatterviShayaH'
iti nirastam, avachChinnAnavachChinnayorvirodhAbhAvAt |
udAharaNAntarANi chArthApatterevamevAnumAne.antarbhAvanIyAni |
tasmAnnAnumAnAtpramANAntaramarthApattiriti siddham |
evamabhAvo.api pratyakShameva | na hi bhUtalasya pariNAmavisheShAt
kaivalyalakShaNAdanyo ghaTAbhAvo nAma | pratikShaNapariNAmino hi sarve
eva bhAvAH, R^ite chitishakteH | sa cha pariNAmabheda aindriyaka iti nAsti
pratyakShAnavaruddho viShayo yatrA.abhAvAhvayaM pramANAntaramabhyupeyeteti |
sambhavastu, yathA khAryAM droNADhakaprastyAdyavagamaH | sa chAnumAnameva |
khArItvaM hi droNAdyavinAbhUtaM pratItaM khAryAM droNAdisattvamavagamayati |
yachchAnirdiShTapravaktR^ikaM pravAdapAramparyamAtram\- 'iti hochurvR^iddhAH'
ityaitihyam | yathA 'iha vaTe yakShaH prativasati' iti, na tat pramANAntaram |
anirdiShTapravaktR^ikatvena sAMshayikatvAt | AptavaktR^ikatvanishchaye
tvAgama eva, ityupapannaM "trividhampramANam" iti |


kArikA 6


evaM tAvadvyaktAvyaktaj~nalakShaNaprameyasiddhyarthaM pramANAni lakShitAni |
tatra vyaktaM pR^ithivyAdi svarUpataH pAMsulapAdo hAliko.api pratyakShataH
pratipadyate, pUrvavatA chAnumAnena dhUmAdidarshanAt vahnyAdIni cheti,
tadvyutpAdanAya mandaprayojanaM shAstramiti duradhigamamanena vyutpAdyam |
tatra yat pramANaM yatra shaktaM taduktalakShaNebhyaH pramANebhyo niShkR^iShya
darshayati \-

|| sAmAnyatastu dR^iShTAt atIndriyANAM pratItiranumAnAt |
tasmAdapi chAsiddham parokShAptAgamAt siddham || 6 || ||

"sAmAnyataH" iti | tushabdaH pratyakShapUrvavadbhyAM vishinaShTi |
sAmAnyatodR^iShTAdanumAnAdatIndriyANAM pradhAnapuruShAdInAM pratItiH
\- chitichChAyApattirbuddheradhyavasAya ityarthaH | upalakShaNaM
chaitat, sheShavata ityapi draShTavyam | tatkiM sarveShvatIndriyeShu
sAmAnyatodR^iShTameva pravarttate ? tathA cha yatra tannAsi,
mahadAdyArambhakrame svargApUrvadevatAdau cha, tatra teShAmabhAvaH prApta
ityata Aha \- "tasmAdapi" iti | tasmAdapItyetAvataiva siddhe chakAreNa
sheShavat ityapi samuchchitam ||


kArikA 7


syAdetat, yathA gaganakusumakUrmaromashashaviShANAdShu
pratyakShamapravartamAnaM tadabhAvamavagamayati, evaM pradhAnAdiShvapi |
tatkathaM teShAM sAmAnyatodR^iShTAdibhyaH siddhirityata Aha \-

|| atidUrAt sAmIpyAt indriyaghAtAnmano.anavasthAnAt |
saukShmyAdvyavadhAnAt abhibhavAt samAnAbhihArAchcha || 7 || ||

"atidUrAt" iti anupalabdhiriti vakShyamANaM siMhAvalokananyAyenAnuSha~njanIyam |
yathA utpatan viyati atidUratayA sannapi pratyakSheNa nopalabhyate |
sAmIpyAdityatrApyatiranuvartanIyaH, yathA lochanasthama~njanamatisAmIpyAnna
dR^ishyate | indriyaghAto.andhatvabadhiratvAdiH | "mano.avasthAnAt" yathA
kAmAdyupahatamanAH sphItAlokamadhyavartinamindriyasannikR^iShTamarthaM na
pashyati | "saukShmyAt" yathendriyasannikR^iShTaM paramANvAdi praNihitamanA api
na pashyati | vyavadhAnAt\- yathA kuDyAdivyavahitaM rAjadArAdikaM na pashyati |
abhibhavAt\- yathA.ahani saurAbhirbhAbhirabhibhUtaM grahanakShatramaNDalaM
na pashyati | samAnAbhihArAt \- yathA toyadavimuktAnudabindUn jalAshaye na
pashyati |
chakAro.anuktasamuchchayArthaH | tenAnudbhavo.api sa~NgR^ihItaH | tadyathA
kShIrAdyavasthAyAM dadhyAdyanudbhavAnna pashyati |
etaduktaM bhavati na pratyakShanivR^ittimAtrAdvastvabhAvo bhavati,
atiprasa~NgAt | tathA hi \- gR^ihAdvinirgato gR^ihajanamapashyaMstadabhAvaM
vinishchinuyAt, na tvevam | api tu yogyapratyakShanivR^itterayamabhAvaM
vinishchinoti | na cha pradhAnapuruShAdInAmasti pratyakShayogyatA, iti na
tannivR^ittimAtrAttadabhAvanishchayo yuktaH prAmANikAnAmiti |


kArikA 8


katamatpunareteShu kAraNaM pradhAnAdInAmanupalabdhau ? ityata Aha \-

|| saukShmyAttadanupalabdhirnAbhAvAt, kAryatastadupalabdheH |
mahadAdi tachcha kAryaM prakR^itisarUpaM virUpaM cha || 8 || ||

"saukShmyAt" iti | athAbhAvAdeva saptamarasavadeteShAmanupalabdhiH kasmAnna
bhavati? ityata Aha \- "nAbhAvAt" iti | kutaH ? "kAryatastadupalabdheH",
'tat' iti pradhAnaM parAmR^ishati | puruShopalabdhau tu pramANaM vakShyati,
"sa~NghAtaparArthatvAt" \-(kA0 17) iti | dR^iDhatarapramANAvadhArite
hi pratyakShamapravartamAnamayogyatvAnna pravartate iti kalpyate |
saptamastu raso na pramANenAvadhArita iti na tatra pratyakShasyAyogyatA
shakyA.adhyavasAtumityabhiprAyaH |
kiM punastatkAryaM yataH pradhAnAnumAnam ? ityata Aha \- "mahadAdi tachcha
kAryam" iti | etachcha yathA gamakaM tathopariShTAdupapAdayiShyate | tasya
cha kAryasya vivekaj~nAnopayoginI sArUpyavairUpye Aha \- "prakR^itisarUpaM
virUpaM cha" iti | ete tUpariShTAdvibhajanIye iti |


kArikA 9


kAryAt kAraNamAtraM gamyate | santi chAtra vAdinAM vipratipattayaH | tathA
hi kechidAhuH \- 'asataH sat jAtate' iti, 'ekasya sato vivartaH kAryajAtaM
na vastusat' ityapare, anye tu 'sataH asat jAyate' iti, 'sataH sat jAyate'
iti vR^iddhAH |
tatra pUrvasmin kalpatraye pradhAnaM na siddhyati |
sukhaduHkhamohabhedasvarUpapariNAmashabdAdyAtmakaM hi jagatkAraNasya
pradhAnatvaM sattvarajastamaHsvabhAvatvamavagamayati |
yadi punarasataH sajjAyeta asat nirUpAkhyaM kAraNaM sukhAdirUpashabdAdyAtmakaM
kathaM syAt ? sadasatostAdAtmyAnupapatteH |
athaikarUpasya sato vivartaH shabdAdiprapa~nchaH, tathA.api sataH sajjAyata
iti na syAt | na chAsyAdvayasya prapa~nchAtmakatvam, api tvaprapa~nchasya
prapa~nchAtmakatayA pratItirbhrama eva |
yeShAmapi kaNabhakShAkShacharaNAdInAM sata eva kAraNAdasato janma, teShAmapi
sadasatorekatvAnupapatterna kAryAtmakaM kAraNamiti na tanmate pradhAnasiddhiH |
ataH pradhAnasiddhyarthaM prathamaM tAvatsatkAryaM pratijAnIte |

|| asadakaraNAdupAdAnagrahaNAt sarvasambhavAbhAvAt |
shaktasya shakyakaraNAt kAraNabhAvAchcha sat kAryam || 9 || ||

"asadakaraNAt" iti | "sat kAryam" kAraNavyApArAt prAgapIti sheShaH | tathA
cha na siddhasAdhanaM naiyAyikatanayairudbhAvanIyam |
yadyapi bIjamR^itpiNDAdipradhvaMsAnantarama~NkuraghaTAdyutpattirupalabhyate,
tathA.api na pradhvaMsasya kAraNatvam, api tu bhAvasyaiva
bIjAdyavayavasya | abhAvAttu bhAvotpattau tasya sarvatra sulabhatvAt
sarvadA sarvakAryotpAdaprasa~Nga ityAdi nyAyavArtikatAtparyaTIkAyAmasmAbhiH
pratipAditam |
prapa~nchapratyayashchAsati bAdhake na shakyo mithyeti vaditumiti
kaNabhakShAkShachAraNamatamavashiShyate |
tatredaM pratij~nAtam, "sat kAryam" iti | atra hetumAha "asadakaraNAt" iti |
asat chet kAraNavyApArAt pUrvaM kAryam, nAsya sattvaM kartuM kenApi shakyam |
na hi nIlaM shilpisahasreNApi pItaM kartuM shakyate | 'sadasattve ghaTasya
dharmau' iti chet, tathApi asati dharmiNi na tasya dharma iti sattvaM
tadavasthameva, tathA cha nAttvam | asambaddhenAtadAtmanA chAsattvena
kathamasan ghaTaH? tasmAt kAraNavyApArAdUrdhvamiva tataH prAgapi sadeva
kAryamiti |
kAraNAchchAsya sato.abhivyaktirevAvashiShyate | satashchAbhivyaktirupapannA |
yathA pIDanena tileShu tailarUpa, avaghAtena dhAnyeShu taNDulAnAm, dohanena
saurabheyIShu payasaH | asataH karaNe tu na nidarshanaM ki~nchidasti |
na khalvabhivyajyamAnaM chotpadyamAnaM vA kvachidasat dR^iShTam |
itashcha kAraNavyApArAt prAk sadeva kAryam\- "upAdAnagrahaNAt", upAdAnAni\-
kAraNAni, teShAM grahaNaM \- kAryeNa sambandhaH | upAdAnaiH kAryasya
sambandhAditi yAvat |
etaduktaM bhavati\- kAryeNa sambaddhaM kAraNaM kAryasya janakam, sambandhashcha
kAryasyAsato na sambhavati, tasmAditi |
syAdetat \- asambaddhameva kAraNaiH kAryaM kasmAnna janyate ? tathA
chAsadevotpasyeta ityata Aha \- "sarvasambavAbhAvAt" iti | asambaddhasya
janyatve asambaddhatvAvisheSheNa sarvaM kAryajAtaM sarvasmAdbhavet | na
chaitadasti, tasmAnnAsambaddhamasambaddhena janyate, api tu sambaddhaM
sambaddhena janyata iti | yathA.a.ahuH sAMkhyavR^iddhAH \-
"asattve nAsti sambandhaH kAraNaiH sattvasa~NgibhiH |
asambaddhasya chotpattimichChato na vyavasthitiH\-" iti |
syAdetat\- asambaddhamapi sat tadeva karoti yatra yat kAraNaM shaktaM,
shaktishcha kAryadarshanAdavagamyate | tena nAvyavasthetyata Aha\- "shaktasya
shakyakaraNAt" iti | sA shaktiH shaktakAraNAshrayA, sarvatra vA syAt, shakye
eva vA ? sarvatra chet, tadavasthaivAvyavasthA | shakye chet, kathamasati
shakye tatra ? iti vaktavyam | shaktibheda eva etAdR^isho yataH ki~nchideva
kAryaM janayet na sarvamiti chet, hanta bhoH ! shaktivisheShaH kAryasambaddho
vA.asambaddho vA ? sambaddhatve nAsatA sambandha iti sat kAryam | asambaddhatve
saivAvyavasthA, iti suShThUktaM "shaktasya shakyakaraNAt" iti |
itashcha sat kAryamityAha \- "kAraNabhAvAchcha", kAryasya kAraNAtmakatvAt |
na hi kAraNAdbhinnaM kAryam, kAraNaM cha saditi kathaM tadabhinnaM
kAryamasadbhavet ?
kAryasya kAraNAbhedasAdhanAni cha pramANAni \-
(1) na paTastantubhyo bhidyate, tantudharmAt | iha yadyato bhidyate tat
tasya dharmo na bhavati, yathA gaurashvasya | dharmashcha paTastantUnAM,
tasmAnnArthAntaram |
(2) upAdAnopAdeyabhAvAchcha nArthAntaratvaM tantupaTayoH | yayorarthAntaratvaM
na tayorupAdAnopAdeyabhAvaH, yathA ghaTapaTayoH | upAdAnopAdeyabhAvashcha
tantupaTayoH | tasmAnnArthAntaratvam |
(3) itashcha nArthAntaratvaM tantupaTayoH, saMyogAprAptyabhAvAt | arthAntaratve
hi saMyogo dR^iShTo yathA kuNDabadarayoH, aprAptirvA yathA himavadvindhyayoH |
na cheha saMyogAprAptI, tasmAnnArthAntaratvamiti |
(4) itashcha paTastantubhyo na bhidyate, gurutvAntarakAryAgrahaNAt |
iha yadyasmAdbhinnam, tasmAt tasya gurutvAntaraM
kAryaM gR^ihyate, yathaikapalikasya svastikasya yo
gurutvakAryo.avanativisheShastasmAddvipalikasya svastikasya
gurutvakAryo.avanatibhedo.adhikaH | na cha tathA tantugurutvakAryAt
paTagurutvakAryAntaraM dR^ishyate | tasmAdabhinnastantubhyaH paTa iti |
tAnyetAnyabhedasAdhanAnyavItAni |
evamabhede siddhe, tantava eva tena saMsthAnabhedena pariNatAH paTaH, na
tantubhyo.arthAntaraM paTaH |
svAtmani kriyAnirodhabuddhivyapadeshArthakriyAbhedAshcha
naikAntikaM bhedaM sAdhayitumarhanti | ekasminnapi
tattadvisheShAvirbhAvatirobhAvAbhyAmeteShAmavirodhAt | yathA hi kUrmasyA~NgAni
kUrmasharIre nivishamAnAni tirobhavanti, niHsaranti chAvirbhavanti, na tu
kUrmatastada~NgAnyutpadyante pradhvaMsante vA | evamekasyA mR^idaH suvarNasya
vA ghaTamukuTAdayo visheShA niHsaranta Avirbhavanta utpadyanta ityuchyante,
nivishamAnAstirobhavanti vinashyantItyuchyante | na punarasatAmutpAdaH satAM
vA nirodhaH | yathA.a.aha bhagavAn kR^iShNadvaipAyanaH \-
"nAsato vidyate bhAvo nAbhAvo vidyate sataH " (gItA 2\-16 iti) |
yathA kUrmaH svAvayavebhyaH sa~NkochavikAsibhyo na bhinnaH, evaM
ghaTamukuTAdayo.api mR^itsuvarNAdibhyo na bhinnAH |
eva~ncha 'iha tantuShu paTaH' iti vyapadesho yathA 'iha vane tilakAH'
ityupapannaH |
na chArthakriyAbhedo.api bhedamApAdayati, ekasyApi nAnArthakriyAdarshanAt |
yathaika eva vahnirdAhakaH pAchakaH prakAshakashcheti | nApyarthakriyAvyavasthA
vastubhede hetuH, teShAmeva samastavyastAnAmarthakriyAvyavasthAdarshanAt |
yathA pratyekaM viShTayo vartmadarshanalakShaNAmarthakriyAM kurvanti, na
tu shibikAvahanam, militAstu shibikAmudvahanti, evaM tantavaH pratyekaM
prAvaraNamakurvANA api militA AvirbhUtapaTabhAvAH prAvariShyanti |
syAdetat \- AvirbhAvaH paTasya kAraNavyApArAt prAk san asan vA ? asaMshchet
prAptaM tarhyasadutpAdanam | atha san, kR^itaM tarhi kAraNavyApAreNa |
na hi sati kArye kAraNavyApAraprayojanaM pashyAmaH | AvirbhAve
chAvirbhAvAntarakalpane.anavasthAprasa~NgaH | tasmAdAvirbhUtapaTabhAvAstantavaH
kriyanta iti riktaM vachaH |
maivam | athAsadutpadyata iti mate keyamasadutpattiH ? satI, asatI vA ? satI
chet, kR^itaM tarhi kAraNaiH | asatI chet, tasyA apyutpattyantaramityanavasthA
|
atha\- utpattiH paTAnnArthAntaram, api tu paTa evAsau, tathApi yAvaduktaM
bhavati 'paTaH' iti, tAvaduktaM bhavati 'utpadyate' iti | tatashcha 'paTaH'
ityukte 'utpadyate' iti na vAchyam, paunaruktyAt, 'vinashyati' ityapi na
vAchyam, utpattivinAshayoryugapadekatra virodhAt |
tasmAdiyaM paTotpattiH svakAraNasamavAyo vA, svasattAsamavAyo vA
? ubhayathA.api notpadyate, atha cha tadarthAni kAraNAni vyApAryante |
evaM sata eva paTAderAvirbhAvAya kAraNApekShetyupapannam |
na cha paTarUpeNa kAraNAnAM sambandhaH, tadrUpasyAkriyAtvAt,
kriyAsambandhitvAchcha kArakANAm, anyathA kAraNatvAbhAvAt |
tasmAt sat kAryamiti puShkalam |


kArikA 10


tadevaM pradhAnasAdhanAnuguNaM satkAryamupapAdya yAdR^ishaM tat
pradhAnaM sAdhanIyaM tAdR^ishamAdarshayituM vivekaj~nAnopayoginI
vyaktAvyaktasArUpyavairUpye tAvadAha \-

|| hetumadanityamavyApi sakriyamanekamAshritaM li~Ngam |
sAvayavaM paratantraM vyaktaM, viparItamavyaktam || 10 || ||

"hetumat" iti | vyaktaM hetumat, hetuH kAraNam, tadvat, yasya cha yo
hetustamupariShTAdvakShyati .
"anityam" vinAshi, tirobhAvIti yAvat |
"avyApi" sarvaM pariNAminaM na vyApnoti | kAraNena hi kAryamAviShTam, na
kAryeNa kAraNam | na cha buddhyAdayaH pradhAnaM veviShatItyavyApakAH |
"sakriyam" parispandavat | tathA hi buddhyAdayaH upAttamupAttaM dehaM tyajanti,
dehAntaraM chopAdadate, iti teShAM parispandaH | sharIrapR^ithivyAdInAM cha
parispandaH prasiddha eva |
"anekam" pratipuruShaM buddhyAdInAM bhedAt | pR^ithivyAdyapi
sharIraghaTAdibhedenAnekameva |
"Ashritam" svakAraNamAshritam | buddhyAdikAryANAmabhede.api
katha~nchidbhedavivakShayA.a.ashrayAshrayibhAvaH, yathA 'iha vane tilakAH'
ityuktam |
"li~Ngam" pradhAnasya | yathA chaite buddhyAdayaH pradhAnasya li~Ngam,
tathopariShTAdvakShyati | pradhAnaM tu na pradhAnasya li~NgaM puruShasya
li~NgaM bhavadapIti bhAvaH |
"sAvayavam" avayanamavayavaH, avayavAnAmavayavinAM mithaH saMshleSho mishraNaM
saMyoga iti yAvat | aprAptipUrvikA prAptiH saMyogaH | tena saha vartata iti
sAvayavam |
tathA hi\- pR^ithivyAdayaH parasparaM saMyujyante, evamanye.api, na tu
pradhAnasya buddhyAdibhiH saMyogaH, tAdAtmyAt | nApi sattvarajastamasAM
parasparaM saMyogaH, aprApterabhAvAt |
"paratantram" buddhyAdi | buddhyA svakArye.aha~NkAre janayitavye
prakR^ityApUro.apekShyate, anyathA kShINA satI nAlamaha~NkAraM janayitumiti
sthitiH | evamaha~NkArAdibhirapi svakAryajanane iti sarvaM svakAryeShu
prakR^ityA.a.apUramapekShate | tena parAM prakR^itimapekShamANaM kAraNamapi
svakAryajanane paratantraM vyaktam |
"viparItamavyaktam" vyaktAt | ahetumat, nityaM, vyApi, niShkriyam,
yadyapyavyaktasyAsti pariNAmalakShaNA kriyA, tathA.api parispando nAsti |
ekam, anAshritam, ali~Ngam, anavayavam, svatantram, avyaktam |


kArikA 11


tadanena prabandhena vyaktAvyaktayorvaidharmyamuktam | samprati tayoH
sAdharmyam, puruShAchcha vaidharmyamAha \-

|| triguNamaviveki viShayaH sAmAnyamachetanaM prasavadharmi |
vyaktaM tathA pradhAnam, tadviparItastathA cha pumAn || 11 || ||

"triguNam" iti | trayo guNAH sukhaduHkhamohA asyeti triguNam | tadanena
sukhAdInAmAtmaguNatvaM parAbhimatamapAkR^itam |
"aviveki" | yathA pradhAnaM na svato vivichyate, evammahadAdayo.api na
pradhAnAdvivichyante, tadAtmakatvAt | atha vA sambhUyakAritA.atrAvivekitA |
na hi ki~nchidekaM paryAptaM svakArye, api tu sambhUya | tatra naikasmAt
yasya kasyachit kenachitsambhava iti ||
ye tvAhuH \- 'vij~nAnameva harShaviShAdamohashabdAdyAtmakam, na
punarito.anyastaddharmA' iti\- tAn pratyAha \- "viShaya" iti | 'viShayo'
grAhyaH, vij~nAnAdbahiriti yAvat |
ata eva "sAmAnyam" sAdhAraNam, ghaTAdivat | anekaiH puruShairgR^ihItamityarthaH |
vij~nAnAkAratve tu asAdhAraNyAdvij~nAnAnAM vR^ittirUpANAM,
te.apyasAdhAraNAH syuH, vij~nAnaM yathA pareNa na gR^ihyate,
parabuddherapratyakShatvAdityabhiprAyaH | tathA cha nartakIbhrUlatAbha~Nge
ekasmin bahUnAM pratisandhAnaM yuktam | anyathA tanna syAditi bhAvaH |
"achetanam" | sarve eva pradhAnabuddhyAdayo.achetanAH, na tu vainAshikavat \-
chaitanyaM buddherityarthaH |
"prasavadharmi" \- prasavarUpo dharmo yaH so.asyA.astIti prasavadharmi |
prasavadharmeti vaktavye matvarthIyaH prasavadharmasya nityayogamAkhyAtum |
sarUpavirUpapariNAmAbhyAM na kadAchidapi viyujyate ityarthaH |
vyaktavR^ittamavyakte.atidishati \- "tathA pradhAnam" iti | yathA vyaktaM
tathA.avyaktamityarthaH |
tAbhyAM vaidharmyaM puruShasyAha \- "tadviparItaH pumAn" iti |
syAdetat\- ahetumattvanityatvAdi pradhAnasAdharmyamasti puruShasya,
evamanekatvaM vyaktasAdharmyam, tatkathamuchyate 'tadviparItaH pumAn' iti
? ata Aha \- "tathA cha" iti | chakAro.apyarthaH | yadyapyahetumattvAdikaM
sAdharmyam, tathA.apyatraiguNyAdivaiparItyamastyevetyarthaH |


kArikA 12


triguNamityuktam, tatra ke te trayo guNAH ? kiM cha tallakShaNam ? ityata
Aha \-

|| prItyaprItiviShAdAtmakAH prakAshapravR^ittiniyamArthAH |
anyonyAbhibhavAshrayajananamithunavR^ittayashcha guNAH || 12 || ||

"guNAH" iti parArthAH | "sattvaM laghu prakAshakam" ityatra cha sattvAdayaH
krameNa nirdekShyante | tadanAgatAvekShaNena tantrayuktyA vA prItyAdInAM
yathAsa~NkhyaM veditavyam |
etaduktaM bhavati \- prItiH sukham, prItyAtmakaH sattvaguNaH | aprItiH duHkham,
aprItyAtmako rajoguNaH | viShAdaH mohaH, viShAdAtmakastamoguNa ityarthaH |
ye tu manyante " na prItirduHkhAbhAvAdatirichyate, evaM duHkhamapi na
prItyabhAvAdanyaditi, tAn prati "Atma"grahaNam |
netaretarAbhAvAH sukhAdayaH, api tu bhAvAH, Atmashabdasya bhAvavachanatvAt,
prItirAtmAbhAvo yeShAM te prItyAtmAnaH | evamanyadapi vyAkhyeyam |
bhAvarUpatA chaiShAmanubhavasiddhA | parasparAbhAvAtmakatve tu
parasparAshrayApatterekasyApyasiddherubhayAsiddhiriti bhAvaH |
svarUpameShAmuktvA prayojanamAha \- "prakAshapravR^ittiniyamArthAH" iti |
atrApi yathAsa~Nkhyameva | rajaH pravartakatvAt sarvatra laghu sattvaM
pravartayet, yadi tamasA guruNA na niyamyeta, tamoniyataM tu kvachideva
pravartatIti bhavati tamo niyamArtham |
prayojanamuktvA kriyAmAha\- "anyonyAbhibhavAshrayajananamithunavR^ittayashcha"
iti | vR^ittiH \- kriyA, sA cha pratyekamabhisambadhyate |
"anyonyAbhibhavavR^ittayaH" eShAmanyatamenArthavashAdudbhUtenAnyadabhibhUyate |
tathA hi\- sattvaM rajastamasI abhibhUya shAntAmAtmano vR^ittiM pratilabhate,
evaM rajaH sattvatamasI abhibhUya ghorAm, evaM tamaH sattvarajasI abhibhUya
mUDhAmiti |
"anyonyAshrayavR^ittayaH" | yadyapyAdhArAdheyabhAvena nAyamartho ghaTate,
tathA.api yadapekShayA yasya kriyA sa tasyAshrayaH |
tathA hi\- sattvaM pravR^ittiniyamAvAshritya rajastamasoH prakAshenopakaroti,
rajaH prakAshaniyamAvAshritya pravR^ittyA itarayoH, tamaH prakAshapravR^ittI
Ashritya niyamenetarayoriti |
"anyonyajananavR^ittayaH" | anyatamo.anyatamaM janayati | jananaM cha
pariNAmaH, sa cha guNAnAM sadR^isharUpaH | ata eva na hetumattvam,
tattvAntarasya hetorabhAvAt | nApyanityatvam, tattvAntare layAbhAvAt |
"anyonyamithunavR^ittayaH" | anyonyasahacharAH avinAbhAvavR^ittaya iti yAvat |
"chaH" samuchchaye | bhavati chAtrAgamaH \-
"anyonyamithunAH sarve sarve sarvatra gAminaH |
rajaso mithunaM sattvaM sattvasya mithunaM rajaH ||
tamasashchApi mithune te sattvarajasI ubhe |
ubhayoH sattvarajasormithunaM tama uchyate ||
naiShAmAdiH samprayogo viyogo vopalabhyate " iti (de. bhA. 3/8) |


kArikA 13


"prakAshapravR^ittiniyamArthAH" ityuktam, tatra ke te itthambhUtAH
kutashchetyata Aha \-

|| sattvaM laghu prakAshakamiShTamupaShTambhakaM chalaM cha rajaH |
guru varaNakameva tamaH, pradIpavachchArthato vR^ittiH || 13 || ||

"sattvam" iti | sattvameva laghu prakAshakamiShTaM sA~NkhyAchAryaiH | tatra
kAryodgamane heturdharmo lAghavaM gauravapratidvandvi, yato.agnerUrdhvajvalanaM
bhavati | tadeva lAghavaM kasyachittiryaggamane heturbhavati, yathA vAyoH |
evaM karaNAnAM vR^ittipaTutvaheturlAghavam, gurutve hi mandAni syuriti
sattvasya prakAshAtmakatvamuktam |
sattvatamasI svayamakriyatayA svakAryapravR^ittiM pratyavasIdantI
rajasopaShTabhyete\- avasAdAt prachyAvya svakArye utsAhaM prayatnaM kAryete |
tadidamuktam\- "upaShTambhakam" iti | kasmAdityata uktam \- "chalam" iti |
tadanena rajasaH pravR^ittyarthatvaM darshitam |
rajastu chalatayA paritastraiguNyaM chAlayat guruNA.a.avR^iNvatA cha tamasA
tatra tatra pravR^ittipratibandhakena kvachideva pravartyata iti tatastato
vyAvR^ittyA tamo niyAmakamuktam\- "guru varaNakameva tamaH" iti | evakAraH
pratyekaM bhinnakramaH sambadhyate, sattvameva, raja eva, tama eveti |
nanu ete parasparavirodhashIlA guNAH sundopasundavat parasparaM
dhvaMsanta ityeva yuktaM prAgeva teShAmekakriyAkartR^itAyA ityata
Aha\- "pradIpavachchArthato vR^ittiH" iti | dR^iShTametat, yathA
varttitaile.analavirodhinI, atha milite sahAnalena rUpaprakAshalakShaNaM
kAryaM kurutaH | yathA cha vAtapittashleShmANaH parasparavirodhinaH
sharIradhAraNalakShaNakAryakAriNaH | evaM sattvarajastamAMsi mitho
viruddhyAnyapyanuvartsyanti svakAryaM kariShyanti cha |
"arthataH" iti | puruShArthata iti yAvat, yathA cha vakShyati\-
"puruShArtha eva heturna kenachit kAryate karaNam" iti (kA0 31)
atra cha sukhaduHkhamohAH parasparavirodhinaH svasvAnurUpANi
sukhaduHkhamohAtmakAnyeva nimittAni kalpayanti | teShAM cha
parasparamabhibhAvyAbhibhAvakabhAvAnnAnAtvam |
tadyathA \- ekaiva strI rUpayauvanakulashIlasampannA svAminaM sukhAkaroti |
tatkasya hetoH ? svAminaM prati tasyAH sukharUpasamudbhavAt | saiva strI
sapatnIrduHkhAkaroti, tat kasya hetoH ? tAH prati tasyA duHkharUpasamudbhavAt |
evaM puruShAntaraM tAmavindamAnaM saiva mohayati, tat kasya hetoH ? tat
prati tasyA moharUpasamudbhavAt | anayA cha striyA sarve bhAvA vyAkhyAtAH |
tatra yat sukhahetuH tat sukhAtmakaM sattvam, yat duHkhahetustat duHkhAtmakaM
rajaH, yanmohahetustanmohAtmakaM tamaH | sukhaprakAshalAghavAnAM tvekasmin
yugapadudbhUtAvavirodhaH, sahadarshanAt | tasmAt sukhaduHkhamohairiva
virodhibhiH avirodhibhirekaikaguNavR^ittibhiH sukhaprakAshalAghavairna
nimittabhedA unnIyante | evaM duHkhopaShTambhakatvapravartakatvaiH, evaM
mohagurutvAvaraNaiH \- iti siddhaM traiguNyamiti |


kArikA 14


syAdetat \- anubhUyamAneShu pR^ithivyAdiShvanubhavasiddhA
bhavantyavivekitvAdayaH | ye punaH sattvAdayo nAnyubhavapathamadhirohanti,
teShAM kutastyamavivekitvaM viShayatvamachetanatvaM prasavadharmitvaM cha
? ityata Aha \-

|| avivekyAdeH siddhistraiguNyAtadviparyayAbhAvAt |
kAraNaguNAtmakatvAtkAryasyAvyaktamapi siddham || 14 || ||

"avivekyAdeH" iti | avivekitvamaviveki | yathA 'dvyekayordvivachanaikavachane'
(pA. sU. 1.4.22) ityatra dvitvaikatvayoriti, anyathA dvyekeShviti syAt |
kutaH punaravivekitvAdeH siddhirityatra Aha \- "traiguNyAt" iti | "yadyat
sukhaduHkhamohAtmakaM tattadavivekitvAdiyogi, yathedamanubhUyamAnaM vyaktam"
iti sphuTatvAdanvayo noktaH |
vyatirekamAha \- "tadviparyayAbhAvAt" iti | avivekyAdiviparyaye puruShe
traiguNyAbhAvAt |
atha vA vyaktAvyakte pakShIkR^ityAnvayAbhAvenAvIta eva hetustraiguNyAditi
vaktavyaH |
syAdetat \- avyaktasiddhau satyAM tasyAvivekitvAdayo dharmAH sidhyanti,
avyaktameva tvadyApi na sidhyati, tatkathamavivekitvAdisiddhirata Aha\-
"kAraNaguNAtmakatvAt" iti |
ayamabhisandhiH\- kAryaM hi kAraNaguNAtmakaM dR^iShTam, yathA
tantvAdiguNAtmakaM paTAdi | tathA mahadAdilakShaNenApi kAryeNa
sukhaduHkhamoharUpeNa svakAraNaM sukhaduHkhamohAtmakaM pradhAnamavyaktaM
siddhaM bhavati |


kArikA 15\-16


syAdetat \- 'vyaktAt vyaktamutpadyate' iti kaNabhakShAkShacharaNatanayAH |
paramANavo hi vyaktAH, tebhyo dvyaNukAdikrameNa pR^ithivyAdilakShaNaM
kAryaM vyaktamArabhyate | pR^ithivyAdiShu cha kAraNaguNakrameNa
rUpAdyutpattiH | tasmAt vyaktAt vyaktasya tadguNasya chotpatteH
kR^itamadR^iShTachareNAvyaktenetyata Aha \-

|| bhedAnAM parimANAt samanvayAt shaktitaH pravR^itteshcha |
kAraNakAryavibhAgAdavibhAgAdvaishvarUpyasya || 15 || ||
|| kAraNamastyavyaktam, pravartate triguNataH samudayAchcha |
pariNAmataH salilavat pratipratiguNAshrayavisheShAt || 16 || ||

"bhedAnAm" iti | bhedAnAM \- visheShANAM mahadAdInAM
bhUmyantAnAM kAryANAM kAraNaM\- mUlakAraNamastyavyaktam | kutaH
? "kAraNakAryavibhAgAdavibhAgAdvaishvarUpyasya" | kAraNe sat kAryamiti sthitam |
tathA cha yathA kUrmasharIre santyevA.a~NgAni niHsaranti vibhajyante\-
'idaM kUrmasharIraM, etAnyetasyA~NgAni'\- iti | evaM nivishamAnAni
tasmin avyaktIbhavanti | evaM kAraNAmR^itpiNDAddhemapiNDAdvA kAryANi
ghaTamukuTAdIni santyevAvirbhavanti vibhajyante | santyeva pR^ithivyAdIni
kAraNAttanmAtrAdAvirbhavanti vibhajyante, santyeva cha tanmAtrANyaha~NkArAt
kAraNAt, santyevAha~NkAraH kAraNAnmahataH, sanneva cha mahAn paramAvyaktAt |
so.ayaM kAraNAt paramAvyaktAt sAkShAt pAramparyeNAnvitasya vishvasya kAryasya
vibhAgaH |
pratisarge tu mR^itpiNDaM suvarNapi~NgaM vA ghaTamukuTAdayo
vishanto.avyaktIbhavanti | tatkAraNarUpamevAnabhivyaktaM
kAryamapekShyAvyaktaM bhavati | evaM pR^ithivyAdayastanmAtrANi vishantaH
svApekShayA tanmAtrANyavyaktayanti | evaM tanmAtrANyaha~NkAraM
vishantyaha~NkAramavyaktayanti, evamaha~NkAro mahAntamAvishan
mahAntamavyaktayati,  mahAn prakR^itiM svakAraNaM vishan prakR^itimavyaktayati |
prakR^itestu na kvachinnivesha iti sA sarvakAryANAmavyaktameva |
so.ayamavibhAgaH prakR^itau vaishvarUpyasya \- nAnArUpasya kAryasya,
svArthikaH Shya~n, tasmAt kAraNe kAryasya sata eva vibhAgAvibhAgAbhyAmavyaktaM
kAraNamasti |
itashchAvyaktamastItyata Aha \- "shaktitaH pravR^itteshcha" iti |
kAraNashaktitaH kAryaM pravartata iti siddham, ashaktAt kAraNAt
kAryasyAnupapatteH, shaktishcha kAraNagato na kAryasyAvyaktatvAdanyA | na hi
satkAryapakShe kAryasyAvyAvyaktatAyA anyasyAM shaktau pramANamasti, ayameva hi
sikatAbhyastilAnAM tailopAdAnAnAM bhedo yadeteShveve tailamastyanAgatAvasthaM
na sikatAsviti |
syAdetat \- shaktitaH pravR^ittiH kAraNakAryavibhAgAvibhAgau cha mahata eva
paramAvyaktatvaM sAdhayiShyataH, kR^itaM tataH pareNAvyaktenetyata Aha \-
"parimANAt" iti | parimitatvAt, avyApitvAditi yAvat | vivAdAdhyAsitA
mahadAdibhedA avyaktakAraNavantaH, parimitatvAt, ghaTAdivat | ghaTAdayo
hi parimitAH mR^idAdyavyaktakAraNakA dR^iShTAH | uktametadyathA
kAryasyAvyaktAvasthA kAraNameveti, yanmahataH kAraNaM yat paramAvyaktam,
tataH paratarAvyaktakalpanAyAM pramANAbhAvAt |
itashcha vivAdAdhyAsitA bhedAH avyaktakAraNavantaH, "samanvayAt" |
bhinnAnAM samAnarUpatA samanvayaH |  sukhaduHkhamohasamanvitA hi
buddhyAdayo.adhyavasAyAdilakShaNAH pratIyante | yAni cha yadrUpasamanugatAni,
tAni tatsvabhAvAvyaktakAraNAni, yathA mR^iddhemapiNDasamanugatA ghaTamukuTAdayo
mR^iddhemapiNDAvyaktakAraNakA iti kAraNamastyavyaktaM bhedAnAmiti siddham |
avyaktaM sAdhayitvA asya pravR^ittiprakAramAha \- "pravartane triguNataH" iti |
pratisargAvasthAyAM sattvaM rajastamashcha sadR^ishapariNAmAni bhavanti |
pariNAmasvabhAvA hi guNA nApariNamya kShaNamapyavatiShThante | tasmAt sattvaM
sattvarUpatayA, rajo rajorUpatayA, tamastamorUpatayA pratisargAvasthAyAmapi
pravartate | tadidamuktaM \- "triguNataH" iti |
pravR^ittyantaramAha \- "samudayAchcha" iti | sametya udayaH \- 'samudayaH'
samavAyaH | samudayashcha guNAnAM na guNapradhAnabhAvamantareNa
sambhavati, na cha guNapradhAnabhAvo vaiShamyaM vinA, na
cha vaiShamyamupamardyopamardakabhAvAdR^ite, iti mahadAdibhAvena
pravR^ittirdvitIyA |
syAdetat\- kathamekarUpANAM guNAnAmanekarUpA
pravR^ittirityata Aha \- "pariNAmataH salilavat" iti |
yathA hi vAridavimuktamudakamekarasamapi tattdbhUvikArAnAsAdya
nArikelatAlatAlIbilvachirabilvatindukAmalakaprAchInAmalakakapitthaphalarasatayA
pariNamanmadhurAmlalavaNatiktakaShAyakaTutayA vikalpate,
evamekaikaguNasamudbhavAt pradhAnaM guNamAshrityApradhAnaguNAH pariNAmabhedAn
pravartayanti | tadidamuktam\- "pratipratiguNAshrayavisheShAt" |
ekaikaguNAshrayeNa yo visheShastasmAdityarthaH |


kArikA 16



##
Encoded and proofread by Dhaval Patel drdhaval2785 at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}