% Text title            : sAMkhyatattvavivecanam
% File name             : sAMkhyatattvavivecanam.itx
% Category              : major\_works
% Location              : doc\_z\_misc\_major\_works
% Transliterated by     : Dhaval Patel drdhaval2785 at gmail.com
% Proofread by          : Dhaval Patel drdhaval2785 at gmail.com
% Source                : sAnkhyasaNgrahaH 1918
% Latest update         : August 28, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. sAMkhyatattvavivechanam  ..}##
\itxtitle{.. sA~Nkhyatattvavivechanam ..}##\endtitles ##
\section{.. shrIShimAnandavirachitam ..}

raghunandanasutenedamiShTikApuravAsinA |
kAnyakubjadvijAgryeNa ShimAnandena tanyate || 1||
sAMkhyopaj~na namastubhyaM kapilAya mahAtmane |
pa~nchaviMshatitattvAnAM tattvaj~nAnapravartakaH || 2||
duHkhatrayAbhibhUtasya shAntirme syAt kutastviha |
tathopadisha janmAdi yathA na syAt kR^ipAnidhe || 3||
evaM pR^iShTo muniH prAha nirviNNAya kR^ipAnidhiH |
pa~nchaviMshatisUtrANi vyAkhyAtAni mahAtmabhiH || 4||
babandhuH kavayaH kAvye vyAchikhyuH kavayaH pare |
sAMkhyashAstrasya yAthArthyaM tadevedaM vivichyate ||
ShimAnandena mandena kukShimbharishatAdinA || 5||

\section{aShTau prakR^itayaH || 1 ||}

prakR^itirbuddhyahaMkArau tanmAtraikAdashendriyam |
bhUtAni cheti sAmAnyAchchaturviMshatireva te ||
eteShveva dharmadharmyabhedena guNakarmasAmAnyAnAmantarbhAvaH |
prakR^ititvaM cha sAkShAtparamparayAkhilavikAropAdAnatvam |
vyutpattistu prakR^iShTA pariNAmarUpA AkR^itirasyA iti | sA cha
sAmyAvasthayopalakShitasattvAdidravyatrayarUpA | sAmyAvasthA
cha shAntaghoramUDhAdirUpANAmapi asamudAyavadrUpatvepi
atishayaiH samudAyavadbhiravirodhena vartamAnatvaM sAmAnyAtmanA
guNabhAvo.atishayAtmanA prAdhAnyaM visheShAtmanA vaiShamyamityato
nyUnAdhikabhAvenAsaMhatAvasthA.akAryAvastheti yAvat | mahadAdikaM
tu kAryasattvAdikaM na kadApyakAryAvasthaM bhavatIti tadvyAvR^ittiH |
vaiShamyAvasthAyAmapi prakR^ititvasiddhaye upalakShitamityuktaM
sattvAdiguNavatI prakR^itiH sattvAdyanatiriktatvAt tathA cha sUtraM
sattvAdInAmataddharmatvaM tadrUpatvAditi sattvAdInAM prakR^itisvarUpatvaM
na tu prakR^itidharmatvam | guNebhya eva sarvakAryopapattau
tadanyaprakR^itikalpanAvaiyarthyAt | sUtrabhAShyAbhyAmapi
tathoktatvAt | yattu prakR^iterguNA itivat vanasya vR^ikShA itivat
vyaShTisamaShTyabhiprAyeNeti sattvaM rajastama iti prakR^iterabhavan guNA
iti cha na sattvAdInAM prakR^itikAryatvavachanaM guNanityatAvAkyavirodhena
mahattattvakAraNIbhUtakAryasattvAdiparam | mahadAdisR^iShTirguNavaimyAt |
tachcha sajAtIyasaMvalanena guNAntaravyAvR^ittaprakAshAdiphalopahitaH
sattvAdivyavahArayogyaH pariNAma iti sattvAdivyavahAro vaiShamya evetyAha
shrutiH yathA tama evedamagra AsIt tatpare syAt pareNeritaM viShamatvaM(1)
pratyayAdvai rajaso(2) rUpaM tadrajaH khalvIritaM viShamatvaM pratyayAdvai
sattvasya(3) rUpamiti sattvAditrayaM cha sattvAdisvarUpamiti
sattvAditrayaM cha sukhaprakAshalAghavaprasAdAdiguNakatayA
saMyogavibhAgAdimattayAnAshritatvopAdAnatvAdinA dravyatve.api
puruShopakAratvAt puruShabandhakatvAchcha guNashabdenochyate
indriyAdivat guNAnAM sukhaduHkamohAtmakapravAdastu
dharmadharmyabhedAt manasaH sa~NkalpAtmakatvavat tatra sattvaM
sukhaprasAdaprakAshAdyanekadharmakamapi pradhAnatastu sukhAtmakamuchyate |
evaM rajo.api duHkhakAluShyapravR^ityAdyanekadharmakaM prAdhAnyatastu
duHkhAtmakamuchyate | evaM tamo.api mohAvaraNastambhanAdyanekadharmakaM
prAdhAnyatastu mohAtmakamuchyate | sato bhAvaH sattvaM dharmaprAdhAnyenottamaM
puruShopakaraNaM rAgayogAdrajo madhyamam | tamodharmAvaraNayogAdadhamaM
sattvAdInyasaMkhyavyaktayaH pratikShaNapariNAmitvAt laghutvAdidharmairanyonyaM
sAdharmyaM vaidharmyaM cha guNAnAmasaMkhyAtamiti sUtrAt |
ekadAnekapuruShAdisR^iShTishravaNAchcha ekaikavyaktitve vibhutvaM syAt
tathA cha saMyogavaichitryAbhAvAdanantavaichitryaM kAryANAM na syAt |
dravyAntarasyAvachChedakIbhUtasyAbhAvAchcha | tasmAdasaMkhyAtAnyeva
sattvAdIni tritvakathanaM tu vibhAjakopAdhitrayeNaiva vaisheShikANAM
navadravyavachanavat sattvAdIni cha yathAyogyamaNuvibhuparimANakAni itarathA
rajasashchalasvabhAvatvavachananirodhaH syAt | AkAshakAraNasya vibhutvauchityAt
sarvakAraNadravyavibhutve kAryaparichChedAsambhava iti ||
shabdasparshavihInaM tadrUpAdibhirasaMhatam |
triguNaM tajjagadyoniranAdiprabhavApyayam ||
ityAdyukterna paramANvAdAvantarbhAvaH prakR^iteriti |
athaivamapi prakR^iteraNuvibhusAdhAraNasattvAdyanekavyaktirUpatve
aparichChinnatvaikatvAkriyatvasaiddhAntakShatiriti chenna
kAraNadravyatvasvarUpaprakR^ititvenaivAparichChinnatvavachanAdgandhatvena
gandhAnAM pR^ithivIvyApakatAvat AkAshAdiprakR^itInAM vibhutvenaiva
prakR^itivibhutvasiddhAntopapatteshcha | tathA puruShabhedena sargabhedena
cha bhedAbhAvasyaiva ekashabdArthatvAt | ajAmekAmitishrutestathAvagamAt |
tathAdhyavasAyo.abhimAnAdikriyArAhityasyaivAkriyashabdArthatvAdityanyathA
shrutismR^itityuktasya prakR^itikShobhasyAnupapatteriti | tatrAyaM prayogaH
sukhaduHkhamohAtmakamahadAdikAryaM sukhaduHkhamohAtmakadravyakAryaM
sukhaduHkhamohAtmakatvAt vastrAdikAryashayyAvaditi prakR^itau pramANam |
bAhyavastuShu sukhAdikamuttamatvAdikameva ghaTarUpamitivachchandanasukhaM
strIsukhamityAdipratyayAchcheti dik |
avyaktabuddhyaha~NkArAstanmAtrANAM cha pa~nchakam |
aShTau prakR^itayastvetAH sapta cha vyaktatAmiyAt ||
avyaktaprakR^itijanyatvAt avyaktAnIti chochyate |
vyajyante cha yathA loke ghaTAdyA na tathA hi tat ||
avyaktaM prakR^itirmAyA pradhAnaM brahma kAraNam |
avyAkR^itaM tamaHpuShpaM kShetramakSharanAmakam ||
bahudhAtmakAdinAmAni tasyAmI te jagurbudhAH |
vyajyate nendriyairyasmAdavyaktamata uchyate |
anAdimadhyanidhanAnnira~Ngatvena tat tathA ||
tadevAha shrutiH |
ashabdamasparshamarUpamavyayaM
yathA cha nityaM rasagandhavarjitam |
anAdimadhyaM mahataH paraM dhruvam
pradhAnametat pravadanti sUrayaH || iti
tasmAdali~NgakaM sUkShmaM tathA prasavadharmikam |
ekaM sAdhAraNaM tatra kAryaM kasyApi netare ||
buddhirmahAn mano brahmA matiH khyAtirapUrvakam |
praj~nA bhUtirdhR^itirj~nAnaM santatiH smR^itirityapi ||
hairaNyagarbhyA buddhestu mahato nAma sUchitam |
guNebhyaH kShobhyamANebhyastrayo vedA vijaj~nire ||
ekA mUrttistrayo devA brahmaviShNumaheshvarAH | iti
viShNurevAdisargeShu svayaMbhUrbhavati prabhuH ||
atra sattvAdyaMshatrayeNa mahato devatAtrayopAdhitvAttadavivekena tisra iti |
sAttvikAMshAt pradhAnAt tu mahattattvamajAyata iti mahattvasya prAdhAnyena
chAdhyavasAyo vR^ittirmahadahaMkAramanastritayAtmakasyAntaHkaraNavR^ikShasya
mahattattvaM bIjAvasthA taduktaM sAMkhyasUtre idameva mahattattvamaMshato
rajastamaHsaMbhedena pariNataM sat vyaShTijIvAnAmupAdhiradharmAdiyuktaM
kShudramapi bhavati mahaduparAgAdviparItamiti |
mahatastriguNasvarUpatvAddehasya dehinA kAlarUpaviShNunA
kShobhyadashAyAM guNarUpopAdhiprAdhAnyAdaviveke brahmaviShNushivatvaM
tatra mahAn suShuptyabhimAnI shivastadupAdhistamaHkAryarUpI tatra
svapnAbhimAnI viShNustadupAdhiH kAryasattvaM tatra jAgradabhimAnI
brahmA tadupAdhiH kAryarajaH tatra samudAyasamunnayananyAyena
samaShTervyaShTyananyatvAnmashakAdirapi viShNureveti bhAvaH | sR^iShTistu
mahadAdikrameNaiva na tu bhUtAdikrameNeti ||
sA cha kaurme
bhUtAdistu vikurvANaH shabdamAtraM sasarja ha |
AkAshasuShiraM tasmAdutpannaM shabdalakShaNam ||
AkAshaM tu vikurvANaH sparshamAtraM sasarja ha |
vAyurutpadyate tasmAttasya sparsho guNo mataH || ityAdi
nanvevaM chedAkAshAdInAM kevalaM vikR^ititvaM kathaM tatra AkAshAdInAM
sparshAditanmAtreShu ahaMkAropaShTambhamAtreNa kAraNatvasya purANAdiShUktatvAt
|
na pumAn sthANurevAyaM buddhiradhyavasAyinI |
puruShAdhiShThitAt sarvagatAjjAtA pradhAnatA ||
chichChaktiryAdR^ishI tAdR^ig vR^ittiH sattvavimishritA |
rajoguNasvarUpA yat trivR^itkaraNataH shruteH ||
j~nAnaM dharmashcha vairAgyamaishvaryaM sattvato hyamI |
anaishvaryamavairAgyamadharmo.aj~nAnameva tu ||
tamasashchApi te j~neyA buddherbhedA itIritAH |
j~nAnaM tattvAvabodho.ayaM dharmaH shrutyuktapAlanam ||
vairAgyamarthAnAsaktiraishvaryamaNimAdikam |
tattadviparyayeNaiva tAmasaM tachchatuShTayam ||
j~nAnena mokSho dharmeNa gatirUrdhvA bhavediti |
vairAgyenAkSharalaya aishvaryeNAhatA gatiH ||
evameShAShTadhA shaktirvyAkhyAtA buddhisa~nj~nitA |
pradhAnavikR^itistveShAhaMkAraprakR^itishcha sA ||
mUlaprakR^itirityAdi kavibhishcha nirUpitam |
eko.ahaMkAra ityetajjij~nAsA chedvibhAvaya ||
yo.ahaMshabdaM karotyeSha abhimAna iti smR^itaH |
spR^ishe.ahaM rasaye vAhaM svAmI chAhaM mayA hR^itaH ||
ityAdi nAma yasyAsIttasya bhedA amI shR^iNu |
vaikArikastaijaso.api bhUtAdiH sAnumAnakaH ||
niranumAnashcha pa~nchaite bhedAstasya prakIrttitAH |
vaikArikaH sAttviko.ayaM bhUtAdistAmasaH smR^itaH ||
taijaso rAjaso j~neyastasmAt tanmAtrapa~nchakam |
ekAdashendriyagaNaH sAttvikAdabhijAyate ||
devatAstvabhimAninyastaijasAdapi chochyate |
tadeva kathamevaM chet trivR^itkaraNahetutaH ||
shabdatanmAtramityetat shabda evopalabhyate |
na tUdAttaniShAdAdibhedastasyopalabhyate ||
sparshatanmAtramevaitat sparsha evopalabhyate |
na tu shItamR^idutvAdivisheShastasya labhyate ||
rUpatanmAtramevaM vai rasatanmAtramapyatha |
gandhatanmAtrameteShu visheSho nopalabhyate ||
tanmAtrANyavisheShANi sUkShmabhUtAni chochyate |
bhogyAni shAntaghorAni prakR^ityA.aNava eva cha ||
kurvadrUpAt prakR^itayaH saMkhyayA.aShTau prakIrttitAH ||


\section{ ShoDasha vikArAH || 2 || }

ekAdashaivendriyANi mahAbhUtAni pa~ncha cha |
vikArAH ShoDashaivaite na tu prakR^ititAjuShaH ||
shrotraM tvak chakShUShI jihvA ghrANaM j~nAnendriyaM tvidam |
vAkpANipAyUpasthapAdAH karmendriyaM matam ||
svaM svaM karma prakurvanti j~nAnaM cheti yathaiShitam |
ubhayAtmakaM manashchaiva saMkalpAdisvarUpavat ||
karaNAnIndriyANIti vaikArikamayaM rayaH |
padAni niyatAnItyakShANItyabhidhIyate ||
pR^ithivIjalatejAMsi vAyurAkAsha ityapi |
mahAbhUtAni pa~nchaiva dhAraNAdyupakArataH ||
ApaH saMgrahabhAvena chaturNAmupakArikAH |
tejaH pAchakabhAvena vAyurvahanabhAvataH ||
shabdAdipa~nchaguNavatpR^ithvI pa~nchaguNA matA |
ApaH shabdAdisahitAH gandhena rahitAstathA ||
tejaH shabdasparshavat rUpavat shvasane punaH |
shabdashcha sparsha ityevamAkAshe shabda eva tu ||
na tu vigrahabhUtAni visheShAkR^itayastathA |
vikArAH shAntaghorAkhyamUDhAH trividhakIrttitAH ||

\section{ puruShaH || 3 || }
puri shayanAt pramANAt pUraNAt puruvR^ittitaH |
sa chAnAdiH sarvagatashchetano nirguNo.aparaH ||
draShTA bhoktA kShetravidamalo.aprasavadharmakaH |
sUkShmo nityo hyanAdistvamadhyanidhano.api saH ||
sarvamAptamaneneti tasmAt sarvagatastu saH |
sukhopalabdhimattvAchcha chetano nirguNastathA ||
sattvAdiguNarAhityAt paraH paratayA smR^itaH |
dR^ishyaprakR^itisambandhAt draShTA bhoktA.anubhAvanAt ||
kShetre guNagataM vetti kShetraj~na iti kIrttitaH |
shubhAshubhAdisaMsargAbhAvAdamala IShyate ||
nirbIjatvAt prasUte cha netyaprasavadharmakaH |
nira~NgatvAtIndriyatvAt sUkShmo nityaH sadAtanAt ||
evaM sAMkhyaH sa puruSho vyAkhyAtaH pUrvasUribhiH |
jIvo jantuH pumAnAtmA puruShaH pUjako naraH ||
kShetraj~nashchAkSharaH prANaH koya eShaH sa j~nastathA |
aja etAni nAmAni sAMkhye puruShasa~nj~nite ||
evam,
pa~nchaviMshatitattvaj~no yatra kutrAshrame rataH |
muNDI jaTI shikhI vApi muchyate nAtra saMshayaH ||
ayaM kartA.athavA.akarttA puruShaH prakR^iteH paraH |
shubhAshubhAni karttA chet kuryAdvR^ittitrayaM vinA ||
lokadR^iShTaguNAnAM chet kartR^itA dharmitA katham ||
sAhityaM yamaniyamaniShechanaprasaMkhyAnAt |
j~nAnaishvaryavikAraprakAshane sAttvikI vR^ittiH ||
rAgaH krodho lobhaH paraparivAdo nindA tuShTiH |
vikR^itAkR^itapAruShyaM prakhyAtaiShA rajobuddhiH ||
unmAdamadaviShAdA nAstikyaM strIprasa~NgitA |
nidrAlasyaM nairghR^iNyaM tvashauchamiti tAmasI vR^ittiH ||
etadvR^ittitrayaM dR^iShTvA guNAnAM kartR^itA.athavA |
akartA puruShaH siddha iti siddhAnta iShyate ||
pravarttamAnaprakR^iterimAn guNAn
rajastamobhyAM viparItadarshanAt |
AtmAnamAchChAdya sa Atmane tad
aha~NkaromItyabudho.avamanyate ||
bAlAgrakukShIkaraNAsamarthaH
sarvaM mayedaM kR^itamityamanyata |
unmattavadbhAvyata ityabodhaH
aho vidhe paNDitamAninaH kaH ||
taduktaM gItAsu
prakR^iteH kriyamANAni guNaiH karmANi sarvashaH |
aha~NkAravimUDhAtmA kartA.ahamiti manyate ||
anAditvAnnirguNatvAt paramAtmA.ayamavyayaH |
sharIrastho.api kaunteya na karoti na lipyate ||
prakR^ityaiva cha karmANi kriyamANAni sarvashaH |
yaH pashyati sadA.a.atmAnamakartAraM sa pashyati || ityAdi |
sa ekaH puruShaH kiM vA nAneti cha vichAraya |
sukhaduHkhamohasa~NkaravishuddhajanmamaraNAnAm |
nAnAtvAt puruShabahutvaM siddhaM lokAshramavarNabhedAchcha ||
yadyekaH puruShaH syAd buddhihAniH prasajyate |
ekasmin sukhite sarve sukhinaH syurataH param |
ekasmin duHkhite sarve duHkhitAH syuriti kramAt ||
ato bahutvaM saMsiddhaM bahavaH puruShAH smR^itAH .
AkR^itigarbhAshayabhAvasa~NgatisharIravibhAgAlli~NgabahutvAt sAMkhyAchAryAH
kapilAsuripa~nchashikhapata~njaliprabhR^itayaH puruShabahutvaM varNayanti |
vedavAdina AchAryA hariharahiraNyagarbhavyAsAdaya ekamAtmAnaM, tathA cha
shrutiH |
puruSha evedaM sarvaM yadbhUtaM yachcha bhAvyam |
utAmR^itatvasyeshAno yadanyenAtirohati |
tadevAgnistadAdityastadvAyustadu chandramAH ||
tadeva shukraM tadbrahma tA ApaH sa prajApatiH |
tadeva satyamamR^itaM sa mokShaH sA parA gatiH ||
tadakSharaM tatsaviturvareNyaM yasmAt paraM nAparamasti ki~nchit |
yasmAnnANIyo na jyAyo.asti ki~nchit ||
vR^ikSha iva stambho divi tiShThatyekaH tenedaM pUrNaM puruSheNa |
sarvataH pANipAdaM tat sarvato.akShishiromukham ||
sarvataH shrutimalloke sarvamAvR^itya tiShThati |
sarvendriyaguNAbhAsaM sarvendriyavivarjitam ||
sarvasya pashumIshAnaM sarvasya sharaNaM mahat |
sarvataH sarvasattvAni sarvAtmA sarvasambhavaH ||
sarvaM vilIyate yasmin tadbrahma munayo viduH |
eka eva hi bhUtAtmA bhUte bhUte vyavasthitaH ||
ekadhA bahudhA chaiva dR^ishyate jalachandravat |
sa hi sarveShu bhUteShu sthAvareShu chareShu cha ||
vasatyeko mahAnAtmA yena sarvamidaM tatam || ityAdi |


\section{ traiguNyam || 4 || }

sattvaM rajastama iti guNAH bhAveNyastraiguNyam |
prasAdo lAghavaM sa~NgaH prasa~NgAt prItirArjavam ||
tuShTistitikShA sattvasya rUpaM sAkShAt sukhAvaham |
shokastambhadveShatApakhedabhogAbhimAnitA ||
rajorUpANyanekAni bahuduHkhapradAni vai |
tamo nAmAchChAdanAdi bIbhatsAvaraNAdi cha ||
dainyagauravanidrAdipramAdAlasyalakShaNam |
mohAtmakamanantaM tadevaM traiguNyamIritam |
sattvaM prakAshakaM vidyAdrajo vidyAt pravarttakam ||
vinAshakaM tamo vidyAt traiguNyaM nAma sa~nj~nitam |

\section{ sa~ncharaH || 5 || }
sAmyAvasthA guNAnAM yA prakR^itiH sA svabhAvataH |
kAlakShobheNa vaiShamyAt kShetre parayute purA ||
buddhistatashchAha~NkArastrividho.api vyajAyata |
tanmAtrANIndriyANi mahAbhUtAni cha kramAt ||
evaM krameNaivotpattiH sa~ncharaH parikIrttitaH |

\section{ pratisa~ncharaH || 6 || }
vyutkrameNaiva lIyante tanmAtre bhUtapa~nchakam |
tanmAtrANIndriyANi aha~NkAre vilIyate ||
aha~NkAro.atha buddhau tu buddhiravyaktasa~nj~nake |
avyaktaM na kvachillInaM pratisa~nchara iti smR^itaH ||

\section{ adhyAtmamadhibhUtamadhidaivataM cha || 7 || }
buddhyAha~NkAramanasI shrotraM tvak chakShuShI tathA |
jihvA ghrANaM pAdapAyUpasthamadhyAtmasa~nj~nitam ||
yattu mokShadharme
Adau mana aha~NkArAt jAyate vR^ittayaschatAH ||
shabdarAgAt shrotramasya jAyate bhAvitAtmanaH |
rUparAgAt tathA chakShurghrANaM gandhajidhR^ikShayA ||
ityAdinendriyANAM manovR^ittirAgAdikAryatvaM tadvedAntarItyaiveti mantavyam |
adhibhUtam |
yathAkrameNa boddhavyamabhimantavyameva cha |
sa~NkalpitavyaM shrotavyaM spraShTavyaM draShTavyameva cha ||
rasayitavyaM ghrAtavyaM gantavyamutsraShTavyaM cha |
AnandayitavyamityevamadhibhUtaM prakIrtitam ||
adhidaivataM cha |
brahmA rudrashchandramAshcha AkAsho vAyureva cha |
sUryo varuNa indrashcha viShNumitraM tathaiva cha ||
anenaiva krameNedaM samproktamadhidaivatam |
chatvAri yo vedayate yathA cha\-
kShuShA svarUpANyadhidaivataM vA |
vimuktayAthAgatadoShasa~Ngo\-
guNAMstu bhu~Nkte na guNaiH sa yujyate ||

\section{ pa~nchAbhibuddhayaH || 8 || }
ichChAbhirbuddhirvij~neyA Abhimukhyena karmaNaH |
idaM me kAryamityeSho.adhyavasAyaH karomyaham ||
ichChA vA~nChA.atha sa~Nkalpo manasaH karma cheShyate |
evametAshcha pa~nchAbhibuddhayaH parikIrtitAH ||

\section{ pa~ncha karmayonayaH || 9 || }
dhR^itiH shraddhA sukhechChA vividiShA tadabhAvakau |
sAmAnyataH samuddiShTAH pa~nchaite karmayonayaH ||
vAchi karmaNi saMkalpe pratItiryAbhirajyate |
tanniShThastatpratiShThashcha dhR^iteretaddhi lakShaNam ||
anasUyA brahmacharyaM yajanaM yAjanaM tapaH |
pratigrahashcha homashcha shraddhAyA lakShaNaM smR^itam ||
sukhaM sukhArthI seveta vidyA karma tapAMsi cha |
prAyashchittaparo nityaM sukheyaM parikIrttitA ||
viShadhUmamUrChitavad vividiShA dhyAninAM praj~nAyoniH |
ekatvaM cha pR^ithaktvaM cha nityaM vedamachetanam ||
sUkShmasatkAryasaMkShobhyaM j~neyA vividiShA hi sA |
kAryakaraNakShamakarI vividiShA prAkR^itI vR^ittiH ||
dhR^itiH shraddhA vividiShA sukhA cheti chatuShTayam |
j~neyaM bandho vividiShA mokShAya parikalpitA |
karmayonisvarUpo.ayaM vishiShya parikIrttitaH ||

\section{ pa~ncha vAyavaH || 10 || }
prANo.apAnaH samAnashcha udAno vyAna eva cha |
ityete vAyavaH pa~ncha sharIreShu sharIriNAm ||
mukhanAsAdhichArI yaH prANanAt prANa uchyate |
nAbheradhicharatyevopAnaye.apAna iShyate ||
hR^idyadhiShThAnanayanAt samAna iti kIrtitaH |
kaNThAdUrdhvAvagamanAdudAna iti cha smR^itaH ||
sandhyadhiShThAnato vyAno vikShepaNavijR^imbhaNAt |

\section{ pa~ncha karmAtmAnaH || 11 || }
vaikArikAdayaH pUrvaM yathAkramamudAhR^itAH |
shubhaM vA.ashubhamUDhau cha shubhamUDhA.ashubhamUDhake ||
yathAkramaM cha karttArastattatkarma samIritam |

\section{ pa~nchaparvA avidyA || 12 || }
tamo moho mahAmohastAmisrashchAndhatAmisraH ||
aShTakau tau tamau mohau prakR^ityaShTakaniShThitau |
Atmaj~nAnAbhimAnyeyaM prAptyAdyaishvaryamAnitA ||
nirvR^itte viShaye dR^iShTe pa~nchAnushravike tathA |
moho.ahamabhimAno yo mahAmoho dashAtmakaH ||
aShTaishvarye dashaviShaye siddhatAmisra uchyate |
viShAdaH so.andhatAmisro maraNe pratipadyate ||
avidyA pa~nchaparvaiShA bhinnA dvAShaShTibhedataH |

\section{ aShTAviMshatidhA.ashaktiH || 13 || }
jaDatvakuShTikubjatvarUpatA\-
.aghrANatvamUkatvasupa~NgutAshcha |
kuNirgudAvartti cha ShaNDhatA cha
unmAda ityeSha nirUpito.ayam ||
ekAdashendriyavadho bAdhiryAdisvarUpataH |
buddhervadhaH saptadasha tuShTisiddhiviparyayaH ||
nAsti pradhAnamiti yA pratipattirajambhikA |
na mahAnityasalilA nAyAchChA chAnahaMkR^itau ||
na vA.astyadR^iShTistanmAtrapa~nchakaM bhUtakAraNam |
sarvamevedaM brahmeti brahmaiva san brahmApyeti |
yathA vedAntinAM tadvat sAMkhyAnAmIdR^ishI matiH ||
asutA viShayArjane pravR^ittiH
sutarA parirakShaNe pravR^ittiH |
krayadoShamapashyato dhane pravR^ittiH
asunetrA parikIrttyate hi sAMkhyaiH ||
akurmarIchikAbhogashaktirhiMsAdyapashyataH |
anuttambhAmbhasikA doShabhogAdambhaH pravarttanam ||
navadhA kathitA hyete tatra tuShTirviparyayAH |
kathyante siddhayo hyaShTau te.amI siddhiviparyayAH ||
nAnAtvamUhamAnasya siddhamekamatArakam |
viparItagrahaH shabdashravaNAdasutArakam ||
nAnAtvaj~no mukta iti shrutvaikaj~no na muktibhAk |
atArayantamaj~nAnAsadachChAstraniveshataH |
duHkhitasyApyanudvegAdapramodA hi saMsR^itau ||
apramudaM tadaj~nAnapramuditamapramodamAnaM vA |
asamyagvachanAdapyuparodhena vA gurau ||
abhAgyasya na siddhiH syAt j~nAne tat samudIritam |
snigdhasaMsargato j~nAnottarAj~nAnamaramyakam ||
vyAkhyAtAH pUrvarItyAShTAvete siddhiviparyayAH |
aShTAviMshatidhA.ashaktirvyAkhyAtobhayayogataH ||

\section{ navadhA tuShTiH || 14 || }
prakR^itau paramAtmatvaM pratipadyaiva tuShTibhAk ||
mAdhyasthyamavalambeta ambhaH sA tuShTiruchyate |
buddhau cha paramAtmatve tuShTiH sA salilA smR^itA ||
ahaMkAre yadA sA syAdAyAchChA iti shabdhitA |
tanmAtreShu yadA sA syAt tuShTirdR^iShTirnigadyate ||
AdhyAtmikAshchatasrastu tuShTayaH prabhavanti hi |
mokShastAsvapi nAstyeva tattvaj~nAnAdyathoditA ||
arthAnAmarjane duHkhamarjitAnAM cha rakShaNe |
tyAge duHkhaM kShaye duHkhaM dhigarthaM duHkhabhAjanam || iti
doShadarshanasantuShTaH parabrahmaiva mokShabhAk |
suteyaM pa~nchamI tuShTistattvaj~nAnAdyabhAvataH ||
rakShaNe sutarA ShaShThI saptamI kShayadarshanAt |
sunetrA sa~NgadoShA chAShTamI kurmarIchikA ||
arthe hiMsAdidoSheNa nivR^ittishcha samaskarI |
tuShTistu navamI proktA hyuttamAmbhasikA tava ||

\section{ aShTadhA siddhiH || 15 || }
j~nAnaM yaddUramutpannaM tArAkhyA prathamA hi sA |
shabdamAtreNa bhUteShu sutArA j~nAnamiShyate ||
j~nAnamadhyayanenaiva tArayantI tR^itIyakA |
adhyAtmaduHkhApanayAt pramodetyabhidhIyate ||
bhautikakleshaharaNAt pramudA siddhiruchyate |
AdhidaivakleshaharaNAt j~nAnamutpadyate nR^iNAm ||
pramodamAnetyAkhyAtA ShaShThI siddhiH svayaM satAm |
snigdhasaMsarganAshAttu ramyakA saptamI smR^itA ||
pramudA chAShTamI siddhiH paricharyAdinA guroH |
ityetAH siddhayo hyaShTau vyAkhyAtAH j~nAnasAdhikAH ||

\section{ dasha mUlikArthAH || 16 || }
astitvamekatvayathArthavattve
pArArthyamanyatvamakartR^ikatvam |
yogo viyogo bahavaH pumAMsaH
sthitiH sharIrasya cha sheShavR^ittiH ||
eShA sA dashamUlikA.arthagaNanA sa~NghAtapArArthyataH
siddhA sA puruShAstitA pariNaterbhedasya tatkAraNam |
astyavyaktamanantamekamiti cha premAviShAdAtmakaM
nAnApAyaparArthatA triguNato.anyatvasya siddhistathA ||
viparyAsAdakartR^itvaM yogaH puruShadarshanAt |
prApte sharIrabhede tu charitArthatvadarshanAt ||
janmAdikaraNAntAnAM bhedAnnAnA hi te smR^itAH |
chakrabhramivat sheShavR^ittiH siddhArthAH dasha mUlikAH ||
saptatyA prAgupadiShTAH pa~nchAshat pratyayA ime |
dashaShaShTipadArthaistu ShaShTitantra itIryate ||

\section{ anugrahasargaH || 17 || }
brahmAnugrahamasR^ijadrUpatanmAtrataH pR^ithak |
utpAdyAnugrahadhyAnAt prAktanAdhAravarjanAt ||

\section{ chaturdashavidho bhUtasargaH || 18 || }
aShTavikalpaM daivaM paishAchaM rAkShasaM tadvat |
gAndharvamaindraM brAhmaM cha saumyaM brAhmyamathAShTakam ||
devayonaya evaite tiryagyonistu pa~nchadhA |
mR^igapashupakShisarIsR^ipasthAvaramiti bhedasambhinA ||
mAnuShyakaM chaikavidhaM brAhmaNAdichANDAlAntam |
pashavo gavAdimUShAntAH pakShiNo garUDAdikAH ||
mashakAntA mR^igAshchApi siMhAdi cha shivAntikAH |
sheShAdi alagardAntAH sarpAH parvatabhUtR^iNAH ||
sthAvarA bhautikaH sarga etatsaMsAramaNDalam ||

\section{ trividho bandhaH || 19 || }
prakR^itibandhaH prakR^itilayaH paratvenAbhimanyataH |
saMnyAsinAmindriyeShu layo vaikAriko.aparaH ||
gR^ihINAM dakShiNAbandho vadAnyatvAbhimAninAm |
ityeShastrividho bandhastrividho mokSha uchyate ||

\section{ trividho mokShaH || 20 || }
j~nAnodrekAduparateshcha dharmAdharmakShayo bhavet |
dharmAdharmakShayAchchAtha kaivalyamiti gIyate ||
taduktam |
Adyo hi mokSho j~nAnena dvitIyo rAgasaMkShayAt |
kR^itsnakShayAt tR^itIyastu vyAkhyAtaM mokShalakShaNam ||

\section{ trividhaM pramANam || 21 || }
dR^iShTamanumAnamAptavachanaM chaitat pramANakam |
pa~nchendriyANi pratyakShaM vR^iShTirmeghodayena tu ||
anumAnamindro devAnAM rAjAshabdaH pramApakaH ||
Agame.api,
svakarmabhirvinirmukto rAgadveShavivarjitaH ||
j~nAnavAn shIlasampannaH so.api j~neyashcha tAdR^ishaH ||

\section{ trividhaM duHkham || 22 || }
duHkhaM tu trividhaM proktamadhyAtmamadhibhUtakam |
AdhidaivaM cha tatrApi prathamaM dvividhaM smR^itam ||
shArIraM mAnasaM cheti vAtakAmAdidoShajam |
bhUtebhyo mAnuShAdibhyo jAtaM syAdAdhibhautikam ||
devebhyaH shItavAtAdibhavaM syAdAdhidaivikam |
etat samAsataH proktA sUtravyAkhyA yathAmati ||
prakriyAM cha pravakShyAmi paurANikahitAya vai ||

\section{ etat paramparayA yAthAtathyam || 23 || }
\section{ etat sarvaM j~nAtvA kR^itakR^ityaH syAt || 24 || }
\section{ na punastrividhena duHkhenAbhibhUyate || 25 || }
mahAn ahaMkAraH pa~ncha tanmAtrANi avyaktasaMj~nAni bhavanti mahachChabdena
hairaNyagarbho buddhiruchyate | pradhAnaM mUlamavyaktasaMj~nam | j~naH
puruShaH | etAni pa~nchaviMshatitattvAni | tatra pradhAnaM kAraNameva na
kAryam | mahadAdayaH sapta pUrvapUrvasya kAryANi uttarottarasya kAraNAni |
indriyANyekAdasha pa~ncha mahAbhUtAni kAryANyeva na kAraNAni | puruShastu
na kAryaM na vA kAraNam | taduktam mUlaprakR^itirityAdi | mahAn ahaMkAraH
pa~ncha tanmAtrANi sapta prakR^itivikR^itayaH | pradhAnAd buddhirjAyata
iti pradhAnavikAraH saivAha~NkAraM janayatIti prakR^itiH aha~NkAro.api
buddherjAyata iti vikR^itiH so.api ekAdashendriyANi pa~ncha tanmAtrANi
janayatIti prakR^itiH ||
tatra shabdatanamAtramahaMkArAjjAyata iti vikR^itistasmAdAkAshaM jAyata
iti shabdatanmAtraM prakR^itiH | tathA sparshatanmAtramahaMkArAjjAyata
iti vikR^itiH tadeva vAyuM janayatIti prakR^itiH | evaM
rUpatanmAtramahaMkArAjjAyata iti vikR^itiH tadeva tejo janayatIti prakR^itiH |
rasatanmAtramaha~NkArAjjAyata iti vikR^itistadevAmbho janayatIti prakR^itiH |
tathA gandhatanmAtramahaMkArAjjAyata iti vikR^itiH tadevAvaniM janayatIti
prakR^itiH ||
etAni pa~ncha tanmAtrANi sUkShmabhUtAni sthUlabhUtAnAM kAraNAni ShoDashakashcha
vikAraH | pa~ncha buddhIndriyANi pa~ncha karmendriyANi ekAdashaM manaH
pa~ncha mahAbhUtAni eSha ShoDashako gaNo vikAra eva na prakR^itiH | puruShastu
nobhayamityarthaH ||
pratyakShAnumAnashabdarUpaM trividhaM pramANam | tatra pratyakShaM
tAvat shrotrAdipa~nchakaM lokochitashabdAdiguNagrAhakam | anumAnaM
chApratyakShArthagrAhakaM dhUmAdi | shabdastAvat trividho bhavati
vAgindriyaviShayaH shrotraviShayo buddhimAtraviShayashcha | teShu
kaNThatAlvAdisthalAvachChinnaH shabdo vAgIndriyaviShayaH tatkAryatvAt
vAgindriyavyavahitashrotrasthashcha shabdataH shabdaH shrotrasya
viShayastadgrAhyatvAt | ghaTa ityAdipadAni tu buddhimAtrasya viShayaH
vakShyamANayuktyA buddhimAtragrAhyatvAt ||
tAni padAnyevArthasya karaNatvAt sphoTa ityuchyate | taddi padaM
vAgindriyochchAryapratyekavarNebhyo.atiriktaM varNAnAmAshutaravinAshitayA
melanAbhAvenaikaM padamiti vyavahAragocharatvAsambhavAt
arthasmArakatvAsambhavAchcha | asya cha sphoTasya kAraNamekaH prayatnavisheShaH
prayatnabhedenochchAraNe sati ekapadavyavahArAbhAvAdarthApratyayAchcha
tasya cha sphoTasya vya~njaka AnupUrvIvishiShTatayA antyavarNapratyayaH
atashcha buddhereva sphoTagrAhakatvam AnupUrvyA buddhyaiva
grahaNasambhavena sAmAnAdhikaraNyapratyAsattyaivAnupUrvIpratyayasya
sphoTAkhyapadAbhivyaktihetutve lAghavAt | ata eva sphoTaH shrotreNa grahItuM
na shakyate ghottaraTatvAdirarUpiNyA AnupUrvyAH shrotreNa grahaNAsambhavAt
AshutaravinAshitayA varNAnAM melanAsambhavAt pUrvapUrvavarNasaMskArANAM
tatsmR^itInAM chAntaHkaraNaniShThAnAmantaHkaraNasahakAritvasyaivauchityAditi |
syAdetat sphoTavya~njakasyAnupUrvIvishiShTacharamavarNasyaiva
padatvamarthapratyAyakatvaM vA.astu alaM sphoTena taddhetoreva tadastviti
nyAyAt | etadeva sAMkhyasUtreNoktaM pratItyapratItibhyAM na sphoTAtmakaH shabda
iti | ekatvapratyayo.apyAnupUrvIvishiShTacharamavarNasyaikatvenopapadyate ||
atrochyate | evaM satyavayavyuchChedaprasa~NgaH |
asamavAyikAraNasaMyogavisheShAvachChinnAnAmavayavAnAmeva
jalAdyAharaNahetutvakalpanAyAM lAghavAt taddhetoreva tadastviti nyAyasAmyAt
eko ghaTa ityAdipratyayAnAmapyekaM vanamityAdipratyayavadupapatteH |
atha paramANUnAM tatsaMyogAnAM chAtIndriyatayA tadrUpatve.avayavinaH
pratyakShAnupapattirityAdikamavayavisAdhakamiti chet tulyaM sphoTe.api
AnupUrvyAH kShaNAdyatIndriyaghaTitatayA AnupUrvIvishiShTacharamavarNAtmakatve
padasya pratyakShAnupapattirityAdikaM sphoTasAdhakamiti | api cha
sphoTashabdo.asmAbhiH shrutipramANenaiva svargAdivat kalpyate ityatastatra
laukikapramANAbhAve.api na kShatiH ||
tathAhi praNavasyAkArokAramakArarUpamAtrAtrayaM brahmAdidevatAtrayAtmakamuktvA
praNavaM devatAtrayAtiriktaparabrahmAtmakaM chaturthamAtrAM shrutaya
Amananti | sA chaturthI mAtrA varNatrayAdatiriktaH sphoTa eva sambhavati saiva
chArddhamAtretyuchyate rAshivadavibhaktayorvarNapadayorvarNA ekamarddhaM padaM
chAnyadarddhamityupapadyate | yathA chAvayavebhyo vivichyAvayavI na vyavahAryo
bhavati evameva pratyekavarNebhyo vivichya padamuchchArayituM na shakyata
iti | ataH smaryate "arddhamAtrA sthitA nityA yAnuchchAryA visheShata" iti ||
nanu syAdevamarddhamAtropapattiH | nAdabindostu kiM svarUpam uchyate | praNave
uchchAryamANe sha~NkhanAdaveNunAdAdivadyaH svaravisheSho bhavati sa nAdaH
yA cha nAdasyoparamAvasthA atisUkShmA sA shUnyatulyatayA binduruchyata iti |
tasmAdavayavebhyo.avayavIva varNebhyo.atiriktaM padaM tadeva sphoTa iti siddham |
nanvevaM vAkyamapi sphoTaH syAditi chenna bAdhakAbhAve satIShyatAmiti dik ||
shabdastAvat yathodeShTR^ipuruShavAkyalakShaNaH indro devarADityAdiH |
arthApattisambhavAbhAvaitihyapratibhopamAnAni yadi pramANAni
tarhyatraivAntarbhAvyAni na pR^ithak | prakR^itipuruShau vidyamAnAvapi
nopalabhyete sUkShmatvAt yathAkAshe dhUmoShmanIhAraparamANavaH santo.api
nopalabhyante | mahadAdikAryadarshanena tatkAraNamiva pradhAnamanumIyate |
triguNapradhAnajanyaM mahadAdikAryaM ki~nchitprakR^itisadR^ishaM
ki~nchidvikR^itisadR^ishaM loke ubhayathA puttrarUpakAryadarshanAt | tachcha
kAryaM sat nAsat na sadasat nAnirvachanIyam atyantAsattve sikatAbhyo.api
tailamutpadyeta | anyau cha pakShau viruddhAveva avyaktasa~nj~naM pradhAnaM
svatantraM vyApi nityaM cha vyaktasa~nj~naM kAryamasvatantramavyApi
anityaM cha | puruShaH svatantro vyApI nityashcha | trayANAM lokAnAM kAraNaM
pradhAnaM tachchaikaM lAghavAt | pralayakAle mahadAdikAryaM pradhAne lIyate |
tachcha pradhAnaM sattvarajastamomayam | guNatrayasAmyAvasthA prakR^itiH |
pradhAnamachetanaM puruShastu chetanaH | vyaktapradhAnavilakShaNaH shuddho
guNarahitaH | kAryasya sukhaduHkhamohajanakatvena tatra kAraNIbhUtAni
sattvarajastamAMsi anumeyAni | dR^iShTaM cha yathAkramaM bhartR^isapatnIviTeShu
sukhaduHkhamohajanakatvaM kAminyAH | triguNamaye.api kArye yadA sattvamudriktaM
bhavati janAdR^iShTAt tadA rajastamasI abhibhUya svakAryaM sukhaM janayati |
evaM yadA raja udriktaM bhavati tadA sattvatamasI abhibhUya svakAryaM
janayati duHkham | evaM yadA tama udriktaM bhavati tadA sattvarajasI abhibhUya
svakAryaM mohaM janayati ||
  duHkhaM trividham AdhyAtmikAdhibhautikAdhidaivikabhedAt | tathAhi
  tatra AdhyAtmikaM dvirUpaM shArIraM mAnasaM cheti | shArIraM
  tAvat vAtapittashleShmaviparyayakR^itaM jvarAtIsArAdi | mAnasaM tu
  priyaviyogApriyasaMyogAdijam | AdhibhautikaM tu chaturddhAbhUtagrAmanimittaM
  pashupakShimR^igamanuShyasarIsR^ipadaMshayUkAmatkuNasthAvarebhyo
  jarAyujANDajasvedajodbhijjebhyo jAyate | divaH prabhavati taddaivaM
  tadadhikR^itya yajjAyate tadAdhidaivikaM shItoShNavAtavarShAshanipAtajam |
  samuditatantavaH paTamiva guNasamudAyAtmakaM pradhAnam mahadAdikAryaM
  janayati | ekarasamapi yathA AkAshasalilaM vApyAdau patitaM
  sat vApyAdisaMshleShAt rasAntaramApadyate tathA ekarUpAdapi
  pradhAnAddevAdayaH krameNa sukhino duHkhino atyantamUDhAshcha bhavanti
  | tathA sattvautkaTyAdrajastamasoraudAsInyAddevAH atyantaM sukhinaH |
  rajasa autkaTyAt sattvatamasoraudAsInyAnmanuShyAH atyantaM duHkhinaH |
  tamasa autkaTyAt sattvarajasoraudAsInyAttirya~nchaH atyantaM mUDhAH
  | mahadAdisa~NghAtaH bhoktR^isApekShaH bhogyatvAt parya~Nkavat |
  mahadAdisa~NghaH parAdhInaH achetanatvAt mAlAvat | evaM puruSho.anumIyate
  | sa cha nAnA janmamaraNakaraNAnAM pratyekaM bhedAt | ayamarthaH |
  ekasya maraNe sarve mriyeran yadyeka eva AtmA syAt ekasya cha janmani
  sarve jAyeran ekasya karaNavaikalye sarve karaNavaikalyavantaH syuH | na
  chaivaM dR^ishyate tasmAnnAnA | pa~nchaviMshatitattvagocharasamyagj~nAnAt
  puruShasya kaivalyaM bhavati | tachchAnyatvaM pradhAnAdibheda iti yAvat |
  avivekAt saMsAraH vivekAt kaivalyam | arthataH akhyAtivAdA~NgIkAraH | ata eva
  idaM rajatamiti j~nAnaM na bhramaH kiMtu svarUpataH arthatashcha aviviktaM
  j~nAnadvayam | yasya yAdR^ishamidaM rajatamiti rajataj~nAnaviShayIbhUtaM
  tasya tAdR^ishameva jagaditi nirNayaH ||
ata eva vastutastAttviko.anyathAbhAvaH pariNAma ityeva lakShaNalakShitaH
pariNAmo.a~NgAkR^itaH sa cha puruShaH pratisharIraM nAnetyatrAdi sma
avikAritvAt | vastuto.akarttA muktavat sAkShivadudAsInaH | sattvarajastamAMsi
kartR^INi karmANyapi bhavanti | akarttA.api puruShaH kartteva vyavahriyate |
achorashchoraiH saha dhR^itashchora eva | guNAbhedAt prakR^itiH kartrI
na puruShaH | darshanashaktimataH kriyAshaktirahitasya puruShasya
pradhAnena saha saMyogaH mahadAdibhUtaparyantaM pradhAnaM draShTum |
darshanashaktirahitasya kriyAshaktimataH pradhAnasyApi puruSheNa
saMyogaH mokShArthaM puruShasya bhinnatvena vyaktAvyaktapuruShaj~nAne
jAte pradhAnasya mokSho bhavati | nityasukhopalabdhirmokSha
iti chedupalabdherapi nityAnityavivekagrastatvAdasAram | na cha
nityasukhagocharasyAvidyAdiyatki~nchidAvaraNabha~Nga eva puruShArtho vAchyaH
sukhAnubhavasyaiva puruShArthatvAchchaitanyanityatvenAvaraNasyApi
asambhavAchcha | mokShe paramAnandashrutismR^itayastu
mokShashAstraparibhAShAmAtrA |
duHkhamevAsti na sukhaM yasmAt tadupalabhyate |
duHkhArttasya pratIkAre sukhasa~nj~nA vidhIyate ||
duHkhaM kAmasukhApekShA sukhaM duHkhAtyayaH smR^itaH ||
ityAdismR^itibhirduHkhanivR^ittireva sukhatvena paribhAShitA |
sAMkhyasUtramapi duHkhanivR^ittirgauNa iti vimuktiprashaMsA mandAnAmiti cha |
AnandAvAptistu gauNamokSho brahmaloke bhavati iti pashchAt kR^itArthayoH
pradhAnapuruShayorviyogo bhavati andhapa~NgusaMyogavat | tathAhi ekaH
pa~NguraparashchAndhaH dvAvapyetau duShTe pathi gachChantau mahatA sArthena
saha daivAdbandhubhiH parityaktau yathAyogaM gamanashaktidarshanashaktirahitau
darshanArthaM gamanArthaM cha saMyuktau bhavataH | tathA chAndhena pa~NguH
skandhamAropitastaddarshitamArgeNAndho yAti pa~NgushchAndhaskandhArUDhaH
san yAti | pashchAt svasvadeshaprAptyanantaraM kR^itArthau santau
viyuktau bhavataH | tathA cha pradhAnaM puruShasya mokShaM kR^itvA
nivarttate | puruSho na pravarttate nApi nivarttate | draShTA bhoktA
cha puruShaH | bhogashchidavasAnatA lakShaNaH | na kriyAveshAtmA sa cha
puruShaH anAdyavivekAt saMsarati | sachChAstrashravaNena gurvanugraheNa cha
nirvichikitso vivekaj~nAne jAte muchyate | prakR^itipuruShasaMyogAt saMsAraH
sa~njAyate | strIpuruShasaMyogAdapatyamiva prakR^itermahattatvaM jAyate |
mahattatvAdaha~NkAro jAyate | sa cha trividhaH vaikAriko bhUtAdistaijasashcha |
yo hi vaikarikaH sa eva sAttvikaH yo bhUtAdiH sa eva tAmasaH | yo
hi taijasaH sa eva rAjasaH tatra vaikArikAdaha~NkArAdekAdashendriyANi
tadabhimAninyo devatAshcha jAyante | bhUtAdeshchAhaMkArAt tanmAtrANi
jAyante taijasAdahaMkArAdekAdashendriyagaNastanmAtrapa~nchakaM cha jAyate |
etadgaNadvayasya yathAsaMkhyaM vaikArikAdbhUtAdeshchAhaMkArAjjAtatvAt kathaM
punarutpattiruchyata iti chechChR^iNu |
yadA rajastamasI abhibhUya sattvaguNa utkaTo vaikarikasa~nj~nAM
labhamAno.ahaMkAro.apravR^ittidharmA taijasAhaMkAraM
sahAyIkR^itya pravR^ittidharmANyekAdashendriyANi janayati tadA tAni
svasAhAyyachChalamadhigamya taijasasvarUpeNApi	kR^itAnItyuchyate |
yadA cha sattvarajasI abhibhUya tamoguNotkaTo bhUtAdistaijasAhaMkArasya
rUpaM sahAyIkR^itya tanmAtrapa~nchakaM pravR^ittidharmakaM karoti tadA
tattanmAtrapa~nchakaM svasAhAyyenaiva taijasenApi kR^itamityuchyate tasmAt
pravR^ittidharmakAt tattanmAtrapa~nchakAd bhUtapa~nchakamutpadyate | eSha
pariNAmakramaH | vaikArikAdekAdashendriyANi bhUtAdestanmAtrapa~nchakamiti ||
ayamarthaH | vaikArikasya bhUtAdeshcha svasvapravR^ittidharmakakAryadvayasya
yathAsaMkhyaM janane taijasAhaMkArasya sAhAyyam |
taijasAhaMkArasya sAhAyyakaraNAdeva etadgaNadvayalakShaNakakAryasya
pravR^ittidharmakatvam | buddhijanakAnIndriyANi buddhIndriyANi tAni
chakShuHshrotraghrANarasanatvagindriyANi | teShAM cha viShayAH
rUpashabdagandharasasparshAH | karma kurvantIti karmendriyANi
tAni cha vAkpANipAdapAyUpasthAni | teShAM cha viShayAH
vAgvadanAdAnagamanotsargAnandAH | mano buddhIndriyaM karmendriyaM
cha yato buddhIndriyANAM vR^ittiM saMkalpayati karmendriyANAM cha
ata ubhayAtmakaM manaH | mano.api vibhu dharmAdharmavAsanAshrayataH
pratipuruShamantaHkaraNaM nityamAkAshavat | na cha prakR^itidharmA
eva santvadR^iShTAdaya iti vAchyam  anyaniShThAdR^iShTAdibhiranyatra
sukhaduHkhAdyutpAde.atiprasa~NgAt | tachcha nANu saMbhavati yoginAM
sarvAvachChedena ekadA.akhilasAkShAtkArAsambhavAt | na cha yoginAM yogajadharma
eva pratyAsattiH syAt saMyogasaMyuktasamavAyAdilaukikapratyAsattyaivopapattau
sannikarShAntarakalpane mAnAbhAvAt gauravAchcha anyonyavyabhichArAchcha |
sAkShAtkAreShvavAntarajAtikalpane jAtisA~NkaryAt atigauravAchcha |
yogimate sarvArthagrahaNasamarthasyAntaHkaraNasya tamAkhyAvaraNabha~Nga eva
yogajadharmAdibhiH kriyate suShuptau tamaso vR^ittipratibandhakatvasiddheriti
nApyantaHkaraNaM madhyamaparimANamAtraM sambhavati pralaye
vinAshenAdR^iShTAdyAdhAratAnupapatteH ataH parisheShato.antaHkaraNaM vibhveva
sidyati taduktam |
chittAkAshaM chidAkAshamAkAshaM cha tR^itIyakam |
dvAbhyAM shUnyatamaM viddhi chidAkAshaM varAnane ||

syAdetat | antaHkaraNasya vibhutve
parichChinnavR^ittilAbhasyAvaraNenopapattAvapi lokAntaragamanAdikaM nopapadyate |
ata eva sAMkhyasUtram "na vyApakaM manaH karaNatvA"diti | tadgatishruteriti
veti kiM chaivaM sati lAghavAt chaitanyasyaivAvaraNakalpanamuchitaM kimarthaM
vibhvantaHkaraNaM parikalpyate tatra j~nAnapratibandhakamAvaraNaM kalpyate ||
atrochyate | gatishrutistAvat AtmanIvAntaHkaraNe.api
prANendriyAdyupAdhinopapadyate kAryakAraNarUpeNAntaHkaraNadvaitAt |
kAryAntaHkaraNasya svato.api gatirupapadyate kAryakAraNarUpeNAntaHkaraNadvaitaM
cha sAMkhyairapyeShTavyam kevalakAryatve.antaHkaraNadharmatvaM dharmAdInAmiti
sAMkhyasUtrAnupapatteH | kevalanityatve cha mahadAdyutpattisUtrAnupapatteH
yattUktaM chaitanyasyaivAvaraNakalpanaM yuktamiti tadayuktam |
kUTasthachaitanyasya j~nAnapratibandharUpAvaraNAsambhavAt | na
cha chaitanyasyArthasambandha eva pratibimbAdirUpe pratibandhakaM
kalpanIyamiti vAchyam evamapyAtmadarshanAnupapatteH karaNadvAraM
vinA svasmin pratibimbAdirUpeNa svasvasambandhAsambhavAt |
api cha ichChAkR^ityAdyAdhAratayA.antaHkaraNe siddhe
svapnAdAvantardR^ishyamAnaghaTAdayo.api tasyaiva pariNAmAH
kalpyante kAryakAraNayoH sAmAnAdhikaraNyauchityAt | evaM cha
ghaTAdyAkArapariNatAshchaitanye bhAsante tadavibhAgenaiva bAhyaghaTAdikaM
bhAsate.atastAdR^ishapariNAmapratibandhakamevAvaraNaM tatraiva yuktaM ki~ncha
bAhyakaraNasyAvaraNadarshanenAntarAvaraNasyApi karaNaniShThatvaM chAnumIyate
Atmano.anAvR^itatvaM shrutismR^itibhyAM cheti |
nanvantaHkaraNasya vibhutve sati kathaM kAryatvaM syAditi chenna
vibhvyA api AkashaprakR^iteH kAryAkAsharUpaparichChinnapariNAmavad
guNAntarasambhedenAntaHkaraNaprakR^iterapi
parichChinnAntaHkaraNarUpapariNAmopapattiH
shrutismR^itiprAmANyAchchaitadiShyata iti dik ||
manasaH sa~Nkalpo viShayaH | etAnyekAdasha vaikR^itAhaMkArAjjAtAni
ityavAdi smaiva buddhipratibimbitamarthaM puruSha upalabhate | taduktaM
buddhisthamarthaM puruShashchetayate | ahaM dharmaM kariShyAmItyadhyavasAyo
buddherlakShaNam | dharmo j~nAnaM virAgaH aishvaryametat sAttvikabuddheH |
tadviparItamavirAgAdi tAmasam ||
pa~nchaviMshatitattvaireva jagadvyAptaM na nyUnairnAdhikaishcha
vatsavivR^iddhinimittaM kShIrasyeva aj~nasyApi pradhAnasya
puruShamokShArthaM pravR^ittiruchitaiva | li~NgasharIraM tu
buddhyahaMkAramanobuddhIndriyakarmendriyapa~nchatanmAtrANAmaShTAdashAnAM
samudAyaH trayoviMshatitattvamadhye pa~nchabhUtAni varjayitvA ahaMkAraM
cha buddhau praveshya saptadashakaM li~NgasharIrasa~nj~naM bhavati
vahnerindhanavadAtmano.abhivyaktisthAnavAt | tachcha sarvapuruShANAM
sargAdAvutpadya prAkR^itapralayaparyantaM tiShThati tena chaiveha
lokaparalokayoH saMsaraNaM jIvAnAM bhavati | prANashcha buddhereva vR^ittibheda
ityato na li~NgasharIrAt pR^itha~N nirdishyate tasya cha li~NgasharIrasya
sUkShmANi pa~ncha bhUtAni AshrayashchitrAdivadAshrayaM vinA paramasUkShmasya
lokAntaragamanAsambhavAt ||
idaM cha li~NgasharIramAdau svayaMbhuva upAdhibhUtamekameva jAyate tasyaiva
virADAkhyavakShyamANasthUlasharIravat tatashcha vyaShTijIvAnAmupAdhibhUtAni
vyaShTili~NgasharIrANi tadaMshabhUtAni tato vibhajyante | piturli~NgasharIrAt
puttrali~NgasharIravat | taduktaM sUtrakAreNa | vyaktibhedaH karmavisheShAditi
manunApyuktam |
teShAM tvavayavAn sUkShmAn ShaNNAmapyamitaujasAm |
sanniveshyAtmamAtrAsu sarvabhUtAni nirmame || iti |
ShaNNAmiti ShaDindriyaM samastali~NgasharIropalakShakam tathA cha svayambhUH
svali~NgasharIrAvayavAn sUkShmAnalpAn AtmamAtrAsu svAMshachetaneShu saMyojya
sarvaprANinaH sasarjjetyartha iti li~NgasharIram | sthUlasharIrotpattistu
dashaguNitamahattattvamadhye.ahaMkArastasyApi dashaguNitasya madhye
vyomno.api dashaguNitasya madhye vAyurvAyorapi dashaguNitasya madhye
tejastejaso.api dashaguNitasya madhye jalaM jalasyApi dashaguNitasya
madhye pR^ithivI samutpadyate saiva cha sthUlasharIrasya bIjaM tadeva cha
pR^ithivIrUpaM bIjamaNDarUpeNa pariNamate tasyApi dashaguNitANDarUpasya
pR^ithivyAvaraNasya madhye chaturdashabhuvanAtmakaM svayambhuvaH sthUlasharIraM
tatsaMkalpAdevotpadyate tenaiva sharIreNa svayambhUrnArAyaNa ityuchyate |
taduktaM manunA svayambhuvaM prakR^itya |
so.abhidhyAya sharIrAt svAt sisR^ikShurvividhAH prajAH |
apa eva sasarjAdau tAsu vIryamavAsR^ijat ||
tadaNDamabhavaddhaimaM sahasrAMshusamaprabham |
tasmin yaj~ne svayaM brahmA sarvalokapitAmahaH ||
sa vai sharIrI prathamaH sa vai puruSha uchyate |
AdikarttA sa bhUtAnAM brahmAgre samavarttata ||
Apo nArA iti proktA Apo vai narasUnavaH |
tA yadasyAyanaM pUrvaM tena nArAyaNaH smR^itaH ||
ityAdineti |
tata eva chAdipuruShAt vyaShTipuruShANAM vibhAgAdante cha tatraiva layAt
sa eva chaika Atmeti shrutismR^ityorvyavahriyate ato na vyavahAraparatayA
nArAyaNa eva sarvabhUtAnAmAtmetyAdishrutismR^itivirodha iti | tatashcha
sa nArAyaNo virATsharIrI svanAbhikamalakarNikAsthAnIyasya sumerorupari
chaturmukhAkhyaM svayaMbhuvaM sR^iShTvA taddvArAnyAnapi vyaShTisharIriNaH
sthAvarAntAn sasarja taduktam \-
tachCharIrasamutpannaiH kAryaistaiH kAraNaiH saha |
kShetraj~nAH samajAyanta gAtrebhyastasya dhImataH || iti |
yattu sheShashAyino nArAyaNasya
nAbhikamalashrotrachakShurAdibhyashchaturmukhasyAvirbhAvaH
shrUyate taddainyandinasargeShveva kalpabhedena mantavyam |
dainandinapralayeShveva hi nArAyaNasharIre pravishyaikIbhUya suptAnAM devAnAM
chaturmukhAdikrameNAvirbhAvaH sheShashAyinaH sakAshAt ghaTate na tvAdisargeShu
dainandinapralaya eva lIlAvigraheNa shayanAditi ||
tadevaM saMkShepatashchaturviMshatitattvAni teShAM sR^iShTikShayaM prayojanaM
choktam | tatra yadyasmAjjAyate tasya tadA.a.apUraNenaiva sthitiH tatastasya
saMhAro.api tatraiva bhavati | tathA cha bhArate |
yadyasmAjjAyate tattvaM tachcha tatra pralIyate |
lIyante pratilomAni jAyante chottarottaram || iti |
ete cha sR^iShTisthitisaMhArarUpAH sthUlA eva pariNAmAshchaturviMshatitattvAnAM
kUTasthapuruShavivekAya pradarshitAH sUkShmA apyanye pratikShaNapariNAmA
eteShAM smaryante |
nityadAhya~NgabhUtAni bhavanti na bhavanti cha |
kAlenAlakShyavegena sUkShmatvAt tanna gR^ihyate || iti |
atastu sarvaM jaDavastu paramArthataH sarvadaivAsaduchyate | tatashcha
tasmAdvirajya Atmaiva paramArthasatyo duHkhabhIrubhirdraShTavyaH taduktam |
avyaktabIjaprabhavo buddhiskandhamayo mahAn |
mahAhaMkAraviTapa indriyA~NkurakoTaraH ||
mahAbhUtaprashAkhashcha visheShapratishAkhavAn |
sadAparNaH sadApuShpaH shubhAshubhaphalodayaH ||
AjIvaH sarvabhUtAnAM brahmavR^ikShaH sanAtanaH .
etajj~nAtvA cha tattvena j~nAnena paramAsinA ||
kR^itvA chAkSharatAM prApya jahAti mR^ityujanmanI || iti |
taduktaM \-
indriyANIndriyArthAshcha nopasarpantyataH khalu |
hInashcha karaNairdehI na dehaM punararhati ||
tasmAtsarvAtmakAdrAgAjjAyante sarvajantavaH || iti |
narakAdau visheSharAgAbhAve.api sAmAnyarAgasattvAdrAgasya karmasahakAritvaM
viShAkArambhe tadeva saktaH saha karmaNaiti li~NgaM mano yatra niShaktamasyeti
shrutAvabhimAnarAgadveShAdijanyasya viShyavAsanAkhyasa~NgasAmAnyasyaiva
janmAdiviShAkArambhe sahakAritvasiddheH |
yatra yatra mano dehI dhArayet sakalaM dhiyA |
snehAd dveShAd guNAdvApi yAti tattatsarUpatAm || iti smR^iteH |
so.ayaM pratinivR^ittAkSho gurudarpaNabodhitaH |
svato.anyAM vikriyAM mauDhyAdasthitAma~njasaikShata ||
athAsau prakR^itirnAhamiyaM hi kaluShAtmikA |
shuddhabuddhasvabhAvo.ahamiti tyajati tAM vidan ||
evaM dehendriyAdibhyaH shuddhatvenAtmani smR^ite |
nikhilA savikAreyaM tyaktaprAyA hi charmavat	||
nanvanAtmanyAtmabuddhirUpA yA.avidyA tasyAH
kathamAtmavisheShyakavivekaj~nAnanAshyatvaM
prakArAdibhedAditi chet na tAdR^ishAvidyAyA
anAtmavisheShyakavivekadvAreNAtmavisheShyakavivekanAshyatvAditi | yachcha
yogena nirvikalpakamAtmaj~nAnaM jAyate | tadvivekaj~nAnadvAraiva mokShakAraNaM
bhavati na tu sAkShAt | avidyAnivartakatvAbhAvAt ahaM gauraH karttA sukhI
duHkhItyAdij~nAnameva hyavidyA saMsArAnarthahetutayA shrutismR^itinyAyasiddhA
tasyAshcha nivarttikA nAhaM gaura ityAdirUpA vivekakhyAtireva bhavati samAne
viShaye grAhyAbhAvatvaprakArakagrAhyAbhAvaj~nAnatvenaiva virodhAt anyathA
muktinirvikalpakasyApi idaM rajatamiti j~nAnavirodhitvApatteH | ki~ncha
yathoktAbhAvaj~nAne grAhyaj~nAnavirodhitvasyAvashyakatayA nirvikalpaj~nAnasya
bhramanivartakatvaM na pR^ithak kalpyate gauravAt ||
api cha athAta Adesho neti neti na hyetasmAditi netyanyat paramastItyAdishrutyA
vivekopadeshApekShayottama upadesho nAstItyuchyate ||
kShetrakShetraj~nayorevamantaraM j~nAnachakShuShA |
bhUtaprakR^itimokShaM cha ye viduryAnti te param ||
iti gItAvAkyaishcha vivekaj~nAnasyaiva mokShahetutvamuchyate.ato
vivekaj~nAnameva sAkShAdavidyAnivR^ittyA
mokShahetuH | yogena kevalatmasAkShAtkArastu
yogyAnupalabdhividhayopAdhyAdigatadharmAbhAvamupAdhyAdibhedaM cha
grAhayati tato.avidyAnivR^ittiriti | etena sarvabhUteShu samatAj~nAnam
AtmanaH sarvAtmakatvAdij~nAnaM cha shrutismR^ityorgIyamAnaM
vivekaj~nAnasyaiva sheShabhUtaM sarvadarshaneShu mantavyam |
j~nAnAntarANAM sAkShAdabhimAnAnivartakatvAt brahmamImAMsAyAM tvayaM visheSho
yatparamAtmavivekasheShatvam | sAMkhyashAstre tu sAmAnyAtmavivekasheShatvamiti
dik ||
vivekakhyAtestvavidyAnAshakatvameva na tu shuktirajatavivekadarshina iva
punarbhramadarshanAt pratibandhakatvaM dR^iShTAnte paTalakAmAdidoShabAhulyAt
punarujjIvanaM bhramasya | atra cha anAtmanyAtmAbhimAne.anAdivAsanaiva
doShaH sarvAstikasaMmataH jAtamAtrasyAbhimAne doShAntarAnupalabdheH sA
mithyAj~nAnavAsanA yadA vivekakhyAtiparamparAjanyadR^iDhavAsanayonmUlitA
tadaiva vivekasAkShAtkAraniShThochyate tatpUrvamavashyaM vAsanAleshato
mithyAMshasya kasyApyAtmani bhAnAt tasyAM cha vivekakhyAtiniShThAyAM
jAtAyAM na punarabhimAnaH sambhavati vAsanAkhyadoShAbhAvAditi | yadi tu
buddhipuruShayoranyonyapratibimbanAdikamavivekakAraNaM doSha iShyate tadA tu
taM doShaM bAdhitvaiva vivekasAkShAtkAra udita iti na tasya punarbhramahetutvaM
phalabalena yogajadharmAsahakR^itasyaiva tasya doShatvakalpanAsambhavAditi |
yadyapi vivekapratiyogipadArthAnAmAntyAdvisheSharUpeNa vivekagraho na
sambhavati tathApi dR^ishyatvapariNAmitvAdirUpaiH sAmAnyavivekagrahasambhavAt
prakR^ityAdipadArthAnAM vishiShTaj~nAnAbhAve.api sAmAnyato
vivekakhyAtermokShahetutvam | taduktam |
ghaTadraShTA ghaTAdbhinnaH sarvathA na ghaTo yathA |
dehadraShTA tadA dehI nAhamityAdirUpataH || iti |
AtmA vA are draShTavya ityatra tu na Atmano dR^ishyatvaM vR^ittivyApyatve.api
phalavyApyatvarUpaM yattu bauddhairapi sukhaduHkhAdimattvenApi
buddhiranubhUyamAnA svaprakAshatayA chaitanyavyApyA na bhavati yathA
vedAntinAmahamityanubhUyamAno.apyAtmA chaitanyAkhyaphalavyApyo na
bhavatItyuchyate tanniHpramANatvAdupekShyam | tatpradhAnAdisarge utpadyate |
adharmavashAt pashvAdau dharmavashAddevAdau saMsarati | atattvaj~nAnAdeva
dharmAdharmopara~njitaM pralayakAle pradhAne lIyate | yadyapi pradhAnapuruShau
vibhU tathApi prakR^itireva li~NgavyavasthAM karoti | li~NgaM sUkShmaiH
paramANubhistanmAtrairupachitaM mAnuShAdiShu vyavatiShThate naTavat yathA
naTaH svarUpeNa eko.api veShAntareNa nAnArUpaH tathA li~NgamudarAntaH
pravishya hastI strI pumAniti bhavati pa~nchaviparyayasaMj~nA
bhavati yathA tamo moho mahAmohastAmishro.andhatAmishra iti | dharmeNa
prAjApatyAdyUrdhvalokaprAptiH | adharmeNa pashvAdiprAptiraj~nAnena bandhaH
pa~nchaviMshatitattvaj~nAnenApavargaH | tachcha tattvaj~nAnaM guroH
sakAshAt shAstrashravaNenaitAdR^ishaM jAyate | tathAhi pradhAnAdanyaH
puruShaH anyA buddhiH anyo.ahaMkAraH anyAni tanmAtrANi indriyANi
pa~nchamahAbhUtAni cheti | sarvaM kAryaM triguNAtmakamapi udriktaguNApekShayA
sAttvikAdishabdavyapadeshabhAk chetanaH puruShaH nAnAyoniShu jarAmaraNakR^itaM
duHkhaM chetayate prApnotItyarthaH | yAvat tattvaj~nAnena li~NgasharIraM
na nivarttate tAvat sthUlaM sharIraM pratijanma nUtanaM jAyate nashyati
cha | svaprayojanAbhAve.api pratyupakAranirapekShaM sumitravat pradhAnaM
mahadAdiviShayabhUtaparyantaM kAryaM puruShasya bhogAya mokShAya chArabhate
prakR^itiH puruShasya bhedena buddhyahaMkArAdi darshayitvA nivarttate | yathA
narttakI shR^i~NgArAdirasairhAsyAdibhAvaishcha nibaddhagItAdIni ra~Ngasya
darshayitvA nivarttate kR^itArthatvAt tadvat | ki~ncha prakR^itirguNavatI
aguNasya puMsaH jagadyonibhAvena sukhaduHkhamohAtmakena shabdAdiviShayabhAvena
vetyevaMvidhairupakArairanupakAriNaH puruShasyopakurvatI pashchAdAtmAnaM
prakAshya ahamanyA tvamanya iti nivartate sumitravat AtmanaH pratyupakAraM
nechChati |
sargasya neshvaraH kAraNaM na svabhAvo na kAlaH kAlo.api yoginAM kShaNarUpa
eva na tu nyAyavaisheShikayorivAtmavadakhaNDo nitya eko lAghavAt sa eva
tattadupAdyavachChinnaH san kShaNamuhUrtAdivatsarAntaM vyavahAraM karotIti |
na tu kShaNanAmA pR^ithak padArtho.astIti ||
sAMkhyaistu dikkAlAvAkAshAdibhya iti sUtritaM mahAkAlo vA kShaNAdirvA pR^ithak
padArtho nAsti kintvAkAshamevopAdhibhirvishiShTaM kShaNAdimahAkAlAntavyavahAraM
kurute iti manyate | tadetanmatadvayamapyasama~njasamityAha yogI
sthireNa kenApyupAdhinA mahAkAlAkAshAbhyAM kShaNavyavahArasyAsambhavAt |
tathAhi uttaradeshasaMyogAvachChinnA paramANvAdikriyA anyadvA etAdR^ishaM
ki~nchinmahAkAlAkAshayoH kShaNarUpatAyAmupAdhiH parairiShyate tatra uktaM
saMyogavishiShTakriyAdikaM chet visheShyavisheShaNatatsambandhamAtraM
tarhi trayANAmaparaiH sthiratvAbhyupagamAt na taiH kShaNavyavahAraH
sambhavati yadi cha tattebhyo.atiriktamiShyate na tu tanmahAkAla
AkAshaM vA tenaiva kShaNavyavahAropapattau tadavachChinnasyAnyasya
kShaNavyavahArahetutvakalpanAvaiyarthyAt sa cha vishiShTAdirAsthiraH
kShaNaH prakR^iterevAtibha~NguraH pariNAmavisheSha ityato
na prakR^itipuruShAtiriktatvApattiH | tasyaiva kShaNasya
prachayavisheShairmuhUrtAhorAtrAdirdviparArddhAntavyavahAro bhavati
natvakhaNDo mahAkAlo.asti pramANAbhAvAt adyatyAdivyavahAraH kShaNaprachayenaiva
kAlanityatvashrutismR^itayastu pravAhanityatAparA iti tasmAdAvashyakatvAt
kShaNAtmaka eva kAlo nAkhaNDo mahAkAlo.asti nApyAkAshaM kAlavyavahAraheturiti
kiM tu pradhAnam | puruSho na badhyate na muchyate nApi saMsaratIti kiM tu
nAnAshrayA prakR^itireva tatheti sarvaM sama~njasam ||
iti kAnyakubjashrIShimAnandadIkShitavirachitaM sAMkhyatattvavivechanaM
samAptam ||
##
Encoded and proofread by Dhaval Patel drdhaval2785 at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}