% Text title            : shatashloki
% File name             : shatashloki.itx
% Category              : major\_works, shankarAchArya
% Location              : doc\_z\_misc\_major\_works
% Author                : Shankaracharya
% Transliterated by     : Subhash Prajapati, Sunder Hattangadi
% Proofread by          : Subhash Prajapati, Sreenivasa Rao Bhagavatula, Sunder Hattangadi
% Latest update         : December 19, 2020
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shata Shloki or Vedanta Kesari ..}##
\itxtitle{.. shatashlokI athavA vedAntakesarI ..}##\endtitles ##
               || shrIH||
            || atha shatashlokI||
dR^iShTAnto naiva dR^iShTastribhuvanajaThare sadgurordnyAnadAtuH
sparshashchettatra kalpyaH sa nayati yadaho svarNatAmashmasAram |
na sparshatvaM tathApi shritacharaNayuge sadguruH svIyashiShye
svIyaM sAmyaM vidhatte bhavati nirupamastena vA.alaukiko.api || 1|| (chAlaukiko.api)

yadvachChrIkhaNDavR^ikShaprasR^itaparimalenAbhito.anye.api vR^ikShAH
shashvatsaugandhyabhAjo.apyatanutanubhR^itAM tApamunmUlayanti |
AchAryAllabdhabodhA api vidhivashataH saMnidhau saMsthitAnAM
tredhA tApaM cha pApaM sakaruNahR^idayAH svoktibhiH kShAlayanti || 2||
AtmAnAtmapratItiH prathamamabhihitA satyamithyAtvayogA-
ddvedhA brahmapratItirnigamanigaditA svAnubhUtyopapattyA |
AdyA dehAnubandhAdbhavati tadaparA sA cha sarvAtmakatvA-
dAdau brahmAhamasmItyanubhava udite khalvidaM brahma pashchAt || 3||
AtmA chidvitsukhAtmAnubhavaparichitaH sarvadehAdiyantA
satyevaM mUDhabuddhirbhajati nanu jano.anityadehAtmabuddhim |
bAhyo.asthisnAyumajjApalarudhiravasAcharmamedoyuganta-
rviNmUtrashleShmapUrNaM svaparavapuraho saMviditvApi bhUyaH || 4||
dehastrIputramitrAnucharahayavR^iShAstoShaheturmametthaM
sarve svAyurnayanti prathitamalamamI mAMsamImAMsayeha |
ete jIvanti yena vyavahR^itipaTavo yena saubhAgyabhAja-
staM prANAdhIshamantargatamamR^itamamuM naiva mImAMsayanti || 5||
kashchitkITaH kathaMchitpaTumatirabhitaH kaNTakAnAM kuTIraM
kurvaMstenaiva sAkaM vyavahR^itividhaye cheShTate yAvadAyuH |
tadvajjIvo.api nAnAcharitasamuditaiH karmabhiH sthUladehaM
nirmAyAtraiva tiShThannanudinamamunA sAkamabhyeti bhUmau || 6||
svIkurvanvyAghraveShaM svajaTharabhR^itaye bhIShayanyashcha mugdhA-
nmatvA vyAghro.ahamitthaM sa narapashumukhAnbAdhate kiM nu sattvAn |
matvA strIveShadhArI stryahamiti kurute kiM naTo bharturichChAM
tadvachChArIra AtmA pR^ithaganubhavato dehato yatsa sAkShI || 7|| (yaH sa)

svaM bAlaM rodamAnaM chiratarasamayaM shAntimAnetumagre
drAkShaM khArjUramAmraM sukadalamathavA yojayatyambikAsya |
tadvachcheto.atimUDhaM bahujananabhavAnmauDhyasaMskArayogA-
dbodhopAyairanekairavashamupaniShadbodhayAmAsa samyak || 8||
yatprItyA prItipAtraM tanuyuvatitanUjArthamukhyaM sa tasmA-
tpreyAnAtmAtha shokAspadamitaradataH preya etatkathaM syAt |
bhAryAdyaM jIvitArthI vitarati cha vapuH svAtmanaH shreya ichChaM-
stasmAdAtmAnameva priyamadhikamupAsIta vidvAnna chAnyat || 9||
yasmAdyAvatpriyaM syAdiha hi viShayatastAvadasminpriyatvaM
yAvadduHkhaM cha yasmAdbhavati khalu tatastAvadevApriyatvam |
naikasminsarvakAle.astyubhayamapi kadApyapriyo.api priyaH syA-
tpreyAnapyapriyo vA satatamapi tataH preya AtmAkhyavastu || 10||
shreyaH preyashcha loke dvividhamabhihitaM kAmyamAtyantikaM cha
kAmyaM duHkhaikabIjaM kShaNalavavirasaM tachchikIrShanti mandAH |
brahmaivAtyantikaM yanniratishayasukhasyAspadaM saMshrayante
tattvadnyAstachcha kAThopaniShadabhihitaM ShaDvidhAyAM cha vallyAm || 11||
AtmAmbhodhestara~Ngo.asmyahamiti gamane bhAvayannAsanasthaH
saMvitsUtrAnuviddho maNirahamiti vAsmIndriyArthapratItau |
dR^iShTo.asmyAtmAvalokAditi shayanavidhau magna AnandasindhA-
vantarniShTho mumukShuH sa khalu tanubhR^itAM yo nayatyevamAyuH || 12||
vairAjavyaShTirUpaM jagadakhilamidaM nAmarUpAtmakaM syA-
dantaHsthaprANamukhyAtprachalati cha punarvetti sarvAnpadArthAn |
nAyaM kartA na bhoktA savitR^ivaditi yo dnyAnavidnyAnapUrNaH
sAkShAditthaM vijAnanvyaharati parAtmAnusaMdhAnapUrvam || 13||
nairvedyaM dnyAnagarbhaM dvividhamabhihitaM tatra vairAgyamAdyaM
prAyo duHkhAvalokAdbhavati gR^ihasuhR^itputravittaiShaNAdeH |
anyajdnyAnopadeshAdyaduditaviShaye vAntavaddheyatA syA-
tpravrajyApi dvidhA syAnniyamitamanasM dehato gehatashcha || 14|| (manaso gehato)

yaH kashchitsaukhyahetostrijagati yatate naiva duHkhasya heto-
rdehe.ahantA tadutthA svaviShayamamatA cheti duHkhAspade dve |
jAnanrogAbhighAtAdyanubhavati yato nityadehAtmabuddhi-
rbhAryAputrArthanAshe vipadamatha parAmeti nArAtinAshe || 15||
tiShThangehe gR^ihesho.apyatithiriva nijaM dhAma gantuM chikIrShu-
rdehasthaM duHkhasaukhyaM na bhajati sahasA nirmamatvAbhimAnaH |
AyAtrAyAsyatIdaM jaladapaTalavadyAtR^i yAsyatyavashyaM
dehAdyaM sarvamevaM praviditavishayo yashcha tiShThatyayatnaH || 16||
shaktyA nirmokataH svAdbahirahiriva yaH pravrajansvIyagehA-
chChAyAM mArgadrumotthAM pathika iva manAk saMshrayeddehasaMsthAm |
kShutparyAptaM tarubhyaH patitaphalamayaM prArthayedbhaikShamannaM
svAtmArAmaM praveShTuM sa khalu sukhamayaM pravrajeddehato.api || 17||
kAmo buddhAvudeti prathamamiha manasyuddishatyarthajAtaM
tadgR^ihNAtIndriyAsyaistadanadhigamataH krodha Avirbhavechcha |
prAptAvarthasya saMrakShaNamatirudito lobha etattrayaM syA-
tsarveShAM pAtahetustadiha matimatA tyAjyamadhyAtmayogAt || 18||
dAnaM brahmArpaNaM yatkriyata iha nR^ibhiH syAtkShamAkrodhasaMdnyA
shraddhAstikyaM cha satyaM saditi paramataH setusaMdnyaM chatuShkam |
tatsyAdbandhAya jantoriti chatura imAndAnapUrvaishchaturbhi-
stIrtvA shreyo.amR^itaM cha shrayata iha naraH svargatiM jyotirAptim || 19||
annaM devAtithibhyo.arpitamamR^itamidaM chAnyathA moghamannaM
yashchAtmArthaM vidhatte tadiha nigaditaM mR^ityurUpaM hi tasya |
loke.asau kevalAgho bhavati tanubhR^itAM kevalAdI cha yaH syA-
ttyaktvA prANAgnihotraM vidhivadanudinaM yo.ashnute so.api martyaH || 20||
loke bhojaH sa evArpayati gR^ihagatAyArthine.annaM kR^ishAya
yastasmai pUrNamannaM bhavati makhavidhau jAyate.ajAtashatruH |
sakhye nAnnArthine yo.arpayati na sa sakhA sevamAnAya nityaM
saMsaktAyAnnamasmAdvimukha iva parAvR^ittimichChetkadaryAt || 21||
svAdnyAnadnyAnahetU jagadudayalayau sarvasAdhAraNau sto
jIveShvAsvarNagarbhaM shrutaya iti jagurhUyate svaprabodhe |
vishvaM brahmaNyabodhe jagati punaridaM hUyate brahma yadva-
chChuktau raupyaM cha raupye.adhikaraNamathavA hUyate.anyonyamohAt || 22||
tuchChatvAnnAsadAsIdgaganakusumavadbhedakaM no sadAsI-
tkiM tvAbhyAmanyadAsIdvyavahR^itigatisannAsa lokastadAnIm |
kiM tvarvAgeva shuktau rajatavadaparo no virAD vyomapUrvaH
sharmaNyAtmanyathaitatkuhakasalilavatkiM bhavedAvarIvaH || 23||
bandho janmAtyayAtmA yadi na punarabhUttarhi mokSho.api nAsI-
dyadvadrAtrirdinaM vA na bhavati taraNau kiM tu dR^igdoSha eShaH |
aprANaM shuddhamekaM samabhavadatha tanmAyayA kartR^isaMdnyaM
tasmAdanyachcha nAsItparivR^itamajayA jIvabhUtaM tadeva || 24||
prAgAsIdbhAvarUpaM tama iti tamasA gUDhamasmAdatarkyaM
kShIrAntaryadvadambho janiriha jagato nAmarUpAtmakasya |
kAmAddhAtuH sisR^ikShoranugatajagataH karmabhiH sampravR^ittA-
dretorUpairmanobhiH prathamamanugataiH saMtataiH kAryamANaiH || 25||
chatvAro.asyAH kapardA yuvatiratha bhavennUtanA nityameShA
mAyA vA peshalA syAdaghaTanaghaTanApATavaM yAti yasmAt |
syAdArambhe ghR^itAsyA shrutibhavavayunAnyevamAchChAdayantI
tasyAmetau suparNAviva parapuruShau tiShThato.arthapratItyA || 26||
ekastatrAstyasa~Ngastadanu tadaparo.adnyAnasindhuM praviShTo
vismR^ityAtmasvarUpaM sa vividhajagadAkAramAbhAsamaikShat |
buddhyAntaryAvadaikShadvisR^ijati tamajA so.api tAmevameka-
stAvadviprAstamekaM kathamapi bahudhA kalpayanti svavAgbhiH || 27||
nAyAti pratyagAtmA prajananasamaye naiva yAtyantakAle
yatso.akhaNDo.asti lai~NgaM mana iha vishati pravrajatyUrdhvamarvAk |
tatkArshyaM sthUlatAM vA na bhajati vapuShaH kiMtu saMskArajAte
tejomAtrA gR^ihItvA vrajati punarihAyAti taistaiH sahaiva || 28||
AsItpUrvaM subandhurbhR^ishamavanisuro yaH purodhAH sanAte-
rbrAhmyAtkUTAbhichArAtsa khalu mR^itimitastanmano.agAtkR^itAntam |
tadbhrAtA shrautamantraiH punaranayaditi prAha sUktena veda-
stasmAdAtmAbhiyuktaM vrajati nanu manaH karhichinnAntarAtmA || 29||
eko niShkampa AtmA prachalati manasA dhAvamAnena tasmiM-
stiShThannagre.atha pashchAnna hi tamanugataM jAnate chakShurAdyAH |
yadvatpAthastara~NgaiH prachalati parito dhAvamAnaistadantaH
prAkpashchAdasti teShAM pavanasamuditaistaiH prashAntairyathAvat || 30||
ekAkyAsItsa pUrvaM mR^igayati viShayAnAnupUrvyAntarAtmA
jAyA me syAtprajA vA dhanamupakaraNaM karma kurvaMstadartham |
kleshaiH prANAvasheShairmahadapi manute nAnyadasmAdgarIya-
stvekAlAbhe.apyakR^itsno mR^ita iva viramatyekahAnyAkR^itArthaH || 31||
nAsItpUrvaM na pashchAdatanudinakarAchChAdako vArivAho
dR^ishyaH kiM tvantarAsau sthagayati sa dR^ishaM pashyato nArkabimbam |
no chedevaM vinArkaM jaladharapaTalaM bhAsate tarhi kasmA-
ttadvadvishvaM pidhatte dR^ishamatha na paraM bhAsakaM chAlakaM svam || 32||
bhu~njAnaH svapnarAjyaM sasakalavibhavo jAgaraM prApya bhUyo
rAjyabhraShTo.ahamitthaM na bhajati viShamaM tanmR^iShA manyamAnaH |
svapne kurvannagamyAgamanamukhamaghaM tena na pratyavAyI
tadvajjAgraddashAyAM vyavahR^itimakhilAM svapnavadvismarechchet || 33||
svapnAvasthAnubhUtaM shubhamatha viShamaM tanmR^iShA jAgare syA-
jjAgratyAM sthUladehavyavahR^itiviShayaM tanmR^iShA svApakAle |
itthaM mithyAtvasiddhAvanishamubhayathA sajjate tatra mUDhaH
satye tadbhAsake.asminniha hi kuta idaM tanna vidmo vayaM hi || 34||
jIvantaM jAgratIha svajanamatha mR^itaM svapnakAle nirIkShya
nirvedaM yAtyakasmAnmR^itamamR^itamamuM vIkShya harShaM prayAti |
smR^itvApyetasya jantornidhanamasuyutiM bhAShate tena sAkaM
satyevaM bhAti bhUyo.alpakasamayavashAtsatyatA vA mR^iShAtvam || 35||
svApnastrIsa~NgasaukhyAdapi bhR^ishamasato yA cha retashchyutiH syA-
tsA dR^ishyA tadvadetatsphurati jagadasatkAraNaM satyakalpam |
svapne satyaH pumAnsyAdyuvatiriha mR^iShaivAnayoH saMyutishcha
prAtaH shukreNa vastropahatiriti yataH kalpanAmUlametat || 36||
pashyantyArAmamasya pratidivasamamI jantavaH svApakAle
pashyatyenaM na kashchitkaraNagaNamR^ite mAyayA krIDamAnam |
jAgratyarthavrajAnAmatha cha tanubhR^itAM bhAsakaM chAlakaM vA
no jAnIte suShuptau paramasukhamayaM kashchidAshcharyametat || 37||
svapne mantropadeshaH shravaNaparichitaH satya eSha prabodhe
svApnAdeva prasAdAdabhilaShitaphalaM satyatAM prAtareti |
satyaprAptistvasatyAdapi bhavati tathA kiM cha tatsvaprakAshaM
yenedaM bhAti sarvaM charamacharamathochchAvachaM dR^ishyajAtam || 38||
madhyaprANaM suShuptau svajanimanuvishantyagnisUryAdayo.amI
vAgAdyAH prANavAyuM tadiha nigaditA glAnireShAM na vAyoH |
tebhyo dR^ishyAvabhAso bhrama iti viditaH shuktikAraupyakalpaH
prANAyAmavrataM tachChrutishirasi mataM svAtmalabdhau na chAnyat || 39||
no.akasmAdArdramedhaH spR^ishati cha dahanaH kiM tu shuShkaM nidAghA-
dArdraM cheto.anubandhaiH kR^itasukR^itamapi svoktakarmaprajArthaiH |
tadvajdnyAnAgniretatspR^ishati na sahasA kiM tu vairAgyashuShkaM
tasmAchChuddho virAgaH prathamamabhihitastena vidnyAnasiddhiH || 40||
yatki~nchinnAmarUpAtmakamidamasadevoditaM bhAti bhUmau
yenAnekaprakArairvyavaharati jagadyena teneshvareNa |
tadvatprachChAdanIyaM nibhR^itarashanayA yadvadeSha dvijihva-
stena tyaktena bhojyaM sukhamanatishayaM mA gR^idho.anyaddhanAdyam || 41||
jIvanmuktirmumukShoH prathamamatha tato muktirAtyantikI cha
te.abhyAsadnyAnayogAdgurucharaNakR^ipApA~Ngasa~Ngena labdhAt |
abhyAso.api dvidhA syAdadhikaraNavashAddaihiko mAnasashcha
shArIrastvAsanAdyo hyuparatiraparo dnyAnayogaH puroktaH || 42||
sarvAnunmUlya kAmAnhR^idi kR^itanilayAnkShiptasha~NkUnivochchai-
rdIryaddehAbhimAnastyajati chapalatAmAtmadattAvadhAnaH |
yAtyUrdhvasthAnamuchchaiH kR^itasukR^itabharo nADikAbhirvichitraM
nIlashvetAruNAbhiH sravadamR^itabharaM gR^ihyamANAtmasaukhyaH || 43||
prApashyadvishvamAtmetyayamiha puruShaH shokamohAdyatItaH
shukraM brahmAdhyagachChatsa khalu sakalavitsarvasiddhyAspadaM hi |
vismR^itya sthUlasUkShmaprabhR^itivapurasau sarvasaMkalpashUnyo
jIvanmuktasturIyaM padamadhigatavAnpuNyapApairvihInaH || 44||
yaH sattvAkAravR^ittau pratiphalati yuvA dehamAtrAvR^ito.api
taddharmairbAlyavArddhyAdibhiranupahataH prANa AvirbabhUva |
shreyAnsAdhyastametaM sunipuNamatayaH satyasaMkalpabhAjo
hyabhyAsAddevayantaH pariNatamanasA sAkamUrdhvaM nayanti || 45||
prAyo.akAmo.astakAmo niratishayasukhAyAtmakAmastadAsau
tatprAptAvAptakAmaH sthitacharamadashastasya dehAvasAne |
prANA naivotkramanti kramaviratimitAH svasvahetau tadAnIM
kvAyaM jIvo vilIno lavaNamiva jale.akhaNDa Atmaiva pashchAt || 46||
piNDIbhUtaM yadantarjalanidhisalilaM yAti tatsaindhavAkhyaM
bhUyaH prakShiptamasminvilayamupagataM nAmarUpe jahAti |
prAdnyastadvatparAtmanyatha bhajati layaM tasya cheto himAMshau
vAgagnau chakShurarke payasi punarasR^igretasI dikShu karNau || 47||
kShIrAntaryadvadAjyaM madhurimaviditaM tatpR^ithagbhUtamasmA-
dbhUteShu brahma tadvadvyavahR^itividitaM shrAntavishrAntibIjam |
yaM labdhvA lAbhamanyaM tR^iNamiva manute yatra nodeti bhItiH
sAndrAnandaM yadantaH sphurati tadamR^itaM viddhyato hyanyadArtam || 48||
otaH protashcha tantuShviha vitatapaTashchitravarNeShu chitra-
stasmi~njidnyAsyamAne nanu bhavati paTaH sUtramAtrAvasheShaH |
tadvadvishvaM vichitraM naganagaranaragrAmapashvAdirUpaM
protaM vairAjarUpe sa viyati tadapi brahmaNi protamotam || 49||
rUpaM rUpaM pratIdaM pratiphalanavashAtprAtirUpyaM prapede
hyeko draShTA dvitIyo bhavati cha salile sarvato.anantarUpaH |
indro mAyAbhirAste shrutiriti vadati vyApakaM brahma tasmA-
jjIvatvaM yAtyakasmAdativimalatare bimbitaM buddhyupAdhau || 50||
tajdnyAH pashyanti buddhyA paramabalavato mAyayAktaM pata~NgaM
buddhAvantaHsamudre pratiphalitamarIchyAspadaM vedhasastam |
yAdR^igyAvAnupAdhiH pratiphalati tathA brahma tasminyathAsyaM
prAptAdarshAnurUpaM pratiphalati yathAvasthitaM satsadaiva || 51||
eko bhAnustadasthaH pratiphalanavashAdyastvanekodakAnta-
rnAnAtvaM yAtyupAdhisthitigatisamatAM chApi tadvatparAtmA |
bhUteShUchchAvacheShu pratiphalita ivAbhAti tAvatsvabhAvA-
vachChinno yaH paraM tu sphuTamanupahato bhAti tAvatsvabhAvaiH || 52||
yadvatpIyUSharashmau dinakarakiraNairbimbitaireti sAndraM
nAshaM naishaM tamisraM gR^ihagatamathavA mUrChitaiH kAMsyapAtre |
tadvadbuddhau parAtmadyutibhiranupadaM bimbitAbhiH samantA-
dbhAsante hIndriyAsyaprasR^itibhiranishaM rUpamukhyAH padArthAH || 53||
pUrNAtmAnAtmabhedAttrividhamiha paraM buddhyavachChinnamanya-
ttatraivAbhAsamAtraM gaganamiva jale triprakAraM vibhAti |
ambhovachChinnamasminpratiphalitamataH pAthasontarbahishcha
pUrNAvachChinnayoge vrajati layamavidyA svakAryaiH sahaiva || 54||
dR^ishyante dArunAryo yugapadagaNitAH stambhasUtraprayuktAH
saMgItaM darshayantyo vyavahR^itimaparAM lokasiddhAM cha sarvAm |
sarvatrAnupraviShTAdabhinavavibhavAdyAvadarthAnubandhA-
ttadvatsUtrAtmasaMdnyAdvyavaharati jagadbhUrbhuvaHsvarmahAntam || 55||
tatsatyaM yattrikAleShvanupahatamadaH prANadigvyomamukhyaM
yasminvishrAntamAste tadiha nigaditaM brahma satyasya satyam |
nAstyanyatkiMcha yadvatparamadhikamato nAma satyasya satyaM
sachcha tyachcheti mUrtAdyupahitamavaraM satyamasyApi satyam || 56||
yatki~nchidbhAtyasatyaM vyavahR^itiviShaye raupyasarpAmbumukhyaM
tadvai satyAshrayeNetyayamiha niyamaH sAvadhirlokasiddhaH |
tadvai satyasya satye jagadakhilamidaM brahmaNi prAvirAsI-
nmithyAbhUtaM pratItaM bhavati khalu yatastachcha satyaM vadanti || 57||
yatrAkAshAvakAshaH kalayati cha kalAmAtratAM yatra kAlo
yatraivAshAvasAnaM bR^ihadiha hi virAT pUrvamarvAgivAste |
sUtraM yatrAvirAsInmahadapi mahatastaddhi pUrNAchcha pUrNaM
sampUrNAdarNavAderapi bhavati yathA pUrNamekArNavAmbhaH || 58||
antaH sarvauShadhInAM pR^ithagamitarasairgandhavIryairvipAkai-
rekaM pAthodapAthaH pariNamati yathA tadvadevAntarAtmA |
nAnAbhUtasvabhAvairvahati vasumatI yena vishvaM payodo
varShatyuchchairhutAshaH pachati dahati vA yena sarvAntaro.asau || 59||
bhUteShvAtmAnamAtmanyanugatamakhilaM bhUtajAtaM prapashye-
tprAyaH pAthastara~NgAnvayavadatha chiraM sarvamAtmaiva pashyet |
ekaM brahmAdvitIyaM shrutishirasi mataM neha nAnAsti kiM chi-
nmR^ityorApnoti mR^ityuM sa iha jagadidaM yastu nAneva pashyet || 60||
prAkpashchAdasti kumbhAdgaganamidamiti pratyaye satyapIdaM
kumbhotpattAvudeti pralayamupagate nashyatItyanyadesham |
nIte kumbhena sAkaM vrajati bhajati vA tatpramANAnukArA-
vitthaM mithyApratItiH sphurati tanubhR^itAM vishvatastadvadAtmA || 61||
yAvAnpiNDo guDasya sphurati madhurimaivAsti sarvo.api tAvA-
nyAvAnkarpUrapiNDaH pariNamati sadAmoda evAtra tAvAn |
vishvaM yAvadvibhAti drumanaganagarArAmachaityAbhirAmaM
tAvachchaitanyamekaM pravikasati yato.ante tadAtmAvasheSham || 62||
vAdyAnnAdAnubhUtiryadapi tadapi sA nUnamAghAtagamyA
vAdyAghAtadhvanInAM na pR^ithaganubhavaH kiM tu tatsAhacharyAt |
mAyopAdAnametatsahacharitamiva brahmaNAbhAti tadva-
ttasminpratyakpratIte na kimapi viShayIbhAvamApnoti yasmAt || 63||
dR^iShTaH sAkShAdidAnImiha khalu jagatAmIshvaraH saMvidAtmA
vidnyAtaH sthANureko gaganavadabhitaH sarvabhUtAntarAtmA |
dR^iShTaM brahmAtiriktaM sakalamidamasadrUpamAbhAsamAtraM
shuddhaM brahmAhamasmItyaviratamadhunAtraiva tiShThedanIhaH || 64||
indrendrANyoH prakAmaM suratasukhajuShoH syAdratAntaH suShupti-
stasyAmAnandasAndraM padamatigahanaM yatsa AnandakoshaH |
tasminno veda ki~nchinniratishayasukhAbhyantare lIyamAno
duHkhI syAdbodhitaH sanniti kushalamatirbodhayennaiva suptam || 65||
sarve nandanti jIvA adhigatayashasA gR^ihNatA chakShurAdI-
nantaH sarvopakartrA bahirapi cha suShuptau yathA tulyasaMsthAH |
eteShAM kilbiShaspR^igjaTharabhR^itikR^ite yo bahirvR^ittirAste
tvakchakShuHshrotranAsArasanavashamito yAti shokaM cha moham || 66||
jAgratyAmantarAtmA viShayasukhakR^ite.anekayatnAnvidhAsya-
~nshrAmyatsarvendriyaugho.adhigatamapi sukhaM vismaranyAti nidrAm |
vishrAmAya svarUpe tvatitarasulabhaM tena chAtIndriyaM hi
sukhaM sarvottamaM syAt pariNativirasAdindriyotthAtsukhAchcha || 67|| (saukhyaM)

pakShAvabhyasya pakShI janayati marutaM tena yAtyuchchadeshaM
labdhvA vAyuM mahAntaM shramamapanayati svIyapakShau prasArya |
duHsaMkalpairvikalpairviShayamanu kadarthIkR^itaM chittameta-
tkhinnaM vishrAmahetoH svapiti chiramaho hastapAdAnprasArya || 68||
AshliShyAtmAnamAtmA na kimapi sahasaivAntaraM veda bAhyaM
yadvatkAmI videshAtsadanamupagato gADhamAshliShya kAntAm |
yAtyastaM tatra lokavyavahR^itirakhilA puNyapApAnubandhaH
shoko moho bhayaM vA samaviShamamidaM na smaratyeva kiMchit || 69||
alpAnalpaprapa~nchapralaya uparatishchendriyANAM sukhApti-
rjIvanmuktau suShuptau tritayamapi samaM kiM tu tatrAsti bhedaH |
prAksaMskArAtprasuptaH punarapi cha parAvR^ittimeti prabuddho
nashyatsaMskArajAto na sa kila punarAvartate yashcha muktaH || 70||
AnandAnyashcha sarvAnanubhavati nR^ipaH sarvasampatsamR^iddha
stasyAnandaH sa ekaH sa khalu shataguNaH sanpradiShTaH pitR^INAm |
AdevabrahmalokaM shatashataguNitAste yadantargatAH syu-
rbrahmAnandaH sa eko.astyatha viShayasukhAnyasya mAtrA bhavanti || 71||
yatrAnandAshcha modAH pramuda iti mudashchAsate sarva ete
yatrAptAH sarvakAmAH syurakhilaviramAtkevalIbhAva Aste |
mAM tatrAnandasAndre kR^idhi chiramamR^itaM somapIyUShapUrNAM
dhArAmindrAya dehItyapi nigamagiro bhrUyugAntargatAya || 72||
AtmA.akampaH sukhAtmA sphurati tadaparA tvanyathaiva sphurantI
sthairyaM vA cha~nchalatvaM manasi pariNatiM yAti tatratyamasmin |
chA~nchalyaM duHkhaheturmanasa idamaho yAvadiShTArthalabdhi-
stasyAM yAvatsthiratvaM manasi viShayajaM syAtsukhaM tAvadeva || 73||
yadvatsaukhyaM ratAnte nimiShamiha manasyekatAne rase syA-
tsthairyaM yAvatsuShuptau sukhamanatishayaM tAvadevAtha muktau |
nityAnandaH prashAnte hR^idi tadiha sukhasthairyayoH sAhacharyaM
nityAnandasya mAtrA viShayasukhamidaM yujyate tena vaktum || 74||
shrAntaM svAntaM sa bAhyavyavahR^itibhiridaM tAH samAkR^iShya sarvA-
stattatsaMskArayuktaM hyuparamati parAvR^ittamichChannidAnam |
svApnAnsaMskArajAtaprajanitaviShayAnsvApnadehe.anubhUtA-
nprojjhyAntaH pratyagAtmapravaNamidamagAdbhUri vishrAmamasmin || 75||
svapne bhogaH sukhAderbhavati nanu kutaH sAdhane mUrChamAne
svApnaM dehAntaraM tadvyavahR^itikushalaM navyamutpadyate chet |
tatsAmagryA abhAvAtkuta idamuditaM taddhi sAMkalpikaM che-
ttatkiM svApne ratAnte vapuShi nipatite dR^ishyate shukramokShaH || 76||
bhItyA rodityanena pravadati hasati shlAghate nUnamasmA-
tsvapne.apya~Nge.anubandhaM tyajati na sahasA mUrChite.apyantarAtmA |
pUrvaM ye ye.anubhUtAstanuyuvatihayavyAghradeshAdayo.arthA-
statsaMskArasvarUpAnsR^ijati punaramU~nshritya saMskAradeham || 77||
saMdhau jAgratsuShuptyoranubhavaviditA svApnyavasthA dvitIyA
tatrAtmajyotirAste puruSha iha samAkR^iShya sarvendriyANi |
saMveshya sthUladehaM samuchitashayane svIyabhAsAntarAtmA
pashyansaMskArarUpAnabhimataviShayAnyAti kutrApi tadvat || 78||
rakShanprANaiH kulAyaM nijashayanagataM shvAsamAtrAvasheShai-
rmA bhUttatpretakalpAkR^itikamiti punaH sArameyAdibhakShyam |
svapne svIyaprabhAvAtsR^ijati hayarathAnnimnagAH palvalAni
krIDAsthAnAnyanekAnyapi suhR^idabalAputramitrAnukArAn || 79||
mAta~NgavyAghradasyudviShaduragakapInkutrachitpreyasIbhiH
krIDannAste hasanvA viharati kuhachinmR^iShTamashnAti chAnnam |
mlechChatvaM prAptavAnasmyahamiti kuhachichCha~NkitaH svIyalokA-
dAste vyAghrAdibhItyA prachalati kuhachidroditi grasyamAnaH || 80||
yo yo dR^iggocharo.artho bhavati sa sa tadA tadgatAtmasvarUpA-
vidnyAnotpadyamAnaH sphurati nanu yathA shuktikA.aj~nyAnahetuH |
raupyAbhAso mR^iShaiva sphurati cha kiraNadnyAnato.ambho bhuja~Ngo
rajjvadnyAnAnnimeShaM sukhabhayakR^idato dR^iShTisR^iShTaM kiledam || 81||
mAyAdhyAsAshrayeNa pravitatamakhilaM yanmayA tena matsthA-
nyetAnyeteShu nAhaM yadapi hi rajataM bhAti shuktau na raupye |
shuktyaMshastena bhUtAnyapi mayi na vasantIti viShvagvinetA
prAhAsmAddR^ishyajAtaM sakalamapi mR^iShaivendrajAlopameyam || 82||
hetuH karmaiva loke sukhataditarayorevamadnyo.aviditvA
mitraM vA shatruritthaM vyavaharati mR^iShA yAdnyavalkyArtabhAgau |
yatkarmaivochatuH prAgjanakanR^ipagR^ihe chakratustatprashaMsAM
vaMshottaMso yadUnAmiti vadati na ko.apyatra tiShThatyakarmA || 83||
vR^ikShachChede kuThAraH prabhavati yadapi prANinodyastathApi
prAyo.annaM tR^iptihetustadapi nigaditaM kAraNaM bhoktR^iyatnaH |
prAchInaM karma tadvadviShamasamaphalaprAptihetustathApi
svAtantryaM nashvare.asminna hi khalu ghaTate prerako.asyAntarAtmA || 84||
smR^ityA lokeShu varNAshramavihitamado nityakAmyAdi karma
sarvaM brahmArpaNaM syAditi nigamagiraH saMgirante.atiramyam |
yannAsAnetrajihvAkaracharaNashiraHshrotrasaMtarpaNena
tuShyeda~NgIva sAkShAttaruriva sakalo mUlasaMtarpaNena || 85||
yaH praityAtmAnabhidnyaH shrutividapi tathAkarmakR^itkarmaNo.asya
nAshaH syAdalpabhogAtpunaravataraNe duHkhabhogo mahIyAn |
AtmAbhidnyasya lipsorapi bhavati mahA~nshAshvataH siddhibhogo
hyAtmA tasmAdupAsyaH khalu tadadhigame sarvasaukhyAnyalipsoH || 86||
sUryAdyairarthabhAnaM na hi bhavati punaH kevalairnAtra chitraM
sUryAtsUryapratItirna bhavati sahasA nApi chandrasya chandrAt |
agneragneshcha kiM tu sphurati ravimukhaM chakShuShashchitprayuktA-
dAtmajyotistato.ayaM puruSha iha maho devatAnAM cha chitram || 87||
prANenAmbhAMsi bhUyaH pibati punarasAvannamashnAti tatra
tatpAkaM jATharo.agnistadupahitabalo drAkChanairvA karoti |
vyAnaH sarvA~NganADIShvatha nayati rasaM prANasaMtarpaNArthaM
niHsAraM pUtigandhaM tyajati bahirayaM dehato.apAnasaMdnyaH || 88||
vyApAraM dehasaMsthaH prativapurakhilaM pa~nchavR^ittyAtmako.asau
prANaH sarvendriyANAmadhipatiranishaM sattayA nirvivAdam |
yasyetthaM chidghanasya sphuTamiha kurute so.asmi sarvasya sAkShI
prANasya prANa eSho.apyakhilatanubhR^itAM chakShuShashchakShureShaH || 89||
yaM bhAntaM chidghanaikaM kShitijalapavanAdityachandrAdayo ye
bhAsA tasyaiva chAnu praviralagatayo bhAnti tasminvasanti |
vidyutpu~njo.agnisaMgho.apyuDugaNavitatirbhAsayetkiM pareshaM
jyotiH shAntaM hyanantaM kavimajamamaraM shAshvataM janmashUnyam || 90||
tadbrahmaivAhamasmItyanubhava udito yasya kasyApi chedvai
puMsaH shrIsadgurUNAmatulitakaruNApUrNapIyUShadR^iShTyA |
jIvanmuktaH sa eva bhramavidhuramanA nirgate.anAdyupAdhau
nityAnandaikadhAma pravishati paramaM naShTasaMdehavR^ittiH || 91||
no deho nendriyANi kSharamatichapalaM no mano naiva buddhiH
prANo naivAhamasmItyakhilajaDamidaM vastujAtaM kathaM syAm |
nAhaMkAro na dArA gR^ihasutasujanakShetravittAdi dUraM
sAkShI chitpratyagAtmA nikhilajagadadhiShThAnabhUtaH shivo.aham || 92||
dR^ishyaM yadrUpametadbhavati cha vishadaM nIlapItAdyanekaM
sarvasyaitasya dR^igvai sphuradanubhavato lochanaM chaikarUpam |
taddR^ishyaM mAnasaM dR^ikpariNataviShayAkAradhIvR^ittayo.api
dR^ishyA dR^igrUpa eva prabhuriha sa tathA dR^ishyate naiva sAkShI || 93||
rajjvadnyAnAdbhuja~Ngastadupari sahasA bhAti mandAndhakAre
svAtmAdnyAnAttathAsau bhR^ishamasukhamabhUdAtmano jIvabhAvaH |
AptoktyAhibhramAnte sa cha khalu viditA rajjurekA tathAhaM
kUTastho naiva jIvo nijaguruvachasA sAkShibhUtaH shivo.aham || 94||
kiM jyotiste vadasvAhani raviriha me chandradIpAdi rAtrau
syAdevaM bhAnudIpAdikaparikalane kiM tava jyotirasti |
chakShustanmIlane kiM bhavati cha sutarAM dhIrdhiyaH kiM prakAshe
tatraivAhaM tatastvaM tadasi paramakaM jyotirasmi prabho.aham || 95||
kaMchitkAlaM sthitaH kau punariha bhajate naiva dehAdisaMghaM
yAvatprArabdhabhogaM kathamapi sa sukhaM cheShTate.asa~NgabuddhyA |
nirdvandvo nityashuddho vigalitamamatAhaMkR^itirnityatR^ipto
brahmAnandasvarUpaH sthiramatirachalo nirgatAsheShamohaH || 96||
jIvAtmabrahmabhedaM dalayati sahasA yatprakAshaikarUpaM
vidnyAnaM tachcha buddhau samuditamatulaM yasya puMsaH pavitram |
mAyA tenaiva tasya kShayamupagamitA saMsR^iteH kAraNaM yA
naShTA sA kAryakartrI punarapi bhavitA naiva vidnyAnamAtrAt || 97||
vishvaM neti pramANAdvigalitajagadAkArabhAnastyajedvai
pItvA yadvatphalAmbhastyajati cha sutarAM tatphalaM saurabhADhyam |
samyaksachchidghanaikAmR^itasukhakabalAsvAdapUrNo hR^idAsau
dnyAtvA niHsAramevaM jagadakhilamidaM svaprabhaH shAntachittaH || 98||
kShIyante chAsya karmANyapi khalu hR^idayagranthirudbhidyate vai
Chidyante saMshayA ye janimR^itiphaladA dR^iShTamAtre pareshe |
tasmiMshchinmAtrarUpe guNamalarahite tattvamasyAdilakShye
kUTasthe pratyagAtmanyakhilavidhimano.agochare brahmaNIshe || 99||
Adau madhye tathAnte janimR^itiphaladaM karmamUlaM vishAlaM
dnyAtvA saMsAravR^ikShaM bhramamadamuditAshokatAnekapatram |
kAmakrodhAdishAkhaM sutapashuvanitAkanyakApakShisaMghaM
ChitvAsa~NgAsinainaM paTumatirabhitashchintayedvAsudevam || 100||
jAtaM mayyeva sarvaM punarapi mayi tatsaMsthitaM chaiva vishvaM
sarvaM mayyeva yAti pravilayamiti tadbrahma chaivAhamasmi |
yasya smR^ityA cha yadnyAdyakhilashubhavidhau suprayAtIha kAryaM
nyUnaM sampUrNatAM vai tamahamatimudaivAchyutaM saMnato.asmi || 101||

iti shrImatparamahaMsaparivrAjakAchAryasya shrIgovindabhagava\-
tpUjyapAdashiShyasya shrImachChaMkarabhagavataH kR^itau
shatashlokI samAptA ||
##
Encoded by Subhash Prajapati, Sunder Hattangadi
Proofread by Subhash Prajapati, Sunder Hattangadi,
            Sreenivasa Rao Bhagavatula

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}