% Text title : sudhAlaharI % File name : sudhAlaharI.itx % Category : laharI, major\_works, jagannAthapaNDita % Location : doc\_z\_misc\_major\_works % Author : Jagannathapandita % Transliterated by : Dhaval Patel drdhaval2785 at gmail.com % Proofread by : Dhaval Patel drdhaval2785 at gmail.com % Description-comments : A stotra of 30 verses in praise of Sun God % Latest update : September 15, 2014 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Sudhalahari in Praise of Sun by PaNDitaraj JagannAtha ..}## \itxtitle{.. sudhAlaharI paNDitarAjashrIjagannAthavirachitA ..}##\endtitles ## ullAsaH phullapa~NkeruhapaTalatanmattapuShpaMdhayAnAM nistAraH shokadAvAnalavikalahR^idAM kokasImantinInAm | utpAtastAmasAnAmupahatamahasAM chakShuShAM pakShapAtaH saMghAtaH ko.api dhAmnAmayamudayagiriprAntataH prAdurAsIt || 1|| padmadrohoddhurANAM dhavalitaharitAmaindavInAM dyutInAM darpaM drAgdrAvayanto vidaladaruNimodrekadedIpyamAnAH | dUrAdevAndhakArAndhitadharaNaitaladyotane baddhadIkShA\- ste dainyadhvaMsadakShA mudamudayadinodveladusrA dishantu || 2|| trAtAmIvArtalakShAH pratidinavihitAnekagIrvANarakShA bhaktAnAM kalpavR^ikShAH sphuradanalagatasvarNabhAsAM sadR^ikShAH | lokakShemAttadIkShA nalinapariShadAM dattasaubhAgyalAkShA durvR^ittadhvaMsadakShA mama ravikiraNAH santvaghAnAM vipakShAH || 3|| prAleyAnAM karAlAH kavalitajagatImaNDaladhvAntajAlAH strAtasvarlokapAlA vidaladaruNimakShiptabAlapravAlAH | vishliShyatkokabAlAjvaraharaNabhavatkIrtijAlairjaTAlA vyomavyAptau vishAlAstvayi dadhatu shivaM bhAsvato bhAnumAlAH || 4|| nirbhidye kShmAruhANAmatighanamudaraM yeShu gotrAM gateShu drAdhiShThasvarNadaNDabhramabhR^itamanasaH saMnidhitsanti pAdAn | yaiH saMbhinne dalAgraprachalahimakaNe dADimIbIjabuddhyA cha~nchUchA~nchalyama~nchanti cha shukashishavasteM.ashavaH pAntu bhAnoH || 5|| ahni krIDochitAnAM sarasiruhalasanmandirANAM prabhAte prodghATya drAkkapATAnyatha kumudagR^ihAnmudrayanto vimuktAn | si~nchantaH kiM cha bhUmItalamakhilamapi kShuNNakAshmIranIraiH pAyAsuH shrIsaparyAvirachanapaTavaH padmabandhoH karA naH || 6|| AlepA hi~NgulAnAmiva dharaNibhujAmachChasaudhAgramauli\- ShvagreShu kShmAruhANAmabhinavavidalatpallavollAsalIlAH | prauDhaprAleyapu~njopari chitasvadirA~NgArabhArA ivArA\- tpArAvArAtprayAnto dinakarakiraNA ma~NgalaM naH kR^iShIran || 7|| kIlAlaiH ku~NkumAnAM nikhilamapi jagajjAlametanniShiktaM muktAshchonmattabhR^i~NgAvidalitakamalakroDakArAgR^ihebhyaH | utsR^iShTaM gosahasraM bahalakalakalaH shrUyate cha dvijAnAM bhAgyairvR^indArakANAM harihayaharitA sUyate putraratnam || 8|| yA sUte savabhUteShvanudinamudaye chetanAyA vilAsA\- nyAntI sAyaM nikAyaM jalanidhijaTharaM saMjarIharti sadyaH | atyarthaM vardhayantI maNigaNasuShamAsampadaM ratnasAnoH sA no bhAnoH prabhA no nayanasaraNito dUrato jAtu yAtu || 9|| nIhArairnIrajAnAM nibiDatamatamorAshibhirlochanAnAM shrautasmArtakriyANAmapi khalu nishayA nAshamAlakShya dUrAt | sadyaH sindhoH sakAshAdadhikatarajavenAgatA vAsavAshA\- mAshApAshAnasheShAnapaharatutarAM tIkShNabhAnoH prabhA naH || 10|| shIte shokaM shashA~Nke kR^ishatamaruchitAmAshunAshaM nishAyAM dhikkAraM dhvAntavarge kumudapariShadi prodgamaM dInatAyAH | pANDityaM puNDarIkeShvanudinamadhikAM kAntimAshAsu tanva\- nnanva~nchatyanvahaM dyAmuShasi karuNayA vishvavandyo vivasvAn || 11|| svApaM svApAkulAnAM gadamatha gadinAmandhakAraM trilokyAH pApaM pApAvilAnAM sapadi pariharannAgato vAsavAshAm | nityaprasthAnalIlAkupitakamalinInarmanirmANakarmA vishvArtitrANadharmA gaganamaNirasau pAtu sharmAnishaM vaH || 12|| antarnIraM nadInAmanudinamudaye bimbitA ye samantA\- dgIrvANAdreruda~nchanmaNigaNajaTilAM medinIM darshayanti | vipraprotkShiptasaMdhyA~njalijalakaNikAjAlamAkAshamadhye mANikyavrAtayanto mama mihirakarA mAndyamunmUlayantu || 13|| pratyagroDhAH pragalbhA yuvatipariShadaH proShitaprANanAthA yasminnastAdrimauleruparimaNimayachChatralIlAM dadhAne | satrAsaM saprasAdaM pariNatakaruNaM lochanAnyutkShipanti sthemAnaM sa priyANAM ghaTayatu bhagavAnpadminIvallabho vaH || 14|| antardyAvApR^ithivyoradhirajani bhR^itAnandhakArAnudArA\- nvidrAvya drAktadIyairiva jayadaruNaM shoNitairyadvidhate | sAyaM prAtashcha saMdhyA~njalimavanisurAH samprayachChanti yasmai tasmai kasmaichidetanmama paramahaMse devatAyai namo.astu || 15|| trANaM traiviShTapAnAM taraNamatha payastomatAmyattanUnAM nadyantAnAmatarkyaM triguNamayatayA yattrayANAM turIyam | tattAdR^iktundilAyAstaruNataratamaHsaMtaterantakR^ittvAM tejastrailokyatAmrIkaraNachaturima trAyatAM tIkShNabhAnoH || 16|| gIrvANagrAmaNIbhirgaganatalagatairgIrbhirudgIthagAbhi\- rgandharvaishchApi gItA guNagaNagAramodgArigAthAsahasraiH | gAhaM gAhaM gR^ihAlIragatikagadinAM gandhayanto gadArtiM glAnigrAmaM grasantAM graharuchiguravo gopatergovilAsAH || 17|| jIvAturjADyajAlAdhikajanitarujAM taptajAmbUnadAbhaM ja~NghAlaM jA~NghikAnAM jaladhijaTharato jR^imbhamANaM jagatyAm | jIvAdhAnaM janAnAM janakamatha rucho jIvajaivAtR^ikAde\- rjyotirjAjvalyamAnaM jalajahitakR^ito jAyatAM vo jayAya || 18|| prAtarnirgatya gobhiH saha ruchiviShaye saMcharantyo.ahni tAbhiH sAkaM sAyaM nikAyaM prati punarapi yAH samprayAtuM tvarante | yAsAM divyaprabhAvastrijagadaghavanashreNidAhaikadAvaH kShemaM tanvantu tA vaH shivamayavapuSho vAsareshasya gAvaH || 19|| vR^indairvR^indArakANAM danutanujanuShAM rakShasAM cha kShapAnte gandharvANAM dhurINaiH praNatamahivaraiH kiMnarairyannaraishcha | vidyAM hR^idyAM nijebhyo vitaradavirataM dIptibhirdIpayaddyA\- madyAdAdyAmavidyAmidamudayagirerudyadarkasya bimbam || 20|| A pAthojAsanAyuH kShaNalavaghaTikAdyAtmakaM kAlachakraM prAhuH pUrve purANAgamaviShayavido yasya lIlAvilAsam | bhAvAnAM ShaDvikArAnatha khalu gatibhiryashcha nityaM prasUte sa prAtaH pauruhUte parilasati harinmaNDale chaNDabhAnuH || 21|| a~NgAni brAhmaNAnAmuShasi himabharAsa~Ngato bha~NgurANi vyAlakShya drAkprapAtA ripujanitaruShevAruNA vAsavAshAm | dharmadhvaMsoddhurANAmakhilamapi kulaM jakShataH shobhitakShmA yakShmANaM me harantu tvaritamaghabhido bhAnavashchaNDabhAnoH || 22|| vishrAntiM brAhmaNAnAM sukhamatishayitaM kAminAM sthAyilIlA\- mambhojAnAM prabodhaM kumudapariShadAM yashchikIrShandayArdraH | niryAtyantaHsamudraM sakalamapi nR^iNAM bhAramAdhAya vahnA\- vahnAyAhnAmadhIshaH sa bhavatu bhavatAM bhUyase ma~NgalAya || 23|| drAgAhatya prabhAte rajanihimavataH kaumudIH kautukena prodyatprauDhAnukampAH punarapi khalu ye sAyamujjIvayanti | AruNye pallavAnAmatha gurucharaNAH shakragopAvalInAM te yuShmadbhAvalInAM dinakarakiraNAH klAntimunmUlayantu || 24|| drAgadvaitaM vitanvaMstribhuvanamabhitaH kau~NkumInAM dyutInAM nyakkurvanmAndyamudrAmatha rajanirujAM kokasImantinInAm | tandrAndhAnAndhyasindhoriha vitatatarairuddadhAnaM karAgraiH svAntadhvAntaM dhunItAmudayagirishirashchumbi mArtaNDabimbam || 25|| shuddhaM brahmAlavAlaM prakR^itishabalitaM yasya mUlaM karAsta\- ddrAdhiShTasvarNashAkhA vikasadaruNimA pallavAnAM vilAsaH | nIlaM vyomAlimAlA surasaphalabharo dharmakAmArthamokShAH sa shrImAnvA~nChitArthaM vitaratu satataM sUryakalpadrumo vaH || 26|| nIhAraM nimnagAbhyo nikhilanayanato nIrajebhyashcha nidrAM nIDebhyo nIDajAnAM nikaramuShasi ye nityamudvAsayanti | sAyaM teShveva teShAM punarapi ghR^iNayA kalpayante cha vAsaM te vaH santu prayAsaM ghR^iNighanaghR^iNayo hantumAbaddhakakShAH || 27|| saMhR^itya drAgbahiHsthaM timirakulamathAbhyantaraM hartukAmA randhrAlIbhirgR^ihANAmudaramanudinaM ye visha~NkaM vishanti | bhAnoste.amI hR^iShIkANyakhilatanubhR^itAM harShayanto hitehA hR^idrogaM saMharantAM himamahimahR^ito hemahR^idyAH karA naH || 28|| brahmANDaM maNDayanto viyati valayino maNDalairaNDajAnAM pAkhaNDAndaNDayanto danutanujanuShAM shobhitAkhaNDAlAshAH | ye khaNDAnpauNDarIkAnvidalayitumathoddaNDapANDityabhAja\- ste chaNDAMshorachaNDAstvaritamiha karAH pANDutAM khaNDayantu || 29|| UrdhvaM pApAvalibhyaH sthita iti jagade yasya vedairudAkhyA ninyuH ke.apyAsanArthaM khalu sahacharatAM netrayoH puNDarIkam | oShThAvR^iksAma yasya drutakanakanibhashmashrukeshAkhilA~NgaH so.ayaM sarvAntarAtmA tava dishatutarAM vAsareshaH shivAni || 30|| iti paNDitarAjashrIjagannAthavirachitA sudhAlaharI samAptA | ## A stotra of 30 verses in praise of Sun God by Panditraj Jagannatha. Encoded and proofread by Dhaval Patel drdhaval2785 at gmail.com \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}