% Text title            : tattvasamAsasUtravRtti
% File name             : tattvasamAsasUtravRtti.itx
% Category              : sUtra, major\_works
% Location              : doc\_z\_misc\_major\_works
% Transliterated by     : Dhaval Patel drdhaval2785 at gmail.com
% Proofread by          : Dhaval Patel drdhaval2785 at gmail.com
% Source                : sAnkhyasaNgrahaH 1918
% Latest update         : September 15, 2014
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. tattvasamAsasUtravRittiH ..}##
\itxtitle{.. tattvasamAsasUtravR^ittiH ..}##\endtitles ##

pa~nchaviMshatitattveShu janmanA j~nAnamAptavAn |
AdisR^iShTau namastasmai kapilAya maharShaye || 1 ||
athAtastattvasamAsAkhyasA~NkhyasUtrANi vyAkhyAsyAmaH | iha
kashchidbrAhmaNastrividhena duHkhenAbhibhUtaH sA~NkhyAchAryaM kapilamaharShiM
sharaNamupAgataH | svakulanAmagotrasvAdhyAyaM nivedyAha | bhagavan kimiha
paraM kiM yAthAtathyaM kiM kR^itvA kR^itakR^ityaH syAmiti | kapila uvAcha
kathayiShyAmi | aShTau prakR^itayaH || 1 || ShoDasha vikArAH || 2 ||
puruShaH || 3 || traiguNyam || 4 || sa~ncharaH || 5 || pratisa~ncharaH ||
6 || adhyAtmam adhibhUtam adhidaivataM cha || 7 || pa~nchAbhibuddhayaH ||
8 || pa~nchakarmayonayaH || 9 || pa~nchavAyavaH || 10 || pa~nchakarmAtmAnaH
|| 11 || pa~nchaparvA.avidyA || 12 || aShTAviMshatidhA.ashaktiH || 13 ||
navadhA tuShTiH || 14 || aShTadhA siddhiH || 15 || dashadhA mUlikArthAH ||
16 || anugrahasargaH || 17 || chaturdashavidho bhUtasargaH || 18 || trividho
dhAtusargaH || 19 || trividho bandhaH || 20 || trividho mokShaH || 21 ||
trividhaM pramANam || 22 || trividhaM duHkham || 23 || etat paramparayA
yAthAtathyametat samyag j~nAtvA kR^itakR^ityaH syAnna punastrividhena
duHkhenAbhibhUyate | iti tattvasamAsAkhyasA~NkhyasUtrANi ||
atha kA aShTau prakR^itaya ityatrochyate | avyaktaM buddhiraha~NkAraH
pa~ncha tanmAtrANItyetA aShTau prakR^itayaH | tatrAvyaktaM tAvaduchyate
yathA loke vyajyante ghaTapaTakuDyashayanakAdyA na tathA vyajata
ityavyaktam | shrotrAdibhirindriyairna gR^ihyata ityarthaH | kasmAt
anAdimadhyAntatvAnniravayavatvAchcha ||
ashabdamasparshamarUpamavyayaM
tathA cha nityaM rasagandhavarjitam |
anAdimadhyaM mahataH paraM dhruvaM
pradhAnametat pravadanti sUrayaH ||
sUkShmamali~NgamachetanamanAdinidhanaM tathAprasavadharmi niravayavamekameva
hi sAdhAraNametadavyaktam | avyaktasyAmI paryAyashabdA bhavanti | avyaktaM
pradhAnaM brahma paraM dhruvaM bahudhAnakamakSharaM kShetraM tamaHprasUtamiti |
kA buddhiratrochyate | adhyavasAyo buddhiH | soyamadhyavasAyo gavAdiShu
dravyeShu yasmAt pratipattiH | evametannAnyathA | gaurevAyaM nAshvaH |
sthANurevAyaM na puruShaH | ityeShA buddhiH | asyAstu buddheraShTau
rUpANi bhavanti dharmo j~nAnaM vairAgyamaishvaryamiti | tatra
dharmo nAmAdharmaviparyayaH shrutismR^itivihitaH shiShTAchArAviruddhaH
shubhalakShaNaH | j~nAnaM nAmAj~nAnaviparyayastattvabhAvabhUtAnAM sambodhaH |
vairAgyaM nAmAvairAgyaviparyayaH shabdAdiviShayeShvaprasaktiH | aishvaryaM
nAmAnaishvaryaviparyayo.aNimAdayo.aShTaguNAH | etAni sAttvikAni chatvAri |
adharmo.aj~nAnamavairAgyamanaishvaryamiti adharmo nAma dharmaviparyayaH
shrutismR^itiviruddhaH shiShTAchAraviruddho.ashubhalakShaNaH | aj~nAnaM
nAma j~nAnaviparyayastattvabhAvabhUtAnAmanavabodhaH | avairAgyaM
nAma vairAgyaviparyaH shabdAdiviShayeShvabhiSha~NgaH | anaishvaryaM
nAmaishvaryaviparyayo.aNimAdirahitatvam | etAni tAmasAni chatvAri | tatra
dharmeNa nimittenordhvagamanam | j~nAnena nimittena mokShaH | vairAgyeNa
nimittena prakR^itilayaH | aishvaryanimittenA.apratihatagatirbhavati |
evameShAShTarUpA buddhirvyAkhyAtA | buddheramI paryAyashabdA bhavanti |
mano matirmahAn brahmA khyAtiH praj~nA shrutirdhR^itiH |
praj~nAnaM santatiH smR^itirdhIrbuddhiH parikathyate ||
atrAha ko.aha~NkAra ityuchyate | abhimAno.aha~NkAraH |
ahaM shabde ahaM sparshe ahaM rUpe ahaM rase |
ahaM gandhe ahaM svAmI dhanavAnahamIshvaraH || 1||
ahaM bhogI ahaM dharme.abhiShikto.asau mayA hataH |
ahaM haniShye balibhiH parairityevamAdikaH || 2||
yo.ayamabhimAnapratyayo so.aha~NkAraH | aha~NkArasyA.amI paryAyashabdAH |
aha~NkAro vaikArikastaijaso bhUtAdiH sAnumAno niranumAnashcheti ||
atrAha kAni pa~nchatanmAtrANItyuchyate | aha~NkArAnvitAni pa~nchatanmAtrANi
shabdatanmAtraM sparshatanmAtraM rUpatanmAtraM rasatanmAtraM gandhatanmAtraM
cheti pa~nchatanmAtrANi | tatra tAvachChabdatanmAtrANi shabdeShvevopalabhyante
udAttAnudAttasvaritakampitaShaDjarShabhagAndhAramadhyamapa~nchamadhaivataniShAdAdayaH
shabdavisheShAdupalabhyante | tasmAchChabdatanmAtre.avisheShaH |
atha sparshatanmAtrANi sparsheShvevopalabhyante tatra
mR^idukaThinakarkashapichChilashItoShNAdayaH sparshavisheShA upalabhyante |
tasmAt sparshatanmAtre.avisheShaH | rUpatanmAtrANi rUpeShvevopalabhyante |
tatra shuklaraktakR^iShNaharitapItahAridramA~njiShThAdayo rUpavisheShA
upalabhyante | tasmAdrUpatanmAtre.avisheShaH | tathA rasatanmAtrANi
raseShvevopalabhyante | tatra kaTutiktakaShAyakShAramadhurAmlalavaNAdayo
rasavisheShA upalabhyante | tasmAdrasatanmAtre.avisheShaH | atha
gandhatanmAtrANi gandha evopalabhyante | tatra surabhirasurabhishcha
gandhavisheShA upalabhyante | tasmAd gandhatanmAtre.avisheShaH |
evametatpa~nchatanmAtrANi sUchitAni | athaiShAM paryAyashabdAH |
tanmAtrANyavisheShANi mahAbhUtaprakR^itayo bhogyAnyaNavaH shAntaghoramUDhAnIti |
evametA avyaktabuddhyahaMkAratanmAtrasa~nj~nitA aShTau prakR^itayo vyAkhyAtAH |
atha kasmAt prakR^itayaH | prakurvantIti prakR^itayaH |
atha te ke ShoDashavikArA ityatrochyate | ekAdashendriyANi
pa~nchamahAbhUtAnyete ShoDashavikArAH | tatrendriyANi tAvaduchyante | shrotraM
tvak chakShuShI jihvA ghrANamiti pa~ncha buddhIndriyANi | shrotraM svaviShayaM
shabdaM gR^ihNAti tvaksparshaviShayaM chakShU rUpaviShayaM rasanA rasaviShayaM
ghrANaM gandhaviShayamiti | vAkpANipAdapAyUpasthAkhyAni pa~ncha karmendriyANi
svaM svaM karma kurvanti | tatra vAgvachanamuchcharati | hastau karma kurutaH |
pAdau viharaNam | pAyurvisargam | upasthamAnandam | ubhayAtmakaM manaH |
svasaMkalpavikalpavR^ittI kurute | evanekAdashendriyANi vyAkhyAtAni |
athaiShAM paryAyAH | indriyANi karaNAni vaikArikANi khAni niyatAni padAni
avadhR^itAni aNUni akShANIti |
atha kAni pa~nchamahAbhUtAnItyatrochyate | pR^ithivyaptejovAyvAkAshAnIti
mahAbhUtAni | tatra pR^ithivI dhAraNabhAvena pravartamAnA chaturNAmupakAraM
karoti | Apo jalAni saMgrahabhAvena pravarttamAnAshchaturNAmupakAraM
kurvanti | tejaH pAchakabhAvena pravartamAnaM chaturNAmupakAraM
karoti | vAyurvAhanabhAvena pravartamAnashchaturNAmupakAraM
karoti | AkAshamavakAshadAnena pravartamAnaM chaturNAmupakAraM
karoti | shabdasparsharUparasagandhavatI pa~nchaguNA pR^ithivI |
shabdasparsharUparasavatyashchaturguNA ApaH | shabdasparsharUpavat
triguNaM tejaH | shabdasparshavAn dviguNo vAyuH | shabdavadekaguNamAkAsham |
evamAkhyAtAni pa~ncha mahAbhUtAni | athaiShAM paryAyAH | bhUtAni bhUtavisheShAH
vikArAH AkR^itayaH tanavaH vigrahAH shAntAH ghorAH mUDhAH ityete ShoDashavikArA
vyAkhyAtAH |
athAha kaH puruSha ityuchyate | puruSho.anAdiH sUkShmaH
sarvagatashchetano.aguNo nityo draShTA bhoktA.akarttA
kShetravidamalo.aprasavadharmI cheti | athAha kasmAt puruShaH purANAt
purishayanAt purohitavR^ittitvAchcha puruShaH | atha kasmAdanAdiH |
nAsyAdiranto madhyo vA vidyata ityanAdiH | kasmAt sUkShmaH |
niravayavatvAdatIndriyatvAt sUkShmaH | kasmAt sarvagataH | sarvaM
prAptamanena nAsya gaganamastIti sarvagataH | kasmAchchetanaH |
sukhaduHkamohopalabdhimattvAt | kasmAdaguNaH | sattvarajastamAMsyasminna
santyato.aguNaH | kasmAnnityaH akR^itakatvAdanutpAdakatvAchcha | kasmAd
draShTA | prakR^itivikArAnupalambhena iti | kasmAdbhoktA | chetanabhAvAt
sukhaduHkhaparij~nAnAchcha | kasmAdakartA | udAsInatvAdaguNatvAchcha | kasmAt
kShetravid | kShetrebhyo guNAn vettIti kShetravid | atha kasmAdamalaH |
shubhAshubhakarmANyasmin puruShe na santItyamalaH | kasmAdaprasavadharmI |
nirbIjatvAt | na ki~nchidutpAdayatItyarthaH | evameSha sAMkhyapuruSho
vyAkhyAtaH | athAsya puruShasya paryAyAH | puruShaH AtmA pumAn puMguNaH
bahulaH jantuH jIvaH kShetraj~naH naraH kaviH brahma akSharaH prANaH ajaH
yaH kaH saH eShaH | evametAni pa~nchaviMshatitattvAni vyAkhyAtAni | aShTau
prakR^itayaH ShoDashavikArAH puruShashcheti ||
pa~nchaviMshatitattvaj~no yatra kutrAshrame rataH |
jaTI muNDI shikhI vApi muchyate nAtra saMshayaH ||
atrAha puruShaH kiM kartA akarttA veti | yadi karttA puruShaH syAt tadA
shubhAni kuryAt | nanu vR^ittitrayaM loke dR^iShTaM puruShasya tataH kiM
guNAnAM kartR^itA.asiddhA ?
dharmAkhyaM sauhityaM yamaniyamaniShevaNaM prakhyAnam |
j~nAnaishvaryavirAgAH prakAshanamiti sAttvikI vR^ittiH ||
rAgaH krodho lobhaH paraparivAdo.atiraudratA.atuShTiH |
vikR^itAkR^itipAruShyaM prakhyAtaiShA tu rAjasI vR^ittiH ||
pramAdamadaviShAdA nAstikyaM strIprasa~NgitA nidrA |
AlasyaM nairghR^iNyamashauchamiti tAmasI vR^ittiH ||
etadvR^ittitrayaM dR^iShTvA loke guNAnAM kartR^itvaM siddhamiti chAkarttA
puruShaH siddho bhavati ||
pravarttamAnAn prakR^iterimAn guNAn
rajastamobhyAM viparItadarshanAt |
ahaM karomItyabudho.abhimanyate
tR^iNasya kubjIkaraNe.apyanIshvaraH ||
sarvamidaM mayA kR^itaM mamedamiti vadannabhimAnAdabudha unmattaH
kartR^ivadbhavati atrAha |
prakR^iteH kriyamANAni guNaiH karmANi sarvashaH |
aha~NkAravimUDhAtmA kartAhamiti manyate ||
anAditvAnnirguNatvAt paramAtmA.ayamavyayaH |
sharIrastho.api kauntaya na karoti na lipyate ||
evam |
prakR^ityaiva cha karmANi kriyamANAni sarvashaH |
yaH pashyati tathAtmAnamakartAraM sa pashyati ||
tatrAha kimayamekaH puruSho bahavo vetyuchyate |
sukhaduHkhamohasa~NkaravishuddhakaraNapATavajanmamaraNakaraNAnAM
nAnAtvAt puruShabahutvaM siddhaM lokAshramavarNabhedAchcha | yadyekaH
puruShaH syAdekasmin sukhini sarva eva sukhinaH syuH | ekasmin
duHkhini sarva eva duHkhinaH syuH | ekasmin karaNapATave sarveShAmeva
karaNapATavaM syAt | ekasmi~njAte sarva eva jAyeran | ekasmin mR^ite
sarva eva mriyeranniti | na chaivam itashcha bahavaH puruShAH siddhAH |
AkR^itigarbhAshayabhAvasa~NgatisharIravibhAge li~NgabahutvAt | evaM tAvat
sAMkhyAchAryAH kapilAsuripa~nchashikhapata~njaliprabhR^itayo bahUn puruShAn
varNayanti | vedAntavAdina AchAryA hariharahiraNyagarbhavyAsAdaya ekamevAtmAnaM
varNayanti | kasmAdevaM tadAha |
puruSha evedaM sarvaM bhUtaM yachcha bhAvyam |
utAmR^itatvasyeshAno yadanyenAtirohati ||
tadevAgnistadAdityastadvAyustaddhi chandramAH |
tadeva shukraM tadbrahma tadApaH saH prajApatiH ||
tadeva satyamamR^itaM sa mokShaH sA parA gatiH ||
tadakSharaM tat saviturvareNyaM
yasmAtparaM nAparamasti ki~nchit ||
yasmAnnANIyo na jyAyo.asti kashchid vR^ikSha iva stabdho divi
tiShThatyekastenedaM pUrNaM puruSheNa sarvam |
sarvataH pANipAdAntaM sarvatokShishiromukham |
sarvataH shrutimalloke sarvamAvR^ittya tiShThati ||
sarvendriyaguNAbhAsaM sarvendriyavivarjitam |
sarveShAM prabhumIshAnaM sarvasya sharaNaM mahat ||
sarvataH sarvatattvAni sarvAtmA sarvasambhavaH |
sarvaM vilIyate yasmin tadbrahma munayo viduH ||
eka eva hi bhUtAtmA dehe dehe vyavasthitaH |
ekadhA bahudhA chaiva dR^ishyate jalachandravat ||
sa hi sarveShu bhUteShu sthAvareShu chareShu cha |
vasatyeko mahAnAtmA yena sarvamidaM tatam ||
ekoyamAtmA jagatAmekena bahudhA kR^itaH |
pR^ithag vadanti chAtmAnaM j~nAnAdikapravartane ||
brAhmaNe kR^imikITeShu shvapAke shuni hastini |
pashugodaMshamashake samaM pashyanti paNDitAH ||
eka eva yathA sUtraM suvarNe vartate punaH |
muktAmaNipravAleShu mR^iNmaye rajate tathA ||
tadvad goShu manuShyeShu tadvaddhastimR^igAdiShu |
ekoyamAtmA vij~neyaH sarvatraiva vyavasthitaH ||
atrAha kiM traiguNyaM nAmochyate |
sattvarajastamAMsIti triguNA eva traiguNyam | sattvaM nAma
prasAdalAghavaprasannatAbhiSha~NgaprItituShTititikShAsantoShAdilakShaNamanantabhedaM
samAsataH sukhAtmakam | rajo nAma
shokatApasvedastambhodvegaroShamAnAdilakShaNamanantabhedaM
samAsato duHkhAtmakam | tamo
nAmA.a.achChAdanAvaraNabIbhatsadainyagauravAlasyanidrApramAdAdilakShaNamanantabhedaM
samAsato mohAtmakam | etat traiguNyaM vyAkhyAtam |
sattvaM prakAshakaM vidyAdrajo vidyAt pravartakam |
tamo.aprakAshakaM vidyAttraiguNyannAma saMj~nitam ||
atrAha kaH sa~ncharaH pratisa~ncharashcha | atrochyate | utpattiH sa~ncharaH
pralayaH pratisa~ncharaH | tatrotpattirnAmAvyaktAt prAgupadiShTAt
sarvataH puruSheNa pareNAdhiShThitA buddhirutpadyate | aShTaguNA
buddhiH | buddhitattvAdaha~NkAra utpadyate | sa chAhaMkArastrividho
vaikArikastaijaso bhUtAdiriti | tatra vaikArikAdahaMkArAdeva indriyANi
chotpadyante | bhUtAdestanmAtrANi | taijasAdubhayam | tanmAtrebhyo
bhUtAnIti sa~ncharaH | pratisa~ncharo nAma bhUtAni tanmAtreShu lIyante |
tanmAtrANIndriyANi chAhaMkAre | ahaMkAro buddhau | buddhiravyakte |
tadavyaktaM kvachinna lIyate | kasmAdanutpadyamAnatvAt prakR^itiM
puruSha~nchaiva viddhyanAdi ityevaM pratisa~ncharo vyAkhyAtaH |
tatrAha kiM tadadhyAtmamadhibhUtamadhidaivataM cheti | tatrochyate |
buddhiradhyAtmam boddhavyamadhibhUtaM brahmA tatrAdhidaivatam |
ahaMkAro.adhyAtmaM mantavyamadhibhUtaM rudrastatrAdhidaivatam |
mano.adhyAtmaM saMkalpitavyamadhibhUtaM chandrastatrAdhidaivatam |
shrotramadhyAtmaM shrotavyamadhibhUtamAkAshastatrAdhidaivatam |
tvagadhyAtmaM sparshayitavyamadhibhUtaM vAyustatrAdhidaivatam |
chakShuradhyAtmaM draShTavyamadhibhUtamAdityastatrAdhidaivatam |
jihvAdhyAtmaM rasayitavyamadhibhUtaM varuNastatrAdhidaivatam |
ghrANamadhyAtmaM ghrAtavyamadhibhUtaM pR^ithvI tatrAdhidaivatam |
vAgadhyAtmaM vaktavyamadhibhUtaM agnistatrAdhidaivatam |
pANI adhyAtmaM grahItavyamadhibhUtamindrastatrAdhidaivatam |
pAdAvAdhyAtmaM gantavyamadhibhUtaM viShNustatrAdhidaivatam |
pAyuradhyAtmamutsraShTavyamadhibhUtaM mitrastatrAdhidaivatam |
upasthamadhyAtmamAnandayitavyamadhibhUtaM prajApatistatrAdhidaivatam | evametat
trayodashavidhasya karaNasyAdhyAtmamadhibhUtamadhidaivataM vyAkhyAtam |
tattvAni yo vedayate yathAvad
guNasvarUpANyadhidaivataM cha |
vimuktapApmA gatadoShasa~Ngho
guNAMstu bhu~Nkte na guNaiH sa bhajyate ||
atha kAstAH pa~nchAbhibuddhaya uchyate | vyavasAyo.abhimAnechChA
kartavyatA kriyeti | abhimukhI buddhiridaM karaNIyaM mayeti vyavasAyo
buddhikriyA | AtmaparAtmasvarUpapratyayAbhimukho.abhimAno.ahaMkAro
buddheH kriyA | ichChA vA~nChA sa~Nkalpo manaso buddhikriyA |
shabdAdiviShayAlochanashravaNAdilakShaNakartavyatA buddhIndriyANAM
buddhikriyA | vachanAdilakShaNabuddhikriyA karmendriyANAM sA kriyeti |
evametAH pa~nchAbhibuddhayo vyAkhyAtAH |
atha kAstAH pa~nchakarmayonaya uchyante | dhR^itiH shraddhA sukhA.avividiShA
vividiShA cha pa~nchakarmayonayaH |
bAhyakarmANi saMkalpya pratItaM yo.abhirakShati |
tanniShThastatpratiShThashcha dhR^iteretaddhi lakShaNam ||
svAdhyAyo brahmacharyaM cha yajanaM yAjanaM tapaH |
dAnaM pratigraho homaH shraddhAyA lakShaNaM smR^itam ||
sukhArthaM yastu seveta brahmakarmatapAMsi cha |
prAyashchittaparo nityaM sukheyaM parikIrtitA ||
viShayamadhumishritAntaHkAraNatvamavividiShA | vividiShA cha dhyAninAM
praj~nAnayoniH |
ekatvaM cha pR^ithaktvaM cha nityaM chaivamachetanam |
sUkShmaM satkAryamakShobhyaM j~neyA vividiShA cha sA ||
kAryakAraNakShayakarI vividiShA prAkR^itikI vR^ittiH | dhR^itiH shraddhA
sukhA.avividiShA chatasro bandhAya vidiShaikA mokShAya | evametA pa~ncha
karmayonayo vyAkhyAtAH |
atrAha ke pa~nchavAyava uchyante |
prANopAnaH samAnashcha udAno vyAna eva cha |
ityete vAyavaH pa~ncha sharIreShu sharIriNAm |
tatra prANo nAma vAyurmukhanAsikAdhiShThAtA praNayanAtprakramaNAchcha prANa
ityabhidhIyate | apAno nAma vAyurnAbhyadhiShThitApanayanAdadhogamanAchchApAna
ityabhidhIyate | samAno nAma vAyurhR^idadhiShThAtA samanayanAt
sa~NgamanAchcha samAna ityabhidhIyate | udAno nAma vAyuH kaNThAdhiShThAtA
UrdhvagamanAdutkramaNAchchodAna ityabhidhIyate | vyAno nAma vAyuH
sandhyadhiShThAtA vikShepaNAdvijR^imbhaNAchcha vyAna ityabhidhIyate | iti
pa~nchavAyavo vyAkhyAtAH |
atrAha ke te pa~nchakarmAtmAna ityuchyate | vaikArikastaijaso bhUtAdiH sAnumAno
niranumAnashcha | tatra vaikArikaH shubhakarmakartA | taijaso.ashubhakarmakartA |
bhUtAdirmUDhakarmakartA | sAnumAnaH shubhamUDhakarmakartA |
niranumAno.ashubhamUDhakarmakartA chaivaM pa~nchakarmAtmAno vyAkhyAtAH |
atrAha kA sA pa~nchaparvA.avidyetyuchyate | tamo moho
mahAmohastAmishro.andhatamisrashcheti | tatra tamomohAvubhAvaShTAtmakau |
mahAmoho dashAtmakaH | tAmisrondhatAmisrashchAShTAdashAtmakau | tamo nAmAShTasu
prakR^itiShvavyaktabuddhyahaMkArapa~nchatanmAtrasaMj~nitAsvanAtmasvAtmAbhimAnastama
ityabhidhIyate | moho nAmANimAdyaShTaishvaryaprAptaye yo.abhimAna
utpadyate sa moha ityabhidhIyate | mahAmoho nAma dR^iShTAnushravikeShu
shabdAdiviShayeShu dashasu vR^ittiShu muktohamiti manyate sa mahAmoha
ityabhidhIyate | tAmisro nAmAShTaguNaishvarye.aNimAdye dashavidhe cha viShaye
yo dveSho.apratihatastatra yad duHkhamutpadyate.asau tAmisra ityabhidhIyate |
andhatAmisro nAmAShTaguNaishvarye.aNimAdye dashavidhe cha viShaye siddhe
maraNakAle yo viShAda utpadyate so.andhatAmisra ityabhidhIyate | evameShA
pa~nchaparvA.avidyA dviShaShTibhedA vyAkhyAtAH |
atrAha kA sA.aShTAviMshatidhA.ashaktiratrochyate | ekAdashendriyavadhAH
saptadasha tuShTisiddhi(buddhi)vadhAH | eShAShTAviMshatidhA.ashaktiriti |
tatrendriyavadhAstAvaduchyante | shrotre bAdhiryaM jihvAyAM jaDatvaM tvachi
kuShThitvaM chakShuShyarUpatvaM nAsikAyAmaghrANatvaM vAchi mUkatvaM hastayoH
kuNitvaM pAdayoH pa~NgutvaM vAgindriya udAvarta upasthendriye klaibyaM
manasyunmAda ityekAdashendriyavadhAH | saptadashatuShTisiddhivadhA
nAma viparyayAstuShTisiddhInAm | tuShTiviparyayAstAvaduchyante |
tatra nAsti pradhAnamiti yA pratipattiranantA | evamahamityAtmaj~nAne
tAmasalInA tathAhaMkArasyAdarshanamavidyA | naiva santi tanmAtrANi
bhUtakAraNAnItyavR^iShTiH | viShayANAmarjane pravR^ittirasutArA |
rakShaNe tu pravR^ittirasupArA cha | kShayadoShamadR^iShTvA.arthe
pravR^ittirasunetrA | bhogA shaktirasumarIchikA | hiMsAdoShamapashyato
bhogArambho.anuttamAmbhasikA | iti tuShTiviparyayA navadhA.atuShTayo
vyAkhyAtAH | atha siddhiviparyayA asiddhayo.aShTau chAbhidhIyante |
nAnAtvaM bhUtamAtrasyaikAtvamAvirbhUtamatAramuchyate |
shabdamAtrashravaNAdviparItagrahaNamAsutAraM yathA nAnAtvaj~no
mukta iti shrutvA viparItaM pratipanno nAnAtvaj~no hyamukta iti |
adhyayanashravaNAbhiniviShTasyApi jaDatvAdasachChAstropahatabuddhitvAdvA
pa~nchaviMshatitattvaj~nAnasiddhirna bhavati tadA.atAratAraM tadaj~nAnam |
kasyachidAdhyAtmikena duHkhenAbhibhUtasyApi saMsAre.anudvegAdajij~nAsorna
j~nAnaM tatpramAdam | evamapramuditApramodamAnayoshchAnyonyayordvayamaparaM
draShTavyam | suhR^idupadiShTe.apyanishchayabuddheraj~nAnam
parasparamasampA | asampAvachanAdathavA parA~Nmukhe gurau durbhAgyasya
j~nAnAsiddhistadaj~nAnamasatpramuditamiti | evamete siddhiviparyayA
asiddhayo.aShTau vyAkhyAtAH | evameShA.aShTaviMshatidhA.ashaktirvyAkhyAtA |
atrAha kA sA navadhA tuShTiratrochyate | prakR^itiM paramArthatvena parikalpya
parituShTe mAdhyasthaM labhate tasya tuShTyA sA tAntrikI saMj~nA.ambha iti |
aparo buddhiM paramArthavena pratipadya parituShTastasyAstuShTeH shalilA
iti saMj~nA | anyo.ahaMkAraM paramArthatvenAbhyupagamya parituShTasta\-\-\-
page 134\-135 missing
sa~NghAtaparArthatvAditi puruShAstitvaM siddham | bhedAnAM parimANAt
kAraNamastyavyaktamiti paryAyadvayena pradhAnasyAstitvaM siddham |
hetumadanityamityekatvaM siddham | prItyaprItiviShAdAtmakA ityarthavattvaM
siddham | nAnAvidhairupAyairiti parArthatvaM siddham | triguNamaviveki
viShaya ityanyatvaM siddham | tasmAchcha viparyAsAdityakartR^itvaM siddham |
puruShasya darshanArthaM kaivalyArthaM tathA pradhAnasyApIti yogasiddhiH |
prApte sharIrabhede charitArthatvAditi viyogasiddhiH | janmamaraNakaraNAnAmiti
puruShabahutvaM siddham | chakrabhramivaditi sheShavR^ittiH siddhA |
ete dashamUlikArthA vyAkhyAtAH | eteShAM dashAnAM prAgupadiShTAnAM cha
pa~nchAshatpratyayAH | ete cha ShaShTipadArthAH ShaShTitantramityuchyate |
atrAha ko.anugrahasargaH atrochyate | bAhyAn
pa~nchatanmAtrebhyashchotpAdyAnugrahasargadhyAnotpannenAdhAravarjitAn putrAn
dR^iShTvA tebhyastanmAtrebhyo.anugrahasargamasR^ijadbrahmA |
atrAha kashchaturdashavidho bhUtasarga ityatrochyate | aShTavikalpo daivaH
paishAcho rAkShaso yAkSho gAndharva aindraH prAjApatyo brAhma ityaShTau
devayonayaH | pa~nchadhA tiryagyonashcha pashupakShimR^igasarIsR^ipasthAvarA
iti | gavAdimUShakAntAH pashavaH | garuDAdimashakAntAH pakShiNaH |
siMhAdishR^igAlAntAH mR^igAH | sheShAdikITAntAH sarIsR^ipAH |
parvatAditR^iNAntAH sthAvarAH | mAnuShyaM chaikavidhaM brAhmaNAdichANDAlAntam |
aShTavikalpo daivastiryagyonashcha pa~nchadhA bhavati | mAnuShyashchaikavidhaH
samAsato bhautikaH sargaH ||
samAsato ye tridhAH sargAH tatrAha kastrividho dhAtusargaH atrochyate
sUkShmAH mAtApitR^ijAH prabhUtA iti | j~nAnendriyapa~nchaprANabuddhimanasAM
gaNaH sUkShmaH | li~NgasharIrANItyarthaH | mAtApitR^ijA ShATkaushikAH tatra
mAtR^ito lomalohitamAMsAni pitR^itaH snAyvasthimajjAna iti ShaTko gaNaH |
prabhUtAH pa~nchamahAbhUtAni mahAbhUte ghaTAdInAM nivesha iti trividho
dhAtusargo vyAkhyAtaH | etatsaMsAramaNDalamuktam ||
atrAha kastrividho bandya ityatrochyate | prakR^itibandho
vaikArikabandho dakShiNAbandhashcheti | tatra prakR^itibandho
nAmAShTau prakR^itayastAH paratenAbhimanyamAnasya prakR^itilayaH
prakR^itibandha ityuchyate | tatra vaikArikabandho nAma pravrajitAnAM
laukikAnAM vaikArikairindriyairvashIkR^itAnAM shabdAdiviShaye
prashaktAnAmajitendriyANAmaj~nAninAM kAmamohitAnAM vaikArikabandha
ityuchyate | dakShiNAbandho nAma brahmachArigR^ihasthabhikShuvaikhAnasAnAM
kAmamohopahatachetasAmabhimAnapUrvikAM dakShiNAM prayachChatAM dakShiNAbandha
ityuchyate | iti trividho bandho vyAkhyAtaH | uktaM cha |
prAkR^itena tu bandhena tathA vaikArikeNa cha |
dakShiNAbhistR^itIyena bandhoyaM cha nigadyate ||
atrAha kastrividho mokSha ityatrochyate | j~nAnodrekAdindriyarAgopashamAt
kR^itsnakShayAchcheti | j~nAnodrekAdindriyarAgopashamAt svadharmAdharmakShayo
bhavati dharmAdharmakShayAchcha kaivalyamiti | uktaM cha |
Adyo hi mokSho j~nAnena dvitIyo rAgasaMkShayAt |
kR^itsnakShayAt tR^itIyastu vyAkhyAtaM mokShalakShaNam ||
kiM trividhaM pramANamityatrochyate | dR^iShTamanumAnamAptavachanaM
cheti etat trividhaM pramANam | dR^iShTaM tAvadvyAkhyAyate yAvadindriyANAM
pa~nchendriyArthAH pratyakShA eva dR^iShTam | anumAnam pramANaM li~Ngadarshane
jAyamAnaM j~nAnam | yathA meghodayena vR^iShTiH sAdhyate bakapa~NktibhiH
salilam dhUmenAgniH tadanumAnam | pratyakSheNAnumAnena vA yortho na sAdhyate sa
AptavachanAt sAdhyate | yathendro devAnAM rAjA uttarAH kuravaH sauvarNo meruH
svarge.apsarasa iti | ta indrAdayaH pratyakShAnumAnAsAdhyAshcha vasiShTAdayo
munayo vadanti santIndrAdayaH Agamopyasti |
svakarmaNyabhiyukto yo rAgadveShavivarjitaH |
j~nAnavAn shIlasampanna Apto j~neyastu tAdR^ishaH ||
evametat trividhaM pramANamabhihitam | atrAha tena trividhena pramANena
kiM sAdhyate atrochyate | yathA loke mAnena prasthAdinA dhAnyAni mIyante |
tulayA chandanAdIni dravyANi | evamanena tattvabhAvabhUtAni pramIyante |
trividhena duHkhenAbhibhUto brAhmaNaH kapilamaharShisharaNamupAgataH atrAha |
kiM trividhaM duHkhamityatrochyate | AdhyAtmikamAdhibhautikamAdhidaivikamiti |
tatrAdhyAtmikaM dvividhaM shArIraM mAnasaM cheti | sharIre bhavaM shArIram
manasi bhavaM mAnasaM cheti | tatra shArIraM nAma vAtapittashleShmaNAM
vaiShamyAdyadduHkhamutpadyate jvarAtisAravisUchikAmUrChAdikaM
tachChArIramuchyate | kAmakrodhalobhamohamaderShyAdikaM priyaviyogAdikaM
tanmAnasamityuchyate | adhibhUtebhyo bhavamAdhibhautikam |
mAnuShapashumR^igasarIsR^ipasthAvarebhyo yadduHkhamutpadyate tadAdhibhautikam |
adhidevebhyo jAtamAdhidaivikam | shItoShNavAtavarShAsannipAtAdinimittaM
yadduHkhamutpadyate tadAdhidaivikam | anena trividhena duHkhenAbhibhUtasya
brAhmaNasya jij~nAsotpanA | j~nAtumichChA jij~nAsA | yathA tR^iShitasya
pAnIyaM pAtumichChA pipAsA | etatsamAsato niHshreyasaM j~nAnam | yajj~nAtvA
punarjanma na syAditi ||

etanmaharShervij~nAnaM kapilasya mahAtmanaH |
yachChrutvA brAhmaNaH shreyaH kR^itakR^ityo.abhavat tadA ||
sAMkhyasUtrakrameNaiShA vyAkhyAtA kramadIpikA |
anuShTupaChandasA chAtra j~neyaM shlokashatatrayam ||

iti shrItattvasamAsAkhyA sUtravR^ittiH samAptA ||


Encoded and proofread by Dhaval Patel drdhaval2785 at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}