% Text title            : Upadesha Shatakam
% File name             : upadeshashatakam.itx
% Category              : major\_works, shataka, upadesha
% Location              : doc\_z\_misc\_major\_works
% Author                : gumAnikavi
% Transliterated by     : Akash Pandey
% Proofread by          : Akash Pandey
% Latest update         : January 22, 2022
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Upadesha Shatakam ..}##
\itxtitle{.. upadeshashatakam ..}##\endtitles ##
triShu deveShu mahAntaM bhR^igurbubhutsuH parIkShya harimekam |
mene.adhikaM mahimnA sevyaH sarvottamo viShNuH || 1||
rukmA~NgadaH svaputraM nihatya khaDgena mohinIvachasA |
satyAM rarakSha vAchaM na sa~NkaTe.api tyajeddharmam || 2||
nirvAsito hitepsurvibhIShaNo rAvaNena la~NkAyAH |
tannAshaheturAsInnahi nijabandhurviroddhavyaH || 3||
hR^itarAjyadarpasAraM suyodhanaM nigrahItumapi shaktAH |
proShurvaneShu pArthA dhIraH samayaM pratIkSheta || 4||
maNihetorabhishaptaH kR^iShNaH satrAjitAtha jAmbavataH |
jitvA dadau tamasmai janApavAdAdbhajedbhItim || 5||
svArAjyamashnuvAnaH prakopya nahuSho munInahirbhUtvA |
nyapatattvaritamadhastAtprAptaishvaryo na dR^iptaH syAt || 6||
sahadharmiNIM vanAntAddasharathasUnorjahAra dashavaktraH |
bandhanamApa samudro na durjanasyAntike nivaset || 7||
hantuM devakatanayAM vasudevenodyatAyudhaH kaMsaH |
madhuroktibhiranunItaH sAmnA mUrkhaM vashe kuryAt || 8||
bhrAtarmahadatichAro na yukta iti vAdinaM dashagrIvaH |
dhanadaM babandha yuddhe mUDhamatirnopadeShTavyaH || 9||
vishrabdhashchaTuvachanaiH kaikeyyai dasharatho varaM dattvA |
sa~NkaTamApa durantaM strIShu na kurvIta vishvAsam || 10||
garvAdyoddhumupetaH paulastyaH sapadi kArtavIryeNa |
krIDAmR^iga iva baddho na balodriktena yoddhavyam || 11||
sandIpitAgrapuchCho baddhatanustADito.api rakShobhiH |
la~NkAM mArutiradahadvipadi vijahyAnna shUratvam || 12||
rukmI Chalena dIvyanbalaM vijityAtha parihasannuchchaiH |
drAgvadhamApa sabhAyAM nopahasennirjitaM dyUte || 13||
shakunisuyodhanakarNairjito.akShadhUtairyudhiShThiro dyUte |
nirvAsitaH svarAShTrAtkitavaiH saha nAchareddyUtam || 14||
makharakShaNAya putraM vishvAmitrAya dasharatho.arthayate |
prAyachChadgatasha~NkaM dustyajamapyarthine deyam || 15||
tyaja pArthaiH saha raNamiti vidureNokto.ambikAsutaH satatam |
tadamatvA kShayamApatkartavyaM bhAShitaM suhR^idAm || 16||
shishupAlaH kratukAle harimarhaM garhayannanarhoktyA |
tatkShaNamiyAya nAshaM na mahAntaM kvApi garheta || 17||
anyadvijAya mohAnnR^igo vadAnyo dvijasya gAM dattvA |
sadyo.abhUtkR^ikalAso brahmasvaM dUrato visR^ijet || 18||
sugrIvo raghupatinA hR^itadAreNopagamya hR^itadAraH |
dR^iDhamAbabandha sakhyaM samAnaduHkhaH sakhA kAryaH || 19||
vIro vaitanikaH sanvirATanagaroShitaH kumArINAm |
nartayitArjuna AsIdbhajedavasthochitA vR^ittim || 20||
duShyantaH svavadhUmapi kaNvAnItAM shakuntalAM sasutAm |
suchiraM vimR^ishya bheje kAryaM sahasA na vidadhIta || 21||
jamadagninA niyuktaH sadyo nijaghAna mAtaraM rAmaH |
nirdoShaH punarAsIdgurUktamavichAritaM kuryAt || 22||
shatayojanatatamabdhiM vila~Nghya vAtAtmajo.avishalla~NkAm |
vIrAgrataHsaro.abhUdyasho.arjayansAhasaM kuryAt || 23||
prahitaH surairjigIShurharaM prahartuM smaro.abhyayAdyAvat |
bhasmIbabhUva tAvanna chikIrShedduShkaraM karma || 24||
sa~NkuTya pAdaghAtaiH kAlindyAM kauliyaM kR^itAgaskam |
nirayApayanmukundo duShTe daNDaH prayoktavyaH || 25||
kulishAhatihR^itashirase.apyadAtkabandhAya jIvate shakraH |
ashanAyorasi vadanaM dIno ripurapyanugrAhyaH || 26||
sugrIvAya shukaH svAddashamukhasandeshamAdishankapibhiH |
santADya sapadi baddho na dUtabhAvaM bhajedasataH || 27||
ashvatthAmA hata iti yudhi giramanR^itAM yudhiShThiro.avAdIt |
punaranutApamavApatpApaM kR^itvAnutapyeta || 28||
bhogAnbahUnyayAtirbhuktvA vayasA sutasya chirakAlam |
niravidyatAvitR^iptaH kAmaM manyeta duShpUram || 29||
balirindrajittrilokyAM bhu~njanbhogAMshchirAdvinaShTashrIH |
sutale.abadhyata pAshairbhogAnkShaNabha~NgurAnvidyAt || 30||
vilapantaM hataputraM dhR^itarAShTra vIkShya karuNayA kR^iShNaH |
kShaNamanushushocha sAsraM duHkhitamanu duHkhito bhUyAt || 31||
niHkShatriyAM na chakre yAvadrAmo bhuvaM ruShA tAvat |
AsIdraNaikatAno viramedasamApya nArabdham || 32||
duhitA videhabharturdAsharatherbhAminI sItA |
vadhamApa rAkShasInAM vidhervichitrA gatirbodhyA || 33||
nigamAgamaikavettA droNastaptvA tapo.arthamanvichChan |
dhAnuShkavR^ittirAsIddharmaM chArthaM cha seveta || 34||
adhishambhumauli nivasannekakalAtmA yathArchyate chandraH |
na tathA sa pUrNabimbaH shrayenmahAntaM mahattvAya || 35||
sharatalpamadhishayAnAdbhIShmAdAkarNya dharmajo dharmAn |
duHkhaM jahau durantaM praShTavyAH satpathaM vR^iddhAH || 36||
karNena ghAtayitvA ghaTotkachaM shakrashaktinirmokShAt |
jIvitamarakShi pArthaiH svAtmAnaM sarvato rakShet || 37||
pR^ithukopahArapANirhariM sakhAyaM prapadya dInAtmA |
shrImAnabhUtsudAmA shrayeta sanmittramApatsu || 38||
dR^iShTvA hariH samakShaM bANatrANAya koTavIM nagnAm |
samare parA~Nmukho.abhUtstriyaM vivastrAM na vIkSheta || 39||
adishallakShmaNahetormArutimAnetumoShadhIM rAmaH |
tAmAnayatsa dUrAddhuryaH kArye niyoktavyaH || 40||
ArAdhya kaitavaj~no raudraM rudrAdvR^iko varaM labdhvA |
gaurImiyeSha hartuM na vinItaM vishvaseddhUrtam || 41||
dashakaNTharakShitAyAM la~NkAyAM rakShasAmabhUdvasatAm |
gR^ihavittabandhunAsho vasenna rAShTre kubhUpAle || 42||
shaptvAmbarIShamAryaM durvAsAH kopano nirAgaskam |
chakreNa tApito.abhUnna vidadhyAtkrodhamasthAne || 43||
makhashikhini hUyamAnaM takShakamavituM prapannamasamarthaH |
ajahAnna tu puruhUtaH sharaNamupeto na hAtavyaH || 44||
hatvA svasustanUjAnsadyo jAtAnbahUnkhalaH kaMsaH |
utsannaH sahasAbhUnna kutsitaM karma kurvIta || 45||
sItAM visR^ijya rAmaH sAkaM munibhirmunivrato rAjyam |
shAsannuvAsa puryAM neyaH sadbhiH samaM samayaH || 46||
kR^iShNadhana~njayabhImAndvijaveShasthA~njarAsutashchihnaiH |
kShAtraiH kShipramajAnAdAkArairi~NgitaM vidyAt || 47||
yAM yAM dishaM gato.abhUddhiraNyakashipuryadR^ichChayA vicharan |
tAM tAM surAH praNemurduShTajanaM dUrataH praNamet || 48||
kurvannapi munishaptaH svajIvitArthI parIkShito yatnam |
daShTo.ahinA vinaShTo j~neyo mR^ityuH sudurvAraH || 49||
saditi pratIyamAnaM jaganmR^iShaiveti kevalaM buddhvA |
janako vimuktimAgAtsvapnavadantarjagadbodhyam || 50||
viharanvadhUbhirantaHpure.agnivarNo divAnishaM kAmI |
grasto.atha yakShmaNAbhUdviShayAnviShabhIShaNAnvidyAt || 51||
vipraH patirvR^iShalyA hiMsro.apyabhivAdanAnmaharShINAm |
vAlmIkirmunirAsItpuruShAnabhivAdayenmahataH || 52||
nishi kAmayandurAtmA drupadasutAM kIchako rahaH prAptAm |
vadhamApa bhImasenAtparastriyaM nAbhikA~Nketa || 53||
yudhi kuravaH kR^itavairA vIraM vyUhaM vishantamabhimanyum |
bahavo nijaghnurevaM naiko ripumaNDalaM pravishet || 54||
puShkaranirjitarAjyaH puramR^ituparNasya naiShadho gatvA |
sArathirabhUnnigUDho duravastho na prakAshaH syAt || 55||
kShAtraM vimR^iShya dharmaM mAnyairgurubhirdvijaiH samaM samare |
yuyudhe.arjuno dhanuShmAnghoramapi svaM chareddharmam || 56||
harirambudhimathanotthAM sudhAM surebhyaH surAM surAribhyaH |
vyataratsamaM yathArhaM yogyaM yogyAya dAtavyam || 57||
atha chaikatvamavAptAH surAM nipIyoddhatA mitho ghnantaH |
yudhi yAdavAH praNeshurdhImAnmadyaM na seveta || 58||
yaj~notsave svapitrA haThAdanAkAritA satI gatvA |
tanumajahAtparibhUtA kvApi na gachChedanAhUtaH || 59||
muchukundena mukundo yadubhiravadhyasya kAlayavanasya |
Chalato.achIkaradantaM vadhyo.arirva~nchayitvApi || 60||
asakR^idyudhi vijitAdapi bhIto bArhadrathAjjale durgam |
kR^itvA harinyavAtsIdvijito.apyAsha~NkanIyo.ariH || 61||
turagArthe.abhisarantaH prakopya kapilaM kShaNAtsamaM sarve |
sagarasutAH kShayamIyurna kopayettApasaM shAntam || 62||
munirapi vishvAmitraH shvA bhUtvA gUDhamurvashIvashagaH |
anvavrajatsmarArto bhetavyaM durjayAtkAmAt || 63||
baladarpitastrilokyAM tR^iNavadgaNayandashAnanaH shUrAn |
yudhi nirjitaH plava~Ngairna vahedgarvambudho manasA || 64||
mAturvAksharaviddhaH pa~nchAbdo duShkaraM tapastaptvA |
dhruva uchchaiHpadamabhajatpuMsA vyavasAyinA bhAvyam || 65||
nItA rahasi sakhIbhyo bahumahitA ballavI pathi shrAntA |
vaha mAmiti harimUche na hyatisammAnayetpramadAm || 66||
dadhataH svalakShma yuddhe muhuH shR^igAlasya jalpataH paruSham |
shrutvA jahAsa shaurirna vAgvivAdaM shaThaiH kuryAt || 67||
akR^itAgasamapi rAmo vAlinamantarhitashChalenaiva |
sakhyurjaghAna shatruM suhR^idripuM bhAvayedripuvat || 68||
kruddho halI kurUNAM puramutthApya kShipannadyAm |
anunItastadamu~nchatkrodhAviShTo.anunetavyaH || 69||
baddhvArpitaM kumArairdroNo drupadaM kR^itAparAdhamapi |
vyasR^ijadvisR^ijya roShaM kShamiNA puruSheNa bhavitavyam || 70||
duryodhane sabhAyAM mAnabhraShTe jahAsa yadbhImaH |
tadabhUdvigrahabIjaM na vairamutpAdayetsvasmAt || 71||
svapitR^InsamuddidhIrShanprApayya kShmAM bhagIratho ga~NgAm |
pAvitavAnitarAnapi hitaM charetkarma sarveShAm || 72||
tArAM jahAra chandraH striyaM gurordruhyatAM mithastena |
samaro.abhavatsurANAM bodhyaM vairaikabIjaM strI || 73||
adhiveshma pUjanIyA chiramuShitA brahmadattabhUpasya |
andhaM chakAra putraM na nIchamAvAsayetsvagR^ihe || 74||
lubdho balAjjighR^ikShankAmadughaM kaushiko vasiShThasya |
na prApa jAtadarpo haThaM na kuryAddurApe.arthe || 75||
dR^iptaM balena roShAnnibadhya vairaM kirITinA karNam |
kuravo vyadhuH sakhAyaM riporvipakShaH sakhA kAryaH || 76||
dviShatAM vadhe sahAyaM kakutsthamindro raNe vR^iSho bhUtvA |
avahadvihAya lajjAM kAryArthI nAvahenmAnam || 77||
api gautamo dvinetraM shakramahalyArataM shapankruddhaH |
chakre sahasranetraM guNavAnbodhyaH satAM shApaH || 78||
dhanadaH puShpakamekaM la~NkApataye yuyutsave dattvA |
alakAmapAtsamagrAM bahu rakShedalpadAnena || 79||
tanaye vinayini vIre pArthaH kurubhihate.api saubhadre |
yuyudhe vidhUya shokaM na gate shoko vidhAtavyaH || 80||
vyAsAchChrutaM bhaviShyadbhImaM janamejayaH svakaM vR^ittam |
shashvatsmarannashochanna bhAvinaM chintayedartham || 81||
vaikartanamapi kuntyAH sutamapi loko.anyasevinaM karNam |
rAdheyameva mene budhaH svavR^ittyAnuvarteta || 82||
hitvAnyAnharidArAnsAtrAjityai surarShirarthaj~naH |
divyaM dadau prasUnaM mano.anuvR^ittiM prabhoH kuryAt || 83||
rohiNyA vashago.anyAH striyaH parityajya dakShashApena |
yakShmI babhUva chandro naikarataH sthAdbahustrIkaH || 84||
tapasA vidhUtapApaM mANDavyaM daNDayanyamaH sadyaH |
shUdratvamApa shApAnnAdaNDye pAtayeddaNDam || 85||
satrAjitaM nishAyAM nirbharanidrANameva shatadhanvA |
avadhItsyamantakArthe nAtishayAlurbhavedrAtrau || 86||
hatavatyapi nijatanujAngAdhisute vIryavAnvidheH sunuH |
pratikartumApa lajjAM kulAnurUpaM vahechChIlam || 87||
vidyAM kacho bubhutsuH shukrAtsa~njIvinIM vinItAtmA |
surapakShago.api lebhe vinayAtsaMsAdhayetkAryam || 88||
droNe sakha iti vAdini nArathirathinoH sakhitvamityAha |
drupado vidhUya sakhyaM nR^ipaM na mitraM vijAnIyAt || 89||
api shaktaH parihartuM yayAtishApaM harihate kaMse |
rAjAsanaM na bheje purAtanI pAlayetsaMsthAm || 90||
vimukho dyumadgadArtaH pradyumno dhikkR^ito raNe hariNA |
paribhavamApa mahAntaM na bhavedvimukho raNAddhIraH || 91||
ekAgratAM svakarmaNi dattAtreyaH prashasya sharakartuH |
samashikShatAtmayogaM nIchAdapi sadguNo grAhyaH || 92||
api va~nchayanviri~nchiH kR^iShNaM vatsAnsavatsapAnhR^itvA |
svayameva va~nchito.abhUnmAyAviShu nAcharenmAyAm || 93||
mR^igayArataH praseno vighaTitaseno.aTavImaTannekaH |
kesariNA vinijaghne naikAkI sa~ncharedvipinam || 94||
shivali~NgAntamalabdhaM labdhaM vidhineti kAmadhukprAha |
atha nindyamApa shApaM na vidadhyAtkUTasAkShitvam || 95||
putreNa savyasAchI parAjito babhruvAhanenAjau |
tuShyanhR^idi na lalajje parAjayaM putrato.anvichChet || 96||
chirasa~NgatAya kuntI kR^iShNAya kleshitA kurukShetre |
vyasanaM svamAha sarvaM suhR^ide vinivedayedduHkham || 97||
pA~nchAlIgajarAjau hariNA duHshAsanAvahArAbhyAm |
trAtau kShaNAtprapannau hariM bhayArtaH prapadyeta || 98||
daivAdvanopalabdhAM yayAtirabrAhmaNo.api gatasha~Nkam |
shukrasutAmupayeme vidhipraNIte pravarteta || 99||
asuro hitamupadiShTaH prahlAdo nAradena garbhasthaH |
tattvaviduShAM varo.abhUddhitopadeshaM sadA shR^iNuyAt || 100||
sphuTamAryAshatamaditAnpR^ithakpramANIkR^itAnudAharaNaiH |
shatametAnupadeshAnvibhAvayanbhAvayetsiddhim || 101||
kutukAya kovidAnAM mUDhamatInAM mahopakArAya |
niramAtkavirgumAniH shatopadeshaprabandhamamum || 102||

|| iti shrIgumAnikavipraNItamupadeshashatakaM samAptam ||
##


Encoded and proofread by Akash Pandey

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}