नवग्रहमङ्गलस्तोत्रम्
भास्वान् काश्यपगोत्रजोऽरुणरुचिः सिंहाधिपोऽर्कः समित्
षट्त्रिस्थो दशमः शुभो गुरुशशी क्षोणीज मित्रं सदा ।
शुक्रार्कीतु रिपू कलिङ्गविषयेशोऽग्नीश्वरौ देवते
मध्ये वर्तुल पूर्व दिङ्मुख इनः कुर्यात् सदा मङ्गलम् ॥ १॥
चन्द्रः कर्कट राशिपः सितरुचिः स्वच्छोत्रि गोत्रोद्भवो
वह्नयाशा चतुरस्र वारुणमुखस्त्वापःशिवा देवते ।
षट्सप्ताग्नि दशाद्यगः शुभफलो नारिर्बुधार्क प्रियः
स्यातां यामुनदेश पर्णसमिधः कुर्यात् सदा मङ्गलम् ॥ २॥
भौमो याम्य मुखस्त्रिकोणनिलयोऽवन्तीश्वरः खादिरः
त्विध्मोवृश्चिक मेषपोऽस्य सुहृदः सूर्येन्दुजीवाः स्मृताः ।
ज्ञोऽरिः षट् त्रिणगः शुभोथ वसुधा स्कन्दौ क्रमात् देवते
भारद्वाज कुलोद्भवः क्षितिसुतः कुर्यात् सदा मङ्गलम् ॥ ३॥
सौम्यः पीत उदङ्मुखः समिदपामार्गोऽत्रि गोत्रोद्भवो
बाणेशानदिशौ हितो रवि सितौ शत्रुः स्मृतः शीतगुः ।
कन्यायुग्मपतिर्दशाष्टमचतुः षण्नेत्रगः शोभनो
देवौ केशवपूरुषौ मग धपः कुर्यात् सदा मङ्गलम् ॥ ४॥
जीवत्वाङ्गिरसः कुबेर वदनो दीर्घाब्धि कोणे स्थितः
पीतोश्वत्थ समिच्च सिन्धुविषयः शक्रोविधिर्देवते ।
सूर्येन्दु क्षितिजप्रियो बुधसितौशत्रू धनुर्मीनपः
सप्ताङ्कद्विसुते हितः सुरगुरुः कुर्यात् सदा मङ्गलम् ॥ ५॥
शुक्रोभार्गव गोत्रजः सितनिभः पूर्वामुखः पञ्चको-
णस्थोऽस्थो तुल गोपतिः खलु महाराष्ट्रेश औदुम्बरी ।
इन्द्राणी मघवासुरौ बुधशनिमित्रे रवीन्दू अरी
षट्सप्ताभ्र कुवर्जिते शुभफलः कुर्यात् सदा मङ्गलम् ॥ ६॥
मन्दः पाशिमुखः शमीसमिदथो सौराष्ट्रपः काश्यपो
नक्रादि द्वयपो हितो बुधसितौ सूर्येन्दुभौमाः पराः ।
स्थानं पश्चिमदिक् प्रजापतियमौ देवौ धनुष्यासनः
षट्त्रिस्थः शुभकृत् शमी रविसुतः कुर्यात् सदा मङ्गलम् ॥ ७॥
राहुर्बर्बर देशपः तिमिरभो नैरृत्य शूर्पासनो
यः पैठीनसि गोत्रजः खलु समिद्दूर्वामुखं दक्षिणे ।
कालः प्रत्यधिदेवतास्त्वधिसुरः सोऽरि चन्द्र स्थितः
षट्त्रिस्थः शुभदोऽर्धकाय उदितः कुर्यात् सदा मङ्गलम् ॥ ८॥
केतुजैमिनि गोत्रजः कुशसमित् वायव्य कोणेस्थितः
चित्राङ्क ध्वजलाञ्छनो हि भगवन् यो दक्षिणाशा मुखः ।
ब्रह्मादि त्रिदशालयः सुरपतिः सच्चित्रगुप्तः खगः
षट्त्रिस्थश्च शुभः पलाश सदृशः कुर्यात् सदा मङ्गलम् ॥ ९॥
इत्येवं ग्रहमङ्गलाष्टकमिदं लोकोपकारप्रदम्
पापौघ प्रशमं महत् सुखकरं सौभाग्य संवर्धनम् ।
यः प्रातः शृणुयात् पठेदनुदिनं श्रीकालिदासोचितम्
स्तोत्रं मङ्गलदायकं परिपठन् प्राप्नोत्यभीष्टं महत् ॥ १०॥
इति श्रीकालिदासोचितं नवग्रहमङ्गलस्तोत्रं सम्पूर्णम् ।
नवग्रहमङ्गलाष्टकम्
Version 2
भास्वान् काश्यपगोत्रजोऽरुणरुचिर्यस्सिंहपोऽर्कस्समि-
त्षट्त्रिस्थोऽदशशोभनो गुरुशशी भौमास्सुमित्रास्सदा ।
शुक्रो मन्दरिपुः कलिङ्गजनपश्चाग्नीश्वरौ देवते
मध्येवर्तुलपूर्वदिग्दिनकरः कुर्यात्सदा मङ्गलम् ॥ १॥
चन्द्रः कर्कटकप्रभुस्सितनिभश्चात्रेयगोत्रोद्भव-
श्चात्रेयश्चतुरश्रवारुणमुखश्चापे उमाधीश्वरः ।
षट्सप्ताग्नि दशैकशोभनफलो नोरिर्बुधार्कौप्रियौ
स्वामी यामुनजश्च पर्णसमिधः कुर्यात्सदा मङ्गलम् ॥ २॥
भौमो दक्षिणदिक्त्रिकोणयमदिग्विन्ध्येश्वरः खादिरः
स्वामी वृश्चिकमेषयोस्सु गुरुश्चार्कश्शशी सौहृदः ।
ज्ञोऽरिष्षट्त्रिफलप्रदश्च वसुधास्कन्दौ क्रमाद्देवते
भारद्वाजकुलोद्वहोऽरुणरुचिः कुर्यात्सदा मङ्गलम् ॥ ३॥
सौम्यः पीत उदङ्मुखस्समिदपामार्गो त्रिगोत्रोद्भवो
बाणेशानदिशस्सुहृद्रविसुतश्शेषास्समाश्शीतगोः ।
कन्यायुग्मपतिर्दशाष्टचतुरष्षण्णेत्रगश्शोभनो
विष्णुर्देव्यधिदेवते मगधपः कुर्यात्सदा मङ्गलम् ॥ ४॥
जीवश्चाङ्गिरगोत्रजोत्तरमुखो दीर्घोत्तराशास्थितः
पीतोऽश्वत्थसमिच्चसिन्धुजनितश्चापोऽथ मीनाधिपः ।
सूर्येन्दुक्षितिजाः प्रिया बुधसितौ शत्रू समाश्चापरे
सप्त द्वे नव पञ्चमे शुभकरः कुर्यात्सदा मङ्गलम् ॥ ५॥
शुक्रोभार्गवगोत्रजस्सितरुचिः पूर्वामुखः पूर्वदिक्
पाञ्चालस्थ वृषस्तुलाधिपमहाराष्ट्राधिपौदुम्बरः ।
इन्द्राणीमघवाबुधश्च रविजो मित्रोर्क चन्द्रावरी
षष्ठत्रिर्दशवर्जितेभृगुसुतः कुर्यात्सदा मङ्गलम् ॥ ६॥
मन्दः कृष्णनिभः सपश्चिममुखः सौराष्ट्रपः काश्यप-
स्स्वामी नक्रसुकुम्भयोर्बुधसितौ मित्रौ कुजेन्दूद्विषौ ।
स्थानम्पश्चिमदिक्प्रजापतियमौ देवौ धनुष्यासनौ-
ष्षट्त्रिस्थश्शुभकृच्छमीरविसुतः कुर्यात्सदा मङ्गलम् ॥ ७॥
राहुस्सिंहलदेशपो निरृतिः कृष्णाङ्गशूर्पासनः
यःपैठीनसगोत्रसम्भवसमिद्दूर्वामुखो दक्षिणः ।
यस्सर्पः पशुदैवतोऽखिलगतस्स्वाम्याद्विशेषप्रद
षट्त्रिस्थश्शुभकृच्च सिंहकसुतः कुर्यात्सदा मङ्गलम् ॥ ८॥
केतुर्जैमिनिगोत्रजः कुशसमिद्वायव्यकोणेस्थितः
चित्राङ्कध्वजलाञ्छनोहिभगवान्यो दक्षिणाशामुखः ।
ब्रह्माचैवतु चित्रगुप्तपतिमान्प्रीत्याधिदेवस्सदा-
षट्त्रिस्थशुभः कृच्च बर्बरपतिः कुर्यात्सदा मङ्गलम् ॥ ९॥
इति नवग्रहमङ्गलस्तोत्रं सम्पूर्णम् ।
नवग्रहमङ्गलाष्टकम्
The stotra has at least nine verses but is also
called as aShTakam, perhaps mistakenly.