व्यासकृतः नवग्रहस्तवः
व्यास उवाच ।
शृणुष्व द्विजशार्दूल सूर्यस्तोत्रं महाफलम् ।
यच्छ्रुत्वा च पठित्वा च सर्वपापैः प्रमुच्यते ॥ १॥
--
१. सूर्यः
॥ अथ सूर्यस्तोत्रम् ॥
(सूर्याष्टोत्तरशतनामस्तोत्रम्)
ओङ्काररूपो गवान् भास्करश्च विकर्तनः ।
सूर्यो रविः काश्यपेयो भानुर्दिनकरः प्रभुः ॥ २॥
लोकप्रकाशकः साक्षी श्रीमांल्लोकदिगीश्वरः ।
गभस्तिमाली सप्ताश्च स्त्रिगुणः कमलासनः ॥ ३॥
ग्रहेश्वरो गुणाधारो ब्रह्मविष्णुशिवात्मकः ।
ज्योतिष्मान् ज्योतिषां नाथो ब्रह्मा ब्राह्मणदैवतः ॥ ४॥
त्रैगुण्यनायको दिव्यो लोकबन्धुर्भयापहः ।
तिमिरारी रश्मिमाली सहस्रकिरणः करी ॥ ५॥
शूरः करीन्द्रो मैत्रेयः केवलात्मार्यमामलः ।
पद्मप्रकाशको धाता विष्णुस्त्वष्टांशुरेव च ॥ ६॥
वेदात्मा वेदवेद्यश्च यमकर्ताश्विनीपतिः ।
नासत्यदत्रजनको ज्ञानज्योतिः सनातनः ॥ ७॥
पूषा विवस्वानादित्यो द्वादशात्मा दिवाकरः ।
अहस्करः प्रभाराशी रोगहा रुक्चिकित्सकः ॥ ८॥
महौषधस्मृतिः पुण्यः परमार्थः स्मृतार्त्तिहा ।
ऋषिस्तुत्यो जपप्रीतो गायत्रीजनकोऽव्ययः ॥ ९॥
गायत्रीजपसुप्रीतस्त्रिसन्ध्यपरसुप्रियः ।
शिवपूजकसुप्रीतो विष्णुपूजकसुप्रियः ॥ १०॥
गङ्गास्नानप्रियप्रीतो दुर्गाजपसुहृद्वरः ।
पितृमातृभक्तिभक्तो धर्मो धर्मात्मदण्डकृत् ॥ ११॥
रक्तवर्णः श्यामवर्णो धवलः कालभेदतः ।
स्वयम्भूरन्नदो वारिप्रदो ह्यरुणसारथिः ॥ १२॥
पिता पितामहो देवो दक्षिणाशापतिः सुरुक् ।
आकाशरत्नं तरणिश्चित्रभानुर्विरोचनः ॥ १३॥
मार्त्तण्डोऽर्को वायुकर्ता सम्यक्ज्ञाता कृपामयः ।
प्रातर्मध्याह्नसायाह्ने सन्ध्यावन्दनकृत्प्रियः ॥ १४॥
प्रातर्ब्राह्मणहस्ताब्जजलाञ्जलिसुखी सदा ।
तपनस्तापनो विश्वस्तीर्थोदय उदारधीः ॥ १५॥
भूरसग्राहकश्चेति सूर्यनामशतं परम् ।
फलश्रुतिः ।
साष्टकं कथितं तुभ्यं पापरोगहरं परम् ॥ १६॥
सर्वज्वरप्रशमनं सर्वव्याधिमहौषधम् ।
पवित्रं पुण्यदं पुण्यं यः पठेत् सुसमाहितः ॥ १७॥
तस्य सर्वार्थसिद्धिः स्याद्यद्यन्मनसि वर्त्तते ।
उत्पन्नेषु ह्यरिष्टेषु सङ्कल्प्येदं पठेत् शुभम् ॥ १८॥
तदा तस्यारिष्टशान्तिर्भवत्येव न संशयः ।
रविप्रियदिने पुण्ये रविं सम्पूज्य यः पठेत् ॥ १९॥
स रवेर्मण्डलं भित्वा याति ब्रह्म ह्यनागतिम् ।
॥ इति सूर्यस्तोत्रम् ॥
--
अथ वक्ष्ये शशिस्तोत्रं तच्छृणुष्व मुदान्वितः ॥ २०॥
--
२. शशिः
॥ अथ शशिस्तोत्रम् ॥
(चन्द्राष्टोत्तरशतनामस्तोत्रम्)
चन्द्रोऽमृतमयः श्वेतो विधुर्विमलरूपवान् ।
विशालमण्डलः श्रीमान् पीयूषकिरणः करी ॥ २१॥
द्विजराजः शशधरः शशी शिवशिरोगृहः ।
क्षीराब्धितनयो दिव्यो महात्माऽमृतवर्षणः ॥ २२॥
रात्रिनाथो ध्वान्तहर्त्ता निर्मलो लोकलोचनः ।
चक्षुराह्लादजनकस्तारापतिरखण्डितः ॥ २३॥
षोडशात्मा कलानाथो मदनः कामवल्लभः ।
हंसःस्वामी क्षीणबृद्धो गौरः सततसुन्दरः ॥ २४॥
मनोहरो देवभोग्यो ब्रह्मकर्मविवर्द्धनः ।
वेदप्रियो वेदकर्मकर्ता हर्त्ता हरो हरिः ॥ २५॥
उद्धर्ववासी निशानाथः शृङ्गारभावकर्षणः ।
मुक्तिद्वारं शिवात्मा च तिथिकर्ता कलानिधिः ॥ २६॥
ओषधीपतिरब्जश्च सोमो जैवातृकः शुचिः ।
मृगाङ्को ग्लौः पुण्यनामा चित्रकर्मा सुरार्च्चितः ॥ २७॥
रोहिणीशो बुधपिता आत्रेयः पुण्यकीर्त्तकः ।
निरामयो मन्त्ररूपः सत्यो राजा धनप्रदः ॥ २८॥
सौन्दर्यदायको दाता राहुग्रासपराङ्मुखः ।
शरण्यः पार्वतीभालभूषणं भगवानपि ॥ २९॥
पुण्यारण्यप्रियः पूर्णः पूर्णमण्डलमण्डितः ।
हास्यरूपो हास्यकर्ता शुद्धः शुद्धस्वरूपकः ॥ ३०॥
शरत्कालपरिप्रीतः शारदः कुमुदप्रियः ।
द्युमणिर्दक्षजामाता यक्ष्मारिः पापमोचनः ॥ ३१॥
इन्दुः कलङ्कनाशी च सूर्यसङ्गमपण्डितः ।
सूर्योद्भूतः सूर्यगतः सूर्यप्रियपरःपरः ॥ ३२॥
स्निग्धरूपः प्रसन्नश्च मुक्ताकर्पूरसुन्दरः ।
जगदाह्लादसन्दर्शो ज्योतिःशास्त्रप्रमाणकः ॥ ३३॥
सूर्याभावदुःखहर्त्ता वनस्पतिगतः कृती ।
यज्ञरूपो यज्ञभागी वैद्यो विद्याविशारदः ॥ ३४॥
रश्मिकोटिर्दीप्तिकारी गौरभानुरिति द्विज ।
फलश्रुतिः ।
नाम्नामष्टोत्तरशतं चन्द्रस्य पापनाशनम् ॥ ३५॥
चन्द्रोदये पठेद्यस्तु स तु सौन्दर्यवान्भवेत् ।
पौर्णमास्यां पठेदेतं स्तवं दिव्यं विशेषतः ॥ ३६॥
स्तवस्यास्य प्रसादेन त्रिसन्ध्यापठितस्य च ।
सदाप्रसादास्तिष्ठन्ति ब्राह्मणाश्च द्विजोत्तम ॥ ३७॥
श्राद्धे चापि पठेदेतं स्तवं पीयूषरूपिणम् ।
तत्तु श्राद्धमनन्तञ्च कलानाथप्रसादतः ॥ ३८॥
दुःस्वप्ननाशनं पुण्यं दाहज्वरविनाशनम् ।
ब्राह्मणाद्याः पठेयुस्तु स्त्रीशूद्राः शृणुयुस्तथा ॥ ३९॥
ब्राह्मणाः शृणुयुश्चापि लभेयुश्च समं फलम् ।
॥ इति शशिस्तोत्रम् ॥
--
अथान्येषान्तु नामानि स्तोत्ररूपाणि मे शृणु ॥ ४०॥
--
३. मङ्गलः
॥ अथ मङ्गलस्तवम् ॥
(मङ्गलैकविंशनामानि)
मङ्गलस्य स्तवं वक्ष्ये सर्वमङ्गलदायकम् ।
मङ्गलो भूमिपुत्रश्च रक्ताङ्गोऽरुणलोचनः ॥ ४१॥
अङ्गारको दीप्तारः शस्त्रपाणिः ऋणापहा ।
मेषराश्यधिपो रक्तो रक्ताम्बरधरस्तथा ॥ ४२॥
शूकराश्यधिपो देवो यात्रामङ्गलवृत्तिदः ।
समुद्रशोषकश्चैव वह्निनेत्रः प्रतापवान् ॥ ४३॥
धनदः प्रीतवदनः प्रलयात्मा प्रमोददः ।
फलश्रुतिः ।
इत्येकविंशतिं नाम्नां मङ्गलस्य तु यः पठेत् ॥ ४४॥
स एव निरृणो भूत्वा धार्मिकश्च धनी भवेत् ।
सम्पूज्य रक्तपुष्पेण मङ्गलाहे च मङ्गलम् ॥ ४५॥
स्तवमेतं पठित्वा तु निरृणः सन् धनी भवेत् ।
॥ इति मङ्गलस्तवम् ॥
--
अथ वक्ष्ये बुधस्यापि स्तोत्रं बुद्धिविवर्द्धनम् ॥ ४६॥
--
४. बुधः
॥ अथ बुधस्तोत्रम् ॥
(बुधैकविंशनामानि)
बुधो गौरतनुः सौम्यो मानवीशः शुभाननः ।
शुभग्रहः पुण्यकीर्त्तिस्तारेयश्च इलापतिः ॥ ४७॥
पुरूरवपिता धीरः कुमारो राजवल्ल्भः ।
राजपुत्रो राज्यदाता ब्रह्मराज उषर्वुधः ॥ ४८॥
द्वन्द्वराश्यधिपश्चैव सिंहराश्यधिपस्तथा ।
नवग्रहप्रियश्चेति नाम्नामेवैकविंशतिम् ॥ ४९॥
फलश्रुतिः ।
बुधस्य यः पठेदेतां स यात्रायां सुखं लभेत् ।
ग्रहास्तस्य प्रसन्नाः स्युः पुत्रवान् धनवान् भवेत् ॥ ५०॥
धर्मज्ञानञ्च पाण्डित्यं जायते तस्य सर्वशः ।
॥ इति बुधस्तोत्रम् ॥
--
अथ वक्ष्ये गुरुस्तोत्रं जावाले शृणु कथ्यते ॥ ५१॥
--
५. गुरुः
॥ अथ गुरुस्तोत्रम् ॥
( गुरुसप्तविंशनामावलिः )
देवाचार्यो गुरुर्जीवः कमनीयः सुरेश्वरः ।
वाचस्पतिः पण्डितश्च सर्वशास्त्रवरः सुरः ॥ ५२॥
धिषणो गीस्पतिर्ब्रह्मा ब्राह्मणश्च बृहस्पतिः ।
श्रीमानाङ्गिरसस्तारावल्लभो जीवनप्रदः ॥ ५३॥
ज्येष्ठो ज्येष्ठग्रहो विज्ञो धनुर्मीनाधिपो जयः ।
शुभग्रहो यज्ञकर्ता कृती चित्रशिखण्डिजः ॥ ५४॥
फलश्रुतिः ।
नामान्येतानि जीवस्य पाद्यानि सप्तविंशतिः ।
बुद्धिवृद्धिकराण्याहुः प्रसादेन बृहस्पतेः ॥ ५५॥
ब्राह्मणो वेदविज्ञः स्यादन्येषां स्वोचितं फलम् ।
यात्रायां मङ्गलश्चापि स्तवराजो बृहस्पतेः ॥ ५६॥
॥ इति गुरुस्तोत्रम् ॥
--
शृणुष्व द्विजशार्दूल शुक्रनामानि सम्प्रति ।
शिवावताररूपस्य दैत्याचार्यस्य धीमतः ॥ ५७॥
--
६. शुक्रः
॥ अथ शुक्रस्तोत्रम् ॥
(शुक्रसप्तविंशनामानि)
शुक्रो दैत्यगुरुः श्रीमान् कविः काव्यश्च भार्गवः ।
सितः शुक्लः शुचिर्विप्रो महात्मा शङ्करः प्रभुः ॥ ५८॥
उशना उत्तमौजाश्च उदयी उज्वलत्प्रभः ।
ऊर्ज्जस्वी वृषराशीशस्तुलाराश्यधिपस्तथा ॥ ५९॥
मृतसञ्जीवको ज्ञाता विद्याविनयपण्डितः ।
सद्ग्रहः साधुशीलश्च ययातिश्वशुरो वशी ॥ ६०॥
फलश्रुतिः ।
एतानि कविनामानि प्रोक्तानि सप्तविंशतिः ।
पठ शृणुष्व जावाले पाठय श्रावयापि च ॥ ६१॥
शुक्राचार्यस्तवं यस्तु पठेत् शुक्रदिनेषु च ।
तस्य प्रीतो भवेत् शुक्रः श्वेतपुष्पैश्च पूजितः ॥ ६२॥
शतावृत्तिं पठन्नस्य कविर्भवति नान्यथा ।
प्रत्यहं भक्तिभावेन यः पठेत् सुसमाहितः ॥ ६३॥
तस्य धर्मे शुभा बुद्धिर्भवत्येव न संशयः ।
इत्येतत् कथितं स्तोत्रं शुक्राचार्यस्य भास्वतः ॥ ६४॥
॥ इति शुक्रस्तोत्रम् ॥
--
अथ वक्ष्ये शृणु स्तोत्रं शनेः सूरसुतस्य ह ।
शनिग्रहो भवद् येन तुष्टः शुभवरप्रदः ॥ ६५॥
--
७. शनिः
॥ अथ शनिस्तोत्रम् ॥
सूर्यपुत्रः शनिः श्यामो मन्दोऽमन्दः शनैश्चरः ।
छायागर्भोद्भवो वीरो दीर्घवक्त्रः प्रतापवान् ॥ ६६॥
एकाक्षः सर्वसञ्चारी दीर्घवासी शुभाक्षरः ।
एतानि शनिनामानि यः पठेत्प्रयतो नरः ॥ ६७॥
फलश्रुतिः ।
तस्याष्टमगतोऽप्येष भवेदेकादशस्थवत् ।
शनिवारे तु सम्पूज्य शनिं सूर्यसुतं नरः ॥ ६८॥
लभते वाञ्छितं सर्वं ग्रहारिष्टविनाशजम् ।
प्रत्यहं प्रातरुत्थाय यः पठेत्तु शनेः स्तवम् ॥ ६९॥
तस्य सर्वे ग्रहाः साधो भवन्ति सुखदायकाः ।
इति ते कथितं विप्र शनिस्तोत्रं महद्गुणम् ॥ ७०॥
॥ इति शनिस्तोत्रम् ॥
--
राहुनामान्यथो वक्ष्ये राहुप्रीतिकराणि च ।
--
८. राहुः
॥ अथ राहुनामाष्टकम् ॥
पीयुषपायी मस्ताख्यो राहुर्भिन्नगतिस्तमः ॥ ७१॥
उपरागग्रहः पुण्यचरित्रः पुत्रवद्भयः ।
फलश्रुतिः ।
राहुनामाष्टकमिदं राहुप्रीतिकरं परम् ॥ ७२॥
यः पठेच्छृणुयाद्वापि राहुदोषैर्न सोऽन्वितः ।
॥ इति राहुनामाष्टकम् ॥
--
केतुनामान्यथो वक्ष्ये जावाले शृणु भक्तितः ॥ ७३॥
--
९. केतुः
॥ अथ केतुनामानि ॥
सैंहिकेयो धूमनामा दीर्घाङ्गो बहुरूपवान् ।
स्कन्धरूपतनुः केतुर्महाभीमग्रहो ग्रहः ॥ ७४॥
शेषग्रहाख्यो नवमग्रहश्चेति द्विजोत्तम ।
फलश्रुतिः ।
केतूनाञ्चारुनामानि कथितानि मया तव ॥ ७५॥
केतुप्रीतिकराण्याहुः पुत्रसम्पतप्रदानि च ।
॥ इति केतुनामानि ॥
नवग्रहस्तवस्य फलश्रुतिः ।
नवग्रहाणामेते वै स्तवाः सर्वे निरूपिताः ॥ ७६॥
पुण्याः पापहरः सर्वे श्राव्यः पाद्याः प्रयत्नतः ।
नवग्रहस्तवाध्यायं यः पठेत् प्रातरुत्थितः । ७७॥
प्रदक्षिणाः ग्रहास्तस्य सूर्यचन्द्रादयो द्विज ।
धनं धान्यं धरां धर्मं कीर्त्तिमायुर्यशः श्रियम् ॥ ७८॥
पुत्रान् पौत्रान् शुभां भार्यां गोविन्दे नतिमुत्तमाम् ।
अन्तकाले च गङ्गायां मरणं ददते ध्रुवम् ॥ ७९॥
दुःस्वप्ननाशनाः सर्वे ज्ञातिश्रैष्ठ्यप्रसाधकाः ।
पितॄणां प्रीतिदा एते नवग्रहमहास्तवाः ॥ ८०॥
॥ इति बृहद्धर्मपुराणन्तर्गते नवग्रहस्तवहः ॥
॥ बृहद्धर्मपुराणम् । उत्तरखण्डः । अध्यायः ११। १-८०॥
Proofread by Ruma Dewan