सूर्यस्तुतिः
ॐ नम आदित्याय ॥
श्रीभैरवी -
भगवन्देवदेवेश भक्तानुग्रहकारक ।
देहास्वास्थ्यं परं दुःखं भवेदिति न संशयः ॥ १॥
रोगैर्जीर्णो यदा देहस्तदा कं दैवतं श्रयेत् ।
यं स्तुत्वा स्वास्थ्यमाप्नोति तदुपासनमादिश ॥ २॥
श्रीभैरवः -
शृणु देवि प्रवक्ष्यामि लोकानुग्रहकाम्यया ।
रोगाजगरग्रस्तानां जन्तूनां पापचेतसाम् ॥ ३॥
स्मरणं धारणं चैव सूर्यस्यार्चनमेव च ।
ज्वरातिसाररोगानां नाशनं स्मरणादपि ॥ ४॥
कुष्ठविचर्चिकादद्रूसन्निपातादि नाशनम् ।
सूक्ष्मातिसूक्ष्मं यत्तेजो तं देवं शरणं श्रये ॥ ५॥
वारयेद्विघ्नराशींश्च तमांसि च मुहुर्मुहुः ।
अन्तर्वातौधध्वंसी यस्तं देवं शरणं श्रये ॥ ६॥
आकाशरूपो विश्वात्मा देवःप्रमकटितः प्रभुः ।
द्योतनात्त्रिषु लोकेषु तं दैवं शरणं श्रये ॥ ७॥
ध्यायनात्सर्वलोकेषु चिन्तनादपराजितम् ।
बुद्ध्यात्सर्वसमायुक्तं तं देवं शरणं श्रये ॥ ८॥
धीप्रेरकं तु यत्तेजः सर्वव्यापकमव्ययम् ।
बुद्धेः पारङ्गतं यत्तच्छरण्यं शरणं श्रये ॥ ९॥
यत्तदादिशते बुद्धिर्भर्गः सदसदात्मकम् ।
आर्तो भक्त्या च परमं शरणं तं व्रजाम्यहम् ॥ १०॥
रक्तपुष्पसमायुक्तं गृहीत्वोद्यन्तमर्चयेत् ।
प्रतिश्लोकमर्धपुष्पं दत्त्वा प्राञ्जलिकं स्थितम् ॥ ११॥
सर्वे रोगाः प्रणश्यन्ति लूता विस्फोटकादयः ।
भगन्दरशिरोरोगमूत्ररोगाश्मरीयुताः ॥ १२॥
श्वेतकुष्ठाद्यतीसारपायुकुक्षिसमुद्भवाः ।
त्वग्रोगा ये क्षुद्ररोगा ये त्वन्ये च महेश्वरि ॥ १३॥
ते सर्वे सम्प्रणश्यन्ति स्तोत्रस्यास्यानुकीर्तनात् ।
आपन्न आपदो मुच्येद्बद्धो मुच्येत बन्धनात् ॥ १४॥
अपुत्रः पुत्रमाप्नोति कन्या विन्दति सत्पतिम् ।
भीतो भयात्प्रमुच्येत चेत्याज्ञा पारमेश्वरी ॥ १५॥
इदं रहस्यं परमं नाख्येयं यस्य कस्यचित् ।
गुह्यं गुह्यतमं लोके वेदतन्त्रसमुत्थितम् ॥ १६॥
सर्वतः सारमुद्धृत्यतवस्नेहात्प्रकाशितम् ।
नातः परतरं स्तोत्रं सूर्यस्याराधनं परम् ॥ १७॥
अत्र पूज्यो रविर्देवि स्तोत्रेणानेन भक्तितः ।
सायं प्रातर्नमस्कृत्य नान्नमद्याज्जलं पिबेत् ॥ १८॥
वर्षेणैव भवेत्सिद्धिरिति सत्यं वरानने ।
बद्धपद्मासनो देवः प्रसन्नो भक्तवत्सलः ॥ १९॥
सप्ताश्वः सप्तजिह्वश्च द्विभुजः पातु नो रविः ।
अकृतानि च पुष्पाणि सलिलारुणचन्दनैः ॥ २०॥
अर्घ्यं दत्त्वा प्रयत्नेन सूर्यनामानि कीर्तयेत् ।
नमस्ते विश्वरूपाय नमस्ते ब्रह्मरूपिणे ॥ २१॥
सहस्ररश्मये नित्यं नमस्ते सर्वतेजसे ।
नमस्ते रुद्रवपुषे नमस्ते भक्तवत्सल ॥ २२॥
पद्मनाम नमस्तेऽस्तु कुण्डलाङ्गदशोभित ।
नमस्ते सर्वलोकेश जगत्सर्वं प्रबोधसे ॥ २३॥
सुकृतं दुष्कृतं चैव सर्वं पश्यसि सर्वग ।
सत्यदेव नमस्तेऽस्तु प्रसीद मम भास्कर ॥ २४॥
दिवाकर नमस्तेऽस्तु प्रभाकर नमोऽस्तु ते ।
आश्रमस्थस्ततः पूजाप्रतिमां चापि पूजयेत् ॥ २५॥
उदयंस्तु महाभानुस्तेजसा चाभयङ्करः ।
सहस्ररश्मिदीप्तश्च ह्यादित्यः प्रीयतां मम ॥ २६॥
इति सूर्यस्तुतिः समाप्ता ।
Proofread by PSA Easwaran