% Text title            : Advaitanubhuti
% File name             : advaitanubhuti.itx
% Category              : vedanta, shankarAchArya
% Location              : doc\_z\_misc\_shankara
% Author                : Adi Shankaracharya
% Transliterated by     : Sunder Hattangadi
% Proofread by          : Sunder Hattangadi
% Description-comments  : In 84 verses
% Latest update         : November 21, 2020
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. advaitanubhuti ..}##
\itxtitle{.. advaitAnubhUti ..}##\endtitles ##
.. shrIH ..
.. advaitAnubhUtiH ..
ahamAnandasatyAdilakShaNaH kevalaH shivaH .
sadAnandAdirUpaM yattenAhamachalo.advayaH ..1..
akShidoShAdyathaiko.api dvayavadbhAti chandramAH .
eko.apyAtmA tathA bhAti dvayavanmAyayA mR^iShA ..2..
akShidoShavihInAnAmeka eva yathA shashI .
mAyAdoShavihInAnAmAtmaivaikastathA sadA ..3..
dvitvaM bhAtyakShidoSheNa chandre sve mAyayA jagat .
dvitvaM mR^iShA yathA chandre mR^iShA dvaitaM tathAtmani ..4..
AtmanaH kAryamAkAsho vinAtmAnaM na saMbhavet .
kAryasya pUrNatA siddhA kiM punaH pUrNatAtmanaH ..5..
kAryabhUto yathAkAsha eka eva na hi dvidhA .
hetubhUtastathAtmAyameka eva vijAnataH ..6..
eko.api dvayavadbhAti yathAkAsha upAdhitaH .
eko.api dvayavatpUrNastathAtmAyamupAdhitaH ..7..
kAraNopAdhichaitanyaM kAryasaMsthAcchito.adhikam .
na ghaTAbhrAnmR^idAkAshaH kutrachinnAdhiko bhavet ..8..
nirgatopAdhirAkAsha eka eva yathA bhavet .
eka eva tathAtmAyaM nirgatopAdhikaH sadA ..9..
AkAshAdanya AkAsha AkAshasya yathA na hi .
ekatvAdAtmano nAnya AtmA sidhyati chAtmanaH ..10..
meghayogAdyathA nIraM karakAkAratAmiyAt .
mAyAyogAttathaivAtmA prapa~nchAkAratAmiyAt ..11..
varShopala ivAbhAti nIramevAbhrayogataH .
varShopalavinAshena nIranAsho yathA na hi ..12..
AtmaivAyaM tathA bhAti mAyAyogAtprapa~nchavat .
prapa~nchasya vinAshena svAtmanAsho na hi kvachit ..13..
jalAdanya ivAbhAti jalottho budbudo yathA .
tathAtmanaH pR^ithagiva prapa~ncho.ayamanekadhA ..14..
yathA budbudanAshena jalanAsho na karhichit .
tathA prapa~nchanAshena nAshaH syAdAtmano na hi ..15..
ahinirlvayanIjAtaH shucyAdirnAhimApnuyAt .
tathA sthUlAdisaMbhUtaH shucyAdirnApnuyAdimam ..16..
tyaktAM tvachamahiryadvadAtmatvena na manyate .
Atmatvena sadA j~nAnI tyaktadehatrayaM tathA ..17..
ahinirlvayanInAshAdahernAsho yathA na hi .
dehatrayavinAshena nAtmanAshastathA bhavet ..18..
takrAdilavaNopetamaj~nairlavaNavadyathA .
AtmA sthUlAdisaMyukto dUShyate sthUlakAdivat ..19..
ayaHkAShThAdikaM yadvadvahnivadvahniyogataH .
bhAti sthUlAdikaM sarvamAtmavatsvAtmayogataH ..20..
dAhako naiva dAhyaM syAddAhyaM tadvanna dAhakaH .
naivAtmAyamanAtmA syAdanAtmAyaM na chAtmakaH ..21..
prameyAditrayaM sArthaM bhAnunA ghaTakuDyavat .
yena bhAti sa evAhaM prameyAdivilakShaNaH ..22..
bhAnusphuraNato yadvatsphuratIva ghaTAdikam .
sphuratIva prameyAdirAtmasphuraNatastathA ..23..
piShTAdigulasamparkAdgulavatprItimAnyathA .
AtmayogAtprameyAdirAtmavatprItimAnbhavet ..24..
ghaTanIrAnnapiShTAnAmuShNatvaM vahniyogataH .
vahniM vinA kathaM teShAmuShNatA syAdyathA kvachit ..25..
bhUtabhautikadehAnAM sphUrtitA svAtmayogataH .
vinAtmAnaM kathaM teShAM sphUrtitA syAttathA kvachit ..26..
nAnAvidheShu kumbheShu vasatyekaM nabho yathA .
nAnAvidheShu deheShu tadvadeko vasAmyaham ..27..
nAnAvidhatvaM kumbhAnAM na yAtyeva yathA nabhaH .
nAnAvidhatvaM dehAnAM tadvadeva na yAmyaham ..28.. (nayAmyaham)

yathA ghaTeShu naShTeShu ghaTAkAsho na nashyati .
tathA deheShu naShTeShu naiva nashyAmi sarvagaH ..29..
uttamAdIni puShpANi vartante sUtrake yathA .
uttamAdyAstathA dehA vartante mayi sarvadA ..30..
yathA na saMspR^ishetsUtraM puShpANAmuttamAditA .
tathA naikaM sarvagaM mAM dehAnAmuttamAditA ..31..
puShpeShu teShu naShTeShu yadvatsUtraM na nashyati .
tathA deheShu naShTeShu naiva nashyAmyahaM sadA ..32..
parya~NakarajjurandhreShu nAnevaikApi sUryabhA .
eko.apyanekavadbhAti tathA kShetreShu sarvagaH ..33..
rajjurandhrasthadoShAdi sUryabhAM na spR^ishedyathA .
tathA kShetrasthadoShAdi sarvagaM mAM na saMspR^ishet ..34..
tadrajjurandhranAsheShu naiva nashyati sUryabhA .
tathA kShetravinAsheShu naiva nashyAmi sarvagaH ..35..
deho nAhaM pradR^ishyatvAdbhautikatvAnna chendriyam .
prANo nAhamanekatvAnmano nAhaM chalatvataH ..36..
buddhirnAhaM vikAritvAttamo nAhaM jaDatvataH .
dehendriyAdikaM nAhaM vinAshitvAdghaTAdivat ..37..
dehendriyaprANamanobuddhyaj~nAnAni bhAsayan .
ahaMkAraM tathA bhAmi chaiteShAmabhimAninam ..38..
sarvaM jagadidaM nAhaM viShayatvAdidaMdhiyaH .
ahaM nAhaM suShuptyAdau ahamaH sAkShitaH sadA ..39..
suptau yathA nirvikArastathAvasthAdvaye.api cha .
dvayormAtrAbhiyogena vikArIva vibhAmyaham ..40..
upAdhinIlaraktAdyaiH sphaTiko naiva lipyate .
tathAtmA koshajaiH sarvaiH kAmAdyairnaiva lipyate ..41..
phAlena bhrAmyamANena bhramatIva yathA mahI .
ago.apyAtmA vimUDhena chalatIva pradR^ishyate ..42..
dehatrayamidaM nityamAtmatvenAbhimanyate .
yAvattAvadayaM mUDho nAnAyoniShu jAyate ..43..
nidrAdehajaduHkhAdi jAgraddehaM na saMspR^ishet .
jAgraddehajaduHkhAdistathAtmAnaM na saMspR^ishet ..44..
jAgraddehavadAbhAti nidrAdehastu nidrayA .
nidrAdehavinAshena jAgraddeho na nashyati ..45..
tathAyamAtmavadbhAti jAgraddehastu jAgarAt .
jAgraddehavinAshena nAtmA nashyati karhichit ..46..
hitvAyaM svApnikaM dehaM jAgraddehamapekShate .
jAgraddehaprabuddho.ayaM hitvAtmAnaM yathA tathA ..47..
svapnabhoge yathaivechChA prabuddhasya na vidyate .
asatsvargAdike bhoge naivechChA j~nAninastathA ..48..
bhoktrA bahiryathA bhogyaH sarpo dR^iShadi kalpitaH .
rUpashIlAdayashchAtmabhogA bhogyasvarUpakAH ..49..
j~nasya nAstyeva saMsAro yadvadaj~nasya karmiNaH .
jAnato naiva bhIryadvadrajjusarpamajAnataH ..50..
saindhavasya ghano yadvajjalayogAjjalaM bhavet .
svAtmayogAttathA buddhirAtmaiva brahmavedinaH ..51..
toyAshrayeShu sarveShu bhAnureko.apyanekavat .
eko.apyAtmA tathA bhAti sarvakShetreShvanekavat ..52..
bhAnoranya ivAbhAti jalabhAnurjale yathA .
Atmano.anya ivAbhAso bhAti buddhau tathAtmanaH ..53..
bimbaM vinA yathA nIre pratibimbo bhavetkatham .
vinAtmAnaM tathA buddhau chidAbhAso bhavetkatham ..54..
pratibimbachalatvAdyA yathA bimbasya karhichit .
na bhaveyustathA.a.abhAsakartR^itvAdyAstu nAtmanaH ..55.. (bhaveyustathAbhAsa)

jale shaityAdikaM yadvajjalabhAnuM na saMspR^ishet .
buddheH karmAdikaM tadvacchidAbhAsaM na saMspR^ishet ..56..
buddheH kartR^itvabhoktR^itvaduHkhitvAdyaistu saMyutaH .
chidAbhAso vikArIva sharAvasthAmbubhAnuvat ..57..
sharAvasthodake naShTe tatstho bhAnurvinaShTavat .
buddherlaye tathA suptau naShTavatpratibhAtyayam ..58..
jalasthArkaM jalaM chormiM bhAsayanbhAti bhAskaraH .
AtmAbhAsaM dhiyaM buddheH kartR^itvAdInayaM tathA ..59..
meghAvabhAsako bhAnurmeghachChanno.avabhAsate .
mohAvabhAsakastadvanmohachChanno vibhAtyayam ..60..
bhAsyaM meghAdikaM bhAnurbhAsayanpratibhAsate .
tathA sthUlAdikaM bhAsyaM bhAsayanpratibhAtyayam ..61..
sarvaprakAshako bhAnuH prakAshyernaiva dUShyate . (prakAshyairnaiva)
sarvaprakAshako hyAtmA sarvaistadvanna dUShyate ..62..
mukurasthaM mukhaM yadvanmukhavatprathate mR^iShA .
buddhisthAbhAsakastadvadAtmavatprathate mR^iShA ..63..
mukurasthasya nAshena mukhanAsho bhavetkatham .
buddhisthAbhAsanAshena nAsho naivAtmanaH kvachit ..64..
tAmrakalpitadevAdistAmrAdanya iva sphuret .
pratibhAsyAdirUpeNa tathAtmotthamidaM jagat ..65..
IshajIvAtmavadbhAti yathaikamapi tAmrakam .
eko.apyAtmA tathaivAyamIshajIvAdivanmR^iShA ..66..
yatheshvarAdinAshena tAmranAsho na vidyate .
tatheshvarAdinAshena nAsho naivAtmanaH sadA ..67..
adhyasto rajjusarpo.ayaM satyavadrajjusattayA .
tathA jagadidaM bhAti satyavatsvAtmasattayA ..68..
adhyastAherabhAvena rajjurevAvashiShyate .
tathA jagadabhAvena sadAtmaivAvashiShyate ..69..
sphaTike raktatA yadvadupAdhernIlatAmbare .
yathA jagadidaM bhAti tathA satyamivAdvaye ..70..
sphaTike raktatA mithyA mR^iShA khe nIlatA yathA .
tathA jagadidaM mithyA ekasminnadvaye mayi ..71..
jIveshvarAdibhAvena bhedaM pashyati mUDhadhIH .
nirbhede nirvisheShe.asminkathaM bhedo bhaveddhruvam ..72..
li~Ngasya dhAraNAdeva shivo.ayaM jIvatAM vrajet .
li~NganAshe shivasyAsya jIvatAveshatA kutaH ..73..
shiva eva sadA jIvo jIva eva sadA shivaH .
vettyaikyamanayoryastu sa Atmaj~no na chetaraH ..74..
kShIrayogAdyathA nIraM kShIravaddR^ishyate mR^iShA .
AtmayogAdanAtmAyamAtmavaddR^ishyate tathA ..75..
nIrAtkShIraM pR^ithakkR^itya haMso bhavati nAnyathA .
sthUlAdeH svaM pR^ithakkR^itya mukto bhavati nAnyathA ..76..
kShIranIravivekaj~no haMsa eva na chetaraH .
AtmAnAtmavivekaj~no yatireva na chetaraH ..77..
adhyastachorajaH sthANorvikAraH syAnna hi kvachit .
nAtmano nirvikArasya vikAro vishvajastathA ..78..
j~nAte sthANau kutashchorashchorAbhAve bhayaM kutaH .
j~nAte svasminkuto vishvaM vishvAbhAve kuto.akhilam ..79..
guNavR^ittitrayaM bhAti parasparavilakShaNam .
satyAtmalakShaNe yasminsa evAhaM niraMshakaH ..80..
dehatrayamidaM bhAti yasminbrahmaNi satyavat .
tadevAhaM paraM brahma dehatrayavilakShaNaH ..81..
jAgradAditrayaM yasminpratyagAtmani satyavat .
sa evAhaM paraM brahma jAgradAdivilakShaNaH ..82..
vishvAdikatrayaM yasminparamAtmani satyavat .
sa eva paramAtmAhaM vishvAdikavilakShaNaH ..83..
virADAditrayaM bhAti yasminsAkShiNi satyavat .
sa eva sacchidAnandalakShaNo.ahaM svayaMprabhaH ..84..

iti shrImatparamahaMsaparivrAjakAchAryasya
shrIgovindabhagavatpUjyapAdashiShyasya
shrImachChaMkarabhagavataH kR^itau
advaitAnubhUtiH sampUrNA ..
##

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}