% Text title            : Svatmaprakashika
% File name             : svatmaprakashika.itx
% Category              : shankarAchArya
% Location              : doc\_z\_misc\_shankara
% Author                : Adi Shankaracharya
% Transliterated by     : Sunder Hattangadi
% Proofread by          : Sunder Hattangadi
% Latest update         : Nov. 9, 2009
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Svatmaprakashika ..}##
\itxtitle{.. svAtmaprakAshikA ..}##\endtitles ##

..shrIH..
..svAtmaprakAshikA..

jagatkAraNamaj~nAnamekameva cidanvitam.
eka eva manaH sAkShI jAnAtyeva.n jagattrayam..1..

vivekayuktabuddhyAha.n jAnAmyAtmAnamadvayam.
tathApi bandhamokShAdivyavahAraH pratIyate..2..

vivarto.api prapa~nco me satyavadbhAti sarvadA.
iti sa.nshayapAshena baddho.aha.n Chinddhi sa.nshayam..3..

eva.n shiShyavacaH shrutvA gururAhottara.n sphuTam.
nAj~nAna.n na ca buddhishca na jaganna ca sAkShitA..4..

gandhamokShAdayaH sarve kR^itAH satye'dvaye tvayi.
bhAtItyukte jagatsarva.n sadrUpa.n brahma tadbhavet..5..

sarpAdau rajjusatteva brahmasattaiva kevalam.
prapa~ncAdhArarUpeNa vartate tajjaganna hi..6..

yathekShumabhisa.nvyApya sharkarA vartate tathA.
AshcaryabrahmarUpeNa tva.n vyApto.asi jagattrayam..7..

marubhUmau jala.n sarva.n marubhUmAtrameva tat.
jagattrayamida.n sarva.n cinmAtra.n suvicArataH..8..

brahmAdistambaparyantAH prANinastvayi kalpitAH.
budbudAditara~NgAntA vikArAH sAgare yathA..9..

tara~Ngatva.n dhruva.n sindhurna vA~nChati yathA tathA.
viShayAnandavA~nChA te mahadAnandarUpataH..10..

piShTa.n vyApya guDa.n yadvanmAdhurya.n na hi vA~nChati.
pUrNAnando jagadvyApya tadAnanda.n na vA~nChati..11..

dAridryAshA yathA nAsti sa.npannasya tathA tava.
brahmAnandanimagnasya viShayAshA na sa.nbhavet..12..

viSha.n dR^iShTvAmR^ita.n dR^iShTvA viSha.n tyajati buddhimAn.
AtmAnamapi dR^iShTvA tva.n tyajAnAtmAnamAdarAt..13..

ghaTAvabhAsako bhAnurghaTanAshe na nashyati.
dehAvabhAsakaH sAkShI dehanAshe na nashyati..14..

nirAkAra.n jagatsarva.n nirmala.n saccidAtmakam.
dvaitAbhAvAtkatha.n kasmAdbhaya.n pUrNasya me vada..15..

brahmAdika.n jagatsarva.n tvayyAnande prakalpitam.
tvayyeva lIna.n jagattva.n katha.n lIyase vada..16..

na hi prapa~nco na hi bhUtajAta.n
na cendriya.n prANagaNo na dehaH.
na buddhicitta.n na mano na kartA
brahmaiva satya.n paramAtmarUpam..17..

sarva.n sukha.n viddhi suduHkhanAshA-
tsarva.n ca sadrUpamasatyanAshAt.
cidrUpameva pratibhAnayukta.n
tasmAdakhaNDa.n paramAtmarUpam..18..

cideva dehastu cideva lokA\-
shcideva bhUtAni cidindriyANi.
kartA cidantaHkaraNa.n cideva
cideva satya.n paramArtharUpam..19..

na me bandho na me muktirna me shAstra.n na me guruH.
mAyAmAtravilAso hi mAyAtIto.ahamadvayaH..20..

rAjya.n karotu vij~nAnI bhikShAmaTatu nirbhayaH.
doShairna lipyate shuddhaH padmapatramivAmbhasA..21..

puNyAni pApakarmANi svapnagAni na jAgrati.
eva.n jAgratpuNyapApakarmANi na hi me prabhoH..22..

kAyaH karotu karmANi vR^ithA vAgucyatAmiha.
rAjya.n dhyAyatu vA buddhiH pUrNasya mama kA kShatiH..23..

prANAshcarantu taddharmaiH kAmairvA hanyatA.n manaH.
AnandAmR^itapUrNasya mama duHkha.n katha.n bhavet..24..

AnandAmbudhimagno.asau dehI tatra na dR^ishyate.
lavaNa.n jalamadhyastha.n yathA tatra laya.n gatam..25..

indriyANi manaH prANA aha.nkAraH parasparam.
jADyasa.ngatimutsR^ijya magnA mayi cidarNave..26..

AtmAnama~njasA vedmi tvaj~nAna.n prapalAyitam.
kartR^itvamadya me naShTa.n kartavya.n vApi na kvacit..27..

cidamR^itasukharAshau cittaphena.n vilIna.n
kShayamadhigata eva vR^ittica~ncattara~NgaH.
stimitasukhasamudro nirviceShTaH supUrNaH
kathamiha mama dukha.n sarvadaiko.ahamasmi..28..

AnandarUpo.ahamakhaNDabodhaH
parAtparo.aha.n ghanacitprakAshaH.
meghA yathA vyoma na ca spR^ishanti
sa.nsAraduHkhAni na mA.n spR^ishanti..29..

asthimA.nsapurIShAntracarmalomasamanvitaH.
annAdaH sthUladehaH syAdato.aha.n shuddhacidghanaH..30..

sthUladehAshritA ete sthUlAdbhinnasya me na hi.
li~Nga.n jaDAtmaka.n nAha.n citsvarUpo.ahamadvayaH..31..

kShutpipAsAndhyabAdhiryakAmakrodhAdayo.akhilAH.
li~NgadehAshritA hyete naivAli~Ngasya me vibhoH..32..

anAdyaj~nAnamevAtra kAraNa.n dehamucyate.
nAha.n kAraNadeho.api svaprakAsho nira~njanaH..33..

jaDatvapriyamodatvadharmAH kAraNadehagAH.
na santi mama nityasya nirvikArasvarUpiNaH..34..

jIvAdbhinnaH paresho.asti pareshatva.n kutastava.
ityaj~najanasa.nvAdo vicAraH kriyate.adhunA..35..

adhiShThAna.n cidAbhAso buddhiretattraya.n yadA.
aj~nAnAdekavadbhAti jIva ityucyate tadA..36..

adhiShThAna.n na jIvaH syAtpratyeka.n nirvikArataH.
avastutvAccidAbhAso nAsti tasya ca jIvatA..37..

pratyeka.n jIvatA nAsti buddherapi jaDatvataH.
jIva AbhAsakUTasthabuddhitrayamato bhavet..38..

mAyAbhAso vishuddhAtmA trayametanmaheshvaraH.
mAyAbhAso.apyavastutvAtpratyeka.n neshvaro bhavet..39..

pUrNatvAnnirvikAratvAdvishuddhatvAnmaheshvaraH.
jaDatvahetormAyAyAmIshvaratva.n nu durghaTam..40..

tasmAdetattraya.n mithyA tadartho neshvaro bhavet.
iti jIveshvarau bhAtaH svAj~nAnAnna hi vastutaH..41..

ghaTAkAshamaThAkAshau mahAkAshe prakalpitau.
eva.n mayi cidAkAshe jIveshau parikalpitau..42..

mAyAtatkAryavilaye neshvaratva.n ca jIvatA.
tataH shuddhacidevAha.n cidvyomanirupAdhitaH..43..

satyaciddhanamanantamadvaya.n
sarvadR^ishyarahita.n nirAmayam.
yatpada.n vimalamadvaya.n shiva.n
tatsadAhamiti maunamAshraye..44..

pUrNamadvayamakhaNDacetana.n
vishvabhedakalanAdivarjitam.
advitIyaparasa.nvida.nshaka.n
tatsadAhamiti maunamAshraye..45..

janmamR^ityusukhaduHkhavarjita.n
jAtinItikulagotradUragam.
cidvivartajagato.asya kAraNa.n
tatsadAhamiti maunamAshraye..46..

ulUkasya yathA bhAnAvandhakAraH pratIyate.
svaprakAshe parAnande tamo mUDhasya bhAsate..47..

yathA dR^iShTinirodhArto sUryo nAstIti manyate.
tathAj~nAnAvR^ito dehI brahma nAstIti manyate..48..

yathAmR^ita.n viShAdbhinna.n viShadoShairna lipyate.
na spR^ishAmi jaDAdbhinno jaDadoShAnprakAshayan..49..

svalpApi dIpakaNikA bahula.n nAshayettamaH.
svalpo.api bodho mahatImavidyA.n shamayettathA..50..

cidrUpatvAnna me jADya.n satyatvAnnAnR^ita.n mama.
AnandatvAnna me duHkhamaj~nAnAdbhAti tattrayam..51..

kAlatraye yathA sarpo rajjau nAsti tathA mayi.
aha.nkArAdi dehAnta.n jagannAstyahamadvayaH..52..

bhAnau tamaHprakAshatvAnnA~NgIkurvanti sajjanAH.
tamastatkAryasAkShIti bhrAntabuddhiraho mayi..53..

yathA shIta.n jala.n vahnisa.nbandhAduShNavadbhavet.
buddhitAdAtmyasa.nbandhAtkartR^itva.n vastuto na hi..54..

jalabindubhirAkAsha.n na sikta.n na ca shudhyati.
tathA ga~NgAjalenAya.n na shuddho nityashuddhataH..55..

vR^ikShotpannaphalairvR^ikSho yathA tR^ipti.n na gachChati.
mayyadhyastAnnapAnAdyaistathA tR^iptirna vidyate..56..

sthANau prakalpitashcoraH sa sthANutva.n na bAdhate.
svasminkalpitajIvashca sva.n bAdhitumashakyate..57..

aj~nAne buddhivilaye nidrA sA bhaNyate budhaiH.
vilInAj~nAnatatkArye mayi nidrA katha.n bhavet..58..

buddheH pUrNavikAso.aya.n jAgaraH parikIrtyate.
vikArAdivihInatvAjjAgaro me na vidyate..59..

sUkShmanADIShu sa.ncAro buddheH svapnaH prajAyate.
sa.ncAradharmarahite svapno nAsti tathA mayi..60..

paripUrNasya nityasya shuddhasya jyotiSho mama.
AgantukamalAbhAvAtki.n snAnena prayojanam..61..

deshAbhAvAtkva gantavya.n sthAnAbhAvAtkva vA sthitiH.
pUrNe mayi sthAnadeshau kalpitAvahamadvayaH..62..

prANasa.ncArasa.nshoShAtpipAsA jAyate khalu.
shoShaNAnarhacidrUpe mayyeShA jAyate katham..63..

nADIShu pIDyamAnAsu vAyvagnibhyA.n bhavetkShudhA.
tayoH pIDanahetutvAtsa.nvidrUpe katha.n mayi..64..

sharIrasthitishaithilya.n shvetalomasamanvitam.
jarA bhavati sA nAsti nira.nshe mayi sarvage..65..

yoShitkrIDA sukhasyAntargarvADhya.n yauvana.n kila.
AtmAnande pare pUrNe mayi nAsti hi yauvanam..66..

mUDhabuddhiparivyApta.n duHkhAnAmAlaya.n sadA.
bAlya.n kopanashIlAnta.n na me sukhajalAmbudheH..67..

eva.n tattvavicArAbdhau nimagnAnA.n sadA nR^iNAm.
paramAdvetavij~nAnamaparokSha.n na sa.nshayaH..68..

iti shrImatparamaha.nsaparivrAjakAcAryasya
shrIgovindabhagavatpUjyapAdashiShyasya
shrImachCha.nkarabhagavataH kR^itau
svAtmaprakAshikA sa.npUrNA..
##
\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}