% Text title            : upadesha saahasrii
% File name             : upadeshasaahasrii1.itx
% Category              : vedanta, upadesha, shankarAchArya
% Location              : doc\_z\_misc\_shankara
% Author                : Shankaracharya
% Transliterated by     : Sunder Hattangadi
% Proofread by          : Sunder Hattangadi
% Latest update         : August 25, 2002, July 2, 2011
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. upadeshasAhasrI ..}##
\itxtitle{.. upadeshasAhasrI ..}##\endtitles ##

gadyabandhaH
prathamo bhAgaH
           shiShyapratibodhavidhiprakaraNam .            1
           kUTasthAdvayAtmabodhaprakaraNam .          2
           parisa~NkhyAnaprakaraNam .                    3
padyabandhaH
dvitIyo bhAgaH
           upodghAtaprakaraNam                           1
           pratiShedhaprakaraNam                         2
           IshvarAtmaprakaraNam                         3
           tattvaj~nAnasvabhAvaprakaraNam                4
           buddhyaparAdhaprakaraNam                      5
           visheShApohaprakaraNam                        6
           buddhyArUDhaprakaraNam                       7
           mativilApanaprakaraNam                        8
           sUkShmatAvyApitAprakaraNam                   9
           dR^ishisvarUpaparamArthadarshanaprakaraNam   10
           IkShitR^itvaprakaraNam                          11
           prakAshaprakaraNam                            12
           achakShuShTvaprakaraNam                        13
           svapnasmR^itiprakaraNam                        14
           nAnyadanyatprakaraNam                         15
           pArthivaprakaraNam                            16
           samya~NmatiprakaraNam                          17
           tattvamasiprakaraNam                           18
           athAtmamanaHsa.nvAdaprakaraNam               19
\medskip\hrule\medskip
          gadyabandhaH prathamo bhAgaH .

          shiShyapratibodhavidhiprakaraNam .. 1..

atha mokShasAdhanopadeshavidhiM vyAkhyAsyAmo mumukShUNAM
shraddadhAnAnAmarthinAmarthAya .. 1..
tadidaM mokShasAdhanaM j~nAnaM
sAdhanasAdhyAdanityAtsarvasmAdviraktAya tyaktaputravittalokaiShaNAya
pratipannaparamaha.nsapArivrAjyAya shamadamadayAdiyuktAya
shAstraprasiddhashiShyaguNasampannAya shuchaye brAhmaNAya
vidhivadupasannAya shiShyAya jAtikarmavR^ittavidyAbhijanaiH parIkShitAya
brUyAtpunaHpunaH yAvadgrahaNaM dR^iDhIbhavati .. 2..
shrutishcha\-\-\- ##'## parIkShya lokAn ##...##tattvato brahmavidyAm ##'##
iti . dR^iDhagR^ihItA hi vidyA AtmanaH shreyase santatyai cha bhavati .
vidyAsantatishcha prANyanugrahAya bhavati nauriva nadIM titIrShoH .
shAstraM cha\-\-\-##'## yadyapyasmA imAmadbhiH parigR^ihItAM dhanasya pUrNAM
dadyAdetadeva tato bhUyaH ##'## iti .
anyathA cha j~nAnaprAptyabhAvAt.h\-\-\-##'## AchAryavAn puruSho veda ##' ,##
##'##AchAryAddhaiva vidyA viditA##', '##AchAryaH plAvayitA ##',##
##'##samyagj~nAnaM plava ihochyate ##'## ityAdishrutibhyaH,  ##'## upadekShyanti
te j~nAnaM, ##'## ityAdismR^iteshcha .. 3..
shiShyasya j~nAnAgrahaNaM cha li~NgairbuddhvA agrahaNe
hetUnadharmalaukika\-pramAda\-nityAnityavivekaviShayA\-
sa~njAtadR^iDhapUrvashrutatvalokachintAvekShaNa\-jAtyAdyabhimAnAdIn
tatpratipakShaiH shrutismR^itivihitaiH apanayet ,
akrodhAdibhirahi.nsAdibhishcha yamaiH, j~nAnAviruddhaishcha niyamaiH .. 4..
amAnitvAdiguNaM cha j~nAnopAyaM samyak grAhayet .. 5..
AchAryastUhApohagrahaNadhAraNashamadamadayAnugrahAdisampanno
labdhAgamo dR^iShTAdR^iShTabhogeShvanAsaktaH
tyaktasarvakarmasAdhano brahmavidbrahmaNi sthito.abhinnavR^itto
daMbhadarpakuhakashAThyamAyAmAtsaryAnR^itAha~NkAramamatvAdidoShavarjitaH
kevalaparAnugrahaprayojano vidyopayogArthI pUrvamupadishet.h\-\-\-
##'##sadeva somyedamagra AsIdekamevAdvitIyam##', '##yatra nAnyatpashyati ##', ## 
##'##AtmaivedaM sarvam##', '##AtmA vA idameka evAgra AsIt##', '##sarvaM khalvidaM
brahma ##'## ityAdyAH AtmaikyapratipAdanaparAH shrutIH .. 6..
upadishya cha grAhayedbrahmaNo lakShaNam.h---##'## ya AtmA.apahatapApmA ##', ##
##'##yatsAkShAdaparokShAdbrahma##', '##yo.ashanAyApipAse ##', ##
##'##neti neti##', '##asthUlamanaNu ##', ## ##'## sa eSha neti ##', ## ##'##adR^iShTaM draShTR^i##', ##
##'##vij~nAnamAnandam ##', ## ##'##satyaM j~nAnamanantam ##', ## adR^ishye.anAtmye ##', ##
##'##sa vA eSha mahAnaja AtmA ##', ## aprANo hyamanAH##', '##sabAhyAbhyantaro hyajaH##', ##
##'##vij~nAnaghana eva##', '##anantaramabAhyam ##', ##
##'##anyadeva tadviditAdatho aviditAt ##', ####'## AkAsho vai nAma ##'## ityAdishrutibhiH .. 7..
smR^itibhishcha---##'## na jAyate mriyate vA##', '##nAdatte kasyachitpApam##', ## 
##'##yathAkAshasthito nityam ##', ## kShetraj~naM chApi mAM viddhi ##', ##
##'##na sattannAsaduchyate##', '##anAditvAnnirguNatvAt##', '##samaM
sarveShu bhUteShu##', '##uttamaH puruShastvanyaH ##'## ityAdibhiH
shrutyuktalakShaNAviruddhAbhiH paramAtmAsa.nsAritvapratipAdanaparAbhiH
tasya sarveNAnanyatvapratipAdanaparAbhishcha .. 8..
evaM shrutismR^itibhiH gR^ihItaparamAtmalakShaNaM shiShyaM
sa.nsArasAgarAduttitIrShuM pR^ichChet.h---kastvamasi somyeti .. 9..
sa yadi brUyAt.h---brAhmaNaputraH adonvayaH brahmachAryAsam.h, gR^ihastho
vA, idAnImasmi paramaha.nsaparivrAT sa.nsArasAgarAt janmamR^ityumahAgrAhAt
uttitIrShuriti .. 10..
AchAryo brUyAt.h---ihaiva tava somya mR^itasya sharIraM vayobhiradyate
mR^idbhAvaM vApadyate, tatra kathaM sa.nsArAduddhartumichChasIti . nahi
nadyAH avare kUle bhasmIbhUte nadyAH pAraM tariShyasIti .. 11..
sa yadi brUyAt.h---anyo.ahaM sharIrAt . sharIraM tu jAyate, mriyate,
vayobhiradyate, shastrAgnyAdibhishcha vinAshyate, vyAdhyAdibhishcha
prayujyate . tasminnahaM svakR^itadharmAdharmavashAt pakShI nIDamiva
praviShTaH punaH punaH sharIravinAshe dharmAdharmavashAt sharIrAntaraM
yAsyAmi, pUrvanIDavinAshe pakShIva nIDAntaram . evamevAhamanAdau sa.nsAre
devamanuShyatirya~N.hnirayasthAneShu svakarmavashAdupAttamupAttaM sharIraM
tyajan.h, navaM navaM cha anyadupAdadAno, janmamaraNaprabandhachakre
ghaTIyantravat svakarmaNA bhrAmyamANaH krameNedaM sharIramAsAdya
sa.nsArachakrabhramaNAt asmAnnirviNNo bhagavantamupasanno.asmi
sa.nsArachakrabhramaNaprashamAya . tasmAnnitya evAhaM sharIrAdanyaH .
sharIrANi AgachChantyapagachChanti cha vAsA.nsIva puruShasyeti .. 12..
AchAryo brUyAt.h\-\-\-sAdhvavAdIH, samyakpashyasi . kathaM mR^iShA.avAdIH
brAhmaNaputro.adonvayo brahmachAryAsam.h, gR^ihastho vA, idAnImasmi
paramaha.nsaparivrADiti ..13..
taM prati brUyAdAchAryaH\-\-\-sa yadi brUyAt bhagavan.h, kathamahaM
mR^iShA.avAdiShamiti .. 14..
yatastvaM bhinnajAtyanvayasa.nskAraM sharIraM jAtyanvayavarjitasyAtmanaH
pratyabhyaj~nAsIH brAhmaNaputro.adonvaya ityAdinA vAkyeneti .. 15..
sa yadi pR^ichChet kathaM bhinnajAtyanvayasa.nskAraM sharIraM, kathaM
vA ahaM jAtyanvayasa.nskAravarjita iti .. 16..
AchAryo brUyAt.h\-\-\-shR^iNu somya yathedaM sharIraM tvatto bhinnaM
bhinnajAtyanvayasa.nskAraM,
tvaM cha jAtyanvayasa.nskAravarjitaH, ityuktvA taM
smArayet.h\-\-\-smartumarhasi somya, paramAtmAnaM sarvAtmAnaM
yathoktalakShaNaM shrAvito.asi ##'## sadeva somyedam ##'## ityAdibhiH shrutibhiH
smR^itibhishcha . lakShaNaM cha tasya shrutibhiH smR^itibhishcha .. 17..
labdhaparamAtmalakShaNasmR^itaye brUyAt.h\-\-\-yo.asAvAkAshanAmA
nAmarUpAbhyAmarthAntarabhUtaH asharIraH asthUlAdilakShaNaH
apahatapApmAdilakShaNashcha
sarvaiH sa.nsAradharmaiH anAgandhitaH ##'## yatsAkShAdaparokShAdbrahma##', ##
 ##'## ya AtmA sarvAntaraH##', ## ##'## adR^iShTo draShTA ashrutaH shrotA
amato mantA avij~nAto vij~nAtA##', ## ##'## nityavij~nAnasvarUpaH anantaraH
abAhyaH vij~nAnaghana eva##', '##paripUrNaH AkAshavat.h##', '##anantashaktiH##', ## 
##'##AtmA sarvasya, ashanAyAdivarjitaH, AvirbhAvatirobhAvavarjitashcha,
svAtmavilakShaNayoH nAmarUpayoH jagadbIjabhUtayoH svAtmasthayoH
tattvAnyatvAbhyAmanirvachanIyayoH svaya.nvedyayoH
sadbhAvamAtreNAchintyashaktitvAd vyAkartA avyAkR^itayoH .. 18..
te nAmarUpe avyAkR^ite satI vyAkriyamANe tasmAdetasmAdAtmana
AkAshanAmAkR^itI sa.nvR^itte . tachchAkAshAkhyaM bhUtamanena prakAreNa
paramAtmanaH sambhUtaM prasannAdiva salilAnmalamiva phenam . na salilaM na
cha salilAdatyantabhinnaM phenam . salilavyatirekeNAdarshanAt . salilaM
tu svachChaM anyat phenAnmalarUpAt . evaM paramAtmA nAmarUpAbhyAmanyaH
phenasthAnIyAbhyAM shuddhaH prasannaH tadvilakShaNaH .
te nAmarUpe avyAkR^ite satI vyAkriyamANe phenasthAnIye
AkAshanAmAkR^itI sa.nvR^itte .. 19..
tato.api sthUlabhAvamApadyamAne nAmarUpe vyAkriyamANe vAyubhAvamApadyete,
tato.agnibhAvaM, agnerabbhAvaM, tataH pR^ithvIbhAvaM ityeva.nkrameNa
pUrvapUrvAnupraveshena pa~nchamahAbhUtAni pR^ithivyantAnyutpannAni . tataH
pa~nchamahAbhUtaguNavishiShTA pR^ithvI . pR^ithvyAshcha pa~nchAtmikyo
vrIhiyavAdyA oShadhayo jAyante . tAbhyo bhakShitAbhyo lohitaM cha
shukraM cha strIpu.nsasharIrasaMbandhi jAyate . tadubhayamR^itukAle
avidyAprayuktakAmakhajanirmathanodbhUtaM mantrasa.nskR^itaM garbhAshaye
niShichyate . tatsvayonirasAnupraveshena vivardhamAnaM garbhIbhUtaM
navame dashame vA mAsi sa~njAyate .. 20..
tajjAtaM labdhanAmAkR^itikaM jAtakarmAdibhiH mantrasa.nskR^itaM
punaH upanayanasa.nskArayogena brahmachArisa.nj~naM bhavati .
tadeva sharIraM patnIyogasa.nskArayogena gR^ihasthasa.nj~naM
bhavati . tadeva vanasthasa.nskAreNa tApasasa.nj~naM bhavati . tadeva
kriyAvinivR^ittinimittasa.nskAreNa parivrAT.hsa.nj~naM bhavati . ityevaM
tvatto bhinnaM bhinnajAtyanvayasa.nskAraM sharIram .. 21..
manashchendriyANi cha nAmarUpAtmakAnyeva ##'## annamayaM hi somya manaH ##'##
ityAdishrutibhyaH .. 22..
kathaM chAhaM bhinnajAtyanvayasa.nskAravarjita ityetachChR^iNu . yo.asau
nAmarUpayorvyAkartA nAmarUpadharmavilakShaNaH sa eva nAmarUpe vyAkurvan
sR^iShT.hvedaM sharIraM svayaM sa.nskAradharmavarjito nAmarUpe iha
praviShTaH anyairadR^iShTaH svayaM pashyan.h, tathA.ashrutaH shruNvan.h,
amato manvAno, avij~nAto vijAnan.h\-\-\-##'## sarvANi rUpANi vichitya dhIro
nAmAni kR^itvA.abhivadan yadAste ##'## iti . asminnarthe shrutayaH sahasrashaH
##'##tatsR^iShTvA tadevAnuprAvishat##', '##antaH praviShTaH shAstA janAnAm##', ##
##'##sa eSha iha praviShTaH##', '##eSha ta AtmA##', '##sa etameva sImAnaM
vidAryaitayA dvArA prApadyata##', '##eSha sarveShu bhUteShu gUDho.a.atmA ##', ##
##'##seyaM devataikShata hantAhamimAstisro devatAH ##'## ityAdyAH .. 23..
smR^itayo.api ##'## Atmaiva devatAH sarvAH##', '##navadvAre pure dehI ##', ##
##'##kShetraj~naM chApi mAM viddhi##', '##samaH sarveShu bhUteShu ##', ## 
##'##upadraShTAnumantA cha##', '##uttamaH puruShastvanyaH ##', ## asharIraM sharIreShu
##'##ityAdyAH . tasmAt jAtyanvayasa.nskAravarjitastvamiti siddham .. 24..
sa yadi brUyAt.h\-\-\-anya evAhamaj~naH sukhI duHkhI baddhaH
sa.nsArI, anyo.asau madvilakShaNaH asa.nsArI devaH . tamahaM
balyupahAranamaskArAdibhiH varNAshramakarmabhishchArAdhya
sa.nsArasAgarAduttitIrShurasmi . kathamahaM sa eveti .. 25..
AchAryo brUyAt.h\-\-\-naivaM somya pratipattumarhasi,
pratiShiddhatvAdbhedapratipatteH . kathaM pratiShiddhA
bhedapratipattirityata Aha\-\-\-##'## anyo.asAvanyo.ahamasmIti na sa veda##', ##
##'##brahma taM parAdAdyo.anyatrAtmano brahma veda##', '##mR^ityoH sa
mR^ityumApnoti ya iha nAneva pashyati ##'##
 ityevamAdyAH .. 26..
etA eva shrutayo bhedapratipatteH sa.nsAragamanaM darshayanti .. 27..
abhedapratipatteshcha mokShaM darshayanti sahasrashaH\-\-\-
##'##sa AtmA tattvamasi ##'## iti paramAtmabhAvaM vidhAya ##'## AchAryavAn
puruSho veda ##'## ityuktvA ##'## tasya tAvadeva chiram ##'## iti mokShaM
darshayantyabhedavij~nAnAdeva . satyAbhisandhasya ataskarasyeva
dAhAdyabhAvavat sa.nsArAbhAvaM darshayanti dR^iShTAntena,
bhedadarshanAdasatyAbhisandhasya sa.nsAragamanaM darshayanti taskarasyeva
dAhAdidR^iShTAntena .. 28..
##'##ta iha vyAghro vA ##'## ityAdinA cha abhedadarshanAt ##'## sa svarAT bhavati ##'##
ityuktvA tadviparItena bhedadarshanena sa.nsAragamanaM darshayanti\-\-\-
##'##atha ye.anyathA.ato viduranyarAjAnaste kShayyalokA bhavanti ##'## iti
pratishAkham . tasmAt mR^iShaivaivamavAdIH\-\-\-brAhmaNaputro.adonvayaH
sa.nsArI paramAtmavilakShaNa iti .. 29..
tasmAt pratiShiddhatvAdbhedadarshanasya, bhedaviShayatvAchcha
karmopAdAnasya, karmasAdhanatvAchcha yaj~nopavItAdeH karmasAdhanopAdAnasya
paramAtmAbhedapratipattyA pratiShedhaH kR^ito veditavyaH . karmaNAM
tatsAdhanAnAM cha yaj~nopavItAdInAM paramAtmAbhedapratipattiviruddhatvAt .
sa.nsAriNo hi karmANi vidhIyante tatsAdhanAni cha yaj~nopavItAdIni,
na paramAtmano.abhedadarshinaH .
bhedadarshanamAtreNa cha tato.anyatvam .. 30..
yadi karmANi kartavyAni, na nivartayiShitAni, karmasAdhanAsambandhinaH
karmanimittajAtyAshramAdyasambandhinashcha paramAtmanashcha
AtmanaivAbhedapratipattiM nAvakShyat ##'## sa AtmA tattvamasi ##'##
ityevamAdibhirnishchitarUpairvAkyaiH . bhedapratipattinindAM cha
nAbhyadhAsyat ##'## eSha nityo mahimA brAhmaNasya##', '##ananvAgataM
puNyenAnanvAgataM pApena atra steno.astenaH ##'## ityAdinA .. 31..
karmAsambandhisvarUpatvaM karmanimittavarNAdyasambandharUpatAM cha
nAbhyadhAsyat.h, karmANi cha karmasAdhanAni cha yaj~nopavItAdIni
yadyaparitityAjayiShitAni . tasmAt sasAdhanaM karma parityaktavyaM
mumukShuNA, paramAtmA.abhedadarshanavirodhAt.h . AtmA cha para eveti
pratipattavyo yathAshrutyuktalakShaNaH .. 32..
sa yadi brUyAt.h\-\-\-bhagavan.h, dahyamAne ChidyamAne vA
dehe pratyakShA vedanA, ashanAyAdinimittaM cha pratyakShaM
duHkhaM mama . parashchAyamAtmA, ##'##ayamAtmA.apahatapApmA vijaro
vimR^ityurvishoko vijighatso.apipAsaH sarvagandharasavarjitaH ##'##
iti shrUyate sarvashrutiShu smR^itiShu cha . kathaM tadvilakShaNaH
anekasa.nsAradharmasa.nyuktaH paramAtmAnamAtmatvena cha mAM sa.nsAriNaM
paramAtmatvena agnimiva shItatvena pratipadyeyam.h\? sa.nsArI cha san
sarvAbhyudayaniHshreyasasAdhane adhikR^itaH abhyudayaniHshreyasasAdhanAni
karmANi tatsAdhanAni cha yaj~nopavItAdIni kathaM
parityajeyamiti .. 33..
taM prati brUyAt.h\-\-\-yadavocho dahyamAne ChidyamAne vA dehe pratyakShA
vedanopalabhyate mameti tadasat . kasmAt.h\? dahyamAne ChidyamAna iva
vR^ikShe upalabdhurupalabhyamAne karmaNi sharIre dAhachChedavedanAyA
upalabhyamAnatvAt dAhAdisamAnAshrayaiva vedanA . yatra hi dAhaH Chedo
vA kriyate tatraiva vyapadishati dAhAdivedanAM lokaH, na vedanAM
dAhAdyupalabdharIti . kathaM\? kva te vedaneti pR^iShTaH shirasi
me vedanA urasi udare iti vA yatra dAhAdistatraiva vyapadishati,
na tUpalabdharIti . yadupalabdhari vedanA syAt.h, vedanAnimittaM vA
dAhachChedAdi, vedanAshrayatvenopadisheddAhAdyAshrayavat .. 34..
svayaM cha nopalabhyeta chakShurgatarUpavat . tasmAt
dAhachChedAdisamAnAshrayatvena upalabhyamAnatvAddAhAdivat karmabhUtaiva
vedanA . bhAvarUpatvAchcha sAshrayA taNDulapAkavat . vedanAsamAnAshraya
eva tatsa.nskAraH . smR^itisamAnakAla evopalabhyamAnatvAt vedanAviShayaH .
tannimittaviShayashcha dveSho.api sa.nskArasamAnAshraya eva . tathA
choktam.h\-\-\-##'## rUpasa.nskAratulyA.a.adhI rAgadveShau bhayaM cha yat .
gR^ihyate dhIshrayaM tasmAjj~nAtA shuddho.abhayaH sadA ##'## .. 35..
kimAshrayAH punA rUpAdisa.nskArAdaya iti . uchyate . yatra kAmAdayaH .
kva punaste kAmAdayaH\? ##'## kAmaH sa~Nkalpo vichikitsA ##'## ityAdishruteH
buddhAveva . tatraiva rUpAdisa.nskArAdayo.api##, '##kasminnu rUpANi
pratiShThitAnIti hR^idaye ##'## iti shruteH . ##'## kAmA ye.asya hR^idi shritAH##', ##
##'##tIrNo hi tadA sarvAn shokAn hR^idayasya##', '##asa~Ngo hyayam.h##', ## 
##'##tadvA asyaitadatichChandAH##'## ityAdishrutibhyaH . ##'## avikAryo.ayamuchyate##',## 
##'##anAditvAnnirguNatvAt.h##'## ityAdibhyaH . ichChAdveShAdi cha kShetrasyaiva viShayasya
dharmo nAtmana iti smR^itibhyashcha karmasthaivAshuddhiH nAtmasthA iti .. 36..
ato rUpAdisa.nskArAdyashuddhisambandhAbhAvAt na parasmAdAtmano
vilakShaNastvamiti pratyakShAdivirodhAbhAvAt yuktaM para
evAtmA.ahamiti pratipattum.h\-\-\-##'##tadAtmAnamevAvedahaM brahmAsmi ##', ##
##'##ekadhaivAnudraShTavyam##', '##ahamevA.adhastAt##', '##AtmaivA.adhastAt ##', ##
##'##sarvamAtmAnaM pashyet##', '##yatratvasya sarvamAtmaiva##',
'##idaM sarvaM yadayamAtmA##', '##sa eSho.akalaH##', '##anantaramabAhyam ##', ##
##'##sabAhyAbhyantaro
hyajaH##', '##brahmaivedam##', '##etayA dvArA prApadyata##', '##praj~nAnasya
nAmadheyAni##', '##satyaM j~nAnamanantaM brahma##', '##tasmAdvA ##', ## 
##'##tatsR^iShTvA tadevAnuprAvishat##', '##eko devaH sarvabhUteShu gUDhaH
sarvavyApI##', '##asharIraM sharIreShu##', '##na jAyate mriyate ##', ## 
##'##svapnAntaM jAgaritAntam##', '##sa ma Atmeti vidyAt##', '##yastu sarvANi
bhUtAni ##', ## tadejati tannaijati##', '##venastatpashyan##', '##tadevAgniH ##', ##
##'##ahaM manurabhavaM sUryashcha##', '##antaH praviShTaH shAstA janAnAm ##', ##
##'##sadeva somya##', '##tatsatyaM sa AtmA tattvamasi ##'## ityAdishrutibhyaH .. 37..
smR^itibhyashcha\-\-\-##'## pUH prANinaH sarvaguhAshayam ##', ## 
##'##Atmaiva devatAH##', '##navadvAre pure##', '##samaM sarveShu bhUteShu ##', ## 
##'##vidyAvinayasampanne##', '##avibhaktaM vibhakteShu##', '##vAsudevaH sarvam ##'##
ityAdibhyaH eka evAtmA paraM brahma sarvasa.nsAradharmavinirmuktastvamiti
 siddham ..38..
sa yadi brUyAt.h\-\-\-yadi bhagavan ##'## anantaro.abAhyaH ##' , ##
##'##sabAhyAbhyantaro hyajaH ##', ## ##'##kR^itsnaH ##'##,
##'##praj~nAnaghana eva ##'## saindhavaghanavadAtmA sarvamUrtibhedavarjitaH
AkAshavadekarasaH, tarhi kimidaM dR^ishyate shrUyate vA sAdhyaM sAdhanaM
vA sAdhakashcheti shrutismR^itilokaprasiddhaM vAdishatavipratipattiviShaya
iti .. 39..
AchAryo brUyAt.h\-\-\-avidyAkR^itametadyadidaM dR^ishyate
shrUyate vA, paramArthatastveka evAtmA avidyAdR^iShTeH anekavat
AbhAsate, timiradR^iShTyA anekachandravat . ##'## yatra vA anyadiva
syAt##', '##yatra hi dvaitamiva bhavati taditara itaraM pashyati ##', ##
##'##mR^ityoH sa mR^ityumApnoti##', '##atha yatrAnyatpashyati
anyachChR^iNoti anyadvijAnAti tadalpaM, atha yadalpaM tanmartyamiti##', ##
##'##vAchArambhaNaM vikAro nAmadheyaM mR^ittiketyeva satyam ##', ## 
##'##anyo.asAvanyo.aham ##'## iti bhedadarshananindopapatteravidyAkR^itaM dvaitaM
##'##ekamevAdvitIyam##', '##yatra tvasya##', '##tatra ko mohaH kaH shokaH ##'##
ityAdyekatvavidhishrutibhyashcheti .. 40..
yadyevaM bhagavan.h, kimarthaM shrutyA sAdhyasAdhanAdibheda uchyate
utpattiH pralayashcheti .. 41..
atrochyate\-\-\-avidyAvata upAttasharIrAdibhedasya
iShTAniShTayoginamAtmAnaM manyamAnasya
sAdhanaireveShTAniShTaprAptiparihAropAyavivekamajAnataH iShTaprAptiM
chAniShTaparihAraM chechChataH shanaistadviShayamaj~nAnaM nivartayituM
shAstraM na sAdhyasAdhanAdibhedaM vidhatte . aniShTarUpaH sa.nsAro
hi sa iti tadbhedadR^iShTimevAvidyAM sa.nsAramUlamunmUlayati utpattiH
pralayAdyekatvopapattipradarshanena .. 42..
avidyAyAmunmUlitAyAM shrutismR^itinyAyebhyaH ##'## anantaramabAhyam ##', ##
##'##sabAhyAbhyantaro hyajaH##', '##saindhavaghanavat##', '##praj~nAnaghana
evaika AtmA##', '##AkAshavatparipUrNaH ##'## ityatraiva ekA praj~nApratiShThA
paramArthadarshino bhavati . na sAdhyasAdhanotpattipralayAdibhedena
ashuddhigandho.apyupapadyate .. 43..
tachchaitat paramArthadarshanaM pratipattumichChatA
varNAshramAdyabhimAnakR^itapA~NktarUpaputravittalokaiShaNAdibhyo
vyutthAnaM kartavyam . samyakpratyayavirodhAttadabhimAnasya
bhedadarshanapratiShedhArthopapattishcopapadyate .
nahyekasminnAtmanyasa.nsAritvabuddhau shAstranyAyotpAditAyAM tadviparItA
buddhirbhavati . nahyagnau shItatvabuddhiH sharIre vA ajarAmaraNabuddhiH .
tasmAdavidyAkAryatvAt sarvakarmaNAM tatsAdhanAnAM cha yaj~nopavItAdInAM
paramArthadarshananiShThena tyAgaH kartavyaH .. 44..

.. OM tat sat ..
##
Encoded by Sunder Hattangadi
Proofread by Sunder Hattangadi and Kalyana Krrit kalyanakrrit at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}