% Text title            : laghujAtakam by varAhamihirAchArya
% File name             : laghujAtaka.itx
% Category              : jyotisha, sociology\_astrology, varAhamihira
% Location              : doc\_z\_misc\_sociology\_astrology
% Author                : Varahamihira
% Transliterated by     : Radu Canahai clradu at yahoo.com
% Proofread by          : Radu Canahai, Marthi Narayana Sarma
% Latest update         : June 21, 2020
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. laghujAtakam by varAhamihirAchArya ..}##
\itxtitle{.. varAhamihirAchAryasya laghujAtakam ..}##\endtitles ##
           adhyAyAH anukramaNikA 
           1\. rAshiprabhedAdhyAyaH
           2\. grahabhedAdhyAyaH
           3\. grahamaitrIvivekAdhyAyaH
           4\. grahasvarupAdhyAyaH
           5\. garbhAdhAnAdhyAyaH
           6\. sUtikAdhyAyaH
           7\. ariShTabha~NgAdhyAyaH
           8\. ariShTadhyAyaH
           9\. AyurdAyAdhyAyaH
          10\. dashAntardashAdhyAyaH
          11\. aShTakavargAdhyAyaH
          12\. prakIrNAdhyAyaH
          13\. nAbhasayogAdhyAyaH
          14\. strIjAtakAdhyAyaH
          15\. niryANAdhyAyaH
          16\. naShTajAtakAdhyAyaH
\section{atha rAshiprabhedAdhyAyaH || 1||}
yasyodayAstasamaye suramukuTanighR^iShTacharaNakamalo.api |
kurute.a~njaliM trinetraH sa jayati dhAmnAM nidhi sUryaH || 1||
horAshAstraM vR^ittairmayA nibadhaM narIkShya shAstrANi |
yattasyApyAryAbhiH sAramahaM sa.npravakShyAmi || 2||
yadupachitamanyajanmani shubhA.ashubhaM tasya karmaNaH pa~Nktim |
vya~njayati shAstrametat tamasi dravyANi dIpa iva || 3||
shIrShamukhabAhuhR^idayodarANi kaTibastiguhyasaM~N~nAni |
UrU jAnU ja~Nghe charaNAviti rAshayo.ajAdyAH || 4||
kAlanarasyAvayavAn puruShANAM chintayetprasavakAle |
sadasadgrahasaMyogAt puShTAH sopadravAste cha || 5||
aruNasitaharitapATalapANDuvichitrA sitetarapisha~Ngau |
pi~NgalakarburababhrukamalinA ruchayo yathAsa~Nkhyam || 6||
puMstrI\-krUrA.akrUrau chara\-sthira\-dvisvabhAvasa.nj~nAshcha |
ajavR^iShamithunakulIrAH pa~nchamanavamaiH sahaindryAdyAH || 7||
kujashukraj~nendvarkaj~nashukrakujajIvasauriyamaguravaH |
me(bhe)ShA navAMshakAnAmajamakaratulAkulIrAdyAH || 8||
svagR^ihAd dvAdashabhAgAH dreShkANAH prathamapa~nchanavapAnAm |
hore viShame.arkendvoH samarAshau chandratIkShNAMshoH || 9||
kujayamajIvaj~nasitAH pa~nchendriyavasumunIndriyAMshAnAm |
viShameShu samarkSheShUtkrameNa triMshAMshapAH kalpyAH || 10||
nR^ichatuShpadakITApyAbalinaH prAgdakShiNAparottaragAH |
sandhyAdyurAtribalinaH kITA nR^ichatuShpadAshchaivam || 11||
meShavR^iShadhanvisiMhAshchatuShpadA makarapUrvabhAgashcha |
kITaH karkaTarAshiH sarIsR^ipo vR^ishchikaH kathitaH || 12||
makarasya pashchimArdhaM j~neyo mInashcha jalacharaH khyAtaH |
mithunatulAghaTakanyA dvipadAkhyA dhanvipUrvabhAgashcha || 13||
adhipayuto dR^iShTo vA budhajIvayutekShitashcha yo rAshiH |
sa bhavati balavAnna yadA yukto dR^iShTo.api vA sheShaiH || 14||
tanudhanasahajasuhR^it\-sutaripujAyAmR^ityudharmakarmAkhyAH |
vyaya iti lagnAdbhAvAshchaturasrAkhye.aShTamachaturthe || 15||
pAtAlahibukaveshmasukhabandhusa.nj~nAshchaturthabhAvasya |
nava\-pa~nchame trikoNe navamarkSha tritrikoNaM cha || 16||
dhIH pa~nchamaM tR^itIyaM dushchikyaM saptamaM tu yAmitram |
dyUnaM dyunaM cha tadvachChidramaShTamaM dvAdashaM riShpham || 17||
kendrachatuShTayakaNTakalagnA.astadashamachaturthAnAm |
sa.nj~nA parataH paNapharamApoklImaM cha tatparataH || 18||
triShaDekAdashadashamAnyupachayabhavanAnyato.anyathA.anyAni |
vargottamA navAMshAshcharAdiShu prathamamadhyAntyAH || 19||
meShAdyAshchatvAraH sadhanvimakarAH kShapAbalA j~neyAH |
pR^iShThodayA vimithunAH shirasAnye hyubhayato mInaH || 20||
ajavR^iShamR^igA~NganAkarkimInavaNijAMshakeShvinAdyuchchAH |
dashashikhyaShTAviMshatitithIndriyatrinavaviMsheShu || 21||
uchchAnnIchaM saptamamarkAdInAM trikoNasa.nj~nAni |
siMhavR^iShAjapramadA\-kArmuka bhR^itaulikumbhadharAH || 22||
gR^ihahorAdreShkANA navabhAgo dvAdashAMshakastriMshaH |
vargaH pratyetavyo grahasya yo yasya nirdiShTaH || 23||

iti shrIvarAhamihiravirachita laghujAtake rAshiprabhedAdhyAyaH prathamaH ||
\section{atha grahabalAdhyAyaH || 2||}
AtmA raviH shItakarastu chetaH
sattvaM dharAjaH shashijo.atha vANI |
j~nAnaM sukhaM chendragururmadashcha
shukraH shaniH kAlanarasya duHkham || 1||
AtmAdayo gaganagairbalibhirbalavattarAH |
durbalairdurbalA ~N~neyA viparItaH shaniH smR^itaH || 2||
rAjA raviH shashadharashcha budhaH kumAraH
senApatiH kShitisutaH sachivau sitejyau |
bhR^ityastathA taraNijaH sabalA grahAshcha
kurvanti janmasamaye nijameva rUpam || 3||
prAchyAdIshA ravisitakujarAhuyamendusaumyavAkpatayaH |
kShINendvarkayamArAH pApAstaiH saMyutaH saumyaH || 4||
klIbapatI budhasaurI chandrasitau yoShitAM nR^iNAM sheShAH |
R^igatharvasAmayajuShAmadhipA gurusaumyabhaumasitAH || 5||
jIvasitau viprANAM kShatrANAM ravikujau vishAM chandraH |
shUdrAdhipaH shashisutaH shanaishcharaH sa~NkarabhavAnAm || 6||
balavAn svagR^ihochchAMshe mitrarkShe vIkShitaH shubhaishchApi |
chandrasitau strIkShetre puruShakShetropagAH sheShAH || 7||
prAchyAdiShu jIvabudhau sUryArau bhAskariH shashA~Nkasitau |
udagayane shashisUryau vakre.anye snigdhavipulAshcha || 8||
ahani sitArkasurejyA dyunishaM j~no naktamindukujasaurAH |
svadinAdiShvashubhashubhA bahulottarapakShayorbalinaH || 9||
mandArasaumyavAkpatisitachandrArkA yathottaraM balinaH |
naisargikabalametat balasAmye.asmAd balAdhikatA || 10||
mitrakShetre svochche svahorAyAM svabhavanatrikoNe cha |
svadreShkANe svAMshe svadine cha balAnvitAH sarve || 11||
dashama\-tR^itIye nava\-pa~nchame chaturthAShTame kalatraM cha |
pashyanti pAdavR^id.hdhyA phalAni chaivaM prayachChanti || 12||
pUrNampashyati ravijastR^itIyadashame trikoNamapi jIvaH |
chaturasraM bhUmisutaH sitArkabudhahimakarAH kalatraM cha || 13||

|| iti shrIvarAhamihiravirachita laghujAtake grahabhedAdhyAyaH dvitIyaH ||
\section{atha grahamaitrIvivekAdhyAyaH || 3||}
mitrANyarkAjjIvo j~nagurU j~nasitau vibhAskarA vikujAH |
vIndvarkA vikujaravIndavashcha keShA~nchidarayo.anye || 1||
shatrU mandasitau samashcha shashijo mitrANi sheShA rave\-
stIkShNAMshurhimarashmijashcha suhR^idau sheShAH samAH shItagoH |
jIvendUShNakarAH kujasya suhR^ido j~no.ariH sitArkI samau
mitre sUryasitau budhasya himaguH shatruH samAshchApare || 2||
sUreH saumyasitAvarI ravisuto madhyo.apare tvanyathA
saumyArkI suhR^idau samau kujagurU shukrasya sheShAvarI
shukragayau suhR^idau samaH suraguruH saurestathAnye.araya\-
statkAle cha dashA.a.ayabandhusahajasvA.antyeShu mitraM sthitaH || 3||
mUlatrikoNaShaShThatrikoNanidhanaikarAshisaptamagAH |
ekaikasya yathA sambhavanti tAtkAlikA ripavaH || 4||
mitramudAsIno.arirvyAkhyAtA ye nisargabhAvena |
te.adhisuhR^inmitrasamAstatkAlamupasthitAshchintyAH || 5||

|| iti shrIvarAhamihiravirachita laghujAtake grahamaitrIvivekAdhyAyaH tR^itIyaH ||
\section{atha grahasvarUpAdhyAyaH || 4||}
sUryasvarUpam \-
chaturastro nAtyuchchastanukeshaH paittiko.asthisArashcha |
shUro madhupi~NgAkSho raktashyAmaH pR^ithushchArkaH || 1||
chandrasvarUpam \-
svachChaH prAj~no gaurashchapalaH kaphavAtiko rudhirasAraH |
mR^iduvAg ghR^iNI priyasakhastanuvR^ittashchandramAH prAMshuH || 2||
bhaumasvarUpaM
hiMsro hrasvastaruNaH pi~NgAkShaH paittiko durAdharShaH |
chapalaH saraktagauro majjAsArashcha mAheyaH || 3||
budhasvarUpaM
madhyamarUpaH priyavAg dUrvAshyAmaH shirAtato nipuNaH |
tvaksArastristhUNaH satataM hR^iShTastu chandrasutaH || 4||
gurusvarUpam \-
madhunibhanayano matimAnupachitamAMsaH kaphAtmako gauraH |
IShatpi~Ngalakesho medaHsAro gururdIrghashcha || 5||
shukrasvarUpaM
shyAmo vikuShTaparvA kuTilAsitamUrdhajaH sukhI kAntaH |
kaphavAtiko madhuravAgbhR^iguputraH shukrasArashcha || 6||
shanisvarUpam \-
kR^ishadIrghaH pi~NgAkShaH kR^iShNaH pishuno.anilaprakR^itiH |
sthUlanakhadantaromA shanaishcharo snAyusArashcha || 7||
svarUpaprayojanaM
ete grahA baliShThAH prasUtikAle nR^iNAM svamUrtisamam |
kuryurdehaM niyataM bahavashcha samAgatA mishram || 8||

|| iti shrIvarAhamihiravirachita laghujAtake grahasvarUpAdhyAyashchaturthaH ||
\section{atha garbhAdhAnAdhyAyaH || 5||}
AdhAne.astagR^ihaM yattachChIlo maithune pumAn bhavati |
sAyAsamasadyutavIkShite vidagdhaM shubhairaste || 1||
saurAMshe.abjAMshe vA chandraH saurAnvito.atha hibuke vA |
shAnto dIpo janmanyAdhAne chenna ravidR^iShTaH || 2||
chandro yAvatsa~Nkhye dvAdashabhAge niShekasamaye syAt |
tasmAt tAvati rAshau janmendau sambhave mAsi || 3||
udayati mR^idubhAMshe saptamasthe cha mande
yadi bhavati niShekaH sUtimabdatrayeNa |
shashini tu vidhireSha dvAdashe.abde prakuryA\-
nnigaditamiha chintyaM sUtikAle.api yuktyA || 4||
yamavakrau dyUne.arkAt puMso rogapradau striyashchandrAt |
tanmadhyagayormR^ityustadekayutadR^iShTayoshchaivam || 5||
kalalaghanAvayavAsthitvagromasmR^itisamudbhavAH kramashaH |
mAseShu shukrakujajIvasUryachandrArkisaumyAnAm || 6||
ashanodvegaprasavAH parato lagneshachandrasUryANAm |
kaluShaiH pIDA patanaM nipIDitairnirmalaiH puShTiH || 7||
balayuktau svagR^ihAMsheShvarkasitAvupachayarkShagau puMsAm |
strINAM vA kujachandrau yadA tadA garbhasambhavo bhavati || 8||
lagne balini gurau vA navapa~nchamasaMsthite.api vA bhavati |
yogA hatabIjAnAmaphalA vINeva badhirANAm || 9||
viShamarkShe viShamAMshe saMsthitAshcha gurushashA~NkalagnArkAH |
pu~njanmakarAH samabheShu yoShitAM samanavAMshagatAH || 10||
balinau viShame.arkagurU naraM striyaM samagR^ihe kujendusitAH |
yamalaM dvisharIrAMsheShvindujadR^iShTAH svapakShasamam || 11||
lagnAdviShamopagataH shanaishcharaH putrajanmado bhavati |
nigaditayogabalAbalamavalokya vinishchayo vAchyaH || 12||

|| iti shrIvarAhamihiravirachita laghujAtake garbhAdhAnAdhyAyaH pa~nchamaH ||
\section{atha sUtikAdhyAyaH || 6||}
gurushashiravayaH sattvaM rajaH sitaj~nau tamo.arkasutabhaumau |
ete.antarAtmani svAM prakR^itiM jantoH prayachChanti || 1||
sattvaM rajastamo vA triMshAMshe yasya bhAskarastAdR^ik |
balinaH sadR^ishI mUrtirbudhvA vA jAtikuladeshAn || 2||
pUrvavilagne yAdR^ig nava bhAgastAdR^ishI bhavati mUrtiH |
yo vA graho baliShThastatkAle tAdR^ishI vAchyA || 3||
chandre lagnamapashyati madhye vA shukrasaumyayoshchandre |
janma parokShasya pituryamodaye vA kuje vA.aste || 4||
pApayuto.arkaH senduH pashyati horAM na chandramapi jIvaH |
pashyati sArkaM nenduM yadi jIvo vA parairjAtaH || 5||
dvAraM vAstuni kendropagAd grahAdasati vA vilagnarkShAt |
dIpo.arkAdudayAd vartirindutaH snehanirdeshaH || 6||
adR^iDhaM navamatha dagdhaM chitraM sudR^iDhaM manoramaM jIrNam |
gR^ihamarkAdikavIryAt patibhavanaM sannikR^iShTaishcha || 7||
gururuchcho dashamastho dvitrichaturbhUmikaM karoti gR^iham |
dhanuShi sabalastrishAlaM dvishAlamanyeShu yamaleShu || 8||
ShaTtrinavAntyAH pAdAH khaTvA~NgAnyantarAlabhavanAni |
vinatatvaM yamalarkShaiH krUraistattulya upaghAtaH || 9||
ChAge siMhe vR^iShe lagne tatsthe saure.athavA kuje |
rAshyaMshasadR^ishe gAtre jAyate nAlaveShTitaH || 10||
j~neyAni tAmramaNihemashuktiraupyANi mauktikaM loham |
arkAdyairbalavadbhiH svasthAne hema jIve.api || 11||
shashilagnAntarasaMsthagrahatulyAshchopasUtikA j~neyAH |
udagardhe.abhyantaragA bAhyAshchakrasya dR^ishye.ardhe || 12||

|| iti shrIvarAhamihiravirachita laghujAtake sUtikAdhyAyaH ShaShThaH ||
\section{atha ariShTAdhyAyaH || 7||}
ShaShThe.aShTame.api chandraH sadyo maraNAya pApasandR^iShTaH |
aShTAbhiH shubhadR^iShTo varShairmishraistadardhena || 1||
shashivatsaumyAH pApairvakribhiravalokitA na shubhadR^iShTAH |
mAsena maraNadAH syuH pApajito lagnapashchAste || 2||
rAshyantasthaiH pApaiH sandhyAyAM himamayUkhahorAyAm |
mR^ityuH pratyekasthaiH kendreShu shashA~NkapApaishcha || 3||
chakraprAkpashchArdhe pApashubhaiH kITabhodaye mR^ityuH |
nidhanachatuShTayagairvA krUraiH kShINe shashinyudaye || 4||
saptAShTAntyodayage shashini sapApe shubhekShaNaviyukte |
na cha kaNTake.asti kashchichChubhastadA mR^ityurAdeshyaH || 5||
chaturasre saptamagaH pApAntasthaH shashI maraNadAtA |
udayagato vA chandraH saptamarAshisthitaiH pApaiH || 6||
kShINendau dvAdashage lagnAShTamarAshisaMsthitaiH pApaiH |
saumyarahite cha kendre sadyo mR^ityurvinirdeshyaH || 7||
sopaplave shashA~Nke sakrUre lagnage kuje.aShTamage |
mR^ityurmAtrA sArdhaM chandravadarke cha shastreNa || 8||
lagna\-dvAdasha\-navamA.aShTamasaMsthaishchandra\-sauri\-sUryA.a.araiH |
jAtasya bhavati maraNaM yadi na balayutaH patirvachasAm || 9||
sutamadananavAntyalagnarandhreShvashubhayuto maraNAya shItarashmiH |
bhR^igusutashashiputradevapUjyairyadi balibhirna yuto.avalokito vA || 10||
yoge sthAnaM gatavati balinashchandre svaM vA tanugR^ihamathavA |
pApairdR^iShTe balavati maraNaM varShasyAntaH kila munigaditam || 11||

|| iti shrIvarAhamihiravirachita laghujAtake ariShTAdhyAyaH saptamaH ||
\section{atha ariShTabha~NgAdhyAyaH || 8||}
sarvAnimAnatibalaH sphuradaMshujAlo
lagnasthitaH prashamayet surarAjamantrI |
eko bahUni duritAni sudustarANi
bhaktyA prayukta iva shUladharapraNAmaH || 1||
lagnAdhipo.atibalavAnashubhairadR^iShTaH
kendrasthitaiH shubhakhagairavalokyamAnaH |
mR^ityuM vidhUya vidadhAti shudIrghamAyuH
sArdhaM guNairbahubhirUrjitayA cha lakShmyA || 2||
lagnAdaShTamavartyapi budhagurubhArgavadR^ikANagashchandraH |
mR^ityuM prAptamapi naraM parirakShatyeva nirvyAjam || 3||
chandraH sampUrNatanuH saumyarkShagataH sthitaH shubhasyAntaH |
prakaroti riShTabha~NgaM visheShataH shukrasandR^iShTaH || 4||
budhabhArgavajIvAnAmekatamaH kendramAgato balavAn |
krUrasahAyo yadyapi sadyo riShTasya bha~NgAya || 5||
ripubhavanagato.api shashI gurusitachandrAtmajadR^ikANasthaH |
garuDa iva bhogidaShTaM parirakShatyeva nirvyAjam || 6||
saumyadvayamadhyagataH sampUrNaH snigdhamaNDalaH shashabhR^it |
niHsheShAriShTahantA bhuja~Ngalokasya garuDa iva || 7||
shashabhR^iti pUrNasharIre shukle pakShe nishAbhave kAle |
ripunidhanasthe riShTaM prabhavati naivAtra jAtasya || 8||
prasphuritakiraNajAle snigdhAmalamaNDale balopete |
suramantriNi kendragate sarvAriShTaM shamaM yAti || 9||
saumyabhavanopayAtAH saumyAMshakagAH saumyadR^ikkANasthhAH |
guruchandrakAbyashashijAH sarve.ariShTasya hantAraH || 10||
chandrAdhyAsitarAsheradhipaH kendre shubhagraho vApi |
prashamayati riShTayogaM pApAni yathA harismaraNam || 11||
pApAH yadi shubhavarge saumyairdR^iShTAH shubheshavargasthaiH |
nighnanti tadA riShTaM patiM viraktA yathA yuvatiH || 12||
rAhustriShaShThalAbhe lagnAt saumyairnirIkShitaH sadyaH |
nAshayati sarvaduritaM mAruta iva tUlasa~NghAtam || 13||
shIrShodayeShu rAshiShu sarve gaganAdhivAsinaH sUtau |
prakR^itistha~nchAriShTaM vilIyate ghR^itamivAgnistham || 14||
tatkAle yadi vijayI shubhagrahaH shubhanirIkShito.avashyam |
nAshayati sarvAriShTaM mAruta iva pAdapAn prabalaH || 15||
pakShe site bhavati janma yadi kShapAyAM
kR^iShNe tathA.ahani shubhAshubha.addR^ishyamAnaH |
taM chandramA ripuvinAshagato.api yatnA\-
dApatsu rakShati piteva shishuM na hanti || 16||

|| iti shrIvarAhamihiravirachita laghujAtake ariShTabha~NgAdhyAyaH aShTamaH  ||
\section{atha AyurdAyAdhyAyaH || 9||}
rAshyaMshakalA guNitA dvAdashanavabhirgrahasya bhagaNebhyaH |
dvAdashahR^itAvasheShe.abdamAsadinanADikAH kramashaH || 1||
horAdAyo.apyevaM balayuktA.anyAni rAshitulyAni |
varShANi sa.nprayachChatyanupAtAchchAMshakAdiphalam || 2||
vargottamasvarAshidreShkANanavAMshake sakR^id\-dviguNaM (ddviguNam) |
vakrochchayostriguNitaM dvitriguNatve sakR^it triguNam || 3||
tryaMshamavakro ripubhe nIche.ardhaM sUryaluptakiraNashcha |
kShapayati svAyurdAyAnnAstaM yAtau rAvijashukrau || 4||
sarvArdhatrichaturthendriyartubhAgAn vyayAddharantyashubhAH |
santo.ardhamato vAmaM balavAnekarkShageShvekaH || 5||

|| iti shrIvarAhamihiravirachita laghujAtake AyurdAyAdhyAyaH navamaH  ||
\section{atha dashAntardashAdhyAyaH || 10||}
shodhyakShepavishuddhaH kAlo yo yena jIvite dattaH |
sa vichintyA tasya dashA svadashAsu phalapradAH sarve || 1||
lagnArkashashA~NkAnAM yo balavAMstaddashA bhavet prathamA |
tatkendrapaNapharApoklimagatAnAM balAchCheShAH || 2||
mitrochchasvagR^ihAMshopagatAnAM shobhanA dashAH sarvAH |
svochchAbhilAShiNAmapi na tu kathitaviparyayasthAnAm || 3||
horAdashA dR^ikANaiH pUjitamadhyAdhamA chare kramashaH |
dvisharIre viparItA sthire tu pApeShTamadhyaphalA || 4||
ekarkShe.ardhaM tryaMshaM trikoNayoH saptame tu saptAMsham |
chaturasra(stra)yostu pAdaM pAchayati gato grahaH svaguNaiH || 5||
bhAgAH sadR^ishachChedairvivarjitAH saMyutA dashAchChedAH |
pratyaMshA guNakArAH pR^ithak pR^ithak chAntardashAstAH || 6||

|| iti shrIvarAhamihiravirachita laghujAtake dashAntardashAdhyAyaH dashamaH  ||
\section{atha aShTakavargAdhyAyaH || 11||}
kendrAyAShTadvinavasvarkaH svAdArkibhaumatashcha shubhaH |
ShaTsaptAntyeShu sitAt ShaDAyadhIdharmago jIvAt || 1||
upachayago.arkashchandrAdupachayanavamAntyadhIgataH saumyAt |
lagnAdupachayabandhuvyayasthitaH shobhanaH proktaH || 2||
shashyupachayeShu lagnAtsAdyamuniH svAtkujAtvanavadhIShu |
sUryat sAShTasmaragastriShaDAyasuteShu sUryasutAt || 3||
j~nAt kendratrisutAyAShTago gurorvyayAyamR^ityukendreShu |
trichatuHsutanavadashamadyunAyagashchandramAH shukrAt || 4||
bhaumaH svAdAyasvAShTakendragastryAyaShaTsuteShu budhAt |
jIvAd dashAya\-shatru\-vyayeShvinAdupachaya\-suteShu || 5||
udayAdupachayatanuShu triShaDAyeShvindutaH samo dashamaH |
bhR^igutontyaShaDaShTAyeShvasitAt kendrAyanavavasuShu || 6||
saumyo.antyaShaNNavAyAtmajeShvinAt svAt tritanudashayuteShu |
chandrAddviripudashAyAShTasukhagataH svAt sAdiShu vilagnAt || 7||
prathamasukhAyadvinidhanadharmeShu sitAt tridhIsameteShu |
sAshAsmareShu saurArayorvyayAyaripuvasuShu guroH || 8||
jIvo bhaumAd dvayAyAShTakendrago.arkAt sadharmasahajeShu |
svAt satrikeShu shukrAnnavadashalAbhasvadhIripuShu || 9||
shashinaH svaratrikoNArthalAbhagastriripudhIvyayeShu yamAt |
navadiksukhAdhyadhIsvAyashatruShu j~nAt sakAmago lagnAt || 10||
shukro lagnAdAsutanavAShTalAbheShu savyayashchandrAt |
svAt sadigasitAt trisukhAtmajAShTadigdharmalAbheShu || 11||
vasvantyAyeShvarkAnnavadiglAbhAShTadhIsthito jIvAt |
j~nAt trisutanavAyAriShvAyasutApo.aklimeShu kujAt || 12||
svAt sauristrisutAyArigaH kujAdantyakarmasahiteShu |
svAyAShTakendrago.arkAchChukrAt ShaShThAntyalAbheShu || 13||
triShaDAyagaH shashA~NkAdudayAt sasukhAdyakarmago.atha guroH |
sutaShaTvyayAyago j~nAt vyayAyaripudi~NnavAShTasthaH || 14||
sthAneShveteShu shubhAH sheSheShvahitA bhavanti chAShTAnAm |
ashubhashubhavisheShaphalaM grahAH prayachChanti chAragatAH || 15||

|| iti shrIvarAhamihiravirachita laghujAtake aShTakavargAdhyAyaH ekAdashaH  ||
\section{atha prakIrNAdhyAyaH || 12||}
ravivarjyaM dvAdashagairanaphA chandrAddvitIyagaiH sunaphA |
ubhayasthitairdurudharA kemadrumasa.nj~nako.ato.anyaH || 1||
sachChIlaM viShayasukhAnvitaM prabhuM khyAtiyuktamanaphAyAm |
sunaphAyAM dhIdhanakIrtiyuktamAtmArjitaishvaryAm || 2||
bahubhR^ityakuTumbArambhaM sukhabhogAnvitaM cha daurdharike |
bhR^itakaM duHkhitamadhanaM jAtaM kemadrume vidyAt || 3||
bhaumaH shUrashchaNDo mahAdhano j~nAnavAn budho nipuNaH |
R^iddhaH shukraH sukhito gururguNADhyo nR^ipatipUjyaH || 4||
bahvArambhaH saurirbahubhR^ityAH pUjito guNairviddhaH
eShAM guNaiH samaguNA j~neyA yogodbhavAH puruShAH || 5||
sUryAddvitIyamR^ikShaM veshisthAnaM prakIrtitaM yavanaiH |
tachcheShTagrahayuktaM janmani cheShTAsu cha vilagnam || 6||
yantraj~naM pAparataM nipuNaM krUraM cha shastravR^ittiM cha |
dhAtuj~naM cha kramashashchandrAdibhiranvitaH sUryaH || 7||
chandro.a~NgArakapUrvaiH kUTaj~naM prashritaM kulAbhyadhikam |
vastravyavahAraj~naM krameNa paunarbhavaM chApi || 8||
mallo rakSho.anyastrIsakto duHkhAnvitaH kujo j~nAdyaiH |
j~no jIvAdyairgItaj~naM vAgminaM mahendrajAlaj~nam || 9||
jIvaH sitena bahuguNamasitena samanvito.atra ghaTakAram |
strIsvaM mandena sitastribhirapyevaM phalAni vadet || 10||
chaturAdibhirekasthaiH pravrajyAM svAM grahaH karoti balI |
bahuvIryaistAvatyaH prathamA vIryAdhikasyaiva || 11||
tApasavR^iddhashrAvakaraktapaTAjIvibhikShucharakANAm |
nirgranthAnAM chArkAt parAjitaiH prachyutirbalibhiH || 12||
dinakaraluptamayUkhairadI(vI)kShitA bhaktivAdinasteShAm |
yAchitadIkShA balibhiH parAjitairanyadR^iShTairvA || 13||
\section{atha rAshishIlanirUpaNaM}
asthiravibhUtimitraM chalanamaTanaM skhalitaniyamamapi charabhe |
sthirabhe tadviparItaM kShamAnvitaM dIrghasUtraM (dIrghasUnnaM) cha || 1||
dvisharIre (tadviparItaM)tyAgayutaM kR^itaj~namutsAhitaM vividhacheShTam |
grAmyAraNyajalodbhavarAshiShu vidyAchcha tachChIlAn || 2||
kShetrAdhipasandR^iShTe shashini nR^ipastatsuhR^idbhirapi dhanavAn |
dreShkANAMshakapairvA prAyaH saumyaiH shubhaM nA.anyaiH || 3||
puShNanti shubhA bhAvAnmUrtyAdIn ghnanti saMsthitAH pApAH |
saumyAH ShaShThe.arighnAH(ShNAH) sarve.ariShTA vyayAShTamagAH || 4||
karkavR^iShAjopagate chandre lagne dhanI surUpashcha |
vikalA~NgajaDadaridrAH sheSheShu visheShataH kR^iShNe || 5||
vikalekShano.arkalagne taimiriko.aje svabhe tu rAtryandhaH |
bud\-buddR^iShTiH karkiNi kANo vyayage shashA~Nke vA || 6||
iShTaM pAdavivR^id.hdhyA mitrasvagR^ihatrikoNatu~NgeShu |
ripubhe.alpaM phalamarkopagatasya pApaM shubhaM naiva || 7||

iti rAshishIlanirUpaNam |
\section{atha Ashrayayoga nirUpaNaM}
taskarabhoktR^ivichakShaNadhaninR^ipatinapuMsakA.abhayadaridrAH |
kha(sva)lapApogrotkR^ikR^iShTA meShAdInAM navAMshabhavAH || 1||
kulatulyakulAdhikabandhumAnyadhanibhoginR^ipasamanarendrAH |
svarkShagataikavivR^id.hdhyA ki~nchinnyUnA suhR^id gR^ihagaiH || 2||
triprabhR^itibhiruchchasthairnR^ipavaMshabhavA bhavanti rAjAnaH |
pa~nchAdibhiranyakulodbhavAshcha tadvattrikoNagataiH || 3||
nirdhanaduHkhitamUDhavyAdhitabandhAbhitaptavadhabhAjaH |
ekottaraparivR^id.hdhyA nIchagataiH shatrugR^ihagairvA || 4||
eko.api nR^ipatijanmaprado grahaH svochchagaH suhR^id dR^iShTaH |
balibhiH kendropagataistriprabhR^itibhiravanipAlabhavaH || 5||
vargottamage chandre chaturAdyairvIkShite vilagne vA |
nR^ipajanma bhavati rAjyaM nR^ipayoge balayutadashAyAm || 6||
uDupatiyogasamAgamabhashIlasandarshanAni bhAvAshcha |
AshrayarAjyaprabhAvAshchAdhyAye.asmin krameNoktAH || 7||

|| iti shrIvarAhamihiravirachita laghujAtake prakIrNAdhyAyaH dvAdashaH  ||
\section{atha nAbhasayogAdhyAyaH || 13||}
charbhabhavanAdiShu sarvairAshrayajA rajjumusalanalayogAH |
IrShyurmAnI dhanavAn krameNa kulavishrutAH sarve || 1||
dalayogau (subtitlurile tin de comentariu)
kendratrayagaiH pApaiH shubhairdalAkhyAvahishcha mAlA cha |
sarpe.atiduHkhitAnAM mAlAyAM janma sukhinAM cha || 2||
dviranantarakendrasthairgadAvilagnAstasaMsthitaiH shakaTam |
khachaturthayorviha~NgaH shR^i~NgATakamudayasutanavagaiH || 3||
shR^i~NgATakato.anyagatairhalameteShAM kramAt phalopanayaH |
yajvA shakaTAjIvI(vo) dUtashchirasaumkhyabhAk\-kR^iShikR^it || 4||
krUraiH sukhakarmasthaiH saumyairudayAstasaMsthitairvajram |
yava iti tadviparItairmishraiH kamalaM chyutairvApI || 5||
lagnAdikaNTakebhyashchaturgR^ihAvasthitairgrahairyogAH |
yUpeShushaktidaNDA vajrAdInAM phalAnyasmAt || 6||
AdyantayoH sukhayutaH sukhabhA~Nmadhye dhanAnvito.alpasukhaH |
tyAgI hiMstro(sro) dhanavarjitaH pumAn priyairviyuktashcha || 7||
tadvat saptabhasaMsthairnaukUTachChatrakArmukANi syuH |
nAvAdyairapyevaM kaNTakAnyasthaiH smR^ito.ardhashashI || 8||
ekAntarairvilagnAt ShaD\-bhavanAvasthitairgrahaishchakram |
arthAchcha tadvadudadhinauprabhR^itiphalAnyatho kramashaH || 9||
kIrtyA yukto.anR^itavAk svajanahitaH shUrasubhagadhanIbhUpAH |
ityAkR^itijA yogA viMshatirAtmaguNaisteShu nandante || 10||
ekAdigR^ihopagatairuktAn yogAn vihAya sa~NkhyAne |
gola\-yuga\-shUla\-kedAra pAsha\-dAmAkhya\-vINAH syuH || 11||
duHkhitadaridraghAtakakR^iShikaraduHshIlapashupatinipuNAnAm |
janma krameNa sukhinaH parabhAgyaissarva evaite || 12||

|| iti shrIvarAhamihiravirachita laghujAtake nAbhasayogAdhyAyasaH trayodashaH ||
\section{atha strIjAtakAdhyAyaH || 14||}
strIpuMsorjanmaphalaM tulyaM kintvatra lagnachandrastham |
tadbalayogAdvapurAkR^itishcha saubhAgyamastamayAt || 1||
yugmarkShe lagnendvoH prakR^itisthA rUpashIlaguNayuktA |
oje puruShAkArA duHshIlA duHkhitA chaiva || 2||
abale saptamabhavane saumyekShaNavarjite cha kApuruShaH |
bhavati patishcharabhe.aste pravAsashIlo bhaved bhrAntI || 3||
bAlye vidhavA bhaume patisantyaktA divAkare.astasthe |
saure pApairdR^iShTe kanyaiva jAraM samupayAti || 4||
sitakujajIvendusutairbalibhirlagne samashcha yadi rAshiH |
strI brahmavAdinI syAt sushAstrakushalA pratItA sA || 5||
pu~njanmaphalaM yadyanna ghaTati vanitAsu tattAsAm |
vaktavyaM rAjyAdyaM vR^iShaNavinAshAdi vA pApam || 6||

|| iti shrIvarAhamihiravirachita laghujAtake strIjAtakAdhyAyaH chaturdashaH ||
\section{atha niryANAdhyAyaH || 15||}
sUryAdibhirnidhanagairhutavahasalilAyudhajvarAmayaj~naH |
kShuttR^iTkR^itashcha mR^ityuH paradeshe naidhane charabhe || 1||
yo vA nidhanaM pashyati balavAMstaddhAtukopajo mR^ityuH |
lagnAt tryaMshapatirvA dvAviMshaH kAraNaM mR^ityoH || 2||
surapitR^itirya~NnarakAn gururindusitAvasR^igravI j~nayamau |
ripurandhratryaMshakapA nayanti chA.astArinidhanasthAH || 3||
ShaShThAShTamakaNTakago gururuchcho bhavati mInalagne vA |
sheShairabalairjanmani maraNe vA mokShagatimAhuH || 4||
gururuDupatishukrau syUryabhaumau yamaj~nau
vibudhapitR^itirashcho nArakIyAMshcha kuryuH |
dinakarashashivIryA.adhiShThitatryaMshanAthAH
pravarasamanikR^iShTAstu~NgahrAsAdanUke || 5||

|| iti shrIvarAhamihiravirachita laghujAtake niryANAdhyAyaH pa~nchadashaH ||
\section{atha naShTajAtakAdhyAyaH || 16||}
gosiMhau jitumAShTamau(mithunAShTamau) kriyatule kanyAmR^igau cha kramAt
saMvargyA dashakAShTasaptaviShayaiH sheShAH svasa~NkhyAguNAH |
jIvArAsphujidaindavaH(vAH) prathamavachCheShA grahAH saumyava\-
drAshInAM niyato vidhirgrahayutaiH kAryA cha tadvargaNA || 1||
saptAhataM trighanabhAjitasheShamR^ikShaM
datvA.athavA nava shishodhya navA.athavA syAt |
evaM kalatrasahajAtmajashatrubhebhyaH
praShTurvadedudayarAshivashena teShAm || 2||
varShartumAsatithayo dyunishaM hyuDUni
velodayarkShanavabhAgavikalpanAH syuH |
bhUyo dashAdiguNitAH svavikalpabhaktA
varShAdayo navakadAnavishodhanAbhyAm || 3||
vij~neyA dashakeShvabdA R^itumAsAstathaiva cha |
aShTakeShvapi mAsArdhaM tithayashcha tathA smR^itAH || 4||
divArAtriprasUtiM cha nakShatrAnayanaM tathA |
saptasa~Nkhye.api varge tu nityamevopalakShayet || 5||
velAmatha vilagnaM cha horAmaMshakameva cha |
pa~nchakeShu vijAnIyAnnaShTajAtakasiddhaye || 6||

|| iti shrIvarAhamihiravirachita laghujAtake naShTajAtakAdhyAyaH ShoDashaH ||

|| iti varAhamihirAchAryakR^ite laghujAtakagranthaH samAptaH ||

##
Encoded and proofread by Radu Canahai,
Reproofread by Marthi Narayana Sarma

1. edition: Krishnadas Academy, Varanasi-221001, 1983
2. Dr. K S Charak, Uma publications, Delhi, April 2008
3. daivagna vachaspati, Sri vasudeva,
                     Thakur Prasad Pustak Mandir, 1882

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}