चिन्तिपूजिकथिकुम्बिचर्चश् च ३।३।१०५

चिति स्मृत्याम्, पूज पूजायाम्, कथ वाक्यप्रबन्धे, कुबि आच्छादने, चर्च अध्ययने चुरादिः, एभ्यो धातुभ्यः युचि प्राप्ते स्त्रियाम् अङ् प्रत्ययो भवति। चिन्ता। पूजा। कथा। कुम्बा। चर्चा। चकारात् युचपि भवति। चिन्तना।

चिन्तिपूजिकथिकुम्बचर्चश्च। , ३।३।१०५

"चुरादिः"इति। एतत् "चिति स्मृत्याम्" (धा।पा।१५३५) इत्यादिभिः प्रत्येकमभिसम्बध्यते। "युचि प्राप्ते" इति। "ण्याससश्रन्थो युच्" ३।३।१०७ इत्यनेन। यस्तु भ्वादौ कुम्बिः पठ()ते ततो "गुरोश्च हलः" ३।३।१०३ इत्यकारेण भवितव्यम्। न च कुम्बेरकारेऽङि वा सति कश्चिद्विशेषोऽस्तीति नासाविह ग्रहणं प्रयोजयति॥

चिन्तिपूजिकथिकुम्बिचर्चश्च १५६५, ३।३।१०५

चिन्तिपूजि। चकारोऽनुक्तसमुच्चयार्थः। तेन तोलयतेस्तुलेति हरदत्तः। अतएव "तुलां यदारोहति दन्तवाससा" इति नैषधकृदाह। युचोऽपवादैति। "ण्यासश्रन्थे"ति वक्ष्यमाणस्येत्यर्थः।