कुरुनादिभ्यो ण्यः ४।१।१७२

जनपदशब्दात् क्षत्रियातित्येव। कुरुशब्दात् नादिभ्यश्च प्रातिपदिकेभ्यो ण्यः प्रत्ययो भवति। अणञोरपवादः। कौरव्यः। नकारादिभ्यः नैषध्यः। नैपथ्यः। तस्य राजनि इत्येव, कौरव्यो राजा।

कुरुनादिभ्यो ण्यः १०३२, ४।१।१७०

कौरव्यः। नैषध्यः॥

कुरुनादिभ्यो ण्यः। , ४।१।१७०

अञणोरपवादः। कुरुशब्दस्यतु द्व्यज्लक्षणस्याणः। कुरुशब्दात् "कुर्वादिभ्यो ण्यः" ४।१।१५१ इति पूर्वमपत्ये उक्तः। तस्य यो जनपदशब्द क्षत्त्रियो न भवति सोऽवकाशः, यस्तु जनपदशब्दः क्षत्त्रियस्तस्मात् परत्वादञि तदपवादो द्व्यज्लक्षणोऽण् स्यात्। अतस्तं बाधितुं पुनर्ण्यो विधीयते॥

कुरुनादिभ्यो ण्यः ११७२, ४।१।१७०

कुरुनादिभ्यो ण्यः। कुरुशब्दान्नकारादिभ्यश्च जनपदक्षत्रियवाचकेभ्योऽपत्ये राजनि च ण्यः स्यादित्यर्थः। कौरव्य इति। कुरोरपत्यं, कुरूणां राजेति वा विग्रहः। नैषध्य इति। निषधशब्दो देशे राजनि च। शैषिक इति। "तस्येदमित्यनेने"ति शेषः।

कुरुनादिभ्यो ण्यः ९६८, ४।१।१७०

कुरुना। नकार आदिर्येषां ते नादयः। कुरुशब्दाद्()व्द्यज्लक्षणे अणि प्राप्ते, नादिभ्यस्त्वञि प्राप्ते[च] वचनम्।