उमाऊर्णयोर् वा ४।३।१५८

उमाशब्दादूर्णाशदच् च वा वुञ् प्रत्ययो भवति विकारावयवयोरर्थयोः। औमकम्, औमम्। और्णकम् और्णम्।

उमोर्णयोर्वा। , ४।३।१५६

उमाशब्दस्तृणधान्यमित्याह (फि।सू।२।२७) नाद्युदात्तः, ऊर्णाशब्दोऽपि प्रातिपदिकस्वरेणान्तोदात्तः, ताभ्यां यथासंख्यमणञोः प्राप्तयोर्विभाषा वुञारभ्यते॥

उमोर्णयोर्वा १५१५, ४।३।१५६

उमोर्णयोर्वा। "नु"ञिति शेषः। औमकमिति। उमा--सस्यविशेषः। "उमा स्यादतसी क्षुमा" इत्यमरः। उमाया विकारोऽवयवो वेत्यर्थः। औममिति। "तृणधान्यानां चे"त्युमाशब्द आद्युदात्तः। ततो वुञभावे "अनुदात्तादेश्चे"त्यञभावादौत्सर्गिकोऽण्। ऊर्णाशब्दस्तु फिट्स्वरेणान्तोदात्तः। ततो वुञभावे अनुदात्तादित्वादञित्यर्थः। "ऊर्णा मेषादिलोम्नि स्यादि"त्यमरः। "स्थूणोर्णे नपुंसके चे"ति लिङ्गानुशासनसूत्रम्।

उमोर्णयोर्वा ११७८, ४।३।१५६

अणञाविति। उमाशब्दः "तृणधान्यानां च" इत्याद्युदात्तः। ऊर्णाशब्दस्तु प्रातिपदिकस्वरेणान्तोदात्त इति भावः।