अनद्यतने र्हिलन्यतरस्याम् ५।३।२१

छन्दसि इति न स्वर्यते। सामान्येन विधानम्। किंसर्वनामबहुभ्यः सप्तम्यन्तेभ्यः अनद्यतने कालविशेषे वर्तमानेभ्यः र्हिल् प्रत्ययो भवत्यन्तरस्याम्। कर्हि, कदा। यर्हि, यदा। तर्हि, तदा।

अनद्यतने र्हिलन्यतरस्याम् १२१६, ५।३।२१

कर्हि, कदा। यर्हि, यदा। तर्हि, तदा॥

अनद्यतने र्हिलन्यतरस्याम्?। , ५।३।२१

तसिलादिषु प्राप्तेषु हिल्प्रत्ययो विधीयते। "कहि" इति। "किमः कः" ७।२।१०३। "कदा, यदा, तदा" इति। "सर्वैकान्यकियत्तदः काले दा" ५।३।१५॥

अनद्यतने र्हिलन्यतरस्याम् १९४४, ५।३।२१

अनद्यतने र्हिल्। अनद्यतनकालवृत्तिभ्यः किमादिभ्यः सप्तम्यन्तेभ्यः र्हिल्प्रत्ययो वा स्यादित्यर्थः। पक्षे दाप्रत्ययः। एतर्हीति। एतच्छब्दात् र्हिल्। "एतद" इति योगविभागाद्रेफादौ एतादेशः।

अनद्यतने र्हिलन्यतरस्याम् १४८०, ५।३।२१

एतस्मिन्काले एतर्हीति। "एतदः"इति योगविबागाद्रेफादावेतादेशः।