%@@1
% File name             : mbh17.itx
%--------------------------------------------
% Text title            : 17 mahAbhArate mahAprasthAnikaparva.n
% Author                : Veda Vyasa
% Language              : sanskrit
% Subject               : religion
% Description/comments  : Access available at Prof John Smith's site 
% http://bombay.indology.info/mahabharata/statement.html
% Transliterated by     : Prof. Tokunaga
% Proofread by          : Team at Bhandarkar Oriental Research Institute (BORI), Tokunaga
% Latest update         : September 16, 2013
% Send corrections to   : sanskrit at cheerful dot c om
%
% Special Instructions  : i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.3
% Site access           : http://sanskritdocuments.org/
%-----------------------------------------------------
% The text is prepared by volunteers and is to be used for personal study
% and research.  The file is not to be copied or reposted for promotion of 
% any website or individuals or for commercial purpose without permission.
%        Please help to maintain respect for volunteer spirit.
%@@1
%--------------------------------------------------------

\engtitle{.. 17 Mahabharata - Mahaprasthanikaparva ..}##
\itxtitle{.. 17 mahAbhArate mahAprasthAnikaparvam ..}##\endtitles ##

              mahAprasthAnikaparva
              pANDavapravrajanam.h
                  1
\medskip

janamejaya uvAcha||

evaM vRRiShNyandhakakule shrutvA mausalamAhavam |
pANDavAH kimakurvanta tathA kRRiShNe divaM gate || 1||

vaishampAyana uvAcha||

shrutvaiva kauravo rAjA vRRiShNInAM kadanaM mahat |
prasthAne matimAdhAya vAkyamarjunamabravIt || 2||

kAlaH pachati bhUtAni sarvANyeva mahAmate |
karmanyAsamahaM manye tvamapi draShTumarhasi || 3||

ityuktaH sa tu kaunteyaH kAlaH kAla iti bruvan |
anvapadyata tadvAkyaM bhrAturjyeShThasya vIryavAn || 4||

arjunasya mataM j~nAtvA bhImaseno yamau tathA |
anvapadyanta tadvAkyaM yaduktaM savyasAchinA || 5||

tato yuyutsumAnAyya pravrajandharmakAmyayA |
rAjyaM paridadau sarvaM vaishyAputre yudhiShThiraH || 6||

abhiShichya svarAjye tu taM rAjAnaM parikShitam |
duHkhArtashchAbravIdrAjA subhadrAM pANDavAgrajaH || 7||

eSha putrasya te putraH kururAjo bhaviShyati |
yadUnAM parisheShashcha vajro rAjA kRRitashcha ha || 8||

parikShiddhAstinapure shakraprasthe tu yAdavaH |
vajro rAjA tvayA rakShyo mA chAdharme manaH kRRithAH || 9||

ityuktvA dharmarAjaH sa vAsudevasya dhImataH |
mAtulasya cha vRRiddhasya rAmAdInAM tathaiva cha || 10||

mAtRRibhiH saha dharmAtmA kRRitvodakamatandritaH |
shrAddhAnyuddishya sarveShAM chakAra vidhivattadA || 11||

dadau ratnAni vAsA.nsi grAmAnashvAnrathAnapi |
striyashcha dvijamukhyebhyo gavAM shatasahasrashaH || 12||

kRRipamabhyarchya cha gurumarthamAnapuraskRRitam |
shiShyaM parikShitaM tasmai dadau bharatasattamaH || 13||

tatastu prakRRitIH sarvAH samAnAyya yudhiShThiraH |
sarvamAchaShTa rAjarShishchikIrShitamathAtmanaH || 14||

te shrutvaiva vachastasya paurajAnapadA janAH |
bhRRishamudvignamanaso nAbhyanandanta tadvachaH || 15||

naivaM kartavyamiti te tadochuste narAdhipam |
na cha rAjA tathAkArShItkAlaparyAyadharmavit || 16||

tato.anumAnya dharmAtmA paurajAnapadaM janam |
gamanAya matiM chakre bhrAtarashchAsya te tadA || 17||

tataH sa rAjA kauravyo dharmaputro yudhiShThiraH |
utsRRijyAbharaNAnya~NgAjjagRRihe valkalAnyuta || 18||

bhImArjunau yamau chaiva draupadI cha yashasvinI |
tathaiva sarve jagRRihurvalkalAni janAdhipa || 19||

vidhivatkArayitveShTiM naiShThikIM bharatarShabha |
samutsRRijyApsu sarve.agnInpratasthurnarapu~NgavAH || 20||

tataH praruruduH sarvAH striyo dRRiShTvA nararShabhAn |
prasthitAndraupadIShaShThAnpurA dyUtajitAnyathA || 21||

harSho.abhavachcha sarveShAM bhrAtR^INAM gamanaM prati |
yudhiShThiramataM j~nAtvA vRRiShNikShayamavekShya cha || 22||

bhrAtaraH pa~ncha kRRiShNA cha ShaShThI shvA chaiva saptamaH |
AtmanA saptamo rAjA niryayau gajasAhvayAt || 23||

paurairanugato dUraM sarvairantaHpuraistathA || 23||

na chainamashakatkashchinnivartasveti bhAShitum |
nyavartanta tataH sarve narA nagaravAsinaH || 24||

kRRipaprabhRRitayashchaiva yuyutsuM paryavArayan |
vivesha ga~NgAM kauravya ulUpI bhujagAtmajA || 25||

chitrA~NgadA yayau chApi maNipUrapuraM prati |
shiShTAH parikShitaM tvanyA mAtaraH paryavArayan || 26||

pANDavAshcha mahAtmAno draupadI cha yashasvinI |
kRRitopavAsAH kauravya prayayuH prA~NmukhAstataH || 27||

yogayuktA mahAtmAnastyAgadharmamupeyuShaH |
abhijagmurbahUndeshAnsaritaH parvatA.nstathA || 28||

yudhiShThiro yayAvagre bhImastu tadanantaram |
arjunastasya chAnveva yamau chaiva yathAkramam || 29||

pRRiShThatastu varArohA shyAmA padmadalekShaNA |
draupadI yoShitAM shreShThA yayau bharatasattama || 30||

shvA chaivAnuyayAvekaH pANDavAnprasthitAnvane |
krameNa te yayurvIrA lauhityaM salilArNavam || 31||

gANDIvaM cha dhanurdivyaM na mumocha dhana~njayaH |
ratnalobhAnmahArAja tau chAkShayyau maheShudhI || 32||

agniM te dadRRishustatra sthitaM shailamivAgrataH |
mArgamAvRRitya tiShThantaM sAkShAtpuruShavigraham || 33||

tato devaH sa saptArchiH pANDavAnidamabravIt |
bho bho pANDusutA vIrAH pAvakaM mAM vibodhata || 34||

yudhiShThira mahAbAho bhImasena parantapa |
arjunAshvisutau vIrau nibodhata vacho mama || 35||

ahamagniH kurushreShThA mayA dagdhaM cha khANDavam |
arjunasya prabhAveNa tathA nArAyaNasya cha || 36||

ayaM vaH phalguno bhrAtA gANDIvaM paramAyudham |
parityajya vanaM yAtu nAnenArtho.asti kashchana || 37||

chakraratnaM tu yatkRRiShNe sthitamAsInmahAtmani |
gataM tachcha punarhaste kAlenaiShyati tasya ha || 38||

varuNAdAhRRitaM pUrvaM mayaitatpArthakAraNAt |
gANDIvaM kArmukashreShThaM varuNAyaiva dIyatAm || 39||

tataste bhrAtaraH sarve dhana~njayamachodayan |
sa jale prAkShipattattu tathAkShayyau maheShudhI || 40||

tato.agnirbharatashreShTha tatraivAntaradhIyata |
yayushcha pANDavA vIrAstataste dakShiNAmukhAH || 41||

tataste tUttareNaiva tIreNa lavaNAmbhasaH |
jagmurbharatashArdUla dishaM dakShiNapashchimam || 42||

tataH punaH samAvRRittAH pashchimAM dishameva te |
dadRRishurdvArakAM chApi sAgareNa pariplutAm || 43||

udIchIM punarAvRRittya yayurbharatasattamAH |
prAdakShiNyaM chikIrShantaH pRRithivyA yogadharmiNaH || 44||

\hrule

\medskip
              bhImAdipatanam.h
                  2
\medskip

vaishampAyana uvAcha||

tataste niyatAtmAna udIchIM dishamAsthitAH |
dadRRishuryogayuktAshcha himavantaM mahAgirim || 1||

taM chApyatikramantaste dadRRishurvAlukArNavam |
avaikShanta mahAshailaM meruM shikhariNAM varam || 2||

teShAM tu gachChatAM shIghraM sarveShAM yogadharmiNAm |
yAj~nasenI bhraShTayogA nipapAta mahItale || 3||

tAM tu prapatitAM dRRiShTvA bhImaseno mahAbalaH |
uvAcha dharmarAjAnaM yAj~nasenImavekShya ha || 4||

nAdharmashcharitaH kashchidrAjaputryA parantapa |
kAraNaM kiM nu tadrAjanyatkRRiShNA patitA bhuvi || 5||

yudhiShThira uvAcha||

pakShapAto mahAnasyA visheSheNa dhana~njaye |
tasyaitatphalamadyaiShA bhu~Nkte puruShasattama || 6||

vaishampAyana uvAcha||

evamuktvAnavekShyainAM yayau dharmasuto nRRipaH |
samAdhAya mano dhImAndharmAtmA puruSharShabhaH || 7||

sahadevastato dhImAnnipapAta mahItale |
taM chApi patitaM dRRiShTvA bhImo rAjAnamabravIt || 8||

yo.ayamasmAsu sarveShu shushrUShuranaha~NkRRitaH |
so.ayaM mAdravatIputraH kasmAnnipatito bhuvi || 9||

yudhiShThira uvAcha||

AtmanaH sadRRishaM prAj~naM naiSho.amanyata ka~nchana |
tena doSheNa patitastasmAdeSha nRRipAtmajaH || 10||

vaishampAyana uvAcha||

ityuktvA tu samutsRRijya sahadevaM yayau tadA |
bhrAtRRibhiH saha kaunteyaH shunA chaiva yudhiShThiraH || 11||

kRRiShNAM nipatitAM dRRiShTvA sahadevaM cha pANDavam |
Arto bandhupriyaH shUro nakulo nipapAta ha || 12||

tasminnipatite vIre nakule chArudarshane |
punareva tadA bhImo rAjAnamidamabravIt || 13||

yo.ayamakShatadharmAtmA bhrAtA vachanakArakaH |
rUpeNApratimo loke nakulaH patito bhuvi || 14||

ityukto bhImasenena pratyuvAcha yudhiShThiraH |
nakulaM prati dharmAtmA sarvabuddhimatAM varaH || 15||

rUpeNa matsamo nAsti kashchidityasya darshanam |
adhikashchAhamevaika ityasya manasi sthitam || 16||

nakulaH patitastasmAdAgachCha tvaM vRRikodara |
yasya yadvihitaM vIra so.avashyaM tadupAshnute || 17||

tA.nstu prapatitAndRRiShTvA pANDavaH shvetavAhanaH |
papAta shokasantaptastato.anu paravIrahA || 18||

tasmi.nstu puruShavyAghre patite shakratejasi |
mriyamANe durAdharShe bhImo rAjAnamabravIt || 19||

anRRitaM na smarAmyasya svaireShvapi mahAtmanaH |
atha kasya vikAro.ayaM yenAyaM patito bhuvi || 20||

yudhiShThira uvAcha||

ekAhnA nirdaheyaM vai shatrUnityarjuno.abravIt |
na cha tatkRRitavAneSha shUramAnI tato.apatat || 21||

avamene dhanurgrAhAneSha sarvA.nshcha phalgunaH |
yathA choktaM tathA chaiva kartavyaM bhUtimichChatA || 22||

vaishampAyana uvAcha||

ityuktvA prasthito rAjA bhImo.atha nipapAta ha |
patitashchAbravIdbhImo dharmarAjaM yudhiShThiram || 23||

bho bho rAjannavekShasva patito.ahaM priyastava |
kiMnimittaM cha patanaM brUhi me yadi vettha ha || 24||

yudhiShThira uvAcha||

atibhuktaM cha bhavatA prANena cha vikatthase |
anavekShya paraM pArtha tenAsi patitaH kShitau || 25||

vaishampAyana uvAcha||

ityuktvA taM mahAbAhurjagAmAnavalokayan |
shvA tveko.anuyayau yaste bahushaH kIrtito mayA || 26||

\hrule

\medskip
              indrayudhiShThirasa.nvAdaH
                  3
\medskip

vaishampAyana uvAcha||

tataH saMnAdaya~nshakro divaM bhUmiM cha sarvashaH |
rathenopayayau pArthamArohetyabravIchcha tam || 1||

sa bhrAtR^InpatitAndRRiShTvA dharmarAjo yudhiShThiraH |
abravIchChokasantaptaH sahasrAkShamidaM vachaH || 2||

bhrAtaraH patitA me.atra AgachCheyurmayA saha |
na vinA bhrAtRRibhiH svargamichChe gantuM sureshvara || 3||

sukumArI sukhArhA cha rAjaputrI pura.ndara |
sAsmAbhiH saha gachCheta tadbhavAnanumanyatAm || 4||

indra uvAcha||

bhrAtR^IndrakShyasi putrA.nstvamagratastridivaM gatAn |
kRRiShNayA sahitAnsarvAnmA shucho bharatarShabha || 5||

nikShipya mAnuShaM dehaM gatAste bharatarShabha |
anena tvaM sharIreNa svargaM gantA na sa.nshayaH || 6||

yudhiShThira uvAcha||

ayaM shvA bhUtabhavyesha bhakto mAM nityameva ha |
sa gachCheta mayA sArdhamAnRRisha.nsyA hi me matiH || 7||

indra uvAcha||

amartyatvaM matsamatvaM cha rAja;~nshriyaM kRRitsnAM mahatIM chaiva kIrtim |
samprApto.adya svargasukhAni cha tvaM; tyaja shvAnaM nAtra nRRisha.nsamasti || 8||

yudhiShThira uvAcha||

anAryamAryeNa sahasranetra; shakyaM kartuM duShkarametadArya |
mA me shriyA sa~NgamanaM tayAstu; yasyAH kRRite bhaktajanaM tyajeyam || 9||

indra uvAcha||

svarge loke shvavatAM nAsti dhiShNya;miShTApUrtaM krodhavashA haranti |
tato vichArya kriyatAM dharmarAja; tyaja shvAnaM nAtra nRRisha.nsamasti || 10||

yudhiShThira uvAcha||

bhaktatyAgaM prAhuratyantapApaM; tulyaM loke brahmavadhyAkRRitena |
tasmAnnAhaM jAtu katha~nchanAdya; tyakShyAmyenaM svasukhArthI mahendra || 11||

indra uvAcha||

shunA dRRiShTaM krodhavashA haranti; yaddattamiShTaM vivRRitamatho hutaM cha |
tasmAchChunastyAgamimaM kuruShva; shunastyAgAtprApsyase devalokam || 12||

tyaktvA bhrAtR^IndayitAM chApi kRRiShNAM; prApto lokaH karmaNA svena vIra |
shvAnaM chainaM na tyajase kathaM nu; tyAgaM kRRitsnaM chAsthito muhyase.adya || 13||

yudhiShThira uvAcha||

na vidyate sandhirathApi vigraho; mRRitairmartyairiti lokeShu niShThA |
na te mayA jIvayituM hi shakyA; tasmAttyAgasteShu kRRito na jIvatAm || 14||

pratipradAnaM sharaNAgatasya; striyA vadho brAhmaNasvApahAraH |
mitradrohastAni chatvAri shakra; bhaktatyAgashchaiva samo mato me || 15||

vaishampAyana uvAcha||

taddharmarAjasya vacho nishamya; dharmasvarUpI bhagavAnuvAcha |
yudhiShThiraM prItiyukto narendraM; shlakShNairvAkyaiH sa.nstavasamprayuktaiH || 16||

abhijAto.asi rAjendra piturvRRittena medhayA |
anukroshena chAnena sarvabhUteShu bhArata || 17||

purA dvaitavane chAsi mayA putra parIkShitaH |
pAnIyArthe parAkrAntA yatra te bhrAtaro hatAH || 18||

bhImArjunau parityajya yatra tvaM bhrAtarAvubhau |
mAtroH sAmyamabhIpsanvai nakulaM jIvamichChasi || 19||

ayaM shvA bhakta ityeva tyakto devarathastvayA |
tasmAtsvarge na te tulyaH kashchidasti narAdhipa || 20||

atastavAkShayA lokAH svasharIreNa bhArata |
prApto.asi bharatashreShTha divyAM gatimanuttamAm || 21||

tato dharmashcha shakrashcha marutashchAshvinAvapi |
devA devarShayashchaiva rathamAropya pANDavam || 22||

prayayuH svairvimAnaiste siddhAH kAmavihAriNaH |
sarve virajasaH puNyAH puNyavAgbuddhikarmiNaH || 23||

sa taM rathaM samAsthAya rAjA kurukulodvahaH |
UrdhvamAchakrame shIghraM tejasAvRRitya rodasI || 24||

tato devanikAyastho nAradaH sarvalokavit |
uvAchochchaistadA vAkyaM bRRihadvAdI bRRihattapAH || 25||

ye.api rAjarShayaH sarve te chApi samupasthitAH |
kIrtiM prachChAdya teShAM vai kururAjo.adhitiShThati || 26||

lokAnAvRRitya yashasA tejasA vRRittasampadA |
svasharIreNa samprAptaM nAnyaM shushruma pANDavAt || 27||

nAradasya vachaH shrutvA rAjA vachanamabravIt |
devAnAmantrya dharmAtmA svapakShA.nshchaiva pArthivAn || 28||

shubhaM vA yadi vA pApaM bhrAtR^INAM sthAnamadya me |
tadeva prAptumichChAmi lokAnanyAnna kAmaye || 29||

rAj~nastu vachanaM shrutvA devarAjaH pura.ndaraH |
AnRRisha.nsyasamAyuktaM pratyuvAcha yudhiShThiram || 30||

sthAne.asminvasa rAjendra karmabhirnirjite shubhaiH |
kiM tvaM mAnuShyakaM snehamadyApi parikarShasi || 31||

siddhiM prApto.asi paramAM yathA nAnyaH pumAnkvachit |
naiva te bhrAtaraH sthAnaM samprAptAH kurunandana || 32||

adyApi mAnuSho bhAvaH spRRishate tvAM narAdhipa |
svargo.ayaM pashya devarShInsiddhA.nshcha tridivAlayAn || 33||

yudhiShThirastu devendrameva.nvAdinamIshvaram |
punarevAbravIddhImAnidaM vachanamarthavat || 34||

tairvinA notsahe vastumiha daityanibarhaNa |
gantumichChAmi tatrAhaM yatra me bhrAtaro gatAH || 35||

yatra sA bRRihatI shyAmA buddhisattvaguNAnvitA |
draupadI yoShitAM shreShThA yatra chaiva priyA mama || 36||

\medskip
##

\hrule

Mahabharata Critical Edition Only for Personal Studies
Encoding: ISCII
Electronic text (C) Bhandarkar Oriental Research Institute,
Pune, India, 1999

http://bombay.indology.info/mahabharata/statement.html
for further details