|| ṛgvedaḥ maṇḍalaṁ 1 ||
a̱gnimī̍ḻe pu̱rohi̍taṁ ya̱jñasya̍ de̱vamṛ̱tvija̍m |
hotā̍raṁ ratna̱dhāta̍mam || 1.001.01
a̱gniḥ pūrve̍bhi̱rṛṣi̍bhi̱rīḍyo̱ nūta̍nairu̱ta |
sa de̱vā eha va̍kṣati || 1.001.02
a̱gninā̍ ra̱yima̍śnava̱tpoṣa̍me̱va di̱vedi̍ve |
ya̱śasa̍ṁ vī̱rava̍ttamam || 1.001.03
agne̱ yaṁ ya̱jñama̍dhva̱raṁ vi̱śvata̍ḥ pari̱bhūrasi̍ |
sa idde̱veṣu̍ gacchati || 1.001.04
a̱gnirhotā̍ ka̱vikra̍tuḥ sa̱tyaści̱traśra̍vastamaḥ |
de̱vo de̱vebhi̱rā ga̍mat || 1.001.05
yada̱ṅga dā̱śuṣe̱ tvamagne̍ bha̱draṁ ka̍ri̱ṣyasi̍ |
tavettatsa̱tyama̍ṅgiraḥ || 1.001.06
upa̍ tvāgne di̱vedi̍ve̱ doṣā̍vastardhi̱yā va̱yam |
namo̱ bhara̍nta̱ ema̍si || 1.001.07
rāja̍ntamadhva̱rāṇā̍ṁ go̱pāmṛ̱tasya̱ dīdi̍vim |
vardha̍māna̱ṁ sve dame̍ || 1.001.08
sa na̍ḥ pi̱teva̍ sū̱nave'gne̍ sūpāya̱no bha̍va |
saca̍svā naḥ sva̱staye̍ || 1.001.09
vāya̱vā yā̍hi darśate̱me somā̱ ara̍ṁkṛtāḥ |
teṣā̍ṁ pāhi śru̱dhī hava̍m || 1.002.01
vāya̍ u̱kthebhi̍rjarante̱ tvāmacchā̍ jari̱tāra̍ḥ |
su̱taso̍mā aha̱rvida̍ḥ || 1.002.02
vāyo̱ tava̍ prapṛñca̱tī dhenā̍ jigāti dā̱śuṣe̍ |
u̱rū̱cī soma̍pītaye || 1.002.03
indra̍vāyū i̱me su̱tā upa̱ prayo̍bhi̱rā ga̍tam |
inda̍vo vāmu̱śanti̱ hi || 1.002.04
vāya̱vindra̍śca cetathaḥ su̱tānā̍ṁ vājinīvasū |
tāvā yā̍ta̱mupa̍ dra̱vat || 1.002.05
vāya̱vindra̍śca sunva̱ta ā yā̍ta̱mupa̍ niṣkṛ̱tam |
ma̱kṣvi1̱̍tthā dhi̱yā na̍rā || 1.002.06
mi̱traṁ hu̍ve pū̱tada̍kṣa̱ṁ varu̍ṇaṁ ca ri̱śāda̍sam |
dhiya̍ṁ ghṛ̱tācī̱ṁ sādha̍ntā || 1.002.07
ṛ̱tena̍ mitrāvaruṇāvṛtāvṛdhāvṛtaspṛśā |
kratu̍ṁ bṛ̱hanta̍māśāthe || 1.002.08
ka̱vī no̍ mi̱trāvaru̍ṇā tuvijā̱tā u̍ru̱kṣayā̍ |
dakṣa̍ṁ dadhāte a̱pasa̍m || 1.002.09
aśvi̍nā̱ yajva̍rī̱riṣo̱ drava̍tpāṇī̱ śubha̍spatī |
puru̍bhujā cana̱syata̍m || 1.003.01
aśvi̍nā̱ puru̍daṁsasā̱ narā̱ śavī̍rayā dhi̱yā |
dhiṣṇyā̱ vana̍ta̱ṁ gira̍ḥ || 1.003.02
dasrā̍ yu̱vāka̍vaḥ su̱tā nāsa̍tyā vṛ̱ktaba̍rhiṣaḥ |
ā yā̍taṁ rudravartanī || 1.003.03
indrā yā̍hi citrabhāno su̱tā i̱me tvā̱yava̍ḥ |
aṇvī̍bhi̱stanā̍ pū̱tāsa̍ḥ || 1.003.04
indrā yā̍hi dhi̱yeṣi̱to vipra̍jūtaḥ su̱tāva̍taḥ |
upa̱ brahmā̍ṇi vā̱ghata̍ḥ || 1.003.05
indrā yā̍hi̱ tūtu̍jāna̱ upa̱ brahmā̍ṇi harivaḥ |
su̱te da̍dhiṣva na̱ścana̍ḥ || 1.003.06
omā̍saścarṣaṇīdhṛto̱ viśve̍ devāsa̱ ā ga̍ta |
dā̱śvāṁso̍ dā̱śuṣa̍ḥ su̱tam || 1.003.07
viśve̍ de̱vāso̍ a̱ptura̍ḥ su̱tamā ga̍nta̱ tūrṇa̍yaḥ |
u̱srā i̍va̱ svasa̍rāṇi || 1.003.08
viśve̍ de̱vāso̍ a̱sridha̱ ehi̍māyāso a̱druha̍ḥ |
medha̍ṁ juṣanta̱ vahna̍yaḥ || 1.003.09
pā̱va̱kā na̱ḥ sara̍svatī̱ vāje̍bhirvā̱jinī̍vatī |
ya̱jñaṁ va̍ṣṭu dhi̱yāva̍suḥ || 1.003.10
co̱da̱yi̱trī sū̱nṛtā̍nā̱ṁ ceta̍ntī sumatī̱nām |
ya̱jñaṁ da̍dhe̱ sara̍svatī || 1.003.11
ma̱ho arṇa̱ḥ sara̍svatī̱ pra ce̍tayati ke̱tunā̍ |
dhiyo̱ viśvā̱ vi rā̍jati || 1.003.12
su̱rū̱pa̱kṛ̱tnumū̱taye̍ su̱dughā̍miva go̱duhe̍ |
ju̱hū̱masi̱ dyavi̍dyavi || 1.004.01
upa̍ na̱ḥ sava̱nā ga̍hi̱ soma̍sya somapāḥ piba |
go̱dā idre̱vato̱ mada̍ḥ || 1.004.02
athā̍ te̱ anta̍mānāṁ vi̱dyāma̍ sumatī̱nām |
mā no̱ ati̍ khya̱ ā ga̍hi || 1.004.03
pare̍hi̱ vigra̱mastṛ̍ta̱mindra̍ṁ pṛcchā vipa̱ścita̍m |
yaste̱ sakhi̍bhya̱ ā vara̍m || 1.004.04
u̱ta bru̍vantu no̱ nido̱ nira̱nyata̍ścidārata |
dadhā̍nā̱ indra̱ idduva̍ḥ || 1.004.05
u̱ta na̍ḥ su̱bhagā̍ a̱rirvo̱ceyu̍rdasma kṛ̱ṣṭaya̍ḥ |
syāmedindra̍sya̱ śarma̍ṇi || 1.004.06
emā̱śumā̱śave̍ bhara yajña̱śriya̍ṁ nṛ̱māda̍nam |
pa̱ta̱yanma̍nda̱yatsa̍kham || 1.004.07
a̱sya pī̱tvā śa̍takrato gha̱no vṛ̱trāṇā̍mabhavaḥ |
prāvo̱ vāje̍ṣu vā̱jina̍m || 1.004.08
taṁ tvā̱ vāje̍ṣu vā̱jina̍ṁ vā̱jayā̍maḥ śatakrato |
dhanā̍nāmindra sā̱taye̍ || 1.004.09
yo rā̱yo̱3̱̍'vani̍rma̱hānsu̍pā̱raḥ su̍nva̱taḥ sakhā̍ |
tasmā̱ indrā̍ya gāyata || 1.004.10
ā tvetā̱ ni ṣī̍da̱tendra̍ma̱bhi pra gā̍yata |
sakhā̍ya̱ḥ stoma̍vāhasaḥ || 1.005.01
pu̱rū̱tama̍ṁ purū̱ṇāmīśā̍na̱ṁ vāryā̍ṇām |
indra̱ṁ some̱ sacā̍ su̱te || 1.005.02
sa ghā̍ no̱ yoga̱ ā bhu̍va̱tsa rā̱ye sa pura̍ṁdhyām |
gama̱dvāje̍bhi̱rā sa na̍ḥ || 1.005.03
yasya̍ sa̱ṁsthe na vṛ̱ṇvate̱ harī̍ sa̱matsu̱ śatra̍vaḥ |
tasmā̱ indrā̍ya gāyata || 1.005.04
su̱ta̱pāvne̍ su̱tā i̱me śuca̍yo yanti vī̱taye̍ |
somā̍so̱ dadhyā̍śiraḥ || 1.005.05
tvaṁ su̱tasya̍ pī̱taye̍ sa̱dyo vṛ̱ddho a̍jāyathāḥ |
indra̱ jyaiṣṭhyā̍ya sukrato || 1.005.06
ā tvā̍ viśantvā̱śava̱ḥ somā̍sa indra girvaṇaḥ |
śaṁ te̍ santu̱ prace̍tase || 1.005.07
tvāṁ stomā̍ avīvṛdha̱ntvāmu̱kthā śa̍takrato |
tvāṁ va̍rdhantu no̱ gira̍ḥ || 1.005.08
akṣi̍totiḥ sanedi̱maṁ vāja̱mindra̍ḥ saha̱sriṇa̍m |
yasmi̱nviśvā̍ni̱ pauṁsyā̍ || 1.005.09
mā no̱ martā̍ a̱bhi dru̍hanta̱nūnā̍mindra girvaṇaḥ |
īśā̍no yavayā va̱dham || 1.005.10
yu̱ñjanti̍ bra̱dhnama̍ru̱ṣaṁ cara̍nta̱ṁ pari̍ ta̱sthuṣa̍ḥ |
roca̍nte roca̱nā di̱vi || 1.006.01
yu̱ñjantya̍sya̱ kāmyā̱ harī̱ vipa̍kṣasā̱ rathe̍ |
śoṇā̍ dhṛ̱ṣṇū nṛ̱vāha̍sā || 1.006.02
ke̱tuṁ kṛ̱ṇvanna̍ke̱tave̱ peśo̍ maryā ape̱śase̍ |
samu̱ṣadbhi̍rajāyathāḥ || 1.006.03
ādaha̍ sva̱dhāmanu̱ puna̍rgarbha̱tvame̍ri̱re |
dadhā̍nā̱ nāma̍ ya̱jñiya̍m || 1.006.04
vī̱ḻu ci̍dāruja̱tnubhi̱rguhā̍ cidindra̱ vahni̍bhiḥ |
avi̍nda u̱sriyā̱ anu̍ || 1.006.05
de̱va̱yanto̱ yathā̍ ma̱timacchā̍ vi̱dadva̍su̱ṁ gira̍ḥ |
ma̱hāma̍nūṣata śru̱tam || 1.006.06
indre̍ṇa̱ saṁ hi dṛkṣa̍se saṁjagmā̱no abi̍bhyuṣā |
ma̱ndū sa̍mā̱nava̍rcasā || 1.006.07
a̱na̱va̱dyaira̱bhidyu̍bhirma̱khaḥ saha̍svadarcati |
ga̱ṇairindra̍sya̱ kāmyai̍ḥ || 1.006.08
ata̍ḥ parijma̱nnā ga̍hi di̱vo vā̍ roca̱nādadhi̍ |
sama̍sminnṛñjate̱ gira̍ḥ || 1.006.09
i̱to vā̍ sā̱timīma̍he di̱vo vā̱ pārthi̍vā̱dadhi̍ |
indra̍ṁ ma̱ho vā̱ raja̍saḥ || 1.006.10
indra̱midgā̱thino̍ bṛ̱hadindra̍ma̱rkebhi̍ra̱rkiṇa̍ḥ |
indra̱ṁ vāṇī̍ranūṣata || 1.007.01
indra̱ iddharyo̱ḥ sacā̱ sammi̍śla̱ ā va̍co̱yujā̍ |
indro̍ va̱jrī hi̍ra̱ṇyaya̍ḥ || 1.007.02
indro̍ dī̱rghāya̱ cakṣa̍sa̱ ā sūrya̍ṁ rohayaddi̱vi |
vi gobhi̱radri̍mairayat || 1.007.03
indra̱ vāje̍ṣu no'va sa̱hasra̍pradhaneṣu ca |
u̱gra u̱grābhi̍rū̱tibhi̍ḥ || 1.007.04
indra̍ṁ va̱yaṁ ma̍hādha̱na indra̱marbhe̍ havāmahe |
yuja̍ṁ vṛ̱treṣu̍ va̱jriṇa̍m || 1.007.05
sa no̍ vṛṣanna̱muṁ ca̱ruṁ satrā̍dāva̱nnapā̍ vṛdhi |
a̱smabhya̱mapra̍tiṣkutaḥ || 1.007.06
tu̱ñjetu̍ñje̱ ya utta̍re̱ stomā̱ indra̍sya va̱jriṇa̍ḥ |
na vi̍ndhe asya suṣṭu̱tim || 1.007.07
vṛṣā̍ yū̱theva̱ vaṁsa̍gaḥ kṛ̱ṣṭīri̍ya̱rtyoja̍sā |
īśā̍no̱ apra̍tiṣkutaḥ || 1.007.08
ya eka̍ścarṣaṇī̱nāṁ vasū̍nāmira̱jyati̍ |
indra̱ḥ pañca̍ kṣitī̱nām || 1.007.09
indra̍ṁ vo vi̱śvata̱spari̱ havā̍mahe̱ jane̍bhyaḥ |
a̱smāka̍mastu̱ keva̍laḥ || 1.007.10
endra̍ sāna̱siṁ ra̱yiṁ sa̱jitvā̍naṁ sadā̱saha̍m |
varṣi̍ṣṭhamū̱taye̍ bhara || 1.008.01
ni yena̍ muṣṭiha̱tyayā̱ ni vṛ̱trā ru̱ṇadhā̍mahai |
tvotā̍so̱ nyarva̍tā || 1.008.02
indra̱ tvotā̍sa̱ ā va̱yaṁ vajra̍ṁ gha̱nā da̍dīmahi |
jaye̍ma̱ saṁ yu̱dhi spṛdha̍ḥ || 1.008.03
va̱yaṁ śūre̍bhi̱rastṛ̍bhi̱rindra̱ tvayā̍ yu̱jā va̱yam |
sā̱sa̱hyāma̍ pṛtanya̱taḥ || 1.008.04
ma̱hā indra̍ḥ pa̱raśca̱ nu ma̍hi̱tvama̍stu va̱jriṇe̍ |
dyaurna pra̍thi̱nā śava̍ḥ || 1.008.05
sa̱mo̱he vā̱ ya āśa̍ta̱ nara̍sto̱kasya̱ sani̍tau |
viprā̍so vā dhiyā̱yava̍ḥ || 1.008.06
yaḥ ku̱kṣiḥ so̍ma̱pāta̍maḥ samu̱dra i̍va̱ pinva̍te |
u̱rvīrāpo̱ na kā̱kuda̍ḥ || 1.008.07
e̱vā hya̍sya sū̱nṛtā̍ vira̱pśī goma̍tī ma̱hī |
pa̱kvā śākhā̱ na dā̱śuṣe̍ || 1.008.08
e̱vā hi te̱ vibhū̍taya ū̱taya̍ indra̱ māva̍te |
sa̱dyaści̱tsanti̍ dā̱śuṣe̍ || 1.008.09
e̱vā hya̍sya̱ kāmyā̱ stoma̍ u̱kthaṁ ca̱ śaṁsyā̍ |
indrā̍ya̱ soma̍pītaye || 1.008.10
indrehi̱ matsyandha̍so̱ viśve̍bhiḥ soma̱parva̍bhiḥ |
ma̱hā a̍bhi̱ṣṭiroja̍sā || 1.009.01
eme̍naṁ sṛjatā su̱te ma̱ndimindrā̍ya ma̱ndine̍ |
cakri̱ṁ viśvā̍ni̱ cakra̍ye || 1.009.02
matsvā̍ suśipra ma̱ndibhi̱ḥ stome̍bhirviśvacarṣaṇe |
sacai̱ṣu sava̍ne̱ṣvā || 1.009.03
asṛ̍gramindra te̱ gira̱ḥ prati̱ tvāmuda̍hāsata |
ajo̍ṣā vṛṣa̱bhaṁ pati̍m || 1.009.04
saṁ co̍daya ci̱trama̱rvāgrādha̍ indra̱ vare̍ṇyam |
asa̱ditte̍ vi̱bhu pra̱bhu || 1.009.05
a̱smānsu tatra̍ coda̱yendra̍ rā̱ye rabha̍svataḥ |
tuvi̍dyumna̱ yaśa̍svataḥ || 1.009.06
saṁ goma̍dindra̱ vāja̍vada̱sme pṛ̱thu śravo̍ bṛ̱hat |
vi̱śvāyu̍rdhe̱hyakṣi̍tam || 1.009.07
a̱sme dhe̍hi̱ śravo̍ bṛ̱haddyu̱mnaṁ sa̍hasra̱sāta̍mam |
indra̱ tā ra̱thinī̱riṣa̍ḥ || 1.009.08
vaso̱rindra̱ṁ vasu̍patiṁ gī̱rbhirgṛ̱ṇanta̍ ṛ̱gmiya̍m |
homa̱ gantā̍ramū̱taye̍ || 1.009.09
su̱tesu̍te̱ nyo̍kase bṛ̱hadbṛ̍ha̱ta eda̱riḥ |
indrā̍ya śū̱ṣama̍rcati || 1.009.10
gāya̍nti tvā gāya̱triṇo'rca̍ntya̱rkama̱rkiṇa̍ḥ |
bra̱hmāṇa̍stvā śatakrata̱ udva̱ṁśami̍va yemire || 1.010.01
yatsāno̱ḥ sānu̱māru̍ha̱dbhūryaspa̍ṣṭa̱ kartva̍m |
tadindro̱ artha̍ṁ cetati yū̱thena̍ vṛ̱ṣṇire̍jati || 1.010.02
yu̱kṣvā hi ke̱śinā̱ harī̱ vṛṣa̍ṇā kakṣya̱prā |
athā̍ na indra somapā gi̱rāmupa̍śrutiṁ cara || 1.010.03
ehi̱ stomā̍ a̱bhi sva̍rā̱bhi gṛ̍ṇī̱hyā ru̍va |
brahma̍ ca no vaso̱ sacendra̍ ya̱jñaṁ ca̍ vardhaya || 1.010.04
u̱kthamindrā̍ya̱ śaṁsya̱ṁ vardha̍naṁ puruni̱ṣṣidhe̍ |
śa̱kro yathā̍ su̱teṣu̍ ṇo rā̱raṇa̍tsa̱khyeṣu̍ ca || 1.010.05
tamitsa̍khi̱tva ī̍mahe̱ taṁ rā̱ye taṁ su̱vīrye̍ |
sa śa̱kra u̱ta na̍ḥ śaka̱dindro̱ vasu̱ daya̍mānaḥ || 1.010.06
su̱vi̱vṛta̍ṁ suni̱raja̱mindra̱ tvādā̍ta̱midyaśa̍ḥ |
gavā̱mapa̍ vra̱jaṁ vṛ̍dhi kṛṇu̱ṣva rādho̍ adrivaḥ || 1.010.07
na̱hi tvā̱ roda̍sī u̱bhe ṛ̍ghā̱yamā̍ṇa̱minva̍taḥ |
jeṣa̱ḥ sva̍rvatīra̱paḥ saṁ gā a̱smabhya̍ṁ dhūnuhi || 1.010.08
āśru̍tkarṇa śru̱dhī hava̱ṁ nū ci̍ddadhiṣva me̱ gira̍ḥ |
indra̱ stoma̍mi̱maṁ mama̍ kṛ̱ṣvā yu̱jaści̱danta̍ram || 1.010.09
vi̱dmā hi tvā̱ vṛṣa̍ntama̱ṁ vāje̍ṣu havana̱śruta̍m |
vṛṣa̍ntamasya hūmaha ū̱tiṁ sa̍hasra̱sāta̍mām || 1.010.10
ā tū na̍ indra kauśika mandasā̱naḥ su̱taṁ pi̍ba |
navya̱māyu̱ḥ pra sū ti̍ra kṛ̱dhī sa̍hasra̱sāmṛṣi̍m || 1.010.11
pari̍ tvā girvaṇo̱ gira̍ i̱mā bha̍vantu vi̱śvata̍ḥ |
vṛ̱ddhāyu̱manu̱ vṛddha̍yo̱ juṣṭā̍ bhavantu̱ juṣṭa̍yaḥ || 1.010.12
indra̱ṁ viśvā̍ avīvṛdhansamu̱dravya̍casa̱ṁ gira̍ḥ |
ra̱thīta̍maṁ ra̱thīnā̱ṁ vājā̍nā̱ṁ satpa̍ti̱ṁ pati̍m || 1.011.01
sa̱khye ta̍ indra vā̱jino̱ mā bhe̍ma śavasaspate |
tvāma̱bhi pra ṇo̍numo̱ jetā̍ra̱mapa̍rājitam || 1.011.02
pū̱rvīrindra̍sya rā̱tayo̱ na vi da̍syantyū̱taya̍ḥ |
yadī̱ vāja̍sya̱ goma̍taḥ sto̱tṛbhyo̱ maṁha̍te ma̱gham || 1.011.03
pu̱rāṁ bhi̱nduryuvā̍ ka̱virami̍taujā ajāyata |
indro̱ viśva̍sya̱ karma̍ṇo dha̱rtā va̱jrī pu̍ruṣṭu̱taḥ || 1.011.04
tvaṁ va̱lasya̱ goma̱to'pā̍varadrivo̱ bila̍m |
tvāṁ de̱vā abi̍bhyuṣastu̱jyamā̍nāsa āviṣuḥ || 1.011.05
tavā̱haṁ śū̍ra rā̱tibhi̱ḥ pratyā̍ya̱ṁ sindhu̍mā̱vada̍n |
upā̍tiṣṭhanta girvaṇo vi̱duṣṭe̱ tasya̍ kā̱rava̍ḥ || 1.011.06
mā̱yābhi̍rindra mā̱yina̱ṁ tvaṁ śuṣṇa̱mavā̍tiraḥ |
vi̱duṣṭe̱ tasya̱ medhi̍rā̱steṣā̱ṁ śravā̱ṁsyutti̍ra || 1.011.07
indra̱mīśā̍na̱moja̍sā̱bhi stomā̍ anūṣata |
sa̱hasra̱ṁ yasya̍ rā̱taya̍ u̱ta vā̱ santi̱ bhūya̍sīḥ || 1.011.08
a̱gniṁ dū̱taṁ vṛ̍ṇīmahe̱ hotā̍raṁ vi̱śvave̍dasam |
a̱sya ya̱jñasya̍ su̱kratu̍m || 1.012.01
a̱gnima̍gni̱ṁ havī̍mabhi̱ḥ sadā̍ havanta vi̱śpati̍m |
ha̱vya̱vāha̍ṁ purupri̱yam || 1.012.02
agne̍ de̱vā i̱hā va̍ha jajñā̱no vṛ̱ktaba̍rhiṣe |
asi̱ hotā̍ na̱ īḍya̍ḥ || 1.012.03
tā u̍śa̱to vi bo̍dhaya̱ yada̍gne̱ yāsi̍ dū̱tya̍m |
de̱vairā sa̍tsi ba̱rhiṣi̍ || 1.012.04
ghṛtā̍havana dīdiva̱ḥ prati̍ ṣma̱ riṣa̍to daha |
agne̱ tvaṁ ra̍kṣa̱svina̍ḥ || 1.012.05
a̱gninā̱gniḥ sami̍dhyate ka̱virgṛ̱hapa̍ti̱ryuvā̍ |
ha̱vya̱vāḍju̱hvā̍syaḥ || 1.012.06
ka̱vima̱gnimupa̍ stuhi sa̱tyadha̍rmāṇamadhva̱re |
de̱vama̍mīva̱cāta̍nam || 1.012.07
yastvāma̍gne ha̱viṣpa̍tirdū̱taṁ de̍va sapa̱ryati̍ |
tasya̍ sma prāvi̱tā bha̍va || 1.012.08
yo a̱gniṁ de̱vavī̍taye ha̱viṣmā̍ ā̱vivā̍sati |
tasmai̍ pāvaka mṛḻaya || 1.012.09
sa na̍ḥ pāvaka dīdi̱vo'gne̍ de̱vā i̱hā va̍ha |
upa̍ ya̱jñaṁ ha̱viśca̍ naḥ || 1.012.10
sa na̱ḥ stavā̍na̱ ā bha̍ra gāya̱treṇa̱ navī̍yasā |
ra̱yiṁ vī̱rava̍tī̱miṣa̍m || 1.012.11
agne̍ śu̱kreṇa̍ śo̱ciṣā̱ viśvā̍bhirde̱vahū̍tibhiḥ |
i̱maṁ stoma̍ṁ juṣasva naḥ || 1.012.12
susa̍middho na̱ ā va̍ha de̱vā a̍gne ha̱viṣma̍te |
hota̍ḥ pāvaka̱ yakṣi̍ ca || 1.013.01
madhu̍mantaṁ tanūnapādya̱jñaṁ de̱veṣu̍ naḥ kave |
a̱dyā kṛ̍ṇuhi vī̱taye̍ || 1.013.02
narā̱śaṁsa̍mi̱ha pri̱yama̱sminya̱jña upa̍ hvaye |
madhu̍jihvaṁ havi̱ṣkṛta̍m || 1.013.03
agne̍ su̱khata̍me̱ rathe̍ de̱vā ī̍ḻi̱ta ā va̍ha |
asi̱ hotā̱ manu̍rhitaḥ || 1.013.04
stṛ̱ṇī̱ta ba̱rhirā̍nu̱ṣagghṛ̱tapṛ̍ṣṭhaṁ manīṣiṇaḥ |
yatrā̱mṛta̍sya̱ cakṣa̍ṇam || 1.013.05
vi śra̍yantāmṛtā̱vṛdho̱ dvāro̍ de̱vīra̍sa̱ścata̍ḥ |
a̱dyā nū̱naṁ ca̱ yaṣṭa̍ve || 1.013.06
nakto̱ṣāsā̍ su̱peśa̍sā̱sminya̱jña upa̍ hvaye |
i̱daṁ no̍ ba̱rhirā̱sade̍ || 1.013.07
tā su̍ji̱hvā upa̍ hvaye̱ hotā̍rā̱ daivyā̍ ka̱vī |
ya̱jñaṁ no̍ yakṣatāmi̱mam || 1.013.08
iḻā̱ sara̍svatī ma̱hī ti̱sro de̱vīrma̍yo̱bhuva̍ḥ |
ba̱rhiḥ sī̍dantva̱sridha̍ḥ || 1.013.09
i̱ha tvaṣṭā̍ramagri̱yaṁ vi̱śvarū̍pa̱mupa̍ hvaye |
a̱smāka̍mastu̱ keva̍laḥ || 1.013.10
ava̍ sṛjā vanaspate̱ deva̍ de̱vebhyo̍ ha̱viḥ |
pra dā̱tura̍stu̱ ceta̍nam || 1.013.11
svāhā̍ ya̱jñaṁ kṛ̍ṇota̱nendrā̍ya̱ yajva̍no gṛ̱he |
tatra̍ de̱vā upa̍ hvaye || 1.013.12
aibhi̍ragne̱ duvo̱ giro̱ viśve̍bhi̱ḥ soma̍pītaye |
de̱vebhi̍ryāhi̱ yakṣi̍ ca || 1.014.01
ā tvā̱ kaṇvā̍ ahūṣata gṛ̱ṇanti̍ vipra te̱ dhiya̍ḥ |
de̱vebhi̍ragna̱ ā ga̍hi || 1.014.02
i̱ndra̱vā̱yū bṛha̱spati̍ṁ mi̱trāgniṁ pū̱ṣaṇa̱ṁ bhaga̍m |
ā̱di̱tyānmāru̍taṁ ga̱ṇam || 1.014.03
pra vo̍ bhriyanta̱ inda̍vo matsa̱rā mā̍dayi̱ṣṇava̍ḥ |
dra̱psā madhva̍ścamū̱ṣada̍ḥ || 1.014.04
īḻa̍te̱ tvāma̍va̱syava̱ḥ kaṇvā̍so vṛ̱ktaba̍rhiṣaḥ |
ha̱viṣma̍nto ara̱ṁkṛta̍ḥ || 1.014.05
ghṛ̱tapṛ̍ṣṭhā mano̱yujo̱ ye tvā̱ vaha̍nti̱ vahna̍yaḥ |
ā de̱vānsoma̍pītaye || 1.014.06
tānyaja̍trā ṛtā̱vṛdho'gne̱ patnī̍vataskṛdhi |
madhva̍ḥ sujihva pāyaya || 1.014.07
ye yaja̍trā̱ ya īḍyā̱ste te̍ pibantu ji̱hvayā̍ |
madho̍ragne̱ vaṣa̍ṭkṛti || 1.014.08
ākī̱ṁ sūrya̍sya roca̱nādviśvā̍nde̱vā u̍ṣa̱rbudha̍ḥ |
vipro̱ hote̱ha va̍kṣati || 1.014.09
viśve̍bhiḥ so̱myaṁ madhvagna̱ indre̍ṇa vā̱yunā̍ |
pibā̍ mi̱trasya̱ dhāma̍bhiḥ || 1.014.10
tvaṁ hotā̱ manu̍rhi̱to'gne̍ ya̱jñeṣu̍ sīdasi |
semaṁ no̍ adhva̱raṁ ya̍ja || 1.014.11
yu̱kṣvā hyaru̍ṣī̱ rathe̍ ha̱rito̍ deva ro̱hita̍ḥ |
tābhi̍rde̱vā i̱hā va̍ha || 1.014.12
indra̱ soma̱ṁ piba̍ ṛ̱tunā tvā̍ viśa̱ntvinda̍vaḥ |
ma̱tsa̱rāsa̱stado̍kasaḥ || 1.015.01
maru̍ta̱ḥ piba̍ta ṛ̱tunā̍ po̱trādya̱jñaṁ pu̍nītana |
yū̱yaṁ hi ṣṭhā su̍dānavaḥ || 1.015.02
a̱bhi ya̱jñaṁ gṛ̍ṇīhi no̱ gnāvo̱ neṣṭa̱ḥ piba̍ ṛ̱tunā̍ |
tvaṁ hi ra̍tna̱dhā asi̍ || 1.015.03
agne̍ de̱vā i̱hā va̍ha sā̱dayā̱ yoni̍ṣu tri̱ṣu |
pari̍ bhūṣa̱ piba̍ ṛ̱tunā̍ || 1.015.04
brāhma̍ṇādindra̱ rādha̍sa̱ḥ pibā̱ soma̍mṛ̱tūranu̍ |
taveddhi sa̱khyamastṛ̍tam || 1.015.05
yu̱vaṁ dakṣa̍ṁ dhṛtavrata̱ mitrā̍varuṇa dū̱ḻabha̍m |
ṛ̱tunā̍ ya̱jñamā̍śāthe || 1.015.06
dra̱vi̱ṇo̱dā dravi̍ṇaso̱ grāva̍hastāso adhva̱re |
ya̱jñeṣu̍ de̱vamī̍ḻate || 1.015.07
dra̱vi̱ṇo̱dā da̍dātu no̱ vasū̍ni̱ yāni̍ śṛṇvi̱re |
de̱veṣu̱ tā va̍nāmahe || 1.015.08
dra̱vi̱ṇo̱dāḥ pi̍pīṣati ju̱hota̱ pra ca̍ tiṣṭhata |
ne̱ṣṭrādṛ̱tubhi̍riṣyata || 1.015.09
yattvā̍ tu̱rīya̍mṛ̱tubhi̱rdravi̍ṇodo̱ yajā̍mahe |
adha̍ smā no da̱dirbha̍va || 1.015.10
aśvi̍nā̱ piba̍ta̱ṁ madhu̱ dīdya̍gnī śucivratā |
ṛ̱tunā̍ yajñavāhasā || 1.015.11
gārha̍patyena santya ṛ̱tunā̍ yajña̱nīra̍si |
de̱vānde̍vaya̱te ya̍ja || 1.015.12
ā tvā̍ vahantu̱ hara̍yo̱ vṛṣa̍ṇa̱ṁ soma̍pītaye |
indra̍ tvā̱ sūra̍cakṣasaḥ || 1.016.01
i̱mā dhā̱nā ghṛ̍ta̱snuvo̱ harī̍ i̱hopa̍ vakṣataḥ |
indra̍ṁ su̱khata̍me̱ rathe̍ || 1.016.02
indra̍ṁ prā̱tarha̍vāmaha̱ indra̍ṁ praya̱tya̍dhva̱re |
indra̱ṁ soma̍sya pī̱taye̍ || 1.016.03
upa̍ naḥ su̱tamā ga̍hi̱ hari̍bhirindra ke̱śibhi̍ḥ |
su̱te hi tvā̱ havā̍mahe || 1.016.04
semaṁ na̱ḥ stoma̱mā ga̱hyupe̱daṁ sava̍naṁ su̱tam |
gau̱ro na tṛ̍ṣi̱taḥ pi̍ba || 1.016.05
i̱me somā̍sa̱ inda̍vaḥ su̱tāso̱ adhi̍ ba̱rhiṣi̍ |
tā i̍ndra̱ saha̍se piba || 1.016.06
a̱yaṁ te̱ stomo̍ agri̱yo hṛ̍di̱spṛga̍stu̱ śaṁta̍maḥ |
athā̱ soma̍ṁ su̱taṁ pi̍ba || 1.016.07
viśva̱mitsava̍naṁ su̱tamindro̱ madā̍ya gacchati |
vṛ̱tra̱hā soma̍pītaye || 1.016.08
semaṁ na̱ḥ kāma̱mā pṛ̍ṇa̱ gobhi̱raśvai̍ḥ śatakrato |
stavā̍ma tvā svā̱dhya̍ḥ || 1.016.09
indrā̱varu̍ṇayora̱haṁ sa̱mrājo̱rava̱ ā vṛ̍ṇe |
tā no̍ mṛḻāta ī̱dṛśe̍ || 1.017.01
gantā̍rā̱ hi stho'va̍se̱ hava̱ṁ vipra̍sya̱ māva̍taḥ |
dha̱rtārā̍ carṣaṇī̱nām || 1.017.02
a̱nu̱kā̱maṁ ta̍rpayethā̱mindrā̍varuṇa rā̱ya ā |
tā vā̱ṁ nedi̍ṣṭhamīmahe || 1.017.03
yu̱vāku̱ hi śacī̍nāṁ yu̱vāku̍ sumatī̱nām |
bhū̱yāma̍ vāja̱dāvnā̍m || 1.017.04
indra̍ḥ sahasra̱dāvnā̱ṁ varu̍ṇa̱ḥ śaṁsyā̍nām |
kratu̍rbhavatyu̱kthya̍ḥ || 1.017.05
tayo̱ridava̍sā va̱yaṁ sa̱nema̱ ni ca̍ dhīmahi |
syādu̱ta pra̱reca̍nam || 1.017.06
indrā̍varuṇa vāma̱haṁ hu̱ve ci̱trāya̱ rādha̍se |
a̱smānsu ji̱gyuṣa̍skṛtam || 1.017.07
indrā̍varuṇa̱ nū nu vā̱ṁ siṣā̍santīṣu dhī̱ṣvā |
a̱smabhya̱ṁ śarma̍ yacchatam || 1.017.08
pra vā̍maśnotu suṣṭu̱tirindrā̍varuṇa̱ yāṁ hu̱ve |
yāmṛ̱dhāthe̍ sa̱dhastu̍tim || 1.017.09
so̱māna̱ṁ svara̍ṇaṁ kṛṇu̱hi bra̍hmaṇaspate |
ka̱kṣīva̍nta̱ṁ ya au̍śi̱jaḥ || 1.018.01
yo re̱vānyo a̍mīva̱hā va̍su̱vitpu̍ṣṭi̱vardha̍naḥ |
sa na̍ḥ siṣaktu̱ yastu̱raḥ || 1.018.02
mā na̱ḥ śaṁso̱ ara̍ruṣo dhū̱rtiḥ praṇa̱ṅmartya̍sya |
rakṣā̍ ṇo brahmaṇaspate || 1.018.03
sa ghā̍ vī̱ro na ri̍ṣyati̱ yamindro̱ brahma̍ṇa̱spati̍ḥ |
somo̍ hi̱noti̱ martya̍m || 1.018.04
tvaṁ taṁ bra̍hmaṇaspate̱ soma̱ indra̍śca̱ martya̍m |
dakṣi̍ṇā pā̱tvaṁha̍saḥ || 1.018.05
sada̍sa̱spati̱madbhu̍taṁ pri̱yamindra̍sya̱ kāmya̍m |
sa̱niṁ me̱dhāma̍yāsiṣam || 1.018.06
yasmā̍dṛ̱te na sidhya̍ti ya̱jño vi̍pa̱ścita̍śca̱na |
sa dhī̱nāṁ yoga̍minvati || 1.018.07
ādṛ̍dhnoti ha̱viṣkṛ̍ti̱ṁ prāñca̍ṁ kṛṇotyadhva̱ram |
hotrā̍ de̱veṣu̍ gacchati || 1.018.08
narā̱śaṁsa̍ṁ su̱dhṛṣṭa̍ma̱mapa̍śyaṁ sa̱pratha̍stamam |
di̱vo na sadma̍makhasam || 1.018.09
prati̱ tyaṁ cāru̍madhva̱raṁ go̍pī̱thāya̱ pra hū̍yase |
ma̱rudbhi̍ragna̱ ā ga̍hi || 1.019.01
na̱hi de̱vo na martyo̍ ma̱hastava̱ kratu̍ṁ pa̱raḥ |
ma̱rudbhi̍ragna̱ ā ga̍hi || 1.019.02
ye ma̱ho raja̍so vi̱durviśve̍ de̱vāso̍ a̱druha̍ḥ |
ma̱rudbhi̍ragna̱ ā ga̍hi || 1.019.03
ya u̱grā a̱rkamā̍nṛ̱curanā̍dhṛṣṭāsa̱ oja̍sā |
ma̱rudbhi̍ragna̱ ā ga̍hi || 1.019.04
ye śu̱bhrā gho̱rava̍rpasaḥ sukṣa̱trāso̍ ri̱śāda̍saḥ |
ma̱rudbhi̍ragna̱ ā ga̍hi || 1.019.05
ye nāka̱syādhi̍ roca̱ne di̱vi de̱vāsa̱ āsa̍te |
ma̱rudbhi̍ragna̱ ā ga̍hi || 1.019.06
ya ī̱ṅkhaya̍nti̱ parva̍tānti̱raḥ sa̍mu̱drama̍rṇa̱vam |
ma̱rudbhi̍ragna̱ ā ga̍hi || 1.019.07
ā ye ta̱nvanti̍ ra̱śmibhi̍sti̱raḥ sa̍mu̱dramoja̍sā |
ma̱rudbhi̍ragna̱ ā ga̍hi || 1.019.08
a̱bhi tvā̍ pū̱rvapī̍taye sṛ̱jāmi̍ so̱myaṁ madhu̍ |
ma̱rudbhi̍ragna̱ ā ga̍hi || 1.019.09
a̱yaṁ de̱vāya̱ janma̍ne̱ stomo̱ vipre̍bhirāsa̱yā |
akā̍ri ratna̱dhāta̍maḥ || 1.020.01
ya indrā̍ya vaco̱yujā̍ tata̱kṣurmana̍sā̱ harī̍ |
śamī̍bhirya̱jñamā̍śata || 1.020.02
takṣa̱nnāsa̍tyābhyā̱ṁ pari̍jmānaṁ su̱khaṁ ratha̍m |
takṣa̍ndhe̱nuṁ sa̍ba̱rdughā̍m || 1.020.03
yuvā̍nā pi̱tarā̱ puna̍ḥ sa̱tyama̍ntrā ṛjū̱yava̍ḥ |
ṛ̱bhavo̍ vi̱ṣṭya̍krata || 1.020.04
saṁ vo̱ madā̍so agma̱tendre̍ṇa ca ma̱rutva̍tā |
ā̱di̱tyebhi̍śca̱ rāja̍bhiḥ || 1.020.05
u̱ta tyaṁ ca̍ma̱saṁ nava̱ṁ tvaṣṭu̍rde̱vasya̱ niṣkṛ̍tam |
aka̍rta ca̱tura̱ḥ puna̍ḥ || 1.020.06
te no̱ ratnā̍ni dhattana̱ trirā sāptā̍ni sunva̱te |
eka̍mekaṁ suśa̱stibhi̍ḥ || 1.020.07
adhā̍rayanta̱ vahna̱yo'bha̍janta sukṛ̱tyayā̍ |
bhā̱gaṁ de̱veṣu̍ ya̱jñiya̍m || 1.020.08
i̱hendrā̱gnī upa̍ hvaye̱ tayo̱ritstoma̍muśmasi |
tā soma̍ṁ soma̱pāta̍mā || 1.021.01
tā ya̱jñeṣu̱ pra śa̍ṁsatendrā̱gnī śu̍mbhatā naraḥ |
tā gā̍ya̱treṣu̍ gāyata || 1.021.02
tā mi̱trasya̱ praśa̍staya indrā̱gnī tā ha̍vāmahe |
so̱ma̱pā soma̍pītaye || 1.021.03
u̱grā santā̍ havāmaha̱ upe̱daṁ sava̍naṁ su̱tam |
i̱ndrā̱gnī eha ga̍cchatām || 1.021.04
tā ma̱hāntā̱ sada̱spatī̱ indrā̍gnī̱ rakṣa̍ ubjatam |
apra̍jāḥ santva̱triṇa̍ḥ || 1.021.05
tena̍ sa̱tyena̍ jāgṛta̱madhi̍ prace̱tune̍ pa̱de |
indrā̍gnī̱ śarma̍ yacchatam || 1.021.06
prā̱ta̱ryujā̱ vi bo̍dhayā̱śvinā̱veha ga̍cchatām |
a̱sya soma̍sya pī̱taye̍ || 1.022.01
yā su̱rathā̍ ra̱thīta̍mo̱bhā de̱vā di̍vi̱spṛśā̍ |
a̱śvinā̱ tā ha̍vāmahe || 1.022.02
yā vā̱ṁ kaśā̱ madhu̍ma̱tyaśvi̍nā sū̱nṛtā̍vatī |
tayā̍ ya̱jñaṁ mi̍mikṣatam || 1.022.03
na̱hi vā̱masti̍ dūra̱ke yatrā̱ rathe̍na̱ gaccha̍thaḥ |
aśvi̍nā so̱mino̍ gṛ̱ham || 1.022.04
hira̍ṇyapāṇimū̱taye̍ savi̱tāra̱mupa̍ hvaye |
sa cettā̍ de̱vatā̍ pa̱dam || 1.022.05
a̱pāṁ napā̍ta̱mava̍se savi̱tāra̱mupa̍ stuhi |
tasya̍ vra̱tānyu̍śmasi || 1.022.06
vi̱bha̱ktāra̍ṁ havāmahe̱ vaso̍ści̱trasya̱ rādha̍saḥ |
sa̱vi̱tāra̍ṁ nṛ̱cakṣa̍sam || 1.022.07
sakhā̍ya̱ ā ni ṣī̍data savi̱tā stomyo̱ nu na̍ḥ |
dātā̱ rādhā̍ṁsi śumbhati || 1.022.08
agne̱ patnī̍ri̱hā va̍ha de̱vānā̍muśa̱tīrupa̍ |
tvaṣṭā̍ra̱ṁ soma̍pītaye || 1.022.09
ā gnā a̍gna i̱hāva̍se̱ hotrā̍ṁ yaviṣṭha̱ bhāra̍tīm |
varū̍trīṁ dhi̱ṣaṇā̍ṁ vaha || 1.022.10
a̱bhi no̍ de̱vīrava̍sā ma̱haḥ śarma̍ṇā nṛ̱patnī̍ḥ |
acchi̍nnapatrāḥ sacantām || 1.022.11
i̱hendrā̱ṇīmupa̍ hvaye varuṇā̱nīṁ sva̱staye̍ |
a̱gnāyī̱ṁ soma̍pītaye || 1.022.12
ma̱hī dyauḥ pṛ̍thi̱vī ca̍ na i̱maṁ ya̱jñaṁ mi̍mikṣatām |
pi̱pṛ̱tāṁ no̱ bharī̍mabhiḥ || 1.022.13
tayo̱ridghṛ̱tava̱tpayo̱ viprā̍ rihanti dhī̱tibhi̍ḥ |
ga̱ndha̱rvasya̍ dhru̱ve pa̱de || 1.022.14
syo̱nā pṛ̍thivi bhavānṛkṣa̱rā ni̱veśa̍nī |
yacchā̍ na̱ḥ śarma̍ sa̱pratha̍ḥ || 1.022.15
ato̍ de̱vā a̍vantu no̱ yato̱ viṣṇu̍rvicakra̱me |
pṛ̱thi̱vyāḥ sa̱pta dhāma̍bhiḥ || 1.022.16
i̱daṁ viṣṇu̱rvi ca̍krame tre̱dhā ni da̍dhe pa̱dam |
samū̍ḻhamasya pāṁsu̱re || 1.022.17
trīṇi̍ pa̱dā vi ca̍krame̱ viṣṇu̍rgo̱pā adā̍bhyaḥ |
ato̱ dharmā̍ṇi dhā̱raya̍n || 1.022.18
viṣṇo̱ḥ karmā̍ṇi paśyata̱ yato̍ vra̱tāni̍ paspa̱śe |
indra̍sya̱ yujya̱ḥ sakhā̍ || 1.022.19
tadviṣṇo̍ḥ para̱maṁ pa̱daṁ sadā̍ paśyanti sū̱raya̍ḥ |
di̱vī̍va̱ cakṣu̱rāta̍tam || 1.022.20
tadviprā̍so vipa̱nyavo̍ jāgṛ̱vāṁsa̱ḥ sami̍ndhate |
viṣṇo̱ryatpa̍ra̱maṁ pa̱dam || 1.022.21
tī̱vrāḥ somā̍sa̱ ā ga̍hyā̱śīrva̍ntaḥ su̱tā i̱me |
vāyo̱ tānprasthi̍tānpiba || 1.023.01
u̱bhā de̱vā di̍vi̱spṛśe̍ndravā̱yū ha̍vāmahe |
a̱sya soma̍sya pī̱taye̍ || 1.023.02
i̱ndra̱vā̱yū ma̍no̱juvā̱ viprā̍ havanta ū̱taye̍ |
sa̱ha̱srā̱kṣā dhi̱yaspatī̍ || 1.023.03
mi̱traṁ va̱yaṁ ha̍vāmahe̱ varu̍ṇa̱ṁ soma̍pītaye |
ja̱jñā̱nā pū̱tada̍kṣasā || 1.023.04
ṛ̱tena̱ yāvṛ̍tā̱vṛdhā̍vṛ̱tasya̱ jyoti̍ṣa̱spatī̍ |
tā mi̱trāvaru̍ṇā huve || 1.023.05
varu̍ṇaḥ prāvi̱tā bhu̍vanmi̱tro viśvā̍bhirū̱tibhi̍ḥ |
kara̍tāṁ naḥ su̱rādha̍saḥ || 1.023.06
ma̱rutva̍ntaṁ havāmaha̱ indra̱mā soma̍pītaye |
sa̱jūrga̱ṇena̍ tṛmpatu || 1.023.07
indra̍jyeṣṭhā̱ maru̍dgaṇā̱ devā̍sa̱ḥ pūṣa̍rātayaḥ |
viśve̱ mama̍ śrutā̱ hava̍m || 1.023.08
ha̱ta vṛ̱traṁ su̍dānava̱ indre̍ṇa̱ saha̍sā yu̱jā |
mā no̍ du̱ḥśaṁsa̍ īśata || 1.023.09
viśvā̍nde̱vānha̍vāmahe ma̱ruta̱ḥ soma̍pītaye |
u̱grā hi pṛśni̍mātaraḥ || 1.023.10
jaya̍tāmiva tanya̱turma̱rutā̍meti dhṛṣṇu̱yā |
yacchubha̍ṁ yā̱thanā̍ naraḥ || 1.023.11
ha̱skā̱rādvi̱dyuta̱sparyato̍ jā̱tā a̍vantu naḥ |
ma̱ruto̍ mṛḻayantu naḥ || 1.023.12
ā pū̍ṣañci̱traba̍rhiṣa̱māghṛ̍ṇe dha̱ruṇa̍ṁ di̱vaḥ |
ājā̍ na̱ṣṭaṁ yathā̍ pa̱śum || 1.023.13
pū̱ṣā rājā̍na̱māghṛ̍ṇi̱rapa̍gūḻha̱ṁ guhā̍ hi̱tam |
avi̍ndacci̱traba̍rhiṣam || 1.023.14
u̱to sa mahya̱mindu̍bhi̱ḥ ṣaḍyu̱ktā a̍nu̱seṣi̍dhat |
gobhi̱ryava̱ṁ na ca̍rkṛṣat || 1.023.15
a̱mbayo̍ ya̱ntyadhva̍bhirjā̱mayo̍ adhvarīya̱tām |
pṛ̱ñca̱tīrmadhu̍nā̱ paya̍ḥ || 1.023.16
a̱mūryā upa̱ sūrye̱ yābhi̍rvā̱ sūrya̍ḥ sa̱ha |
tā no̍ hinvantvadhva̱ram || 1.023.17
a̱po de̱vīrupa̍ hvaye̱ yatra̱ gāva̱ḥ piba̍nti naḥ |
sindhu̍bhya̱ḥ kartva̍ṁ ha̱viḥ || 1.023.18
a̱psva1̱̍ntara̱mṛta̍ma̱psu bhe̍ṣa̱jama̱pāmu̱ta praśa̍staye |
devā̱ bhava̍ta vā̱jina̍ḥ || 1.023.19
a̱psu me̱ somo̍ abravīda̱ntarviśvā̍ni bheṣa̱jā |
a̱gniṁ ca̍ vi̱śvaśa̍mbhuva̱māpa̍śca vi̱śvabhe̍ṣajīḥ || 1.023.20
āpa̍ḥ pṛṇī̱ta bhe̍ṣa̱jaṁ varū̍thaṁ ta̱nve̱3̱̍ mama̍ |
jyokca̱ sūrya̍ṁ dṛ̱śe || 1.023.21
i̱damā̍pa̱ḥ pra va̍hata̱ yatkiṁ ca̍ duri̱taṁ mayi̍ |
yadvā̱hama̍bhidu̱droha̱ yadvā̍ śe̱pa u̱tānṛ̍tam || 1.023.22
āpo̍ a̱dyānva̍cāriṣa̱ṁ rase̍na̱ sama̍gasmahi |
paya̍svānagna̱ ā ga̍hi̱ taṁ mā̱ saṁ sṛ̍ja̱ varca̍sā || 1.023.23
saṁ mā̍gne̱ varca̍sā sṛja̱ saṁ pra̱jayā̱ samāyu̍ṣā |
vi̱dyurme̍ asya de̱vā indro̍ vidyātsa̱ha ṛṣi̍bhiḥ || 1.023.24
kasya̍ nū̱naṁ ka̍ta̱masyā̱mṛtā̍nā̱ṁ manā̍mahe̱ cāru̍ de̱vasya̱ nāma̍ |
ko no̍ ma̱hyā adi̍taye̱ puna̍rdātpi̱tara̍ṁ ca dṛ̱śeya̍ṁ mā̱tara̍ṁ ca || 1.024.01
a̱gnerva̱yaṁ pra̍tha̱masyā̱mṛtā̍nā̱ṁ manā̍mahe̱ cāru̍ de̱vasya̱ nāma̍ |
sa no̍ ma̱hyā adi̍taye̱ puna̍rdātpi̱tara̍ṁ ca dṛ̱śeya̍ṁ mā̱tara̍ṁ ca || 1.024.02
a̱bhi tvā̍ deva savita̱rīśā̍na̱ṁ vāryā̍ṇām |
sadā̍vanbhā̱gamī̍mahe || 1.024.03
yaści̱ddhi ta̍ i̱tthā bhaga̍ḥ śaśamā̱naḥ pu̱rā ni̱daḥ |
a̱dve̱ṣo hasta̍yorda̱dhe || 1.024.04
bhaga̍bhaktasya te va̱yamuda̍śema̱ tavāva̍sā |
mū̱rdhāna̍ṁ rā̱ya ā̱rabhe̍ || 1.024.05
na̱hi te̍ kṣa̱traṁ na saho̱ na ma̱nyuṁ vaya̍śca̱nāmī pa̱taya̍nta ā̱puḥ |
nemā āpo̍ animi̱ṣaṁ cara̍ntī̱rna ye vāta̍sya prami̱nantyabhva̍m || 1.024.06
a̱bu̱dhne rājā̱ varu̍ṇo̱ vana̍syo̱rdhvaṁ stūpa̍ṁ dadate pū̱tada̍kṣaḥ |
nī̱cīnā̍ḥ sthuru̱pari̍ bu̱dhna e̍ṣāma̱sme a̱ntarnihi̍tāḥ ke̱tava̍ḥ syuḥ || 1.024.07
u̱ruṁ hi rājā̱ varu̍ṇaśca̱kāra̱ sūryā̍ya̱ panthā̱manve̍ta̱vā u̍ |
a̱pade̱ pādā̱ prati̍dhātave'karu̱tāpa̍va̱ktā hṛ̍dayā̱vidha̍ścit || 1.024.08
śa̱taṁ te̍ rājanbhi̱ṣaja̍ḥ sa̱hasra̍mu̱rvī ga̍bhī̱rā su̍ma̱tiṣṭe̍ astu |
bādha̍sva dū̱re nirṛ̍tiṁ parā̱caiḥ kṛ̱taṁ ci̱dena̱ḥ pra mu̍mugdhya̱smat || 1.024.09
a̱mī ya ṛkṣā̱ nihi̍tāsa u̱ccā nakta̱ṁ dadṛ̍śre̱ kuha̍ ci̱ddive̍yuḥ |
ada̍bdhāni̱ varu̍ṇasya vra̱tāni̍ vi̱cāka̍śacca̱ndramā̱ nakta̍meti || 1.024.10
tattvā̍ yāmi̱ brahma̍ṇā̱ vanda̍māna̱stadā śā̍ste̱ yaja̍māno ha̱virbhi̍ḥ |
ahe̍ḻamāno varuṇe̱ha bo̱dhyuru̍śaṁsa̱ mā na̱ āyu̱ḥ pra mo̍ṣīḥ || 1.024.11
tadinnakta̱ṁ taddivā̱ mahya̍māhu̱stada̱yaṁ keto̍ hṛ̱da ā vi ca̍ṣṭe |
śuna̱ḥśepo̱ yamahva̍dgṛbhī̱taḥ so a̱smānrājā̱ varu̍ṇo mumoktu || 1.024.12
śuna̱ḥśepo̱ hyahva̍dgṛbhī̱tastri̱ṣvā̍di̱tyaṁ dru̍pa̱deṣu̍ ba̱ddhaḥ |
avai̍na̱ṁ rājā̱ varu̍ṇaḥ sasṛjyādvi̱dvā ada̍bdho̱ vi mu̍moktu̱ pāśā̍n || 1.024.13
ava̍ te̱ heḻo̍ varuṇa̱ namo̍bhi̱rava̍ ya̱jñebhi̍rīmahe ha̱virbhi̍ḥ |
kṣaya̍nna̱smabhya̍masura pracetā̱ rāja̱nnenā̍ṁsi śiśrathaḥ kṛ̱tāni̍ || 1.024.14
udu̍tta̱maṁ va̍ruṇa̱ pāśa̍ma̱smadavā̍dha̱maṁ vi ma̍dhya̱maṁ śra̍thāya |
athā̍ va̱yamā̍ditya vra̱te tavānā̍gaso̱ adi̍taye syāma || 1.024.15
yacci̱ddhi te̱ viśo̍ yathā̱ pra de̍va varuṇa vra̱tam |
mi̱nī̱masi̱ dyavi̍dyavi || 1.025.01
mā no̍ va̱dhāya̍ ha̱tnave̍ jihīḻā̱nasya̍ rīradhaḥ |
mā hṛ̍ṇā̱nasya̍ ma̱nyave̍ || 1.025.02
vi mṛ̍ḻī̱kāya̍ te̱ mano̍ ra̱thīraśva̱ṁ na saṁdi̍tam |
gī̱rbhirva̍ruṇa sīmahi || 1.025.03
parā̱ hi me̱ vima̍nyava̱ḥ pata̍nti̱ vasya̍iṣṭaye |
vayo̱ na va̍sa̱tīrupa̍ || 1.025.04
ka̱dā kṣa̍tra̱śriya̱ṁ nara̱mā varu̍ṇaṁ karāmahe |
mṛ̱ḻī̱kāyo̍ru̱cakṣa̍sam || 1.025.05
taditsa̍mā̱namā̍śāte̱ vena̍ntā̱ na pra yu̍cchataḥ |
dhṛ̱tavra̍tāya dā̱śuṣe̍ || 1.025.06
vedā̱ yo vī̱nāṁ pa̱dama̱ntari̍kṣeṇa̱ pata̍tām |
veda̍ nā̱vaḥ sa̍mu̱driya̍ḥ || 1.025.07
veda̍ mā̱so dhṛ̱tavra̍to̱ dvāda̍śa pra̱jāva̍taḥ |
vedā̱ ya u̍pa̱jāya̍te || 1.025.08
veda̱ vāta̍sya varta̱nimu̱rorṛ̱ṣvasya̍ bṛha̱taḥ |
vedā̱ ye a̱dhyāsa̍te || 1.025.09
ni ṣa̍sāda dhṛ̱tavra̍to̱ varu̍ṇaḥ pa̱styā̱3̱̍svā |
sāmrā̍jyāya su̱kratu̍ḥ || 1.025.10
ato̱ viśvā̱nyadbhu̍tā ciki̱tvā a̱bhi pa̍śyati |
kṛ̱tāni̱ yā ca̱ kartvā̍ || 1.025.11
sa no̍ vi̱śvāhā̍ su̱kratu̍rādi̱tyaḥ su̱pathā̍ karat |
pra ṇa̱ āyū̍ṁṣi tāriṣat || 1.025.12
bibhra̍ddrā̱piṁ hi̍ra̱ṇyaya̱ṁ varu̍ṇo vasta ni̱rṇija̍m |
pari̱ spaśo̱ ni ṣe̍dire || 1.025.13
na yaṁ dipsa̍nti di̱psavo̱ na druhvā̍ṇo̱ janā̍nām |
na de̱vama̱bhimā̍tayaḥ || 1.025.14
u̱ta yo mānu̍ṣe̱ṣvā yaśa̍śca̱kre asā̱myā |
a̱smāka̍mu̱dare̱ṣvā || 1.025.15
parā̍ me yanti dhī̱tayo̱ gāvo̱ na gavyū̍tī̱ranu̍ |
i̱cchantī̍ruru̱cakṣa̍sam || 1.025.16
saṁ nu vo̍cāvahai̱ puna̱ryato̍ me̱ madhvābhṛ̍tam |
hote̍va̱ kṣada̍se pri̱yam || 1.025.17
darśa̱ṁ nu vi̱śvada̍rśata̱ṁ darśa̱ṁ ratha̱madhi̱ kṣami̍ |
e̱tā ju̍ṣata me̱ gira̍ḥ || 1.025.18
i̱maṁ me̍ varuṇa śrudhī̱ hava̍ma̱dyā ca̍ mṛḻaya |
tvāma̍va̱syurā ca̍ke || 1.025.19
tvaṁ viśva̍sya medhira di̱vaśca̱ gmaśca̍ rājasi |
sa yāma̍ni̱ prati̍ śrudhi || 1.025.20
udu̍tta̱maṁ mu̍mugdhi no̱ vi pāśa̍ṁ madhya̱maṁ cṛ̍ta |
avā̍dha̱māni̍ jī̱vase̍ || 1.025.21
vasi̍ṣvā̱ hi mi̍yedhya̱ vastrā̍ṇyūrjāṁ pate |
semaṁ no̍ adhva̱raṁ ya̍ja || 1.026.01
ni no̱ hotā̱ vare̍ṇya̱ḥ sadā̍ yaviṣṭha̱ manma̍bhiḥ |
agne̍ di̱vitma̍tā̱ vaca̍ḥ || 1.026.02
ā hi ṣmā̍ sū̱nave̍ pi̱tāpiryaja̍tyā̱paye̍ |
sakhā̱ sakhye̱ vare̍ṇyaḥ || 1.026.03
ā no̍ ba̱rhī ri̱śāda̍so̱ varu̍ṇo mi̱tro a̍rya̱mā |
sīda̍ntu̱ manu̍ṣo yathā || 1.026.04
pūrvya̍ hotara̱sya no̱ manda̍sva sa̱khyasya̍ ca |
i̱mā u̱ ṣu śru̍dhī̱ gira̍ḥ || 1.026.05
yacci̱ddhi śaśva̍tā̱ tanā̍ de̱vaṁde̍va̱ṁ yajā̍mahe |
tve iddhū̍yate ha̱viḥ || 1.026.06
pri̱yo no̍ astu vi̱śpati̱rhotā̍ ma̱ndro vare̍ṇyaḥ |
pri̱yāḥ sva̱gnayo̍ va̱yam || 1.026.07
sva̱gnayo̱ hi vārya̍ṁ de̱vāso̍ dadhi̱re ca̍ naḥ |
sva̱gnayo̍ manāmahe || 1.026.08
athā̍ na u̱bhaye̍ṣā̱mamṛ̍ta̱ martyā̍nām |
mi̱thaḥ sa̍ntu̱ praśa̍stayaḥ || 1.026.09
viśve̍bhiragne a̱gnibhi̍ri̱maṁ ya̱jñami̱daṁ vaca̍ḥ |
cano̍ dhāḥ sahaso yaho || 1.026.10
aśva̱ṁ na tvā̱ vāra̍vantaṁ va̱ndadhyā̍ a̱gniṁ namo̍bhiḥ |
sa̱mrāja̍ntamadhva̱rāṇā̍m || 1.027.01
sa ghā̍ naḥ sū̱nuḥ śava̍sā pṛ̱thupra̍gāmā su̱śeva̍ḥ |
mī̱ḍhvā a̱smāka̍ṁ babhūyāt || 1.027.02
sa no̍ dū̱rāccā̱sācca̱ ni martyā̍daghā̱yoḥ |
pā̱hi sada̱midvi̱śvāyu̍ḥ || 1.027.03
i̱mamū̱ ṣu tvama̱smāka̍ṁ sa̱niṁ gā̍ya̱traṁ navyā̍ṁsam |
agne̍ de̱veṣu̱ pra vo̍caḥ || 1.027.04
ā no̍ bhaja para̱meṣvā vāje̍ṣu madhya̱meṣu̍ |
śikṣā̱ vasvo̱ anta̍masya || 1.027.05
vi̱bha̱ktāsi̍ citrabhāno̱ sindho̍rū̱rmā u̍pā̱ka ā |
sa̱dyo dā̱śuṣe̍ kṣarasi || 1.027.06
yama̍gne pṛ̱tsu martya̱mavā̱ vāje̍ṣu̱ yaṁ ju̱nāḥ |
sa yantā̱ śaśva̍tī̱riṣa̍ḥ || 1.027.07
naki̍rasya sahantya parye̱tā kaya̍sya cit |
vājo̍ asti śra̱vāyya̍ḥ || 1.027.08
sa vāja̍ṁ vi̱śvaca̍rṣaṇi̱rarva̍dbhirastu̱ taru̍tā |
vipre̍bhirastu̱ sani̍tā || 1.027.09
jarā̍bodha̱ tadvi̍viḍḍhi vi̱śevi̍śe ya̱jñiyā̍ya |
stoma̍ṁ ru̱drāya̱ dṛśī̍kam || 1.027.10
sa no̍ ma̱hā a̍nimā̱no dhū̱make̍tuḥ puruśca̱ndraḥ |
dhi̱ye vājā̍ya hinvatu || 1.027.11
sa re̱vā i̍va vi̱śpati̱rdaivya̍ḥ ke̱tuḥ śṛ̍ṇotu naḥ |
u̱kthaira̱gnirbṛ̱hadbhā̍nuḥ || 1.027.12
namo̍ ma̱hadbhyo̱ namo̍ arbha̱kebhyo̱ namo̱ yuva̍bhyo̱ nama̍ āśi̱nebhya̍ḥ |
yajā̍ma de̱vānyadi̍ śa̱knavā̍ma̱ mā jyāya̍sa̱ḥ śaṁsa̱mā vṛ̍kṣi devāḥ || 1.027.13
yatra̱ grāvā̍ pṛ̱thubu̍dhna ū̱rdhvo bhava̍ti̱ sota̍ve |
u̱lūkha̍lasutānā̱mavedvi̍ndra jalgulaḥ || 1.028.01
yatra̱ dvāvi̍va ja̱ghanā̍dhiṣava̱ṇyā̍ kṛ̱tā |
u̱lūkha̍lasutānā̱mavedvi̍ndra jalgulaḥ || 1.028.02
yatra̱ nārya̍pacya̱vamu̍pacya̱vaṁ ca̱ śikṣa̍te |
u̱lūkha̍lasutānā̱mavedvi̍ndra jalgulaḥ || 1.028.03
yatra̱ manthā̍ṁ viba̱dhnate̍ ra̱śmīnyami̍ta̱vā i̍va |
u̱lūkha̍lasutānā̱mavedvi̍ndra jalgulaḥ || 1.028.04
yacci̱ddhi tvaṁ gṛ̱hegṛ̍ha̱ ulū̍khalaka yu̱jyase̍ |
i̱ha dyu̱matta̍maṁ vada̱ jaya̍tāmiva dundu̱bhiḥ || 1.028.05
u̱ta sma̍ te vanaspate̱ vāto̱ vi vā̱tyagra̱mit |
atho̱ indrā̍ya̱ pāta̍ve su̱nu soma̍mulūkhala || 1.028.06
ā̱ya̱jī vā̍ja̱sāta̍mā̱ tā hyu1̱̍ccā vi̍jarbhṛ̱taḥ |
harī̍ i̱vāndhā̍ṁsi̱ bapsa̍tā || 1.028.07
tā no̍ a̱dya va̍naspatī ṛ̱ṣvāvṛ̱ṣvebhi̍ḥ so̱tṛbhi̍ḥ |
indrā̍ya̱ madhu̍matsutam || 1.028.08
ucchi̱ṣṭaṁ ca̱mvo̍rbhara̱ soma̍ṁ pa̱vitra̱ ā sṛ̍ja |
ni dhe̍hi̱ goradhi̍ tva̱ci || 1.028.09
yacci̱ddhi sa̍tya somapā anāśa̱stā i̍va̱ smasi̍ |
ā tū na̍ indra śaṁsaya̱ goṣvaśve̍ṣu śu̱bhriṣu̍ sa̱hasre̍ṣu tuvīmagha || 1.029.01
śipri̍nvājānāṁ pate̱ śacī̍va̱stava̍ da̱ṁsanā̍ |
ā tū na̍ indra śaṁsaya̱ goṣvaśve̍ṣu śu̱bhriṣu̍ sa̱hasre̍ṣu tuvīmagha || 1.029.02
ni ṣvā̍payā mithū̱dṛśā̍ sa̱stāmabu̍dhyamāne |
ā tū na̍ indra śaṁsaya̱ goṣvaśve̍ṣu śu̱bhriṣu̍ sa̱hasre̍ṣu tuvīmagha || 1.029.03
sa̱santu̱ tyā arā̍tayo̱ bodha̍ntu śūra rā̱taya̍ḥ |
ā tū na̍ indra śaṁsaya̱ goṣvaśve̍ṣu śu̱bhriṣu̍ sa̱hasre̍ṣu tuvīmagha || 1.029.04
sami̍ndra garda̱bhaṁ mṛ̍ṇa nu̱vanta̍ṁ pā̱payā̍mu̱yā |
ā tū na̍ indra śaṁsaya̱ goṣvaśve̍ṣu śu̱bhriṣu̍ sa̱hasre̍ṣu tuvīmagha || 1.029.05
patā̍ti kuṇḍṛ̱ṇācyā̍ dū̱raṁ vāto̱ vanā̱dadhi̍ |
ā tū na̍ indra śaṁsaya̱ goṣvaśve̍ṣu śu̱bhriṣu̍ sa̱hasre̍ṣu tuvīmagha || 1.029.06
sarva̍ṁ parikro̱śaṁ ja̍hi ja̱mbhayā̍ kṛkadā̱śva̍m |
ā tū na̍ indra śaṁsaya̱ goṣvaśve̍ṣu śu̱bhriṣu̍ sa̱hasre̍ṣu tuvīmagha || 1.029.07
ā va̱ indra̱ṁ krivi̍ṁ yathā vāja̱yanta̍ḥ śa̱takra̍tum |
maṁhi̍ṣṭhaṁ siñca̱ indu̍bhiḥ || 1.030.01
śa̱taṁ vā̱ yaḥ śucī̍nāṁ sa̱hasra̍ṁ vā̱ samā̍śirām |
edu̍ ni̱mnaṁ na rī̍yate || 1.030.02
saṁ yanmadā̍ya śu̱ṣmiṇa̍ e̱nā hya̍syo̱dare̍ |
sa̱mu̱dro na vyaco̍ da̱dhe || 1.030.03
a̱yamu̍ te̱ sama̍tasi ka̱pota̍ iva garbha̱dhim |
vaca̱stacci̍nna ohase || 1.030.04
sto̱traṁ rā̍dhānāṁ pate̱ girvā̍ho vīra̱ yasya̍ te |
vibhū̍tirastu sū̱nṛtā̍ || 1.030.05
ū̱rdhvasti̍ṣṭhā na ū̱taye̱'sminvāje̍ śatakrato |
sama̱nyeṣu̍ bravāvahai || 1.030.06
yoge̍yoge ta̱vasta̍ra̱ṁ vāje̍vāje havāmahe |
sakhā̍ya̱ indra̍mū̱taye̍ || 1.030.07
ā ghā̍ gama̱dyadi̱ śrava̍tsaha̱sriṇī̍bhirū̱tibhi̍ḥ |
vāje̍bhi̱rupa̍ no̱ hava̍m || 1.030.08
anu̍ pra̱tnasyauka̍so hu̱ve tu̍vipra̱tiṁ nara̍m |
yaṁ te̱ pūrva̍ṁ pi̱tā hu̱ve || 1.030.09
taṁ tvā̍ va̱yaṁ vi̍śvavā̱rā śā̍smahe puruhūta |
sakhe̍ vaso jari̱tṛbhya̍ḥ || 1.030.10
a̱smāka̍ṁ śi̱priṇī̍nā̱ṁ soma̍pāḥ soma̱pāvnā̍m |
sakhe̍ vajri̱nsakhī̍nām || 1.030.11
tathā̱ tada̍stu somapā̱ḥ sakhe̍ vajri̱ntathā̍ kṛṇu |
yathā̍ ta u̱śmasī̱ṣṭaye̍ || 1.030.12
re̱vatī̍rnaḥ sadha̱māda̱ indre̍ santu tu̱vivā̍jāḥ |
kṣu̱manto̱ yābhi̱rmade̍ma || 1.030.13
ā gha̱ tvāvā̱ntmanā̱ptaḥ sto̱tṛbhyo̍ dhṛṣṇaviyā̱naḥ |
ṛ̱ṇorakṣa̱ṁ na ca̱kryo̍ḥ || 1.030.14
ā yadduva̍ḥ śatakrata̱vā kāma̍ṁ jaritṝ̱ṇām |
ṛ̱ṇorakṣa̱ṁ na śacī̍bhiḥ || 1.030.15
śaśva̱dindra̱ḥ popru̍thadbhirjigāya̱ nāna̍dadbhi̱ḥ śāśva̍sadbhi̱rdhanā̍ni |
sa no̍ hiraṇyara̱thaṁ da̱ṁsanā̍vā̱nsa na̍ḥ sani̱tā sa̱naye̱ sa no̍'dāt || 1.030.16
āśvi̍nā̱vaśvā̍vatye̱ṣā yā̍ta̱ṁ śavī̍rayā |
goma̍ddasrā̱ hira̍ṇyavat || 1.030.17
sa̱mā̱nayo̍jano̱ hi vā̱ṁ ratho̍ dasrā̱vama̍rtyaḥ |
sa̱mu̱dre a̍śvi̱neya̍te || 1.030.18
nya1̱̍ghnyasya̍ mū̱rdhani̍ ca̱kraṁ ratha̍sya yemathuḥ |
pari̱ dyāma̱nyadī̍yate || 1.030.19
kasta̍ uṣaḥ kadhapriye bhu̱je marto̍ amartye |
kaṁ na̍kṣase vibhāvari || 1.030.20
va̱yaṁ hi te̱ ama̍nma̱hyāntā̱dā pa̍rā̱kāt |
aśve̱ na ci̍tre aruṣi || 1.030.21
tvaṁ tyebhi̱rā ga̍hi̱ vāje̍bhirduhitardivaḥ |
a̱sme ra̱yiṁ ni dhā̍raya || 1.030.22
tvama̍gne pratha̱mo aṅgi̍rā̱ ṛṣi̍rde̱vo de̱vānā̍mabhavaḥ śi̱vaḥ sakhā̍ |
tava̍ vra̱te ka̱vayo̍ vidma̱nāpa̱so'jā̍yanta ma̱ruto̱ bhrāja̍dṛṣṭayaḥ || 1.031.01
tvama̍gne pratha̱mo aṅgi̍rastamaḥ ka̱virde̱vānā̱ṁ pari̍ bhūṣasi vra̱tam |
vi̱bhurviśva̍smai̱ bhuva̍nāya̱ medhi̍ro dvimā̱tā śa̱yuḥ ka̍ti̱dhā ci̍dā̱yave̍ || 1.031.02
tvama̍gne pratha̱mo mā̍ta̱riśva̍na ā̱virbha̍va sukratū̱yā vi̱vasva̍te |
are̍jetā̱ṁ roda̍sī hotṛ̱vūrye'sa̍ghnorbhā̱ramaya̍jo ma̱ho va̍so || 1.031.03
tvama̍gne̱ mana̍ve̱ dyāma̍vāśayaḥ purū̱rava̍se su̱kṛte̍ su̱kṛtta̍raḥ |
śvā̱treṇa̱ yatpi̱trormucya̍se̱ paryā tvā̱ pūrva̍manaya̱nnāpa̍ra̱ṁ puna̍ḥ || 1.031.04
tvama̍gne vṛṣa̱bhaḥ pu̍ṣṭi̱vardha̍na̱ udya̍tasruce bhavasi śra̱vāyya̍ḥ |
ya āhu̍ti̱ṁ pari̱ vedā̱ vaṣa̍ṭkṛti̱mekā̍yu̱ragre̱ viśa̍ ā̱vivā̍sasi || 1.031.05
tvama̍gne vṛji̱nava̍rtani̱ṁ nara̱ṁ sakma̍npiparṣi vi̱dathe̍ vicarṣaṇe |
yaḥ śūra̍sātā̱ pari̍takmye̱ dhane̍ da̱bhrebhi̍ści̱tsamṛ̍tā̱ haṁsi̱ bhūya̍saḥ || 1.031.06
tvaṁ tama̍gne amṛta̱tva u̍tta̱me marta̍ṁ dadhāsi̱ śrava̍se di̱vedi̍ve |
yastā̍tṛṣā̱ṇa u̱bhayā̍ya̱ janma̍ne̱ maya̍ḥ kṛ̱ṇoṣi̱ praya̱ ā ca̍ sū̱raye̍ || 1.031.07
tvaṁ no̍ agne sa̱naye̱ dhanā̍nāṁ ya̱śasa̍ṁ kā̱ruṁ kṛ̍ṇuhi̱ stavā̍naḥ |
ṛ̱dhyāma̱ karmā̱pasā̱ nave̍na de̱vairdyā̍vāpṛthivī̱ prāva̍taṁ naḥ || 1.031.08
tvaṁ no̍ agne pi̱troru̱pastha̱ ā de̱vo de̱veṣva̍navadya̱ jāgṛ̍viḥ |
ta̱nū̱kṛdbo̍dhi̱ prama̍tiśca kā̱rave̱ tvaṁ ka̍lyāṇa̱ vasu̱ viśva̱mopi̍ṣe || 1.031.09
tvama̍gne̱ prama̍ti̱stvaṁ pi̱tāsi̍ na̱stvaṁ va̍ya̱skṛttava̍ jā̱mayo̍ va̱yam |
saṁ tvā̱ rāya̍ḥ śa̱tina̱ḥ saṁ sa̍ha̱sriṇa̍ḥ su̱vīra̍ṁ yanti vrata̱pāma̍dābhya || 1.031.10
tvāma̍gne pratha̱mamā̱yumā̱yave̍ de̱vā a̍kṛṇva̱nnahu̍ṣasya vi̱śpati̍m |
iḻā̍makṛṇva̱nmanu̍ṣasya̱ śāsa̍nīṁ pi̱turyatpu̱tro mama̍kasya̱ jāya̍te || 1.031.11
tvaṁ no̍ agne̱ tava̍ deva pā̱yubhi̍rma̱ghono̍ rakṣa ta̱nva̍śca vandya |
trā̱tā to̱kasya̱ tana̍ye̱ gavā̍ma̱syani̍meṣa̱ṁ rakṣa̍māṇa̱stava̍ vra̱te || 1.031.12
tvama̍gne̱ yajya̍ve pā̱yuranta̍ro'niṣa̱ṅgāya̍ catura̱kṣa i̍dhyase |
yo rā̱taha̍vyo'vṛ̱kāya̱ dhāya̍se kī̱reści̱nmantra̱ṁ mana̍sā va̱noṣi̱ tam || 1.031.13
tvama̍gna uru̱śaṁsā̍ya vā̱ghate̍ spā̱rhaṁ yadrekṇa̍ḥ para̱maṁ va̱noṣi̱ tat |
ā̱dhrasya̍ ci̱tprama̍tirucyase pi̱tā pra pāka̱ṁ śāssi̱ pra diśo̍ vi̱duṣṭa̍raḥ || 1.031.14
tvama̍gne̱ praya̍tadakṣiṇa̱ṁ nara̱ṁ varme̍va syū̱taṁ pari̍ pāsi vi̱śvata̍ḥ |
svā̱du̱kṣadmā̱ yo va̍sa̱tau syo̍na̱kṛjjī̍vayā̱jaṁ yaja̍te̱ sopa̱mā di̱vaḥ || 1.031.15
i̱māma̍gne śa̱raṇi̍ṁ mīmṛṣo na i̱mamadhvā̍na̱ṁ yamagā̍ma dū̱rāt |
ā̱piḥ pi̱tā prama̍tiḥ so̱myānā̱ṁ bhṛmi̍rasyṛṣi̱kṛnmartyā̍nām || 1.031.16
ma̱nu̱ṣvada̍gne aṅgira̱svada̍ṅgiro yayāti̱vatsada̍ne pūrva̱vacchu̍ce |
accha̍ yā̱hyā va̍hā̱ daivya̱ṁ jana̱mā sā̍daya ba̱rhiṣi̱ yakṣi̍ ca pri̱yam || 1.031.17
e̱tenā̍gne̱ brahma̍ṇā vāvṛdhasva̱ śaktī̍ vā̱ yatte̍ cakṛ̱mā vi̱dā vā̍ |
u̱ta pra ṇe̍ṣya̱bhi vasyo̍ a̱smānsaṁ na̍ḥ sṛja suma̱tyā vāja̍vatyā || 1.031.18
indra̍sya̱ nu vī̱ryā̍ṇi̱ pra vo̍ca̱ṁ yāni̍ ca̱kāra̍ pratha̱māni̍ va̱jrī |
aha̱nnahi̱manva̱pasta̍tarda̱ pra va̱kṣaṇā̍ abhina̱tparva̍tānām || 1.032.01
aha̱nnahi̱ṁ parva̍te śiśriyā̱ṇaṁ tvaṣṭā̍smai̱ vajra̍ṁ sva̱rya̍ṁ tatakṣa |
vā̱śrā i̍va dhe̱nava̱ḥ syanda̍mānā̱ añja̍ḥ samu̱dramava̍ jagmu̱rāpa̍ḥ || 1.032.02
vṛ̱ṣā̱yamā̍ṇo'vṛṇīta̱ soma̱ṁ trika̍drukeṣvapibatsu̱tasya̍ |
ā sāya̍kaṁ ma̱ghavā̍datta̱ vajra̱maha̍nnenaṁ prathama̱jāmahī̍nām || 1.032.03
yadi̱ndrāha̍nprathama̱jāmahī̍nā̱mānmā̱yinā̱mami̍nā̱ḥ prota mā̱yāḥ |
ātsūrya̍ṁ ja̱naya̱ndyāmu̱ṣāsa̍ṁ tā̱dītnā̱ śatru̱ṁ na kilā̍ vivitse || 1.032.04
aha̍nvṛ̱traṁ vṛ̍tra̱tara̱ṁ vya̍ṁsa̱mindro̱ vajre̍ṇa maha̱tā va̱dhena̍ |
skandhā̍ṁsīva̱ kuli̍śenā̱ vivṛ̱kṇāhi̍ḥ śayata upa̱pṛkpṛ̍thi̱vyāḥ || 1.032.05
a̱yo̱ddheva̍ du̱rmada̱ ā hi ju̱hve ma̍hāvī̱raṁ tu̍vibā̱dhamṛ̍jī̱ṣam |
nātā̍rīdasya̱ samṛ̍tiṁ va̱dhānā̱ṁ saṁ ru̱jānā̍ḥ pipiṣa̱ indra̍śatruḥ || 1.032.06
a̱pāda̍ha̱sto a̍pṛtanya̱dindra̱māsya̱ vajra̱madhi̱ sānau̍ jaghāna |
vṛṣṇo̱ vadhri̍ḥ prati̱māna̱ṁ bubhū̍ṣanpuru̱trā vṛ̱tro a̍śaya̱dvya̍staḥ || 1.032.07
na̱daṁ na bhi̱nnama̍mu̱yā śayā̍na̱ṁ mano̱ ruhā̍ṇā̱ ati̍ ya̱ntyāpa̍ḥ |
yāści̍dvṛ̱tro ma̍hi̱nā pa̱ryati̍ṣṭha̱ttāsā̱mahi̍ḥ patsuta̱ḥśīrba̍bhūva || 1.032.08
nī̱cāva̍yā abhavadvṛ̱trapu̱trendro̍ asyā̱ ava̱ vadha̍rjabhāra |
utta̍rā̱ sūradha̍raḥ pu̱tra ā̍sī̱ddānu̍ḥ śaye sa̱hava̍tsā̱ na dhe̱nuḥ || 1.032.09
ati̍ṣṭhantīnāmaniveśa̱nānā̱ṁ kāṣṭhā̍nā̱ṁ madhye̱ nihi̍ta̱ṁ śarī̍ram |
vṛ̱trasya̍ ni̱ṇyaṁ vi ca̍ra̱ntyāpo̍ dī̱rghaṁ tama̱ āśa̍ya̱dindra̍śatruḥ || 1.032.10
dā̱sapa̍tnī̱rahi̍gopā atiṣṭha̱nniru̍ddhā̱ āpa̍ḥ pa̱ṇine̍va̱ gāva̍ḥ |
a̱pāṁ bila̱mapi̍hita̱ṁ yadāsī̍dvṛ̱traṁ ja̍gha̱nvā apa̱ tadva̍vāra || 1.032.11
aśvyo̱ vāro̍ abhava̱stadi̍ndra sṛ̱ke yattvā̍ pra̱tyaha̍nde̱va eka̍ḥ |
aja̍yo̱ gā aja̍yaḥ śūra̱ soma̱mavā̍sṛja̱ḥ sarta̍ve sa̱pta sindhū̍n || 1.032.12
nāsmai̍ vi̱dyunna ta̍nya̱tuḥ si̍ṣedha̱ na yāṁ miha̱maki̍raddhrā̱duni̍ṁ ca |
indra̍śca̱ yadyu̍yu̱dhāte̱ ahi̍śco̱tāpa̱rībhyo̍ ma̱ghavā̱ vi ji̍gye || 1.032.13
ahe̍ryā̱tāra̱ṁ kama̍paśya indra hṛ̱di yatte̍ ja̱ghnuṣo̱ bhīraga̍cchat |
nava̍ ca̱ yanna̍va̱tiṁ ca̱ srava̍ntīḥ śye̱no na bhī̱to ata̍ro̱ rajā̍ṁsi || 1.032.14
indro̍ yā̱to'va̍sitasya̱ rājā̱ śama̍sya ca śṛ̱ṅgiṇo̱ vajra̍bāhuḥ |
sedu̱ rājā̍ kṣayati carṣaṇī̱nāma̱rānna ne̱miḥ pari̱ tā ba̍bhūva || 1.032.15
etāyā̱mopa̍ ga̱vyanta̱ indra̍ma̱smāka̱ṁ su prama̍tiṁ vāvṛdhāti |
a̱nā̱mṛ̱ṇaḥ ku̱vidāda̱sya rā̱yo gavā̱ṁ keta̱ṁ para̍mā̱varja̍te naḥ || 1.033.01
upeda̱haṁ dha̍na̱dāmapra̍tīta̱ṁ juṣṭā̱ṁ na śye̱no va̍sa̱tiṁ pa̍tāmi |
indra̍ṁ nama̱syannu̍pa̱mebhi̍ra̱rkairyaḥ sto̱tṛbhyo̱ havyo̱ asti̱ yāma̍n || 1.033.02
ni sarva̍sena iṣu̱dhīra̍sakta̱ sama̱ryo gā a̍jati̱ yasya̱ vaṣṭi̍ |
co̱ṣkū̱yamā̍ṇa indra̱ bhūri̍ vā̱maṁ mā pa̱ṇirbhū̍ra̱smadadhi̍ pravṛddha || 1.033.03
vadhī̱rhi dasyu̍ṁ dha̱nina̍ṁ gha̱nena̱ eka̱ścara̍nnupaśā̱kebhi̍rindra |
dhano̱radhi̍ viṣu̱ṇakte vyā̍ya̱nnaya̍jvānaḥ sana̱kāḥ preti̍mīyuḥ || 1.033.04
parā̍ cicchī̱rṣā va̍vṛju̱sta i̱ndrāya̍jvāno̱ yajva̍bhi̱ḥ spardha̍mānāḥ |
pra yaddi̱vo ha̍rivaḥ sthātarugra̱ nira̍vra̱tā a̍dhamo̱ roda̍syoḥ || 1.033.05
ayu̍yutsannanava̱dyasya̱ senā̱mayā̍tayanta kṣi̱tayo̱ nava̍gvāḥ |
vṛ̱ṣā̱yudho̱ na vadhra̍yo̱ nira̍ṣṭāḥ pra̱vadbhi̱rindrā̍cci̱taya̍nta āyan || 1.033.06
tvame̱tānru̍da̱to jakṣa̍ta̱ścāyo̍dhayo̱ raja̍sa indra pā̱re |
avā̍daho di̱va ā dasyu̍mu̱ccā pra su̍nva̱taḥ stu̍va̱taḥ śaṁsa̍māvaḥ || 1.033.07
ca̱krā̱ṇāsa̍ḥ parī̱ṇaha̍ṁ pṛthi̱vyā hira̍ṇyena ma̱ṇinā̱ śumbha̍mānāḥ |
na hi̍nvā̱nāsa̍stitiru̱sta indra̱ṁ pari̱ spaśo̍ adadhā̱tsūrye̍ṇa || 1.033.08
pari̱ yadi̍ndra̱ roda̍sī u̱bhe abu̍bhojīrmahi̱nā vi̱śvata̍ḥ sīm |
ama̍nyamānā a̱bhi manya̍mānai̱rnirbra̱hmabhi̍radhamo̱ dasyu̍mindra || 1.033.09
na ye di̱vaḥ pṛ̍thi̱vyā anta̍mā̱purna mā̱yābhi̍rdhana̱dāṁ pa̱ryabhū̍van |
yuja̱ṁ vajra̍ṁ vṛṣa̱bhaśca̍kra̱ indro̱ nirjyoti̍ṣā̱ tama̍so̱ gā a̍dukṣat || 1.033.10
anu̍ sva̱dhāma̍kṣara̱nnāpo̍ a̱syāva̍rdhata̱ madhya̱ ā nā̱vyā̍nām |
sa̱dhrī̱cīne̍na̱ mana̍sā̱ tamindra̱ oji̍ṣṭhena̱ hanma̍nāhanna̱bhi dyūn || 1.033.11
nyā̍vidhyadilī̱biśa̍sya dṛ̱ḻhā vi śṛ̱ṅgiṇa̍mabhina̱cchuṣṇa̱mindra̍ḥ |
yāva̱ttaro̍ maghava̱nyāva̱dojo̱ vajre̍ṇa̱ śatru̍mavadhīḥ pṛta̱nyum || 1.033.12
a̱bhi si̱dhmo a̍jigādasya̱ śatrū̱nvi ti̱gmena̍ vṛṣa̱bheṇā̱ puro̍'bhet |
saṁ vajre̍ṇāsṛjadvṛ̱tramindra̱ḥ pra svāṁ ma̱tima̍tira̱cchāśa̍dānaḥ || 1.033.13
āva̱ḥ kutsa̍mindra̱ yasmi̍ñcā̱kanprāvo̱ yudhya̍ntaṁ vṛṣa̱bhaṁ daśa̍dyum |
śa̱phacyu̍to re̱ṇurna̍kṣata̱ dyāmucchvai̍tre̱yo nṛ̱ṣāhyā̍ya tasthau || 1.033.14
āva̱ḥ śama̍ṁ vṛṣa̱bhaṁ tugryā̍su kṣetraje̱ṣe ma̍ghava̱ñchvitrya̱ṁ gām |
jyokci̱datra̍ tasthi̱vāṁso̍ akrañchatrūya̱tāmadha̍rā̱ veda̍nākaḥ || 1.033.15
triści̍nno a̱dyā bha̍vataṁ navedasā vi̱bhurvā̱ṁ yāma̍ u̱ta rā̱tira̍śvinā |
yu̱vorhi ya̱ntraṁ hi̱myeva̱ vāsa̍so'bhyāya̱ṁsenyā̍ bhavataṁ manī̱ṣibhi̍ḥ || 1.034.01
traya̍ḥ pa̱vayo̍ madhu̱vāha̍ne̱ rathe̱ soma̍sya ve̱nāmanu̱ viśva̱ idvi̍duḥ |
traya̍ḥ ska̱mbhāsa̍ḥ skabhi̱tāsa̍ ā̱rabhe̱ trirnakta̍ṁ yā̱thastrirva̍śvinā̱ divā̍ || 1.034.02
sa̱mā̱ne aha̱ntrira̍vadyagohanā̱ trira̱dya ya̱jñaṁ madhu̍nā mimikṣatam |
trirvāja̍vatī̱riṣo̍ aśvinā yu̱vaṁ do̱ṣā a̱smabhya̍mu̱ṣasa̍śca pinvatam || 1.034.03
trirva̱rtiryā̍ta̱ṁ triranu̍vrate ja̱ne triḥ su̍prā̱vye̍ tre̱dheva̍ śikṣatam |
trirnā̱ndya̍ṁ vahatamaśvinā yu̱vaṁ triḥ pṛkṣo̍ a̱sme a̱kṣare̍va pinvatam || 1.034.04
trirno̍ ra̱yiṁ va̍hatamaśvinā yu̱vaṁ trirde̱vatā̍tā̱ triru̱tāva̍ta̱ṁ dhiya̍ḥ |
triḥ sau̍bhaga̱tvaṁ triru̱ta śravā̍ṁsi nastri̱ṣṭhaṁ vā̱ṁ sūre̍ duhi̱tā ru̍ha̱dratha̍m || 1.034.05
trirno̍ aśvinā di̱vyāni̍ bheṣa̱jā triḥ pārthi̍vāni̱ triru̍ dattama̱dbhyaḥ |
o̱māna̍ṁ śa̱ṁyormama̍kāya sū̱nave̍ tri̱dhātu̱ śarma̍ vahataṁ śubhaspatī || 1.034.06
trirno̍ aśvinā yaja̱tā di̱vedi̍ve̱ pari̍ tri̱dhātu̍ pṛthi̱vīma̍śāyatam |
ti̱sro nā̍satyā rathyā parā̱vata̍ ā̱tmeva̱ vāta̱ḥ svasa̍rāṇi gacchatam || 1.034.07
trira̍śvinā̱ sindhu̍bhiḥ sa̱ptamā̍tṛbhi̱straya̍ āhā̱vāstre̱dhā ha̱viṣkṛ̱tam |
ti̱sraḥ pṛ̍thi̱vīru̱pari̍ pra̱vā di̱vo nāka̍ṁ rakṣethe̱ dyubhi̍ra̱ktubhi̍rhi̱tam || 1.034.08
kva1̱̍ trī ca̱krā tri̱vṛto̱ ratha̍sya̱ kva1̱̍ trayo̍ va̱ndhuro̱ ye sanī̍ḻāḥ |
ka̱dā yogo̍ vā̱jino̱ rāsa̍bhasya̱ yena̍ ya̱jñaṁ nā̍satyopayā̱thaḥ || 1.034.09
ā nā̍satyā̱ gaccha̍taṁ hū̱yate̍ ha̱virmadhva̍ḥ pibataṁ madhu̱pebhi̍rā̱sabhi̍ḥ |
yu̱vorhi pūrva̍ṁ savi̱toṣaso̱ ratha̍mṛ̱tāya̍ ci̱traṁ ghṛ̱tava̍nta̱miṣya̍ti || 1.034.10
ā nā̍satyā tri̱bhire̍kāda̱śairi̱ha de̱vebhi̍ryātaṁ madhu̱peya̍maśvinā |
prāyu̱stāri̍ṣṭa̱ṁ nī rapā̍ṁsi mṛkṣata̱ṁ sedha̍ta̱ṁ dveṣo̱ bhava̍taṁ sacā̱bhuvā̍ || 1.034.11
ā no̍ aśvinā tri̱vṛtā̱ rathe̍nā̱rvāñca̍ṁ ra̱yiṁ va̍hataṁ su̱vīra̍m |
śṛ̱ṇvantā̍ vā̱mava̍se johavīmi vṛ̱dhe ca̍ no bhavata̱ṁ vāja̍sātau || 1.034.12
hvayā̍mya̱gniṁ pra̍tha̱maṁ sva̱staye̱ hvayā̍mi mi̱trāvaru̍ṇāvi̱hāva̍se |
hvayā̍mi̱ rātrī̱ṁ jaga̍to ni̱veśa̍nī̱ṁ hvayā̍mi de̱vaṁ sa̍vi̱tāra̍mū̱taye̍ || 1.035.01
ā kṛ̱ṣṇena̱ raja̍sā̱ varta̍māno nive̱śaya̍nna̱mṛta̱ṁ martya̍ṁ ca |
hi̱ra̱ṇyaye̍na savi̱tā rathe̱nā de̱vo yā̍ti̱ bhuva̍nāni̱ paśya̍n || 1.035.02
yāti̍ de̱vaḥ pra̱vatā̱ yātyu̱dvatā̱ yāti̍ śu̱bhrābhyā̍ṁ yaja̱to hari̍bhyām |
ā de̱vo yā̍ti savi̱tā pa̍rā̱vato'pa̱ viśvā̍ duri̱tā bādha̍mānaḥ || 1.035.03
a̱bhīvṛ̍ta̱ṁ kṛśa̍nairvi̱śvarū̍pa̱ṁ hira̍ṇyaśamyaṁ yaja̱to bṛ̱hanta̍m |
āsthā̱dratha̍ṁ savi̱tā ci̱trabhā̍nuḥ kṛ̱ṣṇā rajā̍ṁsi̱ tavi̍ṣī̱ṁ dadhā̍naḥ || 1.035.04
vi janā̍ñchyā̱vāḥ śi̍ti̱pādo̍ akhya̱nratha̱ṁ hira̍ṇyaprauga̱ṁ vaha̍ntaḥ |
śaśva̱dviśa̍ḥ savi̱turdaivya̍syo̱pasthe̱ viśvā̱ bhuva̍nāni tasthuḥ || 1.035.05
ti̱sro dyāva̍ḥ savi̱turdvā u̱pasthā̱ ekā̍ ya̱masya̱ bhuva̍ne virā̱ṣāṭ |
ā̱ṇiṁ na rathya̍ma̱mṛtādhi̍ tasthuri̱ha bra̍vītu̱ ya u̱ taccike̍tat || 1.035.06
vi su̍pa̱rṇo a̱ntari̍kṣāṇyakhyadgabhī̱rave̍pā̱ asu̍raḥ sunī̱thaḥ |
kve̱3̱̍dānī̱ṁ sūrya̱ḥ kaści̍keta kata̱māṁ dyāṁ ra̱śmira̱syā ta̍tāna || 1.035.07
a̱ṣṭau vya̍khyatka̱kubha̍ḥ pṛthi̱vyāstrī dhanva̱ yoja̍nā sa̱pta sindhū̍n |
hi̱ra̱ṇyā̱kṣaḥ sa̍vi̱tā de̱va āgā̱ddadha̱dratnā̍ dā̱śuṣe̱ vāryā̍ṇi || 1.035.08
hira̍ṇyapāṇiḥ savi̱tā vica̍rṣaṇiru̱bhe dyāvā̍pṛthi̱vī a̱ntarī̍yate |
apāmī̍vā̱ṁ bādha̍te̱ veti̱ sūrya̍ma̱bhi kṛ̱ṣṇena̱ raja̍sā̱ dyāmṛ̍ṇoti || 1.035.09
hira̍ṇyahasto̱ asu̍raḥ sunī̱thaḥ su̍mṛḻī̱kaḥ svavā̍ yātva̱rvāṅ |
a̱pa̱sedha̍nra̱kṣaso̍ yātu̱dhānā̱nasthā̍dde̱vaḥ pra̍tido̱ṣaṁ gṛ̍ṇā̱naḥ || 1.035.10
ye te̱ panthā̍ḥ savitaḥ pū̱rvyāso̍'re̱ṇava̱ḥ sukṛ̍tā a̱ntari̍kṣe |
tebhi̍rno a̱dya pa̱thibhi̍ḥ su̱gebhī̱ rakṣā̍ ca no̱ adhi̍ ca brūhi deva || 1.035.11
pra vo̍ ya̱hvaṁ pu̍rū̱ṇāṁ vi̱śāṁ de̍vaya̱tīnā̍m |
a̱gniṁ sū̱ktebhi̱rvaco̍bhirīmahe̱ yaṁ sī̱mida̱nya īḻa̍te || 1.036.01
janā̍so a̱gniṁ da̍dhire saho̱vṛdha̍ṁ ha̱viṣma̍nto vidhema te |
sa tvaṁ no̍ a̱dya su̱manā̍ i̱hāvi̱tā bhavā̱ vāje̍ṣu santya || 1.036.02
pra tvā̍ dū̱taṁ vṛ̍ṇīmahe̱ hotā̍raṁ vi̱śvave̍dasam |
ma̱haste̍ sa̱to vi ca̍rantya̱rcayo̍ di̱vi spṛ̍śanti bhā̱nava̍ḥ || 1.036.03
de̱vāsa̍stvā̱ varu̍ṇo mi̱tro a̍rya̱mā saṁ dū̱taṁ pra̱tnami̍ndhate |
viśva̱ṁ so a̍gne jayati̱ tvayā̱ dhana̱ṁ yaste̍ da̱dāśa̱ martya̍ḥ || 1.036.04
ma̱ndro hotā̍ gṛ̱hapa̍ti̱ragne̍ dū̱to vi̱śāma̍si |
tve viśvā̱ saṁga̍tāni vra̱tā dhru̱vā yāni̍ de̱vā akṛ̍ṇvata || 1.036.05
tve ida̍gne su̱bhage̍ yaviṣṭhya̱ viśva̱mā hū̍yate ha̱viḥ |
sa tvaṁ no̍ a̱dya su̱manā̍ u̱tāpa̱raṁ yakṣi̍ de̱vānsu̱vīryā̍ || 1.036.06
taṁ ghe̍mi̱tthā na̍ma̱svina̱ upa̍ sva̱rāja̍māsate |
hotrā̍bhira̱gniṁ manu̍ṣa̱ḥ sami̍ndhate titi̱rvāṁso̱ ati̱ sridha̍ḥ || 1.036.07
ghnanto̍ vṛ̱trama̍tara̱nroda̍sī a̱pa u̱ru kṣayā̍ya cakrire |
bhuva̱tkaṇve̱ vṛṣā̍ dyu̱mnyāhu̍ta̱ḥ kranda̱daśvo̱ gavi̍ṣṭiṣu || 1.036.08
saṁ sī̍dasva ma̱hā a̍si̱ śoca̍sva deva̱vīta̍maḥ |
vi dhū̱mama̍gne aru̱ṣaṁ mi̍yedhya sṛ̱ja pra̍śasta darśa̱tam || 1.036.09
yaṁ tvā̍ de̱vāso̱ mana̍ve da̱dhuri̱ha yaji̍ṣṭhaṁ havyavāhana |
yaṁ kaṇvo̱ medhyā̍tithirdhana̱spṛta̱ṁ yaṁ vṛṣā̱ yamu̍pastu̱taḥ || 1.036.10
yama̱gniṁ medhyā̍tithi̱ḥ kaṇva̍ ī̱dha ṛ̱tādadhi̍ |
tasya̱ preṣo̍ dīdiyu̱stami̱mā ṛca̱stama̱gniṁ va̍rdhayāmasi || 1.036.11
rā̱yaspū̍rdhi svadhā̱vo'sti̱ hi te'gne̍ de̱veṣvāpya̍m |
tvaṁ vāja̍sya̱ śrutya̍sya rājasi̱ sa no̍ mṛḻa ma̱hā a̍si || 1.036.12
ū̱rdhva ū̱ ṣu ṇa̍ ū̱taye̱ tiṣṭhā̍ de̱vo na sa̍vi̱tā |
ū̱rdhvo vāja̍sya̱ sani̍tā̱ yada̱ñjibhi̍rvā̱ghadbhi̍rvi̱hvayā̍mahe || 1.036.13
ū̱rdhvo na̍ḥ pā̱hyaṁha̍so̱ ni ke̱tunā̱ viśva̱ṁ sama̱triṇa̍ṁ daha |
kṛ̱dhī na̍ ū̱rdhvāñca̱rathā̍ya jī̱vase̍ vi̱dā de̱veṣu̍ no̱ duva̍ḥ || 1.036.14
pā̱hi no̍ agne ra̱kṣasa̍ḥ pā̱hi dhū̱rterarā̍vṇaḥ |
pā̱hi rīṣa̍ta u̱ta vā̱ jighā̍ṁsato̱ bṛha̍dbhāno̱ yavi̍ṣṭhya || 1.036.15
gha̱neva̱ viṣva̱gvi ja̱hyarā̍vṇa̱stapu̍rjambha̱ yo a̍sma̱dhruk |
yo martya̱ḥ śiśī̍te̱ atya̱ktubhi̱rmā na̱ḥ sa ri̱purī̍śata || 1.036.16
a̱gnirva̍vne su̱vīrya̍ma̱gniḥ kaṇvā̍ya̱ saubha̍gam |
a̱gniḥ prāva̍nmi̱trota medhyā̍tithima̱gniḥ sā̱tā u̍pastu̱tam || 1.036.17
a̱gninā̍ tu̱rvaśa̱ṁ yadu̍ṁ parā̱vata̍ u̱grāde̍vaṁ havāmahe |
a̱gnirna̍ya̱nnava̍vāstvaṁ bṛ̱hadra̍thaṁ tu̱rvīti̱ṁ dasya̍ve̱ saha̍ḥ || 1.036.18
ni tvāma̍gne̱ manu̍rdadhe̱ jyoti̱rjanā̍ya̱ śaśva̍te |
dī̱detha̱ kaṇva̍ ṛ̱tajā̍ta ukṣi̱to yaṁ na̍ma̱syanti̍ kṛ̱ṣṭaya̍ḥ || 1.036.19
tve̱ṣāso̍ a̱gnerama̍vanto a̱rcayo̍ bhī̱māso̱ na pratī̍taye |
ra̱kṣa̱svina̱ḥ sada̱midyā̍tu̱māva̍to̱ viśva̱ṁ sama̱triṇa̍ṁ daha || 1.036.20
krī̱ḻaṁ va̱ḥ śardho̱ māru̍tamana̱rvāṇa̍ṁ rathe̱śubha̍m |
kaṇvā̍ a̱bhi pra gā̍yata || 1.037.01
ye pṛṣa̍tībhirṛ̱ṣṭibhi̍ḥ sā̱kaṁ vāśī̍bhira̱ñjibhi̍ḥ |
ajā̍yanta̱ svabhā̍navaḥ || 1.037.02
i̱heva̍ śṛṇva eṣā̱ṁ kaśā̱ haste̍ṣu̱ yadvadā̍n |
ni yāma̍ñci̱tramṛ̍ñjate || 1.037.03
pra va̱ḥ śardhā̍ya̱ ghṛṣva̍ye tve̱ṣadyu̍mnāya śu̱ṣmiṇe̍ |
de̱vatta̱ṁ brahma̍ gāyata || 1.037.04
pra śa̍ṁsā̱ goṣvaghnya̍ṁ krī̱ḻaṁ yacchardho̱ māru̍tam |
jambhe̱ rasa̍sya vāvṛdhe || 1.037.05
ko vo̱ varṣi̍ṣṭha̱ ā na̍ro di̱vaśca̱ gmaśca̍ dhūtayaḥ |
yatsī̱manta̱ṁ na dhū̍nu̱tha || 1.037.06
ni vo̱ yāmā̍ya̱ mānu̍ṣo da̱dhra u̱grāya̍ ma̱nyave̍ |
jihī̍ta̱ parva̍to gi̱riḥ || 1.037.07
yeṣā̱majme̍ṣu pṛthi̱vī ju̍ju̱rvā i̍va vi̱śpati̍ḥ |
bhi̱yā yāme̍ṣu̱ reja̍te || 1.037.08
sthi̱raṁ hi jāna̍meṣā̱ṁ vayo̍ mā̱turnire̍tave |
yatsī̱manu̍ dvi̱tā śava̍ḥ || 1.037.09
udu̱ tye sū̱navo̱ gira̱ḥ kāṣṭhā̱ ajme̍ṣvatnata |
vā̱śrā a̍bhi̱jñu yāta̍ve || 1.037.10
tyaṁ ci̍dghā dī̱rghaṁ pṛ̱thuṁ mi̱ho napā̍ta̱mamṛ̍dhram |
pra cyā̍vayanti̱ yāma̍bhiḥ || 1.037.11
maru̍to̱ yaddha̍ vo̱ bala̱ṁ janā̍ acucyavītana |
gi̱rīra̍cucyavītana || 1.037.12
yaddha̱ yānti̍ ma̱ruta̱ḥ saṁ ha̍ bruva̱te'dhva̱nnā |
śṛ̱ṇoti̱ kaści̍deṣām || 1.037.13
pra yā̍ta̱ śībha̍mā̱śubhi̱ḥ santi̱ kaṇve̍ṣu vo̱ duva̍ḥ |
tatro̱ ṣu mā̍dayādhvai || 1.037.14
asti̱ hi ṣmā̱ madā̍ya va̱ḥ smasi̍ ṣmā va̱yame̍ṣām |
viśva̍ṁ ci̱dāyu̍rjī̱vase̍ || 1.037.15
kaddha̍ nū̱naṁ ka̍dhapriyaḥ pi̱tā pu̱traṁ na hasta̍yoḥ |
da̱dhi̱dhve vṛ̍ktabarhiṣaḥ || 1.038.01
kva̍ nū̱naṁ kadvo̱ artha̱ṁ gantā̍ di̱vo na pṛ̍thi̱vyāḥ |
kva̍ vo̱ gāvo̱ na ra̍ṇyanti || 1.038.02
kva̍ vaḥ su̱mnā navyā̍ṁsi̱ maru̍ta̱ḥ kva̍ suvi̱tā |
kvo̱3̱̍ viśvā̍ni̱ saubha̍gā || 1.038.03
yadyū̱yaṁ pṛ̍śnimātaro̱ martā̍sa̱ḥ syāta̍na |
sto̱tā vo̍ a̱mṛta̍ḥ syāt || 1.038.04
mā vo̍ mṛ̱go na yava̍se jari̱tā bhū̱dajo̍ṣyaḥ |
pa̱thā ya̱masya̍ gā̱dupa̍ || 1.038.05
mo ṣu ṇa̱ḥ parā̍parā̱ nirṛ̍tirdu̱rhaṇā̍ vadhīt |
pa̱dī̱ṣṭa tṛṣṇa̍yā sa̱ha || 1.038.06
sa̱tyaṁ tve̱ṣā ama̍vanto̱ dhanva̍ñci̱dā ru̱driyā̍saḥ |
miha̍ṁ kṛṇvantyavā̱tām || 1.038.07
vā̱śreva̍ vi̱dyunmi̍māti va̱tsaṁ na mā̱tā si̍ṣakti |
yade̍ṣāṁ vṛ̱ṣṭirasa̍rji || 1.038.08
divā̍ ci̱ttama̍ḥ kṛṇvanti pa̱rjanye̍nodavā̱hena̍ |
yatpṛ̍thi̱vīṁ vyu̱ndanti̍ || 1.038.09
adha̍ sva̱nānma̱rutā̱ṁ viśva̱mā sadma̱ pārthi̍vam |
are̍janta̱ pra mānu̍ṣāḥ || 1.038.10
maru̍to vīḻupā̱ṇibhi̍ści̱trā rodha̍svatī̱ranu̍ |
yā̱temakhi̍drayāmabhiḥ || 1.038.11
sthi̱rā va̍ḥ santu ne̱mayo̱ rathā̱ aśvā̍sa eṣām |
susa̍ṁskṛtā a̱bhīśa̍vaḥ || 1.038.12
acchā̍ vadā̱ tanā̍ gi̱rā ja̱rāyai̱ brahma̍ṇa̱spati̍m |
a̱gniṁ mi̱traṁ na da̍rśa̱tam || 1.038.13
mi̱mī̱hi śloka̍mā̱sye̍ pa̱rjanya̍ iva tatanaḥ |
gāya̍ gāya̱tramu̱kthya̍m || 1.038.14
vanda̍sva̱ māru̍taṁ ga̱ṇaṁ tve̱ṣaṁ pa̍na̱syuma̱rkiṇa̍m |
a̱sme vṛ̱ddhā a̍sanni̱ha || 1.038.15
pra yadi̱tthā pa̍rā̱vata̍ḥ śo̱cirna māna̱masya̍tha |
kasya̱ kratvā̍ maruta̱ḥ kasya̱ varpa̍sā̱ kaṁ yā̍tha̱ kaṁ ha̍ dhūtayaḥ || 1.039.01
sthi̱rā va̍ḥ sa̱ntvāyu̍dhā parā̱ṇude̍ vī̱ḻū u̱ta pra̍ti̱ṣkabhe̍ |
yu̱ṣmāka̍mastu̱ tavi̍ṣī̱ panī̍yasī̱ mā martya̍sya mā̱yina̍ḥ || 1.039.02
parā̍ ha̱ yatsthi̱raṁ ha̱tha naro̍ va̱rtaya̍thā gu̱ru |
vi yā̍thana va̱nina̍ḥ pṛthi̱vyā vyāśā̱ḥ parva̍tānām || 1.039.03
na̱hi va̱ḥ śatru̍rvivi̱de adhi̱ dyavi̱ na bhūmyā̍ṁ riśādasaḥ |
yu̱ṣmāka̍mastu̱ tavi̍ṣī̱ tanā̍ yu̱jā rudrā̍so̱ nū ci̍dā̱dhṛṣe̍ || 1.039.04
pra ve̍payanti̱ parva̍tā̱nvi vi̍ñcanti̱ vana̱spatī̍n |
pro ā̍rata maruto du̱rmadā̍ iva̱ devā̍sa̱ḥ sarva̍yā vi̱śā || 1.039.05
upo̱ rathe̍ṣu̱ pṛṣa̍tīrayugdhva̱ṁ praṣṭi̍rvahati̱ rohi̍taḥ |
ā vo̱ yāmā̍ya pṛthi̱vī ci̍daśro̱dabī̍bhayanta̱ mānu̍ṣāḥ || 1.039.06
ā vo̍ ma̱kṣū tanā̍ya̱ kaṁ rudrā̱ avo̍ vṛṇīmahe |
gantā̍ nū̱naṁ no'va̍sā̱ yathā̍ pu̱retthā kaṇvā̍ya bi̱bhyuṣe̍ || 1.039.07
yu̱ṣmeṣi̍to maruto̱ martye̍ṣita̱ ā yo no̱ abhva̱ īṣa̍te |
vi taṁ yu̍yota̱ śava̍sā̱ vyoja̍sā̱ vi yu̱ṣmākā̍bhirū̱tibhi̍ḥ || 1.039.08
asā̍mi̱ hi pra̍yajyava̱ḥ kaṇva̍ṁ da̱da pra̍cetasaḥ |
asā̍mibhirmaruta̱ ā na̍ ū̱tibhi̱rgantā̍ vṛ̱ṣṭiṁ na vi̱dyuta̍ḥ || 1.039.09
asā̱myojo̍ bibhṛthā sudāna̱vo'sā̍mi dhūtaya̱ḥ śava̍ḥ |
ṛ̱ṣi̱dviṣe̍ marutaḥ parima̱nyava̱ iṣu̱ṁ na sṛ̍jata̱ dviṣa̍m || 1.039.10
utti̍ṣṭha brahmaṇaspate deva̱yanta̍stvemahe |
upa̱ pra ya̍ntu ma̱ruta̍ḥ su̱dāna̍va̱ indra̍ prā̱śūrbha̍vā̱ sacā̍ || 1.040.01
tvāmiddhi sa̍hasasputra̱ martya̍ upabrū̱te dhane̍ hi̱te |
su̱vīrya̍ṁ maruta̱ ā svaśvya̱ṁ dadhī̍ta̱ yo va̍ āca̱ke || 1.040.02
praitu̱ brahma̍ṇa̱spati̱ḥ pra de̱vye̍tu sū̱nṛtā̍ |
acchā̍ vī̱raṁ narya̍ṁ pa̱ṅktirā̍dhasaṁ de̱vā ya̱jñaṁ na̍yantu naḥ || 1.040.03
yo vā̱ghate̱ dadā̍ti sū̱nara̱ṁ vasu̱ sa dha̍tte̱ akṣi̍ti̱ śrava̍ḥ |
tasmā̱ iḻā̍ṁ su̱vīrā̱mā ya̍jāmahe su̱pratū̍rtimane̱hasa̍m || 1.040.04
pra nū̱naṁ brahma̍ṇa̱spati̱rmantra̍ṁ vadatyu̱kthya̍m |
yasmi̱nnindro̱ varu̍ṇo mi̱tro a̍rya̱mā de̱vā okā̍ṁsi cakri̱re || 1.040.05
tamidvo̍cemā vi̱dathe̍ṣu śa̱mbhuva̱ṁ mantra̍ṁ devā ane̱hasa̍m |
i̱māṁ ca̱ vāca̍ṁ prati̱harya̍thā naro̱ viśvedvā̱mā vo̍ aśnavat || 1.040.06
ko de̍va̱yanta̍maśnava̱jjana̱ṁ ko vṛ̱ktaba̍rhiṣam |
prapra̍ dā̱śvānpa̱styā̍bhirasthitānta̱rvāva̱tkṣaya̍ṁ dadhe || 1.040.07
upa̍ kṣa̱traṁ pṛ̍ñcī̱ta hanti̱ rāja̍bhirbha̱ye ci̍tsukṣi̱tiṁ da̍dhe |
nāsya̍ va̱rtā na ta̍ru̱tā ma̍hādha̱ne nārbhe̍ asti va̱jriṇa̍ḥ || 1.040.08
yaṁ rakṣa̍nti̱ prace̍taso̱ varu̍ṇo mi̱tro a̍rya̱mā |
nū ci̱tsa da̍bhyate̱ jana̍ḥ || 1.041.01
yaṁ bā̱hute̍va̱ pipra̍ti̱ pānti̱ martya̍ṁ ri̱ṣaḥ |
ari̍ṣṭa̱ḥ sarva̍ edhate || 1.041.02
vi du̱rgā vi dviṣa̍ḥ pu̱ro ghnanti̱ rājā̍na eṣām |
naya̍nti duri̱tā ti̱raḥ || 1.041.03
su̱gaḥ panthā̍ anṛkṣa̱ra ādi̍tyāsa ṛ̱taṁ ya̱te |
nātrā̍vakhā̱do a̍sti vaḥ || 1.041.04
yaṁ ya̱jñaṁ naya̍thā nara̱ ādi̍tyā ṛ̱junā̍ pa̱thā |
pra va̱ḥ sa dhī̱taye̍ naśat || 1.041.05
sa ratna̱ṁ martyo̱ vasu̱ viśva̍ṁ to̱kamu̱ta tmanā̍ |
acchā̍ gaccha̱tyastṛ̍taḥ || 1.041.06
ka̱thā rā̍dhāma sakhāya̱ḥ stoma̍ṁ mi̱trasyā̍rya̱mṇaḥ |
mahi̱ psaro̱ varu̍ṇasya || 1.041.07
mā vo̱ ghnanta̱ṁ mā śapa̍nta̱ṁ prati̍ voce deva̱yanta̍m |
su̱mnairidva̱ ā vi̍vāse || 1.041.08
ca̱tura̍ści̱ddada̍mānādbibhī̱yādā nidhā̍toḥ |
na du̍ru̱ktāya̍ spṛhayet || 1.041.09
saṁ pū̍ṣa̱nnadhva̍nastira̱ vyaṁho̍ vimuco napāt |
sakṣvā̍ deva̱ pra ṇa̍spu̱raḥ || 1.042.01
yo na̍ḥ pūṣanna̱gho vṛko̍ du̱ḥśeva̍ ā̱dide̍śati |
apa̍ sma̱ taṁ pa̱tho ja̍hi || 1.042.02
apa̱ tyaṁ pa̍ripa̱nthina̍ṁ muṣī̱vāṇa̍ṁ hura̱ścita̍m |
dū̱ramadhi̍ sru̱tera̍ja || 1.042.03
tvaṁ tasya̍ dvayā̱vino̱'ghaśa̍ṁsasya̱ kasya̍ cit |
pa̱dābhi ti̍ṣṭha̱ tapu̍ṣim || 1.042.04
ā tatte̍ dasra mantuma̱ḥ pūṣa̱nnavo̍ vṛṇīmahe |
yena̍ pi̱tṝnaco̍dayaḥ || 1.042.05
adhā̍ no viśvasaubhaga̱ hira̍ṇyavāśīmattama |
dhanā̍ni su̱ṣaṇā̍ kṛdhi || 1.042.06
ati̍ naḥ sa̱ścato̍ naya su̱gā na̍ḥ su̱pathā̍ kṛṇu |
pūṣa̍nni̱ha kratu̍ṁ vidaḥ || 1.042.07
a̱bhi sū̱yava̍saṁ naya̱ na na̍vajvā̱ro adhva̍ne |
pūṣa̍nni̱ha kratu̍ṁ vidaḥ || 1.042.08
śa̱gdhi pū̱rdhi pra ya̍ṁsi ca śiśī̱hi prāsyu̱dara̍m |
pūṣa̍nni̱ha kratu̍ṁ vidaḥ || 1.042.09
na pū̱ṣaṇa̍ṁ methāmasi sū̱ktaira̱bhi gṛ̍ṇīmasi |
vasū̍ni da̱smamī̍mahe || 1.042.10
kadru̱drāya̱ prace̍tase mī̱ḻhuṣṭa̍māya̱ tavya̍se |
vo̱cema̱ śaṁta̍maṁ hṛ̱de || 1.043.01
yathā̍ no̱ adi̍ti̱ḥ kara̱tpaśve̱ nṛbhyo̱ yathā̱ gave̍ |
yathā̍ to̱kāya̍ ru̱driya̍m || 1.043.02
yathā̍ no mi̱tro varu̍ṇo̱ yathā̍ ru̱draścike̍tati |
yathā̱ viśve̍ sa̱joṣa̍saḥ || 1.043.03
gā̱thapa̍tiṁ me̱dhapa̍tiṁ ru̱draṁ jalā̍ṣabheṣajam |
taccha̱ṁyoḥ su̱mnamī̍mahe || 1.043.04
yaḥ śu̱kra i̍va̱ sūryo̱ hira̍ṇyamiva̱ roca̍te |
śreṣṭho̍ de̱vānā̱ṁ vasu̍ḥ || 1.043.05
śaṁ na̍ḥ kara̱tyarva̍te su̱gaṁ me̱ṣāya̍ me̱ṣye̍ |
nṛbhyo̱ nāri̍bhyo̱ gave̍ || 1.043.06
a̱sme so̍ma̱ śriya̱madhi̱ ni dhe̍hi śa̱tasya̍ nṛ̱ṇām |
mahi̱ śrava̍stuvinṛ̱mṇam || 1.043.07
mā na̍ḥ somapari̱bādho̱ mārā̍tayo juhuranta |
ā na̍ indo̱ vāje̍ bhaja || 1.043.08
yāste̍ pra̱jā a̱mṛta̍sya̱ para̍smi̱ndhāma̍nnṛ̱tasya̍ |
mū̱rdhā nābhā̍ soma vena ā̱bhūṣa̍ntīḥ soma vedaḥ || 1.043.09
agne̱ viva̍svadu̱ṣasa̍ści̱traṁ rādho̍ amartya |
ā dā̱śuṣe̍ jātavedo vahā̱ tvama̱dyā de̱vā u̍ṣa̱rbudha̍ḥ || 1.044.01
juṣṭo̱ hi dū̱to asi̍ havya̱vāha̱no'gne̍ ra̱thīra̍dhva̱rāṇā̍m |
sa̱jūra̱śvibhyā̍mu̱ṣasā̍ su̱vīrya̍ma̱sme dhe̍hi̱ śravo̍ bṛ̱hat || 1.044.02
a̱dyā dū̱taṁ vṛ̍ṇīmahe̱ vasu̍ma̱gniṁ pu̍rupri̱yam |
dhū̱make̍tu̱ṁ bhāṛ̍jīka̱ṁ vyu̍ṣṭiṣu ya̱jñānā̍madhvara̱śriya̍m || 1.044.03
śreṣṭha̱ṁ yavi̍ṣṭha̱mati̍thi̱ṁ svā̍huta̱ṁ juṣṭa̱ṁ janā̍ya dā̱śuṣe̍ |
de̱vā acchā̱ yāta̍ve jā̱tave̍dasama̱gnimī̍ḻe̱ vyu̍ṣṭiṣu || 1.044.04
sta̱vi̱ṣyāmi̱ tvāma̱haṁ viśva̍syāmṛta bhojana |
agne̍ trā̱tāra̍ma̱mṛta̍ṁ miyedhya̱ yaji̍ṣṭhaṁ havyavāhana || 1.044.05
su̱śaṁso̍ bodhi gṛṇa̱te ya̍viṣṭhya̱ madhu̍jihva̱ḥ svā̍hutaḥ |
praska̍ṇvasya prati̱rannāyu̍rjī̱vase̍ nama̱syā daivya̱ṁ jana̍m || 1.044.06
hotā̍raṁ vi̱śvave̍dasa̱ṁ saṁ hi tvā̱ viśa̍ i̱ndhate̍ |
sa ā va̍ha puruhūta̱ prace̍ta̱so'gne̍ de̱vā i̱ha dra̱vat || 1.044.07
sa̱vi̱tāra̍mu̱ṣasa̍ma̱śvinā̱ bhaga̍ma̱gniṁ vyu̍ṣṭiṣu̱ kṣapa̍ḥ |
kaṇvā̍sastvā su̱taso̍māsa indhate havya̱vāha̍ṁ svadhvara || 1.044.08
pati̱rhya̍dhva̱rāṇā̱magne̍ dū̱to vi̱śāmasi̍ |
u̱ṣa̱rbudha̱ ā va̍ha̱ soma̍pītaye de̱vā a̱dya sva̱rdṛśa̍ḥ || 1.044.09
agne̱ pūrvā̱ anū̱ṣaso̍ vibhāvaso dī̱detha̍ vi̱śvada̍rśataḥ |
asi̱ grāme̍ṣvavi̱tā pu̱rohi̱to'si̍ ya̱jñeṣu̱ mānu̍ṣaḥ || 1.044.10
ni tvā̍ ya̱jñasya̱ sādha̍na̱magne̱ hotā̍ramṛ̱tvija̍m |
ma̱nu̱ṣvadde̍va dhīmahi̱ prace̍tasaṁ jī̱raṁ dū̱tamama̍rtyam || 1.044.11
yadde̱vānā̍ṁ mitramahaḥ pu̱rohi̱to'nta̍ro̱ yāsi̍ dū̱tya̍m |
sindho̍riva̱ prasva̍nitāsa ū̱rmayo̱'gnerbhrā̍jante a̱rcaya̍ḥ || 1.044.12
śru̱dhi śru̍tkarṇa̱ vahni̍bhirde̱vaira̍gne sa̱yāva̍bhiḥ |
ā sī̍dantu ba̱rhiṣi̍ mi̱tro a̍rya̱mā prā̍ta̱ryāvā̍ṇo adhva̱ram || 1.044.13
śṛ̱ṇvantu̱ stoma̍ṁ ma̱ruta̍ḥ su̱dāna̍vo'gniji̱hvā ṛ̍tā̱vṛdha̍ḥ |
piba̍tu̱ soma̱ṁ varu̍ṇo dhṛ̱tavra̍to̱'śvibhyā̍mu̱ṣasā̍ sa̱jūḥ || 1.044.14
tvama̍gne̱ vasū̍ri̱ha ru̱drā ā̍di̱tyā u̱ta |
yajā̍ svadhva̱raṁ jana̱ṁ manu̍jātaṁ ghṛta̱pruṣa̍m || 1.045.01
śru̱ṣṭī̱vāno̱ hi dā̱śuṣe̍ de̱vā a̍gne̱ vice̍tasaḥ |
tānro̍hidaśva girvaṇa̱straya̍striṁśata̱mā va̍ha || 1.045.02
pri̱ya̱me̱dha̱vada̍tri̱vajjāta̍vedo virūpa̱vat |
a̱ṅgi̱ra̱svanma̍hivrata̱ praska̍ṇvasya śrudhī̱ hava̍m || 1.045.03
mahi̍kerava ū̱taye̍ pri̱yame̍dhā ahūṣata |
rāja̍ntamadhva̱rāṇā̍ma̱gniṁ śu̱kreṇa̍ śo̱ciṣā̍ || 1.045.04
ghṛtā̍havana santye̱mā u̱ ṣu śru̍dhī̱ gira̍ḥ |
yābhi̱ḥ kaṇva̍sya sū̱navo̱ hava̱nte'va̍se tvā || 1.045.05
tvāṁ ci̍traśravastama̱ hava̍nte vi̱kṣu ja̱ntava̍ḥ |
śo̱ciṣke̍śaṁ purupri̱yāgne̍ ha̱vyāya̱ voḻha̍ve || 1.045.06
ni tvā̱ hotā̍ramṛ̱tvija̍ṁ dadhi̱re va̍su̱vitta̍mam |
śrutka̍rṇaṁ sa̱pratha̍stama̱ṁ viprā̍ agne̱ divi̍ṣṭiṣu || 1.045.07
ā tvā̱ viprā̍ acucyavuḥ su̱taso̍mā a̱bhi praya̍ḥ |
bṛ̱hadbhā bibhra̍to ha̱viragne̱ martā̍ya dā̱śuṣe̍ || 1.045.08
prā̱ta̱ryāvṇa̍ḥ sahaskṛta soma̱peyā̍ya santya |
i̱hādya daivya̱ṁ jana̍ṁ ba̱rhirā sā̍dayā vaso || 1.045.09
a̱rvāñca̱ṁ daivya̱ṁ jana̱magne̱ yakṣva̱ sahū̍tibhiḥ |
a̱yaṁ soma̍ḥ sudānava̱staṁ pā̍ta ti̱roa̍hnyam || 1.045.10
e̱ṣo u̱ṣā apū̍rvyā̱ vyu̍cchati pri̱yā di̱vaḥ |
stu̱ṣe vā̍maśvinā bṛ̱hat || 1.046.01
yā da̱srā sindhu̍mātarā mano̱tarā̍ rayī̱ṇām |
dhi̱yā de̱vā va̍su̱vidā̍ || 1.046.02
va̱cyante̍ vāṁ kaku̱hāso̍ jū̱rṇāyā̱madhi̍ vi̱ṣṭapi̍ |
yadvā̱ṁ ratho̱ vibhi̱ṣpatā̍t || 1.046.03
ha̱viṣā̍ jā̱ro a̱pāṁ pipa̍rti̱ papu̍rirnarā |
pi̱tā kuṭa̍sya carṣa̱ṇiḥ || 1.046.04
ā̱dā̱ro vā̍ṁ matī̱nāṁ nāsa̍tyā matavacasā |
pā̱taṁ soma̍sya dhṛṣṇu̱yā || 1.046.05
yā na̱ḥ pīpa̍radaśvinā̱ jyoti̍ṣmatī̱ tama̍sti̱raḥ |
tāma̱sme rā̍sāthā̱miṣa̍m || 1.046.06
ā no̍ nā̱vā ma̍tī̱nāṁ yā̱taṁ pā̱rāya̱ ganta̍ve |
yu̱ñjāthā̍maśvinā̱ ratha̍m || 1.046.07
a̱ritra̍ṁ vāṁ di̱vaspṛ̱thu tī̱rthe sindhū̍nā̱ṁ ratha̍ḥ |
dhi̱yā yu̍yujra̱ inda̍vaḥ || 1.046.08
di̱vaska̍ṇvāsa̱ inda̍vo̱ vasu̱ sindhū̍nāṁ pa̱de |
svaṁ va̱vriṁ kuha̍ dhitsathaḥ || 1.046.09
abhū̍du̱ bhā u̍ a̱ṁśave̱ hira̍ṇya̱ṁ prati̱ sūrya̍ḥ |
vya̍khyajji̱hvayāsi̍taḥ || 1.046.10
abhū̍du pā̱rameta̍ve̱ panthā̍ ṛ̱tasya̍ sādhu̱yā |
ada̍rśi̱ vi sru̱tirdi̱vaḥ || 1.046.11
tatta̱dida̱śvino̱ravo̍ jari̱tā prati̍ bhūṣati |
made̱ soma̍sya̱ pipra̍toḥ || 1.046.12
vā̱va̱sā̱nā vi̱vasva̍ti̱ soma̍sya pī̱tyā gi̱rā |
ma̱nu̱ṣvaccha̍mbhū̱ ā ga̍tam || 1.046.13
yu̱voru̱ṣā anu̱ śriya̱ṁ pari̍jmanoru̱pāca̍rat |
ṛ̱tā va̍natho a̱ktubhi̍ḥ || 1.046.14
u̱bhā pi̍batamaśvino̱bhā na̱ḥ śarma̍ yacchatam |
a̱vi̱dri̱yābhi̍rū̱tibhi̍ḥ || 1.046.15
a̱yaṁ vā̱ṁ madhu̍mattamaḥ su̱taḥ soma̍ ṛtāvṛdhā |
tama̍śvinā pibataṁ ti̱roa̍hnyaṁ dha̱ttaṁ ratnā̍ni dā̱śuṣe̍ || 1.047.01
tri̱va̱ndhu̱reṇa̍ tri̱vṛtā̍ su̱peśa̍sā̱ rathe̱nā yā̍tamaśvinā |
kaṇvā̍so vā̱ṁ brahma̍ kṛṇvantyadhva̱re teṣā̱ṁ su śṛ̍ṇuta̱ṁ hava̍m || 1.047.02
aśvi̍nā̱ madhu̍mattamaṁ pā̱taṁ soma̍mṛtāvṛdhā |
athā̱dya da̍srā̱ vasu̱ bibhra̍tā̱ rathe̍ dā̱śvāṁsa̱mupa̍ gacchatam || 1.047.03
tri̱ṣa̱dha̱sthe ba̱rhiṣi̍ viśvavedasā̱ madhvā̍ ya̱jñaṁ mi̍mikṣatam |
kaṇvā̍so vāṁ su̱taso̍mā a̱bhidya̍vo yu̱vāṁ ha̍vante aśvinā || 1.047.04
yābhi̱ḥ kaṇva̍ma̱bhiṣṭi̍bhi̱ḥ prāva̍taṁ yu̱vama̍śvinā |
tābhi̱ḥ ṣva1̱̍smā a̍vataṁ śubhaspatī pā̱taṁ soma̍mṛtāvṛdhā || 1.047.05
su̱dāse̍ dasrā̱ vasu̱ bibhra̍tā̱ rathe̱ pṛkṣo̍ vahatamaśvinā |
ra̱yiṁ sa̍mu̱drādu̱ta vā̍ di̱vasparya̱sme dha̍ttaṁ puru̱spṛha̍m || 1.047.06
yannā̍satyā parā̱vati̱ yadvā̱ stho adhi̍ tu̱rvaśe̍ |
ato̱ rathe̍na su̱vṛtā̍ na̱ ā ga̍taṁ sā̱kaṁ sūrya̍sya ra̱śmibhi̍ḥ || 1.047.07
a̱rvāñcā̍ vā̱ṁ sapta̍yo'dhvara̱śriyo̱ vaha̍ntu̱ sava̱nedupa̍ |
iṣa̍ṁ pṛ̱ñcantā̍ su̱kṛte̍ su̱dāna̍va̱ ā ba̱rhiḥ sī̍dataṁ narā || 1.047.08
tena̍ nāsa̱tyā ga̍ta̱ṁ rathe̍na̱ sūrya̍tvacā |
yena̱ śaśva̍dū̱hathu̍rdā̱śuṣe̱ vasu̱ madhva̱ḥ soma̍sya pī̱taye̍ || 1.047.09
u̱kthebhi̍ra̱rvāgava̍se purū̱vasū̍ a̱rkaiśca̱ ni hva̍yāmahe |
śaśva̱tkaṇvā̍nā̱ṁ sada̍si pri̱ye hi ka̱ṁ soma̍ṁ pa̱pathu̍raśvinā || 1.047.10
sa̱ha vā̱mena̍ na uṣo̱ vyu̍cchā duhitardivaḥ |
sa̱ha dyu̱mnena̍ bṛha̱tā vi̍bhāvari rā̱yā de̍vi̱ dāsva̍tī || 1.048.01
aśvā̍vatī̱rgoma̍tīrviśvasu̱vido̱ bhūri̍ cyavanta̱ vasta̍ve |
udī̍raya̱ prati̍ mā sū̱nṛtā̍ uṣa̱ścoda̱ rādho̍ ma̱ghonā̍m || 1.048.02
u̱vāso̱ṣā u̱cchācca̱ nu de̱vī jī̱rā rathā̍nām |
ye a̍syā ā̱cara̍ṇeṣu dadhri̱re sa̍mu̱dre na śra̍va̱syava̍ḥ || 1.048.03
uṣo̱ ye te̱ pra yāme̍ṣu yu̱ñjate̱ mano̍ dā̱nāya̍ sū̱raya̍ḥ |
atrāha̱ tatkaṇva̍ eṣā̱ṁ kaṇva̍tamo̱ nāma̍ gṛṇāti nṛ̱ṇām || 1.048.04
ā ghā̱ yoṣe̍va sū̱naryu̱ṣā yā̍ti prabhuñja̱tī |
ja̱raya̍ntī̱ vṛja̍naṁ pa̱dvadī̍yata̱ utpā̍tayati pa̱kṣiṇa̍ḥ || 1.048.05
vi yā sṛ̱jati̱ sama̍na̱ṁ vya1̱̍rthina̍ḥ pa̱daṁ na ve̱tyoda̍tī |
vayo̱ naki̍ṣṭe papti̱vāṁsa̍ āsate̱ vyu̍ṣṭau vājinīvati || 1.048.06
e̱ṣāyu̍kta parā̱vata̱ḥ sūrya̍syo̱daya̍nā̱dadhi̍ |
śa̱taṁ rathe̍bhiḥ su̱bhago̱ṣā i̱yaṁ vi yā̍tya̱bhi mānu̍ṣān || 1.048.07
viśva̍masyā nānāma̱ cakṣa̍se̱ jaga̱jjyoti̍ṣkṛṇoti sū̱narī̍ |
apa̱ dveṣo̍ ma̱ghonī̍ duhi̱tā di̱va u̱ṣā u̍ccha̱dapa̱ sridha̍ḥ || 1.048.08
uṣa̱ ā bhā̍hi bhā̱nunā̍ ca̱ndreṇa̍ duhitardivaḥ |
ā̱vaha̍ntī̱ bhūrya̱smabhya̱ṁ saubha̍gaṁ vyu̱cchantī̱ divi̍ṣṭiṣu || 1.048.09
viśva̍sya̱ hi prāṇa̍na̱ṁ jīva̍na̱ṁ tve vi yadu̱cchasi̍ sūnari |
sā no̱ rathe̍na bṛha̱tā vi̍bhāvari śru̱dhi ci̍trāmaghe̱ hava̍m || 1.048.10
uṣo̱ vāja̱ṁ hi vaṁsva̱ yaści̱tro mānu̍ṣe̱ jane̍ |
tenā va̍ha su̱kṛto̍ adhva̱rā upa̱ ye tvā̍ gṛ̱ṇanti̱ vahna̍yaḥ || 1.048.11
viśvā̍nde̱vā ā va̍ha̱ soma̍pītaye̱'ntari̍kṣāduṣa̱stvam |
sāsmāsu̍ dhā̱ goma̱daśvā̍vadu̱kthya1̱̍muṣo̱ vāja̍ṁ su̱vīrya̍m || 1.048.12
yasyā̱ ruśa̍nto a̱rcaya̱ḥ prati̍ bha̱drā adṛ̍kṣata |
sā no̍ ra̱yiṁ vi̱śvavā̍raṁ su̱peśa̍samu̱ṣā da̍dātu̱ sugmya̍m || 1.048.13
ye ci̱ddhi tvāmṛṣa̍ya̱ḥ pūrva̍ ū̱taye̍ juhū̱re'va̍se mahi |
sā na̱ḥ stomā̍ a̱bhi gṛ̍ṇīhi̱ rādha̱soṣa̍ḥ śu̱kreṇa̍ śo̱ciṣā̍ || 1.048.14
uṣo̱ yada̱dya bhā̱nunā̱ vi dvārā̍vṛ̱ṇavo̍ di̱vaḥ |
pra no̍ yacchatādavṛ̱kaṁ pṛ̱thu ccha̱rdiḥ pra de̍vi̱ goma̍tī̱riṣa̍ḥ || 1.048.15
saṁ no̍ rā̱yā bṛ̍ha̱tā vi̱śvape̍śasā mimi̱kṣvā samiḻā̍bhi̱rā |
saṁ dyu̱mnena̍ viśva̱turo̍ṣo mahi̱ saṁ vājai̍rvājinīvati || 1.048.16
uṣo̍ bha̱drebhi̱rā ga̍hi di̱vaści̍droca̱nādadhi̍ |
vaha̍ntvaru̱ṇapsa̍va̱ upa̍ tvā so̱mino̍ gṛ̱ham || 1.049.01
su̱peśa̍saṁ su̱khaṁ ratha̱ṁ yama̱dhyasthā̍ uṣa̱stvam |
tenā̍ su̱śrava̍sa̱ṁ jana̱ṁ prāvā̱dya du̍hitardivaḥ || 1.049.02
vaya̍ścitte pata̱triṇo̍ dvi̱paccatu̍ṣpadarjuni |
uṣa̱ḥ prāra̍nnṛ̱tūranu̍ di̱vo ante̍bhya̱spari̍ || 1.049.03
vyu̱cchantī̱ hi ra̱śmibhi̱rviśva̍mā̱bhāsi̍ roca̱nam |
tāṁ tvāmu̍ṣarvasū̱yavo̍ gī̱rbhiḥ kaṇvā̍ ahūṣata || 1.049.04
udu̱ tyaṁ jā̱tave̍dasaṁ de̱vaṁ va̍hanti ke̱tava̍ḥ |
dṛ̱śe viśvā̍ya̱ sūrya̍m || 1.050.01
apa̱ tye tā̱yavo̍ yathā̱ nakṣa̍trā yantya̱ktubhi̍ḥ |
sūrā̍ya vi̱śvaca̍kṣase || 1.050.02
adṛ̍śramasya ke̱tavo̱ vi ra̱śmayo̱ janā̱ anu̍ |
bhrāja̍nto a̱gnayo̍ yathā || 1.050.03
ta̱raṇi̍rvi̱śvada̍rśato jyoti̱ṣkṛda̍si sūrya |
viśva̱mā bhā̍si roca̱nam || 1.050.04
pra̱tyaṅde̱vānā̱ṁ viśa̍ḥ pra̱tyaṅṅude̍ṣi̱ mānu̍ṣān |
pra̱tyaṅviśva̱ṁ sva̍rdṛ̱śe || 1.050.05
yenā̍ pāvaka̱ cakṣa̍sā bhura̱ṇyanta̱ṁ janā̱ anu̍ |
tvaṁ va̍ruṇa̱ paśya̍si || 1.050.06
vi dyāme̍ṣi̱ raja̍spṛ̱thvahā̱ mimā̍no a̱ktubhi̍ḥ |
paśya̱ñjanmā̍ni sūrya || 1.050.07
sa̱pta tvā̍ ha̱rito̱ rathe̱ vaha̍nti deva sūrya |
śo̱ciṣke̍śaṁ vicakṣaṇa || 1.050.08
ayu̍kta sa̱pta śu̱ndhyuva̱ḥ sūro̱ ratha̍sya na̱ptya̍ḥ |
tābhi̍ryāti̱ svayu̍ktibhiḥ || 1.050.09
udva̱yaṁ tama̍sa̱spari̱ jyoti̱ṣpaśya̍nta̱ utta̍ram |
de̱vaṁ de̍va̱trā sūrya̱maga̍nma̱ jyoti̍rutta̱mam || 1.050.10
u̱dyanna̱dya mi̍tramaha ā̱roha̱nnutta̍rā̱ṁ diva̍m |
hṛ̱dro̱gaṁ mama̍ sūrya hari̱māṇa̍ṁ ca nāśaya || 1.050.11
śuke̍ṣu me hari̱māṇa̍ṁ ropa̱ṇākā̍su dadhmasi |
atho̍ hāridra̱veṣu̍ me hari̱māṇa̱ṁ ni da̍dhmasi || 1.050.12
uda̍gāda̱yamā̍di̱tyo viśve̍na̱ saha̍sā sa̱ha |
dvi̱ṣanta̱ṁ mahya̍ṁ ra̱ndhaya̱nmo a̱haṁ dvi̍ṣa̱te ra̍dham || 1.050.13
a̱bhi tyaṁ me̱ṣaṁ pu̍ruhū̱tamṛ̱gmiya̱mindra̍ṁ gī̱rbhirma̍datā̱ vasvo̍ arṇa̱vam |
yasya̱ dyāvo̱ na vi̱cara̍nti̱ mānu̍ṣā bhu̱je maṁhi̍ṣṭhama̱bhi vipra̍marcata || 1.051.01
a̱bhīma̍vanvansvabhi̱ṣṭimū̱tayo̍'ntarikṣa̱prāṁ tavi̍ṣībhi̱rāvṛ̍tam |
indra̱ṁ dakṣā̍sa ṛ̱bhavo̍ mada̱cyuta̍ṁ śa̱takra̍tu̱ṁ java̍nī sū̱nṛtāru̍hat || 1.051.02
tvaṁ go̱tramaṅgi̍robhyo'vṛṇo̱rapo̱tātra̍ye śa̱tadu̍reṣu gātu̱vit |
sa̱sena̍ cidvima̱dāyā̍vaho̱ vasvā̱jāvadri̍ṁ vāvasā̱nasya̍ na̱rtaya̍n || 1.051.03
tvama̱pāma̍pi̱dhānā̍vṛṇo̱rapādhā̍raya̱ḥ parva̍te̱ dānu̍ma̱dvasu̍ |
vṛ̱traṁ yadi̍ndra̱ śava̱sāva̍dhī̱rahi̱māditsūrya̍ṁ di̱vyāro̍hayo dṛ̱śe || 1.051.04
tvaṁ mā̱yābhi̱rapa̍ mā̱yino̍'dhamaḥ sva̱dhābhi̱rye adhi̱ śuptā̱vaju̍hvata |
tvaṁ pipro̍rnṛmaṇa̱ḥ prāru̍ja̱ḥ pura̱ḥ pra ṛ̱jiśvā̍naṁ dasyu̱hatye̍ṣvāvitha || 1.051.05
tvaṁ kutsa̍ṁ śuṣṇa̱hatye̍ṣvāvi̱thāra̍ndhayo'tithi̱gvāya̱ śamba̍ram |
ma̱hānta̍ṁ cidarbu̱daṁ ni kra̍mīḥ pa̱dā sa̱nāde̱va da̍syu̱hatyā̍ya jajñiṣe || 1.051.06
tve viśvā̱ tavi̍ṣī sa̱dhrya̍gghi̱tā tava̱ rādha̍ḥ somapī̱thāya̍ harṣate |
tava̱ vajra̍ścikite bā̱hvorhi̱to vṛ̱ścā śatro̱rava̱ viśvā̍ni̱ vṛṣṇyā̍ || 1.051.07
vi jā̍nī̱hyāryā̱nye ca̱ dasya̍vo ba̱rhiṣma̍te randhayā̱ śāsa̍davra̱tān |
śākī̍ bhava̱ yaja̍mānasya codi̱tā viśvettā te̍ sadha̱māde̍ṣu cākana || 1.051.08
anu̍vratāya ra̱ndhaya̱nnapa̍vratānā̱bhūbhi̱rindra̍ḥ śna̱thaya̱nnanā̍bhuvaḥ |
vṛ̱ddhasya̍ ci̱dvardha̍to̱ dyāmina̍kṣata̱ḥ stavā̍no va̱mro vi ja̍ghāna sa̱ṁdiha̍ḥ || 1.051.09
takṣa̱dyatta̍ u̱śanā̱ saha̍sā̱ saho̱ vi roda̍sī ma̱jmanā̍ bādhate̱ śava̍ḥ |
ā tvā̱ vāta̍sya nṛmaṇo mano̱yuja̱ ā pūrya̍māṇamavahanna̱bhi śrava̍ḥ || 1.051.10
mandi̍ṣṭa̱ yadu̱śane̍ kā̱vye sacā̱ indro̍ va̱ṅkū va̍ṅku̱tarādhi̍ tiṣṭhati |
u̱gro ya̱yiṁ nira̱paḥ srota̍sāsṛja̱dvi śuṣṇa̍sya dṛṁhi̱tā ai̍raya̱tpura̍ḥ || 1.051.11
ā smā̱ ratha̍ṁ vṛṣa̱pāṇe̍ṣu tiṣṭhasi śāryā̱tasya̱ prabhṛ̍tā̱ yeṣu̱ manda̍se |
indra̱ yathā̍ su̱taso̍meṣu cā̱kano̍'na̱rvāṇa̱ṁ śloka̱mā ro̍hase di̱vi || 1.051.12
ada̍dā̱ arbhā̍ṁ maha̱te va̍ca̱syave̍ ka̱kṣīva̍te vṛca̱yāmi̍ndra sunva̱te |
menā̍bhavo vṛṣaṇa̱śvasya̍ sukrato̱ viśvettā te̱ sava̍neṣu pra̱vācyā̍ || 1.051.13
indro̍ aśrāyi su̱dhyo̍ nire̱ke pa̱jreṣu̱ stomo̱ duryo̱ na yūpa̍ḥ |
a̱śva̱yurga̱vyū ra̍tha̱yurva̍sū̱yurindra̱ idrā̱yaḥ kṣa̍yati praya̱ntā || 1.051.14
i̱daṁ namo̍ vṛṣa̱bhāya̍ sva̱rāje̍ sa̱tyaśu̍ṣmāya ta̱vase̍'vāci |
a̱sminni̍ndra vṛ̱jane̱ sarva̍vīrā̱ḥ smatsū̱ribhi̱stava̱ śarma̍nsyāma || 1.051.15
tyaṁ su me̱ṣaṁ ma̍hayā sva̱rvida̍ṁ śa̱taṁ yasya̍ su̱bhva̍ḥ sā̱kamīra̍te |
atya̱ṁ na vāja̍ṁ havana̱syada̱ṁ ratha̱mendra̍ṁ vavṛtyā̱mava̍se suvṛ̱ktibhi̍ḥ || 1.052.01
sa parva̍to̱ na dha̱ruṇe̱ṣvacyu̍taḥ sa̱hasra̍mūti̱stavi̍ṣīṣu vāvṛdhe |
indro̱ yadvṛ̱tramava̍dhīnnadī̱vṛta̍mu̱bjannarṇā̍ṁsi̱ jarhṛ̍ṣāṇo̱ andha̍sā || 1.052.02
sa hi dva̱ro dva̱riṣu̍ va̱vra ūdha̍ni ca̱ndrabu̍dhno̱ mada̍vṛddho manī̱ṣibhi̍ḥ |
indra̱ṁ tama̍hve svapa̱syayā̍ dhi̱yā maṁhi̍ṣṭharāti̱ṁ sa hi papri̱randha̍saḥ || 1.052.03
ā yaṁ pṛ̱ṇanti̍ di̱vi sadma̍barhiṣaḥ samu̱draṁ na su̱bhva1̱̍ḥ svā a̱bhiṣṭa̍yaḥ |
taṁ vṛ̍tra̱hatye̱ anu̍ tasthurū̱taya̱ḥ śuṣmā̱ indra̍mavā̱tā ahru̍tapsavaḥ || 1.052.04
a̱bhi svavṛ̍ṣṭi̱ṁ made̍ asya̱ yudhya̍to ra̱ghvīri̍va prava̱ṇe sa̍srurū̱taya̍ḥ |
indro̱ yadva̱jrī dhṛ̱ṣamā̍ṇo̱ andha̍sā bhi̱nadva̱lasya̍ pari̱dhīri̍va tri̱taḥ || 1.052.05
parī̍ṁ ghṛ̱ṇā ca̍rati titvi̱ṣe śavo̱'po vṛ̱tvī raja̍so bu̱dhnamāśa̍yat |
vṛ̱trasya̱ yatpra̍va̱ṇe du̱rgṛbhi̍śvano nija̱ghantha̱ hanvo̍rindra tanya̱tum || 1.052.06
hra̱daṁ na hi tvā̍ nyṛ̱ṣantyū̱rmayo̱ brahmā̍ṇīndra̱ tava̱ yāni̱ vardha̍nā |
tvaṣṭā̍ citte̱ yujya̍ṁ vāvṛdhe̱ śava̍sta̱takṣa̱ vajra̍ma̱bhibhū̍tyojasam || 1.052.07
ja̱gha̱nvā u̱ hari̍bhiḥ sambhṛtakrata̱vindra̍ vṛ̱traṁ manu̍ṣe gātu̱yanna̱paḥ |
aya̍cchathā bā̱hvorvajra̍māya̱samadhā̍rayo di̱vyā sūrya̍ṁ dṛ̱śe || 1.052.08
bṛ̱hatsvaśca̍ndra̱mama̍va̱dyadu̱kthya1̱̍makṛ̍ṇvata bhi̱yasā̱ roha̍ṇaṁ di̱vaḥ |
yanmānu̍ṣapradhanā̱ indra̍mū̱taya̱ḥ sva̍rnṛ̱ṣāco̍ ma̱ruto'ma̍da̱nnanu̍ || 1.052.09
dyauści̍da̱syāma̍vā̱ ahe̍ḥ sva̱nādayo̍yavīdbhi̱yasā̱ vajra̍ indra te |
vṛ̱trasya̱ yadba̍dbadhā̱nasya̍ rodasī̱ made̍ su̱tasya̱ śava̱sābhi̍na̱cchira̍ḥ || 1.052.10
yadinnvi̍ndra pṛthi̱vī daśa̍bhuji̱rahā̍ni̱ viśvā̍ ta̱tana̍nta kṛ̱ṣṭaya̍ḥ |
atrāha̍ te maghava̱nviśru̍ta̱ṁ saho̱ dyāmanu̱ śava̍sā ba̱rhaṇā̍ bhuvat || 1.052.11
tvama̱sya pā̱re raja̍so̱ vyo̍mana̱ḥ svabhū̍tyojā̱ ava̍se dhṛṣanmanaḥ |
ca̱kṛ̱ṣe bhūmi̍ṁ prati̱māna̱moja̍so̱'paḥ sva̍ḥ pari̱bhūre̱ṣyā diva̍m || 1.052.12
tvaṁ bhu̍vaḥ prati̱māna̍ṁ pṛthi̱vyā ṛ̱ṣvavī̍rasya bṛha̱taḥ pati̍rbhūḥ |
viśva̱māprā̍ a̱ntari̍kṣaṁ mahi̱tvā sa̱tyama̱ddhā naki̍ra̱nyastvāvā̍n || 1.052.13
na yasya̱ dyāvā̍pṛthi̱vī anu̱ vyaco̱ na sindha̍vo̱ raja̍so̱ anta̍māna̱śuḥ |
nota svavṛ̍ṣṭi̱ṁ made̍ asya̱ yudhya̍ta̱ eko̍ a̱nyacca̍kṛṣe̱ viśva̍mānu̱ṣak || 1.052.14
ārca̱nnatra̍ ma̱ruta̱ḥ sasmi̍nnā̱jau viśve̍ de̱vāso̍ amada̱nnanu̍ tvā |
vṛ̱trasya̱ yadbhṛ̍ṣṭi̱matā̍ va̱dhena̱ ni tvami̍ndra̱ pratyā̱naṁ ja̱ghantha̍ || 1.052.15
nyū̱3̱̍ ṣu vāca̱ṁ pra ma̱he bha̍rāmahe̱ gira̱ indrā̍ya̱ sada̍ne vi̱vasva̍taḥ |
nū ci̱ddhi ratna̍ṁ sasa̱tāmi̱vāvi̍da̱nna du̍ṣṭu̱tirdra̍viṇo̱deṣu̍ śasyate || 1.053.01
du̱ro aśva̍sya du̱ra i̍ndra̱ gora̍si du̱ro yava̍sya̱ vasu̍na i̱naspati̍ḥ |
śi̱kṣā̱na̱raḥ pra̱divo̱ akā̍makarśana̱ḥ sakhā̱ sakhi̍bhya̱stami̱daṁ gṛ̍ṇīmasi || 1.053.02
śacī̍va indra purukṛddyumattama̱ tavedi̱dama̱bhita̍ścekite̱ vasu̍ |
ata̍ḥ sa̱ṁgṛbhyā̍bhibhūta̱ ā bha̍ra̱ mā tvā̍ya̱to ja̍ri̱tuḥ kāma̍mūnayīḥ || 1.053.03
e̱bhirdyubhi̍ḥ su̱manā̍ e̱bhirindu̍bhirnirundhā̱no ama̍ti̱ṁ gobhi̍ra̱śvinā̍ |
indre̍ṇa̱ dasyu̍ṁ da̱raya̍nta̱ indu̍bhiryu̱tadve̍ṣasa̱ḥ sami̱ṣā ra̍bhemahi || 1.053.04
sami̍ndra rā̱yā sami̱ṣā ra̍bhemahi̱ saṁ vāje̍bhiḥ puruśca̱ndraira̱bhidyu̍bhiḥ |
saṁ de̱vyā prama̍tyā vī̱raśu̍ṣmayā̱ goa̍gra̱yāśvā̍vatyā rabhemahi || 1.053.05
te tvā̱ madā̍ amada̱ntāni̱ vṛṣṇyā̱ te somā̍so vṛtra̱hatye̍ṣu satpate |
yatkā̱rave̱ daśa̍ vṛ̱trāṇya̍pra̱ti ba̱rhiṣma̍te̱ ni sa̱hasrā̍ṇi ba̱rhaya̍ḥ || 1.053.06
yu̱dhā yudha̱mupa̱ ghede̍ṣi dhṛṣṇu̱yā pu̱rā pura̱ṁ sami̱daṁ ha̱ṁsyoja̍sā |
namyā̱ yadi̍ndra̱ sakhyā̍ parā̱vati̍ niba̱rhayo̱ namu̍ci̱ṁ nāma̍ mā̱yina̍m || 1.053.07
tvaṁ kara̍ñjamu̱ta pa̱rṇaya̍ṁ vadhī̱steji̍ṣṭhayātithi̱gvasya̍ varta̱nī |
tvaṁ śa̱tā vaṅgṛ̍dasyābhina̱tpuro̍'nānu̱daḥ pari̍ṣūtā ṛ̱jiśva̍nā || 1.053.08
tvame̱tāñja̍na̱rājño̱ dvirdaśā̍ba̱ndhunā̍ su̱śrava̍sopaja̱gmuṣa̍ḥ |
ṣa̱ṣṭiṁ sa̱hasrā̍ nava̱tiṁ nava̍ śru̱to ni ca̱kreṇa̱ rathyā̍ du̱ṣpadā̍vṛṇak || 1.053.09
tvamā̍vitha su̱śrava̍sa̱ṁ tavo̱tibhi̱stava̱ trāma̍bhirindra̱ tūrva̍yāṇam |
tvama̍smai̱ kutsa̍matithi̱gvamā̱yuṁ ma̱he rājñe̱ yūne̍ arandhanāyaḥ || 1.053.10
ya u̱dṛcī̍ndra de̱vago̍pā̱ḥ sakhā̍yaste śi̱vata̍mā̱ asā̍ma |
tvāṁ sto̍ṣāma̱ tvayā̍ su̱vīrā̱ drāghī̍ya̱ āyu̍ḥ prata̱raṁ dadhā̍nāḥ || 1.053.11
mā no̍ a̱sminma̍ghavanpṛ̱tsvaṁha̍si na̱hi te̱ anta̱ḥ śava̍saḥ parī̱ṇaśe̍ |
akra̍ndayo na̱dyo̱3̱̍ roru̍va̱dvanā̍ ka̱thā na kṣo̱ṇīrbhi̱yasā̱ samā̍rata || 1.054.01
arcā̍ śa̱krāya̍ śā̱kine̱ śacī̍vate śṛ̱ṇvanta̱mindra̍ṁ ma̱haya̍nna̱bhi ṣṭu̍hi |
yo dhṛ̱ṣṇunā̱ śava̍sā̱ roda̍sī u̱bhe vṛṣā̍ vṛṣa̱tvā vṛ̍ṣa̱bho nyṛ̱ñjate̍ || 1.054.02
arcā̍ di̱ve bṛ̍ha̱te śū̱ṣyaṁ1̱̍ vaca̱ḥ svakṣa̍tra̱ṁ yasya̍ dhṛṣa̱to dhṛ̱ṣanmana̍ḥ |
bṛ̱hacchra̍vā̱ asu̍ro ba̱rhaṇā̍ kṛ̱taḥ pu̱ro hari̍bhyāṁ vṛṣa̱bho ratho̱ hi ṣaḥ || 1.054.03
tvaṁ di̱vo bṛ̍ha̱taḥ sānu̍ kopa̱yo'va̱ tmanā̍ dhṛṣa̱tā śamba̍raṁ bhinat |
yanmā̱yino̍ vra̱ndino̍ ma̱ndinā̍ dhṛ̱ṣacchi̱tāṁ gabha̍stima̱śani̍ṁ pṛta̱nyasi̍ || 1.054.04
ni yadvṛ̱ṇakṣi̍ śvasa̱nasya̍ mū̱rdhani̱ śuṣṇa̍sya cidvra̱ndino̱ roru̍va̱dvanā̍ |
prā̱cīne̍na̱ mana̍sā ba̱rhaṇā̍vatā̱ yada̱dyā ci̍tkṛ̱ṇava̱ḥ kastvā̱ pari̍ || 1.054.05
tvamā̍vitha̱ narya̍ṁ tu̱rvaśa̱ṁ yadu̱ṁ tvaṁ tu̱rvīti̍ṁ va̱yya̍ṁ śatakrato |
tvaṁ ratha̱meta̍śa̱ṁ kṛtvye̱ dhane̱ tvaṁ puro̍ nava̱tiṁ da̍mbhayo̱ nava̍ || 1.054.06
sa ghā̱ rājā̱ satpa̍tiḥ śūśuva̱jjano̍ rā̱taha̍vya̱ḥ prati̱ yaḥ śāsa̱minva̍ti |
u̱kthā vā̱ yo a̍bhigṛ̱ṇāti̱ rādha̍sā̱ dānu̍rasmā̱ upa̍rā pinvate di̱vaḥ || 1.054.07
asa̍maṁ kṣa̱tramasa̍mā manī̱ṣā pra so̍ma̱pā apa̍sā santu̱ neme̍ |
ye ta̍ indra da̱duṣo̍ va̱rdhaya̍nti̱ mahi̍ kṣa̱traṁ sthavi̍ra̱ṁ vṛṣṇya̍ṁ ca || 1.054.08
tubhyede̱te ba̍hu̱lā adri̍dugdhāścamū̱ṣada̍ścama̱sā i̍ndra̱pānā̍ḥ |
vya̍śnuhi ta̱rpayā̱ kāma̍meṣā̱mathā̱ mano̍ vasu̱deyā̍ya kṛṣva || 1.054.09
a̱pāma̍tiṣṭhaddha̱ruṇa̍hvara̱ṁ tamo̱'ntarvṛ̱trasya̍ ja̱ṭhare̍ṣu̱ parva̍taḥ |
a̱bhīmindro̍ na̱dyo̍ va̱vriṇā̍ hi̱tā viśvā̍ anu̱ṣṭhāḥ pra̍va̱ṇeṣu̍ jighnate || 1.054.10
sa śevṛ̍dha̱madhi̍ dhā dyu̱mnama̱sme mahi̍ kṣa̱traṁ ja̍nā̱ṣāḻi̍ndra̱ tavya̍m |
rakṣā̍ ca no ma̱ghona̍ḥ pā̱hi sū̱rīnrā̱ye ca̍ naḥ svapa̱tyā i̱ṣe dhā̍ḥ || 1.054.11
di̱vaści̍dasya vari̱mā vi pa̍pratha̱ indra̱ṁ na ma̱hnā pṛ̍thi̱vī ca̱na prati̍ |
bhī̱mastuvi̍ṣmāñcarṣa̱ṇibhya̍ āta̱paḥ śiśī̍te̱ vajra̱ṁ teja̍se̱ na vaṁsa̍gaḥ || 1.055.01
so a̍rṇa̱vo na na̱dya̍ḥ samu̱driya̱ḥ prati̍ gṛbhṇāti̱ viśri̍tā̱ varī̍mabhiḥ |
indra̱ḥ soma̍sya pī̱taye̍ vṛṣāyate sa̱nātsa yu̱dhma oja̍sā panasyate || 1.055.02
tvaṁ tami̍ndra̱ parva̍ta̱ṁ na bhoja̍se ma̱ho nṛ̱mṇasya̱ dharma̍ṇāmirajyasi |
pra vī̱rye̍ṇa de̱vatāti̍ cekite̱ viśva̍smā u̱graḥ karma̍ṇe pu̱rohi̍taḥ || 1.055.03
sa idvane̍ nama̱syubhi̍rvacasyate̱ cāru̱ jane̍ṣu prabruvā̱ṇa i̍ndri̱yam |
vṛṣā̱ chandu̍rbhavati harya̱to vṛṣā̱ kṣeme̍ṇa̱ dhenā̍ṁ ma̱ghavā̱ yadinva̍ti || 1.055.04
sa inma̱hāni̍ sami̱thāni̍ ma̱jmanā̍ kṛ̱ṇoti̍ yu̱dhma oja̍sā̱ jane̍bhyaḥ |
adhā̍ ca̱na śradda̍dhati̱ tviṣī̍mata̱ indrā̍ya̱ vajra̍ṁ ni̱ghani̍ghnate va̱dham || 1.055.05
sa hi śra̍va̱syuḥ sada̍nāni kṛ̱trimā̍ kṣma̱yā vṛ̍dhā̱na oja̍sā vinā̱śaya̍n |
jyotī̍ṁṣi kṛ̱ṇvanna̍vṛ̱kāṇi̱ yajya̱ve'va̍ su̱kratu̱ḥ sarta̱vā a̱paḥ sṛ̍jat || 1.055.06
dā̱nāya̱ mana̍ḥ somapāvannastu te̱'rvāñcā̱ harī̍ vandanaśru̱dā kṛ̍dhi |
yami̍ṣṭhāsa̱ḥ sāra̍thayo̱ ya i̍ndra te̱ na tvā̱ ketā̱ ā da̍bhnuvanti̱ bhūrṇa̍yaḥ || 1.055.07
apra̍kṣita̱ṁ vasu̍ bibharṣi̱ hasta̍yo̱raṣā̍ḻha̱ṁ saha̍sta̱nvi̍ śru̱to da̍dhe |
āvṛ̍tāso'va̱tāso̱ na ka̱rtṛbhi̍sta̱nūṣu̍ te̱ krata̍va indra̱ bhūra̍yaḥ || 1.055.08
e̱ṣa pra pū̱rvīrava̱ tasya̍ ca̱mriṣo'tyo̱ na yoṣā̱muda̍yaṁsta bhu̱rvaṇi̍ḥ |
dakṣa̍ṁ ma̱he pā̍yayate hira̱ṇyaya̱ṁ ratha̍mā̱vṛtyā̱ hari̍yoga̱mṛbhva̍sam || 1.056.01
taṁ gū̱rtayo̍ nema̱nniṣa̱ḥ parī̍ṇasaḥ samu̱draṁ na sa̱ṁcara̍ṇe sani̱ṣyava̍ḥ |
pati̱ṁ dakṣa̍sya vi̱datha̍sya̱ nū saho̍ gi̱riṁ na ve̱nā adhi̍ roha̱ teja̍sā || 1.056.02
sa tu̱rvaṇi̍rma̱hā a̍re̱ṇu pauṁsye̍ gi̱rerbhṛ̱ṣṭirna bhrā̍jate tu̱jā śava̍ḥ |
yena̱ śuṣṇa̍ṁ mā̱yina̍māya̱so made̍ du̱dhra ā̱bhūṣu̍ rā̱maya̱nni dāma̍ni || 1.056.03
de̱vī yadi̱ tavi̍ṣī̱ tvāvṛ̍dho̱taya̱ indra̱ṁ siṣa̍ktyu̱ṣasa̱ṁ na sūrya̍ḥ |
yo dhṛ̱ṣṇunā̱ śava̍sā̱ bādha̍te̱ tama̱ iya̍rti re̱ṇuṁ bṛ̱hada̍rhari̱ṣvaṇi̍ḥ || 1.056.04
vi yatti̱ro dha̱ruṇa̱macyu̍ta̱ṁ rajo'ti̍ṣṭhipo di̱va ātā̍su ba̱rhaṇā̍ |
sva̍rmīḻhe̱ yanmada̍ indra̱ harṣyāha̍nvṛ̱traṁ nira̱pāmau̍bjo arṇa̱vam || 1.056.05
tvaṁ di̱vo dha̱ruṇa̍ṁ dhiṣa̱ oja̍sā pṛthi̱vyā i̍ndra̱ sada̍neṣu̱ māhi̍naḥ |
tvaṁ su̱tasya̱ made̍ ariṇā a̱po vi vṛ̱trasya̍ sa̱mayā̍ pā̱ṣyā̍rujaḥ || 1.056.06
pra maṁhi̍ṣṭhāya bṛha̱te bṛ̱hadra̍ye sa̱tyaśu̍ṣmāya ta̱vase̍ ma̱tiṁ bha̍re |
a̱pāmi̍va prava̱ṇe yasya̍ du̱rdhara̱ṁ rādho̍ vi̱śvāyu̱ śava̍se̱ apā̍vṛtam || 1.057.01
adha̍ te̱ viśva̱manu̍ hāsadi̱ṣṭaya̱ āpo̍ ni̱mneva̱ sava̍nā ha̱viṣma̍taḥ |
yatparva̍te̱ na sa̱maśī̍ta harya̱ta indra̍sya̱ vajra̱ḥ śnathi̍tā hira̱ṇyaya̍ḥ || 1.057.02
a̱smai bhī̱māya̱ nama̍sā̱ sama̍dhva̱ra uṣo̱ na śu̍bhra̱ ā bha̍rā̱ panī̍yase |
yasya̱ dhāma̱ śrava̍se̱ nāme̍ndri̱yaṁ jyoti̱rakā̍ri ha̱rito̱ nāya̍se || 1.057.03
i̱me ta̍ indra̱ te va̱yaṁ pu̍ruṣṭuta̱ ye tvā̱rabhya̱ carā̍masi prabhūvaso |
na̱hi tvada̱nyo gi̍rvaṇo̱ gira̱ḥ sagha̍tkṣo̱ṇīri̍va̱ prati̍ no harya̱ tadvaca̍ḥ || 1.057.04
bhūri̍ ta indra vī̱ryaṁ1̱̍ tava̍ smasya̱sya sto̱turma̍ghava̱nkāma̱mā pṛ̍ṇa |
anu̍ te̱ dyaurbṛ̍ha̱tī vī̱rya̍ṁ mama i̱yaṁ ca̍ te pṛthi̱vī ne̍ma̱ oja̍se || 1.057.05
tvaṁ tami̍ndra̱ parva̍taṁ ma̱hāmu̱ruṁ vajre̍ṇa vajrinparva̱śaśca̍kartitha |
avā̍sṛjo̱ nivṛ̍tā̱ḥ sarta̱vā a̱paḥ sa̱trā viśva̍ṁ dadhiṣe̱ keva̍la̱ṁ saha̍ḥ || 1.057.06
nū ci̍tsaho̱jā a̱mṛto̱ ni tu̍ndate̱ hotā̱ yaddū̱to abha̍vadvi̱vasva̍taḥ |
vi sādhi̍ṣṭhebhiḥ pa̱thibhī̱ rajo̍ mama̱ ā de̱vatā̍tā ha̱viṣā̍ vivāsati || 1.058.01
ā svamadma̍ yu̱vamā̍no a̱jara̍stṛ̱ṣva̍vi̱ṣyanna̍ta̱seṣu̍ tiṣṭhati |
atyo̱ na pṛ̱ṣṭhaṁ pru̍ṣi̱tasya̍ rocate di̱vo na sānu̍ sta̱naya̍nnacikradat || 1.058.02
krā̱ṇā ru̱drebhi̱rvasu̍bhiḥ pu̱rohi̍to̱ hotā̱ niṣa̍tto rayi̱ṣāḻama̍rtyaḥ |
ratho̱ na vi̱kṣvṛ̍ñjasā̱na ā̱yuṣu̱ vyā̍nu̱ṣagvāryā̍ de̱va ṛ̍ṇvati || 1.058.03
vi vāta̍jūto ata̱seṣu̍ tiṣṭhate̱ vṛthā̍ ju̱hūbhi̱ḥ sṛṇyā̍ tuvi̱ṣvaṇi̍ḥ |
tṛ̱ṣu yada̍gne va̱nino̍ vṛṣā̱yase̍ kṛ̱ṣṇaṁ ta̱ ema̱ ruśa̍dūrme ajara || 1.058.04
tapu̍rjambho̱ vana̱ ā vāta̍codito yū̱the na sā̱hvā ava̍ vāti̱ vaṁsa̍gaḥ |
a̱bhi̱vraja̱nnakṣi̍ta̱ṁ pāja̍sā̱ raja̍ḥ sthā̱tuśca̱ratha̍ṁ bhayate pata̱triṇa̍ḥ || 1.058.05
da̱dhuṣṭvā̱ bhṛga̍vo̱ mānu̍ṣe̱ṣvā ra̱yiṁ na cāru̍ṁ su̱hava̱ṁ jane̍bhyaḥ |
hotā̍ramagne̱ ati̍thi̱ṁ vare̍ṇyaṁ mi̱traṁ na śeva̍ṁ di̱vyāya̱ janma̍ne || 1.058.06
hotā̍raṁ sa̱pta ju̱hvo̱3̱̍ yaji̍ṣṭha̱ṁ yaṁ vā̱ghato̍ vṛ̱ṇate̍ adhva̱reṣu̍ |
a̱gniṁ viśve̍ṣāmara̱tiṁ vasū̍nāṁ sapa̱ryāmi̱ praya̍sā̱ yāmi̱ ratna̍m || 1.058.07
acchi̍drā sūno sahaso no a̱dya sto̱tṛbhyo̍ mitramaha̱ḥ śarma̍ yaccha |
agne̍ gṛ̱ṇanta̱maṁha̍sa uru̱ṣyorjo̍ napātpū̱rbhirāya̍sībhiḥ || 1.058.08
bhavā̱ varū̍thaṁ gṛṇa̱te vi̍bhāvo̱ bhavā̍ maghavanma̱ghava̍dbhya̱ḥ śarma̍ |
u̱ru̱ṣyāgne̱ aṁha̍so gṛ̱ṇanta̍ṁ prā̱tarma̱kṣū dhi̱yāva̍surjagamyāt || 1.058.09
va̱yā ida̍gne a̱gnaya̍ste a̱nye tve viśve̍ a̱mṛtā̍ mādayante |
vaiśvā̍nara̱ nābhi̍rasi kṣitī̱nāṁ sthūṇe̍va̱ janā̍ upa̱midya̍yantha || 1.059.01
mū̱rdhā di̱vo nābhi̍ra̱gniḥ pṛ̍thi̱vyā athā̍bhavadara̱tī roda̍syoḥ |
taṁ tvā̍ de̱vāso̍'janayanta de̱vaṁ vaiśvā̍nara̱ jyoti̱ridāryā̍ya || 1.059.02
ā sūrye̱ na ra̱śmayo̍ dhru̱vāso̍ vaiśvāna̱re da̍dhire̱'gnā vasū̍ni |
yā parva̍te̱ṣvoṣa̍dhīṣva̱psu yā mānu̍ṣe̱ṣvasi̱ tasya̱ rājā̍ || 1.059.03
bṛ̱ha̱tī i̍va sū̱nave̱ roda̍sī̱ giro̱ hotā̍ manu̱ṣyo̱3̱̍ na dakṣa̍ḥ |
sva̍rvate sa̱tyaśu̍ṣmāya pū̱rvīrvai̍śvāna̱rāya̱ nṛta̍māya ya̱hvīḥ || 1.059.04
di̱vaści̍tte bṛha̱to jā̍tavedo̱ vaiśvā̍nara̱ pra ri̍rice mahi̱tvam |
rājā̍ kṛṣṭī̱nāma̍si̱ mānu̍ṣīṇāṁ yu̱dhā de̱vebhyo̱ vari̍vaścakartha || 1.059.05
pra nū ma̍hi̱tvaṁ vṛ̍ṣa̱bhasya̍ voca̱ṁ yaṁ pū̱ravo̍ vṛtra̱haṇa̱ṁ saca̍nte |
vai̱śvā̱na̱ro dasyu̍ma̱gnirja̍gha̱nvā adhū̍no̱tkāṣṭhā̱ ava̱ śamba̍raṁ bhet || 1.059.06
vai̱śvā̱na̱ro ma̍hi̱mnā vi̱śvakṛ̍ṣṭirbha̱radvā̍jeṣu yaja̱to vi̱bhāvā̍ |
śā̱ta̱va̱ne̱ye śa̱tinī̍bhira̱gniḥ pu̍ruṇī̱the ja̍rate sū̱nṛtā̍vān || 1.059.07
vahni̍ṁ ya̱śasa̍ṁ vi̱datha̍sya ke̱tuṁ su̍prā̱vya̍ṁ dū̱taṁ sa̱dyoa̍rtham |
dvi̱janmā̍naṁ ra̱yimi̍va praśa̱staṁ rā̱tiṁ bha̍ra̱dbhṛga̍ve māta̱riśvā̍ || 1.060.01
a̱sya śāsu̍ru̱bhayā̍saḥ sacante ha̱viṣma̍nta u̱śijo̱ ye ca̱ martā̍ḥ |
di̱vaści̱tpūrvo̱ nya̍sādi̱ hotā̱pṛcchyo̍ vi̱śpati̍rvi̱kṣu ve̱dhāḥ || 1.060.02
taṁ navya̍sī hṛ̱da ā jāya̍mānama̱smatsu̍kī̱rtirmadhu̍jihvamaśyāḥ |
yamṛ̱tvijo̍ vṛ̱jane̱ mānu̍ṣāsa̱ḥ praya̍svanta ā̱yavo̱ jīja̍nanta || 1.060.03
u̱śikpā̍va̱ko vasu̱rmānu̍ṣeṣu̱ vare̍ṇyo̱ hotā̍dhāyi vi̱kṣu |
damū̍nā gṛ̱hapa̍ti̱rdama̱ ā a̱gnirbhu̍vadrayi̱patī̍ rayī̱ṇām || 1.060.04
taṁ tvā̍ va̱yaṁ pati̍magne rayī̱ṇāṁ pra śa̍ṁsāmo ma̱tibhi̱rgota̍māsaḥ |
ā̱śuṁ na vā̍jambha̱raṁ ma̱rjaya̍ntaḥ prā̱tarma̱kṣū dhi̱yāva̍surjagamyāt || 1.060.05
a̱smā idu̱ pra ta̱vase̍ tu̱rāya̱ prayo̱ na ha̍rmi̱ stoma̱ṁ māhi̍nāya |
ṛcī̍ṣamā̱yādhri̍gava̱ oha̱mindrā̍ya̱ brahmā̍ṇi rā̱tata̍mā || 1.061.01
a̱smā idu̱ praya̍ iva̱ pra ya̍ṁsi̱ bharā̍myāṅgū̱ṣaṁ bādhe̍ suvṛ̱kti |
indrā̍ya hṛ̱dā mana̍sā manī̱ṣā pra̱tnāya̱ patye̱ dhiyo̍ marjayanta || 1.061.02
a̱smā idu̱ tyamu̍pa̱maṁ sva̱rṣāṁ bharā̍myāṅgū̱ṣamā̱sye̍na |
maṁhi̍ṣṭha̱maccho̍ktibhirmatī̱nāṁ su̍vṛ̱ktibhi̍ḥ sū̱riṁ vā̍vṛ̱dhadhyai̍ || 1.061.03
a̱smā idu̱ stoma̱ṁ saṁ hi̍nomi̱ ratha̱ṁ na taṣṭe̍va̱ tatsi̍nāya |
gira̍śca̱ girvā̍hase suvṛ̱ktīndrā̍ya viśvami̱nvaṁ medhi̍rāya || 1.061.04
a̱smā idu̱ sapti̍miva śrava̱syendrā̍yā̱rkaṁ ju̱hvā̱3̱̍ sama̍ñje |
vī̱raṁ dā̱nauka̍saṁ va̱ndadhyai̍ pu̱rāṁ gū̱rtaśra̍vasaṁ da̱rmāṇa̍m || 1.061.05
a̱smā idu̱ tvaṣṭā̍ takṣa̱dvajra̱ṁ svapa̍stamaṁ sva̱ryaṁ1̱̍ raṇā̍ya |
vṛ̱trasya̍ cidvi̱dadyena̱ marma̍ tu̱jannīśā̍nastuja̱tā ki̍ye̱dhāḥ || 1.061.06
a̱syedu̍ mā̱tuḥ sava̍neṣu sa̱dyo ma̱haḥ pi̱tuṁ pa̍pi̱vāñcārvannā̍ |
mu̱ṣā̱yadviṣṇu̍ḥ paca̱taṁ sahī̍yā̱nvidhya̍dvarā̱haṁ ti̱ro adri̱mastā̍ || 1.061.07
a̱smā idu̱ gnāści̍dde̱vapa̍tnī̱rindrā̍yā̱rkama̍hi̱hatya̍ ūvuḥ |
pari̱ dyāvā̍pṛthi̱vī ja̍bhra u̱rvī nāsya̱ te ma̍hi̱māna̱ṁ pari̍ ṣṭaḥ || 1.061.08
a̱syede̱va pra ri̍rice mahi̱tvaṁ di̱vaspṛ̍thi̱vyāḥ parya̱ntari̍kṣāt |
sva̱rāḻindro̱ dama̱ ā vi̱śvagū̍rtaḥ sva̱rirama̍tro vavakṣe̱ raṇā̍ya || 1.061.09
a̱syede̱va śava̍sā śu̱ṣanta̱ṁ vi vṛ̍śca̱dvajre̍ṇa vṛ̱tramindra̍ḥ |
gā na vrā̱ṇā a̱vanī̍ramuñcada̱bhi śravo̍ dā̱vane̱ sace̍tāḥ || 1.061.10
a̱syedu̍ tve̱ṣasā̍ ranta̱ sindha̍va̱ḥ pari̱ yadvajre̍ṇa sī̱maya̍cchat |
ī̱śā̱na̱kṛddā̱śuṣe̍ daśa̱syantu̱rvīta̍ye gā̱dhaṁ tu̱rvaṇi̍ḥ kaḥ || 1.061.11
a̱smā idu̱ pra bha̍rā̱ tūtu̍jāno vṛ̱trāya̱ vajra̱mīśā̍naḥ kiye̱dhāḥ |
gorna parva̱ vi ra̍dā tira̱śceṣya̱nnarṇā̍ṁsya̱pāṁ ca̱radhyai̍ || 1.061.12
a̱syedu̱ pra brū̍hi pū̱rvyāṇi̍ tu̱rasya̱ karmā̍ṇi̱ navya̍ u̱kthaiḥ |
yu̱dhe yadi̍ṣṇā̱na āyu̍dhānyṛghā̱yamā̍ṇo niri̱ṇāti̱ śatrū̍n || 1.061.13
a̱syedu̍ bhi̱yā gi̱raya̍śca dṛ̱ḻhā dyāvā̍ ca̱ bhūmā̍ ja̱nuṣa̍stujete |
upo̍ ve̱nasya̱ jogu̍vāna o̱ṇiṁ sa̱dyo bhu̍vadvī̱ryā̍ya no̱dhāḥ || 1.061.14
a̱smā idu̱ tyadanu̍ dāyyeṣā̱meko̱ yadva̱vne bhūre̱rīśā̍naḥ |
praita̍śa̱ṁ sūrye̍ paspṛdhā̱naṁ sauva̍śvye̱ suṣvi̍māva̱dindra̍ḥ || 1.061.15
e̱vā te̍ hāriyojanā suvṛ̱ktīndra̱ brahmā̍ṇi̱ gota̍māso akran |
aiṣu̍ vi̱śvape̍śasa̱ṁ dhiya̍ṁ dhāḥ prā̱tarma̱kṣū dhi̱yāva̍surjagamyāt || 1.061.16
pra ma̍nmahe śavasā̱nāya̍ śū̱ṣamā̍ṅgū̱ṣaṁ girva̍ṇase aṅgira̱svat |
su̱vṛ̱ktibhi̍ḥ stuva̱ta ṛ̍gmi̱yāyārcā̍mā̱rkaṁ nare̱ viśru̍tāya || 1.062.01
pra vo̍ ma̱he mahi̱ namo̍ bharadhvamāṅgū̱ṣya̍ṁ śavasā̱nāya̱ sāma̍ |
yenā̍ na̱ḥ pūrve̍ pi̱tara̍ḥ pada̱jñā arca̍nto̱ aṅgi̍raso̱ gā avi̍ndan || 1.062.02
indra̱syāṅgi̍rasāṁ ce̱ṣṭau vi̱datsa̱ramā̱ tana̍yāya dhā̱sim |
bṛha̱spati̍rbhi̱nadadri̍ṁ vi̱dadgāḥ samu̱sriyā̍bhirvāvaśanta̱ nara̍ḥ || 1.062.03
sa su̱ṣṭubhā̱ sa stu̱bhā sa̱pta viprai̍ḥ sva̱reṇādri̍ṁ sva̱ryo̱3̱̍ nava̍gvaiḥ |
sa̱ra̱ṇyubhi̍ḥ phali̱gami̍ndra śakra va̱laṁ rave̍ṇa darayo̱ daśa̍gvaiḥ || 1.062.04
gṛ̱ṇā̱no aṅgi̍robhirdasma̱ vi va̍ru̱ṣasā̱ sūrye̍ṇa̱ gobhi̱randha̍ḥ |
vi bhūmyā̍ aprathaya indra̱ sānu̍ di̱vo raja̱ upa̍ramastabhāyaḥ || 1.062.05
tadu̱ praya̍kṣatamamasya̱ karma̍ da̱smasya̱ cāru̍tamamasti̱ daṁsa̍ḥ |
u̱pa̱hva̱re yadupa̍rā̱ api̍nva̱nmadhva̍rṇaso na̱dya1̱̍ścata̍sraḥ || 1.062.06
dvi̱tā vi va̍vre sa̱najā̱ sanī̍ḻe a̱yāsya̱ḥ stava̍mānebhira̱rkaiḥ |
bhago̱ na mene̍ para̱me vyo̍ma̱nnadhā̍raya̱droda̍sī su̱daṁsā̍ḥ || 1.062.07
sa̱nāddiva̱ṁ pari̱ bhūmā̱ virū̍pe puna̱rbhuvā̍ yuva̱tī svebhi̱revai̍ḥ |
kṛ̱ṣṇebhi̍ra̱ktoṣā ruśa̍dbhi̱rvapu̍rbhi̱rā ca̍rato a̱nyānyā̍ || 1.062.08
sane̍mi sa̱khyaṁ sva̍pa̱syamā̍naḥ sū̱nurdā̍dhāra̱ śava̍sā su̱daṁsā̍ḥ |
ā̱māsu̍ ciddadhiṣe pa̱kvama̱ntaḥ paya̍ḥ kṛ̱ṣṇāsu̱ ruśa̱drohi̍ṇīṣu || 1.062.09
sa̱nātsanī̍ḻā a̱vanī̍ravā̱tā vra̱tā ra̍kṣante a̱mṛtā̱ḥ saho̍bhiḥ |
pu̱rū sa̱hasrā̱ jana̍yo̱ na patnī̍rduva̱syanti̱ svasā̍ro̱ ahra̍yāṇam || 1.062.10
sa̱nā̱yuvo̱ nama̍sā̱ navyo̍ a̱rkairva̍sū̱yavo̍ ma̱tayo̍ dasma dadruḥ |
pati̱ṁ na patnī̍ruśa̱tīru̱śanta̍ṁ spṛ̱śanti̍ tvā śavasāvanmanī̱ṣāḥ || 1.062.11
sa̱nāde̱va tava̱ rāyo̱ gabha̍stau̱ na kṣīya̍nte̱ nopa̍ dasyanti dasma |
dyu̱mā a̍si̱ kratu̍mā indra̱ dhīra̱ḥ śikṣā̍ śacīva̱stava̍ na̱ḥ śacī̍bhiḥ || 1.062.12
sa̱nā̱ya̱te gota̍ma indra̱ navya̱mata̍kṣa̱dbrahma̍ hari̱yoja̍nāya |
su̱nī̱thāya̍ naḥ śavasāna no̱dhāḥ prā̱tarma̱kṣū dhi̱yāva̍surjagamyāt || 1.062.13
tvaṁ ma̱hā i̍ndra̱ yo ha̱ śuṣmai̱rdyāvā̍ jajñā̱naḥ pṛ̍thi̱vī ame̍ dhāḥ |
yaddha̍ te̱ viśvā̍ gi̱raya̍ści̱dabhvā̍ bhi̱yā dṛ̱ḻhāsa̍ḥ ki̱raṇā̱ naija̍n || 1.063.01
ā yaddharī̍ indra̱ vivra̍tā̱ verā te̱ vajra̍ṁ jari̱tā bā̱hvordhā̍t |
yenā̍viharyatakrato a̱mitrā̱npura̍ i̱ṣṇāsi̍ puruhūta pū̱rvīḥ || 1.063.02
tvaṁ sa̱tya i̍ndra dhṛ̱ṣṇure̱tāntvamṛ̍bhu̱kṣā narya̱stvaṁ ṣāṭ |
tvaṁ śuṣṇa̍ṁ vṛ̱jane̍ pṛ̱kṣa ā̱ṇau yūne̱ kutsā̍ya dyu̱mate̱ sacā̍han || 1.063.03
tvaṁ ha̱ tyadi̍ndra codī̱ḥ sakhā̍ vṛ̱traṁ yadva̍jrinvṛṣakarmannu̱bhnāḥ |
yaddha̍ śūra vṛṣamaṇaḥ parā̱cairvi dasyū̱ryonā̱vakṛ̍to vṛthā̱ṣāṭ || 1.063.04
tvaṁ ha̱ tyadi̱ndrāri̍ṣaṇyandṛ̱ḻhasya̍ ci̱nmartā̍nā̱maju̍ṣṭau |
vya1̱̍smadā kāṣṭhā̱ arva̍te vargha̱neva̍ vajriñchnathihya̱mitrā̍n || 1.063.05
tvāṁ ha̱ tyadi̱ndrārṇa̍sātau̱ sva̍rmīḻhe̱ nara̍ ā̱jā ha̍vante |
tava̍ svadhāva i̱yamā sa̍ma̱rya ū̱tirvāje̍ṣvata̱sāyyā̍ bhūt || 1.063.06
tvaṁ ha̱ tyadi̍ndra sa̱pta yudhya̱npuro̍ vajrinpuru̱kutsā̍ya dardaḥ |
ba̱rhirna yatsu̱dāse̱ vṛthā̱ varga̱ṁho rā̍ja̱nvari̍vaḥ pū̱rave̍ kaḥ || 1.063.07
tvaṁ tyāṁ na̍ indra deva ci̱trāmiṣa̱māpo̱ na pī̍paya̱ḥ pari̍jman |
yayā̍ śūra̱ pratya̱smabhya̱ṁ yaṁsi̱ tmana̱mūrja̱ṁ na vi̱śvadha̱ kṣara̍dhyai || 1.063.08
akā̍ri ta indra̱ gota̍mebhi̱rbrahmā̱ṇyoktā̱ nama̍sā̱ hari̍bhyām |
su̱peśa̍sa̱ṁ vāja̱mā bha̍rā naḥ prā̱tarma̱kṣū dhi̱yāva̍surjagamyāt || 1.063.09
vṛṣṇe̱ śardhā̍ya̱ suma̍khāya ve̱dhase̱ nodha̍ḥ suvṛ̱ktiṁ pra bha̍rā ma̱rudbhya̍ḥ |
a̱po na dhīro̱ mana̍sā su̱hastyo̱ gira̱ḥ sama̍ñje vi̱dathe̍ṣvā̱bhuva̍ḥ || 1.064.01
te ja̍jñire di̱va ṛ̱ṣvāsa̍ u̱kṣaṇo̍ ru̱drasya̱ maryā̱ asu̍rā are̱pasa̍ḥ |
pā̱va̱kāsa̱ḥ śuca̍ya̱ḥ sūryā̍ iva̱ satvā̍no̱ na dra̱psino̍ gho̱rava̍rpasaḥ || 1.064.02
yuvā̍no ru̱drā a̱jarā̍ abho̱gghano̍ vava̱kṣuradhri̍gāva̱ḥ parva̍tā iva |
dṛ̱ḻhā ci̱dviśvā̱ bhuva̍nāni̱ pārthi̍vā̱ pra cyā̍vayanti di̱vyāni̍ ma̱jmanā̍ || 1.064.03
ci̱traira̱ñjibhi̱rvapu̍ṣe̱ vya̍ñjate̱ vakṣa̍ssu ru̱kmā adhi̍ yetire śu̱bhe |
aṁse̍ṣveṣā̱ṁ ni mi̍mṛkṣurṛ̱ṣṭaya̍ḥ sā̱kaṁ ja̍jñire sva̱dhayā̍ di̱vo nara̍ḥ || 1.064.04
ī̱śā̱na̱kṛto̱ dhuna̍yo ri̱śāda̍so̱ vātā̍nvi̱dyuta̱stavi̍ṣībhirakrata |
du̱hantyūdha̍rdi̱vyāni̱ dhūta̍yo̱ bhūmi̍ṁ pinvanti̱ paya̍sā̱ pari̍jrayaḥ || 1.064.05
pinva̍ntya̱po ma̱ruta̍ḥ su̱dāna̍va̱ḥ payo̍ ghṛ̱tava̍dvi̱dathe̍ṣvā̱bhuva̍ḥ |
atya̱ṁ na mi̱he vi na̍yanti vā̱jina̱mutsa̍ṁ duhanti sta̱naya̍nta̱makṣi̍tam || 1.064.06
ma̱hi̱ṣāso̍ mā̱yina̍ści̱trabhā̍navo gi̱rayo̱ na svata̍vaso raghu̱ṣyada̍ḥ |
mṛ̱gā i̍va ha̱stina̍ḥ khādathā̱ vanā̱ yadāru̍ṇīṣu̱ tavi̍ṣī̱rayu̍gdhvam || 1.064.07
si̱ṁhā i̍va nānadati̱ prace̍tasaḥ pi̱śā i̍va su̱piśo̍ vi̱śvave̍dasaḥ |
kṣapo̱ jinva̍nta̱ḥ pṛṣa̍tībhirṛ̱ṣṭibhi̱ḥ samitsa̱bādha̱ḥ śava̱sāhi̍manyavaḥ || 1.064.08
roda̍sī̱ ā va̍datā gaṇaśriyo̱ nṛṣā̍caḥ śūrā̱ḥ śava̱sāhi̍manyavaḥ |
ā va̱ndhure̍ṣva̱mati̱rna da̍rśa̱tā vi̱dyunna ta̍sthau maruto̱ rathe̍ṣu vaḥ || 1.064.09
vi̱śvave̍daso ra̱yibhi̱ḥ samo̍kasa̱ḥ sammi̍ślāsa̱stavi̍ṣībhirvira̱pśina̍ḥ |
astā̍ra̱ iṣu̍ṁ dadhire̱ gabha̍styorana̱ntaśu̍ṣmā̱ vṛṣa̍khādayo̱ nara̍ḥ || 1.064.10
hi̱ra̱ṇyaye̍bhiḥ pa̱vibhi̍ḥ payo̱vṛdha̱ ujji̍ghnanta āpa̱thyo̱3̱̍ na parva̍tān |
ma̱khā a̱yāsa̍ḥ sva̱sṛto̍ dhruva̱cyuto̍ dudhra̱kṛto̍ ma̱ruto̱ bhrāja̍dṛṣṭayaḥ || 1.064.11
ghṛṣu̍ṁ pāva̱kaṁ va̱nina̱ṁ vica̍rṣaṇiṁ ru̱drasya̍ sū̱nuṁ ha̱vasā̍ gṛṇīmasi |
ra̱ja̱stura̍ṁ ta̱vasa̱ṁ māru̍taṁ ga̱ṇamṛ̍jī̱ṣiṇa̱ṁ vṛṣa̍ṇaṁ saścata śri̱ye || 1.064.12
pra nū sa marta̱ḥ śava̍sā̱ janā̱ ati̍ ta̱sthau va̍ ū̱tī ma̍ruto̱ yamāva̍ta |
arva̍dbhi̱rvāja̍ṁ bharate̱ dhanā̱ nṛbhi̍rā̱pṛcchya̱ṁ kratu̱mā kṣe̍ti̱ puṣya̍ti || 1.064.13
ca̱rkṛtya̍ṁ marutaḥ pṛ̱tsu du̱ṣṭara̍ṁ dyu̱manta̱ṁ śuṣma̍ṁ ma̱ghava̍tsu dhattana |
dha̱na̱spṛta̍mu̱kthya̍ṁ vi̱śvaca̍rṣaṇiṁ to̱kaṁ pu̍ṣyema̱ tana̍yaṁ śa̱taṁ himā̍ḥ || 1.064.14
nū ṣṭhi̱raṁ ma̍ruto vī̱rava̍ntamṛtī̱ṣāha̍ṁ ra̱yima̱smāsu̍ dhatta |
sa̱ha̱sriṇa̍ṁ śa̱tina̍ṁ śūśu̱vāṁsa̍ṁ prā̱tarma̱kṣū dhi̱yāva̍surjagamyāt || 1.064.15
pa̱śvā na tā̱yuṁ guhā̱ cata̍nta̱ṁ namo̍ yujā̱naṁ namo̱ vaha̍ntam || 1.065.01
sa̱joṣā̱ dhīrā̍ḥ pa̱dairanu̍ gma̱nnupa̍ tvā sīda̱nviśve̱ yaja̍trāḥ || 1.065.02
ṛ̱tasya̍ de̱vā anu̍ vra̱tā gu̱rbhuva̱tpari̍ṣṭi̱rdyaurna bhūma̍ || 1.065.03
vardha̍ntī̱māpa̍ḥ pa̱nvā suśi̍śvimṛ̱tasya̱ yonā̱ garbhe̱ sujā̍tam || 1.065.04
pu̱ṣṭirna ra̱ṇvā kṣi̱tirna pṛ̱thvī gi̱rirna bhujma̱ kṣodo̱ na śa̱mbhu || 1.065.05
atyo̱ nājma̱nsarga̍pratakta̱ḥ sindhu̱rna kṣoda̱ḥ ka ī̍ṁ varāte || 1.065.06
jā̱miḥ sindhū̍nā̱ṁ bhrāte̍va̱ svasrā̱mibhyā̱nna rājā̱ vanā̍nyatti || 1.065.07
yadvāta̍jūto̱ vanā̱ vyasthā̍da̱gnirha̍ dāti̱ romā̍ pṛthi̱vyāḥ || 1.065.08
śvasi̍tya̱psu ha̱ṁso na sīda̱nkratvā̱ ceti̍ṣṭho vi̱śāmu̍ṣa̱rbhut || 1.065.09
somo̱ na ve̱dhā ṛ̱tapra̍jātaḥ pa̱śurna śiśvā̍ vi̱bhurdū̱rebhā̍ḥ || 1.065.10
ra̱yirna ci̱trā sūro̱ na sa̱ṁdṛgāyu̱rna prā̱ṇo nityo̱ na sū̱nuḥ || 1.066.01
takvā̱ na bhūrṇi̱rvanā̍ siṣakti̱ payo̱ na dhe̱nuḥ śuci̍rvi̱bhāvā̍ || 1.066.02
dā̱dhāra̱ kṣema̱moko̱ na ra̱ṇvo yavo̱ na pa̱kvo jetā̱ janā̍nām || 1.066.03
ṛṣi̱rna stubhvā̍ vi̱kṣu pra̍śa̱sto vā̱jī na prī̱to vayo̍ dadhāti || 1.066.04
du̱roka̍śoci̱ḥ kratu̱rna nityo̍ jā̱yeva̱ yonā̱vara̱ṁ viśva̍smai || 1.066.05
ci̱tro yadabhrā̍ṭ chve̱to na vi̱kṣu ratho̱ na ru̱kmī tve̱ṣaḥ sa̱matsu̍ || 1.066.06
sene̍va sṛ̱ṣṭāma̍ṁ dadhā̱tyastu̱rna di̱dyuttve̱ṣapra̍tīkā || 1.066.07
ya̱mo ha̍ jā̱to ya̱mo jani̍tvaṁ jā̱raḥ ka̱nīnā̱ṁ pati̱rjanī̍nām || 1.066.08
taṁ va̍śca̱rāthā̍ va̱yaṁ va̍sa̱tyāsta̱ṁ na gāvo̱ nakṣa̍nta i̱ddham || 1.066.09
sindhu̱rna kṣoda̱ḥ pra nīcī̍raino̱nnava̍nta̱ gāva̱ḥ sva1̱̍rdṛśī̍ke || 1.066.10
vane̍ṣu jā̱yurmarte̍ṣu mi̱tro vṛ̍ṇī̱te śru̱ṣṭiṁ rāje̍vāju̱ryam || 1.067.01
kṣemo̱ na sā̱dhuḥ kratu̱rna bha̱dro bhuva̍tsvā̱dhīrhotā̍ havya̱vāṭ || 1.067.02
haste̱ dadhā̍no nṛ̱mṇā viśvā̱nyame̍ de̱vāndhā̱dguhā̍ ni̱ṣīda̍n || 1.067.03
vi̱dantī̱matra̱ naro̍ dhiya̱ṁdhā hṛ̱dā yatta̱ṣṭānmantrā̱ aśa̍ṁsan || 1.067.04
a̱jo na kṣāṁ dā̱dhāra̍ pṛthi̱vīṁ ta̱stambha̱ dyāṁ mantre̍bhiḥ sa̱tyaiḥ || 1.067.05
pri̱yā pa̱dāni̍ pa̱śvo ni pā̍hi vi̱śvāyu̍ragne gu̱hā guha̍ṁ gāḥ || 1.067.06
ya ī̍ṁ ci̱keta̱ guhā̱ bhava̍nta̱mā yaḥ sa̱sāda̱ dhārā̍mṛ̱tasya̍ || 1.067.07
vi ye cṛ̱tantyṛ̱tā sapa̍nta̱ ādidvasū̍ni̱ pra va̍vācāsmai || 1.067.08
vi yo vī̱rutsu̱ rodha̍nmahi̱tvota pra̱jā u̱ta pra̱sūṣva̱ntaḥ || 1.067.09
citti̍ra̱pāṁ dame̍ vi̱śvāyu̱ḥ sadme̍va̱ dhīrā̍ḥ sa̱mmāya̍ cakruḥ || 1.067.10
śrī̱ṇannupa̍ sthā̱ddiva̍ṁ bhura̱ṇyuḥ sthā̱tuśca̱ratha̍ma̱ktūnvyū̍rṇot || 1.068.01
pari̱ yade̍ṣā̱meko̱ viśve̍ṣā̱ṁ bhuva̍dde̱vo de̱vānā̍ṁ mahi̱tvā || 1.068.02
āditte̱ viśve̱ kratu̍ṁ juṣanta̱ śuṣkā̱dyadde̍va jī̱vo jani̍ṣṭhāḥ || 1.068.03
bhaja̍nta̱ viśve̍ deva̱tvaṁ nāma̍ ṛ̱taṁ sapa̍nto a̱mṛta̱mevai̍ḥ || 1.068.04
ṛ̱tasya̱ preṣā̍ ṛ̱tasya̍ dhī̱tirvi̱śvāyu̱rviśve̱ apā̍ṁsi cakruḥ || 1.068.05
yastubhya̱ṁ dāśā̱dyo vā̍ te̱ śikṣā̱ttasmai̍ ciki̱tvānra̱yiṁ da̍yasva || 1.068.06
hotā̱ niṣa̍tto̱ mano̱rapa̍tye̱ sa ci̱nnvā̍sā̱ṁ patī̍ rayī̱ṇām || 1.068.07
i̱cchanta̱ reto̍ mi̱thasta̱nūṣu̱ saṁ jā̍nata̱ svairdakṣai̱ramū̍rāḥ || 1.068.08
pi̱turna pu̱trāḥ kratu̍ṁ juṣanta̱ śroṣa̱nye a̍sya̱ śāsa̍ṁ tu̱rāsa̍ḥ || 1.068.09
vi rāya̍ aurṇo̱ddura̍ḥ puru̱kṣuḥ pi̱peśa̱ nāka̱ṁ stṛbhi̱rdamū̍nāḥ || 1.068.10
śu̱kraḥ śu̍śu̱kvā u̱ṣo na jā̱raḥ pa̱prā sa̍mī̱cī di̱vo na jyoti̍ḥ || 1.069.01
pari̱ prajā̍ta̱ḥ kratvā̍ babhūtha̱ bhuvo̍ de̱vānā̍ṁ pi̱tā pu̱traḥ san || 1.069.02
ve̱dhā adṛ̍pto a̱gnirvi̍jā̱nannūdha̱rna gonā̱ṁ svādmā̍ pitū̱nām || 1.069.03
jane̱ na śeva̍ ā̱hūrya̱ḥ sanmadhye̱ niṣa̍tto ra̱ṇvo du̍ro̱ṇe || 1.069.04
pu̱tro na jā̱to ra̱ṇvo du̍ro̱ṇe vā̱jī na prī̱to viśo̱ vi tā̍rīt || 1.069.05
viśo̱ yadahve̱ nṛbhi̱ḥ sanī̍ḻā a̱gnirde̍va̱tvā viśvā̍nyaśyāḥ || 1.069.06
naki̍ṣṭa e̱tā vra̱tā mi̍nanti̱ nṛbhyo̱ yade̱bhyaḥ śru̱ṣṭiṁ ca̱kartha̍ || 1.069.07
tattu te̱ daṁso̱ yadaha̍nsamā̱nairnṛbhi̱ryadyu̱kto vi̱ve rapā̍ṁsi || 1.069.08
u̱ṣo na jā̱ro vi̱bhāvo̱sraḥ saṁjñā̍tarūpa̱ścike̍tadasmai || 1.069.09
tmanā̱ vaha̍nto̱ duro̱ vyṛ̍ṇva̱nnava̍nta̱ viśve̱ sva1̱̍rdṛśī̍ke || 1.069.10
va̱nema̍ pū̱rvīra̱ryo ma̍nī̱ṣā a̱gniḥ su̱śoko̱ viśvā̍nyaśyāḥ || 1.070.01
ā daivyā̍ni vra̱tā ci̍ki̱tvānā mānu̍ṣasya̱ jana̍sya̱ janma̍ || 1.070.02
garbho̱ yo a̱pāṁ garbho̱ vanā̍nā̱ṁ garbha̍śca sthā̱tāṁ garbha̍śca̱rathā̍m || 1.070.03
adrau̍ cidasmā a̱ntardu̍ro̱ṇe vi̱śāṁ na viśvo̍ a̱mṛta̍ḥ svā̱dhīḥ || 1.070.04
sa hi kṣa̱pāvā̍ a̱gnī ra̍yī̱ṇāṁ dāśa̱dyo a̍smā̱ ara̍ṁ sū̱ktaiḥ || 1.070.05
e̱tā ci̍kitvo̱ bhūmā̱ ni pā̍hi de̱vānā̱ṁ janma̱ martā̍śca vi̱dvān || 1.070.06
vardhā̱nyaṁ pū̱rvīḥ kṣa̱po virū̍pāḥ sthā̱tuśca̱ ratha̍mṛ̱tapra̍vītam || 1.070.07
arā̍dhi̱ hotā̱ sva1̱̍rniṣa̍ttaḥ kṛ̱ṇvanviśvā̱nyapā̍ṁsi sa̱tyā || 1.070.08
goṣu̱ praśa̍sti̱ṁ vane̍ṣu dhiṣe̱ bhara̍nta̱ viśve̍ ba̱liṁ sva̍rṇaḥ || 1.070.09
vi tvā̱ nara̍ḥ puru̱trā sa̍paryanpi̱turna jivre̱rvi vedo̍ bharanta || 1.070.10
sā̱dhurna gṛ̱dhnuraste̍va̱ śūro̱ yāte̍va bhī̱mastve̱ṣaḥ sa̱matsu̍ || 1.070.11
upa̱ pra ji̍nvannuśa̱tīru̱śanta̱ṁ pati̱ṁ na nitya̱ṁ jana̍ya̱ḥ sanī̍ḻāḥ |
svasā̍ra̱ḥ śyāvī̱maru̍ṣīmajuṣrañci̱tramu̱cchantī̍mu̱ṣasa̱ṁ na gāva̍ḥ || 1.071.01
vī̱ḻu ci̍ddṛ̱ḻhā pi̱taro̍ na u̱kthairadri̍ṁ ruja̱nnaṅgi̍raso̱ rave̍ṇa |
ca̱krurdi̱vo bṛ̍ha̱to gā̱tuma̱sme aha̱ḥ sva̍rvividuḥ ke̱tumu̱srāḥ || 1.071.02
dadha̍nnṛ̱taṁ dha̱naya̍nnasya dhī̱timādida̱ryo di̍dhi̱ṣvo̱3̱̍ vibhṛ̍trāḥ |
atṛ̍ṣyantīra̱paso̍ ya̱ntyacchā̍ de̱vāñjanma̱ praya̍sā va̱rdhaya̍ntīḥ || 1.071.03
mathī̱dyadī̱ṁ vibhṛ̍to māta̱riśvā̍ gṛ̱hegṛ̍he śye̱to jenyo̱ bhūt |
ādī̱ṁ rājñe̱ na sahī̍yase̱ sacā̱ sannā dū̱tyaṁ1̱̍ bhṛga̍vāṇo vivāya || 1.071.04
ma̱he yatpi̱tra ī̱ṁ rasa̍ṁ di̱ve karava̍ tsaratpṛśa̱nya̍ściki̱tvān |
sṛ̱jadastā̍ dhṛṣa̱tā di̱dyuma̍smai̱ svāyā̍ṁ de̱vo du̍hi̱tari̱ tviṣi̍ṁ dhāt || 1.071.05
sva ā yastubhya̱ṁ dama̱ ā vi̱bhāti̱ namo̍ vā̱ dāśā̍duśa̱to anu̱ dyūn |
vardho̍ agne̱ vayo̍ asya dvi̱barhā̱ yāsa̍drā̱yā sa̱ratha̱ṁ yaṁ ju̱nāsi̍ || 1.071.06
a̱gniṁ viśvā̍ a̱bhi pṛkṣa̍ḥ sacante samu̱draṁ na sra̱vata̍ḥ sa̱pta ya̱hvīḥ |
na jā̱mibhi̱rvi ci̍kite̱ vayo̍ no vi̱dā de̱veṣu̱ prama̍tiṁ ciki̱tvān || 1.071.07
ā yadi̱ṣe nṛ̱pati̱ṁ teja̱ āna̱ṭ chuci̱ reto̱ niṣi̍kta̱ṁ dyaura̱bhīke̍ |
a̱gniḥ śardha̍manava̱dyaṁ yuvā̍naṁ svā̱dhya̍ṁ janayatsū̱daya̍cca || 1.071.08
mano̱ na yo'dhva̍naḥ sa̱dya etyeka̍ḥ sa̱trā sūro̱ vasva̍ īśe |
rājā̍nā mi̱trāvaru̍ṇā supā̱ṇī goṣu̍ pri̱yama̱mṛta̱ṁ rakṣa̍māṇā || 1.071.09
mā no̍ agne sa̱khyā pitryā̍ṇi̱ pra ma̍rṣiṣṭhā a̱bhi vi̱duṣka̱viḥ san |
nabho̱ na rū̱paṁ ja̍ri̱mā mi̍nāti pu̱rā tasyā̍ a̱bhiśa̍ste̱radhī̍hi || 1.071.10
ni kāvyā̍ ve̱dhasa̱ḥ śaśva̍taska̱rhaste̱ dadhā̍no̱ naryā̍ pu̱rūṇi̍ |
a̱gnirbhu̍vadrayi̱patī̍ rayī̱ṇāṁ sa̱trā ca̍krā̱ṇo a̱mṛtā̍ni̱ viśvā̍ || 1.072.01
a̱sme va̱tsaṁ pari̱ ṣanta̱ṁ na vi̍ndanni̱cchanto̱ viśve̍ a̱mṛtā̱ amū̍rāḥ |
śra̱ma̱yuva̍ḥ pada̱vyo̍ dhiya̱ṁdhāsta̱sthuḥ pa̱de pa̍ra̱me cārva̱gneḥ || 1.072.02
ti̱sro yada̍gne śa̱rada̱stvāmicchuci̍ṁ ghṛ̱tena̱ śuca̍yaḥ sapa̱ryān |
nāmā̍ni ciddadhire ya̱jñiyā̱nyasū̍dayanta ta̱nva1̱̍ḥ sujā̍tāḥ || 1.072.03
ā roda̍sī bṛha̱tī vevi̍dānā̱ḥ pra ru̱driyā̍ jabhrire ya̱jñiyā̍saḥ |
vi̱danmarto̍ ne̱madhi̍tā ciki̱tvāna̱gniṁ pa̱de pa̍ra̱me ta̍sthi̱vāṁsa̍m || 1.072.04
sa̱ṁjā̱nā̱nā upa̍ sīdannabhi̱jñu patnī̍vanto nama̱sya̍ṁ namasyan |
ri̱ri̱kvāṁsa̍sta̱nva̍ḥ kṛṇvata̱ svāḥ sakhā̱ sakhyu̍rni̱miṣi̱ rakṣa̍māṇāḥ || 1.072.05
triḥ sa̱pta yadguhyā̍ni̱ tve itpa̱dāvi̍da̱nnihi̍tā ya̱jñiyā̍saḥ |
tebhī̍ rakṣante a̱mṛta̍ṁ sa̱joṣā̍ḥ pa̱śūñca̍ sthā̱tṝñca̱ratha̍ṁ ca pāhi || 1.072.06
vi̱dvā a̍gne va̱yunā̍ni kṣitī̱nāṁ vyā̍nu̱ṣakchu̱rudho̍ jī̱vase̍ dhāḥ |
a̱nta̱rvi̱dvā adhva̍no deva̱yānā̱nata̍ndro dū̱to a̍bhavo havi̱rvāṭ || 1.072.07
svā̱dhyo̍ di̱va ā sa̱pta ya̱hvī rā̱yo duro̱ vyṛ̍ta̱jñā a̍jānan |
vi̱dadgavya̍ṁ sa̱ramā̍ dṛ̱ḻhamū̱rvaṁ yenā̱ nu ka̱ṁ mānu̍ṣī̱ bhoja̍te̱ viṭ || 1.072.08
ā ye viśvā̍ svapa̱tyāni̍ ta̱sthuḥ kṛ̍ṇvā̱nāso̍ amṛta̱tvāya̍ gā̱tum |
ma̱hnā ma̱hadbhi̍ḥ pṛthi̱vī vi ta̍sthe mā̱tā pu̱trairadi̍ti̱rdhāya̍se̱ veḥ || 1.072.09
adhi̱ śriya̱ṁ ni da̍dhu̱ścāru̍masmindi̱vo yada̱kṣī a̱mṛtā̱ akṛ̍ṇvan |
adha̍ kṣaranti̱ sindha̍vo̱ na sṛ̱ṣṭāḥ pra nīcī̍ragne̱ aru̍ṣīrajānan || 1.072.10
ra̱yirna yaḥ pi̍tṛvi̱tto va̍yo̱dhāḥ su̱praṇī̍tiściki̱tuṣo̱ na śāsu̍ḥ |
syo̱na̱śīrati̍thi̱rna prī̍ṇā̱no hote̍va̱ sadma̍ vidha̱to vi tā̍rīt || 1.073.01
de̱vo na yaḥ sa̍vi̱tā sa̱tyama̍nmā̱ kratvā̍ ni̱pāti̍ vṛ̱janā̍ni̱ viśvā̍ |
pu̱ru̱pra̱śa̱sto a̱mati̱rna sa̱tya ā̱tmeva̱ śevo̍ didhi̱ṣāyyo̍ bhūt || 1.073.02
de̱vo na yaḥ pṛ̍thi̱vīṁ vi̱śvadhā̍yā upa̱kṣeti̍ hi̱tami̍tro̱ na rājā̍ |
pu̱ra̱ḥsada̍ḥ śarma̱sado̱ na vī̱rā a̍nava̱dyā pati̍juṣṭeva̱ nārī̍ || 1.073.03
taṁ tvā̱ naro̱ dama̱ ā nitya̍mi̱ddhamagne̱ saca̍nta kṣi̱tiṣu̍ dhru̱vāsu̍ |
adhi̍ dyu̱mnaṁ ni da̍dhu̱rbhūrya̍smi̱nbhavā̍ vi̱śvāyu̍rdha̱ruṇo̍ rayī̱ṇām || 1.073.04
vi pṛkṣo̍ agne ma̱ghavā̍no aśyu̱rvi sū̱rayo̱ dada̍to̱ viśva̱māyu̍ḥ |
sa̱nema̱ vāja̍ṁ sami̱theṣva̱ryo bhā̱gaṁ de̱veṣu̱ śrava̍se̱ dadhā̍nāḥ || 1.073.05
ṛ̱tasya̱ hi dhe̱navo̍ vāvaśā̱nāḥ smadū̍dhnīḥ pī̱paya̍nta̱ dyubha̍ktāḥ |
pa̱rā̱vata̍ḥ suma̱tiṁ bhikṣa̍māṇā̱ vi sindha̍vaḥ sa̱mayā̍ sasru̱radri̍m || 1.073.06
tve a̍gne suma̱tiṁ bhikṣa̍māṇā di̱vi śravo̍ dadhire ya̱jñiyā̍saḥ |
naktā̍ ca ca̱kruru̱ṣasā̱ virū̍pe kṛ̱ṣṇaṁ ca̱ varṇa̍maru̱ṇaṁ ca̱ saṁ dhu̍ḥ || 1.073.07
yānrā̱ye martā̱nsuṣū̍do agne̱ te syā̍ma ma̱ghavā̍no va̱yaṁ ca̍ |
chā̱yeva̱ viśva̱ṁ bhuva̍naṁ sisakṣyāpapri̱vānroda̍sī a̱ntari̍kṣam || 1.073.08
arva̍dbhiragne̱ arva̍to̱ nṛbhi̱rnṝnvī̱rairvī̱rānva̍nuyāmā̱ tvotā̍ḥ |
ī̱śā̱nāsa̍ḥ pitṛvi̱ttasya̍ rā̱yo vi sū̱raya̍ḥ śa̱tahi̍mā no aśyuḥ || 1.073.09
e̱tā te̍ agna u̱cathā̍ni vedho̱ juṣṭā̍ni santu̱ mana̍se hṛ̱de ca̍ |
śa̱kema̍ rā̱yaḥ su̱dhuro̱ yama̱ṁ te'dhi̱ śravo̍ de̱vabha̍kta̱ṁ dadhā̍nāḥ || 1.073.10
u̱pa̱pra̱yanto̍ adhva̱raṁ mantra̍ṁ vocemā̱gnaye̍ |
ā̱re a̱sme ca̍ śṛṇva̱te || 1.074.01
yaḥ snīhi̍tīṣu pū̱rvyaḥ sa̍ṁjagmā̱nāsu̍ kṛ̱ṣṭiṣu̍ |
ara̍kṣaddā̱śuṣe̱ gaya̍m || 1.074.02
u̱ta bru̍vantu ja̱ntava̱ uda̱gnirvṛ̍tra̱hāja̍ni |
dha̱na̱ṁja̱yo raṇe̍raṇe || 1.074.03
yasya̍ dū̱to asi̱ kṣaye̱ veṣi̍ ha̱vyāni̍ vī̱taye̍ |
da̱smatkṛ̱ṇoṣya̍dhva̱ram || 1.074.04
tamitsu̍ha̱vyama̍ṅgiraḥ sude̱vaṁ sa̍haso yaho |
janā̍ āhuḥ suba̱rhiṣa̍m || 1.074.05
ā ca̱ vahā̍si̱ tā i̱ha de̱vā upa̱ praśa̍staye |
ha̱vyā su̍ścandra vī̱taye̍ || 1.074.06
na yoru̍pa̱bdiraśvya̍ḥ śṛ̱ṇve ratha̍sya̱ kacca̱na |
yada̍gne̱ yāsi̍ dū̱tya̍m || 1.074.07
tvoto̍ vā̱jyahra̍yo̱'bhi pūrva̍smā̱dapa̍raḥ |
pra dā̱śvā a̍gne asthāt || 1.074.08
u̱ta dyu̱matsu̱vīrya̍ṁ bṛ̱hada̍gne vivāsasi |
de̱vebhyo̍ deva dā̱śuṣe̍ || 1.074.09
ju̱ṣasva̍ sa̱pratha̍stama̱ṁ vaco̍ de̱vapsa̍rastamam |
ha̱vyā juhvā̍na ā̱sani̍ || 1.075.01
athā̍ te aṅgirasta̱māgne̍ vedhastama pri̱yam |
vo̱cema̱ brahma̍ sāna̱si || 1.075.02
kaste̍ jā̱mirjanā̍nā̱magne̱ ko dā̱śva̍dhvaraḥ |
ko ha̱ kasmi̍nnasi śri̱taḥ || 1.075.03
tvaṁ jā̱mirjanā̍nā̱magne̍ mi̱tro a̍si pri̱yaḥ |
sakhā̱ sakhi̍bhya̱ īḍya̍ḥ || 1.075.04
yajā̍ no mi̱trāvaru̍ṇā̱ yajā̍ de̱vā ṛ̱taṁ bṛ̱hat |
agne̱ yakṣi̱ svaṁ dama̍m || 1.075.05
kā ta̱ upe̍ti̱rmana̍so̱ varā̍ya̱ bhuva̍dagne̱ śaṁta̍mā̱ kā ma̍nī̱ṣā |
ko vā̍ ya̱jñaiḥ pari̱ dakṣa̍ṁ ta āpa̱ kena̍ vā te̱ mana̍sā dāśema || 1.076.01
ehya̍gna i̱ha hotā̱ ni ṣī̱dāda̍bdha̱ḥ su pu̍rae̱tā bha̍vā naḥ |
ava̍tāṁ tvā̱ roda̍sī viśvami̱nve yajā̍ ma̱he sau̍mana̱sāya̍ de̱vān || 1.076.02
pra su viśvā̍nra̱kṣaso̱ dhakṣya̍gne̱ bhavā̍ ya̱jñānā̍mabhiśasti̱pāvā̍ |
athā va̍ha̱ soma̍pati̱ṁ hari̍bhyāmāti̱thyama̍smai cakṛmā su̱dāvne̍ || 1.076.03
pra̱jāva̍tā̱ vaca̍sā̱ vahni̍rā̱sā ca̍ hu̱ve ni ca̍ satsī̱ha de̱vaiḥ |
veṣi̍ ho̱tramu̱ta po̱traṁ ya̍jatra bo̱dhi pra̍yantarjanita̱rvasū̍nām || 1.076.04
yathā̱ vipra̍sya̱ manu̍ṣo ha̱virbhi̍rde̱vā aya̍jaḥ ka̱vibhi̍ḥ ka̱viḥ san |
e̱vā ho̍taḥ satyatara̱ tvama̱dyāgne̍ ma̱ndrayā̍ ju̱hvā̍ yajasva || 1.076.05
ka̱thā dā̍śemā̱gnaye̱ kāsmai̍ de̱vaju̍ṣṭocyate bhā̱mine̱ gīḥ |
yo martye̍ṣva̱mṛta̍ ṛ̱tāvā̱ hotā̱ yaji̍ṣṭha̱ itkṛ̱ṇoti̍ de̱vān || 1.077.01
yo a̍dhva̱reṣu̱ śaṁta̍ma ṛ̱tāvā̱ hotā̱ tamū̱ namo̍bhi̱rā kṛ̍ṇudhvam |
a̱gniryadvermartā̍ya de̱vānsa cā̱ bodhā̍ti̱ mana̍sā yajāti || 1.077.02
sa hi kratu̱ḥ sa marya̱ḥ sa sā̱dhurmi̱tro na bhū̱dadbhu̍tasya ra̱thīḥ |
taṁ medhe̍ṣu pratha̱maṁ de̍va̱yantī̱rviśa̱ upa̍ bruvate da̱smamārī̍ḥ || 1.077.03
sa no̍ nṛ̱ṇāṁ nṛta̍mo ri̱śādā̍ a̱gnirgiro'va̍sā vetu dhī̱tim |
tanā̍ ca̱ ye ma̱ghavā̍na̱ḥ śavi̍ṣṭhā̱ vāja̍prasūtā i̱ṣaya̍nta̱ manma̍ || 1.077.04
e̱vāgnirgota̍mebhirṛ̱tāvā̱ vipre̍bhirastoṣṭa jā̱tave̍dāḥ |
sa e̍ṣu dyu̱mnaṁ pī̍paya̱tsa vāja̱ṁ sa pu̱ṣṭiṁ yā̍ti̱ joṣa̱mā ci̍ki̱tvān || 1.077.05
a̱bhi tvā̱ gota̍mā gi̱rā jāta̍vedo̱ vica̍rṣaṇe |
dyu̱mnaira̱bhi pra ṇo̍numaḥ || 1.078.01
tamu̍ tvā̱ gota̍mo gi̱rā rā̱yaskā̍mo duvasyati |
dyu̱mnaira̱bhi pra ṇo̍numaḥ || 1.078.02
tamu̍ tvā vāja̱sāta̍mamaṅgira̱svaddha̍vāmahe |
dyu̱mnaira̱bhi pra ṇo̍numaḥ || 1.078.03
tamu̍ tvā vṛtra̱hanta̍ma̱ṁ yo dasyū̍ravadhūnu̱ṣe |
dyu̱mnaira̱bhi pra ṇo̍numaḥ || 1.078.04
avo̍cāma̱ rahū̍gaṇā a̱gnaye̱ madhu̍ma̱dvaca̍ḥ |
dyu̱mnaira̱bhi pra ṇo̍numaḥ || 1.078.05
hira̍ṇyakeśo̱ raja̍so visā̱re'hi̱rdhuni̱rvāta̍ iva̱ dhrajī̍mān |
śuci̍bhrājā u̱ṣaso̱ nave̍dā̱ yaśa̍svatīrapa̱syuvo̱ na sa̱tyāḥ || 1.079.01
ā te̍ supa̱rṇā a̍minanta̱ evai̍ḥ kṛ̱ṣṇo no̍nāva vṛṣa̱bho yadī̱dam |
śi̱vābhi̱rna smaya̍mānābhi̱rāgā̱tpata̍nti̱ miha̍ḥ sta̱naya̍ntya̱bhrā || 1.079.02
yadī̍mṛ̱tasya̱ paya̍sā̱ piyā̍no̱ naya̍nnṛ̱tasya̍ pa̱thibhī̱ raji̍ṣṭhaiḥ |
a̱rya̱mā mi̱tro varu̍ṇa̱ḥ pari̍jmā̱ tvaca̍ṁ pṛñca̱ntyupa̍rasya̱ yonau̍ || 1.079.03
agne̱ vāja̍sya̱ goma̍ta̱ īśā̍naḥ sahaso yaho |
a̱sme dhe̍hi jātavedo̱ mahi̱ śrava̍ḥ || 1.079.04
sa i̍dhā̱no vasu̍ṣka̱vira̱gnirī̱ḻenyo̍ gi̱rā |
re̱vada̱smabhya̍ṁ purvaṇīka dīdihi || 1.079.05
kṣa̱po rā̍jannu̱ta tmanāgne̱ vasto̍ru̱toṣasa̍ḥ |
sa ti̍gmajambha ra̱kṣaso̍ daha̱ prati̍ || 1.079.06
avā̍ no agna ū̱tibhi̍rgāya̱trasya̱ prabha̍rmaṇi |
viśvā̍su dhī̱ṣu va̍ndya || 1.079.07
ā no̍ agne ra̱yiṁ bha̍ra satrā̱sāha̱ṁ vare̍ṇyam |
viśvā̍su pṛ̱tsu du̱ṣṭara̍m || 1.079.08
ā no̍ agne suce̱tunā̍ ra̱yiṁ vi̱śvāyu̍poṣasam |
mā̱rḍī̱kaṁ dhe̍hi jī̱vase̍ || 1.079.09
pra pū̱tāsti̱gmaśo̍ciṣe̱ vāco̍ gotamā̱gnaye̍ |
bhara̍sva sumna̱yurgira̍ḥ || 1.079.10
yo no̍ agne'bhi̱dāsa̱tyanti̍ dū̱re pa̍dī̱ṣṭa saḥ |
a̱smāka̱midvṛ̱dhe bha̍va || 1.079.11
sa̱ha̱srā̱kṣo vica̍rṣaṇira̱gnī rakṣā̍ṁsi sedhati |
hotā̍ gṛṇīta u̱kthya̍ḥ || 1.079.12
i̱tthā hi soma̱ inmade̍ bra̱hmā ca̱kāra̱ vardha̍nam |
śavi̍ṣṭha vajri̱nnoja̍sā pṛthi̱vyā niḥ śa̍śā̱ ahi̱marca̱nnanu̍ sva̱rājya̍m || 1.080.01
sa tvā̍mada̱dvṛṣā̱ mada̱ḥ soma̍ḥ śye̱nābhṛ̍taḥ su̱taḥ |
yenā̍ vṛ̱traṁ nira̱dbhyo ja̱ghantha̍ vajri̱nnoja̱sārca̱nnanu̍ sva̱rājya̍m || 1.080.02
prehya̱bhī̍hi dhṛṣṇu̱hi na te̱ vajro̱ ni ya̍ṁsate |
indra̍ nṛ̱mṇaṁ hi te̱ śavo̱ hano̍ vṛ̱traṁ jayā̍ a̱po'rca̱nnanu̍ sva̱rājya̍m || 1.080.03
niri̍ndra̱ bhūmyā̱ adhi̍ vṛ̱traṁ ja̍ghantha̱ nirdi̱vaḥ |
sṛ̱jā ma̱rutva̍tī̱rava̍ jī̱vadha̍nyā i̱mā a̱po'rca̱nnanu̍ sva̱rājya̍m || 1.080.04
indro̍ vṛ̱trasya̱ dodha̍ta̱ḥ sānu̱ṁ vajre̍ṇa hīḻi̱taḥ |
a̱bhi̱kramyāva̍ jighnate̱'paḥ sarmā̍ya co̱daya̱nnarca̱nnanu̍ sva̱rājya̍m || 1.080.05
adhi̱ sānau̱ ni ji̍ghnate̱ vajre̍ṇa śa̱tapa̍rvaṇā |
ma̱ndā̱na indro̱ andha̍sa̱ḥ sakhi̍bhyo gā̱tumi̍ccha̱tyarca̱nnanu̍ sva̱rājya̍m || 1.080.06
indra̱ tubhya̱mida̍dri̱vo'nu̍ttaṁ vajrinvī̱rya̍m |
yaddha̱ tyaṁ mā̱yina̍ṁ mṛ̱gaṁ tamu̱ tvaṁ mā̱yayā̍vadhī̱rarca̱nnanu̍ sva̱rājya̍m || 1.080.07
vi te̱ vajrā̍so asthirannava̱tiṁ nā̱vyā̱3̱̍ anu̍ |
ma̱hatta̍ indra vī̱rya̍ṁ bā̱hvoste̱ bala̍ṁ hi̱tamarca̱nnanu̍ sva̱rājya̍m || 1.080.08
sa̱hasra̍ṁ sā̱kama̍rcata̱ pari̍ ṣṭobhata viṁśa̱tiḥ |
śa̱taina̱manva̍nonavu̱rindrā̍ya̱ brahmodya̍ta̱marca̱nnanu̍ sva̱rājya̍m || 1.080.09
indro̍ vṛ̱trasya̱ tavi̍ṣī̱ṁ nira̍ha̱nsaha̍sā̱ saha̍ḥ |
ma̱hattada̍sya̱ pauṁsya̍ṁ vṛ̱traṁ ja̍gha̱nvā a̍sṛja̱darca̱nnanu̍ sva̱rājya̍m || 1.080.10
i̱me ci̱ttava̍ ma̱nyave̱ vepe̍te bhi̱yasā̍ ma̱hī |
yadi̍ndra vajri̱nnoja̍sā vṛ̱traṁ ma̱rutvā̱ ava̍dhī̱rarca̱nnanu̍ sva̱rājya̍m || 1.080.11
na vepa̍sā̱ na ta̍nya̱tendra̍ṁ vṛ̱tro vi bī̍bhayat |
a̱bhye̍na̱ṁ vajra̍ āya̱saḥ sa̱hasra̍bhṛṣṭirāya̱tārca̱nnanu̍ sva̱rājya̍m || 1.080.12
yadvṛ̱traṁ tava̍ cā̱śani̱ṁ vajre̍ṇa sa̱mayo̍dhayaḥ |
ahi̍mindra̱ jighā̍ṁsato di̱vi te̍ badbadhe̱ śavo'rca̱nnanu̍ sva̱rājya̍m || 1.080.13
a̱bhi̱ṣṭa̱ne te̍ adrivo̱ yatsthā jaga̍cca rejate |
tvaṣṭā̍ ci̱ttava̍ ma̱nyava̱ indra̍ vevi̱jyate̍ bhi̱yārca̱nnanu̍ sva̱rājya̍m || 1.080.14
na̱hi nu yāda̍dhī̱masīndra̱ṁ ko vī̱ryā̍ pa̱raḥ |
tasmi̍nnṛ̱mṇamu̱ta kratu̍ṁ de̱vā ojā̍ṁsi̱ saṁ da̍dhu̱rarca̱nnanu̍ sva̱rājya̍m || 1.080.15
yāmatha̍rvā̱ manu̍ṣpi̱tā da̱dhyaṅdhiya̱matna̍ta |
tasmi̱nbrahmā̍ṇi pū̱rvathendra̍ u̱kthā sama̍gma̱tārca̱nnanu̍ sva̱rājya̍m || 1.080.16
indro̱ madā̍ya vāvṛdhe̱ śava̍se vṛtra̱hā nṛbhi̍ḥ |
taminma̱hatsvā̱jiṣū̱temarbhe̍ havāmahe̱ sa vāje̍ṣu̱ pra no̍'viṣat || 1.081.01
asi̱ hi vī̍ra̱ senyo'si̱ bhūri̍ parāda̱diḥ |
asi̍ da̱bhrasya̍ cidvṛ̱dho yaja̍mānāya śikṣasi sunva̱te bhūri̍ te̱ vasu̍ || 1.081.02
yadu̱dīra̍ta ā̱jayo̍ dhṛ̱ṣṇave̍ dhīyate̱ dhanā̍ |
yu̱kṣvā ma̍da̱cyutā̱ harī̱ kaṁ hana̱ḥ kaṁ vasau̍ dadho̱'smā i̍ndra̱ vasau̍ dadhaḥ || 1.081.03
kratvā̍ ma̱hā a̍nuṣva̱dhaṁ bhī̱ma ā vā̍vṛdhe̱ śava̍ḥ |
śri̱ya ṛ̱ṣva u̍pā̱kayo̱rni śi̱prī hari̍vāndadhe̱ hasta̍yo̱rvajra̍māya̱sam || 1.081.04
ā pa̍prau̱ pārthi̍va̱ṁ rajo̍ badba̱dhe ro̍ca̱nā di̱vi |
na tvāvā̍ indra̱ kaśca̱na na jā̱to na ja̍niṣya̱te'ti̱ viśva̍ṁ vavakṣitha || 1.081.05
yo a̱ryo ma̍rta̱bhoja̍naṁ parā̱dadā̍ti dā̱śuṣe̍ |
indro̍ a̱smabhya̍ṁ śikṣatu̱ vi bha̍jā̱ bhūri̍ te̱ vasu̍ bhakṣī̱ya tava̱ rādha̍saḥ || 1.081.06
made̍made̱ hi no̍ da̱diryū̱thā gavā̍mṛju̱kratu̍ḥ |
saṁ gṛ̍bhāya pu̱rū śa̱tobha̍yāha̱styā vasu̍ śiśī̱hi rā̱ya ā bha̍ra || 1.081.07
mā̱daya̍sva su̱te sacā̱ śava̍se śūra̱ rādha̍se |
vi̱dmā hi tvā̍ purū̱vasu̱mupa̱ kāmā̍nsasṛ̱jmahe'thā̍ no'vi̱tā bha̍va || 1.081.08
e̱te ta̍ indra ja̱ntavo̱ viśva̍ṁ puṣyanti̱ vārya̍m |
a̱ntarhi khyo janā̍nāma̱ryo vedo̱ adā̍śuṣā̱ṁ teṣā̍ṁ no̱ veda̱ ā bha̍ra || 1.081.09
upo̱ ṣu śṛ̍ṇu̱hī giro̱ magha̍va̱nmāta̍thā iva |
ya̱dā na̍ḥ sū̱nṛtā̍vata̱ḥ kara̱ āda̱rthayā̍sa̱ idyojā̱ nvi̍ndra te̱ harī̍ || 1.082.01
akṣa̱nnamī̍madanta̱ hyava̍ pri̱yā a̍dhūṣata |
asto̍ṣata̱ svabhā̍navo̱ viprā̱ navi̍ṣṭhayā ma̱tī yojā̱ nvi̍ndra te̱ harī̍ || 1.082.02
su̱sa̱ṁdṛśa̍ṁ tvā va̱yaṁ magha̍vanvandiṣī̱mahi̍ |
pra nū̱naṁ pū̱rṇava̍ndhuraḥ stu̱to yā̍hi̱ vaśā̱ anu̱ yojā̱ nvi̍ndra te̱ harī̍ || 1.082.03
sa ghā̱ taṁ vṛṣa̍ṇa̱ṁ ratha̱madhi̍ tiṣṭhāti go̱vida̍m |
yaḥ pātra̍ṁ hāriyoja̱naṁ pū̱rṇami̍ndra̱ cike̍tati̱ yojā̱ nvi̍ndra te̱ harī̍ || 1.082.04
yu̱ktaste̍ astu̱ dakṣi̍ṇa u̱ta sa̱vyaḥ śa̍takrato |
tena̍ jā̱yāmupa̍ pri̱yāṁ ma̍ndā̱no yā̱hyandha̍so̱ yojā̱ nvi̍ndra te̱ harī̍ || 1.082.05
yu̱najmi̍ te̱ brahma̍ṇā ke̱śinā̱ harī̱ upa̱ pra yā̍hi dadhi̱ṣe gabha̍styoḥ |
uttvā̍ su̱tāso̍ rabha̱sā a̍mandiṣuḥ pūṣa̱ṇvānva̍jri̱nsamu̱ patnyā̍madaḥ || 1.082.06
aśvā̍vati pratha̱mo goṣu̍ gacchati suprā̱vīri̍ndra̱ martya̱stavo̱tibhi̍ḥ |
tamitpṛ̍ṇakṣi̱ vasu̍nā̱ bhavī̍yasā̱ sindhu̱māpo̱ yathā̱bhito̱ vice̍tasaḥ || 1.083.01
āpo̱ na de̱vīrupa̍ yanti ho̱triya̍ma̱vaḥ pa̍śyanti̱ vita̍ta̱ṁ yathā̱ raja̍ḥ |
prā̱cairde̱vāsa̱ḥ pra ṇa̍yanti deva̱yuṁ bra̍hma̱priya̍ṁ joṣayante va̱rā i̍va || 1.083.02
adhi̱ dvayo̍radadhā u̱kthyaṁ1̱̍ vaco̍ ya̱tasru̍cā mithu̱nā yā sa̍pa̱ryata̍ḥ |
asa̍ṁyatto vra̱te te̍ kṣeti̱ puṣya̍ti bha̱drā śa̱ktiryaja̍mānāya sunva̱te || 1.083.03
ādaṅgi̍rāḥ pratha̱maṁ da̍dhire̱ vaya̍ i̱ddhāgna̍ya̱ḥ śamyā̱ ye su̍kṛ̱tyayā̍ |
sarva̍ṁ pa̱ṇeḥ sama̍vindanta̱ bhoja̍na̱maśvā̍vanta̱ṁ goma̍nta̱mā pa̱śuṁ nara̍ḥ || 1.083.04
ya̱jñairatha̍rvā pratha̱maḥ pa̱thasta̍te̱ tata̱ḥ sūryo̍ vrata̱pā ve̱na āja̍ni |
ā gā ā̍jadu̱śanā̍ kā̱vyaḥ sacā̍ ya̱masya̍ jā̱tama̱mṛta̍ṁ yajāmahe || 1.083.05
ba̱rhirvā̱ yatsva̍pa̱tyāya̍ vṛ̱jyate̱'rko vā̱ śloka̍mā̱ghoṣa̍te di̱vi |
grāvā̱ yatra̱ vada̍ti kā̱ruru̱kthya1̱̍stasyedindro̍ abhipi̱tveṣu̍ raṇyati || 1.083.06
asā̍vi̱ soma̍ indra te̱ śavi̍ṣṭha dhṛṣṇa̱vā ga̍hi |
ā tvā̍ pṛṇaktvindri̱yaṁ raja̱ḥ sūryo̱ na ra̱śmibhi̍ḥ || 1.084.01
indra̱middharī̍ vaha̱to'pra̍tidhṛṣṭaśavasam |
ṛṣī̍ṇāṁ ca stu̱tīrupa̍ ya̱jñaṁ ca̱ mānu̍ṣāṇām || 1.084.02
ā ti̍ṣṭha vṛtraha̱nratha̍ṁ yu̱ktā te̱ brahma̍ṇā̱ harī̍ |
a̱rvā̱cīna̱ṁ su te̱ mano̱ grāvā̍ kṛṇotu va̱gnunā̍ || 1.084.03
i̱mami̍ndra su̱taṁ pi̍ba̱ jyeṣṭha̱mama̍rtya̱ṁ mada̍m |
śu̱krasya̍ tvā̱bhya̍kṣara̱ndhārā̍ ṛ̱tasya̱ sāda̍ne || 1.084.04
indrā̍ya nū̱nama̍rcato̱kthāni̍ ca bravītana |
su̱tā a̍matsu̱rinda̍vo̱ jyeṣṭha̍ṁ namasyatā̱ saha̍ḥ || 1.084.05
naki̱ṣṭvadra̱thīta̍ro̱ harī̱ yadi̍ndra̱ yaccha̍se |
naki̱ṣṭvānu̍ ma̱jmanā̱ naki̱ḥ svaśva̍ ānaśe || 1.084.06
ya eka̱ idvi̱daya̍te̱ vasu̱ martā̍ya dā̱śuṣe̍ |
īśā̍no̱ apra̍tiṣkuta̱ indro̍ a̱ṅga || 1.084.07
ka̱dā marta̍marā̱dhasa̍ṁ pa̱dā kṣumpa̍miva sphurat |
ka̱dā na̍ḥ śuśrava̱dgira̱ indro̍ a̱ṅga || 1.084.08
yaści̱ddhi tvā̍ ba̱hubhya̱ ā su̱tāvā̍ ā̱vivā̍sati |
u̱graṁ tatpa̍tyate̱ śava̱ indro̍ a̱ṅga || 1.084.09
svā̱dori̱tthā vi̍ṣū̱vato̱ madhva̍ḥ pibanti gau̱rya̍ḥ |
yā indre̍ṇa sa̱yāva̍rī̱rvṛṣṇā̱ mada̍nti śo̱bhase̱ vasvī̱ranu̍ sva̱rājya̍m || 1.084.10
tā a̍sya pṛśanā̱yuva̱ḥ soma̍ṁ śrīṇanti̱ pṛśna̍yaḥ |
pri̱yā indra̍sya dhe̱navo̱ vajra̍ṁ hinvanti̱ sāya̍ka̱ṁ vasvī̱ranu̍ sva̱rājya̍m || 1.084.11
tā a̍sya̱ nama̍sā̱ saha̍ḥ sapa̱ryanti̱ prace̍tasaḥ |
vra̱tānya̍sya saścire pu̱rūṇi̍ pū̱rvaci̍ttaye̱ vasvī̱ranu̍ sva̱rājya̍m || 1.084.12
indro̍ dadhī̱co a̱sthabhi̍rvṛ̱trāṇyapra̍tiṣkutaḥ |
ja̱ghāna̍ nava̱tīrnava̍ || 1.084.13
i̱cchannaśva̍sya̱ yacchira̱ḥ parva̍te̱ṣvapa̍śritam |
tadvi̍daccharya̱ṇāva̍ti || 1.084.14
atrāha̱ gora̍manvata̱ nāma̱ tvaṣṭu̍rapī̱cya̍m |
i̱tthā ca̱ndrama̍so gṛ̱he || 1.084.15
ko a̱dya yu̍ṅkte dhu̱ri gā ṛ̱tasya̱ śimī̍vato bhā̱mino̍ durhṛṇā̱yūn |
ā̱sanni̍ṣūnhṛ̱tsvaso̍ mayo̱bhūnya e̍ṣāṁ bhṛ̱tyāmṛ̱ṇadha̱tsa jī̍vāt || 1.084.16
ka ī̍ṣate tu̱jyate̱ ko bi̍bhāya̱ ko ma̍ṁsate̱ santa̱mindra̱ṁ ko anti̍ |
kasto̱kāya̱ ka ibhā̍yo̱ta rā̱ye'dhi̍ bravatta̱nve̱3̱̍ ko janā̍ya || 1.084.17
ko a̱gnimī̍ṭṭe ha̱viṣā̍ ghṛ̱tena̍ sru̱cā ya̍jātā ṛ̱tubhi̍rdhru̱vebhi̍ḥ |
kasmai̍ de̱vā ā va̍hānā̱śu homa̱ ko ma̍ṁsate vī̱tiho̍traḥ sude̱vaḥ || 1.084.18
tvama̱ṅga pra śa̍ṁsiṣo de̱vaḥ śa̍viṣṭha̱ martya̍m |
na tvada̱nyo ma̍ghavannasti marḍi̱tendra̱ bravī̍mi te̱ vaca̍ḥ || 1.084.19
mā te̱ rādhā̍ṁsi̱ mā ta̍ ū̱tayo̍ vaso̱'smānkadā̍ ca̱nā da̍bhan |
viśvā̍ ca na upamimī̱hi mā̍nuṣa̱ vasū̍ni carṣa̱ṇibhya̱ ā || 1.084.20
pra ye śumbha̍nte̱ jana̍yo̱ na sapta̍yo̱ yāma̍nru̱drasya̍ sū̱nava̍ḥ su̱daṁsa̍saḥ |
roda̍sī̱ hi ma̱ruta̍ścakri̱re vṛ̱dhe mada̍nti vī̱rā vi̱dathe̍ṣu̱ ghṛṣva̍yaḥ || 1.085.01
ta u̍kṣi̱tāso̍ mahi̱māna̍māśata di̱vi ru̱drāso̱ adhi̍ cakrire̱ sada̍ḥ |
arca̍nto a̱rkaṁ ja̱naya̍nta indri̱yamadhi̱ śriyo̍ dadhire̱ pṛśni̍mātaraḥ || 1.085.02
gomā̍taro̱ yacchu̱bhaya̍nte a̱ñjibhi̍sta̱nūṣu̍ śu̱bhrā da̍dhire vi̱rukma̍taḥ |
bādha̍nte̱ viśva̍mabhimā̱tina̱mapa̱ vartmā̍nyeṣā̱manu̍ rīyate ghṛ̱tam || 1.085.03
vi ye bhrāja̍nte̱ suma̍khāsa ṛ̱ṣṭibhi̍ḥ pracyā̱vaya̍nto̱ acyu̍tā ci̱doja̍sā |
ma̱no̱juvo̱ yanma̍ruto̱ rathe̱ṣvā vṛṣa̍vrātāsa̱ḥ pṛṣa̍tī̱rayu̍gdhvam || 1.085.04
pra yadrathe̍ṣu̱ pṛṣa̍tī̱rayu̍gdhva̱ṁ vāje̱ adri̍ṁ maruto ra̱ṁhaya̍ntaḥ |
u̱tāru̱ṣasya̱ vi ṣya̍nti̱ dhārā̱ścarme̍vo̱dabhi̱rvyu̍ndanti̱ bhūma̍ || 1.085.05
ā vo̍ vahantu̱ sapta̍yo raghu̱ṣyado̍ raghu̱patvā̍na̱ḥ pra ji̍gāta bā̱hubhi̍ḥ |
sīda̱tā ba̱rhiru̱ru va̱ḥ sada̍skṛ̱taṁ mā̱daya̍dhvaṁ maruto̱ madhvo̱ andha̍saḥ || 1.085.06
te̍'vardhanta̱ svata̍vaso mahitva̱nā nāka̍ṁ ta̱sthuru̱ru ca̍krire̱ sada̍ḥ |
viṣṇu̱ryaddhāva̱dvṛṣa̍ṇaṁ mada̱cyuta̱ṁ vayo̱ na sī̍da̱nnadhi̍ ba̱rhiṣi̍ pri̱ye || 1.085.07
śūrā̍ i̱vedyuyu̍dhayo̱ na jagma̍yaḥ śrava̱syavo̱ na pṛta̍nāsu yetire |
bhaya̍nte̱ viśvā̱ bhuva̍nā ma̱rudbhyo̱ rājā̍na iva tve̱ṣasa̍ṁdṛśo̱ nara̍ḥ || 1.085.08
tvaṣṭā̱ yadvajra̱ṁ sukṛ̍taṁ hira̱ṇyaya̍ṁ sa̱hasra̍bhṛṣṭi̱ṁ svapā̱ ava̍rtayat |
dha̱tta indro̱ naryapā̍ṁsi̱ karta̱ve'ha̍nvṛ̱traṁ nira̱pāmau̍bjadarṇa̱vam || 1.085.09
ū̱rdhvaṁ nu̍nudre'va̱taṁ ta oja̍sā dādṛhā̱ṇaṁ ci̍dbibhidu̱rvi parva̍tam |
dhama̍nto vā̱ṇaṁ ma̱ruta̍ḥ su̱dāna̍vo̱ made̱ soma̍sya̱ raṇyā̍ni cakrire || 1.085.10
ji̱hmaṁ nu̍nudre'va̱taṁ tayā̍ di̱śāsi̍ñca̱nnutsa̱ṁ gota̍māya tṛ̱ṣṇaje̍ |
ā ga̍cchantī̱mava̍sā ci̱trabhā̍nava̱ḥ kāma̱ṁ vipra̍sya tarpayanta̱ dhāma̍bhiḥ || 1.085.11
yā va̱ḥ śarma̍ śaśamā̱nāya̱ santi̍ tri̱dhātū̍ni dā̱śuṣe̍ yaccha̱tādhi̍ |
a̱smabhya̱ṁ tāni̍ maruto̱ vi ya̍nta ra̱yiṁ no̍ dhatta vṛṣaṇaḥ su̱vīra̍m || 1.085.12
maru̍to̱ yasya̱ hi kṣaye̍ pā̱thā di̱vo vi̍mahasaḥ |
sa su̍go̱pāta̍mo̱ jana̍ḥ || 1.086.01
ya̱jñairvā̍ yajñavāhaso̱ vipra̍sya vā matī̱nām |
maru̍taḥ śṛṇu̱tā hava̍m || 1.086.02
u̱ta vā̱ yasya̍ vā̱jino'nu̱ vipra̱mata̍kṣata |
sa gantā̱ goma̍ti vra̱je || 1.086.03
a̱sya vī̱rasya̍ ba̱rhiṣi̍ su̱taḥ somo̱ divi̍ṣṭiṣu |
u̱kthaṁ mada̍śca śasyate || 1.086.04
a̱sya śro̍ṣa̱ntvā bhuvo̱ viśvā̱ yaśca̍rṣa̱ṇīra̱bhi |
sūra̍ṁ citsa̱sruṣī̱riṣa̍ḥ || 1.086.05
pū̱rvībhi̱rhi da̍dāśi̱ma śa̱radbhi̍rmaruto va̱yam |
avo̍bhiścarṣaṇī̱nām || 1.086.06
su̱bhaga̱ḥ sa pra̍yajyavo̱ maru̍to astu̱ martya̍ḥ |
yasya̱ prayā̍ṁsi̱ parṣa̍tha || 1.086.07
śa̱śa̱mā̱nasya̍ vā nara̱ḥ sveda̍sya satyaśavasaḥ |
vi̱dā kāma̍sya̱ vena̍taḥ || 1.086.08
yū̱yaṁ tatsa̍tyaśavasa ā̱viṣka̍rta mahitva̱nā |
vidhya̍tā vi̱dyutā̱ rakṣa̍ḥ || 1.086.09
gūha̍tā̱ guhya̱ṁ tamo̱ vi yā̍ta̱ viśva̍ma̱triṇa̍m |
jyoti̍ṣkartā̱ yadu̱śmasi̍ || 1.086.10
pratva̍kṣasa̱ḥ prata̍vaso vira̱pśino'nā̍natā̱ avi̍thurā ṛjī̱ṣiṇa̍ḥ |
juṣṭa̍tamāso̱ nṛta̍māso a̱ñjibhi̱rvyā̍najre̱ ke ci̍du̱srā i̍va̱ stṛbhi̍ḥ || 1.087.01
u̱pa̱hva̱reṣu̱ yadaci̍dhvaṁ ya̱yiṁ vaya̍ iva maruta̱ḥ kena̍ citpa̱thā |
ścota̍nti̱ kośā̱ upa̍ vo̱ rathe̱ṣvā ghṛ̱tamu̍kṣatā̱ madhu̍varṇa̱marca̍te || 1.087.02
praiṣā̱majme̍ṣu vithu̱reva̍ rejate̱ bhūmi̱ryāme̍ṣu̱ yaddha̍ yu̱ñjate̍ śu̱bhe |
te krī̱ḻayo̱ dhuna̍yo̱ bhrāja̍dṛṣṭayaḥ sva̱yaṁ ma̍hi̱tvaṁ pa̍nayanta̱ dhūta̍yaḥ || 1.087.03
sa hi sva̱sṛtpṛṣa̍daśvo̱ yuvā̍ ga̱ṇo̱3̱̍'yā ī̍śā̱nastavi̍ṣībhi̱rāvṛ̍taḥ |
asi̍ sa̱tya ṛ̍ṇa̱yāvāne̍dyo̱'syā dhi̱yaḥ prā̍vi̱tāthā̱ vṛṣā̍ ga̱ṇaḥ || 1.087.04
pi̱tuḥ pra̱tnasya̱ janma̍nā vadāmasi̱ soma̍sya ji̱hvā pra ji̍gāti̱ cakṣa̍sā |
yadī̱mindra̱ṁ śamyṛkvā̍ṇa̱ āśa̱tādinnāmā̍ni ya̱jñiyā̍ni dadhire || 1.087.05
śri̱yase̱ kaṁ bhā̱nubhi̱ḥ saṁ mi̍mikṣire̱ te ra̱śmibhi̱sta ṛkva̍bhiḥ sukhā̱daya̍ḥ |
te vāśī̍manta i̱ṣmiṇo̱ abhī̍ravo vi̱dre pri̱yasya̱ māru̍tasya̱ dhāmna̍ḥ || 1.087.06
ā vi̱dyunma̍dbhirmarutaḥ sva̱rkai rathe̍bhiryāta ṛṣṭi̱madbhi̱raśva̍parṇaiḥ |
ā varṣi̍ṣṭhayā na i̱ṣā vayo̱ na pa̍ptatā sumāyāḥ || 1.088.01
te̍'ru̱ṇebhi̱rvara̱mā pi̱śaṅgai̍ḥ śu̱bhe kaṁ yā̍nti ratha̱tūrbhi̱raśvai̍ḥ |
ru̱kmo na ci̱traḥ svadhi̍tīvānpa̱vyā ratha̍sya jaṅghananta̱ bhūma̍ || 1.088.02
śri̱ye kaṁ vo̱ adhi̍ ta̱nūṣu̱ vāśī̍rme̱dhā vanā̱ na kṛ̍ṇavanta ū̱rdhvā |
yu̱ṣmabhya̱ṁ kaṁ ma̍rutaḥ sujātāstuvidyu̱mnāso̍ dhanayante̱ adri̍m || 1.088.03
ahā̍ni̱ gṛdhrā̱ḥ paryā va̱ āgu̍ri̱māṁ dhiya̍ṁ vārkā̱ryāṁ ca̍ de̱vīm |
brahma̍ kṛ̱ṇvanto̱ gota̍māso a̱rkairū̱rdhvaṁ nu̍nudra utsa̱dhiṁ piba̍dhyai || 1.088.04
e̱tattyanna yoja̍namaceti sa̱svarha̱ yanma̍ruto̱ gota̍mo vaḥ |
paśya̱nhira̍ṇyacakrā̱nayo̍daṁṣṭrānvi̱dhāva̍to va̱rāhū̍n || 1.088.05
e̱ṣā syā vo̍ maruto'nubha̱rtrī prati̍ ṣṭobhati vā̱ghato̱ na vāṇī̍ |
asto̍bhaya̱dvṛthā̍sā̱manu̍ sva̱dhāṁ gabha̍styoḥ || 1.088.06
ā no̍ bha̱drāḥ krata̍vo yantu vi̱śvato'da̍bdhāso̱ apa̍rītāsa u̱dbhida̍ḥ |
de̱vā no̱ yathā̱ sada̱midvṛ̱dhe asa̱nnaprā̍yuvo rakṣi̱tāro̍ di̱vedi̍ve || 1.089.01
de̱vānā̍ṁ bha̱drā su̍ma̱tirṛ̍jūya̱tāṁ de̱vānā̍ṁ rā̱tira̱bhi no̱ ni va̍rtatām |
de̱vānā̍ṁ sa̱khyamupa̍ sedimā va̱yaṁ de̱vā na̱ āyu̱ḥ pra ti̍rantu jī̱vase̍ || 1.089.02
tānpūrva̍yā ni̱vidā̍ hūmahe va̱yaṁ bhaga̍ṁ mi̱tramadi̍ti̱ṁ dakṣa̍ma̱sridha̍m |
a̱rya̱maṇa̱ṁ varu̍ṇa̱ṁ soma̍ma̱śvinā̱ sara̍svatī naḥ su̱bhagā̱ maya̍skarat || 1.089.03
tanno̱ vāto̍ mayo̱bhu vā̍tu bheṣa̱jaṁ tanmā̱tā pṛ̍thi̱vī tatpi̱tā dyauḥ |
tadgrāvā̍ṇaḥ soma̱suto̍ mayo̱bhuva̱stada̍śvinā śṛṇutaṁ dhiṣṇyā yu̱vam || 1.089.04
tamīśā̍na̱ṁ jaga̍tasta̱sthuṣa̱spati̍ṁ dhiyaṁji̱nvamava̍se hūmahe va̱yam |
pū̱ṣā no̱ yathā̱ veda̍sā̱masa̍dvṛ̱dhe ra̍kṣi̱tā pā̱yurada̍bdhaḥ sva̱staye̍ || 1.089.05
sva̱sti na̱ indro̍ vṛ̱ddhaśra̍vāḥ sva̱sti na̍ḥ pū̱ṣā vi̱śvave̍dāḥ |
sva̱sti na̱stārkṣyo̱ ari̍ṣṭanemiḥ sva̱sti no̱ bṛha̱spati̍rdadhātu || 1.089.06
pṛṣa̍daśvā ma̱ruta̱ḥ pṛśni̍mātaraḥ śubha̱ṁyāvā̍no vi̱dathe̍ṣu̱ jagma̍yaḥ |
a̱gni̱ji̱hvā mana̍va̱ḥ sūra̍cakṣaso̱ viśve̍ no de̱vā ava̱sā ga̍manni̱ha || 1.089.07
bha̱draṁ karṇe̍bhiḥ śṛṇuyāma devā bha̱draṁ pa̍śyemā̱kṣabhi̍ryajatrāḥ |
sthi̱rairaṅgai̍stuṣṭu̱vāṁsa̍sta̱nūbhi̱rvya̍śema de̱vahi̍ta̱ṁ yadāyu̍ḥ || 1.089.08
śa̱taminnu śa̱rado̱ anti̍ devā̱ yatrā̍ naśca̱krā ja̱rasa̍ṁ ta̱nūnā̍m |
pu̱trāso̱ yatra̍ pi̱taro̱ bhava̍nti̱ mā no̍ ma̱dhyā rī̍riṣa̱tāyu̱rganto̍ḥ || 1.089.09
adi̍ti̱rdyauradi̍tira̱ntari̍kṣa̱madi̍tirmā̱tā sa pi̱tā sa pu̱traḥ |
viśve̍ de̱vā adi̍ti̱ḥ pañca̱ janā̱ adi̍tirjā̱tamadi̍ti̱rjani̍tvam || 1.089.10
ṛ̱ju̱nī̱tī no̱ varu̍ṇo mi̱tro na̍yatu vi̱dvān |
a̱rya̱mā de̱vaiḥ sa̱joṣā̍ḥ || 1.090.01
te hi vasvo̱ vasa̍vānā̱ste apra̍mūrā̱ maho̍bhiḥ |
vra̱tā ra̍kṣante vi̱śvāhā̍ || 1.090.02
te a̱smabhya̱ṁ śarma̍ yaṁsanna̱mṛtā̱ martye̍bhyaḥ |
bādha̍mānā̱ apa̱ dviṣa̍ḥ || 1.090.03
vi na̍ḥ pa̱thaḥ su̍vi̱tāya̍ ci̱yantvindro̍ ma̱ruta̍ḥ |
pū̱ṣā bhago̱ vandyā̍saḥ || 1.090.04
u̱ta no̱ dhiyo̱ goa̍grā̱ḥ pūṣa̱nviṣṇa̱veva̍yāvaḥ |
kartā̍ naḥ svasti̱mata̍ḥ || 1.090.05
madhu̱ vātā̍ ṛtāya̱te madhu̍ kṣaranti̱ sindha̍vaḥ |
mādhvī̍rnaḥ sa̱ntvoṣa̍dhīḥ || 1.090.06
madhu̱ nakta̍mu̱toṣaso̱ madhu̍ma̱tpārthi̍va̱ṁ raja̍ḥ |
madhu̱ dyaura̍stu naḥ pi̱tā || 1.090.07
madhu̍mānno̱ vana̱spati̱rmadhu̍mā astu̱ sūrya̍ḥ |
mādhvī̱rgāvo̍ bhavantu naḥ || 1.090.08
śaṁ no̍ mi̱traḥ śaṁ varu̍ṇa̱ḥ śaṁ no̍ bhavatvarya̱mā |
śaṁ na̱ indro̱ bṛha̱spati̱ḥ śaṁ no̱ viṣṇu̍rurukra̱maḥ || 1.090.09
tvaṁ so̍ma̱ pra ci̍kito manī̱ṣā tvaṁ raji̍ṣṭha̱manu̍ neṣi̱ panthā̍m |
tava̱ praṇī̍tī pi̱taro̍ na indo de̱veṣu̱ ratna̍mabhajanta̱ dhīrā̍ḥ || 1.091.01
tvaṁ so̍ma̱ kratu̍bhiḥ su̱kratu̍rbhū̱stvaṁ dakṣai̍ḥ su̱dakṣo̍ vi̱śvave̍dāḥ |
tvaṁ vṛṣā̍ vṛṣa̱tvebhi̍rmahi̱tvā dyu̱mnebhi̍rdyu̱mnya̍bhavo nṛ̱cakṣā̍ḥ || 1.091.02
rājño̱ nu te̱ varu̍ṇasya vra̱tāni̍ bṛ̱hadga̍bhī̱raṁ tava̍ soma̱ dhāma̍ |
śuci̱ṣṭvama̍si pri̱yo na mi̱tro da̱kṣāyyo̍ arya̱mevā̍si soma || 1.091.03
yā te̱ dhāmā̍ni di̱vi yā pṛ̍thi̱vyāṁ yā parva̍te̱ṣvoṣa̍dhīṣva̱psu |
tebhi̍rno̱ viśvai̍ḥ su̱manā̱ ahe̍ḻa̱nrāja̍nsoma̱ prati̍ ha̱vyā gṛ̍bhāya || 1.091.04
tvaṁ so̍māsi̱ satpa̍ti̱stvaṁ rājo̱ta vṛ̍tra̱hā |
tvaṁ bha̱dro a̍si̱ kratu̍ḥ || 1.091.05
tvaṁ ca̍ soma no̱ vaśo̍ jī̱vātu̱ṁ na ma̍rāmahe |
pri̱yasto̍tro̱ vana̱spati̍ḥ || 1.091.06
tvaṁ so̍ma ma̱he bhaga̱ṁ tvaṁ yūna̍ ṛtāya̱te |
dakṣa̍ṁ dadhāsi jī̱vase̍ || 1.091.07
tvaṁ na̍ḥ soma vi̱śvato̱ rakṣā̍ rājannaghāya̱taḥ |
na ri̍ṣye̱ttvāva̍ta̱ḥ sakhā̍ || 1.091.08
soma̱ yāste̍ mayo̱bhuva̍ ū̱taya̱ḥ santi̍ dā̱śuṣe̍ |
tābhi̍rno'vi̱tā bha̍va || 1.091.09
i̱maṁ ya̱jñami̱daṁ vaco̍ jujuṣā̱ṇa u̱pāga̍hi |
soma̱ tvaṁ no̍ vṛ̱dhe bha̍va || 1.091.10
soma̍ gī̱rbhiṣṭvā̍ va̱yaṁ va̱rdhayā̍mo vaco̱vida̍ḥ |
su̱mṛ̱ḻī̱ko na̱ ā vi̍śa || 1.091.11
ga̱ya̱sphāno̍ amīva̱hā va̍su̱vitpu̍ṣṭi̱vardha̍naḥ |
su̱mi̱traḥ so̍ma no bhava || 1.091.12
soma̍ rāra̱ndhi no̍ hṛ̱di gāvo̱ na yava̍se̱ṣvā |
marya̍ iva̱ sva o̱kye̍ || 1.091.13
yaḥ so̍ma sa̱khye tava̍ rā̱raṇa̍ddeva̱ martya̍ḥ |
taṁ dakṣa̍ḥ sacate ka̱viḥ || 1.091.14
u̱ru̱ṣyā ṇo̍ a̱bhiśa̍ste̱ḥ soma̱ ni pā̱hyaṁha̍saḥ |
sakhā̍ su̱śeva̍ edhi naḥ || 1.091.15
ā pyā̍yasva̱ same̍tu te vi̱śvata̍ḥ soma̱ vṛṣṇya̍m |
bhavā̱ vāja̍sya saṁga̱the || 1.091.16
ā pyā̍yasva madintama̱ soma̱ viśve̍bhira̱ṁśubhi̍ḥ |
bhavā̍ naḥ su̱śrava̍stama̱ḥ sakhā̍ vṛ̱dhe || 1.091.17
saṁ te̱ payā̍ṁsi̱ samu̍ yantu̱ vājā̱ḥ saṁ vṛṣṇyā̍nyabhimāti̱ṣāha̍ḥ |
ā̱pyāya̍māno a̱mṛtā̍ya soma di̱vi śravā̍ṁsyutta̱māni̍ dhiṣva || 1.091.18
yā te̱ dhāmā̍ni ha̱viṣā̱ yaja̍nti̱ tā te̱ viśvā̍ pari̱bhūra̍stu ya̱jñam |
ga̱ya̱sphāna̍ḥ pra̱tara̍ṇaḥ su̱vīro'vī̍rahā̱ pra ca̍rā soma̱ duryā̍n || 1.091.19
somo̍ dhe̱nuṁ somo̱ arva̍ntamā̱śuṁ somo̍ vī̱raṁ ka̍rma̱ṇya̍ṁ dadāti |
sā̱da̱nya̍ṁ vida̱thya̍ṁ sa̱bheya̍ṁ pitṛ̱śrava̍ṇa̱ṁ yo dadā̍śadasmai || 1.091.20
aṣā̍ḻhaṁ yu̱tsu pṛta̍nāsu̱ papri̍ṁ sva̱rṣāma̱psāṁ vṛ̱jana̍sya go̱pām |
bha̱re̱ṣu̱jāṁ su̍kṣi̱tiṁ su̱śrava̍sa̱ṁ jaya̍nta̱ṁ tvāmanu̍ madema soma || 1.091.21
tvami̱mā oṣa̍dhīḥ soma̱ viśvā̱stvama̱po a̍janaya̱stvaṁ gāḥ |
tvamā ta̍tantho̱rva1̱̍ntari̍kṣa̱ṁ tvaṁ jyoti̍ṣā̱ vi tamo̍ vavartha || 1.091.22
de̱vena̍ no̱ mana̍sā deva soma rā̱yo bhā̱gaṁ sa̍hasāvanna̱bhi yu̍dhya |
mā tvā ta̍na̱dīśi̍ṣe vī̱rya̍syo̱bhaye̍bhya̱ḥ pra ci̍kitsā̱ gavi̍ṣṭau || 1.091.23
e̱tā u̱ tyā u̱ṣasa̍ḥ ke̱tuma̍krata̱ pūrve̱ ardhe̱ raja̍so bhā̱numa̍ñjate |
ni̱ṣkṛ̱ṇvā̱nā āyu̍dhānīva dhṛ̱ṣṇava̱ḥ prati̱ gāvo'ru̍ṣīryanti mā̱tara̍ḥ || 1.092.01
uda̍paptannaru̱ṇā bhā̱navo̱ vṛthā̍ svā̱yujo̱ aru̍ṣī̱rgā a̍yukṣata |
akra̍nnu̱ṣāso̍ va̱yunā̍ni pū̱rvathā̱ ruśa̍ntaṁ bhā̱numaru̍ṣīraśiśrayuḥ || 1.092.02
arca̍nti̱ nārī̍ra̱paso̱ na vi̱ṣṭibhi̍ḥ samā̱nena̱ yoja̍ne̱nā pa̍rā̱vata̍ḥ |
iṣa̱ṁ vaha̍ntīḥ su̱kṛte̍ su̱dāna̍ve̱ viśvedaha̱ yaja̍mānāya sunva̱te || 1.092.03
adhi̱ peśā̍ṁsi vapate nṛ̱tūri̱vāpo̍rṇute̱ vakṣa̍ u̱sreva̱ barja̍ham |
jyoti̱rviśva̍smai̱ bhuva̍nāya kṛṇva̱tī gāvo̱ na vra̱jaṁ vyu1̱̍ṣā ā̍va̱rtama̍ḥ || 1.092.04
pratya̱rcī ruśa̍dasyā adarśi̱ vi ti̍ṣṭhate̱ bādha̍te kṛ̱ṣṇamabhva̍m |
svaru̱ṁ na peśo̍ vi̱dathe̍ṣva̱ñjañci̱traṁ di̱vo du̍hi̱tā bhā̱numa̍śret || 1.092.05
atā̍riṣma̱ tama̍saspā̱rama̱syoṣā u̱cchantī̍ va̱yunā̍ kṛṇoti |
śri̱ye chando̱ na sma̍yate vibhā̱tī su̱pratī̍kā saumana̱sāyā̍jīgaḥ || 1.092.06
bhāsva̍tī ne̱trī sū̱nṛtā̍nāṁ di̱vaḥ sta̍ve duhi̱tā gota̍mebhiḥ |
pra̱jāva̍to nṛ̱vato̱ aśva̍budhyā̱nuṣo̱ goa̍grā̱ upa̍ māsi̱ vājā̍n || 1.092.07
uṣa̱stama̍śyāṁ ya̱śasa̍ṁ su̱vīra̍ṁ dā̱sapra̍vargaṁ ra̱yimaśva̍budhyam |
su̱daṁsa̍sā̱ śrava̍sā̱ yā vi̱bhāsi̱ vāja̍prasūtā subhage bṛ̱hanta̍m || 1.092.08
viśvā̍ni de̱vī bhuva̍nābhi̱cakṣyā̍ pratī̱cī cakṣu̍rurvi̱yā vi bhā̍ti |
viśva̍ṁ jī̱vaṁ ca̱rase̍ bo̱dhaya̍ntī̱ viśva̍sya̱ vāca̍mavidanmanā̱yoḥ || 1.092.09
puna̍ḥpuna̱rjāya̍mānā purā̱ṇī sa̍mā̱naṁ varṇa̍ma̱bhi śumbha̍mānā |
śva̱ghnīva̍ kṛ̱tnurvija̍ āminā̱nā marta̍sya de̱vī ja̱raya̱ntyāyu̍ḥ || 1.092.10
vyū̱rṇva̱tī di̱vo antā̍ abo̱dhyapa̱ svasā̍raṁ sanu̱taryu̍yoti |
pra̱mi̱na̱tī ma̍nu̱ṣyā̍ yu̱gāni̱ yoṣā̍ jā̱rasya̱ cakṣa̍sā̱ vi bhā̍ti || 1.092.11
pa̱śūnna ci̱trā su̱bhagā̍ prathā̱nā sindhu̱rna kṣoda̍ urvi̱yā vya̍śvait |
ami̍natī̱ daivyā̍ni vra̱tāni̱ sūrya̍sya ceti ra̱śmibhi̍rdṛśā̱nā || 1.092.12
uṣa̱stacci̱tramā bha̍rā̱smabhya̍ṁ vājinīvati |
yena̍ to̱kaṁ ca̱ tana̍yaṁ ca̱ dhāma̍he || 1.092.13
uṣo̍ a̱dyeha go̍ma̱tyaśvā̍vati vibhāvari |
re̱vada̱sme vyu̍ccha sūnṛtāvati || 1.092.14
yu̱kṣvā hi vā̍jinīva̱tyaśvā̍ a̱dyāru̱ṇā u̍ṣaḥ |
athā̍ no̱ viśvā̱ saubha̍gā̱nyā va̍ha || 1.092.15
aśvi̍nā va̱rtira̱smadā goma̍ddasrā̱ hira̍ṇyavat |
a̱rvāgratha̱ṁ sama̍nasā̱ ni ya̍cchatam || 1.092.16
yāvi̱tthā śloka̱mā di̱vo jyoti̱rjanā̍ya ca̱krathu̍ḥ |
ā na̱ ūrja̍ṁ vahatamaśvinā yu̱vam || 1.092.17
eha de̱vā ma̍yo̱bhuvā̍ da̱srā hira̍ṇyavartanī |
u̱ṣa̱rbudho̍ vahantu̱ soma̍pītaye || 1.092.18
agnī̍ṣomāvi̱maṁ su me̍ śṛṇu̱taṁ vṛ̍ṣaṇā̱ hava̍m |
prati̍ sū̱ktāni̍ haryata̱ṁ bhava̍taṁ dā̱śuṣe̱ maya̍ḥ || 1.093.01
agnī̍ṣomā̱ yo a̱dya vā̍mi̱daṁ vaca̍ḥ sapa̱ryati̍ |
tasmai̍ dhattaṁ su̱vīrya̱ṁ gavā̱ṁ poṣa̱ṁ svaśvya̍m || 1.093.02
agnī̍ṣomā̱ ya āhu̍ti̱ṁ yo vā̱ṁ dāśā̍ddha̱viṣkṛ̍tim |
sa pra̱jayā̍ su̱vīrya̱ṁ viśva̱māyu̱rvya̍śnavat || 1.093.03
agnī̍ṣomā̱ ceti̱ tadvī̱rya̍ṁ vā̱ṁ yadamu̍ṣṇītamava̱saṁ pa̱ṇiṁ gāḥ |
avā̍tirata̱ṁ bṛsa̍yasya̱ śeṣo'vi̍ndata̱ṁ jyoti̱reka̍ṁ ba̱hubhya̍ḥ || 1.093.04
yu̱vame̱tāni̍ di̱vi ro̍ca̱nānya̱gniśca̍ soma̱ sakra̍tū adhattam |
yu̱vaṁ sindhū̍ra̱bhiśa̍sterava̱dyādagnī̍ṣomā̱vamu̍ñcataṁ gṛbhī̱tān || 1.093.05
ānyaṁ di̱vo mā̍ta̱riśvā̍ jabhā̱rāma̍thnāda̱nyaṁ pari̍ śye̱no adre̍ḥ |
agnī̍ṣomā̱ brahma̍ṇā vāvṛdhā̱noruṁ ya̱jñāya̍ cakrathuru lo̱kam || 1.093.06
agnī̍ṣomā ha̱viṣa̱ḥ prasthi̍tasya vī̱taṁ harya̍taṁ vṛṣaṇā ju̱ṣethā̍m |
su̱śarmā̍ṇā̱ svava̍sā̱ hi bhū̱tamathā̍ dhatta̱ṁ yaja̍mānāya̱ śaṁ yoḥ || 1.093.07
yo a̱gnīṣomā̍ ha̱viṣā̍ sapa̱ryādde̍va̱drīcā̱ mana̍sā̱ yo ghṛ̱tena̍ |
tasya̍ vra̱taṁ ra̍kṣataṁ pā̱tamaṁha̍so vi̱śe janā̍ya̱ mahi̱ śarma̍ yacchatam || 1.093.08
agnī̍ṣomā̱ save̍dasā̱ sahū̍tī vanata̱ṁ gira̍ḥ |
saṁ de̍va̱trā ba̍bhūvathuḥ || 1.093.09
agnī̍ṣomāva̱nena̍ vā̱ṁ yo vā̍ṁ ghṛ̱tena̱ dāśa̍ti |
tasmai̍ dīdayataṁ bṛ̱hat || 1.093.10
agnī̍ṣomāvi̱māni̍ no yu̱vaṁ ha̱vyā ju̍joṣatam |
ā yā̍ta̱mupa̍ na̱ḥ sacā̍ || 1.093.11
agnī̍ṣomā pipṛ̱tamarva̍to na̱ ā pyā̍yantāmu̱sriyā̍ havya̱sūda̍ḥ |
a̱sme balā̍ni ma̱ghava̍tsu dhattaṁ kṛṇu̱taṁ no̍ adhva̱raṁ śru̍ṣṭi̱manta̍m || 1.093.12
i̱maṁ stoma̱marha̍te jā̱tave̍dase̱ ratha̍miva̱ saṁ ma̍hemā manī̱ṣayā̍ |
bha̱drā hi na̱ḥ prama̍tirasya sa̱ṁsadyagne̍ sa̱khye mā ri̍ṣāmā va̱yaṁ tava̍ || 1.094.01
yasmai̱ tvamā̱yaja̍se̱ sa sā̍dhatyana̱rvā kṣe̍ti̱ dadha̍te su̱vīrya̍m |
sa tū̍tāva̱ naina̍maśnotyaṁha̱tiragne̍ sa̱khye mā ri̍ṣāmā va̱yaṁ tava̍ || 1.094.02
śa̱kema̍ tvā sa̱midha̍ṁ sā̱dhayā̱ dhiya̱stve de̱vā ha̱vira̍da̱ntyāhu̍tam |
tvamā̍di̱tyā ā va̍ha̱ tānhyu1̱̍śmasyagne̍ sa̱khye mā ri̍ṣāmā va̱yaṁ tava̍ || 1.094.03
bharā̍me̱dhmaṁ kṛ̱ṇavā̍mā ha̱vīṁṣi̍ te ci̱taya̍nta̱ḥ parva̍ṇāparvaṇā va̱yam |
jī̱vāta̍ve prata̱raṁ sā̍dhayā̱ dhiyo'gne̍ sa̱khye mā ri̍ṣāmā va̱yaṁ tava̍ || 1.094.04
vi̱śāṁ go̱pā a̍sya caranti ja̱ntavo̍ dvi̱pacca̱ yadu̱ta catu̍ṣpada̱ktubhi̍ḥ |
ci̱traḥ pra̍ke̱ta u̱ṣaso̍ ma̱hā a̱syagne̍ sa̱khye mā ri̍ṣāmā va̱yaṁ tava̍ || 1.094.05
tvama̍dhva̱ryuru̱ta hotā̍si pū̱rvyaḥ pra̍śā̱stā potā̍ ja̱nuṣā̍ pu̱rohi̍taḥ |
viśvā̍ vi̱dvā ārtvi̍jyā dhīra puṣya̱syagne̍ sa̱khye mā ri̍ṣāmā va̱yaṁ tava̍ || 1.094.06
yo vi̱śvata̍ḥ su̱pratī̍kaḥ sa̱dṛṅṅasi̍ dū̱re ci̱tsanta̱ḻidi̱vāti̍ rocase |
rātryā̍ści̱dandho̱ ati̍ deva paśya̱syagne̍ sa̱khye mā ri̍ṣāmā va̱yaṁ tava̍ || 1.094.07
pūrvo̍ devā bhavatu sunva̱to ratho̱'smāka̱ṁ śaṁso̍ a̱bhya̍stu dū̱ḍhya̍ḥ |
tadā jā̍nīto̱ta pu̍ṣyatā̱ vaco'gne̍ sa̱khye mā ri̍ṣāmā va̱yaṁ tava̍ || 1.094.08
va̱dhairdu̱ḥśaṁsā̱ apa̍ dū̱ḍhyo̍ jahi dū̱re vā̱ ye anti̍ vā̱ ke ci̍da̱triṇa̍ḥ |
athā̍ ya̱jñāya̍ gṛṇa̱te su̱gaṁ kṛ̱dhyagne̍ sa̱khye mā ri̍ṣāmā va̱yaṁ tava̍ || 1.094.09
yadayu̍kthā aru̱ṣā rohi̍tā̱ rathe̱ vāta̍jūtā vṛṣa̱bhasye̍va te̱ rava̍ḥ |
ādi̍nvasi va̱nino̍ dhū̱make̍tu̱nāgne̍ sa̱khye mā ri̍ṣāmā va̱yaṁ tava̍ || 1.094.10
adha̍ sva̱nādu̱ta bi̍bhyuḥ pata̱triṇo̍ dra̱psā yatte̍ yava̱sādo̱ vyasthi̍ran |
su̱gaṁ tatte̍ tāva̱kebhyo̱ rathe̱bhyo'gne̍ sa̱khye mā ri̍ṣāmā va̱yaṁ tava̍ || 1.094.11
a̱yaṁ mi̱trasya̱ varu̍ṇasya̱ dhāya̍se'vayā̱tāṁ ma̱rutā̱ṁ heḻo̱ adbhu̍taḥ |
mṛ̱ḻā su no̱ bhūtve̍ṣā̱ṁ mana̱ḥ puna̱ragne̍ sa̱khye mā ri̍ṣāmā va̱yaṁ tava̍ || 1.094.12
de̱vo de̱vānā̍masi mi̱tro adbhu̍to̱ vasu̱rvasū̍nāmasi̱ cāru̍radhva̱re |
śarma̍nsyāma̱ tava̍ sa̱pratha̍sta̱me'gne̍ sa̱khye mā ri̍ṣāmā va̱yaṁ tava̍ || 1.094.13
tatte̍ bha̱draṁ yatsami̍ddha̱ḥ sve dame̱ somā̍huto̱ jara̍se mṛḻa̱yatta̍maḥ |
dadhā̍si̱ ratna̱ṁ dravi̍ṇaṁ ca dā̱śuṣe'gne̍ sa̱khye mā ri̍ṣāmā va̱yaṁ tava̍ || 1.094.14
yasmai̱ tvaṁ su̍draviṇo̱ dadā̍śo'nāgā̱stvama̍dite sa̱rvatā̍tā |
yaṁ bha̱dreṇa̱ śava̍sā co̱dayā̍si pra̱jāva̍tā̱ rādha̍sā̱ te syā̍ma || 1.094.15
sa tvama̍gne saubhaga̱tvasya̍ vi̱dvāna̱smāka̱māyu̱ḥ pra ti̍re̱ha de̍va |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.094.16
dve virū̍pe carata̱ḥ svarthe̍ a̱nyānyā̍ va̱tsamupa̍ dhāpayete |
hari̍ra̱nyasyā̱ṁ bhava̍ti sva̱dhāvā̍ñchu̱kro a̱nyasyā̍ṁ dadṛśe su̱varcā̍ḥ || 1.095.01
daśe̱maṁ tvaṣṭu̍rjanayanta̱ garbha̱mata̍ndrāso yuva̱tayo̱ vibhṛ̍tram |
ti̱gmānī̍ka̱ṁ svaya̍śasa̱ṁ jane̍ṣu vi̱roca̍māna̱ṁ pari̍ ṣīṁ nayanti || 1.095.02
trīṇi̱ jānā̱ pari̍ bhūṣantyasya samu̱dra eka̍ṁ di̱vyeka̍ma̱psu |
pūrvā̱manu̱ pra diśa̱ṁ pārthi̍vānāmṛ̱tūnpra̱śāsa̱dvi da̍dhāvanu̱ṣṭhu || 1.095.03
ka i̱maṁ vo̍ ni̱ṇyamā ci̍keta va̱tso mā̱tṝrja̍nayata sva̱dhābhi̍ḥ |
ba̱hvī̱nāṁ garbho̍ a̱pasā̍mu̱pasthā̍nma̱hānka̱virniśca̍rati sva̱dhāvā̍n || 1.095.04
ā̱viṣṭyo̍ vardhate̱ cāru̍rāsu ji̱hmānā̍mū̱rdhvaḥ svaya̍śā u̱pasthe̍ |
u̱bhe tvaṣṭu̍rbibhyatu̱rjāya̍mānātpratī̱cī si̱ṁhaṁ prati̍ joṣayete || 1.095.05
u̱bhe bha̱dre jo̍ṣayete̱ na mene̱ gāvo̱ na vā̱śrā upa̍ tasthu̱revai̍ḥ |
sa dakṣā̍ṇā̱ṁ dakṣa̍patirbabhūvā̱ñjanti̱ yaṁ da̍kṣiṇa̱to ha̱virbhi̍ḥ || 1.095.06
udya̍ṁyamīti savi̱teva̍ bā̱hū u̱bhe sicau̍ yatate bhī̱ma ṛ̱ñjan |
ucchu̱kramatka̍majate si̱masmā̱nnavā̍ mā̱tṛbhyo̱ vasa̍nā jahāti || 1.095.07
tve̱ṣaṁ rū̱paṁ kṛ̍ṇuta̱ utta̍ra̱ṁ yatsa̍mpṛñcā̱naḥ sada̍ne̱ gobhi̍ra̱dbhiḥ |
ka̱virbu̱dhnaṁ pari̍ marmṛjyate̱ dhīḥ sā de̱vatā̍tā̱ sami̍tirbabhūva || 1.095.08
u̱ru te̱ jraya̱ḥ parye̍ti bu̱dhnaṁ vi̱roca̍mānaṁ mahi̱ṣasya̱ dhāma̍ |
viśve̍bhiragne̱ svaya̍śobhiri̱ddho'da̍bdhebhiḥ pā̱yubhi̍ḥ pāhya̱smān || 1.095.09
dhanva̱nsrota̍ḥ kṛṇute gā̱tumū̱rmiṁ śu̱krairū̱rmibhi̍ra̱bhi na̍kṣati̱ kṣām |
viśvā̱ sanā̍ni ja̱ṭhare̍ṣu dhatte̱'ntarnavā̍su carati pra̱sūṣu̍ || 1.095.10
e̱vā no̍ agne sa̱midhā̍ vṛdhā̱no re̱vatpā̍vaka̱ śrava̍se̱ vi bhā̍hi |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.095.11
sa pra̱tnathā̱ saha̍sā̱ jāya̍mānaḥ sa̱dyaḥ kāvyā̍ni̱ baḻa̍dhatta̱ viśvā̍ |
āpa̍śca mi̱traṁ dhi̱ṣaṇā̍ ca sādhande̱vā a̱gniṁ dhā̍rayandraviṇo̱dām || 1.096.01
sa pūrva̍yā ni̱vidā̍ ka̱vyatā̱yori̱māḥ pra̱jā a̍janaya̱nmanū̍nām |
vi̱vasva̍tā̱ cakṣa̍sā̱ dyāma̱paśca̍ de̱vā a̱gniṁ dhā̍rayandraviṇo̱dām || 1.096.02
tamī̍ḻata pratha̱maṁ ya̍jña̱sādha̱ṁ viśa̱ ārī̱rāhu̍tamṛñjasā̱nam |
ū̱rjaḥ pu̱traṁ bha̍ra̱taṁ sṛ̱pradā̍nuṁ de̱vā a̱gniṁ dhā̍rayandraviṇo̱dām || 1.096.03
sa mā̍ta̱riśvā̍ puru̱vāra̍puṣṭirvi̱dadgā̱tuṁ tana̍yāya sva̱rvit |
vi̱śāṁ go̱pā ja̍ni̱tā roda̍syorde̱vā a̱gniṁ dhā̍rayandraviṇo̱dām || 1.096.04
nakto̱ṣāsā̱ varṇa̍mā̱memyā̍ne dhā̱paye̍te̱ śiśu̱meka̍ṁ samī̱cī |
dyāvā̱kṣāmā̍ ru̱kmo a̱ntarvi bhā̍ti de̱vā a̱gniṁ dhā̍rayandraviṇo̱dām || 1.096.05
rā̱yo bu̱dhnaḥ sa̱ṁgama̍no̱ vasū̍nāṁ ya̱jñasya̍ ke̱turma̍nma̱sādha̍no̱ veḥ |
a̱mṛ̱ta̱tvaṁ rakṣa̍māṇāsa enaṁ de̱vā a̱gniṁ dhā̍rayandraviṇo̱dām || 1.096.06
nū ca̍ pu̱rā ca̱ sada̍naṁ rayī̱ṇāṁ jā̱tasya̍ ca̱ jāya̍mānasya ca̱ kṣām |
sa̱taśca̍ go̱pāṁ bhava̍taśca̱ bhūre̍rde̱vā a̱gniṁ dhā̍rayandraviṇo̱dām || 1.096.07
dra̱vi̱ṇo̱dā dravi̍ṇasastu̱rasya̍ draviṇo̱dāḥ sana̍rasya̱ pra ya̍ṁsat |
dra̱vi̱ṇo̱dā vī̱rava̍tī̱miṣa̍ṁ no draviṇo̱dā rā̍sate dī̱rghamāyu̍ḥ || 1.096.08
e̱vā no̍ agne sa̱midhā̍ vṛdhā̱no re̱vatpā̍vaka̱ śrava̍se̱ vi bhā̍hi |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.096.09
apa̍ na̱ḥ śośu̍cada̱ghamagne̍ śuśu̱gdhyā ra̱yim |
apa̍ na̱ḥ śośu̍cada̱gham || 1.097.01
su̱kṣe̱tri̱yā su̍gātu̱yā va̍sū̱yā ca̍ yajāmahe |
apa̍ na̱ḥ śośu̍cada̱gham || 1.097.02
pra yadbhandi̍ṣṭha eṣā̱ṁ prāsmākā̍saśca sū̱raya̍ḥ |
apa̍ na̱ḥ śośu̍cada̱gham || 1.097.03
pra yatte̍ agne sū̱rayo̱ jāye̍mahi̱ pra te̍ va̱yam |
apa̍ na̱ḥ śośu̍cada̱gham || 1.097.04
pra yada̱gneḥ saha̍svato vi̱śvato̱ yanti̍ bhā̱nava̍ḥ |
apa̍ na̱ḥ śośu̍cada̱gham || 1.097.05
tvaṁ hi vi̍śvatomukha vi̱śvata̍ḥ pari̱bhūrasi̍ |
apa̍ na̱ḥ śośu̍cada̱gham || 1.097.06
dviṣo̍ no viśvatomu̱khāti̍ nā̱veva̍ pāraya |
apa̍ na̱ḥ śośu̍cada̱gham || 1.097.07
sa na̱ḥ sindhu̍miva nā̱vayāti̍ parṣā sva̱staye̍ |
apa̍ na̱ḥ śośu̍cada̱gham || 1.097.08
vai̱śvā̱na̱rasya̍ suma̱tau syā̍ma̱ rājā̱ hi ka̱ṁ bhuva̍nānāmabhi̱śrīḥ |
i̱to jā̱to viśva̍mi̱daṁ vi ca̍ṣṭe vaiśvāna̱ro ya̍tate̱ sūrye̍ṇa || 1.098.01
pṛ̱ṣṭo di̱vi pṛ̱ṣṭo a̱gniḥ pṛ̍thi̱vyāṁ pṛ̱ṣṭo viśvā̱ oṣa̍dhī̱rā vi̍veśa |
vai̱śvā̱na̱raḥ saha̍sā pṛ̱ṣṭo a̱gniḥ sa no̱ divā̱ sa ri̱ṣaḥ pā̍tu̱ nakta̍m || 1.098.02
vaiśvā̍nara̱ tava̱ tatsa̱tyama̍stva̱smānrāyo̍ ma̱ghavā̍naḥ sacantām |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.098.03
jā̱tave̍dase sunavāma̱ soma̍marātīya̱to ni da̍hāti̱ veda̍ḥ |
sa na̍ḥ parṣa̱dati̍ du̱rgāṇi̱ viśvā̍ nā̱veva̱ sindhu̍ṁ duri̱tātya̱gniḥ || 1.099.01
sa yo vṛṣā̱ vṛṣṇye̍bhi̱ḥ samo̍kā ma̱ho di̱vaḥ pṛ̍thi̱vyāśca̍ sa̱mrāṭ |
sa̱tī̱nasa̍tvā̱ havyo̱ bhare̍ṣu ma̱rutvā̍nno bhava̱tvindra̍ ū̱tī || 1.100.01
yasyānā̍pta̱ḥ sūrya̍syeva̱ yāmo̱ bhare̍bhare vṛtra̱hā śuṣmo̱ asti̍ |
vṛṣa̍ntama̱ḥ sakhi̍bhi̱ḥ svebhi̱revai̍rma̱rutvā̍nno bhava̱tvindra̍ ū̱tī || 1.100.02
di̱vo na yasya̱ reta̍so̱ dughā̍nā̱ḥ panthā̍so̱ yanti̱ śava̱sāpa̍rītāḥ |
ta̱raddve̍ṣāḥ sāsa̱hiḥ pauṁsye̍bhirma̱rutvā̍nno bhava̱tvindra̍ ū̱tī || 1.100.03
so aṅgi̍robhi̱raṅgi̍rastamo bhū̱dvṛṣā̱ vṛṣa̍bhi̱ḥ sakhi̍bhi̱ḥ sakhā̱ san |
ṛ̱gmibhi̍rṛ̱gmī gā̱tubhi̱rjyeṣṭho̍ ma̱rutvā̍nno bhava̱tvindra̍ ū̱tī || 1.100.04
sa sū̱nubhi̱rna ru̱drebhi̱rṛbhvā̍ nṛ̱ṣāhye̍ sāsa̱hvā a̱mitrā̍n |
sanī̍ḻebhiḥ śrava̱syā̍ni̱ tūrva̍nma̱rutvā̍nno bhava̱tvindra̍ ū̱tī || 1.100.05
sa ma̍nyu̱mīḥ sa̱mada̍nasya ka̱rtāsmāke̍bhi̱rnṛbhi̱ḥ sūrya̍ṁ sanat |
a̱sminnaha̱nsatpa̍tiḥ puruhū̱to ma̱rutvā̍nno bhava̱tvindra̍ ū̱tī || 1.100.06
tamū̱tayo̍ raṇaya̱ñchūra̍sātau̱ taṁ kṣema̍sya kṣi̱taya̍ḥ kṛṇvata̱ trām |
sa viśva̍sya ka̱ruṇa̍syeśa̱ eko̍ ma̱rutvā̍nno bhava̱tvindra̍ ū̱tī || 1.100.07
tama̍psanta̱ śava̍sa utsa̱veṣu̱ naro̱ nara̱mava̍se̱ taṁ dhanā̍ya |
so a̱ndhe ci̱ttama̍si̱ jyoti̍rvidanma̱rutvā̍nno bhava̱tvindra̍ ū̱tī || 1.100.08
sa sa̱vyena̍ yamati̱ vrādha̍taści̱tsa da̍kṣi̱ṇe saṁgṛ̍bhītā kṛ̱tāni̍ |
sa kī̱riṇā̍ ci̱tsani̍tā̱ dhanā̍ni ma̱rutvā̍nno bhava̱tvindra̍ ū̱tī || 1.100.09
sa grāme̍bhi̱ḥ sani̍tā̱ sa rathe̍bhirvi̱de viśvā̍bhiḥ kṛ̱ṣṭibhi̱rnva1̱̍dya |
sa pauṁsye̍bhirabhi̱bhūraśa̍stīrma̱rutvā̍nno bhava̱tvindra̍ ū̱tī || 1.100.10
sa jā̱mibhi̱ryatsa̱majā̍ti mī̱ḻhe'jā̍mibhirvā puruhū̱ta evai̍ḥ |
a̱pāṁ to̱kasya̱ tana̍yasya je̱ṣe ma̱rutvā̍nno bhava̱tvindra̍ ū̱tī || 1.100.11
sa va̍jra̱bhṛdda̍syu̱hā bhī̱ma u̱graḥ sa̱hasra̍cetāḥ śa̱tanī̍tha̱ ṛbhvā̍ |
ca̱mrī̱ṣo na śava̍sā̱ pāñca̍janyo ma̱rutvā̍nno bhava̱tvindra̍ ū̱tī || 1.100.12
tasya̱ vajra̍ḥ krandati̱ smatsva̱rṣā di̱vo na tve̱ṣo ra̱vatha̱ḥ śimī̍vān |
taṁ sa̍cante sa̱naya̱staṁ dhanā̍ni ma̱rutvā̍nno bhava̱tvindra̍ ū̱tī || 1.100.13
yasyāja̍sra̱ṁ śava̍sā̱ māna̍mu̱kthaṁ pa̍ribhu̱jadroda̍sī vi̱śvata̍ḥ sīm |
sa pā̍riṣa̱tkratu̍bhirmandasā̱no ma̱rutvā̍nno bhava̱tvindra̍ ū̱tī || 1.100.14
na yasya̍ de̱vā de̱vatā̱ na martā̱ āpa̍śca̱na śava̍so̱ anta̍mā̱puḥ |
sa pra̱rikvā̱ tvakṣa̍sā̱ kṣmo di̱vaśca̍ ma̱rutvā̍nno bhava̱tvindra̍ ū̱tī || 1.100.15
ro̱hicchyā̱vā su̱mada̍ṁśurlalā̱mīrdyu̱kṣā rā̱ya ṛ̱jrāśva̍sya |
vṛṣa̍ṇvanta̱ṁ bibhra̍tī dhū̱rṣu ratha̍ṁ ma̱ndrā ci̍keta̱ nāhu̍ṣīṣu vi̱kṣu || 1.100.16
e̱tattyatta̍ indra̱ vṛṣṇa̍ u̱kthaṁ vā̍rṣāgi̱rā a̱bhi gṛ̍ṇanti̱ rādha̍ḥ |
ṛ̱jrāśva̱ḥ praṣṭi̍bhiramba̱rīṣa̍ḥ sa̱hade̍vo̱ bhaya̍mānaḥ su̱rādhā̍ḥ || 1.100.17
dasyū̱ñchimyū̍śca puruhū̱ta evai̍rha̱tvā pṛ̍thi̱vyāṁ śarvā̱ ni ba̍rhīt |
sana̱tkṣetra̱ṁ sakhi̍bhiḥ śvi̱tnyebhi̱ḥ sana̱tsūrya̱ṁ sana̍da̱paḥ su̱vajra̍ḥ || 1.100.18
vi̱śvāhendro̍ adhiva̱ktā no̍ a̱stvapa̍rihvṛtāḥ sanuyāma̱ vāja̍m |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.100.19
pra ma̱ndine̍ pitu̱mada̍rcatā̱ vaco̱ yaḥ kṛ̱ṣṇaga̍rbhā ni̱raha̍nnṛ̱jiśva̍nā |
a̱va̱syavo̱ vṛṣa̍ṇa̱ṁ vajra̍dakṣiṇaṁ ma̱rutva̍ntaṁ sa̱khyāya̍ havāmahe || 1.101.01
yo vya̍ṁsaṁ jāhṛṣā̱ṇena̍ ma̱nyunā̱ yaḥ śamba̍ra̱ṁ yo aha̱npipru̍mavra̱tam |
indro̱ yaḥ śuṣṇa̍ma̱śuṣa̱ṁ nyāvṛ̍ṇaṅma̱rutva̍ntaṁ sa̱khyāya̍ havāmahe || 1.101.02
yasya̱ dyāvā̍pṛthi̱vī pauṁsya̍ṁ ma̱hadyasya̍ vra̱te varu̍ṇo̱ yasya̱ sūrya̍ḥ |
yasyendra̍sya̱ sindha̍va̱ḥ saśca̍ti vra̱taṁ ma̱rutva̍ntaṁ sa̱khyāya̍ havāmahe || 1.101.03
yo aśvā̍nā̱ṁ yo gavā̱ṁ gopa̍tirva̱śī ya ā̍ri̱taḥ karma̍ṇikarmaṇi sthi̱raḥ |
vī̱ḻości̱dindro̱ yo asu̍nvato va̱dho ma̱rutva̍ntaṁ sa̱khyāya̍ havāmahe || 1.101.04
yo viśva̍sya̱ jaga̍taḥ prāṇa̱taspati̱ryo bra̱hmaṇe̍ pratha̱mo gā avi̍ndat |
indro̱ yo dasyū̱radha̍rā a̱vāti̍ranma̱rutva̍ntaṁ sa̱khyāya̍ havāmahe || 1.101.05
yaḥ śūre̍bhi̱rhavyo̱ yaśca̍ bhī̱rubhi̱ryo dhāva̍dbhirhū̱yate̱ yaśca̍ ji̱gyubhi̍ḥ |
indra̱ṁ yaṁ viśvā̱ bhuva̍nā̱bhi sa̍ṁda̱dhurma̱rutva̍ntaṁ sa̱khyāya̍ havāmahe || 1.101.06
ru̱drāṇā̍meti pra̱diśā̍ vicakṣa̱ṇo ru̱drebhi̱ryoṣā̍ tanute pṛ̱thu jraya̍ḥ |
indra̍ṁ manī̱ṣā a̱bhya̍rcati śru̱taṁ ma̱rutva̍ntaṁ sa̱khyāya̍ havāmahe || 1.101.07
yadvā̍ marutvaḥ para̱me sa̱dhasthe̱ yadvā̍va̱me vṛ̱jane̍ mā̱dayā̍se |
ata̱ ā yā̍hyadhva̱raṁ no̱ acchā̍ tvā̱yā ha̱viśca̍kṛmā satyarādhaḥ || 1.101.08
tvā̱yendra̱ soma̍ṁ suṣumā sudakṣa tvā̱yā ha̱viśca̍kṛmā brahmavāhaḥ |
adhā̍ niyutva̱ḥ saga̍ṇo ma̱rudbhi̍ra̱sminya̱jñe ba̱rhiṣi̍ mādayasva || 1.101.09
mā̱daya̍sva̱ hari̍bhi̱rye ta̍ indra̱ vi ṣya̍sva̱ śipre̱ vi sṛ̍jasva̱ dhene̍ |
ā tvā̍ suśipra̱ hara̍yo vahantū̱śanha̱vyāni̱ prati̍ no juṣasva || 1.101.10
ma̱rutsto̍trasya vṛ̱jana̍sya go̱pā va̱yamindre̍ṇa sanuyāma̱ vāja̍m |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.101.11
i̱māṁ te̱ dhiya̱ṁ pra bha̍re ma̱ho ma̱hīma̱sya sto̱tre dhi̱ṣaṇā̱ yatta̍ āna̱je |
tamu̍tsa̱ve ca̍ prasa̱ve ca̍ sāsa̱himindra̍ṁ de̱vāsa̱ḥ śava̍sāmada̱nnanu̍ || 1.102.01
a̱sya śravo̍ na̱dya̍ḥ sa̱pta bi̍bhrati̱ dyāvā̱kṣāmā̍ pṛthi̱vī da̍rśa̱taṁ vapu̍ḥ |
a̱sme sū̍ryācandra̱masā̍bhi̱cakṣe̍ śra̱ddhe kami̍ndra carato vitartu̱ram || 1.102.02
taṁ smā̱ ratha̍ṁ maghava̱nprāva̍ sā̱taye̱ jaitra̱ṁ yaṁ te̍ anu̱madā̍ma saṁga̱me |
ā̱jā na̍ indra̱ mana̍sā puruṣṭuta tvā̱yadbhyo̍ maghava̱ñcharma̍ yaccha naḥ || 1.102.03
va̱yaṁ ja̍yema̱ tvayā̍ yu̱jā vṛta̍ma̱smāka̱maṁśa̱muda̍vā̱ bhare̍bhare |
a̱smabhya̍mindra̱ vari̍vaḥ su̱gaṁ kṛ̍dhi̱ pra śatrū̍ṇāṁ maghava̱nvṛṣṇyā̍ ruja || 1.102.04
nānā̱ hi tvā̱ hava̍mānā̱ janā̍ i̱me dhanā̍nāṁ dharta̱rava̍sā vipa̱nyava̍ḥ |
a̱smāka̍ṁ smā̱ ratha̱mā ti̍ṣṭha sā̱taye̱ jaitra̱ṁ hī̍ndra̱ nibhṛ̍ta̱ṁ mana̱stava̍ || 1.102.05
go̱jitā̍ bā̱hū ami̍takratuḥ si̱maḥ karma̍nkarmañcha̱tamū̍tiḥ khajaṁka̱raḥ |
a̱ka̱lpa indra̍ḥ prati̱māna̱moja̱sāthā̱ janā̱ vi hva̍yante siṣā̱sava̍ḥ || 1.102.06
utte̍ śa̱tānma̍ghava̱nnucca̱ bhūya̍sa̱ utsa̱hasrā̍dririce kṛ̱ṣṭiṣu̱ śrava̍ḥ |
a̱mā̱traṁ tvā̍ dhi̱ṣaṇā̍ titviṣe ma̱hyadhā̍ vṛ̱trāṇi̍ jighnase puraṁdara || 1.102.07
tri̱vi̱ṣṭi̱dhātu̍ prati̱māna̱moja̍sasti̱sro bhūmī̍rnṛpate̱ trīṇi̍ roca̱nā |
atī̱daṁ viśva̱ṁ bhuva̍naṁ vavakṣithāśa̱truri̍ndra ja̱nuṣā̍ sa̱nāda̍si || 1.102.08
tvāṁ de̱veṣu̍ pratha̱maṁ ha̍vāmahe̱ tvaṁ ba̍bhūtha̱ pṛta̍nāsu sāsa̱hiḥ |
semaṁ na̍ḥ kā̱rumu̍pama̱nyumu̱dbhida̱mindra̍ḥ kṛṇotu prasa̱ve ratha̍ṁ pu̱raḥ || 1.102.09
tvaṁ ji̍getha̱ na dhanā̍ rurodhi̱thārbhe̍ṣvā̱jā ma̍ghavanma̱hatsu̍ ca |
tvāmu̱gramava̍se̱ saṁ śi̍śīma̱syathā̍ na indra̱ hava̍neṣu codaya || 1.102.10
vi̱śvāhendro̍ adhiva̱ktā no̍ a̱stvapa̍rihvṛtāḥ sanuyāma̱ vāja̍m |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.102.11
tatta̍ indri̱yaṁ pa̍ra̱maṁ pa̍rā̱cairadhā̍rayanta ka̱vaya̍ḥ pu̱redam |
kṣa̱medama̱nyaddi̱vya1̱̍nyada̍sya̱ samī̍ pṛcyate sama̱neva̍ ke̱tuḥ || 1.103.01
sa dhā̍rayatpṛthi̱vīṁ pa̱pratha̍cca̱ vajre̍ṇa ha̱tvā nira̱paḥ sa̍sarja |
aha̱nnahi̱mabhi̍nadrauhi̱ṇaṁ vyaha̱nvya̍ṁsaṁ ma̱ghavā̱ śacī̍bhiḥ || 1.103.02
sa jā̱tūbha̍rmā śra̱ddadhā̍na̱ oja̱ḥ puro̍ vibhi̱ndanna̍cara̱dvi dāsī̍ḥ |
vi̱dvānva̍jri̱ndasya̍ve he̱tima̱syārya̱ṁ saho̍ vardhayā dyu̱mnami̍ndra || 1.103.03
tadū̱cuṣe̱ mānu̍ṣe̱mā yu̱gāni̍ kī̱rtenya̍ṁ ma̱ghavā̱ nāma̱ bibhra̍t |
u̱pa̱pra̱yanda̍syu̱hatyā̍ya va̱jrī yaddha̍ sū̱nuḥ śrava̍se̱ nāma̍ da̱dhe || 1.103.04
tada̍sye̱daṁ pa̍śyatā̱ bhūri̍ pu̱ṣṭaṁ śradindra̍sya dhattana vī̱ryā̍ya |
sa gā a̍vinda̱tso a̍vinda̱daśvā̱nsa oṣa̍dhī̱ḥ so a̱paḥ sa vanā̍ni || 1.103.05
bhūri̍karmaṇe vṛṣa̱bhāya̱ vṛṣṇe̍ sa̱tyaśu̍ṣmāya sunavāma̱ soma̍m |
ya ā̱dṛtyā̍ paripa̱nthīva̱ śūro'ya̍jvano vi̱bhaja̱nneti̱ veda̍ḥ || 1.103.06
tadi̍ndra̱ preva̍ vī̱rya̍ṁ cakartha̱ yatsa̱santa̱ṁ vajre̱ṇābo̍dha̱yo'hi̍m |
anu̍ tvā̱ patnī̍rhṛṣi̱taṁ vaya̍śca̱ viśve̍ de̱vāso̍ amada̱nnanu̍ tvā || 1.103.07
śuṣṇa̱ṁ pipru̱ṁ kuya̍vaṁ vṛ̱trami̍ndra ya̱dāva̍dhī̱rvi pura̱ḥ śamba̍rasya |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.103.08
yoni̍ṣṭa indra ni̱ṣade̍ akāri̱ tamā ni ṣī̍da svā̱no nārvā̍ |
vi̱mucyā̱ vayo̍'va̱sāyāśvā̍ndo̱ṣā vasto̱rvahī̍yasaḥ prapi̱tve || 1.104.01
o tye nara̱ indra̍mū̱taye̍ gu̱rnū ci̱ttānsa̱dyo adhva̍no jagamyāt |
de̱vāso̍ ma̱nyuṁ dāsa̍sya ścamna̱nte na̱ ā va̍kṣansuvi̱tāya̱ varṇa̍m || 1.104.02
ava̱ tmanā̍ bharate̱ keta̍vedā̱ ava̱ tmanā̍ bharate̱ phena̍mu̱dan |
kṣī̱reṇa̍ snāta̱ḥ kuya̍vasya̱ yoṣe̍ ha̱te te syā̍tāṁ prava̱ṇe śiphā̍yāḥ || 1.104.03
yu̱yopa̱ nābhi̱rupa̍rasyā̱yoḥ pra pūrvā̍bhistirate̱ rāṣṭi̱ śūra̍ḥ |
a̱ñja̱sī ku̍li̱śī vī̱rapa̍tnī̱ payo̍ hinvā̱nā u̱dabhi̍rbharante || 1.104.04
prati̱ yatsyā nīthāda̍rśi̱ dasyo̱roko̱ nācchā̱ sada̍naṁ jāna̱tī gā̍t |
adha̍ smā no maghavañcarkṛ̱tādinmā no̍ ma̱gheva̍ niṣṣa̱pī parā̍ dāḥ || 1.104.05
sa tvaṁ na̍ indra̱ sūrye̱ so a̱psva̍nāgā̱stva ā bha̍ja jīvaśa̱ṁse |
mānta̍rā̱ṁ bhuja̱mā rī̍riṣo na̱ḥ śraddhi̍taṁ te maha̱ta i̍ndri̱yāya̍ || 1.104.06
adhā̍ manye̱ śratte̍ asmā adhāyi̱ vṛṣā̍ codasva maha̱te dhanā̍ya |
mā no̱ akṛ̍te puruhūta̱ yonā̱vindra̱ kṣudhya̍dbhyo̱ vaya̍ āsu̱tiṁ dā̍ḥ || 1.104.07
mā no̍ vadhīrindra̱ mā parā̍ dā̱ mā na̍ḥ pri̱yā bhoja̍nāni̱ pra mo̍ṣīḥ |
ā̱ṇḍā mā no̍ maghavañchakra̱ nirbhe̱nmā na̱ḥ pātrā̍ bhetsa̱hajā̍nuṣāṇi || 1.104.08
a̱rvāṅehi̱ soma̍kāmaṁ tvāhura̱yaṁ su̱tastasya̍ pibā̱ madā̍ya |
u̱ru̱vyacā̍ ja̱ṭhara̱ ā vṛ̍ṣasva pi̱teva̍ naḥ śṛṇuhi hū̱yamā̍naḥ || 1.104.09
ca̱ndramā̍ a̱psva1̱̍ntarā su̍pa̱rṇo dhā̍vate di̱vi |
na vo̍ hiraṇyanemayaḥ pa̱daṁ vi̍ndanti vidyuto vi̱ttaṁ me̍ a̱sya ro̍dasī || 1.105.01
artha̱midvā u̍ a̱rthina̱ ā jā̱yā yu̍vate̱ pati̍m |
tu̱ñjāte̱ vṛṣṇya̱ṁ paya̍ḥ pari̱dāya̱ rasa̍ṁ duhe vi̱ttaṁ me̍ a̱sya ro̍dasī || 1.105.02
mo ṣu de̍vā a̱daḥ sva1̱̍rava̍ pādi di̱vaspari̍ |
mā so̱myasya̍ śa̱mbhuva̱ḥ śūne̍ bhūma̱ kadā̍ ca̱na vi̱ttaṁ me̍ a̱sya ro̍dasī || 1.105.03
ya̱jñaṁ pṛ̍cchāmyava̱maṁ sa taddū̱to vi vo̍cati |
kva̍ ṛ̱taṁ pū̱rvyaṁ ga̱taṁ kastadbi̍bharti̱ nūta̍no vi̱ttaṁ me̍ a̱sya ro̍dasī || 1.105.04
a̱mī ye de̍vā̱ḥ sthana̍ tri̱ṣvā ro̍ca̱ne di̱vaḥ |
kadva̍ ṛ̱taṁ kadanṛ̍ta̱ṁ kva̍ pra̱tnā va̱ āhu̍tirvi̱ttaṁ me̍ a̱sya ro̍dasī || 1.105.05
kadva̍ ṛ̱tasya̍ dharṇa̱si kadvaru̍ṇasya̱ cakṣa̍ṇam |
kada̍rya̱mṇo ma̱haspa̱thāti̍ krāmema dū̱ḍhyo̍ vi̱ttaṁ me̍ a̱sya ro̍dasī || 1.105.06
a̱haṁ so a̍smi̱ yaḥ pu̱rā su̱te vadā̍mi̱ kāni̍ cit |
taṁ mā̍ vyantyā̱dhyo̱3̱̍ vṛko̱ na tṛ̱ṣṇaja̍ṁ mṛ̱gaṁ vi̱ttaṁ me̍ a̱sya ro̍dasī || 1.105.07
saṁ mā̍ tapantya̱bhita̍ḥ sa̱patnī̍riva̱ parśa̍vaḥ |
mūṣo̱ na śi̱śnā vya̍danti mā̱dhya̍ḥ sto̱tāra̍ṁ te śatakrato vi̱ttaṁ me̍ a̱sya ro̍dasī || 1.105.08
a̱mī ye sa̱pta ra̱śmaya̱statrā̍ me̱ nābhi̱rāta̍tā |
tri̱tastadve̍dā̱ptyaḥ sa jā̍mi̱tvāya̍ rebhati vi̱ttaṁ me̍ a̱sya ro̍dasī || 1.105.09
a̱mī ye pañco̱kṣaṇo̱ madhye̍ ta̱sthurma̱ho di̱vaḥ |
de̱va̱trā nu pra̱vācya̍ṁ sadhrīcī̱nā ni vā̍vṛturvi̱ttaṁ me̍ a̱sya ro̍dasī || 1.105.10
su̱pa̱rṇā e̱ta ā̍sate̱ madhya̍ ā̱rodha̍ne di̱vaḥ |
te se̍dhanti pa̱tho vṛka̱ṁ tara̍ntaṁ ya̱hvatī̍ra̱po vi̱ttaṁ me̍ a̱sya ro̍dasī || 1.105.11
navya̱ṁ tadu̱kthya̍ṁ hi̱taṁ devā̍saḥ supravāca̱nam |
ṛ̱tama̍rṣanti̱ sindha̍vaḥ sa̱tyaṁ tā̍tāna̱ sūryo̍ vi̱ttaṁ me̍ a̱sya ro̍dasī || 1.105.12
agne̱ tava̱ tyadu̱kthya̍ṁ de̱veṣva̱styāpya̍m |
sa na̍ḥ sa̱tto ma̍nu̱ṣvadā de̱vānya̍kṣi vi̱duṣṭa̍ro vi̱ttaṁ me̍ a̱sya ro̍dasī || 1.105.13
sa̱tto hotā̍ manu̱ṣvadā de̱vā acchā̍ vi̱duṣṭa̍raḥ |
a̱gnirha̱vyā su̍ṣūdati de̱vo de̱veṣu̱ medhi̍ro vi̱ttaṁ me̍ a̱sya ro̍dasī || 1.105.14
brahmā̍ kṛṇoti̱ varu̍ṇo gātu̱vida̱ṁ tamī̍mahe |
vyū̍rṇoti hṛ̱dā ma̱tiṁ navyo̍ jāyatāmṛ̱taṁ vi̱ttaṁ me̍ a̱sya ro̍dasī || 1.105.15
a̱sau yaḥ panthā̍ ādi̱tyo di̱vi pra̱vācya̍ṁ kṛ̱taḥ |
na sa de̍vā ati̱krame̱ taṁ ma̍rtāso̱ na pa̍śyatha vi̱ttaṁ me̍ a̱sya ro̍dasī || 1.105.16
tri̱taḥ kūpe'va̍hito de̱vānha̍vata ū̱taye̍ |
tacchu̍śrāva̱ bṛha̱spati̍ḥ kṛ̱ṇvanna̍ṁhūra̱ṇādu̱ru vi̱ttaṁ me̍ a̱sya ro̍dasī || 1.105.17
a̱ru̱ṇo mā̍ sa̱kṛdvṛka̍ḥ pa̱thā yanta̍ṁ da̱darśa̱ hi |
ujji̍hīte ni̱cāyyā̱ taṣṭe̍va pṛṣṭyāma̱yī vi̱ttaṁ me̍ a̱sya ro̍dasī || 1.105.18
e̱nāṅgū̱ṣeṇa̍ va̱yamindra̍vanto̱'bhi ṣyā̍ma vṛ̱jane̱ sarva̍vīrāḥ |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.105.19
indra̍ṁ mi̱traṁ varu̍ṇama̱gnimū̱taye̱ māru̍ta̱ṁ śardho̱ adi̍tiṁ havāmahe |
ratha̱ṁ na du̱rgādva̍savaḥ sudānavo̱ viśva̍smānno̱ aṁha̍so̱ niṣpi̍partana || 1.106.01
ta ā̍dityā̱ ā ga̍tā sa̱rvatā̍taye bhū̱ta de̍vā vṛtra̱tūrye̍ṣu śa̱mbhuva̍ḥ |
ratha̱ṁ na du̱rgādva̍savaḥ sudānavo̱ viśva̍smānno̱ aṁha̍so̱ niṣpi̍partana || 1.106.02
ava̍ntu naḥ pi̱tara̍ḥ supravāca̱nā u̱ta de̱vī de̱vapu̍tre ṛtā̱vṛdhā̍ |
ratha̱ṁ na du̱rgādva̍savaḥ sudānavo̱ viśva̍smānno̱ aṁha̍so̱ niṣpi̍partana || 1.106.03
narā̱śaṁsa̍ṁ vā̱jina̍ṁ vā̱jaya̍nni̱ha kṣa̱yadvī̍raṁ pū̱ṣaṇa̍ṁ su̱mnairī̍mahe |
ratha̱ṁ na du̱rgādva̍savaḥ sudānavo̱ viśva̍smānno̱ aṁha̍so̱ niṣpi̍partana || 1.106.04
bṛha̍spate̱ sada̱minna̍ḥ su̱gaṁ kṛ̍dhi̱ śaṁ yoryatte̱ manu̍rhita̱ṁ tadī̍mahe |
ratha̱ṁ na du̱rgādva̍savaḥ sudānavo̱ viśva̍smānno̱ aṁha̍so̱ niṣpi̍partana || 1.106.05
indra̱ṁ kutso̍ vṛtra̱haṇa̱ṁ śacī̱pati̍ṁ kā̱ṭe nibā̍ḻha̱ ṛṣi̍rahvadū̱taye̍ |
ratha̱ṁ na du̱rgādva̍savaḥ sudānavo̱ viśva̍smānno̱ aṁha̍so̱ niṣpi̍partana || 1.106.06
de̱vairno̍ de̱vyadi̍ti̱rni pā̍tu de̱vastrā̱tā trā̍yatā̱mapra̍yucchan |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.106.07
ya̱jño de̱vānā̱ṁ pratye̍ti su̱mnamādi̍tyāso̱ bhava̍tā mṛḻa̱yanta̍ḥ |
ā vo̱'rvācī̍ suma̱tirva̍vṛtyāda̱ṁhości̱dyā va̍rivo̱vitta̱rāsa̍t || 1.107.01
upa̍ no de̱vā ava̱sā ga̍ma̱ntvaṅgi̍rasā̱ṁ sāma̍bhiḥ stū̱yamā̍nāḥ |
indra̍ indri̱yairma̱ruto̍ ma̱rudbhi̍rādi̱tyairno̱ adi̍ti̱ḥ śarma̍ yaṁsat || 1.107.02
tanna̱ indra̱stadvaru̍ṇa̱stada̱gnistada̍rya̱mā tatsa̍vi̱tā cano̍ dhāt |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.107.03
ya i̍ndrāgnī ci̱trata̍mo̱ ratho̍ vāma̱bhi viśvā̍ni̱ bhuva̍nāni̱ caṣṭe̍ |
tenā yā̍taṁ sa̱ratha̍ṁ tasthi̱vāṁsāthā̱ soma̍sya pibataṁ su̱tasya̍ || 1.108.01
yāva̍di̱daṁ bhuva̍na̱ṁ viśva̱mastyu̍ru̱vyacā̍ vari̱matā̍ gabhī̱ram |
tāvā̍ a̱yaṁ pāta̍ve̱ somo̍ a̱stvara̍mindrāgnī̱ mana̍se yu̱vabhyā̍m || 1.108.02
ca̱krāthe̱ hi sa̱dhrya1̱̍ṅnāma̍ bha̱draṁ sa̍dhrīcī̱nā vṛ̍trahaṇā u̱ta stha̍ḥ |
tāvi̍ndrāgnī sa̱dhrya̍ñcā ni̱ṣadyā̱ vṛṣṇa̱ḥ soma̍sya vṛṣa̱ṇā vṛ̍ṣethām || 1.108.03
sami̍ddheṣva̱gniṣvā̍najā̱nā ya̱tasru̍cā ba̱rhiru̍ tistirā̱ṇā |
tī̱vraiḥ somai̱ḥ pari̍ṣiktebhira̱rvāgendrā̍gnī saumana̱sāya̍ yātam || 1.108.04
yānī̍ndrāgnī ca̱krathu̍rvī̱ryā̍ṇi̱ yāni̍ rū̱pāṇyu̱ta vṛṣṇyā̍ni |
yā vā̍ṁ pra̱tnāni̍ sa̱khyā śi̱vāni̱ tebhi̱ḥ soma̍sya pibataṁ su̱tasya̍ || 1.108.05
yadabra̍vaṁ pratha̱maṁ vā̍ṁ vṛṇā̱no̱3̱̍'yaṁ somo̱ asu̍rairno vi̱havya̍ḥ |
tāṁ sa̱tyāṁ śra̱ddhāma̱bhyā hi yā̱tamathā̱ soma̍sya pibataṁ su̱tasya̍ || 1.108.06
yadi̍ndrāgnī̱ mada̍tha̱ḥ sve du̍ro̱ṇe yadbra̱hmaṇi̱ rāja̍ni vā yajatrā |
ata̱ḥ pari̍ vṛṣaṇā̱vā hi yā̱tamathā̱ soma̍sya pibataṁ su̱tasya̍ || 1.108.07
yadi̍ndrāgnī̱ yadu̍ṣu tu̱rvaśe̍ṣu̱ yaddru̱hyuṣvanu̍ṣu pū̱ruṣu̱ sthaḥ |
ata̱ḥ pari̍ vṛṣaṇā̱vā hi yā̱tamathā̱ soma̍sya pibataṁ su̱tasya̍ || 1.108.08
yadi̍ndrāgnī ava̱masyā̍ṁ pṛthi̱vyāṁ ma̍dhya̱masyā̍ṁ para̱masyā̍mu̱ta sthaḥ |
ata̱ḥ pari̍ vṛṣaṇā̱vā hi yā̱tamathā̱ soma̍sya pibataṁ su̱tasya̍ || 1.108.09
yadi̍ndrāgnī para̱masyā̍ṁ pṛthi̱vyāṁ ma̍dhya̱masyā̍mava̱masyā̍mu̱ta sthaḥ |
ata̱ḥ pari̍ vṛṣaṇā̱vā hi yā̱tamathā̱ soma̍sya pibataṁ su̱tasya̍ || 1.108.10
yadi̍ndrāgnī di̱vi ṣṭho yatpṛ̍thi̱vyāṁ yatparva̍te̱ṣvoṣa̍dhīṣva̱psu |
ata̱ḥ pari̍ vṛṣaṇā̱vā hi yā̱tamathā̱ soma̍sya pibataṁ su̱tasya̍ || 1.108.11
yadi̍ndrāgnī̱ udi̍tā̱ sūrya̍sya̱ madhye̍ di̱vaḥ sva̱dhayā̍ mā̱daye̍the |
ata̱ḥ pari̍ vṛṣaṇā̱vā hi yā̱tamathā̱ soma̍sya pibataṁ su̱tasya̍ || 1.108.12
e̱vendrā̍gnī papi̱vāṁsā̍ su̱tasya̱ viśvā̱smabhya̱ṁ saṁ ja̍yata̱ṁ dhanā̍ni |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.108.13
vi hyakhya̱ṁ mana̍sā̱ vasya̍ i̱cchannindrā̍gnī jñā̱sa u̱ta vā̍ sajā̱tān |
nānyā yu̱vatprama̍tirasti̱ mahya̱ṁ sa vā̱ṁ dhiya̍ṁ vāja̱yantī̍matakṣam || 1.109.01
aśra̍va̱ṁ hi bhū̍ri̱dāva̍ttarā vā̱ṁ vijā̍māturu̱ta vā̍ ghā syā̱lāt |
athā̱ soma̍sya̱ praya̍tī yu̱vabhyā̱mindrā̍gnī̱ stoma̍ṁ janayāmi̱ navya̍m || 1.109.02
mā cche̍dma ra̱śmīriti̱ nādha̍mānāḥ pitṝ̱ṇāṁ śa̱ktīra̍nu̱yaccha̍mānāḥ |
i̱ndrā̱gnibhyā̱ṁ kaṁ vṛṣa̍ṇo madanti̱ tā hyadrī̍ dhi̱ṣaṇā̍yā u̱pasthe̍ || 1.109.03
yu̱vābhyā̍ṁ de̱vī dhi̱ṣaṇā̱ madā̱yendrā̍gnī̱ soma̍muśa̱tī su̍noti |
tāva̍śvinā bhadrahastā supāṇī̱ ā dhā̍vata̱ṁ madhu̍nā pṛ̱ṅktama̱psu || 1.109.04
yu̱vāmi̍ndrāgnī̱ vasu̍no vibhā̱ge ta̱vasta̍mā śuśrava vṛtra̱hatye̍ |
tāvā̱sadyā̍ ba̱rhiṣi̍ ya̱jñe a̱sminpra ca̍rṣaṇī mādayethāṁ su̱tasya̍ || 1.109.05
pra ca̍rṣa̱ṇibhya̍ḥ pṛtanā̱have̍ṣu̱ pra pṛ̍thi̱vyā ri̍ricāthe di̱vaśca̍ |
pra sindhu̍bhya̱ḥ pra gi̱ribhyo̍ mahi̱tvā prendrā̍gnī̱ viśvā̱ bhuva̱nātya̱nyā || 1.109.06
ā bha̍rata̱ṁ śikṣa̍taṁ vajrabāhū a̱smā i̍ndrāgnī avata̱ṁ śacī̍bhiḥ |
i̱me nu te ra̱śmaya̱ḥ sūrya̍sya̱ yebhi̍ḥ sapi̱tvaṁ pi̱taro̍ na̱ āsa̍n || 1.109.07
pura̍ṁdarā̱ śikṣa̍taṁ vajrahastā̱smā i̍ndrāgnī avata̱ṁ bhare̍ṣu |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.109.08
ta̱taṁ me̱ apa̱stadu̍ tāyate̱ puna̱ḥ svādi̍ṣṭhā dhī̱tiru̱cathā̍ya śasyate |
a̱yaṁ sa̍mu̱dra i̱ha vi̱śvade̍vya̱ḥ svāhā̍kṛtasya̱ samu̍ tṛpṇuta ṛbhavaḥ || 1.110.01
ā̱bho̱gaya̱ṁ pra yadi̱cchanta̱ aita̱nāpā̍kā̱ḥ prāñco̱ mama̱ ke ci̍dā̱paya̍ḥ |
saudha̍nvanāsaścari̱tasya̍ bhū̱manāga̍cchata savi̱turdā̱śuṣo̍ gṛ̱ham || 1.110.02
tatsa̍vi̱tā vo̍'mṛta̱tvamāsu̍va̱dago̍hya̱ṁ yacchra̱vaya̍nta̱ aita̍na |
tyaṁ ci̍ccama̱samasu̍rasya̱ bhakṣa̍ṇa̱meka̱ṁ santa̍makṛṇutā̱ catu̍rvayam || 1.110.03
vi̱ṣṭvī śamī̍ taraṇi̱tvena̍ vā̱ghato̱ martā̍sa̱ḥ santo̍ amṛta̱tvamā̍naśuḥ |
sau̱dha̱nva̱nā ṛ̱bhava̱ḥ sūra̍cakṣasaḥ saṁvatsa̱re sama̍pṛcyanta dhī̱tibhi̍ḥ || 1.110.04
kṣetra̍miva̱ vi ma̍mu̱steja̍nena̱ eka̱ṁ pātra̍mṛ̱bhavo̱ jeha̍mānam |
upa̍stutā upa̱maṁ nādha̍mānā̱ ama̍rtyeṣu̱ śrava̍ i̱cchamā̍nāḥ || 1.110.05
ā ma̍nī̱ṣāma̱ntari̍kṣasya̱ nṛbhya̍ḥ sru̱ceva̍ ghṛ̱taṁ ju̍havāma vi̱dmanā̍ |
ta̱ra̱ṇi̱tvā ye pi̱tura̍sya saści̱ra ṛ̱bhavo̱ vāja̍maruhandi̱vo raja̍ḥ || 1.110.06
ṛ̱bhurna̱ indra̱ḥ śava̍sā̱ navī̍yānṛ̱bhurvāje̍bhi̱rvasu̍bhi̱rvasu̍rda̱diḥ |
yu̱ṣmāka̍ṁ devā̱ ava̱sāha̍ni pri̱ye̱3̱̍'bhi ti̍ṣṭhema pṛtsu̱tīrasu̍nvatām || 1.110.07
niścarma̍ṇa ṛbhavo̱ gāma̍piṁśata̱ saṁ va̱tsenā̍sṛjatā mā̱tara̱ṁ puna̍ḥ |
saudha̍nvanāsaḥ svapa̱syayā̍ naro̱ jivrī̱ yuvā̍nā pi̱tarā̍kṛṇotana || 1.110.08
vāje̍bhirno̱ vāja̍sātāvaviḍḍhyṛbhu̱mā i̍ndra ci̱tramā da̍rṣi̱ rādha̍ḥ |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.110.09
takṣa̱nratha̍ṁ su̱vṛta̍ṁ vidma̱nāpa̍sa̱stakṣa̱nharī̍ indra̱vāhā̱ vṛṣa̍ṇvasū |
takṣa̍npi̱tṛbhyā̍mṛ̱bhavo̱ yuva̱dvaya̱stakṣa̍nva̱tsāya̍ mā̱tara̍ṁ sacā̱bhuva̍m || 1.111.01
ā no̍ ya̱jñāya̍ takṣata ṛbhu̱madvaya̱ḥ kratve̱ dakṣā̍ya supra̱jāva̍tī̱miṣa̍m |
yathā̱ kṣayā̍ma̱ sarva̍vīrayā vi̱śā tanna̱ḥ śardhā̍ya dhāsathā̱ svi̍ndri̱yam || 1.111.02
ā ta̍kṣata sā̱tima̱smabhya̍mṛbhavaḥ sā̱tiṁ rathā̍ya sā̱timarva̍te naraḥ |
sā̱tiṁ no̱ jaitrī̱ṁ saṁ ma̍heta vi̱śvahā̍ jā̱mimajā̍mi̱ṁ pṛta̍nāsu sa̱kṣaṇi̍m || 1.111.03
ṛ̱bhu̱kṣaṇa̱mindra̱mā hu̍va ū̱taya̍ ṛ̱bhūnvājā̍nma̱ruta̱ḥ soma̍pītaye |
u̱bhā mi̱trāvaru̍ṇā nū̱nama̱śvinā̱ te no̍ hinvantu sā̱taye̍ dhi̱ye ji̱ṣe || 1.111.04
ṛ̱bhurbharā̍ya̱ saṁ śi̍śātu sā̱tiṁ sa̍marya̱jidvājo̍ a̱smā a̍viṣṭu |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.111.05
īḻe̱ dyāvā̍pṛthi̱vī pū̱rvaci̍ttaye̱'gniṁ gha̱rmaṁ su̱ruca̱ṁ yāma̍nni̱ṣṭaye̍ |
yābhi̱rbhare̍ kā̱ramaṁśā̍ya̱ jinva̍tha̱stābhi̍rū̱ ṣu ū̱tibhi̍raśvi̱nā ga̍tam || 1.112.01
yu̱vordā̱nāya̍ su̱bharā̍ asa̱ścato̱ ratha̱mā ta̍sthurvaca̱saṁ na manta̍ve |
yābhi̱rdhiyo'va̍tha̱ḥ karma̍nni̱ṣṭaye̱ tābhi̍rū̱ ṣu ū̱tibhi̍raśvi̱nā ga̍tam || 1.112.02
yu̱vaṁ tāsā̍ṁ di̱vyasya̍ pra̱śāsa̍ne vi̱śāṁ kṣa̍yatho a̱mṛta̍sya ma̱jmanā̍ |
yābhi̍rdhe̱numa̱svaṁ1̱̍ pinva̍tho narā̱ tābhi̍rū̱ ṣu ū̱tibhi̍raśvi̱nā ga̍tam || 1.112.03
yābhi̱ḥ pari̍jmā̱ tana̍yasya ma̱jmanā̍ dvimā̱tā tū̱rṣu ta̱raṇi̍rvi̱bhūṣa̍ti |
yābhi̍stri̱mantu̱rabha̍vadvicakṣa̱ṇastābhi̍rū̱ ṣu ū̱tibhi̍raśvi̱nā ga̍tam || 1.112.04
yābhī̍ re̱bhaṁ nivṛ̍taṁ si̱tama̱dbhya udvanda̍na̱maira̍yata̱ṁ sva̍rdṛ̱śe |
yābhi̱ḥ kaṇva̱ṁ pra siṣā̍santa̱māva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.05
yābhi̱ranta̍ka̱ṁ jasa̍māna̱māra̍ṇe bhu̱jyuṁ yābhi̍ravya̱thibhi̍rjiji̱nvathu̍ḥ |
yābhi̍ḥ ka̱rkandhu̍ṁ va̱yya̍ṁ ca̱ jinva̍tha̱stābhi̍rū̱ ṣu ū̱tibhi̍raśvi̱nā ga̍tam || 1.112.06
yābhi̍ḥ śuca̱ntiṁ dha̍na̱sāṁ su̍ṣa̱ṁsada̍ṁ ta̱ptaṁ gha̱rmamo̱myāva̍nta̱matra̍ye |
yābhi̱ḥ pṛśni̍guṁ puru̱kutsa̱māva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.07
yābhi̱ḥ śacī̍bhirvṛṣaṇā parā̱vṛja̱ṁ prāndhaṁ śro̱ṇaṁ cakṣa̍sa̱ eta̍ve kṛ̱thaḥ |
yābhi̱rvarti̍kāṁ grasi̱tāmamu̍ñcata̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.08
yābhi̱ḥ sindhu̱ṁ madhu̍manta̱masa̍ścata̱ṁ vasi̍ṣṭha̱ṁ yābhi̍rajarā̱vaji̍nvatam |
yābhi̱ḥ kutsa̍ṁ śru̱tarya̱ṁ narya̱māva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.09
yābhi̍rvi̱śpalā̍ṁ dhana̱sāma̍tha̱rvya̍ṁ sa̱hasra̍mīḻha ā̱jāvaji̍nvatam |
yābhi̱rvaśa̍ma̱śvyaṁ pre̱ṇimāva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.10
yābhi̍ḥ sudānū auśi̱jāya̍ va̱ṇije̍ dī̱rghaśra̍vase̱ madhu̱ kośo̱ akṣa̍rat |
ka̱kṣīva̍ntaṁ sto̱tāra̱ṁ yābhi̱rāva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.11
yābhī̍ ra̱sāṁ kṣoda̍so̱dnaḥ pi̍pi̱nvathu̍rana̱śvaṁ yābhī̱ ratha̱māva̍taṁ ji̱ṣe |
yābhi̍stri̱śoka̍ u̱sriyā̍ u̱dāja̍ta̱ tābhi̍rū̱ ṣu ū̱tibhi̍raśvi̱nā ga̍tam || 1.112.12
yābhi̱ḥ sūrya̍ṁ pariyā̱thaḥ pa̍rā̱vati̍ mandhā̱tāra̱ṁ kṣaitra̍patye̱ṣvāva̍tam |
yābhi̱rvipra̱ṁ pra bha̱radvā̍ja̱māva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.13
yābhi̍rma̱hāma̍tithi̱gvaṁ ka̍śo̱juva̱ṁ divo̍dāsaṁ śambara̱hatya̱ āva̍tam |
yābhi̍ḥ pū̱rbhidye̍ tra̱sada̍syu̱māva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.14
yābhi̍rva̱mraṁ vi̍pipā̱namu̍pastu̱taṁ ka̱liṁ yābhi̍rvi̱ttajā̍niṁ duva̱syatha̍ḥ |
yābhi̱rvya̍śvamu̱ta pṛthi̱māva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.15
yābhi̍rnarā śa̱yave̱ yābhi̱ratra̍ye̱ yābhi̍ḥ pu̱rā mana̍ve gā̱tumī̱ṣathu̍ḥ |
yābhi̱ḥ śārī̱rāja̍ta̱ṁ syūma̍raśmaye̱ tābhi̍rū̱ ṣu ū̱tibhi̍raśvi̱nā ga̍tam || 1.112.16
yābhi̱ḥ paṭha̍rvā̱ jaṭha̍rasya ma̱jmanā̱gnirnādī̍decci̱ta i̱ddho ajma̱nnā |
yābhi̱ḥ śaryā̍ta̱mava̍tho mahādha̱ne tābhi̍rū̱ ṣu ū̱tibhi̍raśvi̱nā ga̍tam || 1.112.17
yābhi̍raṅgiro̱ mana̍sā nira̱ṇyatho'gra̱ṁ gaccha̍tho viva̱re goa̍rṇasaḥ |
yābhi̱rmanu̱ṁ śūra̍mi̱ṣā sa̱māva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.18
yābhi̱ḥ patnī̍rvima̱dāya̍ nyū̱hathu̱rā gha̍ vā̱ yābhi̍raru̱ṇīraśi̍kṣatam |
yābhi̍ḥ su̱dāsa̍ ū̱hathu̍ḥ sude̱vyaṁ1̱̍ tābhi̍rū̱ ṣu ū̱tibhi̍raśvi̱nā ga̍tam || 1.112.19
yābhi̱ḥ śaṁtā̍tī̱ bhava̍tho dadā̱śuṣe̍ bhu̱jyuṁ yābhi̱rava̍tho̱ yābhi̱radhri̍gum |
o̱myāva̍tīṁ su̱bharā̍mṛta̱stubha̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.20
yābhi̍ḥ kṛ̱śānu̱masa̍ne duva̱syatho̍ ja̱ve yābhi̱ryūno̱ arva̍nta̱māva̍tam |
madhu̍ pri̱yaṁ bha̍ratho̱ yatsa̱raḍbhya̱stābhi̍rū̱ ṣu ū̱tibhi̍raśvi̱nā ga̍tam || 1.112.21
yābhi̱rnara̍ṁ goṣu̱yudha̍ṁ nṛ̱ṣāhye̱ kṣetra̍sya sā̱tā tana̍yasya̱ jinva̍thaḥ |
yābhī̱ rathā̱ ava̍tho̱ yābhi̱rarva̍ta̱stābhi̍rū̱ ṣu ū̱tibhi̍raśvi̱nā ga̍tam || 1.112.22
yābhi̱ḥ kutsa̍mārjune̱yaṁ śa̍takratū̱ pra tu̱rvīti̱ṁ pra ca̍ da̱bhīti̱māva̍tam |
yābhi̍rdhva̱santi̍ṁ puru̱ṣanti̱māva̍ta̱ṁ tābhi̍rū̱ ṣu ū̱tibhi̍raśvi̱nā ga̍tam || 1.112.23
apna̍svatīmaśvinā̱ vāca̍ma̱sme kṛ̱taṁ no̍ dasrā vṛṣaṇā manī̱ṣām |
a̱dyū̱tye'va̍se̱ ni hva̍ye vāṁ vṛ̱dhe ca̍ no bhavata̱ṁ vāja̍sātau || 1.112.24
dyubhi̍ra̱ktubhi̱ḥ pari̍ pātama̱smānari̍ṣṭebhiraśvinā̱ saubha̍gebhiḥ |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.112.25
i̱daṁ śreṣṭha̱ṁ jyoti̍ṣā̱ṁ jyoti̱rāgā̍cci̱traḥ pra̍ke̱to a̍janiṣṭa̱ vibhvā̍ |
yathā̱ prasū̍tā savi̱tuḥ sa̱vāya̍ e̱vā rātryu̱ṣase̱ yoni̍māraik || 1.113.01
ruśa̍dvatsā̱ ruśa̍tī śve̱tyāgā̱dārai̍gu kṛ̱ṣṇā sada̍nānyasyāḥ |
sa̱mā̱naba̍ndhū a̱mṛte̍ anū̱cī dyāvā̱ varṇa̍ṁ carata āminā̱ne || 1.113.02
sa̱mā̱no adhvā̱ svasro̍rana̱ntastama̱nyānyā̍ carato de̱vaśi̍ṣṭe |
na me̍thete̱ na ta̍sthatuḥ su̱meke̱ nakto̱ṣāsā̱ sama̍nasā̱ virū̍pe || 1.113.03
bhāsva̍tī ne̱trī sū̱nṛtā̍nā̱mace̍ti ci̱trā vi duro̍ na āvaḥ |
prārpyā̱ jaga̱dvyu̍ no rā̱yo a̍khyadu̱ṣā a̍jīga̱rbhuva̍nāni̱ viśvā̍ || 1.113.04
ji̱hma̱śye̱3̱̍ cari̍tave ma̱ghonyā̍bho̱gaya̍ i̱ṣṭaye̍ rā̱ya u̍ tvam |
da̱bhraṁ paśya̍dbhya urvi̱yā vi̱cakṣa̍ u̱ṣā a̍jīga̱rbhuva̍nāni̱ viśvā̍ || 1.113.05
kṣa̱trāya̍ tva̱ṁ śrava̍se tvaṁ mahī̱yā i̱ṣṭaye̍ tva̱martha̍miva tvami̱tyai |
visa̍dṛśā jīvi̱tābhi̍pra̱cakṣa̍ u̱ṣā a̍jīga̱rbhuva̍nāni̱ viśvā̍ || 1.113.06
e̱ṣā di̱vo du̍hi̱tā pratya̍darśi vyu̱cchantī̍ yuva̱tiḥ śu̱kravā̍sāḥ |
viśva̱syeśā̍nā̱ pārthi̍vasya̱ vasva̱ uṣo̍ a̱dyeha su̍bhage̱ vyu̍ccha || 1.113.07
pa̱rā̱ya̱tī̱nāmanve̍ti̱ pātha̍ āyatī̱nāṁ pra̍tha̱mā śaśva̍tīnām |
vyu̱cchantī̍ jī̱vamu̍dī̱raya̍ntyu̱ṣā mṛ̱taṁ kaṁ ca̱na bo̱dhaya̍ntī || 1.113.08
uṣo̱ yada̱gniṁ sa̱midhe̍ ca̱kartha̱ vi yadāva̱ścakṣa̍sā̱ sūrya̍sya |
yanmānu̍ṣānya̱kṣyamā̍ṇā̱ ajī̍ga̱stadde̱veṣu̍ cakṛṣe bha̱dramapna̍ḥ || 1.113.09
kiyā̱tyā yatsa̱mayā̱ bhavā̍ti̱ yā vyū̱ṣuryāśca̍ nū̱naṁ vyu̱cchān |
anu̱ pūrvā̍ḥ kṛpate vāvaśā̱nā pra̱dīdhyā̍nā̱ joṣa̍ma̱nyābhi̍reti || 1.113.10
ī̱yuṣṭe ye pūrva̍tarā̱mapa̍śyanvyu̱cchantī̍mu̱ṣasa̱ṁ martyā̍saḥ |
a̱smābhi̍rū̱ nu pra̍ti̱cakṣyā̍bhū̱do te ya̍nti̱ ye a̍pa̱rīṣu̱ paśyā̍n || 1.113.11
yā̱va̱yaddve̍ṣā ṛta̱pā ṛ̍te̱jāḥ su̍mnā̱varī̍ sū̱nṛtā̍ ī̱raya̍ntī |
su̱ma̱ṅga̱līrbibhra̍tī de̱vavī̍timi̱hādyoṣa̱ḥ śreṣṭha̍tamā̱ vyu̍ccha || 1.113.12
śaśva̍tpu̱roṣā vyu̍vāsa de̱vyatho̍ a̱dyedaṁ vyā̍vo ma̱ghonī̍ |
atho̱ vyu̍cchā̱dutta̍rā̱ anu̱ dyūna̱jarā̱mṛtā̍ carati sva̱dhābhi̍ḥ || 1.113.13
vya1̱̍ñjibhi̍rdi̱va ātā̍svadyau̱dapa̍ kṛ̱ṣṇāṁ ni̱rṇija̍ṁ de̱vyā̍vaḥ |
pra̱bo̱dhaya̍ntyaru̱ṇebhi̱raśvai̱roṣā yā̍ti su̱yujā̱ rathe̍na || 1.113.14
ā̱vaha̍ntī̱ poṣyā̱ vāryā̍ṇi ci̱traṁ ke̱tuṁ kṛ̍ṇute̱ ceki̍tānā |
ī̱yuṣī̍ṇāmupa̱mā śaśva̍tīnāṁ vibhātī̱nāṁ pra̍tha̱moṣā vya̍śvait || 1.113.15
udī̍rdhvaṁ jī̱vo asu̍rna̱ āgā̱dapa̱ prāgā̱ttama̱ ā jyoti̍reti |
ārai̱kpanthā̱ṁ yāta̍ve̱ sūryā̱yāga̍nma̱ yatra̍ prati̱ranta̱ āyu̍ḥ || 1.113.16
syūma̍nā vā̱ca udi̍yarti̱ vahni̱ḥ stavā̍no re̱bha u̱ṣaso̍ vibhā̱tīḥ |
a̱dyā tadu̍ccha gṛṇa̱te ma̍ghonya̱sme āyu̱rni di̍dīhi pra̱jāva̍t || 1.113.17
yā goma̍tīru̱ṣasa̱ḥ sarva̍vīrā vyu̱cchanti̍ dā̱śuṣe̱ martyā̍ya |
vā̱yori̍va sū̱nṛtā̍nāmuda̱rke tā a̍śva̱dā a̍śnavatsoma̱sutvā̍ || 1.113.18
mā̱tā de̱vānā̱madi̍te̱ranī̍kaṁ ya̱jñasya̍ ke̱turbṛ̍ha̱tī vi bhā̍hi |
pra̱śa̱sti̱kṛdbrahma̍ṇe no̱ vyu1̱̍cchā no̱ jane̍ janaya viśvavāre || 1.113.19
yacci̱tramapna̍ u̱ṣaso̱ vaha̍ntījā̱nāya̍ śaśamā̱nāya̍ bha̱dram |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.113.20
i̱mā ru̱drāya̍ ta̱vase̍ kapa̱rdine̍ kṣa̱yadvī̍rāya̱ pra bha̍rāmahe ma̱tīḥ |
yathā̱ śamasa̍ddvi̱pade̱ catu̍ṣpade̱ viśva̍ṁ pu̱ṣṭaṁ grāme̍ a̱sminna̍nātu̱ram || 1.114.01
mṛ̱ḻā no̍ rudro̱ta no̱ maya̍skṛdhi kṣa̱yadvī̍rāya̱ nama̍sā vidhema te |
yacchaṁ ca̱ yośca̱ manu̍rāye̱je pi̱tā tada̍śyāma̱ tava̍ rudra̱ praṇī̍tiṣu || 1.114.02
a̱śyāma̍ te suma̱tiṁ de̍vaya̱jyayā̍ kṣa̱yadvī̍rasya̱ tava̍ rudra mīḍhvaḥ |
su̱mnā̱yannidviśo̍ a̱smāka̱mā ca̱rāri̍ṣṭavīrā juhavāma te ha̱viḥ || 1.114.03
tve̱ṣaṁ va̱yaṁ ru̱draṁ ya̍jña̱sādha̍ṁ va̱ṅkuṁ ka̱vimava̍se̱ ni hva̍yāmahe |
ā̱re a̱smaddaivya̱ṁ heḻo̍ asyatu suma̱timidva̱yama̱syā vṛ̍ṇīmahe || 1.114.04
di̱vo va̍rā̱hama̍ru̱ṣaṁ ka̍pa̱rdina̍ṁ tve̱ṣaṁ rū̱paṁ nama̍sā̱ ni hva̍yāmahe |
haste̱ bibhra̍dbheṣa̱jā vāryā̍ṇi̱ śarma̱ varma̍ ccha̱rdira̱smabhya̍ṁ yaṁsat || 1.114.05
i̱daṁ pi̱tre ma̱rutā̍mucyate̱ vaca̍ḥ svā̱doḥ svādī̍yo ru̱drāya̱ vardha̍nam |
rāsvā̍ ca no amṛta marta̱bhoja̍na̱ṁ tmane̍ to̱kāya̱ tana̍yāya mṛḻa || 1.114.06
mā no̍ ma̱hānta̍mu̱ta mā no̍ arbha̱kaṁ mā na̱ ukṣa̍ntamu̱ta mā na̍ ukṣi̱tam |
mā no̍ vadhīḥ pi̱tara̱ṁ mota mā̱tara̱ṁ mā na̍ḥ pri̱yāsta̱nvo̍ rudra rīriṣaḥ || 1.114.07
mā na̍sto̱ke tana̍ye̱ mā na̍ ā̱yau mā no̱ goṣu̱ mā no̱ aśve̍ṣu rīriṣaḥ |
vī̱rānmā no̍ rudra bhāmi̱to va̍dhīrha̱viṣma̍nta̱ḥ sada̱mittvā̍ havāmahe || 1.114.08
upa̍ te̱ stomā̍npaśu̱pā i̱vāka̍ra̱ṁ rāsvā̍ pitarmarutāṁ su̱mnama̱sme |
bha̱drā hi te̍ suma̱tirmṛ̍ḻa̱yatta̱māthā̍ va̱yamava̱ itte̍ vṛṇīmahe || 1.114.09
ā̱re te̍ go̱ghnamu̱ta pū̍ruṣa̱ghnaṁ kṣaya̍dvīra su̱mnama̱sme te̍ astu |
mṛ̱ḻā ca̍ no̱ adhi̍ ca brūhi de̱vādhā̍ ca na̱ḥ śarma̍ yaccha dvi̱barhā̍ḥ || 1.114.10
avo̍cāma̱ namo̍ asmā ava̱syava̍ḥ śṛ̱ṇotu̍ no̱ hava̍ṁ ru̱dro ma̱rutvā̍n |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.114.11
ci̱traṁ de̱vānā̱muda̍gā̱danī̍ka̱ṁ cakṣu̍rmi̱trasya̱ varu̍ṇasyā̱gneḥ |
āprā̱ dyāvā̍pṛthi̱vī a̱ntari̍kṣa̱ṁ sūrya̍ ā̱tmā jaga̍tasta̱sthuṣa̍śca || 1.115.01
sūryo̍ de̱vīmu̱ṣasa̱ṁ roca̍mānā̱ṁ maryo̱ na yoṣā̍ma̱bhye̍ti pa̱ścāt |
yatrā̱ naro̍ deva̱yanto̍ yu̱gāni̍ vitanva̱te prati̍ bha̱drāya̍ bha̱dram || 1.115.02
bha̱drā aśvā̍ ha̱rita̱ḥ sūrya̍sya ci̱trā eta̍gvā anu̱mādyā̍saḥ |
na̱ma̱syanto̍ di̱va ā pṛ̱ṣṭhama̍sthu̱ḥ pari̱ dyāvā̍pṛthi̱vī ya̍nti sa̱dyaḥ || 1.115.03
tatsūrya̍sya deva̱tvaṁ tanma̍hi̱tvaṁ ma̱dhyā karto̱rvita̍ta̱ṁ saṁ ja̍bhāra |
ya̱dedayu̍kta ha̱rita̍ḥ sa̱dhasthā̱dādrātrī̱ vāsa̍stanute si̱masmai̍ || 1.115.04
tanmi̱trasya̱ varu̍ṇasyābhi̱cakṣe̱ sūryo̍ rū̱paṁ kṛ̍ṇute̱ dyoru̱pasthe̍ |
a̱na̱ntama̱nyadruśa̍dasya̱ pāja̍ḥ kṛ̱ṣṇama̱nyaddha̱rita̱ḥ saṁ bha̍ranti || 1.115.05
a̱dyā de̍vā̱ udi̍tā̱ sūrya̍sya̱ niraṁha̍saḥ pipṛ̱tā nira̍va̱dyāt |
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ || 1.115.06
nāsa̍tyābhyāṁ ba̱rhiri̍va̱ pra vṛ̍ñje̱ stomā̍ iyarmya̱bhriye̍va̱ vāta̍ḥ |
yāvarbha̍gāya vima̱dāya̍ jā̱yāṁ se̍nā̱juvā̍ nyū̱hatū̱ rathe̍na || 1.116.01
vī̱ḻu̱patma̍bhirāśu̱hema̍bhirvā de̱vānā̍ṁ vā jū̱tibhi̱ḥ śāśa̍dānā |
tadrāsa̍bho nāsatyā sa̱hasra̍mā̱jā ya̱masya̍ pra̱dhane̍ jigāya || 1.116.02
tugro̍ ha bhu̱jyuma̍śvinodame̱ghe ra̱yiṁ na kaści̍nmamṛ̱vā avā̍hāḥ |
tamū̍hathurnau̱bhirā̍tma̱nvatī̍bhirantarikṣa̱prudbhi̱rapo̍dakābhiḥ || 1.116.03
ti̱sraḥ kṣapa̱strirahā̍ti̱vraja̍dbhi̱rnāsa̍tyā bhu̱jyumū̍hathuḥ pata̱ṁgaiḥ |
sa̱mu̱drasya̱ dhanva̍nnā̱rdrasya̍ pā̱re tri̱bhī rathai̍ḥ śa̱tapa̍dbhi̱ḥ ṣaḻa̍śvaiḥ || 1.116.04
a̱nā̱ra̱mbha̱ṇe tada̍vīrayethāmanāsthā̱ne a̍grabha̱ṇe sa̍mu̱dre |
yada̍śvinā ū̱hathu̍rbhu̱jyumasta̍ṁ śa̱tāri̍trā̱ṁ nāva̍mātasthi̱vāṁsa̍m || 1.116.05
yama̍śvinā da̱dathu̍ḥ śve̱tamaśva̍ma̱ghāśvā̍ya̱ śaśva̱ditsva̱sti |
tadvā̍ṁ dā̱traṁ mahi̍ kī̱rtenya̍ṁ bhūtpai̱dvo vā̱jī sada̱middhavyo̍ a̱ryaḥ || 1.116.06
yu̱vaṁ na̍rā stuva̱te pa̍jri̱yāya̍ ka̱kṣīva̍te aradata̱ṁ pura̍ṁdhim |
kā̱ro̱ta̱rāccha̱phādaśva̍sya̱ vṛṣṇa̍ḥ śa̱taṁ ku̱mbhā a̍siñcata̱ṁ surā̍yāḥ || 1.116.07
hi̱menā̱gniṁ ghra̱ṁsama̍vārayethāṁ pitu̱matī̱mūrja̍masmā adhattam |
ṛ̱bīse̱ atri̍maśvi̱nāva̍nīta̱munni̍nyathu̱ḥ sarva̍gaṇaṁ sva̱sti || 1.116.08
parā̍va̱taṁ nā̍satyānudethāmu̱ccābu̍dhnaṁ cakrathurji̱hmabā̍ram |
kṣara̱nnāpo̱ na pā̱yanā̍ya rā̱ye sa̱hasrā̍ya̱ tṛṣya̍te̱ gota̍masya || 1.116.09
ju̱ju̱ruṣo̍ nāsatyo̱ta va̱vriṁ prāmu̍ñcataṁ drā̱pimi̍va̱ cyavā̍nāt |
prāti̍rataṁ jahi̱tasyāyu̍rda̱srāditpati̍makṛṇutaṁ ka̱nīnā̍m || 1.116.10
tadvā̍ṁ narā̱ śaṁsya̱ṁ rādhya̍ṁ cābhiṣṭi̱mannā̍satyā̱ varū̍tham |
yadvi̱dvāṁsā̍ ni̱dhimi̱vāpa̍gūḻha̱mudda̍rśa̱tādū̱pathu̱rvanda̍nāya || 1.116.11
tadvā̍ṁ narā sa̱naye̱ daṁsa̍ u̱gramā̱viṣkṛ̍ṇomi tanya̱turna vṛ̱ṣṭim |
da̱dhyaṅha̱ yanmadhvā̍tharva̱ṇo vā̱maśva̍sya śī̱rṣṇā pra yadī̍mu̱vāca̍ || 1.116.12
ajo̍havīnnāsatyā ka̱rā vā̍ṁ ma̱he yāma̍npurubhujā̱ pura̍ṁdhiḥ |
śru̱taṁ tacchāsu̍riva vadhrima̱tyā hira̍ṇyahastamaśvināvadattam || 1.116.13
ā̱sno vṛka̍sya̱ varti̍kāma̱bhīke̍ yu̱vaṁ na̍rā nāsatyāmumuktam |
u̱to ka̱viṁ pu̍rubhujā yu̱vaṁ ha̱ kṛpa̍māṇamakṛṇutaṁ vi̱cakṣe̍ || 1.116.14
ca̱ritra̱ṁ hi veri̱vācche̍di pa̱rṇamā̱jā khe̱lasya̱ pari̍takmyāyām |
sa̱dyo jaṅghā̱māya̍sīṁ vi̱śpalā̍yai̱ dhane̍ hi̱te sarta̍ve̱ pratya̍dhattam || 1.116.15
śa̱taṁ me̱ṣānvṛ̱kye̍ cakṣadā̱namṛ̱jrāśva̱ṁ taṁ pi̱tāndhaṁ ca̍kāra |
tasmā̍ a̱kṣī nā̍satyā vi̱cakṣa̱ ādha̍ttaṁ dasrā bhiṣajāvana̱rvan || 1.116.16
ā vā̱ṁ ratha̍ṁ duhi̱tā sūrya̍sya̱ kārṣme̍vātiṣṭha̱darva̍tā̱ jaya̍ntī |
viśve̍ de̱vā anva̍manyanta hṛ̱dbhiḥ samu̍ śri̱yā nā̍satyā sacethe || 1.116.17
yadayā̍ta̱ṁ divo̍dāsāya va̱rtirbha̱radvā̍jāyāśvinā̱ haya̍ntā |
re̱vadu̍vāha saca̱no ratho̍ vāṁ vṛṣa̱bhaśca̍ śiṁśu̱māra̍śca yu̱ktā || 1.116.18
ra̱yiṁ su̍kṣa̱traṁ sva̍pa̱tyamāyu̍ḥ su̱vīrya̍ṁ nāsatyā̱ vaha̍ntā |
ā ja̱hnāvī̱ṁ sama̍na̱sopa̱ vājai̱strirahno̍ bhā̱gaṁ dadha̍tīmayātam || 1.116.19
pari̍viṣṭaṁ jāhu̱ṣaṁ vi̱śvata̍ḥ sīṁ su̱gebhi̱rnakta̍mūhathū̱ rajo̍bhiḥ |
vi̱bhi̱ndunā̍ nāsatyā̱ rathe̍na̱ vi parva̍tā ajara̱yū a̍yātam || 1.116.20
eka̍syā̱ vasto̍rāvata̱ṁ raṇā̍ya̱ vaśa̍maśvinā sa̱naye̍ sa̱hasrā̍ |
nira̍hataṁ du̱cchunā̱ indra̍vantā pṛthu̱śrava̍so vṛṣaṇā̱varā̍tīḥ || 1.116.21
śa̱rasya̍ cidārca̱tkasyā̍va̱tādā nī̱cādu̱ccā ca̍krathu̱ḥ pāta̍ve̱ vāḥ |
śa̱yave̍ cinnāsatyā̱ śacī̍bhi̱rjasu̍raye sta̱rya̍ṁ pipyathu̱rgām || 1.116.22
a̱va̱sya̱te stu̍va̱te kṛ̍ṣṇi̱yāya̍ ṛjūya̱te nā̍satyā̱ śacī̍bhiḥ |
pa̱śuṁ na na̱ṣṭami̍va̱ darśa̍nāya viṣṇā̱pva̍ṁ dadathu̱rviśva̍kāya || 1.116.23
daśa̱ rātrī̱raśi̍venā̱ nava̱ dyūnava̍naddhaṁ śnathi̱tama̱psva1̱̍ntaḥ |
vipru̍taṁ re̱bhamu̱dani̱ pravṛ̍kta̱munni̍nyathu̱ḥ soma̍miva sru̱veṇa̍ || 1.116.24
pra vā̱ṁ daṁsā̍ṁsyaśvināvavocama̱sya pati̍ḥ syāṁ su̱gava̍ḥ su̱vīra̍ḥ |
u̱ta paśya̍nnaśnu̱vandī̱rghamāyu̱rasta̍mi̱vejja̍ri̱māṇa̍ṁ jagamyām || 1.116.25
madhva̱ḥ soma̍syāśvinā̱ madā̍ya pra̱tno hotā vi̍vāsate vām |
ba̱rhiṣma̍tī rā̱tirviśri̍tā̱ gīri̱ṣā yā̍taṁ nāsa̱tyopa̱ vājai̍ḥ || 1.117.01
yo vā̍maśvinā̱ mana̍so̱ javī̍yā̱nratha̱ḥ svaśvo̱ viśa̍ ā̱jigā̍ti |
yena̱ gaccha̍thaḥ su̱kṛto̍ duro̱ṇaṁ tena̍ narā va̱rtira̱smabhya̍ṁ yātam || 1.117.02
ṛṣi̍ṁ narā̱vaṁha̍sa̱ḥ pāñca̍janyamṛ̱bīsā̱datri̍ṁ muñcatho ga̱ṇena̍ |
mi̱nantā̱ dasyo̱raśi̍vasya mā̱yā a̍nupū̱rvaṁ vṛ̍ṣaṇā co̱daya̍ntā || 1.117.03
aśva̱ṁ na gū̱ḻhama̍śvinā du̱revai̱rṛṣi̍ṁ narā vṛṣaṇā re̱bhama̱psu |
saṁ taṁ ri̍ṇītho̱ vipru̍ta̱ṁ daṁso̍bhi̱rna vā̍ṁ jūryanti pū̱rvyā kṛ̱tāni̍ || 1.117.04
su̱ṣu̱pvāṁsa̱ṁ na nirṛ̍teru̱pasthe̱ sūrya̱ṁ na da̍srā̱ tama̍si kṣi̱yanta̍m |
śu̱bhe ru̱kmaṁ na da̍rśa̱taṁ nikhā̍ta̱mudū̍pathuraśvinā̱ vanda̍nāya || 1.117.05
tadvā̍ṁ narā̱ śaṁsya̍ṁ pajri̱yeṇa̍ ka̱kṣīva̍tā nāsatyā̱ pari̍jman |
śa̱phādaśva̍sya vā̱jino̱ janā̍ya śa̱taṁ ku̱mbhā a̍siñcata̱ṁ madhū̍nām || 1.117.06
yu̱vaṁ na̍rā stuva̱te kṛ̍ṣṇi̱yāya̍ viṣṇā̱pva̍ṁ dadathu̱rviśva̍kāya |
ghoṣā̍yai citpitṛ̱ṣade̍ duro̱ṇe pati̱ṁ jūrya̍ntyā aśvināvadattam || 1.117.07
yu̱vaṁ śyāvā̍ya̱ ruśa̍tīmadattaṁ ma̱haḥ kṣo̱ṇasyā̍śvinā̱ kaṇvā̍ya |
pra̱vācya̱ṁ tadvṛ̍ṣaṇā kṛ̱taṁ vā̱ṁ yannā̍rṣa̱dāya̱ śravo̍ a̱dhyadha̍ttam || 1.117.08
pu̱rū varpā̍ṁsyaśvinā̱ dadhā̍nā̱ ni pe̱dava̍ ūhathurā̱śumaśva̍m |
sa̱ha̱sra̱sāṁ vā̱jina̱mapra̍tītamahi̱hana̍ṁ śrava̱syaṁ1̱̍ taru̍tram || 1.117.09
e̱tāni̍ vāṁ śrava̱syā̍ sudānū̱ brahmā̍ṅgū̱ṣaṁ sada̍na̱ṁ roda̍syoḥ |
yadvā̍ṁ pa̱jrāso̍ aśvinā̱ hava̍nte yā̱tami̱ṣā ca̍ vi̱duṣe̍ ca̱ vāja̍m || 1.117.10
sū̱normāne̍nāśvinā gṛṇā̱nā vāja̱ṁ viprā̍ya bhuraṇā̱ rada̍ntā |
a̱gastye̱ brahma̍ṇā vāvṛdhā̱nā saṁ vi̱śpalā̍ṁ nāsatyāriṇītam || 1.117.11
kuha̱ yāntā̍ suṣṭu̱tiṁ kā̱vyasya̱ divo̍ napātā vṛṣaṇā śayu̱trā |
hira̍ṇyasyeva ka̱laśa̱ṁ nikhā̍ta̱mudū̍pathurdaśa̱me a̍śvi̱nāha̍n || 1.117.12
yu̱vaṁ cyavā̍namaśvinā̱ jara̍nta̱ṁ puna̱ryuvā̍naṁ cakrathu̱ḥ śacī̍bhiḥ |
yu̱vo ratha̍ṁ duhi̱tā sūrya̍sya sa̱ha śri̱yā nā̍satyāvṛṇīta || 1.117.13
yu̱vaṁ tugrā̍ya pū̱rvyebhi̱revai̍ḥ punarma̱nyāva̍bhavataṁ yuvānā |
yu̱vaṁ bhu̱jyumarṇa̍so̱ niḥ sa̍mu̱drādvibhi̍rūhathurṛ̱jrebhi̱raśvai̍ḥ || 1.117.14
ajo̍havīdaśvinā tau̱gryo vā̱ṁ proḻha̍ḥ samu̱drama̍vya̱thirja̍ga̱nvān |
niṣṭamū̍hathuḥ su̱yujā̱ rathe̍na̱ mano̍javasā vṛṣaṇā sva̱sti || 1.117.15
ajo̍havīdaśvinā̱ varti̍kā vāmā̱sno yatsī̱mamu̍ñcata̱ṁ vṛka̍sya |
vi ja̱yuṣā̍ yayathu̱ḥ sānvadre̍rjā̱taṁ vi̱ṣvāco̍ ahataṁ vi̱ṣeṇa̍ || 1.117.16
śa̱taṁ me̱ṣānvṛ̱kye̍ māmahā̱naṁ tama̱ḥ praṇī̍ta̱maśi̍vena pi̱trā |
ākṣī ṛ̱jrāśve̍ aśvināvadhatta̱ṁ jyoti̍ra̱ndhāya̍ cakrathurvi̱cakṣe̍ || 1.117.17
śu̱nama̱ndhāya̱ bhara̍mahvaya̱tsā vṛ̱kīra̍śvinā vṛṣaṇā̱ nareti̍ |
jā̱raḥ ka̱nīna̍ iva cakṣadā̱na ṛ̱jrāśva̍ḥ śa̱tameka̍ṁ ca me̱ṣān || 1.117.18
ma̱hī vā̍mū̱tira̍śvinā mayo̱bhūru̱ta srā̱maṁ dhi̍ṣṇyā̱ saṁ ri̍ṇīthaḥ |
athā̍ yu̱vāmida̍hvaya̱tpura̍ṁdhi̱rāga̍cchataṁ sīṁ vṛṣaṇā̱vavo̍bhiḥ || 1.117.19
adhe̍nuṁ dasrā sta̱ryaṁ1̱̍ viṣa̍ktā̱mapi̍nvataṁ śa̱yave̍ aśvinā̱ gām |
yu̱vaṁ śacī̍bhirvima̱dāya̍ jā̱yāṁ nyū̍hathuḥ purumi̱trasya̱ yoṣā̍m || 1.117.20
yava̱ṁ vṛke̍ṇāśvinā̱ vapa̱nteṣa̍ṁ du̱hantā̱ manu̍ṣāya dasrā |
a̱bhi dasyu̱ṁ baku̍reṇā̱ dhama̍nto̱ru jyoti̍ścakrathu̱rāryā̍ya || 1.117.21
ā̱tha̱rva̱ṇāyā̍śvinā dadhī̱ce'śvya̱ṁ śira̱ḥ pratyai̍rayatam |
sa vā̱ṁ madhu̱ pra vo̍cadṛtā̱yantvā̱ṣṭraṁ yadda̍srāvapika̱kṣya̍ṁ vām || 1.117.22
sadā̍ kavī suma̱timā ca̍ke vā̱ṁ viśvā̱ dhiyo̍ aśvinā̱ prāva̍taṁ me |
a̱sme ra̱yiṁ nā̍satyā bṛ̱hanta̍mapatya̱sāca̱ṁ śrutya̍ṁ rarāthām || 1.117.23
hira̍ṇyahastamaśvinā̱ rarā̍ṇā pu̱traṁ na̍rā vadhrima̱tyā a̍dattam |
tridhā̍ ha̱ śyāva̍maśvinā̱ vika̍sta̱mujjī̱vasa̍ airayataṁ sudānū || 1.117.24
e̱tāni̍ vāmaśvinā vī̱ryā̍ṇi̱ pra pū̱rvyāṇyā̱yavo̍'vocan |
brahma̍ kṛ̱ṇvanto̍ vṛṣaṇā yu̱vabhyā̍ṁ su̱vīrā̍so vi̱datha̱mā va̍dema || 1.117.25
ā vā̱ṁ ratho̍ aśvinā śye̱napa̍tvā sumṛḻī̱kaḥ svavā̍ yātva̱rvāṅ |
yo martya̍sya̱ mana̍so̱ javī̍yāntrivandhu̱ro vṛ̍ṣaṇā̱ vāta̍raṁhāḥ || 1.118.01
tri̱va̱ndhu̱reṇa̍ tri̱vṛtā̱ rathe̍na trica̱kreṇa̍ su̱vṛtā yā̍tama̱rvāk |
pinva̍ta̱ṁ gā jinva̍ta̱marva̍to no va̱rdhaya̍tamaśvinā vī̱rama̱sme || 1.118.02
pra̱vadyā̍manā su̱vṛtā̱ rathe̍na̱ dasrā̍vi̱maṁ śṛ̍ṇuta̱ṁ śloka̱madre̍ḥ |
kima̱ṅga vā̱ṁ pratyava̍rti̱ṁ gami̍ṣṭhā̱hurviprā̍so aśvinā purā̱jāḥ || 1.118.03
ā vā̍ṁ śye̱nāso̍ aśvinā vahantu̱ rathe̍ yu̱ktāsa̍ ā̱śava̍ḥ pata̱ṁgāḥ |
ye a̱pturo̍ di̱vyāso̱ na gṛdhrā̍ a̱bhi prayo̍ nāsatyā̱ vaha̍nti || 1.118.04
ā vā̱ṁ ratha̍ṁ yuva̱tisti̍ṣṭha̱datra̍ ju̱ṣṭvī na̍rā duhi̱tā sūrya̍sya |
pari̍ vā̱maśvā̱ vapu̍ṣaḥ pata̱ṁgā vayo̍ vahantvaru̱ṣā a̱bhīke̍ || 1.118.05
udvanda̍namairataṁ da̱ṁsanā̍bhi̱rudre̱bhaṁ da̍srā vṛṣaṇā̱ śacī̍bhiḥ |
niṣṭau̱gryaṁ pā̍rayathaḥ samu̱drātpuna̱ścyavā̍naṁ cakrathu̱ryuvā̍nam || 1.118.06
yu̱vamatra̱ye'va̍nītāya ta̱ptamūrja̍mo̱māna̍maśvināvadhattam |
yu̱vaṁ kaṇvā̱yāpi̍riptāya̱ cakṣu̱ḥ pratya̍dhattaṁ suṣṭu̱tiṁ ju̍juṣā̱ṇā || 1.118.07
yu̱vaṁ dhe̱nuṁ śa̱yave̍ nādhi̱tāyāpi̍nvatamaśvinā pū̱rvyāya̍ |
amu̍ñcata̱ṁ varti̍kā̱maṁha̍so̱ niḥ prati̱ jaṅghā̍ṁ vi̱śpalā̍yā adhattam || 1.118.08
yu̱vaṁ śve̱taṁ pe̱dava̱ indra̍jūtamahi̱hana̍maśvinādatta̱maśva̍m |
jo̱hūtra̍ma̱ryo a̱bhibhū̍timu̱graṁ sa̍hasra̱sāṁ vṛṣa̍ṇaṁ vī̱ḍva̍ṅgam || 1.118.09
tā vā̍ṁ narā̱ svava̍se sujā̱tā havā̍mahe aśvinā̱ nādha̍mānāḥ |
ā na̱ upa̱ vasu̍matā̱ rathe̍na̱ giro̍ juṣā̱ṇā su̍vi̱tāya̍ yātam || 1.118.10
ā śye̱nasya̱ java̍sā̱ nūta̍nenā̱sme yā̍taṁ nāsatyā sa̱joṣā̍ḥ |
have̱ hi vā̍maśvinā rā̱taha̍vyaḥ śaśvatta̱māyā̍ u̱ṣaso̱ vyu̍ṣṭau || 1.118.11
ā vā̱ṁ ratha̍ṁ purumā̱yaṁ ma̍no̱juva̍ṁ jī̱rāśva̍ṁ ya̱jñiya̍ṁ jī̱vase̍ huve |
sa̱hasra̍ketuṁ va̱nina̍ṁ śa̱tadva̍suṁ śruṣṭī̱vāna̍ṁ varivo̱dhāma̱bhi praya̍ḥ || 1.119.01
ū̱rdhvā dhī̱tiḥ pratya̍sya̱ prayā̍ma̱nyadhā̍yi̱ śasma̱nsama̍yanta̱ ā diśa̍ḥ |
svadā̍mi gha̱rmaṁ prati̍ yantyū̱taya̱ ā vā̍mū̱rjānī̱ ratha̍maśvināruhat || 1.119.02
saṁ yanmi̱thaḥ pa̍spṛdhā̱nāso̱ agma̍ta śu̱bhe ma̱khā ami̍tā jā̱yavo̱ raṇe̍ |
yu̱voraha̍ prava̱ṇe ce̍kite̱ ratho̱ yada̍śvinā̱ vaha̍thaḥ sū̱rimā vara̍m || 1.119.03
yu̱vaṁ bhu̱jyuṁ bhu̱ramā̍ṇa̱ṁ vibhi̍rga̱taṁ svayu̍ktibhirni̱vaha̍ntā pi̱tṛbhya̱ ā |
yā̱si̱ṣṭaṁ va̱rtirvṛ̍ṣaṇā vije̱nyaṁ1̱̍ divo̍dāsāya̱ mahi̍ ceti vā̱mava̍ḥ || 1.119.04
yu̱vora̍śvinā̱ vapu̍ṣe yuvā̱yuja̱ṁ ratha̱ṁ vāṇī̍ yematurasya̱ śardhya̍m |
ā vā̍ṁ pati̱tvaṁ sa̱khyāya̍ ja̱gmuṣī̱ yoṣā̍vṛṇīta̱ jenyā̍ yu̱vāṁ patī̍ || 1.119.05
yu̱vaṁ re̱bhaṁ pari̍ṣūteruruṣyatho hi̱mena̍ gha̱rmaṁ pari̍tapta̱matra̍ye |
yu̱vaṁ śa̱yora̍va̱saṁ pi̍pyathu̱rgavi̱ pra dī̱rgheṇa̱ vanda̍nastā̱ryāyu̍ṣā || 1.119.06
yu̱vaṁ vanda̍na̱ṁ nirṛ̍taṁ jara̱ṇyayā̱ ratha̱ṁ na da̍srā kara̱ṇā sami̍nvathaḥ |
kṣetrā̱dā vipra̍ṁ janatho vipa̱nyayā̱ pra vā̱matra̍ vidha̱te da̱ṁsanā̍ bhuvat || 1.119.07
aga̍cchata̱ṁ kṛpa̍māṇaṁ parā̱vati̍ pi̱tuḥ svasya̱ tyaja̍sā̱ nibā̍dhitam |
sva̍rvatīri̱ta ū̱tīryu̱voraha̍ ci̱trā a̱bhīke̍ abhavanna̱bhiṣṭa̍yaḥ || 1.119.08
u̱ta syā vā̱ṁ madhu̍ma̱nmakṣi̍kārapa̱nmade̱ soma̍syauśi̱jo hu̍vanyati |
yu̱vaṁ da̍dhī̱co mana̱ ā vi̍vāsa̱tho'thā̱ śira̱ḥ prati̍ vā̱maśvya̍ṁ vadat || 1.119.09
yu̱vaṁ pe̱dave̍ puru̱vāra̍maśvinā spṛ̱dhāṁ śve̱taṁ ta̍ru̱tāra̍ṁ duvasyathaḥ |
śaryai̍ra̱bhidyu̱ṁ pṛta̍nāsu du̱ṣṭara̍ṁ ca̱rkṛtya̱mindra̍miva carṣaṇī̱saha̍m || 1.119.10
kā rā̍dha̱ddhotrā̍śvinā vā̱ṁ ko vā̱ṁ joṣa̍ u̱bhayo̍ḥ |
ka̱thā vi̍dhā̱tyapra̍cetāḥ || 1.120.01
vi̱dvāṁsā̱viddura̍ḥ pṛcche̱davi̍dvāni̱tthāpa̍ro ace̱tāḥ |
nū ci̱nnu marte̱ akrau̍ || 1.120.02
tā vi̱dvāṁsā̍ havāmahe vā̱ṁ tā no̍ vi̱dvāṁsā̱ manma̍ vocetama̱dya |
prārca̱ddaya̍māno yu̱vāku̍ḥ || 1.120.03
vi pṛ̍cchāmi pā̱kyā̱3̱̍ na de̱vānvaṣa̍ṭkṛtasyādbhu̱tasya̍ dasrā |
pā̱taṁ ca̱ sahya̍so yu̱vaṁ ca̱ rabhya̍so naḥ || 1.120.04
pra yā ghoṣe̱ bhṛga̍vāṇe̱ na śobhe̱ yayā̍ vā̱cā yaja̍ti pajri̱yo vā̍m |
praiṣa̱yurna vi̱dvān || 1.120.05
śru̱taṁ gā̍ya̱traṁ taka̍vānasyā̱haṁ ci̱ddhi ri̱rebhā̍śvinā vām |
ākṣī śu̍bhaspatī̱ dan || 1.120.06
yu̱vaṁ hyāsta̍ṁ ma̱ho ranyu̱vaṁ vā̱ yanni̱rata̍taṁsatam |
tā no̍ vasū sugo̱pā syā̍taṁ pā̱taṁ no̱ vṛkā̍daghā̱yoḥ || 1.120.07
mā kasmai̍ dhātama̱bhya̍mi̱triṇe̍ no̱ mākutrā̍ no gṛ̱hebhyo̍ dhe̱navo̍ guḥ |
sta̱nā̱bhujo̱ aśi̍śvīḥ || 1.120.08
du̱hī̱yanmi̱tradhi̍taye yu̱vāku̍ rā̱ye ca̍ no mimī̱taṁ vāja̍vatyai |
i̱ṣe ca̍ no mimītaṁ dhenu̱matyai̍ || 1.120.09
a̱śvino̍rasana̱ṁ ratha̍mana̱śvaṁ vā̱jinī̍vatoḥ |
tenā̱haṁ bhūri̍ cākana || 1.120.10
a̱yaṁ sa̍maha mā tanū̱hyāte̱ janā̱ anu̍ |
so̱ma̱peya̍ṁ su̱kho ratha̍ḥ || 1.120.11
adha̱ svapna̍sya̱ nirvi̱de'bhu̍ñjataśca re̱vata̍ḥ |
u̱bhā tā basri̍ naśyataḥ || 1.120.12
kadi̱tthā nṝḥ pātra̍ṁ devaya̱tāṁ śrava̱dgiro̱ aṅgi̍rasāṁ tura̱ṇyan |
pra yadāna̱ḍviśa̱ ā ha̱rmyasyo̱ru kra̍ṁsate adhva̱re yaja̍traḥ || 1.121.01
stambhī̍ddha̱ dyāṁ sa dha̱ruṇa̍ṁ pruṣāyadṛ̱bhurvājā̍ya̱ dravi̍ṇa̱ṁ naro̱ goḥ |
anu̍ sva̱jāṁ ma̍hi̱ṣaśca̍kṣata̱ vrāṁ menā̱maśva̍sya̱ pari̍ mā̱tara̱ṁ goḥ || 1.121.02
nakṣa̱ddhava̍maru̱ṇīḥ pū̱rvyaṁ rāṭ tu̱ro vi̱śāmaṅgi̍rasā̱manu̱ dyūn |
takṣa̱dvajra̱ṁ niyu̍taṁ ta̱stambha̱ddyāṁ catu̍ṣpade̱ naryā̍ya dvi̱pāde̍ || 1.121.03
a̱sya made̍ sva̱rya̍ṁ dā ṛ̱tāyāpī̍vṛtamu̱sriyā̍ṇā̱manī̍kam |
yaddha̍ pra̱sarge̍ trika̱kumni̱varta̱dapa̱ druho̱ mānu̍ṣasya̱ duro̍ vaḥ || 1.121.04
tubhya̱ṁ payo̱ yatpi̱tarā̱vanī̍tā̱ṁ rādha̍ḥ su̱reta̍stu̱raṇe̍ bhura̱ṇyū |
śuci̱ yatte̱ rekṇa̱ āya̍janta saba̱rdughā̍yā̱ḥ paya̍ u̱sriyā̍yāḥ || 1.121.05
adha̱ pra ja̍jñe ta̱raṇi̍rmamattu̱ pra ro̍cya̱syā u̱ṣaso̱ na sūra̍ḥ |
indu̱ryebhi̱rāṣṭa̱ svedu̍havyaiḥ sru̱veṇa̍ si̱ñcañja̱raṇā̱bhi dhāma̍ || 1.121.06
svi̱dhmā yadva̱nadhi̍tirapa̱syātsūro̍ adhva̱re pari̱ rodha̍nā̱ goḥ |
yaddha̍ pra̱bhāsi̱ kṛtvyā̱ anu̱ dyūnana̍rviśe pa̱śviṣe̍ tu̱rāya̍ || 1.121.07
a̱ṣṭā ma̱ho di̱va ādo̱ harī̍ i̱ha dyu̍mnā̱sāha̍ma̱bhi yo̍dhā̱na utsa̍m |
hari̱ṁ yatte̍ ma̱ndina̍ṁ du̱kṣanvṛ̱dhe gora̍bhasa̱madri̍bhirvā̱tāpya̍m || 1.121.08
tvamā̍ya̱saṁ prati̍ vartayo̱ gordi̱vo aśmā̍na̱mupa̍nīta̱mṛbhvā̍ |
kutsā̍ya̱ yatra̍ puruhūta va̱nvañchuṣṇa̍mana̱ntaiḥ pa̍ri̱yāsi̍ va̱dhaiḥ || 1.121.09
pu̱rā yatsūra̱stama̍so̱ apī̍te̱stama̍drivaḥ phali̱gaṁ he̱tima̍sya |
śuṣṇa̍sya ci̱tpari̍hita̱ṁ yadojo̍ di̱vaspari̱ sugra̍thita̱ṁ tadāda̍ḥ || 1.121.10
anu̍ tvā ma̱hī pāja̍sī aca̱kre dyāvā̱kṣāmā̍ madatāmindra̱ karma̍n |
tvaṁ vṛ̱tramā̱śayā̍naṁ si̱rāsu̍ ma̱ho vajre̍ṇa siṣvapo va̱rāhu̍m || 1.121.11
tvami̍ndra̱ naryo̱ yā avo̱ nṝntiṣṭhā̱ vāta̍sya su̱yujo̱ vahi̍ṣṭhān |
yaṁ te̍ kā̱vya u̱śanā̍ ma̱ndina̱ṁ dādvṛ̍tra̱haṇa̱ṁ pārya̍ṁ tatakṣa̱ vajra̍m || 1.121.12
tvaṁ sūro̍ ha̱rito̍ rāmayo̱ nṝnbhara̍cca̱krameta̍śo̱ nāyami̍ndra |
prāsya̍ pā̱raṁ na̍va̱tiṁ nā̱vyā̍nā̱mapi̍ ka̱rtama̍varta̱yo'ya̍jyūn || 1.121.13
tvaṁ no̍ a̱syā i̍ndra du̱rhaṇā̍yāḥ pā̱hi va̍jrivo duri̱tāda̱bhīke̍ |
pra no̱ vājā̍nra̱thyo̱3̱̍ aśva̍budhyāni̱ṣe ya̍ndhi̱ śrava̍se sū̱nṛtā̍yai || 1.121.14
mā sā te̍ a̱smatsu̍ma̱tirvi da̍sa̱dvāja̍pramaha̱ḥ samiṣo̍ varanta |
ā no̍ bhaja maghava̱ngoṣva̱ryo maṁhi̍ṣṭhāste sadha̱māda̍ḥ syāma || 1.121.15
pra va̱ḥ pānta̍ṁ raghumanya̱vo'ndho̍ ya̱jñaṁ ru̱drāya̍ mī̱ḻhuṣe̍ bharadhvam |
di̱vo a̍sto̱ṣyasu̍rasya vī̱rairi̍ṣu̱dhyeva̍ ma̱ruto̱ roda̍syoḥ || 1.122.01
patnī̍va pū̱rvahū̍tiṁ vāvṛ̱dhadhyā̍ u̱ṣāsā̱naktā̍ puru̱dhā vidā̍ne |
sta̱rīrnātka̱ṁ vyu̍ta̱ṁ vasā̍nā̱ sūrya̍sya śri̱yā su̱dṛśī̱ hira̍ṇyaiḥ || 1.122.02
ma̱mattu̍ na̱ḥ pari̍jmā vasa̱rhā ma̱mattu̱ vāto̍ a̱pāṁ vṛṣa̍ṇvān |
śi̱śī̱tami̍ndrāparvatā yu̱vaṁ na̱stanno̱ viśve̍ varivasyantu de̱vāḥ || 1.122.03
u̱ta tyā me̍ ya̱śasā̍ śveta̱nāyai̱ vyantā̱ pāntau̍śi̱jo hu̱vadhyai̍ |
pra vo̱ napā̍tama̱pāṁ kṛ̍ṇudhva̱ṁ pra mā̱tarā̍ rāspi̱nasyā̱yoḥ || 1.122.04
ā vo̍ ruva̱ṇyumau̍śi̱jo hu̱vadhyai̱ ghoṣe̍va̱ śaṁsa̱marju̍nasya̱ naṁśe̍ |
pra va̍ḥ pū̱ṣṇe dā̱vana̱ ā acchā̍ voceya va̱sutā̍tima̱gneḥ || 1.122.05
śru̱taṁ me̍ mitrāvaruṇā̱ have̱mota śru̍ta̱ṁ sada̍ne vi̱śvata̍ḥ sīm |
śrotu̍ na̱ḥ śrotu̍rātiḥ su̱śrotu̍ḥ su̱kṣetrā̱ sindhu̍ra̱dbhiḥ || 1.122.06
stu̱ṣe sā vā̍ṁ varuṇa mitra rā̱tirgavā̍ṁ śa̱tā pṛ̱kṣayā̍meṣu pa̱jre |
śru̱tara̍the pri̱yara̍the̱ dadhā̍nāḥ sa̱dyaḥ pu̱ṣṭiṁ ni̍rundhā̱nāso̍ agman || 1.122.07
a̱sya stu̍ṣe̱ mahi̍maghasya̱ rādha̱ḥ sacā̍ sanema̱ nahu̍ṣaḥ su̱vīrā̍ḥ |
jano̱ yaḥ pa̱jrebhyo̍ vā̱jinī̍vā̱naśvā̍vato ra̱thino̱ mahya̍ṁ sū̱riḥ || 1.122.08
jano̱ yo mi̍trāvaruṇāvabhi̱dhruga̱po na vā̍ṁ su̱notya̍kṣṇayā̱dhruk |
sva̱yaṁ sa yakṣma̱ṁ hṛda̍ye̱ ni dha̍tta̱ āpa̱ yadī̱ṁ hotrā̍bhirṛ̱tāvā̍ || 1.122.09
sa vrādha̍to̱ nahu̍ṣo̱ daṁsu̍jūta̱ḥ śardha̍staro na̱rāṁ gū̱rtaśra̍vāḥ |
visṛ̍ṣṭarātiryāti bāḻha̱sṛtvā̱ viśvā̍su pṛ̱tsu sada̱micchūra̍ḥ || 1.122.10
adha̱ gmantā̱ nahu̍ṣo̱ hava̍ṁ sū̱reḥ śrotā̍ rājāno a̱mṛta̍sya mandrāḥ |
na̱bho̱juvo̱ yanni̍ra̱vasya̱ rādha̱ḥ praśa̍staye mahi̱nā ratha̍vate || 1.122.11
e̱taṁ śardha̍ṁ dhāma̱ yasya̍ sū̱reritya̍voca̱ndaśa̍tayasya̱ naṁśe̍ |
dyu̱mnāni̱ yeṣu̍ va̱sutā̍tī rā̱ranviśve̍ sanvantu prabhṛ̱theṣu̱ vāja̍m || 1.122.12
mandā̍mahe̱ daśa̍tayasya dhā̱serdviryatpañca̱ bibhra̍to̱ yantyannā̍ |
kimi̱ṣṭāśva̍ i̱ṣṭara̍śmire̱ta ī̍śā̱nāsa̱staru̍ṣa ṛñjate̱ nṝn || 1.122.13
hira̍ṇyakarṇaṁ maṇigrīva̱marṇa̱stanno̱ viśve̍ varivasyantu de̱vāḥ |
a̱ryo gira̍ḥ sa̱dya ā ja̱gmuṣī̱rosrāścā̍kantū̱bhaye̍ṣva̱sme || 1.122.14
ca̱tvāro̍ mā maśa̱rśāra̍sya̱ śiśva̱strayo̱ rājña̱ āya̍vasasya ji̱ṣṇoḥ |
ratho̍ vāṁ mitrāvaruṇā dī̱rghāpsā̱ḥ syūma̍gabhasti̱ḥ sūro̱ nādyau̍t || 1.122.15
pṛ̱thū ratho̱ dakṣi̍ṇāyā ayo̱jyaina̍ṁ de̱vāso̍ a̱mṛtā̍so asthuḥ |
kṛ̱ṣṇāduda̍sthāda̱ryā̱3̱̍ vihā̍yā̱ściki̍tsantī̱ mānu̍ṣāya̱ kṣayā̍ya || 1.123.01
pūrvā̱ viśva̍smā̱dbhuva̍nādabodhi̱ jaya̍ntī̱ vāja̍ṁ bṛha̱tī sanu̍trī |
u̱ccā vya̍khyadyuva̱tiḥ pu̍na̱rbhūroṣā a̍ganpratha̱mā pū̱rvahū̍tau || 1.123.02
yada̱dya bhā̱gaṁ vi̱bhajā̍si̱ nṛbhya̱ uṣo̍ devi martya̱trā su̍jāte |
de̱vo no̱ atra̍ savi̱tā damū̍nā̱ anā̍gaso vocati̱ sūryā̍ya || 1.123.03
gṛ̱haṁgṛ̍hamaha̱nā yā̱tyacchā̍ di̱vedi̍ve̱ adhi̱ nāmā̱ dadhā̍nā |
siṣā̍santī dyota̱nā śaśva̱dāgā̱dagra̍magra̱midbha̍jate̱ vasū̍nām || 1.123.04
bhaga̍sya̱ svasā̱ varu̍ṇasya jā̱miruṣa̍ḥ sūnṛte pratha̱mā ja̍rasva |
pa̱ścā sa da̍ghyā̱ yo a̱ghasya̍ dhā̱tā jaye̍ma̱ taṁ dakṣi̍ṇayā̱ rathe̍na || 1.123.05
udī̍ratāṁ sū̱nṛtā̱ utpura̍ṁdhī̱ruda̱gnaya̍ḥ śuśucā̱nāso̍ asthuḥ |
spā̱rhā vasū̍ni̱ tama̱sāpa̍gūḻhā̱viṣkṛ̍ṇvantyu̱ṣaso̍ vibhā̱tīḥ || 1.123.06
apā̱nyadetya̱bhya1̱̍nyade̍ti̱ viṣu̍rūpe̱ aha̍nī̱ saṁ ca̍rete |
pa̱ri̱kṣito̱stamo̍ a̱nyā guhā̍ka̱radyau̍du̱ṣāḥ śośu̍catā̱ rathe̍na || 1.123.07
sa̱dṛśī̍ra̱dya sa̱dṛśī̱ridu̱ śvo dī̱rghaṁ sa̍cante̱ varu̍ṇasya̱ dhāma̍ |
a̱na̱va̱dyāstri̱ṁśata̱ṁ yoja̍nā̱nyekai̍kā̱ kratu̱ṁ pari̍ yanti sa̱dyaḥ || 1.123.08
jā̱na̱tyahna̍ḥ pratha̱masya̱ nāma̍ śu̱krā kṛ̱ṣṇāda̍janiṣṭa śvitī̱cī |
ṛ̱tasya̱ yoṣā̱ na mi̍nāti̱ dhāmāha̍raharniṣkṛ̱tamā̱cara̍ntī || 1.123.09
ka̱nye̍va ta̱nvā̱3̱̍ śāśa̍dānā̱ eṣi̍ devi de̱vamiya̍kṣamāṇam |
sa̱ṁsmaya̍mānā yuva̱tiḥ pu̱rastā̍dā̱virvakṣā̍ṁsi kṛṇuṣe vibhā̱tī || 1.123.10
su̱sa̱ṁkā̱śā mā̱tṛmṛ̍ṣṭeva̱ yoṣā̱vista̱nva̍ṁ kṛṇuṣe dṛ̱śe kam |
bha̱drā tvamu̍ṣo vita̱raṁ vyu̍ccha̱ na tatte̍ a̱nyā u̱ṣaso̍ naśanta || 1.123.11
aśvā̍vatī̱rgoma̍tīrvi̱śvavā̍rā̱ yata̍mānā ra̱śmibhi̱ḥ sūrya̍sya |
parā̍ ca̱ yanti̱ puna̱rā ca̍ yanti bha̱drā nāma̱ vaha̍mānā u̱ṣāsa̍ḥ || 1.123.12
ṛ̱tasya̍ ra̱śmima̍nu̱yaccha̍mānā bha̱drambha̍dra̱ṁ kratu̍ma̱smāsu̍ dhehi |
uṣo̍ no a̱dya su̱havā̱ vyu̍cchā̱smāsu̱ rāyo̍ ma̱ghava̍tsu ca syuḥ || 1.123.13
u̱ṣā u̱cchantī̍ samidhā̱ne a̱gnā u̱dyansūrya̍ urvi̱yā jyoti̍raśret |
de̱vo no̱ atra̍ savi̱tā nvartha̱ṁ prāsā̍vīddvi̱patpra catu̍ṣpadi̱tyai || 1.124.01
ami̍natī̱ daivyā̍ni vra̱tāni̍ pramina̱tī ma̍nu̱ṣyā̍ yu̱gāni̍ |
ī̱yuṣī̍ṇāmupa̱mā śaśva̍tīnāmāyatī̱nāṁ pra̍tha̱moṣā vya̍dyaut || 1.124.02
e̱ṣā di̱vo du̍hi̱tā pratya̍darśi̱ jyoti̱rvasā̍nā sama̱nā pu̱rastā̍t |
ṛ̱tasya̱ panthā̱manve̍ti sā̱dhu pra̍jāna̱tīva̱ na diśo̍ mināti || 1.124.03
upo̍ adarśi śu̱ndhyuvo̱ na vakṣo̍ no̱dhā i̍vā̱vira̍kṛta pri̱yāṇi̍ |
a̱dma̱sanna sa̍sa̱to bo̱dhaya̍ntī śaśvatta̱māgā̱tpuna̍re̱yuṣī̍ṇām || 1.124.04
pūrve̱ ardhe̱ raja̍so a̱ptyasya̱ gavā̱ṁ jani̍tryakṛta̱ pra ke̱tum |
vyu̍ prathate vita̱raṁ varī̍ya̱ obhā pṛ̱ṇantī̍ pi̱troru̱pasthā̍ || 1.124.05
e̱vede̱ṣā pu̍ru̱tamā̍ dṛ̱śe kaṁ nājā̍mi̱ṁ na pari̍ vṛṇakti jā̱mim |
a̱re̱pasā̍ ta̱nvā̱3̱̍ śāśa̍dānā̱ nārbhā̱dīṣa̍te̱ na ma̱ho vi̍bhā̱tī || 1.124.06
a̱bhrā̱teva̍ pu̱ṁsa e̍ti pratī̱cī ga̍rtā̱rugi̍va sa̱naye̱ dhanā̍nām |
jā̱yeva̱ patya̍ uśa̱tī su̱vāsā̍ u̱ṣā ha̱sreva̱ ni ri̍ṇīte̱ apsa̍ḥ || 1.124.07
svasā̱ svasre̱ jyāya̍syai̱ yoni̍mārai̱gapai̍tyasyāḥ prati̱cakṣye̍va |
vyu̱cchantī̍ ra̱śmibhi̱ḥ sūrya̍syā̱ñjya̍ṅkte samana̱gā i̍va̱ vrāḥ || 1.124.08
ā̱sāṁ pūrvā̍sā̱maha̍su̱ svasṝ̍ṇā̱mapa̍rā̱ pūrvā̍ma̱bhye̍ti pa̱ścāt |
tāḥ pra̍tna̱vannavya̍sīrnū̱nama̱sme re̱vadu̍cchantu su̱dinā̍ u̱ṣāsa̍ḥ || 1.124.09
pra bo̍dhayoṣaḥ pṛṇa̱to ma̍gho̱nyabu̍dhyamānāḥ pa̱ṇaya̍ḥ sasantu |
re̱vadu̍ccha ma̱ghava̍dbhyo maghoni re̱vatsto̱tre sū̍nṛte jā̱raya̍ntī || 1.124.10
ave̱yama̍śvaidyuva̱tiḥ pu̱rastā̍dyu̱ṅkte gavā̍maru̱ṇānā̱manī̍kam |
vi nū̱namu̍cchā̱dasa̍ti̱ pra ke̱turgṛ̱haṁgṛ̍ha̱mupa̍ tiṣṭhāte a̱gniḥ || 1.124.11
utte̱ vaya̍ścidvasa̱tera̍papta̱nnara̍śca̱ ye pi̍tu̱bhājo̱ vyu̍ṣṭau |
a̱mā sa̱te va̍hasi̱ bhūri̍ vā̱mamuṣo̍ devi dā̱śuṣe̱ martyā̍ya || 1.124.12
asto̍ḍhvaṁ stomyā̱ brahma̍ṇā̱ me'vī̍vṛdhadhvamuśa̱tīru̍ṣāsaḥ |
yu̱ṣmāka̍ṁ devī̱rava̍sā sanema saha̱sriṇa̍ṁ ca śa̱tina̍ṁ ca̱ vāja̍m || 1.124.13
prā̱tā ratna̍ṁ prāta̱ritvā̍ dadhāti̱ taṁ ci̍ki̱tvānpra̍ti̱gṛhyā̱ ni dha̍tte |
tena̍ pra̱jāṁ va̱rdhaya̍māna̱ āyū̍ rā̱yaspoṣe̍ṇa sacate su̱vīra̍ḥ || 1.125.01
su̱gura̍satsuhira̱ṇyaḥ svaśvo̍ bṛ̱hada̍smai̱ vaya̱ indro̍ dadhāti |
yastvā̱yanta̱ṁ vasu̍nā prātaritvo mu̱kṣīja̍yeva̱ padi̍mutsi̱nāti̍ || 1.125.02
āya̍ma̱dya su̱kṛta̍ṁ prā̱tari̱cchanni̱ṣṭeḥ pu̱traṁ vasu̍matā̱ rathe̍na |
a̱ṁśoḥ su̱taṁ pā̍yaya matsa̱rasya̍ kṣa̱yadvī̍raṁ vardhaya sū̱nṛtā̍bhiḥ || 1.125.03
upa̍ kṣaranti̱ sindha̍vo mayo̱bhuva̍ ījā̱naṁ ca̍ ya̱kṣyamā̍ṇaṁ ca dhe̱nava̍ḥ |
pṛ̱ṇanta̍ṁ ca̱ papu̍riṁ ca śrava̱syavo̍ ghṛ̱tasya̱ dhārā̱ upa̍ yanti vi̱śvata̍ḥ || 1.125.04
nāka̍sya pṛ̱ṣṭhe adhi̍ tiṣṭhati śri̱to yaḥ pṛ̱ṇāti̱ sa ha̍ de̱veṣu̍ gacchati |
tasmā̱ āpo̍ ghṛ̱tama̍rṣanti̱ sindha̍va̱stasmā̍ i̱yaṁ dakṣi̍ṇā pinvate̱ sadā̍ || 1.125.05
dakṣi̍ṇāvatā̱midi̱māni̍ ci̱trā dakṣi̍ṇāvatāṁ di̱vi sūryā̍saḥ |
dakṣi̍ṇāvanto a̱mṛta̍ṁ bhajante̱ dakṣi̍ṇāvanta̱ḥ pra ti̍ranta̱ āyu̍ḥ || 1.125.06
mā pṛ̱ṇanto̱ duri̍ta̱mena̱ āra̱nmā jā̍riṣuḥ sū̱raya̍ḥ suvra̱tāsa̍ḥ |
a̱nyasteṣā̍ṁ pari̱dhira̍stu̱ kaści̱dapṛ̍ṇantama̱bhi saṁ ya̍ntu̱ śokā̍ḥ || 1.125.07
ama̍ndā̱nstomā̱npra bha̍re manī̱ṣā sindhā̱vadhi̍ kṣiya̱to bhā̱vyasya̍ |
yo me̍ sa̱hasra̱mami̍mīta sa̱vāna̱tūrto̱ rājā̱ śrava̍ i̱cchamā̍naḥ || 1.126.01
śa̱taṁ rājño̱ nādha̍mānasya ni̱ṣkāñcha̱tamaśvā̱npraya̍tānsa̱dya āda̍m |
śa̱taṁ ka̱kṣīvā̱ asu̍rasya̱ gonā̍ṁ di̱vi śravo̱'jara̱mā ta̍tāna || 1.126.02
upa̍ mā śyā̱vāḥ sva̱naye̍na da̱ttā va̱dhūma̍nto̱ daśa̱ rathā̍so asthuḥ |
ṣa̱ṣṭiḥ sa̱hasra̱manu̱ gavya̱māgā̱tsana̍tka̱kṣīvā̍ abhipi̱tve ahnā̍m || 1.126.03
ca̱tvā̱ri̱ṁśaddaśa̍rathasya̱ śoṇā̍ḥ sa̱hasra̱syāgre̱ śreṇi̍ṁ nayanti |
ma̱da̱cyuta̍ḥ kṛśa̱nāva̍to̱ atyā̍nka̱kṣīva̍nta̱ uda̍mṛkṣanta pa̱jrāḥ || 1.126.04
pūrvā̱manu̱ praya̍ti̱mā da̍de va̱strīnyu̱ktā a̱ṣṭāva̱ridhā̍yaso̱ gāḥ |
su̱bandha̍vo̱ ye vi̱śyā̍ iva̱ vrā ana̍svanta̱ḥ śrava̱ aiṣa̍nta pa̱jrāḥ || 1.126.05
āga̍dhitā̱ pari̍gadhitā̱ yā ka̍śī̱keva̱ jaṅga̍he |
dadā̍ti̱ mahya̱ṁ yādu̍rī̱ yāśū̍nāṁ bho̱jyā̍ śa̱tā || 1.126.06
upo̍pa me̱ parā̍ mṛśa̱ mā me̍ da̱bhrāṇi̍ manyathāḥ |
sarvā̱hama̍smi roma̱śā ga̱ndhārī̍ṇāmivāvi̱kā || 1.126.07
a̱gniṁ hotā̍raṁ manye̱ dāsva̍nta̱ṁ vasu̍ṁ sū̱nuṁ saha̍so jā̱tave̍dasa̱ṁ vipra̱ṁ na jā̱tave̍dasam |
ya ū̱rdhvayā̍ svadhva̱ro de̱vo de̱vācyā̍ kṛ̱pā |
ghṛ̱tasya̱ vibhrā̍ṣṭi̱manu̍ vaṣṭi śo̱ciṣā̱juhvā̍nasya sa̱rpiṣa̍ḥ || 1.127.01
yaji̍ṣṭhaṁ tvā̱ yaja̍mānā huvema̱ jyeṣṭha̱maṅgi̍rasāṁ vipra̱ manma̍bhi̱rvipre̍bhiḥ śukra̱ manma̍bhiḥ |
pari̍jmānamiva̱ dyāṁ hotā̍raṁ carṣaṇī̱nām |
śo̱ciṣke̍śa̱ṁ vṛṣa̍ṇa̱ṁ yami̱mā viśa̱ḥ prāva̍ntu jū̱taye̱ viśa̍ḥ || 1.127.02
sa hi pu̱rū ci̱doja̍sā vi̱rukma̍tā̱ dīdyā̍no̱ bhava̍ti druhaṁta̱raḥ pa̍ra̱śurna dru̍haṁta̱raḥ |
vī̱ḻu ci̱dyasya̱ samṛ̍tau̱ śruva̱dvane̍va̱ yatsthi̱ram |
ni̱ḥṣaha̍māṇo yamate̱ nāya̍te dhanvā̱sahā̱ nāya̍te || 1.127.03
dṛ̱ḻhā ci̍dasmā̱ anu̍ du̱ryathā̍ vi̱de teji̍ṣṭhābhira̱raṇi̍bhirdā̱ṣṭyava̍se̱'gnaye̍ dā̱ṣṭyava̍se |
pra yaḥ pu̱rūṇi̱ gāha̍te̱ takṣa̱dvane̍va śo̱ciṣā̍ |
sthi̱rā ci̱dannā̱ ni ri̍ṇā̱tyoja̍sā̱ ni sthi̱rāṇi̍ ci̱doja̍sā || 1.127.04
tama̍sya pṛ̱kṣamupa̍rāsu dhīmahi̱ nakta̱ṁ yaḥ su̱darśa̍taro̱ divā̍tarā̱daprā̍yuṣe̱ divā̍tarāt |
āda̱syāyu̱rgrabha̍ṇavadvī̱ḻu śarma̱ na sū̱nave̍ |
bha̱ktamabha̍kta̱mavo̱ vyanto̍ a̱jarā̍ a̱gnayo̱ vyanto̍ a̱jarā̍ḥ || 1.127.05
sa hi śardho̱ na māru̍taṁ tuvi̱ṣvaṇi̱rapna̍svatīṣū̱rvarā̍svi̱ṣṭani̱rārta̍nāsvi̱ṣṭani̍ḥ |
āda̍ddha̱vyānyā̍da̱dirya̱jñasya̍ ke̱tura̱rhaṇā̍ |
adha̍ smāsya̱ harṣa̍to̱ hṛṣī̍vato̱ viśve̍ juṣanta̱ panthā̱ṁ nara̍ḥ śu̱bhe na panthā̍m || 1.127.06
dvi̱tā yadī̍ṁ kī̱stāso̍ a̱bhidya̍vo nama̱syanta̍ upa̱voca̍nta̱ bhṛga̍vo ma̱thnanto̍ dā̱śā bhṛga̍vaḥ |
a̱gnirī̍śe̱ vasū̍nā̱ṁ śuci̱ryo dha̱rṇire̍ṣām |
pri̱yā a̍pi̱dhīrva̍niṣīṣṭa̱ medhi̍ra̱ ā va̍niṣīṣṭa̱ medhi̍raḥ || 1.127.07
viśvā̍sāṁ tvā vi̱śāṁ pati̍ṁ havāmahe̱ sarvā̍sāṁ samā̱naṁ dampa̍tiṁ bhu̱je sa̱tyagi̍rvāhasaṁ bhu̱je |
ati̍thi̱ṁ mānu̍ṣāṇāṁ pi̱turna yasyā̍sa̱yā |
a̱mī ca̱ viśve̍ a̱mṛtā̍sa̱ ā vayo̍ ha̱vyā de̱veṣvā vaya̍ḥ || 1.127.08
tvama̍gne̱ saha̍sā̱ saha̍ntamaḥ śu̱ṣminta̍mo jāyase de̱vatā̍taye ra̱yirna de̱vatā̍taye |
śu̱ṣminta̍mo̱ hi te̱ mado̍ dyu̱mninta̍ma u̱ta kratu̍ḥ |
adha̍ smā te̱ pari̍ carantyajara śruṣṭī̱vāno̱ nāja̍ra || 1.127.09
pra vo̍ ma̱he saha̍sā̱ saha̍svata uṣa̱rbudhe̍ paśu̱ṣe nāgnaye̱ stomo̍ babhūtva̱gnaye̍ |
prati̱ yadī̍ṁ ha̱viṣmā̱nviśvā̍su̱ kṣāsu̱ jogu̍ve |
agre̍ re̱bho na ja̍rata ṛṣū̱ṇāṁ jūrṇi̱rhota̍ ṛṣū̱ṇām || 1.127.10
sa no̱ nedi̍ṣṭha̱ṁ dadṛ̍śāna̱ ā bha̱rāgne̍ de̱vebhi̱ḥ saca̍nāḥ suce̱tunā̍ ma̱ho rā̱yaḥ su̍ce̱tunā̍ |
mahi̍ śaviṣṭha naskṛdhi sa̱ṁcakṣe̍ bhu̱je a̱syai |
mahi̍ sto̱tṛbhyo̍ maghavansu̱vīrya̱ṁ mathī̍ru̱gro na śava̍sā || 1.127.11
a̱yaṁ jā̍yata̱ manu̍ṣo̱ dharī̍maṇi̱ hotā̱ yaji̍ṣṭha u̱śijā̱manu̍ vra̱tama̱gniḥ svamanu̍ vra̱tam |
vi̱śvaśru̍ṣṭiḥ sakhīya̱te ra̱yiri̍va śravasya̱te |
ada̍bdho̱ hotā̱ ni ṣa̍dadi̱ḻaspa̱de pari̍vīta i̱ḻaspa̱de || 1.128.01
taṁ ya̍jña̱sādha̱mapi̍ vātayāmasyṛ̱tasya̍ pa̱thā nama̍sā ha̱viṣma̍tā de̱vatā̍tā ha̱viṣma̍tā |
sa na̍ ū̱rjāmu̱pābhṛ̍tya̱yā kṛ̱pā na jū̍ryati |
yaṁ mā̍ta̱riśvā̱ mana̍ve parā̱vato̍ de̱vaṁ bhāḥ pa̍rā̱vata̍ḥ || 1.128.02
eve̍na sa̱dyaḥ parye̍ti̱ pārthi̍vaṁ muhu̱rgī reto̍ vṛṣa̱bhaḥ kani̍krada̱ddadha̱dreta̱ḥ kani̍kradat |
śa̱taṁ cakṣā̍ṇo a̱kṣabhi̍rde̱vo vane̍ṣu tu̱rvaṇi̍ḥ |
sado̱ dadhā̍na̱ upa̍reṣu̱ sānu̍ṣva̱gniḥ pare̍ṣu̱ sānu̍ṣu || 1.128.03
sa su̱kratu̍ḥ pu̱rohi̍to̱ dame̍dame̱'gnirya̱jñasyā̍dhva̱rasya̍ cetati̱ kratvā̍ ya̱jñasya̍ cetati |
kratvā̍ ve̱dhā i̍ṣūya̱te viśvā̍ jā̱tāni̍ paspaśe |
yato̍ ghṛta̱śrīrati̍thi̱rajā̍yata̱ vahni̍rve̱dhā ajā̍yata || 1.128.04
kratvā̱ yada̍sya̱ tavi̍ṣīṣu pṛ̱ñcate̱'gnerave̍ṇa ma̱rutā̱ṁ na bho̱jye̍ṣi̱rāya̱ na bho̱jyā̍ |
sa hi ṣmā̱ dāna̱minva̍ti̱ vasū̍nāṁ ca ma̱jmanā̍ |
sa na̍strāsate duri̱tāda̍bhi̱hruta̱ḥ śaṁsā̍da̱ghāda̍bhi̱hruta̍ḥ || 1.128.05
viśvo̱ vihā̍yā ara̱tirvasu̍rdadhe̱ haste̱ dakṣi̍ṇe ta̱raṇi̱rna śi̍śrathacchrava̱syayā̱ na śi̍śrathat |
viśva̍smā̱ idi̍ṣudhya̱te de̍va̱trā ha̱vyamohi̍ṣe |
viśva̍smā̱ itsu̱kṛte̱ vāra̍mṛṇvatya̱gnirdvārā̱ vyṛ̍ṇvati || 1.128.06
sa mānu̍ṣe vṛ̱jane̱ śaṁta̍mo hi̱to̱3̱̍'gnirya̱jñeṣu̱ jenyo̱ na vi̱śpati̍ḥ pri̱yo ya̱jñeṣu̍ vi̱śpati̍ḥ |
sa ha̱vyā mānu̍ṣāṇāmi̱ḻā kṛ̱tāni̍ patyate |
sa na̍strāsate̱ varu̍ṇasya dhū̱rterma̱ho de̱vasya̍ dhū̱rteḥ || 1.128.07
a̱gniṁ hotā̍ramīḻate̱ vasu̍dhitiṁ pri̱yaṁ ceti̍ṣṭhamara̱tiṁ nye̍rire havya̱vāha̱ṁ nye̍rire |
vi̱śvāyu̍ṁ vi̱śvave̍dasa̱ṁ hotā̍raṁ yaja̱taṁ ka̱vim |
de̱vāso̍ ra̱ṇvamava̍se vasū̱yavo̍ gī̱rbhī ra̱ṇvaṁ va̍sū̱yava̍ḥ || 1.128.08
yaṁ tvaṁ ratha̍mindra me̱dhasā̍taye'pā̱kā santa̍miṣira pra̱ṇaya̍si̱ prāna̍vadya̱ naya̍si |
sa̱dyaści̱ttama̱bhiṣṭa̍ye̱ karo̱ vaśa̍śca vā̱jina̍m |
sāsmāka̍manavadya tūtujāna ve̱dhasā̍mi̱māṁ vāca̱ṁ na ve̱dhasā̍m || 1.129.01
sa śru̍dhi̱ yaḥ smā̱ pṛta̍nāsu̱ kāsu̍ cidda̱kṣāyya̍ indra̱ bhara̍hūtaye̱ nṛbhi̱rasi̱ pratū̍rtaye̱ nṛbhi̍ḥ |
yaḥ śūrai̱ḥ sva1̱̍ḥ sani̍tā̱ yo viprai̱rvāja̱ṁ taru̍tā |
tamī̍śā̱nāsa̍ iradhanta vā̱jina̍ṁ pṛ̱kṣamatya̱ṁ na vā̱jina̍m || 1.129.02
da̱smo hi ṣmā̱ vṛṣa̍ṇa̱ṁ pinva̍si̱ tvaca̱ṁ kaṁ ci̍dyāvīra̱raru̍ṁ śūra̱ martya̍ṁ parivṛ̱ṇakṣi̱ martya̍m |
indro̱ta tubhya̱ṁ taddi̱ve tadru̱drāya̱ svaya̍śase |
mi̱trāya̍ voca̱ṁ varu̍ṇāya sa̱pratha̍ḥ sumṛḻī̱kāya̍ sa̱pratha̍ḥ || 1.129.03
a̱smāka̍ṁ va̱ indra̍muśmasī̱ṣṭaye̱ sakhā̍yaṁ vi̱śvāyu̍ṁ prā̱saha̱ṁ yuja̱ṁ vāje̍ṣu prā̱saha̱ṁ yuja̍m |
a̱smāka̱ṁ brahmo̱taye'vā̍ pṛ̱tsuṣu̱ kāsu̍ cit |
na̱hi tvā̱ śatru̱ḥ stara̍te stṛ̱ṇoṣi̱ yaṁ viśva̱ṁ śatru̍ṁ stṛ̱ṇoṣi̱ yam || 1.129.04
ni ṣū na̱māti̍mati̱ṁ kaya̍sya ci̱tteji̍ṣṭhābhira̱raṇi̍bhi̱rnotibhi̍ru̱grābhi̍rugro̱tibhi̍ḥ |
neṣi̍ ṇo̱ yathā̍ pu̱rāne̱nāḥ śū̍ra̱ manya̍se |
viśvā̍ni pū̱rorapa̍ parṣi̱ vahni̍rā̱sā vahni̍rno̱ accha̍ || 1.129.05
pra tadvo̍ceya̱ṁ bhavyā̱yenda̍ve̱ havyo̱ na ya i̱ṣavā̱nmanma̱ reja̍ti rakṣo̱hā manma̱ reja̍ti |
sva̱yaṁ so a̱smadā ni̱do va̱dhaira̍jeta durma̱tim |
ava̍ sraveda̱ghaśa̍ṁso'vata̱ramava̍ kṣu̱drami̍va sravet || 1.129.06
va̱nema̱ taddhotra̍yā ci̱tantyā̍ va̱nema̍ ra̱yiṁ ra̍yivaḥ su̱vīrya̍ṁ ra̱ṇvaṁ santa̍ṁ su̱vīrya̍m |
du̱rmanmā̍naṁ su̱mantu̍bhi̱remi̱ṣā pṛ̍cīmahi |
ā sa̱tyābhi̱rindra̍ṁ dyu̱mnahū̍tibhi̱ryaja̍traṁ dyu̱mnahū̍tibhiḥ || 1.129.07
praprā̍ vo a̱sme svaya̍śobhirū̱tī pa̍riva̱rga indro̍ durmatī̱nāṁ darī̍mandurmatī̱nām |
sva̱yaṁ sā ri̍ṣa̱yadhyai̱ yā na̍ upe̱ṣe a̱traiḥ |
ha̱tema̍sa̱nna va̍kṣati kṣi̱ptā jū̱rṇirna va̍kṣati || 1.129.08
tvaṁ na̍ indra rā̱yā parī̍ṇasā yā̱hi pa̱thā a̍ne̱hasā̍ pu̱ro yā̍hyara̱kṣasā̍ |
saca̍sva naḥ parā̱ka ā saca̍svāstamī̱ka ā |
pā̱hi no̍ dū̱rādā̱rāda̱bhiṣṭi̍bhi̱ḥ sadā̍ pāhya̱bhiṣṭi̍bhiḥ || 1.129.09
tvaṁ na̍ indra rā̱yā tarū̍ṣaso̱graṁ ci̍ttvā mahi̱mā sa̍kṣa̱dava̍se ma̱he mi̱traṁ nāva̍se |
oji̍ṣṭha̱ trāta̱ravi̍tā̱ ratha̱ṁ kaṁ ci̍damartya |
a̱nyama̱smadri̍riṣe̱ḥ kaṁ ci̍dadrivo̱ riri̍kṣantaṁ cidadrivaḥ || 1.129.10
pā̱hi na̍ indra suṣṭuta sri̱dho̍'vayā̱tā sada̱middu̍rmatī̱nāṁ de̱vaḥ sandu̍rmatī̱nām |
ha̱ntā pā̱pasya̍ ra̱kṣasa̍strā̱tā vipra̍sya̱ māva̍taḥ |
adhā̱ hi tvā̍ jani̱tā jīja̍nadvaso rakṣo̱haṇa̍ṁ tvā̱ jīja̍nadvaso || 1.129.11
endra̍ yā̱hyupa̍ naḥ parā̱vato̱ nāyamacchā̍ vi̱dathā̍nīva̱ satpa̍ti̱rasta̱ṁ rāje̍va̱ satpa̍tiḥ |
havā̍mahe tvā va̱yaṁ praya̍svantaḥ su̱te sacā̍ |
pu̱trāso̱ na pi̱tara̱ṁ vāja̍sātaye̱ maṁhi̍ṣṭha̱ṁ vāja̍sātaye || 1.130.01
pibā̱ soma̍mindra suvā̱namadri̍bhi̱ḥ kośe̍na si̱ktama̍va̱taṁ na vaṁsa̍gastātṛṣā̱ṇo na vaṁsa̍gaḥ |
madā̍ya harya̱tāya̍ te tu̱viṣṭa̍māya̱ dhāya̍se |
ā tvā̍ yacchantu ha̱rito̱ na sūrya̱mahā̱ viśve̍va̱ sūrya̍m || 1.130.02
avi̍ndaddi̱vo nihi̍ta̱ṁ guhā̍ ni̱dhiṁ verna garbha̱ṁ pari̍vīta̱maśma̍nyana̱nte a̱ntaraśma̍ni |
vra̱jaṁ va̱jrī gavā̍miva̱ siṣā̍sa̱nnaṅgi̍rastamaḥ |
apā̍vṛṇo̱diṣa̱ indra̱ḥ parī̍vṛtā̱ dvāra̱ iṣa̱ḥ parī̍vṛtāḥ || 1.130.03
dā̱dṛ̱hā̱ṇo vajra̱mindro̱ gabha̍styo̱ḥ kṣadme̍va ti̱gmamasa̍nāya̱ saṁ śya̍dahi̱hatyā̍ya̱ saṁ śya̍t |
sa̱ṁvi̱vyā̱na oja̍sā̱ śavo̍bhirindra ma̱jmanā̍ |
taṣṭe̍va vṛ̱kṣaṁ va̱nino̱ ni vṛ̍ścasi para̱śveva̱ ni vṛ̍ścasi || 1.130.04
tvaṁ vṛthā̍ na̱dya̍ indra̱ sarta̱ve'cchā̍ samu̱drama̍sṛjo̱ rathā̍ iva vājaya̱to rathā̍ iva |
i̱ta ū̱tīra̍yuñjata samā̱namartha̱makṣi̍tam |
dhe̱nūri̍va̱ mana̍ve vi̱śvado̍haso̱ janā̍ya vi̱śvado̍hasaḥ || 1.130.05
i̱māṁ te̱ vāca̍ṁ vasū̱yanta̍ ā̱yavo̱ ratha̱ṁ na dhīra̱ḥ svapā̍ atakṣiṣuḥ su̱mnāya̱ tvāma̍takṣiṣuḥ |
śu̱mbhanto̱ jenya̍ṁ yathā̱ vāje̍ṣu vipra vā̱jina̍m |
atya̍miva̱ śava̍se sā̱taye̱ dhanā̱ viśvā̱ dhanā̍ni sā̱taye̍ || 1.130.06
bhi̱natpuro̍ nava̱timi̍ndra pū̱rave̱ divo̍dāsāya̱ mahi̍ dā̱śuṣe̍ nṛto̱ vajre̍ṇa dā̱śuṣe̍ nṛto |
a̱ti̱thi̱gvāya̱ śamba̍raṁ gi̱reru̱gro avā̍bharat |
ma̱ho dhanā̍ni̱ daya̍māna̱ oja̍sā̱ viśvā̱ dhanā̱nyoja̍sā || 1.130.07
indra̍ḥ sa̱matsu̱ yaja̍māna̱mārya̱ṁ prāva̱dviśve̍ṣu śa̱tamū̍tirā̱jiṣu̱ sva̍rmīḻheṣvā̱jiṣu̍ |
mana̍ve̱ śāsa̍davra̱tāntvaca̍ṁ kṛ̱ṣṇāma̍randhayat |
dakṣa̱nna viśva̍ṁ tatṛṣā̱ṇamo̍ṣati̱ nya̍rśasā̱namo̍ṣati || 1.130.08
sūra̍śca̱kraṁ pra vṛ̍hajjā̱ta oja̍sā prapi̱tve vāca̍maru̱ṇo mu̍ṣāyatīśā̱na ā mu̍ṣāyati |
u̱śanā̱ yatpa̍rā̱vato'ja̍gannū̱taye̍ kave |
su̱mnāni̱ viśvā̱ manu̍ṣeva tu̱rvaṇi̱rahā̱ viśve̍va tu̱rvaṇi̍ḥ || 1.130.09
sa no̱ navye̍bhirvṛṣakarmannu̱kthaiḥ purā̍ṁ dartaḥ pā̱yubhi̍ḥ pāhi śa̱gmaiḥ |
di̱vo̱dā̱sebhi̍rindra̱ stavā̍no vāvṛdhī̱thā aho̍bhiriva̱ dyauḥ || 1.130.10
indrā̍ya̱ hi dyaurasu̍ro̱ ana̍mna̱tendrā̍ya ma̱hī pṛ̍thi̱vī varī̍mabhirdyu̱mnasā̍tā̱ varī̍mabhiḥ |
indra̱ṁ viśve̍ sa̱joṣa̍so de̱vāso̍ dadhire pu̱raḥ |
indrā̍ya̱ viśvā̱ sava̍nāni̱ mānu̍ṣā rā̱tāni̍ santu̱ mānu̍ṣā || 1.131.01
viśve̍ṣu̱ hi tvā̱ sava̍neṣu tu̱ñjate̍ samā̱nameka̱ṁ vṛṣa̍maṇyava̱ḥ pṛtha̱ksva̍ḥ sani̱ṣyava̱ḥ pṛtha̍k |
taṁ tvā̱ nāva̱ṁ na pa̱rṣaṇi̍ṁ śū̱ṣasya̍ dhu̱ri dhī̍mahi |
indra̱ṁ na ya̱jñaiści̱taya̍nta ā̱yava̱ḥ stome̍bhi̱rindra̍mā̱yava̍ḥ || 1.131.02
vi tvā̍ tatasre mithu̱nā a̍va̱syavo̍ vra̱jasya̍ sā̱tā gavya̍sya ni̱ḥsṛja̱ḥ sakṣa̍nta indra ni̱ḥsṛja̍ḥ |
yadga̱vyantā̱ dvā janā̱ sva1̱̍ryantā̍ sa̱mūha̍si |
ā̱viṣkari̍kra̱dvṛṣa̍ṇaṁ sacā̱bhuva̱ṁ vajra̍mindra sacā̱bhuva̍m || 1.131.03
vi̱duṣṭe̍ a̱sya vī̱rya̍sya pū̱rava̱ḥ puro̱ yadi̍ndra̱ śāra̍dīra̱vāti̍raḥ sāsahā̱no a̱vāti̍raḥ |
śāsa̱stami̍ndra̱ martya̱maya̍jyuṁ śavasaspate |
ma̱hīma̍muṣṇāḥ pṛthi̱vīmi̱mā a̱po ma̍ndasā̱na i̱mā a̱paḥ || 1.131.04
āditte̍ a̱sya vī̱rya̍sya carkira̱nmade̍ṣu vṛṣannu̱śijo̱ yadāvi̍tha sakhīya̱to yadāvi̍tha |
ca̱kartha̍ kā̱rame̍bhya̱ḥ pṛta̍nāsu̱ prava̍ntave |
te a̱nyāma̍nyāṁ na̱dya̍ṁ saniṣṇata śrava̱syanta̍ḥ saniṣṇata || 1.131.05
u̱to no̍ a̱syā u̱ṣaso̍ ju̱ṣeta̱ hya1̱̍rkasya̍ bodhi ha̱viṣo̱ havī̍mabhi̱ḥ sva̍rṣātā̱ havī̍mabhiḥ |
yadi̍ndra̱ hanta̍ve̱ mṛdho̱ vṛṣā̍ vajri̱ñcike̍tasi |
ā me̍ a̱sya ve̱dhaso̱ navī̍yaso̱ manma̍ śrudhi̱ navī̍yasaḥ || 1.131.06
tvaṁ tami̍ndra vāvṛdhā̱no a̍sma̱yura̍mitra̱yanta̍ṁ tuvijāta̱ martya̱ṁ vajre̍ṇa śūra̱ martya̍m |
ja̱hi yo no̍ aghā̱yati̍ śṛṇu̱ṣva su̱śrava̍stamaḥ |
ri̱ṣṭaṁ na yāma̱nnapa̍ bhūtu durma̱tirviśvāpa̍ bhūtu durma̱tiḥ || 1.131.07
tvayā̍ va̱yaṁ ma̍ghava̱npūrvye̱ dhana̱ indra̍tvotāḥ sāsahyāma pṛtanya̱to va̍nu̱yāma̍ vanuṣya̱taḥ |
nedi̍ṣṭhe a̱sminnaha̱nyadhi̍ vocā̱ nu su̍nva̱te |
a̱sminya̱jñe vi ca̍yemā̱ bhare̍ kṛ̱taṁ vā̍ja̱yanto̱ bhare̍ kṛ̱tam || 1.132.01
sva̱rje̱ṣe bhara̍ ā̱prasya̱ vakma̍nyuṣa̱rbudha̱ḥ svasmi̱nnañja̍si krā̱ṇasya̱ svasmi̱nnañja̍si |
aha̱nnindro̱ yathā̍ vi̱de śī̱rṣṇāśī̍rṣṇopa̱vācya̍ḥ |
a̱sma̱trā te̍ sa̱dhrya̍ksantu rā̱tayo̍ bha̱drā bha̱drasya̍ rā̱taya̍ḥ || 1.132.02
tattu praya̍ḥ pra̱tnathā̍ te śuśukva̱naṁ yasmi̍nya̱jñe vāra̱makṛ̍ṇvata̱ kṣaya̍mṛ̱tasya̱ vāra̍si̱ kṣaya̍m |
vi tadvo̍ce̱radha̍ dvi̱tāntaḥ pa̍śyanti ra̱śmibhi̍ḥ |
sa ghā̍ vide̱ anvindro̍ ga̱veṣa̍ṇo bandhu̱kṣidbhyo̍ ga̱veṣa̍ṇaḥ || 1.132.03
nū i̱tthā te̍ pū̱rvathā̍ ca pra̱vācya̱ṁ yadaṅgi̍ro̱bhyo'vṛ̍ṇo̱rapa̍ vra̱jamindra̱ śikṣa̱nnapa̍ vra̱jam |
aibhya̍ḥ samā̱nyā di̱śāsmabhya̍ṁ jeṣi̱ yotsi̍ ca |
su̱nvadbhyo̍ randhayā̱ kaṁ ci̍davra̱taṁ hṛ̍ṇā̱yanta̍ṁ cidavra̱tam || 1.132.04
saṁ yajjanā̱nkratu̍bhi̱ḥ śūra̍ ī̱kṣaya̱ddhane̍ hi̱te ta̍ruṣanta śrava̱syava̱ḥ pra ya̍kṣanta śrava̱syava̍ḥ |
tasmā̱ āyu̍ḥ pra̱jāva̱didbādhe̍ arca̱ntyoja̍sā |
indra̍ o̱kya̍ṁ didhiṣanta dhī̱tayo̍ de̱vā acchā̱ na dhī̱taya̍ḥ || 1.132.05
yu̱vaṁ tami̍ndrāparvatā puro̱yudhā̱ yo na̍ḥ pṛta̱nyādapa̱ taṁta̱middha̍ta̱ṁ vajre̍ṇa̱ taṁta̱middha̍tam |
dū̱re ca̱ttāya̍ cchantsa̱dgaha̍na̱ṁ yadina̍kṣat |
a̱smāka̱ṁ śatrū̱npari̍ śūra vi̱śvato̍ da̱rmā da̍rṣīṣṭa vi̱śvata̍ḥ || 1.132.06
u̱bhe pu̍nāmi̱ roda̍sī ṛ̱tena̱ druho̍ dahāmi̱ saṁ ma̱hīra̍ni̱ndrāḥ |
a̱bhi̱vlagya̱ yatra̍ ha̱tā a̱mitrā̍ vailasthā̱naṁ pari̍ tṛ̱ḻhā aśe̍ran || 1.133.01
a̱bhi̱vlagyā̍ cidadrivaḥ śī̱rṣā yā̍tu̱matī̍nām |
chi̱ndhi va̍ṭū̱riṇā̍ pa̱dā ma̱hāva̍ṭūriṇā pa̱dā || 1.133.02
avā̍sāṁ maghavañjahi̱ śardho̍ yātu̱matī̍nām |
vai̱la̱sthā̱na̱ke a̍rma̱ke ma̱hāvai̍lasthe arma̱ke || 1.133.03
yāsā̍ṁ ti̱sraḥ pa̍ñcā̱śato̍'bhivla̱ṅgaira̱pāva̍paḥ |
tatsu te̍ manāyati ta̱katsu te̍ manāyati || 1.133.04
pi̱śaṅga̍bhṛṣṭimambhṛ̱ṇaṁ pi̱śāci̍mindra̱ saṁ mṛ̍ṇa |
sarva̱ṁ rakṣo̱ ni ba̍rhaya || 1.133.05
a̱varma̱ha i̍ndra dādṛ̱hi śru̱dhī na̍ḥ śu̱śoca̱ hi dyauḥ kṣā na bhī̱ṣā a̍drivo ghṛ̱ṇānna bhī̱ṣā a̍drivaḥ |
śu̱ṣminta̍mo̱ hi śu̱ṣmibhi̍rva̱dhairu̱grebhi̱rīya̍se |
apū̍ruṣaghno apratīta śūra̱ satva̍bhistrisa̱ptaiḥ śū̍ra̱ satva̍bhiḥ || 1.133.06
va̱noti̱ hi su̱nvankṣaya̱ṁ parī̍ṇasaḥ sunvā̱no hi ṣmā̱ yaja̱tyava̱ dviṣo̍ de̱vānā̱mava̱ dviṣa̍ḥ |
su̱nvā̱na itsi̍ṣāsati sa̱hasrā̍ vā̱jyavṛ̍taḥ |
su̱nvā̱nāyendro̍ dadātyā̱bhuva̍ṁ ra̱yiṁ da̍dātyā̱bhuva̍m || 1.133.07
ā tvā̱ juvo̍ rārahā̱ṇā a̱bhi prayo̱ vāyo̱ vaha̍ntvi̱ha pū̱rvapī̍taye̱ soma̍sya pū̱rvapī̍taye |
ū̱rdhvā te̱ anu̍ sū̱nṛtā̱ mana̍stiṣṭhatu jāna̱tī |
ni̱yutva̍tā̱ rathe̱nā yā̍hi dā̱vane̱ vāyo̍ ma̱khasya̍ dā̱vane̍ || 1.134.01
manda̍ntu tvā ma̱ndino̍ vāya̱vinda̍vo̱'smatkrā̱ṇāsa̱ḥ sukṛ̍tā a̱bhidya̍vo̱ gobhi̍ḥ krā̱ṇā a̱bhidya̍vaḥ |
yaddha̍ krā̱ṇā i̱radhyai̱ dakṣa̱ṁ saca̍nta ū̱taya̍ḥ |
sa̱dhrī̱cī̱nā ni̱yuto̍ dā̱vane̱ dhiya̱ upa̍ bruvata ī̱ṁ dhiya̍ḥ || 1.134.02
vā̱yuryu̍ṅkte̱ rohi̍tā vā̱yura̍ru̱ṇā vā̱yū rathe̍ aji̱rā dhu̱ri voḻha̍ve̱ vahi̍ṣṭhā dhu̱ri voḻha̍ve |
pra bo̍dhayā̱ pura̍ṁdhiṁ jā̱ra ā sa̍sa̱tīmi̍va |
pra ca̍kṣaya̱ roda̍sī vāsayo̱ṣasa̱ḥ śrava̍se vāsayo̱ṣasa̍ḥ || 1.134.03
tubhya̍mu̱ṣāsa̱ḥ śuca̍yaḥ parā̱vati̍ bha̱drā vastrā̍ tanvate̱ daṁsu̍ ra̱śmiṣu̍ ci̱trā navye̍ṣu ra̱śmiṣu̍ |
tubhya̍ṁ dhe̱nuḥ sa̍ba̱rdughā̱ viśvā̱ vasū̍ni dohate |
aja̍nayo ma̱ruto̍ va̱kṣaṇā̍bhyo di̱va ā va̱kṣaṇā̍bhyaḥ || 1.134.04
tubhya̍ṁ śu̱krāsa̱ḥ śuca̍yastura̱ṇyavo̱ made̍ṣū̱grā i̍ṣaṇanta bhu̱rvaṇya̱pāmi̍ṣanta bhu̱rvaṇi̍ |
tvāṁ tsā̱rī dasa̍māno̱ bhaga̍mīṭṭe takva̱vīye̍ |
tvaṁ viśva̍smā̱dbhuva̍nātpāsi̱ dharma̍ṇāsu̱ryā̍tpāsi̱ dharma̍ṇā || 1.134.05
tvaṁ no̍ vāyaveṣā̱mapū̍rvya̱ḥ somā̍nāṁ pratha̱maḥ pī̱tima̍rhasi su̱tānā̍ṁ pī̱tima̍rhasi |
u̱to vi̱hutma̍tīnāṁ vi̱śāṁ va̍va̱rjuṣī̍ṇām |
viśvā̱ itte̍ dhe̱navo̍ duhra ā̱śira̍ṁ ghṛ̱taṁ du̍hrata ā̱śira̍m || 1.134.06
stī̱rṇaṁ ba̱rhirupa̍ no yāhi vī̱taye̍ sa̱hasre̍ṇa ni̱yutā̍ niyutvate śa̱tinī̍bhirniyutvate |
tubhya̱ṁ hi pū̱rvapī̍taye de̱vā de̱vāya̍ yemi̱re |
pra te̍ su̱tāso̱ madhu̍manto asthira̱nmadā̍ya̱ kratve̍ asthiran || 1.135.01
tubhyā̱yaṁ soma̱ḥ pari̍pūto̱ adri̍bhiḥ spā̱rhā vasā̍na̱ḥ pari̱ kośa̍marṣati śu̱krā vasā̍no arṣati |
tavā̱yaṁ bhā̱ga ā̱yuṣu̱ somo̍ de̱veṣu̍ hūyate |
vaha̍ vāyo ni̱yuto̍ yāhyasma̱yurju̍ṣā̱ṇo yā̍hyasma̱yuḥ || 1.135.02
ā no̍ ni̱yudbhi̍ḥ śa̱tinī̍bhiradhva̱raṁ sa̍ha̱sriṇī̍bhi̱rupa̍ yāhi vī̱taye̱ vāyo̍ ha̱vyāni̍ vī̱taye̍ |
tavā̱yaṁ bhā̱ga ṛ̱tviya̱ḥ sara̍śmi̱ḥ sūrye̱ sacā̍ |
a̱dhva̱ryubhi̱rbhara̍māṇā ayaṁsata̱ vāyo̍ śu̱krā a̍yaṁsata || 1.135.03
ā vā̱ṁ ratho̍ ni̱yutvā̍nvakṣa̱dava̍se̱'bhi prayā̍ṁsi̱ sudhi̍tāni vī̱taye̱ vāyo̍ ha̱vyāni̍ vī̱taye̍ |
piba̍ta̱ṁ madhvo̱ andha̍saḥ pūrva̱peya̱ṁ hi vā̍ṁ hi̱tam |
vāya̱vā ca̱ndreṇa̱ rādha̱sā ga̍ta̱mindra̍śca̱ rādha̱sā ga̍tam || 1.135.04
ā vā̱ṁ dhiyo̍ vavṛtyuradhva̱rā upe̱mamindu̍ṁ marmṛjanta vā̱jina̍mā̱śumatya̱ṁ na vā̱jina̍m |
teṣā̍ṁ pibatamasma̱yū ā no̍ gantami̱hotyā |
indra̍vāyū su̱tānā̱madri̍bhiryu̱vaṁ madā̍ya vājadā yu̱vam || 1.135.05
i̱me vā̱ṁ somā̍ a̱psvā su̱tā i̱hādhva̱ryubhi̱rbhara̍māṇā ayaṁsata̱ vāyo̍ śu̱krā a̍yaṁsata |
e̱te vā̍ma̱bhya̍sṛkṣata ti̱raḥ pa̱vitra̍mā̱śava̍ḥ |
yu̱vā̱yavo'ti̱ romā̍ṇya̱vyayā̱ somā̍so̱ atya̱vyayā̍ || 1.135.06
ati̍ vāyo sasa̱to yā̍hi̱ śaśva̍to̱ yatra̱ grāvā̱ vada̍ti̱ tatra̍ gacchataṁ gṛ̱hamindra̍śca gacchatam |
vi sū̱nṛtā̱ dadṛ̍śe̱ rīya̍te ghṛ̱tamā pū̱rṇayā̍ ni̱yutā̍ yātho adhva̱ramindra̍śca yātho adhva̱ram || 1.135.07
atrāha̱ tadva̍hethe̱ madhva̱ āhu̍ti̱ṁ yama̍śva̱tthamu̍pa̱tiṣṭha̍nta jā̱yavo̱'sme te sa̍ntu jā̱yava̍ḥ |
sā̱kaṁ gāva̱ḥ suva̍te̱ pacya̍te̱ yavo̱ na te̍ vāya̱ upa̍ dasyanti dhe̱navo̱ nāpa̍ dasyanti dhe̱nava̍ḥ || 1.135.08
i̱me ye te̱ su vā̍yo bā̱hvo̍jaso̱'ntarna̱dī te̍ pa̱taya̍ntyu̱kṣaṇo̱ mahi̱ vrādha̍nta u̱kṣaṇa̍ḥ |
dhanva̍ñci̱dye a̍nā̱śavo̍ jī̱rāści̱dagi̍raukasaḥ |
sūrya̍syeva ra̱śmayo̍ durni̱yanta̍vo̱ hasta̍yordurni̱yanta̍vaḥ || 1.135.09
pra su jyeṣṭha̍ṁ nici̱rābhyā̍ṁ bṛ̱hannamo̍ ha̱vyaṁ ma̱tiṁ bha̍ratā mṛḻa̱yadbhyā̱ṁ svādi̍ṣṭhaṁ mṛḻa̱yadbhyā̍m |
tā sa̱mrājā̍ ghṛ̱tāsu̍tī ya̱jñeya̍jña̱ upa̍stutā |
athai̍noḥ kṣa̱traṁ na kuta̍śca̱nādhṛṣe̍ deva̱tvaṁ nū ci̍dā̱dhṛṣe̍ || 1.136.01
ada̍rśi gā̱turu̱rave̱ varī̍yasī̱ panthā̍ ṛ̱tasya̱ sama̍yaṁsta ra̱śmibhi̱ścakṣu̱rbhaga̍sya ra̱śmibhi̍ḥ |
dyu̱kṣaṁ mi̱trasya̱ sāda̍namarya̱mṇo varu̍ṇasya ca |
athā̍ dadhāte bṛ̱hadu̱kthyaṁ1̱̍ vaya̍ upa̱stutya̍ṁ bṛ̱hadvaya̍ḥ || 1.136.02
jyoti̍ṣmatī̱madi̍tiṁ dhāra̱yatkṣi̍ti̱ṁ sva̍rvatī̱mā sa̍cete di̱vedi̍ve jāgṛ̱vāṁsā̍ di̱vedi̍ve |
jyoti̍ṣmatkṣa̱tramā̍śāte ādi̱tyā dānu̍na̱spatī̍ |
mi̱trastayo̱rvaru̍ṇo yāta̱yajja̍no'rya̱mā yā̍ta̱yajja̍naḥ || 1.136.03
a̱yaṁ mi̱trāya̱ varu̍ṇāya̱ śaṁta̍ma̱ḥ somo̍ bhūtvava̱pāne̱ṣvābha̍go de̱vo de̱veṣvābha̍gaḥ |
taṁ de̱vāso̍ juṣerata̱ viśve̍ a̱dya sa̱joṣa̍saḥ |
tathā̍ rājānā karatho̱ yadīma̍ha̱ ṛtā̍vānā̱ yadīma̍he || 1.136.04
yo mi̱trāya̱ varu̍ṇā̱yāvi̍dha̱jjano̍'na̱rvāṇa̱ṁ taṁ pari̍ pāto̱ aṁha̍so dā̱śvāṁsa̱ṁ marta̱maṁha̍saḥ |
tama̍rya̱mābhi ra̍kṣatyṛjū̱yanta̱manu̍ vra̱tam |
u̱kthairya e̍noḥ pari̱bhūṣa̍ti vra̱taṁ stomai̍rā̱bhūṣa̍ti vra̱tam || 1.136.05
namo̍ di̱ve bṛ̍ha̱te roda̍sībhyāṁ mi̱trāya̍ voca̱ṁ varu̍ṇāya mī̱ḻhuṣe̍ sumṛḻī̱kāya̍ mī̱ḻhuṣe̍ |
indra̍ma̱gnimupa̍ stuhi dyu̱kṣama̍rya̱maṇa̱ṁ bhaga̍m |
jyogjīva̍ntaḥ pra̱jayā̍ sacemahi̱ soma̍syo̱tī sa̍cemahi || 1.136.06
ū̱tī de̱vānā̍ṁ va̱yamindra̍vanto maṁsī̱mahi̱ svaya̍śaso ma̱rudbhi̍ḥ |
a̱gnirmi̱tro varu̍ṇa̱ḥ śarma̍ yaṁsa̱ntada̍śyāma ma̱ghavā̍no va̱yaṁ ca̍ || 1.136.07
su̱ṣu̱mā yā̍ta̱madri̍bhi̱rgośrī̍tā matsa̱rā i̱me somā̍so matsa̱rā i̱me |
ā rā̍jānā divispṛśāsma̱trā ga̍nta̱mupa̍ naḥ |
i̱me vā̍ṁ mitrāvaruṇā̱ gavā̍śira̱ḥ somā̍ḥ śu̱krā gavā̍śiraḥ || 1.137.01
i̱ma ā yā̍ta̱minda̍va̱ḥ somā̍so̱ dadhyā̍śiraḥ su̱tāso̱ dadhyā̍śiraḥ |
u̱ta vā̍mu̱ṣaso̍ bu̱dhi sā̱kaṁ sūrya̍sya ra̱śmibhi̍ḥ |
su̱to mi̱trāya̱ varu̍ṇāya pī̱taye̱ cāru̍rṛ̱tāya̍ pī̱taye̍ || 1.137.02
tāṁ vā̍ṁ dhe̱nuṁ na vā̍sa̱rīma̱ṁśuṁ du̍ha̱ntyadri̍bhi̱ḥ soma̍ṁ duha̱ntyadri̍bhiḥ |
a̱sma̱trā ga̍nta̱mupa̍ no̱'rvāñcā̱ soma̍pītaye |
a̱yaṁ vā̍ṁ mitrāvaruṇā̱ nṛbhi̍ḥ su̱taḥ soma̱ ā pī̱taye̍ su̱taḥ || 1.137.03
prapra̍ pū̱ṣṇastu̍vijā̱tasya̍ śasyate mahi̱tvama̍sya ta̱vaso̱ na ta̍ndate sto̱trama̍sya̱ na ta̍ndate |
arcā̍mi sumna̱yanna̱hamantyū̍tiṁ mayo̱bhuva̍m |
viśva̍sya̱ yo mana̍ āyuyu̱ve ma̱kho de̱va ā̍yuyu̱ve ma̱khaḥ || 1.138.01
pra hi tvā̍ pūṣannaji̱raṁ na yāma̍ni̱ stome̍bhiḥ kṛ̱ṇva ṛ̱ṇavo̱ yathā̱ mṛdha̱ uṣṭro̱ na pī̍paro̱ mṛdha̍ḥ |
hu̱ve yattvā̍ mayo̱bhuva̍ṁ de̱vaṁ sa̱khyāya̱ martya̍ḥ |
a̱smāka̍māṅgū̱ṣāndyu̱mnina̍skṛdhi̱ vāje̍ṣu dyu̱mnina̍skṛdhi || 1.138.02
yasya̍ te pūṣansa̱khye vi̍pa̱nyava̱ḥ kratvā̍ ci̱tsanto'va̍sā bubhujri̱ra iti̱ kratvā̍ bubhujri̱re |
tāmanu̍ tvā̱ navī̍yasīṁ ni̱yuta̍ṁ rā̱ya ī̍mahe |
ahe̍ḻamāna uruśaṁsa̱ sarī̍ bhava̱ vāje̍vāje̱ sarī̍ bhava || 1.138.03
a̱syā ū̱ ṣu ṇa̱ upa̍ sā̱taye̍ bhu̱vo'he̍ḻamāno rari̱vā a̍jāśva śravasya̱tāma̍jāśva |
o ṣu tvā̍ vavṛtīmahi̱ stome̍bhirdasma sā̱dhubhi̍ḥ |
na̱hi tvā̍ pūṣannati̱manya̍ āghṛṇe̱ na te̍ sa̱khyama̍pahnu̱ve || 1.138.04
astu̱ śrauṣa̍ṭ pu̱ro a̱gniṁ dhi̱yā da̍dha̱ ā nu tacchardho̍ di̱vyaṁ vṛ̍ṇīmaha indravā̱yū vṛ̍ṇīmahe |
yaddha̍ krā̱ṇā vi̱vasva̍ti̱ nābhā̍ sa̱ṁdāyi̱ navya̍sī |
adha̱ pra sū na̱ upa̍ yantu dhī̱tayo̍ de̱vā acchā̱ na dhī̱taya̍ḥ || 1.139.01
yaddha̱ tyanmi̍trāvaruṇāvṛ̱tādadhyā̍da̱dāthe̱ anṛ̍ta̱ṁ svena̍ ma̱nyunā̱ dakṣa̍sya̱ svena̍ ma̱nyunā̍ |
yu̱vori̱tthādhi̱ sadma̱svapa̍śyāma hira̱ṇyaya̍m |
dhī̱bhiśca̱na mana̍sā̱ svebhi̍ra̱kṣabhi̱ḥ soma̍sya̱ svebhi̍ra̱kṣabhi̍ḥ || 1.139.02
yu̱vāṁ stome̍bhirdeva̱yanto̍ aśvināśrā̱vaya̍nta iva̱ śloka̍mā̱yavo̍ yu̱vāṁ ha̱vyābhyā̱3̱̍yava̍ḥ |
yu̱vorviśvā̱ adhi̱ śriya̱ḥ pṛkṣa̍śca viśvavedasā |
pru̱ṣā̱yante̍ vāṁ pa̱vayo̍ hira̱ṇyaye̱ rathe̍ dasrā hira̱ṇyaye̍ || 1.139.03
ace̍ti dasrā̱ vyu1̱̍ nāka̍mṛṇvatho yu̱ñjate̍ vāṁ ratha̱yujo̱ divi̍ṣṭiṣvadhva̱smāno̱ divi̍ṣṭiṣu |
adhi̍ vā̱ṁ sthāma̍ va̱ndhure̱ rathe̍ dasrā hira̱ṇyaye̍ |
pa̱theva̱ yantā̍vanu̱śāsa̍tā̱ rajo'ñja̍sā̱ śāsa̍tā̱ raja̍ḥ || 1.139.04
śacī̍bhirnaḥ śacīvasū̱ divā̱ nakta̍ṁ daśasyatam |
mā vā̍ṁ rā̱tirupa̍ dasa̱tkadā̍ ca̱nāsmadrā̱tiḥ kadā̍ ca̱na || 1.139.05
vṛṣa̍nnindra vṛṣa̱pāṇā̍sa̱ inda̍va i̱me su̱tā adri̍ṣutāsa u̱dbhida̱stubhya̍ṁ su̱tāsa̍ u̱dbhida̍ḥ |
te tvā̍ mandantu dā̱vane̍ ma̱he ci̱trāya̱ rādha̍se |
gī̱rbhirgi̍rvāha̱ḥ stava̍māna̱ ā ga̍hi sumṛḻī̱ko na̱ ā ga̍hi || 1.139.06
o ṣū ṇo̍ agne śṛṇuhi̱ tvamī̍ḻi̱to de̱vebhyo̍ bravasi ya̱jñiye̍bhyo̱ rāja̍bhyo ya̱jñiye̍bhyaḥ |
yaddha̱ tyāmaṅgi̍robhyo dhe̱nuṁ de̍vā̱ ada̍ttana |
vi tāṁ du̍hre arya̱mā ka̱rtarī̱ sacā̍ e̱ṣa tāṁ ve̍da me̱ sacā̍ || 1.139.07
mo ṣu vo̍ a̱smada̱bhi tāni̱ pauṁsyā̱ sanā̍ bhūvandyu̱mnāni̱ mota jā̍riṣura̱smatpu̱rota jā̍riṣuḥ |
yadva̍ści̱traṁ yu̱geyu̍ge̱ navya̱ṁ ghoṣā̱dama̍rtyam |
a̱smāsu̱ tanma̍ruto̱ yacca̍ du̱ṣṭara̍ṁ didhṛ̱tā yacca̍ du̱ṣṭara̍m || 1.139.08
da̱dhyaṅha̍ me ja̱nuṣa̱ṁ pūrvo̱ aṅgi̍rāḥ pri̱yame̍dha̱ḥ kaṇvo̱ atri̱rmanu̍rvidu̱ste me̱ pūrve̱ manu̍rviduḥ |
teṣā̍ṁ de̱veṣvāya̍tira̱smāka̱ṁ teṣu̱ nābha̍yaḥ |
teṣā̍ṁ pa̱dena̱ mahyā na̍me gi̱rendrā̱gnī ā na̍me gi̱rā || 1.139.09
hotā̍ yakṣadva̱nino̍ vanta̱ vārya̱ṁ bṛha̱spati̍ryajati ve̱na u̱kṣabhi̍ḥ puru̱vāre̍bhiru̱kṣabhi̍ḥ |
ja̱gṛ̱bhmā dū̱raā̍diśa̱ṁ śloka̱madre̱radha̱ tmanā̍ |
adhā̍rayadara̱rindā̍ni su̱kratu̍ḥ pu̱rū sadmā̍ni su̱kratu̍ḥ || 1.139.10
ye de̍vāso di̱vyekā̍daśa̱ stha pṛ̍thi̱vyāmadhyekā̍daśa̱ stha |
a̱psu̱kṣito̍ mahi̱naikā̍daśa̱ stha te de̍vāso ya̱jñami̱maṁ ju̍ṣadhvam || 1.139.11
ve̱di̱ṣade̍ pri̱yadhā̍māya su̱dyute̍ dhā̱simi̍va̱ pra bha̍rā̱ yoni̍ma̱gnaye̍ |
vastre̍ṇeva vāsayā̱ manma̍nā̱ śuci̍ṁ jyo̱tīra̍thaṁ śu̱krava̍rṇaṁ tamo̱hana̍m || 1.140.01
a̱bhi dvi̱janmā̍ tri̱vṛdanna̍mṛjyate saṁvatsa̱re vā̍vṛdhe ja̱gdhamī̱ puna̍ḥ |
a̱nyasyā̱sā ji̱hvayā̱ jenyo̱ vṛṣā̱ nya1̱̍nyena̍ va̱nino̍ mṛṣṭa vāra̱ṇaḥ || 1.140.02
kṛ̱ṣṇa̱prutau̍ vevi̱je a̍sya sa̱kṣitā̍ u̱bhā ta̍rete a̱bhi mā̱tarā̱ śiśu̍m |
prā̱cāji̍hvaṁ dhva̱saya̍ntaṁ tṛṣu̱cyuta̱mā sācya̱ṁ kupa̍ya̱ṁ vardha̍naṁ pi̱tuḥ || 1.140.03
mu̱mu̱kṣvo̱3̱̍ mana̍ve mānavasya̱te ra̍ghu̱druva̍ḥ kṛ̱ṣṇasī̍tāsa ū̱ juva̍ḥ |
a̱sa̱ma̱nā a̍ji̱rāso̍ raghu̱ṣyado̱ vāta̍jūtā̱ upa̍ yujyanta ā̱śava̍ḥ || 1.140.04
āda̍sya̱ te dhva̱saya̍nto̱ vṛthe̍rate kṛ̱ṣṇamabhva̱ṁ mahi̱ varpa̱ḥ kari̍krataḥ |
yatsī̍ṁ ma̱hīma̱vani̱ṁ prābhi marmṛ̍śadabhiśva̱sansta̱naya̱nneti̱ nāna̍dat || 1.140.05
bhūṣa̱nna yo'dhi̍ ba̱bhrūṣu̱ namna̍te̱ vṛṣe̍va̱ patnī̍ra̱bhye̍ti̱ roru̍vat |
o̱jā̱yamā̍nasta̱nva̍śca śumbhate bhī̱mo na śṛṅgā̍ davidhāva du̱rgṛbhi̍ḥ || 1.140.06
sa sa̱ṁstiro̍ vi̱ṣṭira̱ḥ saṁ gṛ̍bhāyati jā̱nanne̱va jā̍na̱tīrnitya̱ ā śa̍ye |
puna̍rvardhante̱ api̍ yanti de̱vya̍ma̱nyadvarpa̍ḥ pi̱troḥ kṛ̍ṇvate̱ sacā̍ || 1.140.07
tama̱gruva̍ḥ ke̱śinī̱ḥ saṁ hi re̍bhi̱ra ū̱rdhvāsta̍sthurma̱mruṣī̱ḥ prāyave̱ puna̍ḥ |
tāsā̍ṁ ja̱rāṁ pra̍mu̱ñcanne̍ti̱ nāna̍da̱dasu̱ṁ para̍ṁ ja̱naya̍ñjī̱vamastṛ̍tam || 1.140.08
a̱dhī̱vā̱saṁ pari̍ mā̱tū ri̱hannaha̍ tuvi̱grebhi̱ḥ satva̍bhiryāti̱ vi jraya̍ḥ |
vayo̱ dadha̍tpa̱dvate̱ reri̍ha̱tsadānu̱ śyenī̍ sacate varta̱nīraha̍ || 1.140.09
a̱smāka̍magne ma̱ghava̍tsu dīdi̱hyadha̱ śvasī̍vānvṛṣa̱bho damū̍nāḥ |
a̱vāsyā̱ śiśu̍matīradīde̱rvarme̍va yu̱tsu pa̍ri̱jarbhu̍rāṇaḥ || 1.140.10
i̱dama̍gne̱ sudhi̍ta̱ṁ durdhi̍tā̱dadhi̍ pri̱yādu̍ ci̱nmanma̍na̱ḥ preyo̍ astu te |
yatte̍ śu̱kraṁ ta̱nvo̱3̱̍ roca̍te̱ śuci̱ tenā̱smabhya̍ṁ vanase̱ ratna̱mā tvam || 1.140.11
rathā̍ya̱ nāva̍mu̱ta no̍ gṛ̱hāya̱ nityā̍ritrāṁ pa̱dvatī̍ṁ rāsyagne |
a̱smāka̍ṁ vī̱rā u̱ta no̍ ma̱ghono̱ janā̍śca̱ yā pā̱rayā̱ccharma̱ yā ca̍ || 1.140.12
a̱bhī no̍ agna u̱kthamijju̍guryā̱ dyāvā̱kṣāmā̱ sindha̍vaśca̱ svagū̍rtāḥ |
gavya̱ṁ yavya̱ṁ yanto̍ dī̱rghāheṣa̱ṁ vara̍maru̱ṇyo̍ varanta || 1.140.13
baḻi̱tthā tadvapu̍ṣe dhāyi darśa̱taṁ de̱vasya̱ bharga̱ḥ saha̍so̱ yato̱ jani̍ |
yadī̱mupa̱ hvara̍te̱ sādha̍te ma̱tirṛ̱tasya̱ dhenā̍ anayanta sa̱sruta̍ḥ || 1.141.01
pṛ̱kṣo vapu̍ḥ pitu̱mānnitya̱ ā śa̍ye dvi̱tīya̱mā sa̱ptaśi̍vāsu mā̱tṛṣu̍ |
tṛ̱tīya̍masya vṛṣa̱bhasya̍ do̱hase̱ daśa̍pramatiṁ janayanta̱ yoṣa̍ṇaḥ || 1.141.02
niryadī̍ṁ bu̱dhnānma̍hi̱ṣasya̱ varpa̍sa īśā̱nāsa̱ḥ śava̍sā̱ kranta̍ sū̱raya̍ḥ |
yadī̱manu̍ pra̱divo̱ madhva̍ ādha̱ve guhā̱ santa̍ṁ māta̱riśvā̍ mathā̱yati̍ || 1.141.03
pra yatpi̱tuḥ pa̍ra̱mānnī̱yate̱ paryā pṛ̱kṣudho̍ vī̱rudho̱ daṁsu̍ rohati |
u̱bhā yada̍sya ja̱nuṣa̱ṁ yadinva̍ta̱ ādidyavi̍ṣṭho abhavadghṛ̱ṇā śuci̍ḥ || 1.141.04
ādinmā̱tṝrāvi̍śa̱dyāsvā śuci̱rahi̍ṁsyamāna urvi̱yā vi vā̍vṛdhe |
anu̱ yatpūrvā̱ aru̍hatsanā̱juvo̱ ni navya̍sī̱ṣvava̍rāsu dhāvate || 1.141.05
ādiddhotā̍raṁ vṛṇate̱ divi̍ṣṭiṣu̱ bhaga̍miva papṛcā̱nāsa̍ ṛñjate |
de̱vānyatkratvā̍ ma̱jmanā̍ puruṣṭu̱to marta̱ṁ śaṁsa̍ṁ vi̱śvadhā̱ veti̱ dhāya̍se || 1.141.06
vi yadasthā̍dyaja̱to vāta̍codito hvā̱ro na vakvā̍ ja̱raṇā̱ anā̍kṛtaḥ |
tasya̱ patma̍nda̱kṣuṣa̍ḥ kṛ̱ṣṇaja̍ṁhasa̱ḥ śuci̍janmano̱ raja̱ ā vya̍dhvanaḥ || 1.141.07
ratho̱ na yā̱taḥ śikva̍bhiḥ kṛ̱to dyāmaṅge̍bhiraru̱ṣebhi̍rīyate |
āda̍sya̱ te kṛ̱ṣṇāso̍ dakṣi sū̱raya̱ḥ śūra̍syeva tve̱ṣathā̍dīṣate̱ vaya̍ḥ || 1.141.08
tvayā̱ hya̍gne̱ varu̍ṇo dhṛ̱tavra̍to mi̱traḥ śā̍śa̱dre a̍rya̱mā su̱dāna̍vaḥ |
yatsī̱manu̱ kratu̍nā vi̱śvathā̍ vi̱bhura̱rānna ne̱miḥ pa̍ri̱bhūrajā̍yathāḥ || 1.141.09
tvama̍gne śaśamā̱nāya̍ sunva̱te ratna̍ṁ yaviṣṭha de̱vatā̍timinvasi |
taṁ tvā̱ nu navya̍ṁ sahaso yuvanva̱yaṁ bhaga̱ṁ na kā̱re ma̍hiratna dhīmahi || 1.141.10
a̱sme ra̱yiṁ na svartha̱ṁ damū̍nasa̱ṁ bhaga̱ṁ dakṣa̱ṁ na pa̍pṛcāsi dharṇa̱sim |
ra̱śmīri̍va̱ yo yama̍ti̱ janma̍nī u̱bhe de̱vānā̱ṁ śaṁsa̍mṛ̱ta ā ca̍ su̱kratu̍ḥ || 1.141.11
u̱ta na̍ḥ su̱dyotmā̍ jī̱rāśvo̱ hotā̍ ma̱ndraḥ śṛ̍ṇavacca̱ndrara̍thaḥ |
sa no̍ neṣa̱nneṣa̍tamai̱ramū̍ro̱'gnirvā̱maṁ su̍vi̱taṁ vasyo̱ accha̍ || 1.141.12
astā̍vya̱gniḥ śimī̍vadbhira̱rkaiḥ sāmrā̍jyāya prata̱raṁ dadhā̍naḥ |
a̱mī ca̱ ye ma̱ghavā̍no va̱yaṁ ca̱ miha̱ṁ na sūro̱ ati̱ niṣṭa̍tanyuḥ || 1.141.13
sami̍ddho agna̱ ā va̍ha de̱vā a̱dya ya̱tasru̍ce |
tantu̍ṁ tanuṣva pū̱rvyaṁ su̱taso̍māya dā̱śuṣe̍ || 1.142.01
ghṛ̱tava̍nta̱mupa̍ māsi̱ madhu̍mantaṁ tanūnapāt |
ya̱jñaṁ vipra̍sya̱ māva̍taḥ śaśamā̱nasya̍ dā̱śuṣa̍ḥ || 1.142.02
śuci̍ḥ pāva̱ko adbhu̍to̱ madhvā̍ ya̱jñaṁ mi̍mikṣati |
narā̱śaṁsa̱strirā di̱vo de̱vo de̱veṣu̍ ya̱jñiya̍ḥ || 1.142.03
ī̱ḻi̱to a̍gna̱ ā va̱hendra̍ṁ ci̱trami̱ha pri̱yam |
i̱yaṁ hi tvā̍ ma̱tirmamācchā̍ sujihva va̱cyate̍ || 1.142.04
stṛ̱ṇā̱nāso̍ ya̱tasru̍co ba̱rhirya̱jñe sva̍dhva̱re |
vṛ̱ñje de̱vavya̍castama̱mindrā̍ya̱ śarma̍ sa̱pratha̍ḥ || 1.142.05
vi śra̍yantāmṛtā̱vṛdha̍ḥ pra̱yai de̱vebhyo̍ ma̱hīḥ |
pā̱va̱kāsa̍ḥ puru̱spṛho̱ dvāro̍ de̱vīra̍sa̱ścata̍ḥ || 1.142.06
ā bhanda̍māne̱ upā̍ke̱ nakto̱ṣāsā̍ su̱peśa̍sā |
ya̱hvī ṛ̱tasya̍ mā̱tarā̱ sīda̍tāṁ ba̱rhirā su̱mat || 1.142.07
ma̱ndraji̍hvā jugu̱rvaṇī̱ hotā̍rā̱ daivyā̍ ka̱vī |
ya̱jñaṁ no̍ yakṣatāmi̱maṁ si̱dhrama̱dya di̍vi̱spṛśa̍m || 1.142.08
śuci̍rde̱veṣvarpi̍tā̱ hotrā̍ ma̱rutsu̱ bhāra̍tī |
iḻā̱ sara̍svatī ma̱hī ba̱rhiḥ sī̍dantu ya̱jñiyā̍ḥ || 1.142.09
tanna̍stu̱rīpa̱madbhu̍taṁ pu̱ru vāra̍ṁ pu̱ru tmanā̍ |
tvaṣṭā̱ poṣā̍ya̱ vi ṣya̍tu rā̱ye nābhā̍ no asma̱yuḥ || 1.142.10
a̱va̱sṛ̱jannupa̱ tmanā̍ de̱vānya̍kṣi vanaspate |
a̱gnirha̱vyā su̍ṣūdati de̱vo de̱veṣu̱ medhi̍raḥ || 1.142.11
pū̱ṣa̱ṇvate̍ ma̱rutva̍te vi̱śvade̍vāya vā̱yave̍ |
svāhā̍ gāya̱trave̍pase ha̱vyamindrā̍ya kartana || 1.142.12
svāhā̍kṛtā̱nyā ga̱hyupa̍ ha̱vyāni̍ vī̱taye̍ |
indrā ga̍hi śru̱dhī hava̱ṁ tvāṁ ha̍vante adhva̱re || 1.142.13
pra tavya̍sī̱ṁ navya̍sīṁ dhī̱tima̱gnaye̍ vā̱co ma̱tiṁ saha̍saḥ sū̱nave̍ bhare |
a̱pāṁ napā̱dyo vasu̍bhiḥ sa̱ha pri̱yo hotā̍ pṛthi̱vyāṁ nyasī̍dadṛ̱tviya̍ḥ || 1.143.01
sa jāya̍mānaḥ para̱me vyo̍manyā̱vira̱gnira̍bhavanmāta̱riśva̍ne |
a̱sya kratvā̍ samidhā̱nasya̍ ma̱jmanā̱ pra dyāvā̍ śo̱ciḥ pṛ̍thi̱vī a̍rocayat || 1.143.02
a̱sya tve̱ṣā a̱jarā̍ a̱sya bhā̱nava̍ḥ susa̱ṁdṛśa̍ḥ su̱pratī̍kasya su̱dyuta̍ḥ |
bhātva̍kṣaso̱ atya̱kturna sindha̍vo̱'gne re̍jante̱ asa̍santo a̱jarā̍ḥ || 1.143.03
yame̍ri̱re bhṛga̍vo vi̱śvave̍dasa̱ṁ nābhā̍ pṛthi̱vyā bhuva̍nasya ma̱jmanā̍ |
a̱gniṁ taṁ gī̱rbhirhi̍nuhi̱ sva ā dame̱ ya eko̱ vasvo̱ varu̍ṇo̱ na rāja̍ti || 1.143.04
na yo varā̍ya ma̱rutā̍miva sva̱naḥ sene̍va sṛ̱ṣṭā di̱vyā yathā̱śani̍ḥ |
a̱gnirjambhai̍stigi̱taira̍tti̱ bharva̍ti yo̱dho na śatrū̱nsa vanā̱ nyṛ̍ñjate || 1.143.05
ku̱vinno̍ a̱gniru̱catha̍sya̱ vīrasa̱dvasu̍ṣku̱vidvasu̍bhi̱ḥ kāma̍mā̱vara̍t |
co̱daḥ ku̱vittu̍tu̱jyātsā̱taye̱ dhiya̱ḥ śuci̍pratīka̱ṁ tama̱yā dhi̱yā gṛ̍ṇe || 1.143.06
ghṛ̱tapra̍tīkaṁ va ṛ̱tasya̍ dhū̱rṣada̍ma̱gniṁ mi̱traṁ na sa̍midhā̱na ṛ̍ñjate |
indhā̍no a̱kro vi̱dathe̍ṣu̱ dīdya̍cchu̱krava̍rṇā̱mudu̍ no yaṁsate̱ dhiya̍m || 1.143.07
apra̍yuccha̱nnapra̍yucchadbhiragne śi̱vebhi̍rnaḥ pā̱yubhi̍ḥ pāhi śa̱gmaiḥ |
ada̍bdhebhi̱radṛ̍pitebhiri̱ṣṭe'ni̍miṣadbhi̱ḥ pari̍ pāhi no̱ jāḥ || 1.143.08
eti̱ pra hotā̍ vra̱tama̍sya mā̱yayo̱rdhvāṁ dadhā̍na̱ḥ śuci̍peśasa̱ṁ dhiya̍m |
a̱bhi sruca̍ḥ kramate dakṣiṇā̱vṛto̱ yā a̍sya̱ dhāma̍ pratha̱maṁ ha̱ niṁsa̍te || 1.144.01
a̱bhīmṛ̱tasya̍ do̱hanā̍ anūṣata̱ yonau̍ de̱vasya̱ sada̍ne̱ parī̍vṛtāḥ |
a̱pāmu̱pasthe̱ vibhṛ̍to̱ yadāva̍sa̱dadha̍ sva̱dhā a̍dhaya̱dyābhi̱rīya̍te || 1.144.02
yuyū̍ṣata̱ḥ sava̍yasā̱ tadidvapu̍ḥ samā̱namartha̍ṁ vi̱tari̍tratā mi̱thaḥ |
ādī̱ṁ bhago̱ na havya̱ḥ sama̱smadā voḻhu̱rna ra̱śmīnsama̍yaṁsta̱ sāra̍thiḥ || 1.144.03
yamī̱ṁ dvā sava̍yasā sapa̱ryata̍ḥ samā̱ne yonā̍ mithu̱nā samo̍kasā |
divā̱ na nakta̍ṁ pali̱to yuvā̍jani pu̱rū cara̍nna̱jaro̱ mānu̍ṣā yu̱gā || 1.144.04
tamī̍ṁ hinvanti dhī̱tayo̱ daśa̱ vriśo̍ de̱vaṁ martā̍sa ū̱taye̍ havāmahe |
dhano̱radhi̍ pra̱vata̱ ā sa ṛ̍ṇvatyabhi̱vraja̍dbhirva̱yunā̱ navā̍dhita || 1.144.05
tvaṁ hya̍gne di̱vyasya̱ rāja̍si̱ tvaṁ pārthi̍vasya paśu̱pā i̍va̱ tmanā̍ |
enī̍ ta e̱te bṛ̍ha̱tī a̍bhi̱śriyā̍ hira̱ṇyayī̱ vakva̍rī ba̱rhirā̍śāte || 1.144.06
agne̍ ju̱ṣasva̱ prati̍ harya̱ tadvaco̱ mandra̱ svadhā̍va̱ ṛta̍jāta̱ sukra̍to |
yo vi̱śvata̍ḥ pra̱tyaṅṅasi̍ darśa̱to ra̱ṇvaḥ saṁdṛ̍ṣṭau pitu̱mā i̍va̱ kṣaya̍ḥ || 1.144.07
taṁ pṛ̍cchatā̱ sa ja̍gāmā̱ sa ve̍da̱ sa ci̍ki̱tvā ī̍yate̱ sā nvī̍yate |
tasmi̍nsanti pra̱śiṣa̱stasmi̍nni̱ṣṭaya̱ḥ sa vāja̍sya̱ śava̍saḥ śu̱ṣmiṇa̱spati̍ḥ || 1.145.01
tamitpṛ̍cchanti̱ na si̱mo vi pṛ̍cchati̱ svene̍va̱ dhīro̱ mana̍sā̱ yadagra̍bhīt |
na mṛ̍ṣyate pratha̱maṁ nāpa̍ra̱ṁ vaco̱'sya kratvā̍ sacate̱ apra̍dṛpitaḥ || 1.145.02
tamidga̍cchanti ju̱hva1̱̍stamarva̍tī̱rviśvā̱nyeka̍ḥ śṛṇava̱dvacā̍ṁsi me |
pu̱ru̱prai̱ṣastatu̍riryajña̱sādha̱no'cchi̍droti̱ḥ śiśu̱rāda̍tta̱ saṁ rabha̍ḥ || 1.145.03
u̱pa̱sthāya̍ṁ carati̱ yatsa̱māra̍ta sa̱dyo jā̱tasta̍tsāra̱ yujye̍bhiḥ |
a̱bhi śvā̱ntaṁ mṛ̍śate nā̱ndye̍ mu̱de yadī̱ṁ gaccha̍ntyuśa̱tīra̍piṣṭhi̱tam || 1.145.04
sa ī̍ṁ mṛ̱go apyo̍ vana̱rgurupa̍ tva̱cyu̍pa̱masyā̱ṁ ni dhā̍yi |
vya̍bravīdva̱yunā̱ martye̍bhyo̱'gnirvi̱dvā ṛ̍ta̱ciddhi sa̱tyaḥ || 1.145.05
tri̱mū̱rdhāna̍ṁ sa̱ptara̍śmiṁ gṛṇī̱ṣe'nū̍nama̱gniṁ pi̱troru̱pasthe̍ |
ni̱ṣa̱ttama̍sya̱ cara̍to dhru̱vasya̱ viśvā̍ di̱vo ro̍ca̱nāpa̍pri̱vāṁsa̍m || 1.146.01
u̱kṣā ma̱hā a̱bhi va̍vakṣa ene a̱jara̍stasthāvi̱taū̍tirṛ̱ṣvaḥ |
u̱rvyāḥ pa̱do ni da̍dhāti̱ sānau̍ ri̱hantyūdho̍ aru̱ṣāso̍ asya || 1.146.02
sa̱mā̱naṁ va̱tsama̱bhi sa̱ṁcara̍ntī̱ viṣva̍gdhe̱nū vi ca̍rataḥ su̱meke̍ |
a̱na̱pa̱vṛ̱jyā adhva̍no̱ mimā̍ne̱ viśvā̱nketā̱ adhi̍ ma̱ho dadhā̍ne || 1.146.03
dhīrā̍saḥ pa̱daṁ ka̱vayo̍ nayanti̱ nānā̍ hṛ̱dā rakṣa̍māṇā aju̱ryam |
siṣā̍santa̱ḥ parya̍paśyanta̱ sindhu̍mā̱vire̍bhyo abhava̱tsūryo̱ nṝn || 1.146.04
di̱dṛ̱kṣeṇya̱ḥ pari̱ kāṣṭhā̍su̱ jenya̍ ī̱ḻenyo̍ ma̱ho arbhā̍ya jī̱vase̍ |
pu̱ru̱trā yadabha̍va̱tsūrahai̍bhyo̱ garbhe̍bhyo ma̱ghavā̍ vi̱śvada̍rśataḥ || 1.146.05
ka̱thā te̍ agne śu̱caya̍nta ā̱yorda̍dā̱śurvāje̍bhirāśuṣā̱ṇāḥ |
u̱bhe yatto̱ke tana̍ye̱ dadhā̍nā ṛ̱tasya̱ sāma̍nra̱ṇaya̍nta de̱vāḥ || 1.147.01
bodhā̍ me a̱sya vaca̍so yaviṣṭha̱ maṁhi̍ṣṭhasya̱ prabhṛ̍tasya svadhāvaḥ |
pīya̍ti tvo̱ anu̍ tvo gṛṇāti va̱ndāru̍ste ta̱nva̍ṁ vande agne || 1.147.02
ye pā̱yavo̍ māmate̱yaṁ te̍ agne̱ paśya̍nto a̱ndhaṁ du̍ri̱tādara̍kṣan |
ra̱rakṣa̱ tānsu̱kṛto̍ vi̱śvave̍dā̱ dipsa̍nta̱ idri̱pavo̱ nāha̍ debhuḥ || 1.147.03
yo no̍ agne̱ ara̍rivā aghā̱yura̍rātī̱vā ma̱rcaya̍ti dva̱yena̍ |
mantro̍ gu̱ruḥ puna̍rastu̱ so a̍smā̱ anu̍ mṛkṣīṣṭa ta̱nva̍ṁ duru̱ktaiḥ || 1.147.04
u̱ta vā̱ yaḥ sa̍hasya pravi̱dvānmarto̱ marta̍ṁ ma̱rcaya̍ti dva̱yena̍ |
ata̍ḥ pāhi stavamāna stu̱vanta̱magne̱ māki̍rno duri̱tāya̍ dhāyīḥ || 1.147.05
mathī̱dyadī̍ṁ vi̱ṣṭo mā̍ta̱riśvā̱ hotā̍raṁ vi̱śvāpsu̍ṁ vi̱śvade̍vyam |
ni yaṁ da̱dhurma̍nu̱ṣyā̍su vi̱kṣu sva1̱̍rṇa ci̱traṁ vapu̍ṣe vi̱bhāva̍m || 1.148.01
da̱dā̱naminna da̍dabhanta̱ manmā̱gnirvarū̍tha̱ṁ mama̱ tasya̍ cākan |
ju̱ṣanta̱ viśvā̍nyasya̱ karmopa̍stuti̱ṁ bhara̍māṇasya kā̱roḥ || 1.148.02
nitye̍ ci̱nnu yaṁ sada̍ne jagṛ̱bhre praśa̍stibhirdadhi̱re ya̱jñiyā̍saḥ |
pra sū na̍yanta gṛ̱bhaya̍nta i̱ṣṭāvaśvā̍so̱ na ra̱thyo̍ rārahā̱ṇāḥ || 1.148.03
pu̱rūṇi̍ da̱smo ni ri̍ṇāti̱ jambhai̱rādro̍cate̱ vana̱ ā vi̱bhāvā̍ |
āda̍sya̱ vāto̱ anu̍ vāti śo̱cirastu̱rna śaryā̍masa̱nāmanu̱ dyūn || 1.148.04
na yaṁ ri̱pavo̱ na ri̍ṣa̱ṇyavo̱ garbhe̱ santa̍ṁ reṣa̱ṇā re̱ṣaya̍nti |
a̱ndhā a̍pa̱śyā na da̍bhannabhi̱khyā nityā̍sa īṁ pre̱tāro̍ arakṣan || 1.148.05
ma̱haḥ sa rā̱ya eṣa̍te̱ pati̱rdanni̱na i̱nasya̱ vasu̍naḥ pa̱da ā |
upa̱ dhraja̍nta̱madra̍yo vi̱dhannit || 1.149.01
sa yo vṛṣā̍ na̱rāṁ na roda̍syo̱ḥ śravo̍bhi̱rasti̍ jī̱vapī̍tasargaḥ |
pra yaḥ sa̍srā̱ṇaḥ śi̍śrī̱ta yonau̍ || 1.149.02
ā yaḥ pura̱ṁ nārmi̍ṇī̱madī̍de̱datya̍ḥ ka̱virna̍bha̱nyo̱3̱̍ nārvā̍ |
sūro̱ na ru̍ru̱kvāñcha̱tātmā̍ || 1.149.03
a̱bhi dvi̱janmā̱ trī ro̍ca̱nāni̱ viśvā̱ rajā̍ṁsi śuśucā̱no a̍sthāt |
hotā̱ yaji̍ṣṭho a̱pāṁ sa̱dhasthe̍ || 1.149.04
a̱yaṁ sa hotā̱ yo dvi̱janmā̱ viśvā̍ da̱dhe vāryā̍ṇi śrava̱syā |
marto̱ yo a̍smai su̱tuko̍ da̱dāśa̍ || 1.149.05
pu̱ru tvā̍ dā̱śvānvo̍ce̱'rira̍gne̱ tava̍ svi̱dā |
to̱dasye̍va śara̱ṇa ā ma̱hasya̍ || 1.150.01
vya̍ni̱nasya̍ dha̱nina̍ḥ praho̱ṣe ci̱dara̍ruṣaḥ |
ka̱dā ca̱na pra̱jiga̍to̱ ade̍vayoḥ || 1.150.02
sa ca̱ndro vi̍pra̱ martyo̍ ma̱ho vrādha̍ntamo di̱vi |
praprette̍ agne va̱nuṣa̍ḥ syāma || 1.150.03
mi̱traṁ na yaṁ śimyā̱ goṣu̍ ga̱vyava̍ḥ svā̱dhyo̍ vi̱dathe̍ a̱psu jīja̍nan |
are̍jetā̱ṁ roda̍sī̱ pāja̍sā gi̱rā prati̍ pri̱yaṁ ya̍ja̱taṁ ja̱nuṣā̱mava̍ḥ || 1.151.01
yaddha̱ tyadvā̍ṁ purumī̱ḻhasya̍ so̱mina̱ḥ pra mi̱trāso̱ na da̍dhi̱re svā̱bhuva̍ḥ |
adha̱ kratu̍ṁ vidataṁ gā̱tumarca̍ta u̱ta śru̍taṁ vṛṣaṇā pa̱styā̍vataḥ || 1.151.02
ā vā̍ṁ bhūṣankṣi̱tayo̱ janma̱ roda̍syoḥ pra̱vācya̍ṁ vṛṣaṇā̱ dakṣa̍se ma̱he |
yadī̍mṛ̱tāya̱ bhara̍tho̱ yadarva̍te̱ pra hotra̍yā̱ śimyā̍ vītho adhva̱ram || 1.151.03
pra sā kṣi̱tira̍sura̱ yā mahi̍ pri̱ya ṛtā̍vānāvṛ̱tamā gho̍ṣatho bṛ̱hat |
yu̱vaṁ di̱vo bṛ̍ha̱to dakṣa̍mā̱bhuva̱ṁ gāṁ na dhu̱ryupa̍ yuñjāthe a̱paḥ || 1.151.04
ma̱hī atra̍ mahi̱nā vāra̍mṛṇvatho're̱ṇava̱stuja̱ ā sadma̍ndhe̱nava̍ḥ |
svara̍nti̱ tā u̍pa̱ratā̍ti̱ sūrya̱mā ni̱mruca̍ u̱ṣasa̍stakva̱vīri̍va || 1.151.05
ā vā̍mṛ̱tāya̍ ke̱śinī̍ranūṣata̱ mitra̱ yatra̱ varu̍ṇa gā̱tumarca̍thaḥ |
ava̱ tmanā̍ sṛ̱jata̱ṁ pinva̍ta̱ṁ dhiyo̍ yu̱vaṁ vipra̍sya̱ manma̍nāmirajyathaḥ || 1.151.06
yo vā̍ṁ ya̱jñaiḥ śa̍śamā̱no ha̱ dāśa̍ti ka̱virhotā̱ yaja̍ti manma̱sādha̍naḥ |
upāha̱ taṁ gaccha̍tho vī̱tho a̍dhva̱ramacchā̱ gira̍ḥ suma̱tiṁ ga̍ntamasma̱yū || 1.151.07
yu̱vāṁ ya̱jñaiḥ pra̍tha̱mā gobhi̍rañjata̱ ṛtā̍vānā̱ mana̍so̱ na prayu̍ktiṣu |
bhara̍nti vā̱ṁ manma̍nā sa̱ṁyatā̱ giro'dṛ̍pyatā̱ mana̍sā re̱vadā̍śāthe || 1.151.08
re̱vadvayo̍ dadhāthe re̱vadā̍śāthe̱ narā̍ mā̱yābhi̍ri̱taū̍ti̱ māhi̍nam |
na vā̱ṁ dyāvo'ha̍bhi̱rnota sindha̍vo̱ na de̍va̱tvaṁ pa̱ṇayo̱ nāna̍śurma̱gham || 1.151.09
yu̱vaṁ vastrā̍ṇi pīva̱sā va̍sāthe yu̱voracchi̍drā̱ manta̍vo ha̱ sargā̍ḥ |
avā̍tirata̱manṛ̍tāni̱ viśva̍ ṛ̱tena̍ mitrāvaruṇā sacethe || 1.152.01
e̱tacca̱na tvo̱ vi ci̍ketadeṣāṁ sa̱tyo mantra̍ḥ kaviśa̱sta ṛghā̍vān |
tri̱raśri̍ṁ hanti̱ catu̍raśriru̱gro de̍va̱nido̱ ha pra̍tha̱mā a̍jūryan || 1.152.02
a̱pāde̍ti pratha̱mā pa̱dvatī̍nā̱ṁ kastadvā̍ṁ mitrāvaru̱ṇā ci̍keta |
garbho̍ bhā̱raṁ bha̍ra̱tyā ci̍dasya ṛ̱taṁ pipa̱rtyanṛ̍ta̱ṁ ni tā̍rīt || 1.152.03
pra̱yanta̱mitpari̍ jā̱raṁ ka̱nīnā̱ṁ paśyā̍masi̱ nopa̍ni̱padya̍mānam |
ana̍vapṛgṇā̱ vita̍tā̱ vasā̍naṁ pri̱yaṁ mi̱trasya̱ varu̍ṇasya̱ dhāma̍ || 1.152.04
a̱na̱śvo jā̱to a̍nabhī̱śurarvā̱ kani̍kradatpatayadū̱rdhvasā̍nuḥ |
a̱citta̱ṁ brahma̍ jujuṣu̱ryuvā̍na̱ḥ pra mi̱tre dhāma̱ varu̍ṇe gṛ̱ṇanta̍ḥ || 1.152.05
ā dhe̱navo̍ māmate̱yamava̍ntīrbrahma̱priya̍ṁ pīpaya̱nsasmi̱nnūdha̍n |
pi̱tvo bhi̍kṣeta va̱yunā̍ni vi̱dvānā̱sāvivā̍sa̱nnadi̍timuruṣyet || 1.152.06
ā vā̍ṁ mitrāvaruṇā ha̱vyaju̍ṣṭi̱ṁ nama̍sā devā̱vava̍sā vavṛtyām |
a̱smāka̱ṁ brahma̱ pṛta̍nāsu sahyā a̱smāka̍ṁ vṛ̱ṣṭirdi̱vyā su̍pā̱rā || 1.152.07
yajā̍mahe vāṁ ma̱haḥ sa̱joṣā̍ ha̱vyebhi̍rmitrāvaruṇā̱ namo̍bhiḥ |
ghṛ̱tairghṛ̍tasnū̱ adha̱ yadvā̍ma̱sme a̍dhva̱ryavo̱ na dhī̱tibhi̱rbhara̍nti || 1.153.01
prastu̍tirvā̱ṁ dhāma̱ na prayu̍kti̱rayā̍mi mitrāvaruṇā suvṛ̱ktiḥ |
a̱nakti̱ yadvā̍ṁ vi̱dathe̍ṣu̱ hotā̍ su̱mnaṁ vā̍ṁ sū̱rirvṛ̍ṣaṇā̱viya̍kṣan || 1.153.02
pī̱pāya̍ dhe̱nuradi̍tirṛ̱tāya̱ janā̍ya mitrāvaruṇā havi̱rde |
hi̱noti̱ yadvā̍ṁ vi̱dathe̍ sapa̱ryansa rā̱taha̍vyo̱ mānu̍ṣo̱ na hotā̍ || 1.153.03
u̱ta vā̍ṁ vi̱kṣu madyā̱svandho̱ gāva̱ āpa̍śca pīpayanta de̱vīḥ |
u̱to no̍ a̱sya pū̱rvyaḥ pati̱rdanvī̱taṁ pā̱taṁ paya̍sa u̱sriyā̍yāḥ || 1.153.04
viṣṇo̱rnu ka̍ṁ vī̱ryā̍ṇi̱ pra vo̍ca̱ṁ yaḥ pārthi̍vāni vima̱me rajā̍ṁsi |
yo aska̍bhāya̱dutta̍raṁ sa̱dhastha̍ṁ vicakramā̱ṇastre̱dhoru̍gā̱yaḥ || 1.154.01
pra tadviṣṇu̍ḥ stavate vī̱rye̍ṇa mṛ̱go na bhī̱maḥ ku̍ca̱ro gi̍ri̱ṣṭhāḥ |
yasyo̱ruṣu̍ tri̱ṣu vi̱krama̍ṇeṣvadhikṣi̱yanti̱ bhuva̍nāni̱ viśvā̍ || 1.154.02
pra viṣṇa̍ve śū̱ṣame̍tu̱ manma̍ giri̱kṣita̍ urugā̱yāya̱ vṛṣṇe̍ |
ya i̱daṁ dī̱rghaṁ praya̍taṁ sa̱dhastha̱meko̍ vima̱me tri̱bhiritpa̱debhi̍ḥ || 1.154.03
yasya̱ trī pū̱rṇā madhu̍nā pa̱dānyakṣī̍yamāṇā sva̱dhayā̱ mada̍nti |
ya u̍ tri̱dhātu̍ pṛthi̱vīmu̱ta dyāmeko̍ dā̱dhāra̱ bhuva̍nāni̱ viśvā̍ || 1.154.04
tada̍sya pri̱yama̱bhi pātho̍ aśyā̱ṁ naro̱ yatra̍ deva̱yavo̱ mada̍nti |
u̱ru̱kra̱masya̱ sa hi bandhu̍ri̱tthā viṣṇo̍ḥ pa̱de pa̍ra̱me madhva̱ utsa̍ḥ || 1.154.05
tā vā̱ṁ vāstū̍nyuśmasi̱ gama̍dhyai̱ yatra̱ gāvo̱ bhūri̍śṛṅgā a̱yāsa̍ḥ |
atrāha̱ tadu̍rugā̱yasya̱ vṛṣṇa̍ḥ para̱maṁ pa̱damava̍ bhāti̱ bhūri̍ || 1.154.06
pra va̱ḥ pānta̱mandha̍so dhiyāya̱te ma̱he śūrā̍ya̱ viṣṇa̍ve cārcata |
yā sānu̍ni̱ parva̍tānā̱madā̍bhyā ma̱hasta̱sthatu̱rarva̍teva sā̱dhunā̍ || 1.155.01
tve̱ṣami̱tthā sa̱mara̍ṇa̱ṁ śimī̍vato̱rindrā̍viṣṇū suta̱pā vā̍muruṣyati |
yā martyā̍ya pratidhī̱yamā̍na̱mitkṛ̱śāno̱rastu̍rasa̱nāmu̍ru̱ṣyatha̍ḥ || 1.155.02
tā ī̍ṁ vardhanti̱ mahya̍sya̱ pauṁsya̱ṁ ni mā̱tarā̍ nayati̱ reta̍se bhu̱je |
dadhā̍ti pu̱tro'va̍ra̱ṁ para̍ṁ pi̱turnāma̍ tṛ̱tīya̱madhi̍ roca̱ne di̱vaḥ || 1.155.03
tatta̱dida̍sya̱ pauṁsya̍ṁ gṛṇīmasī̱nasya̍ trā̱tura̍vṛ̱kasya̍ mī̱ḻhuṣa̍ḥ |
yaḥ pārthi̍vāni tri̱bhiridvigā̍mabhiru̱ru krami̍ṣṭorugā̱yāya̍ jī̱vase̍ || 1.155.04
dve ida̍sya̱ krama̍ṇe sva̱rdṛśo̍'bhi̱khyāya̱ martyo̍ bhuraṇyati |
tṛ̱tīya̍masya̱ naki̱rā da̍dharṣati̱ vaya̍śca̱na pa̱taya̍ntaḥ pata̱triṇa̍ḥ || 1.155.05
ca̱turbhi̍ḥ sā̱kaṁ na̍va̱tiṁ ca̱ nāma̍bhiśca̱kraṁ na vṛ̱ttaṁ vyatī̍ravīvipat |
bṛ̱haccha̍rīro vi̱mimā̍na̱ ṛkva̍bhi̱ryuvāku̍māra̱ḥ pratye̍tyāha̱vam || 1.155.06
bhavā̍ mi̱tro na śevyo̍ ghṛ̱tāsu̍ti̱rvibhū̍tadyumna eva̱yā u̍ sa̱prathā̍ḥ |
adhā̍ te viṣṇo vi̱duṣā̍ ci̱dardhya̱ḥ stomo̍ ya̱jñaśca̱ rādhyo̍ ha̱viṣma̍tā || 1.156.01
yaḥ pū̱rvyāya̍ ve̱dhase̱ navī̍yase su̱majjā̍naye̱ viṣṇa̍ve̱ dadā̍śati |
yo jā̱tama̍sya maha̱to mahi̱ brava̱tsedu̱ śravo̍bhi̱ryujya̍ṁ cida̱bhya̍sat || 1.156.02
tamu̍ stotāraḥ pū̱rvyaṁ yathā̍ vi̱da ṛ̱tasya̱ garbha̍ṁ ja̱nuṣā̍ pipartana |
āsya̍ jā̱nanto̱ nāma̍ cidvivaktana ma̱haste̍ viṣṇo suma̱tiṁ bha̍jāmahe || 1.156.03
tama̍sya̱ rājā̱ varu̍ṇa̱stama̱śvinā̱ kratu̍ṁ sacanta̱ māru̍tasya ve̱dhasa̍ḥ |
dā̱dhāra̱ dakṣa̍mutta̱mama̍ha̱rvida̍ṁ vra̱jaṁ ca̱ viṣṇu̱ḥ sakhi̍vā aporṇu̱te || 1.156.04
ā yo vi̱vāya̍ sa̱cathā̍ya̱ daivya̱ indrā̍ya̱ viṣṇu̍ḥ su̱kṛte̍ su̱kṛtta̍raḥ |
ve̱dhā a̍jinvattriṣadha̱stha ārya̍mṛ̱tasya̍ bhā̱ge yaja̍māna̱mābha̍jat || 1.156.05
abo̍dhya̱gnirjma ude̍ti̱ sūryo̱ vyu1̱̍ṣāśca̱ndrā ma̱hyā̍vo a̱rciṣā̍ |
āyu̍kṣātāma̱śvinā̱ yāta̍ve̱ ratha̱ṁ prāsā̍vīdde̱vaḥ sa̍vi̱tā jaga̱tpṛtha̍k || 1.157.01
yadyu̱ñjāthe̱ vṛṣa̍ṇamaśvinā̱ ratha̍ṁ ghṛ̱tena̍ no̱ madhu̍nā kṣa̱tramu̍kṣatam |
a̱smāka̱ṁ brahma̱ pṛta̍nāsu jinvataṁ va̱yaṁ dhanā̱ śūra̍sātā bhajemahi || 1.157.02
a̱rvāṅtri̍ca̱kro ma̍dhu̱vāha̍no̱ ratho̍ jī̱rāśvo̍ a̱śvino̍ryātu̱ suṣṭu̍taḥ |
tri̱va̱ndhu̱ro ma̱ghavā̍ vi̱śvasau̍bhaga̱ḥ śaṁ na̱ ā va̍kṣaddvi̱pade̱ catu̍ṣpade || 1.157.03
ā na̱ ūrja̍ṁ vahatamaśvinā yu̱vaṁ madhu̍matyā na̱ḥ kaśa̍yā mimikṣatam |
prāyu̱stāri̍ṣṭa̱ṁ nī rapā̍ṁsi mṛkṣata̱ṁ sedha̍ta̱ṁ dveṣo̱ bhava̍taṁ sacā̱bhuvā̍ || 1.157.04
yu̱vaṁ ha̱ garbha̱ṁ jaga̍tīṣu dhattho yu̱vaṁ viśve̍ṣu̱ bhuva̍neṣva̱ntaḥ |
yu̱vama̱gniṁ ca̍ vṛṣaṇāva̱paśca̱ vana̱spatī̍raśvinā̱vaira̍yethām || 1.157.05
yu̱vaṁ ha̍ stho bhi̱ṣajā̍ bheṣa̱jebhi̱ratho̍ ha stho ra̱thyā̱3̱̍ rāthye̍bhiḥ |
atho̍ ha kṣa̱tramadhi̍ dhattha ugrā̱ yo vā̍ṁ ha̱viṣmā̱nmana̍sā da̱dāśa̍ || 1.157.06
vasū̍ ru̱drā pu̍ru̱mantū̍ vṛ̱dhantā̍ daśa̱syata̍ṁ no vṛṣaṇāva̱bhiṣṭau̍ |
dasrā̍ ha̱ yadrekṇa̍ auca̱thyo vā̱ṁ pra yatsa̱srāthe̱ aka̍vābhirū̱tī || 1.158.01
ko vā̍ṁ dāśatsuma̱taye̍ cida̱syai vasū̱ yaddhethe̱ nama̍sā pa̱de goḥ |
ji̱gṛ̱tama̱sme re̱vatī̱ḥ pura̍ṁdhīḥ kāma̱preṇe̍va̱ mana̍sā̱ cara̍ntā || 1.158.02
yu̱kto ha̱ yadvā̍ṁ tau̱gryāya̍ pe̱rurvi madhye̱ arṇa̍so̱ dhāyi̍ pa̱jraḥ |
upa̍ vā̱mava̍ḥ śara̱ṇaṁ ga̍meya̱ṁ śūro̱ nājma̍ pa̱taya̍dbhi̱revai̍ḥ || 1.158.03
upa̍stutirauca̱thyamu̍ruṣye̱nmā māmi̱me pa̍ta̱triṇī̱ vi du̍gdhām |
mā māmedho̱ daśa̍tayaści̱to dhā̱kpra yadvā̍ṁ ba̱ddhastmani̱ khāda̍ti̱ kṣām || 1.158.04
na mā̍ garanna̱dyo̍ mā̱tṛta̍mā dā̱sā yadī̱ṁ susa̍mubdhama̱vādhu̍ḥ |
śiro̱ yada̍sya traita̱no vi̱takṣa̍tsva̱yaṁ dā̱sa uro̱ aṁsā̱vapi̍ gdha || 1.158.05
dī̱rghata̍mā māmate̱yo ju̍ju̱rvānda̍śa̱me yu̱ge |
a̱pāmartha̍ṁ ya̱tīnā̍ṁ bra̱hmā bha̍vati̱ sāra̍thiḥ || 1.158.06
pra dyāvā̍ ya̱jñaiḥ pṛ̍thi̱vī ṛ̍tā̱vṛdhā̍ ma̱hī stu̍ṣe vi̱dathe̍ṣu̱ prace̍tasā |
de̱vebhi̱rye de̱vapu̍tre su̱daṁsa̍se̱tthā dhi̱yā vāryā̍ṇi pra̱bhūṣa̍taḥ || 1.159.01
u̱ta ma̍nye pi̱tura̱druho̱ mano̍ mā̱turmahi̱ svata̍va̱staddhavī̍mabhiḥ |
su̱reta̍sā pi̱tarā̱ bhūma̍ cakraturu̱ru pra̱jāyā̍ a̱mṛta̱ṁ varī̍mabhiḥ || 1.159.02
te sū̱nava̱ḥ svapa̍saḥ su̱daṁsa̍so ma̱hī ja̍jñurmā̱tarā̍ pū̱rvaci̍ttaye |
sthā̱tuśca̍ sa̱tyaṁ jaga̍taśca̱ dharma̍ṇi pu̱trasya̍ pāthaḥ pa̱damadva̍yāvinaḥ || 1.159.03
te mā̱yino̍ mamire su̱prace̍taso jā̱mī sayo̍nī mithu̱nā samo̍kasā |
navya̍ṁnavya̱ṁ tantu̱mā ta̍nvate di̱vi sa̍mu̱dre a̱ntaḥ ka̱vaya̍ḥ sudī̱taya̍ḥ || 1.159.04
tadrādho̍ a̱dya sa̍vi̱turvare̍ṇyaṁ va̱yaṁ de̱vasya̍ prasa̱ve ma̍nāmahe |
a̱smabhya̍ṁ dyāvāpṛthivī suce̱tunā̍ ra̱yiṁ dha̍tta̱ṁ vasu̍mantaṁ śata̱gvina̍m || 1.159.05
te hi dyāvā̍pṛthi̱vī vi̱śvaśa̍mbhuva ṛ̱tāva̍rī̱ raja̍so dhāra̱yatka̍vī |
su̱janma̍nī dhi̱ṣaṇe̍ a̱ntarī̍yate de̱vo de̱vī dharma̍ṇā̱ sūrya̱ḥ śuci̍ḥ || 1.160.01
u̱ru̱vyaca̍sā ma̱hinī̍ asa̱ścatā̍ pi̱tā mā̱tā ca̱ bhuva̍nāni rakṣataḥ |
su̱dhṛṣṭa̍me vapu̱ṣye̱3̱̍ na roda̍sī pi̱tā yatsī̍ma̱bhi rū̱pairavā̍sayat || 1.160.02
sa vahni̍ḥ pu̱traḥ pi̱troḥ pa̱vitra̍vānpu̱nāti̱ dhīro̱ bhuva̍nāni mā̱yayā̍ |
dhe̱nuṁ ca̱ pṛśni̍ṁ vṛṣa̱bhaṁ su̱reta̍saṁ vi̱śvāhā̍ śu̱kraṁ payo̍ asya dukṣata || 1.160.03
a̱yaṁ de̱vānā̍ma̱pasā̍ma̱pasta̍mo̱ yo ja̱jāna̱ roda̍sī vi̱śvaśa̍mbhuvā |
vi yo ma̱me raja̍sī sukratū̱yayā̱jare̍bhi̱ḥ skambha̍nebhi̱ḥ samā̍nṛce || 1.160.04
te no̍ gṛṇā̱ne ma̍hinī̱ mahi̱ śrava̍ḥ kṣa̱traṁ dyā̍vāpṛthivī dhāsatho bṛ̱hat |
yenā̱bhi kṛ̱ṣṭīsta̱tanā̍ma vi̱śvahā̍ pa̱nāyya̱mojo̍ a̱sme sami̍nvatam || 1.160.05
kimu̱ śreṣṭha̱ḥ kiṁ yavi̍ṣṭho na̱ āja̍ga̱nkimī̍yate dū̱tyaṁ1̱̍ kadyadū̍ci̱ma |
na ni̍ndima cama̱saṁ yo ma̍hāku̱lo'gne̍ bhrāta̱rdruṇa̱ idbhū̱timū̍dima || 1.161.01
eka̍ṁ cama̱saṁ ca̱tura̍ḥ kṛṇotana̱ tadvo̍ de̱vā a̍bruva̱ntadva̱ āga̍mam |
saudha̍nvanā̱ yadye̱vā ka̍ri̱ṣyatha̍ sā̱kaṁ de̱vairya̱jñiyā̍so bhaviṣyatha || 1.161.02
a̱gniṁ dū̱taṁ prati̱ yadabra̍vīta̱nāśva̱ḥ kartvo̱ ratha̍ u̱teha kartva̍ḥ |
dhe̱nuḥ kartvā̍ yuva̱śā kartvā̱ dvā tāni̍ bhrāta̱ranu̍ vaḥ kṛ̱tvyema̍si || 1.161.03
ca̱kṛ̱vāṁsa̍ ṛbhava̱stada̍pṛcchata̱ kveda̍bhū̱dyaḥ sya dū̱to na̱ āja̍gan |
ya̱dāvākhya̍ccama̱sāñca̱tura̍ḥ kṛ̱tānādittvaṣṭā̱ gnāsva̱ntarnyā̍naje || 1.161.04
hanā̍mainā̱ iti̱ tvaṣṭā̱ yadabra̍vīccama̱saṁ ye de̍va̱pāna̱mani̍ndiṣuḥ |
a̱nyā nāmā̍ni kṛṇvate su̱te sacā̍ a̱nyaire̍nānka̱nyā̱3̱̍ nāma̍bhiḥ sparat || 1.161.05
indro̱ harī̍ yuyu̱je a̱śvinā̱ ratha̱ṁ bṛha̱spati̍rvi̱śvarū̍pā̱mupā̍jata |
ṛ̱bhurvibhvā̱ vājo̍ de̱vā a̍gacchata̱ svapa̍so ya̱jñiya̍ṁ bhā̱gamai̍tana || 1.161.06
niścarma̍ṇo̱ gāma̍riṇīta dhī̱tibhi̱ryā jara̍ntā yuva̱śā tākṛ̍ṇotana |
saudha̍nvanā̱ aśvā̱daśva̍matakṣata yu̱ktvā ratha̱mupa̍ de̱vā a̍yātana || 1.161.07
i̱damu̍da̱kaṁ pi̍ba̱tetya̍bravītane̱daṁ vā̍ ghā pibatā muñja̱neja̍nam |
saudha̍nvanā̱ yadi̱ tanneva̱ harya̍tha tṛ̱tīye̍ ghā̱ sava̍ne mādayādhvai || 1.161.08
āpo̱ bhūyi̍ṣṭhā̱ ityeko̍ abravīda̱gnirbhūyi̍ṣṭha̱ itya̱nyo a̍bravīt |
va̱dha̱ryantī̍ṁ ba̱hubhya̱ḥ praiko̍ abravīdṛ̱tā vada̍ntaścama̱sā a̍piṁśata || 1.161.09
śro̱ṇāmeka̍ uda̱kaṁ gāmavā̍jati mā̱ṁsameka̍ḥ piṁśati sū̱nayābhṛ̍tam |
ā ni̱mruca̱ḥ śakṛ̱deko̱ apā̍bhara̱tkiṁ svi̍tpu̱trebhya̍ḥ pi̱tarā̱ upā̍vatuḥ || 1.161.10
u̱dvatsva̍smā akṛṇotanā̱ tṛṇa̍ṁ ni̱vatsva̱paḥ sva̍pa̱syayā̍ naraḥ |
ago̍hyasya̱ yadasa̍stanā gṛ̱he tada̱dyedamṛ̍bhavo̱ nānu̍ gacchatha || 1.161.11
sa̱mmīlya̱ yadbhuva̍nā pa̱ryasa̍rpata̱ kva̍ svittā̱tyā pi̱tarā̍ va āsatuḥ |
aśa̍pata̱ yaḥ ka̱rasna̍ṁ va āda̱de yaḥ prābra̍vī̱tpro tasmā̍ abravītana || 1.161.12
su̱ṣu̱pvāṁsa̍ ṛbhava̱stada̍pṛccha̱tāgo̍hya̱ ka i̱daṁ no̍ abūbudhat |
śvāna̍ṁ ba̱sto bo̍dhayi̱tāra̍mabravītsaṁvatsa̱ra i̱dama̱dyā vya̍khyata || 1.161.13
di̱vā yā̍nti ma̱ruto̱ bhūmyā̱gnira̱yaṁ vāto̍ a̱ntari̍kṣeṇa yāti |
a̱dbhiryā̍ti̱ varu̍ṇaḥ samu̱drairyu̱ṣmā i̱cchanta̍ḥ śavaso napātaḥ || 1.161.14
mā no̍ mi̱tro varu̍ṇo arya̱māyurindra̍ ṛbhu̱kṣā ma̱ruta̱ḥ pari̍ khyan |
yadvā̱jino̍ de̱vajā̍tasya̱ sapte̍ḥ prava̱kṣyāmo̍ vi̱dathe̍ vī̱ryā̍ṇi || 1.162.01
yanni̱rṇijā̱ rekṇa̍sā̱ prāvṛ̍tasya rā̱tiṁ gṛ̍bhī̱tāṁ mu̍kha̱to naya̍nti |
suprā̍ṅa̱jo memya̍dvi̱śvarū̍pa indrāpū̱ṣṇoḥ pri̱yamapye̍ti̱ pātha̍ḥ || 1.162.02
e̱ṣa cchāga̍ḥ pu̱ro aśve̍na vā̱jinā̍ pū̱ṣṇo bhā̱go nī̍yate vi̱śvade̍vyaḥ |
a̱bhi̱priya̱ṁ yatpu̍ro̱ḻāśa̱marva̍tā̱ tvaṣṭede̍naṁ sauśrava̱sāya̍ jinvati || 1.162.03
yaddha̍vi̱ṣya̍mṛtu̱śo de̍va̱yāna̱ṁ trirmānu̍ṣā̱ḥ paryaśva̱ṁ naya̍nti |
atrā̍ pū̱ṣṇaḥ pra̍tha̱mo bhā̱ga e̍ti ya̱jñaṁ de̱vebhya̍ḥ prative̱daya̍nna̱jaḥ || 1.162.04
hotā̍dhva̱ryurāva̍yā agnimi̱ndho grā̍vagrā̱bha u̱ta śaṁstā̱ suvi̍praḥ |
tena̍ ya̱jñena̱ sva̍raṁkṛtena̱ svi̍ṣṭena va̱kṣaṇā̱ ā pṛ̍ṇadhvam || 1.162.05
yū̱pa̱vra̱skā u̱ta ye yū̍pavā̱hāśca̱ṣāla̱ṁ ye a̍śvayū̱pāya̱ takṣa̍ti |
ye cārva̍te̱ paca̍naṁ sa̱mbhara̍ntyu̱to teṣā̍ma̱bhigū̍rtirna invatu || 1.162.06
upa̱ prāgā̍tsu̱manme̍'dhāyi̱ manma̍ de̱vānā̱māśā̱ upa̍ vī̱tapṛ̍ṣṭhaḥ |
anve̍na̱ṁ viprā̱ ṛṣa̍yo madanti de̱vānā̍ṁ pu̱ṣṭe ca̍kṛmā su̱bandhu̍m || 1.162.07
yadvā̱jino̱ dāma̍ sa̱ṁdāna̱marva̍to̱ yā śī̍rṣa̱ṇyā̍ raśa̱nā rajju̍rasya |
yadvā̍ ghāsya̱ prabhṛ̍tamā̱sye̱3̱̍ tṛṇa̱ṁ sarvā̱ tā te̱ api̍ de̱veṣva̍stu || 1.162.08
yadaśva̍sya kra̱viṣo̱ makṣi̱kāśa̱ yadvā̱ svarau̱ svadhi̍tau ri̱ptamasti̍ |
yaddhasta̍yoḥ śami̱turyanna̱kheṣu̱ sarvā̱ tā te̱ api̍ de̱veṣva̍stu || 1.162.09
yadūva̍dhyamu̱dara̍syāpa̱vāti̱ ya ā̱masya̍ kra̱viṣo̍ ga̱ndho asti̍ |
su̱kṛ̱tā taccha̍mi̱tāra̍ḥ kṛṇvantū̱ta medha̍ṁ śṛta̱pāka̍ṁ pacantu || 1.162.10
yatte̱ gātrā̍da̱gninā̍ pa̱cyamā̍nāda̱bhi śūla̱ṁ niha̍tasyāva̱dhāva̍ti |
mā tadbhūmyā̱mā śri̍ṣa̱nmā tṛṇe̍ṣu de̱vebhya̱stadu̱śadbhyo̍ rā̱tama̍stu || 1.162.11
ye vā̱jina̍ṁ pari̱paśya̍nti pa̱kvaṁ ya ī̍mā̱huḥ su̍ra̱bhirnirha̱reti̍ |
ye cārva̍to māṁsabhi̱kṣāmu̱pāsa̍ta u̱to teṣā̍ma̱bhigū̍rtirna invatu || 1.162.12
yannīkṣa̍ṇaṁ mā̱spaca̍nyā u̱khāyā̱ yā pātrā̍ṇi yū̱ṣṇa ā̱seca̍nāni |
ū̱ṣma̱ṇyā̍pi̱dhānā̍ carū̱ṇāma̱ṅkāḥ sū̱nāḥ pari̍ bhūṣa̱ntyaśva̍m || 1.162.13
ni̱krama̍ṇaṁ ni̱ṣada̍naṁ vi̱varta̍na̱ṁ yacca̱ paḍbī̍śa̱marva̍taḥ |
yacca̍ pa̱pau yacca̍ ghā̱siṁ ja̱ghāsa̱ sarvā̱ tā te̱ api̍ de̱veṣva̍stu || 1.162.14
mā tvā̱gnirdhva̍nayīddhū̱maga̍ndhi̱rmokhā bhrāja̍ntya̱bhi vi̍kta̱ jaghri̍ḥ |
i̱ṣṭaṁ vī̱tama̱bhigū̍rta̱ṁ vaṣa̍ṭkṛta̱ṁ taṁ de̱vāsa̱ḥ prati̍ gṛbhṇa̱ntyaśva̍m || 1.162.15
yadaśvā̍ya̱ vāsa̍ upastṛ̱ṇantya̍dhīvā̱saṁ yā hira̍ṇyānyasmai |
sa̱ṁdāna̱marva̍nta̱ṁ paḍbī̍śaṁ pri̱yā de̱veṣvā yā̍mayanti || 1.162.16
yatte̍ sā̱de maha̍sā̱ śūkṛ̍tasya̱ pārṣṇyā̍ vā̱ kaśa̍yā vā tu̱toda̍ |
sru̱ceva̱ tā ha̱viṣo̍ adhva̱reṣu̱ sarvā̱ tā te̱ brahma̍ṇā sūdayāmi || 1.162.17
catu̍striṁśadvā̱jino̍ de̱vaba̍ndho̱rvaṅkrī̱raśva̍sya̱ svadhi̍ti̱ḥ same̍ti |
acchi̍drā̱ gātrā̍ va̱yunā̍ kṛṇota̱ paru̍ṣparuranu̱ghuṣyā̱ vi śa̍sta || 1.162.18
eka̱stvaṣṭu̱raśva̍syā viśa̱stā dvā ya̱ntārā̍ bhavata̱statha̍ ṛ̱tuḥ |
yā te̱ gātrā̍ṇāmṛtu̱thā kṛ̱ṇomi̱ tātā̱ piṇḍā̍nā̱ṁ pra ju̍homya̱gnau || 1.162.19
mā tvā̍ tapatpri̱ya ā̱tmāpi̱yanta̱ṁ mā svadhi̍tista̱nva1̱̍ ā ti̍ṣṭhipatte |
mā te̍ gṛ̱dhnura̍viśa̱stāti̱hāya̍ chi̱drā gātrā̍ṇya̱sinā̱ mithū̍ kaḥ || 1.162.20
na vā u̍ e̱tanmri̍yase̱ na ri̍ṣyasi de̱vā ide̍ṣi pa̱thibhi̍ḥ su̱gebhi̍ḥ |
harī̍ te̱ yuñjā̱ pṛṣa̍tī abhūtā̱mupā̍sthādvā̱jī dhu̱ri rāsa̍bhasya || 1.162.21
su̱gavya̍ṁ no vā̱jī svaśvya̍ṁ pu̱ṁsaḥ pu̱trā u̱ta vi̍śvā̱puṣa̍ṁ ra̱yim |
a̱nā̱gā̱stvaṁ no̱ adi̍tiḥ kṛṇotu kṣa̱traṁ no̱ aśvo̍ vanatāṁ ha̱viṣmā̍n || 1.162.22
yadakra̍ndaḥ pratha̱maṁ jāya̍māna u̱dyansa̍mu̱drādu̱ta vā̱ purī̍ṣāt |
śye̱nasya̍ pa̱kṣā ha̍ri̱ṇasya̍ bā̱hū u̍pa̱stutya̱ṁ mahi̍ jā̱taṁ te̍ arvan || 1.163.01
ya̱mena̍ da̱ttaṁ tri̱ta e̍namāyuna̱gindra̍ eṇaṁ pratha̱mo adhya̍tiṣṭhat |
ga̱ndha̱rvo a̍sya raśa̱nāma̍gṛbhṇā̱tsūrā̱daśva̍ṁ vasavo̱ nira̍taṣṭa || 1.163.02
asi̍ ya̱mo asyā̍di̱tyo a̍rva̱nnasi̍ tri̱to guhye̍na vra̱tena̍ |
asi̱ some̍na sa̱mayā̱ vipṛ̍kta ā̱huste̱ trīṇi̍ di̱vi bandha̍nāni || 1.163.03
trīṇi̍ ta āhurdi̱vi bandha̍nāni̱ trīṇya̱psu trīṇya̱ntaḥ sa̍mu̱dre |
u̱teva̍ me̱ varu̍ṇaśchantsyarva̱nyatrā̍ ta ā̱huḥ pa̍ra̱maṁ ja̱nitra̍m || 1.163.04
i̱mā te̍ vājinnava̱mārja̍nānī̱mā śa̱phānā̍ṁ sani̱turni̱dhānā̍ |
atrā̍ te bha̱drā ra̍śa̱nā a̍paśyamṛ̱tasya̱ yā a̍bhi̱rakṣa̍nti go̱pāḥ || 1.163.05
ā̱tmāna̍ṁ te̱ mana̍sā̱rāda̍jānāma̱vo di̱vā pa̱taya̍ntaṁ pata̱ṁgam |
śiro̍ apaśyaṁ pa̱thibhi̍ḥ su̱gebhi̍rare̱ṇubhi̱rjeha̍mānaṁ pata̱tri || 1.163.06
atrā̍ te rū̱pamu̍tta̱mama̍paśya̱ṁ jigī̍ṣamāṇami̱ṣa ā pa̱de goḥ |
ya̱dā te̱ marto̱ anu̱ bhoga̱māna̱ḻādidgrasi̍ṣṭha̱ oṣa̍dhīrajīgaḥ || 1.163.07
anu̍ tvā̱ ratho̱ anu̱ maryo̍ arva̱nnanu̱ gāvo'nu̱ bhaga̍ḥ ka̱nīnā̍m |
anu̱ vrātā̍sa̱stava̍ sa̱khyamī̍yu̱ranu̍ de̱vā ma̍mire vī̱rya̍ṁ te || 1.163.08
hira̍ṇyaśṛ̱ṅgo'yo̍ asya̱ pādā̱ mano̍javā̱ ava̍ra̱ indra̍ āsīt |
de̱vā ida̍sya havi̱radya̍māya̱nyo arva̍ntaṁ pratha̱mo a̱dhyati̍ṣṭhat || 1.163.09
ī̱rmāntā̍sa̱ḥ sili̍kamadhyamāsa̱ḥ saṁ śūra̍ṇāso di̱vyāso̱ atyā̍ḥ |
ha̱ṁsā i̍va śreṇi̱śo ya̍tante̱ yadākṣi̍ṣurdi̱vyamajma̱maśvā̍ḥ || 1.163.10
tava̱ śarī̍raṁ patayi̱ṣṇva̍rva̱ntava̍ ci̱ttaṁ vāta̍ iva̱ dhrajī̍mān |
tava̱ śṛṅgā̍ṇi̱ viṣṭhi̍tā puru̱trāra̍ṇyeṣu̱ jarbhu̍rāṇā caranti || 1.163.11
upa̱ prāgā̱cchasa̍naṁ vā̱jyarvā̍ deva̱drīcā̱ mana̍sā̱ dīdhyā̍naḥ |
a̱jaḥ pu̱ro nī̍yate̱ nābhi̍ra̱syānu̍ pa̱ścātka̱vayo̍ yanti re̱bhāḥ || 1.163.12
upa̱ prāgā̍tpara̱maṁ yatsa̱dhastha̱marvā̱ acchā̍ pi̱tara̍ṁ mā̱tara̍ṁ ca |
a̱dyā de̱vāñjuṣṭa̍tamo̱ hi ga̱myā athā śā̍ste dā̱śuṣe̱ vāryā̍ṇi || 1.163.13
a̱sya vā̱masya̍ pali̱tasya̱ hotu̱stasya̱ bhrātā̍ madhya̱mo a̱styaśna̍ḥ |
tṛ̱tīyo̱ bhrātā̍ ghṛ̱tapṛ̍ṣṭho a̱syātrā̍paśyaṁ vi̱śpati̍ṁ sa̱ptapu̍tram || 1.164.01
sa̱pta yu̍ñjanti̱ ratha̱meka̍cakra̱meko̱ aśvo̍ vahati sa̱ptanā̍mā |
tri̱nābhi̍ ca̱krama̱jara̍mana̱rvaṁ yatre̱mā viśvā̱ bhuva̱nādhi̍ ta̱sthuḥ || 1.164.02
i̱maṁ ratha̱madhi̱ ye sa̱pta ta̱sthuḥ sa̱ptaca̍kraṁ sa̱pta va̍ha̱ntyaśvā̍ḥ |
sa̱pta svasā̍ro a̱bhi saṁ na̍vante̱ yatra̱ gavā̱ṁ nihi̍tā sa̱pta nāma̍ || 1.164.03
ko da̍darśa pratha̱maṁ jāya̍mānamastha̱nvanta̱ṁ yada̍na̱sthā bibha̍rti |
bhūmyā̱ asu̱rasṛ̍gā̱tmā kva̍ svi̱tko vi̱dvāṁsa̱mupa̍ gā̱tpraṣṭu̍me̱tat || 1.164.04
pāka̍ḥ pṛcchāmi̱ mana̱sāvi̍jānande̱vānā̍me̱nā nihi̍tā pa̱dāni̍ |
va̱tse ba̱ṣkaye'dhi̍ sa̱pta tantū̱nvi ta̍tnire ka̱vaya̱ ota̱vā u̍ || 1.164.05
aci̍kitvāñciki̱tuṣa̍ści̱datra̍ ka̱vīnpṛ̍cchāmi vi̱dmane̱ na vi̱dvān |
vi yasta̱stambha̱ ṣaḻi̱mā rajā̍ṁsya̱jasya̍ rū̱pe kimapi̍ svi̱deka̍m || 1.164.06
i̱ha bra̍vītu̱ ya ī̍ma̱ṅga vedā̱sya vā̱masya̱ nihi̍taṁ pa̱daṁ veḥ |
śī̱rṣṇaḥ kṣī̱raṁ du̍hrate̱ gāvo̍ asya va̱vriṁ vasā̍nā uda̱kaṁ pa̱dāpu̍ḥ || 1.164.07
mā̱tā pi̱tara̍mṛ̱ta ā ba̍bhāja dhī̱tyagre̱ mana̍sā̱ saṁ hi ja̱gme |
sā bī̍bha̱tsurgarbha̍rasā̱ nivi̍ddhā̱ nama̍svanta̱ idu̍pavā̱kamī̍yuḥ || 1.164.08
yu̱ktā mā̱tāsī̍ddhu̱ri dakṣi̍ṇāyā̱ ati̍ṣṭha̱dgarbho̍ vṛja̱nīṣva̱ntaḥ |
amī̍medva̱tso anu̱ gāma̍paśyadviśvarū̱pya̍ṁ tri̱ṣu yoja̍neṣu || 1.164.09
ti̱sro mā̱tṝstrīnpi̱tṝnbibhra̱deka̍ ū̱rdhvasta̍sthau̱ nemava̍ glāpayanti |
ma̱ntraya̍nte di̱vo a̱muṣya̍ pṛ̱ṣṭhe vi̍śva̱vida̱ṁ vāca̱mavi̍śvaminvām || 1.164.10
dvāda̍śāraṁ na̱hi tajjarā̍ya̱ varva̍rti ca̱kraṁ pari̱ dyāmṛ̱tasya̍ |
ā pu̱trā a̍gne mithu̱nāso̱ atra̍ sa̱pta śa̱tāni̍ viṁśa̱tiśca̍ tasthuḥ || 1.164.11
pañca̍pādaṁ pi̱tara̱ṁ dvāda̍śākṛtiṁ di̱va ā̍hu̱ḥ pare̱ ardhe̍ purī̱ṣiṇa̍m |
athe̱me a̱nya upa̍re vicakṣa̱ṇaṁ sa̱ptaca̍kre̱ ṣaḻa̍ra āhu̱rarpi̍tam || 1.164.12
pañcā̍re ca̱kre pa̍ri̱varta̍māne̱ tasmi̱nnā ta̍sthu̱rbhuva̍nāni̱ viśvā̍ |
tasya̱ nākṣa̍stapyate̱ bhūri̍bhāraḥ sa̱nāde̱va na śī̍ryate̱ sanā̍bhiḥ || 1.164.13
sane̍mi ca̱krama̱jara̱ṁ vi vā̍vṛta uttā̱nāyā̱ṁ daśa̍ yu̱ktā va̍hanti |
sūrya̍sya̱ cakṣū̱ raja̍sai̱tyāvṛ̍ta̱ṁ tasmi̱nnārpi̍tā̱ bhuva̍nāni̱ viśvā̍ || 1.164.14
sā̱ka̱ṁjānā̍ṁ sa̱ptatha̍māhureka̱jaṁ ṣaḻidya̱mā ṛṣa̍yo deva̱jā iti̍ |
teṣā̍mi̱ṣṭāni̱ vihi̍tāni dhāma̱śaḥ sthā̱tre re̍jante̱ vikṛ̍tāni rūpa̱śaḥ || 1.164.15
striya̍ḥ sa̱tīstā u̍ me pu̱ṁsa ā̍hu̱ḥ paśya̍dakṣa̱ṇvānna vi ce̍tada̱ndhaḥ |
ka̱viryaḥ pu̱traḥ sa ī̱mā ci̍keta̱ yastā vi̍jā̱nātsa pi̱tuṣpi̱tāsa̍t || 1.164.16
a̱vaḥ pare̍ṇa pa̱ra e̱nāva̍reṇa pa̱dā va̱tsaṁ bibhra̍tī̱ gauruda̍sthāt |
sā ka̱drīcī̱ kaṁ svi̱dardha̱ṁ parā̍gā̱tkva̍ svitsūte na̱hi yū̱the a̱ntaḥ || 1.164.17
a̱vaḥ pare̍ṇa pi̱tara̱ṁ yo a̍syānu̱veda̍ pa̱ra e̱nāva̍reṇa |
ka̱vī̱yamā̍na̱ḥ ka i̱ha pra vo̍cadde̱vaṁ mana̱ḥ kuto̱ adhi̱ prajā̍tam || 1.164.18
ye a̱rvāñca̱stā u̱ parā̍ca āhu̱rye parā̍ñca̱stā u̍ a̱rvāca̍ āhuḥ |
indra̍śca̱ yā ca̱krathu̍ḥ soma̱ tāni̍ dhu̱rā na yu̱ktā raja̍so vahanti || 1.164.19
dvā su̍pa̱rṇā sa̱yujā̱ sakhā̍yā samā̱naṁ vṛ̱kṣaṁ pari̍ ṣasvajāte |
tayo̍ra̱nyaḥ pippa̍laṁ svā̱dvattyana̍śnanna̱nyo a̱bhi cā̍kaśīti || 1.164.20
yatrā̍ supa̱rṇā a̱mṛta̍sya bhā̱gamani̍meṣaṁ vi̱dathā̍bhi̱svara̍nti |
i̱no viśva̍sya̱ bhuva̍nasya go̱pāḥ sa mā̱ dhīra̱ḥ pāka̱matrā vi̍veśa || 1.164.21
yasmi̍nvṛ̱kṣe ma̱dhvada̍ḥ supa̱rṇā ni̍vi̱śante̱ suva̍te̱ cādhi̱ viśve̍ |
tasyedā̍hu̱ḥ pippa̍laṁ svā̱dvagre̱ tannonna̍śa̱dyaḥ pi̱tara̱ṁ na veda̍ || 1.164.22
yadgā̍ya̱tre adhi̍ gāya̱tramāhi̍ta̱ṁ traiṣṭu̍bhādvā̱ traiṣṭu̍bhaṁ ni̱rata̍kṣata |
yadvā̱ jaga̱jjaga̱tyāhi̍taṁ pa̱daṁ ya ittadvi̱duste a̍mṛta̱tvamā̍naśuḥ || 1.164.23
gā̱ya̱treṇa̱ prati̍ mimīte a̱rkama̱rkeṇa̱ sāma̱ traiṣṭu̍bhena vā̱kam |
vā̱kena̍ vā̱kaṁ dvi̱padā̱ catu̍ṣpadā̱kṣare̍ṇa mimate sa̱pta vāṇī̍ḥ || 1.164.24
jaga̍tā̱ sindhu̍ṁ di̱vya̍stabhāyadrathaṁta̱re sūrya̱ṁ parya̍paśyat |
gā̱ya̱trasya̍ sa̱midha̍sti̱sra ā̍hu̱stato̍ ma̱hnā pra ri̍rice mahi̱tvā || 1.164.25
upa̍ hvaye su̱dughā̍ṁ dhe̱nume̱tāṁ su̱hasto̍ go̱dhugu̱ta do̍hadenām |
śreṣṭha̍ṁ sa̱vaṁ sa̍vi̱tā sā̍viṣanno̱'bhī̍ddho gha̱rmastadu̱ ṣu pra vo̍cam || 1.164.26
hi̱ṅkṛ̱ṇva̱tī va̍su̱patnī̱ vasū̍nāṁ va̱tsami̱cchantī̱ mana̍sā̱bhyāgā̍t |
du̱hāma̱śvibhyā̱ṁ payo̍ a̱ghnyeyaṁ sā va̍rdhatāṁ maha̱te saubha̍gāya || 1.164.27
gaura̍mīme̱danu̍ va̱tsaṁ mi̱ṣanta̍ṁ mū̱rdhāna̱ṁ hiṅṅa̍kṛṇo̱nmāta̱vā u̍ |
sṛkvā̍ṇaṁ gha̱rmama̱bhi vā̍vaśā̱nā mimā̍ti mā̱yuṁ paya̍te̱ payo̍bhiḥ || 1.164.28
a̱yaṁ sa śi̍ṅkte̱ yena̱ gaura̱bhīvṛ̍tā̱ mimā̍ti mā̱yuṁ dhva̱sanā̱vadhi̍ śri̱tā |
sā ci̱ttibhi̱rni hi ca̱kāra̱ martya̍ṁ vi̱dyudbhava̍ntī̱ prati̍ va̱vrimau̍hata || 1.164.29
a̱naccha̍ye tu̱ragā̍tu jī̱vameja̍ddhru̱vaṁ madhya̱ ā pa̱styā̍nām |
jī̱vo mṛ̱tasya̍ carati sva̱dhābhi̱rama̍rtyo̱ martye̍nā̱ sayo̍niḥ || 1.164.30
apa̍śyaṁ go̱pāmani̍padyamāna̱mā ca̱ parā̍ ca pa̱thibhi̱ścara̍ntam |
sa sa̱dhrīcī̱ḥ sa viṣū̍cī̱rvasā̍na̱ ā va̍rīvarti̱ bhuva̍neṣva̱ntaḥ || 1.164.31
ya ī̍ṁ ca̱kāra̱ na so a̱sya ve̍da̱ ya ī̍ṁ da̱darśa̱ hiru̱ginnu tasmā̍t |
sa mā̱turyonā̱ pari̍vīto a̱ntarba̍hupra̱jā nirṛ̍ti̱mā vi̍veśa || 1.164.32
dyaurme̍ pi̱tā ja̍ni̱tā nābhi̱ratra̱ bandhu̍rme mā̱tā pṛ̍thi̱vī ma̱hīyam |
u̱ttā̱nayo̍śca̱mvo̱3̱̍ryoni̍ra̱ntaratrā̍ pi̱tā du̍hi̱turgarbha̱mādhā̍t || 1.164.33
pṛ̱cchāmi̍ tvā̱ para̱manta̍ṁ pṛthi̱vyāḥ pṛ̱cchāmi̱ yatra̱ bhuva̍nasya̱ nābhi̍ḥ |
pṛ̱cchāmi̍ tvā̱ vṛṣṇo̱ aśva̍sya̱ reta̍ḥ pṛ̱cchāmi̍ vā̱caḥ pa̍ra̱maṁ vyo̍ma || 1.164.34
i̱yaṁ vedi̱ḥ paro̱ anta̍ḥ pṛthi̱vyā a̱yaṁ ya̱jño bhuva̍nasya̱ nābhi̍ḥ |
a̱yaṁ somo̱ vṛṣṇo̱ aśva̍sya̱ reto̍ bra̱hmāyaṁ vā̱caḥ pa̍ra̱maṁ vyo̍ma || 1.164.35
sa̱ptārdha̍ga̱rbhā bhuva̍nasya̱ reto̱ viṣṇo̍stiṣṭhanti pra̱diśā̱ vidha̍rmaṇi |
te dhī̱tibhi̱rmana̍sā̱ te vi̍pa̱ścita̍ḥ pari̱bhuva̱ḥ pari̍ bhavanti vi̱śvata̍ḥ || 1.164.36
na vi jā̍nāmi̱ yadi̍ve̱damasmi̍ ni̱ṇyaḥ saṁna̍ddho̱ mana̍sā carāmi |
ya̱dā māga̍nprathama̱jā ṛ̱tasyādidvā̱co a̍śnuve bhā̱gama̱syāḥ || 1.164.37
apā̱ṅprāṅe̍ti sva̱dhayā̍ gṛbhī̱to'ma̍rtyo̱ martye̍nā̱ sayo̍niḥ |
tā śaśva̍ntā viṣū̱cīnā̍ vi̱yantā̱ nya1̱̍nyaṁ ci̱kyurna ni ci̍kyura̱nyam || 1.164.38
ṛ̱co a̱kṣare̍ para̱me vyo̍ma̱nyasmi̍nde̱vā adhi̱ viśve̍ niṣe̱duḥ |
yastanna veda̱ kimṛ̱cā ka̍riṣyati̱ ya ittadvi̱dusta i̱me samā̍sate || 1.164.39
sū̱ya̱va̱sādbhaga̍vatī̱ hi bhū̱yā atho̍ va̱yaṁ bhaga̍vantaḥ syāma |
a̱ddhi tṛṇa̍maghnye viśva̱dānī̱ṁ piba̍ śu̱ddhamu̍da̱kamā̱cara̍ntī || 1.164.40
gau̱rīrmi̍māya sali̱lāni̱ takṣa̱tyeka̍padī dvi̱padī̱ sā catu̍ṣpadī |
a̱ṣṭāpa̍dī̱ nava̍padī babhū̱vuṣī̍ sa̱hasrā̍kṣarā para̱me vyo̍man || 1.164.41
tasyā̍ḥ samu̱drā adhi̱ vi kṣa̍ranti̱ tena̍ jīvanti pra̱diśa̱ścata̍sraḥ |
tata̍ḥ kṣaratya̱kṣara̱ṁ tadviśva̱mupa̍ jīvati || 1.164.42
śa̱ka̱maya̍ṁ dhū̱mamā̱rāda̍paśyaṁ viṣū̱vatā̍ pa̱ra e̱nāva̍reṇa |
u̱kṣāṇa̱ṁ pṛśni̍mapacanta vī̱rāstāni̱ dharmā̍ṇi pratha̱mānyā̍san || 1.164.43
traya̍ḥ ke̱śina̍ ṛtu̱thā vi ca̍kṣate saṁvatsa̱re va̍pata̱ eka̍ eṣām |
viśva̱meko̍ a̱bhi ca̍ṣṭe̱ śacī̍bhi̱rdhrāji̱reka̍sya dadṛśe̱ na rū̱pam || 1.164.44
ca̱tvāri̱ vākpari̍mitā pa̱dāni̱ tāni̍ vidurbrāhma̱ṇā ye ma̍nī̱ṣiṇa̍ḥ |
guhā̱ trīṇi̱ nihi̍tā̱ neṅga̍yanti tu̱rīya̍ṁ vā̱co ma̍nu̱ṣyā̍ vadanti || 1.164.45
indra̍ṁ mi̱traṁ varu̍ṇama̱gnimā̍hu̱ratho̍ di̱vyaḥ sa su̍pa̱rṇo ga̱rutmā̍n |
eka̱ṁ sadviprā̍ bahu̱dhā va̍dantya̱gniṁ ya̱maṁ mā̍ta̱riśvā̍namāhuḥ || 1.164.46
kṛ̱ṣṇaṁ ni̱yāna̱ṁ hara̍yaḥ supa̱rṇā a̱po vasā̍nā̱ diva̱mutpa̍tanti |
ta āva̍vṛtra̱nsada̍nādṛ̱tasyādidghṛ̱tena̍ pṛthi̱vī vyu̍dyate || 1.164.47
dvāda̍śa pra̱dhaya̍śca̱krameka̱ṁ trīṇi̱ nabhyā̍ni̱ ka u̱ tacci̍keta |
tasmi̍nsā̱kaṁ tri̍śa̱tā na śa̱ṅkavo̍'rpi̱tāḥ ṣa̱ṣṭirna ca̍lāca̱lāsa̍ḥ || 1.164.48
yaste̱ stana̍ḥ śaśa̱yo yo ma̍yo̱bhūryena̱ viśvā̱ puṣya̍si̱ vāryā̍ṇi |
yo ra̍tna̱dhā va̍su̱vidyaḥ su̱datra̱ḥ sara̍svati̱ tami̱ha dhāta̍ve kaḥ || 1.164.49
ya̱jñena̍ ya̱jñama̍yajanta de̱vāstāni̱ dharmā̍ṇi pratha̱mānyā̍san |
te ha̱ nāka̍ṁ mahi̱māna̍ḥ sacanta̱ yatra̱ pūrve̍ sā̱dhyāḥ santi̍ de̱vāḥ || 1.164.50
sa̱mā̱name̱tadu̍da̱kamuccaityava̱ cāha̍bhiḥ |
bhūmi̍ṁ pa̱rjanyā̱ jinva̍nti̱ diva̍ṁ jinvantya̱gnaya̍ḥ || 1.164.51
di̱vyaṁ su̍pa̱rṇaṁ vā̍ya̱saṁ bṛ̱hanta̍ma̱pāṁ garbha̍ṁ darśa̱tamoṣa̍dhīnām |
a̱bhī̱pa̱to vṛ̱ṣṭibhi̍sta̱rpaya̍nta̱ṁ sara̍svanta̱mava̍se johavīmi || 1.164.52
kayā̍ śu̱bhā sava̍yasa̱ḥ sanī̍ḻāḥ samā̱nyā ma̱ruta̱ḥ saṁ mi̍mikṣuḥ |
kayā̍ ma̱tī kuta̱ etā̍sa e̱te'rca̍nti̱ śuṣma̱ṁ vṛṣa̍ṇo vasū̱yā || 1.165.01
kasya̱ brahmā̍ṇi jujuṣu̱ryuvā̍na̱ḥ ko a̍dhva̱re ma̱ruta̱ ā va̍varta |
śye̱nā i̍va̱ dhraja̍to a̱ntari̍kṣe̱ kena̍ ma̱hā mana̍sā rīramāma || 1.165.02
kuta̱stvami̍ndra̱ māhi̍na̱ḥ sanneko̍ yāsi satpate̱ kiṁ ta̍ i̱tthā |
saṁ pṛ̍cchase samarā̱ṇaḥ śu̍bhā̱nairvo̱cestanno̍ harivo̱ yatte̍ a̱sme || 1.165.03
brahmā̍ṇi me ma̱taya̱ḥ śaṁ su̱tāsa̱ḥ śuṣma̍ iyarti̱ prabhṛ̍to me̱ adri̍ḥ |
ā śā̍sate̱ prati̍ haryantyu̱kthemā harī̍ vahata̱stā no̱ accha̍ || 1.165.04
ato̍ va̱yama̍nta̱mebhi̍ryujā̱nāḥ svakṣa̍trebhista̱nva1̱̍ḥ śumbha̍mānāḥ |
maho̍bhi̱retā̱ upa̍ yujmahe̱ nvindra̍ sva̱dhāmanu̱ hi no̍ ba̱bhūtha̍ || 1.165.05
kva1̱̍ syā vo̍ marutaḥ sva̱dhāsī̱dyanmāmeka̍ṁ sa̱madha̍ttāhi̱hatye̍ |
a̱haṁ hyu1̱̍grasta̍vi̱ṣastuvi̍ṣmā̱nviśva̍sya̱ śatro̱rana̍maṁ vadha̱snaiḥ || 1.165.06
bhūri̍ cakartha̱ yujye̍bhira̱sme sa̍mā̱nebhi̍rvṛṣabha̱ pauṁsye̍bhiḥ |
bhūrī̍ṇi̱ hi kṛ̱ṇavā̍mā śavi̱ṣṭhendra̱ kratvā̍ maruto̱ yadvaśā̍ma || 1.165.07
vadhī̍ṁ vṛ̱traṁ ma̍ruta indri̱yeṇa̱ svena̱ bhāme̍na tavi̱ṣo ba̍bhū̱vān |
a̱hame̱tā mana̍ve vi̱śvaśca̍ndrāḥ su̱gā a̱paśca̍kara̱ vajra̍bāhuḥ || 1.165.08
anu̍tta̱mā te̍ maghava̱nnaki̱rnu na tvāvā̍ asti de̱vatā̱ vidā̍naḥ |
na jāya̍māno̱ naśa̍te̱ na jā̱to yāni̍ kari̱ṣyā kṛ̍ṇu̱hi pra̍vṛddha || 1.165.09
eka̍sya cinme vi̱bhva1̱̍stvojo̱ yā nu da̍dhṛ̱ṣvānkṛ̱ṇavai̍ manī̱ṣā |
a̱haṁ hyu1̱̍gro ma̍ruto̱ vidā̍no̱ yāni̱ cyava̱mindra̱ idī̍śa eṣām || 1.165.10
ama̍ndanmā maruta̱ḥ stomo̱ atra̱ yanme̍ nara̱ḥ śrutya̱ṁ brahma̍ ca̱kra |
indrā̍ya̱ vṛṣṇe̱ suma̍khāya̱ mahya̱ṁ sakhye̱ sakhā̍yasta̱nve̍ ta̱nūbhi̍ḥ || 1.165.11
e̱vede̱te prati̍ mā̱ roca̍mānā̱ ane̍dya̱ḥ śrava̱ eṣo̱ dadhā̍nāḥ |
sa̱ṁcakṣyā̍ marutaśca̱ndrava̍rṇā̱ acchā̍nta me cha̱dayā̍thā ca nū̱nam || 1.165.12
ko nvatra̍ maruto māmahe va̱ḥ pra yā̍tana̱ sakhī̱racchā̍ sakhāyaḥ |
manmā̍ni citrā apivā̱taya̍nta e̱ṣāṁ bhū̍ta̱ nave̍dā ma ṛ̱tānā̍m || 1.165.13
ā yaddu̍va̱syāddu̱vase̱ na kā̱rura̱smāñca̱kre mā̱nyasya̍ me̱dhā |
o ṣu va̍rtta maruto̱ vipra̱macche̱mā brahmā̍ṇi jari̱tā vo̍ arcat || 1.165.14
e̱ṣa va̱ḥ stomo̍ maruta i̱yaṁ gīrmā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṁ vi̱dyāme̱ṣaṁ vṛ̱jana̍ṁ jī̱radā̍num || 1.165.15
tannu vo̍cāma rabha̱sāya̱ janma̍ne̱ pūrva̍ṁ mahi̱tvaṁ vṛ̍ṣa̱bhasya̍ ke̱tave̍ |
ai̱dheva̱ yāma̍nmarutastuviṣvaṇo yu̱dheva̍ śakrāstavi̱ṣāṇi̍ kartana || 1.166.01
nitya̱ṁ na sū̱nuṁ madhu̱ bibhra̍ta̱ upa̱ krīḻa̍nti krī̱ḻā vi̱dathe̍ṣu̱ ghṛṣva̍yaḥ |
nakṣa̍nti ru̱drā ava̍sā nama̱svina̱ṁ na ma̍rdhanti̱ svata̍vaso havi̱ṣkṛta̍m || 1.166.02
yasmā̱ ūmā̍so a̱mṛtā̱ arā̍sata rā̱yaspoṣa̍ṁ ca ha̱viṣā̍ dadā̱śuṣe̍ |
u̱kṣantya̍smai ma̱ruto̍ hi̱tā i̍va pu̱rū rajā̍ṁsi̱ paya̍sā mayo̱bhuva̍ḥ || 1.166.03
ā ye rajā̍ṁsi̱ tavi̍ṣībhi̱ravya̍ta̱ pra va̱ evā̍sa̱ḥ svaya̍tāso adhrajan |
bhaya̍nte̱ viśvā̱ bhuva̍nāni ha̱rmyā ci̱tro vo̱ yāma̱ḥ praya̍tāsvṛ̱ṣṭiṣu̍ || 1.166.04
yattve̱ṣayā̍mā na̱daya̍nta̱ parva̍tāndi̱vo vā̍ pṛ̱ṣṭhaṁ naryā̱ acu̍cyavuḥ |
viśvo̍ vo̱ ajma̍nbhayate̱ vana̱spatī̍ rathī̱yantī̍va̱ pra ji̍hīta̱ oṣa̍dhiḥ || 1.166.05
yū̱yaṁ na̍ ugrā marutaḥ suce̱tunāri̍ṣṭagrāmāḥ suma̱tiṁ pi̍partana |
yatrā̍ vo di̱dyudrada̍ti̱ krivi̍rdatī ri̱ṇāti̍ pa̱śvaḥ sudhi̍teva ba̱rhaṇā̍ || 1.166.06
pra ska̱mbhade̍ṣṇā anava̱bhrarā̍dhaso'lātṛ̱ṇāso̍ vi̱dathe̍ṣu̱ suṣṭu̍tāḥ |
arca̍ntya̱rkaṁ ma̍di̱rasya̍ pī̱taye̍ vi̱durvī̱rasya̍ pratha̱māni̱ pauṁsyā̍ || 1.166.07
śa̱tabhu̍jibhi̱stama̱bhihru̍tera̱ghātpū̱rbhī ra̍kṣatā maruto̱ yamāva̍ta |
jana̱ṁ yamu̍grāstavaso virapśinaḥ pā̱thanā̱ śaṁsā̱ttana̍yasya pu̱ṣṭiṣu̍ || 1.166.08
viśvā̍ni bha̱drā ma̍ruto̱ rathe̍ṣu vo mitha̱spṛdhye̍va tavi̱ṣāṇyāhi̍tā |
aṁse̱ṣvā va̱ḥ prapa̍theṣu khā̱dayo'kṣo̍ vaśca̱krā sa̱mayā̱ vi vā̍vṛte || 1.166.09
bhūrī̍ṇi bha̱drā narye̍ṣu bā̱huṣu̱ vakṣa̍ssu ru̱kmā ra̍bha̱sāso̍ a̱ñjaya̍ḥ |
aṁse̱ṣvetā̍ḥ pa̱viṣu̍ kṣu̱rā adhi̱ vayo̱ na pa̱kṣānvyanu̱ śriyo̍ dhire || 1.166.10
ma̱hānto̍ ma̱hnā vi̱bhvo̱3̱̍ vibhū̍tayo dūre̱dṛśo̱ ye di̱vyā i̍va̱ stṛbhi̍ḥ |
ma̱ndrāḥ su̍ji̱hvāḥ svari̍tāra ā̱sabhi̱ḥ sammi̍ślā̱ indre̍ ma̱ruta̍ḥ pari̱ṣṭubha̍ḥ || 1.166.11
tadva̍ḥ sujātā maruto mahitva̱naṁ dī̱rghaṁ vo̍ dā̱tramadi̍teriva vra̱tam |
indra̍śca̱na tyaja̍sā̱ vi hru̍ṇāti̱ tajjanā̍ya̱ yasmai̍ su̱kṛte̱ arā̍dhvam || 1.166.12
tadvo̍ jāmi̱tvaṁ ma̍ruta̱ḥ pare̍ yu̱ge pu̱rū yacchaṁsa̍mamṛtāsa̱ āva̍ta |
a̱yā dhi̱yā mana̍ve śru̱ṣṭimāvyā̍ sā̱kaṁ naro̍ da̱ṁsanai̱rā ci̍kitrire || 1.166.13
yena̍ dī̱rghaṁ ma̍rutaḥ śū̱śavā̍ma yu̱ṣmāke̍na̱ parī̍ṇasā turāsaḥ |
ā yatta̱tana̍nvṛ̱jane̱ janā̍sa e̱bhirya̱jñebhi̱stada̱bhīṣṭi̍maśyām || 1.166.14
e̱ṣa va̱ḥ stomo̍ maruta i̱yaṁ gīrmā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṁ vi̱dyāme̱ṣaṁ vṛ̱jana̍ṁ jī̱radā̍num || 1.166.15
sa̱hasra̍ṁ ta indro̱tayo̍ naḥ sa̱hasra̱miṣo̍ harivo gū̱rtata̍māḥ |
sa̱hasra̱ṁ rāyo̍ māda̱yadhyai̍ saha̱sriṇa̱ upa̍ no yantu̱ vājā̍ḥ || 1.167.01
ā no'vo̍bhirma̱ruto̍ yā̱ntvacchā̱ jyeṣṭhe̍bhirvā bṛ̱haddi̍vaiḥ sumā̱yāḥ |
adha̱ yade̍ṣāṁ ni̱yuta̍ḥ para̱māḥ sa̍mu̱drasya̍ ciddha̱naya̍nta pā̱re || 1.167.02
mi̱myakṣa̱ yeṣu̱ sudhi̍tā ghṛ̱tācī̱ hira̍ṇyanirṇi̱gupa̍rā̱ na ṛ̱ṣṭiḥ |
guhā̱ cara̍ntī̱ manu̍ṣo̱ na yoṣā̍ sa̱bhāva̍tī vida̱thye̍va̱ saṁ vāk || 1.167.03
parā̍ śu̱bhrā a̱yāso̍ ya̱vyā sā̍dhāra̱ṇyeva̍ ma̱ruto̍ mimikṣuḥ |
na ro̍da̱sī apa̍ nudanta gho̱rā ju̱ṣanta̱ vṛdha̍ṁ sa̱khyāya̍ de̱vāḥ || 1.167.04
joṣa̱dyadī̍masu̱ryā̍ sa̱cadhyai̱ viṣi̍tastukā roda̱sī nṛ̱maṇā̍ḥ |
ā sū̱ryeva̍ vidha̱to ratha̍ṁ gāttve̱ṣapra̍tīkā̱ nabha̍so̱ netyā || 1.167.05
āsthā̍payanta yuva̱tiṁ yuvā̍naḥ śu̱bhe nimi̍ślāṁ vi̱dathe̍ṣu pa̱jrām |
a̱rko yadvo̍ maruto ha̱viṣmā̱ngāya̍dgā̱thaṁ su̱taso̍mo duva̱syan || 1.167.06
pra taṁ vi̍vakmi̱ vakmyo̱ ya e̍ṣāṁ ma̱rutā̍ṁ mahi̱mā sa̱tyo asti̍ |
sacā̱ yadī̱ṁ vṛṣa̍maṇā aha̱ṁyuḥ sthi̱rā ci̱jjanī̱rvaha̍te subhā̱gāḥ || 1.167.07
pānti̍ mi̱trāvaru̍ṇāvava̱dyāccaya̍ta īmarya̱mo apra̍śastān |
u̱ta cya̍vante̱ acyu̍tā dhru̱vāṇi̍ vāvṛ̱dha ī̍ṁ maruto̱ dāti̍vāraḥ || 1.167.08
na̱hī nu vo̍ maruto̱ antya̱sme ā̱rāttā̍cci̱cchava̍so̱ anta̍mā̱puḥ |
te dhṛ̱ṣṇunā̱ śava̍sā śūśu̱vāṁso'rṇo̱ na dveṣo̍ dhṛṣa̱tā pari̍ ṣṭhuḥ || 1.167.09
va̱yama̱dyendra̍sya̱ preṣṭhā̍ va̱yaṁ śvo vo̍cemahi sama̱rye |
va̱yaṁ pu̱rā mahi̍ ca no̱ anu̱ dyūntanna̍ ṛbhu̱kṣā na̱rāmanu̍ ṣyāt || 1.167.10
e̱ṣa va̱ḥ stomo̍ maruta i̱yaṁ gīrmā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṁ vi̱dyāme̱ṣaṁ vṛ̱jana̍ṁ jī̱radā̍num || 1.167.11
ya̱jñāya̍jñā vaḥ sama̱nā tu̍tu̱rvaṇi̱rdhiya̍ṁdhiyaṁ vo deva̱yā u̍ dadhidhve |
ā vo̱'rvāca̍ḥ suvi̱tāya̱ roda̍syorma̱he va̍vṛtyā̱mava̍se suvṛ̱ktibhi̍ḥ || 1.168.01
va̱vrāso̱ na ye sva̱jāḥ svata̍vasa̱ iṣa̱ṁ sva̍rabhi̱jāya̍nta̱ dhūta̍yaḥ |
sa̱ha̱sriyā̍so a̱pāṁ normaya̍ ā̱sā gāvo̱ vandyā̍so̱ nokṣaṇa̍ḥ || 1.168.02
somā̍so̱ na ye su̱tāstṛ̱ptāṁśa̍vo hṛ̱tsu pī̱tāso̍ du̱vaso̱ nāsa̍te |
aiṣā̱maṁse̍ṣu ra̱mbhiṇī̍va rārabhe̱ haste̍ṣu khā̱diśca̍ kṛ̱tiśca̱ saṁ da̍dhe || 1.168.03
ava̱ svayu̍ktā di̱va ā vṛthā̍ yayu̱rama̍rtyā̱ḥ kaśa̍yā codata̱ tmanā̍ |
a̱re̱ṇava̍stuvijā̱tā a̍cucyavurdṛ̱ḻhāni̍ cinma̱ruto̱ bhrāja̍dṛṣṭayaḥ || 1.168.04
ko vo̱'ntarma̍ruta ṛṣṭividyuto̱ reja̍ti̱ tmanā̱ hanve̍va ji̱hvayā̍ |
dha̱nva̱cyuta̍ i̱ṣāṁ na yāma̍ni puru̱praiṣā̍ aha̱nyo̱3̱̍ naita̍śaḥ || 1.168.05
kva̍ svida̱sya raja̍so ma̱haspara̱ṁ kvāva̍raṁ maruto̱ yasmi̍nnāya̱ya |
yaccyā̱vaya̍tha vithu̱reva̱ saṁhi̍ta̱ṁ vyadri̍ṇā patatha tve̱ṣama̍rṇa̱vam || 1.168.06
sā̱tirna vo'ma̍vatī̱ sva̍rvatī tve̱ṣā vipā̍kā maruta̱ḥ pipi̍ṣvatī |
bha̱drā vo̍ rā̱tiḥ pṛ̍ṇa̱to na dakṣi̍ṇā pṛthu̱jrayī̍ asu̱rye̍va̱ jañja̍tī || 1.168.07
prati̍ ṣṭobhanti̱ sindha̍vaḥ pa̱vibhyo̱ yada̱bhriyā̱ṁ vāca̍mudī̱raya̍nti |
ava̍ smayanta vi̱dyuta̍ḥ pṛthi̱vyāṁ yadī̍ ghṛ̱taṁ ma̱ruta̍ḥ pruṣṇu̱vanti̍ || 1.168.08
asū̍ta̱ pṛśni̍rmaha̱te raṇā̍ya tve̱ṣama̱yāsā̍ṁ ma̱rutā̱manī̍kam |
te sa̍psa̱rāso̍'janaya̱ntābhva̱māditsva̱dhāmi̍ṣi̱rāṁ parya̍paśyan || 1.168.09
e̱ṣa va̱ḥ stomo̍ maruta i̱yaṁ gīrmā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṁ vi̱dyāme̱ṣaṁ vṛ̱jana̍ṁ jī̱radā̍num || 1.168.10
ma̱haści̱ttvami̍ndra ya̱ta e̱tānma̱haści̍dasi̱ tyaja̍so varū̱tā |
sa no̍ vedho ma̱rutā̍ṁ ciki̱tvānsu̱mnā va̍nuṣva̱ tava̱ hi preṣṭhā̍ || 1.169.01
ayu̍jranta indra vi̱śvakṛ̍ṣṭīrvidā̱nāso̍ ni̱ṣṣidho̍ martya̱trā |
ma̱rutā̍ṁ pṛtsu̱tirhāsa̍mānā̱ sva̍rmīḻhasya pra̱dhana̍sya sā̱tau || 1.169.02
amya̱ksā ta̍ indra ṛ̱ṣṭira̱sme sane̱myabhva̍ṁ ma̱ruto̍ junanti |
a̱gniści̱ddhi ṣmā̍ta̱se śu̍śu̱kvānāpo̱ na dvī̱paṁ dadha̍ti̱ prayā̍ṁsi || 1.169.03
tvaṁ tū na̍ indra̱ taṁ ra̱yiṁ dā̱ oji̍ṣṭhayā̱ dakṣi̍ṇayeva rā̱tim |
stuta̍śca̱ yāste̍ ca̱kana̍nta vā̱yoḥ stana̱ṁ na madhva̍ḥ pīpayanta̱ vājai̍ḥ || 1.169.04
tve rāya̍ indra to̱śata̍māḥ praṇe̱tāra̱ḥ kasya̍ cidṛtā̱yoḥ |
te ṣu ṇo̍ ma̱ruto̍ mṛḻayantu̱ ye smā̍ pu̱rā gā̍tū̱yantī̍va de̱vāḥ || 1.169.05
prati̱ pra yā̍hīndra mī̱ḻhuṣo̱ nṝnma̱haḥ pārthi̍ve̱ sada̍ne yatasva |
adha̱ yade̍ṣāṁ pṛthubu̱dhnāsa̱ etā̍stī̱rthe nāryaḥ pauṁsyā̍ni ta̱sthuḥ || 1.169.06
prati̍ gho̱rāṇā̱metā̍nāma̱yāsā̍ṁ ma̱rutā̍ṁ śṛṇva āya̱tāmu̍pa̱bdiḥ |
ye martya̍ṁ pṛtanā̱yanta̱mūmai̍rṛṇā̱vāna̱ṁ na pa̱taya̍nta̱ sargai̍ḥ || 1.169.07
tvaṁ māne̍bhya indra vi̱śvaja̍nyā̱ radā̍ ma̱rudbhi̍ḥ śu̱rudho̱ goa̍grāḥ |
stavā̍nebhiḥ stavase deva de̱vairvi̱dyāme̱ṣaṁ vṛ̱jana̍ṁ jī̱radā̍num || 1.169.08
na nū̱namasti̱ no śvaḥ kastadve̍da̱ yadadbhu̍tam |
a̱nyasya̍ ci̱ttama̱bhi sa̍ṁca̱reṇya̍mu̱tādhī̍ta̱ṁ vi na̍śyati || 1.170.01
kiṁ na̍ indra jighāṁsasi̱ bhrāta̍ro ma̱ruta̱stava̍ |
tebhi̍ḥ kalpasva sādhu̱yā mā na̍ḥ sa̱mara̍ṇe vadhīḥ || 1.170.02
kiṁ no̍ bhrātaragastya̱ sakhā̱ sannati̍ manyase |
vi̱dmā hi te̱ yathā̱ mano̱'smabhya̱minna di̍tsasi || 1.170.03
ara̍ṁ kṛṇvantu̱ vedi̱ṁ sama̱gnimi̍ndhatāṁ pu̱raḥ |
tatrā̱mṛta̍sya̱ ceta̍naṁ ya̱jñaṁ te̍ tanavāvahai || 1.170.04
tvamī̍śiṣe vasupate̱ vasū̍nā̱ṁ tvaṁ mi̱trāṇā̍ṁ mitrapate̱ dheṣṭha̍ḥ |
indra̱ tvaṁ ma̱rudbhi̱ḥ saṁ va̍da̱svādha̱ prāśā̍na ṛtu̱thā ha̱vīṁṣi̍ || 1.170.05
prati̍ va e̱nā nama̍sā̱hame̍mi sū̱ktena̍ bhikṣe suma̱tiṁ tu̱rāṇā̍m |
ra̱rā̱ṇatā̍ maruto ve̱dyābhi̱rni heḻo̍ dha̱tta vi mu̍cadhva̱maśvā̍n || 1.171.01
e̱ṣa va̱ḥ stomo̍ maruto̱ nama̍svānhṛ̱dā ta̱ṣṭo mana̍sā dhāyi devāḥ |
upe̱mā yā̍ta̱ mana̍sā juṣā̱ṇā yū̱yaṁ hi ṣṭhā nama̍sa̱ idvṛ̱dhāsa̍ḥ || 1.171.02
stu̱tāso̍ no ma̱ruto̍ mṛḻayantū̱ta stu̱to ma̱ghavā̱ śambha̍viṣṭhaḥ |
ū̱rdhvā na̍ḥ santu ko̱myā vanā̱nyahā̍ni̱ viśvā̍ maruto jigī̱ṣā || 1.171.03
a̱smāda̱haṁ ta̍vi̱ṣādīṣa̍māṇa̱ indrā̍dbhi̱yā ma̍ruto̱ reja̍mānaḥ |
yu̱ṣmabhya̍ṁ ha̱vyā niśi̍tānyāsa̱ntānyā̱re ca̍kṛmā mṛ̱ḻatā̍ naḥ || 1.171.04
yena̱ mānā̍saści̱taya̍nta u̱srā vyu̍ṣṭiṣu̱ śava̍sā̱ śaśva̍tīnām |
sa no̍ ma̱rudbhi̍rvṛṣabha̱ śravo̍ dhā u̱gra u̱grebhi̱ḥ sthavi̍raḥ saho̱dāḥ || 1.171.05
tvaṁ pā̍hīndra̱ sahī̍yaso̱ nṝnbhavā̍ ma̱rudbhi̱rava̍yātaheḻāḥ |
su̱pra̱ke̱tebhi̍ḥ sāsa̱hirdadhā̍no vi̱dyāme̱ṣaṁ vṛ̱jana̍ṁ jī̱radā̍num || 1.171.06
ci̱tro vo̍'stu̱ yāma̍ści̱tra ū̱tī su̍dānavaḥ |
maru̍to̱ ahi̍bhānavaḥ || 1.172.01
ā̱re sā va̍ḥ sudānavo̱ maru̍ta ṛñja̱tī śaru̍ḥ |
ā̱re aśmā̱ yamasya̍tha || 1.172.02
tṛ̱ṇa̱ska̱ndasya̱ nu viśa̱ḥ pari̍ vṛṅkta sudānavaḥ |
ū̱rdhvānna̍ḥ karta jī̱vase̍ || 1.172.03
gāya̱tsāma̍ nabha̱nyaṁ1̱̍ yathā̱ verarcā̍ma̱ tadvā̍vṛdhā̱naṁ sva̍rvat |
gāvo̍ dhe̱navo̍ ba̱rhiṣyada̍bdhā̱ ā yatsa̱dmāna̍ṁ di̱vyaṁ vivā̍sān || 1.173.01
arca̱dvṛṣā̱ vṛṣa̍bhi̱ḥ svedu̍havyairmṛ̱go nāśno̱ ati̱ yajju̍gu̱ryāt |
pra ma̍nda̱yurma̱nāṁ gū̍rta̱ hotā̱ bhara̍te̱ maryo̍ mithu̱nā yaja̍traḥ || 1.173.02
nakṣa̱ddhotā̱ pari̱ sadma̍ mi̱tā yanbhara̱dgarbha̱mā śa̱rada̍ḥ pṛthi̱vyāḥ |
kranda̱daśvo̱ naya̍māno ru̱vadgaura̱ntardū̱to na roda̍sī cara̱dvāk || 1.173.03
tā ka̱rmāṣa̍tarāsmai̱ pra cyau̱tnāni̍ deva̱yanto̍ bharante |
jujo̍ṣa̱dindro̍ da̱smava̍rcā̱ nāsa̍tyeva̱ sugmyo̍ rathe̱ṣṭhāḥ || 1.173.04
tamu̍ ṣṭu̱hīndra̱ṁ yo ha̱ satvā̱ yaḥ śūro̍ ma̱ghavā̱ yo ra̍the̱ṣṭhāḥ |
pra̱tī̱caści̱dyodhī̍yā̱nvṛṣa̍ṇvānvava̱vruṣa̍ści̱ttama̍so viha̱ntā || 1.173.05
pra yadi̱tthā ma̍hi̱nā nṛbhyo̱ astyara̱ṁ roda̍sī ka̱kṣye̱3̱̍ nāsmai̍ |
saṁ vi̍vya̱ indro̍ vṛ̱jana̱ṁ na bhūmā̱ bharti̍ sva̱dhāvā̍ opa̱śami̍va̱ dyām || 1.173.06
sa̱matsu̍ tvā śūra sa̱tāmu̍rā̱ṇaṁ pra̍pa̱thinta̍maṁ paritaṁsa̱yadhyai̍ |
sa̱joṣa̍sa̱ indra̱ṁ made̍ kṣo̱ṇīḥ sū̱riṁ ci̱dye a̍nu̱mada̍nti̱ vājai̍ḥ || 1.173.07
e̱vā hi te̱ śaṁ sava̍nā samu̱dra āpo̱ yatta̍ ā̱su mada̍nti de̱vīḥ |
viśvā̍ te̱ anu̱ joṣyā̍ bhū̱dgauḥ sū̱rīści̱dyadi̍ dhi̱ṣā veṣi̱ janā̍n || 1.173.08
asā̍ma̱ yathā̍ suṣa̱khāya̍ ena svabhi̱ṣṭayo̍ na̱rāṁ na śaṁsai̍ḥ |
asa̱dyathā̍ na̱ indro̍ vandane̱ṣṭhāstu̱ro na karma̱ naya̍māna u̱kthā || 1.173.09
viṣpa̍rdhaso na̱rāṁ na śaṁsai̍ra̱smākā̍sa̱dindro̱ vajra̍hastaḥ |
mi̱trā̱yuvo̱ na pūrpa̍ti̱ṁ suśi̍ṣṭau madhyā̱yuva̱ upa̍ śikṣanti ya̱jñaiḥ || 1.173.10
ya̱jño hi ṣmendra̱ṁ kaści̍dṛ̱ndhañju̍hurā̱ṇaści̱nmana̍sā pari̱yan |
tī̱rthe nācchā̍ tātṛṣā̱ṇamoko̍ dī̱rgho na si̱dhramā kṛ̍ṇo̱tyadhvā̍ || 1.173.11
mo ṣū ṇa̍ i̱ndrātra̍ pṛ̱tsu de̱vairasti̱ hi ṣmā̍ te śuṣminnava̱yāḥ |
ma̱haści̱dyasya̍ mī̱ḻhuṣo̍ ya̱vyā ha̱viṣma̍to ma̱ruto̱ vanda̍te̱ gīḥ || 1.173.12
e̱ṣa stoma̍ indra̱ tubhya̍ma̱sme e̱tena̍ gā̱tuṁ ha̍rivo vido naḥ |
ā no̍ vavṛtyāḥ suvi̱tāya̍ deva vi̱dyāme̱ṣaṁ vṛ̱jana̍ṁ jī̱radā̍num || 1.173.13
tvaṁ rāje̍ndra̱ ye ca̍ de̱vā rakṣā̱ nṝnpā̱hya̍sura̱ tvama̱smān |
tvaṁ satpa̍tirma̱ghavā̍ na̱staru̍tra̱stvaṁ sa̱tyo vasa̍vānaḥ saho̱dāḥ || 1.174.01
dano̱ viśa̍ indra mṛ̱dhravā̍caḥ sa̱pta yatpura̱ḥ śarma̱ śāra̍dī̱rdart |
ṛ̱ṇora̱po a̍nava̱dyārṇā̱ yūne̍ vṛ̱traṁ pu̍ru̱kutsā̍ya randhīḥ || 1.174.02
ajā̱ vṛta̍ indra̱ śūra̍patnī̱rdyāṁ ca̱ yebhi̍ḥ puruhūta nū̱nam |
rakṣo̍ a̱gnima̱śuṣa̱ṁ tūrva̍yāṇaṁ si̱ṁho na dame̱ apā̍ṁsi̱ vasto̍ḥ || 1.174.03
śeṣa̱nnu ta i̍ndra̱ sasmi̱nyonau̱ praśa̍staye̱ pavī̍ravasya ma̱hnā |
sṛ̱jadarṇā̱ṁsyava̱ yadyu̱dhā gāstiṣṭha̱ddharī̍ dhṛṣa̱tā mṛ̍ṣṭa̱ vājā̍n || 1.174.04
vaha̱ kutsa̍mindra̱ yasmi̍ñcā̱kansyū̍ma̱nyū ṛ̱jrā vāta̱syāśvā̍ |
pra sūra̍śca̱kraṁ vṛ̍hatāda̱bhīke̱'bhi spṛdho̍ yāsiṣa̱dvajra̍bāhuḥ || 1.174.05
ja̱gha̱nvā i̍ndra mi̱trerū̍ñco̱dapra̍vṛddho harivo̱ adā̍śūn |
pra ye paśya̍nnarya̱maṇa̱ṁ sacā̱yostvayā̍ śū̱rtā vaha̍mānā̱ apa̍tyam || 1.174.06
rapa̍tka̱viri̍ndrā̱rkasā̍tau̱ kṣāṁ dā̱sāyo̍pa̱barha̍ṇīṁ kaḥ |
kara̍tti̱sro ma̱ghavā̱ dānu̍citrā̱ ni du̍ryo̱ṇe kuya̍vācaṁ mṛ̱dhi śre̍t || 1.174.07
sanā̱ tā ta̍ indra̱ navyā̱ āgu̱ḥ saho̱ nabho'vi̍raṇāya pū̱rvīḥ |
bhi̱natpuro̱ na bhido̱ ade̍vīrna̱namo̱ vadha̱rade̍vasya pī̱yoḥ || 1.174.08
tvaṁ dhuni̍rindra̱ dhuni̍matīrṛ̱ṇora̱paḥ sī̱rā na srava̍ntīḥ |
pra yatsa̍mu̱dramati̍ śūra̱ parṣi̍ pā̱rayā̍ tu̱rvaśa̱ṁ yadu̍ṁ sva̱sti || 1.174.09
tvama̱smāka̍mindra vi̱śvadha̍ syā avṛ̱kata̍mo na̱rāṁ nṛ̍pā̱tā |
sa no̱ viśvā̍sāṁ spṛ̱dhāṁ sa̍ho̱dā vi̱dyāme̱ṣaṁ vṛ̱jana̍ṁ jī̱radā̍num || 1.174.10
matsyapā̍yi te̱ maha̱ḥ pātra̍syeva harivo matsa̱ro mada̍ḥ |
vṛṣā̍ te̱ vṛṣṇa̱ indu̍rvā̱jī sa̍hasra̱sāta̍maḥ || 1.175.01
ā na̍ste gantu matsa̱ro vṛṣā̱ mado̱ vare̍ṇyaḥ |
sa̱hāvā̍ indra sāna̱siḥ pṛ̍tanā̱ṣāḻama̍rtyaḥ || 1.175.02
tvaṁ hi śūra̱ḥ sani̍tā co̱dayo̱ manu̍ṣo̱ ratha̍m |
sa̱hāvā̱ndasyu̍mavra̱tamoṣa̱ḥ pātra̱ṁ na śo̱ciṣā̍ || 1.175.03
mu̱ṣā̱ya sūrya̍ṁ kave ca̱kramīśā̍na̱ oja̍sā |
vaha̱ śuṣṇā̍ya va̱dhaṁ kutsa̱ṁ vāta̱syāśvai̍ḥ || 1.175.04
śu̱ṣminta̍mo̱ hi te̱ mado̍ dyu̱mninta̍ma u̱ta kratu̍ḥ |
vṛ̱tra̱ghnā va̍rivo̱vidā̍ maṁsī̱ṣṭhā a̍śva̱sāta̍maḥ || 1.175.05
yathā̱ pūrve̍bhyo jari̱tṛbhya̍ indra̱ maya̍ i̱vāpo̱ na tṛṣya̍te ba̱bhūtha̍ |
tāmanu̍ tvā ni̱vida̍ṁ johavīmi vi̱dyāme̱ṣaṁ vṛ̱jana̍ṁ jī̱radā̍num || 1.175.06
matsi̍ no̱ vasya̍iṣṭaya̱ indra̍mindo̱ vṛṣā vi̍śa |
ṛ̱ghā̱yamā̍ṇa invasi̱ śatru̱manti̱ na vi̍ndasi || 1.176.01
tasmi̱nnā ve̍śayā̱ giro̱ ya eka̍ścarṣaṇī̱nām |
anu̍ sva̱dhā yamu̱pyate̱ yava̱ṁ na carkṛ̍ṣa̱dvṛṣā̍ || 1.176.02
yasya̱ viśvā̍ni̱ hasta̍yo̱ḥ pañca̍ kṣitī̱nāṁ vasu̍ |
spā̱śaya̍sva̱ yo a̍sma̱dhrugdi̱vyevā̱śani̍rjahi || 1.176.03
asu̍nvantaṁ samaṁ jahi dū̱ṇāśa̱ṁ yo na te̱ maya̍ḥ |
a̱smabhya̍masya̱ veda̍naṁ da̱ddhi sū̱riści̍dohate || 1.176.04
āvo̱ yasya̍ dvi̱barha̍so̱'rkeṣu̍ sānu̱ṣagasa̍t |
ā̱jāvindra̍syendo̱ prāvo̱ vāje̍ṣu vā̱jina̍m || 1.176.05
yathā̱ pūrve̍bhyo jari̱tṛbhya̍ indra̱ maya̍ i̱vāpo̱ na tṛṣya̍te ba̱bhūtha̍ |
tāmanu̍ tvā ni̱vida̍ṁ johavīmi vi̱dyāme̱ṣaṁ vṛ̱jana̍ṁ jī̱radā̍num || 1.176.06
ā ca̍rṣaṇi̱prā vṛ̍ṣa̱bho janā̍nā̱ṁ rājā̍ kṛṣṭī̱nāṁ pu̍ruhū̱ta indra̍ḥ |
stu̱taḥ śra̍va̱syannava̱sopa̍ ma̱drigyu̱ktvā harī̱ vṛṣa̱ṇā yā̍hya̱rvāṅ || 1.177.01
ye te̱ vṛṣa̍ṇo vṛṣa̱bhāsa̍ indra brahma̱yujo̱ vṛṣa̍rathāso̱ atyā̍ḥ |
tā ā ti̍ṣṭha̱ tebhi̱rā yā̍hya̱rvāṅhavā̍mahe tvā su̱ta i̍ndra̱ some̍ || 1.177.02
ā ti̍ṣṭha̱ ratha̱ṁ vṛṣa̍ṇa̱ṁ vṛṣā̍ te su̱taḥ soma̱ḥ pari̍ṣiktā̱ madhū̍ni |
yu̱ktvā vṛṣa̍bhyāṁ vṛṣabha kṣitī̱nāṁ hari̍bhyāṁ yāhi pra̱vatopa̍ ma̱drik || 1.177.03
a̱yaṁ ya̱jño de̍va̱yā a̱yaṁ mi̱yedha̍ i̱mā brahmā̍ṇya̱yami̍ndra̱ soma̍ḥ |
stī̱rṇaṁ ba̱rhirā tu śa̍kra̱ pra yā̍hi̱ pibā̍ ni̱ṣadya̱ vi mu̍cā̱ harī̍ i̱ha || 1.177.04
o suṣṭu̍ta indra yāhya̱rvāṅupa̱ brahmā̍ṇi mā̱nyasya̍ kā̱roḥ |
vi̱dyāma̱ vasto̱rava̍sā gṛ̱ṇanto̍ vi̱dyāme̱ṣaṁ vṛ̱jana̍ṁ jī̱radā̍num || 1.177.05
yaddha̱ syā ta̍ indra śru̱ṣṭirasti̱ yayā̍ ba̱bhūtha̍ jari̱tṛbhya̍ ū̱tī |
mā na̱ḥ kāma̍ṁ ma̱haya̍nta̱mā dha̱gviśvā̍ te aśyā̱ṁ paryāpa̍ ā̱yoḥ || 1.178.01
na ghā̱ rājendra̱ ā da̍bhanno̱ yā nu svasā̍rā kṛ̱ṇava̍nta̱ yonau̍ |
āpa̍ścidasmai su̱tukā̍ aveṣa̱ngama̍nna̱ indra̍ḥ sa̱khyā vaya̍śca || 1.178.02
jetā̱ nṛbhi̱rindra̍ḥ pṛ̱tsu śūra̱ḥ śrotā̱ hava̱ṁ nādha̍mānasya kā̱roḥ |
prabha̍rtā̱ ratha̍ṁ dā̱śuṣa̍ upā̱ka udya̍ntā̱ giro̱ yadi̍ ca̱ tmanā̱ bhūt || 1.178.03
e̱vā nṛbhi̱rindra̍ḥ suśrava̱syā pra̍khā̱daḥ pṛ̱kṣo a̱bhi mi̱triṇo̍ bhūt |
sa̱ma̱rya i̱ṣaḥ sta̍vate̱ vivā̍ci satrāka̱ro yaja̍mānasya̱ śaṁsa̍ḥ || 1.178.04
tvayā̍ va̱yaṁ ma̍ghavannindra̱ śatrū̍na̱bhi ṣyā̍ma maha̱to manya̍mānān |
tvaṁ trā̱tā tvamu̍ no vṛ̱dhe bhū̍rvi̱dyāme̱ṣaṁ vṛ̱jana̍ṁ jī̱radā̍num || 1.178.05
pū̱rvīra̱haṁ śa̱rada̍ḥ śaśramā̱ṇā do̱ṣā vasto̍ru̱ṣaso̍ ja̱raya̍ntīḥ |
mi̱nāti̱ śriya̍ṁ jari̱mā ta̱nūnā̱mapyū̱ nu patnī̱rvṛṣa̍ṇo jagamyuḥ || 1.179.01
ye ci̱ddhi pūrva̍ ṛta̱sāpa̱ āsa̍nsā̱kaṁ de̱vebhi̱rava̍dannṛ̱tāni̍ |
te ci̱davā̍surna̱hyanta̍mā̱puḥ samū̱ nu patnī̱rvṛṣa̍bhirjagamyuḥ || 1.179.02
na mṛṣā̍ śrā̱ntaṁ yadava̍nti de̱vā viśvā̱ itspṛdho̍ a̱bhya̍śnavāva |
jayā̱vedatra̍ śa̱tanī̍thamā̱jiṁ yatsa̱myañcā̍ mithu̱nāva̱bhyajā̍va || 1.179.03
na̱dasya̍ mā rudha̱taḥ kāma̱ āga̍nni̱ta ājā̍to a̱muta̱ḥ kuta̍ścit |
lopā̍mudrā̱ vṛṣa̍ṇa̱ṁ nī ri̍ṇāti̱ dhīra̱madhī̍rā dhayati śva̱santa̍m || 1.179.04
i̱maṁ nu soma̱manti̍to hṛ̱tsu pī̱tamupa̍ bruve |
yatsī̱māga̍ścakṛ̱mā tatsu mṛ̍ḻatu pulu̱kāmo̱ hi martya̍ḥ || 1.179.05
a̱gastya̱ḥ khana̍mānaḥ kha̱nitrai̍ḥ pra̱jāmapa̍tya̱ṁ bala̍mi̱cchamā̍naḥ |
u̱bhau varṇā̱vṛṣi̍ru̱graḥ pu̍poṣa sa̱tyā de̱veṣvā̱śiṣo̍ jagāma || 1.179.06
yu̱vo rajā̍ṁsi su̱yamā̍so̱ aśvā̱ ratho̱ yadvā̱ṁ paryarṇā̍ṁsi̱ dīya̍t |
hi̱ra̱ṇyayā̍ vāṁ pa̱vaya̍ḥ pruṣāya̱nmadhva̱ḥ piba̍ntā u̱ṣasa̍ḥ sacethe || 1.180.01
yu̱vamatya̱syāva̍ nakṣatho̱ yadvipa̍tmano̱ narya̍sya̱ praya̍jyoḥ |
svasā̱ yadvā̍ṁ viśvagūrtī̱ bharā̍ti̱ vājā̱yeṭṭe̍ madhupāvi̱ṣe ca̍ || 1.180.02
yu̱vaṁ paya̍ u̱sriyā̍yāmadhattaṁ pa̱kvamā̱māyā̱mava̱ pūrvya̱ṁ goḥ |
a̱ntaryadva̱nino̍ vāmṛtapsū hvā̱ro na śuci̱ryaja̍te ha̱viṣmā̍n || 1.180.03
yu̱vaṁ ha̍ gha̱rmaṁ madhu̍manta̱matra̍ye̱'po na kṣodo̍'vṛṇītame̱ṣe |
tadvā̍ṁ narāvaśvinā̱ paśva̍iṣṭī̱ rathye̍va ca̱krā prati̍ yanti̱ madhva̍ḥ || 1.180.04
ā vā̍ṁ dā̱nāya̍ vavṛtīya dasrā̱ gorohe̍ṇa tau̱gryo na jivri̍ḥ |
a̱paḥ kṣo̱ṇī sa̍cate̱ māhi̍nā vāṁ jū̱rṇo vā̱makṣu̱raṁha̍so yajatrā || 1.180.05
ni yadyu̱vethe̍ ni̱yuta̍ḥ sudānū̱ upa̍ sva̱dhābhi̍ḥ sṛjatha̱ḥ pura̍ṁdhim |
preṣa̱dveṣa̱dvāto̱ na sū̱rirā ma̱he da̍de suvra̱to na vāja̍m || 1.180.06
va̱yaṁ ci̱ddhi vā̍ṁ jari̱tāra̍ḥ sa̱tyā vi̍pa̱nyāma̍he̱ vi pa̱ṇirhi̱tāvā̍n |
adhā̍ ci̱ddhi ṣmā̍śvināvanindyā pā̱tho hi ṣmā̍ vṛṣaṇā̱vanti̍devam || 1.180.07
yu̱vāṁ ci̱ddhi ṣmā̍śvinā̱vanu̱ dyūnviru̍drasya pra̱srava̍ṇasya sā̱tau |
a̱gastyo̍ na̱rāṁ nṛṣu̱ praśa̍sta̱ḥ kārā̍dhunīva citayatsa̱hasrai̍ḥ || 1.180.08
pra yadvahe̍the mahi̱nā ratha̍sya̱ pra sya̍ndrā yātho̱ manu̍ṣo̱ na hotā̍ |
dha̱ttaṁ sū̱ribhya̍ u̱ta vā̱ svaśvya̱ṁ nāsa̍tyā rayi̱ṣāca̍ḥ syāma || 1.180.09
taṁ vā̱ṁ ratha̍ṁ va̱yama̱dyā hu̍vema̱ stomai̍raśvinā suvi̱tāya̱ navya̍m |
ari̍ṣṭanemi̱ṁ pari̱ dyāmi̍yā̱naṁ vi̱dyāme̱ṣaṁ vṛ̱jana̍ṁ jī̱radā̍num || 1.180.10
kadu̱ preṣṭā̍vi̱ṣāṁ ra̍yī̱ṇāma̍dhva̱ryantā̱ yadu̍nninī̱tho a̱pām |
a̱yaṁ vā̍ṁ ya̱jño a̍kṛta̱ praśa̍sti̱ṁ vasu̍dhitī̱ avi̍tārā janānām || 1.181.01
ā vā̱maśvā̍sa̱ḥ śuca̍yaḥ paya̱spā vāta̍raṁhaso di̱vyāso̱ atyā̍ḥ |
ma̱no̱juvo̱ vṛṣa̍ṇo vī̱tapṛ̍ṣṭhā̱ eha sva̱rājo̍ a̱śvinā̍ vahantu || 1.181.02
ā vā̱ṁ ratho̱'vani̱rna pra̱vatvā̍nsṛ̱prava̍ndhuraḥ suvi̱tāya̍ gamyāḥ |
vṛṣṇa̍ḥ sthātārā̱ mana̍so̱ javī̍yānahampū̱rvo ya̍ja̱to dhi̍ṣṇyā̱ yaḥ || 1.181.03
i̱heha̍ jā̱tā sama̍vāvaśītāmare̱pasā̍ ta̱nvā̱3̱̍ nāma̍bhi̱ḥ svaiḥ |
ji̱ṣṇurvā̍ma̱nyaḥ suma̍khasya sū̱rirdi̱vo a̱nyaḥ su̱bhaga̍ḥ pu̱tra ū̍he || 1.181.04
pra vā̍ṁ nice̱ruḥ ka̍ku̱ho vaśā̱ anu̍ pi̱śaṅga̍rūpa̱ḥ sada̍nāni gamyāḥ |
harī̍ a̱nyasya̍ pī̱paya̍nta̱ vājai̍rma̱thrā rajā̍ṁsyaśvinā̱ vi ghoṣai̍ḥ || 1.181.05
pra vā̍ṁ śa̱radvā̍nvṛṣa̱bho na ni̱ṣṣāṭ pū̱rvīriṣa̍ścarati̱ madhva̍ i̱ṣṇan |
evai̍ra̱nyasya̍ pī̱paya̍nta̱ vājai̱rveṣa̍ntīrū̱rdhvā na̱dyo̍ na̱ āgu̍ḥ || 1.181.06
asa̍rji vā̱ṁ sthavi̍rā vedhasā̱ gīrbā̱ḻhe a̍śvinā tre̱dhā kṣara̍ntī |
upa̍stutāvavata̱ṁ nādha̍māna̱ṁ yāma̱nnayā̍mañchṛṇuta̱ṁ hava̍ṁ me || 1.181.07
u̱ta syā vā̱ṁ ruśa̍to̱ vapsa̍so̱ gīstri̍ba̱rhiṣi̱ sada̍si pinvate̱ nṝn |
vṛṣā̍ vāṁ me̱gho vṛ̍ṣaṇā pīpāya̱ gorna seke̱ manu̍ṣo daśa̱syan || 1.181.08
yu̱vāṁ pū̱ṣevā̍śvinā̱ pura̍ṁdhira̱gnimu̱ṣāṁ na ja̍rate ha̱viṣmā̍n |
hu̱ve yadvā̍ṁ variva̱syā gṛ̍ṇā̱no vi̱dyāme̱ṣaṁ vṛ̱jana̍ṁ jī̱radā̍num || 1.181.09
abhū̍di̱daṁ va̱yuna̱mo ṣu bhū̍ṣatā̱ ratho̱ vṛṣa̍ṇvā̱nmada̍tā manīṣiṇaḥ |
dhi̱ya̱ṁji̱nvā dhiṣṇyā̍ vi̱śpalā̍vasū di̱vo napā̍tā su̱kṛte̱ śuci̍vratā || 1.182.01
indra̍tamā̱ hi dhiṣṇyā̍ ma̱rutta̍mā da̱srā daṁsi̍ṣṭhā ra̱thyā̍ ra̱thīta̍mā |
pū̱rṇaṁ ratha̍ṁ vahethe̱ madhva̱ āci̍ta̱ṁ tena̍ dā̱śvāṁsa̱mupa̍ yātho aśvinā || 1.182.02
kimatra̍ dasrā kṛṇutha̱ḥ kimā̍sāthe̱ jano̱ yaḥ kaści̱daha̍virmahī̱yate̍ |
ati̍ kramiṣṭaṁ ju̱rata̍ṁ pa̱ṇerasu̱ṁ jyoti̱rviprā̍ya kṛṇutaṁ vaca̱syave̍ || 1.182.03
ja̱mbhaya̍tama̱bhito̱ rāya̍ta̱ḥ śuno̍ ha̱taṁ mṛdho̍ vi̱dathu̱stānya̍śvinā |
vāca̍ṁvācaṁ jari̱tū ra̱tninī̍ṁ kṛtamu̱bhā śaṁsa̍ṁ nāsatyāvata̱ṁ mama̍ || 1.182.04
yu̱vame̱taṁ ca̍krathu̱ḥ sindhu̍ṣu pla̱vamā̍tma̱nvanta̍ṁ pa̱kṣiṇa̍ṁ tau̱gryāya̱ kam |
yena̍ deva̱trā mana̍sā nirū̱hathu̍ḥ supapta̱nī pe̍tathu̱ḥ kṣoda̍so ma̱haḥ || 1.182.05
ava̍viddhaṁ tau̱gryama̱psva1̱̍ntara̍nārambha̱ṇe tama̍si̱ pravi̍ddham |
cata̍sro̱ nāvo̱ jaṭha̍lasya̱ juṣṭā̱ uda̱śvibhyā̍miṣi̱tāḥ pā̍rayanti || 1.182.06
kaḥ svi̍dvṛ̱kṣo niṣṭhi̍to̱ madhye̱ arṇa̍so̱ yaṁ tau̱gryo nā̍dhi̱taḥ pa̱ryaṣa̍svajat |
pa̱rṇā mṛ̱gasya̍ pa̱taro̍rivā̱rabha̱ uda̍śvinā ūhathu̱ḥ śroma̍tāya̱ kam || 1.182.07
tadvā̍ṁ narā nāsatyā̱vanu̍ ṣyā̱dyadvā̱ṁ mānā̍sa u̱catha̱mavo̍can |
a̱smāda̱dya sada̍saḥ so̱myādā vi̱dyāme̱ṣaṁ vṛ̱jana̍ṁ jī̱radā̍num || 1.182.08
taṁ yu̍ñjāthā̱ṁ mana̍so̱ yo javī̍yāntrivandhu̱ro vṛ̍ṣaṇā̱ yastri̍ca̱kraḥ |
yeno̍payā̱thaḥ su̱kṛto̍ duro̱ṇaṁ tri̱dhātu̍nā patatho̱ virna pa̱rṇaiḥ || 1.183.01
su̱vṛdratho̍ vartate̱ yanna̱bhi kṣāṁ yattiṣṭha̍tha̱ḥ kratu̍ma̱ntānu̍ pṛ̱kṣe |
vapu̍rvapu̱ṣyā sa̍catāmi̱yaṁ gīrdi̱vo du̍hi̱troṣasā̍ sacethe || 1.183.02
ā ti̍ṣṭhataṁ su̱vṛta̱ṁ yo ratho̍ vā̱manu̍ vra̱tāni̱ varta̍te ha̱viṣmā̍n |
yena̍ narā nāsatyeṣa̱yadhyai̍ va̱rtiryā̱thastana̍yāya̱ tmane̍ ca || 1.183.03
mā vā̱ṁ vṛko̱ mā vṛ̱kīrā da̍dharṣī̱nmā pari̍ varktamu̱ta māti̍ dhaktam |
a̱yaṁ vā̍ṁ bhā̱go nihi̍ta i̱yaṁ gīrdasrā̍vi̱me vā̍ṁ ni̱dhayo̱ madhū̍nām || 1.183.04
yu̱vāṁ gota̍maḥ purumī̱ḻho atri̱rdasrā̱ hava̱te'va̍se ha̱viṣmā̍n |
diśa̱ṁ na di̱ṣṭāmṛ̍jū̱yeva̱ yantā me̱ hava̍ṁ nāsa̱tyopa̍ yātam || 1.183.05
atā̍riṣma̱ tama̍saspā̱rama̱sya prati̍ vā̱ṁ stomo̍ aśvināvadhāyi |
eha yā̍taṁ pa̱thibhi̍rdeva̱yānai̍rvi̱dyāme̱ṣaṁ vṛ̱jana̍ṁ jī̱radā̍num || 1.183.06
tā vā̍ma̱dya tāva̍pa̱raṁ hu̍vemo̱cchantyā̍mu̱ṣasi̱ vahni̍ru̱kthaiḥ |
nāsa̍tyā̱ kuha̍ ci̱tsantā̍va̱ryo di̱vo napā̍tā su̱dāsta̍rāya || 1.184.01
a̱sme ū̱ ṣu vṛ̍ṣaṇā mādayethā̱mutpa̱ṇīrha̍tamū̱rmyā mada̍ntā |
śru̱taṁ me̱ accho̍ktibhirmatī̱nāmeṣṭā̍ narā̱ nice̍tārā ca̱ karṇai̍ḥ || 1.184.02
śri̱ye pū̍ṣanniṣu̱kṛte̍va de̱vā nāsa̍tyā vaha̱tuṁ sū̱ryāyā̍ḥ |
va̱cyante̍ vāṁ kaku̱hā a̱psu jā̱tā yu̱gā jū̱rṇeva̱ varu̍ṇasya̱ bhūre̍ḥ || 1.184.03
a̱sme sā vā̍ṁ mādhvī rā̱tira̍stu̱ stoma̍ṁ hinotaṁ mā̱nyasya̍ kā̱roḥ |
anu̱ yadvā̍ṁ śrava̱syā̍ sudānū su̱vīryā̍ya carṣa̱ṇayo̱ mada̍nti || 1.184.04
e̱ṣa vā̱ṁ stomo̍ aśvināvakāri̱ māne̍bhirmaghavānā suvṛ̱kti |
yā̱taṁ va̱rtistana̍yāya̱ tmane̍ cā̱gastye̍ nāsatyā̱ mada̍ntā || 1.184.05
atā̍riṣma̱ tama̍saspā̱rama̱sya prati̍ vā̱ṁ stomo̍ aśvināvadhāyi |
eha yā̍taṁ pa̱thibhi̍rdeva̱yānai̍rvi̱dyāme̱ṣaṁ vṛ̱jana̍ṁ jī̱radā̍num || 1.184.06
ka̱ta̱rā pūrvā̍ kata̱rāpa̍rā̱yoḥ ka̱thā jā̱te ka̍vaya̱ḥ ko vi ve̍da |
viśva̱ṁ tmanā̍ bibhṛto̱ yaddha̱ nāma̱ vi va̍rtete̱ aha̍nī ca̱kriye̍va || 1.185.01
bhūri̱ṁ dve aca̍rantī̱ cara̍ntaṁ pa̱dvanta̱ṁ garbha̍ma̱padī̍ dadhāte |
nitya̱ṁ na sū̱nuṁ pi̱troru̱pasthe̱ dyāvā̱ rakṣa̍taṁ pṛthivī no̱ abhvā̍t || 1.185.02
a̱ne̱ho dā̱tramadi̍terana̱rvaṁ hu̱ve sva̍rvadava̱dhaṁ nama̍svat |
tadro̍dasī janayataṁ jari̱tre dyāvā̱ rakṣa̍taṁ pṛthivī no̱ abhvā̍t || 1.185.03
ata̍pyamāne̱ ava̱sāva̍ntī̱ anu̍ ṣyāma̱ roda̍sī de̱vapu̍tre |
u̱bhe de̱vānā̍mu̱bhaye̍bhi̱rahnā̱ṁ dyāvā̱ rakṣa̍taṁ pṛthivī no̱ abhvā̍t || 1.185.04
sa̱ṁgaccha̍māne yuva̱tī sama̍nte̱ svasā̍rā jā̱mī pi̱troru̱pasthe̍ |
a̱bhi̱jighra̍ntī̱ bhuva̍nasya̱ nābhi̱ṁ dyāvā̱ rakṣa̍taṁ pṛthivī no̱ abhvā̍t || 1.185.05
u̱rvī sadma̍nī bṛha̱tī ṛ̱tena̍ hu̱ve de̱vānā̱mava̍sā̱ jani̍trī |
da̱dhāte̱ ye a̱mṛta̍ṁ su̱pratī̍ke̱ dyāvā̱ rakṣa̍taṁ pṛthivī no̱ abhvā̍t || 1.185.06
u̱rvī pṛ̱thvī ba̍hu̱le dū̱rea̍nte̱ upa̍ bruve̱ nama̍sā ya̱jñe a̱smin |
da̱dhāte̱ ye su̱bhage̍ su̱pratū̍rtī̱ dyāvā̱ rakṣa̍taṁ pṛthivī no̱ abhvā̍t || 1.185.07
de̱vānvā̱ yacca̍kṛ̱mā kacci̱dāga̱ḥ sakhā̍yaṁ vā̱ sada̱mijjāspa̍tiṁ vā |
i̱yaṁ dhīrbhū̍yā ava̱yāna̍meṣā̱ṁ dyāvā̱ rakṣa̍taṁ pṛthivī no̱ abhvā̍t || 1.185.08
u̱bhā śaṁsā̱ naryā̱ māma̍viṣṭāmu̱bhe māmū̱tī ava̍sā sacetām |
bhūri̍ cida̱ryaḥ su̱dāsta̍rāye̱ṣā mada̍nta iṣayema devāḥ || 1.185.09
ṛ̱taṁ di̱ve tada̍vocaṁ pṛthi̱vyā a̍bhiśrā̱vāya̍ pratha̱maṁ su̍me̱dhāḥ |
pā̱tāma̍va̱dyāddu̍ri̱tāda̱bhīke̍ pi̱tā mā̱tā ca̍ rakṣatā̱mavo̍bhiḥ || 1.185.10
i̱daṁ dyā̍vāpṛthivī sa̱tyama̍stu̱ pita̱rmāta̱ryadi̱hopa̍bru̱ve vā̍m |
bhū̱taṁ de̱vānā̍mava̱me avo̍bhirvi̱dyāme̱ṣaṁ vṛ̱jana̍ṁ jī̱radā̍num || 1.185.11
ā na̱ iḻā̍bhirvi̱dathe̍ suśa̱sti vi̱śvāna̍raḥ savi̱tā de̱va e̍tu |
api̱ yathā̍ yuvāno̱ matsa̍thā no̱ viśva̱ṁ jaga̍dabhipi̱tve ma̍nī̱ṣā || 1.186.01
ā no̱ viśva̱ āskrā̍ gamantu de̱vā mi̱tro a̍rya̱mā varu̍ṇaḥ sa̱joṣā̍ḥ |
bhuva̱nyathā̍ no̱ viśve̍ vṛ̱dhāsa̱ḥ kara̍nsu̱ṣāhā̍ vithu̱raṁ na śava̍ḥ || 1.186.02
preṣṭha̍ṁ vo̱ ati̍thiṁ gṛṇīṣe̱'gniṁ śa̱stibhi̍stu̱rvaṇi̍ḥ sa̱joṣā̍ḥ |
asa̱dyathā̍ no̱ varu̍ṇaḥ sukī̱rtiriṣa̍śca parṣadarigū̱rtaḥ sū̱riḥ || 1.186.03
upa̍ va̱ eṣe̱ nama̍sā jigī̱ṣoṣāsā̱naktā̍ su̱dughe̍va dhe̱nuḥ |
sa̱mā̱ne aha̍nvi̱mimā̍no a̱rkaṁ viṣu̍rūpe̱ paya̍si̱ sasmi̱nnūdha̍n || 1.186.04
u̱ta no'hi̍rbu̱dhnyo̱3̱̍ maya̍ska̱ḥ śiśu̱ṁ na pi̱pyuṣī̍va veti̱ sindhu̍ḥ |
yena̱ napā̍tama̱pāṁ ju̱nāma̍ mano̱juvo̱ vṛṣa̍ṇo̱ yaṁ vaha̍nti || 1.186.05
u̱ta na̍ ī̱ṁ tvaṣṭā ga̱ntvacchā̱ smatsū̱ribhi̍rabhipi̱tve sa̱joṣā̍ḥ |
ā vṛ̍tra̱hendra̍ścarṣaṇi̱prāstu̱viṣṭa̍mo na̱rāṁ na̍ i̱ha ga̍myāḥ || 1.186.06
u̱ta na̍ īṁ ma̱tayo'śva̍yogā̱ḥ śiśu̱ṁ na gāva̱staru̍ṇaṁ rihanti |
tamī̱ṁ giro̱ jana̍yo̱ na patnī̍ḥ sura̱bhiṣṭa̍maṁ na̱rāṁ na̍santa || 1.186.07
u̱ta na̍ īṁ ma̱ruto̍ vṛ̱ddhase̍nā̱ḥ smadroda̍sī̱ sama̍nasaḥ sadantu |
pṛṣa̍daśvāso̱'vana̍yo̱ na rathā̍ ri̱śāda̍so mitra̱yujo̱ na de̱vāḥ || 1.186.08
pra nu yade̍ṣāṁ mahi̱nā ci̍ki̱tre pra yu̍ñjate pra̱yuja̱ste su̍vṛ̱kti |
adha̱ yade̍ṣāṁ su̱dine̱ na śaru̱rviśva̱meri̍ṇaṁ pruṣā̱yanta̱ senā̍ḥ || 1.186.09
pro a̱śvinā̱vava̍se kṛṇudhva̱ṁ pra pū̱ṣaṇa̱ṁ svata̍vaso̱ hi santi̍ |
a̱dve̱ṣo viṣṇu̱rvāta̍ ṛbhu̱kṣā acchā̍ su̱mnāya̍ vavṛtīya de̱vān || 1.186.10
i̱yaṁ sā vo̍ a̱sme dīdhi̍tiryajatrā api̱prāṇī̍ ca̱ sada̍nī ca bhūyāḥ |
ni yā de̱veṣu̱ yata̍te vasū̱yurvi̱dyāme̱ṣaṁ vṛ̱jana̍ṁ jī̱radā̍num || 1.186.11
pi̱tuṁ nu sto̍ṣaṁ ma̱ho dha̱rmāṇa̱ṁ tavi̍ṣīm |
yasya̍ tri̱to vyoja̍sā vṛ̱traṁ vipa̍rvama̱rdaya̍t || 1.187.01
svādo̍ pito̱ madho̍ pito va̱yaṁ tvā̍ vavṛmahe |
a̱smāka̍mavi̱tā bha̍va || 1.187.02
upa̍ naḥ pita̱vā ca̍ra śi̱vaḥ śi̱vābhi̍rū̱tibhi̍ḥ |
ma̱yo̱bhura̍dviṣe̱ṇyaḥ sakhā̍ su̱śevo̱ adva̍yāḥ || 1.187.03
tava̱ tye pi̍to̱ rasā̱ rajā̱ṁsyanu̱ viṣṭhi̍tāḥ |
di̱vi vātā̍ iva śri̱tāḥ || 1.187.04
tava̱ tye pi̍to̱ dada̍ta̱stava̍ svādiṣṭha̱ te pi̍to |
pra svā̱dmāno̱ rasā̍nāṁ tuvi̱grīvā̍ iverate || 1.187.05
tve pi̍to ma̱hānā̍ṁ de̱vānā̱ṁ mano̍ hi̱tam |
akā̍ri̱ cāru̍ ke̱tunā̱ tavāhi̱mava̍sāvadhīt || 1.187.06
yada̱do pi̍to̱ aja̍ganvi̱vasva̱ parva̍tānām |
atrā̍ cinno madho pi̱to'ra̍ṁ bha̱kṣāya̍ gamyāḥ || 1.187.07
yada̱pāmoṣa̍dhīnāṁ pari̱ṁśamā̍ri̱śāma̍he |
vātā̍pe̱ pīva̱ idbha̍va || 1.187.08
yatte̍ soma̱ gavā̍śiro̱ yavā̍śiro̱ bhajā̍mahe |
vātā̍pe̱ pīva̱ idbha̍va || 1.187.09
ka̱ra̱mbha o̍ṣadhe bhava̱ pīvo̍ vṛ̱kka u̍dāra̱thiḥ |
vātā̍pe̱ pīva̱ idbha̍va || 1.187.10
taṁ tvā̍ va̱yaṁ pi̍to̱ vaco̍bhi̱rgāvo̱ na ha̱vyā su̍ṣūdima |
de̱vebhya̍stvā sadha̱māda̍ma̱smabhya̍ṁ tvā sadha̱māda̍m || 1.187.11
sami̍ddho a̱dya rā̍jasi de̱vo de̱vaiḥ sa̍hasrajit |
dū̱to ha̱vyā ka̱virva̍ha || 1.188.01
tanū̍napādṛ̱taṁ ya̱te madhvā̍ ya̱jñaḥ sama̍jyate |
dadha̍tsaha̱sriṇī̱riṣa̍ḥ || 1.188.02
ā̱juhvā̍no na̱ īḍyo̍ de̱vā ā va̍kṣi ya̱jñiyā̍n |
agne̍ sahasra̱sā a̍si || 1.188.03
prā̱cīna̍ṁ ba̱rhiroja̍sā sa̱hasra̍vīramastṛṇan |
yatrā̍dityā vi̱rāja̍tha || 1.188.04
vi̱rāṭ sa̱mrāḍvi̱bhvīḥ pra̱bhvīrba̱hvīśca̱ bhūya̍sīśca̱ yāḥ |
duro̍ ghṛ̱tānya̍kṣaran || 1.188.05
su̱ru̱kme hi su̱peśa̱sādhi̍ śri̱yā vi̱rāja̍taḥ |
u̱ṣāsā̱veha sī̍datām || 1.188.06
pra̱tha̱mā hi su̱vāca̍sā̱ hotā̍rā̱ daivyā̍ ka̱vī |
ya̱jñaṁ no̍ yakṣatāmi̱mam || 1.188.07
bhāra̱tīḻe̱ sara̍svati̱ yā va̱ḥ sarvā̍ upabru̱ve |
tā na̍ścodayata śri̱ye || 1.188.08
tvaṣṭā̍ rū̱pāṇi̱ hi pra̱bhuḥ pa̱śūnviśvā̍nsamāna̱je |
teṣā̍ṁ naḥ sphā̱timā ya̍ja || 1.188.09
upa̱ tmanyā̍ vanaspate̱ pātho̍ de̱vebhya̍ḥ sṛja |
a̱gnirha̱vyāni̍ siṣvadat || 1.188.10
pu̱ro̱gā a̱gnirde̱vānā̍ṁ gāya̱treṇa̱ sama̍jyate |
svāhā̍kṛtīṣu rocate || 1.188.11
agne̱ naya̍ su̱pathā̍ rā̱ye a̱smānviśvā̍ni deva va̱yunā̍ni vi̱dvān |
yu̱yo̱dhya1̱̍smajju̍hurā̱ṇameno̱ bhūyi̍ṣṭhāṁ te̱ nama̍uktiṁ vidhema || 1.189.01
agne̱ tvaṁ pā̍rayā̱ navyo̍ a̱smānsva̱stibhi̱rati̍ du̱rgāṇi̱ viśvā̍ |
pūśca̍ pṛ̱thvī ba̍hu̱lā na̍ u̱rvī bhavā̍ to̱kāya̱ tana̍yāya̱ śaṁ yoḥ || 1.189.02
agne̱ tvama̱smadyu̍yo̱dhyamī̍vā̱ ana̍gnitrā a̱bhyama̍nta kṛ̱ṣṭīḥ |
puna̍ra̱smabhya̍ṁ suvi̱tāya̍ deva̱ kṣāṁ viśve̍bhira̱mṛte̍bhiryajatra || 1.189.03
pā̱hi no̍ agne pā̱yubhi̱raja̍srairu̱ta pri̱ye sada̍na̱ ā śu̍śu̱kvān |
mā te̍ bha̱yaṁ ja̍ri̱tāra̍ṁ yaviṣṭha nū̱naṁ vi̍da̱nmāpa̱raṁ sa̍hasvaḥ || 1.189.04
mā no̍ a̱gne'va̍ sṛjo a̱ghāyā̍vi̱ṣyave̍ ri̱pave̍ du̱cchunā̍yai |
mā da̱tvate̱ daśa̍te̱ mādate̍ no̱ mā rīṣa̍te sahasāva̱nparā̍ dāḥ || 1.189.05
vi gha̱ tvāvā̍ ṛtajāta yaṁsadgṛṇā̱no a̍gne ta̱nve̱3̱̍ varū̍tham |
viśvā̍driri̱kṣoru̱ta vā̍ nini̱tsora̍bhi̱hrutā̱masi̱ hi de̍va vi̱ṣpaṭ || 1.189.06
tvaṁ tā a̍gna u̱bhayā̱nvi vi̱dvānveṣi̍ prapi̱tve manu̍ṣo yajatra |
a̱bhi̱pi̱tve mana̍ve̱ śāsyo̍ bhūrmarmṛ̱jenya̍ u̱śigbhi̱rnākraḥ || 1.189.07
avo̍cāma ni̱vaca̍nānyasmi̱nmāna̍sya sū̱nuḥ sa̍hasā̱ne a̱gnau |
va̱yaṁ sa̱hasra̱mṛṣi̍bhiḥ sanema vi̱dyāme̱ṣaṁ vṛ̱jana̍ṁ jī̱radā̍num || 1.189.08
a̱na̱rvāṇa̍ṁ vṛṣa̱bhaṁ ma̱ndraji̍hva̱ṁ bṛha̱spati̍ṁ vardhayā̱ navya̍ma̱rkaiḥ |
gā̱thā̱nya̍ḥ su̱ruco̱ yasya̍ de̱vā ā̍śṛ̱ṇvanti̱ nava̍mānasya̱ martā̍ḥ || 1.190.01
tamṛ̱tviyā̱ upa̱ vāca̍ḥ sacante̱ sargo̱ na yo de̍vaya̱tāmasa̍rji |
bṛha̱spati̱ḥ sa hyañjo̱ varā̍ṁsi̱ vibhvābha̍va̱tsamṛ̱te mā̍ta̱riśvā̍ || 1.190.02
upa̍stuti̱ṁ nama̍sa̱ udya̍tiṁ ca̱ śloka̍ṁ yaṁsatsavi̱teva̱ pra bā̱hū |
a̱sya kratvā̍ha̱nyo̱3̱̍ yo asti̍ mṛ̱go na bhī̱mo a̍ra̱kṣasa̱stuvi̍ṣmān || 1.190.03
a̱sya śloko̍ di̱vīya̍te pṛthi̱vyāmatyo̱ na ya̍ṁsadyakṣa̱bhṛdvice̍tāḥ |
mṛ̱gāṇā̱ṁ na he̱tayo̱ yanti̍ ce̱mā bṛha̱spate̱rahi̍māyā a̱bhi dyūn || 1.190.04
ye tvā̍ devosri̱kaṁ manya̍mānāḥ pā̱pā bha̱dramu̍pa̱jīva̍nti pa̱jrāḥ |
na dū̱ḍhye̱3̱̍ anu̍ dadāsi vā̱maṁ bṛha̍spate̱ caya̍sa̱ itpiyā̍rum || 1.190.05
su̱praitu̍ḥ sū̱yava̍so̱ na panthā̍ durni̱yantu̱ḥ pari̍prīto̱ na mi̱traḥ |
a̱na̱rvāṇo̍ a̱bhi ye cakṣa̍te̱ no'pī̍vṛtā aporṇu̱vanto̍ asthuḥ || 1.190.06
saṁ yaṁ stubho̱'vana̍yo̱ na yanti̍ samu̱draṁ na sra̱vato̱ rodha̍cakrāḥ |
sa vi̱dvā u̱bhaya̍ṁ caṣṭe a̱ntarbṛha̱spati̱stara̱ āpa̍śca̱ gṛdhra̍ḥ || 1.190.07
e̱vā ma̱hastu̍vijā̱tastuvi̍ṣmā̱nbṛha̱spati̍rvṛṣa̱bho dhā̍yi de̱vaḥ |
sa na̍ḥ stu̱to vī̱rava̍ddhātu̱ goma̍dvi̱dyāme̱ṣaṁ vṛ̱jana̍ṁ jī̱radā̍num || 1.190.08
kaṅka̍to̱ na kaṅka̱to'tho̍ satī̱naka̍ṅkataḥ |
dvāviti̱ pluṣī̱ iti̱ nya1̱̍dṛṣṭā̍ alipsata || 1.191.01
a̱dṛṣṭā̍nhantyāya̱tyatho̍ hanti parāya̱tī |
atho̍ avaghna̱tī ha̱ntyatho̍ pinaṣṭi piṁṣa̱tī || 1.191.02
śa̱rāsa̱ḥ kuśa̍rāso da̱rbhāsa̍ḥ sai̱ryā u̱ta |
mau̱ñjā a̱dṛṣṭā̍ vairi̱ṇāḥ sarve̍ sā̱kaṁ nya̍lipsata || 1.191.03
ni gāvo̍ go̱ṣṭhe a̍sada̱nni mṛ̱gāso̍ avikṣata |
ni ke̱tavo̱ janā̍nā̱ṁ nya1̱̍dṛṣṭā̍ alipsata || 1.191.04
e̱ta u̱ tye pratya̍dṛśranprado̱ṣaṁ taska̍rā iva |
adṛ̍ṣṭā̱ viśva̍dṛṣṭā̱ḥ prati̍buddhā abhūtana || 1.191.05
dyaurva̍ḥ pi̱tā pṛ̍thi̱vī mā̱tā somo̱ bhrātādi̍ti̱ḥ svasā̍ |
adṛ̍ṣṭā̱ viśva̍dṛṣṭā̱stiṣṭha̍te̱laya̍tā̱ su ka̍m || 1.191.06
ye aṁsyā̱ ye aṅgyā̍ḥ sū̱cīkā̱ ye pra̍kaṅka̱tāḥ |
adṛ̍ṣṭā̱ḥ kiṁ ca̱neha va̱ḥ sarve̍ sā̱kaṁ ni ja̍syata || 1.191.07
utpu̱rastā̱tsūrya̍ eti vi̱śvadṛ̍ṣṭo adṛṣṭa̱hā |
a̱dṛṣṭā̱nsarvā̍ñja̱mbhaya̱nsarvā̍śca yātudhā̱nya̍ḥ || 1.191.08
uda̍paptada̱sau sūrya̍ḥ pu̱ru viśvā̍ni̱ jūrva̍n |
ā̱di̱tyaḥ parva̍tebhyo vi̱śvadṛ̍ṣṭo adṛṣṭa̱hā || 1.191.09
sūrye̍ vi̱ṣamā sa̍jāmi̱ dṛti̱ṁ surā̍vato gṛ̱he |
so ci̱nnu na ma̍rāti̱ no va̱yaṁ ma̍rāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || 1.191.10
i̱ya̱tti̱kā śa̍kunti̱kā sa̱kā ja̍ghāsa te vi̱ṣam |
so ci̱nnu na ma̍rāti̱ no va̱yaṁ ma̍rāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || 1.191.11
triḥ sa̱pta vi̍ṣpuliṅga̱kā vi̱ṣasya̱ puṣya̍makṣan |
tāści̱nnu na ma̍ranti̱ no va̱yaṁ ma̍rāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || 1.191.12
na̱vā̱nāṁ na̍vatī̱nāṁ vi̱ṣasya̱ ropu̍ṣīṇām |
sarvā̍sāmagrabha̱ṁ nāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || 1.191.13
triḥ sa̱pta ma̍yū̱rya̍ḥ sa̱pta svasā̍ro a̱gruva̍ḥ |
tāste̍ vi̱ṣaṁ vi ja̍bhrira uda̱kaṁ ku̱mbhinī̍riva || 1.191.14
i̱ya̱tta̱kaḥ ku̍ṣumbha̱kasta̱kaṁ bhi̍na̱dmyaśma̍nā |
tato̍ vi̱ṣaṁ pra vā̍vṛte̱ parā̍cī̱ranu̍ sa̱ṁvata̍ḥ || 1.191.15
ku̱ṣu̱mbha̱kastada̍bravīdgi̱reḥ pra̍vartamāna̱kaḥ |
vṛści̍kasyāra̱saṁ vi̱ṣama̍ra̱saṁ vṛ̍ścika te vi̱ṣam || 1.191.16
Last udpated July 2, 2013
Special mention : Initial processing and help by Avinash and Shashi Sathaye,
Avinash Chopde, Shree Devi Kumar, Sunder Hattangadi, John Gardner.
Reprocessed from Original in final form by Detlef Eichler with additional corrections.
See Detlef's site http://www.detlef108.de/Rigveda.htm
for other details and formats.
The text is shown with accents (Anudattas, dependent Svaritas,
and independent Svaritas including Kampas). Words are connected (agnimILe).
Ch is doubled as in gachChati according to the rules of Rigveda-Pratishakhya.
At the end of a word m is replaced by Anusvara M if the initial letter of the
following word is a labial stop consonant (p, ph, b, bh, m).
Visarga H before sh, Sh or s followed by a voiceless consonant has been restored.
Source : The Aufrecht/van Nooten/Holland (Samhita) version
of the Rigveda (http://www.people.fas.harvard.edu/~witzel/onlineRV.htm).
In this text accented vowels have Udatta or 'independent Svarita' markers.
Kampas are not shown. Words are separated (agnim ILe).
Ch is not doubled as in gaChati. At the end of a word we find m before
a following labial stop consonant (p, ph, b, bh, m).
Visarga H before sh, Sh or s followed by a voiceless consonant has
been dropped according to a rule of Rigveda-Pratishakhya.
Send corrections to : detlefeichler@googlemail.com, sanskrit@cheerful.com
The text is to be used for personal studies and research only.
Any use for commercial purpose is prohibited as a `gentleman's' agreement.