|| ṛgvedaḥ maṇḍalaṁ 4 ||
tvāṁ hya̍gne̱ sada̱mitsa̍ma̱nyavo̍ de̱vāso̍ de̱vama̍ra̱tiṁ nye̍ri̱ra iti̱ kratvā̍ nyeri̱re |
ama̍rtyaṁ yajata̱ martye̱ṣvā de̱vamāde̍vaṁ janata̱ prace̍tasa̱ṁ viśva̱māde̍vaṁ janata̱ prace̍tasam || 4.001.01
sa bhrāta̍ra̱ṁ varu̍ṇamagna̱ ā va̍vṛtsva de̱vā acchā̍ suma̱tī ya̱jñava̍nasa̱ṁ jyeṣṭha̍ṁ ya̱jñava̍nasam |
ṛ̱tāvā̍namādi̱tyaṁ ca̍rṣaṇī̱dhṛta̱ṁ rājā̍naṁ carṣaṇī̱dhṛta̍m || 4.001.02
sakhe̱ sakhā̍yama̱bhyā va̍vṛtsvā̱śuṁ na ca̱kraṁ rathye̍va̱ raṁhyā̱smabhya̍ṁ dasma̱ raṁhyā̍ |
agne̍ mṛḻī̱kaṁ varu̍ṇe̱ sacā̍ vido ma̱rutsu̍ vi̱śvabhā̍nuṣu |
to̱kāya̍ tu̱je śu̍śucāna̱ śaṁ kṛ̍dhya̱smabhya̍ṁ dasma̱ śaṁ kṛ̍dhi || 4.001.03
tvaṁ no̍ agne̱ varu̍ṇasya vi̱dvānde̱vasya̱ heḻo'va̍ yāsisīṣṭhāḥ |
yaji̍ṣṭho̱ vahni̍tama̱ḥ śośu̍cāno̱ viśvā̱ dveṣā̍ṁsi̱ pra mu̍mugdhya̱smat || 4.001.04
sa tvaṁ no̍ agne'va̱mo bha̍vo̱tī nedi̍ṣṭho a̱syā u̱ṣaso̱ vyu̍ṣṭau |
ava̍ yakṣva no̱ varu̍ṇa̱ṁ rarā̍ṇo vī̱hi mṛ̍ḻī̱kaṁ su̱havo̍ na edhi || 4.001.05
a̱sya śreṣṭhā̍ su̱bhaga̍sya sa̱ṁdṛgde̱vasya̍ ci̱trata̍mā̱ martye̍ṣu |
śuci̍ ghṛ̱taṁ na ta̱ptamaghnyā̍yāḥ spā̱rhā de̱vasya̍ ma̱ṁhane̍va dhe̱noḥ || 4.001.06
trira̍sya̱ tā pa̍ra̱mā sa̍nti sa̱tyā spā̱rhā de̱vasya̱ jani̍mānya̱gneḥ |
a̱na̱nte a̱ntaḥ pari̍vīta̱ āgā̱cchuci̍ḥ śu̱kro a̱ryo roru̍cānaḥ || 4.001.07
sa dū̱to viśveda̱bhi va̍ṣṭi̱ sadmā̱ hotā̱ hira̍ṇyaratho̱ raṁsu̍jihvaḥ |
ro̱hida̍śvo vapu̱ṣyo̍ vi̱bhāvā̱ sadā̍ ra̱ṇvaḥ pi̍tu̱matī̍va sa̱ṁsat || 4.001.08
sa ce̍taya̱nmanu̍ṣo ya̱jñaba̍ndhu̱ḥ pra taṁ ma̱hyā ra̍śa̱nayā̍ nayanti |
sa kṣe̍tyasya̱ duryā̍su̱ sādha̍nde̱vo marta̍sya sadhani̱tvamā̍pa || 4.001.09
sa tū no̍ a̱gnirna̍yatu prajā̱nannacchā̱ ratna̍ṁ de̱vabha̍kta̱ṁ yada̍sya |
dhi̱yā yadviśve̍ a̱mṛtā̱ akṛ̍ṇva̱ndyauṣpi̱tā ja̍ni̱tā sa̱tyamu̍kṣan || 4.001.10
sa jā̍yata pratha̱maḥ pa̱styā̍su ma̱ho bu̱dhne raja̍so a̱sya yonau̍ |
a̱pāda̍śī̱rṣā gu̱hamā̍no̱ antā̱yoyu̍vāno vṛṣa̱bhasya̍ nī̱ḻe || 4.001.11
pra śardha̍ ārta pratha̱maṁ vi̍pa̱nyā ṛ̱tasya̱ yonā̍ vṛṣa̱bhasya̍ nī̱ḻe |
spā̱rho yuvā̍ vapu̱ṣyo̍ vi̱bhāvā̍ sa̱pta pri̱yāso̍'janayanta̱ vṛṣṇe̍ || 4.001.12
a̱smāka̱matra̍ pi̱taro̍ manu̱ṣyā̍ a̱bhi pra se̍durṛ̱tamā̍śuṣā̱ṇāḥ |
aśma̍vrajāḥ su̱dughā̍ va̱vre a̱ntarudu̱srā ā̍jannu̱ṣaso̍ huvā̱nāḥ || 4.001.13
te ma̍rmṛjata dadṛ̱vāṁso̱ adri̱ṁ tade̍ṣāma̱nye a̱bhito̱ vi vo̍can |
pa̱śvaya̍ntrāso a̱bhi kā̱rama̍rcanvi̱danta̱ jyoti̍ścakṛ̱panta̍ dhī̱bhiḥ || 4.001.14
te ga̍vya̱tā mana̍sā dṛ̱dhramu̱bdhaṁ gā ye̍mā̱naṁ pari̱ ṣanta̱madri̍m |
dṛ̱ḻhaṁ naro̱ vaca̍sā̱ daivye̍na vra̱jaṁ goma̍ntamu̱śijo̱ vi va̍vruḥ || 4.001.15
te ma̍nvata pratha̱maṁ nāma̍ dhe̱nostriḥ sa̱pta mā̱tuḥ pa̍ra̱māṇi̍ vindan |
tajjā̍na̱tīra̱bhya̍nūṣata̱ vrā ā̱virbhu̍vadaru̱ṇīrya̱śasā̱ goḥ || 4.001.16
neśa̱ttamo̱ dudhi̍ta̱ṁ roca̍ta̱ dyaurudde̱vyā u̱ṣaso̍ bhā̱nura̍rta |
ā sūryo̍ bṛha̱tasti̍ṣṭha̱dajrā̍ ṛ̱ju marte̍ṣu vṛji̱nā ca̱ paśya̍n || 4.001.17
āditpa̱ścā bu̍budhā̱nā vya̍khya̱nnādidratna̍ṁ dhārayanta̱ dyubha̍ktam |
viśve̱ viśvā̍su̱ duryā̍su de̱vā mitra̍ dhi̱ye va̍ruṇa sa̱tyama̍stu || 4.001.18
acchā̍ voceya śuśucā̱nama̱gniṁ hotā̍raṁ vi̱śvabha̍rasa̱ṁ yaji̍ṣṭham |
śucyūdho̍ atṛṇa̱nna gavā̱mandho̱ na pū̱taṁ pari̍ṣiktama̱ṁśoḥ || 4.001.19
viśve̍ṣā̱madi̍tirya̱jñiyā̍nā̱ṁ viśve̍ṣā̱mati̍thi̱rmānu̍ṣāṇām |
a̱gnirde̱vānā̱mava̍ āvṛṇā̱naḥ su̍mṛḻī̱ko bha̍vatu jā̱tave̍dāḥ || 4.001.20
yo martye̍ṣva̱mṛta̍ ṛ̱tāvā̍ de̱vo de̱veṣva̍ra̱tirni̱dhāyi̍ |
hotā̱ yaji̍ṣṭho ma̱hnā śu̱cadhyai̍ ha̱vyaira̱gnirmanu̍ṣa īra̱yadhyai̍ || 4.002.01
i̱ha tvaṁ sū̍no sahaso no a̱dya jā̱to jā̱tā u̱bhayā̍ a̱ntara̍gne |
dū̱ta ī̍yase yuyujā̱na ṛ̍ṣva ṛjumu̱ṣkānvṛṣa̍ṇaḥ śu̱krāśca̍ || 4.002.02
atyā̍ vṛdha̱snū rohi̍tā ghṛ̱tasnū̍ ṛ̱tasya̍ manye̱ mana̍sā̱ javi̍ṣṭhā |
a̱ntarī̍yase aru̱ṣā yu̍jā̱no yu̱ṣmāśca̍ de̱vānviśa̱ ā ca̱ martā̍n || 4.002.03
a̱rya̱maṇa̱ṁ varu̍ṇaṁ mi̱trame̍ṣā̱mindrā̱viṣṇū̍ ma̱ruto̍ a̱śvino̱ta |
svaśvo̍ agne su̱ratha̍ḥ su̱rādhā̱ edu̍ vaha suha̱viṣe̱ janā̍ya || 4.002.04
gomā̍ a̱gne'vi̍mā a̱śvī ya̱jño nṛ̱vatsa̍khā̱ sada̱mida̍pramṛ̱ṣyaḥ |
iḻā̍vā e̱ṣo a̍sura pra̱jāvā̍ndī̱rgho ra̱yiḥ pṛ̍thubu̱dhnaḥ sa̱bhāvā̍n || 4.002.05
yasta̍ i̱dhmaṁ ja̱bhara̍tsiṣvidā̱no mū̱rdhāna̍ṁ vā ta̱tapa̍te tvā̱yā |
bhuva̱stasya̱ svata̍vāḥ pā̱yura̍gne̱ viśva̍smātsīmaghāya̱ta u̍ruṣya || 4.002.06
yaste̱ bharā̱danni̍yate ci̱danna̍ṁ ni̱śiṣa̍nma̱ndramati̍thimu̱dīra̍t |
ā de̍va̱yuri̱nadha̍te duro̱ṇe tasmi̍nra̱yirdhru̱vo a̍stu̱ dāsvā̍n || 4.002.07
yastvā̍ do̱ṣā ya u̱ṣasi̍ pra̱śaṁsā̍tpri̱yaṁ vā̍ tvā kṛ̱ṇava̍te ha̱viṣmā̍n |
aśvo̱ na sve dama̱ ā he̱myāvā̱ntamaṁha̍saḥ pīparo dā̱śvāṁsa̍m || 4.002.08
yastubhya̍magne a̱mṛtā̍ya̱ dāśa̱dduva̱stve kṛ̱ṇava̍te ya̱tasru̍k |
na sa rā̱yā śa̍śamā̱no vi yo̍ṣa̱nnaina̱maṁha̱ḥ pari̍ varadaghā̱yoḥ || 4.002.09
yasya̱ tvama̍gne adhva̱raṁ jujo̍ṣo de̱vo marta̍sya̱ sudhi̍ta̱ṁ rarā̍ṇaḥ |
prī̱teda̍sa̱ddhotrā̱ sā ya̍vi̱ṣṭhāsā̍ma̱ yasya̍ vidha̱to vṛ̱dhāsa̍ḥ || 4.002.10
citti̱maci̍ttiṁ cinava̱dvi vi̱dvānpṛ̱ṣṭheva̍ vī̱tā vṛ̍ji̱nā ca̱ martā̍n |
rā̱ye ca̍ naḥ svapa̱tyāya̍ deva̱ diti̍ṁ ca̱ rāsvādi̍timuruṣya || 4.002.11
ka̱viṁ śa̍śāsuḥ ka̱vayo'da̍bdhā nidhā̱raya̍nto̱ duryā̍svā̱yoḥ |
ata̱stvaṁ dṛśyā̍ agna e̱tānpa̱ḍbhiḥ pa̍śye̱radbhu̍tā a̱rya evai̍ḥ || 4.002.12
tvama̍gne vā̱ghate̍ su̱praṇī̍tiḥ su̱taso̍māya vidha̱te ya̍viṣṭha |
ratna̍ṁ bhara śaśamā̱nāya̍ ghṛṣve pṛ̱thu śca̱ndramava̍se carṣaṇi̱prāḥ || 4.002.13
adhā̍ ha̱ yadva̱yama̍gne tvā̱yā pa̱ḍbhirhaste̍bhiścakṛ̱mā ta̱nūbhi̍ḥ |
ratha̱ṁ na kranto̱ apa̍sā bhu̱rijo̍rṛ̱taṁ ye̍muḥ su̱dhya̍ āśuṣā̱ṇāḥ || 4.002.14
adhā̍ mā̱turu̱ṣasa̍ḥ sa̱pta viprā̱ jāye̍mahi pratha̱mā ve̱dhaso̱ nṝn |
di̱vaspu̱trā aṅgi̍raso bhave̱mādri̍ṁ rujema dha̱nina̍ṁ śu̱canta̍ḥ || 4.002.15
adhā̱ yathā̍ naḥ pi̱tara̱ḥ parā̍saḥ pra̱tnāso̍ agna ṛ̱tamā̍śuṣā̱ṇāḥ |
śucīda̍ya̱ndīdhi̍timuktha̱śāsa̱ḥ kṣāmā̍ bhi̱ndanto̍ aru̱ṇīrapa̍ vran || 4.002.16
su̱karmā̍ṇaḥ su̱ruco̍ deva̱yanto'yo̱ na de̱vā jani̍mā̱ dhama̍ntaḥ |
śu̱canto̍ a̱gniṁ va̍vṛ̱dhanta̱ indra̍mū̱rvaṁ gavya̍ṁ pari̱ṣada̍nto agman || 4.002.17
ā yū̱theva̍ kṣu̱mati̍ pa̱śvo a̍khyadde̱vānā̱ṁ yajjani̱māntyu̍gra |
martā̍nāṁ cidu̱rvaśī̍rakṛpranvṛ̱dhe ci̍da̱rya upa̍rasyā̱yoḥ || 4.002.18
aka̍rma te̱ svapa̍so abhūma ṛ̱tama̍vasrannu̱ṣaso̍ vibhā̱tīḥ |
anū̍nama̱gniṁ pu̍ru̱dhā su̍śca̱ndraṁ de̱vasya̱ marmṛ̍jata̱ścāru̱ cakṣu̍ḥ || 4.002.19
e̱tā te̍ agna u̱cathā̍ni ve̱dho'vo̍cāma ka̱vaye̱ tā ju̍ṣasva |
uccho̍casva kṛṇu̱hi vasya̍so no ma̱ho rā̱yaḥ pu̍ruvāra̱ pra ya̍ndhi || 4.002.20
ā vo̱ rājā̍namadhva̱rasya̍ ru̱draṁ hotā̍raṁ satya̱yaja̱ṁ roda̍syoḥ |
a̱gniṁ pu̱rā ta̍nayi̱tnora̱cittā̱ddhira̍ṇyarūpa̱mava̍se kṛṇudhvam || 4.003.01
a̱yaṁ yoni̍ścakṛ̱mā yaṁ va̱yaṁ te̍ jā̱yeva̱ patya̍ uśa̱tī su̱vāsā̍ḥ |
a̱rvā̱cī̱naḥ pari̍vīto̱ ni ṣī̍de̱mā u̍ te svapāka pratī̱cīḥ || 4.003.02
ā̱śṛ̱ṇva̱te adṛ̍pitāya̱ manma̍ nṛ̱cakṣa̍se sumṛḻī̱kāya̍ vedhaḥ |
de̱vāya̍ śa̱stima̱mṛtā̍ya śaṁsa̱ grāve̍va̱ sotā̍ madhu̱ṣudyamī̱ḻe || 4.003.03
tvaṁ ci̍nna̱ḥ śamyā̍ agne a̱syā ṛ̱tasya̍ bodhyṛtacitsvā̱dhīḥ |
ka̱dā ta̍ u̱kthā sa̍dha̱mādyā̍ni ka̱dā bha̍vanti sa̱khyā gṛ̱he te̍ || 4.003.04
ka̱thā ha̱ tadvaru̍ṇāya̱ tvama̍gne ka̱thā di̱ve ga̍rhase̱ kanna̱ āga̍ḥ |
ka̱thā mi̱trāya̍ mī̱ḻhuṣe̍ pṛthi̱vyai brava̱ḥ kada̍rya̱mṇe kadbhagā̍ya || 4.003.05
kaddhiṣṇyā̍su vṛdhasā̱no a̍gne̱ kadvātā̍ya̱ prata̍vase śubha̱ṁye |
pari̍jmane̱ nāsa̍tyāya̱ kṣe brava̱ḥ kada̍gne ru̱drāya̍ nṛ̱ghne || 4.003.06
ka̱thā ma̱he pu̍ṣṭimbha̱rāya̍ pū̱ṣṇe kadru̱drāya̱ suma̍khāya havi̱rde |
kadviṣṇa̍va urugā̱yāya̱ reto̱ brava̱ḥ kada̍gne̱ śara̍ve bṛha̱tyai || 4.003.07
ka̱thā śardhā̍ya ma̱rutā̍mṛ̱tāya̍ ka̱thā sū̱re bṛ̍ha̱te pṛ̱cchyamā̍naḥ |
prati̍ bra̱vo'di̍taye tu̱rāya̱ sādhā̍ di̱vo jā̍tavedaściki̱tvān || 4.003.08
ṛ̱tena̍ ṛ̱taṁ niya̍tamīḻa̱ ā gorā̱mā sacā̱ madhu̍matpa̱kvama̍gne |
kṛ̱ṣṇā sa̱tī ruśa̍tā dhā̱sinai̱ṣā jāma̍ryeṇa̱ paya̍sā pīpāya || 4.003.09
ṛ̱tena̱ hi ṣmā̍ vṛṣa̱bhaści̍da̱ktaḥ pumā̍ a̱gniḥ paya̍sā pṛ̱ṣṭhye̍na |
aspa̍ndamāno acaradvayo̱dhā vṛṣā̍ śu̱kraṁ du̍duhe̱ pṛśni̱rūdha̍ḥ || 4.003.10
ṛ̱tenādri̱ṁ vya̍sanbhi̱danta̱ḥ samaṅgi̍raso navanta̱ gobhi̍ḥ |
śu̱naṁ nara̱ḥ pari̍ ṣadannu̱ṣāsa̍mā̱viḥ sva̍rabhavajjā̱te a̱gnau || 4.003.11
ṛ̱tena̍ de̱vīra̱mṛtā̱ amṛ̍ktā̱ arṇo̍bhi̱rāpo̱ madhu̍madbhiragne |
vā̱jī na sarge̍ṣu prastubhā̱naḥ pra sada̱mitsravi̍tave dadhanyuḥ || 4.003.12
mā kasya̍ ya̱kṣaṁ sada̱middhu̱ro gā̱ mā ve̱śasya̍ pramina̱to māpeḥ |
mā bhrātu̍ragne̱ anṛ̍jorṛ̱ṇaṁ ve̱rmā sakhyu̱rdakṣa̍ṁ ri̱porbhu̍jema || 4.003.13
rakṣā̍ ṇo agne̱ tava̱ rakṣa̍ṇebhī rārakṣā̱ṇaḥ su̍makha prīṇā̱naḥ |
prati̍ ṣphura̱ vi ru̍ja vī̱ḍvaṁho̍ ja̱hi rakṣo̱ mahi̍ cidvāvṛdhā̱nam || 4.003.14
e̱bhirbha̍va su̱manā̍ agne a̱rkairi̱mānspṛ̍śa̱ manma̍bhiḥ śūra̱ vājā̍n |
u̱ta brahmā̍ṇyaṅgiro juṣasva̱ saṁ te̍ śa̱stirde̱vavā̍tā jareta || 4.003.15
e̱tā viśvā̍ vi̱duṣe̱ tubhya̍ṁ vedho nī̱thānya̍gne ni̱ṇyā vacā̍ṁsi |
ni̱vaca̍nā ka̱vaye̱ kāvyā̱nyaśa̍ṁsiṣaṁ ma̱tibhi̱rvipra̍ u̱kthaiḥ || 4.003.16
kṛ̱ṇu̱ṣva pāja̱ḥ prasi̍ti̱ṁ na pṛ̱thvīṁ yā̱hi rāje̱vāma̍vā̱ ibhe̍na |
tṛ̱ṣvīmanu̱ prasi̍tiṁ drūṇā̱no'stā̍si̱ vidhya̍ ra̱kṣasa̱stapi̍ṣṭhaiḥ || 4.004.01
tava̍ bhra̱māsa̍ āśu̱yā pa̍ta̱ntyanu̍ spṛśa dhṛṣa̱tā śośu̍cānaḥ |
tapū̍ṁṣyagne ju̱hvā̍ pata̱ṁgānasa̍ṁdito̱ vi sṛ̍ja̱ viṣva̍gu̱lkāḥ || 4.004.02
prati̱ spaśo̱ vi sṛ̍ja̱ tūrṇi̍tamo̱ bhavā̍ pā̱yurvi̱śo a̱syā ada̍bdhaḥ |
yo no̍ dū̱re a̱ghaśa̍ṁso̱ yo antyagne̱ māki̍ṣṭe̱ vyathi̱rā da̍dharṣīt || 4.004.03
uda̍gne tiṣṭha̱ pratyā ta̍nuṣva̱ nya1̱̍mitrā̍ oṣatāttigmahete |
yo no̱ arā̍tiṁ samidhāna ca̱kre nī̱cā taṁ dha̍kṣyata̱saṁ na śuṣka̍m || 4.004.04
ū̱rdhvo bha̍va̱ prati̍ vi̱dhyādhya̱smadā̱viṣkṛ̍ṇuṣva̱ daivyā̍nyagne |
ava̍ sthi̱rā ta̍nuhi yātu̱jūnā̍ṁ jā̱mimajā̍mi̱ṁ pra mṛ̍ṇīhi̱ śatrū̍n || 4.004.05
sa te̍ jānāti suma̱tiṁ ya̍viṣṭha̱ ya īva̍te̱ brahma̍ṇe gā̱tumaira̍t |
viśvā̍nyasmai su̱dinā̍ni rā̱yo dyu̱mnānya̱ryo vi duro̍ a̱bhi dyau̍t || 4.004.06
seda̍gne astu su̱bhaga̍ḥ su̱dānu̱ryastvā̱ nitye̍na ha̱viṣā̱ ya u̱kthaiḥ |
piprī̍ṣati̱ sva āyu̍ṣi duro̱ṇe viśveda̍smai su̱dinā̱ sāsa̍di̱ṣṭiḥ || 4.004.07
arcā̍mi te suma̱tiṁ ghoṣya̱rvāksaṁ te̍ vā̱vātā̍ jaratāmi̱yaṁ gīḥ |
svaśvā̍stvā su̱rathā̍ marjayemā̱sme kṣa̱trāṇi̍ dhāraye̱ranu̱ dyūn || 4.004.08
i̱ha tvā̱ bhūryā ca̍re̱dupa̱ tmandoṣā̍vastardīdi̱vāṁsa̱manu̱ dyūn |
krīḻa̍ntastvā su̱mana̍saḥ sapemā̱bhi dyu̱mnā ta̍sthi̱vāṁso̱ janā̍nām || 4.004.09
yastvā̱ svaśva̍ḥ suhira̱ṇyo a̍gna upa̱yāti̱ vasu̍matā̱ rathe̍na |
tasya̍ trā̱tā bha̍vasi̱ tasya̱ sakhā̱ yasta̍ āti̱thyamā̍nu̱ṣagjujo̍ṣat || 4.004.10
ma̱ho ru̍jāmi ba̱ndhutā̱ vaco̍bhi̱stanmā̍ pi̱turgota̍mā̱danvi̍yāya |
tvaṁ no̍ a̱sya vaca̍saścikiddhi̱ hota̍ryaviṣṭha sukrato̱ damū̍nāḥ || 4.004.11
asva̍pnajasta̱raṇa̍yaḥ su̱śevā̱ ata̍ndrāso'vṛ̱kā aśra̍miṣṭhāḥ |
te pā̱yava̍ḥ sa̱dhrya̍ñco ni̱ṣadyāgne̱ tava̍ naḥ pāntvamūra || 4.004.12
ye pā̱yavo̍ māmate̱yaṁ te̍ agne̱ paśya̍nto a̱ndhaṁ du̍ri̱tādara̍kṣan |
ra̱rakṣa̱ tānsu̱kṛto̍ vi̱śvave̍dā̱ dipsa̍nta̱ idri̱pavo̱ nāha̍ debhuḥ || 4.004.13
tvayā̍ va̱yaṁ sa̍dha̱nya1̱̍stvotā̱stava̱ praṇī̍tyaśyāma̱ vājā̍n |
u̱bhā śaṁsā̍ sūdaya satyatāte'nuṣṭhu̱yā kṛ̍ṇuhyahrayāṇa || 4.004.14
a̱yā te̍ agne sa̱midhā̍ vidhema̱ prati̱ stoma̍ṁ śa̱syamā̍naṁ gṛbhāya |
dahā̱śaso̍ ra̱kṣasa̍ḥ pā̱hya1̱̍smāndru̱ho ni̱do mi̍tramaho ava̱dyāt || 4.004.15
vai̱śvā̱na̱rāya̍ mī̱ḻhuṣe̍ sa̱joṣā̍ḥ ka̱thā dā̍śemā̱gnaye̍ bṛ̱hadbhāḥ |
anū̍nena bṛha̱tā va̱kṣathe̱nopa̍ stabhāyadupa̱minna rodha̍ḥ || 4.005.01
mā ni̍ndata̱ ya i̱māṁ mahya̍ṁ rā̱tiṁ de̱vo da̱dau martyā̍ya sva̱dhāvā̍n |
pākā̍ya̱ gṛtso̍ a̱mṛto̱ vice̍tā vaiśvāna̱ro nṛta̍mo ya̱hvo a̱gniḥ || 4.005.02
sāma̍ dvi̱barhā̱ mahi̍ ti̱gmabhṛ̍ṣṭiḥ sa̱hasra̍retā vṛṣa̱bhastuvi̍ṣmān |
pa̱daṁ na gorapa̍gūḻhaṁ vivi̱dvāna̱gnirmahya̱ṁ predu̍ vocanmanī̱ṣām || 4.005.03
pra tā a̱gnirba̍bhasatti̱gmaja̍mbha̱stapi̍ṣṭhena śo̱ciṣā̱ yaḥ su̱rādhā̍ḥ |
pra ye mi̱nanti̱ varu̍ṇasya̱ dhāma̍ pri̱yā mi̱trasya̱ ceta̍to dhru̱vāṇi̍ || 4.005.04
a̱bhrā̱taro̱ na yoṣa̍ṇo̱ vyanta̍ḥ pati̱ripo̱ na jana̍yo du̱revā̍ḥ |
pā̱pāsa̱ḥ santo̍ anṛ̱tā a̍sa̱tyā i̱daṁ pa̱dama̍janatā gabhī̱ram || 4.005.05
i̱daṁ me̍ agne̱ kiya̍te pāva̱kāmi̍nate gu̱ruṁ bhā̱raṁ na manma̍ |
bṛ̱hadda̍dhātha dhṛṣa̱tā ga̍bhī̱raṁ ya̱hvaṁ pṛ̱ṣṭhaṁ praya̍sā sa̱ptadhā̍tu || 4.005.06
taminnve̱3̱̍va sa̍ma̱nā sa̍mā̱nama̱bhi kratvā̍ puna̱tī dhī̱tira̍śyāḥ |
sa̱sasya̱ carma̱nnadhi̱ cāru̱ pṛśne̱ragre̍ ru̱pa āru̍pita̱ṁ jabā̍ru || 4.005.07
pra̱vācya̱ṁ vaca̍sa̱ḥ kiṁ me̍ a̱sya guhā̍ hi̱tamupa̍ ni̱ṇigva̍danti |
yadu̱sriyā̍ṇā̱mapa̱ vāri̍va̱ vranpāti̍ pri̱yaṁ ru̱po agra̍ṁ pa̱daṁ veḥ || 4.005.08
i̱damu̱ tyanmahi̍ ma̱hāmanī̍ka̱ṁ yadu̱sriyā̱ saca̍ta pū̱rvyaṁ gauḥ |
ṛ̱tasya̍ pa̱de adhi̱ dīdyā̍na̱ṁ guhā̍ raghu̱ṣyadra̍ghu̱yadvi̍veda || 4.005.09
adha̍ dyutā̱naḥ pi̱troḥ sacā̱sāma̍nuta̱ guhya̱ṁ cāru̱ pṛśne̍ḥ |
mā̱tuṣpa̱de pa̍ra̱me anti̱ ṣadgorvṛṣṇa̍ḥ śo̱ciṣa̱ḥ praya̍tasya ji̱hvā || 4.005.10
ṛ̱taṁ vo̍ce̱ nama̍sā pṛ̱cchyamā̍na̱stavā̱śasā̍ jātavedo̱ yadī̱dam |
tvama̱sya kṣa̍yasi̱ yaddha̱ viśva̍ṁ di̱vi yadu̱ dravi̍ṇa̱ṁ yatpṛ̍thi̱vyām || 4.005.11
kiṁ no̍ a̱sya dravi̍ṇa̱ṁ kaddha̱ ratna̱ṁ vi no̍ voco jātavedaściki̱tvān |
guhādhva̍naḥ para̱maṁ yanno̍ a̱sya reku̍ pa̱daṁ na ni̍dā̱nā aga̍nma || 4.005.12
kā ma̱ryādā̍ va̱yunā̱ kaddha̍ vā̱mamacchā̍ gamema ra̱ghavo̱ na vāja̍m |
ka̱dā no̍ de̱vīra̱mṛta̍sya̱ patnī̱ḥ sūro̱ varṇe̍na tatanannu̱ṣāsa̍ḥ || 4.005.13
a̱ni̱reṇa̱ vaca̍sā pha̱lgve̍na pra̱tītye̍na kṛ̱dhunā̍tṛ̱pāsa̍ḥ |
adhā̱ te a̍gne̱ kimi̱hā va̍dantyanāyu̱dhāsa̱ āsa̍tā sacantām || 4.005.14
a̱sya śri̱ye sa̍midhā̱nasya̱ vṛṣṇo̱ vaso̱ranī̍ka̱ṁ dama̱ ā ru̍roca |
ruśa̱dvasā̍naḥ su̱dṛśī̍karūpaḥ kṣi̱tirna rā̱yā pu̍ru̱vāro̍ adyaut || 4.005.15
ū̱rdhva ū̱ ṣu ṇo̍ adhvarasya hota̱ragne̱ tiṣṭha̍ de̱vatā̍tā̱ yajī̍yān |
tvaṁ hi viśva̍ma̱bhyasi̱ manma̱ pra ve̱dhasa̍ścittirasi manī̱ṣām || 4.006.01
amū̍ro̱ hotā̱ nya̍sādi vi̱kṣva1̱̍gnirma̱ndro vi̱dathe̍ṣu̱ prace̍tāḥ |
ū̱rdhvaṁ bhā̱nuṁ sa̍vi̱tevā̍śre̱nmete̍va dhū̱maṁ sta̍bhāya̱dupa̱ dyām || 4.006.02
ya̱tā su̍jū̱rṇī rā̱tinī̍ ghṛ̱tācī̍ pradakṣi̱ṇidde̱vatā̍timurā̱ṇaḥ |
udu̱ svaru̍rnava̱jā nākraḥ pa̱śvo a̍nakti̱ sudhi̍taḥ su̱meka̍ḥ || 4.006.03
stī̱rṇe ba̱rhiṣi̍ samidhā̱ne a̱gnā ū̱rdhvo a̍dhva̱ryurju̍juṣā̱ṇo a̍sthāt |
parya̱gniḥ pa̍śu̱pā na hotā̍ trivi̱ṣṭye̍ti pra̱diva̍ urā̱ṇaḥ || 4.006.04
pari̱ tmanā̍ mi̱tadru̍reti̱ hotā̱gnirma̱ndro madhu̍vacā ṛ̱tāvā̍ |
drava̍ntyasya vā̱jino̱ na śokā̱ bhaya̍nte̱ viśvā̱ bhuva̍nā̱ yadabhrā̍ṭ || 4.006.05
bha̱drā te̍ agne svanīka sa̱ṁdṛggho̱rasya̍ sa̱to viṣu̍ṇasya̱ cāru̍ḥ |
na yatte̍ śo̱cistama̍sā̱ vara̍nta̱ na dhva̱smāna̍sta̱nvī̱3̱̍ repa̱ ā dhu̍ḥ || 4.006.06
na yasya̱ sātu̱rjani̍to̱ravā̍ri̱ na mā̱tarā̍pi̱tarā̱ nū ci̍di̱ṣṭau |
adhā̍ mi̱tro na sudhi̍taḥ pāva̱ko̱3̱̍'gnirdī̍dāya̱ mānu̍ṣīṣu vi̱kṣu || 4.006.07
dviryaṁ pañca̱ jīja̍nansa̱ṁvasā̍nā̱ḥ svasā̍ro a̱gniṁ mānu̍ṣīṣu vi̱kṣu |
u̱ṣa̱rbudha̍matha̱ryo̱3̱̍ na danta̍ṁ śu̱kraṁ svāsa̍ṁ para̱śuṁ na ti̱gmam || 4.006.08
tava̱ tye a̍gne ha̱rito̍ ghṛta̱snā rohi̍tāsa ṛ̱jvañca̱ḥ svañca̍ḥ |
a̱ru̱ṣāso̱ vṛṣa̍ṇa ṛjumu̱ṣkā ā de̱vatā̍timahvanta da̱smāḥ || 4.006.09
ye ha̱ tye te̱ saha̍mānā a̱yāsa̍stve̱ṣāso̍ agne a̱rcaya̱ścara̍nti |
śye̱nāso̱ na du̍vasa̱nāso̱ artha̍ṁ tuviṣva̱ṇaso̱ māru̍ta̱ṁ na śardha̍ḥ || 4.006.10
akā̍ri̱ brahma̍ samidhāna̱ tubhya̱ṁ śaṁsā̍tyu̱kthaṁ yaja̍te̱ vyū̍ dhāḥ |
hotā̍rama̱gniṁ manu̍ṣo̱ ni ṣe̍durnama̱syanta̍ u̱śija̱ḥ śaṁsa̍mā̱yoḥ || 4.006.11
a̱yami̱ha pra̍tha̱mo dhā̍yi dhā̱tṛbhi̱rhotā̱ yaji̍ṣṭho adhva̱reṣvīḍya̍ḥ |
yamapna̍vāno̱ bhṛga̍vo viruru̱curvane̍ṣu ci̱traṁ vi̱bhva̍ṁ vi̱śevi̍śe || 4.007.01
agne̍ ka̱dā ta̍ ānu̱ṣagbhuva̍dde̱vasya̱ ceta̍nam |
adhā̱ hi tvā̍ jagṛbhri̱re martā̍so vi̱kṣvīḍya̍m || 4.007.02
ṛ̱tāvā̍na̱ṁ vice̍tasa̱ṁ paśya̍nto̱ dyāmi̍va̱ stṛbhi̍ḥ |
viśve̍ṣāmadhva̱rāṇā̍ṁ haska̱rtāra̱ṁ dame̍dame || 4.007.03
ā̱śuṁ dū̱taṁ vi̱vasva̍to̱ viśvā̱ yaśca̍rṣa̱ṇīra̱bhi |
ā ja̍bhruḥ ke̱tumā̱yavo̱ bhṛga̍vāṇaṁ vi̱śevi̍śe || 4.007.04
tamī̱ṁ hotā̍ramānu̱ṣakci̍ki̱tvāṁsa̱ṁ ni ṣe̍dire |
ra̱ṇvaṁ pā̍va̱kaśo̍ciṣa̱ṁ yaji̍ṣṭhaṁ sa̱pta dhāma̍bhiḥ || 4.007.05
taṁ śaśva̍tīṣu mā̱tṛṣu̱ vana̱ ā vī̱tamaśri̍tam |
ci̱traṁ santa̱ṁ guhā̍ hi̱taṁ su̱veda̍ṁ kūcida̱rthina̍m || 4.007.06
sa̱sasya̱ yadviyu̍tā̱ sasmi̱nnūdha̍nnṛ̱tasya̱ dhāma̍nra̱ṇaya̍nta de̱vāḥ |
ma̱hā a̱gnirnama̍sā rā̱taha̍vyo̱ vera̍dhva̱rāya̱ sada̱midṛ̱tāvā̍ || 4.007.07
vera̍dhva̱rasya̍ dū̱tyā̍ni vi̱dvānu̱bhe a̱ntā roda̍sī saṁciki̱tvān |
dū̱ta ī̍yase pra̱diva̍ urā̱ṇo vi̱duṣṭa̍ro di̱va ā̱rodha̍nāni || 4.007.08
kṛ̱ṣṇaṁ ta̱ ema̱ ruśa̍taḥ pu̱ro bhāśca̍ri̱ṣṇva1̱̍rcirvapu̍ṣā̱mideka̍m |
yadapra̍vītā̱ dadha̍te ha̱ garbha̍ṁ sa̱dyaści̍jjā̱to bhava̱sīdu̍ dū̱taḥ || 4.007.09
sa̱dyo jā̱tasya̱ dadṛ̍śāna̱mojo̱ yada̍sya̱ vāto̍ anu̱vāti̍ śo̱ciḥ |
vṛ̱ṇakti̍ ti̱gmāma̍ta̱seṣu̍ ji̱hvāṁ sthi̱rā ci̱dannā̍ dayate̱ vi jambhai̍ḥ || 4.007.10
tṛ̱ṣu yadannā̍ tṛ̱ṣuṇā̍ va̱vakṣa̍ tṛ̱ṣuṁ dū̱taṁ kṛ̍ṇute ya̱hvo a̱gniḥ |
vāta̍sya me̱ḻiṁ sa̍cate ni̱jūrva̍nnā̱śuṁ na vā̍jayate hi̱nve arvā̍ || 4.007.11
dū̱taṁ vo̍ vi̱śvave̍dasaṁ havya̱vāha̱mama̍rtyam |
yaji̍ṣṭhamṛñjase gi̱rā || 4.008.01
sa hi vedā̱ vasu̍dhitiṁ ma̱hā ā̱rodha̍naṁ di̱vaḥ |
sa de̱vā eha va̍kṣati || 4.008.02
sa ve̍da de̱va ā̱nama̍ṁ de̱vā ṛ̍tāya̱te dame̍ |
dāti̍ pri̱yāṇi̍ ci̱dvasu̍ || 4.008.03
sa hotā̱ sedu̍ dū̱tya̍ṁ ciki̱tvā a̱ntarī̍yate |
vi̱dvā ā̱rodha̍naṁ di̱vaḥ || 4.008.04
te syā̍ma̱ ye a̱gnaye̍ dadā̱śurha̱vyadā̍tibhiḥ |
ya ī̱ṁ puṣya̍nta indha̱te || 4.008.05
te rā̱yā te su̱vīryai̍ḥ sasa̱vāṁso̱ vi śṛ̍ṇvire |
ye a̱gnā da̍dhi̱re duva̍ḥ || 4.008.06
a̱sme rāyo̍ di̱vedi̍ve̱ saṁ ca̍rantu puru̱spṛha̍ḥ |
a̱sme vājā̍sa īratām || 4.008.07
sa vipra̍ścarṣaṇī̱nāṁ śava̍sā̱ mānu̍ṣāṇām |
ati̍ kṣi̱preva̍ vidhyati || 4.008.08
agne̍ mṛ̱ḻa ma̱hā a̍si̱ ya ī̱mā de̍va̱yuṁ jana̍m |
i̱yetha̍ ba̱rhirā̱sada̍m || 4.009.01
sa mānu̍ṣīṣu dū̱ḻabho̍ vi̱kṣu prā̱vīrama̍rtyaḥ |
dū̱to viśve̍ṣāṁ bhuvat || 4.009.02
sa sadma̱ pari̍ ṇīyate̱ hotā̍ ma̱ndro divi̍ṣṭiṣu |
u̱ta potā̱ ni ṣī̍dati || 4.009.03
u̱ta gnā a̱gnira̍dhva̱ra u̱to gṛ̱hapa̍ti̱rdame̍ |
u̱ta bra̱hmā ni ṣī̍dati || 4.009.04
veṣi̱ hya̍dhvarīya̱tāmu̍pava̱ktā janā̍nām |
ha̱vyā ca̱ mānu̍ṣāṇām || 4.009.05
veṣīdva̍sya dū̱tyaṁ1̱̍ yasya̱ jujo̍ṣo adhva̱ram |
ha̱vyaṁ marta̍sya̱ voḻha̍ve || 4.009.06
a̱smāka̍ṁ joṣyadhva̱rama̱smāka̍ṁ ya̱jñama̍ṅgiraḥ |
a̱smāka̍ṁ śṛṇudhī̱ hava̍m || 4.009.07
pari̍ te dū̱ḻabho̱ ratho̱'smā a̍śnotu vi̱śvata̍ḥ |
yena̱ rakṣa̍si dā̱śuṣa̍ḥ || 4.009.08
agne̱ tama̱dyāśva̱ṁ na stomai̱ḥ kratu̱ṁ na bha̱draṁ hṛ̍di̱spṛśa̍m |
ṛ̱dhyāmā̍ ta̱ ohai̍ḥ || 4.010.01
adhā̱ hya̍gne̱ krato̍rbha̱drasya̱ dakṣa̍sya sā̱dhoḥ |
ra̱thīrṛ̱tasya̍ bṛha̱to ba̱bhūtha̍ || 4.010.02
e̱bhirno̍ a̱rkairbhavā̍ no a̱rvāṅsva1̱̍rṇa jyoti̍ḥ |
agne̱ viśve̍bhiḥ su̱manā̱ anī̍kaiḥ || 4.010.03
ā̱bhiṣṭe̍ a̱dya gī̱rbhirgṛ̱ṇanto'gne̱ dāśe̍ma |
pra te̍ di̱vo na sta̍nayanti̱ śuṣmā̍ḥ || 4.010.04
tava̱ svādi̱ṣṭhāgne̱ saṁdṛ̍ṣṭiri̱dā ci̱dahna̍ i̱dā ci̍da̱ktoḥ |
śri̱ye ru̱kmo na ro̍cata upā̱ke || 4.010.05
ghṛ̱taṁ na pū̱taṁ ta̱nūra̍re̱pāḥ śuci̱ hira̍ṇyam |
tatte̍ ru̱kmo na ro̍cata svadhāvaḥ || 4.010.06
kṛ̱taṁ ci̱ddhi ṣmā̱ sane̍mi̱ dveṣo'gna̍ i̱noṣi̱ martā̍t |
i̱tthā yaja̍mānādṛtāvaḥ || 4.010.07
śi̱vā na̍ḥ sa̱khyā santu̍ bhrā̱trāgne̍ de̱veṣu̍ yu̱ṣme |
sā no̱ nābhi̱ḥ sada̍ne̱ sasmi̱nnūdha̍n || 4.010.08
bha̱draṁ te̍ agne sahasi̱nnanī̍kamupā̱ka ā ro̍cate̱ sūrya̍sya |
ruśa̍ddṛ̱śe da̍dṛśe nakta̱yā ci̱darū̍kṣitaṁ dṛ̱śa ā rū̱pe anna̍m || 4.011.01
vi ṣā̍hyagne gṛṇa̱te ma̍nī̱ṣāṁ khaṁ vepa̍sā tuvijāta̱ stavā̍naḥ |
viśve̍bhi̱ryadvā̱vana̍ḥ śukra de̱vaistanno̍ rāsva sumaho̱ bhūri̱ manma̍ || 4.011.02
tvada̍gne̱ kāvyā̱ tvanma̍nī̱ṣāstvadu̱kthā jā̍yante̱ rādhyā̍ni |
tvade̍ti̱ dravi̍ṇaṁ vī̱rape̍śā i̱tthādhi̍ye dā̱śuṣe̱ martyā̍ya || 4.011.03
tvadvā̱jī vā̍jambha̱ro vihā̍yā abhiṣṭi̱kṛjjā̍yate sa̱tyaśu̍ṣmaḥ |
tvadra̱yirde̱vajū̍to mayo̱bhustvadā̱śurjū̍ju̱vā a̍gne̱ arvā̍ || 4.011.04
tvāma̍gne pratha̱maṁ de̍va̱yanto̍ de̱vaṁ martā̍ amṛta ma̱ndraji̍hvam |
dve̱ṣo̱yuta̱mā vi̍vāsanti dhī̱bhirdamū̍nasaṁ gṛ̱hapa̍ti̱mamū̍ram || 4.011.05
ā̱re a̱smadama̍timā̱re aṁha̍ ā̱re viśvā̍ṁ durma̱tiṁ yanni̱pāsi̍ |
do̱ṣā śi̱vaḥ sa̍hasaḥ sūno agne̱ yaṁ de̱va ā ci̱tsaca̍se sva̱sti || 4.011.06
yastvāma̍gna i̱nadha̍te ya̱tasru̱ktriste̱ anna̍ṁ kṛ̱ṇava̱tsasmi̱nnaha̍n |
sa su dyu̱mnaira̱bhya̍stu pra̱sakṣa̱ttava̱ kratvā̍ jātavedaściki̱tvān || 4.012.01
i̱dhmaṁ yaste̍ ja̱bhara̍cchaśramā̱ṇo ma̱ho a̍gne̱ anī̍ka̱mā sa̍pa̱ryan |
sa i̍dhā̱naḥ prati̍ do̱ṣāmu̱ṣāsa̱ṁ puṣya̍nra̱yiṁ sa̍cate̱ ghnanna̱mitrā̍n || 4.012.02
a̱gnirī̍śe bṛha̱taḥ kṣa̱triya̍syā̱gnirvāja̍sya para̱masya̍ rā̱yaḥ |
dadhā̍ti̱ ratna̍ṁ vidha̱te yavi̍ṣṭho̱ vyā̍nu̱ṣaṅmartyā̍ya sva̱dhāvā̍n || 4.012.03
yacci̱ddhi te̍ puruṣa̱trā ya̍vi̱ṣṭhāci̍ttibhiścakṛ̱mā kacci̱dāga̍ḥ |
kṛ̱dhī ṣva1̱̍smā adi̍te̱ranā̍gā̱nvyenā̍ṁsi śiśratho̱ viṣva̍gagne || 4.012.04
ma̱haści̍dagna̱ ena̍so a̱bhīka̍ ū̱rvādde̱vānā̍mu̱ta martyā̍nām |
mā te̱ sakhā̍ya̱ḥ sada̱midri̍ṣāma̱ yacchā̍ to̱kāya̱ tana̍yāya̱ śaṁ yoḥ || 4.012.05
yathā̍ ha̱ tyadva̍savo gau̱rya̍ṁ citpa̱di ṣi̱tāmamu̍ñcatā yajatrāḥ |
e̱vo ṣva1̱̍smanmu̍ñcatā̱ vyaṁha̱ḥ pra tā̍ryagne prata̱raṁ na̱ āyu̍ḥ || 4.012.06
pratya̱gniru̱ṣasā̱magra̍makhyadvibhātī̱nāṁ su̱manā̍ ratna̱dheya̍m |
yā̱tama̍śvinā su̱kṛto̍ duro̱ṇamutsūryo̱ jyoti̍ṣā de̱va e̍ti || 4.013.01
ū̱rdhvaṁ bhā̱nuṁ sa̍vi̱tā de̱vo a̍średdra̱psaṁ davi̍dhvadgavi̱ṣo na satvā̍ |
anu̍ vra̱taṁ varu̍ṇo yanti mi̱tro yatsūrya̍ṁ di̱vyā̍ro̱haya̍nti || 4.013.02
yaṁ sī̱makṛ̍ṇva̱ntama̍se vi̱pṛce̍ dhru̱vakṣe̍mā̱ ana̍vasyanto̱ artha̍m |
taṁ sūrya̍ṁ ha̱rita̍ḥ sa̱pta ya̱hvīḥ spaśa̱ṁ viśva̍sya̱ jaga̍to vahanti || 4.013.03
vahi̍ṣṭhebhirvi̱hara̍nyāsi̱ tantu̍mava̱vyaya̱nnasi̍taṁ deva̱ vasma̍ |
davi̍dhvato ra̱śmaya̱ḥ sūrya̍sya̱ carme̱vāvā̍dhu̱stamo̍ a̱psva1̱̍ntaḥ || 4.013.04
anā̍yato̱ ani̍baddhaḥ ka̱thāyaṁ nya̍ṅṅuttā̱no'va̍ padyate̱ na |
kayā̍ yāti sva̱dhayā̱ ko da̍darśa di̱vaḥ ska̱mbhaḥ samṛ̍taḥ pāti̱ nāka̍m || 4.013.05
pratya̱gniru̱ṣaso̍ jā̱tave̍dā̱ akhya̍dde̱vo roca̍mānā̱ maho̍bhiḥ |
ā nā̍satyorugā̱yā rathe̍ne̱maṁ ya̱jñamupa̍ no yāta̱maccha̍ || 4.014.01
ū̱rdhvaṁ ke̱tuṁ sa̍vi̱tā de̱vo a̍śre̱jjyoti̱rviśva̍smai̱ bhuva̍nāya kṛ̱ṇvan |
āprā̱ dyāvā̍pṛthi̱vī a̱ntari̍kṣa̱ṁ vi sūryo̍ ra̱śmibhi̱śceki̍tānaḥ || 4.014.02
ā̱vaha̍ntyaru̱ṇīrjyoti̱ṣāgā̍nma̱hī ci̱trā ra̱śmibhi̱śceki̍tānā |
pra̱bo̱dhaya̍ntī suvi̱tāya̍ de̱vyu1̱̍ṣā ī̍yate su̱yujā̱ rathe̍na || 4.014.03
ā vā̱ṁ vahi̍ṣṭhā i̱ha te va̍hantu̱ rathā̱ aśvā̍sa u̱ṣaso̱ vyu̍ṣṭau |
i̱me hi vā̍ṁ madhu̱peyā̍ya̱ somā̍ a̱sminya̱jñe vṛ̍ṣaṇā mādayethām || 4.014.04
anā̍yato̱ ani̍baddhaḥ ka̱thāyaṁ nya̍ṅṅuttā̱no'va̍ padyate̱ na |
kayā̍ yāti sva̱dhayā̱ ko da̍darśa di̱vaḥ ska̱mbhaḥ samṛ̍taḥ pāti̱ nāka̍m || 4.014.05
a̱gnirhotā̍ no adhva̱re vā̱jī sanpari̍ ṇīyate |
de̱vo de̱veṣu̍ ya̱jñiya̍ḥ || 4.015.01
pari̍ trivi̱ṣṭya̍dhva̱raṁ yātya̱gnī ra̱thīri̍va |
ā de̱veṣu̱ prayo̱ dadha̍t || 4.015.02
pari̱ vāja̍patiḥ ka̱vira̱gnirha̱vyānya̍kramīt |
dadha̱dratnā̍ni dā̱śuṣe̍ || 4.015.03
a̱yaṁ yaḥ sṛñja̍ye pu̱ro dai̍vavā̱te sa̍mi̱dhyate̍ |
dyu̱mā a̍mitra̱dambha̍naḥ || 4.015.04
asya̍ ghā vī̱ra īva̍to̱'gnerī̍śīta̱ martya̍ḥ |
ti̱gmaja̍mbhasya mī̱ḻhuṣa̍ḥ || 4.015.05
tamarva̍nta̱ṁ na sā̍na̱sima̍ru̱ṣaṁ na di̱vaḥ śiśu̍m |
ma̱rmṛ̱jyante̍ di̱vedi̍ve || 4.015.06
bodha̱dyanmā̱ hari̍bhyāṁ kumā̱raḥ sā̍hade̱vyaḥ |
acchā̱ na hū̱ta uda̍ram || 4.015.07
u̱ta tyā ya̍ja̱tā harī̍ kumā̱rātsā̍hade̱vyāt |
praya̍tā sa̱dya ā da̍de || 4.015.08
e̱ṣa vā̍ṁ devāvaśvinā kumā̱raḥ sā̍hade̱vyaḥ |
dī̱rghāyu̍rastu̱ soma̍kaḥ || 4.015.09
taṁ yu̱vaṁ de̍vāvaśvinā kumā̱raṁ sā̍hade̱vyam |
dī̱rghāyu̍ṣaṁ kṛṇotana || 4.015.10
ā sa̱tyo yā̍tu ma̱ghavā̍ ṛjī̱ṣī drava̍ntvasya̱ hara̍ya̱ upa̍ naḥ |
tasmā̱ idandha̍ḥ suṣumā su̱dakṣa̍mi̱hābhi̍pi̱tvaṁ ka̍rate gṛṇā̱naḥ || 4.016.01
ava̍ sya śū̱rādhva̍no̱ nānte̱'sminno̍ a̱dya sava̍ne ma̱ndadhyai̍ |
śaṁsā̍tyu̱kthamu̱śane̍va ve̱dhāści̍ki̱tuṣe̍ asu̱ryā̍ya̱ manma̍ || 4.016.02
ka̱virna ni̱ṇyaṁ vi̱dathā̍ni̱ sādha̱nvṛṣā̱ yatseka̍ṁ vipipā̱no arcā̍t |
di̱va i̱tthā jī̍janatsa̱pta kā̱rūnahnā̍ ciccakrurva̱yunā̍ gṛ̱ṇanta̍ḥ || 4.016.03
sva1̱̍ryadvedi̍ su̱dṛśī̍kama̱rkairmahi̱ jyotī̍ rurucu̱ryaddha̱ vasto̍ḥ |
a̱ndhā tamā̍ṁsi̱ dudhi̍tā vi̱cakṣe̱ nṛbhya̍ścakāra̱ nṛta̍mo a̱bhiṣṭau̍ || 4.016.04
va̱va̱kṣa indro̱ ami̍tamṛjī̱ṣyu1̱̍bhe ā pa̍prau̱ roda̍sī mahi̱tvā |
ata̍ścidasya mahi̱mā vi re̍cya̱bhi yo viśvā̱ bhuva̍nā ba̱bhūva̍ || 4.016.05
viśvā̍ni śa̱kro naryā̍ṇi vi̱dvāna̱po ri̍reca̱ sakhi̍bhi̱rnikā̍maiḥ |
aśmā̍naṁ ci̱dye bi̍bhi̱durvaco̍bhirvra̱jaṁ goma̍ntamu̱śijo̱ vi va̍vruḥ || 4.016.06
a̱po vṛ̱traṁ va̍vri̱vāṁsa̱ṁ parā̍ha̱nprāva̍tte̱ vajra̍ṁ pṛthi̱vī sace̍tāḥ |
prārṇā̍ṁsi samu̱driyā̍ṇyaino̱ḥ pati̱rbhava̱ñchava̍sā śūra dhṛṣṇo || 4.016.07
a̱po yadadri̍ṁ puruhūta̱ darda̍rā̱virbhu̍vatsa̱ramā̍ pū̱rvyaṁ te̍ |
sa no̍ ne̱tā vāja̱mā da̍rṣi̱ bhūri̍ṁ go̱trā ru̱jannaṅgi̍robhirgṛṇā̱naḥ || 4.016.08
acchā̍ ka̱viṁ nṛ̍maṇo gā a̱bhiṣṭau̱ sva̍rṣātā maghava̱nnādha̍mānam |
ū̱tibhi̱stami̍ṣaṇo dyu̱mnahū̍tau̱ ni mā̱yāvā̱nabra̍hmā̱ dasyu̍rarta || 4.016.09
ā da̍syu̱ghnā mana̍sā yā̱hyasta̱ṁ bhuva̍tte̱ kutsa̍ḥ sa̱khye nikā̍maḥ |
sve yonau̱ ni ṣa̍data̱ṁ sarū̍pā̱ vi vā̍ṁ cikitsadṛta̱ciddha̱ nārī̍ || 4.016.10
yāsi̱ kutse̍na sa̱ratha̍mava̱syusto̱do vāta̍sya̱ haryo̱rīśā̍naḥ |
ṛ̱jrā vāja̱ṁ na gadhya̱ṁ yuyū̍ṣanka̱viryadaha̱npāryā̍ya̱ bhūṣā̍t || 4.016.11
kutsā̍ya̱ śuṣṇa̍ma̱śuṣa̱ṁ ni ba̍rhīḥ prapi̱tve ahna̱ḥ kuya̍vaṁ sa̱hasrā̍ |
sa̱dyo dasyū̱npra mṛ̍ṇa ku̱tsyena̱ pra sūra̍śca̱kraṁ vṛ̍hatāda̱bhīke̍ || 4.016.12
tvaṁ pipru̱ṁ mṛga̍yaṁ śūśu̱vāṁsa̍mṛ̱jiśva̍ne vaidathi̱nāya̍ randhīḥ |
pa̱ñcā̱śatkṛ̱ṣṇā ni va̍paḥ sa̱hasrātka̱ṁ na puro̍ jari̱mā vi da̍rdaḥ || 4.016.13
sūra̍ upā̱ke ta̱nvaṁ1̱̍ dadhā̍no̱ vi yatte̱ cetya̱mṛta̍sya̱ varpa̍ḥ |
mṛ̱go na ha̱stī tavi̍ṣīmuṣā̱ṇaḥ si̱ṁho na bhī̱ma āyu̍dhāni̱ bibhra̍t || 4.016.14
indra̱ṁ kāmā̍ vasū̱yanto̍ agma̱nsva̍rmīḻhe̱ na sava̍ne cakā̱nāḥ |
śra̱va̱syava̍ḥ śaśamā̱nāsa̍ u̱kthairoko̱ na ra̱ṇvā su̱dṛśī̍va pu̱ṣṭiḥ || 4.016.15
tamidva̱ indra̍ṁ su̱hava̍ṁ huvema̱ yastā ca̱kāra̱ naryā̍ pu̱rūṇi̍ |
yo māva̍te jari̱tre gadhya̍ṁ cinma̱kṣū vāja̱ṁ bhara̍ti spā̱rharā̍dhāḥ || 4.016.16
ti̱gmā yada̱ntara̱śani̱ḥ patā̍ti̱ kasmi̍ñcicchūra muhu̱ke janā̍nām |
gho̱rā yada̍rya̱ samṛ̍ti̱rbhavā̱tyadha̍ smā nasta̱nvo̍ bodhi go̱pāḥ || 4.016.17
bhuvo̍'vi̱tā vā̱made̍vasya dhī̱nāṁ bhuva̱ḥ sakhā̍vṛ̱ko vāja̍sātau |
tvāmanu̱ prama̍ti̱mā ja̍ganmoru̱śaṁso̍ jari̱tre vi̱śvadha̍ syāḥ || 4.016.18
e̱bhirnṛbhi̍rindra tvā̱yubhi̍ṣṭvā ma̱ghava̍dbhirmaghava̱nviśva̍ ā̱jau |
dyāvo̱ na dyu̱mnaira̱bhi santo̍ a̱ryaḥ kṣa̱po ma̍dema śa̱rada̍śca pū̱rvīḥ || 4.016.19
e̱vedindrā̍ya vṛṣa̱bhāya̱ vṛṣṇe̱ brahmā̍karma̱ bhṛga̍vo̱ na ratha̍m |
nū ci̱dyathā̍ naḥ sa̱khyā vi̱yoṣa̱dasa̍nna u̱gro̍'vi̱tā ta̍nū̱pāḥ || 4.016.20
nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ || 4.016.21
tvaṁ ma̱hā i̍ndra̱ tubhya̍ṁ ha̱ kṣā anu̍ kṣa̱traṁ ma̱ṁhanā̍ manyata̱ dyauḥ |
tvaṁ vṛ̱traṁ śava̍sā jagha̱nvānsṛ̱jaḥ sindhū̱rahi̍nā jagrasā̱nān || 4.017.01
tava̍ tvi̱ṣo jani̍manrejata̱ dyau reja̱dbhūmi̍rbhi̱yasā̱ svasya̍ ma̱nyoḥ |
ṛ̱ghā̱yanta̍ su̱bhva1̱̍ḥ parva̍tāsa̱ ārda̱ndhanvā̍ni sa̱raya̍nta̱ āpa̍ḥ || 4.017.02
bhi̱nadgi̱riṁ śava̍sā̱ vajra̍mi̱ṣṇannā̍viṣkṛṇvā̱naḥ sa̍hasā̱na oja̍ḥ |
vadhī̍dvṛ̱traṁ vajre̍ṇa mandasā̱naḥ sara̱nnāpo̱ java̍sā ha̱tavṛ̍ṣṇīḥ || 4.017.03
su̱vīra̍ste jani̱tā ma̍nyata̱ dyaurindra̍sya ka̱rtā svapa̍stamo bhūt |
ya ī̍ṁ ja̱jāna̍ sva̱rya̍ṁ su̱vajra̱mana̍pacyuta̱ṁ sada̍so̱ na bhūma̍ || 4.017.04
ya eka̍ iccyā̱vaya̍ti̱ pra bhūmā̱ rājā̍ kṛṣṭī̱nāṁ pu̍ruhū̱ta indra̍ḥ |
sa̱tyame̍na̱manu̱ viśve̍ madanti rā̱tiṁ de̱vasya̍ gṛṇa̱to ma̱ghona̍ḥ || 4.017.05
sa̱trā somā̍ abhavannasya̱ viśve̍ sa̱trā madā̍so bṛha̱to madi̍ṣṭhāḥ |
sa̱trābha̍vo̱ vasu̍pati̱rvasū̍nā̱ṁ datre̱ viśvā̍ adhithā indra kṛ̱ṣṭīḥ || 4.017.06
tvamadha̍ pratha̱maṁ jāya̍mā̱no'me̱ viśvā̍ adhithā indra kṛ̱ṣṭīḥ |
tvaṁ prati̍ pra̱vata̍ ā̱śayā̍na̱mahi̱ṁ vajre̍ṇa maghava̱nvi vṛ̍ścaḥ || 4.017.07
sa̱trā̱haṇa̱ṁ dādhṛ̍ṣi̱ṁ tumra̱mindra̍ṁ ma̱hāma̍pā̱raṁ vṛ̍ṣa̱bhaṁ su̱vajra̍m |
hantā̱ yo vṛ̱traṁ sani̍to̱ta vāja̱ṁ dātā̍ ma̱ghāni̍ ma̱ghavā̍ su̱rādhā̍ḥ || 4.017.08
a̱yaṁ vṛta̍ścātayate samī̱cīrya ā̱jiṣu̍ ma̱ghavā̍ śṛ̱ṇva eka̍ḥ |
a̱yaṁ vāja̍ṁ bharati̱ yaṁ sa̱notya̱sya pri̱yāsa̍ḥ sa̱khye syā̍ma || 4.017.09
a̱yaṁ śṛ̍ṇve̱ adha̱ jaya̍nnu̱ta ghnanna̱yamu̱ta pra kṛ̍ṇute yu̱dhā gāḥ |
ya̱dā sa̱tyaṁ kṛ̍ṇu̱te ma̱nyumindro̱ viśva̍ṁ dṛ̱ḻhaṁ bha̍yata̱ eja̍dasmāt || 4.017.10
samindro̱ gā a̍jaya̱tsaṁ hira̍ṇyā̱ sama̍śvi̱yā ma̱ghavā̱ yo ha̍ pū̱rvīḥ |
e̱bhirnṛbhi̱rnṛta̍mo asya śā̱kai rā̱yo vi̍bha̱ktā sa̍mbha̱raśca̱ vasva̍ḥ || 4.017.11
kiya̍tsvi̱dindro̱ adhye̍ti mā̱tuḥ kiya̍tpi̱turja̍ni̱turyo ja̱jāna̍ |
yo a̍sya̱ śuṣma̍ṁ muhu̱kairiya̍rti̱ vāto̱ na jū̱taḥ sta̱naya̍dbhira̱bhraiḥ || 4.017.12
kṣi̱yanta̍ṁ tva̱makṣi̍yantaṁ kṛṇo̱tīya̍rti re̱ṇuṁ ma̱ghavā̍ sa̱moha̍m |
vi̱bha̱ñja̱nura̱śani̍mā iva̱ dyauru̱ta sto̱tāra̍ṁ ma̱ghavā̱ vasau̍ dhāt || 4.017.13
a̱yaṁ ca̱krami̍ṣaṇa̱tsūrya̍sya̱ nyeta̍śaṁ rīramatsasṛmā̱ṇam |
ā kṛ̱ṣṇa ī̍ṁ juhurā̱ṇo ji̍gharti tva̱co bu̱dhne raja̍so a̱sya yonau̍ || 4.017.14
asi̍knyā̱ṁ yaja̍māno̱ na hotā̍ || 4.017.15
ga̱vyanta̱ indra̍ṁ sa̱khyāya̱ viprā̍ aśvā̱yanto̱ vṛṣa̍ṇaṁ vā̱jaya̍ntaḥ |
ja̱nī̱yanto̍ jani̱dāmakṣi̍toti̱mā cyā̍vayāmo'va̱te na kośa̍m || 4.017.16
trā̱tā no̍ bodhi̱ dadṛ̍śāna ā̱pira̍bhikhyā̱tā ma̍rḍi̱tā so̱myānā̍m |
sakhā̍ pi̱tā pi̱tṛta̍maḥ pitṝ̱ṇāṁ karte̍mu lo̱kamu̍śa̱te va̍yo̱dhāḥ || 4.017.17
sa̱khī̱ya̱tāma̍vi̱tā bo̍dhi̱ sakhā̍ gṛṇā̱na i̍ndra stuva̱te vayo̍ dhāḥ |
va̱yaṁ hyā te̍ cakṛ̱mā sa̱bādha̍ ā̱bhiḥ śamī̍bhirma̱haya̍nta indra || 4.017.18
stu̱ta indro̍ ma̱ghavā̱ yaddha̍ vṛ̱trā bhūrī̱ṇyeko̍ apra̱tīni̍ hanti |
a̱sya pri̱yo ja̍ri̱tā yasya̱ śarma̱nnaki̍rde̱vā vā̱raya̍nte̱ na martā̍ḥ || 4.017.19
e̱vā na̱ indro̍ ma̱ghavā̍ vira̱pśī kara̍tsa̱tyā ca̍rṣaṇī̱dhṛda̍na̱rvā |
tvaṁ rājā̍ ja̱nuṣā̍ṁ dhehya̱sme adhi̱ śravo̱ māhi̍na̱ṁ yajja̍ri̱tre || 4.017.20
nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ || 4.017.21
a̱yaṁ panthā̱ anu̍vittaḥ purā̱ṇo yato̍ de̱vā u̱dajā̍yanta̱ viśve̍ |
ata̍ści̱dā ja̍niṣīṣṭa̱ pravṛ̍ddho̱ mā mā̱tara̍mamu̱yā patta̍ve kaḥ || 4.018.01
nāhamato̱ nira̍yā du̱rgahai̱tatti̍ra̱ścatā̍ pā̱rśvānnirga̍māṇi |
ba̱hūni̍ me̱ akṛ̍tā̱ kartvā̍ni̱ yudhyai̍ tvena̱ saṁ tve̍na pṛcchai || 4.018.02
pa̱rā̱ya̱tīṁ mā̱tara̱manva̍caṣṭa̱ na nānu̍ gā̱nyanu̱ nū ga̍māni |
tvaṣṭu̍rgṛ̱he a̍piba̱tsoma̱mindra̍ḥ śatadha̱nya̍ṁ ca̱mvo̍ḥ su̱tasya̍ || 4.018.03
kiṁ sa ṛdha̍kkṛṇava̱dyaṁ sa̱hasra̍ṁ mā̱so ja̱bhāra̍ śa̱rada̍śca pū̱rvīḥ |
na̱hī nva̍sya prati̱māna̱mastya̱ntarjā̱teṣū̱ta ye jani̍tvāḥ || 4.018.04
a̱va̱dyami̍va̱ manya̍mānā̱ guhā̍ka̱rindra̍ṁ mā̱tā vī̱rye̍ṇā̱ nyṛ̍ṣṭam |
athoda̍sthātsva̱yamatka̱ṁ vasā̍na̱ ā roda̍sī apṛṇā̱jjāya̍mānaḥ || 4.018.05
e̱tā a̍rṣantyalalā̱bhava̍ntīrṛ̱tāva̍rīriva sa̱ṁkrośa̍mānāḥ |
e̱tā vi pṛ̍ccha̱ kimi̱daṁ bha̍nanti̱ kamāpo̱ adri̍ṁ pari̱dhiṁ ru̍janti || 4.018.06
kimu̍ ṣvidasmai ni̱vido̍ bhana̱ntendra̍syāva̱dyaṁ di̍dhiṣanta̱ āpa̍ḥ |
mamai̱tānpu̱tro ma̍ha̱tā va̱dhena̍ vṛ̱traṁ ja̍gha̱nvā a̍sṛja̱dvi sindhū̍n || 4.018.07
mama̍cca̱na tvā̍ yuva̱tiḥ pa̱rāsa̱ mama̍cca̱na tvā̍ ku̱ṣavā̍ ja̱gāra̍ |
mama̍cci̱dāpa̱ḥ śiśa̍ve mamṛḍyu̱rmama̍cci̱dindra̱ḥ saha̱soda̍tiṣṭhat || 4.018.08
mama̍cca̱na te̍ maghava̱nvya̍ṁso nivivi̱dhvā apa̱ hanū̍ ja̱ghāna̍ |
adhā̱ nivi̍ddha̱ utta̍ro babhū̱vāñchiro̍ dā̱sasya̱ saṁ pi̍ṇagva̱dhena̍ || 4.018.09
gṛ̱ṣṭiḥ sa̍sūva̱ sthavi̍raṁ tavā̱gāma̍nādhṛ̱ṣyaṁ vṛ̍ṣa̱bhaṁ tumra̱mindra̍m |
arī̍ḻhaṁ va̱tsaṁ ca̱rathā̍ya mā̱tā sva̱yaṁ gā̱tuṁ ta̱nva̍ i̱cchamā̍nam || 4.018.10
u̱ta mā̱tā ma̍hi̱ṣamanva̍venada̱mī tvā̍ jahati putra de̱vāḥ |
athā̍bravīdvṛ̱tramindro̍ hani̱ṣyansakhe̍ viṣṇo vita̱raṁ vi kra̍masva || 4.018.11
kaste̍ mā̱tara̍ṁ vi̱dhavā̍macakraccha̱yuṁ kastvāma̍jighāṁsa̱ccara̍ntam |
kaste̍ de̱vo adhi̍ mārḍī̱ka ā̍sī̱dyatprākṣi̍ṇāḥ pi̱tara̍ṁ pāda̱gṛhya̍ || 4.018.12
ava̍rtyā̱ śuna̍ ā̱ntrāṇi̍ pece̱ na de̱veṣu̍ vivide marḍi̱tāra̍m |
apa̍śyaṁ jā̱yāmama̍hīyamānā̱madhā̍ me śye̱no madhvā ja̍bhāra || 4.018.13
e̱vā tvāmi̍ndra vajri̱nnatra̱ viśve̍ de̱vāsa̍ḥ su̱havā̍sa̱ ūmā̍ḥ |
ma̱hāmu̱bhe roda̍sī vṛ̱ddhamṛ̱ṣvaṁ nireka̱midvṛ̍ṇate vṛtra̱hatye̍ || 4.019.01
avā̍sṛjanta̱ jivra̍yo̱ na de̱vā bhuva̍ḥ sa̱mrāḻi̍ndra sa̱tyayo̍niḥ |
aha̱nnahi̍ṁ pari̱śayā̍na̱marṇa̱ḥ pra va̍rta̱nīra̍rado vi̱śvadhe̍nāḥ || 4.019.02
atṛ̍pṇuvanta̱ṁ viya̍tamabu̱dhyamabu̍dhyamānaṁ suṣupā̱ṇami̍ndra |
sa̱pta prati̍ pra̱vata̍ ā̱śayā̍na̱mahi̱ṁ vajre̍ṇa̱ vi ri̍ṇā apa̱rvan || 4.019.03
akṣo̍daya̱cchava̍sā̱ kṣāma̍ bu̱dhnaṁ vārṇa vāta̱stavi̍ṣībhi̱rindra̍ḥ |
dṛ̱ḻhānyau̍bhnādu̱śamā̍na̱ ojo'vā̍bhinatka̱kubha̱ḥ parva̍tānām || 4.019.04
a̱bhi pra da̍dru̱rjana̍yo̱ na garbha̱ṁ rathā̍ iva̱ pra ya̍yuḥ sā̱kamadra̍yaḥ |
ata̍rpayo vi̱sṛta̍ u̱bja ū̱rmīntvaṁ vṛ̱tā a̍riṇā indra̱ sindhū̍n || 4.019.05
tvaṁ ma̱hīma̱vani̍ṁ vi̱śvadhe̍nāṁ tu̱rvīta̍ye va̱yyā̍ya̱ kṣara̍ntīm |
ara̍mayo̱ nama̱saija̱darṇa̍ḥ sutara̱ṇā a̍kṛṇorindra̱ sindhū̍n || 4.019.06
prāgruvo̍ nabha̱nvo̱3̱̍ na vakvā̍ dhva̱srā a̍pinvadyuva̱tīrṛ̍ta̱jñāḥ |
dhanvā̱nyajrā̍ apṛṇaktṛṣā̱ṇā adho̱gindra̍ḥ sta̱ryo̱3̱̍ daṁsu̍patnīḥ || 4.019.07
pū̱rvīru̱ṣasa̍ḥ śa̱rada̍śca gū̱rtā vṛ̱traṁ ja̍gha̱nvā a̍sṛja̱dvi sindhū̍n |
pari̍ṣṭhitā atṛṇadbadbadhā̱nāḥ sī̱rā indra̱ḥ sravi̍tave pṛthi̱vyā || 4.019.08
va̱mrībhi̍ḥ pu̱trama̱gruvo̍ adā̱naṁ ni̱veśa̍nāddhariva̱ ā ja̍bhartha |
vya1̱̍ndho a̍khya̱dahi̍mādadā̱no nirbhū̍dukha̱cchitsama̍ranta̱ parva̍ || 4.019.09
pra te̱ pūrvā̍ṇi̱ kara̍ṇāni viprāvi̱dvā ā̍ha vi̱duṣe̱ karā̍ṁsi |
yathā̍yathā̱ vṛṣṇyā̍ni̱ svagū̱rtāpā̍ṁsi rāja̱nnaryāvi̍veṣīḥ || 4.019.10
nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ || 4.019.11
ā na̱ indro̍ dū̱rādā na̍ ā̱sāda̍bhiṣṭi̱kṛdava̍se yāsadu̱graḥ |
oji̍ṣṭhebhirnṛ̱pati̱rvajra̍bāhuḥ sa̱ṁge sa̱matsu̍ tu̱rvaṇi̍ḥ pṛta̱nyūn || 4.020.01
ā na̱ indro̱ hari̍bhiryā̱tvacchā̍rvācī̱no'va̍se̱ rādha̍se ca |
tiṣṭhā̍ti va̱jrī ma̱ghavā̍ vira̱pśīmaṁ ya̱jñamanu̍ no̱ vāja̍sātau || 4.020.02
i̱maṁ ya̱jñaṁ tvama̱smāka̍mindra pu̱ro dadha̍tsaniṣyasi̱ kratu̍ṁ naḥ |
śva̱ghnīva̍ vajrinsa̱naye̱ dhanā̍nā̱ṁ tvayā̍ va̱yama̱rya ā̱jiṁ ja̍yema || 4.020.03
u̱śannu̱ ṣu ṇa̍ḥ su̱manā̍ upā̱ke soma̍sya̱ nu suṣu̍tasya svadhāvaḥ |
pā i̍ndra̱ prati̍bhṛtasya̱ madhva̱ḥ samandha̍sā mamadaḥ pṛ̱ṣṭhye̍na || 4.020.04
vi yo ra̍ra̱pśa ṛṣi̍bhi̱rnave̍bhirvṛ̱kṣo na pa̱kvaḥ sṛṇyo̱ na jetā̍ |
maryo̱ na yoṣā̍ma̱bhi manya̍mā̱no'cchā̍ vivakmi puruhū̱tamindra̍m || 4.020.05
gi̱rirna yaḥ svata̍vā ṛ̱ṣva indra̍ḥ sa̱nāde̱va saha̍se jā̱ta u̱graḥ |
āda̍rtā̱ vajra̱ṁ sthavi̍ra̱ṁ na bhī̱ma u̱dneva̱ kośa̱ṁ vasu̍nā̱ nyṛ̍ṣṭam || 4.020.06
na yasya̍ va̱rtā ja̱nuṣā̱ nvasti̱ na rādha̍sa āmarī̱tā ma̱ghasya̍ |
u̱dvā̱vṛ̱ṣā̱ṇasta̍viṣīva ugrā̱smabhya̍ṁ daddhi puruhūta rā̱yaḥ || 4.020.07
īkṣe̍ rā̱yaḥ kṣaya̍sya carṣaṇī̱nāmu̱ta vra̱jama̍pava̱rtāsi̱ gonā̍m |
śi̱kṣā̱na̱raḥ sa̍mi̱theṣu̍ pra̱hāvā̱nvasvo̍ rā̱śima̍bhine̱tāsi̱ bhūri̍m || 4.020.08
kayā̱ tacchṛ̍ṇve̱ śacyā̱ śaci̍ṣṭho̱ yayā̍ kṛ̱ṇoti̱ muhu̱ kā ci̍dṛ̱ṣvaḥ |
pu̱ru dā̱śuṣe̱ vica̍yiṣṭho̱ aṁho'thā̍ dadhāti̱ dravi̍ṇaṁ jari̱tre || 4.020.09
mā no̍ mardhī̱rā bha̍rā da̱ddhi tanna̱ḥ pra dā̱śuṣe̱ dāta̍ve̱ bhūri̱ yatte̍ |
navye̍ de̱ṣṇe śa̱ste a̱sminta̍ u̱kthe pra bra̍vāma va̱yami̍ndra stu̱vanta̍ḥ || 4.020.10
nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ || 4.020.11
ā yā̱tvindro'va̍sa̱ upa̍ na i̱ha stu̱taḥ sa̍dha̱māda̍stu̱ śūra̍ḥ |
vā̱vṛ̱dhā̱nastavi̍ṣī̱ryasya̍ pū̱rvīrdyaurna kṣa̱trama̱bhibhū̍ti̱ puṣyā̍t || 4.021.01
tasyedi̱ha sta̍vatha̱ vṛṣṇyā̍ni tuvidyu̱mnasya̍ tuvi̱rādha̍so̱ nṝn |
yasya̱ kratu̍rvida̱thyo̱3̱̍ na sa̱mrāṭ sā̱hvāntaru̍tro a̱bhyasti̍ kṛ̱ṣṭīḥ || 4.021.02
ā yā̱tvindro̍ di̱va ā pṛ̍thi̱vyā ma̱kṣū sa̍mu̱drādu̱ta vā̱ purī̍ṣāt |
sva̍rṇarā̱dava̍se no ma̱rutvā̍nparā̱vato̍ vā̱ sada̍nādṛ̱tasya̍ || 4.021.03
sthū̱rasya̍ rā̱yo bṛ̍ha̱to ya īśe̱ tamu̍ ṣṭavāma vi̱dathe̱ṣvindra̍m |
yo vā̱yunā̱ jaya̍ti̱ goma̍tīṣu̱ pra dhṛ̍ṣṇu̱yā naya̍ti̱ vasyo̱ accha̍ || 4.021.04
upa̱ yo namo̱ nama̍si stabhā̱yanniya̍rti̱ vāca̍ṁ ja̱naya̱nyaja̍dhyai |
ṛ̱ñja̱sā̱naḥ pu̍ru̱vāra̍ u̱kthairendra̍ṁ kṛṇvīta̱ sada̍neṣu̱ hotā̍ || 4.021.05
dhi̱ṣā yadi̍ dhiṣa̱ṇyanta̍ḥ sara̱ṇyānsada̍nto̱ adri̍mauśi̱jasya̱ gohe̍ |
ā du̱roṣā̍ḥ pā̱styasya̱ hotā̱ yo no̍ ma̱hānsa̱ṁvara̍ṇeṣu̱ vahni̍ḥ || 4.021.06
sa̱trā yadī̍ṁ bhārva̱rasya̱ vṛṣṇa̱ḥ siṣa̍kti̱ śuṣma̍ḥ stuva̱te bharā̍ya |
guhā̱ yadī̍mauśi̱jasya̱ gohe̱ pra yaddhi̱ye prāya̍se̱ madā̍ya || 4.021.07
vi yadvarā̍ṁsi̱ parva̍tasya vṛ̱ṇve payo̍bhirji̱nve a̱pāṁ javā̍ṁsi |
vi̱dadgau̱rasya̍ gava̱yasya̱ gohe̱ yadī̱ vājā̍ya su̱dhyo̱3̱̍ vaha̍nti || 4.021.08
bha̱drā te̱ hastā̱ sukṛ̍to̱ta pā̱ṇī pra̍ya̱ntārā̍ stuva̱te rādha̍ indra |
kā te̱ niṣa̍tti̱ḥ kimu̱ no ma̍matsi̱ kiṁ nodu̍du harṣase̱ dāta̱vā u̍ || 4.021.09
e̱vā vasva̱ indra̍ḥ sa̱tyaḥ sa̱mrāḍḍhantā̍ vṛ̱traṁ vari̍vaḥ pū̱rave̍ kaḥ |
puru̍ṣṭuta̱ kratvā̍ naḥ śagdhi rā̱yo bha̍kṣī̱ya te'va̍so̱ daivya̍sya || 4.021.10
nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ || 4.021.11
yanna̱ indro̍ juju̱ṣe yacca̱ vaṣṭi̱ tanno̍ ma̱hānka̍rati śu̱ṣmyā ci̍t |
brahma̱ stoma̍ṁ ma̱ghavā̱ soma̍mu̱kthā yo aśmā̍na̱ṁ śava̍sā̱ bibhra̱deti̍ || 4.022.01
vṛṣā̱ vṛṣa̍ndhi̱ṁ catu̍raśri̱masya̍nnu̱gro bā̱hubhyā̱ṁ nṛta̍ma̱ḥ śacī̍vān |
śri̱ye paru̍ṣṇīmu̱ṣamā̍ṇa̱ ūrṇā̱ṁ yasyā̱ḥ parvā̍ṇi sa̱khyāya̍ vi̱vye || 4.022.02
yo de̱vo de̱vata̍mo̱ jāya̍māno ma̱ho vāje̍bhirma̱hadbhi̍śca̱ śuṣmai̍ḥ |
dadhā̍no̱ vajra̍ṁ bā̱hvoru̱śanta̱ṁ dyāmame̍na rejaya̱tpra bhūma̍ || 4.022.03
viśvā̱ rodhā̍ṁsi pra̱vata̍śca pū̱rvīrdyaurṛ̱ṣvājjani̍manrejata̱ kṣāḥ |
ā mā̱tarā̱ bhara̍ti śu̱ṣmyā gornṛ̱vatpari̍jmannonuvanta̱ vātā̍ḥ || 4.022.04
tā tū ta̍ indra maha̱to ma̱hāni̱ viśve̱ṣvitsava̍neṣu pra̱vācyā̍ |
yacchū̍ra dhṛṣṇo dhṛṣa̱tā da̍dhṛ̱ṣvānahi̱ṁ vajre̍ṇa̱ śava̱sāvi̍veṣīḥ || 4.022.05
tā tū te̍ sa̱tyā tu̍vinṛmṇa̱ viśvā̱ pra dhe̱nava̍ḥ sisrate̱ vṛṣṇa̱ ūdhna̍ḥ |
adhā̍ ha̱ tvadvṛ̍ṣamaṇo bhiyā̱nāḥ pra sindha̍vo̱ java̍sā cakramanta || 4.022.06
atrāha̍ te hariva̱stā u̍ de̱vīravo̍bhirindra stavanta̱ svasā̍raḥ |
yatsī̱manu̱ pra mu̱co ba̍dbadhā̱nā dī̱rghāmanu̱ prasi̍tiṁ syanda̱yadhyai̍ || 4.022.07
pi̱pī̱ḻe a̱ṁśurmadyo̱ na sindhu̱rā tvā̱ śamī̍ śaśamā̱nasya̍ śa̱ktiḥ |
a̱sma̱drya̍kchuśucā̱nasya̍ yamyā ā̱śurna ra̱śmiṁ tu̱vyoja̍sa̱ṁ goḥ || 4.022.08
a̱sme varṣi̍ṣṭhā kṛṇuhi̱ jyeṣṭhā̍ nṛ̱mṇāni̍ sa̱trā sa̍hure̱ sahā̍ṁsi |
a̱smabhya̍ṁ vṛ̱trā su̱hanā̍ni randhi ja̱hi vadha̍rva̱nuṣo̱ martya̍sya || 4.022.09
a̱smāka̱mitsu śṛ̍ṇuhi̱ tvami̍ndrā̱smabhya̍ṁ ci̱trā upa̍ māhi̱ vājā̍n |
a̱smabhya̱ṁ viśvā̍ iṣaṇa̱ḥ pura̍ṁdhīra̱smāka̱ṁ su ma̍ghavanbodhi go̱dāḥ || 4.022.10
nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ || 4.022.11
ka̱thā ma̱hāma̍vṛdha̱tkasya̱ hotu̍rya̱jñaṁ ju̍ṣā̱ṇo a̱bhi soma̱mūdha̍ḥ |
piba̍nnuśā̱no ju̱ṣamā̍ṇo̱ andho̍ vava̱kṣa ṛ̱ṣvaḥ śu̍ca̱te dhanā̍ya || 4.023.01
ko a̍sya vī̱raḥ sa̍dha̱māda̍māpa̱ samā̍naṁśa suma̱tibhi̱ḥ ko a̍sya |
kada̍sya ci̱traṁ ci̍kite̱ kadū̱tī vṛ̱dhe bhu̍vacchaśamā̱nasya̱ yajyo̍ḥ || 4.023.02
ka̱thā śṛ̍ṇoti hū̱yamā̍na̱mindra̍ḥ ka̱thā śṛ̱ṇvannava̍sāmasya veda |
kā a̍sya pū̱rvīrupa̍mātayo ha ka̱thaina̍māhu̱ḥ papu̍riṁ jari̱tre || 4.023.03
ka̱thā sa̱bādha̍ḥ śaśamā̱no a̍sya̱ naśa̍da̱bhi dravi̍ṇa̱ṁ dīdhyā̍naḥ |
de̱vo bhu̍va̱nnave̍dā ma ṛ̱tānā̱ṁ namo̍ jagṛ̱bhvā a̱bhi yajjujo̍ṣat || 4.023.04
ka̱thā kada̱syā u̱ṣaso̱ vyu̍ṣṭau de̱vo marta̍sya sa̱khyaṁ ju̍joṣa |
ka̱thā kada̍sya sa̱khyaṁ sakhi̍bhyo̱ ye a̍smi̱nkāma̍ṁ su̱yuja̍ṁ tata̱sre || 4.023.05
kimādama̍traṁ sa̱khyaṁ sakhi̍bhyaḥ ka̱dā nu te̍ bhrā̱traṁ pra bra̍vāma |
śri̱ye su̱dṛśo̱ vapu̍rasya̱ sargā̱ḥ sva1̱̍rṇa ci̱trata̍mamiṣa̱ ā goḥ || 4.023.06
druha̱ṁ jighā̍ṁsandhva̱rasa̍mani̱ndrāṁ teti̍kte ti̱gmā tu̱jase̱ anī̍kā |
ṛ̱ṇā ci̱dyatra̍ ṛṇa̱yā na̍ u̱gro dū̱re ajñā̍tā u̱ṣaso̍ babā̱dhe || 4.023.07
ṛ̱tasya̱ hi śu̱rudha̱ḥ santi̍ pū̱rvīrṛ̱tasya̍ dhī̱tirvṛ̍ji̱nāni̍ hanti |
ṛ̱tasya̱ śloko̍ badhi̱rā ta̍tarda̱ karṇā̍ budhā̱naḥ śu̱camā̍na ā̱yoḥ || 4.023.08
ṛ̱tasya̍ dṛ̱ḻhā dha̱ruṇā̍ni santi pu̱rūṇi̍ ca̱ndrā vapu̍ṣe̱ vapū̍ṁṣi |
ṛ̱tena̍ dī̱rghami̍ṣaṇanta̱ pṛkṣa̍ ṛ̱tena̱ gāva̍ ṛ̱tamā vi̍veśuḥ || 4.023.09
ṛ̱taṁ ye̍mā̱na ṛ̱tamidva̍notyṛ̱tasya̱ śuṣma̍stura̱yā u̍ ga̱vyuḥ |
ṛ̱tāya̍ pṛ̱thvī ba̍hu̱le ga̍bhī̱re ṛ̱tāya̍ dhe̱nū pa̍ra̱me du̍hāte || 4.023.10
nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ || 4.023.11
kā su̍ṣṭu̱tiḥ śava̍saḥ sū̱numindra̍marvācī̱naṁ rādha̍sa̱ ā va̍vartat |
da̱dirhi vī̱ro gṛ̍ṇa̱te vasū̍ni̱ sa gopa̍tirni̱ṣṣidhā̍ṁ no janāsaḥ || 4.024.01
sa vṛ̍tra̱hatye̱ havya̱ḥ sa īḍya̱ḥ sa suṣṭu̍ta̱ indra̍ḥ sa̱tyarā̍dhāḥ |
sa yāma̱nnā ma̱ghavā̱ martyā̍ya brahmaṇya̱te suṣva̍ye̱ vari̍vo dhāt || 4.024.02
taminnaro̱ vi hva̍yante samī̱ke ri̍ri̱kvāṁsa̍sta̱nva̍ḥ kṛṇvata̱ trām |
mi̱tho yattyā̱gamu̱bhayā̍so̱ agma̱nnara̍sto̱kasya̱ tana̍yasya sā̱tau || 4.024.03
kra̱tū̱yanti̍ kṣi̱tayo̱ yoga̍ ugrāśuṣā̱ṇāso̍ mi̱tho arṇa̍sātau |
saṁ yadviśo'va̍vṛtranta yu̱dhmā ādinnema̍ indrayante a̱bhīke̍ || 4.024.04
ādiddha̱ nema̍ indri̱yaṁ ya̍janta̱ āditpa̱ktiḥ pu̍ro̱ḻāśa̍ṁ riricyāt |
āditsomo̱ vi pa̍pṛcyā̱dasu̍ṣvī̱nādijju̍joṣa vṛṣa̱bhaṁ yaja̍dhyai || 4.024.05
kṛ̱ṇotya̍smai̱ vari̍vo̱ ya i̱tthendrā̍ya̱ soma̍muśa̱te su̱noti̍ |
sa̱dhrī̱cīne̍na̱ mana̱sāvi̍vena̱ntamitsakhā̍yaṁ kṛṇute sa̱matsu̍ || 4.024.06
ya indrā̍ya su̱nava̱tsoma̍ma̱dya pacā̍tpa̱ktīru̱ta bhṛ̱jjāti̍ dhā̱nāḥ |
prati̍ manā̱yoru̱cathā̍ni̱ harya̱ntasmi̍ndadha̱dvṛṣa̍ṇa̱ṁ śuṣma̱mindra̍ḥ || 4.024.07
ya̱dā sa̍ma̱ryaṁ vyace̱dṛghā̍vā dī̱rghaṁ yadā̱jima̱bhyakhya̍da̱ryaḥ |
aci̍krada̱dvṛṣa̍ṇa̱ṁ patnyacchā̍ duro̱ṇa ā niśi̍taṁ soma̱sudbhi̍ḥ || 4.024.08
bhūya̍sā va̱snama̍cara̱tkanī̱yo'vi̍krīto akāniṣa̱ṁ puna̱ryan |
sa bhūya̍sā̱ kanī̍yo̱ nāri̍recīddī̱nā dakṣā̱ vi du̍hanti̱ pra vā̱ṇam || 4.024.09
ka i̱maṁ da̱śabhi̱rmamendra̍ṁ krīṇāti dhe̱nubhi̍ḥ |
ya̱dā vṛ̱trāṇi̱ jaṅgha̍na̱dathai̍naṁ me̱ puna̍rdadat || 4.024.10
nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ || 4.024.11
ko a̱dya naryo̍ de̱vakā̍ma u̱śannindra̍sya sa̱khyaṁ ju̍joṣa |
ko vā̍ ma̱he'va̍se̱ pāryā̍ya̱ sami̍ddhe a̱gnau su̱taso̍ma īṭṭe || 4.025.01
ko nā̍nāma̱ vaca̍sā so̱myāya̍ manā̱yurvā̍ bhavati̱ vasta̍ u̱srāḥ |
ka indra̍sya̱ yujya̱ṁ kaḥ sa̍khi̱tvaṁ ko bhrā̱traṁ va̍ṣṭi ka̱vaye̱ ka ū̱tī || 4.025.02
ko de̱vānā̱mavo̍ a̱dyā vṛ̍ṇīte̱ ka ā̍di̱tyā adi̍ti̱ṁ jyoti̍rīṭṭe |
kasyā̱śvinā̱vindro̍ a̱gniḥ su̱tasyā̱ṁśoḥ pi̍banti̱ mana̱sāvi̍venam || 4.025.03
tasmā̍ a̱gnirbhāra̍ta̱ḥ śarma̍ yaṁsa̱jjyokpa̍śyā̱tsūrya̍mu̱ccara̍ntam |
ya indrā̍ya su̱navā̱metyāha̱ nare̱ naryā̍ya̱ nṛta̍māya nṛ̱ṇām || 4.025.04
na taṁ ji̍nanti ba̱havo̱ na da̱bhrā u̱rva̍smā̱ adi̍ti̱ḥ śarma̍ yaṁsat |
pri̱yaḥ su̱kṛtpri̱ya indre̍ manā̱yuḥ pri̱yaḥ su̍prā̱vīḥ pri̱yo a̍sya so̱mī || 4.025.05
su̱prā̱vya̍ḥ prāśu̱ṣāḻe̱ṣa vī̱raḥ suṣve̍ḥ pa̱ktiṁ kṛ̍ṇute̱ keva̱lendra̍ḥ |
nāsu̍ṣverā̱pirna sakhā̱ na jā̱mirdu̍ṣprā̱vyo̍'vaha̱ntedavā̍caḥ || 4.025.06
na re̱vatā̍ pa̱ṇinā̍ sa̱khyamindro'su̍nvatā suta̱pāḥ saṁ gṛ̍ṇīte |
āsya̱ veda̍ḥ khi̱dati̱ hanti̍ na̱gnaṁ vi suṣva̍ye pa̱ktaye̱ keva̍lo bhūt || 4.025.07
indra̱ṁ pare'va̍re madhya̱māsa̱ indra̱ṁ yānto'va̍sitāsa̱ indra̍m |
indra̍ṁ kṣi̱yanta̍ u̱ta yudhya̍mānā̱ indra̱ṁ naro̍ vāja̱yanto̍ havante || 4.025.08
a̱haṁ manu̍rabhava̱ṁ sūrya̍ścā̱haṁ ka̱kṣīvā̱ ṛṣi̍rasmi̱ vipra̍ḥ |
a̱haṁ kutsa̍mārjune̱yaṁ nyṛ̍ñje̱'haṁ ka̱viru̱śanā̱ paśya̍tā mā || 4.026.01
a̱haṁ bhūmi̍madadā̱māryā̍yā̱haṁ vṛ̱ṣṭiṁ dā̱śuṣe̱ martyā̍ya |
a̱hama̱po a̍nayaṁ vāvaśā̱nā mama̍ de̱vāso̱ anu̱ keta̍māyan || 4.026.02
a̱haṁ puro̍ mandasā̱no vyai̍ra̱ṁ nava̍ sā̱kaṁ na̍va̱tīḥ śamba̍rasya |
śa̱ta̱ta̱maṁ ve̱śya̍ṁ sa̱rvatā̍tā̱ divo̍dāsamatithi̱gvaṁ yadāva̍m || 4.026.03
pra su ṣa vibhyo̍ maruto̱ vira̍stu̱ pra śye̱naḥ śye̱nebhya̍ āśu̱patvā̍ |
a̱ca̱krayā̱ yatsva̱dhayā̍ supa̱rṇo ha̱vyaṁ bhara̱nmana̍ve de̱vaju̍ṣṭam || 4.026.04
bhara̱dyadi̱ virato̱ vevi̍jānaḥ pa̱thoruṇā̱ mano̍javā asarji |
tūya̍ṁ yayau̱ madhu̍nā so̱myeno̱ta śravo̍ vivide śye̱no atra̍ || 4.026.05
ṛ̱jī̱pī śye̱no dada̍māno a̱ṁśuṁ pa̍rā̱vata̍ḥ śaku̱no ma̱ndraṁ mada̍m |
soma̍ṁ bharaddādṛhā̱ṇo de̱vāvā̍ndi̱vo a̱muṣmā̱dutta̍rādā̱dāya̍ || 4.026.06
ā̱dāya̍ śye̱no a̍bhara̱tsoma̍ṁ sa̱hasra̍ṁ sa̱vā a̱yuta̍ṁ ca sā̱kam |
atrā̱ pura̍ṁdhirajahā̱darā̍tī̱rmade̱ soma̍sya mū̱rā amū̍raḥ || 4.026.07
garbhe̱ nu sannanve̍ṣāmavedama̱haṁ de̱vānā̱ṁ jani̍māni̱ viśvā̍ |
śa̱taṁ mā̱ pura̱ āya̍sīrarakṣa̱nnadha̍ śye̱no ja̱vasā̱ nira̍dīyam || 4.027.01
na ghā̱ sa māmapa̱ joṣa̍ṁ jabhārā̱bhīmā̍sa̱ tvakṣa̍sā vī̱rye̍ṇa |
ī̱rmā pura̍ṁdhirajahā̱darā̍tīru̱ta vātā̍ atara̱cchūśu̍vānaḥ || 4.027.02
ava̱ yacchye̱no asva̍nī̱dadha̱ dyorvi yadyadi̱ vāta̍ ū̱huḥ pura̍ṁdhim |
sṛ̱jadyada̍smā̱ ava̍ ha kṣi̱pajjyāṁ kṛ̱śānu̱rastā̱ mana̍sā bhura̱ṇyan || 4.027.03
ṛ̱ji̱pya ī̱mindrā̍vato̱ na bhu̱jyuṁ śye̱no ja̍bhāra bṛha̱to adhi̱ ṣṇoḥ |
a̱ntaḥ pa̍tatpata̱trya̍sya pa̱rṇamadha̱ yāma̍ni̱ prasi̍tasya̱ tadveḥ || 4.027.04
adha̍ śve̱taṁ ka̱laśa̱ṁ gobhi̍ra̱ktamā̍pipyā̱naṁ ma̱ghavā̍ śu̱kramandha̍ḥ |
a̱dhva̱ryubhi̱ḥ praya̍ta̱ṁ madhvo̱ agra̱mindro̱ madā̍ya̱ prati̍ dha̱tpiba̍dhyai̱ śūro̱ madā̍ya̱ prati̍ dha̱tpiba̍dhyai || 4.027.05
tvā yu̱jā tava̱ tatso̍ma sa̱khya indro̍ a̱po mana̍ve sa̱sruta̍skaḥ |
aha̱nnahi̱mari̍ṇātsa̱pta sindhū̱napā̍vṛṇo̱dapi̍hiteva̱ khāni̍ || 4.028.01
tvā yu̱jā ni khi̍da̱tsūrya̱syendra̍śca̱kraṁ saha̍sā sa̱dya i̍ndo |
adhi̱ ṣṇunā̍ bṛha̱tā varta̍mānaṁ ma̱ho dru̱ho apa̍ vi̱śvāyu̍ dhāyi || 4.028.02
aha̱nnindro̱ ada̍hada̱gniri̍ndo pu̱rā dasyū̍nma̱dhyaṁdi̍nāda̱bhīke̍ |
du̱rge du̍ro̱ṇe kratvā̱ na yā̱tāṁ pu̱rū sa̱hasrā̱ śarvā̱ ni ba̍rhīt || 4.028.03
viśva̍smātsīmadha̱mā i̍ndra̱ dasyū̱nviśo̱ dāsī̍rakṛṇorapraśa̱stāḥ |
abā̍dhethā̱mamṛ̍ṇata̱ṁ ni śatrū̱navi̍ndethā̱mapa̍citi̱ṁ vadha̍traiḥ || 4.028.04
e̱vā sa̱tyaṁ ma̍ghavānā yu̱vaṁ tadindra̍śca somo̱rvamaśvya̱ṁ goḥ |
āda̍rdṛta̱mapi̍hitā̱nyaśnā̍ riri̱cathu̱ḥ kṣāści̍ttatṛdā̱nā || 4.028.05
ā na̍ḥ stu̱ta upa̱ vāje̍bhirū̱tī indra̍ yā̱hi hari̍bhirmandasā̱naḥ |
ti̱raści̍da̱ryaḥ sava̍nā pu̱rūṇyā̍ṅgū̱ṣebhi̍rgṛṇā̱naḥ sa̱tyarā̍dhāḥ || 4.029.01
ā hi ṣmā̱ yāti̱ narya̍ściki̱tvānhū̱yamā̍naḥ so̱tṛbhi̱rupa̍ ya̱jñam |
svaśvo̱ yo abhī̍ru̱rmanya̍mānaḥ suṣvā̱ṇebhi̱rmada̍ti̱ saṁ ha̍ vī̱raiḥ || 4.029.02
śrā̱vayeda̍sya̱ karṇā̍ vāja̱yadhyai̱ juṣṭā̱manu̱ pra diśa̍ṁ manda̱yadhyai̍ |
u̱dvā̱vṛ̱ṣā̱ṇo rādha̍se̱ tuvi̍ṣmā̱nkara̍nna̱ indra̍ḥ sutī̱rthābha̍yaṁ ca || 4.029.03
acchā̱ yo gantā̱ nādha̍mānamū̱tī i̱tthā vipra̱ṁ hava̍mānaṁ gṛ̱ṇanta̍m |
upa̱ tmani̱ dadhā̍no dhu̱ryā̱3̱̍śūnsa̱hasrā̍ṇi śa̱tāni̱ vajra̍bāhuḥ || 4.029.04
tvotā̍so maghavannindra̱ viprā̍ va̱yaṁ te̍ syāma sū̱rayo̍ gṛ̱ṇanta̍ḥ |
bhe̱jā̱nāso̍ bṛ̱haddi̍vasya rā̱ya ā̍kā̱yya̍sya dā̱vane̍ puru̱kṣoḥ || 4.029.05
naki̍rindra̱ tvadutta̍ro̱ na jyāyā̍ asti vṛtrahan |
naki̍re̱vā yathā̱ tvam || 4.030.01
sa̱trā te̱ anu̍ kṛ̱ṣṭayo̱ viśvā̍ ca̱kreva̍ vāvṛtuḥ |
sa̱trā ma̱hā a̍si śru̱taḥ || 4.030.02
viśve̍ ca̱neda̱nā tvā̍ de̱vāsa̍ indra yuyudhuḥ |
yadahā̱ nakta̱māti̍raḥ || 4.030.03
yatro̱ta bā̍dhi̱tebhya̍śca̱kraṁ kutsā̍ya̱ yudhya̍te |
mu̱ṣā̱ya i̍ndra̱ sūrya̍m || 4.030.04
yatra̍ de̱vā ṛ̍ghāya̱to viśvā̱ ayu̍dhya̱ eka̱ it |
tvami̍ndra va̱nūraha̍n || 4.030.05
yatro̱ta martyā̍ya̱ kamari̍ṇā indra̱ sūrya̍m |
prāva̱ḥ śacī̍bhi̱reta̍śam || 4.030.06
kimādu̱tāsi̍ vṛtraha̱nmagha̍vanmanyu̱matta̍maḥ |
atrāha̱ dānu̱māti̍raḥ || 4.030.07
e̱tadghedu̱ta vī̱rya1̱̍mindra̍ ca̱kartha̱ pauṁsya̍m |
striya̱ṁ yaddu̍rhaṇā̱yuva̱ṁ vadhī̍rduhi̱tara̍ṁ di̱vaḥ || 4.030.08
di̱vaści̍dghā duhi̱tara̍ṁ ma̱hānma̍hī̱yamā̍nām |
u̱ṣāsa̍mindra̱ saṁ pi̍ṇak || 4.030.09
apo̱ṣā ana̍saḥ sara̱tsampi̍ṣṭā̱daha̍ bi̱bhyuṣī̍ |
ni yatsī̍ṁ śi̱śnatha̱dvṛṣā̍ || 4.030.10
e̱tada̍syā̱ ana̍ḥ śaye̱ susa̍mpiṣṭa̱ṁ vipā̱śyā |
sa̱sāra̍ sīṁ parā̱vata̍ḥ || 4.030.11
u̱ta sindhu̍ṁ vibā̱lya̍ṁ vitasthā̱nāmadhi̱ kṣami̍ |
pari̍ ṣṭhā indra mā̱yayā̍ || 4.030.12
u̱ta śuṣṇa̍sya dhṛṣṇu̱yā pra mṛ̍kṣo a̱bhi veda̍nam |
puro̱ yada̍sya sampi̱ṇak || 4.030.13
u̱ta dā̱saṁ kau̍lita̱raṁ bṛ̍ha̱taḥ parva̍tā̱dadhi̍ |
avā̍hannindra̱ śamba̍ram || 4.030.14
u̱ta dā̱sasya̍ va̱rcina̍ḥ sa̱hasrā̍ṇi śa̱tāva̍dhīḥ |
adhi̱ pañca̍ pra̱dhīri̍va || 4.030.15
u̱ta tyaṁ pu̱trama̱gruva̱ḥ parā̍vṛktaṁ śa̱takra̍tuḥ |
u̱ktheṣvindra̱ ābha̍jat || 4.030.16
u̱ta tyā tu̱rvaśā̱yadū̍ asnā̱tārā̱ śacī̱pati̍ḥ |
indro̍ vi̱dvā a̍pārayat || 4.030.17
u̱ta tyā sa̱dya āryā̍ sa̱rayo̍rindra pā̱rata̍ḥ |
arṇā̍ci̱trara̍thāvadhīḥ || 4.030.18
anu̱ dvā ja̍hi̱tā na̍yo̱'ndhaṁ śro̱ṇaṁ ca̍ vṛtrahan |
na tatte̍ su̱mnamaṣṭa̍ve || 4.030.19
śa̱tama̍śma̱nmayī̍nāṁ pu̱rāmindro̱ vyā̍syat |
divo̍dāsāya dā̱śuṣe̍ || 4.030.20
asvā̍payadda̱bhīta̍ye sa̱hasrā̍ tri̱ṁśata̱ṁ hathai̍ḥ |
dā̱sānā̱mindro̍ mā̱yayā̍ || 4.030.21
sa ghedu̱tāsi̍ vṛtrahansamā̱na i̍ndra̱ gopa̍tiḥ |
yastā viśvā̍ni cicyu̱ṣe || 4.030.22
u̱ta nū̱naṁ yadi̍ndri̱yaṁ ka̍ri̱ṣyā i̍ndra̱ pauṁsya̍m |
a̱dyā naki̱ṣṭadā mi̍nat || 4.030.23
vā̱maṁvā̍maṁ ta ādure de̱vo da̍dātvarya̱mā |
vā̱maṁ pū̱ṣā vā̱maṁ bhago̍ vā̱maṁ de̱vaḥ karū̍ḻatī || 4.030.24
kayā̍ naści̱tra ā bhu̍vadū̱tī sa̱dāvṛ̍dha̱ḥ sakhā̍ |
kayā̱ śaci̍ṣṭhayā vṛ̱tā || 4.031.01
kastvā̍ sa̱tyo madā̍nā̱ṁ maṁhi̍ṣṭho matsa̱dandha̍saḥ |
dṛ̱ḻhā ci̍dā̱ruje̱ vasu̍ || 4.031.02
a̱bhī ṣu ṇa̱ḥ sakhī̍nāmavi̱tā ja̍ritṝ̱ṇām |
śa̱taṁ bha̍vāsyū̱tibhi̍ḥ || 4.031.03
a̱bhī na̱ ā va̍vṛtsva ca̱kraṁ na vṛ̱ttamarva̍taḥ |
ni̱yudbhi̍ścarṣaṇī̱nām || 4.031.04
pra̱vatā̱ hi kratū̍nā̱mā hā̍ pa̱deva̱ gaccha̍si |
abha̍kṣi̱ sūrye̱ sacā̍ || 4.031.05
saṁ yatta̍ indra ma̱nyava̱ḥ saṁ ca̱krāṇi̍ dadhanvi̱re |
adha̱ tve adha̱ sūrye̍ || 4.031.06
u̱ta smā̱ hi tvāmā̱hurinma̱ghavā̍naṁ śacīpate |
dātā̍ra̱mavi̍dīdhayum || 4.031.07
u̱ta smā̍ sa̱dya itpari̍ śaśamā̱nāya̍ sunva̱te |
pu̱rū ci̍nmaṁhase̱ vasu̍ || 4.031.08
na̱hi ṣmā̍ te śa̱taṁ ca̱na rādho̱ vara̍nta ā̱mura̍ḥ |
na cyau̱tnāni̍ kariṣya̱taḥ || 4.031.09
a̱smā a̍vantu te śa̱tama̱smānsa̱hasra̍mū̱taya̍ḥ |
a̱smānviśvā̍ a̱bhiṣṭa̍yaḥ || 4.031.10
a̱smā i̱hā vṛ̍ṇīṣva sa̱khyāya̍ sva̱staye̍ |
ma̱ho rā̱ye di̱vitma̍te || 4.031.11
a̱smā a̍viḍḍhi vi̱śvahendra̍ rā̱yā parī̍ṇasā |
a̱smānviśvā̍bhirū̱tibhi̍ḥ || 4.031.12
a̱smabhya̱ṁ tā apā̍ vṛdhi vra̱jā aste̍va̱ goma̍taḥ |
navā̍bhirindro̱tibhi̍ḥ || 4.031.13
a̱smāka̍ṁ dhṛṣṇu̱yā ratho̍ dyu̱mā i̱ndrāna̍pacyutaḥ |
ga̱vyura̍śva̱yurī̍yate || 4.031.14
a̱smāka̍mutta̱maṁ kṛ̍dhi̱ śravo̍ de̱veṣu̍ sūrya |
varṣi̍ṣṭha̱ṁ dyāmi̍vo̱pari̍ || 4.031.15
ā tū na̍ indra vṛtrahanna̱smāka̍ma̱rdhamā ga̍hi |
ma̱hānma̱hībhi̍rū̱tibhi̍ḥ || 4.032.01
bhṛmi̍ścidghāsi̱ tūtu̍ji̱rā ci̍tra ci̱triṇī̱ṣvā |
ci̱traṁ kṛ̍ṇoṣyū̱taye̍ || 4.032.02
da̱bhrebhi̍ści̱cchaśī̍yāṁsa̱ṁ haṁsi̱ vrādha̍nta̱moja̍sā |
sakhi̍bhi̱rye tve sacā̍ || 4.032.03
va̱yami̍ndra̱ tve sacā̍ va̱yaṁ tvā̱bhi no̍numaḥ |
a̱smāa̍smā̱ iduda̍va || 4.032.04
sa na̍ści̱trābhi̍radrivo'nava̱dyābhi̍rū̱tibhi̍ḥ |
anā̍dhṛṣṭābhi̱rā ga̍hi || 4.032.05
bhū̱yāmo̱ ṣu tvāva̍ta̱ḥ sakhā̍ya indra̱ goma̍taḥ |
yujo̱ vājā̍ya̱ ghṛṣva̍ye || 4.032.06
tvaṁ hyeka̱ īśi̍ṣa̱ indra̱ vāja̍sya̱ goma̍taḥ |
sa no̍ yandhi ma̱hīmiṣa̍m || 4.032.07
na tvā̍ varante a̱nyathā̱ yadditsa̍si stu̱to ma̱gham |
sto̱tṛbhya̍ indra girvaṇaḥ || 4.032.08
a̱bhi tvā̱ gota̍mā gi̱rānū̍ṣata̱ pra dā̱vane̍ |
indra̱ vājā̍ya̱ ghṛṣva̍ye || 4.032.09
pra te̍ vocāma vī̱ryā̱3̱̍ yā ma̍ndasā̱na āru̍jaḥ |
puro̱ dāsī̍ra̱bhītya̍ || 4.032.10
tā te̍ gṛṇanti ve̱dhaso̱ yāni̍ ca̱kartha̱ pauṁsyā̍ |
su̱teṣvi̍ndra girvaṇaḥ || 4.032.11
avī̍vṛdhanta̱ gota̍mā̱ indra̱ tve stoma̍vāhasaḥ |
aiṣu̍ dhā vī̱rava̱dyaśa̍ḥ || 4.032.12
yacci̱ddhi śaśva̍tā̱masīndra̱ sādhā̍raṇa̱stvam |
taṁ tvā̍ va̱yaṁ ha̍vāmahe || 4.032.13
a̱rvā̱cī̱no va̍so bhavā̱sme su ma̱tsvāndha̍saḥ |
somā̍nāmindra somapāḥ || 4.032.14
a̱smāka̍ṁ tvā matī̱nāmā stoma̍ indra yacchatu |
a̱rvāgā va̍rtayā̱ harī̍ || 4.032.15
pu̱ro̱ḻāśa̍ṁ ca no̱ ghaso̍ jo̱ṣayā̍se̱ gira̍śca naḥ |
va̱dhū̱yuri̍va̱ yoṣa̍ṇām || 4.032.16
sa̱hasra̱ṁ vyatī̍nāṁ yu̱ktānā̱mindra̍mīmahe |
śa̱taṁ soma̍sya khā̱rya̍ḥ || 4.032.17
sa̱hasrā̍ te śa̱tā va̱yaṁ gavā̱mā cyā̍vayāmasi |
a̱sma̱trā rādha̍ etu te || 4.032.18
daśa̍ te ka̱laśā̍nā̱ṁ hira̍ṇyānāmadhīmahi |
bhū̱ri̱dā a̍si vṛtrahan || 4.032.19
bhūri̍dā̱ bhūri̍ dehi no̱ mā da̱bhraṁ bhūryā bha̍ra |
bhūri̱ ghedi̍ndra ditsasi || 4.032.20
bhū̱ri̱dā hyasi̍ śru̱taḥ pu̍ru̱trā śū̍ra vṛtrahan |
ā no̍ bhajasva̱ rādha̍si || 4.032.21
pra te̍ ba̱bhrū vi̍cakṣaṇa̱ śaṁsā̍mi goṣaṇo napāt |
mābhyā̱ṁ gā anu̍ śiśrathaḥ || 4.032.22
ka̱nī̱na̱keva̍ vidra̱dhe nave̍ drupa̱de a̍rbha̱ke |
ba̱bhrū yāme̍ṣu śobhete || 4.032.23
ara̍ṁ ma u̱srayā̱mṇe'ra̱manu̍srayāmṇe |
ba̱bhrū yāme̍ṣva̱sridhā̍ || 4.032.24
pra ṛ̱bhubhyo̍ dū̱tami̍va̱ vāca̍miṣya upa̱stire̱ śvaita̍rīṁ dhe̱numī̍ḻe |
ye vāta̍jūtāsta̱raṇi̍bhi̱revai̱ḥ pari̱ dyāṁ sa̱dyo a̱paso̍ babhū̱vuḥ || 4.033.01
ya̱dāra̱makra̍nnṛ̱bhava̍ḥ pi̱tṛbhyā̱ṁ pari̍viṣṭī ve̱ṣaṇā̍ da̱ṁsanā̍bhiḥ |
ādidde̱vānā̱mupa̍ sa̱khyamā̍ya̱ndhīrā̍saḥ pu̱ṣṭima̍vahanma̱nāyai̍ || 4.033.02
puna̱rye ca̱kruḥ pi̱tarā̱ yuvā̍nā̱ sanā̱ yūpe̍va jara̱ṇā śayā̍nā |
te vājo̱ vibhvā̍ ṛ̱bhurindra̍vanto̱ madhu̍psaraso no'vantu ya̱jñam || 4.033.03
yatsa̱ṁvatsa̍mṛ̱bhavo̱ gāmara̍kṣa̱nyatsa̱ṁvatsa̍mṛ̱bhavo̱ mā api̍ṁśan |
yatsa̱ṁvatsa̱mabha̍ra̱nbhāso̍ asyā̱stābhi̱ḥ śamī̍bhiramṛta̱tvamā̍śuḥ || 4.033.04
jye̱ṣṭha ā̍ha cama̱sā dvā ka̱reti̱ kanī̍yā̱ntrīnkṛ̍ṇavā̱metyā̍ha |
ka̱ni̱ṣṭha ā̍ha ca̱tura̍ska̱reti̱ tvaṣṭa̍ ṛbhava̱statpa̍naya̱dvaco̍ vaḥ || 4.033.05
sa̱tyamū̍cu̱rnara̍ e̱vā hi ca̱kruranu̍ sva̱dhāmṛ̱bhavo̍ jagmure̱tām |
vi̱bhrāja̍mānāścama̱sā ahe̱vāve̍na̱ttvaṣṭā̍ ca̱turo̍ dadṛ̱śvān || 4.033.06
dvāda̍śa̱ dyūnyadago̍hyasyāti̱thye raṇa̍nnṛ̱bhava̍ḥ sa̱santa̍ḥ |
su̱kṣetrā̍kṛṇva̱nnana̍yanta̱ sindhū̱ndhanvāti̍ṣṭha̱nnoṣa̍dhīrni̱mnamāpa̍ḥ || 4.033.07
ratha̱ṁ ye ca̱kruḥ su̱vṛta̍ṁ nare̱ṣṭhāṁ ye dhe̱nuṁ vi̍śva̱juva̍ṁ vi̱śvarū̍pām |
ta ā ta̍kṣantvṛ̱bhavo̍ ra̱yiṁ na̱ḥ svava̍sa̱ḥ svapa̍saḥ su̱hastā̍ḥ || 4.033.08
apo̱ hye̍ṣā̱maju̍ṣanta de̱vā a̱bhi kratvā̱ mana̍sā̱ dīdhyā̍nāḥ |
vājo̍ de̱vānā̍mabhavatsu̱karmendra̍sya ṛbhu̱kṣā varu̍ṇasya̱ vibhvā̍ || 4.033.09
ye harī̍ me̱dhayo̱kthā mada̍nta̱ indrā̍ya ca̱kruḥ su̱yujā̱ ye aśvā̍ |
te rā̱yaspoṣa̱ṁ dravi̍ṇānya̱sme dha̱tta ṛ̍bhavaḥ kṣema̱yanto̱ na mi̱tram || 4.033.10
i̱dāhna̍ḥ pī̱timu̱ta vo̱ mada̍ṁ dhu̱rna ṛ̱te śrā̱ntasya̍ sa̱khyāya̍ de̱vāḥ |
te nū̱nama̱sme ṛ̍bhavo̱ vasū̍ni tṛ̱tīye̍ a̱sminsava̍ne dadhāta || 4.033.11
ṛ̱bhurvibhvā̱ vāja̱ indro̍ no̱ acche̱maṁ ya̱jñaṁ ra̍tna̱dheyopa̍ yāta |
i̱dā hi vo̍ dhi̱ṣaṇā̍ de̱vyahnā̱madhā̍tpī̱tiṁ saṁ madā̍ agmatā vaḥ || 4.034.01
vi̱dā̱nāso̱ janma̍no vājaratnā u̱ta ṛ̱tubhi̍rṛbhavo mādayadhvam |
saṁ vo̱ madā̱ agma̍ta̱ saṁ pura̍ṁdhiḥ su̱vīrā̍ma̱sme ra̱yimera̍yadhvam || 4.034.02
a̱yaṁ vo̍ ya̱jña ṛ̍bhavo'kāri̱ yamā ma̍nu̱ṣvatpra̱divo̍ dadhi̱dhve |
pra vo'cchā̍ jujuṣā̱ṇāso̍ asthu̱rabhū̍ta̱ viśve̍ agri̱yota vā̍jāḥ || 4.034.03
abhū̍du vo vidha̱te ra̍tna̱dheya̍mi̱dā na̍ro dā̱śuṣe̱ martyā̍ya |
piba̍ta vājā ṛbhavo da̱de vo̱ mahi̍ tṛ̱tīya̱ṁ sava̍na̱ṁ madā̍ya || 4.034.04
ā vā̍jā yā̱topa̍ na ṛbhukṣā ma̱ho na̍ro̱ dravi̍ṇaso gṛṇā̱nāḥ |
ā va̍ḥ pī̱tayo̍'bhipi̱tve ahnā̍mi̱mā asta̍ṁ nava̱sva̍ iva gman || 4.034.05
ā na̍pātaḥ śavaso yāta̱nope̱maṁ ya̱jñaṁ nama̍sā hū̱yamā̍nāḥ |
sa̱joṣa̍saḥ sūrayo̱ yasya̍ ca̱ stha madhva̍ḥ pāta ratna̱dhā indra̍vantaḥ || 4.034.06
sa̱joṣā̍ indra̱ varu̍ṇena̱ soma̍ṁ sa̱joṣā̍ḥ pāhi girvaṇo ma̱rudbhi̍ḥ |
a̱gre̱pābhi̍rṛtu̱pābhi̍ḥ sa̱joṣā̱ gnāspatnī̍bhī ratna̱dhābhi̍ḥ sa̱joṣā̍ḥ || 4.034.07
sa̱joṣa̍sa ādi̱tyairmā̍dayadhvaṁ sa̱joṣa̍sa ṛbhava̱ḥ parva̍tebhiḥ |
sa̱joṣa̍so̱ daivye̍nā savi̱trā sa̱joṣa̍sa̱ḥ sindhu̍bhī ratna̱dhebhi̍ḥ || 4.034.08
ye a̱śvinā̱ ye pi̱tarā̱ ya ū̱tī dhe̱nuṁ ta̍ta̱kṣurṛ̱bhavo̱ ye aśvā̍ |
ye aṁsa̍trā̱ ya ṛdha̱groda̍sī̱ ye vibhvo̱ nara̍ḥ svapa̱tyāni̍ ca̱kruḥ || 4.034.09
ye goma̍nta̱ṁ vāja̍vantaṁ su̱vīra̍ṁ ra̱yiṁ dha̱ttha vasu̍mantaṁ puru̱kṣum |
te a̍gre̱pā ṛ̍bhavo mandasā̱nā a̱sme dha̍tta̱ ye ca̍ rā̱tiṁ gṛ̱ṇanti̍ || 4.034.10
nāpā̍bhūta̱ na vo̍'tītṛṣā̱māni̍ḥśastā ṛbhavo ya̱jñe a̱smin |
samindre̍ṇa̱ mada̍tha̱ saṁ ma̱rudbhi̱ḥ saṁ rāja̍bhī ratna̱dheyā̍ya devāḥ || 4.034.11
i̱hopa̍ yāta śavaso napāta̱ḥ saudha̍nvanā ṛbhavo̱ māpa̍ bhūta |
a̱sminhi va̱ḥ sava̍ne ratna̱dheya̱ṁ gama̱ntvindra̱manu̍ vo̱ madā̍saḥ || 4.035.01
āga̍nnṛbhū̱ṇāmi̱ha ra̍tna̱dheya̱mabhū̱tsoma̍sya̱ suṣu̍tasya pī̱tiḥ |
su̱kṛ̱tyayā̱ yatsva̍pa̱syayā̍ ca̱ eka̍ṁ vica̱kra ca̍ma̱saṁ ca̍tu̱rdhā || 4.035.02
vya̍kṛṇota cama̱saṁ ca̍tu̱rdhā sakhe̱ vi śi̱kṣetya̍bravīta |
athai̍ta vājā a̱mṛta̍sya̱ panthā̍ṁ ga̱ṇaṁ de̱vānā̍mṛbhavaḥ suhastāḥ || 4.035.03
ki̱mmaya̍ḥ sviccama̱sa e̱ṣa ā̍sa̱ yaṁ kāvye̍na ca̱turo̍ vica̱kra |
athā̍ sunudhva̱ṁ sava̍na̱ṁ madā̍ya pā̱ta ṛ̍bhavo̱ madhu̍naḥ so̱myasya̍ || 4.035.04
śacyā̍karta pi̱tarā̱ yuvā̍nā̱ śacyā̍karta cama̱saṁ de̍va̱pāna̍m |
śacyā̱ harī̱ dhanu̍tarāvataṣṭendra̱vāhā̍vṛbhavo vājaratnāḥ || 4.035.05
yo va̍ḥ su̱notya̍bhipi̱tve ahnā̍ṁ tī̱vraṁ vā̍jāsa̱ḥ sava̍na̱ṁ madā̍ya |
tasmai̍ ra̱yimṛ̍bhava̱ḥ sarva̍vīra̱mā ta̍kṣata vṛṣaṇo mandasā̱nāḥ || 4.035.06
prā̱taḥ su̱tama̍pibo haryaśva̱ mādhya̍ṁdina̱ṁ sava̍na̱ṁ keva̍laṁ te |
samṛ̱bhubhi̍ḥ pibasva ratna̱dhebhi̱ḥ sakhī̱ryā i̍ndra cakṛ̱ṣe su̍kṛ̱tyā || 4.035.07
ye de̱vāso̱ abha̍vatā sukṛ̱tyā śye̱nā i̱vedadhi̍ di̱vi ni̍ṣe̱da |
te ratna̍ṁ dhāta śavaso napāta̱ḥ saudha̍nvanā̱ abha̍vatā̱mṛtā̍saḥ || 4.035.08
yattṛ̱tīya̱ṁ sava̍naṁ ratna̱dheya̱makṛ̍ṇudhvaṁ svapa̱syā su̍hastāḥ |
tadṛ̍bhava̱ḥ pari̍ṣiktaṁ va e̱tatsaṁ made̍bhirindri̱yebhi̍ḥ pibadhvam || 4.035.09
a̱na̱śvo jā̱to a̍nabhī̱śuru̱kthyo̱3̱̍ ratha̍strica̱kraḥ pari̍ vartate̱ raja̍ḥ |
ma̱hattadvo̍ de̱vya̍sya pra̱vāca̍na̱ṁ dyāmṛ̍bhavaḥ pṛthi̱vīṁ yacca̱ puṣya̍tha || 4.036.01
ratha̱ṁ ye ca̱kruḥ su̱vṛta̍ṁ su̱ceta̱so'vi̍hvaranta̱ṁ mana̍sa̱spari̱ dhyayā̍ |
tā ū̱ nva1̱̍sya sava̍nasya pī̱taya̱ ā vo̍ vājā ṛbhavo vedayāmasi || 4.036.02
tadvo̍ vājā ṛbhavaḥ supravāca̱naṁ de̱veṣu̍ vibhvo abhavanmahitva̱nam |
jivrī̱ yatsantā̍ pi̱tarā̍ sanā̱jurā̱ puna̱ryuvā̍nā ca̱rathā̍ya̱ takṣa̍tha || 4.036.03
eka̱ṁ vi ca̍kra cama̱saṁ catu̍rvaya̱ṁ niścarma̍ṇo̱ gāma̍riṇīta dhī̱tibhi̍ḥ |
athā̍ de̱veṣva̍mṛta̱tvamā̍naśa śru̱ṣṭī vā̍jā ṛbhava̱stadva̍ u̱kthya̍m || 4.036.04
ṛ̱bhu̱to ra̱yiḥ pra̍tha̱maśra̍vastamo̱ vāja̍śrutāso̱ yamajī̍jana̱nnara̍ḥ |
vi̱bhva̱ta̱ṣṭo vi̱dathe̍ṣu pra̱vācyo̱ yaṁ de̍vā̱so'va̍thā̱ sa vica̍rṣaṇiḥ || 4.036.05
sa vā̱jyarvā̱ sa ṛṣi̍rvaca̱syayā̱ sa śūro̱ astā̱ pṛta̍nāsu du̱ṣṭara̍ḥ |
sa rā̱yaspoṣa̱ṁ sa su̱vīrya̍ṁ dadhe̱ yaṁ vājo̱ vibhvā̍ ṛ̱bhavo̱ yamāvi̍ṣuḥ || 4.036.06
śreṣṭha̍ṁ va̱ḥ peśo̱ adhi̍ dhāyi darśa̱taṁ stomo̍ vājā ṛbhava̱staṁ ju̍juṣṭana |
dhīrā̍so̱ hi ṣṭhā ka̱vayo̍ vipa̱ścita̱stānva̍ e̱nā brahma̱ṇā ve̍dayāmasi || 4.036.07
yū̱yama̱smabhya̍ṁ dhi̱ṣaṇā̍bhya̱spari̍ vi̱dvāṁso̱ viśvā̱ naryā̍ṇi̱ bhoja̍nā |
dyu̱manta̱ṁ vāja̱ṁ vṛṣa̍śuṣmamutta̱mamā no̍ ra̱yimṛ̍bhavastakṣa̱tā vaya̍ḥ || 4.036.08
i̱ha pra̱jāmi̱ha ra̱yiṁ rarā̍ṇā i̱ha śravo̍ vī̱rava̍ttakṣatā naḥ |
yena̍ va̱yaṁ ci̱taye̱mātya̱nyāntaṁ vāja̍ṁ ci̱tramṛ̍bhavo dadā naḥ || 4.036.09
upa̍ no vājā adhva̱ramṛ̍bhukṣā̱ devā̍ yā̱ta pa̱thibhi̍rdeva̱yānai̍ḥ |
yathā̍ ya̱jñaṁ manu̍ṣo vi̱kṣvā̱3̱̍su da̍dhi̱dhve ra̍ṇvāḥ su̱dine̱ṣvahnā̍m || 4.037.01
te vo̍ hṛ̱de mana̍se santu ya̱jñā juṣṭā̍so a̱dya ghṛ̱tani̍rṇijo guḥ |
pra va̍ḥ su̱tāso̍ harayanta pū̱rṇāḥ kratve̱ dakṣā̍ya harṣayanta pī̱tāḥ || 4.037.02
tryu̱dā̱yaṁ de̱vahi̍ta̱ṁ yathā̍ va̱ḥ stomo̍ vājā ṛbhukṣaṇo da̱de va̍ḥ |
ju̱hve ma̍nu̱ṣvadupa̍rāsu vi̱kṣu yu̱ṣme sacā̍ bṛ̱haddi̍veṣu̱ soma̍m || 4.037.03
pīvo̍aśvāḥ śu̱cadra̍thā̱ hi bhū̱tāya̍ḥśiprā vājinaḥ suni̱ṣkāḥ |
indra̍sya sūno śavaso napā̱to'nu̍ vaścetyagri̱yaṁ madā̍ya || 4.037.04
ṛ̱bhumṛ̍bhukṣaṇo ra̱yiṁ vāje̍ vā̱jinta̍ma̱ṁ yuja̍m |
indra̍svantaṁ havāmahe sadā̱sāta̍mama̱śvina̍m || 4.037.05
sedṛ̍bhavo̱ yamava̍tha yū̱yamindra̍śca̱ martya̍m |
sa dhī̱bhira̍stu̱ sani̍tā me̱dhasā̍tā̱ so arva̍tā || 4.037.06
vi no̍ vājā ṛbhukṣaṇaḥ pa̱thaści̍tana̱ yaṣṭa̍ve |
a̱smabhya̍ṁ sūrayaḥ stu̱tā viśvā̱ āśā̍starī̱ṣaṇi̍ || 4.037.07
taṁ no̍ vājā ṛbhukṣaṇa̱ indra̱ nāsa̍tyā ra̱yim |
samaśva̍ṁ carṣa̱ṇibhya̱ ā pu̱ru śa̍sta ma̱ghatta̍ye || 4.037.08
u̱to hi vā̍ṁ dā̱trā santi̱ pūrvā̱ yā pū̱rubhya̍stra̱sada̍syurnito̱śe |
kṣe̱trā̱sāṁ da̍dathururvarā̱sāṁ gha̱naṁ dasyu̍bhyo a̱bhibhū̍timu̱gram || 4.038.01
u̱ta vā̱jina̍ṁ puruni̱ṣṣidhvā̍naṁ dadhi̱krāmu̍ dadathurvi̱śvakṛ̍ṣṭim |
ṛ̱ji̱pyaṁ śye̱naṁ pru̍ṣi̱tapsu̍mā̱śuṁ ca̱rkṛtya̍ma̱ryo nṛ̱pati̱ṁ na śūra̍m || 4.038.02
yaṁ sī̱manu̍ pra̱vate̍va̱ drava̍nta̱ṁ viśva̍ḥ pū̱rurmada̍ti̱ harṣa̍māṇaḥ |
pa̱ḍbhirgṛdhya̍ntaṁ medha̱yuṁ na śūra̍ṁ ratha̱tura̱ṁ vāta̍miva̱ dhraja̍ntam || 4.038.03
yaḥ smā̍rundhā̱no gadhyā̍ sa̱matsu̱ sanu̍tara̱ścara̍ti̱ goṣu̱ gaccha̍n |
ā̱virṛ̍jīko vi̱dathā̍ ni̱cikya̍tti̱ro a̍ra̱tiṁ paryāpa̍ ā̱yoḥ || 4.038.04
u̱ta smai̍naṁ vastra̱mathi̱ṁ na tā̱yumanu̍ krośanti kṣi̱tayo̱ bhare̍ṣu |
nī̱cāya̍māna̱ṁ jasu̍ri̱ṁ na śye̱naṁ śrava̱ścācchā̍ paśu̱macca̍ yū̱tham || 4.038.05
u̱ta smā̍su pratha̱maḥ sa̍ri̱ṣyanni ve̍veti̱ śreṇi̍bhī̱ rathā̍nām |
sraja̍ṁ kṛṇvā̱no janyo̱ na śubhvā̍ re̱ṇuṁ reri̍hatki̱raṇa̍ṁ dada̱śvān || 4.038.06
u̱ta sya vā̱jī sahu̍rirṛ̱tāvā̱ śuśrū̍ṣamāṇasta̱nvā̍ sama̱rye |
tura̍ṁ ya̱tīṣu̍ tu̱raya̍nnṛji̱pyo'dhi̍ bhru̱voḥ ki̍rate re̱ṇumṛ̱ñjan || 4.038.07
u̱ta smā̍sya tanya̱tori̍va̱ dyorṛ̍ghāya̱to a̍bhi̱yujo̍ bhayante |
ya̱dā sa̱hasra̍ma̱bhi ṣī̱mayo̍dhīddu̱rvartu̍ḥ smā bhavati bhī̱ma ṛ̱ñjan || 4.038.08
u̱ta smā̍sya panayanti̱ janā̍ jū̱tiṁ kṛ̍ṣṭi̱pro a̱bhibhū̍timā̱śoḥ |
u̱taina̍māhuḥ sami̱the vi̱yanta̱ḥ parā̍ dadhi̱krā a̍saratsa̱hasrai̍ḥ || 4.038.09
ā da̍dhi̱krāḥ śava̍sā̱ pañca̍ kṛ̱ṣṭīḥ sūrya̍ iva̱ jyoti̍ṣā̱pasta̍tāna |
sa̱ha̱sra̱sāḥ śa̍ta̱sā vā̱jyarvā̍ pṛ̱ṇaktu̱ madhvā̱ sami̱mā vacā̍ṁsi || 4.038.10
ā̱śuṁ da̍dhi̱krāṁ tamu̱ nu ṣṭa̍vāma di̱vaspṛ̍thi̱vyā u̱ta ca̍rkirāma |
u̱cchantī̱rmāmu̱ṣasa̍ḥ sūdaya̱ntvati̱ viśvā̍ni duri̱tāni̍ parṣan || 4.039.01
ma̱haśca̍rka̱rmyarva̍taḥ kratu̱prā da̍dhi̱krāvṇa̍ḥ puru̱vāra̍sya̱ vṛṣṇa̍ḥ |
yaṁ pū̱rubhyo̍ dīdi̱vāṁsa̱ṁ nāgniṁ da̱dathu̍rmitrāvaruṇā̱ tatu̍rim || 4.039.02
yo aśva̍sya dadhi̱krāvṇo̱ akā̍rī̱tsami̍ddhe a̱gnā u̱ṣaso̱ vyu̍ṣṭau |
anā̍gasa̱ṁ tamadi̍tiḥ kṛṇotu̱ sa mi̱treṇa̱ varu̍ṇenā sa̱joṣā̍ḥ || 4.039.03
da̱dhi̱krāvṇa̍ i̱ṣa ū̱rjo ma̱ho yadama̍nmahi ma̱rutā̱ṁ nāma̍ bha̱dram |
sva̱staye̱ varu̍ṇaṁ mi̱trama̱gniṁ havā̍maha̱ indra̱ṁ vajra̍bāhum || 4.039.04
indra̍mi̱vedu̱bhaye̱ vi hva̍yanta u̱dīrā̍ṇā ya̱jñamu̍papra̱yanta̍ḥ |
da̱dhi̱krāmu̱ sūda̍na̱ṁ martyā̍ya da̱dathu̍rmitrāvaruṇā no̱ aśva̍m || 4.039.05
da̱dhi̱krāvṇo̍ akāriṣaṁ ji̱ṣṇoraśva̍sya vā̱jina̍ḥ |
su̱ra̱bhi no̱ mukhā̍ kara̱tpra ṇa̱ āyū̍ṁṣi tāriṣat || 4.039.06
da̱dhi̱krāvṇa̱ idu̱ nu ca̍rkirāma̱ viśvā̱ inmāmu̱ṣasa̍ḥ sūdayantu |
a̱pāma̱gneru̱ṣasa̱ḥ sūrya̍sya̱ bṛha̱spate̍rāṅgira̱sasya̍ ji̱ṣṇoḥ || 4.040.01
satvā̍ bhari̱ṣo ga̍vi̱ṣo du̍vanya̱sacchra̍va̱syādi̱ṣa u̱ṣasa̍sturaṇya̱sat |
sa̱tyo dra̱vo dra̍va̱raḥ pa̍taṁga̱ro da̍dhi̱krāveṣa̱mūrja̱ṁ sva̍rjanat || 4.040.02
u̱ta smā̍sya̱ drava̍tasturaṇya̱taḥ pa̱rṇaṁ na veranu̍ vāti praga̱rdhina̍ḥ |
śye̱nasye̍va̱ dhraja̍to aṅka̱saṁ pari̍ dadhi̱krāvṇa̍ḥ sa̱horjā tari̍trataḥ || 4.040.03
u̱ta sya vā̱jī kṣi̍pa̱ṇiṁ tu̍raṇyati grī̱vāyā̍ṁ ba̱ddho a̍pika̱kṣa ā̱sani̍ |
kratu̍ṁ dadhi̱krā anu̍ sa̱ṁtavī̍tvatpa̱thāmaṅkā̱ṁsyanvā̱panī̍phaṇat || 4.040.04
ha̱ṁsaḥ śu̍ci̱ṣadvasu̍rantarikṣa̱saddhotā̍ vedi̱ṣadati̍thirduroṇa̱sat |
nṛ̱ṣadva̍ra̱sadṛ̍ta̱sadvyo̍ma̱sada̱bjā go̱jā ṛ̍ta̱jā a̍dri̱jā ṛ̱tam || 4.040.05
indrā̱ ko vā̍ṁ varuṇā su̱mnamā̍pa̱ stomo̍ ha̱viṣmā̍ a̱mṛto̱ na hotā̍ |
yo vā̍ṁ hṛ̱di kratu̍mā a̱smadu̱ktaḥ pa̱sparśa̍dindrāvaruṇā̱ nama̍svān || 4.041.01
indrā̍ ha̱ yo varu̍ṇā ca̱kra ā̱pī de̱vau marta̍ḥ sa̱khyāya̱ praya̍svān |
sa ha̍nti vṛ̱trā sa̍mi̱theṣu̱ śatrū̱navo̍bhirvā ma̱hadbhi̱ḥ sa pra śṛ̍ṇve || 4.041.02
indrā̍ ha̱ ratna̱ṁ varu̍ṇā̱ dheṣṭhe̱tthā nṛbhya̍ḥ śaśamā̱nebhya̱stā |
yadī̱ sakhā̍yā sa̱khyāya̱ somai̍ḥ su̱tebhi̍ḥ supra̱yasā̍ mā̱dayai̍te || 4.041.03
indrā̍ yu̱vaṁ va̍ruṇā di̱dyuma̍smi̱nnoji̍ṣṭhamugrā̱ ni va̍dhiṣṭa̱ṁ vajra̍m |
yo no̍ du̱revo̍ vṛ̱kati̍rda̱bhīti̱stasmi̍nmimāthāma̱bhibhū̱tyoja̍ḥ || 4.041.04
indrā̍ yu̱vaṁ va̍ruṇā bhū̱tama̱syā dhi̱yaḥ pre̱tārā̍ vṛṣa̱bheva̍ dhe̱noḥ |
sā no̍ duhīya̱dyava̍seva ga̱tvī sa̱hasra̍dhārā̱ paya̍sā ma̱hī gauḥ || 4.041.05
to̱ke hi̱te tana̍ya u̱rvarā̍su̱ sūro̱ dṛśī̍ke̱ vṛṣa̍ṇaśca̱ pauṁsye̍ |
indrā̍ no̱ atra̱ varu̍ṇā syātā̱mavo̍bhirda̱smā pari̍takmyāyām || 4.041.06
yu̱vāmiddhyava̍se pū̱rvyāya̱ pari̱ prabhū̍tī ga̱viṣa̍ḥ svāpī |
vṛ̱ṇī̱mahe̍ sa̱khyāya̍ pri̱yāya̱ śūrā̱ maṁhi̍ṣṭhā pi̱tare̍va śa̱mbhū || 4.041.07
tā vā̱ṁ dhiyo'va̍se vāja̱yantī̍rā̱jiṁ na ja̍gmuryuva̱yūḥ su̍dānū |
śri̱ye na gāva̱ upa̱ soma̍masthu̱rindra̱ṁ giro̱ varu̍ṇaṁ me manī̱ṣāḥ || 4.041.08
i̱mā indra̱ṁ varu̍ṇaṁ me manī̱ṣā agma̱nnupa̱ dravi̍ṇami̱cchamā̍nāḥ |
upe̍masthurjo̱ṣṭāra̍ iva̱ vasvo̍ ra̱ghvīri̍va̱ śrava̍so̱ bhikṣa̍māṇāḥ || 4.041.09
aśvya̍sya̱ tmanā̱ rathya̍sya pu̱ṣṭernitya̍sya rā̱yaḥ pata̍yaḥ syāma |
tā ca̍krā̱ṇā ū̱tibhi̱rnavya̍sībhirasma̱trā rāyo̍ ni̱yuta̍ḥ sacantām || 4.041.10
ā no̍ bṛhantā bṛha̱tībhi̍rū̱tī indra̍ yā̱taṁ va̍ruṇa̱ vāja̍sātau |
yaddi̱dyava̱ḥ pṛta̍nāsu pra̱krīḻā̱ntasya̍ vāṁ syāma sani̱tāra̍ ā̱jeḥ || 4.041.11
mama̍ dvi̱tā rā̱ṣṭraṁ kṣa̱triya̍sya vi̱śvāyo̱rviśve̍ a̱mṛtā̱ yathā̍ naḥ |
kratu̍ṁ sacante̱ varu̍ṇasya de̱vā rājā̍mi kṛ̱ṣṭeru̍pa̱masya̍ va̱vreḥ || 4.042.01
a̱haṁ rājā̱ varu̍ṇo̱ mahya̱ṁ tānya̍su̱ryā̍ṇi pratha̱mā dhā̍rayanta |
kratu̍ṁ sacante̱ varu̍ṇasya de̱vā rājā̍mi kṛ̱ṣṭeru̍pa̱masya̍ va̱vreḥ || 4.042.02
a̱hamindro̱ varu̍ṇa̱ste ma̍hi̱tvorvī ga̍bhī̱re raja̍sī su̱meke̍ |
tvaṣṭe̍va̱ viśvā̱ bhuva̍nāni vi̱dvānsamai̍raya̱ṁ roda̍sī dhā̱raya̍ṁ ca || 4.042.03
a̱hama̱po a̍pinvamu̱kṣamā̍ṇā dhā̱raya̱ṁ diva̱ṁ sada̍na ṛ̱tasya̍ |
ṛ̱tena̍ pu̱tro adi̍terṛ̱tāvo̱ta tri̱dhātu̍ prathaya̱dvi bhūma̍ || 4.042.04
māṁ nara̱ḥ svaśvā̍ vā̱jaya̍nto̱ māṁ vṛ̱tāḥ sa̱mara̍ṇe havante |
kṛ̱ṇomyā̱jiṁ ma̱ghavā̱hamindra̱ iya̍rmi re̱ṇuma̱bhibhū̍tyojāḥ || 4.042.05
a̱haṁ tā viśvā̍ cakara̱ṁ naki̍rmā̱ daivya̱ṁ saho̍ varate̱ apra̍tītam |
yanmā̱ somā̍so ma̱mada̱nyadu̱kthobhe bha̍yete̱ raja̍sī apā̱re || 4.042.06
vi̱duṣṭe̱ viśvā̱ bhuva̍nāni̱ tasya̱ tā pra bra̍vīṣi̱ varu̍ṇāya vedhaḥ |
tvaṁ vṛ̱trāṇi̍ śṛṇviṣe jagha̱nvāntvaṁ vṛ̱tā a̍riṇā indra̱ sindhū̍n || 4.042.07
a̱smāka̱matra̍ pi̱tara̱sta ā̍sansa̱pta ṛṣa̍yo daurga̱he ba̱dhyamā̍ne |
ta āya̍janta tra̱sada̍syumasyā̱ indra̱ṁ na vṛ̍tra̱tura̍mardhade̱vam || 4.042.08
pu̱ru̱kutsā̍nī̱ hi vā̱madā̍śaddha̱vyebhi̍rindrāvaruṇā̱ namo̍bhiḥ |
athā̱ rājā̍naṁ tra̱sada̍syumasyā vṛtra̱haṇa̍ṁ dadathurardhade̱vam || 4.042.09
rā̱yā va̱yaṁ sa̍sa̱vāṁso̍ madema ha̱vyena̍ de̱vā yava̍sena̱ gāva̍ḥ |
tāṁ dhe̱numi̍ndrāvaruṇā yu̱vaṁ no̍ vi̱śvāhā̍ dhatta̱mana̍pasphurantīm || 4.042.10
ka u̍ śravatkata̱mo ya̱jñiyā̍nāṁ va̱ndāru̍ de̱vaḥ ka̍ta̱mo ju̍ṣāte |
kasye̱māṁ de̱vīma̱mṛte̍ṣu̱ preṣṭhā̍ṁ hṛ̱di śre̍ṣāma suṣṭu̱tiṁ su̍ha̱vyām || 4.043.01
ko mṛ̍ḻāti kata̱ma āga̍miṣṭho de̱vānā̍mu kata̱maḥ śambha̍viṣṭhaḥ |
ratha̱ṁ kamā̍hurdra̱vada̍śvamā̱śuṁ yaṁ sūrya̍sya duhi̱tāvṛ̍ṇīta || 4.043.02
ma̱kṣū hi ṣmā̱ gaccha̍tha̱ īva̍to̱ dyūnindro̱ na śa̱ktiṁ pari̍takmyāyām |
di̱va ājā̍tā di̱vyā su̍pa̱rṇā kayā̱ śacī̍nāṁ bhavatha̱ḥ śaci̍ṣṭhā || 4.043.03
kā vā̍ṁ bhū̱dupa̍māti̱ḥ kayā̍ na̱ āśvi̍nā gamatho hū̱yamā̍nā |
ko vā̍ṁ ma̱haści̱ttyaja̍so a̱bhīka̍ uru̱ṣyata̍ṁ mādhvī dasrā na ū̱tī || 4.043.04
u̱ru vā̱ṁ ratha̱ḥ pari̍ nakṣati̱ dyāmā yatsa̍mu̱drāda̱bhi varta̍te vām |
madhvā̍ mādhvī̱ madhu̍ vāṁ pruṣāya̱nyatsī̍ṁ vā̱ṁ pṛkṣo̍ bhu̱raja̍nta pa̱kvāḥ || 4.043.05
sindhu̍rha vāṁ ra̱sayā̍ siñca̱daśvā̍nghṛ̱ṇā vayo̍'ru̱ṣāsa̱ḥ pari̍ gman |
tadū̱ ṣu vā̍maji̱raṁ ce̍ti̱ yāna̱ṁ yena̱ patī̱ bhava̍thaḥ sū̱ryāyā̍ḥ || 4.043.06
i̱heha̱ yadvā̍ṁ sama̱nā pa̍pṛ̱kṣe seyama̱sme su̍ma̱tirvā̍jaratnā |
u̱ru̱ṣyata̍ṁ jari̱tāra̍ṁ yu̱vaṁ ha̍ śri̱taḥ kāmo̍ nāsatyā yuva̱drik || 4.043.07
taṁ vā̱ṁ ratha̍ṁ va̱yama̱dyā hu̍vema pṛthu̱jraya̍maśvinā̱ saṁga̍ti̱ṁ goḥ |
yaḥ sū̱ryāṁ vaha̍ti vandhurā̱yurgirvā̍hasaṁ puru̱tama̍ṁ vasū̱yum || 4.044.01
yu̱vaṁ śriya̍maśvinā de̱vatā̱ tāṁ divo̍ napātā vanatha̱ḥ śacī̍bhiḥ |
yu̱vorvapu̍ra̱bhi pṛkṣa̍ḥ sacante̱ vaha̍nti̱ yatka̍ku̱hāso̱ rathe̍ vām || 4.044.02
ko vā̍ma̱dyā ka̍rate rā̱taha̍vya ū̱taye̍ vā suta̱peyā̍ya vā̱rkaiḥ |
ṛ̱tasya̍ vā va̱nuṣe̍ pū̱rvyāya̱ namo̍ yemā̱no a̍śvi̱nā va̍vartat || 4.044.03
hi̱ra̱ṇyaye̍na purubhū̱ rathe̍ne̱maṁ ya̱jñaṁ nā̍sa̱tyopa̍ yātam |
pibā̍tha̱ inmadhu̍naḥ so̱myasya̱ dadha̍tho̱ ratna̍ṁ vidha̱te janā̍ya || 4.044.04
ā no̍ yātaṁ di̱vo acchā̍ pṛthi̱vyā hi̍ra̱ṇyaye̍na su̱vṛtā̱ rathe̍na |
mā vā̍ma̱nye ni ya̍mandeva̱yanta̱ḥ saṁ yadda̱de nābhi̍ḥ pū̱rvyā vā̍m || 4.044.05
nū no̍ ra̱yiṁ pu̍ru̱vīra̍ṁ bṛ̱hanta̱ṁ dasrā̱ mimā̍thāmu̱bhaye̍ṣva̱sme |
naro̱ yadvā̍maśvinā̱ stoma̱māva̍nsa̱dhastu̍timājamī̱ḻhāso̍ agman || 4.044.06
i̱heha̱ yadvā̍ṁ sama̱nā pa̍pṛ̱kṣe seyama̱sme su̍ma̱tirvā̍jaratnā |
u̱ru̱ṣyata̍ṁ jari̱tāra̍ṁ yu̱vaṁ ha̍ śri̱taḥ kāmo̍ nāsatyā yuva̱drik || 4.044.07
e̱ṣa sya bhā̱nurudi̍yarti yu̱jyate̱ ratha̱ḥ pari̍jmā di̱vo a̱sya sāna̍vi |
pṛ̱kṣāso̍ asminmithu̱nā adhi̱ trayo̱ dṛti̍stu̱rīyo̱ madhu̍no̱ vi ra̍pśate || 4.045.01
udvā̍ṁ pṛ̱kṣāso̱ madhu̍manta īrate̱ rathā̱ aśvā̍sa u̱ṣaso̱ vyu̍ṣṭiṣu |
a̱po̱rṇu̱vanta̱stama̱ ā parī̍vṛta̱ṁ sva1̱̍rṇa śu̱kraṁ ta̱nvanta̱ ā raja̍ḥ || 4.045.02
madhva̍ḥ pibataṁ madhu̱pebhi̍rā̱sabhi̍ru̱ta pri̱yaṁ madhu̍ne yuñjāthā̱ṁ ratha̍m |
ā va̍rta̱niṁ madhu̍nā jinvathaspa̱tho dṛti̍ṁ vahethe̱ madhu̍mantamaśvinā || 4.045.03
ha̱ṁsāso̱ ye vā̱ṁ madhu̍manto a̱sridho̱ hira̍ṇyaparṇā u̱huva̍ uṣa̱rbudha̍ḥ |
u̱da̱pruto̍ ma̱ndino̍ mandini̱spṛśo̱ madhvo̱ na makṣa̱ḥ sava̍nāni gacchathaḥ || 4.045.04
sva̱dhva̱rāso̱ madhu̍manto a̱gnaya̍ u̱srā ja̍rante̱ prati̱ vasto̍ra̱śvinā̍ |
yanni̱ktaha̍stasta̱raṇi̍rvicakṣa̱ṇaḥ soma̍ṁ su̱ṣāva̱ madhu̍manta̱madri̍bhiḥ || 4.045.05
ā̱ke̱ni̱pāso̱ aha̍bhi̱rdavi̍dhvata̱ḥ sva1̱̍rṇa śu̱kraṁ ta̱nvanta̱ ā raja̍ḥ |
sūra̍ści̱daśvā̍nyuyujā̱na ī̍yate̱ viśvā̱ anu̍ sva̱dhayā̍ cetathaspa̱thaḥ || 4.045.06
pra vā̍mavocamaśvinā dhiya̱ṁdhā ratha̱ḥ svaśvo̍ a̱jaro̱ yo asti̍ |
yena̍ sa̱dyaḥ pari̱ rajā̍ṁsi yā̱tho ha̱viṣma̍ntaṁ ta̱raṇi̍ṁ bho̱jamaccha̍ || 4.045.07
agra̍ṁ pibā̱ madhū̍nāṁ su̱taṁ vā̍yo̱ divi̍ṣṭiṣu |
tvaṁ hi pū̍rva̱pā asi̍ || 4.046.01
śa̱tenā̍ no a̱bhiṣṭi̍bhirni̱yutvā̱ indra̍sārathiḥ |
vāyo̍ su̱tasya̍ tṛmpatam || 4.046.02
ā vā̍ṁ sa̱hasra̱ṁ hara̍ya̱ indra̍vāyū a̱bhi praya̍ḥ |
vaha̍ntu̱ soma̍pītaye || 4.046.03
ratha̱ṁ hira̍ṇyavandhura̱mindra̍vāyū svadhva̱ram |
ā hi sthātho̍ divi̱spṛśa̍m || 4.046.04
rathe̍na pṛthu̱pāja̍sā dā̱śvāṁsa̱mupa̍ gacchatam |
indra̍vāyū i̱hā ga̍tam || 4.046.05
indra̍vāyū a̱yaṁ su̱tastaṁ de̱vebhi̍ḥ sa̱joṣa̍sā |
piba̍taṁ dā̱śuṣo̍ gṛ̱he || 4.046.06
i̱ha pra̱yāṇa̍mastu vā̱mindra̍vāyū vi̱moca̍nam |
i̱ha vā̱ṁ soma̍pītaye || 4.046.07
vāyo̍ śu̱kro a̍yāmi te̱ madhvo̱ agra̱ṁ divi̍ṣṭiṣu |
ā yā̍hi̱ soma̍pītaye spā̱rho de̍va ni̱yutva̍tā || 4.047.01
indra̍śca vāyaveṣā̱ṁ somā̍nāṁ pī̱tima̍rhathaḥ |
yu̱vāṁ hi yantīnda̍vo ni̱mnamāpo̱ na sa̱dhrya̍k || 4.047.02
vāya̱vindra̍śca śu̱ṣmiṇā̍ sa̱ratha̍ṁ śavasaspatī |
ni̱yutva̍ntā na ū̱taya̱ ā yā̍ta̱ṁ soma̍pītaye || 4.047.03
yā vā̱ṁ santi̍ puru̱spṛho̍ ni̱yuto̍ dā̱śuṣe̍ narā |
a̱sme tā ya̍jñavāha̱sendra̍vāyū̱ ni ya̍cchatam || 4.047.04
vi̱hi hotrā̱ avī̍tā̱ vipo̱ na rāyo̍ a̱ryaḥ |
vāya̱vā ca̱ndreṇa̱ rathe̍na yā̱hi su̱tasya̍ pī̱taye̍ || 4.048.01
ni̱ryu̱vā̱ṇo aśa̍stīrni̱yutvā̱ indra̍sārathiḥ |
vāya̱vā ca̱ndreṇa̱ rathe̍na yā̱hi su̱tasya̍ pī̱taye̍ || 4.048.02
anu̍ kṛ̱ṣṇe vasu̍dhitī ye̱māte̍ vi̱śvape̍śasā |
vāya̱vā ca̱ndreṇa̱ rathe̍na yā̱hi su̱tasya̍ pī̱taye̍ || 4.048.03
vaha̍ntu tvā mano̱yujo̍ yu̱ktāso̍ nava̱tirnava̍ |
vāya̱vā ca̱ndreṇa̱ rathe̍na yā̱hi su̱tasya̍ pī̱taye̍ || 4.048.04
vāyo̍ śa̱taṁ harī̍ṇāṁ yu̱vasva̱ poṣyā̍ṇām |
u̱ta vā̍ te saha̱sriṇo̱ ratha̱ ā yā̍tu̱ pāja̍sā || 4.048.05
i̱daṁ vā̍mā̱sye̍ ha̱viḥ pri̱yami̍ndrābṛhaspatī |
u̱kthaṁ mada̍śca śasyate || 4.049.01
a̱yaṁ vā̱ṁ pari̍ ṣicyate̱ soma̍ indrābṛhaspatī |
cāru̱rmadā̍ya pī̱taye̍ || 4.049.02
ā na̍ indrābṛhaspatī gṛ̱hamindra̍śca gacchatam |
so̱ma̱pā soma̍pītaye || 4.049.03
a̱sme i̍ndrābṛhaspatī ra̱yiṁ dha̍ttaṁ śata̱gvina̍m |
aśvā̍vantaṁ saha̱sriṇa̍m || 4.049.04
indrā̱bṛha̱spatī̍ va̱yaṁ su̱te gī̱rbhirha̍vāmahe |
a̱sya soma̍sya pī̱taye̍ || 4.049.05
soma̍mindrābṛhaspatī̱ piba̍taṁ dā̱śuṣo̍ gṛ̱he |
mā̱daye̍thā̱ṁ tado̍kasā || 4.049.06
yasta̱stambha̱ saha̍sā̱ vi jmo antā̱nbṛha̱spati̍striṣadha̱stho rave̍ṇa |
taṁ pra̱tnāsa̱ ṛṣa̍yo̱ dīdhyā̍nāḥ pu̱ro viprā̍ dadhire ma̱ndraji̍hvam || 4.050.01
dhu̱neta̍yaḥ suprake̱taṁ mada̍nto̱ bṛha̍spate a̱bhi ye na̍stata̱sre |
pṛṣa̍ntaṁ sṛ̱pramada̍bdhamū̱rvaṁ bṛha̍spate̱ rakṣa̍tādasya̱ yoni̍m || 4.050.02
bṛha̍spate̱ yā pa̍ra̱mā pa̍rā̱vadata̱ ā ta̍ ṛta̱spṛśo̱ ni ṣe̍duḥ |
tubhya̍ṁ khā̱tā a̍va̱tā adri̍dugdhā̱ madhva̍ḥ ścotantya̱bhito̍ vira̱pśam || 4.050.03
bṛha̱spati̍ḥ pratha̱maṁ jāya̍māno ma̱ho jyoti̍ṣaḥ para̱me vyo̍man |
sa̱ptāsya̍stuvijā̱to rave̍ṇa̱ vi sa̱ptara̍śmiradhama̱ttamā̍ṁsi || 4.050.04
sa su̱ṣṭubhā̱ sa ṛkva̍tā ga̱ṇena̍ va̱laṁ ru̍roja phali̱gaṁ rave̍ṇa |
bṛha̱spati̍ru̱sriyā̍ havya̱sūda̱ḥ kani̍krada̱dvāva̍śatī̱rudā̍jat || 4.050.05
e̱vā pi̱tre vi̱śvade̍vāya̱ vṛṣṇe̍ ya̱jñairvi̍dhema̱ nama̍sā ha̱virbhi̍ḥ |
bṛha̍spate supra̱jā vī̱rava̍nto va̱yaṁ syā̍ma̱ pata̍yo rayī̱ṇām || 4.050.06
sa idrājā̱ prati̍janyāni̱ viśvā̱ śuṣme̍ṇa tasthāva̱bhi vī̱rye̍ṇa |
bṛha̱spati̱ṁ yaḥ subhṛ̍taṁ bi̱bharti̍ valgū̱yati̱ vanda̍te pūrva̱bhāja̍m || 4.050.07
sa itkṣe̍ti̱ sudhi̍ta̱ oka̍si̱ sve tasmā̱ iḻā̍ pinvate viśva̱dānī̍m |
tasmai̱ viśa̍ḥ sva̱yame̱vā na̍mante̱ yasmi̍nbra̱hmā rāja̍ni̱ pūrva̱ eti̍ || 4.050.08
apra̍tīto jayati̱ saṁ dhanā̍ni̱ prati̍janyānyu̱ta yā saja̍nyā |
a̱va̱syave̱ yo vari̍vaḥ kṛ̱ṇoti̍ bra̱hmaṇe̱ rājā̱ tama̍vanti de̱vāḥ || 4.050.09
indra̍śca̱ soma̍ṁ pibataṁ bṛhaspate̱'sminya̱jñe ma̍ndasā̱nā vṛ̍ṣaṇvasū |
ā vā̍ṁ viśa̱ntvinda̍vaḥ svā̱bhuvo̱'sme ra̱yiṁ sarva̍vīra̱ṁ ni ya̍cchatam || 4.050.10
bṛha̍spata indra̱ vardha̍taṁ na̱ḥ sacā̱ sā vā̍ṁ suma̱tirbhū̍tva̱sme |
a̱vi̱ṣṭaṁ dhiyo̍ jigṛ̱taṁ pura̍ṁdhīrjaja̱stama̱ryo va̱nuṣā̱marā̍tīḥ || 4.050.11
i̱damu̱ tyatpu̍ru̱tama̍ṁ pu̱rastā̱jjyoti̱stama̍so va̱yunā̍vadasthāt |
nū̱naṁ di̱vo du̍hi̱taro̍ vibhā̱tīrgā̱tuṁ kṛ̍ṇavannu̱ṣaso̱ janā̍ya || 4.051.01
asthu̍ru ci̱trā u̱ṣasa̍ḥ pu̱rastā̍nmi̱tā i̍va̱ svara̍vo'dhva̱reṣu̍ |
vyū̍ vra̱jasya̱ tama̍so̱ dvāro̱cchantī̍ravra̱ñchuca̍yaḥ pāva̱kāḥ || 4.051.02
u̱cchantī̍ra̱dya ci̍tayanta bho̱jānrā̍dho̱deyā̍yo̱ṣaso̍ ma̱ghonī̍ḥ |
a̱ci̱tre a̱ntaḥ pa̱ṇaya̍ḥ sasa̱ntvabu̍dhyamānā̱stama̍so̱ vima̍dhye || 4.051.03
ku̱vitsa de̍vīḥ sa̱nayo̱ navo̍ vā̱ yāmo̍ babhū̱yādu̍ṣaso vo a̱dya |
yenā̱ nava̍gve̱ aṅgi̍re̱ daśa̍gve sa̱ptāsye̍ revatī re̱vadū̱ṣa || 4.051.04
yū̱yaṁ hi de̍vīrṛta̱yugbhi̱raśvai̍ḥ pariprayā̱tha bhuva̍nāni sa̱dyaḥ |
pra̱bo̱dhaya̍ntīruṣasaḥ sa̱santa̍ṁ dvi̱pāccatu̍ṣpācca̱rathā̍ya jī̱vam || 4.051.05
kva̍ svidāsāṁ kata̱mā pu̍rā̱ṇī yayā̍ vi̱dhānā̍ vida̱dhurṛ̍bhū̱ṇām |
śubha̱ṁ yacchu̱bhrā u̱ṣasa̱ścara̍nti̱ na vi jñā̍yante sa̱dṛśī̍raju̱ryāḥ || 4.051.06
tā ghā̱ tā bha̱drā u̱ṣasa̍ḥ pu̱rāsu̍rabhi̱ṣṭidyu̍mnā ṛ̱tajā̍tasatyāḥ |
yāsvī̍jā̱naḥ śa̍śamā̱na u̱kthaiḥ stu̱vañchaṁsa̱ndravi̍ṇaṁ sa̱dya āpa̍ || 4.051.07
tā ā ca̍ranti sama̱nā pu̱rastā̍tsamā̱nata̍ḥ sama̱nā pa̍prathā̱nāḥ |
ṛ̱tasya̍ de̱vīḥ sada̍so budhā̱nā gavā̱ṁ na sargā̍ u̱ṣaso̍ jarante || 4.051.08
tā innve̱3̱̍va sa̍ma̱nā sa̍mā̱nīramī̍tavarṇā u̱ṣasa̍ścaranti |
gūha̍ntī̱rabhva̱masi̍ta̱ṁ ruśa̍dbhiḥ śu̱krāsta̱nūbhi̱ḥ śuca̍yo rucā̱nāḥ || 4.051.09
ra̱yiṁ di̍vo duhitaro vibhā̱tīḥ pra̱jāva̍ntaṁ yacchatā̱smāsu̍ devīḥ |
syo̱nādā va̍ḥ prati̱budhya̍mānāḥ su̱vīrya̍sya̱ pata̍yaḥ syāma || 4.051.10
tadvo̍ divo duhitaro vibhā̱tīrupa̍ bruva uṣaso ya̱jñake̍tuḥ |
va̱yaṁ syā̍ma ya̱śaso̱ jane̍ṣu̱ taddyauśca̍ dha̱ttāṁ pṛ̍thi̱vī ca̍ de̱vī || 4.051.11
prati̱ ṣyā sū̱narī̱ janī̍ vyu̱cchantī̱ pari̱ svasu̍ḥ |
di̱vo a̍darśi duhi̱tā || 4.052.01
aśve̍va ci̱trāru̍ṣī mā̱tā gavā̍mṛ̱tāva̍rī |
sakhā̍bhūda̱śvino̍ru̱ṣāḥ || 4.052.02
u̱ta sakhā̍sya̱śvino̍ru̱ta mā̱tā gavā̍masi |
u̱toṣo̱ vasva̍ īśiṣe || 4.052.03
yā̱va̱yaddve̍ṣasaṁ tvā ciki̱tvitsū̍nṛtāvari |
prati̱ stomai̍rabhutsmahi || 4.052.04
prati̍ bha̱drā a̍dṛkṣata̱ gavā̱ṁ sargā̱ na ra̱śmaya̍ḥ |
oṣā a̍prā u̱ru jraya̍ḥ || 4.052.05
ā̱pa̱pruṣī̍ vibhāvari̱ vyā̍va̱rjyoti̍ṣā̱ tama̍ḥ |
uṣo̱ anu̍ sva̱dhāma̍va || 4.052.06
ā dyāṁ ta̍noṣi ra̱śmibhi̱rāntari̍kṣamu̱ru pri̱yam |
uṣa̍ḥ śu̱kreṇa̍ śo̱ciṣā̍ || 4.052.07
tadde̱vasya̍ savi̱turvārya̍ṁ ma̱hadvṛ̍ṇī̱mahe̱ asu̍rasya̱ prace̍tasaḥ |
cha̱rdiryena̍ dā̱śuṣe̱ yaccha̍ti̱ tmanā̱ tanno̍ ma̱hā uda̍yānde̱vo a̱ktubhi̍ḥ || 4.053.01
di̱vo dha̱rtā bhuva̍nasya pra̱jāpa̍tiḥ pi̱śaṅga̍ṁ drā̱piṁ prati̍ muñcate ka̱viḥ |
vi̱ca̱kṣa̱ṇaḥ pra̱thaya̍nnāpṛ̱ṇannu̱rvajī̍janatsavi̱tā su̱mnamu̱kthya̍m || 4.053.02
āprā̱ rajā̍ṁsi di̱vyāni̱ pārthi̍vā̱ śloka̍ṁ de̱vaḥ kṛ̍ṇute̱ svāya̱ dharma̍ṇe |
pra bā̱hū a̍srāksavi̱tā savī̍mani nive̱śaya̍nprasu̱vanna̱ktubhi̱rjaga̍t || 4.053.03
adā̍bhyo̱ bhuva̍nāni pra̱cāka̍śadvra̱tāni̍ de̱vaḥ sa̍vi̱tābhi ra̍kṣate |
prāsrā̍gbā̱hū bhuva̍nasya pra̱jābhyo̍ dhṛ̱tavra̍to ma̱ho ajma̍sya rājati || 4.053.04
trira̱ntari̍kṣaṁ savi̱tā ma̍hitva̱nā trī rajā̍ṁsi pari̱bhustrīṇi̍ roca̱nā |
ti̱sro diva̍ḥ pṛthi̱vīsti̱sra i̍nvati tri̱bhirvra̱taira̱bhi no̍ rakṣati̱ tmanā̍ || 4.053.05
bṛ̱hatsu̍mnaḥ prasavī̱tā ni̱veśa̍no̱ jaga̍taḥ sthā̱turu̱bhaya̍sya̱ yo va̱śī |
sa no̍ de̱vaḥ sa̍vi̱tā śarma̍ yacchatva̱sme kṣayā̍ya tri̱varū̍tha̱maṁha̍saḥ || 4.053.06
āga̍nde̱va ṛ̱tubhi̱rvardha̍tu̱ kṣaya̱ṁ dadhā̍tu naḥ savi̱tā su̍pra̱jāmiṣa̍m |
sa na̍ḥ kṣa̱pābhi̱raha̍bhiśca jinvatu pra̱jāva̍ntaṁ ra̱yima̱sme sami̍nvatu || 4.053.07
abhū̍dde̱vaḥ sa̍vi̱tā vandyo̱ nu na̍ i̱dānī̱mahna̍ upa̱vācyo̱ nṛbhi̍ḥ |
vi yo ratnā̱ bhaja̍ti māna̱vebhya̱ḥ śreṣṭha̍ṁ no̱ atra̱ dravi̍ṇa̱ṁ yathā̱ dadha̍t || 4.054.01
de̱vebhyo̱ hi pra̍tha̱maṁ ya̱jñiye̍bhyo'mṛta̱tvaṁ su̱vasi̍ bhā̱gamu̍tta̱mam |
ādiddā̱māna̍ṁ savita̱rvyū̍rṇuṣe'nūcī̱nā jī̍vi̱tā mānu̍ṣebhyaḥ || 4.054.02
aci̍ttī̱ yacca̍kṛ̱mā daivye̱ jane̍ dī̱nairdakṣai̱ḥ prabhū̍tī pūruṣa̱tvatā̍ |
de̱veṣu̍ ca savita̱rmānu̍ṣeṣu ca̱ tvaṁ no̱ atra̍ suvatā̱danā̍gasaḥ || 4.054.03
na pra̱miye̍ savi̱turdaivya̍sya̱ tadyathā̱ viśva̱ṁ bhuva̍naṁ dhārayi̱ṣyati̍ |
yatpṛ̍thi̱vyā vari̍ma̱nnā sva̍ṅgu̱rirvarṣma̍ndi̱vaḥ su̱vati̍ sa̱tyama̍sya̱ tat || 4.054.04
indra̍jyeṣṭhānbṛ̱hadbhya̱ḥ parva̍tebhya̱ḥ kṣayā̍ ebhyaḥ suvasi pa̱styā̍vataḥ |
yathā̍yathā pa̱taya̍nto viyemi̱ra e̱vaiva ta̍sthuḥ savitaḥ sa̱vāya̍ te || 4.054.05
ye te̱ triraha̍nsavitaḥ sa̱vāso̍ di̱vedi̍ve̱ saubha̍gamāsu̱vanti̍ |
indro̱ dyāvā̍pṛthi̱vī sindhu̍ra̱dbhirā̍di̱tyairno̱ adi̍ti̱ḥ śarma̍ yaṁsat || 4.054.06
ko va̍strā̱tā va̍sava̱ḥ ko va̍rū̱tā dyāvā̍bhūmī adite̱ trāsī̍thāṁ naḥ |
sahī̍yaso varuṇa mitra̱ martā̱tko vo̍'dhva̱re vari̍vo dhāti devāḥ || 4.055.01
pra ye dhāmā̍ni pū̱rvyāṇyarcā̱nvi yadu̱cchānvi̍yo̱tāro̱ amū̍rāḥ |
vi̱dhā̱tāro̱ vi te da̍dhu̱raja̍srā ṛ̱tadhī̍tayo rurucanta da̱smāḥ || 4.055.02
pra pa̱styā̱3̱̍madi̍ti̱ṁ sindhu̍ma̱rkaiḥ sva̱stimī̍ḻe sa̱khyāya̍ de̱vīm |
u̱bhe yathā̍ no̱ aha̍nī ni̱pāta̍ u̱ṣāsā̱naktā̍ karatā̱mada̍bdhe || 4.055.03
vya̍rya̱mā varu̍ṇaśceti̱ panthā̍mi̱ṣaspati̍ḥ suvi̱taṁ gā̱tuma̱gniḥ |
indrā̍viṣṇū nṛ̱vadu̱ ṣu stavā̍nā̱ śarma̍ no yanta̱mama̍va̱dvarū̍tham || 4.055.04
ā parva̍tasya ma̱rutā̱mavā̍ṁsi de̱vasya̍ trā̱tura̍vri̱ bhaga̍sya |
pātpati̱rjanyā̱daṁha̍so no mi̱tro mi̱triyā̍du̱ta na̍ uruṣyet || 4.055.05
nū ro̍dasī̱ ahi̍nā bu̱dhnye̍na stuvī̱ta de̍vī̱ apye̍bhiri̱ṣṭaiḥ |
sa̱mu̱draṁ na sa̱ṁcara̍ṇe sani̱ṣyavo̍ gha̱rmasva̍raso na̱dyo̱3̱̍ apa̍ vran || 4.055.06
de̱vairno̍ de̱vyadi̍ti̱rni pā̍tu de̱vastrā̱tā trā̍yatā̱mapra̍yucchan |
na̱hi mi̱trasya̱ varu̍ṇasya dhā̱simarhā̍masi pra̱miya̱ṁ sānva̱gneḥ || 4.055.07
a̱gnirī̍śe vasa̱vya̍syā̱gnirma̱haḥ saubha̍gasya |
tānya̱smabhya̍ṁ rāsate || 4.055.08
uṣo̍ magho̱nyā va̍ha̱ sūnṛ̍te̱ vāryā̍ pu̱ru |
a̱smabhya̍ṁ vājinīvati || 4.055.09
tatsu na̍ḥ savi̱tā bhago̱ varu̍ṇo mi̱tro a̍rya̱mā |
indro̍ no̱ rādha̱sā ga̍mat || 4.055.10
ma̱hī dyāvā̍pṛthi̱vī i̱ha jyeṣṭhe̍ ru̱cā bha̍vatāṁ śu̱caya̍dbhira̱rkaiḥ |
yatsī̱ṁ vari̍ṣṭhe bṛha̱tī vi̍mi̱nvanru̱vaddho̱kṣā pa̍prathā̱nebhi̱revai̍ḥ || 4.056.01
de̱vī de̱vebhi̍ryaja̱te yaja̍trai̱rami̍natī tasthaturu̱kṣamā̍ṇe |
ṛ̱tāva̍rī a̱druhā̍ de̱vapu̍tre ya̱jñasya̍ ne̱trī śu̱caya̍dbhira̱rkaiḥ || 4.056.02
sa itsvapā̱ bhuva̍neṣvāsa̱ ya i̱me dyāvā̍pṛthi̱vī ja̱jāna̍ |
u̱rvī ga̍bhī̱re raja̍sī su̱meke̍ ava̱ṁśe dhīra̱ḥ śacyā̱ samai̍rat || 4.056.03
nū ro̍dasī bṛ̱hadbhi̍rno̱ varū̍thai̱ḥ patnī̍vadbhiri̱ṣaya̍ntī sa̱joṣā̍ḥ |
u̱rū̱cī viśve̍ yaja̱te ni pā̍taṁ dhi̱yā syā̍ma ra̱thya̍ḥ sadā̱sāḥ || 4.056.04
pra vā̱ṁ mahi̱ dyavī̍ a̱bhyupa̍stutiṁ bharāmahe |
śucī̱ upa̱ praśa̍staye || 4.056.05
pu̱nā̱ne ta̱nvā̍ mi̱thaḥ svena̱ dakṣe̍ṇa rājathaḥ |
ū̱hyāthe̍ sa̱nādṛ̱tam || 4.056.06
ma̱hī mi̱trasya̍ sādhatha̱stara̍ntī̱ pipra̍tī ṛ̱tam |
pari̍ ya̱jñaṁ ni ṣe̍dathuḥ || 4.056.07
kṣetra̍sya̱ pati̍nā va̱yaṁ hi̱tene̍va jayāmasi |
gāmaśva̍ṁ poṣayi̱tnvā sa no̍ mṛḻātī̱dṛśe̍ || 4.057.01
kṣetra̍sya pate̱ madhu̍mantamū̱rmiṁ dhe̱nuri̍va̱ payo̍ a̱smāsu̍ dhukṣva |
ma̱dhu̱ścuta̍ṁ ghṛ̱tami̍va̱ supū̍tamṛ̱tasya̍ na̱ḥ pata̍yo mṛḻayantu || 4.057.02
madhu̍matī̱roṣa̍dhī̱rdyāva̱ āpo̱ madhu̍manno bhavatva̱ntari̍kṣam |
kṣetra̍sya̱ pati̱rmadhu̍mānno a̱stvari̍ṣyanto̱ anve̍naṁ carema || 4.057.03
śu̱naṁ vā̱hāḥ śu̱naṁ nara̍ḥ śu̱naṁ kṛ̍ṣatu̱ lāṅga̍lam |
śu̱naṁ va̍ra̱trā ba̍dhyantāṁ śu̱namaṣṭrā̱mudi̍ṅgaya || 4.057.04
śunā̍sīrāvi̱māṁ vāca̍ṁ juṣethā̱ṁ yaddi̱vi ca̱krathu̱ḥ paya̍ḥ |
tene̱māmupa̍ siñcatam || 4.057.05
a̱rvācī̍ subhage bhava̱ sīte̱ vandā̍mahe tvā |
yathā̍ naḥ su̱bhagāsa̍si̱ yathā̍ naḥ su̱phalāsa̍si || 4.057.06
indra̱ḥ sītā̱ṁ ni gṛ̍hṇātu̱ tāṁ pū̱ṣānu̍ yacchatu |
sā na̱ḥ paya̍svatī duhā̱mutta̍rāmuttarā̱ṁ samā̍m || 4.057.07
śu̱naṁ na̱ḥ phālā̱ vi kṛ̍ṣantu̱ bhūmi̍ṁ śu̱naṁ kī̱nāśā̍ a̱bhi ya̍ntu vā̱haiḥ |
śu̱naṁ pa̱rjanyo̱ madhu̍nā̱ payo̍bhi̱ḥ śunā̍sīrā śu̱nama̱smāsu̍ dhattam || 4.057.08
sa̱mu̱drādū̱rmirmadhu̍mā̱ udā̍ra̱dupā̱ṁśunā̱ sama̍mṛta̱tvamā̍naṭ |
ghṛ̱tasya̱ nāma̱ guhya̱ṁ yadasti̍ ji̱hvā de̱vānā̍ma̱mṛta̍sya̱ nābhi̍ḥ || 4.058.01
va̱yaṁ nāma̱ pra bra̍vāmā ghṛ̱tasyā̱sminya̱jñe dhā̍rayāmā̱ namo̍bhiḥ |
upa̍ bra̱hmā śṛ̍ṇavaccha̱syamā̍na̱ṁ catu̍ḥśṛṅgo'vamīdgau̱ra e̱tat || 4.058.02
ca̱tvāri̱ śṛṅgā̱ trayo̍ asya̱ pādā̱ dve śī̱rṣe sa̱pta hastā̍so asya |
tridhā̍ ba̱ddho vṛ̍ṣa̱bho ro̍ravīti ma̱ho de̱vo martyā̱ ā vi̍veśa || 4.058.03
tridhā̍ hi̱taṁ pa̱ṇibhi̍rgu̱hyamā̍na̱ṁ gavi̍ de̱vāso̍ ghṛ̱tamanva̍vindan |
indra̱ eka̱ṁ sūrya̱ eka̍ṁ jajāna ve̱nādeka̍ṁ sva̱dhayā̱ niṣṭa̍takṣuḥ || 4.058.04
e̱tā a̍rṣanti̱ hṛdyā̍tsamu̱drāccha̱tavra̍jā ri̱puṇā̱ nāva̱cakṣe̍ |
ghṛ̱tasya̱ dhārā̍ a̱bhi cā̍kaśīmi hira̱ṇyayo̍ veta̱so madhya̍ āsām || 4.058.05
sa̱myaksra̍vanti sa̱rito̱ na dhenā̍ a̱ntarhṛ̱dā mana̍sā pū̱yamā̍nāḥ |
e̱te a̍rṣantyū̱rmayo̍ ghṛ̱tasya̍ mṛ̱gā i̍va kṣipa̱ṇorīṣa̍māṇāḥ || 4.058.06
sindho̍riva prādhva̱ne śū̍gha̱nāso̱ vāta̍pramiyaḥ patayanti ya̱hvāḥ |
ghṛ̱tasya̱ dhārā̍ aru̱ṣo na vā̱jī kāṣṭhā̍ bhi̱ndannū̱rmibhi̱ḥ pinva̍mānaḥ || 4.058.07
a̱bhi pra̍vanta̱ sama̍neva̱ yoṣā̍ḥ kalyā̱ṇya1̱̍ḥ smaya̍mānāso a̱gnim |
ghṛ̱tasya̱ dhārā̍ḥ sa̱midho̍ nasanta̱ tā ju̍ṣā̱ṇo ha̍ryati jā̱tave̍dāḥ || 4.058.08
ka̱nyā̍ iva vaha̱tumeta̱vā u̍ a̱ñjya̍ñjā̱nā a̱bhi cā̍kaśīmi |
yatra̱ soma̍ḥ sū̱yate̱ yatra̍ ya̱jño ghṛ̱tasya̱ dhārā̍ a̱bhi tatpa̍vante || 4.058.09
a̱bhya̍rṣata suṣṭu̱tiṁ gavya̍mā̱jima̱smāsu̍ bha̱drā dravi̍ṇāni dhatta |
i̱maṁ ya̱jñaṁ na̍yata de̱vatā̍ no ghṛ̱tasya̱ dhārā̱ madhu̍matpavante || 4.058.10
dhāma̍nte̱ viśva̱ṁ bhuva̍na̱madhi̍ śri̱tama̱ntaḥ sa̍mu̱dre hṛ̱dya1̱̍ntarāyu̍ṣi |
a̱pāmanī̍ke sami̱the ya ābhṛ̍ta̱stama̍śyāma̱ madhu̍mantaṁ ta ū̱rmim || 4.058.11
Last udpated July 2, 2013
Special mention : Initial processing and help by Avinash and Shashi Sathaye,
Avinash Chopde, Shree Devi Kumar, Sunder Hattangadi, John Gardner.
Reprocessed from Original in final form by Detlef Eichler with additional corrections.
See Detlef's site http://www.detlef108.de/Rigveda.htm
for other details and formats.
The text is shown with accents (Anudattas, dependent Svaritas,
and independent Svaritas including Kampas). Words are connected (agnimILe).
Ch is doubled as in gachChati according to the rules of Rigveda-Pratishakhya.
At the end of a word m is replaced by Anusvara M if the initial letter of the
following word is a labial stop consonant (p, ph, b, bh, m).
Visarga H before sh, Sh or s followed by a voiceless consonant has been restored.
Source : The Aufrecht/van Nooten/Holland (Samhita) version
of the Rigveda (http://www.people.fas.harvard.edu/~witzel/onlineRV.htm).
In this text accented vowels have Udatta or 'independent Svarita' markers.
Kampas are not shown. Words are separated (agnim ILe).
Ch is not doubled as in gaChati. At the end of a word we find m before
a following labial stop consonant (p, ph, b, bh, m).
Visarga H before sh, Sh or s followed by a voiceless consonant has
been dropped according to a rule of Rigveda-Pratishakhya.
Send corrections to : detlefeichler@googlemail.com, sanskrit@cheerful.com
The text is to be used for personal studies and research only.
Any use for commercial purpose is prohibited as a `gentleman's' agreement.