|| ṛgvedaḥ maṇḍalaṁ 5 ||
abo̍dhya̱gniḥ sa̱midhā̱ janā̍nā̱ṁ prati̍ dhe̱numi̍vāya̱tīmu̱ṣāsa̍m |
ya̱hvā i̍va̱ pra va̱yāmu̱jjihā̍nā̱ḥ pra bhā̱nava̍ḥ sisrate̱ nāka̱maccha̍ || 5.001.01
abo̍dhi̱ hotā̍ ya̱jathā̍ya de̱vānū̱rdhvo a̱gniḥ su̱manā̍ḥ prā̱tara̍sthāt |
sami̍ddhasya̱ ruśa̍dadarśi̱ pājo̍ ma̱hānde̱vastama̍so̱ nira̍moci || 5.001.02
yadī̍ṁ ga̱ṇasya̍ raśa̱nāmajī̍ga̱ḥ śuci̍raṅkte̱ śuci̍bhi̱rgobhi̍ra̱gniḥ |
āddakṣi̍ṇā yujyate vāja̱yantyu̍ttā̱nāmū̱rdhvo a̍dhayajju̱hūbhi̍ḥ || 5.001.03
a̱gnimacchā̍ devaya̱tāṁ manā̍ṁsi̱ cakṣū̍ṁṣīva̱ sūrye̱ saṁ ca̍ranti |
yadī̱ṁ suvā̍te u̱ṣasā̱ virū̍pe śve̱to vā̱jī jā̍yate̱ agre̱ ahnā̍m || 5.001.04
jani̍ṣṭa̱ hi jenyo̱ agre̱ ahnā̍ṁ hi̱to hi̱teṣva̍ru̱ṣo vane̍ṣu |
dame̍dame sa̱pta ratnā̱ dadhā̍no̱'gnirhotā̱ ni ṣa̍sādā̱ yajī̍yān || 5.001.05
a̱gnirhotā̱ nya̍sīda̱dyajī̍yānu̱pasthe̍ mā̱tuḥ su̍ra̱bhā u̍ lo̱ke |
yuvā̍ ka̱viḥ pu̍runi̱ṣṭha ṛ̱tāvā̍ dha̱rtā kṛ̍ṣṭī̱nāmu̱ta madhya̍ i̱ddhaḥ || 5.001.06
pra ṇu tyaṁ vipra̍madhva̱reṣu̍ sā̱dhuma̱gniṁ hotā̍ramīḻate̱ namo̍bhiḥ |
ā yasta̱tāna̱ roda̍sī ṛ̱tena̱ nitya̍ṁ mṛjanti vā̱jina̍ṁ ghṛ̱tena̍ || 5.001.07
mā̱rjā̱lyo̍ mṛjyate̱ sve damū̍nāḥ kavipraśa̱sto ati̍thiḥ śi̱vo na̍ḥ |
sa̱hasra̍śṛṅgo vṛṣa̱bhastado̍jā̱ viśvā̍ agne̱ saha̍sā̱ prāsya̱nyān || 5.001.08
pra sa̱dyo a̍gne̱ atye̍ṣya̱nyānā̱viryasmai̱ cāru̍tamo ba̱bhūtha̍ |
ī̱ḻenyo̍ vapu̱ṣyo̍ vi̱bhāvā̍ pri̱yo vi̱śāmati̍thi̱rmānu̍ṣīṇām || 5.001.09
tubhya̍ṁ bharanti kṣi̱tayo̍ yaviṣṭha ba̱lima̍gne̱ anti̍ta̱ ota dū̱rāt |
ā bhandi̍ṣṭhasya suma̱tiṁ ci̍kiddhi bṛ̱hatte̍ agne̱ mahi̱ śarma̍ bha̱dram || 5.001.10
ādya ratha̍ṁ bhānumo bhānu̱manta̱magne̱ tiṣṭha̍ yaja̱tebhi̱ḥ sama̍ntam |
vi̱dvānpa̍thī̱nāmu̱rva1̱̍ntari̍kṣa̱meha de̱vānha̍vi̱radyā̍ya vakṣi || 5.001.11
avo̍cāma ka̱vaye̱ medhyā̍ya̱ vaco̍ va̱ndāru̍ vṛṣa̱bhāya̱ vṛṣṇe̍ |
gavi̍ṣṭhiro̱ nama̍sā̱ stoma̍ma̱gnau di̱vī̍va ru̱kmamu̍ru̱vyañca̍maśret || 5.001.12
ku̱mā̱raṁ mā̱tā yu̍va̱tiḥ samu̍bdha̱ṁ guhā̍ bibharti̱ na da̍dāti pi̱tre |
anī̍kamasya̱ na mi̱najjanā̍saḥ pu̱raḥ pa̍śyanti̱ nihi̍tamara̱tau || 5.002.01
kame̱taṁ tvaṁ yu̍vate kumā̱raṁ peṣī̍ bibharṣi̱ mahi̍ṣī jajāna |
pū̱rvīrhi garbha̍ḥ śa̱rado̍ va̱vardhāpa̍śyaṁ jā̱taṁ yadasū̍ta mā̱tā || 5.002.02
hira̍ṇyadanta̱ṁ śuci̍varṇamā̱rātkṣetrā̍dapaśya̱māyu̍dhā̱ mimā̍nam |
da̱dā̱no a̍smā a̱mṛta̍ṁ vi̱pṛkva̱tkiṁ māma̍ni̱ndrāḥ kṛ̍ṇavannanu̱kthāḥ || 5.002.03
kṣetrā̍dapaśyaṁ sanu̱taścara̍ntaṁ su̱madyū̱thaṁ na pu̱ru śobha̍mānam |
na tā a̍gṛbhra̱nnaja̍niṣṭa̱ hi ṣaḥ pali̍knī̱ridyu̍va̱tayo̍ bhavanti || 5.002.04
ke me̍ marya̱kaṁ vi ya̍vanta̱ gobhi̱rna yeṣā̍ṁ go̱pā ara̍ṇaści̱dāsa̍ |
ya ī̍ṁ jagṛ̱bhurava̱ te sṛ̍ja̱ntvājā̍ti pa̱śva upa̍ naściki̱tvān || 5.002.05
va̱sāṁ rājā̍naṁ vasa̱tiṁ janā̍nā̱marā̍tayo̱ ni da̍dhu̱rmartye̍ṣu |
brahmā̱ṇyatre̱rava̱ taṁ sṛ̍jantu nindi̱tāro̱ nindyā̍so bhavantu || 5.002.06
śuna̍ści̱cchepa̱ṁ nidi̍taṁ sa̱hasrā̱dyūpā̍damuñco̱ aśa̍miṣṭa̱ hi ṣaḥ |
e̱vāsmada̍gne̱ vi mu̍mugdhi̱ pāśā̱nhota̍ścikitva i̱ha tū ni̱ṣadya̍ || 5.002.07
hṛ̱ṇī̱yamā̍no̱ apa̱ hi madaiye̱ḥ pra me̍ de̱vānā̍ṁ vrata̱pā u̍vāca |
indro̍ vi̱dvā anu̱ hi tvā̍ ca̱cakṣa̱ tenā̱hama̍gne̱ anu̍śiṣṭa̱ āgā̍m || 5.002.08
vi jyoti̍ṣā bṛha̱tā bhā̍tya̱gnirā̱virviśvā̍ni kṛṇute mahi̱tvā |
prāde̍vīrmā̱yāḥ sa̍hate du̱revā̱ḥ śiśī̍te̱ śṛṅge̱ rakṣa̍se vi̱nikṣe̍ || 5.002.09
u̱ta svā̱nāso̍ di̱vi ṣa̍ntva̱gnesti̱gmāyu̍dhā̱ rakṣa̍se̱ hanta̱vā u̍ |
made̍ cidasya̱ pra ru̍janti̱ bhāmā̱ na va̍rante pari̱bādho̱ ade̍vīḥ || 5.002.10
e̱taṁ te̱ stoma̍ṁ tuvijāta̱ vipro̱ ratha̱ṁ na dhīra̱ḥ svapā̍ atakṣam |
yadīda̍gne̱ prati̱ tvaṁ de̍va̱ haryā̱ḥ sva̍rvatīra̱pa e̍nā jayema || 5.002.11
tu̱vi̱grīvo̍ vṛṣa̱bho vā̍vṛdhā̱no̍'śa̱trva1̱̍ryaḥ sama̍jāti̱ veda̍ḥ |
itī̱mama̱gnima̱mṛtā̍ avocanba̱rhiṣma̍te̱ mana̍ve̱ śarma̍ yaṁsaddha̱viṣma̍te̱ mana̍ve̱ śarma̍ yaṁsat || 5.002.12
tvama̍gne̱ varu̍ṇo̱ jāya̍se̱ yattvaṁ mi̱tro bha̍vasi̱ yatsami̍ddhaḥ |
tve viśve̍ sahasasputra de̱vāstvamindro̍ dā̱śuṣe̱ martyā̍ya || 5.003.01
tvama̍rya̱mā bha̍vasi̱ yatka̱nīnā̱ṁ nāma̍ svadhāva̱nguhya̍ṁ bibharṣi |
a̱ñjanti̍ mi̱traṁ sudhi̍ta̱ṁ na gobhi̱ryaddampa̍tī̱ sama̍nasā kṛ̱ṇoṣi̍ || 5.003.02
tava̍ śri̱ye ma̱ruto̍ marjayanta̱ rudra̱ yatte̱ jani̍ma̱ cāru̍ ci̱tram |
pa̱daṁ yadviṣṇo̍rupa̱maṁ ni̱dhāyi̱ tena̍ pāsi̱ guhya̱ṁ nāma̱ gonā̍m || 5.003.03
tava̍ śri̱yā su̱dṛśo̍ deva de̱vāḥ pu̱rū dadhā̍nā a̱mṛta̍ṁ sapanta |
hotā̍rama̱gniṁ manu̍ṣo̱ ni ṣe̍durdaśa̱syanta̍ u̱śija̱ḥ śaṁsa̍mā̱yoḥ || 5.003.04
na tvaddhotā̱ pūrvo̍ agne̱ yajī̍yā̱nna kāvyai̍ḥ pa̱ro a̍sti svadhāvaḥ |
vi̱śaśca̱ yasyā̱ ati̍thi̱rbhavā̍si̱ sa ya̱jñena̍ vanavaddeva̱ martā̍n || 5.003.05
va̱yama̍gne vanuyāma̱ tvotā̍ vasū̱yavo̍ ha̱viṣā̱ budhya̍mānāḥ |
va̱yaṁ sa̍ma̱rye vi̱dathe̱ṣvahnā̍ṁ va̱yaṁ rā̱yā sa̍hasasputra̱ martā̍n || 5.003.06
yo na̱ āgo̍ a̱bhyeno̱ bharā̱tyadhīda̱ghama̱ghaśa̍ṁse dadhāta |
ja̱hī ci̍kitvo a̱bhiśa̍stime̱tāmagne̱ yo no̍ ma̱rcaya̍ti dva̱yena̍ || 5.003.07
tvāma̱syā vyuṣi̍ deva̱ pūrve̍ dū̱taṁ kṛ̍ṇvā̱nā a̍yajanta ha̱vyaiḥ |
sa̱ṁsthe yada̍gna̱ īya̍se rayī̱ṇāṁ de̱vo martai̱rvasu̍bhiri̱dhyamā̍naḥ || 5.003.08
ava̍ spṛdhi pi̱tara̱ṁ yodhi̍ vi̱dvānpu̱tro yaste̍ sahasaḥ sūna ū̱he |
ka̱dā ci̍kitvo a̱bhi ca̍kṣase̱ no'gne̍ ka̱dā ṛ̍ta̱cidyā̍tayāse || 5.003.09
bhūri̱ nāma̱ vanda̍māno dadhāti pi̱tā va̍so̱ yadi̱ tajjo̱ṣayā̍se |
ku̱vidde̱vasya̱ saha̍sā cakā̱naḥ su̱mnama̱gnirva̍nate vāvṛdhā̱naḥ || 5.003.10
tvama̱ṅga ja̍ri̱tāra̍ṁ yaviṣṭha̱ viśvā̍nyagne duri̱tāti̍ parṣi |
ste̱nā a̍dṛśranri̱pavo̱ janā̱so'jñā̍taketā vṛji̱nā a̍bhūvan || 5.003.11
i̱me yāmā̍sastva̱driga̍bhūva̱nvasa̍ve vā̱ tadidāgo̍ avāci |
nāhā̱yama̱gnira̱bhiśa̍staye no̱ na rīṣa̍te vāvṛdhā̱naḥ parā̍ dāt || 5.003.12
tvāma̍gne̱ vasu̍pati̱ṁ vasū̍nāma̱bhi pra ma̍nde adhva̱reṣu̍ rājan |
tvayā̱ vāja̍ṁ vāja̱yanto̍ jayemā̱bhi ṣyā̍ma pṛtsu̱tīrmartyā̍nām || 5.004.01
ha̱vya̱vāḻa̱gnira̱jara̍ḥ pi̱tā no̍ vi̱bhurvi̱bhāvā̍ su̱dṛśī̍ko a̱sme |
su̱gā̱rha̱pa̱tyāḥ samiṣo̍ didīhyasma̱drya1̱̍ksaṁ mi̍mīhi̱ śravā̍ṁsi || 5.004.02
vi̱śāṁ ka̱viṁ vi̱śpati̱ṁ mānu̍ṣīṇā̱ṁ śuci̍ṁ pāva̱kaṁ ghṛ̱tapṛ̍ṣṭhama̱gnim |
ni hotā̍raṁ viśva̱vida̍ṁ dadhidhve̱ sa de̱veṣu̍ vanate̱ vāryā̍ṇi || 5.004.03
ju̱ṣasvā̍gna̱ iḻa̍yā sa̱joṣā̱ yata̍māno ra̱śmibhi̱ḥ sūrya̍sya |
ju̱ṣasva̍ naḥ sa̱midha̍ṁ jātaveda̱ ā ca̍ de̱vānha̍vi̱radyā̍ya vakṣi || 5.004.04
juṣṭo̱ damū̍nā̱ ati̍thirduro̱ṇa i̱maṁ no̍ ya̱jñamupa̍ yāhi vi̱dvān |
viśvā̍ agne abhi̱yujo̍ vi̱hatyā̍ śatrūya̱tāmā bha̍rā̱ bhoja̍nāni || 5.004.05
va̱dhena̱ dasyu̱ṁ pra hi cā̱taya̍sva̱ vaya̍ḥ kṛṇvā̱nasta̱nve̱3̱̍ svāyai̍ |
pipa̍rṣi̱ yatsa̍hasasputra de̱vāntso a̍gne pāhi nṛtama̱ vāje̍ a̱smān || 5.004.06
va̱yaṁ te̍ agna u̱kthairvi̍dhema va̱yaṁ ha̱vyaiḥ pā̍vaka bhadraśoce |
a̱sme ra̱yiṁ vi̱śvavā̍ra̱ṁ sami̍nvā̱sme viśvā̍ni̱ dravi̍ṇāni dhehi || 5.004.07
a̱smāka̍magne adhva̱raṁ ju̍ṣasva̱ saha̍saḥ sūno triṣadhastha ha̱vyam |
va̱yaṁ de̱veṣu̍ su̱kṛta̍ḥ syāma̱ śarma̍ṇā nastri̱varū̍thena pāhi || 5.004.08
viśvā̍ni no du̱rgahā̍ jātaveda̱ḥ sindhu̱ṁ na nā̱vā du̍ri̱tāti̍ parṣi |
agne̍ atri̱vannama̍sā gṛṇā̱no̱3̱̍'smāka̍ṁ bodhyavi̱tā ta̱nūnā̍m || 5.004.09
yastvā̍ hṛ̱dā kī̱riṇā̱ manya̍mā̱no'ma̍rtya̱ṁ martyo̱ joha̍vīmi |
jāta̍vedo̱ yaśo̍ a̱smāsu̍ dhehi pra̱jābhi̍ragne amṛta̱tvama̍śyām || 5.004.10
yasmai̱ tvaṁ su̱kṛte̍ jātaveda u lo̱kama̍gne kṛ̱ṇava̍ḥ syo̱nam |
a̱śvina̱ṁ sa pu̱triṇa̍ṁ vī̱rava̍nta̱ṁ goma̍ntaṁ ra̱yiṁ na̍śate sva̱sti || 5.004.11
susa̍middhāya śo̱ciṣe̍ ghṛ̱taṁ tī̱vraṁ ju̍hotana |
a̱gnaye̍ jā̱tave̍dase || 5.005.01
narā̱śaṁsa̍ḥ suṣūdatī̱maṁ ya̱jñamadā̍bhyaḥ |
ka̱virhi madhu̍hastyaḥ || 5.005.02
ī̱ḻi̱to a̍gna̱ ā va̱hendra̍ṁ ci̱trami̱ha pri̱yam |
su̱khai rathe̍bhirū̱taye̍ || 5.005.03
ūrṇa̍mradā̱ vi pra̍thasvā̱bhya1̱̍rkā a̍nūṣata |
bhavā̍ naḥ śubhra sā̱taye̍ || 5.005.04
devī̍rdvāro̱ vi śra̍yadhvaṁ suprāya̱ṇā na̍ ū̱taye̍ |
prapra̍ ya̱jñaṁ pṛ̍ṇītana || 5.005.05
su̱pratī̍ke vayo̱vṛdhā̍ ya̱hvī ṛ̱tasya̍ mā̱tarā̍ |
do̱ṣāmu̱ṣāsa̍mīmahe || 5.005.06
vāta̍sya̱ patma̍nnīḻi̱tā daivyā̱ hotā̍rā̱ manu̍ṣaḥ |
i̱maṁ no̍ ya̱jñamā ga̍tam || 5.005.07
iḻā̱ sara̍svatī ma̱hī ti̱sro de̱vīrma̍yo̱bhuva̍ḥ |
ba̱rhiḥ sī̍dantva̱sridha̍ḥ || 5.005.08
śi̱vastva̍ṣṭari̱hā ga̍hi vi̱bhuḥ poṣa̍ u̱ta tmanā̍ |
ya̱jñeya̍jñe na̱ uda̍va || 5.005.09
yatra̱ vettha̍ vanaspate de̱vānā̱ṁ guhyā̱ nāmā̍ni |
tatra̍ ha̱vyāni̍ gāmaya || 5.005.10
svāhā̱gnaye̱ varu̍ṇāya̱ svāhendrā̍ya ma̱rudbhya̍ḥ |
svāhā̍ de̱vebhyo̍ ha̱viḥ || 5.005.11
a̱gniṁ taṁ ma̍nye̱ yo vasu̱rasta̱ṁ yaṁ yanti̍ dhe̱nava̍ḥ |
asta̱marva̍nta ā̱śavo'sta̱ṁ nityā̍so vā̱jina̱ iṣa̍ṁ sto̱tṛbhya̱ ā bha̍ra || 5.006.01
so a̱gniryo vasu̍rgṛ̱ṇe saṁ yamā̱yanti̍ dhe̱nava̍ḥ |
samarva̍nto raghu̱druva̱ḥ saṁ su̍jā̱tāsa̍ḥ sū̱raya̱ iṣa̍ṁ sto̱tṛbhya̱ ā bha̍ra || 5.006.02
a̱gnirhi vā̱jina̍ṁ vi̱śe dadā̍ti vi̱śvaca̍rṣaṇiḥ |
a̱gnī rā̱ye svā̱bhuva̱ṁ sa prī̱to yā̍ti̱ vārya̱miṣa̍ṁ sto̱tṛbhya̱ ā bha̍ra || 5.006.03
ā te̍ agna idhīmahi dyu̱manta̍ṁ devā̱jara̍m |
yaddha̱ syā te̱ panī̍yasī sa̱middī̱daya̍ti̱ dyavīṣa̍ṁ sto̱tṛbhya̱ ā bha̍ra || 5.006.04
ā te̍ agna ṛ̱cā ha̱viḥ śukra̍sya śociṣaspate |
suśca̍ndra̱ dasma̱ viśpa̍te̱ havya̍vā̱ṭ tubhya̍ṁ hūyata̱ iṣa̍ṁ sto̱tṛbhya̱ ā bha̍ra || 5.006.05
pro tye a̱gnayo̱'gniṣu̱ viśva̍ṁ puṣyanti̱ vārya̍m |
te hi̍nvire̱ ta i̍nvire̱ ta i̍ṣaṇyantyānu̱ṣagiṣa̍ṁ sto̱tṛbhya̱ ā bha̍ra || 5.006.06
tava̱ tye a̍gne a̱rcayo̱ mahi̍ vrādhanta vā̱jina̍ḥ |
ye patva̍bhiḥ śa̱phānā̍ṁ vra̱jā bhu̱ranta̱ gonā̱miṣa̍ṁ sto̱tṛbhya̱ ā bha̍ra || 5.006.07
navā̍ no agna̱ ā bha̍ra sto̱tṛbhya̍ḥ sukṣi̱tīriṣa̍ḥ |
te syā̍ma̱ ya ā̍nṛ̱custvādū̍tāso̱ dame̍dama̱ iṣa̍ṁ sto̱tṛbhya̱ ā bha̍ra || 5.006.08
u̱bhe su̍ścandra sa̱rpiṣo̱ darvī̍ śrīṇīṣa ā̱sani̍ |
u̱to na̱ utpu̍pūryā u̱ktheṣu̍ śavasaspata̱ iṣa̍ṁ sto̱tṛbhya̱ ā bha̍ra || 5.006.09
e̱vā a̱gnima̍juryamurgī̱rbhirya̱jñebhi̍rānu̱ṣak |
dadha̍da̱sme su̱vīrya̍mu̱ta tyadā̱śvaśvya̱miṣa̍ṁ sto̱tṛbhya̱ ā bha̍ra || 5.006.10
sakhā̍ya̱ḥ saṁ va̍ḥ sa̱myañca̱miṣa̱ṁ stoma̍ṁ cā̱gnaye̍ |
varṣi̍ṣṭhāya kṣitī̱nāmū̱rjo naptre̱ saha̍svate || 5.007.01
kutrā̍ ci̱dyasya̱ samṛ̍tau ra̱ṇvā naro̍ nṛ̱ṣada̍ne |
arha̍ntaści̱dyami̍ndha̱te sa̍ṁja̱naya̍nti ja̱ntava̍ḥ || 5.007.02
saṁ yadi̱ṣo vanā̍mahe̱ saṁ ha̱vyā mānu̍ṣāṇām |
u̱ta dyu̱mnasya̱ śava̍sa ṛ̱tasya̍ ra̱śmimā da̍de || 5.007.03
sa smā̍ kṛṇoti ke̱tumā nakta̍ṁ ciddū̱ra ā sa̱te |
pā̱va̱ko yadvana̱spatī̱npra smā̍ mi̱nātya̱jara̍ḥ || 5.007.04
ava̍ sma̱ yasya̱ veṣa̍ṇe̱ sveda̍ṁ pa̱thiṣu̱ juhva̍ti |
a̱bhīmaha̱ svaje̍nya̱ṁ bhūmā̍ pṛ̱ṣṭheva̍ ruruhuḥ || 5.007.05
yaṁ martya̍ḥ puru̱spṛha̍ṁ vi̱dadviśva̍sya̱ dhāya̍se |
pra svāda̍naṁ pitū̱nāmasta̍tātiṁ cidā̱yave̍ || 5.007.06
sa hi ṣmā̱ dhanvākṣi̍ta̱ṁ dātā̱ na dātyā pa̱śuḥ |
hiri̍śmaśru̱ḥ śuci̍dannṛ̱bhurani̍bhṛṣṭataviṣiḥ || 5.007.07
śuci̍ḥ ṣma̱ yasmā̍ atri̱vatpra svadhi̍tīva̱ rīya̍te |
su̱ṣūra̍sūta mā̱tā krā̱ṇā yadā̍na̱śe bhaga̍m || 5.007.08
ā yaste̍ sarpirāsu̱te'gne̱ śamasti̱ dhāya̍se |
aiṣu̍ dyu̱mnamu̱ta śrava̱ ā ci̱ttaṁ martye̍ṣu dhāḥ || 5.007.09
iti̍ cinma̱nyuma̱dhrija̱stvādā̍ta̱mā pa̱śuṁ da̍de |
āda̍gne̱ apṛ̍ṇa̱to'tri̍ḥ sāsahyā̱ddasyū̍ni̱ṣaḥ sā̍sahyā̱nnṝn || 5.007.10
tvāma̍gna ṛtā̱yava̱ḥ samī̍dhire pra̱tnaṁ pra̱tnāsa̍ ū̱taye̍ sahaskṛta |
pu̱ru̱śca̱ndraṁ ya̍ja̱taṁ vi̱śvadhā̍yasa̱ṁ damū̍nasaṁ gṛ̱hapa̍ti̱ṁ vare̍ṇyam || 5.008.01
tvāma̍gne̱ ati̍thiṁ pū̱rvyaṁ viśa̍ḥ śo̱ciṣke̍śaṁ gṛ̱hapa̍ti̱ṁ ni ṣe̍dire |
bṛ̱hatke̍tuṁ puru̱rūpa̍ṁ dhana̱spṛta̍ṁ su̱śarmā̍ṇa̱ṁ svava̍saṁ jara̱dviṣa̍m || 5.008.02
tvāma̍gne̱ mānu̍ṣīrīḻate̱ viśo̍ hotrā̱vida̱ṁ vivi̍ciṁ ratna̱dhāta̍mam |
guhā̱ santa̍ṁ subhaga vi̱śvada̍rśataṁ tuviṣva̱ṇasa̍ṁ su̱yaja̍ṁ ghṛta̱śriya̍m || 5.008.03
tvāma̍gne dharṇa̱siṁ vi̱śvadhā̍ va̱yaṁ gī̱rbhirgṛ̱ṇanto̱ nama̱sopa̍ sedima |
sa no̍ juṣasva samidhā̱no a̍ṅgiro de̱vo marta̍sya ya̱śasā̍ sudī̱tibhi̍ḥ || 5.008.04
tvama̍gne puru̱rūpo̍ vi̱śevi̍śe̱ vayo̍ dadhāsi pra̱tnathā̍ puruṣṭuta |
pu̱rūṇyannā̱ saha̍sā̱ vi rā̍jasi̱ tviṣi̱ḥ sā te̍ titviṣā̱ṇasya̱ nādhṛṣe̍ || 5.008.05
tvāma̍gne samidhā̱naṁ ya̍viṣṭhya de̱vā dū̱taṁ ca̍krire havya̱vāha̍nam |
u̱ru̱jraya̍saṁ ghṛ̱tayo̍ni̱māhu̍taṁ tve̱ṣaṁ cakṣu̍rdadhire coda̱yanma̍ti || 5.008.06
tvāma̍gne pra̱diva̱ āhu̍taṁ ghṛ̱taiḥ su̍mnā̱yava̍ḥ suṣa̱midhā̱ samī̍dhire |
sa vā̍vṛdhā̱na oṣa̍dhībhirukṣi̱to̱3̱̍'bhi jrayā̍ṁsi̱ pārthi̍vā̱ vi ti̍ṣṭhase || 5.008.07
tvāma̍gne ha̱viṣma̍nto de̱vaṁ martā̍sa īḻate |
manye̍ tvā jā̱tave̍dasa̱ṁ sa ha̱vyā va̍kṣyānu̱ṣak || 5.009.01
a̱gnirhotā̱ dāsva̍ta̱ḥ kṣaya̍sya vṛ̱ktaba̍rhiṣaḥ |
saṁ ya̱jñāsa̱ścara̍nti̱ yaṁ saṁ vājā̍saḥ śrava̱syava̍ḥ || 5.009.02
u̱ta sma̱ yaṁ śiśu̍ṁ yathā̱ nava̱ṁ jani̍ṣṭā̱raṇī̍ |
dha̱rtāra̱ṁ mānu̍ṣīṇāṁ vi̱śāma̱gniṁ sva̍dhva̱ram || 5.009.03
u̱ta sma̍ durgṛbhīyase pu̱tro na hvā̱ryāṇā̍m |
pu̱rū yo dagdhāsi̱ vanāgne̍ pa̱śurna yava̍se || 5.009.04
adha̍ sma̱ yasyā̱rcaya̍ḥ sa̱myaksa̱ṁyanti̍ dhū̱mina̍ḥ |
yadī̱maha̍ tri̱to di̱vyupa̱ dhmāte̍va̱ dhama̍ti̱ śiśī̍te dhmā̱tarī̍ yathā || 5.009.05
tavā̱hama̍gna ū̱tibhi̍rmi̱trasya̍ ca̱ praśa̍stibhiḥ |
dve̱ṣo̱yuto̱ na du̍ri̱tā tu̱ryāma̱ martyā̍nām || 5.009.06
taṁ no̍ agne a̱bhī naro̍ ra̱yiṁ sa̍hasva̱ ā bha̍ra |
sa kṣe̍paya̱tsa po̍ṣaya̱dbhuva̱dvāja̍sya sā̱taya̍ u̱taidhi̍ pṛ̱tsu no̍ vṛ̱dhe || 5.009.07
agna̱ oji̍ṣṭha̱mā bha̍ra dyu̱mnama̱smabhya̍madhrigo |
pra no̍ rā̱yā parī̍ṇasā̱ ratsi̱ vājā̍ya̱ panthā̍m || 5.010.01
tvaṁ no̍ agne adbhuta̱ kratvā̱ dakṣa̍sya ma̱ṁhanā̍ |
tve a̍su̱rya1̱̍māru̍hatkrā̱ṇā mi̱tro na ya̱jñiya̍ḥ || 5.010.02
tvaṁ no̍ agna eṣā̱ṁ gaya̍ṁ pu̱ṣṭiṁ ca̍ vardhaya |
ye stome̍bhi̱ḥ pra sū̱rayo̱ naro̍ ma̱ghānyā̍na̱śuḥ || 5.010.03
ye a̍gne candra te̱ gira̍ḥ śu̱mbhantyaśva̍rādhasaḥ |
śuṣme̍bhiḥ śu̱ṣmiṇo̱ naro̍ di̱vaści̱dyeṣā̍ṁ bṛ̱hatsu̍kī̱rtirbodha̍ti̱ tmanā̍ || 5.010.04
tava̱ tye a̍gne a̱rcayo̱ bhrāja̍nto yanti dhṛṣṇu̱yā |
pari̍jmāno̱ na vi̱dyuta̍ḥ svā̱no ratho̱ na vā̍ja̱yuḥ || 5.010.05
nū no̍ agna ū̱taye̍ sa̱bādha̍saśca rā̱taye̍ |
a̱smākā̍saśca sū̱rayo̱ viśvā̱ āśā̍starī̱ṣaṇi̍ || 5.010.06
tvaṁ no̍ agne aṅgiraḥ stu̱taḥ stavā̍na̱ ā bha̍ra |
hota̍rvibhvā̱saha̍ṁ ra̱yiṁ sto̱tṛbhya̱ḥ stava̍se ca na u̱taidhi̍ pṛ̱tsu no̍ vṛ̱dhe || 5.010.07
jana̍sya go̱pā a̍janiṣṭa̱ jāgṛ̍vira̱gniḥ su̱dakṣa̍ḥ suvi̱tāya̱ navya̍se |
ghṛ̱tapra̍tīko bṛha̱tā di̍vi̱spṛśā̍ dyu̱madvi bhā̍ti bhara̱tebhya̱ḥ śuci̍ḥ || 5.011.01
ya̱jñasya̍ ke̱tuṁ pra̍tha̱maṁ pu̱rohi̍tama̱gniṁ nara̍striṣadha̱sthe samī̍dhire |
indre̍ṇa de̱vaiḥ sa̱ratha̱ṁ sa ba̱rhiṣi̱ sīda̱nni hotā̍ ya̱jathā̍ya su̱kratu̍ḥ || 5.011.02
asa̍mmṛṣṭo jāyase mā̱troḥ śuci̍rma̱ndraḥ ka̱viruda̍tiṣṭho vi̱vasva̍taḥ |
ghṛ̱tena̍ tvāvardhayannagna āhuta dhū̱maste̍ ke̱tura̍bhavaddi̱vi śri̱taḥ || 5.011.03
a̱gnirno̍ ya̱jñamupa̍ vetu sādhu̱yāgniṁ naro̱ vi bha̍rante gṛ̱hegṛ̍he |
a̱gnirdū̱to a̍bhavaddhavya̱vāha̍no̱'gniṁ vṛ̍ṇā̱nā vṛ̍ṇate ka̱vikra̍tum || 5.011.04
tubhye̱dama̍gne̱ madhu̍mattama̱ṁ vaca̱stubhya̍ṁ manī̱ṣā i̱yama̍stu̱ śaṁ hṛ̱de |
tvāṁ gira̱ḥ sindhu̍mivā̱vanī̍rma̱hīrā pṛ̍ṇanti̱ śava̍sā va̱rdhaya̍nti ca || 5.011.05
tvāma̍gne̱ aṅgi̍raso̱ guhā̍ hi̱tamanva̍vindañchiśriyā̱ṇaṁ vane̍vane |
sa jā̍yase ma̱thyamā̍na̱ḥ saho̍ ma̱hattvāmā̍hu̱ḥ saha̍saspu̱trama̍ṅgiraḥ || 5.011.06
prāgnaye̍ bṛha̱te ya̱jñiyā̍ya ṛ̱tasya̱ vṛṣṇe̱ asu̍rāya̱ manma̍ |
ghṛ̱taṁ na ya̱jña ā̱sye̱3̱̍ supū̍ta̱ṁ gira̍ṁ bhare vṛṣa̱bhāya̍ pratī̱cīm || 5.012.01
ṛ̱taṁ ci̍kitva ṛ̱tamicci̍kiddhyṛ̱tasya̱ dhārā̱ anu̍ tṛndhi pū̱rvīḥ |
nāhaṁ yā̱tuṁ saha̍sā̱ na dva̱yena̍ ṛ̱taṁ sa̍pāmyaru̱ṣasya̱ vṛṣṇa̍ḥ || 5.012.02
kayā̍ no agna ṛ̱taya̍nnṛ̱tena̱ bhuvo̱ nave̍dā u̱catha̍sya̱ navya̍ḥ |
vedā̍ me de̱va ṛ̍tu̱pā ṛ̍tū̱nāṁ nāhaṁ pati̍ṁ sani̱tura̱sya rā̱yaḥ || 5.012.03
ke te̍ agne ri̱pave̱ bandha̍nāsa̱ḥ ke pā̱yava̍ḥ saniṣanta dyu̱manta̍ḥ |
ke dhā̱sima̍gne̱ anṛ̍tasya pānti̱ ka āsa̍to̱ vaca̍saḥ santi go̱pāḥ || 5.012.04
sakhā̍yaste̱ viṣu̍ṇā agna e̱te śi̱vāsa̱ḥ santo̱ aśi̍vā abhūvan |
adhū̍rṣata sva̱yame̱te vaco̍bhirṛjūya̱te vṛ̍ji̱nāni̍ bru̱vanta̍ḥ || 5.012.05
yaste̍ agne̱ nama̍sā ya̱jñamīṭṭa̍ ṛ̱taṁ sa pā̍tyaru̱ṣasya̱ vṛṣṇa̍ḥ |
tasya̱ kṣaya̍ḥ pṛ̱thurā sā̱dhure̍tu pra̱sarsrā̍ṇasya̱ nahu̍ṣasya̱ śeṣa̍ḥ || 5.012.06
arca̍ntastvā havāma̱he'rca̍nta̱ḥ sami̍dhīmahi |
agne̱ arca̍nta ū̱taye̍ || 5.013.01
a̱gneḥ stoma̍ṁ manāmahe si̱dhrama̱dya di̍vi̱spṛśa̍ḥ |
de̱vasya̍ draviṇa̱syava̍ḥ || 5.013.02
a̱gnirju̍ṣata no̱ giro̱ hotā̱ yo mānu̍ṣe̱ṣvā |
sa ya̍kṣa̱ddaivya̱ṁ jana̍m || 5.013.03
tvama̍gne sa̱prathā̍ asi̱ juṣṭo̱ hotā̱ vare̍ṇyaḥ |
tvayā̍ ya̱jñaṁ vi ta̍nvate || 5.013.04
tvāma̍gne vāja̱sāta̍ma̱ṁ viprā̍ vardhanti̱ suṣṭu̍tam |
sa no̍ rāsva su̱vīrya̍m || 5.013.05
agne̍ ne̱mira̱rā i̍va de̱vāstvaṁ pa̍ri̱bhūra̍si |
ā rādha̍ści̱tramṛ̍ñjase || 5.013.06
a̱gniṁ stome̍na bodhaya samidhā̱no ama̍rtyam |
ha̱vyā de̱veṣu̍ no dadhat || 5.014.01
tama̍dhva̱reṣvī̍ḻate de̱vaṁ martā̱ ama̍rtyam |
yaji̍ṣṭha̱ṁ mānu̍ṣe̱ jane̍ || 5.014.02
taṁ hi śaśva̍nta̱ īḻa̍te sru̱cā de̱vaṁ ghṛ̍ta̱ścutā̍ |
a̱gniṁ ha̱vyāya̱ voḻha̍ve || 5.014.03
a̱gnirjā̱to a̍rocata̱ ghnandasyū̱ñjyoti̍ṣā̱ tama̍ḥ |
avi̍nda̱dgā a̱paḥ sva̍ḥ || 5.014.04
a̱gnimī̱ḻenya̍ṁ ka̱viṁ ghṛ̱tapṛ̍ṣṭhaṁ saparyata |
vetu̍ me śṛ̱ṇava̱ddhava̍m || 5.014.05
a̱gniṁ ghṛ̱tena̍ vāvṛdhu̱ḥ stome̍bhirvi̱śvaca̍rṣaṇim |
svā̱dhībhi̍rvaca̱syubhi̍ḥ || 5.014.06
pra ve̱dhase̍ ka̱vaye̱ vedyā̍ya̱ gira̍ṁ bhare ya̱śase̍ pū̱rvyāya̍ |
ghṛ̱tapra̍satto̱ asu̍raḥ su̱śevo̍ rā̱yo dha̱rtā dha̱ruṇo̱ vasvo̍ a̱gniḥ || 5.015.01
ṛ̱tena̍ ṛ̱taṁ dha̱ruṇa̍ṁ dhārayanta ya̱jñasya̍ śā̱ke pa̍ra̱me vyo̍man |
di̱vo dharma̍ndha̱ruṇe̍ se̱duṣo̱ nṝñjā̱tairajā̍tā a̱bhi ye na̍na̱kṣuḥ || 5.015.02
a̱ṅho̱yuva̍sta̱nva̍stanvate̱ vi vayo̍ ma̱haddu̱ṣṭara̍ṁ pū̱rvyāya̍ |
sa sa̱ṁvato̱ nava̍jātastuturyātsi̱ṅhaṁ na kru̱ddhama̱bhita̱ḥ pari̍ ṣṭhuḥ || 5.015.03
mā̱teva̱ yadbhara̍se paprathā̱no jana̍ṁjana̱ṁ dhāya̍se̱ cakṣa̍se ca |
vayo̍vayo jarase̱ yaddadhā̍na̱ḥ pari̱ tmanā̱ viṣu̍rūpo jigāsi || 5.015.04
vājo̱ nu te̱ śava̍saspā̱tvanta̍mu̱ruṁ dogha̍ṁ dha̱ruṇa̍ṁ deva rā̱yaḥ |
pa̱daṁ na tā̱yurguhā̱ dadhā̍no ma̱ho rā̱ye ci̱taya̱nnatri̍maspaḥ || 5.015.05
bṛ̱hadvayo̱ hi bhā̱nave'rcā̍ de̱vāyā̱gnaye̍ |
yaṁ mi̱traṁ na praśa̍stibhi̱rmartā̍so dadhi̱re pu̱raḥ || 5.016.01
sa hi dyubhi̱rjanā̍nā̱ṁ hotā̱ dakṣa̍sya bā̱hvoḥ |
vi ha̱vyama̱gnirā̍nu̱ṣagbhago̱ na vāra̍mṛṇvati || 5.016.02
a̱sya stome̍ ma̱ghona̍ḥ sa̱khye vṛ̱ddhaśo̍ciṣaḥ |
viśvā̱ yasmi̍ntuvi̱ṣvaṇi̱ sama̱rye śuṣma̍māda̱dhuḥ || 5.016.03
adhā̱ hya̍gna eṣāṁ su̱vīrya̍sya ma̱ṁhanā̍ |
tamidya̱hvaṁ na roda̍sī̱ pari̱ śravo̍ babhūvatuḥ || 5.016.04
nū na̱ ehi̱ vārya̱magne̍ gṛṇā̱na ā bha̍ra |
ye va̱yaṁ ye ca̍ sū̱raya̍ḥ sva̱sti dhāma̍he̱ saco̱taidhi̍ pṛ̱tsu no̍ vṛ̱dhe || 5.016.05
ā ya̱jñairde̍va̱ martya̍ i̱tthā tavyā̍ṁsamū̱taye̍ |
a̱gniṁ kṛ̱te sva̍dhva̱re pū̱rurī̍ḻī̱tāva̍se || 5.017.01
asya̱ hi svaya̍śastara ā̱sā vi̍dharma̱nmanya̍se |
taṁ nāka̍ṁ ci̱traśo̍ciṣaṁ ma̱ndraṁ pa̱ro ma̍nī̱ṣayā̍ || 5.017.02
a̱sya vāsā u̍ a̱rciṣā̱ ya āyu̍kta tu̱jā gi̱rā |
di̱vo na yasya̱ reta̍sā bṛ̱hacchoca̍ntya̱rcaya̍ḥ || 5.017.03
a̱sya kratvā̱ vice̍taso da̱smasya̱ vasu̱ ratha̱ ā |
adhā̱ viśvā̍su̱ havyo̱'gnirvi̱kṣu pra śa̍syate || 5.017.04
nū na̱ iddhi vārya̍mā̱sā sa̍canta sū̱raya̍ḥ |
ūrjo̍ napāda̱bhiṣṭa̍ye pā̱hi śa̱gdhi sva̱staya̍ u̱taidhi̍ pṛ̱tsu no̍ vṛ̱dhe || 5.017.05
prā̱tara̱gniḥ pu̍rupri̱yo vi̱śaḥ sta̍ve̱tāti̍thiḥ |
viśvā̍ni̱ yo ama̍rtyo ha̱vyā marte̍ṣu̱ raṇya̍ti || 5.018.01
dvi̱tāya̍ mṛ̱ktavā̍hase̱ svasya̱ dakṣa̍sya ma̱ṁhanā̍ |
indu̱ṁ sa dha̍tta ānu̱ṣaksto̱tā ci̍tte amartya || 5.018.02
taṁ vo̍ dī̱rghāyu̍śociṣaṁ gi̱rā hu̍ve ma̱ghonā̍m |
ari̍ṣṭo̱ yeṣā̱ṁ ratho̱ vya̍śvadāva̱nnīya̍te || 5.018.03
ci̱trā vā̱ yeṣu̱ dīdhi̍tirā̱sannu̱kthā pānti̱ ye |
stī̱rṇaṁ ba̱rhiḥ sva̍rṇare̱ śravā̍ṁsi dadhire̱ pari̍ || 5.018.04
ye me̍ pañcā̱śata̍ṁ da̱duraśvā̍nāṁ sa̱dhastu̍ti |
dyu̱mada̍gne̱ mahi̱ śravo̍ bṛ̱hatkṛ̍dhi ma̱ghonā̍ṁ nṛ̱vada̍mṛta nṛ̱ṇām || 5.018.05
a̱bhya̍va̱sthāḥ pra jā̍yante̱ pra va̱vrerva̱vriści̍keta |
u̱pasthe̍ mā̱turvi ca̍ṣṭe || 5.019.01
ju̱hu̱re vi ci̱taya̱nto'ni̍miṣaṁ nṛ̱mṇaṁ pā̍nti |
ā dṛ̱ḻhāṁ pura̍ṁ viviśuḥ || 5.019.02
ā śvai̍tre̱yasya̍ ja̱ntavo̍ dyu̱madva̍rdhanta kṛ̱ṣṭaya̍ḥ |
ni̱ṣkagrī̍vo bṛ̱hadu̍ktha e̱nā madhvā̱ na vā̍ja̱yuḥ || 5.019.03
pri̱yaṁ du̱gdhaṁ na kāmya̱majā̍mi jā̱myoḥ sacā̍ |
gha̱rmo na vāja̍jaṭha̱ro'da̍bdha̱ḥ śaśva̍to̱ dabha̍ḥ || 5.019.04
krīḻa̍nno raśma̱ ā bhu̍va̱ḥ saṁ bhasma̍nā vā̱yunā̱ vevi̍dānaḥ |
tā a̍sya sandhṛ̱ṣajo̱ na ti̱gmāḥ susa̍ṁśitā va̱kṣyo̍ vakṣaṇe̱sthāḥ || 5.019.05
yama̍gne vājasātama̱ tvaṁ ci̱nmanya̍se ra̱yim |
taṁ no̍ gī̱rbhiḥ śra̱vāyya̍ṁ deva̱trā pa̍nayā̱ yuja̍m || 5.020.01
ye a̍gne̱ neraya̍nti te vṛ̱ddhā u̱grasya̱ śava̍saḥ |
apa̱ dveṣo̱ apa̱ hvaro̱'nyavra̍tasya saścire || 5.020.02
hotā̍raṁ tvā vṛṇīma̱he'gne̱ dakṣa̍sya̱ sādha̍nam |
ya̱jñeṣu̍ pū̱rvyaṁ gi̱rā praya̍svanto havāmahe || 5.020.03
i̱tthā yathā̍ ta ū̱taye̱ saha̍sāvandi̱vedi̍ve |
rā̱ya ṛ̱tāya̍ sukrato̱ gobhi̍ḥ ṣyāma sadha̱mādo̍ vī̱raiḥ syā̍ma sadha̱māda̍ḥ || 5.020.04
ma̱nu̱ṣvattvā̱ ni dhī̍mahi manu̱ṣvatsami̍dhīmahi |
agne̍ manu̱ṣvada̍ṅgiro de̱vānde̍vaya̱te ya̍ja || 5.021.01
tvaṁ hi mānu̍ṣe̱ jane'gne̱ suprī̍ta i̱dhyase̍ |
sruca̍stvā yantyānu̱ṣaksujā̍ta̱ sarpi̍rāsute || 5.021.02
tvāṁ viśve̍ sa̱joṣa̍so de̱vāso̍ dū̱tama̍krata |
sa̱pa̱ryanta̍stvā kave ya̱jñeṣu̍ de̱vamī̍ḻate || 5.021.03
de̱vaṁ vo̍ devaya̱jyayā̱gnimī̍ḻīta̱ martya̍ḥ |
sami̍ddhaḥ śukra dīdihyṛ̱tasya̱ yoni̱māsa̍daḥ sa̱sasya̱ yoni̱māsa̍daḥ || 5.021.04
pra vi̍śvasāmannatri̱vadarcā̍ pāva̱kaśo̍ciṣe |
yo a̍dhva̱reṣvīḍyo̱ hotā̍ ma̱ndrata̍mo vi̱śi || 5.022.01
nya1̱̍gniṁ jā̱tave̍dasa̱ṁ dadhā̍tā de̱vamṛ̱tvija̍m |
pra ya̱jña e̍tvānu̱ṣaga̱dyā de̱vavya̍castamaḥ || 5.022.02
ci̱ki̱tvinma̍nasaṁ tvā de̱vaṁ martā̍sa ū̱taye̍ |
vare̍ṇyasya̱ te'va̍sa iyā̱nāso̍ amanmahi || 5.022.03
agne̍ ciki̱ddhya1̱̍sya na̍ i̱daṁ vaca̍ḥ sahasya |
taṁ tvā̍ suśipra dampate̱ stomai̍rvardha̱ntyatra̍yo gī̱rbhiḥ śu̍mbha̱ntyatra̍yaḥ || 5.022.04
agne̱ saha̍nta̱mā bha̍ra dyu̱mnasya̍ prā̱sahā̍ ra̱yim |
viśvā̱ yaśca̍rṣa̱ṇīra̱bhyā̱3̱̍sā vāje̍ṣu sā̱saha̍t || 5.023.01
tama̍gne pṛtanā̱ṣaha̍ṁ ra̱yiṁ sa̍hasva̱ ā bha̍ra |
tvaṁ hi sa̱tyo adbhu̍to dā̱tā vāja̍sya̱ goma̍taḥ || 5.023.02
viśve̱ hi tvā̍ sa̱joṣa̍so̱ janā̍so vṛ̱ktaba̍rhiṣaḥ |
hotā̍ra̱ṁ sadma̍su pri̱yaṁ vyanti̱ vāryā̍ pu̱ru || 5.023.03
sa hi ṣmā̍ vi̱śvaca̍rṣaṇira̱bhimā̍ti̱ saho̍ da̱dhe |
agna̍ e̱ṣu kṣaye̱ṣvā re̱vanna̍ḥ śukra dīdihi dyu̱matpā̍vaka dīdihi || 5.023.04
agne̱ tvaṁ no̱ anta̍ma u̱ta trā̱tā śi̱vo bha̍vā varū̱thya̍ḥ || 5.024.01
vasu̍ra̱gnirvasu̍śravā̱ acchā̍ nakṣi dyu̱matta̍maṁ ra̱yiṁ dā̍ḥ || 5.024.02
sa no̍ bodhi śru̱dhī hava̍muru̱ṣyā ṇo̍ aghāya̱taḥ sa̍masmāt || 5.024.03
taṁ tvā̍ śociṣṭha dīdivaḥ su̱mnāya̍ nū̱namī̍mahe̱ sakhi̍bhyaḥ || 5.024.04
acchā̍ vo a̱gnimava̍se de̱vaṁ gā̍si̱ sa no̱ vasu̍ḥ |
rāsa̍tpu̱tra ṛ̍ṣū̱ṇāmṛ̱tāvā̍ parṣati dvi̱ṣaḥ || 5.025.01
sa hi sa̱tyo yaṁ pūrve̍ cidde̱vāsa̍ści̱dyamī̍dhi̱re |
hotā̍raṁ ma̱ndraji̍hva̱mitsu̍dī̱tibhi̍rvi̱bhāva̍sum || 5.025.02
sa no̍ dhī̱tī vari̍ṣṭhayā̱ śreṣṭha̍yā ca suma̱tyā |
agne̍ rā̱yo di̍dīhi naḥ suvṛ̱ktibhi̍rvareṇya || 5.025.03
a̱gnirde̱veṣu̍ rājatya̱gnirmarte̍ṣvāvi̱śan |
a̱gnirno̍ havya̱vāha̍no̱'gniṁ dhī̱bhiḥ sa̍paryata || 5.025.04
a̱gnistu̱viśra̍vastamaṁ tu̱vibra̍hmāṇamutta̱mam |
a̱tūrta̍ṁ śrāva̱yatpa̍tiṁ pu̱traṁ da̍dāti dā̱śuṣe̍ || 5.025.05
a̱gnirda̍dāti̱ satpa̍tiṁ sā̱sāha̱ yo yu̱dhā nṛbhi̍ḥ |
a̱gniratya̍ṁ raghu̱ṣyada̱ṁ jetā̍ra̱mapa̍rājitam || 5.025.06
yadvāhi̍ṣṭha̱ṁ tada̱gnaye̍ bṛ̱hada̍rca vibhāvaso |
mahi̍ṣīva̱ tvadra̱yistvadvājā̱ udī̍rate || 5.025.07
tava̍ dyu̱manto̍ a̱rcayo̱ grāve̍vocyate bṛ̱hat |
u̱to te̍ tanya̱turya̍thā svā̱no a̍rta̱ tmanā̍ di̱vaḥ || 5.025.08
e̱vā a̱gniṁ va̍sū̱yava̍ḥ sahasā̱naṁ va̍vandima |
sa no̱ viśvā̱ ati̱ dviṣa̱ḥ parṣa̍nnā̱veva̍ su̱kratu̍ḥ || 5.025.09
agne̍ pāvaka ro̱ciṣā̍ ma̱ndrayā̍ deva ji̱hvayā̍ |
ā de̱vānva̍kṣi̱ yakṣi̍ ca || 5.026.01
taṁ tvā̍ ghṛtasnavīmahe̱ citra̍bhāno sva̱rdṛśa̍m |
de̱vā ā vī̱taye̍ vaha || 5.026.02
vī̱tiho̍traṁ tvā kave dyu̱manta̱ṁ sami̍dhīmahi |
agne̍ bṛ̱hanta̍madhva̱re || 5.026.03
agne̱ viśve̍bhi̱rā ga̍hi de̱vebhi̍rha̱vyadā̍taye |
hotā̍raṁ tvā vṛṇīmahe || 5.026.04
yaja̍mānāya sunva̱ta āgne̍ su̱vīrya̍ṁ vaha |
de̱vairā sa̍tsi ba̱rhiṣi̍ || 5.026.05
sa̱mi̱dhā̱naḥ sa̍hasraji̱dagne̱ dharmā̍ṇi puṣyasi |
de̱vānā̍ṁ dū̱ta u̱kthya̍ḥ || 5.026.06
nya1̱̍gniṁ jā̱tave̍dasaṁ hotra̱vāha̱ṁ yavi̍ṣṭhyam |
dadhā̍tā de̱vamṛ̱tvija̍m || 5.026.07
pra ya̱jña e̍tvānu̱ṣaga̱dyā de̱vavya̍castamaḥ |
stṛ̱ṇī̱ta ba̱rhirā̱sade̍ || 5.026.08
edaṁ ma̱ruto̍ a̱śvinā̍ mi̱traḥ sī̍dantu̱ varu̍ṇaḥ |
de̱vāsa̱ḥ sarva̍yā vi̱śā || 5.026.09
ana̍svantā̱ satpa̍tirmāmahe me̱ gāvā̱ ceti̍ṣṭho̱ asu̍ro ma̱ghona̍ḥ |
trai̱vṛ̱ṣṇo a̍gne da̱śabhi̍ḥ sa̱hasrai̱rvaiśvā̍nara̱ trya̍ruṇaściketa || 5.027.01
yo me̍ śa̱tā ca̍ viṁśa̱tiṁ ca̱ gonā̱ṁ harī̍ ca yu̱ktā su̱dhurā̱ dadā̍ti |
vaiśvā̍nara̱ suṣṭu̍to vāvṛdhā̱no'gne̱ yaccha̱ trya̍ruṇāya̱ śarma̍ || 5.027.02
e̱vā te̍ agne suma̱tiṁ ca̍kā̱no navi̍ṣṭhāya nava̱maṁ tra̱sada̍syuḥ |
yo me̱ gira̍stuvijā̱tasya̍ pū̱rvīryu̱ktenā̱bhi trya̍ruṇo gṛ̱ṇāti̍ || 5.027.03
yo ma̱ iti̍ pra̱voca̱tyaśva̍medhāya sū̱raye̍ |
dada̍dṛ̱cā sa̱niṁ ya̱te dada̍nme̱dhāmṛ̍tāya̱te || 5.027.04
yasya̍ mā paru̱ṣāḥ śa̱tamu̍ddha̱rṣaya̍ntyu̱kṣaṇa̍ḥ |
aśva̍medhasya̱ dānā̱ḥ somā̍ iva̱ tryā̍śiraḥ || 5.027.05
indrā̍gnī śata̱dāvnyaśva̍medhe su̱vīrya̍m |
kṣa̱traṁ dhā̍rayataṁ bṛ̱haddi̱vi sūrya̍mivā̱jara̍m || 5.027.06
sami̍ddho a̱gnirdi̱vi śo̱cira̍śretpra̱tyaṅṅu̱ṣasa̍murvi̱yā vi bhā̍ti |
eti̱ prācī̍ vi̱śvavā̍rā̱ namo̍bhirde̱vā īḻā̍nā ha̱viṣā̍ ghṛ̱tācī̍ || 5.028.01
sa̱mi̱dhyamā̍no a̱mṛta̍sya rājasi ha̱viṣkṛ̱ṇvanta̍ṁ sacase sva̱staye̍ |
viśva̱ṁ sa dha̍tte̱ dravi̍ṇa̱ṁ yaminva̍syāti̱thyama̍gne̱ ni ca̍ dhatta̱ itpu̱raḥ || 5.028.02
agne̱ śardha̍ maha̱te saubha̍gāya̱ tava̍ dyu̱mnānyu̍tta̱māni̍ santu |
saṁ jā̍spa̱tyaṁ su̱yama̱mā kṛ̍ṇuṣva śatrūya̱tāma̱bhi ti̍ṣṭhā̱ mahā̍ṁsi || 5.028.03
sami̍ddhasya̱ prama̍ha̱so'gne̱ vande̱ tava̱ śriya̍m |
vṛ̱ṣa̱bho dyu̱mnavā̍ asi̱ sama̍dhva̱reṣvi̍dhyase || 5.028.04
sami̍ddho agna āhuta de̱vānya̍kṣi svadhvara |
tvaṁ hi ha̍vya̱vāḻasi̍ || 5.028.05
ā ju̍hotā duva̱syatā̱gniṁ pra̍ya̱tya̍dhva̱re |
vṛ̱ṇī̱dhvaṁ ha̍vya̱vāha̍nam || 5.028.06
trya̍rya̱mā manu̍ṣo de̱vatā̍tā̱ trī ro̍ca̱nā di̱vyā dhā̍rayanta |
arca̍nti tvā ma̱ruta̍ḥ pū̱tada̍kṣā̱stvame̍ṣā̱mṛṣi̍rindrāsi̱ dhīra̍ḥ || 5.029.01
anu̱ yadī̍ṁ ma̱ruto̍ mandasā̱namārca̱nnindra̍ṁ papi̱vāṁsa̍ṁ su̱tasya̍ |
āda̍tta̱ vajra̍ma̱bhi yadahi̱ṁ hanna̱po ya̱hvīra̍sṛja̱tsarta̱vā u̍ || 5.029.02
u̱ta bra̍hmāṇo maruto me a̱syendra̱ḥ soma̍sya̱ suṣu̍tasya peyāḥ |
taddhi ha̱vyaṁ manu̍ṣe̱ gā avi̍nda̱daha̱nnahi̍ṁ papi̱vā indro̍ asya || 5.029.03
ādroda̍sī vita̱raṁ vi ṣka̍bhāyatsaṁvivyā̱naści̍dbhi̱yase̍ mṛ̱gaṁ ka̍ḥ |
jiga̍rti̱mindro̍ apa̱jargu̍rāṇa̱ḥ prati̍ śva̱santa̱mava̍ dāna̱vaṁ ha̍n || 5.029.04
adha̱ kratvā̍ maghava̱ntubhya̍ṁ de̱vā anu̱ viśve̍ adaduḥ soma̱peya̍m |
yatsūrya̍sya ha̱rita̱ḥ pata̍ntīḥ pu̱raḥ sa̱tīrupa̍rā̱ eta̍śe̱ kaḥ || 5.029.05
nava̱ yada̍sya nava̱tiṁ ca̍ bho̱gānsā̱kaṁ vajre̍ṇa ma̱ghavā̍ vivṛ̱ścat |
arca̱ntīndra̍ṁ ma̱ruta̍ḥ sa̱dhasthe̱ traiṣṭu̍bhena̱ vaca̍sā bādhata̱ dyām || 5.029.06
sakhā̱ sakhye̍ apaca̱ttūya̍ma̱gnira̱sya kratvā̍ mahi̱ṣā trī śa̱tāni̍ |
trī sā̱kamindro̱ manu̍ṣa̱ḥ sarā̍ṁsi su̱taṁ pi̍badvṛtra̱hatyā̍ya̱ soma̍m || 5.029.07
trī yaccha̱tā ma̍hi̱ṣāṇā̱magho̱ māstrī sarā̍ṁsi ma̱ghavā̍ so̱myāpā̍ḥ |
kā̱raṁ na viśve̍ ahvanta de̱vā bhara̱mindrā̍ya̱ yadahi̍ṁ ja̱ghāna̍ || 5.029.08
u̱śanā̱ yatsa̍ha̱syai̱3̱̍rayā̍taṁ gṛ̱hami̍ndra jūjuvā̱nebhi̱raśvai̍ḥ |
va̱nvā̱no atra̍ sa̱ratha̍ṁ yayātha̱ kutse̍na de̱vairava̍norha̱ śuṣṇa̍m || 5.029.09
prānyacca̱krama̍vṛha̱ḥ sūrya̍sya̱ kutsā̍yā̱nyadvari̍vo̱ yāta̍ve'kaḥ |
a̱nāso̱ dasyū̍ramṛṇo va̱dhena̱ ni du̍ryo̱ṇa ā̍vṛṇaṅmṛ̱dhravā̍caḥ || 5.029.10
stomā̍sastvā̱ gauri̍vīteravardha̱nnara̍ndhayo vaidathi̱nāya̱ pipru̍m |
ā tvāmṛ̱jiśvā̍ sa̱khyāya̍ cakre̱ paca̍npa̱ktīrapi̍ba̱ḥ soma̍masya || 5.029.11
nava̍gvāsaḥ su̱taso̍māsa̱ indra̱ṁ daśa̍gvāso a̱bhya̍rcantya̱rkaiḥ |
gavya̍ṁ cidū̱rvama̍pi̱dhāna̍vanta̱ṁ taṁ ci̱nnara̍ḥ śaśamā̱nā apa̍ vran || 5.029.12
ka̱tho nu te̱ pari̍ carāṇi vi̱dvānvī̱ryā̍ maghava̱nyā ca̱kartha̍ |
yā co̱ nu navyā̍ kṛ̱ṇava̍ḥ śaviṣṭha̱ predu̱ tā te̍ vi̱dathe̍ṣu bravāma || 5.029.13
e̱tā viśvā̍ cakṛ̱vā i̍ndra̱ bhūryapa̍rīto ja̱nuṣā̍ vī̱rye̍ṇa |
yā ci̱nnu va̍jrinkṛ̱ṇavo̍ dadhṛ̱ṣvānna te̍ va̱rtā tavi̍ṣyā asti̱ tasyā̍ḥ || 5.029.14
indra̱ brahma̍ kri̱yamā̍ṇā juṣasva̱ yā te̍ śaviṣṭha̱ navyā̱ aka̍rma |
vastre̍va bha̱drā sukṛ̍tā vasū̱yū ratha̱ṁ na dhīra̱ḥ svapā̍ atakṣam || 5.029.15
kva1̱̍ sya vī̱raḥ ko a̍paśya̱dindra̍ṁ su̱khara̍tha̱mīya̍māna̱ṁ hari̍bhyām |
yo rā̱yā va̱jrī su̱taso̍mami̱cchantadoko̱ gantā̍ puruhū̱ta ū̱tī || 5.030.01
avā̍cacakṣaṁ pa̱dama̍sya sa̱svaru̱graṁ ni̍dhā̱turanvā̍yami̱cchan |
apṛ̍cchama̱nyā u̱ta te ma̍ āhu̱rindra̱ṁ naro̍ bubudhā̱nā a̍śema || 5.030.02
pra nu va̱yaṁ su̱te yā te̍ kṛ̱tānīndra̱ bravā̍ma̱ yāni̍ no̱ jujo̍ṣaḥ |
veda̱davi̍dvāñchṛ̱ṇava̍cca vi̱dvānvaha̍te̱'yaṁ ma̱ghavā̱ sarva̍senaḥ || 5.030.03
sthi̱raṁ mana̍ścakṛṣe jā̱ta i̍ndra̱ veṣīdeko̍ yu̱dhaye̱ bhūya̍saścit |
aśmā̍naṁ ci̱cchava̍sā didyuto̱ vi vi̱do gavā̍mū̱rvamu̱sriyā̍ṇām || 5.030.04
pa̱ro yattvaṁ pa̍ra̱ma ā̱jani̍ṣṭhāḥ parā̱vati̱ śrutya̱ṁ nāma̱ bibhra̍t |
ata̍ści̱dindrā̍dabhayanta de̱vā viśvā̍ a̱po a̍jayaddā̱sapa̍tnīḥ || 5.030.05
tubhyede̱te ma̱ruta̍ḥ su̱śevā̱ arca̍ntya̱rkaṁ su̱nvantyandha̍ḥ |
ahi̍mohā̱nama̱pa ā̱śayā̍na̱ṁ pra mā̱yābhi̍rmā̱yina̍ṁ sakṣa̱dindra̍ḥ || 5.030.06
vi ṣū mṛdho̍ ja̱nuṣā̱ dāna̱minva̱nnaha̱ngavā̍ maghavansaṁcakā̱naḥ |
atrā̍ dā̱sasya̱ namu̍ce̱ḥ śiro̱ yadava̍rtayo̱ mana̍ve gā̱tumi̱cchan || 5.030.07
yuja̱ṁ hi māmakṛ̍thā̱ ādidi̍ndra̱ śiro̍ dā̱sasya̱ namu̍cermathā̱yan |
aśmā̍naṁ citsva̱ryaṁ1̱̍ varta̍māna̱ṁ pra ca̱kriye̍va̱ roda̍sī ma̱rudbhya̍ḥ || 5.030.08
striyo̱ hi dā̱sa āyu̍dhāni ca̱kre kiṁ mā̍ karannaba̱lā a̍sya̱ senā̍ḥ |
a̱ntarhyakhya̍du̱bhe a̍sya̱ dhene̱ athopa̱ praidyu̱dhaye̱ dasyu̱mindra̍ḥ || 5.030.09
samatra̱ gāvo̱'bhito̍'navante̱heha̍ va̱tsairviyu̍tā̱ yadāsa̍n |
saṁ tā indro̍ asṛjadasya śā̱kairyadī̱ṁ somā̍sa̱ḥ suṣu̍tā̱ ama̍ndan || 5.030.10
yadī̱ṁ somā̍ ba̱bhrudhū̍tā̱ ama̍nda̱nnaro̍ravīdvṛṣa̱bhaḥ sāda̍neṣu |
pu̱ra̱ṁda̱raḥ pa̍pi̱vā indro̍ asya̱ puna̱rgavā̍madadādu̱sriyā̍ṇām || 5.030.11
bha̱drami̱daṁ ru̱śamā̍ agne akra̱ngavā̍ṁ ca̱tvāri̱ dada̍taḥ sa̱hasrā̍ |
ṛ̱ṇa̱ṁca̱yasya̱ praya̍tā ma̱ghāni̱ pratya̍grabhīṣma̱ nṛta̍masya nṛ̱ṇām || 5.030.12
su̱peśa̍sa̱ṁ māva̍ sṛja̱ntyasta̱ṁ gavā̍ṁ sa̱hasrai̍ ru̱śamā̍so agne |
tī̱vrā indra̍mamamanduḥ su̱tāso̱'ktorvyu̍ṣṭau̱ pari̍takmyāyāḥ || 5.030.13
auccha̱tsā rātrī̱ pari̍takmyā̱ yā ṛ̍ṇaṁca̱ye rāja̍ni ru̱śamā̍nām |
atyo̱ na vā̱jī ra̱ghura̱jyamā̍no ba̱bhruśca̱tvārya̍sanatsa̱hasrā̍ || 5.030.14
catu̍ḥsahasra̱ṁ gavya̍sya pa̱śvaḥ pratya̍grabhīṣma ru̱śame̍ṣvagne |
gha̱rmaści̍tta̱ptaḥ pra̱vṛje̱ ya āsī̍daya̱smaya̱stamvādā̍ma̱ viprā̍ḥ || 5.030.15
indro̱ rathā̍ya pra̱vata̍ṁ kṛṇoti̱ yama̱dhyasthā̍nma̱ghavā̍ vāja̱yanta̍m |
yū̱theva̍ pa̱śvo vyu̍noti go̱pā ari̍ṣṭo yāti pratha̱maḥ siṣā̍san || 5.031.01
ā pra dra̍va harivo̱ mā vi ve̍na̱ḥ piśa̍ṅgarāte a̱bhi na̍ḥ sacasva |
na̱hi tvadi̍ndra̱ vasyo̍ a̱nyadastya̍me̱nāści̱jjani̍vataścakartha || 5.031.02
udyatsaha̱ḥ saha̍sa̱ āja̍niṣṭa̱ dedi̍ṣṭa̱ indra̍ indri̱yāṇi̱ viśvā̍ |
prāco̍dayatsu̱dughā̍ va̱vre a̱ntarvi jyoti̍ṣā saṁvavṛ̱tvattamo̍'vaḥ || 5.031.03
ana̍vaste̱ ratha̱maśvā̍ya takṣa̱ntvaṣṭā̱ vajra̍ṁ puruhūta dyu̱manta̍m |
bra̱hmāṇa̱ indra̍ṁ ma̱haya̍nto a̱rkairava̍rdhaya̱nnaha̍ye̱ hanta̱vā u̍ || 5.031.04
vṛṣṇe̱ yatte̱ vṛṣa̍ṇo a̱rkamarcā̱nindra̱ grāvā̍ṇo̱ adi̍tiḥ sa̱joṣā̍ḥ |
a̱na̱śvāso̱ ye pa̱vayo̍'ra̱thā indre̍ṣitā a̱bhyava̍rtanta̱ dasyū̍n || 5.031.05
pra te̱ pūrvā̍ṇi̱ kara̍ṇāni voca̱ṁ pra nūta̍nā maghava̱nyā ca̱kartha̍ |
śaktī̍vo̱ yadvi̱bharā̱ roda̍sī u̱bhe jaya̍nna̱po mana̍ve̱ dānu̍citrāḥ || 5.031.06
tadinnu te̱ kara̍ṇaṁ dasma vi̱prāhi̱ṁ yadghnannojo̱ atrāmi̍mīthāḥ |
śuṣṇa̍sya ci̱tpari̍ mā̱yā a̍gṛbhṇāḥ prapi̱tvaṁ yannapa̱ dasyū̍rasedhaḥ || 5.031.07
tvama̱po yada̍ve tu̱rvaśā̱yāra̍mayaḥ su̱dughā̍ḥ pā̱ra i̍ndra |
u̱grama̍yāta̱mava̍ho ha̱ kutsa̱ṁ saṁ ha̱ yadvā̍mu̱śanāra̍nta de̱vāḥ || 5.031.08
indrā̍kutsā̱ vaha̍mānā̱ rathe̱nā vā̱matyā̱ api̱ karṇe̍ vahantu |
niḥ ṣī̍ma̱dbhyo dhama̍tho̱ niḥ ṣa̱dhasthā̍nma̱ghono̍ hṛ̱do va̍ratha̱stamā̍ṁsi || 5.031.09
vāta̍sya yu̱ktānsu̱yuja̍ści̱daśvā̍nka̱viści̍de̱ṣo a̍jagannava̱syuḥ |
viśve̍ te̱ atra̍ ma̱ruta̱ḥ sakhā̍ya̱ indra̱ brahmā̍ṇi̱ tavi̍ṣīmavardhan || 5.031.10
sūra̍ści̱dratha̱ṁ pari̍takmyāyā̱ṁ pūrva̍ṁ kara̱dupa̍raṁ jūju̱vāṁsa̍m |
bhara̍cca̱krameta̍śa̱ḥ saṁ ri̍ṇāti pu̱ro dadha̍tsaniṣyati̱ kratu̍ṁ naḥ || 5.031.11
āyaṁ ja̍nā abhi̱cakṣe̍ jagā̱mendra̱ḥ sakhā̍yaṁ su̱taso̍mami̱cchan |
vada̱ngrāvāva̱ vedi̍ṁ bhriyāte̱ yasya̍ jī̱rama̍dhva̱ryava̱ścara̍nti || 5.031.12
ye cā̱kana̍nta cā̱kana̍nta̱ nū te martā̍ amṛta̱ mo te aṁha̱ āra̍n |
vā̱va̱ndhi yajyū̍ru̱ta teṣu̍ dhe̱hyojo̱ jane̍ṣu̱ yeṣu̍ te̱ syāma̍ || 5.031.13
ada̍rda̱rutsa̱masṛ̍jo̱ vi khāni̱ tvama̍rṇa̱vānba̍dbadhā̱nā a̍ramṇāḥ |
ma̱hānta̍mindra̱ parva̍ta̱ṁ vi yadvaḥ sṛ̱jo vi dhārā̱ ava̍ dāna̱vaṁ ha̍n || 5.032.01
tvamutsā̍ ṛ̱tubhi̍rbadbadhā̱nā ara̍ṁha̱ ūdha̱ḥ parva̍tasya vajrin |
ahi̍ṁ cidugra̱ prayu̍ta̱ṁ śayā̍naṁ jagha̱nvā i̍ndra̱ tavi̍ṣīmadhatthāḥ || 5.032.02
tyasya̍ cinmaha̱to nirmṛ̱gasya̱ vadha̍rjaghāna̱ tavi̍ṣībhi̱rindra̍ḥ |
ya eka̱ ida̍pra̱tirmanya̍māna̱ āda̍smāda̱nyo a̍janiṣṭa̱ tavyā̍n || 5.032.03
tyaṁ ci̍deṣāṁ sva̱dhayā̱ mada̍ntaṁ mi̱ho napā̍taṁ su̱vṛdha̍ṁ tamo̱gām |
vṛṣa̍prabharmā dāna̱vasya̱ bhāma̱ṁ vajre̍ṇa va̱jrī ni ja̍ghāna̱ śuṣṇa̍m || 5.032.04
tyaṁ ci̍dasya̱ kratu̍bhi̱rniṣa̍ttamama̱rmaṇo̍ vi̱dadida̍sya̱ marma̍ |
yadī̍ṁ sukṣatra̱ prabhṛ̍tā̱ mada̍sya̱ yuyu̍tsanta̱ṁ tama̍si ha̱rmye dhāḥ || 5.032.05
tyaṁ ci̍di̱tthā ka̍tpa̱yaṁ śayā̍namasū̱rye tama̍si vāvṛdhā̱nam |
taṁ ci̍nmandā̱no vṛ̍ṣa̱bhaḥ su̱tasyo̱ccairindro̍ apa̱gūryā̍ jaghāna || 5.032.06
udyadindro̍ maha̱te dā̍na̱vāya̱ vadha̱ryami̍ṣṭa̱ saho̱ apra̍tītam |
yadī̱ṁ vajra̍sya̱ prabhṛ̍tau da̱dābha̱ viśva̍sya ja̱ntora̍dha̱maṁ ca̍kāra || 5.032.07
tyaṁ ci̱darṇa̍ṁ madhu̱paṁ śayā̍namasi̱nvaṁ va̱vraṁ mahyāda̍du̱graḥ |
a̱pāda̍ma̱traṁ ma̍ha̱tā va̱dhena̱ ni du̍ryo̱ṇa ā̍vṛṇaṅmṛ̱dhravā̍cam || 5.032.08
ko a̍sya̱ śuṣma̱ṁ tavi̍ṣīṁ varāta̱ eko̱ dhanā̍ bharate̱ apra̍tītaḥ |
i̱me ci̍dasya̱ jraya̍so̱ nu de̱vī indra̱syauja̍so bhi̱yasā̍ jihāte || 5.032.09
nya̍smai de̱vī svadhi̍tirjihīta̱ indrā̍ya gā̱turu̍śa̱tīva̍ yeme |
saṁ yadojo̍ yu̱vate̱ viśva̍mābhi̱ranu̍ sva̱dhāvne̍ kṣi̱tayo̍ namanta || 5.032.10
eka̱ṁ nu tvā̱ satpa̍ti̱ṁ pāñca̍janyaṁ jā̱taṁ śṛ̍ṇomi ya̱śasa̱ṁ jane̍ṣu |
taṁ me̍ jagṛbhra ā̱śaso̱ navi̍ṣṭhaṁ do̱ṣā vasto̱rhava̍mānāsa̱ indra̍m || 5.032.11
e̱vā hi tvāmṛ̍tu̱thā yā̱taya̍ntaṁ ma̱ghā vipre̍bhyo̱ dada̍taṁ śṛ̱ṇomi̍ |
kiṁ te̍ bra̱hmāṇo̍ gṛhate̱ sakhā̍yo̱ ye tvā̱yā ni̍da̱dhuḥ kāma̍mindra || 5.032.12
mahi̍ ma̱he ta̱vase̍ dīdhye̱ nṝnindrā̍ye̱tthā ta̱vase̱ ata̍vyān |
yo a̍smai suma̱tiṁ vāja̍sātau stu̱to jane̍ sama̱rya̍ści̱keta̍ || 5.033.01
sa tvaṁ na̍ indra dhiyasā̱no a̱rkairharī̍ṇāṁ vṛṣa̱nyoktra̍maśreḥ |
yā i̱tthā ma̍ghava̱nnanu̱ joṣa̱ṁ vakṣo̍ a̱bhi prāryaḥ sa̍kṣi̱ janā̍n || 5.033.02
na te ta̍ indrā̱bhya1̱̍smadṛ̱ṣvāyu̍ktāso abra̱hmatā̱ yadasa̍n |
tiṣṭhā̱ ratha̱madhi̱ taṁ va̍jraha̱stā ra̱śmiṁ de̍va yamase̱ svaśva̍ḥ || 5.033.03
pu̱rū yatta̍ indra̱ santyu̱kthā gave̍ ca̱kartho̱rvarā̍su̱ yudhya̍n |
ta̱ta̱kṣe sūryā̍ya ci̱doka̍si̱ sve vṛṣā̍ sa̱matsu̍ dā̱sasya̱ nāma̍ cit || 5.033.04
va̱yaṁ te ta̍ indra̱ ye ca̱ nara̱ḥ śardho̍ jajñā̱nā yā̱tāśca̱ rathā̍ḥ |
āsmāñja̍gamyādahiśuṣma̱ satvā̱ bhago̱ na havya̍ḥ prabhṛ̱theṣu̱ cāru̍ḥ || 5.033.05
pa̱pṛ̱kṣeṇya̍mindra̱ tve hyojo̍ nṛ̱mṇāni̍ ca nṛ̱tamā̍no̱ ama̍rtaḥ |
sa na̱ enī̍ṁ vasavāno ra̱yiṁ dā̱ḥ prāryaḥ stu̍ṣe tuvima̱ghasya̱ dāna̍m || 5.033.06
e̱vā na̍ indro̱tibhi̍rava pā̱hi gṛ̍ṇa̱taḥ śū̍ra kā̱rūn |
u̱ta tvaca̱ṁ dada̍to̱ vāja̍sātau piprī̱hi madhva̱ḥ suṣu̍tasya̱ cāro̍ḥ || 5.033.07
u̱ta tye mā̍ pauruku̱tsyasya̍ sū̱restra̱sada̍syorhira̱ṇino̱ rarā̍ṇāḥ |
vaha̍ntu mā̱ daśa̱ śyetā̍so asya gairikṣi̱tasya̱ kratu̍bhi̱rnu sa̍śce || 5.033.08
u̱ta tye mā̍ māru̱tāśva̍sya̱ śoṇā̱ḥ kratvā̍maghāso vi̱datha̍sya rā̱tau |
sa̱hasrā̍ me̱ cyava̍tāno̱ dadā̍na ānū̱kama̱ryo vapu̍ṣe̱ nārca̍t || 5.033.09
u̱ta tye mā̍ dhva̱nya̍sya̱ juṣṭā̍ lakṣma̱ṇya̍sya su̱ruco̱ yatā̍nāḥ |
ma̱hnā rā̱yaḥ sa̱ṁvara̍ṇasya̱ ṛṣe̍rvra̱jaṁ na gāva̱ḥ praya̍tā̱ api̍ gman || 5.033.10
ajā̍taśatruma̱jarā̱ sva̍rva̱tyanu̍ sva̱dhāmi̍tā da̱smamī̍yate |
su̱nota̍na̱ paca̍ta̱ brahma̍vāhase puruṣṭu̱tāya̍ prata̱raṁ da̍dhātana || 5.034.01
ā yaḥ some̍na ja̱ṭhara̱mapi̍pra̱tāma̍ndata ma̱ghavā̱ madhvo̱ andha̍saḥ |
yadī̍ṁ mṛ̱gāya̱ hanta̍ve ma̱hāva̍dhaḥ sa̱hasra̍bhṛṣṭimu̱śanā̍ va̱dhaṁ yama̍t || 5.034.02
yo a̍smai ghra̱ṁsa u̱ta vā̱ ya ūdha̍ni̱ soma̍ṁ su̱noti̱ bhava̍ti dyu̱mā aha̍ |
apā̍pa śa̱krasta̍ta̱nuṣṭi̍mūhati ta̱nūśu̍bhraṁ ma̱ghavā̱ yaḥ ka̍vāsa̱khaḥ || 5.034.03
yasyāva̍dhītpi̱tara̱ṁ yasya̍ mā̱tara̱ṁ yasya̍ śa̱kro bhrāta̍ra̱ṁ nāta̍ īṣate |
vetīdva̍sya̱ praya̍tā yataṁka̱ro na kilbi̍ṣādīṣate̱ vasva̍ āka̱raḥ || 5.034.04
na pa̱ñcabhi̍rda̱śabhi̍rvaṣṭyā̱rabha̱ṁ nāsu̍nvatā sacate̱ puṣya̍tā ca̱na |
ji̱nāti̱ veda̍mu̱yā hanti̍ vā̱ dhuni̱rā de̍va̱yuṁ bha̍jati̱ goma̍ti vra̱je || 5.034.05
vi̱tvakṣa̍ṇa̱ḥ samṛ̍tau cakramāsa̱jo'su̍nvato̱ viṣu̍ṇaḥ sunva̱to vṛ̱dhaḥ |
indro̱ viśva̍sya dami̱tā vi̱bhīṣa̍ṇo yathāva̱śaṁ na̍yati̱ dāsa̱mārya̍ḥ || 5.034.06
samī̍ṁ pa̱ṇera̍jati̱ bhoja̍naṁ mu̱ṣe vi dā̱śuṣe̍ bhajati sū̱nara̱ṁ vasu̍ |
du̱rge ca̱na dhri̍yate̱ viśva̱ ā pu̱ru jano̱ yo a̍sya̱ tavi̍ṣī̱macu̍krudhat || 5.034.07
saṁ yajjanau̍ su̱dhanau̍ vi̱śvaśa̍rdhasā̱vave̱dindro̍ ma̱ghavā̱ goṣu̍ śu̱bhriṣu̍ |
yuja̱ṁ hya1̱̍nyamakṛ̍ta pravepa̱nyudī̱ṁ gavya̍ṁ sṛjate̱ satva̍bhi̱rdhuni̍ḥ || 5.034.08
sa̱ha̱sra̱sāmāgni̍veśiṁ gṛṇīṣe̱ śatri̍magna upa̱māṁ ke̱tuma̱ryaḥ |
tasmā̱ āpa̍ḥ sa̱ṁyata̍ḥ pīpayanta̱ tasmi̍nkṣa̱tramama̍vattve̱ṣama̍stu || 5.034.09
yaste̱ sādhi̱ṣṭho'va̍sa̱ indra̱ kratu̱ṣṭamā bha̍ra |
a̱smabhya̍ṁ carṣaṇī̱saha̱ṁ sasni̱ṁ vāje̍ṣu du̱ṣṭara̍m || 5.035.01
yadi̍ndra te̱ cata̍sro̱ yacchū̍ra̱ santi̍ ti̱sraḥ |
yadvā̱ pañca̍ kṣitī̱nāmava̱statsu na̱ ā bha̍ra || 5.035.02
ā te'vo̱ vare̍ṇya̱ṁ vṛṣa̍ntamasya hūmahe |
vṛṣa̍jūti̱rhi ja̍jñi̱ṣa ā̱bhūbhi̍rindra tu̱rvaṇi̍ḥ || 5.035.03
vṛṣā̱ hyasi̱ rādha̍se jajñi̱ṣe vṛṣṇi̍ te̱ śava̍ḥ |
svakṣa̍traṁ te dhṛ̱ṣanmana̍ḥ satrā̱hami̍ndra̱ pauṁsya̍m || 5.035.04
tvaṁ tami̍ndra̱ martya̍mamitra̱yanta̍madrivaḥ |
sa̱rva̱ra̱thā śa̍takrato̱ ni yā̍hi śavasaspate || 5.035.05
tvāmidvṛ̍trahantama̱ janā̍so vṛ̱ktaba̍rhiṣaḥ |
u̱graṁ pū̱rvīṣu̍ pū̱rvyaṁ hava̍nte̱ vāja̍sātaye || 5.035.06
a̱smāka̍mindra du̱ṣṭara̍ṁ puro̱yāvā̍namā̱jiṣu̍ |
sa̱yāvā̍na̱ṁ dhane̍dhane vāja̱yanta̍mavā̱ ratha̍m || 5.035.07
a̱smāka̍mi̱ndrehi̍ no̱ ratha̍mavā̱ pura̍ṁdhyā |
va̱yaṁ śa̍viṣṭha̱ vārya̍ṁ di̱vi śravo̍ dadhīmahi di̱vi stoma̍ṁ manāmahe || 5.035.08
sa ā ga̍ma̱dindro̱ yo vasū̍nā̱ṁ cike̍ta̱ddātu̱ṁ dāma̍no rayī̱ṇām |
dha̱nva̱ca̱ro na vaṁsa̍gastṛṣā̱ṇaśca̍kamā̱naḥ pi̍batu du̱gdhama̱ṁśum || 5.036.01
ā te̱ hanū̍ harivaḥ śūra̱ śipre̱ ruha̱tsomo̱ na parva̍tasya pṛ̱ṣṭhe |
anu̍ tvā rāja̱nnarva̍to̱ na hi̱nvangī̱rbhirma̍dema puruhūta̱ viśve̍ || 5.036.02
ca̱kraṁ na vṛ̱ttaṁ pu̍ruhūta vepate̱ mano̍ bhi̱yā me̱ ama̍te̱rida̍drivaḥ |
rathā̱dadhi̍ tvā jari̱tā sa̍dāvṛdha ku̱vinnu sto̍ṣanmaghavanpurū̱vasu̍ḥ || 5.036.03
e̱ṣa grāve̍va jari̱tā ta̍ i̱ndreya̍rti̱ vāca̍ṁ bṛ̱hadā̍śuṣā̱ṇaḥ |
pra sa̱vyena̍ maghava̱nyaṁsi̍ rā̱yaḥ pra da̍kṣi̱ṇiddha̍rivo̱ mā vi ve̍naḥ || 5.036.04
vṛṣā̍ tvā̱ vṛṣa̍ṇaṁ vardhatu̱ dyaurvṛṣā̱ vṛṣa̍bhyāṁ vahase̱ hari̍bhyām |
sa no̱ vṛṣā̱ vṛṣa̍rathaḥ suśipra̱ vṛṣa̍krato̱ vṛṣā̍ vajri̱nbhare̍ dhāḥ || 5.036.05
yo rohi̍tau vā̱jinau̍ vā̱jinī̍vāntri̱bhiḥ śa̱taiḥ saca̍mānā̱vadi̍ṣṭa |
yūne̱ sama̍smai kṣi̱tayo̍ namantāṁ śru̱tara̍thāya maruto duvo̱yā || 5.036.06
saṁ bhā̱nunā̍ yatate̱ sūrya̍syā̱juhvā̍no ghṛ̱tapṛ̍ṣṭha̱ḥ svañcā̍ḥ |
tasmā̱ amṛ̍dhrā u̱ṣaso̱ vyu̍cchā̱nya indrā̍ya su̱navā̱metyāha̍ || 5.037.01
sami̍ddhāgnirvanavatstī̱rṇaba̍rhiryu̱ktagrā̍vā su̱taso̍mo jarāte |
grāvā̍ṇo̱ yasye̍ṣi̱raṁ vada̱ntyaya̍dadhva̱ryurha̱viṣāva̱ sindhu̍m || 5.037.02
va̱dhūri̱yaṁ pati̍mi̱cchantye̍ti̱ ya ī̱ṁ vahā̍te̱ mahi̍ṣīmiṣi̱rām |
āsya̍ śravasyā̱dratha̱ ā ca̍ ghoṣātpu̱rū sa̱hasrā̱ pari̍ vartayāte || 5.037.03
na sa rājā̍ vyathate̱ yasmi̱nnindra̍stī̱vraṁ soma̱ṁ piba̍ti̱ gosa̍khāyam |
ā sa̍tva̱nairaja̍ti̱ hanti̍ vṛ̱traṁ kṣeti̍ kṣi̱tīḥ su̱bhago̱ nāma̱ puṣya̍n || 5.037.04
puṣyā̱tkṣeme̍ a̱bhi yoge̍ bhavātyu̱bhe vṛtau̍ saṁya̱tī saṁ ja̍yāti |
pri̱yaḥ sūrye̍ pri̱yo a̱gnā bha̍vāti̱ ya indrā̍ya su̱taso̍mo̱ dadā̍śat || 5.037.05
u̱roṣṭa̍ indra̱ rādha̍so vi̱bhvī rā̱tiḥ śa̍takrato |
adhā̍ no viśvacarṣaṇe dyu̱mnā su̍kṣatra maṁhaya || 5.038.01
yadī̍mindra śra̱vāyya̱miṣa̍ṁ śaviṣṭha dadhi̱ṣe |
pa̱pra̱the dī̍rgha̱śrutta̍ma̱ṁ hira̍ṇyavarṇa du̱ṣṭara̍m || 5.038.02
śuṣmā̍so̱ ye te̍ adrivo me̱hanā̍ keta̱sāpa̍ḥ |
u̱bhā de̱vāva̱bhiṣṭa̍ye di̱vaśca̱ gmaśca̍ rājathaḥ || 5.038.03
u̱to no̍ a̱sya kasya̍ ci̱ddakṣa̍sya̱ tava̍ vṛtrahan |
a̱smabhya̍ṁ nṛ̱mṇamā bha̍rā̱smabhya̍ṁ nṛmaṇasyase || 5.038.04
nū ta̍ ā̱bhira̱bhiṣṭi̍bhi̱stava̱ śarma̍ñchatakrato |
indra̱ syāma̍ sugo̱pāḥ śūra̱ syāma̍ sugo̱pāḥ || 5.038.05
yadi̍ndra citra me̱hanāsti̱ tvādā̍tamadrivaḥ |
rādha̱stanno̍ vidadvasa ubhayāha̱styā bha̍ra || 5.039.01
yanmanya̍se̱ vare̍ṇya̱mindra̍ dyu̱kṣaṁ tadā bha̍ra |
vi̱dyāma̱ tasya̍ te va̱yamakū̍pārasya dā̱vane̍ || 5.039.02
yatte̍ di̱tsu pra̱rādhya̱ṁ mano̱ asti̍ śru̱taṁ bṛ̱hat |
tena̍ dṛ̱ḻhā ci̍dadriva̱ ā vāja̍ṁ darṣi sā̱taye̍ || 5.039.03
maṁhi̍ṣṭhaṁ vo ma̱ghonā̱ṁ rājā̍naṁ carṣaṇī̱nām |
indra̱mupa̱ praśa̍staye pū̱rvībhi̍rjujuṣe̱ gira̍ḥ || 5.039.04
asmā̱ itkāvya̱ṁ vaca̍ u̱kthamindrā̍ya̱ śaṁsya̍m |
tasmā̍ u̱ brahma̍vāhase̱ giro̍ vardha̱ntyatra̍yo̱ gira̍ḥ śumbha̱ntyatra̍yaḥ || 5.039.05
ā yā̱hyadri̍bhiḥ su̱taṁ soma̍ṁ somapate piba |
vṛṣa̍nnindra̱ vṛṣa̍bhirvṛtrahantama || 5.040.01
vṛṣā̱ grāvā̱ vṛṣā̱ mado̱ vṛṣā̱ somo̍ a̱yaṁ su̱taḥ |
vṛṣa̍nnindra̱ vṛṣa̍bhirvṛtrahantama || 5.040.02
vṛṣā̍ tvā̱ vṛṣa̍ṇaṁ huve̱ vajri̍ñci̱trābhi̍rū̱tibhi̍ḥ |
vṛṣa̍nnindra̱ vṛṣa̍bhirvṛtrahantama || 5.040.03
ṛ̱jī̱ṣī va̱jrī vṛ̍ṣa̱bhastu̍rā̱ṣāṭ chu̱ṣmī rājā̍ vṛtra̱hā so̍ma̱pāvā̍ |
yu̱ktvā hari̍bhyā̱mupa̍ yāsada̱rvāṅmādhya̍ṁdine̱ sava̍ne matsa̱dindra̍ḥ || 5.040.04
yattvā̍ sūrya̱ sva̍rbhānu̱stama̱sāvi̍dhyadāsu̱raḥ |
akṣe̍travi̱dyathā̍ mu̱gdho bhuva̍nānyadīdhayuḥ || 5.040.05
sva̍rbhāno̱radha̱ yadi̍ndra mā̱yā a̱vo di̱vo varta̍mānā a̱vāha̍n |
gū̱ḻhaṁ sūrya̱ṁ tama̱sāpa̍vratena tu̱rīye̍ṇa̱ brahma̍ṇāvinda̱datri̍ḥ || 5.040.06
mā māmi̱maṁ tava̱ santa̍matra ira̱syā dru̱gdho bhi̱yasā̱ ni gā̍rīt |
tvaṁ mi̱tro a̍si sa̱tyarā̍dhā̱stau me̱hāva̍ta̱ṁ varu̍ṇaśca̱ rājā̍ || 5.040.07
grāvṇo̍ bra̱hmā yu̍yujā̱naḥ sa̍pa̱ryankī̱riṇā̍ de̱vānnama̍sopa̱śikṣa̍n |
atri̱ḥ sūrya̍sya di̱vi cakṣu̱rādhā̱tsva̍rbhāno̱rapa̍ mā̱yā a̍ghukṣat || 5.040.08
yaṁ vai sūrya̱ṁ sva̍rbhānu̱stama̱sāvi̍dhyadāsu̱raḥ |
atra̍ya̱stamanva̍vindanna̱hya1̱̍nye aśa̍knuvan || 5.040.09
ko nu vā̍ṁ mitrāvaruṇāvṛtā̱yandi̱vo vā̍ ma̱haḥ pārthi̍vasya vā̱ de |
ṛ̱tasya̍ vā̱ sada̍si̱ trāsī̍thāṁ no yajñāya̱te vā̍ paśu̱ṣo na vājā̍n || 5.041.01
te no̍ mi̱tro varu̍ṇo arya̱māyurindra̍ ṛbhu̱kṣā ma̱ruto̍ juṣanta |
namo̍bhirvā̱ ye dadha̍te suvṛ̱ktiṁ stoma̍ṁ ru̱drāya̍ mī̱ḻhuṣe̍ sa̱joṣā̍ḥ || 5.041.02
ā vā̱ṁ yeṣṭhā̍śvinā hu̱vadhyai̱ vāta̍sya̱ patma̱nrathya̍sya pu̱ṣṭau |
u̱ta vā̍ di̱vo asu̍rāya̱ manma̱ prāndhā̍ṁsīva̱ yajya̍ve bharadhvam || 5.041.03
pra sa̱kṣaṇo̍ di̱vyaḥ kaṇva̍hotā tri̱to di̱vaḥ sa̱joṣā̱ vāto̍ a̱gniḥ |
pū̱ṣā bhaga̍ḥ prabhṛ̱the vi̱śvabho̍jā ā̱jiṁ na ja̍gmurā̱śva̍śvatamāḥ || 5.041.04
pra vo̍ ra̱yiṁ yu̱ktāśva̍ṁ bharadhvaṁ rā̱ya eṣe'va̍se dadhīta̱ dhīḥ |
su̱śeva̱ evai̍rauśi̱jasya̱ hotā̱ ye va̱ evā̍ marutastu̱rāṇā̍m || 5.041.05
pra vo̍ vā̱yuṁ ra̍tha̱yuja̍ṁ kṛṇudhva̱ṁ pra de̱vaṁ vipra̍ṁ pani̱tāra̍ma̱rkaiḥ |
i̱ṣu̱dhyava̍ ṛta̱sāpa̱ḥ pura̍ṁdhī̱rvasvī̍rno̱ atra̱ patnī̱rā dhi̱ye dhu̍ḥ || 5.041.06
upa̍ va̱ eṣe̱ vandye̍bhiḥ śū̱ṣaiḥ pra ya̱hvī di̱vaści̱taya̍dbhira̱rkaiḥ |
u̱ṣāsā̱naktā̍ vi̱duṣī̍va̱ viśva̱mā hā̍ vahato̱ martyā̍ya ya̱jñam || 5.041.07
a̱bhi vo̍ arce po̱ṣyāva̍to̱ nṝnvāsto̱ṣpati̱ṁ tvaṣṭā̍ra̱ṁ rarā̍ṇaḥ |
dhanyā̍ sa̱joṣā̍ dhi̱ṣaṇā̱ namo̍bhi̱rvana̱spatī̱roṣa̍dhī rā̱ya eṣe̍ || 5.041.08
tu̱je na̱stane̱ parva̍tāḥ santu̱ svaita̍vo̱ ye vasa̍vo̱ na vī̱rāḥ |
pa̱ni̱ta ā̱ptyo ya̍ja̱taḥ sadā̍ no̱ vardhā̍nna̱ḥ śaṁsa̱ṁ naryo̍ a̱bhiṣṭau̍ || 5.041.09
vṛṣṇo̍ astoṣi bhū̱myasya̱ garbha̍ṁ tri̱to napā̍tama̱pāṁ su̍vṛ̱kti |
gṛ̱ṇī̱te a̱gnire̱tarī̱ na śū̱ṣaiḥ śo̱ciṣke̍śo̱ ni ri̍ṇāti̱ vanā̍ || 5.041.10
ka̱thā ma̱he ru̱driyā̍ya bravāma̱ kadrā̱ye ci̍ki̱tuṣe̱ bhagā̍ya |
āpa̱ oṣa̍dhīru̱ta no̍'vantu̱ dyaurvanā̍ gi̱rayo̍ vṛ̱kṣake̍śāḥ || 5.041.11
śṛ̱ṇotu̍ na ū̱rjāṁ pati̱rgira̱ḥ sa nabha̱starī̍yā iṣi̱raḥ pari̍jmā |
śṛ̱ṇvantvāpa̱ḥ puro̱ na śu̱bhrāḥ pari̱ sruco̍ babṛhā̱ṇasyādre̍ḥ || 5.041.12
vi̱dā ci̱nnu ma̍hānto̱ ye va̱ evā̱ bravā̍ma dasmā̱ vārya̱ṁ dadhā̍nāḥ |
vaya̍śca̱na su̱bhva1̱̍ āva̍ yanti kṣu̱bhā marta̱manu̍yataṁ vadha̱snaiḥ || 5.041.13
ā daivyā̍ni̱ pārthi̍vāni̱ janmā̱paścācchā̱ suma̍khāya vocam |
vardha̍ntā̱ṁ dyāvo̱ gira̍śca̱ndrāgrā̍ u̱dā va̍rdhantāma̱bhiṣā̍tā̱ arṇā̍ḥ || 5.041.14
pa̱depa̍de me jari̱mā ni dhā̍yi̱ varū̍trī vā śa̱krā yā pā̱yubhi̍śca |
siṣa̍ktu mā̱tā ma̱hī ra̱sā na̱ḥ smatsū̱ribhi̍rṛju̱hasta̍ ṛju̱vani̍ḥ || 5.041.15
ka̱thā dā̍śema̱ nama̍sā su̱dānū̍neva̱yā ma̱ruto̱ accho̍ktau̱ praśra̍vaso ma̱ruto̱ accho̍ktau |
mā no'hi̍rbu̱dhnyo̍ ri̱ṣe dhā̍da̱smāka̍ṁ bhūdupamāti̱vani̍ḥ || 5.041.16
iti̍ ci̱nnu pra̱jāyai̍ paśu̱matyai̱ devā̍so̱ vana̍te̱ martyo̍ va̱ ā de̍vāso vanate̱ martyo̍ vaḥ |
atrā̍ śi̱vāṁ ta̱nvo̍ dhā̱sima̱syā ja̱rāṁ ci̍nme̱ nirṛ̍tirjagrasīta || 5.041.17
tāṁ vo̍ devāḥ suma̱timū̱rjaya̍ntī̱miṣa̍maśyāma vasava̱ḥ śasā̱ goḥ |
sā na̍ḥ su̱dānu̍rmṛ̱ḻaya̍ntī de̱vī prati̱ drava̍ntī suvi̱tāya̍ gamyāḥ || 5.041.18
a̱bhi na̱ iḻā̍ yū̱thasya̍ mā̱tā smanna̱dībhi̍ru̱rvaśī̍ vā gṛṇātu |
u̱rvaśī̍ vā bṛhaddi̱vā gṛ̍ṇā̱nābhyū̍rṇvā̱nā pra̍bhṛ̱thasyā̱yoḥ || 5.041.19
siṣa̍ktu na ūrja̱vya̍sya pu̱ṣṭeḥ || 5.041.20
pra śaṁta̍mā̱ varu̍ṇa̱ṁ dīdhi̍tī̱ gīrmi̱traṁ bhaga̱madi̍tiṁ nū̱nama̍śyāḥ |
pṛṣa̍dyoni̱ḥ pañca̍hotā śṛṇo̱tvatū̍rtapanthā̱ asu̍ro mayo̱bhuḥ || 5.042.01
prati̍ me̱ stoma̱madi̍tirjagṛbhyātsū̱nuṁ na mā̱tā hṛdya̍ṁ su̱śeva̍m |
brahma̍ pri̱yaṁ de̱vahi̍ta̱ṁ yadastya̱haṁ mi̱tre varu̍ṇe̱ yanma̍yo̱bhu || 5.042.02
udī̍raya ka̱vita̍maṁ kavī̱nāmu̱nattai̍nama̱bhi madhvā̍ ghṛ̱tena̍ |
sa no̱ vasū̍ni̱ praya̍tā hi̱tāni̍ ca̱ndrāṇi̍ de̱vaḥ sa̍vi̱tā su̍vāti || 5.042.03
sami̍ndra ṇo̱ mana̍sā neṣi̱ gobhi̱ḥ saṁ sū̱ribhi̍rhariva̱ḥ saṁ sva̱sti |
saṁ brahma̍ṇā de̱vahi̍ta̱ṁ yadasti̱ saṁ de̱vānā̍ṁ suma̱tyā ya̱jñiyā̍nām || 5.042.04
de̱vo bhaga̍ḥ savi̱tā rā̱yo aṁśa̱ indro̍ vṛ̱trasya̍ sa̱ṁjito̱ dhanā̍nām |
ṛ̱bhu̱kṣā vāja̍ u̱ta vā̱ pura̍ṁdhi̱rava̍ntu no a̱mṛtā̍sastu̱rāsa̍ḥ || 5.042.05
ma̱rutva̍to̱ apra̍tītasya ji̱ṣṇorajū̍ryata̱ḥ pra bra̍vāmā kṛ̱tāni̍ |
na te̱ pūrve̍ maghava̱nnāpa̍rāso̱ na vī̱ryaṁ1̱̍ nūta̍na̱ḥ kaśca̱nāpa̍ || 5.042.06
upa̍ stuhi pratha̱maṁ ra̍tna̱dheya̱ṁ bṛha̱spati̍ṁ sani̱tāra̱ṁ dhanā̍nām |
yaḥ śaṁsa̍te stuva̱te śambha̍viṣṭhaḥ purū̱vasu̍rā̱gama̱jjohu̍vānam || 5.042.07
tavo̱tibhi̱ḥ saca̍mānā̱ ari̍ṣṭā̱ bṛha̍spate ma̱ghavā̍naḥ su̱vīrā̍ḥ |
ye a̍śva̱dā u̱ta vā̱ santi̍ go̱dā ye va̍stra̱dāḥ su̱bhagā̱steṣu̱ rāya̍ḥ || 5.042.08
vi̱sa̱rmāṇa̍ṁ kṛṇuhi vi̱ttame̍ṣā̱ṁ ye bhu̱ñjate̱ apṛ̍ṇanto na u̱kthaiḥ |
apa̍vratānprasa̱ve vā̍vṛdhā̱nānbra̍hma̱dviṣa̱ḥ sūryā̍dyāvayasva || 5.042.09
ya oha̍te ra̱kṣaso̍ de̱vavī̍tāvaca̱krebhi̱staṁ ma̍ruto̱ ni yā̍ta |
yo va̱ḥ śamī̍ṁ śaśamā̱nasya̱ nindā̍ttu̱cchyānkāmā̍nkarate siṣvidā̱naḥ || 5.042.10
tamu̍ ṣṭuhi̱ yaḥ svi̱ṣuḥ su̱dhanvā̱ yo viśva̍sya̱ kṣaya̍ti bheṣa̱jasya̍ |
yakṣvā̍ ma̱he sau̍mana̱sāya̍ ru̱draṁ namo̍bhirde̱vamasu̍raṁ duvasya || 5.042.11
damū̍naso a̱paso̱ ye su̱hastā̱ vṛṣṇa̱ḥ patnī̍rna̱dyo̍ vibhvata̱ṣṭāḥ |
sara̍svatī bṛhaddi̱vota rā̱kā da̍śa̱syantī̍rvarivasyantu śu̱bhrāḥ || 5.042.12
pra sū ma̱he su̍śara̱ṇāya̍ me̱dhāṁ gira̍ṁ bhare̱ navya̍sī̱ṁ jāya̍mānām |
ya ā̍ha̱nā du̍hi̱turva̱kṣaṇā̍su rū̱pā mi̍nā̱no akṛ̍ṇodi̱daṁ na̍ḥ || 5.042.13
pra su̍ṣṭu̱tiḥ sta̱naya̍ntaṁ ru̱vanta̍mi̱ḻaspati̍ṁ jaritarnū̱nama̍śyāḥ |
yo a̍bdi̱mā u̍dani̱mā iya̍rti̱ pra vi̱dyutā̱ roda̍sī u̱kṣamā̍ṇaḥ || 5.042.14
e̱ṣa stomo̱ māru̍ta̱ṁ śardho̱ acchā̍ ru̱drasya̍ sū̱nūryu̍va̱nyūruda̍śyāḥ |
kāmo̍ rā̱ye ha̍vate mā sva̱styupa̍ stuhi̱ pṛṣa̍daśvā a̱yāsa̍ḥ || 5.042.15
praiṣa stoma̍ḥ pṛthi̱vīma̱ntari̍kṣa̱ṁ vana̱spatī̱roṣa̍dhī rā̱ye a̍śyāḥ |
de̱vode̍vaḥ su̱havo̍ bhūtu̱ mahya̱ṁ mā no̍ mā̱tā pṛ̍thi̱vī du̍rma̱tau dhā̍t || 5.042.16
u̱rau de̍vā anibā̱dhe syā̍ma || 5.042.17
sama̱śvino̱rava̍sā̱ nūta̍nena mayo̱bhuvā̍ su̱praṇī̍tī gamema |
ā no̍ ra̱yiṁ va̍hata̱mota vī̱rānā viśvā̍nyamṛtā̱ saubha̍gāni || 5.042.18
ā dhe̱nava̱ḥ paya̍sā̱ tūrṇya̍rthā̱ ama̍rdhantī̱rupa̍ no yantu̱ madhvā̍ |
ma̱ho rā̱ye bṛ̍ha̱tīḥ sa̱pta vipro̍ mayo̱bhuvo̍ jari̱tā jo̍havīti || 5.043.01
ā su̍ṣṭu̱tī nama̍sā varta̱yadhyai̱ dyāvā̱ vājā̍ya pṛthi̱vī amṛ̍dhre |
pi̱tā mā̱tā madhu̍vacāḥ su̱hastā̱ bhare̍bhare no ya̱śasā̍vaviṣṭām || 5.043.02
adhva̍ryavaścakṛ̱vāṁso̱ madhū̍ni̱ pra vā̱yave̍ bharata̱ cāru̍ śu̱kram |
hote̍va naḥ pratha̱maḥ pā̍hya̱sya deva̱ madhvo̍ rari̱mā te̱ madā̍ya || 5.043.03
daśa̱ kṣipo̍ yuñjate bā̱hū adri̱ṁ soma̍sya̱ yā śa̍mi̱tārā̍ su̱hastā̍ |
madhvo̱ rasa̍ṁ su̱gabha̍stirgiri̱ṣṭhāṁ cani̍ścadadduduhe śu̱krama̱ṁśuḥ || 5.043.04
asā̍vi te jujuṣā̱ṇāya̱ soma̱ḥ kratve̱ dakṣā̍ya bṛha̱te madā̍ya |
harī̱ rathe̍ su̱dhurā̱ yoge̍ a̱rvāgindra̍ pri̱yā kṛ̍ṇuhi hū̱yamā̍naḥ || 5.043.05
ā no̍ ma̱hīma̱rama̍tiṁ sa̱joṣā̱ gnāṁ de̱vīṁ nama̍sā rā̱taha̍vyām |
madho̱rmadā̍ya bṛha̱tīmṛ̍ta̱jñāmāgne̍ vaha pa̱thibhi̍rdeva̱yānai̍ḥ || 5.043.06
a̱ñjanti̱ yaṁ pra̱thaya̍nto̱ na viprā̍ va̱pāva̍nta̱ṁ nāgninā̱ tapa̍ntaḥ |
pi̱turna pu̱tra u̱pasi̱ preṣṭha̱ ā gha̱rmo a̱gnimṛ̱taya̍nnasādi || 5.043.07
acchā̍ ma̱hī bṛ̍ha̱tī śaṁta̍mā̱ gīrdū̱to na ga̍ntva̱śvinā̍ hu̱vadhyai̍ |
ma̱yo̱bhuvā̍ sa̱rathā yā̍tama̱rvāgga̱ntaṁ ni̱dhiṁ dhura̍mā̱ṇirna nābhi̍m || 5.043.08
pra tavya̍so̱ nama̍uktiṁ tu̱rasyā̱haṁ pū̱ṣṇa u̱ta vā̱yora̍dikṣi |
yā rādha̍sā codi̱tārā̍ matī̱nāṁ yā vāja̍sya draviṇo̱dā u̱ta tman || 5.043.09
ā nāma̍bhirma̱ruto̍ vakṣi̱ viśvā̱nā rū̱pebhi̍rjātavedo huvā̱naḥ |
ya̱jñaṁ giro̍ jari̱tuḥ su̍ṣṭu̱tiṁ ca̱ viśve̍ ganta maruto̱ viśva̍ ū̱tī || 5.043.10
ā no̍ di̱vo bṛ̍ha̱taḥ parva̍tā̱dā sara̍svatī yaja̱tā ga̍ntu ya̱jñam |
hava̍ṁ de̱vī ju̍juṣā̱ṇā ghṛ̱tācī̍ śa̱gmāṁ no̱ vāca̍muśa̱tī śṛ̍ṇotu || 5.043.11
ā ve̱dhasa̱ṁ nīla̍pṛṣṭhaṁ bṛ̱hanta̱ṁ bṛha̱spati̱ṁ sada̍ne sādayadhvam |
sā̱dadyo̍ni̱ṁ dama̱ ā dī̍di̱vāṁsa̱ṁ hira̍ṇyavarṇamaru̱ṣaṁ sa̍pema || 5.043.12
ā dha̍rṇa̱sirbṛ̱haddi̍vo̱ rarā̍ṇo̱ viśve̍bhirga̱ntvoma̍bhirhuvā̱naḥ |
gnā vasā̍na̱ oṣa̍dhī̱ramṛ̍dhrastri̱dhātu̍śṛṅgo vṛṣa̱bho va̍yo̱dhāḥ || 5.043.13
mā̱tuṣpa̱de pa̍ra̱me śu̱kra ā̱yorvi̍pa̱nyavo̍ rāspi̱rāso̍ agman |
su̱śevya̱ṁ nama̍sā rā̱taha̍vyā̱ḥ śiśu̍ṁ mṛjantyā̱yavo̱ na vā̱se || 5.043.14
bṛ̱hadvayo̍ bṛha̱te tubhya̍magne dhiyā̱juro̍ mithu̱nāsa̍ḥ sacanta |
de̱vode̍vaḥ su̱havo̍ bhūtu̱ mahya̱ṁ mā no̍ mā̱tā pṛ̍thi̱vī du̍rma̱tau dhā̍t || 5.043.15
u̱rau de̍vā anibā̱dhe syā̍ma || 5.043.16
sama̱śvino̱rava̍sā̱ nūta̍nena mayo̱bhuvā̍ su̱praṇī̍tī gamema |
ā no̍ ra̱yiṁ va̍hata̱mota vī̱rānā viśvā̍nyamṛtā̱ saubha̍gāni || 5.043.17
taṁ pra̱tnathā̍ pū̱rvathā̍ vi̱śvathe̱mathā̍ jye̱ṣṭhatā̍tiṁ barhi̱ṣada̍ṁ sva̱rvida̍m |
pra̱tī̱cī̱naṁ vṛ̱jana̍ṁ dohase gi̱rāśuṁ jaya̍nta̱manu̱ yāsu̱ vardha̍se || 5.044.01
śri̱ye su̱dṛśī̱rupa̍rasya̱ yāḥ sva̍rvi̱roca̍mānaḥ ka̱kubhā̍maco̱date̍ |
su̱go̱pā a̍si̱ na dabhā̍ya sukrato pa̱ro mā̱yābhi̍rṛ̱ta ā̍sa̱ nāma̍ te || 5.044.02
atya̍ṁ ha̱viḥ sa̍cate̱ sacca̱ dhātu̱ cāri̍ṣṭagātu̱ḥ sa hotā̍ saho̱bhari̍ḥ |
pra̱sarsrā̍ṇo̱ anu̍ ba̱rhirvṛṣā̱ śiśu̱rmadhye̱ yuvā̱jaro̍ vi̱sruhā̍ hi̱taḥ || 5.044.03
pra va̍ e̱te su̱yujo̱ yāma̍nni̱ṣṭaye̱ nīcī̍ra̱muṣmai̍ ya̱mya̍ ṛtā̱vṛdha̍ḥ |
su̱yantu̍bhiḥ sarvaśā̱saira̱bhīśu̍bhi̱ḥ krivi̱rnāmā̍ni prava̱ṇe mu̍ṣāyati || 5.044.04
sa̱ṁjarbhu̍rāṇa̱staru̍bhiḥ sute̱gṛbha̍ṁ vayā̱kina̍ṁ ci̱ttaga̍rbhāsu su̱svaru̍ḥ |
dhā̱ra̱vā̱keṣvṛ̍jugātha śobhase̱ vardha̍sva̱ patnī̍ra̱bhi jī̱vo a̍dhva̱re || 5.044.05
yā̱dṛge̱va dadṛ̍śe tā̱dṛgu̍cyate̱ saṁ chā̱yayā̍ dadhire si̱dhrayā̱psvā |
ma̱hīma̱smabhya̍muru̱ṣāmu̱ru jrayo̍ bṛ̱hatsu̱vīra̱mana̍pacyuta̱ṁ saha̍ḥ || 5.044.06
vetyagru̱rjani̍vā̱nvā ati̱ spṛdha̍ḥ samarya̱tā mana̍sā̱ sūrya̍ḥ ka̱viḥ |
ghra̱ṁsaṁ rakṣa̍nta̱ṁ pari̍ vi̱śvato̱ gaya̍ma̱smāka̱ṁ śarma̍ vanava̱tsvāva̍suḥ || 5.044.07
jyāyā̍ṁsama̱sya ya̱tuna̍sya ke̱tuna̍ ṛṣisva̱raṁ ca̍rati̱ yāsu̱ nāma̍ te |
yā̱dṛśmi̱ndhāyi̱ tama̍pa̱syayā̍ vida̱dya u̍ sva̱yaṁ vaha̍te̱ so ara̍ṁ karat || 5.044.08
sa̱mu̱dramā̍sā̱mava̍ tasthe agri̱mā na ri̍ṣyati̱ sava̍na̱ṁ yasmi̱nnāya̍tā |
atrā̱ na hārdi̍ krava̱ṇasya̍ rejate̱ yatrā̍ ma̱tirvi̱dyate̍ pūta̱bandha̍nī || 5.044.09
sa hi kṣa̱trasya̍ mana̱sasya̱ citti̍bhirevāva̱dasya̍ yaja̱tasya̱ sadhre̍ḥ |
a̱va̱tsā̱rasya̍ spṛṇavāma̱ raṇva̍bhi̱ḥ śavi̍ṣṭha̱ṁ vāja̍ṁ vi̱duṣā̍ ci̱dardhya̍m || 5.044.10
śye̱na ā̍sā̱madi̍tiḥ ka̱kṣyo̱3̱̍ mado̍ vi̱śvavā̍rasya yaja̱tasya̍ mā̱yina̍ḥ |
sama̱nyama̍nyamarthaya̱ntyeta̍ve vi̱durvi̱ṣāṇa̍ṁ pari̱pāna̱manti̱ te || 5.044.11
sa̱dā̱pṛ̱ṇo ya̍ja̱to vi dviṣo̍ vadhīdbāhuvṛ̱ktaḥ śru̍ta̱vittaryo̍ va̱ḥ sacā̍ |
u̱bhā sa varā̱ pratye̍ti̱ bhāti̍ ca̱ yadī̍ṁ ga̱ṇaṁ bhaja̍te supra̱yāva̍bhiḥ || 5.044.12
su̱ta̱mbha̱ro yaja̍mānasya̱ satpa̍ti̱rviśvā̍sā̱mūdha̱ḥ sa dhi̱yāmu̱dañca̍naḥ |
bhara̍ddhe̱nū rasa̍vacchiśriye̱ payo̍'nubruvā̱ṇo adhye̍ti̱ na sva̱pan || 5.044.13
yo jā̱gāra̱ tamṛca̍ḥ kāmayante̱ yo jā̱gāra̱ tamu̱ sāmā̍ni yanti |
yo jā̱gāra̱ tama̱yaṁ soma̍ āha̱ tavā̱hama̍smi sa̱khye nyo̍kāḥ || 5.044.14
a̱gnirjā̍gāra̱ tamṛca̍ḥ kāmayante̱'gnirjā̍gāra̱ tamu̱ sāmā̍ni yanti |
a̱gnirjā̍gāra̱ tama̱yaṁ soma̍ āha̱ tavā̱hama̍smi sa̱khye nyo̍kāḥ || 5.044.15
vi̱dā di̱vo vi̱ṣyannadri̍mu̱kthairā̍ya̱tyā u̱ṣaso̍ a̱rcino̍ guḥ |
apā̍vṛta vra̱jinī̱rutsva̍rgā̱dvi duro̱ mānu̍ṣīrde̱va ā̍vaḥ || 5.045.01
vi sūryo̍ a̱mati̱ṁ na śriya̍ṁ sā̱dorvādgavā̍ṁ mā̱tā jā̍na̱tī gā̍t |
dhanva̍rṇaso na̱dya1̱̍ḥ khādo̍arṇā̱ḥ sthūṇe̍va̱ sumi̍tā dṛṁhata̱ dyauḥ || 5.045.02
a̱smā u̱kthāya̱ parva̍tasya̱ garbho̍ ma̱hīnā̍ṁ ja̱nuṣe̍ pū̱rvyāya̍ |
vi parva̍to̱ jihī̍ta̱ sādha̍ta̱ dyaurā̱vivā̍santo dasayanta̱ bhūma̍ || 5.045.03
sū̱ktebhi̍rvo̱ vaco̍bhirde̱vaju̍ṣṭai̱rindrā̱ nva1̱̍gnī ava̍se hu̱vadhyai̍ |
u̱kthebhi̱rhi ṣmā̍ ka̱vaya̍ḥ suya̱jñā ā̱vivā̍santo ma̱ruto̱ yaja̍nti || 5.045.04
eto̱ nva1̱̍dya su̱dhyo̱3̱̍ bhavā̍ma̱ pra du̱cchunā̍ minavāmā̱ varī̍yaḥ |
ā̱re dveṣā̍ṁsi sanu̱tarda̍dhā̱māyā̍ma̱ prāñco̱ yaja̍māna̱maccha̍ || 5.045.05
etā̱ dhiya̍ṁ kṛ̱ṇavā̍mā sakhā̱yo'pa̱ yā mā̱tā ṛ̍ṇu̱ta vra̱jaṁ goḥ |
yayā̱ manu̍rviśiśi̱praṁ ji̱gāya̱ yayā̍ va̱ṇigva̱ṅkurāpā̱ purī̍ṣam || 5.045.06
anū̍no̱datra̱ hasta̍yato̱ adri̱rārca̱nyena̱ daśa̍ mā̱so nava̍gvāḥ |
ṛ̱taṁ ya̱tī sa̱ramā̱ gā a̍vinda̱dviśvā̍ni sa̱tyāṅgi̍rāścakāra || 5.045.07
viśve̍ a̱syā vyuṣi̱ māhi̍nāyā̱ḥ saṁ yadgobhi̱raṅgi̍raso̱ nava̍nta |
utsa̍ āsāṁ para̱me sa̱dhastha̍ ṛ̱tasya̍ pa̱thā sa̱ramā̍ vida̱dgāḥ || 5.045.08
ā sūryo̍ yātu sa̱ptāśva̱ḥ kṣetra̱ṁ yada̍syorvi̱yā dī̍rghayā̱the |
ra̱ghuḥ śye̱naḥ pa̍taya̱dandho̱ acchā̱ yuvā̍ ka̱virdī̍daya̱dgoṣu̱ gaccha̍n || 5.045.09
ā sūryo̍ aruhacchu̱kramarṇo'yu̍kta̱ yaddha̱rito̍ vī̱tapṛ̍ṣṭhāḥ |
u̱dnā na nāva̍manayanta̱ dhīrā̍ āśṛṇva̱tīrāpo̍ a̱rvāga̍tiṣṭhan || 5.045.10
dhiya̍ṁ vo a̱psu da̍dhiṣe sva̱rṣāṁ yayāta̍ra̱ndaśa̍ mā̱so nava̍gvāḥ |
a̱yā dhi̱yā syā̍ma de̱vago̍pā a̱yā dhi̱yā tu̍turyā̱mātyaṁha̍ḥ || 5.045.11
hayo̱ na vi̱dvā a̍yuji sva̱yaṁ dhu̱ri tāṁ va̍hāmi pra̱tara̍ṇīmava̱syuva̍m |
nāsyā̍ vaśmi vi̱muca̱ṁ nāvṛta̱ṁ puna̍rvi̱dvānpa̱thaḥ pu̍rae̱ta ṛ̱ju ne̍ṣati || 5.046.01
agna̱ indra̱ varu̍ṇa̱ mitra̱ devā̱ḥ śardha̱ḥ pra ya̍nta̱ māru̍to̱ta vi̍ṣṇo |
u̱bhā nāsa̍tyā ru̱dro adha̱ gnāḥ pū̱ṣā bhaga̱ḥ sara̍svatī juṣanta || 5.046.02
i̱ndrā̱gnī mi̱trāvaru̱ṇādi̍ti̱ṁ sva̍ḥ pṛthi̱vīṁ dyāṁ ma̱ruta̱ḥ parva̍tā a̱paḥ |
hu̱ve viṣṇu̍ṁ pū̱ṣaṇa̱ṁ brahma̍ṇa̱spati̱ṁ bhaga̱ṁ nu śaṁsa̍ṁ savi̱tāra̍mū̱taye̍ || 5.046.03
u̱ta no̱ viṣṇu̍ru̱ta vāto̍ a̱sridho̍ draviṇo̱dā u̱ta somo̱ maya̍skarat |
u̱ta ṛ̱bhava̍ u̱ta rā̱ye no̍ a̱śvino̱ta tvaṣṭo̱ta vibhvānu̍ maṁsate || 5.046.04
u̱ta tyanno̱ māru̍ta̱ṁ śardha̱ ā ga̍maddivikṣa̱yaṁ ya̍ja̱taṁ ba̱rhirā̱sade̍ |
bṛha̱spati̱ḥ śarma̍ pū̱ṣota no̍ yamadvarū̱thyaṁ1̱̍ varu̍ṇo mi̱tro a̍rya̱mā || 5.046.05
u̱ta tye na̱ḥ parva̍tāsaḥ suśa̱staya̍ḥ sudī̱tayo̍ na̱dya1̱̍strāma̍ṇe bhuvan |
bhago̍ vibha̱ktā śava̱sāva̱sā ga̍maduru̱vyacā̱ adi̍tiḥ śrotu me̱ hava̍m || 5.046.06
de̱vānā̱ṁ patnī̍ruśa̱tīra̍vantu na̱ḥ prāva̍ntu nastu̱jaye̱ vāja̍sātaye |
yāḥ pārthi̍vāso̱ yā a̱pāmapi̍ vra̱te tā no̍ devīḥ suhavā̱ḥ śarma̍ yacchata || 5.046.07
u̱ta gnā vya̍ntu de̱vapa̍tnīrindrā̱ṇya1̱̍gnāyya̱śvinī̱ rāṭ |
ā roda̍sī varuṇā̱nī śṛ̍ṇotu̱ vyantu̍ de̱vīrya ṛ̱turjanī̍nām || 5.046.08
pra̱yu̱ñja̱tī di̱va e̍ti bruvā̱ṇā ma̱hī mā̱tā du̍hi̱turbo̱dhaya̍ntī |
ā̱vivā̍santī yuva̱tirma̍nī̱ṣā pi̱tṛbhya̱ ā sada̍ne̱ johu̍vānā || 5.047.01
a̱ji̱rāsa̱stada̍pa̱ īya̍mānā ātasthi̱vāṁso̍ a̱mṛta̍sya̱ nābhi̍m |
a̱na̱ntāsa̍ u̱ravo̍ vi̱śvata̍ḥ sī̱ṁ pari̱ dyāvā̍pṛthi̱vī ya̍nti̱ panthā̍ḥ || 5.047.02
u̱kṣā sa̍mu̱dro a̍ru̱ṣaḥ su̍pa̱rṇaḥ pūrva̍sya̱ yoni̍ṁ pi̱turā vi̍veśa |
madhye̍ di̱vo nihi̍ta̱ḥ pṛśni̱raśmā̱ vi ca̍krame̱ raja̍saspā̱tyantau̍ || 5.047.03
ca̱tvāra̍ īṁ bibhrati kṣema̱yanto̱ daśa̱ garbha̍ṁ ca̱rase̍ dhāpayante |
tri̱dhāta̍vaḥ para̱mā a̍sya̱ gāvo̍ di̱vaśca̍ranti̱ pari̍ sa̱dyo antā̍n || 5.047.04
i̱daṁ vapu̍rni̱vaca̍naṁ janāsa̱ścara̍nti̱ yanna̱dya̍sta̱sthurāpa̍ḥ |
dve yadī̍ṁ bibhṛ̱to mā̱tura̱nye i̱heha̍ jā̱te ya̱myā̱3̱̍ saba̍ndhū || 5.047.05
vi ta̍nvate̱ dhiyo̍ asmā̱ apā̍ṁsi̱ vastrā̍ pu̱trāya̍ mā̱taro̍ vayanti |
u̱pa̱pra̱kṣe vṛṣa̍ṇo̱ moda̍mānā di̱vaspa̱thā va̱dhvo̍ ya̱ntyaccha̍ || 5.047.06
tada̍stu mitrāvaruṇā̱ tada̍gne̱ śaṁ yora̱smabhya̍mi̱dama̍stu śa̱stam |
a̱śī̱mahi̍ gā̱dhamu̱ta pra̍ti̱ṣṭhāṁ namo̍ di̱ve bṛ̍ha̱te sāda̍nāya || 5.047.07
kadu̍ pri̱yāya̱ dhāmne̍ manāmahe̱ svakṣa̍trāya̱ svaya̍śase ma̱he va̱yam |
ā̱me̱nyasya̱ raja̍so̱ yada̱bhra ā a̱po vṛ̍ṇā̱nā vi̍ta̱noti̍ mā̱yinī̍ || 5.048.01
tā a̍tnata va̱yuna̍ṁ vī̱rava̍kṣaṇaṁ samā̱nyā vṛ̱tayā̱ viśva̱mā raja̍ḥ |
apo̱ apā̍cī̱rapa̍rā̱ ape̍jate̱ pra pūrvā̍bhistirate deva̱yurjana̍ḥ || 5.048.02
ā grāva̍bhiraha̱nye̍bhira̱ktubhi̱rvari̍ṣṭha̱ṁ vajra̱mā ji̍gharti mā̱yini̍ |
śa̱taṁ vā̱ yasya̍ pra̱cara̱nsve dame̍ saṁva̱rtaya̍nto̱ vi ca̍ vartaya̱nnahā̍ || 5.048.03
tāma̍sya rī̱tiṁ pa̍ra̱śori̍va̱ pratyanī̍kamakhyaṁ bhu̱je a̍sya̱ varpa̍saḥ |
sacā̱ yadi̍ pitu̱manta̍miva̱ kṣaya̱ṁ ratna̱ṁ dadhā̍ti̱ bhara̍hūtaye vi̱śe || 5.048.04
sa ji̱hvayā̱ catu̍ranīka ṛñjate̱ cāru̱ vasā̍no̱ varu̍ṇo̱ yata̍nna̱rim |
na tasya̍ vidma puruṣa̱tvatā̍ va̱yaṁ yato̱ bhaga̍ḥ savi̱tā dāti̱ vārya̍m || 5.048.05
de̱vaṁ vo̍ a̱dya sa̍vi̱tāra̱meṣe̱ bhaga̍ṁ ca̱ ratna̍ṁ vi̱bhaja̍ntamā̱yoḥ |
ā vā̍ṁ narā purubhujā vavṛtyāṁ di̱vedi̍ve cidaśvinā sakhī̱yan || 5.049.01
prati̍ pra̱yāṇa̱masu̍rasya vi̱dvānsū̱ktairde̱vaṁ sa̍vi̱tāra̍ṁ duvasya |
upa̍ bruvīta̱ nama̍sā vijā̱nañjyeṣṭha̍ṁ ca̱ ratna̍ṁ vi̱bhaja̍ntamā̱yoḥ || 5.049.02
a̱da̱tra̱yā da̍yate̱ vāryā̍ṇi pū̱ṣā bhago̱ adi̍ti̱rvasta̍ u̱sraḥ |
indro̱ viṣṇu̱rvaru̍ṇo mi̱tro a̱gnirahā̍ni bha̱drā ja̍nayanta da̱smāḥ || 5.049.03
tanno̍ ana̱rvā sa̍vi̱tā varū̍tha̱ṁ tatsindha̍va i̱ṣaya̍nto̱ anu̍ gman |
upa̱ yadvoce̍ adhva̱rasya̱ hotā̍ rā̱yaḥ syā̍ma̱ pata̍yo̱ vāja̍ratnāḥ || 5.049.04
pra ye vasu̍bhya̱ īva̱dā namo̱ durye mi̱tre varu̍ṇe sū̱ktavā̍caḥ |
avai̱tvabhva̍ṁ kṛṇu̱tā varī̍yo di̱vaspṛ̍thi̱vyorava̍sā madema || 5.049.05
viśvo̍ de̱vasya̍ ne̱turmarto̍ vurīta sa̱khyam |
viśvo̍ rā̱ya i̍ṣudhyati dyu̱mnaṁ vṛ̍ṇīta pu̱ṣyase̍ || 5.050.01
te te̍ deva neta̱rye ce̱mā a̍nu̱śase̍ |
te rā̱yā te hyā̱3̱̍pṛce̱ sace̍mahi saca̱thyai̍ḥ || 5.050.02
ato̍ na̱ ā nṝnati̍thī̱nata̱ḥ patnī̍rdaśasyata |
ā̱re viśva̍ṁ pathe̱ṣṭhāṁ dvi̱ṣo yu̍yotu̱ yūyu̍viḥ || 5.050.03
yatra̱ vahni̍ra̱bhihi̍to du̱drava̱ddroṇya̍ḥ pa̱śuḥ |
nṛ̱maṇā̍ vī̱rapa̱styo'rṇā̱ dhīre̍va̱ sani̍tā || 5.050.04
e̱ṣa te̍ deva netā̱ ratha̱spati̱ḥ śaṁ ra̱yiḥ |
śaṁ rā̱ye śaṁ sva̱staya̍ iṣa̱ḥstuto̍ manāmahe deva̱stuto̍ manāmahe || 5.050.05
agne̍ su̱tasya̍ pī̱taye̱ viśvai̱rūme̍bhi̱rā ga̍hi |
de̱vebhi̍rha̱vyadā̍taye || 5.051.01
ṛta̍dhītaya̱ ā ga̍ta̱ satya̍dharmāṇo adhva̱ram |
a̱gneḥ pi̍bata ji̱hvayā̍ || 5.051.02
vipre̍bhirvipra santya prāta̱ryāva̍bhi̱rā ga̍hi |
de̱vebhi̱ḥ soma̍pītaye || 5.051.03
a̱yaṁ soma̍śca̱mū su̱to'ma̍tre̱ pari̍ ṣicyate |
pri̱ya indrā̍ya vā̱yave̍ || 5.051.04
vāya̱vā yā̍hi vī̱taye̍ juṣā̱ṇo ha̱vyadā̍taye |
pibā̍ su̱tasyāndha̍so a̱bhi praya̍ḥ || 5.051.05
indra̍śca vāyaveṣāṁ su̱tānā̍ṁ pī̱tima̍rhathaḥ |
tāñju̍ṣethāmare̱pasā̍va̱bhi praya̍ḥ || 5.051.06
su̱tā indrā̍ya vā̱yave̱ somā̍so̱ dadhyā̍śiraḥ |
ni̱mnaṁ na ya̍nti̱ sindha̍vo̱'bhi praya̍ḥ || 5.051.07
sa̱jūrviśve̍bhirde̱vebhi̍ra̱śvibhyā̍mu̱ṣasā̍ sa̱jūḥ |
ā yā̍hyagne atri̱vatsu̱te ra̍ṇa || 5.051.08
sa̱jūrmi̱trāvaru̍ṇābhyāṁ sa̱jūḥ some̍na̱ viṣṇu̍nā |
ā yā̍hyagne atri̱vatsu̱te ra̍ṇa || 5.051.09
sa̱jūrā̍di̱tyairvasu̍bhiḥ sa̱jūrindre̍ṇa vā̱yunā̍ |
ā yā̍hyagne atri̱vatsu̱te ra̍ṇa || 5.051.10
sva̱sti no̍ mimītāma̱śvinā̱ bhaga̍ḥ sva̱sti de̱vyadi̍tirana̱rvaṇa̍ḥ |
sva̱sti pū̱ṣā asu̍ro dadhātu naḥ sva̱sti dyāvā̍pṛthi̱vī su̍ce̱tunā̍ || 5.051.11
sva̱staye̍ vā̱yumupa̍ bravāmahai̱ soma̍ṁ sva̱sti bhuva̍nasya̱ yaspati̍ḥ |
bṛha̱spati̱ṁ sarva̍gaṇaṁ sva̱staye̍ sva̱staya̍ ādi̱tyāso̍ bhavantu naḥ || 5.051.12
viśve̍ de̱vā no̍ a̱dyā sva̱staye̍ vaiśvāna̱ro vasu̍ra̱gniḥ sva̱staye̍ |
de̱vā a̍vantvṛ̱bhava̍ḥ sva̱staye̍ sva̱sti no̍ ru̱draḥ pā̱tvaṁha̍saḥ || 5.051.13
sva̱sti mi̍trāvaruṇā sva̱sti pa̍thye revati |
sva̱sti na̱ indra̍ścā̱gniśca̍ sva̱sti no̍ adite kṛdhi || 5.051.14
sva̱sti panthā̱manu̍ carema sūryācandra̱masā̍viva |
puna̱rdada̱tāghna̍tā jāna̱tā saṁ ga̍memahi || 5.051.15
pra śyā̍vāśva dhṛṣṇu̱yārcā̍ ma̱rudbhi̱rṛkva̍bhiḥ |
ye a̍dro̱ghama̍nuṣva̱dhaṁ śravo̱ mada̍nti ya̱jñiyā̍ḥ || 5.052.01
te hi sthi̱rasya̱ śava̍sa̱ḥ sakhā̍ya̱ḥ santi̍ dhṛṣṇu̱yā |
te yāma̱nnā dhṛ̍ṣa̱dvina̱stmanā̍ pānti̱ śaśva̍taḥ || 5.052.02
te sya̱ndrāso̱ nokṣaṇo'ti̍ ṣkandanti̱ śarva̍rīḥ |
ma̱rutā̱madhā̱ maho̍ di̱vi kṣa̱mā ca̍ manmahe || 5.052.03
ma̱rutsu̍ vo dadhīmahi̱ stoma̍ṁ ya̱jñaṁ ca̍ dhṛṣṇu̱yā |
viśve̱ ye mānu̍ṣā yu̱gā pānti̱ martya̍ṁ ri̱ṣaḥ || 5.052.04
arha̍nto̱ ye su̱dāna̍vo̱ naro̱ asā̍miśavasaḥ |
pra ya̱jñaṁ ya̱jñiye̍bhyo di̱vo a̍rcā ma̱rudbhya̍ḥ || 5.052.05
ā ru̱kmairā yu̱dhā nara̍ ṛ̱ṣvā ṛ̱ṣṭīra̍sṛkṣata |
anve̍nā̱ aha̍ vi̱dyuto̍ ma̱ruto̱ jajjha̍tīriva bhā̱nura̍rta̱ tmanā̍ di̱vaḥ || 5.052.06
ye vā̍vṛ̱dhanta̱ pārthi̍vā̱ ya u̱rāva̱ntari̍kṣa̱ ā |
vṛ̱jane̍ vā na̱dīnā̍ṁ sa̱dhasthe̍ vā ma̱ho di̱vaḥ || 5.052.07
śardho̱ māru̍ta̱muccha̍ṁsa sa̱tyaśa̍vasa̱mṛbhva̍sam |
u̱ta sma̱ te śu̱bhe nara̱ḥ pra sya̱ndrā yu̍jata̱ tmanā̍ || 5.052.08
u̱ta sma̱ te paru̍ṣṇyā̱mūrṇā̍ vasata śu̱ndhyava̍ḥ |
u̱ta pa̱vyā rathā̍nā̱madri̍ṁ bhinda̱ntyoja̍sā || 5.052.09
āpa̍thayo̱ vipa̍tha̱yo'nta̍spathā̱ anu̍pathāḥ |
e̱tebhi̱rmahya̱ṁ nāma̍bhirya̱jñaṁ vi̍ṣṭā̱ra o̍hate || 5.052.10
adhā̱ naro̱ nyo̍ha̱te'dhā̍ ni̱yuta̍ ohate |
adhā̱ pārā̍vatā̱ iti̍ ci̱trā rū̱pāṇi̱ darśyā̍ || 5.052.11
cha̱nda̱ḥstubha̍ḥ kubha̱nyava̱ utsa̱mā kī̱riṇo̍ nṛtuḥ |
te me̱ ke ci̱nna tā̱yava̱ ūmā̍ āsandṛ̱śi tvi̱ṣe || 5.052.12
ya ṛ̱ṣvā ṛ̱ṣṭivi̍dyutaḥ ka̱vaya̱ḥ santi̍ ve̱dhasa̍ḥ |
tamṛ̍ṣe̱ māru̍taṁ ga̱ṇaṁ na̍ma̱syā ra̱mayā̍ gi̱rā || 5.052.13
accha̍ ṛṣe̱ māru̍taṁ ga̱ṇaṁ dā̱nā mi̱traṁ na yo̱ṣaṇā̍ |
di̱vo vā̍ dhṛṣṇava̱ oja̍sā stu̱tā dhī̱bhiri̍ṣaṇyata || 5.052.14
nū ma̍nvā̱na e̍ṣāṁ de̱vā acchā̱ na va̱kṣaṇā̍ |
dā̱nā sa̍ceta sū̱ribhi̱ryāma̍śrutebhira̱ñjibhi̍ḥ || 5.052.15
pra ye me̍ bandhve̱ṣe gāṁ voca̍nta sū̱raya̱ḥ pṛśni̍ṁ vocanta mā̱tara̍m |
adhā̍ pi̱tara̍mi̱ṣmiṇa̍ṁ ru̱draṁ vo̍canta̱ śikva̍saḥ || 5.052.16
sa̱pta me̍ sa̱pta śā̱kina̱ eka̍mekā śa̱tā da̍duḥ |
ya̱munā̍yā̱madhi̍ śru̱tamudrādho̱ gavya̍ṁ mṛje̱ ni rādho̱ aśvya̍ṁ mṛje || 5.052.17
ko ve̍da̱ jāna̍meṣā̱ṁ ko vā̍ pu̱rā su̱mneṣvā̍sa ma̱rutā̍m |
yadyu̍yu̱jre ki̍lā̱sya̍ḥ || 5.053.01
aitānrathe̍ṣu ta̱sthuṣa̱ḥ kaḥ śu̍śrāva ka̱thā ya̍yuḥ |
kasmai̍ sasruḥ su̱dāse̱ anvā̱paya̱ iḻā̍bhirvṛ̱ṣṭaya̍ḥ sa̱ha || 5.053.02
te ma̍ āhu̱rya ā̍ya̱yurupa̱ dyubhi̱rvibhi̱rmade̍ |
naro̱ maryā̍ are̱pasa̍ i̱mānpaśya̱nniti̍ ṣṭuhi || 5.053.03
ye a̱ñjiṣu̱ ye vāśī̍ṣu̱ svabhā̍navaḥ sra̱kṣu ru̱kmeṣu̍ khā̱diṣu̍ |
śrā̱yā rathe̍ṣu̱ dhanva̍su || 5.053.04
yu̱ṣmāka̍ṁ smā̱ rathā̱ anu̍ mu̱de da̍dhe maruto jīradānavaḥ |
vṛ̱ṣṭī dyāvo̍ ya̱tīri̍va || 5.053.05
ā yaṁ nara̍ḥ su̱dāna̍vo dadā̱śuṣe̍ di̱vaḥ kośa̱macu̍cyavuḥ |
vi pa̱rjanya̍ṁ sṛjanti̱ roda̍sī̱ anu̱ dhanva̍nā yanti vṛ̱ṣṭaya̍ḥ || 5.053.06
ta̱tṛ̱dā̱nāḥ sindha̍va̱ḥ kṣoda̍sā̱ raja̱ḥ pra sa̍srurdhe̱navo̍ yathā |
sya̱nnā aśvā̍ i̱vādhva̍no vi̱moca̍ne̱ vi yadvarta̍nta e̱nya̍ḥ || 5.053.07
ā yā̍ta maruto di̱va āntari̍kṣāda̱mādu̱ta |
māva̍ sthāta parā̱vata̍ḥ || 5.053.08
mā vo̍ ra̱sāni̍tabhā̱ kubhā̱ krumu̱rmā va̱ḥ sindhu̱rni rī̍ramat |
mā va̱ḥ pari̍ ṣṭhātsa̱rayu̍ḥ purī̱ṣiṇya̱sme itsu̱mnama̍stu vaḥ || 5.053.09
taṁ va̱ḥ śardha̱ṁ rathā̍nāṁ tve̱ṣaṁ ga̱ṇaṁ māru̍ta̱ṁ navya̍sīnām |
anu̱ pra ya̍nti vṛ̱ṣṭaya̍ḥ || 5.053.10
śardha̍ṁśardhaṁ va eṣā̱ṁ vrāta̍ṁvrātaṁ ga̱ṇaṁga̍ṇaṁ suśa̱stibhi̍ḥ |
anu̍ krāmema dhī̱tibhi̍ḥ || 5.053.11
kasmā̍ a̱dya sujā̍tāya rā̱taha̍vyāya̱ pra ya̍yuḥ |
e̱nā yāme̍na ma̱ruta̍ḥ || 5.053.12
yena̍ to̱kāya̱ tana̍yāya dhā̱nyaṁ1̱̍ bīja̱ṁ vaha̍dhve̱ akṣi̍tam |
a̱smabhya̱ṁ taddha̍ttana̱ yadva̱ īma̍he̱ rādho̍ vi̱śvāyu̱ saubha̍gam || 5.053.13
atī̍yāma ni̱dasti̱raḥ sva̱stibhi̍rhi̱tvāva̱dyamarā̍tīḥ |
vṛ̱ṣṭvī śaṁ yorāpa̍ u̱sri bhe̍ṣa̱jaṁ syāma̍ marutaḥ sa̱ha || 5.053.14
su̱de̱vaḥ sa̍mahāsati su̱vīro̍ naro maruta̱ḥ sa martya̍ḥ |
yaṁ trāya̍dhve̱ syāma̱ te || 5.053.15
stu̱hi bho̱jānstu̍va̱to a̍sya̱ yāma̍ni̱ raṇa̱ngāvo̱ na yava̍se |
ya̱taḥ pūrvā̍ iva̱ sakhī̱ranu̍ hvaya gi̱rā gṛ̍ṇīhi kā̱mina̍ḥ || 5.053.16
pra śardhā̍ya̱ māru̍tāya̱ svabhā̍nava i̱māṁ vāca̍manajā parvata̱cyute̍ |
gha̱rma̱stubhe̍ di̱va ā pṛ̍ṣṭha̱yajva̍ne dyu̱mnaśra̍vase̱ mahi̍ nṛ̱mṇama̍rcata || 5.054.01
pra vo̍ marutastavi̱ṣā u̍da̱nyavo̍ vayo̱vṛdho̍ aśva̱yuja̱ḥ pari̍jrayaḥ |
saṁ vi̱dyutā̱ dadha̍ti̱ vāśa̍ti tri̱taḥ svara̱ntyāpo̱'vanā̱ pari̍jrayaḥ || 5.054.02
vi̱dyunma̍haso̱ naro̱ aśma̍didyavo̱ vāta̍tviṣo ma̱ruta̍ḥ parvata̱cyuta̍ḥ |
a̱bda̱yā ci̱nmuhu̱rā hrā̍dunī̱vṛta̍ḥ sta̱naya̍damā rabha̱sā udo̍jasaḥ || 5.054.03
vya1̱̍ktūnru̍drā̱ vyahā̍ni śikvaso̱ vya1̱̍ntari̍kṣa̱ṁ vi rajā̍ṁsi dhūtayaḥ |
vi yadajrā̱ aja̍tha̱ nāva̍ īṁ yathā̱ vi du̱rgāṇi̍ maruto̱ nāha̍ riṣyatha || 5.054.04
tadvī̱rya̍ṁ vo maruto mahitva̱naṁ dī̱rghaṁ ta̍tāna̱ sūryo̱ na yoja̍nam |
etā̱ na yāme̱ agṛ̍bhītaśoci̱ṣo'na̍śvadā̱ṁ yannyayā̍tanā gi̱rim || 5.054.05
abhrā̍ji̱ śardho̍ maruto̱ yada̍rṇa̱saṁ moṣa̍thā vṛ̱kṣaṁ ka̍pa̱neva̍ vedhasaḥ |
adha̍ smā no a̱rama̍tiṁ sajoṣasa̱ścakṣu̍riva̱ yanta̱manu̍ neṣathā su̱gam || 5.054.06
na sa jī̍yate maruto̱ na ha̍nyate̱ na sre̍dhati̱ na vya̍thate̱ na ri̍ṣyati |
nāsya̱ rāya̱ upa̍ dasyanti̱ notaya̱ ṛṣi̍ṁ vā̱ yaṁ rājā̍naṁ vā̱ suṣū̍datha || 5.054.07
ni̱yutva̍nto grāma̱jito̱ yathā̱ naro̍'rya̱maṇo̱ na ma̱ruta̍ḥ kaba̱ndhina̍ḥ |
pinva̱ntyutsa̱ṁ yadi̱nāso̱ asva̍ra̱nvyu̍ndanti pṛthi̱vīṁ madhvo̱ andha̍sā || 5.054.08
pra̱vatva̍tī̱yaṁ pṛ̍thi̱vī ma̱rudbhya̍ḥ pra̱vatva̍tī̱ dyaurbha̍vati pra̱yadbhya̍ḥ |
pra̱vatva̍tīḥ pa̱thyā̍ a̱ntari̍kṣyāḥ pra̱vatva̍nta̱ḥ parva̍tā jī̱radā̍navaḥ || 5.054.09
yanma̍rutaḥ sabharasaḥ svarṇara̱ḥ sūrya̱ udi̍te̱ mada̍thā divo naraḥ |
na vo'śvā̍ḥ śrathaya̱ntāha̱ sisra̍taḥ sa̱dyo a̱syādhva̍naḥ pā̱rama̍śnutha || 5.054.10
aṁse̍ṣu va ṛ̱ṣṭaya̍ḥ pa̱tsu khā̱dayo̱ vakṣa̍ssu ru̱kmā ma̍ruto̱ rathe̱ śubha̍ḥ |
a̱gnibhrā̍jaso vi̱dyuto̱ gabha̍styo̱ḥ śiprā̍ḥ śī̱rṣasu̱ vita̍tā hira̱ṇyayī̍ḥ || 5.054.11
taṁ nāka̍ma̱ryo agṛ̍bhītaśociṣa̱ṁ ruśa̱tpippa̍laṁ maruto̱ vi dhū̍nutha |
sama̍cyanta vṛ̱janāti̍tviṣanta̱ yatsvara̍nti̱ ghoṣa̱ṁ vita̍tamṛtā̱yava̍ḥ || 5.054.12
yu̱ṣmāda̍ttasya maruto vicetaso rā̱yaḥ syā̍ma ra̱thyo̱3̱̍ vaya̍svataḥ |
na yo yuccha̍ti ti̱ṣyo̱3̱̍ yathā̍ di̱vo̱3̱̍'sme rā̍ranta marutaḥ saha̱sriṇa̍m || 5.054.13
yū̱yaṁ ra̱yiṁ ma̍rutaḥ spā̱rhavī̍raṁ yū̱yamṛṣi̍mavatha̱ sāma̍vipram |
yū̱yamarva̍ntaṁ bhara̱tāya̱ vāja̍ṁ yū̱yaṁ dha̍ttha̱ rājā̍naṁ śruṣṭi̱manta̍m || 5.054.14
tadvo̍ yāmi̱ dravi̍ṇaṁ sadyaūtayo̱ yenā̱ sva1̱̍rṇa ta̱tanā̍ma̱ nṝra̱bhi |
i̱daṁ su me̍ maruto haryatā̱ vaco̱ yasya̱ tare̍ma̱ tara̍sā śa̱taṁ himā̍ḥ || 5.054.15
praya̍jyavo ma̱ruto̱ bhrāja̍dṛṣṭayo bṛ̱hadvayo̍ dadhire ru̱kmava̍kṣasaḥ |
īya̍nte̱ aśvai̍ḥ su̱yame̍bhirā̱śubhi̱ḥ śubha̍ṁ yā̱tāmanu̱ rathā̍ avṛtsata || 5.055.01
sva̱yaṁ da̍dhidhve̱ tavi̍ṣī̱ṁ yathā̍ vi̱da bṛ̱hanma̍hānta urvi̱yā vi rā̍jatha |
u̱tāntari̍kṣaṁ mamire̱ vyoja̍sā̱ śubha̍ṁ yā̱tāmanu̱ rathā̍ avṛtsata || 5.055.02
sā̱kaṁ jā̱tāḥ su̱bhva̍ḥ sā̱kamu̍kṣi̱tāḥ śri̱ye ci̱dā pra̍ta̱raṁ vā̍vṛdhu̱rnara̍ḥ |
vi̱ro̱kiṇa̱ḥ sūrya̍syeva ra̱śmaya̱ḥ śubha̍ṁ yā̱tāmanu̱ rathā̍ avṛtsata || 5.055.03
ā̱bhū̱ṣeṇya̍ṁ vo maruto mahitva̱naṁ di̍dṛ̱kṣeṇya̱ṁ sūrya̍syeva̱ cakṣa̍ṇam |
u̱to a̱smā a̍mṛta̱tve da̍dhātana̱ śubha̍ṁ yā̱tāmanu̱ rathā̍ avṛtsata || 5.055.04
udī̍rayathā marutaḥ samudra̱to yū̱yaṁ vṛ̱ṣṭiṁ va̍rṣayathā purīṣiṇaḥ |
na vo̍ dasrā̱ upa̍ dasyanti dhe̱nava̱ḥ śubha̍ṁ yā̱tāmanu̱ rathā̍ avṛtsata || 5.055.05
yadaśvā̍ndhū̱rṣu pṛṣa̍tī̱rayu̍gdhvaṁ hira̱ṇyayā̱npratyatkā̱ amu̍gdhvam |
viśvā̱ itspṛdho̍ maruto̱ vya̍syatha̱ śubha̍ṁ yā̱tāmanu̱ rathā̍ avṛtsata || 5.055.06
na parva̍tā̱ na na̱dyo̍ varanta vo̱ yatrāci̍dhvaṁ maruto̱ gaccha̱thedu̱ tat |
u̱ta dyāvā̍pṛthi̱vī yā̍thanā̱ pari̱ śubha̍ṁ yā̱tāmanu̱ rathā̍ avṛtsata || 5.055.07
yatpū̱rvyaṁ ma̍ruto̱ yacca̱ nūta̍na̱ṁ yadu̱dyate̍ vasavo̱ yacca̍ śa̱syate̍ |
viśva̍sya̱ tasya̍ bhavathā̱ nave̍dasa̱ḥ śubha̍ṁ yā̱tāmanu̱ rathā̍ avṛtsata || 5.055.08
mṛ̱ḻata̍ no maruto̱ mā va̍dhiṣṭanā̱smabhya̱ṁ śarma̍ bahu̱laṁ vi ya̍ntana |
adhi̍ sto̱trasya̍ sa̱khyasya̍ gātana̱ śubha̍ṁ yā̱tāmanu̱ rathā̍ avṛtsata || 5.055.09
yū̱yama̱smānna̍yata̱ vasyo̱ acchā̱ nira̍ṁha̱tibhyo̍ maruto gṛṇā̱nāḥ |
ju̱ṣadhva̍ṁ no ha̱vyadā̍tiṁ yajatrā va̱yaṁ syā̍ma̱ pata̍yo rayī̱ṇām || 5.055.10
agne̱ śardha̍nta̱mā ga̱ṇaṁ pi̱ṣṭaṁ ru̱kmebhi̍ra̱ñjibhi̍ḥ |
viśo̍ a̱dya ma̱rutā̱mava̍ hvaye di̱vaści̍droca̱nādadhi̍ || 5.056.01
yathā̍ ci̱nmanya̍se hṛ̱dā tadinme̍ jagmurā̱śasa̍ḥ |
ye te̱ nedi̍ṣṭha̱ṁ hava̍nānyā̱gama̱ntānva̍rdha bhī̱masa̍ṁdṛśaḥ || 5.056.02
mī̱ḻhuṣma̍tīva pṛthi̱vī parā̍hatā̱ mada̍ntyetya̱smadā |
ṛkṣo̱ na vo̍ maruta̱ḥ śimī̍vā̱ amo̍ du̱dhro gauri̍va bhīma̱yuḥ || 5.056.03
ni ye ri̱ṇantyoja̍sā̱ vṛthā̱ gāvo̱ na du̱rdhura̍ḥ |
aśmā̍naṁ citsva̱ryaṁ1̱̍ parva̍taṁ gi̱riṁ pra cyā̍vayanti̱ yāma̍bhiḥ || 5.056.04
utti̍ṣṭha nū̱name̍ṣā̱ṁ stomai̱ḥ samu̍kṣitānām |
ma̱rutā̍ṁ puru̱tama̱mapū̍rvya̱ṁ gavā̱ṁ sarga̍miva hvaye || 5.056.05
yu̱ṅgdhvaṁ hyaru̍ṣī̱ rathe̍ yu̱ṅgdhvaṁ rathe̍ṣu ro̱hita̍ḥ |
yu̱ṅgdhvaṁ harī̍ aji̱rā dhu̱ri voḻha̍ve̱ vahi̍ṣṭhā dhu̱ri voḻha̍ve || 5.056.06
u̱ta sya vā̱jya̍ru̱ṣastu̍vi̱ṣvaṇi̍ri̱ha sma̍ dhāyi darśa̱taḥ |
mā vo̱ yāme̍ṣu marutaści̱raṁ ka̍ra̱tpra taṁ rathe̍ṣu codata || 5.056.07
ratha̱ṁ nu māru̍taṁ va̱yaṁ śra̍va̱syumā hu̍vāmahe |
ā yasmi̍nta̱sthau su̱raṇā̍ni̱ bibhra̍tī̱ sacā̍ ma̱rutsu̍ roda̱sī || 5.056.08
taṁ va̱ḥ śardha̍ṁ rathe̱śubha̍ṁ tve̱ṣaṁ pa̍na̱syumā hu̍ve |
yasmi̱nsujā̍tā su̱bhagā̍ mahī̱yate̱ sacā̍ ma̱rutsu̍ mīḻhu̱ṣī || 5.056.09
ā ru̍drāsa̱ indra̍vantaḥ sa̱joṣa̍so̱ hira̍ṇyarathāḥ suvi̱tāya̍ gantana |
i̱yaṁ vo̍ a̱smatprati̍ haryate ma̱tistṛ̱ṣṇaje̱ na di̱va utsā̍ uda̱nyave̍ || 5.057.01
vāśī̍manta ṛṣṭi̱manto̍ manī̱ṣiṇa̍ḥ su̱dhanvā̍na̱ iṣu̍manto niṣa̱ṅgiṇa̍ḥ |
svaśvā̍ḥ stha su̱rathā̍ḥ pṛśnimātaraḥ svāyu̱dhā ma̍ruto yāthanā̱ śubha̍m || 5.057.02
dhū̱nu̱tha dyāṁ parva̍tāndā̱śuṣe̱ vasu̱ ni vo̱ vanā̍ jihate̱ yāma̍no bhi̱yā |
ko̱paya̍tha pṛthi̱vīṁ pṛ̍śnimātaraḥ śu̱bhe yadu̍grā̱ḥ pṛṣa̍tī̱rayu̍gdhvam || 5.057.03
vāta̍tviṣo ma̱ruto̍ va̱rṣani̍rṇijo ya̱mā i̍va̱ susa̍dṛśaḥ su̱peśa̍saḥ |
pi̱śaṅgā̍śvā aru̱ṇāśvā̍ are̱pasa̱ḥ pratva̍kṣaso mahi̱nā dyauri̍vo̱rava̍ḥ || 5.057.04
pu̱ru̱dra̱psā a̍ñji̱manta̍ḥ su̱dāna̍vastve̱ṣasa̍ṁdṛśo anava̱bhrarā̍dhasaḥ |
su̱jā̱tāso̍ ja̱nuṣā̍ ru̱kmava̍kṣaso di̱vo a̱rkā a̱mṛta̱ṁ nāma̍ bhejire || 5.057.05
ṛ̱ṣṭayo̍ vo maruto̱ aṁsa̍yo̱radhi̱ saha̱ ojo̍ bā̱hvorvo̱ bala̍ṁ hi̱tam |
nṛ̱mṇā śī̱rṣasvāyu̍dhā̱ rathe̍ṣu vo̱ viśvā̍ va̱ḥ śrīradhi̍ ta̱nūṣu̍ pipiśe || 5.057.06
goma̱daśvā̍va̱dratha̍vatsu̱vīra̍ṁ ca̱ndrava̱drādho̍ maruto dadā naḥ |
praśa̍stiṁ naḥ kṛṇuta rudriyāso bhakṣī̱ya vo'va̍so̱ daivya̍sya || 5.057.07
ha̱ye naro̱ maru̍to mṛ̱ḻatā̍ na̱stuvī̍maghāso̱ amṛ̍tā̱ ṛta̍jñāḥ |
satya̍śruta̱ḥ kava̍yo̱ yuvā̍no̱ bṛha̍dgirayo bṛ̱hadu̱kṣamā̍ṇāḥ || 5.057.08
tamu̍ nū̱naṁ tavi̍ṣīmantameṣāṁ stu̱ṣe ga̱ṇaṁ māru̍ta̱ṁ navya̍sīnām |
ya ā̱śva̍śvā̱ ama̍va̱dvaha̍nta u̱teśi̍re a̱mṛta̍sya sva̱rāja̍ḥ || 5.058.01
tve̱ṣaṁ ga̱ṇaṁ ta̱vasa̱ṁ khādi̍hasta̱ṁ dhuni̍vrataṁ mā̱yina̱ṁ dāti̍vāram |
ma̱yo̱bhuvo̱ ye ami̍tā mahi̱tvā vanda̍sva vipra tuvi̱rādha̍so̱ nṝn || 5.058.02
ā vo̍ yantūdavā̱hāso̍ a̱dya vṛ̱ṣṭiṁ ye viśve̍ ma̱ruto̍ ju̱nanti̍ |
a̱yaṁ yo a̱gnirma̍ruta̱ḥ sami̍ddha e̱taṁ ju̍ṣadhvaṁ kavayo yuvānaḥ || 5.058.03
yū̱yaṁ rājā̍na̱mirya̱ṁ janā̍ya vibhvata̱ṣṭaṁ ja̍nayathā yajatrāḥ |
yu̱ṣmade̍ti muṣṭi̱hā bā̱hujū̍to yu̱ṣmatsada̍śvo marutaḥ su̱vīra̍ḥ || 5.058.04
a̱rā i̱vedaca̍ramā̱ ahe̍va̱ prapra̍ jāyante̱ aka̍vā̱ maho̍bhiḥ |
pṛśne̍ḥ pu̱trā u̍pa̱māso̱ rabhi̍ṣṭhā̱ḥ svayā̍ ma̱tyā ma̱ruta̱ḥ saṁ mi̍mikṣuḥ || 5.058.05
yatprāyā̍siṣṭa̱ pṛṣa̍tībhi̱raśvai̍rvīḻupa̱vibhi̍rmaruto̱ rathe̍bhiḥ |
kṣoda̍nta̱ āpo̍ riṇa̱te vanā̱nyavo̱sriyo̍ vṛṣa̱bhaḥ kra̍ndatu̱ dyauḥ || 5.058.06
prathi̍ṣṭa̱ yāma̍npṛthi̱vī ci̍deṣā̱ṁ bharte̍va̱ garbha̱ṁ svamicchavo̍ dhuḥ |
vātā̱nhyaśvā̍ndhu̱ryā̍yuyu̱jre va̱rṣaṁ sveda̍ṁ cakrire ru̱driyā̍saḥ || 5.058.07
ha̱ye naro̱ maru̍to mṛ̱ḻatā̍ na̱stuvī̍maghāso̱ amṛ̍tā̱ ṛta̍jñāḥ |
satya̍śruta̱ḥ kava̍yo̱ yuvā̍no̱ bṛha̍dgirayo bṛ̱hadu̱kṣamā̍ṇāḥ || 5.058.08
pra va̱ḥ spaḻa̍kransuvi̱tāya̍ dā̱vane'rcā̍ di̱ve pra pṛ̍thi̱vyā ṛ̱taṁ bha̍re |
u̱kṣante̱ aśvā̱ntaru̍ṣanta̱ ā rajo'nu̱ svaṁ bhā̱nuṁ śra̍thayante arṇa̱vaiḥ || 5.059.01
amā̍deṣāṁ bhi̱yasā̱ bhūmi̍rejati̱ naurna pū̱rṇā kṣa̍rati̱ vyathi̍rya̱tī |
dū̱re̱dṛśo̱ ye ci̱taya̍nta̱ ema̍bhira̱ntarma̱he vi̱dathe̍ yetire̱ nara̍ḥ || 5.059.02
gavā̍miva śri̱yase̱ śṛṅga̍mutta̱maṁ sūryo̱ na cakṣū̱ raja̍so vi̱sarja̍ne |
atyā̍ iva su̱bhva1̱̍ścāra̍vaḥ sthana̱ maryā̍ iva śri̱yase̍ cetathā naraḥ || 5.059.03
ko vo̍ ma̱hānti̍ maha̱tāmuda̍śnava̱tkaskāvyā̍ maruta̱ḥ ko ha̱ pauṁsyā̍ |
yū̱yaṁ ha̱ bhūmi̍ṁ ki̱raṇa̱ṁ na re̍jatha̱ pra yadbhara̍dhve suvi̱tāya̍ dā̱vane̍ || 5.059.04
aśvā̍ i̱veda̍ru̱ṣāsa̱ḥ saba̍ndhava̱ḥ śūrā̍ iva pra̱yudha̱ḥ prota yu̍yudhuḥ |
maryā̍ iva su̱vṛdho̍ vāvṛdhu̱rnara̱ḥ sūrya̍sya̱ cakṣu̱ḥ pra mi̍nanti vṛ̱ṣṭibhi̍ḥ || 5.059.05
te a̍jye̱ṣṭhā aka̍niṣṭhāsa u̱dbhido'ma̍dhyamāso̱ maha̍sā̱ vi vā̍vṛdhuḥ |
su̱jā̱tāso̍ ja̱nuṣā̱ pṛśni̍mātaro di̱vo maryā̱ ā no̱ acchā̍ jigātana || 5.059.06
vayo̱ na ye śreṇī̍ḥ pa̱pturoja̱sāntā̍ndi̱vo bṛ̍ha̱taḥ sānu̍na̱spari̍ |
aśvā̍sa eṣāmu̱bhaye̱ yathā̍ vi̱duḥ pra parva̍tasya nabha̱nūra̍cucyavuḥ || 5.059.07
mimā̍tu̱ dyauradi̍tirvī̱taye̍ na̱ḥ saṁ dānu̍citrā u̱ṣaso̍ yatantām |
ācu̍cyavurdi̱vyaṁ kośa̍me̱ta ṛṣe̍ ru̱drasya̍ ma̱ruto̍ gṛṇā̱nāḥ || 5.059.08
īḻe̍ a̱gniṁ svava̍sa̱ṁ namo̍bhiri̱ha pra̍sa̱tto vi ca̍yatkṛ̱taṁ na̍ḥ |
rathai̍riva̱ pra bha̍re vāja̱yadbhi̍ḥ pradakṣi̱ṇinma̱rutā̱ṁ stoma̍mṛdhyām || 5.060.01
ā ye ta̱sthuḥ pṛṣa̍tīṣu śru̱tāsu̍ su̱kheṣu̍ ru̱drā ma̱ruto̱ rathe̍ṣu |
vanā̍ cidugrā jihate̱ ni vo̍ bhi̱yā pṛ̍thi̱vī ci̍drejate̱ parva̍taścit || 5.060.02
parva̍taści̱nmahi̍ vṛ̱ddho bi̍bhāya di̱vaści̱tsānu̍ rejata sva̱ne va̍ḥ |
yatkrīḻa̍tha maruta ṛṣṭi̱manta̱ āpa̍ iva sa̱dhrya̍ñco dhavadhve || 5.060.03
va̱rā i̱vedrai̍va̱tāso̱ hira̍ṇyaira̱bhi sva̱dhābhi̍sta̱nva̍ḥ pipiśre |
śri̱ye śreyā̍ṁsasta̱vaso̱ rathe̍ṣu sa̱trā mahā̍ṁsi cakrire ta̱nūṣu̍ || 5.060.04
a̱jye̱ṣṭhāso̱ aka̍niṣṭhāsa e̱te saṁ bhrāta̍ro vāvṛdhu̱ḥ saubha̍gāya |
yuvā̍ pi̱tā svapā̍ ru̱dra e̍ṣāṁ su̱dughā̱ pṛśni̍ḥ su̱dinā̍ ma̱rudbhya̍ḥ || 5.060.05
yadu̍tta̱me ma̍ruto madhya̱me vā̱ yadvā̍va̱me su̍bhagāso di̱vi ṣṭha |
ato̍ no rudrā u̱ta vā̱ nva1̱̍syāgne̍ vi̱ttāddha̱viṣo̱ yadyajā̍ma || 5.060.06
a̱gniśca̱ yanma̍ruto viśvavedaso di̱vo vaha̍dhva̱ utta̍rā̱dadhi̱ ṣṇubhi̍ḥ |
te ma̍ndasā̱nā dhuna̍yo riśādaso vā̱maṁ dha̍tta̱ yaja̍mānāya sunva̱te || 5.060.07
agne̍ ma̱rudbhi̍ḥ śu̱bhaya̍dbhi̱rṛkva̍bhi̱ḥ soma̍ṁ piba mandasā̱no ga̍ṇa̱śribhi̍ḥ |
pā̱va̱kebhi̍rviśvami̱nvebhi̍rā̱yubhi̱rvaiśvā̍nara pra̱divā̍ ke̱tunā̍ sa̱jūḥ || 5.060.08
ke ṣṭhā̍ nara̱ḥ śreṣṭha̍tamā̱ ya eka̍eka āya̱ya |
pa̱ra̱masyā̍ḥ parā̱vata̍ḥ || 5.061.01
kva1̱̍ vo'śvā̱ḥ kvā̱3̱̍bhīśa̍vaḥ ka̱thaṁ śe̍ka ka̱thā ya̍ya |
pṛ̱ṣṭhe sado̍ na̱soryama̍ḥ || 5.061.02
ja̱ghane̱ coda̍ eṣā̱ṁ vi sa̱kthāni̱ naro̍ yamuḥ |
pu̱tra̱kṛ̱the na jana̍yaḥ || 5.061.03
parā̍ vīrāsa etana̱ maryā̍so̱ bhadra̍jānayaḥ |
a̱gni̱tapo̱ yathāsa̍tha || 5.061.04
sana̱tsāśvya̍ṁ pa̱śumu̱ta gavya̍ṁ śa̱tāva̍yam |
śyā̱vāśva̍stutāya̱ yā dorvī̱rāyo̍pa̱barbṛ̍hat || 5.061.05
u̱ta tvā̱ strī śaśī̍yasī pu̱ṁso bha̍vati̱ vasya̍sī |
ade̍vatrādarā̱dhasa̍ḥ || 5.061.06
vi yā jā̱nāti̱ jasu̍ri̱ṁ vi tṛṣya̍nta̱ṁ vi kā̱mina̍m |
de̱va̱trā kṛ̍ṇu̱te mana̍ḥ || 5.061.07
u̱ta ghā̱ nemo̱ astu̍ta̱ḥ pumā̱ iti̍ bruve pa̱ṇiḥ |
sa vaira̍deya̱ itsa̱maḥ || 5.061.08
u̱ta me̍'rapadyuva̱tirma̍ma̱nduṣī̱ prati̍ śyā̱vāya̍ varta̱nim |
vi rohi̍tā purumī̱ḻhāya̍ yematu̱rviprā̍ya dī̱rghaya̍śase || 5.061.09
yo me̍ dhenū̱nāṁ śa̱taṁ vaida̍daśvi̱ryathā̱ dada̍t |
ta̱ra̱nta i̍va ma̱ṁhanā̍ || 5.061.10
ya ī̱ṁ vaha̍nta ā̱śubhi̱ḥ piba̍nto madi̱raṁ madhu̍ |
atra̱ śravā̍ṁsi dadhire || 5.061.11
yeṣā̍ṁ śri̱yādhi̱ roda̍sī vi̱bhrāja̍nte̱ rathe̱ṣvā |
di̱vi ru̱kma i̍vo̱pari̍ || 5.061.12
yuvā̱ sa māru̍to ga̱ṇastve̱ṣara̍tho̱ ane̍dyaḥ |
śu̱bha̱ṁyāvāpra̍tiṣkutaḥ || 5.061.13
ko ve̍da nū̱name̍ṣā̱ṁ yatrā̱ mada̍nti̱ dhūta̍yaḥ |
ṛ̱tajā̍tā are̱pasa̍ḥ || 5.061.14
yū̱yaṁ marta̍ṁ vipanyavaḥ praṇe̱tāra̍ i̱tthā dhi̱yā |
śrotā̍ro̱ yāma̍hūtiṣu || 5.061.15
te no̱ vasū̍ni̱ kāmyā̍ puruśca̱ndrā ri̍śādasaḥ |
ā ya̍jñiyāso vavṛttana || 5.061.16
e̱taṁ me̱ stoma̍mūrmye dā̱rbhyāya̱ parā̍ vaha |
giro̍ devi ra̱thīri̍va || 5.061.17
u̱ta me̍ vocatā̱diti̍ su̱taso̍me̱ ratha̍vītau |
na kāmo̱ apa̍ veti me || 5.061.18
e̱ṣa kṣe̍ti̱ ratha̍vītirma̱ghavā̱ goma̍tī̱ranu̍ |
parva̍te̱ṣvapa̍śritaḥ || 5.061.19
ṛ̱tena̍ ṛ̱tamapi̍hitaṁ dhru̱vaṁ vā̱ṁ sūrya̍sya̱ yatra̍ vimu̱cantyaśvā̍n |
daśa̍ śa̱tā sa̱ha ta̍sthu̱stadeka̍ṁ de̱vānā̱ṁ śreṣṭha̱ṁ vapu̍ṣāmapaśyam || 5.062.01
tatsu vā̍ṁ mitrāvaruṇā mahi̱tvamī̱rmā ta̱sthuṣī̱raha̍bhirduduhre |
viśvā̍ḥ pinvatha̱ḥ svasa̍rasya̱ dhenā̱ anu̍ vā̱meka̍ḥ pa̱virā va̍varta || 5.062.02
adhā̍rayataṁ pṛthi̱vīmu̱ta dyāṁ mitra̍rājānā varuṇā̱ maho̍bhiḥ |
va̱rdhaya̍ta̱moṣa̍dhī̱ḥ pinva̍ta̱ṁ gā ava̍ vṛ̱ṣṭiṁ sṛ̍jataṁ jīradānū || 5.062.03
ā vā̱maśvā̍saḥ su̱yujo̍ vahantu ya̱tara̍śmaya̱ upa̍ yantva̱rvāk |
ghṛ̱tasya̍ ni̱rṇiganu̍ vartate vā̱mupa̱ sindha̍vaḥ pra̱divi̍ kṣaranti || 5.062.04
anu̍ śru̱tāma̱mati̱ṁ vardha̍du̱rvīṁ ba̱rhiri̍va̱ yaju̍ṣā̱ rakṣa̍māṇā |
nama̍svantā dhṛtada̱kṣādhi̱ garte̱ mitrāsā̍the varu̱ṇeḻā̍sva̱ntaḥ || 5.062.05
akra̍vihastā su̱kṛte̍ para̱spā yaṁ trāsā̍the varu̱ṇeḻā̍sva̱ntaḥ |
rājā̍nā kṣa̱tramahṛ̍ṇīyamānā sa̱hasra̍sthūṇaṁ bibhṛthaḥ sa̱ha dvau || 5.062.06
hira̍ṇyanirṇi̱gayo̍ asya̱ sthūṇā̱ vi bhrā̍jate di̱vya1̱̍śvāja̍nīva |
bha̱dre kṣetre̱ nimi̍tā̱ tilvi̍le vā sa̱nema̱ madhvo̱ adhi̍gartyasya || 5.062.07
hira̍ṇyarūpamu̱ṣaso̱ vyu̍ṣṭā̱vaya̍ḥsthūṇa̱mudi̍tā̱ sūrya̍sya |
ā ro̍hatho varuṇa mitra̱ garta̱mata̍ścakṣāthe̱ adi̍ti̱ṁ diti̍ṁ ca || 5.062.08
yadbaṁhi̍ṣṭha̱ṁ nāti̱vidhe̍ sudānū̱ acchi̍dra̱ṁ śarma̍ bhuvanasya gopā |
tena̍ no mitrāvaruṇāvaviṣṭa̱ṁ siṣā̍santo jigī̱vāṁsa̍ḥ syāma || 5.062.09
ṛta̍sya gopā̱vadhi̍ tiṣṭhatho̱ ratha̱ṁ satya̍dharmāṇā para̱me vyo̍mani |
yamatra̍ mitrāvaru̱ṇāva̍tho yu̱vaṁ tasmai̍ vṛ̱ṣṭirmadhu̍matpinvate di̱vaḥ || 5.063.01
sa̱mrājā̍va̱sya bhuva̍nasya rājatho̱ mitrā̍varuṇā vi̱dathe̍ sva̱rdṛśā̍ |
vṛ̱ṣṭiṁ vā̱ṁ rādho̍ amṛta̱tvamī̍mahe̱ dyāvā̍pṛthi̱vī vi ca̍ranti ta̱nyava̍ḥ || 5.063.02
sa̱mrājā̍ u̱grā vṛ̍ṣa̱bhā di̱vaspatī̍ pṛthi̱vyā mi̱trāvaru̍ṇā̱ vica̍rṣaṇī |
ci̱trebhi̍ra̱bhrairupa̍ tiṣṭhatho̱ rava̱ṁ dyāṁ va̍rṣayatho̱ asu̍rasya mā̱yayā̍ || 5.063.03
mā̱yā vā̍ṁ mitrāvaruṇā di̱vi śri̱tā sūryo̱ jyoti̍ścarati ci̱tramāyu̍dham |
tama̱bhreṇa̍ vṛ̱ṣṭyā gū̍hatho di̱vi parja̍nya dra̱psā madhu̍manta īrate || 5.063.04
ratha̍ṁ yuñjate ma̱ruta̍ḥ śu̱bhe su̱khaṁ śūro̱ na mi̍trāvaruṇā̱ gavi̍ṣṭiṣu |
rajā̍ṁsi ci̱trā vi ca̍ranti ta̱nyavo̍ di̱vaḥ sa̍mrājā̱ paya̍sā na ukṣatam || 5.063.05
vāca̱ṁ su mi̍trāvaruṇā̱virā̍vatīṁ pa̱rjanya̍ści̱trāṁ va̍dati̱ tviṣī̍matīm |
a̱bhrā va̍sata ma̱ruta̱ḥ su mā̱yayā̱ dyāṁ va̍rṣayatamaru̱ṇāma̍re̱pasa̍m || 5.063.06
dharma̍ṇā mitrāvaruṇā vipaścitā vra̱tā ra̍kṣethe̱ asu̍rasya mā̱yayā̍ |
ṛ̱tena̱ viśva̱ṁ bhuva̍na̱ṁ vi rā̍jatha̱ḥ sūrya̱mā dha̍ttho di̱vi citrya̱ṁ ratha̍m || 5.063.07
varu̍ṇaṁ vo ri̱śāda̍samṛ̱cā mi̱traṁ ha̍vāmahe |
pari̍ vra̱jeva̍ bā̱hvorja̍ga̱nvāṁsā̱ sva̍rṇaram || 5.064.01
tā bā̱havā̍ suce̱tunā̱ pra ya̍ntamasmā̱ arca̍te |
śeva̱ṁ hi jā̱rya̍ṁ vā̱ṁ viśvā̍su̱ kṣāsu̱ jogu̍ve || 5.064.02
yannū̱nama̱śyāṁ gati̍ṁ mi̱trasya̍ yāyāṁ pa̱thā |
asya̍ pri̱yasya̱ śarma̱ṇyahi̍ṁsānasya saścire || 5.064.03
yu̱vābhyā̍ṁ mitrāvaruṇopa̱maṁ dhe̍yāmṛ̱cā |
yaddha̱ kṣaye̍ ma̱ghonā̍ṁ stotṝ̱ṇāṁ ca̍ spū̱rdhase̍ || 5.064.04
ā no̍ mitra sudī̱tibhi̱rvaru̍ṇaśca sa̱dhastha̱ ā |
sve kṣaye̍ ma̱ghonā̱ṁ sakhī̍nāṁ ca vṛ̱dhase̍ || 5.064.05
yu̱vaṁ no̱ yeṣu̍ varuṇa kṣa̱traṁ bṛ̱hacca̍ bibhṛ̱thaḥ |
u̱ru ṇo̱ vāja̍sātaye kṛ̱taṁ rā̱ye sva̱staye̍ || 5.064.06
u̱cchantyā̍ṁ me yaja̱tā de̱vakṣa̍tre̱ ruśa̍dgavi |
su̱taṁ soma̱ṁ na ha̱stibhi̱rā pa̱ḍbhirdhā̍vataṁ narā̱ bibhra̍tāvarca̱nāna̍sam || 5.064.07
yaści̱keta̱ sa su̱kratu̍rdeva̱trā sa bra̍vītu naḥ |
varu̍ṇo̱ yasya̍ darśa̱to mi̱tro vā̱ vana̍te̱ gira̍ḥ || 5.065.01
tā hi śreṣṭha̍varcasā̱ rājā̍nā dīrgha̱śrutta̍mā |
tā satpa̍tī ṛtā̱vṛdha̍ ṛ̱tāvā̍nā̱ jane̍jane || 5.065.02
tā vā̍miyā̱no'va̍se̱ pūrvā̱ upa̍ bruve̱ sacā̍ |
svaśvā̍sa̱ḥ su ce̱tunā̱ vājā̍ a̱bhi pra dā̱vane̍ || 5.065.03
mi̱tro a̱ṁhości̱dādu̱ru kṣayā̍ya gā̱tuṁ va̍nate |
mi̱trasya̱ hi pra̱tūrva̍taḥ suma̱tirasti̍ vidha̱taḥ || 5.065.04
va̱yaṁ mi̱trasyāva̍si̱ syāma̍ sa̱pratha̍stame |
a̱ne̱hasa̱stvota̍yaḥ sa̱trā varu̍ṇaśeṣasaḥ || 5.065.05
yu̱vaṁ mi̍tre̱maṁ jana̱ṁ yata̍tha̱ḥ saṁ ca̍ nayathaḥ |
mā ma̱ghona̱ḥ pari̍ khyata̱ṁ mo a̱smāka̱mṛṣī̍ṇāṁ gopī̱the na̍ uruṣyatam || 5.065.06
ā ci̍kitāna su̱kratū̍ de̱vau ma̍rta ri̱śāda̍sā |
varu̍ṇāya ṛ̱tape̍śase dadhī̱ta praya̍se ma̱he || 5.066.01
tā hi kṣa̱tramavi̍hrutaṁ sa̱myaga̍su̱rya1̱̍māśā̍te |
adha̍ vra̱teva̱ mānu̍ṣa̱ṁ sva1̱̍rṇa dhā̍yi darśa̱tam || 5.066.02
tā vā̱meṣe̱ rathā̍nāmu̱rvīṁ gavyū̍timeṣām |
rā̱taha̍vyasya suṣṭu̱tiṁ da̱dhṛkstomai̍rmanāmahe || 5.066.03
adhā̱ hi kāvyā̍ yu̱vaṁ dakṣa̍sya pū̱rbhira̍dbhutā |
ni ke̱tunā̱ janā̍nāṁ ci̱kethe̍ pūtadakṣasā || 5.066.04
tadṛ̱taṁ pṛ̍thivi bṛ̱hacchra̍vae̱ṣa ṛṣī̍ṇām |
jra̱ya̱sā̱nāvara̍ṁ pṛ̱thvati̍ kṣaranti̱ yāma̍bhiḥ || 5.066.05
ā yadvā̍mīyacakṣasā̱ mitra̍ va̱yaṁ ca̍ sū̱raya̍ḥ |
vyaci̍ṣṭhe bahu̱pāyye̱ yate̍mahi sva̱rājye̍ || 5.066.06
baḻi̱tthā de̍va niṣkṛ̱tamādi̍tyā yaja̱taṁ bṛ̱hat |
varu̍ṇa̱ mitrārya̍ma̱nvarṣi̍ṣṭhaṁ kṣa̱tramā̍śāthe || 5.067.01
ā yadyoni̍ṁ hira̱ṇyaya̱ṁ varu̍ṇa̱ mitra̱ sada̍thaḥ |
dha̱rtārā̍ carṣaṇī̱nāṁ ya̱ntaṁ su̱mnaṁ ri̍śādasā || 5.067.02
viśve̱ hi vi̱śvave̍daso̱ varu̍ṇo mi̱tro a̍rya̱mā |
vra̱tā pa̱deva̍ saścire̱ pānti̱ martya̍ṁ ri̱ṣaḥ || 5.067.03
te hi sa̱tyā ṛ̍ta̱spṛśa̍ ṛ̱tāvā̍no̱ jane̍jane |
su̱nī̱thāsa̍ḥ su̱dāna̍vo̱ṁ'hości̍duru̱cakra̍yaḥ || 5.067.04
ko nu vā̍ṁ mi̱trāstu̍to̱ varu̍ṇo vā ta̱nūnā̍m |
tatsu vā̱meṣa̍te ma̱tiratri̍bhya̱ eṣa̍te ma̱tiḥ || 5.067.05
pra vo̍ mi̱trāya̍ gāyata̱ varu̍ṇāya vi̱pā gi̱rā |
mahi̍kṣatrāvṛ̱taṁ bṛ̱hat || 5.068.01
sa̱mrājā̱ yā ghṛ̱tayo̍nī mi̱traśco̱bhā varu̍ṇaśca |
de̱vā de̱veṣu̍ praśa̱stā || 5.068.02
tā na̍ḥ śakta̱ṁ pārthi̍vasya ma̱ho rā̱yo di̱vyasya̍ |
mahi̍ vāṁ kṣa̱traṁ de̱veṣu̍ || 5.068.03
ṛ̱tamṛ̱tena̱ sapa̍nteṣi̱raṁ dakṣa̍māśāte |
a̱druhā̍ de̱vau va̍rdhete || 5.068.04
vṛ̱ṣṭidyā̍vā rī̱tyā̍pe̱ṣaspatī̱ dānu̍matyāḥ |
bṛ̱hanta̱ṁ garta̍māśāte || 5.068.05
trī ro̍ca̱nā va̍ruṇa̱ trīru̱ta dyūntrīṇi̍ mitra dhārayatho̱ rajā̍ṁsi |
vā̱vṛ̱dhā̱nāva̱mati̍ṁ kṣa̱triya̱syānu̍ vra̱taṁ rakṣa̍māṇāvaju̱ryam || 5.069.01
irā̍vatīrvaruṇa dhe̱navo̍ vā̱ṁ madhu̍madvā̱ṁ sindha̍vo mitra duhre |
traya̍stasthurvṛṣa̱bhāsa̍stisṛ̱ṇāṁ dhi̱ṣaṇā̍nāṁ reto̱dhā vi dyu̱manta̍ḥ || 5.069.02
prā̱tarde̱vīmadi̍tiṁ johavīmi ma̱dhyaṁdi̍na̱ udi̍tā̱ sūrya̍sya |
rā̱ye mi̍trāvaruṇā sa̱rvatā̱teḻe̍ to̱kāya̱ tana̍yāya̱ śaṁ yoḥ || 5.069.03
yā dha̱rtārā̱ raja̍so roca̱nasyo̱tādi̱tyā di̱vyā pārthi̍vasya |
na vā̍ṁ de̱vā a̱mṛtā̱ ā mi̍nanti vra̱tāni̍ mitrāvaruṇā dhru̱vāṇi̍ || 5.069.04
pu̱rū̱ruṇā̍ ci̱ddhyastyavo̍ nū̱naṁ vā̍ṁ varuṇa |
mitra̱ vaṁsi̍ vāṁ suma̱tim || 5.070.01
tā vā̍ṁ sa̱myaga̍druhvā̱ṇeṣa̍maśyāma̱ dhāya̍se |
va̱yaṁ te ru̍drā syāma || 5.070.02
pā̱taṁ no̍ rudrā pā̱yubhi̍ru̱ta trā̍yethāṁ sutrā̱trā |
tu̱ryāma̱ dasyū̍nta̱nūbhi̍ḥ || 5.070.03
mā kasyā̍dbhutakratū ya̱kṣaṁ bhu̍jemā ta̱nūbhi̍ḥ |
mā śeṣa̍sā̱ mā tana̍sā || 5.070.04
ā no̍ gantaṁ riśādasā̱ varu̍ṇa̱ mitra̍ ba̱rhaṇā̍ |
upe̱maṁ cāru̍madhva̱ram || 5.071.01
viśva̍sya̱ hi pra̍cetasā̱ varu̍ṇa̱ mitra̱ rāja̍thaḥ |
ī̱śā̱nā pi̍pyata̱ṁ dhiya̍ḥ || 5.071.02
upa̍ naḥ su̱tamā ga̍ta̱ṁ varu̍ṇa̱ mitra̍ dā̱śuṣa̍ḥ |
a̱sya soma̍sya pī̱taye̍ || 5.071.03
ā mi̱tre varu̍ṇe va̱yaṁ gī̱rbhirju̍humo atri̱vat |
ni ba̱rhiṣi̍ sadata̱ṁ soma̍pītaye || 5.072.01
vra̱tena̍ stho dhru̱vakṣe̍mā̱ dharma̍ṇā yāta̱yajja̍nā |
ni ba̱rhiṣi̍ sadata̱ṁ soma̍pītaye || 5.072.02
mi̱traśca̍ no̱ varu̍ṇaśca ju̱ṣetā̍ṁ ya̱jñami̱ṣṭaye̍ |
ni ba̱rhiṣi̍ sadatā̱ṁ soma̍pītaye || 5.072.03
yada̱dya sthaḥ pa̍rā̱vati̱ yada̍rvā̱vatya̍śvinā |
yadvā̍ pu̱rū pu̍rubhujā̱ yada̱ntari̍kṣa̱ ā ga̍tam || 5.073.01
i̱ha tyā pu̍ru̱bhūta̍mā pu̱rū daṁsā̍ṁsi̱ bibhra̍tā |
va̱ra̱syā yā̱myadhri̍gū hu̱ve tu̱viṣṭa̍mā bhu̱je || 5.073.02
ī̱rmānyadvapu̍ṣe̱ vapu̍śca̱kraṁ ratha̍sya yemathuḥ |
parya̱nyā nāhu̍ṣā yu̱gā ma̱hnā rajā̍ṁsi dīyathaḥ || 5.073.03
tadū̱ ṣu vā̍me̱nā kṛ̱taṁ viśvā̱ yadvā̱manu̱ ṣṭave̍ |
nānā̍ jā̱tāva̍re̱pasā̱ sama̱sme bandhu̱meya̍thuḥ || 5.073.04
ā yadvā̍ṁ sū̱ryā ratha̱ṁ tiṣṭha̍draghu̱ṣyada̱ṁ sadā̍ |
pari̍ vāmaru̱ṣā vayo̍ ghṛ̱ṇā va̍ranta ā̱tapa̍ḥ || 5.073.05
yu̱voratri̍ściketati̱ narā̍ su̱mnena̱ ceta̍sā |
gha̱rmaṁ yadvā̍mare̱pasa̱ṁ nāsa̍tyā̱snā bhu̍ra̱ṇyati̍ || 5.073.06
u̱gro vā̍ṁ kaku̱ho ya̱yiḥ śṛ̱ṇve yāme̍ṣu saṁta̱niḥ |
yadvā̱ṁ daṁso̍bhiraśvi̱nātri̍rnarāva̱varta̍ti || 5.073.07
madhva̍ ū̱ ṣu ma̍dhūyuvā̱ rudrā̱ siṣa̍kti pi̱pyuṣī̍ |
yatsa̍mu̱drāti̱ parṣa̍thaḥ pa̱kvāḥ pṛkṣo̍ bharanta vām || 5.073.08
sa̱tyamidvā u̍ aśvinā yu̱vāmā̍hurmayo̱bhuvā̍ |
tā yāma̍nyāma̱hūta̍mā̱ yāma̱nnā mṛ̍ḻa̱yatta̍mā || 5.073.09
i̱mā brahmā̍ṇi̱ vardha̍nā̱śvibhyā̍ṁ santu̱ śaṁta̍mā |
yā takṣā̍ma̱ rathā̍ i̱vāvo̍cāma bṛ̱hannama̍ḥ || 5.073.10
kūṣṭho̍ devāvaśvinā̱dyā di̱vo ma̍nāvasū |
tacchra̍vatho vṛṣaṇvasū̱ atri̍rvā̱mā vi̍vāsati || 5.074.01
kuha̱ tyā kuha̱ nu śru̱tā di̱vi de̱vā nāsa̍tyā |
kasmi̱nnā ya̍tatho̱ jane̱ ko vā̍ṁ na̱dīnā̱ṁ sacā̍ || 5.074.02
kaṁ yā̍tha̱ḥ kaṁ ha̍ gacchatha̱ḥ kamacchā̍ yuñjāthe̱ ratha̍m |
kasya̱ brahmā̍ṇi raṇyatho va̱yaṁ vā̍muśmasī̱ṣṭaye̍ || 5.074.03
pau̱raṁ ci̱ddhyu̍da̱pruta̱ṁ paura̍ pau̱rāya̱ jinva̍thaḥ |
yadī̍ṁ gṛbhī̱tatā̍taye si̱ṁhami̍va dru̱haspa̱de || 5.074.04
pra cyavā̍nājjuju̱ruṣo̍ va̱vrimatka̱ṁ na mu̍ñcathaḥ |
yuvā̱ yadī̍ kṛ̱thaḥ puna̱rā kāma̍mṛṇve va̱dhva̍ḥ || 5.074.05
asti̱ hi vā̍mi̱ha sto̱tā smasi̍ vāṁ sa̱ṁdṛśi̍ śri̱ye |
nū śru̱taṁ ma̱ ā ga̍ta̱mavo̍bhirvājinīvasū || 5.074.06
ko vā̍ma̱dya pu̍rū̱ṇāmā va̍vne̱ martyā̍nām |
ko vipro̍ vipravāhasā̱ ko ya̱jñairvā̍jinīvasū || 5.074.07
ā vā̱ṁ ratho̱ rathā̍nā̱ṁ yeṣṭho̍ yātvaśvinā |
pu̱rū ci̍dasma̱yusti̱ra ā̍ṅgū̱ṣo martye̱ṣvā || 5.074.08
śamū̱ ṣu vā̍ṁ madhūyuvā̱smāka̍mastu carkṛ̱tiḥ |
a̱rvā̱cī̱nā vi̍cetasā̱ vibhi̍ḥ śye̱neva̍ dīyatam || 5.074.09
aśvi̍nā̱ yaddha̱ karhi̍ cicchuśrū̱yāta̍mi̱maṁ hava̍m |
vasvī̍rū̱ ṣu vā̱ṁ bhuja̍ḥ pṛ̱ñcanti̱ su vā̱ṁ pṛca̍ḥ || 5.074.10
prati̍ pri̱yata̍ma̱ṁ ratha̱ṁ vṛṣa̍ṇaṁ vasu̱vāha̍nam |
sto̱tā vā̍maśvinā̱vṛṣi̱ḥ stome̍na̱ prati̍ bhūṣati̱ mādhvī̱ mama̍ śruta̱ṁ hava̍m || 5.075.01
a̱tyāyā̍tamaśvinā ti̱ro viśvā̍ a̱haṁ sanā̍ |
dasrā̱ hira̍ṇyavartanī̱ suṣu̍mnā̱ sindhu̍vāhasā̱ mādhvī̱ mama̍ śruta̱ṁ hava̍m || 5.075.02
ā no̱ ratnā̍ni̱ bibhra̍tā̱vaśvi̍nā̱ gaccha̍taṁ yu̱vam |
rudrā̱ hira̍ṇyavartanī juṣā̱ṇā vā̍jinīvasū̱ mādhvī̱ mama̍ śruta̱ṁ hava̍m || 5.075.03
su̱ṣṭubho̍ vāṁ vṛṣaṇvasū̱ rathe̱ vāṇī̱cyāhi̍tā |
u̱ta vā̍ṁ kaku̱ho mṛ̱gaḥ pṛkṣa̍ḥ kṛṇoti vāpu̱ṣo mādhvī̱ mama̍ śruta̱ṁ hava̍m || 5.075.04
bo̱dhinma̍nasā ra̱thye̍ṣi̱rā ha̍vana̱śrutā̍ |
vibhi̱ścyavā̍namaśvinā̱ ni yā̍tho̱ adva̍yāvina̱ṁ mādhvī̱ mama̍ śruta̱ṁ hava̍m || 5.075.05
ā vā̍ṁ narā mano̱yujo'śvā̍saḥ pruṣi̱tapsa̍vaḥ |
vayo̍ vahantu pī̱taye̍ sa̱ha su̱mnebhi̍raśvinā̱ mādhvī̱ mama̍ śruta̱ṁ hava̍m || 5.075.06
aśvi̍nā̱veha ga̍cchata̱ṁ nāsa̍tyā̱ mā vi ve̍natam |
ti̱raści̍darya̱yā pari̍ va̱rtiryā̍tamadābhyā̱ mādhvī̱ mama̍ śruta̱ṁ hava̍m || 5.075.07
a̱sminya̱jñe a̍dābhyā jari̱tāra̍ṁ śubhaspatī |
a̱va̱syuma̍śvinā yu̱vaṁ gṛ̱ṇanta̱mupa̍ bhūṣatho̱ mādhvī̱ mama̍ śruta̱ṁ hava̍m || 5.075.08
abhū̍du̱ṣā ruśa̍tpaśu̱rāgnira̍dhāyyṛ̱tviya̍ḥ |
ayo̍ji vāṁ vṛṣaṇvasū̱ ratho̍ dasrā̱vama̍rtyo̱ mādhvī̱ mama̍ śruta̱ṁ hava̍m || 5.075.09
ā bhā̍tya̱gniru̱ṣasā̱manī̍ka̱mudviprā̍ṇāṁ deva̱yā vāco̍ asthuḥ |
a̱rvāñcā̍ nū̱naṁ ra̍thye̱ha yā̍taṁ pīpi̱vāṁsa̍maśvinā gha̱rmamaccha̍ || 5.076.01
na sa̍ṁskṛ̱taṁ pra mi̍mīto̱ gami̱ṣṭhānti̍ nū̱nama̱śvinopa̍stute̱ha |
divā̍bhipi̱tve'va̱sāga̍miṣṭhā̱ pratyava̍rtiṁ dā̱śuṣe̱ śambha̍viṣṭhā || 5.076.02
u̱tā yā̍taṁ saṁga̱ve prā̱tarahno̍ ma̱dhyaṁdi̍na̱ udi̍tā̱ sūrya̍sya |
divā̱ nakta̱mava̍sā̱ śaṁta̍mena̱ nedānī̍ṁ pī̱tira̱śvinā ta̍tāna || 5.076.03
i̱daṁ hi vā̍ṁ pra̱divi̱ sthāna̱moka̍ i̱me gṛ̱hā a̍śvine̱daṁ du̍ro̱ṇam |
ā no̍ di̱vo bṛ̍ha̱taḥ parva̍tā̱dādbhyo yā̍ta̱miṣa̱mūrja̱ṁ vaha̍ntā || 5.076.04
sama̱śvino̱rava̍sā̱ nūta̍nena mayo̱bhuvā̍ su̱praṇī̍tī gamema |
ā no̍ ra̱yiṁ va̍hata̱mota vī̱rānā viśvā̍nyamṛtā̱ saubha̍gāni || 5.076.05
prā̱ta̱ryāvā̍ṇā pratha̱mā ya̍jadhvaṁ pu̱rā gṛdhrā̱dara̍ruṣaḥ pibātaḥ |
prā̱tarhi ya̱jñama̱śvinā̍ da̱dhāte̱ pra śa̍ṁsanti ka̱vaya̍ḥ pūrva̱bhāja̍ḥ || 5.077.01
prā̱tarya̍jadhvama̱śvinā̍ hinota̱ na sā̱yama̍sti deva̱yā aju̍ṣṭam |
u̱tānyo a̱smadya̍jate̱ vi cāva̱ḥ pūrva̍ḥpūrvo̱ yaja̍māno̱ vanī̍yān || 5.077.02
hira̍ṇyatva̱ṅmadhu̍varṇo ghṛ̱tasnu̱ḥ pṛkṣo̱ vaha̱nnā ratho̍ vartate vām |
mano̍javā aśvinā̱ vāta̍raṁhā̱ yenā̍tiyā̱tho du̍ri̱tāni̱ viśvā̍ || 5.077.03
yo bhūyi̍ṣṭha̱ṁ nāsa̍tyābhyāṁ vi̱veṣa̱ cani̍ṣṭhaṁ pi̱tvo rara̍te vibhā̱ge |
sa to̱kama̍sya pīpara̱cchamī̍bhi̱ranū̍rdhvabhāsa̱ḥ sada̱mittu̍turyāt || 5.077.04
sama̱śvino̱rava̍sā̱ nūta̍nena mayo̱bhuvā̍ su̱praṇī̍tī gamema |
ā no̍ ra̱yiṁ va̍hata̱mota vī̱rānā viśvā̍nyamṛtā̱ saubha̍gāni || 5.077.05
aśvi̍nā̱veha ga̍cchata̱ṁ nāsa̍tyā̱ mā vi ve̍natam |
ha̱ṁsāvi̍va patata̱mā su̱tā upa̍ || 5.078.01
aśvi̍nā hari̱ṇāvi̍va gau̱rāvi̱vānu̱ yava̍sam |
ha̱ṁsāvi̍va patata̱mā su̱tā upa̍ || 5.078.02
aśvi̍nā vājinīvasū ju̱ṣethā̍ṁ ya̱jñami̱ṣṭaye̍ |
ha̱ṁsāvi̍va patata̱mā su̱tā upa̍ || 5.078.03
atri̱ryadvā̍mava̱roha̍nnṛ̱bīsa̱majo̍havī̱nnādha̍māneva̱ yoṣā̍ |
śye̱nasya̍ ci̱jjava̍sā̱ nūta̍ne̱nāga̍cchatamaśvinā̱ śaṁta̍mena || 5.078.04
vi ji̍hīṣva vanaspate̱ yoni̱ḥ sūṣya̍ntyā iva |
śru̱taṁ me̍ aśvinā̱ hava̍ṁ sa̱ptava̍dhriṁ ca muñcatam || 5.078.05
bhī̱tāya̱ nādha̍mānāya̱ ṛṣa̍ye sa̱ptava̍dhraye |
mā̱yābhi̍raśvinā yu̱vaṁ vṛ̱kṣaṁ saṁ ca̱ vi cā̍cathaḥ || 5.078.06
yathā̱ vāta̍ḥ puṣka̱riṇī̍ṁ sami̱ṅgaya̍ti sa̱rvata̍ḥ |
e̱vā te̱ garbha̍ ejatu ni̱raitu̱ daśa̍māsyaḥ || 5.078.07
yathā̱ vāto̱ yathā̱ vana̱ṁ yathā̍ samu̱dra eja̍ti |
e̱vā tvaṁ da̍śamāsya sa̱hāve̍hi ja̱rāyu̍ṇā || 5.078.08
daśa̱ māsā̍ñchaśayā̱naḥ ku̍mā̱ro adhi̍ mā̱tari̍ |
ni̱raitu̍ jī̱vo akṣa̍to jī̱vo jīva̍ntyā̱ adhi̍ || 5.078.09
ma̱he no̍ a̱dya bo̍dha̱yoṣo̍ rā̱ye di̱vitma̍tī |
yathā̍ cinno̱ abo̍dhayaḥ sa̱tyaśra̍vasi vā̱yye sujā̍te̱ aśva̍sūnṛte || 5.079.01
yā su̍nī̱the śau̍cadra̱the vyauccho̍ duhitardivaḥ |
sā vyu̍ccha̱ sahī̍yasi sa̱tyaśra̍vasi vā̱yye sujā̍te̱ aśva̍sūnṛte || 5.079.02
sā no̍ a̱dyābha̱radva̍su̱rvyu̍cchā duhitardivaḥ |
yo vyauccha̱ḥ sahī̍yasi sa̱tyaśra̍vasi vā̱yye sujā̍te̱ aśva̍sūnṛte || 5.079.03
a̱bhi ye tvā̍ vibhāvari̱ stomai̍rgṛ̱ṇanti̱ vahna̍yaḥ |
ma̱ghairma̍ghoni su̱śriyo̱ dāma̍nvantaḥ surā̱taya̱ḥ sujā̍te̱ aśva̍sūnṛte || 5.079.04
yacci̱ddhi te̍ ga̱ṇā i̱me cha̱daya̍nti ma̱ghatta̍ye |
pari̍ ci̱dvaṣṭa̍yo dadhu̱rdada̍to̱ rādho̱ ahra̍ya̱ṁ sujā̍te̱ aśva̍sūnṛte || 5.079.05
aiṣu̍ dhā vī̱rava̱dyaśa̱ uṣo̍ maghoni sū̱riṣu̍ |
ye no̱ rādhā̱ṁsyahra̍yā ma̱ghavā̍no̱ arā̍sata̱ sujā̍te̱ aśva̍sūnṛte || 5.079.06
tebhyo̍ dyu̱mnaṁ bṛ̱hadyaśa̱ uṣo̍ magho̱nyā va̍ha |
ye no̱ rādhā̱ṁsyaśvyā̍ ga̱vyā bhaja̍nta sū̱raya̱ḥ sujā̍te̱ aśva̍sūnṛte || 5.079.07
u̱ta no̱ goma̍tī̱riṣa̱ ā va̍hā duhitardivaḥ |
sā̱kaṁ sūrya̍sya ra̱śmibhi̍ḥ śu̱kraiḥ śoca̍dbhira̱rcibhi̱ḥ sujā̍te̱ aśva̍sūnṛte || 5.079.08
vyu̍cchā duhitardivo̱ mā ci̱raṁ ta̍nuthā̱ apa̍ḥ |
nettvā̍ ste̱naṁ yathā̍ ri̱puṁ tapā̍ti̱ sūro̍ a̱rciṣā̱ sujā̍te̱ aśva̍sūnṛte || 5.079.09
e̱tāva̱dvedu̍ṣa̱stvaṁ bhūyo̍ vā̱ dātu̍marhasi |
yā sto̱tṛbhyo̍ vibhāvaryu̱cchantī̱ na pra̱mīya̍se̱ sujā̍te̱ aśva̍sūnṛte || 5.079.10
dyu̱tadyā̍mānaṁ bṛha̱tīmṛ̱tena̍ ṛ̱tāva̍rīmaru̱ṇapsu̍ṁ vibhā̱tīm |
de̱vīmu̱ṣasa̱ṁ sva̍rā̱vaha̍ntī̱ṁ prati̱ viprā̍so ma̱tibhi̍rjarante || 5.080.01
e̱ṣā jana̍ṁ darśa̱tā bo̱dhaya̍ntī su̱gānpa̱thaḥ kṛ̍ṇva̱tī yā̱tyagre̍ |
bṛ̱ha̱dra̱thā bṛ̍ha̱tī vi̍śvami̱nvoṣā jyoti̍ryaccha̱tyagre̱ ahnā̍m || 5.080.02
e̱ṣā gobhi̍raru̱ṇebhi̍ryujā̱nāsre̍dhantī ra̱yimaprā̍yu cakre |
pa̱tho rada̍ntī suvi̱tāya̍ de̱vī pu̍ruṣṭu̱tā vi̱śvavā̍rā̱ vi bhā̍ti || 5.080.03
e̱ṣā vye̍nī bhavati dvi̱barhā̍ āviṣkṛṇvā̱nā ta̱nva̍ṁ pu̱rastā̍t |
ṛ̱tasya̱ panthā̱manve̍ti sā̱dhu pra̍jāna̱tīva̱ na diśo̍ mināti || 5.080.04
e̱ṣā śu̱bhrā na ta̱nvo̍ vidā̱nordhveva̍ snā̱tī dṛ̱śaye̍ no asthāt |
apa̱ dveṣo̱ bādha̍mānā̱ tamā̍ṁsyu̱ṣā di̱vo du̍hi̱tā jyoti̱ṣāgā̍t || 5.080.05
e̱ṣā pra̍tī̱cī du̍hi̱tā di̱vo nṝnyoṣe̍va bha̱drā ni ri̍ṇīte̱ apsa̍ḥ |
vyū̱rṇva̱tī dā̱śuṣe̱ vāryā̍ṇi̱ puna̱rjyoti̍ryuva̱tiḥ pū̱rvathā̍kaḥ || 5.080.06
yu̱ñjate̱ mana̍ u̱ta yu̍ñjate̱ dhiyo̱ viprā̱ vipra̍sya bṛha̱to vi̍pa̱ścita̍ḥ |
vi hotrā̍ dadhe vayunā̱videka̱ inma̱hī de̱vasya̍ savi̱tuḥ pari̍ṣṭutiḥ || 5.081.01
viśvā̍ rū̱pāṇi̱ prati̍ muñcate ka̱viḥ prāsā̍vīdbha̱draṁ dvi̱pade̱ catu̍ṣpade |
vi nāka̍makhyatsavi̱tā vare̱ṇyo'nu̍ pra̱yāṇa̍mu̱ṣaso̱ vi rā̍jati || 5.081.02
yasya̍ pra̱yāṇa̱manva̱nya idya̱yurde̱vā de̱vasya̍ mahi̱māna̱moja̍sā |
yaḥ pārthi̍vāni vima̱me sa eta̍śo̱ rajā̍ṁsi de̱vaḥ sa̍vi̱tā ma̍hitva̱nā || 5.081.03
u̱ta yā̍si savita̱strīṇi̍ roca̱nota sūrya̍sya ra̱śmibhi̱ḥ samu̍cyasi |
u̱ta rātrī̍mubha̱yata̱ḥ parī̍yasa u̱ta mi̱tro bha̍vasi deva̱ dharma̍bhiḥ || 5.081.04
u̱teśi̍ṣe prasa̱vasya̱ tvameka̱ idu̱ta pū̱ṣā bha̍vasi deva̱ yāma̍bhiḥ |
u̱tedaṁ viśva̱ṁ bhuva̍na̱ṁ vi rā̍jasi śyā̱vāśva̍ste savita̱ḥ stoma̍mānaśe || 5.081.05
tatsa̍vi̱turvṛ̍ṇīmahe va̱yaṁ de̱vasya̱ bhoja̍nam |
śreṣṭha̍ṁ sarva̱dhāta̍ma̱ṁ tura̱ṁ bhaga̍sya dhīmahi || 5.082.01
asya̱ hi svaya̍śastaraṁ savi̱tuḥ kacca̱na pri̱yam |
na mi̱nanti̍ sva̱rājya̍m || 5.082.02
sa hi ratnā̍ni dā̱śuṣe̍ su̱vāti̍ savi̱tā bhaga̍ḥ |
taṁ bhā̱gaṁ ci̱tramī̍mahe || 5.082.03
a̱dyā no̍ deva savitaḥ pra̱jāva̍tsāvī̱ḥ saubha̍gam |
parā̍ du̱ṣṣvapnya̍ṁ suva || 5.082.04
viśvā̍ni deva savitarduri̱tāni̱ parā̍ suva |
yadbha̱draṁ tanna̱ ā su̍va || 5.082.05
anā̍gaso̱ adi̍taye de̱vasya̍ savi̱tuḥ sa̱ve |
viśvā̍ vā̱māni̍ dhīmahi || 5.082.06
ā vi̱śvade̍va̱ṁ satpa̍tiṁ sū̱ktaira̱dyā vṛ̍ṇīmahe |
sa̱tyasa̍vaṁ savi̱tāra̍m || 5.082.07
ya i̱me u̱bhe aha̍nī pu̱ra etyapra̍yucchan |
svā̱dhīrde̱vaḥ sa̍vi̱tā || 5.082.08
ya i̱mā viśvā̍ jā̱tānyā̍śrā̱vaya̍ti̱ śloke̍na |
pra ca̍ su̱vāti̍ savi̱tā || 5.082.09
acchā̍ vada ta̱vasa̍ṁ gī̱rbhirā̱bhiḥ stu̱hi pa̱rjanya̱ṁ nama̱sā vi̍vāsa |
kani̍kradadvṛṣa̱bho jī̱radā̍nū̱ reto̍ dadhā̱tyoṣa̍dhīṣu̱ garbha̍m || 5.083.01
vi vṛ̱kṣānha̍ntyu̱ta ha̍nti ra̱kṣaso̱ viśva̍ṁ bibhāya̱ bhuva̍naṁ ma̱hāva̍dhāt |
u̱tānā̍gā īṣate̱ vṛṣṇyā̍vato̱ yatpa̱rjanya̍ḥ sta̱naya̱nhanti̍ du̱ṣkṛta̍ḥ || 5.083.02
ra̱thīva̱ kaśa̱yāśvā̍ abhikṣi̱pannā̱virdū̱tānkṛ̍ṇute va̱rṣyā̱3̱̍ aha̍ |
dū̱rātsi̱ṁhasya̍ sta̱nathā̱ udī̍rate̱ yatpa̱rjanya̍ḥ kṛṇu̱te va̱rṣyaṁ1̱̍ nabha̍ḥ || 5.083.03
pra vātā̱ vānti̍ pa̱taya̍nti vi̱dyuta̱ udoṣa̍dhī̱rjiha̍te̱ pinva̍te̱ sva̍ḥ |
irā̱ viśva̍smai̱ bhuva̍nāya jāyate̱ yatpa̱rjanya̍ḥ pṛthi̱vīṁ reta̱sāva̍ti || 5.083.04
yasya̍ vra̱te pṛ̍thi̱vī nanna̍mīti̱ yasya̍ vra̱te śa̱phava̱jjarbhu̍rīti |
yasya̍ vra̱ta oṣa̍dhīrvi̱śvarū̍pā̱ḥ sa na̍ḥ parjanya̱ mahi̱ śarma̍ yaccha || 5.083.05
di̱vo no̍ vṛ̱ṣṭiṁ ma̍ruto rarīdhva̱ṁ pra pi̍nvata̱ vṛṣṇo̱ aśva̍sya̱ dhārā̍ḥ |
a̱rvāṅe̱tena̍ stanayi̱tnunehya̱po ni̍ṣi̱ñcannasu̍raḥ pi̱tā na̍ḥ || 5.083.06
a̱bhi kra̍nda sta̱naya̱ garbha̱mā dhā̍ uda̱nvatā̱ pari̍ dīyā̱ rathe̍na |
dṛti̱ṁ su ka̍rṣa̱ viṣi̍ta̱ṁ nya̍ñcaṁ sa̱mā bha̍vantū̱dvato̍ nipā̱dāḥ || 5.083.07
ma̱hānta̱ṁ kośa̱muda̍cā̱ ni ṣi̍ñca̱ syanda̍ntāṁ ku̱lyā viṣi̍tāḥ pu̱rastā̍t |
ghṛ̱tena̱ dyāvā̍pṛthi̱vī vyu̍ndhi suprapā̱ṇaṁ bha̍vatva̱ghnyābhya̍ḥ || 5.083.08
yatpa̍rjanya̱ kani̍kradatsta̱naya̱nhaṁsi̍ du̱ṣkṛta̍ḥ |
pratī̱daṁ viśva̍ṁ modate̱ yatkiṁ ca̍ pṛthi̱vyāmadhi̍ || 5.083.09
ava̍rṣīrva̱rṣamudu̱ ṣū gṛ̍bhā̱yāka̱rdhanvā̱nyatye̍ta̱vā u̍ |
ajī̍jana̱ oṣa̍dhī̱rbhoja̍nāya̱ kamu̱ta pra̱jābhyo̍'vido manī̱ṣām || 5.083.10
baḻi̱tthā parva̍tānāṁ khi̱draṁ bi̍bharṣi pṛthivi |
pra yā bhūmi̍ṁ pravatvati ma̱hnā ji̱noṣi̍ mahini || 5.084.01
stomā̍sastvā vicāriṇi̱ prati̍ ṣṭobhantya̱ktubhi̍ḥ |
pra yā vāja̱ṁ na heṣa̍ntaṁ pe̱rumasya̍syarjuni || 5.084.02
dṛ̱ḻhā ci̱dyā vana̱spatī̍nkṣma̱yā dardha̱rṣyoja̍sā |
yatte̍ a̱bhrasya̍ vi̱dyuto̍ di̱vo varṣa̍nti vṛ̱ṣṭaya̍ḥ || 5.084.03
pra sa̱mrāje̍ bṛ̱hada̍rcā gabhī̱raṁ brahma̍ pri̱yaṁ varu̍ṇāya śru̱tāya̍ |
vi yo ja̱ghāna̍ śami̱teva̱ carmo̍pa̱stire̍ pṛthi̱vīṁ sūryā̍ya || 5.085.01
vane̍ṣu̱ vya1̱̍ntari̍kṣaṁ tatāna̱ vāja̱marva̍tsu̱ paya̍ u̱sriyā̍su |
hṛ̱tsu kratu̱ṁ varu̍ṇo a̱psva1̱̍gniṁ di̱vi sūrya̍madadhā̱tsoma̱madrau̍ || 5.085.02
nī̱cīna̍bāra̱ṁ varu̍ṇa̱ḥ kava̍ndha̱ṁ pra sa̍sarja̱ roda̍sī a̱ntari̍kṣam |
tena̱ viśva̍sya̱ bhuva̍nasya̱ rājā̱ yava̱ṁ na vṛ̱ṣṭirvyu̍natti̱ bhūma̍ || 5.085.03
u̱natti̱ bhūmi̍ṁ pṛthi̱vīmu̱ta dyāṁ ya̱dā du̱gdhaṁ varu̍ṇo̱ vaṣṭyādit |
sama̱bhreṇa̍ vasata̱ parva̍tāsastaviṣī̱yanta̍ḥ śrathayanta vī̱rāḥ || 5.085.04
i̱māmū̱ ṣvā̍su̱rasya̍ śru̱tasya̍ ma̱hīṁ mā̱yāṁ varu̍ṇasya̱ pra vo̍cam |
māne̍neva tasthi̱vā a̱ntari̍kṣe̱ vi yo ma̱me pṛ̍thi̱vīṁ sūrye̍ṇa || 5.085.05
i̱māmū̱ nu ka̱vita̍masya mā̱yāṁ ma̱hīṁ de̱vasya̱ naki̱rā da̍dharṣa |
eka̱ṁ yadu̱dnā na pṛ̱ṇantyenī̍rāsi̱ñcantī̍ra̱vana̍yaḥ samu̱dram || 5.085.06
a̱rya̱mya̍ṁ varuṇa mi̱trya̍ṁ vā̱ sakhā̍yaṁ vā̱ sada̱midbhrāta̍raṁ vā |
ve̱śaṁ vā̱ nitya̍ṁ varu̱ṇāra̍ṇaṁ vā̱ yatsī̱māga̍ścakṛ̱mā śi̱śratha̱stat || 5.085.07
ki̱ta̱vāso̱ yadri̍ri̱purna dī̱vi yadvā̍ ghā sa̱tyamu̱ta yanna vi̱dma |
sarvā̱ tā vi ṣya̍ śithi̱reva̍ de̱vādhā̍ te syāma varuṇa pri̱yāsa̍ḥ || 5.085.08
indrā̍gnī̱ yamava̍tha u̱bhā vāje̍ṣu̱ martya̍m |
dṛ̱ḻhā ci̱tsa pra bhe̍dati dyu̱mnā vāṇī̍riva tri̱taḥ || 5.086.01
yā pṛta̍nāsu du̱ṣṭarā̱ yā vāje̍ṣu śra̱vāyyā̍ |
yā pañca̍ carṣa̱ṇīra̱bhī̍ndrā̱gnī tā ha̍vāmahe || 5.086.02
tayo̱ridama̍va̱cchava̍sti̱gmā di̱dyunma̱ghono̍ḥ |
prati̱ druṇā̱ gabha̍styo̱rgavā̍ṁ vṛtra̱ghna eṣa̍te || 5.086.03
tā vā̱meṣe̱ rathā̍nāmindrā̱gnī ha̍vāmahe |
patī̍ tu̱rasya̱ rādha̍so vi̱dvāṁsā̱ girva̍ṇastamā || 5.086.04
tā vṛ̱dhantā̱vanu̱ dyūnmartā̍ya de̱vāva̱dabhā̍ |
arha̍ntā citpu̱ro da̱dheṁ'śe̍va de̱vāvarva̍te || 5.086.05
e̱vendrā̱gnibhyā̱mahā̍vi ha̱vyaṁ śū̱ṣya̍ṁ ghṛ̱taṁ na pū̱tamadri̍bhiḥ |
tā sū̱riṣu̱ śravo̍ bṛ̱hadra̱yiṁ gṛ̱ṇatsu̍ didhṛta̱miṣa̍ṁ gṛ̱ṇatsu̍ didhṛtam || 5.086.06
pra vo̍ ma̱he ma̱tayo̍ yantu̱ viṣṇa̍ve ma̱rutva̍te giri̱jā e̍va̱yāma̍rut |
pra śardhā̍ya̱ praya̍jyave sukhā̱daye̍ ta̱vase̍ bha̱ndadi̍ṣṭaye̱ dhuni̍vratāya̱ śava̍se || 5.087.01
pra ye jā̱tā ma̍hi̱nā ye ca̱ nu sva̱yaṁ pra vi̱dmanā̍ bru̱vata̍ eva̱yāma̍rut |
kratvā̱ tadvo̍ maruto̱ nādhṛṣe̱ śavo̍ dā̱nā ma̱hnā tade̍ṣā̱madhṛ̍ṣṭāso̱ nādra̍yaḥ || 5.087.02
pra ye di̱vo bṛ̍ha̱taḥ śṛ̍ṇvi̱re gi̱rā su̱śukvā̍naḥ su̱bhva̍ eva̱yāma̍rut |
na yeṣā̱mirī̍ sa̱dhastha̱ īṣṭa̱ ā a̱gnayo̱ na svavi̍dyuta̱ḥ pra sya̱ndrāso̱ dhunī̍nām || 5.087.03
sa ca̍krame maha̱to niru̍rukra̱maḥ sa̍mā̱nasmā̱tsada̍sa eva̱yāma̍rut |
ya̱dāyu̍kta̱ tmanā̱ svādadhi̱ ṣṇubhi̱rviṣpa̍rdhaso̱ vima̍haso̱ jigā̍ti̱ śevṛ̍dho̱ nṛbhi̍ḥ || 5.087.04
sva̱no na vo'ma̍vānrejaya̱dvṛṣā̍ tve̱ṣo ya̱yista̍vi̱ṣa e̍va̱yāma̍rut |
yenā̱ saha̍nta ṛ̱ñjata̱ svaro̍ciṣa̱ḥ sthāra̍śmāno hira̱ṇyayā̍ḥ svāyu̱dhāsa̍ i̱ṣmiṇa̍ḥ || 5.087.05
a̱pā̱ro vo̍ mahi̱mā vṛ̍ddhaśavasastve̱ṣaṁ śavo̍'vatveva̱yāma̍rut |
sthātā̍ro̱ hi prasi̍tau sa̱ṁdṛśi̱ sthana̱ te na̍ uruṣyatā ni̱daḥ śu̍śu̱kvāṁso̱ nāgnaya̍ḥ || 5.087.06
te ru̱drāsa̱ḥ suma̍khā a̱gnayo̍ yathā tuvidyu̱mnā a̍vantveva̱yāma̍rut |
dī̱rghaṁ pṛ̱thu pa̍prathe̱ sadma̱ pārthi̍va̱ṁ yeṣā̱majme̱ṣvā ma̱haḥ śardhā̱ṁsyadbhu̍tainasām || 5.087.07
a̱dve̱ṣo no̍ maruto gā̱tumeta̍na̱ śrotā̱ hava̍ṁ jari̱ture̍va̱yāma̍rut |
viṣṇo̍rma̱haḥ sa̍manyavo yuyotana̱ smadra̱thyo̱3̱̍ na da̱ṁsanāpa̱ dveṣā̍ṁsi sanu̱taḥ || 5.087.08
gantā̍ no ya̱jñaṁ ya̍jñiyāḥ su̱śami̱ śrotā̱ hava̍mara̱kṣa e̍va̱yāma̍rut |
jyeṣṭhā̍so̱ na parva̍tāso̱ vyo̍mani yū̱yaṁ tasya̍ pracetasa̱ḥ syāta̍ du̱rdharta̍vo ni̱daḥ || 5.087.09
Last udpated July 2, 2013
Special mention : Initial processing and help by Avinash and Shashi Sathaye,
Avinash Chopde, Shree Devi Kumar, Sunder Hattangadi, John Gardner.
Reprocessed from Original in final form by Detlef Eichler with additional corrections.
See Detlef's site http://www.detlef108.de/Rigveda.htm
for other details and formats.
The text is shown with accents (Anudattas, dependent Svaritas,
and independent Svaritas including Kampas). Words are connected (agnimILe).
Ch is doubled as in gachChati according to the rules of Rigveda-Pratishakhya.
At the end of a word m is replaced by Anusvara M if the initial letter of the
following word is a labial stop consonant (p, ph, b, bh, m).
Visarga H before sh, Sh or s followed by a voiceless consonant has been restored.
Source : The Aufrecht/van Nooten/Holland (Samhita) version
of the Rigveda (http://www.people.fas.harvard.edu/~witzel/onlineRV.htm).
In this text accented vowels have Udatta or 'independent Svarita' markers.
Kampas are not shown. Words are separated (agnim ILe).
Ch is not doubled as in gaChati. At the end of a word we find m before
a following labial stop consonant (p, ph, b, bh, m).
Visarga H before sh, Sh or s followed by a voiceless consonant has
been dropped according to a rule of Rigveda-Pratishakhya.
Send corrections to : detlefeichler@googlemail.com, sanskrit@cheerful.com
The text is to be used for personal studies and research only.
Any use for commercial purpose is prohibited as a `gentleman's' agreement.