|| ṛgvedaḥ maṇḍalaṁ 7 ||
a̱gniṁ naro̱ dīdhi̍tibhira̱raṇyo̱rhasta̍cyutī janayanta praśa̱stam |
dū̱re̱dṛśa̍ṁ gṛ̱hapa̍timatha̱ryum || 7.001.01
tama̱gnimaste̱ vasa̍vo̱ nyṛ̍ṇvansuprati̱cakṣa̱mava̍se̱ kuta̍ścit |
da̱kṣāyyo̱ yo dama̱ āsa̱ nitya̍ḥ || 7.001.02
preddho̍ agne dīdihi pu̱ro no'ja̍srayā sū̱rmyā̍ yaviṣṭha |
tvāṁ śaśva̍nta̱ upa̍ yanti̱ vājā̍ḥ || 7.001.03
pra te a̱gnayo̱'gnibhyo̱ vara̱ṁ niḥ su̱vīrā̍saḥ śośucanta dyu̱manta̍ḥ |
yatrā̱ nara̍ḥ sa̱māsa̍te sujā̱tāḥ || 7.001.04
dā no̍ agne dhi̱yā ra̱yiṁ su̱vīra̍ṁ svapa̱tyaṁ sa̍hasya praśa̱stam |
na yaṁ yāvā̱ tara̍ti yātu̱māvā̍n || 7.001.05
upa̱ yameti̍ yuva̱tiḥ su̱dakṣa̍ṁ do̱ṣā vasto̍rha̱viṣma̍tī ghṛ̱tācī̍ |
upa̱ svaina̍ma̱rama̍tirvasū̱yuḥ || 7.001.06
viśvā̍ a̱gne'pa̍ da̱hārā̍tī̱ryebhi̱stapo̍bhi̱rada̍ho̱ jarū̍tham |
pra ni̍sva̱raṁ cā̍taya̱svāmī̍vām || 7.001.07
ā yaste̍ agna idha̱te anī̍ka̱ṁ vasi̍ṣṭha̱ śukra̱ dīdi̍va̱ḥ pāva̍ka |
u̱to na̍ e̱bhiḥ sta̱vathai̍ri̱ha syā̍ḥ || 7.001.08
vi ye te̍ agne bheji̱re anī̍ka̱ṁ martā̱ nara̱ḥ pitryā̍saḥ puru̱trā |
u̱to na̍ e̱bhiḥ su̱manā̍ i̱ha syā̍ḥ || 7.001.09
i̱me naro̍ vṛtra̱hatye̍ṣu̱ śūrā̱ viśvā̱ ade̍vīra̱bhi sa̍ntu mā̱yāḥ |
ye me̱ dhiya̍ṁ pa̱naya̍nta praśa̱stām || 7.001.10
mā śūne̍ agne̱ ni ṣa̍dāma nṛ̱ṇāṁ māśeṣa̍so̱'vīra̍tā̱ pari̍ tvā |
pra̱jāva̍tīṣu̱ duryā̍su durya || 7.001.11
yama̱śvī nitya̍mupa̱yāti̍ ya̱jñaṁ pra̱jāva̍ntaṁ svapa̱tyaṁ kṣaya̍ṁ naḥ |
svaja̍nmanā̱ śeṣa̍sā vāvṛdhā̱nam || 7.001.12
pā̱hi no̍ agne ra̱kṣaso̱ aju̍ṣṭātpā̱hi dhū̱rterara̍ruṣo aghā̱yoḥ |
tvā yu̱jā pṛ̍tanā̱yūra̱bhi ṣyā̍m || 7.001.13
seda̱gnira̱gnīratya̍stva̱nyānyatra̍ vā̱jī tana̍yo vī̱ḻupā̍ṇiḥ |
sa̱hasra̍pāthā a̱kṣarā̍ sa̱meti̍ || 7.001.14
seda̱gniryo va̍nuṣya̱to ni̱pāti̍ same̱ddhāra̱maṁha̍sa uru̱ṣyāt |
su̱jā̱tāsa̱ḥ pari̍ caranti vī̱rāḥ || 7.001.15
a̱yaṁ so a̱gnirāhu̍taḥ puru̱trā yamīśā̍na̱ḥ samidi̱ndhe ha̱viṣmā̍n |
pari̱ yametya̍dhva̱reṣu̱ hotā̍ || 7.001.16
tve a̍gna ā̱hava̍nāni̱ bhūrī̍śā̱nāsa̱ ā ju̍huyāma̱ nityā̍ |
u̱bhā kṛ̱ṇvanto̍ vaha̱tū mi̱yedhe̍ || 7.001.17
i̱mo a̍gne vī̱tata̍māni ha̱vyāja̍sro vakṣi de̱vatā̍ti̱maccha̍ |
prati̍ na īṁ sura̱bhīṇi̍ vyantu || 7.001.18
mā no̍ agne̱'vīra̍te̱ parā̍ dā du̱rvāsa̱se'ma̍taye̱ mā no̍ a̱syai |
mā na̍ḥ kṣu̱dhe mā ra̱kṣasa̍ ṛtāvo̱ mā no̱ dame̱ mā vana̱ ā ju̍hūrthāḥ || 7.001.19
nū me̱ brahmā̍ṇyagna̱ uccha̍śādhi̱ tvaṁ de̍va ma̱ghava̍dbhyaḥ suṣūdaḥ |
rā̱tau syā̍mo̱bhayā̍sa̱ ā te̍ yū̱yaṁ pā̍ta sva̱stibhi̱ḥ sadā̍ naḥ || 7.001.20
tvama̍gne su̱havo̍ ra̱ṇvasa̍ṁdṛksudī̱tī sū̍no sahaso didīhi |
mā tve sacā̱ tana̍ye̱ nitya̱ ā dha̱ṅmā vī̱ro a̱smannaryo̱ vi dā̍sīt || 7.001.21
mā no̍ agne durbhṛ̱taye̱ sacai̱ṣu de̱veddhe̍ṣva̱gniṣu̱ pra vo̍caḥ |
mā te̍ a̱smāndu̍rma̱tayo̍ bhṛ̱mācci̍dde̱vasya̍ sūno sahaso naśanta || 7.001.22
sa marto̍ agne svanīka re̱vānama̍rtye̱ ya ā̍ju̱hoti̍ ha̱vyam |
sa de̱vatā̍ vasu̱vani̍ṁ dadhāti̱ yaṁ sū̱rira̱rthī pṛ̱cchamā̍na̱ eti̍ || 7.001.23
ma̱ho no̍ agne suvi̱tasya̍ vi̱dvānra̱yiṁ sū̱ribhya̱ ā va̍hā bṛ̱hanta̍m |
yena̍ va̱yaṁ sa̍hasāva̱nmade̱māvi̍kṣitāsa̱ āyu̍ṣā su̱vīrā̍ḥ || 7.001.24
nū me̱ brahmā̍ṇyagna̱ uccha̍śādhi̱ tvaṁ de̍va ma̱ghava̍dbhyaḥ suṣūdaḥ |
rā̱tau syā̍mo̱bhayā̍sa̱ ā te̍ yū̱yaṁ pā̍ta sva̱stibhi̱ḥ sadā̍ naḥ || 7.001.25
ju̱ṣasva̍ naḥ sa̱midha̍magne a̱dya śocā̍ bṛ̱hadya̍ja̱taṁ dhū̱mamṛ̱ṇvan |
upa̍ spṛśa di̱vyaṁ sānu̱ stūpai̱ḥ saṁ ra̱śmibhi̍statana̱ḥ sūrya̍sya || 7.002.01
narā̱śaṁsa̍sya mahi̱māna̍meṣā̱mupa̍ stoṣāma yaja̱tasya̍ ya̱jñaiḥ |
ye su̱krata̍va̱ḥ śuca̍yo dhiya̱ṁdhāḥ svada̍nti de̱vā u̱bhayā̍ni ha̱vyā || 7.002.02
ī̱ḻenya̍ṁ vo̱ asu̍raṁ su̱dakṣa̍ma̱ntardū̱taṁ roda̍sī satya̱vāca̍m |
ma̱nu̱ṣvada̱gniṁ manu̍nā̱ sami̍ddha̱ṁ sama̍dhva̱rāya̱ sada̱minma̍hema || 7.002.03
sa̱pa̱ryavo̱ bhara̍māṇā abhi̱jñu pra vṛ̍ñjate̱ nama̍sā ba̱rhira̱gnau |
ā̱juhvā̍nā ghṛ̱tapṛ̍ṣṭha̱ṁ pṛṣa̍dva̱dadhva̍ryavo ha̱viṣā̍ marjayadhvam || 7.002.04
svā̱dhyo̱3̱̍ vi duro̍ deva̱yanto'śi̍śrayū ratha̱yurde̱vatā̍tā |
pū̱rvī śiśu̱ṁ na mā̱tarā̍ rihā̱ṇe sama̱gruvo̱ na sama̍neṣvañjan || 7.002.05
u̱ta yoṣa̍ṇe di̱vye ma̱hī na̍ u̱ṣāsā̱naktā̍ su̱dughe̍va dhe̱nuḥ |
ba̱rhi̱ṣadā̍ puruhū̱te ma̱ghonī̱ ā ya̱jñiye̍ suvi̱tāya̍ śrayetām || 7.002.06
viprā̍ ya̱jñeṣu̱ mānu̍ṣeṣu kā̱rū manye̍ vāṁ jā̱tave̍dasā̱ yaja̍dhyai |
ū̱rdhvaṁ no̍ adhva̱raṁ kṛ̍ta̱ṁ have̍ṣu̱ tā de̱veṣu̍ vanatho̱ vāryā̍ṇi || 7.002.07
ā bhāra̍tī̱ bhāra̍tībhiḥ sa̱joṣā̱ iḻā̍ de̱vairma̍nu̱ṣye̍bhira̱gniḥ |
sara̍svatī sārasva̱tebhi̍ra̱rvākti̱sro de̱vīrba̱rhiredaṁ sa̍dantu || 7.002.08
tanna̍stu̱rīpa̱madha̍ poṣayi̱tnu deva̍ tvaṣṭa̱rvi ra̍rā̱ṇaḥ sya̍sva |
yato̍ vī̱raḥ ka̍rma̱ṇya̍ḥ su̱dakṣo̍ yu̱ktagrā̍vā̱ jāya̍te de̱vakā̍maḥ || 7.002.09
vana̍spa̱te'va̍ sṛ̱jopa̍ de̱vāna̱gnirha̱viḥ śa̍mi̱tā sū̍dayāti |
sedu̱ hotā̍ sa̱tyata̍ro yajāti̱ yathā̍ de̱vānā̱ṁ jani̍māni̱ veda̍ || 7.002.10
ā yā̍hyagne samidhā̱no a̱rvāṅindre̍ṇa de̱vaiḥ sa̱ratha̍ṁ tu̱rebhi̍ḥ |
ba̱rhirna̍ āstā̱madi̍tiḥ supu̱trā svāhā̍ de̱vā a̱mṛtā̍ mādayantām || 7.002.11
a̱gniṁ vo̍ de̱vama̱gnibhi̍ḥ sa̱joṣā̱ yaji̍ṣṭhaṁ dū̱tama̍dhva̱re kṛ̍ṇudhvam |
yo martye̍ṣu̱ nidhru̍virṛ̱tāvā̱ tapu̍rmūrdhā ghṛ̱tānna̍ḥ pāva̱kaḥ || 7.003.01
protha̱daśvo̱ na yava̍se'vi̱ṣyanya̱dā ma̱haḥ sa̱ṁvara̍ṇā̱dvyasthā̍t |
āda̍sya̱ vāto̱ anu̍ vāti śo̱ciradha̍ sma te̱ vraja̍naṁ kṛ̱ṣṇama̍sti || 7.003.02
udyasya̍ te̱ nava̍jātasya̱ vṛṣṇo'gne̱ cara̍ntya̱jarā̍ idhā̱nāḥ |
acchā̱ dyāma̍ru̱ṣo dhū̱ma e̍ti̱ saṁ dū̱to a̍gna̱ īya̍se̱ hi de̱vān || 7.003.03
vi yasya̍ te pṛthi̱vyāṁ pājo̱ aśre̍ttṛ̱ṣu yadannā̍ sa̱mavṛ̍kta̱ jambhai̍ḥ |
sene̍va sṛ̱ṣṭā prasi̍tiṣṭa eti̱ yava̱ṁ na da̍sma ju̱hvā̍ vivekṣi || 7.003.04
tamiddo̱ṣā tamu̱ṣasi̱ yavi̍ṣṭhama̱gnimatya̱ṁ na ma̍rjayanta̱ nara̍ḥ |
ni̱śiśā̍nā̱ ati̍thimasya̱ yonau̍ dī̱dāya̍ śo̱cirāhu̍tasya̱ vṛṣṇa̍ḥ || 7.003.05
su̱sa̱ṁdṛkte̍ svanīka̱ pratī̍ka̱ṁ vi yadru̱kmo na roca̍sa upā̱ke |
di̱vo na te̍ tanya̱ture̍ti̱ śuṣma̍ści̱tro na sūra̱ḥ prati̍ cakṣi bhā̱num || 7.003.06
yathā̍ va̱ḥ svāhā̱gnaye̱ dāśe̍ma̱ parīḻā̍bhirghṛ̱tava̍dbhiśca ha̱vyaiḥ |
tebhi̍rno agne̱ ami̍tai̱rmaho̍bhiḥ śa̱taṁ pū̱rbhirāya̍sībhi̱rni pā̍hi || 7.003.07
yā vā̍ te̱ santi̍ dā̱śuṣe̱ adhṛ̍ṣṭā̱ giro̍ vā̱ yābhi̍rnṛ̱vatī̍ruru̱ṣyāḥ |
tābhi̍rnaḥ sūno sahaso̱ ni pā̍hi̱ smatsū̱rīñja̍ri̱tṝñjā̍tavedaḥ || 7.003.08
niryatpū̱teva̱ svadhi̍ti̱ḥ śuci̱rgātsvayā̍ kṛ̱pā ta̱nvā̱3̱̍ roca̍mānaḥ |
ā yo mā̱troru̱śenyo̱ jani̍ṣṭa deva̱yajyā̍ya su̱kratu̍ḥ pāva̱kaḥ || 7.003.09
e̱tā no̍ agne̱ saubha̍gā didī̱hyapi̱ kratu̍ṁ su̱ceta̍saṁ vatema |
viśvā̍ sto̱tṛbhyo̍ gṛṇa̱te ca̍ santu yū̱yaṁ pā̍ta sva̱stibhi̱ḥ sadā̍ naḥ || 7.003.10
pra va̍ḥ śu̱krāya̍ bhā̱nave̍ bharadhvaṁ ha̱vyaṁ ma̱tiṁ cā̱gnaye̱ supū̍tam |
yo daivyā̍ni̱ mānu̍ṣā ja̱nūṁṣya̱ntarviśvā̍ni vi̱dmanā̱ jigā̍ti || 7.004.01
sa gṛtso̍ a̱gnistaru̍ṇaścidastu̱ yato̱ yavi̍ṣṭho̱ aja̍niṣṭa mā̱tuḥ |
saṁ yo vanā̍ yu̱vate̱ śuci̍da̱nbhūri̍ ci̱dannā̱ samida̍tti sa̱dyaḥ || 7.004.02
a̱sya de̱vasya̍ sa̱ṁsadyanī̍ke̱ yaṁ martā̍saḥ śye̱taṁ ja̍gṛ̱bhre |
ni yo gṛbha̱ṁ pauru̍ṣeyīmu̱voca̍ du̱roka̍ma̱gnirā̱yave̍ śuśoca || 7.004.03
a̱yaṁ ka̱viraka̍viṣu̱ prace̍tā̱ marte̍ṣva̱gnira̱mṛto̱ ni dhā̍yi |
sa mā no̱ atra̍ juhuraḥ sahasva̱ḥ sadā̱ tve su̱mana̍saḥ syāma || 7.004.04
ā yo yoni̍ṁ de̱vakṛ̍taṁ sa̱sāda̱ kratvā̱ hya1̱̍gnira̱mṛtā̱ atā̍rīt |
tamoṣa̍dhīśca va̱nina̍śca̱ garbha̱ṁ bhūmi̍śca vi̱śvadhā̍yasaṁ bibharti || 7.004.05
īśe̱ hya1̱̍gnira̱mṛta̍sya̱ bhūre̱rīśe̍ rā̱yaḥ su̱vīrya̍sya̱ dāto̍ḥ |
mā tvā̍ va̱yaṁ sa̍hasāvanna̱vīrā̱ māpsa̍va̱ḥ pari̍ ṣadāma̱ mādu̍vaḥ || 7.004.06
pa̱ri̱ṣadya̱ṁ hyara̍ṇasya̱ rekṇo̱ nitya̍sya rā̱yaḥ pata̍yaḥ syāma |
na śeṣo̍ agne a̱nyajā̍tama̱styace̍tānasya̱ mā pa̱tho vi du̍kṣaḥ || 7.004.07
na̱hi grabhā̱yāra̍ṇaḥ su̱śevo̱'nyoda̍ryo̱ mana̍sā̱ manta̱vā u̍ |
adhā̍ ci̱doka̱ḥ puna̱ritsa e̱tyā no̍ vā̱jya̍bhī̱ṣāḻe̍tu̱ navya̍ḥ || 7.004.08
tvama̍gne vanuṣya̱to ni pā̍hi̱ tvamu̍ naḥ sahasāvannava̱dyāt |
saṁ tvā̍ dhvasma̱nvada̱bhye̍tu̱ pātha̱ḥ saṁ ra̱yiḥ spṛ̍ha̱yāyya̍ḥ saha̱srī || 7.004.09
e̱tā no̍ agne̱ saubha̍gā didī̱hyapi̱ kratu̍ṁ su̱ceta̍saṁ vatema |
viśvā̍ sto̱tṛbhyo̍ gṛṇa̱te ca̍ santu yū̱yaṁ pā̍ta sva̱stibhi̱ḥ sadā̍ naḥ || 7.004.10
prāgnaye̍ ta̱vase̍ bharadhva̱ṁ gira̍ṁ di̱vo a̍ra̱taye̍ pṛthi̱vyāḥ |
yo viśve̍ṣāma̱mṛtā̍nāmu̱pasthe̍ vaiśvāna̱ro vā̍vṛ̱dhe jā̍gṛ̱vadbhi̍ḥ || 7.005.01
pṛ̱ṣṭo di̱vi dhāyya̱gniḥ pṛ̍thi̱vyāṁ ne̱tā sindhū̍nāṁ vṛṣa̱bhaḥ stiyā̍nām |
sa mānu̍ṣīra̱bhi viśo̱ vi bhā̍ti vaiśvāna̱ro vā̍vṛdhā̱no vare̍ṇa || 7.005.02
tvadbhi̱yā viśa̍ āya̱nnasi̍knīrasama̱nā jaha̍tī̱rbhoja̍nāni |
vaiśvā̍nara pū̱rave̱ śośu̍cāna̱ḥ puro̱ yada̍gne da̱raya̱nnadī̍deḥ || 7.005.03
tava̍ tri̱dhātu̍ pṛthi̱vī u̱ta dyaurvaiśvā̍nara vra̱tama̍gne sacanta |
tvaṁ bhā̱sā roda̍sī̱ ā ta̍ta̱nthāja̍sreṇa śo̱ciṣā̱ śośu̍cānaḥ || 7.005.04
tvāma̍gne ha̱rito̍ vāvaśā̱nā gira̍ḥ sacante̱ dhuna̍yo ghṛ̱tācī̍ḥ |
pati̍ṁ kṛṣṭī̱nāṁ ra̱thya̍ṁ rayī̱ṇāṁ vai̍śvāna̱ramu̱ṣasā̍ṁ ke̱tumahnā̍m || 7.005.05
tve a̍su̱ryaṁ1̱̍ vasa̍vo̱ nyṛ̍ṇva̱nkratu̱ṁ hi te̍ mitramaho ju̱ṣanta̍ |
tvaṁ dasyū̱roka̍so agna āja u̱ru jyoti̍rja̱naya̱nnāryā̍ya || 7.005.06
sa jāya̍mānaḥ para̱me vyo̍manvā̱yurna pātha̱ḥ pari̍ pāsi sa̱dyaḥ |
tvaṁ bhuva̍nā ja̱naya̍nna̱bhi kra̱nnapa̍tyāya jātavedo daśa̱syan || 7.005.07
tāma̍gne a̱sme iṣa̱mera̍yasva̱ vaiśvā̍nara dyu̱matī̍ṁ jātavedaḥ |
yayā̱ rādha̱ḥ pinva̍si viśvavāra pṛ̱thu śravo̍ dā̱śuṣe̱ martyā̍ya || 7.005.08
taṁ no̍ agne ma̱ghava̍dbhyaḥ puru̱kṣuṁ ra̱yiṁ ni vāja̱ṁ śrutya̍ṁ yuvasva |
vaiśvā̍nara̱ mahi̍ na̱ḥ śarma̍ yaccha ru̱drebhi̍ragne̱ vasu̍bhiḥ sa̱joṣā̍ḥ || 7.005.09
pra sa̱mrājo̱ asu̍rasya̱ praśa̍stiṁ pu̱ṁsaḥ kṛ̍ṣṭī̱nāma̍nu̱mādya̍sya |
indra̍syeva̱ pra ta̱vasa̍skṛ̱tāni̱ vande̍ dā̱ruṁ vanda̍māno vivakmi || 7.006.01
ka̱viṁ ke̱tuṁ dhā̱siṁ bhā̱numadre̍rhi̱nvanti̱ śaṁ rā̱jyaṁ roda̍syoḥ |
pu̱ra̱ṁda̱rasya̍ gī̱rbhirā vi̍vāse̱'gnervra̱tāni̍ pū̱rvyā ma̱hāni̍ || 7.006.02
nya̍kra̱tūngra̱thino̍ mṛ̱dhravā̍caḥ pa̱ṇīra̍śra̱ddhā a̍vṛ̱dhā a̍ya̱jñān |
prapra̱ tāndasyū̍ra̱gnirvi̍vāya̱ pūrva̍ścakā̱rāpa̍rā̱ aya̍jyūn || 7.006.03
yo a̍pā̱cīne̱ tama̍si̱ mada̍ntī̱ḥ prācī̍śca̱kāra̱ nṛta̍ma̱ḥ śacī̍bhiḥ |
tamīśā̍na̱ṁ vasvo̍ a̱gniṁ gṛ̍ṇī̱ṣe'nā̍nataṁ da̱maya̍ntaṁ pṛta̱nyūn || 7.006.04
yo de̱hyo̱3̱̍ ana̍mayadvadha̱snairyo a̱ryapa̍tnīru̱ṣasa̍śca̱kāra̍ |
sa ni̱rudhyā̱ nahu̍ṣo ya̱hvo a̱gnirviśa̍ścakre bali̱hṛta̱ḥ saho̍bhiḥ || 7.006.05
yasya̱ śarma̱nnupa̱ viśve̱ janā̍sa̱ evai̍sta̱sthuḥ su̍ma̱tiṁ bhikṣa̍māṇāḥ |
vai̱śvā̱na̱ro vara̱mā roda̍syo̱rāgniḥ sa̍sāda pi̱troru̱pastha̍m || 7.006.06
ā de̱vo da̍de bu̱dhnyā̱3̱̍ vasū̍ni vaiśvāna̱ra udi̍tā̱ sūrya̍sya |
ā sa̍mu̱drādava̍rā̱dā para̍smā̱dāgnirda̍de di̱va ā pṛ̍thi̱vyāḥ || 7.006.07
pra vo̍ de̱vaṁ ci̍tsahasā̱nama̱gnimaśva̱ṁ na vā̱jina̍ṁ hiṣe̱ namo̍bhiḥ |
bhavā̍ no dū̱to a̍dhva̱rasya̍ vi̱dvāntmanā̍ de̱veṣu̍ vivide mi̱tadru̍ḥ || 7.007.01
ā yā̍hyagne pa̱thyā̱3̱̍ anu̱ svā ma̱ndro de̱vānā̍ṁ sa̱khyaṁ ju̍ṣā̱ṇaḥ |
ā sānu̱ śuṣmai̍rna̱daya̍npṛthi̱vyā jambhe̍bhi̱rviśva̍mu̱śadha̱gvanā̍ni || 7.007.02
prā̱cīno̍ ya̱jñaḥ sudhi̍ta̱ṁ hi ba̱rhiḥ prī̍ṇī̱te a̱gnirī̍ḻi̱to na hotā̍ |
ā mā̱tarā̍ vi̱śvavā̍re huvā̱no yato̍ yaviṣṭha jajñi̱ṣe su̱śeva̍ḥ || 7.007.03
sa̱dyo a̍dhva̱re ra̍thi̱raṁ ja̍nanta̱ mānu̍ṣāso̱ vice̍taso̱ ya e̍ṣām |
vi̱śāma̍dhāyi vi̱śpati̍rduro̱ṇe̱3̱̍'gnirma̱ndro madhu̍vacā ṛ̱tāvā̍ || 7.007.04
asā̍di vṛ̱to vahni̍rājaga̱nvāna̱gnirbra̱hmā nṛ̱ṣada̍ne vidha̱rtā |
dyauśca̱ yaṁ pṛ̍thi̱vī vā̍vṛ̱dhāte̱ ā yaṁ hotā̱ yaja̍ti vi̱śvavā̍ram || 7.007.05
e̱te dyu̱mnebhi̱rviśva̱māti̍ranta̱ mantra̱ṁ ye vāra̱ṁ naryā̱ ata̍kṣan |
pra ye viśa̍sti̱ranta̱ śroṣa̍māṇā̱ ā ye me̍ a̱sya dīdha̍yannṛ̱tasya̍ || 7.007.06
nū tvāma̍gna īmahe̱ vasi̍ṣṭhā īśā̱naṁ sū̍no sahaso̱ vasū̍nām |
iṣa̍ṁ sto̱tṛbhyo̍ ma̱ghava̍dbhya ānaḍyū̱yaṁ pā̍ta sva̱stibhi̱ḥ sadā̍ naḥ || 7.007.07
i̱ndhe rājā̱ sama̱ryo namo̍bhi̱ryasya̱ pratī̍ka̱māhu̍taṁ ghṛ̱tena̍ |
naro̍ ha̱vyebhi̍rīḻate sa̱bādha̱ āgniragra̍ u̱ṣasā̍maśoci || 7.008.01
a̱yamu̱ ṣya suma̍hā avedi̱ hotā̍ ma̱ndro manu̍ṣo ya̱hvo a̱gniḥ |
vi bhā a̍kaḥ sasṛjā̱naḥ pṛ̍thi̱vyāṁ kṛ̱ṣṇapa̍vi̱roṣa̍dhībhirvavakṣe || 7.008.02
kayā̍ no agne̱ vi va̍saḥ suvṛ̱ktiṁ kāmu̍ sva̱dhāmṛ̍ṇavaḥ śa̱syamā̍naḥ |
ka̱dā bha̍vema̱ pata̍yaḥ sudatra rā̱yo va̱ntāro̍ du̱ṣṭara̍sya sā̱dhoḥ || 7.008.03
praprā̱yama̱gnirbha̍ra̱tasya̍ śṛṇve̱ vi yatsūryo̱ na roca̍te bṛ̱hadbhāḥ |
a̱bhi yaḥ pū̱ruṁ pṛta̍nāsu ta̱sthau dyu̍tā̱no daivyo̱ ati̍thiḥ śuśoca || 7.008.04
asa̱nnittve ā̱hava̍nāni̱ bhūri̱ bhuvo̱ viśve̍bhiḥ su̱manā̱ anī̍kaiḥ |
stu̱taści̍dagne śṛṇviṣe gṛṇā̱naḥ sva̱yaṁ va̍rdhasva ta̱nva̍ṁ sujāta || 7.008.05
i̱daṁ vaca̍ḥ śata̱sāḥ saṁsa̍hasra̱muda̱gnaye̍ janiṣīṣṭa dvi̱barhā̍ḥ |
śaṁ yatsto̱tṛbhya̍ ā̱paye̱ bhavā̍ti dyu̱mada̍mīva̱cāta̍naṁ rakṣo̱hā || 7.008.06
nū tvāma̍gna īmahe̱ vasi̍ṣṭhā īśā̱naṁ sū̍no sahaso̱ vasū̍nām |
iṣa̍ṁ sto̱tṛbhyo̍ ma̱ghava̍dbhya ānaḍyū̱yaṁ pā̍ta sva̱stibhi̱ḥ sadā̍ naḥ || 7.008.07
abo̍dhi jā̱ra u̱ṣasā̍mu̱pasthā̱ddhotā̍ ma̱ndraḥ ka̱vita̍maḥ pāva̱kaḥ |
dadhā̍ti ke̱tumu̱bhaya̍sya ja̱ntorha̱vyā de̱veṣu̱ dravi̍ṇaṁ su̱kṛtsu̍ || 7.009.01
sa su̱kratu̱ryo vi dura̍ḥ paṇī̱nāṁ pu̍nā̱no a̱rkaṁ pu̍ru̱bhoja̍saṁ naḥ |
hotā̍ ma̱ndro vi̱śāṁ damū̍nāsti̱rastamo̍ dadṛśe rā̱myāṇā̍m || 7.009.02
amū̍raḥ ka̱viradi̍tirvi̱vasvā̍nsusa̱ṁsanmi̱tro ati̍thiḥ śi̱vo na̍ḥ |
ci̱trabhā̍nuru̱ṣasā̍ṁ bhā̱tyagre̱'pāṁ garbha̍ḥ pra̱sva1̱̍ ā vi̍veśa || 7.009.03
ī̱ḻenyo̍ vo̱ manu̍ṣo yu̱geṣu̍ samana̱gā a̍śucajjā̱tave̍dāḥ |
su̱sa̱ṁdṛśā̍ bhā̱nunā̱ yo vi̱bhāti̱ prati̱ gāva̍ḥ samidhā̱naṁ bu̍dhanta || 7.009.04
agne̍ yā̱hi dū̱tyaṁ1̱̍ mā ri̍ṣaṇyo de̱vā acchā̍ brahma̱kṛtā̍ ga̱ṇena̍ |
sara̍svatīṁ ma̱ruto̍ a̱śvinā̱po yakṣi̍ de̱vānra̍tna̱dheyā̍ya̱ viśvā̍n || 7.009.05
tvāma̍gne samidhā̱no vasi̍ṣṭho̱ jarū̍thaṁ ha̱nyakṣi̍ rā̱ye pura̍ṁdhim |
pu̱ru̱ṇī̱thā jā̍tavedo jarasva yū̱yaṁ pā̍ta sva̱stibhi̱ḥ sadā̍ naḥ || 7.009.06
u̱ṣo na jā̱raḥ pṛ̱thu pājo̍ aśre̱ddavi̍dyuta̱ddīdya̱cchośu̍cānaḥ |
vṛṣā̱ hari̱ḥ śuci̱rā bhā̍ti bhā̱sā dhiyo̍ hinvā̱na u̍śa̱tīra̍jīgaḥ || 7.010.01
sva1̱̍rṇa vasto̍ru̱ṣasā̍maroci ya̱jñaṁ ta̍nvā̱nā u̱śijo̱ na manma̍ |
a̱gnirjanmā̍ni de̱va ā vi vi̱dvāndra̱vaddū̱to de̍va̱yāvā̱ vani̍ṣṭhaḥ || 7.010.02
acchā̱ giro̍ ma̱tayo̍ deva̱yantī̍ra̱gniṁ ya̍nti̱ dravi̍ṇa̱ṁ bhikṣa̍māṇāḥ |
su̱sa̱ṁdṛśa̍ṁ su̱pratī̍ka̱ṁ svañca̍ṁ havya̱vāha̍mara̱tiṁ mānu̍ṣāṇām || 7.010.03
indra̍ṁ no agne̱ vasu̍bhiḥ sa̱joṣā̍ ru̱draṁ ru̱drebhi̱rā va̍hā bṛ̱hanta̍m |
ā̱di̱tyebhi̱radi̍tiṁ vi̱śvaja̍nyā̱ṁ bṛha̱spati̱mṛkva̍bhirvi̱śvavā̍ram || 7.010.04
ma̱ndraṁ hotā̍ramu̱śijo̱ yavi̍ṣṭhama̱gniṁ viśa̍ īḻate adhva̱reṣu̍ |
sa hi kṣapā̍vā̱ abha̍vadrayī̱ṇāmata̍ndro dū̱to ya̱jathā̍ya de̱vān || 7.010.05
ma̱hā a̍syadhva̱rasya̍ prake̱to na ṛ̱te tvada̱mṛtā̍ mādayante |
ā viśve̍bhiḥ sa̱ratha̍ṁ yāhi de̱vairnya̍gne̱ hotā̍ pratha̱maḥ sa̍de̱ha || 7.011.01
tvāmī̍ḻate aji̱raṁ dū̱tyā̍ya ha̱viṣma̍nta̱ḥ sada̱minmānu̍ṣāsaḥ |
yasya̍ de̱vairāsa̍do ba̱rhira̱gne'hā̍nyasmai su̱dinā̍ bhavanti || 7.011.02
triści̍da̱ktoḥ pra ci̍kitu̱rvasū̍ni̱ tve a̱ntardā̱śuṣe̱ martyā̍ya |
ma̱nu̱ṣvada̍gna i̱ha ya̍kṣi de̱vānbhavā̍ no dū̱to a̍bhiśasti̱pāvā̍ || 7.011.03
a̱gnirī̍śe bṛha̱to a̍dhva̱rasyā̱gnirviśva̍sya ha̱viṣa̍ḥ kṛ̱tasya̍ |
kratu̱ṁ hya̍sya̱ vasa̍vo ju̱ṣantāthā̍ de̱vā da̍dhire havya̱vāha̍m || 7.011.04
āgne̍ vaha havi̱radyā̍ya de̱vānindra̍jyeṣṭhāsa i̱ha mā̍dayantām |
i̱maṁ ya̱jñaṁ di̱vi de̱veṣu̍ dhehi yū̱yaṁ pā̍ta sva̱stibhi̱ḥ sadā̍ naḥ || 7.011.05
aga̍nma ma̱hā nama̍sā̱ yavi̍ṣṭha̱ṁ yo dī̱dāya̱ sami̍ddha̱ḥ sve du̍ro̱ṇe |
ci̱trabhā̍nu̱ṁ roda̍sī a̱ntaru̱rvī svā̍hutaṁ vi̱śvata̍ḥ pra̱tyañca̍m || 7.012.01
sa ma̱hnā viśvā̍ duri̱tāni̍ sā̱hvāna̱gniḥ ṣṭa̍ve̱ dama̱ ā jā̱tave̍dāḥ |
sa no̍ rakṣiṣadduri̱tāda̍va̱dyāda̱smāngṛ̍ṇa̱ta u̱ta no̍ ma̱ghona̍ḥ || 7.012.02
tvaṁ varu̍ṇa u̱ta mi̱tro a̍gne̱ tvāṁ va̍rdhanti ma̱tibhi̱rvasi̍ṣṭhāḥ |
tve vasu̍ suṣaṇa̱nāni̍ santu yū̱yaṁ pā̍ta sva̱stibhi̱ḥ sadā̍ naḥ || 7.012.03
prāgnaye̍ viśva̱śuce̍ dhiya̱ṁdhe̍'sura̱ghne manma̍ dhī̱tiṁ bha̍radhvam |
bhare̍ ha̱virna ba̱rhiṣi̍ prīṇā̱no vai̍śvāna̱rāya̱ yata̍ye matī̱nām || 7.013.01
tvama̍gne śo̱ciṣā̱ śośu̍cāna̱ ā roda̍sī apṛṇā̱ jāya̍mānaḥ |
tvaṁ de̱vā a̱bhiśa̍steramuñco̱ vaiśvā̍nara jātavedo mahi̱tvā || 7.013.02
jā̱to yada̍gne̱ bhuva̍nā̱ vyakhya̍ḥ pa̱śūnna go̱pā irya̱ḥ pari̍jmā |
vaiśvā̍nara̱ brahma̍ṇe vinda gā̱tuṁ yū̱yaṁ pā̍ta sva̱stibhi̱ḥ sadā̍ naḥ || 7.013.03
sa̱midhā̍ jā̱tave̍dase de̱vāya̍ de̱vahū̍tibhiḥ |
ha̱virbhi̍ḥ śu̱kraśo̍ciṣe nama̱svino̍ va̱yaṁ dā̍śemā̱gnaye̍ || 7.014.01
va̱yaṁ te̍ agne sa̱midhā̍ vidhema va̱yaṁ dā̍śema suṣṭu̱tī ya̍jatra |
va̱yaṁ ghṛ̱tenā̍dhvarasya hotarva̱yaṁ de̍va ha̱viṣā̍ bhadraśoce || 7.014.02
ā no̍ de̱vebhi̱rupa̍ de̱vahū̍ti̱magne̍ yā̱hi vaṣa̍ṭkṛtiṁ juṣā̱ṇaḥ |
tubhya̍ṁ de̱vāya̱ dāśa̍taḥ syāma yū̱yaṁ pā̍ta sva̱stibhi̱ḥ sadā̍ naḥ || 7.014.03
u̱pa̱sadyā̍ya mī̱ḻhuṣa̍ ā̱sye̍ juhutā ha̱viḥ |
yo no̱ nedi̍ṣṭha̱māpya̍m || 7.015.01
yaḥ pañca̍ carṣa̱ṇīra̱bhi ni̍ṣa̱sāda̱ dame̍dame |
ka̱virgṛ̱hapa̍ti̱ryuvā̍ || 7.015.02
sa no̱ vedo̍ a̱mātya̍ma̱gnī ra̍kṣatu vi̱śvata̍ḥ |
u̱tāsmānpā̱tvaṁha̍saḥ || 7.015.03
nava̱ṁ nu stoma̍ma̱gnaye̍ di̱vaḥ śye̱nāya̍ jījanam |
vasva̍ḥ ku̱vidva̱nāti̍ naḥ || 7.015.04
spā̱rhā yasya̱ śriyo̍ dṛ̱śe ra̱yirvī̱rava̍to yathā |
agre̍ ya̱jñasya̱ śoca̍taḥ || 7.015.05
semāṁ ve̍tu̱ vaṣa̍ṭkṛtima̱gnirju̍ṣata no̱ gira̍ḥ |
yaji̍ṣṭho havya̱vāha̍naḥ || 7.015.06
ni tvā̍ nakṣya viśpate dyu̱manta̍ṁ deva dhīmahi |
su̱vīra̍magna āhuta || 7.015.07
kṣapa̍ u̱sraśca̍ dīdihi sva̱gnaya̱stvayā̍ va̱yam |
su̱vīra̱stvama̍sma̱yuḥ || 7.015.08
upa̍ tvā sā̱taye̱ naro̱ viprā̍so yanti dhī̱tibhi̍ḥ |
upākṣa̍rā saha̱sriṇī̍ || 7.015.09
a̱gnī rakṣā̍ṁsi sedhati śu̱kraśo̍ci̱rama̍rtyaḥ |
śuci̍ḥ pāva̱ka īḍya̍ḥ || 7.015.10
sa no̱ rādhā̱ṁsyā bha̱reśā̍naḥ sahaso yaho |
bhaga̍śca dātu̱ vārya̍m || 7.015.11
tvama̍gne vī̱rava̱dyaśo̍ de̱vaśca̍ savi̱tā bhaga̍ḥ |
diti̍śca dāti̱ vārya̍m || 7.015.12
agne̱ rakṣā̍ ṇo̱ aṁha̍sa̱ḥ prati̍ ṣma deva̱ rīṣa̍taḥ |
tapi̍ṣṭhaira̱jaro̍ daha || 7.015.13
adhā̍ ma̱hī na̱ āya̱syanā̍dhṛṣṭo̱ nṛpī̍taye |
pūrbha̍vā śa̱tabhu̍jiḥ || 7.015.14
tvaṁ na̍ḥ pā̱hyaṁha̍so̱ doṣā̍vastaraghāya̱taḥ |
divā̱ nakta̍madābhya || 7.015.15
e̱nā vo̍ a̱gniṁ nama̍so̱rjo napā̍ta̱mā hu̍ve |
pri̱yaṁ ceti̍ṣṭhamara̱tiṁ sva̍dhva̱raṁ viśva̍sya dū̱tama̱mṛta̍m || 7.016.01
sa yo̍jate aru̱ṣā vi̱śvabho̍jasā̱ sa du̍drava̱tsvā̍hutaḥ |
su̱brahmā̍ ya̱jñaḥ su̱śamī̱ vasū̍nāṁ de̱vaṁ rādho̱ janā̍nām || 7.016.02
uda̍sya śo̱cira̍sthādā̱juhvā̍nasya mī̱ḻhuṣa̍ḥ |
uddhū̱māso̍ aru̱ṣāso̍ divi̱spṛśa̱ḥ sama̱gnimi̍ndhate̱ nara̍ḥ || 7.016.03
taṁ tvā̍ dū̱taṁ kṛ̍ṇmahe ya̱śasta̍maṁ de̱vā ā vī̱taye̍ vaha |
viśvā̍ sūno sahaso marta̱bhoja̍nā̱ rāsva̱ tadyattvema̍he || 7.016.04
tvama̍gne gṛ̱hapa̍ti̱stvaṁ hotā̍ no adhva̱re |
tvaṁ potā̍ viśvavāra̱ prace̍tā̱ yakṣi̱ veṣi̍ ca̱ vārya̍m || 7.016.05
kṛ̱dhi ratna̱ṁ yaja̍mānāya sukrato̱ tvaṁ hi ra̍tna̱dhā asi̍ |
ā na̍ ṛ̱te śi̍śīhi̱ viśva̍mṛ̱tvija̍ṁ su̱śaṁso̱ yaśca̱ dakṣa̍te || 7.016.06
tve a̍gne svāhuta pri̱yāsa̍ḥ santu sū̱raya̍ḥ |
ya̱ntāro̱ ye ma̱ghavā̍no̱ janā̍nāmū̱rvāndaya̍nta̱ gonā̍m || 7.016.07
yeṣā̱miḻā̍ ghṛ̱taha̍stā duro̱ṇa ā api̍ prā̱tā ni̱ṣīda̍ti |
tāstrā̍yasva sahasya dru̱ho ni̱do yacchā̍ na̱ḥ śarma̍ dīrgha̱śrut || 7.016.08
sa ma̱ndrayā̍ ca ji̱hvayā̱ vahni̍rā̱sā vi̱duṣṭa̍raḥ |
agne̍ ra̱yiṁ ma̱ghava̍dbhyo na̱ ā va̍ha ha̱vyadā̍tiṁ ca sūdaya || 7.016.09
ye rādhā̍ṁsi̱ dada̱tyaśvyā̍ ma̱ghā kāme̍na̱ śrava̍so ma̱haḥ |
tā aṁha̍saḥ pipṛhi pa̱rtṛbhi̱ṣṭvaṁ śa̱taṁ pū̱rbhirya̍viṣṭhya || 7.016.10
de̱vo vo̍ draviṇo̱dāḥ pū̱rṇāṁ vi̍vaṣṭyā̱sica̍m |
udvā̍ si̱ñcadhva̱mupa̍ vā pṛṇadhva̱mādidvo̍ de̱va o̍hate || 7.016.11
taṁ hotā̍ramadhva̱rasya̱ prace̍tasa̱ṁ vahni̍ṁ de̱vā a̍kṛṇvata |
dadhā̍ti̱ ratna̍ṁ vidha̱te su̱vīrya̍ma̱gnirjanā̍ya dā̱śuṣe̍ || 7.016.12
agne̱ bhava̍ suṣa̱midhā̱ sami̍ddha u̱ta ba̱rhiru̍rvi̱yā vi stṛ̍ṇītām || 7.017.01
u̱ta dvāra̍ uśa̱tīrvi śra̍yantāmu̱ta de̱vā u̍śa̱ta ā va̍he̱ha || 7.017.02
agne̍ vī̱hi ha̱viṣā̱ yakṣi̍ de̱vānsva̍dhva̱rā kṛ̍ṇuhi jātavedaḥ || 7.017.03
sva̱dhva̱rā ka̍rati jā̱tave̍dā̱ yakṣa̍dde̱vā a̱mṛtā̍npi̱praya̍cca || 7.017.04
vaṁsva̱ viśvā̱ vāryā̍ṇi pracetaḥ sa̱tyā bha̍vantvā̱śiṣo̍ no a̱dya || 7.017.05
tvāmu̱ te da̍dhire havya̱vāha̍ṁ de̱vāso̍ agna ū̱rja ā napā̍tam || 7.017.06
te te̍ de̱vāya̱ dāśa̍taḥ syāma ma̱ho no̱ ratnā̱ vi da̍dha iyā̱naḥ || 7.017.07
tve ha̱ yatpi̱tara̍ścinna indra̱ viśvā̍ vā̱mā ja̍ri̱tāro̱ asa̍nvan |
tve gāva̍ḥ su̱dughā̱stve hyaśvā̱stvaṁ vasu̍ devaya̱te vani̍ṣṭhaḥ || 7.018.01
rāje̍va̱ hi jani̍bhi̱ḥ kṣeṣye̱vāva̱ dyubhi̍ra̱bhi vi̱duṣka̱viḥ san |
pi̱śā giro̍ maghava̱ngobhi̱raśvai̍stvāya̱taḥ śi̍śīhi rā̱ye a̱smān || 7.018.02
i̱mā u̍ tvā paspṛdhā̱nāso̱ atra̍ ma̱ndrā giro̍ deva̱yantī̱rupa̍ sthuḥ |
a̱rvācī̍ te pa̱thyā̍ rā̱ya e̍tu̱ syāma̍ te suma̱tāvi̍ndra̱ śarma̍n || 7.018.03
dhe̱nuṁ na tvā̍ sū̱yava̍se̱ dudu̍kṣa̱nnupa̱ brahmā̍ṇi sasṛje̱ vasi̍ṣṭhaḥ |
tvāminme̱ gopa̍ti̱ṁ viśva̍ ā̱hā na̱ indra̍ḥ suma̱tiṁ ga̱ntvaccha̍ || 7.018.04
arṇā̍ṁsi citpaprathā̱nā su̱dāsa̱ indro̍ gā̱dhānya̍kṛṇotsupā̱rā |
śardha̍ntaṁ śi̱myumu̱catha̍sya̱ navya̱ḥ śāpa̱ṁ sindhū̍nāmakṛṇo̱daśa̍stīḥ || 7.018.05
pu̱ro̱ḻā ittu̱rvaśo̱ yakṣu̍rāsīdrā̱ye matsyā̍so̱ niśi̍tā̱ apī̍va |
śru̱ṣṭiṁ ca̍kru̱rbhṛga̍vo dru̱hyava̍śca̱ sakhā̱ sakhā̍yamatara̱dviṣū̍coḥ || 7.018.06
ā pa̱kthāso̍ bhalā̱naso̍ bhana̱ntāli̍nāso viṣā̱ṇina̍ḥ śi̱vāsa̍ḥ |
ā yo'na̍yatsadha̱mā ārya̍sya ga̱vyā tṛtsu̍bhyo ajaganyu̱dhā nṝn || 7.018.07
du̱rā̱dhyo̱3̱̍ adi̍tiṁ sre̱vaya̍nto'ce̱taso̱ vi ja̍gṛbhre̱ paru̍ṣṇīm |
ma̱hnāvi̍vyakpṛthi̱vīṁ patya̍mānaḥ pa̱śuṣka̱vira̍śaya̱ccāya̍mānaḥ || 7.018.08
ī̱yurartha̱ṁ na nya̱rthaṁ paru̍ṣṇīmā̱śuśca̱neda̍bhipi̱tvaṁ ja̍gāma |
su̱dāsa̱ indra̍ḥ su̱tukā̍ a̱mitrā̱nara̍ndhaya̱nmānu̍ṣe̱ vadhri̍vācaḥ || 7.018.09
ī̱yurgāvo̱ na yava̍sā̱dago̍pā yathākṛ̱tama̱bhi mi̱traṁ ci̱tāsa̍ḥ |
pṛśni̍gāva̱ḥ pṛśni̍nipreṣitāsaḥ śru̱ṣṭiṁ ca̍krurni̱yuto̱ ranta̍yaśca || 7.018.10
eka̍ṁ ca̱ yo vi̍ṁśa̱tiṁ ca̍ śrava̱syā vai̍ka̱rṇayo̱rjanā̱nrājā̱ nyasta̍ḥ |
da̱smo na sadma̱nni śi̍śāti ba̱rhiḥ śūra̱ḥ sarga̍makṛṇo̱dindra̍ eṣām || 7.018.11
adha̍ śru̱taṁ ka̱vaṣa̍ṁ vṛ̱ddhama̱psvanu̍ dru̱hyuṁ ni vṛ̍ṇa̱gvajra̍bāhuḥ |
vṛ̱ṇā̱nā atra̍ sa̱khyāya̍ sa̱khyaṁ tvā̱yanto̱ ye ama̍da̱nnanu̍ tvā || 7.018.12
vi sa̱dyo viśvā̍ dṛṁhi̱tānye̍ṣā̱mindra̱ḥ pura̱ḥ saha̍sā sa̱pta da̍rdaḥ |
vyāna̍vasya̱ tṛtsa̍ve̱ gaya̍ṁ bhā̱gjeṣma̍ pū̱ruṁ vi̱dathe̍ mṛ̱dhravā̍cam || 7.018.13
ni ga̱vyavo'na̍vo dru̱hyava̍śca ṣa̱ṣṭiḥ śa̱tā su̍ṣupu̱ḥ ṣaṭ sa̱hasrā̍ |
ṣa̱ṣṭirvī̱rāso̱ adhi̱ ṣaḍdu̍vo̱yu viśvedindra̍sya vī̱ryā̍ kṛ̱tāni̍ || 7.018.14
indre̍ṇai̱te tṛtsa̍vo̱ vevi̍ṣāṇā̱ āpo̱ na sṛ̱ṣṭā a̍dhavanta̱ nīcī̍ḥ |
du̱rmi̱trāsa̍ḥ prakala̱vinmimā̍nā ja̱hurviśvā̍ni̱ bhoja̍nā su̱dāse̍ || 7.018.15
a̱rdhaṁ vī̱rasya̍ śṛta̱pāma̍ni̱ndraṁ parā̱ śardha̍ntaṁ nunude a̱bhi kṣām |
indro̍ ma̱nyuṁ ma̍nyu̱myo̍ mimāya bhe̱je pa̱tho va̍rta̱niṁ patya̍mānaḥ || 7.018.16
ā̱dhreṇa̍ ci̱ttadveka̍ṁ cakāra si̱ṁhya̍ṁ ci̱tpetve̍nā jaghāna |
ava̍ sra̱ktīrve̱śyā̍vṛśca̱dindra̱ḥ prāya̍ccha̱dviśvā̱ bhoja̍nā su̱dāse̍ || 7.018.17
śaśva̍nto̱ hi śatra̍vo rāra̱dhuṣṭe̍ bhe̱dasya̍ ci̱cchardha̍to vinda̱ randhi̍m |
martā̱ ena̍ḥ stuva̱to yaḥ kṛ̱ṇoti̍ ti̱gmaṁ tasmi̱nni ja̍hi̱ vajra̍mindra || 7.018.18
āva̱dindra̍ṁ ya̱munā̱ tṛtsa̍vaśca̱ prātra̍ bhe̱daṁ sa̱rvatā̍tā muṣāyat |
a̱jāsa̍śca̱ śigra̍vo̱ yakṣa̍vaśca ba̱liṁ śī̱rṣāṇi̍ jabhru̱raśvyā̍ni || 7.018.19
na ta̍ indra suma̱tayo̱ na rāya̍ḥ sa̱ṁcakṣe̱ pūrvā̍ u̱ṣaso̱ na nūtnā̍ḥ |
deva̍kaṁ cinmānyamā̱naṁ ja̍gha̱nthāva̱ tmanā̍ bṛha̱taḥ śamba̍raṁ bhet || 7.018.20
pra ye gṛ̱hādama̍madustvā̱yā pa̍rāśa̱raḥ śa̱tayā̍tu̱rvasi̍ṣṭhaḥ |
na te̍ bho̱jasya̍ sa̱khyaṁ mṛ̍ṣa̱ntādhā̍ sū̱ribhya̍ḥ su̱dinā̱ vyu̍cchān || 7.018.21
dve naptu̍rde̱vava̍taḥ śa̱te gordvā rathā̍ va̱dhūma̍ntā su̱dāsa̍ḥ |
arha̍nnagne paijava̱nasya̱ dāna̱ṁ hote̍va̱ sadma̱ parye̍mi̱ rebha̍n || 7.018.22
ca̱tvāro̍ mā paijava̱nasya̱ dānā̱ḥ smaddi̍ṣṭayaḥ kṛśa̱nino̍ nire̱ke |
ṛ̱jrāso̍ mā pṛthivi̱ṣṭhāḥ su̱dāsa̍sto̱kaṁ to̱kāya̱ śrava̍se vahanti || 7.018.23
yasya̱ śravo̱ roda̍sī a̱ntaru̱rvī śī̱rṣṇeśī̍rṣṇe viba̱bhājā̍ vibha̱ktā |
sa̱ptedindra̱ṁ na sra̱vato̍ gṛṇanti̱ ni yu̍dhyāma̱dhima̍śiśāda̱bhīke̍ || 7.018.24
i̱maṁ na̍ro marutaḥ saśca̱tānu̱ divo̍dāsa̱ṁ na pi̱tara̍ṁ su̱dāsa̍ḥ |
a̱vi̱ṣṭanā̍ paijava̱nasya̱ keta̍ṁ dū̱ṇāśa̍ṁ kṣa̱trama̱jara̍ṁ duvo̱yu || 7.018.25
yasti̱gmaśṛ̍ṅgo vṛṣa̱bho na bhī̱ma eka̍ḥ kṛ̱ṣṭīścyā̱vaya̍ti̱ pra viśvā̍ḥ |
yaḥ śaśva̍to̱ adā̍śuṣo̱ gaya̍sya praya̱ntāsi̱ suṣvi̍tarāya̱ veda̍ḥ || 7.019.01
tvaṁ ha̱ tyadi̍ndra̱ kutsa̍māva̱ḥ śuśrū̍ṣamāṇasta̱nvā̍ sama̱rye |
dāsa̱ṁ yacchuṣṇa̱ṁ kuya̍va̱ṁ nya̍smā̱ ara̍ndhaya ārjune̱yāya̱ śikṣa̍n || 7.019.02
tvaṁ dhṛ̍ṣṇo dhṛṣa̱tā vī̱taha̍vya̱ṁ prāvo̱ viśvā̍bhirū̱tibhi̍ḥ su̱dāsa̍m |
pra pauru̍kutsiṁ tra̱sada̍syumāva̱ḥ kṣetra̍sātā vṛtra̱hatye̍ṣu pū̱rum || 7.019.03
tvaṁ nṛbhi̍rnṛmaṇo de̱vavī̍tau̱ bhūrī̍ṇi vṛ̱trā ha̍ryaśva haṁsi |
tvaṁ ni dasyu̱ṁ cumu̍ri̱ṁ dhuni̱ṁ cāsvā̍payo da̱bhīta̍ye su̱hantu̍ || 7.019.04
tava̍ cyau̱tnāni̍ vajrahasta̱ tāni̱ nava̱ yatpuro̍ nava̱tiṁ ca̍ sa̱dyaḥ |
ni̱veśa̍ne śatata̱māvi̍veṣī̱raha̍ñca vṛ̱traṁ namu̍cimu̱tāha̍n || 7.019.05
sanā̱ tā ta̍ indra̱ bhoja̍nāni rā̱taha̍vyāya dā̱śuṣe̍ su̱dāse̍ |
vṛṣṇe̍ te̱ harī̱ vṛṣa̍ṇā yunajmi̱ vyantu̱ brahmā̍ṇi puruśāka̱ vāja̍m || 7.019.06
mā te̍ a̱syāṁ sa̍hasāva̱npari̍ṣṭāva̱ghāya̍ bhūma harivaḥ parā̱dai |
trāya̍sva no'vṛ̱kebhi̱rvarū̍thai̱stava̍ pri̱yāsa̍ḥ sū̱riṣu̍ syāma || 7.019.07
pri̱yāsa̱ itte̍ maghavanna̱bhiṣṭau̱ naro̍ madema śara̱ṇe sakhā̍yaḥ |
ni tu̱rvaśa̱ṁ ni yādva̍ṁ śiśīhyatithi̱gvāya̱ śaṁsya̍ṁ kari̱ṣyan || 7.019.08
sa̱dyaści̱nnu te ma̍ghavanna̱bhiṣṭau̱ nara̍ḥ śaṁsantyuktha̱śāsa̍ u̱kthā |
ye te̱ have̍bhi̱rvi pa̱ṇīradā̍śanna̱smānvṛ̍ṇīṣva̱ yujyā̍ya̱ tasmai̍ || 7.019.09
e̱te stomā̍ na̱rāṁ nṛ̍tama̱ tubhya̍masma̱drya̍ñco̱ dada̍to ma̱ghāni̍ |
teṣā̍mindra vṛtra̱hatye̍ śi̱vo bhū̱ḥ sakhā̍ ca̱ śūro̍'vi̱tā ca̍ nṛ̱ṇām || 7.019.10
nū i̍ndra śūra̱ stava̍māna ū̱tī brahma̍jūtasta̱nvā̍ vāvṛdhasva |
upa̍ no̱ vājā̍nmimī̱hyupa̱ stīnyū̱yaṁ pā̍ta sva̱stibhi̱ḥ sadā̍ naḥ || 7.019.11
u̱gro ja̍jñe vī̱ryā̍ya sva̱dhāvā̱ñcakri̱rapo̱ naryo̱ yatka̍ri̱ṣyan |
jagmi̱ryuvā̍ nṛ̱ṣada̍na̱mavo̍bhistrā̱tā na̱ indra̱ ena̍so ma̱haści̍t || 7.020.01
hantā̍ vṛ̱tramindra̱ḥ śūśu̍vāna̱ḥ prāvī̱nnu vī̱ro ja̍ri̱tāra̍mū̱tī |
kartā̍ su̱dāse̱ aha̱ vā u̍ lo̱kaṁ dātā̱ vasu̱ muhu̱rā dā̱śuṣe̍ bhūt || 7.020.02
yu̱dhmo a̍na̱rvā kha̍ja̱kṛtsa̱madvā̱ śūra̍ḥ satrā̱ṣāḍja̱nuṣe̱maṣā̍ḻhaḥ |
vyā̍sa̱ indra̱ḥ pṛta̍nā̱ḥ svojā̱ adhā̱ viśva̍ṁ śatrū̱yanta̍ṁ jaghāna || 7.020.03
u̱bhe ci̍dindra̱ roda̍sī mahi̱tvā pa̍prātha̱ tavi̍ṣībhistuviṣmaḥ |
ni vajra̱mindro̱ hari̍vā̱nmimi̍kṣa̱nsamandha̍sā̱ made̍ṣu̱ vā u̍voca || 7.020.04
vṛṣā̍ jajāna̱ vṛṣa̍ṇa̱ṁ raṇā̍ya̱ tamu̍ ci̱nnārī̱ narya̍ṁ sasūva |
pra yaḥ se̍nā̱nīradha̱ nṛbhyo̱ astī̱naḥ satvā̍ ga̱veṣa̍ṇa̱ḥ sa dhṛ̱ṣṇuḥ || 7.020.05
nū ci̱tsa bhre̍ṣate̱ jano̱ na re̍ṣa̱nmano̱ yo a̍sya gho̱ramā̱vivā̍sāt |
ya̱jñairya indre̱ dadha̍te̱ duvā̍ṁsi̱ kṣaya̱tsa rā̱ya ṛ̍ta̱pā ṛ̍te̱jāḥ || 7.020.06
yadi̍ndra̱ pūrvo̱ apa̍rāya̱ śikṣa̱nnaya̱jjyāyā̱nkanī̍yaso de̱ṣṇam |
a̱mṛta̱ itparyā̍sīta dū̱ramā ci̍tra̱ citrya̍ṁ bharā ra̱yiṁ na̍ḥ || 7.020.07
yasta̍ indra pri̱yo jano̱ dadā̍śa̱dasa̍nnire̱ke a̍driva̱ḥ sakhā̍ te |
va̱yaṁ te̍ a̱syāṁ su̍ma̱tau cani̍ṣṭhā̱ḥ syāma̱ varū̍the̱ aghna̍to̱ nṛpī̍tau || 7.020.08
e̱ṣa stomo̍ acikrada̱dvṛṣā̍ ta u̱ta stā̱murma̍ghavannakrapiṣṭa |
rā̱yaskāmo̍ jari̱tāra̍ṁ ta̱ āga̱ntvama̱ṅga śa̍kra̱ vasva̱ ā śa̍ko naḥ || 7.020.09
sa na̍ indra̱ tvaya̍tāyā i̱ṣe dhā̱stmanā̍ ca̱ ye ma̱ghavā̍no ju̱nanti̍ |
vasvī̱ ṣu te̍ jari̱tre a̍stu śa̱ktiryū̱yaṁ pā̍ta sva̱stibhi̱ḥ sadā̍ naḥ || 7.020.10
asā̍vi de̱vaṁ goṛ̍jīka̱mandho̱ nya̍smi̱nnindro̍ ja̱nuṣe̍muvoca |
bodhā̍masi tvā haryaśva ya̱jñairbodhā̍ na̱ḥ stoma̱mandha̍so̱ made̍ṣu || 7.021.01
pra ya̍nti ya̱jñaṁ vi̱paya̍nti ba̱rhiḥ so̍ma̱mādo̍ vi̱dathe̍ du̱dhravā̍caḥ |
nyu̍ bhriyante ya̱śaso̍ gṛ̱bhādā dū̱rau̍pabdo̱ vṛṣa̍ṇo nṛ̱ṣāca̍ḥ || 7.021.02
tvami̍ndra̱ sravi̍ta̱vā a̱paska̱ḥ pari̍ṣṭhitā̱ ahi̍nā śūra pū̱rvīḥ |
tvadvā̍vakre ra̱thyo̱3̱̍ na dhenā̱ reja̍nte̱ viśvā̍ kṛ̱trimā̍ṇi bhī̱ṣā || 7.021.03
bhī̱mo vi̍ve̱ṣāyu̍dhebhireṣā̱mapā̍ṁsi̱ viśvā̱ naryā̍ṇi vi̱dvān |
indra̱ḥ puro̱ jarhṛ̍ṣāṇo̱ vi dū̍dho̱dvi vajra̍hasto mahi̱nā ja̍ghāna || 7.021.04
na yā̱tava̍ indra jūjuvurno̱ na vanda̍nā śaviṣṭha ve̱dyābhi̍ḥ |
sa śa̍rdhada̱ryo viṣu̍ṇasya ja̱ntormā śi̱śnade̍vā̱ api̍ gurṛ̱taṁ na̍ḥ || 7.021.05
a̱bhi kratve̍ndra bhū̱radha̱ jmanna te̍ vivyaṅmahi̱māna̱ṁ rajā̍ṁsi |
svenā̱ hi vṛ̱traṁ śava̍sā ja̱ghantha̱ na śatru̱ranta̍ṁ vividadyu̱dhā te̍ || 7.021.06
de̱vāści̍tte asu̱ryā̍ya̱ pūrve'nu̍ kṣa̱trāya̍ mamire̱ sahā̍ṁsi |
indro̍ ma̱ghāni̍ dayate vi̱ṣahyendra̱ṁ vāja̍sya johuvanta sā̱tau || 7.021.07
kī̱riści̱ddhi tvāmava̍se ju̱hāveśā̍namindra̱ saubha̍gasya̱ bhūre̍ḥ |
avo̍ babhūtha śatamūte a̱sme a̍bhikṣa̱ttustvāva̍to varū̱tā || 7.021.08
sakhā̍yasta indra vi̱śvaha̍ syāma namovṛ̱dhāso̍ mahi̱nā ta̍rutra |
va̱nvantu̍ smā̱ te'va̍sā samī̱ke̱3̱̍'bhī̍tima̱ryo va̱nuṣā̱ṁ śavā̍ṁsi || 7.021.09
sa na̍ indra̱ tvaya̍tāyā i̱ṣe dhā̱stmanā̍ ca̱ ye ma̱ghavā̍no ju̱nanti̍ |
vasvī̱ ṣu te̍ jari̱tre a̍stu śa̱ktiryū̱yaṁ pā̍ta sva̱stibhi̱ḥ sadā̍ naḥ || 7.021.10
pibā̱ soma̍mindra̱ manda̍tu tvā̱ yaṁ te̍ su̱ṣāva̍ harya̱śvādri̍ḥ |
so̱turbā̱hubhyā̱ṁ suya̍to̱ nārvā̍ || 7.022.01
yaste̱ mado̱ yujya̱ścāru̱rasti̱ yena̍ vṛ̱trāṇi̍ haryaśva̱ haṁsi̍ |
sa tvāmi̍ndra prabhūvaso mamattu || 7.022.02
bodhā̱ su me̍ maghava̱nvāca̱memāṁ yāṁ te̱ vasi̍ṣṭho̱ arca̍ti̱ praśa̍stim |
i̱mā brahma̍ sadha̱māde̍ juṣasva || 7.022.03
śru̱dhī hava̍ṁ vipipā̱nasyādre̱rbodhā̱ vipra̱syārca̍to manī̱ṣām |
kṛ̱ṣvā duvā̱ṁsyanta̍mā̱ sace̱mā || 7.022.04
na te̱ giro̱ api̍ mṛṣye tu̱rasya̱ na su̍ṣṭu̱tima̍su̱rya̍sya vi̱dvān |
sadā̍ te̱ nāma̍ svayaśo vivakmi || 7.022.05
bhūri̱ hi te̱ sava̍nā̱ mānu̍ṣeṣu̱ bhūri̍ manī̱ṣī ha̍vate̱ tvāmit |
māre a̱smanma̍ghava̱ñjyokka̍ḥ || 7.022.06
tubhyedi̱mā sava̍nā śūra̱ viśvā̱ tubhya̱ṁ brahmā̍ṇi̱ vardha̍nā kṛṇomi |
tvaṁ nṛbhi̱rhavyo̍ vi̱śvadhā̍si || 7.022.07
nū ci̱nnu te̱ manya̍mānasya da̱smoda̍śnuvanti mahi̱māna̍mugra |
na vī̱rya̍mindra te̱ na rādha̍ḥ || 7.022.08
ye ca̱ pūrva̱ ṛṣa̍yo̱ ye ca̱ nūtnā̱ indra̱ brahmā̍ṇi ja̱naya̍nta̱ viprā̍ḥ |
a̱sme te̍ santu sa̱khyā śi̱vāni̍ yū̱yaṁ pā̍ta sva̱stibhi̱ḥ sadā̍ naḥ || 7.022.09
udu̱ brahmā̍ṇyairata śrava̱syendra̍ṁ sama̱rye ma̍hayā vasiṣṭha |
ā yo viśvā̍ni̱ śava̍sā ta̱tāno̍paśro̱tā ma̱ īva̍to̱ vacā̍ṁsi || 7.023.01
ayā̍mi̱ ghoṣa̍ indra de̱vajā̍mirira̱jyanta̱ yacchu̱rudho̱ vivā̍ci |
na̱hi svamāyu̍ściki̱te jane̍ṣu̱ tānīdaṁhā̱ṁsyati̍ parṣya̱smān || 7.023.02
yu̱je ratha̍ṁ ga̱veṣa̍ṇa̱ṁ hari̍bhyā̱mupa̱ brahmā̍ṇi jujuṣā̱ṇama̍sthuḥ |
vi bā̍dhiṣṭa̱ sya roda̍sī mahi̱tvendro̍ vṛ̱trāṇya̍pra̱tī ja̍gha̱nvān || 7.023.03
āpa̍ścitpipyuḥ sta̱ryo̱3̱̍ na gāvo̱ nakṣa̍nnṛ̱taṁ ja̍ri̱tāra̍sta indra |
yā̱hi vā̱yurna ni̱yuto̍ no̱ acchā̱ tvaṁ hi dhī̱bhirdaya̍se̱ vi vājā̍n || 7.023.04
te tvā̱ madā̍ indra mādayantu śu̱ṣmiṇa̍ṁ tuvi̱rādha̍saṁ jari̱tre |
eko̍ deva̱trā daya̍se̱ hi martā̍na̱smiñchū̍ra̱ sava̍ne mādayasva || 7.023.05
e̱vedindra̱ṁ vṛṣa̍ṇa̱ṁ vajra̍bāhu̱ṁ vasi̍ṣṭhāso a̱bhya̍rcantya̱rkaiḥ |
sa na̍ḥ stu̱to vī̱rava̍ddhātu̱ goma̍dyū̱yaṁ pā̍ta sva̱stibhi̱ḥ sadā̍ naḥ || 7.023.06
yoni̍ṣṭa indra̱ sada̍ne akāri̱ tamā nṛbhi̍ḥ puruhūta̱ pra yā̍hi |
aso̱ yathā̍ no'vi̱tā vṛ̱dhe ca̱ dado̱ vasū̍ni ma̱mada̍śca̱ somai̍ḥ || 7.024.01
gṛ̱bhī̱taṁ te̱ mana̍ indra dvi̱barhā̍ḥ su̱taḥ soma̱ḥ pari̍ṣiktā̱ madhū̍ni |
visṛ̍ṣṭadhenā bharate suvṛ̱ktiri̱yamindra̱ṁ johu̍vatī manī̱ṣā || 7.024.02
ā no̍ di̱va ā pṛ̍thi̱vyā ṛ̍jīṣinni̱daṁ ba̱rhiḥ so̍ma̱peyā̍ya yāhi |
vaha̍ntu tvā̱ hara̍yo ma̱drya̍ñcamāṅgū̱ṣamacchā̍ ta̱vasa̱ṁ madā̍ya || 7.024.03
ā no̱ viśvā̍bhirū̱tibhi̍ḥ sa̱joṣā̱ brahma̍ juṣā̱ṇo ha̍ryaśva yāhi |
varī̍vṛja̱tsthavi̍rebhiḥ suśiprā̱sme dadha̱dvṛṣa̍ṇa̱ṁ śuṣma̍mindra || 7.024.04
e̱ṣa stomo̍ ma̱ha u̱grāya̱ vāhe̍ dhu̱rī̱3̱̍vātyo̱ na vā̱jaya̍nnadhāyi |
indra̍ tvā̱yama̱rka ī̍ṭṭe̱ vasū̍nāṁ di̱vī̍va̱ dyāmadhi̍ na̱ḥ śroma̍taṁ dhāḥ || 7.024.05
e̱vā na̍ indra̱ vārya̍sya pūrdhi̱ pra te̍ ma̱hīṁ su̍ma̱tiṁ ve̍vidāma |
iṣa̍ṁ pinva ma̱ghava̍dbhyaḥ su̱vīrā̍ṁ yū̱yaṁ pā̍ta sva̱stibhi̱ḥ sadā̍ naḥ || 7.024.06
ā te̍ ma̱ha i̍ndro̱tyu̍gra̱ sama̍nyavo̱ yatsa̱mara̍nta̱ senā̍ḥ |
patā̍ti di̱dyunnarya̍sya bā̱hvormā te̱ mano̍ viṣva̱drya1̱̍gvi cā̍rīt || 7.025.01
ni du̱rga i̍ndra śnathihya̱mitrā̍ a̱bhi ye no̱ martā̍so a̱manti̍ |
ā̱re taṁ śaṁsa̍ṁ kṛṇuhi nini̱tsorā no̍ bhara sa̱mbhara̍ṇa̱ṁ vasū̍nām || 7.025.02
śa̱taṁ te̍ śiprinnū̱taya̍ḥ su̱dāse̍ sa̱hasra̱ṁ śaṁsā̍ u̱ta rā̱tira̍stu |
ja̱hi vadha̍rva̱nuṣo̱ martya̍syā̱sme dyu̱mnamadhi̱ ratna̍ṁ ca dhehi || 7.025.03
tvāva̍to̱ hī̍ndra̱ kratve̱ asmi̱ tvāva̍to'vi̱tuḥ śū̍ra rā̱tau |
viśvedahā̍ni taviṣīva ugra̱ oka̍ḥ kṛṇuṣva harivo̱ na ma̍rdhīḥ || 7.025.04
kutsā̍ e̱te harya̍śvāya śū̱ṣamindre̱ saho̍ de̱vajū̍tamiyā̱nāḥ |
sa̱trā kṛ̍dhi su̱hanā̍ śūra vṛ̱trā va̱yaṁ taru̍trāḥ sanuyāma̱ vāja̍m || 7.025.05
e̱vā na̍ indra̱ vārya̍sya pūrdhi̱ pra te̍ ma̱hīṁ su̍ma̱tiṁ ve̍vidāma |
iṣa̍ṁ pinva ma̱ghava̍dbhyaḥ su̱vīrā̍ṁ yū̱yaṁ pā̍ta sva̱stibhi̱ḥ sadā̍ naḥ || 7.025.06
na soma̱ indra̱masu̍to mamāda̱ nābra̍hmāṇo ma̱ghavā̍naṁ su̱tāsa̍ḥ |
tasmā̍ u̱kthaṁ ja̍naye̱ yajjujo̍ṣannṛ̱vannavī̍yaḥ śṛ̱ṇava̱dyathā̍ naḥ || 7.026.01
u̱kthau̍kthe̱ soma̱ indra̍ṁ mamāda nī̱thenī̍the ma̱ghavā̍naṁ su̱tāsa̍ḥ |
yadī̍ṁ sa̱bādha̍ḥ pi̱tara̱ṁ na pu̱trāḥ sa̍mā̱nada̍kṣā̱ ava̍se̱ hava̍nte || 7.026.02
ca̱kāra̱ tā kṛ̱ṇava̍nnū̱nama̱nyā yāni̍ bru̱vanti̍ ve̱dhasa̍ḥ su̱teṣu̍ |
janī̍riva̱ pati̱reka̍ḥ samā̱no ni mā̍mṛje̱ pura̱ indra̱ḥ su sarvā̍ḥ || 7.026.03
e̱vā tamā̍huru̱ta śṛ̍ṇva̱ indra̱ eko̍ vibha̱ktā ta̱raṇi̍rma̱ghānā̍m |
mi̱tha̱stura̍ ū̱tayo̱ yasya̍ pū̱rvīra̱sme bha̱drāṇi̍ saścata pri̱yāṇi̍ || 7.026.04
e̱vā vasi̍ṣṭha̱ indra̍mū̱taye̱ nṝnkṛ̍ṣṭī̱nāṁ vṛ̍ṣa̱bhaṁ su̱te gṛ̍ṇāti |
sa̱ha̱sriṇa̱ upa̍ no māhi̱ vājā̍nyū̱yaṁ pā̍ta sva̱stibhi̱ḥ sadā̍ naḥ || 7.026.05
indra̱ṁ naro̍ ne̱madhi̍tā havante̱ yatpāryā̍ yu̱naja̍te̱ dhiya̱stāḥ |
śūro̱ nṛṣā̍tā̱ śava̍saścakā̱na ā goma̍ti vra̱je bha̍jā̱ tvaṁ na̍ḥ || 7.027.01
ya i̍ndra̱ śuṣmo̍ maghavante̱ asti̱ śikṣā̱ sakhi̍bhyaḥ puruhūta̱ nṛbhya̍ḥ |
tvaṁ hi dṛ̱ḻhā ma̍ghava̱nvice̍tā̱ apā̍ vṛdhi̱ pari̍vṛta̱ṁ na rādha̍ḥ || 7.027.02
indro̱ rājā̱ jaga̍taścarṣaṇī̱nāmadhi̱ kṣami̱ viṣu̍rūpa̱ṁ yadasti̍ |
tato̍ dadāti dā̱śuṣe̱ vasū̍ni̱ coda̱drādha̱ upa̍stutaścida̱rvāk || 7.027.03
nū ci̍nna̱ indro̍ ma̱ghavā̱ sahū̍tī dā̱no vāja̱ṁ ni ya̍mate na ū̱tī |
anū̍nā̱ yasya̱ dakṣi̍ṇā pī̱pāya̍ vā̱maṁ nṛbhyo̍ a̱bhivī̍tā̱ sakhi̍bhyaḥ || 7.027.04
nū i̍ndra rā̱ye vari̍vaskṛdhī na̱ ā te̱ mano̍ vavṛtyāma ma̱ghāya̍ |
goma̱daśvā̍va̱dratha̍va̱dvyanto̍ yū̱yaṁ pā̍ta sva̱stibhi̱ḥ sadā̍ naḥ || 7.027.05
brahmā̍ ṇa i̱ndropa̍ yāhi vi̱dvāna̱rvāñca̍ste̱ hara̍yaḥ santu yu̱ktāḥ |
viśve̍ ci̱ddhi tvā̍ vi̱hava̍nta̱ martā̍ a̱smāka̱micchṛ̍ṇuhi viśvaminva || 7.028.01
hava̍ṁ ta indra mahi̱mā vyā̍na̱ḍbrahma̱ yatpāsi̍ śavasi̱nnṛṣī̍ṇām |
ā yadvajra̍ṁ dadhi̱ṣe hasta̍ ugra gho̱raḥ sankratvā̍ janiṣṭhā̱ aṣā̍ḻhaḥ || 7.028.02
tava̱ praṇī̍tīndra̱ johu̍vānā̱nsaṁ yannṝnna roda̍sī ni̱netha̍ |
ma̱he kṣa̱trāya̱ śava̍se̱ hi ja̱jñe'tū̍tujiṁ ci̱ttūtu̍jiraśiśnat || 7.028.03
e̱bhirna̍ i̱ndrāha̍bhirdaśasya durmi̱trāso̱ hi kṣi̱taya̱ḥ pava̍nte |
prati̱ yaccaṣṭe̱ anṛ̍tamane̱nā ava̍ dvi̱tā varu̍ṇo mā̱yī na̍ḥ sāt || 7.028.04
vo̱cemedindra̍ṁ ma̱ghavā̍namenaṁ ma̱ho rā̱yo rādha̍so̱ yaddada̍nnaḥ |
yo arca̍to̱ brahma̍kṛti̱mavi̍ṣṭho yū̱yaṁ pā̍ta sva̱stibhi̱ḥ sadā̍ naḥ || 7.028.05
a̱yaṁ soma̍ indra̱ tubhya̍ṁ sunva̱ ā tu pra yā̍hi hariva̱stado̍kāḥ |
pibā̱ tva1̱̍sya suṣu̍tasya̱ cāro̱rdado̍ ma̱ghāni̍ maghavanniyā̱naḥ || 7.029.01
brahma̍nvīra̱ brahma̍kṛtiṁ juṣā̱ṇo̍'rvācī̱no hari̍bhiryāhi̱ tūya̍m |
a̱sminnū̱ ṣu sava̍ne mādaya̱svopa̱ brahmā̍ṇi śṛṇava i̱mā na̍ḥ || 7.029.02
kā te̍ a̱styara̍ṁkṛtiḥ sū̱ktaiḥ ka̱dā nū̱naṁ te̍ maghavandāśema |
viśvā̍ ma̱tīrā ta̍tane tvā̱yādhā̍ ma indra śṛṇavo̱ have̱mā || 7.029.03
u̱to ghā̱ te pu̍ru̱ṣyā̱3̱̍ idā̍sa̱nyeṣā̱ṁ pūrve̍ṣā̱maśṛ̍ṇo̱rṛṣī̍ṇām |
adhā̱haṁ tvā̍ maghavañjohavīmi̱ tvaṁ na̍ indrāsi̱ prama̍tiḥ pi̱teva̍ || 7.029.04
vo̱cemedindra̍ṁ ma̱ghavā̍namenaṁ ma̱ho rā̱yo rādha̍so̱ yaddada̍nnaḥ |
yo arca̍to̱ brahma̍kṛti̱mavi̍ṣṭho yū̱yaṁ pā̍ta sva̱stibhi̱ḥ sadā̍ naḥ || 7.029.05
ā no̍ deva̱ śava̍sā yāhi śuṣmi̱nbhavā̍ vṛ̱dha i̍ndra rā̱yo a̱sya |
ma̱he nṛ̱mṇāya̍ nṛpate suvajra̱ mahi̍ kṣa̱trāya̱ pauṁsyā̍ya śūra || 7.030.01
hava̍nta u tvā̱ havya̱ṁ vivā̍ci ta̱nūṣu̱ śūrā̱ḥ sūrya̍sya sā̱tau |
tvaṁ viśve̍ṣu̱ senyo̱ jane̍ṣu̱ tvaṁ vṛ̱trāṇi̍ randhayā su̱hantu̍ || 7.030.02
ahā̱ yadi̍ndra su̱dinā̍ vyu̱cchāndadho̱ yatke̱tumu̍pa̱maṁ sa̱matsu̍ |
nya1̱̍gniḥ sī̍da̱dasu̍ro̱ na hotā̍ huvā̱no atra̍ su̱bhagā̍ya de̱vān || 7.030.03
va̱yaṁ te ta̍ indra̱ ye ca̍ deva̱ stava̍nta śūra̱ dada̍to ma̱ghāni̍ |
yacchā̍ sū̱ribhya̍ upa̱maṁ varū̍thaṁ svā̱bhuvo̍ jara̱ṇāma̍śnavanta || 7.030.04
vo̱cemedindra̍ṁ ma̱ghavā̍namenaṁ ma̱ho rā̱yo rādha̍so̱ yaddada̍nnaḥ |
yo arca̍to̱ brahma̍kṛti̱mavi̍ṣṭho yū̱yaṁ pā̍ta sva̱stibhi̱ḥ sadā̍ naḥ || 7.030.05
pra va̱ indrā̍ya̱ māda̍na̱ṁ harya̍śvāya gāyata |
sakhā̍yaḥ soma̱pāvne̍ || 7.031.01
śaṁsedu̱kthaṁ su̱dāna̍va u̱ta dyu̱kṣaṁ yathā̱ nara̍ḥ |
ca̱kṛ̱mā sa̱tyarā̍dhase || 7.031.02
tvaṁ na̍ indra vāja̱yustvaṁ ga̱vyuḥ śa̍takrato |
tvaṁ hi̍raṇya̱yurva̍so || 7.031.03
va̱yami̍ndra tvā̱yavo̱'bhi pra ṇo̍numo vṛṣan |
vi̱ddhī tva1̱̍sya no̍ vaso || 7.031.04
mā no̍ ni̱de ca̱ vakta̍ve̱'ryo ra̍ndhī̱rarā̍vṇe |
tve api̱ kratu̱rmama̍ || 7.031.05
tvaṁ varmā̍si sa̱pratha̍ḥ puroyo̱dhaśca̍ vṛtrahan |
tvayā̱ prati̍ bruve yu̱jā || 7.031.06
ma̱hā u̱tāsi̱ yasya̱ te'nu̍ sva̱dhāva̍rī̱ saha̍ḥ |
ma̱mnāte̍ indra̱ roda̍sī || 7.031.07
taṁ tvā̍ ma̱rutva̍tī̱ pari̱ bhuva̱dvāṇī̍ sa̱yāva̍rī |
nakṣa̍māṇā sa̱ha dyubhi̍ḥ || 7.031.08
ū̱rdhvāsa̱stvānvinda̍vo̱ bhuva̍nda̱smamupa̱ dyavi̍ |
saṁ te̍ namanta kṛ̱ṣṭaya̍ḥ || 7.031.09
pra vo̍ ma̱he ma̍hi̱vṛdhe̍ bharadhva̱ṁ prace̍tase̱ pra su̍ma̱tiṁ kṛ̍ṇudhvam |
viśa̍ḥ pū̱rvīḥ pra ca̍rā carṣaṇi̱prāḥ || 7.031.10
u̱ru̱vyaca̍se ma̱hine̍ suvṛ̱ktimindrā̍ya̱ brahma̍ janayanta̱ viprā̍ḥ |
tasya̍ vra̱tāni̱ na mi̍nanti̱ dhīrā̍ḥ || 7.031.11
indra̱ṁ vāṇī̱ranu̍ttamanyume̱va sa̱trā rājā̍naṁ dadhire̱ saha̍dhyai |
harya̍śvāya barhayā̱ samā̱pīn || 7.031.12
mo ṣu tvā̍ vā̱ghata̍śca̱nāre a̱smanni rī̍raman |
ā̱rāttā̍ccitsadha̱māda̍ṁ na̱ ā ga̍hī̱ha vā̱ sannupa̍ śrudhi || 7.032.01
i̱me hi te̍ brahma̱kṛta̍ḥ su̱te sacā̱ madhau̱ na makṣa̱ āsa̍te |
indre̱ kāma̍ṁ jari̱tāro̍ vasū̱yavo̱ rathe̱ na pāda̱mā da̍dhuḥ || 7.032.02
rā̱yaskā̍mo̱ vajra̍hastaṁ su̱dakṣi̍ṇaṁ pu̱tro na pi̱tara̍ṁ huve || 7.032.03
i̱ma indrā̍ya sunvire̱ somā̍so̱ dadhyā̍śiraḥ |
tā ā madā̍ya vajrahasta pī̱taye̱ hari̍bhyāṁ yā̱hyoka̱ ā || 7.032.04
śrava̱cchrutka̍rṇa īyate̱ vasū̍nā̱ṁ nū ci̍nno mardhiṣa̱dgira̍ḥ |
sa̱dyaści̱dyaḥ sa̱hasrā̍ṇi śa̱tā dada̱nnaki̱rditsa̍nta̱mā mi̍nat || 7.032.05
sa vī̱ro apra̍tiṣkuta̱ indre̍ṇa śūśuve̱ nṛbhi̍ḥ |
yaste̍ gabhī̱rā sava̍nāni vṛtrahansu̱notyā ca̱ dhāva̍ti || 7.032.06
bhavā̱ varū̍thaṁ maghavanma̱ghonā̱ṁ yatsa̱majā̍si̱ śardha̍taḥ |
vi tvāha̍tasya̱ veda̍naṁ bhajema̱hyā dū̱ṇāśo̍ bharā̱ gaya̍m || 7.032.07
su̱notā̍ soma̱pāvne̱ soma̱mindrā̍ya va̱jriṇe̍ |
paca̍tā pa̱ktīrava̍se kṛṇu̱dhvamitpṛ̱ṇannitpṛ̍ṇa̱te maya̍ḥ || 7.032.08
mā sre̍dhata somino̱ dakṣa̍tā ma̱he kṛ̍ṇu̱dhvaṁ rā̱ya ā̱tuje̍ |
ta̱raṇi̱rijja̍yati̱ kṣeti̱ puṣya̍ti̱ na de̱vāsa̍ḥ kava̱tnave̍ || 7.032.09
naki̍ḥ su̱dāso̱ ratha̱ṁ paryā̍sa̱ na rī̍ramat |
indro̱ yasyā̍vi̱tā yasya̍ ma̱ruto̱ gama̱tsa goma̍ti vra̱je || 7.032.10
gama̱dvāja̍ṁ vā̱jaya̍nnindra̱ martyo̱ yasya̱ tvama̍vi̱tā bhuva̍ḥ |
a̱smāka̍ṁ bodhyavi̱tā rathā̍nāma̱smāka̍ṁ śūra nṛ̱ṇām || 7.032.11
udinnva̍sya ricya̱teṁ'śo̱ dhana̱ṁ na ji̱gyuṣa̍ḥ |
ya indro̱ hari̍vā̱nna da̍bhanti̱ taṁ ripo̱ dakṣa̍ṁ dadhāti so̱mini̍ || 7.032.12
mantra̱makha̍rva̱ṁ sudhi̍taṁ su̱peśa̍sa̱ṁ dadhā̍ta ya̱jñiye̱ṣvā |
pū̱rvīśca̱na prasi̍tayastaranti̱ taṁ ya indre̱ karma̍ṇā̱ bhuva̍t || 7.032.13
kastami̍ndra̱ tvāva̍su̱mā martyo̍ dadharṣati |
śra̱ddhā itte̍ maghava̱npārye̍ di̱vi vā̱jī vāja̍ṁ siṣāsati || 7.032.14
ma̱ghona̍ḥ sma vṛtra̱hatye̍ṣu codaya̱ ye dada̍ti pri̱yā vasu̍ |
tava̱ praṇī̍tī haryaśva sū̱ribhi̱rviśvā̍ tarema duri̱tā || 7.032.15
tavedi̍ndrāva̱maṁ vasu̱ tvaṁ pu̍ṣyasi madhya̱mam |
sa̱trā viśva̍sya para̱masya̍ rājasi̱ naki̍ṣṭvā̱ goṣu̍ vṛṇvate || 7.032.16
tvaṁ viśva̍sya dhana̱dā a̍si śru̱to ya ī̱ṁ bhava̍ntyā̱jaya̍ḥ |
tavā̱yaṁ viśva̍ḥ puruhūta̱ pārthi̍vo'va̱syurnāma̍ bhikṣate || 7.032.17
yadi̍ndra̱ yāva̍ta̱stvame̱tāva̍da̱hamīśī̍ya |
sto̱tāra̱middi̍dhiṣeya radāvaso̱ na pā̍pa̱tvāya̍ rāsīya || 7.032.18
śikṣe̍ya̱minma̍haya̱te di̱vedi̍ve rā̱ya ā ku̍haci̱dvide̍ |
na̱hi tvada̱nyanma̍ghavanna̱ āpya̱ṁ vasyo̱ asti̍ pi̱tā ca̱na || 7.032.19
ta̱raṇi̱ritsi̍ṣāsati̱ vāja̱ṁ pura̍ṁdhyā yu̱jā |
ā va̱ indra̍ṁ puruhū̱taṁ na̍me gi̱rā ne̱miṁ taṣṭe̍va su̱drva̍m || 7.032.20
na du̍ṣṭu̱tī martyo̍ vindate̱ vasu̱ na sredha̍ntaṁ ra̱yirna̍śat |
su̱śakti̱rinma̍ghava̱ntubhya̱ṁ māva̍te de̱ṣṇaṁ yatpārye̍ di̱vi || 7.032.21
a̱bhi tvā̍ śūra nonu̱mo'du̍gdhā iva dhe̱nava̍ḥ |
īśā̍nama̱sya jaga̍taḥ sva̱rdṛśa̱mīśā̍namindra ta̱sthuṣa̍ḥ || 7.032.22
na tvāvā̍ a̱nyo di̱vyo na pārthi̍vo̱ na jā̱to na ja̍niṣyate |
a̱śvā̱yanto̍ maghavannindra vā̱jino̍ ga̱vyanta̍stvā havāmahe || 7.032.23
a̱bhī ṣa̱tastadā bha̱rendra̱ jyāya̱ḥ kanī̍yasaḥ |
pu̱rū̱vasu̱rhi ma̍ghavansa̱nādasi̱ bhare̍bhare ca̱ havya̍ḥ || 7.032.24
parā̍ ṇudasva maghavanna̱mitrā̍nsu̱vedā̍ no̱ vasū̍ kṛdhi |
a̱smāka̍ṁ bodhyavi̱tā ma̍hādha̱ne bhavā̍ vṛ̱dhaḥ sakhī̍nām || 7.032.25
indra̱ kratu̍ṁ na̱ ā bha̍ra pi̱tā pu̱trebhyo̱ yathā̍ |
śikṣā̍ ṇo a̱sminpu̍ruhūta̱ yāma̍ni jī̱vā jyoti̍raśīmahi || 7.032.26
mā no̱ ajñā̍tā vṛ̱janā̍ durā̱dhyo̱3̱̍ māśi̍vāso̱ ava̍ kramuḥ |
tvayā̍ va̱yaṁ pra̱vata̱ḥ śaśva̍tīra̱po'ti̍ śūra tarāmasi || 7.032.27
śvi̱tyañco̍ mā dakṣiṇa̱taska̍pardā dhiyaṁji̱nvāso̍ a̱bhi hi pra̍ma̱nduḥ |
u̱ttiṣṭha̍nvoce̱ pari̍ ba̱rhiṣo̱ nṝnna me̍ dū̱rādavi̍tave̱ vasi̍ṣṭhāḥ || 7.033.01
dū̱rādindra̍manaya̱nnā su̱tena̍ ti̱ro vai̍śa̱ntamati̱ pānta̍mu̱gram |
pāśa̍dyumnasya vāya̱tasya̱ somā̍tsu̱tādindro̍'vṛṇītā̱ vasi̍ṣṭhān || 7.033.02
e̱vennu ka̱ṁ sindhu̍mebhistatāre̱vennu ka̍ṁ bhe̱dame̍bhirjaghāna |
e̱vennu ka̍ṁ dāśarā̱jñe su̱dāsa̱ṁ prāva̱dindro̱ brahma̍ṇā vo vasiṣṭhāḥ || 7.033.03
juṣṭī̍ naro̱ brahma̍ṇā vaḥ pitṝ̱ṇāmakṣa̍mavyaya̱ṁ na kilā̍ riṣātha |
yacchakva̍rīṣu bṛha̱tā rave̱ṇendre̱ śuṣma̱mada̍dhātā vasiṣṭhāḥ || 7.033.04
uddyāmi̱vettṛ̱ṣṇajo̍ nāthi̱tāso'dī̍dhayurdāśarā̱jñe vṛ̱tāsa̍ḥ |
vasi̍ṣṭhasya stuva̱ta indro̍ aśrodu̱ruṁ tṛtsu̍bhyo akṛṇodu lo̱kam || 7.033.05
da̱ṇḍā i̱vedgo̱aja̍nāsa āsa̱npari̍cchinnā bhara̱tā a̍rbha̱kāsa̍ḥ |
abha̍vacca purae̱tā vasi̍ṣṭha̱ ādittṛtsū̍nā̱ṁ viśo̍ aprathanta || 7.033.06
traya̍ḥ kṛṇvanti̱ bhuva̍neṣu̱ reta̍sti̱sraḥ pra̱jā āryā̱ jyoti̍ragrāḥ |
trayo̍ gha̱rmāsa̍ u̱ṣasa̍ṁ sacante̱ sarvā̱ ittā anu̍ vidu̱rvasi̍ṣṭhāḥ || 7.033.07
sūrya̍syeva va̱kṣatho̱ jyoti̍reṣāṁ samu̱drasye̍va mahi̱mā ga̍bhī̱raḥ |
vāta̍syeva praja̱vo nānyena̱ stomo̍ vasiṣṭhā̱ anve̍tave vaḥ || 7.033.08
ta inni̱ṇyaṁ hṛda̍yasya prake̱taiḥ sa̱hasra̍valśama̱bhi saṁ ca̍ranti |
ya̱mena̍ ta̱taṁ pa̍ri̱dhiṁ vaya̍nto'psa̱rasa̱ upa̍ sedu̱rvasi̍ṣṭhāḥ || 7.033.09
vi̱dyuto̱ jyoti̱ḥ pari̍ sa̱ṁjihā̍naṁ mi̱trāvaru̍ṇā̱ yadapa̍śyatāṁ tvā |
tatte̱ janmo̱taika̍ṁ vasiṣṭhā̱gastyo̱ yattvā̍ vi̱śa ā̍ja̱bhāra̍ || 7.033.10
u̱tāsi̍ maitrāvaru̱ṇo va̍siṣṭho̱rvaśyā̍ brahma̱nmana̱so'dhi̍ jā̱taḥ |
dra̱psaṁ ska̱nnaṁ brahma̍ṇā̱ daivye̍na̱ viśve̍ de̱vāḥ puṣka̍re tvādadanta || 7.033.11
sa pra̍ke̱ta u̱bhaya̍sya pravi̱dvānsa̱hasra̍dāna u̱ta vā̱ sadā̍naḥ |
ya̱mena̍ ta̱taṁ pa̍ri̱dhiṁ va̍yi̱ṣyanna̍psa̱rasa̱ḥ pari̍ jajñe̱ vasi̍ṣṭhaḥ || 7.033.12
sa̱tre ha̍ jā̱tāvi̍ṣi̱tā namo̍bhiḥ ku̱mbhe reta̍ḥ siṣicatuḥ samā̱nam |
tato̍ ha̱ māna̱ udi̍yāya̱ madhyā̱ttato̍ jā̱tamṛṣi̍māhu̱rvasi̍ṣṭham || 7.033.13
u̱ktha̱bhṛta̍ṁ sāma̱bhṛta̍ṁ bibharti̱ grāvā̍ṇa̱ṁ bibhra̱tpra va̍dā̱tyagre̍ |
upai̍namādhvaṁ sumana̱syamā̍nā̱ ā vo̍ gacchāti pratṛdo̱ vasi̍ṣṭhaḥ || 7.033.14
pra śu̱kraitu̍ de̱vī ma̍nī̱ṣā a̱smatsuta̍ṣṭo̱ ratho̱ na vā̱jī || 7.034.01
vi̱duḥ pṛ̍thi̱vyā di̱vo ja̱nitra̍ṁ śṛ̱ṇvantyāpo̱ adha̱ kṣara̍ntīḥ || 7.034.02
āpa̍ścidasmai̱ pinva̍nta pṛ̱thvīrvṛ̱treṣu̱ śūrā̱ maṁsa̍nta u̱grāḥ || 7.034.03
ā dhū̱rṣva̍smai̱ dadhā̱tāśvā̱nindro̱ na va̱jrī hira̍ṇyabāhuḥ || 7.034.04
a̱bhi pra sthā̱tāhe̍va ya̱jñaṁ yāte̍va̱ patma̱ntmanā̍ hinota || 7.034.05
tmanā̍ sa̱matsu̍ hi̱nota̍ ya̱jñaṁ dadhā̍ta ke̱tuṁ janā̍ya vī̱ram || 7.034.06
uda̍sya̱ śuṣmā̍dbhā̱nurnārta̱ bibha̍rti bhā̱raṁ pṛ̍thi̱vī na bhūma̍ || 7.034.07
hvayā̍mi de̱vā ayā̍turagne̱ sādha̍nnṛ̱tena̱ dhiya̍ṁ dadhāmi || 7.034.08
a̱bhi vo̍ de̱vīṁ dhiya̍ṁ dadhidhva̱ṁ pra vo̍ deva̱trā vāca̍ṁ kṛṇudhvam || 7.034.09
ā ca̍ṣṭa āsā̱ṁ pātho̍ na̱dīnā̱ṁ varu̍ṇa u̱graḥ sa̱hasra̍cakṣāḥ || 7.034.10
rājā̍ rā̱ṣṭrānā̱ṁ peśo̍ na̱dīnā̱manu̍ttamasmai kṣa̱traṁ vi̱śvāyu̍ || 7.034.11
avi̍ṣṭo a̱smānviśvā̍su vi̱kṣvadyu̍ṁ kṛṇota̱ śaṁsa̍ṁ nini̱tsoḥ || 7.034.12
vye̍tu di̱dyuddvi̱ṣāmaśe̍vā yu̱yota̱ viṣva̱grapa̍sta̱nūnā̍m || 7.034.13
avī̍nno a̱gnirha̱vyānnamo̍bhi̱ḥ preṣṭho̍ asmā adhāyi̱ stoma̍ḥ || 7.034.14
sa̱jūrde̱vebhi̍ra̱pāṁ napā̍ta̱ṁ sakhā̍yaṁ kṛdhvaṁ śi̱vo no̍ astu || 7.034.15
a̱bjāmu̱kthairahi̍ṁ gṛṇīṣe bu̱dhne na̱dīnā̱ṁ raja̍ssu̱ ṣīda̍n || 7.034.16
mā no'hi̍rbu̱dhnyo̍ ri̱ṣe dhā̱nmā ya̱jño a̍sya sridhadṛtā̱yoḥ || 7.034.17
u̱ta na̍ e̱ṣu nṛṣu̱ śravo̍ dhu̱ḥ pra rā̱ye ya̍ntu̱ śardha̍nto a̱ryaḥ || 7.034.18
tapa̍nti̱ śatru̱ṁ sva1̱̍rṇa bhūmā̍ ma̱hāse̍nāso̱ ame̍bhireṣām || 7.034.19
ā yanna̱ḥ patnī̱rgama̱ntyacchā̱ tvaṣṭā̍ supā̱ṇirdadhā̍tu vī̱rān || 7.034.20
prati̍ na̱ḥ stoma̱ṁ tvaṣṭā̍ juṣeta̱ syāda̱sme a̱rama̍tirvasū̱yuḥ || 7.034.21
tā no̍ rāsanrāti̱ṣāco̱ vasū̱nyā roda̍sī varuṇā̱nī śṛ̍ṇotu |
varū̍trībhiḥ suśara̱ṇo no̍ astu̱ tvaṣṭā̍ su̱datro̱ vi da̍dhātu̱ rāya̍ḥ || 7.034.22
tanno̱ rāya̱ḥ parva̍tā̱stanna̱ āpa̱stadrā̍ti̱ṣāca̱ oṣa̍dhīru̱ta dyauḥ |
vana̱spati̍bhiḥ pṛthi̱vī sa̱joṣā̍ u̱bhe roda̍sī̱ pari̍ pāsato naḥ || 7.034.23
anu̱ tadu̱rvī roda̍sī jihātā̱manu̍ dyu̱kṣo varu̍ṇa̱ indra̍sakhā |
anu̱ viśve̍ ma̱ruto̱ ye sa̱hāso̍ rā̱yaḥ syā̍ma dha̱ruṇa̍ṁ dhi̱yadhyai̍ || 7.034.24
tanna̱ indro̱ varu̍ṇo mi̱tro a̱gnirāpa̱ oṣa̍dhīrva̱nino̍ juṣanta |
śarma̍nsyāma ma̱rutā̍mu̱pasthe̍ yū̱yaṁ pā̍ta sva̱stibhi̱ḥ sadā̍ naḥ || 7.034.25
śaṁ na̍ indrā̱gnī bha̍vatā̱mavo̍bhi̱ḥ śaṁ na̱ indrā̱varu̍ṇā rā̱taha̍vyā |
śamindrā̱somā̍ suvi̱tāya̱ śaṁ yoḥ śaṁ na̱ indrā̍pū̱ṣaṇā̱ vāja̍sātau || 7.035.01
śaṁ no̱ bhaga̱ḥ śamu̍ na̱ḥ śaṁso̍ astu̱ śaṁ na̱ḥ pura̍ṁdhi̱ḥ śamu̍ santu̱ rāya̍ḥ |
śaṁ na̍ḥ sa̱tyasya̍ su̱yama̍sya̱ śaṁsa̱ḥ śaṁ no̍ arya̱mā pu̍rujā̱to a̍stu || 7.035.02
śaṁ no̍ dhā̱tā śamu̍ dha̱rtā no̍ astu̱ śaṁ na̍ urū̱cī bha̍vatu sva̱dhābhi̍ḥ |
śaṁ roda̍sī bṛha̱tī śaṁ no̱ adri̱ḥ śaṁ no̍ de̱vānā̍ṁ su̱havā̍ni santu || 7.035.03
śaṁ no̍ a̱gnirjyoti̍ranīko astu̱ śaṁ no̍ mi̱trāvaru̍ṇāva̱śvinā̱ śam |
śaṁ na̍ḥ su̱kṛtā̍ṁ sukṛ̱tāni̍ santu̱ śaṁ na̍ iṣi̱ro a̱bhi vā̍tu̱ vāta̍ḥ || 7.035.04
śaṁ no̱ dyāvā̍pṛthi̱vī pū̱rvahū̍tau̱ śama̱ntari̍kṣaṁ dṛ̱śaye̍ no astu |
śaṁ na̱ oṣa̍dhīrva̱nino̍ bhavantu̱ śaṁ no̱ raja̍sa̱spati̍rastu ji̱ṣṇuḥ || 7.035.05
śaṁ na̱ indro̱ vasu̍bhirde̱vo a̍stu̱ śamā̍di̱tyebhi̱rvaru̍ṇaḥ su̱śaṁsa̍ḥ |
śaṁ no̍ ru̱dro ru̱drebhi̱rjalā̍ṣa̱ḥ śaṁ na̱stvaṣṭā̱ gnābhi̍ri̱ha śṛ̍ṇotu || 7.035.06
śaṁ na̱ḥ somo̍ bhavatu̱ brahma̱ śaṁ na̱ḥ śaṁ no̱ grāvā̍ṇa̱ḥ śamu̍ santu ya̱jñāḥ |
śaṁ na̱ḥ svarū̍ṇāṁ mi̱tayo̍ bhavantu̱ śaṁ na̍ḥ pra̱sva1̱̍ḥ śamva̍stu̱ vedi̍ḥ || 7.035.07
śaṁ na̱ḥ sūrya̍ uru̱cakṣā̱ ude̍tu̱ śaṁ na̱ścata̍sraḥ pra̱diśo̍ bhavantu |
śaṁ na̱ḥ parva̍tā dhru̱vayo̍ bhavantu̱ śaṁ na̱ḥ sindha̍va̱ḥ śamu̍ sa̱ntvāpa̍ḥ || 7.035.08
śaṁ no̱ adi̍tirbhavatu vra̱tebhi̱ḥ śaṁ no̍ bhavantu ma̱ruta̍ḥ sva̱rkāḥ |
śaṁ no̱ viṣṇu̱ḥ śamu̍ pū̱ṣā no̍ astu̱ śaṁ no̍ bha̱vitra̱ṁ śamva̍stu vā̱yuḥ || 7.035.09
śaṁ no̍ de̱vaḥ sa̍vi̱tā trāya̍māṇa̱ḥ śaṁ no̍ bhavantū̱ṣaso̍ vibhā̱tīḥ |
śaṁ na̍ḥ pa̱rjanyo̍ bhavatu pra̱jābhya̱ḥ śaṁ na̱ḥ kṣetra̍sya̱ pati̍rastu śa̱mbhuḥ || 7.035.10
śaṁ no̍ de̱vā vi̱śvade̍vā bhavantu̱ śaṁ sara̍svatī sa̱ha dhī̱bhira̍stu |
śama̍bhi̱ṣāca̱ḥ śamu̍ rāti̱ṣāca̱ḥ śaṁ no̍ di̱vyāḥ pārthi̍vā̱ḥ śaṁ no̱ apyā̍ḥ || 7.035.11
śaṁ na̍ḥ sa̱tyasya̱ pata̍yo bhavantu̱ śaṁ no̱ arva̍nta̱ḥ śamu̍ santu̱ gāva̍ḥ |
śaṁ na̍ ṛ̱bhava̍ḥ su̱kṛta̍ḥ su̱hastā̱ḥ śaṁ no̍ bhavantu pi̱taro̱ have̍ṣu || 7.035.12
śaṁ no̍ a̱ja eka̍pādde̱vo a̍stu̱ śaṁ no'hi̍rbu̱dhnya1̱̍ḥ śaṁ sa̍mu̱draḥ |
śaṁ no̍ a̱pāṁ napā̍tpe̱rura̍stu̱ śaṁ na̱ḥ pṛśni̍rbhavatu de̱vago̍pā || 7.035.13
ā̱di̱tyā ru̱drā vasa̍vo juṣante̱daṁ brahma̍ kri̱yamā̍ṇa̱ṁ navī̍yaḥ |
śṛ̱ṇvantu̍ no di̱vyāḥ pārthi̍vāso̱ gojā̍tā u̱ta ye ya̱jñiyā̍saḥ || 7.035.14
ye de̱vānā̍ṁ ya̱jñiyā̍ ya̱jñiyā̍nā̱ṁ mano̱ryaja̍trā a̱mṛtā̍ ṛta̱jñāḥ |
te no̍ rāsantāmurugā̱yama̱dya yū̱yaṁ pā̍ta sva̱stibhi̱ḥ sadā̍ naḥ || 7.035.15
pra brahmai̍tu̱ sada̍nādṛ̱tasya̱ vi ra̱śmibhi̍ḥ sasṛje̱ sūryo̱ gāḥ |
vi sānu̍nā pṛthi̱vī sa̍sra u̱rvī pṛ̱thu pratī̍ka̱madhyedhe̍ a̱gniḥ || 7.036.01
i̱māṁ vā̍ṁ mitrāvaruṇā suvṛ̱ktimiṣa̱ṁ na kṛ̍ṇve asurā̱ navī̍yaḥ |
i̱no vā̍ma̱nyaḥ pa̍da̱vīrada̍bdho̱ jana̍ṁ ca mi̱tro ya̍tati bruvā̱ṇaḥ || 7.036.02
ā vāta̍sya̱ dhraja̍to ranta i̱tyā apī̍payanta dhe̱navo̱ na sūdā̍ḥ |
ma̱ho di̱vaḥ sada̍ne̱ jāya̍mā̱no'ci̍kradadvṛṣa̱bhaḥ sasmi̱nnūdha̍n || 7.036.03
gi̱rā ya e̱tā yu̱naja̱ddharī̍ ta̱ indra̍ pri̱yā su̱rathā̍ śūra dhā̱yū |
pra yo ma̱nyuṁ riri̍kṣato mi̱nātyā su̱kratu̍marya̱maṇa̍ṁ vavṛtyām || 7.036.04
yaja̍nte asya sa̱khyaṁ vaya̍śca nama̱svina̱ḥ sva ṛ̱tasya̱ dhāma̍n |
vi pṛkṣo̍ bābadhe̱ nṛbhi̱ḥ stavā̍na i̱daṁ namo̍ ru̱drāya̱ preṣṭha̍m || 7.036.05
ā yatsā̱kaṁ ya̱śaso̍ vāvaśā̱nāḥ sara̍svatī sa̱ptathī̱ sindhu̍mātā |
yāḥ su̱ṣvaya̍nta su̱dughā̍ḥ sudhā̱rā a̱bhi svena̱ paya̍sā̱ pīpyā̍nāḥ || 7.036.06
u̱ta tye no̍ ma̱ruto̍ mandasā̱nā dhiya̍ṁ to̱kaṁ ca̍ vā̱jino̍'vantu |
mā na̱ḥ pari̍ khya̱dakṣa̍rā̱ cara̱ntyavī̍vṛdha̱nyujya̱ṁ te ra̱yiṁ na̍ḥ || 7.036.07
pra vo̍ ma̱hīma̱rama̍tiṁ kṛṇudhva̱ṁ pra pū̱ṣaṇa̍ṁ vida̱thyaṁ1̱̍ na vī̱ram |
bhaga̍ṁ dhi̱yo̍'vi̱tāra̍ṁ no a̱syāḥ sā̱tau vāja̍ṁ rāti̱ṣāca̱ṁ pura̍ṁdhim || 7.036.08
acchā̱yaṁ vo̍ maruta̱ḥ śloka̍ e̱tvacchā̱ viṣṇu̍ṁ niṣikta̱pāmavo̍bhiḥ |
u̱ta pra̱jāyai̍ gṛṇa̱te vayo̍ dhuryū̱yaṁ pā̍ta sva̱stibhi̱ḥ sadā̍ naḥ || 7.036.09
ā vo̱ vāhi̍ṣṭho vahatu sta̱vadhyai̱ ratho̍ vājā ṛbhukṣaṇo̱ amṛ̍ktaḥ |
a̱bhi tri̍pṛ̱ṣṭhaiḥ sava̍neṣu̱ somai̱rmade̍ suśiprā ma̱habhi̍ḥ pṛṇadhvam || 7.037.01
yū̱yaṁ ha̱ ratna̍ṁ ma̱ghava̍tsu dhattha sva̱rdṛśa̍ ṛbhukṣaṇo̱ amṛ̍ktam |
saṁ ya̱jñeṣu̍ svadhāvantaḥ pibadhva̱ṁ vi no̱ rādhā̍ṁsi ma̱tibhi̍rdayadhvam || 7.037.02
u̱voci̍tha̱ hi ma̍ghavande̱ṣṇaṁ ma̱ho arbha̍sya̱ vasu̍no vibhā̱ge |
u̱bhā te̍ pū̱rṇā vasu̍nā̱ gabha̍stī̱ na sū̱nṛtā̱ ni ya̍mate vasa̱vyā̍ || 7.037.03
tvami̍ndra̱ svaya̍śā ṛbhu̱kṣā vājo̱ na sā̱dhurasta̍me̱ṣyṛkvā̍ |
va̱yaṁ nu te̍ dā̱śvāṁsa̍ḥ syāma̱ brahma̍ kṛ̱ṇvanto̍ harivo̱ vasi̍ṣṭhāḥ || 7.037.04
sani̍tāsi pra̱vato̍ dā̱śuṣe̍ ci̱dyābhi̱rvive̍ṣo haryaśva dhī̱bhiḥ |
va̱va̱nmā nu te̱ yujyā̍bhirū̱tī ka̱dā na̍ indra rā̱ya ā da̍śasyeḥ || 7.037.05
vā̱saya̍sīva ve̱dhasa̱stvaṁ na̍ḥ ka̱dā na̍ indra̱ vaca̍so bubodhaḥ |
asta̍ṁ tā̱tyā dhi̱yā ra̱yiṁ su̱vīra̍ṁ pṛ̱kṣo no̱ arvā̱ nyu̍hīta vā̱jī || 7.037.06
a̱bhi yaṁ de̱vī nirṛ̍tiści̱dīśe̱ nakṣa̍nta̱ indra̍ṁ śa̱rada̍ḥ su̱pṛkṣa̍ḥ |
upa̍ triba̱ndhurja̱rada̍ṣṭime̱tyasva̍veśa̱ṁ yaṁ kṛ̱ṇava̍nta̱ martā̍ḥ || 7.037.07
ā no̱ rādhā̍ṁsi savitaḥ sta̱vadhyā̱ ā rāyo̍ yantu̱ parva̍tasya rā̱tau |
sadā̍ no di̱vyaḥ pā̱yuḥ si̍ṣaktu yū̱yaṁ pā̍ta sva̱stibhi̱ḥ sadā̍ naḥ || 7.037.08
udu̱ ṣya de̱vaḥ sa̍vi̱tā ya̍yāma hira̱ṇyayī̍ma̱mati̱ṁ yāmaśi̍śret |
nū̱naṁ bhago̱ havyo̱ mānu̍ṣebhi̱rvi yo ratnā̍ purū̱vasu̱rdadhā̍ti || 7.038.01
udu̍ tiṣṭha savitaḥ śru̱dhya1̱̍sya hira̍ṇyapāṇe̱ prabhṛ̍tāvṛ̱tasya̍ |
vyu1̱̍rvīṁ pṛ̱thvīma̱mati̍ṁ sṛjā̱na ā nṛbhyo̍ marta̱bhoja̍naṁ suvā̱naḥ || 7.038.02
api̍ ṣṭu̱taḥ sa̍vi̱tā de̱vo a̍stu̱ yamā ci̱dviśve̱ vasa̍vo gṛ̱ṇanti̍ |
sa na̱ḥ stomā̍nnama̱sya1̱̍ścano̍ dhā̱dviśve̍bhiḥ pātu pā̱yubhi̱rni sū̱rīn || 7.038.03
a̱bhi yaṁ de̱vyadi̍tirgṛ̱ṇāti̍ sa̱vaṁ de̱vasya̍ savi̱turju̍ṣā̱ṇā |
a̱bhi sa̱mrājo̱ varu̍ṇo gṛṇantya̱bhi mi̱trāso̍ arya̱mā sa̱joṣā̍ḥ || 7.038.04
a̱bhi ye mi̱tho va̱nuṣa̱ḥ sapa̍nte rā̱tiṁ di̱vo rā̍ti̱ṣāca̍ḥ pṛthi̱vyāḥ |
ahi̍rbu̱dhnya̍ u̱ta na̍ḥ śṛṇotu̱ varū̱tryeka̍dhenubhi̱rni pā̍tu || 7.038.05
anu̱ tanno̱ jāspati̍rmaṁsīṣṭa̱ ratna̍ṁ de̱vasya̍ savi̱turi̍yā̱naḥ |
bhaga̍mu̱gro'va̍se̱ joha̍vīti̱ bhaga̱manu̍gro̱ adha̍ yāti̱ ratna̍m || 7.038.06
śaṁ no̍ bhavantu vā̱jino̱ have̍ṣu de̱vatā̍tā mi̱tadra̍vaḥ sva̱rkāḥ |
ja̱mbhaya̱nto'hi̱ṁ vṛka̱ṁ rakṣā̍ṁsi̱ sane̍mya̱smadyu̍yava̱nnamī̍vāḥ || 7.038.07
vāje̍vāje'vata vājino no̱ dhane̍ṣu viprā amṛtā ṛtajñāḥ |
a̱sya madhva̍ḥ pibata mā̱daya̍dhvaṁ tṛ̱ptā yā̍ta pa̱thibhi̍rdeva̱yānai̍ḥ || 7.038.08
ū̱rdhvo a̱gniḥ su̍ma̱tiṁ vasvo̍ aśretpratī̱cī jū̱rṇirde̱vatā̍timeti |
bhe̱jāte̱ adrī̍ ra̱thye̍va̱ panthā̍mṛ̱taṁ hotā̍ na iṣi̱to ya̍jāti || 7.039.01
pra vā̍vṛje supra̱yā ba̱rhire̍ṣā̱mā vi̱śpatī̍va̱ bīri̍ṭa iyāte |
vi̱śāma̱ktoru̱ṣasa̍ḥ pū̱rvahū̍tau vā̱yuḥ pū̱ṣā sva̱staye̍ ni̱yutvā̍n || 7.039.02
jma̱yā atra̱ vasa̍vo ranta de̱vā u̱rāva̱ntari̍kṣe marjayanta śu̱bhrāḥ |
a̱rvākpa̱tha u̍rujrayaḥ kṛṇudhva̱ṁ śrotā̍ dū̱tasya̍ ja̱gmuṣo̍ no a̱sya || 7.039.03
te hi ya̱jñeṣu̍ ya̱jñiyā̍sa̱ ūmā̍ḥ sa̱dhastha̱ṁ viśve̍ a̱bhi santi̍ de̱vāḥ |
tā a̍dhva̱ra u̍śa̱to ya̍kṣyagne śru̱ṣṭī bhaga̱ṁ nāsa̍tyā̱ pura̍ṁdhim || 7.039.04
āgne̱ giro̍ di̱va ā pṛ̍thi̱vyā mi̱traṁ va̍ha̱ varu̍ṇa̱mindra̍ma̱gnim |
ārya̱maṇa̱madi̍ti̱ṁ viṣṇu̍meṣā̱ṁ sara̍svatī ma̱ruto̍ mādayantām || 7.039.05
ra̱re ha̱vyaṁ ma̱tibhi̍rya̱jñiyā̍nā̱ṁ nakṣa̱tkāma̱ṁ martyā̍nā̱masi̍nvan |
dhātā̍ ra̱yima̍vida̱syaṁ sa̍dā̱sāṁ sa̍kṣī̱mahi̱ yujye̍bhi̱rnu de̱vaiḥ || 7.039.06
nū roda̍sī a̱bhiṣṭu̍te̱ vasi̍ṣṭhairṛ̱tāvā̍no̱ varu̍ṇo mi̱tro a̱gniḥ |
yaccha̍ntu ca̱ndrā u̍pa̱maṁ no̍ a̱rkaṁ yū̱yaṁ pā̍ta sva̱stibhi̱ḥ sadā̍ naḥ || 7.039.07
o śru̱ṣṭirvi̍da̱thyā̱3̱̍ same̍tu̱ prati̱ stoma̍ṁ dadhīmahi tu̱rāṇā̍m |
yada̱dya de̱vaḥ sa̍vi̱tā su̱vāti̱ syāmā̍sya ra̱tnino̍ vibhā̱ge || 7.040.01
mi̱trastanno̱ varu̍ṇo̱ roda̍sī ca̱ dyubha̍kta̱mindro̍ arya̱mā da̍dātu |
dide̍ṣṭu de̱vyadi̍tī̱ rekṇo̍ vā̱yuśca̱ yanni̍yu̱vaite̱ bhaga̍śca || 7.040.02
sedu̱gro a̍stu maruta̱ḥ sa śu̱ṣmī yaṁ martya̍ṁ pṛṣadaśvā̱ avā̍tha |
u̱tema̱gniḥ sara̍svatī ju̱nanti̱ na tasya̍ rā̱yaḥ pa̍rye̱tāsti̍ || 7.040.03
a̱yaṁ hi ne̱tā varu̍ṇa ṛ̱tasya̍ mi̱tro rājā̍no arya̱māpo̱ dhuḥ |
su̱havā̍ de̱vyadi̍tirana̱rvā te no̱ aṁho̱ ati̍ parṣa̱nnari̍ṣṭān || 7.040.04
a̱sya de̱vasya̍ mī̱ḻhuṣo̍ va̱yā viṣṇo̍re̱ṣasya̍ prabhṛ̱the ha̱virbhi̍ḥ |
vi̱de hi ru̱dro ru̱driya̍ṁ mahi̱tvaṁ yā̍si̱ṣṭaṁ va̱rtira̍śvinā̱virā̍vat || 7.040.05
mātra̍ pūṣannāghṛṇa irasyo̱ varū̍trī̱ yadrā̍ti̱ṣāca̍śca̱ rāsa̍n |
ma̱yo̱bhuvo̍ no̱ arva̍nto̱ ni pā̍ntu vṛ̱ṣṭiṁ pari̍jmā̱ vāto̍ dadātu || 7.040.06
nū roda̍sī a̱bhiṣṭu̍te̱ vasi̍ṣṭhairṛ̱tāvā̍no̱ varu̍ṇo mi̱tro a̱gniḥ |
yaccha̍ntu ca̱ndrā u̍pa̱maṁ no̍ a̱rkaṁ yū̱yaṁ pā̍ta sva̱stibhi̱ḥ sadā̍ naḥ || 7.040.07
prā̱tara̱gniṁ prā̱tarindra̍ṁ havāmahe prā̱tarmi̱trāvaru̍ṇā prā̱tara̱śvinā̍ |
prā̱tarbhaga̍ṁ pū̱ṣaṇa̱ṁ brahma̍ṇa̱spati̍ṁ prā̱taḥ soma̍mu̱ta ru̱draṁ hu̍vema || 7.041.01
prā̱ta̱rjita̱ṁ bhaga̍mu̱graṁ hu̍vema va̱yaṁ pu̱tramadi̍te̱ryo vi̍dha̱rtā |
ā̱dhraści̱dyaṁ manya̍mānastu̱raści̱drājā̍ ci̱dyaṁ bhaga̍ṁ bha̱kṣītyāha̍ || 7.041.02
bhaga̱ praṇe̍ta̱rbhaga̱ satya̍rādho̱ bhage̱māṁ dhiya̱muda̍vā̱ dada̍nnaḥ |
bhaga̱ pra ṇo̍ janaya̱ gobhi̱raśvai̱rbhaga̱ pra nṛbhi̍rnṛ̱vanta̍ḥ syāma || 7.041.03
u̱tedānī̱ṁ bhaga̍vantaḥ syāmo̱ta pra̍pi̱tva u̱ta madhye̱ ahnā̍m |
u̱todi̍tā maghava̱nsūrya̍sya va̱yaṁ de̱vānā̍ṁ suma̱tau syā̍ma || 7.041.04
bhaga̍ e̱va bhaga̍vā astu devā̱stena̍ va̱yaṁ bhaga̍vantaḥ syāma |
taṁ tvā̍ bhaga̱ sarva̱ ijjo̍havīti̱ sa no̍ bhaga purae̱tā bha̍ve̱ha || 7.041.05
sama̍dhva̱rāyo̱ṣaso̍ namanta dadhi̱krāve̍va̱ śuca̍ye pa̱dāya̍ |
a̱rvā̱cī̱naṁ va̍su̱vida̱ṁ bhaga̍ṁ no̱ ratha̍mi̱vāśvā̍ vā̱jina̱ ā va̍hantu || 7.041.06
aśvā̍vatī̱rgoma̍tīrna u̱ṣāso̍ vī̱rava̍tī̱ḥ sada̍mucchantu bha̱drāḥ |
ghṛ̱taṁ duhā̍nā vi̱śvata̱ḥ prapī̍tā yū̱yaṁ pā̍ta sva̱stibhi̱ḥ sadā̍ naḥ || 7.041.07
pra bra̱hmāṇo̱ aṅgi̍raso nakṣanta̱ pra kra̍nda̱nurna̍bha̱nya̍sya vetu |
pra dhe̱nava̍ uda̱pruto̍ navanta yu̱jyātā̱madrī̍ adhva̱rasya̱ peśa̍ḥ || 7.042.01
su̱gaste̍ agne̱ sana̍vitto̱ adhvā̍ yu̱kṣvā su̱te ha̱rito̍ ro̱hita̍śca |
ye vā̱ sadma̍nnaru̱ṣā vī̍ra̱vāho̍ hu̱ve de̱vānā̱ṁ jani̍māni sa̱ttaḥ || 7.042.02
samu̍ vo ya̱jñaṁ ma̍haya̱nnamo̍bhi̱ḥ pra hotā̍ ma̱ndro ri̍rica upā̱ke |
yaja̍sva̱ su pu̍rvaṇīka de̱vānā ya̱jñiyā̍ma̱rama̍tiṁ vavṛtyāḥ || 7.042.03
ya̱dā vī̱rasya̍ re̱vato̍ duro̱ṇe syo̍na̱śīrati̍thirā̱cike̍tat |
suprī̍to a̱gniḥ sudhi̍to̱ dama̱ ā sa vi̱śe dā̍ti̱ vārya̱miya̍tyai || 7.042.04
i̱maṁ no̍ agne adhva̱raṁ ju̍ṣasva ma̱rutsvindre̍ ya̱śasa̍ṁ kṛdhī naḥ |
ā naktā̍ ba̱rhiḥ sa̍datāmu̱ṣāso̱śantā̍ mi̱trāvaru̍ṇā yaje̱ha || 7.042.05
e̱vāgniṁ sa̍ha̱syaṁ1̱̍ vasi̍ṣṭho rā̱yaskā̍mo vi̱śvapsnya̍sya staut |
iṣa̍ṁ ra̱yiṁ pa̍pratha̱dvāja̍ma̱sme yū̱yaṁ pā̍ta sva̱stibhi̱ḥ sadā̍ naḥ || 7.042.06
pra vo̍ ya̱jñeṣu̍ deva̱yanto̍ arca̱ndyāvā̱ namo̍bhiḥ pṛthi̱vī i̱ṣadhyai̍ |
yeṣā̱ṁ brahmā̱ṇyasa̍māni̱ viprā̱ viṣva̍gvi̱yanti̍ va̱nino̱ na śākhā̍ḥ || 7.043.01
pra ya̱jña e̍tu̱ hetvo̱ na sapti̱rudya̍cchadhva̱ṁ sama̍naso ghṛ̱tācī̍ḥ |
stṛ̱ṇī̱ta ba̱rhira̍dhva̱rāya̍ sā̱dhūrdhvā śo̱cīṁṣi̍ deva̱yūnya̍sthuḥ || 7.043.02
ā pu̱trāso̱ na mā̱tara̱ṁ vibhṛ̍trā̱ḥ sānau̍ de̱vāso̍ ba̱rhiṣa̍ḥ sadantu |
ā vi̱śvācī̍ vida̱thyā̍mana̱ktvagne̱ mā no̍ de̱vatā̍tā̱ mṛdha̍skaḥ || 7.043.03
te sī̍ṣapanta̱ joṣa̱mā yaja̍trā ṛ̱tasya̱ dhārā̍ḥ su̱dughā̱ duhā̍nāḥ |
jyeṣṭha̍ṁ vo a̱dya maha̱ ā vasū̍nā̱mā ga̍ntana̱ sama̍naso̱ yati̱ ṣṭha || 7.043.04
e̱vā no̍ agne vi̱kṣvā da̍śasya̱ tvayā̍ va̱yaṁ sa̍hasāva̱nnāskrā̍ḥ |
rā̱yā yu̱jā sa̍dha̱mādo̱ ari̍ṣṭā yū̱yaṁ pā̍ta sva̱stibhi̱ḥ sadā̍ naḥ || 7.043.05
da̱dhi̱krāṁ va̍ḥ pratha̱mama̱śvino̱ṣasa̍ma̱gniṁ sami̍ddha̱ṁ bhaga̍mū̱taye̍ huve |
indra̱ṁ viṣṇu̍ṁ pū̱ṣaṇa̱ṁ brahma̍ṇa̱spati̍mādi̱tyāndyāvā̍pṛthi̱vī a̱paḥ sva̍ḥ || 7.044.01
da̱dhi̱krāmu̱ nama̍sā bo̱dhaya̍nta u̱dīrā̍ṇā ya̱jñamu̍papra̱yanta̍ḥ |
iḻā̍ṁ de̱vīṁ ba̱rhiṣi̍ sā̱daya̍nto̱'śvinā̱ viprā̍ su̱havā̍ huvema || 7.044.02
da̱dhi̱krāvā̍ṇaṁ bubudhā̱no a̱gnimupa̍ bruva u̱ṣasa̱ṁ sūrya̱ṁ gām |
bra̱dhnaṁ mā̍śca̱torvaru̍ṇasya ba̱bhruṁ te viśvā̱smaddu̍ri̱tā yā̍vayantu || 7.044.03
da̱dhi̱krāvā̍ pratha̱mo vā̱jyarvāgre̱ rathā̍nāṁ bhavati prajā̱nan |
sa̱ṁvi̱dā̱na u̱ṣasā̱ sūrye̍ṇādi̱tyebhi̱rvasu̍bhi̱raṅgi̍robhiḥ || 7.044.04
ā no̍ dadhi̱krāḥ pa̱thyā̍manaktvṛ̱tasya̱ panthā̱manve̍ta̱vā u̍ |
śṛ̱ṇotu̍ no̱ daivya̱ṁ śardho̍ a̱gniḥ śṛ̱ṇvantu̱ viśve̍ mahi̱ṣā amū̍rāḥ || 7.044.05
ā de̱vo yā̍tu savi̱tā su̱ratno̍'ntarikṣa̱prā vaha̍māno̱ aśvai̍ḥ |
haste̱ dadhā̍no̱ naryā̍ pu̱rūṇi̍ nive̱śaya̍ñca prasu̱vañca̱ bhūma̍ || 7.045.01
uda̍sya bā̱hū śi̍thi̱rā bṛ̱hantā̍ hira̱ṇyayā̍ di̱vo antā̍ anaṣṭām |
nū̱naṁ so a̍sya mahi̱mā pa̍niṣṭa̱ sūra̍ścidasmā̱ anu̍ dādapa̱syām || 7.045.02
sa ghā̍ no de̱vaḥ sa̍vi̱tā sa̱hāvā sā̍viṣa̱dvasu̍pati̱rvasū̍ni |
vi̱śraya̍māṇo a̱mati̍murū̱cīṁ ma̍rta̱bhoja̍na̱madha̍ rāsate naḥ || 7.045.03
i̱mā gira̍ḥ savi̱tāra̍ṁ suji̱hvaṁ pū̱rṇaga̍bhastimīḻate supā̱ṇim |
ci̱traṁ vayo̍ bṛ̱hada̱sme da̍dhātu yū̱yaṁ pā̍ta sva̱stibhi̱ḥ sadā̍ naḥ || 7.045.04
i̱mā ru̱drāya̍ sthi̱radha̍nvane̱ gira̍ḥ kṣi̱preṣa̍ve de̱vāya̍ sva̱dhāvne̍ |
aṣā̍ḻhāya̱ saha̍mānāya ve̱dhase̍ ti̱gmāyu̍dhāya bharatā śṛ̱ṇotu̍ naḥ || 7.046.01
sa hi kṣaye̍ṇa̱ kṣamya̍sya̱ janma̍na̱ḥ sāmrā̍jyena di̱vyasya̱ ceta̍ti |
ava̱nnava̍ntī̱rupa̍ no̱ dura̍ścarānamī̱vo ru̍dra̱ jāsu̍ no bhava || 7.046.02
yā te̍ di̱dyudava̍sṛṣṭā di̱vaspari̍ kṣma̱yā cara̍ti̱ pari̱ sā vṛ̍ṇaktu naḥ |
sa̱hasra̍ṁ te svapivāta bheṣa̱jā mā na̍sto̱keṣu̱ tana̍yeṣu rīriṣaḥ || 7.046.03
mā no̍ vadhī rudra̱ mā parā̍ dā̱ mā te̍ bhūma̱ prasi̍tau hīḻi̱tasya̍ |
ā no̍ bhaja ba̱rhiṣi̍ jīvaśa̱ṁse yū̱yaṁ pā̍ta sva̱stibhi̱ḥ sadā̍ naḥ || 7.046.04
āpo̱ yaṁ va̍ḥ pratha̱maṁ de̍va̱yanta̍ indra̱pāna̍mū̱rmimakṛ̍ṇvate̱ḻaḥ |
taṁ vo̍ va̱yaṁ śuci̍mari̱prama̱dya ghṛ̍ta̱pruṣa̱ṁ madhu̍mantaṁ vanema || 7.047.01
tamū̱rmimā̍po̱ madhu̍mattamaṁ vo̱'pāṁ napā̍davatvāśu̱hemā̍ |
yasmi̱nnindro̱ vasu̍bhirmā̱dayā̍te̱ tama̍śyāma deva̱yanto̍ vo a̱dya || 7.047.02
śa̱tapa̍vitrāḥ sva̱dhayā̱ mada̍ntīrde̱vīrde̱vānā̱mapi̍ yanti̱ pātha̍ḥ |
tā indra̍sya̱ na mi̍nanti vra̱tāni̱ sindhu̍bhyo ha̱vyaṁ ghṛ̱tava̍jjuhota || 7.047.03
yāḥ sūryo̍ ra̱śmibhi̍rāta̱tāna̱ yābhya̱ indro̱ ara̍dadgā̱tumū̱rmim |
te si̍ndhavo̱ vari̍vo dhātanā no yū̱yaṁ pā̍ta sva̱stibhi̱ḥ sadā̍ naḥ || 7.047.04
ṛbhu̍kṣaṇo vājā mā̱daya̍dhvama̱sme na̍ro maghavānaḥ su̱tasya̍ |
ā vo̱'rvāca̱ḥ krata̍vo̱ na yā̱tāṁ vibhvo̱ ratha̱ṁ narya̍ṁ vartayantu || 7.048.01
ṛ̱bhurṛ̱bhubhi̍ra̱bhi va̍ḥ syāma̱ vibhvo̍ vi̱bhubhi̱ḥ śava̍sā̱ śavā̍ṁsi |
vājo̍ a̱smā a̍vatu̱ vāja̍sātā̱vindre̍ṇa yu̱jā ta̍ruṣema vṛ̱tram || 7.048.02
te ci̱ddhi pū̱rvīra̱bhi santi̍ śā̱sā viśvā̍ a̱rya u̍pa̱ratā̍ti vanvan |
indro̱ vibhvā̍ ṛbhu̱kṣā vājo̍ a̱ryaḥ śatro̍rmitha̱tyā kṛ̍ṇava̱nvi nṛ̱mṇam || 7.048.03
nū de̍vāso̱ vari̍vaḥ kartanā no bhū̱ta no̱ viśve'va̍se sa̱joṣā̍ḥ |
sama̱sme iṣa̱ṁ vasa̍vo dadīranyū̱yaṁ pā̍ta sva̱stibhi̱ḥ sadā̍ naḥ || 7.048.04
sa̱mu̱drajye̍ṣṭhāḥ sali̱lasya̱ madhyā̍tpunā̱nā ya̱ntyani̍viśamānāḥ |
indro̱ yā va̱jrī vṛ̍ṣa̱bho ra̱rāda̱ tā āpo̍ de̱vīri̱ha māma̍vantu || 7.049.01
yā āpo̍ di̱vyā u̱ta vā̱ srava̍nti kha̱nitri̍mā u̱ta vā̱ yāḥ sva̍ya̱ṁjāḥ |
sa̱mu̱drārthā̱ yāḥ śuca̍yaḥ pāva̱kāstā āpo̍ de̱vīri̱ha māma̍vantu || 7.049.02
yāsā̱ṁ rājā̱ varu̍ṇo̱ yāti̱ madhye̍ satyānṛ̱te a̍va̱paśya̱ñjanā̍nām |
ma̱dhu̱ścuta̱ḥ śuca̍yo̱ yāḥ pā̍va̱kāstā āpo̍ de̱vīri̱ha māma̍vantu || 7.049.03
yāsu̱ rājā̱ varu̍ṇo̱ yāsu̱ somo̱ viśve̍ de̱vā yāsūrja̱ṁ mada̍nti |
vai̱śvā̱na̱ro yāsva̱gniḥ pravi̍ṣṭa̱stā āpo̍ de̱vīri̱ha māma̍vantu || 7.049.04
ā māṁ mi̍trāvaruṇe̱ha ra̍kṣataṁ kulā̱yaya̍dvi̱śvaya̱nmā na̱ ā ga̍n |
a̱ja̱kā̱vaṁ du̱rdṛśī̍kaṁ ti̱ro da̍dhe̱ mā māṁ padye̍na̱ rapa̍sā vida̱ttsaru̍ḥ || 7.050.01
yadvi̱jāma̱nparu̍ṣi̱ vanda̍na̱ṁ bhuva̍daṣṭhī̱vantau̱ pari̍ ku̱lphau ca̱ deha̍t |
a̱gniṣṭacchoca̱nnapa̍ bādhatāmi̱to mā māṁ padye̍na̱ rapa̍sā vida̱ttsaru̍ḥ || 7.050.02
yaccha̍lma̱lau bhava̍ti̱ yanna̱dīṣu̱ yadoṣa̍dhībhya̱ḥ pari̱ jāya̍te vi̱ṣam |
viśve̍ de̱vā niri̱tastatsu̍vantu̱ mā māṁ padye̍na̱ rapa̍sā vida̱ttsaru̍ḥ || 7.050.03
yāḥ pra̱vato̍ ni̱vata̍ u̱dvata̍ uda̱nvatī̍ranuda̱kāśca̱ yāḥ |
tā a̱smabhya̱ṁ paya̍sā̱ pinva̍mānāḥ śi̱vā de̱vīra̍śipa̱dā bha̍vantu̱ sarvā̍ na̱dyo̍ aśimi̱dā bha̍vantu || 7.050.04
ā̱di̱tyānā̱mava̍sā̱ nūta̍nena sakṣī̱mahi̱ śarma̍ṇā̱ śaṁta̍mena |
a̱nā̱gā̱stve a̍diti̱tve tu̱rāsa̍ i̱maṁ ya̱jñaṁ da̍dhatu̱ śroṣa̍māṇāḥ || 7.051.01
ā̱di̱tyāso̱ adi̍tirmādayantāṁ mi̱tro a̍rya̱mā varu̍ṇo̱ raji̍ṣṭhāḥ |
a̱smāka̍ṁ santu̱ bhuva̍nasya go̱pāḥ piba̍ntu̱ soma̱mava̍se no a̱dya || 7.051.02
ā̱di̱tyā viśve̍ ma̱ruta̍śca̱ viśve̍ de̱vāśca̱ viśva̍ ṛ̱bhava̍śca̱ viśve̍ |
indro̍ a̱gnira̱śvinā̍ tuṣṭuvā̱nā yū̱yaṁ pā̍ta sva̱stibhi̱ḥ sadā̍ naḥ || 7.051.03
ā̱di̱tyāso̱ adi̍tayaḥ syāma̱ pūrde̍va̱trā va̍savo martya̱trā |
sane̍ma mitrāvaruṇā̱ sana̍nto̱ bhave̍ma dyāvāpṛthivī̱ bhava̍ntaḥ || 7.052.01
mi̱trastanno̱ varu̍ṇo māmahanta̱ śarma̍ to̱kāya̱ tana̍yāya go̱pāḥ |
mā vo̍ bhujemā̱nyajā̍ta̱meno̱ mā tatka̍rma vasavo̱ yaccaya̍dhve || 7.052.02
tu̱ra̱ṇyavo'ṅgi̍raso nakṣanta̱ ratna̍ṁ de̱vasya̍ savi̱turi̍yā̱nāḥ |
pi̱tā ca̱ tanno̍ ma̱hānyaja̍tro̱ viśve̍ de̱vāḥ sama̍naso juṣanta || 7.052.03
pra dyāvā̍ ya̱jñaiḥ pṛ̍thi̱vī namo̍bhiḥ sa̱bādha̍ īḻe bṛha̱tī yaja̍tre |
te ci̱ddhi pūrve̍ ka̱vayo̍ gṛ̱ṇanta̍ḥ pu̱ro ma̱hī da̍dhi̱re de̱vapu̍tre || 7.053.01
pra pū̍rva̱je pi̱tarā̱ navya̍sībhirgī̱rbhiḥ kṛ̍ṇudhva̱ṁ sada̍ne ṛ̱tasya̍ |
ā no̍ dyāvāpṛthivī̱ daivye̍na̱ jane̍na yāta̱ṁ mahi̍ vā̱ṁ varū̍tham || 7.053.02
u̱to hi vā̍ṁ ratna̱dheyā̍ni̱ santi̍ pu̱rūṇi̍ dyāvāpṛthivī su̱dāse̍ |
a̱sme dha̍tta̱ṁ yadasa̱daskṛ̍dhoyu yū̱yaṁ pā̍ta sva̱stibhi̱ḥ sadā̍ naḥ || 7.053.03
vāsto̍ṣpate̱ prati̍ jānīhya̱smānsvā̍ve̱śo a̍namī̱vo bha̍vā naḥ |
yattvema̍he̱ prati̱ tanno̍ juṣasva̱ śaṁ no̍ bhava dvi̱pade̱ śaṁ catu̍ṣpade || 7.054.01
vāsto̍ṣpate pra̱tara̍ṇo na edhi gaya̱sphāno̱ gobhi̱raśve̍bhirindo |
a̱jarā̍saste sa̱khye syā̍ma pi̱teva̍ pu̱trānprati̍ no juṣasva || 7.054.02
vāsto̍ṣpate śa̱gmayā̍ sa̱ṁsadā̍ te sakṣī̱mahi̍ ra̱ṇvayā̍ gātu̱matyā̍ |
pā̱hi kṣema̍ u̱ta yoge̱ vara̍ṁ no yū̱yaṁ pā̍ta sva̱stibhi̱ḥ sadā̍ naḥ || 7.054.03
a̱mī̱va̱hā vā̍stoṣpate̱ viśvā̍ rū̱pāṇyā̍vi̱śan |
sakhā̍ su̱śeva̍ edhi naḥ || 7.055.01
yada̍rjuna sārameya da̱taḥ pi̍śaṅga̱ yaccha̍se |
vī̍va bhrājanta ṛ̱ṣṭaya̱ upa̱ srakve̍ṣu̱ bapsa̍to̱ ni ṣu sva̍pa || 7.055.02
ste̱naṁ rā̍ya sārameya̱ taska̍raṁ vā punaḥsara |
sto̱tṝnindra̍sya rāyasi̱ kima̱smāndu̍cchunāyase̱ ni ṣu sva̍pa || 7.055.03
tvaṁ sū̍ka̱rasya̍ dardṛhi̱ tava̍ dardartu sūka̱raḥ |
sto̱tṝnindra̍sya rāyasi̱ kima̱smāndu̍cchunāyase̱ ni ṣu sva̍pa || 7.055.04
sastu̍ mā̱tā sastu̍ pi̱tā sastu̱ śvā sastu̍ vi̱śpati̍ḥ |
sa̱santu̱ sarve̍ jñā̱taya̱ḥ sastva̱yama̱bhito̱ jana̍ḥ || 7.055.05
ya āste̱ yaśca̱ cara̍ti̱ yaśca̱ paśya̍ti no̱ jana̍ḥ |
teṣā̱ṁ saṁ ha̍nmo a̱kṣāṇi̱ yathe̱daṁ ha̱rmyaṁ tathā̍ || 7.055.06
sa̱hasra̍śṛṅgo vṛṣa̱bho yaḥ sa̍mu̱drādu̱dāca̍rat |
tenā̍ saha̱sye̍nā va̱yaṁ ni janā̍nsvāpayāmasi || 7.055.07
pro̱ṣṭhe̱śa̱yā va̍hyeśa̱yā nārī̱ryāsta̍lpa̱śīva̍rīḥ |
striyo̱ yāḥ puṇya̍gandhā̱stāḥ sarvā̍ḥ svāpayāmasi || 7.055.08
ka ī̱ṁ vya̍ktā̱ nara̱ḥ sanī̍ḻā ru̱drasya̱ maryā̱ adha̱ svaśvā̍ḥ || 7.056.01
naki̱rhye̍ṣāṁ ja̱nūṁṣi̱ veda̱ te a̱ṅga vi̍dre mi̱tho ja̱nitra̍m || 7.056.02
a̱bhi sva̱pūbhi̍rmi̱tho va̍panta̱ vāta̍svanasaḥ śye̱nā a̍spṛdhran || 7.056.03
e̱tāni̱ dhīro̍ ni̱ṇyā ci̍keta̱ pṛśni̱ryadūdho̍ ma̱hī ja̱bhāra̍ || 7.056.04
sā viṭ su̱vīrā̍ ma̱rudbhi̍rastu sa̱nātsaha̍ntī̱ puṣya̍ntī nṛ̱mṇam || 7.056.05
yāma̱ṁ yeṣṭhā̍ḥ śu̱bhā śobhi̍ṣṭhāḥ śri̱yā sammi̍ślā̱ ojo̍bhiru̱grāḥ || 7.056.06
u̱graṁ va̱ oja̍ḥ sthi̱rā śavā̱ṁsyadhā̍ ma̱rudbhi̍rga̱ṇastuvi̍ṣmān || 7.056.07
śu̱bhro va̱ḥ śuṣma̱ḥ krudhmī̱ manā̍ṁsi̱ dhuni̱rmuni̍riva̱ śardha̍sya dhṛ̱ṣṇoḥ || 7.056.08
sane̍mya̱smadyu̱yota̍ di̱dyuṁ mā vo̍ durma̱tiri̱ha praṇa̍ṅnaḥ || 7.056.09
pri̱yā vo̱ nāma̍ huve tu̱rāṇā̱mā yattṛ̱panma̍ruto vāvaśā̱nāḥ || 7.056.10
svā̱yu̱dhāsa̍ i̱ṣmiṇa̍ḥ suni̱ṣkā u̱ta sva̱yaṁ ta̱nva1̱̍ḥ śumbha̍mānāḥ || 7.056.11
śucī̍ vo ha̱vyā ma̍ruta̱ḥ śucī̍nā̱ṁ śuci̍ṁ hinomyadhva̱raṁ śuci̍bhyaḥ |
ṛ̱tena̍ sa̱tyamṛ̍ta̱sāpa̍ āya̱ñchuci̍janmāna̱ḥ śuca̍yaḥ pāva̱kāḥ || 7.056.12
aṁse̱ṣvā ma̍rutaḥ khā̱dayo̍ vo̱ vakṣa̍ssu ru̱kmā u̍paśiśriyā̱ṇāḥ |
vi vi̱dyuto̱ na vṛ̱ṣṭibhī̍ rucā̱nā anu̍ sva̱dhāmāyu̍dhai̱ryaccha̍mānāḥ || 7.056.13
pra bu̱dhnyā̍ va īrate̱ mahā̍ṁsi̱ pra nāmā̍ni prayajyavastiradhvam |
sa̱ha̱sriya̱ṁ damya̍ṁ bhā̱game̱taṁ gṛ̍hame̱dhīya̍ṁ maruto juṣadhvam || 7.056.14
yadi̍ stu̱tasya̍ maruto adhī̱thetthā vipra̍sya vā̱jino̱ havī̍man |
ma̱kṣū rā̱yaḥ su̱vīrya̍sya dāta̱ nū ci̱dyama̱nya ā̱dabha̱darā̍vā || 7.056.15
atyā̍so̱ na ye ma̱ruta̱ḥ svañco̍ yakṣa̱dṛśo̱ na śu̱bhaya̍nta̱ maryā̍ḥ |
te ha̍rmye̱ṣṭhāḥ śiśa̍vo̱ na śu̱bhrā va̱tsāso̱ na pra̍krī̱ḻina̍ḥ payo̱dhāḥ || 7.056.16
da̱śa̱syanto̍ no ma̱ruto̍ mṛḻantu variva̱syanto̱ roda̍sī su̱meke̍ |
ā̱re go̱hā nṛ̱hā va̱dho vo̍ astu su̱mnebhi̍ra̱sme va̍savo namadhvam || 7.056.17
ā vo̱ hotā̍ johavīti sa̱ttaḥ sa̱trācī̍ṁ rā̱tiṁ ma̍ruto gṛṇā̱naḥ |
ya īva̍to vṛṣaṇo̱ asti̍ go̱pāḥ so adva̍yāvī havate va u̱kthaiḥ || 7.056.18
i̱me tu̱raṁ ma̱ruto̍ rāmayantī̱me saha̱ḥ saha̍sa̱ ā na̍manti |
i̱me śaṁsa̍ṁ vanuṣya̱to ni pā̍nti gu̱ru dveṣo̱ ara̍ruṣe dadhanti || 7.056.19
i̱me ra̱dhraṁ ci̍nma̱ruto̍ junanti̱ bhṛmi̍ṁ ci̱dyathā̱ vasa̍vo ju̱ṣanta̍ |
apa̍ bādhadhvaṁ vṛṣaṇa̱stamā̍ṁsi dha̱tta viśva̱ṁ tana̍yaṁ to̱kama̱sme || 7.056.20
mā vo̍ dā̱trānma̍ruto̱ nira̍rāma̱ mā pa̱ścādda̍ghma rathyo vibhā̱ge |
ā na̍ḥ spā̱rhe bha̍jatanā vasa̱vye̱3̱̍ yadī̍ṁ sujā̱taṁ vṛ̍ṣaṇo vo̱ asti̍ || 7.056.21
saṁ yaddhana̍nta ma̱nyubhi̱rjanā̍sa̱ḥ śūrā̍ ya̱hvīṣvoṣa̍dhīṣu vi̱kṣu |
adha̍ smā no maruto rudriyāsastrā̱tāro̍ bhūta̱ pṛta̍nāsva̱ryaḥ || 7.056.22
bhūri̍ cakra maruta̱ḥ pitryā̍ṇyu̱kthāni̱ yā va̍ḥ śa̱syante̍ pu̱rā ci̍t |
ma̱rudbhi̍ru̱graḥ pṛta̍nāsu̱ sāḻhā̍ ma̱rudbhi̱ritsani̍tā̱ vāja̱marvā̍ || 7.056.23
a̱sme vī̱ro ma̍rutaḥ śu̱ṣmya̍stu̱ janā̍nā̱ṁ yo asu̍ro vidha̱rtā |
a̱po yena̍ sukṣi̱taye̱ tare̱mādha̱ svamoko̍ a̱bhi va̍ḥ syāma || 7.056.24
tanna̱ indro̱ varu̍ṇo mi̱tro a̱gnirāpa̱ oṣa̍dhīrva̱nino̍ juṣanta |
śarma̍nsyāma ma̱rutā̍mu̱pasthe̍ yū̱yaṁ pā̍ta sva̱stibhi̱ḥ sadā̍ naḥ || 7.056.25
madhvo̍ vo̱ nāma̱ māru̍taṁ yajatrā̱ḥ pra ya̱jñeṣu̱ śava̍sā madanti |
ye re̱jaya̍nti̱ roda̍sī cidu̱rvī pinva̱ntyutsa̱ṁ yadayā̍suru̱grāḥ || 7.057.01
ni̱ce̱tāro̱ hi ma̱ruto̍ gṛ̱ṇanta̍ṁ praṇe̱tāro̱ yaja̍mānasya̱ manma̍ |
a̱smāka̍ma̱dya vi̱dathe̍ṣu ba̱rhirā vī̱taye̍ sadata pipriyā̱ṇāḥ || 7.057.02
naitāva̍da̱nye ma̱ruto̱ yathe̱me bhrāja̍nte ru̱kmairāyu̍dhaista̱nūbhi̍ḥ |
ā roda̍sī viśva̱piśa̍ḥ piśā̱nāḥ sa̍mā̱nama̱ñjya̍ñjate śu̱bhe kam || 7.057.03
ṛdha̱ksā vo̍ maruto di̱dyuda̍stu̱ yadva̱ āga̍ḥ puru̱ṣatā̱ karā̍ma |
mā va̱stasyā̱mapi̍ bhūmā yajatrā a̱sme vo̍ astu suma̱tiścani̍ṣṭhā || 7.057.04
kṛ̱te ci̱datra̍ ma̱ruto̍ raṇantānava̱dyāsa̱ḥ śuca̍yaḥ pāva̱kāḥ |
pra ṇo̍'vata suma̱tibhi̍ryajatrā̱ḥ pra vāje̍bhistirata pu̱ṣyase̍ naḥ || 7.057.05
u̱ta stu̱tāso̍ ma̱ruto̍ vyantu̱ viśve̍bhi̱rnāma̍bhi̱rnaro̍ ha̱vīṁṣi̍ |
dadā̍ta no a̱mṛta̍sya pra̱jāyai̍ jigṛ̱ta rā̱yaḥ sū̱nṛtā̍ ma̱ghāni̍ || 7.057.06
ā stu̱tāso̍ maruto̱ viśva̍ ū̱tī acchā̍ sū̱rīnsa̱rvatā̍tā jigāta |
ye na̱stmanā̍ śa̱tino̍ va̱rdhaya̍nti yū̱yaṁ pā̍ta sva̱stibhi̱ḥ sadā̍ naḥ || 7.057.07
pra sā̍ka̱mukṣe̍ arcatā ga̱ṇāya̱ yo daivya̍sya̱ dhāmna̱stuvi̍ṣmān |
u̱ta kṣo̍danti̱ roda̍sī mahi̱tvā nakṣa̍nte̱ nāka̱ṁ nirṛ̍terava̱ṁśāt || 7.058.01
ja̱nūści̍dvo marutastve̱ṣye̍ṇa̱ bhīmā̍sa̱stuvi̍manya̱vo'yā̍saḥ |
pra ye maho̍bhi̱roja̍so̱ta santi̱ viśvo̍ vo̱ yāma̍nbhayate sva̱rdṛk || 7.058.02
bṛ̱hadvayo̍ ma̱ghava̍dbhyo dadhāta̱ jujo̍ṣa̱nninma̱ruta̍ḥ suṣṭu̱tiṁ na̍ḥ |
ga̱to nādhvā̱ vi ti̍rāti ja̱ntuṁ pra ṇa̍ḥ spā̱rhābhi̍rū̱tibhi̍stireta || 7.058.03
yu̱ṣmoto̱ vipro̍ marutaḥ śata̱svī yu̱ṣmoto̱ arvā̱ sahu̍riḥ saha̱srī |
yu̱ṣmota̍ḥ sa̱mrāḻu̱ta ha̍nti vṛ̱traṁ pra tadvo̍ astu dhūtayo de̱ṣṇam || 7.058.04
tā ā ru̱drasya̍ mī̱ḻhuṣo̍ vivāse ku̱vinnaṁsa̍nte ma̱ruta̱ḥ puna̍rnaḥ |
yatsa̱svartā̍ jihīḻi̱re yadā̱virava̱ tadena̍ īmahe tu̱rāṇā̍m || 7.058.05
pra sā vā̍ci suṣṭu̱tirma̱ghonā̍mi̱daṁ sū̱ktaṁ ma̱ruto̍ juṣanta |
ā̱rācci̱ddveṣo̍ vṛṣaṇo yuyota yū̱yaṁ pā̍ta sva̱stibhi̱ḥ sadā̍ naḥ || 7.058.06
yaṁ trāya̍dhva i̱dami̍da̱ṁ devā̍so̱ yaṁ ca̱ naya̍tha |
tasmā̍ agne̱ varu̍ṇa̱ mitrārya̍ma̱nmaru̍ta̱ḥ śarma̍ yacchata || 7.059.01
yu̱ṣmāka̍ṁ devā̱ ava̱sāha̍ni pri̱ya ī̍jā̱nasta̍rati̱ dviṣa̍ḥ |
pra sa kṣaya̍ṁ tirate̱ vi ma̱hīriṣo̱ yo vo̱ varā̍ya̱ dāśa̍ti || 7.059.02
na̱hi va̍ścara̱maṁ ca̱na vasi̍ṣṭhaḥ pari̱maṁsa̍te |
a̱smāka̍ma̱dya ma̍rutaḥ su̱te sacā̱ viśve̍ pibata kā̱mina̍ḥ || 7.059.03
na̱hi va̍ ū̱tiḥ pṛta̍nāsu̱ mardha̍ti̱ yasmā̱ arā̍dhvaṁ naraḥ |
a̱bhi va̱ āva̍rtsuma̱tirnavī̍yasī̱ tūya̍ṁ yāta pipīṣavaḥ || 7.059.04
o ṣu ghṛ̍ṣvirādhaso yā̱tanāndhā̍ṁsi pī̱taye̍ |
i̱mā vo̍ ha̱vyā ma̍ruto ra̱re hi ka̱ṁ mo ṣva1̱̍nyatra̍ gantana || 7.059.05
ā ca̍ no ba̱rhiḥ sada̍tāvi̱tā ca̍ naḥ spā̱rhāṇi̱ dāta̍ve̱ vasu̍ |
asre̍dhanto marutaḥ so̱mye madhau̱ svāhe̱ha mā̍dayādhvai || 7.059.06
sa̱svaści̱ddhi ta̱nva1̱̍ḥ śumbha̍mānā̱ ā ha̱ṁsāso̱ nīla̍pṛṣṭhā apaptan |
viśva̱ṁ śardho̍ a̱bhito̍ mā̱ ni ṣe̍da̱ naro̱ na ra̱ṇvāḥ sava̍ne̱ mada̍ntaḥ || 7.059.07
yo no̍ maruto a̱bhi du̍rhṛṇā̱yusti̱raści̱ttāni̍ vasavo̱ jighā̍ṁsati |
dru̱haḥ pāśā̱nprati̱ sa mu̍cīṣṭa̱ tapi̍ṣṭhena̱ hanma̍nā hantanā̱ tam || 7.059.08
sāṁta̍panā i̱daṁ ha̱virmaru̍ta̱stajju̍juṣṭana |
yu̱ṣmāko̱tī ri̍śādasaḥ || 7.059.09
gṛha̍medhāsa̱ ā ga̍ta̱ maru̍to̱ māpa̍ bhūtana |
yu̱ṣmāko̱tī su̍dānavaḥ || 7.059.10
i̱heha̍ vaḥ svatavasa̱ḥ kava̍ya̱ḥ sūrya̍tvacaḥ |
ya̱jñaṁ ma̍ruta̱ ā vṛ̍ṇe || 7.059.11
trya̍mbakaṁ yajāmahe su̱gandhi̍ṁ puṣṭi̱vardha̍nam |
u̱rvā̱ru̱kami̍va̱ bandha̍nānmṛ̱tyormu̍kṣīya̱ māmṛtā̍t || 7.059.12
yada̱dya sū̍rya̱ bravo'nā̍gā u̱dyanmi̱trāya̱ varu̍ṇāya sa̱tyam |
va̱yaṁ de̍va̱trādi̍te syāma̱ tava̍ pri̱yāso̍ aryamangṛ̱ṇanta̍ḥ || 7.060.01
e̱ṣa sya mi̍trāvaruṇā nṛ̱cakṣā̍ u̱bhe ude̍ti̱ sūryo̍ a̱bhi jman |
viśva̍sya sthā̱turjaga̍taśca go̱pā ṛ̱ju marte̍ṣu vṛji̱nā ca̱ paśya̍n || 7.060.02
ayu̍kta sa̱pta ha̱rita̍ḥ sa̱dhasthā̱dyā ī̱ṁ vaha̍nti̱ sūrya̍ṁ ghṛ̱tācī̍ḥ |
dhāmā̍ni mitrāvaruṇā yu̱vāku̱ḥ saṁ yo yū̱theva̱ jani̍māni̱ caṣṭe̍ || 7.060.03
udvā̍ṁ pṛ̱kṣāso̱ madhu̍manto asthu̱rā sūryo̍ aruhacchu̱kramarṇa̍ḥ |
yasmā̍ ādi̱tyā adhva̍no̱ rada̍nti mi̱tro a̍rya̱mā varu̍ṇaḥ sa̱joṣā̍ḥ || 7.060.04
i̱me ce̱tāro̱ anṛ̍tasya̱ bhūre̍rmi̱tro a̍rya̱mā varu̍ṇo̱ hi santi̍ |
i̱ma ṛ̱tasya̍ vāvṛdhurduro̱ṇe śa̱gmāsa̍ḥ pu̱trā adi̍te̱rada̍bdhāḥ || 7.060.05
i̱me mi̱tro varu̍ṇo dū̱ḻabhā̍so'ce̱tasa̍ṁ ciccitayanti̱ dakṣai̍ḥ |
api̱ kratu̍ṁ su̱ceta̍sa̱ṁ vata̍ntasti̱raści̱daṁha̍ḥ su̱pathā̍ nayanti || 7.060.06
i̱me di̱vo ani̍miṣā pṛthi̱vyāści̍ki̱tvāṁso̍ ace̱tasa̍ṁ nayanti |
pra̱vrā̱je ci̍nna̱dyo̍ gā̱dhama̍sti pā̱raṁ no̍ a̱sya vi̍ṣpi̱tasya̍ parṣan || 7.060.07
yadgo̱pāva̱dadi̍ti̱ḥ śarma̍ bha̱draṁ mi̱tro yaccha̍nti̱ varu̍ṇaḥ su̱dāse̍ |
tasmi̱nnā to̱kaṁ tana̍ya̱ṁ dadhā̍nā̱ mā ka̍rma deva̱heḻa̍naṁ turāsaḥ || 7.060.08
ava̱ vedi̱ṁ hotrā̍bhiryajeta̱ ripa̱ḥ kāści̍dvaruṇa̱dhruta̱ḥ saḥ |
pari̱ dveṣo̍bhirarya̱mā vṛ̍ṇaktū̱ruṁ su̱dāse̍ vṛṣaṇā u lo̱kam || 7.060.09
sa̱svaści̱ddhi samṛ̍tistve̱ṣye̍ṣāmapī̱cye̍na̱ saha̍sā̱ saha̍nte |
yu̱ṣmadbhi̱yā vṛ̍ṣaṇo̱ reja̍mānā̱ dakṣa̍sya cinmahi̱nā mṛ̱ḻatā̍ naḥ || 7.060.10
yo brahma̍ṇe suma̱timā̱yajā̍te̱ vāja̍sya sā̱tau pa̍ra̱masya̍ rā̱yaḥ |
sīkṣa̍nta ma̱nyuṁ ma̱ghavā̍no a̱rya u̱ru kṣayā̍ya cakrire su̱dhātu̍ || 7.060.11
i̱yaṁ de̍va pu̱rohi̍tiryu̱vabhyā̍ṁ ya̱jñeṣu̍ mitrāvaruṇāvakāri |
viśvā̍ni du̱rgā pi̍pṛtaṁ ti̱ro no̍ yū̱yaṁ pā̍ta sva̱stibhi̱ḥ sadā̍ naḥ || 7.060.12
udvā̱ṁ cakṣu̍rvaruṇa su̱pratī̍kaṁ de̱vayo̍reti̱ sūrya̍stata̱nvān |
a̱bhi yo viśvā̱ bhuva̍nāni̱ caṣṭe̱ sa ma̱nyuṁ martye̱ṣvā ci̍keta || 7.061.01
pra vā̱ṁ sa mi̍trāvaruṇāvṛ̱tāvā̱ vipro̱ manmā̍ni dīrgha̱śrudi̍yarti |
yasya̱ brahmā̍ṇi sukratū̱ avā̍tha̱ ā yatkratvā̱ na śa̱rada̍ḥ pṛ̱ṇaithe̍ || 7.061.02
prorormi̍trāvaruṇā pṛthi̱vyāḥ pra di̱va ṛ̱ṣvādbṛ̍ha̱taḥ su̍dānū |
spaśo̍ dadhāthe̱ oṣa̍dhīṣu vi̱kṣvṛdha̍gya̱to ani̍miṣa̱ṁ rakṣa̍māṇā || 7.061.03
śaṁsā̍ mi̱trasya̱ varu̍ṇasya̱ dhāma̱ śuṣmo̱ roda̍sī badbadhe mahi̱tvā |
aya̱nmāsā̱ aya̍jvanāma̱vīrā̱ḥ pra ya̱jñama̍nmā vṛ̱jana̍ṁ tirāte || 7.061.04
amū̍rā̱ viśvā̍ vṛṣaṇāvi̱mā vā̱ṁ na yāsu̍ ci̱traṁ dadṛ̍śe̱ na ya̱kṣam |
druha̍ḥ sacante̱ anṛ̍tā̱ janā̍nā̱ṁ na vā̍ṁ ni̱ṇyānya̱cite̍ abhūvan || 7.061.05
samu̍ vāṁ ya̱jñaṁ ma̍haya̱ṁ namo̍bhirhu̱ve vā̍ṁ mitrāvaruṇā sa̱bādha̍ḥ |
pra vā̱ṁ manmā̍nyṛ̱case̱ navā̍ni kṛ̱tāni̱ brahma̍ jujuṣanni̱māni̍ || 7.061.06
i̱yaṁ de̍va pu̱rohi̍tiryu̱vabhyā̍ṁ ya̱jñeṣu̍ mitrāvaruṇāvakāri |
viśvā̍ni du̱rgā pi̍pṛtaṁ ti̱ro no̍ yū̱yaṁ pā̍ta sva̱stibhi̱ḥ sadā̍ naḥ || 7.061.07
utsūryo̍ bṛ̱hada̱rcīṁṣya̍śretpu̱ru viśvā̱ jani̍ma̱ mānu̍ṣāṇām |
sa̱mo di̱vā da̍dṛśe̱ roca̍māna̱ḥ kratvā̍ kṛ̱taḥ sukṛ̍taḥ ka̱rtṛbhi̍rbhūt || 7.062.01
sa sū̍rya̱ prati̍ pu̱ro na̱ udgā̍ e̱bhiḥ stome̍bhireta̱śebhi̱revai̍ḥ |
pra no̍ mi̱trāya̱ varu̍ṇāya vo̱co'nā̍gaso arya̱mṇe a̱gnaye̍ ca || 7.062.02
vi na̍ḥ sa̱hasra̍ṁ śu̱rudho̍ radantvṛ̱tāvā̍no̱ varu̍ṇo mi̱tro a̱gniḥ |
yaccha̍ntu ca̱ndrā u̍pa̱maṁ no̍ a̱rkamā na̱ḥ kāma̍ṁ pūpurantu̱ stavā̍nāḥ || 7.062.03
dyāvā̍bhūmī adite̱ trāsī̍thāṁ no̱ ye vā̍ṁ ja̱jñuḥ su̱jani̍māna ṛṣve |
mā heḻe̍ bhūma̱ varu̍ṇasya vā̱yormā mi̱trasya̍ pri̱yata̍masya nṛ̱ṇām || 7.062.04
pra bā̱havā̍ sisṛtaṁ jī̱vase̍ na̱ ā no̱ gavyū̍timukṣataṁ ghṛ̱tena̍ |
ā no̱ jane̍ śravayataṁ yuvānā śru̱taṁ me̍ mitrāvaruṇā̱ have̱mā || 7.062.05
nū mi̱tro varu̍ṇo arya̱mā na̱stmane̍ to̱kāya̱ vari̍vo dadhantu |
su̱gā no̱ viśvā̍ su̱pathā̍ni santu yū̱yaṁ pā̍ta sva̱stibhi̱ḥ sadā̍ naḥ || 7.062.06
udve̍ti su̱bhago̍ vi̱śvaca̍kṣā̱ḥ sādhā̍raṇa̱ḥ sūryo̱ mānu̍ṣāṇām |
cakṣu̍rmi̱trasya̱ varu̍ṇasya de̱vaścarme̍va̱ yaḥ sa̱mavi̍vya̱ktamā̍ṁsi || 7.063.01
udve̍ti prasavī̱tā janā̍nāṁ ma̱hānke̱tura̍rṇa̱vaḥ sūrya̍sya |
sa̱mā̱naṁ ca̱kraṁ pa̍ryā̱vivṛ̍tsa̱nyade̍ta̱śo vaha̍ti dhū̱rṣu yu̱ktaḥ || 7.063.02
vi̱bhrāja̍māna u̱ṣasā̍mu̱pasthā̍dre̱bhairude̍tyanuma̱dyamā̍naḥ |
e̱ṣa me̍ de̱vaḥ sa̍vi̱tā ca̍cchanda̱ yaḥ sa̍mā̱naṁ na pra̍mi̱nāti̱ dhāma̍ || 7.063.03
di̱vo ru̱kma u̍ru̱cakṣā̱ ude̍ti dū̱rea̍rthasta̱raṇi̱rbhrāja̍mānaḥ |
nū̱naṁ janā̱ḥ sūrye̍ṇa̱ prasū̍tā̱ aya̱nnarthā̍ni kṛ̱ṇava̱nnapā̍ṁsi || 7.063.04
yatrā̍ ca̱krura̱mṛtā̍ gā̱tuma̍smai śye̱no na dīya̱nnanve̍ti̱ pātha̍ḥ |
prati̍ vā̱ṁ sūra̱ udi̍te vidhema̱ namo̍bhirmitrāvaruṇo̱ta ha̱vyaiḥ || 7.063.05
nū mi̱tro varu̍ṇo arya̱mā na̱stmane̍ to̱kāya̱ vari̍vo dadhantu |
su̱gā no̱ viśvā̍ su̱pathā̍ni santu yū̱yaṁ pā̍ta sva̱stibhi̱ḥ sadā̍ naḥ || 7.063.06
di̱vi kṣaya̍ntā̱ raja̍saḥ pṛthi̱vyāṁ pra vā̍ṁ ghṛ̱tasya̍ ni̱rṇijo̍ dadīran |
ha̱vyaṁ no̍ mi̱tro a̍rya̱mā sujā̍to̱ rājā̍ sukṣa̱tro varu̍ṇo juṣanta || 7.064.01
ā rā̍jānā maha ṛtasya gopā̱ sindhu̍patī kṣatriyā yātama̱rvāk |
iḻā̍ṁ no mitrāvaruṇo̱ta vṛ̱ṣṭimava̍ di̱va i̍nvataṁ jīradānū || 7.064.02
mi̱trastanno̱ varu̍ṇo de̱vo a̱ryaḥ pra sādhi̍ṣṭhebhiḥ pa̱thibhi̍rnayantu |
brava̱dyathā̍ na̱ āda̱riḥ su̱dāsa̍ i̱ṣā ma̍dema sa̱ha de̱vago̍pāḥ || 7.064.03
yo vā̱ṁ garta̱ṁ mana̍sā̱ takṣa̍de̱tamū̱rdhvāṁ dhī̱tiṁ kṛ̱ṇava̍ddhā̱raya̍cca |
u̱kṣethā̍ṁ mitrāvaruṇā ghṛ̱tena̱ tā rā̍jānā sukṣi̱tīsta̍rpayethām || 7.064.04
e̱ṣa stomo̍ varuṇa mitra̱ tubhya̱ṁ soma̍ḥ śu̱kro na vā̱yave̍'yāmi |
a̱vi̱ṣṭaṁ dhiyo̍ jigṛ̱taṁ pura̍ṁdhīryū̱yaṁ pā̍ta sva̱stibhi̱ḥ sadā̍ naḥ || 7.064.05
prati̍ vā̱ṁ sūra̱ udi̍te sū̱ktairmi̱traṁ hu̍ve̱ varu̍ṇaṁ pū̱tada̍kṣam |
yayo̍rasu̱rya1̱̍makṣi̍ta̱ṁ jyeṣṭha̱ṁ viśva̍sya̱ yāma̍nnā̱citā̍ jiga̱tnu || 7.065.01
tā hi de̱vānā̱masu̍rā̱ tāva̱ryā tā na̍ḥ kṣi̱tīḥ ka̍ratamū̱rjaya̍ntīḥ |
a̱śyāma̍ mitrāvaruṇā va̱yaṁ vā̱ṁ dyāvā̍ ca̱ yatra̍ pī̱paya̱nnahā̍ ca || 7.065.02
tā bhūri̍pāśā̱vanṛ̍tasya̱ setū̍ dura̱tyetū̍ ri̱pave̱ martyā̍ya |
ṛ̱tasya̍ mitrāvaruṇā pa̱thā vā̍ma̱po na nā̱vā du̍ri̱tā ta̍rema || 7.065.03
ā no̍ mitrāvaruṇā ha̱vyaju̍ṣṭiṁ ghṛ̱tairgavyū̍timukṣata̱miḻā̍bhiḥ |
prati̍ vā̱matra̱ vara̱mā janā̍ya pṛṇī̱tamu̱dno di̱vyasya̱ cāro̍ḥ || 7.065.04
e̱ṣa stomo̍ varuṇa mitra̱ tubhya̱ṁ soma̍ḥ śu̱kro na vā̱yave̍'yāmi |
a̱vi̱ṣṭaṁ dhiyo̍ jigṛ̱taṁ pura̍ṁdhīryū̱yaṁ pā̍ta sva̱stibhi̱ḥ sadā̍ naḥ || 7.065.05
pra mi̱trayo̱rvaru̍ṇayo̱ḥ stomo̍ na etu śū̱ṣya̍ḥ |
nama̍svāntuvijā̱tayo̍ḥ || 7.066.01
yā dhā̱raya̍nta de̱vāḥ su̱dakṣā̱ dakṣa̍pitarā |
a̱su̱ryā̍ya̱ prama̍hasā || 7.066.02
tā na̍ḥ sti̱pā ta̍nū̱pā varu̍ṇa jaritṝ̱ṇām |
mitra̍ sā̱dhaya̍ta̱ṁ dhiya̍ḥ || 7.066.03
yada̱dya sūra̱ udi̱te'nā̍gā mi̱tro a̍rya̱mā |
su̱vāti̍ savi̱tā bhaga̍ḥ || 7.066.04
su̱prā̱vīra̍stu̱ sa kṣaya̱ḥ pra nu yāma̍nsudānavaḥ |
ye no̱ aṁho̍'ti̱pipra̍ti || 7.066.05
u̱ta sva̱rājo̱ adi̍ti̱rada̍bdhasya vra̱tasya̱ ye |
ma̱ho rājā̍na īśate || 7.066.06
prati̍ vā̱ṁ sūra̱ udi̍te mi̱traṁ gṛ̍ṇīṣe̱ varu̍ṇam |
a̱rya̱maṇa̍ṁ ri̱śāda̍sam || 7.066.07
rā̱yā hi̍raṇya̱yā ma̱tiri̱yama̍vṛ̱kāya̱ śava̍se |
i̱yaṁ viprā̍ me̱dhasā̍taye || 7.066.08
te syā̍ma deva varuṇa̱ te mi̍tra sū̱ribhi̍ḥ sa̱ha |
iṣa̱ṁ sva̍śca dhīmahi || 7.066.09
ba̱hava̱ḥ sūra̍cakṣaso'gniji̱hvā ṛ̍tā̱vṛdha̍ḥ |
trīṇi̱ ye ye̱murvi̱dathā̍ni dhī̱tibhi̱rviśvā̍ni̱ pari̍bhūtibhiḥ || 7.066.10
vi ye da̱dhuḥ śa̱rada̱ṁ māsa̱mādaha̍rya̱jñama̱ktuṁ cādṛca̍m |
a̱nā̱pyaṁ varu̍ṇo mi̱tro a̍rya̱mā kṣa̱traṁ rājā̍na āśata || 7.066.11
tadvo̍ a̱dya ma̍nāmahe sū̱ktaiḥ sūra̱ udi̍te |
yadoha̍te̱ varu̍ṇo mi̱tro a̍rya̱mā yū̱yamṛ̱tasya̍ rathyaḥ || 7.066.12
ṛ̱tāvā̍na ṛ̱tajā̍tā ṛtā̱vṛdho̍ gho̱rāso̍ anṛta̱dviṣa̍ḥ |
teṣā̍ṁ vaḥ su̱mne su̍ccha̱rdiṣṭa̍me nara̱ḥ syāma̱ ye ca̍ sū̱raya̍ḥ || 7.066.13
udu̱ tyadda̍rśa̱taṁ vapu̍rdi̱va e̍ti pratihva̱re |
yadī̍mā̱śurvaha̍ti de̱va eta̍śo̱ viśva̍smai̱ cakṣa̍se̱ ara̍m || 7.066.14
śī̱rṣṇaḥśī̍rṣṇo̱ jaga̍tasta̱sthuṣa̱spati̍ṁ sa̱mayā̱ viśva̱mā raja̍ḥ |
sa̱pta svasā̍raḥ suvi̱tāya̱ sūrya̱ṁ vaha̍nti ha̱rito̱ rathe̍ || 7.066.15
taccakṣu̍rde̱vahi̍taṁ śu̱kramu̱ccara̍t |
paśye̍ma śa̱rada̍ḥ śa̱taṁ jīve̍ma śa̱rada̍ḥ śa̱tam || 7.066.16
kāvye̍bhiradā̱bhyā yā̍taṁ varuṇa dyu̱mat |
mi̱traśca̱ soma̍pītaye || 7.066.17
di̱vo dhāma̍bhirvaruṇa mi̱traścā yā̍tama̱druhā̍ |
piba̍ta̱ṁ soma̍mātu̱jī || 7.066.18
ā yā̍taṁ mitrāvaruṇā juṣā̱ṇāvāhu̍tiṁ narā |
pā̱taṁ soma̍mṛtāvṛdhā || 7.066.19
prati̍ vā̱ṁ ratha̍ṁ nṛpatī ja̱radhyai̍ ha̱viṣma̍tā̱ mana̍sā ya̱jñiye̍na |
yo vā̍ṁ dū̱to na dhi̍ṣṇyā̱vajī̍ga̱racchā̍ sū̱nurna pi̱tarā̍ vivakmi || 7.067.01
aśo̍cya̱gniḥ sa̍midhā̱no a̱sme upo̍ adṛśra̱ntama̍saści̱dantā̍ḥ |
ace̍ti ke̱turu̱ṣasa̍ḥ pu̱rastā̍cchri̱ye di̱vo du̍hi̱turjāya̍mānaḥ || 7.067.02
a̱bhi vā̍ṁ nū̱nama̍śvinā̱ suho̍tā̱ stomai̍ḥ siṣakti nāsatyā viva̱kvān |
pū̱rvībhi̍ryātaṁ pa̱thyā̍bhira̱rvāksva̱rvidā̱ vasu̍matā̱ rathe̍na || 7.067.03
a̱vorvā̍ṁ nū̱nama̍śvinā yu̱vāku̍rhu̱ve yadvā̍ṁ su̱te mā̍dhvī vasū̱yuḥ |
ā vā̍ṁ vahantu̱ sthavi̍rāso̱ aśvā̱ḥ pibā̍tho a̱sme suṣu̍tā̱ madhū̍ni || 7.067.04
prācī̍mu devāśvinā̱ dhiya̱ṁ me'mṛ̍dhrāṁ sā̱taye̍ kṛtaṁ vasū̱yum |
viśvā̍ aviṣṭa̱ṁ vāja̱ ā pura̍ṁdhī̱stā na̍ḥ śaktaṁ śacīpatī̱ śacī̍bhiḥ || 7.067.05
a̱vi̱ṣṭaṁ dhī̱ṣva̍śvinā na ā̱su pra̱jāva̱dreto̱ ahra̍yaṁ no astu |
ā vā̍ṁ to̱ke tana̍ye̱ tūtu̍jānāḥ su̱ratnā̍so de̱vavī̍tiṁ gamema || 7.067.06
e̱ṣa sya vā̍ṁ pūrva̱gatve̍va̱ sakhye̍ ni̱dhirhi̱to mā̍dhvī rā̱to a̱sme |
ahe̍ḻatā̱ mana̱sā yā̍tama̱rvāga̱śnantā̍ ha̱vyaṁ mānu̍ṣīṣu vi̱kṣu || 7.067.07
eka̍smi̱nyoge̍ bhuraṇā samā̱ne pari̍ vāṁ sa̱pta sra̱vato̱ ratho̍ gāt |
na vā̍yanti su̱bhvo̍ de̱vayu̍ktā̱ ye vā̍ṁ dhū̱rṣu ta̱raṇa̍yo̱ vaha̍nti || 7.067.08
a̱sa̱ścatā̍ ma̱ghava̍dbhyo̱ hi bhū̱taṁ ye rā̱yā ma̍gha̱deya̍ṁ ju̱nanti̍ |
pra ye bandhu̍ṁ sū̱nṛtā̍bhisti̱rante̱ gavyā̍ pṛ̱ñcanto̱ aśvyā̍ ma̱ghāni̍ || 7.067.09
nū me̱ hava̱mā śṛ̍ṇutaṁ yuvānā yāsi̱ṣṭaṁ va̱rtira̍śvinā̱virā̍vat |
dha̱ttaṁ ratnā̍ni̱ jara̍taṁ ca sū̱rīnyū̱yaṁ pā̍ta sva̱stibhi̱ḥ sadā̍ naḥ || 7.067.10
ā śu̍bhrā yātamaśvinā̱ svaśvā̱ giro̍ dasrā jujuṣā̱ṇā yu̱vāko̍ḥ |
ha̱vyāni̍ ca̱ prati̍bhṛtā vī̱taṁ na̍ḥ || 7.068.01
pra vā̱mandhā̍ṁsi̱ madyā̍nyasthu̱rara̍ṁ gantaṁ ha̱viṣo̍ vī̱taye̍ me |
ti̱ro a̱ryo hava̍nāni śru̱taṁ na̍ḥ || 7.068.02
pra vā̱ṁ ratho̱ mano̍javā iyarti ti̱ro rajā̍ṁsyaśvinā śa̱toti̍ḥ |
a̱smabhya̍ṁ sūryāvasū iyā̱naḥ || 7.068.03
a̱yaṁ ha̱ yadvā̍ṁ deva̱yā u̱ adri̍rū̱rdhvo viva̍kti soma̱sudyu̱vabhyā̍m |
ā va̱lgū vipro̍ vavṛtīta ha̱vyaiḥ || 7.068.04
ci̱traṁ ha̱ yadvā̱ṁ bhoja̍na̱ṁ nvasti̱ nyatra̍ye̱ mahi̍ṣvantaṁ yuyotam |
yo vā̍mo̱māna̱ṁ dadha̍te pri̱yaḥ san || 7.068.05
u̱ta tyadvā̍ṁ jura̱te a̍śvinā bhū̱ccyavā̍nāya pra̱tītya̍ṁ havi̱rde |
adhi̱ yadvarpa̍ i̱taū̍ti dha̱tthaḥ || 7.068.06
u̱ta tyaṁ bhu̱jyuma̍śvinā̱ sakhā̍yo̱ madhye̍ jahurdu̱revā̍saḥ samu̱dre |
nirī̍ṁ parṣa̱darā̍vā̱ yo yu̱vāku̍ḥ || 7.068.07
vṛkā̍ya ci̱jjasa̍mānāya śaktamu̱ta śru̍taṁ śa̱yave̍ hū̱yamā̍nā |
yāva̱ghnyāmapi̍nvatama̱po na sta̱rya̍ṁ ciccha̱ktya̍śvinā̱ śacī̍bhiḥ || 7.068.08
e̱ṣa sya kā̱rurja̍rate sū̱ktairagre̍ budhā̱na u̱ṣasā̍ṁ su̱manmā̍ |
i̱ṣā taṁ va̍rdhada̱ghnyā payo̍bhiryū̱yaṁ pā̍ta sva̱stibhi̱ḥ sadā̍ naḥ || 7.068.09
ā vā̱ṁ ratho̱ roda̍sī badbadhā̱no hi̍ra̱ṇyayo̱ vṛṣa̍bhiryā̱tvaśvai̍ḥ |
ghṛ̱tava̍rtaniḥ pa̱vibhī̍ rucā̱na i̱ṣāṁ vo̱ḻhā nṛ̱pati̍rvā̱jinī̍vān || 7.069.01
sa pa̍prathā̱no a̱bhi pañca̱ bhūmā̍ trivandhu̱ro mana̱sā yā̍tu yu̱ktaḥ |
viśo̱ yena̱ gaccha̍tho deva̱yantī̱ḥ kutrā̍ ci̱dyāma̍maśvinā̱ dadhā̍nā || 7.069.02
svaśvā̍ ya̱śasā yā̍tama̱rvāgdasrā̍ ni̱dhiṁ madhu̍mantaṁ pibāthaḥ |
vi vā̱ṁ ratho̍ va̱dhvā̱3̱̍ yāda̍mā̱no'ntā̍ndi̱vo bā̍dhate varta̱nibhyā̍m || 7.069.03
yu̱voḥ śriya̱ṁ pari̱ yoṣā̍vṛṇīta̱ sūro̍ duhi̱tā pari̍takmyāyām |
yadde̍va̱yanta̱mava̍tha̱ḥ śacī̍bhi̱ḥ pari̍ ghra̱ṁsamo̱manā̍ vā̱ṁ vayo̍ gāt || 7.069.04
yo ha̱ sya vā̍ṁ rathirā̱ vasta̍ u̱srā ratho̍ yujā̱naḥ pa̍ri̱yāti̍ va̱rtiḥ |
tena̍ na̱ḥ śaṁ yoru̱ṣaso̱ vyu̍ṣṭau̱ nya̍śvinā vahataṁ ya̱jñe a̱smin || 7.069.05
narā̍ gau̱reva̍ vi̱dyuta̍ṁ tṛṣā̱ṇāsmāka̍ma̱dya sava̱nopa̍ yātam |
pu̱ru̱trā hi vā̍ṁ ma̱tibhi̱rhava̍nte̱ mā vā̍ma̱nye ni ya̍mandeva̱yanta̍ḥ || 7.069.06
yu̱vaṁ bhu̱jyumava̍viddhaṁ samu̱dra udū̍hathu̱rarṇa̍so̱ asri̍dhānaiḥ |
pa̱ta̱tribhi̍raśra̱maira̍vya̱thibhi̍rda̱ṁsanā̍bhiraśvinā pā̱raya̍ntā || 7.069.07
nū me̱ hava̱mā śṛ̍ṇutaṁ yuvānā yāsi̱ṣṭaṁ va̱rtira̍śvinā̱virā̍vat |
dha̱ttaṁ ratnā̍ni̱ jara̍taṁ ca sū̱rīnyū̱yaṁ pā̍ta sva̱stibhi̱ḥ sadā̍ naḥ || 7.069.08
ā vi̍śvavārāśvinā gataṁ na̱ḥ pra tatsthāna̍mavāci vāṁ pṛthi̱vyām |
aśvo̱ na vā̱jī śu̱napṛ̍ṣṭho asthā̱dā yatse̱dathu̍rdhru̱vase̱ na yoni̍m || 7.070.01
siṣa̍kti̱ sā vā̍ṁ suma̱tiścani̱ṣṭhātā̍pi gha̱rmo manu̍ṣo duro̱ṇe |
yo vā̍ṁ samu̱drānsa̱rita̱ḥ pipa̱rtyeta̍gvā ci̱nna su̱yujā̍ yujā̱naḥ || 7.070.02
yāni̱ sthānā̍nyaśvinā da̱dhāthe̍ di̱vo ya̱hvīṣvoṣa̍dhīṣu vi̱kṣu |
ni parva̍tasya mū̱rdhani̱ sada̱nteṣa̱ṁ janā̍ya dā̱śuṣe̱ vaha̍ntā || 7.070.03
ca̱ni̱ṣṭaṁ de̍vā̱ oṣa̍dhīṣva̱psu yadyo̱gyā a̱śnavai̍the̱ ṛṣī̍ṇām |
pu̱rūṇi̱ ratnā̱ dadha̍tau̱ nya1̱̍sme anu̱ pūrvā̍ṇi cakhyathuryu̱gāni̍ || 7.070.04
śu̱śru̱vāṁsā̍ cidaśvinā pu̱rūṇya̱bhi brahmā̍ṇi cakṣāthe̱ ṛṣī̍ṇām |
prati̱ pra yā̍ta̱ṁ vara̱mā janā̍yā̱sme vā̍mastu suma̱tiścani̍ṣṭhā || 7.070.05
yo vā̍ṁ ya̱jño nā̍satyā ha̱viṣmā̍nkṛ̱tabra̍hmā sama̱ryo̱3̱̍ bhavā̍ti |
upa̱ pra yā̍ta̱ṁ vara̱mā vasi̍ṣṭhami̱mā brahmā̍ṇyṛcyante yu̱vabhyā̍m || 7.070.06
i̱yaṁ ma̍nī̱ṣā i̱yama̍śvinā̱ gīri̱māṁ su̍vṛ̱ktiṁ vṛ̍ṣaṇā juṣethām |
i̱mā brahmā̍ṇi yuva̱yūnya̍gmanyū̱yaṁ pā̍ta sva̱stibhi̱ḥ sadā̍ naḥ || 7.070.07
apa̱ svasu̍ru̱ṣaso̱ nagji̍hīte ri̱ṇakti̍ kṛ̱ṣṇīra̍ru̱ṣāya̱ panthā̍m |
aśvā̍maghā̱ goma̍ghā vāṁ huvema̱ divā̱ nakta̱ṁ śaru̍ma̱smadyu̍yotam || 7.071.01
u̱pāyā̍taṁ dā̱śuṣe̱ martyā̍ya̱ rathe̍na vā̱mama̍śvinā̱ vaha̍ntā |
yu̱yu̱tama̱smadani̍rā̱mamī̍vā̱ṁ divā̱ nakta̍ṁ mādhvī̱ trāsī̍thāṁ naḥ || 7.071.02
ā vā̱ṁ ratha̍mava̱masyā̱ṁ vyu̍ṣṭau sumnā̱yavo̱ vṛṣa̍ṇo vartayantu |
syūma̍gabhastimṛta̱yugbhi̱raśvai̱rāśvi̍nā̱ vasu̍mantaṁ vahethām || 7.071.03
yo vā̱ṁ ratho̍ nṛpatī̱ asti̍ vo̱ḻhā tri̍vandhu̱ro vasu̍mā u̱srayā̍mā |
ā na̍ e̱nā nā̍sa̱tyopa̍ yātama̱bhi yadvā̍ṁ vi̱śvapsnyo̱ jigā̍ti || 7.071.04
yu̱vaṁ cyavā̍naṁ ja̱raso̍'mumukta̱ṁ ni pe̱dava̍ ūhathurā̱śumaśva̍m |
niraṁha̍sa̱stama̍saḥ sparta̱matri̱ṁ ni jā̍hu̱ṣaṁ śi̍thi̱re dhā̍tama̱ntaḥ || 7.071.05
i̱yaṁ ma̍nī̱ṣā i̱yama̍śvinā̱ gīri̱māṁ su̍vṛ̱ktiṁ vṛ̍ṣaṇā juṣethām |
i̱mā brahmā̍ṇi yuva̱yūnya̍gmanyū̱yaṁ pā̍ta sva̱stibhi̱ḥ sadā̍ naḥ || 7.071.06
ā goma̍tā nāsatyā̱ rathe̱nāśvā̍vatā puruśca̱ndreṇa̍ yātam |
a̱bhi vā̱ṁ viśvā̍ ni̱yuta̍ḥ sacante spā̱rhayā̍ śri̱yā ta̱nvā̍ śubhā̱nā || 7.072.01
ā no̍ de̱vebhi̱rupa̍ yātama̱rvāksa̱joṣa̍sā nāsatyā̱ rathe̍na |
yu̱vorhi na̍ḥ sa̱khyā pitryā̍ṇi samā̱no bandhu̍ru̱ta tasya̍ vittam || 7.072.02
udu̱ stomā̍so a̱śvino̍rabudhrañjā̱mi brahmā̍ṇyu̱ṣasa̍śca de̱vīḥ |
ā̱vivā̍sa̱nroda̍sī̱ dhiṣṇye̱me acchā̱ vipro̱ nāsa̍tyā vivakti || 7.072.03
vi cedu̱cchantya̍śvinā u̱ṣāsa̱ḥ pra vā̱ṁ brahmā̍ṇi kā̱ravo̍ bharante |
ū̱rdhvaṁ bhā̱nuṁ sa̍vi̱tā de̱vo a̍średbṛ̱hada̱gnaya̍ḥ sa̱midhā̍ jarante || 7.072.04
ā pa̱ścātā̍nnāsa̱tyā pu̱rastā̱dāśvi̍nā yātamadha̱rāduda̍ktāt |
ā vi̱śvata̱ḥ pāñca̍janyena rā̱yā yū̱yaṁ pā̍ta sva̱stibhi̱ḥ sadā̍ naḥ || 7.072.05
atā̍riṣma̱ tama̍saspā̱rama̱sya prati̱ stoma̍ṁ deva̱yanto̱ dadhā̍nāḥ |
pu̱ru̱daṁsā̍ puru̱tamā̍ purā̱jāma̍rtyā havate a̱śvinā̱ gīḥ || 7.073.01
nyu̍ pri̱yo manu̍ṣaḥ sādi̱ hotā̱ nāsa̍tyā̱ yo yaja̍te̱ vanda̍te ca |
a̱śnī̱taṁ madhvo̍ aśvinā upā̱ka ā vā̍ṁ voce vi̱dathe̍ṣu̱ praya̍svān || 7.073.02
ahe̍ma ya̱jñaṁ pa̱thāmu̍rā̱ṇā i̱māṁ su̍vṛ̱ktiṁ vṛ̍ṣaṇā juṣethām |
śru̱ṣṭī̱veva̱ preṣi̍to vāmabodhi̱ prati̱ stomai̱rjara̍māṇo̱ vasi̍ṣṭhaḥ || 7.073.03
upa̱ tyā vahnī̍ gamato̱ viśa̍ṁ no rakṣo̱haṇā̱ sambhṛ̍tā vī̱ḻupā̍ṇī |
samandhā̍ṁsyagmata matsa̱rāṇi̱ mā no̍ mardhiṣṭa̱mā ga̍taṁ śi̱vena̍ || 7.073.04
ā pa̱ścātā̍nnāsa̱tyā pu̱rastā̱dāśvi̍nā yātamadha̱rāduda̍ktāt |
ā vi̱śvata̱ḥ pāñca̍janyena rā̱yā yū̱yaṁ pā̍ta sva̱stibhi̱ḥ sadā̍ naḥ || 7.073.05
i̱mā u̍ vā̱ṁ divi̍ṣṭaya u̱srā ha̍vante aśvinā |
a̱yaṁ vā̍ma̱hve'va̍se śacīvasū̱ viśa̍ṁviśa̱ṁ hi gaccha̍thaḥ || 7.074.01
yu̱vaṁ ci̱traṁ da̍dathu̱rbhoja̍naṁ narā̱ code̍thāṁ sū̱nṛtā̍vate |
a̱rvāgratha̱ṁ sama̍nasā̱ ni ya̍cchata̱ṁ piba̍taṁ so̱myaṁ madhu̍ || 7.074.02
ā yā̍ta̱mupa̍ bhūṣata̱ṁ madhva̍ḥ pibatamaśvinā |
du̱gdhaṁ payo̍ vṛṣaṇā jenyāvasū̱ mā no̍ mardhiṣṭa̱mā ga̍tam || 7.074.03
aśvā̍so̱ ye vā̱mupa̍ dā̱śuṣo̍ gṛ̱haṁ yu̱vāṁ dīya̍nti̱ bibhra̍taḥ |
ma̱kṣū̱yubhi̍rnarā̱ haye̍bhiraśvi̱nā de̍vā yātamasma̱yū || 7.074.04
adhā̍ ha̱ yanto̍ a̱śvinā̱ pṛkṣa̍ḥ sacanta sū̱raya̍ḥ |
tā ya̍ṁsato ma̱ghava̍dbhyo dhru̱vaṁ yaśa̍ścha̱rdira̱smabhya̱ṁ nāsa̍tyā || 7.074.05
pra ye ya̱yura̍vṛ̱kāso̱ rathā̍ iva nṛpā̱tāro̱ janā̍nām |
u̱ta svena̱ śava̍sā śūśuvu̱rnara̍ u̱ta kṣi̍yanti sukṣi̱tim || 7.074.06
vyu1̱̍ṣā ā̍vo divi̱jā ṛ̱tenā̍viṣkṛṇvā̱nā ma̍hi̱māna̱māgā̍t |
apa̱ druha̱stama̍ āva̱raju̍ṣṭa̱maṅgi̍rastamā pa̱thyā̍ ajīgaḥ || 7.075.01
ma̱he no̍ a̱dya su̍vi̱tāya̍ bo̱dhyuṣo̍ ma̱he saubha̍gāya̱ pra ya̍ndhi |
ci̱traṁ ra̱yiṁ ya̱śasa̍ṁ dhehya̱sme devi̱ marte̍ṣu mānuṣi śrava̱syum || 7.075.02
e̱te tye bhā̱navo̍ darśa̱tāyā̍ści̱trā u̱ṣaso̍ a̱mṛtā̍sa̱ āgu̍ḥ |
ja̱naya̍nto̱ daivyā̍ni vra̱tānyā̍pṛ̱ṇanto̍ a̱ntari̍kṣā̱ vya̍sthuḥ || 7.075.03
e̱ṣā syā yu̍jā̱nā pa̍rā̱kātpañca̍ kṣi̱tīḥ pari̍ sa̱dyo ji̍gāti |
a̱bhi̱paśya̍ntī va̱yunā̱ janā̍nāṁ di̱vo du̍hi̱tā bhuva̍nasya̱ patnī̍ || 7.075.04
vā̱jinī̍vatī̱ sūrya̍sya̱ yoṣā̍ ci̱trāma̍ghā rā̱ya ī̍śe̱ vasū̍nām |
ṛṣi̍ṣṭutā ja̱raya̍ntī ma̱ghonyu̱ṣā u̍cchati̱ vahni̍bhirgṛṇā̱nā || 7.075.05
prati̍ dyutā̱nāma̍ru̱ṣāso̱ aśvā̍ści̱trā a̍dṛśrannu̱ṣasa̱ṁ vaha̍ntaḥ |
yāti̍ śu̱bhrā vi̍śva̱piśā̱ rathe̍na̱ dadhā̍ti̱ ratna̍ṁ vidha̱te janā̍ya || 7.075.06
sa̱tyā sa̱tyebhi̍rmaha̱tī ma̱hadbhi̍rde̱vī de̱vebhi̍ryaja̱tā yaja̍traiḥ |
ru̱jaddṛ̱ḻhāni̱ dada̍du̱sriyā̍ṇā̱ṁ prati̱ gāva̍ u̱ṣasa̍ṁ vāvaśanta || 7.075.07
nū no̱ goma̍dvī̱rava̍ddhehi̱ ratna̱muṣo̱ aśvā̍vatpuru̱bhojo̍ a̱sme |
mā no̍ ba̱rhiḥ pu̍ru̱ṣatā̍ ni̱de ka̍ryū̱yaṁ pā̍ta sva̱stibhi̱ḥ sadā̍ naḥ || 7.075.08
udu̱ jyoti̍ra̱mṛta̍ṁ vi̱śvaja̍nyaṁ vi̱śvāna̍raḥ savi̱tā de̱vo a̍śret |
kratvā̍ de̱vānā̍majaniṣṭa̱ cakṣu̍rā̱vira̍ka̱rbhuva̍na̱ṁ viśva̍mu̱ṣāḥ || 7.076.01
pra me̱ panthā̍ deva̱yānā̍ adṛśra̱nnama̍rdhanto̱ vasu̍bhi̱riṣkṛ̍tāsaḥ |
abhū̍du ke̱turu̱ṣasa̍ḥ pu̱rastā̍tpratī̱cyāgā̱dadhi̍ ha̱rmyebhya̍ḥ || 7.076.02
tānīdahā̍ni bahu̱lānyā̍sa̱nyā prā̱cīna̱mudi̍tā̱ sūrya̍sya |
yata̱ḥ pari̍ jā̱ra i̍vā̱cara̱ntyuṣo̍ dadṛ̱kṣe na puna̍rya̱tīva̍ || 7.076.03
ta idde̱vānā̍ṁ sadha̱māda̍ āsannṛ̱tāvā̍naḥ ka̱vaya̍ḥ pū̱rvyāsa̍ḥ |
gū̱ḻhaṁ jyoti̍ḥ pi̱taro̱ anva̍vindansa̱tyama̍ntrā ajanayannu̱ṣāsa̍m || 7.076.04
sa̱mā̱na ū̱rve adhi̱ saṁga̍tāsa̱ḥ saṁ jā̍nate̱ na ya̍tante mi̱thaste |
te de̱vānā̱ṁ na mi̍nanti vra̱tānyama̍rdhanto̱ vasu̍bhi̱ryāda̍mānāḥ || 7.076.05
prati̍ tvā̱ stomai̍rīḻate̱ vasi̍ṣṭhā uṣa̱rbudha̍ḥ subhage tuṣṭu̱vāṁsa̍ḥ |
gavā̍ṁ ne̱trī vāja̍patnī na u̱cchoṣa̍ḥ sujāte pratha̱mā ja̍rasva || 7.076.06
e̱ṣā ne̱trī rādha̍saḥ sū̱nṛtā̍nāmu̱ṣā u̱cchantī̍ ribhyate̱ vasi̍ṣṭhaiḥ |
dī̱rgha̱śruta̍ṁ ra̱yima̱sme dadhā̍nā yū̱yaṁ pā̍ta sva̱stibhi̱ḥ sadā̍ naḥ || 7.076.07
upo̍ ruruce yuva̱tirna yoṣā̱ viśva̍ṁ jī̱vaṁ pra̍su̱vantī̍ ca̱rāyai̍ |
abhū̍da̱gniḥ sa̱midhe̱ mānu̍ṣāṇā̱maka̱rjyoti̱rbādha̍mānā̱ tamā̍ṁsi || 7.077.01
viśva̍ṁ pratī̱cī sa̱prathā̱ uda̍sthā̱druśa̱dvāso̱ bibhra̍tī śu̱krama̍śvait |
hira̍ṇyavarṇā su̱dṛśī̍kasaṁdṛ̱ggavā̍ṁ mā̱tā ne̱tryahnā̍maroci || 7.077.02
de̱vānā̱ṁ cakṣu̍ḥ su̱bhagā̱ vaha̍ntī śve̱taṁ naya̍ntī su̱dṛśī̍ka̱maśva̍m |
u̱ṣā a̍darśi ra̱śmibhi̱rvya̍ktā ci̱trāma̍ghā̱ viśva̱manu̱ prabhū̍tā || 7.077.03
anti̍vāmā dū̱re a̱mitra̍muccho̱rvīṁ gavyū̍ti̱mabha̍yaṁ kṛdhī naḥ |
yā̱vaya̱ dveṣa̱ ā bha̍rā̱ vasū̍ni co̱daya̱ rādho̍ gṛṇa̱te ma̍ghoni || 7.077.04
a̱sme śreṣṭhe̍bhirbhā̱nubhi̱rvi bhā̱hyuṣo̍ devi prati̱rantī̍ na̱ āyu̍ḥ |
iṣa̍ṁ ca no̱ dadha̍tī viśvavāre̱ goma̱daśvā̍va̱dratha̍vacca̱ rādha̍ḥ || 7.077.05
yāṁ tvā̍ divo duhitarva̱rdhaya̱ntyuṣa̍ḥ sujāte ma̱tibhi̱rvasi̍ṣṭhāḥ |
sāsmāsu̍ dhā ra̱yimṛ̱ṣvaṁ bṛ̱hanta̍ṁ yū̱yaṁ pā̍ta sva̱stibhi̱ḥ sadā̍ naḥ || 7.077.06
prati̍ ke̱tava̍ḥ pratha̱mā a̍dṛśrannū̱rdhvā a̍syā a̱ñjayo̱ vi śra̍yante |
uṣo̍ a̱rvācā̍ bṛha̱tā rathe̍na̱ jyoti̍ṣmatā vā̱mama̱smabhya̍ṁ vakṣi || 7.078.01
prati̍ ṣīma̱gnirja̍rate̱ sami̍ddha̱ḥ prati̱ viprā̍so ma̱tibhi̍rgṛ̱ṇanta̍ḥ |
u̱ṣā yā̍ti̱ jyoti̍ṣā̱ bādha̍mānā̱ viśvā̱ tamā̍ṁsi duri̱tāpa̍ de̱vī || 7.078.02
e̱tā u̱ tyāḥ pratya̍dṛśranpu̱rastā̱jjyoti̱ryaccha̍ntīru̱ṣaso̍ vibhā̱tīḥ |
ajī̍jana̱nsūrya̍ṁ ya̱jñama̱gnima̍pā̱cīna̱ṁ tamo̍ agā̱daju̍ṣṭam || 7.078.03
ace̍ti di̱vo du̍hi̱tā ma̱ghonī̱ viśve̍ paśyantyu̱ṣasa̍ṁ vibhā̱tīm |
āsthā̱dratha̍ṁ sva̱dhayā̍ yu̱jyamā̍na̱mā yamaśvā̍saḥ su̱yujo̱ vaha̍nti || 7.078.04
prati̍ tvā̱dya su̱mana̍so budhantā̱smākā̍so ma̱ghavā̍no va̱yaṁ ca̍ |
ti̱lvi̱lā̱yadhva̍muṣaso vibhā̱tīryū̱yaṁ pā̍ta sva̱stibhi̱ḥ sadā̍ naḥ || 7.078.05
vyu1̱̍ṣā ā̍vaḥ pa̱thyā̱3̱̍ janā̍nā̱ṁ pañca̍ kṣi̱tīrmānu̍ṣīrbo̱dhaya̍ntī |
su̱sa̱ṁdṛgbhi̍ru̱kṣabhi̍rbhā̱numa̍śre̱dvi sūryo̱ roda̍sī̱ cakṣa̍sāvaḥ || 7.079.01
vya̍ñjate di̱vo ante̍ṣva̱ktūnviśo̱ na yu̱ktā u̱ṣaso̍ yatante |
saṁ te̱ gāva̱stama̱ ā va̍rtayanti̱ jyoti̍ryacchanti savi̱teva̍ bā̱hū || 7.079.02
abhū̍du̱ṣā indra̍tamā ma̱ghonyajī̍janatsuvi̱tāya̱ śravā̍ṁsi |
vi di̱vo de̱vī du̍hi̱tā da̍dhā̱tyaṅgi̍rastamā su̱kṛte̱ vasū̍ni || 7.079.03
tāva̍duṣo̱ rādho̍ a̱smabhya̍ṁ rāsva̱ yāva̍tsto̱tṛbhyo̱ ara̍do gṛṇā̱nā |
yāṁ tvā̍ ja̱jñurvṛ̍ṣa̱bhasyā̱ rave̍ṇa̱ vi dṛ̱ḻhasya̱ duro̱ adre̍raurṇoḥ || 7.079.04
de̱vaṁde̍va̱ṁ rādha̍se co̱daya̍ntyasma̱drya̍ksū̱nṛtā̍ ī̱raya̍ntī |
vyu̱cchantī̍ naḥ sa̱naye̱ dhiyo̍ dhā yū̱yaṁ pā̍ta sva̱stibhi̱ḥ sadā̍ naḥ || 7.079.05
prati̱ stome̍bhiru̱ṣasa̱ṁ vasi̍ṣṭhā gī̱rbhirviprā̍saḥ pratha̱mā a̍budhran |
vi̱va̱rtaya̍ntī̱ṁ raja̍sī̱ sama̍nte āviṣkṛṇva̱tīṁ bhuva̍nāni̱ viśvā̍ || 7.080.01
e̱ṣā syā navya̱māyu̱rdadhā̍nā gū̱ḍhvī tamo̱ jyoti̍ṣo̱ṣā a̍bodhi |
agra̍ eti yuva̱tirahra̍yāṇā̱ prāci̍kita̱tsūrya̍ṁ ya̱jñama̱gnim || 7.080.02
aśvā̍vatī̱rgoma̍tīrna u̱ṣāso̍ vī̱rava̍tī̱ḥ sada̍mucchantu bha̱drāḥ |
ghṛ̱taṁ duhā̍nā vi̱śvata̱ḥ prapī̍tā yū̱yaṁ pā̍ta sva̱stibhi̱ḥ sadā̍ naḥ || 7.080.03
pratyu̍ adarśyāya̱tyu1̱̍cchantī̍ duhi̱tā di̱vaḥ |
apo̱ mahi̍ vyayati̱ cakṣa̍se̱ tamo̱ jyoti̍ṣkṛṇoti sū̱narī̍ || 7.081.01
udu̱sriyā̍ḥ sṛjate̱ sūrya̱ḥ sacā̍ u̱dyannakṣa̍tramarci̱vat |
tavedu̍ṣo̱ vyuṣi̱ sūrya̍sya ca̱ saṁ bha̱ktena̍ gamemahi || 7.081.02
prati̍ tvā duhitardiva̱ uṣo̍ jī̱rā a̍bhutsmahi |
yā vaha̍si pu̱ru spā̱rhaṁ va̍nanvati̱ ratna̱ṁ na dā̱śuṣe̱ maya̍ḥ || 7.081.03
u̱cchantī̱ yā kṛ̱ṇoṣi̍ ma̱ṁhanā̍ mahi pra̱khyai de̍vi̱ sva̍rdṛ̱śe |
tasyā̍ste ratna̱bhāja̍ īmahe va̱yaṁ syāma̍ mā̱turna sū̱nava̍ḥ || 7.081.04
tacci̱traṁ rādha̱ ā bha̱roṣo̱ yaddī̍rgha̱śrutta̍mam |
yatte̍ divo duhitarmarta̱bhoja̍na̱ṁ tadrā̍sva bhu̱najā̍mahai || 7.081.05
śrava̍ḥ sū̱ribhyo̍ a̱mṛta̍ṁ vasutva̱naṁ vājā̍ a̱smabhya̱ṁ goma̍taḥ |
co̱da̱yi̱trī ma̱ghona̍ḥ sū̱nṛtā̍vatyu̱ṣā u̍ccha̱dapa̱ sridha̍ḥ || 7.081.06
indrā̍varuṇā yu̱vama̍dhva̱rāya̍ no vi̱śe janā̍ya̱ mahi̱ śarma̍ yacchatam |
dī̱rghapra̍yajyu̱mati̱ yo va̍nu̱ṣyati̍ va̱yaṁ ja̍yema̱ pṛta̍nāsu dū̱ḍhya̍ḥ || 7.082.01
sa̱mrāḻa̱nyaḥ sva̱rāḻa̱nya u̍cyate vāṁ ma̱hāntā̱vindrā̱varu̍ṇā ma̱hāva̍sū |
viśve̍ de̱vāsa̍ḥ para̱me vyo̍mani̱ saṁ vā̱mojo̍ vṛṣaṇā̱ saṁ bala̍ṁ dadhuḥ || 7.082.02
anva̱pāṁ khānya̍tṛnta̱moja̱sā sūrya̍mairayataṁ di̱vi pra̱bhum |
indrā̍varuṇā̱ made̍ asya mā̱yino'pi̍nvatama̱pita̱ḥ pinva̍ta̱ṁ dhiya̍ḥ || 7.082.03
yu̱vāmidyu̱tsu pṛta̍nāsu̱ vahna̍yo yu̱vāṁ kṣema̍sya prasa̱ve mi̱tajña̍vaḥ |
ī̱śā̱nā vasva̍ u̱bhaya̍sya kā̱rava̱ indrā̍varuṇā su̱havā̍ havāmahe || 7.082.04
indrā̍varuṇā̱ yadi̱māni̍ ca̱krathu̱rviśvā̍ jā̱tāni̱ bhuva̍nasya ma̱jmanā̍ |
kṣeme̍ṇa mi̱tro varu̍ṇaṁ duva̱syati̍ ma̱rudbhi̍ru̱graḥ śubha̍ma̱nya ī̍yate || 7.082.05
ma̱he śu̱lkāya̱ varu̍ṇasya̱ nu tvi̱ṣa ojo̍ mimāte dhru̱vama̍sya̱ yatsvam |
ajā̍mima̱nyaḥ śna̱thaya̍nta̱māti̍radda̱bhrebhi̍ra̱nyaḥ pra vṛ̍ṇoti̱ bhūya̍saḥ || 7.082.06
na tamaṁho̱ na du̍ri̱tāni̱ martya̱mindrā̍varuṇā̱ na tapa̱ḥ kuta̍śca̱na |
yasya̍ devā̱ gaccha̍tho vī̱tho a̍dhva̱raṁ na taṁ marta̍sya naśate̱ pari̍hvṛtiḥ || 7.082.07
a̱rvāṅna̍rā̱ daivye̱nāva̱sā ga̍taṁ śṛṇu̱taṁ hava̱ṁ yadi̍ me̱ jujo̍ṣathaḥ |
yu̱vorhi sa̱khyamu̱ta vā̱ yadāpya̍ṁ mārḍī̱kami̍ndrāvaruṇā̱ ni ya̍cchatam || 7.082.08
a̱smāka̍mindrāvaruṇā̱ bhare̍bhare puroyo̱dhā bha̍vataṁ kṛṣṭyojasā |
yadvā̱ṁ hava̍nta u̱bhaye̱ adha̍ spṛ̱dhi nara̍sto̱kasya̱ tana̍yasya sā̱tiṣu̍ || 7.082.09
a̱sme indro̱ varu̍ṇo mi̱tro a̍rya̱mā dyu̱mnaṁ ya̍cchantu̱ mahi̱ śarma̍ sa̱pratha̍ḥ |
a̱va̱dhraṁ jyoti̱radi̍terṛtā̱vṛdho̍ de̱vasya̱ śloka̍ṁ savi̱turma̍nāmahe || 7.082.10
yu̱vāṁ na̍rā̱ paśya̍mānāsa̱ āpya̍ṁ prā̱cā ga̱vyanta̍ḥ pṛthu̱parśa̍vo yayuḥ |
dāsā̍ ca vṛ̱trā ha̱tamāryā̍ṇi ca su̱dāsa̍mindrāvaru̱ṇāva̍sāvatam || 7.083.01
yatrā̱ nara̍ḥ sa̱maya̍nte kṛ̱tadhva̍jo̱ yasmi̍nnā̱jā bhava̍ti̱ kiṁ ca̱na pri̱yam |
yatrā̱ bhaya̍nte̱ bhuva̍nā sva̱rdṛśa̱statrā̍ na indrāvaru̱ṇādhi̍ vocatam || 7.083.02
saṁ bhūmyā̱ antā̍ dhvasi̱rā a̍dṛkṣa̱tendrā̍varuṇā di̱vi ghoṣa̱ āru̍hat |
asthu̱rjanā̍nā̱mupa̱ māmarā̍tayo̱'rvāgava̍sā havanaśru̱tā ga̍tam || 7.083.03
indrā̍varuṇā va̱dhanā̍bhirapra̱ti bhe̱daṁ va̱nvantā̱ pra su̱dāsa̍māvatam |
brahmā̍ṇyeṣāṁ śṛṇuta̱ṁ havī̍mani sa̱tyā tṛtsū̍nāmabhavatpu̱rohi̍tiḥ || 7.083.04
indrā̍varuṇāva̱bhyā ta̍panti mā̱ghānya̱ryo va̱nuṣā̱marā̍tayaḥ |
yu̱vaṁ hi vasva̍ u̱bhaya̍sya̱ rāja̱tho'dha̍ smā no'vata̱ṁ pārye̍ di̱vi || 7.083.05
yu̱vāṁ ha̍vanta u̱bhayā̍sa ā̱jiṣvindra̍ṁ ca̱ vasvo̱ varu̍ṇaṁ ca sā̱taye̍ |
yatra̱ rāja̍bhirda̱śabhi̱rnibā̍dhita̱ṁ pra su̱dāsa̱māva̍ta̱ṁ tṛtsu̍bhiḥ sa̱ha || 7.083.06
daśa̱ rājā̍na̱ḥ sami̍tā̱ aya̍jyavaḥ su̱dāsa̍mindrāvaruṇā̱ na yu̍yudhuḥ |
sa̱tyā nṛ̱ṇāma̍dma̱sadā̱mupa̍stutirde̱vā e̍ṣāmabhavande̱vahū̍tiṣu || 7.083.07
dā̱śa̱rā̱jñe pari̍yattāya vi̱śvata̍ḥ su̱dāsa̍ indrāvaruṇāvaśikṣatam |
śvi̱tyañco̱ yatra̱ nama̍sā kapa̱rdino̍ dhi̱yā dhīva̍nto̱ asa̍panta̱ tṛtsa̍vaḥ || 7.083.08
vṛ̱trāṇya̱nyaḥ sa̍mi̱theṣu̱ jighna̍te vra̱tānya̱nyo a̱bhi ra̍kṣate̱ sadā̍ |
havā̍mahe vāṁ vṛṣaṇā suvṛ̱ktibhi̍ra̱sme i̍ndrāvaruṇā̱ śarma̍ yacchatam || 7.083.09
a̱sme indro̱ varu̍ṇo mi̱tro a̍rya̱mā dyu̱mnaṁ ya̍cchantu̱ mahi̱ śarma̍ sa̱pratha̍ḥ |
a̱va̱dhraṁ jyoti̱radi̍terṛtā̱vṛdho̍ de̱vasya̱ śloka̍ṁ savi̱turma̍nāmahe || 7.083.10
ā vā̍ṁ rājānāvadhva̱re va̍vṛtyāṁ ha̱vyebhi̍rindrāvaruṇā̱ namo̍bhiḥ |
pra vā̍ṁ ghṛ̱tācī̍ bā̱hvordadhā̍nā̱ pari̱ tmanā̱ viṣu̍rūpā jigāti || 7.084.01
yu̱vo rā̱ṣṭraṁ bṛ̱hadi̍nvati̱ dyauryau se̱tṛbhi̍rara̱jjubhi̍ḥ sinī̱thaḥ |
pari̍ no̱ heḻo̱ varu̍ṇasya vṛjyā u̱ruṁ na̱ indra̍ḥ kṛṇavadu lo̱kam || 7.084.02
kṛ̱taṁ no̍ ya̱jñaṁ vi̱dathe̍ṣu̱ cāru̍ṁ kṛ̱taṁ brahmā̍ṇi sū̱riṣu̍ praśa̱stā |
upo̍ ra̱yirde̱vajū̍to na etu̱ pra ṇa̍ḥ spā̱rhābhi̍rū̱tibhi̍stiretam || 7.084.03
a̱sme i̍ndrāvaruṇā vi̱śvavā̍raṁ ra̱yiṁ dha̍tta̱ṁ vasu̍mantaṁ puru̱kṣum |
pra ya ā̍di̱tyo anṛ̍tā mi̱nātyami̍tā̱ śūro̍ dayate̱ vasū̍ni || 7.084.04
i̱yamindra̱ṁ varu̍ṇamaṣṭa me̱ gīḥ prāva̍tto̱ke tana̍ye̱ tūtu̍jānā |
su̱ratnā̍so de̱vavī̍tiṁ gamema yū̱yaṁ pā̍ta sva̱stibhi̱ḥ sadā̍ naḥ || 7.084.05
pu̱nī̱ṣe vā̍mara̱kṣasa̍ṁ manī̱ṣāṁ soma̱mindrā̍ya̱ varu̍ṇāya̱ juhva̍t |
ghṛ̱tapra̍tīkāmu̱ṣasa̱ṁ na de̱vīṁ tā no̱ yāma̍nnuruṣyatāma̱bhīke̍ || 7.085.01
spardha̍nte̱ vā u̍ deva̱hūye̱ atra̱ yeṣu̍ dhva̱jeṣu̍ di̱dyava̱ḥ pata̍nti |
yu̱vaṁ tā i̍ndrāvaruṇāva̱mitrā̍nha̱taṁ parā̍ca̱ḥ śarvā̱ viṣū̍caḥ || 7.085.02
āpa̍ści̱ddhi svaya̍śasa̱ḥ sada̍ssu de̱vīrindra̱ṁ varu̍ṇaṁ de̱vatā̱ dhuḥ |
kṛ̱ṣṭīra̱nyo dhā̱raya̍ti̱ pravi̍ktā vṛ̱trāṇya̱nyo a̍pra̱tīni̍ hanti || 7.085.03
sa su̱kratu̍rṛta̱cida̍stu̱ hotā̱ ya ā̍ditya̱ śava̍sā vā̱ṁ nama̍svān |
ā̱va̱varta̱dava̍se vāṁ ha̱viṣmā̱nasa̱ditsa su̍vi̱tāya̱ praya̍svān || 7.085.04
i̱yamindra̱ṁ varu̍ṇamaṣṭa me̱ gīḥ prāva̍tto̱ke tana̍ye̱ tūtu̍jānā |
su̱ratnā̍so de̱vavī̍tiṁ gamema yū̱yaṁ pā̍ta sva̱stibhi̱ḥ sadā̍ naḥ || 7.085.05
dhīrā̱ tva̍sya mahi̱nā ja̱nūṁṣi̱ vi yasta̱stambha̱ roda̍sī cidu̱rvī |
pra nāka̍mṛ̱ṣvaṁ nu̍nude bṛ̱hanta̍ṁ dvi̱tā nakṣa̍traṁ pa̱pratha̍cca̱ bhūma̍ || 7.086.01
u̱ta svayā̍ ta̱nvā̱3̱̍ saṁ va̍de̱ tatka̱dā nva1̱̍ntarvaru̍ṇe bhuvāni |
kiṁ me̍ ha̱vyamahṛ̍ṇāno juṣeta ka̱dā mṛ̍ḻī̱kaṁ su̱manā̍ a̱bhi khya̍m || 7.086.02
pṛ̱cche tadeno̍ varuṇa di̱dṛkṣūpo̍ emi ciki̱tuṣo̍ vi̱pṛccha̍m |
sa̱mā̱naminme̍ ka̱vaya̍ścidāhura̱yaṁ ha̱ tubhya̱ṁ varu̍ṇo hṛṇīte || 7.086.03
kimāga̍ āsa varuṇa̱ jyeṣṭha̱ṁ yatsto̱tāra̱ṁ jighā̍ṁsasi̱ sakhā̍yam |
pra tanme̍ voco dūḻabha svadhā̱vo'va̍ tvāne̱nā nama̍sā tu̱ra i̍yām || 7.086.04
ava̍ dru̱gdhāni̱ pitryā̍ sṛjā̱ no'va̱ yā va̱yaṁ ca̍kṛ̱mā ta̱nūbhi̍ḥ |
ava̍ rājanpaśu̱tṛpa̱ṁ na tā̱yuṁ sṛ̱jā va̱tsaṁ na dāmno̱ vasi̍ṣṭham || 7.086.05
na sa svo dakṣo̍ varuṇa̱ dhruti̱ḥ sā surā̍ ma̱nyurvi̱bhīda̍ko̱ aci̍ttiḥ |
asti̱ jyāyā̱nkanī̍yasa upā̱re svapna̍śca̱nedanṛ̍tasya prayo̱tā || 7.086.06
ara̍ṁ dā̱so na mī̱ḻhuṣe̍ karāṇya̱haṁ de̱vāya̱ bhūrṇa̱ye'nā̍gāḥ |
ace̍tayada̱cito̍ de̱vo a̱ryo gṛtsa̍ṁ rā̱ye ka̱vita̍ro junāti || 7.086.07
a̱yaṁ su tubhya̍ṁ varuṇa svadhāvo hṛ̱di stoma̱ upa̍śritaścidastu |
śaṁ na̱ḥ kṣeme̱ śamu̱ yoge̍ no astu yū̱yaṁ pā̍ta sva̱stibhi̱ḥ sadā̍ naḥ || 7.086.08
rada̍tpa̱tho varu̍ṇa̱ḥ sūryā̍ya̱ prārṇā̍ṁsi samu̱driyā̍ na̱dīnā̍m |
sargo̱ na sṛ̱ṣṭo arva̍tīrṛtā̱yañca̱kāra̍ ma̱hīra̱vanī̱raha̍bhyaḥ || 7.087.01
ā̱tmā te̱ vāto̱ raja̱ ā na̍vīnotpa̱śurna bhūrṇi̱ryava̍se sasa̱vān |
a̱ntarma̱hī bṛ̍ha̱tī roda̍sī̱me viśvā̍ te̱ dhāma̍ varuṇa pri̱yāṇi̍ || 7.087.02
pari̱ spaśo̱ varu̍ṇasya̱ smadi̍ṣṭā u̱bhe pa̍śyanti̱ roda̍sī su̱meke̍ |
ṛ̱tāvā̍naḥ ka̱vayo̍ ya̱jñadhī̍rā̱ḥ prace̍taso̱ ya i̱ṣaya̍nta̱ manma̍ || 7.087.03
u̱vāca̍ me̱ varu̍ṇo̱ medhi̍rāya̱ triḥ sa̱pta nāmāghnyā̍ bibharti |
vi̱dvānpa̱dasya̱ guhyā̱ na vo̍cadyu̱gāya̱ vipra̱ upa̍rāya̱ śikṣa̍n || 7.087.04
ti̱sro dyāvo̱ nihi̍tā a̱ntara̍sminti̱sro bhūmī̱rupa̍rā̱ḥ ṣaḍvi̍dhānāḥ |
gṛtso̱ rājā̱ varu̍ṇaścakra e̱taṁ di̱vi pre̱ṅkhaṁ hi̍ra̱ṇyaya̍ṁ śu̱bhe kam || 7.087.05
ava̱ sindhu̱ṁ varu̍ṇo̱ dyauri̍va sthāddra̱pso na śve̱to mṛ̱gastuvi̍ṣmān |
ga̱mbhī̱raśa̍ṁso̱ raja̍so vi̱māna̍ḥ supā̱rakṣa̍traḥ sa̱to a̱sya rājā̍ || 7.087.06
yo mṛ̱ḻayā̍ti ca̱kruṣe̍ ci̱dāgo̍ va̱yaṁ syā̍ma̱ varu̍ṇe̱ anā̍gāḥ |
anu̍ vra̱tānyadi̍terṛ̱dhanto̍ yū̱yaṁ pā̍ta sva̱stibhi̱ḥ sadā̍ naḥ || 7.087.07
pra śu̱ndhyuva̱ṁ varu̍ṇāya̱ preṣṭhā̍ṁ ma̱tiṁ va̍siṣṭha mī̱ḻhuṣe̍ bharasva |
ya ī̍ma̱rvāñca̱ṁ kara̍te̱ yaja̍traṁ sa̱hasrā̍magha̱ṁ vṛṣa̍ṇaṁ bṛ̱hanta̍m || 7.088.01
adhā̱ nva̍sya sa̱ṁdṛśa̍ṁ jaga̱nvāna̱gneranī̍ka̱ṁ varu̍ṇasya maṁsi |
sva1̱̍ryadaśma̍nnadhi̱pā u̱ andho̱'bhi mā̱ vapu̍rdṛ̱śaye̍ ninīyāt || 7.088.02
ā yadru̱hāva̱ varu̍ṇaśca̱ nāva̱ṁ pra yatsa̍mu̱dramī̱rayā̍va̱ madhya̍m |
adhi̱ yada̱pāṁ snubhi̱ścarā̍va̱ pra pre̱ṅkha ī̍ṅkhayāvahai śu̱bhe kam || 7.088.03
vasi̍ṣṭhaṁ ha̱ varu̍ṇo nā̱vyādhā̱dṛṣi̍ṁ cakāra̱ svapā̱ maho̍bhiḥ |
sto̱tāra̱ṁ vipra̍ḥ sudina̱tve ahnā̱ṁ yānnu dyāva̍sta̱tana̱nyādu̱ṣāsa̍ḥ || 7.088.04
kva1̱̍ tyāni̍ nau sa̱khyā ba̍bhūvu̱ḥ sacā̍vahe̱ yada̍vṛ̱kaṁ pu̱rā ci̍t |
bṛ̱hanta̱ṁ māna̍ṁ varuṇa svadhāvaḥ sa̱hasra̍dvāraṁ jagamā gṛ̱haṁ te̍ || 7.088.05
ya ā̱pirnityo̍ varuṇa pri̱yaḥ santvāmāgā̍ṁsi kṛ̱ṇava̱tsakhā̍ te |
mā ta̱ ena̍svanto yakṣinbhujema ya̱ndhi ṣmā̱ vipra̍ḥ stuva̱te varū̍tham || 7.088.06
dhru̱vāsu̍ tvā̱su kṣi̱tiṣu̍ kṣi̱yanto̱ vya1̱̍smatpāśa̱ṁ varu̍ṇo mumocat |
avo̍ vanvā̱nā adi̍teru̱pasthā̍dyū̱yaṁ pā̍ta sva̱stibhi̱ḥ sadā̍ naḥ || 7.088.07
mo ṣu va̍ruṇa mṛ̱nmaya̍ṁ gṛ̱haṁ rā̍janna̱haṁ ga̍mam |
mṛ̱ḻā su̍kṣatra mṛ̱ḻaya̍ || 7.089.01
yademi̍ prasphu̱ranni̍va̱ dṛti̱rna dhmā̱to a̍drivaḥ |
mṛ̱ḻā su̍kṣatra mṛ̱ḻaya̍ || 7.089.02
kratva̍ḥ samaha dī̱natā̍ pratī̱paṁ ja̍gamā śuce |
mṛ̱ḻā su̍kṣatra mṛ̱ḻaya̍ || 7.089.03
a̱pāṁ madhye̍ tasthi̱vāṁsa̱ṁ tṛṣṇā̍vidajjari̱tāra̍m |
mṛ̱ḻā su̍kṣatra mṛ̱ḻaya̍ || 7.089.04
yatkiṁ ce̱daṁ va̍ruṇa̱ daivye̱ jane̍'bhidro̱haṁ ma̍nu̱ṣyā̱3̱̍ścarā̍masi |
aci̍ttī̱ yattava̱ dharmā̍ yuyopi̱ma mā na̱stasmā̱dena̍so deva rīriṣaḥ || 7.089.05
pra vī̍ra̱yā śuca̍yo dadrire vāmadhva̱ryubhi̱rmadhu̍mantaḥ su̱tāsa̍ḥ |
vaha̍ vāyo ni̱yuto̍ yā̱hyacchā̱ pibā̍ su̱tasyāndha̍so̱ madā̍ya || 7.090.01
ī̱śā̱nāya̱ prahu̍ti̱ṁ yasta̱ āna̱ṭ chuci̱ṁ soma̍ṁ śucipā̱stubhya̍ṁ vāyo |
kṛ̱ṇoṣi̱ taṁ martye̍ṣu praśa̱staṁ jā̱tojā̍to jāyate vā̱jya̍sya || 7.090.02
rā̱ye nu yaṁ ja̱jñatū̱ roda̍sī̱me rā̱ye de̱vī dhi̱ṣaṇā̍ dhāti de̱vam |
adha̍ vā̱yuṁ ni̱yuta̍ḥ saścata̱ svā u̱ta śve̱taṁ vasu̍dhitiṁ nire̱ke || 7.090.03
u̱cchannu̱ṣasa̍ḥ su̱dinā̍ ari̱prā u̱ru jyoti̍rvividu̱rdīdhyā̍nāḥ |
gavya̍ṁ cidū̱rvamu̱śijo̱ vi va̍vru̱steṣā̱manu̍ pra̱diva̍ḥ sasru̱rāpa̍ḥ || 7.090.04
te sa̱tyena̱ mana̍sā̱ dīdhyā̍nā̱ḥ svena̍ yu̱ktāsa̱ḥ kratu̍nā vahanti |
indra̍vāyū vīra̱vāha̱ṁ ratha̍ṁ vāmīśā̱nayo̍ra̱bhi pṛkṣa̍ḥ sacante || 7.090.05
ī̱śā̱nāso̱ ye dadha̍te̱ sva̍rṇo̱ gobhi̱raśve̍bhi̱rvasu̍bhi̱rhira̍ṇyaiḥ |
indra̍vāyū sū̱rayo̱ viśva̱māyu̱rarva̍dbhirvī̱raiḥ pṛta̍nāsu sahyuḥ || 7.090.06
arva̍nto̱ na śrava̍so̱ bhikṣa̍māṇā indravā̱yū su̍ṣṭu̱tibhi̱rvasi̍ṣṭhāḥ |
vā̱ja̱yanta̱ḥ svava̍se huvema yū̱yaṁ pā̍ta sva̱stibhi̱ḥ sadā̍ naḥ || 7.090.07
ku̱vida̱ṅga nama̍sā̱ ye vṛ̱dhāsa̍ḥ pu̱rā de̱vā a̍nava̱dyāsa̱ āsa̍n |
te vā̱yave̱ mana̍ve bādhi̱tāyāvā̍sayannu̱ṣasa̱ṁ sūrye̍ṇa || 7.091.01
u̱śantā̍ dū̱tā na dabhā̍ya go̱pā mā̱saśca̍ pā̱thaḥ śa̱rada̍śca pū̱rvīḥ |
indra̍vāyū suṣṭu̱tirvā̍miyā̱nā mā̍rḍī̱kamī̍ṭṭe suvi̱taṁ ca̱ navya̍m || 7.091.02
pīvo̍annā rayi̱vṛdha̍ḥ sume̱dhāḥ śve̱taḥ si̍ṣakti ni̱yutā̍mabhi̱śrīḥ |
te vā̱yave̱ sama̍naso̱ vi ta̍sthu̱rviśvennara̍ḥ svapa̱tyāni̍ cakruḥ || 7.091.03
yāva̱ttara̍sta̱nvo̱3̱̍ yāva̱dojo̱ yāva̱nnara̱ścakṣa̍sā̱ dīdhyā̍nāḥ |
śuci̱ṁ soma̍ṁ śucipā pātama̱sme indra̍vāyū̱ sada̍taṁ ba̱rhiredam || 7.091.04
ni̱yu̱vā̱nā ni̱yuta̍ḥ spā̱rhavī̍rā̱ indra̍vāyū sa̱ratha̍ṁ yātama̱rvāk |
i̱daṁ hi vā̱ṁ prabhṛ̍ta̱ṁ madhvo̱ agra̱madha̍ prīṇā̱nā vi mu̍muktama̱sme || 7.091.05
yā vā̍ṁ śa̱taṁ ni̱yuto̱ yāḥ sa̱hasra̱mindra̍vāyū vi̱śvavā̍rā̱ḥ saca̍nte |
ābhi̍ryātaṁ suvi̱datrā̍bhira̱rvākpā̱taṁ na̍rā̱ prati̍bhṛtasya̱ madhva̍ḥ || 7.091.06
arva̍nto̱ na śrava̍so̱ bhikṣa̍māṇā indravā̱yū su̍ṣṭu̱tibhi̱rvasi̍ṣṭhāḥ |
vā̱ja̱yanta̱ḥ svava̍se huvema yū̱yaṁ pā̍ta sva̱stibhi̱ḥ sadā̍ naḥ || 7.091.07
ā vā̍yo bhūṣa śucipā̱ upa̍ naḥ sa̱hasra̍ṁ te ni̱yuto̍ viśvavāra |
upo̍ te̱ andho̱ madya̍mayāmi̱ yasya̍ deva dadhi̱ṣe pū̍rva̱peya̍m || 7.092.01
pra sotā̍ jī̱ro a̍dhva̱reṣva̍sthā̱tsoma̱mindrā̍ya vā̱yave̱ piba̍dhyai |
pra yadvā̱ṁ madhvo̍ agri̱yaṁ bhara̍ntyadhva̱ryavo̍ deva̱yanta̱ḥ śacī̍bhiḥ || 7.092.02
pra yābhi̱ryāsi̍ dā̱śvāṁsa̱macchā̍ ni̱yudbhi̍rvāyavi̱ṣṭaye̍ duro̱ṇe |
ni no̍ ra̱yiṁ su̱bhoja̍saṁ yuvasva̱ ni vī̱raṁ gavya̱maśvya̍ṁ ca̱ rādha̍ḥ || 7.092.03
ye vā̱yava̍ indra̱māda̍nāsa̱ āde̍vāso ni̱tośa̍nāso a̱ryaḥ |
ghnanto̍ vṛ̱trāṇi̍ sū̱ribhi̍ḥ ṣyāma sāsa̱hvāṁso̍ yu̱dhā nṛbhi̍ra̱mitrā̍n || 7.092.04
ā no̍ ni̱yudbhi̍ḥ śa̱tinī̍bhiradhva̱raṁ sa̍ha̱sriṇī̍bhi̱rupa̍ yāhi ya̱jñam |
vāyo̍ a̱sminsava̍ne mādayasva yū̱yaṁ pā̍ta sva̱stibhi̱ḥ sadā̍ naḥ || 7.092.05
śuci̱ṁ nu stoma̱ṁ nava̍jātama̱dyendrā̍gnī vṛtrahaṇā ju̱ṣethā̍m |
u̱bhā hi vā̍ṁ su̱havā̱ joha̍vīmi̱ tā vāja̍ṁ sa̱dya u̍śa̱te dheṣṭhā̍ || 7.093.01
tā sā̍na̱sī śa̍vasānā̱ hi bhū̱taṁ sā̍ka̱ṁvṛdhā̱ śava̍sā śūśu̱vāṁsā̍ |
kṣaya̍ntau rā̱yo yava̍sasya̱ bhūre̍ḥ pṛ̱ṅktaṁ vāja̍sya̱ sthavi̍rasya̱ ghṛṣve̍ḥ || 7.093.02
upo̍ ha̱ yadvi̱datha̍ṁ vā̱jino̱ gurdhī̱bhirviprā̱ḥ prama̍timi̱cchamā̍nāḥ |
arva̍nto̱ na kāṣṭhā̱ṁ nakṣa̍māṇā indrā̱gnī johu̍vato̱ nara̱ste || 7.093.03
gī̱rbhirvipra̱ḥ prama̍timi̱cchamā̍na̱ īṭṭe̍ ra̱yiṁ ya̱śasa̍ṁ pūrva̱bhāja̍m |
indrā̍gnī vṛtrahaṇā suvajrā̱ pra no̱ navye̍bhistirataṁ de̱ṣṇaiḥ || 7.093.04
saṁ yanma̱hī mi̍tha̱tī spardha̍māne tanū̱rucā̱ śūra̍sātā̱ yatai̍te |
ade̍vayuṁ vi̱dathe̍ deva̱yubhi̍ḥ sa̱trā ha̍taṁ soma̱sutā̱ jane̍na || 7.093.05
i̱māmu̱ ṣu soma̍suti̱mupa̍ na̱ endrā̍gnī saumana̱sāya̍ yātam |
nū ci̱ddhi pa̍rima̱mnāthe̍ a̱smānā vā̱ṁ śaśva̍dbhirvavṛtīya̱ vājai̍ḥ || 7.093.06
so a̍gna e̱nā nama̍sā̱ sami̱ddho'cchā̍ mi̱traṁ varu̍ṇa̱mindra̍ṁ voceḥ |
yatsī̱māga̍ścakṛ̱mā tatsu mṛ̍ḻa̱ tada̍rya̱mādi̍tiḥ śiśrathantu || 7.093.07
e̱tā a̍gna āśuṣā̱ṇāsa̍ i̱ṣṭīryu̱voḥ sacā̱bhya̍śyāma̱ vājā̍n |
mendro̍ no̱ viṣṇu̍rma̱ruta̱ḥ pari̍ khyanyū̱yaṁ pā̍ta sva̱stibhi̱ḥ sadā̍ naḥ || 7.093.08
i̱yaṁ vā̍ma̱sya manma̍na̱ indrā̍gnī pū̱rvyastu̍tiḥ |
a̱bhrādvṛ̱ṣṭiri̍vājani || 7.094.01
śṛ̱ṇu̱taṁ ja̍ri̱turhava̱mindrā̍gnī̱ vana̍ta̱ṁ gira̍ḥ |
ī̱śā̱nā pi̍pyata̱ṁ dhiya̍ḥ || 7.094.02
mā pā̍pa̱tvāya̍ no na̱rendrā̍gnī̱ mābhiśa̍staye |
mā no̍ rīradhataṁ ni̱de || 7.094.03
indre̍ a̱gnā namo̍ bṛ̱hatsu̍vṛ̱ktimera̍yāmahe |
dhi̱yā dhenā̍ ava̱syava̍ḥ || 7.094.04
tā hi śaśva̍nta̱ īḻa̍ta i̱tthā viprā̍sa ū̱taye̍ |
sa̱bādho̱ vāja̍sātaye || 7.094.05
tā vā̍ṁ gī̱rbhirvi̍pa̱nyava̱ḥ praya̍svanto havāmahe |
me̱dhasā̍tā sani̱ṣyava̍ḥ || 7.094.06
indrā̍gnī̱ ava̱sā ga̍tama̱smabhya̍ṁ carṣaṇīsahā |
mā no̍ du̱ḥśaṁsa̍ īśata || 7.094.07
mā kasya̍ no̱ ara̍ruṣo dhū̱rtiḥ praṇa̱ṅmartya̍sya |
indrā̍gnī̱ śarma̍ yacchatam || 7.094.08
goma̱ddhira̍ṇyava̱dvasu̱ yadvā̱maśvā̍va̱dīma̍he |
indrā̍gnī̱ tadva̍nemahi || 7.094.09
yatsoma̱ ā su̱te nara̍ indrā̱gnī ajo̍havuḥ |
saptī̍vantā sapa̱ryava̍ḥ || 7.094.10
u̱kthebhi̍rvṛtra̱hanta̍mā̱ yā ma̍ndā̱nā ci̱dā gi̱rā |
ā̱ṅgū̱ṣairā̱vivā̍sataḥ || 7.094.11
tāviddu̱ḥśaṁsa̱ṁ martya̱ṁ durvi̍dvāṁsaṁ rakṣa̱svina̍m |
ā̱bho̱gaṁ hanma̍nā hatamuda̱dhiṁ hanma̍nā hatam || 7.094.12
pra kṣoda̍sā̱ dhāya̍sā sasra e̱ṣā sara̍svatī dha̱ruṇa̱māya̍sī̱ pūḥ |
pra̱bāba̍dhānā ra̱thye̍va yāti̱ viśvā̍ a̱po ma̍hi̱nā sindhu̍ra̱nyāḥ || 7.095.01
ekā̍ceta̱tsara̍svatī na̱dīnā̱ṁ śuci̍rya̱tī gi̱ribhya̱ ā sa̍mu̱drāt |
rā̱yaśceta̍ntī̱ bhuva̍nasya̱ bhūre̍rghṛ̱taṁ payo̍ duduhe̱ nāhu̍ṣāya || 7.095.02
sa vā̍vṛdhe̱ naryo̱ yoṣa̍ṇāsu̱ vṛṣā̱ śiśu̍rvṛṣa̱bho ya̱jñiyā̍su |
sa vā̱jina̍ṁ ma̱ghava̍dbhyo dadhāti̱ vi sā̱taye̍ ta̱nva̍ṁ māmṛjīta || 7.095.03
u̱ta syā na̱ḥ sara̍svatī juṣā̱ṇopa̍ śravatsu̱bhagā̍ ya̱jṇe a̱smin |
mi̱tajñu̍bhirnama̱syai̍riyā̱nā rā̱yā yu̱jā ci̱dutta̍rā̱ sakhi̍bhyaḥ || 7.095.04
i̱mā juhvā̍nā yu̱ṣmadā namo̍bhi̱ḥ prati̱ stoma̍ṁ sarasvati juṣasva |
tava̱ śarma̍npri̱yata̍me̱ dadhā̍nā̱ upa̍ stheyāma śara̱ṇaṁ na vṛ̱kṣam || 7.095.05
a̱yamu̍ te sarasvati̱ vasi̍ṣṭho̱ dvārā̍vṛ̱tasya̍ subhage̱ vyā̍vaḥ |
vardha̍ śubhre stuva̱te rā̍si̱ vājā̍nyū̱yaṁ pā̍ta sva̱stibhi̱ḥ sadā̍ naḥ || 7.095.06
bṛ̱hadu̍ gāyiṣe̱ vaco̍'su̱ryā̍ na̱dīnā̍m |
sara̍svatī̱minma̍hayā suvṛ̱ktibhi̱ḥ stomai̍rvasiṣṭha̱ roda̍sī || 7.096.01
u̱bhe yatte̍ mahi̱nā śu̍bhre̱ andha̍sī adhikṣi̱yanti̍ pū̱rava̍ḥ |
sā no̍ bodhyavi̱trī ma̱rutsa̍khā̱ coda̱ rādho̍ ma̱ghonā̍m || 7.096.02
bha̱dramidbha̱drā kṛ̍ṇava̱tsara̍sva̱tyaka̍vārī cetati vā̱jinī̍vatī |
gṛ̱ṇā̱nā ja̍madagni̱vatstu̍vā̱nā ca̍ vasiṣṭha̱vat || 7.096.03
ja̱nī̱yanto̱ nvagra̍vaḥ putrī̱yanta̍ḥ su̱dāna̍vaḥ |
sara̍svantaṁ havāmahe || 7.096.04
ye te̍ sarasva ū̱rmayo̱ madhu̍manto ghṛta̱ścuta̍ḥ |
tebhi̍rno'vi̱tā bha̍va || 7.096.05
pī̱pi̱vāṁsa̱ṁ sara̍svata̱ḥ stana̱ṁ yo vi̱śvada̍rśataḥ |
bha̱kṣī̱mahi̍ pra̱jāmiṣa̍m || 7.096.06
ya̱jñe di̱vo nṛ̱ṣada̍ne pṛthi̱vyā naro̱ yatra̍ deva̱yavo̱ mada̍nti |
indrā̍ya̱ yatra̱ sava̍nāni su̱nve gama̱nmadā̍ya pratha̱maṁ vaya̍śca || 7.097.01
ā daivyā̍ vṛṇīma̱he'vā̍ṁsi̱ bṛha̱spati̍rno maha̱ ā sa̍khāyaḥ |
yathā̱ bhave̍ma mī̱ḻhuṣe̱ anā̍gā̱ yo no̍ dā̱tā pa̍rā̱vata̍ḥ pi̱teva̍ || 7.097.02
tamu̱ jyeṣṭha̱ṁ nama̍sā ha̱virbhi̍ḥ su̱śeva̱ṁ brahma̍ṇa̱spati̍ṁ gṛṇīṣe |
indra̱ṁ śloko̱ mahi̱ daivya̍ḥ siṣaktu̱ yo brahma̍ṇo de̱vakṛ̍tasya̱ rājā̍ || 7.097.03
sa ā no̱ yoni̍ṁ sadatu̱ preṣṭho̱ bṛha̱spati̍rvi̱śvavā̍ro̱ yo asti̍ |
kāmo̍ rā̱yaḥ su̱vīrya̍sya̱ taṁ dā̱tparṣa̍nno̱ ati̍ sa̱ścato̱ ari̍ṣṭān || 7.097.04
tamā no̍ a̱rkama̱mṛtā̍ya̱ juṣṭa̍mi̱me dhā̍sura̱mṛtā̍saḥ purā̱jāḥ |
śuci̍krandaṁ yaja̱taṁ pa̱styā̍nā̱ṁ bṛha̱spati̍mana̱rvāṇa̍ṁ huvema || 7.097.05
taṁ śa̱gmāso̍ aru̱ṣāso̱ aśvā̱ bṛha̱spati̍ṁ saha̱vāho̍ vahanti |
saha̍ści̱dyasya̱ nīla̍vatsa̱dhastha̱ṁ nabho̱ na rū̱pama̍ru̱ṣaṁ vasā̍nāḥ || 7.097.06
sa hi śuci̍ḥ śa̱tapa̍tra̱ḥ sa śu̱ndhyurhira̍ṇyavāśīriṣi̱raḥ sva̱rṣāḥ |
bṛha̱spati̱ḥ sa svā̍ve̱śa ṛ̱ṣvaḥ pu̱rū sakhi̍bhya āsu̱tiṁ kari̍ṣṭhaḥ || 7.097.07
de̱vī de̱vasya̱ roda̍sī̱ jani̍trī̱ bṛha̱spati̍ṁ vāvṛdhaturmahi̱tvā |
da̱kṣāyyā̍ya dakṣatā sakhāya̱ḥ kara̱dbrahma̍ṇe su̱tarā̍ sugā̱dhā || 7.097.08
i̱yaṁ vā̍ṁ brahmaṇaspate suvṛ̱ktirbrahmendrā̍ya va̱jriṇe̍ akāri |
a̱vi̱ṣṭaṁ dhiyo̍ jigṛ̱taṁ pura̍ṁdhīrjaja̱stama̱ryo va̱nuṣā̱marā̍tīḥ || 7.097.09
bṛha̍spate yu̱vamindra̍śca̱ vasvo̍ di̱vyasye̍śāthe u̱ta pārthi̍vasya |
dha̱ttaṁ ra̱yiṁ stu̍va̱te kī̱raye̍ cidyū̱yaṁ pā̍ta sva̱stibhi̱ḥ sadā̍ naḥ || 7.097.10
adhva̍ryavo'ru̱ṇaṁ du̱gdhama̱ṁśuṁ ju̱hota̍na vṛṣa̱bhāya̍ kṣitī̱nām |
gau̱rādvedī̍yā ava̱pāna̱mindro̍ vi̱śvāhedyā̍ti su̱taso̍mami̱cchan || 7.098.01
yadda̍dhi̱ṣe pra̱divi̱ cārvanna̍ṁ di̱vedi̍ve pī̱timida̍sya vakṣi |
u̱ta hṛ̱dota mana̍sā juṣā̱ṇa u̱śanni̍ndra̱ prasthi̍tānpāhi̱ somā̍n || 7.098.02
ja̱jñā̱naḥ soma̱ṁ saha̍se papātha̱ pra te̍ mā̱tā ma̍hi̱māna̍muvāca |
endra̍ paprātho̱rva1̱̍ntari̍kṣaṁ yu̱dhā de̱vebhyo̱ vari̍vaścakartha || 7.098.03
yadyo̱dhayā̍ maha̱to manya̍mānā̱nsākṣā̍ma̱ tānbā̱hubhi̱ḥ śāśa̍dānān |
yadvā̱ nṛbhi̱rvṛta̍ indrābhi̱yudhyā̱staṁ tvayā̱jiṁ sau̍śrava̱saṁ ja̍yema || 7.098.04
prendra̍sya vocaṁ pratha̱mā kṛ̱tāni̱ pra nūta̍nā ma̱ghavā̱ yā ca̱kāra̍ |
ya̱dedade̍vī̱rasa̍hiṣṭa mā̱yā athā̍bhava̱tkeva̍la̱ḥ somo̍ asya || 7.098.05
tave̱daṁ viśva̍ma̱bhita̍ḥ paśa̱vyaṁ1̱̍ yatpaśya̍si̱ cakṣa̍sā̱ sūrya̍sya |
gavā̍masi̱ gopa̍ti̱reka̍ indra bhakṣī̱mahi̍ te̱ praya̍tasya̱ vasva̍ḥ || 7.098.06
bṛha̍spate yu̱vamindra̍śca̱ vasvo̍ di̱vyasye̍śāthe u̱ta pārthi̍vasya |
dha̱ttaṁ ra̱yiṁ stu̍va̱te kī̱raye̍ cidyū̱yaṁ pā̍ta sva̱stibhi̱ḥ sadā̍ naḥ || 7.098.07
pa̱ro mātra̍yā ta̱nvā̍ vṛdhāna̱ na te̍ mahi̱tvamanva̍śnuvanti |
u̱bhe te̍ vidma̱ raja̍sī pṛthi̱vyā viṣṇo̍ deva̱ tvaṁ pa̍ra̱masya̍ vitse || 7.099.01
na te̍ viṣṇo̱ jāya̍māno̱ na jā̱to deva̍ mahi̱mnaḥ para̱manta̍māpa |
uda̍stabhnā̱ nāka̍mṛ̱ṣvaṁ bṛ̱hanta̍ṁ dā̱dhartha̱ prācī̍ṁ ka̱kubha̍ṁ pṛthi̱vyāḥ || 7.099.02
irā̍vatī dhenu̱matī̱ hi bhū̱taṁ sū̍yava̱sinī̱ manu̍ṣe daśa̱syā |
vya̍stabhnā̱ roda̍sī viṣṇave̱te dā̱dhartha̍ pṛthi̱vīma̱bhito̍ ma̱yūkhai̍ḥ || 7.099.03
u̱ruṁ ya̱jñāya̍ cakrathuru lo̱kaṁ ja̱naya̍ntā̱ sūrya̍mu̱ṣāsa̍ma̱gnim |
dāsa̍sya cidvṛṣaśi̱prasya̍ mā̱yā ja̱ghnathu̍rnarā pṛta̱nājye̍ṣu || 7.099.04
indrā̍viṣṇū dṛṁhi̱tāḥ śamba̍rasya̱ nava̱ puro̍ nava̱tiṁ ca̍ śnathiṣṭam |
śa̱taṁ va̱rcina̍ḥ sa̱hasra̍ṁ ca sā̱kaṁ ha̱tho a̍pra̱tyasu̍rasya vī̱rān || 7.099.05
i̱yaṁ ma̍nī̱ṣā bṛ̍ha̱tī bṛ̱hanto̍rukra̱mā ta̱vasā̍ va̱rdhaya̍ntī |
ra̱re vā̱ṁ stoma̍ṁ vi̱dathe̍ṣu viṣṇo̱ pinva̍ta̱miṣo̍ vṛ̱jane̍ṣvindra || 7.099.06
vaṣa̍ṭ te viṣṇavā̱sa ā kṛ̍ṇomi̱ tanme̍ juṣasva śipiviṣṭa ha̱vyam |
vardha̍ntu tvā suṣṭu̱tayo̱ giro̍ me yū̱yaṁ pā̍ta sva̱stibhi̱ḥ sadā̍ naḥ || 7.099.07
nū marto̍ dayate sani̱ṣyanyo viṣṇa̍va urugā̱yāya̱ dāśa̍t |
pra yaḥ sa̱trācā̱ mana̍sā̱ yajā̍ta e̱tāva̍nta̱ṁ narya̍mā̱vivā̍sāt || 7.100.01
tvaṁ vi̍ṣṇo suma̱tiṁ vi̱śvaja̍nyā̱mapra̍yutāmevayāvo ma̱tiṁ dā̍ḥ |
parco̱ yathā̍ naḥ suvi̱tasya̱ bhūre̱raśvā̍vataḥ puruśca̱ndrasya̍ rā̱yaḥ || 7.100.02
trirde̱vaḥ pṛ̍thi̱vīme̱ṣa e̱tāṁ vi ca̍krame śa̱tarca̍saṁ mahi̱tvā |
pra viṣṇu̍rastu ta̱vasa̱stavī̍yāntve̱ṣaṁ hya̍sya̱ sthavi̍rasya̱ nāma̍ || 7.100.03
vi ca̍krame pṛthi̱vīme̱ṣa e̱tāṁ kṣetrā̍ya̱ viṣṇu̱rmanu̍ṣe daśa̱syan |
dhru̱vāso̍ asya kī̱rayo̱ janā̍sa urukṣi̱tiṁ su̱jani̍mā cakāra || 7.100.04
pra tatte̍ a̱dya śi̍piviṣṭa̱ nāmā̱ryaḥ śa̍ṁsāmi va̱yunā̍ni vi̱dvān |
taṁ tvā̍ gṛṇāmi ta̱vasa̱mata̍vyā̱nkṣaya̍ntama̱sya raja̍saḥ parā̱ke || 7.100.05
kimitte̍ viṣṇo pari̱cakṣya̍ṁ bhū̱tpra yadva̍va̱kṣe śi̍pivi̱ṣṭo a̍smi |
mā varpo̍ a̱smadapa̍ gūha e̱tadyada̱nyarū̍paḥ sami̱the ba̱bhūtha̍ || 7.100.06
vaṣa̍ṭ te viṣṇavā̱sa ā kṛ̍ṇomi̱ tanme̍ juṣasva śipiviṣṭa ha̱vyam |
vardha̍ntu tvā suṣṭu̱tayo̱ giro̍ me yū̱yaṁ pā̍ta sva̱stibhi̱ḥ sadā̍ naḥ || 7.100.07
ti̱sro vāca̱ḥ pra va̍da̱ jyoti̍ragrā̱ yā e̱taddu̱hre ma̍dhudo̱ghamūdha̍ḥ |
sa va̱tsaṁ kṛ̱ṇvangarbha̱moṣa̍dhīnāṁ sa̱dyo jā̱to vṛ̍ṣa̱bho ro̍ravīti || 7.101.01
yo vardha̍na̱ oṣa̍dhīnā̱ṁ yo a̱pāṁ yo viśva̍sya̱ jaga̍to de̱va īśe̍ |
sa tri̱dhātu̍ śara̱ṇaṁ śarma̍ yaṁsattri̱vartu̱ jyoti̍ḥ svabhi̱ṣṭya1̱̍sme || 7.101.02
sta̱rīru̍ tva̱dbhava̍ti̱ sūta̍ u tvadyathāva̱śaṁ ta̱nva̍ṁ cakra e̱ṣaḥ |
pi̱tuḥ paya̱ḥ prati̍ gṛbhṇāti mā̱tā tena̍ pi̱tā va̍rdhate̱ tena̍ pu̱traḥ || 7.101.03
yasmi̱nviśvā̍ni̱ bhuva̍nāni ta̱sthusti̱sro dyāva̍stre̱dhā sa̱srurāpa̍ḥ |
traya̱ḥ kośā̍sa upa̱seca̍nāso̱ madhva̍ḥ ścotantya̱bhito̍ vira̱pśam || 7.101.04
i̱daṁ vaca̍ḥ pa̱rjanyā̍ya sva̱rāje̍ hṛ̱do a̱stvanta̍ra̱ṁ tajju̍joṣat |
ma̱yo̱bhuvo̍ vṛ̱ṣṭaya̍ḥ santva̱sme su̍pippa̱lā oṣa̍dhīrde̱vago̍pāḥ || 7.101.05
sa re̍to̱dhā vṛ̍ṣa̱bhaḥ śaśva̍tīnā̱ṁ tasmi̍nnā̱tmā jaga̍tasta̱sthuṣa̍śca |
tanma̍ ṛ̱taṁ pā̍tu śa̱taśā̍radāya yū̱yaṁ pā̍ta sva̱stibhi̱ḥ sadā̍ naḥ || 7.101.06
pa̱rjanyā̍ya̱ pra gā̍yata di̱vaspu̱trāya̍ mī̱ḻhuṣe̍ |
sa no̱ yava̍samicchatu || 7.102.01
yo garbha̱moṣa̍dhīnā̱ṁ gavā̍ṁ kṛ̱ṇotyarva̍tām |
pa̱rjanya̍ḥ puru̱ṣīṇā̍m || 7.102.02
tasmā̱ idā̱sye̍ ha̱virju̱hotā̱ madhu̍mattamam |
iḻā̍ṁ naḥ sa̱ṁyata̍ṁ karat || 7.102.03
sa̱ṁva̱tsa̱raṁ śa̍śayā̱nā brā̍hma̱ṇā vra̍tacā̱riṇa̍ḥ |
vāca̍ṁ pa̱rjanya̍jinvitā̱ṁ pra ma̱ṇḍūkā̍ avādiṣuḥ || 7.103.01
di̱vyā āpo̍ a̱bhi yade̍na̱māya̱ndṛti̱ṁ na śuṣka̍ṁ sara̱sī śayā̍nam |
gavā̱maha̱ na mā̱yurva̱tsinī̍nāṁ ma̱ṇḍūkā̍nāṁ va̱gnuratrā̱ same̍ti || 7.103.02
yadī̍menā uśa̱to a̱bhyava̍rṣīttṛ̱ṣyāva̍taḥ prā̱vṛṣyāga̍tāyām |
a̱khkha̱lī̱kṛtyā̍ pi̱tara̱ṁ na pu̱tro a̱nyo a̱nyamupa̱ vada̍ntameti || 7.103.03
a̱nyo a̱nyamanu̍ gṛbhṇātyenora̱pāṁ pra̍sa̱rge yadama̍ndiṣātām |
ma̱ṇḍūko̱ yada̱bhivṛ̍ṣṭa̱ḥ kani̍ṣka̱npṛśni̍ḥ sampṛ̱ṅkte hari̍tena̱ vāca̍m || 7.103.04
yade̍ṣāma̱nyo a̱nyasya̱ vāca̍ṁ śā̱ktasye̍va̱ vada̍ti̱ śikṣa̍māṇaḥ |
sarva̱ṁ tade̍ṣāṁ sa̱mṛdhe̍va̱ parva̱ yatsu̱vāco̱ vada̍tha̱nādhya̱psu || 7.103.05
gomā̍yu̱reko̍ a̱jamā̍yu̱reka̱ḥ pṛśni̱reko̱ hari̍ta̱ eka̍ eṣām |
sa̱mā̱naṁ nāma̱ bibhra̍to̱ virū̍pāḥ puru̱trā vāca̍ṁ pipiśu̱rvada̍ntaḥ || 7.103.06
brā̱hma̱ṇāso̍ atirā̱tre na some̱ saro̱ na pū̱rṇama̱bhito̱ vada̍ntaḥ |
sa̱ṁva̱tsa̱rasya̱ tadaha̱ḥ pari̍ ṣṭha̱ yanma̍ṇḍūkāḥ prāvṛ̱ṣīṇa̍ṁ ba̱bhūva̍ || 7.103.07
brā̱hma̱ṇāsa̍ḥ so̱mino̱ vāca̍makrata̱ brahma̍ kṛ̱ṇvanta̍ḥ parivatsa̱rīṇa̍m |
a̱dhva̱ryavo̍ gha̱rmiṇa̍ḥ siṣvidā̱nā ā̱virbha̍vanti̱ guhyā̱ na ke ci̍t || 7.103.08
de̱vahi̍tiṁ jugupurdvāda̱śasya̍ ṛ̱tuṁ naro̱ na pra mi̍nantye̱te |
sa̱ṁva̱tsa̱re prā̱vṛṣyāga̍tāyāṁ ta̱ptā gha̱rmā a̍śnuvate visa̱rgam || 7.103.09
gomā̍yuradāda̱jamā̍yuradā̱tpṛśni̍radā̱ddhari̍to no̱ vasū̍ni |
gavā̍ṁ ma̱ṇḍūkā̱ dada̍taḥ śa̱tāni̍ sahasrasā̱ve pra ti̍ranta̱ āyu̍ḥ || 7.103.10
indrā̍somā̱ tapa̍ta̱ṁ rakṣa̍ u̱bjata̱ṁ nya̍rpayataṁ vṛṣaṇā tamo̱vṛdha̍ḥ |
parā̍ śṛṇītama̱cito̱ nyo̍ṣataṁ ha̱taṁ nu̱dethā̱ṁ ni śi̍śītama̱triṇa̍ḥ || 7.104.01
indrā̍somā̱ sama̱ghaśa̍ṁsama̱bhya1̱̍ghaṁ tapu̍ryayastu ca̱rura̍gni̱vā i̍va |
bra̱hma̱dviṣe̍ kra̱vyāde̍ gho̱raca̍kṣase̱ dveṣo̍ dhattamanavā̱yaṁ ki̍mī̱dine̍ || 7.104.02
indrā̍somā du̱ṣkṛto̍ va̱vre a̱ntara̍nārambha̱ṇe tama̍si̱ pra vi̍dhyatam |
yathā̱ nāta̱ḥ puna̱reka̍śca̱nodaya̱ttadvā̍mastu̱ saha̍se manyu̱macchava̍ḥ || 7.104.03
indrā̍somā va̱rtaya̍taṁ di̱vo va̱dhaṁ saṁ pṛ̍thi̱vyā a̱ghaśa̍ṁsāya̱ tarha̍ṇam |
utta̍kṣataṁ sva̱ryaṁ1̱̍ parva̍tebhyo̱ yena̱ rakṣo̍ vāvṛdhā̱naṁ ni̱jūrva̍thaḥ || 7.104.04
indrā̍somā va̱rtaya̍taṁ di̱vasparya̍gnita̱ptebhi̍ryu̱vamaśma̍hanmabhiḥ |
tapu̍rvadhebhira̱jare̍bhira̱triṇo̱ ni parśā̍ne vidhyata̱ṁ yantu̍ nisva̱ram || 7.104.05
indrā̍somā̱ pari̍ vāṁ bhūtu vi̱śvata̍ i̱yaṁ ma̱tiḥ ka̱kṣyāśve̍va vā̱jinā̍ |
yāṁ vā̱ṁ hotrā̍ṁ parihi̱nomi̍ me̱dhaye̱mā brahmā̍ṇi nṛ̱patī̍va jinvatam || 7.104.06
prati̍ smarethāṁ tu̱jaya̍dbhi̱revai̍rha̱taṁ dru̱ho ra̱kṣaso̍ bhaṅgu̱rāva̍taḥ |
indrā̍somā du̱ṣkṛte̱ mā su̱gaṁ bhū̱dyo na̍ḥ ka̱dā ci̍dabhi̱dāsa̍ti dru̱hā || 7.104.07
yo mā̱ pāke̍na̱ mana̍sā̱ cara̍ntamabhi̱caṣṭe̱ anṛ̍tebhi̱rvaco̍bhiḥ |
āpa̍ iva kā̱śinā̱ saṁgṛ̍bhītā̱ asa̍nna̱stvāsa̍ta indra va̱ktā || 7.104.08
ye pā̍kaśa̱ṁsaṁ vi̱hara̍nta̱ evai̱rye vā̍ bha̱draṁ dū̱ṣaya̍nti sva̱dhābhi̍ḥ |
aha̍ye vā̱ tānpra̱dadā̍tu̱ soma̱ ā vā̍ dadhātu̱ nirṛ̍teru̱pasthe̍ || 7.104.09
yo no̱ rasa̱ṁ dipsa̍ti pi̱tvo a̍gne̱ yo aśvā̍nā̱ṁ yo gavā̱ṁ yasta̱nūnā̍m |
ri̱puḥ ste̱naḥ ste̍ya̱kṛdda̱bhrame̍tu̱ ni ṣa hī̍yatāṁ ta̱nvā̱3̱̍ tanā̍ ca || 7.104.10
pa̱raḥ so a̍stu ta̱nvā̱3̱̍ tanā̍ ca ti̱sraḥ pṛ̍thi̱vīra̱dho a̍stu̱ viśvā̍ḥ |
prati̍ śuṣyatu̱ yaśo̍ asya devā̱ yo no̱ divā̱ dipsa̍ti̱ yaśca̱ nakta̍m || 7.104.11
su̱vi̱jñā̱naṁ ci̍ki̱tuṣe̱ janā̍ya̱ saccāsa̍cca̱ vaca̍sī paspṛdhāte |
tayo̱ryatsa̱tyaṁ ya̍ta̱radṛjī̍ya̱staditsomo̍'vati̱ hantyāsa̍t || 7.104.12
na vā u̱ somo̍ vṛji̱naṁ hi̍noti̱ na kṣa̱triya̍ṁ mithu̱yā dhā̱raya̍ntam |
hanti̱ rakṣo̱ hantyāsa̱dvada̍ntamu̱bhāvindra̍sya̱ prasi̍tau śayāte || 7.104.13
yadi̍ vā̱hamanṛ̍tadeva̱ āsa̱ mogha̍ṁ vā de̱vā a̍pyū̱he a̍gne |
kima̱smabhya̍ṁ jātavedo hṛṇīṣe drogha̱vāca̍ste nirṛ̱thaṁ sa̍cantām || 7.104.14
a̱dyā mu̍rīya̱ yadi̍ yātu̱dhāno̱ asmi̱ yadi̱ vāyu̍sta̱tapa̱ pūru̍ṣasya |
adhā̱ sa vī̱rairda̱śabhi̱rvi yū̍yā̱ yo mā̱ mogha̱ṁ yātu̍dhā̱netyāha̍ || 7.104.15
yo māyā̍tu̱ṁ yātu̍dhā̱netyāha̱ yo vā̍ ra̱kṣāḥ śuci̍ra̱smītyāha̍ |
indra̱staṁ ha̍ntu maha̱tā va̱dhena̱ viśva̍sya ja̱ntora̍dha̱maspa̍dīṣṭa || 7.104.16
pra yā jigā̍ti kha̱rgale̍va̱ nakta̱mapa̍ dru̱hā ta̱nvaṁ1̱̍ gūha̍mānā |
va̱vrā a̍na̱ntā ava̱ sā pa̍dīṣṭa̱ grāvā̍ṇo ghnantu ra̱kṣasa̍ upa̱bdaiḥ || 7.104.17
vi ti̍ṣṭhadhvaṁ maruto vi̱kṣvi1̱̍cchata̍ gṛbhā̱yata̍ ra̱kṣasa̱ḥ saṁ pi̍naṣṭana |
vayo̱ ye bhū̱tvī pa̱taya̍nti na̱ktabhi̱rye vā̱ ripo̍ dadhi̱re de̱ve a̍dhva̱re || 7.104.18
pra va̍rtaya di̱vo aśmā̍namindra̱ soma̍śitaṁ maghava̱nsaṁ śi̍śādhi |
prāktā̱dapā̍ktādadha̱rāduda̍ktāda̱bhi ja̍hi ra̱kṣasa̱ḥ parva̍tena || 7.104.19
e̱ta u̱ tye pa̍tayanti̱ śvayā̍tava̱ indra̍ṁ dipsanti di̱psavo'dā̍bhyam |
śiśī̍te śa̱kraḥ piśu̍nebhyo va̱dhaṁ nū̱naṁ sṛ̍jada̱śani̍ṁ yātu̱madbhya̍ḥ || 7.104.20
indro̍ yātū̱nāma̍bhavatparāśa̱ro ha̍vi̱rmathī̍nāma̱bhyā̱3̱̍vivā̍satām |
a̱bhīdu̍ śa̱kraḥ pa̍ra̱śuryathā̱ vana̱ṁ pātre̍va bhi̱ndansa̱ta e̍ti ra̱kṣasa̍ḥ || 7.104.21
ulū̍kayātuṁ śuśu̱lūka̍yātuṁ ja̱hi śvayā̍tumu̱ta koka̍yātum |
su̱pa̱rṇayā̍tumu̱ta gṛdhra̍yātuṁ dṛ̱ṣade̍va̱ pra mṛ̍ṇa̱ rakṣa̍ indra || 7.104.22
mā no̱ rakṣo̍ a̱bhi na̍ḍyātu̱māva̍tā̱mapo̍cchatu mithu̱nā yā ki̍mī̱dinā̍ |
pṛ̱thi̱vī na̱ḥ pārthi̍vātpā̱tvaṁha̍so̱'ntari̍kṣaṁ di̱vyātpā̍tva̱smān || 7.104.23
indra̍ ja̱hi pumā̍ṁsaṁ yātu̱dhāna̍mu̱ta striya̍ṁ mā̱yayā̱ śāśa̍dānām |
vigrī̍vāso̱ mūra̍devā ṛdantu̱ mā te dṛ̍śa̱nsūrya̍mu̱ccara̍ntam || 7.104.24
prati̍ cakṣva̱ vi ca̱kṣvendra̍śca soma jāgṛtam |
rakṣo̍bhyo va̱dhama̍syatama̱śani̍ṁ yātu̱madbhya̍ḥ || 7.104.25
Last udpated July 2, 2013
Special mention : Initial processing and help by Avinash and Shashi Sathaye,
Avinash Chopde, Shree Devi Kumar, Sunder Hattangadi, John Gardner.
Reprocessed from Original in final form by Detlef Eichler with additional corrections.
See Detlef's site http://www.detlef108.de/Rigveda.htm
for other details and formats.
The text is shown with accents (Anudattas, dependent Svaritas,
and independent Svaritas including Kampas). Words are connected (agnimILe).
Ch is doubled as in gachChati according to the rules of Rigveda-Pratishakhya.
At the end of a word m is replaced by Anusvara M if the initial letter of the
following word is a labial stop consonant (p, ph, b, bh, m).
Visarga H before sh, Sh or s followed by a voiceless consonant has been restored.
Source : The Aufrecht/van Nooten/Holland (Samhita) version
of the Rigveda (http://www.people.fas.harvard.edu/~witzel/onlineRV.htm).
In this text accented vowels have Udatta or 'independent Svarita' markers.
Kampas are not shown. Words are separated (agnim ILe).
Ch is not doubled as in gaChati. At the end of a word we find m before
a following labial stop consonant (p, ph, b, bh, m).
Visarga H before sh, Sh or s followed by a voiceless consonant has
been dropped according to a rule of Rigveda-Pratishakhya.
Send corrections to : detlefeichler@googlemail.com, sanskrit@cheerful.com
The text is to be used for personal studies and research only.
Any use for commercial purpose is prohibited as a `gentleman's' agreement.