% Text title            : sadAshivendrastavaH
% File name             : sadAshivendrastavaH.itx
% Category              : deities\_misc, sachchidAnanda-shivAbhinava-nRisiMhabhAratI, gurudeva
% Location              : doc\_deities\_misc
% Author                : Sachchidananda Shivabhinava Nrisimha Bharati Swamigal
% Proofread by          : PSA Easwaran psawaswaran at gmail.com
% Latest update         : November 9, 2018
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Sadashivendrastavah ..}##
\itxtitle{.. shrIsadAshivendrastavaH ..}##\endtitles ##
paratattvalInamanase praNamadbhavabandhamochanAyAshu |
prakaTitaparatattvAya praNatiM kurmaH sadAshivendrAya || 1||
paramashivendrakarAmbujasambhUtAya praNamravaradAya |
padadhUtapa~NkajAya praNatiM kurmaH sadAshivendrAya || 2||
vijananadIku~njagR^ihe ma~njulapulinaikama~njutaratalpe |
shayanaM kurvANAya praNatiM kurmaH sadAshivendrAya || 3||
kAmAhidvijapataye shamadamamukhadivyaratnavAridhaye |
shamanAya mohavitateH praNatiM kurma sadAshivendrAya || 4||
namadAtmabodhadAyAramate paramAtmatattvasaudhAgre |
samabuddhaye.ashmahemnoH praNatiM kurmaH sadAshivendrAya || 5||
gilitAvidyAhAlAhalahatapuryaShTakAya bodhena |
mohAndhakAraravaye praNatiM kurmaH sadAshivendrAya || 6||
shamamukhaShaTpadamumukShAvivekavairAgyadAnaniratAya
tarasA natajanatataye praNatiM kurmaH sadAshivendrAya || 7||
siddhAntakalpavallImukhakR^itikartre kapAlibhaktikR^ite |
karatalamuktiphalAya praNatiM kurmaH sadAshivendrAya || 8||
tR^iNapa~NkaliptavapuShe tR^iNato.apyadharaM jagadvilokayate |
vanamadhyaviharaNAya praNatiM kurmaH sadAshivendrAya || 9||
nigR^ihItahR^idayaharaye pragR^ihItAtmasvarUparatnAya |
praNatAbdhipUrNashashine praNatiM kurmaH sadAshivendrAya || 10||
aj~nAnatimiraravaye praj~nAnAmbhodhipUrNachandrAya |
praNatAghavipinashuchaye praNatiM kurmaH sadAshivendrAya || 11||
matimalamochanadakShapratyagbrahmaikyadAnaniratAya |
smR^itimAtratuShTamanase praNatiM kurmaH sadAshivendrAya || 12||
nijaguruparamashivendrashlAghitavij~nAnakAShThAya |
nijatattvanishchalahR^ide praNatiM kurmaH sadAshivendrAya || 13||
pravilApya jagadasheShaM parishiShTAkhaNDavastuniratAya |
AsyaprAptAnnabhuje praNatiM kurmaH sadAshivedrAya || 14||
upadhAnIkR^itabAhuH parirabdhaviraktirAmo yaH |
vasanIkR^itakhAyAsmai praNatiM kurmaH sadAshivendrAya || 15||
sakalAgamAntasAraprakaTanadakShAya namrapakShAya |
sachchitsukharUpAya praNatiM kurmaH sadAshivendrAya || 16||
drAkShAshikShaNachaturavyAhArAya prabhUtakaruNAya |
vIkShApAvitajagate praNatiM kurmaH sadAshivendrAya || 17||
yo.anutpannavikAro bAhau mlechChena chChinnapatite.api |
aviditamamatAyAsmai praNatiM kurmaH sadAshivendrAya || 18||
nyapatansumAni mUrdhani yenochchariteShu nAmasUgrasya |
tasmai siddhavarAya praNatiM kurmaH sadAshivendrAya || 19||
yaH pApino.api lokAMstarasA prakaroti puNyaniShThAgryAn |
karuNAmburAshaye.asmai praNatiM kurmaH sadAshivendrAya || 20||
siddheshvarAya buddheH shuddhipradapAdapadmanamanAya |
baddhaughamochakAya praNatiM kurmaH sadAshivendrAya || 21||
hR^idyAya lokavitateH padyAvalidAya janmamUkebhyaH |
praNatebhyaH padayugale praNatiM kurmaH sadAshivendrAya || 22||
jihvopastharatAnapyAhvochchAreNa jAtu naijasya |
kurvANAya viraktAnpraNatiM kurmaH sadAshivendrAya || 23||
kamanIyakavanakartre shamanIyabhayApahArachaturAya |
tapanIyasadR^ishavapuShe praNatiM kurmaH sadAshivendrAya || 24||
tArakavidyAdAtre tArApatigarvavArakAsyAya |
tArajapapravaNAya praNatiM kurmaH sadAshivendrAya || 25||
mUko.api yatkR^ipA chellokottarakIrtirAshu jAyeta |
adbhutacharitAyAsmai praNatiM kurmaH sadAshivendrAya || 26||
durjanadUrAyatarAM sajjanasulabhAya pAtrahastAya |
tarutalaniketanAya praNatiM kurmaH sadAshivendrAya || 27||
bhavasindhutArayitre bhavabhaktAya praNamravashyAya |
bhavabandhavirahitAya praNatiM kurmaH sadAshivendrAya || 28||
trividhasyApi tyAgaM vapuShaH kartuM sthalatraye ya iva |
akarotsamAdhimasmai praNatiM kurmaH sadAshivendrAya || 29||
kAminamapi jitahR^idayaM krUraM shAntaM jaDaM sudhiyam |
kurute yatkaruNAsmai praNatiM kurmaH sadAshivendrAya || 30||
vedasmR^itisthavidvallakShaNalakShyeShu sandihAnAnAm |
nishchayakR^ite vihartre praNatiM kurmaH sadAshivendrAya || 31||
bAlAruNanibhavapuShe lIlAnirdhUtakAmagarvAya |
lolAya chiti parasyAM praNatiM kurmaH sadAshivendrAya || 32||
sharaNIkR^itAya suguNaishcharaNIkR^itaraktapa~NkajAtAya |
dharaNIsadR^ikkShamAya praNatiM kurmaH sadAshivendrAya || 33||
praNatAya yativareNyairgaNanAthenApyahAryavighnahR^ite |
guNadAsIkR^itajagate praNatiM kurmaH sadAshivendrAya || 34||
sahamAnAya sahasrANyapyaparAdhAnpraNamrajanarachitAn |
sahasaiva mokShadAtre praNatiM kurmaH sadAshivendrAya || 35||
dhR^itadehAya natAvalitUrNapraj~nApradAnavA~nChAtaH |
shrIdakShiNavaktrAya praNatiM kurmaH sadAshivendrAya || 36||
tApatrayArtahR^idayastApatrayahAradakShanamanamaham |
guruvarabodhitamahimA sharaNaM yAsye tavA~Nghrikamalayugam || 37||
sadAtmani vilInahR^itsakalavedashAstrArthavi\-
tsarittaTavihArakR^itsakalalokahR^ittApahR^it |
sadAshivapadAmbujapraNatalokalabhya prabho
sadAshivayatIT sadA mayi kR^ipAmapArAM kuru || 38||
purA yavanakartanasravadamandarakto.api yaH
punaHpadasaroruhapraNatamenamenonidhim |
kR^ipAparavashaH padaM patanavarjitaM prApaya\-
tsadAshivayatIT sa mayyanavadhiM kR^ipAM si~nchatu || 39||
hR^iShIkahR^itachetasi prahR^itadehake rogakai\-
ranekavR^ijinAlaye shamadamAdigandhojjhite |
tavA~Nghripatite yatau yatipate mahAyogirAT
sadAshiva kR^ipAM mayi prakuru hetushUnyAM drutam || 40||
na chAhamatichAturIrachitashabdasa~NghaiH stutiM
vidhAtumapi cha kShamo na cha japAdike.apyasti me |
balaM balavatAM vara prakuru hetushUnyAM vibho
sadAshiva kR^ipAM mayi pravara yoginAM satvaram || 41||
shabdArthavij~nAnayutA hi loke vasanti lokA bahavaH prakAmam |
niShThAyutA na shrutadR^iShTapUrvA vinA bhavantaM yatirAja nUnam || 42||
stokArchanaprItahR^idambujAya pAkAbjachUDApararUpadhartre |
shokApahartre tarasA natAnAM pAkAya puNyasya namo yatIshe || 43||
nAhaM hR^iShIkANi vijetumIsho nAhaM saparyAbhajanAdi kartum |
nisargayA tvaM dayayaiva pAhi sadAshivemaM karuNApayodhe || 44||
kR^itayAnayA natAvalikoTigatenAtimandabodhena |
mudamehi nityatR^iptapravara stutyA sadAshivAshvAshu || 45||

iti shR^i~Ngeri shrIjagadguru shrIsachchidAnandashivAbhinavanR^isiMha\-
bhAratIsvAmibhiH virachitaH shrIsadAshivendrastavaH sampUrNaH |
##
Proofread by PSA Easwaran psaeaswaran at gmail.com

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}