% Text title            : vivekAnandopadeshadvishatI
% File name             : vivekAnandopadeshadvishatI.itx
% Category              : deities\_misc, gurudev, dvishatI
% Location              : doc\_deities\_misc
% Author                : Tryambak Bhandarkar
% Transliterated by     : Sunder Hattangadi
% Proofread by          : Sunder Hattangadi
% Latest update         : March 21, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Advice of Swami Vivekananda (200) ..}##
\itxtitle{.. svAmivivekAnandopadeshadvishatiH ..}##\endtitles ##

avatAraH
sthApakAya cha dharmasya sarvadharmasvarUpiNe |
avatAravariShThAya rAmakR^iShNAya te namaH || 1||
rAmakR^iShNAvatAre tu sthitaM sarvamanantakam |
anantaprema, bhaktishchAnantA,j~nAnamanantakam || 2||
sahasrayugaparyantaM yallabdhaM vishvahindubhiH |
rAmakR^iShNena tallabdhamekasminneva janmani || 3||
sarvajAtIyavedAnAM rAmakR^iShNasya jIvanam |
vidyate bhAShyarUpaM tadvedArthAnAM prakAshane || 4||
kasyApi deshasya gatetihAse
      na tAdR^isho dharmasamanvayo.asti |
pratyakShamIshaH khalu rAmakR^iShNo
      laghurmato.asya tvavatAravAdaH || 5||
yasmindine.asau narajanma lebhe
      tasmAddinAtsatyayugaM pravR^ittam |
bhedA vivAdAstvakhilA vinaShTAH
      aspR^ishyavargaH priyatAmupetaH || 6||
lupto hindukhristamohammadIya\-
        bauddhAdInAM bhedabhAvaH samantAt |
eko varNo veda eko.adhunAste
      shAntisthAnaM nUtanaM bhArataM naH || 7||
\ldq{}bhaktij~nAne karmayogau sametyA\-
      bhedaH sampadyeta sadbhAvanAnAm |
jAyetaivaM naH samAjo navInaH\rdq{}
      preShThaH shreShThashchAvatAropadeshaH || 8||
\ldq{}vishvAso.astu\rdq{} gurorvAchi nishchitA bhAratonnatiH |
kartavyAH sukhinaH sarve niHsvAH sAdhAraNA janAH || 9||

deshabhaktiH
umAnAthastavopAsyaH sarvatyAgI cha sha~NkaraH |
dhanajIvanasaukhyAni na santyAtmasukhAya te || 10||
balisvarUpo janito.asi mAtu\-
      shChAyA virAjastava yaH samAjaH |
vipannachaNDAla daridramUrkhA\-
      stvadraktamAMsAnvitabAndhavAste || 11||
uchchairvacho brUhi sadhairyagarvo
      \ldq{}bhrAtA madIyaH khalu bhAratIyaH |
sa brAhmaNo vAstvathavAtishUdraH
      sa nirdhano vAstu nirakSharo vA || 12||
mameshvaro bhAratadevadevyo
      mAtuH shubhaM yatkushalaM madIyam |
dattvA balaM me balinI punastvaM
      mAM mAtaritthaM puruShaM vidhehi || 13||
grasyate mR^ityunA janturekavAraM svajIvane |
mAturunnataye tasmAtsAhasaM kuru sAhasam || 14||
dyauruttamA bhAratabhUrmameyaM
      dolAsvarUpA mama bAlyakAle |
yUnastathA sundaranandanaM cha
      vArANasIyaM mama vR^iddhabhAve || 15||
tUShNIM rahaH siktatuShArasampat
      samparkataH pATala\-ku~NmalAnAm |
vikAsavat vishvachAradhArAM,
      prabhAvitA bhAratabhAvavR^indaiH. || 16||
AplAvyate vishvamadamyashaktyA
      vinA ninAdaM khalu bhAratena |
dhruvaM navInaM yugamAvirAste
      na j~nAyate tu prabhavaH kutastyaH || 17||
nAshonmukhaM naH kimu bhArataM syA\-
      daho tadAdhyAtmikatAvinAshaH |
gatA dhruvaM dharmasahAnubhUti\-
      rmR^itA sadAchAravArtA ! || 18||
vinAshitAdarshajagatprabhAvatA
      pratiShThitA chAshu vilAsitA bhavet |
pratAraNA pAshavikaM balaM vidhi\-.
      rdhanaM purodhA balirasmadAtmana ! || 19||
na bhArataM ruddhasamunnati syA\-
      nna chaiti nidrAvashatAmidAnIm |
shaktiH punaH kAlamimaM vijetuM.
      santyaktanidraH khalu kumbhakarNaH || 20||
UrjasvikAlAyasanirmitAbhi\-
      rvajraM vapuH snAyushirAbhirastu |
sevArthamasmatpriyamAtR^ibhUme\-
      rIhA balaM chAstu yad.hvitIyam || 21||
anena sadyatnaparA bhavema
      prAptuM vayaM vishvarahasyabodham |
udanvadantastalamabhyupema
      prANavyayenApyudayArthasid.h{}dhyai || 22||
kAlo.ayaM kaThinashramasya bhavato bhrAtarvachaH shrUyatA\-
      mutthAya drutamArabhasva samaye manye.atinidrA tava |
mAtA prAptanijAsanA balavatI tandrAbhibhUtA manAk
      tasyA AyatirujjvalA paramasau yuShmatprayatnAshrayA || 23||
bhaviShyanmahadbhArataM kartumIhA
      yadi syAdupAyatrayaM saMvidheyam |
adamyaM bala nirmitiH sa~Nghashakte\-
      rvikIrNA samIhA tathaikatvasUtrA || 24||
AyAntu mitrANi bhavantu vIrA
      bahirvinirgatya nijAndhakUpAt |
vidhAya dR^iShTiM parito vishAlAM
      pashyantu rAShTrANi kathaM prayAnti || 25||
premAsti chenmAnavajAtimAtre
      svajanmabhUmau cha tathA tvadIyam |
AyAhi gantuM purato na pashchAd
      yatAmahe sattamalakShyasid.h{}dhyai || 26||

tudantu suhR^idaH sarve rudantu tava bAndhavAH |
shreyasI na gatiH pashchAnnityamagragatirbhaveH || 27||
upekShyate yajjanatAjanArdano
      mahattadaMhaH kriyate nirantaram |
dhruvaM hi tannaH patanasya kAraNaM
      na vismarAto janatAsamunnatim || 28||
niShphalA rAjanItiH syAtsamudAyakR^itena yA |
tattachChikShAnnavAsAnAmupAyAn parichintayet || 29||
na tAdR^ishe vishvasimIshvare.ahaM
      yo mahyamannaM na dadAti bhUmau |
prayojanaM svargasukhena kiM me
      shikShAnnashUnyA yadi bhAratIyAH || 30||
IrShAM dveShaM parityajya sahAnyairbhava sodyamaH |
svadeshabandhuvargArthamidamAvashyakaM param || 31||
utthAya dhAraya dhuraM tvaritaM jagatyAM
      jAnAsi jIvitamidaM kShaNabha~NguraM te |
jAto.asi yatkimapi lakShma tyaja svakIyaM
      jAtAH sthitAH kati na vA pashavo mriyante || 32||
bhayaM putra! parityajyAnishamagresaro bhaveH |
nirbhIkA eva shobhante narAH kesariNo yathA || 33||
vimuktyai deshasya prayatanaparo.athAsya jagato
      bhava, tvayyevAste shR^iNu sakalasevAbharadhR^itiH |
udetvantarjyotiH satatamadhijIvAtmanihitaM
      ruchirvedAntasya pratigR^ihamidAnIM pravishatu || 34||

Adau samAlpAvitamastu bhAvai\-
      rAdhyAtmikairarunnatabhArataM naH |
tato.anu sAmAjika rAjakIya\-
      vichAradhArAbhirudetu kAryam || 35||
AjIvanaM bhavata kAryaparA, bhavatsu
      sthitvAdya mR^ityumanu chApi bhavenmamAtmA |
AyAti yAti nanu pArthivajIvanaM no
      nityAni kiM vibhavamAnayashaHsukhAni ? || 36||
dvAveva bhavadAdarshau sevA tyAgastathA tayoH |
ched bhAratena tAdAtmyaM sheShaM sampatsyate svayam || 37||
abhilaShasi yadi tvaM bhArata! svAM samR^iddhiM
      vikira jagati sarvaM ratnajAtaM svakIyam |
aparajanapadebhyaH prAptumichCheryaduchchaM
      grahaNamatha cha dAnaM laukiko dharmamArgaH || 38||
pratyaggatau yadabhavanmama hArdapAtraM
      tIrthaM pavitramadhunA mama bhArataM tat |
pratyAgato.atrajarajaH shirasA vahAmi
      puNyo vahanniha vibhAti kathaM samIraH || 39||

vishvAso balaM cha
anantaM balameva syAtparo dharmaH pareshvaraH |
daurbalyaM parihartavyaM dAsyena cha sahAtmanaH || 40||
balaM jIvanaM durbalatvaM cha mR^ityu\-
      rbalaM shAshvataM syAdalaM siddhibIjam |
balaM saukhyakR^id durbalatvaM cha duHkhaM
      balAnyarjayadhvaM balAnyajayadhvam || 41||
\ldq{}badvo.asmi mUrkho.asmi cha durbalo.asmi\rdq{}
      tvayochyate chettava durbhagatvam |
daurbalyachintA na sakhe vidheyA
      pratyAtmasaMsthaM balamAvirastu || 42||
balaM paraM jIvanamArgadarshakaM
      kriyApradhAne jagatIha sarvashaH |
parityajerdurbalatAnusAratAM
      samudyame sA pratibandhikA yataH || 43||
shraddhatta yUyaM mama vIramitrA\-
      NyatrAgatA unnatakAryahetoH |
kShudrashvashabdAdathavApi vajrA\-
      dabhIravaH karma nijaM kurudhvam || 44||
tejasvino janA addhA shraddhAvanto balAnvitAH |
nirmalAntA apekShyante puruShAstu sapauruShAH || 45||
sarve.api doShAH prabhavantyashakte\-
      rashaktiraMhaHkaraNe.api shaktA |
svArthasya mUlaprabhavo.apyashakti\-
      stayaiva lokAH kalahe pravR^ittAH || 46||
bhrAtarvR^ithAyaM bhavadashrupAta\-
      stvayyeva nAste nihitaM balaM kima ? |
svAM chedvijAnAsi baliShTha! shaktim |
      sarvaM jagattvatpadalagnameva || 47||

sapremabhAvaiH sabalairmanuShyaiH
      satyAnurAgairadhunAsti kAryam |
pratArakaiH kiM kriyate sukAryaM
      tasmAtsakhe darshaya pauruShaM te || 48||
shaityaM kShudhA pArthivajIvanaM cha
      na ki~nchidIsho balanAyako naH |
adamyavishvAsasahAnubhUtI
      AstAM purastAdanishaM purastAt || 49||
kadApi pashchAnna vilokanIyaM
      chintyaM na \ldq{}kartavyapathe patetkaH\rdq{} |
nityaM vayaM bhoH purato vrajAmaH
      kashchitpatatyanyataro.abhyupaiti || 50||
asImadhairyaM cha samudyamashcha
      mahAMshcha kAryakShamatA guNo.api |
Aj~nAkaratvaM militAni santi
      vyakteshcha rAShTrsya yashaskarANi || 51||
apekShyate vyaktibaliShThatAdau
      shraddhAtha lakShyaM prati tatparatvam |
etatsamagraM tvayi vidyate che\-
      tkashchyAvayettvAM nijakAryamArgAt || 52||

tyAgaH dAnashIlatA cha
shrUyatAM nishchite mR^ityAvAdarsho.astu mahAMstava |
varaM mR^ityumukhe vAso mahAdarshasya pAlane || 53||
vikiratitarAM ko.asmiMlloke prakAshaparamparAM ?
      gatayugagato dharmastyAgaH punaH samudeShyati |
jagati sadayAH svAtmotsargaprasaktahR^ido dhruvaM
      bahujanahitashraddhA buddhAH shataM prabhavantapi || 54||
nisvArthaH sarvadA karmaNyadhikaM phalamashnute |
tathA tvAcharaNaM kartuM narA dhairyaM na kurvate || 55||
Aste jIvanameva bha~NguramidaM tuchCho.abhimAnastathA
      yatsAMsArikabhogajAtamakhilaM nAnAvilAsAnvitam |
yo jIvedaparArthasAdhanakR^ite tasyaiva janmojjvalaM
      prANanto.api mR^itopamAH khalu narA ye svArthinaH kevalam || 56||
kalyANAya svarAShTramya sarvasya jagatastathA |
svAtmotsargavidherayanmahatkAryaM na vidyate || 57||
hindo svAbhAvikI shraddhA jIvitaM shAshvataM tava |
tadarthaM chintitaH kasmAtkalyANaM jagatAM varam || 58||
kalyANaM jagatAM vidhAtumanishaM vA~nChanti ye sajjanA\-
      rate sampatsukhalAbhamAnayashasAmIhAM tyajantu drutam |
teShAM poTTalikAM vidhAya sahasA.agAdhe kShipantvambudhau
      kurvantvIshapadAmbujaM svasharaNaM vAkyaM satAmIdR^isham || 59||
audAryaM priyatApi jantuShu bhavenmitreShvamitreShu cha
      svAnte.anantasahAnubhUtiranishaM duHkhAbhibhUte jane |
sadvidyAdhanasampadanvitanare.asUyAnivR^ittistatathA
      doShAviShkaraNAdviraktiraparasyaitatsatAM lakShaNam || 60||

sevA
pratiShThitashchArusharIramandire
      tvayAtmadevaH satataM niShevyatAm |
prabhurna chettvaM prabhumatra sevituM
      prayojanaM te.asti kimanyamandiraiH || 61||

nArIM naraM chAkhilajIvalokaM
      sevasva nArAyaNabhAvatastvam |
dayApradAne nanu ko.asi teShAM
      sevApradAnaM chara dharmamarma || 62||
shivaM sakhe vanditumIhase chiraM
      shivAtmajAnAM kriyatAM samarchanam |
sampUjayedyaH parameshaputrakAn
      sa eva sAkShAjjagadIshapUjakaH || 63||
durbhikShaduHkhagadapIDitalokashokaM
      hartuM prayAta bhuvane bhuvaneshatuShTyai |
prANavyayAdapi janAH sukhinaH kriyantAM
      jAtA hi pashyata vR^ithA shatasho mriyante || 64||
uchchaiH sthitaH karaguhItapaNo vinodA\-
      nmA brUhi \ldq{}bhikShuka gR^ihANa dayAparo.aham |\rdq{}
dAtA bhavatyupakR^ito.atra paraM grahItrA
      saubhAgyametadiha te svasahAyakartuH || 65||
IshaH sthito dalitadurbaladuHkhiteShu
      ye.arhanti sevanamalaM priyabAndhavAste |
tAnmR^igayase kathamoshamanyaM
      ga~NgAtaTe khanitumichChati ko.api kUpam || 66||
yAvajjanAH santi sahasrasho.anye
      shikShAvihInAshcha bubhukShitAshcha |
arthe na teShAM yadi shikShitAH smo
      tadA kR^itaghnAtkhalu dhigdhigasmAn || 67||

durgatAnvIkShya yatsvAntaM dravIbhavati tatkShaNAt |
sa mahAtmA stuteH pAtraM. nirvikArastvasajjanaH || 68||
paropakAraH satkAryaM yadyapi syAtsakAraNaH |
shivaj~nAnAjjIvasevA kAryaM puNyatamaM param || 69||
na kevalaM mUrtiShu vidyate shivaH
      paraM daridreShu cha durgateShu cha |
shubhAkR^itirnirmala ! tatkR^ite kR^itA
      samarchanA sAramato.avadhAryatAm || 70||
yAvajjIvasamaShTikAraNavashAdeko mahAkAshavat
      yAvadvargavibhinnajAtiShu tato yo dInahIneShu cha |
yo duShTeShu cha duHkhiteShu cha punarvyAptaH samAno.anishaM
      tasyArAdhanahetunA janitatau kaShTaM samIhe mahat || 71||

prema tathA niHsvArthatA
mayAnubhUtaM nijajIvane.asmi\-
      nnirvyAjamantaHkaraNaM narANAm |
sadbhAvanA shAshvatikaM cha hArdaM
      jetuM jagatsarvamalaM trayaM syAt || 72||
eko.api yuktastriguNairamIbhiH
      sahasrasho.api chChalanAparANAm |
nR^iNAM pashUnAmapavitramarthaM
      bhave bhavennAshayituM samarthaH || 73||
asmadAshAvalambo.asti hInadInajanAH paraH |
      eta eva nitAntaM hi yAnti vishvAsapAtratAm || 74||

vishvAsastvIshvare kAryI na chChalena prayojanam |
paraduduHkhairduHkhitAnAM bhavedIshaH sahAyakR^it || 75||
bhavyo niHsvArthabhAvo.atra sadAchAro vibhAvyate |
paraM svArthaparatvaM cha durAchAro vichAryate || 76||
vasunA yashasA cha vidyayA
      priyatAyAH saphalatvamApyate |
charitena satA vidAryate\-
      .adamanIyA nanu bhittirApadAm || 77||
sAphalyasya rahasyaM syAdahambhAvAnnivartanam |
tena sid.h{}dhyanti kAryANi prabhAvo.api mahAnbhavet || 78||
vistAro jIvanaM proktaM sa~Nkocho mR^ityureva cha |
sneha evAsti vistAraH svArthaH sa~Nkocha uchyate || 79||
premaiva no jIvanadharma eko
      yaH snihyati prANiti sa prakAsham |
yaH svArthasaktaH sa mR^ito.asti jIvanaM
      snehena mR^ityushchirajIvitatvam || 80||
dhAryate yadvadasmAbhi. shvAsochChvAsena jIvitam |
tathaivAhetukaM prema bhavejjIvanakAraNam || 81||
charitrahInatvamavApya lokA
      dharmaM gataprANamakArpuradya
apArthahArdaM charitaM tvapekShyaM
      sauhArdabhAvaH kulishaprabhAvaH || 82||
pavitratA chetasi dhairyamagryaM
      tathA svadharmAdhyavasAyatA cha |
guNatrayaM syAtsaphalatvahetu\-
      stathApi sarvopari hArdabhAvaH || 83||

shikShA
mAnavAntaHsthitAyAstu pUrNatAyA vikAsitA |
sachChikShA prochyate sadbhirno chechChikShA nirarthikA || 84||
yA svAvalambaM na dadAti shikShA
      \ldq{}shikShAbhidhAnaM\rdq{} kathamApnuyAtsA |
vidyArthinaH pAThagR^iheShvajIrNa\-
      rujAdhunAkrAntatayA vishIrNAH || 85||
sAdhAraNeShvatha punarvanitAsamAje
      shikShAsamaH kimaparo.asti paropakAraH |
vidyAbalaM prasR^itamatra yadA pratIchyAM
      lokonnatiH samabhavatparitastadAnIm || 86||
mastiShkaM paripUritaM yadi bhavedAvedanArAshibhiH
      sambodhAnubhavau vinA pariNamettatkevalaM sa~Nkare |
sA~NkaryeNa bhavedashaktiranishaM nAshonmukhI, tvaM tataH
      shikShAmAshraya sachcharitranaratAdhIpAkavidyAkarIm || 87||

strIshikShA
na syAtstrINAM sudhAreNa vinA saMsArama~Ngalam |
ekapakShAH pakShiNaH kimuDDayante vihAyasi || 88||
svopaj~namArgairmahilAH svakIyAH
      kurvantu sarvAH saralAH samasyAH |
nAnyastadarthaM yatatAM striyaH kiM
      na bhAratIyAH sutarAM samarthAH || 89||
syAdAdyashakterjagato jananyA
      vinonnatiM nonnatiradya nRRINAm |
ityeva hetoH kila rAmakR^iShNai\-
      rgurukR^itA strI paripUjitA cha || 90||
sAvitrI damayantI cha sItA cha janakAtmajA |
AdarshabhUtAstAH santi shR^iNu bhArata! bhAratom || 91||
yasminsamAje kila bhAratIye
      jagatyasAmAnyaguNAnvitAyAH. |
jAtA janiH sA janakAtmajAyA
      jAnAti kartuM lalanAdaraM sA || 92||
AsIt strINAM j~nAnalAbhAdhikAraH
      pUrvaM kasmAdadya tA va~nchitAH syuH |
yadvattyaktA brAhmaNairanyavarNA\-
      stadvannAryashChinnasarvAdhikArAH || 93||
pUrvaM chAsIdagnihotrAdikArye
      sAkaM patyA sthityapekShA vadhUnAm |
adyatve tA hanta nArhanti gehe
      shAligrAmasparshamAtraM vidhAtum || 94||
kutrApi shAstre vihitaM kimasti
      \ldq{}strI j~nAnabhaktyoradhikArashUnyA\rdq{} |
sItA padA~NkAnukR^itiH paraM tat
      samunnateradya visheShamArgaH || 95||
nindanti nArIranishaM narA ye
      tAsAM kR^ite vihitaM kimasti ?
kShiptAH paraM tAH smR^itikArabAlaiH
      \ldq{}svAtantryahInA\rdq{} \ldq{}narakasya panthAH\rdq{} || 96||
yadi syurghR^iNitAH kITA iva nAryastataH katham |
manunoktaM yatra nAryaH pUjyante tatra devatAH || 97||
pAshchAttyakR^ityanukR^itiryadi bhAratasya
      nArIjanena vihitA tyajatA svalakShyam |
tAbhiH sahaiva bhavitA.avanatirnarANAM
      sarvo bhaviShyati punarviphalaH prayatnaH || 98||

dharmaH
na ko.api dharmo \ldq{}naradivyabhAvaM\rdq{}
      yathochchakairgAyati hindudharmaH |
sa eva chitraM bata! durbaleShu
      pAdaprahAra kurute nitAntam || 99||
Adarshe.asmi~njIvane mAnavAnAM
      shikShA bhaktij~nAnayogatrayasya |
dharmANAM sallakShyametatsameShAM
      vedAntastatsiddhaye syAtsamarthaH || 100||
sparshAsparshau nAsti hindutvachihnaM
      saMskAro.ayaM kevalaM nindanIyaH |
dR^iShTaM nAma kvApi shAstrapramANaM
      sAmAjikyAstUnnatervighna eShaH || 101||
na dharmadoSho.astyathavAtra ko.api
      pAkhaNDino yachChalanAparAshcha |
parArthanAmnA vividhairupAyaiH
      pratArayanti chChalashUnyachittAn || 102||
purANadharmAttu purohitAnAM
      tyAgAdbhaveduttamahindudharmaH |
tenAtha pAshchAtyasamAjavargaH
      prabhAvitaH syAditi nishchayo me || 103||
dharmaM vinAsmAkasamAjavargo
      bhavedaraNyaM pashubhirvikIrNam |
bhogA vilAsA na manuShyadharmo
      j~nAnaM paraM jIvanasAdhyamuchchaiH || 104||
dharmastvalaukikopAyaH pashuryena narAyate |
narAshchApIshvarAyante vinA dharmaM naraH pashuH || 105||
pratyakShaM shAshvataM yatprakaTayati punarjIvanaM mAnavAnAM
      j~nAnAdaj~nAnasAndraM pashumapi manujaM drAkkaroti prabhAvAt |
taM sAkShAdIshvare.ayaM vipariNamayati svendrajAlAdivAnte
      dharmaH kiM kiM na kuryAjjagadupakR^itaye kalpavR^ikSheNa tulyaH || 106||
sarvagaM paramaM tattvaM nAsi ched draShTumIshvaraH |
adhyAtmaj~nAnasUryasya nodayastava mandire || 107||

tvayIshvaro yaH sakale.api vidyate
      na budhyate chediyamaj~natA tava |
samagramekaM yadi bhinnatA kutaH
      paraM hitatvaM prati jIvamandiram || 108||
\ldq{}IshvaraH khalu jagatpitA\rdq{} svayaM
      prArthanAsu bhavatedamuchyate |
pratyahaM vyavahR^itau paraM paraM
      manyase na kimiti svabAndhavam || 109||
tvamaMshabhUto.asyavinAshivastunaH
      samaShTireShApyavinAshinI matA |
ataH svakIyAM prakR^itiM vibhAvayan
      samaShTisevAmiha kartumarhasi || 110||
mAnave mAnave mAnyA divyatA yAditaH sthitA |
prakaTIkaraNaM tasyA dharma ityuchyate budhaiH || 111||
nochchairvAdA nApi siddhAntadhArA
      nApyasmAkaM chArunAnAmatAni |
dharmaH, kintu svAnubhUteravAptiH
      kiM chaitasyAH kAryajAte prakAshaH || 112||
mUrtirgranthA mandire prArthanAyAH
      siddhiprAptyai kevalaM santyupAyAH |
sAkShAtkAraH svAtmano divyatAyA
      uchchairdhyeyaM yA hi nityaM purastAt || 113||
yadA santoShaH syAtkShaNikasukhatuchChena jagatA
      ghR^iNA dR^iShTvA loke kapaTaparipUrNA vyavahR^itim |
yadA cha dveShaH syAdanR^itavachane nAstikajane
      tadA dharmApekShaM bhavati khalu sashraddhahR^idayam || 114||
avApya j~nAnamIshasya chintanaM tasya nityashaH |
pratyakShaM tena sambhAShA prochyate dharmalakShaNam || 115||
snehaH sampUrNasaMsAre sthitaprANiShu nirmalaH |
udAratA tathA teShu dharmasya nikaShaH smR^itaH || 116||
pAvitryaM nirmalatvaM sukR^ititatiratiH sarvabhUtAnukampA
      dharmasyaikasya sampanna khalu samabhavan kiM cha sarvatra santaH |
\ldq{}anye lupyantu dharmA mama bhavatu punaH sarvadharmapradhAno\rdq{}
      yadyevaM ko.api vA~nChatyakhilajanadayApAtrametaM dhigastu || 117||
shrUyatAmadhunA mitra! dharma\-bhedo vina~NkShyati |
sarvadharmapatAkAsu va~nchanaM likhitaM bhavet || 118||
\ldq{}sahayogo virodho na\rdq{} \ldq{}svIkR^itirna vinAshanam\rdq{} |
\ldq{}shAntiH samanvayashchApi\rdq{} \ldq{}na kalirna mate bhidA\rdq{} || 119||
matAni shAstrANi cha mandirANi
      kriyAkalApAH samanuShThitishcha |
yada~NgabhUtAni sa muktilAbho
      dharmasya sarvasvamidaM bruvanti || 120||
dharmAshrayaM tvaM kalahaM na kuryA
      aj~nAnamUlaH kalaho.anishaM syAt |
asAratattvAshrayameva nUnaM
      kiM dhArmikasyAsti kalerna bIjam || 121||
pAvitryamAdhyAtmikatA vidhAtuM
      svaM nIrasaM dUramito yadaiva |
tadaiva dharme kalahA bhavanti
      bhavatyashAntishcha jagatyanantA || 122||
na vaidikAstAntrikAshcha na cha vedAntino vayam |
paurANikAstathA na smaH kevalaM \ldq{}spR^isha mA\rdq{} vayam || 123||
dharmo.asmAkaM shiShyate pAkagehe
      devo.asmAkaM pAkapAtrasvarUpaH ! |
dhyeyaM chAste \ldq{}mA pavitraM spR^ishermA\rdq{}\-
      mitthaM sarve svAtmanAshaM vrajAmaH ! || 124||
dharmopadeshastu bubhukShitAnAM
      vaidheyatA syAdatha vA pramAdaH |
riktodarANAM kimu dharmabhAvaH ?
      kShutpIDitAMstoShaya bhojanena || 125||
vyaShTeryathA jIvanalakShyamekaM
      tathA samaShTerapi nishchitaM syAt |
a~NgIkR^itaM bhAratavAsibhirya\-
      llakShyaM purA tairna kR^itaH pramAdaH || 126||
vividham
bhAratamahimA
prAchyAM tu bhAratAdeva sarvaM prAchInakAlataH |
prasasArAtra saMsAre prItirj~nAnaM tapaH shivam || 127||
dharmasyAvAsabhUmiH prabhavapadamidaM nityasho darshanAnAM
      nAnAvIraiH sudhIrairaviratamavanAtsvastikAlAdanAdeH |
vishvapremaprakarShaH prakR^itimadhurimA mArdavaM bhAvanAnA\-
      mebhirlokasya kartuM prabhavati satataM netR^itAM bhArataM naH || 128||
AghAtapratighAtasa~NkaTashatairudyatsamAjaprathA\-
      chArANAM tatibhishcha sa~NkulamabhUdAkrAntametyAribhiH |
Aste prANabalAnvitaM tadapi yattu~NgAdrishR^i~NgopamaM
      manye bhAratajIvanaM khalu jagatyAdyantashUnyaM dhruvam || 129||

na j~nAto grIsadesho.abhavadavanitale romavArtApi nAsIt
      yUropasthAshcha lokA gahanavanagatA dIrghamAsannasabhyAH |
dhvAntachChannetihAsaM jagadidamakhilaM, durbalA kiMvadantI
      tatrAsIdachchashailasthirataravasatiH saMskR^itirbhAratIyA || 130||
AdarshAnAM janmabhUrvishratAnAM
      sadbhAvAnAmAkaro bhArataM naH |
asmAdevAdhyAtmikaj~nAnadhArA\-
      pUraH pUrvaM prasthitau.abhUjjagatyAm || 131||
saMsAre punarapyasminpUro.ayaM prasariShyati |
navajIvanasa~nchAro dhruvaM yena bhaviShyati || 132||
kA puNyabhUmiruchitA jagatItale.asmin
      kiM sthAnamatra paramIshvaralAbhasid.h{}dhyai ? |
nRRINAM cha karmaphalabhogapadaM kimAste ?
      tatrottaraM shR^iNuta bhAratabhUriyam || 133||
kShetraM kimasti balashIladayAguNAnA\-
      mantardR^isho.apyajani yatra paro vikAsaH |
jAtA cha yatra paramAtmavichAracharchA
      tatrottaraM shR^iNuta bhAratabhUriyaM naH || 134||
mahAmahimamaNDitA bhavati bhAratI bhUH purA
      samujjvalatarA dhruvaM sa samayo.achirAdeShyati |
gR^ihItajanuSho.atra saMshrutamaharShayaH pUrvavat
      samagrajagato janAn supathagAnvidhAsyanti te || 135||

(bandhusevA)
AnanditA bhavata bAndhavasevanArthaM
      yuShmAbhireva madhuro.avasaro.adya labdhaH |
AplAvitaM ta yena jagatsamagraM
      vR^iddhiM sa yAti khalu dharmasamudrapUraH || 136||
niHsvAnnityaM duHkhitAnIshaputrAn
      ye sevante pApinastApinashcha |
teShAM jihvAgrasthitA bhAratI syAd
      devI chAste mAnase shaktirUpA || 137||
parArthaM tyaktasarvasvo muktastiShThati mAnavaH |
ito bhraShTastato bhraShTo \ldq{}muktirme syAditi bruvan\rdq{} || 138||

(dharmamahattA)
dharmaH paro bhAratapuNyabhUmau
      jAtIyashakteravalambarUpaH |
deshasya no jIvanagItashAstre
      dharmaH pradhAnasvaratAmupaiti || 139||
nArhA vayaM tyaktumataH svadharma\-
      mAdarshabhUta\-svabalaM kadApi |
asAvadhAnA yadi taM tyajema
      pratikriyA tasya bhavedadamyA || 140||

(bhAratasya avanatiH)
yasmindine \ldq{}mlechCha\rdq{}padaM prasiddhaM
      ChinnaM vijAtIyajanaiH sakhitvam |
tasmindine bhAratabhAgyasUryo\-
      .apyastAchalaM gantumiva pravR^ittaH || 141||

(karma akarma cha)
AtmabhAvavikAsasya kAraNaM karmasa.nj~nitam |
anAtmabhAvo yena syAt tadakarmeti saMsmR^itam || 142||
sabalAH kAryakartAro vishvaM jetumalaM dasha |
sahasrasho.api vaidheya na samarthA bhavanti te || 143||
pashunaratvamApnoti satkarmavashataH param |
naraH pashutvaM labhate.asatkarmavashato.avashaH || 144||

(strI\-mahimA)
jAtAnyajAtiShu jagatyabalonnatiryA
      sA yoShitAM kila suyogyapadasya lAbhAt |
yAdhogatishchiramabhUdiha bhArate.asmin
      sA shaktirUpamahilAsu nirAdareNa || 145||

(mAnavonnatiH)
samAnAdhikArA janA jIvane syuH
      paraM duHkhitA janmato jAtibhedAt |
ataH karmaNo varNa ityeva satyaM
      samAjonnatAvasti dharmochchatattvam || 146||
ayi! kaThorataraM khalu jIvanaM
      tanutaraM kShaNajIvi cha tatphalam |
pihitamasti tavAgramathAprabhaM
      tadapi dhIratayAgrasaro bhaveH || 147||

uttiShTha jAgR^ihi drAktvaM svaprenAlaM tavAdhunA |
svalakShyaprAptiparyantamudyamaM na parityajeH || 148||
sahAnubhUteratha kAryashakte\-
      rabhAva evAsti vipannidAnam |
doShaM tamAdau parihR^itya shIghraM
      kuruShva kAryakShamamAtmadeham || 149||
asImashaktirnihitA shivena
      vyaktau, vijAnAti naraH kathaM tAm |
sarve.api tulyAvasaraM labhantAM
      balIyasItaH parameshvarechChA || 150|||
vijayaH prakR^iterasyA mukhyaM lakShyaM nR^ijanmanaH |
na jAto manujo jAtu gantuM prakR^itidAsatAm || 151||
sashraddhakarmaThajanasya sasImabud.h{}dhyA
      vij~nAnabhautikavichAravashAlatAyAH |
kartuM samanvayamahaM hR^idayaM samIhe
      gambhIramabdhiriva yachcha nabho vishAlam || 152||
sukhaM narANAM purato.abhyupaiti
      prAyo vipachChekharitottamA~Ngam |
prayojanaM yasya sukhena tasmA\-
      tsa tatparaH syAdvipado.anugantam || 153||
kalyANamadhyAtmasamAjanIti\-
      traye.avalambeta vishuddhabhAvam |
sarveShu desheShvatha sarvakAle\-
      ShvabhinnatA smAsu cha bAndhaveShu || 154||

(j~nAnamahimA)
gamyamuchchatamaM tattvaM jIvanasya shrutaM smR^itam |
tattvamanveShaya bhrAtaH! dhruvaM lAbho bhaviShyati || 155||
j~nAnaM paraM pratigR^ihaM pravisheditItthaM
      chakraM pravartayitumichChati mAnasaM me |
yena striyashcha puruShAshcha jagatyamuShmin |
      svAtmeShunirNayavidhiM paribhAvayantu || 156||

(sevAbhAvaH)
yathAhaM bhAratIyo.asmi tathA saMsArasevakaH |
sandehakalpanAjAlaprasAro.atra nirarthakaH || 157||

(sadAchAraH)
AchAravAn bhava suhR^id balavAnkR^itAnta\-
      syAhvAnato.api gatabhIramalAntarastvam |
vyarthaiva dhArmikavivAdaparamparA.a.aste
      duShkarmajAtamiti kAtarakAryametat || 158||

(satyaM upakArashcha)
apakArAdupakAro.asatyAdapi chAtirichyate satyam |
anantaguNametatkhalu yasyAste tasya jIvitaM saphalam || 159||

(bhAratonnatiH)
bhAratAbhyudayo.avashyaM bhaviteshavidhAnataH |
aruNodayavelAsAvutthAtavyaM gatA nishA! || 160||

(balamahattA)
shuShkAd gItApAThAtpadakandukakhelanaM tu bhadrataram |
shaktermahatyapekShA, gItApaThanaM bhavettataH saphalam || 161||

(vyaktimahattA)
bhrAtastvamehi balavAnanubhUya \ldq{}sohaM\rdq{}
      bhasmIbhaviShyati manomalinatvamasmAt |
jAgarti shaktiranishaM tviha yA prasuptA
      tvaM cha prachaNDadalamUrtiriva svayaM syAH || 162||

(dalitavargaH)
shramikA bhAratasyaite dalitAshchirakAlataH
apUrvakAryakartAro.apyahaM tAnabhivAdaye || 163||
daridrANAM kuTIreShu bhArataM vasati dhruvam |
paramunnataye teShAmasmAbhirvata kiM kR^itam ? || 164||
sAMsArikeShu viShayetaShu bhavantyasuj~nA
      niHsvA janAstadapi durjanatAvihInAH |
te santi shraddhahR^idayAshChalashUnyabhAvA
      hiMsAvichArarahitA hitakAryasaktAH || 165||
nimnA janA jetR^inipIDanena
trastAH svakIyairavamAnitAshcha |
chirAtsvakAryaprasitAstathApi
      shramasya nApuH phalamadya yAvat || 166||

(purANAbhimAnaH)
kechidvadantyavanateH kila kAraNaM no
      vyarthaM mamatvamatipUrvaparamparAsu |
j~nAtaM bhayA paramidaM viparItameva
      tyAgaH purANavibhavasya mahAnpramAdaH || 167||

(hanUmadAdarshaH)
sarvadAstu tavAdarsho hanUmAnbalavAnsudhIH |
jIvitaM maraNaM vAstu sa na dadhyau jitendriyaH || 168||

(j~nAnI bhaktashcha)
agAdhapremahR^idayo.advaitAnubhavavAnsvayam |
j~nAnIshvareNa tAdAtmyavAMshcha bhakto nigadyate || 169||
nindako j~nAnino bhakto j~nAnI bhaktasya nindakaH |
dvAvapyetau matau dhUrtau na bhedo j~nAnibhaktayoH || 170||

(IshvaraH)
yadIshvarasya sattAyAM vishvAso vidyate tava |
pade pade tatsmR^itiH syAtsmR^itireveshasevana || 171||
yadIshvaraH syAnnaradehadhArI
      hAnirbhavetkiM tadanantashakteH ?
chaitanyarUpasya sharIralAbho
      na bAdhakaH syAttadanantatAyAm || 172||

(bhaktiH)
bhaktinirantaramasau manujAntarasthA
      yA kAmakA~nchanapidhAnavashAdadR^ishyA |
dUrIkuru tvamidamAvaraNaM kShaNena
      svAntaH sthitAtha bhavati svayameva dR^ishyA || 173||

(bandhaH)
sauvarNo vApyAyaso vAstu bandha\-
      shchChedyo, dvandvaM dveSharAgAdyapAsyam |
haimo bandho.apyastu tulyaH kaThoro
      dAso dAsaH pUjitastADito vA || 174||

(muktiH)
anveShTavyA kutra muktiH sakhe! sA
      labhyA nehAmutra vA mAndire vA |
shAstragranthe vA na mA duHkhito bhU
      ryasmAdekastvaM tadAlambabhUbhiH || 175||

(upAsanA)
anuShThAnAni shAstrANi sampradAyAstathaiva cha |
sAkShAtkArasya sid.h{}dhyarthaM sAdhanAnIva kevalama || 176||

(ahambhAvaH)
dehamAnasasaMyogAdahambhAvodbhavo bhavet |
\ldq{}jAnAmI\rdq{}tyupalabdhistu pramANaM syA\rdq{}dahaM\rdq{}sthitau || 177||

(vedamahattA)
dR^iShTo virodho yadi vedavAkyaiH
      shAstraM purANaM na bhavetpramANam |
vishve.atra vedAnanubhAsitaM ya\-
      jjAnIhi vedodbhavameva sarvam || 178||

(shikShAprachAraH)
shikShA\-saMsthA\-mAdhyamena prachAraH
      kartavyaH syAllokasAdhAraNena |
gatvA pashchAttairitaH pratyagAraM
      boddhavyAH syurbAndhavA nirdhanAste || 179||

(mUrtipUjA)
sAkShAdiyaM chenna vimuktihetu\-
      stathApi nindyA na hi mUrtipUjA |
advaitabodhAgamasAdhyasiddhi\-
      yogyaM manaH sA kurute janAnAm || 180||

(adhyAtmam)
narasya divyAM prakR^itiM purastA\- 0
      duddhAryya tajjIvanakAryavR^inde |
praveshanIyaM kathamityupAyaH
      sa~NkShepato lakShyamidaM madIyam || 181||
adhyAtmatattvavibhavasya bhuvi prasAro
      nityaM vidheya iti bhAratadharmakAryam |
yadgrIka\-hUNa\-shaka\-moghala\-turkayAnaiH
      sampIDitaM bhavadapi sthirasaMvidAste || 182||
vaij~nAnikAviShkR^itimAtramasmin
      kathaM jagatyarhati sabhyatAkhyAm |
manuShyajAtau kiyatIshvarasya
      vyaktiH pramANaM khalu sabhyatAyAH || 183||
AtmAvyaktabrahma sarvo.api bAhyaH
      svAntaHsaMstho yaH prakR^ityantarAyaH |
taM saMyamya brahmabhAvaprakAsho
      lakShyaM loke jIvanasyochchamAste || 184||
karmopAstij~nAnachetojayAnA\-
      mekopAyenAtha vA tairanekaiH |
vyaktIkR^itya svAtmano divyarUpaM
      mukterlAbhaM kartumarhasyanantam || 185||
naya tvaM mAmamba! tvaritamatidIptaM parapadaM
      nishAnAtho yasmindyumaNirapi khadyotasadR^ishaH |
vR^ithA svapnAnetAMstiraya mama lIlAntasamaye
      vibhidyedaM dIrghaM nigaDamadhunA mochaya sutam || 186||
vyaShTiH paraM brahma vibhAga shUnyaM
      mAyAvashAdeva pR^ithaktvameti |
mAyApi chaikIbhavituM svabhAvA\-
      ttadbhedashUnyaM yatate prayAtum || 187||
\ldq{}ahaM\rdq{} pUrNashaktiprakAshasvarUpaM
      tathA bhAvaneyaM jananai\rdq{}rj~nAna\rdq{}muktam |
svarUpaM tu sApekShametena siddhaye\-
      dapekShAyutA shuddhasaMvitkR^itaH syAt ?|| 188||
j~nAnAtItA pUrNatA satsvabhAvA
      j~nAnAj~nAne pUrNatAMshasvarUpe |
sApekShatvaM pUrNatAto.asti nIchai\-
      raj~nAnena j~nAnametAdR^ishaM syAt || 189||
bandhanAtsadasatorvimochanaM
      muktirityabhihitA manIShibhiH |
astu haimamathavApyayomayaM
      vastutastu nigaDaM taduchyate || 190||
mAyA sAdiranAdirvA sAntA sA vyaShTirUpataH |
samaShTirUpato.anantA tathAnAdishcha manyate || 191||
vastvekameva na dvaitaM chaitanyaM vApyachetanam |
aj~nAnAkhyA paraM mAyA dvaitabhedakarI bhavet || 192||
Adau yadA syAdviShayAkShayogo
      na dvaitabodhasya tadAvakAshaH |
kShaNe dvitIye savikalpabhAnaM
      satyAdisaMvitkhalu nirvikalpA || 193||
ghanAndhakAraH parito visarpan
      dR^iShTiM vilumpannayamantametu |
mR^ityorna yanmR^ityumathAbhilAShaH
      \ldq{}sva\rdq{}\-nAshako nashyatu dIrghashAntyai || 194||
eko muktaH sarvavedyasya vettA,
      nAmnA rUpeNApi hInaH samAnaH |

sAkShI sarvasvapnajAtasya bIjaM
      mAyAdhAro vishvarUpo.ayamAtmA || 195||
tAto mAtA putrajAye cha mitraM
      svapnaM sarvaM nAsti ki~nchidyathArtham |
yadyekastvaM kaH pitA kashcha mitraM
      tvatto bhinnaM nAsti sarvaM tvameva || 196||
AdhyAtmikatvaM khalu naH samAje
      raktapravAho.amalajIvanasya |
ojo.anvito yAvadasau pravAho
      niShkaNTakastAvadayasya panthAH || 197||
na ko.apyabhAvaH paripIDayenno
      daridratA mAnasadurbalatvam |
adhyAtmadharmAshrayatAsti yAva\-
      nnAshonmukhaM syAtkimu bhArataM naH || 198||
shuddho.asi pUrNo.asi balAnvito.asi
      yadasti pApaM na tavAsti ki~nchit |
daurbalyachintA na sakhe vidheyA
      pratyAtmasaMsthaM balamAvirastu || 199||
kadApyuchchairgachChansamayajaladhervIchivashato
      luThannIchaistUrNaM tadapi nijadhArAmanusaran |
itaH shrAnto mAtaH kShaNikasukhaduHkhAtmajagata\-
      stathA dUrAd draShTuM paramaparatIraM tvaparataH || 200||

(janatAjanArdanaH)
tvatsammukho vividharUpadharo ya Isha\-
      staM santyajannu kuha mArgayase vR^ithaiva |
yaH snehatatparamanAH khalu jIvavR^inde
      jAnAti sevitumasAvanishaM paresham || 201||

(svAmijIvanalakShyam)
jIrNaM vastramiva tyajAmi sukhatastUrNa svakIyaM vapuH
      pUrNaM kartumathApi kAryamanishaM loke yatiShye dhuvam |
yAvadbrahmamayaM samagramiti na j~nAnaM jagatyAM janaiH
      tAvatprerayituM prayatnaparatA manye madIyaM tapaH || 202||

(samarpaNam)
svAmishabdairvirachyedaM navyaM shlokashatadvayam |
tvadIyaM vastu bhagavan! tubhyameva samarpaye || 203||

iti sAhityAchArya\-em0e0\-bhaNDArakaropAhva tryambakasharmaNA
virachitA shrIsvAmivivekAnandopadeshadvishatI samAptA |
##
Encoded and proofread by Sunder Hattangadi

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}