% Text title : Aryatarasragdhara Stotram % File name : AryatArAsragdharAstotram.itx % Category : devii, devI, buddha, stotra % Location : doc\_devii % Transliterated by : DSBC staff % Proofread by : Miroj Shakya % Acknowledge-Permission: Prof. Miroj Shakya, Text Nagarjuna Institute of Exact Methods, Digital Sanskrit Buddhist Canon Project, University of the West https://www.dsbcproject.org/ % Latest update : March 8, 2025 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Aryatarasragdhara Stotram ..}## \itxtitle{.. AryatArAsragdharAstotram ..}##\endtitles ## namastArAyai | bAlArkAlokatAmrapravarasurashirashchAruchUDAmaNishrI\- sampatsamparkarAgAnatichirarachitAlaktakavyakta bhaktI | bhaktyA pAdau tavArye karapuTamukuTATopabhugnottamA~Nga\- stAriNyApachCharaNye navanutikusumasragbhirabhyarchayAmi || 1|| durla~Ndhye duHkhavahnau vinipatitatanurdurbhagaH kAndishIkaH kiM kiM mUDhaH karomItyasakR^idapi kR^itArambhavaiyarthyakhinnaH | shrutvA bhUyaH parebhyaH kShatanayana iva vyomni chandrArkalakShmI\- mAlokAshAnibaddhaH paragatigamanastvAM shraye pApahantrIm || 2|| sarvasmin sattvamArge nanu tava karuNA nirvisheShaM pravR^ittA tanmadhye tadgraheNa grahaNamupagataM mAdR^ishasyApyavashyam | sAmarthyaM cha dvitIyaM sakalajagadaghadhvAntatigmAMshubimbaM duHkhyevAhaM tathApi pratapati dhigaho duShkR^itaM durvidagdham || 3|| dhigdhi~N mAM mandabhAgyaM divasakararuchApyapraNUtAndhakAraM tR^iShyantaM kUlakachChe himashakalashilAshItale haimavatyAH | ratnadvIpapratolyA vipulamaNiguhAgehagarbhe daridraM nAthIkR^ityApyanAthaM bhagavati bhavatIM sarvalokaikadhAtrIm || 4|| mAtApi stanyahetorviruvati tanaye khedamAyAti putre krodhaM dhatte pitApi pratidivasamasatprArthanAsu prayuktaH | tvaM tu trailokyavA~nChAvipulaphalamahAkalpavR^ikShAgravallI sarvebhyo.abhyarthitArthAn visR^ijasi na cha te vikriyA jAtu kAchit || 5|| yo yaH klaishaughavahnijvalitatanurahaM tAriNI tasya tasye\- tyAtmopaj~naM pratij~nAM kuru mayi saphalAM duHkhapAtAlamagne | vardhante yAvadete paruShaparibhavAH prANinAM dukhavegAH samyaksambuddhayAne praNidhidhR^itadhiyAM tAvadevAnukampA || 6|| ityuchchairurdhvavAhau nadati nutipadavyAjamAkrandanAdaM nArhatyanyo.apyupekShAM janani janayituM kiM punaryAdR^ishI tvam | tvattaH pashyan pareShAmabhimatavibhavaprArthanAH prAptakAmA dahye sahyena bhUyastaramaratibhuvA santatAntarjvareNa || 7|| pApI yadyasmi kasmAttvayi mama mahatI barddhate bhaktireShA shrutyA smR^ityA cha nAmnApyapaharasi haThAtpApamekA tvameva | tyaktavyApArabhArA tadasi mayi kathaM kathyatAM tathyakathye pathyaM glAne mariShyatyapi vipulakR^ipaH kiM bhiShag rorudhIti || 8|| mAyAmAtsaryamAnaprabhR^itibhiradhamaistulyakAlakramAchcha svairdoShairvAhyamAno maThakarabha ivAnekasAdhAraNAMshaH | yuShmatpAdAbjapUjAM na kShaNamapi labhe yattadarthe visheShA\- deShA kArpaNyadInAkSharapadarachanA syAnmamAvandhyakAmA || 9|| kalpAntodbhrAntavAtabhramitajalachalallolakallolahelA\- sa.nkShobhotkShiptavelAtaTavikaTachaTatsphoTamoTTATTahAsAt | majjadbhirbhinnanaukaiH sakaruNaruditAkrandaniShpandamandaiH svachChandaM devi sadyastvadabhinutiparaistIramuttIryate.abdheH || 10|| dhUmabhrAntAbhragarbhodbhavagaganagR^ihotsa~Ngari~Ngatsphuli~Nga\- sphUrjajjvAlAkarAlajvalanajavavishadveshmavishrAntashayyAH | tvayyAbaddhapraNAmA~njalipuTamukuTA gadgadodgItayAchShAH prodyadvidyudvilAsojjvalajaladajavairAdhriyante kShaNena || 11|| dAnAmbhaHpUryamANobhayakaTakaTakAlambirolambamAlA\- hU~NkArAhUyamAnapratigajajanitadveShavahnerdvipasya | dantAntottu~NgadolAtalatulitatanustvAmanusmR^itya mR^ityuM pratyAchaShTe prahR^iShTaH pR^ithushikharashiraHkoTikoTTopaviShTaH || 12|| prauDhaprAsaprahAraprahatanarashiraHshUlavallyutsavAyAM shUnyATavyAM karAgragrahavilasadasispheTakasphItadarpAn | dasyUn dAsye niyu~Nkte sabhR^ikuTikuTilabhrUkaTAkShekShitAkShAM\- shchintAlekhanyakhinnasphuTalikhitapadaM nAmadhAma shriyAM te || 13|| vajrakUraprahAraprakharanakhamukhotkhAtamattebhakumbha\- shchyotatsAndrAsradhautasphUTavikaTasaTAsa~NkaTaskandhasandhiH | krudhyannApitsurArAdupari mR^igaripustIkShNadaMShTrotkaTAsya\- strasyannAvR^itya yAti tvaduchitarachitastotradigdhArthavAchaH || 14|| dhUmAvartAndhakArAkR^itivikR^itaphaNisphAraphUtkArapUra\- vyApAravyAptavaktrasphuradururasanArajjukonAshapAshaiH | pApAtsambhUya bhUyastavaguNagaNanAtatparastvatparAtmA dhatte mattAlimAlAvalayakuvalasragavibhUShAM vibhUtim || 15|| bhartR^ibhrUbhedabhItodbhaTakaTakabhaTAkR^iShTaduHshliShTakesha\- shcha~nchadvAchATacheTotkaTaraTitakaTugranthipAshopagUDhaH | kShuttR^iTkShAmopakaNThastyajati sa sapadi vyApadaM tAM durantAM yo yAyAdAryatArAcharaNasharaNatAM snigdhabandhUjjhito.api || 16|| mAyAnirmANakarmakramakR^itavikR^itAnekanepathyamithyA\- rUpArambhAnurUpapraharaNakiraNADambaroDDAmarANi | tvattantroddhAryamantrasmR^itihR^itaduritasyAvahantyapradhR^iShyAM pretaprotAntratantrInichayavirachitasra~nji rakShAMsi rakShAm || 17|| garjajjImUtamUrtitrimadamadanadIbaddhadhArAndhakAre vidhuddyotAyamAnapraharaNakiraNe niShpatadbANavarShe | ruddhaH sa~NgrAmakAle prabalabhujabalairvidviShadbhirdviShadbhi\- stvaddattotsAhapuShTiH prasabhamarimahImekavIraH pinaShTi || 18|| pApAchArAnubandhoddhR^itagadavigalatpUtipUyAsravisra\- tva~NmAMsAsaktanADImukhakuharagalajjantujagdhakShatA~NgAH | yuShmatpAdopasevAgadavaraguTikAbhyAsabhaktiprasaktA jAyante jAtarUpapratinidhivapuShaH puNDarIkAyatAkShAH || 19|| vishrAntaM shrautapAtre gurubhirupahR^itaM yasya nAmnAyabhaikShyaM vidvadgoShThIShu yashcha shrutadhanavirahAnmUkatAmabhyupetaH | sarvAla~NkArabhUShAvibhavasamuditaM prApya vAgIshvaratvaM so.api tvadbhaktishaktyA harati nR^ipasabhe vAdisiMhAsanAni || 20|| bhUshayyAdhUlidhUmraH sphuTitakaTitaTIkarpaToddyotitA~Ngo yUkAyUMShi prapiMShan parapuTapurataH karpare tarpaNArthI | tvAmArAdhyAdhyavasyan varayuvativahachchAmarasmerachArvI\- mUrvI dhatte madAndhadvipadashanaghanAmuddhR^ittaikAtapatrAm || 21|| sevAkarmAntashilpapraNayavinimayopAyaparyAyakhinnAH prAgjanmopAttapuNyopachitashubhaphalaM vittamaprApnuvantaH | daivAtikrAmaNIM tvAM kR^ipaNajanajananyarthamabhyarthya bhUme\- rbhUyo nirvAntachAmIkaranikaranidhIn nirdhanAH prApnuvanti || 22|| vR^ittichChede vilakShaH kShatanivasanayA bhAryayA bhartsyamAno dUrAdAtmambharitvAt svajanasutasuhR^idbandhubhirvarjyamAnaH | tvayyAvedya svaduHkhaM turagakhuramukhotkhAtasImnAM gR^ihANAM IShTe svAntaHpurastrIvalayajhaNajhaNAjAtanidrAprabodhaH || 23|| cha~NkraddikchakrachumbisphuradurukiraNA lakShaNAla~NkR^itA strI\- ShaTdanto dantimukhyaH shikhigalakaruchishyAmaromA varAshvaH | bhAsvadbhAsvanmayUkho maNiramalaguNaH koShabhR^it svarNakoShaH senAnIrvIrasainyo bhavati bhagavati tvatprasAdAMshaleshAt || 24|| svachChandaM chandanAmbhaHsurabhimaNishilAdattasa~NketakAntaH kAntAkrIDAnurAgAdabhinavarachitAtithyatathyopachAraH | tvadvidyAlabdhasiddhirmalayamadhuvanaM yAti vidyAdharendraH kha~NgAMshushyAmapInonnatabhujaparighaprollasatpArihAryaH || 25|| hArAkrAntastanAntAH shravaNakuvalayasparddhamAnAyatAkShyo mandArodAraveNItaruNaparimalAmodamAdyaddvirephAH | kA~nchInAdAnubandhoddhatataracharaNodArama~njIratUryAs tvannAthAn prArthayante smaramadamuditAH sAdarA devakanyAH || 26|| ratnachChannAntavApIkanakakamalinIvajraki~njalkamAlAM unmajjatpArijAtadrumamadhupavadhUddhUtadhUlIvitAnAm | vINAveNupravINAmarapuraramaNIdattamAdhuryatUryAM kR^itvA yuShmatsaparyAmanubhavati chiraM nandanodyAnayAtrAm || 27|| karpUrailAlava~NgatvagagurunaladakShodagandhodakAyAm | kAntAkandarpadarpotkaTakuchakuharAvartavishrAntavIchyAm | mandAkinyAmamandachChaTasalilasaritkrIDayA sundarIbhiH krIDanti tvadgatAntaHkaraNapariNatottaptapuNyaprabhAvAH || 28|| gIrvANagrAmaNIbhirvinayabharanamanmaulibhirvanditAj~naH svargotsa~Nge.adhirUDhaH surakariNi jhaNadbhUShaNodbhAsitA~Nge | shachyA dordAmadolAviralavalayitoddAmaromA~nchamUrtiH pUtastvaddR^iShTipAtairavati suramahIM hIrabhinnaprakoShThaH || 29|| chUDAratnAvataMsAsanagatasugatavyomalakShmIvitAnaM prodyadbAlArkakoTIpaTutarakiraNApUryamANatrilokam | prauDhAlIDhaikapAdakramabharavinamadbrahmarudrendraviShNuM tvadrUpaM bhAvyamAnaM bhavati bhavabhayachChittye janmabhAjAm || 30|| pashyantyeke sakopaM praharaNakiraNodgIrNadordaNDakhaNDa\- vyAptavyomAntarAlaM valayaphaNiphaNAdAruNAhAryacharyam | dviShTavyatrAsihAsoDDamaraDamarukoDDAmarAsphAlavelA\- vetAlottAlatAlapramadamadamahAkelikolAhalogram || 31|| kechittvekaikaromodgamagatagaganAbhogabhUbhUtalastha\- svasthabrahmendrarudraprabhR^itinaramarutsiddhagandharvanAgam | dikchakrAkrAmidhAmasthitasugatashatAnAntanirmANachittaM chitraM trailokyavandayaM sthirachararachitAsheShabhAvasvabhAvam || 32|| lAkShAsindUrarAgAruNatarakiraNAdityalauhityameke shrImatsAndrendranIlopaladalitadalakShodanIlaM tathAnye | kShIrAbdhikShubdhadugdhAdhikataradhavalaM kA~nchanAbhaM cha kechit tvadrUpaM vishvarUpaM sphaTikavadupadhAyuktibhedAd vibhinnam || 33|| sArvaj~naj~nAnadIpaprakaTitasakalaj~neyatattvaikasAkShI sAkShAdvetti tvadIyAM guNagaNagaNanAM sarvavit tatsuto vA | yastu vyAdAya vaktraM valibhujaraTitaM mAdR^isho rAraTIti vyApat sA tIvraduHkhajvarajanitarujashchetaso hAsyahetuH || 34|| yanme vij~nApyamAnaM prathamataramadastvaM visheSheNa vettrI tadvayAhArAtirekashramavidhirabudhasvAntasantoShahetuH | kintu snigdhasya bandhorviShamiva purato duHkhamudgIrya vAchAM j~nAtArthasyApi duHkhI hR^idayalaghutayA svasthatAM vindatIva || 35|| kalyANAnandasindhuprakaTashashikale shItalAM dehi dR^iShTiM puShTiM j~nAnopadeshaiH kuru dhanakaruNe dhvaMsaya dhvAntamantaH | tvatstotrAmbhaHpavitrIkR^itamanasi mayi shreyasaH sthAnamekaM dR^iShTaM yasmAdamoghaM jagati tavaguNastotramAtraM prajAnAm || 36|| saMstutya tvadguNaughAvayavamaniyateyattamAptaM mayA yat puNyaM puNyArdravA~nChAphalamadhurarasAsvAdamAmuktibhogyam | lokastenAryalokeshvaracharaNatalasvastikasvastichihnA\- mahnAyAyaM prayAyAt sugatasutamahIM tAM sukhAvatyupAkhyAm || 37|| iti shrI sarvaj~namitravirachitamAryatArAsragdharAstotraM sampUrNam || ## \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}