% Text title            : Dayasahasram by lakShmIdAsa
% File name             : dayAsahasram.itx
% Category              : devii, vedAnta-deshika
% Location              : doc\_devii
% Author                : lakShmIdAsa revealed by vedAntadeshika
% Transliterated by     : M N Ramanuja
% Proofread by          : M N Ramanuja
% Latest update         : March 17, 2025
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Dayasahasram by Lakshmidasa ..}##
\itxtitle{.. shrIlakShmIdAsavirachitaM dayAsahasram ..}##\endtitles ##
\section{1\. prathamashatakam}
shrIH |
shrI padmAvatIsametAya shrInivAsAya namaH |
shrImate rAmAnujAya namaH |
shrImadvaravaramunaye namaH |
shrImate nigamAnta mahAdeshikAya namaH |
shrIlakShmIdAsAdhiShThita vedAntadeshikapraNItaM dayAsahasram |
atha dayAsahasre prathamashatakam |

vande vandArumandAraM taM vR^iShAdri vihAriNam |
yatkR^ipAvitaratyArAt puruShArtha chatuShTayam || 1||
phaNAsahasro dvisahasrajihvaH
shuddhAtmako bhogipatistvadIyAm |
dayAM na dakSho gadituM kathaM vA
tAM varNayAmyadya vR^iShAdrinAtha || 2||
athavA madrasaj~nAyAM tAM vANImanaNIyasIm |
nartayatyahishailesha karuNA chirakA~NkShitA || 3||
karuNAvaruNAlayArtihArin!
karuNA te taruNAgasi prakAmam |
chirajIvini mayyapi prasannA
sharaNaM hanta! rameritA babhUva || 4||
sharaNAgatavatsalatvamambho\-
ruhanetrasya hare! kathaM bhavette |
karuNA yadi vallabhA nahi syAt
tvayi nityaM paratA lasedgabhIrA || 5||
dayA payodhitanayA hR^idi chenna dvayaM tava |
nirbhayashsharaNaM pApo vrajeyaM tvAM kathaM hare || 6||
indranIlamaNigrAvaprasravatkaruNArasam |
pAyampAyaM bhavAraNyashramamatyajamAdarAt || 7||
ayi! daye! hR^idaye kamalApateH
kR^itapadorasi sindhusutA sthitA |
aparatantramapi shritavashyatA\-
manayatAM tamubhe mahadadbhutam || 8||
sA kalpavallI sukR^itibhya eva dadAti kAmAMstridive yathechCham |
hare! dayAkhyA tava kalpavallI pApAtmanAM pUrayatIpsitAni || 9||
anukampA sadAkampA pa~NkajAkSha! dR^ishostava |
yad dR^ishyate kaTAkShaM tatkA~NkShe mantukR^idapyaham || 10||
anudinamanukampA kampitaM pApasa~NghaiH
ahigirinilaya! shrI shrInivAsa! tvadIyA |
smR^itipathamanuyAtA sAntvayatyAdarAnmAM
tyaja bhayamiha vatsetyAshu mAteva dInam || 11||
achidanalpaguNaM tava chidgaNaM
karaNakAyagaNairghaTayan hare! |
iha pumarthachatuShTayabhAjanaM
samakaroH karuNA kila kAraNam || 12||
pupuShuShShaDrasA mAntu ShaDvargo mitratAM gataH |
nAparAdhI kathaM syAM tvaddayA mAmuddhareddhare! || 13||
karuNAkara! sheShashailavAsin!
karuNA te madhure smite dR^igabje |
prachurA varadAyi pANipadme
janatAM sAntvayati prakAmapApAm || 14||
sarvAn guNAn saphalayatyavanau murAre!
sA te dayA jaladhijAsahachAriNI yA |
vaikuNThadhAmni parataikaguNojjvalasya
te.anyairguNaiH kimamalaiH parishuddhasattve || 15||
ahishailapateH priye! daye! tvaM
guNinastatvavido vihAya dUre |
aghaduHkhijanaughamArgaNe kiM
niratA kAraNamatra vedayAmba || 16||
pravighaTayya ramAmapi satvaraM
gajapateH karuNoktivichoditA |
ayi daye! garuDena tadantikaM
samanayaH prajavaM bata chakriNam || 17||
drupadajAvasanAbhivivR^iddhaye
nanu daye! bhagavantamachodayaH |
jagati nAryavahelanamArtitaH
sapadi vettyabalaiva pumAnna hi || 18||
kAruNyashrIstvayi vasati yachChrInivAso.asi tasmAt
bhaktAbhIShTaM vitarasi tatashsheShashaile vasansan |
ArtatrANaM vidadhadamita kliShTabhaktAgradR^iShTaH
dattaM svalpaM subahu gaNayasyadbhutA te.anukampA || 19||
bhavaghoramahAraNye duHkhadhvAntagataM hare!
mAM dayAdIpashikhayA kadA neShyasi satpatham || 20||
bhavakUpanimagnAnAmAbhIlajalapAyinAm |
shrInivAsAnukampe! tvaM rajjuruddharaNe hyasi || 21||
sa~NkalpitAnalpa jagatpravR^ittiH
nArAyaNashshAstramatAnuyAyI |
daNDonmukho hanta! daye! babhUva
tvadvIkShitaH tvanmatabaddhadIkShaH || 22||
kuchelamamitampachaM chipiTamuShTisantuShTahR^it
chakAra garuDadhvajo bhajanashIlamibhyaM bhuvi |
vidAritakudInatAviShalatAnidAnAM daye!
vadanti bhavatIM janAH jalajavAsinIsodari! || 23||
AshritAvanagurutvare! daye! svAmi mAnasarayaM vichintya cha |
tatra vAsarasikAsi kiM sadA shrIshachodanakR^ite prasUriva || 24||
vichitrA lIlA te vR^iShagiripateramba! karuNe!
vasantaM vaikuNThe paramapuruShaM bhaktavashagam |
vidhAya prANyArtiprashamanakR^ite chArayasi taM
dharitryAM tuchChairyatkamaThakiTirUpaiH pratiyugam || 25||
AshritAn shrInivAso.ayaM toShayatyanukampayA |
mahAn mahIruhaH sphItachChAyayeva janAnbhuvi || 26||
puruShottama~ncha karuNe! shriyaHpatiM
shritabhaktarakShaNakR^ite purA.akaroH |
vratinaM mR^igAjinadharaM suvAmanaM
balisadmadehalicharaM dharArthinam || 27||
puruShottamasya lalanAsvarUpama\-
pyadishassudhAvitaraNe karuNe! |
shritarakShaNAya kathamapyaho! hariM
bahuveShato.api bhuvi yojayasi || 28||
sheShAchaleshahR^idayAchChasarovarAntaH\-
krIDaikatAnaramaNIyadayAmarAlI! |
kShIrAmbuvatsukR^itaduShkR^itarAshimAshu
shaktyA vibhedya sukR^itaikaphalaM dadAti || 29||
ullAghatAM suguNatAM shatavatsarAnta\-
mAyuH kalA nigamashAstrayathArthabuddhim |
saundaryamuchchakulajanma cha kAyadArDhya\-
maishvaryamabdhitanayeshadayA dadAti || 30||
nAhaM sharIriduritAnyavalokayAmI\-
tyAchChAdya lochanayugaM ghanasAradhUlyA |
mandasmitena varadAnaparaH shritAnAM
kiM tvaM ghR^iNAmahigirau prakaTIkaroShi? || 31||
kaumudIva karuNA tava shaure! chakShuShI shishirayatyanishaM naH |
phullayatyavaguNApanayArthaM ku~nchikeva hR^idayAraramAshu || 32||
aparAdha svabhAvAnAM mAdR^ishAnAM durAtmanAm |
tvaddayaikA gatirnAnyA vR^iShAdritridashadruma || 33||
navavArivAhahR^idayakShapAkaraprasR^itAtisundaradayAchChakaumudI |
dhanidurgatAditanumadvrajaM samaM paritassushItalayati svayaM bata || 34||
kShaNamapi karuNe! tvaM kShINapuNyAvanAshe
muraripuhR^idayAchched dUrato hanta! tiShTheH |
amalasalilapUrAduddhR^itA jAlamInAH
iva duritanivAsAshchetanAssyurvisattAH || 35||
lakShmIssvayaM nijakaTAkShavisheShato.atra
nimnonnatasthitijuSho vitanoti jantUn |
tvaM kArayasyayi daye! bhujagAdrinetrA
nimnasthiterupashamaM tadavekShaNena || 36||
paravAsudevamapi mAnuShaM daye!
pravidhAya sindhurashanAmanInayaH |
avamanyate sma janatA tamapyaho!
bhavatI tathApi samarakShadatra tAm || 37||
shabarImamarIM chakAra shAr~Ngin!
karuNA te pariNAma pakva bhogyam |
pravitIrNamanalpabhaktisAraM
phalamAdAya vanaikavAsajIrNAm || 38||
sarveshvaropi bhagavAn dhR^itamartyarUpaH
sa~nchodito nanu daye! nitarAM bhavatyA |
sakhyaM prakalpya kapinA vipine dhanuShmAn
tasmai dadau praguNasampadagArarAjyam || 39||
ulUkhalanibandhanaprakaTitAnyavashyAkR^itiM
daye! vR^iShagirIshvaraM kuTayugAntarAkarShaNe |
prachodya bahuvatsarAmaramahAmahIruTsthiti\-
prabandhanamapAkarostadahamasmi dhIro.aghakR^it || 40||
samprerito nanu daye! bhujagAdrinAthaH
divyasvarUpamabhidarshya gavAM vrajeshaH |
akrUramaryamasutAsalile nimagnaM
Anandasindhuvinimagnamaho vyatAnIt || 41||
bhuja~Ngama mahIdhare prakaTitAtmadivyAkR^itiH
sughorasamare dhanuShpravarapANirabhradyutiH |
dashAnanamasa.nj~nakaM raghupatistadA prAhiNot
nijashramavinuttaye nanu daye! tvayA choditaH || 42||
pApAtmanAM ayi! daye! bhuvi mAdR^ishAnAM
nochejjaniH kimapi nAma tavAsti kAryam |
jyotirmaye duritadUratare.apavarge
tUShNIM tadanyaguNabhAvanayAsi lInA || 43||
doShAkare jagati yatspR^ihaNIya rUpaH
sheShAchale sakalalokavilokitastvam |
bhUShA~nchito.asi kamalesha! tadeva deva!
keShAM na sUchayati te karuNAmapArAm || 44||
karuNe! taruNAparAdhashikShA\-
kR^itayatnaM bhujagakShamAbhR^idIsham |
vinivArya cha dApayasyabhIShTaM
kimidaM mantukR^ite vichitrametat || 45||
kanakAmbara! nIradAbha! shaure!
karuNA te taruNAyate parArtham |
aparAdhini mayyapi prasannA
vR^iShashailesha! yadIkShito mayApi || 46||
Ahvayantu janAH shrIsha! shrInivAseti bhaktitaH |
dayAvAsetyahaM tu tvAM bravImi kR^itaduShkR^itaH || 47||
karuNA varakAminIva nityaM
hR^idayaM te parivartayatyamogham |
ahishailapate! tatastavAsIt
jagatAM rakShaka ityaho! prasiddhiH || 48||
durvAsaHpramukhAttapodhanagaNAdabhyAgatAddruhyataH
trAtuM pANDusutAnvane drupadajAbhuktAvashiShTAlpakam |
bhuktvA shAkamamatragaM yadupate! tatkukShipUrtiM vyadhAH
kiM kiM vA bhavatA na kArayati te svAntasthiteyaM dayA || 49||
yavanAdavanIpatessubhIto
javanAtItavano guhAttanidram |
muchukundamaho! vibodhya tasmai
dayayA darshitavAn mukunda rUpam || 50||
vArA~NganAnartanavIkShaNArthaM
tvanmandiraM prAptavato.api nAstikAn |
a~NgIkaroShyAtmavilokanArthaM
samAgatAn shrIsha! tavAdbhutA dayA || 51||
pR^idAkugirimandAra! vandArujanachandana |
kubjAmabjamukhIM chakre dayA te chandanArthinaH || 52||
kiM bhuktA bhavatAdhvamR^it, nahi mayA bhuktA, suhR^idhbhistathA
proktaM tairanR^itaM, pradarshaya mukhaM vyAdAya pashyAmyaham |
pashyAmbeti tathA vidhAya vadane lokAstvayA darshitAH
bhaktAnAM vashavartitA tava hare! kAruNyamUlA kila || 53||
trivikramasamuddhR^itaprayatapAdapa~NkeruhAt
viri~nchipadapa~NkajasnapitapUtapAthassruteH |
dharAtalamupAgatA suradhunI punAnA janAn
tanoti karuNApagAdhiyamaye! vR^iShAdrIshvara || 54||
jvalanojjvalitAtmaheyakAyaM
karuNAdR^iksudhayA vidhAya siktam |
sharabha~Ngamabha~NguravrataM taM
karuNAnInayadadbhutaM padante || 55||
achintyaguNavaibhavaprakaTitAtmasaulabhyataH
charAchara nirantare jagati labdhajanmA bhavAn |
kR^itAtiduritairjanairjaDamanIShibhirdUShitaH
dayA tava nira~NkushA niravadhiH kimu brUmahe || 56||
adhigatasakalArtho.apyatra goShThe charan san
vrajajanaparibhIto lInadeho gR^ihAntaH |
pramuShitanavanIto rajjubaddho jananyA
nanu chiramarudastvaM kR^iShNa! hantAnukampA || 57||
mahAraNye shIlavyapagamanadUrIkR^itasukhAM
ahalyAM pAShANasthitimupagatAM vallabharuShA |
dayAsImAbhUme! dasharathasuta! svA~NghrikalanAt
vishuddhAM divyAbhAM sapadi kR^itavAn hanta! karuNA || 58||
jambAlacha~NkramaNalabdhapadAbhipIDaM
kAntArasa~ncharaNadhUlyavaguNThitaM tvAm |
te na smaranti navanItamuShaM vadanti
dhik! bAlishAn vrajajanAn bata! te.anukampA || 59||
samo bhavAn bhaktaripuM nijAriM jAnannapi sphItadayAvinunnaH |
tadrakShaNAyApi kR^itaprayatno dautyaM nihInaM shritavAn mukunda || 60||
balibhujamaparAdhimukhyagaNyaM
tribhuvanadurlabharakShamabhyarakShaH |
charaNataTanipAtamAtratuShTo
vR^iShagirinAtha! dayA tavAdbhutA hi || 61||
karNAruntudavAk kShurapranikaraiH hR^iddArayantaM hidhi\-
kkurvantaM samitau sabhAjanaparaM kuntIsutaM roShataH |
chedIshaM pravilUya tatra kadalIlAvaM shirodhau hasan
sheShAdrIsha! bhavatpadAmbujamadAstasmai dayA te bata || 62||
vR^iShagirishikhare shrIshrInivAsAbhidho.ayaM
surataruratitu~NgaH prArthitArtha pradAyI |
niratishayadayAkhyachChAyayA svAshritAnAM
harati sapadi tApAMstriprakArAn bhavAgneH || 63||
vR^iShAdrishR^i~NgashItAMsho!  dayAjyotsnA tavAmalA |
vikAsayati susnigdhaM sphItaM kuvalayaM sadA || 64||
bhujagagiripate! tavAnukampA\-
vratatitatiH paritassupuShpitAgrA |
jagadakhilamapi svakIyagandhaiH
duritamalaM parinodayatyanalpaiH || 65||
hR^idayAlavAladR^iDharUDhaduShkR^ita\-
drumadAraNAsilatikAsi dAruNA |
vR^iShashailanAthakaruNe! nR^iNAM mana\-
syadhiropayasyanuguNAn guNadrumAn || 66||
lakShmIssvayaM kR^itajanirbhuvanAvanAya
kShIrAmbudhau bhagavato hR^idayaM praviShTA |
sheShAdrinAthakaruNe! bhavatI tu tasya
svAnte janiM gatavatI parivartanAya || 67||
velolla~NghanamAdito jaDamayo ratnAkaro.api svayaM
sheShAdrIshvara!  te.anushAsanavashAnnaivAcharatyadbhutam |
kR^ityAkR^ityavivekabuddhivibhavaM dattaM vihAyoddhataH
velolla~NghanamAcharAmi karuNe! tatpAhi mAmIdR^isham || 68||
avasitasamaraM rathe niShaNNaM
shibirataTe tvavatArya phalgunaM tam |
svayamapi rathato.avatIrya shaure!
jvalanabhayAddayayAnvapAlayo hi || 69||
dayA kApi kAntA bhuja~NgAdrinetuH
kayApi pravR^ittyA priyeva prakAmam |
manovAstuvAsA jagajjanmiyA~nchAM
vinA mAtR^ikalpA dadAtIpsitArthAn || 70||
sItAnveShaNatatparo raghupate! pR^ichChan vane pakShiNo
vR^ikShAn parvata kandarAMshcha vilapan hA! jAnakItyAhvayan |
madhyemArgamavekShya bhUmipatitaM gR^idhrAdhipaM duHkhinaM
tasmai sadgatimantyakarmakaraNAtprAdAH dayA te.anaghA || 71||
rukmiNIM bhavadavAptikA~NkShiNImanyamartyasahavAsadUShiNIm |
prAptasannidhirachUchuro hare! pANipIDanakR^ite dayAnaghA || 72||
surabhiShu muShitAsu vedhasA drAk
adhigatatAdR^ishavigraho mukunda |
vrajajanamabhiharShayannabhUstvaM
tava karuNA nanu vismayaM tanoti || 73||
dAvAgniM vipinataTe vrajArbhakAnA\-
mAbAdhAmupajanayantamantakAbham |
shaure! tvaM sapadi nigIrya modado.abhUH
kAruNyaM kimiva nakArayatyachintyam || 74||
vR^iShAchalashikhAmaNe! tava guNeShu bhadrAtmake\-
ShvachintyavibhavAM dayAM gaditumakShamA sA trayI |
hriyA kila parA~NmukhI sthitavatI chirAdapyaho!
kathaM tu kathayeyamapyachaladuShkR^itaste dayAm || 75||
dayA dUrIbhUtA tava tu hR^idayAchchedguNanidhe!
tadaitAn pApastvaM shrutivihitakarmapratibhaTaH |
madAj~nAchChedI tvaM nirayakuhare ghoratimire
kShipAmIti brUyAstadiha sharaNaM yAmi karuNAm || 76||
bhavasAgaratAraNe murAre! nanu naurasyaghabhAravAhakAnAm |
paritassusukhaM pravartayitrI karuNA kShepaNikA hi yAtrikAnAm || 77||
mAlAkAro grathitasumanojIvakaH kaMsavashyaH
bhaktyA namraH svayamupagataM sheShashailAgradIpa |
tvAmabhyarchya srajamatiguNAmarpayitvA svavaMshyaiH
sAkaM mokShaM samadhigatavAMste.anukampA vichitrA || 78||
bhagavan! duhiturvivAhasid.hdhyai
harachApaM nihitaM vibhajya shauryAt |
kR^itatatkarapIDano vyatAnIH
janakaM hR^iShTamaho! tavAnukampA || 79||
karuNA tava mugdhavallavInAM smaratApaprashamaikabaddhadIkShA |
sharaNAgatavatsala! tvadIyaM parirambhaM samadApayaddhi tAbhyaH || 80||
karuNA vashavartinI vasheva
svavashe tvAM parikalpya yUdhapAbham |
vR^iShashailavibho! gajAbhamartyAn
bhavavanyAn vivashI karoti mattAn || 81||
avinAbhAvinI kAntA daye! sA kamalAlayA |
avanIbhAvinI tvantu ve~NkaTeshasya hR^idgatA || 82||
vihitakarmakR^idapyahamalpadhIH
anavadhAnatayA vidhitasskhalan |
duritakR^id vR^iShashailashikhAmaNe!
sharaNamemi bhavatkaruNAM sadA || 83||
tailadhArAvadachChinnasmR^itisantAnato hare |
dhyAtuM tvAmasamarthastvatkaruNA sharaNaM mama || 84||
vR^iShashailavallabhadayAkhyadIpikA
hR^idayAntarasthatimiraM nudatyadaH |
kamaleshapAdasarasIruhe sthitAM
vitanoti bhaktiruchiradyutiM nR^iNAm || 85||
navakajjalAbhayamunApayodhunI\-
mavagAhya gopavanitAbhirachyuta |
jhaShatAM pradarshya tadavAptikhelane
samanandayo hi karuNA tavAnaghA || 86||
na hi mayi mahAvishvAso.api prapattikaraNe hare!
na cha duravagAhe shAstre buddhirastyamitapakShake |
na cha kimapi karma j~nAnaM bhaktirastyahigireH prabho!
tava tu karuNAM yAche nIcho.apyanArataratipriyaH || 87||
rAsakrIDAkalitalalanAmaNDale vAsudeva!
svIyaM kAyaM subahu kalayan kAminIkAmitArthAn |
datvAkrIDo muralivadanaH pItachelopavItaH
kAruNyaikapraNayi khalu te mAnasaM mAnanIyam || 88||
kamalAkaTAkShakaraNe.api kAraNaM
karuNe tvameva phaNishailachakriNaH |
ata eva sA tu tava sannidhau vasa\-
tyamalAyatAsitamR^igekShaNA sadA || 89||
sumasAyako.api gatavigraho.apyayaM
jhaShaketanastu viShayAn pradarshya mAm |
vanitaikasakta hR^idayaM madoddhataM
vitanoti nAtha! sharaNaM dayAstu te || 90||
amarSho nityaM mAM kathamapi vashe hanta! kalayan
pishAchAbho raktaprachuranayanaM krUravachanam |
pratIkShyANAmapyatyatibhavanasaktaikamanasaM
tanoti shrIsha! tvadruchirakaruNA me.astu sharaNam || 91||
lobho lAbhamukho vyaye natamukhaH svAntaikavAso.asti me
svAtmArthe.api parA~Nmukho vitaraNe mUkAnubhAvonmukhaH |
sheShagrAvashikhAmaNe! tava padanyAsaprasUnAya vA
dattA kAkaNikApi hanta! na mayA tatte dayA me gatiH || 92||
moho.aha~NkR^itikalpakalpanapaTustalpAyamAno mahA\-
maurkhyasya prathamapravR^ittikaraNavyagro duradhvodgateH |
dehAtmabhramavibhramabhramaNakR^inmanmitrabhAvaM gataH
tvatpUjAvimukho.asmi ve~NkaTapate! tatte dayA me gatiH || 93||
madena shithilendriyo guruvarAnnamasyochitAn
tiraskaraNavIkShaNairvyathitamAnasAnAcharan |
vR^iShAchalapate! vayaHkulakalAdibhirgarvitaH
tvada~NghrinatimapyahaM na kR^itavAn dayA me gatiH || 94||
paradhanaparivIkShaNaikatAnaH
parashubhadarshanadarshitAtmavairaH |
smaraNamapi na te tanomi tasmAt
vR^iShashikharIsha! dayA gatistvadIyA || 95||
kAmAdyavakarapUrNe hR^idAlavAle dayAkhyalatikAM tAm |
pariShichya ve~NkaTesha! tvadguNasalilaM praropayAmyadhunA || 96||
kaMsaM nihatya parahiMsana mAnasaM taM
saMsArachakra iva bandhanamandire tau |
baddhau vimochya pitarau chiraduHkhitau tvaM
prAharShayo hi nR^ihare! karuNA taveDyA || 97||
shakaTaM nikaTe kuTI taTIsthaM prakaTATopapadAbhighaTTanena |
truTitaM prakaTayya pATavena vrajarakShAmatanoH kR^ipA taveDyA || 98||
nishitabANahativraNitA~NgakaH
krudabhidarshitachakrakaro hare |
nutivivarjitabhIShmahatirhyabhUH
vachanadUratarA karuNA tava || 99||
bAlo.api bAhushikhareNa vR^iShAdrinAtha!
govardhanAbhidhamudUhya shilochchayaM gAH |
ghorAtivR^iShTihatibhirvinivArya  dhairyA\-
dAmodayo hi karuNA tava mAnanIyA || 100||

iti shrIlakShmIdAsAdhiShThita vedAntadeshikapraNIte dayAsahasre
prathamashatakaM sampUrNam |
\section{2\. dvitIyashatakam}
shrIH |
shrImate rAmAnujAya namaH |
shrImate lakShmIdAsAya namaH |
shrImate nigamAnta deshikAya namaH |
atha dayAsahasre dvitIyashatakam |

divAkarAtmajAhrade nilInamadbhutAkR^itiM
pR^idAkumuchchamastake vichitratANDavairnaTan |
nivArya darpamambudhiM bhavAnninAya hiMsakaM
dayA tavAnaghA hare! bhuja~NgamAdri shekhara || 101||
dashAnanahatiH kR^itA na hi tathApi baddhA~njaliM
vibhIShaNamarindamaM ripusakAshato.abhyAgatam |
payodhitaTa eva taM samabhiShichya rAjye.akaroH
raghUttama! dayAnaghA tava vR^iShAchalasvAminaH || 102||
suketu tanayAM vane nijagurUpadeshonmukhaH
nihatya munighAtinIM sapadi shaishave rAkShasAn |
nipAtya gurukaushikakratumapi prapUryAdarAt
prahR^iShTahR^idayo hyabhUH tavakR^ipA vichitrA hare! || 103||
sa~NkalpamAtraparikalpitasarvalokaH
karmAnurUpakR^itajanmisharIrayogaH |
tatrApi tatsukR^itaduShkR^itayogyabhoga\-
dAtAsi deva! karuNA spR^ihaNIyarUpA || 104||
AtmAbhirakShaNakR^ite pratijantuvarga
tattatsvarUpaguNacheShTitashaktiyogAn |
prApayya rakShasi yathechChamanantabhUSha!
sheShAdrishekhara! dayA tava mAnanIyA || 105||
sarvajantuhR^idayAntarasthitaH jIvikAkalanakarmachodakaH |
rakShasi pratisharIrivargamapyambujAkSha! karuNA manoharA || 106||
lIlArthaM patageShu chitragarutAM nirmANamatyadbhutaM
vaividhyaM dhvanisantatau kathamiva prItiM na kuryAnnR^iNAm |
evaM vR^ikShalatAdiku~njanivahe vaichitryamuchchAvachaM
sarvaM shrI vR^iShashailanAtha! karuNAkAryaM kilaitattava || 107||
avAptasarvakAmasya sR^iShTyA kiM te prayojanam |
chetanojjIvanAyaiva hanta! te karuNA hare || 108||
nimittamAtraM parikalpya shakraM
svaya~ncha mathnan dadhimAthamabdhim |
jIvAtumutpAditavAMstrilokI\-
trANAya te hanta! dayA ramesha || 109||
jagatsR^iShTishaktiM prasAdyopadiShTa\-
shrutirvedhase nAbhipadmodbhavAya |
jagatpAlane baddhadIkSho.asi kaShTe
dayAkAryametatkilAbjAyatAkSha || 110||
rudraM rodanalabdhanAmavibhavaM phAlAkShamakShA~nchitaM
trailokyakShapaNakShamaM sabhasitaM sa~Nkalpya kalpe hare! |
rakShArthaM bhuvanatrayaM shishutanurnikShipya kukShyantare
pAthodhau shayitohyabhUrvaTadale mAnyAnukampA tava || 111||
apavAdavinuttaye syamantaM vararatnaM hR^itavAniti pramugdhaH |
jitajAmbavadAtta divya ratno vigatAdhistvamabhUrdayA vichitrA || 112||
nanu pUtanAntu viShapUritastanIM
hananAya ramyatanumAgatAM vraje |
shishubhAva eva hatavAn payaH piban
karuNA vipatti parihAriNI kila || 113||
aNorjIvasyAntaH kR^itavasatirAnandamayatA\-
suvAso merorapyatipR^ithutanurvishvatanubhR^it |
samastasyApyantarbahirapi sadA vyApya ruchimAn
jagadrakShAM tanvanvilasasi hare! hanta! karuNA || 114||
trissaptakR^itvo bhramaNaikashIlaH
kuThArakR^ittAvanirAjalokaH |
sadrakShako.abhUrvR^iShashailanAtha!
dayaikakAryaM kila sarvametat || 115||
saMsArachakre bahuheyadehAn
jantUn pramohavyathitAn murAre |
archAvatAraprakaTasvarUpaH
santoShayasyArtiharA dayA te || 116||
shrI ve~NkaTesha! karuNA tava lokabandhuH
dIneShu saktahR^idayA bhagavatpadAbje |
teShAM manAMsi viniveshya nirantaraM tAn
uddhartumichChati bhuvIha kR^itArthayantI || 117||
vidurAlayametya tatra bhuktvA bhayabhaktyarpitapAyasAdi bhojyam |
anujagrahithAhishailavAsin! karuNA te shravaNAbhirAmalIlA || 118||
skhaladgatessadA nAtha! kimastyaskhalanaM mama |
ataste karuNApANiravalambanadashshubhaH || 119||
prapattikaraNe matiM dhR^iDatarAM vitanvan hare!
madIyakaraNatrayaM niratama~NghrisevAvidhau |
chirantanasamArjitaprachurakarmajAM vAsanAM
nirAkuru parA~Nmukhe karuNayA vinunno mayi || 120||
aki~nchanaM mAM duritaikabhAjanaM
sadAparAdhonmukhamambujekShaNa! |
kadA kaTAkShaiH karuNArasAmalaiH
kariShyasi snApitamIpsitArthada || 121||
jIvAtmA ruchiruchiro.api pApasa~NghaiH
AchChanno bahutaraduHkhabhAjanaM syAt |
kAruNyaM patati tavaiha nAtha! yasmin
AnandI bhavati sa eva dhanyadhanyaH || 122||
shrI shrInivAsa! tava vakShasi bhAsamAnAM
lakShmIM vilokya mayi sAntvanamAvirAsIt |
smR^itvA manonivasanAM karuNAM tvadIyAM
nirbhIka eva pashuvadvicharAmi bhUmau || 123||
pariNAmasaukhyavaraNAya te janaiH
karuNAkaratvamaruNodayopamam |
sharaNAgatArtiharaNAnukUlyabhAk
niraNAyi kAraNamiti shriyaHpate! || 124||
chintAmaNissuratarurdivi kAmadhenuH
airAvatassuruchirApsaraso.ashvaratnam |
etatsamastamahishailapate! tvadIya\-
kAruNyavibhramabhavaM kila shakrahetoH || 125||
vAgdevatApariNayo.ambujapatranetra
sraShTustvadIyadayayA kila sambabhUva |
phAlekShaNe.api bhavadIyadayAvisheShAt
atyadbhutAShTavidhabhUti samR^iddhirAsIt || 126||
ravimaNDalarUpeNa kAruNyaM tava rAjate |
dadyAdatastadevAtra rugNAyollAghatAM hare! || 127||
kR^itvA yathechChamamitaM duritaM manuShyaH
karmAnurUpa phalamudgatamashnuvAnaH |
mauDhyAdvinindati bhavantamanantarUpaM
tasminnipAtaya kR^ipAmahishailanAtha! || 128||
pArthasya rakShaNakR^ite bhagavaMstadIya \-
rathyAnuchodanagR^ihItakasho rathAgre |
sArathyapATavavichAlita vAjivaryaH
prAvartayo hi samaraM karuNA vichitrA || 129||
yuddhe guruprabhR^itibandhugaNAnnihantuM
pArthe prakAshitadaye sujanAvanAya |
sandarshya vishvatanutAmupadishya gItAM
prAvartayohi samaraM karuNA vichitrA || 130||
rAkShasAshitavisR^iShTatApasa kShINakIkasagaNAMstapodhanaiH |
darshitAnabhisamIkShya duHkhitassambabhUva karaNAmayo bhavAn || 131||
alpavaMshajaguhAya pR^ichChate chakravartitanayo.api rAghava!
AtmanashcharitamabhyudIrayan sakhyamApitha dayA tavAnaghA || 132||
adhidevatA hi manasassa chandramAH
karuNA tvadIyahR^idayaikavAsinI |
ata eva shItakiraNodaye janAH
pramadAnvitA nanu bhavanti mAdhava || 133||
karmAnurUpasukhaduHkhaphalAnubhUtyai
nAnAprakAravapuShAmiha chetanAnAm |
nishreNirasyayi! daye! sukR^itaikagamya\-
lokAdhirohaNakR^ite vR^iShashailanetuH || 134||
uda~NkamudakArthinaM virachitAnuyogakShaNa\-
pradhAvitamukundamapyayi! daye! vR^iShAdriprabhoH |
tiraskR^itadivaspatipramadadattapIyUShakaM
vareNa samatoShayastava vichitrarUpA kriyA || 135||
avyAjabandhurahamityanushaMsanAya
svIyaM paratvamanapAyyapi sannigUhya |
indrAnujo.asi raghuvaMshasuto.asi chandra\-
vaMshyo.asi hanta! karuNA tava ve~NkaTesha! || 136||
vanavAsariktasitavAhanAtmaja\-
prathitAbhimanyu karapIDanotsave |
pravitIrNavastradhanadhAnyavAhano
mudito.asi hanta! karuNA tavAnaghA || 137||
ShaDUrmisantADitadehabandhaM vyAdhyAdiyAdaHkulakR^iShyamANam |
saMsArasindhau plavamAnamenamuttArayAbjAkShadaye! drutaM mAm || 138||
karmAnurUpasukhaduHkhaparamparAsti
yadyapyanalpatanuviplutamAnase.asmin |
syAnnAma ve~NkaTavibho! dayayA tathApi
nirliptatAstu mayi puShkarapatravadvA || 139||
duShTairapyanudinachintanIyametat
vAtsalyaM nanu karuNe! murArichitte |
rakShArthaM samajanayo hi dInabandhuH
doShADhyatribhuvanavIkShaNAtikhinnA || 140||
pitR^ipitAmahatatpitR^ivargamapyu\-
parataM bhagavanniha karmaNA |
sakalabhoktR^itayA sa bhavAn divaM
nayati sheShagirIsha! dayAnaghA || 141||
sukR^itaduShkR^itashR^i~NkhalikAdvaya\-
prakR^itimaNDalamandirabandhanam |
mama vR^iShAdrivibho! tava sA dayA
vighaTayatvachirAd dhR^iDhaku~nchikA || 142||
durbharavirAvivegAM viShNupadIM tAM kapardakuharAntaH |
voDhuM shivAya shaktiM tavAnukampA dadau hi kamalesha || 143||
tattatkriyAniyamitAdbhutabhUtavargaH
sa~NkalpamAtraparikalpitavaibhavo.ayam |
bhItyA tanoti nijakarmasharIrarakShA\-
sakto dayAtra tava kAraNamambujAkSha || 144||
avAchaM saMvAchAlayasi karuNe! vallabhatamaM
shritAnAM duHkhaughaprashamanakR^ite sAdarahR^idam |
khageshenATantaM charaNakamalAbhyAM kShititale
mukundaM bhaktArthaM vividhamukhataH chAlayasi tam || 145||
saulabhyaM nanu karuNe! sushIlatA cha
shrIneturdvayamidamuttamottamasya |
AyAtaM tava parichodanena tasmAt
asmAdR^igvrajajanagocharo.atra so.abhUt || 146||
bhavagrIShme ghore hariguNajalAbhAvatR^iShitAH
samantAtsantApaistrividhavisR^itaiH pluShTatanavaH |
dayAmeghALinte vR^iShagiripate! viShNupadagAH
narAkhyA yAchante hyamR^itamamalaM chAtakagaNAH || 147||
viTapiShu vividheShu kechidAtta\-
prasavaguNAH katichit phalAbhirAmAH |
vR^iShashikharivibho! sapatramAtrAH
katichididaM karuNAvibhedataste || 148||
krimikITajaniShvapi pratIka\-
sphuTavarNaspR^ihaNIyatodgatA yA |
nanu sApi vR^iShAdrishekhara! tva\-
tkaruNAtUlikayA tvayA kR^itA hi || 149||
lAsyena darshitavilAsavadhUsvarUpaH
svIyaM karaM svashirasi praNidhApayan san |
bhasmAsuraM varaparIkShaNadhAviteshaM
bhasmIchakAra sa bhavAn karuNA vichitrA || 150||
samabhimukhayasImAn kAmachArAn manuShyAn
bahuvidhaviShayaistaiH kR^iShyamANendriyaughAn |
vR^iShagirishikharAgre kalpavR^ikShasya viShNoH
iha bhuvi karuNe tvaM pAdasevAvidhau hi || 151||
yathechChasa~nchAraparAnnarAnno dayAguNenaiva nibadhya vashyAn |
sUto yathA pragrahapANirashvAn satpaddhatau chAraya ve~NkaTesha || 152||
tApatrayAkhyabaDishena vane bhavAkhye
kAlAkhyadhIvaravareNa nipAtitaM mAm |
sheShAdrishekhara! vibho! karuNApayodhA\-
vujjIvayAshu vinipAtya jhaShaM luThantam || 153||
sAndIpanisutaM naShTaM pratyarpya gurudakShiNAm |
apUrayo hi karuNA hanta! te ve~NkaTAlaya || 154||
dadhibhANDabhANDajaThare nilIya ta\-
dvashavartitAM prakaTayan padArthine |
pravitIrNavAn khalu parampadaM juShe
vR^iShashailanAtha! karuNAtra kAraNam || 155||
shayAnaH kShIrAbdhAvuragapatiparya~Nkaphalake
yashodA~Nke suptvA stanakalashadugdhaikarasikaH |
punAnaH pR^ithvIM tvachcharaNakamalodbhUtarajasA
vR^iShAdrIshAbhUstvaM tava hi karuNA kAraNamiha || 156||
kaikeyI makuTamayAchatAtmajAya
shrIrAmastadatulapAdukAkirITam |
tachChIrShe vinihitavAMstadarthitastvaM
vA~nChAto.apyadhikavidhAyinI dayA te || 157||
drogdhuM tvannikaTamupAgatAhitebhyo
dogdhi drAktava karuNA phalaM munIDyam |
kAlIyodbhaTashakaTAdiShu tvada~Nghri\-
sparshaM sA susukhamadApayan mukunda || 158||
pArijAtamamaraikasubhogyaM prApayo hi dayitopavanAntaH |
ve~NkaTeshakaruNe! vitanoShi svargakalpamavanItalamalpam || 159||
mInAtmA pralayapayonidhau charan san
shR^i~NgAgrapraghaTitanauvikarShaNADhyaH |
AmnAyAn vR^iShagirinAtha! tAnarakShaH
kAruNyaM kimiva na kArayatyachintyam || 160||
pUrvaM vAmanarUpabhR^idbalikarAtpAdatrayaikAvaniM
prArthya prAMshutanurbabhUvitha shunAsIrArthamabjekShaNa! |
kubjAM chandanamAtmakAyasubhagaM samprArthya tAM sundarIM
AtmArthaM ruchirochchamUrtimatanoshchitrAnukampA tava || 161||
kalau kAruNyAbdhe! tava padayugadhyAnavimukho
nitAntaklAntAtmA yadi sharaNamIyAtkR^itamatiH |
tadA tasmin kShipraM prakaTaya kR^ipAM kAmapi hare!
tathA no chelloko bhavati vitato nAstikagaNaiH || 162||
tvaritagamanamAyurbhogatR^iShNAkulaM hR^it
jaTharapiTharapUrtyai duShkR^itaikapravR^ittiH |
bahuvidhagadapIDAkliShTametachCharIraM
bhujagashikharinAtha! tvatkR^ipaikA gatirme || 163||
tamoyavanikAdR^iDhasthagitachittasakto.apyahaM
nitAntamatikubhramo.apyamitaShaDripUpAsakaH |
kR^itAntabhayavihvalastava dayAntu dInassmaran
nirastagurusAdhvaso vR^iShagiriprabho! nirbharaH || 164||
bhavabaddhasharIridarshanAttvAM karuNA drAvayatIha ve~NkaTesha |
tadahaM vinivedayAmi tUrNaM praNatAn rakSha vitIrya tatpumarthAn || 165||
shrIsheShAchalanityavAsarasika! shrIsho.api sAkShI bhavAn
lokAlokamahIdhratulyavibhavaM lokaM vitanvan hare |
kAruNyapraNipAtane prakaTayatyuchchAvacha prAbhavaM
tejorUpamihaikabhAgamaparaM gADhAndhakArAvR^itam || 166||
kShaNArdhakR^itaduShkR^itaprashamanAya nAnAtanu\-
ShvavApya chiradustaraM vividhaduHkhamAtmA bhuvi |
tvadIya karuNAvashAdadhigatadvijatvottamaH
kadApi sukR^itI kR^itI tava kR^ipAM hare! yAchate || 167||
heyeShu nashvaratayA viShayeShu nR^INAM
yA prItirasti vR^iShashailavibho! sadA sA |
AvirbhavetkaruNayA tava dInabandho!
kvApi tvadIyapadapa~NkajayoH kadApi || 168||
kanyAyAM varakaruNAkaTAkShavIkShA
yasyAM shrIvR^iShagirinAtha! sampatetsA |
Apnoti priyakarapIDanotsavaM tat
kanyAsu prahiNu kR^ipAkaTAkShamAshu || 169||
pApmAno mR^igayata mAM vihAya dUrAt
anyatkvApyudavasitaM svavAsayogyam |
adyAyaM niravadhidurguNo.apyahaM shrI\-
sheShAdriprabhukaruNAkaTAkShapAtram || 170||
mahAmoha! dUre bhavAdyAnukampA
bhuja~NgAdrinetrA mayi preShitA sA |
vivasvatprasarpanmayUkheShu satsu
sthitissyAtkathaM vA tamisrasya loke || 171||
duritaghasmaratAprayatIkR^itAH
nanu janA vR^iShashailavibhordaye |
shishirayAshvaghinaM tadamuM janaM
shashinibhA bhavabhItivighUrNitam || 172||
gu~njAma~njulamastakapravilasatpi~nChA~nchitAvartakaM
bhrUbha~NgasphuTitAyatAlikakanatkastUrikAchitrakam |
nAnArAgatara~Ngara~njitachaladveNuprasaktAdharaM
kR^iShNaM tvAM paridarshayiShyati kadA shrIsha! tvadIyA dayA || 173||
yathA tvAM grAhArtashsharaNamabhajadvAraNapatiH
yathA vA pA~nchAlI shithilanijayatnA dR^iDhamatiH |
tathAhaM naivAsmi prabaladuritaM pAhi karuNA\-
kaTAkSheNaiva shrIvR^iShagiripate! mAmapi hare || 174||
tiryagbhiryadupArjitaM sukR^itajaM tvatsAhyakarma priyaM
tasyAlpAMshalavo.api hanta! na mayA sampAditaH pApinA |
grAvaprApaNasetubandhanamR^idhaiH sevAM purA vAnarAH
chakrurnAhamaNuM naro.api karuNA tatte gatirme hare || 175||
martyeShvapi shrayaNayogyayatIndravarya\-
rAmAnujAryacharaNAmbujasaMshrayaM me |
datvA pavitramatanornanu vaiShNavaM mAM
shrIshrInivAsa! karuNA tava mAnanIyA || 176||
ambhoruhAkSha! karuNAM tava pApino.api
saMsmR^itya dhairyavashatashsharaNaM vrajanti |
kAkAsurasya hi nidarshanamatra vR^ittaM
tatpAhi pApinikaraM dayayA ramesha || 177||
anupadamaparAdhaM shrInivAsa! tvadIye\-
Shvanudinamapi tanvanmAnamatto.asmyamarShI |
mayi kR^itaduritaughe nAnutApo.apyudeti
prakaTaya karuNAM tanmAdR^ishojjIvanAya || 178||
shrutyantasaMstutabhavatkaruNA madIyAn
doShAn kadApyavigaNayya bibhartyamuM mAm |
no chettathA vividhadurguNavAgurAntaH
baddhaH kura~Nga iva duHkhamayo bhaveyam || 179||
prakR^ityanuguNaM sadA vividhavA~nChayA sa~ncharan
alabdhasumanorathastadupalabdhaye duShkR^ite |
pravartitamanA bhavAmyamitaduHkhapAtraM tataH
pradehi dayayaiva me tava padAbjabhaktiM hare || 180||
rAmAnujAryakarachihnitasha~NkhachakraH
yashshrIgurUttamaparamparikApratIkShyaH |
tasyoragAchalapateH karuNApagA mAM
pApaikamandiramamuM prayatA punAtu || 181||
shrutyekagamyamahimAtishayaM bhavantaM
shrIshrInivAsa! bhujagendramahIdhrashR^i~Nge |
pashyAmyahaM nanu bhavatkaruNAvisheShAt
yogIndramR^igyamamarArchitapAdapadmam || 182||
varShAtapAmitasamIraNasambhR^ite.api
bhogIndrabhUmidharatu~NgavishAlashR^i~Nge |
mAdR^igjanArthamavanau kR^itasannidhAnaH
dR^iggocharo.asi karuNA khalu kAraNaM te || 183||
jAnAmyanAdiparijR^imbhitavAsanAnu\-
svIyapravR^ittiriti tattava nAma pUtam |
na smaryate na cha bhavatpadabhaktavargo.a\-
pyevaM sthite tava dayA sharaNaM sadA me || 184||
adharanihitaveNuM rAdhikAli~NgyamAnaM
madanaparavashAbhirvallavIbhiH parItam |
vichaladalakapa~NktiprochchaladbarhachUDaM
mama manasi daye! shrInandasUnuM nidhehi || 185||
yasmin bhuvi praNayinI karuNA tvadIyA
shrIshrInivAsa! sa sadA pramadAnvitassan |
dhatte suvR^ittaparishuddhaguNAM svakaNThe
muktAvaliM sakalalokavibhAvyamAnAm || 186||
he ve~NkaTa! tvamasi nishchalatAM prapannaH
tattvachChiro.arpitapadaH kamalAsakho.ayam |
nAhaM tathA.asmi na hi me tava bhAgadheyaM
samprArthaye tadiha tatkaruNAM sudInaH || 187||
dAsyaM kR^itaM kujanasannidhimetya kukShi\-
sampUraNAya na hi te padayoH kadApi |
shrIve~NkaTesha! karuNA yadi te mayi syAt
etAdR^ishI kimu dashA mayi sambhavedvA || 188||
purArachitaduShkR^itodgataphalAnubhUtau rudan
bhavantamiha garhayAmyaviditAtmapApakriyaH |
tathApi rachitasmitaprakaTitAtmagAmbhIryataH
kaTAkShayasi mAM kR^ipArasapariplutAkSho hare || 189||
nopekShaNIyamidamuttamapAtramadya
kAruNyadugdhamiha pUraya ve~NkaTesha |
mR^itsnAghaTo.api nanu gokuladugdhapUrNaH
kR^iShNAtmakasya tava bhogyatamo babhUva || 190||
kanatkanakavAsasaM kaTitaTA.arpitelItsaruM
varapradakarAmbujaM ruchirajAnucha~nchatkaram |
karadvayadhR^itAyudhaM smitamanoj~nabimbAdharaM
bhavantamanukampayA hR^idi sadA mama sthApaya || 191||
achintyaguNacheShTito.apyavanijairjanairduShkR^ita\-
praropitamatibhramairnahi bhavAnaho! gaNyate |
tadadya rachitA~njalissavinayaM muhuH prArthaye
nipAtaya kR^ipAmR^itaM bhuvi vR^iShAdridhArAdhara || 192||
lIlAmAnuShavigrahaM virachitapratyarthisannigrahaM
kAruNyaikakR^itAtimAnuShajagadvikhyApitAtmakriyam |
jAnAtyatra tu ko.api tApasagaNastvAM bhArgavIvallabhaM
nAnye tatkaruNAmR^itaM prahiNu te sheShAdridhArAdhara || 193||
prahlAdaM pitR^ibhartsitaM dR^iDhataraprItistutatvatpadaM
sthAsnustambhavijR^imbhitAtmanR^iharikrUrasvarUpo bhavAn |
hatvA shatrumarakShadatra karuNA te chakriNaH kAraNaM
tachCheShAdripate! nipAtaya kR^ipAM pApAtmake mayyapi || 194||
navanItachikkaNa payaHplutAMshuka\-
vrajagopikAbhirabhidarshitAdaraH |
yamunAtaTochchapulinAbhikhelane
vyaharo hi hanta! karuNA tavedR^ishI || 195||
kadaryagR^ihadehalIdaradurAsikAM dAraya
pradApaya daye! hareH karavareNa vittaM tu me |
yadatra bhagavatpadapravaNabhaktavargeShvahaM
mudA samupayujya cha pramudito bhaveyaM sadA || 196||
jihvA yathA me na kadApi nindAM parasya kuryAdvR^iShashailanAtha!
sadA dayA te sakaleShTadAtrI tanotu vAchATamamuM tathA mAm || 197||
tvatkR^ipApAtratAM nItA vR^iShashailashikhAmaNe!
tvatkIrtanaparA me.astu rasaj~nA ma~njubhAShiNI || 198||
kAruNyaprachurataraM tvadIyachittaM
kAThiNyapravaNamidaM madIyachittam |
vastusthityavinimayaH prasiddha eva
shrImaMstanmayi karuNAM kuru prasIda || 199||
AshAyA viratirnahIha bhuvane datte.api vitte punaH
kA~NkShA tatparivR^iddhaye cha punarapyAptau samujjR^imbhate |
evaM svAnubhave.api tasya sumahAn rogo.avakAshapradaH
na syAdeva tadadya te.atra karuNAM nIcho.api yAche hare || 200||

iti shrIlakShmIdAsAdhiShThita vedAntadeshikapraNIte dayAsahasre
dvitIyashatakaM sampUrNam |
\section{3\. tR^itIyashatakam}
shrIH |
shrImate rAmAnujAya namaH |
shrImate lakShmIdAsAya namaH |
shrImate nigamAnta deshikAya namaH |
atha dayAsahasre tR^itIyashatakam |

dAnena kiM nigamashAstrapurANatattva\-
j~nAnena kiM sutapasA kimu tIrthagAhaiH |
yogena kiM kimu japena vR^iShAdrinAtha!
dUre bhavedyadi dayA tava duHkhahantrI || 201||
vikartanakulodbavaH pratibhaTaM prachaNDadyutiM
kuThAravaradAritaprabaladR^iptarAjadrumam |
vidhAya gatatejasaM parashurAmamAshvatyajo
raghUttama! dayAnaghA prakaTitA ripAvapyaho || 202||
vAmAkR^itirvAmanavigrahastvaM sAmAbhigIto.api purandarasya |
kAmAbhipUrtyai bata! yAchako.abhUH sImAtigA te karuNA  ramesha || 203||
satyAM dayAyAM tava ve~NkaTesha! na karmaTho.ahaM na hi bhaktibhAkcha |
tvannAmavaktA na na shAstravettA sA rakShatIti pratipannadhairyaH || 204||
yathA tathA vA sakR^ida~njaliM hare!
vitanvate.ahaM vitarAmyabhIpsitam |
itIritaM tatparipAlayAshu mAM
tathAvidhaM sheShagirIsha! sAdaram || 205||
kalyANakR^idrasanayA samudIraNena
tvannAma divyamabhidhAtumapi shrutIDyam |
ghoraM ruNaddhi duritaM chirasa~nchitaM mAM
tatkShAlayAshu karuNAsalilairmukunda! || 206||
kAryaM kAraNamantarA na hi bhavatyetat prasiddhaM kila
shrImannatra nidarshanaM tvahamahikShmAbhR^idvibho! sAmpratam |
sadvaMshe jananaM satAM cha nivahe vAsaH pavitrAvanau
sthAnaM j~nAniShu bhAShaNaM cha karuNAkAryaM kilaitanmama || 207||
abhiniveshavashaM mama mAnasaM
nijamatAnugataM kathamachyuta! |
svaguruvAganuvarti bhavettataH
karuNayA nanu vartaya satpathe || 208||
machChemuShI viShayamArgaNasammukhInA
vismR^itya sarvapatimapyamitAshayA tvAm |
dhAvatyabhItikulaTeva tadadya nAtha!
sanmArgagAM tava dayAM kuru tatsakhIM drAk || 209||
smitamukhIM mukuTaprasavasrajaM
tuhinavAlukayA kR^itapuNDrakAm |
mayi dayA yadi te.ahigiriprabho!
nayanagocharatAM svatanuM naya || 210||
dhIsArathirviShayivAjigaNaM gR^ihIta\-
hR^itpragrahastanurathaM gamayatyatandraH |
AtmA rathI viShayaghAsasamarpaNena
vAhAn supoShayati te karuNA\-sudUraH || 211||
prANAyAmavidhirna me sthirasukhaM nApyAsanaM mAnasa\-
sthairyaM naiva shuchitvamapyachapaladhyAnaM na siddhervachaH |
no hiMsAvinivR^ittirapyupakR^itirnaivAhishailaprabho!
kAruNyAmR^itavarShiNaM prahiNu tatsvIyaM kaTAkShaM mayi || 212||
katakakShodavatpAtho ve~NkaTesha! dayA tava |
tanotu nirmalaM me.adya kilbiShairAvilaM manaH || 213||
bhogIndratu~NgAdrishirovivasvan! visR^itvarAste karuNAmayUkhAH |
AvidyamantardR^iDhagADharUDhaM tamo vyapohantu pinaddhachakShuH || 214||
animiShaparivIkShaNIyamanta\-
ssmaraNavivardhitadivyamodabhAram |
prakaTitakaruNaM tvadIyarUpaM
hR^idayataTAka taTe.aTatu prabho! me || 215||
nagnA vidhAya yamunAsalilArdhamagnAH
gopIstadaMshukaharo mumude bhavAn hi |
magnAntu duHkhajaladhau paTado hyanagnAM
kR^iShNAM shushocha karuNA tava chitrarUpA || 216||
divyApavargasukhapaddhatisAkShiNaM taM
rAmAnujaM munivaraM sharaNArthine me |
sandarshya bhogigirinAtha! bhavAbdhibhAje
mandasmito.asi karuNA tava mAdR^ishAya || 217||
kIshAnasrapaghAtitAn samarabhUsuptAn svasAhyonmukhAn
martyAtmA surasArvabhaumavarataH svAtmArthamutthApya cha |
saprANAn samatoShayo hi bhujagakShmAbhR^itsudhAdIdhite!
kAruNyaM tava vAgagocharamaho! mAdR^igvidhe mAdhava || 218||
kAdambinI sujanadurjanatAratamyaM
kiMvAvalokayati? taptajanAn dhinoti |
evaM vR^iShAchalapate! karuNA tvadIyA
tApatrayaikanilayAn shishirIkarotu || 219||
anubhavanti janA nijakarmataH
sukhamasharma cha sheShagiriprabho |
tadapi te karuNA shritavatsalA
shamayatu shritaduHkhamabhIShTadA || 220||
bhujagAvanibhR^ichChirovihArin!
yadi dIyeta punashcha janma mahyam |
bhavatA dayayA pradIyatAM shrI\-
munirAmAnujapAdapUtadeshe || 221||
sImAtItaprachuravibhavA bhAvanAgamyarUpA
trailokyasthairahamahamikAprArthanIyA dayA te |
dainyakShoNIbhR^idashanirahikShmAbhR^idagrAvataMsa!
tvatkIrtishrIprasaraNachaNA bhAgyato bhAti kApi || 222||
abhyarthanAprakAraH prAkR^itadhiShaNasya naiva me viditaH |
nirhetukaprasannA karuNA rakShatu tavAhishailaprabho || 223||
vArAhaM prayatasavA~NgadivyarUpaM
samprApya  pralayapayonidhau nimagnAm |
uddhR^itya kShitimiva mAM bhavAbdhimagnaM
rakSha tvatsitakaruNAkhyadaMShTrayaiva || 224||
mR^igarAjashirA narottamastvaM ripuhantA ramayA prashAmitakrut |
api cheddayayA vichoditassan na bhaveshshrIsha! jagadbhavetkathaM vA || 225||
vidhyAdayastava dayodayatastvadIyAM
divyAmudAradaradUravibhUtimetya |
dedIpyamAnadiviShatpariShatparItAH
shrI ve~NkaTesha! vilasanti nira~NkushAste || 226||
mA no bhuja~NgamagirIndrashirovihArin!
mAno.astu martyanivaheShu kadApi nAtha! |
tvatpAdatAmarasaki~NkaratopalabdhyA
so.astu tvadIyasahavAsavisheShajanmA || 227||
svAminnudArakaruNA tava ki~Nkare.asmin
sAhyaM mahatkR^itavatI jagatItale.asmin |
tvaddarshanAnubhavakandalitAnubhAva\-
harShaprakarShapulakA~nchitamAtanonmAm || 228||
duratyayA hi mAyA te tayA vAgurayeva mAm |
baddhaM vimochayatvenaM karuNA te ramApate || 229||
yathA bhavantaM pashyema sharadashshatamAdarAt |
asmAsvanugrahaM kuryAttathA te karuNAchyuta || 230||
kaThorahR^idayAsuraprakupitAkShisaMstambhana\-
pradAnapaTuvIkShaNakShapitavairabhAraM hare! |
pradarshitasuvibhramaM bhramarakA~nchitAsyAmbujaM
dayA kila dadau tadA ruchiramohinIvarShma te || 231||
bhavada~Nghrisarojachintanaika\-
sthirachittatvamarALagAdrinAtha! |
vitaratvanishaM shritAya mahyaM
karuNA te sakalepsidArthadAtrI || 232||
kAmAdicha~nchalaShaDUrmyabhitADitAtmA
nAmApi te smR^itipathe na niveshayAmi |
sAmAdyupAyagaNanA na kR^itA mayA tat
sImAtigA tava dayAchyuta! mAM punAtu || 233||
kShINAtmA duritachayaishchirArjitaiste
kAruNyaM kimu kathayeyamambujAkSha! |
yanme tvannirupamadarshanantu kAka\-
tAlIyaM samabhavadatra ve~NkaTesha || 234||
sukumArakAnta shishubhAvabhAvitaM
kamanIyarUpamavanIpabhartsitam |
dhruvamAdareNa tapasi sthitaM vane
dayayaiva ve~NkaTapate! rarakShitha || 235||
mAtardaye! kuru tathA hR^idi me yathA syAt
shrIshrInivAsacharaNasmaraNaM samodam |
tatkIrtana\-shravaNa\-vandana\-mandirAbhi\-
yAnAdayashcha karaNeShvitareShu nityam || 236||
asatyamashauchamanAratadauShTyaM
vininditakarmaratiM cha dayAlo! |
ahIshashilochchayashR^i~NgavihArin!
nirAkuru sarvamidaM dayayA me || 237||
smaraMstava dayAlutAM duritakR^idbhavAmyuddhataH
bhaveyamiti bhAvayaMstava dayaikasadbhAjanam |
yatastava dayA sadA duritaduHkhinassAntvaya\-
tyameyashubhavaibhava! dvirasanAdridIpAchyuta || 238||
kiM vA kR^itaM sukR^itamatra manuShyadeha\-
bhAjA mayeti suvichAraviloDite me |
hantAvichAraramaNIyamidaM kileti
chittaM vadatyayi! dayAM kuru tadramesha || 239||
karoTipaTalasrajo bhasitaliptacha~nchattanoH
shmashAnavasateH jvalatkuTilaphAlachakShuShmataH |
gajAjinakaTeH naTadvikaTabhUtasa~NghaprabhoH
shivatvamabhavatsarIsR^ipagirIshakAruNyataH || 240||
saulabhyaM na hi gaNayanti mAnavAste
pAramyaM tadapi vR^ithaiva bhUtale.asmin |
archyatvaM tu durupayojayanti mauDhyAt
tvAM yAche tadiha dayAM nidhehi nAtha || 241||
satvodrekAtkatichana sadA bhAvayantyAtmatuShTyai
kechitsvIyaM nirupamaphalaM kA~NkShamANA rajastaH |
anyadrohe niratamatayastAmasAstvAM murAre!
sarvatrApi tvadatuladayAtvekarUpA kimetat? || 242||
tyaja hR^idaya! bhayaM tannArakAdrauravAkhyAt
yadapi duritakR^ittvaM sha~NkamAnaM bibheShi |
shR^iNu hitavachanaM me kApi jAgarti viShNoH
tvadupamajanarakShAbaddhadIkShAnukampA || 243||
kalikalmaShAbhihatamAnase jane
vinivedayAmi yadi vaibhavaM tava |
parihAsabhAjanamaho bhavAmyahaM
vR^iShashailanAtha! kuru tAdR^ishe dayAm || 244||
kiM vA payodhitanayA sahachAriNI te
mA shrInivAsakaruNe! nanu tAdR^ishI bhUH |
ekatra sAtvachapalA na hi tiShThati tvaM
syAshchettathA jagadida kathamamba! tiShThet? || 245||
uchchasthalAdvahati viShNupadI pavitrA
nIcheShu saMshritajanAghavimochanAya |
shrIve~NkaTeshakaruNApi tathaiva hanta!
loke mahAtmasaraNissahajaikarUpA || 246||
yaM jAyamAnamahishailapate! pumAMsaM
pashyeranugrahasupUrNakR^ipAkaTAkShaiH |
shrImAn guNI dhiShaNatulyamatissurUpo
lokapriyo dR^iDhatanussukR^itI bhavetsaH || 247||
jagatsR^iShTirakShAvinAshAdikarma
svasa~NkalpamAtreNa tanvannapi tvam |
nR^ishaMsAsuradhvaMsanAyAvatIrNo
dharitryAM kR^ipAkAryametatkilesha || 248||
sarvavyApI niravadhiguNaH karmasAkShI dayAluH
tattatkarmaprashamanakR^ite chetanebhyashsharIram |
datvA svIyaprapadanavidhiM bodhayan shAstratastAn
rakShasyambhoruhanayana! te tAM dayAM kiM bravImi || 249||
chirArjitatapaHphalaM kimuta te kR^ipAyAH phalaM
vR^iShAchalashikhAmaNe! mama tu vaiShNavAnAM kule |
janiryadabhavattatastava padAbjanutyai spR^ihA
yatIndrapadasaMshrayaH prayatadivyadeshe sthitiH || 250||
shrIshrInivAsa! mayi te karuNA na chetsyAt
tvatsannidhau kR^itakaThoratarAparAdhaH |
kAkolavattribhuvaneShu   cha kAndishIkaH
dInashchareyamuruvakragatirnR^ishaMsaH || 251||
kamalA vimalAyatAbjanetrI tavalIlAkalanAya ve~NkaTesha!
jagadetadakArayattvadIyA karuNA rakShati tattadarthadAtrI || 252||
AtatAyinamameya balADhyaM ve~NkaTesha ShaDarAti samUham |
Chindhi kandalitaduShTakucheShTaM tvaddayAsi shitadhArikayA drAk || 253||
shrIve~NkaTesha! sumatervijitendriyasya
kvApyantara~NgalalanAkR^itasannidhAnam |
nAsya prakalpayasi yattvamihAvakAshaM
svAmiMstadeva khalu te karuNaikakAryam || 254||
pApAdvyAdhirbhavati hi tato glAnirAtmanyudeti
prAyo dehe tadanu virasA heyatAshemuShI syAt |
eShA rItirvR^iShagiripate! tvatpadadhyAnato.api
syAdduHkhADhyaM prathamamaparaM modadaM tvatkR^ipAtaH || 255||
stambhAtsAndrAt shritanijamahAbhaktabAlasya sUktiM
sAkShAtsatyApayitumudabhUrnArasiMhasvarUpaH |
siktA~Ngo.abhUrdhamanirudhirairdAritArAtivakShAH
kAruNyaikapravaNahR^idayo heyabhogyo hi jAtaH || 256||
pralayakAlanijodararakShita\-
tribhuvano.api vasan vrajamandire |
kShudabhipIDitavannavanItamuT
karuNayAj~najaneShvabhavashshishuH || 257||
kastUrItilakaM tava kva niTile kvedaM vraje gomayaM
pakShIndrATanamambare kva nu tava kvAraNyapAdATanam |
sUrIndraiH kva sahAnubhUtiriha te gopaiH kva sakhyaM vraje
bhogIndrAchalashR^i~NgadIpa! karuNAnighno.asi chitrAkR^itiH || 258||
kiM kAraNaM raghupate! charaNatrayaM drAk
pashchAdgatAH kharakharAdiraNAjire tvam |
kiM vArirAkShasagaNeShvapi te.anukampA
nUnaM tvadIyahR^idayaM sakalaikarUpam || 259||
sampatsamR^iddhivibhavo.api sukhI na martyaH
vittavyayAmayavayaHpariNAmaduHkhaiH |
kliShTo hi tachcharaNayugmamidaM bhajasve\-
tya~NghrI pradarshayasi kiM kR^ipayA kareNa || 260||
prakR^itimaNDalapa~njaramadhyagaH
shukanibho.ashanapAnavashaMvadaH |
vigatapakShatayAhigiriprabho!
tava kR^ipAM nanu mokShakR^ite.arthaye || 261||
kAlakShepashchalati bahushaH kShutpipAsAdishAntyai
nityaM rAtrindivamapi parakrItadehasya nAtha! |
tvatsevAyAmavichalamatirme kadodeShyati shrI\-
sheShAdrIsha! prayatamanasastvatkR^ipAnugrahAdvA || 262||
aruNodayena vikachAmbujavrajaM
madhuma~njulAbhamalimaNDalaM yathA |
ahishailanAtha! karuNodayena te
padapadmamAtmahR^idayaM vrajettathA || 263||
sukhadhiyA viShayAnalamAdarAt
abhipatantamuparyabhidhAvitam |
karuNayA vinivAraya mAM rayAt
shalabhasannibhamambujalochana || 264||
kAruNyA~njanama~njanAdrinibha! te vAtsalyaku~nchyArpayan
antashchakShuShi janmataH prabhR^iti me sambhUtamAndhyaM haran |
kAntArasya bhavAbhidasya saraNau shashvat skhalatpadgateH
AvirbhAvaya ve~NkaTesha! nayanaM sanmArgasamprApakam || 265||
svA~Nghrau nipatya nijarakShaNamarthayantaM
bhItaM sarIsR^ipavaraM parinudya shatrau |
tArkShye nijA~NghrishikhareNa vR^iShAchalesha!
tadrakShaNe karuNayA tamayUyujo hi || 266||
tApatrayaikanilayaH karaNatrayeNa
kAlatrayaM virachitatrividhAparAdhaH |
lokatraye.apyavihitatripumarthalAbhaH
yAche tavAdya karuNAM sharaNaM ramesha || 267||
vanitAtanayAlayAdisaukhyaM
nijakarmAnuguNaM bhavatyatandram |
tadahaM spR^ihayAmi naiva tasmai
karuNAyai tava ve~NkaTesha! kintu || 268||
mAtrA baddhaH kupitamanasA svodare vatsadAmnA
prArodIstvaM prashakanaguNo.apyalpabandhAsahiShNuH |
nityaM baddhaH kathamiva bhave durbalo.ahaM na rudyAM
sheShAdrIsha! prahiNu karuNAM tanmayi sphItaduHkhe || 269||
kimpachatvavinivAritadhairyaH
pApakarmaNi rato.asmi nitAntam |
pAhi tatkaruNayA pravitIrya
shrIsha! nityamamitampachatAM me || 270||
kAlo gachChati yauvanavyatikaraprAptAnurAgaH pumAn
nArIvibhramabhavyahR^inna gaNayatyAtmakShatiM tattvataH |
jAto.ayaM pravayAH krameNa galitasvAtmendriyo bandhubhiH
tyaktaH khidyati ve~NkaTesha! karuNAM puMsyarpaya prArthaye || 271||
datte shAstrepyamitamatayastarkato.apArthaniShThAH
sarvaM mithyA nayanaviShayaM svapnatulyaM bruvANAH |
satyaM brahma tvaguNamiti ye sAdhayanti tvadIyA
dUre teShAM nirupamadayetyachyutAhaM tu vedmi || 272||
machchittakAlIyaphaNopari tvaM
nR^ityannaghakShvelamapohya dInam |
AnandasindhuM naya taM dayAlo
shrIsheShashailesha! kR^ipAkaTAkShaiH || 273||
sadvaMshajo.api nanu sIdasi re! nijAntaH
tuchCho.assmyahantviti mudhA vR^iShashailanetuH |
jAgarti tasya karuNA bhuvi veNutulyaM
tvAM grAhayatyabhimukhI khalu shauriNA sA || 274||
akrUrAya rathena kaMsanikaTaM netuM sabhaktIyuShe
magnAyAryamasambhavodakaraye divyasvarUpaM yathA |
krUrAyApi bhavAmburAshijaThare magnAya mahyaM tathA
datvAnandaya bhaktiriktamanase shrIsha! anukampojjvala! || 275||
daityAssvayaM nijasamIpamupAgataM tvAM
vIkShya tvada~NghrikarapadmavarAbhimarsham |
prApuryathA na hi tathA munayo.api tatte
shatruShvavaimi karuNA tvadhiketi nAtha || 276||
duryodhanAya vishadIkR^itashAtravAya
sandarshitaM sadasi tAvakavishvarUpam |
yaddurlabhaM mananashIlatapasvinAM tat
kAruNyakAryamaniyantritamambujAkSha || 277||
shabarIvitIrNavighasAshano.abhavaH
vR^iShashailanAtha! nanu shAstradUShitam |
kR^itavAn kimatra karuNA tu kAraNaM
kimu tatsubhaktirathavA raghUdvaha || 278||
kAmaM santu prathitavibhavA devatA yAstu loke
bhaktebhyo yatpriyamupaharantyalpasaukhyaM tadeva |
sarvasya tvaM hitakR^idachalasphItasaukhyaprado yat
sheShAdrIsha! tvayi vasati tanmAtR^ikalpAnukampA || 279||
tejomayassa bhagavAn puruShottamastvaM
mAdR^igjanAvanakR^ite vR^iShashailashR^i~Ngam |
uchchasthalaM samadhiruhya didR^ikShayaiva
tiShThasyaho! karuNayA bhuvi ve~NkaTesha || 280||
upagrAhyaM dattaM shritanR^ipatibhirdR^iptanayanaH
nijApA~Ngenaiva kShaNamabhimukhIbhUya sapadi |
svabhR^ityAyattaM yaH kalayati hare! so.api karuNA
sudUre cheddIno vasati vipine shatrubhayataH || 281||
heyatvapratipAdane.api viShayeShvAbhIlavartmonmukhe\-
ShvalpAnanda vidhAyiShu praNayino martyAH kimarthaM vada |
saMskArasthiravAsanAbalamidaM chedve~NkaTesha! prabho!
kAruNyAmR^itasechanena hR^idayaM nirNiktamApAdaya || 282||
gajendraparirakakShaNe kR^itamatirbhavAMstasya cha
svabhaktagajarAT padagrahaNamuktaghorAMhasaH |
vidArya nijachakrataH prathamameva tAM nakratA\-
mapAharadaho! hare! tava kR^ipAtvapArA khalu || 283||
grahaNakurdanasaktamanA hare!
ravisutAsalile ramaNItateH |
pratitara~NgagaNapratibimbitaM
karuNayAkalayassvamR^itaM vasham || 284||
nAhaM tvadIya padapa~NkajayornamasyAM
puShpodakodanaphalAdi subhogyavastu |
prItyai kadApi bhavate.arpitavAn murAre!
satyevamapyakalayaH karuNAM mayIttham || 285||
sR^iShTaM tvayaiva sumachandanabhogyavastu
shrIve~NkaTesha! bhavate tadapi prayatnAt |
nAhaM kadApi karato.arpitavAMstathApi
mayyAhitAdhika dayo.asi dayAnidhe! tvam || 286||
tvayA sR^iShTAn brahmapramukhavibudhAnmandamatayo
bhajante te heyakShaNikaphalalAbhAya bahushaH |
tapobhiryAgAdyaiH pashuvishasanasphItakaraNaiH
na manyante ye tvAM sthirasukhadamatyadbhutadayam || 287||
alpAsthiratvamatayassugurUpadeshaiH
svargAdiShu praNayino na bhavanti dhIrAH |
bhAntyatra kintu bhavadIyapadAbjasaktAH
shrI ve~NkaTesha! karuNAM tava kA~NkShamANAH || 288||
yadyadvibhUtimadiha prathitaprabhAvaM
tattattvadIyamahimAtishayorjitaM hi |
evaM sharIriShu kadApi dayAvisheShAt
kvApi prakR^iShTasukR^itI nanu bhAjanaM syAt || 289||
tapasA na tathApyupAsanAdyaiH
na tathA dhUmasumodanArpaNena |
na tathA vR^iShashailanAtha! dIne
dayayA te manuje yathA prasannaH || 290||
shrIve~NkaTesha! navahIrakirITashIrSha
snigdhAsitAtimR^idulAlakapa~Nktibhogyam |
AkarNavistR^itavilochanapuNDarIkaM
manmAnase tava mukhaM kR^ipayAvirastu || 291||
graiveyakaprasR^itaratnamayUkhakAnti\-
gIrNatrirekhagalalolasuvarNamAlam |
lakShmIvilAsanilayaM sumamAlikADhyaM
manmAnase vasatu te kR^ipayaiva vakShaH || 292||
shubhrAbhrachUrNavimalordhvavishAlapuNDraM
mandasmitonnatakapolamanoj~narUpam |
aMsAvalambimaNikuNDaladIprakarNaM
manmAnase tava mukhaM kR^ipayAvirastu || 293||
shrIshrInivAsa! ruchirAdharapIThakalpaM
vinyastashubhraghanakaitavaguptamaugdhyam |
snigdhAtimAMsalasunistalabhavyarUpaM
manmAnasaM smaratu te chubukaM dayAloH || 294||
aMsadvayA~nchalasamarpitasha~NkhachakraM
AbhUmilambitamahAdhanagUDhahastam |
gA~NgeyalambipR^ithulojjvalabhUShaNADhyaM
bAhudvayaM smaratu te kR^ipayA mano me || 295||
pratyuptahIramayahematalA~nchitante
vishrANanAhitamaNiM cha virAjamAnam |
pANiM varapradamahIndramahIdhranAtha!
manmAnasaM smaratu te karuNAvisheShAt || 296||
dairghyantu mAtumiva jAnutaTArpitAgraM
dairghyAdivAlpavalitAhitapANipadmam |
bhogIndrabhoganibhamambujanetra! vAmaM
bAhuM smarAmi kR^ipayA tava bhogibhUSham || 297||
kA~nchIkalApaviniveshitakhaDgakoshaM
hemAbhichitritamahAdhanabhAsurA~Ngam |
shrIve~NkaTesha! kaTideshamahaM tvadIyaM
nityaM smarAmi karuNAmR^itabhAjanaM te || 298||
asmachchirArjitabhayAnakapApasa~Ngha\-
ja~NghAlatAkaraNaghoShaNakAhalI te |
shrIve~NkaTesha! kanakAmbarabhAsurAbhe
ja~Nghe smarAmi karuNAmR^itabhAjanaM te || 299||
yannissR^itodakadhunI janapAvanI yat\-
saMsparshato dR^iShadapi prayatAbalAbhUt |
shrIve~NkaTesha! tava tatpadapa~NkajaM me
chitte sadAstu karuNAmR^itabhAjanasya || 300||

iti shrIlakShmIdAsAdhiShThita vedAntadeshikapraNIte dayAsahasre
tR^itIyashatakaM sampUrNam |
\section{4\. chaturthashatakam}
shrIH |
shrImate rAmAnujAya namaH |
shrImate lakShmIdAsAya namaH |
shrImate nigamAnta deshikAya namaH |
atha dayAsahasre chaturthashatakam |

prAchInakarmaparivIkShaNamambujAkSha!
yuktaM kimu shritajaneShvapi duHkhabhAkShu |
tvAmeva rakShakatayA sharaNaM prapannaM
rakSha drutaM karuNayA vR^iShashailanAtha || 301||
lIlArthaM yadapi bhavAn pravR^itta eva
tvallIlAviShayacharAcharaM jagaddhi |
kiM kurvantyamitavichitraduHkhabhAjaH
kAruNyaM tava sharaNaM mukunda! teShAm || 302||
navagrahabalaM bhavatprathitashaktyadhInaM kila
tvadIyanayanA~nchalaprachalanAttakAryA hi te |
nipAtaya tadadya mA tadupari prathAM tvaM vR^ithA
kR^ipAM kuru kR^ipAnidhe! sapadi sAparAdheShvapi || 303||
dayAnidhiH kAruNikaH kR^ipAluH kAruNyamUrtiH karuNApayodhiH |
itIrayantIha janA bhavantaM shrIve~NkaTesha! tvadananyabhAvAH || 304||
lokatraye.api puruShottama eka eva
shrIman bhavAMstvaditare nikhilAshcha lokAH |
nAryAtmakA iti kR^itaM tadamuM janaM mAM
a~NgIkuruShva kR^ipayA tava bhogyavastu || 305||
karuNAkara ityahaM bhavantaM
ramaNIyAdbhutavigrahaM yuvAnam |
upagantuM abhIpsayAsmi dInA
karuNAM te mayi pAtayAshu nAtha || 306||
strIchApalaM viditameva sadA yuvAnaM
shrImantamujjvalatanuM guNinaM pumAMsam |
mugdhAbhikA~NkShati mudeti tadadya nAtha!
tvayyarpitaM mama manaH karuNAM kuru tvam || 307||
ratnAkarasya tanayAmupayamya tuShTaH
tatkrIDanaikanirataH shvashurAlaye tvam |
nityaM shayAlurasi bhogimR^idUchchatalpe
dIneShu nAtha! karuNA kathamApatette || 308||
sadyaH praphullanavasaurabhapuShpamAlyaM
bhogyAni pakvamadhurANi phalAni dhUpam |
shrIve~NkaTesha! bhavadarthamahaM chireNa
vinyasya te.abhigamanaM pratipAlayAmi || 309||
kvAsIti mArgaNakR^ite.apyabalojjhitahrIH
ekAkinI kvanu kathaM gatabhIH bhramAmi |
pR^ichChAmi kaM bhuvi na ko.api bhavatsvarUpaM
jAnAti tatkaruNayA samupehi nAtha || 310||
tvaM tvekabhArya iti kiM viramAmi nAtha!
naivaM hi divyamahiShIshatavallabho.asi |
tasmAttvadIyakaruNAmabhikA~NkShamANA
tvallAbhamAtratR^iShitA sharaNaM vrajAmi || 311||
kiM yAsi tArkShyagamanashshritarakShaNAya
yatrAhvayanti bahavo nanu mAdR^ishAstvAm |
kiM vAthavA mayi yathA nitarAM tathaiva
nAtha! prakAshayasi teShvapi nirdayatvam || 312||
sadguruM nanu purohitaM kuru
prArthayAtmahitakA~NkShayaiva tam |
so.anudarshayati chediti priyaM
dehi tAdR^ishaguruM tvameva me || 313||
anabhyarchito.api prasUnairmayA tvaM
kR^ipAdR^iShTipAtaissadAnandado me |
sthite.apyevamenAM kuto vA sudUre
nidhitsasyaho! te.anukampA vichitrA || 314||
nityama~NgalaguNAMstavAnishaM
bhAvayantyanavadhipramodabhAk |
tvatsamAgamasukhepsayAsmyahaM
ve~NkaTesha! karuNaikakA~NkShiNI || 315||
tvatprAptikA~NkShihR^idayaM mama dInabandho!
nirnidratAgalitashaktinitAntatAntam |
bAhyendriyANi vikalAni tanoti nAtha!
tasmAnmayi prahiNu te karuNAM kR^ipAlo || 316||
saurabhyapUrNatulasIvanamAlikA shrI\-
dIprendranIlaphalakAmalavakShasaM tvAm |
nityaM smarantyapagatAkhilakalmaShAsmi
svIkR^itya tatkaruNayAchyuta! mAM punIhi || 317||
gopIbhirnavanItagandhitanubhissvinnA~NgakAbhirvraje
grAmyAbhUShaNabhUShitAbhiranishaM goviT karAbhirhare! |
krIDan bhogyatayA pramodamabhajo nAhaM tathA kiM kR^ipA\-
pAtraM te vR^iShashailanAtha! kR^ipayA tAdR^igvidhAM svIkuru || 318||
shrutivedyamAtmani vichintya darshana\-
spR^ihayaiva santatavichAratatparA |
vibudhairudIritamahaM nishamya te
tvanupAlayAmi karuNAM ramApate || 319||
brahmAdayo.api munayo.api suyogino.api
dhyAnArchanAdibhirupAsanatatparA ye |
dR^iggocharo.asti na kadApi bhavAMstu teShAM
kA vA kathA mayi vibho! karuNA gatirme || 320||
sarvaj~nastvaM mama cha hR^idayaM vetsi kAruNyamUrtiH
kliShTakleshaprashamanapaTussarvashakto.asi nAtha! |
tvAmevAhaM tadiha sharaNaM yAmi dInAtimugdhA
tvatsvaM shrIsha! prabhavati bhavAnkartumIsho yathechCham || 321||
kalikalmaShadurjanaughamadhye
kathamekA nivasAmi nAtha! bhItA |
puruShottama! te karAvalambaM
kR^ipayA dehi samuddharAbalAM mAm || 322||
durmAnadR^iptahR^idayAsmi kurUpaheyA\-
pyAtmanyanekasukhabhAvanayAtikhinnA |
kubjApradarshitadayAmanuchintya dhIrA
hR^iShTA tathApi vR^iShashailavibho! bhavAmi || 323||
AtmA guNairvividhagumbhanabhogyarUpA
mAlArpitA bhagavate karaNAnyamUni |
koTIrahAramaNikuNDalanUpurAdi\-
divyojjvalAbharaNakAni kR^ipAM vichintya || 324||
gAmbhIryaM hR^idayagataM ruNaddhi bhAvaM
kAruNyaM nayanayuge vijR^imbhate te |
stabdhAsmi prathamamavekShya tu dvitIyaM
hR^iShTAsmi shritajanarakShaNaikadIkSha! || 325||
svapne bhavAnnayanayordhuri sa~ncharan san
shubhrAmbuvAhashakaleShu vilInadehaH |
dhUmopamo malinakAntiragocharaH kiM
kAruNyakAryamahishailavibho! tavedam || 326||
prAleyapu~njapihitA~NgavadachChakAntiH
mandaM samIpamupagamya sudhAMshubimbAt |
antarhito.asi malinassvapane smitAsyaH
kAruNyakAryamahishailavibho! tavedam || 327||
tvachchintanAchalavilochanasammukhInaH
bAhU prasArya parirambhamivAbhikA~NkShan |
antarhito.asi sahasA svapane pralobhya
kAruNyakAryamahishailavibho! kimetat? || 328||
vR^iShashailasAnuShu ghanopama ssthitaH
chapalAbhanetrayugasa.nj~nayAhvayan |
svapane drumaughapihitaH pralobhya mAM
gatavAn kimetaduchitaM dayAnidheH? || 329||
sa~NgrathyamAnamapahR^itya haThAtprasUna\-
mAlyaM samarpya nijakaNThatale smitAsyaH |
pashchAnmadIkShaNapidhAnakR^itodyamo.abhUH
svapne tirohitatanuH karuNA kimeShA? || 330||
kAnto vyavasyati kimityanupAlanAya
dhyAnaikamandharadR^ishaM svapane niShaNNAm |
ekAntanishchalatanuM parirabhya mAM drAk
antarhito.asi kimu te karuNAchyutaiShA || 331||
vivAhasamayochita prathitabhUShaNAbhUShitAM
sakhIjanasamedhitapriyavilokanAbhAShaNAm |
trapAnatamukhImimAM svapanake vilobhya shriyA
khageshagamano.agamaH kimu kR^ipA taveyaM hare! || 332||
karuNAkara ityasheShabhaktai\-
rvinuto mAM suShamAvihInadehAm |
parivarjitasarvabhogabhAgAM
bhavadIyAM samupekShase hare! kim? || 333||
aki~nchaneyamiti mAM kimu varjayasi prabho!
ananyagatiketyevaM UrIkuru kR^ipAkara! || 334||
prArthito.api bhagavAn sa na dR^iShTaH nApyabhAShata na mAmabhiyAtaH |
vArivAhamupakalpya sudUtaM preShayAmi yadasau gatidakShaH || 335||
he jImUta! kShitijavinuta! sphItakIrtistvameva
kliShTairjuShTashshishirahR^idayo jIvanasparshanAtmA |
yatte janma prakR^itimadhuraM prANinaH prArthayante
tasmAddUto bhava mama kR^ipAnIrapUrAbhivarShI || 336||
kAntyA tulyo ditisutariporindirAtulyavidyu\-
chChliShTo viShNoH padamanusarasyAshritashrAntishAntyai |
yattvaM sthAtuM shikharishikharaM kA~NkShase sAdaraM tad
dUto bhUtvA mama hR^idayajaM tApamunmUlayAshu || 337||
vidyuddIpraH prachala gagane megha! gambhIraghoShaH
prAchIM kAShThAM gahanasubhagaM bhUtalaM vIkShamANaH |
madhyemArgaM kuTilagatayo vIchishubhrAmbupUrAH
karShantyakShi prayatasarito nimnavegorurAvAH || 338||
gachChanmandaM viyati marutA preryamANo rasAtmA
harShoDDInairanusR^itagatissa~NghashashchAtakaistvam |
utpi~nChADhyairnaTanapaTubhirvIkShyamANo mayUraiH
pashyasyArAdgirimurutaruvyAptamatyuchChritAgram || 339||
dUrAtso.ayaM dhavalatuhinastomasa~nChAditasnuH
patrorNA~Ngo vratatikusumairmAlabhArIva vR^ikShaiH |
keshADhyo vA vishadanipatannirjharasphArahAraH
kShmAbhR^ichChrImAn subhagatanubhR^id dR^ishyate prochchamauliH || 340||
stokaM mandaM nikaTagamanaH pashya sAnuM vishAlaM
tuShTaiH kIrairdviguNitaharidvarNaparNAbhirAmam |
kAsAraishcha sphuTakamalinIkarShaNakrIDanebhaiH
ku~njairnAnAbhujagatatibhirdarshanIyaM taTitvan! || 341||
nAnAvarNaplavaganivahaishchAlyamAnochchashAkhaiH
vR^ikShaissUrisvakR^itajanibhissevyamAnaM sumaughaiH |
valmIkaishcha vratatipihitaissarpanirmokajuShTaiH
vyAptaM pashya prashamitagatissAnudeshaM vR^iShAdreH || 342||
kahvAnmInagrahaNaniratAn dhyAnivannishchalA~NgAn
kAsArAnte kuTilacharaNAn pashya dIrghAgracha~nchUn |
kroDAnmustAkhananakaluShasphItaghoNAnmahIdhra\-
prasthe pashyan jalada! purato yAhi mandaM vigarjan || 343||
vaprakrIDAkutukamahiShoddhUlitodagranAkUn
bhallUkaughaprakaTitaguhAnachChatAheyabhAgAn |
dIrghasthUlairajagaragaNaiH kR^iShyamANAgrasatvAn
bhogIndrAdrerjalada! purato yAhi pashyan pradeshAn || 344||
tArkShyAhIshapramukhaduritadhvaMsipuNyAchChatIrthAn
prAleyAbhapratibhR^igutaTasrAvinIrapravAhAn |
nAnAvR^ikShaprachuraphalabhukpakShirAvAbhirAmAn
bhogIndrAdrerjalada! purato yAhi pashyan pradeshAn || 345||
vaikuNThaprAptyabhimukhasamArohanishreNitulyA
sopAnAlirnayanayugalaM chetanAnAM dhinoti |
yA sheShasya pratatajaTharasthAnarekhAlikalpA
draShTavyA shrIjalada! bhavatApyadbhutA dUrato hi || 346||
evaM pashyan divi shikhariNaH ShaDvyatItyAtha mandaM
divyaM gotraM jalada! vinayAt saptamaM yAhi bhaktyA |
kiM vA brUyAM niravadhimahAvaibhavaM tatra viShNoH
gatvA pashyansaphalaya dR^ishau sAvadhAnaM krameNa || 347||
yAtAyAtaprasR^itajanatAduShpraveshAgrabhAgaM (mArgaM)
nAnAvastuprachuravipaNidhvAnanirbhiNNakarNam |
sadyaH kShauraprakaTajanatAsnigdhanirlomamuNDaM
sheShAdrerdR^ikprathamaviShayaM pashya bAhyaM pradesham || 348||
agre stokaM vrajasi yadi te dR^ikpathaprApyashR^i~NgaM
tAlottu~NgaM vividhavilasatputrikAchitritA~Ngam |
sauvarNA~nchatkalashashikharaM gopuraM dR^ishyate.akShNA
peyaM dR^iShTvA sughaTitakaro modase vismitastvam || 349||
shvabhre divyaM lasati vitataM mandiraM sundarA~NgaM
nityaM nAnAjanapadajanaiH pUryate yattu bhaktaiH |
bhaktAnItairdraviNakanakaiH vastraratnaishcha yasmin
kosho bhaktyA jalada! bhavatA darshanIyaM tadArAt || 350||
tArkShyastambhaM kanakapihitaM tAlatu~NgaM purastAt
karpUraughajvalanamalinasphItapAShANapITham |
pashyannagre virachitanatirdakShiNenAtha gachChan
mAlyAgAraM ghusR^iNadR^iShadaM vIkShya mandaM prayAhi || 351||
vAme pArshve kanakaruchirAchitritA~Nge vimAne
dIprAbhaM tvaM ravikiraNataH pashya taM ve~NkaTesham |
sthitvA stokaM yatipativaraM j~nAnamudrAbhirAmaM
taM sAShTA~NgapraNati vinayAtpashya tattIrthapAyI || 352||
ghaNTAghoShaH prasarati yadA bhojyapIThasthitaM taM
jAnIhi tvaM jaladhara! tadAbhyantaraM tasya mA gAH |
yAvad ghaNTAninada viratistAvadekatra bhaktyA
dvArasthAnAmanumatimahaM pAlayaMstiShTha dUre || 353||
bhaktaughAnAmahamahamikAsambhramAmardabhAktvaM
mA bhUH ka~nchidbhagavadupasAnnidhyakai~NkaryabhAjam |
AshrityArAtpravisha na tathA chetsadA bhaktasa~NghaiH
yuktashshrImAn lasati na raho vaktumevAvakAshaH || 354||
bAhye dvAre jayavijayayoH darshanaM prApya pUrvaM
tatratyassan vR^iShagiripatiM pashya pashchAdudagram |
dIpajvAlAkabalitatamogarbhagehe sthito yaH
shrImAnUShmaprasaraNakanaddivyadeho yathenduH || 355||
antaryAto vinayavinato dehalIM garbhadhAmnaH
prApya shrIman vR^iShagiripatervIkShya mandasmitAsyam |
mugdho mA bhUssmaraNavikalasstabdhagAtro yatastvaM
madvArtAM tachChravaNapathagAM preShitaH kartumeva || 356||
kAruNyaikapravaNahR^idayo yadyapi shrInivAsaH
visrambhArho na bhavati tathApyatra yadva~nchakassaH |
saundaryeNa shritajanamanassampratArya svakAryaM
kartuM shakto balimiva purA vAmano vAmamUrtiH || 357||
vakShaHpIThInilayakamalAvIkShaNaikAbhikA~NkShI
tiShThAmyeko giritaTagato hanta! te.atrApi bhaktAH |
AyAntIti smitavadanabhAk nishchalAtmA sthitaH kiM
pR^ichChaivaM taM sa tu kimathavA maunamudrAM labheta || 358||
ekAkI na kShaNamapi rahasyAsthitaH shrAntishAntyai
bhaktaughAnAM shramaparihR^itau dattadR^iShTisthitassaH |
tanmadhye tvaM kathamapi chiraM pAlayan kAlamIShat
labdhvA brUhi prathamamamitaprArthanAsammukhInam || 359||
he! nAtha! tvAM niravadhiguNaM nityakAruNyamUrtiM
matvA mugdhA shrutishubhagirA proktayA paNDitaistaiH |
tyaktAhArA vrataniyamataH kleshayantI sharIraM
nirnidraikA tvadupagamane vartate dattadR^iShTiH || 360||
shrutvA vR^ittaM bhavati kutukI shrotukAmaH punastat
yasmAtso.ayaM niravadhidayashchArtavR^ittAntatAntaH |
tasmin kAle mama tu viShayaM shrAvaya shrotrabhavyaM
prAptaM kAlaM viphalaya kadApyanyavR^ittena maiva || 361||
santaptAnAM shramaharaNavitprANinAM jIvanAtmA
sR^iShTashchAhaM samabhavamahaM yatprasannAmmayo.asmi |
tvadbhaktAyAstava padakR^ite santataM chintayantyAH
dUto.asmIti svakaparichayaM tvaM samAvedayAdau || 362||
AshApAshagrathitahR^idayA prAkR^itaM vastu bhogyaM
manvAnechChAviShayavichaye baddhadIkShA mR^igAkShI! |
mandammandaM viShayaviduShAM tatvavANIM nishamya
pratyAdiShTaprabalaviShayA dInadInAsti kApi || 363||
AdAvevaM jalada! vinayAt stokamAvedaya prAk
pashchAttattatsamayavadanaM kIdR^ishaM brUhi vIkShya |
sAkalyena prayatanaparastatpuro maddashAM tvaM
shrImAn harShAchChravaNakutukI syAdyathA te.api vANyAH || 364||
gachChatyeShA tava bhajanakAnveShaNAsaktachittA
bhaktAnAmapyupavishati sA madhyametyAshrunetrI! |
tAlAsaktasvakarayugalI gAyati dhyAnamandaM
he! shrIsheti pralapati sadA pAhi tAM tatkR^ipAlo || 365||
mAtrahUtA pihitavadanA bAShpapUrAvilAkShI
mUkaivaikA nijagR^ihakagA hastavinyastagaNDA |
dhyAnastabdhA parihR^itanijasnAnapAnAdikAryA
he! kR^iShNeti kShaNarachitanishvAsasuvyaktachintA || 366||
unmatteva prahasati kadApyashrudigdhAchChagaNDA
nAke dR^iShTI kShipati vitate nirnimeShe mR^igAkShI! |
AhUyArAtpathipathi bhavannAma bhikShAmaTantaM
vyAhR^ityochchaiH kamapi bhavato rUpamApR^ichChatIyam || 367||
indujyotsnAmupavanagatAM vR^ikShagulmALidR^ishyAM
darshandarshaM smR^itipathasamAyAtayuShmatprabhAvA |
tvatsAnnidhyaM shramapariharaM kA~NkShate dikShu chakShuH
prakShipya kvetyavanatamukhI roditi prAptamaunA || 368||
AvirbhUte tuhinakiraNe tvanmukhaM sA smarantI
samprApto.ayaM gaganataTato matsakAshaM murAriH |
ityevaM drAk prakaTitamanassambhramA tvAmadR^iShTvA
tAntasvAntA pralapati kare svaM kapolaM nidhAya || 369||
AyAtAMstvatpadasarasijanyastachittAn dvijAgryAn
ArAdhya prAgatha tava guNAn shR^iNvatI tanmukhebhyaH |
romAshliShTA rachitamananA pR^ichChati prA~njalistAn
labhyetAyaM kathamiti muhurdainyatassA mR^igAkShI || 370||
saurabhyADhyA grathitakusumasragbhavaddarshanArthaM
vinyastA sA sutanutanuvad glAnimetyAstyavarNA |
svIkR^ityainAM saphalaya hare! tAM svakIyAM purA tvaM
mAlAkAraM ripuparavashaM prApya khalvanvagR^ihNaH || 371||
nirnidratvAtkShipati yugavadyAminIM kAminI sA
vaivarNyena glapitasuShamA tAntadR^iktArakA cha |
tyaktAbhUShA galitavalayA kArshyataH kShINavANI
tvannAmnaiva shvasiti nitarAM dhyAnamandAshrunetrI || 372||
tvadvaktrAbhaM kamalamamale dhArayantI kapole
sammIlyAkShi prasR^itasalilApA~NgakoNapraNAlI |
smAraM smAraM smaraparavashA bhAvanAlabdhasa~NgA
romAshliShTA vinamitamukhI meti meti bravIti || 373||
vINAma~Nke mR^idulasubhage shAyayitvA manoj~nAM
a~NgulyagraprachalitaguNAM vINayantI bhavantam |
dhyAnashrAntA shithilitabhujA bAShpapUrNAyatAkShI
he! shrIsheti pratidishamasau nishvasityakShi kR^itvA || 374||
yatra kvApi pravitatagiriM vIkShya so.astyatra chakrI\-
tyevaM dhAvatyanibhR^itamiyaM bandhuruddhApi mugdhA |
dhAvandhAvaM mR^igayati guhAku~njapu~njAdiShu tvAM
aprApyAtha shramashithiladR^ik shrInivAseti rauti || 375||
chandrajyotsnAM ravikiraNajaM sAtapaM manyamAnA
santApasya prashamanakR^ite pa~NkajaM yAchamAnA |
tvatpAdAbhaM hR^idi nayanayoH kArayantI nimIla\-
nnetrAmbhojA shvasiti dharaNau pAtitAtmapraveShTA || 376||
sarvasvAmI tvamasi khalu tatsarvamadhyapraviShTA
kiM vA nAsmi prahiNu karuNAM mayyapi shrInivAsa! |
no chedevaM jagati bhagavAn pakShapAtIti nindA
shrotavyA syAdahaha! na sahe tAdR^ishIM durdashAM te || 377||
nityA muktA iva tava dharAchetanAssanti sheShAH
AgaHpUrNA api sudayitAnirvisheShAstvadIyAH |
satyevaM tvaM gaNayasi na mAM vatsalo.api tvadIyAM
doShADhyeyaM tviti na dayase kiM dayA sA kva yAtA || 378||
ekA nAhaM tava padayuge nyastabhArAsmi loke
brahmendrAditridivavibudhA darshanAkA~NkShayA te |
svAtantryeNa tvamiha karuNAM yatra kutrApi tanvan
krIDasyambhoruhanayana! te va~nchanAM vetti ko vA || 379||
saundaryante kva nu nirupamaM vAmanatvaM kva vA tat?
satyapyevaM bhavadupayame labdhasampUrNatarShA |
sa~nchintyAtha praguNaniyamaM brahmacharyaM nirantaM
vanyAM jyotsnAmiva tava ruchiM manyamAnAsmi dInA || 380||
sarvaiH proktaM sa ditijaripuryoginAmapyagamyaH
tanmA yatnaM kalaya subhage! kiM mudhA klishyasIti |
ruddhApyevaM tava tu karuNAM chintayitvA murAre!
tvatsevAyAM nihitahR^idayA santataM chintayAmi || 381||
jAnAmyAdiM tava tu na tathaivAntamapyambujAkSha!
shrImAnnityaM taruNa iti cha prAhurAmnAyinastvAm |
satyapyevaM shritajanakR^ite labdhajanmAsi loke
kA~NkShe tasmAchChrayaNasulabhaM vallabhaM tvAM mukunda || 382||
kAlindIM tAM nijatanuruchA vardhitAnIlavarNAM
tanvan gopIgaNaparivR^itastoyakeliM vyatAnIH |
nAhaM kiM vA vrajayuvativadvallabhA te murAre
tasmin kAle na hi samabhavaM kApi gopI vraje.aham || 383||
dR^iShTveva tvAM pratidishamasAvakShivikShepahR^iShTA
kvApyantardhiM gata iti tato rodanaklinnanetrI |
kvAsi shrIshetyasakR^idabalA mArgaNAsaktachittA
tvAmaprApya glapitahR^idayA mUrChitA sA kadApi || 384||
prApayyainAM manujatanumapyAtmano j~nAnadAyI
sadvaMshashrIpravitaraNatassadvachaH shrAvayan yaH |
chakre sAhyaM tamahishikharisvAminaM shrIshamenaM
tyaktvA nAnyaM prakR^itivashagaM kvApi martyaM bhajAmi || 385||
saMvarte sve jaTharakuhare prANinaH pAlayan yaH
bAlo bhUtvA tatavaTadale vAripUre shayAnaH |
teShAM sR^iShTiM tadanu vidadhat krIDanArthaM rarAja
tyaktvA taM shrIvR^iShagiripatiM martyamanyaM na seve || 386||
sItAmekAM nijasudayitAM rAghavo manyamAno
nArImanyAM na khalu manasApyekadApyasmaradyaH |
tAdR^i~N niShThAniratamamarastUyamAnA~NghripadmaM
tyaktvA taM shrIvR^iShagiripatiM martyamanyaM na seve || 387||
sAkShAtkartuM kathamapi hR^idA shakyate nirmalena
tva~N netreNa prathitavibhavo naiva sandR^ishyate yaH |
archArUpaprakaTitatanuM sarvadR^ishyaM kR^ipAluM
tyaktvA taM shrIvR^iShagiripatiM martyamanyaM na seve || 388||
nyastaM dvAre padashuchikR^ite shodhitaM pUrNakumbhaM
manvAno yo vinihitamidaM mahyamityambujAkShaH |
a~NgIchakre paramakaruNApUritAtmA ripAva\-
pyevaM tyaktvA tamiha kamahaM martyamanyaM bhajAmi || 389||
shaive chApe bharaNadalite jAnakImAlabhArI
tatpANyabje nijakaravaragrAhiNi prIyamANaH |
shrIsha! tvaM yaH priyavaraguNo darshayanmAnuSho.api
tyaktvA taM shrIvR^iShagiripatiM martyamanyaM na seve || 390||
kShIbakShAtraprashamanaratasphItacha~nchatkuThAraM
krUrAkAradviguNitadharApAlakasvAntakampam |
sItAvIkShAdviguNitabalo bhArgavaM bhagnashaktiM
yashchakre shrIvR^iShagiripatiM taM vinA kaM bhajAmi || 391||
grAhagrastaM gajaparibR^iDhaM trAtukAmaH kShaNAdyaH
tArkShyArUDhaH paramapadato vegavAMshchakradhArI |
hatvA nakraM gajakarasumAdAnato.amodayattaM
tyaktvA taM shrIvR^iShagiripatiM martyamanyaM na seve || 392||
nAnAkA~NkShAshashadharakalAvardhitAghormipa~NkteH
svAntAmbhodheH prashamanapaTurbADavo yatkR^ipA me |
dInAnAthA paramapuruShaM bhaktarakShAttadIkShaM
tyaktvA taM shrIvR^iShagiripatiM martyamanyaM na seve || 393||
vedAnteShu prathitavibhavA vishrutAssadguNA ye
te sarve.api shravaNasubhagAH kIrtanIyAshcha bhaktaiH |
satyapyevaM mayi tu karuNA yasya sAbhyarhitashrIH |
tyaktvA taM shrIvR^iShagiripatiM martyamanyaM na seve || 394||
mAtrA niShiddhamatirapyanishaM tvadIya\-
divyAbhirAmaguNasaMsmaraNaikachittA |
tvannAmakIrtanaparA tvadadhInadehA
mAtre niveditavatI nijabhAvamevam || 395||
evaM nivedaya kanatkamanIyavidyu\-
tkAntAmbubhR^id bhagavate bhujagAdrinetre |
so.api smitaprakaTitAtmahR^idAshayastvAM
sampreShayiShyati punashcha nivartanAya || 396||
mA tiShTha tadguNavibhAvanayA nabhogre
tatrApi tatparamakAruNikatvasaktaH |
jImUta! tanmadhuravigrahakAntikR^iShTo
niShThassvakarmaNi rayAdupayAhi mAM tvam || 397||
yAvattvadAgamanamatra tadIyadivya\-
kAruNyanIradhipariplavamAnadehA |
tAvachcha tadguNarasAyanapAnadhanyA
jIvAmi jIvanada! tatpadachintanena || 398||
mA vismara pratinivartanasambhrameNa
tatpAdapadmatulasIM samupAhara tvam |
AshvAsayatyupagatAbhra! sakhIva yA mAM
saurabhyamAtravinivAritasarvatApA || 399||
gachCha jImUta! bhadraM te
dhanyo drakShyasi matpriyam |
sukhasparshAnukUlAshcha
santu te pathi mArutAH || 400||

iti shrIlakShmIdAsAdhiShThita vedAntadeshikapraNIte dayAsahasre
chaturthashatakam sampUrNam |
\section{5\. pa~nchamashatakam}
shrIH |
shrImate rAmAnujAya namaH |
shrImate lakShmIdAsAya namaH |
shrImadvedAntadeshikAya namaH |
atha dayAsahasre pa~nchamashatakam |

matsyAdirUpamapi sahyamihAchyutasya
mAtardaye! manujatAM na kadApi dadyAH |
yasmAdanantashubhadivyaguNAkaro.api
kleshAnubhUtilaghutAmabhajannaratve || 401||
kiM vA sukhaM bhagavato.api naratvabhAjaH
karmAbhilepavimukhasya guNAkarasya |
mAtardaye! kimuchitaM tadavekShaNaM te
hantAthavA tanubhR^idArtiharArthamevam || 402||
shakrAya rAjyaparidApanabaddhadIkShA
sarveshvaraM paTuvaTuM parikalpya kubjaM! |
ghore tapasyapi rataM vipine vyatAnIH
mAtardaye kimuchitaM tadidaM shritArtham || 403||
daityAbhiyAtimapi bhaktavashaM mukundaM
yA~nchAprasAritakaraM vyatanorajasraM! |
bhaktAgragaNyabalidehalipAlakaM taM
mAtardaye! kimuchitaM tadidaM shritArtham || 404||
haste vidhAya parashuM bhuvanabhrameNa
trissaptakR^itva iha ruT kShubhitAsravegaM! |
kShIbakShitIshaparikR^intanalabdhashAntiM
mAtardaye! kR^itavatI kimidantu yuktam || 405||
nityAnapAyikamalApatimambujAkShaM
sUryAnvavAyabhavapa~NktirathAtmajAtaM! |
mAtardaye! bhuvi vidhAya budhAvanArthaM
kleshAkaraM tamakaroH kimidantu yuktam || 406||
rAjIvalochanamamuM munikaushikasya
yAgAbhirakShaNakR^ite viniyojya bAlye |
kAntAracha~NkramaNapIDitapAdapadmaM
mAtardaye! samatanoH kimidaM shritArtham || 407||
jArendrasa~Nga kupitapriyagautamAtta\-
shApaprabhAvadhR^itavanyashilAsvarUpAm |
rAmA~NghripUtatanumAtanuShe sma yoShAM
mAtardaye! tvamasi sarvajanAbhivandyA || 408||
lokatrayaikagurumapyaTavIkuTIraM
shiShyaM munestamupakalpya tadArjitAstraM! |
bhAvyAjikarmapariniShThitamAtanostat
mAtardaye! tvamasi sarvajanAbhivandyA || 409||
nityAnapAyidayitAkarapIDane.api
shauryAbhivIkShaNamapekShitamatra hanta! |
mAtardaye! bhuvi jagattrayama~NgaLAya
sItAraghUdvahavivAhamakalpayo hi || 410||
bhaktAvanaikaniratA raghuvIrapaTTa
bandhe.api nAnumatidAsi vichitrametat! |
tasyAntarAyamupakalpya vanAya rAmaM
taM prAhiNornanu daye! kimidaM shritArtham || 411||
lokavyathAshamanakAraNamAtmatulyAM
sItAM vichintya vanavAsakR^ite prachodya |
tAmapyaho! kusumakomalabhavyagAtrIM
tvaM prAhiNornanu daye! kimidaM shritArtham || 412||
shrIrAmasadguNanibaddhamivAnukR^iShTaM
niShThaM gurUpasadane nanu lakShmaNaM cha |
bhAvIndrajidvadhakR^idityahino hi sAkaM
mAtardaye! tvamasi saMsmaraNIyakIrtiH || 413||
tvaM sarvathA bhuvanarakShaNatatparA taM
sarveshvaraM saparivAramarAtinAshe |
saMyojayasyanavalokitatatparatvA
mAtardaye! kimuchitaM tadidaM bhavatyAH || 414||
pItAmbaraM kaThinavalkaladhAriNaM taM
divyAshmadIpramakuTa~ncha jaTAkirITam |
pa~nchAyudhaM piTakadIrghakhanitrapANiM
draShTuM kathaM nanu daye! tvamasi pragalbhA || 415||
tAM jAnakImapi vanAbhimukhImasUryaM\-
pashyAM samastajanalochanapIyamAnAm |
chaNDAtapashlathashirIShasumAbhakAntiM
mAtardaye! kR^itavatI kimidaM shritArtham || 416||
AtmAnuyAyijanabR^indamamandabhakti\-
bhAraM pratArya nishi viShNupadItaTIsthe |
tu~Nge~NgudItarutale suguhAbhivIkShyaM
sItApatiM samatanoH karuNe! kimetat || 417||
bhogIndrabhogashayanIyashayAlumenaM
lakShmyA kathaM nanu daye! vipine nishIthe |
bAhUpadhAnamurukaNTakaparNatalpe
suptaM tamIkShitumapekShitavatyaho! dhik || 418||
syAdetadamba! tanubhR^ijjananIM pratIkShyAM
vAtsalyapUrNahR^idayAM patidevatAM tAm |
sItAmaho! kShititale vipine shayAnAM
draShTuM kathaM nanu daye! tvamabhUssamarthA || 419||
saMsArasindhuparitAraNadakShamenaM
ga~NgAntu bha~Nguratara~Ngasuma~NgalA~NgIm |
rAmaM guhena bata! tArayasi sma mAtaH!
droNyA daye! tava hi dAkShyamachintyavR^ittam || 420||
vaikuNThadhAmni kR^itanityashubhaMyuvAsaM
yogIndrashuddhahR^idayAmbujabhavyapITham |
saumitriNA virachite vanaparNagehe
taM vAsayasyayi daye! sma kimetadamba || 421||
dharmAtmakaM tribhuvanaikaguruM pramIta\-
tAtArthamatra vihitArtinivApakR^ityam |
srotasvinIsnapanashuddhamajasrashuddhaM
mAtardaye! kR^itavatI svavashaM mukundam || 422||
bhaktAya muktavararAjyabharAya dainya\-
samprArthitAgrajapurAbhinivartanAya |
pAdUkirITamupadApitavatyamoghaM
mAtardaye.asi bharatAya janAvanArtham || 423||
sItAkuchArachitacha~nchukarAlacheShTaM
bhItyA hataM tribhuvanabhramaNAtikhinnam |
mAtardaye! raghupateH prathitAstrato.api
kAkAsuraM bata! rarakShitha kiM bravImi || 424||
saumitrisevitapadaM janakAtmajAta\-
modaM vasantamapi ma~njulachitrakUTe |
bhAvyarthakaNTakatayA parichintya rAmaM
taM prAhiNornanu daye! vipinaM kimetat || 425||
mattebhacha~NkramaNamamburuhAyatAkShaM
nIlAmbudAbhamuragAdhipabhogabAhum |
rAmaM kirAtagaNalochanagocharaM taM
kiM vaitadamba! karuNe! kR^itavatyahetu || 426||
nAnAtarUlapalatAsarasIsravantI\-
tu~NgAdrima~njulapatatrimanoharaM tam |
vyAghrAdighoratarasattvabhayAnaka~ncha
prAveshayo hi karuNe! vanamAshritArtham || 427||
sItAM virAdhakarapa~njaravepamAnAM
sammochya khaDgavinipAtitabAhumUlam |
taM koNapaM raghuvareNa nipAtya garte
mAtardaye!  munijanAnavanAvarakShaH || 428||
shrIrAmadarshanamanupratipAlayantaM
dIpraM daye! sutapasaM sharabha~Ngamamba! |
vaishvAnarAhutatanuM samanInayo hi
divyaM padaM raghupatIkShaNadhanyadhanyam || 429||
vAchaMyamaissamupadarshitaparNashAlAH
pashyantamambujadR^ishaM saha sItayA tam |
kAntAravartmani sutIkShNatapodhanAya
prAdarshayassupatasAM phalarUpamamba || 430||
pashyAtra rAma! pishitAshanabhakShitAnAM
kIrNA~NgakIkasagaNaM bhuvi tApasAnAm |
ityArtatApasagiraM nanu shR^iNvato.asya
mAtardaye! nayanayorudapAdayo.ashru || 431||
niShkAraNaM vipinagAn pishitAshanAMstAn
mA pIDayeti janakAtmajayA dhanuShmAn |
saMsmArito raghuvaro.api sa dharmavettA
sItAtmikA khalu jagajjananI daye! tvam || 432||
tasmAdagastyamunipu~NgavaparNashAlAM
kekAvalaiNagaNama~njutarUlapADhyAm |
tanmAnasAbhilaShitArthasupUraNArthaM
prAveshayo hi karuNe! raghupu~NgavaM tam || 433||
AtithyamAshramapade muninA kR^itaM tat
svIkAryakAryakaraNe karuNe pragalbhA |
saumitriNA dayitayA saha rAmamenaM
santoShya tachchiratR^iShaM samapUrayo hi || 434||
abhyarchito munivareNa tadAj~nayaiva
kAruNyakAryakaraNAya tapodhaneShu |
sItApatirnijasahodaranirmite shrI\-
ramyoTaje nyavasadAyatapa~nchavaTyAm || 435||
saumitriNoktanijamadhyamamAtR^idoSha\-
mAkarNya karNaparuShaM tadapohanAya |
rAmeNa sAdhu tadanalpaguNaprashaMsAM
tatsvAntavartini daye! tvamakArayo hi || 436||
kalye himAtishishire sarayUpravAhe
majjantamAtmakR^itamatsmaraNaM kR^ishA~Ngam |
chIrAmbaraM dhR^itajaTaM bharataM vichintya
vidrAvito raghupatiH karuNe! tvayA hi || 437||
j~nAtvApi rAma! pishitAshanaghorachittaM
kAmAbhitaptasR^itashUrpaNakhAsrapAyai |
uktvA svavR^ittamakhilaM parihAsyachu~nchuH
tAM nAkaroH karuNayA hi gatAsumenAm || 438||
ekAkinA bata! hatAH kharadUShaNAdyAH
rakShogaNA raNashirasyatidAruNA hi |
he rAma! tApasagaNe nihitA kR^ipedR^ik\-
kArye pravartayati nAthamamuM bhavantam || 439||
yuddhe jayI pratinivR^itya kuTIrabhAjA
shrIsItayA dR^iDhataraM parirabdhagAtraH |
dhvastavraNo raghupate! vigatashramo.asi
yajjAnakI tanumatI karuNA tvadIyA || 440||
taM va~nchanAparigR^ihItakura~NgarUpaM
mArIchanIchamabhilaShya tadAptikR^itye |
sItAmukhAdraghupatiM samayUyujo hi
mAtardaye! munigaNAvanadattadR^iShTiH || 441||
rakShaikatAnamapi lakShmaNamAttachApaM
dUraM viyojya raghupu~NgavadharmapatnIm |
paulastyanIchavashagAM tvamakArayo hi
mAtardaye! tribhuvanAvR^itaduHkhashAntyai || 442||
grAvadravIkaraNadakShanitAntashoka\-
santaptamAtmadayitAvirahAtitAntam |
rAmaM gabhIrahR^idayaM tvamarodayo hi
mAtardaye! kimuchitaM shritarakShaNArtham || 443||
mAtardaye! kuNapaghasmaragR^idhranetre
lokaM durApamapi pa~Nktirathena tena |
prAdApayo hi raghupu~Ngavato munIndra\-
prArthyaM shriteShu tanumatsu nira~NkushAsi || 444||
unmattavadvanataTe charate daye! tvaM
sa~njIrNayA raghupatIkShaNakA~NkShayaiva |
svAdUni kAnanaphalAnyanupAlayantyA
prAdApayo raghuvarAya mudA shabaryA || 445||
rAmaM tvamantubalivAliniShUdanAya
mAtardaye! tarutirohitamAkalayya |
bhAvyarthachintanaparA jagadArtihantrI
prAchodayo hi kimidaM tava yuktarUpam || 446||
sugrIvasakhyamiShataH puruShottamaM taM
shAkhAmR^igairbahuvidhaiH parivAryamANam |
mAtardaye! raghupatiM kR^itavatyaho! tvaM
nAvekShase taratamatvamihAshritArtham || 447||
he rAma! te kShititale karuNAkaTAkSha\-
pAtrantu yo bhavati sa prathitaprabhAvaH |
vikhyAtakIrtirakhilairabhivandanIyaH
syAdeva mArutasutaH prabalo.atra sAkShI || 448||
shrIrAghavasya karuNe! karuNAtmikAM tAM
sItAmashokavanikAsrapalabdhapIDAm |
draShTuM samIraNapaTuH prahitassamIra\-
sUnuH karArpitatadakSharamudrikA~NkaH || 449||
mAtardaye! kapimapi prathitaprabhAva\-
mApAdayo.abdhimapi tasya tu palvalAbham |
rakShogaNaM mashakakalpamakalpayo hi
sarvaM kilaitadavanau shritarakShaNAya || 450||
lA~NgUladIpitasamIrasakhe yadauShNyaM
svAbhAvikaM tadapi hanta! jhaDityapohya |
utpAdya shaityamanilAtmajamabhyarakShaH
tvadvaibhavaM nigadituM nipuNaH kR^ipe! kaH || 451||
dvIpAntarAnmaNivaraM varamUrdhni dhAryaM
Anetumamba! karuNe! kapimekameva |
Ayojya vishlathamate raghupu~Ngavasya
vishleShaduHkhamaharo maNidApanena || 452||
yogIpsitaM janakajAsulabhaM pavitraM
mAtardaye! bhagavato raghupu~Ngavasya |
Ali~NganaM maNivarArpaNabhAgyabhAje
vAtAtmajAya nanu dApitavatyudAram || 453||
mAtardaye! bhavadanugrahapAtratAM yo
nIto.atra jAtiguNabhedamanekavR^ittim |
chitte.api ki~nchidavichArya dadAsi tasmai
yogIndradurlabhamameyamaho! pramodam || 454||
kiM vA shrutAtmadayitAmitashokanunnaH
chUDAmaNervitatarashmisudUrakR^iShTaH |
kiM vA dayAmbunidhisAmyadidR^ikShayA tvaM
he rAma! sAgarataTaM samavApithAshu || 455||
prAgeva viShNupadalabdhagatiM daye! tvaM
tyaktAtmadArasutabandhugR^ihAgrajeShTam |
dhanyaM vibhIShaNamaho! sharaNArthinaM taM
rAmeNa yojitavatI shritapakShapAtaH || 456||
kIshoktimapyavigaNayya palAshajAtiM
chitte.api ki~nchidavichArya guNAnadR^iShTvA |
mAtardaye! tamatanoshsharaNArthinaM drAk
rAmA~Nghrisevakamaho! shritapakShapAtaH || 457||
yadyAgato dashamukho.api kR^itAparAdho\-
pyAtmArpito raghuvareti vadetsakR^itsaH |
jIvetkatha~nchidupayAti na garvamattaH
mAtardaye! tvamiti khidyasi kiM nu kurmaH || 458||
dhvA~NkShepi markaTavare.api palAshane.api
mAtardaye! raghupatiM sharaNaM prapannAH |
ityAkalayya bhavatI sakalaikarUpA
mAtAtmajeShu na hi pashyati tAratamyam || 459||
santADanonmukhavalImukhakAnnivArya
pratyarthipakShyashukasAraNasAraNAya |
mAtardaye! raghupatiM parichodya shatru\-
pakShe.api darshitavatI bata! pakShapAtam || 460||
vAnaM vidhAya jaladhiM bhuvi vAnarANAM
yAtrAnukUlyakalane kushalo.api rAmaH |
mAtardaye! jaDamayo.ayamitIva tasya
samprArthanAya taTa eva sa shAyito nu || 461||
nolla~Nghito jalanidhiH na hato dashAsyaH
prAgeva hanta! sharaNArthivibhIShaNAya |
la~NkAmadAH kimidamamba! daye! shritAya
tyaktAkhilAya vitarasyatulAM shriyaM hi || 462||
kodaNDapArshvamavanItaladarbhashayya\-
mAjAnubAhumamalAyatapadmanetram |
bAhUpadhAnamatanoH karuNe! shayAluM
yogIndradurlabhamamuM kapinetrapeyam || 463||
abhyarthanAM jaDamayasya cha sannidhAne
rAmeNa kAritavatI karuNe! kimetat? |
naivAvalokitavatI jagatAM sharaNyaM
mattAnuvartanaphalaM bhuvi so.anvabhUchcha || 464||
shrIrAmanAmaparichihnitabANayogAt
udbodhya vAridhipatiM maNibhUShitA~Ngam |
dArairdaye! trijagatAM sharaNaM sharaNyaM
taM prApayo mativihInajane tvamevam || 465||
samplAvya sindhusalile pR^ithushailavR^indaM
mAtardaye! shritavalImukhatAraNAya |
atyadbhutaM bhuvanapAvanamIDyasetuM
rAmeNa kAritavatI tava kIrtiruchchA || 466||
matki~NkarAn kaTubhavAbdhimapArameva\-
muttArayAmi karuNAparichodito.aham |
jantUniti prakaTayanniva vAnaraughAn
ratnAkaraM samudala~NghayadAshu rAmaH || 467||
ratnAkaraH kapimayassamabhUtkimetat
sthAne kapistaraNirApibatIti kaM yat |
tadvaMsharAghavakR^ite taraNipratAryaM
mAtardaye! kR^itavatI kimu taM payodhim || 468||
mAtardaye! janakajAchirabandhamokSha\-
kA~NkShAkulA jalanidhiM dR^iDhasetubandham |
rAmeNa kAritavatI kimu yuktametat?
no chettathA sa bhuvi pUjyatamaH kathaM syAt || 469||
durdAntadR^iptakaTurAvaNayuddhasaktaM
sugrIvamamba! karuNe! sitasaudhashR^i~NgAt |
nAnInayo yadi tadA raghuvIrapArshvaM
kIdR^ik sthitirbhuvi bhavedraghupu~Ngavasya || 470||
rAmasya rAkShasapatissakalAM svala~NkAM
sItAsvarUpakaruNAchirabandhanena |
IkShe cha markaTamayIM kapirAvadIrNAM
svapnodbhavAmiva nijAshubhashaMsinIM tAm || 471||
kShIbairvalImukhagaNaiH nichitA hi la~NkA
tIkShNaishshilImukhagaNairnichitaM nabhashcha |
mAtardaye! raghuvarasya mano vihAya
sIteva kiM nigalitA pishitAshanena || 472||
shrIrAmamAnasamapAsya videhaputryAH
drAksAntvanAya kimashokavanaM gatAsi?
nochettathA raghuvarashsharavR^iShTimevaM
kuryAtkathaM nishichareShu ruShAnukampe? || 473||
mAyAraghUdvahashiraHpravilokanAtta\-
shokApanodanakR^ite saramAM tadAnIm |
Ayojayerna yadi bhogyamadhusravAsyAM
sItAdashA kathaya hanta! daye! kathaM syAt || 474||
paulastyapuShpakajuShA janakasya putryA
mAtardaye! divi kaTAkShasudhAbhiShekaiH |
prAbodhayo raghuvarau bhujagAstrabaddhau
tArkShyo nimittamabhavad bhujagApanode || 475||
he rAma! te nirupamA karuNAsrapeShu
jImUtavR^iShTiriva hanta! shilochchayeShu |
naiShphalyamApa tata eva nirAshrayAste
kAThinyakUTakuTilatvaphalaM tvavApuH || 476||
kAruNyanIradhijalairabhiShiktamenaM
la~NkApure punarapi svasahodareNa |
bhaktaM vibhIShaNamanekapavitratIrthaiH
rAmo.abhiShechya dayitAptyadhikaM nananda || 477||
rAmArthameva samare tR^iNavatkR^itAsUn
kIshAnsureshavarakaitavatassamastAn |
sa~njIvya hanta! samarAtprathamaM yathAsIt
rAmastathA nanu kR^itaH karuNe! bhavatyA || 478||
samprArthitA pavanajena nishAcharINAM
niShpeShaNAya janakasya sutA tadAnIm |
uktvAnyanighnajanavR^ittimavArayattaM
tvadrUpiNI khalu daye! janakAtmajA sA || 479||
yA shItabhAvamanayajjvalanaM shritArthaM
tAM jAnakIM raghupatiH karuNe! bhavatyA |
tyakto nyapAtayadaho! jvalane.atimauDhyAt
agniH kathaM vada dahetpatidevatAM tAm || 480||
brahmAdibhissuragaNaiH prakaTIkR^itAtma\-
tejovisheShamapi taM karuNe! ramesham |
martyatvasUktivinigUhitavaibhavaM shrI\-
rAmaM vyadhA dasharathAtmamude kimamba? || 481||
vaishvAnareNa karuNe! madhurAnudArAn
vishrANitAnpatiparAn raghuvIradArAn |
saMyojya shAntamanasA raghupu~Ngavena
trailokyama~NgalanidAnamabhUH kilAmba || 482||
mAtardaye! bhava raghUdvahamAnasAnmA
dUre kadApi sa tu vismarati svakAryam |
yA pAvakaM bhuvi punAti vivekashUnyaH
tAM pAvake bata! nipAtitavAn vishud.hdhyai || 483||
sItApuTArpitasuvarNatanuprabhAbhiH
shrIrAmamambudharabhavyatanuM daye! tvam |
sauvarNachakraviniveshitashakranIla\-
ratnopamaM bhuvanabhUShaNamAtanorhi || 484||
jAyApatI samabhidarshya purAtanau tau
nishvAsadarshitaruShaM shritasheShabhAve |
rAmAnuje nanu daye! prasR^itAM shuchaM tAM
utsArya modamachirAdudapAdayo.amba || 485||
kai~NkaryakAryanirataM vratini prakAmaM
rAme svarUpaviniShiddhamidaM tvitIDye |
khidyantamamba! karuNe! chiradampatI tau
sandarshya lakShmaNamaho! samatoShayo hi || 486||
paTTAbhiShekamabhivIkShitumAhvayattaM
shrIjAnakIpuruShakArasuhR^iShTachittaH |
rAmo vibhIShaNamasheShabalaissadAraiH
mAtardaye! janakajA bhavatIva nUnam || 487||
AmnAyapAraviduShA dashakandhareNa
tatpuShpakaM raghuvarArthamavaimi guptam |
mAtardaye! bharatarakShaNatatparAsi
rAmatvarAbhigamane hyupakAryabhUdyat || 488||
kauberapuShpakasuviShTarasanniviShTaM
vAmA~NkapIThaviniveshitabhavyasItam |
rAmaM daye! kanakabhavyalataikapArshvaM
mandAravR^ikShamiva darshitavatyamogham || 489||
naShTashriyaM punarapi pratipannalakShmIM
la~NkAM vidhAtumachirAtkaruNe! bhavatyA |
samprerito gaganayAnagataH shritArthaM
sItAkaTAkShamabhipAtayati sma rAmaH || 490||
sItApatiM dasharathAttapunarniyogaM
paTTAbhiShekakaraNe karuNe! dayAluM! |
bhaktAgragaNyabharatekShaNakA~NkShayArtaM
tUrNaM prayANadhR^itamAnasamAtanorhi || 491||
vR^ittAbhidhAnanirate dhuri tatra tatra
rAme pradarshya gaganAttvaritaprayANe |
dR^iShTvA jaTAyunidhanasthalamashrunetrI
sItAbhavatkaruNayA pravilInachittA || 492||
vAtAtmajaM bharatabhAgyavidhAyinaM taM
rAmATavIpratinivartanashaMsanAya |
sampreShya bhaktabharatAntikamAshu mAtaH!
mAtR^itvakAryamakaroH karuNe! tadAnIm || 493||
anyonyadarshanakR^itaM manasApyachintyaM
chIrAmbarasya bharatasya tadagrajasya |
AnandashokanayanAshru daye! yadAsIt
tattAvadamba! bhavadIyavilAsakAryam || 494||
rAmaM chaturdashasamA vanavAsakhinnaM
pratyAgataM janakajA~nchitavAmapArshvam |
sandarshya bhaktabharatAya mudAshrubhAje
mAtardaye! tvamabhajaH kR^itakR^ityatAM hi || 495||
pAdAvalambanaparasya jitendriyasya
tyaktAtmasarvaviShayasya dhR^itavR^itasya |
pratyakShatAM sa bhagavAnupayAti satya\-
mityatra darshitavatI karuNe! kimamba || 496||
pAdUshiraskamavanItalacha~NkramaM taM
Alambipi~NgalajaTaM malinA~NgayaShTim |
chIrAmbaraM bharatamamba! daye! pradarshya
shokAtmakaM raghuvaraM vyatanossabAShpam || 497||
sItAmapAsya sahasA bharataM kR^ishA~NgaM
rAmeNa bAhuyugalena nijA~Nkadesham |
Aropya taM samabhiShechayasi sma bAShpaiH
naisargikaM khalu daye! tadidaM tavaiva || 498||
sAketavAsiShu raghUdvahavipralambha\-
khinneShu hanta! karuNe! tava tu prasAdaH |
yaddUravartinamanantaguNAkaraM taM
AnIya rAmamabhidarshitavatyudAram || 499||
paTTAbhiShekamakuTA~nchitamastako.ayaM
rAjyashriyA suhitayA saha sItayA cha |
AtmAnujaiH parivR^itassuguNAbhirAmo
rAmo dayArdrahR^idayo jagadabhyarakShat || 500||
vAme bhUmisutA purashcha hanumAn pashchAt sumitrAsutaH
shatrughno bharatashcha pArshvadalayorvAyvAdikoNeShu cha |
sugrIvashcha vibhIShaNashcha yuvarAT tArAsuto jAmbavAn
madhye nIla sarojakomalaruchiM rAmaM bhaje shyAmalam ||

iti shrIlakShmIdAsAdhiShThita vedAntadeshikapraNIte dayAsahasre
pa~nchamashatakaM sampUrNam |
\section{6\. ShaShThashatakam}
shrIH |
shrImate rAmAnujAya namaH |
shrImate lakShmIdAsAya namaH |
shrImadvedAntadeshikAya namaH |
atha dayAsahasre ShaShThashatakam |

darshaM darshaM bhuvi manujatAkleshamambAnukampe
lakShmInAthaM paramapuruShaM sarvashabdAbhidheyam |
sarvaishvaryaprakaTitajagadvaibhavaM saMshritAnAM
rakShArthaM taM punarapi naraM kArayasyambujAkSham || 501||
tAdR^isha~ncha bhagavantamapitvaM shatrubandhanagR^ihe janimantam |
bhaktarakShaNakR^itehyanukampe! martyarUpamavatArayasi sma || 502||
karuNA khalu kAraNaM murAre!
parakArAvasathe bhavajjanestu |
varanirvahaNApadeshatastvaM
vasudevasya sutatvamApithAtra || 503||
kShIrAbdhiM bhujagavarAchChatu~NgatalpaM
santyAjya prabalatamonigAlageham |
AnIya shritajanarakShaNaikatAnA
shrIshaM taM narasutamAtanordaye tvam || 504||
pItAmbaraM ruchiraratnakirITadIpraM
nIlAlakaM makarakuNDalakarNapAsham |
pa~nchAyudhaM vararamorasamambujAkShaM
bhaktAya darshitavatI karuNe! kishoram || 505||
dhyAnaikagamyamapi taM nigamAntavedyaM
hR^idyAnavadyaguNasAgaramambujAkSham |
martyAya saMshrayaNasammatidAnatuShTA
sandarshayasyayi! daye! bahurUpamenam || 506||
sudhAsadhrIchIM tadgiramatha nishamyAtmasuhitAM
hitAkA~NkShI sAkShAtsapadi vasudevo dayitayA |
vinirmukto bandhAtkarapuTagR^ihItAtmatanayaH
babhUvedaM sarvaM tava vilasitaM hyamba! karuNe || 507||
yatrAste maNisa~nchayo viShadharo jAgarti tatreti ya\-
tsatyaM tadvasudevasannidhigataM nIlaprabhaM sanmaNim |
sheShasphItaphaNo rarakSha nishi yadvarShAtapatrAtmakaH
tatsarvaM khalu nandabhAvisukR^itodbodhAya mAtardaye || 508||
svApekShayA sumadhuraM parivIkShya vastu
ko nApagachChati kR^ipe! trapayerShyayA vA |
kR^iShNe kShaNena yamunA trapayeva sAgA\-
dAgAmibhAvukadhiyA vihitaM kimevam || 509||
nira~njanamamuM daye! vrajagataM vidhAtuM kathaM
tvayepsitamihAthavA shritajanArthamevaM kila |
vibhAvya pashupAlakAbhyudayakAlamambAthavA
vrajaukasamakalpayaH kimu shishuM vishAlekShaNam || 510||
chitte.apyachintitamanAshritamaprayatnaM
kvApi kShitau nanu kadApi kuto.apyahetu |
vAchAmagocharamaninditamAdarArhaM
bhAgyaM dadAsi karuNe bata chetanAya || 511||
nidrAvismR^itabAhyasarvaviShayAmantastamogUhitAM
kR^iShNAkhyaM yadanInayo nirupamaM ratnaM yashodAM daye! |
yatprAptyarthamanekavatsarashataM vAtAtapApIDitAH
yogIndrA munayo.api santatamahAdhyAnaikaniShThAssthitAH || 512||
putraH putra iti praphullavadanA gopA~NganA gokule
harShodrekagatAgataprakaTitasphItotsavAssa~NghashaH |
nAbhUvan suhitAshshishuM marakatasphArA~NgakAntiM muhuH
darshandarshamaye! daye! prachalitaM hyetatprasAdAttava || 513||
aye! daye! tadbhavadIyakArya\-
mAnandadaM sarvasamR^iddhidAyi |
shrIkR^iShNajanmotsavasambhramantu
sahasravaktro.api na vaktumIShTe || 514||
ki~nchitku~nchitabAhujAnuyugalaM cha~nchadvikoshekShaNaM
DimbhatvAruNanailyamugdhakadalIbAlAtapAtmadyutim |
shashvanmuShTivilolapANimukule nirlakShyadR^iShTiM shishuM
dR^iShTvA gokulayoShito na dadR^ishuH pAraM pramododadheH || 515||
chirArjitatapaHphalaM kimanarAlamugdhAtmanAM
vrajAvasathavAsinAM pashusamAnavR^ittIyuShAm |
parAtparamamuM hariM nanu daye! vidhAyArbhakaM
karAtkaramanInayo vrajanitambinInAM yataH || 516||
kramasho vilokayiturAnanaM manA\-
gavalokya mandamadhurasmitAnanaH |
kramamAMsalAvayavama~njulAkR^itiH
navagokulotsavamarIrachachChishuH || 517||
karuNArasapUritaM vilolaM
kamanIyAkR^itikAntikA~NkShaNIyam |
vrajavAsimanovisArajAlaM
shishunetraM kramasho vishAlamAsIt || 518||
karayugmapallavoddhR^itaM svaM
charaNA~NguShThamatishrameNa mandam |
adharoShThasampuTe niviShTaM
parichUShan dadR^ishe janaiH kishoraH || 519||
Dimbho bhUtvA charaNashikharaM nyasya vaktrAbjadeshe
lAlAvyAjAdvibudhasaritaM srAvayan gokulaM tat |
kurvanpUtaM malinashayane mAtR^ipArshve shayAnaH
dR^iShTaH kR^iShNo vrajayuvatibhiH kAryametaddaye! te || 520||
yashodAyA vaktraM muhurabhivilokyAttahasitaH
kimetanmaugdhyaM mAM nanu nijasutaM vetti bhavatI |
dayA me tvAmevaM kalayati kileti prakaTaya\-
nnivAyaM shrIkR^iShNo vyalasadamalasmeravadanaH || 521||
animittarodanaparaH karoddhR^ito
jaratIbhiruchchabahulAttarodanaH |
mukulastanIbhirupalAlitastadA
hasati sma nandatanayastu shaishave || 522||
Dimbho nyubjIbhavitumasakR^idyatnamAsthAya kR^ichChrAt
nyubjIbhUto namitavadano medinIsaktanAsaH |
lAlAdhArAtimitadharaNirdhAtri! mA bhUdbhayante
bhAradhvaMsI tvahamiti rahassAntvayaMstAmivAsIt || 523||
jAnupANiyugasAhyataH kramAt
mandama~NkaNatale vrajan shishuH |
yauvatena sahasAnusaMsR^ito
mAtura~Nkamupagamya sasmaye || 524||
navaki~NkiNIkaNakaNakvaNatkaTiH
maNinUpurAraNitama~njulA~NghrikaH |
karajAnucha~NkramaNaki~NkarA~NkaNaH
ramaNIhR^idambujamapAharachChishuH || 525||
krIDArthaM bahuvidhaputrikApradAne\-
pyakrandatkR^itakapashau puro vitIrNe |
AmodaprakaTita kautukassa kR^iShNaH
sa~NkrIDanvyatanuta vismayaM svapitroH || 526||
kR^itakapashupuro nidhAya ghAsAn
tR^iNamupabhu~NkShva vitIrNamityasuShThu |
anulapanaparo na khAdatIti
vyalapadanalpamayaM svamAtR^ipArshve || 527||
pUtanAM kapaTasundarIM shishoH
yAtanAkaraNabaddhachetasam |
pAtayanviShadharastanandhayaH
pota eva taduparyarAjata || 528||
ambAnukampe! duritaikabhAjaH
prANAtyayAnehasi pUtanAyAH |
pratyakShatAM prApita eva hanta!
parAtparastApasadurlabho yaH || 529||
pUtanAdehadAhotthaH pUtigandho.api nUtanaH |
pUtanandAtmajasparshAt jAtashchandanagandhabhAk || 530||
ekasyAH karapallavAbhigamanaM saMsUchayan sasmitaM
vakShojopari sannipatya jananIhastAtparasyA drutam |
lAlAsnApitatatkuchaH kachakaro valgaMshchalatkuntalaH
kR^iShNo gokulayauvataM vyatanuta svAgArakAryojjhitam || 531||
mahAnasopAntaniveshitasya
mahAnaso.adhassthalashAyito.ayam |
kShudrAsurAviShTamanovichintya
nidrAmapAsyodbubudhe sa kR^iShNaH || 532||
truTitaM shakaTaM praghaTTanena
svapadAmbhoruhayorvidhAya kR^iShNaH |
prarudan jananIkarAdR^ito drAk
charaNA~NguShThamukho hasan babhUva || 533||
nitambinIpANigR^ihItapANiH
mandaM skhalachcha~NkramaNaH padAbhyAm |
ma~njIrajha~NkAraraveNa gopI\-
chittAni sa~nchAlayati sma kR^iShNaH || 534||
khelanAtsa virataH kShudhA rudan
gehakarmaniratAM svamAtaram |
mAtarityanunayanyashodayA
stanyama~NkanihitaH papau hasan || 535||
hastA~NgulIkuTilitaikaka chUchuko.ayaM
anyastanAhitamukhassrutadugdhasR^ikvA |
ambAmukhaprahitapadmavishAlanetraH
mAnAtirekasubhagAmatanodyashodAm || 536||
dhenuM duhAnAM jananImupetya pashchAd gR^ihItvA chaShakaM kareNa |
sa~nchAlayan pR^iShThataTe vivalgan dohAntarAyaM vyatanotpayorthI || 537||
manthAnadaNDavR^itadAmavikarShaNena
lolakvaNadvalayanAdavikR^iShTachetAH |
kasyAshchidAlayamupetya nitambinIM tAM
pashchAchChanairupasaran vyatanotsa bhItAm || 538||
kasyAshchidArohagataH kishoryAH
ka~nchulyupArUDhakuchochchakorake |
pANiM prasArya prahasan vivalgan
tAmAtanojjihmamukhIM vilajjitAm || 539||
a~Nke shayAluranimittakR^itasmito.ayaM
sandarshitAtmavadanAntarasheShalokaH |
vyasmApayannijamukhAbjavilokayitrIM
ambAM srutastanapayaHpR^iShatAbhiShiktaH || 540||
kUpa~NgatAyAM nijamAtari shrInandAtmajo.antarnilayaM pravishya |
AvarjitakShIrapR^ithUchchabhANDo dugdhAbhiShiktovyarudat svadaMstat || 541||
kShIrapravAhajaThare puruhUtanIla\-
ratnaprabhaM samupaviShTamarAlakesham |
ArohanIrakalashopagatA yashodA
dugdhAbdhimadhyagamivaikShata vAsudevam || 542||
tR^iNAvartasamutkShipto
daharAkAshavartitAm |
darshayanniva nAkastho
nijaghAnAsuraM shishuH || 543||
vatsAnAM galatalabaddhadAmahastaH
karShaMstAn dR^iDhanihitA~NghrikAnnatAsyAn |
tatkaNThaprachalitaki~NkiNIninAdaiH
kR^iShNo.ayaM prakaTitavismayo jahAsa || 544||
bahirmA gA vatsa! vrajati janako dhenubharaNaM
vidhAtuM mAtastatkaraNakutukI tvaM bhava mahAn |
idAnIM prAMshussyAmiti sapadi dolAM pariharan
udagrAkArassannatanuta yashodAM chalamatim || 545||
dadhibhANDamanthanasamutthitaM navaM
navanItamanyasadane.apyanuddhR^itam |
svakareNa mandamupagR^ihya jihvayA
muhurAlihan sa jananIniyantritaH || 546||
dhvAntAgAre mudirasuShamo rauhiNeyadvitIyaH
shikye nyastaM chalitalaguDAnmarkamashnannipAtya |
kAryAsaktyA svanikaTajuSho nUtnavadhvA mukhe tat
kShiptvA shvashrUkaTutaravachaHpAtramApAdya hR^iShTaH || 547||
kasyAshchinnijachauryavIkShaNakR^ite mandaM gR^ihAbhyantare
nishshabdAyitanUpuraM padagatervadhvA mukhAmboruhe |
phUtkR^ityA payaso nijAsyanalikAgaNDUShitasyA~njasA
kR^iShNo.ayaM nayane pidhAya niragAdgehAtsvagehaM prati || 548||
anyairgopakishorakairbahirasau krIDaikasaktaH kShaNAt
anyAntarbhavanaM pravishya kalashAddugdhaM nipIyotkShipan |
bAhyAkrIDanakaH punargR^ihavadhUmAhUya mandasmitaH
mArjAlo bhavadIyadugdhamapibatpashyetyavochachChaThaH || 549||
visraMsanena sahasA galabaddhadhAmnAM
vatsAnvimochya parinudya cha mAtR^ipAshvam |
UdhaH payaH pibati vatsa iti svakArya\-
saktAsstriyo vyaghaTayad gR^ihakarmaNo.ayam || 550||
kumbhAnnavoddhR^itamudasya parokasi drAk
aMsAvalambi kanakAMshuka baddhapiNDaH |
khAdan svayaM rahasi mugdhakumArikAyAH
tat svAdayan svaparirabdhatanormumoda || 551||
markApahArapishunAya vadhUryashodA\-
veshmAgatA karagR^ihItamukundapANiH |
ambA~NkashAyinamavekShya kR^itasmitaM taM
chitrArpiteva nijagaNDakaraiva tasthau || 552||
hayya~NgavInamapahR^itya sajagdhikelyAM
jyotsnyAM tamAlatarumUlamupetya kR^iShNaH |
shashvallihannanupalabdhaghR^itaissravantI\-
tIre jahAsa mR^igito ghanaruksuhR^idbhiH || 553||
kaMsAya sarvamidamityanushAsya mAtrA
nyastAni markadadhitaptapayAMsi kR^iShNaH |
kaMse nidhAya paribhujya cha mAtR^ipR^iShTaH
kaMsArpitAni hi mayetyavadatsmitAsyaH || 554||
karakabalaparo murArirArAt
parakarabhojyaharo virAvayaMstam |
mama karakabalaM jahAra mAtaH
svayamiti tatpurato hasan vavalga || 555||
udarapratimuktadAmabaddhaM
pR^ithulolUkhalamambayaiva roShAt |
yamalArjunamadhyago vikarShan
nanu mokShAya tayorbabha~nja shauriH || 556||
ghoShasthAkhiladAmasa~Ngrathanato dIrghIkR^itasyApi te
dAmno dvya~NgulamAtramUnamudare dR^iShTvA yashodAlpadhIH |
AshcharyAkulamAnasA sthitavatI jAnAti sA tvAM kathaM
brahmANDodaramabjalochana! kR^ipAbaddho.asi baddhastayA || 557||
aho te kAruNyaM dhanadasutayoshshApakuTayoH
vimokShArthaM bAlo vrajarachitacheShTAkupitayA |
tayA baddho mAtrA kaTukuTiladAmnAsti sa bhavAn
abhUnnAmAsmabhyaM shrutimadhuradAmodara iti || 558||
nande janmadinotsavaM rachayituM kR^iShNasya puShpAdibhiH
gehAla~NkaraNaikatAnahR^idaye nandAtmajo bAlakaiH |
krIDan vartmani dhUlidhUsarakacho mAtrAbhiShikto.abravIt
bhakShyaM dehi madIya janmadivaso mA tADayeti prasUm || 559||
chakitachakitadR^iShTirmandamanyopagehe
vinihitacharaNo.ayaM maNDaM Alihya sarvam |
truTitadadhighaTo drAgAkhubhuktulyanAdaH
samupagatanatA~NgIgaNDachumbI vyadhAvat || 560||
pralambaghnenArAdgrahaNakutukI krIDanaparaH
prasannajyotsnAyAM tamabhimR^igayan pArshvagamapi |
adR^iShTvA tenaiva grahaNavichitashshashvadachirAt
anindadduHkhArto nijamudira dehadyutimayam || 561||
vatsAnyagehadadhimarkapayopahArI
mA bhUrvadanti suhR^idastvasitaM prasUrmAm |
khAdansitAni navanItapayodadhIni
shubhro bhaveyamiti tatsatataM harAmi || 562||
puShpopakaNThachalachitrapata~NgapANiH
mugdhAkuchopari niveshya cha taM mukundaH |
bhItyA kuchAMshukamudasya vidhUnvatIM tAM
dR^iShTvA jahAsa sasuhR^idvinadan satAlam || 563||
bR^indAvanaM duravagAhamamandabR^indaM
nandAtmajA~NghrikamalanyasanAttaghAsam |
vandAruvR^indaparivanditamandirADhyaM
bR^indArakAdibudhananditanandamindhe || 564||
vatsalo vatsavatso yo
vatsotsAhotsavotsukaH |
matsaraM vatsamutsArya
sAle.apAsuM sa sasmaye || 565||
bR^indAvane kusumitAkhilavIrudagra\-
sa~nchArashIlamadhuliNmadhurAraveNa |
sammishrayanvadanaveNuninAdameShaH
tadyauvataM vyatanutAchalaputrikAbham || 566||
mAyUrabarhakR^itamastakamaNDano.ayaM
gu~njonniyantritakacho vichalekShaNAbjaH |
bhrUbha~Ngabha~NguravisheShakamugdhaphAlaH
so.astambhayadvanamR^igAn muralIninAdaiH || 567||
duhAnAyA dhenuM taruNimalasanmugdhasudR^ishaH
praveNIM vatsasya prachalagaladAmnA charamataH |
raho baddhvottAnIkR^itatanumathAkarShaNabalAt
vilokyAyaM kR^iShNo hasitavadano dugdhamaharat || 568||
utkShipyokShipya kumbhAnnaTanapaTutayA nyastatAlAnupAdaH
ma~njIradhvAnatAlashshirasi bhujayuge pAtayannUrdhvatastAn |
gopAnAM gopikAnAM dhuri valayajuShAM svedabindUchchaphAlaH
nR^ityan vismApayaMstAn sa samadhigatavAnmarkapiNDAn mukundaH || 569||
bakAsuraM vIraNavadvidArya
tIkShNAyatatroTi dalAdhvanAyam |
vilAsinI lolavilochanAli\-
pIto vraje nandasuto nananda || 570||
jambUphalAni patitAni jale.ambujAkSha\-
stvambUkR^itAmburaya samplavane jhaShAbhaH |
bimbAdharoShThapuTasa~NgrahaNena khAdan
jambUphaladyutirakheladayaM sravantyAm || 571||
upadaMshadaMshanavikUNitekShaNaH
kShaNabha~NgurabhrumadhurodanAshanaH |
suhR^idAM mukheShu kabalAni pAtayan
yamunAtaTIShu vijahAra veNubhAk || 572||
giritaTabahugairikapraliptaH
navamudiradyutiruchchapi~nChachUDaH |
bahuvanasumamAlikA~nchitA~Ngo
vyalasadayaM surachApanAkakalpaH || 573||
ajagaraM vitatAsyamaghAsuraM
nijasuhR^idgaNarakShaNakA~NkShayA |
udarago nijaghAna janArdano
vanataTe pR^ithuparvatasannibham || 574||
agharUpamaghaM kR^iShNassadgatiM samanInayat |
ko vetti nipatettasya dayA kasmin kadA katham || 575||
ghaTIyantradeshyA dayA te dayAbdhe
kaThorAvilaM tuchChamantashcha pAtram |
prahau drA~N  nipAtyAmR^itAsvAdasaktaM
vidhAyodgatiM hanta! tasmai dadAti || 576||
muShiteShu vatsa nivaheShu kAnane
vidhinA tadaiva vasudevanandanaH |
parilabdhatattadavisheShavigraho
nijamAtR^idugdhasuhito.abhavatsamAm || 577||
paugaNDavayasA kR^iShNo
vyaktAvayavasauShThavaH |
dayAlakShmIlasannetro
vR^indAvanamanandayat || 578||
barhAvataMsashcharamA~Nga baddha\-
barhAvalirbhugnagalo natAsyaH |
kekAbhanAdo vanabarhivR^indaM
nandAtmajo nartayati sma hR^iShTam || 579||
girinirjharaughapR^iShadAchitA~Ngako
ravighR^iShTipAtakR^itashakrachApakaH |
rayanAdamishritanijasvano dhunI\-
pihitassuhR^idbhirabhavadgaveShitaH || 580||
jharIyavanikAtiraskR^itatanuH payomugruchiH
gaveShaNaparairvane nijasuhR^idbhiranveShitaH |
vilokya navanIlarugruchiranIrapUraM tadA
hasadbhirupavIkShitassmitamukho babhUvAchyutaH || 581||
abdhau dugdhamaye shayAlurapi tatsandarshanodvejitaH
bhItyA tadvrajamandireShu rahasi stokaM haraMstR^iptibhAk |
kR^iShNo.abhUtsulabhe tu vastuni sadA prAyassamIpasthite
bhogye.api svayamIhite.api bahule syAt  khalvavaj~nA chiram || 582||
pR^iShThA~NghridhUnanakaThoravirAvarUkSha\-
chakShuHkarAlaradadarshitahiMsracheShTam |
utpAtya dhenukamapAsumapAtayattaM
tAlAtphalaissaha kharaM bhuvi nIlachelaH || 583||
dIprAshmadivyamakuTArhashirAH pinaddha\-
gu~njAsarA~nchitashirA vanamAlikorAH |
vanyaprasUnaruchiraH kamalAsakho.api
gopIpriyo vrajagato vyalasanmukundaH || 584||
sanmArgadarshanaparaM gurumambujAkShaH
tyaktvA halAyudhamayaM vipinaM prayAtaH |
gochAraNAya varaveNudharo bhuja~Nga\-
kShvelAnale hradajale nipapAta kR^iShNaH || 585||
tathA nApIDayatkR^iShNaM
hradasphItaviShodakam |
vilApAshrujalaM tIkShNaM
yathA tIravrajaukasAm || 586||
kAlIyanIlaviShakAlAyamAnatanurAlolachikkaNaphaNAM
Aruhya tANDavapadanyAsajha~NkR^itijatAlAnubhugnashirasam |
shoNorushoNitamukhAlolanIladalajihvAtara~NgakalilaM
kAlIyamambunidhivAsAya kAlayati dAraissma shaurirachirAt || 587||
bhaktarakShaNakR^ite muravairin
Atmano na gaNayasyapi kaShTam |
yatsamutplutigato viShanIre
hanta! te nirupamA karuNA hi || 588||
bhavatpAdasaMsparshamAtreNa loke
viShaM syAtsudhA hanta! hiMsro.api sAdhuH |
bhavatpUtanAmnAM smR^itau chechChubhaM syAt
kimu tvatsamIpasthitau chakrapANe || 589||
vane grAhyakrIDAparakapaTagopAlavapuShA
pralambenoDho.ayaM danujaripubhItena halabhR^it |
vyatAnIchChrIkR^iShNapraNihitagirA sakthiyugataH
pralambagrIvaM taM vyasumapasR^itasphItanayanam || 590||
vAchATakUTakuTavATanaTatsphuli~Nga
tu~NgAdrikandaradarAjagaraprasAram |
dAvAnalaM shritasuhR^ijjanagogaNAnAM
rakShAkR^ite tarugato.agiladambujAkShaH || 591||
gopyassarvAstaruNimalasatsvA~NgamaugdhyAbhirAmAH
kAmAshliShTAstapasi sharadi prAptakR^iShNAkhyajIvAH |
kAshchid.hdhyAnAttadanukaraNAtkAshchidapyuchchagAnAt
vR^indAraNye karaNamakhilaM sArthayAmAsurevam || 592||
dayAdhunI te vrajavAsinInAM
shauchavratAchAraparA~NmukhInAm |
chittAni sa~NkShAlayati sma shaure!
yathA bhaveyurbhavadekabhA~nji || 593||
veNuM kUNitarAgamugdhanayanaH kR^iShNaH kalindAtmajA
tIrArUDha mahIruhAntaragato nIladyutirvAdayan |
dUrAtkokilavadvanapriyatayA puShTaH pareNApyayaM
gopIrAhvayati sma mR^igyamadhurasvIyAkR^itirnAdataH || 594||
gopInAM gamanaM nirIkShya pashavaH phenAktaghAsAnanAH
karNotkShepaNadarshitorumuralIhR^idyasvanaikAdarAH |
hu~NkAraprakaTIkR^itAtmagamanotsAhA raNad ghaNTikAH
dhAvanti sma viku~nchitoddhR^itachaladvAlA mukundAntikam || 595||
hemantashItapavanAbhihatAstu mugdhAH
kR^iShNAptikAmaruchiravratamajjanechChAH |
vAsAMsyuShasyabhivimuchya niveshya tIre
mandaM kalindatanayAM vivishurvivastrAH || 596||
parasparajalAhatismitavihArasaktAsu tA\-
svayaM rahasi sa~ncharannapahR^itAni tAni drume |
nidhAya muralIsvanasvakakR^itAkShisa~nchAlanAH
vidhAya rachitA~njalIH karuNayAMshukAnyArpayat || 597||
kR^iShNasya narmavachanaikavashAssakhAyaH
kAntAracha~NkramaNaja kShudavAptabAdhAH |
sUryAtapaglapita vishlathadhUsarA~NgAH
bhissArthino muraripuM sharaNaM prapannAH || 598||
kR^iShNoktyA vrajabAlakAssava bhuvaM prApyAvanamrA dvijAn
Uchurnandasuto nijAgrajayutaH kShutpIDitaH prAhiNot |
havyArthI vitarantu havyamiti tachChrutvA.apyudAsInataH
viprAstAnavahelanena vimukhAMshchakruH kimeSha kratuH? || 599||
vinA kAruNyaM te kathamiha bhavantaM dvijavarAH
api prAptaM sAkShAtsavanapuruShaM kR^iShNa! viditum |
samarthAssyuH karmapravaNamanaso j~nAnavimukhAH
svashaktyA bAhlIkodvahanabharakhidyatkhara nibhAH || 600||

iti shrIlakShmIdAsAdhiShThita vedAntadeshikapraNIte dayAsahasre
ShaShThashatakaM sampUrNam |
\section{7\. saptamashatakam}
shrIH |
shrImate rAmAnujAya namaH |
shrImate lakShmIdAsAya namaH |
shrImadvedAntadeshikAya namaH |
atha dayAsahasre saptamashatakam |

tatpatnyaH patibhirniruddhagamanA apyambujAkShAya ta\-
ddhavyaM bhogyatamAnnapAyasapayohayya~NgavInAnvitam |
bhaktyAdAya samarpya tAstu mumuduH kR^iShNo.api mitraissamaM
tadbhuktvA suhito.abhavatsa bhagavAn bhaktyekavashyaH khalu || 601||
karmaNA kimu vasha~Ngato hariH j~nAnavaibhavanimittataH kimu |
prItimAtrarachitArpaNastadA so.anvagR^ihNadabalA dvijanmanAm || 602||
kiM kR^itaM tapa uta vrataM kShitau
dhyAnavartmani chirasthitiH purA |
vipradAraviShaye kutastathA
mAdhava! prakaTitA dayA tvayA || 603||
viditapravR^ittirapi gopasambhrame
shishubhAvayogyamadhurAnuyogataH |
jananImukhAdavagatAdikAraNo
nijagAda sAdhu jarato janArdanaH || 604||
vayovR^iddhA yUyaM kimidamuchitaM yachcha suchirAt
samArabdhaM karma prakR^itamavichAraikasubhagam |
kimarthaM kartavyaM kimu phalamiha dravyavilayAt
mudhaivaitanmanye surapatimakhaM duHkhabahulam || 605||
kathaM shrImAnindrastridivanilayastoyadapatiH
kutastasmai kAryaM vrajavasatibhiH pUjanamiha |
payojyotirdhUmaprabhR^itivalanaM yAti ghanatAM
svayaM varShatyambu prasaraditi vAtyAhatatanuH || 606||
karmAnurUpiNI bhUmau sthitissarvasharIriNAM |
purAkR^itasvakarmAnurUpamashnanti te phalam || 607||
asmadrakShaNabhAramudvahati hi shrImAnayaM parvataH
ghAsAmbuprabhR^itipradAnanirato govardhanAkhyo mahAn |
tasmAtsamprati sAdaraM vayamamuM sambhArabhArAnvitAH
prArchiShyAma itIrayan vrajajanAn nighnAnatAnIdayam || 608||
evaM kurvatsu sarveShvatikupitatuShArAT praNunneShu meghe\-
ShvArAdvarShatsu ghoraM paTukuTilaraTatsphUrjathudhvAnabhAkShu |
gopAlaiH prArthito.ayaM pashubhirapi muhussAshru saMvIkShyamANaH
hastenotpATya gotraM nijakarakalitaM Chatravatso.apyabibhrat || 609||
jitashshrImAnvajrI dhavalagajarADvAhanagato
vinamrasstunvan sansurabhisahitaH prA~njalishirAH |
sabAShpaM govindetyasakR^idabhidhAyAmR^itakaNaiH
aShi~nchadbAlaM taM yaduparibR^iDhaM mitravinutam ||  610||
aishvaryadR^iptamapi vismR^itasarvashaktaM
kR^itvA katha~nchidavanAya cha sammukhInam |
utpAdayasyayi! daye! bhagavatyapArAM
bhaktiM mahIdharabhidatra bhaveddhi sAkShI || 611||
prAyovirodhakR^idihaiva bhavatkaTAkSha\-
pAtraM bhavatyanitarAptavisheShabhAgyam |
tatpUtanAprabhR^itivR^itraniShUdanAntAH
sarve.apyavApuramalAmbujapatranetra || 612||
nandAdayo nigamavedyamamuM mukundaM
kAruNyadarshitamahAdbhutadivyacheShTam |
stutvA charantamiha bAlishagopabAlaiH
te menire nijajaniM saphalA~ncha dhanyAm || 613||
yamunApravAhavinimagnama~njasA
varuNopanItamavakarNya nandaja |
pitaraM punashcha samanInayo vrajaM
karuNA na kArayati kiM tvayAchyuta || 614||
sharajjyotsnAkAnte vimalapuline sUryatanayA\-
taTe kR^iShNe veNuM madhuramadhuraM vAdayati tAH |
nishamyArAdgopyo nijasadanakarmavyatikaraM
vihAyottasthurdrAkpatiguruniruddhA api tadA || 615||
kAshchiddohaM katichana shishUn kAshchidapyAryakAryaM
kAshchinnAthaM katichana nijAla~NkR^itiM pAkamardham |
tyaktvA gopyo yadupatihR^idaH prAptasa~NghA viyAtAH
yAtAstasminviharati mudA nandajastaM pradesham || 616||
nandAtmasambhava! kishora! vishAlanetre
dR^iShTe tvayi smitamukhe bhuvi bAlishAshcha |
tyaktvAtmabandhupatimitrakalatraputrAH
snihyanti nAtha! bhavatIti kimatra chitram ||  617||
krIDantIryadupu~Ngavena yamunAtIre kR^itAmaNDalAH
tatsaMshleShavijR^imbhitasmaramahAvaidagdhyarAsotsavAH |
gAyantIrvrajayoShito hatahR^ido.aha~NkAramAnonnatAH
tyaktvAha~NkR^itinAshanAya viharannantardadhe mAdhavaH || 618||
karuNayA yadi darshayasi svayaM
nijamanoharadivyasuvigraham |
anubhavanti bhavantamihAshritAH
yadi tathA na kimu prabhavanti te || 619||
sannidhApayati saMrirakShayA
tvAM dayA bhavadavAptigarvite |
Ashrite bata tirohitaM tathA
tanvatI harati garvamachyuta || 620||
kadAchidambikAvanaM pravishya mAdhavassuhR^id vR^itaH
prasUnakArchitAmbiko vihAratatparashchiraM vane |
bhuja~NgamAd gR^ihItamAtmanandama~njasA vyamochayat
bhuja~Ngama~ncha shApataH padAbhimarshanena pAvayan || 621||
anugrahAya shApo.api kalpate hi tapasvinAm |
yatkR^iShNacharaNasparshamanvabhUt sa sudarshanaH || 622||
sukhaM duHkhaM sarvaM kamalanayana! prAktanavidheH
bhavedyadbhavyaM tattvadamitakR^ipaikAyatikR^ite |
dine gharme sUryapratapanaparosraprasaraNa\-
prataptA kShoNI syAnnavajaladharAsArashishirA || 623||
sha~NkhachUDamupayAtamaraNye lIlayaiva vinipAtya shirasstham |
ratnamagrajakare viniveshya krIDati sma suchiraM vanamAlI || 624||
bhraShTarAjyakule jAto.apyaharachChIrSharatnakam |
sarveShAM ratnahAritvaM darshayanniva shaishave || 625||
bhA~NkArabhIkararavaM samudagrapakShma\-
raktekShaNaM pR^ithulalolakakutkarAlam |
sUtkAravAtadhutabhUmimR^idaM sushR^i~NgaM
taM jaghnithAshu vR^iShabhaM khurakIrNamUtram || 626||
vyAdAya vaktramabhidarshitashubhratIkShNa\-
dantaM karAlanayanaM kaTutAraheSham |
taM keshinaM khuravighaTTanadIrNagotraM
vaktraprasAritabhujo nijaghAna kR^iShNaH || 627||
vyomAsuraM kapaTagopatanuM nihatya
tenApahR^itya girikandarasanniruddhAn |
gopArbhakAnparivimochya rarakShitha tvaM
kAruNyakAryamakhilaM khalu pa~NkajAkSha || 628||
yathA tuchChIkuryuH paramapadamapyuchchavibhavaM
sadAnantAnandaM madhumathana! kAruNyajaladhe! |
bhavallIlAlInA mukhakamalabhR^i~NgA vrajajuShaH
tathAbhUvanmagnAH bhavadanubhavAnandajaladhau || 629||
madhurAdharachumbiramyaveNuM
chalavallImiva bha~NgurA~Ngabha~NgIm |
parirabhya murArireSha rAdhAM
abhireme smarashAsanAnurodhAm || 630||
naivaikarUpaM kimapIha loke
dvandvAtmake vartata ityabhIkShNam |
shaMsannivAgAnnR^ipakaMsanunna\-
sso.akrUranAmA bhagavatsakAsham || 631||
akrUraH pashubR^indamadhyavisaraddhUlyasphuTA~NgaM kana\-
tsandhyArAgavijR^imbhamANakanakatviDbhAsuraikAmbaram |
ghaNTATa~NkR^ititAlamishramuraLInAdaM suhR^idvellitaM
dR^iShTvAyAntamaraNyato muraripuM svaM dhanyamAmanyata || 632||
madhuripubalarAmau syandanAntarniShaNNau
rachitasalilagAhastau vilokyAmbhasi drAk ||
kimidamiti sa nIrAdutthitassyandanasthau
tadamitakaruNAM tAM saMsmarannabhyanandat ||  633||
rathavare viniveshya madhudviShaM
haladhareNa sa sArathitA~NgataH |
samanayanmadhurAM madhurAnanaM
svakR^itapuNyaphalaM manasi smaran || 634||
smAraM smAraM tadamitakR^ipAM bAShpadigdhekShaNo.ayaM
darshaM darshaM navaghanaruchaM puNDarIkAyatAkSham |
romAshliShTo manasi kalayan kaMsashaMsyopakAraM
naivAkrUraH pramadajaladheH pAradarshI babhUva || 635||
duShTakaMsavashavartinIM bhuvaM
pAvayanniva padAbjacha~NkramaH |
kAmapAlakalito vilokayan
prAvishatsa madhurAmadhokShajaH || 636||
kalabhagamanaM shaure! draShTuM bhavantamihAdarAt
kimiva rachitaM puNyaM kiMvA tapo madhurAjanaiH |
tava tu karuNAM kiM vA brUmastapasvisudurlabhaM
navaghananibhaM divyaM rUpaM pradarshitavAnaho || 637||
madhurAgR^ihamedhino bhavantaM
paripIyAkShipuTairhare! nananduH |
ahamasmi tadA bhavatkR^ipAyAH
na hi pAtraM kva gataH kathaM sthitirme || 638||
tadA mAM nAdrAkShIriti hR^idi vichintyAghini kalau
madarthaM sheShAdrau kimu vasasi divyArchyatanubhR^it! |
aho te kAruNyaM duritanilaye mayyapi hare!
kR^itArtho jAto.ahaM bhavadanubhavenAdya sukR^itI || 639||
adhigatasakalArtho.apyarthayaMshchelamekaM
rajakamakR^itachelasparshanaM kaMsavashyam |
karahatigalitAsuM pAtayaMshcheladhArI
sapadi mumudiShe tvaM chitracheShTo.asi shaure || 640||
yA~nchAvR^ittistava bahumatA prAyasho bhUmibhAge
labdhvA kShoNIM balibalikarAdanvagR^ihNaH purA tam |
kubjAhastAtparimalayutaM chandanaM yAchamAno
mugdhAM tAmapyarachaya ihAnugrahArthaM hi yA~nchA || 641||
divyagandhahR^idaya~NgamassadA
chandanena kimanena te.achyuta |
tAntu vakratanumArjavottamAM
kartumeva karuNA tavAnaghA || 642||
vivekavikalAn svayaM samupagamya sanmArgagaH
katha~nchidapi kaitavAtprakaTitAtmachitrakriyaH |
kaThorakuTilAshayAn kR^ipaNakAnapi svechChayA
rirakShasi ramApate! vitanute kR^ipA tvAM tathA || 643||
pApI kubjo bhavati janimAn vakra ityapyudIrNaM
seyaM kubjA kumanujapateH bhR^ityabhAvaM prapannA |
satyapyevaM yadukulamaNe! tvatsamAshleShasaukhyaM
bheje rUpaM sthitimapi nahi prekShate te.anukampA || 644||
kR^itAgasamapi prabho! tvamapadeshataH pAlaya\-
syaho! kimuta? saMshrite tava padAbjadAse jane |
gato.asi tata eva tatprasavamAlikAjIvikaM
bhavadbhajanatatparaM nanu gaveShayanmandiram || 645||
sumanassu me tu mahatI mudityamuM
tava bhAvamatra paridarshayanniva |
sumamAlyajIvikagR^ihaM gato bhavAn
akarotkR^ipaikasadanaM tamAdarAt || 646||
vanamAlAla~NkR^itA~Ngo.apyarimAlAbhilAShavAn |
kimarthamabhavashshaure! kiM bhaktAnujighR^ikShayA || 647||
rAjArhaM parimaLabandhuraM vichitraiH
puShpaughaiH grathitamanoj~nasannivesham |
mAlyaM tannijahalinA svayaM samarpya
grIvAyAM pramuditamAnaso.abhavastvam || 648||
mAlAla~NkR^itamambujekShaNamayaM nandAtmajo mAnayan
mAlAkAra idaM madIyabhavanaM pUtaM tvada~NghryarpaNAt |
dhanyo.asmIti vadan sabAShpanayano nR^ityan satAlaM muhuH
shaure ki~NkaravANi te tu karuNAM sa~nchintya mUDho.asmyaham || 649||
ityudIrya kR^itamastakA~njaliH
kR^iShNapAdanihitAtmamastakaH |
bAShpavAriparimR^iShTatatpado
harShavArinidhimajjito.abhavat || 650||
gatvA svayaM tadgR^ihamambujAkSha!
puShpasrajA yAchitayAtihR^iShTaH |
tadvaMshajebhyo.apyapavargado.abhUH
kathaM dayAM tAM tava varNayeyam || 651||
patraM vA phalamapi vA prasUnamekaM
yo bhaktyA vitarati te.ambujAyatAkSha! |
svIkR^itya svayamakhilaM tadatra tasmai
yachChasyapyanitaralabhyamAshu bhAgyam || 652||
bAlye dhanurvidalanaM raghupu~Ngavassan
kR^itvA videhatanayAkarapIDito.abhUH |
adyApi kR^iShNa! yadurAT dhanuSho vibha~NgAt
kiM pANipIDanamupaiShi jayashriyastvam || 653||
kShIraM nipIya shakaTasya talapradeshe
suptvAnishaM himamayIM ativAhya shaure! |
uttiShThati sma sa bhavAn bhagavan! prabhAte
dhi~NmAnuShatvamidamatra dayaikakAryam || 654||
vAtsalyapUrNahR^idayasya tavochiteyaM
gopAlakaishshakaTamUlatale.api shayyA |
asnAtagopatanudoShasubhogyatAtta\-
harShaprakarShaparipuShTamanA yatastvam || 655||
indrAdayo.api savanAhutahavyabhAga\-
mAdAtumatra naradoShaparA~NmukhAsyAH |
AyAntyagocharasharIravarA murAre!
shakrArchitA~Nghrikamalo.apyasi gopabAlaiH || 656||
j~nAtodantassa tu kuvalayApIDamAsAdya mattaM
nAgendraM drAgupari patitaM shuNDayA tADayantam |
utpATyaikaM musalasadR^ishaM dantamAhatya tena
sphIte kumbhe vividhagamanaH pAtayAmAsithorvyAm || 657||
gaje nipatite kR^iShNaH kishoraH khelanotsukaH |
reje shilochchayaprasthe ghanapota iva sthitaH || 658||
kR^iShNAyedamiti prashastakusumasrakchUtarambhAvaliM
shvetollochatalAbhilolavilasanmuktAkalApA~nchitam |
kaMso maNDapamAvishanyadushishorabhyAgame kautukI
bhItyA santatakR^iShNanAmahR^idayo nirNiktapApo.abhavat || 659||
samutsAritajihmAgrakuntalo madhusUdanaH |
chANUraM chUrNayAmAsa chAruchandranibhAnanaH || 660||
shubhratUlakR^itakandukopamo
mallatallajakare vivalganaH! |
muShTipAtahatamuShTiko.abhava \-
dra~NgavAdyalayacha~Nkramo halI || 661||
kva shikShitA nAtha! niyuddhavaikharI
prachaNDamallapratiyuddhapaNDitaH |
kishora evAsi hi sarvashaktatA
kva yAti te martyatanorapi prabho || 662||
govardhanaM girivaraM shritarakShaNArthaM
ekA~NgulIshikharato divasAMshcha sapta! |
bAlye prabho! dhR^itavatastava lIlayaiva
mallAH kiyanta iha sallapanapraphullAH || 663||
kartavyashUnyahR^idayaM kR^itadausthyachintaM
vyarthodyamaM bhayavighUrNitamAshu kaMsam |
siMhAsanAdbhuvi nipAtya samutplutastvaM
muShTyAhatiprahatamAtanuShe sma kR^iShNa || 664||
vidhivilasitaM kartuM kovAnyathA chaturo bhavet
yadabhihanane kaMso hiMsrAnmuhuH parinodayan |
api vinihatastenaivAyaM duradhyavasAnataH
tadiha karuNA shaureH pApAtmanAM sharaNaM sadA || 665||
dhanyaH kaMso yadanavarataM kR^iShNanAmaikachitto
darshandarshaM svayamupagataM tasya saundaryamugdhaH |
sAkShAttena prayatatanunA spR^iShTamAtro gatAsuH
tatpAdAbje vinihitashirAH dhvastapApo babhUva || 666||
nindA bhaktirbhItirapyatra yena
prAyastvayyevArpyate kApichaikA |
tasmai shrImaMstvatkR^ipA tAratamyaM
tyaktvA shreyo dAsyati prAptakAmA || 667||
yadyapyachyuta! te tu mAtR^isadR^ishI sarvaikarUpA kR^ipA
shreyo dAsyati tatra naiva bahushaH kAryA hi charchA hare! |
satyapyambujapatranetra! bhavati prItyaiva yo vartate
tasyAnandalavo.asti kiM bhuvi tayostadbhinnayoranyayoH || 668||
pitarau vimochya nigalAd ghanadyutiH
tadavAptagADhaparirambhaNotsavaH |
galitAshrulochanachirAvalokitaH
kR^itakR^ityatAmamanutAtmani prabhuH || 669||
saMsAraghoranigalAtparimochayitre
tubhyaM namo.astu karuNAkara! divyamUrte! |
asmAdayonigalanAtparimochito.asmI\-
tyatra pramugdhahR^idayaH kimahaM vadeyam || 670||
abhayadAtari hanta! bhavatyapi
pratikalaM ripubhItirasha~Nkyata! |
vitanute tvayi vatsalatA tathA
na mama yAti matistava shaktiShu || 671||
Amananti nigamaikagocharaM
paNDitA nanu bhavantamachyuta! |
vedmyahaM mama bhavantamarbhakaM
mAyayaiva tava mohito.assmyataH || 672||
ekaikamadbhutatamaM tava bAlyakAryaM
sa~nchintya varShma pulakA~nchitamambujAkSha! |
AsIttathApi mama putratayAtikhinno
naivAsmaraM sakaladuHkhaharaM bhavantam || 673||
nandasya bhAgyamiha me na hi nandasUno!
bAlye manoharavihAraparamparAM te |
bhUyo.anubhUya mudito bhavasArapAraM
pashyan kR^itArthitajaniryadabhUdvraje saH || 674||
yashodAyA bhAgyaM kimiti nigadeyaM kathamahaM
pibantaM stanyaM tvAM marakatanibhaM svA~NkashayitaM! |
praphullAsyAmbhojaprahitanayanaM vIkShya mumude
tadetaddevakyA na hi khalu mahAbhAgyamavanau || 675||
pUtodakaissnApanamannadAnaM
puShpAdyala~NkArapariShkR^iti~ncha |
kR^itvA yashodA yadunAtha! tubhyaM
sA dhanyadhanyA muditA babhUva || 676||
sha~NkamAnahR^idayaH pratikShaNaM
duShTakaMsabhayamachyuta! tvayi |
jarjharIkR^itamanAssadAbhavaM
hanta! so.api nihato hi ghAtukaH || 677||
kiM bhAgyaM vrajavAsinAM kimu gavAM kiM bAlakAnAM tathA
bR^indAkhyasya vanasya kiM ravisutAnadyA vadhUnAM kimu ||
vatsAnAM kimu taiH purA virachitaM puNyaM tapo vA vrataM
he govinda! bhavatpadAmbujarajodhanyAssamastA api || 678||
ityuktavantaM pitaraM praNamya
kR^iShNo.abravIttAta! bhavadviyuktaH |
nAhaM tvadAnandakR^idarhasi tvaM
kShantuM hi mantuM mama sampratIti || 679||
sa~NkarShaNaM sarvajanAkShikarShaNaM
gADhaM samAli~Ngya jagAda devakI |
pashyAmi diShTyA nanu vatsa! govraje
tvAM kliShTamiShTairvanacha~Nkramairiti || 680||
baddhaM taM sapadi vimochya chograsenaM
rAjAnaM punarapi kArayan sa kR^iShNaH |
svaM dharmaM prakaTitavAnyadUdvahAnAM
prabhraShTakShitiparibhR^iTtva rUpamIDyaH || 681||
asa~NkhyabrahmANDaprakaTitanijaishvaryavibhavaH
samastAntaryAmI yadukulamaNe! kintava bhuvA |
naraissarvairevaM vidhiniyamavashyatvamanishaM
supAlyaM dhIrairityanurachitakarmopadishasi || 682||
niyAmakatve svata eva siddhe
kenApi dAtavyamihAsti kinte |
tathApi lokAnusR^itau kR^itAtmA
bhraShTo.asi rAjyAditi tadvichitram || 683||
sa~NkalpamAtraparikalpitasarvajantu\-
vR^ittyutthamatyanuguNaprachurapravR^ittiH |
trailokyarakShaNaparo.asi yadUttama! tvaM
rAjeva shAsanaparaH kimu rakShaNArtham || 684||
antaH praviShTashcha charAcharANAM
yathochitasthAnaniveshayogyAn |
bibharShi tAnambujapatranetra!
sUtraM vichitrAniva ratnasa~NghAn || 685||
nandaM vilokya karuNArasapUritAkSho
bR^indAvanaM kimabhiyAsi suhR^itsametaH |
vAtsalyapUrNahR^idayo mayi manmanAstvaM
sarvasvadAnaniratassamapAlayo mAm || 686||
iti nigaditaM shrutvA nando.apyAnanditamanA manAk
nijabhujasamAshliShTaM kR^iShNaM sabAShpanayano.abravIt |
kimidamuchitaM kR^iShNa! shrImaMstvayaiva parirakShitAH
vayamiha muhushshatruvrAtAtkR^ipaikanilayAchyuta || 687||
tvayyAgate tR^iNajalAdisamR^iddhirAsIt
gAvo.apikumbhapayasaH paripuShTagAtrAH |
hR^iShTA babhUvurakhilA vrajabAlakAshcha
yoShAH bhavatsahavasatyanaghAtma bhUShAH || 688||
tvatpAdapa~NkajarajaHparipUtadhanyaM
bR^indAvanaM sakalabhAgyanitAntabhogyam |
sAnnidhyatastava mahotsavapuShTamAsIt
tattvAM vinA kathamahaM vikalaM visheyam || 689||
tyaktvA tR^iNaM jalamapi pratipannamaunAH
gAvo.api kR^iShNa! bhavadAgamanAdhvanetrAH |
hu~NkAramAtraparidarshitadainyaduHkhAH
goShTheShu santi kathametya vilokayeyam || 690||
kaMsaM nihatya punarapyabhiyAsyatIti
gopA~NganAH kR^itadhiyastvadananyabhAvAH |
rAtrandivaM nanu hare! pratipAlayanti
mAmekamAgatamavekShya kathaM bhaveyuH || 691||
puShpANyaraNye vividhAni kR^iShNa!
mlAnAni tatraiva patanti bhUmau |
rAjye sthite tvayyapi tAni ko vA
sAnandamAdAsyati dhAraNArtham || 692||
yA bhItyA navanItadugdhadadhibhR^idbhANDopagUhotsukAH
tA evAdya samarpaNAya bhavate hastoddhR^itaM tvatpriyam |
ehyehIti sabAShpagadgadagirastvAmAhvayantyAdarAt
tadgovinda! mayaiva samprati samAyAhi vrajaM sAgrajaH || 693||
rAdheva gAnavimukhI muralI mukunda!
vAtAtapAbhinihatA bhavadAptikAmA |
bhUmau luThatyavirataM dayanIyashobhA
tatsAntvanAya samupaihi mayA vrajaM tvam || 694||
shrutvA nandavacho viyogashithilaM hR^iddrAvi kR^iShNo.abravIt
kartavyaM bahu vartate.atra nitarAmAyAtumevotsahe |
nAhaM samprati yAtumarhatha punardraShTuM vrajeyaM vrajaM
tvitthaM sAntvanatatparo muraripussampreShayAmAsa tAn || 695||
savidhi samupanItau rAmakR^iShNau svapitrA
gurumukhamadhigantuM sarvavidyAH prayAtau |
vinamitashirasau sAndIpaniM prApya hR^iShTau
nijaguruvarivasyAsaktachittau samAstAm || 696||
sakR^iduktaM punarnaiva viShayagrAhiNostayoH |
vidyAdhidevate tau tu lokasa~Ngrahatatparau || 697||
anugrahakR^itAdaraM kalayati priyA sA dayA
bhavantamiha yojayatyaniyatakriyAyAM ChalAt |
jagadgurumapi svayaM guruvashaM vyatAnIttathA
vyadApayadaho! gurostanayamabdhigaM dakShiNAm || 698||
evaM kShitau manujatAkR^itachitrakarmA
shrI ve~NkaTesha! karuNAparichoditassan |
mauDhyAdbhavatparibhavaikahR^ido manuShyAn
sa~nchintya parvatataTe.asi kimarchyamUrtiH || 699||
kathamapyamatInnarAnadhInAn
karavANIti kR^itapratij~na eva |
ahishailataTe vichintayan kiM
janabhAvasmaraNAtkR^itasmito.asi || 700||

iti shrIlakShmIdAsAdhiShThita vedAntadeshikapraNIte dayAsahasre
saptamashatakaM sampUrNam |
\section{8\. aShTamashatakam}
shrIH |
shrImate rAmAnujAya namaH |
shrImate lakShmIdAsAya namaH |
shrImadvedAntadeshikAya namaH |
atha dayAsahasre aShTamashatakam |

abhihitaM vachanaM parirakShituM
punarapi pratipadya yashasvinIm |
surabhichandanadAM madhurAnanAM
tadabhilAShamapUrayadachyutaH || 701||
nirAta~NkAparichChinnasadAnandaghanasya te |
anyApekShA mude kiM vA kR^ipAkAryamidaM khalu || 702||
bhaktAnAM mudameva hanta! manuShe svIyAM mudaM shrIpate!
teShAM duHkhamavaiShi duHkhamamitaM svIyaM kR^ipAvAridhe! |
tadbhaktairyadapekShyate tadachirAtsampUrayasyAdarAt
AtmArthaM na kimapyapekShitamaye! sampUrNakAmo bhavAn || 703||
svakIyAvirbhAvaM saphalayitukAmo yadupurI\-
nivAsashshrIvAso ghanaruchipaTapremamuditaH |
vadhAya pratyarthipravaranikarANAM kR^itamanAH
manAgbIjAvApaM sapadi kR^itavAn kaMsamukhataH || 704||
anekavAraM magadheshvareNa
saMyudhya taM kAlayasi sma shaure! |
samastashaktasya kiyAnayaM te
krIDasyaho! mAnuShayogyakR^ityaH || 705||
sR^iShTiM sthitiM layamapi prabhavaM trilokyAH
sa~Nkalpato rachayituM kimidaM mukunda! |
Aj~nAnuvarti sakalAyudhachakravarti
jAgarti chakramanishaM bhavadIyapANau || 706||
ekato yavanapIDanaM jarA\-
sandhayuddhamaparatra chintayan |
dvArakAM jalanidhAvakArayo
divyasampadamaye! mayena hi || 707||
ratnAkaropari suratnapurI tvadIyA
sA dvArakA surapurItaruratnadIprA! |
vedAntavedyamahimA tava vAgatItaH
satyevamapyanukaroShi manuShyacheShTAm || 708||
kathaM vA shaure! tvaM jalanidhijale divyanagarIM
vishAlAM nirmApya sphuradudadhinA dhArayasi tAm |
purA rAmatve.api prabalajaladhau setumatulaM
nalenaitadyuktaM tava tu vitataM kAritavataH || 709||
bhayakR^idbhayanAshano.api shaure!
yavanAdbhIta  iva pradhAvya dUram |
amunA yavanena vIkShyamANo
hyavishaH parvatakandarodaraM drAk || 710||
dhanyo.ayameva yavano yadamuM bhavantaM
pItAmbaraM ghanaruchiM nalinAyatAkSham |
pa~nchAyudhA~nchitachaturbhujadaNDamIDyaM
mattebhadhAvanamapashyadachintyarUpam || 711||
muchukundadR^ishA vinAshya vIraM yavanaM tatpratibodhanAparAdham |
prakaTIkR^itavAn phalaM hyavAryaM bhagavadbhaktakR^itAgasAM mukunda || 712||
jImUtakAntaruchipa~NkajapatranetraM
chakrAbjanandakagadAramaNIyahastam |
kastUrikAtilakaphAlamarAlavAlaM
divyasvarUpamayi! darshitavAnamuShmai || 713||
suptaM vyutthApya karuNe! muchukundaM vyadApayaH |
divyarUpaM mukundasya tasmai yogibhirIpsitam || 714||
jarAsandhAdbhIto haladharayuto dhAvanapaTuH
samutsedhe shaile pihitatanurapyalpamatinA |
girau dagdhe tasmAtplutigatadharaH kvApi niragAH
vichitrA lIlA te paramapuruShasyApi dharaNau || 715||
navanItachauryachiravAsanAbalAt
navanItakomalatarAchChamAnasAm |
apahartumeva kR^itadhIrabhUH kimu
prasabhaM mukunda! bhavadIyarukmiNIm || 716||
nikaShopalakR^iShTahemarekhA\-
sadR^ishI tAvakavakShasi prasaktA |
mumude nanu rukmiNI murAre!
bhavadIyAptividhAvapi shramaste || 717||
pramathyAbdhiM pUrvaM samadhigatavAn padmanilayAM
dhanurbha~NgAtsItAM janakatanayAmApitha hare! |
idAnImapyevaM yudhi jitaripurbhIShmakasutAM
shrameNa svAyattIkR^itachakitadAro.asi kimidam || 718||
athavA sati puShkale.api vighne
tadapohyAshritarakShaNaM tanomi |
iti darshayituM kimambujAkSha!
shramanirvAsitavighna eva jiShNuH || 719||
dayitayA pratiShiddhavadhaM hare!
samabhirakShitavAnaparAdhinam |
karuNayA nanu rukmiNamAhave
puruShakAradhurA vachanAtigA || 720||
purA yenAkAri pradhanabhuvi sAhyaM nirupamaM
niyuddhaM tenAsIttava jaraThabhallUkapatinA |
anugrAhye jantau kathamapi hare! kAmapi dayAM
vitanvanmohAttaM vighaTayasi dattAtmavibhavaH || 721||
svA~NgAbhimarshanasukhAnubhavena bAlye
nIrAbhikhelanavidhau janitAnurAgAm |
sUryAtmajAM tvadanuchintanadhanyadhanyAM
AmodayaH karuNayA pariNIya shaure || 722||
mandAkShamandadhiShaNAn dhutagarvagandhAn
AndolayannarapatIMshchiranindanArhAn |
govinda! sundaramukhIM nanu mitravindAM
vindannananditha milinda ivAravindam || 723||
durdAntadR^iptaduravagrahadurvinItAn
saptApi kR^iShNa! vR^iShabhAn damanena vashyAn |
saptAkR^itirnanu vidhAya karagraheNa
satyAmavApitha cha nAgnajitIM kR^ipAlo! || 724||
shrutakIrtisutAM mukunda! bhadrAM
nanu bhadrAvayavAM kura~NganetrIm |
vidhivatkarapIDanena shaure!
dayitAmApitha modayan kR^ipAlo! || 725||
madrAdhinAthatanayAM nanu lakShmaNA~ncha
bhUpAlamaNDalapariShkR^itamaNDapasthAm |
sarveShu rAjasu miShatsu cha jahritha drAk
tArkShyassudhAmiva janArdana! tArkShyaketo! || 726||
narakaM vinAshya narakaM yathA nR^iNAM
nigalIkR^itAstu surasundarIsamAH |
nijarUpasaktahR^idayA nitambinIH
samanInayo hi kR^ipayA puraM svakam || 727||
narakApahR^ite sukuNDale tvi\-
DDhasitAdityaruchI samarpya tasyai |
kR^ipayA kulishAyudhasya mAtre
kR^itakR^ityatvamadarshayo hi shaure || 728||
evaM sAhyakR^idapyameyavibhavo vajrAyudhenAhave
dviShTastaM pravijitya divyamadhuliT jha~NkArasusvAgatam |
tArkShye nyasya cha pArijAtamamitAmodaprasUnA~nchitaM
satrAjittanayAvanIM samanayo mAyAhyachintyA tava || 729||
mAnApanodAya narmoktivettA
shrIrukmiNIdR^iptahR^itkR^intanoktyA |
tAM rodayan sAntvanoktyApi shaure!
prAharShayaH prANisadvartmakA~NkShI || 730||
svaputrapautrAdivivAhakAle
tAnantarAyAn pravijitya shatrUn |
amAnuSheNAtmabalena shaure!
tvadIyarakShAM bahudhA vyatAnIH || 731||
tvadIyArthaM shrImanmanujatanurapyadbhutavidhiH
dharaNyAM pratyUhaprashamanakR^ite kleshamamitam |
samAropya shreyo vitarasi natebhyo yadupate!
dayAM te nissImAM kathayitumanIshastvamapi hi || 732||
kR^ikalAsamanalpavarNadehaM
muhurAvalgitamastakaM prahisthaM! |
kR^ipayAnujighR^ikShurAtmahastA\-
dudabibhrastava kAryametadeva || 733||
nR^igachakravartinamanalpadAyinaM
dvijayugmagharShaNanirastavaibhavam |
samudasya kUpakuharAtkR^ipAnidhe!
patitoddharatvamabhidarshitaM tvayA || 734||
munipu~NgavairmuhurabhiShTuto bhavAn
dharaNIsureShu dR^iDhadarshitAdaraH |
dvijavittachauryaphalamapyudAharan
nR^igachakravartikathayaiva rauravam || 735||
nIlAmbaro vrajamupetya punashcha tatra
nirvartitotsavanirutsukadeshakalpe! |
teShAM mukundavirahAturamAnasAnAM
bAShpaissvaya~ncha samabhAgabhavadviyoge || 736||
pauNDrakavAsudevamupakalpitatArkShyarathaM
kR^itrimasha~NkhachakrabhujamIpsitatatpradhanam |
chakranikR^ittamastakamapatayadalpamatiM
kR^iShNa! bhavAn duradhvagavinAshakR^ite tvamabhUH || 737||
kAshIM tatprabhumapyanAdinidhane kR^ityAnikR^ityutsukaM
chakreNa jvalanatviShA samadahassphItasphuli~NgArchiShA |
daityadhvAntadivAkare tvayi bhavantyauddhatyadurmArgagAH
jvAlAyAM shalabhA iva pratibhaTAH kiM chitramatrAchyuta || 738||
raghuvIrarAmacharaNAbjabhaktibhAk
abhavatpurANakapipu~Ngavastu yaH |
yaduvIrarAmaparipanthinaM sa taM
dvividaM jaghAna yugadharma IdR^ishaH || 739||
yadunAthaShoDashasahasrasundarIH
samakAla eva samasa~NkhyakAyabhAk |
samanandayassuratikelikovidaH
tava kAraNaM hi karuNA tathAsthiteH || 740||
sa~NkalpitaM nAtha! yathA tathaiva
bhaktAvanArthaM kriyate tvayA hi |
shakto.api bhImena gatAsumAjau
tvaM kArayAmAsitha mAgadhaM tam || 741||
bandhAdvimochya nR^ipatIn pravitIrya tebhyo
vastrAdi vastu vinuto vinatairmudA taiH |
svIyeShu rAjyavibhaveShu punarniyojya
tAnAvithAchyuta! dayA tava vAgatItA || 742||
pratyUhavidhvaMsanapUrvakaM tvat\-
padAbjasevAratamAnasAnAm |
satkarma nirvartayasIha shaure!
chitraM na chaitatkaruNA tavaivam || 743||
yudhiShThiramakhaM hare! sumukhamantarAyaM vinA
sahodarabhujArjitaiH kanakavastravasvAdibhiH |
yathAvidhi vidhApayannigamapAragaistApasaiH
nR^ipottamashiromaNiM vyatanuthAH pR^ithAyAssutam || 744||
yassaptatantutanubhR^iddhutabhuk svarUpo
mantrAtmakassuramayo hutahavyabhoktA |
tasmiMsthite tvayi dhuri kraturAjamenaM
dharmo vyadhAditi kimatra mukunda! chitram || 745||
shriyashshrIstvaM shrImanyadukulamaNe! kAmapi kR^ipAM
vitanvannirvyAjaM nivasasi suhR^idyatra nitarAm |
kathaM na syAttasminniravadhi nidhInAmupachayaH
tadasminnirhetu prahiNu karuNAM tAdR^ishaguNAm || 746||
vitarkasandigdhamanassu sabhye\-
ShvabhyarhaNe j~nassahadeva ekaH |
bhavantamekaM nanu nishchikAya
sarveDyamityachyuta! dhanyadhanyaH || 747||
sabhAjanArhaM bahudhA vigarhan
sabhAjanArhaM kamalAsakha! tvAm |
sa chedirAjassukR^itI kimAho\-
svitpApakR^idyattava pAdamApa || 748||
nAnAshAstraprabaladhiShaNA apyapArArhaNArhAH
vidvAMsastvAM yadukulamaNe! naiva jAnanti dR^iptAH |
kAruNyaM te yadupari patatyambujAkSha! pratIkShyaM
lakShmIshaM tvAM prathitavibhavaM shuddhasatvassa  vetti || 749||
chedirAjacharitAnuchintanA\-
nnaShTabhItirahamasmi sAmpratam |
nindate.api nijapAdapa~NkajaM
yachChasi sma kR^ipayA yadachyuta || 750||
sajjo.abhavo hi savanAgatamAnavAnAM
pAdAvanejanavidhau yadunAtha! tIrthaiH |
kiM nyAyyametadamarArchitapa~NkajA~NghreH
te bhaktanaighnyamathavA prakaTIkR^itaM nu || 751||
shatAnandasa~NkShAlitA~NghrisrutAyAH
sravantyAH payaH prokShya ye dhanyadhanyAH |
aho! kR^iShNa! teShAM padakShAlanena
svayaM dhanyamAmanyase svaM kimetat || 752||
bhaktA yathA bhavatprANAH
bhaktaprANastathA bhavAn |
tatte yuktamidaM shaure!
yadbhaktA~Nghryavanejanam || 753||
tripuraripuvareNa prAptamAyantu sAlvaM
pratibhaTayaduvIraploShaNopAttadarpam |
shritajanaparirakShAbaddhadIkShasvachakra\-
praharaNavinikR^ittagrIvamAshu vyatAnIH || 754||
dantavakramapi hanta! sa~Ngare
hanti sa sma gadayA bhavAn hare! |
tasya kaNThatalanirgatA dyutiH
prAvishattava padaM kR^ipA ripau || 755||
bhUdevanaipathyanigUDhashauryAn
dharmAtmanaH pANDusutAnrirakShuH |
saMyojya pA~nchAlikayA mukunda
santoShayAmAsitha te dayAho || 756||
durodaranira~NkushAn pariharanti satsampado\-
pyarAladharaNIpatInupasaranti dAmodara! |
iti vyasaninAM nR^iNAM prakaTayannivAtmAshrita\-
prachaNDabalapANDavAvanatimatra kiM sehiShe || 757||
tathApi bhaktAnnavimu~nchasi tvaM
kadApi govinda! savAgnijAtAm |
tAM draupadIM tvachcharaNaikasaktAM
rarakShithAchChAdanadAnato yat || 758||
ambarAdyadupate! hyavateru\-
shchitritAmbaraparamparikA drAk! |
tvaddayormaya iva prayatAtma\-
draupadIhR^idayachandravivR^iddhAH || 759||
govindeti sudUravartinamapi tvAmAhvayantIM muhuH
mAnatrANaparAyaNAM svapatibhistyaktAtmasaMrakShaNAm |
pA~nchAlIM bhavato rarakSha kimu tannAmAthavA kiM bhavAn
sA te kiM karuNAthavA shritamahAduHkhApahantrI hare || 760||
govindeti yadAkrandat kR^iShNA mAM dUravAsinaM!
R^iNaM pravR^iddhamiva me hR^idayAnnApasarpati ||
durvAsaH prabhR^iti munIndra kukShipUrtiM
kaunteyakShatiharaNArthamambujAkSha! |
shAkAlpaM svayamupabhujya kalpayan san
sarvAntarnijavasatiM vyadarshayo hi || 761||
dUto bhUtvA mR^idhahatikR^ite pANDavArthaM gajAhvaM
sthAnaM yAtaH kurukulapatiM yAchamAnashcha sandhiM! |
moghIbhUtaprachurayatanassannivR^ittaH kimarthaM
kShoNIbhAraprashamanakR^ite te tu sa~Nkalpa evam || 762||
gItA gItA sapadi bhavatA vishvarUpaM vyadarshi
shrIman sarvaM samabhavadaho! yAtayAmaM kimetat! |
mAyaivaivaM kalayati kalau mAnuSheShu tvadIyA
tasmAddInastava tu karuNAM prArthaye bhaktidAtrIm || 763||
puruhUtanIlamaNikAntima~njulaH
sitamugdhavAjigaNachodanonmukhaH! |
pradhanAjire.api vijayasya sArathiH
nanu kasya kR^iShNa! na chakarShithekShaNam || 764||
saundaryaM te pradhanabhuvi ye samprahAraikaniShThAH
teShAM chakShUMShyapi vivashayannirnimeShANyakArShIt! |
darshaM darshaM yadukulamaNe! tvAM prabhupreryamANAH
apyAsaMste tvayi kR^itahR^idastyaktakartavyakAryAH || 765||
duShTAtmakAnnaparipoShitadehabandhAH
praj~nAtimAndyakR^itakApathagAnumodAH |
vadhyA iti prathayituM kimu bhIShmamukhya\-
vR^iddhAdinAshanavidhau rachitAnumodaH || 766||
shilImukhavidAritasphuTitapANirapya~njasA
suparvavaranimnagAsutamabhidravaMshchakrabhR^it |
chalatkuTilakuntalaprachuraphAladesho hare!
nijAkR^itimadarshayo bata! ripoH kR^ipA te.anaghA || 767||
AtmAnamAyodhanabhUmibhAge
sandarshya bANAhatipAtitena |
bhIShmeNa bhAvyAtmaparatvashaMsAM
shrotuM vyatAnIH kimu jIvinaM tam || 768||
kapiketurakShaNakR^ite raNe.abhavo
bhagadattamuktavaravaiShNavAstrabhAk |
urasA payodhitanayaikasadmanA
shritarakShaNe hi dayitA~ncha nekShase || 769||
pareNa yuddhaikaratasya shaure!
pArthena bhUrishravaso bhujaM drAk |
achChedayastvatparichoditena
nAvekShase dharmamapi shritArtham || 770||
pishitapa~NkanimagnarathA~Ngaka\-
svabhujakoTisamuddharaNonmukham |
ravisutaM nanu mArayasi sma taM
vijayatassukR^itaM tava yanmatam || 771||
kuntItanUjamapi karNamaye! murAre!
prAghApayassitahayAvanabaddhadIkShaH! |
evaM vidhAtumapi kAraNamasti tasya
durvR^ittamAnivibhuvardhitasAndramaitrI || 772||
vadAnyastatsamAno.atra
vadAnyaH ko.asti mAdhava! |
tadguNo nekShito yasmAt
rAdheyo ghAtitastvayA || 773||
ekaM pashyasi dharmapakShapatanaM nAnyaM guNaM shrIpate!
sAdhuShvAtmarateShu kintu karuNAM sarvAtmasantoShiNIm |
yasmiMstaddvayamapyabAdhitagati snihyasyaho tatra hi
vyarthatvena parAn guNAn gaNayatA kiM sa tvayA dhvaMsitaH || 774||
karma kinnu jananAntarArjitaM
sampratIha rachitaM vilokya vA |
ditsasi pratiphalaM nR^iNAM hare!
duShpravesha karuNA hyaghAtmakAH || 775||
duryodhanaM hradanimagnamapAstadhairya\-
mutthApya bhImagadayorutaTe.abhighAtya |
kApaTyato muraripo! tamapAtayo hi
karmAnurUpamiha darshayituM phalaM kim || 776||
shAThyena dharmasutasampadamakShakelyAM
paishunyaniShThasuhR^idAM vachasApahR^itya |
kiM saukhyabhAgabhavadatra suyodhano.ayaM
shaure! parasvaharaNena sukhI na martyaH || 777||
yathAlAbhasantuShTachitto bhavedyaH
kR^ipApAtratAM yAti shaure! sa te.atra |
parasvApahartA tu chintAparassyAt
atassvApateyaM harennAnyadIyam || 778||
dR^iShTvA bAndhavaputramitrasahajAnyuddhe hatAMshchakShuShA
mAnI dainyahato gatAsurabhavadduryodhano dhUrvahaH |
shrImaMshchakradhara! tvadIyavachasAM dhikkAramUlA kimu
syAdetAdR^iganarthasantatiraho! kAruNyadUrIkR^itA || 779||
bhagavaMstvayi nirmito.aparAdhaH
kathamapyachyuta! sahyate tvayaiva |
tava bhaktajane kR^ito.aparAdho
na hi sahyo.atra sa kauravastu sAkShI || 780||
rajoguNavimUDhadhIrviShayavAgurAyantritaH
parasvaharaNotsuko hR^itasurakShaNe vyAkulaH |
nirastasukhanidrako vigalitakShudhAttAmayaH
bhavediha naro hare! karuNayA spR^ihAM vAraya || 781||
dharmAtmA shamanasuto nirIhachittaH
kAntAre prayatadhunIkR^itAvagAhaH |
abhyarchanmunicharaNAn sukhI nyavAtsIt
kAruNyapravaNamanAstavAmbujAkSha! || 782||
bahunA vachasA kimatra shaure!
bhagavan! rakShitumichChasi svayaM yam |
vitarasyakhilAMshcha sadguNAMstvaM
nanu tasmai karuNAkaTAkShapAtaiH || 783||
hutabhuk pravItIrNamadbhutA~NgaM
kapiketvarjunavAjimaNDita~ncha |
rathavaryamananyavIradamyaM
bhagavaMshchArayasi sma phalgunArtham || 784||
yannimittamupadApitastvayA
syandanassitahayAya mAdhava! |
sAmparAyakamapUryatApi ta\-
nnirvR^ito.asi dharaNIbharavyayAt || 785||
prANebhyo.apyadhikapriyaM rathagataM pArthaM rirakShU rathAt
prAktaM drAgavatArya roShaNatayA tenaiva vAgbhartsitaH |
smerAsyastadanu svayaM rathavarAdutplutya dagdhAttataH
svAyattaM hi rarakShithAchyuta! kR^ipAM te kiM bravImyAshrite || 786||
nininda shishupAlako nanu bhavantamabjekShaNa!
priyo.api puruhUtajastvayi kR^itAtmabhAro.apyayam |
ubhAvapi samau khalu pratikalaM nijAtmonnatau
dviDeka iha te kathaM suhR^idabhUddvitIyo hare || 787||
dharmAtmajaM kShitidhurandharamAkalayya
siMhAsane samupaviShTamapArabhaktim |
hR^iShTo babhUvitha mukunda! dayApayodhe!
bhaktapramodabhara eva hi te.api harShaH || 788||
nijaparatvamudIritamAtmanA
raNamukhe.arjunakaitavato hare! |
anupayuktamavetya punarnadI\-
sutamukhAtprakaTIkR^itavAn kimu || 789||
karuNAkara! nAkivandyapAda!
prathayannAtmaparatvamaj~nanR^ibhyaH |
kathamapyanukampayoddidhIrShuH
yatase te tu parA~NmukhAstathApi || 790||
samo.ahamakhileShvapItyabhidadhatsvayaM shrIpate!
svabhaktaparipanthino nijaripUn bhavAn bhAvayan |
dayAnidhirapi shritAvanaparaH parAnAsurAn
vinAshya dharaNIbharaM parijahAra yuktantvidam || 791||
brahmAdayo.api vitatANDakuTIrakITAH
vishvAtmakasya tava yasya parAtparasya |
sa tvaM kShitau kaphaluThatkrimikalpamartyaiH
chikrIDithAchyuta! kathaM karuNAtra hetuH || 792||
sa~NkalpamAtraparikalpitabhasmasheShAn
yodhAnvidhAtumapi mAdhava hanta! dakShaH |
pratyarthishastramathitastvamabhUH kimarthaM
kiM svAshrayArthamupagachChati ko.api veti || 793||
kvachidyuddharuddhaH kvachitkAndishIkaH
kvachidvishvakAyaH kvachidbANaviddhaH |
kvachichchakradhArI kvachidvipralApI
shritArthaM vichitrakriyo.abhUrmurAre || 794||
yuddhA~NkaNe praharaNapravaNAH pravIrAH
krodhAbhibhUtahR^idayA api dhanyadhanyAH |
prANAtyayAvasaradR^iShTabhavanmanoj~na\-
rUpAssuyogisadR^ishA hyabhavan hare! yat || 795||
karmAnurUpaphalabhogaparAMstu jIvAn
evaM samastahR^idayAntaragassamIkShe |
ityAsthito rathamukhe raNavIkShaNaika\-
tAnaH kimu svayamasakta ivAbhavastvam || 796||
karuNA tava mAnasAdhivAsA
sharaNAyAtajanAvanaikatAnA |
aruNAmbujalochana! shritArteH
pariNAmapratipAdinIva bhAti || 797||
bhavantaM jagadgarhaNIya~ncha dUtaM
dayA te vyatAnIttadA vAvadUkam |
aho! shUdragehAnnabhoktAramevaM
hayapreraka~ncha shritArthaM murAre || 798||
sarvaj~no.api shritajanakR^ite mUDhavanmAnuShAtmA
nAnAkleshavyatikarajahaddivyabhogAnubhUtiH |
sAmastutyo.apyatikaTujanAruntudaprAptanindaH
shrIman lakShmIramaNa! karuNAnighna etAdR^isho.abhUH || 799||
shrIman! phaNIndradharaNIdharabhavyashR^i~Nge
vishrAntisaukhyamadhigantumivArchyamUrtiH |
bhaktaughakA~NkShitavarapratipAdanArthaM
maunena tiShThasi kimu shritapArijAta || 800||

iti shrIlakShmIdAsAdhiShThita vedAntadeshikapraNIte dayAsahasre
aShTamashatakaM saMpUrNam |
\section{9\. navamashatakam}
shrIH |
shrImate rAmAnujAya namaH |
shrImate lakShmIdAsAya namaH |
shrImannigamAntamahAdeshikAya namaH |
atha dayAsahasre navamashatakam |

yadyapyasti dayA nAtha! tvayi nityAnapAyinI |
durvR^ittakaNTakAkIrNe pravishenmayi sA katham || 801||
aMhassaMhatibhArabhugnahR^idayaM saMsArasindhvAplutaM
vyAdhyAdhipramukhAtikarkashamahAnakrArdhajagdhojjhitam |
dArApatyanirantarapravisaradvAtyAbhisa~NghUrNitaM
sheShAdrIsha! kadA tvadIyakaruNA sA mAM samAdhAsyati || 802||
madAndhamambhoruhapatranetra!
kandarpavashyaM paravittagR^idhnum |
nR^ishaMsamenaM lalanAvilolaM
kadA samAdhAsyati te dayA mAm || 803||
AshA vishAlabhuvaneshitR^ibhAvalabdhyA\-
pIshAnamitravarakoshavashAbhilAShA |
shrIsha! tvada~NghrishatapatravisheShasheShA
kAruNyatastava bhaviShyati me kadA vA || 804||
shrIve~NkaTAdrishikharaprakaTIkR^itAtman !
buddhissadA viShayamArgaNalampaTA me |
tvatpAdapa~NkajamarandamilindabhAvaM
yAsyatyaho! karuNayA tava sA kadA vA || 805||
duHkhAtmakeShu viShayeShu sukhatvabuddhiH
hA ! hanta ! pApavashatassamudeti nityam |
teShvambujAkSha! bhavadIyadayAvisheShAt
AvirbhaviShyati kadA bata ! me jihAsA || 806||
daurgatyAddhanalipsutA tadanu tatprAptyarthamanyAshrayaH
taddAsyena manashshramo.apyasamaye chintA kadannAshanam |
tenApyAmayapIDana~ncha gR^ihiNIdhikkAravANI hare!
nairAshyaM svatanau bhavanti bhavitA tattvaddayAsmin kadA || 807||
nAnAkleshaparamparA janimato me nAtmashAntirhare!
tvatpAdAmbujayugmachintanavidhiM naivAnumodeta hR^it |
kiM tApatrayajarjharIkR^itatanussatkarma kuryAtkathaM
kAruNyaM mayi te patiShyati kadA tvatpAdasevApradam || 808||
cha~nchalaM mana idaM mukunda! te
pAdatAmarasaparyupAsane |
nishchalatvamupayAti me kathaM
sthApayiShyati kadA sthiraM dayA || 809||
madIyamidamapyadastadapi sarvametanmame\-
tyanalpamamatAdhiyA kShubhitamattachittakriyaH |
samujjhitabhavatpadasmaraNamambujAkSha! prabho!
kadA tava dayA tu mAmamamamenamAdhAsyati || 810||
mAyAjAlamabhedyarandhramabudhagrAhyaM vR^iShAdriprabho !
vistIryAdbhutayatnato bhavamahAraNye narAkhyAn mR^igAn |
jIvagrAhamaho! grahItumasakR^innAnAsvarUpo bhavAn
tiShThanneva kimekamapyalabhata shrIman! dayAM tatkuru || 811||
kShaNaM kShaNamapi kShipan kShapayati kShitAvakShataH
nR^iNAM sa mahadAyurapyahaha! kAla eSha prabhuH |
sarandhraghaTikAgataprachuratailavachChrIpate!
tadadya dayayA tava smaraNabuddhimApAdaya || 812||
kShaNArdhakR^itaduShkR^itasmaraNamAtrasa~NghUrNito
nR^iNAM yadi vidhAsyasi pratiphalaM tvaghochChittaye |
tadA tu narakAntaraprachurasarjanaM shrIpate!
bhaveddhi karuNA tava pratibhaTaiva tatkarmaNe || 813||
AshA praviShTA prathamaM mano me
vAmA tato veshma dayApayodhe!
AshApraNunno dayitAbhilAShaM
sampUrayannasmi kutassmR^itiste || 814||
bAlye krIDan janakajananIlAlito yauvane.ahaM
yoShAshleShapravaNahR^idayo bhogalAbhaikatAnaH |
vArdhakye.api prashithilatanurvyAdhibhiH pIDyamAnaH
tvatpAdAbjasmaraNasamayo brUhi shaure! kadA me || 815||
shvaH kariShyAmi te dhyAnamiti shaure! vadanti ye |
te.api dhanyA yato.atra tvad dhyAnakartavyadhIrabhUt || 816||
kAryAntaraprasR^itachittatayA manuShyaH
tvatpAdapadmamananaM vidadhAtu mA vA |
tvachCheShabhAvadhiShaNA yadi tasya shaure!
dhanyassa eva tava yatkaruNaikapAtram || 817||
phalonmukhachirantanaprachurakarma nirvApaya\-
tyanalpachiraduHkhadaM tvachiradabhraduHkhapradam |
dayA tava vitanvatI sharaNamIyuShAM shrIpate!
bhavantamiha vedanAsahatayaiva nAmagraham || 818||
shItalApi karuNA tava shaure! vahnivaddahati pApamameyam |
tatsadA mR^igayati prasarantI mAdR^ishaM duritameva sadeham || 819||
indriyANi viShayaikaparANi prAptapATavatayAtibalAni |
tvatkR^ipA kalayitA tava sevAkautukIni kamalAkSha! kadA me || 820||
udarabharaNaniShTho duShTasevAtikhinno\-
pyanadhigatasutR^iptirdInadIno murAre !
gR^ihatanayakalatratrANasantrastachittaH
sharaNamupagato.ahaM tvAM na bhaktyA dayAlum || 821||
dayase yadi mAdR^ishaM murAre!
paraduHkhAdikaduHkhitAsvarUpA |
karuNA tava sArthakA tadAnIM
na tathA chedbhuvi sA vR^ithA bhaveddhi || 822||
vR^iShAdrIsha! shrIman! kvachidapi kadApi prayatadhIH
savishvAsaM tubhyaM praNatimapi nAhaM rachitavAn !
kathA kA vA dravyavyayaphalasumasparshanavidhau
nirAlambo nityaM tava tu karuNAyAchaka iha || 823||
saMsAradAvadahanodaradahyamAno
pyAshAvisheShavashamAnasabaddhadehaH |
IshAnaphAlashalabhAyitakAmavashyaH
shrIsha! tvadIyakaruNAM bata! kAmaye.aham || 824||
lUtAsyUtavichitrajAlajaTharAlagnasphuranmakShikA\-
kalpaM saMsR^itighorasAndrajaTilAnAyasphuradvigrahaM !
ko vA mochayati prachaNDaduritagranthyulbaNAbandhanaM
tachCheShAchalanAtha! mochaya dayAshastreNa kR^intvAdya mAm || 825||
sadAchAryAbandho jagati bahusho durlabha iha
prasanne samprApte.apyahaha janasAmAnyadhiShaNA |
na vishvAsastasminmadanuguNasarvavyavahR^itau
kR^ipAM tasmAtpApe prahiNu vR^iShashailAlaya! mayi || 826||
mAyAM prasArya viShayeShu sukhatvabuddhi\-
mutpAdya sarvaviShayAn pravidarshya nAtha!
matpAdapadmavimukho.ayamitIha jantUn
naivekShase kimuchitaM karuNAM nidhehi || 827||
yadyapyayaM sadupadeshavashAtkatha~nchit
svIyendriyANi balavanti niyantumeva |
yatnIbhavannapi pumAnviShayAbhilAShI
tannighna eva bhavatIha dayAM nidhehi || 828||
yogaikasaktahR^idayA api bhogyavastu\-
sandarshanaskhalitamAnasasusthiratvAH |
bhraShTA bhavanti kimutAtra tu mAdR^isheShu
sheShAdrinAtha! karuNAM prahiNu prasIda || 829||
prItissvadArasutabandhuShu yAdR^ishI syAt
tAdR^iktvayIha yadi tAM pravadanti bhaktim |
shrutyekavedyavapuShi tvayi sA kathaM vA
prAdurbhavetsapadi te karuNA gatirme || 830||
yasmin dayA patati te vR^iShashailanAtha !
dhImAnayaM sa hR^idaya~NgamabhAShaNena |
AkarShatIha sakalAnapi modayan san
digvyApikIrtiviShayaH paripUjyamAnaH || 831||
patitAnapi pAmarAn shvapAkAn
parapIDAparapANipAshaghorAn !
karuNA tava kaitavena kenA\-
pyudadhArShIdata eva nirbhayo.asmi || 832||
ghaNTAkarNo himagiritaTe paryaTan bhUtavargaiH
kiM vA karma shrutivihitamudbhrAntachitto vyatAnIt !
sAkShAchChrIman! svayamupagatastatra tasmai pradarshya
svIyaM rUpaM tadabhimatamapyanvagR^ihNAH kR^ipAtaH || 833||
vipraM hatvA tamapi shakalIkR^itya goviT pavitre
nyasya kShetre pishitamashivaM yAtu pUtatvabud.hdhyA !
prAdAttubhyaM yadukulamaNe! vipramujjIvayan san
a~NgIchakre tadapi cha bhavAn hanta! bhakte kR^ipA te || 834||
karuNAvashavartitA murAre!
sharaNAyAtajanArtikIrtanena |
tanute satataM bhavantamArtaM
kvanu te bhUmitale sukhAnubhUtiH || 835||
sR^iShTAstvayA tarulatolapaku~njapu~njAH
nAnAvidhAdbhutapata~NgamR^igendrakITAH !
sarve.api mAnuShakR^ite sa tu naiva tebhyaH
martyeShu nAtha! karuNA tava sannikR^iShTA || 836||
dattaM j~nAnaM priyahitamatissatpathaikapravR^ittiH
vastuShvevaM sukhakaramidaM duHkhadaM tvetaditthaM !
satyapyevaM tava tu karuNAmasmaranto manuShyAH
AshAbhraShTA viShayachapalAH kleshinaH paryaTanti || 837||
chAturvaNyaM nijaguNamahatkarmasambhAgasho ya\-
tsR^iShTaM tattadvihitaniyatAjIvikaM ve~NkaTesha !
vyatyastaM tatkalimalatalasparshi vaiShamyapAtraM
tasmAdatra prahiNu karuNAmuddidhIrShustvadIyam || 838||
kR^ityAkR^ityavivekaleshavikalA martyA mR^igApekShayA
kShudrA drohaparAH parasvaharaNe nissAdhvasAstvatrapAH !
AshApAshakR^itAtmadharShitajagannindA vR^iShAdriprabho!
tvatpAdAbjaparA~NmukhAH khalu tatassampreShaya tvatkR^ipAm || 839||
sarpAdbhayaM na hi yato nijarUpatastaM
dR^iShTvA janAH pariharanti mukunda! dUrAt |
visrambhadarshitasuhR^ittvavilobhitAste
nashyanti hanta! shaThataH karuNAM nidhehi || 840||
vyAghrAdayaH pishitamAtrakR^ite nR^ishaMsAH
kAntAravartmani charanti tato bhayaM na |
duShTAH parasvaharaNAya suhR^itsvarUpAH
druhyanti mAdhava! sa te karuNAM nidhehi || 841||
valmIkavajjagati hanta! bahishshaThAste
dR^ishyAtmakA nanu lasanti tadantara~Ngam |
ko vetti vipriyapR^idAkukarAladaMshaM
khidyanti santa iha tatkaruNAM nidhehi || 842||
kandarpadarpakR^itakarpaTakalpakAyo\-
pyAshAvisheShavidhR^ito viShayapraNunnaH !
tvatpAdapa~NkajayugasmaraNaM kuto me
tatpAhi mAM karuNayA duritApahArin || 843||
sarveshvaratvamabhidarshitamapyudAraM
duryodhanaprabhR^itayo duritAkarAste |
naivApuratra sharaNaM sasharA bhavantaM
dUrIkR^itAH karuNayA kimu te mukunda || 844||
sarvaj~natA sakalashaktirapi tvadIyA
mAdR^igvidheShu na hi kAryakR^idAyatAkSha !
mayyarpayAdya chirarUDhamamatvabuddhau
shaure! dayAM vashayituM sa tu mAmupAyaH || 845||
tvatpAdasArasaviShaktahR^ido janAstu
kleshAkarA nanu bhavanti kuto nitAntam |
teShAM hitaikamanasA tanuShe kimevaM
jAnanti naiva karuNAM tava nAtha! mUDhAH || 846||
yadyaddhitaM chiratarArjitapAparAshi\-
bhraShTAtmanAM tadavalokya tanoShi shaure!
chintA kimatra mama tAvakaki~Nkarasya
kAruNyamAtrakutukI divasAn kShipAmi || 847||
aj~nena nAtha! yadi ko.api mayA pumarthaH
prArthyeta sa tvahitado bhavitA kadApi |
tvayyarpitAtmabhara eva tadastasha~NkaH
kAlaM kShipAmi karuNaikachirAbhikA~NkShI || 848||
jAtyA yashshvapacha iha prakR^iShTa eva
syAtkarmashvapachavimarshane sa sAdhuH |
yatkarma svavidhikR^itaM tanoti nAnye
tasmAtte prahiNu dayAM vR^iShAdrinAtha || 849||
hiMsAtmakaM jagadidaM kalikalmaShADhyaM
kShudrairjanairnichitamalpamatipragal\-bhaiH |
shrIve~NkaTesha! nanu sAtvikaduShpravesha\-
mevaM sthite.asmi bhavadIyadayAvalambaH || 850||
pApArjanAya bahavo nanu santi mArgAH
sadyassukhaM sphurati paryaTatA~ncha teShu |
kleshAvahaM sukR^itakarma tato bhavanti
pApAtmakA bhuvi janAH karuNAM nidhehi || 851||
tAtaH kApathagAminaM nijasutaM santADayatya~njasA
mAtA sAntvanatatparA karaparAmarshAd bravIti priyam |
tasmAchCheShagirIsha! bhItahR^idayo varte bhavatsannidhau
kA~NkShe tvatkaruNAM sudhIrahR^idayo ghorAparAdho.apyaham || 852||
viShayaguNavimarshe prAyasho naiva saukhyaM
yadiha tadupabhogAjjarjharIbhUtadehAH !
sapadi jaraThabhAvaM te bhajante manuShyAH
tadupashamaya bhoge shrIsha! kA~NkShAM kR^ipAtaH || 853||
bhogAbhilAShijanamAnasamadvitIyaM
labdhAdhikaM yadabhikA~NkShati vastu bhogyam |
indre.api dR^iShTacharametadaho! murAre!
tatkShAlayAshu dayayA hR^idayaM madIyam || 854||
mArastArAdhipasahacharashchArayan dhIravAraM
dArodArapraNayaparirambhorurambhorusAraM !
ArAmArAmamuragadharAdhIsha! kAruNyadUraM
ghorArAvaM rachayati chirAdrauravArabdhachAram || 855||
kleshe satyapi hanta! chetanagaNA dehAvasAnaM kuto
vArdhakye.apyanumanvate na gadabhAgbAhyendriye shrIpate !
mAyA te vR^iShashailanAtha! tanute jantUMstathA saspR^ihAM\-
stadyAche karuNAM taveha pashuto nIcho.api vAchA muhuH || 856||
uparyupari mAnasaM sapadi chArayan puNyavAn
visheShasukhalipsayA surapure.api mAtsaryataH |
sa khidyati nijAdhikaprathitabhogabhAgvIkShaNAt
vR^iShAchalapate! tataH prahiNu te dayAM modadAm || 857||
anAthadInAdiShu te dayA kShitau
mukunda! jAgarti rirakShayA sadA |
idantu yuktaM vikalaM prasUssutaM
visheShadR^iShTiM dadhatI rirakShati || 858||
svabhAvAnapAyaH prasiddho hi vastu
Shvato.ahaM svabhAvaM na mu~nchAmi shaure !
svasa~NkalpatashchechChilAnAmivAbdhau
svabhAvachyutissyAtkR^ipAlo mamApi || 859||
kAmaM santu dhanAdhikA dhavalitaprotsedhasaudhAshrayAH
kiMvA tairbhavadIyapAdavimukhaisstrIvibhramaikonmukhaiH |
kintu tvatpadapadmachintanaparairbhikShAttabhissAshanaiH
dInairastu sahAnubhUtiriha me shrIshAnukampAbalAt || 860||
bhavadanugrahavardhitasampado
bhuvi janAH pratibhArjitabuddhayaH |
gurutiraskR^itigarvitamAnasAH
prahiNu teShvapi te karuNAM hare || 861||
karaNashuddhiraho! bhavitA kathaM
manasi vAchi cha karmaNi bhinnatA |
yadi bhavedvR^iShashailavibho! kR^ipAM
prahiNu tanmayi shAThyavidUShite || 862||
kanakaparvatakUTagato.api ya\-
nnijachirantanakarmavipAkataH |
sa labhate sukhaduHkhaparamparAM
tadiha te karuNA gatirachyuta || 863||
vidhilalATavilekhanamArjanaM
rachayituM bhuvi ko.api na shaknuyAt |
sa tu vilokya cha karma likhennR^iNAM
tadiha te karuNA gatirachyuta || 864||
manujatA khalu janmiShu durlabhA
tadapi viprakule.apyatha vaiShNave |
jananamachyuta! te kR^ipayA kadA\-
pyata iha tvayi bhaktirapekShyate || 865||
janananAshavashAH khalu chetanAH
kaTuparibhramabha~NguravigrahAH |
ashanapAnavihAraratA hare!
hyabhilaShanti kR^ipAM tava naiva te || 866||
bhagavannabhirakShituM yamichCha\-
syavanau taM nanu yojayasyatandram |
bhujagAchalanAtha! medhayA drA\-
kkaruNA kAraNamatra tetvahetuH || 867||
tvadadhInasharIrisAdhyamasmin
bhuvane kiM bata! vartate murAre!
bhavatA bhuvanAntarapraviShTaM
sakalaM tvatkR^ipayA vichAlyate hi || 868||
kAluShyadUShitavapurjanasannidhAna\-
mAtreNa shubhratanurudvijate hi loke |
bAhyAntarAvilamayairmanujairvitIrNa\-
ma~NgIkaroShi bhagavan! karuNA vichitrA || 869||
prakR^ityanuguNaM chalantyakhilajantavassantataM
prakR^ityanugataM khalu pratipadaM tadAgassvayaM !
bhuja~Ngadharashekhara! tvamanavekShya doShaM nR^iNAM
nipAtaya kR^ipAmR^itaM bhavadapA~NgasampAditam || 870||
yugatrayaviparyayaH kaliyuge bhavedityaye !
tvayaiva nanu kalpitaM tadiha ko.asti doSho nR^iNAm |
yathechChamavashA janA viShayabhogatR^iShNAkulAH
charanti pashuvattataH prahiNu te kR^ipAmachyuta || 871||
vardhayatyanishamambujAkSha! ya\-
chChAstradhIrbudhamanassamunnatim |
naiva te charaNabhaktikAriNI
tatpradehi dayayA bhavat smR^itim || 872||
kR^ityaM tyajanti manujA bhuvanetvakR^ityaM
harShAdbhajanti sulabhaM kila yatra saukhyam |
jAnAti kaH paragatiM nitarAM parokShAM
tatte kR^ipAM prahiNu satpathabuddhidAtrIm || 873||
loke vratAdiniyamAcharaNe hi yAdR^ik
kleshassukhAspadapadArthasamArjane.api !
tAdR^igbhavenna manute manujassukhepsuH
tatte vivekajananIM karuNAM nidhehi || 874||
kurvanti kAmyaM bhuvi karma martyAH
kai~Nkaryabud.hdhyA bhavato na shaure!
tasmAdbhavAraNyagatAshcharanti
yAche kR^ipAM teShu nipAtayeti || 875||
sarve stuvantu bhavatastvapadAnamuchchaiH
yaddaityarAvaNamukhArinishAraNAdi |
tvadvaibhave bata! kiyanta ime murAre!
kITAtmakAH khalu tadatra dayaikakAryam || 876||
hiraNyAkShahatyai varAhasvarUpaM
jagadgarhyamatrAbhyupeyaM kuto vA |
svasa~Nkalpavadhye.api kITe murAre!
kR^ipAkAryametaddhi sarvAtmakasya || 877||
ekasya kITasadR^ishasya mukunda! shatroH
hatyai hiraNyakashipornarasiMharUpaH |
stambhodgato vilasasi sma nakhAyudhassan
kAruNyato haravarAnusamarthanAya || 878||
sa~NkalpamAtrakR^itasusthiratApi bhUmiH
pAtAlagena kamaThAkR^itinA tvayApi |
ashrAntameva murabhiddhriyate kimarthaM
kAruNyakAryamidamapyakhilAvanArtham || 879||
sarvA~ncha vetsi bhagavan! bhuvanodarastha\-
nAnAsharIrichirakarmaparamparAM tvam |
tatprArthaye kuru tathA karuNAvisheShAt
ujjIvanaM janimatAM bhavitA yathA vA || 880||
loke durbharabhArabhugnashiraso bhArApasArAdyathA
saukhyaM sammanute tathaiva manujaH kleshApanodAdapi |
nityAnandamayasya varShmanigalAjjIvasya hA! durdashA
shrIsha! preShaya kardamodaramaNiprakhye dayAM chetane || 881||
chitraM chitraM mahadidamaho ! chetanA dIrghatR^iShNAH
kleshAvAsA api gadamayA durgatA apyajasram |
jIrNAstuchChA apicha maraNAdbhItabhItA murAre !
vartante tat prahiNu karuNAM heyatAj~nAnadAtrIm || 882||
hR^idayasarasijAshAsaurabhassarvato.api
prasarati vashayan san mAnuShaM ve~NkaTesha !
tadiha karuNayA tvaM tanmukhatvaM nivArya
tvadatulacharaNAbjAmodavashyaM kuruShva || 883||
ajasraM tvannAmasmaraNaniratAn sAdhucharitAn
svakAryaikAsaktAnanitaranihiMsAnvaraguNAn |
vinA hetuM nindantyatikaTuhR^ido duShTacharitAH
kathaM vojjIveyustava tu karuNAM te.achyuta vinA || 884||
kAryAntarapravaNachittatayA kadApi
tvanmandirAntikagatAnnijakAryasaktAn |
ichChAM vinApi sakR^ida~njalibandhane vA
sa~nchodayAchyuta! dayAmaya! nAstikAMshcha || 885||
nihInakarmApi duradhvachAro.a
pyanalpapApo.apyahishailanAtha !
vichintya te tAM karuNAM vilajjo
rakSheti yAche dhuri dhairyatastvAm || 886||
svechChApravR^ittikR^itadurjanaduShTacheShTAH
bAlA bhavanti tadidaM sahajaM kileha |
dauShTyAnavekShaNaguNe karuNe! vR^iShAdri\-
netustato.asi jagatAM jananI kila tvam || 887||
kAruNyamUrtirapi saMshritarakShako.api
jIvAntarAvasathago.api vR^iShAdrinAtha!
jIvasya jIvanamaho! bhuvi jIva eve\-
tyevaM vyadhAH kimuchitaM tadidaM dayAyAH || 888||
pratikShaNamahaM kShitau jaTharapoShaNAyAdayaH
trivikrama! bhavatpadasmaraNamapyakurvannR^iNAm |
tiraskR^itisamutthitAmanubhavan vyathAM prANimi
shritArtihara! tatkR^ipAM mayi kuru prapanne kShaNam || 889||
galitendriyo.api malinAshayassadA
viShayAnubhUtikutukI kR^itodyamaH |
abhilAShamAtrasuhito bhavatyaho
manujastadatra karuNAM kuru prabho || 890||
lIlAvibhUtiriti karmasu sarvabhAra\-
mAropya chetanagaNAn sukhaduHkhabhAjaH |
pashyaMssthito.asi madhurasmitakAntavaktraH
shrIve~NkaTAchalapate! kva gatA kR^ipA te || 891||
shrutayo vadanti bhavato guNAn shubhAn
na bhavAn kadApi janagocharo.asti cha |
kathamambujAkSha! bhavati tvayi sthirA
nanu bhaktiratra karuNAmataH kuru || 892||
shAkhopashAkhanigamapratipAdyamAnAH
arthAH punarmanujasaMshayavardhakA hi |
nirNetumatra paratattvamidaM budhAshcha
klishnanti tatkuru kR^ipAM vR^iShashailanAtha || 893||
kR^iShimAtanoti vidhivat kR^iShIvalo
jalamu~N na vR^iShTimabhipAtayedyadi |
kimu tena tadvadiha sAdhako vratI
karuNAM vinaiva gatibhAgbhavetkatham || 894||
karuNA yadi ve~NkaTesha! na syA\-
tkimu karmAdibhiratra mAnavAnAm |
karuNA yadi pAtitA tadAnIM
kimu karmAdibhiratra mAnavAnAm || 895||
kShudrA dadatyachirameva nijepsitArthAn
yaddevatAstadiha tA manujA bhajanti |
tAn kShudrasampadabhilAShitayA mukunda !
bhaktAnvidhehi kR^ipayA bhavada~Nghripadme || 896||
mUDhaprAye jagati bhagavan! sha~NkaropAsanena
preShThaM daivaM kimiti janayan saMshayaM mAnavAnAm |
DolArUDhaM kalayasi manastattvalabdhyutsukAnAM
tattvAMshe tatkuru karuNayA buddhidArDhyaM murAre || 897||
AshAvisheShapariguNThitasatsvabhAvAH
vishvAsapAtramapi hanta! sadAshrita~ncha |
hA! va~nchayanti shaThatAkuTilA manuShyAH
teShu prasIda kR^ipayA kuru sanmatIMstAn || 898||
supteShu pannagasuchAranirargalatvaM
sa~nchintya ko nu manute nijarakShaNe svam |
svApaikalInahR^idayAn kR^ipayAvasIti
matvA bhajantu manujA nR^ihare! bhavantam || 899||
vakShasyamoghamaNihArapariShkR^ite te
lakShmIssadA vasati bhogigiriprabho ! yat |
tanmatkR^ite puruShakAraparAnukampA
sampAtinI yadahamArjitakilbiSho.asmi || 900||
nirbhayo.asmi duritAkaro.apyahaM nirbharo.asmi karuNAkarAchyuta !
tvaddayAsti jananI hi vatsalA mAdR^ishAvananibaddhaka~NkaNA || 901||

iti shrIlakShmIdAsAdhiShThita vedAntadeshikapraNIte dayAsahasre
navamashatakaM sampUrNam |
\section{10\. dashamashatakam}
shrIH |
shrImate rAmAnujAya namaH |
shrIlakShmIdAsAya namaH |
shrImadvedAntadeshikAya namaH |
atha dayAsahasre dashamashatakam |

padmAkShaM padmanAbhaM patagapatipadaM pUtapAthodhitalpaM
prAptAnekAvatAraM shritaduritaharaM shrIdharodAradAram |
divyaiH pa~nchAyudhaishcha prakaTitavibhavaM nIlajImUtakAntaM
shAntaM pItAmbarantaM mama cha nayanayordarshayAdyAnukampe || 902||
nirlipto nirvikAraH khagapatigamanastvaM kva devesha! goptA
sphItAghasthemadhAmA kucharitanirataH kvAhamalpArthalipsuH |
nirlajjo.ahaM tathApi praNipatanaparo bhaktileshaM vinaiva
trAyasvetIha yAche praguNaguNanidhe! te tu vIkShyAnukampAm || 903||
nAhaM shakto.asmi rAmAvarajamunikR^ite tvatsaparyAvidhauyat
kartavye nityakarmaNyapi jaDahR^idayo naiva niShThAM vahAmi |
tvadbhaktAnAM murAre shrutimadhuragirAM saMshrave me na saktiH
bhaktirnaiva tvadIye padakamalayuge tatpratIkShe.anukampAm || 904||
niShpratyUhaM vidhAtuM vidhivadiha budhairapyashaktaM sukarma
shrIshArchaikasvarUpaM vighaTanapaTubhiH pa~nchabhUtairvikR^iShTaiH |
chittaM chA~nchalyamatta kShaNamapi na bhavettvatpadadhyAnasaktaM
sheShagrAvAgradIpa! prahiNu tava kR^ipAM tatsamastAghahantrIm || 905||
pashchAttApo.api nodetyanudinamapi duShkarmaNAmArjane.api
prAyo jAnanti kR^ityaM sukR^itamitikR^itaM lobhalAbhAbhibhUtAH |
sUnAgAre pashUnAM hananamiva kR^itaM nirdayo ghAtuko yat
teShAmujjIvanaM hA! kathamiti nR^ihare! vedmi nAhaM kR^ipAlo || 906||
yatra kvApi sthitaM mAM vividhatanujuShaM prAptatApatraya~ncha
shrIman sheShAdrinAtha! tvadaruNacharaNadhyAnasaktaM vitanvan |
tad.hdhyAnaprAptaharShaM vidalitahR^idayadhvAntamadhvAvabodha\-
tvadbhaktA~NghriprasaktaM vitanu karuNayA pApavarmAvaguptam || 907||
dhUrto.ayaM me vipakShassuhR^idayamiti yadbhedamAkalpya mauDhyAt
martyeShu svIyabhAvapraguNitacharito duHkhabhA~NmodabhAk syAm |
saMliptAchChorugandhe dhuri nijabhujayoshChedake.api pramodaM
svasvAntetvekarUpaM vitara karuNayA me bhuja~NgAdrinAtha || 908||
etatkarmAbhinunnaM phalamidamiti yatsa~nchiteShu krameNa
sraShTA neShTe.api vaktuM hyaviratakaraNAtkarmaNAM bhedabhAjAm |
vyAsenApyuktametadgatirapi bahudhAho vichitreti tasmAt
shrIman sheShAdrinAtha! prahiNu tava kR^ipAM karmahantrIM janeShu || 809||
sarvaj~no.api prakR^ityA bahuvidhakuTilakrUrakarmAbhiShaktAM\-
stattatkarmAnurUpaM tanuvitaraNatashchetanAnpAtayeshchet |
kleshaprAye jagatyapyanubhavashithilAstvatpadadhyAnasaktAH
bhUyAsuste kathaMvA vR^iShashikharipate! tatkR^ipAM pAtayAshu || 910||
brahmANDAntargatAnAM vividhatanujuShAmantarAvishya tatta\-
ttattatkarmapravR^ittyA vR^iShashikharipate! prerayannaihikeShu |
tAMstAn dvandvAbhiShiktAnanavaratamapi prekShamANo vibhAsi
svIyaM bhavyasvarUpaM prakaTaya kR^ipayA bhaktisamprApaNArtham || 911||
mAturgarbhe vasansan paravashavichalatpiNDakashchaNDapIDaH
mAtrAbhuktAnnanAnArasapariNamanaprAptavR^iddhissvakoshe |
jIvo.ayaM sa~nchitAnAM phalamanubhavituM karmaNAM jAyate yat
tasmAdabhyarthaye tvAM prahiNu mayi kR^ipAM janmahantrIM kR^ipAlo || 912||
datvA shAstraM narebhyaH prakR^itimapi tathA tAvakIM kalpayansan
Aj~nAchChedIti ruShTaH kShipasi viShayagAnmAyayA mohitAMstAn |
yuktaM kiM vA tavedaM satatasukhadhiyaH kShiprasaukhyepsavaste
mAdrAkShIrdoShameShAM tadiha karuNayA rakSha sheShAdrinAtha || 913||
AhArasnAnabhogAdyakhilamapi cha yanmAnuSho nityamasyAM
medinyAM sAbhilAShaM muhuranubhavati shrInivAsAtmamitraiH |
chitraM tattajjihAsA na hi bhavati kadApyevamasya tvadIyA
sA mAyA kAraNaM tatprahiNu tava kR^ipAM heyatAj~nAnadAtrIm || 914||
mAtashsheShAdrineturhR^idayakamalaje! sAnukampe.anukampe !
tannAbhIkUpapadmaprabhavashatadhR^itessAhyakR^idbhAsi nityam |
yasmAttvAM vIkShamANassa tu sR^ijati chirAtkarmavIkShAnapekShaH
jantUnantAbhimantUnkalayasi satataM tvaM yatashshrIshasaktAn || 915||
Aki~nchanyaM dhanAdeH prakaTayitumahaM na tvayi shrIsha ! sajjaH
kai~NkaryAbhAvarUpaM taditi nigadituM hanta! jihremi nAtha!
yasmAdAshAvisheShAddhanagR^ihasutadArAdivashyastadarthaM
duShkarmaprAptapApastadiha tava kR^ipAM pApahantrIM nidhehi || 916||
ekatra dveShivargo dhanasutadayitApremabandhaH paratra
sphItAshAnyatra nityaM vR^iShashikharipate! pIDayantyekadaiva |
antaH kAmAdidoShAH bahuvidhaviShayavyagratAjagdhamenaM
dInaM mAM pAtu nityaM nirupamaduritAkampamAnaM dayA te || 917||
syAnnAmaitanmurAre! trividhakaTumahAtApasantapyamAne
loke.asmiMstvatsaparyAvyatikarakaraNe.apyantarAyo mahAn hi |
AstikyAdyadyateta prakR^itivashatayA puNyakarmapratIpo
vighnassyAdeva tasmAtsavinayamadhunA tvaddayAM prArthaye.aham || 918||
brahmAdyA devatA yachChrutimadhuravachashshrotukAmAH payodheH
pAraM prApya stavaistairghaTitakarapuTA bhaktibhAjasstuvanti |
mAtashshrIshAnukampe! vR^iShashikharitaTe martyanetraikapeyaM
kR^itvA taM ve~NkaTeshaM paramapadamudaM dApayasyaihikebhyaH || 919||
kAruNyaikArNavastvaM dashashirasi kuto nAkarostvaddayAM tAM
dhvA~NkShe yAmAtanoryatpraNipatanaparassa tvayaM neti kiM vA |
gR^idhreshasyAbhihantA sharaNamupajuSho yaddayA tanna saktA
sthAne bhaktAparAdhiShvayi! bhavasi kathaM nAtha! kAruNyamUrtiH || 920||
prAchInAnalpakarmavyatikarajanitasphItaduHkhopabhuktyai
tuchChachChAgAdiyoniShvadhigatajananassaMsarannAsamatra |
jAtashshrIvaiShNavassaMstava tu karuNayA divyadeshe.adya nAtha!
tvadbhaktAnA~ncha sevAkR^itamatirabhavaM dhanyadhanyo.asmyato.aham || 921||
grAhagrastaM gajendraM paramapadagato rakShituM hanta! shakto.a\-
pyArAtsa~Nkalpato yadvR^iShashikharimaNe! pa~nchahetIshapANiH |
AkarShanpItachelaM svayamahiripumapyAttavego.abhinunnaH
kAruNyenAshu sAkShAdibhapatimagamastAdR^ishaM rakSha tanmAm || 922||
pA~nchAlIM pa~nchapatnIM sapadi nR^ipasabhe duShTadushshAsanena
prAkR^iShTAtmAMshukAM tAM vividhavasanadassvasthalasthohyarakShaH |
evaM vA nAtha! mAM cha priyavR^iShashikharin! tatra tiShThankR^ipAlo!
saMrakShetyArtachittasstvayi nihitabharaH prA~njaliH prArthaye tvAm || 923||
mAtaH kiM vAnukampe! na danujaripuNA kArayasyAshritArthaM
yanmAturgarbhakoshe mR^itamapi tanayaM jIvayannuttarAyAH |
kaunteyebhyaH pramodaM vyataradayamaho! chodito hi tvayaiva
shrImAnsheShAdrinAthaH prakathaya kimito.apyasti vaichitryamanyat || 924||
vedAdhyAyI na dharmapravaNasitamanA nApi tatvapravettA
dravyatyAgI na chAhaM na nijagurujanAsaktachitto na shAntaH |
nApyanyakleshaduHkhI na paradhanajihAsustathA nopakArI
mAtashshrIshAnukampe! kathaya janamamuM vallabhAyedR^ishaM mAm || 925||
AshAtUddAmabhUmA bahuvidhaviTapA dhAvayatyAshu dUraM
trailokyAgArasAraprasR^imaramanasaM mAM vR^iShagrAvanAtha |
tasmAdekatra tiShThaMstavapadayugaladhyAnasaktaH kathaM vA
bhUyAsaM bhUmibhAge prahiNu mayi kR^ipAM tatsadA sthemadAtrIm || 926||
mAyAsammohitAnAM dhuri yadi nR^ihare! gocharassyA janAnAM
AshApAshAbhinunnairahamahamikayA prArthyamAnashcha taisstaiH |
sarvaj~nassarvashakto.apyahaha sapadi di~NmUDhatAM prApya tiShTheH
apratyakShastadetAnavasi karuNayA prArthitArthapradAyI || 927||
archArUpI svakIyAM shriyamatishayinIM darshayanpApinA~ncha
shrImaMstArkShyAbhiyAyin! svayamatimadhurAM mUrtimapyArtihantrIm |
tattatkAmAbhipUrtyai vilasasi shikhare sheShashailasya nityaM
kiM brUmaste.anukampAM bhuvi tu kimathavA bhAgyametajjanAnAm || 928||
svAnuShThAnaM vinA ye pravachanapaTavo bodhayantIha shAstraM
govaktravyAghrakalpAssahR^idayajanatAva~nchakAssa~nchitArthAH |
teShAM j~nAnopadeshAtkathamiva bhavitA shuddhachitto jano.ayaM
shAstrAnuShThAnasaktAn virachaya kR^ipayA tAnmurAre! tadatra || 929||
sheShAdrIsha! tvadIyasphuTakamalapadadhyAnadhAraikanighnaM
svAntaM me modamAnaM bhavatu karuNayA puNDarIkAkSha! nityam |
yad.hdhyAnAdaihikAnAM bahuvidhaviShayavrAtabhAjAM janAnAM
dUrIbhUyAdatandrA sahavasatiriha prAyashashshokahetuH || 930||
lakShmIstvAM vishvabandhuM bhajati nirupamaprItibandhAnubaddhA
tva~nchAsyA bhrUvilAsaprasaraparavasho vartase nighnacheShTaH |
nityAvAsA dvayossA manasi cha karuNA svAshritakleshahantrI
satyevaM chintayeyaM tvayi nihitabhara shshrIsha! dAsaH kimartham || 931||
nAnAjanmapradAnaM prabalaniravadhikleshadAnaM kuvR^ittiH
yadyatkAruNyakAryaM tadiha guNanidhe! chetanAnAM jagatyAm |
kleshaiH pApapraNAsho bhavati tadanu cha shreShThavaMshaprasUtiH
bhUyAttvatpAdapadmapravaNamatirapi shrIsha! satsa~Nga bodhaH || 932||
nissImAshcharyakAryaprakaTitavibhavaM mAnuShAkArabhavyaM
divyAkAraM bhavantaM chiraduritagaNadhvAntaruddhAntarAkShAH |
dhikkurvanto manuShyA nikaTaparichayAnnaiva jAnanti sevyaM
shaure! tanmAvatAraM bhuvi kuru kR^ipayA duShTametajjagaddhi || 933||
bhaktAdhInatvamarchAkR^itiriha bhagavan! shItavAtAtapotthAn
kleshAn shashvatsahiShNuH prakR^itivashatayA svAnukUlaM kR^itArchAm |
a~NgIkurvan smitAsyaH prakaTayasi hare! shrIpateste kimetat
svAtantryaM kutra yAtaM bhavasi karuNayA chAthavA lokanighnaH || 934||
nityAnandAtmako.api prakR^itivikR^itijadvandvasa~NghUrNitAkShaiH
svechChAvR^ittipravR^ittaiShShaDarigaNavishIrNAtmakairmAnuShaistvam |
nitya~nchAbhyarchyamAno vR^iShashikharipate! mandahAsAbhirAmaH
kShAntyaudAryorukAryaM kalayasi karuNApreryamANo dharitryAm || 935||
doSho naivaiSha nR^INAmiha kalimahimA tAdR^igityambujAkSha |
tvaM manvAnassaparyAM kaluShijanakR^itAM sAdaraM svIkaroShi |
kAruNyaikAkaro hi prashamitaduritassaMshritAnAM vR^iShAdrau
kShAntyaudAryorukAryaM kalayasi satataM prArthitArthapradAyI || 936||
patraM puShpaM phala~nchApyupahR^itamudakaM bhaktito.admIti shaure |
yatproktaM tachcha kartuM tvayi mama na dR^iDhA bhaktirastIha tAdR^ik |
sR^iShTaM vastu tvayA tadbhuvi karayugato bhaktipUtaM gR^ihItvA
tubhyaM dattAnyamUnItyahaha | gaditumapyuddhato.ahaM vilajje || 937||
ghorAraNye jaTAyurdhutakuNapagaNAghasmare gR^idhravaMshe
jAto.api svAmibhakto jaraThatanurapi prANanirNiktarAgaH |
paulastyauddhatyahantA raghuvaracharaNanyastamasto.astamAgAt
tAdR^i~N niShThA kathaM syAnmayi tava karuNApAtratAM yallabheya || 938||
bhIShAsmAnmAtarishvA pavata iha tathodeti sUryo.api bhIShA
mR^ityurdhAvatyatandro druhiNaharaturAShAT kirITArchitA~Nghre |
etatsarvaM sharIriprakaraparirirakShAkR^itaM sarvavettrA
kAruNyapreritena tribhuvanavibhunA ve~NkaTesha! tvayA hi || 939||
samprAptAnekabhogo.apyasakR^idiva tavAnugrahAdAshayaiva
shrIman! shashvaddhanArthI dhanijanasadanadvArasa~nchArashIlaH |
dhikkArAshIrNakarNo nirupamahR^idayakleshasandahyamAno
martyassyAtte.anukampAM tadiha narahare! nikShipAshAnihantrIm || 940||
duShTe shiShTopadiShTA bhavati hi phaNitirvR^iShTivachchoShare ya\-
ttatkaShTA duShTamaitrI jagadidamanishaM ghuShTadauShTyaikaniShTham |
suspaShTAShTApadashrIriyamapi jagatI shArisa~NkShobhadakShA
hyakShaprakShepashikShAkShubhitakukitavA tatkShipAtrAnukampAm || 941||
sAdhUnAM prAyasho.asmin jagati paribhavassambhavatyalpachittaiH
duShTaistanmaunamudrAparihR^itajanatAste visR^iShTAbhimAnAH |
tvannAmadhyAnatuShTA dalapihitashalATupratIkAshakAyAH
lIyante kvApi tAdR^iksthitimiha kR^ipayA dehi mahyaM kR^ipAlo || 942||
viShNo! pauShNo.asi koShNaiH katipayakiraNairvyAdhimunmUlayansan
kaishchittIkShNaiH karaishcha pravitatajaladherambu jImUtayansan |
kAla~nchAkalpayansan prayatavidhikR^ite sarvasAkShI niyantA
trayyAtmAnnapradAtA nanu tava karuNA hanta! vaiShamyamuktA || 943||
kandarpo darpadAtA jaraThamapi manonodanenAninIShuH
kAntAbhyarNaM vivarNaM kimuta! yuvajaneShvasya cheShTAvisheShe |
jAnantyete yuvAnassmaraparavashatAbhrAntachittAH pramattAH
vishvaM kAntAmayaM tatparihara kR^ipayA mauDhyametanmurAre || 944||
darshaM darshaM manuShyA yamasadanagatAnprANinassthairyamAtma\-
nyAmanvAnA nijAsoshshamadamarahitAH drohalabdhAnyavittAH |
AtmAnaM poShayantassatatamapi parodgarhaNAsaktachittAH
kAlaM saMyApayanti prahiNu tava kR^ipAM tvatpadadhyAnadAtrIm || 945||
sR^iShTau yadvastu heyaM tadiha janimataH kasyachidbhogyameva
prAyashchedaM hi dR^iShTaM kiTiratikaluShaM heyavastvatti bhogyam |
tyAjyaM yad j~nAninAM tadviShayiparavashAnAM bhavedbhogyabhogyaM
tasmAchChrI shrInivAsa! prahiNu tava kR^ipAM teShu mUDhAtmakeShu || 946||
saMrAD bhUtvA samantAdupanR^ipatishiroratnakoTIranirya\-
drochirnIrAjitA~NghrishshashadharasadR^ishachChatramUrdhA kadAchit |
dviDbhiH prabhraMshitassannaTati nishi parAgArakadvAri bhissA\-
bhikShArthI sthema ki~nchittadiha na nR^ihare! tenukampA sthiraikA || 947||
yadyadrUpaM manoj~naM kramasha iha vayovyutkramAttatkarAlaM
yadyatkhAdyaM svabhogyaM kramagalitaradAlestadutsAryameva |
kAntAsraggandhabhUShAdyakhilamapi tathA syAjjihAsaikapAtraM
tyAjyaM bhogyaM na ki~nchittadabhilaShata tAM shrInivAsAnukampAm || 948||
nirdhUtAsheShapApo.apyanusR^itasukR^itastatphalaM chAnubhoktuM
rambhorvashyAdiyoShApaTukuTilakaTAkShaikapAtraM hi nAke |
bhUyAsaM tatkaTAkShaM prahiNu mayi tathA chintayantyAM kR^ito yaH
shrIman! sheShAdrinAtha! tvadatulakaruNAM kA~NkShamANo.asmi dInaH || 949||
yadyadbhavyaM bhaviShyatyanubhavaphaladaM prAyashastattadeva
shrIshAnudhyAnaniShThAM kuta iha vayamapyAdriyAmo mudheti |
mUDhA jalpanti kechittvadamalakaruNAvaibhavaM no viduste
tvatpAdadhyAnayogAdrachitamapi mahatkarma tannashyatIti || 950||
vitte satyapyadAnAdanubhavavirahAjjAyate durgatassan
daurgatyAtpApakarmaNyanudinanirataH pApatastuchChajanmA |
tAdR^igjanmAttaduHkhaprasaraNagalitasvIyakarmapravR^ittiH
tachCheShagrAvanAtha! prahiNu tava kR^ipAM dAnabuddhipradAtrIm || 951||
sA trayyapyAdarAttvadguNagaNagaNanArabdhasarvaprayatnA\-
pyaikaikasyAntamantassuchiramananato.aprApya khinnA nivR^ittA |
satyapyevaM dayAyA niravadhimahimAkR^iShyamANA nitAntaM
smAraMsmAraM vilInA bhavati khalu sadA tanmayI ve~NkaTesha || 952||
saMvarte j~nAnahInAngatakaraNatayApyAtmarakShAviyuktAn
jIvAMstAn saMrirakShushshishurapi jaThare poShayansAvakAshe |
sR^iShTau spaShTA~NgakAMstAnvisR^ijasi jaTharAtsendriyAn j~nAnabuddhAn
shrIman! sheShAdrinAtha! tvadamitakaruNAkAryametaddhi sarvam || 953||
yuddhAnte prArthitA yA pavanatanubhuvA rAkShasIchChedanArthaM
pApAnAM vA shubhAnAM hananasamuchitAnA~ncha kAryA kR^ipeha |
nirdoShI ko.asti loketviti gaditavatI sAsti vakShassthale te
nirbhIko ghorapApastadahamiha phaNikShmAbhR^idIshAsmi hR^iShTaH || 954||
arthAnAmarthitAnAM pravitaraNakR^ite sheShashaile vasansan
lakShmIvakShAH kShamAkShashshrayaNavachanamAtreNa jAnansvabhaktam |
tatklesha~ncha kShipansaMstadudayamanishaM bhAvayasyAdarAdya\-
nmartyA jAnanti naiva tvadamalakaruNAkAryamaj~nAnatastat || 955||
nindAgarbhairvachobhissucharitajanatAruntudaissapramodaM
pApAtmAno manuShyAssamayamakhilamapyutsukAste kShipanti |
AyurvyarthaM nudantaH kShaNamapi bhavato nAmasa~NkIrtanArthaM
buddhiM nAvartayanti prahiNu tava kR^ipAM teShu tadve~NkaTesha || 956||
nAnAvittApahArAtsvayamiha dhaniko jR^imbhamANAmayassan
svIyadravyopabhoge.apyanabhimatamanAstAntanetraH kShudhArtaH |
tadvittaM bheShajArthaM vitarati bhiShaje na tvadarchopayuktyai
pApaM hi dravyamUlaM tviti cha na manute tvaddayA tatra dUre || 957||
tvaddAsapreShyadAsapravarapadasarojAttabhaktiM kR^ipAlo!
tanvanmAmapyamantuM virachaya kR^ipayA yatprahR^iShTo bhavestvam |
tvayyAgaH kShantumarhasyapi tu bhuvi bhavaddAsavarge kR^itaM ta\-
tkShantuM shaknoShi naiva priyavR^iShashikharin! vartayaivaM sadA mAm || 958||
aishvaryonmattachittAstridivavibhavato vismR^itatvatpadAbjAH
devA apyAtmalAbhapraNihitamanaso bhaktasR^iShTAparAdhAH |
prApte kleshe tadAnIM tvadamalakaruNAM yAchamAnA labhante
svAsthyaM tatte.anukampA nirupamamahimA sheShashailAgradIpa! || 959||
tvad.hdhyAnasthApitAsuM savanadharaNijAM jAnakIM hanta! rAma |
krodhAndhastvadgirA drAgghutavahapatitAM vIkShamANo vyatiShThaH |
trailokyapratyayArthaM vyavasitamuchitaM kiM kva yAtA dayA te
duShTaM hyetajjagadyattribhuvanajananIM tAM tathApyabhyanindat || 960||
hantuM taM saindhavaM yatprakupitavijayodagrasograpratij~nAM
sArthaM kartuM cha koTidyumaNiruchijuShA chakrarAjena nAke |
cha~nchatsUryApidhAnaM pradhanabhuvi bhavAnkArayAmAsa shaure |
bhaktatrANAya kiM vA kalayasi kR^ipayA nAtra chitraM na ki~nchit || 961||
uddishya shvetavAhaM tapanatanubhuvA rakShitAM shaktimekAM
rakShasyakShobhyadAkShye pavatanayaje pAtayitvA rajanyAm |
jiShNuM bhaktAgragaNyaM raNabhuvi vipado mochayAmAsithAho |
bhaktatrANAya kiM vA kalayasi kR^ipayA nAtra chitraM na ki~nchit || 962||
uttu~NgakShmAbhR^idagrAdgaganagamanatassphItashubhrAMshukassan
lokAyaivaM sudhAMshussamupadishati yanmAnasAnmAdhavasya |
AvirbhUtA dayA sApyahamiva tadiyaM shItalA kleshahantrI
tadyUyaM saMshrayadhvaM vR^iShashikharipatestAmatandrA manuShyAH || 963||
shashvadbhogAnubhUtyApyuparatiriha naivAnubhUtau punasta\-
tkA~NkShA chojjR^imbhate yaddhutaghR^itahutabhukkalpasa~NkalpatArA |
asmin sAkShI yayAtistadanudinamahaM kAmakopAbhitaptaH
shrIman! sheShAdrinAtha! tvadamalakaruNAM shItalAmatra yAche || 964||
svArthatvenArjiteShu prachurataradhaneShUchchashR^i~Nge.api saudhe
sevAhevAkabhR^ityeShvapi navaruchirapratnaratneShu mAnI |
prAyassvIyA~Ngameye svapiti khalu tale kukShimeyaM rasAnnaM
prAshnAtyanyaM parArthaM prakR^itivivashatAkAryametatkR^ipAlo || 965||
vaikuNThAddivyadhAmno.apyuragashayanato.apIndirAsundarA~NgaM
nityAnandasvarUpaM bhavagahanagalatprANipIDApanutyai |
mAtardhIre.anukampe! tribhuvanasaraNiM darshayantyAnayasya\-
pyArAdbhAgyaM tadetatkathayitumahamasmyalpachitto na dakShaH || 966||
sadbhissaMsevyamAnaM kumativanakuThAraM mahAbhAShyakAraM
shrImadrAmAnujAryaM guruvaramuruhR^iddhvAntavidhvaMsasUram |
sandarshyAj~nAya mahyaM yadupakR^itimatAnIH kR^ipAM kiM bravImi
shrImaMstachChrInivAsa! praguNaguNanidhe! nirbhayo.asmyatra pApaH || 967||
kShIrAkUpArakanyA yadachaladayitA yasya sarveshvaratvaM
shrIvatso yasya vakShasyabhikanati tathA kaustubho vaijayantI |
yadvAho vainateyashshayanamahipatirdhAma vaikuNThanAma
tvaM sheShAdrau sa eva pravilasasi kR^ipA hanta! martyeShu kIdR^ik || 968||
durmArgavyApR^itAnAM kaTukapaTahR^idAmanyavidrohiNA~ncha
svAdhInAtyantashAnta svavachanakaraNAsaktahiMsApradAnAm |
sAhyaprotsAhakesminsati kalipuruShe sArvabhaume murAre!
santastvad.hdhyAnasaktAH kathamiva nivaseyuH kR^ipAM te vinAtra || 969||
prAmANyena trayIM tAM nu katichidurarIkR^itya yepyAmanantaH
tadvyAkhyAkaitavAttvAM guNinamaguNinaM hanta | mithyA jagachcha |
ityevaM va~nchayanti priyavR^iShashikhariMstaiH kalibhraShTadhIbhiH
vyAptesmin bhUmibhAge parihara vasatiM me kR^ipAlo kR^ipAtaH || 970||
kR^ityAkR^ityAndhaduShTaprachurabhuvanato bhItabhItaH prasarpa\-
jjvAlAjAjvalyamAnajvalanaparigatAgAravAsIva varte |
shashvadrakShApratIkShaH kShaNamapi yugavadbhAvayanbhUmibhAge
sheShakShmAbhR^itkShitIsha | tvadamalakaruNAM kA~NkShamANaH kShamArthI || 971||
dharmoyatrAsti tatra pravilasati jayopIti vArtApi mithyA
prAyo dR^iShTaM kilaitatkalimalakaluShe   tatpratIpotra jetA |
pratyakShaikapramANo na yadanumanute shAstravedyaM parokShaM
tasmAchChrI shrInivAsa prahiNu tava kR^ipAM vedavishvAsadAtrIm || 972||
shAstrAnuShThAnahInA muhurabhidadhatassvIyavairAgyaniShThAM
sarveShvAsaktachittA jalakamaladalaM sAdhu dR^iShTAntayantaH |
pUrvachAryopadiShTAM  saraNimatigatAssvechChayA sa~ncharantaH
santi j~nAnitvadR^iptAH nanu kathaya kutasteShu te nAnukampA || 973||
tvatkai~NkaryaikatAnairahipatishayanassUribhirgIyamAnaM
shR^iNvanyassAmagAnaM sarasijanilayAvidyududyotamAnaH |
gAmbhIryAvAsanetraH pravilasati yathAvAksadAdhAmni divye
bhaktArthaM sheShashaile niravadhikR^ipayaivArchyarUpastathA saH || 974||
durvR^ittakShINapuNyaH punarapi narake sampatanduHkhabhAgI
shashvadbhogAbhilAShI pratijani bhuvane paryaTatyeSha martyaH |
j~nAtvaitachChAstrato.ayaM sukR^itakR^itamatirbhogalabdhyA prahR^iShTaH
bhUyAttachChrInivAsa! tvadamalakaruNAM preShayAtra prasannaH || 975||
yogIndrA dhyAnayogAdbhavadanubhavataH phullaromA~nchitA~NgAH
AnandAshrupradigdhAshshithilitahR^idayA vismR^itaitatprapa~nchAH |
kAlaM tvAnandarUpaM bhuvi parikalayantyaihikAMstuchChayantaH
shrImaMstAdR^igdashAM me vitara karuNayA sheShashailAgradIpa || 976||
sarvaM dvandvAtmakaM hi pratibhaTasahitaM yadyapIha prakR^iShTaM
duShTairvyAhanyate yajjayati bhuvi tathApyAgamatyAjyameva |
tasmAtsatkarma loke prachalati viralaM santi santo.apyatandrAH
evaM tachChrInivAsa! prahiNu tava kR^ipAM satsamR^iddhipradAtrIm || 977||
yogAbhyAsaikaniShTho.apyadhigatahR^idayasvasthabhAvo.api dIrgha\-
prANAyAmAvaruddhashvasanagatirapi sthemasiddhAsano.api |
yogI tatsiddhakAle surapadavibhavAkR^iShTachitto yiyAsuH
prabhraShTassyAddayA te na yadi madhuripo! pUrvasaMskAravashyaH || 978||
shrImAnkUrAdhinAthaH pathigatadayitAbhItisannodanArthaM
dUre prakShipya vastraprapihitakanakAmatramatrastachittAm |
vyAtanvannabravIttAM na cha yadi mamatA tatra bhIrneti dhIraH
tAdR^igbuddhiM murAre! vitara karuNayA me mamatvAshrayAya || 979||
j~nAnyagryAdyAj~navalkyAdadhigatamamatAhInataikopadeshaH
tatsR^iShTAgnipradagdhaM sa sapadi janakassaudhamAkarNya dhIraH |
audAsyenopadeshe vinihitahR^idayo me na ki~nchit pradagdhaM
j~nAnItyUche tathA mAM kuru tava kR^ipayA bhogirAT shailanAtha || 980||
snAnAnuShThAnahInA mR^igasahavasatishchAkSharaj~nAnashUnyA
vArdhakyakliShTakAryApyavanigataphalAnveShaNAyAttachArA |
bhaktyA tAnyarpayitvA dyumaNikulamaNe! te shramaNyApa harShaM
tasyA bhakterlavAMshopyayi na mayi vibho | te.anukampA gatirme || 981||
kAntAre vyAghrabhItashsharaNamupagato markaTaM vR^ikShasaMsthaM
kashchinmartyo.abhiguptastaruviTapataTe tena nidrAlumenam |
kIshaM tasmai tvadAttanna hi jagati narAtsvArthino hA! kR^itaghnaH
tasmAchChrIve~NkaTesha! prahiNu tava kR^ipAM sarvasattvAbhirAmAm || 982||
dIkShAbaddhA dvijAgryAssavahavanaratAsstvAM vidurnaiva shaure!
yaj~nArAdhyaM budhAste kimu phalamakhilaj~nAnatastad gR^ihiNyaH |
tubhyaM yatpAyasAdi priyatamamanasaivArpayAmAsurArAt
shAstraj~nAnena kiM vA na yadi tava kR^ipA ve~NkaTakShmAbhR^idIsha || 983||
skhAlityaM gachChatassyAditi nayamanusR^ityAparAdhAnmadIyAn
aj~nAnojjR^imbhitAMstAnvR^iShashikharipate! kShantukAmo.asi satyam |
ichChApUrvaM kR^itAnAM pratidinamapi chogrAgasAM mAmakAnAM
kShAntissA te kathaM vA tadahamiha kR^ipAM mAtR^ikalpAM tu yAche || 984||
matto j~nAnaM tvapohassmaraNamapi tathetyabhyudIrNaM tvayaiva
shrIman! ko.ahaM tathAtve nikhilamapi bhavatsiddhasa~Nkalpanighnam |
tattvatsa~NkalpanighnaH pashusadR^ishagatiH kShutpipAsAbhibhUtaH
sarvatrApi bhramAmi prahiNu tava kR^ipAM mAthavA me na ki~nchit || 985||
gambhIrAmbhassujAtadyumaNikaraparAmarshaphullAmbujAkSha !
tvatkulyAkalpanetre pravahati karuNA sAparAdheShvapIha |
tasmAdabhyarthaye tvAM mayi duritamaye pAtayetyekavAraM
shrImaMstAdR^ikkaTAkShaM madhumathana! mama prArthanAM svIkuru tvam || 986||
saushIlyaM yattvayA tatprakaTitamiha gopAlakaissevitena
svAtantryaM kvApi lInaM yaduvarakulajAtasya te ve~NkaTesha!
sa~NkochaM tvadguNAnAM vikasanamapi tatkAlayogyaM tanoShi
prAyassarvatra nityaM tava khalu karuNA tvekarUpA vichitram || 987||
bhedAbhedashrutInAM ghaTakanigamatovArayannarthadausthyaM
jIvAntaryAmitAM te sadakhilamiti yo darshanAdarshadarshI |
vyAchaShTe lakShmaNAryaM guruvaramabhajastaM kimetanmurAre!
svaM j~nAtuM gurvapekShA tava cha kimathavA lokamartye kR^ipAtaH || 988||
aishvaryodriktachittAH kShaNamapi na hi mAM saMsmarantIti matvA
dAridryakleshadAyI bhavadamalapadadhyAnasaktAnvitanvan |
pApagranthyujjhitAMstAnnanu bhuvi tanuShe naiva jAnanti te tu
tvatkAruNyaM janebhyassukR^ita vitaraNe baddhadIkShaM hi nAtha || 989||
nityassannirvikAraH prakR^itimanusaran bAlyakaumAracha~ncha\-
ttAruNyasthAvirAntAstadanuguNaguNA dhArayansan dashAshcha |
rAmatve yAdavatve.apyanubhavarasiko mAnuShaprApyabhogo
bhaktAdhIno hyabhUstvaM vR^iShashikharipate! vachmi kiM te.anukampAm || 990||
kAchidvANI trayIsthA tripuraripunamasyAM vadatyAdarArhaM
kAchiddambholipANerapachitimuchitAM stauti vahnestathaiva |
eva~nchedalpabuddheH kathamiva na bhavechchittachA~nchalyamasmin
tatte tAstA bhajanti tvadaruNacharaNaM nAnukampA na teShu || 991||
sarvAntaryAmitAnte bhuvi manasi janA bhAvayanto namasyAM
kurvantvete parebhyo jaladhiriva gatiryannadInAM bhavestvam |
tasyA vismR^itya cha tvAmachiralaghuphalaprepsavo devatAstAH
vandante mandamedhAstadiha kuru kR^ipAM tvatsaparyAnukUlAm || 992||
sAkShAddraShTA yatInAM prabhuvaraguruNA tA~ncha vaikuNThagadye
proktAM sUktiM smaransanparamapadamahAvaibhavadhyAnayogAt |
sarvaM kAlaM kShipAmi druhiNamukhasurAgamyadivyapradeshaM
draShTuM shakto mukunda! tvadamitakaruNApAtamatrAntarA kaH || 993||
vedA nirvedavAdA hutabhugapi ghR^itaM chakShuShA nekShate.api
vyApAdApAdanechChA jagati cha manujAssajjanAkalpakalyAH |
vandhyA sandhyopasattyA bhagavadapachitishshochanIyA vicheyAH
tvadbhaktA hanta! shaure! chalati kalibale tvaddayaikA gatirme || 994||
ekA yaddhAtR^ipIThaM vidalayati tathA dR^iShTiranyA tvadIyA
samphullaM tannitAntaM mukulayati hare! lokamevaM kaTAkShaiH |
hAsahrAsapravR^ittau ghaTayati tata evAhuretadbudhendrAH
dvandvAyattaM jagaddhItyanupamakR^ipayA mAM kuru dvandvamuktam || 995||
yAtAyAtAtikhinnA api shaThapavanAchChannapUrvasmR^ititvAt
nUtnatvenAttadehabhramamuShita bahUtpattiheyatvamedhAH |
jIvAstejassvarUpAapi jagati luThantyambujAkShapratIkShAH
shikShAhInA mukunda | prahiNu tava kR^ipAM chetanojjIvanArtham || 996||
mUrdhA tvatpAdanatyAM nayanamapi bhavadrUpasandarshane me
jihvA tvannAmanutyAM karayugalamapi tvatpadArchA vidhau cha |
pAdau tvanmandirAbhyantaraparisaraNe dhyAnasaktaM manassyuH
shrIman! sheShAdrinAtha! tvadamalakR^ipayA prArthayetvAmidantu || 997||
dhUrtAnAM va~nchakAnAM kapaTakaTuhR^idAmanyayoShijjuShA~ncha
drohodriktAtmakAnAM shritahR^idayAruntudavyAhR^itInAm |
vAso yatrAsti tasmin parihara kR^ipayA me sthitiM dInabandho
shrIman! sheShAdrinAtha! pratidinamapi tatprArthaye tvAmidantu || 998||
tvaddattAdbhogabhAgAdadhikatarasukhaprepsayA martyavargaH
kR^ichChrAsAdhyaprayatnasskhalati patati chAprAptakAmotiduHkhI |
yaddhAtrA phAladeshe parilikhitamato nAdhikaM prApsyatIti
prAyo jAnAti naiva prahiNu tava kR^ipAM kAmahantrIM kR^ipAlo || 999||
shrImadrAmAnujAryaprayatapadayugadhyAnatashchittashuddhiH
tachChrIsUktyarthachintAdviguNitapulakasyAstu me kAlayApaH |
tadbhaktAnAM padAbjeShvanishamataralA bhaktirapyAvirastu
shrIman | evaM tanotu tvadamalakaruNA hetuhInAtidIne || 1000||
shrIshAhetuprasAdasphuraduruvimalaj~nAnadR^iShTAchyutasya
svAntadhvAntoShNarashmeH kaThinashaTharipo rbhUmibhAgyAtmakasya |
trayyantodghuShTasAraprakaTanaruchirA drAviDAmnAyagAthAH
gAyan kAlaM kShipeyaM satatamapi yathA mAM tathA vartayAtra || 1001||
itthaM shrInigamAntadeshikavareNoktaM vR^iShAdrIshituH
stotraM shrIvaravarNinImukhavarAdyo vA paThatyAdarAt |
sampaddAyi dayAsahasramamalaM shrIshAnukampAM sadA
sa prApnoti yadIpsitaM tadapi yaddattaihikAmuShmikam || 1002||
shrInivAsAya sarvAntarvAsAya karuNAtmane |
tanmAnasanivAsAyai dayAyai chAstu ma~NgaLam || 1003||

iti shrIlakShmIdAsAdhiShThita vedAntadeshikapraNIte dayAsahasre
dashamashatakaM sampUrNam |

iti samAptashchAyaM granthaH |
shrImate rAmAnujAya namaH |
shrImate lakShmIdAsAya namaH |
shrImate nigamAnta deshikAya namaH |
\section{muktakAni shrIlakShmIdAsakR^itAni}
dravyamUlAni pApAni harannahi mahIdhare |
yo.anugR^ihNAti martyAMstAn shrInivAsamupAsmahe || 1||
paTIroshIra kAshmIra janmakarpUravAsitaiH |
tIrthaishshriyAbhiShiktaH shrI ve~NkaTesho jayatvasau || 2||
sha~NkhachakrA~NkitaH shrImAn bhAShyakArasya shiShyatAm |
bheje bhuja~Ngashaile yaH shrInivAsaM namAmi tam || 3||
parAtparo.api sulabhaH sheShAdrishikhare mudA |
yo rAjate namastasmai shrInivAsAya ma~NgaLam || 4||
padmAvatI sametAya sheShashailavihAriNe |
sarvAbhIShTapradAtresyAt shrInivAsAya ma~NgaLam || 5||
ma~NgaLAnAM nidhirmugdhA shrInivAsAnuvartinI |
pAvayantI dR^ishA martyAn jIyAt padmavatI sadA || 6||
bhrUlatAchAlanenaiva dvandvAtmakamidaM jagat |
krIDArthaM kArayatyai syAt padmAvatyai suma~Ngalam || 7||
padmAvatIti vikhyAtA shrInivAsapriyA cha yA |
padmAvAsA jagadvandyA tasyai syAnma~NgalaM shriyai || 8|| \- shrI lakShmIdAsaH
\- shrIrastu \-
aShTashaktivishiShTAya shiShTeShTArthapradAyine |
darshayitre prapattiM syAdve~NkaTeshAya ma~NgaLam || \- shrI rAmAnujamuni
madhurasmitamAtreNa kR^itAshvAsamiva shriyA |
a~nchitorassthalaM devaM shrInivAsamupAsmahe || \-\- shrI godAdevI
##

Encoded and proofread by Mandayam Nayaka Ramanuja

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}