कावेर्यष्टकम्

कावेर्यष्टकम्

मरुद्वृधे मान्यजलप्रवाहे कवेरकन्ये नमतां शरण्ये । मान्ये विधेर्मानसपुत्रि सौम्ये कावेरि कावेरि मम प्रसीद ॥ १॥ देवेशवन्द्ये विमले नदीशि परात्परे पावनि नित्यपूर्णे । समस्तलोकोत्तमतीर्थपादे कावेरि कावेरि मम प्रसीद ॥ २॥ वेदानुवेद्ये विमलप्रवाहे विशुद्धयोगीन्द्रनिवासयोग्ये । रङ्गेशभोगायतनात्तपारे कावेरि कावेरि मम प्रसीद ॥ ३॥ भक्तानुकम्पे ह्यतिभाग्यलब्धे नित्ये जगन्मङ्गलदानशीले । निरञ्जने दक्षिणदेशगङ्गे कावेरि कावेरि मम प्रसीद ॥ ४॥ कलिप्रमादाखिलदोषनाशे कारुण्यपूर्णे कमलायताक्षे । कदम्बकल्हारसुगन्धिपूरे कावेरि कावेरि मम प्रसीद ॥ ५॥ अनन्तदिव्यामलमोक्षदात्रि दुरन्तसंसारविमोचनाङ्घ्र्ये सह्याचलोत्पन्नविश्वस्वरूपे कावेरि कावेरि मम प्रसीद ॥ ६॥ देवालयापूरितदिव्यतीरे समस्तलोकोत्तमतीर्थमूर्धे काश्मीरभूःकल्पितचोलदेशे कावेरि कावेरि मम प्रसीद ॥ ७॥ प्रसीद कल्याणगुणाभिरामे प्रसीद कावेरि मम प्रसीद प्रसीद कामादिहरे पवित्रे कावेरि कावेरि मम प्रसीद ॥ ८॥ काकारो कल्मषं हन्ति वेकारो वाञ्छितप्रदः रीकारो मोक्षदो नॄणां कावेरीत्युच्यते बुधैः ॥ ९॥ ॥ इति कावेर्यष्टकं सम्पूर्णम् ॥ Encoded by Suresh Pitre suresh.pitre at gmail.com Proofread by Suresh Pitre, PR Kannan, PSA Easwaran
% Text title            : kAveryaShTakam
% File name             : kAveryaShTakam.itx
% itxtitle              : kAveryaShTakam
% engtitle              : kAveryaShTakam
% Category              : aShTaka, devii, nadI, devI
% Location              : doc_devii
% Sublocation           : devii
% SubDeity              : nadI
% Language              : Sanskrit
% Subject               : philosophy/hinduism/religion
% Transliterated by     : Suresh Pitre suresh.pitre at gmail.com
% Proofread by          : Suresh Pitre, PR Kannan
% Description-comments  : Kaveri Rahasyam
% Latest update         : December 31, 2016
% Send corrections to   : Sanskrit@cheerful.com
% Site access           : https://sanskritdocuments.org

This text is prepared by volunteers and is to be used for personal study and research. The file is not to be copied or reposted for promotion of any website or individuals or for commercial purpose without permission. Please help to maintain respect for volunteer spirit.

BACK TO TOP
sanskritdocuments.org