% Text title            : Minakshishatakam or Minakshistavarajam
% File name             : mInAkShIshatakam.itx
% Category              : devii, devI, shataka, stavarAja, mInAkShI
% Location              : doc\_devii
% Author                : sachchidAnandabhAratI (not sure if same as sachchidAnandashivAbhinavanRisiMhabhAratI)
% Transliterated by     : Aaditya Kalyanaraman
% Proofread by          : Aaditya Kalyanaraman, Rajani Arjun Shankar
% Latest update         : July 30, 2025
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Minakshi Shatakam or Stavarajam ..}##
\itxtitle{.. shrImInAkShIshatakam athavA mInAkShIstavarAjam ..}##\endtitles ##
shrImInAkShIdhyAnam |
shabdabrahmamayI charAcharamayI jyotirmayI vA~NmayI
nityAnandamayI nira~njanamayI tattvamayI chinmayI |
tattvAtItamayI parAtparamayI mAyAmayI shrImayI
sarvaishvaryamayI sadAshivamayI mAM pAhi mInAmbike ||
(shrImachCha~NkarabhagavatpAdAchAryavirachita shrImInAkShIstotrAntargatam)

shrIsachchidAnandabhAratImahAsvAminAM dhyAnashlokaH \-
satyasvarUpaM sadj~nAnaniShThaM sAkShAchChivaM param |
sadA dAnarataM dAntaM sachchidAnandamAshraye ||
shrIgaNAdhipataye namaH |
shrIsachchidAnandagurubhyo namaH ||
\section{shrImInAkShIshatakam}
bAlArkakoTiruchire varade vareNye
bAle balapramathane madanapravINe |
lIlAsahasranipuNeshamahAvihAra\-
shIle sumInanayane kuru ma~NgalAni || 1||
sharvANi vANi kamale kamalAsanasthe
mInAkShi kA~NkShitavarapradakAmarUpe |
savyetareNa cha kareNa gR^ihItachAru\-
krIDAshuke karuNayA kuru sAkSharaM mAm || 2||
kalyANade kamalalochanaka~njavaktre
kAmAkShi kAmini kalAnipuNe kulIne |
kAmAriNA hR^itanijArdhasharIrabhAge
kAruNyataH kuru bhavatpadi mAM cha bhaktam || 3||
atyantachAruvasane rasanAgranR^ityat\-
vidyAvishAradavidhAtR^isuraprapUjye |
yAjyAdigItamakhageyapuronuvAkye
vAkye mameshvari sudhAM praNidhehi mAtaH || 4||
yAgassarAgavihitassupavitratIrtha\-
sArthairavApyamatha bhoga upAttabhogaH |
yogo niyogaparidUShita eSha tasmAt
mInAkShi tAvaka padasmaraNaM pradehi || 5||
gopIjanaprabhavakAmavihAravIrya\-
vikhyAtakIrtiparamaH puruShaH purANaH |
tatpauruShAkR^itiriti prabhurambike tvAM
shrIsha~NkaraH kila purA samudAjahAra || 6||
brahmANDamaNDalamidaM hi mahAnidhAnaM
bhAvatkama~NgalamahAyashasAmapAram |
tretAyugoditadharAtanayAdhinAtha\-
shrIrAmanAmajapapUritapuNyapu~nje || 7||
tvaM kAmadhenuratha kalpatarustvameva
chintAmaNirmaNivaro mama mInanetre |
ramyANi tAvakacharitrasahasrakANi
shrIpANDyarAjatanaye ramayanti chAsmAn || 8||
kalyANakAraNasharAsanashAsitAriH
kAruNyapUrNasumanAH sa purA purAriH |
devi tvadIyatapasA kila santutoSha
bhrAjadvR^iShopari vasan vR^itapa~nchavaktraH || 9||
hAlAsyanAyaki haro hR^itakAmadarpaH
sarpaughamaNDitavapurbhR^itasatkapAlaH |
shUlapradhAvitaratatsuravairisa~Ngho
hu~NkAraduShTadamanastava saumyarUpaH || 10||
nArAyaNapraNatapAdapavitrapAMsu
pAMsupratAritasamastanirastabodhe |
kastUrikAtilakanAmakabhR^i~Ngasa~Nga\-
bhrAjanmukhAkhyakamale vimale namaste || 11||
mANikyagarbhitalasatsubhagatvadIya\-
nAbhIsarojavaravAsaparA ramaiShA |
bhUShAsahasraparibhUShitaramyarUpa\-
yoShAvisheShaparipUjitapatsaroje || 12||
tvannUpuradhvanivimohitavishvametat
chintA paraM kimanayA kR^itamatra bhadram |
tvAM sarvakarmaphaladAM sakalasvatantrAM
kechidvidurna khalu kechana bodhashUnyAH || 13||
dedIpyamAnatanumadhyagahemapaTTo
jAjvalyamAnashubharatnamaNiprakUTaH |
rambhoruyugmapariveShTitarAgarakta\-
vAsastu vAsavamanaH kurute sarAgam || 14||
tvatkukShiniShThamidamamba jagattraya~ncha
tvattejasA khalu vibhAnti samastalokAH |
Aj~nAdharAstava maheshvari te digIsha\-
brahmeshaviShNava ime.apyabhavadguNaste || 15||
kA~nchIsragamba tava puShpitahATakAnta\-
rvibhrAjamAnavaradIpashataprabhaughAm |
satki~NkiNIgaNajhaNAvR^itahaimanAga\-
shrImanmukhAnatashukAvalirAjitashrIH || 16||
AsIttvadIyajaghanaM ghanamityavekShya
meghassa garjitadivaH kupito.adhunApi |
tadyuktameva hi tadastu ghane ghanatvaM
tachchettvadIyajaghanena samAsthitaM syAt || 17||
shailopamastanavidhUtamahAbhayo.ayaM
tvAmAshrito madana eSha maheshashatruH |
taM tAdR^ishaM girivaraM pratipadya shauryaM
tejassamAjakR^itasAlavidhistanoti || 18||
tvatkaNThanAlaparichumbitalAlaseva
lakShmIrvibhAti tava kaNThagabhUShaNaughaiH |
hastollasajjhaNajhaNIkR^itaka~NkaNAni
kArtasvaraprabhavasuprabhayArjitAni || 19||
ratnaprabhAdhaladhalIkR^itasatkapola\-
shrIkuNDalojvalalasachCharadinduvaktre |
mAye maheshvaramanohararamyarUpe
mAM pAhi mInanayane madhurAdhinAthe || 20||
tvadbAhudaNDamupalabhya shashAsa shambhuM
chetobhavashchiramana~NgatayAtikopaH |
tasmAdageshvarasute jagadIshvaro.api
sthANutvamabhyupagataH khalu khinnachetAH || 21||
tvatpANisaundaraparAjitapa~NkajAni
tvachChoNapAdayugale nipatanti nityam |
namrA api prabhujaneShu sudurjayeShu
dhAryanta eva shirasA sakalairjanaiste || 22||
rAjajjapAkusumarAganibhaprabhANi
sarvANi devi tava pANipadodbhavAni |
sharvANi tAvakanakhAni tavochitAni
saundaryasAraghaTitAni suma~NgalAni || 23||
mAdhuryavaryamahimApahR^itA~Ngara~Nga\-
bhR^i~NgakramollasitasatkamalADhyahaste |
gAmbhIryagumphitalasad hR^idaye dayAsmin
daityaprahAraparashupravarapriya syAt || 24||
hAro vihAraviShayAbdhijamauktikaugha\-
shreNIsahasrapariniShThitasAratejAH |
tvatkaNThagashshivada eSha mamAstu mAtaH
shAntipradashcha shatakoTiyugeShu siddhaH || 25||
tvannAsikApuTaviDambitabhadrarUpA
bhadre vibhAti bhagavatyadhunendirAho |
sA shrIrjuhoti vadane madanAgnihotre
lAvaNyakalpitamahollasadAjyadhArAm || 26||
shrR^i~NgArashAntinilaye shivadevakAnte
rAgAnura~njitarade varachAruvINe |
pakShe sitaprathamato bhuvi dR^iShTabAla\-
chandropamaM bhuvi patettvayi me.amba chetaH || 27||
sa~NgItashAstrarasike vasa puShparAga\-
vyaktAnuvAdaparamA~Ngulipa~nchakADhye |
bimbAdhare balasamAhR^itaratnasAra\-
nAsAmaNibhramaNasambhramasambhR^itAsye || 28||
sauvarNagopurapurogatapaurarAja\-
chchakShushchakoraparitoShaNachandrarUpe |
chA~nchalyarUpaguNasambhR^itachandrasUrya\-
netrobhayodayavibhAsitasarvaloke || 29||
shrR^i~NgArachAruvachane rachanApravINe
shrIvatsalA~nChanamahodayahetubhUte |
shrIsundareshadayite praNatosmi cha tvAM
shrIprAptaye shritajanAvanalAlaso.aham || 30||
tejastara~Ngitasuma~NgalatArakastha\-
lAvaNyajAlajalapUritasAgarAntaH |
shIghraprachAraNapaTU iva devi matsyau
netre ubhe cha tava pANDyasute vibhAtaH || 31||
satku~NkumA~NkitalalATamahAprabhAvaH
kairvarNyate jagati sarvamanoharAsye |
chandraprakAshaghaTitasphaTikopamAna\-
kAmAtigaprabhumanaH kaluShIkaroti || 32||
tvatkleshapAshaparisR^iShTajapAvisheSha\-
spaShTasphuratkaThinapInanitambadeshe |
tAdR^igjapAkalitashobhanagandhayukta\-
shrImallikAkusumakalpitamAlikaughe || 33||
mAnonnate madanachAraNachakrabhUte
mArtANDamaNDalamahAsanapadmasaMsthe |
mAheshvari prashamayAshu mamAntahInAM
tR^iShNAM triNetradayite dayayArdrabhAve || 34||
mA~NgalyamandiramidaM madanodayADhyaM
sA~NgaM sulakShaNamarakShaNajAtakArshyam |
avyaktavAdaparakokilavANi vANI\-
mulla~Nghya tiShThati sharIramala~NkR^itaM te || 35||
mandAkinIvarasaritsalilAbhiSheke
mandasmite malayachandanacharchitA~Ngi |
mandAranAmakamahIruhapuShpapUjye
mandaprasiddhagamane mahasA vibhAsi || 36||
vaiDUryavajraghaTitAtmamahAkirITe
ghaNTAravairatha vidheyasudhUpadIpe |
nAnAvidhArchakasamarpitabhakShyabhojye
pUrNe vasAntariha me chiramannapUrNe || 37||
divyAmbare kanakaratnavibhUShitA~Nge
dikpAlavanditapade paramArtharUpe |
nIrAjanojjvalamahollasadAtmarUpe
nitye jaye vijayade jaya vishvarUpe || 38||
karpUradIpavihitAtmashubhe shubhAnA\-
mAdhArabhUtacharaNe karuNArasADhye |
gAnairanekavidharAgavisheShayuktai\-
rgIte suma~Ngalapade tvayi dehi dAsyam || 39||
pratyakShalakShaNapade paramapramANe
prAmANyavAdavidite paramArthaniShThe |
nityAnumeyanijarUpadhare dharaNyAM
naivopamAnamiha te kR^itashabdashAstre || 40||
vedatrayo viditakarmakR^itakramashrI\-
prAdhAnyavAkyanichayapratipAdyarUpe |
kalyANi kAraNavisheShavishiShTakArya\-
nyAyAbhidhAnasunaye jaya devi nityam || 41||
shrR^i~NgArama~NgalamahojjvaladivyabhAShe
bhAShAvisheShaviShayIkR^itabhAvarUpe |
sheShAdividvadanubhAvitashabdarUpe
sA~Ngaissamastanigamairapi vedyarUpA || 42||
sauvarNapAtraghaTitaM paramAmR^itAnnaM
sAjyaM sasharkaramidaM rasanApramodam |
tvadbhuktashiShTamiha bhUmitale bhajema
bhrAjatsudhArasamanekabudhairupAsyam || 43||
sandhyAsu sadvijavarairanugIyamAne
gAyatri gAnaparame supavitragAtri |
sAvitri sarvavarade savitR^isvarUpe
tArtIyarUpasavane.asi sarasvatI tvam || 44||
rAjatsuratnashubhamaNTapakAntarasthai\-
rdIpairanekashatakoTisahasrasa~NkhyaiH |
tvanmandiraM janani bhAti mahAprakAshaM
kailAsashrR^i~Ngamiva bhUmitale.api sAkShAt || 45||
amba tvadIyashubhamandirapaTTashAlAH
shailonnatA varashilArachitA vishAlAH |
bahvantarAntaravibhAgavishobhamAnAH
na kvApi bhAgyabharite bhuvi dR^iShTapUrvAH || 46||
nandIshachaNDagajavaktrakumAramukhyAH
shrIvIrabhUpavibhavArchitavIrabhadraH |
sarve.api daivatagaNAssamupAsate tvA\-
mIshAnadevadayite sashivAM shivArtham || 47||
sopAnapa~NktisahitaM tava sArasAkhyaM
tIrthaM mahojjvalajalaM munimukhyasevyam |
puNyaM purANamaravindasamaM samantA\-
ttvajjanmakAraNamiti prathitaM pR^ithivyAm || 48||
kiM tIrthamatra bhuvi vA tava puShkariNyA
sAmyaM prayAtu bahupuNyajalaughayAmba |
yatrApluto.atra manujo.apyajaDo bhuvi syA\-
nnAnAjalagrahasamAkulatoyajAle || 49||
kvairAvatastava gajeShu guNottareShu
nochchaishravAstava hayAdhikatAM prayAti |
tAvatkavAdyaninadaughadhutAtmadarpAH
svarge.api devavaradundubhayaH kilAsan || 50||
tvadgopurANi surashailamahonnatAni
nAnAvidhAni madhurApurabhUShaNAni |
AdyantamadhyavicharadvaravAnarANi
mInAkShi tAvakayasho vikiranti dikShu || 51||
shrR^i~NgonnatA bahudughAstava dhenavo.amU\-
stuShTAstuShArakiraNodbhavachandrikAbhAH |
puShTAH purANapuruShaM bhavamAshrayantyaH
spR^iShTAH punanti puruShaiH puruShAnasheShAn || 52||
tvatpAdapadmayugalasmaraNena mAtaH
nityaM prabodhasamaye vibudhaprabodhye |
iShTaM cha mR^iShTamashanaM bhuvi dharmaniShThA
buddhissamR^iddhiratha gehagatA bhavennaH || 53||
shrIchakrataH kR^itamahojjavalamandirA tvaM
bhakteShu yAsi cha bhajatsu tathendirAtvam |
indUpamAnavadane sadane madIya\-
hR^itpadmarUpiNi sadA bhava susthirA tvam || 54||
yAM devatAssvariti bhUtalameva matvA
nityaM prabhAtasamaye saha sha~NkareNa |
tAmbUlacharvaNaparAnnavaratnapIThe
bhejurbhajanti bhavatImapi tAM bhaje.aham || 55||
vairAgyashAntinilayaM puruShaM purANaM
nityakriyAdibhirupAsitamantashUnyam |
mUrdhasthagA~NgasalilaM jaTilaM trinetraM
bhasmapriyaM bhajasi bhUtasahAyamIsham || 56||
phAlAnalaM bhavamajaM bhavanAshahetuM
kAlaM kalAnidhimanantadR^ishaM vishuddham |
vaiyyAghracharmavasanaM jitakAmamIshaM
AkAshakeshamanishaM bhajase bhavAni || 57||
nirdhUtamAnamanaghaM vijitendriya~ncha
vedAntavedyamanaha~NkR^itimaprameyam |
lokottarorjitaguNe guNahInameva
rAjanyadevatanaye vR^iNuShe kimetat || 58||
tvadrUpavitsa cha haro.atha harasya rUpaM
tvaM vetsi matsyanayane vinayAnatAsye |
itthaM parasparagataM khalu sakhyamamba
koveha veda yuvayoshshivayormahatvam || 59||
tvAmadrirAjatanayAmatha bhUtalasya
bhadrArthamAgatavatIM vidurAtmavantaH |
tvaM padmamAlini cha mAnini mAnayuktaM
mAM mInalochanadhare kuru gauravarNe || 60||
devi svayaMvarapadaM pratipadya devaH
pratyakShatastava kuchadvayamaikShateti |
Ashcharyamatra vibudhairapi naiva kAryaM
lokeShvamIShu sakaleShu sa hi trinetraH || 61||
shambhorvivAhasamaye shivapArshvagAM tvAM
Alokya nAkasadanAssakalAssayoShAH |
bhrAntA babhUvuratha te.amba kaTAkShamUDhA
te.api sma te vilikhiteravidhirvidhishcha || 62||
shrIkaNThachArukaraka~njayugaprabaddha\-
mA~NgalyasUtraparishobhitakambukaNThi |
brahmeha shAshvatamanAkR^iti yAvadeva
tAvachChivAni shivatastava santi devi || 63||
bhikShAshanaM khalu tadApi na bhagnamasmin
shambhau bhavatkaragR^ihItavarAnnadAnaiH |
itthaM priya~NkaratayA saha bhojane.amba
shambhupriyeti kathitAsi jagattraye.api || 64||
tvatka~njavaktraparishobhitamandahAsa\-
bhrUllAsadarshanaparaH parameshvaro.api |
sAnandamandahasanAnuvidheyasAra\-
sambhAvanassa cha babhUva purA trayIshaH || 65||
pANigraheNa parituShTamanAstavAbhUt
shambhuH prabhurvibhurabhUtavibhAvitA~Ngi |
saMsAragahvaramahAgahanaM praviShTaH
saMsAriNAM gatirayaM guNasAkShibhUtaH || 66||
shambhuprabhAvashubhavarNanayAbhiyukta\-
jihvA jayatyatha vibhAvitashuddhavarNA |
itthaM patiM khalu niShevya paraM pumAMsaM
saMsAdhitAkhilasukhAni vishAlanetre || 67||
hrI~NkAravAdasulabhe hitade samasta\-
lokasya lochanagatA~njanashobhanADhye |
shrIsundareshvarapade vihitAntara~Nge
shrImattara~NgitapadastutibhisstutA~Nge || 68||
santoShayuktahR^idaye sati sAravAkye
vAkye mahatyapi vibhAtavarAtmaniShThe |
mahyaM pradehi varade bhuvi cha pratiShThAM
kAShThAM kalAdirahitAmatha yogilabhyAm || 69||
ra~NgasthalIvihitanartanavArtayAho
sarve.api devi tava sannidhimetya devAH |
hR^iShyanti hanta manasA vachasA cha bhUyaH
puShNanti bhadravapuShA cha viShAdashUnyAH || 70||
tvatpAdasArasanibaddhasamR^iddhabAla\-
ghaNTAravairghalaghalIkR^itanATyara~Nge |
nATyAnura~njitanayojjvalachArulIlA\-
kolAhalAhR^itasamastasurAntara~Nge || 71||
tAlaprabhedagatinR^ityamahAvihAra\-
nityotsavena paritoShitanAgahAre |
tvatsAmyameti na ramA na sarasvatI cha
shakrapriyA na cha shachI na cha devavadhvaH || 72||
tvadvaktranissR^itamR^idUjjvalasAravalgu\-
vyaktasvarAmR^itarasAkSharavAkyaleshaiH |
kShoNIbhR^ito hariharau vidhimukhyadevAH
sarve.api vismitahR^idaH kila nR^ityakAle || 73||
naiva shramo na cha tavAmba varA~NgajAta\-
svedAmbu shUnyagatayo na cha tAlabhedAH |
naivAsi sha~NkitamanAH punareva dhIrAH
pashyatsu daivatajaneShvapi ra~Ngadeshe || 74||
chandrodaye sati sharadyatulashriyAho
vArAnnidhirdhvanijitetarashabdajAlaH |
vardheta harShavashago nishi vA yathaiva\-
mutsAha eSha tava vR^iddhimupaiti nitye || 75||
chakrAkR^itibhramaNadhUtapaTAntabhAta\-
kArtasvarAbhashubhajAnuvihAra eShaH |
lakShmIM tanotu nitarAmaravindapAda\-
sparshaprabhUtadharaNItalashabdaramyaH || 76||
nAsaktamatra cha mano bhuvi kasya vA.abhUt
sAkShAdapi triNayanaH kR^itakAmamaitraH |
yatrAbhavanniyatachittatayA samAdhi\-
sthityeva yogaparamastava nR^ityasAre || 77||
AnandapUrNahR^idaye vishadAtmalIle
mA~NgalyasUchakamanoharachArushIle |
chA~nchalyagarbhitasharIravisheShaNA~Nge
ra~Ngasthale jaya jaye jitajAtarUpe || 78||
nR^ityena mInanayane na hi sA hi rambhA
naivorvashI navanavena tilottamA cha |
hA prItimattvajanane tava devi shaktA\-
stisrastisR^iShvapi lasajjagatIShu gItAH || 79||
tvAdR^igjaneShu tapasA prathiteShu loke
nAnAkalAnipuNateti na chitramatra |
nArAyaNo.api navanItaharo yato.abhUt
nR^ityena toShitasamastavadhUsamUhaH || 80||
kAruNyasha~Nkaramaje kamanIyarUpaM
kAntAsahasraparibhAvitapadmavaktram |
vibhrAjitAkhiladigantarachandramauliM
santoShayantamanishaM kurute vinodaiH || 81||
tATa~NkabAlanavibhAtavichitravarNa\-
vidyotamAnasakapolavimohito.ayam |
tAmeva nityamagajAmatisamprahR^iShTo
dhyAyatyananyaviShayo vR^iShavAhano.api || 82||
devi tvadAsyasarasIruhasaktabhR^i~Nga\-
jha~NkAralakShaNamahAmadanaprasa~NgaH |
sa~NgItashAstrarahasAkR^itanityasa~NgaH
shR^i~NgArashAstrashirasA shritadIrghashR^i~NgaH || 83||
tvadbhogalampaTamanA hi mahAnubhAvaH
sharvassa koTimadanopamaramyarUpaH |
nityaM tavaiva gR^ihavAsaparo babhUva
tvanmohito rativishAlasukhAnuraktaH || 84||
tvadvaktrachumbanasupItasudhAraso.ayaM
pa~nchAnanaH parigR^ihItasapa~nchabANaH |
nochetkuto dhavalimAtra maheshagAtre
syAchchandrachArukiraNodbhavachandrikeva || 85||
AghrAya tAvakamukhAmbujagandhamIsho
mene tapaH phalamahassa taponidhAnaH |
Ali~Ngya gADhamanagho bhavatIM kR^ishA~NgIM
kAmodadhau saha mamajja vidhUtalajjaH || 86||
hAsairvihAraparamaiH kR^itakautukAbhyAM
pUrvottarakramavisheShavishobhitAbhyAm |
saMvardhito.anala ivAjyahuto yuvAbhyAM
kAmAnalaH kila raho gR^ihamadhyamAnaH || 87||
mene kR^itArthamagarAjamajo gR^ihesho
yasyAsi mInanayane duhitA sabhadrA |
tvatkAmakautukamanaH parituShTabhAvaH
pUrNo.api pUrNaratimetya vidhUtashokaH || 88||
bhogIndrakalpitakarasthitaka~NkaNashrIH
bhogashrameNa sahitashshayanaM chikIrShuH |
nAnyaM giriM vrajati hanta girIshvaro.ayaM
matvA giriM gurutaraM jaghanaM ghanaM te || 89||
kastUrikaiva tava kaNThagatA samR^iddhA
bhasmapriyasya cha gale pratibimbatA.abhUt |
tenAtishubhrashubhagAtradharo.api shambhuH
tvatsa~Ngatassati babhUva sa nIlakaNThaH || 90||
kAmA~NkitAkR^itivisheShavirAjamAnau
tAmbUlaraktavadanau shramatoyasiktau |
kShema~Nkarau cha jagataH pitarau yuvA~NkaiH
sevyau samastavaradau bhuvi devi na staH || 91||
sUryodayAbharadane surapUjyapAde
sUtAdibhisstutaguNe sukhabodhasAre |
sUteShu sUktirachiteShu sukhena bodhye
sUchyagrabuddhivishade sutamamba pAhi || 92||
sa~NgItasArahR^idaye samadR^iShTiyukte
samyakshukendraparibhAShitanAmajAle |
sAyantanAgatasamAnasakhIsamete
saMsArasAgaragataM paripAhi mAM tvam || 93||
santAnakAmyaphalade savitR^iprasUte
sandehasAdhitarame samayapratiShThe |
sAdhyAmR^itAkhyavaratIrthavishodhitAnta\-
ssAdhAraNetaramanaH karaNairupAsye || 94||
mAtrAchatuShTayapade sukhabodhamAtre
yAtrAvichAraNapare paramAtmarUpe |
mAtrAsmi pAlitabhavo jagatAmamIShAM
netrA cha netraparidUShitapadmajAte || 95||
mInAkShi tAvakarathotsavasambhramArtha\-
mAheprayuktavachasaH pathi saMsaranti |
pashyema mInanayanAmatha sundareshaM
shIghraM sakhe sara sareti digantasaMsthAH || 96||
evaM janAstu shatasho.atha sahasrasho.ami
tvAmetya nityamavilambitadIkShayAmba |
yuktAM cha yuktahR^idayAshshuchayassamaunAH
netronnatAH pratidinaM bhavatIM bhajante || 97||
tvadvAhanAni vR^iShasiMhagajAshvahaMsa\-
mukhyAni mAnavakR^itAni mahonnatAni |
a~NgAni tAvakarathotsavakarmaNashcha
sA~NgAni sarvanayanotsavasAdhanAni || 98||
prAkArasAraparikalpitatatsarandhra\-
mUrdhAvalImuditamAnasarAjahaMse |
netrAvalIkalitahemarathoparistha\-
kAntAnudhAvitarathe rathaghoShapUrNe || 99||
sAkShAdivAmaranagashshatahemashrR^i~Ngo\-
ratnaugharAjitarathaH prachalatpatAkaH |
AbhAti bhAnukiraNapratibhAsamAna\-
stambhAyutojjvalasuvarNavadhUsamUhaH || 100||
tAvatkabhAvitasuvarNakalAvisR^iShTa\-
stambhasphuraddhaTitachakrarathopamAmba |
sA syAchChashA~NkashatakoTimahodaya shrI\-
rekatra chenmilati devi sharannishAyAm || 101||
vaikuNThagashriyamasAviha nIlakaNThaH
kaNThIraveNa sadR^ishasvakavikrameNa |
kiM vA.aharaddharatayA yadi vA na tatsyA\-
ddhaimassa te rathavaraH kathamIdR^ishassyAt || 102||
tadvegavegitarayo rathinAM variShThaH
paurapradakShiNaparaH parameshvaro.ayaM
bhUtAni bhAvitashivAni shivArjitAni
kurvankR^ipAlurabhitaH khalu yAti shIghram || 103||
tadghoShaghoShitadisho dasha kAshitAstat \-
tejobhirutthitarajaH kaNasambhR^itAstAH |
senA chaturvidhabalA cha sarAjavIrA
tvAmeva yAti paramotsavapAravashyAt || 104||
tvaddarshanena cha jagajjitasarvakAma\-
mAbAlavR^iddhapashupAlakavishvabhUtam |
rAmAssuma~NgalabhavAstava darshanena
rAmAbhirAmahR^idayAmbujasadmasaMsthe || 105||
shambhurhiraNyakavachAvR^itadivyamUrtiH
keyUrahAramakuTaishcha virAjamAnaH |
gachChanpurassa bhavatImanusamprayAntIM
pratya~NmukhaH kila punaH parivIkShate.amba || 106||
devi tvadIyaguNasR^iShTaguNo haro.ayaM
tvadvaktrasobhagarasaM paripIya dR^igbhiH |
ki~nchidgaladvasanabhAtaghanastanAgrAM
dR^iShTvA mR^iDassa bhavatIM punareti hR^iShTaH || 107||
taM tAdR^ishaM cha rathinaM rathamadhyasaMsthA
kAmena kAntaripuNA pratibodhiteva |
vidrAvayasyatulavegarathe rathA~Nga\-
sparshairdR^iDhaishchaTachaTIkR^itabhUtale tvam || 108||
evaMvidhAni charitAni bahUni dR^iShTvA
sarvekR^itArthamanaso bhuvi bhUtasa~NghAH |
kalyANadekamalalochanakAlakAla\-
kAnte kR^itotsavachaye jaya lokamAtaH || 109||
devi tvadIyashubhagAtravarAbhiShekaiH
hAridratIrthamabhavachChubhadaM vadhUnAm |
taddhAraNasmR^itinatIkShaNasaMstavaistu
syAdeva sarvaphalasiddhirihaiva nR^INAm || 110||
ka~njAtapuShpavadane kamanIyagAtre
kAruNyarUparasapUritachArunetre |
tasmai namo nama idaM tava saMvidhAtre
tubhyaM cha tasya cha vidhAturathaiva mAtre || 111||
saubhAgyade cha dhanade jagadAdhipatya\-
prAgalbhyade puruShade pramadAjaneShu |
yoShitprade.adya sutajanmamahotsavasya
dAtrI tvameva matidAnaratA namatsu || 112||
devi shrutishrutimatAM vachasAM vidUre
vidrAvitAkhilashubhetarakarmajAle |
o~NkAranAdaparibhAvitadivyarUpe
tva~NkArabhedarahitA vasa me.antara~Nge || 113||
tATa~NkayugmasahitA dhR^itakaNThabhUShA
lAvaNyajAlalasitA bahubhUShaNADhyA |
dR^iShTAsi cha stutapadAsi mayeha mAtaH
mAM maiva vismara maheshvari mInanetre || 114||
tvatkIrtito jagadidaM paripUrNamamba
mInAkShi hATakamayAmbujamadhyasaMsthe |
brAhmyAdishaktirachitAvaraNe shivAkhye
hAlAsyanAyaki sadA.api namo namaste || 115||
shrR^i~NgArapUrNashatakaM paripUrNametat
mInAkShikAshubhapavitracharitragarbham |
santAnarUpaphaladaM kR^itama~NgalaM tat
sampatpradaM bhuvi nR^iNAM paThatAM subhadram || 116||
sarveShu vaidikapadeShu yathAnupUrvI
nityA tathAstu mama vAgrachite prabandhe |
sA sarvavismayakarI kavitArasaj~na\-
santoShadA mama himAchalajA kR^ipAtaH || 117||
shrIpANaDyarAjatanayAnilayaM prapadya
prAtaH paThanti manujA bhuvi ye tu bhaktyA |
mAdhyandine cha savaneShu cha yo.atha sAyaM
te vedashAstradhanabhogasamR^iddhigAssyuH || 118||
AnandadAyakashukAkSharavanmadIya\-
mAnandadAyakamidaM bhavatAdbudhebhyaH |
AnandarUpaparameshiturapyapUrva\-
mAnandameva tanute bhuvi yA tadIyam || 119||
AchAryasha~NkaramahojjvalasampradAyaH
shrInArasiMhagurupuNyakaTAkShapUtaH |
lIlAbhirenamatanotsa mudaiva sachchi\-
dAnandasaMyamivarastavamambikAyAH || 120||
puNyashlokaH paramapuruShassundaresho mahAtmA
puNyashlokA jhaShakanayanA pArvatI pANDyajA sA |
puNyashlokAH mama cha dashakadvyuttarA ye shatAntAH
puNyashlokAH paThananiratAH pANDyaputrIstavasya || 121||
iti shrIsachchidAnanda\-bhAratI svAmibhiH kR^itam |
mInAkShIstavarAjaM ye paThanti narasattamAH ||
tridivaM te tR^iNIkR^itya kailAse vAsamApnuyuH |
kurvanti ye.atra sandehaM narakArhA bhavanti te || 122||

|| iti shrIsachchidAnandabhAratImahAsvAmibhiH virachitaM
shrImInAkShIshatakaM athavA shrImInAkShIstavarAjaM sampUrNam ||
##

The referenced book in print had missing
syllables in verse lines 100.1 and 101.1.
The words ##nagaH## and ##kalA## are added for
their metrical suitability and meaning.

Encoded by Aaditya Kalyanaraman
Proofread by Aaditya Kalyanaraman, Rajani Arjun Shankar

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}