% Text title            : Shri Ganesha Dhyanadurvadipujavidhi
% File name             : gaNeshadhyAnadUrvAdipUjAvidhi.itx
% Category              : ganesha, mudgalapurANa, dhyAnam, pUjA
% Location              : doc\_ganesha
% Proofread by          : Yash Khasbage, Preeti Bhandare
% Description/comments  : mudgalapurANaM panchamaH khaNDaH | adhyAyaH 44 | 5.44. 6-52||
% Latest update         : June 4, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Ganesha Dhyanadurvadipujavidhi ..}##
\itxtitle{.. shrIgaNeshadhyAnadUrvAdipUjAvidhi ..}##\endtitles ##
|| shrIgaNeshAya namaH ||
aila uvAcha |
namAmi vighneshvarapAdapa~NkajaM suchihnitaM chAkhiladaM nijAtmanAm |
dhvajAsipadmAbhayavajralA~nChanaiH parashvadhenaiva sukomalaM param || 6||
suraktapAdA~NgulakaiH sukomalairnakhaprabhAtAmratayA surAjitam |
sugulphayuktaM mR^idumAMsalaM mahan mohaM haret tattimiraM hR^idi sthitam || 7||
ja~Nghe pare raktasubhAmaye tato dhyAyAmi mAMsena yute sukomale |
tajjAnunI mAMsalake suromabhirAkomalairvakrashikhaiH susaMvR^ite || 8||
UrU sumAMsena samAvR^itau parau rambhAsamAnau suvirAjitau tathA |
raktau hR^idA chintanamAtrabhAvato bhaktipradau vighnaharasya chintaye || 9||
kaTiM sadA mAMsalaraktara~njitAM suvartulAM madhyamabhAgasaMshritAm |
gaNeshvarasyaiva tu chintayAmyahaM sadA sukhAnandakarasya nityadA || 10||
vastraM suraktaM hR^idi chintayAmyahamanantamaulyaM kaTibhAgasaMsthitam |
nAbhiM suvR^ittAM paramashriyA yutAM sheShasya saMvAsakarIM tu chintaye || 11||
mahodaraM mAMsalabhAvasaMyutaM suromayuktaM prabhayA virAjitam |
vichintaye.ahaM sakalaprakAshakaM trayIpramUlaM paramavyayaM param || 12||
shrIvakratuNDasya vishAlarUpakaM vakShastathA raktamayaM sumAMsalam |
raktaM stanAbhyAM hR^idayaM tu chintaye chintAmaNiM tatra sukhapradaM param || 13||
kaNThaM trirekhAyutameva mAMsalaM raktaM gaNeshasya cha tejasA yutam |
skandhau vR^iShaskandhasamau sukomalau dhyAyAmi chitte satataM suraktakau || 14||
bAhU sadA mAMsalakau prabhAsitau svAnandanAthasya mano.atisaukhyadau |
hastau tathA raktasutejasA yutau vAmau hR^idA dakShiNakau tu chintaye || 15||
karA~NgulIrviMshatikAH suvartulA nakhaiH suraktaishcha sutejasA yutAH |
gaNeshvarasyaiva hR^idi prachintaye svabhaktarakShAkarikAH subhUShitAH || 16||
mukhaM tu shuNDAyutameva chintaye trinetrayuktaM paramaprakAshakam |
sadaikadantasya cha tIkShNadantakaM svabhaktakAn premarasena saukhyadam || 17||
karNau vishAlau hR^idi chintaye parau bhaktAya niShkAmasukAmadau tathA |
shUrpAkR^itI cha~nchalabhAvadhAriNau vighneshvarasyaiva cha vedarUpiNau || 18||
kapolakau ShaTpadarUpadhAribhirmunIshvarairbrahmamadadravArthibhiH |
susaMvR^itau nAdayutairnirantaraM gaNeshvarasyaiva hR^idA vichintaye || 19||
bhAlaM sutejoyutameva chintaye shrIDhuNDhirAjasya nishAkarasthalam |
raktAShTagandhaishcha suchitritaM prabhorbinduprayuktaM tvatha taNDulairyutam || 20||
keshaiH samAchChAditamastakaM tathA sa~nchintaye vighnavinAshakAriNaH |
brahmANDamUle prabhumastakAshrite kumbhasthale brahmavarasya saukhyade || 21||
gaNeshadehaM parichintayAmyahaM subhUShaNairbhUShitakaM vichitrakaiH |
anarghamUlyaishcha suvastrakaistathA sushobhitaM brahmavarasya sarvadA || 22||
vichitragandhaiH parilepitaM tathA suchitritaM bhaktavaraiH suyogibhiH |
gaNAdhipaM sAdhu hR^idi sthitaM sadA vichintaye.ahaM nijabhaktilAlasam || 23||
pAshA~NkushAdyaishcha susaMstutaM paraM DhuNDhiM pramodAdibhireva nityadA |
gaNeshvaraM davevaraistathondururAjena pUjyaM cha suchintaye hR^idi || 24||
vedaiH purANaiH smR^itibhishcha shAstrakaiH stotraiH stutaM dehadharairvichintaye |
brahmapriyAdyaishcha gaNairasa~NkhyakairbhaktyA tathA mudgalamukhyakaiH param || 25||
sarvA~NgasaMshobhanarUpayuktayA sid.hdhyA gaNeshaM parichintaye hR^idi |
saMsevitaM vAmagayA sushaktibhiH sid.hdhyAdibhiH saMvR^itayA svamAyayA || 26||
bud.hdhyA kalAbhishcha susevitaM tathA vidyAbhirArAdgaNanAyakaM hR^idi |
sarvA~NgasaMshobhanayA svamAyayA sa~nchintaye dakShiNabhAgabhUShayA || 27||
lakSheNa lAbhena cha vighnanAyakaM saMsevitaM shobhanashobhanena tu |
sa~nchintaye putravareNa sarvadA brahmeshvaraM bhaktajanaiH svadhAmagaiH || 28||
anantamantraiH kathitaM svarUpakaM vichintaye vaktumashakyabhAvataH |
hR^idi sthitaM dhyAnasulolupaM paraM gaNeshvaraM brahmamayAgadhAriNam || 29||
mudgala uvAcha |
evamailaH sa rAjarShirgaNeshabhajane rataH |
dhyAnaM kR^itvA sadA.atiShThadgaNeshasya nivR^ittitaH || 30||
prAtaH kAle samutthAya sastrIkaH sa mahIpatiH |
dharmayuktaM chakArA.api nityaM karma nirantaram || 31||
tato gaNeshvaraM bhaktyA.apUjayadbhaktisaMyutaH |
yathA gArgyeNa bho dakSha shikShitaH sa tathA.akarot || 32||
shamImandAradUrvAshchApUjayadbhaktisaMyutaH |
prArthya patrA~NkurAdyaM sa puShpaM chaivA.a.achinonnR^ipaH || 33||
dakSha uvAcha |
shamImandAradUrvANAM pUjanaM vada mudgala |
siddherbuddheshcha vipendra sutayorlakShalAbhayoH || 34||
shamImandAradUrvANAM prArthanA kIdR^ishI bhavet |
tAM kR^itvA puShpapatrAdIMshchinomyahaM tvadAj~nayA || 35||
kena mantreNa yogIndra shamImandArakAMstadA |
narottamo gaNeshAya pareshAya samarpayet || 36||
mudgala uvAcha |
shR^iNu dakSha mahAprAj~na gANapatyaparAyaNa |
santuShTo.ahaM visheSheNa prashnena cha vadAmi te || 37||
gaNeshasyaiva mantreNa pUjanIyA ime matAH |
vastubhirgANapatyaishcha abhavaMstoShasaMyutAH || 38||
strIpumbhAvAtmakaM dakSha nAsti tatra vichArataH |
gakAraH siddhirUpashcha NakAro buddhiruchyate || 39||
tayoH svAmI gaNeshaH sa tredhArUpadharo babhau |
gaNAstasya tathA pUjyA gANapatyaishcha mantrakaiH || 40||
gakArAdbimbabhAvAkhyo lakShaH putraH prakathyate |
tathA gakArarUpAdvai lAbhastau tanmayau matau || 41||
shamImandArakau dakSha varadAnAdvisheShataH |
gaNeshAkArarUpau tau bhAvayennAtra saMshayaH || 42||
dUrvAM devIM gaNeshasya mantreNApUjayennaraH |
athavA vaidikairmantraiH kANDAdibhiH prapUjayet || 43||
nAmamantreNa shUdrastAn pUjayet sarvabhAvataH |
etadeva rahasyaM te kathitaM sarvama~njasA || 44||
prArthanAM te pravakShyAmi shR^iNu dakSha mahAmate |
snAnayukto vanaM gatvA.athavA pure svamandire || 45||
yatra dUrvA cha mandAraH shamI tiShThati tatra saH |
gatvA praNamya tAnAdau prArthayedbhaktisaMyutaH || 46||
dUrve.annabrahmarUpe chAmR^itarUpe shatA~Nkure |
gaNeshaprINanArthAya chinomi tvAM kShamasva bhoH || 47||
shamI sarvaprade devi gaNesharUpadhAriNi |
chinomi tvAM gaNeshasya prINanAya namAmyaham || 48||
mandAravA~nChitArthasya dAtarvighnesharUpaka |
kShamasva prINanArthAya gaNeshasya chinomya.aham || 49||
evaM prArthya prajAnAtha shamImandArakau purA |
dUrvApatrANi puShpANi vibhuM hyAnAyya pUjayet || 50||
sahasranAmamantraishcha aShTottarashatairnaraH |
ekaviMshatikaishchaiva nAmabhistAH samarpayet || 51||
athavA mUlamantreNa nAmamantreNa vA tathA |
gANeshairvividhairmantrairdUrvAdIni samarpayet || 52||

iti shrIgaNeshadhyAnadUrvAdipUjAvidhi sampUrNam ||

\- || mudgalapurANaM pa~nchamaH khaNDaH | adhyAyaH 44 | 5\.44. 6\-52|| 
##
- .. mudgalapurANaM pa~nchamaH khaNDaH . adhyAyaH 44 . 5.44. 6-52.. 

Proofread by Yash Khasbage, Preeti Bhandare 

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}