% Text title : agastyagItA varAhapurANe % File name : agastyagItA.itx % Category : gItA, giitaa % Location : doc\_giitaa % Proofread by : PSA Easwaran % Description-comments : Varahapurana adhyAya 51-67. There are quite a few variations in printed books. % Latest update : June 26, 2022 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Agastya Gita ..}## \itxtitle{.. agastyagItA ..}##\endtitles ## \section{ekapa~nchAsho.adhyAyaH} shrIvarAha uvAcha | shrutvA durvAsaso vAkyaM dharaNIvratamuttamam | yayau satyatapAH sadyo himavatpArshvamuttamam || 51\.1|| puShpabhadrA nadI yatra shilA chitrashilA tathA | vaTo bhadravaTo yatra tatra tasyAshramo babhau | tatropari mahat tasya charitaM sambhaviShyati || 51\.2|| dharaNyuvAcha | bahukalpasahasrANi vratasyAsya sanAtana | mayA kR^itasya tapasastanmayA vismR^itaM prabho || 51\.3|| idAnIM tvatprasAdena smaraNaM prAktanaM mama | jAtaM jAtismarA chAsmi vishokA parameshvara || 51\.4|| yadi nAma paraM deva kautukaM hR^idi vartate | agastyaH punarAgatya bhadrAshvasya niveshanam | yachchakAra sa rAjA cha tanmamAchakShva bhUdhara || 51\.5|| shrIvarAha uvAcha | pratyAgatamR^iShiM dR^iShTvA bhadrAshvaH shvetavAhanaH | varAsanagataM dR^iShTvA kR^itvA pUjAM visheShataH | apR^ichChanmokShadharmAkhyaM prashnaM sakaladhAriNi || 51\.6|| bhadrAshva uvAcha | bhagavan karmaNA kena Chidyate bhavasaMsR^itiH | kiM vA kR^itvA na shochanti mUrttAmUrttopapattiShu || 51\.7|| agastya uvAcha | shR^iNu rAjan kathAM divyAM dUrAsannavyavasthitAm | dR^ishyAdR^ishyavibhAgotthAM samAhitamanA nR^ipa || 51\.8|| nAho na rAtrirna disho.adishashcha na dyaurna devA na dinaM na sUryaH | tasmin kAle pashupAleti rAjA sa pAlayAmAsa pashUnanekAn || 51\.9|| tAn pAlayan sa kadAchiddidR^ikShuH pUrvaM samudraM cha jagAma tUrNam | anantapArasya mahodadhestu tIre vanaM tatra vasanti sarpAH || 51\.10|| aShTau drumAH kAmavahA nadI cha tiryak chordhvaM babhramustatra chAnye | pa~ncha pradhAnAH puruShAstathaikAM striyaM bibhrate tejasA dIpyamAnAm || 51\.11|| sA.api strI sve vakShasi dhArayantI sahasrasUryapratimaM vishAlam | tasyAdharastrirvikArastrivarNa\- staM rAjAnaM pashya paribhramantam || 51\.12|| tUShNImbhUtA mR^itakalpA ivAsan nR^ipo.apyasau tadvanaM saMvivesha | tasmin praviShTe sarva ete vivishu\- rbhayAdaikyaM gatavantaH kShaNena || 51\.13|| taiH sarpaiH sa nR^ipo durvinItaiH saMveShTito dasyubhishchintayAnaH | kathaM chaitena bhaviShyanti yena kathaM chaite saMsR^itAH sambhaveyuH || 51\.14|| evaM rAj~nashchintayatastrivarNaH puruShaH paraH | shvetaM raktaM tathA kR^iShNaM trivarNaM dhArayannaraH || 51\.15|| sa sa.nj~nAM kR^itavAn mahyamaparo.atha kva yAsyasi | evaM tasya bruvANasya mahannAma vyajAyata || 51\.16|| tenApi rAjA saMvItaH sa budhyasveti chAbravIt | evamukte tataH strI tu taM rAjAnaM rurodha ha || 51\.17|| mAyAtataM taM mA bhaiShTa tato.anyaH puruSho nR^ipam | saMveShTya sthitavAn vIrastataH sarveshvareshvaraH || 51\.18|| tato.anye pa~ncha puruShA Agatya nR^ipasattamam | saMviShTya saMsthitAH sarve tato rAjA virodhitaH || 51\.19|| ruddhe rAjani te sarve ekIbhUtAstu dasyavaH | mathituM shastramAdAya lInA.anyo.anyaM tato bhayAt || 51\.20|| tairlInairnR^iparterveshma babhau paramashobhanam | anyeShAmapi pApAnAM koTiH sAgrAbhavannR^ipa || 51\.21|| gR^ihe bhUsalilaM vahniH sukhashItashcha mArutaH | sAvakAshAni shubhrANi pa~nchaikonaguNAni cha || 51\.22|| ekaiva teShAM suchiraM saMveShTyAsajyasaMsthitA | evaM sa pashupAlo.asau kR^itavAna~njasA nR^ipa || 51\.23|| tasya tallAghavaM dR^iShTvA rUpaM cha nR^ipatermR^idhe | trivarNaH puruSho rAjannabravIdrAjasattamam || 51\.24|| tvatputro.asmi mahArAja brUhi kiM karavANi te | asmAbhirbandhumichChadbhirbhavantaM nishchayaH kR^itaH || 51\.25|| yadi nAma kR^itAH sarve vayaM deva parAjitAH | evameva sharIreShu lInAstiShThAma pArthiva || 51\.26|| mayyeke tava putratvaM gate sarveShu sambhavaH | evamuktastato rAjA taM naraM punarabravIt || 51\.27|| putro bhavati me karttA anyeShAmapi sattama | yuShmatsukhairnarairbhAvairnAhaM lipye kadAchana || 51\.28|| evamuktvA sa nR^ipatistamAtmajamathAkarot | tairvimuktaH svayaM teShAM madhye sa virarAma ha || 51\.29|| || iti shrIvarAhapurANe bhagavachChAstre ekapa~nchAsho.adhyAyaH || 51|| \secttion{dvipa~nchAshattamo.adhyAyaH} agastya uvAcha | sa trivarNo nR^ipotsR^iShTaH svatantratvAchcha pArthiva | ahaM nAmAnamasR^ijat putraM putrastrivarNakam || 52\.1|| tasyApi chAbhavat kanyA avabodhasvarUpiNI | sA tu vij~nAnadaM putraM manoj~naM visasarja ha || 52\.2|| tasyApi sarvarUpAH syustanayAH pa~nchabhoginaH | yathAsa~Nkhyena putrAstu teShAmakShAbhidhAnakAH || 52\.3|| ete pUrvaM dasyavaH syustato rAj~nA vashIkR^itAH | amUrttA iva te sarve chakrurAyatanaM shubham || 52\.4|| navadbAraM puraM tasya tvekastambhaM chatuShpatham | nadIsahasrasa~NkIrNaM jalakR^ityasamAsthitam || 52\.5|| tatpuraM te pravivishurekIbhUtAstato nava | puruSho mUrttimAn rAjA pashupAlo.abhavat kShaNAt || 52\.6|| tatastatpurasaMsthastu pashupAlo mahAnR^ipaH | saMsUchya vAchakA~nChabdAn vedAn sasmAra tatpure || 52\.7|| AtmasvarUpiNo nityAstaduktAni vratAni cha | niyamAn kratavashchaiva sarvAn rAjA chakAra ha || 52\.8|| sa kadAchinnR^ipaH khinnaH karmakANDamarochayat | sarvaj~no yoganidrAyAM sthitvA putraM sasarja ha || 52\.9|| chaturvaktraM chaturbAhuM chaturvedaM chatuShpatham | tasmAdArabhya nR^ipatervashe pashvAdayaH sthitAH || 52\.10|| tasmin samudre sa nR^ipo vane tasmiMstathaiva cha | tR^iNAdiShu nR^ipassaiva hastyAdiShu tathaiva cha | samo.abhavat karmakANDAdanuj~nAya mahAmate || 52\.11|| || iti shrIvarAhapurANe bhagavachChAstre dvipa~nchAshattamo.adhyAyaH || 52|| \section{tripa~nchAshattamo.adhyAyaH} bhadrAshva uvAcha | matprashnaviShaye brahman katheyaM kathitA tvayA | tasyA vibhUtirabhavat kasya kena kR^itena ha || 53\.1|| agastya uvAcha | AgateyaM kathA chitrA sarvasya viShaye sthitA | tvaddehe mama dehe cha sarvajantuShu sA samA || 53\.2|| tasyAM sambhUtimichChan yastasyopAyaM svayaM param | pashupAlAt samutpanno yashchatuShpAchchaturmukhaH || 53\.3|| sa guruH sa kathAyAstu tasyAshchaiva pravarttakaH | tasya putraH svaro nAma saptamUrtirasau smR^itaH || 53\.4|| tena proktaM tu yatki~nchit chaturNAM sAdhanaM nR^ipa | R^igarthAnAM chaturbhiste tadbhaktyArAdhyatAM yayuH || 53\.5|| chaturNAM prathamo yastu chatuHshR^i~NgasamAsthitaH | vR^iShadvitIyastatproktamArgeNaiva tR^itIyakaH | chaturthastatpraNItastAM pUjya bhaktyA.a.ashu taM vrajet || 53\.6|| saptamUrttestu charitaM shushruvuH prathamaM nR^ipa | brahmacharyeNa vartteta dvitIyo.asya sanAtanaH || 53\.7|| tato bhR^ityAdibharaNaM vR^iShabhArohaNaM triShu | vanavAsashcha nirddiShTa Atmasthe vR^iShabhe sati || 53\.8|| ahamasmi vadatyanyashchaturddhA ekadhA dvidhA | bhedabhinnasahotpannAstasyApatyAni jaj~nire || 53\.9|| nityAnityasvarUpANi dR^iShTvA pUrvaM chaturmukhaH | chintayAmAsa janakaM kathaM pashyAmyahaM nR^ipa || 53\.10|| madIyasya piturye hi guNA Asan mahAtmanaH | na te samprati dR^ishyante svarApatyeShu keShuchit || 53\.11|| pituH putrasya yaH putraH sa pitAmahanAmavAn | evaM shrutiH sthitA cheyaM svarApatyeShu nAnyathA || 53\.12|| kvApi sampatsyate bhAvo draShTavyashchApi te pitA | evaM nIte.api kiM kAryamiti chintAparo.abhavat || 53\.13|| tasya chintayataH shastraM pitR^ikaM purato babhau | tena shastreNa taM roShAnmamantha svaramantike || 53\.14|| tasmin mathitamAtre tu shirastasyApi durgraham | nAlikeraphalAkAraM chaturvaktro.anvapashyata || 53\.15|| tachchAvR^itaM pradhAnena dashadhA saMvR^ito babhau | chatuShpAdena shastreNa chichCheda tilakANDavat || 53\.16|| prakAmaM tilasa~nchChinne tadamUlo na me babhau | ahaM tvahaM vadan bhUtaM tamapyevamathAchChinat || 53\.17|| tasmin bhAge dR^ishaM kR^itvA hrasvamanyamavekShata | ahaM bhUtAdi vaH pa~ncha vadantaM bhUtimantikAt || 53\.18|| tamapyevamatho ChittvA pa~nchAshUnyamamIkShata | kR^itvAvakAshaM te sarve jalpanta idamantikAt || 53\.19|| tamapyasa~NgashastreNa chichCheda tilakANDavat | tasmi~nchChinne dashAMshena hrasvamanyamapashyata || 53\.20|| puruShaM rUpashastreNa taM ChittvA.anyamapashyata | tadvaddhrasvaM sitaM saumyaM tamapyevaM tadA.akarot || 53\.21|| evaM kR^ite sharIraM tu dadarsha sa punaH prabhuH | svakIyameva tasyAntaH pitaraM nR^ipasattama || 53\.22|| trasareNusamaM mUrtyA avyaktaM sarvajantuShu | sa me dR^iShTvA paraM harShamubhau hi sa svaro.abhavat || 53\.23|| evaMvidho.asau puruShaH svaranAmA mahAtapAH | mUrttistasya pravR^ittAkhyaM nivR^ittAkhyaM shiro mahat || 53\.24|| etasmAdeva tasyAshu kathayA rAjasattama | sambhUtirabhavadrAjan vivR^ittestveSha eva tu || 53\.25|| eShetihAsaH prathamaH sarvasya jagato bhR^isham | ya imaM vetti tattvena sAkShAt karmaparo bhavet || 53\.26|| || iti shrIvarAhapurANe bhagavachChAstre tripa~nchAshattamo.adhyAyaH || 53|| \section{chatuHpa~nchAshattamo.adhyAyaH} bhadrAshva uvAcha | vij~nAnotpattikAmasya ka ArAdhyo bhaveddvija | kathaM chArAdhyate.asau hi etadAkhyAhi me dvija || 54\.1|| agastya uvAcha | viShNureva sadA.a.arAdhyaH sarvadevairapi prabhuH | tasyopAyaM pravakShyAmi yenAsau varado bhavet || 54\.2|| rahasyaM sarvadevAnAM munInAM manujAMstathA | nArAyaNaH paro devastaM praNamya na sIdati || 54\.3|| shrUyate cha purA rAjan nAradena mahAtmanA | kathitaM tuShTidaM viShNorvratamapsarasAM tathA || 54\.4|| nAradastu purA kalpe gatavAn mAnasaM saraH | snAnArthaM tatra chApashyat sarvamapsarasAM gaNam || 54\.5|| tAstaM dR^iShTvA vilAsinyo jaTAmukuTadhAriNam | asthicharmAvasheShaM tu ChatradaNDakapAlinam || 54\.6|| devAsuramanuShyANAM didR^ikShuM kalahapriyam | brahmaputraM tapoyuktaM paprachChustA varA~NganAH || 54\.7|| apsarasa UchuH | bhagavan brahmatanaya bhartR^ikAmA vayaM dvija | nArAyaNashcha bharttA no yathA syAt tat prachakShva naH || 54\.8|| nArada uvAcha | praNAmapUrvakaH prashnaH sarvatra vihitaH shubhaH | sa cha me na kR^ito garvAdyuShmAbhiryauvanasmayAt || 54\.9|| tathApi devadevasya viShNoryannAmakIrtitam | bhavatIbhistathA bharttA bhavatviti hariH kR^itaH | tannAmochchAraNAdeva kR^itaM sarvaM na saMshayaH || 54\.10|| idAnIM kathayAmyAshu vrataM yena hariH svayam | varadatvamavApnoti bhartR^itvaM cha niyachChati || 54\.11|| nArada uvAcha | vasante shuklapakShasya dvAdashI yA bhavechChubhA | tasyAmupoShya vidhivannishAyAM harimarchchayet || 54\.12|| parya~NkAstaraNaM kR^itvA nAnAchitrasamanvitam | tatra lakShmyA yutaM raupyaM hariM kR^itvA niveshayet || 54\.13|| tasyopari tataH puShpairmaNDapaM kArayedbudhaH | nR^ityavAditrageyaishcha jAgaraM tatra kArayet || 54\.14|| namo bhavAyeti shira ana~NgAyeti vai kaTim | kAmAya bAhumUle tu sushAstrAyeti chodaram || 54\.15|| manmathAyeti pAdau tu harayeti cha sarvataH | puShpaiH sampUjya deveshaM mallikAjAtibhistathA || 54\.16|| pashchAchchatura AdAya ikShudaNDAn sushobhanAn | chaturdikShu nyaset tasya devasya praNato nR^ipa || 54\.17|| evaM kR^itvA prabhAte tu pradadyAdbrAhmaNAya vai | vedavedA~NgayuktAya sampUrNA~NgAya dhImate || 54\.18|| brAhmaNAMshcha tathA pUjya vratametat samApayet | evaM kR^ite tathA viShNurbharttA vo bhavitA dhruvam || 54\.19|| akR^itvA matpraNAmaM tu pR^iShTo garveNa shobhanAH | avamAnasya tasyAyaM vipAko vo bhaviShyati || 54\.20|| etasminneva sarasi aShTAvakro mahAmuniH | tasyopahAsaM kR^itvA tu shApaM lapsyatha shobhanAH || 54\.21|| vratenAnena deveshaM patiM labdhvA.abhimAnataH | avamAnena haraNaM gopAlairvo bhaviShyati | purA harttA cha kanyAnAM devo bharttA bhaviShyati || 54\.22|| agastya uvAcha | evamuktvA sa devarShiH prayayau nAradaH kShaNAt | tA apyetadvrataM chakrustuShTashchAsAM svayaM hariH || 54\.23|| || iti shrIvarAhapurANe bhagavachChAstre chatuHpa~nchAshattamo.adhyAyaH || 54|| \section{pa~nchapa~nchAshattamo.adhyAyaH} agastya uvAcha | shR^iNu rAjan mahAbhAga vratAnAmuttamaM vratam | yena samprApyate viShNuH shubhenaiva na saMshayaH || 55\.1|| mArgashIrShe.atha mAse tu prathamAhnAt samArabhet | ekabhaktaM site pakShe yAvat syAddashamI tithiH || 55\.2|| tato dashamyAM madhyAhne snAtvA viShNuM samarchya cha | bhaktyA sa~Nkalpayet prAgvaddvAdashIM pakShato nR^ipa || 55\.3|| tAmapyevamuShitvA cha yavAn viprAya dApayet | kR^iShNAyeti harirvAchyo dAne home tathArchchane || 55\.4|| chAturmAsyamathaivaM tu kShapitvA rAjasattama | chaitrAdiShu punastadvadupoShya prayataH sudhIH | saktupAtrANi viprANAM sahiraNyAni dApayet || 55\.5|| shrAvaNAdiShu mAseShu tadvachChAliM pradApayet | triShu mAseShu yAvachcha kArttikasyAdirAgataH || 55\.6|| tamapyevaM kShapitvA tu dashamyAM prayataH shuchiH | archayitvA hariM bhaktyA mAsanAmnA vichakShaNaH || 55\.7|| sa~NkalpaM pUrvavadbhaktyA dvAdashyAM saMyatendriyaH | ekAdashyAM yathAshaktyA kArayet pR^ithivIM nR^ipa || 55\.8|| kA~nchanA~NgAM cha pAtAlakulaparvatasaMyutAm | bhUminyAsavidhAnena sthApayet tAM hareH puraH || 55\.9|| sitavastrayugachChannAM sarvabIjasamanvitAm | sampUjya priyadatteti pa~ncharatnairvichakShaNaH || 55\.10|| jAgaraM tatra kurvIta prabhAte tu punardvijAn | Amantrya sa~NkhyayA rAjaMshchaturviMshati yAvataH || 55\.11|| teShAM ekaikasho gAM cha anaDvAhaM cha dApayet | ekaikaM vastrayugmaM cha a~NgulIyakameva cha || 55\.12|| kaTakAni cha sauvarNakarNAbharaNakAni cha | ekaikaM grAmameteShAM rAjA rAjan pradApayet || 55\.13|| tanmadhyamaM sayugmaM tu sarvamAdyaM pradApayet | svashaktyAbharaNaM chaiva daridrasya svashaktitaH || 55\.14|| yathAshaktyA mahIM kR^itvA kA~nchanIM goyugaM tathA | vastrayugmaM cha dAtavyaM yathAvibhavashaktitaH || 55\.15|| gAM yugmAbharaNAt sarvaM sahiraNyaM cha kArayet | evaM kR^ite tathA kR^iShNashukladvAdashyAmeva cha || 55\.16|| raupyAM vA pR^ithivIM kR^itvA yathAvibhavashaktitaH | dApayedbrAhmaNAnAM tu tathA teShAM cha bhojanam | upAnahau yathAshaktyA pAduke ChatrikAM tathA || 55\.17|| etAn dattvA vadedevaM kR^iShNo dAmodaro mama | prIyatAM sarvadA devo vishvarUpo harirmama || 55\.18|| dAne cha bhojane chaiva kR^itvA yat phalamApyate | tanna shakyaM sahasreNa varShANAmapi kIrtitum || 55\.19|| tathApyuddeshataH ki~nchit phalaM vakShyAmi te.anagha | vratasyAsya purA vR^ittaM shubhAnyasya shR^iNuShva tat || 55\.20|| AsIdAdiyuge rAjA brahmavAdI dR^iDhavrataH | sa putrakAmaH paprachCha brahmANaM parameShThinam | tasyedaM vratamAchakhyau brahmA sa kR^itavAMstathA || 55\.21|| tasya vratAnte vishvAtmA svayaM pratyakShatAM yayau | tuShTashchovAcha bho rAjan varo me vriyatAM varaH || 55\.22|| rAjovAcha | putraM me dehi devesha vedamantravishAradam | yAjakaM yajanAsaktaM kIrtyA yuktaM chirAyuSham | asa~NkhyAtaguNaM chaiva brahmabhUtamakalmaSham || 55\.23|| evamuktvA tato rAjA punarvachanamabravIt | mamApyante shubhaM sthAnaM prayachCha parameshvara | yattanmunipadaM nAma yatra gatvA na shochati || 55\.24|| evamastviti taM devaH proktvA chAdarshanaM gataH | tasyApi rAj~naH putro.abhUdvatsashrIrnAma nAmataH || 55\.25|| vedavedA~Ngasampanno yaj~nayAjI bahushrutaH | tasya kIrttirmahArAja vistR^itA dharaNItale || 55\.26|| rAjA.api taM sutaM labdhvA viShNudattaM pratApinam | jagAma tapase yuktaH sarvadvandvAn prahAya saH || 55\.27|| ArAdhayAmAsa hariM nirAhAro jitendriyaH | himavatparvate ramye stutiM kurvaMstadA nR^ipaH || 55\.28|| bhadrAshva uvAcha | kIdR^ishI sA stutirbrahman yAM chakAra sa pArthivaH | kiM cha tasyAbhavaddevaM stuvataH puruShottamam || 55\.29|| durvAsA uvAcha | himavantaM samAshritya rAjA tadgatamAnasaH | stutiM chakAra devAya viShNave prabhaviShNave || 55\.30|| rAjovAcha | kSharAkSharaM kShIrasamudrashAyinaM kShitIdharaM mUrtimatAM paraM padam | atIndriyaM vishvabhujAM puraH kR^itaM nirAkR^itaM staumi janArdanaM prabhum || 55\.31|| tvamAdidevaH paramArtharUpI vibhuH purANaH puruShottamashcha | atIndriyo vedavidAM pradhAnaH prapAhi mAM sha~NkhagadAstrapANe || 55\.32|| kR^itaM tvayA deva surAsurANAM sa~NkIrtyate.asau cha anantamUrte | sR^iShTyarthametat tava deva viShNo na cheShTitaM kUTagatasya tatsyAt || 55\.33|| tathaiva kUrmatvamR^igatvamuchchaistvayA kR^itaM rUpamanekarUpa | sarvaj~nabhAvAdasakR^ichcha janma sa~NkIrttyate te.achyuta naitadasti || 55\.34|| nR^isiMha namo vAmana jamadagninAma dashAsyagotrAntaka vAsudeva | namo.astu te buddha kalkin khagesha shambho namaste vibudhArinAshana || 55\.35|| namo.astu nArAyaNa padmanAbha namo namaste puruShottamAya | namaH samastAmarasa~NghapUjya namo.astu te sarvavidAM pradhAna || 55\.36|| namaH karAlAsya nR^isiMhamUrtte namo vishAlAdrisamAna kUrma | namaH samudrapratimAna matsya namAmi tvAM kroDarUpinnananta || 55\.37|| sR^iShTyarthametat tava deva cheShTitaM na mukhyapakShe tava mUrttitA vibho | ajAnatA dhyAnamidaM prakAshitaM naibhirvinA lakShyase tvaM purANa || 55\.38|| Adyo makhastvaM svayameva viShNo makhA~NgabhUto.asi havistvameva | pashurbhavAn R^itvigijyaM tvameva tvAM devasa~NghA munayo yajanti || 55\.39|| yadetasmin jagaddhruvaM chalAchalaM surAdikAlAnalasaMsthamuttamam | na tvaM vibhakto.asi janArdanesha prayachCha siddhiM hR^idayepsitAM me || 55\.40|| namaH kamalapatrAkSha mUrttAmUrtta namo hare | sharaNaM tvAM prapanno.asmi saMsArAnmAM samuddhara || 55\.41|| evaM stutastadA devastena rAj~nA mahAtmanA | vishAlAmratalasthena tutoSha parameshvaraH || 55\.42|| kubjarUpI tato bhUtvA AjagAma hariH svayam | tasminnAgatamAtre tu sopyAmraH kubjako.abhavat || 55\.43|| taM dR^iShTvA mahadAshcharyaM sa rAjA saMshitavrataH | vishAlasya kathaM kaubjyamiti chintAparobhavat || 55\.44|| tasya chintayato buddhirbabhau taM brAhmaNaM prati | anenAgatamAtreNa kR^itametanna saMshayaH || 55\.45|| tasmAdeShaiva bhavitA bhagavAn puruShottamaH | evamuktvA namashchakre taM vipraM sa nR^ipottamaH || 55\.46|| anugrahAya bhagavan nUnaM tvaM puruShottamaH | Agato.asi svarUpaM me darshayasvAdhunA hare || 55\.47|| evamuktastadA devaH sha~NkhachakragadAdharaH | babhau tatpurataH saumyo vAkyaM chedamuvAcha ha || 55\.48|| varaM vR^iNIShva rAjendra yatte manasi vartate | mayi prasanne trailokyaM tilamAtramidaM nR^ipa || 55\.49|| evamuktastato rAjA harShotphullitalochanaH | mokShaM prayachCha deveshetyuktvA novAcha ki~nchana || 55\.50|| evamuktaH sa bhagavAn punarvAkyamuvAcha ha | mayyAgate vishAlo.ayamAmraH kubjatvamAgataH | yasmAt tasmAt tIrthamidaM kubjakAmraM bhaviShyati || 55\.51|| tiryagyonyAdayo.apyasmin brAhmaNA vA yadi svakam | kalevaraM tyajiShyanti teShAM pa~nchashatAni cha | vimAnAni bhaviShyanti yoginAM muktireva cha || 55\.52|| evamuktvA nR^ipaM devaH sha~NkhAgreNa janArdanaH | pasparsha spR^iShTamAtro.asau paraM nirvANamAptavAn || 55\.53|| tasmAttvamapi rAjendra taM devaM sharaNaM vraja | yena bhUyaH punaH shochyapadavIM no prayAsyasi || 55\.54|| ya idaM shR^iNuyAnnityaM prAtarutthAya mAnavaH | paThedyashcharitaM tAbhyAM mokShadharmArthado bhavet || 55\.55|| shubhavratamidaM puNyaM yashcha kuryAjjaneshvara | sa sarvasampadaM cheha bhuktvAnte tallayaM vrajet || 55\.56|| || iti shrIvarAhapurANe bhagavachChAstre pa~nchapa~nchAshattamo.adhyAyaH || 55|| \section{ShaTpa~nchAshattamo.adhyAyaH} agastya uvAcha | ataH paraM pravakShyAmi dhanyavratamanuttamam | yena sadyo bhaveddhanya adhanyo.api hi yo bhavet || 56\.1|| mArgashIrShe site pakShe pratipadyA tithirbhavet | tasyAM naktaM prakurvIta viShNumagniM prapUjayet || 56\.2|| vaishvAnarAya pAdau tu agnayetyudaraM tathA | havirbhu~njAya cha uro draviNodeti vai bhujo || 56\.3|| saMvarttAyeti cha shiro jvalanAyeti sarvataH | abhyarchyaivaM vidhAnena devadevaM janArdanam || 56\.4|| tasyaiva purataH kuNDaM kArayitvA vidhAnataH | homaM tatra prakurvIta ebhirmantrairvichakShaNaH || 56\.5|| tataH saMyAvakaM chAnnaM bhu~njIyAdghR^itasaMyutam | kR^iShNapakShe.apyevameva chAturmAsyaM tu yAvataH || 56\.6|| chaitrAdiShu cha bhu~njIta pAyasaM saghR^itaM budhaH | shrAvaNAdiShu saktUMshcha tatashchaitat samApyate || 56\.7|| samApte tu vrate vahniM kA~nchanaM kArayedbudhaH | raktavastrayugachChannaM raktapuShpAnulepanam || 56\.8|| ku~Nkumena tathA lipya brAhmaNaM sattvameva cha | sarvAvayavasampUrNaM brAhmaNaM priyadarshanam || 56\.9|| pUjayitvA vidhAnena raktavastrayugena cha | pashchAt taM dApayet tasya mantreNAnena buddhimAn || 56\.10|| dhanyo.asmi dhanyakarmA.asmi dhanyacheShTo.asmi dhanyavAn | dhanyenAnena chIrNena vratena syAM sadA sukhI || 56\.11|| evamuchchArya taM vipre nyasya koshaM mahAtmanaH | sadyo dhanyatvamApnoti yo.api syAdbhogavarjitaH || 56\.12|| iha janmani saubhAgyaM dhanaM dhAnyaM cha puShkalam | anena kR^itamAtreNa jAyate nAtra saMshayaH || 56\.13|| prAgjanmajanitaM pApamagnirdahati tasya ha | dagdhe pApe vimuktAtmA iha janmanyasau bhavet || 56\.14|| yo.apIdaM shR^iNuyAnnityaM yashcha bhaktyA paTheddvijaH | ubhau tAviha loke tu dhanyau sadyo bhaviShyataH || 56\.15|| shrUyate cha vrataM chaitachchIrNamAsInmahAtmanA | dhanadena purA kalpe shUdrayonau sthitena tu || 56\.16|| || iti shrIvarAhapurANe bhagavachChAstre ShaTpa~nchAshattamo.adhyAyaH || 56|| \section{saptapa~nchAsho.adhyAyaH |} agastya uvAcha | ataH paraM pravakShyAmi kAntivratamanuttamam | yatkR^itvA tu purA somaH kAntimAnabhavat punaH || 57\.1|| yakShmaNA dakShashApena purAkrAnto nishAkaraH | etachchIrtvA vrataM sadyaH kAntimAnabhavat kila || 57\.2|| dvitIyAyAM tu rAjendra kArttikasya site dine | naktaM kurvIta yatnena archayan balakeshavam || 57\.3|| baladevAya pAdau tu keshavAya shiro.archayet | evamabhyarchya medhAvI vaiShNavaM rUpamuttamam || 57\.4|| parasvarUpaM somAkhyaM dvikalaM taddine hi yat | tasyArghyaM dApayeddhImAn mantreNa parameShThinaH || 57\.5|| namo.astvamR^itarUpAya sarvauShadhinR^ipAya cha | yaj~nalokAdhipataye somAya paramAtmane || 57\.6|| anenaiva cha mArgeNa dattvArghyaM parameShThinaH | rAtrau savipro bhu~njIta yavAnnaM saghR^itaM naraH || 57\.7|| phAlgunAdichatuShke tu pAyasaM bhojayechChuchiH | shAlihomaM tu kurvIta kArttike tu yavaistathA || 57\.8|| AShADhAdichatuShke tu tilahomaM tu kArayet | tadvat tilAnnaM bhu~njIta eSha eva vidhikramaH || 57\.9|| tataH saMvatsare pUrNe shashinaM kR^itarAjatam | sitavastrayugachChannaM sitapuShpAnulepanam | evameva dvijaM pUjya tatastaM pratipAdayet || 57\.10|| kAntimAnapi loke.asmin sarvaj~naH priyadarshanaH | tvatprasAdAt somarUpin nArAyaNa namo.astu te || 57\.11|| anena kila mantreNa dattvA viprAya vAgyataH | dattamAtre tatastasmin kAntimAn jAyate naraH || 57\.12|| AtreyeNApi somena kR^itametat purA nR^ipa | tasya vratAnte santuShTaH svayameva janArdanaH | yakShmANamapanIyAshu amR^itAkhyAM kalAM dadau || 57\.13|| tAM kalAM somarAjA.asau tapasA labdhavAniti | somatvaM chAgamat so.asya oShadhInAM patirbabhau || 57\.14|| dvitIyAmashvinau somabhujau kIrtyete taddine nR^ipa | tau sheShaviShNU vikhyAtau mukhyapakShau na saMshayaH || 57\.15|| na viShNorvyatiriktaM syAddaivataM nR^ipasattama | nAmabhedena sarvatra saMsthitaH parameshvaraH || 57\.16|| || iti shrIvarAhapurANe bhagavachChAstre saptapa~nchAsho.adhyAyaH || 57|| \section{aShTapa~nchAsho.adhyAyaH |} agastya uvAcha | ataH paraM mahArAja saubhAgyakaraNaM vratam | shR^iNu yenAshu saubhAgyaM strIpuMsAmupajAyate || 58\.1|| phAlgunasya tu mAsasya tR^itIyA shuklapakShataH | upAsitavyA naktena shuchinA satyavAdinA || 58\.2|| sashrIkaM cha hariM pUjya rudraM vA chomayA saha | yA shrIH sA girijA proktA yo hariH sa trilochanaH || 58\.3|| evaM sarveShu shAstreShu purANeShu cha paThyate | etasmAdanyathA yastu brUte shAstraM pR^ithaktayA || 58\.4|| rudro janAnAM martyAnAM kAvyaM shAstraM na tadbhavet | viShNuM rudrakR^itaM brUyAt shrIrgaurI na tu pArthiva | tannAstikAnAM martyAnAM kAvyaM j~neyaM vichakShaNaiH || 58\.5|| evaM j~nAtvA salakShmIkaM hariM sampUjya bhaktitaH | mantreNAnena rAjendra tatastaM parameshvaram || 58\.6|| gambhIrAyeti pAdau tu subhagAyeti vai kaTim | udaraM devadeveti trinetrAyeti vai mukham | vAchaspataye cha shiro rudrAyeti cha sarvataH || 58\.7|| evamabhyarchya medhAvI viShNuM lakShmyA samanvitam | haraM vA gaurisaMyuktaM gandhapuShpAdibhiH kramAt || 58\.8|| tatastasyAgrato homaM kArayenmadhusarpiShA | tilaiH saha mahArAja saubhAgyapatayeti cha || 58\.9|| tatastvakShAravirasaM niHsnehaM dharaNItale | godhUmAnnaM tu bhu~njIta kR^iShNe.apyevaM vidhiH smR^itaH | AShADhAdidvitIyAM tu pAraNaM tatra bhojanam || 58\.10|| yavAnnaM tu tataH pashchAt kArttikAdiShu pArthiva | shyAmAkaM tatra bhu~njIta trIn mAsAn niyataH shuchiH || 58\.11|| tato mAghasite pakShe tR^itIyAyAM narAdhipa | sauvarNAM kArayedgaurIM rudraM chaikatra buddhimAn || 58\.12|| salakShmIkaM hariM vApi yathAshaktyA prasannadhIH | tatastaM brAhmaNe dadyAt pAtrabhUte vichakShaNe || 58\.13|| annena hIne vedAnAM pArage sAdhuvartini | sadAchAre.atha vA dadyAdalpavitte visheShataH || 58\.14|| ShaDbhiH pAtrairupetaM tu brAhmaNAya nivedayet | ekaM madhumayaM pAtraM dvitIyaM ghR^itapUritam || 58\.15|| tR^itIyaM tilatailasya chaturthaM guDasaMyutam | pa~nchamaM lavaNaiH pUrNaM ShaShThaM gokShIrasaMyutam || 58\.16|| etAni dattvA pAtrANi saptajanmAntaraM bhavet | subhago darshanIyashcha nArI vA puruSho.api vA || 58\.17|| || iti shrIvarAhapurANe bhagavachChAstre aShTapa~nchAsho.adhyAyaH || 58|| \section{ekonaShaShTitamo.adhyAyaH} agastya uvAcha | athAvighnakaraM rAjan kathayAmi shR^iNuShva me | yena samyak kR^itenApi na vighnamupajAyate || 59\.1|| chaturthyAM phAlgune mAsi grahItavyaM vrataM tvidam | naktAhAreNa rAjendra tilAnnaM pAraNaM smR^itam | tadevAgnau tu hotavyaM brAhmaNAya cha tadbhavet || 59\.2|| chAturmAsyaM vrataM chaitat kR^itvA vai pa~ncha me tathA | sauvarNaM gajavaktraM tu kR^itvA viprAya dApayet || 59\.3|| pAyasaiH pa~nchabhiH pAtrairupetaM tu tilaistathA | evaM kR^itvA vrataM chaitat sarvavighnairvimuchyate || 59\.4|| hayamedhasya vighne tu sa~njAte sagaraH purA | etadeva charitvA tu hayamedhaM samAptavAn || 59\.5|| tathA rudreNa devena tripuraM nighnatA purA | etadeva kR^itaM tasmAt tripuraM tena pAtitam | mayA samudraM pibatA etadeva kR^itaM vratam || 59\.6|| anyairapi mahIpAlairetadeva kR^itaM purA | tapo.arthibhirj~nAnakR^itairnirvighnArthe parantapa || 59\.7|| shUrAya dhIrAya gajAnanAya lambodarAyaikadaMShTrAya chaiva | evaM pUjyastaddine tatpunashcha homaM kuryAdvighnavinAshahetoH || 59\.8|| anena kR^itamAtreNa sarvavighnairvimuchyate | vinAyakasya kR^ipayA kR^itakR^ityo naro bhavet || 59\.9|| || iti shrIvarAhapurANe bhagavachChAstre navapa~nchAsho.adhyAyaH || 59|| \section{ShaShTitamo.adhyAyaH} agastya uvAcha | shAntivrataM pravakShyAmi tava rAjan shR^iNuShva tat | yena chIrNena shAntiH syAt sarvadA gR^ihamedhinAm || 60\.1|| pa~nchamyAM shuklapakShasya kArttike mAsi suvrata | ArabhedvarShamekaM tu bhu~njIyAdamlavarjitam || 60\.2|| nakte devaM tu sampUjya hariM sheShopari sthitam | anantAyeti pAdau tu vAsukayeti vai kaTim || 60\.3|| takShakAyeti jaTharamuraH karkoTakAya cha | padmAya kaNThaM sampUjya mahApadmAya doryugam || 60\.4|| sha~NkhapAlAya vaktraM tu kuTilAyeti vai shiraH | evaM viShNugataM pUjya pR^ithaktvena cha pUjayet || 60\.5|| kShIreNa snapanaM kuryAt tAnuddishya hareH punaH | tadagre homayet kShIraM tilaiH saha vichakShaNaH || 60\.6|| evaM saMvatsarasyAnte kuryAdbrAhmaNabhojanam | nAgaM tu kA~nchanaM kuryAdbrAhmaNAya nivedayet || 60\.7|| evaM yaH kurute bhaktyA vratametannarAdhipa | tasya shAntirbhavennityaM nAgAnAM na bhayaM tathA || 60\.8|| || iti shrIvarAhapurANe bhagavachChAstre ShaShTitamo.adhyAyaH || 60|| \section{ekaShaShTitamo.adhyAyaH |} agastya uvAcha | kAmavrataM mahArAja shR^iNu me gadato.adhunA | yena kAmAH samR^id.hdhyante manasA chintitA api || 61\.1|| ShaShThyAM phalAshano yastu varShamekaM vrataM charet | pauShamAsasite pakShe chaturthyAM kR^itabhojanaH || 61\.2|| ShaShThyAM tu pArayeddhImAn prathamaM tu phalaM nR^ipa | tato bhu~njIta yatnena vAgyataH shuddhamodanam || 61\.3|| brAhmaNaiH saha rAjendra athavA kevalaiH phalaiH | tamekaM divasaM sthitvA saptamyAM pArayennR^ipa || 61\.4|| agnikAryaM tu kurvIta guharUpeNa keshavam | pUjayitvAbhidhAnena varShamekaM vrataM charet || 61\.5|| ShaDvaktraH kArttikeyashcha senAnIH kR^ittikAsutaH | kumAraH skanda ityevaM pUjyo viShNuH svanAmabhiH || 61\.6|| samAptau tu vratasyAsya kuryAdbrAhmaNabhojanam | ShaNmukhaM sarvasauvarNaM brAhmaNAya nivedayet || 61\.7|| sarve kAmAH samR^id.hdhyantAM mama deva kumAraka | tvatprasAdAdimaM bhaktyA gR^ihyatAM vipra mA chiram || 61\.8|| anena dattvA mantreNa brAhmaNAya sayugmakam | tataH kAmAH samR^id.hdhyante sarve vai iha janmani || 61\.9|| aputro labhate putramadhano labhate dhanam | bhraShTarAjyo labhedrAjyaM nAtra kAryA vichAraNA || 61\.10|| etadvrataM purA chIrNaM nalena nR^ipasattama | R^ituparNasya viShaye vasatA vratacharyayA || 61\.11|| tathA rAjyachyutairanyairbahubhirnR^ipasattamaiH | paurANikaM vrataM chaiva sid.hdhyarthaM nR^ipasattama || 61\.12|| || iti shrIvarAhapurANe bhagavachChAstre ekaShaShTitamo.adhyAyaH || 61|| \section{dviShaShTatamo.adhyAyaH |} agastya uvAcha | athAparaM mahArAja vratamArogyasa.nj~nitam | kathayAmi paraM puNyaM sarvapApapraNAshanam || 62\.1|| tasyaiva mAghamAsasya saptamyAM samupoShitaH | pUjayedbhAskaraM devaM viShNurUpaM sanAtanam || 62\.2|| Aditya bhAskara rave bhAno sUrya divAkara | prabhAkareti sampUjya evaM sampUjyate raviH || 62\.3|| ShaShThyAM chaiva kR^itAhAraH saptamyAM bhAnumarchayet | aShTamyAM chaiva bhu~njIta eSha eva vidhikramaH || 62\.4|| anena vatsaraM pUrNaM vidhinA yo.archayedravim | tasyArogyaM dhanaM dhAnyamiha janmami jAyate | paratra cha shubhaM sthAnaM yadgatvA na nivartate || 62\.5|| sArvabhaumaH purA rAjA anaraNyo mahAbalaH | tenAyamarchito devo vratenAnena pArthiva | tasya tuShTo varaM devaH prAdAdArogyamuttamam || 62\.6|| bhadrAshva uvAcha | kimasau rogavAn rAjA yenArogyamavAptavAn | sArvabhaumasya cha kathaM brahman rogasya sambhavaH || 62\.7|| agastya uvAcha | sa rAjA sArvabhaumo.abhUdyashasvI cha surUpavAn | sa kadAchinnR^ipashreShTho nR^ipashreShTha mahAbalaH || 62\.8|| gatavAn mAnasaM divyaM saro devagaNAnvitam | tatrApashyadbR^ihatpadmaM saromadhyagataM sitam || 62\.9|| tatra chA~NguShThamAtraM tu sthitaM puruShasattamam | raktavAsobhirAChannaM dvibhujaM tigmatejasam || 62\.10|| taM dR^iShTvA sArathiM prAha padmametat samAnaya | idaM tu shirasA bibhrat sarvalokasya sannidhau | shlAghanIyo bhaviShyAmi tasmAdAhara mA chiram || 62\.11|| evamuktastadA tena sArathiH pravivesha ha | grahItumupachakrAma taM padmaM nR^ipasattama || 62\.12|| spR^iShTamAtre tataH padme hu~NkAraH samajAyata | tena shabdena sa trastaH papAta cha mamAra cha || 62\.13|| rAjA cha tatkShaNAt tena shabdena samapadyata | kuShThI vigatavarNashcha balavIryavivarjitaH || 62\.14|| tathAgatamathAtmAnaM dR^iShTvA sa puruSharShabhaH | tasthau tatraiva shokArttaH kimetaditi chintayan || 62\.15|| tasya chintayato dhImAnAjagAma mahAtapAH | vasiShTho brahmaputro.atha taM sa paprachCha pArthivam || 62\.16|| kathaM te rAjashArdUla tava dehasya shAsanam | idAnImeva kiM kAryaM tanmamAchakShva pR^ichChataH || 62\.17|| evamuktastato rAjA vasiShThena mahAtmanA | sarvaM padmasya vR^ittAntaM kathayAmAsa sa prabhuH || 62\.18|| taM shrutvA sa munistatra sAdhu rAjannathAbravIt | asAdhuratha vA tiShTha tasmAt kuShThitvamAgataH || 62\.19|| evamuktastadA rAjA vepamAnaH kR^itA~njaliH | paprachCha sAdhvahaM vipra kathaM vA.asAdhvahaM mune | kathaM cha kuShThaM me jAtametanme vaktumarhasi || 62\.20|| vasiShTha uvAcha | etadbrahmodbhavaM nAma padmaM trailokyavishrutam | dR^iShTamAtreNa chAnena dR^iShTAH syuH sarvadevatAH | etasmin dR^ishyate chaitat ShaNmAsaM kvApi pArthiva || 62\.21|| etasmin dR^iShTamAtre tu yo jalaM vishate naraH | sarvapApavinirmuktaH paraM nirvANamarhati || 62\.22|| brahmaNaH prAgavasthAyA mUrtirapsu vyavasthitA | etAM dR^iShTvA jale magnaH saMsArAdvipramuchyate || 62\.23|| imaM cha dR^iShTvA te sUto jale magno narottama | praviShTashcha punarimaM hartumichChannarAdhipa | prAptavAnasi durbuddhe kuShThitvaM pApapUruSha || 62\.24|| dR^iShTametat tvayA yasmAt tvaM sAdhviti tataH prabho | mayokto mohamApannastenAsAdhuritIritaH || 62\.25|| brahmaputro hyahaM chemaM pashyAmi parameshvaram | ahanyahani chAgachChaMstaM punardR^iShTavAnasi || 62\.26|| devA api vadantyete padmaM kA~nchanamuttamam | mAnase brahmapadmaM tu dR^iShTvA chAtra gataM harim | prApsyAmastat paraM brahma yadgatvA na punarbhavet || 62\.27|| idaM cha kAraNaM chAnyat kuShThasya shR^iNu pArthiva | AdityaH padmagarbhe.asmin svayameva vyavasthitaH || 62\.28|| taM dR^iShTvA tattvato bhAvaH paramAtmaiSha shAshvataH | dhArayAmi shirasyenaM lokamadhye vibhUShaNam || 62\.29|| evaM te jalpatA pApamidaM devena darshitam | idAnImimameva tvamArAdhaya mahAmate || 62\.30|| agastya uvAcha | evamuktvA vasiShThastu imameva vrataM tadA | AdityArAdhanaM divyamArogyAkhyaM jagAda ha || 62\.31|| so.api rAjA.akarochchemaM vrataM bhaktisamanvitaH | siddhiM cha paramAM prApto virogashchAbhavat kShaNAt || 62\.32|| || iti shrIvarAhapurANe bhagavachChAstre dviShaShTitamo.adhyAyaH || 62|| \section{triShaShTitamo.adhyAyaH} agastya uvAcha | athAparaM mahArAja putraprAptivrataM shubham | kathayAmi samAsena tanme nigadataH shR^iNu || 63\.1|| mAse bhAdrapade yA tu kR^iShNapakShe nareshvara | aShTamyAmupavAsena putraprAptivrataM hi tat || 63\.2|| ShaShThyAM chaiva tu sa~Nkalpya saptamyAmarchayeddharim | devakyutsa~NgagaM devaM mAtR^ibhiH pariveShTitam || 63\.3|| prabhAte vimale.aShTamyAmarchayet prayato harim | prAgvidhAnena govindamarchayitvA vidhAnataH || 63\.4|| tato yavaiH kR^iShNatilaiH saghR^itairhomayeddadhi | brAhmaNAn bhojayedbhaktyA yathAshaktyA sadakShiNAn || 63\.5|| tataH svayaM tu bhu~njIta prathamaM bilvamuttamam | pashchAdyatheShTaM bhu~njIta snehaiH sarvarasairyutam || 63\.6|| pratimAsamanenaiva vidhinopoShya mAnavaH | kR^iShNAShTamImaputro.api labhet putraM na saMshayaH || 63\.7|| shrUyate cha purA rAjA shUrasenaH pratApavAn | sa hyaputrastapastepe himavatparvatottame || 63\.8|| tasyaivaM kurvato devo vratametajjagAda ha | so.apyetat kR^itavAn rAjA putraM chaivopalabdhavAn || 63\.9|| vasudevaM mahAbhAgamanekakratuyAjinam | taM labdhvA so.api rAjarShiH paraM nirvANamApatvAn || 63\.10|| evaM kR^iShNAShTamI rAjan mayA te parikIrtitA | saMvatsarAnte dAtavyaM kR^iShNayugmaM dvijAtaye || 63\.11|| etat putravrataM nAma mayA te parikIrtitam | etat kR^itvA naraH pApaiH sarvaireva pramuchyate || 63\.12|| || iti shrIvarAhapurANe bhagavachChAstre triShaShTitamo.adhyAyaH || 63|| \section{chatuHShTitamo.adhyAyaH |} agastya uvAcha | athAparaM pravakShyAmi shauryavratamanuttamam | yena bhIrorapi mahachChauryaM bhavati tatkShaNAt || 64\.1|| mAsi chAshvayuje shuddhAM navamIM samupoShayet | saptamyAM kR^itasa~NkalpaH sthitvA.aShTamyAM nirodanaH || 64\.2|| navamyAM pArayet piShTaM prathamaM bhaktito nR^ipa | brAhmaNAn bhojayedbhaktyA devIM chaiva tu pUjayet | durgAM devIM mahAbhAgAM mahAmAyAM mahAprabhAm || 64\.3|| evaM saMvatsaraM yAvadupoShyeti vidhAnataH | vratAnte bhojayeddhImAn yathAshaktyA kumArikAH || 64\.4|| hemavastrAdibhistAstu bhUShayitvA tu shaktitaH | pashchAt kShamApayet tAstu devI me prIyatAmiti || 64\.5|| evaM kR^ite bhraShTarAjyo labhedrAjyaM na saMshayaH | avidyo labhate vidyAM bhItaH shauryaM cha vidanti || 64\.6|| || iti shrIvarAhapurANe bhagavachChAstre chatuHShaShTitamo.adhyAyaH || 64|| \section{pa~nchaShaShTitamo.adhyAyaH |} agastya uvAcha | sArvabhaumavrataM chAnyat kathayAmi samAsataH | yena samyakkR^itenAshu sArvabhaumo nR^ipo bhavet || 65\.1|| kArtikasya tu mAsasya dashamI shuklapakShikA | tasyAM naktAshano nityaM dikShu shuddhabaliM haret || 65\.2|| vichitraiH kusumairbhaktyA pUjayitvA dvijottamAn | dishAM tu prArthanAM kuryAnmantreNAnena suvrataH | sarvA bhavatyaH sid.hdhyantu mama janmani janmani || 65\.3|| evamuktvA baliM tAsu dattvA shuddhena chetasA | tato rAtrau tu bhu~njIta dadhyannaM tu susaMskR^itam || 65\.4|| pUrvaM pashchAdyatheShTaM tu evaM saMvatsaraM nR^ipa | yaH karoti naro nityaM tasya digvijayo bhavet || 65\.5|| ekAdashyAM tu yatnena naraH kuryAdyathAvidhi | mArgashIrShe shuklapakShAdArabhyAbdaM vichakShaNaH | tadvrataM dhanadasyeShTaM kR^itaM vittaM prayachChati || 65\.6|| ekAdashyAM nirAhAro yo bhu~Nkte dvAdashIdine | shukle vA.apyathavA kR^iShNe tadvrataM vaiShNavaM mahat || 65\.7|| evaM chIrNaM sughorANi hanti pApAni pArthiva | trayodashyAM tu naktena dharmavratamathochyate || 65\.8|| shuklapakShe phAlgunasya tathArabhya vichakShaNaH | raudraM vrataM chaturdashyAM kR^iShNapakShe visheShataH | mAghamAsAdathArabhya pUrNaM saMvatsaraM nR^ipa || 65\.9|| induvrataM pa~nchadashyAM shuklAyAM naktabhojanam | pitR^ivratamamAvAsyAmiti rAjan tatheritam || 65\.10|| dasha pa~ncha cha varShANi ya evaM kurute nR^ipa | tithivratAni kastasya phalaM vratapramANataH || 65\.11|| ashvamedhasahasrANi rAjasUyashatAni cha | yaShTAni tena rAjendra kalpoktAH kratavastathA || 65\.12|| ekameva kR^itaM hanti vrataM pApAni nityashaH | yaH punaH sarvametaddhi kuryAnnaravarAtmaja | sa shuddho virajo lokAnApnoti sakalaM nR^ipa || 65\.13|| || iti shrIvarAhapurANe bhagavachChAstre pa~nchaShaShTitamo.adhyAyaH || 65|| \section{ShaTShaShTitamo.adhyAyaH} bhadrAshva uvAcha | AshcharyaM yadi te ki~nchidviditaM dR^iShTameva vA | tanme kathaya dharmaj~na mama kautUhalaM mahat || 66\.1|| agastya uvAcha | AshcharyabhUto bhagavAneSha eva janArdanaH | tasyAshcharyANi dR^iShTAni bahUni vividhAni vai || 66\.2|| shvetadvIpaM gataH pUrvaM nAradaH kila pArthiva | so.apashyachCha~NkhachakrAbjAn puruShAMstigmatejasaH || 66\.3|| ayaM viShNurayaM viShNureSha viShNuH sanAtanaH | chintA.abhUttasyatAndR^iShTvA ko.asminviShNuriti prabhuH || 66\.4|| evaM chintayatastasya chintA kR^iShNaM prati prabho | ArAdhayAmi cha kathaM sha~NkhachakragadAdharam || 66\.5|| yena vedmi paraM teShAM devo nArAyaNaH prabhuH | evaM sa~nchintya dadhyau sa taM devaM parameshvaram || 66\.6|| divyaM varShasahasraM tu sAgraM brahmasutastadA | dhyAyatastasya devo.asau paritoShaM jagAma ha || 66\.7|| uvAcha cha prasannAtmA pratyakShatvaM gataH prabhuH | varaM brahmasuta brUhi kiM te dadmi mahAmune || 66\.8|| nArada uvAcha | sahasramekaM varShANAM dhyAtastvaM bhuvaneshvara | tvatprAptiryena tadbrUhi yadi tuShTo.asi me.achyuta || 66\.9|| devadeva uvAcha | pauruShaM sUktamAsthAya ye yajanti dvijAstu mAm | saMhitAmAdyamAsthAya te mAM prApsyanti nArada || 66\.10|| alAbhe vedashAstrANAM pa~ncharAtroditena ha | mArgeNa mAM prapashyante te mAM prApsyanti mAnavAH || 66\.11|| brAhmaNakShatriyavishAM pa~ncharAtraM vidhIyate | shUdrAdInAM na tachChrotrapadavImupayAsyati || 66\.12|| evaM mayoktaM viprendra purAkalpe purAtanam | pa~ncharAtraM sahasrANAM yadi kashchidgrahIShyati || 66\.13|| karmakShaye cha mAM kashchidyadi bhakto bhaviShyati | tasya chedaM pa~ncharAtraM nityaM hR^idi vasiShyati || 66\.14|| itare rAjasairbhAvaistAmasaishcha samAvR^itAH | bhaviShyanti dvijashreShTha machChAsanaparA~NmukhAH || 66\.15|| kR^itaM tretA dvAparaM cha yugAni trINi nArada | sattvasthAM mAM sameShyanti kalau rajastamo.adhikAH || 66\.16|| anyachcha te varaM dadmi shR^iNu nArada sAmpratam | yadidaM pa~ncharAtraM me shAstraM paramadurlabham | tadbhavAn vetsyate sarvaM matprasAdAnna saMshayaH || 66\.17|| vedena pa~ncharAtreNa bhaktyA yaj~nena cha dvija | prApyo.ahaM nAnyathA vatsa varShakoTyAyutairapi || 66\.18|| evamuktvA sa bhagavAn nAradaM parameshvaraH | jagAmAdarshanaM sadyo nArado.api yayau divam || 66\.19|| || iti shrIvarAhapurANe bhagavachChAstre ShaTShaShTitamo.adhyAyaH || 66|| section{saptaShaShTitamo.adhyAyaH} bhadrAshva uvAcha | bhagavan sitakR^iShNe dve bhinne jagati keshavAn | striyau babhUvatuH ke dve sitakR^iShNA cha kA shubhA || 67\.1|| kashchAsau puruSho brahman ya ekaH saptadhA bhavet | ko.asau dvAdashadhA vipra dvidehaH ShaTshirAH shubhaH || 67\.2|| dampatyaM cha dvijashreShTha kR^itasUryodayAdanam | kasmAdetajjagadidaM vitataM dvijasattama || 67\.3|| agastya uvAcha | sitakR^iShNe striyau ye te te bhaginyau prakIrtite | satyAsatye dvivarNA cha nArI rAtrirudAhR^itA || 67\.4|| yaH pumAn saptadhA jAta eko bhUtvA nareshvara | sa samudrastu vij~neyaH saptadhaiko vyavasthitaH || 67\.5|| yo.asau dvAdashadhA rAjan dvidehaH ShaTshirAH prabhuH | saMvatsaraH sa vij~neyaH sharIre dve gatI smR^ite | R^itavaH ShaT cha vaktrANi eSha saMvatsaraH smR^itaH || 67\.6|| dampatyaM tadahorAtraM sUryAchandramasau tataH | tato jagat samuttasthau devasyAsya nR^ipottama || 67\.7|| sa viShNuH paramo devo vij~neyo nR^ipasattama | na cha vedakriyAhInaH pashyate parameshvaram || 67\.8|| || iti varAhapurANe bhagavachChAstre saptaShaShTitamo.adhyAyaH || 67|| iti shrIagastyagItA samAptA | ## Varahapurana adhyAya 51-67 There are quite a few variations in printed books. Proofread by PSA Easwaran \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}