% Text title            : Brahma Gita (Skanda Purana)
% File name             : brahmagiitaaskanda.itx
% Category              : gItA, giitaa
% Location              : doc\_giitaa
% Author                : Vyasa muni (by tradition)
% Transliterated by     : Sunder Hattangadi
% Proofread by          : Sunder Hattangadi, v.subrahmanian, PSA Easwaran
% Latest update         : August 28, 2021
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Brahma Gita Skanda Purana ..}##
\itxtitle{.. brahmagItA skandapurANAntargatA ..}##\endtitles ##

shrIskandapurANe sUtasaMhitAyAM chaturthasya
yaj~navaibhavakhaNDasyoparibhAge brahmagItAsUpaniShatsu
brahmagItirnAma prathamo.adhyAyaH ..              1\-60
vedArthavichAro nAma dvitIyo.adhyAyaH ..       1\-60
sAkShishivasvarUpakathanaM nAma tR^itIyo.adhyayaH ..   1\-118
talavakAropaniShadvyAkhyAkathanaM nAma chaturtho.adhyAyaH .. 1\-154
AdeshakathanaM nAma pa~nchamo.adhyAyaH ..      1\-196
daharopAsanavivaraNaM nAma ShaShTho.adhyAyaH ..     1\-58
vastusvarUpavichAro nAma saptamo.adhyAyaH ..      1\-95
kaivalyopaniShadvivaraNe tattvavedanavidhirnAmAShTamo.adhyAyaH 1\-55
bR^ihAdAraNyakopaniShadvyAkhyAne navamo.adhyAyaH ..     1\-57
bR^ihAdAraNyakavyAkhyAkathanaM nAma dashamo.adhyAyaH ..  1\-56
kaThavallIshvetAshvetaravyAkhyAyAmekAdasho.adhyAyaH ..    1\-72
shivasyAhampratyAyAshratvaM nAma dvAdasho.adhyAyaH ..    1\-77

\medskip\hrule\medskip
  .. atha prArabhyate skandapurANAntargatasUtasaMhitAyAM brahmagItA ..
  .. prathamo.adhyAyaH ..
                    . brahmagItiH .
munaya UchuH \-
bhavatA sarvamAkhyAtaM sa~NkShepAdvistarAdapi .
idAnIM shrotumichChAmo brahmagItAmanuttamAm .. 1..
sarvavij~nAnaratnAnAmAkarasya mahAtmanaH .
kR^iShNadvaipAyanasyaiva bhavA~nChiShyaH sushikShitaH .. 2..
tvayaivAviditaM ki~nchinnAsti satyaM prabhAShitam .
yadi prasanno bhagavA.nstanno vaktumihArhasi .. 3..
sUta uvAcha \-
vakShye tAmAdareNaiva brahmagItAmanuttamAm .
shraddhayA sahitA yUyaM shR^iNuta brahmavittamAH .. 4..
purA kalpAntare devAH sarve sambhUya sAdaram .
vichArya suchiraM kAlaM vedAnAmarthamuttamam .. 5..
sa.nshayAviShTachittAstu tapastaptvA mahattaram .
abhijagmurvidhAtAraM praShTuM devA munIshvarAH .. 6..
yatrAste jagatAM nAthaH sarvaj~naH sarvavitprabhuH .
mahAkAruNikaH shrImAnbrahmA bhaktahite rataH .. 7..
merushR^i~Nge vare ramye sarvayogisamAvR^ite .
yakSharAkShasagandharvasiddhAdyaishcha susevite .. 8..
nAnAratnasamAkIrNe nAnAdhAtuvichitrite .
shakuntasa~Nghasa~NghR^iShTe nAnAtIrthasamAvR^ite .. 9..
guhAkoTisamAyukte giriprasravaNairyute .
madhurAdirasaiH ShaD.hbhiH samR^iddhe.atIva shobhane .. 10..
tatra brahmavanaM nAma shatayojanamAyatam .
shatayojanavistIrNaM dIrghikAbhiH susaMyutam .. 11..
nAnApashusamAyuktaM nAnApakShisamAkulam .
svAdupAnIyasaMyuktaM phalamUlaishcha saMyutam .. 12..
bhramad.hbhramarasa~nChannasugandhakusumadrumam .
mandAnilasamAyuktaM mandAtapasamAyutam .. 13..
nishAkarakarairyuktaM vanamasti mahattaram .
tatra jAmbUnadamayaM taruNAdityasannibham .. 14..
navaprAkArasaMyuktamashItidvArasaMyutam .
mahAbalasamopetairdvArapAlaishcha koTibhiH .. 15..
khaDgatomarachApAdishastrayuktaishcha rakShitam .
puShpaprakarasa~NkIrNaM pUrNakumbhaishcha saMyutam .. 16..
jvaladdIpaiH samAyuktaM puShpamAlAvirAjitam .
vichitrachitrasaMyuktabhittikoTisushobhitam .. 17..
muktAdAmasamAyuktaM vitAnairmauktikairyutam .
abhragAmidhvajairyuktaM prA.nshutoraNasaMyutam .. 18..
nR^ityagItAdibhiryuktamapsarogaNasevitam .
nAnAvidhamahAvAdyairnAnAtAlaishcha saMyutam .. 19..
mR^idumadhyograshabdADhyaM nAnAkAhalasaMyutam .
vedaghoShasamAyuktaM smR^itighoShasamanvitam .. 20..
purANaghoShasaMyuktamitihAsaravAnvitam .
sarvavidyAravairyuktaM sarvaj~naishcha samAvR^itam .. 21..
agAdhajalaparyantamavarodhasamanvitam .
rathakoTisamAyuktaM koTikoTigajAvR^itam .. 22..
koTikoTisahasraishcha mahAshvaishcha virAjitam .
astrashastrAdisaMyuktairasa~NkhyAtabalAnvitaiH .. 23..
asa~NkhyAtairbhaTairnityaM rakShitaM puramuttamam .
asti puNyavatAM prApyamaprApyaM pApakarmaNAm .. 24..
tasminnantaHpure shuddhe sahasrasthUNasaMyute .
sarvalakShaNasaMyukte sarvAla~NkArasaMyute .. 25..
mR^idutoraNasaMyukte kalpavR^ikShasamanvite .
kaNThIravamukhairyukte ShaT.hpadasvanasaMyute .. 26..
mR^idutalpasamopete ratnanirmitamaNDape .
devyA chApi sarasvatyA varNavigrahayA saha .. 27..
sarvashabdArthabhUtastu brahmA nivasati prabhuH .
tatra devA dvijA gatvA dadR^ishurlokanAyakam .. 28..
nAnAratnasamopetaM vichitramukuTojjvalam .
ratnakuNDalasaMyuktaM prasannavadanaM shubham .. 29..
nAnAratnasamopetahArAbharaNabhUShitam .
mahArhamaNisaMyuktakeyUrakarasaMyutam .. 30..
vichitrakaTakopetama~NgulIyakashobhitam .
uttarIyakasaMyuktaM shuklayaj~nopavItinam .. 31..
nAnAratnasamopetaM tundabandhavirAjitam .
chandanAgarukarpUrakShodadigdhatanUruham .. 32..
sugandhakusumotpannanAnAmAlAvibhUShitam .
shuklavastraparIdhAnaM taptajAmbUnadaprabham .. 33..
svabhAsA sakalaM nityaM bhAsayantaM parAtparam .
surAsuramunIndraishcha vandyamAnapadAmbujam .. 34..
taM dR^iShTvA sarvakartAraM sAkShiNaM tamasaH param .
mahAprItisamopetAH prasannavadanekShaNAH .. 35..
sa~njAtapulakairyuktA vivashA gadgadasvarAH .
prakAshitasukhAbdhyantarnimagnA nirmalAvR^itam .. 36..
nirastanikhiladhvAntAH praNamya vasudhAtale .
shirasya~njalimAdhAya sarve devAH samAhitAH .. 37..
tuShTuvurhR^iShTamIshAnaM sarvalokapitAmaham .
muktidaM puNyaniShThAnAM duHkhadaM pApakarmaNAm .. 38..
devA UchuH \-
brahmaNe brahmavij~nAnadugdhodadhividhAyine .
brahmatattvadidR^ikShUNAM brahmadAya namo namaH .. 39..
kaShTasAgaramagnAnAM saMsArottArahetave .
sAkShiNe sarvabhUtAnAM sAkShyahInAya vai namaH .. 40..
sarvadhAtre vidhAtre cha sarvadvandvApahAriNe .
sarvAvasthAsu sarveShAM sAkShiNe vai namo namaH .. 41..
parAtparavihInAya parAya parameShThine .
parij~nAtavatAmAtmasvarUpAya namo namaH .. 42..
padmajAya pavitrAya padmanAbhasutAya cha .
padmapuShpeNa pUjyAya namaH padmadharAya cha .. 43..
surajyeShThAya sUryAdidevatAtR^iptikAriNe .
surAsuranarAdInAM sukhadAya namo namaH .. 44..
vedhase vishvanetrAya vishuddhaj~nAnarUpiNe .
vedavedyAya vedAntavidhaye vai namo namaH .. 45..
vidhaye vidhihInAya vidhivAkyavidhAyine .
vidhyuktakarmaniShThAnAM namo vidyApradAyine .. 46..
viri~nchAya vishiShTAya vishiShTArtiharAya cha .
viShaNNAnAM viShAdAbdhivinAshAya namo namaH .. 47..
namo hiraNyagarbhAya hiraNyagirivartine .
hiraNyadAnalabhyAya hiraNyAtipriyAya cha .. 48..
shatAnandAya shAntAya shA~Nkaraj~nAnadAyine .
shamAdisahitasyaiva j~nAnadAya namo namaH .. 49..
shambhave shambhubhaktAnAM sha~NkarAya sharIriNAm .
shA~Nkaraj~nAnahInAnAM shatrave vai namo namaH .. 50..
namaH svayambhuve nityaM svayambhubrahmadAyine .
svayaM brahmasvarUpAya svatantrAya parAtmane .. 51..
druhiNAya durAchAraniratasya durAtmanaH .
duHkhadAyAnyajantUnAmAtmadAya namo namaH .. 52..
vandyahInAya vandyAya varadAya parasya cha .
variShThAya variShThAnAM chaturvaktrAya vai namaH .. 53..
prajApatisamAkhyAya prajAnAM pataye sadA .
prAjApatyaviraktasya namaH praj~nAnadAyine .. 54..
pitAmahAya pitrAdikalpanArahitAya cha .
pishunAgamyadehAya peshalAya namo namaH .. 55..
jagatkartre jagadgoptre jagaddhantre parAtmane .
jagaddR^ishyavihInAya chinmAtrajyotiShe namaH .. 56..
vishvottIrNAya vishvAya vishvahInAya sAkShiNe .
svaprakAshaikamAnAya namaH pUrNaparAtmane .. 57..
stutyAya stutihInAya stotrarUpAya tattvataH .
stotRRINAmapi sarveShAM sukhadAya namo namaH .. 58..
sUta uvAcha \-
evaM brahmANamAdityAH stutvA bhaktipuraHsaram .
pR^iShTavantastu sarveShAM vedAnAmarthamAdarAt .. 59..
brahmA.api brahmavinmukhyaH sarvavedairabhiShTutaH .
prAha gambhIrayA vAchA vedAnAmarthamuttamam .. 60..
iti shrIskandapurANe sUtasaMhitAyAM chaturthasya
yaj~navaibhavakhaNDasyoparibhAge brahmagItAsUpaniShatsu
brahmagItirnAma prathamo.adhyAyaH .. 1..
\medskip\hrule\medskip
  .. atha dvitIyo.adhyAyaH ..
  .. vedArthavichAraH ..
brahmovAcha \-
avAchya eva vedArthaH sarvathA sarvachetanaiH .
tathA.api vakShye bhaktAnAM yuShmAkaM shR^iNutAdarAt .. 1..
AtmasaMj~naH shivaH shuddha eka evAdvayaH sadA .
agre sarvamidaM devA AsIttanmAtramAstikAH .. 2..
tato nAnyanmiShatki~nchitsa punaH kAlapAkataH .
prANinAM karmasaMskArAtsvashaktigatasattvataH .. 3..
sa aikShata jagatsarvaM nu sR^ijA iti sha~NkaraH .
sa punaH sakalAnetA.NllokAnAtmIyashaktitaH .. 4..
yathApUrvaM krameNaiva surA asR^ijata prabhuH .
taM haraM kechidichChanti kechidviShNuM surottamAH .. 5..
kechinmAmeva chechChanti kechidindrAdidevatAH .
kechitpradhAnaM triguNaM svatantraM kevalaM jaDam .. 6..
aNavaH kechidichChanti shabdaM kechana mohitAH .
kShaNapradhva.nsivij~nAnaM kechana bhrAntachetasaH .. 7..
shUnyasaMj~naM surAH kechinnirupAkhyaM vimohitAH .
kechidbhUtAni chechChanti nisargaM kechana bhramAt .. 8..
tatra tatraiva tarkA.nshcha pravadanti yathAbalam .
sarve vAdAH shrutismR^ityorviruddhA iti me matiH .. 9..
pApiShThAnAM tu jantUnAM tatra tatra surarShabhAH .
prAksaMsAravashAdeva jAyate ruchirAstikAH .. 10..
te.api kAlavipAkena shraddhayA pUtayA.api cha .
purAtanena puNyena devatAnAM prasAdataH .. 11..
kAlena mahatA devAH sopAnakramataH punaH .
vedamArgamimaM mukhyaM prApnuvanti chirantanam .. 12..
prAksaMsAravashAdeva ye vichintya balAbale .
vivashA vedamApannAste.api kaivalyabhAginaH .. 13..
vedamArgamimaM muktvA mArgamanyaM samAshritaH .
hastasthaM pAyasaM tyaktvA lihetkUrparamAtmanaH .. 14..
vidA vedena jantUnAM muktirmArgAntareNa chet .
tamasA.api vinA lokaM te pashyanti ghaTAdikam .. 15..
tasmAdvedodito hyarthaH satyaM satyaM mayoditam .
anyena vedito hyartho na satyaH paramArthataH .. 16..
paramArtho dvidhA prokto mayA he svargavAsinaH .
ekaH svabhAvataH sAkShAtparamArthaH sadaiva tu .. 17..
sa shivaH satyachaitanyasukhAnantasvalakShaNaH .
aparaH kalpitaH sAkShAdbrahmaNyadhyastamAyayA .. 18..
kalpitAnAmavastUnAM madhye kechana mAyayA .
paramArthatayA klR^iptAH vyavahAre surarShabhAH .. 19..
vyavahAre tu sa~NklR^iptAH kechanAparamArthataH .
AkAshAdi jagachChuktirUpe te kathite mayA .. 20..
vyAvahArikasatyArthaM sAkShAtsatyArthachidghanam .
ubhayaM vakti vedastu mArgA naivaM vadanti hi .. 21..
svapnAvasthAsu sa~NklR^iptasatyArthena samAnimAn .
arthAnevAmanantyanye mArgA he svargavAsinaH .. 22..
jAgratkAle tu sa~NklR^iptasatyArthena samAnimAn .
mArgA evAmanantyarthA kA kathA satyachidghane .. 23..
tasmAdekaikayA dR^iShTyA mArgAH satyArthabhAShiNaH .
dR^iShTyAntareNa te bhrAntA iti samya~N.hnirUpaNam .. 24..
chaitanyApekShayA chetyaM vyomAdi sakalaM jagat .
asatyaM satyarUpaM tatkumbhakuDyAdyapekShayA .. 25..
kumbhakuDyAdayo bhAvA api vyomAdyapekShayA .
asatyAH satyarUpAste shuktirUpAdyapekShayA .. 26..
jAgradityuditAvasthAmapekShya svapanAbhidhA .
avasthA.asatyarUpA hi na satyA hi divaukasaH .. 27..
tathA.api svapnadR^iShTaM tu vastu svarganivAsinaH .
sUchakaM hi bhavatyeva jAgratsatyArthasiddhaye .. 28..
tathaiva mArgAH subhrAntA api vedoditasya tu .
arthasya prAptisiddhyArthA bhavantyeva na sa.nshayaH .. 29..
tasmAdvedetarA mArgA naiva tyAjyA nirUpaNe .
vedaniShThastu tAnmArgAnkadAchidapi na spR^ishet .. 30..
vedaniShThastu mArgA.nstAnmohenApi spR^ishedyadi .
prAyashchittI bhavatyeva nAtra kAryA vichAraNA .. 31..
ekasyAmapi taiH sArdhaM pa~Nktau vedaikasaMsthitaH .
mohenApi na bhu~njIta bhuktvA chAndrAyaNaM charet .. 32..
ijyAdAnavivAhAdikAryamadhyayanaM shruteH .
yadi tairmohataH kuryAtkuryAchchAndrAyaNatrayam .. 33..
dharmAdharmAdivij~nAnaM nAdadIta shrutau sthitaH .
tebhyo mohAdapi prAj~nAH shreyaskAmI kadAchana .. 34..
vedabAhyeShu mArgeShu saMskR^itA ye narAH surAH .
te hi pAShaNDinaH sAkShAttathA taiH sahavAsinaH .. 35..
kalau jagadvidhAtAraM shivaM satyAdilakShaNam .
nArchayiShyanti vedena pAShaNDopahatA janAH .. 36..
vedasiddhaM mahAdevaM sAmbaM chandrArdhashekharam .
nArchayiShyanti vedena pAShaNDopahatA janAH .. 37..
vedoktenaiva mArgeNa bhasmaneva tripuNDrakam .
dhUlanaM nAchariShyanti pAShaNDopahatA janAH .. 38..
rudrAkShadhAraNaM bhaktyA vedoktenaive vartmanA .
na kariShyanti mohena pAShaNDopahatA janAH .. 39..
li~Nge dine dine devaM shivarudrAdisaMj~nitam .
nArchayiShyanti vedena pAShaNDopahatA janAH .. 40..
devakAryaM na kurvanti pitR^ikAryaM visheShataH .
aupAsanaM na kurvanti pAShaNDopahatA janAH .. 41..
pa~nchayaj~naM na kurvanti tathaivAtithipUjanam .
vaishvadevaM na kurvanti pAShaNDopahatA janAH .. 42..
vedabAhyena mArgeNa pUjayanti janArdanam .
nindanti sha~NkaraM mohAtpAShaNDopahatA janAH .. 43..
brahmANaM keshavaM rudraM bhedabhAvena mohitAH .
pashyantyekaM na jAnanti pAShaNDopahatA janAH .. 44..
adakShiNamanabhya~NgamadhautacharaNaM tathA .
kurvantyanagnikaM shrAddhaM pAShaNDopahatA janAH .. 45..
ekAdashyAmathAShTamyAM chaturdashyAM visheShataH .
upavAsaM na kurvanti pAShaNDopahatA janAH .. 46..
shatarudrIyachamakaistathA pauruShasUktakaiH .
nAbhiShi~nchanti deveshaM pAShaNDopahatA janAH .. 47..
chirantanAni sthAnAni shivasya paramAtmanaH .
na drakShyanti mahAbhaktyA pAShaNDopahatA janAH .. 48..
shrImaddakShiNakailAse vartanaM shraddhayA saha .
vatsaraM na kariShyanti pAShaNDopahatA janAH .. 49..
shrImadvyAghrapure puNye vartanaM bhuktimuktidam .
vatsaraM na kariShyanti pAShaNDopahatA janAH .. 50..
anyeShu cha vishiShTeShu shivasthAneShu vartanam .
vatsaraM na kariShyanti pAShaNDopahatA janAH .. 51..
dine dine tu vedAntamahAvAkyArthanirNayam .
AchAryAnna kariShyanti pAShaNDopahatA janAH .. 52..
sannyAsaM parahaMsAkhyaM nA~NgIkurvanti mohitAH .
pradveShaM cha kariShyanti pAShaNDopahatA janAH .. 53..
anyAni yAni karmANi vedenaivoditAni tu .
nAchariShyanti tAnyeva pAShaNDopahatA janAH .. 54..
smArtAnyapi cha karmANi yAni yAni surottamAH .
nAchariShyanti tAnyeva pAShaNDopahatA janAH .. 55..
UrdhvapuNDraM lalATe tu vartulaM chArdhachandrakam .
dhArayiShyanti mohena pAShaNDopahatA janAH .. 56..
sha~NkhachakragadAvajraira~NkanaM vigrahe svake .
mohenaiva kariShyanti pAShaNDopahatA janAH .. 57..
manuShyANAM cha nAmnA tu teShAmAkArato.api cha .
lA~nChitAshcha bhaviShyanti pAShaNDopahatA janAH .. 58..
bahunoktena kiM vedamaryAdAbhedanaM surAH .
shraddhayaiva kariShyanti pAShaNDopahatA janAH .. 59..
dhIrA vishiShTAshcha maheshvarasya
       prasAdayuktAshcha mahattamAshcha .
vedoditaM kevalameva devA
       mudA kariShyanti vimuktisiddhyai .. 60..
iti brahmagItAsUpaniShatsu
vedArthavichAro nAma dvitIyo.adhyAyaH .. 2..
\medskip\hrule\medskip
  .. atha tR^itIyo.adhyAyaH ..
  .. sAkShishivasvarUpakathanam ..
brahmovAcha \-
sarvAtmA sha~Nkaro nAma sAkShyeva sakalasya tu .
sAkShyabhAve jagatsAkShyaM kathaM bhAti surottamAH .. 1..
svato bhAnavihInaM hi jagatsarvaM charAcharam .
jaDatA.ajaDatA chAsya jagato bhAnavattayA .. 2..
bhAnaM vij~nAnato janyamiti kaishchidudIryate .
tanna sa~Ngatameva syAjjanyaM chejjaDameva tat .
jaDAnAmeva janyatvaM kumbhAdInAM hi sammatam .. 3..
vij~nAnaM chApi bhAnasya naivotpAdakamiShyate .
j~nAnasya bhAnarUpeNa pariNAmo na sidhyati .. 4..
avikriyatvAjj~nAnasya yadi tasyApi vikriyA .
tarhi kShIrAdivachchetyaM bhavettannaiva vedanam .. 5..
tathA bhAnasya vij~nAnaM naivArambhakamiShyate .
adravyatvAdguNatvena paraira~NgIkR^itatvataH .. 6..
asadrUpasya bhAnasya j~nAnaM nArambhakaM bhavet .
vandhyAsUnorapi j~nAnaM tadA hyArambhakaM bhavet .. 7..
prAgasadrUpabhAnasya j~nAnaM nArambhakaM bhavet .
asataH prAktvapUrvANAM visheShANAmabhAvataH .. 8..
ato vij~nAnajanyatvaM nAsti bhAnasya sarvadA .. 9..
j~nAnasyApi na janyatvamasti he svargavAsinaH .
uktanyAyena janyatvapratItirbhrAntireva hi .. 10..
bhAnasyApi tathA bhrAntirjanyatvapratibhA surAH .
bhAvatve satyajanyatvAdbhAnaM nityaM surottamAH .. 11..
yajjagadbhAsakaM bhAnaM nityaM bhAti svataH surAH .
sa eva jagataH sAkShI sarvAtmA sha~NkarAbhidhaH .. 12..
tena kalpitasambandhAdaj~nAnaM bhAti na svataH .
aj~nAnajanyaM chittaM cha rAgadveShAdayastathA .
aj~nAnaspR^iShTachaitanyAdevaM bhAnti na cha svataH .. 13..
prANashchApi tathA bAhyakaraNAni vapustathA .
chittavR^ittyabhisambandhadvAreNaiva dR^iganvayAt .. 14..
vibhAnti na svato bAhyaviShayAshcha tathaiva cha .. 15..
anumAnAdivR^ittisthaM chaitanyaM surasattamAH .
arthAnAmapi keShAM chidbhAsakaM tena sha~NkaraH .. 16..
sarvAvabhAsakaH proktastena bhAtamidaM jagat .
ato rUpANi tenaiva pashyatIshena mAnavaH .. 17..
shR^iNotyanena shabdA.nshcha gandhAnAjighrati priyAn .
anenaiva sadA vAchaM vyAkaroti tu mAnavaH .
anena svAdu chAsvAdu vijAnAti cha mAnavaH .. 18..
sha~NkarAkhyaM tu vij~nAnaM bahudhA shabdyate budhaiH .
kechid.hhR^idayamityAhurbrAhmaNA he surottamAH .. 19..
mana ityapare santaH saMj~nAnamiti kechana .
Aj~nAnamiti vidvA.nsaH kechiddhe svargavAsinaH .. 20..
vij~nAnamiti chApyanye praj~nAnamiti kechana .
medheti brAhmaNAH kechiddR^iShTirityapare budhAH .. 21..
dhR^itirityapare prAj~nA matirityapi kechana .
manISheti mahAprAj~nA jUtirityapare budhAH .. 22..
smR^itirityAstikAH kechitsa~Nkalpa iti kechana .
kraturityapare prAj~nAH kAma ityapare janAH .. 23..
vasha ityAstikAH kechitsarvANyetAni santatam .
praj~nAnasya shivasyAsya nAmadhyeyAnyasa.nshayam .. 24..
eSha brahmaiSha evendra eSha eva prajApatiH .
eSha eva hi devAshcha bhUtAni bhavanAni cha .. 25..
aNDajA jArujAshchaiva svedajA udbhijA api .
ashvA gAvashcha martyAshcha hastipUrvAstathaiva cha .. 26..
sthAvaraM ja~NgamaM chaiva tathA.anyadapi ki~nchana .
sarvametadayaM shambhuH praj~nAnaghanalakShaNaH .. 27..
pratiShThA sarvavastUnAM praj~naiShA pArameshvarI .
praj~nAnameva tadbrahma shivarudrAdi saMj~nitam .. 28..
evaMrUpaparij~nAnAdeva martyo.amR^ito bhavet .
na karmaNA na prajayA na chAnyenApi kenachit .. 29..
brahmavedanamAtreNa brahmApnotyeva mAnavaH .
atra nAstyeva sandehastrirvaH shapathayAmyaham .. 30..
tadvidyAviShayaM brahma satyaj~nAnasukhAdvayam .
saMsArake guhAvAchye mAyAj~nAnAdisaMj~nite .
nihitaM brahma yo veda paramavyomasaMj~nite .. 31..
so.ashnute sakalAnkAmAnakrameNa surarShabhAH .
viditabrahmarUpeNa jIvanmukto na sa.nshayaH .. 32..
pratyagaj~nAnavij~nAnamAyAshaktestu sAkShiNam .
ekaM brahma cha sampashyansAkShAdbrahmaviduttamaH .. 33..
brahmarUpAtmanastasmAdetasmAchChaktimishritAt .
apa~nchIkR^ita AkAshaH sambhUto rajjusarpavat .. 34..
AkAshAdvAyusa~nj~nastu sparsho.apa~nchIkR^itaH punaH .
vAyoragnistathA chAgnerApa adbhyo vasundharA .. 35..
tAni bhUtAni sUkShmANi pa~nchIkR^itya shivAj~nayA .
tebhya eva surA sR^iShTaM brahmANDAkhyamidaM mayA .. 36..
bhuvanAni vishiShTAni nirmitAni shivAj~nayA .
brahmANDasyodare devA devAshcha vividhA amI .. 37..
devAdayo manuShyAshcha tathA pashvAdayo janAH .
tattatkarmAnurUpeNa mayA sR^iShTAH shivAj~nayA .. 38..
asthisnAyvAdirUpaM yachCharIraM bhAti dehinAm .
tasmAtprANamayo hyAtmA vibhinnashchAntaro yataH .. 39..
yo.ayaM prANamayo hyAtmA bhAti sarvasharIriNAm .
tato manomayo hyAtmA vibhinnashchAntaratvataH .. 40..
yo.ayaM manomayo hyAtmA bhAti sarvasharIriNAm .
vij~nAnamaya AtmA cha tato.anyashchAntaro yataH .. 41..
vij~nAnamaya AtmA yo vibhAti sakalAtmanAm .
Anandamaya AtmA cha  tato.anyashchAntaro yataH .. 42..
yo.ayamannamayaH so.ayaM pUrNaH prANamayena tu .
manomayena prANo.api tathA pUrNaH svabhAvataH .. 43..
tathA manomayo hyAtmA pUrNo j~nAnamayena tu .
Anandena sadA pUrNastathA j~nAnamayaH surAH .. 44..
tathA.a.anandamayashchApi brahmaNA.anyena sAkShiNA .
sarvAntareNa sampUrNo brahma nAnyena kenachit .. 45..
yadidaM brahma puchChAkhyaM satyaj~nAnAdvayAtmakam .
sa rasaH sarvadA sAkShAnnAnyathA surapu~NgavAH .. 46..
etameva rasaM sAkShAllabdhvA dehI sanAtanam .
sukhI bhavati sarvatra nAnyathA surasattamAH .. 47..
asatyasminparAnande svAtmabhUte.akhilAtmanAm .
ko jIvati naro devAH ko vA nityaM vicheShTate .. 48..
tasmAtsarvAtmanAM chitte bhAsamAno raso haraH .
Anandayati duHkhADhyaM jIvAtmAnaM kR^ipAbalAt .. 49..
yadA hyevaiSha etasminnadR^ishyatvAdilakShaNe .
nirbhedaM paramekatvaM vindate surasattamAH .. 50..
tadaivAbhayamatyantaM kalyANaM paramAmR^itam .
svAtmabhUtaM paraM brahma sa yAti svargavAsinaH .. 51..
yadA hyevaiSha etasminnalpamatyantaraM naraH .
vijAnAti tadA tasya bhayaM syAnnAtra sa.nshayaH .. 52..
sarveShAmAtmabhUtaM yadbrahma satyAdilakShaNam .
udAste tatsurashreShThA yathAjAtajanaM prati .. 53..
samyagj~nAnaikaniShThAnAM tadeva paramaM padam .
tadA svAtmatayA bhAti kevalaM kR^ipayA surAH .. 54..
tattvevAdhItavedasya sahA~NgaiH surapu~NgavAH .
mananena vihInasya bhayahetuH sadA bhavet .. 55..
bhIShA.asmAtpavate vAyurbhIShodeti divAkaraH .
bhIShA.asmAdagnirindrashcha mR^ityurdhAvati pa~nchamaH .. 56..
asyaivAnandaleshena stambAntA viShNupUrvakAH .
bhavanti sukhino devAstAratamyakrameNa tu .. 57..
tattatpadaviraktasya shrotriyasya prasAdinaH .
svarUpabhUta AnandaH svayaM bhAti pade yathA .. 58..
ayameva shivaH sAkShAdAdityahR^idaye tathA .
anyeShAM hR^idaye chaiva bhAti sAkShitayA svayam .. 59..
vihAya sAkShyaM dehAdi mAyAntaM tu vivekataH .
sarvasAkShiNamAtmAnaM yaH pashyati sa pashyati .. 60..
rudranArAyaNAdInAM stambAntAnAM cha sAkShiNam .
evaM tarkapramANAbhyAM yaH pashyati sa pashyati .. 61..
yasyaivaM tarkamAnAbhyAmasti vij~nAnamAstikAH .
sa lokAdakhilAdasmAdvibhidyAtmAnamAtmanA .. 62..
annAdInakhilAnkoshAnAbhAsena vibhAsitAn .
upasa~NkrAmatIshasya prasAdAdeva kevalAt .. 63..
yato vAcho nivartante nimittAnAmabhAvataH .
nirvisheShe shive shabdaH kathaM devAH pravartate .. 64..
visheShaM ka~nchidAshritya khalu shabdaH pravartate .
yasmAdetanmanaH sUkShmAM vyAvR^ittaM sarvagocharam .. 65..
yasmAchChrotratvagakShyAdikhAni karmendriyANi cha .
vyAvR^ittAni parAgvastuviShayANi surottamAH .. 66..
tadbrahmAnandamadvandvaM nirguNaM satyachidghanam .
viditvA svAtmarUpeNa na bibheti kutashchana .. 67..
evaM yastu vijAnAti svagurorupadeshataH .
sa sAdhvasAdhukarmabhyAM sadA na tapati prabhuH .. 68..
tapyatApakarUpeNa vibhAtamakhilaM jagat .
pratyagAtmatayA bhAti j~nAnAdvedAntavAkyajAt .. 69..
kartA kArayitA karma karaNaM kAryamAstikaH .
sarvamAtmatayA bhAti prasAdAtparameshvarAt .. 70..
pramAtA cha pramANaM cha prameyaM pramitistathA .
sarvamAtmatayA bhAti prasAdAtpArameshvarAt .. 71..
niyojyashcha niyogashcha sAdhanAni niyojakaH .
sarvamAtmatayA bhAti prasAdAtpArameshvarAt .. 72..
bhoktA bhojayitA bhogo bhogopakaraNAni cha .
sarvamAtmatayA bhAti prasAdAtpArameshvarAt .. 73..
grAhakashcha tathA grAhyaM grahaNaM sarvatomukham .
sarvamAtmatayA bhAti prasAdAtpArameshvarAt .. 74..
anyathAj~nAnamaj~nAnaM sa.nshayaj~nAnameva cha .
sarvamAtmatayA bhAti prasAdAtpArameshvarAt .. 75..
ghaTaj~nAnaM paTaj~nAnaM kuDyAdij~nAnameva cha .
sarvamAtmatayA bhAti prasAdAtpArameshvarAt .. 76..
ghaTaH kuDyaM kusUlaM cha paTaH pAtraM cha parvataH .
sarvamAtmatayA bhAti prasAdAtpArameshvarAt .. 77..
pAtAlAdyAshcha lokAshcha satyalokAdayo.api cha .
sarvamAtmatayA bhAti prasAdAtpArameshvarAt .. 78..
brahmANDaM tatra klR^iptAnAmaNDAnAM shatakoTayaH .
sarvamAtmatayA bhAti prasAdAtpArameshvarAt .. 79..
samudrAshcha taTAkAshcha nadyaH sarvanadA api .
sarvamAtmatayA bhAti prasAdAtpArameshvarAt .. 80..
merumandArapUrvAshcha parvatAshcha mahattarAH .
sarvamAtmatayA bhAti prasAdAtpArameshvarAt .. 81..
vanAni vanadeshAshcha vanyAni vividhAni cha .
sarvamAtmatayA bhAti prasAdAtpArameshvarAt .. 82..
vR^ikShAshcha vividhAH kShudratR^iNagulmAdayo.api cha  .
sarvamAtmatayA bhAti prasAdAtpArameshvarAt .. 83..
AkAshAdIni bhUtAni bhautikAnyakhilAnyapi .
sarvamAtmatayA bhAti prasAdAtpArameshvarAt .. 84..
shabdasparshAditanmAtrarUpANi sakalAni cha .
sarvamAtmatayA bhAti prasAdAtpArameshvarAt .. 85..
kR^imikITapata~NgAshcha kShudrA api cha jantavaH .
sarvamAtmatayA bhAti prasAdAtpArameshvarAt .. 86..
pashavashcha mR^igAshchaiva pannagAH pApayonayaH .
sarvamAtmatayA bhAti prasAdAtpArameshvarAt .. 87..
manuShyAshchaiva mAta~NgA ashvA uShTrAH kharA api .
sarvamAtmatayA bhAti prasAdAtpArameshvarAt .. 88..
yakSharAkShasagandharvapramukhAH siddhakinnarAH .
sarvamAtmatayA bhAti prasAdAtpArameshvarAt .. 89..
karmadevAshcha devAshcha devarAjo virAT svarAT .
sarvamAtmatayA bhAti prasAdAtpArameshvarAt .. 90..
ahaM cha madvibhUtishcha viShNubhaktAshcha dehinaH .
sarvamAtmatayA bhAti prasAdAtpArameshvarAt .. 91..
viShNurviShNuvibhUtishcha viShNubhaktAshcha dehinaH .
sarvamAtmatayA bhAti prasAdAtpArameshvarAt .. 92..
rudro rudravibhUtishcha rudrabhaktAshcha dehinaH .
sarvamAtmatayA bhAti prasAdAtpArameshvarAt .. 93..
IshvarastadvibhUtishcha tadIyAH sarvadehinaH .
sarvamAtmatayA bhAti prasAdAtpArameshvarAt .. 94..
sadAshivasamAkhyastu shivastasya vibhUtayaH .
sarvamAtmatayA bhAti prasAdAtpArameshvarAt .. 95..
dishashcha vidishashchaiva sAbhraM nakShatramaNDalam .
sarvamAtmatayA bhAti prasAdAtpArameshvarAt .. 96..
vAsudevaH sa~NkarShaNaH pradyumnashchAniruddhakaH .
sarvamAtmatayA bhAti prasAdAtpArameshvarAt .. 97..
matsyaH kUrmo varAhashcha nArasi.nho.atha vAmanaH .
tadbhaktAshcha tathA bhAnti prasAdAtpArameshvarAt .. 98..
AshramAshcha tathA varNAH sa~NkarA vividhA api .
sarvamAtmatayA bhAti prasAdAtpArameshvarAt .. 99..
niShiddhaM chAniShiddhaM cha niShedhA vidhayo.api cha .
sarvamAtmatayA bhAti prasAdAtpArameshvarAt .. 100..
sharIramindriyaM prANo mano buddhiraha~NkR^itiH .
sarvamAtmatayA bhAti prasAdAtpArameshvarAt .. 101..
kAmakrodhAdayaH sarve tathA shAntyAdayo.api cha .
sarvamAtmatayA bhAti prasAdAtpArameshvarAt .. 102..
jIvAtmA paramAtmA cha tayorbhedashcha bhedakaH .
sarvamAtmatayA bhAti prasAdAtpArameshvarAt .. 103..
jaDashaktiprabhedAshcha chichChaktistadbhidA.api cha .
sarvamAtmatayA bhAti prasAdAtpArameshvarAt .. 104..
astishabdoditA arthA nAstishabdoditA api .
sarvamAtmatayA bhAti prasAdAtpArameshvarAt .. 105..
AtmA nAma surAH svena bhAsA yo bhAti santatam .
tameva tvamahaMshabdapratyayAbhyAM tu jantavaH .. 106..
vyavahAre vijAnanti na jAnantyeva te.arthataH .
arthatashchAsya vettAro na vidyante.advayatvataH .. 107..
evamAtmAnamadvaitamAtmanA veda yaH sthiram .
so.ayamarthamimaM nityaM gAyannAste svabhAvataH .. 108..
yathA nartanamIshasya svabhAvAllokarakShakam .
tathA vidyA vinodAkhyA gItirlokopakAriNI .. 109..
yathaivAdigurorgItirlokAnAM hitakAriNI .
tathaivAsya gurorgItirlokAnAM hitakAmyayA .. 110..
AptakAmasya rudrasya gItirvyAkhyAnalakShaNA .
paropakAriNI tadvadgItirasyApi sadguroH .. 111..
laukikeShvapi gAneShu prasAdaM kurute shivaH .
kiM punarvaidike gAne tato gAnaM samAshrayet .. 112..
vyAkhyAgAneShvashaktastu shivamuddishya bhaktitaH .
laukikImapi vA gItiM kuryAnnityamatandritaH .. 113..
gItij~nAnaM shivaprApteH sutarAM kAraNaM bhavet .
gItij~nAnena yogaH syAdyogAdeva shivaikyatA .. 114..
gItij~no yadi yogena na yAti parameshvaram .
pratibandhakabAhulyAttasyaivAnucharo bhavet .. 115..
kevalaM laukikaM gAnaM na kuryAnmohato.api vA .
yadi kuryAtpramAdena prAyashchittI bhaved.hvijaH .. 116..
atastu saMsAravinAshane rataH
       shrutipramANena cha tarkavartmanA .
prabodhamAsAdya shivasya taM punaH
       sadaiva gAyanvicharedimAM mahIm .. 117..
ityupaniShatparatattvaviShayA vaH
       satyamuditA sakaladuHkhanihantrI .
 kaShTahR^idayasya manujasya na deyA
       bhaktisahitasya tu shivasya khalu deyA .. 118..
iti brahmagItAsUpaniShatsu
sAkShishivasvarUpakathanaM nAma tR^itIyo.adhyAyaH .. 3..
\medskip\hrule\medskip
  .. atha chaturtho.adhyAyaH ..
  .. talavakAropaniShadvyAkhyAkathanam ..
brahmovAcha \-
asti devaH svataH siddhaH sAkShI sarvasya sarvadA .
saMsArArNavamagnAnAM sAkShAtsaMsAramochakaH .. 1..
sarveShAM tu manastena preritaM niyamena tu .
viShaye gachChati prANashcheShTate vAgvadatyapi .. 2..
chakShuH pashyati rUpANi shrotraM shabdaM shR^iNotyapi .
anyAni khAni sarvANi tenaiva preritAni tu .. 3..
svaM svaM viShayamuddishya pravartante nirantaram .
pravartakatvaM chApyasya mAyayA na svabhAvataH .. 4..
indriyANAM tu sattA cha naiva svAbhAvikI matA .
taptAyaH piNDavattasya sattyayaiva surarShabhAH .. 5..
shrotramAtmani chAdhyastaM svayaM devo maheshvaraH .
anupravishya shrotrasya dadAti shrotratAM haraH .. 6..
mana Atmani chAdhyastaM pravishya parameshvaraH .
manastvaM tasya sattvastho dadAti niyamena tu .. 7..
vAcho vAktvamanuprApya prANasya praNatAM haraH .
dadAti niyamenaiva chakShuShTvaM chakShuShastathA .. 8..
anyeShAmindriyANAM tu kalpitAnAmapIshvaraH .
tattadrUpamanuprApya dadAti niyamena tu .. 9..
tatra chakShushcha vAk.hchaiva manashchAnyAni khAni cha .
na gachChanti svaya~njyotiHsvabhAve paramAtmani .. 10..
sa devo viditAdanyastathaivAviditAdapi.
vAchA cha manasA chaiva chakShuShA cha tathaiva cha .. 11..
shrotreNApi surashreShThAH prANenAnyena kenachit .
na shakyo gocharIkartuM satyameva mayoditam .. 12..
yasyedamakhilaM nityaM gocharaM rUpavadraveH .
tadeva paramaM brahma vitta yUyaM sanAtanam .. 13..
evaM jAnanti ye dhIrAstarkatashcha pramANataH .
gurUktyA svAnubhUtyA cha bhavanti khalu te.amR^itAH .. 14..
suj~nAtamiti tadbrahma manudhvaM yadi he surAH .
dabhrameva hi tatsAkShi brahma vedyaM kathaM bhavet .. 15..
yasya svAtmatayA brahma viditaM karmatAM vinA .
tasya tajj~nAnakartR^itvavihInasya mataM hi tat .. 16..
yasyAmataM tasya mataM mataM yasya na veda saH .
avij~nAtaM vijAnatAM vij~nAtamavijAnatAm .. 17..
brahmaj~nAne ghaTaj~nAne bhrAntij~nAne.api chAstikAH .
naiva kartR^i na karmApi brahma chitkevalaM bhavet .. 18..
yasya kartR^itayA bhAtaM brahmAkartR^i surottamAH .
tasya brahmAmataM yasmAtkarma tasya mataM hi tat .. 19..
yasya karmatayA bhAtaM brahmAkarma surottamAH .
tasya brahmAmataM yasmAtkarma tasya mataM hi tat .. 20..
akartraviShayapratyakprakAshaH svAtmanaiva tu .
vinA tarkapramANAbhyAM brahma yo veda veda saH .. 21..
evaMrUpaparij~nAnamapi dR^ishyatayaiva tu .
yasya bhAti sa tatsAkShI brUta brahmAtmavitkatham .. 22..
brahmAvidyA.api j~nAtA chedvedyA bhavati kumbhavat .
avedyaM brahma vedyaM syAdvedyavidyAbhisa~NgamAt .. 23..
vettA.api vidyAsambandhAtsavisheSho bhaved.hdhruvam .
nirvisheShaM paraM brahma tato vidvAnna chAtmavit .. 24..
vidyAyA Ashrayatvena viShayatvena vA bhavet .
brahma naivAnyathA tatra brahma brahma bhavetkatham .. 25..
brahmasambandhahInA chedvidyA brahma tu veditum .
ashakyaM tatra he devAH ko vA brahmAtmavidbhavet .. 26..
brahmaNyadhyastamAyAdinivR^ittiM kurute tu sA .
vidyA yadi na mAyAyAH pratyagAtmanyasambhavAt .. 27..
pratyagAtmA paraM jyotirmAyA sA tu mahattamaH .
tathA sati kathaM mAyAsambhavaH pratyagAtmani .. 28..
tasmAttarkapramANAbhyAM svAnubhUtyA cha chid.hghane .
svaprakAshaikasa.nsiddhernAsti mAyA parAtmani .. 29..
vyAvahArikadR^iShTyeyaM vidyA.avidyA na chAnyathA .
tattvadR^iShTyA tu nAstyeva tattvamevAsti kevalam .. 30..
vyAvahArikadR^iShTistu prakAshAvyabhichArataH .
prakAsha eva satataM tasmAdadvaitameva hi .. 31..
advaitamiti choktishcha prakAshAvyabhichArataH .
prakAsha eva satataM tasmAnmaunaM hi yujyate .. 32..
pratyakShAdi pramANaishcha tarkaiH shrutyA tathaiva cha .
svagurorupadeshena prasAdena shivasya tu .. 33..
arjitairapi dharmaishcha kAlapAkena dhArmikAH .
artho mahAnayaM bhAti shA~NkaraH puruShasya tu .. 34..
yasya prakAshitaH sAkShAdayamartho mahattaraH .
tasya nAsti kriyAH sarvA j~nAnaM chApyadvayatvataH .. 35..
ayamartho mahAnyasya svata eva prakAshitaH .
na sa jIvo na cha brahma na chAnyadapi ki~nchana .. 36..
ayamartho mahAnyasya svata eva prakAshitaH .
na tasya varNA vidyante nAshramAshcha tathaiva cha .. 37..
ayamartho mahAnyasya svata eva prakAshitaH .
na tasya dharmo.adharmashcha na niShedho vidhirna cha .. 38..
etamarthaM mahAntaM yaH prAptaH shambhoH prasAdataH .
sa shambhureva naivAnya iti me nishchitA matiH .. 39..
etamarthaM mahAntaM yaH prAptaH shambhoH prasAdataH .
tasyAhaM vaibhavaM vaktuM na shaktaH satyamIritam .. 40..
etamarthaM mahAntaM yaH prAptaH shambhoH prasAdataH .
vaibhavaM tasya viShNushcha na shakto vaktumAstikAH .. 41..
etamarthaM mahAntaM yaH prAptaH shambhoH prasAdataH .
vaibhavaM tasya rudrashcha na shakto vaktumAstikAH .. 42..
etamarthaM mahAntaM yaH prAptaH shambhoH prasAdataH .
vaibhavaM tasya vedAshcha na shaktA vaktumAstikAH .. 43..
asmindehe yadi j~nAtaH purokto.arthomahAnayam .
sa sAkShAtsatyamadvaitaM nirvANaM yAti mAnavaH .. 44..
asmindehe na vij~nAtaH purokto.artho mahAnyadi .
vinaShTireva mahatI tasya naiva parA gatiH .. 45..
svasharIre.anyadeheShu samaM nishchitya taM dR^iDham .
atha dhIrA na jAyante hyamR^itAshcha bhavanti hi .. 46..
baddho mukto mahAvidvAnaj~na ityAdibhedataH .
eka eva sadA bhAti nAneva svapnavatsvayam .. 47..
ataH svamuktyaivAnyeShAmAbhAsAnAmapi dhruvam .
muktiM jAnAti he devA AtmanAmAtmavidvaraH .. 48..
svasa.nsAradashAyAM tu svabhrAntyA sarvadehinAm .
AbhAsAnAM cha sa.nsAraM veda muktiM tathaiva cha .. 49..
prArabdhakarmaparyantaM kadAchitparamAtmavit.
jagajjIvAdikaM veda kadAchinnaiva veda tat .. 50..
kadAchidbrahma jAnAti pratItamakhilaM surAH .
kadAchinnaiva jAnAti svabhAvAdeva tattvavit .. 51..
jagajjIvAdirUpeNa yadA brahma vibhAsate .
tadA duHkhAdibhogo.api bhAti chAbhAsarUpataH .. 52..
yadA brahmAtmanA sarvaM vibhAti svata eva tu .
tadA duHkhAdibhogo.ayamAbhAso na vibhAsate .. 53..
jagajjIvAdirUpeNa pashyannapi parAtmavit .
na tatpashyati tadrUpaM brahmavastveva pashyati .. 54..
brahmaNo.anyatsadA nAsti vastuto.avastuto.api cha .
tathA sati shivAdanyatkathaM pashyati tattvavit .. 55..
brahmarUpeNa vA sAkShAjjagajjIvAtmanA.athavA .
yathA yathA prathA sAkShAdbrahma bhAti tathA tathA .. 56..
yathA yathA.avabhAso.ayaM svabhAvAdeva bhAsate .
tathA tathA.anusandhAnaM yoginaH svAtmavedanam .. 57..
nAmatashchArthatashchApi mahAdevo yadi prabhuH .
kiM jahAti tadA vidvAnkiM gR^ihNAti surarShabhAH .. 58..
grAhyaM vA sha~NkarAdanyattyAjyaM vA yadi vidyate .
mahattvaM tasya hIyeta svabhAvo na vihanyate .. 59..
mahattvaM naiva dharmo.asya bhedAbhAvAtparAtmanaH .
dharmadharmitvavArtA cha bhede sati hi vidyate .. 60..
bhedo.abhedastathA bhedAbhedaH sAkShAtparAtmanA .
nAsti svAtmAtirekeNa svayamevAsti sarvadA .. 61..
brahmaiva vidyate sAkShAdvastuto.avastuto.api cha .
tathA sati shivaj~nAnI kiM gR^ihNAti jahAti kim .. 62..
mAyayA vidyate sarvamiti kechana mohitAH .
shivarUpAtirekeNa nAsti mAyA cha vastutaH .. 63..
mAyayA vA shivAdanyadvidyate chechChivasya tu .
mahattvaM paramaM sAkShAddhIyate surapu~NgavAH .. 64..
mahattvasya tu sa~Nkocho nAsti samya~NnirUpaNe .
asti chedapramANaM syAchChrutiH satyArthavAdinI .. 65..
tasmAdasti mahAdeva eva sAkShAtsvayamprabhuH .
AnandarUpaH sampUrNo na tato.anyattu ki~nchana .. 66..
iyameva tu tarkANAM niShThAkAShThA surottamAH .
pratyakShAdipramANAnAM vedAntAnAmapIshvarAH .. 67..
smR^itInAM cha purANAnAM bhAratasya tathaiva cha .
vedAnusArividyAnAmanyAsAmAstikottamAH .. 68..
shaivAgamAnAM sarveShAM viShNuproktAgamasya cha .
asmaduktAgamasyApi surAH sUkShmanirUpaNe .. 69..
buddhAgamAnAM sarveShAM tathaivArhAgamasya cha .
yakShagandharvasiddhAdinirmitasyAgamasya cha .. 70..
paramAdvaitavij~nAnaM kasya martyasya sidhyati .
kasya devasya vA sAkShAchChivasyaiva hi sidhyati .. 71..
paramAdvaitavij~nAnaM shivasyAmitatejasaH .
svabhAvasiddhaM devyAshcha shivAyA AstikottamAH .. 72..
prasAdAdeva rudrasya shivAyAshcha tathaiva cha .
paramAdvaitavij~nAnaM viShNoH sAkShAnmamApi cha .. 73..
virAT.hsa~nj~nasya devasya svarAT.hsa~nj~nasya chAtmanaH .
samrAT.hsa~nj~nasya chAnyeShAM prasAddAeva vedanam .. 74..
yuShmAkamapi sarveShAM shivasya paramAtmanaH .
paramAdvaitavij~nAnaM prasAdAdeva nAnyathA .. 75..
yakSharAkShasagandharvasiddhAdInAmapIshvarAH .
paramAdvaitavij~nAnaM prasAdAdeva shUlinaH .. 76..
manuShyANAM cha sarveShAM pashvAdInAM tathaiva cha .
paramAdvaitavij~nAnaM prasAdAdeva shUlinaH .. 77..
prasAde sati kITo vA pata~Ngo vA naro.atha vA .
devo vA dAnavo vA.api labhate j~nAnamuttamam .. 78..
eSha eva hi jantUnAM paraj~nAnaM dadAti cha .
na viShNurnAhamanyashcha satyameva mayoditam .. 79..
AdAne cha tathA dAne na svatantro mahAn hariH .
tathaivAhaM surashreShThAH satyameva mayoditam .. 80..
svatantraH shiva evAyaM sa hi sa.nsAramochakaH .
taM vinA na mayoddhartuM shakyate sa.nsR^iterjanaH .. 81..
viShNunA cha pareNApi mahAdevaM ghR^iNAnidhim .
vinA jantuM samuddhartuM shakyate na hi sattamAH .. 82..
darvInyAyena sa.nsArAduddharAmi janAnimAn .
na svAtantryeNa he devAH sAkShAdviShNustathaiva cha .. 83..
devadevasya rudrasya svarUpaM tasya vaibhavam .
ko vA jAnAti nAstyeva svayaM jAnAti vA na vA .. 84..
durvij~neyo mahAdevo mahatAmapi dehinAm .
prasAdena vinA devAH satyameva mayoditam .. 85..
purA surANAM sarveShAmasurANAM durAtmanAm .
mahAmohena sa~NgrAmaH sa~njAto durnivArakaH .. 86..
asuraiH pIDitA devA balavadbhiH surA bhR^isham .
tAndR^iShTvA bhagavAnIshaH sarvaj~naH karuNAkaraH .. 87..
devAnAM vijayaM devA asurANAM parAjayam .
dadau tena suraiH shIghramasurAstu parAjitAH .. 88..
avij~nAya mahAdevavaibhavaM parimohitAH .
vayaM vijayamApannA asurAshcha parAjitAH .. 89..
ityahammAnasa~nChannAH sarve devAH purAtanAH .
atIva prItimApannA abhavansurapu~NgavAH .. 90..
punarvishvAdhiko rudro bhagavAnkaruNAnidhiH .
svasya darshayituM teShAM durj~neyatvaM tathaiva cha .. 91..
teShAM bhrAntinivR^ityarthamapi sAkShAnmaheshvaraH .
AvirbabhUva sarvaj~no yakSharUpeNa he surAH .. 92..
taM dR^iShTvA yakShamatyantaM vismayena sahAmarAH .
vichArya sarve sambhUya kimidaM yakShamityapi .. 93..
punaragniM samAhUya devAH sarve vimohitAH .
abruva.nstvaM vijAnIhi kimetadyakShamityapi .. 94..
agnistathA karomIti prochya yakShaM gato.abhavat .
yakSharUpo mahAdevaH ko.asItyAhAnalaM prati .. 95..
agnirvA ahamasmIti yakShaM pratyAha so.api cha .
so.api provAcha bhagavA.nstvayi kiM vIryamityapi .. 96..
idaM sarvaM daheyaM yadidaM bhUmyAM vyavasthitam .
ityAhAgnistR^iNaM tasmai nidhAya parameshvaraH .. 97..
etaddaheti bhagavAnsmayamAno.abhyabhAShata .
agniH sarvajavenaiva taddagdhuM tR^iNamAstikAH .. 98..
ashakto lajjayA yukto bhIto.agachChatsurAnprati .
mAyA tasyaiva vij~nAtuM na shakyaM vaibhavaM surAH .. 99..
vitta yUyaM mahAyAsAdityAhAgniH surAnprati .
tachChrutvA vAyumAhUya vijAnIhIti chAbruvan .. 100..
so.api gatvA tathA tena yakSharUpeNa shambhunA .
bhR^ishaM pratihato bhUtvA tathA.agachChatsurAnprati .. 101..
punarindraH svayaM mohAdahantAka~nchukAvR^itaH .
vij~nAtuM yakShamagamatsa tatraiva tirodadhe .. 102..
indro.atIva viShaNNastu mahAtApasamanvitaH .
vidyArUpAmumAM devIM dhyAtvA kAruNikottamAm .. 103..
laukikairvaidikaiH stotraistuShTAva parameshvarIm .
sA shivA karuNAmUrtirjaganmAtA trayImayI .. 104..
shivAbhinnA parAnandA sha~NkarasyApi sha~NkarI .
svechChayA himavatputrI svabhaktajanavatsalA .. 105..
mahAdevasya mAhAtmyaM durj~neyaM sarvajantubhiH .
iti darshayituM devI tatraivAvirabhUtsvayam .. 106..
tAmArAdhya shivAmindraH shobhamAnAM tu sarvataH .
umAM parvatarAjendrakanyakAmAha vajrabhR^it .. 107..
kimetadyakShamatraiva prAdurbhUtaM tirohitam .
vaktumarhasi deveshi mama kAruNikottame .. 108..
devI paramakAruNyAdbrahma me patiratra tu .
prAdurbhUtaM tirobhUtamityAhAdeShanAyikA .. 109..
durvij~neyo mahAdevo viShNoH sAkShAdajasya cha .
anyeShAmapi devAnAM tavApi maghavanbhR^isham .. 110..
pradarshayitumIshAno durj~neyatvaM svakaM param .
AvirbhUto na chAnyena kAraNena surAdhipa .. 111..
sa eva sarvadevAnAM tavApi vijayapradaH .
parAjayakaro.anyeShAM tameva sharaNaM vraja .. 112..
ityuktvA sA mahAdevI chidrUpA sarvasAkShiNI .
bhaktAnAM pAshahantrI tu tatraivAntarhitA.abhavat .. 113..
punardevA mahAdevaM mahAkAruNikottamam .
durvij~neyaM surashreShThAH svatantraM bhaktimuktidam . bhuktimuktidam?
viduH sunishchitaM tyaktvA mAtsaryaM bhavakAraNam .. 114..
prasAde sati vij~nAtuM shakyate parameshvaraH .
prasAdena vinA naiva shakyate sarvajantubhiH .. 115..
prasAdena vinA viShNurna jAnAti maheshvaram .
tathA chAhaM na jAnAmi devatAH sakalA api .. 116..
prasAdasya tu siddhyarthaM khalu sarvaM surarShabhAH .
prasAdena vinA devaM ye jAnanti surarShabhAH .. 117..
te jAnanti vinA ghrANaM gandhaM hastena kevalam .
prasAdo nAma rudrasya karmasAmye tu dehinAm .. 118..
deshikAlokanAjjAto vishiShTAtishayaH surAH .
prasAdasya svarUpaM tu mayA nArAyaNena cha .. 119..
rudreNApi surA vaktuM na shakyaM kalpakoTibhiH .
kevalaM li~NgagamyaM tu na pratyakShaM shivasya cha .. 120..
shivAyAshcha hareH sAkShAnmama chAnyasya chAstikAH .
praharShaH svaranetrA~NgavikriyA kampanaM tathA .. 121..
stobhaH sharIrapAtashcha bhramaNaM chodgatistathA .
AkAshe.avasthitirdevAH sharIrAntarasa.nsthitiH .. 122..
adarshanaM cha dehasya prakAshatvena bhAsanam .
anadhItasya shAstrasya svata eva prakAshanam .. 123..
nigrahAnugrahe shaktiH parvatAdeshcha bhedanam .
evamAdIni li~NgAni prasAdasya surarShabhAH .. 124..
tIvrAttIvrataraH shambhoH prasAdo na samo bhavet .
eva.nrUpaH prasAdashcha shivayA cha shivena cha .. 125..
j~nAyate na mayA nAnyairnaiva nArAyaNena cha .
ataH sarvaM parityajya shivAdanyattu daivatam .. 126..
tameva sharaNaM gachChetsadyo muktiM yadIchChati .
viShNubhaktyA cha madbhaktyA nAsti nAsti parA gatiH .. 127..
shambhubhaktyaiva sarveShAM satyameva mayoditam .
shambhubhaktasya dehe.asminprasAdo gamyate yathA .. 128..
na tathA viShNubhaktasya na madbhaktasya dehinaH .
tasmAnmumumukShurmAM viShNumapi tyaktvA maheshvaram .. 129..
AshrayetsarvabhAvena prasAdaM kurute hi saH .
prasAde sati devesho durj~neyo.api surarShabhAH .. 130..
shakyate manujairdraShTuM pratyagAtmatayA sadA .
prasAde sati devesho durj~neyo.api surarShabhAH .. 131..
shakyate manujairdraShTuM sadA mUrtyAtmanaiva tu .
prasAde sati devesho durj~neyo.api surarShabhAH .. 132..
shakyate manujairdraShTuM sadA sarvAtmarUpataH .
sarvasAkShiNamAtmAnaM viditvA sakalaM jagat .. 133..
sAkShimAtratayA nityaM yaH pashyati sa pashyati .
paramAdvaitaniShThA hi niShThAkAShThA sudurlabhA .. 134..
shivAdanyatayA bhrAntyA dvaitaM vA veda chetpashuH .
paramAdvaitavij~nAnI svayaM tu paradevatA .. 135..
tasyaiva paramA muktirna hi sa.nshayakAraNam .
gautamasya muneH shApAddadhIchasya cha shApataH .. 136..
janmAntarakR^itAtpApAdayamartho na rochate .
mahApApavatAM nRRINAM paramAdvaitavedane .. 137..
pradveSho jAyate sAkShAdvedajanye shive.api cha .
mahApAvatAM nRRINAM shivaj~nAnasya sAdhane .. 138..
sarvA~NgoddhUlane tiryaktripuNDrasya cha dhAraNe .
rudrAkShadhAraNe rudrali~Ngasyaiva tu pUjane .. 139..
pradveSho jAyate nityaM shivashabdajape.api cha .
anekajanmasiddhAnAM shrautasmArtAnuvartinAm .. 140..
paramAdvaitavij~nAnaM jAyate surapu~NgavAH .
paramAdvaitavij~nAnI mayA.a.arAdhyaH sadaiva tu .. 141..
nArAyaNena rudreNa tathA devairvisheShataH .
paramAdvaitavij~nAnI yatra kutra sthitaH surAH .. 142..
tatra sannihitA muktirnAtra kAryA vichAraNA .
paramAdvaitavij~nAnaniShThasyaiva mahAtmanaH .. 143..
shushrUShA kriyate yena tatpAdau mama mastake .
paramAdvaitavij~nAnaniShThasya parayoginaH .. 144..
samaM devA na pashyAmi na harirna maheshvaraH .
paramAdvaitavij~nAnaniShThAya parayogine .. 145..
sharIramarthaM prANA.nshcha pradadyAchChraddhayA saha .
paramAdvaitavij~nAnaniShThasya parayoginaH .. 146..
shushrUShA shuddhavidyAyAH sAdhanaM hi na sa.nshayaH .
vedabAhyeShu tantreShu narANAM vAsanA.api cha .. 147..
kutarkavAsanA lokavAsanA cha surarShabhAH .
putramitrakalatrAdau vAsanA chArthavAsanA .. 148..
dehendriyamanobuddhiprANAdAvapi vAsanA .
pANDityavAsanA bhogavAsanA kAntivAsanA  .. 149..
pradveShavAsanA rudravedanArAyaNAdiShu .
j~nAnasAdhanabhUteShu tripuNDroddhalanAdiShu .. 150..
pradveShavAsanA pApavAsanA surapu~NgavAH .
paramAdvaitavij~nAnajanmanaH pratibandhakam .. 151..
tasmAnmumukShuH shraddhAlurvAsanAmakhilAmimAm .
visR^ijya paramAdvaitaj~nAnaniShTho bhavetsadA .. 152..
vedoditamahAdvaitaparij~nAnasya vaibhavam .
na shakyaM vaktumasmAbhistasmAdevoparamyate .. 153..
kathitamakhiladuHkhadhva.nsakaM vaH samastaM
     paramasukhashivAtmaprApakaM sadya eva .
vigatasakaladoShA vedavedAntaniShThA
     hR^idayakuharaniShThaM kartumarhanti chaitat .. 154..
iti brahmagItAsUpaniShatsu
talavakAropaniShadvyAkhyAkathanaM
nAma chaturtho.adhyAyaH .. 4..
\medskip\hrule\medskip
  .. atha pa~nchamo.adhyAyaH ..
  .. Adeshakathanam ..
brahmovAcha .
atIvaguhyamAdeshamanantArthaprakAshakam .
vakShye yuShmAkamadyAhaM shR^iNuta shraddhayA saha .. 1..
yasya shravaNamAtreNa shrutamevAshrutaM bhavet .
amataM cha mataM j~nAtamavij~nAtaM cha sattamAH .. 2..
ekenaiva tu piNDena mR^ittikAyA yathA surAH .
vij~nAtaM mR^iNmayaM sarvaM mR^idabhinnatvataH sadA .. 3..
ekena lohamaNinA sarvaM lohamayaM yathA .
vij~nAtaM syAdyathaikena nakhAnAM kR^intanena cha .. 4..
sarvaM kArShNAyasaM j~nAtaM tadabhinnatvataH surAH .
kAryaM tu kAraNAbhinnaM na bhinnaM nobhayAtmakam .. 5..
bhinnapakShe tu sadvA.asatkAryaM sadasadeva vA .
sachchetkAraNasattA vA kAryasattA.athavA parA .. 6..
yadi kAraNasattaiva kAryasattA na chAparA .
tarhi kAraNasattaikA kathaM sattAbhidA bhavet .. 7..
sattaikA.api bhavedbhinnaM kAraNAtkAryasa~nj~nitam .
iti vArtA cha vArtaiva kAryasa~nj~namasatkhalu .. 8..
sattAhInasya kAryasyAsattvameva hi yujyate .
prApte.asattve tu kAryasya satkAryoktirvR^ithA bhavet .. 9..
naiva kAraNasattaiva kAryasattA.aparaiva chet .
tarhi sA kAryasattA tu tayA kAraNasattayA .. 10..
sadrUpeNaiva bhinnA syAdasadrUpeNa vA bhavet .
sadrUpeNeti chedekA sattA bhinnA na sA bhavet .. 11..
asadrUpeNa sA bhinnA kAryasattA tayA yadi .
tarhi sA naiva sattA syAdasattvAdeva shUnyavat .. 12..
yadyasatkAryamiShyeta na kAryaM tarhi tadbhavet .
vandhyAputro na kasyApi vastunaH kAryamiShyate .. 13..
pradhva.nso.api na kAryaM syAttasyotpatterasambhavAt .
nAsti kArakasambandhaH pradhva.nsasya surottamAH .
shUnyavannirupAkhyatvAttato nAsti janikriyA  .. 14..
asattve.api visheSho.asti kAryasyeti matiryadi .. 15..
ko visheSho.asya sambandhaH kArakairyadi tanna hi .
visheShe sati sambandhaH sambandho.asya sa eva hi .. 16..
janikriyAshrayatvaM chedvisheSho.asya tadA.api tu .
pUrvoktadoShaH samprAptastasya nAsti nivArakaH .. 17..
sattAsambandhavattvaM chedvisheSho.asya na tatpaTu .
tadA.api doShaH pUrvoktaH prApnotyeva na sa.nshayaH .. 18..
ato.asato na kAryatvaM sadasattvaM na sa~Ngatam .
uktadoShadvayApatterataH kAryaM tu kAraNAt .
abhinnameva bhedasyAsambhavAdeva vastutaH .. 19..
bhedAbhedasamAkhyA tu sutarAM naiva sidhyati .
kAraNAtkAryajAtasya bhedAbhAvAchcha vastutaH .. 20..
kAryakAraNabhedashcha kArakavyAvR^itistathA .
utpattishcha vinAshashcha tathaivArthakriyA.api cha .. 21..
nAmarUpavisheShashcha sarvaM bhrAntyA prasidhyati .. 22..
ataH sarvo vikArashcha vAchA kevalamAstikAH .
astItyArabhyate nAmadheyamAtraM hi satsadA .. 23..
prAtItikena rUpeNa vikAro.asatya eva hi .
kAraNAkAra evAsya satyaH sAkShAtsadA surAH .. 24..
kAraNAbhinnarUpeNa kAryaM kAraNameva hi .
sadrUpeNa sadA satyaM bhedenoktirmR^iShA khalu .. 25..
ataH kAraNavij~nAnAtsarvavij~nAnamAstikAH .
sutarAmupapannaM hi na sandeho.asti kashchana .. 26..
tachcha kAraNamekaM hi na bhinnaM nobhayAtmakam .
bhedaH sarvatra mithyaiva dharmyAderanirUpaNAt .. 27..
bhede j~nAte hi dharmyAdivibhAgasya cha vedanam .
vibhedenaiva dharmyAdau vij~nAte bhedavedanam .. 28..
bhedAnirUpaNAdeva bhedAbhedo na sa~NgataH .
atashcha kAraNaM nityamekamevAdvayaM surAH .. 29..
kulAlAdermR^idAdeshcha bhede dR^iShTe.api bhUtale .
achaitanyAnmR^idAdestu kulAlAdirapekShyate .. 30..
atra kAraNamadvaitaM shuddhaM chaitanyameva hi .
tena nApekShate hyanyatkAraNaM chetanAtmakam .. 31..
svayaM chetanamapyetatkAraNaM na kulAlavat .
apekShate mR^idA tulyamachidrUpaM tu kAraNam .. 32..
pratItyA kevalaM shaktirachidrUpA tamomayI .
sarvaprakArairvidvadbhiranirUpyA.asti shA~NkarI .. 33..
tayA durghaTakAriNyA tAdAtmyenaiva sa~Ngatam .
kAraNaM sakalasraShTR^i sarvasa.nhartR^i chAstikAH .. 34..
pAlakaM cha sadA sachcha chidrUpatvAtsurottamAH .
chidrUpasya tu satyatvaM yuktamevAstikAH sadA .. 35..
achidrUpAhirajjvAdermR^iShAtvaM sammataM khalu .
atastatkAraNaM devAH sadevaikaM cha shAshvatam .. 36..
idaM sarvaM jagatpUrvaM sadevA.asItsurarShabhAH .
asadAsIditi bhrAntA vadanti surapu~NgavAH .. 37..
asanna kAraNaM yuktaM vastutattvanirUpaNe .
vandhyAputro.api sarveShAM kAraNaM syAtsvayaM khalu .. 38..
svashaktyA.asachcha sarveShAM kAraNaM bhavatIti chet .
shaktirapyasato nAsti sato bIjasya darshanAt .. 39..
a~NkurotpAdikA shaktiH sadrUpasyaiva dR^ishyate .
khalu bIjasya sarvatra nAsatastadadarshanAt .. 40..
sA.api shaktiH satI ki.nvA.asatI sadasatI tu vA .
satI chetsA satI shaktiH kathaM vandhyAsutAshrayA .
AshrayatvaM sato dR^iShTaM khalu loke na chAsataH .. 41..
sA.asatI chetkathaM shaktiH kAryanirvAhikA.asatI .. 42..
vandhyAputraH svayaM naiva kAryanirvAhakaH khalu .
nirvAhakatvadharmashcha sata eva hi dR^ishyate .. 43..
shaktiH sadasatI sA cheddoShadvayasamAgamaH .
ataH svashaktyA chAsattu sarveShAM naiva kAraNam .. 44..
tasmAtso.ayamasadvAdo jalpamAtraM na yuktimAn .
ataH sadeva sarveShAM kAraNaM nAsadAstikAH .. 45..
sR^iShTestu prAgidaM sarvaM sadevA.a.asIttu kAraNam .
tachcha kAraNamAdyantavinirmuktaM sadadvayam .. 46..
pUrvakalpaprapa~nchotthasa.nskAreNAnura~njitam .
kAlakarmavipAkena sattvavR^ittisamAshritam .. 47..
sR^iShTyarthamaikShata prAj~nA bahu syAmiti shaktimat .
punastatpUrvasa.nskArAdAkAshaM vAyumAditaH .. 48..
sR^iShTvA tejastataH sR^iShTvA punaH sR^iShTvA tvapastataH .
annashabdoditAM devAH sasarja pR^ithivIM parAm .. 49..
tatpunaH kAraNaM brahma tAni bhUtAni pa~ncha cha .
ekaikaM dvividhaM kR^itvA teShAM madhye surottamAH .. 50..
a.nshAnpa~ncha samAdAya teShAmekaikamAstikAH .
kR^itvA chaturdhA teShva.nshAnAdAya chaturaH surAH .. 51..
yathAkrameNa bhUtAnAM chaturastA.nshcha kAraNam .
yathAkrameNa bhUtArdhenaikenaikaM karoti tat .. 52..
evama.nshAntarAnetAnAdAya chaturaH svayam .
ekaM bhUtAntarArdhena karoti kramashaH surAH .. 53..
evaM bhUtAni sarvANi pa~nchIkR^itya surarShabhAH .
aNDAni bhuvanAnyAshu karoti brahma kAraNam .. 54..
aNDajaM jArajaM chaiva svedajaM chodbhijaM tathA .
karoti kAlapAkena prANikarmavashena cha .. 55..
brahma sarvatra chidrUpeNaivAnuprApya sAttvikAH .
pR^itha~N.hnAmAni rUpANi kurute pUrvakalpavat .. 56..
idaM sarvaM jagatsatyamiva bhAtamapi svataH .
kAraNavyatirekeNa nAstyevAtra na sa.nshayaH .. 57..
yadgne rohitaM rUpaM tadrUpaM tejasaH sadA .
yachChuklaM tadapAM rUpaM yatkR^iShNaM bhaumameva tat .. 58..
nAsti rUpAtirekeNa sadA so.agniH surarShabhAH .
vAchArambhaNamAtro hi vikAro vahnisa~nj~nitaH .. 59..
trINi rUpANi he devA eva satyaM na chAnalaH .
yadbhAno rohitaM rUpaM tadrUpaM tejasaH sadA .. 60..
yachChuklaM tadapAM rUpaM yatkR^iShNaM bhaumameva tat .
nAsti rUpAtirekeNa sadA.a.adityo na sa.nshayaH .. 61..
bhrAntyA kevalamAditya ityAhuravivekinaH .
evaM chandrashcha vij~neyo vidyuchcha surapu~NgavAH .. 62..
ghaTakuDyAdayo bhAvA bhUtAni bhuvanAni cha .
sarvaM brahmAtirekeNa nAsti brahmaiva satsadA .. 63..
pUrvapUrvabhramotpannavAsanAyA balena tu .
dehendriyAdisa~NghAte.ahammatirjAyate dR^iDham .. 64..
dehendriyAdayo bhAvA nAhamarthA nirUpaNe .
bhautikatvAchcha bhUtA.nshaiH sadaivApyAyitatvataH .. 65..
mR^idambhasA yathA bhittirnirmitA vai mR^idambhasA .
ApyAyate tathA bhuktairbhUtairdehAdayo.api cha .. 66..
ato dehAdisa~NghAte.ahammametyAdikAM matim .
visR^ijya sAkShichaitanye vidvAnkuryAdahammatim .. 67..
dadhnaH sarpiryathA jAtaM manthanena surarShabhAH .
tathA buddhyAdayo bhAvA bhUtebhyashchodbhavanti hi .. 68..
bhautikaM dehasa~NghAtaM visR^ijya matimAnpunaH .
sarvasAkShiNi chidrUpe kuryAnnityamahammatim .. 69..
annenApyAyate.abhukte nAdhItaM tasya bhAsate .
tato.api buddhirannasya kAryameva na saMshayaH .. 70..
ato.api buddhimannasya kAryaM tyaktvA viviktadhIH .
sarvasAkShiNi chidrUpe kuryAnnityamahammatim .. 71..
dehendriyAdisa~NghAte.ahammametyAdikAM matim .
tyaktvA svAtmani chidrUpe yadA.apIto bhavatyayam .. 72..
tadA svapiti duHkhAdidarshanaM cha na vidyate .
svAtmarUpasukhaprAptirevaM dR^iShTA.asya dehinaH .. 73..
ato.api matimAnnityaM tyaktvA dehAdigAM dhiyam .
sarvasAkShiNi chidrUpe sAkShAtkuryAdahammatim .. 74..
yadidaM sAkShiNA vedyaM tatsarvaM brahma kevalam .
tatsatyaM pUrNachaitanyaM tattvamartho na sa.nshayaH .. 75..
tvaMshabdArtho ya AbhAti so.ahaMshabdArtha eva hi .
yo.ahaMshabdArtha AbhAti sa tvaMshabdArtha eva hi .. 76..
tvamahaMshabdalakShyArthaH sAkShAtpratyakchitiH parA .
tachChabdasya cha lakShyArthaH saiva nAtra vichAraNA .. 77..
tvamahaMshabdavAchyArthasyaiva dehAdivastunaH .
na tachChabdArthatAM vakti shrutistattvamasIti sA .. 78..
tadarthaikyaviruddhA.nshaM tyaktvA vAchyagataM shrutiH .
aviruddhachidAkAraM lakShayitvA bravIti hi .. 79..
tadarthe cha tvamarthaikyaviruddhA.nshaM vinaiva tu .
kAraNatvAdivAchyasthaM lakShayitvA tu kevalam .. 80..
chidAkAraM punastasya tvamarthaikyaM bravIti cha .
tattvaMshabdArthalakShyasya chinmAtrasya parAtmanaH .. 81..
ekatvaM yatsvataHsiddhaM sa hi vAkyArtha AstikAH .
ito.anyathA yo vAkyArthaH so.avAkyArtho na sa.nshayaH .. 82..
ekatvapramitiM vAkyaM na karoti surarShabhAH .
vyAvahArikamaj~nAnaM bAdhate vidyayaiva tu .. 83..
sadA pramitamekatvaM svata eva na chAnyataH .
ato na pramitiM vAkyaM kurute.aj~nAnabAdhakam .. 84..
vastuto nAsti chAj~nAnaM chitprakAshavirodhataH .
ato vAkyaM na chAj~nAnabAdhakaM cha nirUpaNe .. 85..
ekatvaM yatpurA proktaM tatsvayaM seddhumarhati .
na pramANena mAnAni tasminkuNThIbhavanti hi .. 86..
vyAvahArikamaj~nAnamapi brahmaiva vastutaH .
aj~nAnamiti vArtA.api tvarthasadbhAva eva hi .. 87..
sata eva hi sadbhAvo nAsataH sUkShmadarshane .
sadasatkoTinirmuktamityuktishchArthabhAsane .
khalu nAbhAsate bhAnaM brahma vastveva kevalam .. 88..
bhAnasambandhato.abhAnamiti vArtA.apyasa~NgatA .. 89.. 
sambandhirUpasadbhAve sati sambandhasambhavaH .
sadbhAve sati sambandhirUpaM brahmaiva kevalam .. 90..
anirUpitarUpeNa sadbhAva iti chenmatam .
anirUpitarUpasya rUpaM tu brahma kevalam .
brahmaiva rUpaM naivAnyanna rUpamaparasya hi .. 91..
asti chedaparasyApi rUpaM tarhi surottamAH .
rUparUpeNa rUpaM cha brahmarUpaM bhavetkhalu .. 92..
brahmarUpeNa nAnyasya rUpaM rUpAntareNa chet .. 93..
tarhi rUpAntaraM rUpAdbhinnaM vA.abhinnameva vA .
bhinnAbhinnaM na vA bhinnaM yadi rUpAdvibhedataH .. 94..
tuchChavattadarUpaM syAdabhinnaM chettadeva tat .
uktadoShadvayApatterbhinnAbhinnaM na tadbhavet .. 95..
ata eva surashreShThA anirUpitarUpataH .
sadbhAva iti vArtA cha vArtaiva khalu kevalam .. 96..
tasmAdaj~nAnamevaitadbrahmaiva satatoditam .
aj~nAnamayamevedaM sarvamityapi bhAShaNam .
naiva bhAShaNamaj~nAnAbhAvAdeva shivaM vinA .. 97..
tasmAdaj~nAnamaj~nAnakAryaM cha surapu~NgavAH .. 98..
ekaM brahmaiva naivAnyaditi me nishchitA matiH .
aitadAtmyamidaM sarvamityAha hi parA shrutiH .. 99..
sAkShAdarthasvabhAvena shrutiH seyaM pravartate .
shrotushchittAvipAkena viShaNNA vivashA shrutiH .. 100..
kvachitkadAchidanyArthaM vakti cha brahmaNaH pR^ithak .
sAdhyasAdhanasambandhakathanaM phalabhAShaNam .. 101..
jagadvaichitryanirdesho dharmAdharmArthabhAShaNam .
varNAshramavibhAgoktistaddharmoktistathaiva cha .. 102..
shobhanAshobhanoktishcha bhUtabhautikabhAShaNam .
shabdAnAM bhedanirdeshastathA.arthAnAM cha bhAShaNam .. 103..
Atmano.anyasya sarvasya sadbhAvoktiH surarShabhAH .
mithyAtvabhAShaNaM tasya mAyAsadbhAvabhAShaNam .. 104..
mAyAtvoktishcha mAyAyA bandha ityabhibhAShaNam .
gurushiShyakathoktishcha brahmavidyAbhibhAShaNam .. 105..
shAstrANAmapi nirdeshastarkANAmapi bhAShaNam .
anyadvitarkajAlaM yattaduktishcha samAsataH .
anyArthena paraM brahma shrutiH sAdhvI na tatparA .. 106..
chittapAkAnuguNyena shrotRRINAM paramA shrutiH .
sopAnakramato devA mandaM mandaM hitaM nR^iNAm .. 107..
upadishya viShaNNA.api punaH pakvAdhikAriNaH .
aitadAtmyamidaM sarvamityAha paramAdvayam .. 108..
jagajjIveshvaratvAdivichitravibhavaM vinA .
kevalaM chitsadAnandabrahmAtmaikyaparA shrutiH .. 109..
jagajjIveshvaratvAdi sarvaM brahmaiva kevalam .
iti svapUrNatAj~nAnaM paramAdvaitavedanam .. 110..
ito.anyadyatparij~nAnaM tadaj~nAnaM na sa.nshayaH .
vichAreNAyamevArthastvayamevAvichAraNe .. 111..
na kadAchidvisheSho.astItyetajj~nAnaM sudurlabham .. 112..
yathA yathA svabhAvena yadyadbhAti surarShabhAH .
tathA tathA shivo bhAti svayameva na chAparaH .. 113..
yathA yathA prabhA sAkShAchChAmbhavI sA na chAparA .
iti nishchayavij~nAnaM paramAdvaitavedanam .. 114..
yathA yathA.avabhAso.ayaM shiva eveti pashyati .
tathA tathA mahAdevaM bhajate.ayatnatastu saH .. 115..
yathA yathA prathA pu.nsastadvastuShvanavasthitA .
tathA tathA.anusandhAnaM svabhAvenaiva pUjanam .. 116..
shivarUpatayA sarvaM yo veda sa hi tattvavit .
ashivaM veda yatki~nchitsa eva parimohitaH .. 117..
shivAdanyatayA ki~nchidapi yo veda so.adhamaH .
shivasyaivApachAraM hi kurute sa pashurnaraH .. 118..
shivarUpatayA sarvaM yasya bhAti svabhAvataH .
svechChAchAraH samAchArastasya chArchA cha shUlinaH .. 119..
yathA yathA prabhA shambhoH prathA sA sA tadarchanam .
ityayatnena vij~nAnAtpUjyate parameshvaraH .. 120..
krIDayA jagadAkArA nAnyatashchAtmadevatA .
krIDayaivAtmanA.a.atmAnaM bhu~Nkte sA taddhi vedanam .. 121..
indriyAkArabhAsA sA viShayAkArabhAsanam .
krIDayA devatA bhu~Nkte svata ityarchanaM matam .. 122..
paramAdvaitavij~nAnamidaM bhavabhayApaham .
bhavaprasAdato labhyaM bhAvanArahitaM param .. 123..
yathA naktandR^ishaH sUryaprakAsho nAvabhAsate .
tathedaM paramAdvaitaM manuShyANAM na bhAsate .. 124..
prasAdAdeva rudrasya shraddhayA svasya dhairyataH .
deshikAlokanAchchaiva karmasAmye prakAshate .. 125..
bahuprakAraM bahushaH shrutiH sAdhvI sanAtanI .
evametaM mahAyAsAdarthaM vadati duHkhinAm .. 126..
shiva evAsti naivAnyaditi yo nishchayaH sthiraH .
sadA sa eva siddhAntaH pUrvapakShAstathA pare .. 127..
ayameva hi vedArtho nAparaH paramAstikAH .
gR^ihNAmi parashuM taptaM satyameva na sa.nshayaH .. 128..
ayameva hi satyArtho nAparaH paramAstikAH .
vishvAsArthaM shivaM spR^iShTvA trirvaH shapathayAmyaham .. 129..
ayameva hi vedArtho nAparaH paramAstikAH .
anyathA chetsurAH satyaM mUrdhA me.atra patiShyati .. 130..
ayameva hi satyArtho nAparaH paramAstikAH .
atraiva sannidhiM devo vishvAsArthaM kariShyati .. 131..
sUta uvAcha \-
evamuktvA tu bhagavAnbrahmA sarvahite rataH .
praNamya daNDavadbhUmau bhaktyA paravasho.abhavat .. 132..
asminnavasare shrImA~nsha~NkaraH shashishekharaH .
nIlakaNTho virUpAkShaH sAmbaH sAkShAd.hghR^iNAnidhiH .. 133..
brahmaviShNumaheshAdyairupAsyo guNamUrtibhiH .
AvirbabhUva sarvaj~nastatraiva surasannidhau .. 134..
AsanaM vimalaM divyaM shivArhaM haimamadbhutam .
AgataM tatra bhagavAnAste tasminyathAsukham .. 135..
viShNurvishvajagatkartA shivasyAmitatejasaH .
buddhvodyogaM mahAprItastatra sannihito.abhavat .. 136..
puShpavR^iShTirabhavatpunaH punaH
     shabditaM cha munibhiH sanAtanaiH .
shuddhavedavachanaiH sushobhanai\-
     rbhaktimadbhirapi pUjanaM kR^itam .. 137..
uchchamandamR^idutIvrakAhalaiH
     shabditaM cha paTahAdibhistathA .
tAlamAnakushalaistathA parai\-
     rbherikAdikushalaiH sughoShitam .. 138..
apsarobhirapi nartanaM kR^itaM
     gAyanaishcha sahitairmahattaraiH .
gItamAshu kavibhishcha kIrtitaM
     sthAnamIshadR^ishigocharaM dvijAH .. 139..
vismitAshcha munayashcha kechana
     shraddhayaiva shirasA cha nartitAH .
muShTiyuddhamapi kuryurAstikAH
     shraddhayaiva parayA cha kechana .. 140..
mastakena manujAnatipriyAn
     pR^iShThatashcha charaNena pANinA .
daNDarajjushibikAdibhistathA
     kechidashvanikarairvahanti cha .. 141..
bandhanaM cha nigaDaishcha garvitA
     mochanaM cha manujAnatipriyAn .
kuryurastranikaraishcha kechana
     chChedanaM cha vivashAshcha kechana .. 142..
anyonyamAli~NganamAcharanti
     priyeNa kechinmunayashcha kechit .
dhAvanti vegena paTaM visR^ijya
     priyeNa chAnyAnapi tADayanti .. 143..
vilokya sarvaM shivayA shivo.api
     prahR^iShTachittastu nivArya sarvAn .
hariM vira~nchiM cha surAnasheShA\-
     natipriyeNaiva nirIkShya viprAH .. 144..
uvAcha satyaM karuNAnidhAnaH
     shrutipramANaikasunishchitArthaH .
hitAya lokasya surAsurAdyaiH
     prapUjanIyashcha sadA maheshaH .. 145..
Ishvara uvAcha \:
ahaM hi sarvaM na cha ki~nchidanya\-
     nnirUpaNAyAmanirUpaNAyAm .
iyaM hi vedasya parA hi niShThA
     mamAnubhUtishcha na sa.nshayashcha .. 146..
ahaM sadA.adhashcha yathA.ahamUrdhvaM
     tvahaM purastAdahameva pashchAt .
ahaM cha savyetaramAstikAstathA
     tvahaM sadaivottarato.antarAlam .. 147..
parokSharUpeNa susa.nsthito.ahaM
     tathA.aparokSheNa susa.nsthito.aham .
anAtmarUpeNa susa.nsthito.ahaM
     sadAtmarUpeNa susa.nsthito.aham .. 148..
jaivena rUpeNa susa.nsthito.aham
     tathesharUpeNa susa.nsthito.aham .
aj~nAnarUpeNa susa.nsthito.aham
     vij~nAnarUpeNa susa.nsthito.aham .. 149..
sa.nsArarUpeNa susa.nsthito.aham
     kaivalyarUpeNa susa.nsthito.aham .
shiShyAdirUpeNa susa.nsthito.aham
     gurvAdirUpeNa susa.nsthito.aham .. 150..
vedAdirUpeNa susa.nsthito.ahaM
     smR^ityAdirUpeNa susa.nsthito.aham .
purANarUpeNa susa.nsthito.ahaM
     kalpAdirUpeNa susa.nsthito.aham .. 151..
pramAtR^irUpeNa susa.nsthito.ahaM
     pramANarUpeNa susa.nsthito.aham .
prameyarUpeNa susa.nsthito.ahaM
     mitisvarUpeNa susa.nsthito.aham .. 152..
kartR^isvarUpeNa susa.nsthito.ahaM
     kriyAsvarUpeNa susa.nsthito.aham .
taddheturUpeNa susa.nsthito.ahaM
     phalasvarUpeNa susa.nsthito.aham .. 153..
bhoktR^isvarUpeNa susa.nsthito.ahaM
     bhogasvarUpeNa susa.nsthito.aham .
taddhetusvarUpeNa susa.nsthito.ahaM
     bhogyasvarUpeNa susa.nsthito.aham .. 154..
puNyasvarUpeNa susa.nsthito.ahaM
     pApasvarUpeNa susa.nsthito.aham .
sukhasvarUpeNa susa.nsthito.ahaM
     duHkhasvarUpeNa susa.nsthito.aham .. 155..
rudraprabhedena susa.nsthito.ahaM
     viShNuprabhedena susa.nsthito.aham .
brahmaprabhedena susa.nsthito.ahaM
     devaprabhedena susa.nsthito.aham .. 156..
martyaprabhedena susa.nsthito.ahaM
     tiryakprabhedena susa.nsthito.ahaM
kR^imiprabhedena susa.nsthito.ahaM
     kITaprabhedena susa.nsthito.aham .. 157..
vR^ikShaprabhedena susa.nsthito.ahaM
     gulmaprabhedena susa.nsthito.aham .
latAprabhedena susa.nsthito.ahaM
     tR^iNaprabhedena susa.nsthito.aham .. 158..
kalAprabhedena susa.nsthito.ahaM
     ghaTaprabhedena susa.nsthito.aham .
paTaprabhedena susa.nsthito.ahaM
     kuDyAdibhedena susa.nsthito.aham .. 159..
annaprabhedena susa.nsthito.ahaM
     pAnaprabhedena susa.nsthito.aham .
vanaprabhedena susa.nsthito.ahaM
     giriprabhedena susa.nsthito.aham .. 160..
nadIprabhedena susa.nsthito.ahaM
     nadaprabhedena susa.nsthito.aham .
samudraprabhedena susa.nsthito.ahaM
     taTaprabhedena susa.nsthito.aham .. 161..
taDAgabhedena susa.nsthito.ahaM
     abhraprabhedena susa.nsthito.aham .
nakShatrabhedena susa.nsthito.ahaM
     grahaprabhedena susa.nsthito.aham .. 162..
meghaprabhedena susa.nsthito.ahaM
     vidyutprabhedena susa.nsthito.aham .
yakShaprabhedena susa.nsthito.ahaM
     rakShaHprabhedena susa.nsthito.aham .. 163..
gandharvabhedena susa.nsthito.ahaM
    siddhaprabhedena susa.nsthito.aham .
aNDaprabhedena susa.nsthito.ahaM
    lokaprabhedena susa.nsthito.aham .. 164..
deshaprabhedena susa.nsthito.ahaM
     grAmaprabhedena susa.nsthito.aham .
gR^ihaprabhedena susa.nsthito.ahaM
     maThaprabhedena susa.nsthito.aham .. 165..
kaTaprabhedena susa.nsthito.ahaM
     prAkArabhedena susa.nsthito.aham .
puraprabhedena susa.nsthito.ahaM
     purIprabhedena susa.nsthito.aham .. 166..
vyomAdibhedena susa.nsthito.ahaM
     shabdAdibhedena susa.nsthito.aham .
sharIrabhedena susa.nsthito.ahaM
     prANaprabhedena susa.nsthito.aham .. 167..
shrotrAdibhedena susa.nsthito.ahaM
     padAdibhedena susa.nsthito.aham .
manaHprabhedena susa.nsthito.ahaM
     buddhiprabhedena susa.nsthito.aham .. 168..
ahamprabhedena susa.nsthito.ahaM
     chittaprabhedena susa.nsthito.aham .
sa~NghAtabhedena susa.nsthito.ahaM
     janmAdibhedena susa.nsthito.aham .. 169..
jAgratprabhedena susa.nsthito.ahaM
     svapnaprabhedena susa.nsthito.aham .
suShuptibhedena susa.nsthito.ahaM
     turIyabhedena susa.nsthito.aham .. 170..
dR^ishyaprabhedena susa.nsthito.ahaM
     draShTR^iprabhedena susa.nsthito.aham .
sAkShisvarUpeNa susa.nsthito.ahaM
     sarvasvarUpeNa susa.nsthito.aham .. 171..
astinAstivachanena bhAShitaM
     bhAtishabdaparibhAShitaM tathA .
bhAnahInaparibhAShitaM cha me
     rUpameva hi na sa.nshayaH kvachit .. 172..
shabdagocharatayA sthitaM sadA
     shabdagocharavihInarUpataH .
yatsthitaM tadahameva santataM
     pratyaye.api gatirevameva hi .. 173..
nityashuddhaparibuddhamuktatAM
     yasya nityamiti vakti vAk shruteH .
tasya satyasukhabodhapUrNatA
     tathyameva mama nAsti sa.nshayaH .. 174..
yatsvarUpamahamAtmanA tathA
     yatsvarUpamidamAtmanaiva tu .
bhAti tattu mama chidvapuH sadA
     bhAti nAnyaditi nishchayo mama .. 175..
ahaM samastaM mama rUpataH pR^itha~N
     na ki~nchidastIti sunishchayaH kR^itaH .
mayA tu vedAntavachobhira~njasA
     pitAmahenApi cha satyamIritam .. 176..
atra sa.nshayamatirvinashyati
     bhraShTa eva paramArthadarshanAt .
atra nishchayamatistu muchyate
     kaShTarUpabhavapAshabandhanAt .. 177..
sUta uvAcha .
evamuktvA mahAdevaH sAmbaH sa.nsAramochakaH .
samAli~Ngya mahAviShNuM brahmANamapi sAdaram .. 178..
vilokya devAnakhilAnvishuddhenaiva chetasA .
bhadramastu surashreShThA yuShmAkamiti chAbravIt .. 179..
devAshcha devadeveshaM prasannaM karuNAnidhim .
pUjayAmAsurAhlAdAtpatrapuShpaphalAdibhiH .. 180..
viShNurvishvajagatkartA vishveshA~Nghrisaroruham .
svamUrdhni bhaktyA nikShipya punaH paravasho.abhavat .. 181..
pitAmaho.api sarvAtmA shivapAdAmbujadvayam .
svamUrdhni bhaktyA nikShipya punaH paravasho.abhavat .. 182..
devadevo mahAdevaH sAmbaH sa.nsAramochakaH .
nanarta paramaM bhAvamaishvaraM sampradarshayan .. 183..
karatAlaM mahAdevI karuNAsAgarA parA .
chakAra paramaprItyA samAlokya maheshvaram .. 184..
viShNurbrahmA surAH sarve tatra sannihitA janAH .
sarve santoShatastatra nR^ityanti sma yathAbalam .. 185..
devadevo mahAdevo mahAnandodadhirdvijAH .
vilokya sarvAnsuprItastatraivAntarhito.abhavat .. 186..
viShNurbrahmANamAli~Ngya vilokya sakalAnsurAn .
prasannaH padmayA sArdhaM vaikuNThamagamatprabhuH .. 187..
brahmA.api vismayApanno vilokya sakalAnsurAn .
avashaH sanpunashchAha shraddhayaiva tu kevalam .. 188..
brahmovAcha .
vidyAH sarvA nR^iNAM sAkShAtsa.nsArasya pravartikAH .
AtmavidyA tu sa.nsAratamasaH pratighAtinI .. 189..
AtmavidyAvihInasya shokasAgara eva hi .
muktirevAtmaniShThasya nAsti sa.nshayakAraNam .. 190..
yatrAnyatpashyati prANI shR^iNotyanyattathaiva cha .
anyajjAnAti chAlpaM tadyadalpaM martyameva tat .. 191..
yatra pashyati nAnyachcha na shR^iNotyanyadAstikAH .
anyachcha na vijAnAti sa bhUmA surapu~NgavAH .. 192..
yo vai bhUmA sukhaM taddhi taddhi kaivalyamuttamam .
nAlpe chAsti sukhaM tasmAnmahAdvaitaparo bhavet .. 193..
mahAdvaitaparasyAsya na nAsho janma naiva cha .
naiva gatyAgatI nAnyadbandhanaM na vimochanam .. 194..
atraiva lIyate samyaksarvamAtmatayA svataH .
ghR^itakAThinyavatsvapnaprapa~nchapratibhAsavat .. 195..
sarvametadatishobhanaM paraM kevalaM karuNayaiva bhAShitam .
devadevacharaNaprasAdato netaraddhi kathanIyamasti vaH .. 196..
iti brahmagItAsUpaniShatsu
AdeshakathanaM nAma pa~nchamo.adhyAyaH .. 5..
\medskip\hrule\medskip
  .. atha ShaShTho.adhyAyaH ..
  .. daharopAsanavivaraNam ..
brahmovAcha .
asminbrahmapure veshma daharaM yadidaM surAH .
puNDarIkaM tu tanmadhya AkAsho daharo.asti tu .. 1..
sa shivaH sachchidAnandaH so.anveShTavyo mumukShibhiH .
sa vijij~nAsitavyashcha vinA sa~NkochamAstikAH .. 2..
svAbhivya~njakasa~Nkochatsa~NkochapratibhA.a.atmanaH .
na svarUpeNa chidrUpaM sarvavyApi sadA khalu .. 3..
j~nAtarUpeNa chAj~nAtasvarUpeNa cha sAkShiNaH .
sarvaM bhAti tadAbhAti tatastadvyApi sarvadA .. 4..
svayaM seddhumashakyaM hi jaDAtmakamidaM jagat .
chitsambandhabalenaiva khalu bhAti na chAnyathA .. 5..
ato.avabhAsyaM sakalaM vyApya tadbhAsakaH shivaH .
svato vyApI na chAvyApI sa~NkochashchAnyasa~NgamAt .. 6..
yAvAnvA ayamAkAshastAvAnAkAsha AntaraH .
dyAvApR^ithvI ubhe asminnantareva samAhite .. 7..
ubhAvagnishcha vAyushcha sUryAchandramasAvubhau .
nakShatrANi cha vidyuchcha yachchAstitvena bhAsate .. 8..
yachcha nAstitayA bhAti sarvaM tasminsamAhitam .
ataH sarvAshrayaH shambhuH sarvavyApI svabhAvataH .. 9..
eSha AtmA paro vyApI pApmabhiH sakalaiH sadA .
asau chA##(##nA##)##pahataH sAkShI vimR^ityurvijaraH surAH .. 10..
vishoko vijighatso.apipAsaH satyAdilakShaNaH .
satyakAmastathA satyasa~Nkalpashcha surarShabhAH .. 11..
yathA karmajitA lokAH kShIyante bhuvi sattamAH .
tathA puNyajitA lokAH kShIyante hi paratra cha .. 12..
ye.aviditvA parAtmAnaM vrajanti sakalAH kriyAH .
teShAM sarveShu lokeShu kAmachAro na vidyate .. 13..
ye viditvA parAtmAnaM vrajantIva kriyAH sthitAH .
teShAM sarveShu lokeShu kAmachArastu vidyate .. 14..
yathA hiraNyaM nihitaM kShetraj~nAnavivarjitAH .
uparyupari gachChantyo na vindeyuH prajA imAH .. 15..
tathA suShuptau gachChanto brahmalokaM svayamprabham .
na vindanti mahAmohAdaho mohasya vaibhavam .. 16..
ayaM hR^idi sthitaH sAkShI sarveShAmavisheShataH .
tenAyaM hR^idayaM proktaM shivaH sa.nsAramochakaH .. 17..
ya evaM veda sa svargaM lokameti na sa.nshayaH .
asmAchCharIrAdutthAya suShuptau yaH surarShabhAH .. 18..
paraM jyotiHsvarUpaM taM shivaM sampadyate surAH .
abhiniShpadyate svena rUpeNaiva svabhAvataH .. 19..
eSha AtmA na chaivAnyaH satyameva mayoditam .
etadevAmR^itaM sAkShAdabhayaM brahma he surAH .. 20..
ya AtmA daharAkAshaH sa seturvidhR^itiH surAH .
asambhedAya lokAnAmeShAmetaM maheshvaram .. 21..
ahorAtre na tarato na mR^ityurna jarA.api cha .
na shoko naiva sukR^itaM na duShkR^itamapIshvarAH .. 22..
ataH sarve nivartante pApmAnaH surapu~NgavAH .
eSho.apahatapApmA hi brahmalokaH svayamprabhaH .. 23..
tasmAdvai setumetaM tu tIrtvA.andhaH sansurarShabhAH .
bhavatyanandho viddhaH sannaviddhastadvadeva tu .. 24..
ya eSho daharAkAsha ityuktaH parameshvaraH .
sa dehAdivisheShebhyaH pR^ithagbhUtaH sanAtanaH .. 25..
jAgratsvapnasuShuptAkhyA.avasthA yA bhAti dehinAm .
tasyA api mahAdevaH sAkShI bhinnaH svayamprabhaH .. 26..
tasminnadhyastarUpeNa sA vibhAti na bhAti cha .. 27..
svadR^ishyena sharIreNa sasharIrasya sarvadA .
priyApriyAbhyAM sambandho bhavatyeva na sa.nshayaH .. 28..
asharIraM vAva santaM vidyayA na priyApriye .
spR^ishataH satyamevoktaM nAtra sandehakAraNam .. 29..
ya eSha daharAkAshaH sa eva surapu~NgavAH .
nAmarUpasya nirmAtA tadeva brahma shAshvatam .. 30..
amR^itaM cha tadevaitatsa AtmA sarvadehinAm .
tato nAnyatparaM ki~nchinnAparaM chAsti ki~nchana .. 31..
sa eva sarvarUpeNa vibhAti na vibhAti cha .
aho rudrasya devasya pUrNatA ko nu veda tAm .. 32..
yathA mR^itsvavikAreShu tattadrUpeNa sa.nsthitA .
tathA sarvatra tatsAkShI tattadrUpeNa sa.nsthitaH .. 33..
yathA vArivikAreShu jalaM tattatsvarUpataH .
tathA sarvatra tatsAkShI tattadrUpeNa sa.nsthitaH .. 34..
yathA.agniH svavikAreShu tattadrUpeNa sa.nsthitaH .
tathA sarvatra tatsAkShI tattadrUpeNa sa.nsthitaH .. 35..
yathA vA svavikAreShu vAyustattatsvarUpataH .
tathA sarvatra tatsAkShI tattadrUpeNa sa.nsthitaH .. 36..
yathA vA sarvagaM vyoma svAkArANaiva sa.nsthitam .
tathA sarvAtmakaH sAkShI sAkShirUpeNa sa.nsthitaH .. 37..
ghaTAkAshAdibhedena vibhinno.apyavibhAgavAn .
AkAshastadvadIshAno  vibhinno.apyavibhAgavAn .. 38..
mahAdevo.avibhAgena vibhAgena cha bhAsate .
anyathA chenmahAdevo mahAdevaH kathaM bhavet .. 39..
mahAdevo mahAdeva eva naivAmahAnayam .
tathA sati mahAdeva eva sarvaM na chAparam .. 40..
yena kenApi rUpeNa yadyadbhAti na bhAti cha .
tena tenaiva rUpeNa shiva evAvabhAsate .. 41..
yathAbhAtena rUpeNa shiva eveti yA matiH .
sA shivA paramA sa.nvinnAparA na hi sa.nshayaH .. 42..
ahamiti shivasatyachidghanaH
     sphurati sadA pR^ithagasti naiva vastu .
idamiti vapuShA cha tena bandhanaM
     na hi manujasya vimochanaM cha ki~nchit .. 43..
shiva iti sakalaM yadA vibhAsate
     na cha maraNaM jananaM tadA.asti ki~nchit .
iti hR^idaye vachanaM madIyameta\-
     nnishitamatiH satataM nidhAya tiShThet .. 44..
paramashivaH parameshvaraH prasanno
     yadi vimalA paramAnubhUtireShA .
na hi sakalairvimalairupAyavR^indai\-
     rna cha hariNA na mayA na chApareNa .. 45..
paramashivaH parameshvaraH svatantro
     yadi kurute manujasya vedanaM hi tat .
paramapadaM vimalaM prayAti martyo
     yadi kurute na shivaH prayAti bandham .. 46..
dinakarakiraNairhi shArvaraM tamo
     nibiDataraM jhaTiti praNAshameti .
ghanatarabhavakAraNAntaraM tamaH
     shivadinakR^itprabhayA na chApareNa .. 47..
harirahamapyapare surAsurAdyAH
     paramashivaprabhayA tiraskR^itAshcha .
ravikiraNairakhilAnyahAni yadvat
     paramashivaH svata eva bodhakArI .. 48..
shivacharaNasmaraNena pUjayA cha
     svakatamasaH parimuchyate hi jantuH .
na hi maraNaprabhavapraNAshahetuH
     shivacharaNasmaraNAdR^ite.asti ki~nchit .. 49..
paramashivaH khalu naH samastahetuH
     paramashivaH khalu naH samastametat .
paramashivaH khalu naH sbarUpabhUtaH
     paramashivaH khalu naH pramANabhUtaH .. 50..
paramashivaH sakalAgamAdiniShThaH
     paramashivaH paramAnubhUtigamyaH .
paramashivaH paramAnubhUtirUpaH
     paramashivaH paramAnubhUtidashcha .. 51..
paramashivasamudre.ahaM hariH sarvadevA
     manujapashumR^igAdyAH shIkarA eva satyam .
vimalamatibhirevaM vedavedAntaniShThai\-
     rhR^idayakuharaniShThaM vedituM shakyate hi .. 52..
mAyAbalenaiva hariM shivena
     samAnamAhuH puruShAdhamAshcha .
mohena kechinmama sAmyamAhu\-
     rmAyA tu shaivI khalu dustareyam .. 53..
khadyoto yadi chaNDabhAnusadR^ishastulyo hariH shambhunA
     kimpAko yadi chandanena sadR^ishastulyo.ahamIshena cha .
aj~nAnaM yadi vedanena sadR^ishaM devena tulyA janAH
     kiM vakShye surapu~NgavA ahamaho mohasya dushcheShTitam .. 54..
ataH shivenaiva samastameta\-
     dbhavatyanantena na chApareNa .
shivasvabhAvena shivaH samastaM
     shivaprabhAvena jagadvichitram .. 55..
tattvadR^iksakalamadvayaM sadA
     pashyati sma parimohitaH pumAn .
kaShTashiShTaghaTakuDyarUpataH
     kaShTameva khalu tasya vedanam .. 56..
idaM jagaditi svataH sakalajantoH pratItirdR^iDhA
      paraM jagaditi sphuratyamalabodhasvabhAvena cha .
idaM hi parivedanaM vimalachittasya pu.nsaH sadA
     bhavaM tarati mAnavaH paramabodhena chaitena hi .. 57..
Chandogashrutimastake vinihitaM vij~nAnametanmayA
     jantUnAmavivekinAmatitarAmaj~nAnavidhvastaye .
kAruNyAdamarAdhipA atishubhabrahmAmR^itAvAptaye
     devAnAmadhipAdhipasya vachanAduktaM maheshasya cha .. 58..
iti brahmagItAsUpaniShatsu daharopAsanavivaraNaM
nAma ShaShTho.adhyAyaH .. 6..
\medskip\hrule\medskip
  .. atha saptamo.adhyAyaH ..
  .. vastusvarUpavichAraH ..
brahmovAcha .
asti tattvaM paraM sAkShAdakSharaM kSharavastunAm .
adhiShThAnamanaupamyamavA~Nmanasagocharam .. 1..
tasminsuvidite sarvaM vij~nAtaM syAdidaM surAH .
tadAtmakatvAtsarvasya nAstyeva hi bhidA svataH .. 2..
dve vidye veditavye hi parA chaivAparApi cha .
tatrAparA tu vidyaiShA R^igvedo yajureva cha .. 3..
sAmavedastathA.atharvavedaH shikShA surarShabhAH .
kalpo vyAkaraNaM chaiva niruktaM Chanda eva cha .
jyotiShaM cha tathA.anAtmaviShayA api buddhayaH .. 4..
athaiShA paravidyA sA yayA tatparamakSharam .
gamyate sudR^iDhaM prAj~naiH sAkShAchChambhoH prasAdibhiH .. 5..
yattadadreshyamagrAhyamagotraM rUpavarjitam .
achakShuH shrotramatyarthaM tadapANipadaM sadA .. 6..
nityaM vibhuM sarvagataM susUkShmaM cha tadavyayam .
yadbhUtayoniM dhImantaH paripashyanti chAtmanA .. 7..
yathorNanAbhiH sR^ijate gR^ihNate cha surarShabhAH .
yathA pR^ithvyAmoShadhayaH sambhavanti yathA sataH .. 8..
puruShAtkeshalomAni tathA chaivAkSharAtsurAH .
vishvaM sambhavatIhaiva tatsarvaM svapanopamam .. 9..
tapasA chIyate brahma tadannamabhijAyate .
annAtprANo manaH satyaM lokAH karmasu chAmR^itam .. 10..
yaH sarvaj~naH sarvavidyo yasya j~nAnamayaM tapaH .. 11..
tasmAdetatsurA brahma nAmarUpAnnapUrvakam .
jAyate satyavatsvapnaprapa~nchopamameva tat .. 12..
tadetadakSharaM satyaM tadvij~nAya vimuchyate .
karmaNA nAsti tatprAptiH sa.nsArasya vinAshanam .
plavA hyete surA yaj~nA adR^iDhAshcha na sa.nshayaH .. 13..
ebhireva paraM shreya iti jAnanti ye janAH .
te mUDhA anishaM mR^ityuM jarAM chaivApiyanti hi .. 14..
karmaniShThAH svayaM dhIrA martyAH paNDitamAninaH .. 15..
mUDhA eva na vidvA.nsasteShAM nAsti parA gatiH .
andhenaiva yathA chAndhA nIyamAnAH sudAruNe .. 16..
andhakUpe patantyeva tathA karmaratA janAH .
karmaniShThA svayaM sarve kR^itArthA iti mohitAH .. 17..
abhimanyanti te karmakShaye vashyaM patanti hi .
vinA nAsti paraM j~nAnaM teShAM kaivalyamuttamam .. 18..
iShTApUrtaM manyamAnA variShThamiti ye janAH .
te mUDhAH paramaM shreyo naiva yAnti na sa.nshayaH .. 19..
anekajanmasa.nsiddhaH shrautasmArtaparAyaNaH .
anityamiti vij~nAya jagadvairAgyamApnuyAt .. 20..
j~nAnAdeva hi sa.nsAravinAsho naiva karmaNA .
iti j~nAtvA shivaj~nAnasiddhyarthaM punarAstikAH .. 21..
shrotriyaM brahmaniShThaM cha guruM gachChetpriyeNa cha .
gurustasmai parAM vidyAM dadyAchcha surapu~NgavAH .. 22..
visphuli~NgA yathA chAgneH sudIptAtprabhavanti cha .
apiyanti tathA bhAvA akShare shivasa~nj~nake .. 23..
divyo hyamUrtaH puruShaH sabAhyAbhyantaro hyajaH .
aprANo hyamanAH shubhro mAyAyA jIvataH paraH .. 24..
etasmAjjAyate prANo manaH sarvendriyANi cha .
khaM vAyurjyotirApashcha bhUmirvishvasya dhAriNI .. 25..
agnirmUrdhA chakShuShI chandrasUryau
     dishaH shrotre vAgvivR^itAshcha vedAH .
vAyuH prANo hR^idayaM vishvamasya
     padbhyAM bhUmiH sha~Nkaro.ayaM hi satyaH .. 26..
tasmAdagniH samidho yasya sUryaH
     somAdvR^iShTishchauShadhayaH pR^ithivyAm .
pumAn retaH si~nchati yoShitAyAM
     bahvIH prajA bahudhA samprasUtAH .. 27..
tasmAdR^ichaH sAma yajU.nShi dIkShA
     yaj~nAshcha sarve kratavo dakShiNAshcha .
sa.nvatsaro yajamAnashcha lokaH
     somo yatra pavate yatra sUryaH .. 28..
tasmAddevA bahudhA samprasUtAH
     sAdhyA martyAH pashavaH pakShiNashcha .
prANApAnau vrIhiyavau tapashcha
     shraddhA satyaM brahmacharyaM vidhishcha .. 29..
tasmAtprANA archiShaH sapta homAH
     surashreShThAH samidhaH sapta chaiva .
lokAH sarve chodbhavantyAshu pUrvaM
     yathA tadvatsvapnatulyaM tathA.api .. 30..
ataH samudrA girayashcha nadya\-
     stathA sarvA oShadhayo rasAshcha .
sarvasyAtmA sarvasAkShI parAtmA
     nityAnando.ayaM purANaH supUrNaH .. 31..
idaM sakalamAstikAH puruSha eva naivAparaM
     na ki~nchidaparaM tataH sakalamasti satyaM hi tat .
idaM hi mama vedanaM munigaNasya shambhorhare\-
     rna kashchidapi sa.nshayaH shrutimatasya yuktaH khalu .. 32..
aho viShayamAyayA maraNapUrvaduHkhodadhau
     patanti manujA amI parashivasya vidyAM vinA .
taranti jananArNavaM parashivasya vidyAbalA\-
     didaM tu shivavedanaM shivapadasya devAbalAt .. 33..
guhAyAM nihitaM sAkShAdakSharaM veda chennaraH .
ChittvA.avidyAmahAgranthiM shivaM gachChetsanAtanam .. 34..
tadetadakSharaM brahma sa prANastadu vA~NmanaH .
tadetadamR^itaM satyaM tadveddhavyaM manIShibhiH .. 35..
dhanustAraM sharo hyAtmA brahma tallakShyamuchyate .
apramattena veddhavyaM sharavattanmayo bhavet .. 36..
lakShyaM sarvagataM chaiva sharo.ayaM sarvatomukhaH .
veddhA sarvagatashchaiva viddhaM lakShyaM na sa.nshayaH .. 37..
AtmAnamaraNiM kR^itvA praNavaM chottarAraNim .
dhyAnanirmathanAbhyAsAddeva pashyennigUDhavat .. 38..
dyaurantarikShaM bhUmishcha manaH prANaH surottamAH .
yasminnotaM tamevaikaM vidyAtprAj~naH samAhitaH .. 39..
brahmaikaviShayAM vAchaM vadetsatatamAstikAH .
anyA vAchastyajedeSha seturevAmR^itasya cha .. 40..
yaH sarvaj~naH sarvavidyo yasyaiSha mahimA bhuvi .
divye brahmapure vyomni shivaH sAkShAtpratiShThitaH .. 41..
manomayaH prANasharIranetA
     pratiShThitaH sarvahR^idambujAntaH .
tadvij~nAnena parimuchyanti dhIrA
     yadbhAti chAnandavapuH svabhAvAt .. 42..
bhidyate hR^idayagranthishChidyante sarvasa.nshayAH .
kShIyante chAsya karmANi tasmindR^iShTe parAvare .. 43..
hiraNmaye pare koshe virajaM brahma niShkalam .
tachChubhraM jyotiShAM jyotistadyadAtmavido viduH .. 44..
na tatra sUryashchandrashcha tArakA vidyuto.analaH .
vibhAnti sha~Nkare sAkShAtsvayambhAne chidAtmake .. 45..
tameva sakalaM bhAntamanubhAti svabhAvataH .
tasya bhAsA sarvamidaM vibhAti tata eva hi .. 46..
na tatra chandrArkavapuH prakAshate
     na vAnti vAtAH sakalAshcha devatAH .
sa eSha devaH kR^itabhUtabhAvanaH
     svayaM vishuddho virajaH prakAshate .. 47..
brahmaivedamamR^itaM tatpurastA\-
     dbrahmAnantaM paramaM chaiva pashchAt .
brahmAnantaM paramaM dakShiNe cha
     brahmAnantaM paramaM chottare cha .. 48..
dvau suparNau sharIre.asmin
     jIveshAkhyau saha sthitau .
tayorjIvaH phalaM bhu~Nkte
     karmaNo na maheshvaraH .. 49..
kevalaM sAkShirUpeNa vinA bhogaM maheshvaraH .
prakAshate svayambhedaH kalpito mAyayA tayoH .. 50..
yathAkAsho ghaTAkAshamahAkAshamabhedataH .
kalpitaH parachijjIvaH shivarUpeNa kalpitaH .. 51..
tattvatashchichChivaH sAkShAchchijjIvashcha tataH sadA .
chichchidAkArato.abhinnA na bhinna chittvahAnitaH .. 52..
chitashchinna chidAkArAdbhidyate jaDarUpataH .
bhidyate chejjaDe bhedashchidekA sarvadA khalu .. 53..
tarkatashcha pramANAchcha chidekatve vyavasthite .
api pApavatAM pu.nsAM viparItA matirbhavet .. 54..
shrautasmArtasamAchArairvishuddhasya mahAtmanaH .
prasAdAdeva rudrasya chidekatve matirbhavet .. 55..
chidekatvaparij~nAnAnna shochati na muhyati .
advaitaM paramAnandaM shivaM yAti tu kevalam .. 56..
shivasthAne sharIre.asminsthito.api svAtmamAyayA .
duHkhAdisAgare magno muhyamAnashcha shochati .. 57..
svasmAdanyatayA bhAtamIshaM svenaiva sevitam .
adhiShThAnaM samastasya jagataH satyachidghanam .. 58..
ahamasmIti nishchitya vItashoko bhavatyayam .
asya chinmAtrarUpasya svasya sarvasya sAkShiNaH .. 59..
mahimAnaM yadA veda paramAdvaitalakShaNam .
tadaiva vidyayA sAkShAdvItashoko bhavatyayam .. 60..
brahmayoniM sadA pUrNaM rukmavarNaM maheshvaram .
apashyanneva pashyantaM kartR^itvena prakAshitam .. 61..
anekakoTibhiH kalpairarjitaiH puNyakarmabhiH .
tarkatashcha pramANAchcha prasAdAtparameshvarAt .. 62..
pashyati shraddhayA chApi yadA vidvAnsurarShabhAH .
puNyapApe vidhUyAyamasaktaH sarvahetubhiH .. 63..
sarvAkAratayA sAmyaM paramAdvaitalakShaNam .
upaiti nAtra sandehaH kartavyashcha manIShibhiH .. 64..
chinmAtraM hi sadA rUpamubhayoH shivajIvayoH .
tathA sati kathaM sAmyaM chinmAtre bhedavarjite .. 65..
upAdhiyuktarUpe tu tayoH sAmyaM bhavedyadi .
tadA.api naiva sAmyaM syAjjIvasya paramAtmanaH .. 66..
mahAkAshasamatvaM tu ghaTAkAshasya sarvathA .
yathA nAsti tathA sAmyaM na jIvasya shivena tu .. 67..
astu vA sAmyamIshena jIvasyAsya tadA.api tu .
karmaNA vidyayA vA tatsAmyaM sidhyati nAnyathA .. 68..
karmaNA chedvinAshaH syAtkarmasAdhyaM hi nashvaram .
vidyayaiva tu chetsAmyaM purastAdeva chAsti hi .. 69..
purastAdeva siddhasya bodhakaM khalu vedanam .
abhUtArthasya chotpattiM na karoti kadAchana .. 70..
tatraivaM sati sAmyaM tu tayoH sarvAtmanaiva tu .
purastAdeva chAstyeva tadA.api shivajIvayoH .. 71..
purastAdeva kaivalyaM lakShaNaikatvato.asti cha .
tathA sati shivo bhinno vidyayA.abhinnavatsthitaH .. 72..
vidyayA tadvinAshena svasAmyaM yAti nAnyathA .
ataH sAmyaM tayoH sAkShAdaikyameva na chetarat .. 73..
evaM jIvaH svakaM rUpaM shivaM pashyati cheddR^iDham .
svAtmanyeva ratiM krIDAmanyachcha kurute sadA .. 74..
bahishcheShTA cha mayyeva shive satyasukhAtmake .
iti jAnAti sarvaM tu svAtmanaiva hi bhAsate .. 75..
svAtmanaiva svayaM sarvaM yadA pashyati nirbhayaH .
tadA mukto na muktashcha baddhasya hi vimuktatA .. 76..
evaM rUpA parA vidyA satyena tapasA.api cha .
brahmacharyAdibhirdharmairlabhyA vedoktavartmanA .. 77..
sharIre.antaH svaya~njyotiHsvarUpaM svakamaishvaram .
kShINadoShAH prapashyanti netare mAyayA.a.avR^itAH .. 78..
evaM rUpaparij~nAnaM yasyAsti parayoginaH .
kutrachidgamanaM nAsti tasya sampUrNarUpiNaH .. 79..
AkAshamekaM sampUrNaM kutrachinnaiva gachChati .
tadvatsvAtmavibhutvaj~naH kutrachinnaiva gachChati .. 80..
na chakShuShA gR^ihyate nApi vAchA
     nAnyairdevaistapasA karmaNA vA .
j~nAnaprasAdena vishuddhasattvaH
     sa niShkalaM pashyati rUpamaisham .. 81..
dhyAnena parameshasya sAmbamUrtidharasya cha .
svaniShkalaparij~nAnaM jAyate nAnyahetunA .. 82..
eSha AtmA susUkShmo.api veditavyo.agryayA dhiyA .
pa~nchadhA sanniviShTo.asuryasminsarvAshraye surAH .. 83..
sa.nvibhAti svacittena yaM yaM lokaM vishuddhadhIH .
sadA kAmayate yA.nshcha tajjayatyakhilaM tataH .. 84..
tasmAdAtmavidaM sAkShAdIshvaraM bhavatArakam .
archayedbhUtikAmastu svasharIreNa chArthataH .. 85..
nAyamAtmA pravachanena labhyo
     na medhayA na bahunA shrutena .
yamevaiSha vR^iNute tena labhya\-
     stasyaiSha AtmA vivR^iNute tanuM svAm .. 86..
nAyamAtmA balahInena labhyaH
     pramAdatastapaso nAnyali~NgAt .
etairyatnaM yaH karotyeva dhImA.n\-
     stasyAtmA.ayaM vishate brahma dhAma .. 87..
samprApyainamR^iShayo j~nAnatR^iptAH
     kR^itAtmAno vItashokAH prashAntAH .
te sarvagaM sarvashaH prApya dhIrA
     yuktAtmAnaH sarvamevAvishanti .. 88..
vedAntavij~nAnasunishchitArthAH
     sannyAsayogAdyatayaH shuddhasattvAH .
te brahmaloke tu parAntakAle
     parAmR^itAtparimuchyanti sarve .. 89..
gatAH kalAH pa~nchadasha pratiShThA
     devAshcha sarve pratidevatAshcha .
karmANi vij~nAnamayashcha AtmA
     pare.avyaye sarva ekIbhavanti .. 90..
yathA nadyaH syandamAnAH samudre
     astaM yAnti nAmarUpe vihAya .
tathA vidvAnnAmarUpAdvimuktaH
     parAtparaM puruShaM brahma yAti .. 91..
sa yo ha vai tatparamaM brahma veda surarShabhAH .
brahmaiva bhavati j~nAnAnnAsti sa.nshayakAraNam .. 92..
sunishchitaM paraM brahma veda chetsvAnubhUtitaH .
kule bhavati nAbrahmavittasya surapu~NgavAH .. 93..
shokaM tarati pApmAnaM guhAgranthirvinashyati .
amR^ito bhavati prAj~naH satyameva mayoditam .. 94..
sarvamuktamatishobhanaM mayA
     shokamohapaTalasya bhedakam .
Ashu satyasukhabodhavastudaM
     vedamAnaniratasya bhAsate .. 95..
iti brahmagItAsUpaniShatsu vastusvarUpavichAro
nAma saptamo.adhyAyaH .. 7..
\medskip\hrule\medskip
  .. atha aShTamo.adhyAH ..
  .. kaivalyopaniShadvivaraNe tattvavedanavidhiH ..
brahmovAcha \-
asti tattvaM paraM sAkShAchChivarudrAdisaMj~nitam .
tadavashyaM mahAyAsAdveditavyaM manIShibhiH .. 1..
tadvidyA yatibhiH sevyA nigUDhAtIva shobhanA .
achirAtsarvapApaghnI parabrahmapradA nR^iNAm .. 2..
shraddhayA parayA ##(##cha mahA##)## bhaktyA dhyAnena cha surottamAH .
yogena cha parA vidyA labhyA sA naiva karmaNA .
na prajAbhirna chArthena tyAgenaiShAM surarShabhAH .. 3..
ye vedAntamahAvAkyashravaNotpannavidyayA .
sunishchitArthA yatayo vishuddhahR^idayA bhR^isham .. 4..
brahmadR^ishye sharIre.asminnantakAle parasya tu .
aj~nAnAkhyasya te sarve muchyanti hi parAmR^itAt .. 5..
ato vidyA.a.aptisiddhyarthaM mumukShurmatimattamaH .. 6..
viviktaM deshamAshritya sukhAsIno mahAshuchiH .
samagrIvashiraHkAyaH sitabhasmAvaguNThitaH .. 7..
indriyANi samastAni nirudhya surapu~NgavAH .
praNamya svaguruM bhaktyA vichintya hR^idayAmbujam .. 8..
vishuddhaM virajaM tasya madhye vishadamIshvaram .
anantaM shuddhamavyaktamachintyaM sarvajantubhiH .. 9..
shivaM prashAntamamR^itaM vedayoniM surarShabhAH .
AdimadhyAntanirmuktamekaM sAkShAdvibhuM tathA .. 10..
arUpaM sachchidAnandamadbhutaM parameshvaraM .
umAsahAyamomarthaM prabhuM sAkShAttrilochanam .
nIlakaNThaM prashA##(##bhA##)##ntastaM##(##sthaM##)## dhyAyennityamatandritaH .. 11..
evaM dhyAnaparaH sAkShAnmunirbrahmAtmavidyayA .. 12..
bhUtayoniM samastasya sAkShiNaM tamasaH param .
gachChatyeva na sandehaH satyamuktaM mayA surAH .. 13..
yo.ayaM dhyeyashcha vij~neyaH shivaH saMsAramochakaH .
sa brahmA sa shivaH sendraH so.akSharaH paramaH svarAT .. 14..
sa eva viShNuH sa prANaH sa kAlo.agniH sa chandramAH .
sa eva sarvaM yadbhUtaM yachcha bhavyaM samAsataH .. 15..
sa eva vidyAvidyA cha na tato.anyattu ki~nchana .
j~nAtvA taM mR^ityumatyeti nAnyaH panthA vimuktaye .. 16..
sarvabhUtasthamAtmAnaM sarvabhUtAni chAtmani .
sampashyanbrahma paramaM yAti nAnyena hetunA .. 17..
AtmAnamaraNiM kR^itvA praNavaM chottarAraNim .
dhyAnanirmathanAdeva pA##(##shA##)##pAndahati paNDitaH .. 18..
sa eva bhagavAnIsho mAyayaivAtmabhUtayA .
muhyamAna iva sthitvA svasvAtantryabalena tu .. 19..
sharIramidamAsthAya karoti sakalaM punaH .
jAgratsaMj~namidaM dhAma prakalpya svIyamAyayA .. 20..
rAjaputrAdivattasminkrIDayA kevalaM haraH .
annapAnAdibhiH strIbhistR^iptimeti surarShabhAH .. 21..
svapnakAle tathA shambhurjIvatvena prakAshitaH .
sukhaduHkhAdikAnbhogAnbhu~Nkte svenaiva nirmitAn .. 22..
suShuptikAle sakale vilIne tamasA.a.avR^itaH .
svasvarUpamahAnandaM bhu~Nkte vishva##(##dR^ishya##)##vivarjitaH .. 23..
punaH pUrvakriyAyogAjjIvatvena prakAshitaH .
jAgratsaMj~namidaM dhAma yAti svapnamathApi vA .. 24..
puratrayamidaM puMso bhogAyaiva vinirmitam .
bhogashchAsya sadA krIDA na duHkhAya kadAchana .. 25..
vishvAdhiko mahAnandaH svatantro nirupadravaH .
asaktaH sarvadoShaishcha kathaM duHkhI bhaveddharaH .. 26..
sa na jIvaH shivAdanyo yo bhu~Nkte karmaNAM phalam .
bhedAbhAvAchchitashchetyaM na karmaphalamarhati .. 27..
ataH sarvajagatsAkShI chidrUpaH parameshvaraH .
advitIyo mahAnandaH krIDayA bhogamarhati .. 28..
dhAmatrayamidaM shambhorna duHkhAya kadAchana .
krIDArAmatayA bhAti na chodyArho maheshvaraH .. 29..
idaM dhAmatrayaM shambhorvibhedena na vidyate .
shambhureva tathA bhAti na hyanyatparameshvarAt .. 30..
jAgratsvapnasuShuptyAkhyAvasthArUpeNa bhAti yaH .
sa vishvataijasaprAj~nasamAkhyAH kramasho bhavet .. 31..
vishvo hi sthUlabhu~N.hnityaM taijasaH praviviktabhuk .
prAj~nastvAnandabhuksAkShI kevalaH sukhalakShaNaH .. 32..
triShu dhAmasu yadbhogyaM bhoktA yashcha prakIrtitaH .
ubhayaM brahma yo veda sa bhu~njAno na lipyate .. 33..
ashvamedhasahasrANi brahmahatyAshatAni cha .
kurvannapi na lipyeta yadyekatvaM prapashyati .. 34..
jIvarUpa iva sthitvA yaH krIDati puratraye .
sa na jIvaH sadA shambhuH satyameva na sa.nshayaH .. 35..
tatastu jAtaM sakalaM vichitraM satyavatsurAH .
sa satyo.asatyasAkShitvAtsAkShitvAchchitsukhaM tathA .. 36..
premAspadatvAdadvaito bhedAbhAvAtsurarShabhAH .
tasminnaiva layaM yAti puratrayamidaM tataH .. 37..
na jIvo jIvavadbhAti sAkShAdbrahmaiva kevalam .
aj~nAnAjjIvarUpeNa bhAsate na svabhAvataH .. 38..
brahmaNo jAyate prANo manaH sarvendriyANi cha .
khaM vAyurjyotirApashcha bhUmirvishvasya dhAriNI .. 39..
yatparaM brahma sarvAtmA vishvasyAyatanaM mahat .
sUkShmAtsUkShmatamaM nityaM tattvaMshabdArtha eva hi .. 40..
yastvaMshabdasya lakShyArthaH sa tachChabdArtha eva hi .
tattvaMshabdau svataHsiddhe chinmAtre paryavasyataH .. 41..
yaH padadvayalakShyArthastasminbhedaH prakalpitaH .
mAyAvidyAtmakopAdhibhedenaiva na vastutaH .. 42..
svataHsiddhaikatAj~nAnaM vyudasya shrutirAdarAt .
svabhAvasiddhamekatvaM bodhayatyadhikAriNaH .. 43..
jAgratsvapnasuShuptyAdiprapa~nchatvena bhAti yat .
tadbrahmAhamiti j~nAtvA sarvabandhaiH pramuchyate .. 44..
yastu brahma vijAnAti svAtmanA sudR^iDhaM naraH .
tasya svAnubhavastvevaM svabhAvAdanuvartate .. 45..
triShu dhAmasu yadbhogyaM bhoktA bhogashcha yastathA .
tebhyo vilakShaNaH sAkShI chinmAtro.ahaM sadAshivaH .. 46..
mayyeva sakalaM jAtaM mayi sarvaM pratiShThitam .
mayi sarvaM layaM yAti tadbrahmAdvayamasmyaham .. 47..
aNoraNIyAnahameva tadva\-
     nmahAnahaM vishvamahaM vishuddhaH .
purAtano.ahaM puruSho.ahamIsho
     hiraNmayo.ahaM shivarUpamasmi .. 48..
apANipAdo.ahamachintyashaktiH
     pashyAmyachakShushcha shR^iNomyakarNaH .
ahaM vijAnAmi viviktarUpo
     na chAsti vettA mama chitsadA.aham .. 49..
vedairanekairahameva vedyo
     vedAntakR^idvedavideva chAham .
na puNyapApe mama nAsti nAsho
     na janma dehendriyabuddhayashcha .. 50..
na bhUmirApo mama naiva vahni\-
     rna chAnilo me.asti na chAmbaraM cha .
sadA.ahamevAhamiti sphurAmi
     svabhAvatashchedamiti sphurAmi .. 51..
abhAtarUpeNa tathaiva sarvadA
     vibhAtarUpeNa cha bhAnarUpataH .
abhAnarUpeNa cha sarvarUpataH
     sphurAmi devo.ahamataH purAtanaH .. 52..
evaM viditvA paramAtmarUpaM
     guhAshayaM niShkalamadvitIyam .
samastabhAnaM sadasadvihInaM
     prayAti shuddhaM paramAtmarUpam .. 53..
atashcha vedAntavachobhira~njasA
     mumukShubhirnityamasheShanAyakaH .
gurUpadeshena cha tarkatastathA
     vichintanIyashcha visheShataH shivaH .. 54..
kaivalyopaniShatparA parakR^ipAyuktA yaduchchairmudA
     provAcha pratitaujasairapi haribrahmAdibhishchAdR^itam .
he devA ahamuktavAnatishubhabrahmAparokShAya ta\-
     tsarveShAmadhikAriNAM matamidaM vittAtibhaktyA saha .. 55..
iti brahmagItAsUpaniShatsu kaivalyopaniShadvivaraNe
tattvavedanavidhirnAmAShTamo.adhyAyaH .. 8..
\medskip\hrule\medskip
  .. atha navamo.dhyAyaH ..
  .. bR^ihAdAraNyakopaniShadvyAkhyAnam ..
brahmovAcha .
pratyagrUpaH shivaH sAkShAtparAnandasvalakShaNaH .
parapremAspadatvena pratItatvAtsurarShabhAH .
parapremAspadAnandaH surA Ananda eva hi .. 1..
priyo bhavati bhAryAyAH patiH so.ayaM surarShabhAH .. 2..
patirna patyuH kAmAya priyo bhavati sarvathA .
kiM tvAtmanastu kAmAya tataH priyatamaH svayam .. 3..
jAyAyAstu na kAmAya na hi jAyA priyA matA .
kiM tvAtmanastu kAmAya tataH priyatamaH svayam .. 4..
putrANAM tu na kAmAya priyAH putrA bhavanti cha .
kiM tvAtmanastu kAmAya tataH priyatamaH svayam .. 5..
brahmaNastveva kAmAya na brahma bhavati priyam .
kiM tvAtmanastu kAmAya tataH priyatamaH svayam .. 6..
kShatrasyaiva tu kAmAya na kShatraM bhavati priyam .
kiM tvAtmanastu kAmAya tataH priyatamaH svayam .. 7..
vittasyaiva tu kAmAya na vittaM bhavati priyam .
kiM tvAtmanastu kAmAya tataH priyatamaH svayam .. 8..
lokAnAmeva kAmAya na bhavanti priyAshcha te .
kiM tvAtmanastu kAmAya tataH priyatamaH svayam .. 9..
devAnAmapi kAmAya priyA devA bhavanti na .
kiM tvAtmanastu kAmAya tataH priyatamaH svayam .. 10..
vedAnAmeva kAmAya priyA vedA bhavanti na .
kiM tvAtmanastu kAmAya tataH priyatamaH svayam .. 11..
bhUtAnyapi cha bhUtAnAM kAmAya na bhavanti cha .
kiM tvAtmanastu kAmAya tataH priyatamaH svayam .. 12..
sarvasyaiva tu kAmAya na sarvaM bhavati priyam .
kiM tvAtmanastu kAmAya tataH priyatamaH svayam .. 13..
ataH priyatamo hyAtmA sukhavatsukhalakShaNaH .
sukhAbhilAShibhiH so.ayaM tyaktvA karmANi sAdaram .. 14..
draShTavyastu surA nityaM shrotavyashcha tathaiva cha .
mantavyashcha vichintyashcha sarvaM taddarshanAdibhiH .. 15..
duHkharAshervinAshAya paramAdvaitavidbhavet .. 16..
paramAdvaitavij~nAnAtsa.nsAraH praviNashyati .
svataHsiddhAdvayAnandaH svayameva vibhAti cha .. 17..
parAdAttaM surA brahma svato.anyadbrahma veda yaH .
tathA parAdAtkShatraM taM lokA api tathaiva cha .. 18..
devA vedAshcha bhUtAni parAduH khalu taM pashum .
svasvarUpAtparaM ki~nchidapi pashyanpraNashyati .. 19..
brahmakShatrAdibhedena pratItA hyakhilA amI .
varNAstathA.a.ashramAH sarve sa~NkarAH sakalA api .. 20..
devagandharvapUrvAshcha bhUtAni bhuvanAni cha .
asti nAstIti shabdArthau tathaivAnyachcha ki~nchana .. 21..
mAyAvidyAtamomohaprabhedA akhilA api .
sarvamAtmaiva naivAnyadanyabuddhirhi sa.nsR^itiH .. 22..
nirvikalpe pare tattve vidyayA buddhivishramaH .
sA hi sa.nsAravichChittirnAparA puruShAdhikA .. 23..
pratItamavisheSheNa sakalaM brahma yaH pumAn .
veda taM shirasA nityaM praNayAmi jagadgurum .. 24..
vedA bahumukhA bhAnti smR^itayashcha tathaiva cha .
purANAni samastAni buddhArhAdyAgamAntarAH .. 25..
shaivAshcha vaiShNavAshchaiva maduktA AgamA api .
apabhra.nshAH samastAshcha kevalaM laukikI matiH .. 26..
tarkAshcha vividhAH sUkShmAH sthUlAshcha sakalA api .
parasparavirodhena prabhAnti sakalAtmanAm .. 27..
teShAmevAvirodhe tu kAlo yAti cha dhImatAm .
katha~nchitkAlasadbhAve.apyavirodho na sidhyati .. 28..
ataH sarvaM parityajya manaso malakAraNam .
yathAbhAtena rUpeNa shivaM pashyetsunishchalaH .. 29..
krimikITapata~NgebhyaH pashavaH praj~nayA.adhikAH .
pashvAdibhyo narAH prAj~nAsteShu kechana kovidAH .. 30..
tathA tebhyashcha gandharvAH pitaro matimattamAH .
anye cha tAratamyena paNDitA utarottaram .. 31..
yUyaM sattvotkaTAH prAj~nAH sarveShAmapi he surAH .
yuShmabhyo.ahaM mahAprAj~no mattaH prAj~no janArdanaH .. 32..
janArdanAdapi prAj~naH sha~Nkaro guNamUrtiShu .
tataH prAj~natamaH sAkShAchChivaH sAmbaH sanAtanaH .. 33..
sa eva sAkShAtsarvaj~nastato.anyo nAsti kashchana .
tasmAdvidyAmimAM tyaktvA brahma sarvaM vilokayet .. 34..
AyAsastAvadatyalpaH phalaM muktirihaiva tu .
tathA.api paramAdvaitaM naiva vA~nChanti mAnavAH .. 35..
kadAchidapi chittasya bhayaM ki~nchinna vidyate .
tathA.api paramAdvaitaM naiva vA~nChanti mAnavAH .. 36..
svasvarUpAtirekeNa nAsti mAnaM virodhi cha .
tathA.api paramAdvaitaM naiva vA~nChanti mAnavAH .. 37..
svasvarUpAtirekeNa tarkashcha na hi vidyate .
tathA.api paramAdvaitaM naiva vA~nChanti mAnavAH .. 38..
shrutismR^itipurANAni prAhurekatvamAtmanaH .
tathA.api paramAdvaitaM naiva vA~nChanti mAnavAH .. 39..
anugrAhakatarkashcha kurute tarkavedanam .
tathA.api paramAdvaitaM naiva vA~nChanti mAnavAH .. 40..
shivAgameShu chAdvaitaM babhAShe parameshvaraH .
tathA.api paramAdvaitaM naiva vA~nChanti mAnavAH .. 41..
nArAyaNo.api chAdvaitaM babhAShe svAgameShu cha .
tathA.api paramAdvaitaM naiva vA~nChanti mAnavAH .. 42..
ahaM chAvochamadvaitaM madukteShvAgameShu cha .
tathA.api paramAdvaitaM naiva vA~nChanti mAnavAH .. 43..
anye cha yoginaH sarve prAhuradvaitamAtmanaH .
tathA.api paramAdvaitaM naiva vA~nChanti mAnavAH .. 44..
vishuddhaj~nAninAM devA niShThA.apyadvaitagocharA .
tathA.api paramAdvaitaM naiva vA~nChanti mAnavAH .. 45..
kechitsAmAnyamadvaitaM vadanti bhrAntachetasaH .
visheShaM dvaitamAshritya na teShAmasti vedanam .. 46..
dvaitameva hi sarvatra pravadanti hi kechana .
na te manuShyAH kITAshcha pata~NgAshcha ghaTA hi te .. 47..
avisheSheNa sarvaM tu yaH pashyati maheshvaram .
sa eva sAkShAdvij~nAnI sa shivaH sa tu durlabhaH .. 48..
jagaditi pratibhA vyavahArataH
     parataraH paramaH paramArthataH .
iti matirna bhavatyapi kasyachi\-
     chChashidharasmaraNena hi sidhyati .. 49..
jagaditi pratibhA.api cha shA~NkarI
     matimatAmiti me suvinishchayaH .
iti matirvimalA cha shubhAvahA
     shashidharasmaraNena hi sidhyati .. 50..
jagaditi pratibhAsamapekShya cha
     shrutirapi priyahetumihAha hi .
na hi jagatpratibhA na cha sA shrutiH
     priyakaraH sakalashcha na vastutaH .. 51..
iti matirvimalA nanu jAyate
     yadi janaH shiva eva sa tAdR^ishaH .
na hi kR^itiH sakalA mahAtmano
     yadi kR^itiH pashureva sa mAnavaH .. 52..
na hi janirmaraNaM gamanAgamau
     na hi malaM vimalaM na cha vedanam .
shivamidaM sakalaM vibhAsate
     sphuTataraM paramasya tu yoginaH .. 53..
visR^ijya sandehamasheShamAstikAH
     pratItametannikhilaM jaDAjaDam .
gurUpadeshena shivaM vilokaye\-
     dvilokanaM chApi shivaM vilokayet .. 54..
vilokanaM chApi shivaM vilokaya\-
     nvilokanaM chApi visR^ijya kevalam .
svabhAvabhUtaH svachitA.avashiShyate
     chitA.avasheShashcha na tasya tattvataH .. 55..
niShThA tasya mahAtmanaH suravarA vaktuM mayA shakyate
     na prauDhena shivena vA munigaNairnArAyaNenApi cha .
vedenApi purAtanena parayA shaktyA pareNAtha vA
     mUkIbhAvamupaiti tatra viduShAM niShThA hi tAdR^igvidhA .. 56..
sarvamuktamiti vaH surarShabhAH
     kevalena karuNAbalena cha .
veda eva sakalArthabodhakaH
     sheSha eva vachanaM cha tasya me .. 57..
iti brahmagItAsUpaniShatsu bR^ihadAraNyakopaniShadvyAkhyAne
navamo.adhyAyaH .. 9..
\medskip\hrule\medskip
  .. atha dashamo.adhyAyaH ..
  .. bR^ihAdAraNyakavyAkhyAkathanam ..
brahmovAcha .
asti sarvAntaraH sAkShI pratyagAtmA svayamprabhaH .
tadeva brahma sampUrNamaparokShatamaM surAH .. 1..
prANApAnAdibhedasya yaH sattAsphuraNapradaH .
yasya sannidhimAtreNa cheShTate sakalaM surAH .. 2..
yashcha sarvasya cheShTAyAmasakto niShkriyaH svayam .
sa hi sarvAntaraH sAkShAdAtmA nAnyaH surarShabhAH .. 3..
yo.ayaM sarvAntaraH svAtmA so.ahamartho na vigrahaH .
dR^ishyatvAdasya dehasya draShTA yo.asya sa eva saH .. 4..
yo.ayaM sarvAntaraH svAtmA so.ayaM na prANapUrvakaH .
dR^ishyatvAtprANapUrvasya draShTA yo.asya sa eva saH .. 5..
dR^iShTerdraShTA shruteH shrotA matermantA cha yaH surAH .
vij~nAterapi vij~nAtA sa hi sarvAntaraH paraH .. 6..
ato.anyadArtaM sakalaM na satyaM tu nirUpaNe .
sa eva sarvaM naivAnyaditi samya~N.hnirUpaNe .. 7..
yathA pR^ithivyAmotaM cha protaM cha sakalaM surAH .
tathA.apsu sakalaM devA otaM protaM na sa.nshayaH .. 8..
Apashcha vAyau he devA otAH protAstathaiva cha .
antarikSheShu vAyushcha lokeShu surapu~NgavAH .. 9..
antarikShAshcha lokAshcha tathA gandharvakeShu cha .
lokeShvAdityalokeShu sthitA gandharvasa~nj~nitAH .. 10..
chandralokeShu chAdityalokA otAstathaiva cha .
chandralokAshcha nakShatralokeShu surapu~NgavAH .. 11..
devalokeShu nakShatralokA otAstathaiva cha .
devalokAshcha he devA indralokeShu sa.nsthitAH .. 12..
prAjApatyeShu lokeShu sthitA aindrAH surarShabhAH .
prAjApatyAstathA lokA brahmalokeShu sa.nsthitAH .. 13..
viShNulokeShu he devA brahmalokAH susa.nsthitAH .
viShNulokAstathA otA rudralokeShu he surAH .. 14..
rudralokAH sthitA lokeShvIshvarasya surarShabhAH .
sadAshivasya lokeShu sthitA hyaishAH surarShabhAH .. 15..
otAH protAshcha te lokA brahmasa~nj~ne pare shive .
evaM sarve sadA sAkShisvarUpe pratyagAtmani .. 16..
sarvAntaratame protA otA adhyAsataH sthitAH .. 17..
sarvAdhiShThAnarUpastu pratyagAtmA svayamprabhaH .
na kasmi.nshchitsthitaH sAkShI satsvarUpaH surarShabhAH .. 18..
yasminnadhyastarUpeNa sthitaM sarvaM nirUpaNe .
sa eva sakalaM nAnyaditi samya~N.hnirUpaNe .. 19..
yo.ayamAtmA svayaM bhAti sattayA.anyavivarjitaH .
sa eva sAkShAtsarveShAmantaryAmI na chAparaH .. 20..
pR^ithivyAmapi yastiShThanpR^ithivyA antaraH sadA .
yaM na veda surAH pR^ithvI sharIraM yasya bhUrapi .. 21..
yo.antaro yamayatyetAM bhUmiM niShkriyarUpataH .
eSha eva hi naH sAkShAdantaryAmI parAmR^itaH .. 22..
apsu tiShThannapAM devA antaro yaM na tA viduH .
ApaH sharIraM yasyaitA yo.antaro yamayatyapaH .
eSha eva hi naH sAkShAdantaryAmI parAmR^itaH .. 23..
evamagneshcha yo netA chAntarikShasya he surAH .. 24..
vAyupUrvasya sarvasya chetanAchetanasya cha .
eSha eva hi naH sAkShAdantaryAmI parAmR^itaH .. 25..
adR^iShTo.ayaM surA draShTA shrotaivAyaM tathA.ashrutaH .
amatashcha tathA mantA vij~nAtA kevalaM surAH .. 26..
ravisomAgnipUrveShu vinaShTeShvayamAstikAH .
chittasAkShitayA bhAti svaprakAshena kevalam .. 27..
chittavyApAranAshe tu tadabhAvaM surarShabhAH .
svaprakAshena jAnAti suShuptau veda tAmapi .. 28..
AvirbhAvatirobhAvarahitastu svayamprabhaH .
bhAvAbhAvAtmakaM sarvaM sadA.ayaM veda kevalaH .. 29..
bhAvAbhAvAtmanA vedyaM samastaM surapu~NgavAH .
vettaivAyaM na chaivAnyaditi samya~N.hnirUpaNam .. 30..
evaM dvaitaM vichAreNa svAtmanA veda yaH pumAn .
sa yogI sarvadA dvaitaM pashyannapi na pashyati .. 31..
draShTurdR^iShTerna nAsho.asti dR^ishyameva vinashyati .
tachcha dvaitaM dR^isherdR^ishyaM nAsti draShTA.asti kevalam .. 32..
eShA.asya paramA sampadgatishcha paramA.asya tu .
eSho.asya paramo loka etaddhi paramaM sukham .. 33..
ahinirlvayanIM muktAM yathA.ahiH svAtmanA punaH .
na pashyati tathA vidvAnna dehe.ahammatirbhavet .. 34..
sarvAdhAre svataHsiddhe shivasa~nj~ne tu nirmale .
pratyagrUpe parAnande neha nAnA.asti ki~nchana .. 35..
mR^ityoH sa mR^ityumApnoti iha nAneva pashyati .
tasmAdadhyastamaj~nAnaM tatkAryaM chAtmarUpataH .. 36..
ekadhaiva mahAyAsAd.hdraShTavyo hi mumukShubhiH .
ayamAtmA.aprameyashcha virajashcha mahAndhruvaH .. 37..
tameva dhIro vij~nAya praj~nAM kurvIta brAhmaNaH .
nAnudhyAyAdbahU~nChabdAnvAcho viglApanaM hi tat .. 38..
sa vA eSha mahAnAtmA janmanAshAdivarjitaH .
vashI sarvasya lokasya sarvasyeshAna eva cha .. 39..
sarvasyAdhipatiH shuddho na bhUyAnsAdhukarmaNA .
karmaNA.asAdhunA naiva kanIyAnsurapu~NgavAH .. 40..
eSha sarveshvaraH sAkShAdbhUtAdhipatireva cha .
bhUtapAlashcha lokAnAmasambhedAya he surAH .. 41..
eSha seturvidharaNastameva brAhmaNottamAH .
vedAnuvachanenApi yaj~nena sakalena cha .. 42..
dAnena tapasA devAstathaivAnashanena cha .
vettumichChati yo vidvAnsa munirnetaro janaH .. 43..
neti netIti niShkR^iShTo ya eSha sarvasAdhakaH .
so.ayamAtmA sadA.agrAhyasvarUpo na hi gR^ihyate .. 44..
tathA.ashIryasvabhAvashcha he devA naiva shIryate .
asa~NgarUpo bhagavAnsarvadA na hi sajjate .. 45..
eSha nityo mahimA brAhmaNasya
     na vardhate karmaNA no kanIyAn .
tasyaiva syAtpadavittaM viditvA
     na lipyate karmaNA pApakena .. 46..
tasmAdbrahmaj~nAnalAbhAya vidvA\-
     ~nshAnto dAntaH satyavAdI bhavechcha .
karmatyAgI sarvavedAntasiddhaM
     vidyAhetuM santataM tvabhyupeyAt .. 47..
tripuNDramud.hdhUlanamAstikottamAH
     sadA.a.acharechCha~Nkaravedane rataH .
shivAdishabdaM cha japedvisheShataH
     prapUjayedbhaktipuraHsaraM haram .. 48..
sAdhanaiH sakalaiH sahitaH surA
     vedanena samastamidaM jagat .
devarUpatayaiva tu nishchitaM
     vedahastatalasthitabilvavat .. 49..
nainaM pApmA tarati brahmaniShThaM
     sarvaM pApaM tarati prAkR^itaM cha .
nainaM pApmA tapati brahmaniShThaM
     sarvaM pApaM tapati prAkR^itaM cha .. 50..
itthaM brahma svAtmabhUtaM viditvA
     shraddhApUrvaM dehametaM svakIyam .
arthaM sarvaM kShetrajAtaM samastaM
     dadyAdasmai deshikendrAya martyaH .. 51..
yashchAtR^iNattyavitathena karNA\-
     vaduHkhaM kurvannamR^itaM samprayachChan .
taM vidyAtpitaraM mAtaraM cha
     tasmai na druhyetkR^itamasya jAnan .. 52..
svadeshikasyaiva tu nAmakIrtanaM
     bhavedanantasya shivasya chintanam .
svadeshikasyaiva tu pUjanaM tathA
     bhavedanantasya shivasya pUjanam .. 53..
svadeshikasyaiva tu nAmakIrtanaM
     shivAdishabdasya tu kIrtanaM bhavet .
svadeshikasyaiva tu bAdhanaM tathA
     bhavedanantasya shivasya bAdhanam .. 54..
tasmAdvidvAnsarvametadvihAya
     shraddhAyuktaH sadguruM satyaniShTham .
vidyAkoshaM vedavedAntaniShThaM
     gachChennityaM satyadharmAdiyuktaH .. 55..
vaktavyaM sakalaM mayA parakR^ipAyuktena sa~NkIrtitaM
     kartavyaM sakalaM surA na hi munerbrahmAtmaniShThasya tu .
smartavyaM sakalaM tathA na hi sadA brahmaiva sachchitsukhaM
     sampUrNaM satatoditaM samarasaM shashvatsvayaM bhAsate .. 56..
iti brahmagItAsUpaniShatsu bR^ihadAraNyakavyAkhyAkathanaM nAma
dashamo.adhyAyaH .. 10..
\medskip\hrule\medskip
  .. atha ekAdasho.adhyAyaH ..
  .. kaThavallIshvetAshvataravyAkhyAyAm ..
brahmovAcha .
asti tattvaM paraM sAkShAddurdarshaM gUDhamuttamam .
anupraviShTaM sarvatra guhAyAM nihitaM param .. 1..
tadviditvA mahAdhIro harShashokau jahAti cha .
dharmAdibhyaH paraM tattu bhUtAdbhavyAchcha sattamAH .. 2..
yadAmananti vedAshcha tapA.nsi paramaM padam .
brahmacharyaM yadichChantashcharanti shiva eva saH .. 3..
etaddhyevAkSharaM brahma etaddhyevAkSharaM param .
etaddhyevAkSharaM j~nAtvA yo yadichChati tasya tat .. 4..
etadAlambanaM shreShThametadAlambanaM param .
etadAlambanaM j~nAtvA brahmaloke mahIyate .. 5..
na jAyate mriyate vA vipashchi\-
     nnAyaM kutashchinna babhUva kashchit .
ajo nityaH shAshvato.ayaM purANo
     na hanyate hanyamAne sharIre .. 6..
ya enaM vetti hantAraM yashchainaM manyate hatam .
tAvubhau na vijAnIto nAyaM hanti na hanyate .. 7..
aNoraNIyAnmahato mahIyA\-
     nAtmA.asya jantornihito guhAyAm .
tamakratuH pashyati vItashoko
     dhAtuprasAdAnmahimAnamasya .. 8..
dUraM vrajati chAsInaH shayAno yAti sarvataH .
kastaM sAkShAnmahAdevaM madanyo j~nAtumarhati .. 9..
asharIraM sharIreShu hyanavastheShvavasthitam .
mahAntaM vibhumAtmAnaM matvA dhIro na shochati .. 10..
nAyamAtmA pravachanena labhyo
     na medhayA na bahunA shrutena .
yamevaiSha vR^iNute tena labhya\-
     stasyaiSha AtmA vivR^iNute tanUM svAm .. 11..
nAvirato dushcharitAnnAshAnto nAsamAhitaH .
nAshAntamAnaso vA.api praj~nAnenainamApnuyAt .. 12..
yasya brahma cha kShatraM cha ubhe bhavata odanaH .
ka itthaM veda devo vA manuShyo.anyashcha yatra saH .. 13..
R^itau pibantau sukR^itasya loke
     guhAM praviShTau parame parArdhe .
ChAyAtapau brahmavido vadanti
     sharIrabhR^ichCha~Nkarasa~nj~nitau tau .. 14..
sharIrabhR^itkarmaphalaM bhu~Nkte yojayitA shivaH .
pratItito viruddhau tau bhedastvaupAdhikastayoH .. 15..
AtmAnaM rathinaM vidyAchCharIraM rathameva tu .
buddhiM tu sArathiM vidyAnmanaH pragrahameva cha .. 16..
indriyANi hayAnvidyAdviShayAnapi gocharAn .
AtmendriyamanoyuktaM vidyAdbhoktAramAstikAH .. 17..
yastvavij~nAnavAnmartyo.ayuktena manasA sadA .
tasyendriyANyavashyAni duShTAshvA iva sAratheH .. 18..
yastu vij~nAnavAnmartyo yuktena manasA sadA .
tasyendriyANi vashyAni sadashvA iva sAratheH .. 19..
yastvavij~nAnavAnmartyo hyamanaskaH sadA.ashuchiH .
na sa tatpadamApnoti sa.nsAraM chAdhigachChati .. 20..
yastu vij~nAnavAnmartyaH samanaskaH sadA shuchiH .
sa tu tatpadamApnoti yasmAdbhUyo na jAyate .. 21..
vij~nAnasArathiryastu manaH pragrahavAnnaraH .
so.adhvanaH pAramApnoti tadviShNoH paramaM padam .. 22..
padaM yatparamaM viShNostadevAkhiladehinAm .
padaM paramamadvaitaM sa shivaH sAmbavigrahaH .. 23..
rudraviShNuprajeshAnAmanyeShAmapi dehinAm .
R^ite sAmbaM mahAdevaM kiM bhavetparamaM padam .. 24..
indriyebhyaH parA hyarthA arthebhyashcha paraM manaH .
manasastu parA buddhirbuddherAtmA mahAnparaH .. 25..
mahataH paramavyaktamavyaktAtpuruShaH paraH .
puruShAnna paraM ki~nchitsA kAShThA sA parA gatiH .. 26..
puruSho nAma sampUrNaH shivaH satyAdilakShaNaH .
sAmbamUrtidharo nAnyo rudro viShNurajo.api vA .. 27..
eSha sarveShu bhUteShu gUDhAtmA na prakAshate .
dR^ishyate tvagryayA buddhyA sUkShmayA sUkShmadarshibhiH .. 28..
yachchedvA~N.hmanasI prAj~nastadyachChejj~nAna Atmani .
mahatyAtmanI vij~nAnaM tadyachChechChAnta Atmani .. 29..
ashabdamasparshamarUpamavyayaM
     tathA.arasaM nityamagandhavachcha yat .
anAdyanantaM mahataH paraM dhruvaM
     nichAyya taM mR^ityumukhAtpramuchyate .. 30..
parA~nchi khAni vyatR^iNanmahesha\-
     stasmAtparA~N.hpashyati nAtmarUpam .
kashchiddhIraH pratyagAtmAnamaikShya\-
     dAvR^ittachakShuramR^itatvamichChan .. 31..
parA~nchaH kAmAnanunayanti bAlA
     mR^ityoH pAshaM te.apiyanti svamohAt .
atha dhIrA amR^itatvaM viditvA
     dhruvaM tattvaM yAnti kAmairasaktAH .. 32..
yena rUpAn rasAngandhA~nshabdAnsparshA.nshcha maithunAn .
etenaiva vijAnAti kimatra parishiShyate .. 33..
jAgratsvapnasuShuptAkhyaM puraM yenAnupashyati .
mahAntaM paramAtmAnaM matvA dhIro na shochati .. 34..
jAgradAditrayaM yastu vijAnAti chidAtmanA .
tato bhedena naivAsti puratrayamidaM sadA .. 35..
chaitanyamAtro bhagavA~nshiva eva svayamprabhaH .
puratrayAtmanA bhAti na bhAti cha mahAprabhuH .. 36..
ihAmutra sthitaM tattvaM sadekaM na tato.aparam .
mR^ityoH sa mR^ityumApnoti yo.anyaM devaM prapashyati .. 37..
agniryathaiko bhuvanaM praviShTo
     rUpaM rUpaM pratirUpo babhUva .
ekastathA sarvabhUtAntarAtmA
     rUpaM rUpaM pratirUpo bahishcha .. 38..
vAyuryathaiko bhuvanaM praviShTo
     rUpaM rUpaM pratirUpo babhUva .
ekastathA sarvabhUtAntarAtmA
     rUpaM rUpaM pratirUpo bahishcha .. 39..
sUryo yathA sarvalokasya chakShu\-
     rna lipyate chAkShuShairbAhyadoShaiH .
ekastathA sarvabhUtAntarAtmA
     na lipyate lokaduHkhena bAhyaH .. 40..
eko vashI sarvabhUtAntarAtmA
     ekaM rUpaM bahudhA yaH karoti .
tamAtmasthaM ye.anupashyanti dhIrA\-
     steShAM sukhaM shAshvataM netareShAm .. 41..
yenaiva nityAshcha sachetanashcha
     yasminvibhaktAH pravibhAnti mohAt .
tamAtmasthaM ye.anupashyanti dhIrA\-
     steShAM shAntiH shAshvatI netareShAm .. 42..
tadetaditi manyante.anirdeshyaM paramaM sukham .
kathaM nu tadvijAnIyatkimu bhAti vibhAti vA .. 43..
AdityachandrAnalatArakAdyA
     na bhAnti yasminnanishaM mahAntaH .
prakAshamAnaM tamanuprabhAnti
     prabhAnamasyaiva hi netareShAm .. 44..
UrdhvamUlastvavAkshAkha eSho.ashvatthaH sanAtanaH .
tadeva shukraM tadbrahma tadevAmR^itamuchyate .. 45..
tasmi.NllokAH shritAH sarve tadu nAtyeti kashchana .
etadvai tatsurashreShThAH samyageva mayoditam .. 46..
idaM sarvaM jagatsAkShAchChivaH kampayate dhruvam .
mahadbhayamidaM vajraM viditvA muchyate naraH .. 47..
tapatyasya bhayAdagnirbhayAttapati bhAskaraH .
bhayAdindrashcha vAyushcha mR^ityurdhAvati pa~nchamaH .. 48..
vartamAne sharIre.asminna shakto boddhumIshvaram .
naraH sarveShu lokeShu sharIritvAya kalpate .. 49..
yathA.a.adarshe svakaM rUpaM yathAvannirmale naraH .
tathA pashyati dehesminnAtmAnaM brahma kevalam .. 50..
janmanAshavatAM khAnAM pR^ithagbhAvaM parAtmanaH .
teShAM janmavinAshau cha viditvA.anAtmarUpataH .. 51..
pashchAdanAtmarUpeNa viditaM kevalAtmanA .
viditvA svAnubhUtyeva sa dhIrastu na shochati .. 52..
indriyebhyo manaH shreShThaM manasaH sattvamuttamam .
sattvAdapi mahAnAtmA mahato.avyaktamuttamam .. 53..
avyaktAttu paraH sAkShAdvyApako.ali~Nga eva cha .
yaM viditvA naraH sAkShAdamR^itatvaM hi gachChati .. 54..
na sandR^ishe tiShThati rUpamasya
     na chakShuShA pashyati kashchidenam .
hR^idA manIShA manasA.abhiklR^iptaH
     sAkShAdAtmA shakyate vedituM saH .. 55..
evaM sAkShAtsachchidAnandarUpaM
     bhAvAbhAvAsheShalokasya hetum .
shrutyA yuktyA brahma jAnanti martyA
     vidyAyogAdeva muktA bhavanti .. 56..
vidyAvedyaM brahma yadvedasiddhaM
     tasyAchintyA kAchidastyeva shaktiH .
shaktyA bhinnaM tadbhavatyadvayaM
     satsatyAnandAsa~NgabodhaikarUpam .. 57..
ekaM rUpaM brahmaNo jIvarUpaM
     bhogyaM vishvaM brahmaNastvanyarUpam .
anyadrUpaM brahmaNaH sarvashAstraM
     praj~nAmAtraM shuddharUpaM parasya .. 58..
sarvAjIve sarvasa.nsthe bR^ihante
     tasmi~njIvo bhrAmyate brahmachakre .
brahmAtmAnaM preritAraM cha yuktyA
     matvA chaikaM yAti martyo.amR^itatvam .. 59..
j~nAj~nau jIvAjIvasa~nj~nau pratItyA
     shrutyA yuktyA svAnubhUtyA hyabhinnau .
mAyA bhokturbhogahetuH parAtmA
     rUpairebhirvishvarUpo hyakartA .. 60..
kSharaM mAyA chAkSharaM jIvarUpaM
     kSharAtmanA bhidyate deva ekaH .
tasya dhyAnAdyojanAtattvabhAvA\-
     dbhUyashchAnte vishvamAyAnivR^ittiH .. 61..
j~nAtvA devaM sarvapAshApahAniH
     kShINaiH kleshairjanmamR^ityuprahANiH .
tasya dhyAnAnmUlamAyAvibhede
     vishvaishvaryaM yAti kaivalyarUpam .. 62..
etajj~neyaM nityamevAtmasa.nsthaM
     nAtaH paraM veditavyaM hi ki~nchit .
bhoktA bhogyaM preritAraM cha matvA
     sarvaM proktaM trividhaM brahmametat .. 63..
vahneryathA yonigatasya mUrti\-
     rna dR^ishyate naiva cha li~NganAshaH .
sa bhUya evendhanayonigR^ihya\-
     stadvobhayaM vai praNavena dehe .. 64..
svadehamaraNiM kR^itvA praNavaM chottarAraNim .
dhyAnanirmathanAbhyAsAddevaM pashyennigUDhavat .. 65..
tileShu tailaM dadhinIva sarpi\-
     rApaH srotaHsvaraNIShu chAgniH .
evamAtmA.a.atmani gR^ihyate.asau
    satyenaivaM tapasA yo.anuvetti .. 66..
sarvavyApinamAtmAnaM kShIre sarpirivArpitam .
AtmavidyAtapomUlaM tadbrahmopaniShatparam .. 67..
yaj~naj~nAnAdibhiH puNyairyogasiddhirbhaviShyati .
yogAtsa~njAyate j~nAnaM j~nAnAnmuktirna karmaNA .. 68..
atyAshramibhyaH shAntebhyo vaktavyaM brahmavedanam .
nAprashAntAya dAtavyaM nAputrAya kadAchana .. 69..
agnirityAdibhirmantrairbhasmanoddhUlanaM tathA .
tripuNDradhAraNaM chApi vadantyatyAshramaM budhAH .. 70..
yasya deve parA bhaktiryathA deve tathA gurau .
tasyaite kathitA hyarthAH prakAshante mahAtmanaH .. 71..
shrutivachanena mayaiva samasta
     paramakR^ipAbalataH paThitaM cha .
yadi viditaM sa naraH svakamohaM
     tarati shivaM vishati priyarUpam .. 72..
iti brahmagItAsUpaniShatsu
kaThavallIshvetAshvataravyAkhyAyAmekAdasho.adhyAyaH .. 11..
\medskip\hrule\medskip
  .. atha dvAdasho.adhyAyaH .
  .. shivasyAhampratyayAshratvam ..
brahmovAcha.
vakShye sArataraM sAkShAtsarvashAstrArthasa~Ngraham .
shraddhayA sahitA yUyaM shR^iNutAtIva shobhanam .. 1..
asti tAvadahaMshabdapratyayAlambanaM surAH .
sarveShAM naH paraM j~nAnaM sa evAtmA na sa.nshayaH .. 2..
so.ayaM svAvidyayA sAkShAchChivaH sannapi vastutaH .
svashivatvamavij~nAya sa.nsArIvAvabhAsate .. 3..
vedoditena mArgeNa pAramparyakrameNa tu .
mumukShutvaM dR^iDhaM prApya punaH shAntyAdisAdhanaiH .. 4..
sahitaH shivabhaktyA cha guroH pAdau praNamya cha .
vedAntAnAM mahAvAkyashravaNena tathaiva cha .. 5..
mananena tathA devA dhyAnena paramAtmanaH .
pratyagbrahmaikatAj~nAnaM labdhvA yAti shivaM param .. 6..
pratyagAtmAnamadvandvamahaMshabdopalakShitam .
shivarUpeNa sampashyanneva yAti svapUrNatAm .. 7..
shivarUpatayA bhAte.ahaMshabdArthe munIshvarAH .
avidyA vilayaM yAti vidyayA parayaiva tu .. 8..
vidyayA parayA.avidyAnivR^ittau brahma kevalam .
shiShyate khalu nAbhAvo bhAvo nAnyastathA.api cha .. 9..
vyavahAradR^ishA.avidyA tannivR^ittishcha kathyate .
tattvadR^iShTyA tu nAvidyA tannivR^ittishcha he surAH .. 10..
brahmarUpatayA brahma kevalaM pratibhAsate .
jagadrUpatayA.apyetadbrahmaiva pratibhAsate .. 11..
vidyAvidyAdibhedena bhAvAbhAvAdibhedataH .
gurushiShyAdibhedena brahmaiva pratibhAsate .. 12..
brahma sarvamiti j~nAnaM brahmaprAptestu sAdhanam .
jaganmAyeti vij~nAnamaj~nAnaM phalato bhavet .. 13..
tathA.api paramAdvaitaj~nAnasyedaM tu vedanam .
upakArakamatyantaM taddR^iShTvA vakti cha shrutiH .. 14..
yathA bhAtasvarUpeNa satyatvena jagachChrutiH .
a~NgIkR^itya hitaM nRRINAM kadAchidvakti sAdaram .. 15..
satyatvena jagadbhAnaM sa.nsArasya pravartakam .
asatyatvena bhAnaM tu sa.nsArasya nivartakam .. 16..
ataH sa.nsAranAshAya kadAchitparamA shrutiH .
jagatsarvamidaM mAyA vadatyatyantanirmalA .. 17..
atIva pakvachittasya chittapAkamapekShya sA .
sarvaM brahmeti kalyANI shrutirvadati sAdaram .. 18..
brahmaiva kevalaM shuddhaM vidyate tattvadarshane .
na cha vidyA na chAvidyA jagachcha na chAparam .. 19..
ataH paramanirvANaniShThasya parayoginaH .
yathA yathA.avabhAso.ayaM shiva eva na chAparam .. 20..
bhUtapUrvAnusandhAnAtkathyate na cha vastutaH .
yathA yathA.avabhAso.ayaM shiva ityapi vedanam .. 21..
na hi nirvANaniShThasya shivasya parayoginaH .
yathA yatheti yatki~nchidbhAsate paramArthataH .. 22..
tathA tathA.avabhAsena svena rUpeNa kevalam .
stimitodadhivadyogI svayaM tiShThati nAnyathA .. 23..
paranirvANaniShThasya yoginaH paramAM sthitim .
svayaM cha na vijAnAti na harirna maheshvaraH .. 24..
na mayA cha parij~nAtuM shakyate yoginaH sthitiH .
nApi vedena mAnena na cha smR^itipurANakaiH .. 25..
aho nirvANaniShThasya yoginaH paramA sthitiH .
yAdR^ishI paramA niShThA tAdR^ishyeva hi kevalam .. 26..
evaMrUpA parA niShThA shivasyAsti svabhAvataH .
shivAyAshchAmbikAbhartuH prasAdena harerapi .. 27..
tathA mamApi chAnyeShAM na chodyorho maheshvaraH .
tAdR^igrUpo mahAdevaH khalu sAkShAtsanAtanaH .. 28..
IdR^ishI paramA niShThA guroH sAkShAnnirIkShaNAt .
karmasAmye tvanAyAsAtsidhyatyeva na sa.nshayaH .. 29..
deshikaM devadeveshaM shivaM vidyAdvichakShaNaH .
tadiShTaM sarvayatnena prakuryAtsarvadA.a.adarAt .. 30..
svasyAniShTamapi prAj~naH prakuryAdguruNoditaH .
guroriShTaM prakurvANaH paraM nirvANamR^ichChati .. 31..
svAshramaM cha svajAtiM cha svakIrtiM cha tathaiva cha .
svAdR^iShTaM lokavidviShTaM bandhuputrAdisa~Ngamam .. 32..
gR^ihakShetradhanAdInAM hAniM kleshaM sukhaM tathA .
anavekShya guroriShTaM kuryAnnityamatandritaH .. 33..
gurau prIte shivaH sAkShAtprasannaH pratibhAsate .
gurordehe mahAdevaH sAmbaH sannihitaH sadA .. 34..
guroraniShTaM mohAdvA na kuryAtkurute yadi .
pachyate narake tIvre yAvadAbhUtasamplavam .. 35..
shive kruddhe gurustrAtA gurau kruddhe na kashchana .
tasmAdiShTaM guroH kuryAtkAyena manasA girA .. 36..
gururnAmAtmano nAnyaH satyameva na sa.nshayaH .
AtmalAbhAtparo lAbho nAsti nAsti na sa.nshayaH .. 37..
anAtmarUpaM dehAdi yo dadAti pitA tu saH .
na guruH kathitaH prAj~naiH kleshahetuprado hi saH .. 38..
aShTaishvaryapradastadvadgandharvAdipadapradAH .
sArvabhaumapradashchApi na guruH kleshado hi saH .. 39..
mantratantrAdidastadvallaukikopAyadastathA .
na guruH kathitaH prAj~naiH kleshahetuprado hi saH .. 40..
satyavatsakalaM bhAtaM nishchityAsatyarUpataH .
sarvasAkShitayA.a.atmAnaM vibhajya parachetanam .. 41..
yastvaM taditi vedAntapradIpena svakaM nijam .
shivatvaM bodhayatyeSha guruH sAkShAnna chAparaH .. 42..
dR^ishyarUpamidaM sarvaM dR^igrUpeNa vilApya cha .
dR^igrUpaM brahma yo vakti sa gururnAparaH pumAn .. 43..
paramAdvaitavij~nAnaM kR^ipayaiva dadAti yaH .
so.ayaM guruguruH sAkShAchChiva eva na sa.nshayaH .. 44..
tAdR^ishaM deshikaM sAkShAdvedAntAmbujabhAskaram .
toShayetsarvayatnena shreyase bhUyase naraH .. 45..
sarvavedAntavAkyAnAmarthaH sa~NgraharUpataH .
kathitashcha mayA devA mAmAha parameshvaraH .. 46..
sarvaj~naH sarvavitsAkShAdAptakAmaH kR^ipAkaraH .
sarvadoShavinirmuktaH satyamevAbravInmama .. 47..
yathA.a.aha sarvavedAnAmarthaM sarvaj~na IshvaraH .
tathaiva kathito.asmAbhiH satyameva na sa.nshayaH .. 48..
svaprakAshasvarUpasya svataHshuddhasya shUlinaH .
karAmalakavatsarvaM pratyakShaM hi na sa.nshayaH .. 49..
vedAnAmanyathaivArthaM ye vadanti vimohitAH .
mahAsAhasikA eva te narA na hi sa.nshayaH .. 50..
maduktArthaprakAreNa vinA ye pravadanti te .
andhakUpe nirAlambe patantyeva na sa.nshayaH .. 51..
vedArthaH paramAdvaitaM netaratsurapu~NgavAH .
no chedatraiva me mUrdhA patiShyati na sa.nshayaH .. 52..
anyathA vedavAkyAnAmartha ityabhisha~NkayA .
anishchitArthashchenmUrdhA yuShmAkaM cha patiShyati .. 53..
ataH paraM na vaktavyaM vidyate surapu~NgavAH .
satyameva mayA proktaM shambhoH pAdau spR^ishAmyaham .. 54..
sUta uvAcha .
evamuktvA mahAtejA brahmA cha surapu~NgavAn .
pratyagbhUtaM parAnandaM pArvatIpatimIshvaram .. 55..
paramAdvaitarUpaM taM bhavarogasya bheShajam .
smR^itvA natvA punaH stutvA bhaktyA paravasho.abhavat .. 56..
devAshcha devadeveshaM smR^itvA sAmyaM triyambakam .
praNamya daNDavadbhUmau vivashA abhavanmudA .. 57..
devadevo mahAdevo mahAkAruNikottamaH .
tatraivAvirabhUddevyA saha satyatapodhanAH .. 58..
viShNushcha padmayA sArdhaM tatraiva brahmavittamAH .
Agato bhagavAndraShTumasheShasuranAyakam .. 59..
puShpavR^iShTirabhavadyathA purA
     svastipUrvavachanAni chAbhavan .
tatra bhaktisahitena viShNunA
     padmayA cha paripUjitaH shivaH .. 60..
sha~Nkaro.api shashishekharaH para\-
     stvambayaiva sahitaH sanAtanaH .
tatra nR^ityamakarodatiprabhuH
     svasvarUpaparavedanapriyAt .. 61..
sarvalokajananI shivA parA
     pApanAshakarabodhadAyinI .
brahmavajradharapUrvakAnimA\-
     nsvAnubhUtisahitena chakShuShA .. 62..
vilokya kAruNyabalena kevalaM
     prabodhayAmAsa surottamAnimAn .
punaH prajAnAthapuraHsarAH surAH
     pranR^ityamAnaM tu shivaM shivAmapi .. 63..
tvakchakShuShaiva dadR^ishuH shrutimastakottha\-
     vij~nAnarUpaparalochanagocharArham .
bhaktyA punaH paramakAruNikaM mahAntaM
     pa~nchAkShareNa bhavapAshahareNa pUjyam .. 64..
tuShTavuH shrutivachobhirAdarA\-
     nnaShTakaShTabhavapAshabandhanAH .
iShTasiddhirabhavaddhi yaH surAH
     ityavochadashubhApahaH shivaH .. 65..
shA~NkarI cha sharaNAgatapriyA
     bandhahetumalanAshakAriNI .
matprasAdabalalabdhavedanA
     ityavochadabhavannatipriyA .. 66..
keshavo.api surapu~NgavAnprati
     prAha shambhurayamadbhutaH prabhuH .
sarvavedashirasAmagocharaH
     prIta eva bhavatAmiti dvijAH .. 67..
devo.api kAruNyarasArdramAnasaH
     surAnasheShAnajapUrvakAnprati .
uvAcha gItAmatishobhanAmimAM
     mamAnukUlAmapi yaH paThedvijaH .. 68..
sa yAti mAmeva nirastabandhanaH
     parA shivA vAchi sadaiva vartate .
divAkareNApi samashcha tejasA
     shriyA mukundena samaH sadA bhavet .. 69..
eShA gItA brahmagItAbhidhAnA
     shrutyA yuktA sarvagItottamA cha .
vedAkArA vedaniShThairdvijendrai\-
     rbhaktyA pAThyA naiva shUdrAdibhishcha .. 70..
ityevaM paramashivaH prabhAShya nAthaH
     shiShTAnAmashubhaharaH puratrayAriH .
bhaktAnAmamalasukhaprabodhakArI
     tatraiva sphuraNasukhe tiro babhUva .. 71..
daivI sA sakalajagadvichitrachitrA
     kAruNyAdakhilasurAnajaM vilokya .
suprItA paramasukhaprabodharUpA
     tatraiva sphuraNasukhe tiro babhUva .. 72..
viShNurlakShmyA sAkamAshvAsya devAn
     hR^iShTastuShTaH svasya vaikuNThamApa .
brahmA devAnAtmavidyAbhiyuktA.n\-
     styaktvA rudradhyAnaniShTho babhUva .. 73..
devAH sarve daNDavadbhUmibhAge
     bhaktyA sArdhaM padmayoniM praNamya .
hR^iShTAtmAnaH satyabodhaikaniShThAH
     sadyaH svaM svaM deshamIyurdvijendrAH .. 74..
ItthaM sAkShAdbrahmagItaM bhavadbhiH
     shuddhaj~nAnairAdareNa shrutaiva .
mattaH shraddhAbhaktiyuktasya viprA
     nityaM deyA netarasyAtishuddhA .. 75..
iti parashivabhaktyA prAptavidyastu sUtaH
     sukhaghanashivatattvaprApikAmeva gItAm .
munigaNahitabuddhyA.a.abhAShya nirvANarUpaM
     parataramavalokya praj~nayA maunamApa .. 76..
munayashcha guruM paravedinaM
     praNipatya samastahitapradam .
hR^idayasthamahampadalakShitaM
     paratattvatayaiva viduH sthiram .. 77..
iti shrIbrahmagItAsUpaniShatsu shivasyAhampratyayAshratvaM
nAma dvadasho.adhyAyaH .. 12..
                .. iti brahmagItA samAptA ..
##
Encoded by Sunder Hattangadi
Proofread by Sunder Hattangadi, PSA Easwaran

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}