% Text title : rAmagItAadbhutarAmAyaNa % File name : rAmagItAadbhutarAmAyaNa.itx % Category : giitaa, raama % Location : doc\_giitaa % Transliterated by : Vishwas Bhide vrbhide at rediffmail.com % Proofread by : Vishwas Bhide and PSA Easwaran % Description/comments : Adbhutaramayana Sarga 11-14 % Latest update : September 17, 2018 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Ramagita from Adbhutaramayana ..}## \itxtitle{.. rAmagItA adbhutarAmAyaNAntargatam ..}##\endtitles ## \section{ekAdashaH sargaH |} hanUmate shrIrAmakR^itaM sA~NkhyayogavarNanam \- rAmaHprAha hanUmantamAtmAnaM puruShottamaH | vatsa vatsa hanUmanstvaM bhakto yatpR^iShTashanasi || 1|| tatte.ahaM sampravakShyAmi shR^iNuShvAvahito mama | avAchyametadvij~nAnamAtmaguhyaM sanAtanam || 2|| yanna devA vijAnanti yatanto.api dvijAtayaH | idaM j~nAnaM samAshritya brahmabhUtA dvijottamAH || 3|| na saMsAraM prapashyanti pUrve.api brahmavAdinaH | guhyAdguhyatamaM sAkShAdgopanIyaM prayatnataH || 4|| vaMshe bhaktimato hyasya bhavanti brahmavAdinaH | AtmA yaH kevalaH svachChaH shAntaH sUkShmaH sanAtanaH || 5|| asti sarvAntaraH sAkShAchchinmAtrastamasaH paraH | so.antaryAmI sa puruShaH sa prANaH sa maheshvaraH || 6|| sa kAlAgnistadavyaktaM sadyo vedayati shrutiH | tasmAdvijAyate vishvamatraiva pravilIyate || 7|| mAyAvI mAyayA baddhaH karoti vividhAstanUH | na chApyayaM saMsarati na cha saMsArayetprabhum || 8|| nAyaM pR^ithvI na salilaM na tejaH pavano nabhaH | na prANo na mano vyaktaM na shabdaH sparsha eva cha || 9|| na rUparasagandhAshcha nAha~NkartA nA vAgapi | na pANipAdau no pAyurna chopasthaM plava~Ngama || 10|| na kartA na cha bhoktA cha na cha prakR^itipUrUShau | na mAyA naiva cha prANashchaitanyaM paramArthataH || 11|| tathA prakAshatamasoH sambandho nopapadyate | tadvadeva na sambandhaH prapa~nchaparamAtmanoH || 12|| ChAyAtarU yathA loke parasparavilakShaNau | tadvatpra~nchapuruShau vibhinnau paramArthataH || 13|| yadyAtmA malino.avasthau vikArI syAtsvabhAvataH | nahi tasya bhavenmuktirjanmAntarashatairapi || 14|| pashyanti munayo muktAH svAtmAnaM paramArthataH | vikArahInaM nirduHkhamAnandAtmAnamavyayayam || 15|| ahaM kartA sukhI duHkhI kR^ishaH sthUleti yA matiH | sApyaha~NkR^itisambandhAdAtmanyAropyate janaiH || 16|| vadanti vedavidvAnsaH sAkShiNaM prakR^iteH param | bhoktAramakShayaM buddhvA sarvatra samavasthitam || 17|| tasmAdaj~nAna mUlo.ayaM saMsAraH sarva dehinAm | aj~nAnAdanyathA j~nAtaM tachcha prakR^itisa~Ngatam || 18|| nityoditaH svaya~njyotiH sarvagaH puruShaH paraH | aha~NkArI.avivekena kartAhamiti manyate || 19|| pashyanti R^iShayo vyaktaM nityaM sadasadAtmakam | pradhAnaM prakR^itiM buddhvA kAraNaM brahmavAdinaH || 20|| tenAtra sa~Ngato hyAtmA kUTastho.api nira~njanaH | AtsAnamakSharaM brahma nAvabud.h{}dhyanti tattvataH || 21|| anAtmanyAtmavij~nAnaM tasmAdduHkhaH tathetarat | rAgadveShAdayo doShAH sarvabhrAntinibandhanAH || 22|| kArye hyasya bhavedeShA puNyApuNyamiti shrutiH | tadvashAdeva sarveShAM sarvadehasamudbhavaH || 23|| nitya sarvatrago hyAtmA kUTastho doShavarjitaH | ekaH sa bhidyate shaktyA mAyayA na svabhAvataH || 24|| tasmAdadvaitamevAhurmunayaH paramArthataH | bhedo.avyaktasvabhAvena sA cha mAyA.a.atmasaMshrayA || 25|| yathAhi dhUmasamparkAnnAkAsho malino bhavet | antaHkaraNajairbhAvairAtmA tadvanna lipyate || 26|| yathA svaprabhayA bhAti kevalaH sphaTikopalaH | upAdhihIno vimalastathaivAtmA prakAshate || 27|| j~nAnasvarUpamevAhurjagadetadvichakShaNAH | arthasvarUpamevAj~nAH pashyantyanye kubuddhayaH || 28|| kUTastho nirguNo vyApI chaitanyAtmA svabhAvataH | dR^ishyate hyartharUpeNa puruShaM bhrAntadR^iShTibhiH || 29|| yathA saMlakShyate vyaktaH kevalaH sphaTiko janaiH | raktikAvyavadhAnena tadvatparamapUruShaH || 30|| tasmAdAtmAkSharaH shuddho nityaH sarvagato.avyayaH | upAsitavyo mantavyaH shrotavyashcha mumukShubhiH || 31|| yadA manasi chaitanyaM bhAti sarvatragaM sadA | yogino.avyavadhAnena tadA sampadyate svayam || 32|| yadA sarvANi bhUtAni svAtmanyevAbhi pashyati | sarvabhUteShu chAtmAnaM brahma sampadyate svayam || 33|| yadA sarvANi bhUtAni svAtmanyevAbhipashyati | ekIbhUtaH pareNAsau tadA bhavati kevalaH || 34|| yadA sarve pramuchyante kAmA ye.asya hR^idi sthitAH | tadAsAvamR^itIbhUtaH kShemaM gachChati paNDitaH || 35|| yadA bhUtapR^ithagbhAvamekasthamanupashyati | tata eva cha vistAraM brahma sampadyate tadA || 36|| yadA pashyati chAtmAyaM kevalaM paramArthataH | mAyAmAtraM jagatkR^itsnaM tadA bhavati nirvR^itaH || 37|| yadA janmajarAduHkhavyAdhInAmekabheShajam | kevalaM brahmavij~nAnaM jAyate.asau tadA shivaH || 38|| yathA nadInadA loke sAgareNaikatAM yayuH | tadvadAtmAkShareNAsau niShkalenaikatAM vrajet || 39|| tasmAdvij~nAnamevAsti na prapa~ncho na saMsthitiH | aj~nAnenAvR^itaM lokaM vij~nAnaM tena muhyati || 40|| tajj~nAnaM nirmalaM sUkShmaM nirvikalpaM yadavyayam | aj~nAnamiti tatsarvaM vij~nAnamiti me matam || 41|| etatte paramaM sA~NkhyaM bhAvitaM j~nAnamuttamam | sarvavedAntasAraM hi yogastatraikachittatA || 42|| yogAtsa~njAyate j~nAnaM j~nAnAdyogaH prajAyate | yogaj~nAnAbhiyuktasya nAvApyaM vidyate kvachit || 43|| yadeva yogino yAnti sA~NkhyaM tadabhigamyate | ekaM sA~NkhyaM cha yogaM cha yaH pashyati sa tattvavit || 44|| anye cha yogino vatsa aishvaryAsaktachetasaH | majjanti tatra tatraiva sattvAtmaikyamiti shrutiH || 45|| yattatsarvagataM divyamaishvaryamachalaM mahat | j~nAnayogAbhiyuktastu dehAnte tadavApnuyAt || 46|| eSha AtmAhamavyakto mAyAvI parameshvaraH | kIrtitaH sarvavedeShu sarvAtmA sarvatomukhaH || 47|| sarvakAmaH sarvarasaH sarvagandho.ajaro.amaraH | sarvataH pANipAdo.ahamantaryAmI sanAtanaH || 48|| apANipAdo javano gR^ihIto hR^idi saMsthitaH | achakShurapi pashyAmi tathA.akarNaH shR^iNomyaham || 49|| vedAhaM sarvamevedaM na mAM jAnAti kashchana | prAhurmahAntaM puruShaM mAmekaM tattvadarshinaH || 50|| nirguNAmalarUpasya yattadaishvaryamuttamam | yatra devA vijAnanti mohitA mAyayA mama || 51|| yanme guhyatamaM dehaM sarvagaM tattvadarshinaH | praviShTA mama sAyujyaM labhante yogino.avyayam || 52|| yeShAM hi na samApannA mAyA vai vishvarUpiNI | labhante paramaM shuddhaM nirvANaM te mayA saha || 53|| na teShAM punarAvR^ittiH kalpakoTishatairapi | prasAdAnmama te vatsa etadvedAnushAsanam || 54|| nAputrashiShyayogibhyo dAtavyaM hanumankvachit | yaduktametadvij~nAnaM sA~NkhyayogasamAshrayam || 55|| ityArShe shrImadrAmAyaNe vAlmIkIye AdikAvye adbhutottarakANDe sA~Nkhyayogo nAmaikAdashaH sargaH || 11|| \section{dvAdashaH sargaH |} upaniShatkathanam \- punaH rAmaH pravachanamuvAcha dvijapu~Ngava | avyaktAdabhavatkAlaH pradhAnaM puruShaH paraH || 1|| tebhyaH sarvamidaM jAtaM tasmAtsarvamidaM jagat | sarvataH pANipAdaM tatsarvato.akShishiromukham || 2|| sarvata shrutimalloke sarvamAvR^itya tiShThati | sarvendriyaguNAbhAsaM sarvendriyavivarjitam || 3|| sarvAdhAraM sthirAnandamavyaktaM dvaitavarjitam | sarvopamAnarahitaM pramANAtItagocharam || 4|| nirvikalpaM nirAbhAsaM sarvAbhAsaM parAmR^itam | abhinnaM bhinnasaMsthAnaM shAshvataM dhruvamavyayam || 5|| nirguNaM paramaM vyoma tajj~nAnaM sUrayo viduH | sa AtmA sarvabhUtAnAM sa bAhyAbhyantarAtparaH || 6|| so.ahaM sarvatragaH shAnto j~nAnAtmA parameshvaraH | mayA tatamidaM vishvaM jagadavyaktarUpiNA || 7|| matsthAni sarvabhUtAni yastaM veda sa vedavit | pradhAnaM puruShaM chaiva tattvadvayamudAhR^itam || 8|| tayoranAdinirdiShTaH kAlaH saMyojakaH paraH | trayametadanAdyantamavyaktaM samavasthitam || 9|| tadAtmakaM tadanyatsyAttadrUpaM mAmakaM viduH | mahadAdyaM visheShAntaM samprasUte.akhilaM jagat || 10|| yA sA prakR^itiruddiShTA mohinI sarvadehinAm | puruShaH prakR^itisthoto.apibhu~Nkte yaH prAkR^itAnguNAn || 11|| aha~NkAro viviktatvAtprochyate pa~nchaviMshakaH | Adyo vikAraH prakR^itirmahanAtmeti kathyate || 12|| vij~nAnashaktirvij~nAnAdaha~NkArastadutthitaH | eka eva mahAnAtmA soha~NkAro.abhidhIyate || 13|| rA jIvaH so.antarAtmeti gIyate tattvachintakaiH | tena vedayate sarvaM sukhaM duHkhaM cha janmasu || 14|| sa vij~nAnAtmakastasya manaH syAdupakArakam | tenAvivekatastasmAtsaMsAraM puruShasya tu || 15|| sa chAvivekaH prakR^itau sa~NgAtkAlena so.abhavat | kAlaH sR^ijati bhUtAni kAlaH saMharate prajAH || 16|| sarve kAlasya vashagA na kAlaH kasyachidvashe | so.antarA sarvamevedaM niyachChati sanAtanaH || 17|| prochyate bhagavAnprANaH sarvaj~naH puruShaH paraH | sarvendriyebhyaH paramaM manaH prAhurmanIShiNaH || 18|| manasashchApyaha~NkAramaha~NkArAnmahAn paraH | mahataH paramavyaktamavyaktAtpuruShaH paraH || 19|| puruShAdbhagavAnprANastasya sarvamidaM jagat | prANAtparataraM vyoma vyomAtIto.agnirIshvaraH || 20|| so.ahaM sarvatragaH shAnto j~nAnAtmA parameshvaraH | nAsti matparamaM bhUtaM mAM vij~nAya vimuchyate || 21|| nityaM hi nAsti jagati bhUtaM sthAvaraja~Ngamam | R^ite mAmekamavyaktaM vyomarUpaM maheshvaram || 22|| so.ahaM sR^ijAmi sakalaM saMharAmi sadA jagat | mAyI mAyAmayo devaH kAlena saha sa~NgataH || 23|| matsannidhAveSha kAlaH karoti sakalaM jagat | niyojayatyanantAtmA hyetadvedAnushAsanam || 24|| ityArShe shrImadrAmAyaNe vAlmIkIye AdikAvye adbhutottarakANDe upaniShatkathanaM nAma dvAdashaH sargaH || 12|| \section{trayodashaH sargaH} bhaktiyogakathanam \- vakShye samAhitamanAH shR^iNuShva pavanAtmaja | yenedaM lIyate rUpaM yenedaM sampravartate || 1|| nAhaM tapobhirvividhairna dAnena nacha chejyayA | shakyo hi puruShairj~nAtumR^ite bhaktimanuttamAm || 2|| ahaM hi sarvabhAvAnAmantastiShThAmi sarvagaH | mAM sarvasAkShiNaM loke na jAnanti plava~Ngama || 3|| yasyAntarA sarvamidaM yo hi sarvAntaraH paraH | so.ahaM dhAtA vidhAtA cha loke.asminvishvatomukhaH || 4|| na mAM pashyanti munayaH sarve.api tridivaukasaH | brAhmaNA manavaH shakrA ye chAnye prathitaujasaH || 5|| gR^iNanti satataM vedA mAmekaM parameshvaram | yajanti vividhairagnau brAhmaNA vaidikairmakhaiH || 6|| sarvelokA namasyanti brahmaloke pitAmaham | dhyAyanti yogino devaM bhUtAdhipatimIshvaram || 7|| ahaM hi sarvayaj~nAnAM bhoktA chaiva phalapradaH | sarvadevatanurbhUtvA sarvAtmA sarvasaMstutaH || 8|| mAM pashyantIha vidvAnso dhArmikA vedavAdinaH | teShAM sannihito nityaM ye bhaktA mAmupAsate || 9|| brAhmaNAH kShatriyA vaishyA dhArmikA mAmupAsate | teShAM dadAmi tatsthAnamAnandaM paramaM padam || 10|| anye.api ye vikarmasthAH shUdrAdyA nIchajAtayaH | bhaktimantaH pramuchyante kAlena mayi sa~NgatAH || 11|| na madbhaktA vinashyante madbhaktA vItakalmaShAH | AdAvetatpratij~nAtaM na me bhaktaH praNashyati || 12|| yo vA nindati taM mUDho devadevaM sa nindati | yo hi taM pUjayedbhaktyA sa pUjayati mAM sadA || 13|| patraM puShpaM phalaM toyaM madArAdhanakAraNAt | yo me dadAti niyataH sa me bhaktaH priyo mataH || 14|| ahaM hi jagatAmAdau brahmANaM parameShThinam | vidhAya dattavAnvedAnasheShAnAsyaniHsR^itAn || 15|| ahameva hi sarveShAM yoginAM gururavyayaH | dhArmikAnAM cha goptAhaM nihantA vedavidviShAm || 16|| ahaM vai sarvasaMsArAnmochako yoginAmiha | saMsAraheturevAhaM sarvasaMsAravarjitaH || 17|| ahameva hi saMhartA straShTAhaM paripAlakaH | mAyAvI mAmikA shaktirmAyA lokavimohinI || 18|| mamaiva cha parAshaktiryA sA vidyeti gIyate | nAshayAmi tayA mAyAM yoginAM hR^idi saMsthitaH || 19|| ahaM hi sarvashaktInAM pravartakanivartakaH | AdhArabhUtaH sarveShAM nidhAnamamR^itasya cha || 20|| ekA sarvAntarA shaktiH karoti vividhaM jagat | bhUtvA nArAyaNo.ananto jagannAtho jaganmayaH || 21|| tR^itIyA mahatI shaktirnihanti sakalaM jagat | tAmasI me samAkhyAtA kAlAtmA rudrakapiNI || 22|| dhyAnena mAM prapashyanti kechijj~nAnena chApare | apare bhaktiyogena karmayogena chApare | sarveShAmeva bhaktAnAmeSha priyataro mama || 23|| yo vij~nAnena mAM nityamArAdhayati nAnyathA anye cha ye trayo bhaktA madArAdhanakA~NkShiNaH || 24|| te.api mAM prApnuvantyeva nAvartate cha vai punaH | mayA tatamidaM kR^itsnaM pradhAnapuruShAtmakam | mayyeva saMsthitaM vishvaM mayA sampreryate jagat || 25|| nAhaM prerayitA kIsha paramaM yogamAshritaH | prerayAmi jagatkR^itsnametadyo veda so.amR^itaH || 26|| pashyAmyasheShamevedaM vartamAnaM svabhAvataH | karoti kAle bhagavAnmahAyogeshvaraH svayam || 27|| yogaM samprochyate yogI mAyI shAstreShu sUribhiH | yogeshvaro.asau bhagavAnmahAdevo mahAprabhuH || 28|| mahatvAtsarvasattvAnAM varatvAtparameshvaraH | prochyate bhagavAnbrahmA mahAnbrahmamayo yataH || 29|| yo mAmevaM vijAnAti mahAyogeshvareshvaram | so.avikampena yogena yujyate nAtra saMshayaH || 30|| so.ahaM prerayitA devaH paramAnandamAshritaH | tiShThAmi satataM yogI yastadveda sa vedavit || 31|| iti guhyatamaM j~nAnaM sarvavedeShu nishchitam | prasannachetase deyaM dhArmikAyAhitAgnaye || 32|| ityArShe shrImadrAmAyaNe vAlmIkIye AdikAvye adbhutottarakANDe bhaktiyogo nAma trayodashaH sargaH || 13|| \section{chaturdashaH sargaH |} shrIrAmachandrahanumatsaMvAdavarNanam \- sarvalokaikanirmAtA sarvalokaikarakShitA | sarvalokaikasaMhartA sarvAtmA.ahaM sanAtanaH || 1|| sarveShAmeva vastUnAmantaryAmI pitA hyaham | mayyevAntaHsthitaM sarvaM nAhaM sarvatra saMsthitaH || 2|| bhavatA chAdbhutaM dR^iShTaM yatsvarUpaM tu mAmakam | mamaiShA hyupamA vatsa mAyayA darshitA mayA || 3|| sarveShAmeva bhAvAnAmantarA samavasthitaH | prerayAmi jagatsarvaM kriyAshaktiriyaM mama || 4|| mayedaM cheShTate vishvaM matsvabhAvAnuvarti cha | so.ahaM kAle jagatkR^itsnaM karomi hanuman kila || 5|| saMharAmyekarUpeNa dvidhAvasthA mamaiva tu | AdimadhyAntanirmukto mAyAtattvapravartakaH || 6|| kShobhayAmi cha sargAdau pradhAnapuruShAvubhau | tAbhyAM sa~njAyate sarvaM saMyuktAbhyAM parasparam || 7|| mahadAdikrameNaiva mama tejovijR^imbhitam | yo hi sarvajagatsAkShI kAlachakrapravartakaH || 8|| hiraNyagarbho mArtaNDaH so.api maddehasambhavaH | tasmai divyaM svamaishvaryaM j~nAnayogaM sanAtanam || 9|| dattavAnAtmajAn vedAn kalpAdau vaturaH kila | sa manniyogato brahmA sadA madbhAvabhAvitaH || 10|| divyaM tanmAmakaishvaryaM sarvadA vahati svayam | sa sarvalokanirmAtA manniyogena sarvavit || 11|| bhUtvA chaturmukhaH sarvaM sR^ijatyevAtmasambhavaH | yo.api nArAyaNo.ananto lokAnAM prabhavAvyayaH || 12|| mamaiva paramA mUrtiH karoti paripAlanam | yo.antakaH sarvabhUtAnAM rudraH kAlAtmakaH prabhuH || 13|| madAj~nayA.asau satataM saMhAratyeva me tanuH | havyaM vahati devAnAM kavyaM kavyAshinAmapi || 14|| pAkaM cha kurute vahniH so.api machChaktichoditaH | bhuktamAhArajAtaM yatpachatyetadaharnisham || 15|| vaishvAnaro.agnirbhagavAnIshvarasya niyogataH | yo hi sarvAmbhasAM yonirvaruNo devapu~NgavaH || 16|| sa sa~njIvayate sarvamIshasyaiva niyogataH | yo.antastiShThati bhUtAnAM bahirdevo nira~njanaH || 17|| madAj~nayAsau bhUtAnAM sharIrANi bibharti hi | yo.api sa~njIvano nR^iNAM devAnAmamR^itAkaraH || 18|| somaH sa manniyogena choditaH kila vartate | yaH svabhAsA jagatkR^itsnaM prakAshayati sarvadA || 19|| sUryo vR^iShTiM vitanute shAstreNaiva svayambhuvaH | yo.apyasheShajagachChAstA shakraH sarvAmareshvaraH || 20|| yaj~nAnAM phalado devo vartate.asau madAj~nayA | yaH prashAstA hyasAdhUnAM vartate niyamAdiha || 21|| yamo vaivasvato devo devadevaniyogataH | yo.api sarvadhanAdhyakSho dhanAnAM sampradAyakaH || 22|| so.apIshvaraniyogena kubero vartate sadA | yaH sarvarakShasAM nAthastApasAnAM phalapradAH || 23|| manniyogAdasau devo vartate nirR^itiH sadA | vaitAlagaNabhUtAnAM svAmI bhogaphalapradaH || 24|| IshAnaH sarvabhaktAnAM so.api tiShThenmamAj~nayA | yo vAmadevo.a~NgirasaH shiShyo rudragaNAgraNIH || 25|| rakShako yoginAM nityaM vartate.asau madAj~nayA | yashcha sarvajagatpUjyayo vartate vighnakArakaH || 26|| vinAyako dharmanetA so.api madvachanAtkila | yo.api vedavidAM shreShTho devasenApatiH prabhuH || 27|| skando.asau vartate nityaM svayambhUpratichoditaH | ye cha prajAnAM patayo marIchyAdyA maharShayaH || 28|| sR^ijanti vividhAn lokAn parasyaiva niyogataH | yA cha shrI sarvabhUtAnAM dadAti vipulAM shriyam || 29|| patnI nArAyaNasyAsau vartate madanugrahAt | vAchaM dadAti vipulAM yA cha devI sarasvatI || 30|| sApIshvaraniyogena choditA sampravartate | yAsheShapuruShAn ghorAnnarakAttArayatyapi || 31|| sAvitrI saMsmR^itA devI devAj~nAnuvidhAyinI | pArvatI paramA devI brahmavidyApradAyinI || 32|| yApi dhyAtA visheSheNa sApi madvachanAnugA | yo.ananto mahimAnantaH sheSho.asheShAmaraH prabhuH || 33|| dadhAti shirasA lokaM so.api devaniyogataH | yo.agniH saMvartako nityaM vaDavArUpasaMsthitaH || 34|| pibatyakhilamambhodhimIshvarasya niyogataH | AdityA vasavo rudrA marutashcha tathAshvinau || 35|| anyAshcha devatAH sarvA machChAsanamadhiShThitAH | gandharvA uragA yakShAH siddhAH sAdhyAshcha chAraNAH || 36|| bhUtarakShaHpishAchAshcha sthitAH shAstre svayambhuvaH | kalAkAShThAnimeShAshcha muhUrtA divasAH kShaNAH || 37|| R^itvabdamAsapakShAshcha sthitAH shAstre prajApateH | yugamanvantarANyeva mama tiShThanti shAsane || 38|| parAshchaiva parArddhAshcha kAlabhedAstathApare | chaturvidhAni bhUtAni sthAvarANi charANi cha || 39|| niyogAdeva vartante sarvANyeva svayambhuvaH | pattanAni cha sarvANi bhuvanAni cha shAsanAt || 40|| brahmANDAni cha vartante devasya paramAtmanaH | atItAnyapyasa~NkhyAni brahmANDAni madAj~nayA || 41|| pravR^ittAni padArthaughaiH sahitAni samaM tataH | brahmANDAni bhaviShyanti saha vastubhirAtmajaiH || 42|| hariShyanti sahaivAj~nAM parasya paramAtmanaH | bhUmirApo.analo vAyuH khaM mano buddhireva cha || 43|| bhUtAdirAdiprakR^itirniyogAnmama vartate | yA.asheShasarvajagatAM mohinIM sarvadehinAm || 44|| mAyApi vartate nityaM sApIshvaraniyogataH | vidhUya mohakalilaM yathA pashyati tatpadam || 45|| sApi vidyA maheshasya niyogAdvashavartinI | bahunAtra kimuktena mama shaktyAtmakaM jagat || 46|| mayaiva pUryate vishvaM mayaiva pralayaM vrajet | ahaM hi bhagavAnIshaH svaya~njyotiH sanAtanaH || 47|| paramAtmA parambrahma matto hyanyanna vidyate | ityetatparamaM j~nAnaM bhavate kathitaM mayA || 48|| j~nAtvA vimuchyate janturjanma saMsArabandhanAt | mAyAmAshritya jAto.ahaM gR^ihe dasharathasya hi || 49|| rAmo.ahaM lakShmaNo hyeSha shatrughno bhArato.api cha | chaturdhA samprabhUto.ahaM kathitaM te.anilAtmaja || 50|| mAyAsvarUpaM cha tava kathitaM yatplava~Ngama | kR^ipayA taddhR^idA dhAryaM na vismartavyameva hi || 51|| yenAyaM paThyate nityaM saMvAdo bhavato mama | jIvanmukto bhavetso.api sarvapApaiH pramuchyate || 52|| shrAvayedvA dvijA~nChuddhAnbrahmacharyaparAyaNAn | yo vA vichArayedarthaM sa yAti paramAM gatim || 53|| yashchaitachChR^iNuyAnnityaM bhaktiyukto dR^iDhavrataH | sarvapApavinirmukto brahmaloke mahIyate || 54|| tasmAtsarvaprayatnena paThitavyo manIShibhiH | shrotavyashchApi mantavyo visheShAdbrAhmaNaiH sadA || 55|| ityArShe shrImadrAmAyaNe vAlmIkIye AdikAvye adbhutottarakANDe bhagavaddhanUmatsaMvAdo nAma chaturdashaH sargaH || 14|| ## Adbhutaramayana Sarga 11-14 Encoded by Vishwas Bhide vrbhide at rediffmail.com Proofread by Vishwas Bhide and PSA Easwaran \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}