% Text title            : ramaNagItA
% File name             : ramaNagItA.itx
% Category              : gItA, giitaa, ramaNa-maharShi, ramaNa-maharShi, gurudev
% Location              : doc\_giitaa
% Author                : ramaNAntevAsino vAsiShThasya gaNapaterupanibandhe
% Transliterated by     : DPD
% Proofread by          : DPD
% Latest update         : August 28, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Ramanagita ..}##
\itxtitle{.. shrIramaNagItA ..}##\endtitles ##

         adhyAya         nAma
           1\.    upAsanAprAdhAnyanirUpaNam
           2\.    mArgatrayakathanam
           3\.    mukhyakartavya nirUpaNam
           4\.    j~nAnasvarUpakathanam
           5\.    hR^idayavidyA
           6\.    manonigrahopAyaH
           7\.    AtmavichArAdhikAritada~NganirUpaNam
           8\.    AshramavichAraH
           9\.    granthibhedakathanam
           10\.    sa~NghavidyA
           11\.    j~nAnasiddhisAmarasyakathanam
           12\.    shaktivichAraH
           13\.    sa.nnyAse strIpuruShayostulyAdhikAranirUpaNam
           14\.    jIvanmukti vichAraH
           15\.    shravaNamanananididhyAsananirUpaNam
           16\.    bhaktivichAraH
           17\.    j~nAnaprAptivichAraH
           18\.    siddhamahimAnukIrtanam
\medskip\hrule\medskip
             || shrIramaNagItA ||
atha prathamo.adhyAyaH | (upAsanAprAdhAnyanirUpaNam)

maharShi ramaNaM natvA kArtikeyaM narAkR^itim |
mataM tasya prasannena granthenopanibadhyate || 1||
iShaputrashake rAma bhUminandadharAmite |
ekontriMshaddivase dvAdashe mAsi shItale || 2||
upaviShTeShu sarveShu shiShyeShu niyatAtmasu |
bhagavantamR^iShi so.ahamapR^ichChaM nirNayAptaye || 3||
prathamaH prashnaH
satyAsatyavivekena muchyate kevalena kim |
utAho bandhahAnAya vidyate sAdhanAntaram || 4||
dvitIyaH prashnaH
kimalaM shAstracharchaiva jij~nAsUnAM vimuktaye |
yathA gurupadeshaM kimupAsanapekShate || 5||
tR^itIya prashnaH
sthitapraj~naH sthitapraj~namAtmAnaM kiM samarthayet |
viditvA paripUrNatvaM j~nAnasyoparateruta || 6||
chaturthaH prashnaH
j~nAninaM kena li~Ngena j~nAtuM shakShyanti kovidAH || 7||
pa~nchamaH prashnaH
j~nAnAyaiva samAdhiH kiM kAmAyApyuta kalpate || 7||
ShaShThaH prashnaH
kAmena yogamabhyasya sthitapraj~no bhavedyadi |
sakAmo.amuShya sAphalyamadhigachChati vA na vA || 8||
evaM mama guruH prashnAnakarNya karuNAnidhiH |
abravItsaMshayachChedI ramaNo bhagavAnR^iShiH || 9||
prathamaprashnasyottaram
mochayetsakalAn bandhAnAtmaniShThaiva kevalam |
satyAsatyavivekaM tu prAhurvairAgyasAdhanam || 10||
sadA tiShThati gambhIro j~nAnI kevalamAtmani |
nAsatyaM chintayedvishvaM na vA svasya tadanyatAm || 11||
dvitIyaprashnasyottaram
na saMsiddhirvijij~nAsoH kevalaM shAstracharchayA |
upAsanaM vinA siddhirnaiva syAditi nirNayaH || 12||
abhyAsakAle sahajAM sthitiM prAhurupAsanam |
siddhiM sthirAM yadA gachChetsaiva j~nAnaM tadochyate || 13||
viShayAntsamparityajya svasvabhAvena saMsthitiH |
j~nAnajvAlAkR^itiH prokttA sahajA sthitirAtmanaH || 14||
tR^itIyaprashnasyottaram
nirvAsena maunena sthirAyAM sahajasthitau |
j~nAnI j~nAninamAtmAnaM niHsandehaH samarthayet || 15||
chaturthaprashnasyottaram
sarvabhUtasamatvena li~Ngena j~nAnamUhyatAm |
pa~nchamaprashnasyottaram
kAmArabdhassamAdhistu kAmaM phalai nishchitam || 16||
ShaShThaprashnasyottaram
kAmena yogamabhyasya sthitapraj~no bhavedyadi |
sa kAmo.amuShya sAphalyaM gachChannapi na harShayet || 17||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe upAsanaprAdhAnyanirUpaNaM
nAma prathamo.adhyAyaH || 1
\medskip\hrule\medskip
atha dvitIyo.adhyAyaH | (mArgatrayakathanam)

Ishaputrashake bANabhUminandadharAmite |
chAturmAsye jagau sAraM sa~NgR^ihya bhagavAnR^iShi || 1||
hR^idayakuharamadhye kevalaM brahmamAtraM
hyahamahamiti sAkShAdAtmarUpeNa bhAti |
hR^idi visha manasA svaM chinvtA majjatA vA
pavanachalanarodhAdAtmaniShTho bhava tvam || 2||
shlokaM bhagavato vaktrAnmaharSherimamudgatam |
shrutyantasAraM yo veda saMshayo nAsya jAtuchit || 3||
atra shloke bhagavatA pUrvArdhe sthAnamIritam |
shArIrakasya dR^ishye.asmi~nCharIre pA~nchabhautike || 4||
tatraiva lakShaNaM choktaM dvaitamIshA cha vAritam |
uktaM chApyaparokShatvaM nAnAli~NganibarhaNam || 5||
upadesho dvitIyArdhe shiShyAbhyAsakR^ite kR^itaH |
tredhA bhinnena mArgeNa tattvAdaikyaM samIyuShA || 6||
upAyo mArgaNAbhikhyaH prathamaH samprakIrtitaH |
dvitIyo majjnAbhikhyaH prANarodhastR^itIyakaH || 7||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe mArgatrayakathanaM
nAma dvitIyo.adhyAyaH || 2
\medskip\hrule\medskip
atha tR^itIyo.adhyAyaH | (mukhyakartavyanirUpaNam)

daivarAtasya saMvAdamAchAryaramaNasya cha |
nibadhnImastR^itIye.asminnadhyAye viduShAM mude || 1||
daivarata uvAcha
kiM kartavya manuShyasya pradhAnamiha saMsR^itau |
ekaM nirdhAya bhagavAMstanme vyAkhyAtumarhati || 2||
bhagavAnuvAcha
svasya svarUpaM vij~neyaM pradhAnaM mahadichChatA |
pratiShThA yatra sarveShAM phalAnAmuta karmaNAm || 3||
daivarAta uvAcha
svasya svarUpavij~nAne sAdhanaM kiM samAsataH |
sidhyetkena prayatnena pratyagdR^iShTirmahIyasi || 4||
bhagavAnuvAcha
viShayebhyaH parAvR^itya vR^ittIH sarvAH prayatnataH |
vimarshe kevalaM tiShThedachale nirupAdhike || 5||
svasya svarUpavij~nAne sAdhanaM tatsamAsataH |
sidhyettenaiva yatnena pratyagdR^iShTirmahIyasi || 6||
daivarAta uvAcha
yAvatsiddhirbhavennR^INAM yogasya muniku~njara |
tAvantaM niyamAH kAlaM kiM yatnamupakurvate || 7||
bhagavAnuvAcha
prayatnamupakurvanti niyamA yu~njatAM satAm |
siddhAnAM kR^itakR^ityAnAM galanti niyamAssvayam || 8||
daivarAta uvAcha
kevalena vimarshena sthireNa nirupAdhinA |
yathA siddhistathA mantrairjaptaiH siddhirbhavenna vA || 9||
bhagavAnuvAcha
acha~nchalena manasA mantrairjaptairnirantaram |
siddhiH syAchChaddadhAnAnAM japtena praNavena vA || 10||
vR^itirjapena mantrANAM shuddhasya praNavasya vA |
viShayebhyaH parAvR^ittA svasvarUpAtmikA bhavet || 11||
Ishaputrashake shailabhUminandadharAmite |
saptame saptame so.ayaM saMvAdo.abhavadadbhutaH || 12||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe mukhyakartavyanirUpaNaM
nAma tR^itIyo.adhyAyaH || 3
\medskip\hrule\medskip
atha chaturtho.adhyAyaH | (j~nAnasvarUpakathanam)

prathamaH prashnaH
ahaM brahmAsmIti vR^ittiH kiM j~nAnaM muniku~njara |
uta brahmAhamiti dhIrdhIrahaM sarvamityuta || 1||
athavA sakalaM chaitadbrahmeti j~nAnamuchyate |
asmAdvR^ittichatuShkAdvA kiM nu j~nAnaM vilakShaNam || 2||
asyottaram
imaM mama guruH prashnamantevAsina AdarAt |
AkarNya ramaNo vAkyamuvAcha bhagavAnmuni || 3||
vR^ittayo bhAvanA eva sarvA etA na saMshayaH |
svarUpAvasthitiM shuddhAM j~nAnamAhurmanIShiNaH || 4||
gurorvachastadAkarNya saMshayachChedakArakam |
apR^ichChaM punarevAhamanyaM saMshayamudgatam || 5||
dvitIya prashnaH
vR^ittivyApyaM bhavedbrahma na vA nAtha tapasvinAm |
imaM me hR^idi sa~njAtaM saMshayaM Chettumarhasi || 6||
tamimaM prashnamAkarNya mitrama~NghrijuShAmR^iShiH |
abhiShichya kaTAkSheNa mAmidaM vAkyamabravIt || 7||
asyottaram
svAtmabhUtaM yadi brahma j~nAtuM vR^ittiH pravartate |
svAtmAkArA tadA bhUtvA na pR^ithak pratitiShThati || 8||
ayaM prAgukta evAbde saptame tvekaviMshake |
abhavanno mitagranthaH saMvAdo romaharShaNaH || 9||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe j~nAnasvarupakathanaM
nAma chaturtho.adhyAyaH || 4
\medskip\hrule\medskip
atha pa~nchamo.adhyAyaH | (hR^idayavidyA)

prAgukte.abde.aShTame mAsi navame divase nishi |
upanyasitavAn saMyaguddishya hR^idayaM muniH || 1||
nirgachChanti yataH sarvA vR^ittayoH dehadhAriNAm |
hR^idayaM tatsamAkhyAtaM bhAvanA.a.akR^itivarNanam || 2||
ahaMvR^ittiH samastAnAM vR^ittInAM mUlamuchyate |
nirgachChanti yato.ahandhIrhR^idayaM tatsamAsataH || 3||
hR^idayasya yadi sthAnaM bhavechchakramanAhatam |
mUlAdhAraM samArabhya yogasyopakramaH kutaH || 4||
anyadeva tato raktapiNDAdadR^idayamuchyate
ayaM hR^iditi vR^ittyA tadAtmano rUpamIritam || 5||
tasya dakShiNato dhAma hR^itpIThe naiva vAmataH |
tasmAtpravahati jyotiH sahasrAraM suShumNayA || 6||
sarvaM dehaM sahasrArAttadA lokAnubhUtayaH |
tAH prapashyan vibhedena saMsArI manujo bhavet || 7||
Atmasthasya sahasrAraM shuddhaM jyotirmayaM bhavet |
tatra jIvenna sa~Nkalpo yadi sAnnidhyataH patet || 8||
vij~nAnamAnaviShayaM sannikarSheNa yadyapi |
na bhavedyogabha~NgAya bhedasyAgrahaNe manaH || 9||
gR^ihyato.api sthiraikAdhIH sahajA sthitiruchyate |
nirvikalpaH samAdhistu viShayAsannidhau bhavet || 10||
aNDaM vapuShi niHsheShaM niHsheShaM hR^idaye vapuH |
tasmAdaNDasya sarvasya hR^idayaM rupasa~NgrahaH || 11|
bhuvanaM manaso nAnyadanyanna hR^idayAnmanaH |
asheShA hR^idaye tasmAtkathA parisamApyate || 12||
kIrtyate hR^idayaM piNDe yathANDe bhAnUmaNDalam |
manaH sahasrAragataM bimbaM chAndramasaM yathA || 13||
yathA dadAti tapanastejaH kairavabandhave |
idaM vitarati jyotirhradayaM manase tathA || 14||
hradyasannihito martyo manaH kevalamIkShate |
asannikarShe sUryasya rAtrau chandre yathA mahaH || 15||
apashyaMstejaso mUlaM svarUpaM satyamAtmanaH |
manasA cha pR^ithakpashyan bhAvAn bhrAmyati pAmaraH || 16||
hR^idi sannihito j~nAnI lInaM hR^idayatejasi |
IkShate mAnasaM tejo divA bhAnAvivaindavam || 17||
praj~nAnasya pravettAro vAchyamarthaM mano viduH
arthaM tu lakShyaM hR^idayaM hR^idayAnnaparaH paraH || 18||
dR^igdR^ishyabhedadhIreShA manasi pratitiShThati |
hR^idaye vartamAnAM dR^igdR^ishyenaikatAM vrajet || 19||
mUrchChA nidrAtisantoShashokAveshabhayAdibhiH |
nimittairAhatA vR^ittiH svasthAnaM hR^idayaM vrajet || 20||
tadA na j~nAyate prAptirhR^idayasya sharIriNA |
vij~nAyate samAdhau tu nAmabhedo nimittataH || 21||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe hR^idayavidyA
nAma pa~nchamo.adhyAyaH || 5
\medskip\hrule\medskip
atha ShaShTo.adhyAyaH | (manonigrahopAyaH)

nirupya hR^idayasyaivaM tattvaM tattvavidAM varaH |
manaso nigrahopAyamavadadramaNo muniH || 1||
nityavattimatAM nR^INAM viShayAsakttachetasAm |
vAsanAnAM baliyastvAnmano durnigrahaM bhavet || 2||
chapalaM tannigR^ihNIyAtprANarodhena mAnavaH |
pAshabaddho yathA jantustathA cheto na cheShTate || 3||
prANarodhena vR^ittinAM nirodhaH sAdhito bhavet |
vR^ittirodhena vR^ittinAM janmasthAne sthito bhavet || 4||
prANarodhashcha manasA prANasya pratyavekShaNam |
kumbhakaM sidhyati hyeyaM satatapratyavekShaNAt || 5||
yeShAM naitena vidhinA shaktiH kumbhakasAdhane |
haThayogavidhAnena teShAM kumbhakamiShyate || 6||
ekadA rechakaM kuryAtkuryAtpUrakamekadA |
kumbhakaM tu chaturvAraM nADIshuddhirbhavettataH || 7||
prANo nADIShu shuddhAsu niruddhaH kramasho bhavet |
prANasya sarvadhA rodhaH shuddhaM kumbhakamuchyate || 8||
tyAgaM dehAtmabhAvasya rechakaM j~nAninaH pare |
pUrakaM mArgaNaM svasya kumbhakaM sahajasthitim || 9||
japena vA.atha mantrANAM manaso nigraho bhavet |
mAnasena tadA mantraprANayorekatA bhavet || 10||
mantrAkSharANAM prANena sAyujyaM dhyAnamuchyate |
sahajasthitaye dhyAnaM dR^iDhabhUmiH prakalpate || 11||
sahavAsena mahatAM satAmAruDhachetasAm
kriyamANena vA nityaM sthAne lInaM mano bhavet || 12||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe manonigrahopAyaH
nAma ShaShTo.adhyAyaH || 6
\medskip\hrule\medskip
atha saptamo.adhyAyaH | (AtmavichArAdhikAritada~NganirUpaNam)

bhAradvAjasya vai kArShNerAchAryaramaNasya cha |
adhyAye kathyate shreShThaH saMvAda iha saptame || 1||
kArShNiruvAcha
rUpamAtmavichArasya kiM nu kiM vA prayojanam |
labhyAdAtmavichAreNa phalaM bhUyo.anyato.asti vA || 2||
bhagavAnuvAcha
sarvAsAmapi vR^ittInAM samaShTiryA samIritA |
ahaMvR^itteramuShyAstu janmasthAnaM vimR^ishyatAm || 3||
eSha AtmavichAraH syanna shAstraparishIlanam |
aha~NkAro vilInaH syAnmUlasthAnagaveShaNe || 4||
AtmAbhAsastvaha~NkAraH sa yadA sampraliyate |
AtmA satyo.abhitaH pUrNaH kevalaH parishiShyate || 5||
sarvakleshanivR^ittiH syAtphalamAtmavichArataH |
phalAnAmavadhiH so.ayamasti neto.adhikaM phalam || 6||
adbhutAH siddhayaH sAdhyA upAyAntaratashcha yAH |
tAH prApto.api bhavatyante vichAreNaiva nivR^itaH || 7||
kArShNiruvAcha
etasyAtmavichArasya prAhuH kamadhikAriNam |
adhikArasya sampattiH kiM j~nAtuM shakyate svayam || 8||
bhagavAnuvAcha
upAsanAdibhiH shuddhaM prAgjamasukR^itena vA |
dR^iShTadoShaM mano yasya sharIre viShayeShu cha || 9||
manasA charato yasya viShyeShvaruchirbhR^isham |
dehe chAnityatA buddhistaM prahuradhikAriNam || 10||
dehe nashvaratAbuddhervairAgyAdviShayeShu cha |
etAbhyAmeva li~NgAbhyAM j~neyA svasyAdhikAritA || 11||
kArShNiruvAcha
snAnaM sandhyAM japo homaH svAdhyAyo devapUjanam |
sa~NkIrtanaM tirthayAtrA yaj~no dAnaM vratAni cha || 12||
vichAre sAdhikArasya vairAgyAchcha vivekataH |
kiM vA prayojanAya syuruta kAlavidhUtaye || 13||
bhagavAnuvAcha
ArambhiNAM kShIyamANarAgANAmadhikAriNAm |
karmANyetAni sarvANi bhUyasyai chitashiddhaye || 14||
yatkarma sukR^itaM proktaM manovAkkAyasambhavam |
tattu karmAntaraM hanti manovAkkAyasambhavam || 15||
atyantashuddhamanasAM pakvAnAmadhikAriNAm |
idaM lokopakArAya karmajAlaM bhaviShyati || 16||
pareShAmupadeshAy kShemAya cha manIShiNaH |
pakvAshcha karma kurvanti bhayAnnAdeshashAstrataH || 17||
vichArapratikUlAni na puNyAni nararShabha |
kriyamANAnyasa~Ngena bhedabuddhyupamardinA || 18||
na chAkR^itAni pApAya pakvanAmadhikAriNAm |
svavimarsho mahatpuNyaM pAvanAnAM hi pAvanam || 19||
dR^ishyate dvividhA niShThA pakvAnAmadhikAriNAm |
tyAga ekAntayogAya parArthaM cha kriyAdaraH || 20||
kArShNiruvAcha
nirvANAyAsti chedanyo mArga AtmavichArataH |
eko vA vividhastaM me bhagavAnvaktumarhati || 21||
bhagavAnuvAcha
ekaH prAptuM prayatate paraH prAptAramR^ichChati |
chirAya prathamo gachChan prAptotyAtmAnmantataH || 22||
ekasya dhyAnatashchittamekAkR^itirbhaviShyati |
ekAkR^ititvaM chittasya svarupe sthitaye bhavet || 23||
anichChayApyato dhyAyan vindatyAtmani saMsthitim |
vichArakastu vij~nAya bhavedAtmani saMsthitaH || 24||
dhyAyo devatAM mantramanyadvA lakShyamuttamam |
dhyeyamAtmAtmamahAjyotiShyantato lInatAM vrajet || 25||
gatirevaM dvayorekA dhyAtushchAtmavimarshinaH |
dhyAyannekaH prashAntaH syAdanyo vij~nAya shAmyati || 26||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe AtmavichArAdhikAritada~NganirUpaNaM
nAma saptamo.adhyAyaH || 7
\medskip\hrule\medskip
atha aShTamo.adhyAyaH | (AshramavichAraH)

kArShNerevAparaM prashnaM nishamya bhagavAnmuniH |
chAturAshramyasambaddhamadikAraM nyarUpayat || 1||
brahmachArI gR^ihI vA.api vAnaprastho.athavA yatiH |
nArI vA vR^iShalo vApi pakvo brahma vichArayet || 2||
sopAnavatparaM prAptuM bhaviShyatyAshramakramaH |
atyantapakvachittasya kramApekShA na vidyate || 3||
gataye lokakAryANAmAdishantyAshrAmakramam
AshramatrayadharmANAM na j~nAnapratikUlatA || 4||
sa.nnyAso nirmalaM j~nAnaM na kAShAyo na muNDanam ||
pratibandhakabAhulyavAraNAyAshramo mataH || 5||
brahmachayaryAshrame yasya shaktirujjR^imbhate vrataiH |
vidyayA j~nAnavR^iddhayA cha sa pashchAtprajvaliShyati || 6||
brahmacharyeNa shuddhena gR^ihitve nirmalo bhavet |
sarveShAmupakArAya gR^ihasthAshrama uchyate || 7||
sarvathA vItasa~Ngasya gR^ihasthasyApi dehinaH |
paraM prasphurati jyotistatra naivAsti saMshayaH || 8||
tapasastvAshramaH prokttastR^itIyaH paNDitottamaiH |
abhAryo vA sabhAryo vA tR^itIyAshramabhAgbhavet || 9||
tapasA dagdhapApasya pakvachittasya yoginaH |
chaturtha AshramaH kAle svayameva bhaviShyati || 10||
eSha prAgukta evAbdhe tvaShTame dvAdashe punaH |
upadesho bhagavataH saptamAShTamayorabhUt || 11||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe AshramavichAraH
nAma aShTamo.adhyAyaH || 8
\medskip\hrule\medskip
atha navamo.adhyAyaH | (granthibhedakathanam)

chaturdashe.aShTame rAtrau maharShi pR^iShTavAnaham |
granthibhedaM samuddishya viduShAM yatra saMshayaH || 1||
tamAkarNya mama prashnaM ramaNo bhagavAnR^iShiH |
dhyAtvA divyena bhAvena ki~nchidAha mahAmahAH || 2||
sharIrasyAtmanashchApi sambandho granthiruchyate |
sambandhenaiva shArIraM bhavati j~nAnamAtmanaH || 3||
sharIraM jaDametatsyAdAtmA chaitanyamiShyate |
ubhayorapi sambandho vij~nAnenAnumIyate || 4||
chaitanyachChAyayAshliShTaM sharIraM tAta cheShTate |
nidrAdau grahaNAbhAvAdUhyate sthAnamAtmanaH || 5||
sUkShmANAM vidyudAdInAM sthUle tantryAdike yathA |
tathA kalevare nADyAM chaitanyajyotiSho gatiH || 6||
sthalamekamupAshritya chaitanyajyotirujjvalam |
sarvaM bhAsayate dehaM bhAskaro bhuvanaM yathA || 7||
vyAptena tatprakAshena sharIre tvanubhUtayaH |
sthalaM tadeva hR^idayaM sUrayassamprachakShate || 8||
nADIshaktivilAsena chaitanyAMshugatirmatA |
dehasya shaktayassarvAH pR^itha~NnADIrUpAshritAH || 9||
chaitanyaM tu pR^itha~NnADyAM tAM suShumNAM prachakShate |
AtmanADIM parAmeke paretvamR^itanADikAm || 10||
sarvaM dehaM prakAshena vyApto jIvo.abhimAnavAn |
manyate dehamAtmAnaM tena bhinnaM cha viShTapam || 11||
abhimAnaM parityajya dehe chAtmadhiyaM sudhIH |
vichArayechchedekAgro nADInAM mathanaM bhavet || 12||
nADInAM mathanenaivAtmA tAbhyaH pR^ithakkR^itaH |
kevalAmamR^itAM nADImAshritya prajvaliShyati || 13||
AtmanADyAM yadA bhAti chaitanyajyotirujjvalam |
kevalAyAM tadA nAnyadAtmanassamprabhAsate || 14||
sAnnidhyAdbhAsamAnaM vA na pR^ithakpratitiShThati |
jAnAti spaShTamAtmAnaM sa dehamiva pAmaraH || 15||
Atmaiva bhAsate yasya bahirantashcha sarvataH |
pAmarasyeva rUpAdi sa bhinnagranthiruchyate || 16||
nADIbandho.abhimAnashcha dvayaM granthirudIryate |
nADIbandhena sUkShamo.api sthUlaM sarvaM prapashyati || 17||
nivR^ittaM sarvanADIbhyo yadaikAM nADIkAM shritam |
bhinnagranthi tadA jyotirAtmabhAvAya kalpate || 18||
agnitaptamayogolaM dR^ishyate.agnimayaM yathA |
svavichArAgnisantaptaM tathedaM svamayaM bhavet || 19||
sharIrAdijuShAM pUrvavAsanAnAM kShayastadA |
kartR^itvamasharIratvAnnaiva tasya bhaviShyati || 20||
kartR^itvAbhAvataH karmavinAsho.asya samIritaH |
tasya vastvantarAbhAvAtsaMshayAnAmanudbhavaH || 21||
bhavitA na punarbaddho vibhinnagranthirekadA |
sA sthitiH paramA shaktissA shAntiH paramA matA || 22||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe granthibhedakathanaM
nAma navamo.adhyAyaH || 9
\medskip\hrule\medskip
atha dashamo.adhyAyaH | (sa~NghavidyA)

yatino yoganAthasya maharShiramaNasya cha |
dashame.atra nIbaghnimassaMvAdaM sa~NghaharShadam || 1||
yoganAtha uvAcha
sA~Nghikasya cha sa~Nghasya kassambandho mahAmune |
sa~Nghasya shreyase nAtha tametaM vaktumarhasi || 2||
bhagavAnuvAcha
j~neyashsharIravatsa~NghastattadAchArashAlinam |
a~NgAnIvAtra vij~neyAssA~NghikAssadhusattama || 3||
a~NgaM yathA sharIrasya karotyupakR^itiM yate |
tathopakAraM sa~Nghasya kurvan jayati sA~NghikaH ||
sa~Nghasya vA~NmanaHkAyairupakAro yathA bhavet |
svayaM tathA.a.acharannityaM svakIyAnapi boghayet || 5||
AnukUlyena sa~Nghasya sthApayitvA nijaM kulam |
sa~Nghasyaiva tato bhUtyai kuryAdbhutiyutaM kulam || 6||
yoganAtha uvAcha
shAntiM kechitprashaMsanti shaktiM kechinmanIShiNaH |
anayoH ko guNo jyAyAntsa~NghakShemakR^ite vibho || 7||
bhagavAnuvAcha
svamanashshuddhaye shAntishshaktissa~Nghasya vR^iddhaye |
shaktyA sa~NghaM vidhAyochchaishshAntiM saMsthApayettataH || 8||
yoganAtha uvAcha
sarvasyApi cha sa~Nghasya narANANAmR^iShiku~njara |
gantavyaM samudAyena kiM paraM dharaNItale || 9||
bhagavAnuvAcha
samudAyena sarvasya sa~Nghasya tanudhAriNAm |
saubhrAtraM samabhAvena gantavyaM paramuchyate || 10||
saubhrAtreNa parA shAntiranyonyaM dehadhAriNAm |
tadetyaM shobhate sarvA bhUmirekaM gR^ihaM yathA || 11||
abhUtpa~nchadashe ghastre saMvAdasso.ayamaShTame |
yoganAthasya yatino maharSheshcha dayAvataH || 12||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe sa~NghavidyA
nAma dashamo.adhyAyaH || 10
\medskip\hrule\medskip
atha ekAdasho.adhyAyaH | (j~nAnasiddhisAmarasyakathanam)

ShoDashe divase rAtrau vivikte munisattamam |
guruM brahmavidAM shreShThaM nityamAtmani saMsthitam || 1||
upagamya mahAbhAgaM so.ahaM kaivatamAnavam |
ramaNaM stutavAnasmi durlabhaj~nAnalabdhaye || 2||
tvayyeva paramA niShThA tvayyeva vishadA matiH |
ambhasAmiva vArAshirvij~nAnAnAM tvamAspadam || 3||
tvaM tu saptadashe varShe bAlya eva mahAyashaH |
labdhavAnasi vij~nAnaM yoginAmapi durlabham || 4||
sarve dR^ishyA ime bhAvA yasya ChAyAmayAstava |
tasya te bhagavanniShThAM ko nu varNayituM kShamaH || 5||
majjatAM ghorasaMsAre vyapR^itAnAmitastataH |
duHkhaM mahattitIShUrNAM tvamekA paramA gatiH || 6||
pashyAmi devadattena j~nAnena tvAM muhurmuhuH |
brahmaNyAnAM varaM brahmantsubrahmaNyaM narAkR^itim || 7||
na tvaM svAmigirau nAtha na tvaM kShaNikaparvate |
na tvaM ve~NkaTashailAgre shoNAdrAvasi vastutaH || 8||
bhUmavidyAM purA nAtha nAradAya maharshaye |
bhavAn shushrUShamANAya rahasyAmupadiShTavAn || 9||
sanatkumAraM brahmarShi tvAmAhurvedavedinaH |
AgamAnAM tu vettArassubrahmaNyaM surarShabham || 10||
kevalaM nAma bhedo.ayaM vyaktibhedo na vidyate |
sanatkumArasskandashcha paryAyau tava tattvataH || 11||
purA kumArilo nAma bhUtvA brAhmaNasattamaH |
dharmaM vedoditaM nAtha tvaM saMsthApitavAnasi || 12||
jainairvyAkulite dharme bhagavandraviDeShu cha |
bhUtvA tvaM j~nAnasambandho bhaktiM sthApitavAnasi || 13||
adhunA tvaM mahAbhAga brahmaj~nAnasya guptaye |
shAstraj~nAnena santRRIptairniruddhasyAgato dharAm || 14||
sandehA bahavo nAtha shiShyANAM vAritAstvayA |
imaM cha mama sandehaM nivArayitumarhasi || 15||
j~nAnasya chApi siddhInAM virodhaH kiM parasparam |
utAho ko.api sambandho vartate muniku~njara || 16||
mayaivaM bhagavAnpR^iShTo ramaNo nutipUrvakam |
gabhirayA dR^ishA vIkShya mAmidaM vAkyamabravit || 17||
sahajAM sthitimAruDhaH svabhAvena dine dine |
tapashcharatidurdharShaM nAlasyaM sahajasthitau || 18||
tapastadeva durdharShaM ya niShTha sahajAtmani |
tena nityena tapasA bhavetpAkaH kShaNe kShaNe || 19||
paripAkena kAle syuH siddhayastAta pashyataH |
prArabdhaM yadi tAbhiH syAdvihAro j~nAnino.api cha || 20||
yathA prapa~nchagrahaNe svarupAnnetaranmuneH |
siddhayaH kriyamANAshcha svarupAnnetarattathA || 21||
bhavenna yasya prArabdhaM shaktipUrNo.apyayaM muniH |
atara~Nga ivAmbhodhirna ki~nchitdapi cheShTate || 22||
nAnyaM mR^igayate mArgaM nisargAdAtmani sthitaH ||
sarvAsAmapi shaktInAM samaShTiH svAtmani sthitiH || 23||
aprayatnena tu tapaH sahajA sthitiruchyate |
sahajAyAM sthitau pAkAchChakttinAmudbhavo mataH || 24||
parIvR^ito.api bahubhirnityamAtmani saMsthitaH |
ghoraM tapashcharatyeva na tasyaikAntakAmitA || 25||
j~nAnaM shakterapetaM yo manyate naiva veda saH |
sarvashakte.abhitaH pUrNe svasvarUpe hi bodhavAn || 26||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe j~nAnasiddhisAmarasyakathanaM
nAma ekAdasho.adhyAyaH || 11
\medskip\hrule\medskip
atha dvAdasho.adhyAyaH | (shaktivichAraH)

ekonaviMshe divase bhAradvAjo mahAmanAH |
kapAlI kR^itiShu jyAyAnapR^ichChadramaNaM gurum || 1|
kapAlyuvAcha
viShayI viShayo vR^ittiritIdaM bhagavaMstrikam |
j~nAninAM pAmarANAM cha lokayAtrAsu dR^ishyate || 2||
atha kena visheSheNa j~nAnI pAmarato.adhikaH |
imaM me nAtha sandehaM nivartayitumarhasi || 3||
bhagavAnuvAcha
abhinno viShayI yasya svarUpAnmanujarShabha |
vyApAraviShayau bhAtastasyAbhinnau svarUpataH || 5||
bhedabhAse vijAnAti j~nAnyabhedaM ti tAttvikam |
bhedAbhAsavashaM gatvA pAmarastu vibhidyate || 6||
kapAlyuvAcha
nAtha yasminnime bheda bhAsante tripuTImayAH |
shaktimadvA svarUpaM tadutAho shaktivarjitam || 7||
bhagavAnuvAcha
vatsa yasminnime bhedA bhAsante tripuTImayAH |
sarvashaktaM svarUpaM tadAhurvedAntavedinaH || 8||
kapAlyuvAcha
Ishvarasya tu yA shaktirgItA vedAntavedibhiH |
asti vA chalanaM tasyamAhosvinnAtha nAsti vA || 9||
bhagavAnuvAcha
shaktessa~nchalanAdeva lokAnAM tAta sambhavaH |
chalanasyAshrayo vastu na sa~nchalati karhichit || 10||
achalasya tu yachChaktashchalanaM lokakAraNam |
tAmovAchakShate mAyAmanirvAchyAM vipashchitaH || 11||
cha~nchalatvaM viShayiNo yathArthamiva bhAsate |
chalanaM na narashreShTha svarUpasya tu vastutaH || 12||
Ishvarasya cha shakteshcha bhedo dR^iShtinimittakaH |
mithunaM tvidamekaM syAddR^iShTishchedupasaMhR^itA || 13||
kapAlyuvAcha
vyApAra IshvarasyAyaM dR^ishyabrahmANDakoTikR^it |
nityaH kimathavA.anityo bhagavAnvaktumarhati || 14||
bhagavAnuvAcha
nijayA parayA shaktyA chalannapyachalaH paraH |
kevalaM munisaMvedyaM rahasyamidamuttamam || 15||
chalatvameva vyApAro vyApArashshaktiruchyate |
shaktyA sarvamidaM dR^ishyaM sasarja paramaH pumAn || 16||
vyApArastu pravR^itishcha nivR^ittiriti cha dvidhA |
nivR^iristhA yatra sarvamAtmaivAbhUditi shrutiH || 17||
nAnAtvaM dvaitakAlasthaM gamyate sarvamityataH |
abhUditi padenAtra vyApAraH ko.api gamyate || 18||
Atmaiveti vinirdeshadvisheShANAM samaM tataH |
AtmanyevopasaMhArastajjAtAnAM prakIrtitaH || 19||
vinA shaktiM narashreShTha svarUpaM na pratIyate |
vyApAra Ashrayashcheti dvinAmA shaktiruchyate || 20||
vyApAro vishvasargAdikAryamuktaM manIShibhiH |
Ashrayo dvipadAM shreShTha svarUpAnnAtirichyate || 21||
svarUpamanyasApekShaM naiva sarvAtmakatvataH |
shaktiM vR^ittiM svarUpaM cha ya evaM veda veda saH || 22||
vR^itterabhAve tu sato nAnAbhAvo na sidhyati |
sattA shaktyatirikttA ched vR^iternaiva samudbhavaH || 23||
yadi kAlena bhavitA jagataH pralayo mahAn |
abhedena svarUpe.ayaM vyApAro lInavadbhavet || 24||
sarvo.api vyavahAro.ayaM na bhavechChaktimantarA |
na sR^iShTirnApi vij~nAnaM yadetat tripuTImayam || 25||
svarupamAshrayatvena vyApArassargakarmaNA |
nAmabhyAmuchyate dvAbhyAM shaktirekA parAtparA || 26||
lakShaNaM chalanaM yeShAM shaktesteShAM tadAshrayaH |
yat ki~nchitparamaM vastu vyaktavyaM syAnnararShabha || 27||
tadekaM paramaM vastu shaktimeke prachakShate |
svarupaM ke.api vidvAMso brahmAnye puruShaM pare || 28||
vatsa satyaM dvidhA gamyaM lakShaNena cha vastutaH |
lakShaNenochyate satyaM vastutastvanubhUyate || 29||
tasmAtsvarUpavij~nAnaM vyApAreNa cha vastutaH |
tATasthyena cha sAkShAchcha dvividhaM samprachakShate || 30||
svarupamAshrayaM prAhurvyApAraM tAta lakShaNam |
vR^ityA vij~nAya tanmUlamAshraye pratitiShThati || 31||
svarUpaM lakShaNopetaM lakShaNaM cha svarupavat |
tAdAtmyenaiva sambandhastvanayossamprakIrtitaH || 32||
taTasthalakShaNenaivaM vyApArAkhyena mAriSha |
yato lakShyaM svarUpaM syAnnityavyApAravattataH || 33||
vyApAro vastuno nAnyo yadi pashyasi tattvataH |
idaM tu bhedavij~nAnaM sarvaM kAlpanikaM matam || 34||
shaktyullAsAhyayA seyaM sR^iShTiH syAdIshakalpanA |
kalpaneyamatIta chet svarUpamavashiShyate || 35||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe shaktivichAro
nAma dvAdasho.adhyAyaH || 12
\medskip\hrule\medskip
atha trayodasho.adhyAyaH | (sa.nnyAse strIpuruShayostulyAdhikAranirUpaNam)

atriNAmanvayajyotsnA vasiShThAnAM kulasnuShA |
mahAdevasya jananI dhIrasya brahmavedinaH || 1||
pratimAnaM purandhrINAM lokasevAvrate sthitA |
bibhrANA mahatIM vidyAM brahmAdivibudhastutAm || 2||
dakShiNe vindhyatashshktestAriNyA AdimA guruH |
tapassakhI me dayitA vishAlAkShI yashasvinI || 3||
prashnadvayena ramaNAhyayaM vishvahitaM munim |
abhyagachChadaduShTA~NgI nikShiptena mukhe mama || 4||
AtmasthitAnAM nArINAmasti chetpratibandhakam |
gR^ihatyAgena haMsItvaM kimu syAchChAstrasammatam || 5||
jIvantyA eva muktAyA dehapAto bhavedyadi |
dahanaM vA samAdhirvA kAryaM yuktamanantaram || 6||
prashnadvayamidaM shrutvA bhagavAnR^iShisattamaH |
avochannirNayaM tatra sarvashAstrArthatattvavit || 7||
svarUpe vartamAnAnAM pakvAnAM yoShitAmapi |
nivR^ittatvAnniShedhasya haMsItvaM naiva duShyati || 8||
muktatvasyAvishiShTatvadbodhasya cha vadhUrapi |
jIvanmuktA na dAhyA syAt taddeho hi surAlayaH || 9||
ye doSho dehadahane puMso muktasya saMsmR^itAH |
muktAyAssanti te sarve dehadAhe cha yoShitaH || 10||
ekaviMshe.ahni gIto.abhUdayamartho manIShiNA |
adhikR^itya j~nAnavatIM ramaNena maharShiNA || 11||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe sa.nnyAse strIpuruShayostulyAdhikAranirUpaNaM
nAma trayodasho.adhyAyaH || 13
\medskip\hrule\medskip
atha chaturdasho.adhyAyaH | (jIvanmuktivichAraH)

nishAyAmekaviMshe.ahni bhAradvAji vidAM varaH |
prAj~nashshivakulopAdhirvaidarbho vadatAM varaH || 1||
jIvanamuktiM samuddishya maharShi paripR^iShTavAn |
atha sarveShu shR^iNvatsu maharShirvAkyamabravit || 2||
shAstrIyairlokikaishchApi pratyayairavichAlitA |
svarUpe sudR^iDhA niShThA jIvanmuktirudAhR^itA || 3||
muktirekavidhaiva syAtpraj~nAnasyAvisheShataH |
sharIrasthaM muktabandhaM jIvanmuktaM prachakShate || 4||
brahmalokagato muktashshrUyate nigameShu yaH |
anubhUtau na bhedo.asti jIvanmuktasya tasya cha || 5||
prANAH samavalIyante yasyAtraiva mahAtmanaH |
tasyApyanubhavo vidvannetayorubhayoriva || 6||
sAmyAtsvarUpaniShThAyA bandhahAneshcha sAmyataH |
muktirekavidhaiva syAdbhedastu parabuddhigaH || 7||
mukto bhavati jIvanyo mAhAtmAtmani saMsthitaH |
prANAH samavalIyante tasyaivAtra nararShabha || 8||
jIvanmuktasya kAlena tapasaH paripAkataH |
sparshAbhAvo.api siddhaH syAdrUpe satyapi kutrachit || 9||
bhUyashcha paripAkena rUpAbhAvo.api siddhyati |
kevalaM chinmayo bhUtvA sa siddho vihariShyati || 10||
sharIrasaMshrayaM siddhyordvayametannarottama |
alpenApi cha kAlena devatAnugrahAdbhavet || 11||
bhedametaM puraskR^itya tAratamyaM na sampadi |
dehavAnasharIro vA mukta Atmani saMsthitaH || 12||
nADIdvArArchirodyena mArgeNordhvagatirnaraH |
tatrotpannena bodhena sadyo mukto bhaviShyati || 13||
upAsakasya sutarAM pakvachittasya yoginaH |
IshvarAnugrahAtproktA nADIdvArottamA gatiH || 14||
sarveShu kAmachAro.asya lokeShu parikIrtitaH |
ichChayA.anekadehAnAM grahaNaM chApyanugrahaH || 15||
kailAshaM ke.api muktAnAM lokamAhurmanIShiNaH |
eke vadanti vaikuNThaM pare tvAdityamaNDalam || 16||
muktalokAshcha te sarve vidvanbhUmyAdilokavat |
chitravaibhavayA shaktyA svarupe parikalpitAH || 17||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe jIvanmuktivichAro
nAma chaturdasho.adhyAyaH || 14
\medskip\hrule\medskip
atha pa~nchadasho.adhyAyaH | (shravaNamanananididhyAsananirUpaNam)

shravaNaM nAma kiM nAtha mananaM nAma kiM matam |
kiM vA munikulashreShTha nididhyAsanamuchyate || 1||
ityevaM bhagavAnpR^iShTo mayA brahmavidAM varaH |
dvAviMshe divase prAtarabravIchChiShyasaMsadi || 2||
vedashIrShasthavAkyAnAmarthavyAkhyAnapUrvakam |
AchAryAchChR^ivaNaM kechichChR^ivaNaM parichakShate || 3||
apare shravaNaM prAhurAchAryAdviditAtmanaH |
girAM bhAShAmayInAM cha svarUpaM bodhayanti yAH || 4||
shrutvA vedAntavAkyAni nijavAkyAni vA guroH |
janmAntarIyapuNyena j~nAtvA vobhayamantarA || 5||
ahampratyayamUlaM tvaM sharIrAdervilakShaNaH |
itIdaM shravaNaM chittAchChR^ivaNaM vastuto bhavet || 6||
vadanti mananaM kechichChAstrAtrarthasya vichAraNam |
vastuto mananaM tAta svarupasya vichAraNam || 7||
viparyAsena rahitaM saMshayena cha mAnada |
kaishchidbrahmAtmavij~nAnaM nididhyAsanamuchyate || 8||
viparyAsena rahitaM saMshayena cha yadyapi |
shAstrIyamaikyavij~nAnaM kevalaM nAnubhUtaye || 9||
saMshayashcha viparyAso nivAryete ubhAvapi |
anubhUtyaiva vAsiShTha na shAstrashatakairapi || 10||
shAstraM shraddhAvato hanyAt saMshayaM cha viparyayam |
shraddhAyAH ki~nchidUnatve punarabhyudayastayoH || 11||
mUlachChedastu vAsiShTha svarupAnubhave tayoH |
svarupe saMsthitistasmAnnididhyAsanamuchyate || 12||
bahissa~ncharatastAta svarupe saMsthitiM vinA |
aparokSho bhavedbodho na shAstrashatacharchayA || 13||
svarupasaMsthitiH syAchchet sahajA kuNDinarShabha |
sA muktiH sA parA niShThA sa sAkShAtkAra IritaH || 14||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe shravaNamanananididhyAsana nirUpaNaM
nAma pa~nchadasho.adhyAyaH || 15
\medskip\hrule\medskip
atha ShoDasho.adhyAyaH | (bhaktivichAraH)

atha bhaktiM samuddishya pR^iShTaH puruShasattamaH |
abhAShata mahAbhAgo bhagavAn ramaNo muniH || 1||
AtmA priyaH samastasya priyaM netaradAtmanaH |
achChinnA tailadhArAvat prItirbhaktirudAhR^itA || 2||
abhinnaM svAtmanaH prItyA vijAnAtIshvaraM kaviH |
jAnannapyaparo bhinnaM lIna Atmani tiShThati || 3||
vahantI tailadhArAvadyA prItiH parameshvare |
anichChato.api sA buddhiM svarupaM nayati dhruvam || 4||
parichChinnaM yadAtmAnaM svalpaj~naM chApi manyate |
bhakto viShayirUpeNa tadA kleshanivR^ittaye || 5||
vyApakaM paramaM vastu bhajate devatAdhiyA |
bhajaMshcha devatAbuddhyA tadevAnte samashnute || 6||
devatAyA narashreShTha nAmarUpaprakalpanAt |
tAbhyAM tu nAmarUpAbhyAM nAmarupe vijeShyate || 7||
bhaktau tu paripUrNAyamalaM shravaNamekadA |
j~nAnAya paripUrNAya tadA bhaktiH prakalpate || 8||
dhArAvyapetA yA bhaktiH sA vichChinneti kIrtyate |
bhakteH parasya sA heturbhavatIti vinirNayaH || 9||
kAmAya bhaktiM kurvANaH kAmaM prApyApyanivR^itaH |
shAshvatAya sukhasyAnte bhajate punarIshvaram || 10||
bhaktiH kAmasametA.api kAmAptau na nivartate |
shraddhA vR^iddhA pare puMsi bhUya evAbhirvardhate || 11||
vardhamAnA cha sA bhaktiH kAle pUrNA bhaviShyati |
pUrNayA parayA bhaktyA j~nAneneva bhavaM taret || 12||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe bhaktivichAraH
nAma ShoDasho.adhyAyaH || 16
\medskip\hrule\medskip
atha saptadasho.adhyAyaH | (j~nAnaprAptivichAraH)

pa~nchaviMshe tu divase vaidarbho viduShaM varaH |
prashrayAnavato bhUtvA muniM bhUyo.api pR^iShTavAn || 1||
vaidarbha uvAcha
krameNAyAti kiM j~nAnaM ki~nchitki~nchiddine dine |
ekasminneva kAle kiM pUrNamAbhAti bhAnuvat || 2||
bhagavAnuvAcha
krameNAyAti na j~nAnaM ki~nchitki~nchiddine dine |
abhyAsaparipAkena bhAsate pUrNamekadA || 3||
vaidarbha uvAcha
abhyAsakAle bhagavan vR^ittirantarbahistathA |
yAtAyAtaM prakurvANA yAte kiM j~nAnamuchyate || 4||
bhagavAnuvAcha
antaryAtA matirvidvanbahirAyAti chetpunaH |
abhyAsameva tAmAhurj~nAnaM hyanubhavo.achyutaH || 5||
vaidarbha uvAcha
j~nAnasya munishArdUla bhUmikAH kAshchidIritAH |
shAstreShu viduShAM shreShThaiH kathaM tAsAM samanvayaH || 6||
bhagavAnuvAcha
shAstroktA bhUmikAssarvA bhavanti parabuddhigAH |
muktibhedA iva prAj~na j~nAnamekaM prajAnatAm || 7||
charyAM dehendriyAdInAM vIkShyAbdhAnusAriNIm |
kalpayanti pare bhUmistAratamyaM na vastutaH || 8||
vaidarbha uvAcha
praj~nAnamekadA siddhaM sarvAj~nAnanibarhaNam |
tirodhate kimaj~nAnAtsa~NgAda~NkuritAtpunaH || 9||
bhagavAnuvAcha
aj~nAnasya pratidvandi na parAbhUyate punaH |
praj~nAnamekadA siddhaM bharadvAjakulodvaha || 10||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe j~nAnaprAptivichAro
nAma saptadasho.adhyAyaH || 17
\medskip\hrule\medskip
atha aShTAdasho.adhyAyaH | (siddhamahimAnukIrtanam)

varaparAsharagotrasamudbhavaM vasumatIsurasa~Nghayashaskaram |
vimalasundarapaNDitanandanaM kamalapatravishAlavilochanam || 1||
aruNashailagatAshramavAsinaM paramahaMsamana~njanamachyutam |
karuNayA dadhataM vyavahAritAM satatamAtmani saMsthitamakShare || 2||
akhilasaMshayavAraNabhAShaNaM bhramamadadviradA~NkushavIkShaNam |
avirataM parasaukhyadhR^itodyamaM nijatanUviShayeShvalasAlasam || 3||
pariNatAmraphalaprabhavigrahaM chalatarendriyanigrahasagraham |
amR^itachiddhanavalliparigrahaM mitavachorachitAgamasa~Ngraham || 4||
amaladiptatarAtmamarIchibhirnijakarairiva pa~NkajabAndhavam |
padajuShAM jaDabhAvamanehasA pariharantamanantaguNAkaram || 5||
mR^idutamaM vachane dR^ishi shItalaM vikasitaM vadane sarasIruhe |
manasi shUnyamahashshashisannibhe hR^idi lasantamananta ivAruNam || 6||
adayamAtmatanau kaThinaM vrate pruShachittamalaM viShayavraje |
R^iShimaroShamapetamanorathaM dhR^itamadaM ghanachillaharIvashAt || 7||
vigatamohamalobhamabhavanaM shamitamatsaramutsavinaM sadA |
bhavamahodadhitAraNakarmaNi pratiphalena vinaiva sadodyatam || 8||
mAtAmameti nagarAjasutorupIThaM
nAgAnane bhajati yAhi pitA mameti |
a~NkaM harasya samavApya shirasyanena
sa~nchumbitasya girindhrakR^ito vibhUtim || 9||
vedAdipAkadamanottarakachChapeshai\-
ryuktairdharAdharasuShuptyamareshvaraishcha |
sUkShmAmR^itAyugamR^itena saha praNatyA
sampannashabdapaTalasya rahasyamartham || 10||
daNDaM vinaiva yatinaM bata daNDapANiM
duHkhAbdhitArakamariM bata tArakasya |
tyaktvA bhavaM bhavamaho satataM bhajantaM
haMsaM tathApi gatamAnasasa~NgarAgam || 11||
dhIratvasampadi suvarNagireranUnaM
vArannirodhedhikameva gabhiratAyAm |
kShAntau jayantamachalAmakhilasya dhAtrIM
dAntau nirdashanamashantikathAdaviShTham || 12||
nIlAravindasuhR^idA sadR^ishaM prasAde
tulyaM tathA mahasi toyajabAndhavena |
brAhmyAM sthitau tu pitaraM vaTamUlavAsaM
saMsmArayantamachalantamanUditaM me || 13||
yasyAdhunApi ramaNI ramaNIyabhAvA
girvANalokapR^itanA shubhavR^ittirUpA |
saMshobhate shirasi nApi manojagandha\-
stattAdR^ishaM gR^ihiNamapyadhipaM yatInAm || 14||
vandArulokavaradaM naradantino.api
mantreshvarasya mahato gurutAM vahantam |
mandAravR^ikShamiva sarvajanasya pAda\-
chChAyAM shritasya paritApamapAharantam || 15||
yastantravArtikamanekavichitrayukti\-
saMshobhitaM nigamajIvanamAtatAna |
bhusya tasya budhasaMhatisaMstutasya
veShAntaraM tu nigamAnatavacho vichAri || 16||
vedashIrShachayasArasa~NgrahaM pa~ncharatnamaruNAchalasya yaH |
guptamalpamapi sarvatomukhaM sUtrabhUtamatanodimaM gurum || 17||
devavAchi sutarAmashikShitaM kAvyagandharahitaM cha yadyapi |
granthakramaNi tathA.api sasphuradbhAShitAnucharabhAvasa~nchayam || 18||
lokamAtR^ikuchadugdhapAyinashsha~NkarastavakR^ito mahAkaveH |
drAviDadvijashishornaTadgiro bhUmikAntaramapAramedhasam || 19||
bhUtale tviha tR^itiyamudbhavaM krau~nchabhUmidhararandhrakAriNaH |
brahmaniShThitadashApradarshanAdyuktivAdatimirasya shAntaye || 20||
kumbhayonimukhamaunipUjite drAviDe vachasi vishrutaM kavim |
dR^iShTavantamajaraM paraM mahaH kevalaM dhiShaNayA guruM vinA || 21||
bAlake.api jaDagopake.api va vAnare.api shuni vA khale.api vA |
paNDite.api padasaMshrite.api vA pakShapAtarahitaM samekShaNam || 22||
shaktimantamapi shAntisaMyutaM bhaktimantamapi bhedavarjitam |
vItarAgamapi lokavatsalaM devatAMshamapi namracheShTitam || 23||
eSha yAmi piturantikaM mamAnveShaNaM tu na vidhIyatAmiti |
saMvilikhya gR^ihato vinirgataM shoNashailacharaNaM samAgatam || 24||
IdR^ishaM guNagaNairabhirAmaM prashrayeNa ramaNaM bhagavantam |
siddhalokamahimAnamapAraM pR^iShTavAnamR^itanAthayatIndraH || 25||
Aha taM sa bhagavAnagavAsI siddhalokamahimA tu durUhaH |
te shivena sadR^ishAH shivarUpAH shakruvanti cha varANyapi dAtum || 26||
|| iti shrIramaNagItAsu brahmavidyAyAM yogashAstre ramaNAntevAsino
vAsiShThasya gaNapaterupanibandhe siddhamahimAnukIrtanaM
nAma aShTAdasho.adhyAyaH || 18
            || iti shrIramaNagItA samAptA ||
\medskip\hrule\medskip
\medskip\hrule\medskip
|| atreme bhavantyupasaMhArashlokAH ||
dvitIye tu dvitIye.atra shloko granthe svayaM muneH |
dvitIyAdhyAyagAH shlokA anyemetaM vivR^iNvate || 1||
itaratra tu sarvatra prashnArthaH prashnakAriNaH |
uttarArtho bhagavataH shlokabandho mama svayam || 2||
ayaM gaNapatergranthamAlAyAmujjvalo maNiH |
guroH sarasvatI yatra vishuddhe pratibimbitA || 3||
\medskip\hrule\medskip
|| granthaprashaMsA ||
galanti ga~NgeyaM vimalataragItaiva mahato
nagAdhIshAchChrimadramaNamunirUpAjjanimati |
patho vANIrUpAdgaNapatikaverbhaktahR^idayaM
samudraM saMyAti prabalamalahAriNyanupadam ||
\-\-\-praNavAnandaH
\medskip\hrule\medskip
|| shrIramaNagItAprakAshapIThikA ||
IshvaraH sarvabhUtAnameko.asau hR^idayAshrayaH |
sa AtmA sA parA dR^iShTistadanyannAsti ki~nchana || 1||
sA viyogAsahA shaktirekA shaktasya jagrati |
dR^ishyabrahmANDakoTinAM bhAti janmAdi bibhratI || 2||
yamiyaM vR^iNute dR^iShTirmArjArIva nijaM shishum |
sa tAmanveShate potaH kapiH svAmiva mAtaram || 3||
jayati sa bhagvAnramaNo vAkpatirAchAryagaNapatirjayati |
asya cha vANI bhagvad \- ramaNIyArthAnuvartinI jayati || 4||
\-\-\-kapAli shAstrI
\medskip\hrule\medskip
|| shrIramaNA~njalIH ||
aruNAdritaTe disho vasAnaM
paritaH puNyabhuvaH punaH punAnam |
ramaNAkhyAmaho maho visheShaM
jayati dhvAntaharaM narAtmaveSham || 1||
charitena narAnareShu tulyaM
mahasAM pu~njamidaM vidAmamUlyam |
duritApahamAshriteShu bhAsvat\-
karuNAmUrtivaraM maharShimAhuH || 2||
jvalitena tapaHprabhAvabhUmnA
kabalikR^itya jagadvihasya dhAmnA |
vilasan bhagavAn maharShirasma\-
tparamAchAryapumAn haratvadhaM naH || 3||
prathamaM puruShaM tamIshameke
puruShANAM viduruttamaM tathA.anye |
sarasIjabhavANDamaNDalAnA\-
mapare madhyamAmananti santaH || 4||
puruShatriyate.api bhAsamAnaM
yamahandhimalino na veda jantuH |
ajahattamakhaNDameSha nR^INAM
nijavR^ittena nidarshanAya bhAti || 5||
mR^idulo hasitena mandamandaM
duravekShaH prabalo dR^ishA jvalantyA |
vipulo hR^idayena vishvabhoktrA
gahano maunagR^ihitayA cha vR^ittyA || 6||
gururAT kimu sha~Nkaro.ayamanyaH
kimu vA sha~NkarasambhavaH kumAraH |
kimu kuNDinajaH sa eva bAlaH
kimu vA saMhR^itashaktireSha shambhuH || 7||
bahudheti vikalpanAya vidubhi
rbahubhAgastava maunino vilAshaH |
hR^idayeShu tu naH sadA.avikalpaM
ramaNa tvaM ramase guro gurUNAm || 8||
\medskip\hrule\medskip
aupachChandasikairetairbandhaM nItaH stavA~njaliH |
upahArAyatAmeSha maharShicharaNAbjayoH || 1||
guNo.atra ramaNe bhaktiH kR^itavitta cha shAshvatI |
ramyo ramaNanAmno.ayaM dhvanishcha hR^idaya~NgamaH || 2||
maharShermaunirAjasya yashogAnamala~NkR^itiH |
tadayaM dhvanyaka~NkAraguNairevaM navojjvalaH || 3||
ramaNasya padAmbhojasmaraNaM hR^idaya~Ngamam |
ikShukhaNDarasAsvAde ko vA bhR^itimapekShatAm || 4||
ayaM ramaNapAdAbjaki~NkarasyApi ki~NkR^itA |
kAvyakaNThamunerantevAsinA vAgvilAsinA || 5||
ramaNA~NghrisarojAtarasaj~nena kapAlinA |
bhAradvAjena bhaktena rachito ramaNA~njaliH || 6||
##
\medskip\hrule\medskip
Encoded and proofread byDPD

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}