% Text title : Yama Gita-s % File name : yamagiitaa.itx % Category : gItA, giitaa % Location : doc\_giitaa % Author : Vyasa Rishi (by tradition) % Transliterated by : Sunder Hattangadi (sunderh at hotmail.com) % Proofread by : Sunder Hattangadi (sunderh at hotmail.com) % Description-comments : From Purana-s (Vishnu, Nrisimha, and Agni) % Latest update : July 7, 2008 % Send corrections to : Sanskrit@cheerful.com % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. shrIYama Gita-s from Vishnu, Nrisimha, and Agni Purana ..}## \itxtitle{.. shrIviShNu nR^isiMha athavA agnipurANAntargata yamagItA ..}##\endtitles ## .. atha prArabhyate viShNupurANAntargatA yamagItA .. maitreya uvAcha \- yathAvatkathitaM sarvaM yatpR^iShTo.asi mayA dvija . shrotumichChAmyahaM tvekaM tadbhavAnprabravItu me .. 1 .. saptadvIpAni pAtAlavIthyashcha sumahAmune . saptalokA ye.antarasthA brahmANDasyasya sarvataH .. 2 .. sthUlaiH sUkShmaistathA sthUlasUkShmaiH sUkShmasthUlaistathA . sthUlAsthUlataraishchaitatsarvaM prANibhirAvR^itam.h .. 3 .. a~NgulasyAShTabhAgo.api na so.asti munisattama . na santi prANino yatra karmabandhanibandhanAH .. 4 .. sarve chaite vashaM yAnti yamasya bhagavankila . AyuSho.antena te yAnti yAtanAstatprachoditAH .. 5 .. yAtanAbhyaH paribhraShTA devAdyAsvatha yoniShu . jantavaH parivartante shAstrANAmeSha nirNayaH .. 6 .. so.ahamichChAmi tachChrotuM yamasya vashavartinaH . na bhavanti narA yena tatkarma kathayAmalam.h .. 7 .. parAshara uvAcha \- ayameva mune prashno nakulena mahAtmanA . pR^iShTaH pitAmahaH prAha bhIShmo yattachChruNuShva me .. 8 .. bhIShma uvAcha \- purA mamAgato vatsa sakhA kAli.ngako dvijaH . sa mAmuvAcha pR^iShTo vai mayA jAtismaro muniH .. 9 .. tenAkhyAtamidaM chedamitthaM chaitadbhaviShyati . tathA cha tadabhUdvatsa yathoktaM tena dhImatA .. 10 .. sa pR^iShTashcha mayA bhUyaH shraddadhAnavatA dvijaH . yadyadAha na taddR^iShTamanyathA hi mayA kvachit.h .. 11 .. ekadA tu mayA pR^iShTaM yadetadbhavatoditam.h . prAha kAli.ngako vipraH smR^itvA tasya munervachaH .. 12 .. jAtismareNa kathito rahasyaH paramo mama . yamaki.nkarayoryo.abhUtsaMvAdastaM bravImi te .. 13 .. kAli.nga uvAcha \- svapuruShamabhivIkShya pAshahastaM vadati yamaH kila tasya karNamUle . parihara madhusUdanaM prapannAn.h prabhurahamasmi nR^iNAM na vaiShNavAnAm.h .. 14 .. ahamamaragaNArchitena dhAtrA yama iti lokahitAhite niyuktaH . hariguruvashago.asmi na svatantraH prabhavati saMyamani mamApi viShNuH .. 15 .. kaTakamukuTakarNikAdibhedaiH kanakamabhedamapIShyate yathaikam.h . surapashumanujAdikalpanAbhi\- rharirakhilAbhirudIyate tathaikaH .. 16 .. kShitijalaparamANavo.anilAnte punarapi yAnti yathaikatAM dharitryA . surapashumanujAdayastathAnte guNakaluSheNa sanAtanena tena .. 17 .. harimamaragaNArchitA.nghripadmaM praNamati yaH paramArthato hi martyaH . tamatha gatasamastapApabandhaM vraja parihR^itya yathAgnimAjyasiktam.h .. 18 .. iti yamavachanaM nishamya pAshI yamapuruShamuvAcha dharmarAjam.h . kathaya mama vibhoH samastadhAtu\- rbhavati hareH khalu yAdR^isho.asya bhaktaH .. 19 .. yama uvAcha \- na chalati nijavarNadharmato yaH samamatirAtmasuhR^idvipakShapakShe . na harati na cha hanti ki.nchiduchchaiH sitamanasaM tamavehi viShNubhaktam.h .. 20 .. kalikaluShamalena yasya nAtmA vimalamatermalinIkR^ito.astamohe . manasi kR^itajanArdanaM manuShyaM sattamavehi hareratIvabhaktam.h .. 21 .. kanakamapi rahasyavekShya buddhyA tR^iNamiva yaH samavaiti vai parasvam.h . bhavati cha bhagavatyananyachetAH puruShavaraM tamavehi viShNubhaktam.h .. 22 .. sphaTikagirishilAmalaH kva viShNu\- rmanasi nR^iNAM kva cha matsarAdidoShaH . na hi tuhinamayUkharashmipu~nje bhavati hutAshanadIptijaH pratApaH .. 23 .. vimalamativimatsaraH prashAntaH shuchicharito.akhilasattvamitrabhUtaH . priyahitavachano.astamAnamAyo vasati sadA hR^idi tasya vAsudevaH .. 24 .. vasati hR^idi sanAtane cha tasmin.h bhavatipumA~njagato.asya saumyarUpaH . kShitirasamatiramyamAtmano.antaH kathayati chArutayaiva shAlapotaH .. 25 .. yamaniyamavidhUtakalmaShANA\- manudinamachyutasaktamAnasAnAm.h . apagatamadamAnamatsarANAM vraja bhaTa dUratareNa mAnavAnAm.h .. 26 .. hR^idi yadi bhagavAnanAdirAste harirasisha.nkhagadAdharo.avyayAtmA . tadaghamaghavighAtakartR^ibhinnam.h bhavati kathaM sati vAndhakAramarke .. 27 .. harati paradhanaM nihanti jantUn.h vadati tathAnishaniShThurANi yashcha . ashubhajanitadurmadasya puMsaH kaluShamaterhR^idi tasya nAstyanantaH .. 28 .. na sahati paramaM padaM vinindAM kaluShamatiH kurute satAmasAdhuH . na yajati na dadAti yashca santaM manasi na tasya janArdano.adhamasya .. 29 .. paramasuhR^idi bAndhave kalatre sutatanayApitR^imAtR^ibhR^ityavarge . shaThamatirupayAti yo.arthatR^iShNAM tamadhamacheShTamavehi nAsya bhaktam.h .. 30 .. ashubhamatirasatpravR^ittisaktaH satatamanAryavishAlasa.ngamattaH . anudinakR^itapApabandhayatnaH puruShapashurna hi vAsudevabhaktaH .. 31 .. sakalamidamahaM cha vAsudevaH paramapumAnparameshvaraH sa ekaH . iti matiramalA bhavatyanante hR^idayagate vraja tAnvihAya dUrAt.h .. 32 .. kamalanayana vAsudeva viShNo dharaNidharAchyuta sha.nkhachakrapANe . bhava sharaNamitIrayanti ye vai tyaja bhaTa dUratareNa tAnapApAn.h .. 33 .. vasati manasi yasya so.avyayAtmA puruShavarasya na tasya dR^iShTipAte . tava gatirathavA mamAsti chakra\- pratihatavIryavalasya so.anyalokyaH .. 34 .. kAli.nga uvAcha \- iti nijabhaTashAsanAya devo ravitanayaH sa kilAha dharmarAjaH . mama kathitamidaM cha tena tubhyaM kuruvara samyagidaM mayApi choktam.h .. 35 .. bhIShma uvAcha \- nakulaitanmamAkhyAtaM pUrvaM tena dvijanmanA . kali.ngadeshAdabhyetya prIyatA sumahAtmanA .. 36 .. mayApyetadyathAnyAyaM samyagvatsa tavoditam.h . yathA viShNumR^ite nAnyattrANaM saMsArasAgare .. 37 ki.nkarA daNDapAshau vA na yamo na cha yAtanAH . samarthAstasya yasyAtmA keshavAlambanaH sadA .. 38 .. parAshara uvAcha \- etanmune tavAkhyAtaM gItaM vaivasvatena yat.h . tvatprashnAnugataM samyakkimanyachChrotumichChasi .. 39 .. .. iti viShNupurANAntargatA yamagItA samAptA .. \medskip\hrule\medskip .. atha prArabhyate nR^isiMhapurANAntargatA yamagItA .. vyAsa uvAcha \- mR^ityushcha ki.nkarAshchaiva viShNudUtaiH prapIDitAH . svarAj~naste.anunirveshaM gatvA sa.nchakrushurbhR^isham.h .. 1 .. mR^ityuki.nkarAH UchuH \- shR^iNu rAjanvacho.asmAkaM tavAgre yadbravImahe . tvadAdeshAdvayaM gatvA mR^ityuM saMsthApya dUrataH .. 2 .. brAhmaNasya samIpaM cha bhR^igoH pautrasya sattamaH . taM dhyAyamAnaM kamapi devamevAgramAnasam.h .. 3 .. gantuM na shaktAstatpArshvaM vayaM sarve mahAmate . yAvattAvanmahAkAyaiH puruShairmushalairhatAH .. 4 .. vayaM nivR^ittAstadvIkShya mR^ityustatra gataH punaH . asmAnnirbhartsya tatrAyaM tairnarairmushalairhataH .. 5 .. evamatra tamAnetuM brAhmaNaM tapasi sthitam.h . ashaktA vayamevAtra mR^ityunA saha vai prabho .. 6 .. tadbravImi mahAbhAga yadbrahma brAhmaNasya tu . devaM kaM dhyAyate vipraH ke vA te yairhatA vayam.h .. 7 .. vyAsa uvAcha \- ityuktaH ki.nkaraiH sarvairmR^ityunA cha mahAmate . dhyAtvA kShaNaM mahAbuddhiH prAha vaivasvato yamaH .. 8 .. yama uvAcha \- shR^iNvantu ki.nkarAH sarve mR^ityushchAnye cha me vachaH . satyametatpravakShyAmi j~nAnaM yadyogamArgataH .. 9 .. bhR^igoH pautro mahAbhAgo mArkaNDeyo mahAmatiH . sa j~nAtvAdyAtmanaH kAlaM gato mR^ityujigIShayA .. 10 .. bhR^iguNoktena mArgeNa sa tepe paramaM tapaH . harimArAdhya medhAvI japanvai dvAdashAkSharam.h .. 11 .. ekAgreNaiva manasA dhyAyate hR^idi keshavam.h . satataM yogayuktastu sa munistatra ki.nkarAH .. 12 .. haridhyAnamahAdakShA balaM tasya mahAmuneH . nAnyadvai prAptakAlasya balaM pashyAmi ki.nkarAH .. 13 .. hR^idisthe puNDarIkAkShe satataM bhaktavatsale . pashyantaM viShNubhUtaM nu ko hi syAtkeshavAshrayam.h .. 14 .. te.api vai puruShA viShNoryairyUyaM tADitA bhR^isham.h . ata UrdhvaM na gantavyaM yatra vai vaiShNavAH sthitAH .. 15 .. na chitraM tADanaM tatra ahaM manye mahAtmabhiH . bhavatAM jIvanaM chitraM yakShairdattaM kR^ipAlubhiH .. 16 .. nArAyaNaparaM vipraM kastaM vIkShitumutsahet.h . yuShmAbhishcha mahApApairmArkaNDeyaM haripriyam.h . samAnetuM kR^ito yatnaH samIchInaM na tatkR^itam.h .. 17 .. narasiMhaM mahAdevaM ye narAH paryupAsate . teShAM pArshvaM na gantavyaM yuShmAbhirmama shAsanAt.h .. 18 .. vyAsa uvAcha \- sa evaM ki.nkarAnuktvA mR^ityuM cha purataH sthitam.h . yamo nirIkShya cha janaM narakasthaM prapIDitam.h .. 19 .. kR^ipayA parayA yukto viShNubhaktyA visheShataH . janasyAnugrahArthAya tenoktA chAgiraH shR^iNu .. 20 .. narake pachyamAnasya yamena paribhAShitam.h . kiM tvayA nArchito devaH keshavaH kleshanAshanaH .. 21 .. udakenApyalAbhe tu dravyANAM pUjitaH prabhuH . yo dadAti svakaM lokaM sa tvayA kiM na pUjitaH .. 22 .. narasiMho hR^iShIkeshaH puNDarIkanibhekShaNaH . smaraNAnmuktido nRRINAM sa tvayA kiM na pUjitaH .. 23 .. ityuktvA nArakAnsarvAnpunarAha sa ki.nkarAn.h . vaivasvato yamaH sAkShAdviShNubhaktisamanvitaH .. 24 .. nAradAya sa vishvAtmA prAhaivaM viShNuravyayaH . anyebhyo vaiShNavebhyashcha siddhebhyaH satataM shrutam.h .. 25 .. tadvaH prItyA pravakShyAmi harivAkyamanuttamam.h . shikShArthaM ki.nkarAH sarve shR^iNuta praNatA hareH .. 26 .. he kR^iShNa kR^iShNa kR^iShNeti yo mAM smarati nityashaH . jalaM bhittvA yathA padmaM narakAduddharAmyaham.h .. 27 .. puNDarIkAkSha devesha narasiMha trivikrama . tvAmahaM sharaNaM prApta iti yastaM samuddhara .. 28 .. tvAM prapanno.asmi sharaNaM devadeva janArdana . iti yaH sharaNaM prAptastaM kleshAduddharAmyaham.h .. 29 .. vyAsa uvAcha \- ityudIritamAkarNya harivAkyaM yamena cha . nArakAH kR^iShNa kR^iShNeti nArasiMheti chukrushuH .. 30 .. yathA yathA harernAma kIrtayantyatra nArakAH . tathA tathA harerbhaktimudvahanto.abruvannidam.h .. 31 .. nArakA UchuH \- namo bhagavate tasmai keshavAya mahAtmane . yannAmakIrtanAtsadyo narakAgniH prashAmyati .. 32 .. bhaktapriyAya devAya rakShAya haraye namaH . lokanAthAya shAntAya yaj~neshAyAdimUrtaye .. 33 .. anantAyAprameyAya narasiMhAya te namaH . nArAyaNAya gurave sha.nkhachakragadAbhR^ite .. 34 .. vedapriyAya mahate vikramAya namo namaH . vArAhAyApratarkyAya vedA.ngAya mahIbhR^ite .. 35 .. namo dyutimate nityaM brAhmaNAya namo namaH . vAmanAya bahuj~nAya vedavedA.ngadhAriNe .. 36 .. balibandhanadattAya vedapAlAya te namaH . viShNave suranAthAya vyApine paramAtmane .. 37 .. chaturbhujAya shuddhAya shuddhadravyAya te namaH . jAmadagnyAya rAmAya duShTakShatrAntakAriNe .. 38 .. rAmAya rAvaNAntAya namastubhyaM mahAtmane . asmAnuddhara govinda pUtigandhAnnamo.astu te .. 39 .. iti nR^isiMhapurANe yamagItAdhyAyaH .. .. iti yamagItA samAptA .. \medskip\hrule\medskip .. atha prArabhyate agnipurANAntargatA yamagItA .. agniruvAcha \- yamagItAM pravakShyAmi uktA yA nAchiketase . paThatAM shR^iNvatAM bhuktyai muktyai mokShArthinaM satAm.h .. 1 .. yama uvAcha \- AsanaM shayanaM yAnaparidhAnagR^ihAdikam.h . vA.nChantyaho.atimohena susthiraM svayamasthiraH .. 2 .. bhogeShu shaktiH satataM tathaivAtmAvalokanam.h . shreyaH paraM manuShyANAM kapilodgItameva hi .. 3 .. sarvatra samadarshitvaM nirmamatvamasa.ngatA . shreyaH paraM manuShyANAM gItaM pa.nchashikhena hi .. 4 .. AgarbhajanmabAlyAdivayo.avasthAdivedanam.h . shreyaH paraM manuShyANAM ga.ngAviShNupragItakam.h .. 5 .. AdhyAtmikAdiduHkhAnAmAdyantAdipratikriyA . shreyaH paraM manuShyANAM janakodgItameva cha .. 6 .. abhinnayorbhedakaraH pratyayo yaH parAtmanaH . tachChAntiparamaM shreyo brahmodgItamudAhR^itam.h .. 7 .. kartavayamiti yatkarma R^igyajuHsAmasaMj~nitam.h . kurute shreyase sa.ngAn.h jaigIShavyeNa gIyate .. 8 .. hAniH sarvavidhitsAnAmAtmanaH sukhahaitukI . shreyaH paraM manuShyANAM devalodgItamIritam.h .. 9 .. kAmatyAgAttu vij~nAnaM sukhaM brahmaparaM padam.h . kAminAM na hi vij~nAnaM sanakodgItameva tat.h .. 10 .. pravR^ittaM cha nivR^ittaM cha kAryaM karmaparo.abravIt.h . shreyasA shreya etaddhi naiShkarmya brahma taddahariH .. 11 .. pumAMshchAdhigataj~nAno bhedaM nApnoti sattamaH . brahmaNA viShNusaMj~nena parameNAvyayena cha .. 12 .. j~nAnaM vij~nAnamAstikyaM saubhAgyaM rUpamuttamam.h . tapasA lakShyate sarvaM manasA yadyadichChati .. 13 .. nAsti viShNusamaM dhyeyaM tapo nAnashanAtparam.h . nAstyArogyasamaM dhanyaM nAsti ga.ngAsamA sarit.h .. 14 .. na so.asti bAndhavaH kashchidviShNuM muktvA jagadgurum.h . adhashchordhvaM harishchAgre dehendriyamanomukhe .. 15 .. ityeva saMsmaranprANAnyastyajetsa harirbhavet.h . yattadbrahma yataH sarvaM yatsarvaM tasya saMsthitam.h .. 16 .. agrAhyakamanirdeshyaM supratIkaM cha yatparam.h . parAparasvarUpeNa viShNuH sarvahR^idi sthitaH .. 17 .. yaj~neshaM yaj~napuruShaM kechidichChanti tatparam.h . kechidviShNuM haraM kechitkechidbrahmANamIshvaram.h .. 18 .. indrAdinAmabhiH kechitsUryaM somaM cha kAlakam.h . brahmAdistambaparyantaM jagadviShNuM vadanti cha .. 19 .. sa viShNuH paramaM brahma yato nAvartate punaH . suvarNAdimahAdAnapuNyatIrthAvagAhanaiH .. 20 .. dhyAnairvrataiH pUjayA cha dharmashrutyA tadApnuyAt.h . AtmAnaM rathinaM viddhi sharIraM rathameva cha .. 21 .. buddhiM tu sArathiM viddhi manaH pragrahameva cha . indriyANi hayAnAhurviShayAMsteSu gocharAn.h .. .. 22 .. AtmendriyamanoyuktaM bhoktetyAhurmanIShiNaH . yastvavij~nAnavAnbhavatyayukyena manasA sadA .. 23 .. na tatpadamavApnoti saMsAraM chAdhigachChati . yastu vij~nAnavAnbhavati yuktena manasA sadA .. 24 .. sa tatpadamavApnoti yasmAdbhUyo na jAyate . vij~nAnasArathiryastu manaH pragrahavAnnaraH .. 25 . so.adhvAnaM paramApnoti tadviShNoH paramaM padam.h . indriyebhyaH parA hyarthA arthebhyashcha paraM manaH .. 26 .. manasastu parA buddhirbuddherAtmA mahAnparaH . mahataH paramavyaktamavyaktAtpuruShaH paraH .. 27 .. puruShAnna paraM ki.nchit.h sA kAShThA sA parA gatiH . eShu sarveShu bhUteShu gUDhAtmA na prakAshate .. 28 .. dR^ishyate tvagryayA buddhyA sUkShmayA sUkShmadarshibhiH . yachChedvA~NmanasI prAj~naH tadyachChejj~nAnamAtmani .. 29 .. j~nAnamAtmani mahati niyachChechChAnta Atmani . j~nAtvA brahmAtmanoryogaM yamAdyairbrahma sadbhavet.h .. 30 .. ahiMsA satyamasteyaM brahmacharyAparigrahau . yamAshcha niyamAH pa.nchaM shauchaM sa.ntoShasattamaH .. 31 .. svAdhyAyeshvarapUjA cha AsanaM padmakAdikam.h . prANAyAmo vAyujayaH pratyAhAraH svanigrahaH .. 32 .. shubhe hyekatra viShaye chetaso yatpradhAraNam.h . nishchalatvAttu dhImadbhirdhAraNA dvija kathyate .. 33 .. paunaH punyena tatraiva viShayeShveva dhAraNA . dhyAnaM smR^itaM samAdhistu ahaMbrahmAtmasaMsthitiH .. 34 .. ghaTadhvaMsAdyathAkAshamabhinnaM nabhasA bhavet.h . mukto jIvo brahmaNaivaM sadbrahma brahma vai bhavet.h .. 35 .. AtmAnaM manyate brahma jIvo j~nAnena nAnyathA . jIvo hyaj~nAnatatkAryamuktaH syAdajarAmaraH .. 36 .. agniruvAcha \- vasiShTha yamagItoktA paThatAM bhuktimuktidA . Atyantiko layaH prokto vedAntabrahmadhImayaH .. 37 .. .. iti agnipurANAntargatA yamagItA samAptA .. ## Encoded and proofread by Sunder Hattangadi sunderh at hotmail.com \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}