% Text title            : shrImadbhAgavatam - 03 - tRitIyaskandhaH
% File name             : bhagpur-03.itx
% Category              : purana, shrimadbhagavatam, vyAsa, krishna
% Location              : doc\_purana
% Proofread by          : PSA Easwaran
% Latest update         : July 4, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. shrImadbhAgavatam - tRitIyaskandhaH ..}##
\itxtitle{.. shrImadbhAgavatam \- tRRitIyaskandhaH ..}##\endtitles ##
\chapter{.. OM namo bhagavate vAsudevAya ..}
\section{.. tR^itIyaskandhaH ..}
\section{.. prathamo.adhyAyaH \- 1 ..}
shrIshuka uvAcha
evametatpurA pR^iShTo maitreyo bhagavAn kila |
kShattrA vanaM praviShTena tyaktvA svagR^ihamR^iddhimat || 1||
yadvA ayaM mantrakR^idvo bhagavAnakhileshvaraH |
pauravendragR^ihaM hitvA praviveshAtmasAtkR^itam || 2||
rAjovAcha
kutra kShatturbhagavatA maitreyeNAsa sa~NgamaH |
kadA vA saha saMvAda etadvarNaya naH prabho || 3||
na hyalpArthodayastasya vidurasyAmalAtmanaH |
tasmin varIyasi prashnaH sAdhuvAdopabR^iMhitaH || 4||
sUta uvAcha
sa evamR^iShivaryo.ayaM pR^iShTo rAj~nA parIkShitA |
pratyAha taM subahuvitprItAtmA shrUyatAmiti || 5||
shrIshuka uvAcha
yadA tu rAjA svasutAnasAdhUn
puShNannadharmeNa vinaShTadR^iShTiH |
bhrAturyaviShThasya sutAn vibandhUn
praveshya lAkShAbhavane dadAha || 6||
yadA sabhAyAM kurudevadevyAH
keshAbhimarshaM sutakarma garhyam |
na vArayAmAsa nR^ipaH snuShAyAH
svAsrairharantyAH kuchaku~NkumAni || 7||
dyUte tvadharmeNa jitasya sAdhoH
satyAvalambasya vanAgatasya |
na yAchato.adAtsamayena dAyaM
tamo juShANo yadajAtashatroH || 8||
yadA cha pArthaprahitaH sabhAyAM
jagadgururyAni jagAda kR^iShNaH |
na tAni puMsAmamR^itAyanAni
rAjoru mene kShatapuNyaleshaH || 9||
yadopahUto bhavanaM praviShTo
mantrAya pR^iShTaH kila pUrvajena |
athAha tanmantradR^ishAM varIyAn
yanmantriNo vaidurikaM vadanti || 10||
ajAtashatroH pratiyachCha dAyaM
titikShato durviShahaM tavAgaH |
sahAnujo yatra vR^ikodarAhiH
shvasan ruShA yattvamalaM bibheShi || 11||
pArthAMstu devo bhagavAnmukundo
gR^ihItavAn sakShitidevadevaH |
Aste svapuryAM yadudevadevo
vinirjitAsheShanR^idevadevaH || 12||
sa eSha doShaH puruShadviDAste
gR^ihAn praviShTo yamapatyamatyA |
puShNAsi kR^iShNAdvimukho gatashrIH
tyajAshvashaivaM kulakaushalAya || 13||
ityUchivAMstatra suyodhanena
pravR^iddhakopasphuritAdhareNa |
asatkR^itaH satspR^ihaNIyashIlaH
kShattA sakarNAnujasaubalena || 14||
ka enamatropajuhAva jihmaM
dAsyAH sutaM yadbalinaiva puShTaH |
tasmin pratIpaH parakR^itya Aste
nirvAsyatAmAshu purAchChvasAnaH || 15||
sa itthamatyulbaNakarNabANaiH
bhrAtuH puro marmasu tADito.api |
svayaM dhanurdvAri nidhAya mAyAM
gatavyatho.ayAdurumAnayAnaH || 16||
sa nirgataH kauravapuNyalabdho
gajAhvayAttIrthapadaH padAni |
anvAkramatpuNyachikIrShayorvyAM
svadhiShThito yAni sahasramUrtiH || 17||
pureShu puNyopavanAdriku~nje\-
Shvapa~NkatoyeShu saritsaraHsu |
anantali~NgaiH samala~NkR^iteShu
chachAra tIrthAyataneShvananyaH || 18||
gAM paryaTanmedhyaviviktavR^ittiH
sadA.a.apluto.adhaHshayano.avadhUtaH |
alakShitaH svairavadhUtaveSho
vratAni chere haritoShaNAni || 19||
itthaM vrajanbhAratameva varShaM
kAlena yAvadgatavAnprabhAsam |
tAvachChashAsa kShitimekachakrA\-
mekAtapatrAmajitena pArthaH || 20||
tatrAtha shushrAva suhR^idvinaShTiM
vanaM yathA veNujavahnisaMshrayam |
saMspardhayA dagddhamathAnushochan
sarasvatIM pratyagiyAya tUShNIm || 21||
tasyAM tritasyoshanaso manoshcha
pR^ithorathAgnerasitasya vAyoH |
tIrthaM sudAsasya gavAM guhasya
yachChrAddhadevasya sa AsiSheve || 22||
anyAni cheha dvijadevadevaiH
kR^itAni nAnA.a.ayatanAni viShNoH |
pratya~NgamukhyA~NkitamandirANi
yaddarshanAtkR^iShNamanusmaranti || 23||
tatastvativrajya surAShTramR^iddhaM
sauvIramatsyAn kurujA~NgalAMshcha |
kAlena tAvadyamunAmupetya
tatroddhavaM bhAgavataM dadarsha || 24||
sa vAsudevAnucharaM prashAntaM
bR^ihaspateH prAktanayaM pratItam |
Ali~Ngya gADhaM praNayena bhadraM
svAnAmapR^ichChadbhagavatprajAnAm || 25||
kachchitpurANau puruShau svanAbhya\-
pAdmAnuvR^ittyeha kilAvatIrNau |
AsAta urvyAH kushalaM vidhAya
kR^itakShaNau kushalaM shUragehe || 26||
kachchitkurUNAM paramaH suhR^inno
bhAmaH sa Aste sukhama~Nga shauriH |
yo vai svasR^INAM pitR^ivaddadAti
varAn vadAnyo varatarpaNena || 27||
kachchidvarUthAdhipatiryadUnAM
pradyumna Aste sukhama~Nga vIraH |
yaM rukmiNI bhagavato.abhilebhe
ArAdhya viprAn smaramAdisarge || 28||
kachchitsukhaM sAtvatavR^iShNibhoja\-
dAshArhakANAmadhipaH sa Aste |
yamabhyaShi~nchachChatapatranetro
nR^ipAsanAshAM parihR^itya dUrAt || 29||
kachchiddhareH saumya sutaH sadR^ikSha
Aste.agraNI rathinAM sAdhu sAmbaH |
asUta yaM jAmbavatI vratADhyA
devaM guhaM yoM.abikayA dhR^ito.agre || 30||
kShemaM sa kachchidyuyudhAna Aste
yaH phAlgunAllabdhadhanUrahasyaH |
lebhe.a~njasAdhokShajasevayaiva
gatiM tadIyAM yatibhirdurApAm || 31||
kachchidbudhaH svastyanamIva Aste
shvaphalkaputro bhagavatprapannaH |
yaH kR^iShNapAdA~NkitamArgapAMsu\-
ShvacheShTata premavibhinnadhairyaH || 32||
kachchichChivaM devakabhojaputryA
viShNuprajAyA iva devamAtuH |
yA vai svagarbheNa dadhAra devaM
trayI yathA yaj~navitAnamartham || 33||
apisvidAste bhagavAnsukhaM vo
yaH sAtvatAM kAmadugho.aniruddhaH |
yamAmananti sma ha shabdayoniM
manomayaM sattvaturIyatattvam || 34||
apisvidanye cha nijAtmadaiva\-
mananyavR^ittyA samanuvratA ye |
hR^idIkasatyAtmajachArudeShNa\-
gadAdayaH svasti charanti saumya || 35||
api svadorbhyAM vijayAchyutAbhyAM
dharmeNa dharmaH paripAti setum |
duryodhano.atapyata yatsabhAyAM
sAmrAjyalakShmyA vijayAnuvR^ittyA || 36||
kiM vA kR^itAgheShvaghamatyamarShI
bhImo.ahivaddIrghatamaM vyamu~nchat |
yasyA~NghripAtaM raNabhUrna sehe
mArgaM gadAyAshcharato vichitram || 37||
kachchidyashodhA rathayUthapAnAM
gANDIvadhanvoparatArirAste |
alakShito yachCharakUTagUDho
mAyAkirAto girishastutoSha || 38||
yamAvutasvittanayau pR^ithAyAH
pArthairvR^itau pakShmabhirakShiNIva |
remAta uddAya mR^idhe svarikthaM
parAtsuparNAviva vajrivaktrAt || 39||
aho pR^ithApi dhriyate.arbhakArthe
rAjarShivaryeNa vinApi tena |
yastvekavIro.adhiratho vijigye
dhanurdvitIyaH kakubhashchatasraH || 40||
saumyAnushoche tamadhaHpatantaM
bhrAtre paretAya vidudruhe yaH |
niryApito yena suhR^itsvapuryA
ahaM svaputrAnsamanuvratena || 41||
so.ahaM harermartyaviDambanena
dR^isho nR^iNAM chAlayato vidhAtuH |
nAnyopalakShyaH padavIM prasAdA\-
chcharAmi pashyan gatavismayo.atra || 42||
nUnaM nR^ipANAM trimadotpathAnAM
mahIM muhushchAlayatAM chamUbhiH |
vadhAtprapannArtijihIrShayesho\-
.apyupaikShatAghaM bhagavAnkurUNAm || 43||
ajasya janmotpathanAshanAya
karmANyakarturgrahaNAya puMsAm |
nanvanyathA ko.arhati dehayogaM
paro guNAnAmuta karmatantram || 44||
tasya prapannAkhilalokapAnA\-
mavasthitAnAmanushAsane sve |
arthAya jAtasya yaduShvajasya
vArtAM sakhe kIrtaya tIrthakIrteH || 45||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe viduroddhavasaMvAde prathamo.adhyAyaH || 1||
\iti
\section{.. OM namo bhagavate vAsudevAya ..}
\section{.. dvitIyo.adhyAyaH \- 2 ..}
shrIshuka uvAcha
iti bhAgavataH pR^iShTaH kShattrA vArtAM priyAshrayAm |
prativaktuM na chotseha autkaNThyAtsmAriteshvaraH || 1||
yaH pa~nchahAyano mAtrA prAtarAshAya yAchitaH |
tannaichChadrachayanyasya saparyAM bAlalIlayA || 2||
sa kathaM sevayA tasya kAlena jarasaM gataH |
pR^iShTo vArtAM pratibrUyAdbhartuH pAdAvanusmaran || 3||
sa muhUrtamabhUttUShNIM kR^iShNA~NghrisudhayA bhR^isham |
tIvreNa bhaktiyogena nimagnaH sAdhu nirvR^itaH || 4||
pulakodbhinnasarvA~Ngo mu~nchanmIladdR^ishA shuchaH |
pUrNArtho lakShitastena snehaprasarasamplutaH || 5||
shanakairbhagavallokAnnR^ilokaM punarAgataH |
vimR^ijya netre viduraM pratyAhoddhava utsmayan || 6||
uddhava uvAcha
kR^iShNadyumaNinimloche gIrNeShvajagareNa ha |
kiM nu naH kushalaM brUyAM gatashrIShu gR^iheShvaham || 7||
durbhago bata loko.ayaM yadavo nitarAmapi |
ye saMvasanto na vidurhariM mInA ivoDupam || 8||
i~Ngitaj~nAH puruprauDhA ekArAmAshcha sAttvatAH |
sAttvatAmR^iShabhaM sarve bhUtAvAsamamaMsata || 9||
devasya mAyayA spR^iShTA ye chAnyadasadAshritAH |
bhrAmyate dhIrna tadvAkyairAtmanyuptAtmano harau || 10||
pradarshyAtaptatapasAmavitR^iptadR^ishAM nR^iNAm |
AdAyAntaradhAdyastu svabimbaM lokalochanam || 11||
yanmartyalIlaupayikaM svayoga\-
mAyAbalaM darshayatA gR^ihItam |
vismApanaM svasya cha saubhagarddheH
paraM padaM bhUShaNabhUShaNA~Ngam || 12||
yaddharmasUnorbata rAjasUye
nirIkShya dR^iksvastyayanaM trilokaH |
kArtsnyena chAdyeha gataM vidhAtu\-
rarvAksR^itau kaushalamityamanyata || 13||
yasyAnurAgaplutahAsarAsa\-
lIlAvalokapratilabdhamAnAH |
vrajastriyo dR^igbhiranupravR^itta\-
dhiyo.avatasthuH kila kR^ityasheShAH || 14||
svashAntarUpeShvitaraiH svarUpai\-
rabhyardyamAneShvanukampitAtmA |
parAvaresho mahadaMshayukto
hyajo.api jAto bhagavAn yathAgniH || 15||
mAM khedayatyetadajasya janma
viDambanaM yadvasudevagehe |
vraje cha vAso.aribhayAdiva svayaM
purAdvyavAtsIdyadanantavIryaH || 16||
dunoti chetaH smarato mamaita\-
dyadAha pAdAvabhivandya pitroH |
tAtAmba kaMsAdurusha~NkitAnAM
prasIdataM no.akR^itaniShkR^itInAm || 17||
ko vA amuShyA~NghrisarojareNuM
vismartumIshIta pumAnvijighran |
yo visphuradbhrUviTapena bhUme\-
rbhAraM kR^itAntena tirashchakAra || 18||
dR^iShTA bhavadbhirnanu rAjasUye
chaidyasya kR^iShNaM dviShato.api siddhiH |
yAM yoginaH saMspR^ihayanti samya\-
gyogena kastadvirahaM saheta || 19||
tathaiva chAnye naralokavIrA
ya Ahave kR^iShNamukhAravindam |
netraiH pibanto nayanAbhirAmaM
pArthAstrapUtAH padamApurasya || 20||
svayaM tvasAmyAtishayastryadhIshaH
svArAjyalakShmyA.a.aptasamastakAmaH |
baliM haradbhishchiralokapAlaiH
kirITakoTyeDitapAdapIThaH || 21||
tattasya kai~NkaryamalaM bhR^itAnno
viglApayatya~Nga yadugrasenam |
tiShThanniShaNNaM parameShThidhiShNye
nyabodhayaddeva nidhArayeti || 22||
aho bakI yaM stanakAlakUTaM
jighAMsayApAyayadapyasAdhvI |
lebhe gatiM dhAtryuchitAM tato.anyaM
kaM vA dayAluM sharaNaM vrajema || 23||
manye.asurAnbhAgavatAMstryadhIshe
saMrambhamArgAbhiniviShTachittAn |
ye saMyuge.achakShata tArkShyaputra\-
maMse sunAbhAyudhamApatantam || 24||
vasudevasya devakyAM jAto bhojendrabandhane |
chikIrShurbhagavAnasyAH shamajenAbhiyAchitaH || 25||
tato nandavrajamitaH pitrA kaMsAdvibibhyatA |
ekAdashasamAstatra gUDhArchiH sabalo.avasat || 26||
parIto vatsapairvatsAMshchArayanvyaharadvibhuH |
yamunopavane kUjaddvijasa~NkulitA~Nghripe || 27||
kaumArIM darshayaMshcheShTAM prekShaNIyAM vrajaukasAm |
rudanniva hasanmugddhabAlasiMhAvalokanaH || 28||
sa eva godhanaM lakShmyA niketaM sitagovR^iSham |
chArayannanugAngopAn raNadveNurarIramat || 29||
prayuktAn bhojarAjena mAyinaH kAmarUpiNaH |
lIlayA vyanudattAMstAn bAlaH krIDanakAniva || 30||
vipannAnviShapAnena nigR^ihya bhujagAdhipam |
utthApyApAyayadgAvastattoyaM prakR^itisthitam || 31||
ayAjayadgosavena goparAjaM dvijottamaiH |
vittasya chorubhArasya chikIrShan sadvyayaM vibhuH || 32||
varShatIndre vrajaH kopAdbhagnamAne.ativihvalaH |
gotralIlAtapatreNa trAto bhadrAnugR^ihNatA || 33||
sharachChashikarairmR^iShTaM mAnayan rajanImukham |
gAyan kalapadaM reme strINAM maNDalamaNDanaH || 34||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe viduroddhavasaMvAde dvitIyo.adhyAyaH || 2||
\iti
\section{.. OM namo bhagavate vAsudevAya ..}
\section{.. tR^itIyo.adhyAyaH \- 3 ..}
uddhava uvAcha
tataH sa Agatya puraM svapitro\-
shchikIrShayA shaM baladevasaMyutaH |
nipAtya tu~NgAdripuyUthanAthaM
hataM vyakarShadvyasumojasorvyAm || 1||
sAndIpaneH sakR^itproktaM brahmAdhItya savistaram |
tasmai prAdAdvaraM putraM mR^itaM pa~nchajanodarAt || 2||
samAhutA bhIShmakakanyayA ye
shriyaH savarNena bubhUShayaiShAm |
gAndharvavR^ittyA miShatAM svabhAgaM
jahre padaM mUrdhni dadhatsuparNaH || 3||
kakudmato.aviddhanaso damitvA
svayaMvare nAgnajitImuvAha |
tadbhagnamAnAnapi gR^idhyato.aj~nAn
jaghne.akShataH shastrabhR^itaH svashastraiH || 4||
priyaM prabhurgrAmya iva priyAyA
vidhitsurArchChad dyutaruM yadarthe |
vajryAdravattaM sagaNo ruShAndhaH
krIDAmR^igo nUnamayaM vadhUnAm || 5||
sutaM mR^idhe khaM vapuShA grasantaM
dR^iShTvA sunAbhonmathitaM dharitryA |
AmantritastattanayAya sheShaM
dattvA tadantaHpuramAvivesha || 6||
tatrAhR^itAstA naradevakanyAH
kujena dR^iShTvA harimArtabandhum |
utthAya sadyo jagR^ihuH praharSha\-
vrIDAnurAgaprahitAvalokaiH || 7||
AsAM muhUrta ekasminnAnAgAreShu yoShitAm |
savidhaM jagR^ihe pANInanurUpaH svamAyayA || 8||
tAsvapatyAnyajanayadAtmatulyAni sarvataH |
ekaikasyAM dasha dasha prakR^itervibubhUShayA || 9||
kAlamAgadhashAlvAdInanIkai rundhataH puram |
ajIghanatsvayaM divyaM svapuMsAM teja Adishat || 10||
shambaraM dvividaM bANaM muraM balvalameva cha |
anyAMshcha dantavaktrAdInavadhItkAMshcha ghAtayat || 11||
atha te bhrAtR^iputrANAM pakShayoH patitAnnR^ipAn |
chachAla bhUH kurukShetraM yeShAmApatatAM balaiH || 12||
sakarNaduHshAsanasaubalAnAM
kumantrapAkena hatashriyAyuSham |
suyodhanaM sAnucharaM shayAnaM
bhagnorumurvyAM na nananda pashyan || 13||
kiyAnbhuvo.ayaM kShapitorubhAro
yaddroNabhIShmArjunabhImamUlaiH |
aShTAdashAkShauhiNiko madaMshai\-
rAste balaM durviShahaM yadUnAm || 14||
mitho yadaiShAM bhavitA vivAdo
madhvAmadAtAmravilochanAnAm |
naiShAM vadhopAya iyAnato.anyo
mayyudyate.antardadhate svayaM sma || 15||
evaM sa~nchintya bhagavAnsvarAjye sthApya dharmajam |
nandayAmAsa suhR^idaH sAdhUnAM vartma darshayan || 16||
uttarAyAM dhR^itaH pUrorvaMshaH sAdhvabhimanyunA |
sa vai drauNyastrasa~nchChinnaH punarbhagavatA dhR^itaH || 17||
ayAjayaddharmasutamashvamedhaistribhirvibhuH |
so.api kShmAmanujai rakShan reme kR^iShNamanuvrataH || 18||
bhagavAnapi vishvAtmA lokavedapathAnugaH |
kAmAn siSheve dvArvatyAmasaktaH sA~NkhyamAsthitaH || 19||
snigddhasmitAvalokena vAchA pIyUShakalpayA |
charitreNAnavadyena shrIniketena chAtmanA || 20||
imaM lokamamuM chaiva ramayan sutarAM yadUn |
reme kShaNadayA dattakShaNastrIkShaNasauhR^idaH || 21||
tasyaivaM ramamANasya saMvatsaragaNAn bahUn |
gR^ihamedheShu yogeShu virAgaH samajAyata || 22||
daivAdhIneShu kAmeShu daivAdhInaH svayaM pumAn |
ko vishrambheta yogena yogeshvaramanuvrataH || 23||
puryAM kadAchitkrIDadbhiryadubhojakumArakaiH |
kopitA munayaH shepurbhagavanmatakovidAH || 24||
tataH katipayairmAsairvR^iShNibhojAndhakAdayaH |
yayuH prabhAsaM saMhR^iShTA rathairdevavimohitAH || 25||
tatra snAtvA pitR^In devAn R^iShIMshchaiva tadambhasA |
tarpayitvAtha viprebhyo gAvo bahuguNA daduH || 26||
hiraNyaM rajataM shayyAM vAsAMsyajinakambalAn |
yAnaM rathAnibhAnkanyA dharAM vR^ittikarImapi || 27||
annaM chorurasaM tebhyo dattvA bhagavadarpaNam |
goviprArthAsavaH shUrAH praNemurbhuvi mUrdhabhiH || 28||
iti shrImadbhAgavate mahApurANe pAramahaMsyAM saMhitAyAM
tR^itIyaskandheviduroddhavasaMvAde tR^itIyo.adhyAyaH || 3||
\iti
\section{.. OM namo bhagavate vAsudevAya ..}
\section{.. chaturtho.adhyAyaH \- 4 ..}
uddhava uvAcha
atha te tadanuj~nAtA bhuktvA pItvA cha vAruNIm |
tayA vibhraMshitaj~nAnA duruktairmarma paspR^ishuH || 1||
teShAM maireyadoSheNa viShamIkR^itachetasAm |
nimlochati ravAvAsIdveNUnAmiva mardanam || 2||
bhagavAn svAtmamAyAyA gatiM tAmavalokya saH |
sarasvatImupaspR^ishya vR^ikShamUlamupAvishat || 3||
ahaM chokto bhagavatA prapannArtihareNa ha |
badarIM tvaM prayAhIti svakulaM sa~njihIrShuNA || 4||
athApi tadabhipretaM jAnannahamarindama |
pR^iShThato.anvagamaM bhartuH pAdavishleShaNAkShamaH || 5||
adrAkShamekamAsInaM vichinvan dayitaM patim |
shrIniketaM sarasvatyAM kR^itaketamaketanam || 6||
shyAmAvadAtaM virajaM prashAntAruNalochanam |
dorbhishchaturbhirviditaM pItakaushAmbareNa cha || 7||
vAma UrAvadhishritya dakShiNA~Nghrisaroruham |
apAshritArbhakAshvatthamakR^ishaM tyaktapippalam || 8||
tasminmahAbhAgavato dvaipAyanasuhR^itsakhA |
lokAnanucharan siddha AsasAda yadR^ichChayA || 9||
tasyAnuraktasya munermukundaH
pramodabhAvAnatakandharasya |
AshR^iNvato mAmanurAgahAsa\-
samIkShayA vishramayannuvAcha || 10||
shrIbhagavAnuvAcha
vedAhamantarmanasIpsitaM te
dadAmi yattadduravApamanyaiH |
satre purA vishvasR^ijAM vasUnAM
matsiddhikAmena vaso tvayeShTaH || 11||
sa eSha sAdho charamo bhavAnA\-
mAsAditaste madanugraho yat |
yanmAM nR^ilokAn raha utsR^ijantaM
diShTyA dadR^ishvAn vishadAnuvR^ittyA || 12||
purA mayA proktamajAya nAbhye
padme niShaNNAya mamAdisarge |
j~nAnaM paraM manmahimAvabhAsaM
yatsUrayo bhAgavataM vadanti || 13||
ityAdR^itoktaH paramasya puMsaH
pratikShaNAnugrahabhAjano.aham |
snehottharomA skhalitAkSharastaM
mu~ncha~nChuchaH prA~njalirAbabhAShe || 14||
ko nvIsha te pAdasarojabhAjAM
sudurlabho.artheShu chaturShvapIha |
tathApi nAhaM pravR^iNomi bhUman
bhavatpadAmbhojaniShevaNotsukaH || 15||
karmANyanIhasya bhavo.abhavasya te
durgAshrayo.athAribhayAtpalAyanam |
kAlAtmano yatpramadAyutAshramaH
svAtman rateH khidyati dhIrvidAmiha || 16||
mantreShu mAM vA upahUya yattva\-
makuNThitAkhaNDasadAtmabodhaH |
pR^ichCheH prabho mugddha ivApramattaH
tanno mano mohayatIva deva || 17||
j~nAnaM paraM svAtmarahaHprakAshaM
provAcha kasmai bhagavAn samagram |
api kShamaM no grahaNAya bhartaH
vadA~njasA yadvR^ijinaM tarema || 18||
ityAveditahArdAya mahyaM sa bhagavAn paraH |
AdideshAravindAkSha AtmanaH paramAM sthitim || 19||
sa evamArAdhitapAdatIrthA\-
dadhItatattvAtmavibodhamArgaH |
praNamya pAdau parivR^itya deva\-
mihAgato.ahaM virahAturAtmA || 20||
so.ahaM taddarshanAhlAdaviyogArtiyutaH prabho |
gamiShye dayitaM tasya badaryAshramamaNDalam || 21||
yatra nArAyaNo devo narashcha bhagavAn R^iShiH |
mR^idu tIvraM tapo dIrghaM tepAte lokabhAvanau || 22||
shrIshuka uvAcha
ityuddhavAdupAkarNya suhR^idAM duHsahaM vadham |
j~nAnenAshamayatkShattA shokamutpatitaM budhaH || 23||
sa taM mahAbhAgavataM vrajantaM kauravarShabhaH |
vishrambhAdabhyadhattedaM mukhyaM kR^iShNaparigrahe || 24||
vidura uvAcha
j~nAnaM paraM svAtmarahaHprakAshaM
yadAha yogeshvara Ishvaraste |
vaktuM bhavAnno.arhati yaddhi viShNo\-
rbhR^ityAH svabhR^ityArthakR^itashcharanti || 25||
uddhava uvAcha
nanu te tattvasaMrAdhya R^iShiH kauShAravo.anti me |
sAkShAdbhagavatA.a.adiShTo martyalokaM jihAsatA || 26||
shrIshuka uvAcha
iti saha vidureNa vishvamUrte\-
rguNakathayA sudhayA plAvitorutApaH |
kShaNamiva puline yamasvasustAM
samuShita aupagavirnishAM tato.agAt || 27||
rAjovAcha
nidhanamupagateShu vR^iShNibhoje\-
ShvadhirathayUthapayUthapeShu mukhyaH |
sa tu kathamavashiShTa uddhavo ya\-
ddharirapi tatyaja AkR^itiM tryadhIshaH || 28||
shrIshuka uvAcha
brahmashApApadeshena kAlenAmoghavA~nChitaH |
saMhR^itya svakulaM nUnaM tyakShyan dehamachintayat || 29||
asmAllokAduparate mayi j~nAnaM madAshrayam |
arhatyuddhava evAddhA sampratyAtmavatAM varaH || 30||
noddhavo.aNvapi mannyUno yadguNairnArditaH prabhuH |
ato madvayunaM lokaM grAhayanniha tiShThatu || 31||
evaM trilokaguruNA sandiShTaH shabdayoninA |
badaryAshramamAsAdya harimIje samAdhinA || 32||
viduro.apyuddhavAchChrutvA kR^iShNasya paramAtmanaH |
krIDayopAttadehasya karmANi shlAghitAni cha || 33||
dehanyAsaM cha tasyaivaM dhIrANAM dhairyavardhanam |
anyeShAM duShkarataraM pashUnAM viklavAtmanAm || 34||
AtmAnaM cha kurushreShTha kR^iShNena manasekShitam |
dhyAyan gate bhAgavate ruroda premavihvalaH || 35||
kAlindyAH katibhiH siddha ahobhirbharatarShabha |
prApadyata svaHsaritaM yatra mitrAsuto muniH || 36||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe viduroddhavasaMvAde chaturtho.adhyAyaH || 4||
\iti
\section{.. OM namo bhagavate vAsudevAya ..}
\section{.. pa~nchamo.adhyAyaH \- 5 ..}
shrIshuka uvAcha
dvAri dyunadyA R^iShabhaH kurUNAM
maitreyamAsInamagAdhabodham |
kShattopasR^ityAchyutabhAvashuddhaH
paprachCha saushIlyaguNAbhitR^iptaH || 1||
vidura uvAcha
sukhAya karmANi karoti loko
na taiH sukhaM vAnyadupAramaM vA |
vindeta bhUyastata eva duHkhaM
yadatra yuktaM bhagavAn vadennaH || 2||
janasya kR^iShNAdvimukhasya daivA\-
dadharmashIlasya suduHkhitasya |
anugrahAyeha charanti nUnaM
bhUtAni bhavyAni janArdanasya || 3||
tatsAdhuvaryAdisha vartma shaM naH
saMrAdhito bhagavAn yena puMsAm |
hR^idi sthito yachChati bhaktipUte
j~nAnaM sa tattvAdhigamaM purANam || 4||
karoti karmANi kR^itAvatAro
yAnyAtmatantro bhagavAMstryadhIshaH |
yathA sasarjAgra idaM nirIhaH
saMsthApya vR^ittiM jagato vidhatte || 5||
yathA punaH sve kha idaM niveshya
shete guhAyAM sa nivR^ittavR^ittiH |
yogeshvarAdhIshvara eka eta\-
danupraviShTo bahudhA yathA.a.asIt || 6||
krIDanvidhatte dvijagosurANAM
kShemAya karmANyavatArabhedaiH |
mano na tR^ipyatyapi shR^iNvatAM naH
sushlokamauleshcharitAmR^itAni || 7||
yaistattvabhedairadhilokanAtho
lokAnalokAn saha lokapAlAn |
achIklR^ipadyatra hi sarvasattva\-
nikAyabhedo.adhikR^itaH pratItaH || 8||
yena prajAnAmuta Atmakarma\-
rUpAbhidhAnAM cha bhidAM vyadhatta |
nArAyaNo vishvasR^igAtmayoni\-
retachcha no varNaya vipravarya || 9||
parAvareShAM bhagavanvratAni
shrutAni me vyAsamukhAdabhIkShNam |
atR^ipnuma kShullasukhAvahAnAM
teShAmR^ite kR^iShNakathAmR^itaughAt || 10||
kastR^ipnuyAttIrthapado.abhidhAnA\-
tsatreShu vaH sUribhirIDyamAnAt |
yaH karNanADIM puruShasya yAto
bhavapradAM geharatiM Chinatti || 11||
munirvivakShurbhagavadguNAnAM
sakhApi te bhAratamAha kR^iShNaH |
yasminnR^iNAM grAmyasukhAnuvAdai\-
rmatirgR^ihItA nu hareH kathAyAm || 12||
sA shraddadhAnasya vivardhamAnA
viraktimanyatra karoti puMsaH |
hareH padAnusmR^itinirvR^itasya
samastaduHkhApyayamAshu dhatte || 13||
tA~nChochyashochyAnavido.anushoche
hareH kathAyAM vimukhAnaghena |
kShiNoti devo.animiShastu yeShA\-
mAyurvR^ithA vAdagatismR^itInAm || 14||
tadasya kauShArava sharma dAtu\-
rhareH kathAmeva kathAsu sAram |
uddhR^itya puShpebhya ivArtabandho
shivAya naH kIrtaya tIrthakIrteH || 15||
sa vishvajanmasthitisaMyamArthe
kR^itAvatAraH pragR^ihItashaktiH |
chakAra karmANyatipUruShANi
yAnIshvaraH kIrtaya tAni mahyam || 16||
shrIshuka uvAcha
sa evaM bhagavAn pR^iShTaH kShattrA kauShAravirmuniH |
puMsAM niHshreyasArthena tamAha bahumAnayan || 17||
maitreya uvAcha
sAdhu pR^iShTaM tvayA sAdho lokAn sAdhvanugR^ihNatA |
kIrtiM vitanvatA loke Atmano.adhokShajAtmanaH || 18||
naitachchitraM tvayi kShattarbAdarAyaNavIryaje |
gR^ihIto.ananyabhAvena yattvayA harirIshvaraH || 19||
mANDavyashApAdbhagavAn prajAsaMyamano yamaH |
bhrAtuH kShetre bhujiShyAyAM jAtaH satyavatIsutAt || 20||
bhavAnbhagavato nityaM sammataH sAnugasya ha |
yasya j~nAnopadeshAya mA.a.adishadbhagavAn vrajan || 21||
atha te bhagavallIlAyogamAyorubR^iMhitAH |
vishvasthityudbhavAntArthA varNayAmyanupUrvashaH || 22||
bhagavAneka Asedamagra AtmA.a.atmanAM vibhuH |
AtmechChAnugatAvAtmA nAnAmatyupalakShaNaH || 23||
sa vA eSha tadA draShTA nApashyad‍dR^ishyamekarAT |
mene.asantamivAtmAnaM suptashaktirasuptadR^ik || 24||
sA vA etasya sandraShTuH shaktiH sadasadAtmikA |
mAyA nAma mahAbhAga yayedaM nirmame vibhuH || 25||
kAlavR^ittyA tu mAyAyAM guNamayyAmadhokShajaH |
puruSheNAtmabhUtena vIryamAdhatta vIryavAn || 26||
tato.abhavanmahattattvamavyaktAtkAlachoditAt |
vij~nAnAtmA.a.atmadehasthaM vishvaM vya~njaMstamonudaH || 27||
so.apyaMshaguNakAlAtmA bhagavad‍dR^iShTigocharaH |
AtmAnaM vyakarodAtmA vishvasyAsya sisR^ikShayA || 28||
mahattattvAdvikurvANAdahantattvaM vyajAyata |
kAryakAraNakartrAtmA bhUtendriyamanomayaH || 29||
vaikArikastaijasashcha tAmasashchetyahaM tridhA |
ahantattvAdvikurvANAnmano vaikArikAdabhUt |
vaikArikAshcha ye devA arthAbhivya~njanaM yataH || 30||
taijasAnIndriyANyeva j~nAnakarmamayAni cha |
tAmaso bhUtasUkShmAdiryataH khaM li~NgamAtmanaH || 31||
kAlamAyAMshayogena bhagavadvIkShitaM nabhaH |
nabhaso.anusR^itaM sparshaM vikurvannirmame.anilam || 32||
anilo.api vikurvANo nabhasorubalAnvitaH |
sasarja rUpatanmAtraM jyotirlokasya lochanam || 33||
anilenAnvitaM jyotirvikurvatparavIkShitam |
AdhattAmbho rasamayaM kAlamAyAMshayogataH || 34||
jyotiShAmbho.anusaMsR^iShTaM vikurvadbrahmavIkShitam |
mahIM gandhaguNAmAdhAtkAlamAyAMshayogataH || 35||
bhUtAnAM nabha AdInAM yadyadbhavyAvarAvaram |
teShAM parAnusaMsargAdyathA sa~NkhyaM guNAn viduH || 36||
ete devAH kalA viShNoH kAlamAyAMshali~NginaH |
nAnAtvAtsvakriyAnIshAH prochuH prA~njalayo vibhum || 37||
devA UchuH
namAma te devapadAravindaM
prapannatApopashamAtapatram |
yanmUlaketA yatayo.a~njasoru\-
saMsAraduHkhaM bahirutkShipanti || 38||
dhAtaryadasmin bhava Isha jIvA\-
stApatrayeNopahatA na sharma |
Atman labhante bhagavaMstavA~Nghri\-
chChAyAM savidyAmata Ashrayema || 39||
mArganti yatte mukhapadmanIDai\-
shChandaHsuparNairR^iShayo vivikte |
yasyAghamarShodasaridvarAyAH
padaM padaM tIrthapadaH prapannAH || 40||
yachChraddhayA shrutavatyA cha bhaktyA
sammR^ijyamAne hR^idaye.avadhAya |
j~nAnena vairAgyabalena dhIrA
vrajema tatte.a~NghrisarojapITham || 41||
vishvasya janmasthitisaMyamArthe
kR^itAvatArasya padAmbujaM te |
vrajema sarve sharaNaM yadIsha
smR^itaM prayachChatyabhayaM svapuMsAm || 42||
yatsAnubandhe.asati dehagehe
mamAhamityUDhadurAgrahANAm |
puMsAM sudUraM vasato.api puryAM
bhajema tatte bhagavan padAbjam || 43||
tAnvai hyasadvR^ittibhirakShibhirye
parAhR^itAntarmanasaH paresha |
atho na pashyantyurugAya nUnaM
ye te padanyAsavilAsalakShyAH || 44||
pAnena te deva kathAsudhAyAH
pravR^iddhabhaktyA vishadAshayA ye |
vairAgyasAraM pratilabhya bodhaM
yathA~njasAnvIyurakuNThadhiShNyam || 45||
tathApare chAtmasamAdhiyoga\-
balena jitvA prakR^itiM baliShThAm |
tvAmeva dhIrAH puruShaM vishanti
teShAM shramaH syAnna tu sevayA te || 46||
tatte vayaM lokasisR^ikShayAdya
tvayAnusR^iShTAstribhirAtmabhiH sma |
sarve viyuktAH svavihAratantraM
na shaknumastatpratihartave te || 47||
yAvadbaliM te.aja harAma kAle
yathA vayaM chAnnamadAma yatra |
yathobhayeShAM ta ime hi lokA
baliM haranto.annamadantyanUhAH || 48||
tvaM naH surANAmasi sAnvayAnAM
kUTastha AdyaH puruShaH purANaH |
tvaM deva shaktyAM guNakarmayonau
retastvajAyAM kavimAdadhe.ajaH || 49||
tato vayaM satpramukhA yadarthe
babhUvimAtman karavAma kiM te |
tvaM naH svachakShuH paridehi shaktyA
deva kriyArthe yadanugrahANAm || 50||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe viduroddhavasaMvAde pa~nchamo.adhyAyaH || 5||
\iti
\section{.. OM namo bhagavate vAsudevAya ..}
\section{.. ShaShTho.adhyAyaH \- 6 ..}
R^iShiruvAcha
iti tAsAM svashaktInAM satInAmasametya saH |
prasuptalokatantrANAM nishAmya gatimIshvaraH || 1||
kAlasa~nj~nAM tadA devIM bibhrachChaktimurukramaH |
trayoviMshati tattvAnAM gaNaM yugapadAvishat || 2||
so.anupraviShTo bhagavAMshcheShTArUpeNa taM gaNam |
bhinnaM saMyojayAmAsa suptaM karma prabodhayan || 3||
prabuddhakarmA daivena trayoviMshatiko gaNaH |
prerito.ajanayatsvAbhirmAtrAbhiradhipUruSham || 4||
pareNa vishatA svasminmAtrayA vishvasR^iggaNaH |
chukShobhAnyonyamAsAdya yasmin lokAshcharAcharAH || 5||
hiraNmayaH sa puruShaH sahasraparivatsarAn |
ANDakosha uvAsApsu sarvasattvopabR^iMhitaH || 6||
sa vai vishvasR^ijAM garbho devakarmAtmashaktimAn |
vibabhAjAtmanA.a.atmAnamekadhA dashadhA tridhA || 7||
eSha hyasheShasattvAnAmAtmAMshaH paramAtmanaH |
Adyo.avatAro yatrAsau bhUtagrAmo vibhAvyate || 8||
sAdhyAtmaH sAdhidaivashcha sAdhibhUta iti tridhA |
virAT prANo dashavidha ekadhA hR^idayena cha || 9||
smaranvishvasR^ijAmIsho vij~nApitamadhokShajaH |
virAjamatapatsvena tejasaiShAM vivR^ittaye || 10||
atha tasyAbhitaptasya kati chAyatanAni ha |
nirabhidyanta devAnAM tAni me gadataH shR^iNu || 11||
tasyAgnirAsyaM nirbhinnaM lokapAlo.avishatpadam |
vAchA svAMshena vaktavyaM yayAsau pratipadyate || 12||
nirbhinnaM tAlu varuNo lokapAlo.avishaddhareH |
jihvayAMshena cha rasaM yayAsau pratipadyate || 13||
nirbhinne ashvinau nAse viShNorAvishatAM padam |
ghrANenAMshena gandhasya pratipattiryato bhavet || 14||
nirbhinne akShiNI tvaShTA lokapAlo.avishadvibhoH |
chakShuShAMshena rUpANAM pratipattiryato bhavet || 15||
nirbhinnAnyasya charmANi lokapAlo.anilo.avishat |
prANenAMshena saMsparshaM yenAsau pratipadyate || 16||
karNAvasya vinirbhinnau dhiShNyaM svaM vivishurdishaH |
shrotreNAMshena shabdasya siddhiM yena prapadyate || 17||
tvachamasya vinirbhinnAM vivishurdhiShNyamoShadhIH |
aMshena romabhiH kaNDUM yairasau pratipadyate || 18||
meDhraM tasya vinirbhinnaM svadhiShNyaM ka upAvishat |
retasAMshena yenAsAvAnandaM pratipadyate || 19||
gudaM puMso vinirbhinnaM mitro lokesha Avishat |
pAyunAMshena yenAsau visargaM pratipadyate || 20||
hastAvasya vinirbhinnAvindraH svarpatirAvishat |
vArtayAMshena puruSho yayA vR^ittiM prapadyate || 21||
pAdAvasya vinirbhinnau lokesho viShNurAvishat |
gatyA svAMshena puruSho yayA prApyaM prapadyate || 22||
buddhiM chAsya vinirbhinnAM vAgIsho dhiShNyamAvishat |
bodhenAMshena boddhavyapratipattiryato bhavet || 23||
hR^idayaM chAsya nirbhinnaM chandramA dhiShNyamAvishat |
manasAMshena yenAsau vikriyAM pratipadyate || 24||
AtmAnaM chAsya nirbhinnamabhimAno.avishatpadam |
karmaNAMshena yenAsau kartavyaM pratipadyate || 25||
sattvaM chAsya vinirbhinnaM mahAn dhiShNyamupAvishat |
chittenAMshena yenAsau vij~nAnaM pratipadyate || 26||
shIrShNo.asya dyaurdharA padbhyAM khaM nAbherudapadyata |
guNAnAM vR^ittayo yeShu pratIyante surAdayaH || 27||
Atyantikena sattvena divaM devAH prapedire |
dharAM rajaH svabhAvena paNayo ye cha tAnanu || 28||
tArtIyena svabhAvena bhagavannAbhimAshritAH |
ubhayorantaraM vyoma ye rudrapArShadAM gaNAH || 29||
mukhato.avartata brahma puruShasya kurUdvaha |
yastUnmukhatvAdvarNAnAM mukhyo.abhUdbrAhmaNo guruH || 30||
bAhubhyo.avartata kShatraM kShatriyastadanuvrataH |
yo jAtastrAyate varNAn pauruShaH kaNTakakShatAt || 31||
visho.avartanta tasyorvorlokavR^ittikarIrvibhoH |
vaishyastadudbhavo vArtAM nR^iNAM yaH samavartayat || 32||
padbhyAM bhagavato jaj~ne shushrUShA dharmasiddhaye |
tasyAM jAtaH purA shUdro yadvR^ittyA tuShyate hariH || 33||
ete varNAH svadharmeNa yajanti svaguruM harim |
shraddhayA.a.atmavishud.hdhyarthaM yajjAtAH saha vR^ittibhiH || 34||
etatkShattarbhagavato daivakarmAtmarUpiNaH |
kaH shraddadhyAdupAkartuM yogamAyAbalodayam || 35||
athApi kIrtayAmya~Nga yathAmati yathAshrutam |
kIrtiM hareH svAM satkartuM giramanyAbhidhAsatIm || 36||
ekAntalAbhaM vachaso nu puMsAM
sushlokamaulerguNavAdamAhuH |
shruteshcha vidvadbhirupAkR^itAyAM
kathA sudhAyAmupasamprayogam || 37||
Atmano.avasito vatsa mahimA kavinA.a.adinA |
saMvatsarasahasrAnte dhiyA yogavipakvayA || 38||
ato bhagavato mAyA mAyinAmapi mohinI |
yatsvayaM chAtmavartmAtmA na veda kimutApare || 39||
yato.aprApya nyavartanta vAchashcha manasA saha |
ahaM chAnya ime devAstasmai bhagavate namaH || 40||
iti shrImadbhAgavate mahApurANe pAramahaMsyAM
saMhitAyAM tR^itIyaskandhe ShaShTho.adhyAyaH || 6||
\iti
\section{.. OM namo bhagavate vAsudevAya ..}
\section{.. saptamo.adhyAyaH \- 7 ..}
shrIshuka uvAcha
evaM bruvANaM maitreyaM dvaipAyanasuto budhaH |
prINayanniva bhAratyA viduraH pratyabhAShata || 1||
vidura uvAcha
brahman kathaM bhagavatashchinmAtrasyAvikAriNaH |
lIlayA chApi yujyerannirguNasya guNAH kriyAH || 2||
krIDAyAmudyamo.arbhasya kAmashchikrIDiShAnyataH |
svatastR^iptasya cha kathaM nivR^ittasya sadAnyataH || 3||
asrAkShIdbhagavAnvishvaM guNamayyA.a.atmamAyayA |
tayA saMsthApayatyetadbhUyaH pratyapidhAsyati || 4||
deshataH kAlato yo.asAvavasthAtaH svato.anyataH |
aviluptAvabodhAtmA sa yujyetAjayA katham || 5||
bhagavAneka evaiSha sarvakShetreShvavasthitaH |
amuShya durbhagatvaM vA klesho vA karmabhiH kutaH || 6||
etasmin me mano vidvankhidyate.aj~nAnasa~NkaTe |
tannaH parANuda vibho kashmalaM mAnasaM mahat || 7||
shrIshuka uvAcha
sa itthaM choditaH kShattrA tattvajij~nAsunA muniH |
pratyAha bhagavachchittaH smayanniva gatasmayaH || 8||
maitreya uvAcha
seyaM bhagavato mAyA yannayena virudhyate |
Ishvarasya vimuktasya kArpaNyamuta bandhanam || 9||
yadarthena vinAmuShya puMsa AtmaviparyayaH |
pratIyata upadraShTuH svashirashChedanAdikaH || 10||
yathA jale chandramasaH kampAdistatkR^ito guNaH |
dR^ishyate.asannapi draShTurAtmano.anAtmano guNaH || 11||
sa vai nivR^ittidharmeNa vAsudevAnukampayA |
bhagavadbhaktiyogena tirodhatte shanairiha || 12||
yadendriyoparAmo.atha draShTrAtmani pare harau |
vilIyante tadA kleshAH saMsuptasyeva kR^itsnashaH || 13||
asheShasa~NkleshashamaM vidhatte
guNAnuvAdashravaNaM murAreH |
kutaH punastachcharaNAravinda\-
parAgasevA ratirAtmalabdhA || 14||
vidura uvAcha
sa~nChinnaH saMshayo mahyaM tava sUktAsinA vibho |
ubhayatrApi bhagavan mano me sampradhAvati || 15||
sAdhvetadvyAhR^itaM vidvannAtmamAyAyanaM hareH |
AbhAtyapArthaM nirmUlaM vishvamUlaM na yadbahiH || 16||
yashcha mUDhatamo loke yashcha buddheH paraM gataH |
tAvubhau sukhamedhete klishyatyantarito janaH || 17||
arthAbhAvaM vinishchitya pratItasyApi nAtmanaH |
tAM chApi yuShmachcharaNasevayAhaM parANude || 18||
yatsevayA bhagavataH kUTasthasya madhudviShaH |
ratirAso bhavettIvraH pAdayorvyasanArdanaH || 19||
durApA hyalpatapasaH sevA vaikuNThavartmasu |
yatropagIyate nityaM devadevo janArdanaH || 20||
sR^iShTvAgre mahadAdIni savikArANyanukramAt |
tebhyo virAjamuddhR^itya tamanu prAvishadvibhuH || 21||
yamAhurAdyaM puruShaM sahasrA~NghryUrubAhukam |
yatra vishva ime lokAH savikAsaM samAsate || 22||
yasmin dashavidhaH prANaH sendriyArthendriyastrivR^it |
tvayerito yato varNAstadvibhUtIrvadasva naH || 23||
yatra putraishcha pautraishcha naptR^ibhiH saha gotrajaiH |
prajA vichitrAkR^itaya Asan yAbhiridaM tatam || 24||
prajApatInAM sa patishchaklR^ipe kAn prajApatIn |
sargAMshchaivAnusargAMshcha manUnmanvantarAdhipAn || 25||
eteShAmapi vaMshAMshcha vaMshAnucharitAni cha |
uparyadhashcha ye lokA bhUmermitrAtmajAsate || 26||
teShAM saMsthAM pramANaM cha bhUrlokasya cha varNaya |
tirya~NmAnuShadevAnAM sarIsR^ipapatattriNAm |
vada naH sargasaMvyUhaM gArbhasvedadvijodbhidAm || 27||
guNAvatArairvishvasya sargasthityapyayAshrayam |
sR^ijataH shrInivAsasya vyAchakShvodAravikramam || 28||
varNAshramavibhAgAMshcha rUpashIlasvabhAvataH |
R^iShINAM janmakarmAdi vedasya cha vikarShaNam || 29||
yaj~nasya cha vitAnAni yogasya cha pathaH prabho |
naiShkarmyasya cha sA~Nkhyasya tantraM vA bhagavatsmR^itam || 30||
pAkhaNDapathavaiShamyaM pratilomaniveshanam |
jIvasya gatayo yAshcha yAvatIrguNakarmajAH || 31||
dharmArthakAmamokShANAM nimittAnyavirodhataH |
vArtAyA daNDanIteshcha shrutasya cha vidhiM pR^ithak || 32||
shrAddhasya cha vidhiM brahman pitR^INAM sargameva cha |
grahanakShatratArANAM kAlAvayavasaMsthitim || 33||
dAnasya tapaso vApi yachcheShTApUrtayoH phalam |
pravAsasthasya yo dharmo yashcha puMsa utApadi || 34||
yena vA bhagavAMstuShyeddharmayonirjanArdanaH |
samprasIdati vA yeShAmetadAkhyAhi chAnagha || 35||
anuvratAnAM shiShyANAM putrANAM cha dvijottama |
anApR^iShTamapi brUyurguravo dInavatsalAH || 36||
tattvAnAM bhagavaMsteShAM katidhA pratisa~NkramaH |
tatremaM ka upAsIran ka u svidanusherate || 37||
puruShasya cha saMsthAnaM svarUpaM vA parasya cha |
j~nAnaM cha naigamaM yattadgurushiShyaprayojanam || 38||
nimittAni cha tasyeha proktAnyanagha sUribhiH |
svato j~nAnaM kutaH puMsAM bhaktirvairAgyameva vA || 39||
etAnme pR^ichChataH prashnAn hareH karmavivitsayA |
brUhi me.aj~nasya mitratvAdajayA naShTachakShuShaH || 40||
sarve vedAshcha yaj~nAshcha tapo dAnAni chAnagha |
jIvAbhayapradAnasya na kurvIran kalAmapi || 41||
shrIshuka uvAcha
sa itthamApR^iShTapurANakalpaH
kurupradhAnena munipradhAnaH |
pravR^iddhaharSho bhagavatkathAyAM
sa~nchoditastaM prahasannivAha || 42||
iti shrImadbhAgavate mahApurANe pAramahaMsyAM
saMhitAyAM tR^itIyaskandhe saptamo.adhyAyaH || 7||
\iti
\section{.. OM namo bhagavate vAsudevAya ..}
\section{.. aShTamo.adhyAyaH \- 8 ..}
maitreya uvAcha
satsevanIyo bata pUruvaMsho
yallokapAlo bhagavatpradhAnaH |
babhUvithehAjitakIrtimAlAM
pade pade nUtanayasyabhIkShNam || 1||
so.ahaM nR^iNAM kShullasukhAya duHkhaM
mahadgatAnAM viramAya tasya |
pravartaye bhAgavataM purANaM
yadAha sAkShAdbhagavAn R^iShibhyaH || 2||
AsInamurvyAM bhagavantamAdyaM
sa~NkarShaNaM devamakuNThasattvam |
vivitsavastattvamataHparasya
kumAramukhyA munayo.anvapR^ichChan || 3||
svameva dhiShNyaM bahu mAnayantaM
yaM vAsudevAbhidhamAmananti |
pratyagdhR^itAkShAmbujakoshamISha\-
dunmIlayantaM vibudhodayAya || 4||
svardhunyudArdraiH svajaTAkalApai\-
rupaspR^ishantashcharaNopadhAnam |
padmaM yadarchantyahirAjakanyAH
sapremanAnAbalibhirvarArthAH || 5||
muhurgR^iNanto vachasAnurAga\-
skhalatpadenAsya kR^itAni tajj~nAH |
kirITasAhasramaNipraveka\-
pradyotitoddAmaphaNAsahasram || 6||
proktaM kilaitadbhagavattamena
nivR^ittidharmAbhiratAya tena |
sanatkumArAya sa chAha pR^iShTaH
sA~NkhyAyanAyA~Nga dhR^itavratAya || 7||
sA~NkhyAyanaH pAramahaMsyamukhyo
vivakShamANo bhagavadvibhUtIH |
jagAda so.asmadgurave.anvitAya
parAsharAyAtha bR^ihaspateshcha || 8||
provAcha mahyaM sa dayAlurukto
muniH pulastyena purANamAdyam |
so.ahaM tavaitatkathayAmi vatsa
shraddhAlave nityamanuvratAya || 9||
udAplutaM vishvamidaM tadAsI\-
dyannidrayA.a.amIlitadR^i~N nyamIlayat |
ahIndratalpe.adhishayAna ekaH
kR^itakShaNaH svAtmaratau nirIhaH || 10||
so.antaHsharIre.arpitabhUtasUkShmaH
kAlAtmikAM shaktimudIrayANaH |
uvAsa tasmin salile pade sve
yathAnalo dAruNi ruddhavIryaH || 11||
chaturyugAnAM cha sahasramapsu
svapan svayodIritayA svashaktyA |
kAlAkhyayA.a.asAditakarmatantro
lokAnapItAn dadR^ishe svadehe || 12||
tasyArthasUkShmAbhiniviShTadR^iShTe\-
rantargato.artho rajasA tanIyAn |
guNena kAlAnugatena viddhaH
sUShyaMstadAbhidyata nAbhideshAt || 13||
sa padmakoshaH sahasodatiShTha\-
tkAlena karmapratibodhanena |
svarochiShA tatsalilaM vishAlaM
vidyotayannarka ivAtmayoniH || 14||
tallokapadmaM sa u eva viShNuH
prAvIvishatsarvaguNAvabhAsam |
tasmin svayaM vedamayo vidhAtA
svayambhuvaM yaM sma vadanti so.abhUt || 15||
tasyAM sa chAmbhoruhakarNikAyA\-
mavasthito lokamapashyamAnaH |
parikraman vyomni vivR^ittanetra\-
shchatvAri lebhe.anudishaM mukhAni || 16||
tasmAdyugAntashvasanAvaghUrNa\-
jalormichakrAtsalilAdvirUDham |
upAshritaH ka~njamu lokatattvaM
nAtmAnamaddhAvidadAdidevaH || 17||
ka eSha yo.asAvahamabjapR^iShTha
etatkuto vAbjamananyadapsu |
asti hyadhastAdiha ki~nchanaita\-
dadhiShThitaM yatra satA nu bhAvyam || 18||
sa itthamudvIkShya tadabjanAla\-
nADIbhirantarjalamAvivesha |
nArvAggatastatkharanAlanAla\-
nAbhiM vichinvaMstadavindatAjaH || 19||
tamasyapAre vidurAtmasargaM
vichinvato.abhUtsumahAMstriNemiH |
yo dehabhAjAM bhayamIrayANaH
parikShiNotyAyurajasya hetiH || 20||
tato nivR^itto.apratilabdhakAmaH
svadhiShNyamAsAdya punaH sa devaH |
shanairjitashvAsanivR^ittachitto
nyaShIdadArUDhasamAdhiyogaH || 21||
kAlena so.ajaH puruShAyuShAbhi\-
pravR^ittayogena virUDhabodhaH |
svayaM tadantarhR^idaye.avabhAta\-
mapashyatApashyata yanna pUrvam || 22||
mR^iNAlagaurAyatasheShabhoga\-
parya~Nka ekaM puruShaM shayAnam |
phaNAtapatrAyutamUrdharatna\-
dyubhirhatadhvAntayugAntatoye || 23||
prekShAM kShipantaM haritopalAdreH
sandhyAbhranIverururukmamUrdhnaH |
ratnodadhArauShadhisaumanasya\-
vanasrajo veNubhujA~NghripA~NghreH || 24||
AyAmato vistarataH svamAna\-
dehena lokatrayasa~NgraheNa |
vichitradivyAbharaNAMshukAnAM
kR^itashriyApAshritaveShadeham || 25||
puMsAM svakAmAya viviktamArgai\-
rabhyarchatAM kAmadughA~Nghripadmam |
pradarshayantaM kR^ipayA nakhendu\-
mayUkhabhinnA~NgulichArupatram || 26||
mukhena lokArtiharasmitena
parisphuratkuNDalamaNDitena |
shoNAyitenAdharabimbabhAsA
pratyarhayantaM sunasena subhrvA || 27||
kadambaki~njalkapisha~NgavAsasA
svala~NkR^itaM mekhalayA nitambe |
hAreNa chAnantadhanena vatsa
shrIvatsavakShaHsthalavallabhena || 28||
parArdhyakeyUramaNipraveka\-
paryastadordaNDasahasrashAkham |
avyaktamUlaM bhuvanA~Nghripendra\-
mahIndrabhogairadhivItavalsham || 29||
charAcharauko bhagavan mahIdhra\-
mahIndrabandhuM salilopagUDham |
kirITasAhasrahiraNyashR^i~Nga\-
mAvirbhavatkaustubharatnagarbham || 30||
nivItamAmnAyamadhuvratashriyA
svakIrtimayyA vanamAlayA harim |
sUryenduvAyvagnyagamaM tridhAmabhiH
parikramatprAdhanikairdurAsadam || 31||
tarhyeva tannAbhisaraHsaroja\-
mAtmAnamambhaH shvasanaM viyachcha |
dadarsha devo jagato vidhAtA
nAtaH paraM lokavisargadR^iShTiH || 32||
sa karmabIjaM rajasoparaktaH
prajAH sisR^ikShanniyadeva dR^iShTvA |
astaudvisargAbhimukhastamIDya\-
mavyaktavartmanyabhiveshitAtmA || 33||
iti shrImadbhAgavate mahApurANe pAramahaMsyAM
saMhitAyAM tR^itIyaskandhe aShTamo.adhyAyaH || 8||
\iti
\section{.. OM namo bhagavate vAsudevAya ..}
\section{.. navamo.adhyAyaH \- 9 ..}
brahmovAcha
j~nAto.asi me.adya suchirAnnanu dehabhAjAM
na j~nAyate bhagavato gatirityavadyam |
nAnyattvadasti bhagavannapi tanna shuddhaM
mAyAguNavyatikarAdyadururvibhAsi || 1||
rUpaM yadetadavabodharasodayena
shashvannivR^ittatamasaH sadanugrahAya |
Adau gR^ihItamavatArashataikabIjaM
yannAbhipadmabhavanAdahamAvirAsam || 2||
nAtaHparaM parama yadbhavataH svarUpa\-
mAnandamAtramavikalpamaviddhavarchaH |
pashyAmi vishvasR^ijamekamavishvamAtman
bhUtendriyAtmakamadasta upAshrito.asmi || 3||
tadvA idaM bhuvanama~Ngala ma~NgalAya
dhyAne sma no darshitaM ta upAsakAnAm |
tasmai namo bhagavate.anuvidhema tubhyaM
yo.anAdR^ito narakabhAgbhirasatprasa~NgaiH || 4||
ye tu tvadIyacharaNAmbujakoshagandhaM
jighranti karNavivaraiH shrutivAtanItam |
bhaktyA gR^ihItacharaNaH parayA cha teShAM
nApaiShi nAtha hR^idayAmburuhAtsvapuMsAm || 5||
tAvadbhayaM draviNadehasuhR^innimittaM
shokaH spR^ihA paribhavo vipulashcha lobhaH |
tAvanmametyasadavagraha ArtimUlaM
yAvanna te.a~NghrimabhayaM pravR^iNIta lokaH || 6||
daivena te hatadhiyo bhavataH prasa~NgAt
sarvAshubhopashamanAdvimukhendriyA ye |
kurvanti kAmasukhaleshalavAya dInAH
lobhAbhibhUtamanaso.akushalAni shashvat || 7||
kShuttR^iT tridhAtubhirimA muhurardyamAnAH
shItoShNavAtavaraShairitaretarAchcha |
kAmAgninAchyuta ruShA cha sudurbhareNa
sampashyato mana urukrama sIdate me || 8||
yAvatpR^ithaktvamidamAtmana indriyArtha\-
mAyAbalaM bhagavato jana Isha pashyet |
tAvanna saMsR^itirasau pratisa~Nkrameta
vyarthApi duHkhanivahaM vahatI kriyArthA || 9||
ahnyApR^itArtakaraNA nishi niHshayAnA
nAnAmanorathadhiyA kShaNabhagnanidrAH |
daivAhatArtharachanA R^iShayo.api deva
yuShmatprasa~NgavimukhA iha saMsaranti || 10||
tvaM bhAvayogaparibhAvitahR^itsaroja
Asse shrutekShitapatho nanu nAtha puMsAm |
yadyaddhiyA ta urugAya vibhAvayanti
tattadvapuH praNayase sadanugrahAya || 11||
nAtiprasIdati tathopachitopachArai\-
rArAdhitaH suragaNairhR^idi baddhakAmaiH |
yatsarvabhUtadayayAsadalabhyayaiko
nAnAjaneShvavahitaH suhR^idantarAtmA || 12||
puMsAmato vividhakarmabhiradhvarAdyaiH
dAnena chogratapasA vratacharyayA cha |
ArAdhanaM bhagavatastava satkriyArtho
dharmo.arpitaH karhichiddhriyate na yatra || 13||
shashvatsvarUpamahasaiva nipItabheda\-
mohAya bodhadhiShaNAya namaH parasmai |
vishvodbhavasthitilayeShu nimittalIlA\-
rAsAya te nama idaM chakR^imeshvarAya || 14||
yasyAvatAraguNakarmaviDambanAni
nAmAni ye.asuvigame vivashA gR^iNanti |
te naikajanmashamalaM sahasaiva hitvA
saMyAntyapAvR^itamR^itaM tamajaM prapadye || 15||
yo vA ahaM cha girishashcha vibhuH svayaM cha
sthityudbhavapralayahetava AtmamUlam |
bhittvA tripAdvavR^idha eka urupraroha\-
stasmai namo bhagavate bhuvanadrumAya || 16||
loko vikarmanirataH kushale pramattaH
karmaNyayaM tvadudite bhavadarchane sve |
yastAvadasya balavAniha jIvitAshAM
sadyashChinattyanimiShAya namo.astu tasmai || 17||
yasmAdbibhemyahamapi dviparArdhadhiShNya\-
madhyAsitaH sakalalokanamaskR^itaM yat |
tepe tapo bahusavo.avarurutsamAna\-
stasmai namo bhagavate.adhimakhAya tubhyam || 18||
tirya~NmanuShyavibudhAdiShu jIvayoni\-
ShvAtmechChayA.a.atmakR^itasetuparIpsayA yaH |
reme nirastaratirapyavaruddhadeha\-
stasmai namo bhagavate puruShottamAya || 19||
yo.avidyayAnupahato.api dashArdhavR^ittyA
nidrAmuvAha jaTharIkR^italokayAtraH |
antarjale.ahikashipusparshAnukUlAM
bhImormimAlini janasya sukhaM vivR^iNvan || 20||
yannAbhipadmabhavanAdahamAsamIDya
lokatrayopakaraNo yadanugraheNa |
tasmai namasta udarasthabhavAya yoga\-
nidrAvasAnavikasannalinekShaNAya || 21||
so.ayaM samastajagatAM suhR^ideka AtmA
sattvena yanmR^iDayate bhagavAn bhagena |
tenaiva me dR^ishamanuspR^ishatAdyathAhaM
srakShyAmi pUrvavadidaM praNatapriyo.asau || 22||
eSha prapannavarado ramayA.a.atmashaktyA
yadyatkariShyati gR^ihItaguNAvatAraH |
tasmin svavikramamidaM sR^ijato.api cheto
yu~njIta karmashamalaM cha yathA vijahyAm || 23||
nAbhihradAdiha sato.ambhasi yasya puMso
vij~nAnashaktirahamAsamanantashakteH |
rUpaM vichitramidamasya vivR^iNvato me
mA rIriShIShTa nigamasya girAM visargaH || 24||
so.asAvadabhrakaruNo bhagavAn vivR^iddha\-
premasmitena nayanAmburuhaM vijR^imbhan |
utthAya vishvavijayAya cha no viShAdaM
mAdhvyA girApanayatAtpuruShaH purANaH || 25||
maitreya uvAcha
svasambhavaM nishAmyaivaM tapovidyAsamAdhibhiH |
yAvanmano vachaH stutvA virarAma sa khinnavat || 26||
athAbhipretamanvIkShya brahmaNo madhusUdanaH |
viShaNNachetasaM tena kalpavyatikarAmbhasA || 27||
lokasaMsthAnavij~nAna AtmanaH parikhidyataH |
tamAhAgAdhayA vAchA kashmalaM shamayanniva || 28||
shrIbhagavAnuvAcha
mA vedagarbha gAstandrIM sarga udyamamAvaha |
tanmayA.a.apAditaM hyagre yanmAM prArthayate bhavAn || 29||
bhUyastvaM tapa AtiShTha vidyAM chaiva madAshrayAm |
tAbhyAmantarhR^idi brahman lokAn drakShyasyapAvR^itAn || 30||
tata Atmani loke cha bhaktiyuktaH samAhitaH |
draShTAsi mAM tataM brahman mayi lokAMstvamAtmanaH || 31||
yadA tu sarvabhUteShu dAruShvagnimiva sthitam |
pratichakShIta mAM loko jahyAttarhyeva kashmalam || 32||
yadA rahitamAtmAnaM bhUtendriyaguNAshayaiH |
svarUpeNa mayopetaM pashyan svArAjyamR^ichChati || 33||
nAnAkarmavitAnena prajA bahvIH sisR^ikShataH |
nAtmAvasIdatyasmiMste varShIyAnmadanugrahaH || 34||
R^iShimAdyaM na badhnAti pApIyAMstvAM rajo guNaH |
yanmano mayi nirbaddhaM prajAH saMsR^ijato.api te || 35||
j~nAto.ahaM bhavatA tvadya durvij~neyo.api dehinAm |
yanmAM tvaM manyase.ayuktaM bhUtendriyaguNAtmabhiH || 36||
tubhyaM madvichikitsAyAmAtmA me darshito.abahiH |
nAlena salile mUlaM puShkarasya vichinvataH || 37||
yachchakarthA~Nga matstotraM matkathAbhyudayA~Nkitam |
yadvA tapasi te niShThA sa eSha madanugrahaH || 38||
prIto.ahamastu bhadraM te lokAnAM vijayechChayA |
yadastauShIrguNamayaM nirguNaM mAnuvarNayan || 39||
ya etena pumAnnityaM stutvA stotreNa mAM bhajet |
tasyAshu samprasIdeyaM sarvakAmavareshvaraH || 40||
pUrtena tapasA yaj~nairdAnairyogasamAdhinA |
rAddhaM niHshreyasaM puMsAM matprItistattvavinmatam || 41||
ahamAtmA.a.atmanAM dhAtaH preShThaH san preyasAmapi |
ato mayi ratiM kuryAddehAdiryatkR^ite priyaH || 42||
sarvavedamayenedamAtmanA.a.atmA.a.atmayoninA |
prajAH sR^ija yathA pUrvaM yAshcha mayyanusherate || 43||
maitreya uvAcha
tasmA evaM jagatsraShTre pradhAnapuruSheshvaraH |
vyajyedaM svena rUpeNa ka~njanAbhastirodadhe || 44||
iti shrImadbhAgavate mahApurANe pAramahaMsyAM
saMhitAyAM tR^itIyaskandhe navamo.adhyAyaH || 9||
\iti
\section{.. OM namo bhagavate vAsudevAya ..}
\section{.. dashamo.adhyAyaH \- 10 ..}
vidura uvAcha
antarhite bhagavati brahmA lokapitAmahaH |
prajAH sasarja katidhA daihikIrmAnasIrvibhuH || 1||
ye cha me bhagavan pR^iShTAstvayyarthA bahuvittama |
tAn vadasvAnupUrvyeNa Chindhi naH sarvasaMshayAn || 2||
sUta uvAcha
evaM sa~nchoditastena kShattrA kauShAravo muniH |
prItaH pratyAha tAn prashnAn hR^idisthAnatha bhArgava || 3||
maitreya uvAcha
viri~ncho.api tathA chakre divyaM varShashataM tapaH |
AtmanyAtmAnamAveshya yadAha bhagavAnajaH || 4||
tadvilokyAbjasambhUto vAyunA yadadhiShThitaH |
padmamambhashcha tatkAlakR^itavIryeNa kampitam || 5||
tapasA hyedhamAnena vidyayA chAtmasaMsthayA |
vivR^iddhavij~nAnabalo nyapAdvAyuM sahAmbhasA || 6||
tadvilokya viyadvyApi puShkaraM yadadhiShThitam |
anena lokAn prAglInAn kalpitAsmItyachintayat || 7||
padmakoshaM tadA.a.avishya bhagavatkarmachoditaH |
ekaM vyabhA~NkShIdurudhA tridhA bhAvyaM dvisaptadhA || 8||
etAvA~njIvalokasya saMsthAbhedaH samAhR^itaH |
dharmasya hyanimittasya vipAkaH parameShThyasau || 9||
vidura uvAcha
yadAttha bahurUpasya hareradbhutakarmaNaH |
kAlAkhyaM lakShaNaM brahman yathA varNaya naH prabho || 10||
maitreya uvAcha
guNavyatikarAkAro nirvisheSho.apratiShThitaH |
puruShastadupAdAnamAtmAnaM lIlayAsR^ijat || 11||
vishvaM vai brahma tanmAtraM saMsthitaM viShNumAyayA |
IshvareNa parichChinnaM kAlenAvyaktamUrtinA || 12||
yathedAnIM tathAgre cha pashchAdapyetadIdR^isham |
sargo navavidhastasya prAkR^ito vaikR^itastu yaH || 13||
kAladravyaguNairasya trividhaH pratisa~NkramaH |
Adyastu mahataH sargo guNavaiShamyamAtmanaH || 14||
dvitIyastvahamo yatra dravyaj~nAnakriyodayaH |
bhUtasargastR^itIyastu tanmAtro dravyashaktimAn || 15||
chaturtha aindriyaH sargo yastu j~nAnakriyAtmakaH |
vaikAriko devasargaH pa~nchamo yanmayaM manaH || 16||
ShaShThastu tamasaH sargo yastvabuddhikR^itaH prabho |
ShaDime prAkR^itAH sargA vaikR^itAnapi me shR^iNu || 17||
rajobhAjo bhagavato lIleyaM harimedhasaH |
saptamo mukhyasargastu ShaDvidhastasthuShAM cha yaH || 18||
vanaspatyoShadhilatA tvaksArA vIrudho drumAH |
utsrotasastamaHprAyA antaHsparshA visheShiNaH || 19||
tirashchAmaShTamaH sargaH so.aShTAviMshadvidho mataH |
avido bhUritamasaH ghrANaj~nA hR^idyavedinaH || 20||
gaurajo mahiShaH kR^iShNaH sUkaro gavayo ruruH |
dvishaphAH pashavashcheme aviruShTrashcha sattama || 21||
kharo.ashvo.ashvataro gauraH sharabhashchamarI tathA |
ete chaikashaphAH kShattaH shR^iNu pa~nchanakhAn pashUn || 22||
shvA sR^igAlo vR^iko vyAghro mArjAraH shashashallakau |
siMhaH kapirgajaH kUrmo godhA cha makarAdayaH || 23||
ka~NkagR^idhrabakashyenabhAsabhallUkabarhiNaH |
haMsasArasachakrAhvakAkolUkAdayaH khagAH || 24||
arvAksrotastu navamaH kShattarekavidho nR^iNAm |
rajo.adhikAH karmaparA duHkhe cha sukhamAninaH || 25||
vaikR^itAstraya evaite devasargashcha sattama |
vaikArikastu yaH proktaH kaumArastUbhayAtmakaH || 26||
devasargashchAShTavidho vibudhAH pitaro.asurAH |
gandharvApsarasaH siddhA yakSharakShAMsi chAraNAH || 27||
bhUtapretapishAchAshcha vidyAdhrAH kinnarAdayaH |
dashaite vidurAkhyAtAH sargAste vishvasR^ikkR^itAH || 28||
ataH paraM pravakShyAmi vaMshAn manvantarANi cha |
evaM rajaHplutaH sraShTA kalpAdiShvAtmabhUrhariH |
sR^ijatyamoghasa~Nkalpa AtmaivAtmAnamAtmanA || 29||
iti shrImadbhAgavate mahApurANe pAramahaMsyAM
saMhitAyAM tR^itIyaskandhe dashamo.adhyAyaH || 10||
\iti
\section{.. OM namo bhagavate vAsudevAya ..}
\section{.. ekAdasho.adhyAyaH \- 11 ..}
maitreya uvAcha
charamaH sadvisheShANAmaneko.asaMyutaH sadA |
paramANuH sa vij~neyo nR^iNAmaikyabhramo yataH || 1||
sata eva padArthasya svarUpAvasthitasya yat |
kaivalyaM paramamahAnavisheSho nirantaraH || 2||
evaM kAlo.apyanumitaH saukShmye sthaulye cha sattama |
saMsthAnabhuktyA bhagavAnavyakto vyaktabhugvibhuH || 3||
sa kAlaH paramANurvai yo bhu~Nkte paramANutAm |
sato.avisheShabhugyastu sa kAlaH paramo mahAn || 4||
aNurdvau paramANU syAttrasareNustrayaH smR^itaH |
jAlArkarashmyavagataH khamevAnupatannagAt || 5||
trasareNutrikaM bhu~Nkte yaH kAlaH sa truTiH smR^itaH |
shatabhAgastu vedhaH syAttaistribhistu lavaH smR^itaH || 6||
nimeShastrilavo j~neya AmnAtaste trayaH kShaNaH |
kShaNAn pa~ncha viduH kAShThAM laghu tA dasha pa~ncha cha || 7||
laghUni vai samAmnAtA dasha pa~ncha cha nADikA |
te dve muhUrtaH praharaH ShaDyAmaH sapta vA nR^iNAm || 8||
dvAdashArdhapalonmAnaM chaturbhishchatura~NgulaiH |
svarNamAShaiH kR^itachChidraM yAvatprasthajalaplutam || 9||
yAmAshchatvArashchatvAro martyAnAmahanI ubhe |
pakShaH pa~nchadashAhAni shuklaH kR^iShNashcha mAnada || 10||
tayoH samuchchayo mAsaH pitR^INAM tadaharnisham |
dvau tAvR^ituH ShaDayanaM dakShiNaM chottaraM divi || 11||
ayane chAhanI prAhurvatsaro dvAdasha smR^itaH |
saMvatsarashataM nR^INAM paramAyurnirUpitam || 12||
graharkShatArA chakrasthaH paramANvAdinA jagat |
saMvatsarAvasAnena paryetyanimiSho vibhuH || 13||
saMvatsaraH parivatsara iDAvatsara eva cha |
anuvatsaro vatsarashcha viduraivaM prabhAShyate || 14||
yaH sR^ijyashaktimurudhochChvasayan svashaktyA
puMso.abhramAya divi dhAvati bhUtabhedaH |
kAlAkhyayA guNamayaM kratubhirvitanvan
tasmai baliM harata vatsarapa~nchakAya || 15||
vidura uvAcha
pitR^idevamanuShyANAmAyuH paramidaM smR^itam |
pareShAM gatimAchakShva ye syuH kalpAdbahirvidaH || 16||
bhagavAn veda kAlasya gatiM bhagavato nanu |
vishvaM vichakShate dhIrA yogarAddhena chakShuShA || 17||
maitreya uvAcha
kR^itaM tretA dvAparaM cha kalishcheti chaturyugam |
divyairdvAdashabhirvarShaiH sAvadhAnaM nirUpitam || 18||
chatvAri trINi dve chaikaM kR^itAdiShu yathAkramam |
sa~NkhyAtAni sahasrANi dviguNAni shatAni cha || 19||
sandhyAMshayorantareNa yaH kAlaH shatasa~NkhyayoH |
tamevAhuryugaM tajj~nA yatra dharmo vidhIyate || 20||
dharmashchatuShpAnmanujAn kR^ite samanuvartate |
sa evAnyeShvadharmeNa vyeti pAdena vardhatA || 21||
trilokyA yugasAhasraM bahirAbrahmaNo dinam |
tAvatyeva nishA tAta yannimIlati vishvasR^ik || 22||
nishAvasAna Arabdho lokakalpo.anuvartate |
yAvaddinaM bhagavato manUn bhu~njaMshchaturdasha || 23||
svaM svaM kAlaM manurbhu~Nkte sAdhikAM hyekasaptatim |
manvantareShu manavastadvaMshyA R^iShayaH surAH |
bhavanti chaiva yugapatsureshAshchAnu ye cha tAn || 24||
eSha dainandinaH sargo brAhmastrailokyavartanaH |
tirya~NnR^ipitR^idevAnAM sambhavo yatra karmabhiH || 25||
manvantareShu bhagavAn bibhratsattvaM svamUrtibhiH |
manvAdibhiridaM vishvamavatyuditapauruShaH || 26||
tamomAtrAmupAdAya pratisaMruddhavikramaH |
kAlenAnugatAsheSha Aste tUShNIM dinAtyaye || 27||
tamevAnvapidhIyante lokA bhUrAdayastrayaH |
nishAyAmanuvR^ittAyAM nirmuktashashibhAskaram || 28||
trilokyAM dahyamAnAyAM shaktyA sa~NkarShaNAgninA |
yAntyUShmaNA maharlokAjjanaM bhR^igvAdayo.arditAH || 29||
tAvattribhuvanaM sadyaH kalpAntaidhitasindhavaH |
plAvayantyutkaTATopachaNDavAteritormayaH || 30||
antaH sa tasmin salila Aste.anantAsano hariH |
yoganidrAnimIlAkShaH stUyamAno janAlayaiH || 31||
evaM vidhairahorAtraiH kAlagatyopalakShitaiH |
apakShitamivAsyApi paramAyurvayaH shatam || 32||
yadardhamAyuShastasya parArdhamabhidhIyate |
pUrvaH parArdho.apakrAnto hyaparo.adya pravartate || 33||
pUrvasyAdau parArdhasya brAhmo nAma mahAnabhUt |
kalpo yatrAbhavadbrahmA shabdabrahmeti yaM viduH || 34||
tasyaiva chAnte kalpo.abhUdyaM pAdmamabhichakShate |
yaddharernAbhisarasa AsIllokasaroruham || 35||
ayaM tu kathitaH kalpo dvitIyasyApi bhArata |
vArAha iti vikhyAto yatrAsItsUkaro hariH || 36||
kAlo.ayaM dviparArdhAkhyo nimeSha upacharyate |
avyAkR^itasyAnantasya hyanAderjagadAtmanaH || 37||
kAlo.ayaM paramANvAdirdviparArdhAnta IshvaraH |
naiveshituM prabhurbhUmna Ishvaro dhAmamAninAm || 38||
vikAraiH sahito yuktairvisheShAdibhirAvR^itaH |
ANDakosho bahirayaM pa~nchAshatkoTi vistR^itaH || 39||
dashottarAdhikairyatra praviShTaH paramANuvat |
lakShyate.antargatAshchAnye koTisho hyaNDarAshayaH || 40||
tadAhurakSharaM brahma sarvakAraNakAraNam |
viShNordhAma paraM sAkShAtpuruShasya mahAtmanaH || 41||
iti shrImadbhAgavate mahApurANe pAramahaMsyAM
saMhitAyAM tR^itIyaskandheekAdasho.adhyAyaH || 11||
\iti
\section{.. OM namo bhagavate vAsudevAya ..}
\section{.. dvAdasho.adhyAyaH \- 12 ..}
maitreya uvAcha
iti te varNitaH kShattaH kAlAkhyaH paramAtmanaH |
mahimA vedagarbho.atha yathAsrAkShInnibodha me || 1||
sasarjAgre.andhatAmisramatha tAmisramAdikR^it |
mahAmohaM cha mohaM cha tamashchAj~nAnavR^ittayaH || 2||
dR^iShTvA pApIyasIM sR^iShTiM nAtmAnaM bahvamanyata |
bhagavad.hdhyAnapUtena manasAnyAM tato.asR^ijat || 3||
sanakaM cha sanandaM cha sanAtanamathAtmabhUH |
sanatkumAraM cha munInniShkriyAnUrdhvaretasaH || 4||
tAn babhAShe svabhUH putrAn prajAH sR^ijata putrakAH |
tannaichChanmokShadharmANo vAsudevaparAyaNAH || 5||
so.avadhyAtaH sutairevaM pratyAkhyAtAnushAsanaiH |
krodhaM durviShahaM jAtaM niyantumupachakrame || 6||
dhiyA nigR^ihyamANo.api bhruvormadhyAtprajApateH |
sadyo.ajAyata tanmanyuH kumAro nIlalohitaH || 7||
sa vai ruroda devAnAM pUrvajo bhagavAn bhavaH |
nAmAni kuru me dhAtaH sthAnAni cha jagadguro || 8||
iti tasya vachaH pAdmo bhagavAn paripAlayan |
abhyadhAdbhadrayA vAchA mA rodIstatkaromi te || 9||
yadarodIH surashreShTha sodvega iva bAlakaH |
tatastvAmabhidhAsyanti nAmnA rudra iti prajAH || 10||
hR^idindriyANyasurvyoma vAyuragnirjalaM mahI |
sUryashchandrastapashchaiva sthAnAnyagre kR^itAni me || 11||
manyurmanurmahinaso mahA~nChiva R^itadhvajaH |
ugraretA bhavaH kAlo vAmadevo dhR^itavrataH || 12||
dhIrvR^ittirushanomA cha niyutsarpirilAmbikA |
irAvatI sudhA dIkShA rudrANyo rudra te striyaH || 13||
gR^ihANaitAni nAmAni sthAnAni cha sayoShaNaH |
ebhiH sR^ija prajA bahvIH prajAnAmasi yatpatiH || 14||
ityAdiShTaH svaguruNA bhagavAnnIlalohitaH |
sattvAkR^itisvabhAvena sasarjAtmasamAH prajAH || 15||
rudrANAM rudrasR^iShTAnAM samantAdgrasatAM jagat |
nishAmyAsa~Nkhyasho yUthAn prajApatirasha~Nkata || 16||
alaM prajAbhiH sR^iShTAbhirIdR^ishIbhiH surottama |
mayA saha dahantIbhirdishashchakShurbhirulbaNaiH || 17||
tapa AtiShTha bhadraM te sarvabhUtasukhAvaham |
tapasaiva yathA pUrvaM sraShTA vishvamidaM bhavAn || 18||
tapasaiva paraM jyotirbhagavantamadhokShajam |
sarvabhUtaguhAvAsama~njasA vindate pumAn || 19||
maitreya uvAcha
evamAtmabhuvA.a.adiShTaH parikramya girAM patim |
bADhamityamumAmantrya vivesha tapase vanam || 20||
athAbhidhyAyataH sargaM dashaputrAH prajaj~nire |
bhagavachChaktiyuktasya lokasantAnahetavaH || 21||
marIchiratrya~Ngirasau pulastyaH pulahaH kratuH |
bhR^igurvasiShTho dakShashcha dashamastatra nAradaH || 22||
utsa~NgAnnArado jaj~ne dakSho.a~NguShThAtsvayambhuvaH |
prANAdvasiShThaH sa~njAto bhR^igustvachi karAtkratuH || 23||
pulaho nAbhito jaj~ne pulastyaH karNayoH R^iShiH |
a~NgirA mukhato.akShNo.atrirmarIchirmanaso.abhavat || 24||
dharmaH stanAddakShiNato yatra nArAyaNaH svayam |
adharmaH pR^iShThato yasmAnmR^ityurlokabhaya~NkaraH || 25||
hR^idi kAmo bhruvaH krodho lobhashchAdharadachChadAt |
AsyAdvAksindhavo meDhrAnnirR^itiH pAyoraghAshrayaH || 26||
ChAyAyAH kardamo jaj~ne devahUtyAH patiH prabhuH |
manaso dehatashchedaM jaj~ne vishvakR^ito jagat || 27||
vAchaM duhitaraM tanvIM svayambhUrharatIM manaH |
akAmAM chakame kShattaH sakAma iti naH shrutam || 28||
tamadharme kR^itamatiM vilokya pitaraM sutAH |
marIchimukhyA munayo vishrambhAtpratyabodhayan || 29||
naitatpUrvaiH kR^itaM tvadya na kariShyanti chApare |
yattvaM duhitaraM gachCheranigR^ihyA~NgajaM prabhuH || 30||
tejIyasAmapi hyetanna sushlokyaM jagadguro |
yadvR^ittamanutiShThan vai lokaH kShemAya kalpate || 31||
tasmai namo bhagavate ya idaM svena rochiShA |
AtmasthaM vya~njayAmAsa sa dharmaM pAtumarhati || 32||
sa itthaM gR^iNataH putrAn puro dR^iShTvA prajApatIn |
prajApatipatistanvaM tatyAja vrIDitastadA |
tAM disho jagR^ihurghorAM nIhAraM yadvidustamaH || 33||
kadAchid.hdhyAyataH sraShTurvedA AsaMshchaturmukhAt |
kathaM srakShyAmyahaM lokAn samavetAnyathA purA || 34||
chAturhotraM karmatantramupavedanayaiH saha |
dharmasya pAdAshchatvArastathaivAshramavR^ittayaH || 35||
vidura uvAcha
sa vai vishvasR^ijAmIsho vedAdIn mukhato.asR^ijat |
yadyadyenAsR^ijaddevastanme brUhi tapodhana || 36||
maitreya uvAcha
R^igyajuHsAmAtharvAkhyAn vedAn pUrvAdibhirmukhaiH |
shAstramijyAM stutistomaM prAyashchittaM vyadhAtkramAt || 37||
AyurvedaM dhanurvedaM gAndharvaM vedamAtmanaH |
sthApatyaM chAsR^ijadvedaM kramAtpUrvAdibhirmukhaiH || 38||
itihAsapurANAni pa~nchamaM vedamIshvaraH |
sarvebhya eva vaktrebhyaH sasR^ije sarvadarshanaH || 39||
ShoDashyukthau pUrvavaktrAtpurIShyagniShTutAvatha |
AptoryAmAtirAtrau cha vAjapeyaM sagosavam || 40||
vidyA dAnaM tapaH satyaM dharmasyeti padAni cha |
AshramAMshcha yathAsa~NkhyamasR^ijatsaha vR^ittibhiH || 41||
sAvitraM prAjApatyaM cha brAhmaM chAtha bR^ihattathA |
vArtAsa~nchayashAlInashilo~nCha iti vai gR^ihe || 42||
vaikhAnasA vAlakhilyaudumbarAH phenapA vane |
nyAse kuTIchakaH pUrvaM bahvodo haMsaniShkriyau || 43||
AnvIkShikI trayI vArtA daNDanItistathaiva cha |
evaM vyAhR^itayashchAsan praNavo hyasya dahrataH || 44||
tasyoShNigAsIllomabhyo gAyatrI cha tvacho vibhoH |
triShTummAMsAtsnuto.anuShTubjagatyasthnaH prajApateH || 45||
majjAyAH pa~NktirutpannA bR^ihatI prANato.abhavat |
sparshastasyAbhavajjIvaH svaro deha udAhR^itaH || 46||
UShmANamindriyANyAhurantaHsthA balamAtmanaH |
svarAH saptavihAreNa bhavanti sma prajApateH || 47||
shabdabrahmAtmanastasya vyaktAvyaktAtmanaH paraH |
brahmAvabhAti vitato nAnAshaktyupabR^iMhitaH || 48||
tato.aparAmupAdAya sa sargAya mano dadhe |
R^iShINAM bhUrivIryANAmapi sargamavistR^itam || 49||
j~nAtvA taddhR^idaye bhUyashchintayAmAsa kaurava |
aho adbhutametanme vyApR^itasyApi nityadA || 50||
na hyedhante prajA nUnaM daivamatra vighAtakam |
evaM yuktakR^itastasya daivaM chAvekShatastadA || 51||
kasya rUpamabhUddvedhA yatkAyamabhichakShate |
tAbhyAM rUpavibhAgAbhyAM mithunaM samapadyata || 52||
yastu tatra pumAn so.abhUnmanuH svAyambhuvaH svarAT |
strI yA.a.asIchChatarUpA.a.akhyA mahiShyasya mahAtmanaH || 53||
tadA mithunadharmeNa prajA hyedhAmbabhUvire |
sa chApi shatarUpAyAM pa~nchApatyAnyajIjanat || 54||
priyavratottAnapAdau tisraH kanyAshcha bhArata |
AkUtirdevahUtishcha prasUtiriti sattama || 55||
AkUtiM ruchaye prAdAtkardamAya tu madhyamAm |
dakShAyAdAtprasUtiM cha yata ApUritaM jagat || 56||
iti shrImadbhAgavate mahApurANe pAramahaMsyAM
saMhitAyAntR^itIyaskandhe dvAdasho.adhyAyaH || 12||
\iti
\section{.. OM namo bhagavate vAsudevAya ..}
\section{.. trayodasho.adhyAyaH \- 13 ..}
shrIshuka uvAcha
nishamya vAchaM vadato muneH puNyatamAM nR^ipa |
bhUyaH paprachCha kauravyo vAsudevakathAdR^itaH || 1||
vidura uvAcha
sa vai svAyambhuvaH samrAT priyaH putraH svayambhuvaH |
pratilabhya priyAM patnIM kiM chakAra tato mune || 2||
charitaM tasya rAjarSherAdirAjasya sattama |
brUhi me shraddadhAnAya viShvaksenAshrayo hyasau || 3||
shrutasya puMsAM suchirashramasya
nanva~njasA sUribhirIDito.arthaH |
yattadguNAnushravaNaM mukunda\-
pAdAravindaM hR^idayeShu yeShAm || 4||
shrIshuka uvAcha
iti bruvANaM viduraM vinItaM
sahasrashIrShNashcharaNopadhAnam |
prahR^iShTaromA bhagavatkathAyAM
praNIyamAno munirabhyachaShTa || 5||
maitreya uvAcha
yadA svabhAryayA sAkaM jAtaH svAyambhuvo manuH |
prA~njaliH praNatashchedaM vedagarbhamabhAShata || 6||
tvamekaH sarvabhUtAnAM janmakR^idvR^ittidaH pitA |
athApi naH prajAnAM te shushrUShA kena vA bhavet || 7||
tadvidhehi namastubhyaM karmasvIDyAtmashaktiShu |
yatkR^itveha yasho viShvagamutra cha bhavedgatiH || 8||
brahmovAcha
prItastubhyamahaM tAta svasti stAdvAM kShitIshvara |
yannirvyalIkena hR^idA shAdhi me.atyAtmanArpitam || 9||
etAvatyAtmajairvIra kAryA hyapachitirgurau |
shaktyApramattairgR^ihyeta sAdaraM gatamatsaraiH || 10||
sa tvamasyAmapatyAni sadR^ishAnyAtmano guNaiH |
utpAdya shAsa dharmeNa gAM yaj~naiH puruShaM yaja || 11||
paraM shushrUShaNaM mahyaM syAtprajArakShayA nR^ipa |
bhagavAMste prajAbharturhR^iShIkesho.anutuShyati || 12||
yeShAM na tuShTo bhagavAn yaj~nali~Ngo janArdanaH |
teShAM shramo hyapArthAya yadAtmA nAdR^itaH svayam || 13||
manuruvAcha
Adeshe.ahaM bhagavato varteyAmIvasUdana |
sthAnaM tvihAnujAnIhi prajAnAM mama cha prabho || 14||
yadokaH sarvasattvAnAM mahI magnA mahAmbhasi |
asyA uddharaNe yatno deva devyA vidhIyatAm || 15||
maitreya uvAcha
parameShThI tvapAM madhye tathA sannAmavekShya gAm |
kathamenAM samunneShya iti dadhyau dhiyA chiram || 16||
sR^ijato me kShitirvArbhiH plAvyamAnA rasAM gatA |
athAtra kimanuShTheyamasmAbhiH sargayojitaiH |
yasyAhaM hR^idayAdAsaM sa Isho vidadhAtu me || 17||
ityabhidhyAyato nAsAvivarAtsahasAnagha |
varAhatoko niragAda~NguShThaparimANakaH || 18||
tasyAbhipashyataH khasthaH kShaNena kila bhArata |
gajamAtraH pravavR^idhe tadadbhutamabhUnmahat || 19||
marIchipramukhairvipraiH kumArairmanunA saha |
dR^iShTvA tatsaukaraM rUpaM tarkayAmAsa chitradhA || 20||
kimetatsaukaravyAjaM sattvaM divyamavasthitam |
aho batAshcharyamidaM nAsAyA me viniHsR^itam || 21||
dR^iShTo.a~NguShThashiromAtraH kShaNAdgaNDashilAsamaH |
api svidbhagavAneSha yaj~no me khedayanmanaH || 22||
iti mImAMsatastasya brahmaNaH saha sUnubhiH |
bhagavAn yaj~napuruSho jagarjAgendrasannibhaH || 23||
brahmANaM harShayAmAsa haristAMshcha dvijottamAn |
svagarjitena kakubhaH pratisvanayatA vibhuH || 24||
nishamya te ghargharitaM svakheda\-
kShayiShNu mAyAmayasUkarasya |
janastapaHsatyanivAsinaste
tribhiH pavitrairmunayo.agR^iNan sma || 25||
teShAM satAM vedavitAnamUrtiH
brahmAvadhAryAtmaguNAnuvAdam |
vinadya bhUyo vibudhodayAya
gajendralIlo jalamAvivesha || 26||
utkShiptavAlaH khacharaH kaThoraH
saTA vidhunvan khararomashatvak |
khurAhatAbhraH sitadaMShTra IkShA\-
jyotirbabhAse bhagavAn mahIdhraH || 27||
ghrANena pR^ithvyAH padavIM vijighran
kroDApadeshaH svayamadhvarA~NgaH |
karAladaMShTro.apyakarAladR^igbhyA\-
mudvIkShya viprAn gR^iNato.avishatkam || 28||
sa vajrakUTA~NganipAtavega\-
vishIrNakukShiH stanayannudanvAn |
utsR^iShTadIrghormibhujairivArta\-
shchukrosha yaj~neshvara pAhi meti || 29||
khuraiH kShuraprairdarayaMstadApa
utpArapAraM triparU rasAyAm |
dadarsha gAM tatra suShupsuragre
yAM jIvadhAnIM svayamabhyadhatta || 30||
(pAtAlamUleshvarabhogasaMhatau
vinyasya pAdau pR^ithivIM cha bibhrataH |
yasyopamAno na babhUva so.achyuto
mamAstu mA~NgalyavivR^iddhaye hariH ||)
svadaMShTrayoddhR^itya mahIM nimagnAM
sa utthitaH saMruruche rasAyAH |
tatrApi daityaM gadayA.a.apatantaM
sunAbhasandIpitatIvramanyuH || 31||
jaghAna rundhAnamasahyavikramaM
sa lIlayebhaM mR^igarADivAmbhasi |
tadraktapa~NkA~NkitagaNDatuNDo
yathA gajendro jagatIM vibhindan || 32||
tamAlanIlaM sitadantakoTyA
kShmAmutkShipantaM gajalIlayA~Nga |
praj~nAya baddhA~njalayo.anuvAkaiH
viri~nchimukhyA upatasthurIsham || 33||
R^iShaya UchuH
jitaM jitaM te.ajitayaj~nabhAvana
trayIM tanuM svAM paridhunvate namaH |
yadromagarteShu nililyuradhvarA\-
stasmai namaH kAraNasUkarAya te || 34||
rUpaM tavaitannanu duShkR^itAtmanAM
durdarshanaM deva yadadhvarAtmakam |
ChandAMsi yasya tvachi barhiroma\-
svAjyaM dR^ishi tva~NghriShu chAturhotram || 35||
sraktuNDa AsItsruva Isha nAsayo\-
riDodarechamasAH karNarandhre |
prAshitramAsye grasane grahAstu te
yachcharvaNaM te bhagavannagnihotram || 36||
dIkShAnujanmopasadaH shirodharaM
tvaM prAyaNIyodayanIyadaMShTraH |
jihvA pravargyastava shIrShakaM kratoH
sabhyAvasathyaM chitayo.asavo hi te || 37||
somastu retaH savanAnyavasthitiH
saMsthA vibhedAstava deva dhAtavaH |
satrANi sarvANi sharIrasandhi\-
stvaM sarvayaj~nakraturiShTibandhanaH || 38||
namo namaste.akhilamantradevatA\-
dravyAya sarvakratave kriyAtmane |
vairAgyabhaktyA.a.atmajayAnubhAvita\-
j~nAnAya vidyAgurave namo namaH || 39||
daMShTrAgrakoTyA bhagavaMstvayA dhR^itA
virAjate bhUdhara bhUH sabhUdharA |
yathA vanAnniHsarato datA dhR^itA
mata~Ngajendrasya sapatrapadminI || 40||
trayImayaM rUpamidaM cha saukaraM
bhUmaNDalenAtha datA dhR^itena te |
chakAsti shR^i~NgoDhaghanena bhUyasA
kulAchalendrasya yathaiva vibhramaH || 41||
saMsthApayainAM jagatAM satasthuShAM
lokAya patnImasi mAtaraM pitA |
vidhema chAsyai namasA saha tvayA
yasyAM svatejo.agnimivAraNAvadhAH || 42||
kaH shraddadhItAnyatamastava prabho
rasAM gatAyA bhuva udvibarhaNam |
na vismayo.asau tvayi vishvavismaye
yo mAyayedaM sasR^ije.ativismayam || 43||
vidhunvatA vedamayaM nijaM vapuH
janastapaHsatyanivAsino vayam |
saTAshikhoddhUtashivAmbubindubhiH
vimR^ijyamAnA bhR^ishamIsha pAvitAH || 45||
sa vai bata bhraShTamatistavaiSha te
yaH karmaNAM pAramapArakarmaNaH |
yadyogamAyAguNayogamohitaM
vishvaM samastaM bhagavan vidhehi sham || 45||
maitreya uvAcha
ityupasthIyamAnastaiH munibhirbrahmavAdibhiH |
salile svakhurAkrAnta upAdhattAvitAvanim || 46||
sa itthaM bhagavAnurvIM viShvaksenaH prajApatiH |
rasAyA lIlayonnItAmapsu nyasya yayau hariH || 47||
ya evametAM harimedhaso hareH
kathAM subhadrAM kathanIyamAyinaH |
shR^iNvIta bhaktyA shravayeta voshatIM
janArdano.asyAshu hR^idi prasIdati || 48||
tasmin prasanne sakalAshiShAM prabhau
kiM durlabhaM tAbhiralaM lavAtmabhiH |
ananyadR^iShTyA bhajatAM guhAshayaH
svayaM vidhatte svagatiM paraH parAm || 49||
ko nAma loke puruShArthasAravit
purA kathAnAM bhagavatkathAsudhAm |
ApIya karNA~njalibhirbhavApahA\-
maho virajyeta vinA naretaram || 50||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe varAhaprAdurbhAvAnuvarNane trayodasho.adhyAyaH || 13||
\iti
\section{.. OM namo bhagavate vAsudevAya ..}
\section{.. chaturdasho.adhyAyaH \- 14 ..}
shrIshuka uvAcha
nishamya kauShAraviNopavarNitAM
hareH kathAM kAraNasUkarAtmanaH |
punaH sa paprachCha tamudyatA~njali\-
rnachAtitR^ipto viduro dhR^itavrataH || 1||
vidura uvAcha
tenaiva tu munishreShTha hariNA yaj~namUrtinA |
Adidaityo hiraNyAkSho hata ityanushushruma || 2||
tasya choddharataH kShoNIM svadaMShTrAgreNa lIlayA |
daityarAjasya cha brahman kasmAddhetorabhUnmR^idhaH || 3||
(shraddadhAnAya bhaktAya brUhi tajjanma vistaram |
R^iShe na tR^ipyati manaH paraM kautUhalaM hi me ||)
maitreya uvAcha
sAdhu vIra tvayA pR^iShTamavatArakathAM hareH |
yattvaM pR^ichChasi martyAnAM mR^ityupAshavishAtanIm || 4||
yayottAnapadaH putro muninA gItayArbhakaH |
mR^ityoH kR^itvaiva mUrdhnya~NghrimAruroha hareH padam || 5||
athAtrApItihAso.ayaM shruto me varNitaH purA |
brahmaNA devadevena devAnAmanupR^ichChatAm || 6||
ditirdAkShAyaNI kShattarmArIchaM kashyapaM patim |
apatyakAmA chakame sandhyAyAM hR^ichChayArditA || 7||
iShTvAgnijihvaM payasA puruShaM yajuShAM patim |
nimlochatyarka AsInamagnyagAre samAhitam || 8||
ditiruvAcha
eSha mAM tvatkR^ite vidvan kAma AttasharAsanaH |
dunoti dInAM vikramya rambhAmiva mata~NgajaH || 9||
tadbhavAn dahyamAnAyAM sapatnInAM samR^iddhibhiH |
prajAvatInAM bhadraM te mayyAyu~NktAmanugraham || 10||
bhartaryAptorumAnAnAM lokAnAvishate yashaH |
patirbhavadvidho yAsAM prajayA nanu jAyate || 11||
purA pitA no bhagavAn dakSho duhitR^ivatsalaH |
kaM vR^iNIta varaM vatsA ityapR^ichChata naH pR^ithak || 12||
sa viditvA.a.atmajAnAM no bhAvaM santAnabhAvanaH |
trayodashAdadAttAsAM yAste shIlamanuvratAH || 13||
atha me kuru kalyANa kAmaM ka~njavilochana |
ArtopasarpaNaM bhUmannamoghaM hi mahIyasi || 14||
iti tAM vIra mArIchaH kR^ipaNAM bahubhAShiNIm |
pratyAhAnunayan vAchA pravR^iddhAna~NgakashmalAm || 15||
eSha te.ahaM vidhAsyAmi priyaM bhIru yadichChasi |
tasyAH kAmaM na kaH kuryAtsiddhistraivargikI yataH || 16||
sarvAshramAnupAdAya svAshrameNa kalatravAn |
vyasanArNavamatyeti jalayAnairyathArNavam || 17||
yAmAhurAtmano hyardhaM shreyaskAmasya mAnini |
yasyAM svadhuramadhyasya pumAMshcharati vijvaraH || 18||
yAmAshrityendriyArAtIn durjayAnitarAshramaiH |
vayaM jayema helAbhirdasyUn durgapatiryathA || 19||
na vayaM prabhavastAM tvAmanukartuM gR^iheshvari |
apyAyuShA vA kArtsnyena ye chAnye guNagR^idhnavaH || 20||
athApi kAmametaM te prajAtyai karavANyalam |
yathA mAM nAtirochanti muhUrtaM pratipAlaya || 21||
eShA ghoratamA velA ghorANAM ghoradarshanA |
charanti yasyAM bhUtAni bhUteshAnucharANi ha || 22||
etasyAM sAdhvi sandhyAyAM bhagavAn bhUtabhAvanaH |
parIto bhUtaparShadbhirvR^iSheNATati bhUtarAT || 23||
shmashAnachakrAniladhUlidhUmra\-
vikIrNavidyotajaTAkalApaH |
bhasmAvaguNThAmalarukmadeho
devastribhiH pashyati devaraste || 24||
na yasya loke svajanaH paro vA
nAtyAdR^ito nota kashchidvigarhyaH |
vayaM vratairyachcharaNApaviddhA\-
mAshAsmahe.ajAM bata bhuktabhogAm || 25||
yasyAnavadyAcharitaM manIShiNo
gR^iNantyavidyApaTalaM bibhitsavaH |
nirastasAmyAtishayo.api yatsvayaM
pishAchacharyAmacharadgatiH satAm || 26||
hasanti yasyAcharitaM hi durbhagAH
svAtman ratasyAviduShaH samIhitam |
yairvastramAlyAbharaNAnulepanaiH
shvabhojanaM svAtmatayopalAlitam || 27||
brahmAdayo yatkR^itasetupAlA
yatkAraNaM vishvamidaM cha mAyA |
Aj~nAkarI tasya pishAchacharyA
aho vibhUmnashcharitaM viDambanam || 28||
maitreya uvAcha
saivaM saMvidite bhartrA manmathonmathitendriyA |
jagrAha vAso brahmarShervR^iShalIva gatatrapA || 29||
sa viditvAtha bhAryAyAstaM nirbandhaM vikarmaNi |
natvA diShTAya rahasi tayAthopavivesha ha || 30||
athopaspR^ishya salilaM prANAnAyamya vAgyataH |
dhyAya~njajApa virajaM brahmajyotiH sanAtanam || 31||
ditistu vrIDitA tena karmAvadyena bhArata |
upasa~Ngamya viprarShimadhomukhyabhyabhAShata || 32||
ditiruvAcha
mA me garbhamimaM brahman bhUtAnAmR^iShabho.avadhIt |
rudraH patirhi bhUtAnAM yasyAkaravamaMhasam || 33||
namo rudrAya mahate devAyogrAya mIDhuShe |
shivAya nyastadaNDAya dhR^itadaNDAya manyave || 34||
sa naH prasIdatAM bhAmo bhagavAnurvanugrahaH |
vyAdhasyApyanukampyAnAM strINAM devaH satIpatiH || 35||
maitreya uvAcha
svasargasyAshiShaM lokyAmAshAsAnAM pravepatIm |
nivR^ittasandhyAniyamo bhAryAmAha prajApatiH || 36||
kashyapa uvAcha
aprAyatyAdAtmanaste doShAn mauhUrtikAduta |
mannideshAtichAreNa devAnAM chAtihelanAt || 37||
bhaviShyatastavAbhadrAvabhadre jATharAdhamau |
lokAn sapAlAMstrIMshchaNDi muhurAkrandayiShyataH || 38||
prANinAM hanyamAnAnAM dInAnAmakR^itAgasAm |
strINAM nigR^ihyamANAnAM kopiteShu mahAtmasu || 39||
tadA vishveshvaraH kruddho bhagavAn lokabhAvanaH |
haniShyatyavatIryAsau yathAdrIn shataparvadhR^ik || 40||
ditiruvAcha
vadhaM bhagavatA sAkShAtsunAbhodArabAhunA |
AshAse putrayormahyaM mA kruddhAdbrAhmaNAdvibho || 41||
na brahmadaNDadagddhasya na bhUtabhayadasya cha |
nArakAshchAnugR^ihNanti yAM yAM yonimasau gataH || 42||
kashyapa uvAcha
kR^itashokAnutApena sadyaH pratyavamarshanAt |
bhagavatyurumAnAchcha bhave mayyapi chAdarAt || 43||
putrasyaiva tu putrANAM bhavitaikaH satAM mataH |
gAsyanti yadyashaH shuddhaM bhagavadyashasA samam || 44||
yogairhemeva durvarNaM bhAvayiShyanti sAdhavaH |
nirvairAdibhirAtmAnaM yachChIlamanuvartitum || 45||
yatprasAdAdidaM vishvaM prasIdati yadAtmakam |
sa svadR^igbhagavAn yasya toShyate.ananyayA dR^ishA || 46||
sa vai mahAbhAgavato mahAtmA
mahAnubhAvo mahatAM mahiShThaH |
pravR^iddhabhaktyA hyanubhAvitAshaye
niveshya vaikuNThamimaM vihAsyati || 47||
alampaTaH shIladharo guNAkaro
hR^iShTaH parard.hdhyA vyathito duHkhiteShu |
abhUtashatrurjagataH shokahartA
naidAghikaM tApamivoDurAjaH || 48||
antarbahishchAmalamabjanetraM
svapUruShechChAnugR^ihItarUpam |
pautrastava shrIlalanAlalAmaM
draShTA sphuratkuNDalamaNDitAnanam || 49||
maitreya uvAcha
shrutvA bhAgavataM pautramamodata ditirbhR^isham |
putrayoshcha vadhaM kR^iShNAdviditvA.a.asInmahAmanAH || 50||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe ditikashyapasaMvAde chaturdasho.adhyAyaH || 14||
\iti
\section{.. OM namo bhagavate vAsudevAya ..}
\section{.. pa~nchadasho.adhyAyaH \- 15 ..}
maitreya uvAcha
prAjApatyaM tu tattejaH paratejohanaM ditiH |
dadhAra varShANi shataM sha~NkamAnA surArdanAt || 1||
loke tena hatAloke lokapAlA hataujasaH |
nyavedayan vishvasR^ije dhvAntavyatikaraM dishAm || 2||
devA UchuH
tama etadvibho vettha saMvignA yadvayaM bhR^isham |
na hyavyaktaM bhagavataH kAlenAspR^iShTavartmanaH || 3||
devadeva jagaddhAtarlokanAthashikhAmaNe |
pareShAmapareShAM tvaM bhUtAnAmasi bhAvavit || 4||
namo vij~nAnavIryAya mAyayedamupeyuShe |
gR^ihItaguNabhedAya namaste.avyaktayonaye || 5||
ye tvAnanyena bhAvena bhAvayantyAtmabhAvanam |
Atmani protabhuvanaM paraM sadasadAtmakam || 6||
teShAM supakvayogAnAM jitashvAsendriyAtmanAm |
labdhayuShmatprasAdAnAM na kutashchitparAbhavaH || 7||
yasya vAchA prajAH sarvA gAvastantyeva yantritAH |
haranti balimAyattAstasmai mukhyAya te namaH || 8||
sa tvaM vidhatsva shaM bhUmaMstamasA luptakarmaNAm |
adabhradayayA dR^iShTyA ApannAnarhasIkShitum || 9||
eSha deva ditergarbha ojaH kAshyapamarpitam |
dishastimirayan sarvA vardhate.agnirivaidhasi || 10||
maitreya uvAcha
sa prahasya mahAbAho bhagavAn shabdagocharaH |
pratyAchaShTAtmabhUrdevAn prINan ruchirayA girA || 11||
brahmovAcha
mAnasA me sutA yuShmatpUrvajAH sanakAdayaH |
cherurvihAyasA lokAllokeShu vigataspR^ihAH || 12||
ta ekadA bhagavato vaikuNThasyAmalAtmanaH |
yayurvaikuNThanilayaM sarvalokanamaskR^itam || 13||
vasanti yatra puruShAH sarve vaikuNThamUrtayaH |
ye.animittanimittena dharmeNArAdhayan harim || 14||
yatra chAdyaH pumAnAste bhagavAn shabdagocharaH |
sattvaM viShTabhya virajaM svAnAM no mR^iDayan vR^iShaH || 15||
yatra naiHshreyasaM nAma vanaM kAmadughairdrumaiH |
sarvartushrIbhirvibhrAjatkaivalyamiva mUrtimat || 16||
vaimAnikAH salalanAshcharitAni yatra
gAyanti yatra shamalakShapaNAni bhartuH |
antarjale.anuvikasanmadhumAdhavInAM
gandhena khaNDitadhiyo.apyanilaM kShipantaH || 17||
pArAvatAnyabhR^itasArasachakravAka\-
dAtyUhahaMsashukatittiribarhiNAM yaH |
kolAhalo viramate.achiramAtramuchchaiH
bhR^i~NgAdhipe harikathAmiva gAyamAne || 18||
mandArakundakurabotpalachampakArNa\-
punnAganAgabakulAmbujapArijAtAH |
gandhe.archite tulasikAbharaNena tasyA
yasmiMstapaH sumanaso bahu mAnayanti || 19||
yatsa~NkulaM haripadAnatimAtradR^iShTai\-
rvaidUryamArakatahemamayairvimAnaiH |
yeShAM bR^ihatkaTitaTAH smitashobhimukhyaH
kR^iShNAtmanAM na raja AdadhurutsmayAdyaiH || 20||
shrI rUpiNI kvaNayatI charaNAravindaM
lIlAmbujena harisadmani muktadoShA |
saMlakShyate sphaTikakuDya upetahemni
sammArjatIva yadanugrahaNe.anyayatnaH || 21||
vApIShu vidrumataTAsvamalAmR^itApsu
preShyAnvitA nijavane tulasIbhirIsham |
abhyarchatI svalakamunnasamIkShya vaktra\-
muchCheShitaM bhagavatetyamatA~Nga yachChrIH || 22||
yanna vrajantyaghabhido rachanAnuvAdAt
shR^iNvanti ye.anyaviShayAH kukathA matighnIH |
yAstu shrutA hatabhagairnR^ibhirAttasArA\-
stAMstAn kShipantyasharaNeShu tamaHsu hanta || 23||
ye.abhyarthitAmapi cha no nR^igatiM prapannAH
j~nAnaM cha tattvaviShayaM saha dharma yatra |
nArAdhanaM bhagavato vitarantyamuShya
sammohitA vitatayA bata mAyayA te || 24||
yachcha vrajantyanimiShAmR^iShabhAnuvR^ittyA
dUre yamA hyupari naH spR^ihaNIyashIlAH |
bharturmithaH suyashasaH kathanAnurAga\-
vaiklavyabAShpakalayA pulakIkR^itA~NgAH || 25||
tadvishvagurvadhikR^itaM bhuvanaikavandyaM
divyaM vichitravibudhAgryavimAnashochiH |
ApuH parAM mudamapUrvamupetya yoga\-
mAyAbalena munayastadatho vikuNTham || 26||
tasminnatItya munayaH ShaDasajjamAnAH
kakShAH samAnavayasAvatha saptamAyAm |
devAvachakShata gR^ihItagadau parArdhya\-
keyUrakuNDalakirITaviTa~NkaveShau || 27||
mattadvirephavanamAlikayA nivItau
vinyastayAsitachatuShTayabAhumadhye |
vaktraM bhruvA kuTilayA sphuTanirgamAbhyAM
raktekShaNena cha manAgrabhasaM dadhAnau || 28||
dvAryetayornivivishurmiShatorapR^iShTvA
pUrvA yathA puraTavajrakapATikA yAH |
sarvatra te.aviShamayA munayaH svadR^iShTyA
ye sa~ncharantyavihatA vigatAbhisha~NkAH || 29||
tAn vIkShya vAtarashanAMshchaturaH kumArAn
vR^iddhAn dashArdhavayaso viditAtmatattvAn |
vetreNa chAskhalayatAmatadarhaNAMstau
tejo vihasya bhagavatpratikUlashIlau || 30||
tAbhyAM miShatsvanimiSheShu niShidhyamAnAH
svarhattamA hyapi hareH pratihArapAbhyAm |
UchussuhR^ittamadidR^ikShitabha~Nga IShat
kAmAnujena sahasA ta upaplutAkShAH || 31||
munaya UchuH
ko vAmihaitya bhagavatparicharyayochchaiH
taddharmiNAM nivasatAM viShamaH svabhAvaH |
tasmin prashAntapuruShe gatavigrahe vAM
ko vA.a.atmavatkuhakayoH parisha~NkanIyaH || 32||
na hyantaraM bhagavatIha samastakukShA\-
vAtmAnamAtmani nabho nabhasIva dhIrAH |
pashyanti yatra yuvayoH surali~NginoH kiM
vyutpAditaM hyudarabhedi bhayaM yato.asya || 33||
tadvAmamuShya paramasya vikuNTha bhartuH
kartuM prakR^iShTamiha dhImahi mandadhIbhyAm |
lokAnito vrajatamantarabhAvadR^iShTyA
pApIyasastraya ime ripavo.asya yatra || 34||
teShAmitIritamubhAvavadhArya ghoraM
taM brahmadaNDamanivAraNamastrapUgaiH |
sadyo hareranucharAvurubibhyatastat
pAdagrahAvapatatAmatikAtareNa || 35||
bhUyAdaghoni bhagavadbhirakAri daNDo
yo nau hareta surahelanamapyasheSham |
mA vo.anutApakalayA bhagavatsmR^itighno
moho bhavediha tu nau vrajatoradho.adhaH || 36||
evaM tadaiva bhagavAnaravindanAbhaH
svAnAM vibudhya sadatikramamAryahR^idyaH |
tasminyayau paramahaMsamahAmunInAM
anveShaNIyacharaNau chalayan saha shrIH || 37||
taM tvAgataM pratihR^itaupayikaM svapumbhiH
te.achakShatAkShaviShayaM svasamAdhibhAgyam |
haMsashriyorvyajanayoH shivavAyulola\-
chChubhrAtapatrashashikesarashIkarAmbum || 38||
kR^itsnaprasAdasumukhaM spR^ihaNIyadhAma\-
snehAvalokakalayA hR^idi saMspR^ishantam |
shyAme pR^ithAvurasi shobhitayA shriyAsva\-
shchUDAmaNiM subhagayantamivAtmadhiShNyam || 39||
pItAMshuke pR^ithu nitambini visphurantyA
kA~nchyAlibhirvirutayA vanamAlayA cha |
valguprakoShThavalayaM vinatAsutAMse
vinyastahastamitareNa dhunAnamabjam || 40||
vidyutkShipan makarakuNDalamaNDanArha\-
gaNDasthalonnasamukhaM maNimatkirITam |
dordaNDaShaNDavivare haratA parArdhya\-
hAreNa kandharagatena cha kaustubhena || 41||
atropasR^iShTamiti chotsmitamindirAyAH
svAnAM dhiyA virachitaM bahu sauShThavADhyam |
mahyaM bhavasya bhavatAM cha bhajantama~NgaM
nemurnirIkShya na vitR^iptadR^isho mudA kaiH || 42||
tasyAravindanayanasya padAravinda\-
ki~njalkamishratulasImakarandavAyuH |
antargataH svavivareNa chakAra teShAM
sa~NkShobhamakSharajuShAmapi chittatanvoH || 43||
te vA amuShya vadanAsitapadmakosha\-
mudvIkShya sundaratarAdharakundahAsam |
labdhAshiShaH punaravekShya tadIyama~Nghri\-
dvandvaM nakhAruNamaNishrayaNaM nidadhyuH || 44||
puMsAM gatiM mR^igayatAmiha yogamArgaiH
dhyAnAspadaM bahu mataM nayanAbhirAmam |
pauMsnaM vapurdarshayAnamananyasiddhai\-
rautpattikaiH samagR^iNan yutamaShTabhogaiH || 45||
kumArA UchuH
yo.antarhito hR^idi gato.api durAtmanAM tvaM
so.adyaiva no nayanamUlamananta rAddhaH |
yarhyeva karNavivareNa guhAM gato naH
pitrAnuvarNitarahA bhavadudbhavena || 46||
taM tvAM vidAma bhagavan paramAtmatattvaM
sattvena samprati ratiM rachayantameShAm |
tatte.anutApaviditairdR^iDhabhaktiyogai\-
rudgranthayo hR^idi vidurmunayo virAgAH || 47||
nAtyantikaM vigaNayantyapi te prasAdaM
kintvanyadarpitabhayaM bhruva unnayaiste |
ye.a~Nga tvada~NghrisharaNA bhavataH kathAyAH
kIrtanyatIrthayashasaH kushalA rasaj~nAH || 48||
kAmaM bhavaH svavR^ijinairnirayeShu naH stA\-
chcheto.alivadyadi nu te padayo rameta |
vAchashcha nastulasivadyadi te.a~NghrishobhAH
pUryeta te guNagaNairyadi karNarandhraH || 49||
prAdushchakartha yadidaM puruhUta rUpaM
tenesha nirvR^itimavApuralaM dR^isho naH |
tasmA idaM bhagavate nama idvidhema
yo.anAtmanAM durudayo bhagavAn pratItaH || 50||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe jayavijayayoH sanakAdishApo nAma
pa~nchadasho.adhyAyaH || 15||
\iti
\section{.. OM namo bhagavate vAsudevAya ..}
\section{.. ShoDasho.adhyAyaH \- 16 ..}
brahmovAcha
iti tadgR^iNatAM teShAM munInAM yogadharmiNAm |
pratinandya jagAdedaM vikuNThanilayo vibhuH || 1||
shrIbhagavAnuvAcha
etau tau pArShadau mahyaM jayo vijaya eva cha |
kadarthIkR^itya mAM yadvo bahvakrAtAmatikramam || 2||
yastvetayordhR^ito daNDo bhavadbhirmAmanuvrataiH |
sa evAnumato.asmAbhirmunayo devahelanAt || 3||
tadvaH prasAdayAmyadya brahma daivaM paraM hi me |
taddhItyAtmakR^itaM manye yatsvapumbhirasatkR^itAH || 4||
yannAmAni cha gR^ihNAti loko bhR^itye kR^itAgasi |
so.asAdhuvAdastatkIrtiM hanti tvachamivAmayaH || 5||
yasyAmR^itAmalayashaH shravaNAvagAhaH
sadyaH punAti jagadAshvapachAdvikuNThaH |
so.ahaM bhavadbhya upalabdhasutIrthakIrti\-
shChindyAM svabAhumapi vaH pratikUlavR^ittim || 6||
yatsevayA charaNapadmapavitrareNuM
sadyaH kShatAkhilamalaM pratilabdhashIlam |
na shrIrviraktamapi mAM vijahAti yasyAH
prekShAlavArtha itare niyamAn vahanti || 7||
nAhaM tathAdmi yajamAnahavirvitAne
shchyotadghR^itaplutamadan hutabhu~Nmukhena |
yadbrAhmaNasya mukhatashcharato.anughAsaM
tuShTasya mayyavahitairnijakarmapAkaiH || 8||
yeShAM bibharmyahamakhaNDavikuNThayoga\-
mAyAvibhUtiramalA~NghrirajaHkirITaiH |
viprAMstu ko na viShaheta yadarhaNAmbhaH
sadyaH punAti saha chandralalAma lokAn || 9||
ye me tanUrdvijavarAn duhatIrmadIyA
bhUtAnyalabdhasharaNAni cha bhedabud.hdhyA |
drakShyantyaghakShatadR^isho hyahimanyavastAn
gR^idhrA ruShA mama kuShantyadhidaNDanetuH || 10||
ye brAhmaNAn mayi dhiyA kShipato.archayantaH
tuShyaddhR^idaH smitasudhokShitapadmavaktrAH |
vANyAnurAgakalayA.a.atmajavadgR^iNantaH
sambodhayantyahamivAhamupAhR^itastaiH || 11||
tanme svabharturavasAyamalakShamANau
yuShmadvyatikramagatiM pratipadya sadyaH |
bhUyo mamAntikamitAM tadanugraho me
yatkalpatAmachirato bhR^itayorvivAsaH || 12||
brahmovAcha
atha tasyoshatIM devImR^iShikulyAM sarasvatIm |
nAsvAdya manyudaShTAnAM teShAmAtmApyatR^ipyata || 13||
satIM vyAdAya shR^iNvanto laghvIM gurvarthagahvarAm |
vigAhyAgAdhagambhIrAM na vidustachchikIrShitam || 14||
te yogamAyayA.a.arabdhapArameShThyamahodayam |
prochuH prA~njalayo viprAH prahR^iShTAH kShubhitatvachaH || 15||
R^iShaya UchuH
na vayaM bhagavan vidmastava deva chikIrShitam |
kR^ito me.anugrahashcheti yadadhyakShaH prabhAShase || 16||
brahmaNyasya paraM daivaM brAhmaNAH kila te prabho |
viprANAM devadevAnAM bhagavAnAtmadaivatam || 17||
tvattaH sanAtano dharmo rakShyate tanubhistava |
dharmasya paramo guhyo nirvikAro bhavAnmataH || 18||
taranti hya~njasA mR^ityuM nivR^ittA yadanugrahAt |
yoginaH sa bhavAn kiM svidanugR^ihyeta yatparaiH || 19||
yaM vai vibhUtirupayAtyanuvelamanyai\-
rarthArthibhiH svashirasA dhR^itapAdareNuH |
dhanyArpitA~NghritulasI navadAmadhAmno
lokaM madhuvratapateriva kAmayAnA || 20||
yastAM viviktacharitairanuvartamAnAM
nAtyAdriyatparamabhAgavataprasa~NgaH |
sa tvaM dvijAnupathapuNyarajaHpunItaH
shrIvatsalakShma kimagA bhagabhAjanastvam || 21||
dharmasya te bhagavatastriyuga tribhiH svaiH
padbhishcharAcharamidaM dvijadevatArtham |
nUnaM bhR^itaM tadabhighAti rajastamashcha
sattvena no varadayA tanuvA nirasya || 22||
na tvaM dvijottamakulaM yadi hAtmagopaM
goptA vR^iShaH svarhaNena sa sUnR^itena |
tarhyeva na~NkShyati shivastava deva panthA
loko.agrahIShyadR^iShabhasya hi tatpramANam || 23||
tatte.anabhIShTamiva sattvanidhervidhitsoH
kShemaM janAya nijashaktibhiruddhR^itAreH |
naitAvatA tryadhipaterbata vishvabhartuH
tejaH kShataM tvavanatasya sa te vinodaH || 24||
yaM vAnayordamamadhIsha bhavAn vidhatte
vR^ittiM nu vA tadanumanmahi nirvyalIkam |
asmAsu vA ya uchito dhriyatAM sa daNDo
yenAgasau vayamayu~NkShmahi kilbiSheNa || 25||
shrIbhagavAnuvAcha
etau suretaragatiM pratipadya sadyaH
saMrambhasambhR^itasamAdhyanubaddhayogau |
bhUyaH sakAshamupayAsyata Ashu yo vaH
shApo mayaiva nimitastadavaita viprAH || 26||
brahmovAcha
atha te munayo dR^iShTvA nayanAnandabhAjanam |
vaikuNThaM tadadhiShThAnaM vikuNThaM cha svayamprabham || 27||
bhagavantaM parikramya praNipatyAnumAnya cha |
pratijagmuH pramuditAH shaMsanto vaiShNavIM shriyam || 28||
bhagavAnanugAvAha yAtaM mA bhaiShTamastu sham |
brahmatejaH samartho.api hantuM nechChe mataM tu me || 29||
etatpuraiva nirdiShTaM ramayA kruddhayA yadA |
purApavAritA dvAri vishantI mayyupArate || 30||
mayi saMrambhayogena nistIrya brahmahelanam |
pratyeShyataM nikAshaM me kAlenAlpIyasA punaH || 31||
dvAHsthAvAdishya bhagavAn vimAnashreNibhUShaNam |
sarvAtishayayA lakShmyA juShTaM svaM dhiShNyamAvishat || 32||
tau tu gIrvANaR^iShabhau dustarAddharilokataH |
hatashriyau brahmashApAdabhUtAM vigatasmayau || 33||
tadA vikuNThadhiShaNAttayornipatamAnayoH |
hAhAkAro mahAnAsIdvimAnAgryeShu putrakAH || 34||
tAveva hyadhunA prAptau pArShadapravarau hareH |
diterjaTharanirviShTaM kAshyapaM teja ulbaNam || 35||
tayorasurayoradya tejasA yamayorhi vaH |
AkShiptaM teja etarhi bhagavAMstadvidhitsati || 36||
vishvasya yaH sthitilayodbhavaheturAdyo
yogeshvarairapi duratyayayogamAyaH |
kShemaM vidhAsyati sa no bhagavAMstryadhIshaH
tatrAsmadIyavimR^ishena kiyAnihArthaH || 37||
iti shrImadbhAgavate mahApurANe pAramahaMsyAM
saMhitAyAM tR^itIyaskandhe ShoDasho.adhyAyaH || 16||
\iti
\section{.. OM namo bhagavate vAsudevAya ..}
\section{.. saptadasho.adhyAyaH \- 17 ..}
maitreya uvAcha
nishamyAtmabhuvA gItaM kAraNaM sha~NkayojjhitAH |
tataH sarve nyavartanta tridivAya divaukasaH || 1||
ditistu bharturAdeshAdapatyaparisha~NkinI |
pUrNe varShashate sAdhvI putrau prasuShuve yamau || 2||
utpAtA bahavastatra nipeturjAyamAnayoH |
divi bhuvyantarikShe cha lokasyorubhayAvahAH || 3||
sahAchalA bhuvashchelurdishaH sarvAH prajajvaluH |
solkAshchAshanayaH petuH ketavashchArtihetavaH || 4||
vavau vAyuH suduHsparshaH phUtkArAnIrayan muhuH |
unmUlayannagapatIn vAtyAnIko rajodhvajaH || 5||
uddhasattaDidambhodaghaTayA naShTabhAgaNe |
vyomni praviShTatamasA na sma vyAdR^ishyate padam || 6||
chukrosha vimanA vArdhirudUrmiH kShubhitodaraH |
sodapAnAshcha saritashchukShubhuH shuShkapa~NkajAH || 7||
muhuH paridhayo.abhUvan sarAhvoH shashisUryayoH |
nirghAtA rathanirhrAdA vivarebhyaH prajaj~nire || 8||
antargrAmeShu mukhato vamantyo vahnimulbaNam |
sR^igAlolUkaTa~NkAraiH praNedurashivaM shivAH || 9||
sa~NgItavadrodanavadunnamayya shirodharAm |
vyamu~nchan vividhA vAcho grAmasiMhAstatastataH || 10||
kharAshcha karkashaiH kShattaH khurairghnanto dharAtalam |
khArkArarabhasA mattAH paryadhAvan varUthashaH || 11||
rudanto rAsabhatrastA nIDAdudapatan khagAH |
ghoShe.araNye cha pashavaH shakR^inmUtramakurvata || 12||
gAvo.atrasannasR^igdohAstoyadAH pUyavarShiNaH |
vyarudan devali~NgAni drumAH peturvinAnilam || 13||
grahAn puNyatamAnanye bhagaNAMshchApi dIpitAH |
aticherurvakragatyA yuyudhushcha parasparam || 14||
dR^iShTvAnyAMshcha mahotpAtAnatattattvavidaH prajAH |
brahmaputrAn R^ite bhItA menire vishvasamplavam || 15||
tAvAdidaityau sahasA vyajyamAnAtmapauruShau |
vavR^idhAte.ashmasAreNa kAyenAdripatI iva || 16||
divispR^ishau hemakirITakoTibhiH
niruddhakAShThau sphurada~NgadA bhujau |
gAM kampayantau charaNaiH pade pade
kaTyA sukA~nchyArkamatItya tasthatuH || 17||
prajApatirnAma tayorakArShId\-
yaH prAk svadehAdyamayorajAyata |
taM vai hiraNyakashipuM viduH prajA
yaM taM hiraNyAkShamasUta sAgrataH || 18||
chakre hiraNyakashipurdorbhyAM brahmavareNa cha |
vashe sapAlAn lokAMstrInakutomR^ityuruddhataH || 19||
hiraNyAkSho.anujastasya priyaH prItikR^idanvaham |
gadApANirdivaM yAto yuyutsurmR^igayan raNam || 20||
taM vIkShya duHsahajavaM raNatkA~nchananUpuram |
vaijayantyA srajA juShTamaMsanyastamahAgadam || 21||
manovIryavarotsiktamasR^iNyamakutobhayam |
bhItA nililyire devAstArkShyatrastA ivAhayaH || 22||
sa vai tirohitAn dR^iShTvA mahasA svena daityarAT |
sendrAn devagaNAn kShIbAnapashyan vyanadadbhR^isham || 23||
tato nivR^ittaH krIDiShyan gambhIraM bhImaniHsvanam |
vijagAhe mahAsattvo vArdhiM matta iva dvipaH || 24||
tasmin praviShTe varuNasya sainikA
yAdogaNAH sannadhiyaH sasAdhvasAH |
ahanyamAnA api tasya varchasA
pradharShitA dUrataraM pradudruvuH || 25||
sa varShapUgAnudadhau mahAbala\-
shcharanmahormI~nChvasaneritAn muhuH |
maurvyAbhijaghne gadayA vibhAvarI\-
mAsedivAMstAta purIM prachetasaH || 26||
tatropalabhyAsuralokapAlakaM
yAdogaNAnAmR^iShabhaM prachetasam |
smayan pralabdhuM praNipatya nIchava\-
jjagAdame dehyadhirAja saMyugam || 27||
tvaM lokapAlo.adhipatirbR^ihachChravA
vIryApaho durmadavIramAninAm |
vijitya loke.akhiladaityadAnavAn
yadrAjasUyena purAyajatprabho || 28||
sa evamutsiktamadena vidviShA
dR^iDhaM pralabdho bhagavAnapAmpatiH |
roShaM samutthaM shamayan svayA dhiyA
vyavochada~NgopashamaM gatA vayam || 29||
pashyAmi nAnyaM puruShAtpurAtanAt
yaH saMyuge tvAM raNamArgakovidam |
ArAdhayiShyatyasurarShabhehi taM
manasvino yaM gR^iNate bhavAdR^ishAH || 30||
taM vIramArAdabhipadya vismayaH
shayiShyase vIrashaye shvabhirvR^itaH |
yastvadvidhAnAmasatAM prashAntaye
rUpANi dhatte sadanugrahechChayA || 31||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe hiraNyAkShadigvijaye saptadasho.adhyAyaH || 17||
\iti
\section{.. OM namo bhagavate vAsudevAya ..}
\section{.. aShTAdasho.adhyAyaH \- 18 ..}
maitreya uvAcha
tadevamAkarNya jaleshabhAShitaM
mahAmanAstadvigaNayya durmadaH |
harerviditvA gatima~Nga nAradA\-
drasAtalaM nirvivishe tvarAnvitaH || 1||
dadarsha tatrAbhijitaM dharAdharaM
pronnIyamAnAvanimagradaMShTrayA |
muShNantamakShNA svarucho.aruNashriyA
jahAsa chAho vanagocharo mR^igaH || 2||
Ahainamehyaj~na mahIM vimu~ncha no
rasaukasAM vishvasR^ijeyamarpitA |
na svasti yAsyasyanayA mamekShataH
surAdhamAsAditasUkarAkR^ite || 3||
tvaM naH sapatnairabhavAya kiM bhR^ito
yo mAyayA hantyasurAn parokShajit |
tvAM yogamAyAbalamalpapauruShaM
saMsthApya mUDha pramR^ije suhR^ichChuchaH || 4||
tvayi saMsthite gadayA shIrNashIrSha\-
NyasmadbhujachyutayA ye cha tubhyam |
baliM harantyR^iShayo ye cha devAH
svayaM sarve na bhaviShyantyamUlAH || 5||
sa tudyamAno.ariduruktatomarai\-
rdaMShTrAgragAM gAmupalakShya bhItAm |
todaM mR^iShan niragAdambumadhyA\-
dgrAhAhataH sa kareNuryathebhaH || 6||
taM niHsarantaM salilAdanudruto
hiraNyakesho dviradaM yathA jhaShaH |
karAladaMShTro.ashaninisvano.abravI\-
dgatahriyAM kiM tvasatAM vigarhitam || 7||
sa gAmudastAtsalilasya gochare
vinyasya tasyAmadadhAtsvasattvam |
abhiShTuto vishvasR^ijA prasUnai\-
rApUryamANo vibudhaiH pashyato.areH || 8||
parAnuShaktaM tapanIyopakalpaM
mahAgadaM kA~nchanachitradaMsham |
marmANyabhIkShNaM pratudantaM duruktaiH
prachaNDamanyuH prahasaMstaM babhAShe || 9||
shrIbhagavAnuvAcha
satyaM vayaM bho vanagocharA mR^igA
yuShmadvidhAn mR^igaye grAmasiMhAn |
na mR^ityupAshaiH pratimuktasya vIrA
vikatthanaM tava gR^ihNantyabhadra || 10||
ete vayaM nyAsaharA rasaukasAM
gatahriyo gadayA drAvitAste |
tiShThAmahe.athApi katha~nchidAjau
stheyaM kva yAmo balinotpAdya vairam || 11||
tvaM padrathAnAM kila yUthapAdhipo
ghaTasva no.asvastaya AshvanUhaH |
saMsthApya chAsmAn pramR^ijAshru svakAnAM
yaH svAM pratij~nAM nAtipipartyasabhyaH || 12||
maitreya uvAcha
so.adhikShipto bhagavatA pralabdhashcha ruShA bhR^isham |
AjahArolbaNaM krodhaM krIDyamAno.ahirADiva || 13||
sR^ijannamarShitaH shvAsAn manyuprachalitendriyaH |
AsAdya tarasA daityo gadayAbhyahanaddharim || 14||
bhagavAMstu gadAvegaM visR^iShTaM ripuNorasi |
ava~nchayattirashchIno yogArUDha ivAntakam || 15||
punargadAM svAmAdAya bhrAmayantamabhIkShNashaH |
abhyadhAvaddhariH kruddhaH saMrambhAddaShTadachChadam || 16||
tatashcha gadayArAtiM dakShiNasyAM bhruvi prabhuH |
Ajaghne sa tu tAM saumya gadayA kovido.ahanat || 17||
evaM gadAbhyAM gurvIbhyAM haryakSho harireva cha |
jigIShayA susaMrabdhAvanyonyamabhijaghnatuH || 18||
tayoH spR^idhostigmagadAhatA~NgayoH
kShatAsravaghrANavivR^iddhamanyvoH |
vichitramArgAMshcharatorjigIShayA
vyabhAdilAyAmiva shuShmiNormR^idhaH || 19||
daityasya yaj~nAvayavasya mAyA\-
gR^ihItavArAhatanormahAtmanaH |
kauravya mahyAM dviShatorvimardanaM
didR^ikShurAgAdR^iShibhirvR^itaH svarAT || 20||
AsannashauNDIramapetasAdhvasaM
kR^itapratIkAramahAryavikramam |
vilakShya daityaM bhagavAn sahasraNI\-
rjagAda nArAyaNamAdisUkaram || 21||
brahmovAcha
eSha te deva devAnAma~NghrimUlamupeyuShAm |
viprANAM saurabheyINAM bhUtAnAmapyanAgasAm || 22||
AgaskR^idbhayakR^idduShkR^idasmadrAddhavaro.asuraH |
anveShannapratiratho lokAnaTati kaNTakaH || 23||
mainaM mAyAvinaM dR^iptaM nira~Nkushamasattamam |
AkrIDa bAlavaddeva yathAshIviShamutthitam || 24||
na yAvadeSha vardheta svAM velAM prApya dAruNaH |
svAM deva mAyAmAsthAya tAvajjahyaghamachyuta || 25||
eShA ghoratamA sandhyA lokachChambaTkarI prabho |
upasarpati sarvAtman surANAM jayamAvaha || 26||
adhunaiSho.abhijinnAma yogo mauhUrtiko hyagAt |
shivAya nastvaM suhR^idAmAshu nistara dustaram || 27||
diShTyA tvAM vihitaM mR^ityumayamAsAditaH svayam |
vikramyainaM mR^idhe hatvA lokAnAdhehi sharmaNi || 28||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe hiraNyAkShavadhe aShTAdasho.adhyAyaH || 18||
\iti
\section{.. OM namo bhagavate vAsudevAya ..}
\section{.. ekonaviMsho.adhyAyaH \- 19 ..}
maitreya uvAcha
avadhArya viri~nchasya nirvyalIkAmR^itaM vachaH |
prahasya premagarbheNa tadapA~Ngena so.agrahIt || 1||
tataH sapatnaM mukhatashcharantamakutobhayam |
jaghAnotpatya gadayA hanAvasuramakShajaH || 2||
sA hatA tena gadayA vihatA bhagavatkarAt |
vighUrNitApatadreje tadadbhutamivAbhavat || 3||
sa tadA labdhatIrtho.api na babAdhe nirAyudham |
mAnayan sa mR^idhe dharmaM viShvaksenaM prakopayan || 4||
gadAyAmapaviddhAyAM hAhAkAre vinirgate |
mAnayAmAsa taddharmaM sunAbhaM chAsmaradvibhuH || 5||
taM vyagrachakraM ditiputrAdhamena
svapArShadamukhyena viShajjamAnam |
chitrA vAcho.atadvidAM khecharANAM
tatra smAsan svasti te.amuM jahIti || 6||
sa taM nishAmyAttarathA~Ngamagrato
vyavasthitaM padmapalAshalochanam |
vilokya chAmarShapariplutendriyo
ruShA svadantachChadamAdashachChvasan || 7||
karAladaMShTrashchakShurbhyAM sa~nchakShANo dahanniva |
abhiplutya svagadayA hato.asItyAhanaddharim || 8||
padA savyena tAM sAdho bhagavAn yaj~nasUkaraH |
lIlayA miShataH shatroH prAharadvAtaraMhasam || 9||
Aha chAyudhamAdhatsva ghaTasva tvaM jigIShasi |
ityuktaH sa tadA bhUyastADayan vyanadadbhR^isham || 10||
tAM sa ApatatIM vIkShya bhagavAn samavasthitaH |
jagrAha lIlayA prAptAM garutmAniva pannagIm || 11||
svapauruShe pratihate hatamAno mahAsuraH |
naichChadgadAM dIyamAnAM hariNA vigataprabhaH || 12||
jagrAha trishikhaM shUlaM jvalajjvalanalolupam |
yaj~nAya dhR^itarUpAya viprAyAbhicharan yathA || 13||
tadojasA daityamahAbhaTArpitaM
chakAsadantaHkha udIrNadIdhiti |
\-chakreNa chichCheda nishAtaneminA
hariryathA tArkShyapatatramujjhitam || 14||
vR^ikNe svashUle bahudhAriNA hareH
pratyetya vistIrNamuro vibhUtimat |
pravR^iddharoShaH sa kaThoramuShTinA
nadan prahR^ityAntaradhIyatAsuraH || 15||
tenetthamAhataH kShattarbhagavAnAdisUkaraH |
nAkampata manAk kvApi srajA hata iva dvipaH || 16||
athorudhA.asR^ijanmAyAM yogamAyeshvare harau |
yAM vilokya prajAstrastA menire.asyopasaMyamam || 17||
pravavurvAyavashchaNDAstamaH pAMsavamairayan |
digbhyo nipeturgrAvANaH kShepaNaiH prahitA iva || 18||
dyaurnaShTabhagaNAbhraughaiH savidyutstanayitnubhiH |
varShadbhiH pUyakeshAsR^igviNmUtrAsthIni chAsakR^it || 19||
girayaH pratyadR^ishyanta nAnAyudhamucho.anagha |
digvAsaso yAtudhAnyaH shUlinyo muktamUrdhajAH || 20||
bahubhiryakSharakShobhiH pattyashvarathaku~njaraiH |
AtatAyibhirutsR^iShTA hiMsrA vAcho.ativaishasAH || 21||
prAduShkR^itAnAM mAyAnAmAsurINAM vinAshayat |
sudarshanAstraM bhagavAn prAyu~Nkta dayitaM tripAt || 22||
tadA diteH samabhavatsahasA hR^idi vepathuH |
smarantyA bharturAdeshaM stanAchchAsR^ik prasusruve || 23||
vinaShTAsu svamAyAsu bhUyashchAvrajya keshavam |
ruShopagUhamAno.amuM dadR^ishe.avasthitaM bahiH || 24||
taM muShTibhirvinighnantaM vajrasArairadhokShajaH |
kareNa karNamUle.ahan yathA tvAShTraM marutpatiH || 25||
sa Ahato vishvajitA hyavaj~nayA
paribhramadgAtra udastalochanaH |
vishIrNabAhva~Nghrishiroruho.apata\-
dyathA nagendro lulito nabhasvatA || 26||
kShitau shayAnaM tamakuNThavarchasaM
karAladaMShTraM paridaShTadachChadam |
ajAdayo vIkShya shashaMsurAgatA
aho imaM ko nu labheta saMsthitim || 27||
yaM yogino yogasamAdhinA raho
dhyAyanti li~NgAdasato mumukShayA |
tasyaiSha daityaR^iShabhaH padAhato
mukhaM prapashyaMstanumutsasarja ha || 28||
etau tau pArShadAvasya shApAdyAtAvasadgatim |
punaH katipayaiH sthAnaM prapatsyete ha janmabhiH || 29||
devA UchuH
namo namaste.akhilayaj~natantave
sthitau gR^ihItAmalasattvamUrtaye |
diShTyA hato.ayaM jagatAmaruntudaH
tvatpAdabhaktyA vayamIsha nirvR^itAH || 30||
maitreya uvAcha
evaM hiraNyAkShamasahyavikramaM
sa sAdayitvA harirAdisUkaraH |
jagAma lokaM svamakhaNDitotsavaM
samIDitaH puShkaraviShTarAdibhiH || 31||
mayA yathAnUktamavAdi te hareH
kR^itAvatArasya sumitracheShTitam |
yathA hiraNyAkSha udAravikramo
mahAmR^idhe krIDanavannirAkR^itaH || 32||
sUta uvAcha
iti kauShAravAkhyAtAmAshrutya bhagavatkathAm |
kShattA.a.anandaM paraM lebhe mahAbhAgavato dvija || 33||
anyeShAM puNyashlokAnAmuddAmayashasAM satAm |
upashrutya bhavenmodaH shrIvatsA~Nkasya kiM punaH || 34||
yo gajendraM jhaShagrastaM dhyAyantaM charaNAmbujam |
kroshantInAM kareNUnAM kR^ichChrato.amochayaddrutam || 35||
taM sukhArAdhyamR^ijubhirananyasharaNairnR^ibhiH |
kR^itaj~naH ko na seveta durArAdhyamasAdhubhiH || 36||
yo vai hiraNyAkShavadhaM mahAdbhutaM
vikrIDitaM kAraNasUkarAtmanaH |
shR^iNoti gAyatyanumodate.a~njasA
vimuchyate brahmavadhAdapi dvijAH || 37||
etanmahApuNyamalaM pavitraM
dhanyaM yashasyaM padamAyurAshiShAm |
prANendriyANAM yudhi shauryavardhanaM
nArAyaNo.ante gatira~Nga shR^iNvatAm || 38||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe hiraNyAkShavadho nAmaikonaviMsho.adhyAyaH || 19||
\iti
\section{.. OM namo bhagavate vAsudevAya ..}
\section{.. viMsho.adhyAyaH \- 20 ..}
shaunaka uvAcha
mahIM pratiShThAmadhyasya saute svAyambhuvo manuH |
kAnyanvatiShThaddvArANi mArgAyAvarajanmanAm || 1||
kShattA mahAbhAgavataH kR^iShNasyaikAntikaH suhR^it |
yastatyAjAgrajaM kR^iShNe sApatyamaghavAniti || 2||
dvaipAyanAdanavaro mahitve tasya dehajaH |
sarvAtmanA shritaH kR^iShNaM tatparAMshchApyanuvrataH || 3||
kimanvapR^ichChanmaitreyaM virajAstIrthasevayA |
upagamya kushAvarta AsInaM tattvavittamam || 4||
tayoH saMvadatoH sUta pravR^ittA hyamalAH kathAH |
Apo gA~NgA ivAghaghnIrhareH pAdAmbujAshrayAH || 5||
tA naH kIrtaya bhadraM te kIrtanyodArakarmaNaH |
rasaj~naH ko nu tR^ipyeta harilIlAmR^itaM piban || 6||
evamugrashravAH pR^iShTaH R^iShibhirnaimiShAyanaiH |
bhagavatyarpitAdhyAtmastAnAha shrUyatAmiti || 7||
sUta uvAcha
harerdhR^itakroDatanoH svamAyayA
nishamya goruddharaNaM rasAtalAt |
lIlAM hiraNyAkShamavaj~nayA hataM
sa~njAtaharSho munimAha bhArataH || 8||
vidura uvAcha
prajApatipatiH sR^iShTvA prajAsarge prajApatIn |
kimArabhata me brahman prabrUhyavyaktamArgavit || 9||
ye marIchyAdayo viprA yastu svAyambhuvo manuH |
te vai brahmaNa AdeshAtkathametadabhAvayan || 10||
sadvitIyAH kimasR^ijan svatantrA uta karmasu |
AhosvitsaMhatAH sarva idaM sma samakalpayan || 11||
maitreya uvAcha
daivena durvitarkyeNa pareNAnimiSheNa cha |
jAtakShobhAdbhagavato mahAnAsIdguNatrayAt || 12||
rajaHpradhAnAn mahatastrili~Ngo daivachoditAt |
jAtaH sasarja bhUtAdirviyadAdIni pa~nchashaH || 13||
tAni chaikaikashaH sraShTumasamarthAni bhautikam |
saMhatya daivayogena haimamaNDamavAsR^ijan || 14||
so.ashayiShTAbdhisalile ANDakosho nirAtmakaH |
sAgraM vai varShasAhasramanvavAtsIttamIshvaraH || 15||
tasya nAbherabhUtpadmaM sahasrArkorudIdhiti |
sarvajIvanikAyauko yatra svayamabhUtsvarAT || 16||
so.anuviShTo bhagavatA yaH shete salilAshaye |
lokasaMsthAM yathApUrvaM nirmame saMsthayA svayA || 17||
sasarjachChAyayA vidyAM pa~ncha parvANamagrataH |
tAmisramandhatAmisraM tamo moho mahAtamaH || 18||
visasarjAtmanaH kAyaM nAbhinandaMstamomayam |
jagR^ihuryakSharakShAMsi rAtriM kShuttR^iTsamudbhavAm || 19||
kShuttR^iDbhyAmupasR^iShTAste taM jagdhumabhidudruvuH |
mA rakShatainaM jakShadhvamityUchuH kShuttR^iDarditAH || 20||
devastAnAha saMvigno mA mAM jakShata rakShata |
aho me yakSharakShAMsi prajA yUyaM babhUvitha || 21||
devatAH prabhayA yA yA dIvyan pramukhato.asR^ijat |
te ahArShurdevayanto visR^iShTAM tAM prabhAmahaH || 22||
devo.adevA~njaghanataH sR^ijati smAtilolupAn |
ta enaM lolupatayA maithunAyAbhipedire || 23||
tato hasan sa bhagavAnasurairnirapatrapaiH |
anvIyamAnastarasA kruddho bhItaH parApatat || 24||
sa upavrajya varadaM prapannArtiharaM harim |
anugrahAya bhaktAnAmanurUpAtmadarshanam || 25||
pAhi mAM paramAtmaMste preShaNenAsR^ijaM prajAH |
tA imA yabhituM pApA upAkrAmanti mAM prabho || 26||
tvamekaH kila lokAnAM kliShTAnAM kleshanAshanaH |
tvamekaH kleshadasteShAmanAsannapadAM tava || 27||
so.avadhAryAsya kArpaNyaM viviktAdhyAtmadarshanaH |
vimu~nchAtmatanuM ghorAmityukto vimumocha ha || 28||
tAM kvaNachcharaNAmbhojAM madavihvalalochanAm |
kA~nchIkalApavilasaddukUlachChannarodhasam || 29||
anyonyashleShayottu~NganirantarapayodharAm |
sunAsAM sudvijAM snigddhahAsalIlAvalokanAm || 30||
gUhantIM vrIDayA.a.atmAnaM nIlAlakavarUthinIm |
upalabhyAsurA dharma sarve sammumuhuH striyam || 31||
aho rUpamaho dhairyamaho asyA navaM vayaH |
madhye kAmayamAnAnAmakAmeva visarpati || 32||
vitarkayanto bahudhA tAM sandhyAM pramadAkR^itim |
abhisambhAvya vishrambhAtparyapR^ichChan kumedhasaH || 33||
kAsi kasyAsi rambhoru ko vArthaste.atra bhAmini |
rUpadraviNapaNyena durbhagAnno vibAdhase || 34||
yA vA kAchittvamabale diShTyA sandarshanaM tava |
utsunoShIkShamANAnAM kandukakrIDayA manaH || 35||
naikatra te jayati shAlini pAdapadmaM
ghnantyA muhuH karatalena patatpata~Ngam |
madhyaM viShIdati bR^ihatstanabhArabhItaM
shAnteva dR^iShTiramalA sushikhAsamUhaH || 36||
iti sAyantanIM sandhyAmasurAH pramadAyatIm |
pralobhayantIM jagR^ihurmatvA mUDhadhiyaH striyam || 37||
prahasya bhAvagambhIraM jighrantyAtmAnamAtmanA |
kAntyA sasarja bhagavAn gandharvApsarasAM gaNAn || 38||
visasarja tanuM tAM vai jyotsnAM kAntimatIM priyAm |
ta eva chAdaduH prItyA vishvAvasupurogamAH || 39||
sR^iShTvA bhUtapishAchAMshcha bhagavAnAtmatandriNA |
digvAsaso muktakeshAn vIkShya chAmIlayaddR^ishau || 40||
jagR^ihustadvisR^iShTAM tAM jR^imbhaNAkhyAM tanuM prabhoH |
nidrAmindriyavikledo yayA bhUteShu dR^ishyate |
yenochChiShTAn dharShayanti tamunmAdaM prachakShate || 41||
UrjasvantaM manyamAna AtmAnaM bhagavAnajaH |
sAdhyAn gaNAn pitR^igaNAn parokSheNAsR^ijatprabhuH || 42||
ta AtmasargaM taM kAyaM pitaraH pratipedire |
sAdhyebhyashcha pitR^ibhyashcha kavayo yadvitanvate || 43||
siddhAn vidyAdharAMshchaiva tirodhAnena so.asR^ijat |
tebhyo.adadAttamAtmAnamantardhAnAkhyamadbhutam || 44||
sa kinnarAn kimpuruShAn pratyAtmyenAsR^ijatprabhuH |
mAnayannAtmanA.a.atmAnamAtmAbhAsaM vilokayan || 45||
te tu tajjagR^ihU rUpaM tyaktaM yatparameShThinA |
mithunIbhUya gAyantastamevoShasi karmabhiH || 46||
dehena vai bhogavatA shayAno bahuchintayA |
sarge.anupachite krodhAdutsasarja ha tadvapuH || 47||
ye.ahIyantAmutaH keshA ahayaste.a~Nga jaj~nire |
sarpAH prasarpataH krUrA nAgA bhogorukandharAH || 48||
sa AtmAnaM manyamAnaH kR^itakR^ityamivAtmabhUH |
tadA manUn sasarjAnte manasA lokabhAvanAn || 49||
tebhyaH so.asR^ijatsvIyaM puraM puruShamAtmavAn |
tAn dR^iShTvA ye purA sR^iShTAH prashashaMsuH prajApatim || 50||
aho etajjagatsraShTaH sukR^itaM bata te kR^itam |
pratiShThitAH kriyA yasmin sAkamannamadAmahe || 51||
tapasA vidyayA yukto yogena susamAdhinA |
R^iShIn R^iShirhR^iShIkeshaH sasarjAbhimatAH prajAH || 52||
tebhyashchaikaikashaH svasya dehasyAMshamadAdajaH |
yattatsamAdhiyogarddhitapovidyAviraktimat || 53||
iti shrImadbhAgavate mahApurANe pAramahaMsyAM
saMhitAyAM tR^itIyaskandhe viMsho.adhyAyaH || 20||
\iti
\section{.. OM namo bhagavate vAsudevAya ..}
\section{.. ekaviMsho.adhyAyaH \- 21 ..}
vidura uvAcha
svAyambhuvasya cha manorvaMshaH paramasammataH |
kathyatAM bhagavan yatra maithunenaidhire prajAH || 1||
priyavratottAnapAdau sutau svAyambhuvasya vai |
yathAdharmaM jugupatuH saptadvIpavatIM mahIm || 2||
tasya vai duhitA brahman devahUtIti vishrutA |
patnI prajApateruktA kardamasya tvayAnagha || 3||
tasyAM sa vai mahAyogI yuktAyAM yogalakShaNaiH |
sasarja katidhA vIryaM tanme shushrUShave vada || 4||
ruchiryo bhagavAn brahman dakSho vA brahmaNaH sutaH |
yathA sasarja bhUtAni labdhvA bhAryAM cha mAnavIm || 5||
maitreya uvAcha
prajAH sR^ijeti bhagavAn kardamo brahmaNoditaH |
sarasvatyAM tapastepe sahasrANAM samA dasha || 6||
tataH samAdhiyuktena kriyAyogena kardamaH |
samprapede hariM bhaktyA prapannavaradAshuSham || 7||
tAvatprasanno bhagavAn puShkarAkShaH kR^ite yuge |
darshayAmAsa taM kShattaH shAbdaM brahma dadhadvapuH || 8||
sa taM virajamarkAbhaM sitapadmotpalasrajam |
snigddhanIlAlakavrAtavaktrAbjaM virajo.ambaram || 9||
kirITinaM kuNDalinaM sha~NkhachakragadAdharam |
shvetotpalakrIDanakaM manaHsparshasmitekShaNam || 10||
vinyastacharaNAmbhojamaMsadeshe garutmataH |
dR^iShTvA khe.avasthitaM vakShaHshriyaM kaustubhakandharam || 11||
jAtaharSho.apatanmUrdhnA kShitau labdhamanorathaH |
gIrbhistvabhyagR^iNAtprItisvabhAvAtmA kR^itA~njaliH || 12||
R^iShiruvAcha
juShTaM batAdyAkhilasattvarAsheH
sAMsid.hdhyamakShNostava darshanAnnaH |
yaddarshanaM janmabhirIDya sadbhi\-
rAshAsate yogino rUDhayogAH || 13||
ye mAyayA te hatamedhasastva\-
tpAdAravindaM bhavasindhupotam |
upAsate kAmalavAya teShAM
rAsIsha kAmAnniraye.api ye syuH || 14||
tathA sa chAhaM parivoDhukAmaH
samAnashIlAM gR^ihamedhadhenum |
upeyivAn mUlamasheShamUlaM
durAshayaH kAmadughA~Nghripasya || 15||
prajApateste vachasAdhIsha tantyA
lokaH kilAyaM kAmahato.anubaddhaH |
ahaM cha lokAnugato vahAmi
baliM cha shuklAnimiShAya tubhyam || 16||
lokAMshcha lokAnugatAn pashUMshcha
hitvA shritAste charaNAtapatram |
parasparaM tvadguNavAdasIdhu\-
pIyUShaniryApitadehadharmAH || 17||
na te.ajarAkShabhramirAyureShAM
trayodashAraM trishataM ShaShTiparva |
ShaNnemyanantachChadi yattriNAbhi\-
karAlasroto jagadAchChidya dhAvat || 18||
ekaH svayaM san jagataH sisR^ikShayA
dvitIyayA.a.atmannadhiyogamAyayA |
sR^ijasyadaH pAsi punargrasiShyase
yathorNanAbhirbhagavan svashaktibhiH || 19||
naitadbatAdhIsha padaM tavepsitaM
yanmAyayA nastanuShe bhUtasUkShmam |
anugrahAyAstvapi yarhi mAyayA
lasattulasyA tanuvA vilakShitaH || 20||
taM tvAnubhUtyoparatakriyArthaM
svamAyayA vartitalokatantram |
namAmyabhIkShNaM namanIyapAda\-
sarojamalpIyasi kAmavarSham || 21||
R^iShiruvAcha
ityavyalIkaM praNuto.abjanAbha\-
stamAbabhAShe vachasAmR^itena |
suparNapakShopari rochamAnaH
premasmitodvIkShaNavibhramadbhrUH || 22||
shrIbhagavAnuvAcha
viditvA tava chaityaM me puraiva samayoji tat |
yadarthamAtmaniyamaistvayaivAhaM samarchitaH || 23||
na vai jAtu mR^iShaiva syAtprajAdhyakSha madarhaNam |
bhavadvidheShvatitarAM mayi sa~NgR^ibhitAtmanAm || 24||
prajApatisutaH samrANmanurvikhyAtama~NgalaH |
brahmAvartaM yo.adhivasan shAsti saptArNavAM mahIm || 25||
sa cheha vipra rAjarShirmahiShyA shatarUpayA |
AyAsyati didR^ikShustvAM parashvo dharmakovidaH || 26||
AtmajAmasitApA~NgIM vayaHshIlaguNAnvitAm |
mR^igayantIM patiM dAsyatyanurUpAya te prabho || 27||
samAhitaM te hR^idayaM yatremAn parivatsarAn |
sA tvAM brahman nR^ipavadhUH kAmamAshu bhajiShyati || 28||
yA ta AtmabhR^itaM vIryaM navadhA prasaviShyati |
vIrye tvadIye R^iShaya AdhAsyantya~njasA.a.atmanaH || 29||
tvaM cha samyaganuShThAya nideshaM ma ushattamaH |
mayi tIrthIkR^itAsheShakriyArtho mAM prapatsyase || 30||
kR^itvA dayAM cha jIveShu dattvA chAbhayamAtmavAn |
mayyAtmAnaM saha jagaddrakShyasyAtmani chApi mAm || 31||
sahAhaM svAMshakalayA tvadvIryeNa mahAmune |
tava kShetre devahUtyAM praNeShye tattvasaMhitAm || 32||
maitreya uvAcha
evaM tamanubhAShyAtha bhagavAn pratyagakShajaH |
jagAma bindusarasaH sarasvatyA parishritAt || 33||
nirIkShatastasya yayAvasheSha\-
siddheshvarAbhiShTutasiddhamArgaH |
AkarNayan patrarathendrapakShai\-
ruchchAritaM stomamudIrNasAma || 34||
atha samprasthite shukle kardamo bhagavAn R^iShiH |
Aste sma bindusarasi taM kAlaM pratipAlayan || 35||
manuH syandanamAsthAya shAtakaumbhaparichChadam |
Aropya svAM duhitaraM sabhAryaH paryaTan mahIm || 36||
tasmin sudhanvannahani bhagavAn yatsamAdishat |
upAyAdAshramapadaM muneH shAntavratasya tat || 37||
yasmin bhagavato netrAnnyapatannashrubindavaH |
kR^ipayA samparItasya prapanne.arpitayA bhR^isham || 38||
tadvai bindusaro nAma sarasvatyA pariplutam |
puNyaM shivAmR^itajalaM maharShigaNasevitam || 39||
puNyadrumalatAjAlaiH kUjatpuNyamR^igadvijaiH |
sarvartuphalapuShpADhyaM vanarAjishriyAnvitam || 40||
mattadvijagaNairghuShTaM mattabhramaravibhramam |
mattabarhinaTATopamAhvayan mattakokilam || 41||
kadambachampakAshokakara~njabakulAsanaiH |
kundamandArakuTajaishchUtapotairala~NkR^itam || 42||
kAraNDavaiH plavairhaMsaiH kurarairjalakukkuTaiH |
sArasaishchakravAkaishcha chakorairvalgu kUjitam || 43||
tathaiva hariNaiH kroDaiH shvAvidgavayaku~njaraiH |
gopuchChairharibhirmarkairnakulairnAbhibhirvR^itam || 44||
pravishya tattIrthavaramAdirAjaH sahAtmajaH |
dadarsha munimAsInaM tasmin hutahutAshanam || 45||
vidyotamAnaM vapuShA tapasyugrayujA chiram |
nAtikShAmaM bhagavataH snigdhApA~NgAvalokanAt |
tadvyAhR^itAmR^itakalApIyUShashravaNena cha || 46||
prAMshuM padmapalAshAkShaM jaTilaM chIravAsasam |
upasaMshritya malinaM yathArhaNamasaMskR^itam || 47||
athoTajamupAyAtaM nR^idevaM praNataM puraH |
saparyayA paryagR^ihNAtpratinandyAnurUpayA || 48||
gR^ihItArhaNamAsInaM saMyataM prINayan muniH |
smaran bhagavadAdeshamityAha shlakShNayA girA || 49||
nUnaM cha~NkramaNaM deva satAM saMrakShaNAya te |
vadhAya chAsatAM yastvaM hareH shaktirhi pAlinI || 50||
yo.arkendvagnIndravAyUnAM yamadharmaprachetasAm |
rUpANi sthAna Adhatse tasmai shuklAya te namaH || 51||
na yadA rathamAsthAya jaitraM maNigaNArpitam |
visphUrjachchaNDakodaNDo rathena trAsayannaghAn || 52||
svasainyacharaNakShuNNaM vepayan maNDalaM bhuvaH |
vikarShan bR^ihatIM senAM paryaTasyaMshumAniva || 53||
tadaiva setavaH sarve varNAshramanibandhanAH |
bhagavadrachitA rAjan bhidyeran bata dasyubhiH || 54||
adharmashcha samedheta lolupairvya~NkushairnR^ibhiH |
shayAne tvayi loko.ayaM dasyugrasto vina~NkShyati || 55||
athApi pR^ichChe tvAM vIra yadarthaM tvamihAgataH |
tadvayaM nirvyalIkena pratipadyAmahe hR^idA || 56||
iti shrImadbhAgavate mahApurANe pAramahaMsyAM
saMhitAyAM tR^itIyaskandhe ekaviMsho.adhyAyaH || 21||
\iti
\section{.. OM namo bhagavate vAsudevAya ..}
\section{.. dvAviMsho.adhyAyaH \- 22 ..}
maitreya uvAcha
evamAviShkR^itAsheShaguNakarmodayo munim |
savrIDa iva taM samrADupAratamuvAcha ha || 1||
manuruvAcha
brahmAsR^ijatsvamukhato yuShmAnAtmaparIpsayA |
ChandomayastapovidyAyogayuktAnalampaTAn || 2||
tattrANAyAsR^ijachchAsmAn doHsahasrAtsahasrapAt |
hR^idayaM tasya hi brahma kShatrama~NgaM prachakShate || 3||
ato hyanyonyamAtmAnaM brahma kShatraM cha rakShataH |
rakShati smAvyayo devaH sa yaH sadasadAtmakaH || 4||
tava sandarshanAdeva chChinnA me sarvasaMshayAH |
yatsvayaM bhagavAn prItyA dharmamAha rirakShiShoH || 5||
diShTyA me bhagavAn dR^iShTo durdarsho yo.akR^itAtmanAm |
diShTyA pAdarajaH spR^iShTaM shIrShNA me bhavataH shivam || 6||
diShTyA tvayAnushiShTo.ahaM kR^itashchAnugraho mahAn |
apAvR^itaiH karNarandhrairjuShTA diShTyoshatIrgiraH || 7||
sa bhavAn duhitR^isnehaparikliShTAtmano mama |
shrotumarhasi dInasya shrAvitaM kR^ipayA mune || 8||
priyavratottAnapadoH svaseyaM duhitA mama |
anvichChati patiM yuktaM vayaHshIlaguNAdibhiH || 9||
yadA tu bhavataH shIlashrutarUpavayoguNAn |
ashR^iNonnAradAdeShA tvayyAsItkR^itanishchayA || 10||
tatpratIchCha dvijAgryemAM shraddhayopahR^itAM mayA |
sarvAtmanAnurUpAM te gR^ihamedhiShu karmasu || 11||
udyatasya hi kAmasya prativAdo na shasyate |
api nirmuktasa~Ngasya kAmaraktasya kiM punaH || 12||
ya udyatamanAdR^itya kInAshamabhiyAchate |
kShIyate tadyashaH sphItaM mAnashchAvaj~nayA hataH || 13||
ahaM tvAshR^iNavaM vidvan vivAhArthaM samudyatam |
atastvamupakurvANaH prattAM pratigR^ihANa me || 14||
R^iShiruvAcha
bADhamudvoDhukAmo.ahamaprattA cha tavAtmajA |
AvayoranurUpo.asAvAdyo vaivAhiko vidhiH || 15||
kAmaH sa bhUyAnnaradeva te.asyAH
putryAH samAmnAyavidhau pratItaH |
ka eva te tanayAM nAdriyeta
svayaiva kAntyA kShipatImiva shriyam || 16||
yAM harmyapR^iShThe kvaNada~NghrishobhAM
vikrIDatIM kandukavihvalAkShIm |
vishvAvasurnyapatatsvAdvimAnA\-
dvilokya sammohavimUDhachetAH || 17||
tAM prArthayantIM lalanAlalAma\-
masevitashrIcharaNairadR^iShTAm |
vatsAM manoruchchapadaH svasAraM
ko nAnumanyeta budho.abhiyAtAm || 18||
ato bhajiShye samayena sAdhvIM
yAvattejo bibhR^iyAdAtmano me |
ato dharmAn pAramahaMsyamukhyAn
shuklaproktAn bahu manye.avihiMsrAn || 19||
yato.abhavadvishvamidaM vichitraM
saMsthAsyate yatra cha vAvatiShThate |
prajApatInAM patireSha mahyaM
paraM pramANaM bhagavAnanantaH || 20||
maitreya uvAcha
sa ugradhanvanniyadevAbabhAShe
AsIchcha tUShNImaravindanAbham |
dhiyopagR^ihNan smitashobhitena
mukhena cheto lulubhe devahUtyAH || 21||
so.anuj~nAtvA vyavasitaM mahiShyA duhituH sphuTam |
tasmai guNagaNADhyAya dadau tulyAM praharShitaH || 22||
shatarUpA mahArAj~nI pAribarhAn mahAdhanAn |
dampatyoH paryadAtprItyA bhUShAvAsaH parichChadAn || 23||
prattAM duhitaraM samrAT sadR^ikShAya gatavyathaH |
upaguhya cha bAhubhyAmautkaNThyonmathitAshayaH || 24||
ashaknuvaMstadvirahaM mu~nchan bAShpakalAM muhuH |
Asi~nchadamba vatseti netrodairduhituH shikhAH || 25||
Amantrya taM munivaramanuj~nAtaH sahAnugaH |
pratasthe rathamAruhya sabhAryaH svapuraM nR^ipaH || 26||
ubhayoH R^iShikulyAyAH sarasvatyAH surodhasoH |
R^iShINAmupashAntAnAM pashyannAshramasampadaH || 27||
tamAyAntamabhipretya brahmAvartAtprajAH patim |
gItasaMstutivAditraiH pratyudIyuH praharShitAH || 28||
barhiShmatI nAma purI sarvasampatsamanvitA |
nyapatan yatra romANi yaj~nasyA~NgaM vidhunvataH || 29||
kushAH kAshAsta evAsan shashvaddharitavarchasaH |
R^iShayo yaiH parAbhAvya yaj~naghnAnyaj~namIjire || 30||
kushakAshamayaM barhirAstIrya bhagavAn manuH |
ayajadyaj~napuruShaM labdhA sthAnaM yato bhuvam || 31||
barhiShmatIM nAma vibhuryAM nirvishya samAvasat |
tasyAM praviShTo bhavanaM tApatrayavinAshanam || 32||
sabhAryaH saprajaH kAmAn bubhuje.anyAvirodhataH |
sa~NgIyamAnasatkIrtiH sastrIbhiH suragAyakaiH |
pratyUSheShvanubaddhena hR^idA shR^iNvan hareH kathAH || 33||
niShNAtaM yogamAyAsu muniM svAyambhuvaM manum |
yadA bhraMshayituM bhogA na shekurbhagavatparam || 34||
ayAtayAmAstasyAsan yAmAH svAntarayApanAH |
shR^iNvato dhyAyato viShNoH kurvato bruvataH kathAH || 35||
sa evaM svAntaraM ninye yugAnAmekasaptatim |
vAsudevaprasa~Ngena paribhUtagatitrayaH || 36||
shArIrA mAnasA divyA vaiyAse ye cha mAnuShAH |
bhautikAshcha kathaM kleshA bAdhante harisaMshrayam || 37||
yaH pR^iShTo munibhiH prAha dharmAnnAnAvidhAn shubhAn |
nR^iNAM varNAshramANAM cha sarvabhUtahitaH sadA || 38||
etatta AdirAjasya manoshcharitamadbhutam |
varNitaM varNanIyasya tadapatyodayaM shR^iNu || 39||
iti shrImadbhAgavate mahApurANe pAramahaMsyAM
saMhitAyAM tR^itIyaskandhe dvAviMsho.adhyAyaH || 22||
\iti
\section{.. OM namo bhagavate vAsudevAya ..}
\section{.. trayoviMsho.adhyAyaH \- 23 ..}
maitreya uvAcha
pitR^ibhyAM prasthite sAdhvI patimi~NgitakovidA |
nityaM paryacharatprItyA bhavAnIva bhavaM prabhum || 1||
vishrambheNAtmashauchena gauraveNa damena cha |
shushrUShayA sauhR^idena vAchA madhurayA cha bhoH || 2||
visR^ijya kAmaM dambhaM cha dveShaM lobhamaghaM madam |
apramattodyatA nityaM tejIyAMsamatoShayat || 3||
sa vai devarShivaryastAM mAnavIM samanuvratAm |
daivAdgarIyasaH patyurAshAsAnAM mahAshiShaH || 4||
kAlena bhUyasA kShAmAM karshitAM vratacharyayA |
premagadgadayA vAchA pIDitaH kR^ipayAbravIt || 5||
kardama uvAcha
tuShTo.ahamadya tava mAnavi mAnadAyAH
shushrUShayA paramayA parayA cha bhaktyA |
yo dehinAmayamatIva suhR^itsvadeho
nAvekShitaH samuchitaH kShapituM madarthe || 6||
ye me svadharmaniratasya tapaH samAdhi\-
vidyA.a.atmayogavijitA bhagavatprasAdAH |
tAneva te madanusevanayAvaruddhAn
dR^iShTiM prapashya vitarAmyabhayAnashokAn || 7||
anye punarbhagavato bhruva udvijR^imbha\-
vibhraMshitArtharachanAH kimurukramasya |
siddhAsi bhu~NkShva vibhavAn nijadharmadohAn
divyAnnarairduradhigAnnR^ipavikriyAbhiH || 8||
evaM bruvANamabalAkhilayogamAyA\-
vidyAvichakShaNamavekShya gatAdhirAsIt |
samprashrayapraNayavihvalayA gireShad\-
vrIDAvalokavilasaddhasitAnanA.a.aha || 9||
devahUtiruvAcha
rAddhaM bata dvijavR^iShaitadamoghayoga\-
mAyAdhipe tvayi vibho tadavaimi bhartaH |
yaste.abhyadhAyi samayaH sakR^ida~Ngasa~Ngo
bhUyAdgarIyasi guNaH prasavaH satInAm || 10||
tatretikR^ityamupashikSha yathopadeshaM
yenaiSha me karshito.atiriraMsayA.a.atmA |
sid.hdhyeta te kR^itamanobhavadharShitAyA
dInastadIsha bhavanaM sadR^ishaM vichakShva || 11||
maitreya uvAcha
priyAyAH priyamanvichChan kardamo yogamAsthitaH |
vimAnaM kAmagaM kShattastarhyevAvirachIkarat || 12||
sarvakAmadughaM divyaM sarvaratnasamanvitam |
sarvard.hdhyupachayodarkaM maNistambhairupaskR^itam || 13||
divyopakaraNopetaM sarvakAlasukhAvaham |
paTTikAbhiH patAkAbhirvichitrAbhirala~NkR^itam || 14||
sragbhirvichitramAlyAbhirma~njushi~njatShaDa~NghribhiH |
dukUlakShaumakausheyairnAnAvastrairvirAjitam || 15||
uparyupari vinyastanilayeShu pR^ithakpR^ithak |
kShiptaiH kashipubhiH kAntaM parya~NkavyajanAsanaiH || 16||
tatra tatra vinikShiptanAnAshilpopashobhitam |
mahAmarakatasthAlyA juShTaM vidrumavedibhiH || 17||
dvAHsu vidrumadehalyA bhAtaM vajrakapATavat |
shikhareShvindranIleShu hemakumbhairadhishritam || 18||
chakShuShmatpadmarAgAgryairvajrabhittiShu nirmitaiH |
juShTaM vichitravaitAnairmahArhairhematoraNaiH || 19||
haMsapArAvatavrAtaistatra tatra nikUjitam |
kR^itrimAn manyamAnaiH svAnadhiruhyAdhiruhya cha || 20||
vihArasthAnavishrAmasaMveshaprA~NgaNAjiraiH |
yathopajoShaM rachitairvismApanamivAtmanaH || 21||
IdR^iggR^ihaM tatpashyantIM nAtiprItena chetasA |
sarvabhUtAshayAbhij~naH prAvochatkardamaH svayam || 22||
nimajjyAsmin hrade bhIru vimAnamidamAruha |
idaM shuklakR^itaM tIrthamAshiShAM yApakaM nR^iNAm || 23||
sA tadbhartuH samAdAya vachaH kuvalayekShaNA |
sarajaM bibhratI vAso veNIbhUtAMshcha mUrdhajAn || 24||
a~NgaM cha malapa~Nkena sa~nChannaM shabalastanam |
Avivesha sarasvatyAH saraH shivajalAshayam || 25||
sAntaHsarasi veshmasthAH shatAni dasha kanyakAH |
sarvAH kishoravayaso dadarshotpalagandhayaH || 26||
tAM dR^iShTvA sahasotthAya prochuH prA~njalayaH striyaH |
vayaM karmakarIstubhyaM shAdhi naH karavAma kim || 27||
snAnena tAM mahArheNa snApayitvA manasvinIm |
dukUle nirmale nUtne dadurasyai cha mAnadAH || 28||
bhUShaNAni parArdhyAni varIyAMsi dyumanti cha |
annaM sarvaguNopetaM pAnaM chaivAmR^itAsavam || 29||
athAdarshe svamAtmAnaM sragviNaM virajAmbaram |
virajaM kR^itasvastyayanaM kanyAbhirbahumAnitam || 30||
snAtaM kR^itashiraHsnAnaM sarvAbharaNabhUShitam |
niShkagrIvaM valayinaM kUjatkA~nchananUpuram || 31||
shroNyoradhyastayA kA~nchyA kA~nchanyA bahuratnayA |
hAreNa cha mahArheNa ruchakena cha bhUShitam || 32||
sudatA subhruvA shlakShNasnigdhApA~Ngena chakShuShA |
padmakoshaspR^idhA nIlairalakaishcha lasanmukham || 33||
yadA sasmAra R^iShabhamR^iShINAM dayitaM patim |
tatra chAste saha strIbhiryatrAste sa prajApatiH || 34||
bhartuH purastAdAtmAnaM strIsahasravR^itaM tadA |
nishAmya tadyogagatiM saMshayaM pratyapadyata || 35||
sa tAM kR^itamalasnAnAM vibhrAjantImapUrvavat |
Atmano bibhratIM rUpaM saMvItaruchirastanIm || 36||
vidyAdharIsahasreNa sevyamAnAM suvAsasam |
jAtabhAvo vimAnaM tadArohayadamitrahan || 37||
tasminnaluptamahimA priyayAnurakto
vidyAdharIbhirupachIrNavapurvimAne |
babhrAja utkachakumudgaNavAnapIchyaH
tArAbhirAvR^ita ivoDupatirnabhaHsthaH || 38||
tenAShTalokapavihArakulAchalendra\-
droNIShvana~NgasakhamArutasaubhagAsu |
siddhairnuto dyudhunipAtashivasvanAsu
reme chiraM dhanadavallalanA varUthI || 39||
vaishrambhake surasane nandane puShpabhadrake |
mAnase chaitrarathye cha sa reme rAmayA rataH || 40||
bhrAjiShNunA vimAnena kAmagena mahIyasA |
vaimAnikAnatyasheta charaMllokAn yathAnilaH || 41||
kiM durApAdanaM teShAM puMsAmuddAmachetasAm |
yairAshritastIrthapadashcharaNo vyasanAtyayaH || 42||
prekShayitvA bhuvo golaM patnyai yAvAn svasaMsthayA |
bahvAshcharyaM mahAyogI svAshramAya nyavartata || 43||
vibhajya navadhA.a.atmAnaM mAnavIM suratotsukAm |
rAmAM niramayan reme varShapUgAn muhUrtavat || 44||
tasmin vimAna utkR^iShTAM shayyAM ratikarIM shritA |
na chAbudhyata taM kAlaM patyApIchyena sa~NgatA || 45||
evaM yogAnubhAvena dampatyo ramamANayoH |
shataM vyatIyuH sharadaH kAmalAlasayormanAk || 46||
tasyAmAdhatta retastAM bhAvayannAtmanA.a.atmavit |
nodhA vidhAya rUpaM svaM sarvasa~NkalpavidvibhuH || 47||
ataH sA suShuve sadyo devahUtiH striyaH prajAH |
sarvAstAshchArusarvA~Ngyo lohitotpalagandhayaH || 48||
patiM sA pravrajiShyantaM tadA.a.alakShyoshatI satI |
smayamAnA viklavena hR^idayena vidUyatA || 49||
likhantyadhomukhI bhUmiM padA nakhamaNishriyA |
uvAcha lalitAM vAchaM nirudhyAshrukalAM shanaiH || 50||
devahUtiruvAcha
sarvaM tadbhagavAn mahyamupovAha pratishrutam |
athApi me prapannAyA abhayaM dAtumarhasi || 51||
brahman duhitR^ibhistubhyaM vimR^igyAH patayaH samAH |
kashchitsyAnme vishokAya tvayi pravrajite vanam || 52||
etAvatAlaM kAlena vyatikrAntena me prabho |
indriyArthaprasa~Ngena parityaktaparAtmanaH || 53||
indriyArtheShu sajjantyA prasa~Ngastvayi me kR^itaH |
ajAnantyA paraM bhAvaM tathApyastvabhayAya me || 54||
sa~Ngo yaH saMsR^iterheturasatsu vihito.adhiyA |
sa eva sAdhuShu kR^ito niHsa~NgatvAya kalpate || 55||
neha yatkarma dharmAya na virAgAya kalpate |
na tIrthapadasevAyai jIvannapi mR^ito hi saH || 56||
sAhaM bhagavato nUnaM va~nchitA mAyayA dR^iDham |
yattvAM vimuktidaM prApya na mumukSheya bandhanAt || 57||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe kApileyopAkhyAne trayoviMsho.adhyAyaH || 23||
\iti
\section{.. OM namo bhagavate vAsudevAya ..}
\section{.. chaturviMsho.adhyAyaH \- 24 ..}
maitreya uvAcha
nirvedavAdinImevaM manorduhitaraM muniH |
dayAluH shAlinImAha shuklAbhivyAhR^itaM smaran || 1||
R^iShiruvAcha
mA khido rAjaputrItthamAtmAnaM pratyanindite |
bhagavAMste.akSharo garbhamadUrAtsamprapatsyate || 2||
dhR^itavratAsi bhadraM te damena niyamena cha |
tapodraviNadAnaishcha shraddhayA cheshvaraM bhaja || 3||
sa tvayA.a.arAdhitaH shuklo vitanvan mAmakaM yashaH |
ChettA te hR^idayagranthimaudaryo brahmabhAvanaH || 4||
maitreya uvAcha
devahUtyapi sandeshaM gauraveNa prajApateH |
samyak shraddhAya puruShaM kUTasthamabhajadgurum || 5||
tasyAM bahutithe kAle bhagavAn madhusUdanaH |
kArdamaM vIryamApanno jaj~ne.agniriva dAruNi || 6||
avAdayaMstadA vyomni vAditrANi ghanAghanAH |
gAyanti taM sma gandharvA nR^ityantyapsaraso mudA || 7||
petuH sumanaso divyAH khecharairapavarjitAH |
prasedushcha dishaH sarvA ambhAMsi cha manAMsi cha || 8||
tatkardamAshramapadaM sarasvatyA parishritam |
svayambhUH sAkamR^iShibhirmarIchyAdibhirabhyayAt || 9||
bhagavantaM paraM brahma sattvenAMshena shatruhan |
tattvasa~NkhyAnavij~naptyai jAtaM vidvAnajaH svarAT || 10||
sabhAjayan vishuddhena chetasA tachchikIrShitam |
prahR^iShyamANairasubhiH kardamaM chedamabhyadhAt || 11||
brahmovAcha
tvayA me.apachitistAta kalpitA nirvyalIkataH |
yanme sa~njagR^ihe vAkyaM bhavAn mAnada mAnayan || 12||
etAvatyeva shushrUShA kAryA pitari putrakaiH |
bADhamityanumanyeta gauraveNa gurorvachaH || 13||
imA duhitaraH sabhya tava vatsa sumadhyamAH |
sargametaM prabhAvaiH svairbR^ihayiShyantyanekadhA || 14||
atastvamR^iShimukhyebhyo yathAshIlaM yathAruchi |
AtmajAH paridehyadya vistR^iNIhi yasho bhuvi || 15||
vedAhamAdyaM puruShamavatIrNaM svamAyayA |
bhUtAnAM shevadhiM dehaM bibhrANaM kapilaM mune || 16||
j~nAnavij~nAnayogena karmaNAmuddharan jaTAH |
hiraNyakeshaH padmAkShaH padmamudrApadAmbujaH || 17||
eSha mAnavi te garbhaM praviShTaH kaiTabhArdanaH |
avidyAsaMshayagranthiM ChittvA gAM vichariShyati || 18||
ayaM siddhagaNAdhIshaH sA~NkhyAchAryaiH susammataH |
loke kapila ityAkhyAM gantA te kIrtivardhanaH || 19||
maitreya uvAcha
tAvAshvAsya jagatsraShTA kumAraiH saha nAradaH |
haMso haMsena yAnena tridhAma paramaM yayau || 20||
gate shatadhR^itau kShattaH kardamastena choditaH |
yathoditaM svaduhitR^IH prAdAdvishvasR^ijAM tataH || 21||
marIchaye kalAM prAdAdanasUyAmathAtraye |
shraddhAma~Ngirase.ayachChatpulastyAya havirbhuvam || 22||
pulahAya gatiM yuktAM kratave cha kriyAM satIm |
khyAtiM cha bhR^igave.ayachChadvasiShThAyApyarundhatIm || 23||
atharvaNe.adadAchChAntiM yayA yaj~no vitanyate |
viprarShabhAn kR^itodvAhAn sadArAn samalAlayat || 24||
tatasta R^iShayaH kShattaH kR^itadArA nimantrya tam |
prAtiShThan nandimApannAH svaM svamAshramamaNDalam || 25||
sa chAvatIrNaM triyugamAj~nAya vibudharShabham |
vivikta upasa~Ngamya praNamya samabhAShata || 26||
aho pApachyamAnAnAM niraye svairama~NgalaiH |
kAlena bhUyasA nUnaM prasIdantIha devatAH || 27||
bahujanmavipakvena samyagyogasamAdhinA |
draShTuM yatante yatayaH shUnyAgAreShu yatpadam || 28||
sa eva bhagavAnadya helanaM nagaNayya naH |
gR^iheShu jAto grAmyANAM yaH svAnAM pakShapoShaNaH || 29||
svIyaM vAkyaM R^itaM kartumavatIrNo.asi me gR^ihe |
chikIrShurbhagavAn j~nAnaM bhaktAnAM mAnavardhanaH || 30||
tAnyeva te.abhirUpANi rUpANi bhagavaMstava |
yAni yAni cha rochante svajanAnAmarUpiNaH || 31||
tvAM sUribhistattvabubhutsayAddhA
sadAbhivAdArhaNapAdapITham |
aishvaryavairAgyayasho.avabodha\-
vIryashriyA pUrtamahaM prapadye || 32||
paraM pradhAnaM puruShaM mahAntaM
kAlaM kaviM trivR^itaM lokapAlam |
AtmAnubhUtyAnugataprapa~nchaM
svachChandashaktiM kapilaM prapadye || 33||
A smAbhipR^ichChe.adya patiM prajAnAM
tvayAvatIrNArNa utAptakAmaH |
parivrajatpadavImAsthito.ahaM
chariShye tvAM hR^idi yu~njan vishokaH || 34||
shrIbhagavAnuvAcha
mayA proktaM hi lokasya pramANaM satyalaukike |
athAjani mayA tubhyaM yadavochamR^itaM mune || 35||
etanme janma loke.asmin mumukShUNAM durAshayAt |
prasa~NkhyAnAya tattvAnAM sammatAyAtmadarshane || 36||
eSha Atmapatho.avyakto naShTaH kAlena bhUyasA |
taM pravartayituM dehamimaM viddhi mayA bhR^itam || 37||
gachCha kAmaM mayA pR^iShTo mayi sannyastakarmaNA |
jitvA sudurjayaM mR^ityumamR^itatvAya mAM bhaja || 38||
mAmAtmAnaM svaya~njyotiH sarvabhUtaguhAshayam |
AtmanyevAtmanA vIkShya vishoko.abhayamR^ichChasi || 39||
mAtra AdhyAtmikIM vidyAM shamanIM sarvakarmaNAm |
vitariShye yayA chAsau bhayaM chAtitariShyati || 40||
maitreya uvAcha
evaM samuditastena kapilena prajApatiH |
dakShiNIkR^itya taM prIto vanameva jagAma ha || 41||
vrataM sa Asthito maunamAtmaikasharaNo muniH |
niHsa~Ngo vyacharatkShoNImanagniraniketanaH || 42||
mano brahmaNi yu~njAno yattatsadasataH param |
guNAvabhAse viguNa ekabhaktyAnubhAvite || 43||
niraha~NkR^itirnirmamashcha nirdvandvaH samadR^ik svadR^ik |
pratyakprashAntadhIrdhIraH prashAntormirivodadhiH || 44||
vAsudeve bhagavati sarvaj~ne pratyagAtmani |
pareNa bhaktibhAvena labdhAtmA muktabandhanaH || 45||
AtmAnaM sarvabhUteShu bhagavantamavasthitam |
apashyatsarvabhUtAni bhagavatyapi chAtmani || 46||
ichChAdveShavihInena sarvatra samachetasA |
bhagavadbhaktiyuktena prAptA bhAgavatI gatiH || 47||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe kApileye chaturviMsho.adhyAyaH || 24||
\iti
\section{.. OM namo bhagavate vAsudevAya ..}
\section{.. pa~nchaviMsho.adhyAyaH \- 25 ..}
shaunaka uvAcha
kapilastattvasa~NkhyAtA bhagavAnAtmamAyayA |
jAtaH svayamajaH sAkShAdAtmapraj~naptaye nR^iNAm || 1||
na hyasya varShmaNaH puMsAM varimNaH sarvayoginAm |
vishrutau shrutadevasya bhUri tR^ipyanti me.asavaH || 2||
yadyadvidhatte bhagavAn svachChandAtmA.a.atmamAyayA |
tAni me shraddadhAnasya kIrtanyAnyanukIrtaya || 3||
sUta uvAcha
dvaipAyanasakhastvevaM maitreyo bhagavAMstathA |
prAhedaM viduraM prIta AnvIkShikyAM prachoditaH || 4||
maitreya uvAcha
pitari prasthite.araNyaM mAtuH priyachikIrShayA |
tasmin bindusare.avAtsIdbhagavAn kapilaH kila || 5||
tamAsInamakarmANaM tattvamArgAgradarshanam |
svasutaM devahUtyAha dhAtuH saMsmaratI vachaH || 6||
devahUtiruvAcha
nirviNNA nitarAM bhUmannasadindriyatarShaNAt |
yena sambhAvyamAnena prapannAndhaM tamaH prabho || 7||
tasya tvaM tamaso.andhasya duShpArasyAdya pAragam |
sachchakShurjanmanAmante labdhaM me tvadanugrahAt || 8||
ya Adyo bhagavAn puMsAmIshvaro vai bhavAn kila |
lokasya tamasAndhasya chakShuH sUrya ivoditaH || 9||
atha me deva sammohamapAkraShTuM tvamarhasi |
yo.avagraho.ahammametItyetasmin yojitastvayA || 10||
taM tvA gatAhaM sharaNaM sharaNyaM
svabhR^ityasaMsArataroH kuThAram |
jij~nAsayAhaM prakR^iteH pUruShasya
namAmi saddharmavidAM variShTham || 11||
maitreya uvAcha
iti svamAturniravadyamIpsitaM
nishamya puMsAmapavargavardhanam |
dhiyAbhinandyAtmavatAM satAM gati\-
rbabhASha IShatsmitashobhitAnanaH || 12||
shrIbhagavAnuvAcha
yoga AdhyAtmikaH puMsAM mato niHshreyasAya me |
atyantoparatiryatra duHkhasya cha sukhasya cha || 13||
tamimaM te pravakShyAmi yamavochaM purAnaghe |
R^iShINAM shrotukAmAnAM yogaM sarvA~NganaipuNam || 14||
chetaH khalvasya bandhAya muktaye chAtmano matam |
guNeShu saktaM bandhAya rataM vA puMsi muktaye || 15||
ahammamAbhimAnotthaiH kAmalobhAdibhirmalaiH |
vItaM yadA manaH shuddhamaduHkhamasukhaM samam || 16||
tadA puruSha AtmAnaM kevalaM prakR^iteH param |
nirantaraM svaya~njyotiraNimAnamakhaNDitam || 17||
j~nAnavairAgyayuktena bhaktiyuktena chAtmanA |
paripashyatyudAsInaM prakR^itiM cha hataujasam || 18||
na yujyamAnayA bhaktyA bhagavatyakhilAtmani |
sadR^isho.asti shivaH panthA yoginAM brahmasiddhaye || 19||
prasa~NgamajaraM pAshamAtmanaH kavayo viduH |
sa eva sAdhuShu kR^ito mokShadvAramapAvR^itam || 20||
titikShavaH kAruNikAH suhR^idaH sarvadehinAm |
ajAtashatravaH shAntAH sAdhavaH sAdhubhUShaNAH || 21||
mayyananyena bhAvena bhaktiM kurvanti ye dR^iDhAm |
matkR^ite tyaktakarmANastyaktasvajanabAndhavAH || 22||
madAshrayAH kathAmR^iShTAH shR^iNvanti kathayanti cha |
tapanti vividhAstApA naitAnmadgatachetasaH || 23||
ta ete sAdhavaH sAdhvi sarvasa~NgavivarjitAH |
sa~NgasteShvatha te prArthyaH sa~NgadoShaharA hi te || 24||
satAM prasa~NgAnmama vIryasaMvido
bhavanti hR^itkarNarasAyanAH kathAH |
tajjoShaNAdAshvapavargavartmani
shraddhA ratirbhaktiranukramiShyati || 25||
bhaktyA pumAn jAtavirAga aindriyA\-
ddR^iShTashrutAn madrachanAnuchintayA |
chittasya yatto grahaNe yogayukto
yatiShyate R^ijubhiryogamArgaiH || 26||
asevayAyaM prakR^iterguNAnAM
j~nAnena vairAgyavijR^imbhitena |
yogena mayyarpitayA cha bhaktyA
mAM pratyagAtmAnamihAvarundhe || 27||
devahUtiruvAcha
kAchittvayyuchitA bhaktiH kIdR^ishI mama gocharA |
yayA padaM te nirvANama~njasAnvAshnavA aham || 28||
yo yogo bhagavadbANo nirvANAtmaMstvayoditaH |
kIdR^ishaH kati chA~NgAni yatastattvAvabodhanam || 29||
tadetanme vijAnIhi yathAhaM mandadhIrhare |
sukhaM bud.hdhyeya durbodhaM yoShA bhavadanugrahAt || 30||
maitreya uvAcha
viditvArthaM kapilo mAturitthaM
jAtasneho yatra tanvAbhijAtaH |
tattvAmnAyaM yatpravadanti sA~NkhyaM
provAcha vai bhaktivitAnayogam || 31||
shrIbhagavAnuvAcha
devAnAM guNali~NgAnAmAnushravikakarmaNAm |
sattva evaikamanaso vR^ittiH svAbhAvikI tu yA || 32||
animittA bhAgavatI bhaktiH siddhergarIyasI |
jarayatyAshu yA koshaM nigIrNamanalo yathA || 33||
naikAtmatAM me spR^ihayanti kechi\-
nmatpAdasevAbhiratA madIhAH |
ye.anyonyato bhAgavatAH prasajya
sabhAjayante mama pauruShANi || 34||
pashyanti te me ruchirANyamba santaH
prasannavaktrAruNalochanAni |
rUpANi divyAni varapradAni
sAkaM vAchaM spR^ihaNIyAM vadanti || 35||
tairdarshanIyAvayavairudAra\-
vilAsahAsekShitavAmasUktaiH |
hR^itAtmano hR^itaprANAMshcha bhakti\-
ranichChato me gatimaNvIM prayu~Nkte || 36||
atho vibhUtiM mama mAyAvinastA\-
maishvaryamaShTA~NgamanupravR^ittam |
shriyaM bhAgavatIM vA spR^ihayanti bhadrAM
parasya me te.ashnuvate tu loke || 37||
na karhichinmatparAH shAntarUpe
na~NkShyanti no me.animiSho leDhi hetiH |
yeShAmahaM priya AtmA sutashcha
sakhA guruH suhR^ido daivamiShTam || 38||
imaM lokaM tathaivAmumAtmAnamubhayAyinam |
AtmAnamanu ye cheha ye rAyaH pashavo gR^ihAH || 39||
visR^ijya sarvAnanyAMshcha mAmevaM vishvatomukham |
bhajantyananyayA bhaktyA tAn mR^ityoratipAraye || 40||
nAnyatra madbhagavataH pradhAnapuruSheshvarAt |
AtmanaH sarvabhUtAnAM bhayaM tIvraM nivartate || 41||
madbhayAdvAti vAtoyaM sUryastapati madbhayAt |
varShatIndro dahatyagnirmR^ityushcharati madbhayAt || 42||
j~nAnavairAgyayuktena bhaktiyogena yoginaH |
kShemAya pAdamUlaM me pravishantyakutobhayam || 43||
etAvAneva loke.asmin puMsAM niHshreyasodayaH |
tIvreNa bhaktiyogena mano mayyarpitaM sthiram || 44||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe kApileyopAkhyAne pa~nchaviMsho.adhyAyaH || 25||
\iti
\section{.. OM namo bhagavate vAsudevAya ..}
\section{.. ShaDviMsho.adhyAyaH 26 ..}
shrIbhagavAnuvAcha
atha te sampravakShyAmi tattvAnAM lakShaNaM pR^ithak |
yadviditvA vimuchyeta puruShaH prAkR^itairguNaiH || 1||
j~nAnaM niHshreyasArthAya puruShasyAtmadarshanam |
yadAhurvarNaye tatte hR^idayagranthibhedanam || 2||
anAdirAtmA puruSho nirguNaH prakR^iteH paraH |
pratyagdhAmA svaya~njyotirvishvaM yena samanvitam || 3||
sa eSha prakR^itiM sUkShmAM daivIM guNamayIM vibhuH |
yadR^ichChayaivopagatAmabhyapadyata lIlayA || 4||
guNairvichitrAH sR^ijatIM sarUpAH prakR^itiM prajAH |
vilokya mumuhe sadyaH sa iha j~nAnagUhayA || 5||
evaM parAbhidhyAnena kartR^itvaM prakR^iteH pumAn |
karmasu kriyamANeShu guNairAtmani manyate || 6||
tadasya saMsR^itirbandhaH pAratantryaM cha tatkR^itam |
bhavatyakarturIshasya sAkShiNo nirvR^itAtmanaH || 7||
kAryakAraNakartR^itve kAraNaM prakR^itiM viduH |
bhoktR^itve sukhaduHkhAnAM puruShaM prakR^iteH param || 8||
devahUtiruvAcha
prakR^iteH puruShasyApi lakShaNaM puruShottama |
brUhi kAraNayorasya sadasachcha yadAtmakam || 9||
shrIbhagavAnuvAcha
yattattriguNamavyaktaM nityaM sadasadAtmakam |
pradhAnaM prakR^itiM prAhuravisheShaM visheShavat || 10||
pa~nchabhiH pa~nchabhirbrahma chaturbhirdashabhistathA |
etachchaturviMshatikaM gaNaM prAdhAnikaM viduH || 11||
mahAbhUtAni pa~nchaiva bhUrApo.agnirmarunnabhaH |
tanmAtrANi cha tAvanti gandhAdIni matAni me || 12||
indriyANi dasha shrotraM tvag dR^igrasananAsikAH |
vAkkarau charaNau meDhraM pAyurdashama uchyate || 13||
mano buddhiraha~NkArashchittamityantarAtmakam |
chaturdhA lakShyate bhedo vR^ittyA lakShaNarUpayA || 14||
etAvAneva sa~NkhyAto brahmaNaH saguNasya ha |
sannivesho mayA prokto yaH kAlaH pa~nchaviMshakaH || 15||
prabhAvaM pauruShaM prAhuH kAlameke yato bhayam |
aha~NkAravimUDhasya kartuH prakR^itimIyuShaH || 16||
prakR^iterguNasAmyasya nirvisheShasya mAnavi |
cheShTA yataH sa bhagavAn kAla ityupalakShitaH || 17||
antaH puruSharUpeNa kAlarUpeNa yo bahiH |
samanvetyeSha sattvAnAM bhagavAnAtmamAyayA || 18||
daivAtkShubhitadharmiNyAM svasyAM yonau paraH pumAn
Adhatta vIryaM sAsUta mahattattvaM hiraNmayam || 19||
vishvamAtmagataM vya~njan kUTastho jagada~NkuraH |
svatejasApibattIvramAtmaprasvApanaM tamaH || 20||
yattatsattvaguNaM svachChaM shAntaM bhagavataH padam |
yadAhurvAsudevAkhyaM chittaM tanmahadAtmakam || 21||
svachChatvamavikAritvaM shAntatvamiti chetasaH |
vR^ittibhirlakShaNaM proktaM yathApAM prakR^itiH parA || 22||
mahattattvAdvikurvANAdbhagavadvIryasambhavAt |
kriyAshaktiraha~NkArastrividhaH samapadyata || 23||
vaikArikastaijasashcha tAmasashcha yato bhavaH |
manasashchendriyANAM cha bhUtAnAM mahatAmapi || 24||
sahasrashirasaM sAkShAdyamanantaM prachakShate |
sa~NkarShaNAkhyaM puruShaM bhUtendriyamanomayam || 25||
kartR^itvaM karaNatvaM cha kAryatvaM cheti lakShaNam |
shAntaghoravimUDhatvamiti vA syAdaha~NkR^iteH || 26||
vaikArikAdvikurvANAnmanastattvamajAyata |
yatsa~NkalpavikalpAbhyAM vartate kAmasambhavaH || 27||
yadvidurhyaniruddhAkhyaM hR^iShIkANAmadhIshvaram |
shAradendIvarashyAmaM saMrAdhyaM yogibhiH shanaiH || 28||
taijasAttu vikurvANAdbuddhitattvamabhUtsati |
dravyasphuraNavij~nAnamindriyANAmanugrahaH || 29||
saMshayo.atha viparyAso nishchayaH smR^itireva cha |
svApa ityuchyate buddherlakShaNaM vR^ittitaH pR^ithak || 30||
taijasAnIndriyANyeva kriyAj~nAnavibhAgashaH |
prANasya hi kriyAshaktirbuddhervij~nAnashaktitA || 31||
tAmasAchcha vikurvANAdbhagavadvIryachoditAt |
shabdamAtramabhUttasmAnnabhaH shrotraM tu shabdagam || 32||
arthAshrayatvaM shabdasya draShTurli~Ngatvameva cha |
tanmAtratvaM cha nabhaso lakShaNaM kavayo viduH || 33||
bhUtAnAM ChidradAtR^itvaM bahirantarameva cha |
prANendriyAtmadhiShNyatvaM nabhaso vR^ittilakShaNam || 34||
nabhasaH shabdatanmAtrAtkAlagatyA vikurvataH |
sparsho.abhavattato vAyustvaksparshasya cha sa~NgrahaH || 35||
mR^idutvaM kaThinatvaM cha shaityamuShNatvameva cha |
etatsparshasya sparshatvaM tanmAtratvaM nabhasvataH || 36||
chAlanaM vyUhanaM prAptirnetR^itvaM dravyashabdayoH |
sarvendriyANAmAtmatvaM vAyoH karmAbhilakShaNam || 37||
vAyoshcha sparshatanmAtrAdrUpaM daiveritAdabhUt |
samutthitaM tatastejashchakShU rUpopalambhanam || 38||
dravyAkR^ititvaM guNatA vyaktisaMsthAtvameva cha |
tejastvaM tejasaH sAdhvi rUpamAtrasya vR^ittayaH || 39||
dyotanaM pachanaM pAnamadanaM himamardanam |
tejaso vR^ittayastvetAH shoShaNaM kShuttR^iDeva cha || 40||
rUpamAtrAdvikurvANAttejaso daivachoditAt |
rasamAtramabhUttasmAdambho jihvA rasagrahaH || 41||
kaShAyo madhurastiktaH kaTvamla iti naikadhA |
bhautikAnAM vikAreNa rasa eko vibhidyate || 42||
kledanaM piNDanaM tR^iptiH prANanApyAyanondanam |
tApApanodo bhUyastvamambhaso vR^ittayastvimAH || 43||
rasamAtrAdvikurvANAdambhaso daivachoditAt |
gandhamAtramabhUttasmAtpR^ithvI ghrANastu gandhagaH || 44||
karambhapUtisaurabhyashAntogrAmlAdibhiH pR^ithak |
dravyAvayavavaiShamyAdgandha eko vibhidyate || 45||
bhAvanaM brahmaNaH sthAnaM dhAraNaM sadvisheShaNam |
sarvasattvaguNodbhedaH pR^ithivIvR^ittilakShaNam || 46||
nabhoguNavisheSho.artho yasya tachChrotramuchyate |
vAyorguNavisheSho.artho yasya tatsparshanaM viduH || 47||
tejoguNavisheSho.artho yasya tachchakShuruchyate |
ambhoguNavisheSho.artho yasya tadrasanaM viduH |
bhUmerguNavisheSho.artho yasya sa ghrANa uchyate || 48||
parasya dR^ishyate dharmo hyaparasmin samanvayAt |
ato visheSho bhAvAnAM bhUmAvevopalakShyate || 49||
etAnyasaMhatya yadA mahadAdIni sapta vai |
kAlakarmaguNopeto jagadAdirupAvishat || 50||
tatastenAnuviddhebhyo yuktebhyo.aNDamachetanam |
utthitaM puruSho yasmAdudatiShThadasau virAT || 51||
etadaNDaM visheShAkhyaM kramavR^iddhairdashottaraiH |
toyAdibhiH parivR^itaM pradhAnenAvR^itairbahiH |
yatra lokavitAno.ayaM rUpaM bhagavato hareH || 52||
hiraNmayAdaNDakoshAdutthAya salileshayAt |
tamAvishya mahAdevo bahudhA nirbibheda kham || 53||
nirabhidyatAsya prathamaM mukhaM vANI tato.abhavat |
vANyA vahniratho nAse prANo.ato ghrANa etayoH || 54||
ghrANAdvAyurabhidyetAmakShiNI chakShuretayoH |
tasmAtsUryo vyabhidyetAM karNau shrotraM tato dishaH || 55||
nirbibheda virAjastvagromashmashrvAdayastataH |
tata oShadhayashchAsan shishnaM nirbibhide tataH || 56||
retastasmAdApa Asan nirabhidyata vai gudam |
gudAdapAno.apAnAchcha mR^ityurlokabhaya~NkaraH || 57||
hastau cha nirabhidyetAM balaM tAbhyAM tataH svarAT |
pAdau cha nirabhidyetAM gatistAbhyAM tato hariH || 58||
nADyo.asya nirabhidyanta tAbhyo lohitamAbhR^itam |
nadyastataH samabhavannudaraM nirabhidyata || 59||
kShutpipAse tataH syAtAM samudrastvetayorabhUt |
athAsya hR^idayaM bhinnaM hR^idayAnmana utthitam || 60||
manasashchandramA jAto buddhirbuddhergirAM patiH |
aha~NkArastato rudrashchittaM chaityastato.abhavat || 61||
ete hyabhyutthitA devA naivAsyotthApane.ashakan |
punarAvivishuH khAni tamutthApayituM kramAt || 62||
vahnirvAchA mukhaM bheje nodatiShThattadA virAT |
ghrANena nAsike vAyurnodatiShThattadA virAT || 63||
akShiNI chakShuShA.a.adityo nodatiShThattadA virAT |
shrotreNa karNau cha disho nodatiShThattadA virAT || 64||
tvachaM romabhiroShadhyo nodatiShThattadA virAT |
retasA shishnamApastu nodatiShThattadA virAT || 65||
gudaM mR^ityurapAnena nodatiShThattadA virAT |
hastAvindro balenaiva nodatiShThattadA virAT || 66||
viShNurgatyaiva charaNau nodatiShThattadA virAT |
nADIrnadyo lohitena nodatiShThattadA virAT || 67||
kShuttR^iDbhyAmudaraM sindhurnodatiShThattadA virAT |
hR^idayaM manasA chandro nodatiShThattadA virAT || 68||
bud.hdhyA brahmApi hR^idayaM nodatiShThattadA virAT |
rudro.abhimatyA hR^idayaM nodatiShThattadA virAT || 69||
chittena hR^idayaM chaityaH kShetraj~naH prAvishadyadA |
virAT tadaiva puruShaH salilAdudatiShThata || 70||
yathA prasuptaM puruShaM prANendriyamanodhiyaH |
prabhavanti vinA yena notthApayitumojasA || 71||
tamasmin pratyagAtmAnaM dhiyA yogapravR^ittayA |
bhaktyA viraktyA j~nAnena vivichyAtmani chintayet || 72||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe kApileye tattvasamAmnAye ShaDviMsho.adhyAyaH || 26||
\iti
\section{.. OM namo bhagavate vAsudevAya ..}
\section{.. saptaviMsho.adhyAyaH \- 27 ..}
shrIbhagavAnuvAcha
prakR^itistho.api puruSho nAjyate prAkR^itairguNaiH |
avikArAdakartR^itvAnnirguNatvAjjalArkavat || 1||
sa eSha yarhi prakR^iterguNeShvabhiviShajjate |
aha~NkriyAvimUDhAtmA kartAsmItyabhimanyate || 2||
tena saMsArapadavImavasho.abhyetyanirvR^itaH |
prAsa~NgikaiH karmadoShaiH sadasanmishrayoniShu || 3||
arthe hyavidyamAne.api saMsR^itirna nivartate |
dhyAyato viShayAnasya svapne.anarthAgamo yathA || 4||
ata eva shanaishchittaM prasaktamasatAM pathi |
bhaktiyogena tIvreNa viraktyA cha nayedvasham || 5||
yamAdibhiryogapathairabhyasan shraddhayAnvitaH |
mayi bhAvena satyena matkathAshravaNena cha || 6||
sarvabhUtasamatvena nirvaireNAprasa~NgataH |
brahmacharyeNa maunena svadharmeNa balIyasA || 7||
yadR^ichChayopalabdhena santuShTo mitabhu~NmuniH |
viviktasharaNaH shAnto maitraH karuNa AtmavAn || 8||
sAnubandhe cha dehe.asminnakurvannasadAgraham |
j~nAnena dR^iShTatattvena prakR^iteH puruShasya cha || 9||
nivR^ittabud.hdhyavasthAno dUrIbhUtAnyadarshanaH |
upalabhyAtmanA.a.atmAnaM chakShuShevArkamAtmadR^ik || 10||
muktali~NgaM sadAbhAsamasati pratipadyate |
sato bandhumasachchakShuH sarvAnusyUtamadvayam || 11||
yathA jalastha AbhAsaH sthalasthenAvadR^ishyate |
svAbhAsena tathA sUryo jalasthena divisthitaH || 12||
evaM trivR^idaha~NkAro bhUtendriyamanomayaiH |
svAbhAsairlakShito.anena sadAbhAsena satyadR^ik || 13||
bhUtasUkShmendriyamanobud.hdhyAdiShviha nidrayA |
lIneShvasati yastatra vinidro niraha~NkriyaH || 14||
manyamAnastadA.a.atmAnamanaShTo naShTavanmR^iShA |
naShTe.aha~NkaraNe draShTA naShTavitta ivAturaH || 15||
evaM pratyavamR^ishyAsAvAtmAnaM pratipadyate |
sAha~NkArasya dravyasya yo.avasthAnamanugrahaH || 16||
devahUtiruvAcha
puruShaM prakR^itirbrahman na vimu~nchati karhichit |
anyonyApAshrayatvAchcha nityatvAdanayoH prabho || 17||
yathA gandhasya bhUmeshcha na bhAvo vyatirekataH |
apAM rasasya cha yathA tathA buddheH parasya cha || 18||
akartuH karmabandho.ayaM puruShasya yadAshrayaH |
guNeShu satsu prakR^iteH kaivalyaM teShvataH katham || 19||
kvachittattvAvamarshena nivR^ittaM bhayamulbaNam |
anivR^ittanimittatvAtpunaH pratyavatiShThate || 20||
shrIbhagavAnuvAcha
animittanimittena svadharmeNAmalAtmanA |
tIvrayA mayi bhaktyA cha shrutasambhR^itayA chiram || 21||
j~nAnena dR^iShTatattvena vairAgyeNa balIyasA |
tapoyuktena yogena tIvreNAtmasamAdhinA || 22||
prakR^itiH puruShasyeha dahyamAnA tvaharnisham |
tirobhavitrI shanakairagneryonirivAraNiH || 23||
bhuktabhogA parityaktA dR^iShTadoShA cha nityashaH |
neshvarasyAshubhaM dhatte sve mahimni sthitasya cha || 24||
yathA hyapratibuddhasya prasvApo bahvanarthabhR^it |
sa eva pratibuddhasya na vai mohAya kalpate || 25||
evaM viditatattvasya prakR^itirmayi mAnasam |
yu~njato nApakuruta AtmArAmasya karhichit || 26||
yadaivamadhyAtmarataH kAlena bahujanmanA |
sarvatra jAtavairAgya AbrahmabhuvanAnmuniH || 27||
madbhaktaH pratibuddhArtho matprasAdena bhUyasA |
niHshreyasaM svasaMsthAnaM kaivalyAkhyaM madAshrayam || 28||
prApnotIhA~njasA dhIraH svadR^ishAchChinnasaMshayaH |
yadgatvA na nivarteta yogI li~NgAdvinirgame || 29||
yadA na yogopachitAsu cheto
mAyAsu siddhasya viShajjate.a~Nga |
ananyahetuShvatha me gatiH syA\-
dAtyantikI yatra na mR^ityuhAsaH || 30||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe kApileyopAkhyAne saptaviMsho.adhyAyaH || 27||
\iti
\section{.. OM namo bhagavate vAsudevAya ..}
\section{.. aShTAviMsho.adhyAyaH 28 ..}
shrIbhagavAnuvAcha
yogasya lakShaNaM vakShye sabIjasya nR^ipAtmaje |
mano yenaiva vidhinA prasannaM yAti satpatham || 1||
svadharmAcharaNaM shaktyA vidharmAchcha nivartanam |
daivAllabdhena santoSha AtmavichcharaNArchanam || 2||
grAmyadharmanivR^ittishcha mokShadharmaratistathA |
mitamedhyAdanaM shashvadviviktakShemasevanam || 3||
ahiMsA satyamasteyaM yAvadarthaparigrahaH |
brahmacharyaM tapaH shauchaM svAdhyAyaH puruShArchanam || 4||
maunaM sadAsanajayaH sthairyaM prANajayaH shanaiH |
pratyAhArashchendriyANAM viShayAnmanasA hR^idi || 5||
svadhiShNyAnAmekadeshe manasA prANadhAraNam |
vaikuNThalIlAbhidhyAnaM samAdhAnaM tathA.a.atmanaH || 6||
etairanyaishcha pathibhirmano duShTamasatpatham |
bud.hdhyA yu~njIta shanakairjitaprANo hyatandritaH || 7||
shuchau deshe pratiShThApya vijitAsana Asanam |
tasmin svasti samAsIna R^ijukAyaH samabhyaset || 8||
prANasya shodhayenmArgaM pUrakumbhakarechakaiH |
pratikUlena vA chittaM yathA sthiramacha~nchalam || 9||
mano.achirAtsyAdvirajaM jitashvAsasya yoginaH |
vAyvagnibhyAM yathA lohaM dhmAtaM tyajati vai malam || 10||
prANAyAmairdaheddoShAn dhAraNAbhishcha kilbiShAn |
pratyAhAreNa saMsargAn dhyAnenAnIshvarAn guNAn || 11||
yadA manaH svaM virajaM yogena susamAhitam |
kAShThAM bhagavato dhyAyetsvanAsAgrAvalokanaH || 12||
prasannavadanAmbhojaM padmagarbhAruNekShaNam |
nIlotpaladalashyAmaM sha~NkhachakragadAdharam || 13||
lasatpa~Nkajaki~njalkapItakausheyavAsasam |
shrIvatsavakShasaM bhrAjatkaustubhAmuktakandharam || 14||
mattadvirephakalayA parItaM vanamAlayA |
parArdhyahAravalayakirITA~NgadanUpuram || 15||
kA~nchIguNollasachChroNiM hR^idayAmbhojaviShTaram |
darshanIyatamaM shAntaM manonayanavardhanam || 16||
apIchyadarshanaM shashvatsarvalokanamaskR^itam |
santaM vayasi kaishore bhR^ityAnugrahakAtaram || 17||
kIrtanyatIrthayashasaM puNyashlokayashaskaram |
dhyAyeddevaM samagrA~NgaM yAvanna chyavate manaH || 18||
sthitaM vrajantamAsInaM shayAnaM vA guhAshayam |
prekShaNIyehitaM dhyAyechChuddhabhAvena chetasA || 19||
tasmin labdhapadaM chittaM sarvAvayavasaMsthitam |
vilakShyaikatra saMyujyAda~Nge bhagavato muniH || 20||
sa~nchintayedbhagavatashcharaNAravindaM
vajrA~NkushadhvajasaroruhalA~nChanADhyam |
uttu~NgaraktavilasannakhachakravAla\-
jyotsnAbhirAhatamahaddhR^idayAndhakAram || 21||
yachChauchaniHsR^itasaritpravarodakena
tIrthena mUrdhnyadhikR^itena shivaH shivo.abhUt |
dhyAturmanaHshamalashailanisR^iShTavajraM
dhyAyechchiraM bhagavatashcharaNAravindam || 22||
jAnudvayaM jalajalochanayA jananyA
lakShmyAkhilasya suravanditayA vidhAtuH |
UrvornidhAya karapallavarochiShA yat
saMlAlitaM hR^idi vibhorabhavasya kuryAt || 23||
UrU suparNabhujayoradhishobhamAnA\-
vojonidhI atasikAkusumAvabhAsau |
vyAlambi pItavaravAsasi vartamAna\-
kA~nchIkalApaparirambhinitambabimbam || 24||
nAbhihradaM bhuvanakoshaguhodarasthaM
yatrAtmayonidhiShaNAkhilalokapadmam |
vyUDhaM hariNmaNivR^iShastanayoramuShya
dhyAyeddvayaM vishadahAramayUkhagauram || 25||
vakSho.adhivAsamR^iShabhasya mahAvibhUteH
puMsAM manonayananirvR^itimAdadhAnam |
kaNThaM cha kaustubhamaNeradhibhUShaNArthaM
kuryAnmanasyakhilalokanamaskR^itasya || 26||
bAhUMshcha mandaragireH parivartanena
nirNiktabAhuvalayAnadhilokapAlAn |
sa~nchintayeddashashatAramasahyatejaH
sha~NkhaM cha tatkarasaroruharAjahaMsam || 27||
kaumodakIM bhagavato dayitAM smareta
digdhAmarAtibhaTashoNitakardamena |
mAlAM madhuvratavarUthagiropaghuShTAM
chaityasya tattvamamalaM maNimasya kaNThe || 28||
bhR^ityAnukampitadhiyeha gR^ihItamUrteH
sa~nchintayedbhagavato vadanAravindam |
yadvisphuranmakarakuNDalavalgitena
vidyotitAmalakapolamudAranAsam || 29||
yachChrIniketamalibhiH parisevyamAnaM
bhUtyA svayA kuTilakuntalavR^indajuShTam |
mInadvayAshrayamadhikShipadabjanetraM
dhyAyenmanomayamatandrita ullasadbhru || 30||
tasyAvalokamadhikaM kR^ipayAtighora\-
tApatrayopashamanAya nisR^iShTamakShNoH |
snigddhasmitAnuguNitaM vipulaprasAdaM
dhyAyechchiraM vipulabhAvanayA guhAyAm || 31||
hAsaM hareravanatAkhilalokatIvra\-
shokAshrusAgaravishoShaNamatyudAram |
sammohanAya rachitaM nijamAyayAsya
bhrUmaNDalaM munikR^ite makaradhvajasya || 32||
dhyAnAyanaM prahasitaM bahulAdharoShTha\-
bhAsAruNAyitatanudvijakundapa~Nkti |
dhyAyetsvadehakuhare.avasitasya viShNoH
bhaktyA.a.ardrayArpitamanA na pR^ithagdidR^ikShet || 33||
evaM harau bhagavati pratilabdhabhAvo
bhaktyA dravaddhR^idaya utpulakaH pramodAt |
autkaNThyabAShpakalayA muhurardyamAna\-
stachchApi chittabaDishaM shanakairviyu~Nkte || 34||
muktAshrayaM yarhi nirviShayaM viraktaM
nirvANamR^ichChati manaH sahasA yathArchiH |
AtmAnamatra puruSho.avyavadhAnameka\-
manvIkShate pratinivR^ittaguNapravAhaH || 35||
so.apyetayA charamayA manaso nivR^ittyA
tasminmahimnyavasitaH sukhaduHkhabAhye |
hetutvamapyasati kartari duHkhayoryat
svAtman vidhatta upalabdhaparAtmakAShThaH || 36||
dehaM cha taM na charamaH sthitamutthitaM vA
siddho vipashyati yato.adhyagamatsvarUpam |
daivAdupetamatha daivavashAdapetaM
vAso yathA parikR^itaM madirAmadAndhaH || 37||
deho.api daivavashagaH khalu karma yAvat
svArambhakaM pratisamIkShata eva sAsuH |
taM sa prapa~nchamadhirUDhasamAdhiyogaH
svApnaM punarna bhajate pratibuddhavastuH || 38||
yathA putrAchcha vittAchcha pR^itha~NmartyaH pratIyate |
apyAtmatvenAbhimatAddehAdeH puruShastathA || 39||
yatholmukAdvisphuli~NgAddhUmAdvApi svasambhavAt |
apyAtmatvenAbhimatAdyathAgniH pR^ithagulmukAt || 40||
bhUtendriyAntaHkaraNAtpradhAnAjjIvasa.nj~nitAt |
AtmA tathA pR^ithag draShTA bhagavAn brahmasa.nj~nitaH || 41||
sarvabhUteShu chAtmAnaM sarvabhUtAni chAtmani |
IkShetAnanyabhAvena bhUteShviva tadAtmatAm || 42||
svayoniShu yathA jyotirekaM nAnA pratIyate |
yonInAM guNavaiShamyAttathA.a.atmA prakR^itau sthitaH || 43||
tasmAdimAM svAM prakR^itiM daivIM sadasadAtmikAm |
durvibhAvyAM parAbhAvya svarUpeNAvatiShThate || 44||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe kApileye sAdhanAnuShThAnaM nAmAShTAviMsho.adhyAyaH || 28||
\iti
\section{.. OM namo bhagavate vAsudevAya ..}
\section{.. ekonatriMsho.adhyAyaH \- 29 ..}
devahUtiruvAcha
lakShaNaM mahadAdInAM prakR^iteH puruShasya cha |
svarUpaM lakShyate.amIShAM yena tatpAramArthikam || 1||
yathA sA~NkhyeShu kathitaM yanmUlaM tatprachakShate |
bhaktiyogasya me mArgaM brUhi vistarashaH prabho || 2||
virAgo yena puruSho bhagavan sarvato bhavet |
AchakShva jIvalokasya vividhA mama saMsR^itIH || 3||
kAlasyeshvararUpasya pareShAM cha parasya te |
svarUpaM bata kurvanti yaddhetoH kushalaM janAH || 4||
lokasya mithyAbhimaterachakShuSha\-
shchiraM prasuptasya tamasyanAshraye |
shrAntasya karmasvanuviddhayA dhiyA
tvamAvirAsIH kila yogabhAskaraH || 5||
maitreya uvAcha
iti mAturvachaH shlakShNaM pratinandya mahAmuniH |
AbabhAShe kurushreShTha prItastAM karuNArditaH || 6||
shrIbhagavAnuvAcha
bhaktiyogo bahuvidho mArgairbhAmini bhAvyate |
svabhAvaguNamArgeNa puMsAM bhAvo vibhidyate || 7||
abhisandhAya yo hiMsAM dambhaM mAtsaryameva vA |
saMrambhI bhinnadR^igbhAvaM mayi kuryAtsa tAmasaH || 8||
viShayAnabhisandhAya yasha aishvaryameva vA |
archAdAvarchayedyo mAM pR^ithagbhAvaH sa rAjasaH || 9||
karmanirhAramuddishya parasmin vA tadarpaNam |
yajedyaShTavyamiti vA pR^ithagbhAvaH sa sAttvikaH || 10||
madguNashrutimAtreNa mayi sarvaguhAshaye |
manogatiravichChinnA yathA ga~NgAmbhaso.ambudhau || 11||
lakShaNaM bhaktiyogasya nirguNasya hyudAhR^itam |
ahaitukyavyavahitA yA bhaktiH puruShottame || 12||
sAlokyasArShTisAmIpyasArUpyaikatvamapyuta |
dIyamAnaM na gR^ihNanti vinA matsevanaM janAH || 13||
sa eva bhaktiyogAkhya Atyantika udAhR^itaH |
yenAtivrajya triguNaM madbhAvAyopapadyate || 14||
niShevitenAnimittena svadharmeNa mahIyasA |
kriyAyogena shastena nAtihiMsreNa nityashaH || 15||
maddhiShNyadarshanasparshapUjAstutyabhivandanaiH |
bhUteShu madbhAvanayA sattvenAsa~Ngamena cha || 16||
mahatAM bahumAnena dInAnAmanukampayA |
maitryA chaivAtmatulyeShu yamena niyamena cha || 17||
AdhyAtmikAnushravaNAnnAmasa~NkIrtanAchcha me |
ArjavenAryasa~Ngena niraha~NkriyayA tathA || 18||
maddharmaNo guNairetaiH parisaMshuddha AshayaH |
puruShasyA~njasAbhyeti shrutamAtraguNaM hi mAm || 19||
yathA vAtaratho ghrANamAvR^i~Nkte gandha AshayAt |
evaM yogarataM cheta AtmAnamavikAri yat || 20||
ahaM sarveShu bhUteShu bhUtAtmAvasthitaH sadA |
tamavaj~nAya mAM martyaH kurute.archAviDambanam || 21||
yo mAM sarveShu bhUteShu santamAtmAnamIshvaram |
hitvArchAM bhajate mauDhyAdbhasmanyeva juhoti saH || 22||
dviShataH parakAye mAM mAnino bhinnadarshinaH |
bhUteShu baddhavairasya na manaHshAntimR^ichChati || 23||
ahamuchchAvachairdravyaiH kriyayotpannayAnaghe |
naiva tuShye.archito.archAyAM bhUtagrAmAvamAninaH || 24||
archAdAvarchayettAvadIshvaraM mAM svakarmakR^it |
yAvanna veda svahR^idi sarvabhUteShvavasthitam || 25||
Atmanashcha parasyApi yaH karotyantarodaram |
tasya bhinnadR^isho mR^ityurvidadhe bhayamulbaNam || 26||
atha mAM sarvabhUteShu bhUtAtmAnaM kR^itAlayam |
arhayeddAnamAnAbhyAM maitryAbhinnena chakShuShA || 27||
jIvAH shreShThA hyajIvAnAM tataH prANabhR^itaH shubhe |
tataH sachittAH pravarAstatashchendriyavR^ittayaH || 28||
tatrApi sparshavedibhyaH pravarA rasavedinaH |
tebhyo gandhavidaH shreShThAstataH shabdavido varAH || 29||
rUpabhedavidastatra tatashchobhayato dataH |
teShAM bahupadAH shreShThAshchatuShpAdastato dvipAt || 30||
tato varNAshcha chatvArasteShAM brAhmaNa uttamaH |
brAhmaNeShvapi vedaj~no hyarthaj~no.abhyadhikastataH || 31||
arthaj~nAtsaMshayachChettA tataH shreyAn svakarmakR^it |
muktasa~Ngastato bhUyAnadogdhA dharmamAtmanaH || 32||
tasmAnmayyarpitAsheShakriyArthAtmA nirantaraH |
mayyarpitAtmanaH puMso mayi sannyastakarmaNaH |
na pashyAmi paraM bhUtamakartuH samadarshanAt || 33||
manasaitAni bhUtAni praNamedbahumAnayan |
Ishvaro jIvakalayA praviShTo bhagavAniti || 34||
bhaktiyogashcha yogashcha mayA mAnavyudIritaH |
yayorekatareNaiva puruShaH puruShaM vrajet || 35||
etadbhagavato rUpaM brahmaNaH paramAtmanaH |
paraM pradhAnaM puruShaM daivaM karmavicheShTitam || 36||
rUpabhedAspadaM divyaM kAla ityabhidhIyate |
bhUtAnAM mahadAdInAM yato bhinnadR^ishAM bhayam || 37||
yo.antaHpravishya bhUtAni bhUtairattyakhilAshrayaH |
sa viShNvAkhyo.adhiyaj~no.asau kAlaH kalayatAM prabhuH || 38||
na chAsya kashchiddayito na dveShyo na cha bAndhavaH |
Avishatyapramatto.asau pramattaM janamantakR^it || 39||
yadbhayAdvAti vAto.ayaM sUryastapati yadbhayAt |
yadbhayAdvarShate devo bhagaNo bhAti yadbhayAt || 40||
yadvanaspatayo bhItA latAshchauShadhibhiH saha |
sve sve kAle.abhigR^ihNanti puShpANi cha phalAni cha || 41||
sravanti sarito bhItA notsarpatyudadhiryataH |
agnirindhe sagiribhirbhUrna majjati yadbhayAt || 42||
nabho dadAti shvasatAM padaM yanniyamAdadaH |
lokaM svadehaM tanute mahAnsaptabhirAvR^itam || 43||
guNAbhimAnino devAH sargAdiShvasya yadbhayAt |
vartante.anuyugaM yeShAM vasha etachcharAcharam || 44||
so.ananto.antakaraH kAlo.anAdirAdikR^idavyayaH |
janaM janena janayan mArayan mR^ityunAntakam || 45||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe kApileyopAkhyAne ekonatriMsho.adhyAyaH || 29||
\iti
\section{.. OM namo bhagavate vAsudevAya ..}
\section{.. triMsho.adhyAyaH \- 30 ..}
kapila uvAcha
tasyaitasya jano nUnaM nAyaM vedoruvikramam |
kAlyamAno.api balino vAyoriva ghanAvaliH || 1||
yaM yamarthamupAdatte duHkhena sukhahetave |
taM taM dhunoti bhagavAn pumAn shochati yatkR^ite || 2||
yadadhruvasya dehasya sAnubandhasya durmatiH |
dhruvANi manyate mohAdgR^ihakShetravasUni cha || 3||
janturvai bhava etasmin yAM yAM yonimanuvrajet |
tasyAM tasyAM sa labhate nirvR^itiM na virajyate || 4||
narakastho.api dehaM vai na pumAMstyaktumichChati |
nArakyAM nirvR^itau satyAM devamAyAvimohitaH || 5||
AtmajAyAsutAgArapashudraviNabandhuShu |
nirUDhamUlahR^idaya AtmAnaM bahu manyate || 6||
sandahyamAnasarvA~Nga eShAmudvahanAdhinA |
karotyavirataM mUDho duritAni durAshayaH || 7||
AkShiptAtmendriyaH strINAmasatInAM cha mAyayA |
raho rachitayA.a.alApaiH shishUnAM kalabhAShiNAm || 8||
gR^iheShu kUTadharmeShu duHkhatantreShvatandritaH |
kurvan duHkhapratIkAraM sukhavanmanyate gR^ihI || 9||
arthairApAditairgurvyA hiMsayetastatashcha tAn |
puShNAti yeShAM poSheNa sheShabhugyAtyadhaH svayam || 10||
vArtAyAM lupyamAnAyAmArabdhAyAM punaH punaH |
lobhAbhibhUto niHsattvaH parArthe kurute spR^ihAm || 11||
kuTumbabharaNAkalpo mandabhAgyo vR^ithodyamaH |
shriyA vihInaH kR^ipaNo dhyAyan shvasiti mUDhadhIH || 12||
evaM svabharaNAkalpaM tatkalatrAdayastathA |
nAdriyante yathApUrvaM kInAshA iva gojaram || 13||
tatrApyajAtanirvedo bhriyamANaH svayambhR^itaiH |
jarayopAttavairUpyo maraNAbhimukho gR^ihe || 14||
Aste.avamatyopanyastaM gR^ihapAla ivAharan |
AmayAvyapradIptAgniralpAhAro.alpacheShTitaH || 15||
vAyunotkramatottAraH kaphasaMruddhanADikaH |
kAsashvAsakR^itAyAsaH kaNThe ghuraghurAyate || 16||
shayAnaH parishochadbhiH parivItaH svabandhubhiH |
vAchyamAno.api na brUte kAlapAshavashaM gataH || 17||
evaM kuTumbabharaNe vyApR^itAtmAjitendriyaH |
mriyate rudatAM svAnAmuruvedanayAstadhIH || 18||
yamadUtau tadA prAptau bhImau sarabhasekShaNau |
sa dR^iShTvA trastahR^idayaH shakR^inmUtraM vimu~nchati || 19||
yAtanAdeha AvR^itya pAshairbaddhvA gale balAt |
nayato dIrghamadhvAnaM daNDyaM rAjabhaTA yathA || 20||
tayornirbhinnahR^idayastarjanairjAtavepathuH |
pathi shvabhirbhakShyamANa Arto.aghaM svamanusmaran || 21||
kShuttR^iT parIto.arkadavAnalAnilaiH
santapyamAnaH pathi taptavAluke |
kR^ichChreNa pR^iShThe kashayA cha tADitaH
chalatyashakto.api nirAshramodake || 22||
tatra tatra patan shrAnto mUrchChitaH punarutthitaH |
pathA pApIyasA nItastarasA yamasAdanam || 23||
yojanAnAM sahasrANi navatiM nava chAdhvanaH |
tribhirmuhUrtairdvAbhyAM vA nItaH prApnoti yAtanAH || 24||
AdIpanaM svagAtrANAM veShTayitvolmukAdibhiH |
AtmamAMsAdanaM kvApi svakR^ittaM parato.api vA || 25||
jIvatashchAntrAbhyuddhAraH shvagR^idhrairyamasAdane |
sarpavR^ishchikadaMshAdyairdashadbhishchAtmavaishasam || 26||
kR^intanaM chAvayavasho gajAdibhyo bhidApanam |
pAtanaM girishR^i~Ngebhyo rodhanaM chAmbugartayoH || 27||
yAstAmisrAndhatAmisrA rauravAdyAshcha yAtanAH |
bhu~Nkte naro vA nArI vA mithaH sa~Ngena nirmitAH || 28||
atraiva narakaH svarga iti mAtaH prachakShate |
yA yAtanA vai nArakyastA ihApyupalakShitAH || 29||
evaM kuTumbaM bibhrANa udarambhara eva vA |
visR^ijyehobhayaM pretya bhu~Nkte tatphalamIdR^isham || 30||
ekaH prapadyate dhvAntaM hitvedaM svakalevaram |
kushaletarapAtheyo bhUtadroheNa yadbhR^itam || 31||
daivenAsAditaM tasya shamalaM niraye pumAn |
bhu~Nkte kuTumbapoShasya hR^itavitta ivAturaH || 32||
kevalena hyadharmeNa kuTumbabharaNotsukaH |
yAti jIvo.andhatAmisraM charamaM tamasaH padam || 33||
adhastAnnaralokasya yAvatIryAtanAdayaH |
kramashaH samanukramya punaratrAvrajechChuchiH || 34||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe kApileyopAkhyAne karmavipAko nama
triMsho.adhyAyaH || 30||
\iti
\section{.. OM namo bhagavate vAsudevAya ..}
\section{.. ekatriMsho.adhyAyaH \- 31 ..}
shrIbhagavAnuvAcha
karmaNA daivanetreNa janturdehopapattaye |
striyAH praviShTa udaraM puMso retaH kaNAshrayaH || 1||
kalalaM tvekarAtreNa pa~ncharAtreNa budbudam |
dashAhena tu karkandhUH peshyaNDaM vA tataH param || 2||
mAsena tu shiro dvAbhyAM bAhva~NghryAdya~NgavigrahaH |
nakhalomAsthicharmANi li~NgachChidrodbhavastribhiH || 3||
chaturbhirdhAtavaH sapta pa~nchabhiH kShuttR^iDudbhavaH |
ShaDbhirjarAyuNA vItaH kukShau bhrAmyati dakShiNe || 4||
mAturjagdhAnnapAnAdyairedhaddhAturasammate |
shete viNmUtrayorgarte sa janturjantusambhave || 5||
kR^imibhiH kShatasarvA~NgaH saukumAryAtpratikShaNam |
mUrchChAmApnotyurukleshastatratyaiH kShudhitairmuhuH || 6||
kaTutIkShNoShNalavaNarUkShAmlAdibhirulbaNaiH |
mAtR^ibhuktairupaspR^iShTaH sarvA~NgotthitavedanaH || 7||
ulbena saMvR^itastasminnantraishcha bahirAvR^itaH |
Aste kR^itvA shiraH kukShau bhugnapR^iShThashirodharaH || 8||
akalpaH svA~NgacheShTAyAM shakunta iva pa~njare |
tatra labdhasmR^itirdaivAtkarmajanmashatodbhavam |
smaran dIrghamanuchChvAsaM sharma kiM nAma vindate || 9||
Arabhya saptamAnmAsAllabdhabodho.api vepitaH |
naikatrAste sUtivAtairviShThAbhUriva sodaraH || 10||
nAthamAna R^iShirbhItaH saptavadhriH kR^itA~njaliH |
stuvIta taM viklavayA vAchA yenodare.arpitaH || 11||
janturuvAcha
tasyopasannamavituM jagadichChayAtta\-
nAnAtanorbhuvi chalachcharaNAravindam |
so.ahaM vrajAmi sharaNaM hyakutobhayaM me
yenedR^ishI gatiradarshyasato.anurUpA || 12||
yastvatra baddha iva karmabhirAvR^itAtmA
bhUtendriyAshayamayImavalambya mAyAm |
Aste vishuddhamavikAramakhaNDabodha\-
mAtapyamAnahR^idaye.avasitaM namAmi || 13||
yaH pa~nchabhUtarachite rahitaH sharIre
Channo yathendriyaguNArthachidAtmako.aham |
tenAvikuNThamahimAnamR^iShiM tamenaM
vande paraM prakR^itipUruShayoH pumAMsam || 14||
yanmAyayoruguNakarmanibandhane.asmin
sAMsArike pathi charaMstadabhishrameNa |
naShTasmR^itiH punarayaM pravR^iNIta lokaM
yuktyA kayA mahadanugrahamantareNa || 15||
j~nAnaM yadetadadadhAtkatamaH sa devaH
traikAlikaM sthirachareShvanuvartitAMshaH |
taM jIvakarmapadavImanuvartamAnA\-
stApatrayopashamanAya vayaM bhajema || 16||
dehyanyadehavivare jaTharAgninAsR^ig\-
viNmUtrakUpapatito bhR^ishataptadehaH |
ichChannito vivasituM gaNayan svamAsAn
nirvAsyate kR^ipaNadhIrbhagavan kadA nu || 17||
yenedR^ishIM gatimasau dashamAsya Isha
sa~NgrAhitaH purudayena bhavAdR^ishena |
svenaiva tuShyatu kR^itena sa dInanAthaH
ko nAma tatprati vinA~njalimasya kuryAt || 18||
pashyatyayaM dhiShaNayA nanu saptavadhriH
shArIrake damasharIryaparaH svadehe |
yatsR^iShTayA.a.asaM tamahaM puruShaM purANaM
pashye bahirhR^idi cha chaityamiva pratItam || 19||
so.ahaM vasannapi vibho bahuduHkhavAsaM
garbhAnna nirjigamiShe bahirandhakUpe |
yatropayAtamupasarpati devamAyA
mithyAmatiryadanu saMsR^itichakrametat || 20||
tasmAdahaM vigataviklava uddhariShya
AtmAnamAshu tamasaH suhR^idAtmanaiva |
bhUyo yathA vyasanametadanekarandhraM
mA me bhaviShyadupasAditaviShNupAdaH || 21||
kapila uvAcha
evaM kR^itamatirgarbhe dashamAsyaH stuvan R^iShiH |
sadyaH kShipatyavAchInaM prasUtyai sUtimArutaH || 22||
tenAvasR^iShTaH sahasA kR^itvAvAkshira AturaH |
viniShkrAmati kR^ichChreNa niruchChvAso hatasmR^itiH || 23||
patito bhuvyasR^i~NmUtre viShThAbhUriva cheShTate |
rorUyati gate j~nAne viparItAM gatiM gataH || 24||
parachChandaM na viduShA puShyamANo janena saH |
anabhipretamApannaH pratyAkhyAtumanIshvaraH || 25||
shAyito.ashuchiparya~Nke jantuH svedajadUShite |
neshaH kaNDUyane.a~NgAnAmAsanotthAnacheShTane || 26||
tudantyAmatvachaM daMshA mashakA matkuNAdayaH |
rudantaM vigataj~nAnaM kR^imayaH kR^imikaM yathA || 27||
ityevaM shaishavaM bhuktvA duHkhaM paugaNDameva cha |
alabdhAbhIpsito.aj~nAnAdiddhamanyuH shuchArpitaH || 28||
saha dehena mAnena vardhamAnena manyunA |
karoti vigrahaM kAmI kAmiShvantAya chAtmanaH || 29||
bhUtaiH pa~nchabhirArabdhe dehe dehyabudho.asakR^it |
ahaM mametyasadgrAhaH karoti kumatirmatim || 30||
tadarthaM kurute karma yadbaddho yAti saMsR^itim |
yo.anuyAti dadatkleshamavidyAkarmabandhanaH || 31||
yadyasadbhiH pathi punaH shishnodarakR^itodyamaiH |
Asthito ramate jantustamo vishati pUrvavat || 32||
satyaM shauchaM dayA maunaM buddhiH shrIrhrIryashaH kShamA |
shamo damo bhagashcheti yatsa~NgAdyAti sa~NkShayam || 33||
teShvashAnteShu mUDheShu khaNDitAtmasvasAdhuShu |
sa~NgaM na kuryAchChochyeShu yoShitkrIDAmR^igeShu cha || 34||
na tathAsya bhavenmoho bandhashchAnyaprasa~NgataH |
yoShitsa~NgAdyathA puMso yathA tatsa~Ngisa~NgataH || 35||
prajApatiH svAM duhitaraM dR^iShTvA tadrUpadharShitaH |
rohidbhUtAM so.anvadhAvadR^ikSharUpI hatatrapaH || 36||
tatsR^iShTasR^iShTasR^iShTeShu ko nvakhaNDitadhIH pumAn |
R^iShiM nArAyaNamR^ite yoShinmayyeha mAyayA || 37||
balaM me pashya mAyAyAH strImayyA jayino dishAm |
yA karoti padAkrAntAn bhrUvijR^imbheNa kevalam || 38||
sa~NgaM na kuryAtpramadAsu jAtu
yogasya pAraM paramArurukShuH |
matsevayA pratilabdhAtmalAbho
vadanti yA nirayadvAramasya || 39||
yopayAti shanairmAyA yoShiddevavinirmitA |
tAmIkShetAtmano mR^ityuM tR^iNaiH kUpamivAvR^itam || 40||
yAM manyate patiM mohAnmanmAyAmR^iShabhAyatIm |
strItvaM strIsa~NgataH prApto vittApatyagR^ihapradam || 41||
tAmAtmano vijAnIyAtpatyapatyagR^ihAtmakam |
daivopasAditaM mR^ityuM mR^igayorgAyanaM yathA || 42||
dehena jIvabhUtena lokAllokamanuvrajan |
bhu~njAna eva karmANi karotyavirataM pumAn || 43||
jIvo hyasyAnugo deho bhUtendriyamanomayaH |
tannirodho.asya maraNamAvirbhAvastu sambhavaH || 44||
dravyopalabdhisthAnasya dravyekShAyogyatA yadA |
tatpa~nchatvamahammAnAdutpattirdravyadarshanam || 45||
yathAkShNordravyAvayavadarshanAyogyatA yadA |
tadaiva chakShuSho draShTurdraShTR^itvAyogyatAnayoH || 46||
tasmAnna kAryaH santrAso na kArpaNyaM na sambhramaH |
buddhvA jIvagatiM dhIro muktasa~Ngashcharediha || 47||
samyagdarshanayA bud.hdhyA yogavairAgyayuktayA |
mAyAvirachite loke charennyasya kalevaram || 48||
iti shrImadbhAgavate mahApurANe pAramahaMsyAM saMhitAyAM
tR^itIyaskandhe kApileyopAkhyAne jIvagatirnAma
ekatriMsho.adhyAyaH || 31||
\iti
\section{.. OM namo bhagavate vAsudevAya ..}
\section{..   dvAtriMsho.adhyAyaH \- 32 ..}
kapila uvAcha
atha yo gR^ihamedhIyAn dharmAnevAvasan gR^ihe |
kAmamarthaM cha dharmAn svAn dogdhi bhUyaH piparti tAn || 1||
sa chApi bhagavaddharmAtkAmamUDhaH parA~NmukhaH |
yajate kratubhirdevAn pitR^IMshcha shraddhayAnvitaH || 2||
tachChraddhayA.a.akrAntamatiH pitR^idevavrataH pumAn |
gatvA chAndramasaM lokaM somapAH punareShyati || 3||
yadA chAhIndrashayyAyAM shete.anantAsano hariH |
tadA lokA layaM yAnti ta ete gR^ihamedhinAm || 4||
ye svadharmAn na duhyanti dhIrAH kAmArthahetave |
niHsa~NgA nyastakarmANaH prashAntAH shuddhachetasaH || 5||
nivR^ittidharmaniratA nirmamA niraha~NkR^itAH |
svadharmAkhyena sattvena parishuddhena chetasA || 6||
sUryadvAreNa te yAnti puruShaM vishvatomukham |
parAvareshaM prakR^itimasyotpattyantabhAvanam || 7||
dviparArdhAvasAne yaH pralayo brahmaNastu te |
tAvadadhyAsate lokaM parasya parachintakAH || 8||
kShmAmbho.analA.anilaviyanmana indriyArtha\-
bhUtAdibhiH parivR^itaM pratisa~njihIrShuH |
avyAkR^itaM vishati yarhi guNatrayAtmA
kAlaM parAkhyamanubhUya paraH svayambhUH || 9||
evaM paretya bhagavantamanupraviShTA
ye yogino jitamarunmanaso virAgAH |
tenaiva sAkamamR^itaM puruShaM purANaM
brahma pradhAnamupayAntyagatAbhimAnAH || 10||
atha taM sarvabhUtAnAM hR^itpadmeShu kR^itAlayam |
shrutAnubhAvaM sharaNaM vraja bhAvena bhAmini || 11||
AdyaH sthiracharANAM yo vedagarbhaH saharShibhiH |
yogeshvaraiH kumArAdyaiH siddhairyogapravartakaiH || 12||
bhedadR^iShTyAbhimAnena niHsa~NgenApi karmaNA |
kartR^itvAtsaguNaM brahma puruShaM puruSharShabham || 13||
sa saMsR^itya punaH kAle kAleneshvaramUrtinA |
jAte guNavyatikare yathApUrvaM prajAyate || 14||
aishvaryaM pArameShThyaM cha te.api dharmavinirmitam |
niShevya punarAyAnti guNavyatikare sati || 15||
ye tvihAsaktamanasaH karmasu shraddhayAnvitAH |
kurvantyapratiShiddhAni nityAnyapi cha kR^itsnashaH || 16||
rajasA kuNThamanasaH kAmAtmAno.ajitendriyAH |
pitR^In yajantyanudinaM gR^iheShvabhiratAshayAH || 17||
traivargikAste puruShA vimukhA harimedhasaH |
kathAyAM kathanIyoruvikramasya madhudviShaH || 18||
nUnaM daivena vihatA ye chAchyutakathAsudhAm |
hitvA shR^iNvantyasadgAthAH purIShamiva viDbhujaH || 19||
dakShiNena pathAryamNaH pitR^ilokaM vrajanti te |
prajAmanu prajAyante shmashAnAntakriyAkR^itaH || 20||
tataste kShINasukR^itAH punarlokamimaM sati |
patanti vivashA devaiH sadyo vibhraMshitodayAH || 21||
tasmAttvaM sarvabhAvena bhajasva parameShThinam |
tadguNAshrayayA bhaktyA bhajanIyapadAbujam || 22||
vAsudeve bhagavati bhaktiyogaH prayojitaH |
janayatyAshu vairAgyaM j~nAnaM yadbrahmadarshanam || 23||
yadAsya chittamartheShu sameShvindriyavR^ittibhiH |
na vigR^ihNAti vaiShamyaM priyamapriyamityuta || 24||
sa tadaivAtmanA.a.atmAnaM niHsa~NgaM samadarshanam |
heyopAdeyarahitamArUDhaM padamIkShate || 25||
j~nAnamAtraM paraM brahma paramAtmeshvaraH pumAn |
dR^ishyAdibhiH pR^ithagbhAvairbhagavAneka Iyate || 26||
etAvAneva yogena samagreNeha yoginaH |
yujyate.abhimato hyartho yadasa~Ngastu kR^itsnashaH || 27||
j~nAnamekaM parAchInairindriyairbrahma nirguNam |
avabhAtyartharUpeNa bhrAntyA shabdAdidharmiNA || 28||
yathA mahAnahaM rUpastrivR^itpa~nchavidhaH svarAT |
ekAdashavidhastasya vapuraNDaM jagadyataH || 29||
etadvai shraddhayA bhaktyA yogAbhyAsena nityashaH |
samAhitAtmA niHsa~Ngo viraktyA paripashyati || 30||
ityetatkathitaM gurvi j~nAnaM tadbrahmadarshanam |
yenAvabud.hdhyate tattvaM prakR^iteH puruShasya cha || 31||
j~nAnayogashcha manniShTho nairguNyo bhaktilakShaNaH |
dvayorapyeka evArtho bhagavachChabdalakShaNaH || 32||
yathendriyaiH pR^ithagdvArairartho bahuguNAshrayaH |
eko nAneyate tadvadbhagavAn shAstravartmabhiH || 33||
kriyayA kratubhirdAnaistapaHsvAdhyAyamarshanaiH |
AtmendriyajayenApi sannyAsena cha karmaNAm || 34||
yogena vividhA~Ngena bhaktiyogena chaiva hi |
dharmeNobhayachihnena yaH pravR^ittinivR^ittimAn || 35||
AtmatattvAvabodhena vairAgyeNa dR^iDhena cha |
Iyate bhagavAnebhiH saguNo nirguNaH svadR^ik || 36||
prAvochaM bhaktiyogasya svarUpaM te chaturvidham |
kAlasya chAvyaktagateryo.antardhAvati jantuShu || 37||
jIvasya saMsR^itIrbahvIravidyAkarmanirmitAH |
yAsva~Nga pravishannAtmA na veda gatimAtmanaH || 38||
naitatkhalAyopadishennAvinItAya karhichit |
na stabdhAya na bhinnAya naiva dharmadhvajAya cha || 39||
na lolupAyopadishenna gR^ihArUDhachetase |
nAbhaktAya cha me jAtu na madbhaktadviShAmapi || 40||
shraddadhAnAya bhaktAya vinItAyAnasUyave |
bhUteShu kR^itamaitrAya shushrUShAbhiratAya cha || 41||
bahirjAtavirAgAya shAntachittAya dIyatAm |
nirmatsarAya shuchaye yasyAhaM preyasAM priyaH || 42||
ya idaM shR^iNuyAdamba shraddhayA puruShaH sakR^it |
yo vAbhidhatte machchittaH sa hyeti padavIM cha me || 43||
iti shrImadbhAgavate mahApurANe pAramahaMsyAMsaMhitAyAM
tR^itIyaskandhe kApileye dvAtriMsho.adhyAyaH || 32||
\iti
\section{.. OM namo bhagavate vAsudevAya ..}
\section{.. trayastriMsho.adhyAyaH \- 33 ..}
maitreya uvAcha
evaM nishamya kapilasya vacho janitrI
sA kardamasya dayitA kila devahUtiH |
visrastamohapaTalA tamabhipraNamya
tuShTAva tattvaviShayA~NkitasiddhibhUmim || 1||
devahUtiruvAcha
athApyajo.antaHsalile shayAnaM
bhUtendriyArthAtmamayaM vapuste |
guNapravAhaM sadasheShabIjaM
dadhyau svayaM yajjaTharAbjajAtaH || 2||
sa eva vishvasya bhavAn vidhatte
guNapravAheNa vibhaktavIryaH |
sargAdyanIho.avitathAbhisandhi\-
rAtmeshvaro.atarkyasahasrashaktiH || 3||
sa tvaM bhR^ito me jaThareNa nAtha
kathaM nu yasyodara etadAsIt |
vishvaM yugAnte vaTapatra ekaH
shete sma mAyAshishura~NghripAnaH || 4||
tvaM dehatantraH prashamAya pApmanAM
nideshabhAjAM cha vibho vibhUtaye |
yathAvatArAstava sUkarAdaya\-
stathAyamapyAtmapathopalabdhaye || 5||
yannAmadheyashravaNAnukIrtanA\-
dyatprahvaNAdyatsmaraNAdapi kvachit |
shvAdo.api sadyaH savanAya kalpate
kutaH punaste bhagavan nu darshanAt || 6||
aho bata shvapacho.ato garIyAn
yajjihvAgre vartate nAma tubhyam |
tepustapaste juhuvuH sasnurAryA
brahmAnUchurnAma gR^iNanti ye te || 7||
taM tvAmahaM brahma paraM pumAMsaM
pratyaksrotasyAtmani saMvibhAvyam |
svatejasA dhvastaguNapravAhaM
vande viShNuM kapilaM vedagarbham || 8||
maitreya uvAcha
IDito bhagavAnevaM kapilAkhyaH paraH pumAn |
vAchA viklavayetyAha mAtaraM mAtR^ivatsalaH || 9||
kapila uvAcha
mArgeNAnena mAtaste susevyenoditena me |
Asthitena parAM kAShThAmachirAdavarotsyasi || 10||
shraddhatsvaitanmataM mahyaM juShTaM yadbrahmavAdibhiH |
yena mAmabhavaM yAyA mR^ityumR^ichChantyatadvidaH || 11||
maitreya uvAcha
iti pradarshya bhagavAn satIM tAmAtmano gatim |
svamAtrA brahmavAdinyA kapilo.anumato yayau || 12||
sA chApi tanayoktena yogAdeshena yogayuk |
tasminnAshrama ApIDe sarasvatyAH samAhitA || 13||
abhIkShNAvagAhakapishAn jaTilAn kuTilAlakAn |
AtmAnaM chogratapasA bibhratI chIriNaM kR^isham || 14||
prajApateH kardamasya tapoyogavijR^imbhitam |
svagArhasthyamanaupamyaM prArthyaM vaimAnikairapi || 15||
payaHphenanibhAH shayyA dAntA rukmaparichChadAH |
AsanAni cha haimAni susparshAstaraNAni cha || 16||
svachChasphaTikakuDyeShu mahAmArakateShu cha |
ratnapradIpA AbhAnti lalanAratnasaMyutAH || 17||
gR^ihodyAnaM kusumitai ramyaM bahvamaradrumaiH |
kUjadviha~NgamithunaM gAyan mattamadhuvratam || 18||
yatra praviShTamAtmAnaM vibudhAnucharA jaguH |
vApyAmutpalagandhinyAM kardamenopalAlitam || 19||
hitvA tadIpsitatamamapyAkhaNDalayoShitAm |
ki~nchichchakAra vadanaM putravishleShaNAturA || 20||
vanaM pravrajite patyAvapatyavirahAturA |
j~nAtatattvApyabhUnnaShTe vatse gauriva vatsalA || 21||
tameva dhyAyatI devamapatyaM kapilaM harim |
babhUvAchirato vatsa niHspR^ihA tAdR^ishe gR^ihe || 22||
dhyAyatI bhagavadrUpaM yadAha dhyAnagocharam |
sutaH prasannavadanaM samastavyastachintayA || 23||
bhaktipravAhayogena vairAgyeNa balIyasA |
yuktAnuShThAnajAtena j~nAnena brahmahetunA || 24||
vishuddhena tadA.a.atmAnamAtmanA vishvatomukham |
svAnubhUtyA tirobhUtamAyAguNavisheShaNam || 25||
brahmaNyavasthitamatirbhagavatyAtmasaMshraye |
nivR^ittajIvApattitvAtkShINakleshAptanirvR^itiH || 26||
nityArUDhasamAdhitvAtparAvR^ittaguNabhramA |
na sasmAra tadA.a.atmAnaM svapne dR^iShTamivotthitaH || 27||
taddehaH parataH poSho.apyakR^ishashchAdhyasambhavAt |
babhau malairavachChannaH sadhUma iva pAvakaH || 28||
svA~NgaM tapoyogamayaM muktakeshaM gatAmbaram |
daivaguptaM na bubudhe vAsudevapraviShTadhIH || 29||
evaM sA kapiloktena mArgeNAchirataH param |
AtmAnaM brahmanirvANaM bhagavantamavApa ha || 30||
tadvIrAsItpuNyatamaM kShetraM trailokyavishrutam |
nAmnA siddhapadaM yatra sA saMsiddhimupeyuShI || 31||
tasyAstadyogavidhutamArtyaM martyamabhUtsarit |
srotasAM pravarA saumya siddhidA siddhasevitA || 32||
kapilo.api mahAyogI bhagavAn piturAshramAt |
mAtaraM samanuj~nApya prAgudIchIM dishaM yayau || 33||
siddhachAraNagandharvairmunibhishchApsarogaNaiH |
stUyamAnaH samudreNa dattArhaNaniketanaH || 34||
Aste yogaM samAsthAya sA~NkhyAchAryairabhiShTutaH |
trayANAmapi lokAnAmupashAntyai samAhitaH || 35||

etannigaditaM tAta yatpR^iShTo.ahaM tavAnagha |
kapilasya cha saMvAdo devahUtyAshcha pAvanaH || 36||
ya idamanushR^iNoti yo.abhidhatte
kapilamunermatamAtmayogaguhyam |
bhagavati kR^itadhIH suparNaketA\-
vupalabhate bhagavatpadAravindam || 37||
iti shrImadbhAgavate mahApurANe vaiyAsakyAmaShTAdashasAhasryAM
pAramahaMsyAM saMhitAyAM tR^itIyaskandhe kApileyopAkhyAne
trayastriMshattamo.adhyAyaH || 33||
.. iti tR^itIyaskandhaH samAptaH ..
.. OM tatsat ..
\iti

##

Proofread by PSA Easwaran

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}