% Text title            : shrImadbhAgavatam - 10-1 - dashamaskandhaH pUrvArdham
% File name             : bhagpur-10a.itx
% Category              : purana, shrimadbhagavatam, vyAsa, krishna
% Location              : doc\_purana
% Proofread by          : PSA Easwaran
% Latest update         : July 4, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. shrImadbhAgavataM - dashamaskandhaH pUrvArdhaM ..}##
\itxtitle{.. shrImadbhAgavataM \- dashamaskandhaH pUrvArdham ..}##\endtitles ##
\chapter{.. OM namo bhagavate vAsudevAya ..}
\section{.. dashamaskandhaH pUrvArdhaM ..}
\section{.. prathamo.adhyAyaH \- 1 ..}
rAjovAcha
kathito vaMshavistAro bhavatA somasUryayoH |
rAj~nAM chobhayavaMshyAnAM charitaM paramAdbhutam || 1||
yadoshcha dharmashIlasya nitarAM munisattama |
tatrAMshenAvatIrNasya viShNorvIryANi shaMsa naH || 2||
avatIrya yadorvaMshe bhagavAn bhUtabhAvanaH |
kR^itavAn yAni vishvAtmA tAni no vada vistarAt || 3||
nivR^ittatarShairupagIyamAnA\-
dbhavauShadhAchChrotramanobhirAmAt |
ka uttamashlokaguNAnuvAdA\-
tpumAn virajyeta vinA pashughnAt || 4||
pitAmahA me samare.amara~njayai\-
rdevavratAdyAtirathaistimi~NgilaiH |
duratyayaM kauravasainyasAgaraM
kR^itvAtaran vatsapadaM sma yatplavAH || 5||
drauNyastravipluShTamidaM mada~NgaM
santAnabIjaM kurupANDavAnAm |
jugopa kukShiM gata Attachakro
mAtushcha me yaH sharaNaM gatAyAH || 6||
vIryANi tasyAkhiladehabhAjA\-
mantarbahiH pUruShakAlarUpaiH |
prayachChato mR^ityumutAmR^itaM cha
mAyAmanuShyasya vadasva vidvan || 7||
rohiNyAstanayaH prokto rAmaH sa~NkarShaNastvayA |
devakyA garbhasambandhaH kuto dehAntaraM vinA || 8||
kasmAnmukundo bhagavAn piturgehAdvrajaM gataH |
kva vAsaM j~nAtibhiH sArdhaM kR^itavAn sAtvatAmpatiH || 9||
vraje vasan kimakaronmadhupuryAM cha keshavaH |
bhrAtaraM chAvadhItkaMsaM mAturaddhAtadarhaNam || 10||
dehaM mAnuShamAshritya kati varShANi vR^iShNibhiH |
yadupuryAM sahAvAtsItpatnyaH katyabhavan prabhoH || 11||
etadanyachcha sarvaM me mune kR^iShNavicheShTitam |
vaktumarhasi sarvaj~na shraddadhAnAya vistR^itam || 12||
naiShAtiduHsahA kShunmAM tyaktodamapi bAdhate |
pibantaM tvanmukhAmbhojachyutaM harikathAmR^itam || 13||
sUta uvAcha
evaM nishamya bhR^igunandana sAdhuvAdaM
vaiyAsakiH sa bhagavAnatha viShNurAtam |
pratyarchya kR^iShNacharitaM kalikalmaShaghnaM
vyAhartumArabhata bhAgavatapradhAnaH || 14||
shrIshuka uvAcha
samyagvyavasitA buddhistava rAjarShisattama |
vAsudevakathAyAM te yajjAtA naiShThikI ratiH || 15||
vAsudevakathAprashnaH puruShAMstrIn punAti hi |
vaktAraM pR^ichChakaM shrotR^IMstatpAdasalilaM yathA || 16||
bhUmirdR^iptanR^ipavyAjadaityAnIkashatAyutaiH |
AkrAntA bhUribhAreNa brahmANaM sharaNaM yayau || 17||
gaurbhUtvAshrumukhI khinnA krandantI karuNaM vibhoH |
upasthitAntike tasmai vyasanaM svamavochata || 18||
brahmA tadupadhAryAtha saha devaistayA saha |
jagAma satrinayanastIraM kShIrapayonidheH || 19||
tatra gatvA jagannAthaM devadevaM vR^iShAkapim |
puruShaM puruShasUktena upatasthe samAhitaH || 20||
giraM samAdhau gagane samIritAM
nishamya vedhAstridashAnuvAcha ha |
gAM pauruShIM me shR^iNutAmarAH puna\-
rvidhIyatAmAshu tathaiva mA chiram || 21||
puraiva puMsAvadhR^ito dharAjvaro
bhavadbhiraMshairyaduShUpajanyatAm |
sa yAvadurvyA bharamIshvareshvaraH
svakAlashaktyA kShapayaMshcharedbhuvi || 22||
vasudevagR^ihe sAkShAdbhagavAn puruShaH paraH |
janiShyate tatpriyArthaM sambhavantu surastriyaH || 23||
vAsudevakalAnantaH sahasravadanaH svarAT |
agrato bhavitA devo hareH priyachikIrShayA || 24||
viShNormAyA bhagavatI yayA sammohitaM jagat |
AdiShTA prabhuNAMshena kAryArthe sambhaviShyati || 25||
shrIshuka uvAcha
ityAdishyAmaragaNAn prajApatipatirvibhuH |
AshvAsya cha mahIM gIrbhiH svadhAma paramaM yayau || 26||
shUraseno yadupatirmathurAmAvasan purIm |
mAthurA~nChUrasenAMshcha viShayAn bubhuje purA || 27||
rAjadhAnI tataH sAbhUtsarvayAdavabhUbhujAm |
mathurA bhagavAn yatra nityaM sannihito hariH || 28||
tasyAM tu karhichichChaurirvasudevaH kR^itodvahaH |
devakyA sUryayA sArdhaM prayANe rathamAruhat || 29||
ugrasenasutaH kaMsaH svasuH priyachikIrShayA |
rashmIn hayAnAM jagrAha raukmai rathashatairvR^itaH || 30||
chatuHshataM pAribarhaM gajAnAM hemamAlinAm |
ashvAnAmayutaM sArdhaM rathAnAM cha triShaTshatam || 31||
dAsInAM sukumArINAM dve shate samala~NkR^ite |
duhitre devakaH prAdAdyAne duhitR^ivatsalaH || 32||
sha~NkhatUryamR^ida~NgAshcha nedurdundubhayaH samam |
prayANaprakrame tAvadvaravadhvoH suma~Ngalam || 33||
pathi pragrahiNaM kaMsamAbhAShyAhAsharIravAk |
asyAstvAmaShTamo garbho hantA yAM vahase.abudha || 34||
ityuktaH sa khalaH pApo bhojAnAM kulapAMsanaH |
bhaginIM hantumArabdhaH khaDgapANiH kache.agrahIt || 35||
taM jugupsitakarmANaM nR^ishaMsaM nirapatrapam |
vasudevo mahAbhAga uvAcha parisAntvayan || 36||
vasudeva uvAcha
shlAghanIyaguNaH shUrairbhavAn bhojayashaskaraH |
sa kathaM bhaginIM hanyAtstriyamudvAhaparvaNi || 37||
mR^ityurjanmavatAM vIra dehena saha jAyate |
adya vAbdashatAnte vA mR^ityurvai prANinAM dhruvaH || 38||
dehe pa~nchatvamApanne dehI karmAnugo.avashaH |
dehAntaramanuprApya prAktanaM tyajate vapuH || 39||
vrajaMstiShThan padaikena yathaivaikena gachChati |
yathA tR^iNajalUkaivaM dehI karmagatiM gataH || 40||
svapne yathA pashyati dehamIdR^ishaM
manorathenAbhiniviShTachetanaH |
dR^iShTashrutAbhyAM manasAnuchintayan
prapadyate tatkimapi hyapasmR^itiH || 41||
yato yato dhAvati daivachoditaM
mano vikArAtmakamApa pa~nchasu |
guNeShu mAyArachiteShu dehyasau
prapadyamAnaH saha tena jAyate || 42||
jyotiryathaivodakapArthiveShvadaH
samIravegAnugataM vibhAvyate |
evaM svamAyArachiteShvasau pumAn
guNeShu rAgAnugato vimuhyati || 43||
tasmAnna kasyachiddrohamAcharetsa tathAvidhaH |
AtmanaH kShemamanvichChan drogdhurvai parato bhayam || 44||
eShA tavAnujA bAlA kR^ipaNA putrikopamA |
hantuM nArhasi kalyANImimAM tvaM dInavatsalaH || 45||
shrIshuka uvAcha
evaM sa sAmabhirbhedairbodhyamAno.api dAruNaH |
na nyavartata kauravya puruShAdAnanuvrataH || 46||
nirbandhaM tasya taM j~nAtvA vichintyAnakadundubhiH |
prAptaM kAlaM prativyoDhumidaM tatrAnvapadyata || 47||
mR^ityurbuddhimatApohyo yAvadbuddhibalodayam |
yadyasau na nivarteta nAparAdho.asti dehinaH || 48||
pradAya mR^ityave putrAn mochaye kR^ipaNAmimAm |
sutA me yadi jAyeran mR^ityurvA na mriyeta chet || 49||
viparyayo vA kiM na syAdgatirdhAturduratyayA |
upasthito nivarteta nivR^ittaH punarApatet || 50||
agneryathA dAruviyogayogayo\-
radR^iShTato.anyanna nimittamasti |
evaM hi jantorapi durvibhAvyaH
sharIrasaMyogaviyogahetuH || 51||
evaM vimR^ishya taM pApaM yAvadAtmanidarshanam |
pUjayAmAsa vai shaurirbahumAnapuraHsaram || 52||
prasannavadanAmbhojo nR^ishaMsaM nirapatrapam |
manasA dUyamAnena vihasannidamabravIt || 53||
vasudeva uvAcha
na hyasyAste bhayaM saumya yadvAgAhAsharIriNI |
putrAn samarpayiShye.asyA yataste bhayamutthitam || 54||
shrIshuka uvAcha
svasurvadhAnnivavR^ite kaMsastadvAkyasAravit |
vasudevo.api taM prItaH prashasya prAvishadgR^iham || 55||
atha kAla upAvR^itte devakI sarvadevatA |
putrAn prasuShuve chAShTau kanyAM chaivAnuvatsaram || 56||
kIrtimantaM prathamajaM kaMsAyAnakadundubhiH |
arpayAmAsa kR^ichChreNa so.anR^itAdativihvalaH || 57||
kiM duHsahaM nu sAdhUnAM viduShAM kimapekShitam |
kimakAryaM kadaryANAM dustyajaM kiM dhR^itAtmanAm || 58||
dR^iShTvA samatvaM tachChaureH satye chaiva vyavasthitim |
kaMsastuShTamanA rAjan prahasannidamabravIt || 59||
pratiyAtu kumAro.ayaM na hyasmAdasti me bhayam |
aShTamAdyuvayorgarbhAnmR^ityurme vihitaH kila || 60||
tatheti sutamAdAya yayAvAnakadundubhiH |
nAbhyanandata tadvAkyamasato.avijitAtmanaH || 61||
nandAdyA ye vraje gopA yAshchAmIShAM cha yoShitaH |
vR^iShNayo vasudevAdyA devakyAdyA yadustriyaH || 62||
sarve vai devatAprAyA ubhayorapi bhArata |
j~nAtayo bandhusuhR^ido ye cha kaMsamanuvratAH || 63||
etatkaMsAya bhagavA~nChashaMsAbhyetya nAradaH |
bhUmerbhArAyamANAnAM daityAnAM cha vadhodyamam || 64||
R^iShervinirgame kaMso yadUn matvA surAniti |
devakyA garbhasambhUtaM viShNuM cha svavadhaM prati || 65||
devakIM vasudevaM cha nigR^ihya nigaDairgR^ihe |
jAtaM jAtamahan putraM tayorajanasha~NkayA || 66||
mAtaraM pitaraM bhrAtR^In sarvAMshcha suhR^idastathA |
ghnanti hyasutR^ipo lubdhA rAjAnaH prAyasho bhuvi || 67||
AtmAnamiha sa~njAtaM jAnan prAgviShNunA hatam |
mahAsuraM kAlanemiM yadubhiH sa vyarudhyata || 68||
ugrasenaM cha pitaraM yadubhojAndhakAdhipam |
svayaM nigR^ihya bubhuje shUrasenAnmahAbalaH || 69||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe shrIkR^iShNajanmopakrame prathamo.adhyAyaH || 1||
\iti
\section{.. OM namo bhagavate vAsudevAya ..}
\section{.. dvitIyo.adhyAyaH \- 2 ..}
shrIshuka uvAcha
pralambabakachANUratR^iNAvartamahAshanaiH |
muShTikAriShTadvividapUtanAkeshidhenukaiH || 1||
anyaishchAsurabhUpAlairbANabhaumAdibhiryutaH |
yadUnAM kadanaM chakre balI mAgadhasaMshrayaH || 2||
te pIDitA nivivishuH kurupa~nchAlakekayAn |
shAlvAn vidarbhAnniShadhAn videhAn kosalAnapi || 3||
eke tamanurundhAnA j~nAtayaH paryupAsate |
hateShu ShaTsu bAleShu devakyA augraseninA || 4||
saptamo vaiShNavaM dhAma yamanantaM prachakShate |
garbho babhUva devakyA harShashokavivardhanaH || 5||
bhagavAnapi vishvAtmA viditvA kaMsajaM bhayam |
yadUnAM nijanAthAnAM yogamAyAM samAdishat || 6||
gachCha devi vrajaM bhadre gopagobhirala~NkR^itam |
rohiNI vasudevasya bhAryA.a.aste nandagokule |
anyAshcha kaMsasaMvignA vivareShu vasanti hi || 7||
devakyA jaThare garbhaM sheShAkhyaM dhAma mAmakam |
tatsannikR^iShya rohiNyA udare sanniveshaya || 8||
athAhamaMshabhAgena devakyAH putratAM shubhe |
prApsyAmi tvaM yashodAyAM nandapatnyAM bhaviShyasi || 9||
archiShyanti manuShyAstvAM sarvakAmavareshvarIm |
dhUpopahArabalibhiH sarvakAmavarapradAm || 10||
nAmadheyAni kurvanti sthAnAni cha narA bhuvi |
durgeti bhadrakAlIti vijayA vaiShNavIti cha || 11||
kumudA chaNDikA kR^iShNA mAdhavI kanyaketi cha |
mAyA nArAyaNIshAnI shAradetyambiketi cha || 12||
garbhasa~NkarShaNAttaM vai prAhuH sa~NkarShaNaM bhuvi |
rAmeti lokaramaNAdbalaM balavaduchChrayAt || 13||
sandiShTaivaM bhagavatA tathetyomiti tadvachaH |
pratigR^ihya parikramya gAM gatA tattathAkarot || 14||
garbhe praNIte devakyA rohiNIM yoganidrayA |
aho visraMsito garbha iti paurA vichukrushuH || 15||
bhagavAnapi vishvAtmA bhaktAnAmabhaya~NkaraH |
AviveshAMshabhAgena mana AnakadundubheH || 16||
sa bibhratpauruShaM dhAma bhrAjamAno yathA raviH |
durAsado.atidurdharSho bhUtAnAM sambabhUva ha || 17||
tato jaganma~NgalamachyutAMshaM
samAhitaM shUrasutena devI |
dadhAra sarvAtmakamAtmabhUtaM
kAShThA yathA.a.anandakaraM manastaH || 18||
sA devakI sarvajagannivAsa\-
nivAsabhUtA nitarAM na reje |
bhojendragehe.agnishikheva ruddhA
sarasvatI j~nAnakhale yathA satI || 19||
tAM vIkShya kaMsaH prabhayAjitAntarAM
virochayantIM bhavanaM shuchismitAm |
AhaiSha me prANaharo harirguhAM
dhruvaM shrito yanna pureyamIdR^ishI || 20||
kimadya tasmin karaNIyamAshu me
yadarthatantro na vihanti vikramam |
striyAH svasurgurumatyA vadho.ayaM
yashaH shriyaM hantyanukAlamAyuH || 21||
sa eSha jIvan khalu sampareto
varteta yo.atyantanR^ishaMsitena |
dehe mR^ite taM manujAH shapanti
gantA tamo.andhaM tanumAnino dhruvam || 22||
iti ghoratamAdbhAvAtsannivR^ittaH svayaM prabhuH |
Aste pratIkShaMstajjanma harervairAnubandhakR^it || 23||
AsInaH saMvishaMstiShThan bhu~njAnaH paryaTanmahIm |
chintayAno hR^iShIkeshamapashyattanmayaM jagat || 24||
brahmA bhavashcha tatraitya munibhirnAradAdibhiH |
devaiH sAnucharaiH sAkaM gIrbhirvR^iShaNamaiDayan || 25||
satyavrataM satyaparaM trisatyaM
satyasya yoniM nihitaM cha satye |
satyasya satyamatasatyanetraM
satyAtmakaM tvAM sharaNaM prapannAH || 26||
ekAyano.asau dviphalastrimUla\-
shchatUrasaH pa~nchavidhaH ShaDAtmA |
saptatvagaShTaviTapo navAkSho
dashachChadI dvikhago hyAdivR^ikShaH || 27||
tvameka evAsya sataH prasUti\-
stvaM sannidhAnaM tvamanugrahashcha |
tvanmAyayA saMvR^itachetasastvAM
pashyanti nAnA na vipashchito ye || 28||
bibharShi rUpANyavabodha AtmA
kShemAya lokasya charAcharasya |
sattvopapannAni sukhAvahAni
satAmabhadrANi muhuH khalAnAm || 29||
tvayyambujAkShAkhilasattvadhAmni
samAdhinA.a.aveshitachetasaike |
tvatpAdapotena mahatkR^itena
kurvanti govatsapadaM bhavAbdhim || 30||
svayaM samuttIrya sudustaraM dyuman
bhavArNavaM bhImamadabhrasauhR^idAH |
bhavatpadAmbhoruhanAvamatra te
nidhAya yAtAH sadanugraho bhavAn || 31||
ye.anye.aravindAkSha vimuktamAnina\-
stvayyastabhAvAdavishuddhabuddhayaH |
Aruhya kR^ichChreNa paraM padaM tataH
patantyadho.anAdR^itayuShmada~NghrayaH || 32||
tathA na te mAdhava tAvakAH kvachi\-
dbhrashyanti mArgAttvayi baddhasauhR^idAH |
tvayAbhiguptA vicharanti nirbhayA
vinAyakAnIkapamUrdhasu prabho || 33||
sattvaM vishuddhaM shrayate bhavAn sthitau
sharIriNAM shreya upAyanaM vapuH |
vedakriyAyogatapaHsamAdhibhi\-
stavArhaNaM yena janaH samIhate || 34||
sattvaM na cheddhAtaridaM nijaM bhave\-
dvij~nAnamaj~nAnabhidApamArjanam |
guNaprakAshairanumIyate bhavAn
prakAshate yasya cha yena vA guNaH || 35||
na nAmarUpe guNajanmakarmabhi\-
rnirUpitavye tava tasya sAkShiNaH |
mano vachobhyAmanumeyavartmano
deva kriyAyAM pratiyantyathApi hi || 36||
shR^iNvan gR^iNan saMsmarayaMshcha chintaya\-
nnAmAni rUpANi cha ma~NgalAni te |
kriyAsu yastvachcharaNAravindayo\-
rAviShTachetA na bhavAya kalpate || 37||
diShTyA hare.asyA bhavataH pado bhuvo
bhAro.apanItastava janmaneshituH |
diShTyA~NkitAM tvatpadakaiH sushobhanai\-
rdrakShyAma gAM dyAM cha tavAnukampitAm || 38||
na te.abhavasyesha bhavasya kAraNaM
vinA vinodaM bata tarkayAmahe |
bhavo nirodhaH sthitirapyavidyayA
kR^itA yatastvayyabhayAshrayAtmani || 39||
matsyAshvakachChapanR^isiMhavarAhahaMsa\-
rAjanyavipravibudheShu kR^itAvatAraH |
tvaM pAsi nastribhuvanaM cha yathAdhunesha
bhAraM bhuvo hara yadUttama vandanaM te || 40||
diShTyAmba te kukShigataH paraH pumA\-
naMshena sAkShAdbhagavAn bhavAya naH |
mAbhUdbhayaM bhojapatermumUrSho\-
rgoptA yadUnAM bhavitA tavAtmajaH || 41||
shrIshuka uvAcha
ityabhiShTUya puruShaM yadrUpamanidaM yathA |
brahmeshAnau purodhAya devAH pratiyayurdivam || 42||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe garbhagataviShNorbrahmAdikR^itastutirnAma
dvitIyo.adhyAyaH || 2||
\iti
\section{.. OM namo bhagavate vAsudevAya ..}
\section{.. tR^itIyo.adhyAyaH \- 3 ..}
shrIshuka uvAcha
atha sarvaguNopetaH kAlaH paramashobhanaH |
yarhyevAjanajanmarkShaM shAntarkShagrahatArakam || 1||
dishaH prasedurgaganaM nirmaloDugaNodayam |
mahI ma~NgalabhUyiShThapuragrAmavrajAkarA || 2||
nadyaH prasannasalilA hradA jalaruhashriyaH |
dvijAlikulasannAdastabakA vanarAjayaH || 3||
vavau vAyuH sukhasparshaH puNyagandhavahaH shuchiH |
agnayashcha dvijAtInAM shAntAstatra samindhata || 4||
manAMsyAsan prasannAni sAdhUnAmasuradruhAm |
jAyamAne.ajane tasmin nedurdundubhayo divi || 5||
jaguH kinnaragandharvAstuShTuvuH siddhachAraNAH |
vidyAdharyashcha nanR^iturapsarobhiH samaM tadA || 6||
mumuchurmunayo devAH sumanAMsi mudAnvitAH |
mandaM mandaM jaladharA jagarjuranusAgaram || 7||
nishIthe tama udbhUte jAyamAne janArdane |
devakyAM devarUpiNyAM viShNuH sarvaguhAshayaH |
AvirAsIdyathA prAchyAM dishInduriva puShkalaH || 8||
tamadbhutaM bAlakamambujekShaNaM
chaturbhujaM sha~NkhagadAdyudAyudham |
shrIvatsalakShmaM galashobhikaustubhaM
pItAmbaraM sAndrapayodasaubhagam || 9||
mahArhavaidUryakirITakuNDala\-
tviShA pariShvaktasahasrakuntalam |
uddAmakA~nchya~Ngadaka~NkaNAdibhi\-
rvirochamAnaM vasudeva aikShata || 10||
sa vismayotphullavilochano hariM
sutaM vilokyAnakadundubhistadA |
kR^iShNAvatArotsavasambhramo.aspR^isha\-
nmudA dvijebhyo.ayutamApluto gavAm || 11||
athainamastaudavadhArya pUruShaM
paraM natA~NgaH kR^itadhIH kR^itA~njaliH |
svarochiShA bhArata sUtikAgR^ihaM
virochayantaM gatabhIH prabhAvavit || 12||
vasudeva uvAcha
vidito.asi bhavAn sAkShAtpuruShaH prakR^iteH paraH |
kevalAnubhavAnandasvarUpaH sarvabuddhidR^ik || 13||
sa eva svaprakR^ityedaM sR^iShTvAgre triguNAtmakam |
tadanu tvaM hyapraviShTaH praviShTa iva bhAvyase || 14||
yatheme.avikR^itA bhAvAstathA te vikR^itaiH saha |
nAnAvIryAH pR^ithagbhUtA virAjaM janayanti hi || 15||
sannipatya samutpAdya dR^ishyante.anugatA iva |
prAgeva vidyamAnatvAnna teShAmiha sambhavaH || 16||
evaM bhavAn bud.hdhyanumeyalakShaNai\-
rgrAhyairguNaiH sannapi tadguNAgrahaH |
anAvR^itatvAdbahirantaraM na te
sarvasya sarvAtmana AtmavastunaH || 17||
ya Atmano dR^ishyaguNeShu sanniti
vyavasyate svavyatirekato.abudhaH |
vinAnuvAdaM na cha tanmanIShitaM
samyagyatastyaktamupAdadatpumAn || 18||
tvatto.asya janmasthitisaMyamAn vibho
vadantyanIhAdaguNAdavikriyAt |
tvayIshvare brahmaNi no virudhyate
tvadAshrayatvAdupacharyate guNaiH || 19||
sa tvaM trilokasthitaye svamAyayA
bibharShi shuklaM khalu varNamAtmanaH |
sargAya raktaM rajasopabR^iMhitaM
kR^iShNaM cha varNaM tamasA janAtyaye || 20||
tvamasya lokasya vibho rirakShiShu\-
rgR^ihe.avatIrNo.asi mamAkhileshvara |
rAjanyasa.nj~nAsurakoTiyUthapai\-
rnirvyUhyamAnA nihaniShyase chamUH || 21||
ayaM tvasabhyastava janma nau gR^ihe
shrutvAgrajAMste nyavadhItsureshvara |
sa te.avatAraM puruShaiH samarpitaM
shrutvAdhunaivAbhisaratyudAyudhaH || 22||
shrIshuka uvAcha
athainamAtmajaM vIkShya mahApuruShalakShaNam |
devakI tamupAdhAvatkaMsAdbhItA shuchismitA || 23||
devakyuvAcha
rUpaM yattatprAhuravyaktamAdyaM
brahma jyotirnirguNaM nirvikAram |
sattAmAtraM nirvisheShaM nirIhaM
sa tvaM sAkShAdviShNuradhyAtmadIpaH || 24||
naShTe loke dviparArdhAvasAne
mahAbhUteShvAdibhUtaM gateShu |
vyakte.avyaktaM kAlavegena yAte
bhavAnekaH shiShyate sheShasa.nj~naH || 25||
yo.ayaM kAlastasya te.avyaktabandho
cheShTAmAhushcheShTate yena vishvam |
nimeShAdirvatsarAnto mahIyAM\-
staM tveshAnaM kShemadhAma prapadye || 26||
martyo mR^ityuvyAlabhItaH palAyan
lokAn sarvAnnirbhayaM nAdhyagachChat |
tvatpAdAbjaM prApya yadR^ichChayAdya
svasthaH shete mR^ityurasmAdapaiti || 27||
sa tvaM ghorAdugrasenAtmajAnna\-
strAhi trastAn bhR^ityavitrAsahAsi |
rUpaM chedaM pauruShaM dhyAnadhiShNyaM
mA pratyakShaM mAMsadR^ishAM kR^iShIShThAH || 28||
janma te mayyasau pApo mA vidyAnmadhusUdana |
samudvije bhavaddhetoH kaMsAdahamadhIradhIH || 29||
upasaMhara vishvAtmannado rUpamalaukikam |
sha~NkhachakragadApadmashriyA juShTaM chaturbhujam || 30||
vishvaM yadetatsvatanau nishAnte
yathAvakAshaM puruShaH paro bhavAn |
bibharti so.ayaM mama garbhago.abhU\-
daho nR^ilokasya viDambanaM hi tat || 31||
shrIbhagavAnuvAcha
tvameva pUrvasarge.abhUH pR^ishniH svAyambhuve sati |
tadAyaM sutapA nAma prajApatirakalmaShaH || 32||
yuvAM vai brahmaNA.a.adiShTau prajAsarge yadA tataH |
sanniyamyendriyagrAmaM tepAthe paramaM tapaH || 33||
varShavAtAtapahimagharmakAlaguNAnanu |
sahamAnau shvAsarodhavinirdhUtamanomalau || 34||
shIrNaparNAnilAhArAvupashAntena chetasA |
mattaH kAmAnabhIpsantau madArAdhanamIhatuH || 35||
evaM vAM tapyatostIvraM tapaH paramaduShkaram |
divyavarShasahasrANi dvAdasheyurmadAtmanoH || 36||
tadA vAM parituShTo.ahamamunA vapuShAnaghe |
tapasA shraddhayA nityaM bhaktyA cha hR^idi bhAvitaH || 37||
prAdurAsaM varadarAD yuvayoH kAmaditsayA |
vriyatAM vara ityukte mAdR^isho vAM vR^itaH sutaH || 38||
ajuShTagrAmyaviShayAvanapatyau cha dampatI |
na vavrAthe.apavargaM me mohitau mama mAyayA || 39||
gate mayi yuvAM labdhvA varaM matsadR^ishaM sutam |
grAmyAn bhogAnabhu~njAthAM yuvAM prAptamanorathau || 40||
adR^iShTvAnyatamaM loke shIlaudAryaguNaiH samam |
ahaM suto vAmabhavaM pR^ishnigarbha iti shrutaH || 41||
tayorvAM punarevAhamadityAmAsa kashyapAt |
upendra iti vikhyAto vAmanatvAchcha vAmanaH || 42||
tR^itIye.asmin bhave.ahaM vai tenaiva vapuShAtha vAm |
jAto bhUyastayoreva satyaM me vyAhR^itaM sati || 43||
etadvAM darshitaM rUpaM prAgjanmasmaraNAya me |
nAnyathA madbhavaM j~nAnaM martyali~Ngena jAyate || 44||
yuvAM mAM putrabhAvena brahmabhAvena chAsakR^it |
chintayantau kR^itasnehau yAsyethe madgatiM parAm || 45||
shrIshuka uvAcha
ityuktvA.a.asIddharistUShNIM bhagavAnAtmamAyayA |
pitroH sampashyatoH sadyo babhUva prAkR^itaH shishuH || 46||
tatashcha shaurirbhagavatprachoditaH
sutaM samAdAya sa sUtikA gR^ihAt |
yadA bahirgantumiyeSha tarhyajA
yA yogamAyAjani nandajAyayA || 47||
tayA hR^itapratyayasarvavR^ittiShu
dvAHstheShu paureShvapi shAyiteShvatha |
dvArastu sarvAH pihitA duratyayA
bR^ihatkapATAyasakIlashR^i~NkhalaiH || 48||
tAH kR^iShNavAhe vasudeva Agate
svayaM vyavaryanta yathA tamo raveH |
vavarSha parjanya upAMshugarjitaH
sheSho.anvagAdvAri nivArayan phaNaiH || 49||
maghoni varShatyasakR^idyamAnujA
gambhIratoyaughajavormiphenilA |
bhayAnakAvartashatAkulA nadI
mArgaM dadau sindhuriva shriyaH pateH || 50||
nandavrajaM shaurirupetya tatra tAn
gopAn prasuptAnupalabhya nidrayA |
sutaM yashodAshayane nidhAya tat
sutAmupAdAya punargR^ihAnagAt || 51||
devakyAH shayane nyasya vasudevo.atha dArikAm |
pratimuchya padorlohamAste pUrvavadAvR^itaH || 52||
yashodA nandapatnI cha jAtaM paramabudhyata |
na talli~NgaM parishrAntA nidrayApagatasmR^itiH || 53||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe kR^iShNajanmani tR^itIyo.adhyAyaH || 3||
\iti
\section{.. OM namo bhagavate vAsudevAya ..}
\section{..   chaturtho.adhyAyaH \- 4 ..}
shrIshuka uvAcha
bahirantaHpuradvAraH sarvAH pUrvavadAvR^itAH |
tato bAladhvaniM shrutvA gR^ihapAlAH samutthitAH || 1||
te tu tUrNamupavrajya devakyA garbhajanma tat |
AchakhyurbhojarAjAya yadudvignaH pratIkShate || 2||
sa talpAttUrNamutthAya kAlo.ayamiti vihvalaH |
sUtIgR^ihamagAttUrNaM praskhalan muktamUrdhajaH || 3||
tamAha bhrAtaraM devI kR^ipaNA karuNaM satI |
snuSheyaM tava kalyANa striyaM mA hantumarhasi || 4||
bahavo hiMsitA bhrAtaH shishavaH pAvakopamAH |
tvayA daivanisR^iShTena putrikaikA pradIyatAm || 5||
nanvahaM te hyavarajA dInA hatasutA prabho |
dAtumarhasi mandAyA a~NgemAM charamAM prajAm || 6||
shrIshuka uvAcha
upaguhyAtmajAmevaM rudatyA dInadInavat |
yAchitastAM vinirbhartsya hastAdAchichChide khalaH || 7||
tAM gR^ihItvA charaNayorjAtamAtrAM svasuH sutAm |
apothayachChilApR^iShThe svArthonmUlitasauhR^idaH || 8||
sA taddhastAtsamutpatya sadyo devyambaraM gatA |
adR^ishyatAnujA viShNoH sAyudhAShTamahAbhujA || 9||
divyasragambarAleparatnAbharaNabhUShitA |
dhanuHshUleShucharmAsisha~NkhachakragadAdharA || 10||
siddhachAraNagandharvairapsaraHkinnaroragaiH |
upAhR^itorubalibhiH stUyamAnedamabravIt || 11||
kiM mayA hatayA manda jAtaH khalu tavAntakR^it |
yatra kva vA pUrvashatrurmA hiMsIH kR^ipaNAn vR^ithA || 12||
iti prabhAShya taM devI mAyA bhagavatI bhuvi |
bahunAmaniketeShu bahunAmA babhUva ha || 13||
tayAbhihitamAkarNya kaMsaH paramavismitaH |
devakIM vasudevaM cha vimuchya prashrito.abravIt || 14||
aho bhaginyaho bhAma mayA vAM bata pApmanA |
puruShAda ivApatyaM bahavo hiMsitAH sutAH || 15||
sa tvahaM tyaktakAruNyastyaktaj~nAtisuhR^itkhalaH |
kAn lokAn vai gamiShyAmi brahmaheva mR^itaH shvasan || 16||
daivamapyanR^itaM vakti na martyA eva kevalam |
yadvishrambhAdahaM pApaH svasurnihatavA~nChishUn || 17||
mA shochataM mahAbhAgAvAtmajAn svakR^itambhujaH |
jantavo na sadaikatra daivAdhInAstadAsate || 18||
bhuvi bhaumAni bhUtAni yathA yAntyapayAnti cha |
nAyamAtmA tathaiteShu viparyeti yathaiva bhUH || 19||
yathAnevaMvido bhedo yata AtmaviparyayaH |
dehayogaviyogau cha saMsR^itirna nivartate || 20||
tasmAdbhadre svatanayAn mayA vyApAditAnapi |
mAnushocha yataH sarvaH svakR^itaM vindate.avashaH || 21||
yAvaddhato.asmi hantAsmItyAtmAnaM manyate svadR^ik |
tAvattadabhimAnyaj~no bAdhyabAdhakatAmiyAt || 22||
kShamadhvaM mama daurAtmyaM sAdhavo dInavatsalAH |
ityuktvAshrumukhaH pAdau shyAlaH svasrorathAgrahIt || 23||
mochayAmAsa nigaDAdvishrabdhaH kanyakAgirA |
devakIM vasudevaM cha darshayannAtmasauhR^idam || 24||
bhrAtuH samanutaptasya kShAntvA roShaM cha devakI |
vyasR^ijadvasudevashcha prahasya tamuvAcha ha || 25||
evametanmahAbhAga yathA vadasi dehinAm |
aj~nAnaprabhavAhandhIH svapareti bhidA yataH || 26||
shokaharShabhayadveShalobhamohamadAnvitAH |
mitho ghnantaM na pashyanti bhAvairbhAvaM pR^ithagdR^ishaH || 27||
shrIshuka uvAcha
kaMsa evaM prasannAbhyAM vishuddhaM pratibhAShitaH |
devakIvasudevAbhyAmanuj~nAto.avishadgR^iham || 28||
tasyAM rAtryAM vyatItAyAM kaMsa AhUya mantriNaH |
tebhya AchaShTa tatsarvaM yaduktaM yoganidrayA || 29||
AkarNya bharturgaditaM tamUchurdevashatravaH |
devAn prati kR^itAmarShA daiteyA nAtikovidAH || 30||
evaM chettarhi bhojendra puragrAmavrajAdiShu |
anirdashAn nirdashAMshcha haniShyAmo.adya vai shishUn || 31||
kimudyamaiH kariShyanti devAH samarabhIravaH |
nityamudvignamanaso jyAghoShairdhanuShastava || 32||
asyataste sharavrAtairhanyamAnAH samantataH |
jijIviShava utsR^ijya palAyanaparA yayuH || 33||
kechitprA~njalayo dInA nyastashastrA divaukasaH |
muktakachChashikhAH kechidbhItAH sma iti vAdinaH || 34||
na tvaM vismR^itashastrAstrAn virathAn bhayasaMvR^itAn |
haMsyanyAsaktavimukhAn bhagnachApAnayudhyataH || 35||
kiM kShemashUrairvibudhairasaMyugavikatthanaiH |
rahojuShA kiM hariNA shambhunA vA vanaukasA |
kimindreNAlpavIryeNa brahmaNA vA tapasyatA || 36||
tathApi devAH sApatnyAnnopekShyA iti manmahe |
tatastanmUlakhanane niyu~NkShvAsmAnanuvratAn || 37||
yathA.a.amayo.a~Nge samupekShito nR^ibhi\-
rnashakyate rUDhapadashchikitsitum |
yathendriyagrAma upekShitastathA
ripurmahAn baddhabalo na chAlyate || 38||
mUlaM hi viShNurdevAnAM yatra dharmaH sanAtanaH |
tasya cha brahmagoviprAstapo yaj~nAH sadakShiNAH || 39||
tasmAtsarvAtmanA rAjan brAhmaNAn brahmavAdinaH |
tapasvino yaj~nashIlAn gAshcha hanmo havirdughAH || 40||
viprA gAvashcha vedAshcha tapaH satyaM damaH shamaH |
shraddhA dayA titikShA cha kratavashcha harestanUH || 41||
sa hi sarvasurAdhyakSho hyasuradviDguhAshayaH |
tanmUlA devatAH sarvAH seshvarAH sachaturmukhAH |
ayaM vai tadvadhopAyo yadR^iShINAM vihiMsanam || 42||
shrIshuka uvAcha
evaM durmantribhiH kaMsaH saha sammantrya durmatiH |
brahmahiMsAM hitaM mene kAlapAshAvR^ito.asuraH || 43||
sandishya sAdhulokasya kadane kadanapriyAn |
kAmarUpadharAn dikShu dAnavAn gR^ihamAvishat || 44||
te vai rajaHprakR^itayastamasA mUDhachetasaH |
satAM vidveShamAcherurArAdAgatamR^ityavaH || 45||
AyuH shriyaM yasho dharmaM lokAnAshiSha eva cha |
hanti shreyAMsi sarvANi puMso mahadatikramaH || 46||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvardhe chaturtho.adhyAyaH || 4||
\iti
\section{.. OM namo bhagavate vAsudevAya ..}
\section{.. pa~nchamo.adhyAyaH \- 5 ..}
shrIshuka uvAcha
nandastvAtmaja utpanne jAtAhlAdo mahAmanAH |
AhUya viprAn vedaj~nAn snAtaH shuchirala~NkR^itaH || 1||
vAchayitvA svastyayanaM jAtakarmAtmajasya vai |
kArayAmAsa vidhivatpitR^idevArchanaM tathA || 2||
dhenUnAM niyute prAdAdviprebhyaH samala~NkR^ite |
tilAdrIn sapta ratnaughashAtakaumbhAmbarAvR^itAn || 3||
kAlena snAnashauchAbhyAM saMskAraistapasejyayA |
shudhyanti dAnaiH santuShTyA dravyANyAtmA.a.atmavidyayA || 4||
sauma~Ngalyagiro viprAH sUtamAgadhavandinaH |
gAyakAshcha jagurnedurbheryo dundubhayo muhuH || 5||
vrajaH sammR^iShTasaMsiktadvArAjiragR^ihAntaraH |
chitradhvajapatAkAsrak chailapallavatoraNaiH || 6||
gAvo vR^iShA vatsatarA haridrAtailarUShitAH |
vichitradhAtubarhasragvastrakA~nchanamAlinaH || 7||
mahArhavastrAbharaNaka~nchukoShNIShabhUShitAH |
gopAH samAyayU rAjan nAnopAyanapANayaH || 8||
gopyashchAkarNya muditA yashodAyAH sutodbhavam |
AtmAnaM bhUShayA~nchakrurvastrAkalpA~njanAdibhiH || 9||
navaku~Nkumaki~njalkamukhapa~NkajabhUtayaH |
balibhistvaritaM jagmuH pR^ithushroNyashchalatkuchAH || 10||
gopyaH sumR^iShTamaNikuNDalaniShkakaNThya\-
shchitrAmbarAH pathi shikhAchyutamAlyavarShAH |
nandAlayaM savalayA vrajatIrvireju\-
rvyAlolakuNDalapayodharahArashobhAH || 11||
tA AshiShaH prayu~njAnAshchiraM pAhIti bAlake |
haridrAchUrNatailAdbhiH si~nchantyo.ajanamujjaguH || 12||
avAdyanta vichitrANi vAditrANi mahotsave |
kR^iShNe vishveshvare.anante nandasya vrajamAgate || 13||
gopAH parasparaM hR^iShTA dadhikShIraghR^itAmbubhiH |
Asi~nchanto vilimpanto navanItaishcha chikShipuH || 14||
nando mahAmanAstebhyo vAso.ala~NkAragodhanam |
sUtamAgadhavandibhyo ye.anye vidyopajIvinaH || 15||
taistaiH kAmairadInAtmA yathochitamapUjayat |
viShNorArAdhanArthAya svaputrasyodayAya cha || 16||
rohiNI cha mahAbhAgA nandagopAbhinanditA |
vyacharaddivyavAsasrakkaNThAbharaNabhUShitA || 17||
tata Arabhya nandasya vrajaH sarvasamR^iddhimAn |
harernivAsAtmaguNai ramAkrIDamabhUnnR^ipa || 18||
gopAn gokularakShAyAM nirUpya mathurAM gataH |
nandaH kaMsasya vArShikyaM karaM dAtuM kurUdvaha || 19||
vasudeva upashrutya bhrAtaraM nandamAgatam |
j~nAtvA dattakaraM rAj~ne yayau tadavamochanam || 20||
taM dR^iShTvA sahasotthAya dehaH prANamivAgatam |
prItaH priyatamaM dorbhyAM sasvaje premavihvalaH || 21||
pUjitaH sukhamAsInaH pR^iShTvAnAmayamAdR^itaH |
prasaktadhIH svAtmajayoridamAha vishAmpate || 22||
diShTyA bhrAtaH pravayasa idAnImaprajasya te |
prajAshAyA nivR^ittasya prajA yatsamapadyata || 23||
diShTyA saMsArachakre.asmin vartamAnaH punarbhavaH |
upalabdho bhavAnadya durlabhaM priyadarshanam || 24||
naikatra priyasaMvAsaH suhR^idAM chitrakarmaNAm |
oghena vyUhyamAnAnAM plavAnAM srotaso yathA || 25||
kachchitpashavyaM nirujaM bhUryambutR^iNavIrudham |
bR^ihadvanaM tadadhunA yatrAsse tvaM suhR^idvR^itaH || 26||
bhrAtarmama sutaH kachchinmAtrA saha bhavadvraje |
tAtaM bhavantaM manvAno bhavadbhyAmupalAlitaH || 27||
puMsastrivargo vihitaH suhR^ido hyanubhAvitaH |
na teShu klishyamAneShu trivargo.arthAya kalpate || 28||
nanda uvAcha
aho te devakIputrAH kaMsena bahavo hatAH |
ekAvashiShTAvarajA kanyA sApi divaM gatA || 29||
nUnaM hyadR^iShTaniShTho.ayamadR^iShTaparamo janaH |
adR^iShTamAtmanastattvaM yo veda na sa muhyati || 30||
vasudeva uvAcha
karo vai vArShiko datto rAj~ne dR^iShTA vayaM cha vaH |
neha stheyaM bahutithaM santyutpAtAshcha gokule || 31||
shrIshuka uvAcha
iti nandAdayo gopAH proktAste shauriNA yayuH |
anobhiranaDudyuktaistamanuj~nApya gokulam || 32||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe nandavasudevasammelanaM nAma pa~nchamo.adhyAyaH || 5||
\iti
\section{.. OM namo bhagavate vAsudevAya ..}
\section{.. ShaShTho.adhyAyaH \- 6 ..}
shrIshuka uvAcha
nandaH pathi vachaH shaurerna mR^iSheti vichintayan |
hariM jagAma sharaNamutpAtAgamasha~NkitaH || 1||
kaMsena prahitA ghorA pUtanA bAlaghAtinI |
shishUMshchachAra nighnantI puragrAmavrajAdiShu || 2||
na yatra shravaNAdIni rakShoghnAni svakarmasu |
kurvanti sAtvatAM bharturyAtudhAnyashcha tatra hi || 3||
sA khecharyekadopetya pUtanA nandagokulam |
yoShitvA mAyayA.a.atmAnaM prAvishatkAmachAriNI || 4||
tAM keshabandhavyatiShaktamallikAM
bR^ihannitambastanakR^ichChramadhyamAm |
suvAsasaM kampitakarNabhUShaNa\-
tviShollasatkuntalamaNDitAnanAm || 5||
valgusmitApA~NgavisargavIkShitai\-
rmano harantIM vanitAM vrajaukasAm |
amaMsatAmbhojakareNa rUpiNIM
gopyaH shriyaM draShTumivAgatAM patim || 6||
bAlagrahastatra vichinvatI shishUn
yadR^ichChayA nandagR^ihe.asadantakam |
bAlaM pratichChannanijorutejasaM
dadarsha talpe.agnimivAhitaM bhasi || 7||
vibudhya tAM bAlakamArikAgrahaM
charAcharAtmA sa nimIlitekShaNaH |
anantamAropayada~NkamantakaM
yathoragaM suptamabuddhirajjudhIH || 8||
tAM tIkShNachittAmativAmacheShTitAM
vIkShyAntarA koshaparichChadAsivat |
varastriyaM tatprabhayA cha dharShite
nirIkShamANe jananI hyatiShThatAm || 9||
tasmin stanaM durjaravIryamulbaNaM
ghorA~NkamAdAya shishordadAvatha |
gADhaM karAbhyAM bhagavAn prapIDya tat
prANaiH samaM roShasamanvito.apibat || 10||
sA mu~ncha mu~nchAlamiti prabhAShiNI
niShpIDyamAnAkhilajIvamarmaNi |
vivR^itya netre charaNau bhujau muhuH
prasvinnagAtrA kShipatI ruroda ha || 11||
tasyAH svanenAtigabhIraraMhasA
sAdrirmahI dyaushcha chachAla sagrahA |
rasA dishashcha pratinedire janAH
petuH kShitau vajranipAtasha~NkayA || 12||
nishAcharItthaM vyathitastanA vyasu\-
rvyAdAya keshAMshcharaNau bhujAvapi |
prasArya goShThe nijarUpamAsthitA
vajrAhato vR^itra ivApatannR^ipa || 13||
patamAno.api taddehastrigavyUtyantaradrumAn |
chUrNayAmAsa rAjendra mahadAsIttadadbhutam || 14||
IShAmAtrogradaMShTrAsyaM girikandaranAsikam |
gaNDashailastanaM raudraM prakIrNAruNamUrdhajam || 15||
andhakUpagabhIrAkShaM pulinArohabhIShaNam |
baddhasetubhujorva~NghrishUnyatoyahradodaram || 16||
santatrasuH sma tadvIkShya gopA gopyaH kalevaram |
pUrvaM tu tanniHsvanitabhinnahR^itkarNamastakAH || 17||
bAlaM cha tasyA urasi krIDantamakutobhayam |
gopyastUrNaM samabhyetya jagR^ihurjAtasambhramAH || 18||
yashodArohiNIbhyAM tAH samaM bAlasya sarvataH |
rakShAM vidadhire samyaggopuchChabhramaNAdibhiH || 19||
gomUtreNa snApayitvA punargorajasArbhakam |
rakShAM chakrushcha shakR^itA dvAdashA~NgeShu nAmabhiH || 20||
gopyaH saMspR^iShTasalilA a~NgeShu karayoH pR^ithak |
nyasyAtmanyatha bAlasya bIjanyAsamakurvata || 21||
avyAdajo.a~NghrimaNimAMstava jAnvathorU
yaj~no.achyutaH kaTitaTaM jaTharaM hayAsyaH |
hR^itkeshavastvadura Isha inastu kaNThaM
viShNurbhujaM mukhamurukrama IshvaraH kam || 22||
chakryagrataH sahagado harirastu pashchAt
tvatpArshvayordhanurasI madhuhAjanashcha |
koNeShu sha~Nkha urugAya uparyupendra\-
stArkShyaH kShitau haladharaH puruShaH samantAt || 23||
indriyANi hR^iShIkeshaH prANAn nArAyaNo.avatu |
shvetadvIpapatishchittaM mano yogeshvaro.avatu || 24||
pR^ishnigarbhastu te buddhimAtmAnaM bhagavAn paraH |
krIDantaM pAtu govindaH shayAnaM pAtu mAdhavaH || 25||
vrajantamavyAdvaikuNTha AsInaM tvAM shriyaHpatiH |
bhu~njAnaM yaj~nabhukpAtu sarvagrahabhaya~NkaraH || 26||
DAkinyo yAtudhAnyashcha kUShmANDA ye.arbhakagrahAH |
bhUtapretapishAchAshcha yakSharakShovinAyakAH || 27||
koTarA revatI jyeShThA pUtanA mAtR^ikAdayaH |
unmAdA ye hyapasmArA dehaprANendriyadruhaH || 28||
svapnadR^iShTA mahotpAtA vR^iddhabAlagrahAshcha ye |
sarve nashyantu te viShNornAmagrahaNabhIravaH || 29||
shrIshuka uvAcha
iti praNayabaddhAbhirgopIbhiH kR^itarakShaNam |
pAyayitvA stanaM mAtA sannyaveshayadAtmajam || 30||
tAvannandAdayo gopA mathurAyA vrajaM gatAH |
vilokya pUtanAdehaM babhUvurativismitAH || 31||
nUnaM batarShiH sa~njAto yogesho vA samAsa saH |
sa eva dR^iShTo hyutpAto yadAhAnakadundubhiH || 32||
kalevaraM parashubhishChittvA tatte vrajaukasaH |
dUre kShiptvAvayavasho nyadahan kAShThadhiShTitam || 33||
dahyamAnasya dehasya dhUmashchAgurusaurabhaH |
utthitaH kR^iShNanirbhuktasapadyAhatapApmanaH || 34||
pUtanA lokabAlaghnI rAkShasI rudhirAshanA |
jighAMsayApi haraye stanaM dattvA.a.apa sadgatim || 35||
kiM punaH shraddhayA bhaktyA kR^iShNAya paramAtmane |
yachChan priyatamaM kiM nu raktAstanmAtaro yathA || 36||
padbhyAM bhaktahR^idisthAbhyAM vandyAbhyAM lokavanditaiH |
a~NgaM yasyAH samAkramya bhagavAnapibatstanam || 37||
yAtudhAnyapi sA svargamavApa jananIgatim |
kR^iShNabhuktastanakShIrAH kimu gAvo nu mAtaraH || 38||
payAMsi yAsAmapibatputrasnehasnutAnyalam |
bhagavAn devakIputraH kaivalyAdyakhilapradaH || 39||
tAsAmavirataM kR^iShNe kurvatInAM sutekShaNam |
na punaH kalpate rAjan saMsAro.aj~nAnasambhavaH || 40||
kaTadhUmasya saurabhyamavaghrAya vrajaukasaH |
kimidaM kuta eveti vadanto vrajamAyayuH || 41||
te tatra varNitaM gopaiH pUtanA.a.agamanAdikam |
shrutvA tannidhanaM svasti shishoshchAsan suvismitAH || 42||
nandaH svaputramAdAya pretyAgatamudAradhIH |
mUrdhnyupAghrAya paramAM mudaM lebhe kurUdvaha || 43||
ya etatpUtanAmokShaM kR^iShNasyArbhakamadbhutam |
shR^iNuyAchChraddhayA martyo govinde labhate ratim || 44||
iti shrImadbhAgavate mahApurANe pAramahaMsyAM
saMhitAyAndashmaskandhe pUrvArdhe ShaShTho.adhyAyaH || 6||
\iti
\section{.. OM namo bhagavate vAsudevAya ..}
\section{.. saptamo.adhyAyaH \- 7 ..}
rAjovAcha
yena yenAvatAreNa bhagavAn harirIshvaraH |
karoti karNaramyANi manoj~nAni cha naH prabho || 1||
yachChR^iNvato.apaityaratirvitR^iShNA
sattvaM cha shud.hdhyatyachireNa puMsaH |
bhaktirharau tatpuruShe cha sakhyaM
tadeva hAraM vada manyase chet || 2||
athAnyadapi kR^iShNasya tokAcharitamadbhutam |
mAnuShaM lokamAsAdya tajjAtimanurundhataH || 3||
shrIshuka uvAcha
kadAchidautthAnikakautukAplave
janmarkShayoge samavetayoShitAm |
vAditragItadvijamantravAchakai\-
shchakAra sUnorabhiShechanaM satI || 4||
nandasya patnI kR^itamajjanAdikaM
vipraiH kR^itasvastyayanaM supUjitaiH |
annAdyavAsaHsragabhIShTadhenubhiH
sa~njAtanidrAkShamashIshayachChanaiH || 5||
autthAnikautsukyamanA manasvinI
samAgatAn pUjayatI vrajaukasaH |
naivAshR^iNodvai ruditaM sutasya sA
rudan stanArthI charaNAvudakShipat || 6||
adhaH shayAnasya shishorano.alpaka\-
pravAlamR^idva~NghrihataM vyavartata |
vidhvastanAnArasakupyabhAjanaM
vyatyastachakrAkShavibhinnakUbaram || 7||
dR^iShTvA yashodApramukhA vrajastriya
autthAnike karmaNi yAH samAgatAH |
nandAdayashchAdbhutadarshanAkulAH
kathaM svayaM vai shakaTaM viparyagAt || 8||
UchuravyavasitamatIn gopAn gopIshcha bAlakAH |
rudatAnena pAdena kShiptametanna saMshayaH || 9||
na te shraddadhire gopA bAlabhAShitamityuta |
aprameyaM balaM tasya bAlakasya na te viduH || 10||
rudantaM sutamAdAya yashodA grahasha~NkitA |
kR^itasvastyayanaM vipraiH sUktaiH stanamapAyayat || 11||
pUrvavatsthApitaM gopairbalibhiH saparichChadam |
viprA hutvArchayA~nchakrurdadhyakShatakushAmbubhiH || 12||
ye.asUyAnR^itadambherShyAhiMsAmAnavivarjitAH |
na teShAM satyashIlAnAmAshiSho viphalAH kR^itAH || 13||
iti bAlakamAdAya sAmargyajurupAkR^itaiH |
jalaiH pavitrauShadhibhirabhiShichya dvijottamaiH || 14||
vAchayitvA svastyayanaM nandagopaH samAhitaH |
hutvA chAgniM dvijAtibhyaH prAdAdannaM mahAguNam || 15||
gAvaH sarvaguNopetA vAsaHsragrukmamAlinIH |
AtmajAbhyudayArthAya prAdAtte chAnvayu~njata || 16||
viprA mantravido yuktAstairyAH proktAstathA.a.ashiShaH |
tA niShphalA bhaviShyanti na kadAchidapi sphuTam || 17||
ekadA.a.arohamArUDhaM lAlayantI sutaM satI |
garimANaM shishorvoDhuM na sehe girikUTavat || 18||
bhUmau nidhAya taM gopI vismitA bhArapIDitA |
mahApuruShamAdadhyau jagatAmAsa karmasu || 19||
daityo nAmnA tR^iNAvartaH kaMsabhR^ityaH praNoditaH |
chakravAtasvarUpeNa jahArAsInamarbhakam || 20||
gokulaM sarvamAvR^iNvan muShNaMshchakShUMShi reNubhiH |
Irayan sumahAghorashabdena pradisho dishaH || 21||
muhUrtamabhavadgoShThaM rajasA tamasA.a.avR^itam |
sutaM yashodA nApashyattasmin nyastavatI yataH || 22||
nApashyatkashchanAtmAnaM paraM chApi vimohitaH |
tR^iNAvartanisR^iShTAbhiH sharkarAbhirupadrutaH || 23||
iti kharapavanachakrapAMsuvarShe
sutapadavImabalAvilakShya mAtA |
atikaruNamanusmarantyashocha\-
dbhuvi patitA mR^itavatsakA yathA gauH || 24||
ruditamanunishamya tatra gopyo
bhR^ishamanutaptadhiyo.ashrupUrNamukhyaH |
ruruduranupalabhya nandasUnuM
pavana upArata pAMsuvarShavege || 25||
tR^iNAvartaH shAntarayo vAtyArUpadharo haran |
kR^iShNaM nabho gato gantuM nAshaknodbhUribhArabhR^it || 26||
tamashmAnaM manyamAna Atmano gurumattayA |
gale gR^ihIta utsraShTuM nAshaknodadbhutArbhakam || 27||
galagrahaNanishcheShTo daityo nirgatalochanaH |
avyaktarAvo nyapatatsaha bAlo vyasurvraje || 28||
tamantarikShAtpatitaM shilAyAM
vishIrNasarvAvayavaM karAlam |
puraM yathA rudrashareNa viddhaM
striyo rudatyo dadR^ishuH sametAH || 29||
prAdAya mAtre pratihR^itya vismitAH
kR^iShNaM cha tasyorasi lambamAnam |
taM svastimantaM puruShAdanItaM
vihAyasA mR^ityumukhAtpramuktam |
gopyashcha gopAH kila nandamukhyA
labdhvA punaH prApuratIva modam || 30||
aho batAtyadbhutameSha rakShasA
bAlo nivR^ittiM gamito.abhyagAtpunaH |
hiMsraH svapApena vihiMsitaH khalaH
sAdhuH samatvena bhayAdvimuchyate || 31||
kiM nastapashchIrNamadhokShajArchanaM
pUrteShTadattamuta bhUtasauhR^idam |
yatsamparetaH punareva bAlako
diShTyA svabandhUn praNayannupasthitaH || 32||
dR^iShTvAdbhutAni bahusho nandagopo bR^ihadvane |
vasudevavacho bhUyo mAnayAmAsa vismitaH || 33||
ekadArbhakamAdAya svA~NkamAropya bhAminI |
prasnutaM pAyayAmAsa stanaM snehapariplutA || 34||
pItaprAyasya jananI sA tasya ruchirasmitam |
mukhaM lAlayatI rAja~njR^imbhato dadR^ishe idam || 35||
khaM rodasI jyotiranIkamAshAH
sUryenduvahnishvasanAmbudhIMshcha |
dvIpAn nagAMstadduhitR^IrvanAni
bhUtAni yAni sthiraja~NgamAni || 36||
sA vIkShya vishvaM sahasA rAjan sa~njAtavepathuH |
sammIlya mR^igashAvAkShI netre AsItsuvismitA || 37||
iti shrImadbhAgavate mahApuraNe pAramahaMsyAM saMhitAyAM
dashamaskandhe pUrvArdhe tR^iNAvartamokSho nAma saptamo.adhyAyaH || 7||
\iti
\section{.. OM namo bhagavate vAsudevAya ..}
\section{.. aShTamo.adhyAyaH \- 8 ..}
shrIshuka uvAcha
gargaH purohito rAjan yadUnAM sumahAtapAH |
vrajaM jagAma nandasya vasudevaprachoditaH || 1||
taM dR^iShTvA paramaprItaH pratyutthAya kR^itA~njaliH |
AnarchAdhokShajadhiyA praNipAtapuraHsaram || 2||
sUpaviShTaM kR^itAtithyaM girA sUnR^itayA munim |
nandayitvAbravIdbrahman pUrNasya karavAma kim || 3||
mahadvichalanaM nR^INAM gR^ihiNAM dInachetasAm |
niHshreyasAya bhagavan kalpate nAnyathA kvachit || 4||
jyotiShAmayanaM sAkShAdyattajj~nAnamatIndriyam |
praNItaM bhavatA yena pumAn veda parAvaram || 5||
tvaM hi brahmavidAM shreShThaH saMskArAn kartumarhasi |
bAlayoranayornR^INAM janmanA brAhmaNo guruH || 6||
garga uvAcha
yadUnAmahamAchAryaH khyAtashcha bhuvi sarvataH |
sutaM mayA saMskR^itaM te manyate devakIsutam || 7||
kaMsaH pApamatiH sakhyaM tava chAnakadundubheH |
devakyA aShTamo garbho na strI bhavitumarhati || 8||
iti sa~nchintaya~nChrutvA devakyA dArikAvachaH |
api hantA.a.agatAsha~Nkastarhi tanno.anayo bhavet || 9||
nanda uvAcha
alakShito.asmin rahasi mAmakairapi govraje |
kuru dvijAtisaMskAraM svastivAchanapUrvakam || 10||
shrIshuka uvAcha
evaM samprArthito vipraH svachikIrShitameva tat |
chakAra nAmakaraNaM gUDho rahasi bAlayoH || 11||
garga uvAcha
ayaM hi rohiNIputro ramayan suhR^ido guNaiH |
AkhyAsyate rAma iti balAdhikyAdbalaM viduH |
yadUnAmapR^ithagbhAvAtsa~NkarShaNamushantyuta || 12||
Asan varNAstrayo hyasya gR^ihNato.anuyugaM tanUH |
shuklo raktastathA pIta idAnIM kR^iShNatAM gataH || 13||
prAgayaM vasudevasya kvachijjAtastavAtmajaH |
vAsudeva iti shrImAnabhij~nAH samprachakShate || 14||
bahUni santi nAmAni rUpANi cha sutasya te |
guNakarmAnurUpANi tAnyahaM veda no janAH || 15||
eSha vaH shreya AdhAsyadgopagokulanandanaH |
anena sarvadurgANi yUyama~njastariShyatha || 16||
purAnena vrajapate sAdhavo dasyupIDitAH |
arAjake rakShyamANA jigyurdasyUn samedhitAH || 17||
ya etasmin mahAbhAgAH prItiM kurvanti mAnavAH |
nArayo.abhibhavantyetAn viShNupakShAnivAsurAH || 18||
tasmAnnandAtmajo.ayaM te nArAyaNasamo guNaiH |
shriyA kIrtyAnubhAvena gopAyasva samAhitaH || 19||
ityAtmAnaM samAdishya garge cha svagR^ihaM gate |
nandaH pramudito mene AtmAnaM pUrNamAshiShAm || 20||
kAlena vrajatAlpena gokule rAmakeshavau |
jAnubhyAM saha pANibhyAM ri~NgamANau vijahratuH || 21||
tAva~NghriyugmamanukR^iShya sarIsR^ipantau
ghoShapraghoSharuchiraM vrajakardameShu |
tannAdahR^iShTamanasAvanusR^itya lokaM
mugdhaprabhItavadupeyaturanti mAtroH || 22||
tanmAtarau nijasutau ghR^iNayA snuvantyau
pa~NkA~NgarAgaruchirAvupaguhya dorbhyAm |
dattvA stanaM prapibatoH sma mukhaM nirIkShya
mugdhasmitAlpadashanaM yayatuH pramodam || 23||
yarhya~NganA darshanIyakumAralIlA\-
vantarvrajetadabalAH pragR^ihItapuchChaiH |
vatsairitastata ubhAvanukR^iShyamANau
prekShantya ujjhitagR^ihA jahR^iShurhasantyaH || 24||
shR^i~NgyagnidaMShTryasijaladvijakaNTakebhyaH
krIDAparAvatichalau svasutau niSheddhum |
gR^ihyANi kartumapi yatra na tajjananyau
shekAta ApaturalaM manaso.anavasthAm || 25||
kAlenAlpena rAjarShe rAmaH kR^iShNashcha gokule |
aghR^iShTajAnubhiH padbhirvichakramatura~njasA || 26||
tatastu bhagavAn kR^iShNo vayasyairvrajabAlakaiH |
saha rAmo vrajastrINAM chikrIDe janayan mudam || 27||
kR^iShNasya gopyo ruchiraM vIkShya kaumArachApalam |
shR^iNvantyAH kila tanmAturiti hochuH samAgatAH || 28||
vatsAn mu~nchan kvachidasamaye kroshasa~njAtahAsaH
steyaM svAdvattyatha dadhi payaH kalpitaiH steyayogaiH |
markAn bhokShyan vibhajati sa chennAtti bhANDaM bhinnatti
dravyAlAbhe sa gR^ihakupito yAtyupakroshya tokAn || 29||
hastAgrAhye rachayati vidhiM pIThakolUkhalAdyaiH
ChidraM hyantarnihitavayunaH shikyabhANDeShu tadvit |
dhvAntAgAre dhR^itamaNigaNaM svA~NgamarthapradIpaM
kAle gopyo yarhi gR^ihakR^ityeShu suvyagrachittAH || 30||
evaM dhArShTyAnyushati kurute mehanAdIni vAstau
steyopAyairvirachitakR^itiH supratIko yathA.a.aste |
itthaM strIbhiH sabhayanayanashrImukhAlokinIbhiH
vyAkhyAtArthA prahasitamukhI na hyupAlabdhumaichChat || 31||
ekadA krIDamAnAste rAmAdyA gopadArakAH |
kR^iShNo mR^idaM bhakShitavAniti mAtre nyavedayan || 32||
sA gR^ihItvA kare kR^iShNamupAlabhya hitaiShiNI |
yashodA bhayasambhrAntaprekShaNAkShamabhAShata || 33||
kasmAnmR^idamadAntAtman bhavAn bhakShitavAn rahaH |
vadanti tAvakA hyete kumArAste.agrajo.apyayam || 34||
shrIkR^iShNa uvAcha
nAhaM bhakShitavAnamba sarve mithyAbhishaMsinaH |
yadi satyagirastarhi samakShaM pashya me mukham || 35||
yadyevaM tarhi vyAdehItyuktaH sa bhagavAn hariH |
vyAdattAvyAhataishvaryaH krIDAmanujabAlakaH || 36||
sA tatra dadR^ishe vishvaM jagatsthAsnu cha khaM dishaH |
sAdridvIpAbdhibhUgolaM sa vAyvagnIndutArakam || 37||
jyotishchakraM jalaM tejo nabhasvAn viyadeva cha |
vaikArikANIndriyANi mano mAtrA guNAstrayaH || 38||
etadvichitraM saha jIvakAla\-
svabhAvakarmAshayali~Ngabhedam |
sUnostanau vIkShya vidAritAsye
vrajaM sahAtmAnamavApa sha~NkAm || 39||
kiM svapna etaduta devamAyA
kiM vA madIyo bata buddhimohaH |
atho amuShyaiva mamArbhakasya
yaH kashchanautpattika AtmayogaH || 40||
atho yathAvanna vitarkagocharaM
cheto manaHkarmavachobhira~njasA |
yadAshrayaM yena yataH pratIyate
sudurvibhAvyaM praNatAsmi tatpadam || 41||
ahaM mamAsau patireSha me suto
vrajeshvarasyAkhilavittapA satI |
gopyashcha gopAH saha godhanAshcha me
yanmAyayetthaM kumatiH sa me gatiH || 42||
itthaM viditatattvAyAM gopikAyAM sa IshvaraH |
vaiShNavIM vyatanonmAyAM putrasnehamayIM vibhuH || 43||
sadyonaShTasmR^itirgopI sA.a.aropyArohamAtmajam |
pravR^iddhasnehakalilahR^idayA.a.asIdyathA purA || 44||
trayyA chopaniShadbhishcha sA~Nkhyayogaishcha sAtvataiH |
upagIyamAnamAhAtmyaM hariM sAmanyatAtmajam || 45||
rAjovAcha
nandaH kimakarodbrahman shreya evaM mahodayam |
yashodA cha mahAbhAgA papau yasyAH stanaM hariH || 46||
pitarau nAnvavindetAM kR^iShNodArArbhakehitam |
gAyantyadyApi kavayo yallokashamalApaham || 47||
shrIshuka uvAcha
droNo vasUnAM pravaro dharayA saha bhAryayA |
kariShyamANa AdeshAn brahmaNastamuvAcha ha || 48||
jAtayornau mahAdeve bhuvi vishveshvare harau |
bhaktiH syAtparamA loke yayA~njo durgatiM taret || 49||
astvityuktaH sa bhagavAn vraje droNo mahAyashAH |
jaj~ne nanda iti khyAto yashodA sA dharAbhavat || 50||
tato bhaktirbhagavati putrIbhUte janArdane |
dampatyornitarAmAsIdgopagopIShu bhArata || 51||
kR^iShNo brahmaNa AdeshaM satyaM kartuM vraje vibhuH |
saha rAmo vasaMshchakre teShAM prItiM svalIlayA || 52||
iti shrImadbhAgvate mahApurANe pAramahaMsyAM saMhitAyAM
dashamaskandhe pUrvArdhe vishvarUpadarshane aShTamo.adhyAyaH || 8||
\iti
\section{.. OM namo bhagavate vAsudevAya ..}
\section{.. navamo.adhyAyaH \- 9 ..}
shrIshuka uvAcha
ekadA gR^ihadAsIShu yashodA nandagehinI |
karmAntaraniyuktAsu nirmamantha svayaM dadhi || 1||
yAni yAnIha gItAni tadbAlacharitAni cha |
dadhinirmanthane kAle smarantI tAnyagAyata || 2||
kShaumaM vAsaH pR^ithukaTitaTe bibhratI sUtranaddhaM
putrasnehasnutakuchayugaM jAtakampaM cha subhrUH |
rajjvAkarShashramabhujachalatka~NkaNau kuNDale cha
svinnaM vaktraM kabaravigalanmAlatI nirmamantha || 3||
tAM stanyakAma AsAdya mathnantIM jananIM hariH |
gR^ihItvA dadhimanthAnaM nyaShedhatprItimAvahan || 4||
tama~NkamArUDhamapAyayatstanaM
snehasnutaM sasmitamIkShatI mukham |
atR^iptamutsR^ijya javena sA yayA\-
vutsichyamAne payasi tvadhishrite || 5||
sa~njAtakopaH sphuritAruNAdharaM
sandashya dadbhirdadhimanthabhAjanam |
bhittvA mR^iShAshrurdR^iShadashmanA raho
jaghAsa haiya~NgavamantaraM gataH || 6||
uttArya gopI sushR^itaM payaH punaH
pravishya sandR^ishya cha dadhyamatrakam |
bhagnaM vilokya svasutasya karma ta\-
jjahAsa taM chApi na tatra pashyatI || 7||
ulUkhalA~Nghrerupari vyavasthitaM
markAya kAmaM dadataM shichi sthitam |
haiya~NgavaM chauryavisha~NkitekShaNaM
nirIkShya pashchAtsutamAgamachChanaiH || 8||
tAmAttayaShTiM prasamIkShya satvara\-
stato.avarudhyApasasAra bhItavat |
gopyanvadhAvanna yamApa yoginAM
kShamaM praveShTuM tapaseritaM manaH || 9||
anva~nchamAnA jananI bR^ihachchala\-
chChroNIbharAkrAntagatiH sumadhyamA |
javena visraMsitakeshabandhana\-
chyutaprasUnAnugatiH parAmR^ishat || 10||
kR^itAgasaM taM prarudantamakShiNI
kaShantama~njanmaShiNI svapANinA |
udvIkShamANaM bhayavihvalekShaNaM
haste gR^ihItvA bhiShayantyavAgurat || 11||
tyaktvA yaShTiM sutaM bhItaM vij~nAyArbhakavatsalA |
iyeSha kila taM baddhuM dAmnAtadvIryakovidA || 12||
na chAntarna bahiryasya na pUrvaM nApi chAparam |
pUrvAparaM bahishchAntarjagato yo jagachcha yaH || 13||
taM matvA.a.atmajamavyaktaM martyali~NgamadhokShajam |
gopikolUkhale dAmnA babandha prAkR^itaM yathA || 14||
taddAma badhyamAnasya svArbhakasya kR^itAgasaH |
dvya~NgulonamabhUttena sandadhe.anyachcha gopikA || 15||
yadAsIttadapi nyUnaM tenAnyadapi sandadhe |
tadapi dvya~NgulaM nyUnaM yadyadAdatta bandhanam || 16||
evaM svagehadAmAni yashodA sandadhatyapi |
gopInAM susmayantInAM smayantI vismitAbhavat || 17||
svamAtuH svinnagAtrAyA visrastakabarasrajaH |
dR^iShTvA parishramaM kR^iShNaH kR^ipayA.a.asItsvabandhane || 18||
evaM sandarshitA hya~Nga hariNA bhR^ityavashyatA |
svavashenApi kR^iShNena yasyedaM seshvaraM vashe || 19||
nemaM viri~ncho na bhavo na shrIrapya~Nga saMshrayA |
prasAdaM lebhire gopI yattatprApa vimuktidAt || 20||
nAyaM sukhApo bhagavAn dehinAM gopikAsutaH |
j~nAninAM chAtmabhUtAnAM yathA bhaktimatAmiha || 21||
kR^iShNastu gR^ihakR^ityeShu vyagrAyAM mAtari prabhuH |
adrAkShIdarjunau pUrvaM guhyakau dhanadAtmajau || 22||
purA nAradashApena vR^ikShatAM prApitau madAt |
nalakUbaramaNigrIvAviti khyAtau shriyAnvitau || 23||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe gopIprasAdo nAma navamo.adhyAyaH || 9||
\iti
\section{.. OM namo bhagavate vAsudevAya ..}
\section{.. dashamo.adhyAyaH \-10 ..}
rAjovAcha
kathyatAM bhagavannetattayoH shApasya kAraNam |
yattadvigarhitaM karma yena vA devarShestamaH || 1||
shrIshuka uvAcha
rudrasyAnucharau bhUtvA sudR^iptau dhanadAtmajau |
kailAsopavane ramye mandAkinyAM madotkaTau || 2||
vAruNIM madirAM pItvA madAghUrNitalochanau |
strIjanairanugAyadbhishcheratuH puShpite vane || 3||
antaH pravishya ga~NgAyAmambhojavanarAjini |
chikrIDaturyuvatibhirgajAviva kareNubhiH || 4||
yadR^ichChayA cha devarShirbhagavAMstatra kaurava |
apashyannArado devau kShIbANau samabudhyata || 5||
taM dR^iShTvA vrIDitA devyo vivastrAH shApasha~NkitAH |
vAsAMsi paryadhuH shIghraM vivastrau naiva guhyakau || 6||
tau dR^iShTvA madirAmattau shrImadAndhau surAtmajau |
tayoranugrahArthAya shApaM dAsyannidaM jagau || 7||
nArada uvAcha
na hyanyo juShato joShyAn buddhibhraMsho rajoguNaH |
shrImadAdAbhijAtyAdiryatra strIdyUtamAsavaH || 8||
hanyante pashavo yatra nirdayairajitAtmabhiH |
manyamAnairimaM dehamajarAmR^ityu nashvaram || 9||
devasa.nj~nitamapyante kR^imiviDbhasmasa~nj~nitam |
bhUtadhruk tatkR^ite svArthaM kiM veda nirayo yataH || 10||
dehaH kimannadAtuH svaM niShekturmAtureva cha |
mAtuH piturvA balinaH kreturagneH shuno.api vA || 11||
evaM sAdhAraNaM dehamavyaktaprabhavApyayam |
ko vidvAnAtmasAtkR^itvA hanti jantUn R^ite.asataH || 12||
asataH shrImadAndhasya dAridryaM parama~njanam |
Atmaupamyena bhUtAni daridraH paramIkShate || 13||
yathA kaNTakaviddhA~Ngo jantornechChati tAM vyathAm |
jIvasAmyaM gato li~Ngairna tathA.a.aviddhakaNTakaH || 14||
daridro nirahaMstambho muktaH sarvamadairiha |
kR^ichChraM yadR^ichChayA.a.apnoti taddhi tasya paraM tapaH || 15||
nityaM kShutkShAmadehasya daridrasyAnnakA~NkShiNaH |
indriyANyanushuShyanti hiMsApi vinivartate || 16||
daridrasyaiva yujyante sAdhavaH samadarshinaH |
sadbhiH kShiNoti taM tarShaM tata ArAdvishud.hdhyati || 17||
sAdhUnAM samachittAnAM mukundacharaNaiShiNAm |
upekShyaiH kiM dhanastambhairasadbhirasadAshrayaiH || 18||
tadahaM mattayormAdhvyA vAruNyA shrImadAndhayoH |
tamo madaM hariShyAmi straiNayorajitAtmanoH || 19||
yadimau lokapAlasya putrau bhUtvA tamaHplutau |
na vivAsasamAtmAnaM vijAnItaH sudurmadau || 20||
ato.arhataH sthAvaratAM syAtAM naivaM yathA punaH |
smR^itiH syAnmatprasAdena tatrApi madanugrahAt || 21||
vAsudevasya sAnnidhyaM labdhvA divyasharachChate |
vR^itte svarlokatAM bhUyo labdhabhaktI bhaviShyataH || 22||
shrIshuka uvAcha
evamuktvA sa devarShirgato nArAyaNAshramam |
nalakUvaramaNigrIvAvAsaturyamalArjunau || 23||
R^iSherbhAgavatamukhyasya satyaM kartuM vacho hariH |
jagAma shanakaistatra yatrAstAM yamalArjunau || 24||
devarShirme priyatamo yadimau dhanadAtmajau |
tattathA sAdhayiShyAmi yadgItaM tanmahAtmanA || 25||
ityantareNArjunayoH kR^iShNastu yamayoryayau |
AtmanirveshamAtreNa tiryaggatamulUkhalam || 26||
bAlena niShkarShayatAnvagulUkhalaM ta\-
ddAmodareNa tarasotkalitA~Nghribandhau
niShpetatuH paramavikramitAtivepa\-
skandhapravAlaviTapau kR^itachaNDashabdau || 27||
tatra shriyA paramayA kakubhaH sphurantau
siddhAvupetya kujayoriva jAta vedAH
kR^iShNaM praNamya shirasAkhilalokanAthaM
ddhA~njalI virajasAvidamUchatuH sma || 28||
kR^iShNa kR^iShNa mahAyogiMstvamAdyaH puruShaH paraH |
vyaktAvyaktamidaM vishvaM rUpaM te brAhmaNA viduH || 29||
tvamekaH sarvabhUtAnAM dehAsvAtmendriyeshvaraH |
tvameva kAlo bhagavAn viShNuravyaya IshvaraH || 30||
tvaM mahAn prakR^itiH sUkShmA rajaHsattvatamomayI |
tvameva puruSho.adhyakShaH sarvakShetravikAravit || 31||
gR^ihyamANaistvamagrAhyo vikAraiH prAkR^itairguNaiH |
ko nvihArhati vij~nAtuM prAksiddhaM guNasaMvR^itaH || 32||
tasmai tubhyaM bhagavate vAsudevAya vedhase |
AtmadyotaguNaishChannamahimne brahmaNe namaH || 33||
yasyAvatArA j~nAyante sharIreShvasharIriNaH |
taistairatulyAtishayairvIryairdehiShvasa~NgataiH || 34||
sa bhavAn sarvalokasya bhavAya vibhavAya cha |
avatIrNoM.ashabhAgena sAmprataM patirAshiShAm || 35||
namaH paramakalyANa namaH paramama~Ngala |
vAsudevAya shAntAya yadUnAM pataye namaH || 36||
anujAnIhi nau bhUmaMstavAnucharaki~Nkarau |
darshanaM nau bhagavata R^iSherAsIdanugrahAt || 37||
vANI guNAnukathane shravaNau kathAyAM
hastau cha karmasu manastava pAdayornaH |
smR^ityAM shirastava nivAsajagatpraNAme
dR^iShTiH satAM darshane.astu bhavattanUnAm || 38||
shrIshuka uvAcha
itthaM sa~NkIrtitastAbhyAM bhagavAn gokuleshvaraH |
dAmnA cholUkhale baddhaH prahasannAha guhyakau || 39||
shrIbhagavAnuvAcha
j~nAtaM mama puraivaitadR^iShiNA karuNAtmanA |
yachChrImadAndhayorvAgbhirvibhraMsho.anugrahaH kR^itaH || 40||
sAdhUnAM samachittAnAM sutarAM matkR^itAtmanAm |
darshanAnno bhavedbandhaH puMso.akShNoH savituryathA || 41||
tadgachChataM matparamau nalakUbara sAdanam |
sa~njAto mayi bhAvo vAmIpsitaH paramo.abhavaH || 42||
shrIshuka uvAcha
ityuktau tau parikramya praNamya cha punaH punaH |
baddholUkhalamAmantrya jagmaturdishamuttarAm || 43||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe nAradashApo nAma dashamo.adhyAyaH || 10||
\iti
\section{.. OM namo bhagavate vAsudevAya ..}
\section{.. ekAdashodhyAyaH \- 11 ..}
shrIshuka uvAcha
gopA nandAdayaH shrutvA drumayoH patato ravam |
tatrAjagmuH kurushreShTha nirghAtabhayasha~NkitAH || 1||
bhUmyAM nipatitau tatra dadR^ishuryamalArjunau |
babhramustadavij~nAya lakShyaM patanakAraNam || 2||
ulUkhalaM vikarShantaM dAmnA baddhaM cha bAlakam |
kasyedaM kuta AshcharyamutpAta iti kAtarAH || 3||
bAlA Uchuraneneti tiryaggatamulUkhalam |
vikarShatA madhyagena puruShAvapyachakShmahi || 4||
na te taduktaM jagR^ihurna ghaTeteti tasya tat |
bAlasyotpATanaM tarvoH kechitsandigdhachetasaH || 5||
ulUkhalaM vikarShantaM dAmnA baddhaM svamAtmajam |
vilokya nandaH prahasadvadano vimumocha ha || 6||
gopIbhiH stobhito.anR^ityadbhagavAn bAlavatkvachit |
udgAyati kvachinmugdhastadvasho dAruyantravat || 7||
bibharti kvachidAj~naptaH pIThakonmAnapAdukam |
bAhukShepaM cha kurute svAnAM cha prItimAvahan || 8||
darshayaMstadvidAM loka Atmano bhR^ityavashyatAm |
vrajasyovAha vai harShaM bhagavAn bAlacheShTitaiH || 9||
krINIhi bhoH phalAnIti shrutvA satvaramachyutaH |
phalArthI dhAnyamAdAya yayau sarvaphalapradaH || 10||
phalavikrayiNI tasya chyutadhAnyaM karadvayam |
phalairapUrayadratnaiH phalabhANDamapUri cha || 11||
sarittIragataM kR^iShNaM bhagnArjunamathAhvayat |
rAmaM cha rohiNIdevI krIDantaM bAlakairbhR^isham || 12||
nopeyAtAM yadA.a.ahUtau krIDAsa~Ngena putrakau |
yashodAM preShayAmAsa rohiNI putravatsalAm || 13||
krIDantaM sA sutaM bAlairativelaM sahAgrajam |
yashodAjohavItkR^iShNaM putrasnehasnutastanI || 14||
kR^iShNa kR^iShNAravindAkSha tAta ehi stanaM piba |
alaM vihAraiH kShutkShAntaH krIDAshrAnto.asi putraka || 15||
he rAmAgachCha tAtAshu sAnujaH kulanandana |
prAtareva kR^itAhArastadbhavAn bhoktumarhati || 16||
pratIkShate tvAM dAshArha bhokShyamANo vrajAdhipaH |
ehyAvayoH priyaM dhehi svagR^ihAn yAta bAlakAH || 17||
dhUlidhUsaritA~NgastvaM putra majjanamAvaha |
janmarkShamadya bhavato viprebhyo dehi gAH shuchiH || 18||
pashya pashya vayasyAMste mAtR^imR^iShTAn svala~NkR^itAn |
tvaM cha snAtaH kR^itAhAro viharasva svala~NkR^itaH || 19||
itthaM yashodA tamasheShashekharaM
matvA sutaM snehanibaddhadhIrnR^ipa |
haste gR^ihItvA saha rAmamachyutaM
nItvA svavATaM kR^itavatyathodayam || 20||
gopavR^iddhA mahotpAtAnanubhUya bR^ihadvane |
nandAdayaH samAgamya vrajakAryamamantrayan || 21||
tatropanandanAmA.a.aha gopo j~nAnavayo.adhikaH |
deshakAlArthatattvaj~naH priyakR^idrAmakR^iShNayoH || 22||
utthAtavyamito.asmAbhirgokulasya hitaiShibhiH |
AyAntyatra mahotpAtA bAlAnAM nAshahetavaH || 23||
muktaH katha~nchidrAkShasyA bAlaghnyA bAlako hyasau |
hareranugrahAnnUnamanashchopari nApatat || 24||
chakravAtena nIto.ayaM daityena vipadaM viyat |
shilAyAM patitastatra paritrAtaH sureshvaraiH || 25||
yanna mriyeta drumayorantaraM prApya bAlakaH |
asAvanyatamo vApi tadapyachyutarakShaNam || 26||
yAvadautpAtiko.ariShTo vrajaM nAbhibhaveditaH |
tAvadbAlAnupAdAya yAsyAmo.anyatra sAnugAH || 27||
vanaM vR^indAvanaM nAma pashavyaM navakAnanam |
gopagopIgavAM sevyaM puNyAdritR^iNavIrudham || 28||
tattatrAdyaiva yAsyAmaH shakaTAn yu~Nkta mA chiram |
godhanAnyagrato yAntu bhavatAM yadi rochate || 29||
tachChrutvaikadhiyo gopAH sAdhu sAdhviti vAdinaH |
vrajAn svAn svAn samAyujya yayU rUDhaparichChadAH || 30||
vR^iddhAn bAlAn striyo rAjan sarvopakaraNAni cha |
anassvAropya gopAlA yattA AttasharAsanAH || 31||
godhanAni puraskR^itya shR^i~NgANyApUrya sarvataH |
tUryaghoSheNa mahatA yayuH saha purohitAH || 32||
gopyo rUDharathA nUtnakuchaku~NkumakAntayaH |
kR^iShNalIlA jaguH prItA niShkakaNThyaH suvAsasaH || 33||
tathA yashodArohiNyAvekaM shakaTamAsthite |
rejatuH kR^iShNarAmAbhyAM tatkathAshravaNotsuke || 34||
vR^indAvanaM sampravishya sarvakAlasukhAvaham |
tatra chakrurvrajAvAsaM shakaTairardhachandravat || 35||
vR^indAvanaM govardhanaM yamunApulinAni cha |
vIkShyAsIduttamA prItI rAmamAdhavayornR^ipa || 36||
evaM vrajaukasAM prItiM yachChantau bAlacheShTitaiH |
kalavAkyaiH svakAlena vatsapAlau babhUvatuH || 37||
avidUre vrajabhuvaH saha gopAladArakaiH |
chArayAmAsaturvatsAn nAnAkrIDAparichChadau || 38||
kvachidvAdayato veNuM kShepaNaiH kShipataH kvachit |
kvachitpAdaiH ki~NkiNIbhiH kvachitkR^itrimagovR^iShaiH || 39||
vR^iShAyamANau nardantau yuyudhAte parasparam |
anukR^itya rutairjantUMshcheratuH prAkR^itau yathA || 40||
kadAchidyamunAtIre vatsAMshchArayatoH svakaiH |
vayasyaiH kR^iShNabalayorjighAMsurdaitya Agamat || 41||
taM vatsarUpiNaM vIkShya vatsayUthagataM hariH |
darshayan baladevAya shanairmugdha ivAsadat || 42||
gR^ihItvAparapAdAbhyAM sahalA~NgUlamachyutaH |
bhrAmayitvA kapitthAgre prAhiNodgatajIvitam |
sa kapitthairmahAkAyaH pAtyamAnaiH papAta ha || 43||
taM vIkShya vismitA bAlAH shashaMsuH sAdhu sAdhviti |
devAshcha parisantuShTA babhUvuH puShpavarShiNaH || 44||
tau vatsapAlakau bhUtvA sarvalokaikapAlakau |
saprAtarAshau govatsAMshchArayantau vicheratuH || 45||
svaM svaM vatsakulaM sarve pAyayiShyanta ekadA |
gatvA jalAshayAbhyAshaM pAyayitvA papurjalam || 46||
te tatra dadR^ishurbAlA mahAsattvamavasthitam |
tatrasurvajranirbhinnaM gireH shR^i~Ngamiva chyutam || 47||
sa vai bako nAma mahAnasuro bakarUpadhR^ik |
Agatya sahasA kR^iShNaM tIkShNatuNDo.agrasadbalI || 48||
kR^iShNaM mahAbakagrastaM dR^iShTvA rAmAdayo.arbhakAH |
babhUvurindriyANIva vinA prANaM vichetasaH || 49||
taM tAlumUlaM pradahantamagniva\-
dgopAlasUnuM pitaraM jagadguroH |
chachCharda sadyo.atiruShAkShataM baka\-
stuNDena hantuM punarabhyapadyata || 50||
tamApatantaM sa nigR^ihya tuNDayo\-
rdorbhyAM bakaM kaMsasakhaM satAM patiH |
pashyatsu bAleShu dadAra lIlayA
mudAvaho vIraNavaddivaukasAm || 51||
tadA bakAriM suralokavAsinaH
samAkiran nandanamallikAdibhiH |
samIDire chAnakasha~NkhasaMstavai\-
stadvIkShya gopAlasutA visismire || 52||
muktaM bakAsyAdupalabhya bAlakA
rAmAdayaH prANamivendriyo gaNaH |
sthAnAgataM taM parirabhya nirvR^itAH
praNIya vatsAn vrajametya tajjaguH || 53||
shrutvA tadvismitA gopA gopyashchAtipriyAdR^itAH |
pretyAgatamivautsukyAdaikShanta tR^iShitekShaNAH || 54||
aho batAsya bAlasya bahavo mR^ityavo.abhavan |
apyAsIdvipriyaM teShAM kR^itaM pUrvaM yato bhayam || 55||
athApyabhibhavantyenaM naiva te ghoradarshanAH |
jighAMsayainamAsAdya nashyantyagnau pata~Ngavat || 56||
aho brahmavidAM vAcho nAsatyAH santi karhichit |
gargo yadAha bhagavAnanvabhAvi tathaiva tat || 57||
iti nandAdayo gopAH kR^iShNarAmakathAM mudA |
kurvanto ramamANAshcha nAvindan bhavavedanAm || 58||
evaM vihAraiH kaumAraiH kaumAraM jahaturvraje |
nilAyanaiH setubandhairmarkaTotplavanAdibhiH || 59||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe vatsabakavadho namaikAdasho.adhyAyaH || 11||
\iti
\section{.. OM namo bhagavate vAsudevAya ..}
\section{.. dvAdasho.adhyAyaH \- 12 ..}
shrIshuka uvAcha
kvachidvanAshAya mano dadhadvrajA\-
tprAtaHsamutthAya vayasyavatsapAn |
prabodhaya~nChR^i~NgaraveNa chAruNA
vinirgato vatsapuraHsaro hariH || 1||
tenaiva sAkaM pR^ithukAH sahasrashaH
snigdhAH sushigvetraviShANaveNavaH |
svAnsvAnsahasropari sa~NkhyayAnvitAn
vatsAn puraskR^itya viniryayurmudA || 2||
kR^iShNavatsairasa~NkhyAtairyUthIkR^itya svavatsakAn |
chArayanto.arbhalIlAbhirvijahrustatra tatra ha || 3||
phalapravAlastabakasumanaHpichChadhAtubhiH |
kAchagu~njAmaNisvarNabhUShitA apyabhUShayan || 4||
muShNanto.anyonyashikyAdIn j~nAtAnArAchcha chikShipuH |
tatratyAshcha punardUrAddhasantashcha punardaduH || 5||
yadi dUraM gataH kR^iShNo vanashobhekShaNAya tam |
ahaM pUrvamahaM pUrvamiti saMspR^ishya remire || 6||
kechidveNUn vAdayanto dhmAntaH shR^i~NgANi kechana |
kechidbhR^i~NgaiH pragAyantaH kUjantaH kokilaiH pare || 7||
vichChAyAbhiH pradhAvanto gachChantaH sAdhu haMsakaiH |
bakairupavishantashcha nR^ityantashcha kalApibhiH || 8||
vikarShantaH kIshabAlAnArohantashcha tairdrumAn |
vikurvantashcha taiH sAkaM plavantashcha palAshiShu || 9||
sAkaM bhekairvila~NghantaH saritprasravasamplutAH |
vihasantaH pratichChAyAH shapantashcha pratisvanAn || 10||
itthaM satAM brahmasukhAnubhUtyA
dAsyaM gatAnAM paradaivatena |
mAyAshritAnAM naradArakeNa
sAkaM vijahruH kR^itapuNyapu~njAH || 11||
yatpAdapAMsurbahujanmakR^ichChrato
dhR^itAtmabhiryogibhirapyalabhyaH |
sa eva yaddR^igviShayaH svayaM sthitaH
kiM varNyate diShTamato vrajaukasAm || 12||
athAghanAmAbhyapatanmahAsura\-
steShAM sukhakrIDanavIkShaNAkShamaH |
nityaM yadantarnijajIvitepsubhiH
pItAmR^itairapyamaraiH pratIkShyate || 13||
dR^iShTvArbhakAn kR^iShNamukhAnaghAsuraH
kaMsAnushiShTaH sa bakIbakAnujaH |
ayaM tu me sodaranAshakR^ittayo\-
rdvayormamainaM sabalaM haniShye || 14||
ete yadA matsuhR^idostilApAH
kR^itAstadA naShTasamA vrajaukasaH |
prANe gate varShmasu kA nu chintA
prajAsavaH prANabhR^ito hi ye te || 15||
iti vyavasyAjagaraM bR^ihadvapuH
sa yojanAyAmamahAdripIvaram |
dhR^itvAdbhutaM vyAttaguhAnanaM tadA
pathi vyasheta grasanAshayA khalaH || 16||
dharAdharoShTho jaladottaroShTho
daryAnanAnto girishR^i~NgadaMShTraH |
dhvAntAntarAsyo vitatAdhvajihvaH
paruShAnilashvAsadavekShaNoShNaH || 17||
dR^iShTvA taM tAdR^ishaM sarve matvA vR^indAvanashriyam |
vyAttAjagaratuNDena hyutprekShante sma lIlayA || 18||
aho mitrANi gadata sattvakUTaM puraHsthitam |
asmatsa~NgrasanavyAttavyAlatuNDAyate na vA || 19||
satyamarkakarAraktamuttarAhanuvadghanam |
adharAhanuvadrodhastatpratichChAyayAruNam || 20||
pratispardhete sR^ikkibhyAM savyAsavye nagodare |
tu~NgashR^i~NgAlayo.apyetAstaddaMShTrAbhishcha pashyata || 21||
AstR^itAyAmamArgo.ayaM rasanAM pratigarjati |
eShAmantargataM dhvAntametadapyantarAnanam || 22||
dAvoShNakharavAto.ayaM shvAsavadbhAti pashyata |
taddagdhasattvadurgandho.apyantarAmiShagandhavat || 23||
asmAn kimatra grasitA niviShTA\-
nayaM tathA chedbakavadvina~NkShyati |
kShaNAdaneneti bakAryushanmukhaM
vIkShyoddhasantaH karatADanairyayuH || 24||
tthaM mitho.atathyamatajj~nabhAShitaM
shrutvA vichintyetyamR^iShA mR^iShAyate |
rakSho viditvAkhilabhUtahR^itsthitaH
svAnAM niroddhuM bhagavAn mano dadhe || 25||
tAvatpraviShTAstvasurodarAntaraM
paraM na gIrNAH shishavaH savatsAH |
pratIkShamANena bakAriveshanaM
hatasvakAntasmaraNena rakShasA || 26||
tAn vIkShya kR^iShNaH sakalAbhayaprado
hyananyanAthAn svakarAdavachyutAn |
dInAMshcha mR^ityorjaTharAgnighAsAn
ghR^iNArdito diShTakR^itena vismitaH || 27||
kR^ityaM kimatrAsya khalasya jIvanaM
na vA amIShAM cha satAM vihiMsanam |
dvayaM kathaM syAditi saMvichintya tat
j~nAtvAvishattuNDamasheShadR^igghariH || 28||
tadA ghanachChadA devA bhayAddhA heti chukrushuH |
jahR^iShurye cha kaMsAdyAH kauNapAstvaghabAndhavAH || 29||
tachChrutvA bhagavAn kR^iShNastvavyayaH sArbhavatsakam |
chUrNIchikIrShorAtmAnaM tarasA vavR^idhe gale || 30||
tato.atikAyasya niruddhamArgiNo
hyudgIrNadR^iShTerbhramatastvitastataH |
pUrNo.antara~Nge pavano niruddho
mUrdhan viniShpATya vinirgato bahiH || 31||
tenaiva sarveShu bahirgateShu
prANeShu vatsAn suhR^idaH paretAn |
dR^iShTyA svayotthApya tadanvitaH puna\-
rvaktrAnmukundo bhagavAn viniryayau || 32||
pInAhibhogotthitamadbhutaM maha\-
jjyotiH svadhAmnA jvalayaddisho dasha |
pratIkShya khe.avasthitamIsha nirgamaM
vivesha tasmin miShatAM divaukasAm || 33||
tato.atihR^iShTAH svakR^ito.akR^itArhaNaM
puShpaiH surA apsarasashcha nartanaiH |
gItaiH sugA vAdyadharAshcha vAdyakaiH
stavaishcha viprA jayaniHsvanairgaNAH || 34||
tadadbhutastotrasuvAdyagItikA\-
jayAdinaikotsavama~NgalasvanAn |
shrutvA svadhAmno.antyaja Agato.achirAt
dR^iShTvA mahIshasya jagAma vismayam || 35||
rAjannAjagaraM charma shuShkaM vR^indAvane.adbhutam |
vrajaukasAM bahutithaM babhUvAkrIDagahvaram || 36||
etatkaumArajaM karma harerAtmAhimokShaNam |
mR^ityoH paugaNDake bAlA dR^iShTvochurvismitA vraje || 37||
naitadvichitraM manujArbhamAyinaH
parAvarANAM paramasya vedhasaH |
agho.api yatsparshanadhautapAtakaH
prApAtmasAmyaM tvasatAM sudurlabham || 38||
sakR^idyada~NgapratimAntarAhitA
manomayI bhAgavatIM dadau gatim |
sa eva nityAtmasukhAnubhUtyabhi\-
vyudastamAyo.antargato hi kiM punaH || 39||
sUta uvAcha
itthaM dvijA yAdavadevadattaH
shrutvA svarAtushcharitaM vichitram |
paprachCha bhUyo.api tadeva puNyaM
vaiyAsakiM yannigR^ihItachetAH || 40||
rAjovAcha
brahman kAlAntarakR^itaM tatkAlInaM kathaM bhavet |
yatkaumAre harikR^itaM jaguH paugaNDake.arbhakAH || 41||
tadbrUhi me mahAyogin paraM kautUhalaM guro |
nUnametaddharereva mAyA bhavati nAnyathA || 42||
vayaM dhanyatamA loke guro.api kShatrabandhavaH |
yatpibAmo muhustvattaH puNyaM kR^iShNakathAmR^itam || 43||
sUta uvAcha
itthaM sma pR^iShTaH sa tu bAdarAyaNi\-
statsmAritAnantahR^itAkhilendriyaH |
kR^ichChrAtpunarlabdhabahirdR^ishiH shanaiH
pratyAha taM bhAgavatottamottama || 44||
iti shrImadbhAgavate mahApurANe pAramahaMsyAM
saMhitAyAM dashamaskandhe pUrvArdhe dvAdasho.adhyAyaH || 12||
\iti
\section{.. OM namo bhagavate vAsudevAya ..}
\section{.. trayodasho.adhyAyaH \- 13 ..}
shrIshuka uvAcha
sAdhu pR^iShTaM mahAbhAga tvayA bhAgavatottama |
yannUtanayasIshasya shR^iNvannapi kathAM muhuH || 1||
satAmayaM sArabhR^itAM nisargo
yadarthavANIshrutichetasAmapi |
pratikShaNaM navyavadachyutasya yat
striyA viTAnAmiva sAdhuvArtA || 2||
shR^iNuShvAvahito rAjannapi guhyaM vadAmi te |
brUyuH snigdhasya shiShyasya guravo guhyamapyuta || 3||
tathAghavadanAnmR^ityo rakShitvA vatsapAlakAn |
saritpulinamAnIya bhagavAnidamabravIt || 4||
aho.atiramyaM pulinaM vayasyAH
svakelisampanmR^idulAchChavAlukam |
sphuTatsarogandhahR^itAlipatrika\-
dhvanipratidhvAnalasaddrumAkulam || 5||
atra bhoktavyamasmAbhirdivA rUDhaM kShudhArditAH |
vatsAH samIpe.apaH pItvA charantu shanakaistR^iNam || 6||
tatheti pAyayitvArbhA vatsAnArudhya shAdvale |
muktvA shikyAni bubhujuH samaM bhagavatA mudA || 7||
kR^iShNasya viShvakpururAjimaNDalai\-
rabhyAnanAH phulladR^isho vrajArbhakAH |
sahopaviShTA vipine vireju\-
shChadA yathAmbhoruhakarNikAyAH || 8||
kechitpuShpairdalaiH kechitpallavaira~NkuraiH phalaiH |
shigbhistvagbhirdR^iShadbhishcha bubhujuH kR^itabhAjanAH || 9||
sarve mitho darshayantaH svasvabhojyaruchiM pR^ithak |
hasanto hAsayantashchAbhyavajahruH saheshvarAH || 10||
bibhradveNuM jaTharapaTayoH shR^i~Ngavetre cha kakShe
vAme pANau masR^iNakavalaM tatphalAnya~NgulIShu |
tiShThanmadhye svaparisuhR^ido hAsayan narmabhiH svaiH
svarge loke miShati bubhuje yaj~nabhugbAlakeliH || 11||
bhArataivaM vatsapeShu bhu~njAneShvachyutAtmasu |
vatsAstvantarvane dUraM vivishustR^iNalobhitAH || 12||
tAn dR^iShTvA bhayasantrastAnUche kR^iShNo.asya bhIbhayam |
mitrANyAshAnmA viramatehAneShye vatsakAnaham || 13||
		
ityuktvAdridarIku~njagahvareShvAtmavatsakAn |
vichinvan bhagavAn kR^iShNaH sapANikavalo yayau || 14||
ambhojanmajanistadantaragato mAyArbhakasyeshituH
draShTuM ma~nju mahitvamanyadapi tadvatsAnito vatsapAn |
nItvAnyatra kurUdvahAntaradadhAtkhe.avasthito yaH purA
dR^iShTvAghAsuramokShaNaM prabhavataH prAptaH paraM vismayam || 15||
tato vatsAnadR^iShTvaitya puline.api cha vatsapAn |
ubhAvapi vane kR^iShNo vichikAya samantataH || 16||
kvApyadR^iShTvAntarvipine vatsAn pAlAMshcha vishvavit |
sarvaM vidhikR^itaM kR^iShNaH sahasAvajagAma ha || 17||
tataH kR^iShNo mudaM kartuM tanmAtR^INAM cha kasya cha |
ubhayAyitamAtmAnaM chakre vishvakR^idIshvaraH || 18||
yAvadvatsapavatsakAlpakavapuryAvatkarA~NghryAdikaM
yAvadyaShTiviShANaveNudalashigyAvadvibhUShAmbaram |
yAvachChIlaguNAbhidhAkR^itivayo yAvadvihArAdikaM
sarvaM viShNumayaM giro.a~NgavadajaH sarvasvarUpo babhau || 19||
svayamAtmA.a.atmagovatsAn prativAryAtmavatsapaiH |
krIDannAtmavihAraishcha sarvAtmA prAvishadvrajam || 20||
tattadvatsAn pR^itha~NnItvA tattadgoShThe niveshya saH |
tattadAtmAbhavadrAjaMstattatsadma praviShTavAn || 21||
tanmAtaro veNuravatvarotthitA
utthApya dorbhiH parirabhya nirbharam |
snehasnutastanyapayaHsudhAsavaM
matvA paraM brahma sutAnapAyayan || 22||
tato nR^iponmardanamajjalepanA\-
la~NkArarakShAtilakAshanAdibhiH |
saMlAlitaH svAcharitaiH praharShayan
sAyaM gato yAmayamena mAdhavaH || 23||
gAvastato goShThamupetya satvaraM
hu~NkAraghoShaiH parihUtasa~NgatAn |
svakAnsvakAnvatsatarAnapAyaya\-
nmuhurlihantyaH sravadaudhasaM payaH || 24||
gogopInAM mAtR^itAsmin sarvA snehardhikAM vinA |
purovadAsvapi harestokatA mAyayA vinA || 25||
vrajaukasAM svatokeShu snehavallyAbdamanvaham |
shanairniHsIma vavR^idhe yathA kR^iShNe tvapUrvavat || 26||
itthamAtmA.a.atmanA.a.atmAnaM vatsapAlamiSheNa saH |
pAlayan vatsapo varShaM chikrIDe vanagoShThayoH || 27||
ekadA chArayan vatsAn sarAmo vanamAvishat |
pa~nchaShAsu triyAmAsu hAyanApUraNIShvajaH || 28||
tato vidUrAchcharato gAvo vatsAnupavrajam |
govardhanAdrishirasi charantyo dadR^ishustR^iNam || 29||
dR^iShTvAtha tatsnehavasho.asmR^itAtmA
sa govrajo.atyAtmapadurgamArgaH |
dvipAtkakudgrIva udAsyapuchCho\-
.agAddhu~NkR^itairAsrupayA javena || 30||
sametya gAvo.adho vatsAn vatsavatyo.apyapAyayan |
gilantya iva chA~NgAni lihantyaH svaudhasaM payaH || 31||
gopAstadrodhanAyAsamaughyalajjorumanyunA |
durgAdhvakR^ichChrato.abhyetya govatsairdadR^ishuH sutAn || 32||
tadIkShaNotpremarasAplutAshayA
jAtAnurAgA gatamanyavo.arbhakAn |
uduhya dorbhiH parirabhya mUrdhani
ghrANairavApuH paramAM mudaM te || 33||
tataH pravayaso gopAstokAshleShasunirvR^itAH |
kR^ichChrAchChanairapagatAstadanusmR^ityudashravaH || 34||
vrajasya rAmaH premardhervIkShyautkaNThyamanukShaNam |
muktastaneShvapatyeShvapyahetuvidachintayat || 35||
kimetadadbhutamiva vAsudeve.akhilAtmani |
vrajasya sAtmanastokeShvapUrvaM prema vardhate || 36||
keyaM vA kuta AyAtA daivI vA nAryutAsurI |
prAyo mAyAstu me bharturnAnyA me.api vimohinI || 37||
iti sa~nchintya dAshArho vatsAn savayasAnapi |
sarvAnAchaShTa vaikuNThaM chakShuShA vayunena saH || 38||
naite sureshA R^iShayo na chaite
tvameva bhAsIsha bhidAshraye.api |
sarvaM pR^ithaktvaM nigamAtkathaM vade\-
tyuktena vR^ittaM prabhuNA balo.avait || 39||
tAvadetyAtmabhUrAtmamAnena truTyanehasA |
purovadabdaM krIDantaM dadR^ishe sakalaM harim || 40||
yAvanto gokule bAlAH savatsAH sarva eva hi |
mAyAshaye shayAnA me nAdyApi punarutthitAH || 41||
ita ete.atra kutratyA manmAyAmohitetare |
tAvanta eva tatrAbdaM krIDanto viShNunA samam || 42||
evameteShu bhedeShu chiraM dhyAtvA sa AtmabhUH |
satyAH ke katare neti j~nAtuM neShTe katha~nchana || 43||
evaM sammohayan viShNuM vimohaM vishvamohanam |
svayaiva mAyayAjo.api svayameva vimohitaH || 44||
tamyAM tamovannaihAraM khadyotArchirivAhani |
mahatItaramAyaishyaM nihantyAtmani yu~njataH || 45||
tAvatsarve vatsapAlAH pashyato.ajasya tatkShaNAt |
vyadR^ishyanta ghanashyAmAH pItakausheyavAsasaH || 46||
chaturbhujAH sha~NkhachakragadArAjIvapANayaH |
kirITinaH kuNDalino hAriNo vanamAlinaH || 47||
shrIvatsA~Ngadadoratnakambuka~NkaNapANayaH |
nUpuraiH kaTakairbhAtAH kaTisUtrA~NgulIyakaiH || 48||
A~NghrimastakamApUrNAstulasInavadAmabhiH |
komalaiH sarvagAtreShu bhUri puNyavadarpitaiH || 49||
chandrikAvishadasmeraiH sAruNApA~NgavIkShitaiH |
svakArthAnAmiva rajaHsattvAbhyAM sraShTR^ipAlakAH || 50||
AtmAdistambaparyantairmUrtimadbhishcharAcharaiH |
nR^ityagItAdyanekArhaiH pR^ithakpR^ithagupAsitAH || 51||
aNimAdyairmahimabhirajAdyAbhirvibhUtibhiH |
chaturviMshatibhistattvaiH parItA mahadAdibhiH || 52||
kAlasvabhAvasaMskArakAmakarmaguNAdibhiH |
svamahidhvastamahibhirmUrtimadbhirupAsitAH || 53||
satyaj~nAnAnantAnandamAtraikarasamUrtayaH |
aspR^iShTabhUrimAhAtmyA api hyupaniShaddR^ishAm || 54||
evaM sakR^iddadarshAjaH parabrahmAtmano.akhilAn |
yasya bhAsA sarvamidaM vibhAti sacharAcharam || 55||
tato.atikutukodvR^ittastimitaikAdashendriyaH |
taddhAmnAbhUdajastUShNIM pUrdevyantIva putrikA || 56||
itIreshe.atarkye nijamahimani svapramitike
paratrAjAto.atannirasanamukhabrahmakamitau |
anIshe.api draShTuM kimidamiti vA muhyati sati
chachChAdAjo j~nAtvA sapadi paramo.ajAjavanikAm || 57||
tato.arvAkpratilabdhAkShaH kaH paretavadutthitaH |
kR^ichChrAdunmIlya vai dR^iShTIrAchaShTedaM sahAtmanA || 58||
sapadyevAbhitaH pashyan disho.apashyatpuraH sthitam |
vR^indAvanaM janAjIvyadrumAkIrNaM samApriyam || 59||
yatra naisargadurvairAH sahAsan nR^imR^igAdayaH |
mitrANIvAjitAvAsadrutaruTtarShakAdikam || 60||
tatrodvahatpashupavaMshashishutvanATyaM
brahmAdvayaM paramanantamagAdhabodham |
vatsAn sakhIniva purA parito vichinva\-
dekaM sapANikavalaM parameShThyachaShTa || 61||
dR^iShTvA tvareNa nijadhoraNato.avatIrya
pR^ithvyAM vapuH kanakadaNDamivAbhipAtya |
spR^iShTvA chaturmukuTakoTibhira~NghriyugmaM
natvA mudashrusujalairakR^itAbhiShekam || 62||
utthAyotthAya kR^iShNasya chirasya pAdayoH patan |
Aste mahitvaM prAgdR^iShTaM smR^itvA smR^itvA punaH punaH || 63||
shanairathotthAya vimR^ijya lochane
mukundamudvIkShya vinamrakandharaH |
kR^itA~njaliH prashrayavAn samAhitaH
savepathurgadgadayailatelayA || 64||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe trayodasho.adhyAyaH || 13||
\iti
\section{.. OM namo bhagavate vAsudevAya ..}
\section{.. chaturdasho.adhyAyaH \- 14 ..}
brahmovAcha
naumIDya te.abhravapuShe taDidambarAya
gu~njAvataMsaparipichChalasanmukhAya |
vanyasraje kavalavetraviShANaveNu\-
lakShmashriye mR^idupade pashupA~NgajAya || 1||
asyApi deva vapuSho madanugrahasya
svechChAmayasya na tu bhUtamayasya ko.api |
neshe mahi tvavasituM manasA.a.antareNa
sAkShAttavaiva kimutAtmasukhAnubhUteH || 2||
j~nAne prayAsamudapAsya namanta eva
jIvanti sanmukharitAM bhavadIyavArtAm |
sthAne sthitAH shrutigatAM tanuvA~NmanobhiH
ye prAyasho.ajita jito.apyasi taistrilokyAm || 3||
shreyaHsR^itiM/srutiM bhaktimudasya te vibho
klishyanti ye kevalabodhalabdhaye |
teShAmasau kleshala eva shiShyate
nAnyadyathA sthUlatuShAvaghAtinAm || 4||
pureha bhUman bahavo.api yogina\-
stvadarpitehA nijakarmalabdhayA |
vibudhya bhaktyaiva kathopanItayA
prapedire.a~njo.achyuta te gatiM parAm || 5||
tathApi bhUman mahimAguNasya te
viboddhumarhatyamalAntarAtmabhiH |
avikriyAtsvAnubhavAdarUpato
hyananyabodhyAtmatayA na chAnyathA || 6||
guNAtmanaste.api guNAn vimAtuM
hitAvatIrNasya ka Ishire.asya |
kAlena yairvA vimitAH sukalpai\-
rbhUpAMsavaH khe mihikA dyubhAsAH || 7||
tatte.anukampAM susamIkShamANo
bhu~njAna evAtmakR^itaM vipAkam |
hR^idvAgvapurbhirvidadhannamaste
jIveta yo muktipade sa dAyabhAk || 8||
pashyesha me.anAryamananta Adye
parAtmani tvayyapi mAyimAyini |
mAyAM vitatyekShitumAtmavaibhavaM
hyahaM kiyAnaichChamivArchiragnau || 9||
ataH kShamasvAchyuta me rajobhuvo
hyajAnatastvatpR^ithagIshamAninaH |
ajAvalepAndhatamo.andhachakShuSha
eSho.anukampyo mayi nAthavAniti || 10||
kvAhaM tamomahadaha~NkhacharAgnivArbhU\-
saMveShTitANDaghaTasaptavitastikAyAH |
kvedR^igvidhAvigaNitANDaparANucharyA\-
vAtAdhvaromavivarasya cha te mahitvam || 11||
utkShepaNaM garbhagatasya pAdayoH
kiM kalpate mAturadhokShajAgase |
kimastinAstivyapadeshabhUShitaM
tavAsti kukSheH kiyadapyanantaH || 12||
jagattrayAntodadhisamplavode
nArAyaNasyodaranAbhinAlAt |
vinirgato.ajastviti vA~Nna vai mR^iShA
kintvIshvara tvanna vinirgato.asmi || 13||
nArAyaNastvaM na hi sarvadehinA\-
mAtmAsyadhIshAkhilalokasAkShI |
nArAyaNo.a~NgaM narabhUjalAyanAt
tachchApi satyaM na tavaiva mAyA || 14||
tachchejjalasthaM tava sajjagadvapuH
kiM me na dR^iShTaM bhagavaMstadaiva |
kiM vA sudR^iShTaM hR^idi me tadaiva
kiM no sapadyeva punarvyadarshi || 15||
atraiva mAyAdhamanAvatAre
hyasya prapa~nchasya bahiH sphuTasya |
kR^itsnasya chAntarjaThare jananyA
mAyAtvameva prakaTIkR^itaM te || 16||
yasya kukShAvidaM sarvaM sAtmaM bhAti yathA tathA |
tattvayyapIha tatsarvaM kimidaM mAyayA vinA || 17||
adyaiva tvadR^ite.asya kiM mama na te mAyAtvamAdarshita\-
meko.asi prathamaM tato vrajasuhR^idvatsAH samastA api |
tAvanto.asi chaturbhujAstadakhilaiH sAkaM mayopAsitA\-
stAvantyeva jagantyabhUstadamitaM brahmAdvayaM shiShyate || 18||
ajAnatAM tvatpadavImanAtma\-
nyAtmA.a.atmanA bhAsi vitatya mAyAm |
sR^iShTAvivAhaM jagato vidhAna
iva tvameSho.anta iva trinetraH || 19||
sureShvR^iShiShvIsha tathaiva nR^iShvapi
tiryakShu yAdaHsvapi te.ajanasya |
janmAsatAM durmadanigrahAya
prabho vidhAtaH sadanugrahAya cha || 20||
ko vetti bhUman bhagavan parAtman
yogeshvarotIrbhavatastrilokyAm |
kva vA kathaM vA kati vA kadeti
vistArayan krIDasi yogamAyAm || 21||
tasmAdidaM jagadasheShamasatsvarUpaM
svapnAbhamastadhiShaNaM puruduHkhaduHkham |
tvayyeva nityasukhabodhatanAvanante
mAyAta udyadapi yatsadivAvabhAti || 22||
ekastvamAtmA puruShaH purANaH
satyaH svaya~njyotirananta AdyaH |
nityo.akSharo.ajasrasukho nira~njanaH
pUrNo.advayo mukta upAdhito.amR^itaH || 23||
evaM vidhaM tvAM sakalAtmanAmapi
svAtmAnamAtmA.a.atmatayA vichakShate |
gurvarkalabdhopaniShatsuchakShuShA
ye te tarantIva bhavAnR^itAmbudhim || 24||
AtmAnamevAtmatayAvijAnatAM
tenaiva jAtaM nikhilaM prapa~nchitam |
j~nAnena bhUyo.api cha tatpralIyate
rajjvAmaherbhogabhavAbhavau yathA || 25||
aj~nAnasa.nj~nau bhavabandhamokShau
dvau nAma nAnyau sta R^itaj~nabhAvAt |
ajasrachityA.a.atmani kevale pare
vichAryamANe taraNAvivAhanI || 26||
tvAmAtmAnaM paraM matvA paramAtmAnameva cha |
AtmA punarbahirmR^igya aho.aj~najanatAj~natA || 27||
antarbhave.ananta bhavantameva
hyatattyajanto mR^igayanti santaH |
asantamapyantyahimantareNa
santaM guNaM taM kimu yanti santaH || 28||
athApi te deva padAmbujadvaya\-
prasAdaleshAnugR^ihIta eva hi |
jAnAti tattvaM bhagavan mahimno\-
na chAnya eko.api chiraM vichinvan || 29||
tadastu me nAtha sa bhUribhAgo
bhave.atra vAnyatra tu vA tirashchAm |
yenAhameko.api bhavajjanAnAM
bhUtvA niSheve tava pAdapallavam || 30||
aho.atidhanyA vrajagoramaNyaH
stanyAmR^itaM pItamatIva te mudA |
yAsAM vibho vatsatarAtmajAtmanA
yattR^iptaye.adyApi na chAlamadhvarAH || 31||
ahobhAgyamahobhAgyaM nandagopavrajaukasAm |
yanmitraM paramAnandaM pUrNaM brahma sanAtanam || 32||
eShAM tu bhAgyamahimAchyuta tAvadAstA\-
mekAdashaiva hi vayaM bata bhUribhAgAH |
etaddhR^iShIkachaShakairasakR^itpibAmaH
sharvAdayo.a~NghryudajamadhvamR^itAsavaM te || 33||
tadbhUribhAgyamiha janma kimapyaTavyAM
yadgokule.api katamA~Nghrirajo.abhiShekam |
yajjIvitaM tu nikhilaM bhagavAn mukundaH
tvadyApi yatpadarajaH shrutimR^igyameva || 34||
eShAM ghoShanivAsinAmuta bhavAn kiM deva rAteti naH
cheto vishvaphalAtphalaM tvadaparaM kutrApyayan muhyati |
sadveShAdiva pUtanApi sakulA tvAmeva devApitA
yaddhAmArthasuhR^itpriyAtmatanayaprANAshayAstvatkR^ite || 35||
tAvadrAgAdayaH stenAstAvatkArAgR^ihaM gR^iham |
tAvanmoho.a~NghrinigaDo yAvatkR^iShNa na te janAH || 36||
prapa~nchaM niShprapa~ncho.api viDambayasi bhUtale |
prapannajanatAnandasandohaM prathituM prabho || 37||
jAnanta eva jAnantu kiM bahUktyA na me prabho |
manaso vapuSho vAcho vaibhavaM tava gocharaH || 38||
anujAnIhi mAM kR^iShNa sarvaM tvaM vetsi sarvadR^ik |
tvameva jagatAM nAtho jagadetattavArpitam || 39||
shrIkR^iShNa vR^iShNikulapuShkarajoShadAyin
kShmAnirjaradvijapashUdadhivR^iddhikArin |
uddharmashArvarahara kShitirAkShasadhru\-
gAkalpamArkamarhan bhagavan namaste || 40||
shrIshuka uvAcha
ityabhiShTUya bhUmAnaM triH parikramya pAdayoH |
natvAbhIShTaM jagaddhAtA svadhAma pratyapadyata || 41||
tato.anuj~nApya bhagavAn svabhuvaM prAgavasthitAn |
vatsAn pulinamAninye yathApUrvasakhaM svakam || 42||
ekasminnapi yAte.abde prANeshaM chAntarAtmanaH |
kR^iShNamAyAhatA rAjan kShaNArdhaM menire.arbhakAH || 43||
kiM kiM na vismarantIha mAyAmohitachetasaH |
yanmohitaM jagatsarvamabhIkShNaM vismR^itAtmakam || 44||
Uchushcha suhR^idaH kR^iShNaM svAgataM te.atiraMhasA |
naiko.apyabhoji kavala ehItaH sAdhu bhujyatAm || 45||
tato hasan hR^iShIkesho.abhyavahR^itya sahArbhakaiH |
darshayaMshcharmAjagaraM nyavartata vanAdvrajam || 46||
barhaprasUnanavadhAtuvichitritA~NgaH
proddAmaveNudalashR^i~NgaravotsavADhyaH |
vatsAn gR^iNannanugagItapavitrakIrti\-
rgopIdR^igutsavadR^ishiH pravivesha goShTham || 47||
adyAnena mahAvyAlo yashodAnandasUnunA |
hato.avitA vayaM chAsmAditi bAlA vraje jaguH || 48||
rAjovAcha
brahman parodbhave kR^iShNe iyAn premA kathaM bhavet |
yo.abhUtapUrvastokeShu svodbhaveShvapi kathyatAm || 49||
shrIshuka uvAcha
sarveShAmapi bhUtAnAM nR^ipa svAtmaiva vallabhaH |
itare.apatyavittAdyAstadvallabhatayaiva hi || 50||
tadrAjendra yathA snehaH svasvakAtmani dehinAm |
na tathA mamatAlambiputravittagR^ihAdiShu || 51||
dehAtmavAdinAM puMsAmapi rAjanyasattama |
yathA dehaH priyatamastathA na hyanu ye cha tam || 52||
deho.api mamatAbhAkchettarhyasau nAtmavatpriyaH |
yajjIryatyapi dehe.asmin jIvitAshA balIyasI || 53||
tasmAtpriyatamaH svAtmA sarveShAmapi dehinAm |
tadarthameva sakalaM jagadetachcharAcharam || 54||
kR^iShNamenamavehi tvamAtmAnamakhilAtmanAm |
jagaddhitAya so.apyatra dehIvAbhAti mAyayA || 55||
vastuto jAnatAmatra kR^iShNaM sthAsnu chariShNu cha |
bhagavadrUpamakhilaM nAnyadvastviha ki~nchana || 56||
sarveShAmapi vastUnAM bhAvArtho bhavati sthitaH |
tasyApi bhagavAn kR^iShNaH kimatadvastu rUpyatAm || 57||
samAshritA ye padapallavaplavaM
mahatpadaM puNyayasho murAreH |
bhavAmbudhirvatsapadaM paraM padaM
padaM padaM yadvipadAM na teShAm || 58||
etatte sarvamAkhyAtaM yatpR^iShTo.ahamiha tvayA |
yatkaumAre harikR^itaM paugaNDe parikIrtitam || 59||
etatsuhR^idbhishcharitaM murAre\-
raghArdanaM shAdvalajemanaM cha |
vyaktetaradrUpamajorvabhiShTavaM
shR^iNvan gR^iNanneti naro.akhilArthAn || 60||
evaM vihAraiH kaumAraiH kaumAraM jahaturvraje |
nilAyanaiH setubandhairmarkaTotplavanAdibhiH || 61||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe brahmastutirnAma chaturdasho.adhyAyaH || 14||
\iti
\section{.. OM namo bhagavate vAsudevAya ..}
\section{.. pa~nchadasho.adhyAyaH \- 15 ..}
shrIshuka uvAcha
tatashcha paugaNDavayaH shritau vraje
babhUvatustau pashupAlasammatau |
gAshchArayantau sakhibhiH samaM padaiH
vR^indAvanaM puNyamatIva chakratuH || 1||
tanmAdhavo veNumudIrayan vR^ito
gopairgR^iNadbhiH svayasho balAnvitaH |
pashUn puraskR^itya pashavyamAvisha\-
dvihartukAmaH kusumAkaraM vanam || 2||
tanma~njughoShAlimR^igadvijAkulaM
mahanmanaHprakhyapayaHsarasvatA |
vAtena juShTaM shatapatragandhinA
nirIkShya rantuM bhagavAn mano dadhe || 3||
sa tatra tatrAruNapallavashriyA
phalaprasUnorubhareNa pAdayoH |
spR^ishachChikhAn vIkShya vanaspatIn mudA
smayannivAhAgrajamAdipUruShaH || 4||
shrIbhagavAnuvAcha
aho amI deva varAmarArchitaM
pAdAmbujaM te sumanaHphalArhaNam |
namantyupAdAya shikhAbhirAtmana\-
stamo.apahatyai tarujanma yatkR^itam || 5||
ete.alinastava yasho.akhilalokatIrthaM
gAyanta AdipuruShAnupadaM bhajante |
prAyo amI munigaNA bhavadIyamukhyA
gUDhaM vane.api na jahatyanaghAtmadaivam || 6||
nR^ityantyamI shikhina IDya mudA hariNyaH
kurvanti gopya iva te priyamIkShaNena |
sUktaishcha kokilagaNA gR^ihamAgatAya
dhanyA vanaukasa iyAn hi satAM nisargaH || 7||
dhanyeyamadya dharaNI tR^iNavIrudhastvat\-
pAdaspR^isho drumalatAH karajAbhimR^iShTAH |
nadyo.adrayaH khagamR^igAH sadayAvalokai\-
rgopyo.antareNa bhujayorapi yatspR^ihA shrIH || 8||
shrIshuka uvAcha
evaM vR^indAvanaM shrImatkR^iShNaH prItamanAH pashUn |
reme sa~nchArayannadreH saridrodhaHsu sAnugaH || 9||
kvachidgAyati gAyatsu madAndhAliShvanuvrataiH |
upagIyamAnacharitaH sragvI sa~NkarShaNAnvitaH || 10||
(anujalpati jalpantaM kalavAkyaiH shukaM kvachit |
kvachitsa valgu kUjantamanukUjati kokilam ||)
kvachichcha kalahaMsAnAmanukUjati kUjitam |
abhinR^ityati nR^ityantaM barhiNaM hAsayan kvachit || 11||
meghagambhIrayA vAchA nAmabhirdUragAn pashUn |
kvachidAhvayati prItyA gogopAlamanoj~nayA || 12||
chakorakrau~nchachakrAhvabhAradvAjAMshcha barhiNaH |
anurauti sma sattvAnAM bhItavadvyAghrasiMhayoH || 13||
kvachitkrIDAparishrAntaM gopotsa~NgopabarhaNam |
svayaM vishramayatyAryaM pAdasaMvAhanAdibhiH || 14||
nR^ityato gAyataH kvApi valgato yudhyato mithaH |
gR^ihItahastau gopAlAn hasantau prashashaMsatuH || 15||
kvachitpallavatalpeShu niyuddhashramakarshitaH |
vR^ikShamUlAshrayaH shete gopotsa~NgopabarhaNaH || 16||
pAdasaMvAhanaM chakruH kechittasya mahAtmanaH |
apare hatapApmAno vyajanaiH samavIjayan || 17||
anye tadanurUpANi manoj~nAni mahAtmanaH |
gAyanti sma mahArAja snehaklinnadhiyaH shanaiH || 18||
evaM nigUDhAtmagatiH svamAyayA
gopAtmajatvaM charitairviDambayan |
reme ramAlAlitapAdapallavo
grAmyaiH samaM grAmyavadIshacheShTitaH || 19||
shrIdAmA nAma gopAlo rAmakeshavayoH sakhA |
subalastokakR^iShNAdyA gopAH premNedamabruvan || 20||
rAma rAma mahAbAho kR^iShNa duShTanibarhaNa |
ito.avidUre sumahadvanaM tAlAlisa~Nkulam || 21||
phalAni tatra bhUrINi patanti patitAni cha |
santi kintvavaruddhAni dhenukena durAtmanA || 22||
so.ativIryo.asuro rAma he kR^iShNa khararUpadhR^ik |
Atmatulyabalairanyairj~nAtibhirbahubhirAvR^itaH || 23||
tasmAtkR^itanarAhArAdbhItairnR^ibhiramitrahan |
na sevyate pashugaNaiH pakShisa~Nghairvivarjitam || 24||
vidyante.abhuktapUrvANi phalAni surabhINi cha |
eSha vai surabhirgandho viShUchIno.avagR^ihyate || 25||
prayachCha tAni naH kR^iShNa gandhalobhitachetasAm |
vA~nChAsti mahatI rAma gamyatAM yadi rochate || 26||
evaM suhR^idvachaH shrutvA suhR^itpriyachikIrShayA |
prahasya jagmaturgopairvR^itau tAlavanaM prabhU || 27||
balaH pravishya bAhubhyAM tAlAn samparikampayan |
phalAni pAtayAmAsa mata~Ngaja ivaujasA || 28||
phalAnAM patatAM shabdaM nishamyAsurarAsabhaH |
abhyadhAvatkShititalaM sanagaM parikampayan || 29||
sametya tarasA pratyagdvAbhyAM padbhyAM balaM balI |
nihatyorasi kA shabdaM mu~nchan paryasaratkhalaH || 30||
punarAsAdya saMrabdha upakroShTA parAksthitaH |
charaNAvaparau rAjan balAya prAkShipadruShA || 31||
sa taM gR^ihItvA prapadorbhrAmayitvaikapANinA |
chikShepa tR^iNarAjAgre bhrAmaNatyaktajIvitam || 32||
tenAhato mahAtAlo vepamAno bR^ihachChirAH |
pArshvasthaM kampayan bhagnaH sa chAnyaM so.api chAparam || 33||
balasya lIlayotsR^iShTakharadehahatAhatAH |
tAlAshchakampire sarve mahAvAteritA iva || 34||
naitachchitraM bhagavati hyanante jagadIshvare |
otaprotamidaM yasmiMstantuShva~Nga yathA paTaH || 35||
tataH kR^iShNaM cha rAmaM cha j~nAtayo dhenukasya ye |
kroShTAro.abhyadravan sarve saMrabdhA hatabAndhavAH || 36||
tAMstAnApatataH kR^iShNo rAmashcha nR^ipa lIlayA |
gR^ihItapashchAchcharaNAn prAhiNottR^iNarAjasu || 37||
phalaprakarasa~NkIrNaM daityadehairgatAsubhiH |
rarAja bhUH satAlAgrairghanairiva nabhastalam || 38||
tayostatsumahatkarma nishAmya vibudhAdayaH |
mumuchuH puShpavarShANi chakrurvAdyAni tuShTuvuH || 39||
atha tAlaphalAnyAdan manuShyA gatasAdhvasAH |
tR^iNaM cha pashavashcherurhatadhenukakAnane || 40||
kR^iShNaH kamalapatrAkShaH puNyashravaNakIrtanaH |
stUyamAno.anugairgopaiH sAgrajo vrajamAvrajat || 41||
taM gorajashChuritakuntalabaddhabarha\-
vanyaprasUnaruchirekShaNachAruhAsam |
veNuM kvaNantamanugairupagItakIrtiM
gopyo didR^ikShitadR^isho.abhyagaman sametAH || 42||
pItvA mukundamukhasAraghamakShibhR^i~Ngai\-
stApaM jahurvirahajaM vrajayoShito.ahni |
tatsatkR^itiM samadhigamya vivesha goShThaM
savrIDahAsavinayaM yadapA~NgamokSham || 43||
tayoryashodArohiNyau putrayoH putravatsale |
yathAkAmaM yathAkAlaM vyadhattAM paramAshiShaH || 44||
gatAdhvAnashramau tatra majjanonmardanAdibhiH |
nIvIM vasitvA ruchirAM divyasraggandhamaNDitau || 45||
jananyupahR^itaM prAshya svAdvannamupalAlitau |
saMvishya varashayyAyAM sukhaM suShupaturvraje || 46||
evaM sa bhagavAn kR^iShNo vR^indAvanacharaH kvachit |
yayau rAmamR^ite rAjan kAlindIM sakhibhirvR^itaH || 47||
atha gAvashcha gopAshcha nidAghAtapapIDitAH |
duShTaM jalaM papustasyAstR^iShArtA viShadUShitam || 48||
viShAmbhastadupaspR^ishya daivopahatachetasaH |
nipeturvyasavaH sarve salilAnte kurUdvaha || 49||
vIkShya tAn vai tathAbhUtAn kR^iShNo yogeshvareshvaraH |
IkShayAmR^itavarShiNyA svanAthAn samajIvayat || 50||
te sampratItasmR^itayaH samutthAya jalAntikAt |
Asan suvismitAH sarve vIkShamANAH parasparam || 51||
anvamaMsata tadrAjan govindAnugrahekShitam |
pItvA viShaM paretasya punarutthAnamAtmanaH || 52||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe dhenukavadho nAma pa~nchadasho.adhyAyaH || 15||
\iti
\section{.. OM namo bhagavate vAsudevAya ..}
\section{.. ShoDasho.adhyAyaH 16 ..}
shrIshuka uvAcha
vilokya dUShitAM kR^iShNAM kR^iShNaH kR^iShNAhinA vibhuH |
tasyA vishuddhimanvichChan sarpaM tamudavAsayat || 1||
rAjovAcha
kathamantarjale.agAdhe nyagR^ihNAdbhagavAnahim |
sa vai bahuyugAvAsaM yathA.a.asIdvipra kathyatAm || 2||
brahman bhagavatastasya bhUmnaH svachChandavartinaH |
gopAlodAracharitaM kastR^ipyetAmR^itaM juShan || 3||
shrIshuka uvAcha
kAlindyAM kAliyasyAsIdhradaH kashchidviShAgninA |
shrapyamANapayA yasmin patantyuparigAH khagAH || 4||
vipruShmatA viShodormimArutenAbhimarshitAH |
mriyante tIragA yasya prANinaH sthiraja~NgamAH || 5||
taM chaNDavegaviShavIryamavekShya tena
duShTAM nadIM cha khalasaMyamanAvatAraH |
kR^iShNaH kadambamadhiruhya tato.atitu~Nga\-
mAsphoTya gADharashano nyapatadviShode || 6||
sarpahradaH puruShasAranipAtavega\-
sa~NkShobhitoragaviShochChvasitAmburAshiH |
paryakpluto viShakaShAyavibhIShaNormi\-
rdhAvan dhanuHshatakamanantabalasya kiM tat || 7||
tasya hrade viharato bhujadaNDaghUrNa\-
vArghoShama~Nga varavAraNavikramasya |
Ashrutya tatsvasadanAbhibhavaM nirIkShya
chakShuHshravAH samasarattadamR^iShyamANaH || 8||
taM prekShaNIyasukumAraghanAvadAtaM
shrIvatsapItavasanaM smitasundarAsyam |
krIDantamapratibhayaM kamalodarA~NghriM
sandashya marmasu ruShA bhujayA chaChAda || 9||
taM nAgabhogaparivItamadR^iShTacheShTa\-
mAlokya tatpriyasakhAH pashupA bhR^ishArtAH |
kR^iShNe.arpitAtmasuhR^idarthakalatrakAmA
duHkhAnushokabhayamUDhadhiyo nipetuH || 10||
gAvo vR^iShA vatsataryaH krandamAnAH suduHkhitAH |
kR^iShNe nyastekShaNA bhItA rudantya iva tasthire || 11||
atha vraje mahotpAtAstrividhA hyatidAruNAH |
utpeturbhuvi divyAtmanyAsannabhayashaMsinaH || 12||
tAnAlakShya bhayodvignA gopA nandapurogamAH |
vinA rAmeNa gAH kR^iShNaM j~nAtvA chArayituM gatam || 13||
tairdurnimittairnidhanaM matvA prAptamatadvidaH |
tatprANAstanmanaskAste duHkhashokabhayAturAH || 14||
AbAlavR^iddhavanitAH sarve.a~Nga pashuvR^ittayaH |
nirjagmurgokulAddInAH kR^iShNadarshanalAlasAH || 15||
tAMstathA kAtarAn vIkShya bhagavAn mAdhavo balaH |
prahasya ki~nchinnovAcha prabhAvaj~no.anujasya saH || 16||
te.anveShamANA dayitaM kR^iShNaM sUchitayA padaiH |
bhagavallakShaNairjagmuH padavyA yamunAtaTam || 17||
te tatra tatrAbjayavA~NkushAshani\-
dhvajopapannAni padAni vishpateH |
mArge gavAmanyapadAntarAntare
nirIkShamANA yayura~Nga satvarAH || 18||
antarhrade bhujagabhogaparItamArA\-
tkR^iShNaM nirIhamupalabhya jalAshayAnte |
gopAMshcha mUDhadhiShaNAn paritaH pashUMshcha
sa~NkrandataH paramakashmalamApurArtAH || 19||
gopyo.anuraktamanaso bhagavatyanante
tatsauhR^idasmitavilokagiraH smarantyaH |
graste.ahinA priyatame bhR^ishaduHkhataptAH
shUnyaM priyavyatihR^itaM dadR^ishustrilokam || 20||
tAH kR^iShNamAtaramapatyamanupraviShTAM
tulyavyathAH samanugR^ihya shuchaH sravantyaH |
tAstA vrajapriyakathAH kathayantya Asan
kR^iShNAnane.arpitadR^isho mR^itakapratIkAH || 21||
kR^iShNaprANAnnirvishato nandAdIn vIkShya taM hradam |
pratyaShedhatsa bhagavAn rAmaH kR^iShNAnubhAvavit || 22||
itthaM svagokulamananyagatiM nirIkShya
sastrIkumAramatiduHkhitamAtmahetoH |
Aj~nAya martyapadavImanuvartamAnaH
sthitvA muhUrtamudatiShThadura~NgabandhAt || 23||
tatprathyamAnavapuShA vyathitAtmabhoga\-
styaktvonnamayya kupitaH svaphaNAn bhuja~NgaH |
tasthau shvasa~nChvasanarandhraviShAmbarISha\-
stabdhekShaNolmukamukho harimIkShamANaH || 24||
taM jihvayA dvishikhayA parilelihAnaM
dve sR^ikkiNI hyatikarAlaviShAgnidR^iShTim |
krIDannamuM parisasAra yathA khagendro
babhrAma so.apyavasaraM prasamIkShamANaH || 25||
evaM paribhramahataujasamunnatAMsa\-
mAnamya tatpR^ithushiraHsvadhirUDha AdyaH |
tanmUrdharatnanikarasparshAtitAmra\-
pAdAmbujo.akhilakalAdigururnanarta || 26||
taM nartumudyatamavekShya tadA tadIya\-
gandharvasiddhasurachAraNadevavadhvaH |
prItyA mR^ida~NgapaNavAnakavAdyagIta\-
puShpopahAranutibhiH sahasopaseduH || 27||
yadyachChiro na namate.a~Nga shataikashIrShNa\-
stattanmamarda kharadaNDadharo.a~NghripAtaiH |
kShINAyuSho bhramata ulbaNamAsyato.asR^i~N\-
nasto vaman paramakashmalamApa nAgaH || 28||
tasyAkShibhirgaralamudvamataH shirassu
yadyatsamunnamati niHshvasato ruShochchaiH |
nR^ityan padAnunamayan damayAmbabhUva
puShpaiH prapUjita iveha pumAn purANaH || 29||
tachchitratANDavavirugNaphaNAtapatro
raktaM mukhairuru vaman nR^ipa bhagnagAtraH |
smR^itvA charAcharaguruM puruShaM purANaM
nArAyaNaM tamaraNaM manasA jagAma || 30||
kR^iShNasya garbhajagato.atibharAvasannaM
pArShNiprahAraparirugNaphaNAtapatram |
dR^iShTvAhimAdyamupaseduramuShya patnya
ArtAH shlathadvasanabhUShaNakeshabandhAH || 31||
tAstaM suvignamanaso.atha puraskR^itArbhAH
kAyaM nidhAya bhuvi bhUtapatiM praNemuH |
sAdhvyaH kR^itA~njalipuTAH shamalasya bhartu\-
rmokShepsavaH sharaNadaM sharaNaM prapannAH || 32||
nAgapatnya UchuH
nyAyyo hi daNDaH kR^itakilbiShe.asmiM\-
stavAvatAraH khalanigrahAya |
ripoH sutAnAmapi tulyadR^iShTe\-
rdhatse damaM phalamevAnushaMsan || 33||
anugraho.ayaM bhavataH kR^ito hi no
daNDo.asatAM te khalu kalmaShApahaH |
yaddandashUkatvamamuShya dehinaH
krodho.api te.anugraha eva sammataH || 34||
tapaH sutaptaM kimanena pUrvaM
nirastamAnena cha mAnadena |
dharmo.atha vA sarvajanAnukampayA
yato bhavAMstuShyati sarvajIvaH || 35||
kasyAnubhAvo.asya na deva vidmahe
tavA~NghrireNusparshAdhikAraH |
yadvA~nChayA shrIrlalanAcharattapo
vihAya kAmAn suchiraM dhR^itavratA || 36||
na nAkapR^iShThaM na cha sArvabhaumaM
na pArameShThyaM na rasAdhipatyam |
na yogasiddhIrapunarbhavaM vA
vA~nChanti yatpAdarajaHprapannAH || 37||
tadeSha nAthApa durApamanyai\-
stamojaniHkrodhavasho.apyahIshaH |
saMsArachakre bhramataH sharIriNo
yadichChataH syAdvibhavaH samakShaH || 38||
namastubhyaM bhagavate puruShAya mahAtmane |
bhUtAvAsAya bhUtAya parAya paramAtmane || 39||
j~nAnavij~nAnanidhaye brahmaNe.anantashaktaye |
aguNAyAvikArAya namaste prAkR^itAya cha || 40||
kAlAya kAlanAbhAya kAlAvayavasAkShiNe |
vishvAya tadupadraShTre tatkartre vishvahetave || 41||
bhUtamAtrendriyaprANamanobud.hdhyAshayAtmane |
triguNenAbhimAnena gUDhasvAtmAnubhUtaye || 42||
namo.anantAya sUkShmAya kUTasthAya vipashchite |
nAnAvAdAnurodhAya vAchyavAchakashaktaye || 43||
namaH pramANamUlAya kavaye shAstrayonaye |
pravR^ittAya nivR^ittAya nigamAya namo namaH || 44||
namaH kR^iShNAya rAmAya vasudevasutAya cha |
pradyumnAyAniruddhAya sAtvatAM pataye namaH || 45||
namo guNapradIpAya guNAtmachChAdanAya cha |
guNavR^ittyupalakShyAya guNadraShTre svasaMvide || 46||
avyAkR^itavihArAya sarvavyAkR^itasiddhaye |
hR^iShIkesha namaste.astu munaye maunashIline || 47||
parAvaragatij~nAya sarvAdhyakShAya te namaH |
avishvAya cha vishvAya taddraShTre.asya cha hetave || 48||
tvaM hyasya janmasthitisaMyamAn prabho
guNairanIho.akR^itakAlashaktidhR^ik |
tattatsvabhAvAn pratibodhayan sataH
samIkShayAmoghavihAra Ihase || 49||
tasyaiva te.amUstanavastrilokyAM
shAntA ashAntA uta mUDhayonayaH |
shAntAH priyAste hyadhunAvituM satAM
sthAtushcha te dharmaparIpsayehataH || 50||
aparAdhaH sakR^idbhartrA soDhavyaH svaprajAkR^itaH |
kShantumarhasi shAntAtman mUDhasya tvAmajAnataH || 51||
anugR^ihNIShva bhagavan prANAMstyajati pannagaH |
strINAM naH sAdhushochyAnAM patiH prANaH pradIyatAm || 52||
vidhehi te ki~NkarINAmanuShTheyaM tavAj~nayA |
yachChraddhayAnutiShThan vai muchyate sarvatobhayAt || 53||
shrIshuka uvAcha
itthaM sa nAgapatnIbhirbhagavAn samabhiShTutaH |
mUrchChitaM bhagnashirasaM visasarjA~NghrikuTTanaiH || 54||
pratilabdhendriyaprANaH kAliyaH shanakairharim |
kR^ichChrAtsamuchChvasan dInaH kR^iShNaM prAha kR^itA~njaliH || 55||
kAliya uvAcha
vayaM khalAH sahotpattyA tAmasA dIrghamanyavaH |
svabhAvo dustyajo nAtha lokAnAM yadasadgrahaH || 56||
tvayA sR^iShTamidaM vishvaM dhAtarguNavisarjanam |
nAnAsvabhAvavIryaujoyonibIjAshayAkR^iti || 57||
vayaM cha tatra bhagavan sarpA jAtyurumanyavaH |
kathaM tyajAmastvanmAyAM dustyajAM mohitAH svayam || 58||
bhavAn hi kAraNaM tatra sarvaj~no jagadIshvaraH |
anugrahaM nigrahaM vA manyase tadvidhehi naH || 59||
shrIshuka uvAcha
ityAkarNya vachaH prAha bhagavAn kAryamAnuShaH |
nAtra stheyaM tvayA sarpa samudraM yAhi mA chiram |
svaj~nAtyapatyadArADhyo gonR^ibhirbhujyatAM nadI || 60||
ya etatsaMsmarenmartyastubhyaM madanushAsanam |
kIrtayannubhayoH sandhyorna yuShmadbhayamApnuyAt || 61||
yo.asmin snAtvA madAkrIDe devAdIMstarpayejjalaiH |
upoShya mAM smarannarchetsarvapApaiH pramuchyate || 62||
dvIpaM ramaNakaM hitvA hradametamupAshritaH |
yadbhayAtsa suparNastvAM nAdyAnmatpAdalA~nChitam || 63||
shrIshuka uvAcha
evamukto bhagavatA kR^iShNenAdbhutakarmaNA |
taM pUjayAmAsa mudA nAgapatnyashcha sAdaram || 64||
divyAmbarasra~NmaNibhiH parArdhyairapi bhUShaNaiH |
divyagandhAnulepaishcha mahatyotpalamAlayA || 65||
pUjayitvA jagannAthaM prasAdya garuDadhvajam |
tataH prIto.abhyanuj~nAtaH parikramyAbhivandya tam || 66||
sakalatrasuhR^itputro dvIpamabdherjagAma ha |
tadaiva sAmR^itajalA yamunA nirviShAbhavat |
anugrahAdbhagavataH krIDAmAnuSharUpiNaH || 67||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe kAliyamokShaNaM nAma ShoDasho.adhyAyaH || 16||
\iti
\section{.. OM namo bhagavate vAsudevAya ..}
\section{.. saptadasho.adhyAyaH \- 17 ..}
rAjovAcha
nAgAlayaM ramaNakaM kasmAttatyAja kAliyaH |
kR^itaM kiM vA suparNasya tenaikenAsama~njasam || 1||
shrIshuka uvAcha
upahAryaiH sarpajanairmAsi mAsIha yo baliH |
vAnaspatyo mahAbAho nAgAnAM prA~NnirUpitaH || 2||
svaM svaM bhAgaM prayachChanti nAgAH parvaNi parvaNi |
gopIthAyAtmanaH sarve suparNAya mahAtmane || 3||
viShavIryamadAviShTaH kAdraveyastu kAliyaH |
kadarthIkR^itya garuDaM svayaM taM bubhuje balim || 4||
tachChrutvA kupito rAjan bhagavAn bhagavatpriyaH |
vijighAMsurmahAvegaH kAliyaM samupAdravat || 5||
tamApatantaM tarasA viShAyudhaH
pratyabhyayAduchChritanaikamastakaH |
dadbhiH suparNaM vyadashaddadAyudhaH
karAlajihvochChvasitogralochanaH || 6||
taM tArkShyaputraH sa nirasya manyumAn
prachaNDavego madhusUdanAsanaH |
pakSheNa savyena hiraNyarochiShA
jaghAna kadrUsutamugravikramaH || 7||
suparNapakShAbhihataH kAliyo.atIva vihvalaH |
hradaM vivesha kAlindyAstadagamyaM durAsadam || 8||
tatraikadA jalacharaM garuDo bhakShyamIpsitam |
nivAritaH saubhariNA prasahya kShudhito.aharat || 9||
mInAn suduHkhitAn dR^iShTvA dInAn mInapatau hate |
kR^ipayA saubhariH prAha tatratyakShemamAcharan || 10||
atra pravishya garuDo yadi matsyAn sa khAdati |
sadyaH prANairviyujyeta satyametadbravImyaham || 11||
taM kAliyaH paraM veda nAnyaH kashchana lelihaH |
avAtsIdgaruDAdbhItaH kR^iShNena cha vivAsitaH || 12||
kR^iShNaM hradAdviniShkrAntaM divyasraggandhavAsasam |
mahAmaNigaNAkIrNaM jAmbUnadapariShkR^itam || 13||
upalabhyotthitAH sarve labdhaprANA ivAsavaH |
pramodanibhR^itAtmAno gopAH prItyAbhirebhire || 14||
yashodA rohiNI nando gopyo gopAshcha kaurava |
kR^iShNaM sametya labdhehA Asan labdhamanorathAH || 15||
rAmashchAchyutamAli~Ngya jahAsAsyAnubhAvavit |
(premNA tama~NkamAropya punaH punarudaikShata |)
nagA gAvo vR^iShA vatsA lebhire paramAM mudam || 16||
nandaM viprAH samAgatya guravaH sakalatrakAH |
Uchuste kAliyagrasto diShTyA muktastavAtmajaH || 17||
dehi dAnaM dvijAtInAM kR^iShNanirmuktihetave |
nandaH prItamanA rAjan gAH suvarNaM tadA.a.adishat || 18||
yashodApi mahAbhAgA naShTalabdhaprajA satI |
pariShvajyA~NkamAropya mumochAshrukalAM muhuH || 19||
tAM rAtriM tatra rAjendra kShuttR^iDbhyAM shramakarshitAH |
UShurvrajaukaso gAvaH kAlindyA upakUlataH || 20||
tadA shuchivanodbhUto dAvAgniH sarvato vrajam |
suptaM nishItha AvR^itya pradagdhumupachakrame || 21||
tata utthAya sambhrAntA dahyamAnA vrajaukasaH |
kR^iShNaM yayuste sharaNaM mAyAmanujamIshvaram || 22||
kR^iShNa kR^iShNa mahAbhAga he rAmAmitavikrama |
eSha ghoratamo vahnistAvakAn grasate hi naH || 23||
sudustarAnnaH svAn pAhi kAlAgneH suhR^idaH prabho |
na shaknumastvachcharaNaM santyaktumakutobhayam || 24||
itthaM svajanavaiklavyaM nirIkShya jagadIshvaraH |
tamagnimapibattIvramananto.anantashaktidhR^ik || 25||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe dAvAgnimochanaM nAma saptadasho.adhyAyaH || 17||
\iti
\section{.. OM namo bhagavate vAsudevAya ..}
\section{.. aShTAdasho.adhyAyaH \-18 ..}
shrIshuka uvAcha
atha kR^iShNaH parivR^ito j~nAtibhirmuditAtmabhiH |
anugIyamAno nyavishadvrajaM gokulamaNDitam || 1||
vraje vikrIDatorevaM gopAlachChadmamAyayA |
grIShmo nAmarturabhavannAtipreyA~nCharIriNAm || 2||
sa cha vR^indAvanaguNairvasanta iva lakShitaH |
yatrAste bhagavAn sAkShAdrAmeNa saha keshavaH || 3||
yatra nirjharanirhrAdanivR^ittasvanajhillikam |
shashvattachChIkararjIShadrumamaNDalamaNDitam || 4||
saritsaraHprasravaNormivAyunA
kahlAraka~njotpalareNuhAriNA |
na vidyate yatra vanaukasAM davo
nidAghavahnyarkabhavo.atishAdvale || 5||
agAdhatoyahradinI taTormibhi\-
rdravatpurIShyAH pulinaiH samantataH |
na yatra chaNDAMshukarA viSholbaNA
bhuvo rasaM shAdvalitaM cha gR^ihNate || 6||
vanaM kusumitaM shrImannadachchitramR^igadvijam |
gAyanmayUrabhramaraM kUjatkokilasArasam || 7||
krIDiShyamANastatkR^iShNo bhagavAn balasaMyutaH |
veNuM viraNayan gopairgodhanaiH saMvR^ito.avishat || 8||
pravAlabarhastabakasragdhAtukR^itabhUShaNAH |
rAmakR^iShNAdayo gopA nanR^ituryuyudhurjaguH || 9||
kR^iShNasya nR^ityataH kechijjaguH kechidavAdayan |
veNupANitalaiH shR^i~NgaiH prashashaMsurathApare || 10||
gopajAtipratichChannA devA gopAlarUpiNau |
IDire kR^iShNarAmau cha naTA iva naTaM nR^ipa || 11||
bhrAmaNairla~NghanaiH kShepairAsphoTanavikarShaNaiH |
chikrIDaturniyuddhena kAkapakShadharau kvachit || 12||
kvachinnR^ityatsu chAnyeShu gAyakau vAdakau svayam |
shashaMsaturmahArAja sAdhu sAdhviti vAdinau || 13||
kvachidbilvaiH kvachitkumbhaiH kva chAmalakamuShTibhiH |
aspR^ishyanetrabandhAdyaiH kvachinmR^igakhagehayA || 14||
kvachichcha darduraplAvairvividhairupahAsakaiH |
kadAchitspandolikayA karhichinnR^ipacheShTayA || 15||
evaM tau lokasiddhAbhiH krIDAbhishcheraturvane |
nadyadridroNiku~njeShu kAnaneShu saraHsu cha || 16||
pashUMshchArayatorgopaistadvane rAmakR^iShNayoH |
goparUpI pralambo.agAdasurastajjihIrShayA || 17||
taM vidvAnapi dAshArho bhagavAn sarvadarshanaH |
anvamodata tatsakhyaM vadhaM tasya vichintayan || 18||
tatropAhUya gopAlAn kR^iShNaH prAha vihAravit |
he gopA vihariShyAmo dvandvIbhUya yathAyatham || 19||
tatra chakruH parivR^iDhau gopA rAmajanArdanau |
kR^iShNasa~NghaTTinaH kechidAsan rAmasya chApare || 20||
AcherurvividhAH krIDA vAhyavAhakalakShaNAH |
yatrArohanti jetAro vahanti cha parAjitAH || 21||
vahanto vAhyamAnAshcha chArayantashcha godhanam |
bhANDIrakaM nAma vaTaM jagmuH kR^iShNapurogamAH || 22||
rAmasa~NghaTTino yarhi shrIdAmavR^iShabhAdayaH |
krIDAyAM jayinastAMstAnUhuH kR^iShNAdayo nR^ipa || 23||
uvAha kR^iShNo bhagavAn shrIdAmAnaM parAjitaH |
vR^iShabhaM bhadrasenastu pralambo rohiNIsutam || 24||
aviShahyaM manyamAnaH kR^iShNaM dAnavapu~NgavaH |
vahandrutataraM prAgAdavarohaNataH param || 25||
tamudvahan dharaNidharendragauravaM
mahAsuro vigatarayo nijaM vapuH |
sa AsthitaH puraTaparichChado babhau
taDiddyumAnuDupativADivAmbudaH || 26||
nirIkShya tadvapuralamambare chara\-
tpradIptadR^igbhrukuTitaTogradaMShTrakam |
jvalachChikhaM kaTakakirITakuNDala\-
tviShAdbhutaM haladhara IShadatrasat || 27||
athAgatasmR^itirabhayo ripuM balo
vihAyasArthamiva harantamAtmanaH |
ruShAhanachChirasi dR^iDhena muShTinA
surAdhipo girimiva vajraraMhasA || 28||
sa AhataH sapadi vishIrNamastako
mukhAdvaman rudhiramapasmR^ito.asuraH |
mahAravaM vyasurapatatsamIrayan
giriryathA maghavata AyudhAhataH || 29||
dR^iShTvA pralambaM nihataM balena balashAlinA |
gopAH suvismitA Asan sAdhu sAdhviti vAdinaH || 30||
AshiSho.abhigR^iNantastaM prashashaMsustadarhaNam |
pretyAgatamivAli~Ngya premavihvalachetasaH || 31||
pApe pralambe nihate devAH paramanirvR^itAH |
abhyavarShan balaM mAlyaiH shashaMsuH sAdhu sAdhviti || 32||
iti shrImadbhAgavate mahApurANe pAramahaMsyAM saMhitAyAM
dashamaskandhe purvArdhe pralambavadho nAmAShTAdasho.adhyAyaH || 18||
\iti
\section{.. OM namo bhagavate vAsudevAya ..}
\section{.. ekonaviMsho.adhyAyaH \-19 ..}
shrIshuka uvAcha
krIDAsakteShu gopeShu tadgAvo dUrachAriNIH |
svairaM charantyo vivishustR^iNalobhena gahvaram || 1||
ajA gAvo mahiShyashcha nirvishantyo vanAdvanam |
iShIkATavIM nirvivishuH krandantyo dAvatarShitAH || 2||
te.apashyantaH pashUn gopAH kR^iShNarAmAdayastadA |
jAtAnutApA na vidurvichinvanto gavAM gatim || 3||
tR^iNaistatkhuradachChinnairgoShpadaira~NkitairgavAm |
mArgamanvagaman sarve naShTAjIvyA vichetasaH || 4||
mu~njATavyAM bhraShTamArgaM krandamAnaM svagodhanam |
samprApya tR^iShitAH shrAntAstataste sannyavartayan || 5||
tA AhUtA bhagavatA meghagambhIrayA girA |
svanAmnAM ninadaM shrutvA pratineduH praharShitAH || 6||
tataH samantAdvanadhUmaketu\-
ryadR^ichChayAbhUtkShayakR^idvanaukasAm |
samIritaH sArathinolbaNolmukai\-
rvilelihAnaH sthiraja~NgamAn mahAn || 7||
tamApatantaM parito davAgniM
gopAshcha gAvaH prasamIkShya bhItAH |
Uchushcha kR^iShNaM sabalaM prapannA
yathA hariM mR^ityubhayArditA janAH || 8||
kR^iShNa kR^iShNa mahAvIra he rAmAmitavikrama |
dAvAgninA dahyamAnAn prapannAMstrAtumarhathaH || 9||
nUnaM tvadbAndhavAH kR^iShNa na chArhantyavasAditum |
vayaM hi sarvadharmaj~na tvannAthAstvatparAyaNAH || 10||
shrIshuka uvAcha
vacho nishamya kR^ipaNaM bandhUnAM bhagavAn hariH |
nimIlayata mA bhaiShTa lochanAnItyabhAShata || 11||
tatheti mIlitAkSheShu bhagavAnagnimulbaNam |
pItvA mukhena tAn kR^ichChrAdyogAdhIsho vyamochayat || 12||
tatashcha te.akShINyunmIlya punarbhANDIramApitAH |
nishAmya vismitA AsannAtmAnaM gAshcha mochitAH || 13||
kR^iShNasya yogavIryaM tadyogamAyAnubhAvitam |
dAvAgnerAtmanaH kShemaM vIkShya te menire.amaram || 14||
gAH sannivartya sAyAhne saha rAmo janArdanaH |
veNuM viraNayan goShThamagAdgopairabhiShTutaH || 15||
gopInAM paramAnanda AsIdgovindadarshane |
kShaNaM yugashatamiva yAsAM yena vinAbhavat || 16||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe davAgnipAnaM nAmaikonaviMsho.adhyAyaH || 19||
\iti
\section{.. OM namo bhagavate vAsudevAya ..}
\section{.. viMsho.adhyAyaH \- 20 ..}
shrIshuka uvAcha
tayostadadbhutaM karma dAvAgnermokShamAtmanaH |
gopAH strIbhyaH samAchakhyuH pralambavadhameva cha || 1||
gopavR^iddhAshcha gopyashcha tadupAkarNya vismitAH |
menire devapravarau kR^iShNarAmau vrajaM gatau || 2||
tataH prAvartata prAvR^iT sarvasattvasamudbhavA |
vidyotamAnaparidhirvisphUrjitanabhastalA || 3||
sAndranIlAmbudairvyoma savidyutstanayitnubhiH |
aspaShTajyotirAchChannaM brahmeva saguNaM babhau || 4||
aShTau mAsAn nipItaM yadbhUmyAshchodamayaM vasu |
svagobhirmoktumArebhe parjanyaH kAla Agate || 5||
taDitvanto mahAmeghAshchaNDashvasanavepitAH |
prINanaM jIvanaM hyasya mumuchuH karuNA iva || 6||
tapaHkR^ishA devamIDhA AsIdvarShIyasI mahI |
yathaiva kAmyatapasastanuH samprApya tatphalam || 7||
nishAmukheShu khadyotAstamasA bhAnti na grahAH |
yathA pApena pAkhaNDA na hi vedAH kalau yuge || 8||
shrutvA parjanyaninadaM maNDukAH vyasR^ijan giraH |
tUShNIM shayAnAH prAgyadvadbrAhmaNA niyamAtyaye || 9||
AsannutpathagAminyaH kShudranadyo.anushuShyatIH |
puMso yathAsvatantrasya dehadraviNasampadaH || 10||
haritA haribhiH shaShpairindragopaishcha lohitA |
uchChilIndhrakR^itachChAyA nR^iNAM shrIriva bhUrabhUt || 11||
kShetrANi sasyasampadbhiH karShakANAM mudaM daduH |
dhaninAmupatApaM cha daivAdhInamajAnatAm || 12||
jalasthalaukasaH sarve navavAriniShevayA |
abibhradruchiraM rUpaM yathA hariniShevayA || 13||
saridbhiH sa~NgataH sindhushchukShubhe shvasanormimAn |
apakvayoginashchittaM kAmAktaM guNayugyathA || 14||
girayo varShadhArAbhirhanyamAnA na vivyathuH |
abhibhUyamAnA vyasanairyathAdhokShajachetasaH || 15||
mArgA babhUvuH sandigdhAstR^iNaishChannA hyasaMskR^itAH |
nAbhyasyamAnAH shrutayo dvijaiH kAlAhatA iva || 16||
lokabandhuShu megheShu vidyutashchalasauhR^idAH |
sthairyaM na chakruH kAminyaH puruSheShu guNiShviva || 17||
dhanurviyati mAhendraM nirguNaM cha guNinyabhAt |
vyakte guNavyatikare.aguNavAn puruSho yathA || 18||
na rarAjoDupashChannaH svajyotsnA rAjitairghanaiH |
ahaM matyA bhAsitayA svabhAsA puruSho yathA || 19||
meghAgamotsavA hR^iShTAH pratyananda~nChikhaNDinaH |
gR^iheShu taptA nirviNNA yathAchyutajanAgame || 20||
pItvApaH pAdapAH padbhirAsan nAnA.a.atmamUrtayaH |
prAkkShAmAstapasA shrAntA yathA kAmAnusevayA || 21||
saraHsvashAntarodhaHsu nyUShura~NgApi sArasAH |
gR^iheShvashAntakR^ityeShu grAmyA iva durAshayAH || 22||
jalaughairnirabhidyanta setavo varShatIshvare |
pAkhaNDinAmasadvAdairvedamArgAH kalau yathA || 23||
vyamu~nchan vAyubhirnunnA bhUtebhyo.athAmR^itaM ghanAH |
yathA.a.ashiSho vishpatayaH kAle kAle dvijeritAH || 24||
evaM vanaM tadvarShiShThaM pakvakharjurajambumat |
gogopAlairvR^ito rantuM sabalaH prAvishaddhariH || 25||
dhenavo mandagAminya UdhobhAreNa bhUyasA |
yayurbhagavatA.a.ahUtA drutaM prItyA snutastanIH || 26||
vanaukasaH pramuditA vanarAjIrmadhuchyutaH |
jaladhArA girernAdAdAsannA dadR^ishe guhAH || 27||
kvachidvanaspatikroDe guhAyAM chAbhivarShati |
nirvishya bhagavAn reme kandamUlaphalAshanaH || 28||
dadhyodanaM samAnItaM shilAyAM salilAntike |
sambhojanIyairbubhuje gopaiH sa~NkarShaNAnvitaH || 29||
shAdvalopari saMvishya charvato mIlitekShaNAn |
tR^iptAn vR^iShAn vatsatarAn gAshcha svodhobharashramAH || 30||
prAvR^iT shriyaM cha tAM vIkShya sarvakAlasukhAvahAm |
bhagavAn pUjayA~nchakre AtmashaktyupabR^iMhitAm || 31||
evaM nivasatostasmin rAmakeshavayorvraje |
sharatsamabhavadvyabhrA svachChAmbvaparuShAnilA || 32||
sharadA nIrajotpattyA nIrANi prakR^itiM yayuH |
bhraShTAnAmiva chetAMsi punaryoganiShevayA || 33||
vyomno.abdaM bhUtashAbalyaM bhuvaH pa~NkamapAM malam |
sharajjahArAshramiNAM kR^iShNe bhaktiryathAshubham || 34||
sarvasvaM jaladA hitvA virejuH shubhravarchasaH |
yathA tyaktaiShaNAH shAntA munayo muktakilbiShAH || 35||
girayo mumuchustoyaM kvachinna mumuchuH shivam |
yathA j~nAnAmR^itaM kAle j~nAnino dadate na vA || 36||
naivAvidan kShIyamANaM jalaM gAdhajalecharAH |
yathAyuranvahaM kShayyaM narA mUDhAH kuTumbinaH || 37||
gAdhavAricharAstApamavinda~nCharadarkajam |
yathA daridraH kR^ipaNaH kuTumbyavijitendriyaH || 38||
shanaiH shanairjahuH pa~NkaM sthalAnyAmaM cha vIrudhaH |
yathAhammamatAM dhIrAH sharIrAdiShvanAtmasu || 39||
nishchalAmburabhUttUShNIM samudraH sharadAgame |
Atmanyuparate samya~NmunirvyuparatAgamaH || 40||
kedArebhyastvapo.agR^ihNan karShakA dR^iDhasetubhiH |
yathA prANaiH sravajj~nAnaM tannirodhena yoginaH || 41||
sharadarkAMshujAMstApAn bhUtAnAmuDupo.aharat |
dehAbhimAnajaM bodho mukundo vrajayoShitAm || 42||
khamashobhata nirmeghaM sharadvimalatArakam |
sattvayuktaM yathA chittaM shabdabrahmArthadarshanam || 43||
akhaNDamaNDalo vyomni rarAjoDugaNaiH shashI |
yathA yadupatiH kR^iShNo vR^iShNichakrAvR^ito bhuvi || 44||
AshliShya samashItoShNaM prasUnavanamArutam |
janAstApaM jahurgopyo na kR^iShNahR^itachetasaH || 45||
gAvo mR^igAH khagA nAryaH puShpiNyaH sharadAbhavan |
anvIyamAnAH svavR^iShaiH phalairIshakriyA iva || 46||
udahR^iShyan vArijAni sUryotthAne kumudvinA |
rAj~nA tu nirbhayA lokA yathA dasyUn vinA nR^ipa || 47||
puragrAmeShvAgrayaNairindriyaishcha mahotsavaiH |
babhau bhUH pakvasasyADhyA kalAbhyAM nitarAM hareH || 48||
vaNi~NmuninR^ipasnAtA nirgamyArthAn prapedire |
varSharuddhA yathA siddhAH svapiNDAn kAla Agate || 49||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe prAvR^iDsharadvarNanaM nAma viMsho.adhyAyaH || 20||
\iti
\section{.. OM namo bhagavate vAsudevAya ..}
\section{.. ekaviMsho.adhyAyaH \- 21 ..}
shrIshuka uvAcha
itthaM sharatsvachChajalaM padmAkarasugandhinA |
nyavishadvAyunA vAtaM sagogopAlako.achyutaH || 1||
kusumitavanarAjishuShmibhR^i~Nga\-
dvijakulaghuShTasaraHsarinmahIdhram |
madhupatiravagAhya chArayan gAH
saha pashupAlabalashchukUja veNum || 2||
tadvrajastriya Ashrutya veNugItaM smarodayam |
kAshchitparokShaM kR^iShNasya svasakhIbhyonvavarNayan || 3||
tadvarNayitumArabdhAH smarantyaH kR^iShNacheShTitam |
nAshakan smaravegena vikShiptamanaso nR^ipa || 4||
barhApIDaM naTavaravapuH karNayoH karNikAraM
bibhradvAsaH kanakakapishaM vaijayantIM cha mAlAm |
randhrAn veNoradharasudhayA pUrayan gopavR^indai\-
rvR^indAraNyaM svapadaramaNaM prAvishadgItakIrtiH || 5||
iti veNuravaM rAjan sarvabhUtamanoharam |
shrutvA vrajastriyaH sarvA varNayantyo.abhirebhire || 6||
gopya UchuH
akShaNvatAM phalamidaM na paraM vidAmaH
sakhyaH pashUnanu viveshayatorvayasyaiH |
vaktraM vrajeshasutayoranuveNujuShTaM
yairvA nipItamanuraktakaTAkShamokSham || 7||
chUtapravAlabarhastabakotpalAbja\-
mAlAnupR^iktaparidhAnavichitraveShau |
madhye virejaturalaM pashupAlagoShThyAM
ra~Nge yathA naTavarau kva cha gAyamAnau || 8||
gopyaH kimAcharadayaM kushalaM sma veNu\-
rdAmodarAdharasudhAmapi gopikAnAm |
bhu~Nkte svayaM yadavashiShTarasaM hradinyo
hR^iShyattvacho.ashru mumuchustaravo yathA.a.aryaH || 9||
vR^indAvanaM sakhi bhuvo vitanoti kIrtiM
yaddevakIsutapadAmbujalabdhalakShmi |
govindaveNumanu mattamayUranR^ityaM
prekShyAdrisAnvaparatAnyasamastasattvam || 10||
dhanyAH sma mUDhagatayo.api hariNya etA
yA nandanandanamupAttavichitraveSham |
AkarNya veNuraNitaM sahakR^iShNasArAH
pUjAM dadhurvirachitAM praNayAvalokaiH || 11||
kR^iShNaM nirIkShya vanitotsavarUpashIlaM
shrutvA cha tatkvaNitaveNuvichitragItam |
devyo vimAnagatayaH smaranunnasArA
bhrashyatprasUnakabarA mumuhurvinIvyaH || 12||
gAvashcha kR^iShNamukhanirgataveNugIta\-
pIyUShamuttabhitakarNapuTaiH pibantyaH |
shAvAH snutastanapayaHkavalAH sma tasthu\-
rgovindamAtmani dR^ishAshrukalAH spR^ishantyaH || 13||
prAyo batAmba vihagA munayo vane.asmin
kR^iShNekShitaM taduditaM kalaveNugItam |
Aruhya ye drumabhujAn ruchirapravAlAn
shR^iNvantyamIlitadR^isho vigatAnyavAchaH || 14||
nadyastadA tadupadhArya mukundagIta\-
mAvartalakShitamanobhavabhagnavegAH |
Ali~NganasthagitamUrmibhujairmurAreH
gR^ihNanti pAdayugalaM kamalopahArAH || 15||
dR^iShTvA.a.atape vrajapashUn saha rAmagopaiH
sa~nchArayantamanu veNumudIrayantam |
premapravR^iddha uditaH kusumAvalIbhiH
sakhyurvyadhAtsvavapuShAmbuda Atapatram || 16||
pUrNAH pulindya urugAyapadAbjarAga\-
shrIku~Nkumena dayitAstanamaNDitena |
taddarshanasmararujastR^iNarUShitena
limpantya AnanakucheShu jahustadAdhim || 17||
hantAyamadrirabalA haridAsavaryo
yadrAmakR^iShNacharaNasparshapramodaH |
mAnaM tanoti saha gogaNayostayoryat
pAnIyasUyavasakandarakandamUlaiH || 18||
gA gopakairanuvanaM nayatorudAra\-
veNusvanaiH kalapadaistanubhR^itsu sakhyaH |
aspandanaM gatimatAM pulakastarUNAM
niryogapAshakR^italakShaNayorvichitram || 19||
evaM vidhA bhagavato yA vR^indAvanachAriNaH |
varNayantyo mitho gopyaH krIDAstanmayatAM yayuH || 20||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe veNugItaM nAmaikaviMsho.adhyAyaH || 21||
\iti
\section{.. OM namo bhagavate vAsudevAya ..}
\section{.. dvAviMsho.adhyAyaH \- 22 ..}
shrIshuka uvAcha
hemante prathame mAsi nandavrajakumArikAH |
cherurhaviShyaM bhu~njAnAH kAtyAyanyarchanavratam || 1||
AplutyAmbhasi kAlindyA jalAnte chodite.aruNe |
kR^itvA pratikR^itiM devImAnarchurnR^ipa saikatIm || 2||
gandhairmAlyaiH surabhibhirbalibhirdhUpadIpakaiH |
uchchAvachaishchopahAraiH pravAlaphalataNDulaiH || 3||
kAtyAyani mahAmAye mahAyoginyadhIshvari |
nandagopasutaM devi patiM me kuru te namaH |
iti mantraM japantyastAH pUjAM chakruH kamArikAH || 4||
evaM mAsaM vrataM cheruH kumAryaH kR^iShNachetasaH |
bhadrakAlIM samAnarchurbhUyAnnandasutaH patiH || 5||
uShasyutthAya gotraiH svairanyonyAbaddhabAhavaH |
kR^iShNamuchchairjaguryAntyaH kAlindyAM snAtumanvaham || 6||
nadyAM kadAchidAgatya tIre nikShipya pUrvavat |
vAsAMsi kR^iShNaM gAyantyo vijahruH salile mudA || 7||
bhagavAMstadabhipretya kR^iShNo yogeshvareshvaraH |
vayasyairAvR^itastatra gatastatkarmasiddhaye || 8||
tAsAM vAsAMsyupAdAya nIpamAruhya satvaraH |
hasadbhiH prahasan bAlaiH parihAsamuvAcha ha || 9||
atrAgatyAbalAH kAmaM svaM svaM vAsaH pragR^ihyatAm |
satyaM bravANi no narma yadyUyaM vratakarshitAH || 10||
na mayoditapUrvaM vA anR^itaM tadime viduH |
ekaikashaH pratIchChadhvaM sahaivota sumadhyamAH || 11||
tasya tatkShvelitaM dR^iShTvA gopyaH premapariplutAH |
vrIDitAH prekShya chAnyonyaM jAtahAsA na niryayuH || 12||
evaM bruvati govinde narmaNA.a.akShiptachetasaH |
AkaNThamagnAH shItode vepamAnAstamabruvan || 13||
mAnayaM bhoH kR^ithAstvAM tu nandagopasutaM priyam |
jAnImo.a~Nga vrajashlAghyaM dehi vAsAMsi vepitAH || 14||
shyAmasundara te dAsyaH karavAma tavoditam |
dehi vAsAMsi dharmaj~na no chedrAj~ne bruvAmahe || 15||
shrIbhagavAnuvAcha
bhavatyo yadi me dAsyo mayoktaM vA kariShyatha |
atrAgatya svavAsAMsi pratIchChata shuchismitAH |
(no chennAhaM pradAsye kiM kruddho rAjA kariShyati)|| 16||
tato jalAshayAtsarvA dArikAH shItavepitAH |
pANibhyAM yonimAchChAdya protteruH shItakarshitAH || 17||
bhagavAnAha tA vIkShya shuddhabhAvaprasAditaH |
skandhe nidhAya vAsAMsi prItaH provAcha sasmitam || 18||
yUyaM vivastrA yadapo dhR^itavratA
vyagAhataitattadu devahelanam |
baddhvA~njaliM mUrdhnyapanuttayeM.ahasaH
kR^itvA namo.adho vasanaM pragR^ihyatAm || 19||
ityachyutenAbhihitA vrajAbalA
matvA vivastrAplavanaM vratachyutim |
tatpUrtikAmAstadasheShakarmaNAM
sAkShAtkR^itaM nemuravadyamR^igyataH || 20||
tAstathAvanatA dR^iShTvA bhagavAn devakIsutaH |
vAsAMsi tAbhyaH prAyachChatkaruNastena toShitaH || 21||
dR^iDhaM pralabdhAstrapayA cha hApitAH
prastobhitAH krIDanavachcha kAritAH |
vastrANi chaivApahR^itAnyathApyamuM
tA nAbhyasUyan priyasa~NganirvR^itAH || 22||
paridhAya svavAsAMsi preShThasa~NgamasajjitAH |
gR^ihItachittA no chelustasmin lajjAyitekShaNAH || 23||
tAsAM vij~nAya bhagavAn svapAdasparshakAmyayA |
dhR^itavratAnAM sa~NkalpamAha dAmodaro.abalAH || 24||
sa~Nkalpo viditaH sAdhvyo bhavatInAM madarchanam |
mayAnumoditaH so.asau satyo bhavitumarhati || 25||
na mayyAveshitadhiyAM kAmaH kAmAya kalpate |
bharjitA kvathitA dhAnAH prAyo bIjAya neShyate || 26||
yAtAbalA vrajaM siddhA mayemA raMsyathA kShapAH |
yaduddishya vratamidaM cherurAryArchanaM satIH || 27||
shrIshuka uvAcha
ityAdiShTA bhagavatA labdhakAmAH kumArikAH |
dhyAyantyastatpadAmbhojaM kR^ichChrAnnirvivishurvrajam || 28||
atha gopaiH parivR^ito bhagavAn devakIsutaH |
vR^indAvanAdgato dUraM chArayan gAH sahAgrajaH || 29||
nidAghArkAtape tigme ChAyAbhiH svAbhirAtmanaH |
AtapatrAyitAn vIkShya drumAnAha vrajaukasaH || 30||
he stoka kR^iShNa he aMsho shrIdAman subalArjuna |
vishAlavR^iShabha tejasvin devaprastha varUthapa || 31||
pashyataitAn mahAbhAgAn parArthaikAntajIvitAn |
vAtavarShAtapahimAn sahanto vArayanti naH || 32||
aho eShAM varaM janma sarvaprANyupajIvanam |
sujanasyeva yeShAM vai vimukhA yAnti nArthinaH || 33||
patrapuShpaphalachChAyA mUlavalkaladArubhiH |
gandhaniryAsabhasmAsthitokmaiH kAmAn vitanvate || 34||
etAvajjanmasAphalyaM dehinAmiha dehiShu |
prANairarthairdhiyA vAchA shreya evAcharetsadA || 35||
iti pravAlastabakaphalapuShpadalotkaraiH |
tarUNAM namrashAkhAnAM madhyena yamunAM gataH || 36||
tatra gAH pAyayitvApaH sumR^iShTAH shItalAH shivAH |
tato nR^ipa svayaM gopAH kAmaM svAdu papurjalam || 37||
tasyA upavane kAmaM chArayantaH pashUn nR^ipa |
kR^iShNarAmAvupAgamya kShudhArtA idamabruvan || 38||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe gopIvastrApaharaNaM nAma dvAviMsho.adhyAyaH || 22||
\iti
\section{.. OM namo bhagavate vAsudevAya ..}
\section{.. trayoviMsho.adhyAyaH \- 23 ..}
gopA UchuH
rAma rAma mahAvIrya kR^iShNa duShTanibarhaNa |
eShA vai bAdhate kShunnastachChAntiM kartumarhathaH || 1||
shrIshuka uvAcha
iti vij~nApito gopairbhagavAn devakIsutaH |
bhaktAyA viprabhAryAyAH prasIdannidamabravIt || 2||
prayAta devayajanaM brAhmaNA brahmavAdinaH |
satramA~NgirasaM nAma hyAsate svargakAmyayA || 3||
tatra gatvaudanaM gopA yAchatAsmadvisarjitAH |
kIrtayanto bhagavata Aryasya mama chAbhidhAm || 4||
ityAdiShTA bhagavatA gatvAyAchanta te tathA |
kR^itA~njalipuTA viprAn daNDavatpatitA bhuvi || 5||
he bhUmidevAH shR^iNuta kR^iShNasyAdeshakAriNaH |
prAptA~njAnIta bhadraM vo gopAnno rAmachoditAn || 6||
gAshchArayantAvavidUra odanaM
rAmAchyutau vo laShato bubhukShitau |
tayordvijA odanamarthinoryadi
shraddhA cha vo yachChata dharmavittamAH || 7||
dIkShAyAH pashusaMsthAyAH sautrAmaNyAshcha sattamAH |
anyatra dIkShitasyApi nAnnamashnan hi duShyati || 8||
iti te bhagavadyAch~nAM shR^iNvanto.api na shushruvuH |
kShudrAshA bhUrikarmANo bAlishA vR^iddhamAninaH || 9||
deshaH kAlaH pR^ithagdravyaM mantratantrartvijo.agnayaH |
devatA yajamAnashcha kraturdharmashcha yanmayaH || 10||
taM brahma paramaM sAkShAdbhagavantamadhokShajam |
manuShyadR^iShTyA duShpraj~nA martyAtmAno na menire || 11||
na te yadomiti prochurna neti cha parantapa |
gopA nirAshAH pratyetya tathochuH kR^iShNarAmayoH || 12||
tadupAkarNya bhagavAn prahasya jagadIshvaraH |
vyAjahAra punargopAn darshayan laukikIM gatim || 13||
mAM j~nApayata patnIbhyaH sasa~NkarShaNamAgatam |
dAsyanti kAmamannaM vaH snigdhA mayyuShitA dhiyA || 14||
gatvAtha patnIshAlAyAM dR^iShTvAsInAH svala~NkR^itAH |
natvA dvijasatIrgopAH prashritA idamabruvan || 15||
namo vo viprapatnIbhyo nibodhata vachAMsi naH |
ito.avidUre charatA kR^iShNeneheShitA vayam || 16||
gAshchArayan sa gopAlaiH sarAmo dUramAgataH |
bubhukShitasya tasyAnnaM sAnugasya pradIyatAm || 17||
shrutvAchyutamupAyAtaM nityaM taddarshanotsukAH |
tatkathAkShiptamanaso babhUvurjAtasambhramAH || 18||
chaturvidhaM bahuguNamannamAdAya bhAjanaiH |
abhisasruH priyaM sarvAH samudramiva nimnagAH || 19||
niShidhyamAnAH patibhirbhrAtR^ibhirbandhubhiH sutaiH |
bhagavatyuttamashloke dIrghashrutadhR^itAshayAH || 20||
yamunopavane.ashokanavapallavamaNDite |
vicharantaM vR^itaM gopaiH sAgrajaM dadR^ishuH striyaH || 21||
shyAmaM hiraNyaparidhiM vanamAlyabarha\-
dhAtupravAlanaTaveShamanuvratAMse |
vinyastahastamitareNa dhunAnamabjaM
karNotpalAlakakapolamukhAbjahAsam || 22||
prAyaH shrutapriyatamodayakarNapUrai\-
ryasminnimagnamanasastamathAkShirandhraiH |
antaH praveshya suchiraM parirabhya tApaM
prAj~naM yathAbhimatayo vijahurnarendra || 23||
tAstathA tyaktasarvAshAH prAptA AtmadidR^ikShayA |
vij~nAyAkhiladR^igdraShTA prAha prahasitAnanaH || 24||
svAgataM vo mahAbhAgA AsyatAM karavAma kim |
yanno didR^ikShayA prAptA upapannamidaM hi vaH || 25||
nanvaddhA mayi kurvanti kushalAH svArthadarshinaH |
ahaitukyavyavahitAM bhaktimAtmapriye yathA || 26||
prANabuddhimanaHsvAtmadArApatyadhanAdayaH |
yatsamparkAtpriyA AsaMstataH ko nvaparaH priyaH || 27||
tadyAta devayajanaM patayo vo dvijAtayaH |
svasatraM pArayiShyanti yuShmAbhirgR^ihamedhinaH || 28||
patnya UchuH
maivaM vibho.arhati bhavAn gadituM nR^ishaMsaM
satyaM kuruShva nigamaM tava pAdamUlam |
prAptA vayaM tulasidAmapadAvasR^iShTaM
keshairnivoDhumatila~Nghya samastabandhUn || 29||
gR^ihNanti no na patayaH pitarau sutA vA
na bhrAtR^ibandhusuhR^idaH kuta eva chAnye |
tasmAdbhavatprapadayoH patitAtmanAM no
nAnyA bhavedgatirarindama tadvidhehi || 30||
shrIbhagavAnuvAcha
patayo nAbhyasUyeran pitR^ibhrAtR^isutAdayaH |
lokAshcha vo mayopetA devA apyanumanvate || 31||
na prItaye.anurAgAya hya~Ngasa~Ngo nR^iNAmiha |
tanmano mayi yu~njAnA achirAnmAmavApsyatha || 32||
(shravaNAddarshanAd.hdhyAnAnmayi bhAvo.anukIrtanAt |
na tathA sannikarSheNa pratiyAta tato gR^ihAn ||) 	
shrIshuka uvAcha
ityuktA dvijapatnyastA yaj~navATaM punargatAH |
te chAnasUyavaH svAbhiH strIbhiH satramapArayan || 33||
tatraikA vidhR^itA bhartrA bhagavantaM yathAshrutam |
hR^idopaguhya vijahau dehaM karmAnubandhanam || 34||
bhagavAnapi govindastenaivAnnena gopakAn |
chaturvidhenAshayitvA svayaM cha bubhuje prabhuH || 35||
evaM lIlAnaravapurnR^ilokamanushIlayan |
reme gogopagopInAM ramayan rUpavAkkR^itaiH || 36||
athAnusmR^itya viprAste anvatapyan kR^itAgasaH |
yadvishveshvarayoryAch~nAmahanma nR^iviDambayoH || 37||
dR^iShTvA strINAM bhagavati kR^iShNe bhaktimalaukikIm |
AtmAnaM cha tayA hInamanutaptA vyagarhayan || 38||
dhigjanma nastrivR^idvidyAM dhigvrataM dhigbahuj~natAm |
dhikkulaM dhikkriyAdAkShyaM vimukhA ye tvadhokShaje || 39||
nUnaM bhagavato mAyA yoginAmapi mohinI |
yadvayaM guravo nR^iNAM svArthe muhyAmahe dvijAH || 40||
aho pashyata nArINAmapi kR^iShNe jagadgurau |
durantabhAvaM yo.avidhyan mR^ityupAshAn gR^ihAbhidhAn || 41||
nAsAM dvijAtisaMskAro na nivAso gurAvapi |
na tapo nAtmamImAMsA na shauchaM na kriyAH shubhAH || 42||
athApi hyuttamashloke kR^iShNe yogeshvareshvare |
bhaktirdR^iDhA na chAsmAkaM saMskArAdimatAmapi || 43||
nanu svArthavimUDhAnAM pramattAnAM gR^ihehayA |
aho naH smArayAmAsa gopavAkyaiH satAM gatiH || 44||
anyathA pUrNakAmasya kaivalyAdyAshiShAM pateH |
IshitavyaiH kimasmAbhirIshasyaitadviDambanam || 45||
hitvAnyAn bhajate yaM shrIH pAdasparshAshayA sakR^it |
AtmadoShApavargeNa tadyAch~nA janamohinI || 46||
deshaH kAlaH pR^ithagdravyaM mantratantrartvijo.agnayaH |
devatA yajamAnashcha kraturdharmashcha yanmayaH || 47||
sa eSha bhagavAn sAkShAdviShNuryogeshvareshvaraH |
jAto yaduShvityashR^iNma hyapi mUDhA na vidmahe || 48||
aho vayaM dhanyatamA yeShAM nastAdR^ishIH striyaH |
bhaktyA yAsAM matirjAtA asmAkaM nishchalA harau || 49||
namastubhyaM bhagavate kR^iShNAyAkuNThamedhase |
yanmAyAmohitadhiyo bhramAmaH karmavartmasu || 50||
sa vai na AdyaH puruShaH svamAyAmohitAtmanAm |
avij~natAnubhAvAnAM kShantumarhatyatikramam || 51||
iti svAghamanusmR^itya kR^iShNe te kR^itahelanAH |
didR^ikShavo.apyachyutayoH kaMsAdbhItA na chAchalan || 52||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe yaj~napatnyuddhAraNaM nAma trayoviMsho.adhyAyaH || 23||
\iti
\section{.. OM namo bhagavate vAsudevAya ..}
\section{.. chaturviMsho.adhyAyaH \- 24 ..}
shrIshuka uvAcha
bhagavAnapi tatraiva baladevena saMyutaH |
apashyannivasan gopAnindrayAgakR^itodyamAn || 1||
tadabhij~no.api bhagavAn sarvAtmA sarvadarshanaH |
prashrayAvanato.apR^ichChadvR^iddhAn nandapurogamAn || 2||
kathyatAM me pitaH ko.ayaM sambhramo va upAgataH |
kiM phalaM kasya choddeshaH kena vA sAdhyate makhaH || 3||
etadbrUhi mahAn kAmo mahyaM shushrUShave pitaH |
na hi gopyaM hi sAdhUnAM kR^ityaM sarvAtmanAmiha || 4||
astyasvaparadR^iShTInAmamitrodAstavidviShAm |
udAsIno.arivadvarjya AtmavatsuhR^iduchyate || 5||
j~nAtvAj~nAtvA cha karmANi jano.ayamanutiShThati |
viduShaH karmasiddhiH syAttathA nAviduSho bhavet || 6||
tatra tAvatkriyAyogo bhavatAM kiM vichAritaH |
atha vA laukikastanme pR^ichChataH sAdhu bhaNyatAm || 7||
nanda uvAcha
parjanyo bhagavAnindro meghAstasyAtmamUrtayaH |
te.abhivarShanti bhUtAnAM prINanaM jIvanaM payaH || 8||
taM tAta vayamanye cha vArmuchAM patimIshvaram |
dravyaistadretasA siddhairyajante kratubhirnarAH || 9||
tachCheSheNopajIvanti trivargaphalahetave |
puMsAM puruShakArANAM parjanyaH phalabhAvanaH || 10||
ya evaM visR^ijeddharmaM pAramparyAgataM naraH |
kAmAllobhAdbhayAddveShAtsa vai nApnoti shobhanam || 11||
shrIshuka uvAcha
vacho nishamya nandasya tathAnyeShAM vrajaukasAm |
indrAya manyuM janayan pitaraM prAha keshavaH || 12||
shrIbhagavAnuvAcha
karmaNA jAyate jantuH karmaNaiva vilIyate |
sukhaM duHkhaM bhayaM kShemaM karmaNaivAbhipadyate || 13||
asti chedIshvaraH kashchitphalarUpyanyakarmaNAm |
kartAraM bhajate so.api na hyakartuH prabhurhi saH || 14||
kimindreNeha bhUtAnAM svasvakarmAnuvartinAm |
anIshenAnyathA kartuM svabhAvavihitaM nR^iNAm || 15||
svabhAvatantro hi janaH svabhAvamanuvartate |
svabhAvasthamidaM sarvaM sadevAsuramAnuSham || 16||
dehAnuchchAvachA~njantuH prApyotsR^ijati karmaNA |
shatrurmitramudAsInaH karmaiva gururIshvaraH || 17||
tasmAtsampUjayetkarma svabhAvasthaH svakarmakR^it |
a~njasA yena varteta tadevAsya hi daivatam || 18||
AjIvyaikataraM bhAvaM yastvanyamupajIvati |
na tasmAdvindate kShemaM jAraM nAryasatI yathA || 19||
varteta brahmaNA vipro rAjanyo rakShayA bhuvaH |
vaishyastu vArtayA jIvechChUdrastu dvijasevayA || 20||
kR^iShivANijyagorakShA kusIdaM turyamuchyate |
vArtA chaturvidhA tatra vayaM govR^ittayo.anisham || 21||
sattvaM rajastama iti sthityutpattyantahetavaH |
rajasotpadyate vishvamanyonyaM vividhaM jagat || 22||
rajasA choditA meghA varShantyambUni sarvataH |
prajAstaireva sidhyanti mahendraH kiM kariShyati || 23||
na naH puro janapadA na grAmA na gR^ihA vayam |
nityaM vanaukasastAta vanashailanivAsinaH || 24||
tasmAdgavAM brAhmaNAnAmadreshchArabhyatAM makhaH |
ya indrayAgasambhArAstairayaM sAdhyatAM makhaH || 25||
pachyantAM vividhAH pAkAH sUpAntAH pAyasAdayaH |
saMyAvApUpashaShkulyaH sarvadohashcha gR^ihyatAm || 26||
hUyantAmagnayaH samyagbrAhmaNairbrahmavAdibhiH |
annaM bahuvidhaM tebhyo deyaM vo dhenudakShiNAH || 27||
anyebhyashchAshvachANDAlapatitebhyo yathArhataH |
yavasaM cha gavAM dattvA giraye dIyatAM baliH || 28||
svala~NkR^itA bhuktavantaH svanuliptAH suvAsasaH |
pradakShiNAM cha kuruta goviprAnalaparvatAn || 29||
etanmama mataM tAta kriyatAM yadi rochate |
ayaM gobrAhmaNAdrINAM mahyaM cha dayito makhaH || 30||
shrIshuka uvAcha
kAlAtmanA bhagavatA shakradarpaM jighAMsatA |
proktaM nishamya nandAdyAH sAdhvagR^ihNanta tadvachaH || 31||
tathA cha vyadadhuH sarvaM yathA.a.aha madhusUdanaH |
vAchayitvA svastyayanaM taddravyeNa giridvijAn || 32||
upahR^itya balIn sarvAnAdR^itA yavasaM gavAm |
godhanAni puraskR^itya giriM chakruH pradakShiNam || 33||
anAMsyanaDudyuktAni te chAruhya svala~NkR^itAH |
gopyashcha kR^iShNavIryANi gAyantyaH sadvijAshiShaH || 34||
kR^iShNastvanyatamaM rUpaM gopavishrambhaNaM gataH |
shailo.asmIti bruvan bhUri balimAdadbR^ihadvapuH || 35||
tasmai namo vrajajanaiH saha chakre AtmanA.a.atmane |
aho pashyata shailo.asau rUpI no.anugrahaM vyadhAt || 36||
eSho.avajAnato martyAn kAmarUpI vanaukasaH |
hanti hyasmai namasyAmaH sharmaNe Atmano gavAm || 37||
ityadrigodvijamakhaM vAsudevapraNoditAH |
yathA vidhAya te gopA saha kR^iShNA vrajaM yayuH || 38||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe chaturviMsho.adhyAyaH || 24||
\iti
\section{.. OM namo bhagavate vAsudevAya ..}
\section{..   pa~nchaviMsho.adhyAyaH \- 25 ..}
shrIshuka uvAcha
indrastadAtmanaH pUjAM vij~nAya vihatAM nR^ipa |
gopebhyaH kR^iShNanAthebhyo nandAdibhyashchukopa saH || 1||
gaNaM sAMvartakaM nAma meghAnAM chAntakAriNAm |
indraH prAchodayatkruddho vAkyaM chAheshamAnyuta || 2||
aho shrImadamAhAtmyaM gopAnAM kAnanaukasAm |
kR^iShNaM martyamupAshritya ye chakrurdevahelanam || 3||
yathAdR^iDhaiH karmamayaiH kratubhirnAmanaunibhaiH |
vidyAmAnvIkShikIM hitvA titIrShanti bhavArNavam || 4||
vAchAlaM bAlishaM stabdhamaj~naM paNDitamAninam |
kR^iShNaM martyamupAshritya gopA me chakrurapriyam || 5||
eShAM shriyAvaliptAnAM kR^iShNenAdhmAyitAtmanAm |
dhunuta shrImadastambhaM pashUn nayata sa~NkShayam || 6||
ahaM chairAvataM nAgamAruhyAnuvraje vrajam |
marudgaNairmahAvIryairnandagoShThajighAMsayA || 7||
shrIshuka uvAcha
itthaM maghavatA.a.aj~naptA meghA nirmuktabandhanAH |
nandagokulamAsAraiH pIDayAmAsurojasA || 8||
vidyotamAnA vidyudbhiH stanantaH stanayitnubhiH |
tIvrairmarudgaNairnunnA vavR^iShurjalasharkarAH || 9||
sthUNAsthUlA varShadhArA mu~nchatsvabhreShvabhIkShNashaH |
jalaughaiH plAvyamAnA bhUrnAdR^ishyata natonnatam || 10||
atyAsArAtivAtena pashavo jAtavepanAH |
gopA gopyashcha shItArtA govindaM sharaNaM yayuH || 11||
shiraH sutAMshcha kAyena prachChAdyAsArapIDitAH |
vepamAnA bhagavataH pAdamUlamupAyayuH || 12||
kR^iShNa kR^iShNa mahAbhAga tvannAthaM gokulaM prabho |
trAtumarhasi devAnnaH kupitAdbhaktavatsala || 13||
shilAvarShanipAtena hanyamAnamachetanam |
nirIkShya bhagavAnmene kupitendrakR^itaM hariH || 14||
apartvatyulbaNaM varShamativAtaM shilAmayam |
svayAge vihate.asmAbhirindro nAshAya varShati || 15||
tatra pratividhiM samyagAtmayogena sAdhaye |
lokeshamAninAM mauDhyAddhariShye shrImadaM tamaH || 16||
na hi sadbhAvayuktAnAM surANAmIshavismayaH |
matto.asatAM mAnabha~NgaH prashamAyopakalpate || 17||
tasmAnmachCharaNaM goShThaM mannAthaM matparigraham |
gopAye svAtmayogena so.ayaM me vrata AhitaH || 18||
ityuktvaikena hastena kR^itvA govardhanAchalam |
dadhAra lIlayA kR^iShNashChatrAkamiva bAlakaH || 19||
athAha bhagavAn gopAn he.amba tAta vrajaukasaH |
yathopajoShaM vishata girigartaM sagodhanAH || 20||
na trAsa iha vaH kAryo maddhastAdrinipAtane |
vAtavarShabhayenAlaM tattrANaM vihitaM hi vaH || 21||
tathA nirvivishurgartaM kR^iShNAshvAsitamAnasAH |
yathAvakAshaM sadhanAH savrajAH sopajIvinaH || 22||
kShuttR^iDvyathAM sukhApekShAM hitvA tairvrajavAsibhiH |
vIkShyamANo dadhAvadriM saptAhaM nAchalatpadAt || 23||
kR^iShNayogAnubhAvaM taM nishAmyendro.ativismitaH |
niHstambho bhraShTasa~NkalpaH svAnmeghAn sannyavArayat || 24||
khaM vyabhramuditAdityaM vAtavarShaM cha dAruNam |
nishAmyoparataM gopAn govardhanadharo.abravIt || 25||
niryAta tyajata trAsaM gopAH sastrIdhanArbhakAH |
upArataM vAtavarShaM vyudaprAyAshcha nimnagAH || 26||
tataste niryayurgopAH svaM svamAdAya godhanam |
shakaToDhopakaraNaM strIbAlasthavirAH shanaiH || 27||
bhagavAnapi taM shailaM svasthAne pUrvavatprabhuH |
pashyatAM sarvabhUtAnAM sthApayAmAsa lIlayA || 28||
taM premavegAnnibhR^itA vrajaukaso
yathA samIyuH parirambhaNAdibhiH |
gopyashcha sasnehamapUjayanmudA
dadhyakShatAdbhiryuyujuH sadAshiShaH || 29||
yashodA rohiNI nando rAmashcha balinAM varaH |
kR^iShNamAli~Ngya yuyujurAshiShaH snehakAtarAH || 30||
divi devagaNAH sAdhyAH siddhagandharvachAraNAH |
tuShTuvurmumuchustuShTAH puShpavarShANi pArthiva || 31||
sha~Nkhadundubhayo nedurdivi devapraNoditAH |
jagurgandharvapatayastumburupramukhA nR^ipa || 32||
tato.anuraktaiH pashupaiH parishrito
rAjan sa goShThaM sabalo.avrajaddhariH |
tathAvidhAnyasya kR^itAni gopikAH
gAyantya IyurmuditA hR^idispR^ishaH || 33||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe pa~nchaviMsho.adhyayaH || 25||
\iti
\section{.. OM namo bhagavate vAsudevAya ..}
\section{.. ShaDviMsho.adhyAyaH \- 26 ..}
shrIshuka uvAcha
evaM vidhAni karmANi gopAH kR^iShNasya vIkShya te |
atadvIryavidaH prochuH samabhyetya suvismitAH || 1||
bAlakasya yadetAni karmANyatyadbhutAni vai |
kathamarhatyasau janma grAmyeShvAtmajugupsitam || 2||
yaH saptahAyano bAlaH kareNaikena lIlayA |
kathaM bibhradgirivaraM puShkaraM gajarADiva || 3||
tokenAmIlitAkSheNa pUtanAyA mahaujasaH |
pItaH stanaH saha prANaiH kAleneva vayastanoH || 4||
hinvato.adhaHshayAnasya mAsyasya charaNAvudak |
ano.apatadviparyastaM rudataH prapadAhatam || 5||
ekahAyana AsIno hriyamANo vihAyasA |
daityena yastR^iNAvartamahan kaNThagrahAturam || 6||
kvachiddhaiya~Ngavastainye mAtrA baddha udUkhale |
gachChannarjunayormadhye bAhubhyAM tAvapAtayat || 7||
vane sa~nchArayan vatsAn sarAmo bAlakairvR^itaH |
hantukAmaM bakaM dorbhyAM mukhato.arimapATayat || 8||
vatseShu vatsarUpeNa pravishantaM jighAMsayA |
hatvA nyapAtayattena kapitthAni cha lIlayA || 9||
hatvA rAsabhadaiteyaM tadbandhUMshcha balAnvitaH |
chakre tAlavanaM kShemaM paripakvaphalAnvitam || 10||
pralambaM ghAtayitvograM balena balashAlinA |
amochayadvrajapashUn gopAMshchAraNyavahnitaH || 11||
AshIviShatamAhIndraM damitvA vimadaM hradAt |
prasahyodvAsya yamunAM chakre.asau nirviShodakAm || 12||
dustyajashchAnurAgo.asmin sarveShAM no vrajaukasAm |
nanda te tanaye.asmAsu tasyApyautpattikaH katham || 13||
kva saptahAyano bAlaH kva mahAdrividhAraNam |
tato no jAyate sha~NkA vrajanAtha tavAtmaje || 14||
nanda uvAcha
shrUyatAM me vacho gopA vyetu sha~NkA cha vo.arbhake |
enaM kumAramuddishya gargo me yaduvAcha ha || 15||
varNAstrayaH kilAsyAsan gR^ihNato.anuyugaM tanUH |
shuklo raktastathA pIta idAnIM kR^iShNatAM gataH || 16||
prAgayaM vasudevasya kvachijjAtastavAtmajaH |
vAsudeva iti shrImAnabhij~nAH samprachakShate || 17||
bahUni santi nAmAni rUpANi cha sutasya te |
guNakarmAnurUpANi tAnyahaM veda no janAH || 18||
eSha vaH shreya AdhAsyadgopagokulanandanaH |
anena sarvadurgANi yUyama~njastariShyatha || 19||
purAnena vrajapate sAdhavo dasyupIDitAH |
arAjake rakShyamANA jigyurdasyUn samedhitAH || 20||
ya etasmin mahAbhAgAH prItiM kurvanti mAnavAH |
nArayo.abhibhavantyetAn viShNupakShAnivAsurAH || 21||
tasmAnnanda kumAro.ayaM nArAyaNasamo guNaiH |
shriyA kIrtyAnubhAvena tatkarmasu na vismayaH || 22||
ityaddhA mAM samAdishya garge cha svagR^ihaM gate |
manye nArAyaNasyAMshaM kR^iShNamakliShTakAriNam || 23||
iti nandavachaH shrutvA gargagItaM vrajaukasaH |
dR^iShTashrutAnubhAvAste kR^iShNasyAmitatejasaH |
muditA nandamAnarchuH kR^iShNaM cha gatavismayAH || 24||
deve varShati yaj~naviplavaruShA vajrAshmaparShAnilaiH
sIdatpAlapashustri AtmasharaNaM dR^iShTvAnukampyutsmayan |
utpATyaikakareNa shailamabalo lIlochChilIndhraM yathA
bibhradgoShThamapAnmahendramadabhitprIyAnna indro gavAm || 25||
					
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe ShaDviMsho.adhyAyaH || 26||
\iti
\section{.. OM namo bhagavate vAsudevAya ..}
\section{.. saptaviMsho.adhyAyaH \-27 ..}
shrIshuka uvAcha
govardhane dhR^ite shaile AsArAdrakShite vraje |
golokAdAvrajatkR^iShNaM surabhiH shakra eva cha || 1||
vivikta upasa~Ngamya vrIDItaH kR^itahelanaH |
pasparsha pAdayorenaM kirITenArkavarchasA || 2||
dR^iShTashrutAnubhAvo.asya kR^iShNasyAmitatejasaH |
naShTatrilokeshamada indra Aha kR^itA~njaliH || 3||
indra uvAcha
vishuddhasattvaM tava dhAma shAntaM
tapomayaM dhvastarajastamaskam |
mAyAmayo.ayaM guNasampravAho
na vidyate te.agrahaNAnubandhaH || 4||
kuto nu taddhetava Isha tatkR^itA
lobhAdayo ye.abudhali~NgabhAvAH |
tathApi daNDaM bhagavAn bibharti
dharmasya guptyai khalanigrahAya || 5||
pitA gurustvaM jagatAmadhIsho
duratyayaH kAla upAttadaNDaH |
hitAya chechChAtanubhiH samIhase
mAnaM vidhunvan jagadIshamAninAm || 6||
ye madvidhAj~nA jagadIsha mAnina\-
stvAM vIkShya kAle.abhayamAshu tanmadam |
hitvA.a.aryamArgaM prabhajantyapasmayA
IhA khalAnAmapi te.anushAsanam || 7||
sa tvaM mamaishvaryamadaplutasya
kR^itAgasaste.aviduShaH prabhAvam |
kShantuM prabho.athArhasi mUDhachetaso
maivaM punarbhUnmatirIsha me.asatI || 8||
tavAvatAro.ayamadhokShajeha
svayambharANAmurubhArajanmanAm |
chamUpatInAmabhavAya deva
bhavAya yuShmachcharaNAnuvartinAm || 9||
namastubhyaM bhagavate puruShAya mahAtmane |
vAsudevAya kR^iShNAya sAtvatAM pataye namaH || 10||
svachChandopAttadehAya vishuddhaj~nAnamUrtaye |
sarvasmai sarvabIjAya sarvabhUtAtmane namaH || 11||
mayedaM bhagavan goShThanAshAyAsAravAyubhiH |
cheShTitaM vihate yaj~ne mAninA tIvramanyunA || 12||
tvayeshAnugR^ihIto.asmi dhvastastambho vR^ithodyamaH |
IshvaraM gurumAtmAnaM tvAmahaM sharaNaM gataH || 13||
shrIshuka uvAcha
evaM sa~NkIrtitaH kR^iShNo maghonA bhagavAnamum |
meghagambhIrayA vAchA prahasannidamabravIt || 14||
shrIbhagavAnuvAcha
mayA te.akAri maghavan makhabha~Ngo.anugR^ihNatA |
madanusmR^itaye nityaM mattasyendrashriyA bhR^isham || 15||
mAmaishvaryashrImadAndho daNDapANiM na pashyati |
taM bhraMshayAmi sampadbhyo yasya chechChAmyanugraham || 16||
gamyatAM shakra bhadraM vaH kriyatAM me.anushAsanam |
sthIyatAM svAdhikAreShu yuktairvaH stambhavarjitaiH || 17||
athAha surabhiH kR^iShNamabhivandya manasvinI |
svasantAnairupAmantrya goparUpiNamIshvaram || 18||
surabhiruvAcha
kR^iShNa kR^iShNa mahAyogin vishvAtman vishvasambhava |
bhavatA lokanAthena sanAthA vayamachyuta || 19||
tvaM naH paramakaM daivaM tvaM na indro jagatpate |
bhavAya bhava govipradevAnAM ye cha sAdhavaH || 20||
indraM nastvAbhiShekShyAmo brahmaNA noditA vayam |
avatIrNo.asi vishvAtman bhUmerbhArApanuttaye || 21||
shrIshuka uvAcha
evaM kR^iShNamupAmantrya surabhiH payasA.a.atmanaH |
jalairAkAshaga~NgAyA airAvatakaroddhR^itaiH || 22||
indraH surarShibhiH sAkaM nodito devamAtR^ibhiH |
abhyaShi~nchata dAshArhaM govinda iti chAbhyadhAt || 23||
tatrAgatAstumburunAradAdayo
gandharvavidyAdharasiddhachAraNAH |
jaguryasho lokamalApahaM hareH
surA~NganAH sannanR^iturmudAnvitAH || 24||
taM tuShTuvurdevanikAyaketavo
hyavAkiraMshchAdbhutapuShpavR^iShTibhiH |
lokAH parAM nirvR^itimApnuvaMstrayo
gAvastadA gAmanayan payodrutAm || 25||
nAnArasaughAH sarito vR^ikShA Asan madhusravAH |
akR^iShTapachyauShadhayo girayo.abibhradunmaNIn || 26||
kR^iShNe.abhiShikta etAni sattvAni kurunandana |
nirvairANyabhavaMstAta krUrANyapi nisargataH || 27||
iti gogokulapatiM govindamabhiShichya saH |
anuj~nAto yayau shakro vR^ito devAdibhirdivam || 28||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe indrastutirnAma saptaviMsho.adhyAyaH || 27||
\iti
\section{.. OM namo bhagavate vAsudevAya ..}
\section{.. aShTAviMsho.adhyAyaH \- 28 ..}
shrIshuka uvAcha
ekAdashyAM nirAhAraH samabhyarchya janArdanam |
snAtuM nandastu kAlindyA dvAdashyAM jalamAvishat || 1||
taM gR^ihItvAnayadbhR^ityo varuNasyAsuro.antikam |
avij~nAyAsurIM velAM praviShTamudakaM nishi || 2||
chukrushustamapashyantaH kR^iShNa rAmeti gopakAH |
bhagavAMstadupashrutya pitaraM varuNAhR^itam |
tadantikaM gato rAjan svAnAmabhayado vibhuH || 3||
prAptaM vIkShya hR^iShIkeshaM lokapAlaH saparyayA |
mahatyA pUjayitvA.a.aha taddarshanamahotsavaH || 4||
varuNa uvAcha
adya me nibhR^ito deho.adyaivArtho.adhigataH prabho |
tvatpAdabhAjo bhagavannavApuH pAramadhvanaH || 5||
namastubhyaM bhagavate brahmaNe paramAtmane |
na yatra shrUyate mAyA lokasR^iShTivikalpanA || 6||
ajAnatA mAmakena mUDhenAkAryavedinA |
AnIto.ayaM tava pitA tadbhavAn kShantumarhati || 7||
mamApyanugrahaM kR^iShNa kartumarhasyasheShadR^ik |
govinda nIyatAmeSha pitA te pitR^ivatsala || 8||
shrIshuka uvAcha
evaM prasAditaH kR^iShNo bhagavAnIshvareshvaraH |
AdAyAgAtsvapitaraM bandhUnAM chAvahan mudam || 9||
nandastvatIndriyaM dR^iShTvA lokapAlamahodayam |
kR^iShNe cha sannatiM teShAM j~nAtibhyo vismito.abravIt || 10||
te tvautsukyadhiyo rAjan matvA gopAstamIshvaram |
api naH svagatiM sUkShmAmupAdhAsyadadhIshvaraH || 11||
iti svAnAM sa bhagavAn vij~nAyAkhiladR^ik svayam |
sa~Nkalpasiddhaye teShAM kR^ipayaitadachintayat || 12||
jano vai loka etasminnavidyAkAmakarmabhiH |
uchchAvachAsu gatiShu na veda svAM gatiM bhraman || 13||
iti sa~nchintya bhagavAn mahAkAruNiko hariH |
darshayAmAsa lokaM svaM gopAnAM tamasaH param || 14||
satyaM j~nAnamanantaM yadbrahma jyotiH sanAtanam |
yaddhi pashyanti munayo guNApAye samAhitAH || 15||
te tu brahmahradaM nItA magnAH kR^iShNena choddhR^itAH |
dadR^ishurbrahmaNo lokaM yatrAkrUro.adhyagAtpurA || 16||
nandAdayastu taM dR^iShTvA paramAnandanirvR^itAH |
kR^iShNaM cha tatra ChandobhiH stUyamAnaM suvismitAH || 17||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe aShTAdasho.adhyAyaH || 28||
\iti
\section{.. OM namo bhagavate vAsudevAya ..}
\section{.. ekonatriMsho.adhyAyaH \- 29 ..}
shrIshuka uvAcha
bhagavAnapi tA rAtrIH sharadotphullamallikAH |
vIkShya rantuM manashchakre yogamAyAmupAshritaH || 1||
tadoDurAjaH kakubhaH karairmukhaM
prAchyA vilimpannaruNena shantamaiH |
sa charShaNInAmudagAchChucho mR^ijan
priyaH priyAyA iva dIrghadarshanaH || 2||
dR^iShTvA kumudvantamakhaNDamaNDalaM
ramAnanAbhaM navaku~NkumAruNaM
vanaM cha tatkomalagobhira~njitaM
jagau kalaM vAmadR^ishAM manoharam || 3||
nishamya gItaM tadana~NgavardhanaM
vrajastriyaH kR^iShNagR^ihItamAnasAH |
AjagmuranyonyamalakShitodyamAH
sa yatra kAnto javalolakuNDalAH || 4||
duhantyo.abhiyayuH kAshchiddohaM hitvA samutsukAH |
payo.adhishritya saMyAvamanudvAsyAparA yayuH || 5||
pariveShayantyastaddhitvA pAyayantyaH shishUn payaH |
shushrUShantyaH patIn kAshchidashnantyo.apAsya bhojanam || 6||
limpantyaH pramR^ijantyo.anyA a~njantyaH kAshcha lochane |
vyatyastavastrAbharaNAH kAshchitkR^iShNAntikaM yayuH || 7||
tA vAryamANAH patibhiH pitR^ibhirbhrAtR^ibandhubhiH |
govindApahR^itAtmAno na nyavartanta mohitAH || 8||
antargR^ihagatAH kAshchidgopyo.alabdhavinirgamAH |
kR^iShNaM tadbhAvanAyuktA dadhyurmIlitalochanAH || 9||
duHsahapreShThavirahatIvratApadhutAshubhAH |
dhyAnaprAptAchyutAshleShanirvR^ityA kShINama~NgalAH || 10||
tameva paramAtmAnaM jArabud.hdhyApi sa~NgatAH |
jahurguNamayaM dehaM sadyaH prakShINabandhanAH || 11||
rAjovAcha
kR^iShNaM viduH paraM kAntaM na tu brahmatayA mune |
guNapravAhoparamastAsAM guNadhiyAM katham || 12||
shrIshuka uvAcha
uktaM purastAdetatte chaidyaH siddhiM yathA gataH |
dviShannapi hR^iShIkeshaM kimutAdhokShajapriyAH || 13||
nR^iNAM niHshreyasArthAya vyaktirbhagavato nR^ipa |
avyayasyAprameyasya nirguNasya guNAtmanaH || 14||
kAmaM krodhaM bhayaM snehamaikyaM sauhR^idameva cha |
nityaM harau vidadhato yAnti tanmayatAM hi te || 15||
na chaivaM vismayaH kAryo bhavatA bhagavatyaje |
yogeshvareshvare kR^iShNe yata etadvimuchyate || 16||
tA dR^iShTvAntikamAyAtA bhagavAn vrajayoShitaH |
avadadvadatAM shreShTho vAchaH peshairvimohayan || 17||
shrIbhagavAnuvAcha
svAgataM vo mahAbhAgAH priyaM kiM karavANi vaH |
vrajasyAnAmayaM kachchidbrUtAgamanakAraNam || 18||
rajanyeShA ghorarUpA ghorasattvaniShevitA |
pratiyAta vrajaM neha stheyaM strIbhiH sumadhyamAH || 19||
mAtaraH pitaraH putrA bhrAtaraH patayashcha vaH |
vichinvanti hyapashyanto mA kR^iDhvaM bandhusAdhvasam || 20||
dR^iShTaM vanaM kusumitaM rAkeshakarara~njitam |
yamunAnilalIlaijattarupallavashobhitam || 21||
tadyAta mA chiraM goShThaM shushrUShadhvaM patIn satIH |
krandanti vatsA bAlAshcha tAnpAyayata duhyata || 22||
atha vA madabhisnehAdbhavatyo yantritAshayAH |
AgatA hyupapannaM vaH prIyante mayi jantavaH || 23||
bhartuH shushrUShaNaM strINAM paro dharmo hyamAyayA |
tadbandhUnAM cha kalyANyaH prajAnAM chAnupoShaNam || 24||
duHshIlo durbhago vR^iddho jaDo rogyadhano.api vA |
patiH strIbhirna hAtavyo lokepsubhirapAtakI || 25||
asvargyamayashasyaM cha phalgu kR^ichChraM bhayAvaham |
jugupsitaM cha sarvatra aupapatyaM kulastriyAH || 26||
shravaNAddarshanAd.hdhyAnAnmayi bhAvo.anukIrtanAt |
na tathA sannikarSheNa pratiyAta tato gR^ihAn || 27||
shrIshuka uvAcha
iti vipriyamAkarNya gopyo govindabhAShitam |
viShaNNA bhagnasa~NkalpAshchintAmApurduratyayAm || 28||
kR^itvA mukhAnyava shuchaH shvasanena shuShya\-
dbimbAdharANi charaNena bhuvaM likhantyaH |
asrairupAttamaShibhiH kuchaku~NkumAni
tasthurmR^ijantya uruduHkhabharAH sma tUShNIm || 29||
preShThaM priyetaramiva pratibhAShamANaM
kR^iShNaM tadarthavinivartitasarvakAmAH |
netre vimR^ijya ruditopahate sma ki~nchit
saMrambhagadgadagiro.abruvatAnuraktAH || 30||
gopya UchuH
maivaM vibho.arhati bhavAn gadituM nR^ishaMsaM
santyajya sarvaviShayAMstavapAdamUlam |
bhaktA bhajasva duravagraha mA tyajAsmAn
devo yathA.a.adipuruSho bhajate mumukShUn || 31||
yatpatyapatyasuhR^idAmanuvR^ittira~Nga
strINAM svadharma iti dharmavidA tvayoktam |
astvevametadupadeshapade tvayIshe
preShTho bhavAMstanubhR^itAM kila bandhurAtmA || 32||
kurvanti hi tvayi ratiM kushalAH sva Atman
nityapriye patisutAdibhirArtidaiH kim |
tannaH prasIda parameshvara mA sma ChindyA
AshAM dhR^itAM tvayi chirAdaravindanetra || 33||
chittaM sukhena bhavatApahR^itaM gR^iheShu
yannirvishatyuta karAvapi gR^ihyakR^itye |
pAdau padaM na chalatastava pAdamUlA\-
dyAmaH kathaM vrajamatho karavAma kiM vA || 34||
si~nchA~Nga nastvadadharAmR^itapUrakeNa
hAsAvalokakalagItajahR^ichChayAgnim |
no chedvayaM virahajAgnyupayuktadehA
dhyAnena yAma padayoH padavIM sakhe te || 35||
yarhyambujAkSha tava pAdatalaM ramAyA
dattakShaNaM kvachidaraNyajanapriyasya |
asprAkShma tatprabhR^iti nAnyasamakShama~Nga
sthAtuM tvayAbhiramitA bata pArayAmaH || 36||
shrIryatpadAmbujarajashchakame tulasyA
labdhvApi vakShasi padaM kila bhR^ityajuShTam |
yasyAH svavIkShaNakR^ite.anyasuraprayAsaH
tadvadvayaM cha tava pAdarajaH prapannAH || 37||
tannaH prasIda vR^ijinArdana te.a~NghrimUlaM
prAptA visR^ijya vasatIstvadupAsanAshAH |
tvatsundarasmitanirIkShaNatIvrakAma\-
taptAtmanAM puruShabhUShaNa dehi dAsyam || 38||
vIkShyAlakAvR^itamukhaM tava kuNDalashrI\-
gaNDasthalAdharasudhaM hasitAvalokam |
dattAbhayaM cha bhujadaNDayugaM vilokya
vakShaHshriyaikaramaNaM cha bhavAma dAsyaH || 39||
kA strya~Nga te kalapadAyatamUrchChitena
sammohitA.a.aryacharitAnna chalettrilokyAm |
trailokyasaubhagamidaM cha nirIkShya rUpaM
yadgodvijadrumamR^igAH pulakAnyabibhran || 40||
vyaktaM bhavAn vrajabhayArtiharo.abhijAto
devo yathA.a.adipuruShaH suralokagoptA |
tanno nidhehi karapa~NkajamArtabandho
taptastaneShu cha shiraHsu cha ki~NkarINAm || 41||
shrIshuka uvAcha
iti viklavitaM tAsAM shrutvA yogeshvareshvaraH |
prahasya sadayaM gopIrAtmArAmo.apyarIramat || 42||
tAbhiH sametAbhirudAracheShTitaH
priyekShaNotphullamukhIbhirachyutaH |
udArahAsadvijakundadIdhati\-
rvyarochataiNA~Nka ivoDubhirvR^itaH || 43||
upagIyamAna udgAyan vanitAshatayUthapaH |
mAlAM bibhradvaijayantIM vyacharanmaNDayan vanam || 44||
nadyAH pulinamAvishya gopIbhirhimavAlukam |
reme tattaralAnandakumudAmodavAyunA || 45||
bAhuprasAraparirambhakarAlakoru\-
nIvIstanAlabhananarmanakhAgrapAtaiH |
kShvelyAvalokahasitairvrajasundarINA\-
muttambhayan ratipatiM ramayA~nchakAra || 46||
evaM bhagavataH kR^iShNAllabdhamAnA mahAtmanaH |
AtmAnaM menire strINAM mAninyo.abhyadhikaM bhuvi || 47||
tAsAM tatsaubhagamadaM vIkShya mAnaM cha keshavaH |
prashamAya prasAdAya tatraivAntaradhIyata || 48||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe bhagavato rAsakrIDAvarNanaM nAma
ekonatriMsho.adhyAyaH || 29||
\iti
\section{.. OM namo bhagavate vAsudevAya ..}
\section{.. triMsho.adhyAyaH \- 30 ..}
shrIshuka uvAcha
antarhite bhagavati sahasaiva vrajA~NganAH |
atapyaMstamachakShANAH kariNya iva yUthapam || 1||
gatyAnurAgasmitavibhramekShitai\-
rmanoramAlApavihAravibhramaiH |
AkShiptachittAH pramadA ramApate\-
stAstA vicheShTA jagR^ihustadAtmikAH || 2||
gatismitaprekShaNabhAShaNAdiShu
priyAH priyasya pratirUDhamUrtayaH |
asAvahaM tvityabalAstadAtmikA
nyavediShuH kR^iShNavihAravibhramAH || 3||
gAyantya uchchairamumeva saMhatA
vichikyurunmattakavadvanAdvanam |
paprachChurAkAshavadantaraM bahi\-
rbhUteShu santaM puruShaM vanaspatIn || 4||
dR^iShTo vaH kachchidashvattha plakSha nyagrodha no manaH |
nandasUnurgato hR^itvA premahAsAvalokanaiH || 5||
kachchitkurabakAshokanAgapunnAgachampakAH |
rAmAnujo mAninInAmito darpaharasmitaH || 6||
kachchittulasi kalyANi govindacharaNapriye |
saha tvAlikulairbibhraddR^iShTaste.atipriyo.achyutaH || 7||
mAlatyadarshi vaH kachchinmallike jAti yUthike |
prItiM vo janayan yAtaH karasparshena mAdhavaH || 8||
chUtapriyAlapanasAsanakovidAra\-
jambvarkabilvabakulAmrakadambanIpAH |
ye.anye parArthabhavakA yamunopakUlAH
shaMsantu kR^iShNapadavIM rahitAtmanAM naH || 9||
kiM te kR^itaM kShiti tapo bata keshavA~Nghri\-
sparshotsavotpulakitA~NgaruhairvibhAsi |
apya~Nghrisambhava urukramavikramAdvA
Aho varAhavapuShaH parirambhaNena || 10||
apyeNapatnyupagataH priyayeha gAtrai\-
stanvan dR^ishAM sakhi sunirvR^itimachyuto vaH |
kAntA~Ngasa~Ngakuchaku~Nkumara~njitAyAH
kundasrajaH kulapateriha vAti gandhaH || 11||
bAhuM priyAMsa upadhAya gR^ihItapadmo
rAmAnujastulasikAlikulairmadAndhaiH |
anvIyamAna iha vastaravaH praNAmaM
kiM vAbhinandati charan praNayAvalokaiH || 12||
pR^ichChatemA latA bAhUnapyAshliShTA vanaspateH |
nUnaM tatkarajaspR^iShTA bibhratyutpulakAnyaho || 13||
ityunmattavacho gopyaH kR^iShNAnveShaNakAtarAH |
lIlA bhagavatastAstA hyanuchakrustadAtmikAH || 14||
kasyAshchitpUtanAyantyAH kR^iShNAyantyapibatstanam |
tokAyitvA rudatyanyA padAhan shakaTAyatIm || 15||
daityAyitvA jahArAnyAmekA kR^iShNArbhabhAvanAm |
ri~NgayAmAsa kApya~NghrI karShantI ghoShaniHsvanaiH || 16||
kR^iShNarAmAyite dve tu gopAyantyashcha kAshchana |
vatsAyatIM hanti chAnyA tatraikA tu bakAyatIm || 17||
AhUya dUragA yadvatkR^iShNastamanukurvatIm |
veNuM kvaNantIM krIDantImanyAH shaMsanti sAdhviti || 18||
kasyA~nchitsvabhujaM nyasya chalantyAhAparA nanu |
kR^iShNo.ahaM pashyata gatiM lalitAmiti tanmanAH || 19||
mA bhaiShTa vAtavarShAbhyAM tattrANaM vihitaM mayA |
ityuktvaikena hastena yatantyunnidadhe.ambaram || 20||
AruhyaikA padA.a.akramya shirasyAhAparAM nR^ipa |
duShTAhe gachCha jAto.ahaM khalAnAM nanu daNDadhR^ik || 21||
tatraikovAcha he gopA dAvAgniM pashyatolbaNam |
chakShUMShyAshvapidadhvaM vo vidhAsye kShemama~njasA || 22||
(baddhAnyayA srajA kAchittanvI tatra ulUkhale |)
badhnAmi bhANDabhettAraM haiya~NgavamuShaM tviti |
bhItA sudR^ik pidhAyAsyaM bheje bhItiviDambanam || 23||
evaM kR^iShNaM pR^ichChamAnA vR^indAvanalatAstarUn |
vyachakShata vanoddeshe padAni paramAtmanaH || 24||
padAni vyaktametAni nandasUnormahAtmanaH |
lakShyante hi dhvajAmbhojavajrA~NkushayavAdibhiH || 25||
taistaiH padaistatpadavImanvichChantyo.agrato.abalAH |
vadhvAH padaiH supR^iktAni vilokyArtAH samabruvan || 26||
kasyAH padAni chaitAni yAtAyA nandasUnunA |
aMsanyastaprakoShThAyAH kareNoH kariNA yathA || 27||
anayA.a.arAdhito nUnaM bhagavAn harirIshvaraH |
yanno vihAya govindaH prIto yAmanayadrahaH || 28||
dhanyA aho amI Alyo govindA~NghryabjareNavaH |
yAn brahmeshau ramAdevI dadhurmUrdhnyaghanuttaye || 29||
tasyA amUni naH kShobhaM kurvantyuchchaiH padAni yat |
yaikApahR^itya gopInAM raho bhu~Nkte.achyutAdharam || 30||
na lakShyante padAnyatra tasyA nUnaM tR^iNA~NkuraiH |
khidyatsujAtA~NghritalAmunninye preyasIM priyaH || 31||
imAnyadhikamagnAni padAni vahato vadhUm |
gopyaH pashyata kR^iShNasya bhArAkrAntasya kAminaH || 32||
atrAvaropitA kAntA puShpahetormahAtmanA |
atra prasUnAvachayaH priyArthe preyasA kR^itaH |
prapadAkramaNe ete pashyatAsakale pade || 33||
keshaprasAdhanaM tvatra kAminyAH kAminA kR^itam |
tAni chUDayatA kAntAmupaviShTamiha dhruvam || 34||
reme tayA chAtmarata AtmArAmo.apyakhaNDitaH |
kAminAM darshayan dainyaM strINAM chaiva durAtmatAm || 35||
ityevaM darshayantyastAshcherurgopyo vichetasaH |
yAM gopImanayatkR^iShNo vihAyAnyAH striyo vane || 36||
sA cha mene tadA.a.atmAnaM variShThaM sarvayoShitAm |
hitvA gopIH kAmayAnA mAmasau bhajate priyaH || 37||
tato gatvA vanoddeshaM dR^iptA keshavamabravIt |
na pAraye.ahaM chalituM naya mAM yatra te manaH || 38||
evamuktaH priyAmAha skandha AruhyatAmiti |
tatashchAntardadhe kR^iShNaH sA vadhUranvatapyata || 39||
hA nAtha ramaNa preShTha kvAsi kvAsi mahAbhuja |
dAsyAste kR^ipaNAyA me sakhe darshaya sannidhim || 40||
anvichChantyo bhagavato mArgaM gopyo.avidUritaH |
dadR^ishuH priyavishleShamohitAM duHkhitAM sakhIm || 41||
tayA kathitamAkarNya mAnaprAptiM cha mAdhavAt |
avamAnaM cha daurAtmyAdvismayaM paramaM yayuH || 42||
tato.avishan vanaM chandrajyotsnA yAvadvibhAvyate |
tamaH praviShTamAlakShya tato nivavR^ituH striyaH || 43||
tanmanaskAstadAlApAstadvicheShTAstadAtmikAH |
tadguNAneva gAyantyo nAtmAgArANi sasmaruH || 44||
punaH pulinamAgatya kAlindyAH kR^iShNabhAvanAH |
samavetA jaguH kR^iShNaM tadAgamanakA~NkShitAH || 45||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe rAsakrIDAyAM kR^iShNAnveShaNaM nAma
triMsho.adhyAyaH || 30||
\iti
\section{.. OM namo bhagavate vAsudevAya ..}
\section{.. ekatriMsho.adhyAyaH \- 31 ..}
gopya UchuH
jayati te.adhikaM janmanA vrajaH
shrayata indirA shashvadatra hi |
dayita dR^ishyatAM dikShu tAvakA\-
stvayi dhR^itAsavastvAM vichinvate || 1||
sharadudAshaye sAdhujAtasa\-
tsarasijodara shrImuShA dR^ishA |
suratanAtha te.ashulkadAsikA
varada nighnato neha kiM vadhaH || 2||
viShajalApyayAdvyAlarAkShasA\-
dvarShamArutAdvaidyutAnalAt |
vR^iShamayAtmajAdvishvatobhayA\-
dR^iShabha te vayaM rakShitA muhuH || 3||
na khalu gopikAnandano bhavA\-
nakhiladehinAmantarAtmadR^ik |
vikhanasArthito vishvaguptaye
sakha udeyivAn sAtvatAM kule || 4||
virachitAbhayaM vR^iShNidhurya te
charaNamIyuShAM saMsR^iterbhayAt |
karasaroruhaM kAnta kAmadaM
shirasi dhehi naH shrIkaragraham || 5||
vrajajanArtihan vIrayoShitAM
nijajanasmayadhvaMsanasmita |
bhaja sakhe bhavatki~NkarIH sma no
jalaruhAnanaM chAru darshaya || 6||
praNatadehinAM pApakarshanaM
tR^iNacharAnugaM shrIniketanam |
phaNiphaNArpitaM te padAmbujaM
kR^iNu kucheShu naH kR^indhi hR^ichChayam || 7||
madhurayA girA valguvAkyayA
budhamanoj~nayA puShkarekShaNa |
vidhikarIrimA vIra muhyatI\-
radharasIdhunA.a.apyAyayasva naH || 8||
tava kathAmR^itaM taptajIvanaM
kavibhirIDitaM kalmaShApaham |
shravaNama~NgalaM shrImadAtataM
bhuvigR^iNanti te bhUridA janAH || 9||
prahasitaM priyapremavIkShaNaM
viharaNaM cha te dhyAnama~Ngalam |
rahasi saMvido yA hR^idispR^ishaH
kuhaka no manaH kShobhayanti hi || 10||
chalasi yadvrajAchchArayan pashUn
nalinasundaraM nAtha te padam |
shilatR^iNA~NkuraiH sIdatIti naH
kalilatAM manaH kAnta gachChati || 11||
dinaparikShaye nIlakuntalai\-
rvanaruhAnanaM bibhradAvR^itam |
ghanarajasvalaM darshayan muhu\-
rmanasi naH smaraM vIra yachChasi || 12||
praNatakAmadaM padmajArchitaM
dharaNimaNDanaM dhyeyamApadi |
charaNapa~NkajaM shantamaM cha te
ramaNa naH staneShvarpayAdhihan || 13||
suratavardhanaM shokanAshanaM
svaritaveNunA suShThu chumbitam |
itararAga\-vismAraNaM nR^iNAM
vitara vIra naste.adharAmR^itam || 14||
aTati yadbhavAnahni kAnanaM
truTiryugAyate tvAmapashyatAm |
kuTilakuntalaM shrImukhaM cha te
jaDa udIkShatAM pakShmakR^iddR^ishAm || 15||
patisutAnvayabhrAtR^ibAndhavA\-
nativila~Nghya te.antyachyutAgatAH |
gatividastavodgItamohitAH
kitava yoShitaH kastyajennishi || 16||
rahasi saMvidaM hR^ichChayodayaM
prahasitAnanaM premavIkShaNam |
bR^ihaduraH shriyo vIkShya dhAma te
muhurati spR^ihA muhyate manaH || 17||
vrajavanaukasAM vyaktira~Nga te
vR^ijinahantryalaM vishvama~Ngalam |
tyaja manAk cha nastvatspR^ihAtmanAM
svajanahR^idrujAM yanniShUdanam || 18||
yatte sujAta charaNAmburuhaM staneShu
bhItAH shanaiH priya dadhImahi karkasheShu |
tenATavImaTasi tadvyathate na kiMsvit
kUrpAdibhirbhramati dhIrbhavadAyuShAM naH || 19||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe rAsakrIDAyAM gopikAgItaM
nAmaikatriMsho.adhyAyaH || 31||
\iti
\section{.. OM namo bhagavate vAsudevAya ..}
\section{.. dvAtriMsho.adhyAyaH \- 32 ..}
shrIshuka uvAcha
iti gopyaH pragAyantyaH pralapantyashcha chitradhA |
ruruduH susvaraM rAjan kR^iShNadarshanalAlasAH || 1||
tAsAmAvirabhUchChauriH smayamAnamukhAmbujaH |
pItAmbaradharaH sragvI sAkShAnmanmathamanmathaH || 2||
taM vilokyAgataM preShThaM prItyutphulladR^isho.abalAH |
uttasthuryugapatsarvAstanvaH prANamivAgatam || 3||
kAchitkarAmbujaM shaurerjagR^ihe.a~njalinA mudA |
kAchiddadhAra tadbAhumaMse chandanarUShitam || 4||
kAchida~njalinAgR^ihNAttanvI tAmbUlacharvitam |
ekA tada~NghrikamalaM santaptA stanayoradhAt || 5||
ekA bhrukuTimAbadhya premasaMrambhavihvalA |
ghnantIvaikShatkaTAkShepaiH sandaShTadashanachChadA || 6||
aparAnimiShaddR^igbhyAM juShANA tanmukhAmbujam |
ApItamapi nAtR^ipyatsantastachcharaNaM yathA || 7||
taM kAchinnetrarandhreNa hR^idikR^itya nimIlya cha |
pulakA~NgyupaguhyAste yogIvAnandasamplutA || 8||
sarvAstAH keshavAlokaparamotsavanirvR^itAH |
jahurvirahajaM tApaM prAj~naM prApya yathA janAH || 9||
tAbhirvidhUtashokAbhirbhagavAnachyuto vR^itaH |
vyarochatAdhikaM tAta puruShaH shaktibhiryathA || 10||
tAH samAdAya kAlindyA nirvishya pulinaM vibhuH |
vikasatkundamandArasurabhyanilaShaTpadam || 11||
sharachchandrAMshusandohadhvastadoShAtamaH shivam |
kR^iShNAyA hastataralAchitakomalavAlukam || 12||
taddarshanAhlAdavidhUtahR^idrujo
manorathAntaM shrutayo yathA yayuH |
svairuttarIyaiH kuchaku~NkumA~Nkitai\-
rachIkLLipannAsanamAtmabandhave || 13||
tatropaviShTo bhagavAn sa Ishvaro
yogeshvarAntarhR^idi kalpitAsanaH |
chakAsa gopIpariShadgato.archita\-
strailokyalakShmyekapadaM vapurdadhat || 14||
sabhAjayitvA tamana~NgadIpanaM
sahAsalIlekShaNavibhramabhruvA |
saMsparshanenA~NkakR^itA~NghrihastayoH
saMstutya IShatkupitA babhAShire || 15||
gopya UchuH
bhajato.anubhajantyeka eka etadviparyayam |
nobhayAMshcha bhajantyeka etanno brUhi sAdhu bhoH || 16||
shrIbhagavAnuvAcha
mitho bhajanti ye sakhyaH svArthaikAntodyamA hi te |
na tatra sauhR^idaM dharmaH svArthArthaM taddhi nAnyathA || 17||
bhajantyabhajato ye vai karuNAH pitarau yathA |
dharmo nirapavAdo.atra sauhR^idaM cha sumadhyamAH || 28||
bhajato.api na vai kechidbhajantyabhajataH kutaH |
AtmArAmA hyAptakAmA akR^itaj~nA gurudruhaH || 19||
nAhaM tu sakhyo bhajato.api jantUn
bhajAmyamIShAmanuvR^ittivR^ittaye |
yathAdhano labdhadhane vinaShTe
tachchintayAnyannibhR^ito na veda || 20||
evaM madarthojjhitalokaveda\-
svAnAM hi vo mayyanuvR^ittaye.abalAH |
mayA parokShaM bhajatA tirohitaM
mAsUyituM mArhatha tatpriyaM priyAH || 21||
na pAraye.ahaM niravadyasaMyujAM
svasAdhukR^ityaM vibudhAyuShApi vaH |
yA mAbhajan durjaragehashR^i~NkhalAH
saMvR^ishchya tadvaH pratiyAtu sAdhunA || 22||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvardhe rAsakrIDAyAM gopIsAntvanaM nAma
dvAtriMsho.adhyAyaH || 32||
\iti
\section{.. OM namo bhagavate vAsudevAya ..}
\section{.. trayastriMsho.adhyAyaH 33 ..}
shrIshuka uvAcha
itthaM bhagavato gopyaH shrutvA vAchaH supeshalAH |
jahurvirahajaM tApaM tada~NgopachitAshiShaH || 1||
tatrArabhata govindo rAsakrIDAmanuvrataiH |
strIratnairanvitaH prItairanyonyAbaddhabAhubhiH || 2||
rAsotsavaH sampravR^itto gopImaNDalamaNDitaH |
yogeshvareNa kR^iShNena tAsAM madhye dvayordvayoH |
praviShTena gR^ihItAnAM kaNThe svanikaTaM striyaH || 3||
yaM manyeran nabhastAvadvimAnashatasa~Nkulam |
divaukasAM sadArANAmautsukyApahR^itAtmanAm || 4||
tato dundubhayo nedurnipetuH puShpavR^iShTayaH |
jagurgandharvapatayaH sastrIkAstadyasho.amalam || 5||
valayAnAM nUpurANAM ki~NkiNInAM cha yoShitAm |
sapriyANAmabhUchChabdastumulo rAsamaNDale || 6||
tatrAtishushubhe tAbhirbhagavAn devakIsutaH |
madhye maNInAM haimAnAM mahAmarakato yathA || 7||
pAdanyAsairbhujavidhutibhiH sasmitairbhrUvilAsaiH
bhajyan madhyaishchalakuchapaTaiH kuNDalairgaNDalolaiH |
svidyan mukhyaH kabararashanAgranthayaH kR^iShNavadhvo
gAyantyastaM taDita iva tA meghachakre virejuH || 8||
uchchairjagurnR^ityamAnA raktakaNThyo ratipriyAH |
kR^iShNAbhimarshamuditA yadgItenedamAvR^itam || 9||
kAchitsamaM mukundena svarajAtIramishritAH |
unninye pUjitA tena prIyatA sAdhu sAdhviti |
tadeva dhruvamunninye tasyai mAnaM cha bahvadAt || 10||
kAchidrAsaparishrAntA pArshvasthasya gadAbhR^itaH |
jagrAha bAhunA skandhaM shlathadvalayamallikA || 11||
tatraikAMsagataM bAhuM kR^iShNasyotpalasaurabham |
chandanAliptamAghrAya hR^iShTaromA chuchumba ha || 12||
kasyAshchinnATyavikShiptakuNDalatviShamaNDitam |
gaNDaM gaNDe sandadhatyA adAttAmbUlacharvitam || 13||
nR^ityantI gAyatI kAchitkUjannUpuramekhalA |
pArshvasthAchyutahastAbjaM shrAntAdhAtstanayoH shivam || 14||
gopyo labdhvAchyutaM kAntaM shriya ekAntavallabham |
gR^ihItakaNThyastaddorbhyAM gAyantyastaM vijahrire || 15||
karNotpalAlakaviTa~Nkakapolagharma\-
vaktrashriyo valayanUpuraghoShavAdyaiH |
gopyaH samaM bhagavatA nanR^ituH svakesha\-
srastasrajo bhramaragAyakarAsagoShThyAm || 16||
evaM pariShva~NgakarAbhimarsha\-
snigdhekShaNoddAmavilAsahAsaiH |
reme ramesho vrajasundarIbhi\-
ryathArbhakaH svapratibimbavibhramaH || 17||
tada~Ngasa~NgapramudAkulendriyAH
keshAn dukUlaM kuchapaTTikAM vA |
nA~njaH prativyoDhumalaM vrajastriyo
visrastamAlAbharaNAH kurUdvaha || 18||
kR^iShNavikrIDitaM vIkShya mumuhuH khecharastriyaH |
kAmArditAH shashA~Nkashcha sagaNo vismito.abhavat || 19||
kR^itvA tAvantamAtmAnaM yAvatIrgopayoShitaH |
reme sa bhagavAMstAbhirAtmArAmo.api lIlayA || 20||
tAsAmativihAreNa shrAntAnAM vadanAni saH |
prAmR^ijatkaruNaH premNA shantamenA~NgapANinA || 21||
gopyaH sphuratpuraTakuNDalakuntalatviD\-
gaNDashriyA sudhitahAsanirIkShaNena |
mAnaM dadhatya R^iShabhasya jaguH kR^itAni
puNyAni tatkararuhasparshapramodAH || 22||
tAbhiryutaH shramamapohituma~Ngasa~Nga\-
ghR^iShTasrajaH sa kuchaku~Nkumara~njitAyAH |
gandharvapAlibhiranudruta AvishadvAH
shrAnto gajIbhiribharADiva bhinnasetuH || 23||
so.ambhasyalaM yuvatibhiH pariShichyamAnaH
premNekShitaH prahasatIbhiritastato.a~Nga |
vaimAnikaiH kusumavarShibhirIDyamAno
reme svayaM svaratiratra gajendralIlaH || 24||
tatashcha kR^iShNopavane jalasthala\-
prasUnagandhAnilajuShTadiktaTe |
chachAra bhR^i~NgapramadAgaNAvR^ito
yathA madachyuddviradaH kareNubhiH || 25||
evaM shashA~NkAMshuvirAjitA nishAH
sa satyakAmo.anuratAbalAgaNaH |
siSheva AtmanyavaruddhasaurataH
sarvAH sharatkAvyakathArasAshrayAH || 26||
rAjovAcha
saMsthApanAya dharmasya prashamAyetarasya cha |
avatIrNo hi bhagavAnaMshena jagadIshvaraH || 27||
sa kathaM dharmasetUnAM vaktA kartAbhirakShitA |
pratIpamAcharadbrahman paradArAbhimarshanam || 28||
AptakAmo yadupatiH kR^itavAn vai jugupsitam |
kimabhiprAya etaM naH saMshayaM Chindhi suvrata || 29||
shrIshuka uvAcha
dharmavyatikramo dR^iShTa IshvarANAM cha sAhasam |
tejIyasAM na doShAya vahneH sarvabhujo yathA || 30||
naitatsamAcharejjAtu manasApi hyanIshvaraH |
vinashyatyAcharan mauDhyAdyathA rudro.abdhijaM viSham || 31||
IshvarANAM vachaH satyaM tathaivAcharitaM kvachit |
teShAM yatsvavachoyuktaM buddhimAMstatsamAcharet || 32||
kushalAcharitenaiShAmiha svArtho na vidyate |
viparyayeNa vAnartho niraha~NkAriNAM prabho || 33||
kimutAkhilasattvAnAM tirya~NmartyadivaukasAm |
IshitushcheshitavyAnAM kushalAkushalAnvayaH || 34||
yatpAdapa~NkajaparAganiShevatR^iptA
yogaprabhAvavidhutAkhilakarmabandhAH |
svairaM charanti munayo.api na nahyamAnA\-
stasyechChayA.a.attavapuShaH kuta eva bandhaH || 35||
gopInAM tatpatInAM cha sarveShAmeva dehinAm |
yo.antashcharati so.adhyakShaH krIDaneneha dehabhAk || 36||
anugrahAya bhUtAnAM mAnuShaM dehamAsthitaH |
bhajate tAdR^ishIH krIDA yAH shrutvA tatparo bhavet || 37||
nAsUyan khalu kR^iShNAya mohitAstasya mAyayA |
manyamAnAH svapArshvasthAn svAn svAn dArAn vrajaukasaH || 38||
brahmarAtra upAvR^itte vAsudevAnumoditAH |
anichChantyo yayurgopyaH svagR^ihAn bhagavatpriyAH || 39||
vikrIDitaM vrajavadhUbhiridaM cha viShNoH
shraddhAnvito.anushR^iNuyAdatha varNayedyaH |
bhaktiM parAM bhagavati pratilabhya kAmaM
hR^idrogamAshvapahinotyachireNa dhIraH || 40||
iti shrImadbhAgavate mahApurANe pAramahaMsyAM
saMhitAyAM dashamaskandhe pUrvArdhe rAsakrIDAvarNanaM
nAma trayastriMsho.adhyAyaH || 33||
\iti
\section{.. OM namo bhagavate vAsudevAya ..}
\section{.. chatustriMsho.adhyAyaH \- 34 ..}
shrIshuka uvAcha
ekadA devayAtrAyAM gopAlA jAtakautukAH |
anobhiranaDudyuktaiH prayayuste.ambikAvanam || 1||
tatra snAtvA sarasvatyAM devaM pashupatiM vibhum |
AnarchurarhaNairbhaktyA devIM cha nR^ipate.ambikAm || 2||
gAvo hiraNyaM vAsAMsi madhu madhvannamAdR^itAH |
brAhmaNebhyo daduH sarve devo naH prIyatAmiti || 3||
UShuH sarasvatItIre jalaM prAshya dhR^itavratAH |
rajanIM tAM mahAbhAgA nandasunandakAdayaH || 4||
kashchinmahAnahistasmin vipine.atibubhukShitaH |
yadR^ichChayA.a.agato nandaM shayAnamurago.agrasIt || 5||
sa chukroshAhinA grastaH kR^iShNa kR^iShNa mahAnayam |
sarpo mAM grasate tAta prapannaM parimochaya || 6||
tasya chAkranditaM shrutvA gopAlAH sahasotthitAH |
grastaM cha dR^iShTvA vibhrAntAH sarpaM vivyadhurulmukaiH || 7||
alAtairdahyamAno.api nAmu~nchattamura~NgamaH |
tamaspR^ishatpadAbhyetya bhagavAn sAtvatAM patiH || 8||
sa vai bhagavataH shrImatpAdasparshahatAshubhaH |
bheje sarpavapurhitvA rUpaM vidyAdharArchitam || 9||
tamapR^ichChaddhR^iShIkeshaH praNataM samupasthitam |
dIpyamAnena vapuShA puruShaM hemamAlinam || 10||
ko bhavAn parayA lakShmyA rochate.adbhutadarshanaH |
kathaM jugupsitAmetAM gatiM vA prApito.avashaH || 11||
sarpa uvAcha
ahaM vidyAdharaH kashchitsudarshana iti shrutaH |
shriyA svarUpasampattyA vimAnenAcharaM dishaH || 12||
R^iShIn virUpAna~NgirasaH prAhasaM rUpadarpitaH |
tairimAM prApito yoniM pralabdhaiH svena pApmanA || 13||
shApo me.anugrahAyaiva kR^itastaiH karuNAtmabhiH |
yadahaM lokaguruNA padA spR^iShTo hatAshubhaH || 14||
taM tvAhaM bhavabhItAnAM prapannAnAM bhayApaham |
ApR^ichChe shApanirmuktaH pAdasparshAdamIvahan || 15||
prapanno.asmi mahAyogin mahApuruSha satpate |
anujAnIhi mAM deva sarvalokeshvareshvara || 16||
brahmadaNDAdvimukto.ahaM sadyaste.achyuta darshanAt |
yannAma gR^ihNannakhilAn shrotR^InAtmAnameva cha |
sadyaH punAti kiM bhUyastasya spR^iShTaH padA hi te || 17||
ityanuj~nApya dAshArhaM parikramyAbhivandya cha |
sudarshano divaM yAtaH kR^ichChrAnnandashcha mochitaH || 18||
nishAmya kR^iShNasya tadAtmavaibhavaM
vrajaukaso vismitachetasastataH |
samApya tasminniyamaM punarvrajaM
nR^ipAyayustatkathayanta AdR^itAH || 19||
kadAchidatha govindo rAmashchAdbhutavikramaH |
vijahraturvane rAtryAM madhyagau vrajayoShitAm || 20||
upagIyamAnau lalitaM strIjanairbaddhasauhR^idaiH |
svala~NkR^itAnuliptA~Ngau sragviNau virajo.ambarau || 21||
nishAmukhaM mAnayantAvuditoDupatArakam |
mallikAgandhamattAlijuShTaM kumudavAyunA || 22||
jagatuH sarvabhUtAnAM manaHshravaNama~Ngalam |
tau kalpayantau yugapatsvaramaNDalamUrchChitam || 23||
gopyastadgItamAkarNya mUrchChitA nAvidan nR^ipa |
sraMsaddukUlamAtmAnaM srastakeshasrajaM tataH || 24||
evaM vikrIDatoH svairaM gAyatoH sampramattavat |
sha~NkhachUDa iti khyAto dhanadAnucharo.abhyagAt || 25||
tayornirIkShato rAjaMstannAthaM pramadAjanam |
kroshantaM kAlayAmAsa dishyudIchyAmasha~NkitaH || 26||
kroshantaM kR^iShNa rAmeti vilokya svaparigraham |
yathA gA dasyunA grastA bhrAtarAvanvadhAvatAm || 27||
mA bhaiShTetyabhayArAvau shAlahastau tarasvinau |
AsedatustaM tarasA tvaritaM guhyakAdhamam || 28||
sa vIkShya tAvanuprAptau kAlamR^ityU ivodvijan |
visR^ijya strIjanaM mUDhaH prAdravajjIvitechChayA || 29||
tamanvadhAvadgovindo yatra yatra sa dhAvati |
jihIrShustachChiroratnaM tasthau rakShan striyo balaH || 30||
avidUra ivAbhyetya shirastasya durAtmanaH |
jahAra muShTinaivA~Nga sahachUDAmaNiM vibhuH || 31||
sha~NkhachUDaM nihatyaivaM maNimAdAya bhAsvaram |
agrajAyAdadAtprItyA pashyantInAM cha yoShitAm || 32||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe sha~NkhachUDavadho nAma chatustriMsho.adhyAyaH || 34||
\iti
\section{.. OM namo bhagavate vAsudevAya ..}
\section{.. pa~nchatriMsho.adhyAyaH \- 35 ..}
shrIshuka uvAcha
gopyaH kR^iShNe vanaM yAte tamanudrutachetasaH |
kR^iShNalIlAH pragAyantyo ninyurduHkhena vAsarAn || 1||
gopya UchuH
vAmabAhukR^itavAmakapolo
valgitabhruradharArpitaveNum |
komalA~NgulibhirAshritamArgaM
gopya Irayati yatra mukundaH || 2||
vyomayAnavanitAH sahasiddhai\-
rvismitAstadupadhArya salajjAH |
kAmamArgaNasamarpitachittAH
kashmalaM yayurapasmR^itanIvyaH || 3||
hanta chitramabalAH shR^iNutedaM
hArahAsa urasi sthiravidyut |
nandasUnurayamArtajanAnAM
narmado yarhi kUjitaveNuH || 4||
vR^indasho vrajavR^iShA mR^igagAvo
veNuvAdyahR^itachetasa ArAt |
dantadaShTakavalA dhR^itakarNA
nidritA likhitachitramivAsan || 5||
barhiNastabakadhAtupalAshai\-
rbaddhamallaparibarhaviDambaH |
karhichitsabala Ali sagopai\-
rgAH samAhvayati yatra mukundaH || 6||
	
tarhi bhagnagatayaH sarito vai
tatpadAmbujarajo.anilanItam |
spR^ihayatIrvayamivAbahupuNyAH
premavepitabhujAH stimitApaH || 7||
anucharaiH samanuvarNitavIrya
AdipUruSha ivAchalabhUtiH |
vanacharo giritaTeShu charantI\-
rveNunA.a.ahvayati gAH sa yadA hi || 8||
vanalatAstarava Atmani viShNuM
vya~njayantya iva puShpaphalADhyAH |
praNatabhAraviTapA madhudhArAH
premahR^iShTatanavaH sasR^ijuH sma || 9||
darshanIyatilako vanamAlA\-
divyagandhatulasImadhumattaiH |
alikulairalaghugItamabhIShTa\-
mAdriyan yarhi sandhitaveNuH || 10||
sarasi sArasahaMsaviha~NgA\-
shchArugItahR^itachetasa etya |
harimupAsata te yatachittA
hanta mIlitadR^isho dhR^itamaunAH || 11||
sahabalaH sragavataMsavilAsaH
sAnuShu kShitibhR^ito vrajadevyaH |
harShayan yarhi veNuraveNa
jAtaharSha uparambhati vishvam || 12||
mahadatikramaNasha~NkitachetA
mandamandamanugarjati meghaH |
suhR^idamabhyavarShatsumanobhi\-
shChAyayA cha vidadhatpratapatram || 13||
vividhagopacharaNeShu vidagdho
veNuvAdya urudhA nijashikShAH |
tava sutaH sati yadAdharabimbe
dattaveNuranayatsvarajAtIH || 14||
savanashastadupadhArya sureshAH
shakrasharvaparameShThipurogAH |
kavaya AnatakandharachittAH
kashmalaM yayuranishchitatattvAH || 15||
nijapadAbjadalairdhvajavajra\-
nIrajA~NkushavichitralalAmaiH |
vrajabhuvaH shamayan khuratodaM
varShmadhuryagatirIDitaveNuH || 16||
vrajati tena vayaM savilAsa
vIkShaNArpitamanobhavavegAH |
kujagatiM gamitA na vidAmaH
kashmalena kabaraM vasanaM vA || 17||
maNidharaH kvachidAgaNayan gA
mAlayA dayita gandhatulasyAH |
praNayino.anucharasya kadAMse
prakShipan bhujamagAyata yatra || 18||
kvaNitaveNuravava~nchitachittAH
kR^iShNamanvasata kR^iShNagR^ihiNyaH |
guNagaNArNamanugatya hariNyo
gopikA iva vimuktagR^ihAshAH || 19||
kundadAmakR^itakautukaveSho
gopagodhanavR^ito yamunAyAm |
nandasUnuranaghe tava vatso
narmadaH praNayiNAM vijahAra || 20||
mandavAyurupavAtyanakUlaM
mAnayan malayajasparshena |
vandinastamupadevagaNA ye
vAdyagItabalibhiH parivavruH || 21||
vatsalo vrajagavAM yadagadhro
vandyamAnacharaNaH pathi vR^iddhaiH |
kR^itsnagodhanamupohya dinAnte
gItaveNuranugeDitakIrtiH || 22||
utsavaM shramaruchApi dR^ishInA\-
munnayan khurarajashChuritasrak |
ditsayaiti suhR^idAshiSha eSha
devakIjaTharabhUruDurAjaH || 23||
madavighUrNitalochana ISha\-
nmAnadaH svasuhR^idAM vanamAlI |
badarapANDuvadano mR^idugaNDaM
maNDayan kanakakuNDalalakShmyA || 24||
yadupatirdviradarAjavihAro
yAminIpatirivaiSha dinAnte |
muditavaktra upayAti durantaM
mochayan vrajagavAM dinatApam || 25||
shrIshuka uvAcha
evaM vrajastriyo rAjan kR^iShNalIlA nu gAyatIH |
remire.ahaHsu tachchittAstanmanaskA mahodayAH || 26||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe vR^indAvanakrIDAyAM gopikAyugalagItaM
nAma pa~nchatriMsho.adhyAyaH || 35||
\iti
\section{.. OM namo bhagavate vAsudevAya ..}
\section{.. ShaTtriMsho.adhyAyaH \- 36 ..}
shrIshuka uvAcha
atha tarhyAgato goShThamariShTo vR^iShabhAsuraH |
mahIM mahAkakutkAyaH kampayan khuravikShatAm || 1||
rambhamANaH kharataraM padA cha vilikhan mahIm |
udyamya puchChaM vaprANi viShANAgreNa choddharan || 2||
ki~nchitki~nchichChakR^inmu~nchan mUtrayan stabdhalochanaH |
yasya nirhrAditenA~Nga niShThureNa gavAM nR^iNAm || 3||
patantyakAlato garbhAH sravanti sma bhayena vai |
nirvishanti ghanA yasya kakudyachalasha~NkayA || 4||
taM tIkShNashR^i~NgamudvIkShya gopyo gopAshcha tatrasuH |
pashavo dudruvurbhItA rAjan santyajya gokulam || 5||
kR^iShNa kR^iShNeti te sarve govindaM sharaNaM yayuH |
bhagavAnapi tadvIkShya gokulaM bhayavidrutam || 6||
mA bhaiShTeti girA.a.ashvAsya vR^iShAsuramupAhvayat |
gopAlaiH pashubhirmanda trAsitaiH kimasattama || 7||
baladarpahA duShTAnAM tvadvidhAnAM durAtmanAm |
ityAsphoTyAchyuto.ariShTaM talashabdena kopayan || 8||
sakhyuraMse bhujAbhogaM prasAryAvasthito hariH |
so.apyevaM kopito.ariShTaH khureNAvanimullikhan |
udyatpuchChabhramanmeghaH kruddhaH kR^iShNamupAdravat || 9||
agranyastaviShANAgraH stabdhAsR^iglochano.achyutam |
kaTAkShipyAdravattUrNamindramukto.ashaniryathA || 10||
gR^ihItvA shR^i~NgayostaM vA aShTAdasha padAni saH |
pratyapovAha bhagavAn gajaH pratigajaM yathA || 11||
so.apaviddho bhagavatA punarutthAya satvaraH |
ApatatsvinnasarvA~Ngo niHshvasan krodhamUrchChitaH || 12||
tamApatantaM sa nigR^ihya shR^i~NgayoH
padA samAkramya nipAtya bhUtale |
niShpIDayAmAsa yathA.a.ardramambaraM
kR^itvA viShANena jaghAna so.apatat || 13||
asR^igvaman mUtrashakR^itsamutsR^ijan
kShipaMshcha pAdAnanavasthitekShaNaH |
jagAma kR^ichChraM nirR^iteratha kShayaM
puShpaiH kiranto harimIDire surAH || 14||
evaM kukudminaM hatvA stUyamAnaH svajAtibhiH |
vivesha goShThaM sabalo gopInAM nayanotsavaH || 15||
ariShTe nihate daitye kR^iShNenAdbhutakarmaNA |
kaMsAyAthAha bhagavAn nArado devadarshanaH || 16||
yashodAyAH sutAM kanyAM devakyAH kR^iShNameva cha |
rAmaM cha rohiNIputraM vasudevena bibhyatA || 17||
nyastau svamitre nande vai yAbhyAM te puruShA hatAH |
nishamya tadbhojapatiH kopAtprachalitendriyaH || 18||
nishAtamasimAdatta vasudevajighAMsayA |
nivArito nAradena tatsutau mR^ityumAtmanaH || 19||
j~nAtvA lohamayaiH pAshairbabandha sahabhAryayA |
pratiyAte tu devarShau kaMsa AbhAShya keshinam || 20||
preShayAmAsa hanyetAM bhavatA rAmakeshavau |
tato muShTikachANUrashalatoshalakAdikAn || 21||
amAtyAn hastipAMshchaiva samAhUyAha bhojarAT |
bho bho nishamyatAmetadvIrachANUramuShTikau || 22||
nandavraje kilAsAte sutAvAnakadundubheH |
rAmakR^iShNau tato mahyaM mR^ityuH kila nidarshitaH || 23||
bhavadbhyAmiha samprAptau hanyetAM mallalIlayA |
ma~nchAH kriyantAM vividhA mallara~NgaparishritAH |
paurA jAnapadAH sarve pashyantu svairasaMyugam || 24||
mahAmAtra tvayA bhadra ra~NgadvAryupanIyatAm |
dvipaH kuvalayApIDo jahi tena mamAhitau || 25||
ArabhyatAM dhanuryAgashchaturdashyAM yathAvidhi |
vishasantu pashUn medhyAn bhUtarAjAya mIDhuShe || 26||
ityAj~nApyArthatantraj~na AhUya yadupu~Ngavam |
gR^ihItvA pANinA pANiM tato.akrUramuvAcha ha || 27||
bho bho dAnapate mahyaM kriyatAM maitramAdR^itaH |
nAnyastvatto hitatamo vidyate bhojavR^iShNiShu || 28||
atastvAmAshritaH saumya kAryagauravasAdhanam |
yathendro viShNumAshritya svArthamadhyagamadvibhuH || 29||
gachCha nandavrajaM tatra sutAvAnakadundubheH |
AsAte tAvihAnena rathenAnaya mA chiram || 30||
nisR^iShTaH kila me mR^ityurdevairvaikuNThasaMshrayaiH |
tAvAnaya samaM gopairnandAdyaiH sAbhyupAyanaiH || 31||
ghAtayiShya ihAnItau kAlakalpena hastinA |
yadi muktau tato mallairghAtaye vaidyutopamaiH || 32||
tayornihatayostaptAn vasudevapurogamAn |
tadbandhUnnihaniShyAmi vR^iShNibhojadashArhakAn || 33||
ugrasenaM cha pitaraM sthaviraM rAjyakAmukam |
tadbhrAtaraM devakaM cha ye chAnye vidviSho mama || 34||
tatashchaiShA mahI mitra bhavitrI naShTakaNTakA |
jarAsandho mama gururdvivido dayitaH sakhA || 35||
shambaro narako bANo mayyeva kR^itasauhR^idAH |
tairahaM surapakShIyAn hatvA bhokShye mahIM nR^ipAn || 36||
etajj~nAtvA.a.anaya kShipraM rAmakR^iShNAvihArbhakau |
dhanurmakhanirIkShArthaM draShTuM yadupurashriyam || 37||
akrUra uvAcha
rAjan manIShitaM sadhryak tava svAvadyamArjanam |
sid.hdhyasid.hdhyoH samaM kuryAddaivaM hi phalasAdhanam || 38||
manorathAn karotyuchchairjano daivahatAnapi |
yujyate harShashokAbhyAM tathApyAj~nAM karomi te || 39||
shrIshuka uvAcha
evamAdishya chAkrUraM mantriNashcha visR^ijya saH |
pravivesha gR^ihaM kaMsastathAkrUraH svamAlayam || 40||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe akrUrasampreShaNaM nAma ShaTtriMsho.adhyAyaH || 36||
\iti
\section{.. OM namo bhagavate vAsudevAya ..}
\section{.. saptatriMsho.adhyAyaH \- 37 ..}
shrIshuka uvAcha
keshI tu kaMsaprahitaH khurairmahIM
mahAhayo nirjarayan manojavaH |
saTAvadhUtAbhravimAnasa~NkulaM
kurvannabho heShitabhIShitAkhilaH || 1||
vishAlanetro vikaTAsyakoTaro
bR^ihadgalo nIlamahAmbudopamaH |
durAshayaH kaMsahitaM chikIrShu\-
rvrajaM sa nandasya jagAma kampayan || 2||
taM trAsayantaM bhagavAn svagokulaM
taddheShitairvAlavighUrNitAmbudam |
AtmAnamAjau mR^igayantamagraNI\-
rupAhvayatsa vyanadanmR^igendravat || 3||
sa taM nishAmyAbhimukho mukhena khaM
pibannivAbhyadravadatyamarShaNaH |
jaghAna padbhyAmaravindalochanaM
durAsadashchaNDajavo duratyayaH || 4||
tadva~nchayitvA tamadhokShajo ruShA
pragR^ihya dorbhyAM parividhya pAdayoH |
sAvaj~namutsR^ijya dhanuH shatAntare
yathoragaM tArkShyasuto vyavasthitaH || 5||
sa labdhasa.nj~naH punarutthito ruShA
vyAdAya keshI tarasA.a.apataddharim |
so.apyasya vaktre bhujamuttaraM smayan
praveshayAmAsa yathoragaM bile || 6||
dantA nipeturbhagavadbhujaspR^isha\-
ste keshinastaptamayaHspR^isho yathA |
bAhushcha taddehagato mahAtmano
yathA.a.amayaH saMvavR^idhe upekShitaH || 7||
samedhamAnena sa kR^iShNabAhunA
niruddhavAyushcharaNAMshcha vikShipan |
prasvinnagAtraH parivR^ittalochanaH
papAta leNDaM visR^ijan kShitau vyasuH || 8||
taddehataH karkaTikAphalopamAd\-
vyasorapAkR^iShya bhujaM mahAbhujaH |
avismito.ayatnahatArirutsmayaiH
prasUnavarShairdiviShadbhirIDitaH || 9||
devarShirupasa~Ngamya bhAgavatapravaro nR^ipa |
kR^iShNamakliShTakarmANaM rahasyetadabhAShata || 10||
kR^iShNa kR^iShNAprameyAtman yogesha jagadIshvara |
vAsudevAkhilAvAsa sAtvatAM pravara prabho || 11||
tvamAtmA sarvabhUtAnAmeko jyotirivaidhasAm |
gUDho guhAshayaH sAkShI mahApuruSha IshvaraH || 12||
AtmanA.a.atmA.a.ashrayaH pUrvaM mAyayA sasR^ije guNAn |
tairidaM satyasa~NkalpaH sR^ijasyatsyavasIshvaraH || 13||
sa tvaM bhUdharabhUtAnAM daityapramatharakShasAm |
avatIrNo vinAshAya setUnAM rakShaNAya cha || 14||
diShTyA te nihato daityo lIlayAyaM hayAkR^itiH |
yasya heShitasantrastAstyajantyanimiShA divam || 15||
chANUraM muShTikaM chaiva mallAnanyAMshcha hastinam |
kaMsaM cha nihataM drakShye parashvo.ahani te vibho || 16||
tasyAnu sha~NkhayavanamurANAM narakasya cha |
pArijAtApaharaNamindrasya cha parAjayam || 17||
udvAhaM vIrakanyAnAM vIryashulkAdilakShaNam |
nR^igasya mokShaNaM pApAddvArakAyAM jagatpate || 18||
syamantakasya cha maNerAdAnaM saha bhAryayA |
mR^itaputrapradAnaM cha brAhmaNasya svadhAmataH || 19||
pauNDrakasya vadhaM pashchAtkAshipuryAshcha dIpanam |
dantavaktrasya nidhanaM chaidyasya cha mahAkratau || 20||
yAni chAnyAni vIryANi dvArakAmAvasan bhavAn |
kartA drakShyAmyahaM tAni geyAni kavibhirbhuvi || 21||
atha te kAlarUpasya kShapayiShNoramuShya vai |
akShauhiNInAM nidhanaM drakShyAmyarjunasAratheH || 22||
vishuddhavij~nAnaghanaM svasaMsthayA
samAptasarvArthamamoghavA~nChitam |
svatejasA nityanivR^ittamAyA\-
guNapravAhaM bhagavantamImahi || 23||
tvAmIshvaraM svAshrayamAtmamAyayA
vinirmitAsheShavisheShakalpanam |
krIDArthamadyAttamanuShyavigrahaM
nato.asmi dhuryaM yaduvR^iShNisAtvatAm || 24||
shrIshuka uvAcha
evaM yadupatiM kR^iShNaM bhAgavatapravaro muniH |
praNipatyAbhyanuj~nAto yayau taddarshanotsavaH || 25||
bhagavAnapi govindo hatvA keshinamAhave |
pashUnapAlayatpAlaiH prItairvrajasukhAvahaH || 26||
ekadA te pashUn pAlAshchArayanto.adrisAnuShu |
chakrurnilAyanakrIDAshchorapAlApadeshataH || 27||
tatrAsan katichichchorAH pAlAshcha katichinnR^ipa |
meShAyitAshcha tatraike vijahrurakutobhayAH || 28||
mayaputro mahAmAyo vyomo gopAlaveShadhR^ik |
meShAyitAnapovAha prAyashchorAyito bahUn || 29||
giridaryAM vinikShipya nItaM nItaM mahAsuraH |
shilayA pidadhe dvAraM chatuHpa~nchAvasheShitAH || 30||
tasya tatkarma vij~nAya kR^iShNaH sharaNadaH satAm |
gopAn nayantaM jagrAha vR^ikaM haririvaujasA || 31||
sa nijaM rUpamAsthAya girIndrasadR^ishaM balI |
ichChan vimoktumAtmAnaM nAshaknodgrahaNAturaH || 32||
taM nigR^ihyAchyuto dorbhyAM pAtayitvA mahItale |
pashyatAM divi devAnAM pashumAramamArayat || 33||
guhApidhAnaM nirbhidya gopAnniHsArya kR^ichChrataH |
stUyamAnaH surairgopaiH pravivesha svagokulam || 34||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe vyomAsuravadho nAma saptatriMsho.adhyAyaH || 37||
\iti
\section{.. OM namo bhagavate vAsudevAya ..}
\section{.. aShTAtriMsho.adhyAyaH \- 38 ..}
shrIshuka uvAcha
akrUro.api cha tAM rAtriM madhupuryAM mahAmatiH |
uShitvA rathamAsthAya prayayau nandagokulam || 1||
gachChan pathi mahAbhAgo bhagavatyambujekShaNe |
bhaktiM parAmupagata evametadachintayat || 2||
kiM mayA.a.acharitaM bhadraM kiM taptaM paramaM tapaH |
kiM vAthApyarhate dattaM yaddrakShyAmyadya keshavam || 3||
mamaitaddurlabhaM manya uttamashlokadarshanam |
viShayAtmano yathA brahmakIrtanaM shUdrajanmanaH || 4||
maivaM mamAdhamasyApi syAdevAchyutadarshanam |
hriyamANaH kAlanadyA kvachittarati kashchana || 5||
mamAdyAma~NgalaM naShTaM phalavAMshchaiva me bhavaH |
yannamasye bhagavato yogidhyeyA~Nghripa~Nkajam || 6||
kaMso batAdyAkR^ita me.atyanugrahaM
drakShye.a~NghripadmaM prahito.amunA hareH |
kR^itAvatArasya duratyayaM tamaH
pUrve.ataran yannakhamaNDalatviShA || 7||
yadarchitaM brahmabhavAdibhiH suraiH
shriyA cha devyA munibhissasAtvataiH |
gochAraNAyAnucharaishcharadvane
yadgopikAnAM kuchaku~NkumA~Nkitam || 8||
drakShyAmi nUnaM sukapolanAsikaM
smitAvalokAruNaka~njalochanam |
mukhaM mukundasya guDAlakAvR^itaM
pradakShiNaM me pracharanti vai mR^igAH || 9||
apyadya viShNormanujatvamIyuSho
bhArAvatArAya bhuvo nijechChayA |
lAvaNyadhAmno bhavitopalambhanaM
mahyaM na na syAtphalama~njasA dR^ishaH || 10||
ya IkShitAhaMrahito.apyasatsatoH
svatejasApAstatamobhidAbhramaH |
svamAyayA.a.atman rachitaistadIkShayA
prANAkShadhIbhiH sadaneShvabhIyate || 11||
yasyAkhilAmIvahabhiH suma~Ngalai\-
rvAcho vimishrA guNakarmajanmabhiH |
prANanti shumbhanti punanti vai jaga\-
dyAstadviraktAH shavashobhanA matAH || 12||
sa chAvatIrNaH kila sAtvatAnvaye
svasetupAlAmaravaryasharmakR^it |
yasho vitanvan vraja Asta Ishvaro
gAyanti devA yadasheShama~Ngalam || 13||
taM tvadya nUnaM mahatAM gatiM guruM
trailokyakAntaM dR^ishimanmahotsavam |
rUpaM dadhAnaM shriya IpsitAspadaM
drakShye mamAsannuShasaH sudarshanAH || 14||
athAvarUDhaH sapadIshayo rathAt
pradhAnapuMsoshcharaNaM svalabdhaye |
dhiyA dhR^itaM yogibhirapyahaM dhruvaM
namasya AbhyAM cha sakhIn vanaukasaH || 15||
apya~NghrimUle patitasya me vibhuH
shirasyadhAsyannijahastapa~Nkajam |
dattAbhayaM kAlabhuja~NgaraMhasA
prodvejitAnAM sharaNaiShiNAM nR^iNAm || 16||
samarhaNaM yatra nidhAya kaushika\-
stathA balishchApa jagattrayendratAm |
yadvA vihAre vrajayoShitAM shramaM
sparshena saugandhikagandhyapAnudat || 17||
na mayyupaiShyatyaribuddhimachyutaH
kaMsasya dUtaH prahito.api vishvadR^ik |
yo.antarbahishchetasa etadIhitaM
kShetraj~na IkShatyamalena chakShuShA || 18||
apya~NghrimUle.avahitaM kR^itA~njaliM
mAmIkShitA sasmitamArdrayA dR^ishA |
sapadyapadhvastasamastakilbiSho
voDhA mudaM vItavisha~Nka UrjitAm || 19||
suhR^ittamaM j~nAtimananyadaivataM
dorbhyAM bR^ihadbhyAM parirapsyate.atha mAm |
AtmA hi tIrthIkriyate tadaiva me
bandhashcha karmAtmaka uchChvasityataH || 20||
labdhvA~Ngasa~NgaM praNataM kR^itA~njaliM
mAM vakShyate.akrUra tatetyurushravAH |
tadA vayaM janmabhR^ito mahIyasA
naivAdR^ito yo dhigamuShya janma tat || 21||
na tasya kashchiddayitaH suhR^ittamo
na chApriyo dveShya upekShya eva vA |
tathApi bhaktAn bhajate yathA tathA
suradrumo yadvadupAshrito.arthadaH || 22||
kiM chAgrajo mAvanataM yadUttamaH
smayan pariShvajya gR^ihItama~njalau |
gR^ihaM praveshyAptasamastasatkR^itaM
samprakShyate kaMsakR^itaM svabandhuShu || 23||
shrIshuka uvAcha
iti sa~nchintayan kR^iShNaM shvaphalkatanayo.adhvani |
rathena gokulaM prAptaH sUryashchAstagiriM nR^ipa || 24||
padAni tasyAkhilalokapAla\-
kirITajuShTAmalapAdareNoH |
dadarsha goShThe kShitikautukAni
vilakShitAnyabjayavA~NkushAdyaiH || 25||
taddarshanAhlAdavivR^iddhasambhramaH
premNordhvaromAshrukalAkulekShaNaH |
rathAdavaskandya sa teShvacheShTata
prabhoramUnya~NghrirajAMsyaho iti || 26||
dehambhR^itAmiyAnartho hitvA dambhaM bhiyaM shucham |
sandeshAdyo harerli~NgadarshanashravaNAdibhiH || 27||
dadarsha kR^iShNaM rAmaM cha vraje godohanaM gatau |
pItanIlAmbaradharau sharadamburuhekShaNau || 28||
kishorau shyAmalashvetau shrIniketau bR^ihadbhujau |
sumukhau sundaravarau baladviradavikramau || 29||
dhvajavajrA~NkushAmbhojaishchihnitaira~Nghribhirvrajam |
shobhayantau mahAtmAnAvanukroshasmitekShaNau || 30||
udAraruchirakrIDau sragviNau vanamAlinau |
puNyagandhAnuliptA~Ngau snAtau virajavAsasau || 31||
pradhAnapuruShAvAdyau jagaddhetU jagatpatI |
avatIrNau jagatyarthe svAMshena balakeshavau || 32||
disho vitimirA rAjan kurvANau prabhayA svayA |
yathA mArakataH shailo raupyashcha kanakAchitau || 33||
rathAttUrNamavaplutya so.akrUraH snehavihvalaH |
papAta charaNopAnte daNDavadrAmakR^iShNayoH || 34||
bhagavaddarshanAhlAdabAShpaparyAkulekShaNaH |
pulakAchitA~Nga autkaNThyAtsvAkhyAne nAshakannR^ipa || 35||
bhagavAMstamabhipretya rathA~NgA~NkitapANinA |
parirebhe.abhyupAkR^iShya prItaH praNatavatsalaH || 36||
sa~NkarShaNashcha praNatamupaguhya mahAmanAH |
gR^ihItvA pANinA pANI anayatsAnujo gR^iham || 37||
pR^iShTvAtha svAgataM tasmai nivedya cha varAsanam |
prakShAlya vidhivatpAdau madhuparkArhaNamAharat || 38||
nivedya gAM chAtithaye saMvAhya shrAntamAdR^itaH |
annaM bahuguNaM medhyaM shraddhayopAharadvibhuH || 39||
tasmai bhuktavate prItyA rAmaH paramadharmavit |
mukhavAsairgandhamAlyaiH parAM prItiM vyadhAtpunaH || 40||
paprachCha satkR^itaM nandaH kathaM stha niranugrahe |
kaMse jIvati dAshArha saunapAlA ivAvayaH || 41||
yo.avadhItsvasvasustokAn kroshantyA asutR^ip khalaH |
kiM nu svittatprajAnAM vaH kushalaM vimR^ishAmahe || 42||
itthaM sUnR^itayA vAchA nandena susabhAjitaH |
akrUraH paripR^iShTena jahAvadhvaparishramam || 43||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe akrUrAgamanaM nAmAShTAtriMsho.adhyAyaH || 38||
\iti
\section{.. OM namo bhagavate vAsudevAya ..}
\section{.. ekonachatvAriMsho.adhyAyaH \- 39 ..}
shrIshuka uvAcha
sukhopaviShTaH parya~Nke rAmakR^iShNorumAnitaH |
lebhe manorathAn sarvAn pathi yAn sa chakAra ha || 1||
kimalabhyaM bhagavati prasanne shrIniketane |
tathApi tatparA rAjanna hi vA~nChanti ki~nchana || 2||
sAyantanAshanaM kR^itvA bhagavAn devakIsutaH |
suhR^itsu vR^ittaM kaMsasya paprachChAnyachchikIrShitam || 3||
shrIbhagavAnuvAcha
tAta saumyAgataH kachchitsvAgataM bhadramastu vaH |
api svaj~nAtibandhUnAmanamIvamanAmayam || 4||
kiM nu naH kushalaM pR^ichChe edhamAne kulAmaye |
kaMse mAtulanAmnya~Nga svAnAM nastatprajAsu cha || 5||
aho asmadabhUdbhUri pitrorvR^ijinamAryayoH |
yaddhetoH putramaraNaM yaddhetorbandhanaM tayoH || 6||
diShTyAdya darshanaM svAnAM mahyaM vaH saumya kA~NkShitam |
sa~njAtaM varNyatAM tAta tavAgamanakAraNam || 7||
shrIshuka uvAcha
pR^iShTo bhagavatA sarvaM varNayAmAsa mAdhavaH |
vairAnubandhaM yaduShu vasudevavadhodyamam || 8||
yatsandesho yadarthaM vA dUtaH sampreShitaH svayam |
yaduktaM nAradenAsya svajanmAnakadundubheH || 9||
shrutvAkrUravachaH kR^iShNo balashcha paravIrahA |
prahasya nandaM pitaraM rAj~nA.a.adiShTaM vijaj~natuH || 10||
gopAn samAdishatso.api gR^ihyatAM sarvagorasaH |
upAyanAni gR^ihNIdhvaM yujyantAM shakaTAni cha || 11||
yAsyAmaH shvo madhupurIM dAsyAmo nR^ipate rasAn |
drakShyAmaH sumahatparva yAnti jAnapadAH kila |
evamAghoShayatkShatrA nandagopaH svagokule || 12||
gopyastAstadupashrutya babhUvurvyathitA bhR^isham |
rAmakR^iShNau purIM netumakrUraM vrajamAgatam || 13||
kAshchittatkR^itahR^ittApashvAsamlAnamukhashriyaH |
sraMsaddukUlavalayakeshagranthyashcha kAshchana || 14||
anyAshcha tadanudhyAnanivR^ittAsheShavR^ittayaH |
nAbhyajAnannimaM lokamAtmalokaM gatA iva || 15||
smarantyashchAparAH shaureranurAgasmiteritAH |
hR^idispR^ishashchitrapadA giraH sammumuhuH striyaH || 16||
gatiM sulalitAM cheShTAM snigdhahAsAvalokanam |
shokApahAni narmANi proddAmacharitAni cha || 17||
chintayantyo mukundasya bhItA virahakAtarAH |
sametAH sa~NghashaH prochurashrumukhyo.achyutAshayAH || 18||
gopya UchuH
aho vidhAtastava na kvachiddayA
saMyojya maitryA praNayena dehinaH |
tAMshchAkR^itArthAn viyuna~NkShyapArthakaM
vikrIDitaM te.arbhakacheShTitaM yathA || 19||
yastvaM pradarshyAsitakuntalAvR^itaM
mukundavaktraM sukapolamunnasam |
shokApanodasmitaleshasundaraM
karoShi pArokShyamasAdhu te kR^itam || 20||
krUrastvamakrUra samAkhyayA sma na\-
shchakShurhi dattaM harase batAj~navat |
yenaikadeshe.akhilasargasauShThavaM
tvadIyamadrAkShma vayaM madhudviShaH || 21||
na nandasUnuH kShaNabha~NgasauhR^idaH
samIkShate naH svakR^itAturA bata |
vihAya gehAn svajanAn sutAn patIM\-
staddAsyamaddhopagatA navapriyaH || 22||
sukhaM prabhAtA rajanIyamAshiShaH
satyA babhUvuH purayoShitAM dhruvam |
yAH sampraviShTasya mukhaM vrajaspateH
pAsyantyapA~NgotkalitasmitAsavam || 23||
tAsAM mukundo madhuma~njubhAShitai\-
rgR^ihItachittaH paravAn manasvyapi |
kathaM punarnaH pratiyAsyate.abalA
grAmyAH salajjasmitavibhramairbhraman || 24||
adya dhruvaM tatra dR^isho bhaviShyate
dAshArhabhojAndhakavR^iShNisAtvatAm |
mahotsavaH shrIramaNaM guNAspadaM
drakShyanti ye chAdhvani devakIsutam || 25||
maitadvidhasyAkaruNasya nAma bhU\-
dakrUraityetadatIva dAruNaH |
yo.asAvanAshvAsya suduHkhitaM janaM
priyAtpriyaM neShyati pAramadhvanaH || 26||
anArdradhIreSha samAsthito rathaM
tamanvamI cha tvarayanti durmadAH |
gopA anobhiH sthavirairupekShitaM
daivaM cha no.adya pratikUlamIhate || 27||
nivArayAmaH samupetya mAdhavaM
kiM no.akariShyan kulavR^iddhabAndhavAH |
mukundasa~NgAnnimiShArdhadustyajA\-
ddaivena vidhvaMsitadInachetasAm || 28||
yasyAnurAgalalitasmitavalgumantra\-
lIlAvalokaparirambhaNarAsagoShThyAm |
nItAH sma naH kShaNamiva kShaNadA vinA taM
gopyaH kathaM nvatitarema tamo durantam || 29||
yo.ahnaHkShaye vrajamanantasakhaH parIto
gopairvishankhurarajashChuritAlakasrak |
veNuM kvaNan smitakaTAkShanirIkShaNena
chittaM kShiNotyamumR^ite nu kathaM bhavema || 30||
shrIshuka uvAcha
evaM bruvANA virahAturA bhR^ishaM
vrajastriyaH kR^iShNaviShaktamAnasAH |
visR^ijya lajjAM ruruduH sma susvaraM
govinda dAmodara mAdhaveti || 31||
strINAmevaM rudantInAmudite savitaryatha |
akrUrashchodayAmAsa kR^itamaitrAdiko ratham || 32||
gopAstamanvasajjanta nandAdyAH shakaTaistataH |
AdAyopAyanaM bhUri kumbhAn gorasasambhR^itAn || 33||
gopyashcha dayitaM kR^iShNamanuvrajyAnura~njitAH |
pratyAdeshaM bhagavataH kA~NkShantyashchAvatasthire || 34||
tAstathA tapyatIrvIkShya svaprasthAne yadUttamaH |
sAntvayAmasa sapremairAyAsya iti dautyakaiH || 35||
yAvadAlakShyate keturyAvadreNU rathasya cha |
anuprasthApitAtmAno lekhyAnIvopalakShitAH || 36||
tA nirAshA nivavR^iturgovindavinivartane |
vishokA ahanI ninyurgAyantyaH priyacheShTitam || 37||
bhagavAnapi samprApto rAmAkrUrayuto nR^ipa |
rathena vAyuvegena kAlindImaghanAshinIm || 38||
tatropaspR^ishya pAnIyaM pItvA mR^iShTaM maNiprabham |
vR^ikShaShaNDamupavrajya sarAmo rathamAvishat || 39||
akrUrastAvupAmantrya niveshya cha rathopari |
kAlindyA hradamAgatya snAnaM vidhivadAcharat || 40||
nimajjya tasmin salile japan brahma sanAtanam |
tAveva dadR^ishe.akrUro rAmakR^iShNau samanvitau || 41||
tau rathasthau kathamiha sutAvAnakadundubheH |
tarhi svitsyandane na sta ityunmajjya vyachaShTa saH || 42||
tatrApi cha yathA pUrvamAsInau punareva saH |
nyamajjaddarshanaM yanme mR^iShA kiM salile tayoH || 43||
bhUyastatrApi so.adrAkShItstUyamAnamahIshvaram |
siddhachAraNagandharvairasurairnatakandharaiH || 44||
sahasrashirasaM devaM sahasraphaNamaulinam |
nIlAmbaraM bisashvetaM shR^i~NgaiH shvetamiva sthitam || 45||
tasyotsa~Nge ghanashyAmaM pItakausheyavAsasam |
puruShaM chaturbhujaM shAntaM padmapatrAruNekShaNam || 46||
chAruprasannavadanaM chAruhAsanirIkShaNam |
subhrUnnasaM chArukarNaM sukapolAruNAdharam || 47||
pralambapIvarabhujaM tu~NgAMsoraHsthalashriyam |
kambukaNThaM nimnanAbhiM valimatpallavodaram || 48||
bR^ihatkaTitaTashroNikarabhorudvayAnvitam |
chArujAnuyugaM chAruja~NghAyugalasaMyutam || 49||
tu~NgagulphAruNanakhavrAtadIdhitibhirvR^itam |
navA~Ngulya~NguShThadalairvilasatpAdapa~Nkajam || 50||
sumahArhamaNivrAtakirITakaTakA~NgadaiH |
kaTisUtrabrahmasUtrahAranUpurakuNDalaiH || 51||
bhrAjamAnaM padmakaraM sha~NkhachakragadAdharam |
shrIvatsavakShasaM bhrAjatkaustubhaM vanamAlinam || 52||
sunandanandapramukhaiH pArShadaiH sanakAdibhiH |
sureshairbrahmarudrAdyairnavabhishcha dvijottamaiH || 53||
prahlAdanAradavasupramukhairbhAgavatottamaiH |
stUyamAnaM pR^ithagbhAvairvachobhiramalAtmabhiH || 54||
shriyA puShTyA girA kAntyA kIrtyA tuShTyelayorjayA |
vidyayAvidyayA shaktyA mAyayA cha niShevitam || 55||
vilokya subhR^ishaM prIto bhaktyA paramayA yutaH |
hR^iShyattanUruho bhAvapariklinnAtmalochanaH || 56||
girA gadgadayAstauShItsattvamAlambya sAtvataH |
praNamya mUrdhnAvahitaH kR^itA~njalipuTaH shanaiH || 57||
iti shrImadbhAgavate mahApurANe pAramahaMsyAM saMhitAyAM
dashamaskndhe pUrvArdhe akrUrapratiyAne ekonachatvAriMsho.adhyAyaH || 39||
\iti
\section{.. OM namo bhagavate vAsudevAya ..}
\section{.. chatvAriMsho.adhyAyaH 40 ..}
akrUra uvAcha
nato.asmyahaM tvAkhilahetuhetuM
nArAyaNaM pUruShamAdyamavyayam |
yannAbhijAtAdaravindakoshA\-
dbrahmA.a.avirAsIdyata eSha lokaH || 1||
bhUstoyamagniH pavanaH khamAdi\-
rmahAnajAdirmana indriyANi |
sarvendriyArthA vibudhAshcha sarve
ye hetavaste jagato.a~Nga bhUtAH || 2||
naite svarUpaM vidurAtmanaste
hyajAdayo.anAtmatayA gR^ihItAH |
ajo.anubaddhaH sa guNairajAyA
guNAtparaM veda na te svarUpam || 3||
tvAM yogino yajantyaddhA mahApuruShamIshvaram |
sAdhyAtmaM sAdhibhUtaM cha sAdhidaivaM cha sAdhavaH || 4||
trayyA cha vidyayA kechittvAM vai vaitAnikA dvijAH |
yajante vitatairyaj~nairnAnArUpAmarAkhyayA || 5||
eke tvAkhilakarmANi sannyasyopashamaM gatAH |
j~nAnino j~nAnayaj~nena yajanti j~nAnavigraham || 6||
anye cha saMskR^itAtmAno vidhinAbhihitena te |
yajanti tvanmayAstvAM vai bahumUrtyekamUrtikam || 7||
tvAmevAnye shivoktena mArgeNa shivarUpiNam |
bahvAchAryavibhedena bhagavan samupAsate || 8||
sarva eva yajanti tvAM sarvadevamayeshvaram |
ye.apyanyadevatAbhaktA yadyapyanyadhiyaH prabho || 9||
yathAdriprabhavA nadyaH parjanyApUritAH prabho |
vishanti sarvataH sindhuM tadvattvAM gatayo.antataH || 10||
sattvaM rajastama iti bhavataH prakR^iterguNAH |
teShu hi prAkR^itAH protA AbrahmasthAvarAdayaH || 11||
tubhyaM namaste.astvaviShaktadR^iShTaye
sarvAtmane sarvadhiyAM cha sAkShiNe |
guNapravAho.ayamavidyayA kR^itaH
pravartate devanR^itiryagAtmasu || 12||
agnirmukhaM te.avanira~NghrirIkShaNaM
sUryo nabho nAbhiratho dishaH shrutiH |
dyauH kaM surendrAstava bAhavo.arNavAH
kukShirmarutprANabalaM prakalpitam || 13||
romANi vR^ikShauShadhayaH shiroruhA
meghAH parasyAsthi nakhAni te.adrayaH |
nimeShaNaM rAtryahanI prajApati\-
rmeDhrastu vR^iShTistava vIryamiShyate || 14||
tvayyavyayAtman puruShe prakalpitA
lokAH sapAlA bahujIvasa~NkulAH |
yathA jale sa~njihate jalaukaso\-
.apyudumbare vA mashakA manomaye || 15||
yAni yAnIha rUpANi krIDanArthaM bibharShi hi |
tairAmR^iShTashucho lokA mudA gAyanti te yashaH || 16||
namaH kAraNamatsyAya pralayAbdhicharAya cha |
hayashIrShNe namastubhyaM madhukaiTabhamR^ityave || 17||
akUpArAya bR^ihate namo mandaradhAriNe |
kShityuddhAravihArAya namaH sUkaramUrtaye || 18||
namaste.adbhutasiMhAya sAdhulokabhayApaha |
vAmanAya namastubhyaM krAntatribhuvanAya cha || 19||
namo bhR^iguNAM pataye dR^iptakShatravanachChide |
namaste raghuvaryAya rAvaNAntakarAya cha || 20||
namaste vAsudevAya namaH sa~NkarShaNAya cha |
pradyumnAyAniruddhAya sAttvatAM pataye namaH || 21||
namo buddhAya shuddhAya daityadAnavamohine |
mlechChaprAyakShatrahantre namaste kalkirUpiNe || 22||
bhagavan jIvaloko.ayaM mohitastava mAyayA |
ahammametyasadgrAho bhrAmyate karmavartmasu || 23||
ahaM chAtmA.a.atmajAgAradArArthasvajanAdiShu |
bhramAmi svapnakalpeShu mUDhaH satyadhiyA vibho || 24||
anityAnAtmaduHkheShu viparyayamatirhyaham |
dvandvArAmastamoviShTo na jAne tvAtmanaH priyam || 25||
yathAbudho jalaM hitvA pratichChannaM tadudbhavaiH |
abhyeti mR^igatR^iShNAM vai tadvattvAhaM parA~NmukhaH || 26||
notsahe.ahaM kR^ipaNadhIH kAmakarmahataM manaH |
roddhuM pramAthibhishchAkShairhriyamANamitastataH || 27||
so.ahaM tavA~Nghryupagato.asmyasatAM durApaM
tachchApyahaM bhavadanugraha Isha manye |
puMso bhavedyarhi saMsaraNApavarga\-
stvayyabjanAbha sadupAsanayA matiH syAt || 28||
namo vij~nAnamAtrAya sarvapratyayahetave |
puruSheshapradhAnAya brahmaNe.anantashaktaye || 29||
namaste vAsudevAya sarvabhUtakShayAya cha |
hR^iShIkesha namastubhyaM prapannaM pAhi mAM prabho || 30||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe akrUrastutirnAma chatvAriMsho.adhyAyaH || 40||
\iti
\section{.. OM namo bhagavate vAsudevAya ..}
\section{.. ekachatvAriMsho.adhyAyaH \- 41 ..}
shrIshuka uvAcha
stuvatastasya bhagavAn darshayitvA jale vapuH |
bhUyaH samAharatkR^iShNo naTo nATyamivAtmanaH || 1||
so.api chAntarhitaM vIkShya jalAdunmajya satvaraH |
kR^itvA chAvashyakaM sarvaM vismito rathamAgamat || 2||
tamapR^ichChaddhR^iShIkeshaH kiM te dR^iShTamivAdbhutam |
bhUmau viyati toye vA tathA tvAM lakShayAmahe || 3||
akrUra uvAcha
adbhutAnIha yAvanti bhUmau viyati vA jale |
tvayi vishvAtmake tAni kiM me.adR^iShTaM vipashyataH || 4||
yatrAdbhutAni sarvANi bhUmau viyati vA jale |
taM tvAnupashyato brahman kiM me dR^iShTamihAdbhutam || 5||
ityuktvA chodayAmAsa syandanaM gAndinIsutaH |
mathurAmanayadrAmaM kR^iShNaM chaiva dinAtyaye || 6||
mArge grAmajanA rAjaMstatra tatropasa~NgatAH |
vasudevasutau vIkShya prItA dR^iShTiM na chAdaduH || 7||
tAvadvrajaukasastatra nandagopAdayo.agrataH |
puropavanamAsAdya pratIkShanto.avatasthire || 8||
tAn sametyAha bhagavAnakrUraM jagadIshvaraH |
gR^ihItvA pANinA pANiM prashritaM prahasanniva || 9||
bhavAn pravishatAmagre saha yAnaH purIM gR^iham |
vayaM tvihAvamuchyAtha tato drakShyAmahe purIm || 10||
akrUra uvAcha
nAhaM bhavadbhyAM rahitaH pravekShye mathurAM prabho |
tyaktuM nArhasi mAM nAtha bhaktaM te bhaktavatsala || 11||
AgachCha yAma gehAnnaH sanAthAn kurvadhokShaja |
sahAgrajaH sagopAlaiH suhR^idbhishcha suhR^ittama || 12||
punIhi pAdarajasA gR^ihAnno gR^ihamedhinAm |
yachChauchenAnutR^ipyanti pitaraH sAgnayaH surAH || 13||
avanijyA~NghriyugalamAsIchChlokyo balirmahAn |
aishvaryamatulaM lebhe gatiM chaikAntinAM tu yA || 14||
Apaste.a~NghryavanejanyastrIMllokAn shuchayo.apunan |
shirasAdhatta yAH sharvaH svaryAtAH sagarAtmajAH || 15||
deva deva jagannAtha puNyashravaNakIrtana |
yadUttamottamashloka nArAyaNa namo.astu te || 16||
shrIbhagavanuvAcha
AyAsye bhavato gehamahamAryasamanvitaH |
yaduchakradruhaM hatvA vitariShye suhR^itpriyam || 17||
shrIshuka uvAcha
evamukto bhagavatA so.akrUro vimanA iva |
purIM praviShTaH kaMsAya karmAvedya gR^ihaM yayau || 18||
athAparAhne bhagavAn kR^iShNaH sa~NkarShaNAnvitaH |
mathurAM prAvishadgopairdidR^ikShuH parivAritaH || 19||
dadarsha tAM sphATikatu~Ngagopura\-
dvArAM bR^ihaddhemakapATatoraNAm |
tAmrArakoShThAM parikhAdurAsadA\-
mudyAnaramyopavanopashobhitAm || 20||
sauvarNashR^i~NgATakaharmyaniShkuTaiH
shreNIsabhAbhirbhavanairupaskR^itAm |
vaidUryavajrAmalanIlavidrumai\-
rmuktAharidbhirvalabhIShu vediShu || 21||
juShTeShu jAlAmukharandhrakuTTime\-
ShvAviShTapArAvatabarhinAditAm |
saMsiktarathyA.a.apaNamArgachatvarAM
prakIrNamAlyA~NkuralAjataNDulAm || 22||
ApUrNakumbhairdadhichandanokShitaiH
prasUnadIpAvalibhiH sapallavaiH |
savR^indarambhAkramukaiH saketubhiH
svala~NkR^itadvAragR^ihAM sapaTTikaiH || 23||
tAM sampraviShTau vasudevanandanau
vR^itau vayasyairnaradevavartmanA |
draShTuM samIyustvaritAH purastriyo
harmyANi chaivAruruhurnR^ipotsukAH || 24||
kAshchidviparyagdhR^itavastrabhUShaNA
vismR^itya chaikaM yugaleShvathAparAH |
kR^itaikapatrashravaNaikanUpurA
nA~NktvA dvitIyaM tvaparAshcha lochanam || 25||
ashnantya ekAstadapAsya sotsavA
abhyajyamAnA akR^itopamajjanAH |
svapantya utthAya nishamya niHsvanaM
prapAyayantyo.arbhamapohya mAtaraH || 26||
manAMsi tAsAmaravindalochanaH
pragalbhalIlAhasitAvalokaiH |
jahAra mattadviradendravikramo
dR^ishAM dadachChrIramaNAtmanotsavam || 27||
dR^iShTvA muhuH shrutamanudrutachetasastaM
tatprekShaNotsmitasudhokShaNalabdhamAnAH |
AnandamUrtimupaguhya dR^ishA.a.atmalabdhaM
hR^iShyattvacho jahuranantamarindamAdhim || 28||
prAsAdashikharArUDhAH prItyutphullamukhAmbujAH |
abhyavarShan saumanasyaiH pramadA balakeshavau || 29||
dadhyakShataiH sodapAtraiH sraggandhairabhyupAyanaiH |
tAvAnarchuH pramuditAstatra tatra dvijAtayaH || 30||
UchuH paurA aho gopyastapaH kimacharan mahat |
yA hyetAvanupashyanti naralokamahotsavau || 31||
rajakaM ka~nchidAyAntaM ra~NgakAraM gadAgrajaH |
dR^iShTvAyAchata vAsAMsi dhautAnyatyuttamAni cha || 32||
dehyAvayoH samuchitAnya~Nga vAsAMsi chArhatoH |
bhaviShyati paraM shreyo dAtuste nAtra saMshayaH || 33||
sa yAchito bhagavatA paripUrNena sarvataH |
sAkShepaM ruShitaH prAha bhR^ityo rAj~naH sudurmadaH || 34||
IdR^ishAnyeva vAsAMsI nityaM girivanecharAH |
paridhatta kimudvR^ittA rAjadravyANyabhIpsatha || 35||
yAtAshu bAlishA maivaM prArthyaM yadi jijIviShA |
badhnanti ghnanti lumpanti dR^iptaM rAjakulAni vai || 36||
evaM vikatthamAnasya kupito devakIsutaH |
rajakasya karAgreNa shiraH kAyAdapAtayat || 37||
tasyAnujIvinaH sarve vAsaH koshAn visR^ijya vai |
dudruvuH sarvato mArgaM vAsAMsi jagR^ihe.achyutaH || 38||
vasitvA.a.atmapriye vastre kR^iShNaH sa~NkarShaNastathA |
sheShANyAdatta gopebhyo visR^ijya bhuvi kAnichit || 39||
tatastu vAyakaH prItastayorveShamakalpayat |
vichitravarNaishchaileyairAkalpairanurUpataH || 40||
nAnAlakShaNaveShAbhyAM kR^iShNarAmau virejatuH |
svala~NkR^itau bAlagajau parvaNIva sitetarau || 41||
tasya prasanno bhagavAn prAdAtsArUpyamAtmanaH |
shriyaM cha paramAM loke balaishvaryasmR^itIndriyam || 42||
tataH sudAmno bhavanaM mAlAkArasya jagmatuH |
tau dR^iShTvA sa samutthAya nanAma shirasA bhuvi || 43||
tayorAsanamAnIya pAdyaM chArghyArhaNAdibhiH |
pUjAM sAnugayoshchakre sraktAmbUlAnulepanaiH || 44||
prAha naH sArthakaM janma pAvitaM cha kulaM prabho |
pitR^idevarShayo mahyaM tuShTA hyAgamanena vAm || 45||
bhavantau kila vishvasya jagataH kAraNaM param |
avatIrNAvihAMshena kShemAya cha bhavAya cha || 46||
na hi vAM viShamA dR^iShTiH suhR^idorjagadAtmanoH |
samayoH sarvabhUteShu bhajantaM bhajatorapi || 47||
tAvAj~nApayataM bhR^ityaM kimahaM karavANi vAm |
puMso.atyanugraho hyeSha bhavadbhiryanniyujyate || 48||
ityabhipretya rAjendra sudAmA prItamAnasaH |
shastaiH sugandhaiH kusumairmAlA virachitA dadau || 49||
tAbhiH svala~NkR^itau prItau kR^iShNarAmau sahAnugau |
praNatAya prapannAya dadaturvaradau varAn || 50||
so.api vavre.achalAM bhaktiM tasminnevAkhilAtmani |
tadbhakteShu cha sauhArdaM bhUteShu cha dayAM parAm || 51||
iti tasmai varaM dattvA shriyaM chAnvayavardhinIm |
balamAyuryashaHkAntiM nirjagAma sahAgrajaH || 52||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe purapravesho namaikachatvAriMsho.adhyAyaH || 41||
\iti
\section{.. OM namo bhagavate vAsudevAya ..}
\section{.. dvichatvAriMsho.adhyAyaH \- 42 ..}
shrIshuka uvAcha
atha vrajan rAjapathena mAdhavaH
striyaM gR^ihItA~NgavilepabhAjanAm |
vilokya kubjAM yuvatIM varAnanAM
paprachCha yAntIM prahasan rasapradaH || 1||
kA tvaM varorvetadu hAnulepanaM
kasyA~Ngane vA kathayasva sAdhu naH |
dehyAvayora~NgavilepamuttamaM
shreyastataste na chirAdbhaviShyati || 2||
sairandhryuvAcha
dAsyasmyahaM sundara kaMsasammatA
trivakranAmA hyanulepakarmaNi |
madbhAvitaM bhojapateratipriyaM
vinA yuvAM ko.anyatamastadarhati || 3||
rUpapeshalamAdhuryahasitAlApavIkShitaiH |
dharShitAtmA dadau sAndramubhayoranulepanam || 4||
tatastAva~NgarAgeNa svavarNetarashobhinA |
samprAptaparabhAgena shushubhAte.anura~njitau || 5||
prasanno bhagavAn kubjAM trivakrAM ruchirAnanAm |
R^ijvIM kartuM manashchakre darshayan darshane phalam || 6||
padbhyAmAkramya prapade dvya~NgulyuttAnapANinA |
pragR^ihya chibuke.adhyAtmamudanInamadachyutaH || 7||
sA tadarjusamAnA~NgI bR^ihachChroNipayodharA |
mukundasparshanAtsadyo babhUva pramadottamA || 8||
tato rUpaguNaudAryasampannA prAha keshavam |
uttarIyAntamAkR^iShya smayantI jAtahR^ichChayA || 9||
ehi vIra gR^ihaM yAmo na tvAM tyaktumihotsahe |
tvayonmathitachittAyAH prasIda puruSharShabha || 10||
evaM striyA yAchyamAnaH kR^iShNo rAmasya pashyataH |
mukhaM vIkShyAnugAnAM cha prahasaMstAmuvAcha ha || 11||
eShyAmi te gR^ihaM subhrUH puMsAmAdhivikarshanam |
sAdhitArtho.agR^ihANAM naH pAnthAnAM tvaM parAyaNam || 12||
visR^ijya mAdhvyA vANyA tAM vrajan mArge vaNikpathaiH |
nAnopAyanatAmbUlasraggandhaiH sAgrajo.architaH || 13||
taddarshanasmarakShobhAdAtmAnaM nAvidan striyaH |
visrastavAsaHkabaravalayAlekhyamUrtayaH || 14||
tataH paurAn pR^ichChamAno dhanuShaH sthAnamachyutaH |
tasmin praviShTo dadR^ishe dhanuraindramivAdbhutam || 15||
puruShairbahubhirguptamarchitaM paramarddhimat |
vAryamANo nR^ibhiH kR^iShNaH prasahya dhanurAdade || 16||
kareNa vAmena salIlamuddhR^itaM
sajyaM cha kR^itvA nimiSheNa pashyatAm |
nR^iNAM vikR^iShya prababha~nja madhyato
yathekShudaNDaM madakaryurukramaH || 17||
dhanuSho bhajyamAnasya shabdaH khaM rodasI dishaH |
pUrayAmAsa yaM shrutvA kaMsastrAsamupAgamat || 18||
tadrakShiNaH sAnucharAH kupitA AtatAyinaH |
grahItukAmA AvavrurgR^ihyatAM vadhyatAmiti || 19||
atha tAn durabhiprAyAn vilokya balakeshavau |
kruddhau dhanvana AdAya shakale tAMshcha jaghnatuH || 20||
balaM cha kaMsaprahitaM hatvA shAlAmukhAttataH |
niShkramya cheraturhR^iShTau nirIkShya purasampadaH || 21||
tayostadadbhutaM vIryaM nishAmya puravAsinaH |
tejaH prAgalbhyaM rUpaM cha menire vibudhottamau || 22||
tayorvicharatoH svairamAdityo.astamupeyivAn |
kR^iShNarAmau vR^itau gopaiH purAchChakaTamIyatuH || 23||
gopyo mukundavigame virahAturA yAH
AshAsatAshiSha R^itA madhupuryabhUvan |
sampashyatAM puruShabhUShaNagAtralakShmIM
hitvetarAn nu bhajatashchakame.ayanaM shrIH || 24||
avaniktA~Nghriyugalau bhuktvA kShIropasechanam |
UShatustAM sukhaM rAtriM j~nAtvA kaMsachikIrShitam || 25||
kaMsastu dhanuSho bha~NgaM rakShiNAM svabalasya cha |
vadhaM nishamya govindarAmavikrIDitaM param || 26||
dIrghaprajAgaro bhIto durnimittAni durmatiH |
bahUnyachaShTobhayathA mR^ityordautyakarANi cha || 27||
adarshanaM svashirasaH pratirUpe cha satyapi |
asatyapi dvitIye cha dvairUpyaM jyotiShAM tathA || 28||
ChidrapratItishChAyAyAM prANaghoShAnupashrutiH |
svarNapratItirvR^ikSheShu svapadAnAmadarshanam || 29||
svapne pretapariShva~NgaH kharayAnaM viShAdanam |
yAyAnnaladamAlyekastailAbhyakto digambaraH || 30||
anyAni chetthaM bhUtAni svapnajAgaritAni cha |
pashyan maraNasantrasto nidrAM lebhe na chintayA || 31||
vyuShTAyAM nishi kauravya sUrye chAdbhyaH samutthite |
kArayAmAsa vai kaMso mallakrIDAmahotsavam || 32||
AnarchuH puruShA ra~NgaM tUryabheryashcha jaghnire |
ma~nchAshchAla~NkR^itAH sragbhiH patAkAchailatoraNaiH || 33||
teShu paurA jAnapadA brahmakShatrapurogamAH |
yathopajoShaM vivishU rAjAnashcha kR^itAsanAH || 34||
kaMsaH parivR^ito.amAtyai rAjama~ncha upAvishat |
maNDaleshvaramadhyastho hR^idayena vidUyatA || 35||
vAdyamAneShu tUryeShu mallatAlottareShu cha |
mallAH svala~NkR^itA dR^iptAH sopAdhyAyAH samAvishan || 36||
chANUro muShTikaH kUTaH shalastoshala eva cha |
ta AsedurupasthAnaM valguvAdyapraharShitAH || 37||
nandagopAdayo gopA bhojarAjasamAhutAH |
niveditopAyanAsta ekasmin ma~ncha Avishan || 38||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe mallara~NgopavarNanaM nAma dvichatvAriMsho.adhyAyaH || 42||
\iti
\section{.. OM namo bhagavate vAsudevAya ..}
\section{.. trichatvAriMsho.adhyAyaH \- 43 ..}
shrIshuka uvAcha
atha kR^iShNashcha rAmashcha kR^itashauchau parantapa |
malladundubhinirghoShaM shrutvA draShTumupeyatuH || 1||
ra~NgadvAraM samAsAdya tasmin nAgamavasthitam |
apashyatkuvalayApIDaM kR^iShNo.ambaShThaprachoditam || 2||
baddhvA parikaraM shauriH samuhya kuTilAlakAn |
uvAcha hastipaM vAchA meghanAdagabhIrayA || 3||
ambaShThAmbaShTha mArgaM nau dehyapakrama mA chiram |
no chetsaku~njaraM tvAdya nayAmi yamasAdanam || 4||
evaM nirbhartsito.ambaShThaH kupitaH kopitaM gajam |
chodayAmAsa kR^iShNAya kAlAntakayamopamam || 5||
karIndrastamabhidrutya kareNa tarasAgrahIt |
karAdvigalitaH so.amuM nihatyA~NghriShvalIyata || 6||
sa~NkruddhastamachakShANo ghrANadR^iShTiH sa keshavam |
parAmR^ishatpuShkareNa sa prasahya vinirgataH || 7||
puchChe pragR^ihyAtibalaM dhanuShaH pa~nchaviMshatim |
vichakarSha yathA nAgaM suparNa iva lIlayA || 8||
sa paryAvartamAnena savyadakShiNato.achyutaH |
babhrAma bhrAmyamANena govatseneva bAlakaH || 9||
tato.abhimukhamabhyetya pANinA.a.ahatya vAraNam |
prAdravan pAtayAmAsa spR^ishyamAnaH pade pade || 10||
sa dhAvan krIDayA bhUmau patitvA sahasotthitaH |
taM matvA patitaM kruddho dantAbhyAM so.ahanatkShitim || 11||
svavikrame pratihate ku~njarendro.atyamarShitaH |
chodyamAno mahAmAtraiH kR^iShNamabhyadravadruShA || 12||
tamApatantamAsAdya bhagavAnmadhusUdanaH |
nigR^ihya pANinA hastaM pAtayAmAsa bhUtale || 13||
patitasya padA.a.akramya mR^igendra iva lIlayA |
dantamutpATya tenebhaM hastipAMshchAhanaddhariH || 14||
mR^itakaM dvipamutsR^ijya dantapANiH samAvishat |
aMsanyastaviShANo.asR^i~Nmadabindubhira~NkitaH |
virUDhasvedakaNikAvadanAmburuho babhau || 15||
vR^itau gopaiH katipayairbaladevajanArdanau |
ra~NgaM vivishatU rAjan gajadantavarAyudhau || 16||
mallAnAmashanirnR^iNAM naravaraH strINAM smaro mUrtimAn
gopAnAM svajano.asatAM kShitibhujAM shAstA svapitroH shishuH |
mR^ityurbhojapatervirADaviduShAM tattvaM paraM yoginAM
vR^iShNInAM paradevateti vidito ra~NgaM gataH sAgrajaH || 17||
hataM kuvalayApIDaM dR^iShTvA tAvapi durjayau |
kaMso manasvyapi tadA bhR^ishamudvivije nR^ipa || 18||
tau rejatU ra~Ngagatau mahAbhujau
vichitraveShAbharaNasragambarau |
yathA naTAvuttamaveShadhAriNau
manaH kShipantau prabhayA nirIkShatAm || 19||
nirIkShya tAvuttamapUruShau janA
ma~nchasthitA nAgararAShTrakA nR^ipa |
praharShavegotkalitekShaNAnanAH
papurna tR^iptA nayanaistadAnanam || 20||
pibanta iva chakShurbhyAM lihanta iva jihvayA |
jighranta iva nAsAbhyAM shliShyanta iva bAhubhiH || 21||
UchuH parasparaM te vai yathAdR^iShTaM yathAshrutam |
tadrUpaguNamAdhuryaprAgalbhyasmAritA iva || 22||
etau bhagavataH sAkShAddharernArAyaNasya hi |
avatIrNAvihAMshena vasudevasya veshmani || 23||
eSha vai kila devakyAM jAto nItashcha gokulam |
kAlametaM vasan gUDho vavR^idhe nandaveshmani || 24||
pUtanAnena nItAntaM chakravAtashcha dAnavaH |
arjunau guhyakaH keshI dhenuko.anye cha tadvidhAH || 25||
gAvaH sapAlA etena dAvAgneH parimochitAH |
kAliyo damitaH sarpa indrashcha vimadaH kR^itaH || 26||
saptAhamekahastena dhR^ito.adripravaro.amunA |
varShavAtAshanibhyashcha paritrAtaM cha gokulam || 27||
gopyo.asya nityamuditahasitaprekShaNaM mukham |
pashyantyo vividhAMstApAMstaranti smAshramaM mudA || 28||
vadantyanena vaMsho.ayaM yadoH subahuvishrutaH |
shriyaM yasho mahatvaM cha lapsyate parirakShitaH || 29||
ayaM chAsyAgrajaH shrImAn rAmaH kamalalochanaH |
pralambo nihato yena vatsako ye bakAdayaH || 30||
janeShvevaM bruvANeShu tUryeShu ninadatsu cha |
kR^iShNarAmau samAbhAShya chANUro vAkyamabravIt || 31||
he nandasUno he rAma bhavantau vIrasammatau |
niyuddhakushalau shrutvA rAj~nA.a.ahUtau didR^ikShuNA || 32||
priyaM rAj~naH prakurvantyaH shreyo vindanti vai prajAH |
manasA karmaNA vAchA viparItamato.anyathA || 33||
nityaM pramuditA gopA vatsapAlA yathA sphuTam |
vaneShu mallayuddhena krIDantashchArayanti gAH || 34||
tasmAdrAj~naH priyaM yUyaM vayaM cha karavAma he |
bhUtAni naH prasIdanti sarvabhUtamayo nR^ipaH || 35||
tannishamyAbravItkR^iShNo deshakAlochitaM vachaH |
niyuddhamAtmano.abhIShTaM manyamAno.abhinandya cha || 36||
prajA bhojapaterasya vayaM chApi vanecharAH |
karavAma priyaM nityaM tannaH paramanugrahaH || 37||
bAlA vayaM tulyabalaiH krIDiShyAmo yathochitam |
bhavenniyuddhaM mAdharmaH spR^ishenmallasabhAsadaH || 38||
chANUra uvAcha
na bAlo na kishorastvaM balashcha balinAM varaH |
lIlayebho hato yena sahasradvipasattvabhR^it || 39||
tasmAdbhavadbhyAM balibhiryoddhavyaM nAnayo.atra vai |
mayi vikrama vArShNeya balena saha muShTikaH || 40||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe kuvalayApIDavadho nAma trichatvAriMsho.adhyAyaH || 43||
\iti
\section{.. OM namo bhagavate vAsudevAya ..}
\section{.. chatushchatvAriMsho.adhyAyaH \- 44 ..}
shrIshuka uvAcha
evaM charchitasa~Nkalpo bhagavAnmadhusUdanaH |
AsasAdAtha chANUraM muShTikaM rohiNIsutaH || 1||
hastAbhyAM hastayorbaddhvA padbhyAmeva cha pAdayoH |
vichakarShaturanyonyaM prasahya vijigIShayA || 2||
aratnI dve aratnibhyAM jAnubhyAM chaiva jAnunI |
shiraH shIrShNorasorastAvanyonyamabhijaghnatuH || 3||
paribhrAmaNavikShepaparirambhAvapAtanaiH |
utsarpaNApasarpaNaishchAnyonyaM pratyarundhatAm || 4||
utthApanairunnayanaishchAlanaiH sthApanairapi |
parasparaM jigIShantAvapachakraturAtmanaH || 5||
tadbalAbalavadyuddhaM sametAH sarvayoShitaH |
UchuH parasparaM rAjan sAnukampA varUthashaH || 6||
mahAnayaM batAdharma eShAM rAjasabhAsadAm |
ye balAbalavadyuddhaM rAj~no.anvichChanti pashyataH || 7||
kva vajrasArasarvA~Ngau mallau shailendrasannibhau |
kva chAtisukumArA~Ngau kishorau nAptayauvanau || 8||
dharmavyatikramo hyasya samAjasya dhruvaM bhavet |
yatrAdharmaH samuttiShThenna stheyaM tatra karhichit || 9||
na sabhAM pravishetprAj~naH sabhyadoShAnanusmaran |
abruvan vibruvannaj~no naraH kilbiShamashnute || 10||
valgataH shatrumabhitaH kR^iShNasya vadanAmbujam |
vIkShyatAM shramavAryuptaM padmakoshamivAmbubhiH || 11||
kiM na pashyata rAmasya mukhamAtAmralochanam |
muShTikaM prati sAmarShaM hAsasaMrambhashobhitam || 12||
puNyA bata vrajabhuvo yadayaM nR^ili~Nga\-
gUDhaHpurANapuruSho vanachitramAlyaH |
gAH pAlayan sahabalaH kvaNayaMshcha veNuM
vikrIDayA~nchati giritraramArchitA~NghriH || 13||
gopyastapaH kimacharan yadamuShya rUpaM
lAvaNyasAramasamordhvamananyasiddham |
dR^igbhiH pibantyanusavAbhinavaM durApa\-
mekAntadhAma yashasaH shrIya aishvarasya || 14||
yA dohane.avahanane mathanopalepa\-
pre~Nkhe~NkhanArbharuditokShaNamArjanAdau |
gAyanti chainamanuraktadhiyo.ashrukaNThyo
dhanyA vrajastriya urukramachittayAnAH || 15||
prAtarvrajAdvrajata Avishatashcha sAyaM
gobhiH samaM kvaNayato.asya nishamya veNum |
nirgamya tUrNamabalAH pathi bhUripuNyAH
pashyanti sasmitamukhaM sadayAvalokam || 16||
evaM prabhAShamANAsu strIShu yogeshvaro hariH |
shatruM hantuM manashchakre bhagavAn bharatarShabha || 17||
sabhayAH strIgiraH shrutvA putrasnehashuchA.a.aturau |
pitarAvanvatapyetAM putrayorabudhau balam || 18||
taistairniyuddhavidhibhirvividhairachyutetarau |
yuyudhAte yathAnyonyaM tathaiva balamuShTikau || 19||
bhagavadgAtraniShpAtairvajraniShpeShaniShThuraiH |
chANUro bhajyamAnA~Ngo muhurglAnimavApa ha || 20||
sa shyenavega utpatya muShTIkR^itya karAvubhau |
bhagavantaM vAsudevaM kruddho vakShasyabAdhata || 21||
nAchalattatprahAreNa mAlAhata iva dvipaH |
bAhvornigR^ihya chANUraM bahusho bhrAmayan hariH || 22||
bhUpR^iShThe pothayAmAsa tarasA kShINajIvitam |
visrastAkalpakeshasragindradhvaja ivApatat || 23||
tathaiva muShTikaH pUrvaM svamuShTyAbhihatena vai |
balabhadreNa balinA talenAbhihato bhR^isham || 24||
pravepitaH sa rudhiramudvaman mukhato.arditaH |
vyasuH papAtorvyupasthe vAtAhata ivA~NghripaH || 25||
tataH kUTamanuprAptaM rAmaH praharatAM varaH |
avadhIllIlayA rAjan sAvaj~naM vAmamuShTinA || 26||
tarhyeva hi shalaH kR^iShNapadApahatashIrShakaH |
dvidhA vishIrNastoshalaka ubhAvapi nipetatuH || 27||
chANUre muShTike kUTe shale toshalake hate |
sheShAH pradudruvurmallAH sarve prANaparIpsavaH || 28||
gopAn vayasyAnAkR^iShya taiH saMsR^ijya vijahratuH |
vAdyamAneShu tUryeShu valgantau rutanUpurau || 29||
janAH prajahR^iShuH sarve karmaNA rAmakR^iShNayoH |
R^ite kaMsaM vipramukhyAH sAdhavaH sAdhu sAdhviti || 30||
hateShu mallavaryeShu vidruteShu cha bhojarAT |
nyavArayatsvatUryANi vAkyaM chedamuvAcha ha || 31||
niHsArayata durvR^ittau vasudevAtmajau purAt |
dhanaM harata gopAnAM nandaM badhnIta durmatim || 32||
vasudevastu durmedhA hanyatAmAshvasattamaH |
ugrasenaH pitA chApi sAnugaH parapakShagaH || 33||
evaM vikatthamAne vai kaMse prakupito.avyayaH |
laghimnotpatya tarasA ma~nchamuttu~NgamAruhat || 34||
tamAvishantamAlokya mR^ityumAtmana AsanAt |
manasvI sahasotthAya jagR^ihe so.asicharmaNI || 35||
taM khaDgapANiM vicharantamAshu
shyenaM yathA dakShiNasavyamambare |
samagrahIddurviShahogratejA
yathoragaM tArkShyasutaH prasahya || 36||
pragR^ihya kesheShu chalatkirITaM
nipAtya ra~Ngopari tu~Ngama~nchAt |
tasyopariShTAtsvayamabjanAbhaH
papAta vishvAshraya AtmatantraH || 37||
taM samparetaM vichakarSha bhUmau
hariryathebhaM jagato vipashyataH |
hA heti shabdaH sumahAMstadAbhU\-
dudIritaH sarvajanairnarendra || 38||
sa nityadodvignadhiyA tamIshvaraM
piban vadan vA vicharan svapan shvasan |
dadarsha chakrAyudhamagrato yata\-
stadeva rUpaM duravApamApa || 39||
tasyAnujA bhrAtaro.aShTau ka~NkanyagrodhakAdayaH |
abhyadhAvannatikruddhA bhrAturnirveshakAriNaH || 40||
tathAtirabhasAMstAMstu saMyattAn rohiNIsutaH |
ahan parighamudyamya pashUniva mR^igAdhipaH || 41||
nedurdundubhayo vyomni brahmeshAdyA vibhUtayaH |
puShpaiH kirantastaM prItAH shashaMsurnanR^ituH striyaH || 42||
teShAM striyo mahArAja suhR^inmaraNaduHkhitAH |
tatrAbhIyurvinighnantyaH shIrShANyashruvilochanAH || 43||
shayAnAn vIrashayyAyAM patInAli~Ngya shochatIH |
vilepuH susvaraM nAryo visR^ijantyo muhuH shuchaH || 44||
hA nAtha priya dharmaj~na karuNAnAthavatsala |
tvayA hatena nihatA vayaM te sagR^ihaprajAH || 45||
tvayA virahitA patyA purIyaM puruSharShabha |
na shobhate vayamiva nivR^ittotsavama~NgalA || 46||
anAgasAM tvaM bhUtAnAM kR^itavAn drohamulbaNam |
tenemAM bho dashAM nIto bhUtadhruk ko labheta sham || 47||
sarveShAmiha bhUtAnAmeSha hi prabhavApyayaH |
goptA cha tadavadhyAyI na kvachitsukhamedhate || 48||
shrIshuka uvAcha
rAjayoShita AshvAsya bhagavAMllokabhAvanaH |
yAmAhurlaukikIM saMsthAM hatAnAM samakArayat || 49||
mAtaraM pitaraM chaiva mochayitvAtha bandhanAt |
kR^iShNarAmau vavandAte shirasA.a.aspR^ishya pAdayoH || 50||
devakI vasudevashcha vij~nAya jagadIshvarau |
kR^itasaMvandanau putrau sasvajAte na sha~Nkitau || 51||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe kaMsavadho nAma chatushchatvAriMsho.adhyAyaH || 44||
\iti
\section{.. OM namo bhagavate vAsudevAya ..}
\section{.. pa~nchachatvAriMsho.adhyAyaH \- 45 ..}
shrIshuka uvAcha
pitarAvupalabdhArthau viditvA puruShottamaH |
mA bhUditi nijAM mAyAM tatAna janamohinIm || 1||
uvAcha pitarAvetya sAgrajaH sAtvatarShabhaH |
prashrayAvanataH prINannamba tAteti sAdaram || 2||
nAsmatto yuvayostAta nityotkaNThitayorapi |
bAlyapaugaNDakaishorAH putrAbhyAmabhavan kvachit || 3||
na labdho daivahatayorvAso nau bhavadantike |
yAM bAlAH pitR^igehasthA vindante lAlitA mudam || 4||
sarvArthasambhavo deho janitaH poShito yataH |
na tayoryAti nirveshaM pitrormartyaH shatAyuShA || 5||
yastayorAtmajaH kalpa AtmanA cha dhanena cha |
vR^ittiM na dadyAttaM pretya svamAMsaM khAdayanti hi || 6||
mAtaraM pitaraM vR^iddhaM bhAryAM sAdhvIM sutaM shishum |
guruM vipraM prapannaM cha kalpo.abibhrachChvasan mR^itaH || 7||
tannAvakalpayoH kaMsAnnityamudvignachetasoH |
moghamete vyatikrAntA divasA vAmanarchatoH || 8||
tatkShantumarhathastAta mAtarnau paratantrayoH |
akurvatorvAM shushrUShAM kliShTayordurhR^idA bhR^isham || 9||
shrIshuka uvAcha
iti mAyAmanuShyasya harervishvAtmano girA |
mohitAva~NkamAropya pariShvajyApaturmudam || 10||
si~nchantAvashrudhArAbhiH snehapAshena chAvR^itau |
na ki~nchidUchatU rAjan bAShpakaNThau vimohitau || 11||
evamAshvAsya pitarau bhagavAn devakIsutaH |
mAtAmahaM tUgrasenaM yadUnAmakaronnR^ipam || 12||
Aha chAsmAn mahArAja prajAshchAj~naptumarhasi |
yayAtishApAdyadubhirnAsitavyaM nR^ipAsane || 13||
mayi bhR^itya upAsIne bhavato vibudhAdayaH |
baliM harantyavanatAH kimutAnye narAdhipAH || 14||
sarvAn svAn j~nAtisambandhAn digbhyaH kaMsabhayAkulAn |
yaduvR^iShNyandhakamadhudAshArhakukurAdikAn || 15||
sabhAjitAn samAshvAsya videshAvAsakarshitAn |
nyavAsayatsvageheShu vittaiH santarpya vishvakR^it || 16||
kR^iShNasa~NkarShaNabhujairguptA labdhamanorathAH |
gR^iheShu remire siddhAH kR^iShNarAmagatajvarAH || 17||
vIkShanto.aharahaH prItA mukundavadanAmbujam |
nityaM pramuditaM shrImatsadayasmitavIkShaNam || 18||
tatra pravayaso.apyAsan yuvAno.atibalaujasaH |
pibanto.akShairmukundasya mukhAmbujasudhAM muhuH || 19||
atha nandaM samAsAdya bhagavAn devakIsutaH |
sa~NkarShaNashcha rAjendra pariShvajyedamUchatuH || 20||
pitaryuvAbhyAM snigdhAbhyAM poShitau lAlitau bhR^isham |
pitrorabhyadhikA prItirAtmajeShvAtmano.api hi || 21||
sa pitA sA cha jananI yau puShNItAM svaputravat |
shishUn bandhubhirutsR^iShTAnakalpaiH poSharakShaNe || 22||
yAta yUyaM vrajaM tAta vayaM cha snehaduHkhitAn |
j~nAtIn vo draShTumeShyAmo vidhAya suhR^idAM sukham || 23||
evaM sAntvayya bhagavAn nandaM savrajamachyutaH |
vAso.ala~NkArakupyAdyairarhayAmAsa sAdaram || 24||
ityuktastau pariShvajya nandaH praNayavihvalaH |
pUrayannashrubhirnetre saha gopairvrajaM yayau || 25||
atha shUrasuto rAjan putrayoH samakArayat |
purodhasA brAhmaNaishcha yathAvaddvijasaMskR^itim || 26||
tebhyo.adAddakShiNA gAvo rukmamAlAH svala~NkR^itAH |
svala~NkR^itebhyaH sampUjya savatsAH kShaumamAlinIH || 27||
yAH kR^iShNarAmajanmarkShe manodattA mahAmatiH |
tAshchAdadAdanusmR^itya kaMsenAdharmato hR^itAH || 28||
tatashcha labdhasaMskArau dvijatvaM prApya suvratau |
gargAdyadukulAchAryAdgAyatraM vratamAsthitau || 29||
prabhavau sarvavidyAnAM sarvaj~nau jagadIshvarau |
nAnyasiddhAmalaj~nAnaM gUhamAnau narehitaiH || 30||
atho gurukule vAsamichChantAvupajagmatuH |
kAshyaM sAndIpaniM nAma hyavantipuravAsinam || 31||
yathopasAdya tau dAntau gurau vR^ittimaninditAm |
grAhayantAvupetau sma bhaktyA devamivAdR^itau || 32||
tayordvijavarastuShTaH shuddhabhAvAnuvR^ittibhiH |
provAcha vedAnakhilAn sA~NgopaniShado guruH || 33||
sarahasyaM dhanurvedaM dharmAn nyAyapathAMstathA |
tathA chAnvIkShikIM vidyAM rAjanItiM cha ShaDvidhAm || 34||
sarvaM naravarashreShThau sarvavidyApravartakau |
sakR^innigadamAtreNa tau sa~njagR^ihaturnR^ipa || 35||
ahorAtraishchatuHShaShTyA saMyattau tAvatIH kalAH |
gurudakShiNayA.a.achAryaM ChandayAmAsaturnR^ipa || 36||
dvijastayostaM mahimAnamadbhutaM
saMlakShya rAjannatimAnuShIM matim |
sammantrya patnyA sa mahArNave mR^itaM
bAlaM prabhAse varayAmbabhUva ha || 37||
tathetyathAruhya mahArathau rathaM
prabhAsamAsAdya durantavikramau |
velAmupavrajya niShIdatuH kShaNaM
sindhurviditvArhaNamAharattayoH || 38||
tamAha bhagavAnAshu guruputraH pradIyatAm |
yo.asAviha tvayA grasto bAlako mahatormiNA || 39||
samudra uvAcha
naivAhArShamahaM deva daityaH pa~nchajano mahAn |
antarjalacharaH kR^iShNa sha~NkharUpadharo.asuraH || 40||
Aste tenAhR^ito nUnaM tachChrutvA satvaraM prabhuH |
jalamAvishya taM hatvA nApashyadudare.arbhakam || 41||
tada~NgaprabhavaM sha~NkhamAdAya rathamAgamat |
tataH saMyamanIM nAma yamasya dayitAM purIm || 42||
gatvA janArdanaH sha~NkhaM pradadhmau sahalAyudhaH |
sha~NkhanirhrAdamAkarNya prajAsaMyamano yamaH || 43||
tayoH saparyAM mahatIM chakre bhaktyupabR^iMhitAm |
uvAchAvanataH kR^iShNaM sarvabhUtAshayAlayam |
lIlAmanuShya he viShNo yuvayoH karavAma kim || 44||
shrIbhagavAnuvAcha
guruputramihAnItaM nijakarmanibandhanam |
Anayasva mahArAja machChAsanapuraskR^itaH || 45||
tatheti tenopAnItaM guruputraM yadUttamau |
dattvA svagurave bhUyo vR^iNIShveti tamUchatuH || 46||
gururuvAcha
samyaksampAdito vatsa bhavadbhyAM guruniShkrayaH |
ko nu yuShmadvidhaguroH kAmAnAmavashiShyate || 47||
gachChataM svagR^ihaM vIrau kIrtirvAmastu pAvanI |
ChandAMsyayAtayAmAni bhavantviha paratra cha || 48||
guruNaivamanuj~nAtau rathenAnilaraMhasA |
AyAtau svapuraM tAta parjanyaninadena vai || 49||
samanandan prajAH sarvA dR^iShTvA rAmajanArdanau |
apashyantyo bahvahAni naShTalabdhadhanA iva || 50||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe guruputrAnayanaM nAma pa~nchachatvAriMsho.adhyAyaH || 45||
\iti
\section{.. OM namo bhagavate vAsudevAya ..}
\section{.. ShaTchatvAriMsho.adhyAyaH \- 46 ..}
shrIshuka uvAcha
vR^iShNInAM pravaro mantrI kR^iShNasya dayitaH sakhA |
shiShyo bR^ihaspateH sAkShAduddhavo buddhisattamaH || 1||
tamAha bhagavAn preShThaM bhaktamekAntinaM kvachit |
gR^ihItvA pANinA pANiM prapannArtiharo hariH || 2||
gachChoddhava vrajaM saumya pitrornau prItimAvaha |
gopInAM madviyogAdhiM matsandeshairvimochaya || 3||
tA manmanaskA matprANA madarthe tyaktadaihikAH |
mAmeva dayitaM preShThamAtmAnaM manasA gatAH |
ye tyaktalokadharmAshcha madarthe tAn bibharmyaham || 4||
mayi tAH preyasAM preShThe dUrasthe gokulastriyaH |
smarantyo.a~Nga vimuhyanti virahautkaNThyavihvalAH || 5||
dhArayantyatikR^ichChreNa prAyaH prANAn katha~nchana |
pratyAgamanasandeshairvallavyo me madAtmikAH || 6||
shrIshuka uvAcha
ityukta uddhavo rAjan sandeshaM bharturAdR^itaH |
AdAya rathamAruhya prayayau nandagokulam || 7||
prApto nandavrajaM shrImAn nimlochati vibhAvasau |
ChannayAnaH pravishatAM pashUnAM khurareNubhiH || 8||
vAsitArthe.abhiyudhyadbhirnAditaM shuShmibhirvR^iShaiH |
dhAvantIbhishcha vAsrAbhirUdhobhAraiH svavatsakAn || 9||
itastato vila~NghadbhirgovatsairmaNDitaM sitaiH |
godohashabdAbhiravaM veNUnAM niHsvanena cha || 10||
gAyantIbhishcha karmANi shubhAni balakR^iShNayoH |
svala~NkR^itAbhirgopIbhirgopaishcha suvirAjitam || 11||
agnyarkAtithigoviprapitR^idevArchanAnvitaiH |
dhUpadIpaishcha mAlyaishcha gopAvAsairmanoramam || 12||
sarvataH puShpitavanaM dvijAlikulanAditam |
haMsakAraNDavAkIrNaiH padmaShaNDaishcha maNDitam || 13||
tamAgataM samAgamya kR^iShNasyAnucharaM priyam |
nandaH prItaH pariShvajya vAsudevadhiyArchayat || 14||
bhojitaM paramAnnena saMviShTaM kashipau sukham |
gatashramaM paryapR^ichChatpAdasaMvAhanAdibhiH || 15||
kachchida~Nga mahAbhAga sakhA naH shUranandanaH |
Aste kushalyapatyAdyairyukto muktaH suhR^idvR^itaH || 16||
diShTyA kaMso hataH pApaH sAnugaH svena pApmanA |
sAdhUnAM dharmashIlAnAM yadUnAM dveShTi yaH sadA || 17||
api smarati naH kR^iShNo mAtaraM suhR^idaH sakhIn |
gopAn vrajaM chAtmanAthaM gAvo vR^indAvanaM girim || 18||
apyAyAsyati govindaH svajanAn sakR^idIkShitum |
tarhi drakShyAma tadvaktraM sunasaM susmitekShaNam || 19||
dAvAgnervAtavarShAchcha vR^iShasarpAchcha rakShitAH |
duratyayebhyo mR^ityubhyaH kR^iShNena sumahAtmanA || 20||
smaratAM kR^iShNavIryANi lIlApA~NganirIkShitam |
hasitaM bhAShitaM chA~Nga sarvA naH shithilAH kriyAH || 21||
sarichChailavanoddeshAn mukundapadabhUShitAn |
AkrIDAnIkShamANAnAM mano yAti tadAtmatAm || 22||
manye kR^iShNaM cha rAmaM cha prAptAviha surottamau |
surANAM mahadarthAya gargasya vachanaM yathA || 23||
kaMsaM nAgAyutaprANaM mallau gajapatiM tathA |
avadhiShTAM lIlayaiva pashUniva mR^igAdhipaH || 24||
tAlatrayaM mahAsAraM dhanuryaShTimivebharAT |
babha~njaikena hastena saptAhamadadhAdgirim || 25||
pralambo dhenuko.ariShTastR^iNAvarto bakAdayaH |
daityAH surAsurajito hatA yeneha lIlayA || 26||
shrIshuka uvAcha
iti saMsmR^itya saMsmR^itya nandaH kR^iShNAnuraktadhIH |
atyutkaNTho.abhavattUShNIM premaprasaravihvalaH || 27||
yashodA varNyamAnAni putrasya charitAni cha |
shR^iNvantyashrUNyavAsrAkShItsnehasnutapayodharA || 28||
tayoritthaM bhagavati kR^iShNe nandayashodayoH |
vIkShyAnurAgaM paramaM nandamAhoddhavo mudA || 29||
uddhava uvAcha
yuvAM shlAghyatamau nUnaM dehinAmiha mAnada |
nArAyaNe.akhilagurau yatkR^itA matirIdR^ishI || 30||
etau hi vishvasya cha bIjayonI
rAmo mukundaH puruShaH pradhAnam |
anvIya bhUteShu vilakShaNasya
j~nAnasya cheshAta imau purANau || 31||
yasmin janaH prANaviyogakAle
kShaNaM samAveshya manovishuddham |
nirhR^itya karmAshayamAshu yAti
parAM gatiM brahmamayo.arkavarNaH || 32||
tasmin bhavantAvakhilAtmahetau
nArAyaNe kAraNamartyamUrtau |
bhAvaM vidhattAM nitarAM mahAtman
kiM vAvashiShTaM yuvayoH sukR^ityam || 33||
AgamiShyatyadIrgheNa kAlena vrajamachyutaH |
priyaM vidhAsyate pitrorbhagavAn sAtvatAM patiH || 34||
hatvA kaMsaM ra~Ngamadhye pratIpaM sarvasAtvatAm |
yadAha vaH samAgatya kR^iShNaH satyaM karoti tat || 35||
mA khidyataM mahAbhAgau drakShyathaH kR^iShNamantike |
antarhR^idi sa bhUtAnAmAste jyotirivaidhasi || 36||
na hyasyAsti priyaH kashchinnApriyo vAstyamAninaH |
nottamo nAdhamo nApi samAnasyAsamo.api vA || 37||
na mAtA na pitA tasya na bhAryA na sutAdayaH |
nAtmIyo na parashchApi na deho janma eva cha || 38||
na chAsya karma vA loke sadasanmishrayoniShu |
krIDArthaH so.api sAdhUnAM paritrANAya kalpate || 39||
sattvaM rajastama iti bhajate nirguNo guNAn |
krIDannatIto.atra guNaiH sR^ijatyavati hantyajaH || 40||
yathA bhramarikA dR^iShTyA bhrAmyatIva mahIyate |
chitte kartari tatrAtmA kartevAhandhiyA smR^itaH || 41||
yuvayoreva naivAyamAtmajo bhagavAn hariH |
sarveShAmAtmajo hyAtmA pitA mAtA sa IshvaraH || 42||
dR^iShTaM shrutaM bhUtabhavadbhaviShya\-
tsthAsnushchariShNurmahadalpakaM cha |
vinAchyutAdvastu tarAM na vAchyaM
sa eva sarvaM paramAtmabhUtaH || 43||
evaM nishA sA bruvatorvyatItA
nandasya kR^iShNAnucharasya rAjan |
gopyaH samutthAya nirUpya dIpA\-
nvAstUnsamabhyarchya dadhInyamanthan || 44||
tA dIpadIptairmaNibhirvirejU
rajjUrvikarShadbhujaka~NkaNasrajaH |
chalannitambastanahArakuNDala\-
tviShatkapolAruNaku~NkumAnanAH || 45||
udgAyatInAmaravindalochanaM
vrajA~NganAnAM divamaspR^ishaddhvaniH |
dadhnashcha nirmanthanashabdamishrito
nirasyate yena dishAmama~Ngalam || 46||
bhagavatyudite sUrye nandadvAri vrajaukasaH |
dR^iShTvA rathaM shAtakaumbhaM kasyAyamiti chAbruvan || 47||
akrUra AgataH kiM vA yaH kaMsasyArthasAdhakaH |
yena nIto madhupurIM kR^iShNaH kamalalochanaH || 48||
kiM sAdhayiShyatyasmAbhirbhartuH pretasya niShkR^itim |
iti strINAM vadantInAmuddhavo.agAtkR^itAhnikaH || 49||
iti shrImadbhAgavAte mahApurANe pAramahaMsyAM
saMhitAyAM dashamaskandhe pUrvArdhe nandashokApanayanaM
nAma ShaTchatvAriMsho.adhyAyaH || 46||
\iti
\section{.. OM namo bhagavate vAsudevAya ..}
\section{.. saptachatvAriMsho.adhyAyaH \- 47 ..}
shrIshuka uvAcha
taM vIkShya kR^iShNAnucharaM vrajastriyaH
pralambabAhuM navaka~njalochanam |
pItAmbaraM puShkaramAlinaM lasan\-
mukhAravindaM parimR^iShTakuNDalam || 1||
shuchismitAH ko.ayamapIchyadarshanaH
kutashcha kasyAchyutaveShabhUShaNaH |
iti sma sarvAH parivavrurutsukA\-
stamuttamashlokapadAmbujAshrayam || 2||
taM prashrayeNAvanatAH susatkR^itaM
savrIDahAsekShaNasUnR^itAdibhiH |
rahasyapR^ichChannupaviShTamAsane
vij~nAya sandeshaharaM ramApateH || 3||
jAnImastvAM yadupateH pArShadaM samupAgatam |
bhartreha preShitaH pitrorbhavAn priyachikIrShayA || 4||
anyathA govraje tasya smaraNIyaM na chakShmahe |
snehAnubandho bandhUnAM munerapi sudustyajaH || 5||
anyeShvarthakR^itA maitrI yAvadarthaviDambanam |
pumbhiH strIShu kR^itA yadvatsumanaHsviva ShaTpadaiH || 6||
niHsvaM tyajanti gaNikA akalpaM nR^ipatiM prajAH |
adhItavidyA AchAryaM R^itvijo dattadakShiNam || 7||
khagA vItaphalaM vR^ikShaM bhuktvA chAtithayo gR^iham |
dagdhaM mR^igAstathAraNyaM jAro bhuktvA ratAM striyam || 8||
iti gopyo hi govinde gatavAkkAyamAnasAH |
kR^iShNadUte vrajaM yAte uddhave tyaktalaukikAH || 9||
gAyantyaH priyakarmANi rudatyashcha gatahriyaH |
tasya saMsmR^itya saMsmR^itya yAni kaishorabAlyayoH || 10||
kAchinmadhukaraM dR^iShTvA dhyAyantI kR^iShNasa~Ngamam |
priyaprasthApitaM dUtaM kalpayitvedamabravIt || 11||
gopyuvAcha
madhupa kitavabandho mA spR^ishA~NghriM sapatnyAH
kuchavilulitamAlAku~NkumashmashrubhirnaH |
vahatu madhupatistanmAninInAM prasAdaM
yadusadasi viDambyaM yasya dUtastvamIdR^ik || 12||
sakR^idadharasudhAM svAM mohinIM pAyayitvA
sumanasa iva sadyastatyaje.asmAn bhavAdR^ik |
paricharati kathaM tatpAdapadmaM tu padmA
hyapi bata hR^itachetA hyuttamashlokajalpaiH || 13||
kimiha bahu ShaDa~Nghre gAyasi tvaM yadUnA\-
madhipatimagR^ihANAmagrato naH purANam |
vijayasakhasakhInAM gIyatAM tatprasa~NgaH
kShapitakucharujaste kalpayantIShTamiShTAH || 14||
divi bhuvi cha rasAyAM kAH striyastaddurApAH
kapaTaruchirahAsabhrUvijR^imbhasya yAH syuH |
charaNaraja upAste yasya bhUtirvayaM kAH
api cha kR^ipaNapakShe hyuttamashlokashabdaH || 15||
visR^ija shirasi pAdaM vedmyahaM chATukArai\-
ranunayaviduShaste.abhyetya dautyairmukundAt |
svakR^ita iha visR^iShTApatyapatyanyalokAH
vyasR^ijadakR^itachetAH kiM nu sandheyamasmin || 16||
mR^igayuriva kapIndraM vivyadhe lubdhadharmA
striyamakR^ita virUpAM strIjitaH kAmayAnAm |
balimapi balimattvAveShTayaddhvA~NkShavadyaH
tadalamasitasakhyairdustyajastatkathArthaH || 17||
yadanucharitalIlAkarNapIyUShavipruT
sakR^idadanavidhUtadvandvadharmA vinaShTAH |
sapadi gR^ihakuTumbaM dInamutsR^ijya dInA
bahava iha viha~NgA bhikShucharyAM charanti || 18||
vayamR^itamiva jihmavyAhR^itaM shraddadhAnAH
kulikarutamivAj~nAH kR^iShNavadhvo hariNyaH |
dadR^ishurasakR^idetattannakhasparshatIvra\-
smararuja upamantrin bhaNyatAmanyavArtA || 19||
priyasakha punarAgAH preyasA preShitaH kiM
varaya kimanurundhe mAnanIyo.asi me.a~Nga |
nayasi kathamihAsmAn dustyajadvandvapArshvaM
satatamurasi saumya shrIrvadhUH sAkamAste || 20||
api bata madhupuryAmAryaputro.adhunA.a.aste
smarati sa pitR^igehAn saumya bandhUMshcha gopAn |
kvachidapi sa kathA naH ki~NkarINAM gR^iNIte
bhujamagurusugandhaM mUrdhnyadhAsyatkadA nu || 21||
shrIshuka uvAcha
athoddhavo nishamyaivaM kR^iShNadarshanalAlasAH |
sAntvayan priyasandeshairgopIridamabhAShata || 22||
uddhava uvAcha
aho yUyaM sma pUrNArthA bhavatyo lokapUjitAH |
vAsudeve bhagavati yAsAmityarpitaM manaH || 23||
dAnavratatapohomajapasvAdhyAyasaMyamaiH |
shreyobhirvividhaishchAnyaiH kR^iShNe bhaktirhi sAdhyate || 24||
bhagavatyuttamashloke bhavatIbhiranuttamA |
bhaktiH pravartitA diShTyA munInAmapi durlabhA || 25||
diShTyA putrAn patIn dehAn svajanAn bhavanAni cha |
hitvAvR^iNIta yUyaM yatkR^iShNAkhyaM puruShaM param || 26||
sarvAtmabhAvo.adhikR^ito bhavatInAmadhokShaje |
viraheNa mahAbhAgA mahAn me.anugrahaH kR^itaH || 27||
shrUyatAM priyasandesho bhavatInAM sukhAvahaH |
yamAdAyAgato bhadrA ahaM bhartU rahaskaraH || 28||
shrIbhagavAnuvAcha
bhavatInAM viyogo me na hi sarvAtmanA kvachit |
yathA bhUtAni bhUteShu khaM vAyvagnirjalaM mahI |
tathAhaM cha manaH prANabhUtendriyaguNAshrayaH || 29||
AtmanyevAtmanA.a.atmAnaM sR^ije hanmyanupAlaye |
AtmamAyAnubhAvena bhUtendriyaguNAtmanA || 30||
AtmA j~nAnamayaH shuddho vyatirikto.aguNAnvayaH |
suShuptisvapnajAgradbhirmAyAvR^ittibhirIyate || 31||
yenendriyArthAn dhyAyeta mR^iShA svapnavadutthitaH |
tannirundhyAdindriyANi vinidraH pratyapadyata || 32||
etadantaH samAmnAyo yogaH sA~NkhyaM manIShiNAm |
tyAgastapo damaH satyaM samudrAntA ivApagAH || 33||
yattvahaM bhavatInAM vai dUre varte priyo dR^ishAm |
manasaH sannikarShArthaM madanudhyAnakAmyayA || 34||
yathA dUrachare preShThe mana Avishya vartate |
strINAM cha na tathA chetaH sannikR^iShTe.akShigochare || 35||
mayyAveshya manaH kR^itsnaM vimuktAsheShavR^itti yat |
anusmarantyo mAM nityamachirAnmAmupaiShyatha || 36||
yA mayA krIDatA rAtryAM vane.asmin vraja AsthitAH |
alabdharAsAH kalyANyo mA.a.apurmadvIryachintayA || 37||
shrIshuka uvAcha
evaM priyatamAdiShTamAkarNya vrajayoShitaH |
tA UchuruddhavaM prItAstatsandeshAgatasmR^itIH || 38||
gopya UchuH
diShTyAhito hataH kaMso yadUnAM sAnugo.aghakR^it |
diShTyA.a.aptairlabdhasarvArthaiH kushalyAste.achyuto.adhunA || 39||
kachchidgadAgrajaH saumya karoti purayoShitAm |
prItiM naH snigdhasavrIDahAsodArekShaNArchitaH || 40||
kathaM rativisheShaj~naH priyashcha varayoShitAm |
nAnubadhyeta tadvAkyairvibhramaishchAnubhAjitaH || 41||
api smarati naH sAdho govindaH prastute kvachit |
goShThImadhye purastrINAM grAmyAH svairakathAntare || 42||
tAH kiM nishAH smarati yAsu tadA priyAbhi\-
rvR^indAvane kumudakundashashA~Nkaramye |
reme kvaNachcharaNanUpurarAsagoShThyA\-
masmAbhirIDitamanoj~nakathaH kadAchit || 43||
apyeShyatIha dAshArhastaptAH svakR^itayA shuchA |
sa~njIvayan nu no gAtrairyathendro vanamambudaiH || 44||
kasmAtkR^iShNa ihAyAti prAptarAjyo hatAhitaH |
narendrakanyA udvAhya prItaH sarvasuhR^idvR^itaH || 45||
kimasmAbhirvanaukobhiranyAbhirvA mahAtmanaH |
shrIpaterAptakAmasya kriyetArthaH kR^itAtmanaH || 46||
paraM saukhyaM hi nairAshyaM svairiNyapyAha pi~NgalA |
tajjAnatInAM naH kR^iShNe tathApyAshA duratyayA || 47||
ka utsaheta santyaktumuttamashlokasaMvidam |
anichChato.api yasya shrIra~NgAnna chyavate kvachit || 48||
sarichChailavanoddeshA gAvo veNuravA ime |
sa~NkarShaNasahAyena kR^iShNenAcharitAH prabho || 49||
punaH punaH smArayanti nandagopasutaM bata |
shrIniketaistatpadakairvismartuM naiva shaknumaH || 50||
gatyA lalitayodArahAsalIlAvalokanaiH |
mAdhvyA girA hR^itadhiyaH kathaM taM vismarAmahe || 51||
he nAtha he ramAnAtha vrajanAthArtinAshana |
magnamuddhara govinda gokulaM vR^ijinArNavAt || 52||
shrIshuka uvAcha
tatastAH kR^iShNasandeshairvyapetavirahajvarAH |
uddhavaM pUjayA~nchakrurj~nAtvA.a.atmAnamadhokShajam || 53||
uvAsa katichinmAsAn gopInAM vinudan shuchaH |
kR^iShNalIlAkathAM gAyan ramayAmAsa gokulam || 54||
yAvantyahAni nandasya vraje.avAtsItsa uddhavaH |
vrajaukasAM kShaNaprAyANyAsan kR^iShNasya vArtayA || 55||
saridvanagiridroNIrvIkShan kusumitAn drumAn |
kR^iShNaM saMsmArayan reme haridAso vrajaukasAm || 56||
dR^iShTvaivamAdi gopInAM kR^iShNAveshAtmaviklavam |
uddhavaH paramaprItastA namasyannidaM jagau || 57||
etAH paraM tanubhR^ito bhuvi gopavadhvo
govinda eva nikhilAtmani rUDhabhAvAH |
vA~nChanti yadbhavabhiyo munayo vayaM cha
kiM brahmajanmabhiranantakathArasasya || 58||
kvemAH striyo vanacharIrvyabhichAraduShTAH
kR^iShNe kva chaiSha paramAtmani rUDhabhAvaH |
nanvIshvaro.anubhajato.aviduSho.api sAkShA\-
chChreyastanotyagadarAja ivopayuktaH || 59||
nAyaM shriyo.a~Nga u nitAntarateH prasAdaH
svaryoShitAM nalinagandharuchAM kuto.anyAH |
rAsotsave.asya bhujadaNDagR^ihItakaNTha\-
labdhAshiShAM ya udagAdvrajavallavInAm || 60||
AsAmaho charaNareNujuShAmahaM syAM
vR^indAvane kimapi gulmalatauShadhInAm |
yA dustyajaM svajanamAryapathaM cha hitvA
bhejurmukundapadavIM shrutibhirvimR^igyAm || 61||
yA vai shriyArchitamajAdibhirAptakAmai\-
ryogeshvarairapi yadAtmani rAsagoShThyAm |
kR^iShNasya tadbhagavatashcharaNAravindaM
nyastaM staneShu vijahuH parirabhya tApam || 62||
vande nandavrajastrINAM pAdareNumabhIkShNashaH |
yAsAM harikathodgItaM punAti bhuvanatrayam || 63||
shrIshuka uvAcha
atha gopIranuj~nApya yashodAM nandameva cha |
gopAnAmantrya dAshArho yAsyannAruruhe ratham || 64||
taM nirgataM samAsAdya nAnopAyanapANayaH |
nandAdayo.anurAgeNa prAvochannashrulochanAH || 65||
manaso vR^ittayo naH syuH kR^iShNapAdAmbujAshrayAH |
vAcho.abhidhAyinIrnAmnAM kAyastatprahvaNAdiShu || 66||
karmabhirbhrAmyamANAnAM yatra kvApIshvarechChayA |
ma~NgalAcharitairdAnai ratirnaH kR^iShNa Ishvare || 67||
evaM sabhAjito gopaiH kR^iShNabhaktyA narAdhipa |
uddhavaH punarAgachChanmathurAM kR^iShNapAlitAm || 68||
kR^iShNAya praNipatyAha bhaktyudrekaM vrajaukasAm |
vasudevAya rAmAya rAj~ne chopAyanAnyadAt || 69||
iti shrImadbhAgavate mahApurANe pAramahaMsyAM
saMhitAyAM dashamaskandhe pUrvArdhe uddhavapratiyAne
saptachatvAriMsho.adhyAyaH || 47||
\iti
\section{.. OM namo bhagavate vAsudevAya ..}
\section{.. aShTachatvAriMsho.adhyAyaH \- 48 ..}
shrIshuka uvAcha
atha vij~nAya bhagavAn sarvAtmA sarvadarshanaH |
sairandhryAH kAmataptAyAH priyamichChan gR^ihaM yayau || 1||
mahArhopaskarairADhyaM kAmopAyopabR^iMhitam |
muktAdAmapatAkAbhirvitAnashayanAsanaiH |
dhUpaiH surabhibhirdIpaiH sraggandhairapi maNDitam || 2||
gR^ihaM tamAyAntamavekShya sA.a.asanAt
sadyaHsamutthAya hi jAtasambhramA |
yathopasa~Ngamya sakhIbhirachyutaM
sabhAjayAmAsa sadAsanAdibhiH || 3||
tathoddhavaH sAdhutayAbhipUjito
nyaShIdadurvyAmabhimR^ishya chAsanam |
kR^iShNo.api tUrNaM shayanaM mahAdhanaM
vivesha lokAcharitAnyanuvrataH || 4||
sA majjanAlepadukUlabhUShaNa\-
sraggandhatAmbUlasudhAsavAdibhiH |
prasAdhitAtmopasasAra mAdhavaM
savrIDalIlotsmitavibhramekShitaiH || 5||
AhUya kAntAM navasa~NgamahriyA
visha~NkitAM ka~NkaNabhUShite kare |
pragR^ihya shayyAmadhiveshya rAmayA
reme.anulepArpaNapuNyaleshayA || 6||
sAna~NgataptakuchayorurasastathAkShNo\-
rjighrantyanantacharaNena rujo mR^ijantI |
dorbhyAM stanAntaragataM parirabhya kAnta\-
mAnandamUrtimajahAdatidIrghatApam || 7||
saivaM kaivalyanAthaM taM prApya duShprApamIshvaram |
a~NgarAgArpaNenAho durbhagedamayAchata || 8||
AhoShyatAmiha preShTha dinAni katichinmayA |
ramasva notsahe tyaktuM sa~NgaM te.amburuhekShaNa || 9||
tasyai kAmavaraM dattvA mAnayitvA cha mAnadaH |
sahoddhavena sarveshaH svadhAmAgamadarchitam || 10||
durArArdhyaM samArAdhya viShNuM sarveshvareshvaram |
yo vR^iNIte manogrAhyamasattvAtkumanIShyasau || 11||
akrUrabhavanaM kR^iShNaH saharAmoddhavaH prabhuH |
ki~nchichchikIrShayan prAgAdakrUrapriyakAmyayA || 12||
sa tAn naravarashreShThAnArAdvIkShya svabAndhavAn |
pratyutthAya pramuditaH pariShvajyAbhyanandata || 13||
nanAma kR^iShNaM rAmaM cha sa tairapyabhivAditaH |
pUjayAmAsa vidhivatkR^itAsanaparigrahAn || 14||
pAdAvanejanIrApo dhArayan shirasA nR^ipa |
arhaNenAmbarairdivyairgandhasragbhUShaNottamaiH || 15||
architvA shirasA.a.anamya pAdAva~Nkagatau mR^ijan |
prashrayAvanato.akrUraH kR^iShNarAmAvabhAShata || 16||
diShTyA pApo hataH kaMsaH sAnugo vAmidaM kulam |
bhavadbhyAmuddhR^itaM kR^ichChrAddurantAchcha samedhitam || 17||
yuvAM pradhAnapuruShau jagaddhetU jaganmayau |
bhavadbhyAM na vinA ki~nchitparamasti na chAparam || 18||
AtmasR^iShTamidaM vishvamanvAvishya svashaktibhiH |
Iyate bahudhA brahman shrutapratyakShagocharam || 19||
yathA hi bhUteShu charAchareShu
mahyAdayo yoniShu bhAnti nAnA |
evaM bhavAn kevala Atmayoni\-
ShvAtmA.a.atmatantro bahudhA vibhAti || 20||
sR^ijasyatho lumpasi pAsi vishvaM
rajastamaHsattvaguNaiH svashaktibhiH |
na badhyase tadguNakarmabhirvA
j~nAnAtmanaste kva cha bandhahetuH || 21||
dehAdyupAdheranirUpitatvA\-
dbhavo na sAkShAnna bhidA.a.atmanaH syAt |
ato na bandhastava naiva mokShaH
syAtAM nikAmastvayi no.avivekaH || 22||
tvayodito.ayaM jagato hitAya
yadA yadA vedapathaH purANaH |
bAdhyeta pAkhaNDapathairasadbhi\-
stadA bhavAn sattvaguNaM bibharti || 23||
sa tvaM prabho.adya vasudevagR^ihe.avatIrNaH
svAMshena bhAramapanetumihAsi bhUmeH |
akShauhiNIshatavadhena suretarAMsha\-
rAj~nAmamuShya cha kulasya yasho vitanvan || 24||
adyesha no vasatayaH khalu bhUribhAgA
yaH sarvadevapitR^ibhUtanR^idevamUrtiH |
yatpAdashauchasalilaM trijagatpunAti
sa tvaM jagadgururadhokShaja yAH praviShTaH || 25||
kaH paNDitastvadaparaM sharaNaM samIyAt
bhaktapriyAdR^itagiraH suhR^idaH kR^itaj~nAt |
sarvAn dadAti suhR^ido bhajato.abhikAmA\-
nAtmAnamapyupachayApachayau na yasya || 26||
diShTyA janArdana bhavAniha naH pratIto
yogeshvarairapi durApagatiH sureshaiH |
ChindhyAshu naH sutakalatradhanAptageha\-
dehAdimoharashanAM bhavadIyamAyAm || 27||
shrIshuka uvAcha
ityarchitaH saMstutashcha bhaktena bhagavAn hariH |
akrUraM sasmitaM prAha gIrbhiH sammohayanniva || 28||
shrIbhagavAnuvAcha
tvaM no guruH pitR^ivyashcha shlAghyo bandhushcha nityadA |
vayaM tu rakShyAH poShyAshcha anukampyAH prajA hi vaH || 29||
bhavadvidhA mahAbhAgA niShevyA arhasattamAH |
shreyaskAmairnR^ibhirnityaM devAH svArthA na sAdhavaH || 30||
na hyammayAni tIrthAni na devA mR^ichChilAmayAH |
te punantyurukAlena darshanAdeva sAdhavaH || 31||
sa bhavAn suhR^idAM vai naH shreyAn shreyashchikIrShayA |
jij~nAsArthaM pANDavAnAM gachChasva tvaM gajAhvayam || 32||
pitaryuparate bAlAH saha mAtrA suduHkhitAH |
AnItAH svapuraM rAj~nA vasanta iti shushruma || 33||
teShu rAjAmbikAputro bhrAtR^iputreShu dInadhIH |
samo na vartate nUnaM duShputravashago.andhadR^ik || 34||
gachCha jAnIhi tadvR^ittamadhunA sAdhvasAdhu vA |
vij~nAya tadvidhAsyAmo yathA shaM suhR^idAM bhavet || 35||
ityakrUraM samAdishya bhagavAn harirIshvaraH |
sa~NkarShaNoddhavAbhyAM vai tataH svabhavanaM yayau || 36||
iti shrImadbhAgavate mahApurANe pAramahaMsyAM saMhitAyAM
dashamaskandhe pUrvArdhe aShTachatvAriMsho.adhyAyaH || 48||
\iti
\section{.. OM namo bhagavate vAsudevAya ..}
\section{.. ekonapa~nchAshattamo.adhyAyaH \- 49 ..}
shrIshuka uvAcha
sa gatvA hAstinapuraM pauravendrayasho.a~Nkitam |
dadarsha tatrAmbikeyaM sabhIShmaM viduraM pR^ithAm || 1||
sahaputraM cha bAhlIkaM bhAradvAjaM sagautamam |
karNaM suyodhanaM drauNiM pANDavAn suhR^ido.aparAn || 2||
yathAvadupasa~Ngamya bandhubhirgAndinIsutaH |
sampR^iShTastaiH suhR^idvArtAM svayaM chApR^ichChadavyayam || 3||
uvAsa katichinmAsAn rAj~no vR^ittavivitsayA |
duShprajasyAlpasArasya khalachChandAnuvartinaH || 4||
teja ojo balaM vIryaM prashrayAdIMshcha sadguNAn |
prajAnurAgaM pArtheShu na sahadbhishchikIrShitam || 5||
kR^itaM cha dhArtarAShTrairyadgaradAnAdyapeshalam |
Achakhyau sarvamevAsmai pR^ithA vidura eva cha || 6||
pR^ithA tu bhrAtaraM prAptamakrUramupasR^itya tam |
uvAcha janmanilayaM smarantyashrukalekShaNA || 7||
api smaranti naH saumya pitarau bhrAtarashcha me |
bhaginyau bhrAtR^iputrAshcha jAmayaH sakhya eva cha || 8||
bhrAtreyo bhagavAn kR^iShNaH sharaNyo bhaktavatsalaH |
paitR^iShvaseyAn smarati rAmashchAmburuhekShaNaH || 9||
sApatnamadhye shochantIM vR^ikAnAM hariNImiva |
sAntvayiShyati mAM vAkyaiH pitR^ihInAMshcha bAlakAn || 10||
kR^iShNa kR^iShNa mahAyogin vishvAtman vishvabhAvana |
prapannAM pAhi govinda shishubhishchAvasIdatIm || 11||
nAnyattava padAmbhojAtpashyAmi sharaNaM nR^iNAm |
bibhyatAM mR^ityusaMsArAdIshvarasyApavargikAt || 12||
namaH kR^iShNAya shuddhAya brahmaNe paramAtmane |
yogeshvarAya yogAya tvAmahaM sharaNaM gatA || 13||
shrIshuka uvAcha
ityanusmR^itya svajanaM kR^iShNaM cha jagadIshvaram |
prArudadduHkhitA rAjan bhavatAM prapitAmahI || 14||
samaduHkhasukho.akrUro vidurashcha mahAyashAH |
sAntvayAmAsatuH kuntIM tatputrotpattihetubhiH || 15||
yAsyan rAjAnamabhyetya viShamaM putralAlasam |
avadatsuhR^idAM madhye bandhubhiH sauhR^idoditam || 16||
akrUra uvAcha
bho bho vaichitravIrya tvaM kurUNAM kIrtivardhana |
bhrAtaryuparate pANDAvadhunA.a.asanamAsthitaH || 17||
dharmeNa pAlayannurvIM prajAH shIlena ra~njayan |
vartamAnaH samaH sveShu shreyaH kIrtimavApsyasi || 18||
anyathA tvAcharaMlloke garhito yAsyase tamaH |
tasmAtsamatve vartasva pANDaveShvAtmajeShu cha || 19||
neha chAtyantasaMvAsaH kasyachitkenachitsaha |
rAjan svenApi dehena kimu jAyAtmajAdibhiH || 20||
ekaH prasUyate jantureka eva pralIyate |
eko.anubhu~Nkte sukR^itameka eva cha duShkR^itam || 21||
adharmopachitaM vittaM harantyanye.alpamedhasaH |
sambhojanIyApadeshairjalAnIva jalaukasaH || 22||
puShNAti yAnadharmeNa svabud.hdhyA tamapaNDitam |
te.akR^itArthaM prahiNvanti prANA rAyaH sutAdayaH || 23||
svayaM kilbiShamAdAya taistyakto nArthakovidaH |
asiddhArtho vishatyandhaM svadharmavimukhastamaH || 24||
tasmAllokamimaM rAjan svapnamAyAmanoratham |
vIkShyAyamyAtmanA.a.atmAnaM samaH shAnto bhava prabho || 25||
dhR^itarAShTra uvAcha
yathA vadati kalyANIM vAchaM dAnapate bhavAn |
tathAnayA na tR^ipyAmi martyaH prApya yathAmR^itam || 26||
tathApi sUnR^itA saumya hR^idi na sthIyate chale |
putrAnurAgaviShame vidyutsaudAmanI yathA || 27||
Ishvarasya vidhiM ko nu vidhunotyanyathA pumAn |
bhUmerbhArAvatArAya yo.avatIrNo yadoHkule || 28||
yo durvimarshapathayA nijamAyayedaM
sR^iShTvA guNAn vibhajate tadanupraviShTaH |
tasmai namo duravabodhavihAratantra\-
saMsArachakragataye parameshvarAya || 29||
shrIshuka uvAcha
ityabhipretya nR^ipaterabhiprAyaM sa yAdavaH |
suhR^idbhiH samanuj~nAtaH punaryadupurImagAt || 30||
shashaMsa rAmakR^iShNAbhyAM dhR^itarAShTravicheShTitam |
pANDavAn prati kauravya yadarthaM preShitaH svayam || 31||
iti shrImadbhAgavate mahApurANe vaiyasakyAmaShTAdasha\-
sAhasryAM pAramahaMsyAM saMhitAyAM dashamaskandhe
pUrvArdhe ekonapa~nchAshattamo.adhyAyaH || 49||
\section{.. samAptamidaM dashamaskandhasya pUrvArdham ..}
\section{.. shrIkR^iShNArpaNamastu ..}
\iti
##
Proofread by PSA Easwaran

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}