% Text title            : shrImadbhAgavatam - 10-2 - dashamaskandhaH uttarArdham
% File name             : bhagpur-10b.itx
% Category              : purana, shrimadbhagavatam, vyAsa, krishna
% Location              : doc\_purana
% Proofread by          : PSA Easwaran
% Latest update         : July 4, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. shrImadbhAgavataM - dashamaskandhaH uttarArdhaM ..}##
\itxtitle{.. shrImadbhAgavataM \- dashamaskandhaH uttarArdham ..}##\endtitles ##
\chapter{.. OM namo bhagavate vAsudevAya ..}
\section{.. dashamaskandhaH uttarArdhaM ..}
\section{.. pa~nchAshattamo.adhyAyaH \- 50 ..}
shrIshuka uvAcha
astiH prAptishcha kaMsasya mahiShyau bharatarShabha |
mR^ite bhartari duHkhArte IyatuH sma piturgR^ihAn || 1||
pitre magadharAjAya jarAsandhAya duHkhite |
vedayA~nchakratuH sarvamAtmavaidhavyakAraNam || 2||
sa tadapriyamAkarNya shokAmarShayuto nR^ipa |
ayAdavIM mahIM kartuM chakre paramamudyamam || 3||
akShauhiNIbhirviMshatyA tisR^ibhishchApi saMvR^itaH |
yadurAjadhAnIM mathurAM nyaruNatsarvatodisham || 4||
nirIkShya tadbalaM kR^iShNa udvelamiva sAgaram |
svapuraM tena saMruddhaM svajanaM cha bhayAkulam || 5||
chintayAmAsa bhagavAn hariH kAraNamAnuShaH |
taddeshakAlAnuguNaM svAvatAraprayojanam || 6||
haniShyAmi balaM hyetadbhuvi bhAraM samAhitam |
mAgadhena samAnItaM vashyAnAM sarvabhUbhujAm || 7||
akShauhiNIbhiH sa~NkhyAtaM bhaTAshvarathaku~njaraiH |
mAgadhastu na hantavyo bhUyaH kartA balodyamam || 8||
etadartho.avatAro.ayaM bhUbhAraharaNAya me |
saMrakShaNAya sAdhUnAM kR^ito.anyeShAM vadhAya cha || 9||
anyo.api dharmarakShAyai dehaH sambhriyate mayA |
virAmAyApyadharmasya kAle prabhavataH kvachit || 10||
evaM dhyAyati govinda AkAshAtsUryavarchasau |
rathAvupasthitau sadyaH sasUtau saparichChadau || 11||
AyudhAni cha divyAni purANAni yadR^ichChayA |
dR^iShTvA tAni hR^iShIkeshaH sa~NkarShaNamathAbravIt || 12||
pashyArya vyasanaM prAptaM yadUnAM tvAvatAM prabho |
eSha te ratha AyAto dayitAnyAyudhAni cha || 13||
yAnamAsthAya jahyetadvyasanAtsvAn samuddhara |
etadarthaM hi nau janma sAdhUnAmIsha sharmakR^it || 14||
trayoviMshatyanIkAkhyaM bhUmerbhAramapAkuru |
evaM sammantrya dAshArhau daMshitau rathinau purAt || 15||
nirjagmatuH svAyudhADhyau balenAlpIyasA.a.avR^itau |
sha~NkhaM dadhmau vinirgatya harirdArukasArathiH || 16||
tato.abhUtparasainyAnAM hR^idi vitrAsavepathuH |
tAvAha mAgadho vIkShya he kR^iShNa puruShAdhama || 17||
na tvayA yoddhumichChAmi bAlenaikena lajjayA |
guptena hi tvayA manda na yotsye yAhi bandhuhan || 18||
tava rAma yadi shraddhA yudhyasva dhairyamudvaha |
hitvA vA machCharaishChinnaM dehaM svaryAhi mAM jahi || 19||
shrIbhagavAnuvAcha
na vai shUrA vikatthante darshayantyeva pauruSham |
na gR^ihNImo vacho rAjannAturasya mumUrShataH || 20||
shrIshuka uvAcha
jarAsutastAvabhisR^itya mAdhavau
mahAbalaughena balIyasA.a.avR^iNot |
sasainyayAnadhvajavAjisArathI
sUryAnalau vAyurivAbhrareNubhiH || 21||
suparNatAladhvajachihnitau rathA\-
valakShayantyo harirAmayormR^idhe |
striyaH purATTAlakaharmyagopuraM
samAshritAH sammumuhuH shuchArditAH || 22||
hariH parAnIkapayomuchAM muhuH
shilImukhAtyulbaNavarShapIDitam |
svasainyamAlokya surAsurArchitaM
vyasphUrjayachChAr~NgasharAsanottamam || 23||
gR^ihNan niSha~NgAdatha sandadhachCharAn
vikR^iShya mu~nchan shitabANapUgAn |
nighnan rathAn ku~njaravAjipattIn
nirantaraM yadvadalAtachakram || 24||
nirbhinnakumbhAH kariNo nipetu\-
ranekasho.ashvAH sharavR^ikNakandharAH |
rathA hatAshvadhvajasUtanAyakAH
padAtayashChinnabhujorukandharAH || 25||
sa~nChidyamAnadvipadebhavAjinA\-
ma~Nga prasUtAH shatasho.asR^igApagAH |
bhujAhayaH pUruShashIrShakachChapA
hatadvipadvIpahayagrahAkulAH || 26||
karorumInA narakeshashaivalA
dhanustara~NgAyudhagulmasa~NkulAH |
achChUrikAvartabhayAnakA mahA\-
maNipravekAbharaNAshmasharkarAH || 27||
pravartitA bhIrubhayAvahA mR^idhe
manasvinAM harShakarIH parasparam |
vinighnatArIn musalena durmadAn
sa~NkarShaNenAparimeyatejasA || 28||
balaM tada~NgArNavadurgabhairavaM
durantapAraM magadhendrapAlitam |
kShayaM praNItaM vasudevaputrayo\-
rvikrIDitaM tajjagadIshayoH param || 29||
sthityudbhavAntaM bhuvanatrayasya yaH
samIhate.anantaguNaH svalIlayA |
na tasya chitraM parapakShanigraha\-
stathApi martyAnuvidhasya varNyate || 30||
jagrAha virathaM rAmo jarAsandhaM mahAbalam |
hatAnIkAvashiShTAsuM siMhaH siMhamivaujasA || 31||
badhyamAnaM hatArAtiM pAshairvAruNamAnuShaiH |
vArayAmAsa govindastena kAryachikIrShayA || 32||
sa mukto lokanAthAbhyAM vrIDito vIrasammataH |
tapase kR^itasa~Nkalpo vAritaH pathi rAjabhiH || 33||
vAkyaiH pavitrArthapadairnayanaiH prAkR^itairapi |
svakarmabandhaprApto.ayaM yadubhiste parAbhavaH || 34||
hateShu sarvAnIkeShu nR^ipo bArhadrathastadA |
upekShito bhagavatA magadhAn durmanA yayau || 35||
mukundo.apyakShatabalo nistIrNAribalArNavaH |
vikIryamANaH kusumaistridashairanumoditaH || 36||
mAthurairupasa~Ngamya vijvarairmuditAtmabhiH |
upagIyamAnavijayaH sUtamAgadhavandibhiH || 37||
sha~Nkhadundubhayo nedurbherItUryANyanekashaH |
vINAveNumR^ida~NgAni puraM pravishati prabhau || 38||
siktamArgAM hR^iShTajanAM patAkAbhirala~NkR^itAm |
nirghuShTAM brahmaghoSheNa kautukAbaddhatoraNAm || 39||
nichIyamAno nArIbhirmAlyadadhyakShatA~NkuraiH |
nirIkShyamANaH sasnehaM prItyutkalitalochanaiH || 40||
AyodhanagataM vittamanantaM vIrabhUShaNam |
yadurAjAya tatsarvamAhR^itaM prAdishatprabhuH || 41||
evaM saptadashakR^itvastAvatyakShauhiNIbalaH |
yuyudhe mAgadho rAjA yadubhiH kR^iShNapAlitaiH || 42||
akShiNvaMstadbalaM sarvaM vR^iShNayaH kR^iShNatejasA |
hateShu sveShvanIkeShu tyakto.ayAdaribhirnR^ipaH || 43||
aShTAdashamasa~NgrAme AgAmini tadantarA |
nAradapreShito vIro yavanaH pratyadR^ishyata || 44||
rurodha mathurAmetya tisR^ibhirmlechChakoTibhiH |
nR^iloke chApratidvandvo vR^iShNIn shrutvA.a.atmasammitAn || 45||
taM dR^iShTvAchintayatkR^iShNaH sa~NkarShaNasahAyavAn |
aho yadUnAM vR^ijinaM prAptaM hyubhayato mahat || 46||
yavano.ayaM nirundhe.asmAnadya tAvanmahAbalaH |
mAgadho.apyadya vA shvo vA parashvo vA.a.agamiShyati || 47||
Avayoryudhyatorasya yadyAgantA jarAsutaH |
bandhUn vadhiShyatyatha vA neShyate svapuraM balI || 48||
tasmAdadya vidhAsyAmo durgaM dvipadadurgamam |
tatra j~nAtIn samAdhAya yavanaM ghAtayAmahe || 49||
iti sammantrya bhagavAn durgaM dvAdashayojanam |
antaHsamudre nagaraM kR^itsnAdbhutamachIkarat || 50||
dR^ishyate yatra hi tvAShTraM vij~nAnaM shilpanaipuNam |
rathyAchatvaravIthIbhiryathAvAstu vinirmitam || 51||
suradrumalatodyAnavichitropavanAnvitam |
hemashR^i~NgairdivispR^igbhiH sphaTikATTAlagopuraiH || 52||
rAjatArakuTaiH koShThairhemakumbhairala~NkR^itaiH |
ratnakUTairgR^ihairhaimairmahAmArakatasthalaiH || 53||
vAstoShpatInAM cha gR^ihairvalabhIbhishcha nirmitam |
chAturvarNyajanAkIrNaM yadudevagR^ihollasat || 54||
sudharmAM pArijAtaM cha mahendraH prAhiNoddhareH |
yatra chAvasthito martyo martyadharmairna yujyate || 55||
shyAmaikakarNAn varuNo hayAn shuklAn manojavAn |
aShTau nidhipatiH koshAn lokapAlo nijodayAn || 56||
yadyadbhagavatA dattamAdhipatyaM svasiddhaye |
sarvaM pratyarpayAmAsurharau bhUmigate nR^ipa || 57||
tatra yogaprabhAveNa nItvA sarvajanaM hariH |
prajApAlena rAmeNa kR^iShNaH samanumantritaH |
nirjagAma puradvArAtpadmamAlI nirAyudhaH || 58||
iti shrImadbhAgavate mahApurANe pAramahaMsyAM saMhitAyAM
dashamaskandhe uttarArdhe durganiveshanaM nAma pa~nchAshattamo.adhyAyaH || 50||
\iti
\section{.. OM namo bhagavate vAsudevAya ..}
\section{.. ekapa~nchAshattamo.adhyAyaH \- 51 ..}
shrIshukauvAcha
taM vilokya viniShkrAntamujjihAnamivoDupam |
darshanIyatamaM shyAmaM pItakausheyavAsasam || 1||
shrIvatsavakShasaM bhrAjatkaustubhAmuktakandharam |
pR^ithudIrghachaturbAhuM navaka~njAruNekShaNam || 2||
nityapramuditaM shrImatsukapolaM shuchismitam |
mukhAravindaM bibhrANaM sphuranmakarakuNDalam || 3||
vAsudevo hyayamiti pumAn shrIvatsalA~nChanaH |
chaturbhujo.aravindAkSho vanamAlyatisundaraH || 4||
lakShaNairnAradaproktairnAnyo bhavitumarhati |
nirAyudhashchalan padbhyAM yotsye.anena nirAyudhaH || 5||
iti nishchitya yavanaHprAdravantaM parA~Nmukham |
anvadhAvajjighR^ikShustaM durApamapi yoginAm || 6||
hastaprAptamivAtmAnaM hariNA sa pade pade |
nIto darshayatA dUraM yavanesho.adrikandaram || 7||
palAyanaM yadukule jAtasya tava nochitam |
iti kShipannanugato nainaM prApAhatAshubhaH || 8||
evaM kShipto.api bhagavAn prAvishadgirikandaram |
so.api praviShTastatrAnyaM shayAnaM dadR^ishe naram || 9||
nanvasau dUramAnIya shete mAmiha sAdhuvat |
iti matvAchyutaM mUDhastaM padA samatADayat || 10||
sa utthAya chiraM suptaH shanairunmIlya lochane |
disho vilokayan pArshve tamadrAkShIdavasthitam || 11||
sa tAvattasya ruShTasya dR^iShTipAtena bhArata |
dehajenAgninA dagdho bhasmasAdabhavatkShaNAt || 12||
rAjovAcha
ko nAma sa pumAn brahman kasya kiMvIrya eva cha |
kasmAdguhAM gataH shishye kintejo yavanArdanaH || 13||
shrIshukauvAcha
sa ikShvAkukule jAto mAndhAtR^itanayo mahAn |
muchukunda iti khyAto brahmaNyaH satyasa~NgaraH || 14||
sa yAchitaH suragaNairindrAdyairAtmarakShaNe |
asurebhyaH paritrastaistadrakShAM so.akarochchiram || 15||
labdhvA guhaM te svaHpAlaM muchukundamathAbruvan |
rAjan viramatAM kR^ichChrAdbhavAnnaH paripAlanAt || 16||
naraloke parityajya rAjyaM nihatakaNTakam |
asmAn pAlayato vIra kAmAste sarva ujjhitAH || 17||
sutA mahiShyo bhavato j~nAtayo.amAtyamantriNaH |
prajAshcha tulyakAlIyA nAdhunA santi kAlitAH || 18||
kAlo balIyAn balinAM bhagavAnIshvaro.avyayaH |
prajAH kAlayate krIDan pashupAlo yathA pashUn || 19||
varaM vR^iNIShva bhadraM te R^ite kaivalyamadya naH |
eka eveshvarastasya bhagavAn viShNuravyayaH || 20||
evamuktaH sa vai devAnabhivandya mahAyashAH |
ashayiShTa guhAviShTo nidrayA devadattayA || 21||
svApaM yAtaM yastu madhye bodhayettvAtmachetanaH |
sa tvayA dR^iShTamAtrastu bhasmIbhavatu tatkShNAt || 22||
yavane bhasmasAnnIte bhagavAn sAtvatarShabhaH |
AtmAnaM darshayAmAsa muchukundAya dhImate || 23||
tamAlokya ghanashyAmaM pItakausheyavAsasam |
shrIvatsavakShasaM bhrAjatkaustubhena virAjitam || 24||
chaturbhujaM rochamAnaM vaijayantyA cha mAlayA |
chAruprasannavadanaM sphuranmakarakuNDalam || 25||
prekShaNIyaM nR^ilokasya sAnurAgasmitekShaNam |
apIchyavayasaM mattamR^igendrodAravikramam || 26||
paryapR^ichChanmahAbuddhistejasA tasya dharShitaH |
sha~NkitaH shanakai rAjA durdharShamiva tejasA || 27||
muchukundauvAcha
ko bhavAniha samprApto vipine girigahvare |
padbhyAM padmapalAshAbhyAM vicharasyurukaNTake || 28||
kiMsvittejasvinAM tejo bhagavAn vA vibhAvasuH |
sUryaH somo mahendro vA lokapAlo.aparo.api vA || 29||
manye tvAM devadevAnAM trayANAM puruSharShabham |
yadbAdhase guhAdhvAntaM pradIpaH prabhayA yathA || 30||
shushrUShatAmavyalIkamasmAkaM narapu~Ngava |
svajanma karma gotraM vA kathyatAM yadi rochate || 31||
vayaM tu puruShavyAghra aikShvAkAH kShatrabandhavaH |
muchukunda iti prokto yauvanAshvAtmajaH prabho || 32||
chiraprajAgarashrAnto nidrayopahatendriyaH |
shaye.asmin vijane kAmaM kenApyutthApito.adhunA || 33||
so.api bhasmIkR^ito nUnamAtmIyenaiva pApmanA |
anantaraM bhavAn shrImAMllakShito.amitrashAtanaH || 34||
tejasA te.aviShahyeNa bhUri draShTuM na shaknumaH |
hataujaso mahAbhAga mAnanIyo.asi dehinAm || 35||
evaM sambhAShito rAj~nA bhagavAn bhUtabhAvanaH |
pratyAha prahasan vANyA meghanAdagabhIrayA || 36||
shrIbhagavAnuvAcha
janmakarmAbhidhAnAni santi me.a~Nga sahasrashaH |
na shakyante.anusa~NkhyAtumanantatvAnmayApi hi || 37||
kvachidrajAMsi vimame pArthivAnyurujanmabhiH |
guNakarmAbhidhAnAni na me janmAni karhichit || 38||
kAlatrayopapannAni janmakarmANi me nR^ipa |
anukramanto naivAntaM gachChanti paramarShayaH || 39||
tathApyadyatanAnya~Nga shR^iNuShva gadato mama |
vij~nApito viri~nchena purAhaM dharmaguptaye |
bhUmerbhArAyamANAnAmasurANAM kShayAyacha || 40||
avatIrNo yadukule gR^iha AnakadundubheH |
vadanti vAsudeveti vasudevasutaM hi mAm || 41||
kAlanemirhataH kaMsaH pralambAdyAshcha saddviShaH |
ayaM cha yavano dagdho rAjaMste tigmachakShuShA || 42||
so.ahaM tavAnugrahArthaM guhAmetAmupAgataH |
prArthitaH prachuraM pUrvaM tvayAhaM bhaktavatsalaH || 43||
varAn vR^iNIShva rAjarShe sarvAn kAmAn dadAmi te |
mAM prasanno janaH kashchinna bhUyo.arhati shochitum || 44||
shrIshukauvAcha
ityuktastaM praNamyAha muchukundo mudAnvitaH |
j~nAtvA nArAyaNaM devaM gargavAkyamanusmaran || 45||
muchukunda uvAcha
vimohito.ayaM jana IshamAyayA
tvadIyayA tvAM na bhajatyanarthadR^ik |
sukhAya duHkhaprabhaveShu sajjate
gR^iheShu yoShitpuruShashcha va~nchitaH || 46||
labdhvA jano durlabhamatra mAnuShaM
katha~nchidavya~Ngamayatnato.anagha |
pAdAravindaM na bhajatyasanmati\-
rgR^ihAndhakUpe patito yathA pashuH || 47||
mamaiSha kAlo.ajita niShphalo gato
rAjyashriyonnaddhamadasya bhUpateH |
martyAtmabuddheH sutadArakoshabhU\-
ShvAsajjamAnasya durantachintayA || 48||
kalevare.asmin ghaTakuDyasannibhe
nirUDhamAno naradeva ityaham |
vR^ito rathebhAshvapadAtyanIkapai\-
rgAM paryaTaMstvAgaNayan sudurmadaH || 49||
pramattamuchchairitikR^ityachintayA
pravR^iddhalobhaM viShayeShu lAlasam |
tvamapramattaH sahasAbhipadyase
kShullelihAno.ahirivAkhumantakaH || 50||
purA rathairhemapariShkR^itaishcharan
mata~NgajairvA naradevasa.nj~nitaH |
sa eva kAlena duratyayena te
kalevaro viTkR^imibhasmasa.nj~nitaH || 51||
nirjitya dikchakramabhUtavigraho
varAsanasthaH samarAjavanditaH |
gR^iheShu maithunyasukheShu yoShitAM
krIDAmR^igaH pUruSha Isha nIyate || 52||
karoti karmANi tapaHsuniShThito
nivR^ittabhogastadapekShayA dadat |
punashcha bhUyeyamahaM svarADiti
pravR^iddhatarSho na sukhAya kalpate || 53||
bhavApavargo bhramato yadA bhave\-
jjanasya tarhyachyuta satsamAgamaH |
satsa~Ngamo yarhi tadaiva sadgatau
parAvareshe tvayi jAyatematiH || 54||
manye mamAnugraha Isha te kR^ito
rAjyAnubandhApagamo yadR^ichChayA |
yaH prArthyate sAdhubhirekacharyayA
vanaM vivikShadbhirakhaNDabhUmipaiH || 55||
na kAmaye.anyaM tava pAdasevanA\-
daki~nchanaprArthyatamAdvaraM vibho |
ArAdhya kastvAM hyapavargadaM hare
vR^iNIta Aryo varamAtmabandhanam || 56||
tasmAdvisR^ijyAshiSha Isha sarvato
rajastamaHsattvaguNAnubandhanAH |
nira~njanaM nirguNamadvayaM paraM
tvAM j~naptimAtraM puruShaM vrajAmyaham || 57||
chiramiha vR^ijinArtastapyamAno.anutApai\-
ravitR^iShaShaDamitro.alabdhashAntiH katha~nchit |
sharaNada samupetastvatpadAbjaM parAtman
abhayamR^itamashokaM pAhi mA.a.apannamIsha || 58||
shrIbhagavAnuvAcha
sArvabhauma mahArAja matiste vimalorjitA |
varaiH pralobhitasyApi na kAmairvihatA yataH || 59||
pralobhito varairyattvamapramAdAya viddhi tat |
na dhIrekAntabhaktAnAmAshIrbhirbhidyate kvachit || 60||
yu~njAnAnAmabhaktAnAM prANAyAmAdibhirmanaH |
akShINavAsanaM rAjan dR^ishyate punarutthitam || 61||
vicharasva mahIM kAmaM mayyAveshitamAnasaH |
astveva nityadA tubhyaM bhaktirmayyanapAyinI || 62||
kShAtradharmasthito jantUn nyavadhIrmR^igayAdibhiH |
samAhitastattapasA jahyaghaM madupAshritaH || 63||
janmanyanantare rAjan sarvabhUtasuhR^ittamaH |
bhUtvA dvijavarastvaM vai mAmupaiShyasi kevalam || 64||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe muchukunda\-
stutirnAmaikapa~nchAshattamo.adhyAyaH || 51||
\iti
\section{.. OM namo bhagavate vAsudevAya ..}
\section{.. dvipa~nchAshattamo.adhyAyaH \- 52 ..}
shrIshukauvAcha
itthaM so.anugR^ihIto.a~Nga kR^iShNenekShvAkunandanaH |
taM parikramya sannamya nishchakrAma guhAmukhAt || 1||
sa vIkShya kShullakAnmartyAn pashUn vIrudvanaspatIn |
matvA kaliyugaM prAptaM jagAma dishamuttarAm || 2||
tapaHshraddhAyuto dhIro niHsa~Ngo muktasaMshayaH |
samAdhAya manaHkR^iShNe prAvishadgandhamAdanam || 3||
badaryAshramamAsAdya naranArAyaNAlayam |
sarvadvandvasahaH shAntastapasA.a.arAdhayaddharim || 4||
bhagavAn punarAvrajya purIM yavanaveShTitAm |
hatvA mlechChabalaM ninye tadIyaM dvArakAM dhanam || 5||
nIyamAne dhane gobhirnR^ibhishchAchyutachoditaiH |
AjagAma jarAsandhastrayoviMshatyanIkapaH || 6||
vilokya vegarabhasaM ripusainyasya mAdhavau |
manuShyacheShTAmApannau rAjan dudruvaturdrutam || 7||
vihAya vittaM prachuramabhItau bhIrubhItavat |
padbhyAM padmapalAshAbhyAM cheraturbahuyojanam || 8||
palAyamAnau tau dR^iShTvA mAgadhaH prahasan balI |
anvadhAvadrathAnIkairIshayorapramANavit || 9||
pradrutya dUraM saMshrAntau tu~NgamAruhatAM girim |
pravarShaNAkhyaM bhagavAnnityadA yatra varShati || 10||
girau nilInAvAj~nAya nAdhigamya padaM nR^ipa |
dadAha girimedhobhiH samantAdagnimutsR^ijan || 11||
tata utpatya tarasA dahyamAnataTAdubhau |
dashaikayojanottu~NgAnnipetaturadho bhuvi || 12||
alakShyamANau ripuNA sAnugena yadUttamau |
svapuraM punarAyAtau samudraparikhAM nR^ipa || 13||
so.api dagdhAviti mR^iShA manvAno balakeshavau |
balamAkR^iShya sumahanmagadhAn mAgadho yayau || 14||
AnartAdhipatiH shrImAn raivato revatIM sutAm |
brahmaNA choditaH prAdAdbalAyeti puroditam || 15||
bhagavAnapi govinda upayeme kurUdvaha |
vaidarbhIM bhIShmakasutAM shriyo mAtrAM svayaMvare || 16||
pramathya tarasA rAj~naH shAlvAdIMshchaidyapakShagAn |
pashyatAM sarvalokAnAM tArkShyaputraH sudhAmiva || 17||
rAjovAcha
bhagavAn bhIShmakasutAM rukmiNIM ruchirAnanAm |
rAkShasena vidhAnena upayema iti shrutam || 18||
bhagavan shrotumichChAmi kR^iShNasyAmitatejasaH |
yathA mAgadhashAlvAdIn jitvA kanyAmupAharat || 19||
brahman kR^iShNakathAHpuNyA mAdhvIrlokamalApahAH |
ko nu tR^ipyeta shR^iNvAnaH shrutaj~no nityanUtanAH || 20||
shrIshuka uvAcha
rAjA.a.asIdbhIShmako nAma vidarbhAdhipatirmahAn |
tasya pa~nchAbhavan putrAH kanyaikA cha varAnanA || 21||
rukmyagrajo rukmaratho rukmabAhuranantaraH |
rukmakesho rukmamAlI rukmiNyeShAM svasA satI || 22||
sopashrutya mukundasya rUpavIryaguNashriyaH |
gR^ihAgatairgIyamAnAstaM mene sadR^ishaM patim || 23||
tAM buddhilakShaNaudAryarUpashIlaguNAshrayAm |
kR^iShNashcha sadR^ishIM bhAryAM samudvoDhuM mano dadhe || 24||
bandhUnAmichChatAM dAtuM kR^iShNAya bhaginIM nR^ipa |
tato nivArya kR^iShNadviD rukmI chaidyamamanyata || 25||
tadavetyAsitApA~NgI vaidarbhI durmanA bhR^isham |
vichintyAptaM dvijaM ka~nchitkR^iShNAya prAhiNoddrutam || 26||
dvArakAM sa samabhyetya pratIhAraiH praveshitaH |
apashyadAdyaM puruShamAsInaM kA~nchanAsane || 27||
dR^iShTvA brahmaNyadevastamavaruhya nijAsanAt |
upaveshyArhayA~nchakre yathA.a.atmAnaM divaukasaH || 28||
taM bhuktavantaM vishrAntamupagamya satAM gatiH |
pANinAbhimR^ishan pAdAvavyagrastamapR^ichChata || 29||
kachchiddvijavarashreShTha dharmaste vR^iddhasammataH |
vartate nAtikR^ichChreNa santuShTamanasaH sadA || 30||
santuShTo yarhi varteta brAhmaNo yena kenachit |
ahIyamAnaH svAddharmAtsa hyasyAkhilakAmadhuk || 31||
asantuShTo.asakR^illokAnApnotyapi sureshvaraH |
aki~nchano.api santuShTaH shete sarvA~NgavijvaraH || 32||
viprAn svalAbhasantuShTAn sAdhUn bhUtasuhR^ittamAn |
niraha~NkAriNaH shAntAnnamasye shirasAsakR^it || 33||
kachchidvaH kushalaM brahman rAjato yasya hi prajAH |
sukhaM vasanti viShaye pAlyamAnAH sa me priyaH || 34||
yatastvamAgato durgaM nistIryeha yadichChayA |
sarvaM no brUhyaguhyaM chetkiM kAryaM karavAma te || 35||
evaM sampR^iShTasamprashno brAhmaNaH parameShThinA |
lIlAgR^ihItadehena tasmai sarvamavarNayat || 36||
rukmiNyuvAcha
shrutvA guNAn bhuvanasundara shR^iNvatAM te
nirvishya karNavivarairharato.a~NgatApam |
rUpaM dR^ishAM dR^ishimatAmakhilArthalAbhaM
tvayyachyutAvishati chittamapatrapaM me || 37||
kA tvA mukunda mahatI kulashIlarUpa\-
vidyAvayodraviNadhAmabhirAtmatulyam |
dhIrA patiM kulavatI na vR^iNIta kanyA
kAle nR^isiMha naralokamano.abhirAmam || 38||
tanme bhavAn khalu vR^itaH patira~Nga jAyA\-
mAtmArpitashcha bhavato.atra vibho vidhehi |
mA vIrabhAgamabhimarshatu chaidya ArAd\-
gomAyuvanmR^igapaterbalimambujAkSha || 39||
pUrteShTadattaniyamavratadevavipra\-
gurvarchanAdibhiralaM bhagavAn pareshaH |
ArAdhito yadi gadAgraja etya pANiM
gR^ihNAtu me na damaghoShasutAdayo.anye || 40||
shvobhAvini tvamajitodvahane vidarbhAn
guptaH sametya pR^itanApatibhiH parItaH |
nirmathya chaidyamagadhendrabalaM prasahya
mAM rAkShasenavidhinodvaha vIryashulkAm || 41||
antaHpurAntaracharImanihatya bandhUn
tvAmudvahe kathamiti pravadAmyupAyam |
pUrvedyurasti mahatI kuladeviyAtrA
yasyAM bahirnavavadhUrgirijAmupeyAt || 42||
yasyA~Nghripa~NkajarajaHsnapanaM mahAnto
vA~nChantyumApatirivAtmatamo.apahatyai |
yarhyambujAkSha na labheya bhavatprasAdaM
jahyAmasUn vratakR^ishAn shatajanmabhiH syAt || 43||
brAhmaNa uvAcha
ityete guhyasandeshA yadudeva mayAhR^itAH |
vimR^ishya kartuM yachchAtra kriyatAM tadanantaram || 44||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe rukmiNyudvAha\-
prastAve dvipa~nchAshattamo.adhyAyaH || 52||
\iti
\section{.. OM namo bhagavate vAsudevAya ..}
\section{.. tripa~nchAshattamo.adhyAyaH \- 53 ..}
shrIshuka uvAcha
vaidarbhyAH sa tu sandeshaM nishamya yadunandanaH |
pragR^ihya pANinA pANiM prahasannidamabravIt || 1||
shrIbhagavAnuvAcha
tathAhamapi tachchitto nidrAM cha na labhe nishi |
vedAhaM rukmiNA dveShAnmamodvAho nivAritaH || 2||
tAmAnayiShya unmathya rAjanyApasadAn mR^idhe |
matparAmanavadyA~NgImedhaso.agnishikhAmiva || 3||
shrIshuka uvAcha
udvAharkShaM cha vij~nAya rukmiNyA madhusUdanaH |
rathaH saMyujyatAmAshu dAruketyAha sArathim || 4||
sa chAshvaiH shaibyasugrIvameghapuShpabalAhakaiH |
yuktaM rathamupAnIya tasthau prA~njaliragrataH || 5||
Aruhya syandanaM shaurirdvijamAropya tUrNagaiH |
AnartAdekarAtreNa vidarbhAnagamaddhayaiH || 6||
rAjA sa kuNDinapatiH putrasnehavashaM gataH |
shishupAlAya svAM kanyAM dAsyan karmANyakArayat || 7||
puraM sammR^iShTasaMsiktamArgarathyAchatuShpatham |
chitradhvajapatAkAbhistoraNaiH samala~NkR^itam || 8||
sraggandhamAlyAbharaNairvirajo.ambarabhUShitaiH |
juShTaM strIpuruShaiH shrImadgR^ihairagurudhUpitaiH || 9||
pitR^In devAn samabhyarchya viprAMshcha vidhivannR^ipa |
bhojayitvA yathAnyAyaM vAchayAmAsa ma~Ngalam || 10||
susnAtAM sudatIM kanyAM kR^itakautukama~NgalAm |
ahatAMshukayugmena bhUShitAM bhUShaNottamaiH || 11||
chakruH sAmargyajurmantrairvadhvA rakShAM dvijottamAH |
purohito.atharvavidvai juhAva grahashAntaye || 12||
hiraNyarUpyavAsAMsi tilAMshcha guDamishritAn |
prAdAddhenUshcha viprebhyo rAjA vidhividAM varaH || 13||
evaM chedipatI rAjA damaghoShaH sutAya vai |
kArayAmAsa mantraj~naiH sarvamabhyudayochitam || 14||
madachyudbhirgajAnIkaiH syandanairhemamAlibhiH |
pattyashvasa~NkulaiH sainyaiH parItaH kuNDinaM yayau || 15||
taM vai vidarbhAdhipatiH samabhyetyAbhipUjya cha |
niveshayAmAsa mudA kalpitAnyaniveshane || 16||
tatra shAlvo jarAsandho dantavaktro vidUrathaH |
AjagmushchaidyapakShIyAH pauNDrakAdyAH sahasrashaH || 17||
kR^iShNarAmadviSho yattAH kanyAM chaidyAya sAdhitum |
yadyAgatya haretkR^iShNo rAmAdyairyadubhirvR^itaH || 18||
yotsyAmaH saMhatAstena iti nishchitamAnasAH |
AjagmurbhUbhujaH sarve samagrabalavAhanAH || 19||
shrutvaitadbhagavAn rAmo vipakShIyanR^ipodyamam |
kR^iShNaM chaikaM gataM hartuM kanyAM kalahasha~NkitaH || 20||
balena mahatA sArdhaM bhrAtR^isnehapariplutaH |
tvaritaH kuNDinaM prAgAdgajAshvarathapattibhiH || 21||
bhIShmakanyA varArohA kA~NkShantyAgamanaM hareH |
pratyApattimapashyantI dvijasyAchintayattadA || 22||
aho triyAmAntarita udvAho me.alparAdhasaH |
nAgachChatyaravindAkSho nAhaM vedmyatra kAraNam |
so.api nAvartate.adyApi matsandeshaharo dvijaH || 23||
api mayyanavadyAtmA dR^iShTvA ki~nchijjugupsitam |
matpANigrahaNe nUnaM nAyAti hi kR^itodyamaH || 24||
durbhagAyA na me dhAtA nAnukUlo maheshvaraH |
devI vA vimukhA gaurI rudrANI girijA satI || 25||
evaM chintayatI bAlA govindahR^itamAnasA |
nyamIlayata kAlaj~nA netre chAshrukalAkule || 26||
evaM vadhvAH pratIkShantyA govindAgamanaM nR^ipa |
vAma Ururbhujo netramasphuran priyabhAShiNaH || 27||
atha kR^iShNavinirdiShTaH sa eva dvijasattamaH |
antaHpuracharIM devIM rAjaputrIM dadarsha ha || 28||
sA taM prahR^iShTavadanamavyagrAtmagatiM satI |
AlakShya lakShaNAbhij~nA samapR^ichChachChuchismitA || 29||
tasyA AvedayatprAptaM shashaMsa yadunandanam |
uktaM cha satyavachanamAtmopanayanaM prati || 30||
tamAgataM samAj~nAya vaidarbhI hR^iShTamAnasA |
na pashyantI brAhmaNAya priyamanyannanAma sA || 31||
prAptau shrutvA svaduhiturudvAhaprekShaNotsukau |
abhyayAttUryaghoSheNa rAmakR^iShNau samarhaNaiH || 32||
madhuparkamupAnIya vAsAMsi virajAMsi saH |
upAyanAnyabhIShTAni vidhivatsamapUjayat || 33||
tayorniveshanaM shrImadupAkalpya mahAmatiH |
sasainyayoH sAnugayorAtithyaM vidadhe yathA || 34||
evaM rAj~nAM sametAnAM yathAvIryaM yathAvayaH |
yathAbalaM yathAvittaM sarvaiH kAmaiH samarhayat || 35||
kR^iShNamAgatamAkarNya vidarbhapuravAsinaH |
Agatya netrA~njalibhiH papustanmukhapa~Nkajam || 36||
asyaiva bhAryA bhavituM rukmiNyarhati nAparA |
asAvapyanavadyAtmA bhaiShmyAH samuchitaH patiH || 37||
ki~nchitsucharitaM yannastena tuShTastrilokakR^it |
anugR^ihNAtu gR^ihNAtu vaidarbhyAH pANimachyutaH || 38||
evaM premakalAbaddhA vadanti sma puraukasaH |
kanyA chAntaHpurAtprAgAdbhaTairguptAmbikAlayam || 39||
padbhyAM viniryayau draShTuM bhavAnyAH pAdapallavam |
sA chAnudhyAyatI samya~NmukundacharaNAmbujam || 40||
yatavA~NmAtR^ibhiH sArdhaM sakhIbhiH parivAritA |
guptA rAjabhaTaiH shUraiH sannaddhairudyatAyudhaiH |
mR^ida~Ngasha~NkhapaNavAstUryabheryashcha jaghnire || 41||
nAnopahArabalibhirvAramukhyAH sahasrashaH |
sraggandhavastrAbharaNairdvijapatnyaH svala~NkR^itAH || 42||
gAyantashcha stuvantashcha gAyakA vAdyavAdakAH |
parivArya vadhUM jagmuH sUtamAgadhavandinaH || 43||
AsAdya devIsadanaM dhautapAdakarAmbujA |
upaspR^ishya shuchiH shAntA praviveshAmbikAntikam || 44||
tAM vai pravayaso bAlAM vidhij~nA viprayoShitaH |
bhavAnIM vandayA~nchakrurbhavapatnIM bhavAnvitAm || 45||
namasye tvAmbike.abhIkShNaM svasantAnayutAM shivAm |
bhUyAtpatirme bhagavAn kR^iShNastadanumodatAm || 46||
adbhirgandhAkShatairdhUpairvAsaHsra~NmAlyabhUShaNaiH |
nAnopahArabalibhiH pradIpAvalibhiH pR^ithak || 47||
viprastriyaH patimatIstathA taiH samapUjayat |
lavaNApUpatAmbUlakaNThasUtraphalekShubhiH || 48||
tasyai striyastAH pradaduH sheShAM yuyujurAshiShaH |
tAbhyo devyai namashchakre sheShAM cha jagR^ihe vadhUH || 49||
munivratamatha tyaktvA nishchakrAmAmbikAgR^ihAt |
pragR^ihya pANinA bhR^ityAM ratnamudropashobhinA || 50||
tAM devamAyAmiva vIramohinIM
sumadhyamAM kuNDalamaNDitAnanAm |
shyAmAM nitambArpitaratnamekhalAM
vya~njatstanIM kuntalasha~NkitekShaNAm || 51||
shuchismitAM bimbaphalAdharadyuti
shoNAyamAnadvijakundakuDmalAm |
padA chalantIM kalahaMsagAminIM
shi~njatkalAnUpuradhAmashobhinA |
vilokya vIrA mumuhuH samAgatA
yashasvinastatkR^itahR^ichChayArditAH || 52||
yAM vIkShya te nR^ipatayastadudArahAsa\-
vrIDAvalokahR^itachetasa ujjhitAstrAH |
petuH kShitau gajarathAshvagatA vimUDhA
yAtrAchChalena haraye.arpayatIM svashobhAm || 53||
saivaM shanaishchalayatI chalapadmakoshau
prAptiM tadA bhagavataH prasamIkShamANA |
utsArya vAmakarajairalakAnapA~NgaiH
prAptAn hriyaikShata nR^ipAn dadR^ishe.achyutaM sA || 54||
tAM rAjakanyAM rathamArurukShatIM
jahAra kR^iShNo dviShatAM samIkShatAm |
rathaM samAropya suparNalakShaNaM
rAjanyachakraM paribhUya mAdhavaH || 55||
tato yayau rAmapurogamaiH shanaiH
shR^igAlamadhyAdiva bhAgahR^iddhariH || 56||
taM mAninaH svAbhibhavaM yashaHkShayaM
pare jarAsandhamukhA na sehire |
aho dhigasmAnyasha AttadhanvanAM
gopairhR^itaM kesariNAM mR^igairiva || 57||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe rukmiNIharaNaM
nAma tripa~nchAshattamo.adhyAyaH || 53||
\iti
\section{.. OM namo bhagavate vAsudevAya ..}
\section{.. chatuHpa~nchAshattamo.adhyAyaH \- 54 ..}
shrIshuka uvAcha
iti sarve susaMrabdhA vAhAnAruhya daMshitAH |
svaiH svairbalaiH parikrAntA anvIyurdhR^itakArmukAH || 1||
tAnApatata Alokya yAdavAnIkayUthapAH |
tasthustatsammukhA rAjan visphUrjya svadhanUMShi te || 2||
ashvapR^iShThe gajaskandhe rathopasthe cha kovidAH |
mumuchuH sharavarShANi meghA adriShvapo yathA || 3||
patyurbalaM sharAsAraishChannaM vIkShya sumadhyamA |
savrIDamaikShattadvaktraM bhayavihvalalochanA || 4||
prahasya bhagavAnAha mA sma bhairvAmalochane |
vina~NkShyatyadhunaivaitattAvakaiH shAtravaM balam || 5||
teShAM tadvikramaM vIrA gadasa~NkarShaNAdayaH |
amR^iShyamANA nArAchairjaghnurhayagajAn rathAn || 6||
petuH shirAMsi rathinAmashvinAM gajinAM bhuvi |
sakuNDalakirITAni soShNIShANi cha koTishaH || 7||
hastAH sAsigadeShvAsAH karabhA Uravo.a~NghrayaH |
ashvAshvataranAgoShTrakharamartyashirAMsi cha || 8||
hanyamAnabalAnIkA vR^iShNibhirjayakA~NkShibhiH |
rAjAno vimukhA jagmurjarAsandhapuraHsarAH || 9||
shishupAlaM samabhyetya hR^itadAramivAturam |
naShTatviShaM gatotsAhaM shuShyadvadanamabruvan || 10||
bho bhoH puruShashArdUla daurmanasyamidaM tyaja |
na priyApriyayo rAjan niShThA dehiShu dR^ishyate || 11||
yathA dArumayI yoShinnR^ityate kuhakechChayA |
evamIshvaratantro.ayamIhate sukhaduHkhayoH || 12||
shaureH saptadashAhaM vai saMyugAni parAjitaH |
trayoviMshatibhiH sainyairjigye ekamahaM param || 13||
tathApyahaM na shochAmi na prahR^iShyAmi karhichit |
kAlena daivayuktena jAnan vidrAvitaM jagat || 14||
adhunApi vayaM sarve vIrayUthapayUthapAH |
parAjitAH phalgutantrairyadubhiH kR^iShNapAlitaiH || 15||
ripavo jigyuradhunA kAla AtmAnusAriNi |
tadA vayaM vijeShyAmo yadA kAlaH pradakShiNaH || 16||
evaM prabodhito mitraishchaidyo.agAtsAnugaH puram |
hatasheShAH punaste.api yayuH svaM svaM puraM nR^ipAH || 17||
rukmI tu rAkShasodvAhaM kR^iShNadviDasahan svasuH |
pR^iShThato.anvagamatkR^iShNamakShauhiNyA vR^ito balI || 18||
rukmyamarShI susaMrabdhaH shR^iNvatAM sarvabhUbhujAm |
pratijaj~ne mahAbAhurdaMshitaH sasharAsanaH || 19||
ahatvA samare kR^iShNamapratyUhya cha rukmiNIm |
kuNDinaM na pravekShyAmi satyametadbravImi vaH || 20||
ityuktvA rathamAruhya sArathiM prAha satvaraH |
chodayAshvAn yataH kR^iShNastasya me saMyugaM bhavet || 21||
adyAhaM nishitairbANairgopAlasya sudurmateH |
neShye vIryamadaM yena svasA me prasabhaM hR^itA || 22||
vikatthamAnaH kumatirIshvarasyApramANavit |
rathenaikena govindaM tiShTha tiShThetyathAhvayat || 23||
dhanurvikR^iShya sudR^iDhaM jaghne kR^iShNaM tribhiH sharaiH |
Aha chAtra kShaNaM tiShTha yadUnAM kulapAMsana || 24||
kutra yAsi svasAraM me muShitvA dhvA~NkShavaddhaviH |
hariShye.adya madaM manda mAyinaH kUTayodhinaH || 25||
yAvanna me hato bANaiH shayIthA mu~ncha dArIkAm |
smayan kR^iShNo dhanushChittvA ShaDbhirvivyAdha rukmiNam || 26||
aShTabhishchaturo vAhAn dvAbhyAM sUtaM dhvajaM tribhiH |
sa chAnyaddhanurAdhAya kR^iShNaM vivyAdha pa~nchabhiH || 27||
taistADitaH sharaughaistu chichCheda dhanurachyutaH |
punaranyadupAdatta tadapyachChinadavyayaH || 28||
parighaM paTTishaM shUlaM charmAsI shaktitomarau |
yadyadAyudhamAdatta tatsarvaM so.achChinaddhariH || 29||
tato rathAdavaplutya khaDgapANirjighAMsayA |
kR^iShNamabhyadravatkruddhaH pata~Nga iva pAvakam || 30||
tasya chApatataH khaDgaM tilashashcharma cheShubhiH |
ChittvAsimAdade tigmaM rukmiNaM hantumudyataH || 31||
dR^iShTvA bhrAtR^ivadhodyogaM rukmiNI bhayavihvalA |
patitvA pAdayorbharturuvAcha karuNaM satI || 32||
yogeshvarAprameyAtman deva deva jagatpate |
hantuM nArhasi kalyANa bhrAtaraM me mahAbhuja || 33||
shrIshuka uvAcha
tayA paritrAsavikampitA~NgayA
shuchAvashuShyanmukharuddhakaNThayA |
kAtaryavisraMsitahemamAlayA
gR^ihItapAdaH karuNo nyavartata || 34||
chailena baddhvA tamasAdhukAriNaM
sashmashrukeshaM pravapan vyarUpayat |
tAvanmamarduH parasainyamadbhutaM
yadupravIrA nalinIM yathA gajAH || 35||
kR^iShNAntikamupavrajya dadR^ishustatra rukmiNam |
tathA bhUtaM hataprAyaM dR^iShTvA sa~NkarShaNo vibhuH |
vimuchya baddhaM karuNo bhagavAn kR^iShNamabravIt || 36||
asAdhvidaM tvayA kR^iShNa kR^itamasmajjugupsitam |
vapanaM shmashrukeshAnAM vairUpyaM suhR^ido vadhaH || 37||
maivAsmAn sAdhvyasUyethA bhrAturvairUpyachintayA |
sukhaduHkhado na chAnyo.asti yataH svakR^itabhuk pumAn || 38||
bandhurvadhArhadoSho.api na bandhorvadhamarhati |
tyAjyaH svenaiva doSheNa hataH kiM hanyate punaH || 39||
kShatriyANAmayaM dharmaH prajApativinirmitaH |
bhrAtApi bhrAtaraM hanyAdyena ghoratarastataH || 40||
rAjyasya bhUmervittasya striyo mAnasya tejasaH |
mAnino.anyasya vA hetoH shrImadAndhAH kShipanti hi || 41||
taveyaM viShamA buddhiH sarvabhUteShu durhR^idAm |
yanmanyase sadAbhadraM suhR^idAM bhadramaj~navat || 42||
Atmamoho nR^iNAmeSha kalpate devamAyayA |
suhR^iddurhR^idudAsIna iti dehAtmamAninAm || 43||
eka eva paro hyAtmA sarveShAmapi dehinAm |
nAneva gR^ihyate mUDhairyathA jyotiryathA nabhaH || 44||
deha AdyantavAneSha dravyaprANaguNAtmakaH |
AtmanyavidyayA kLLiptaH saMsArayati dehinam || 45||
nAtmano.anyena saMyogo viyogashchAsataH sati |
taddhetutvAttatprasiddherdR^igrUpAbhyAM yathA raveH || 46||
janmAdayastu dehasya vikriyA nAtmanaH kvachit |
kalAnAmiva naivendormR^itirhyasya kuhUriva || 47||
yathA shayAna AtmAnaM viShayAn phalameva cha |
anubhu~Nkte.apyasatyarthe tathA.a.apnotyabudho bhavam || 48||
tasmAdaj~nAnajaM shokamAtmashoShavimohanam |
tattvaj~nAnena nirhR^itya svasthA bhava shuchismite || 49||
shrIshuka uvAcha
evaM bhagavatA tanvI rAmeNa pratibodhitA |
vaimanasyaM parityajya mano bud.hdhyA samAdadhe || 50||
prANAvasheSha utsR^iShTo dviDbhirhatabalaprabhaH |
smaran virUpakaraNaM vitathAtmamanorathaH || 51||
chakre bhojakaTaM nAma nivAsAya mahatpuram |
ahatvA durmatiM kR^iShNamapratyUhya yavIyasIm |
kuNDinaM na pravekShyAmItyuktvA tatrAvasadruShA || 52||
bhagavAn bhIShmakasutAmevaM nirjitya bhUmipAn |
puramAnIya vidhivadupayeme kurUdvaha || 53||
tadA mahotsavo nR^INAM yadupuryAM gR^ihe gR^ihe |
abhUdananyabhAvAnAM kR^iShNe yadupatau nR^ipa || 54||
narA nAryashcha muditAH pramR^iShTamaNikuNDalAH |
pAribarhamupAjahrurvarayoshchitravAsasoH || 55||
sA vR^iShNipuryuttabhitendraketubhi\-
rvichitramAlyAmbararatnatoraNaiH |
babhau pratidvAryupakLLiptama~Ngalai\-
rApUrNakumbhAgurudhUpadIpakaiH || 56||
siktamArgA madachyudbhirAhUtapreShThabhUbhujAm |
gajairdvAHsu parAmR^iShTarambhApUgopashobhitA || 57||
kurusR^i~njayakaikeyavidarbhayadukuntayaH |
mitho mumudire tasmin sambhramAtparidhAvatAm || 58||
rukmiNyA haraNaM shrutvA gIyamAnaM tatastataH |
rAjAno rAjakanyAshcha babhUvurbhR^ishavismitAH || 59||
dvArakAyAmabhUdrAjan mahAmodaH puraukasAm |
rukmiNyA ramayopetaM dR^iShTvA kR^iShNaM shriyaHpatim || 60||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe rukmiNyudvAhe
chatuHpa~nchAshattamo.adhyAyaH || 54||
\iti
\section{.. OM namo bhagavate vAsudevAya ..}
\section{.. pa~nchapa~nchAshattamo.adhyAyaH \- 55 ..}
shrIshuka uvAcha
kAmastu vAsudevAMsho dagdhaH prAgrudramanyunA |
dehopapattaye bhUyastameva pratyapadyata || 1||
sa eva jAto vaidarbhyAM kR^iShNavIryasamudbhavaH |
pradyumna iti vikhyAtaH sarvato.anavamaH pituH || 2||
taM shambaraH kAmarUpI hR^itvA tokamanirdasham |
sa viditvA.a.atmanaH shatruM prAsyodanvatyagAdgR^iham || 3||
taM nirjagAra balavAn mInaH so.apyaparaiH saha |
vR^ito jAlena mahatA gR^ihIto matsyajIvibhiH || 4||
taM shambarAya kaivartA upAjahrurupAyanam |
sUdA mahAnasaM nItvAvadyan sudhitinAdbhutam || 5||
dR^iShTvA tadudare bAlaM mAyAvatyai nyavedayan |
nArado.akathayatsarvaM tasyAH sha~NkitachetasaH |
bAlasya tattvamutpattiM matsyodaraniveshanam || 6||
sA cha kAmasya vai patnI ratirnAma yashasvinI |
patyurnirdagdhadehasya dehotpattiM pratIkShatI || 7||
nirUpitA shambareNa sA sUdaudanasAdhane |
kAmadevaM shishuM buddhvA chakre snehaM tadArbhake || 8||
nAtidIrgheNa kAlena sa kArShNI rUDhayauvanaH |
janayAmAsa nArINAM vIkShantInAM cha vibhramam || 9||
sA taM patiM padmadalAyatekShaNaM
pralambabAhuM naralokasundaram |
savrIDahAsottabhitabhruvekShatI
prItyopatasthe ratira~Nga saurataiH || 10||
tAmAha bhagavAn kArShNirmAtaste matiranyathA |
mAtR^ibhAvamatikramya vartase kAminI yathA || 11||
ratiruvAcha
bhavAn nArAyaNasutaH shambareNa hR^ito gR^ihAt |
ahaM te.adhikR^itA patnI ratiH kAmo bhavAn prabho || 12||
eSha tvAnirdashaM sindhAvakShipachChambaro.asuraH |
matsyo.agrasIttadudarAdiha prApto bhavAn prabho || 13||
tamimaM jahi durdharShaM durjayaM shatrumAtmanaH |
mAyAshatavidaM tvaM cha mAyAbhirmohanAdibhiH || 14||
parishochati te mAtA kurarIva gataprajA |
putrasnehAkulA dInA vivatsA gaurivAturA || 15||
prabhAShyaivaM dadau vidyAM pradyumnAya mahAtmane |
mAyAvatI mahAmAyAM sarvamAyAvinAshinIm || 16||
sa cha shambaramabhyetya saMyugAya samAhvayat |
aviShahyaistamAkShepaiH kShipan sa~njanayan kalim || 17||
so.adhikShipto durvachobhiH pAdAhata ivoragaH |
nishchakrAma gadApANiramarShAttAmralochanaH || 18||
gadAmAvidhya tarasA pradyumnAya mahAtmane |
prakShipya vyanadannAdaM vajraniShpeShaniShThuram || 19||
tAmApatantIM bhagavAn pradyumno gadayA gadAm |
apAsya shatrave kruddhaH prAhiNotsvagadAM nR^ipa || 20||
sa cha mAyAM samAshritya daiteyIM mayadarshitAm |
mumuche.astramayaM varShaM kArShNau vaihAyaso.asuraH || 21||
bAdhyamAno.astravarSheNa raukmiNeyo mahArathaH |
sattvAtmikAM mahAvidyAM sarvamAyopamardinIm || 22||
tato gauhyakagAndharvapaishAchoragarAkShasIH |
prAyu~Nkta shatasho daityaH kArShNirvyadhamayatsa tAH || 23||
nishAtamasimudyamya sakirITaM sakuNDalam |
shambarasya shiraH kAyAttAmrashmashrvojasAharat || 24||
AkIryamANo divijaiH stuvadbhiH kusumotkaraiH |
bhAryayAmbarachAriNyA puraM nIto vihAyasA || 25||
antaHpuravaraM rAjan lalanAshatasa~Nkulam |
vivesha patnyA gaganAdvidyuteva balAhakaH || 26||
taM dR^iShTvA jaladashyAmaM pItakausheyavAsasam |
pralambabAhuM tAmrAkShaM susmitaM ruchirAnanam || 27||
svala~NkR^itamukhAmbhojaM nIlavakrAlakAlibhiH |
kR^iShNaM matvA striyo hrItA nililyustatra tatra ha || 28||
avadhArya shanairIShadvailakShaNyena yoShitaH |
upajagmuH pramuditAH sastrIratnaM suvismitAH || 29||
atha tatrAsitApA~NgI vaidarbhI valgubhAShiNI |
asmaratsvasutaM naShTaM snehasnutapayodharA || 30||
ko nvayaM naravaidUryaH kasya vA kamalekShaNaH |
dhR^itaH kayA vA jaThare keyaM labdhA tvanena vA || 31||
mama chApyAtmajo naShTo nIto yaH sUtikAgR^ihAt |
etattulyavayorUpo yadi jIvati kutrachit || 32||
kathaM tvanena samprAptaM sArUpyaM shAr~NgadhanvanaH |
AkR^ityAvayavairgatyA svarahAsAvalokanaiH || 33||
sa eva vA bhavennUnaM yo me garbhe dhR^ito.arbhakaH |
amuShmin prItiradhikA vAmaH sphurati me bhujaH || 34||
evaM mImAMsamAnAyAM vaidarbhyAM devakIsutaH |
devakyAnakadundubhyAmuttamashloka Agamat || 35||
vij~nAtArtho.api bhagavAMstUShNImAsa janArdanaH |
nArado.akathayatsarvaM shambarAharaNAdikam || 36||
tachChrutvA mahadAshcharyaM kR^iShNAntaHpurayoShitaH |
abhyanandan bahUnabdAn naShTaM mR^itamivAgatam || 37||
devakI vasudevashcha kR^iShNarAmau tathA striyaH |
dampatI tau pariShvajya rukmiNI cha yayurmudam || 38||
naShTaM pradyumnamAyAtamAkarNya dvArakaukasaH |
aho mR^ita ivAyAto bAlo diShTyeti hAbruvan || 39||
yaM vai muhuH pitR^isarUpanijeshabhAvA\-
stanmAtaro yadabhajan raharUDhabhAvAH |
chitraM na tatkhalu ramAspadabimbabimbe
kAme smare.akShaviShaye kimutAnyanAryaH || 40||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe pradyumnotpatti\-
nirUpaNaM nAma pa~nchapa~nchAshattamo.adhyAyaH || 55||
\iti
\section{.. OM namo bhagavate vAsudevAya ..}
\section{.. ShaTpa~nchAshattamo.adhyAyaH \- 56 ..}
shrIshuka uvAcha
satrAjitaH svatanayAM kR^iShNAya kR^itakilbiShaH |
syamantakena maNinA svayamudyamya dattavAn || 1||
rAjovAcha
satrAjitaH kimakarodbrahman kR^iShNasya kilbiSham |
syamantakaH kutastasya kasmAddattA sutA hareH || 2||
shrIshuka uvAcha
AsItsatrAjitaH sUryo bhaktasya paramaH sakhA |
prItastasmai maNiM prAdAtsUryastuShTaH syamantakam || 3||
sa taM bibhran maNiM kaNThe bhrAjamAno yathA raviH |
praviShTo dvArakAM rAjaMstejasA nopalakShitaH || 4||
taM vilokya janA dUrAttejasA muShTadR^iShTayaH |
dIvyate.akShairbhagavate shashaMsuH sUryasha~NkitAH || 5||
nArAyaNa namaste.astu sha~NkhachakragadAdhara |
dAmodarAravindAkSha govinda yadunandana || 6||
eSha AyAti savitA tvAM didR^ikShurjagatpate |
muShNan gabhastichakreNa nR^iNAM chakShUMShi tigmaguH || 7||
nanvanvichChanti te mArgaM trilokyAM vibudharShabhAH |
j~nAtvAdya gUDhaM yaduShu draShTuM tvAM yAtyajaH prabho || 8||
shrIshuka uvAcha
nishamya bAlavachanaM prahasyAmbujalochanaH |
prAha nAsau ravirdevaH satrAjinmaNinA jvalan || 9||
satrAjitsvagR^ihaM shrImatkR^itakautukama~Ngalam |
pravishya devasadane maNiM viprairnyaveshayat || 10||
dine dine svarNabhArAnaShTau sa sR^ijati prabho |
durbhikShamAryariShTAni sarpAdhivyAdhayo.ashubhAH |
na santi mAyinastatra yatrAste.abhyarchito maNiH || 11||
sa yAchito maNiM kvApi yadurAjAya shauriNA |
naivArthakAmukaH prAdAdyAch~nAbha~Ngamatarkayan || 12||
tamekadA maNiM kaNThe pratimuchya mahAprabham |
praseno hayamAruhya mR^igayAM vyacharadvane || 13||
prasenaM sahayaM hatvA maNimAchChidya kesarI |
giriM vishan jAmbavatA nihato maNimichChatA || 14||
so.api chakre kumArasya maNiM krIDanakaM bile |
apashyan bhrAtaraM bhrAtA satrAjitparyatapyata || 15||
prAyaH kR^iShNena nihato maNigrIvo vanaM gataH |
bhrAtA mameti tachChrutvA karNe karNe.ajapan janAH || 16||
bhagavAMstadupashrutya duryasho liptamAtmani |
mArShTuM prasenapadavImanvapadyata nAgaraiH || 17||
hataM prasenamashvaM cha vIkShya kesariNA vane |
taM chAdripR^iShThe nihataM R^ikSheNa dadR^ishurjanAH || 18||
R^ikSharAjabilaM bhImamandhena tamasA.a.avR^itam |
eko vivesha bhagavAnavasthApya bahiH prajAH || 19||
tatra dR^iShTvA maNipreShThaM bAlakrIDanakaM kR^itam |
hartuM kR^itamatistasminnavatasthe.arbhakAntike || 20||
tamapUrvaM naraM dR^iShTvA dhAtrI chukrosha bhItavat |
tachChrutvAbhyadravatkruddho jAmbavAn balinAM varaH || 21||
sa vai bhagavatA tena yuyudhe svAminA.a.atmanaH |
puruShaM prAkR^itaM matvA kupito nAnubhAvavit || 22||
dvandvayuddhaM sutumulamubhayorvijigIShatoH |
AyudhAshmadrumairdorbhiH kravyArthe shyenayoriva || 23||
AsIttadaShTAviMshAhamitaretaramuShTibhiH |
vajraniShpeShaparuShairavishramamaharnisham || 24||
kR^iShNamuShTiviniShpAtaniShpiShTA~NgorubandhanaH |
kShINasattvaH svinnagAtrastamAhAtIva vismitaH || 25||
jAne tvAM sarvabhUtAnAM prANa ojaH saho balam |
viShNuM purANapuruShaM prabhaviShNumadhIshvaram || 26||
tvaM hi vishvasR^ijAM sraShTA sR^ijyAnAmapi yachcha sat |
kAlaH kalayatAmIshaH para AtmA tathA.a.atmanAm || 27||
yasyeShadutkalitaroShakaTAkShamokShai\-
rvartmAdishatkShubhitanakratimi~Ngilo.abdhiH |
setuH kR^itaH svayasha ujjvalitA cha la~NkA
rakShaH shirAMsi bhuvi peturiShukShatAni || 28||
iti vij~nAtavij~nAnaM R^ikSharAjAnamachyutaH |
vyAjahAra mahArAja bhagavAn devakIsutaH || 29||
abhimR^ishyAravindAkShaH pANinA sha~NkareNa tam |
kR^ipayA parayA bhaktaM premagambhIrayA girA || 30||
maNihetoriha prAptA vayamR^ikShapate bilam |
mithyAbhishApaM pramR^ijannAtmano maNinAmunA || 31||
ityuktaH svAM duhitaraM kanyAM jAmbavatIM mudA |
arhaNArthaM sa maNinA kR^iShNAyopajahAra ha || 32||
adR^iShTvA nirgamaM shaureH praviShTasya bilaM janAH |
pratIkShya dvAdashAhAni duHkhitAH svapuraM yayuH || 33||
nishamya devakI devI rukmiNyAnakadundubhiH |
suhR^ido j~nAtayo.ashochan bilAtkR^iShNamanirgatam || 34||
satrAjitaM shapantaste duHkhitA dvArakaukasaH |
upatasthurmahAmAyAM durgAM kR^iShNopalabdhaye || 35||
teShAM tu devyupasthAnAtpratyAdiShTAshiShA sa cha |
prAdurbabhUva siddhArthaH sadAro harShayan hariH || 36||
upalabhya hR^iShIkeshaM mR^itaM punarivAgatam |
saha patnyA maNigrIvaM sarve jAtamahotsavAH || 37||
satrAjitaM samAhUya sabhAyAM rAjasannidhau |
prAptiM chAkhyAya bhagavAn maNiM tasmai nyavedayat || 38||
sa chAtivrIDito ratnaM gR^ihItvAvA~NmukhastataH |
anutapyamAno bhavanamagamatsvena pApmanA || 39||
so.anudhyAyaMstadevAghaM balavadvigrahAkulaH |
kathaM mR^ijAmyAtmarajaH prasIdedvAchyutaH katham || 40||
kiM kR^itvA sAdhu mahyaM syAnna shapedvA jano yathA |
adIrghadarshanaM kShudraM mUDhaM draviNalolupam || 41||
dAsye duhitaraM tasmai strIratnaM ratnameva cha |
upAyo.ayaM samIchInastasya shAntirna chAnyathA || 42||
evaM vyavasito bud.hdhyA satrAjitsvasutAM shubhAm |
maNiM cha svayamudyamya kR^iShNAyopajahAra ha || 43||
tAM satyabhAmAM bhagavAnupayeme yathAvidhi |
bahubhiryAchitAM shIlarUpaudAryaguNAnvitAm || 44||
bhagavAnAha na maNiM pratIchChAmo vayaM nR^ipa |
tavAstAM devabhaktasya vayaM cha phalabhAginaH || 45||
iti shrImadbhAgavAte mahApurANe pAramahaMsyAM
saMhitAyAM dashamaskandhe uttarArdhe syamantako\-
pAkhyAne ShaTpa~nchAshattamo.adhyAyaH || 56||
\iti
\section{.. OM namo bhagavate vAsudevAya ..}
\section{.. saptapa~nchAshattamo.adhyAyaH \- 57 ..}
shrIshuka uvAcha
vij~nAtArtho.api govindo dagdhAnAkarNya pANDavAn |
kuntIM cha kulyakaraNe saha rAmo yayau kurUn || 1||
bhIShmaM kR^ipaM saviduraM gAndhArIM droNameva cha |
tulyaduHkhau cha sa~Ngamya hA kaShTamiti hochatuH || 2||
labdhvaitadantaraM rAjan shatadhanvAnamUchatuH |
akrUrakR^itavarmANau maNiH kasmAnna gR^ihyate || 3||
yo.asmabhyaM sampratishrutya kanyAratnaM vigarhya naH |
kR^iShNAyAdAnna satrAjitkasmAdbhrAtaramanviyAt || 4||
evaM bhinnamatistAbhyAM satrAjitamasattamaH |
shayAnamavadhIllobhAtsa pApaH kShINajIvitaH || 5||
strINAM vikroshamAnAnAM krandantInAmanAthavat |
hatvA pashUn saunikavanmaNimAdAya jagmivAn || 6||
satyabhAmA cha pitaraM hataM vIkShya shuchArpitA |
vyalapattAta tAteti hA hatAsmIti muhyatI || 7||
tailadroNyAM mR^itaM prAsya jagAma gajasAhvayam |
kR^iShNAya viditArthAya taptA.a.achakhyau piturvadham || 8||
tadAkarNyeshvarau rAjannanusR^itya nR^ilokatAm |
aho naH paramaM kaShTamityasrAkShau vilepatuH || 9||
Agatya bhagavAMstasmAtsabhAryaH sAgrajaH puram |
shatadhanvAnamArebhe hantuM hartuM maNiM tataH || 10||
so.api kR^iShNodyamaM j~nAtvA bhItaH prANaparIpsayA |
sAhAyye kR^itavarmANamayAchata sa chAbravIt || 11||
nAhamIshvarayoH kuryAM helanaM rAmakR^iShNayoH |
ko nu kShemAya kalpeta tayorvR^ijinamAcharan || 12||
kaMsaH sahAnugo.apIto yaddveShAttyAjitaH shriyA |
jarAsandhaH saptadasha saMyugAn viratho gataH || 13||
pratyAkhyAtaH sa chAkrUraM pArShNigrAhamayAchata |
so.apyAha ko virudhyeta vidvAnIshvarayorbalam || 14||
ya idaM lIlayA vishvaM sR^ijatyavati hanti cha |
cheShTAM vishvasR^ijo yasya na vidurmohitAjayA || 15||
yaH saptahAyanaH shailamutpATyaikena pANinA |
dadhAra lIlayA bAla uchChilIndhramivArbhakaH || 16||
namastasmai bhagavate kR^iShNAyAdbhutakarmaNe |
anantAyAdibhUtAya kUTasthAyAtmane namaH || 17||
pratyAkhyAtaH sa tenApi shatadhanvA mahAmaNim |
tasmin nyasyAshvamAruhya shatayojanagaM yayau || 18||
garuDadhvajamAruhya rathaM rAmajanArdanau |
anvayAtAM mahAvegairashvai rAjan gurudruham || 19||
mithilAyAmupavane visR^ijya patitaM hayam |
padbhyAmadhAvatsantrastaH kR^iShNo.apyanvadravadruShA || 20||
padAterbhagavAMstasya padAtistigmaneminA |
chakreNa shira utkR^itya vAsasorvyachinonmaNim || 21||
alabdhamaNirAgatya kR^iShNa AhAgrajAntikam |
vR^ithA hataH shatadhanurmaNistatra na vidyate || 22||
tata Aha balo nUnaM sa maNiH shatadhanvanA |
kasmiMshchitpuruShe nyastastamanveSha puraM vraja || 23||
ahaM videhamichChAmi draShTuM priyatamaM mama |
ityuktvA mithilAM rAjan vivesha yadunandanaH || 24||
taM dR^iShTvA sahasotthAya maithilaH prItamAnasaH |
arhayAmAsa vidhivadarhaNIyaM samarhaNaiH || 25||
uvAsa tasyAM katichinmithilAyAM samA vibhuH |
mAnitaH prItiyuktena janakena mahAtmanA |
tato.ashikShadgadAM kAle dhArtarAShTraH suyodhanaH || 26||
keshavo dvArakAmetya nidhanaM shatadhanvanaH |
aprAptiM cha maNeH prAha priyAyAH priyakR^idvibhuH || 27||
tataH sa kArayAmAsa kriyA bandhorhatasya vai |
sAkaM suhR^idbhirbhagavAn yA yAH syuH sAmparAyikAH || 28||
akrUraH kR^itavarmA cha shrutvA shatadhanorvadham |
vyUShaturbhayavitrastau dvArakAyAH prayojakau || 29||
akrUre proShite.ariShTAnyAsan vai dvArakaukasAm |
shArIrA mAnasAstApA muhurdaivikabhautikAH || 30||
itya~Ngopadishantyeke vismR^itya prAgudAhR^itam |
munivAsanivAse kiM ghaTetAriShTadarshanam || 31||
deve.avarShati kAshIshaH shvaphalkAyAgatAya vai |
svasutAM gAndinIM prAdAttato.avarShatsma kAshiShu || 32||
tatsutastatprabhAvo.asAvakrUro yatra yatra ha |
devo.abhivarShate tatra nopatApA na mArikAH || 33||
iti vR^iddhavachaH shrutvA naitAvadiha kAraNam |
iti matvA samAnAyya prAhAkrUraM janArdanaH || 34||
pUjayitvAbhibhAShyainaM kathayitvA priyAH kathAH |
vij~nAtAkhilachittaj~naH smayamAna uvAcha ha || 35||
nanu dAnapate nyastastvayyAste shatadhanvanA |
syamantako maNiH shrImAn viditaH pUrvameva naH || 36||
satrAjito.anapatyatvAdgR^ihNIyurduhituH sutAH |
dAyaM ninIyApaH piNDAn vimuchyarNaM cha sheShitam || 37||
tathApi durdharastvanyaistvayyAstAM suvrate maNiH |
kintu mAmagrajaH samya~Nna pratyeti maNiM prati || 38||
darshayasva mahAbhAga bandhUnAM shAntimAvaha |
avyuchChinnA makhAste.adya vartante rukmavedayaH || 39||
evaM sAmabhirAlabdhaH shvaphalkatanayo maNim |
AdAya vAsasAchChannaM dadau sUryasamaprabham || 40||
syamantakaM darshayitvA j~nAtibhyo raja AtmanaH |
vimR^ijya maNinA bhUyastasmai pratyarpayatprabhuH || 41||
yastvetadbhagavata Ishvarasya viShNo\-
rvIryADhyaM vR^ijinaharaM suma~NgalaM cha |
AkhyAnaM paThati shR^iNotyanusmaredvA
duShkIrtiM duritamapohya yAti shAntim || 42||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe syamantako\-
pAkhyAne saptapa~nchAshattamo.adhyAyaH || 57||
\iti
\section{.. OM namo bhagavate vAsudevAya ..}
\section{.. aShTapa~nchAshattamo.adhyAyaH \- 58 ..}
shrIshuka uvAcha
ekadA pANDavAn draShTuM pratItAn puruShottamaH |
indraprasthaM gataH shrImAn yuyudhAnAdibhirvR^itaH || 1||
dR^iShTvA tamAgataM pArthA mukundamakhileshvaram |
uttasthuryugapadvIrAH prANA mukhyamivAgatam || 2||
pariShvajyAchyutaM vIrA a~Ngasa~NgahatainasaH |
sAnurAgasmitaM vaktraM vIkShya tasya mudaM yayuH || 3||
yudhiShThirasya bhImasya kR^itvA pAdAbhivandanam |
phAlgunaM parirabhyAtha yamAbhyAM chAbhivanditaH || 4||
paramAsana AsInaM kR^iShNA kR^iShNamaninditA |
navoDhA vrIDitA ki~nchichChanairetyAbhyavandata || 5||
tathaiva sAtyakiH pArthaiH pUjitashchAbhivanditaH |
niShasAdAsane.anye cha pUjitAH paryupAsata || 6||
pR^ithAM samAgatya kR^itAbhivAdana\-
stayAtihArdArdradR^ishAbhirambhitaH |
ApR^iShTavAMstAM kushalaM sahasnuShAM
pitR^iShvasAraM paripR^iShTabAndhavaH || 7||
tamAha premavaiklavyaruddhakaNThAshrulochanA |
smarantI tAn bahUn kleshAn kleshApAyAtmadarshanam || 8||
tadaiva kushalaM no.abhUtsanAthAste kR^itA vayam |
j~nAtIn naH smaratA kR^iShNa bhrAtA me preShitastvayA || 9||
na te.asti svaparabhrAntirvishvasya suhR^idAtmanaH |
tathApi smaratAM shashvatkleshAn haMsi hR^idi sthitaH || 10||
yudhiShThira uvAcha
kiM na AcharitaM shreyo na vedAhamadhIshvara |
yogeshvarANAM durdarsho yanno dR^iShTaH kumedhasAm || 11||
iti vai vArShikAn mAsAn rAj~nA so.abhyarthitaH sukham |
janayan nayanAnandamindraprasthaukasAM vibhuH || 12||
ekadA rathamAruhya vijayo vAnaradhvajam |
gANDIvaM dhanurAdAya tUNau chAkShayasAyakau || 13||
sAkaM kR^iShNena sannaddho vihartuM vipinaM vanam |
bahuvyAlamR^igAkIrNaM prAvishatparavIrahA || 14||
tatrAvidhyachCharairvyAghrAn sUkarAn mahiShAn rurUn |
sharabhAn gavayAn khaDgAn hariNAn shashashallakAn || 15||
tAn ninyuH ki~NkarA rAj~ne medhyAn parvaNyupAgate |
tR^iT parItaH parishrAnto bIbhatsuryamunAmagAt || 16||
tatropaspR^ishya vishadaM pItvA vAri mahArathau |
kR^iShNau dadR^ishatuH kanyAM charantIM chArudarshanAm || 17||
tAmAsAdya varArohAM sudvijAM ruchirAnanAm |
paprachCha preShitaH sakhyA phAlgunaH pramadottamAm || 18||
kA tvaM kasyAsi sushroNi kuto.asi kiM chikIrShasi |
manye tvAM patimichChantIM sarvaM kathaya shobhane || 19||
kAlindyuvAcha
ahaM devasya saviturduhitA patimichChatI |
viShNuM vareNyaM varadaM tapaH paramamAsthitA || 20||
nAnyaM patiM vR^iNe vIra tamR^ite shrIniketanam |
tuShyatAM me sa bhagavAn mukundo.anAthasaMshrayaH || 21||
kAlindIti samAkhyAtA vasAmi yamunAjale |
nirmite bhavane pitrA yAvadachyutadarshanam || 22||
tathAvadadguDAkesho vAsudevAya so.api tAm |
rathamAropya tadvidvAn dharmarAjamupAgamat || 23||
yadaiva kR^iShNaH sandiShTaH pArthAnAM paramAdbhutam |
kArayAmAsa nagaraM vichitraM vishvakarmaNA || 24||
bhagavAMstatra nivasan svAnAM priyachikIrShayA |
agnaye khANDavaM dAtumarjunasyAsa sArathiH || 25||
so.agnistuShTo dhanuradAddhayAn shvetAn rathaM nR^ipa |
arjunAyAkShayau tUNau varma chAbhedyamastribhiH || 26||
mayashcha mochito vahneH sabhAM sakhya upAharat |
yasmin duryodhanasyAsIjjalasthaladR^ishibhramaH || 27||
sa tena samanuj~nAtaH suhR^idbhishchAnumoditaH |
Ayayau dvArakAM bhUyaH sAtyakipramukhairvR^itaH || 28||
athopayeme kAlindIM supuNyartvarkSha Urjite |
vitanvan paramAnandaM svAnAM paramama~Ngalam || 29||
vindAnuvindAvAvantyau duryodhanavashAnugau |
svayaMvare svabhaginIM kR^iShNe saktAM nyaShedhatAm || 30||
rAjAdhidevyAstanayAM mitravindAM pitR^iShvasuH |
prasahya hR^itavAn kR^iShNo rAjan rAj~nAM prapashyatAm || 31||
nagnajinnAma kausalya AsIdrAjAtidhArmikaH |
tasya satyAbhavatkanyA devI nAgnajitI nR^ipa || 32||
na tAM shekurnR^ipA voDhumajitvA sapta govR^iShAn |
tIkShNashR^i~NgAn sudurdharShAn vIragandhAsahAn khalAn || 33||
tAM shrutvA vR^iShajillabhyAM bhagavAn sAtvatAM patiH |
jagAma kausalyapuraM sainyena mahatA vR^itaH || 34||
sa kosalapatiH prItaH pratyutthAnAsanAdibhiH |
arhaNenApi guruNA pUjayan pratinanditaH || 35||
varaM vilokyAbhimataM samAgataM
narendrakanyA chakame ramApatim |
bhUyAdayaM me patirAshiSho.amalAH
karotu satyA yadi me dhR^ito vrataiH || 36||
yatpAdapa~NkajarajaH shirasA bibharti
shrIrabjajaH sagirishaH saha lokapAlaiH |
lIlAtanUH svakR^itasetuparIpsayeshaH
kAle dadhatsa bhagavAn mama kena tuShyet || 37||
architaM punarityAha nArAyaNa jagatpate |
AtmAnandena pUrNasya karavANi kimalpakaH || 38||
shrIshuka uvAcha
tamAha bhagavAn hR^iShTaH kR^itAsanaparigrahaH |
meghagambhIrayA vAchA sasmitaM kurunandana || 39||
shrIbhagavAnuvAcha
narendra yAch~nA kavibhirvigarhitA
rAjanyabandhornijadharmavartinaH |
tathApi yAche tava sauhR^idechChayA
kanyAM tvadIyAM na hi shulkadA vayam || 40||
rAjovAcha
ko.anyaste.abhyadhiko nAtha kanyAvara ihepsitaH |
guNaikadhAmno yasyA~Nge shrIrvasatyanapAyinI || 41||
kintvasmAbhiH kR^itaH pUrvaM samayaH sAtvatarShabha |
puMsAM vIryaparIkShArthaM kanyAvaraparIpsayA || 42||
saptaite govR^iShA vIra durdAntA duravagrahAH |
etairbhagnAH subahavo bhinnagAtrA nR^ipAtmajAH || 43||
yadime nigR^ihItAH syustvayaiva yadunandana |
varo bhavAnabhimato duhiturme shriyaHpate || 44||
evaM samayamAkarNya baddhvA parikaraM prabhuH |
AtmAnaM saptadhA kR^itvA nyagR^ihNAllIlayaiva tAn || 45||
baddhvA tAn dAmabhiH shaurirbhagnadarpAn hataujasaH |
vyakarShallIlayA baddhAn bAlo dArumayAn yathA || 46||
tataH prItaH sutAM rAjA dadau kR^iShNAya vismitaH |
tAM pratyagR^ihNAdbhagavAn vidhivatsadR^ishIM prabhuH || 47||
rAjapatnyashcha duhituH kR^iShNaM labdhvA priyaM patim |
lebhire paramAnandaM jAtashcha paramotsavaH || 48||
sha~NkhabheryAnakA nedurgItavAdyadvijAshiShaH |
narA nAryaH pramuditAH suvAsaHsragala~NkR^itAH || 49||
dashadhenusahasrANi pAribarhamadAdvibhuH |
yuvatInAM trisAhasraM niShkagrIvasuvAsAm || 50||
navanAgasahasrANi nAgAchChataguNAn rathAn |
rathAchChataguNAnashvAnashvAchChataguNAn narAn || 51||
dampatI rathamAropya mahatyA senayA vR^itau |
snehapraklinnahR^idayo yApayAmAsa kosalaH || 52||
shrutvaitadrurudhurbhUpA nayantaM pathi kanyakAm |
bhagnavIryAH sudurmarShA yadubhirgovR^iShaiH purA || 53||
tAnasyataH sharavrAtAn bandhupriyakR^idarjunaH |
gANDIvI kAlayAmAsa siMhaH kShudramR^igAniva || 54||
pAribarhamupAgR^ihya dvArakAmetya satyayA |
reme yadUnAmR^iShabho bhagavAn devakIsutaH || 55||
shrutakIrteH sutAM bhadrAmupayeme pitR^iShvasuH |
kaikeyIM bhrAtR^ibhirdattAM kR^iShNaH santardanAdibhiH || 56||
sutAM cha madrAdhipaterlakShmaNAM lakShaNairyutAm |
svayaMvare jahAraikaH sa suparNaH sudhAmiva || 57||
anyAshchaivaMvidhA bhAryAH kR^iShNasyAsan sahasrashaH |
bhaumaM hatvA tannirodhAdAhR^itAshchArudarshanAH || 58||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe aShTamahiShyudvAho
nAmAShTapa~nchAshattamo.adhyAyaH || 58||
\iti
\section{.. OM namo bhagavate vAsudevAya ..}
\section{.. ekonaShaShTitamo.adhyAyaH \- 59 ..}
rAjovAcha
yathA hato bhagavatA bhaumo yene cha tAH striyaH |
niruddhA etadAchakShva vikramaM shAr~NgadhanvanaH || 1||
shrIshuka uvAcha
indreNa hR^itaChatreNa hR^itakuNDalabandhunA |
hR^itAmarAdristhAnena j~nApito bhaumacheShTitam |
sabhAryo garuDArUDhaH prAgjyotiShapuraM yayau || 2||
giridurgaiH shastradurgairjalAgnyaniladurgamam |
murapAshAyutairghorairdR^iDhaiH sarvata AvR^itam || 3||
gadayA nirbibhedAdrIn shastradurgANi sAyakaiH |
chakreNAgniM jalaM vAyuM murapAshAMstathAsinA || 4||
sha~NkhanAdena yantrANi hR^idayAni manasvinAm |
prAkAraM gadayA gurvyA nirbibheda gadAdharaH || 5||
pA~nchajanyadhvaniM shrutvA yugAntAshanibhIShaNam |
muraH shayAna uttasthau daityaH pa~nchashirA jalAt || 6||
trishUlamudyamya sudurnirIkShaNo
yugAntasUryAnalarochirulbaNaH |
grasaMstrilokImiva pa~nchabhirmukhai\-
rabhyadravattArkShyasutaM yathoragaH || 7||
Avidhya shUlaM tarasA garutmate
nirasya vaktrairvyanadatsa pa~nchabhiH |
sa rodasI sarvadisho.ambaraM mahA\-
nApUrayannaNDakaTAhamAvR^iNot || 8||
tadApatadvai trishikhaM garutmate
hariH sharAbhyAmabhinattridhaujasA |
mukheShu taM chApi sharairatADaya\-
ttasmai gadAM so.api ruShA vyamu~nchata || 9||
tAmApatantIM gadayA gadAM mR^idhe
gadAgrajo nirbibhide sahasradhA |
udyamya bAhUnabhidhAvato.ajitaH
shirAMsi chakreNa jahAra lIlayA || 10||
vyasuH papAtAmbhasi kR^ittashIrSho
nikR^ittashR^i~Ngo.adririvendratejasA |
tasyAtmajAH sapta piturvadhAturAH
pratikriyAmarShajuShaH samudyatAH || 11||
tAmro.antarikShaH shravaNo vibhAvasu\-
rvasurnabhasvAnaruNashcha saptamaH |
pIThaM puraskR^itya chamUpatiM mR^idhe
bhaumaprayuktA niragan dhR^itAyudhAH || 12||
prAyu~njatAsAdya sharAnasIn gadAH
shaktyR^iShTishUlAnyajite ruSholbaNAH |
tachChastrakUTaM bhagavAn svamArgaNai\-
ramoghavIryastilashashchakarta ha || 13||
tAn pIThamukhyAnanayadyamakShayaM
nikR^ittashIrShorubhujA~NghrivarmaNaH |
svAnIkapAnachyutachakrasAyakai\-
stathA nirastAn narako dharAsutaH || 14||
nirIkShya durmarShaNa Asravanmadai\-
rgajaiH payodhiprabhavairnirAkramat |
dR^iShTvA sabhAryaM garuDopari sthitaM
sUryopariShTAtsataDidghanaM yathA |
kR^iShNaM sa tasmai vyasR^ijachChataghnIM
yodhAshcha sarve yugapatsma vivyadhuH || 15||
tadbhaumasainyaM bhagavAn gadAgrajo
vichitravAjairnishitaiH shilImukhaiH |
nikR^ittabAhUrushirodhravigrahaM
chakAra tarhyeva hatAshvaku~njaram || 16||
yAni yodhaiH prayuktAni shastrAstrANi kurUdvaha |
haristAnyachChinattIkShNaiH sharairekaikashastribhiH || 17||
uhyamAnaH suparNena pakShAbhyAM nighnatA gajAn |
garutmatA hanyamAnAstuNDapakShanakhairgajAH || 18||
puramevAvishannArtA narako yudhyayudhyata |
dR^iShTvA vidrAvitaM sainyaM garuDenArditaM svakam || 19||
taM bhaumaH prAharachChaktyA vajraH pratihato yataH |
nAkampata tayA viddho mAlAhata iva dvipaH || 20||
shUlaM bhaumo.achyutaM hantumAdade vitathodyamaH |
tadvisargAtpUrvameva narakasya shiro hariH |
apAharadgajasthasya chakreNa kShuraneminA || 21||
sakuNDalaM chArukirITabhUShaNaM
babhau pR^ithivyAM patitaM samujjvalat |
hA heti sAdhvityR^iShayaH sureshvarA
mAlyairmukundaM vikiranta IDire || 22||
tatashcha bhUH kR^iShNamupetya kuNDale
prataptajAmbUnadaratnabhAsvare |
savaijayantyA vanamAlayArpaya\-
tprAchetasaM Chatramatho mahAmaNim || 23||
astauShIdatha vishveshaM devI devavarArchitam |
prA~njaliH praNatA rAjan bhaktipravaNayA dhiyA || 24||
bhUmiruvAcha
namaste devadevesha sha~NkhachakragadAdhara |
bhaktechChopAttarUpAya paramAtman namo.astu te || 25||
namaH pa~NkajanAbhAya namaH pa~NkajamAline |
namaH pa~NkajanetrAya namaste pa~NkajA~Nghraye || 26||
namo bhagavate tubhyaM vAsudevAya viShNave |
puruShAyAdibIjAya pUrNabodhAya te namaH || 27||
ajAya janayitre.asya brahmaNe.anantashaktaye |
parAvarAtman bhUtAtman paramAtman namo.astu te || 28||
tvaM vai sisR^ikShU raja utkaTaM prabho
tamo nirodhAya bibharShyasaMvR^itaH |
sthAnAya sattvaM jagato jagatpate
kAlaH pradhAnaM puruSho bhavAn paraH || 29||
ahaM payo jyotirathAnilo nabho
mAtrANi devA mana indriyANi |
kartA mahAnityakhilaM charAcharaM
tvayyadvitIye bhagavannayaM bhramaH || 30||
tasyAtmajo.ayaM tava pAdapa~NkajaM
bhItaH prapannArtiharopasAditaH |
tatpAlayainaM kuru hastapa~NkajaM
shirasyamuShyAkhilakalmaShApaham || 31||
shrIshuka uvAcha
iti bhUmyArthito vAgbhirbhagavAn bhaktinamrayA |
dattvAbhayaM bhaumagR^ihaM prAvishatsakalarddhimat || 32||
tatra rAjanyakanyAnAM ShaTsahasrAdhikAyutam |
bhaumAhR^itAnAM vikramya rAjabhyo dadR^ishe hariH || 33||
taM praviShTaM striyo vIkShya naravIraM vimohitAH |
manasA vavrire.abhIShTaM patiM daivopasAditam || 34||
bhUyAtpatirayaM mahyaM dhAtA tadanumodatAm |
iti sarvAH pR^ithakkR^iShNe bhAvena hR^idayaM dadhuH || 35||
tAH prAhiNoddvAravatIM sumR^iShTavirajo.ambarAH |
narayAnairmahAkoshAn rathAshvAn draviNaM mahat || 36||
airAvatakulebhAMshcha chaturdantAMstarasvinaH |
pANDurAMshcha chatuHShaShTiM preShayAmAsa keshavaH || 37||
gatvA surendrabhavanaM dattvAdityai cha kuNDale |
pUjitastridashendreNa sahendrANyA cha sapriyaH || 38||
chodito bhAryayotpATya pArIjAtaM garutmati |
Aropya sendrAn vibudhAn nirjityopAnayatpuram || 39||
sthApitaH satyabhAmAyA gR^ihodyAnopashobhanaH |
anvagurbhramarAH svargAttadgandhAsavalampaTAH || 40||
yayAcha Anamya kirITakoTibhiH
pAdau spR^ishannachyutamarthasAdhanam |
siddhArtha etena vigR^ihyate mahA\-
naho surANAM cha tamo dhigADhyatAm || 41||
atho muhUrta ekasmin nAnAgAreShu tAH striyaH |
yathopayeme bhagavAn tAvadrUpadharo.avyayaH || 42||
gR^iheShu tAsAmanapAyyatarkyakR^i\-
nnirastasAmyAtishayeShvavasthitaH |
reme ramAbhirnijakAmasampluto
yathetaro gArhakamedhikAMshcharan || 43||
itthaM ramApatimavApya patiM striyastA
brahmAdayo.api na viduH padavIM yadIyAm |
bhejurmudAviratamedhitayAnurAga\-
hAsAvalokanavasa~NgamajalpalajjAH || 44||
pratyudgamAsanavarArhaNapAdashaucha\-
tAmbUlavishramaNavIjanagandhamAlyaiH |
keshaprasArashayanasnapanopahAryaiH
dAsIshatA api vibhorvidadhuH sma dAsyam || 45||
iti shrImadbhAgavate mahApurANe pAramahaMsyAM saMhitAyAM
dashamaskandhe uttarArdhe pArijAtaharaNanarakavadho
nAmaikonaShaShTitamo.adhyAyaH || 59||
\iti
\section{.. OM namo bhagavate vAsudevAya ..}
\section{.. ShaShTitamo.adhyAyaH \- 60 ..}
shrIshuka uvAcha
karhichitsukhamAsInaM svatalpasthaM jagadgurum |
patiM paryacharadbhaiShmI vyajanena sakhIjanaiH || 1||
yastvetallIlayA vishvaM sR^ijatyattyavatIshvaraH |
sa hi jAtaH svasetUnAM gopIthAya yaduShvajaH || 2||
tasminnantargR^ihe bhrAjanmuktAdAmavilambinA |
virAjite vitAnena dIpairmaNimayairapi || 3||
mallikAdAmabhiH puShpairdvirephakulanAditaiH |
jAlarandhrapraviShTaishcha gobhishchandramaso.amalaiH || 4||
pArijAtavanAmodavAyunodyAnashAlinA |
dhUpairagurujai rAjan jAlarandhravinirgataiH || 5||
payaHphenanibhe shubhre parya~Nke kashipUttame |
upatasthe sukhAsInaM jagatAmIshvaraM patim || 6||
vAlavyajanamAdAya ratnadaNDaM sakhIkarAt |
tena vIjayatI devI upAsA~nchakra Ishvaram || 7||
sopAchyutaM kvaNayatI maNinUpurAbhyAM
reje.a~NgulIyavalayavyajanAgrahastA |
vastrAntagUDhakuchaku~NkumashoNahAra\-
bhAsAnitambadhR^itayA cha parArdhyakA~nchyA || 8||
tAM rUpiNIM shriyamananyagatiM nirIkShya
yA lIlayA dhR^itatanoranurUparUpA |
prItaH smayannalakakuNDalaniShkakaNTha\-
vaktrollasatsmitasudhAM harirAbabhAShe || 9||
shrIbhagavAnuvAcha
rAjaputrIpsitA bhUpairlokapAlavibhUtibhiH |
mahAnubhAvaiH shrImadbhI rUpaudAryabalorjitaiH || 10||
tAn prAptAnarthino hitvA chaidyAdIn smaradurmadAn |
dattA bhrAtrA svapitrA cha kasmAnno vavR^iShe.asamAn || 11||
rAjabhyo bibhyataH subhrUH samudraM sharaNaM gatAn |
balavadbhiH kR^itadveShAn prAyastyaktanR^ipAsanAn || 12||
aspaShTavartmanAM puMsAmalokapathamIyuShAm |
AsthitAH padavIM subhrUH prAyaH sIdanti yoShitaH || 13||
niShki~nchanA vayaM shashvanniShki~nchanajanapriyAH |
tasmAtprAyeNa na hyADhyA mAM bhajanti sumadhyame || 14||
yayorAtmasamaM vittaM janmaishvaryAkR^itirbhavaH |
tayorvivAho maitrI cha nottamAdhamayoH kvachit || 15||
vaidarbhyetadavij~nAya tvayAdIrghasamIkShayA |
vR^itA vayaM guNairhInA bhikShubhiH shlAghitA mudhA || 16||
athAtmano.anurUpaM vai bhajasva kShatriyarShabham |
yena tvamAshiShaH satyA ihAmutra cha lapsyase || 17||
chaidyashAlvajarAsandhadantavaktrAdayo nR^ipAH |
mama dviShanti vAmoru rukmI chApi tavAgrajaH || 18||
teShAM vIryamadAndhAnAM dR^iptAnAM smayanuttaye |
AnItAsi mayA bhadre tejo.apaharatAsatAm || 19||
udAsInA vayaM nUnaM na stryapatyArthakAmukAH |
AtmalabdhyA.a.asmahe pUrNA gehayorjyotirakriyAH || 20||
shrIshuka uvAcha
etAvaduktvA bhagavAnAtmAnaM vallabhAmiva |
manyamAnAmavishleShAttaddarpaghna upAramat || 21||
iti trilokeshapatestadAtmanaH
priyasya devyashrutapUrvamapriyam |
Ashrutya bhItA hR^idi jAtavepathu\-
shchintAM durantAM rudatI jagAma ha || 22||
padA sujAtena nakhAruNashrIyA
bhuvaM likhantyashrubhira~njanAsitaiH |
Asi~nchatI ku~NkumarUShitau stanau
tasthAvadhomukhyatiduHkharuddhavAk || 23||
tasyAH suduHkhabhayashokavinaShTabuddheH
hastAchChlathadvalayato vyajanaM papAta |
dehashcha viklavadhiyaH sahasaiva muhyan
rambheva vAyuvihatA pravikIrya keshAn || 24||
taddR^iShTvA bhagavAn kR^iShNaH priyAyAH premabandhanam |
hAsyaprauDhimajAnantyAH karuNaH so.anvakampata || 25||
parya~NkAdavaruhyAshu tAmutthApya chaturbhujaH |
keshAn samuhya tadvaktraM prAmR^ijatpadmapANinA || 26||
pramR^ijyAshrukale netre stanau chopahatau shuchA |
AshliShya bAhunA rAjannananyaviShayAM satIm || 27||
sAntvayAmAsa sAntvaj~naH kR^ipayA kR^ipaNAM prabhuH |
hAsyaprauDhibhramachchittAmatadarhAM satAM gatiH || 28||
shrIbhagavAnuvAcha
mA mA vaidarbhyasUyethA jAne tvAM matparAyaNAm |
tvadvachaH shrotukAmena kShvelyAcharitama~Ngane || 29||
mukhaM cha premasaMrambhasphuritAdharamIkShitum |
kaTAkShepAruNApA~NgaM sundarabhrukuTItaTam || 30||
ayaM hi paramo lAbho gR^iheShu gR^ihamedhinAm |
yannarmairIyate yAmaH priyayA bhIru bhAmini || 31||
shrIshuka uvAcha
saivaM bhagavatA rAjan vaidarbhI parisAntvitA |
j~nAtvA tatparihAsoktiM priyatyAgabhayaM jahau || 32||
babhASha R^iShabhaM puMsAM vIkShantI bhagavanmukham |
savrIDahAsaruchirasnigdhApA~Ngena bhArata || 33||
rukmiNyuvAcha
nanvevametadaravindavilochanAha
yadvai bhavAn bhagavato.asadR^ishI vibhUmnaH |
kva sve mahimnyabhirato bhagavAMstryadhIshaH
kvAhaM guNaprakR^itiraj~nagR^ihItapAdA || 34||
satyaM bhayAdiva guNebhya urukramAntaH
shete samudra upalambhanamAtra AtmA |
nityaM kadindriyagaNaiH kR^itavigrahastvaM
tvatsevakairnR^ipapadaM vidhutaM tamo.andham || 35||
tvatpAdapadmamakarandajuShAM munInAM
vartmAsphuTaM nR^ipashubhirnanu durvibhAvyam |
yasmAdalaukikamivehitamIshvarasya
bhUmaMstavehitamatho anu ye bhavantam || 36||
niShki~nchano nanu bhavAn na yato.asti ki~nchi\-
dyasmai baliM balibhujo.api harantyajAdyAH |
na tvA vidantyasutR^ipo.antakamADhyatAndhAH
preShTho bhavAn balibhujAmapi te.api tubhyam || 37||
tvaM vai samastapuruShArthamayaH phalAtmA
yadvA~nChayA sumatayo visR^ijanti kR^itsnam |
teShAM vibho samuchito bhavataH samAjaH
puMsaH striyAshcha ratayoH sukhaduHkhinorna || 38||
tvaM nyastadaNDamunibhirgaditAnubhAva
AtmA.a.atmadashcha jagatAmiti me vR^ito.asi |
hitvA bhavadbhruva udIritakAlavega\-
dhvastAshiSho.abjabhavanAkapatIn kuto.anye || 39||
jADyaM vachastava gadAgraja yastu bhUpAn
vidrAvya shAr~Nganinadena jahartha mAM tvam |
siMho yathA svabalimIsha pashUn svabhAgaM
tebhyo bhayAdyadudadhiM sharaNaM prapannaH || 40||
yadvA~nChayA nR^ipashikhAmaNayo.a~Nga vainya\-
jAyantanAhuShagayAdaya aikapatyam |
rAjyaM visR^ijya vivishurvanamambujAkSha
sIdanti te.anupadavIM ta ihAsthitAH kim || 41||
kAnyaM shrayeta tava pAdasarojagandha\-
mAghrAya sanmukharitaM janatApavargam |
lakShmyAlayaM tvavigaNayya guNAlayasya
martyA sadorubhayamarthaviviktadR^iShTiH || 42||
taM tvAnurUpamabhajaM jagatAmadhIsha\-
mAtmAnamatra cha paratra cha kAmapUram |
syAnme tavA~NghriraraNaM sR^itibhirbhramantyA
yo vai bhajantamupayAtyanR^itApavargaH || 43||
tasyAH syurachyuta nR^ipA bhavatopadiShTAH
strINAM gR^iheShu kharagoshvabiDAlabhR^ityAH |
yatkarNamUlamarikarShaNa nopayAyA\-
dyuShmatkathA mR^iDaviri~nchasabhAsu gItA || 44||
tvakshmashruromanakhakeshapinaddhamanta\-
rmAMsAsthiraktakR^imiviTkaphapittavAtam |
jIvachChavaM bhajati kAntamatirvimUDhA
yA te padAbjamakarandamajighratI strI || 45||
astvambujAkSha mama te charaNAnurAga
Atman ratasya mayi chAnatiriktadR^iShTeH |
yarhyasya vR^iddhaya upAttarajo.atimAtro
mAmIkShase tadu ha naH paramAnukampA || 46||
naivAlIkamahaM manye vachaste madhusUdana |
ambAyA iva hi prAyaH kanyAyAH syAdratiH kvachit || 47||
vyUDhAyAshchApi puMshchalyA mano.abhyeti navaM navam |
budho.asatIM na bibhR^iyAttAM bibhradubhayachyutaH || 48||
shrIbhagavAnuvAcha
sAdhvyetachChrotukAmaistvaM rAjaputri pralambhitA |
mayoditaM yadanvAttha sarvaM tatsatyameva hi || 49||
yAn yAn kAmayase kAmAn mayyakAmAya bhAmini |
santi hyekAntabhaktAyAstava kalyANi nityadA || 50||
upalabdhaM patiprema pAtivratyaM cha te.anaghe |
yadvAkyaishchAlyamAnAyA na dhIrmayyapakarShitA || 51||
ye mAM bhajanti dAmpatye tapasA vratacharyayA |
kAmAtmAno.apavargeshaM mohitA mama mAyayA || 52||
mAM prApya mAninyapavargasampadaM
vA~nChanti ye sampada eva tatpatim |
te mandabhAgyA niraye.api ye nR^iNAM
mAtrAtmakatvAnnirayaH susa~NgamaH || 53||
diShTyA gR^iheshvaryasakR^inmayi tvayA
kR^itAnuvR^ittirbhavamochanI khalaiH |
suduShkarAsau sutarAM durAshiSho
hyasumbharAyA nikR^itiM juShaH striyAH || 54||
na tvAdR^ishIM praNayinIM gR^ihiNIM gR^iheShu
pashyAmi mAnini yayA svavivAhakAle |
prAptAn nR^ipAnavagaNayya raho haro me
prasthApito dvija upashrutasatkathasya || 55||
bhrAturvirUpakaraNaM yudhi nirjitasya
prodvAhaparvaNi cha tadvadhamakShagoShThyAm |
duHkhaM samutthamasaho.asmadayogabhItyA
naivAbravIH kimapi tena vayaM jitAste || 56||
dUtastvayA.a.atmalabhane suviviktamantraH
prasthApito mayi chirAyati shUnyametat |
matvAjihAsa idama~NgamananyayogyaM
tiShTheta tattvayi vayaM pratinandayAmaH || 57||
shrIshuka uvAcha
evaM sauratasaMlApairbhagavAn jagadIshvaraH |
svarato ramayA reme naralokaM viDambayan || 58||
tathAnyAsAmapi vibhurgR^iheShu gR^ihavAniva |
Asthito gR^ihamedhIyAn dharmAn lokagururhariH || 59||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe kR^iShNarukmiNI\-
saMvAdo nAma ShaShTitamo.adhyAyaH || 60||
\iti
\section{.. OM namo bhagavate vAsudevAya ..}
\section{.. ekaShaShTitamo.adhyAyaH \- 61 ..}
shrIshuka uvAcha
ekaikashastAH kR^iShNasya putrAn dasha dashAbalAH |
ajIjanannanavamAn pituH sarvAtmasampadA || 1||
gR^ihAdanapagaM vIkShya rAjaputryo.achyutaM sthitam |
preShThaM nyamaMsata svaM svaM na tattattvavidaH striyaH || 2||
chArvabjakoshavadanAyatabAhunetra\-
sapremahAsarasavIkShitavalgujalpaiH |
sammohitA bhagavato na mano vijetuM
svairvibhramaiH samashakan vanitA vibhUmnaH || 3||
smAyAvalokalavadarshitabhAvahAri\-
bhrUmaNDalaprahitasauratamantrashauNDaiH |
patnyastu ShoDashasahasramana~NgabANaiH
yasyendriyaM vimathituM karaNairna shekuH || 4||
itthaM ramApatimavApya patiM striyastA
brahmAdayo.api na viduH padavIM yadIyAm |
bhejurmudAviratamedhitayAnurAga\-
hAsAvalokanavasa~NgamalAlasAdyam || 5||
pratyudgamAsanavarArhaNapAdashaucha\-
tAmbUlavishramaNavIjanagandhamAlyaiH |
keshaprasArashayanasnapanopahAryaiH
dAsIshatA api vibhorvidadhuH sma dAsyam || 6||
tAsAM yA dasha putrANAM kR^iShNastrINAM puroditAH |
aShTau mahiShyastatputrAn pradyumnAdIn gR^iNAmi te || 7||
chArudeShNaH sudeShNashcha chArudehashcha vIryavAn |
suchArushchAruguptashcha bhadrachArustathAparaH || 8||
chAruchandro vichArushcha chArushcha dashamo hareH |
pradyumnapramukhA jAtA rukmiNyAM nAvamAH pituH || 9||
bhAnuH subhAnuH svarbhAnuH prabhAnurbhAnumAMstathA |
chandrabhAnurbR^ihadbhAnuratibhAnustathAShTamaH || 10||
shrIbhAnuH pratibhAnushcha satyabhAmAtmajA dasha |
sAmbaH sumitraH purujichChatajichcha sahasrajit || 11||
vijayashchitraketushcha vasumAn draviDaH kratuH |
jAmbavatyAH sutA hyete sAmbAdyAH pitR^isammatAH || 12||
vIrashchandro.ashvasenashcha chitragurvegavAn vR^iShaH |
AmaH sha~NkurvasuH shrImAn kuntirnAgnajiteH sutAH || 13||
shrutaH kavirvR^iSho vIraH subAhurbhadra ekalaH |
shAntirdarshaH pUrNamAsaH kAlindyAH somako.avaraH || 14||
praghoSho gAtravAn siMho balaH prabala UrdhvagaH |
mAdryAH putrA mahAshaktiH saha ojo.aparAjitaH || 15||
vR^iko harSho.anilo gR^idhro vardhano.annAda eva cha |
mahAshaH pAvano vahnirmitravindAtmajAH kShudhiH || 16||
sa~NgrAmajidbR^ihatsenaH shUraH praharaNo.arijit |
jayaH subhadro bhadrAyA vAma Ayushcha satyakaH || 17||
dIptimAMstAmrataptAdyA rohiNyAstanayA hareH |
pradyumnAchchAniruddho.abhUdrukmavatyAM mahAbalaH || 18||
putryAM tu rukmiNo rAjan nAmnA bhojakaTe pure |
eteShAM putrapautrAshcha babhUvuH koTisho nR^ipa |
mAtaraH kR^iShNajAtAnAM sahasrANi cha ShoDasha || 19||
rAjovAcha
kathaM rukmyariputrAya prAdAdduhitaraM yudhi |
kR^iShNena paribhUtastaM hantuM randhraM pratIkShate |
etadAkhyAhi me vidvan dviShorvaivAhikaM mithaH || 20||
anAgatamatItaM cha vartamAnamatIndriyam |
viprakR^iShTaM vyavahitaM samyak pashyanti yoginaH || 21||
shrIshuka uvAcha
vR^itaH svayaMvare sAkShAdana~Ngo.a~NgayutastayA |
rAj~naH sametAn nirjitya jahAraikaratho yudhi || 22||
yadyapyanusmaran vairaM rukmI kR^iShNAvamAnitaH |
vyataradbhAgineyAya sutAM kurvan svasuH priyam || 23||
rukmiNyAstanayAM rAjan kR^itavarmasuto balI |
upayeme vishAlAkShIM kanyAM chArumatIM kila || 24||
dauhitrAyAniruddhAya pautrIM rukmyadadAddhareH |
rochanAM baddhavairo.api svasuH priyachikIrShayA |
jAnannadharmaM tadyaunaM snehapAshAnubandhanaH || 25||
tasminnabhyudaye rAjan rukmiNI rAmakeshavau |
puraM bhojakaTaM jagmuH sAmbapradyumnakAdayaH || 26||
tasmin nivR^itta udvAhe kAli~NgapramukhA nR^ipAH |
dR^iptAste rukmiNaM prochurbalamakShairvinirjaya || 27||
anakShaj~no hyayaM rAjannapi tadvyasanaM mahat |
ityukto balamAhUya tenAkShairrukmyadIvyata || 28||
shataM sahasramayutaM rAmastatrAdade paNam |
taM tu rukmyajayattatra kAli~NgaH prAhasadbalam |
dantAn sandarshayannuchchairnAmR^iShyattaddhalAyudhaH || 29||
tato lakShaM rukmyagR^ihNAd glahaM tatrAjayadbalaH |
jitavAnahamityAha rukmI kaitavamAshritaH || 30||
manyunA kShubhitaH shrImAn samudra iva parvaNi |
jAtyAruNAkSho.atiruShA nyarbudaM glahamAdade || 31||
taM chApi jitavAn rAmo dharmeNachChalamAshritaH |
rukmI jitaM mayAtreme vadantu prAshnikA iti || 32||
tadAbravInnabhovANI balenaiva jito glahaH |
dharmato vachanenaiva rukmI vadati vai mR^iShA || 33||
tAmanAdR^itya vaidarbho duShTarAjanyachoditaH |
sa~NkarShaNaM parihasan babhAShe kAlachoditaH || 34||
naivAkShakovidA yUyaM gopAlA vanagocharAH |
akShairdIvyanti rAjAno bANaishcha na bhavAdR^ishAH || 35||
rukmiNaivamadhikShipto rAjabhishchopahAsitaH |
kruddhaH parighamudyamya jaghne taM nR^imNasaMsadi || 36||
kali~NgarAjaM tarasA gR^ihItvA dashame pade |
dantAnapAtayatkruddho yo.ahasadvivR^itairdvijaiH || 37||
anye nirbhinnabAhUrushiraso rudhirokShitAH |
rAjAno dudravarbhItA balena parighArditAH || 38||
nihate rukmiNi shyAle nAbravItsAdhvasAdhu vA |
rukmiNIbalayo rAjan snehabha~NgabhayAddhariH || 39||
tato.aniruddhaM saha sUryayA varaM
rathaM samAropya yayuH kushasthalIm |
rAmAdayo bhojakaTAddashArhAH
siddhAkhilArthA madhusUdanAshrayAH || 40||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe aniruddha\-
vivAhe rukmivadho nAmaikaShaShTitamo.adhyAyaH || 61||
\iti
\section{.. OM namo bhagavate vAsudevAya ..}
\section{.. dviShaShTitamo.adhyAyaH \- 62 ..}
rAjovAcha
bANasya tanayAmUShAmupayeme yadUttamaH |
tatra yuddhamabhUdghoraM harisha~Nkarayormahat |
etatsarvaM mahAyogin samAkhyAtuM tvamarhasi || 1||
shrIshuka uvAcha
bANaH putrashatajyeShTho balerAsInmahAtmanaH |
yena vAmanarUpAya haraye.adAyi medinI || 2||
tasyaurasaH suto bANaH shivabhaktirataH sadA |
mAnyo vadAnyo dhImAMshcha satyasandho dR^iDhavrataH || 3||
shoNitAkhye pure ramye sa rAjyamakarotpurA |
tasya shambhoH prasAdena ki~NkarA iva te.amarAH |
sahasrabAhurvAdyena tANDave.atoShayanmR^iDam || 4||
bhagavAn sarvabhUteshaH sharaNyo bhaktavatsalaH |
vareNa ChandayAmAsa sa taM vavre purAdhipam || 5||
sa ekadA.a.aha girishaM pArshvasthaM vIryadurmadaH |
kirITenArkavarNena saMspR^ishaMstatpadAmbujam || 6||
namasye tvAM mahAdeva lokAnAM gurumIshvaram |
puMsAmapUrNakAmAnAM kAmapUrAmarA~Nghripam || 7||
doHsahasraM tvayA dattaM paraM bhArAya me.abhavat |
trilokyAM pratiyoddhAraM na labhe tvadR^ite samam || 8||
kaNDUtyA nibhR^itairdorbhiryuyutsurdiggajAnaham |
AdyAyAM chUrNayannadrIn bhItAste.api pradudruvuH || 9||
tachChrutvA bhagavAn kruddhaH ketuste bhajyate yadA |
tvaddarpaghnaM bhavenmUDha saMyugaM matsamena te || 10||
ityuktaH kumatirhR^iShTaH svagR^ihaM prAvishannR^ipa |
pratIkShan girishAdeshaM svavIryanashanaM kudhIH || 11||
tasyoShA nAma duhitA svapne prAdyumninA ratim |
kanyAlabhata kAntena prAgadR^iShTashrutena sA || 12||
sA tatra tamapashyantI kvAsi kAnteti vAdinI |
sakhInAM madhya uttasthau vihvalA vrIDitA bhR^isham || 13||
bANasya mantrI kumbhANDashchitralekhA cha tatsutA |
sakhyapR^ichChatsakhImUShAM kautUhalasamanvitA || 14||
kaM tvaM mR^igayase subhrUH kIdR^ishaste manorathaH |
hastagrAhaM na te.adyApi rAjaputryupalakShaye || 15||
UShovAcha
dR^iShTaH kashchinnaraH svapne shyAmaH kamalalochanaH |
pItavAsA bR^ihadbAhuryoShitAM hR^idaya~NgamaH || 16||
tamahaM mR^igaye kAntaM pAyayitvAdharaM madhu |
kvApi yAtaH spR^ihayatIM kShiptvA mAM vR^ijinArNave || 17||
chitralekhovAcha
vyasanaM te.apakarShAmi trilokyAM yadi bhAvyate |
tamAneShye naraM yaste manohartA tamAdisha || 18||
ityuktvA devagandharvasiddhachAraNapannagAn |
daityavidyAdharAn yakShAn manujAMshcha yathAlikhat || 19||
manujeShu cha sA vR^iShNIn shUramAnakadundubhim |
vyalikhadrAmakR^iShNau cha pradyumnaM vIkShya lajjitA || 20||
aniruddhaM vilikhitaM vIkShyoShAvA~NmukhI hriyA |
so.asAvasAviti prAha smayamAnA mahIpate || 21||
chitralekhA tamAj~nAya pautraM kR^iShNasya yoginI |
yayau vihAyasA rAjan dvArakAM kR^iShNapAlitAm || 22||
tatra suptaM suparya~Nke prAdyumniM yogamAsthitA |
gR^ihItvA shoNitapuraM sakhyai priyamadarshayat || 23||
sA cha taM sundaravaraM vilokya muditAnanA |
duShprekShye svagR^ihe pumbhI reme prAdyumninA samam || 24||
parArdhyavAsaH sraggandhadhUpadIpAsanAdibhiH |
pAnabhojanabhakShyaishcha vAkyaiH shushrUShayArchitaH || 25||
gUDhaH kanyApure shashvatpravR^iddhasnehayA tayA |
nAhargaNAn sa bubudhe UShayApahR^itendriyaH || 26||
tAM tathA yaduvIreNa bhujyamAnAM hatavratAm |
hetubhirlakShayA~nchakrurAprItAM duravachChadaiH || 27||
bhaTA AvedayA~nchakrU rAjaMste duhiturvayam |
vicheShTitaM lakShayAmaH kanyAyAH kuladUShaNam || 28||
anapAyibhirasmAbhirguptAyAshcha gR^ihe prabho |
kanyAyA dUShaNaM pumbhirduShprekShAyA na vidmahe || 29||
tataH pravyathito bANo duhituH shrutadUShaNaH |
tvaritaH kanyakAgAraM prApto.adrAkShIdyadUdvaham || 30||
kAmAtmajaM taM bhuvanaikasundaraM
shyAmaM pisha~NgAmbaramambujekShaNam |
bR^ihadbhujaM kuNDalakuntalatviShA
smitAvalokena cha maNDitAnanam || 31||
dIvyantamakShaiH priyayAbhinR^imNayA
tada~Ngasa~Ngastanaku~Nkumasrajam |
bAhvordadhAnaM madhumallikAshritAM
tasyAgra AsInamavekShya vismitaH || 32||
sa taM praviShTaM vR^itamAtatAyibhi\-
rbhaTairanIkairavalokya mAdhavaH |
udyamya maurvaM parighaM vyavasthito
yathAntako daNDadharo jighAMsayA || 33||
jighR^ikShayA tAn paritaH prasarpataH
shuno yathA sUkarayUthapoha.anat |
te hanyamAnA bhavanAdvinirgatA
nirbhinnamUrdhorubhujAH pradudruvuH || 34||
taM nAgapAshairbalinandano balI
ghnantaM svasainyaM kupito babandha ha |
UShA bhR^ishaM shokaviShAdavihvalA
baddhaM nishamyAshrukalAkShyaraudiShIt || 35||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe aniruddhabandho
nAma dviShaShTitamo.adhyAyaH || 62||
\iti
\section{.. OM namo bhagavate vAsudevAya ..}
\section{.. triShaShTitamo.adhyAyaH \- 63 ..}
shrIshuka uvAcha
apashyatAM chAniruddhaM tadbandhUnAM cha bhArata |
chatvAro vArShikA mAsA vyatIyuranushochatAm || 1||
nAradAttadupAkarNya vArtAM baddhasya karma cha |
prayayuH shoNitapuraM vR^iShNayaH kR^iShNadevatAH || 2||
pradyumno yuyudhAnashcha gadaH sAmbo.atha sAraNaH |
nandopanandabhadrAdyA rAmakR^iShNAnuvartinaH || 3||
akShauhiNIbhirdvAdashabhiH sametAH sarvatodisham |
rurudhurbANanagaraM samantAtsAtvatarShabhAH || 4||
bhajyamAnapurodyAnaprAkArATTAlagopuram |
prekShamANo ruShA.a.aviShTastulyasainyo.abhiniryayau || 5||
bANArthe bhagavAn rudraH sasutaiH pramathairvR^itaH |
Aruhya nandivR^iShabhaM yuyudhe rAmakR^iShNayoH || 6||
AsItsutumulaM yuddhamadbhutaM romaharShaNam |
kR^iShNasha~Nkarayo rAjan pradyumnaguhayorapi || 7||
kumbhANDakUpakarNAbhyAM balena saha saMyugaH |
sAmbasya bANaputreNa bANena saha sAtyakeH || 8||
brahmAdayaH surAdhIshA munayaH siddhachAraNAH |
gandharvApsaraso yakShA vimAnairdraShTumAgaman || 9||
sha~NkarAnucharAn shaurirbhUtapramathaguhyakAn |
DAkinIryAtudhAnAMshcha vetAlAn savinAyakAn || 10||
pretamAtR^ipishAchAMshcha kuShmANDAn brahmarAkShasAn |
drAvayAmAsa tIkShNAgraiH sharaiH shAr~NgadhanushchyutaiH || 11||
pR^ithagvidhAni prAyu~Nkta pinAkyastrANi shAr~NgiNe |
pratyastraiH shamayAmAsa shAr~NgapANiravismitaH || 12||
brahmAstrasya cha brahmAstraM vAyavyasya cha pArvatam |
Agneyasya cha pArjanyaM naijaM pAshupatasya cha || 13||
mohayitvA tu girishaM jR^imbhaNAstreNa jR^imbhitam |
bANasya pR^itanAM shaurirjaghAnAsigadeShubhiH || 14||
skandaH pradyumnabANaughairardyamAnaH samantataH |
asR^igvimu~nchan gAtrebhyaH shikhinApAkramadraNAt || 15||
kumbhANDaH kUpakarNashcha petaturmusalArditau |
dudruvustadanIkAni hatanAthAni sarvataH || 16||
vishIryamANaM svabalaM dR^iShTvA bANo.atyamarShaNaH |
kR^iShNamabhyadravatsa~Nkhye rathI hitvaiva sAtyakim || 17||
dhanUMShyAkR^iShya yugapadbANaH pa~nchashatAni vai |
ekaikasmin sharau dvau dvau sandadhe raNadurmadaH || 18||
tAni chichCheda bhagavAn dhanUMShi yugapaddhariH |
sArathiM rathamashvAMshcha hatvA sha~NkhamapUrayat || 19||
tanmAtA koTarA nAma nagnA muktashiroruhA |
puro.avatasthe kR^iShNasya putraprANarirakShayA || 20||
tatastirya~Nmukho nagnAmanirIkShan gadAgrajaH |
bANashcha tAvadvirathashChinnadhanvAvishatpuram || 21||
vidrAvite bhUtagaNe jvarastu trishirAstripAt |
abhyadhAvata dAshArhaM dahanniva disho dasha || 22||
atha nArAyaNo devastaM dR^iShTvA vyasR^ijajjvaram |
mAheshvaro vaiShNavashcha yuyudhAte jvarAvubhau || 23||
mAheshvaraH samAkrandan vaiShNavena balArditaH |
alabdhvAbhayamanyatra bhIto mAheshvaro jvaraH |
sharaNArthI hR^iShIkeshaM tuShTAva prayatA~njaliH || 24||
jvara uvAcha
namAmi tvAnantashaktiM pareshaM
sarvAtmAnaM kevalaM j~naptimAtram |
vishvotpattisthAnasaMrodhahetuM
yattadbrahma brahmali~NgaM prashAntam || 25||
kAlo daivaM karma jIvaH svabhAvo
dravyaM kShetraM prANa AtmA vikAraH |
tatsa~NghAto bIjarohapravAha\-
stvanmAyaiShA tanniShedhaM prapadye || 26||
nAnAbhAvairlIlayaivopapannai\-
rdevAn sAdhUn lokasetUn bibharShi |
haMsyunmArgAn hiMsayA vartamAnAn
janmaitatte bhArahArAya bhUmeH || 27||
tapto.ahaM te tejasA duHsahena
shAntogreNAtyulbaNena jvareNa |
tAvattApo dehinAM te.a~NghrimUlaM
no severan yAvadAshAnubaddhAH || 28||
shrIbhagavAnuvAcha
trishiraste prasanno.asmi vyetu te majjvarAdbhayam |
yo nau smarati saMvAdaM tasya tvanna bhavedbhayam || 29||
ityukto.achyutamAnamya gato mAheshvaro jvaraH |
bANastu rathamArUDhaH prAgAdyotsyan janArdanam || 30||
tato bAhusahasreNa nAnAyudhadharo.asuraH |
mumocha paramakruddho bANAMshchakrAyudhe nR^ipa || 31||
tasyAsyato.astrANyasakR^ichchakreNa kShuraneminA |
chichCheda bhagavAn bAhUn shAkhA iva vanaspateH || 32||
bAhuShu ChidyamAneShu bANasya bhagavAn bhavaH |
bhaktAnukampyupavrajya chakrAyudhamabhAShata || 33||
shrIrudra uvAcha
tvaM hi brahma paraM jyotirgUDhaM brahmaNi vA~Nmaye |
yaM pashyantyamalAtmAna AkAshamiva kevalam || 34||
nAbhirnabho.agnirmukhamambu reto
dyauH shIrShamAshAH shrutira~NghrirurvI |
chandro mano yasya dR^igarka AtmA
ahaM samudro jaTharaM bhujendraH || 35||
romANi yasyauShadhayo.ambuvAhAH
keshA viri~ncho dhiShaNA visargaH |
prajApatirhR^idayaM yasya dharmaH
sa vai bhavAn puruSho lokakalpaH || 36||
tavAvatAro.ayamakuNThadhAman
dharmasya guptyai jagato bhavAya |
vayaM cha sarve bhavatAnubhAvitA
vibhAvayAmo bhuvanAni sapta || 37||
tvameka AdyaH puruSho.advitIya\-
sturyaH svadR^iggheturaheturIshaH |
pratIyase.athApi yathAvikAraM
svamAyayA sarvaguNaprasid.hdhyai || 38||
yathaiva sUryaH pihitashChAyayA svayA
ChAyAM cha rUpANi cha sa~nchakAsti |
evaM guNenApihito guNAMstva\-
mAtmapradIpo guNinashcha bhUman || 39||
yanmAyAmohitadhiyaH putradAragR^ihAdiShu |
unmajjanti nimajjanti prasaktA vR^ijinArNave || 40||
devadattamimaM labdhvA nR^ilokamajitendriyaH |
yo nAdriyeta tvatpAdau sa shochyo hyAtmava~nchakaH || 41||
yastvAM visR^ijate martya AtmAnaM priyamIshvaram |
viparyayendriyArthArthaM viShamattyamR^itaM tyajan || 42||
ahaM brahmAtha vibudhA munayashchAmalAshayAH |
sarvAtmanA prapannAstvAmAtmAnaM preShThamIshvaram || 43||
taM tvA jagatsthityudayAntahetuM
samaM prashAntaM suhR^idAtmadaivam |
ananyamekaM jagadAtmaketaM
bhavApavargAya bhajAma devam || 44||
ayaM mameShTo dayito.anuvartI
mayAbhayaM dattamamuShya deva |
sampAdyatAM tadbhavataH prasAdo
yathA hi te daityapatau prasAdaH || 45||
shrIbhagavAnuvAcha
yadAttha bhagavaMstvaM naH karavAma priyaM tava |
bhavato yadvyavasitaM tanme sAdhvanumoditam || 46||
avadhyo.ayaM mamApyeSha vairochanisuto.asuraH |
prahlAdAya varo datto na vadhyo me tavAnvayaH || 47||
darpopashamanAyAsya pravR^ikNA bAhavo mayA |
sUditaM cha balaM bhUri yachcha bhArAyitaM bhuvaH || 48||
chatvAro.asya bhujAH shiShTA bhaviShyantyajarAmaraH |
pArShadamukhyo bhavato nakutashchidbhayo.asuraH || 49||
iti labdhvAbhayaM kR^iShNaM praNamya shirasAsuraH |
prAdyumniM rathamAropya savadhvA samupAnayat || 50||
akShauhiNyA parivR^itaM suvAsaHsamala~NkR^itam |
sapatnIkaM puraskR^itya yayau rudrAnumoditaH || 51||
svarAjadhAnIM samala~NkR^itAM dhvajaiH
satoraNairukShitamArgachatvarAm |
vivesha sha~NkhAnakadundubhisvanai\-
rabhyudyataH paurasuhR^iddvijAtibhiH || 52||
ya evaM kR^iShNavijayaM sha~NkareNa cha saMyugam |
saMsmaretprAtarutthAya na tasya syAtparAjayaH || 53||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe aniruddhAnayanaM
nAma triShaShTitamo.adhyAyaH || 63||
\iti
\section{.. OM namo bhagavate vAsudevAya ..}
\section{.. chatuHShaShTitamo.adhyAyaH \- 64 ..}
shrIshuka uvAcha
ekadopavanaM rAjan jagmuryadukumArakAH |
vihartuM sAmbapradyumnachArubhAnugadAdayaH || 1||
krIDitvA suchiraM tatra vichinvantaH pipAsitAH |
jalaM nirudake kUpe dadR^ishuH sattvamadbhutam || 2||
kR^ikalAsaM girinibhaM vIkShya vismitamAnasAH |
tasya choddharaNe yatnaM chakruste kR^ipayAnvitAH || 3||
charmajaistAntavaiH pAshairbaddhvA patitamarbhakAH |
nAshaknuvan samuddhartuM kR^iShNAyAchakhyurutsukAH || 4||
tatrAgatyAravindAkSho bhagavAn vishvabhAvanaH |
vIkShyojjahAra vAmena taM kareNa sa lIlayA || 5||
sa uttamashlokakarAbhimR^iShTo
vihAya sadyaH kR^ikalAsarUpam |
santaptachAmIkarachAruvarNaH
svargyadbhutAla~NkaraNAmbarasrak || 6||
paprachCha vidvAnapi tannidAnaM
janeShu vikhyApayituM mukundaH |
kastvaM mahAbhAga vareNyarUpo
devottamaM tvAM gaNayAmi nUnam || 7||
dashAmimAM vA katamena karmaNA
samprApito.asyatadarhaH subhadra |
AtmAnamAkhyAhi vivitsatAM no
yanmanyase naH kShamamatra vaktum || 8||
shrIshuka uvAcha
iti sma rAjA sampR^iShTaH kR^iShNenAnantamUrtinA |
mAdhavaM praNipatyAha kirITenArka varchasA || 9||
nR^iga uvAcha
nR^igo nAma narendro.ahamikShvAkutanayaH prabho |
dAniShvAkhyAyamAneShu yadi te karNamaspR^isham || 10||
kiM nu te.aviditaM nAtha sarvabhUtAtmasAkShiNaH |
kAlenAvyAhatadR^isho vakShye.athApi tavAj~nayA || 11||
yAvatyaH sikatA bhUmeryAvatyo divi tArakAH |
yAvatyo varShadhArAshcha tAvatIradadaM sma gAH || 12||
payasvinIstaruNIH shIlarUpa\-
guNopapannAH kapilA hemashR^i~NgIH |
nyAyArjitA rUpyakhurAH savatsA
dukUlamAlAbharaNA dadAvaham || 13||
svala~NkR^itebhyo guNashIlavadbhyaH
sIdatkuTumbebhya R^itavratebhyaH |
tapaHshrutabrahmavadAnyasadbhyaH
prAdAM yuvabhyo dvijapu~NgavebhyaH || 14||
gobhUhiraNyAyatanAshvahastinaH
kanyAH sadAsIstilarUpyashayyAH |
vAsAMsi ratnAni parichChadAn rathA\-
niShTaM cha yaj~naishcharitaM cha pUrtam || 15||
kasyachiddvijamukhyasya bhraShTA gaurmama godhane |
sampR^iktAviduShA sA cha mayA dattA dvijAtaye || 16||
tAM nIyamAnAM tatsvAmI dR^iShTrovAcha mameti tam |
mameti parigrAhyAha nR^igo me dattavAniti || 17||
viprau vivadamAnau mAmUchatuH svArthasAdhakau |
bhavAn dAtApaharteti tachChrutvA me.abhavadbhramaH || 18||
anunItAvubhau viprau dharmakR^ichChragatena vai |
gavAM lakShaM prakR^iShTAnAM dAsyAmyeShA pradIyatAm || 19||
bhavantAvanugR^ihNItAM ki~NkarasyAvijAnataH |
samuddharata mAM kR^ichChrAtpatantaM niraye.ashuchau || 20||
nAhaM pratIchChe vai rAjannityuktvA svAmyapAkramat |
nAnyadgavAmapyayutamichChAmItyaparo yayau || 21||
etasminnantare yAmyairdUtairnIto yamakShayam |
yamena pR^iShTastatrAhaM devadeva jagatpate || 22||
pUrvaM tvamashubhaM bhu~NkShe utAho nR^ipate shubham |
nAntaM dAnasya dharmasya pashye lokasya bhAsvataH || 23||
pUrvaM devAshubhaM bhu~nja iti prAha pateti saH |
tAvadadrAkShamAtmAnaM kR^ikalAsaM patan prabho || 24||
brahmaNyasya vadAnyasya tava dAsasya keshava |
smR^itirnAdyApi vidhvastA bhavatsandarshanArthinaH || 25||
sa tvaM kathaM mama vibho.akShipathaH parAtmA
yogeshvaraiH shrutidR^ishAmalahR^idvibhAvyaH |
sAkShAdadhokShaja uruvyasanAndhabuddheH
syAnme.anudR^ishya iha yasya bhavApavargaH || 26||
devadeva jagannAtha govinda puruShottama |
nArAyaNa hR^iShIkesha puNyashlokAchyutAvyaya || 27||
anujAnIhi mAM kR^iShNa yAntaM devagatiM prabho |
yatra kvApi satashcheto bhUyAnme tvatpadAspadam || 28||
namaste sarvabhAvAya brahmaNe.anantashaktaye |
kR^iShNAya vAsudevAya yogAnAM pataye namaH || 29||
ityuktvA taM parikramya pAdau spR^iShTvA svamaulinA |
anuj~nAto vimAnAgryamAruhatpashyatAM nR^iNAm || 30||
kR^iShNaH parijanaM prAha bhagavAn devakIsutaH |
brahmaNyadevo dharmAtmA rAjanyAnanushikShayan || 31||
durjaraM bata brahmasvaM bhuktamagnermanAgapi |
tejIyaso.api kimuta rAj~nAmIshvaramAninAm || 32||
nAhaM hAlAhalaM manye viShaM yasya pratikriyA |
brahmasvaM hi viShaM proktaM nAsya pratividhirbhuvi || 33||
hinasti viShamattAraM vahniradbhiH prashAmyati |
kulaM samUlaM dahati brahmasvAraNipAvakaH || 34||
brahmasvaM duranuj~nAtaM bhuktaM hanti tripUruSham |
prasahya tu balAdbhuktaM dasha pUrvAn dashAparAn || 35||
rAjAno rAjalakShmyAndhA nAtmapAtaM vichakShate |
nirayaM ye.abhimanyante brahmasvaM sAdhu bAlishAH || 36||
gR^ihNanti yAvataH pAMsUn krandatAmashrubindavaH |
viprANAM hR^itavR^ittInAM vadAnyAnAM kuTumbinAm || 37||
rAjAno rAjakulyAshcha tAvato.abdAnnira~NkushAH |
kumbhIpAkeShu pachyante brahmadAyApahAriNaH || 38||
svadattAM paradattAM vA brahmavR^ittiM harechcha yaH |
ShaShTivarShasahasrANi viShThAyAM jAyate kR^imiH || 39||
na me brahmadhanaM bhUyAdyadgR^idhvAlpAyuSho narAH |
parAjitAshchyutA rAjyAdbhavantyudvejino.ahayaH || 40||
vipraM kR^itAgasamapi naiva druhyata mAmakAH |
ghnantaM bahu shapantaM vA namaskuruta nityashaH || 41||
yathAhaM praName viprAnanukAlaM samAhitaH |
tathA namata yUyaM cha yo.anyathA me sa daNDabhAk || 42||
brAhmaNArtho hyapahR^ito hartAraM pAtayatyadhaH |
ajAnantamapi hyenaM nR^igaM brAhmaNagauriva || 43||
evaM vishrAvya bhagavAn mukundo dvArakaukasaH |
pAvanaH sarvalokAnAM vivesha nijamandiram || 44||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe nR^igopAkhyAnaM
nAma chatuHShaShTitamo.adhyAyaH || 64||
\iti
\section{.. OM namo bhagavate vAsudevAya ..}
\section{.. pa~nchaShaShTitamo.adhyAyaH \- 65 ..}
shrIshuka uvAcha
balabhadraH kurushreShTha bhagavAn rathamAsthitaH |
suhR^iddidR^ikShurutkaNThaH prayayau nandagokulam || 1||
pariShvaktashchirotkaNThairgopairgopIbhireva cha |
rAmo.abhivAdya pitarAvAshIrbhirabhinanditaH || 2||
chiraM naH pAhi dAshArha sAnujo jagadIshvaraH |
ityAropyA~NkamAli~Ngya netraiH siShichaturjalaiH || 3||
gopavR^iddhAMshcha vidhivadyaviShThairabhivanditaH |
yathAvayo yathAsakhyaM yathAsambandhamAtmanaH || 4||
samupetyAtha gopAlAn hAsyahastagrahAdibhiH |
vishrAntaM sukhamAsInaM paprachChuH paryupAgatAH || 5||
pR^iShTAshchAnAmayaM sveShu premagadgadayA girA |
kR^iShNe kamalapatrAkShe sannyastAkhilarAdhasaH || 6||
kachchinno bAndhavA rAma sarve kushalamAsate |
kachchitsmaratha no rAma yUyaM dArasutAnvitAH || 7||
diShTyA kaMso hataH pApo diShTyA muktAH suhR^ijjanAH |
nihatya nirjitya ripUn diShTyA durgaM samAshrItAH || 8||
gopyo hasantyaH paprachChU rAmasandarshanAdR^itAH |
kachchidAste sukhaM kR^iShNaH purastrIjanavallabhaH || 9||
kachchitsmarati vA bandhUn pitaraM mAtaraM cha saH |
apyasau mAtaraM draShTuM sakR^idapyAgamiShyati |
api vA smarate.asmAkamanusevAM mahAbhujaH || 10||
mAtaraM pitaraM bhrAtR^In patIn putrAn svasR^Irapi |
yadarthe jahima dAshArha dustyajAn svajanAn prabho || 11||
tA naH sadyaH parityajya gataH sa~nChinnasauhR^idaH |
kathaM nu tAdR^ishaM strIbhirna shraddhIyeta bhAShitam || 12||
kathaM nu gR^ihNantyanavasthitAtmano
vachaH kR^itaghnasya budhAH purastriyaH |
gR^ihNanti vai chitrakathasya sundara\-
smitAvalokochChvasitasmarAturAH || 13||
kiM nastatkathayA gopyaH kathAH kathayatAparAH |
yAtyasmAbhirvinA kAlo yadi tasya tathaiva naH || 14||
iti prahasitaM shaurerjalpitaM chAru vIkShitam |
gatiM premapariShva~NgaM smarantyo ruruduH striyaH || 15||
sa~NkarShaNastAH kR^iShNasya sandeshairhR^idaya~NgamaiH |
sAntvayAmAsa bhagavAn nAnAnunayakovidaH || 16||
dvau mAsau tatra chAvAtsInmadhuM mAdhavameva cha |
rAmaH kShapAsu bhagavAn gopInAM ratimAvahan || 17||
pUrNachandrakalAmR^iShTe kaumudIgandhavAyunA |
yamunopavane reme sevite strIgaNairvR^itaH || 18||
varuNapreShitA devI vAruNI vR^ikShakoTarAt |
patantI tadvanaM sarvaM svagandhenAdhyavAsayat || 19||
taM gandhaM madhudhArAyA vAyunopahR^itaM balaH |
AghrAyopagatastatra lalanAbhiH samaM papau || 20||
(upagIyamAno gandharvairvanitAshobhimaNDale |
reme kareNuyUthesho mAhendra iva vAraNaH ||
nedurdundubhayo vyomni vavR^iShuH kusumairmudA |
gandharvA munayo rAmaM tadvIryairIDire tadA ||)
upagIyamAnacharito vanitAbhirhalAyudhaH |
vaneShu vyacharatkShIbo madavihvalalochanaH || 21||
sragvyekakuNDalo matto vaijayantyA cha mAlayA |
bibhratsmitamukhAmbhojaM svedaprAleyabhUShitam || 22||
sa AjuhAva yamunAM jalakrIDArthamIshvaraH |
nijaM vAkyamanAdR^itya matta ityApagAM balaH |
anAgatAM halAgreNa kupito vichakarSha ha || 23||
pApe tvaM mAmavaj~nAya yannAyAsi mayA.a.ahutA |
neShye tvAM lA~NgalAgreNa shatadhA kAmachAriNIm || 24||
evaM nirbhartsitA bhItA yamunA yadunandanam |
uvAcha chakitA vAchaM patitA pAdayornR^ipa || 25||
rAma rAma mahAbAho na jAne tava vikramam |
yasyaikAMshena vidhR^itA jagatI jagataH pate || 26||
paraM bhAvaM bhagavato bhagavan mAmajAnatIm |
moktumarhasi vishvAtman prapannAM bhaktavatsala || 27||
tato vyamu~nchadyamunAM yAchito bhagavAn balaH |
vijagAha jalaM strIbhiH kareNubhirivebharAT || 28||
kAmaM vihR^itya salilAduttIrNAyAsitAmbare |
bhUShaNAni mahArhANi dadau kAntiH shubhAM srajam || 29||
vasitvA vAsasI nIle mAlAmAmuchya kA~nchanIm |
reje svala~NkR^ito lipto mAhendra iva vAraNaH || 30||
adyApi dR^ishyate rAjan yamunA.a.akR^iShTavartmanA |
balasyAnantavIryasya vIryaM sUchayatIva hi || 31||
evaM sarvA nishA yAtA ekeva ramato vraje |
rAmasyAkShiptachittasya mAdhuryairvrajayoShitAm || 32||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe baladevavijaye
yamunAkarShaNaM nAma pa~nchaShaShTitamo.adhyAyaH || 65||
\iti
\section{.. OM namo bhagavate vAsudevAya ..}
\section{.. ShaTShaShTitamo.adhyAyaH \- 66 ..}
shrIshuka uvAcha
nandavrajaM gate rAme karUShAdhipatirnR^ipa |
vAsudevo.ahamityaj~no dUtaM kR^iShNAya prAhiNot || 1||
tvaM vAsudevo bhagavAnavatIrNo jagatpatiH |
iti prastobhito bAlairmena AtmAnamachyutam || 2||
dUtaM cha prAhiNonmandaH kR^iShNAyAvyaktavartmane |
dvArakAyAM yathA bAlo nR^ipo bAlakR^ito.abudhaH || 3||
dUtastu dvArakAmetya sabhAyAmAsthitaM prabhum |
kR^iShNaM kamalapatrAkShaM rAjasandeshamabravIt || 4||
vAsudevo.avatIrNohameka eva na chAparaH |
bhUtAnAmanukampArthaM tvaM tu mithyAbhidhAM tyaja || 5||
yAni tvamasmachchihnAni mauDhyAdbibharShi sAtvata |
tyaktvaihi mAM tvaM sharaNaM no cheddehi mamAhavam || 6||
shrIshuka uvAcha
katthanaM tadupAkarNya pauNDrakasyAlpamedhasaH |
ugrasenAdayaH sabhyA uchchakairjahasustadA || 7||
uvAcha dUtaM bhagavAn parihAsakathAmanu |
utsrakShye mUDha chihnAni yaistvamevaM vikatthase || 8||
mukhaM tadapidhAyAj~na ka~NkagR^idhravaTairvR^itaH |
shayiShyase hatastatra bhavitA sharaNaM shunAm || 9||
iti dUtastadAkShepaM svAmine sarvamAharat |
kR^iShNo.api rathamAsthAya kAshImupajagAma ha || 10||
pauNDrako.api tadudyogamupalabhya mahArathaH |
akShauhiNIbhyAM saMyukto nishchakrAma purAddrutam || 11||
tasya kAshipatirmitraM pArShNigrAho.anvayAnnR^ipa |
akShauhiNIbhistisR^ibhirapashyatpauNDrakaM hariH || 12||
sha~NkhAryasigadAshAr~NgashrIvatsAdyupalakShitam |
bibhrANaM kaustubhamaNiM vanamAlAvibhUShitam || 13||
kausheyavAsasI pIte vasAnaM garuDadhvajam |
amUlyamaulyAbharaNaM sphuranmakarakuNDalam || 14||
dR^iShTvA tamAtmanastulyaveShaM kR^itrimamAsthitam |
yathA naTaM ra~NgagataM vijahAsa bhR^ishaM hariH || 15||
shUlairgadAbhiH parighaiH shaktyR^iShTiprAsatomaraiH |
asibhiH paTTishairbANaiH prAharannarayo harim || 16||
kR^iShNastu tatpauNDrakakAshirAjayo\-
rbalaM gajasyandanavAjipattimat |
gadAsichakreShubhirArdayadbhR^ishaM
yathA yugAnte hutabhukpR^ithak prajAH || 17||
AyodhanaM tadrathavAjiku~njara\-
dvipatkharoShTrairariNAvakhaNDitaiH |
babhau chitaM modavahaM manasvinA\-
mAkrIDanaM bhUtapaterivolbaNam || 18||
athAha pauNDrakaM shaurirbho bho pauNDraka yadbhavAn |
dUtavAkyena mAmAha tAnyastrANyutsR^ijAmi te || 19||
tyAjayiShye.abhidhAnaM me yattvayAj~na mR^iShA dhR^itam |
vrajAmi sharaNaM te.adya yadi nechChAmi saMyugam || 20||
iti kShiptvA shitairbANairvirathIkR^itya pauNDrakam |
shiro.avR^ishchadrathA~Ngena vajreNendro yathA gireH || 21||
tathA kAshIpateH kAyAchChira utkR^itya patribhiH |
nyapAtayatkAshIpuryAM padmakoshamivAnilaH || 22||
evaM matsariNaM hatvA pauNDrakaM sasakhaM hariH |
dvArakAmAvishatsiddhairgIyamAnakathAmR^itaH || 23||
sa nityaM bhagavad.hdhyAnapradhvastAkhilabandhanaH |
bibhrANashcha hare rAjan svarUpaM tanmayo.abhavat || 24||
shiraH patitamAlokya rAjadvAre sakuNDalam |
kimidaM kasya vA vaktramiti saMshishyire janAH || 25||
rAj~naH kAshIpaterj~nAtvA mahiShyaH putrabAndhavAH |
paurAshcha hA hatA rAjan nAtha nAtheti prArudan || 26||
sudakShiNastasya sutaH kR^itvA saMsthAvidhiM pituH |
nihatya pitR^ihantAraM yAsyAmyapachitiM pituH || 27||
ityAtmanAbhisandhAya sopAdhyAyo maheshvaram |
sudakShiNo.archayAmAsa parameNa samAdhinA || 28||
prIto.avimukte bhagavAMstasmai varamadAdbhavaH |
pitR^ihantR^ivadhopAyaM sa vavre varamIpsitam || 29||
dakShiNAgniM parichara brAhmaNaiH samamR^itvijam |
abhichAravidhAnena sa chAgniH pramathairvR^itaH || 30||
sAdhayiShyati sa~NkalpamabrahmaNye prayojitaH |
ityAdiShTastathA chakre kR^iShNAyAbhicharan vratI || 31||
tato.agnirutthitaH kuNDAnmUrtimAnatibhIShaNaH |
taptatAmrashikhAshmashrura~NgArodgArilochanaH || 32||
daMShTrograbhrukuTIdaNDakaThorAsyaH svajihvayA |
Alihan sR^ikkiNI nagno vidhunvaMstrishikhaM jvalat || 33||
padbhyAM tAlapramANAbhyAM kampayannavanItalam |
so.abhyadhAvadvR^ito bhUtairdvArakAM pradahan dishaH || 34||
tamAbhichAradahanamAyAntaM dvArakaukasaH |
vilokya tatrasuH sarve vanadAhe mR^igA yathA || 35||
akShaiH sabhAyAM krIDantaM bhagavantaM bhayAturAH |
trAhi trAhi trilokesha vahneH pradahataH puram || 36||
shrutvA tajjanavaiklavyaM dR^iShTvA svAnAM cha sAdhvasam |
sharaNyaH samprahasyAha mA bhaiShTetyavitAsmyaham || 37||
sarvasyAntarbahiH sAkShI kR^ityAM mAheshvarIM vibhuH |
vij~nAya tadvighAtArthaM pArshvasthaM chakramAdishat || 38||
tatsUryakoTipratimaM sudarshanaM
jAjvalyamAnaM pralayAnalaprabham |
svatejasA khaM kakubho.atha rodasI
chakraM mukundAstramathAgnimArdayat || 39||
kR^ityAnalaH pratihataH sa rathA~NgapANe\-
rastraujasA sa nR^ipa bhagnamukho nivR^ittaH |
vArANasIM parisametya sudakShiNaM taM
sartvigjanaM samadahatsvakR^ito.abhichAraH || 40||
chakraM cha viShNostadanupraviShTaM
vArANasIM sATTasabhAlayApaNAm |
sagopurATTAlakakoShThasa~NkulAM
sakoshahastyashvarathAnnashAlAm || 41||
dagdhvA vArANasIM sarvAM viShNoshchakraM sudarshanam |
bhUyaH pArshvamupAtiShThatkR^iShNasyAkliShTakarmaNaH || 42||
ya etachChrAvayenmartyaH uttamashlokavikramam |
samAhito vA shR^iNuyAtsarvapApaiH pramuchyate || 43||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe pauNDrakAdi\-
vadho nAma ShaTShaShTitamo.adhyAyaH || 66||
\iti
\section{.. OM namo bhagavate vAsudevAya ..}
\section{.. saptaShaShTitamo.adhyAyaH \- 67 ..}
rAjovAcha
bhuyo.ahaM shrotumichChAmi rAmasyAdbhutakarmaNaH |
anantasyAprameyasya yadanyatkR^itavAn prabhuH || 1||
shrIshuka uvAcha
narakasya sakhA kashchiddvivido nAma vAnaraH |
sugrIvasachivaH so.atha bhrAtA maindasya vIryavAn || 2||
sakhyuH so.apachitiM kurvan vAnaro rAShTraviplavam |
puragrAmAkarAn ghoShAnadahadvahnimutsR^ijan || 3||
kvachitsa shailAnutpATya tairdeshAn samachUrNayat |
AnartAn sutarAmeva yatrAste mitrahA hariH || 4||
kvachitsamudramadhyastho dorbhyAmutkShipya tajjalam |
deshAn nAgAyutaprANo velAkUlAnamajjayat || 5||
AshramAn R^iShimukhyAnAM kR^itvA bhagnavanaspatIn |
adUShayachChakR^inmUtrairagnIn vaitAnikAn khalaH || 6||
puruShAn yoShito dR^iptaH kShmAbhR^iddroNIguhAsu saH |
nikShipya chApyadhAchChailaiH peshaskArIva kITakam || 7||
evaM deshAn viprakurvan dUShayaMshcha kulastriyaH |
shrutvA sulalitaM gItaM giriM raivatakaM yayau || 8||
tatrApashyadyadupatiM rAmaM puShkaramAlinam |
sudarshanIyasarvA~NgaM lalanAyUthamadhyagam || 9||
gAyantaM vAruNIM pItvA madavihvalalochanam |
vibhrAjamAnaM vapuShA prabhinnamiva vAraNam || 10||
duShTaH shAkhAmR^igaH shAkhAmArUDhaH kampayan drumAn |
chakre kilakilAshabdamAtmAnaM sampradarshayan || 11||
tasya dhArShTyaM kapervIkShya taruNyo jAtichApalAH |
hAsyapriyA vijahasurbaladevaparigrahAH || 12||
tA helayAmAsa kapirbhrUkShepaiH sammukhAdibhiH |
darshayan svagudaM tAsAM rAmasya cha nirIkShataH || 13||
taM grAvNA prAharatkruddho balaH praharatAM varaH |
sa va~nchayitvA grAvANaM madirAkalashaM kapiH || 14||
gR^ihItvA helayAmAsa dhUrtastaM kopayan hasan |
nirbhidya kalashaM duShTo vAsAMsyAsphAlayadbalam || 15||
kadarthIkR^itya balavAn viprachakre madoddhataH |
taM tasyAvinayaM dR^iShTvA deshAMshcha tadupadrutAn || 16||
kruddho musalamAdatta halaM chArijighAMsayA |
dvivido.api mahAvIryaH sAlamudyamya pANinA || 17||
abhyetya tarasA tena balaM mUrdhanyatADayat |
taM tu sa~NkarShaNo mUrdhni patantamachalo yathA || 18||
pratijagrAha balavAn sunandenAhanachcha tam |
musalAhatamastiShko vireje raktadhArayA || 19||
giriryathA gairikayA prahAraM nAnuchintayan |
punaranyaM samutkShipya kR^itvA niShpatramojasA || 20||
tenAhanatsusa~NkruddhastaM balaH shatadhAchChinat |
tato.anyena ruShA jaghne taM chApi shatadhAchChinat || 21||
evaM yudhyan bhagavatA bhagne bhagne punaH punaH |
AkR^iShya sarvato vR^ikShAn nirvR^ikShamakarodvanam || 22||
tato.amu~nchachChilAvarShaM balasyoparyamarShitaH |
tatsarvaM chUrNayAmAsa lIlayA musalAyudhaH || 23||
sa bAhU tAlasa~NkAshau muShTIkR^itya kapIshvaraH |
AsAdya rohiNIputraM tAbhyAM vakShasyarUrujat || 24||
yAdavendro.api taM dorbhyAM tyaktvA musalalA~Ngale |
jatrAvabhyardayatkruddhaH so.apatadrudhiraM vaman || 25||
chakampe tena patatA saTa~NkaH savanaspatiH |
parvataH kurushArdUla vAyunA naurivAmbhasi || 26||
jayashabdo namaH shabdaH sAdhu sAdhviti chAmbare |
surasiddhamunIndrANAmAsItkusumavarShiNAm || 27||
evaM nihatya dvividaM jagadvyatikarAvaham |
saMstUyamAno bhagavAn janaiH svapuramAvishat || 28||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe dvividhavadho
nAma saptaShaShTitamo.adhyAyaH || 67||
\iti
\section{.. OM namo bhagavate vAsudevAya ..}
\section{.. aShTaShaShTitamo.adhyAyaH \- 68 ..}
shrIshuka uvAcha
duryodhanasutAM rAjan lakShmaNAM samiti~njajayaH |
svayaMvarasthAmaharatsAmbo jAmbavatIsutaH || 1||
kauravAH kupitA UchurdurvinIto.ayamarbhakaH |
kadarthIkR^itya naH kanyAmakAmAmaharadbalAt || 2||
badhnItemaM durvinItaM kiM kariShyanti vR^iShNayaH |
ye.asmatprasAdopachitAM dattAM no bhu~njate mahIm || 3||
nigR^ihItaM sutaM shrutvA yadyeShyantIha vR^iShNayaH |
bhagnadarpAH shamaM yAnti prANA iva susaMyatAH || 4||
iti karNaH shalo bhUriryaj~naketuH suyodhanaH |
sAmbamArebhire baddhuM kuruvR^iddhAnumoditAH || 5||
dR^iShTvAnudhAvataH sAmbo dhArtarAShTrAn mahArathaH |
pragR^ihya ruchiraM chApaM tasthau siMha ivaikalaH || 6||
taM te jighR^ikShavaH kruddhAstiShTha tiShTheti bhAShiNaH |
AsAdya dhanvino bANaiH karNAgraNyaH samAkiran || 7||
so.apaviddhaH kurushreShTha kurubhiryadunandanaH |
nAmR^iShyattadachintyArbhaH siMhaH kShudramR^igairiva || 8||
visphUrjya ruchiraM chApaM sarvAn vivyAdha sAyakaiH |
karNAdIn ShaDrathAn vIrAMstAvadbhiryugapatpR^ithak || 9||
chaturbhishchaturo vAhAnekaikena cha sArathIn |
rathinashcha maheShvAsAMstasya tatte.abhyapUjayan || 10||
taM tu te virathaM chakrushchatvArashchaturo hayAn |
ekastu sArathiM jaghne chichChedAnyaH sharAsanam || 11||
taM baddhvA virathIkR^itya kR^ichChreNa kuravo yudhi |
kumAraM svasya kanyAM cha svapuraM jayino.avishan || 12||
tachChrutvA nAradoktena rAjan sa~njAtamanyavaH |
kurUn pratyudyamaM chakrurugrasenaprachoditAH || 13||
sAntvayitvA tu tAn rAmaH sannaddhAn vR^iShNipu~NgavAn |
naichChatkurUNAM vR^iShNInAM kaliM kalimalApahaH || 14||
jagAma hAstinapuraM rathenAdityavarchasA |
brAhmaNaiH kulavR^iddhaishcha vR^itashchandra iva grahaiH || 15||
gatvA gajAhvayaM rAmo bAhyopavanamAsthitaH |
uddhavaM preShayAmAsa dhR^itarAShTraM bubhutsayA || 16||
so.abhivandyAmbikAputraM bhIShmaM droNaM cha bAhlikam |
duryodhanaM cha vidhivadrAmamAgatamabravIt || 17||
te.atiprItAstamAkarNya prAptaM rAmaM suhR^ittamam |
tamarchayitvAbhiyayuH sarve ma~NgalapANayaH || 18||
taM sa~Ngamya yathAnyAyaM gAmarghyaM cha nyavedayan |
teShAM ye tatprabhAvaj~nAH praNemuH shirasA balam || 19||
bandhUn kushalinaH shrutvA pR^iShTvA shivamanAmayam |
parasparamatho rAmo babhAShe.aviklavaM vachaH || 20||
ugrasenaH kShitIshesho yadva Aj~nApayatprabhuH |
tadavyagradhiyaH shrutvA kurudhvaM mAvilambitam || 21||
yadyUyaM bahavastvekaM jitvA.adharmeNa dhArmikam |
abadhnItAtha tanmR^iShye bandhUnAmaikyakAmyayA || 22||
vIryashauryabalonnaddhamAtmashaktisamaM vachaH |
kuravo baladevasya nishamyochuH prakopitAH || 23||
aho mahachchitramidaM kAlagatyA duratyayA |
ArurukShatyupAnadvai shiro mukuTasevitam || 24||
ete yaunena sambaddhAH sahashayyAsanAshanAH |
vR^iShNayastulyatAM nItA asmaddattanR^ipAsanAH || 25||
chAmaravyajane sha~NkhamAtapatraM cha pANDuram |
kirITamAsanaM shayyAM bhu~njate.asmadupekShayA || 26||
alaM yadUnAM naradevalA~nChanai\-
rdAtuH pratIpaiH phaNinAmivAmR^itam |
ye.asmatprasAdopachitA hi yAdavA
Aj~nApayantyadya gatatrapA bata || 27||
kathamindro.api kurubhirbhIShmadroNArjunAdibhiH |
adattamavarundhIta siMhagrastamivoraNaH || 28||
shrIshuka uvAcha
janmabandhushriyonnaddhamadAste bharatarShabha |
AshrAvya rAmaM durvAchyamasabhyAH puramAvishan || 29||
dR^iShTvA kurUNAM dauHshIlyaM shrutvAvAchyAni chAchyutaH |
avochatkopasaMrabdho duShprekShyaH prahasan muhuH || 30||
nUnaM nAnAmadonnaddhAH shAntiM nechChantyasAdhavaH |
teShAM hi prashamo daNDaH pashUnAM laguDo yathA || 31||
aho yadUn susaMrabdhAn kR^iShNaM cha kupitaM shanaiH |
sAntvayitvAhameteShAM shamamichChannihAgataH || 32||
ta ime mandamatayaH kalahAbhiratAH khalAH |
taM mAmavaj~nAya muhurdurbhAShAn mAnino.abruvan || 33||
nograsenaH kila vibhurbhojavR^iShNyandhakeshvaraH |
shakrAdayo lokapAlA yasyAdeshAnuvartinaH || 34||
sudharmA.a.akramyate yena pArijAto.amarA~NghripaH |
AnIya bhujyate so.asau na kilAdhyAsanArhaNaH || 35||
yasya pAdayugaM sAkShAchChrIrupAste.akhileshvarI |
sa nArhati kila shrIsho naradevaparichChadAn || 36||
yasyA~Nghripa~Nkajarajo.akhilalokapAlaiH
maulyuttamairdhR^itamupAsitatIrthatIrtham |
brahmA bhavo.ahamapi yasya kalAH kalAyAH
shrIshchodvahema chiramasya nR^ipAsanaM kva || 37||
bhu~njate kurubhirdattaM bhUkhaNDaM vR^iShNayaH kila |
upAnahaH kila vayaM svayaM tu kuravaH shiraH || 38||
aho aishvaryamattAnAM mattAnAmiva mAninAm |
asambaddhA giro rUkShAH kaH sahetAnushAsItA || 39||
adya niShkauravIM pR^ithvIM kariShyAmItyamarShitaH |
gR^ihItvA halamuttasthau dahanniva jagattrayam || 40||
lA~NgalAgreNa nagaramudvidArya gajAhvayam |
vichakarSha sa ga~NgAyAM prahariShyannamarShitaH || 41||
jalayAnamivAghUrNaM ga~NgAyAM nagaraM patat |
AkR^iShyamANamAlokya kauravAH jAtasambhramAH || 42||
tameva sharaNaM jagmuH sakuTumbA jijIviShavaH |
salakShmaNaM puraskR^itya sAmbaM prA~njalayaH prabhum || 43||
rAma rAmAkhilAdhAra prabhAvaM na vidAma te |
mUDhAnAM naH kubuddhInAM kShantumarhasyatikramam || 44||
sthityutpattyapyayAnAM tvameko heturnirAshrayaH |
lokAn krIDanakAnIsha krIDataste vadanti hi || 45||
tvameva mUrdhnIdamananta lIlayA
bhUmaNDalaM bibharShi sahasramUrdhan |
ante cha yaH svAtmani ruddhavishvaH
sheShe.advitIyaH parishiShyamANaH || 46||
kopaste.akhilashikShArthaM na dveShAnna cha matsarAt |
bibhrato bhagavan sattvaM sthitipAlanatatparaH || 47||
namaste sarvabhUtAtman sarvashaktidharAvyaya |
vishvakarman namaste.astu tvAM vayaM sharaNaM gatAH || 48||
shrIshuka uvAcha
evaM prapannaiH saMvignairvepamAnAyanairbalaH |
prasAditaH suprasanno mA bhaiShTetyabhayaM dadau || 49||
duryodhanaH pAribarhaM ku~njarAn ShaShTihAyanAn |
dadau cha dvAdashashatAnyayutAni tura~NgamAn || 50||
rathAnAM ShaTsahasrANi raukmANAM sUryavarchasAm |
dAsInAM niShkakaNThInAM sahasraM duhitR^ivatsalaH || 51||
pratigR^ihya tu tatsarvaM bhagavAn sAtvatarShabhaH |
sasutaH sasnuShaH prAgAtsuhR^idbhirabhinanditaH || 52||
tataH praviShTaH svapuraM halAyudhaH
sametya bandhUnanuraktachetasaH |
shashaMsa sarvaM yadupu~NgavAnAM
madhye sabhAyAM kuruShu svacheShTitam || 53||
adyApi cha puraM hyetatsUchayadrAmavikramam |
samunnataM dakShiNato ga~NgAyAmanudR^ishyate || 54||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe hAstinapura\-
karShaNarUpasa~NkarShaNavijayo nAmAShTaShaShTitamo.adhyAyaH || 68||
\iti
\section{.. OM namo bhagavate vAsudevAya ..}
\section{.. ekonasaptatitamo.adhyAyaH \- 69 ..}
shrIshuka uvAcha
narakaM nihataM shrutvA tathodvAhaM cha yoShitAm |
kR^iShNenaikena bahvInAM taddidR^ikShuH sma nAradaH || 1||
chitraM bataitadekena vapuShA yugapatpR^ithak |
gR^iheShu dvyaShTasAhasraM striya eka udAvahat || 2||
ityutsuko dvAravatIM devarShirdraShTumAgamat |
puShpitopavanArAmadvijAlikulanAditAm || 3||
utphullendIvarAmbhojakahlArakumudotpalaiH |
ChuriteShu saraHsUchchaiH kUjitAM haMsasArasaiH || 4||
prAsAdalakShairnavabhirjuShTAM sphATikarAjataiH |
mahAmarakataprakhyaiH svarNaratnaparichChadaiH || 5||
vibhaktarathyApathachatvarApaNaiH
shAlAsabhAbhI ruchirAM surAlayaiH |
saMsiktamArgA~NgaNavIthidehalIM
patatpatAkAdhvajavAritAtapAm || 6||
tasyAmantaHpuraM shrImadarchitaM sarvadhiShNyapaiH |
hareH svakaushalaM yatra tvaShTrA kArtsnyena darshitam || 7||
tatra ShoDashabhiH sadmasahasraiH samala~NkR^itam |
viveshaikatamaM shaureH patnInAM bhavanaM mahat || 8||
viShTabdhaM vidrumastambhairvaidUryaphalakottamaiH |
indranIlamayaiH kuDyairjagatyA chAhatatviShA || 9||
vitAnairnirmitaistvaShTrA muktAdAmavilambibhiH |
dAntairAsanaparya~NkairmaNyuttamapariShkR^itaiH || 10||
dAsIbhirniShkakaNThIbhiH suvAsobhirala~NkR^itam |
pumbhiH saka~nchukoShNIShasuvastramaNikuNDalaiH || 11||
ratnapradIpanikaradyutibhirnirasta\-
dhvAntaM vichitravalabhIShu shikhaNDino.a~Nga |
nR^ityanti yatra vihitAgurudhUpamakShai\-
rniryAntamIkShya ghanabuddhaya unnadantaH || 12||
tasmin samAnaguNarUpavayaHsuveSha\-
dAsIsahasrayutayAnusavaM gR^ihiNyA |
vipro dadarsha chamaravyajanena rukma\-
daNDena sAtvatapatiM parivIjayantyA || 13||
taM sannirIkShya bhagavAn sahasotthitashrI\-
parya~NkataH sakaladharmabhR^itAM variShThaH |
Anamya pAdayugalaM shirasA kirITa\-
juShTena sA~njaliravIvishadAsane sve || 14||
tasyAvanijya charaNau tadapaH svamUrdhnA\-
bibhrajjagadgurutaro.api satAM patirhi |
brahmaNyadeva iti yadguNanAmayuktaM
tasyaiva yachcharaNashauchamasheShatIrtham || 15||
sampUjya devaR^iShivaryamR^iShiH purANo
nArAyaNo narasakho vidhinoditena |
vANyAbhibhAShya mitayAmR^itamiShTayA taM
prAha prabho bhagavate karavAma he kim || 16||
nArada uvAcha
naivAdbhutaM tvayi vibho.akhilalokanAthe
maitrI janeShu sakaleShu damaH khalAnAm |
niHshreyasAya hi jagatsthitirakShaNAbhyAM
svairAvatAra urugAya vidAma suShThu || 17||
dR^iShTaM tavA~NghriyugalaM janatApavargaM
brahmAdibhirhR^idi vichintyamagAdhabodhaiH |
saMsArakUpapatitottaraNAvalambaM
dhyAyaMshcharAmyanugR^ihANa yathA smR^itiH syAt || 18||
tato.anyadAvishadgehaM kR^iShNapatnyAH sa nAradaH |
yogeshvareshvarasyA~Nga yogamAyAvivitsayA || 19||
dIvyantamakShaistatrApi priyayA choddhavena cha |
pUjitaH parayA bhaktyA pratyutthAnAsanAdibhiH || 20||
pR^iShTashchAviduShevAsau kadA.a.ayAto bhavAniti |
kriyate kiM nu pUrNAnAmapUrNairasmadAdibhiH || 21||
athApi brUhi no brahman janmaitachChobhanaM kuru |
sa tu vismita utthAya tUShNImanyadagAdgR^iham || 22||
tatrApyachaShTa govindaM lAlayantaM sutAn shishUn |
tato.anyasmin gR^ihe.apashyanmajjanAya kR^itodyamam || 23||
juhvantaM cha vitAnAgnIn yajantaM pa~nchabhirmakhaiH |
bhojayantaM dvijAn kvApi bhu~njAnamavasheShitam || 24||
kvApi sandhyAmupAsInaM japantaM brahma vAgyatam |
ekatra chAsicharmAbhyAM charantamasivartmasu || 25||
ashvairgajai rathaiH kvApi vicharantaM gadAgrajam |
kvachichChayAnaM parya~Nke stUyamAnaM cha vandibhiH || 26||
mantrayantaM cha kasmiMshchinmantribhishchoddhavAdibhiH |
jalakrIDArataM kvApi vAramukhyAbalAvR^itam || 27||
kutrachiddvijamukhyebhyo dadataM gAH svala~NkR^itAH |
itihAsapurANAni shR^iNvantaM ma~NgalAni cha || 28||
hasantaM hAsyakathayA kadAchitpriyayA gR^ihe |
kvApi dharmaM sevamAnamarthakAmau cha kutrachit || 29||
dhyAyantamekamAsInaM puruShaM prakR^iteH param |
shushrUShantaM gurUn kvApi kAmairbhogaiH saparyayA || 30||
kurvantaM vigrahaM kaishchitsandhiM chAnyatra keshavam |
kutrApi saha rAmeNa chintayantaM satAM shivam || 31||
putrANAM duhitR^INAM cha kAle vidhyupayApanam |
dArairvaraistatsadR^ishaiH kalpayantaM vibhUtibhiH || 32||
prasthApanopAnayanairapatyAnAM mahotsavAn |
vIkShya yogeshvareshasya yeShAM lokA visismire || 33||
yajantaM sakalAn devAn kvApi kratubhirUrjitaiH |
pUrtayantaM kvachiddharmaM kUrpArAmamaThAdibhiH || 34||
charantaM mR^igayAM kvApi hayamAruhya saindhavam |
ghnantaM tataH pashUn medhyAn parItaM yadupu~NgavaiH || 35||
avyaktali~NgaM prakR^itiShvantaHpuragR^ihAdiShu |
kvachichcharantaM yogeshaM tattadbhAvabubhutsayA || 36||
athovAcha hR^iShIkeshaM nAradaH prahasanniva |
yogamAyodayaM vIkShya mAnuShImIyuSho gatim || 37||
vidAma yogamAyAste durdarshA api mAyinAm |
yogeshvarAtman nirbhAtA bhavatpAdaniShevayA || 38||
anujAnIhi mAM deva lokAMste yashasA.a.aplutAn |
paryaTAmi tavodgAyan lIlAM bhuvanapAvanIm || 39||
shrIbhagavAnuvAcha
brahman dharmasya vaktAhaM kartA tadanumoditA |
tachChikShayan lokamimamAsthitaH putra mA khidaH || 40||
shrIshuka uvAcha
ityAcharantaM saddharmAn pAvanAn gR^ihamedhinAm |
tameva sarvageheShu santamekaM dadarsha ha || 41||
kR^iShNasyAnantavIryasya yogamAyAmahodayam |
muhurdR^iShTvA R^iShirabhUdvismito jAtakautukaH || 42||
ityarthakAmadharmeShu kR^iShNena shraddhitAtmanA |
samyak sabhAjitaH prItastamevAnusmaran yayau || 43||
evaM manuShyapadavImanuvartamAno
nArAyaNo.akhilabhavAya gR^ihItashaktiH |
reme.a~Nga ShoDashasahasravarA~NganAnAM
savrIDasauhR^idanirIkShaNahAsajuShTaH || 44||
yAnIha vishvavilayodbhavavR^ittihetuH
karmANyananyaviShayANi harishchakAra |
yastva~Nga gAyati shR^iNotyanumodate vA
bhaktirbhavedbhagavati hyapavargamArge || 45||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe kR^iShNagArhastya\-
darshanaM nAmaikonasaptatitamo.adhyAyaH || 69||
\iti
\section{.. OM namo bhagavate vAsudevAya ..}
\section{.. saptatitamo.adhyAyaH \- 70 ..}
shrIshuka uvAcha
athoShasyupavR^ittAyAM kukkuTAn kUjato.ashapan |
gR^ihItakaNThyaH patibhirmAdhavyo virahAturAH || 1||
vayAMsyaroruvan kR^iShNaM bodhayantIva vandinaH |
gAyatsvaliShvanidrANi mandAravanavAyubhiH || 2||
muhUrtaM taM tu vaidarbhI nAmR^iShyadatishobhanam |
parirambhaNavishleShAtpriyabAhvantaraM gatA || 3||
brAhme muhUrta utthAya vAryupaspR^ishya mAdhavaH |
dadhyau prasannakaraNa AtmAnaM tamasaH param || 4||
ekaM svaya~njyotirananyamavyayaM
svasaMsthayA nityanirastakalmaSham |
brahmAkhyamasyodbhavanAshahetubhiH
svashaktibhirlakShitabhAvanirvR^itim || 5||
athApluto.ambhasyamale yathAvidhi
kriyAkalApaM paridhAya vAsasI |
chakAra sandhyopagamAdi sattamo
hutAnalo brahma jajApa vAgyataH || 6||
upasthAyArkamudyantaM tarpayitvA.a.atmanaH kalAH |
devAn R^iShIn pitR^In vR^iddhAn viprAnabhyarchya chAtmavAn || 7||
dhenUnAM rukmashR^i~NgINAM sAdhvInAM mauktikasrajAm |
payasvinInAM gR^iShTInAM savatsAnAM suvAsasAm || 8||
dadau rUpyakhurAgrANAM kShaumAjinatilaiH saha |
ala~NkR^itebhyo viprebhyo badvaM badvaM dine dine || 9||
govipradevatAvR^iddhagurUn bhUtAni sarvashaH |
namaskR^ityAtmasambhUtIrma~NgalAni samaspR^ishat || 10||
AtmAnaM bhUShayAmAsa naralokavibhUShaNam |
vAsobhirbhUShaNaiH svIyairdivyasraganulepanaiH || 11||
avekShyAjyaM tathA.a.adarshaM govR^iShadvijadevatAH |
kAmAMshcha sarvavarNAnAM paurAntaHpurachAriNAm |
pradApya prakR^itIH kAmaiH pratoShya pratyanandata || 12||
saMvibhajyAgrato viprAn sraktAmbUlAnulepanaiH |
suhR^idaH prakR^itIrdArAnupAyu~Nkta tataH svayam || 13||
tAvatsUta upAnIya syandanaM paramAdbhutam |
sugrIvAdyairhayairyuktaM praNamyAvasthito.agrataH || 14||
gR^ihItvA pANinA pANI sArathestamathAruhat |
sAtyakyuddhavasaMyuktaH pUrvAdrimiva bhAskaraH || 15||
IkShito.antaHpurastrINAM savrIDapremavIkShitaiH |
kR^ichChrAdvisR^iShTo niragAjjAtahAso haran manaH || 16||
sudharmAkhyAM sabhAM sarvairvR^iShNibhiH parivAritaH |
prAvishadyanniviShTAnAM na santya~Nga ShaDUrmayaH || 17||
tatropaviShTaH paramAsane vibhu\-
rbabhau svabhAsA kakubho.avabhAsayan |
vR^ito nR^isiMhairyadubhiryadUttamo
yathoDurAjo divi tArakAgaNaiH || 18||
tatropamantriNo rAjan nAnAhAsyarasairvibhum |
upatasthurnaTAchAryA nartakyastANDavaiH pR^ithak || 19||
mR^ida~NgavINAmurajaveNutAladarasvanaiH |
nanR^iturjagustuShTuvushcha sUtamAgadhavandinaH || 20||
tatrAhurbrAhmaNAH kechidAsInA brahmavAdinaH |
pUrveShAM puNyayashasAM rAj~nAM chAkathayan kathAH || 21||
tatraikaH puruSho rAjannAgato.apUrvadarshanaH |
vij~nApito bhagavate pratIhAraiH praveshitaH || 22||
sa namaskR^itya kR^iShNAya pareshAya kR^itA~njaliH |
rAj~nAmAvedayadduHkhaM jarAsandhanirodhajam || 23||
ye cha digvijaye tasya sannatiM na yayurnR^ipAH |
prasahya ruddhAstenAsannayute dve girivraje || 24||
kR^iShNa kR^iShNAprameyAtman prapannabhayabha~njana |
vayaM tvAM sharaNaM yAmo bhavabhItAH pR^ithagdhiyaH || 25||
loko vikarmanirataH kushale pramattaH
karmaNyayaM tvadudite bhavadarchane sve |
yastAvadasya balavAniha jIvitAshAM
sadyashChinattyanimiShAya namo.astu tasmai || 26||
loke bhavA~njagadinaH kalayAvatIrNaH
sadrakShaNAya khalanigrahaNAya chAnyaH |
kashchittvadIyamatiyAti nideshamIsha
kiM vA janaH svakR^itamR^ichChati tanna vidmaH || 27||
svapnAyitaM nR^ipasukhaM paratantramIsha
shashvadbhayena mR^itakena dhuraM vahAmaH |
hitvA tadAtmani sukhaM tvadanIhalabhyaM
klishyAmahe.atikR^ipaNAstava mAyayeha || 28||
tanno bhavAn praNatashokaharA~Nghriyugmo
baddhAn viyu~NkShva magadhAhvayakarmapAshAt |
yo bhUbhujo.ayutamata~NgajavIryameko
bibhradrurodha bhavane mR^igarADivAvIH || 29||
yo vai tvayA dvinavakR^itva udAttachakra\-
bhagno mR^idhe khalu bhavantamanantavIryam |
jitvA nR^ilokanirataM sakR^idUDhadarpo
yuShmatprajA rujati no.ajita tadvidhehi || 30||
dUta uvAcha
iti mAgadhasaMruddhA bhavaddarshanaka~NkShiNaH |
prapannAH pAdamUlaM te dInAnAM shaM vidhIyatAm || 31||
shrIshuka uvAcha
rAjadUte bruvatyevaM devarShiH paramadyutiH |
bibhratpi~NgajaTAbhAraM prAdurAsIdyathA raviH || 32||
taM dR^iShTvA bhagavAn kR^iShNaH sarvalokeshvareshvaraH |
vavanda utthitaH shIrShNA sasabhyaH sAnugo mudA || 33||
sabhAjayitvA vidhivatkR^itAsanaparigraham |
babhAShe sUnR^itairvAkyaiH shraddhayA tarpayan munim || 34||
api svidadya lokAnAM trayANAmakutobhayam |
nanu bhUyAn bhagavato lokAn paryaTato guNaH || 35||
na hi te.aviditaM ki~nchillokeShvIshvarakartR^iShu |
atha pR^ichChAmahe yuShmAn pANDavAnAM chikIrShitam || 36||
shrInArada uvAcha
dR^iShTA mAyA te bahusho duratyayA
mAyA vibho vishvasR^ijashcha mAyinaH |
bhUteShu bhUmaMshcharataH svashaktibhi\-
rvahnerivachChannarucho na me.adbhutam || 37||
tavehitaM ko.arhati sAdhu vedituM
svamAyayedaM sR^ijato niyachChataH |
yadvidyamAnAtmatayAvabhAsate
tasmai namaste svavilakShaNAtmane || 38||
jIvasya yaH saMsarato vimokShaNaM
na jAnato.anarthavahAchCharIrataH |
lIlAvatAraiH svayashaHpradIpakaM
prAjvAlayattvA tamahaM prapadye || 39||
athApyAshrAvaye brahma naralokaviDambanam |
rAj~naH paitR^iShvaseyasya bhaktasya cha chikIrShitam || 40||
yakShyati tvAM makhendreNa rAjasUyena pANDavaH |
pArameShThyakAmo nR^ipatistadbhavAnanumodatAm || 41||
tasmin deva kratuvare bhavantaM vai surAdayaH |
didR^ikShavaH sameShyanti rAjAnashcha yashasvinaH || 42||
shravaNAtkIrtanAd.hdhyAnAtpUyante.antevasAyinaH |
tava brahmamayasyesha kimutekShAbhimarshinaH || 43||
yasyAmalaM divi yashaH prathitaM rasAyAM
bhUmau cha te bhuvanama~Ngala digvitAnam |
mandAkinIti divi bhogavatIti chAdho
ga~Ngeti cheha charaNAmbu punAti vishvam || 44||
shrIshuka uvAcha
tatra teShvAtmapakSheShvagR^ihNatsu vijigIShayA |
vAchaH peshaiH smayan bhR^ityamuddhavaM prAha keshavaH || 45||
shrIbhagavAnuvAcha
tvaM hi naH paramaM chakShuH suhR^inmantrArthatattvavit |
tathAtra brUhyanuShTheyaM shraddadhmaH karavAma tat || 46||
ityupAmantrito bhartrA sarvaj~nenApi mugdhavat |
nideshaM shirasA.a.adhAya uddhavaH pratyabhAShata || 47||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe bhagavadyAna\-
vichAro nAma saptatitamo.adhyAyaH || 70||
\iti
\section{.. OM namo bhagavate vAsudevAya ..}
\section{.. ekasaptatitamo.adhyAyaH \- 71 ..}
shrIshuka uvAcha
ityudIritamAkarNya devaR^iSheruddhavo.abravIt |
sabhyAnAM matamAj~nAya kR^iShNasya cha mahAmatiH || 1||
uddhava uvAcha
yaduktamR^iShiNA deva sAchivyaM yakShyatastvayA |
kAryaM paitR^iShvaseyasya rakShA cha sharaNaiShiNAm || 2||
yaShTavyaM rAjasUyena dikchakrajayinA vibho |
ato jarAsutajaya ubhayArtho mato mama || 3||
asmAkaM cha mahAnartho hyetenaiva bhaviShyati |
yashashcha tava govinda rAj~no baddhAn vimu~nchataH || 4||
sa vai durviShaho rAjA nAgAyutasamo bale |
balinAmapi chAnyeShAM bhImaM samabalaM vinA || 5||
dvairathe sa tu jetavyo mA shatAkShauhiNIyutaH |
brahmaNyo.abhyarthito viprairna pratyAkhyAti karhichit || 6||
brahmaveShadharo gatvA taM bhikSheta vR^ikodaraH |
haniShyati na sandeho dvairathe tava sannidhau || 7||
nimittaM paramIshasya vishvasarganirodhayoH |
hiraNyagarbhaH sharvashcha kAlasyArUpiNastava || 8||
gAyanti te vishadakarma gR^iheShu devyo
rAj~nAM svashatruvadhamAtmavimokShaNaM cha |
gopyashcha ku~njarapaterjanakAtmajAyAH
pitroshcha labdhasharaNA munayo vayaM cha || 9||
jarAsandhavadhaH kR^iShNa bhUryarthAyopakalpate |
prAyaH pAkavipAkena tava chAbhimataH kratuH || 10||
shrIshuka uvAcha
ityuddhavavacho rAjan sarvatobhadramachyutam |
devarShiryaduvR^iddhAshcha kR^iShNashcha pratyapUjayan || 11||
athAdishatprayANAya bhagavAn devakIsutaH |
bhR^ityAn dArukajaitrAdInanuj~nApya gurUn vibhuH || 12||
nirgamayyAvarodhAn svAn sasutAn saparichChadAn |
sa~NkarShaNamanuj~nApya yadurAjaM cha shatruhan |
sUtopanItaM svarathamAruhadgaruDadhvajam || 13||
tato rathadvipabhaTasAdinAyakaiH
karAlayA parivR^ita AtmasenayA |
mR^ida~NgabheryAnakasha~NkhagomukhaiH
praghoShaghoShitkakubho nirAkramat || 14||
nR^ivAjikA~nchanashibikAbhirachyutaM
sahAtmajAH patimanu suvratA yayuH |
varAmbarAbharaNavilepanasrajaH
susaMvR^itA nR^ibhirasicharmapANibhiH || 15||
naroShTragomahiShakharAshvataryanaH
kareNubhiH parijanavArayoShitaH |
svala~NkR^itAH kaTakuTikambalAmbarA\-
dyupaskarA yayuradhiyujya sarvataH || 16||
balaM bR^ihaddhvajapaTaChatrachAmarai\-
rvarAyudhAbharaNakirITavarmabhiH |
divAMshubhistumularavaM babhau rave\-
ryathArNavaH kShubhitatimi~NgilormibhiH || 17||
atho muniryadupatinA sabhAjitaH
praNamya taM hR^idi vidadhadvihAyasA |
nishamya tadvyavasitamAhR^itArhaNo
mukundasandarshananirvR^itendriyaH || 18||
rAjadUtamuvAchedaM bhagavAn prINayan girA |
mA bhaiShTa dUta bhadraM vo ghAtayiShyAmi mAgadham || 19||
ityuktaH prasthito dUto yathAvadavadannR^ipAn |
te.api sandarshanaM shaureH pratyaikShan yanmumukShavaH || 20||
AnartasauvIramarUMstIrtvA vinashanaM hariH |
girIn nadIratIyAya puragrAmavrajAkarAn || 21||
tato dR^iShadvatIM tIrtvA mukundo.atha sarasvatIm |
pa~nchAlAnatha matsyAMshcha shakraprasthamathAgamat || 22||
tamupAgatamAkarNya prIto durdarshanaM nR^iNAm |
ajAtashatrurniragAtsopAdhyAyaH suhR^idvR^itaH || 23||
gItavAditraghoSheNa brahmaghoSheNa bhUyasA |
abhyayAtsa hR^iShIkeshaM prANAH prANamivAdR^itaH || 24||
dR^iShTvA viklinnahR^idayaH kR^iShNaM snehena pANDavaH |
chirAddR^iShTaM priyatamaM sasvaje.atha punaH punaH || 25||
dorbhyAM pariShvajya ramAmalAlayaM
mukundagAtraM nR^ipatirhatAshubhaH |
lebhe parAM nirvR^itimashrulochano
hR^iShyattanurvismR^italokavibhramaH || 26||
taM mAtuleyaM parirabhya nirvR^ito
bhImaH smayan premajalAkulendriyaH |
yamau kirITI cha suhR^ittamaM mudA
pravR^iddhabAShpAH parirebhire.achyutam || 27||
arjunena pariShvakto yamAbhyAmabhivAditaH |
brAhmaNebhyo namaskR^itya vR^iddhebhyashcha yathArhataH || 28||
mAnito mAnayAmAsa kurusR^i~njayakaikayAn |
sUtamAgadhagandharvA vandinashchopamantriNaH || 29||
mR^ida~Ngasha~NkhapaTahavINApaNavagomukhaiH |
brAhmaNAshchAravindAkShaM tuShTuvurnanR^iturjaguH || 30||
evaM suhR^idbhiH paryastaH puNyashlokashikhAmaNiH |
saMstUyamAno bhagavAn viveshAla~NkR^itaM puram || 31||
saMsiktavartma kariNAM madagandhatoyai\-
shchitradhvajaiH kanakatoraNapUrNakumbhaiH |
mR^iShTAtmabhirnavadukUlavibhUShaNasrag\-
gandhairnR^ibhiryuvatibhishcha virAjamAnam || 32||
uddIptadIpabalibhiH pratisadmajAla\-
niryAtadhUparuchiraM vilasatpatAkam |
mUrdhanyahemakalashai rajatorushR^i~Ngai\-
rjuShTaM dadarsha bhavanaiH kururAjadhAma || 33||
prAptaM nishamya naralochanapAnapAtra\-
mautsukyavishlathitakeshadukUlabandhAH |
sadyo visR^ijya gR^ihakarma patIMshcha talpe
draShTuM yayuryuvatayaH sma narendramArge || 34||
tasmin susa~Nkula ibhAshvarathadvipadbhiH
kR^iShNaM sabhAryamupalabhya gR^ihAdhirUDhAH |
nAryo vikIrya kusumairmanasopaguhya
susvAgataM vidadhurutsmayavIkShitena || 35||
UchuH striyaH pathi nirIkShya mukundapatnIH
tArA yathoDupasahAH kimakAryamUbhiH |
yachchakShuShAM puruShamaulirudArahAsa\-
lIlAvalokakalayotsavamAtanoti || 36||
tatra tatropasa~Ngamya paurA ma~NgalapANayaH |
chakruH saparyAM kR^iShNAya shreNImukhyA hatainasaH || 37||
antaHpurajanaiH prItyA mukundaH phullalochanaiH |
sasambhramairabhyupetaH prAvishadrAjamandiram || 38||
pR^ithA vilokya bhrAtreyaM kR^iShNaM tribhuvaneshvaram |
prItAtmotthAya parya~NkAtsasnuShA pariShasvaje || 39||
govindaM gR^ihamAnIya devadeveshamAdR^itaH |
pUjAyAM nAvidatkR^ityaM pramodopahato nR^ipaH || 40||
pitR^iShvasurgurustrINAM kR^iShNashchakre.abhivAdanam |
svayaM cha kR^iShNayA rAjan bhaginyA chAbhivanditaH || 41||
shvashrvA sa~nchoditA kR^iShNA kR^iShNapatnIshcha sarvashaH |
Anarcha rukmiNIM satyAM bhadrAM jAmbavatIM tathA || 42||
kAlindIM mitravindAM cha shaibyAM nAgnajitIM satIm |
anyAshchAbhyAgatA yAstu vAsaHsra~NmaNDanAdibhiH || 43||
sukhaM nivAsayAmAsa dharmarAjo janArdanam |
sasainyaM sAnugAmAtyaM sabhAryaM cha navaM navam || 44||
tarpayitvA khANDavena vahniM phAlgunasaMyutaH |
mochayitvA mayaM yena rAj~ne divyA sabhA kR^itA || 45||
uvAsa katichinmAsAn rAj~naH priyachikIrShayA |
viharan rathamAruhya phAlgunena bhaTairvR^itaH || 46||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe kR^iShNasya
indraprasthagamanaM nAmaikasaptatitamo.adhyAyaH || 71||
\iti
\section{.. OM namo bhagavate vAsudevAya ..}
\section{.. dvisaptatitamo.adhyAyaH \- 72 ..}
shrIshuka uvAcha
ekadA tu sabhAmadhya Asthito munibhirvR^itaH |
brAhmaNaiH kShatriyairvaishyairbhrAtR^ibhishcha yudhiShThiraH || 1||
AchAryaiH kulavR^iddhaishcha j~nAtisambandhibAndhavaiH |
shR^iNvatAmeva chaiteShAmAbhAShyedamuvAcha ha || 2||
yudhiShThira uvAcha
kraturAjena govinda rAjasUyena pAvanIH |
yakShye vibhUtIrbhavatastatsampAdaya naH prabho || 3||
tvatpAduke avirataM pari ye charanti
dhyAyantyabhadranashane shuchayo gR^iNanti |
vindanti te kamalanAbha bhavApavarga\-
mAshAsate yadi ta AshiSha Isha nAnye || 4||
taddevadeva bhavatashcharaNAravinda\-
sevAnubhAvamiha pashyatu loka eShaH |
ye tvAM bhajanti na bhajantyuta vobhayeShAM
niShThAM pradarshaya vibho kurusR^i~njayAnAm || 5||
na brahmaNaH svaparabhedamatistava syAt
sarvAtmanaH samadR^ishaH svasukhAnubhUteH |
saMsevatAM surataroriva te prasAdaH
sevAnurUpamudayo na viparyayo.atra || 6||
shrIbhagavAnuvAcha
samyagvyavasitaM rAjan bhavatA shatrukarshana |
kalyANI yena te kIrtirlokAnanubhaviShyati || 7||
R^iShINAM pitR^idevAnAM suhR^idAmapi naH prabho |
sarveShAmapi bhUtAnAmIpsitaH kraturADayam || 8||
vijitya nR^ipatIn sarvAn kR^itvA cha jagatIM vashe |
sambhR^itya sarvasambhArAnAharasva mahAkratum || 9||
ete te bhrAtaro rAjaMllokapAlAMshasambhavAH |
jito.asmyAtmavatA te.ahaM durjayo yo.akR^itAtmabhiH || 10||
na kashchinmatparaM loke tejasA yashasA shriyA |
vibhUtibhirvAbhibhaveddevo.api kimu pArthivaH || 11||
shrIshuka uvAcha
nishamya bhagavadgItaM prItaH phullamukhAmbujaH |
bhrAtR^In digvijaye.ayu~Nkta viShNutejopabR^iMhitAn || 12||
sahadevaM dakShiNasyAmAdishatsaha sR^i~njayaiH |
dishi pratIchyAM nakulamudIchyAM savyasAchinam |
prAchyAM vR^ikodaraM matsyaiH kekayaiH saha madrakaiH || 13||
te vijitya nR^ipAn vIrA Ajahrurdigbhya ojasA |
ajAtashatrave bhUri draviNaM nR^ipa yakShyate || 14||
shrutvAjitaM jarAsandhaM nR^ipaterdhyAyato hariH |
AhopAyaM tamevAdya uddhavo yamuvAcha ha || 15||
bhImaseno.arjunaH kR^iShNo brahmali~NgadharAstrayaH |
jagmurgirivrajaM tAta bR^ihadrathasuto yataH || 16||
te gatvA.a.atithyavelAyAM gR^iheShu gR^ihamedhinam |
brahmaNyaM samayAcheran rAjanyA brahmali~NginaH || 17||
rAjan vid.hdhyatithIn prAptAnarthino dUramAgatAn |
tannaH prayachCha bhadraM te yadvayaM kAmayAmahe || 18||
kiM durmarShaM titikShUNAM kimakAryamasAdhubhiH |
kiM na deyaM vadAnyAnAM kaH paraH samadarshinAm || 19||
yo.anityena sharIreNa satAM geyaM yasho dhruvam |
nAchinoti svayaM kalpaH sa vAchyaH shochya eva saH || 20||
harishchandro rantideva u~nChavR^ittiH shibirbaliH |
vyAdhaH kapoto bahavo hyadhruveNa dhruvaM gatAH || 21||
shrIshuka uvAcha
svarairAkR^itibhistAMstu prakoShThairjyAhatairapi |
rAjanyabandhUn vij~nAya dR^iShTapUrvAnachintayat || 22||
rAjanyabandhavo hyete brahmali~NgAni bibhrati |
dadAmi bhikShitaM tebhya AtmAnamapi dustyajam || 23||
balernu shrUyate kIrtirvitatA dikShvakalmaShA |
aishvaryAdbhraMshitasyApi vipravyAjena viShNunA || 24||
shriyaM jihIrShatendrasya viShNave dvijarUpiNe |
jAnannapi mahIM prAdAdvAryamANo.api daityarAT || 25||
jIvatA brAhmaNArthAya ko nvarthaH kShatrabandhunA |
dehena patamAnena nehatA vipulaM yashaH || 26||
ityudAramatiH prAha kR^iShNArjunavR^ikodarAn |
he viprA vriyatAM kAmo dadAmyAtmashiro.api vaH || 27||
shrIbhagavAnuvAcha
yuddhaM no dehi rAjendra dvandvasho yadi manyase |
yuddhArthino vayaM prAptA rAjanyA nAnnakA~NkShiNaH || 28||
asau vR^ikodaraH pArthastasya bhrAtArjuno hyayam |
anayormAtuleyaM mAM kR^iShNaM jAnIhi te ripum || 29||
evamAvedito rAjA jahAsochchaiH sma mAgadhaH |
Aha chAmarShito mandA yuddhaM tarhi dadAmi vaH || 30||
na tvayA bhIruNA yotsye yudhi viklavatejasA |
mathurAM svapurIM tyaktvA samudraM sharaNaM gataH || 31||
ayaM tu vayasAtulyo nAtisattvo na me samaH |
arjuno na bhavedyoddhA bhImastulyabalo mama || 32||
ityuktvA bhImasenAya prAdAya mahatIM gadAm |
dvitIyAM svayamAdAya nirjagAma purAdbahiH || 33||
tataH same khale vIrau saMyuktAvitaretarau |
jaghnaturvajrakalpAbhyAM gadAbhyAM raNadurmadau || 34||
maNDalAni vichitrANi savyaM dakShiNameva cha |
charatoH shushubhe yuddhaM naTayoriva ra~NgiNoH || 35||
tatashchaTachaTAshabdo vajraniShpeShasannibhaH |
gadayoH kShiptayo rAjan dantayoriva dantinoH || 36||
te vai gade bhujajavena nipAtyamAne
anyonyatoM.asakaTipAdakarorujatrUn |
chUrNIbabhUvaturupetya yathArkashAkhe
saMyudhyatordviradayoriva dIptamanvyoH || 37||
itthaM tayoH prahatayorgadayornR^ivIrau
kruddhau svamuShTibhirayaHsparashairapiMShTAm |
shabdastayoH praharatoribhayorivAsI\-
nnirghAtavajraparuShastalatADanotthaH || 38||
tayorevaM praharatoH samashikShAbalaujasoH |
nirvisheShamabhUdyuddhamakShINajavayornR^ipa || 39||
evaM tayormahArAja yudhyatoH saptaviMshatiH |
dinAni niragaMstatra suhR^idvannishi tiShThatoH || 40||
ekadA mAtuleyaM vai prAha rAjan vR^ikodaraH |
na shakto.ahaM jarAsandhaM nirjetuM yudhi mAdhava || 41||
shatrorjanmamR^itI vidvA~njIvitaM cha jarAkR^itam |
pArthamApyAyayan svena tejasAchintayaddhariH || 42||
sa~nchintyArivadhopAyaM bhImasyAmoghadarshanaH |
darshayAmAsa viTapaM pATayanniva sa.nj~nayA || 43||
tadvij~nAya mahAsattvo bhImaH praharatAM varaH |
gR^ihItvA pAdayoH shatruM pAtayAmAsa bhUtale || 44||
ekaM pAdaM padA.a.akramya dorbhyAmanyaM pragR^ihya saH |
gudataH pATayAmAsa shAkhamiva mahAgajaH || 45||
ekapAdoruvR^iShaNakaTipR^iShThastanAMsake |
ekabAhvakShibhrUkarNe shakale dadR^ishuH prajAH || 46||
hAhAkAro mahAnAsInnihate magadheshvare |
pUjayAmAsaturbhImaM parirabhya jayAchyutau || 47||
sahadevaM tattanayaM bhagavAn bhUtabhAvanaH |
abhyaShi~nchadameyAtmA magadhAnAM patiM prabhuH |
mochayAmAsa rAjanyAn saMruddhA mAgadhena ye || 48||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe jarAsandhavadho
nAma dvisaptatitamo.adhyAyaH || 72||
\iti
\section{.. OM namo bhagavate vAsudevAya ..}
\section{.. trisaptatitamo.adhyAyaH \- 73 ..}
shrIshuka uvAcha
ayute dve shatAnyaShTau lIlayA yudhi nirjitAH |
te nirgatA giridroNyAM malinA malavAsasaH || 1||
kShutkShAmAH shuShkavadanAH saMrodhaparikarshitAH |
dadR^ishuste ghanashyAmaM pItakausheyavAsasam || 2||
shrIvatsA~NkaM chaturbAhuM padmagarbhAruNekShaNam |
chAruprasannavadanaM sphuranmakarakuNDalam || 3||
padmahastaM gadAsha~NkharathA~NgairupalakShitam |
kirITahArakaTakakaTisUtrA~NgadA~nchitam || 4||
bhrAjadvaramaNigrIvaM nivItaM vanamAlayA |
pibanta iva chakShurbhyAM lihanta iva jihvayA || 5||
jighranta iva nAsAbhyAM rambhanta iva bAhubhiH |
praNemurhatapApmAno mUrdhabhiH pAdayorhareH || 6||
kR^iShNasandarshanAhlAdadhvastasaMrodhanaklamAH |
prashashaMsurhR^iShIkeshaM gIrbhiH prA~njalayo nR^ipAH || 7||
rAjAna UchuH
namaste devadevesha prapannArtiharAvyaya |
prapannAn pAhi naH kR^iShNa nirviNNAn ghorasaMsR^iteH || 8||
nainaM nAthAnvasUyAmo mAgadhaM madhusUdana |
anugraho yadbhavato rAj~nAM rAjyachyutirvibho || 9||
rAjyaishvaryamadonnaddho na shreyo vindate nR^ipaH |
tvanmAyAmohito.anityA manyate sampado.achalAH || 10||
mR^igatR^iShNAM yathA bAlA manyanta udakAshayam |
evaM vaikArikIM mAyAmayuktA vastu chakShate || 11||
vayaM purA shrImadanaShTadR^iShTayo
jigIShayAsyA itaretaraspR^idhaH |
ghnantaH prajAH svA atinirghR^iNAH prabho
mR^ityuM purastvAvigaNayya durmadAH || 12||
ta eva kR^iShNAdya gabhIraraMhasA
durantavIryeNa vichAlitAH shriyaH |
kAlena tanvA bhavato.anukampayA
vinaShTadarpAshcharaNau smarAma te || 13||
atho na rAjyaM mR^igatR^iShNirUpitaM
dehena shashvatpatatA rujAM bhuvA |
upAsitavyaM spR^ihayAmahe vibho
kriyAphalaM pretya cha karNarochanam || 14||
taM naH samAdishopAyaM yena te charaNAbjayoH |
smR^itiryathA na viramedapi saMsaratAmiha || 15||
kR^iShNAya vAsudevAya haraye paramAtmane |
praNatakleshanAshAya govindAya namo namaH || 16||(2)
shrIshuka uvAcha
saMstUyamAno bhagavAn rAjabhirmuktabandhanaiH |
tAnAha karuNastAta sharaNyaH shlakShNayA girA || 17||
shrIbhagavAnuvAcha
adya prabhR^iti vo bhUpA mayyAtmanyakhileshvare |
sudR^iDhA jAyate bhaktirbADhamAshaMsitaM tathA || 18||
diShTyA vyavasitaM bhUpA bhavanta R^itabhAShiNaH |
shriyaishvaryamadonnAhaM pashya unmAdakaM nR^iNAm || 19||
haihayo nahuSho veno rAvaNo narako.apare |
shrImadAdbhraMshitAH sthAnAddevadaityanareshvarAH || 20||
bhavanta etadvij~nAya dehAdyutpAdyamantavat |
mAM yajanto.adhvarairyuktAH prajA dharmeNa rakShatha || 21||
santanvantaH prajAtantUn sukhaM duHkhaM bhavAbhavau |
prAptaM prAptaM cha sevanto machchittA vichariShyatha || 22||
udAsInAshcha dehAdAvAtmArAmA dhR^itavratAH |
mayyAveshya manaH samya~N mAmante brahma yAsyatha || 23||
shrIshuka uvAcha
ityAdishya nR^ipAn kR^iShNo bhagavAn bhuvaneshvaraH |
teShAM nyayu~Nkta puruShAn striyo majjanakarmaNi || 24||
saparyAM kArayAmAsa sahadevena bhArata |
naradevochitairvastrairbhUShaNaiH sragvilepanaiH || 25||
bhojayitvA varAnnena susnAtAn samala~NkR^itAn |
bhogaishcha vividhairyuktAMstAmbUlAdyairnR^ipochitaiH || 26||
te pUjitA mukundena rAjAno mR^iShTakuNDalAH |
virejurmochitAH kleshAtprAvR^iDante yathA grahAH || 27||
rathAn sadashvAnAropya maNikA~nchanabhUShitAn |
prINayya sUnR^itairvAkyaiH svadeshAn pratyayApayat || 28||
ta evaM mochitAH kR^ichChrAtkR^iShNena sumahAtmanA |
yayustameva dhyAyantaH kR^itAni cha jagatpateH || 29||
jagaduH prakR^itibhyaste mahApuruShacheShTitam |
yathAnvashAsadbhagavAMstathA chakruratandritAH || 30||
jarAsandhaM ghAtayitvA bhImasenena keshavaH |
pArthAbhyAM saMyutaH prAyAtsahadevena pUjitaH || 31||
gatvA te khANDavaprasthaM sha~NkhAn dadhmurjitArayaH |
harShayantaH svasuhR^ido durhR^idAM chAsukhAvahAH || 32||
tachChrutvA prItamanasa indraprasthanivAsinaH |
menire mAgadhaM shAntaM rAjA chAptamanorathaH || 33||
abhivandyAtha rAjAnaM bhImArjunajanArdanAH |
sarvamAshrAvayA~nchakrurAtmanA yadanuShThitam || 34||
nishamya dharmarAjastatkeshavenAnukampitam |
AnandAshrukalAM mu~nchan premNA novAcha ki~nchana || 35||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe kR^iShNAdyAgamane
trisaptatitamo.adhyAyaH || 73||
\iti
\section{.. OM namo bhagavate vAsudevAya ..}
\section{.. chatuHsaptatitamo.adhyAyaH \- 74 ..}
shrIshuka uvAcha
evaM yudhiShThiro rAjA jarAsandhavadhaM vibhoH |
kR^iShNasya chAnubhAvaM taM shrutvA prItastamabravIt || 1||
yudhiShThira uvAcha
ye syustrailokyaguravaH sarve lokamaheshvarAH |
vahanti durlabhaM labdhvA shirasaivAnushAsanam || 2||
sa bhavAnaravindAkSho dInAnAmIshamAninAm |
dhatte.anushAsanaM bhUmaMstadatyantaviDambanam || 3||
na hyekasyAdvitIyasya brahmaNaH paramAtmanaH |
karmabhirvardhate tejo hrasate cha yathA raveH || 4||
na vai te.ajita bhaktAnAM mamAhamiti mAdhava |
tvaM taveti cha nAnAdhIH pashUnAmiva vaikR^itA || 5||
shrIshuka uvAcha
ityuktvA yaj~niye kAle vavre yuktAn sa R^itvijaH |
kR^iShNAnumoditaH pArtho brAhmaNAn brahmavAdinaH || 6||
dvaipAyano bharadvAjaH sumanturgautamo.asitaH |
vasiShThashchyavanaH kaNvo maitreyaH kavaShastritaH || 7||
vishvAmitro vAmadevaH sumatirjaiminiH kratuH |
pailaH parAsharo gargo vaishampAyana eva cha || 8||
atharvA kashyapo dhaumyo rAmo bhArgava AsuriH |
vItihotro madhuchChandA vIraseno.akR^itavraNaH || 9||
upahUtAstathA chAnye droNabhIShmakR^ipAdayaH |
dhR^itarAShTraH sahasuto vidurashcha mahAmatiH || 10||
brAhmaNAH kShatriyA vaishyAH shUdrA yaj~nadidR^ikShavaH |
tatreyuH sarvarAjAno rAj~nAM prakR^itayo nR^ipa || 11||
tataste devayajanaM brAhmaNAH svarNalA~NgalaiH |
kR^iShTvA tatra yathAmnAyaM dIkShayA~nchakrire nR^ipam || 12||
haimAH kilopakaraNA varuNasya yathA purA |
indrAdayo lokapAlA viri~nchabhavasaMyutAH || 13||
sagaNAH siddhagandharvA vidyAdharamahoragAH |
munayo yakSharakShAMsi khagakinnarachAraNAH || 14||
rAjAnashcha samAhUtA rAjapatnyashcha sarvashaH |
rAjasUyaM samIyuH sma rAj~naH pANDusutasya vai || 15||
menire kR^iShNabhaktasya sUpapannamavismitAH |
ayAjayan mahArAjaM yAjakA devavarchasaH || 16||
rAjasUyena vidhivatprachetasamivAmarAH |
sautye.ahanyavanIpAlo yAjakAn sadasaspatIn |
apUjayanmahAbhAgAn yathAvatsusamAhitaH || 17||
sadasyAgryArhaNArhaM vai vimR^ishantaH sabhAsadaH |
nAdhyagachChannanaikAntyAtsahadevastadAbravIt || 18||
arhati hyachyutaH shraiShThyaM bhagavAn sAtvatAmpatiH |
eSha vai devatAH sarvA deshakAladhanAdayaH || 19||
yadAtmakamidaM vishvaM kratavashcha yadAtmakAH |
agnirAhutayo mantrAH sA~NkhyaM yogashcha yatparaH || 20||
eka evAdvitIyo.asAvaitadAtmyamidaM jagat |
AtmanA.a.atmAshrayaH sabhyAH sR^ijatyavati hantyajaH || 21||
vividhAnIha karmANi janayan yadavekShayA |
Ihate yadayaM sarvaH shreyo dharmAdilakShaNam || 22||
tasmAtkR^iShNAya mahate dIyatAM paramArhaNam |
evaM chetsarvabhUtAnAmAtmanashchArhaNaM bhavet || 23||
sarvabhUtAtmabhUtAya kR^iShNAyAnanyadarshine |
deyaM shAntAya pUrNAya dattasyAnantyamichChatA || 24||
ityuktvA sahadevo.abhUttUShNIM kR^iShNAnubhAvavit |
tachChrutvA tuShTuvuH sarve sAdhu sAdhviti sattamAH || 25||
shrutvA dvijeritaM rAjA j~nAtvA hArdaM sabhAsadAm |
samarhayaddhR^iShIkeshaM prItaH praNayavihvalaH || 26||
tatpAdAvavanijyApaH shirasA lokapAvanIH |
sabhAryaH sAnujAmAtyaH sakuTumbo.avahanmudA || 27||
vAsobhiH pItakausheyairbhUShaNaishcha mahAdhanaiH |
arhayitvAshrupUrNAkSho nAshakatsamavekShitum || 28||
itthaM sabhAjitaM vIkShya sarve prA~njalayo janAH |
namo jayeti nemustaM nipetuH puShpavR^iShTayaH || 29||
itthaM nishamya damaghoShasutaH svapIThA\-
dutthAya kR^iShNaguNavarNanajAtamanyuH |
utkShipya bAhumidamAha sadasyamarShI
saMshrAvayan bhagavate paruShANyabhItaH || 30||
Isho duratyayaH kAla iti satyavatI shrutiH |
vR^iddhAnAmapi yadbuddhirbAlavAkyairvibhidyate || 31||
yUyaM pAtravidAM shreShThA mA mandhvaM bAlabhAShItam |
sadasaspatayaH sarve kR^iShNo yatsammato.arhaNe || 32||
tapovidyAvratadharAn j~nAnavidhvastakalmaShAn |
paramaR^iShIn brahmaniShThAMllokapAlaishcha pUjitAn || 33||
sadaspatInatikramya gopAlaH kulapAMsanaH |
yathA kAkaH puroDAshaM saparyAM kathamarhati || 34||
varNAshramakulApetaH sarvadharmabahiShkR^itaH |
svairavartI guNairhInaH saparyAM kathamarhati || 35||
yayAtinaiShAM hi kulaM shaptaM sadbhirbahiShkR^itam |
vR^ithApAnarataM shashvatsaparyAM kathamarhati || 36||
brahmarShisevitAn deshAn hitvaite.abrahmavarchasam |
samudraM durgamAshritya bAdhante dasyavaH prajAH || 37||
evamAdInyabhadrANi babhAShe naShTama~NgalaH |
novAcha ki~nchidbhagavAn yathA siMhaH shivArutam || 38||
bhagavannindanaM shrutvA duHsahaM tatsabhAsadaH |
karNau pidhAya nirjagmuH shapantashchedipaM ruShA || 39||
nindAM bhagavataH shR^iNvaMstatparasya janasya vA |
tato nApaiti yaH so.api yAtyadhaH sukR^itAchchyutaH || 40||
tataH pANDusutAH kruddhA matsyakaikayasR^i~njayAH |
udAyudhAH samuttasthuH shishupAlajighAMsavaH || 41||
tatashchaidyastvasambhrAnto jagR^ihe khaDgacharmaNI |
bhartsayan kR^iShNapakShIyAn rAj~naH sadasi bhArata || 42||
tAvadutthAya bhagavAn svAn nivArya svayaM ruShA |
shiraH kShurAntachakreNa jahArApatato ripoH || 43||
shabdaH kolAhalo.apyAsIchChishupAle hate mahAn |
tasyAnuyAyino bhUpA dudruvurjIvitaiShiNaH || 44||
chaidyadehotthitaM jyotirvAsudevamupAvishat |
pashyatAM sarvabhUtAnAmulkeva bhuvi khAchchyutA || 45||
janmatrayAnuguNitavairasaMrabdhayA dhiyA |
dhyAyaMstanmayatAM yAto bhAvo hi bhavakAraNam || 46||
R^itvigbhyaH sasadasyebhyo dakShiNAM vipulAmadAt |
sarvAn sampUjya vidhivachchakre.avabhR^ithamekarAT || 47||
sAdhayitvA kratuM rAj~naH kR^iShNo yogeshvareshvaraH |
uvAsa katichinmAsAn suhR^idbhirabhiyAchitaH || 48||
tato.anuj~nApya rAjAnamanichChantamapIshvaraH |
yayau sabhAryaH sAmAtyaH svapuraM devakIsutaH || 49||
varNitaM tadupAkhyAnaM mayA te bahuvistaram |
vaikuNThavAsinorjanma viprashApAtpunaH punaH || 50||
rAjasUyAvabhR^ithyena snAto rAjA yudhiShThiraH |
brahmakShatrasabhAmadhye shushubhe surarADiva || 51||
rAj~nA sabhAjitAH sarve suramAnavakhecharAH |
kR^iShNaM kratuM cha shaMsantaH svadhAmAni yayurmudA || 52||
duryodhanamR^ite pApaM kaliM kurukulAmayam |
yo na sehe shriyaM sphItAM dR^iShTvA pANDusutasya tAm || 53||
ya idaM kIrtayedviShNoH karma chaidyavadhAdikam |
rAjamokShaM vitAnaM cha sarvapApaiH pramuchyate || 54||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe shishupAlavadho
nAma chatuHsaptatitamo.adhyAyaH || 74||
\iti
\section{.. OM namo bhagavate vAsudevAya ..}
\section{.. pa~nchasaptatitamo.adhyAyaH \- 75 ..}
rAjovAcha
ajAtashatrostaM dR^iShTvA rAjasUyamahodayam |
sarve mumudire brahman nR^idevA ye samAgatAH || 1||
duryodhanaM varjayitvA rAjAnaH sarShayaH surAH |
iti shrutaM no bhagavaMstatra kAraNamuchyatAm || 2||
R^iShiruvAcha
pitAmahasya te yaj~ne rAjasUye mahAtmanaH |
bAndhavAH paricharyAyAM tasyAsan premabandhanAH || 3||
bhImo mahAnasAdhyakSho dhanAdhyakShaH suyodhanaH |
sahadevastu pUjAyAM nakulo dravyasAdhane || 4||
gurushushrUShaNe jiShNuH kR^iShNaH pAdAvanejane |
pariveShaNe drupadajA karNo dAne mahAmanAH || 5||
yuyudhAno vikarNashcha hArdikyo vidurAdayaH |
bAhlIkaputrA bhUryAdyA ye cha santardanAdayaH || 6||
nirUpitA mahAyaj~ne nAnAkarmasu te tadA |
pravartante sma rAjendra rAj~naH priyachikIrShavaH || 7||
R^itviksadasyabahuvitsu suhR^ittameShu
sviShTeShu sUnR^itasamarhaNadakShiNAbhiH |
chaidye cha sAtvatapateshcharaNaM praviShTe
chakrustatastvavabhR^ithasnapanaM dyunadyAm || 8||
mR^ida~Ngasha~NkhapaNavadhundhuryAnakagomukhAH |
vAditrANi vichitrANi nedurAvabhR^ithotsave || 9||
nartakyo nanR^iturhR^iShTA gAyakA yUthasho jaguH |
vINAveNutalonnAdasteShAM sa divamaspR^ishat || 10||
chitradhvajapatAkAgrairibhendrasyandanArvabhiH |
svala~NkR^itairbhaTairbhUpA niryayU rukmamAlinaH || 11||
yadusR^i~njayakAmbojakurukekayakosalAH |
kampayanto bhuvaM sainyairyajamAnapuraHsarAH || 12||
sadasyartvigdvijashreShThA brahmaghoSheNa bhUyasA |
devarShipitR^igandharvAstuShTuvuH puShpavarShiNaH || 13||
svala~NkR^itA narA nAryo gandhasragbhUShaNAmbaraiH |
vilimpantyo.abhiShi~nchantyo vijahrurvividhai rasaiH || 14||
tailagorasagandhodaharidrAsAndraku~NkumaiH |
pumbhirliptAH pralimpantyo vijahrurvArayoShitaH || 15||
guptA nR^ibhirniragamannupalabdhumeta\-
ddevyo yathA divi vimAnavarairnR^idevyaH |
tA mAtuleyasakhibhiH pariShichyamAnAH
savrIDahAsavikasadvadanA virejuH || 16||
tA devarAnuta sakhIn siShichurdR^itIbhiH
klinnAmbarA vivR^itagAtrakuchorumadhyAH |
autsukyamuktakabarAchchyavamAnamAlyAH
kShobhaM dadhurmaladhiyAM ruchirairvihAraiH || 17||
sa samrAD rathamAruDhaH sadashvaM rukmamAlinam |
vyarochata svapatnIbhiH kriyAbhiH kraturADiva || 18||
patnIsamyAjAvabhR^ithyaishcharitvA te tamR^itvijaH |
AchAntaM snApayA~nchakrurga~NgAyAM saha kR^iShNayA || 19||
devadundubhayo nedurnaradundubhibhiH samam |
mumuchuH puShpavarShANi devarShipitR^imAnavAH || 20||
sasnustatra tataH sarve varNAshramayutA narAH |
mahApAtakyapi yataH sadyo muchyeta kilbiShAt || 21||
atha rAjAhate kShaume paridhAya svala~NkR^itaH |
R^itviksadasyaviprAdInAnarchAbharaNAmbaraiH || 22||
bandhU~nj~nAtinR^ipAn mitrasuhR^ido.anyAMshcha sarvashaH |
abhIkShNaM pUjayAmAsa nArAyaNaparo nR^ipaH || 23||
sarve janAH surarucho maNikuNDalasra\-
guShNIShaka~nchukadukUlamahArghyahArAH |
nAryashcha kuNDalayugAlakavR^indajuShTa\-
vaktrashriyaH kanakamekhalayA virejuH || 24||
athartvijo mahAshIlAH sadasyA brahmavAdinaH |
brahmakShatriyaviT shUdrA rAjAno ye samAgatAH || 25||
devarShipitR^ibhUtAni lokapAlAH sahAnugAH |
pUjitAstamanuj~nApya svadhAmAni yayurnR^ipa || 26||
haridAsasya rAjarShe rAjasUyamahodayam |
naivAtR^ipyan prashaMsantaH piban martyo.amR^itaM yathA || 27||
tato yudhiShThiro rAjA suhR^itsambandhibAndhavAn |
premNA nivArayAmAsa kR^iShNaM cha tyAgakAtaraH || 28||
bhagavAnapi tatrA~Nga nyavAtsIttatpriya~NkaraH |
prasthApya yaduvIrAMshcha sAmbAdIMshcha kushasthalIm || 29||
itthaM rAjA dharmasuto manorathamahArNavam |
sudustaraM samuttIrya kR^iShNenAsIdgatajvaraH || 30||
ekadAntaHpure tasya vIkShya duryodhanaH shriyam |
atapyadrAjasUyasya mahitvaM chAchyutAtmanaH || 31||
yasmin narendraditijendrasurendralakShmIH
nAnA vibhAnti kila vishvasR^ijopakLLiptAH |
tAbhiH patIn drupadarAjasutopatasthe
yasyAM viShaktahR^idayaH kururADatapyat || 32||
yasmiMstadA madhupatermahiShIsahasraM
shroNIbhareNa shanakaiH kvaNada~Nghrishobham |
madhye suchAru kuchaku~NkumashoNahAraM
shrImanmukhaM prachalakuNDalakuntalADhyam || 33||
sabhAyAM mayakLLiptAyAM kvApi dharmasuto.adhirAT |
vR^ito.anujairbandhubhishcha kR^iShNenApi svachakShuShA || 34||
AsInaH kA~nchane sAkShAdAsane maghavAniva |
pArameShThyashrIyA juShTaH stUyamAnashcha vandibhiH || 35||
tatra duryodhano mAnI parIto bhrAtR^ibhirnR^ipa |
kirITamAlI nyavishadasihastaH kShipan ruShA || 36||
sthale.abhyagR^ihNAdvastrAntaM jalaM matvA sthale.apatat |
jale cha sthalavadbhrAntyA mayamAyAvimohitaH || 37||
jahAsa bhImastaM dR^iShTvA striyo nR^ipatayo.apare |
nivAryamANA apya~Nga rAj~nA kR^iShNAnumoditAH || 38||
sa vrIDito.avAgvadano ruShAjvala\-
nniShkramya tUShNIM prayayau gajAhvayam |
hA heti shabdaH sumahAnabhUtsatA\-
majAtashatrurvimanA ivAbhavat |
babhUva tUShNIM bhagavAn bhuvo bharaM
samujjihIrShurbhramati sma yaddR^ishA || 39||
etatte.abhihitaM rAjan yatpR^iShTo.ahamiha tvayA |
suyodhanasya daurAtmyaM rAjasUye mahAkratau || 40||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe duryodhana\-
mAnabha~Ngo nAma pa~nchasaptatitamo.adhyAyaH || 75||
\iti
\section{.. OM namo bhagavate vAsudevAya ..}
\section{.. ShaTsaptatitamo.adhyAyaH \- 76 ..}
shrIshuka uvAcha
athAnyadapi kR^iShNasya shR^iNu karmAdbhutaM nR^ipa |
krIDAnarasharIrasya yathA saubhapatirhataH || 1||
shishupAlasakhaH shAlvo rukmiNyudvAha AgataH |
yadubhirnirjitaH sa~Nkhye jarAsandhAdayastathA || 2||
shAlvaH pratij~nAmakarochChR^iNvatAM sarvabhUbhujAm |
ayAdavIM kShmAM kariShye pauruShaM mama pashyata || 3||
iti mUDhaH pratij~nAya devaM pashupatiM prabhum |
ArAdhayAmAsa nR^ipaH pAMsumuShTiM sakR^idgrasan || 4||
saMvatsarAnte bhagavAnAshutoSha umApatiH |
vareNa chChandayAmAsa shAlvaM sharaNamAgatam || 5||
devAsuramanuShyANAM gandharvoragarakShasAm |
abhedyaM kAmagaM vavre sa yAnaM vR^iShNibhIShaNam || 6||
tatheti girishAdiShTo mayaH parapura~njayaH |
puraM nirmAya shAlvAya prAdAtsaubhamayasmayam || 7||
sa labdhvA kAmagaM yAnaM tamodhAma durAsadam |
yayau dvAravatIM shAlvo vairaM vR^iShNikR^itaM smaran || 8||
nirudhya senayA shAlvo mahatyA bharatarShabha |
purIM babha~njopavanAnyudyAnAni cha sarvashaH || 9||
sa gopurANi dvArANi prAsAdATTAlatolikAH |
vihArAn sa vimAnAgryAnnipetuH shastravR^iShTayaH || 10||
shilA drumAshchAshanayaH sarpA AsArasharkarAH |
prachaNDashchakravAto.abhUdrajasA.a.achChAditA dishaH || 11||
ityardyamAnA saubhena kR^iShNasya nagarI bhR^isham |
nAbhyapadyata shaM rAjaMstripureNa yathA mahI || 12||
pradyumno bhagavAn vIkShya bAdhyamAnA nijAH prajAH |
mA bhaiShTetyabhyadhAdvIro rathArUDho mahAyashAH || 13||
sAtyakishchArudeShNashcha sAmbo.akrUraH sahAnujaH |
hArdikyo bhAnuvindashcha gadashcha shukasAraNau || 14||
apare cha maheShvAsA rathayUthapayUthapAH |
niryayurdaMshitA guptA rathebhAshvapadAtibhiH || 15||
tataH pravavR^ite yuddhaM shAlvAnAM yadubhiH saha |
yathAsurANAM vibudhaistumulaM lomaharShaNam || 16||
tAshcha saubhapatermAyA divyAstrai rukmiNIsutaH |
kShaNena nAshayAmAsa naishaM tama ivoShNaguH || 17||
vivyAdha pa~nchaviMshatyA svarNapu~NkhairayomukhaiH |
shAlvasya dhvajinIpAlaM sharaiH sannataparvabhiH || 18||
shatenAtADayachChAlvamekaikenAsya sainikAn |
dashabhirdashabhirnetR^In vAhanAni tribhistribhiH || 19||
tadadbhutaM mahatkarma pradyumnasya mahAtmanaH |
dR^iShTvA taM pUjayAmAsuH sarve svaparasainikAH || 20||
bahurUpaikarUpaM taddR^ishyate na cha dR^ishyate |
mAyAmayaM mayakR^itaM durvibhAvyaM parairabhUt || 21||
kvachidbhUmau kvachidvyomni girimUrdhni jale kvachit |
alAtachakravadbhrAmyatsaubhaM tadduravasthitam || 22||
yatra yatropalakShyeta sasaubhaH saha sainikaH |
shAlvastatastato.amu~ncha~nCharAn sAtvatayUthapAH || 23||
sharairagnyarkasaMsparshairAshIviShadurAsadaiH |
pIDyamAnapurAnIkaH shAlvo.amuhyatpareritaiH || 24||
shAlvAnIkapashastraughairvR^iShNivIrA bhR^ishArditAH |
na tatyajU raNaM svaM svaM lokadvayajigIShavaH || 25||
shAlvAmAtyo dyumAn nAma pradyumnaM prAkprapIDitaH |
AsAdya gadayA maurvyA vyAhatya vyanadadbalI || 26||
pradyumnaM gadayA shIrNavakShaHsthalamarindamam |
apovAha raNAtsUto dharmaviddArukAtmajaH || 27||
labdhasamj~no muhUrtena kArShNiH sArathimabravIt |
aho asAdhvidaM sUta yadraNAnme.apasarpaNam || 28||
na yadUnAM kule jAtaH shrUyate raNavichyutaH |
vinA matklIbachittena sUtena prAptakilbiShAt || 29||
kiM nu vakShye.abhisa~Ngamya pitarau rAmakeshavau |
yuddhAtsamyagapakrAntaH pR^iShTastatrAtmanaH kShamam || 30||
vyaktaM me kathayiShyanti hasantyo bhrAtR^ijAmayaH |
klaibyaM kathaM kathaM vIra tavAnyaiH kathyatAM mR^idhe || 31||
sArathiruvAcha
dharmaM vijAnatA.a.ayuShman kR^itametanmayA vibho |
sUtaH kR^ichChragataM rakShedrathinaM sArathiM rathI || 32||
etadviditvA tu bhavAn mayApovAhito raNAt |
upasR^iShTaH pareNeti mUrchChito gadayA hataH || 33||
iti shrImadbhAgavate mahApurANe pAramahaMsyAM saMhitAyAM
dashamaskandhe uttarArdhe shAlvayuddhe ShaTsaptatitamo.adhyAyaH || 76||
\iti
\section{.. OM namo bhagavate vAsudevAya ..}
\section{.. saptasaptatitamo.adhyAyaH \- 77 ..}
shrIshuka uvAcha
sa tUpaspR^ishya salilaM daMshito dhR^itakArmukaH |
naya mAM dyumataH pArshvaM vIrasyetyAha sArathim || 1||
vidhamantaM svasainyAni dyumantaM rukmiNIsutaH |
pratihatya pratyavidhyannArAchairaShTabhiH smayan || 2||
chaturbhishchaturo vAhAn sUtamekena chAhanat |
dvAbhyAM dhanushcha ketuM cha shareNAnyena vai shiraH || 3||
gadasAtyakisAmbAdyA jaghnuH saubhapaterbalam |
petuH samudre saubheyAH sarve sa~nChinnakandharAH || 4||
evaM yadUnAM shAlvAnAM nighnatAmitaretaram |
yuddhaM triNavarAtraM tadabhUttumulamulbaNam || 5||
indraprasthaM gataH kR^iShNa AhUto dharmasUnunA |
rAjasUye.atha nirvR^itte shishupAle cha saMsthite || 6||
kuruvR^iddhAnanuj~nApya munIMshcha sasutAM pR^ithAm |
nimittAnyatighorANi pashyan dvAravatIM yayau || 7||
Aha chAhamihAyAta AryamishrAbhisa~NgataH |
rAjanyAshchaidyapakShIyA nUnaM hanyuH purIM mama || 8||
vIkShya tatkadanaM svAnAM nirUpya purarakShaNam |
saubhaM cha shAlvarAjaM cha dArukaM prAha keshavaH || 9||
rathaM prApaya me sUta shAlvasyAntikamAshu vai |
sambhramaste na kartavyo mAyAvI saubharADayam || 10||
ityuktashchodayAmAsa rathamAsthAya dArukaH |
vishantaM dadR^ishuH sarve sve pare chAruNAnujam || 11||
shAlvashcha kR^iShNamAlokya hataprAyabaleshvaraH |
prAharatkR^iShNasUtAya shaktiM bhImaravAM mR^idhe || 12||
tAmApatantIM nabhasi maholkAmiva raMhasA |
bhAsayantIM dishaH shauriH sAyakaiH shatadhAchChinat || 13||
taM cha ShoDashabhirviddhvA bANaiH saubhaM cha khe bhramat |
avidhyachCharasandohaiH khaM sUrya iva rashmibhiH || 14||
shAlvaH shaurestu doH savyaM sashAr~NgaM shAr~NgadhanvanaH |
bibheda nyapataddhastAchChAr~NgamAsIttadadbhutam || 15||
hAhAkAro mahAnAsIdbhUtAnAM tatra pashyatAm |
vinadya saubharADuchchairidamAha janArdanam || 16||
yattvayA mUDha naH sakhyurbhrAturbhAryA hR^itekShatAm |
pramattaH sa sabhAmadhye tvayA vyApAditaH sakhA || 17||
taM tvAdya nishitairbANairaparAjitamAninam |
nayAmyapunarAvR^ittiM yadi tiShThermamAgrataH || 18||
shrIbhagavAnuvAcha
vR^ithA tvaM katthase manda na pashyasyantike.antakam |
pauruShaM darshayanti sma shUrA na bahubhAShiNaH || 19||
ityuktvA bhagavA~nChAlvaM gadayA bhImavegayA |
tatADa jatrau saMrabdhaH sa chakampe vamannasR^ik || 20||
gadAyAM sannivR^ittAyAM shAlvastvantaradhIyata |
tato muhUrta Agatya puruShaH shirasAchyutam |
devakyA prahito.asmIti natvA prAha vacho rudan || 21||
kR^iShNa kR^iShNa mahAbAho pitA te pitR^ivatsala |
baddhvApanItaH shAlvena saunikena yathA pashuH || 22||
nishamya vipriyaM kR^iShNo mAnuShIM prakR^itiM gataH |
vimanasko ghR^iNI snehAdbabhAShe prAkR^ito yathA || 23||
kathaM rAmamasambhrAntaM jitvAjeyaM surAsuraiH |
shAlvenAlpIyasA nItaH pitA me balavAn vidhiH || 24||
iti bruvANe govinde saubharAT pratyupasthitaH |
vasudevamivAnIya kR^iShNaM chedamuvAcha saH || 25||
eSha te janitA tAto yadarthamiha jIvasi |
vadhiShye vIkShataste.amumIshashchetpAhi bAlisha || 26||
evaM nirbhartsya mAyAvI khaDgenAnakadundubheH |
utkR^itya shira AdAya khasthaM saubhaM samAvishat || 27||
tato muhUrtaM prakR^itAvupaplutaH
svabodha Aste svajanAnuSha~NgataH |
mahAnubhAvastadabudhyadAsurIM
mAyAM sa shAlvaprasR^itAM mayoditAm || 28||
na tatra dUtaM na pituH kalevaraM
prabuddha Ajau samapashyadachyutaH |
svApnaM yathA chAmbarachAriNaM ripuM
saubhasthamAlokya nihantumudyataH || 29||
evaM vadanti rAjarShe R^iShayaH ke cha nAnvitAH |
yatsvavAcho virudhyeta nUnaM te na smarantyuta || 30||
kva shokamohau sneho vA bhayaM vA ye.aj~nasambhavAH |
kva chAkhaNDitavij~nAnaj~nAnaishvaryastvakhaNDitaH || 31||
yatpAdasevorjitayA.a.atmavidyayA
hinvantyanAdyAtmaviparyayagraham |
labhanta AtmIyamanantamaishvaraM
kuto nu mohaH paramasya sadgateH || 32||
taM shastrapUgaiH praharantamojasA
shAlvaM sharaiH shauriramoghavikramaH |
viddhvAchChinadvarma dhanuH shiromaNiM
saubhaM cha shatrorgadayA ruroja ha || 33||
tatkR^iShNahasteritayA vichUrNitaM
papAta toye gadayA sahasradhA |
visR^ijya tadbhUtalamAsthito gadA\-
mudyamya shAlvo.achyutamabhyagAddrutam || 34||
AdhAvataH sagadaM tasya bAhuM
bhallena ChittvAtha rathA~Ngamadbhutam |
vadhAya shAlvasya layArkasannibhaM
bibhradbabhau sArka ivodayAchalaH || 35||
jahAra tenaiva shiraH sakuNDalaM
kirITayuktaM purumAyino hariH |
vajreNa vR^itrasya yathA purandaro
babhUva hAheti vachastadA nR^iNAm || 36||
tasmin nipatite pApe saubhe cha gadayA hate |
nedurdundubhayo rAjan divi devagaNeritAH |
sakhInAmapachitiM kurvan dantavaktro ruShAbhyagAt || 37||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe saubhavadho
nAma saptasaptatitamo.adhyAyaH || 77||
\iti
\section{.. OM namo bhagavate vAsudevAya ..}
\section{.. aShTasaptatitamo.adhyAyaH \- 78 ..}
shrIshuka uvAcha
shishupAlasya shAlvasya pauNDrakasyApi durmatiH |
paralokagatAnAM cha kurvan pArokShyasauhR^idam || 1||
ekaH padAtiH sa~Nkruddho gadApANiH prakampayan |
padbhyAmimAM mahArAja mahAsattvo vyadR^ishyata || 2||
taM tathA.a.ayAntamAlokya gadAmAdAya satvaraH |
avaplutya rathAtkR^iShNaH sindhuM veleva pratyadhAt || 3||
gadAmudyamya kArUSho mukundaM prAha durmadaH |
diShTyA diShTyA bhavAnadya mama dR^iShTipathaM gataH || 4||
tvaM mAtuleyo naH kR^iShNa mitradhru~NmAM jighAMsasi |
atastvAM gadayA manda haniShye vajrakalpayA || 5||
tarhyAnR^iNyamupaimyaj~na mitrANAM mitravatsalaH |
bandhurUpamariM hatvA vyAdhiM dehacharaM yathA || 6||
evaM rUkShaistudan vAkyaiH kR^iShNaM totrairiva dvipam |
gadayAtADayanmUrdhni siMhavadvyanadachchasaH || 7||
gadayAbhihato.apyAjau na chachAla yadUdvahaH |
kR^iShNo.api tamahan gurvyA kaumodakyA stanAntare || 8||
gadAnirbhinnahR^idaya udvaman rudhiraM mukhAt |
prasArya keshabAhva~NghrIn dharaNyAM nyapatadvyasuH || 9||
tataH sUkShmataraM jyotiH kR^iShNamAvishadadbhutam |
pashyatAM sarvabhUtAnAM yathA chaidyavadhe nR^ipa || 10||
vidUrathastu tadbhrAtA bhrAtR^ishokapariplutaH |
AgachChadasicharmAbhyAmuchChvasaMstajjighAMsayA || 11||
tasya chApatataH kR^iShNashchakreNa kShuraneminA |
shiro jahAra rAjendra sakirITaM sakuNDalam || 12||
evaM saubhaM cha shAlvaM cha dantavaktraM sahAnujam |
hatvA durviShahAnanyairIDitaH suramAnavaiH || 13||
munibhiH siddhagandharvairvidyAdharamahoragaiH |
apsarobhiH pitR^igaNairyakShaiH kinnarachAraNaiH || 14||
upagIyamAnavijayaH kusumairabhivarShitaH |
vR^itashcha vR^iShNipravarairviveshAla~NkR^itAM purIm || 15||
evaM yogeshvaraH kR^iShNo bhagavAn jagadIshvaraH |
Iyate pashudR^iShTInAM nirjito jayatIti saH || 16||
shrutvA yuddhodyamaM rAmaH kurUNAM saha pANDavaiH |
tIrthAbhiShekavyAjena madhyasthaH prayayau kila || 17||
snAtvA prabhAse santarpya devarShipitR^imAnavAn |
sarasvatIM pratisrotaM yayau brAhmaNasaMvR^itaH || 18||
pR^ithUdakaM bindusarastritakUpaM sudarshanam |
vishAlaM brahmatIrthaM cha chakraM prAchIM sarasvatIm || 19||
yamunAmanu yAnyeva ga~NgAmanu cha bhArata |
jagAma naimiShaM yatra R^iShayaH satramAsate || 20||
tamAgatamabhipretya munayo dIrghasatriNaH |
abhinandya yathAnyAyaM praNamyotthAya chArchayan || 21||
so.architaH saparIvAraH kR^itAsanaparigrahaH |
romaharShaNamAsInaM maharSheH shiShyamaikShata || 22||
apratyutthAyinaM sUtamakR^itaprahvaNA~njalim |
adhyAsInaM cha tAn viprAMshchukopodvIkShya mAdhavaH || 23||
kasmAdasAvimAn viprAnadhyAste pratilomajaH |
dharmapAlAMstathaivAsmAn vadhamarhati durmatiH || 24||
R^iSherbhagavato bhUtvA shiShyo.adhItya bahUni cha |
setihAsapurANAni dharmashAstrANi sarvashaH || 25||
adAntasyAvinItasya vR^ithA paNDitamAninaH |
na guNAya bhavanti sma naTasyevAjitAtmanaH || 26||
etadartho hi loke.asminnavatAro mayA kR^itaH |
vadhyA me dharmadhvajinaste hi pAtakino.adhikAH || 27||
etAvaduktvA bhagavAn nivR^itto.asadvadhAdapi |
bhAvitvAttaM kushAgreNa karasthenAhanatprabhuH || 28||
hAheti vAdinaH sarve munayaH khinnamAnasAH |
UchuH sa~NkarShaNaM devamadharmaste kR^itaH prabho || 29||
asya brahmAsanaM dattamasmAbhiryadunandana |
AyushchAtmAklamaM tAvadyAvatsatraM samApyate || 30||
ajAnataivAcharitastvayA brahmavadho yathA |
yogeshvarasya bhavato nAmnAyo.api niyAmakaH || 31||
yadyetadbrahmahatyAyAH pAvanaM lokapAvana |
chariShyati bhavAMllokasa~Ngraho.ananyachoditaH || 32||
shrIbhagavAnuvAcha
kariShye vadhanirveshaM lokAnugrahakAmyayA |
niyamaH prathame kalpe yAvAn sa tu vidhIyatAm || 33||
dIrghamAyurbataitasya sattvamindriyameva cha |
AshAsitaM yattadbrUta sAdhaye yogamAyayA || 34||
R^iShaya UchuH
astrasya tava vIryasya mR^ityorasmAkameva cha |
yathA bhavedvachaH satyaM tathA rAma vidhIyatAm || 35||
shrIbhagavAnuvAcha
AtmA vai putra utpanna iti vedAnushAsanam |
tasmAdasya bhavedvaktA AyurindriyasattvavAn || 36||
kiM vaH kAmo munishreShThA brUtAhaM karavANyatha |
ajAnatastvapachitiM yathA me chintyatAM budhAH || 37||
R^iShaya UchuH
ilvalasya suto ghoro balvalo nAma dAnavaH |
sa dUShayati naH satrametya parvaNi parvaNi || 38||
taM pApaM jahi dAshArha tannaH shushrUShaNaM param |
pUyashoNitaviNmUtrasurAmAMsAbhivarShiNam || 39||
tatashcha bhArataM varShaM parItya susamAhitaH |
charitvA dvAdashamAsAMstIrthasnAyI vishudhyase || 40||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe baladevacharite
balvalavadhopakramo nAmAShTasaptatitamo.adhyAyaH || 78||
\iti
\section{.. OM namo bhagavate vAsudevAya ..}
\section{.. ekonAshItitamo.adhyAyaH \- 79 ..}
shrIshuka uvAcha
tataH parvaNyupAvR^itte prachaNDaH pAMsuvarShaNaH |
bhImo vAyurabhUdrAjan pUyagandhastu sarvashaH || 1||
tato.amedhyamayaM varShaM balvalena vinirmitam |
abhavadyaj~nashAlAyAM so.anvadR^ishyata shUladhR^ik || 2||
taM vilokya bR^ihatkAyaM bhinnA~njanachayopamam |
taptatAmrashikhAshmashruM daMShTrograbhrukuTImukham || 3||
sasmAra musalaM rAmaH parasainyavidAraNam |
halaM cha daityadamanaM te tUrNamupatasthatuH || 4||
tamAkR^iShya halAgreNa balvalaM gaganecharam |
musalenAhanatkruddho mUrdhni brahmadruhaM balaH || 5||
so.apatadbhuvi nirbhinnalalATo.asR^iksamutsR^ijan |
mu~nchannArtasvaraM shailo yathA vajrahato.aruNaH || 6||
saMstutya munayo rAmaM prayujyAvitathAshiShaH |
abhyaShi~nchanmahAbhAgA vR^itraghnaM vibudhA yathA || 7||
vaijayantIM dadurmAlAM shrIdhAmAmlAnapa~NkajAm |
rAmAya vAsasI divye divyAnyAbharaNAni cha || 8||
atha tairabhyanuj~nAtaH kaushikImetya brAhmaNaiH |
snAtvA sarovaramagAdyataH sarayurAsravat || 9||
anusrotena sarayUM prayAgamupagamya saH |
snAtvA santarpya devAdIn jagAma pulahAshramam || 10||
gomatIM gaNDakIM snAtvA vipAshAM shoNa AplutaH |
gayAM gatvA pitR^IniShTvA ga~NgAsAgarasa~Ngame || 11||
upaspR^ishya mahendrAdrau rAmaM dR^iShTvAbhivAdya cha |
saptagodAvarIM veNAM pampAM bhImarathIM tataH || 12||
skandaM dR^iShTvA yayau rAmaH shrIshailaM girishAlayam |
draviDeShu mahApuNyaM dR^iShTvAdriM ve~NkaTaM prabhuH || 13||
kAmakoShNIM purIM kA~nchIM kAverIM cha saridvarAm |
shrIra~NgAkhyaM mahApuNyaM yatra sannihito hariH || 14||
R^iShabhAdriM hareH kShetraM dakShiNAM mathurAM tathA |
sAmudraM setumagamanmahApAtakanAshanam || 15||
tatrAyutamadAddhenUrbrAhmaNebhyo halAyudhaH |
kR^itamAlAM tAmraparNIM malayaM cha kulAchalam || 16||
tatrAgastyaM samAsInaM namaskR^ityAbhivAdya cha |
yojitastena chAshIrbhiranuj~nAto gato.arNavam |
dakShiNaM tatra kanyAkhyAM durgAM devIM dadarsha saH || 17||
tataH phAlgunamAsAdya pa~nchApsarasamuttamam |
viShNuH sannihito yatra snAtvAsparshadgavAyutam || 18||
tato.abhivrajya bhagavAn keralAMstu trigartakAn |
gokarNAkhyaM shivakShetraM sAnnidhyaM yatra dhUrjaTeH || 19||
AryAM dvaipAyanIM dR^iShTvA shUrpArakamagAdbalaH |
tApIM payoShNIM nirvindhyAmupaspR^ishyAtha daNDakam || 20||
pravishya revAmagamadyatra mAhiShmatI purI |
manutIrthamupaspR^ishya prabhAsaM punarAgamat || 21||
shrutvA dvijaiH kathyamAnaM kurupANDavasaMyuge |
sarvarAjanyanidhanaM bhAraM mene hR^itaM bhuvaH || 22||
sa bhImaduryodhanayorgadAbhyAM yudhyatormR^idhe |
vArayiShyan vinashanaM jagAma yadunandanaH || 23||
yudhiShThirastu taM dR^iShTvA yamau kR^iShNArjunAvapi |
abhivAdyAbhavaMstUShNIM kiM vivakShurihAgataH || 24||
gadApANI ubhau dR^iShTvA saMrabdhau vijayaiShiNau |
maNDalAni vichitrANi charantAvidamabravIt || 25||
yuvAM tulyabalau vIrau he rAjan he vR^ikodara |
ekaM prANAdhikaM manye utaikaM shikShayAdhikam || 26||
tasmAdekatarasyeha yuvayoH samavIryayoH |
na lakShyate jayo.anyo vA viramatvaphalo raNaH || 27||
na tadvAkyaM jagR^ihaturbaddhavairau nR^ipArthavat |
anusmarantAvanyonyaM duruktaM duShkR^itAni cha || 28||
diShTaM tadanumanvAno rAmo dvAravatIM yayau |
ugrasenAdibhiH prItairj~nAtibhiH samupAgataH || 29||
taM punarnaimiShaM prAptamR^iShayo.ayAjayan mudA |
kratva~NgaM kratubhiH sarvairnivR^ittAkhilavigraham || 30||
tebhyo vishuddhaM vij~nAnaM bhagavAn vyataradvibhuH |
yenaivAtmanyado vishvamAtmAnaM vishvagaM viduH || 31||
svapatnyAvabhR^ithasnAto j~nAtibandhusuhR^idvR^itaH |
reje svajyotsnayevenduH suvAsAH suShThvala~NkR^itaH || 32||
IdR^igvidhAnyasa~NkhyAni balasya balashAlinaH |
anantasyAprameyasya mAyAmartyasya santi hi || 33||
yo.anusmareta rAmasya karmANyadbhutakarmaNaH |
sAyamprAtaranantasya viShNoH sa dayito bhavet || 34||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe baladeva\-
tIrthayAtrAnirUpaNaM nAmaikonAshItitamo.adhyAyaH || 79||
\iti
\section{.. OM namo bhagavate vAsudevAya ..}
\section{.. ashItitamo.adhyAyaH \- 80 ..}
rAjovAcha
bhagavan yAni chAnyAni mukundasya mahAtmanaH |
vIryANyanantavIryasya shrotumichChAmahe prabho || 1||
ko nu shrutvAsakR^idbrahmannuttamashlokasatkathAH |
virameta visheShaj~no viShaNNaH kAmamArgaNaiH || 2||
sA vAgyayA tasya guNAn gR^iNIte
karau cha tatkarmakarau manashcha |
smaredvasantaM sthiraja~NgameShu
shR^iNoti tatpuNyakathAH sa karNaH || 3||
shirastu tasyobhayali~NgamAname\-
ttadeva yatpashyati taddhi chakShuH |
a~NgAni viShNoratha tajjanAnAM
pAdodakaM yAni bhajanti nityam || 4||
sUta uvAcha
viShNurAtena sampR^iShTo bhagavAn bAdarAyaNiH |
vAsudeve bhagavati nimagnahR^idayo.abravIt || 5||
shrIshuka uvAcha
kR^iShNasyAsItsakhA kashchidbrAhmaNo brahmavittamaH |
virakta indriyArtheShu prashAntAtmA jitendriyaH || 6||
yadR^ichChayopapannena vartamAno gR^ihAshramI |
tasya bhAryA kuchailasya kShutkShAmA cha tathAvidhA || 7||
pativratA patiM prAha mlAyatA vadanena sA |
daridrA sIdamAnA sA vepamAnAbhigamya cha || 8||
nanu brahman bhagavataH sakhA sAkShAchChriyaH patiH |
brahmaNyashcha sharaNyashcha bhagavAn sAtvatarShabhaH || 9||
tamupaihi mahAbhAga sAdhUnAM cha parAyaNam |
dAsyati draviNaM bhUri sIdate te kuTumbine || 10||
Aste.adhunA dvAravatyAM bhojavR^iShNyandhakeshvaraH |
smarataH pAdakamalamAtmAnamapi yachChati |
kiM nvarthakAmAn bhajato nAtyabhIShTAn jagadguruH || 11||
sa evaM bhAryayA vipro bahushaH prArthito mR^idu |
ayaM hi paramo lAbha uttamashlokadarshanam || 12||
iti sa~nchintya manasA gamanAya matiM dadhe |
apyastyupAyanaM ki~nchidgR^ihe kalyANi dIyatAm || 13||
yAchitvA chaturo muShTIn viprAn pR^ithukataNDulAn |
chailakhaNDena tAn baddhvA bhartre prAdAdupAyanam || 14||
sa tAnAdAya viprAgryaH prayayau dvArakAM kila |
kR^iShNasandarshanaM mahyaM kathaM syAditi chintayan || 15||
trINi gulmAnyatIyAya tisraH kakShAshcha sa dvijaH |
vipro.agamyAndhakavR^iShNInAM gR^iheShvachyutadharmiNAm || 16||
gR^ihaM dvyaShTasahasrANAM mahiShINAM harerdvijaH |
viveshaikatamaM shrImadbrahmAnandaM gato yathA || 17||
taM vilokyAchyuto dUrAtpriyAparya~NkamAsthitaH |
sahasotthAya chAbhyetya dorbhyAM paryagrahInmudA || 18||
sakhyuH priyasya viprarShera~Ngasa~NgAtinirvR^itaH |
prIto vyamu~nchadabbindUn netrAbhyAM puShkarekShaNaH || 19||
athopaveshya parya~Nke svayaM sakhyuH samarhaNam |
upahR^ityAvanijyAsya pAdau pAdAvanejanIH || 20||
agrahIchChirasA rAjan bhagavAMllokapAvanaH |
vyalimpaddivyagandhena chandanAguruku~NkamaiH || 21||
dhUpaiH surabhibhirmitraM pradIpAvalibhirmudA |
architvA.a.avedya tAmbUlaM gAM cha svAgatamabravIt || 22||
kuchailaM malinaM kShAmaM dvijaM dhamanisantatam |
devI paryacharatsAkShAchchAmaravyajanena vai || 23||
antaHpurajano dR^iShTvA kR^iShNenAmalakIrtinA |
vismito.abhUdatiprItyA avadhUtaM sabhAjitam || 24||
kimanena kR^itaM puNyamavadhUtena bhikShuNA |
shriyA hInena loke.asmin garhitenAdhamena cha || 25||
yo.asau trilokaguruNA shrInivAsena sambhR^itaH |
parya~NkasthAM shriyaM hitvA pariShvakto.agrajo yathA || 26||
kathayA~nchakraturgAthAH pUrvA gurukule satoH |
Atmano lalitA rAjan karau gR^ihya parasparam || 27||
shrIbhagavAnuvAcha
api brahman gurukulAdbhavatA labdhadakShiNAt |
samAvR^ittena dharmaj~na bhAryoDhA sadR^ishI na vA || 28||
prAyo gR^iheShu te chittamakAmavihitaM tathA |
naivAtiprIyase vidvan dhaneShu viditaM hi me || 29||
kechitkurvanti karmANi kAmairahatachetasaH |
tyajantaH prakR^itIrdaivIryathAhaM lokasa~Ngraham || 30||
kachchidgurukule vAsaM brahman smarasi nau yataH |
dvijo vij~nAya vij~neyaM tamasaH pAramashnute || 31||
sa vai satkarmaNAM sAkShAddvijAteriha sambhavaH |
Adyo.a~Nga yatrAshramiNAM yathAhaM j~nAnado guruH || 32||
nanvarthakovidA brahman varNAshramavatAmiha |
ye mayA guruNA vAchA tarantya~njo bhavArNavam || 33||
nAhamijyAprajAtibhyAM tapasopashamena vA |
tuShyeyaM sarvabhUtAtmA gurushushrUShayA yathA || 34||
api naH smaryate brahman vR^ittaM nivasatAM gurau |
gurudAraishchoditAnAmindhanAnayane kvachit || 35||
praviShTAnAM mahAraNyamapartau sumahaddvija |
vAtavarShamabhUttIvraM niShThurAH stanayitnavaH || 36||
sUryashchAsta~NgatastAvattamasA chAvR^itA dishaH |
nimnaM kUlaM jalamayaM na prAj~nAyata ki~nchana || 37||
vayaM bhR^ishaM tatra mahAnilAmbubhi\-
rnihanyamAnA mahurambusamplave |
disho.avidanto.atha parasparaM vane
gR^ihItahastAH paribabhrimAturAH || 38||
etadviditvA udite ravau sAndIpanirguruH |
anveShamANo naH shiShyAnAchAryo.apashyadAturAn || 39||
aho he putrakA yUyamasmadarthe.atiduHkhitAH |
AtmA vai prANinAM preShThastamanAdR^itya matparAH || 40||
etadeva hi sachChiShyaiH kartavyaM guruniShkR^itam |
yadvai vishuddhabhAvena sarvArthAtmArpaNaM gurau || 41||
tuShTo.ahaM bho dvijashreShThAH satyAH santu manorathAH |
ChandAMsyayAtayAmAni bhavantviha paratra cha || 42||
itthaM vidhAnyanekAni vasatAM guruveshmasu |
guroranugraheNaiva pumAn pUrNaH prashAntaye || 43||
brAhmaNa uvAcha
kimasmAbhiranirvR^ittaM devadeva jagadguro |
bhavatA satyakAmena yeShAM vAso gurAvabhUt || 44||
yasyachChandomayaM brahma deha AvapanaM vibho |
shreyasAM tasya guruShu vAso.atyantaviDambanam || 45||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe shrIdAmacharite
ashItitamo.adhyAyaH || 80||
\iti
\section{.. OM namo bhagavate vAsudevAya ..}
\section{.. ekAshItitamo.adhyAyaH \- 81 ..}
shrIshuka uvAcha
sa itthaM dvijamukhyena saha sa~Nkathayan hariH |
sarvabhUtamano.abhij~naH smayamAna uvAcha tam || 1||
brahmaNyo brAhmaNaM kR^iShNo bhagavAn prahasan priyam |
premNA nirIkShaNenaiva prekShan khalu satAM gatiH || 2||
shrIbhagavAnuvAcha
kimupAyanamAnItaM brahman me bhavatA gR^ihAt |
aNvapyupAhR^itaM bhaktaiH premNA bhUryeva me bhavet |
bhUryapyabhaktopahR^itaM na me toShAya kalpate || 3||
patraM puShpaM phalaM toyaM yo me bhaktyA prayachChati |
tadahaM bhaktyupahR^itamashnAmi prayatAtmanaH || 4||
ityukto.api dvijastasmai vrIDitaH pataye shriyaH |
pR^ithukaprasR^itiM rAjan na prAyachChadavA~NmukhaH || 5||
sarvabhUtAtmadR^iksAkShAttasyAgamanakAraNam |
vij~nAyAchintayannAyaM shrIkAmo mAbhajatpurA || 6||
patnyAH pativratAyAstu sakhA priyachikIrShayA |
prApto mAmasya dAsyAmi sampado.amartyadurlabhAH || 7||
itthaM vichintya vasanAchchIrabaddhAn dvijanmanaH |
svayaM jahAra kimidamiti pR^ithukataNDulAn || 8||
nanvetadupanItaM me paramaprINanaM sakhe |
tarpayantya~Nga mAM vishvamete pR^ithukataNDulAH || 9||
iti muShTiM sakR^ijjagdhvA dvitIyAM jagdhumAdade |
tAvachChrIrjagR^ihe hastaM tatparA parameShThinaH || 10||
etAvatAlaM vishvAtman sarvasampatsamR^iddhaye |
asmin loke.atha vAmuShmin puMsastvattoShakAraNam || 11||
brAhmaNastAM tu rajanImuShitvAchyutamandire |
bhuktvA pItvA sukhaM mene AtmAnaM svargataM yathA || 12||
shvobhUte vishvabhAvena svasukhenAbhivanditaH |
jagAma svAlayaM tAta pathyanuvrajya nanditaH || 13||
sa chAlabdhvA dhanaM kR^iShNAnna tu yAchitavAn svayam |
svagR^ihAn vrIDito.agachChanmahaddarshananirvR^itaH || 14||
aho brahmaNyadevasya dR^iShTA brahmaNyatA mayA |
yaddaridratamo lakShmImAshliShTo bibhratorasi || 15||
kvAhaM daridraH pApIyAn kva kR^iShNaH shrIniketanaH |
brahmabandhuriti smAhaM bAhubhyAM parirambhitaH || 16||
nivAsitaH priyAjuShTe parya~Nke bhrAtaro yathA |
mahiShyA vIjitaH shrAnto vAlavyajanahastayA || 17||
shushrUShayA paramayA pAdasaMvAhanAdibhiH |
pUjito devadevena vipradevena devavat || 18||
svargApavargayoH puMsAM rasAyAM bhuvi sampadAm |
sarvAsAmapi siddhInAM mUlaM tachcharaNArchanam || 19||
adhano.ayaM dhanaM prApya mAdyannuchchairna mAM smaret |
iti kAruNiko nUnaM dhanaM me.abhUri nAdadAt || 20||
iti tachchintayannantaH prApto nijagR^ihAntikam |
sUryAnalendusa~NkAshairvimAnaiH sarvato vR^itam || 21||
vichitropavanodyAnaiH kUjaddvijakulAkulaiH |
protphullakumudAmbhojakahlArotpalavAribhiH || 22||
juShTaM svala~NkR^itaiH pumbhiH strIbhishcha hariNAkShibhiH |
kimidaM kasya vA sthAnaM kathaM tadidamityabhUt || 23||
evaM mImAMsamAnaM taM narA nAryo.amaraprabhAH |
pratyagR^ihNan mahAbhAgaM gItavAdyena bhUyasA || 24||
patimAgatamAkarNya patnyuddharShAtisambhramA |
nishchakrAma gR^ihAttUrNaM rUpiNI shrIrivAlayAt || 25||
pativratA patiM dR^iShTvA premotkaNThAshrulochanA |
mIlitAkShyanamadbud.hdhyA manasA pariShasvaje || 26||
patnIM vIkShya visphurantIM devIM vaimAnikImiva |
dAsInAM niShkakaNThInAM madhye bhAntIM sa vismitaH || 27||
prItaH svayaM tayA yuktaH praviShTo nijamandiram |
maNistambhashatopetaM mahendrabhavanaM yathA || 28||
payaHphenanibhAH shayyA dAntA rukmaparichChadAH |
parya~NkA hemadaNDAni chAmaravyajanAni cha || 29||
AsanAni cha haimAni mR^idUpastaraNAni cha |
muktAdAmavilambIni vitAnAni dyumanti cha || 30||
svachChasphaTikakuDyeShu mahAmArakateShu cha |
ratnadIpA bhrAjamAnA lalanAratnasaMyutAH || 31||
vilokya brAhmaNastatra samR^iddhIH sarvasampadAm |
tarkayAmAsa nirvyagraH svasamR^iddhimahaitukIm || 32||
nUnaM bataitanmama durbhagasya
shashvaddaridrasya samR^iddhihetuH |
mahAvibhUteravalokato.anyo
naivopapadyeta yadUttamasya || 33||
nanvabruvANo dishate samakShaM
yAchiShNave bhUryapi bhUribhojaH |
parjanyavattatsvayamIkShamANo
dAshArhakANAmR^iShabhaH sakhA me || 34||
ki~nchitkarotyurvapi yatsvadattaM
suhR^itkR^itaM phalgvapi bhUrikArI |
mayopanItAM pR^ithukaikamuShTiM
pratyagrahItprItiyuto mahAtmA || 35||
tasyaiva me sauhR^idasakhyamaitrI\-
dAsyaM punarjanmani janmani syAt |
mahAnubhAvena guNAlayena
viShajjatastatpuruShaprasa~NgaH || 36||
bhaktAya chitrA bhagavAn hi sampado
rAjyaM vibhUtIrna samarthayatyajaH |
adIrghabodhAya vichakShaNaH svayaM
pashyannipAtaM dhaninAM madodbhavam || 37||
itthaM vyavasito bud.hdhyA bhakto.atIva janArdane |
viShayAn jAyayA tyakShyan bubhuje nAtilampaTaH || 38||
tasya vai devadevasya hareryaj~napateH prabhoH |
brAhmaNAH prabhavo daivaM na tebhyo vidyate param || 39||
evaM sa vipro bhagavatsuhR^ittadA
dR^iShTvA svabhR^ityairajitaM parAjitam |
tad.hdhyAnavegodgrathitAtmabandhana\-
staddhAma lebhe.achirataH satAM gatim || 40||
etadbrahmaNyadevasya shrutvA brahmaNyatAM naraH |
labdhabhAvo bhagavati karmabandhAdvimuchyate || 41||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe pR^ithuko\-
pAkhyAnaM nAmaikAshItitamo.adhyAyaH || 81||
\iti
\section{.. OM namo bhagavate vAsudevAya ..}
\section{.. dvyashItitamo.adhyAyaH \- 82 ..}
shrIshuka uvAcha
athaikadA dvAravatyAM vasato rAmakR^iShNayoH |
sUryoparAgaH sumahAnAsItkalpakShaye yathA || 1||
taM j~nAtvA manujA rAjan purastAdeva sarvataH |
samantapa~nchakaM kShetraM yayuH shreyovidhitsayA || 2||
niHkShatriyAM mahIM kurvan rAmaH shastrabhR^itAM varaH |
nR^ipANAM rudhiraugheNa yatra chakre mahAhradAn || 3||
Ije cha bhagavAn rAmo yatrAspR^iShTo.api karmaNA |
lokasya grAhayannIsho yathAnyo.aghApanuttaye || 4||
mahatyAM tIrthayAtrAyAM tatrAgan bhAratIH prajAH |
vR^iShNayashcha tathAkrUravasudevAhukAdayaH || 5||
yayurbhArata tatkShetraM svamaghaM kShapayiShNavaH |
gadapradyumnasAmbAdyAH suchandrashukasAraNaiH || 6||
Aste.aniruddho rakShAyAM kR^itavarmA cha yUthapaH |
te rathairdevadhiShNyAbhairhayaishcha taralaplavaiH || 7||
gajairnadadbhirabhrAbhairnR^ibhirvidyAdharadyubhiH |
vyarochanta mahAtejAH pathi kA~nchanamAlinaH || 8||
divyasragvastrasannAhAH kalatraiH khecharA iva |
tatra snAtvA mahAbhAgA upoShya susamAhitAH || 9||
brAhmaNebhyo dadurdhenUrvAsaHsragrukmamAlinIH |
rAmahradeShu vidhivatpunarAplutya vR^iShNayaH || 10||
daduH svannaM dvijAgryebhyaH kR^iShNe no bhaktirastviti |
svayaM cha tadanuj~nAtA vR^iShNayaH kR^iShNadevatAH || 11||
bhuktvopavivishuH kAmaM snigdhachChAyA~NghripA~NghriShu |
tatrAgatAMste dadR^ishuH suhR^itsambandhino nR^ipAn || 12||
matsyoshInarakausalyavidarbhakurusR^i~njayAn |
kAmbojakaikayAnmadrAn kuntInAnartakeralAn || 13||
anyAMshchaivAtmapakShIyAn parAMshcha shatasho nR^ipa |
nandAdIn suhR^ido gopAn gopIshchotkaNThitAshchiram || 14||
anyonyasandarshanaharSharaMhasA
protphullahR^idvaktrasaroruhashriyaH |
AshliShya gADhaM nayanaiH sravajjalA
hR^iShyattvacho ruddhagiro yayurmudam || 15||
striyashcha saMvIkShya mitho.atisauhR^ida\-
smitAmalApA~NgadR^isho.abhirebhire |
stanaiH stanAn ku~Nkumapa~NkarUShitA\-
nnihatya dorbhiH praNayAshrulochanAH || 16||
tato.abhivAdya te vR^iddhAn yaviShThairabhivAditAH |
svAgataM kushalaM pR^iShTvA chakruH kR^iShNakathA mithaH || 17||
pR^ithA bhrAtR^In svasR^IrvIkShya tatputrAn pitarAvapi |
bhrAtR^ipatnIrmukundaM cha jahau sa~NkathayA shuchaH || 18||
kuntyuvAcha
Arya bhrAtarahaM manye AtmAnamakR^itAshiSham |
yadvA Apatsu madvArtAM nAnusmaratha sattamAH || 19||
suhR^ido j~nAtayaH putrA bhrAtaraH pitarAvapi |
nAnusmaranti svajanaM yasya daivamadakShiNam || 20||
vasudeva uvAcha
amba mAsmAnasUyethA daivakrIDanakAn narAn |
Ishasya hi vashe lokaH kurute kAryate.atha vA || 21||
kaMsapratApitAH sarve vayaM yAtA dishaM disham |
etarhyeva punaH sthAnaM daivenAsAditAH svasaH || 22||
shrIshuka uvAcha
vasudevograsenAdyairyadubhiste.architA nR^ipAH |
AsannachyutasandarshaparamAnandanirvR^itAH || 23||
bhIShmo droNo.ambikAputro gAndhArI sasutA tathA |
sadArAH pANDavAH kuntI sa~njayo viduraH kR^ipaH || 24||‘
kuntibhojo virATashcha bhIShmako nagnajinmahAn |
purujiddrupadaH shalyo dhR^iShTaketuH sakAshirAT || 25||
damaghoSho vishAlAkSho maithilo madrakekayau |
yudhAmanyuH susharmA cha sasutA bAhlikAdayaH || 26||
rAjAno ye cha rAjendra yudhiShThiramanuvratAH |
shrIniketaM vapuH shaureH sastrIkaM vIkShya vismitAH || 27||
atha te rAmakR^iShNAbhyAM samyak prAptasamarhaNAH |
prashashaMsurmudA yuktA vR^iShNIn kR^iShNaparigrahAn || 28||
aho bhojapate yUyaM janmabhAjo nR^iNAmiha |
yatpashyathAsakR^itkR^iShNaM durdarshamapi yoginAm || 29||
yadvishrutiH shrutinutedamalaM punAti
pAdAvanejanapayashcha vachashcha shAstram |
bhUH kAlabharjitabhagApi yada~Nghripadma\-
sparshotthashaktirabhivarShati no.akhilArthAn || 30||
taddarshanasparshanAnupathaprajalpa\-
shayyAsanAshanasayaunasapiNDabandhaH |
yeShAM gR^ihe nirayavartmani vartatAM vaH
svargApavargaviramaH svayamAsa viShNuH || 31||
shrIshuka uvAcha
nandastatra yadUn prAptAn j~nAtvA kR^iShNapurogamAn |
tatrAgamadvR^ito gopairanaHsthArthairdidR^ikShayA || 32||
taM dR^iShTvA vR^iShNayo hR^iShTAstanvaH prANamivotthitAH |
pariShasvajire gADhaM chiradarshanakAtarAH || 33||
vasudevaH pariShvajya samprItaH premavihvalaH |
smaran kaMsakR^itAn kleshAn putranyAsaM cha gokule || 34||
kR^iShNarAmau pariShvajya pitarAvabhivAdya cha |
na ki~nchanochatuH premNA sAshrukaNThau kurUdvaha || 35||
tAvAtmAsanamAropya bAhubhyAM parirabhya cha |
yashodA cha mahAbhAgA sutau vijahatuH shuchaH || 36||
rohiNI devakI chAtha pariShvajya vrajeshvarIm |
smarantyau tatkR^itAM maitrIM bAShpakaNThyau samUchatuH || 37||
kA vismareta vAM maitrImanivR^ittAM vrajeshvari |
avApyApyaindramaishvaryaM yasyA neha pratikriyA || 38||
etAvadR^iShTapitarau yuvayoH sma pitroH
samprINanAbhyudayapoShaNapAlanAni |
prApyoShaturbhavati pakShma ha yadvadakShNoH
nyastAvakutra cha bhayau na satAM paraH svaH || 39||
shrIshuka uvAcha
gopyashcha kR^iShNamupalabhya chirAdabhIShTaM
yatprekShaNe dR^ishiShu pakShmakR^itaM shapanti |
dR^igbhirhR^idIkR^itamalaM parirabhya sarvA\-
stadbhAvamApurapi nityayujAM durApam || 40||
bhagavAMstAstathAbhUtA vivikta upasa~NgataH |
AshliShyAnAmayaM pR^iShTvA prahasannidamabravIt || 41||
api smaratha naH sakhyaH svAnAmarthachikIrShayA |
gatAMshchirAyitA~nChatrupakShakShapaNachetasaH || 42||
apyavadhyAyathAsmAn svidakR^itaj~nAvisha~NkayA |
nUnaM bhUtAni bhagavAn yunakti viyunakti cha || 43||
vAyuryathA ghanAnIkaM tR^iNaM tUlaM rajAMsi cha |
saMyojyAkShipate bhUyastathA bhUtAni bhUtakR^it || 44||
mayi bhaktirhi bhUtAnAmamR^itatvAya kalpate |
diShTyA yadAsInmatsneho bhavatInAM madApanaH || 45||
ahaM hi sarvabhUtAnAmAdiranto.antaraM bahiH |
bhautikAnAM yathA khaM vArbhUrvAyurjyotira~NganAH || 46||
evaM hyetAni bhUtAni bhUteShvAtmA.a.atmanA tataH |
ubhayaM mayyatha pare pashyatAbhAtamakShare || 47||
shrIshuka uvAcha
adhyAtmashikShayA gopya evaM kR^iShNena shikShitAH |
tadanusmaraNadhvastajIvakoshAstamadhyagan || 48||
Ahushcha te nalinanAbha padAravindaM
yogeshvarairhR^idi vichintyamagAdhabodhaiH |
saMsArakUpapatitottaraNAvalambaM
geha~njuShAmapi manasyudiyAtsadA naH || 49||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe vR^iShNigopa\-
sa~Ngamo nAma dvyashItitamo.adhyAyaH || 82||
\iti
\section{.. OM namo bhagavate vAsudevAya ..}
\section{.. tryashItitamo.adhyAyaH \- 83 ..}
shrIshuka uvAcha
tathAnugR^ihya bhagavAn gopInAM sa gururgatiH |
yudhiShThiramathApR^ichChatsarvAMshcha suhR^ido.avyayam || 1||
ta evaM lokanAthena paripR^iShTAH susatkR^itAH |
pratyUchurhR^iShTamanasastatpAdekShAhatAMhasaH || 2||
kuto.ashivaM tvachcharaNAmbujAsavaM
mahanmanasto mukhaniHsR^itaM kvachit |
pibanti ye karNapuTairalaM prabho
dehambhR^itAM dehakR^idasmR^itichChidam || 3||
hitvA.a.atmadhAma vidhutAtmakR^itatryavastha\-
mAnandasamplavamakhaNDamakuNThabodham |
kAlopasR^iShTanigamAvana Attayoga\-
mAyAkR^itiM paramahaMsagatiM natAH smaH || 4||
R^iShiruvAcha
ityuttamashlokashikhAmaNiM jane\-
ShvabhiShTuvatsvandhakakauravastriyaH |
sametya govindakathA mitho.agR^iNaM\-
strilokagItAH shR^iNu varNayAmi te || 5||
draupadyuvAcha
he vaidarbhyachyuto bhadre he jAmbavati kausale |
he satyabhAme kAlindi shaibye rohiNi lakShmaNe || 6||
he kR^iShNapatnya etanno brUta vo bhagavAn svayam |
upayeme yathA lokamanukurvan svamAyayA || 7||
rukmiNyuvAcha
chaidyAya mArpayitumudyatakArmukeShu
rAjasvajeyabhaTashekharitA~NghrireNuH |
ninye mR^igendra iva bhAgamajAviyUthA\-
ttachChrIniketacharaNo.astu mamArchanAya || 8||
satyabhAmovAcha
yo me sanAbhivadhataptahR^idA tatena
liptAbhishApamapamArShTumupAjahAra |
jitvarkSharAjamatha ratnamadAtsa tena
bhItaH pitAdishata mAM prabhave.api dattAm || 9||
jAmbavatyuvAcha
prAj~nAya dehakR^idamuM nijanAthadaivaM
sItApatiM triNavahAnyamunAbhyayudhyat |
j~nAtvA parIkShita upAharadarhaNaM mAM
pAdau pragR^ihya maNinAhamamuShya dAsI || 10||
kAlindyuvAcha
tapashcharantImAj~nAya svapAdasparshanAshayA |
sakhyopetyAgrahItpANiM yo.ahaM tadgR^ihamArjanI || 11||
mitravindovAcha
yo mAM svayaMvara upetya vijitya bhUpAn
ninye shvayUthagamivAtmabaliM dvipAriH |
bhrAtR^IMshcha me.apakurutaH svapuraM shriyaukaH
tasyAstu me.anubhavama~Nghryavanejanatvam || 12||
satyovAcha
saptokShaNo.atibalavIryasutIkShNashR^i~NgAn
pitrA kR^itAn kShitipavIryaparIkShaNAya |
tAn vIradurmadahanastarasA nigR^ihya
krIDan babandha ha yathA shishavo.ajatokAn || 13||
ya itthaM vIryashulkAM mAM dAsIbhishchatura~NgiNIm |
pathi nirjitya rAjanyAn ninye taddAsyamastu me || 14||
bhadrovAcha
pitA me mAtuleyAya svayamAhUya dattavAn |
kR^iShNe kR^iShNAya tachchittAmakShauhiNyA sakhIjanaiH || 15||
asya me pAdasaMsparsho bhavejjanmani janmani |
karmabhirbhrAmyamANAyA yena tachChreya AtmanaH || 16||
lakShmaNovAcha
mamApi rAj~nyachyutajanmakarma
shrutvA muhurnAradagItamAsa ha |
chittaM mukunde kila padmahastayA
vR^itaH susammR^ishya vihAya lokapAn || 17||
j~nAtvA mama mataM sAdhvi pitA duhitR^ivatsalaH |
bR^ihatsena iti khyAtastatropAyamachIkarat || 18||
yathA svayaMvare rAj~ni matsyaH pArthepsayA kR^itaH |
ayaM tu bahirAchChanno dR^ishyate sa jale param || 19||
shrutvaitatsarvato bhUpA AyayurmatpituH puram |
sarvAstrashastratattvaj~nAH sopAdhyAyAH sahasrashaH || 20||
pitrA sampUjitAH sarve yathAvIryaM yathAvayaH |
AdaduH sasharaM chApaM veddhuM parShadi maddhiyaH || 21||
AdAya vyasR^ijan kechitsajyaM kartumanIshvarAH |
AkoTi jyAM samutkR^iShya petureke.amunA hatAH || 22||
sajyaM kR^itvA pare vIrA mAgadhAmbaShThachedipAH |
bhImo duryodhanaH karNo nAvidaMstadavasthitim || 23||
matsyAbhAsaM jale vIkShya j~nAtvA cha tadavasthitim |
pArtho yatto.asR^ijadbANaM nAchChinatpaspR^ishe param || 24||
rAjanyeShu nivR^itteShu bhagnamAneShu mAniShu |
bhagavAn dhanurAdAya sajyaM kR^itvAtha lIlayA || 25||
tasmin sandhAya vishikhaM matsyaM vIkShya sakR^ijjale |
ChittveShuNApAtayattaM sUrye chAbhijiti sthite || 26||
divi dundubhayo nedurjayashabdayutA bhuvi |
devAshcha kusumAsArAn mumuchurharShavihvalAH || 27||
tadra~NgamAvishamahaM kalanUpurAbhyAM
padbhyAM pragR^ihya kanakojjvalaratnamAlAm |
nUtne nivIya paridhAya cha kaushikAgrye
savrIDahAsavadanA kabarIdhR^itasrak || 28||
unnIya vaktramurukuntalakuNDalatvi\-
DgaNDasthalaM shishirahAsakaTAkShamokShaiH |
rAj~no nirIkShya paritaH shanakairmurAre\-
raMse.anuraktahR^idayA nidadhe svamAlAm || 29||
tAvanmR^ida~NgapaTahAH sha~NkhabheryAnakAdayaH |
ninedurnaTanartakyo nanR^iturgAyakA jaguH || 30||
evaM vR^ite bhagavati mayeshe nR^ipayUthapAH |
na sehire yAj~naseni spardhanto hR^ichChayAturAH || 31||
mAM tAvadrathamAropya hayaratnachatuShTayam |
shAr~Ngamudyamya sannaddhastasthAvAjau chaturbhujaH || 32||
dArukashchodayAmAsa kA~nchanopaskaraM ratham |
miShatAM bhUbhujAM rAj~ni mR^igANAM mR^igarADiva || 33||
te.anvasajjanta rAjanyA niSheddhuM pathi kechana |
saMyattA uddhR^iteShvAsA grAmasiMhA yathA harim || 34||
te shAr~NgachyutabANaughaiH kR^ittabAhva~NghrikandharAH |
nipetuH pradhane kechideke santyajya dudruvuH || 35||
tataH purIM yadupatiratyala~NkR^itAM
ravichChadadhvajapaTachitratoraNAm |
kushasthalIM divi bhuvi chAbhisaMstutAM
samAvishattaraNiriva svaketanam || 36||
pitA me pUjayAmAsa suhR^itsambandhibAndhavAn |
mahArhavAso.ala~NkAraiH shayyAsanaparichChadaiH || 37||
dAsIbhiH sarvasampadbhirbhaTebharathavAjibhiH |
AyudhAni mahArhANi dadau pUrNasya bhaktitaH || 38||
AtmArAmasya tasyemA vayaM vai gR^ihadAsikAH |
sarvasa~NganivR^ittyAddhA tapasA cha babhUvima || 39||
mahiShya UchuH
bhaumaM nihatya sagaNaM yudhi tena ruddhA
j~nAtvAtha naH kShitijaye jitarAjakanyAH |
nirmuchya saMsR^itivimokShamanusmarantIH
pAdAmbujaM pariNinAya ya AptakAmaH || 40||
na vayaM sAdhvi sAmrAjyaM svArAjyaM bhaujyamapyuta |
vairAjyaM pArameShThyaM cha AnantyaM vA hareH padam || 41||
kAmayAmaha etasya shrImatpAdarajaH shriyaH |
kuchaku~NkumagandhADhyaM mUrdhnA voDhuM gadAbhR^itaH || 42||
vrajastriyo yadvA~nChanti pulindyastR^iNavIrudhaH |
gAvashchArayato gopAH pAdasparshaM mahAtmanaH || 43||
iti shrImadbhAgavate mahApurANe pAramahaMsyAM saMhitAyAM
dashamaskandhe uttarArdhe tryashItitamo.adhyAyaH || 83||
\iti
\section{.. OM namo bhagavate vAsudevAya ..}
\section{.. chaturashItitamo.adhyAyaH \- 84 ..}
shrIshuka uvAcha
shrutvA pR^ithA subalaputryatha yAj~nasenI
mAdhavyatha kShitipapatnya uta svagopyaH |
kR^iShNe.akhilAtmani harau praNayAnubandhaM
sarvA visismyuralamashrukalAkulAkShyaH || 1||
iti sambhAShamANAsu strIbhiH strIShu nR^ibhirnR^iShu |
Ayayurmunayastatra kR^iShNarAmadidR^ikShayA || 2||
dvaipAyano nAradashcha chyavano devalo.asitaH |
vishvAmitraH shatAnando bharadvAjo.atha gautamaH || 3||
rAmaH sashiShyo bhagavAn vasiShTho gAlavo bhR^iguH |
pulastyaH kashyapo.atrishcha mArkaNDeyo bR^ihaspatiH || 4||
dvitastritashchaikatashcha brahmaputrAstathA~NgirAH |
agastyo yAj~navalkyashcha vAmadevAdayo.apare || 5||
tAn dR^iShTvA sahasotthAya prAgAsInA nR^ipAdayaH |
pANDavAH kR^iShNarAmau cha praNemurvishvavanditAn || 6||
tAnAnarchuryathA sarve saharAmo.achyuto.archayat |
svAgatAsanapAdyArghyamAlyadhUpAnulepanaiH || 7||
uvAcha sukhamAsInAn bhagavAn dharmaguptanuH |
sadasastasya mahato yatavAcho.anushR^iNvataH || 8||
shrIbhagavAnuvAcha
aho vayaM janmabhR^ito labdhaM kArtsnyena tatphalam |
devAnAmapi duShprApaM yadyogeshvaradarshanam || 9||
kiM svalpatapasAM nR^INAmarchAyAM devachakShuShAm |
darshanasparshanaprashnaprahvapAdArchanAdikam || 10||
na hyammayAni tIrthAni na devA mR^ichChilAmayAH |
te punantyurukAlena darshanAdeva sAdhavaH || 11||
nAgnirna sUryo na cha chandratArakA
na bhUrjalaM khaM shvasano.atha vA~NmanaH |
upAsitA bhedakR^ito harantyaghaM
vipashchito ghnanti muhUrtasevayA || 12||
yasyAtmabuddhiH kuNape tridhAtuke
svadhIH kalatrAdiShu bhauma ijyadhIH |
yattIrthabuddhiH salile na karhichi\-
jjaneShvabhij~neShu sa eva gokharaH || 13||
shrIshuka uvAcha
nishamyetthaM bhagavataH kR^iShNasyAkuNThamedhasaH |
vacho duranvayaM viprAstUShNImAsan bhramaddhiyaH || 14||
chiraM vimR^ishya munaya IshvarasyeshitavyatAm |
janasa~Ngraha ityUchuH smayantastaM jagadgurum || 15||
munaya UchuH
yanmAyayA tattvaviduttamA vayaM
vimohitA vishvasR^ijAmadhIshvarAH |
yadIshitavyAyati gUDha IhayA
aho vichitraM bhagavadvicheShTitam || 16||
anIha etadbahudhaika AtmanA
sR^ijatyavatyatti na badhyate yathA |
bhaumairhi bhUmirbahunAmarUpiNI
aho vibhUmnashcharitaM viDambanam || 17||
athApi kAle svajanAbhiguptaye
bibharShi sattvaM khalanigrahAya cha |
svalIlayA vedapathaM sanAtanaM
varNAshramAtmA puruShaH paro bhavAn || 18||
brahma te hR^idayaM shuklaM tapaHsvAdhyAyasaMyamaiH |
yatropalabdhaM sadvyaktamavyaktaM cha tataH param || 19||
tasmAdbrahmakulaM brahman shAstrayonestvamAtmanaH |
sabhAjayasi saddhAma tadbrahmaNyAgraNIrbhavAn || 20||
adya no janmasAphalyaM vidyAyAstapaso dR^ishaH |
tvayA sa~Ngamya sadgatyA yadantaH shreyasAM paraH || 21||
namastasmai bhagavate kR^iShNAyAkuNThamedhase |
svayogamAyayAchChannamahimne paramAtmane || 22||
na yaM vidantyamI bhUpA ekArAmAshcha vR^iShNayaH |
mAyAjavanikAchChannamAtmAnaM kAlamIshvaram || 23||
yathA shayAnaH puruSha AtmAnaM guNatattvadR^ik |
nAmamAtrendriyAbhAtaM na veda rahitaM param || 24||
evaM tvA nAmamAtreShu viShayeShvindriyehayA |
mAyayA vibhramachchitto na veda smR^ityupaplavAt || 25||
tasyAdya te dadR^ishimA~NghrimaghaughamarSha\-
tIrthAspadaM hR^idi kR^itaM suvipakvayogaiH |
utsiktabhaktyupahatAshayajIvakoshA
Apurbhavadgatimatho.anugR^ihANa bhaktAn || 26||
shrIshuka uvAcha
ityanuj~nApya dAshArhaM dhR^itarAShTraM yudhiShThiram |
rAjarShe svAshramAn gantuM munayo dadhire manaH || 27||
tadvIkShya tAnupavrajya vasudevo mahAyashAH |
praNamya chopasa~NgR^ihya babhAShedaM suyantritaH || 28||
vasudeva uvAcha
namo vaH sarvadevebhya R^iShayaH shrotumarhatha |
karmaNA karmanirhAro yathA syAnnastaduchyatAm || 29||
nArada uvAcha
nAti chitramidaM viprA vasudevo bubhutsayA |
kR^iShNaM matvArbhakaM yannaH pR^ichChati shreya AtmanaH || 30||
sannikarSho hi martyAnAmanAdaraNakAraNam |
gA~NgaM hitvA yathAnyAmbhastatratyo yAti shuddhaye || 31||
yasyAnubhUtiH kAlena layotpattyAdinAsya vai |
svato.anyasmAchcha guNato na kutashchana riShyati || 32||
taM kleshakarmaparipAkaguNapravAhai\-
ravyAhatAnubhavamIshvaramadvitIyam |
prANAdibhiH svavibhavairupagUDhamanyo
manyeta sUryamiva meghahimoparAgaiH || 33||
athochurmunayo rAjannAbhAShyAnakadundabhim |
sarveShAM shR^iNvatAM rAj~nAM tathaivAchyutarAmayoH || 34||
karmaNA karmanirhAra eSha sAdhu nirUpitaH |
yachChraddhayA yajedviShNuM sarvayaj~neshvaraM makhaiH || 35||
chittasyopashamo.ayaM vai kavibhiH shAstrachakShuShA |
darshitaH sugamo yogo dharmashchAtmamudAvahaH || 36||
ayaM svastyayanaH panthA dvijAtergR^ihamedhinaH |
yachChraddhayA.a.aptavittena shuklenejyeta pUruShaH || 37||
vittaiShaNAM yaj~nadAnairgR^ihairdArasutaiShaNAm |
AtmalokaiShaNAM deva kAlena visR^ijedbudhaH |
grAme tyaktaiShaNAH sarve yayurdhIrAstapovanam || 38||
R^iNaistribhirdvijo jAto devarShipitR^INAM prabho |
yaj~nAdhyayanaputraistAnyanistIrya tyajan patet || 39||
tvaM tvadya mukto dvAbhyAM vai R^iShipitrormahAmate |
yaj~nairdevarNamunmuchya nirR^iNo.asharaNo bhava || 40||
vasudeva bhavAnnUnaM bhaktyA paramayA harim |
jagatAmIshvaraM prArchaH sa yadvAM putratAM gataH || 41||
shrIshuka uvAcha
iti tadvachanaM shrutvA vasudevo mahAmanAH |
tAn R^iShIn R^itvijo vavre mUrdhnA.a.anamya prasAdya cha || 42||
ta enamR^iShayo rAjan vR^itA dharmeNa dhArmikam |
tasminnayAjayan kShetre makhairuttamakalpakaiH || 43||
taddIkShAyAM pravR^ittAyAM vR^iShNayaH puShkarasrajaH |
snAtAH suvAsaso rAjan rAjAnaH suShThvala~NkR^itAH || 44||
tanmahiShyashcha muditA niShkakaNThyaH suvAsasaH |
dIkShAshAlAmupAjagmurAliptA vastupANayaH || 45||
nedurmR^ida~NgapaTahasha~NkhabheryAnakAdayaH |
nanR^iturnaTanartakyastuShTuvuH sUtamAgadhAH |
jaguH sukaNThyo gandharvyaH sa~NgItaM sahabhartR^ikAH || 46||
tamabhyaShi~nchan vidhivadaktamabhyaktamR^itvijaH |
patnIbhiraShTAdashabhiH somarAjamivoDubhiH || 47||
tAbhirdukUlavalayairhAranUpurakuNDalaiH |
svala~NkR^itAbhirvibabhau dIkShito.ajinasaMvR^itaH || 48||
tasyartvijo mahArAja ratnakausheyavAsasaH |
sasadasyA virejuste yathA vR^itrahaNo.adhvare || 49||
tadA rAmashcha kR^iShNashcha svaiH svairbandhubhiranvitau |
rejatuH svasutairdArairjIveshau svavibhUtibhiH || 50||
Ije.anuyaj~naM vidhinA agnihotrAdilakShaNaiH |
prAkR^itairvaikR^itairyaj~nairdravyaj~nAnakriyeshvaram || 51||
athartvigbhyo.adadAtkAle yathAmnAtaM sa dakShiNAH |
svala~NkR^itebhyo.ala~NkR^itya gobhUkanyA mahAdhanAH || 52||
patnIsaMyAjAvabhR^ithyaishcharitvA te maharShayaH |
sasnU rAmahrade viprA yajamAnapuraHsarAH || 53||
snAto.ala~NkAravAsAMsi vandibhyo.adAttathA striyaH |
tataH svala~NkR^ito varNAnAshvabhyo.annena pUjayat || 54||
bandhUn sadArAn sasutAn pAribarheNa bhUyasA |
vidarbhakosalakurUn kAshikekayasR^i~njayAn || 55||
sadasyartviksuragaNAn nR^ibhUtapitR^ichAraNAn |
shrIniketamanuj~nApya shaMsantaH prayayuH kratum || 56||
dhR^itarAShTro.anujaH pArthA bhIShmo droNaH pR^ithA yamau |
nArado bhagavAn vyAsaH suhR^itsambandhibAndhavAH || 57||
bandhUn pariShvajya yadUn sauhR^idAtklinnachetasaH |
yayurvirahakR^ichChreNa svadeshAMshchApare janAH || 58||
nandastu saha gopAlairbR^ihatyA pUjayArchitaH |
kR^iShNarAmograsenAdyairnyavAtsIdbandhuvatsalaH || 59||
vasudevo.a~njasottIrya manorathamahArNavam |
suhR^idvR^itaH prItamanA nandamAha kare spR^ishan || 60||
vasudeva uvAcha
bhrAtarIshakR^itaH pAsho nR^iNAM yaH snehasa.nj~nitaH |
taM dustyajamahaM manye shUrANAmapi yoginAm || 61||
asmAsvapratikalpeyaM yatkR^itAj~neShu sattamaiH |
maitryarpitAphalA vApi na nivarteta karhichit || 62||
prAgakalpAchcha kushalaM bhrAtarvo nAcharAma hi |
adhunA shrImadAndhAkShA na pashyAmaH puraH sataH || 63||
mA rAjyashrIrabhUtpuMsaH shreyaskAmasya mAnada |
svajanAnuta bandhUn vA na pashyati yayAndhadR^ik || 64||
shrIshuka uvAcha
evaM sauhR^idashaithilyachitta AnakadundubhiH |
ruroda tatkR^itAM maitrIM smarannashruvilochanaH || 65||
nandastu sakhyuH priyakR^itpremNA govindarAmayoH |
adya shva iti mAsAMstrIn yadubhirmAnito.avasat || 66||
tataH kAmaiH pUryamANaH savrajaH sahabAndhavaH |
parArdhyAbharaNakShaumanAnAnarghyaparichChadaiH || 67||
vasudevograsenAbhyAM kR^iShNoddhavabalAdibhiH |
dattamAdAya pAribarhaM yApito yadubhiryayau || 68||
nando gopAshcha gopyashcha govindacharaNAmbuje |
manaH kShiptaM punarhartumanIshA mathurAM yayuH || 69||
bandhuShu pratiyAteShu vR^iShNayaH kR^iShNadevatAH |
vIkShya prAvR^iShamAsannAM yayurdvAravatIM punaH || 70||
janebhyaH kathayA~nchakruryadudevamahotsavam |
yadAsIttIrthayAtrAyAM suhR^itsandarshanAdikam || 71||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe tIrthayAtrA\-
nuvarNanaM nAma chaturashItitamo.adhyAyaH || 84||
\iti
\section{.. OM namo bhagavate vAsudevAya ..}
\section{.. pa~nchAshItitamo.adhyAyaH \- 85 ..}
shrIbAdarAyaNiruvAcha
athaikadA.a.atmajau prAptau kR^itapAdAbhivandanau |
vasudevo.abhinandyAha prItyA sa~NkarShaNAchyutau || 1||
munInAM sa vachaH shrutvA putrayordhAmasUchakam |
tadvIryairjAtavishrambhaH paribhAShyAbhyabhAShata || 2||
kR^iShNa kR^iShNa mahAyogin sa~NkarShaNa sanAtana |
jAne vAmasya yatsAkShAtpradhAnapuruShau parau || 3||
yatra yena yato yasya yasmai yadyadyathA yadA |
syAdidaM bhagavAn sAkShAtpradhAnapuruSheshvaraH || 4||
etannAnAvidhaM vishvamAtmasR^iShTamadhokShaja |
AtmanAnupravishyAtman prANo jIvo bibharShyaja || 5||
prANAdInAM vishvasR^ijAM shaktayo yAH parasya tAH |
pAratantryAdvaisAdR^ishyAddvayoshcheShTaiva cheShTatAm || 6||
kAntistejaH prabhA sattA chandrAgnyarkarkShavidyutAm |
yatsthairyaM bhUbhR^itAM bhUmervR^ittirgandho.arthato bhavAn || 7||
tarpaNaM prANanamapAM devatvaM tAshcha tadrasaH |
ojaH saho balaM cheShTA gatirvAyostaveshvara || 8||
dishAM tvamavakAsho.asi dishaH khaM sphoTa AshrayaH |
nAdo varNastvamo~NkAra AkR^itInAM pR^ithakkR^itiH || 9||
indriyaM tvindriyANAM tvaM devAshcha tadanugrahaH |
avabodhobhavAnbuddherjIvasyAnusmR^itiH satI || 10||
bhUtAnAmasi bhUtAdirindriyANAM cha taijasaH |
vaikAriko vikalpAnAM pradhAnamanushAyinam || 11||
nashvareShviha bhAveShu tadasi tvamanashvaram |
yathA dravyavikAreShu dravyamAtraM nirUpitam || 12||
sattvaMrajastama iti guNAstadvR^ittayashcha yAH |
tvayyaddhA brahmaNi pare kalpitA yogamAyayA || 13||
tasmAnna santyamI bhAvA yarhi tvayi vikalpitAH |
tvaM chAmIShu vikAreShu hyanyadAvyAvahArikaH || 14||
guNapravAha etasminnabudhAstvakhilAtmanaH |
gatiM sUkShmAmabodhena saMsarantIha karmabhiH || 15||
yadR^ichChayA nR^itAM prApya sukalpAmiha durlabhAm |
svArthe pramattasya vayo gataM tvanmAyayeshvara || 16||
asAvahammamaivaite dehe chAsyAnvayAdiShu |
snehapAshairnibadhnAti bhavAn sarvamidaM jagat || 17||
yuvAM na naH sutau sAkShAtpradhAnapuruSheshvarau |
bhUbhArakShatrakShapaNa avatIrNau tathAttha ha || 18||
tatte gato.asmyaraNamadya padAravinda\-
mApannasaMsR^itibhayApahamArtabandho |
etAvatAlamalamindriyalAlasena
martyAtmadR^iktvayi pare yadapatyabuddhiH || 19||
sUtIgR^ihe nanu jagAda bhavAnajo nau
sa~njaj~na ityanuyugaM nijadharmaguptyai |
nAnAtanUrgaganavadvidadhajjahAsi
ko veda bhUmna urugAya vibhUtimAyAm || 20||
shrIshuka uvAcha
AkarNyetthaM piturvAkyaM bhagavAn sAtvatarShabhaH |
pratyAha prashrayAnamraH prahasan shlakShNayA girA || 21||
shrIbhagavAnuvAcha
vacho vaH samavetArthaM tAtaitadupamanmahe |
yannaH putrAn samuddishya tattvagrAma udAhR^itaH || 22||
ahaM yUyamasAvArya ime cha dvArakaukasaH |
sarve.apyevaM yadushreShTha vimR^ishyAH sacharAcharam || 23||
AtmA hyekaH svaya~njyotirnityo.anyo nirguNo guNaiH |
AtmasR^iShTaistatkR^iteShu bhUteShu bahudheyate || 24||
khaM vAyurjyotirApo bhUstatkR^iteShu yathAshayam |
Avistiro.alpabhUryeko nAnAtvaM yAtyasAvapi || 25||
shrIshuka uvAcha
evaM bhagavatA rAjan vasudeva udAhR^itam |
shrutvA vinaShTanAnAdhIstUShNIM prItamanA abhUt || 26||
atha tatra kurushreShTha devakI sarvadevatA |
shrutvA.a.anItaM guroH putramAtmajAbhyAM suvismitA || 27||
kR^iShNarAmau samAshrAvya putrAn kaMsavihiMsitAn |
smarantI kR^ipaNaM prAha vaiklavyAdashrulochanA || 28||
devakyuvAcha
rAma rAmAprameyAtman kR^iShNa yogeshvareshvara |
vedAhaM vAM vishvasR^ijAmIshvarAvAdipUruShau || 29||
kAlavidhvastasattvAnAM rAj~nAmuchChAstravartinAm |
bhUmerbhArAyamANAnAmavatIrNau kilAdya me || 30||
yasyAMshAMshAMshabhAgena vishvotpattilayodayAH |
bhavanti kila vishvAtmaMstaM tvAdyAhaM gatiM gatA || 31||
chirAnmR^itasutAdAne guruNA kila choditau |
AninyathuH pitR^isthAnAdgurave gurudakShiNAm || 32||
tathA me kurutaM kAmaM yuvAM yogeshvareshvarau |
bhojarAjahatAn putrAn kAmaye draShTumAhR^itAn || 33||
R^iShiruvAcha
evaM sa~nchoditau mAtrA rAmaH kR^iShNashcha bhArata |
sutalaM saMvivishaturyogamAyAmupAshritau || 34||
tasmin praviShTAvupalabhya daityarAD
vishvAtmadaivaM sutarAM tathA.a.atmanaH |
taddarshanAhlAdapariplutAshayaH
sadyaH samutthAya nanAma sAnvayaH || 35||
tayoH samAnIya varAsanaM mudA
niviShTayostatra mahAtmanostayoH |
dadhAra pAdAvavanijya tajjalaM
savR^inda Abrahma punadyadambu ha || 36||
samarhayAmAsa sa tau vibhUtibhiH
mahArhavastrAbharaNAnulepanaiH |
tAmbUladIpAmR^itabhakShaNAdibhiH
svagotravittAtmasamarpaNena cha || 37||
sa indraseno bhagavatpadAmbujaM
bibhranmuhuH premavibhinnayA dhiyA |
uvAcha hAnandajalAkulekShaNaH
prahR^iShTaromA nR^ipa gadgadAkSharam || 38||
baliruvAcha
namo.anantAya bR^ihate namaH kR^iShNAya vedhase |
sA~NkhyayogavitAnAya brahmaNe paramAtmane || 39||
darshanaM vAM hi bhUtAnAM duShprApaM chApyadurlabham |
rajastamaHsvabhAvAnAM yannaH prAptau yadR^ichChayA || 40||
daityadAnavagandharvAH siddhavidyAdhrachAraNAH |
yakSharakShaHpishAchAshcha bhUtapramathanAyakAH || 41||
vishuddhasattvadhAmnyaddhA tvayi shAstrasharIriNi |
nityaM nibaddhavairAste vayaM chAnye cha tAdR^ishAH || 42||
kechanodbaddhavaireNa bhaktyA kechana kAmataH |
na tathA sattvasaMrabdhAH sannikR^iShTAH surAdayaH || 43||
idamitthamiti prAyastava yogeshvareshvara |
na vidantyapi yogeshA yogamAyAM kuto vayam || 44||
tannaH prasIda nirapekShavimR^igyayuShmat
pAdAravindadhiShaNAnyagR^ihAndhakUpAt |
niShkramya vishvasharaNA~NghryupalabdhavR^ittiH
shAnto yathaika uta sarvasakhaishcharAmi || 45||
shAdhyasmAnIshitavyesha niShpApAn kuru naH prabho |
pumAn yachChraddhayA.a.atiShThaMshchodanAyA vimuchyate || 46||
shrIbhagavAnuvAcha
Asan marIcheH ShaT putrA UrNAyAM prathame.antare |
devAH kaM jahasurvIkShya sutAM yabhitumudyatam || 47||
tenAsurImagan yonimadhunAvadyakarmaNA |
hiraNyakashiporjAtA nItAste yogamAyayA || 48||
devakyA udare jAtA rAjan kaMsavihiMsitAH |
sA tAn shochatyAtmajAn svAMsta ime.adhyAsate.antike || 49||
ita etAn praNeShyAmo mAtR^ishokApanuttaye |
tataH shApAdvinirmuktA lokaM yAsyanti vijvarAH || 50||
smarodgIthaH pariShva~NgaH pata~NgaH kShudrabhR^idghR^iNI |
ShaDime matprasAdena punaryAsyanti sadgatim || 51||
ityuktvA tAn samAdAya indrasenena pUjitau |
punardvAravatImetya mAtuH putrAnayachChatAm || 52||
tAn dR^iShTvA bAlakAn devI putrasnehasnutastanI |
pariShvajyA~NkamAropya mUrdhnyajighradabhIkShNashaH || 53||
apAyayatstanaM prItA sutasparshapariplutA |
mohitA mAyayA viShNoryayA sR^iShTiH pravartate || 54||
pItvAmR^itaM payastasyAH pItasheShaM gadAbhR^itaH |
nArAyaNA~NgasaMsparshapratilabdhAtmadarshanAH || 55||
te namaskR^itya govindaM devakIM pitaraM balam |
miShatAM sarvabhUtAnAM yayurdhAma divaukasAm || 56||
taM dR^iShTvA devakI devI mR^itAgamananirgamam |
mene suvismitA mAyAM kR^iShNasya rachitAM nR^ipa || 57||
evaM vidhAnyadbhutAni kR^iShNasya paramAtmanaH |
vIryANyanantavIryasya santyanantAni bhArata || 58||
sUta uvAcha
ya idamanushR^iNoti shrAvayedvA murAre\-
shcharitamamR^itakIrtervarNitaM vyAsaputraiH |
jagadaghabhidalaM tadbhaktasatkarNapUraM
bhagavati kR^itachitto yAti tatkShemadhAma || 59||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe mR^itAgrajAnayanaM
nAma pa~nchAshItitamo.adhyAyaH || 85||
\iti
\section{.. OM namo bhagavate vAsudevAya ..}
\section{.. ShaDashItitamo.adhyAyaH \- 86 ..}
rAjovAcha
brahman veditumichChAmaH svasArAM rAmakR^iShNayoH |
yathopayeme vijayo yA mamAsItpitAmahI || 1||
shrIshuka uvAcha
arjunastIrthayAtrAyAM paryaTannavanIM prabhuH |
gataH prabhAsamashR^iNonmAtuleyIM sa AtmanaH || 2||
duryodhanAya rAmastAM dAsyatIti na chApare |
tallipsuH sa yatirbhUtvA tridaNDI dvArakAmagAt || 3||
tatra vai vArShikAn mAsAnavAtsItsvArthasAdhakaH |
pauraiH sabhAjito.abhIkShNaM rAmeNAjAnatA cha saH || 4||
ekadA gR^ihamAnIya Atithyena nimantrya tam |
shraddhayopahR^itaM bhaikShyaM balena bubhuje kila || 5||
so.apashyattatra mahatIM kanyAM vIramanoharAm |
prItyutphullekShaNastasyAM bhAvakShubdhaM mano dadhe || 6||
sApi taM chakame vIkShya nArINAM hR^idaya~Ngamam |
hasantI vrIDitApA~NgI tannyastahR^idayekShaNA || 7||
tAM paraM samanudhyAyannantaraM prepsurarjunaH |
na lebhe shaM bhramachchittaH kAmenAtibalIyasA || 8||
mahatyAM devayAtrAyAM rathasthAM durganirgatAm |
jahArAnumataH pitroH kR^iShNasya cha mahArathaH || 9||
rathastho dhanurAdAya shUrAMshchArundhato bhaTAn |
vidrAvya kroshatAM svAnAM svabhAgaM mR^igarADiva || 10||
tachChrutvA kShubhito rAmaH parvaNIva mahArNavaH |
gR^ihItapAdaH kR^iShNena suhR^idbhishchAnvashAmyata || 11||
prAhiNotpAribarhANi varavadhvormudA balaH |
mahAdhanopaskarebharathAshvanarayoShitaH || 12||
shrIshuka uvAcha
kR^iShNasyAsIddvijashreShThaH shrutadeva iti shrutaH |
kR^iShNaikabhaktyA pUrNArthaH shAntaH kaviralampaTaH || 13||
sa uvAsa videheShu mithilAyAM gR^ihAshramI |
anIhayA.a.agatAhAryanirvartitanijakriyaH || 14||
yAtrAmAtraM tvaharahardaivAdupanamatyuta |
nAdhikaM tAvatA tuShTaH kriyAshchakre yathochitAH || 15||
tathA tadrAShTrapAlo.a~Nga bahulAshva iti shrutaH |
maithilo nirahammAna ubhAvapyachyutapriyau || 16||
tayoH prasanno bhagavAn dArukeNAhR^itaM ratham |
Aruhya sAkaM munibhirvidehAn prayayau prabhuH || 17||
nArado vAmadevo.atriH kR^iShNo rAmo.asito.aruNiH |
ahaM bR^ihaspatiH kaNvo maitreyashchyavanAdayaH || 18||
tatra tatra tamAyAntaM paurA jAnapadA nR^ipa |
upatasthuH sArghyahastA grahaiH sUryamivoditam || 19||
AnartadhanvakurujA~Ngalaka~Nkamatsya\-
pA~nchAlakuntimadhukekayakosalArNAH |
anye cha tanmukhasarojamudArahAsa\-
snigdhekShaNaM nR^ipa papurdR^ishibhirnR^inAryaH || 20||
tebhyaH svavIkShaNavinaShTatamisradR^igbhyaH
kShemaM trilokagururarthadR^ishaM cha yachChan |
shR^iNvan digantadhavalaM svayasho.ashubhaghnaM
gItaM surairnR^ibhiragAchChanakairvidehAn || 21||
te.achyutaM prAptamAkarNya paurA jAnapadA nR^ipa |
abhIyurmuditAstasmai gR^ihItArhaNapANayaH || 22||
dR^iShTvA ta uttamashlokaM prItyutphullAnanAshayAH |
kairdhR^itA~njalibhirnemuH shrutapUrvAMstathA munIn || 23||
svAnugrahAya samprAptaM manvAnau taM jagadgurum |
maithilaH shrutadevashcha pAdayoH petatuH prabhoH || 24||
nyamantrayetAM dAshArhamAtithyena saha dvijaiH |
maithilaH shrutadevashcha yugapatsaMhatA~njalI || 25||
bhagavAMstadabhipretya dvayoH priyachikIrShayA |
ubhayorAvishadgehamubhAbhyAM tadalakShitaH || 26||
shrotumapyasatAM dUrAn janakaH svagR^ihAgatAn |
AnIteShvAsanAgryeShu sukhAsInAn mahAmanAH || 27||
pravR^iddhabhaktyA uddharShahR^idayAsrAvilekShaNaH |
natvA tada~NghrIn prakShAlya tadapo lokapAvanIH || 28||
sakuTumbo vahan mUrdhnA pUjayA~nchakra IshvarAn |
gandhamAlyAmbarAkalpadhUpadIpArghyagovR^iShaiH || 29||
vAchA madhurayA prINannidamAhAnnatarpitAn |
pAdAva~Nkagatau viShNoH saMspR^isha~nChanakairmudA || 30||
rAjovAcha
bhavAn hi sarvabhUtAnAmAtmA sAkShI svadR^igvibho |
atha nastvatpadAmbhojaM smaratAM darshanaM gataH || 31||
svavachastadR^itaM kartumasmaddR^iggocharo bhavAn |
yadAtthaikAntabhaktAnme nAnantaH shrIrajaH priyaH || 32||
ko nu tvachcharaNAmbhojamevaMvidvisR^ijetpumAn |
niShki~nchanAnAM shAntAnAM munInAM yastvamAtmadaH || 33||
yo.avatIrya yadorvaMshe nR^iNAM saMsaratAmiha |
yasho vitene tachChAntyai trailokyavR^ijinApaham || 34||
namastubhyaM bhagavate kR^iShNAyAkuNThamedhase |
nArAyaNAya R^iShaye sushAntaM tapa IyuShe || 35||
dinAni katichidbhUman gR^ihAn no nivasa dvijaiH |
sametaH pAdarajasA punIhIdaM nimeH kulam || 36||
ityupAmantrito rAj~nA bhagavAMllokabhAvanaH |
uvAsa kurvan kalyANaM mithilAnarayoShitAm || 37||
shrutadevo.achyutaM prAptaM svagR^ihA~njanako yathA |
natvA munIn susaMhR^iShTo dhunvan vAso nanarta ha || 38||
tR^iNapIThabR^iShIShvetAnAnIteShUpaveshya saH |
svAgatenAbhinandyA~NghrIn sabhAryo.avanije mudA || 39||
tadambhasA mahAbhAga AtmAnaM sa gR^ihAnvayam |
snApayA~nchakra uddharSho labdhasarvamanorathaH || 40||
phalArhaNoshIrashivAmR^itAmbubhi\-
rmR^idA surabhyA tulasIkushAmbujaiH |
ArAdhayAmAsa yathopapannayA
saparyayA sattvavivardhanAndhasA || 41||
sa tarkayAmAsa kuto mamAnvabhU\-
dgR^ihAndhakupe patitasya sa~NgamaH |
yaH sarvatIrthAspadapAdareNubhiH
kR^iShNena chAsyAtmaniketabhUsuraiH || 42||
sUpaviShTAn kR^itAtithyAn shrutadeva upasthitaH |
sabhAryasvajanApatya uvAchA~NghryabhimarshanaH || 43||
shrutadeva uvAcha
nAdya no darshanaM prAptaH paraM paramapUruShaH |
yarhIdaM shaktibhiH sR^iShTvA praviShTo hyAtmasattayA || 44||
yathA shayAnaH puruSho manasaivAtmamAyayA |
sR^iShTvA lokaM paraM svApnamanuvishyAvabhAsate || 45||
shR^iNvatAM gadatAM shashvadarchatAM tvAbhivandatAm |
nR^iNAM saMvadatAmantarhR^idi bhAsyamalAtmanAm || 46||
hR^idistho.apyatidUrasthaH karmavikShiptachetasAm |
AtmashaktibhiragrAhyo.apyantyupetaguNAtmanAm || 47||
namo.astu te.adhyAtmavidAM parAtmane
anAtmane svAtmavibhaktamR^ityave |
sakAraNAkAraNali~NgamIyuShe
svamAyayAsaMvR^itaruddhadR^iShTaye || 48||
sa tvaM shAdhi svabhR^ityAnnaH kiM deva karavAma he |
etadanto nR^iNAM klesho yadbhavAnakShigocharaH || 49||
shrIshuka uvAcha
taduktamityupAkarNya bhagavAn praNatArtihA |
gR^ihItvA pANinA pANiM prahasaMstamuvAcha ha || 50||
shrIbhagavAnuvAcha
brahmaMste.anugrahArthAya samprAptAn vid.hdhyamUn munIn |
sa~ncharanti mayA lokAn punantaH pAdareNubhiH || 51||
devAH kShetrANi tIrthAni darshanasparshanArchanaiH |
shanaiH punanti kAlena tadapyarhattamekShayA || 52||
brAhmaNo janmanA shreyAn sarveShAM prANinAmiha |
tapasA vidyayA tuShTyA kimu matkalayA yutaH || 53||
na brAhmaNAnme dayitaM rUpametachchaturbhujam |
sarvavedamayo vipraH sarvadevamayo hyaham || 54||
duShpraj~nA aviditvaivamavajAnantyasUyavaH |
guruM mAM vipramAtmAnamarchAdAvijyadR^iShTayaH || 55||
charAcharamidaM vishvaM bhAvA ye chAsya hetavaH |
madrUpANIti chetasyAdhatte vipro madIkShayA || 56||
tasmAdbrahmaR^iShInetAn brahman machChraddhayArchaya |
evaM chedarchito.asmyaddhA nAnyathA bhUribhUtibhiH || 57||
shrIshuka uvAcha
sa itthaM prabhuNA.a.adiShTaH saha kR^iShNAn dvijottamAn |
ArAdhyaikAtmabhAvena maithilashchApa sadgatim || 58||
evaM svabhaktayo rAjan bhagavAn bhaktabhaktimAn |
uShitvA.a.adishya sanmArgaM punardvAravatImagAt || 59||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe shrutadevAnugraho
nAma ShaDashItitamo.adhyAyaH || 86||
\iti
\section{.. OM namo bhagavate vAsudevAya ..}
\section{.. saptAshItitamo.adhyAyaH \- 87 ..}
parIkShiduvAcha
brahman brahmaNyanirdeshye nirguNe guNavR^ittayaH |
kathaM charanti shrutayaH sAkShAtsadasataH pare || 1||
shrIshuka uvAcha
buddhIndriyamanaHprANAn janAnAmasR^ijatprabhuH |
mAtrArthaM cha bhavArthaM cha Atmane.akalpanAya cha || 2||
saiShA hyupaniShadbrAhmI pUrveShAM pUrvajairdhR^itA |
shraddhayA dhArayedyastAM kShemaM gachChedaki~nchanaH || 3||
atra te varNayiShyAmi gAthAM nArAyaNAnvitAm |
nAradasya cha saMvAdamR^iShernArAyaNasya cha || 4||
ekadA nArado lokAn paryaTan bhagavatpriyaH |
sanAtanamR^iShiM draShTuM yayau nArAyaNAshramam || 5||
yo vai bhAratavarShe.asmin kShemAya svastaye nR^iNAm |
dharmaj~nAnashamopetamAkalpAdAsthitastapaH || 6||
tatropaviShTamR^iShibhiH kalApagrAmavAsibhiH |
parItaM praNato.apR^ichChadidameva kurUdvaha || 7||
tasmai hyavochadbhagavAn R^iShINAM shR^iNvatAmidam |
yo brahmavAdaH pUrveShAM janalokanivAsinAm || 8||
shrIbhagavAnuvAcha
svAyambhuva brahmasatraM janaloke.abhavatpurA |
tatrasthAnAM mAnasAnAM munInAmUrdhvaretasAm || 9||
shvetadvIpaM gatavati tvayi draShTuM tadIshvaram |
brahmavAdaH susaMvR^ittaH shrutayo yatra sherate |
tatra hAyamabhUtprashnastvaM mAM yamanupR^ichChasi || 10||
tulyashrutatapaHshIlAstulyasvIyArimadhyamAH |
api chakruH pravachanamekaM shushrUShavo.apare || 11||
sanandana uvAcha
svasR^iShTamidamApIya shayAnaM saha shaktibhiH |
tadante bodhayA~nchakrustalli~NgaiH shrutayaH param || 12||
yathA shayAnaM samrAjaM vandinastatparAkramaiH |
pratyUShe.abhyetya sushlokairbodhayantyanujIvinaH || 13||
shrutaya UchuH
jaya jaya jahyajAmajita doShagR^ibhItaguNAM
tvamasi yadAtmanA samavaruddhasamastabhagaH |
agajagadokasAmakhilashaktyavabodhaka te
kvachidajayA.a.atmanA cha charato.anucharennigamaH || 14||
bR^ihadupalabdhametadavayantyavasheShatayA
yata udayAstamayau vikR^itermR^idi vAvikR^itAt |
ata R^iShayo dadhustvayi manovachanAcharitaM
kathamayathA bhavanti bhuvi dattapadAni nR^iNAm || 15||
iti tava sUrayastryadhipate.akhilalokamala\-
kShapaNakathAmR^itAbdhimavagAhya tapAMsi jahuH |
kimuta punaH svadhAmavidhutAshayakAlaguNAH
parama bhajanti ye padamajasrasukhAnubhavam || 16||
dR^itaya iva shvasantyasubhR^ito yadi te.anuvidhA
mahadahamAdayo.aNDamasR^ijan yadanugrahataH |
puruShavidho.anvayo.atra charamo.annamayAdiShu yaH
sadasataH paraM tvamatha yadeShvavasheShamR^itam || 17||
udaramupAsate ya R^iShivartmasu kUrpadR^ishaH
parisarapaddhatiM hR^idayamAruNayo daharam |
tata udagAdananta tava dhAma shiraH paramaM
punariha yatsametya na patanti kR^itAntamukhe || 18||
svakR^itavichitrayoniShu vishanniva hetutayA
taratamatashchakAssyanalavatsvakR^itAnukR^itiH |
atha vitathAsvamUShvavitathaM tava dhAma samaM
virajadhiyo.anvayantyabhivipaNyava ekarasam || 19||
svakR^itapureShvamIShvabahirantarasaMvaraNaM
tava puruShaM vadantyakhilashaktidhR^itoM.ashakR^itam |
iti nR^igatiM vivichya kavayo nigamAvapanaM
bhavata upAsate.a~NghrimabhavaM bhuvi vishvasitAH || 20||
duravagamAtmatattvanigamAya tavAttatanoH
charitamahAmR^itAbdhiparivartaparishramaNAH |
na parilaShanti kechidapavargamapIshvara te
charaNasarojahaMsakulasa~NgavisR^iShTagR^ihAH || 21||
tvadanupathaM kulAyamidamAtmasuhR^itpriyavat
charati tathonmukhe tvayi hite priya Atmani cha |
na bata ramantyaho asadupAsanayA.a.atmahano
yadanushayA bhramantyurubhaye kusharIrabhR^itaH || 22||
nibhR^itamarunmano.akShadR^iDhayogayujo hR^idi
yanmunaya upAsate tadarayo.api yayuH smaraNAt |
striya uragendrabhogabhujadaNDaviShaktadhiyo
vayamapi te samAH samadR^isho.a~NghrisarojasudhAH || 23||
ka iha nu veda batAvarajanmalayo.agrasaraM
yata udagAdR^iShiryamanu devagaNA ubhaye |
tarhi na sanna chAsadubhayaM na cha kAlajavaH
kimapi na tatra shAstramavakR^iShya shayIta yadA || 24||
janimasataH sato mR^itimutAtmani ye cha bhidAM
vipaNamR^itaM smarantyupadishanti ta ArupitaiH |
triguNamayaH pumAniti bhidA yadabodhakR^itA
tvayi na tataH paratra sa bhavedavabodharase || 25||
sadiva manastrivR^ittvayi vibhAtyasadAmanujAt
sadabhimR^ishantyasheShamidamAtmatayA.a.atmavidaH |
na hi vikR^itiM tyajanti kanakasya tadAtmatayA
svakR^itamanupraviShTamidamAtmatayAvasitam || 26||
tava pari ye charantyakhilasattvaniketatayA
ta uta padA.a.akramantyavigaNayya shiro nirR^iteH |
parivayase pashUniva girA vibudhAnapi tAMstvayi
kR^itasauhR^idAH khalu punanti na ye vimukhAH || 27||
tvamakaraNaH svarADakhilakArakashaktidharaH
tava balimudvahanti samadantyajayAnimiShAH |
varShabhujo.akhilakShitipateriva vishvasR^ijo
vidadhati yatra ye tvadhikR^itA bhavatashchakitAH || 28||
sthiracharajAtayaH syurajayotthanimittayujo
vihara udIkShayA yadi parasya vimukta tataH |
na hi paramasya kashchidaparo na parashcha bhavet
viyata ivApadasya tava shUnyatulAM dadhataH || 29||
aparimitA dhruvAstanubhR^ito yadi sarvagatAH
tarhi na shAsyateti niyamo dhruva netarathA |
ajani cha yanmayaM tadavimuchya niyantR^i bhavet
samamanujAnatAM yadamataM mataduShTatayA || 30||
na ghaTata udbhavaH prakR^itipUruShayorajayoH
ubhayayujA bhavantyasubhR^ito jalabudbudavat |
tvayi ta ime tato vividhanAmaguNaiH parame
sarita ivArNave madhuni lilyurasheSharasAH || 31||
nR^iShu tava mAyayA bhramamamIShvavagatya bhR^ishaM
tvayi sudhiyo.abhave dadhati bhAvamanuprabhavam |
kathamanuvartatAM bhavabhayaM tava yadbhrukuTiH
sR^ijati muhustriNemirabhavachCharaNeShu bhayam || 32||
vijitahR^iShIkavAyubhiradAntamanasturagaM
ya iha yatanti yantumatilolamupAyakhidaH |
vyasanashatAnvitAH samavahAya guroshcharaNaM
vaNija ivAja santyakR^itakarNadharA jaladhau || 33||
svajanasutAtmadAradhanadhAmadharAsurathaiH
tvayi sati kiM nR^iNAM shrayata Atmani sarvarase |
iti sadajAnatAM mithunato rataye charatAM
sukhayati ko nviha svavihate svanirastabhage || 34||
bhuvi purupuNyatIrthasadanAnyR^iShayo vimadAH
ta uta bhavatpadAmbujahR^ido.aghabhida~NghrijalAH |
dadhati sakR^inmanastvayi ya Atmani nityasukhe
na punarupAsate puruShasAraharAvasathAn || 35||
sata idamutthitaM saditi chennanu tarkahataM
vyabhicharati kva cha kva cha mR^iShA na tathobhayayuk |
vyavahR^itaye vikalpa iShito.andhaparamparayA
bhramayati bhAratI ta uruvR^ittibhirukthajaDAn || 36||
na yadidamagra Asa na bhaviShyadato nidhanAt
anumitamantarA tvayi vibhAti mR^iShaikarase |
ata upamIyate draviNajAtivikalpapathaiH
vitathamanovilAsamR^itamityavayantyabudhAH || 37||
sa yadajayA tvajAmanushayIta guNAMshcha juShan
bhajati sarUpatAM tadanu mR^ityumapetabhagaH |
tvamuta jahAsi tAmahiriva tvachamAttabhago
mahasi mahIyase.aShTaguNite.aparimeyabhagaH || 38||
yadi na samuddharanti yatayo hR^idi kAmajaTA
duradhigamo.asatAM hR^idi gato.asmR^itakaNThamaNiH |
asutR^ipayoginAmubhayato.apyasukhaM bhagavan
anapagatAntakAdanadhirUDhapadAdbhavataH || 39||
tvadavagamI na vetti bhavadutthashubhAshubhayoH
guNaviguNAnvayAMstarhi dehabhR^itAM cha giraH |
anuyugamanvahaM saguNa gItaparamparayA
shravaNabhR^ito yatastvamapavargagatirmanujaiH || 40||
dyupataya eva te na yayurantamanantatayA
tvamapi yadantarANDanichayA nanu sAvaraNAH |
kha iva rajAMsi vAnti vayasA saha yachChrutayaH
tvayi hi phalantyatannirasanena bhavannidhanAH || 41||
shrIbhagavAnuvAcha
ityetadbrahmaNaH putrA AshrutyAtmAnushAsanam |
sanandanamathAnarchuH siddhA j~nAtvA.a.atmano gatim || 42||
ityasheShasamAmnAyapurANopaniShadrasaH |
samuddhR^itaH pUrvajAtairvyomayAnairmahAtmabhiH || 43||
tvaM chaitadbrahmadAyAda shraddhayA.a.atmAnushAsanam |
dhArayaMshchara gAM kAmaM kAmAnAM bharjanaM nR^iNAm || 44||
shrIshuka uvAcha
evaM sa R^iShiNA.a.adiShTaM gR^ihItvA shraddhayA.a.atmavAn |
pUrNaH shrutadharo rAjannAha vIravrato muniH || 45||
nArada uvAcha
namastasmai bhagavate kR^iShNAyAmalakIrtaye |
yo dhatte sarvabhUtAnAmabhavAyoshatIH kalAH || 46||
ityAdyamR^iShimAnamya tachChiShyAMshcha mahAtmanaH |
tato.agAdAshramaM sAkShAtpiturdvaipAyanasya me || 47||
sabhAjito bhagavatA kR^itAsanaparigrahaH |
tasmai tadvarNayAmAsa nArAyaNamukhAchChrutam || 48||
ityetadvarNitaM rAjan yannaH prashnaH kR^itastvayA |
yathA brahmaNyanirdeshye nirguNe.api manashcharet || 49||
yo.asyotprekShaka Adimadhyanidhane yo.avyaktajIveshvaro
yaH sR^iShTvedamanupravishya R^iShiNA chakre puraH shAsti tAH |
yaM sampadya jahAtyajAmanushayI suptaH kulAyaM yathA
taM kaivalyanirastayonimabhayaM dhyAyedajasraM harim || 50||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe nAradanArAyaNa\-
saMvAde vedastutirnAma saptAshItitamo.adhyAyaH || 87||
\iti
\section{.. OM namo bhagavate vAsudevAya ..}
\section{.. aShTAshItitamo.adhyAyaH \- 88 ..}
rAjovAcha
devAsuramanuShyeShu ye bhajantyashivaM shivam |
prAyaste dhanino bhojA na tu lakShmyAH patiM harim || 1||
etadveditumichChAmaH sandeho.atra mahAn hi naH |
viruddhashIlayoH prabhvorviruddhA bhajatAM gatiH || 2||
shrIshuka uvAcha
shivaH shaktiyutaH shashvattrili~Ngo guNasaMvR^itaH |
vaikArikastaijasashcha tAmasashchetyahaM tridhA || 3||
tato vikArA abhavan ShoDashAmIShu ka~nchana |
upadhAvan vibhUtInAM sarvAsAmashnute gatim || 4||
harirhi nirguNaH sAkShAtpuruShaH prakR^iteH paraH |
sa sarvadR^igupadraShTA taM bhajan nirguNo bhavet || 5||
nivR^itteShvashvamedheShu rAjA yuShmatpitAmahaH |
shR^iNvan bhagavato dharmAnapR^ichChadidamachyutam || 6||
sa Aha bhagavAMstasmai prItaH shushrUShave prabhuH |
nR^iNAM niHshreyasArthAya yo.avatIrNo yadoH kule || 7||
shrIbhagavAnuvAcha
yasyAhamanugR^ihNAmi hariShye taddhanaM shanaiH |
tato.adhanaM tyajantyasya svajanA duHkhaduHkhitam || 8||
sa yadA vitathodyogo nirviNNaH syAddhanehayA |
matparaiH kR^itamaitrasya kariShye madanugraham || 9||
tadbrahma paramaM sUkShmaM chinmAtraM sadanantakam |
(vij~nAyAtmatayA dhIraH saMsArAtparimuchyate |)
ato mAM sudurArAdhyaM hitvAnyAn bhajate janaH || 10||
tatasta AshutoShebhyo labdharAjyashriyoddhatAH |
mattAH pramattA varadAn vismarantyavajAnate || 11||
shrIshuka uvAcha
shApaprasAdayorIshA brahmaviShNushivAdayaH |
sadyaH shApaprasAdo.a~Nga shivo brahmA na chAchyutaH || 12||
atra chodAharantImamitihAsaM purAtanam |
vR^ikAsurAya girisho varaM dattvA.a.apa sa~NkaTam || 13||
vR^iko nAmAsuraH putraH shakuneH pathi nAradam |
dR^iShTvA.a.ashutoShaM paprachCha deveShu triShu durmatiH || 14||
sa Aha devaM girishamupAdhAvAshu sid.hdhyasi |
yo.alpAbhyAM guNadoShAbhyAmAshu tuShyati kupyati || 15||
dashAsyabANayostuShTaH stuvatorvandinoriva |
aishvaryamatulaM dattvA tata Apa susa~NkaTam || 16||
ityAdiShTastamasura upAdhAvatsvagAtrataH |
kedAra AtmakravyeNa juhvAno.agnimukhaM haram || 17||
devopalabdhimaprApya nirvedAtsaptame.ahani |
shiro.avR^ishchatsvadhitinA tattIrthaklinnamUrdhajam || 18||
tadA mahAkAruNikaH sa dhUrjaTi\-
ryathA vayaM chAgnirivotthito.analAt |
nigR^ihya dorbhyAM bhujayornyavAraya\-
ttatsparshanAdbhUya upaskR^itAkR^itiH || 19||
tamAha chA~NgAlamalaM vR^iNIShva me
yathAbhikAmaM vitarAmi te varam |
prIyeya toyena nR^iNAM prapadyatA\-
maho tvayA.a.atmA bhR^ishamardyate vR^ithA || 20||
devaM sa vavre pApIyAn varaM bhUtabhayAvaham |
yasya yasya karaM shIrShNi dhAsye sa mriyatAmiti || 21||
tachChrutvA bhagavAn rudro durmanA iva bhArata |
oM iti prahasaMstasmai dade.aheramR^itaM yathA || 22||
ityuktaH so.asuro nUnaM gaurIharaNalAlasaH |
sa tadvaraparIkShArthaM shambhormUrdhni kilAsuraH |
svahastaM dhAtumArebhe so.abibhyatsvakR^itAchChivaH || 23||
tenopasR^iShTaH santrastaH parAdhAvan savepathuH |
yAvadantaM divo bhUmeH kAShThAnAmudagAdudak || 24||
ajAnantaH pratividhiM tUShNImAsan sureshvarAH |
tato vaikuNThamagamadbhAsvaraM tamasaH param || 25||
yatra nArAyaNaH sAkShAnnyAsinAM paramA gatiH |
shAntAnAM nyastadaNDAnAM yato nAvartate gataH || 26||
taM tathAvyasanaM dR^iShTvA bhagavAn vR^ijinArdanaH |
dUrAtpratyudiyAdbhUtvA vaTuko yogamAyayA || 27||
mekhalAjinadaNDAkShaistejasAgniriva jvalan |
abhivAdayAmAsa cha taM kushapANirvinItavat || 28||
shrIbhagavAnuvAcha
shAkuneya bhavAn vyaktaM shrAntaH kiM dUramAgataH |
kShaNaM vishramyatAM puMsa AtmAyaM sarvakAmadhuk || 29||
yadi naH shravaNAyAlaM yuShmadvyavasitaM vibho |
bhaNyatAM prAyashaH pumbhirdhR^itaiH svArthAn samIhate || 30||
shrIshuka uvAcha
evaM bhagavatA pR^iShTo vachasAmR^itavarShiNA |
gataklamo.abravIttasmai yathApUrvamanuShThitam || 31||
shrIbhagavAnuvAcha
evaM chettarhi tadvAkyaM na vayaM shraddadhImahi |
yo dakShashApAtpaishAchyaM prAptaH pretapishAcharAT || 32||
yadi vastatra vishrambho dAnavendra jagadgurau |
tarhya~NgAshu svashirasi hastaM nyasya pratIyatAm || 33||
yadyasatyaM vachaH shambhoH katha~nchiddAnavarShabha |
tadainaM jahyasadvAchaM na yadvaktAnR^itaM punaH || 34||
itthaM bhagavatashchitrairvachobhiH sa supeshalaiH |
bhinnadhIrvismR^itaH shIrShNi svahastaM kumatirvyadhAt || 35||
athApatadbhinnashirAH vajrAhata iva kShaNAt |
jayashabdo namaHshabdaH sAdhushabdo.abhavaddivi || 36||
mumuchuH puShpavarShANi hate pApe vR^ikAsure |
devarShipitR^igandharvA mochitaH sa~NkaTAchChivaH || 37||
muktaM girishamabhyAha bhagavAn puruShottamaH |
aho deva mahAdeva pApo.ayaM svena pApmanA || 38||
hataH ko nu mahatsvIsha janturvai kR^itakilbiShaH |
kShemI syAtkimu vishveshe kR^itAgasko jagadgurau || 39||
ya evamavyAkR^itashaktyudanvataH
parasya sAkShAtparamAtmano hareH |
giritramokShaM kathayechChR^iNoti vA
vimuchyate saMsR^itibhistathAribhiH || 40||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe rudramokShaNaM
nAmAShTAshItitamo.adhyAyaH || 88||
\iti
\section{.. OM namo bhagavate vAsudevAya ..}
\section{.. ekonanavatitamo.adhyAyaH \- 89 ..}
shrIshuka uvAcha
sarasvatyAstaTe rAjan R^iShayaH satramAsata |
vitarkaH samabhUtteShAM triShvadhIsheShu ko mahAn || 1||
tasya jij~nAsayA te vai bhR^iguM brahmasutaM nR^ipa |
tajj~naptyai preShayAmAsuH so.abhyagAdbrahmaNaH sabhAm || 2||
na tasmai prahvaNaM stotraM chakre sattvaparIkShayA |
tasmai chukrodha bhagavAn prajvalan svena tejasA || 3||
sa AtmanyutthitaM manyumAtmajAyAtmanA prabhuH |
ashIshamadyathA vahniM svayonyA vAriNA.a.atmabhUH || 4||
tataH kailAsamagamatsa taM devo maheshvaraH |
parirabdhuM samArebha utthAya bhrAtaraM mudA || 5||
naichChattvamasyutpathaga iti devashchukopa ha |
shUlamudyamya taM hantumArebhe tigmalochanaH || 6||
patitvA pAdayordevI sAntvayAmAsa taM girA |
atho jagAma vaikuNThaM yatra devo janArdanaH || 7||
shayAnaM shriya utsa~Nge padA vakShasyatADayat |
tata utthAya bhagavAn saha lakShmyA satAM gatiH || 8||
svatalpAdavaruhyAtha nanAma shirasA munim |
Aha te svAgataM brahman niShIdAtrAsane kShaNam |
ajAnatAmAgatAn vaH kShantumarhatha naH prabho || 9||
atIva komalau tAta charaNau te mahAmune |
ityuktvA vipracharaNau mardayan svena pANinA || 10||
punIhi saha lokaM mAM lokapAlAMshcha madgatAn |
pAdodakena bhavatastIrthAnAM tIrthakAriNA || 11||
adyAhaM bhagavaMllakShmyA AsamekAntabhAjanam |
vatsyatyurasi me bhUtirbhavatpAdahatAMhasaH || 12||
shrIshuka uvAcha
evaM bruvANe vaikuNThe bhR^igustanmandrayA girA |
nirvR^itastarpitastUShNIM bhaktyutkaNTho.ashrulochanaH || 13||
punashcha satramAvrajya munInAM brahmavAdinAm |
svAnubhUtamasheSheNa rAjan bhR^iguravarNayat || 14||
tannishamyAtha munayo vismitA muktasaMshayAH |
bhUyAMsaM shraddadhurviShNuM yataH shAntiryato.abhayam || 15||
dharmaH sAkShAdyato j~nAnaM vairAgyaM cha tadanvitam |
aishvaryaM chAShTadhA yasmAdyashashchAtmamalApaham || 16||
munInAM nyastadaNDAnAM shAntAnAM samachetasAm |
aki~nchanAnAM sAdhUnAM yamAhuH paramAM gatim || 17||
sattvaM yasya priyA mUrtirbrAhmaNAstviShTadevatAH |
bhajantyanAshiShaH shAntA yaM vA nipuNabuddhayaH || 18||
trividhAkR^itayastasya rAkShasA asurAH surAH |
guNinyA mAyayA sR^iShTAH sattvaM tattIrthasAdhanam || 19||
shrIshuka uvAcha
evaM sArasvatA viprA nR^iNAM saMshayanuttaye |
puruShasya padAmbhojasevayA tadgatiM gatAH || 20||
sUta uvAcha
ityetanmunitanayAsyapadmagandha\-
pIyUShaM bhavabhayabhitparasya puMsaH |
sushlokaM shravaNapuTaiH pibatyabhIkShNaM
pAntho.adhvabhramaNaparishramaM jahAti || 21||
shrIshuka uvAcha
ekadA dvAravatyAM tu viprapatnyAH kumArakaH |
jAtamAtro bhuvaM spR^iShTvA mamAra kila bhArata || 22||
vipro gR^ihItvA mR^itakaM rAjadvAryupadhAya saH |
idaM provAcha vilapannAturo dInamAnasaH || 23||
brahmadviShaH shaThadhiyo lubdhasya viShayAtmanaH |
kShatrabandhoH karmadoShAtpa~nchatvaM me gato.arbhakaH || 24||
hiMsAvihAraM nR^ipatiM duHshIlamajitendriyam |
prajA bhajantyaH sIdanti daridrA nityaduHkhitAH || 25||
evaM dvitIyaM viprarShistR^itIyaM tvevameva cha |
visR^ijya sa nR^ipadvAri tAM gAthAM samagAyata || 26||
tAmarjuna upashrutya karhichitkeshavAntike |
parete navame bAle brAhmaNaM samabhAShata || 27||
kiM svidbrahmaMstvannivAse iha nAsti dhanurdharaH |
rAjanyabandhurete vai brAhmaNAH satra Asate || 28||
dhanadArAtmajApR^iktA yatra shochanti brAhmaNAH |
te vai rAjanyaveSheNa naTA jIvantyasumbharAH || 29||
ahaM prajA vAM bhagavan rakShiShye dInayoriha |
anistIrNapratij~no.agniM pravekShye hatakalmaShaH || 30||
brAhmaNa uvAcha
sa~NkarShaNo vAsudevaH pradyumno dhanvinAM varaH |
aniruddho.apratiratho na trAtuM shaknuvanti yat || 31||
tatkathaM nu bhavAn karma duShkaraM jagadIshvaraiH |
chikIrShasi tvaM bAlishyAttanna shraddadhmahe vayam || 32||
arjuna uvAcha
nAhaM sa~NkarShaNo brahman na kR^iShNaH kArShNireva cha |
ahaM vA arjuno nAma gANDIvaM yasya vai dhanuH || 33||
mAvamaMsthA mama brahman vIryaM tryambakatoShaNam |
mR^ityuM vijitya pradhane AneShye te prajAM prabho || 34||
evaM vishrambhito vipraH phAlgunena parantapa |
jagAma svagR^ihaM prItaH pArthavIryaM nishAmayan || 35||
prasUtikAla Asanne bhAryAyA dvijasattamaH |
pAhi pAhi prajAM mR^ityorityAhArjunamAturaH || 36||
sa upaspR^ishya shuchyambho namaskR^itya maheshvaram |
divyAnyastrANi saMsmR^itya sajyaM gANDIvamAdade || 37||
nyaruNatsUtikAgAraM sharairnAnAstrayojitaiH |
tiryagUrdhvamadhaH pArthashchakAra sharapa~njaram || 38||
tataH kumAraH sa~njAto viprapatnyA rudan muhuH |
sadyo.adarshanamApede sasharIro vihAyasA || 39||
tadA.a.aha vipro vijayaM vinindan kR^iShNasannidhau |
mauDhyaM pashyata me yo.ahaM shraddadhe klIbakatthanam || 40||
na pradyumno nAniruddho na rAmo na cha keshavaH |
yasya shekuH paritrAtuM ko.anyastadaviteshvaraH || 41||
dhigarjunaM mR^iShAvAdaM dhigAtmashlAghino dhanuH |
daivopasR^iShTaM yo mauDhyAdAninIShati durmatiH || 42||
evaM shapati viprarShau vidyAmAsthAya phAlgunaH |
yayau saMyamanImAshu yatrAste bhagavAn yamaH || 43||
viprApatyamachakShANastata aindrImagAtpurIm |
AgneyIM nairR^itIM saumyAM vAyavyAM vAruNImatha |
rasAtalaM nAkapR^iShThaM dhiShNyAnyanyAnyudAyudhaH || 44||
tato.alabdhadvijasuto hyanistIrNapratishrutaH |
agniM vivikShuH kR^iShNena pratyuktaH pratiShedhatA || 45||
darshaye dvijasUnUMste mAvaj~nAtmAnamAtmanA |
ye te naH kIrtiM vimalAM manuShyAH sthApayiShyanti || 46||
iti sambhAShya bhagavAnarjunena saheshvaraH |
divyaM svarathamAsthAya pratIchIM dishamAvishat || 47||
saptadvIpAn sapta sindhUnsaptasapta girInatha |
lokAlokaM tathAtItya vivesha sumahattamaH || 48||
tatrAshvAH shaibyasugrIvameghapuShpabalAhakAH |
tamasi bhraShTagatayo babhUvurbharatarShabha || 49||
tAn dR^iShTvA bhagavAn kR^iShNo mahAyogeshvareshvaraH |
sahasrAdityasa~NkAshaM svachakraM prAhiNotpuraH || 50||
tamaH sughoraM gahanaM kR^itaM maha\-
dvidArayadbhUritareNa rochiShA |
manojavaM nirvivishe sudarshanaM
guNachyuto rAmasharo yathA chamUH || 51||
dvAreNa chakrAnupathena tattamaH
paraM paraM jyotiranantapAram |
samashnuvAnaM prasamIkShya phAlgunaH
pratADitAkSho pidadhe.akShiNI ubhe || 52||
tataH praviShTaH salilaM nabhasvatA
balIyasaijadbR^ihadUrmibhUShaNam |
tatrAdbhutaM vai bhavanaM dyumattamaM
bhrAjanmaNistambhasahasrashobhitam || 53||
tasmin mahAbhImamanantamadbhutaM
sahasramUrdhanyaphaNAmaNidyubhiH |
vibhrAjamAnaM dviguNolbaNekShaNaM
sitAchalAbhaM shitikaNThajihvam || 54||
dadarsha tadbhogasukhAsanaM vibhuM
mahAnubhAvaM puruShottamottamam |
sAndrAmbudAbhaM supisha~NgavAsasaM
prasannavaktraM ruchirAyatekShaNam || 55||
mahAmaNivrAtakirITakuNDala\-
prabhAparikShiptasahasrakuntalam |
pralambachArvaShTabhujaM sakaustubhaM
shrIvatsalakShmaM vanamAlayA vR^itam || 56||
sunandanandapramukhaiH svapArShadai\-
shchakrAdibhirmUrtidharairnijAyudhaiH |
puShTyA shriyA kIrtyajayAkhilardhibhi\-
rniShevyamANaM parameShThinAM patim || 57||
vavanda AtmAnamanantamachyuto
jiShNushcha taddarshanajAtasAdhvasaH |
tAvAha bhUmA parameShThinAM prabhu\-
rbaddhA~njalI sasmitamUrjayA girA || 58||
dvijAtmajA me yuvayordidR^ikShuNA
mayopanItA bhuvi dharmaguptaye |
kalAvatIrNAvavanerbharAsurAn
hatveha bhUyastvarayetamanti me || 59||
pUrNakAmAvapi yuvAM naranArAyaNAvR^iShI |
dharmamAcharatAM sthityai R^iShabhau lokasa~Ngraham || 60||
ityAdiShTau bhagavatA tau kR^iShNau parameShThinA |
omityAnamya bhUmAnamAdAya dvijadArakAn || 61||
nyavartatAM svakaM dhAma samprahR^iShTau yathAgatam |
viprAya dadatuH putrAn yathArUpaM yathAvayaH || 62||
nishAmya vaiShNavaM dhAma pArthaH paramavismitaH |
yatki~nchitpauruShaM puMsAM mene kR^iShNAnukampitam || 63||
itIdR^ishAnyanekAni vIryANIha pradarshayan |
bubhuje viShayAn grAmyAnIje chAtyUrjitairmakhaiH || 64||
pravavarShAkhilAn kAmAn prajAsu brAhmaNAdiShu |
yathAkAlaM yathaivendro bhagavAn shraiShThyamAsthitaH || 65||
hatvA nR^ipAnadharmiShThAn ghAtayitvArjunAdibhiH |
a~njasA vartayAmAsa dharmaM dharmasutAdibhiH || 66||
iti shrImadbhAgavate mahApurANe pAramahaMsyAM
saMhitAyAM dashamaskandhe uttarArdhe dvijakumArAnayanaM
nAmaikonanavatitamo.adhyAyaH || 89||
\iti
\section{.. OM namo bhagavate vAsudevAya ..}
\section{.. navatitamo.adhyAyaH \- 90 ..}
shrIshuka uvAcha
sukhaM svapuryAM nivasan dvArakAyAM shriyaH patiH |
sarvasampatsamR^iddhAyAM juShTAyAM vR^iShNipu~NgavaiH || 1||
strIbhishchottamaveShAbhirnavayauvanakAntibhiH |
kandukAdibhirharmyeShu krIDantIbhistaDiddyubhiH || 2||
nityaM sa~NkulamArgAyAM madachyudbhirmata~NgajaiH |
svala~NkR^itairbhaTairashvai rathaishcha kanakojjvalaiH || 3||
udyAnopavanADhyAyAM puShpitadrumarAjiShu |
nirvishadbhR^i~NgavihagairnAditAyAM samantataH || 4||
reme ShoDashasAhasrapatnInAmekavallabhaH |
tAvadvichitrarUpo.asau tadgeheShu maharddhiShu || 5||
protphullotpalakahlArakumudAmbhojareNubhiH |
vAsitAmalatoyeShu kUjaddvijakuleShu cha || 6||
vijahAra vigAhyAmbho hradinIShu mahodayaH |
kuchaku~NkumaliptA~NgaH parirabdhashcha yoShitAm || 7||
upagIyamAno gandharvairmR^ida~NgapaNavAnakAn |
vAdayadbhirmudA vINAM sUtamAgadhavandibhiH || 8||
sichyamAno.achyutastAbhirhasantIbhiH sma rechakaiH |
pratiShi~nchan vichikrIDe yakShIbhiryakSharADiva || 9||
tAH klinnavastravivR^itorukuchapradeshAH
si~nchantya uddhR^itabR^ihatkabaraprasUnAH |
kAntaM sma rechakajihIriShayopaguhya
jAtasmarotsavalasadvadanA virejuH || 10||
kR^iShNastu tatstanaviShajjitaku~Nkumasrak\-
krIDAbhiSha~NgadhutakuntalavR^indabandhaH |
si~nchanmuhuryuvatibhiH pratiShichyamAno
reme kareNubhirivebhapatiH parItaH || 11||
naTAnAM nartakInAM cha gItavAdyopajIvinAm |
krIDAla~NkAravAsAMsi kR^iShNo.adAttasya cha striyaH || 12||
kR^iShNasyaivaM viharato gatyAlApekShitasmitaiH |
narmakShvelipariShva~NgaiH strINAM kila hR^itA dhiyaH || 13||
Uchurmukundaikadhiyo.agira unmattavajjaDam |
chintayantyo.aravindAkShaM tAni me gadataH shR^iNu || 14||
mahiShya UchuH
kurari vilapasi tvaM vItanidrA na sheShe
svapiti jagati rAtryAmIshvaro guptabodhaH |
vayamiva sakhi kachchidgADhanirbhinnachetA
nalinanayanahAsodAralIlekShitena || 15||
netre nimIlayasi naktamadR^iShTabandhu\-
stvaM roravIShi karuNaM bata chakravAki |
dAsyaM gatA vayamivAchyutapAdajuShTAM
kiM vA srajaM spR^ihayase kabareNa voDhum || 16||
bho bhoH sadA niShTanase udanva\-
nnalabdhanidro.adhigataprajAgaraH |
kiM vA mukundApahR^itAtmalA~nChanaH
prAptAM dashAM tvaM cha gato duratyayAm || 17||
tvaM yakShmaNA balavatAsi gR^ihIta indo
kShINastamo na nijadIdhitibhiH kShiNoShi |
kachchinmukundagaditAni yathA vayaM tvaM
vismR^itya bhoH sthagitagIrupalakShyase naH || 18||
kintvAcharitamasmAbhirmalayAnila te.apriyam |
govindApA~Nganirbhinne hR^idIrayasi naH smaram || 19||
megha shrImaMstvamasi dayito yAdavendrasya nUnaM
shrIvatsA~NkaM vayamiva bhavAn dhyAyati premabaddhaH |
atyutkaNThaH shabalahR^idayo.asmadvidho bAShpadhArAH
smR^itvA smR^itvA visR^ijasi muhurduHkhadastatprasa~NgaH || 20||
priyarAvapadAni bhAShase mR^itasa~njIvikayAnayA girA |
karavANi kimadya te priyaM vada me valgitakaNTha kokila || 21||
na chalasi na vadasyudArabuddhe
kShitidhara chintayase mahAntamartham |
api bata vasudevanandanA~NghriM
vayamiva kAmayase stanairvidhartum || 22||
shuShyaddhradAH karshitA bata sindhupatnyaH
sampratyapAstakamalashriya iShTabhartuH |
yadvadvayaM madhupateH praNayAvaloka\-
maprApya muShTahR^idayAH purukarshitAH sma || 23||
haMsa svAgatamAsyatAM piba payo brUhya~Nga shaureH kathAM
dUtaM tvAM nu vidAma kachchidajitaH svastyAsta uktaM purA |
kiM vA nashchalasauhR^idaH smarati taM kasmAdbhajAmo vayaM
kShaudrAlApaya kAmadaM shriyamR^ite saivaikaniShThA striyAm || 24||
itIdR^ishena bhAvena kR^iShNe yogeshvareshvare |
kriyamANena mAdhavyo lebhire paramAM gatim || 25||
shrutamAtro.api yaH strINAM prasahyAkarShate manaH |
urugAyorugIto vA pashyantInAM kutaH punaH || 26||
yAH samparyacharan premNA pAdasaMvAhanAdibhiH |
jagadguruM bhartR^ibud.hdhyA tAsAM kiM varNyate tapaH || 27||
evaM vedoditaM dharmamanutiShThan satAM gatiH |
gR^ihaM dharmArthakAmAnAM muhushchAdarshayatpadam || 28||
Asthitasya paraM dharmaM kR^iShNasya gR^ihamedhinAm |
Asan ShoDashasAhasraM mahiShyashcha shatAdhikam || 29||
tAsAM strIratnabhUtAnAmaShTau yAH prAgudAhR^itAH |
rukmiNIpramukhA rAjaMstatputrAshchAnupUrvashaH || 30||
ekaikasyAM dasha dasha kR^iShNo.ajIjanadAtmajAn |
yAvatya Atmano bhAryA amoghagatirIshvaraH || 31||
teShAmuddAmavIryANAmaShTAdasha mahArathAH |
AsannudArayashasasteShAM nAmAni me shR^iNu || 32||
pradyumnashchAniruddhashcha dIptimAn bhAnureva cha |
sAmbo madhurbR^ihadbhAnushchitrabhAnurvR^iko.aruNaH || 33||
puShkaro vedabAhushcha shrutadevaH sunandanaH |
chitrabAhurvirUpashcha kavirnyagrodha eva cha || 34||
eteShAmapi rAjendra tanujAnAM madhudviShaH |
pradyumna AsItprathamaH pitR^ivadrukmiNIsutaH || 35||
sa rukmiNo duhitaramupayeme mahArathaH |
tasmAtsuto.aniruddho.abhUnnAgAyutabalAnvitaH || 36||
sa chApi rukmiNaH pautrIM dauhitro jagR^ihe tataH |
vajrastasyAbhavadyastu mausalAdavasheShitaH || 37||
pratibAhurabhUttasmAtsubAhustasya chAtmajaH |
subAhoH shAntaseno.abhUchChatasenastu tatsutaH || 38||
na hyetasmin kule jAtA adhanA abahuprajAH |
alpAyuSho.alpavIryAshcha abrahmaNyAshcha jaj~nire || 39||
yaduvaMshaprasUtAnAM puMsAM vikhyAtakarmaNAm |
sa~NkhyA na shakyate kartumapi varShAyutairnR^ipa || 40||
tisraH koTyaH sahasrANAmaShTAshItishatAni cha |
Asan yadukulAchAryAH kumArANAmiti shrutam || 41||
sa~NkhyAnaM yAdavAnAM kaH kariShyati mahAtmanAm |
yatrAyutAnAmayutalakSheNAste sa AhukaH || 42||
devAsurAhavahatA daiteyA ye sudAruNAH |
te chotpannA manuShyeShu prajA dR^iptA babAdhire || 43||
tannigrahAya hariNA proktA devA yadoH kule |
avatIrNAH kulashataM teShAmekAdhikaM nR^ipa || 44||
teShAM pramANaM bhagavAn prabhutvenAbhavaddhariH |
ye chAnuvartinastasya vavR^idhuH sarvayAdavAH || 45||
shayyAsanATanAlApakrIDAsnAnAdikarmasu |
na viduH santamAtmAnaM vR^iShNayaH kR^iShNachetasaH || 46||
tIrthaM chakre nR^iponaM yadajani yaduShu svaH saritpAdashauchaM
vidviT snigdhAH svarUpaM yayurajitaparA shrIryadarthe.anyayatnaH |
yannAmAma~NgalaghnaM shrutamatha gaditaM yatkR^ito gotradharmaH
kR^iShNasyaitanna chitraM kShitibharaharaNaM kAlachakrAyudhasya || 47||
jayati jananivAso devakIjanmavAdo
yaduvarapariShatsvairdorbhirasyannadharmam |
sthiracharavR^ijinaghnaH susmitashrImukhena
vrajapuravanitAnAM vardhayan kAmadevam || 48||
itthaM parasya nijavartmarirakShayA.a.atta\-
lIlAtanostadanurUpaviDambanAni |
karmANi karmakaShaNAni yadUttamasya
shrUyAdamuShya padayoranuvR^ittimichChan || 49||
martyastayAnusavamedhitayA mukunda\-
shrImatkathAshravaNakIrtanachintayaiti |
taddhAma dustarakR^itAntajavApavargaM
grAmAdvanaM kShitibhujo.api yayuryadarthAH || 50||
iti shrImadbhAgavate mahApurANe vaiyAsakyAmaShTAdasha\-
sAhasryAM pAramahaMsyAM saMhitAyAM dashamaskandhe uttarArdhe
shrIkR^iShNacharitAnuvarNanaM  nAma navatitamo.adhyAyaH || 90||
\section{.. iti dashamaskandhottarArdhaH samAptaH ..}
\section{.. OM tatsat ..}
\iti
##
Proofread by PSA Easwaran

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}