% Text title            : shrImadbhAgavatam - 11 - ekAdashaskandhaH
% File name             : bhagpur-11.itx
% Category              : purana, shrimadbhagavatam, vyAsa, krishna
% Location              : doc\_purana
% Proofread by          : PSA Easwaran
% Latest update         : July 4, 2021
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. shrImadbhAgavataM - ekAdashaskandhaH ..}##
\itxtitle{.. shrImadbhAgavataM \- ekAdashaskandhaH ..}##\endtitles ##
\chapter{.. OM namo bhagavate vAsudevAya ..}
\section{.. ekAdashaskandhaH ..}
\section{.. prathamo.adhyAyaH \- 1 ..}
shrIbAdarAyaNiruvAcha
kR^itvA daityavadhaM kR^iShNaH sarAmo yadubhirvR^itaH |
bhuvo.avatArayadbhAraM javiShThaM janayan kalim || 1||
ye kopitAH subahupANDusutAH sapatnai\-
rdurdyUtahelanakachagrahaNAdibhistAn |
kR^itvA nimittamitaretarataH sametAn
hatvA nR^ipAn niraharatkShitibhAramIshaH || 2||
bhUbhArarAjapR^itanA yadubhirnirasya
guptaiH svabAhubhirachintayadaprameyaH |
manye.avanernanu gato.apyagataM hi bhAraM
yadyAdavaM kulamaho aviShahyamAste || 3||
naivAnyataH paribhavo.asya bhavetkatha~nchi\-
nmatsaMshrayasya vibhavonnahanasya nityam |
antaHkaliM yadukulasya vidhAya veNu\-
stambasya vahnimiva shAntimupaimi dhAma || 4||
evaM vyavasito rAjan satyasa~Nkalpa IshvaraH |
shApavyAjena viprANAM sa~njahre svakulaM vibhuH || 5||
svamUrtyA lokalAvaNyanirmuktyA lochanaM nR^iNAm |
gIrbhistAH smaratAM chittaM padaistAnIkShatAM kriyAH || 6||
AchChidya kIrtiM sushlokAM vitatya hya~njasA nu kau |
tamo.anayA tariShyantItyagAtsvaM padamIshvaraH || 7||
rAjovAcha
brahmaNyAnAM vadAnyAnAM nityaM vR^iddhopasevinAm |
viprashApaH kathamabhUdvR^iShNInAM kR^iShNachetasAm || 8||
yannimittaH sa vai shApo yAdR^isho dvijasattama |
kathamekAtmanAM bheda etatsarvaM vadasva me || 9||
shrIshuka uvAcha
bibhradvapuH sakalasundarasanniveshaM
karmAcharan bhuvi suma~NgalamAptakAmaH |
AsthAya dhAma ramamANa udArakIrtiH
saMhartumaichChata kulaM sthitakR^ityasheShaH || 10||
karmANi puNyanivahAni suma~NgalAni
gAyajjagatkalimalApaharANi kR^itvA |
kAlAtmanA nivasatA yadudevagehe
piNDArakaM samagamanmunayo nisR^iShTAH || 11||
vishvAmitro.asitaH kaNvo durvAsA bhR^igura~NgirAH |
kashyapo vAmadevo.atrirvasiShTho nAradAdayaH || 12||
krIDantastAnupavrajya kumArA yadunandanAH |
upasa~NgR^ihya paprachChuravinItA vinItavat || 13||
te veShayitvA strIveShaiH sAmbaM jAmbavatIsutam |
eShA pR^ichChati vo viprA antarvatnyasitekShaNA || 14||
praShTuM vilajjatI sAkShAtprabrUtAmoghadarshanAH |
prasoShyantI putrakAmA kiM svitsa~njanayiShyati || 15||
evaM pralabdhA munayastAnUchuH kupitA nR^ipa |
janayiShyati vo mandA musalaM kulanAshanam || 16||
tachChrutvA te.atisantrastA vimuchya sahasodaram |
sAmbasya dadR^ishustasmin musalaM khalvayasmayam || 17||
kiM kR^itaM mandabhAgyairnaH kiM vadiShyanti no janAH |
iti vihvalitA gehAnAdAya musalaM yayuH || 18||
tachchopanIya sadasi parimlAnamukhashriyaH |
rAj~na AvedayA~nchakruH sarvayAdavasannidhau || 19||
shrutvAmoghaM viprashApaM dR^iShTvA cha musalaM nR^ipa |
vismitA bhayasantrastA babhUvurdvArakaukasaH || 20||
tachchUrNayitvA musalaM yadurAjaH sa AhukaH |
samudrasalile prAsyallohaM chAsyAvasheShitam || 21||
kashchinmatsyo.agrasIllohaM chUrNAni taralaistataH |
uhyamAnAni velAyAM lagnAnyAsan kilairakAH || 22||
matsyo gR^ihIto matsyaghnairjAlenAnyaiH sahArNave |
tasyodaragataM lohaM sa shalye lubdhako.akarot || 23||
bhagavAn j~nAtasarvArtha Ishvaro.api tadanyathA |
kartuM naichChadviprashApaM kAlarUpyanvamodata || 24||
iti shrImadbhAgavate mahApurANe pAramahaMsyAM
saMhitAyAM ekAdashaskandhe prathamo.adhyAyaH || 1||
\iti
\section{.. OM namo bhagavate vAsudevAya ..}
\section{.. dvitIyo.adhyAyaH \- 2 ..}
shrIshuka uvAcha
govindabhujaguptAyAM dvAravatyAM kurUdvaha |
avAtsInnArado.abhIkShNaM kR^iShNopAsanalAlasaH || 1||
ko nu rAjannindriyavAn mukundacharaNAmbujam |
na bhajetsarvato mR^ityurupAsyamamarottamaiH || 2||
tamekadA tu devarShiM vasudevo gR^ihAgatam |
architaM sukhamAsInamabhivAdyedamabravIt || 3||
vasudeva uvAcha
bhagavan bhavato yAtrA svastaye sarvadehinAm |
kR^ipaNAnAM yathA pitroruttamashlokavartmanAm || 4||
bhUtAnAM devacharitaM duHkhAya cha sukhAya cha |
sukhAyaiva hi sAdhUnAM tvAdR^ishAmachyutAtmanAm || 5||
bhajanti ye yathA devAn devA api tathaiva tAn |
ChAyeva karmasachivAH sAdhavo dInavatsalAH || 6||
brahmaMstathApi pR^ichChAmo dharmAn bhAgavatAMstava |
yAn shrutvA shraddhayA martyo muchyate sarvatobhayAt || 7||
ahaM kila purAnantaM prajArtho bhuvi muktidam |
apUjayaM na mokShAya mohito devamAyayA || 8||
yathA vichitravyasanAdbhavadbhirvishvatobhayAt |
muchyema hya~njasaivAddhA tathA naH shAdhi suvrata || 9||
shrIshuka uvAcha
rAjannevaM kR^itaprashno vasudevena dhImatA |
prItastamAha devarShirhareH saMsmArito guNaiH || 10||
nArada uvAcha
samyagetadvyavasitaM bhavatA sAtvatarShabha |
yatpR^ichChase bhAgavatAn dharmAMstvaM vishvabhAvanAn || 11||
shruto.anupaThito dhyAta AdR^ito vAnumoditaH |
sadyaH punAti saddharmo devavishvadruho.api hi || 12||
tvayA paramakalyANaH puNyashravaNakIrtanaH |
smArito bhagavAnadya devo nArAyaNo mama || 13||
atrApyudAharantImamitihAsaM purAtanam |
ArShabhANAM cha saMvAdaM videhasya mahAtmanaH || 14||
priyavrato nAma suto manoH svAyambhuvasya yaH |
tasyAgnIdhrastato nAbhirR^iShabhastatsutaH smR^itaH || 15||
tamAhurvAsudevAMshaM mokShadharmavivakShayA |
avatIrNaM sutashataM tasyAsIdbrahmapAragam || 16||
teShAM vai bharato jyeShTho nArAyaNaparAyaNaH |
vikhyAtaM varShametadyannAmnA bhAratamadbhutam || 17||
sa bhuktabhogAM tyaktvemAM nirgatastapasA harim |
upAsInastatpadavIM lebhe vai janmabhistribhiH || 18||
teShAM nava navadvIpapatayo.asya samantataH |
karmatantrapraNetAra ekAshItirdvijAtayaH || 19||
navAbhavan mahAbhAgA munayo hyarthashaMsinaH |
shramaNA vAtarashanA AtmavidyAvishAradAH || 20||
kavirharirantarikShaH prabuddhaH pippalAyanaH |
Avirhotro.atha drumilashchamasaH karabhAjanaH || 21||
ta ete bhagavadrUpaM vishvaM sadasadAtmakam |
Atmano.avyatirekeNa pashyanto vyacharanmahIm || 22||
avyAhateShTagatayaH surasiddhasAdhya\-
gandharvayakShanarakinnaranAgalokAn |
muktAshcharanti munichAraNabhUtanAtha\-
vidyAdharadvijagavAM bhuvanAni kAmam || 23||
ta ekadA nimeH satramupajagmuryadR^ichChayA |
vitAyamAnamR^iShibhirajanAbhe mahAtmanaH || 24||
tAn dR^iShTvA sUryasa~NkAshAn mahAbhAgavatAn nR^ipa |
yajamAno.agnayo viprAH sarva evopatasthire || 25||
videhastAnabhipretya nArAyaNaparAyaNAn |
prItaH sampUjayA~nchakre AsanasthAn yathArhataH || 26||
tAn rochamAnAn svaruchA brahmaputropamAn nava |
paprachCha paramaprItaH prashrayAvanato nR^ipaH || 27||
videha uvAcha
manye bhagavataH sAkShAtpArShadAn vo madhudviShaH |
viShNorbhUtAni lokAnAM pAvanAya charanti hi || 28||
durlabho mAnuSho deho dehinAM kShaNabha~NguraH |
tatrApi durlabhaM manye vaikuNThapriyadarshanam || 29||
ata AtyantikaM kShemaM pR^ichChAmo bhavato.anaghAH |
saMsAre.asmin kShaNArdho.api satsa~NgaH shevadhirnR^iNAm || 30||
dharmAn bhAgavatAn brUta yadi naH shrutaye kShamam |
yaiH prasannaH prapannAya dAsyatyAtmAnamapyajaH || 31||
shrInArada uvAcha
evaM te niminA pR^iShTA vasudeva mahattamAH |
pratipUjyAbruvan prItyA sasadasyartvijaM nR^ipam || 32||
kaviruvAcha
manye.akutashchidbhayamachyutasya
pAdAmbujopAsanamatra nityam |
udvignabuddherasadAtmabhAvA\-
dvishvAtmanA yatra nivartate bhIH || 33||
ye vai bhagavatA proktA upAyA hyAtmalabdhaye |
a~njaH puMsAmaviduShAM viddhi bhAgavatAn hi tAn || 34||
yAnAsthAya naro rAjan na pramAdyeta karhichit |
dhAvan nimIlya vA netre na skhalenna patediha || 35||
kAyena vAchA manasendriyairvA
bud.hdhyAtmanA vAnusR^itasvabhAvAt |
karoti yadyatsakalaM parasmai
nArAyaNAyeti samarpayettat || 36||
bhayaM dvitIyAbhiniveshataH syA\-
dIshAdapetasya viparyayo.asmR^itiH |
tanmAyayAto budha AbhajettaM
bhaktyaikayeshaM gurudevatAtmA || 37||
avidyamAno.apyavabhAti hi dvayo
dhyAturdhiyA svapnamanorathau yathA |
tatkarmasa~NkalpavikalpakaM mano
budho nirundhyAdabhayaM tataH syAt || 38||
shR^iNvan subhadrANi rathA~NgapANe\-
rjanmAni karmANi cha yAni loke |
gItAni nAmAni tadarthakAni
gAyan vilajjo vicharedasa~NgaH || 39||
evaMvrataH svapriyanAmakIrtyA
jAtAnurAgo drutachitta uchchaiH |
hasatyatho roditi rauti gAya\-
tyunmAdavannR^ityati lokabAhyaH || 40||
khaM vAyumagniM salilaM mahIM cha
jyotIMShi sattvAni disho drumAdIn |
saritsamudrAMshcha hareH sharIraM
yatkiM cha bhUtaM praNamedananyaH || 41||
bhaktiH pareshAnubhavo virakti\-
ranyatra chaiSha trika ekakAlaH |
prapadyamAnasya yathAshnataH syu\-
stuShTiH puShTiH kShudapAyo.anughAsam || 42||
ityachyutA~NghriM bhajato.anuvR^ittyA
bhaktirviraktirbhagavatprabodhaH |
bhavanti vai bhAgavatasya rAjaM\-
stataH parAM shAntimupaiti sAkShAt || 43||
rAjovAcha
atha bhAgavataM brUta yaddharmo yAdR^isho nR^iNAm |
yathA.a.acharati yadbrUte yairli~NgairbhagavatpriyaH || 44||
hariruvAcha
sarvabhUteShu yaH pashyedbhagavadbhAvamAtmanaH |
bhUtAni bhagavatyAtmanyeSha bhAgavatottamaH || 45||
Ishvare tadadhIneShu bAlisheShu dviShatsu cha |
premamaitrIkR^ipopekShA yaH karoti sa madhyamaH || 46||
archAyAmeva haraye pUjAM yaH shraddhayehate |
na tadbhakteShu chAnyeShu sa bhaktaH prAkR^itaH smR^itaH || 47||
gR^ihItvApIndriyairarthAn yo na dveShTi na hR^iShyati |
viShNormAyAmidaM pashyan sa vai bhAgavatottamaH || 48||
dehendriyaprANamanodhiyAM yo
janmApyayakShudbhayatarShakR^ichChraiH |
saMsAradharmairavimuhyamAnaH
smR^ityA harerbhAgavatapradhAnaH || 49||
na kAmakarmabIjAnAM yasya chetasi sambhavaH |
vAsudevaikanilayaH sa vai bhAgavatottamaH || 50||
na yasya janmakarmabhyAM na varNAshramajAtibhiH |
sajjate.asminnahambhAvo dehe vai sa hareH priyaH || 51||
na yasya svaH para iti vitteShvAtmani vA bhidA |
sarvabhUtasamaH shAntaH sa vai bhAgavatottamaH || 52||
tribhuvanavibhavahetave.apyakuNTha\-
smR^itirajitAtmasurAdibhirvimR^igyAt |
na chalati bhagavatpadAravindA\-
llavanimiShArdhamapi yaH sa vaiShNavAgryaH || 53||
bhagavata uruvikramA~NghrishAkhA\-
nakhamaNichandrikayA nirastatApe |
hR^idi kathamupasIdatAM punaH sa
prabhavati chandra ivodite.arkatApaH || 54||
visR^ijati hR^idayaM na yasya sAkShA\-
ddhariravashAbhihito.apyaghaughanAshaH |
praNayarashanayA dhR^itA~NghripadmaH
sa bhavati bhAgavatapradhAna uktaH || 55||
iti shrImadbhAgavate mahApurANe pAramahaMsyAM
saMhitAyAM ekAdashaskandhe dvitIyo.adhyAyaH || 2||
\iti
\section{.. OM namo bhagavate vAsudevAya ..}
\section{.. tR^itIyo.adhyAyaH \- 3 ..}
rAjovAcha
parasya viShNorIshasya mAyinAmapi mohinIm |
mAyAM veditumichChAmo bhagavanto bruvantu naH || 1||
nAnutR^ipye juShan yuShmadvacho harikathAmR^itam |
saMsAratApanistapto martyastattApabheShajam || 2||
antarikSha uvAcha
ebhirbhUtAni bhUtAtmA mahAbhUtairmahAbhuja |
sasarjochchAvachAnyAdyaH svamAtrAtmaprasiddhaye || 3||
evaM sR^iShTAni bhUtAni praviShTaH pa~nchadhAtubhiH |
ekadhA dashadhA.a.atmAnaM vibhajan juShate guNAn || 4||
guNairguNAn sa bhu~njAna AtmapradyotitaiH prabhuH |
manyamAna idaM sR^iShTamAtmAnamiha sajjate || 5||
karmANi karmabhiH kurvan sanimittAni dehabhR^it |
tattatkarmaphalaM gR^ihNan bhramatIha sukhetaram || 6||
itthaM karmagatIrgachChan bahvabhadravahAH pumAn |
AbhUtasamplavAtsargapralayAvashnute.avashaH || 7||
dhAtUpaplava Asanne vyaktaM dravyaguNAtmakam |
anAdinidhanaH kAlo hyavyaktAyApakarShati || 8||
shatavarShA hyanAvR^iShTirbhaviShyatyulbaNA bhuvi |
tatkAlopachitoShNArko lokAMstrIn pratapiShyati || 9||
pAtAlatalamArabhya sa~NkarShaNamukhAnalaH |
dahannUrdhvashikho viShvagvardhate vAyuneritaH || 10||
sAMvartako meghagaNo varShati sma shataM samAH |
dhArAbhirhastihastAbhirlIyate salile virAT || 11||
tato virAjamutsR^ijya vairAjaH puruSho nR^ipa |
avyaktaM vishate sUkShmaM nirindhana ivAnalaH || 12||
vAyunA hR^itagandhA bhUH salilatvAya kalpate |
salilaM taddhR^itarasaM jyotiShTvAyopakalpate || 13||
hR^itarUpaM tu tamasA vAyau jyotiH pralIyate |
hR^itasparsho.avakAshena vAyurnabhasi lIyate || 14||
kAlAtmanA hR^itaguNaM nabha Atmani lIyate |
indriyANi mano buddhiH saha vaikArikairnR^ipa |
pravishanti hyaha~NkAraM svaguNairahamAtmani || 15||
eShA mAyA bhagavataH sargasthityantakAriNI |
trivarNA varNitAsmAbhiH kiM bhUyaH shrotumichChasi || 16||
rAjovAcha
yathaitAmaishvarIM mAyAM dustarAmakR^itAtmabhiH |
tarantya~njaH sthUladhiyo maharSha idamuchyatAm || 17||
prabuddha uvAcha
karmANyArabhamANAnAM duHkhahatyai sukhAya cha |
pashyetpAkaviparyAsaM mithunIchAriNAM nR^iNAm || 18||
nityArtidena vittena durlabhenAtmamR^ityunA |
gR^ihApatyAptapashubhiH kA prItiH sAdhitaishchalaiH || 19||
evaM lokaM paraM vidyAnnashvaraM karmanirmitam |
satulyAtishayadhvaMsaM yathA maNDalavartinAm || 20||
tasmAdguruM prapadyeta jij~nAsuH shreya uttamam |
shAbde pare cha niShNAtaM brahmaNyupashamAshrayam || 21||
tatra bhAgavatAn dharmAn shikShedgurvAtmadaivataH |
amAyayAnuvR^ittyA yaistuShyedAtmA.a.atmado hariH || 22||
sarvato manaso.asa~NgamAdau sa~NgaM cha sAdhuShu |
dayAM maitrIM prashrayaM cha bhUteShvaddhA yathochitam || 23||
shauchaM tapastitikShAM cha maunaM svAdhyAyamArjavam |
brahmacharyamahiMsAM cha samatvaM dvandvasa.nj~nayoH || 24||
sarvatrAtmeshvarAnvIkShAM kaivalyamaniketatAm |
viviktachIravasanaM santoShaM yena kenachit || 25||
shraddhAM bhAgavate shAstre.anindAmanyatra chApi hi |
mano vAkkarmadaNDaM cha satyaM shamadamAvapi || 26||
shravaNaM kIrtanaM dhyAnaM hareradbhutakarmaNaH |
janmakarmaguNAnAM cha tadarthe.akhilacheShTitam || 27||
iShTaM dattaM tapo japtaM vR^ittaM yachchAtmanaH priyam |
dArAn sutAn gR^ihAn prANAn yatparasmai nivedanam || 28||
evaM kR^iShNAtmanAtheShu manuShyeShu cha sauhR^idam |
paricharyAM chobhayatra mahatsu nR^iShu sAdhuShu || 29||
parasparAnukathanaM pAvanaM bhagavadyashaH |
mitho ratirmithastuShTirnivR^ittirmitha AtmanaH || 30||
smarantaH smArayantashcha mitho.aghaughaharaM harim |
bhaktyA sa~njAtayA bhaktyA bibhratyutpulakAM tanum || 31||
kvachidrudantyachyutachintayA kvachi\-
ddhasanti nandanti vadantyalaukikAH |
nR^ityanti gAyantyanushIlayantyajaM
bhavanti tUShNIM parametya nirvR^itAH || 32||
iti bhAgavatAn dharmAn shikShan bhaktyA tadutthayA |
nArAyaNaparo mAyAma~njastarati dustarAm || 33||
rAjovAcha
nArAyaNAbhidhAnasya brahmaNaH paramAtmanaH |
niShThAmarhatha no vaktuM yUyaM hi brahmavittamAH || 34||
pippalAyana uvAcha
sthityudbhavapralayaheturaheturasya
yatsvapnajAgarasuShuptiShu sadbahishcha |
dehendriyAsuhR^idayAni charanti yena
sa~njIvitAni tadavehi paraM narendra || 35||
naitanmano vishati vAguta chakShurAtmA
prANendriyANi cha yathAnalamarchiShaH svAH |
shabdo.api bodhakaniShedhatayA.a.atmamUla\-
marthoktamAha yadR^ite na niShedhasiddhiH || 36||
sattvaM rajastama iti trivR^idekamAdau
sUtraM mahAnahamiti pravadanti jIvam |
j~nAnakriyArthaphalarUpatayorushakti
brahmaiva bhAti sadasachcha tayoH paraM yat || 37||
nAtmA jajAna na mariShyati naidhate.asau
na kShIyate savanavidvyabhichAriNAM hi |
sarvatra shashvadanapAyyupalabdhimAtraM
prANo yathendriyabalena vikalpitaM sat || 38||
aNDeShu peshiShu taruShvavinishchiteShu
prANo hi jIvamupadhAvati tatra tatra |
sanne yadindriyagaNe.ahami cha prasupte
kUTastha AshayamR^ite tadanusmR^itirnaH || 39||
yarhyabjanAbhacharaNaiShaNayorubhaktyA
chetomalAni vidhamedguNakarmajAni |
tasmin vishuddha upalabhyata AtmatattvaM
sAkShAdyathAmaladR^ishoH savitR^iprakAshaH || 40||
rAjovAcha
karmayogaM vadata naH puruSho yena saMskR^itaH |
vidhUyehAshu karmANi naiShkarmyaM vindate param || 41||
evaM prashnamR^iShIn pUrvamapR^ichChaM piturantike |
nAbruvan brahmaNaH putrAstatra kAraNamuchyatAm || 42||
Avirhotra uvAcha
karmAkarmavikarmeti vedavAdo na laukikaH |
vedasya cheshvarAtmatvAttatra muhyanti sUrayaH || 43||
parokShavAdo vedo.ayaM bAlAnAmanushAsanam |
karmamokShAya karmANi vidhatte hyagadaM yathA || 44||
nAcharedyastu vedoktaM svayamaj~no.ajitendriyaH |
vikarmaNA hyadharmeNa mR^ityormR^ityumupaiti saH || 45||
vedoktameva kurvANo niHsa~Ngo.arpitamIshvare |
naiShkarmyaM labhate siddhiM rochanArthA phalashrutiH || 46||
ya Ashu hR^idayagranthiM nirjihIrShuH parAtmanaH |
vidhinopachareddevaM tantroktena cha keshavam || 47||
labdhAnugraha AchAryAttena sandarshitAgamaH |
mahApuruShamabhyarchenmUrtyAbhimatayA.a.atmanaH || 48||
shuchiH sammukhamAsInaH prANasaMyamanAdibhiH |
piNDaM vishodhya sannyAsakR^itarakSho.archayeddharim || 49||
archAdau hR^idaye chApi yathA labdhopachArakaiH |
dravyakShityAtmali~NgAni niShpAdya prokShya chAsanam || 50||
pAdyAdInupakalpyAtha sannidhApya samAhitaH |
hR^idAdibhiH kR^itanyAso mUlamantreNa chArchayet || 51||
sA~NgopA~NgAM sapArShadAM tAM tAM mUrtiM svamantrataH |
pAdyArghyAchamanIyAdyaiH snAnavAsovibhUShaNaiH || 52||
gandhamAlyAkShatasragbhirdhUpadIpopahArakaiH |
sA~NgaM sampUjya vidhivatstavaiH stutvA nameddharim || 53||
AtmAnaM tanmayaM dhyAyan mUrtiM sampUjayeddhareH |
sheShAmAdhAya shirasi svadhAmnyudvAsya satkR^itam || 54||
evamagnyarkatoyAdAvatithau hR^idaye cha yaH |
yajatIshvaramAtmAnamachirAnmuchyate hi saH || 55||
iti shrImadbhAgavate mahApurANe pAramahaMsyAM
saMhitAyAM ekAdashaskandhe tR^itIyo.adhyAyaH || 3||
\iti
\section{.. OM namo bhagavate vAsudevAya ..}
\section{.. chaturtho.adhyAyaH \- 4 ..}
rAjovAcha
yAni yAnIha karmANi yairyaiH svachChandajanmabhiH |
chakre karoti kartA vA haristAni bruvantu naH || 1||
drumila uvAcha
yo vA anantasya guNAnanantA\-
nanukramiShyan sa tu bAlabuddhiH |
rajAMsi bhUmergaNayetkatha~nchit
kAlena naivAkhilashaktidhAmnaH || 2||
bhUtairyadA pa~nchabhirAtmasR^iShTaiH
puraM virAjaM virachayya tasmin |
svAMshena viShTaH puruShAbhidhAna\-
mavApa nArAyaNa AdidevaH || 3||
yatkAya eSha bhuvanatrayasannivesho
yasyendriyaistanubhR^itAmubhayendriyANi |
j~nAnaM svataH shvasanato balamoja IhA
sattvAdibhiH sthitilayodbhava Adi kartA || 4||
AdAvabhUchChatadhR^itI rajasAsya sarge
viShNuH sthitau kratupatirdvijadharmasetuH |
rudro.apyayAya tamasA puruShaH sa Adya
ityudbhavasthitilayAH satataM prajAsu || 5||
dharmasya dakShaduhitaryajaniShTa mUrtyAM
nArAyaNo naraR^iShipravaraH prashAntaH |
naiShkarmyalakShaNamuvAcha chachAra karma
yo.adyApi chAsta R^iShivaryaniShevitA~NghriH || 6||
indro visha~Nkya mama dhAma jighR^ikShatIti
kAmaM nyayu~Nkta sagaNaM sa badaryupAkhyam |
gatvApsarogaNavasantasumandavAtaiH
strIprekShaNeShubhiravidhyadatanmahij~naH || 7||
vij~nAya shakrakR^itamakramamAdidevaH
prAha prahasya gatavismaya ejamAnAn |
mA bhaiShTa bho madana mAruta devavadhvo
gR^ihNIta no balimashUnyamimaM kurudhvam || 8||
itthaM bruvatyabhayade naradeva devAH
savrIDanamrashirasaH saghR^iNaM tamUchuH |
naitadvibho tvayi pare.avikR^ite vichitraM
svArAmadhIranikarAnatapAdapadme || 9||
tvAM sevatAM surakR^itA bahavo.antarAyAH
svauko vila~Nghya paramaM vrajatAM padaM te |
nAnyasya barhiShi balIn dadataH svabhAgAn
dhatte padaM tvamavitA yadi vighnamUrdhni || 10||
kShuttR^iTtrikAlaguNamArutajaihvashaishnA\-
nasmAnapArajaladhInatitIrya kechit |
krodhasya yAnti viphalasya vashaM pade go\-
rmajjanti dushcharatapashcha vR^ithotsR^ijanti || 11||
iti pragR^iNatAM teShAM striyo.atyadbhutadarshanAH |
darshayAmAsa shushrUShAM svarchitAH kurvatIrvibhuH || 12||
te devAnucharA dR^iShTvA striyaH shrIriva rUpiNIH |
gandhena mumuhustAsAM rUpaudAryahatashriyaH || 13||
tAnAha devadeveshaH praNatAn prahasanniva |
AsAmekatamAM vR^i~NdhvaM savarNAM svargabhUShaNAm || 14||
omityAdeshamAdAya natvA taM suravandinaH |
urvashImapsaraHshreShThAM puraskR^itya divaM yayuH || 15||
indrAyAnamya sadasi shR^iNvatAM tridivaukasAm |
UchurnArAyaNabalaM shakrastatrAsa vismitaH || 16||
haMsasvarUpyavadadachyuta AtmayogaM
dattaH kumAra R^iShabho bhagavAn pitA naH |
viShNuH shivAya jagatAM kalayAvatirNa\-
stenAhR^itA madhubhidA shrutayo hayAsye || 17||
gupto.apyaye manurilauShadhayashcha mAtsye
krauDe hato ditija uddharatAmbhasaH kShmAm |
kaurme dhR^ito.adriramR^itonmathane svapR^iShThe
grAhAtprapannamibharAjamamu~nchadArtam || 18||
saMstunvato.abdhipatitAn shramaNAnR^iShIMshcha
shakraM cha vR^itravadhatastamasi praviShTam |
devastriyo.asuragR^ihe pihitA anAthA
jaghne.asurendramabhayAya satAM nR^isiMhe || 19||
devAsure yudhi cha daityapatIn surArthe
hatvAntareShu bhuvanAnyadadhAtkalAbhiH |
bhUtvAtha vAmana imAmaharadbaleH kShmAM
yAch~nAchChalena samadAdaditeH sutebhyaH || 20||
niHkShatriyAmakR^ita gAM cha triHsaptakR^itvo
rAmastu haihayakulApyayabhArgavAgniH |
so.abdhiM babandha dashavaktramahan sala~NkaM
sItApatirjayati lokamalaghnakIrtiH || 21||
bhUmerbharAvataraNAya yaduShvajanmA
jAtaH kariShyati surairapi duShkarANi |
vAdairvimohayati yaj~nakR^ito.atadarhAn
shUdrAn kalau kShitibhujo nyahaniShyadante || 22||
evaMvidhAni karmANi janmAni cha jagatpateH |
bhUrINi bhUriyashaso varNitAni mahAbhuja || 23||
iti shrImadbhAgavate mahApurANe pAramahaMsyAM
saMhitAyAM ekAdashaskandhe chaturtho.adhyAyaH || 4||
\iti
\section{.. OM namo bhagavate vAsudevAya ..}
\section{.. pa~nchamo.adhyAyaH \- 5 ..}
rAjovAcha
bhagavantaM hariM prAyo na bhajantyAtmavittamAH |
teShAmashAntakAmAnAM kA niShThAvijitAtmanAm || 1||
chamasa uvAcha
mukhabAhUrupAdebhyaH puruShasyAshramaiH saha |
chatvAro jaj~nire varNA guNairviprAdayaH pR^ithak || 2||
ya eShAM puruShaM sAkShAdAtmaprabhavamIshvaram |
na bhajantyavajAnanti sthAnAdbhraShTAH patantyadhaH || 3||
dUre harikathAH kechiddUre chAchyutakIrtanAH |
striyaH shUdrAdayashchaiva te.anukampyA bhavAdR^ishAm || 4||
vipro rAjanyavaishyau cha hareH prAptAH padAntikam |
shrautena janmanAthApi muhyantyAmnAyavAdinaH || 5||
karmaNyakovidAH stabdhA mUrkhAH paNDitamAninaH |
vadanti chATukAn mUDhA yayA mAdhvyA girotsukAH || 6||
rajasA ghorasa~NkalpAH kAmukA ahimanyavaH |
dAmbhikA mAninaH pApA vihasantyachyutapriyAn || 7||
vadanti te.anyonyamupAsitastriyo
gR^iheShu maithunyapareShu chAshiShaH |
yajantyasR^iShTAnnavidhAnadakShiNaM
vR^ittyai paraM ghnanti pashUnatadvidaH || 8||
shriyA vibhUtyAbhijanena vidyayA
tyAgena rUpeNa balena karmaNA |
jAtasmayenAndhadhiyaH saheshvarAn
sato.avamanyanti haripriyAn khalAH || 9||
sarveShu shashvattanubhR^itsvavasthitaM
yathA khamAtmAnamabhIShTamIshvaram |
vedopagItaM cha na shR^iNvate.abudhA
manorathAnAM pravadanti vArtayA || 10||
loke vyavAyAmiShamadyasevA
nityAstu jantorna hi tatra chodanA |
vyavasthitisteShu vivAhayaj~na\-
surAgrahairAsu nivR^ittiriShTA || 11||
dhanaM cha dharmaikaphalaM yato vai
j~nAnaM savij~nAnamanuprashAnti |
gR^iheShu yu~njanti kalevarasya
mR^ityuM na pashyanti durantavIryam || 12||
yadghrANabhakSho vihitaH surAyA\-
stathA pashorAlabhanaM na hiMsA |
evaM vyavAyaH prajayA na ratyA
imaM vishuddhaM na viduH svadharmam || 13||
ye tvanevaMvido.asantaH stabdhAH sadabhimAninaH |
pashUn druhyanti vishrabdhAH pretya khAdanti te cha tAn || 14||
dviShantaH parakAyeShu svAtmAnaM harimIshvaram |
mR^itake sAnubandhe.asmin baddhasnehAH patantyadhaH || 15||
ye kaivalyamasamprAptA ye chAtItAshcha mUDhatAm |
traivargikA hyakShaNikA AtmAnaM ghAtayanti te || 16||
eta Atmahano.ashAntA aj~nAne j~nAnamAninaH |
sIdantyakR^itakR^ityA vai kAladhvastamanorathAH || 17||
hitvAtyAyAsarachitA gR^ihApatyasuhR^ichChriyaH |
tamo vishantyanichChanto vAsudevaparA~NmukhAH || 18||
rAjovAcha
kasmin kAle sa bhagavAn kiM varNaH kIdR^isho nR^ibhiH |
nAmnA vA kena vidhinA pUjyate tadihochyatAm || 19||
karabhAjana uvAcha
kR^itaM tretA dvAparaM cha kalirityeShu keshavaH |
nAnAvarNAbhidhAkAro nAnaiva vidhinejyate || 20||
kR^ite shuklashchaturbAhurjaTilo valkalAmbaraH |
kR^iShNAjinopavItAkShAn bibhraddaNDakamaNDalU || 21||
manuShyAstu tadA shAntA nirvairAH suhR^idaH samAH |
yajanti tapasA devaM shamena cha damena cha || 22||
haMsaH suparNo vaikuNTho dharmo yogeshvaro.amalaH |
IshvaraH puruSho.avyaktaH paramAtmeti gIyate || 23||
tretAyAM raktavarNo.asau chaturbAhustrimekhalaH |
hiraNyakeshastrayyAtmA sruksruvAdyupalakShaNaH || 24||
taM tadA manujA devaM sarvadevamayaM harim |
yajanti vidyayA trayyA dharmiShThA brahmavAdinaH || 25||
viShNuryaj~naH pR^ishnigarbhaH sarvadeva urukramaH |
vR^iShAkapirjayantashcha urugAya itIryate || 26||
dvApare bhagavA~nshyAmaH pItavAsA nijAyudhaH |
shrIvatsAdibhira~Nkaishcha lakShaNairupalakShitaH || 27||
taM tadA puruShaM martyA mahArAjopalakShaNam |
yajanti vedatantrAbhyAM paraM jij~nAsavo nR^ipa || 28||
namaste vAsudevAya namaH sa~NkarShaNAya cha |
pradyumnAyAniruddhAya tubhyaM bhagavate namaH || 29||
nArAyaNAya R^iShaye puruShAya mahAtmane |
vishveshvarAya vishvAya sarvabhUtAtmane namaH || 30||
iti dvApara urvIsha stuvanti jagadIshvaram |
nAnAtantravidhAnena kalAvapi yathA shR^iNu || 31||
kR^iShNavarNaM tviShAkR^iShNaM sA~NgopA~NgAstrapArShadam |
yaj~naiH sa~NkIrtanaprAyairyajanti hi sumedhasaH || 32||
dhyeyaM sadA paribhavaghnamabhIShTadohaM
tIrthAspadaM shivaviri~nchinutaM sharaNyam |
bhR^ityArtihaM praNatapAla bhavAbdhipotaM
vande mahApuruSha te charaNAravindam || 33||
tyaktvA sudustyajasurepsitarAjyalakShmIM
dharmiShTha AryavachasA yadagAdaraNyam |
mAyAmR^igaM dayitayepsitamanvadhAva\-
dvande mahApuruSha te charaNAravindam || 34||
evaM yugAnurUpAbhyAM bhagavAn yugavartibhiH |
manujairijyate rAjan shreyasAmIshvaro hariH || 35||
kaliM sabhAjayantyAryA guNaj~nAH sArabhAginaH |
yatra sa~NkIrtanenaiva sarvasvArtho.abhilabhyate || 36||
na hyataH paramo lAbho dehinAM bhrAmyatAmiha |
yato vindeta paramAM shAntiM nashyati saMsR^itiH || 37||
kR^itAdiShu prajA rAjan kalAvichChanti sambhavam |
kalau khalu bhaviShyanti nArAyaNaparAyaNAH || 38||
kvachitkvachinmahArAja draviDeShu cha bhUrishaH |
tAmraparNI nadI yatra kR^itamAlA payasvinI || 39||
kAverI cha mahApuNyA pratIchI cha mahAnadI |
ye pibanti jalaM tAsAM manujA manujeshvara |
prAyo bhaktA bhagavati vAsudeve.amalAshayAH || 40||
devarShibhUtAptanR^iNAM pitR^INAM
na ki~Nkaro nAyamR^iNI cha rAjan |
sarvAtmanA yaH sharaNaM sharaNyaM
gato mukundaM parihR^itya kartam || 41||
svapAdamUlaM bhajataH priyasya
tyaktAnyabhAvasya hariH pareshaH |
vikarma yachchotpatitaM katha~nchi\-
ddhunoti sarvaM hR^idi sanniviShTaH || 42||
nArada uvAcha
dharmAn bhAgavatAnitthaM shrutvAtha mithileshvaraH |
jAyanteyAn munIn prItaH sopAdhyAyo hyapUjayat || 43||
tato.antardadhire siddhAH sarvalokasya pashyataH |
rAjA dharmAnupAtiShThannavApa paramAM gatim || 44||
tvamapyetAn mahAbhAga dharmAn bhAgavatAn shrutAn |
AsthitaH shraddhayA yukto niHsa~Ngo yAsyase param || 45||
yuvayoH khalu dampatyoryashasA pUritaM jagat |
putratAmagamadyadvAM bhagavAnIshvaro hariH || 46||
darshanAli~NganAlApaiH shayanAsanabhojanaiH |
AtmA vAM pAvitaH kR^iShNe putrasnehaM prakurvatoH || 47||
vaireNa yaM nR^ipatayaH shishupAlapauNDra\-
shAlvAdayo gativilAsavilokanAdyaiH |
dhyAyanta AkR^itadhiyaH shayanAsanAdau
tatsAmyamApuranuraktadhiyAM punaH kim || 48||
mApatyabuddhimakR^ithAH kR^iShNe sarvAtmanIshvare |
mAyAmanuShyabhAvena gUDhaishvarye pare.avyaye || 49||
bhUbhArAsurarAjanyahantave guptaye satAm |
avatIrNasya nirvR^ityai yasho loke vitanyate || 50||
shrIshuka uvAcha
etachChrutvA mahAbhAgo vasudevo.ativismitaH |
devakI cha mahAbhAgA jahaturmohamAtmanaH || 51||
itihAsamimaM puNyaM dhArayedyaH samAhitaH |
sa vidhUyeha shamalaM brahmabhUyAya kalpate || 52||
iti shrImadbhAgavate mahApurANe pAramahaMsyAM
saMhitAyAM ekAdashaskandhe pa~nchamo.adhyAyaH || 5||
\iti
\section{.. OM namo bhagavate vAsudevAya ..}
\section{.. ShaShTho.adhyAyaH \- 6 ..}
shrIshuka uvAcha
atha brahmA.a.atmajairdevaiH prajeshairAvR^ito.abhyagAt |
bhavashcha bhUtabhavyesho yayau bhUtagaNairvR^itaH || 1||
indro marudbhirbhagavAnAdityA vasavo.ashvinau |
R^ibhavo.a~Ngiraso rudrA vishve sAdhyAshcha devatAH || 2||
gandharvApsaraso nAgAH siddhachAraNaguhyakAH |
R^iShayaH pitarashchaiva savidyAdharakinnarAH || 3||
dvArakAmupasa~njagmuH sarve kR^iShNadidR^ikShavaH |
vapuShA yena bhagavAnnaralokamanoramaH |
yasho vitene lokeShu sarvalokamalApaham || 4||
tasyAM vibhrAjamAnAyAM samR^iddhAyAM maharddhibhiH |
vyachakShatAvitR^iptAkShAH kR^iShNamadbhutadarshanam || 5||
svargodyAnopagairmAlyaishChAdayanto yudUttamam |
gIrbhishchitrapadArthAbhistuShTuvurjagadIshvaram || 6||
devA UchuH
natAH sma te nAtha padAravindaM
buddhIndriyaprANamanovachobhiH |
yachchintyate.antarhR^idi bhAvayuktai\-
rmumukShubhiH karmamayorupAshAt || 7||
tvaM mAyayA triguNayA.a.atmani durvibhAvyaM
vyaktaM sR^ijasyavasi lumpasi tadguNasthaH |
naitairbhavAnajita karmabhirajyate vai
yatsve sukhe.avyavahite.abhirato.anavadyaH || 8||
shuddhirnR^iNAM na tu tatheDya durAshayAnAM
vidyAshrutAdhyayanadAnatapaHkriyAbhiH |
sattvAtmanAmR^iShabha te yashasi pravR^iddha\-
sachChraddhayA shravaNasambhR^itayA yathA syAt || 9||
syAnnastavA~NghrirashubhAshayadhUmaketuH
kShemAya yo munibhirArdrahR^idohyamAnaH |
yaH sAtvataiH samavibhUtaya Atmavadbhi\-
rvyUhe.architaH savanashaH svaratikramAya || 10||
yashchintyate prayatapANibhiradhvarAgnau
trayyA niruktavidhinesha havirgR^ihItvA |
adhyAtmayoga uta yogibhirAtmamAyAM
jij~nAsubhiH paramabhAgavataiH parIShTaH || 11||
paryuShTayA tava vibho vanamAlayeyaM
saMspardhinI bhagavatI pratipatnivachChrIH |
yaH supraNItamamuyArhaNamAdadanno
bhUyAtsadA~NghrirashubhAshayadhUmaketuH || 12||
ketustrivikramayutastripatatpatAko
yaste bhayAbhayakaro.asuradevachamvoH |
svargAya sAdhuShu khaleShvitarAya bhUman
pAdaH punAtu bhagavan bhajatAmaghaM naH || 13||
nasyotagAva iva yasya vashe bhavanti
brahmAdayastanubhR^ito mithurardyamAnAH |
kAlasya te prakR^itipUruShayoH parasya
shaM nastanotu charaNaH puruShottamasya || 14||
asyAsi heturudayasthitisaMyamAnA\-
mavyaktajIvamahatAmapi kAlamAhuH |
so.ayaM triNAbhirakhilApachaye pravR^ittaH
kAlo gabhIraraya uttamapUruShastvam || 15||
tvattaH pumAn samadhigamya yayA svavIryaM
dhatte mahAntamiva garbhamamoghavIryaH |
so.ayaM tayAnugata Atmana ANDakoshaM
haimaM sasarja bahirAvaraNairupetam || 16||
tattasthuShashcha jagatashcha bhavAnadhIsho
yanmAyayotthaguNavikriyayopanItAn |
arthA~njuShannapi hR^iShIkapate na lipto
ye.anye svataH parihR^itAdapi bibhyati sma || 17||
smAyAvalokalavadarshitabhAvahAri\-
bhrUmaNDalaprahitasauratamantrashauNDaiH |
patnyastu ShoDashasahasramana~NgabANai\-
ryasyendriyaM vimathituM karaNairna vibhvyaH || 18||
vibhvyastavAmR^itakathodavahAstrilokyAH
pAdAvanejasaritaH shamalAni hantum |
AnushravaM shrutibhira~Nghrijama~Ngasa~Ngai\-
stIrthadvayaM shuchiShadasta upaspR^ishanti || 19||
bAdarAyaNiruvAcha
ityabhiShTUya vibudhaiH seshaH shatadhR^itirharim |
abhyabhAShata govindaM praNamyAmbaramAshritaH || 20||
brahmovAcha
bhUmerbhArAvatArAya purA vij~nApitaH prabho |
tvamasmAbhirasheShAtmaMstattathaivopapAditam || 21||
dharmashcha sthApitaH satsu satyasandheShu vai tvayA |
kIrtishcha dikShu vikShiptA sarvalokamalApahA || 22||
avatIrya yadorvaMshe bibhradrUpamanuttamam |
karmANyuddAmavR^ittAni hitAya jagato.akR^ithAH || 23||
yAni te charitAnIsha manuShyAH sAdhavaH kalau |
shR^iNvantaH kIrtayantashcha tariShyantya~njasA tamaH || 24||
yaduvaMshe.avatIrNasya bhavataH puruShottama |
sharachChataM vyatIyAya pa~nchaviMshAdhikaM prabho || 25||
nAdhunA te.akhilAdhAra devakAryAvasheShitam |
kulaM cha viprashApena naShTaprAyamabhUdidam || 26||
tataH svadhAma paramaM vishasva yadi manyase |
salokA.NllokapAlAnnaH pAhi vaikuNThaki~NkarAn || 27||
shrIbhagavAnuvAcha
avadhAritametanme yadAttha vibudheshvara |
kR^itaM vaH kAryamakhilaM bhUmerbhAro.avatAritaH || 28||
tadidaM yAdavakulaM vIryashauryashriyoddhatam |
lokaM jighR^ikShadruddhaM me velayeva mahArNavaH || 29||
yadyasaMhR^itya dR^iptAnAM yadUnAM vipulaM kulam |
gantAsmyanena loko.ayamudvelena vina~NkShyati || 30||
idAnIM nAsha ArabdhaH kulasya dvijashApajaH |
yAsyAmi bhavanaM brahmannetadante tavAnagha || 31||
shrIshuka uvAcha
ityukto lokanAthena svayambhUH praNipatya tam |
saha devagaNairdevaH svadhAma samapadyata || 32||
atha tasyAM mahotpAtAn dvAravatyAM samutthitAn |
vilokya bhagavAnAha yaduvR^iddhAn samAgatAn || 33||
shrIbhagavAnuvAcha
ete vai sumahotpAtA vyuttiShThantIha sarvataH |
shApashcha naH kulasyAsIdbrAhmaNebhyo duratyayaH || 34||
na vastavyamihAsmAbhirjijIviShubhirAryakAH |
prabhAsaM sumahatpuNyaM yAsyAmo.adyaiva mA chiram || 35||
yatra snAtvA dakShashApAdgR^ihIto yakShmaNoDurAT |
vimuktaH kilbiShAtsadyo bheje bhUyaH kalodayam || 36||
vayaM cha tasminnAplutya tarpayitvA pitR^In surAn |
bhojayitvoshijo viprAn nAnAguNavatAndhasA || 37||
teShu dAnAni pAtreShu shraddhayoptvA mahAnti vai |
vR^ijinAni tariShyAmo dAnairnaubhirivArNavam || 38||
shrIshuka uvAcha
evaM bhagavatA.a.adiShTA yAdavAH kulanandana |
gantuM kR^itadhiyastIrthaM syandanAn samayUyujan || 39||
tannirIkShyoddhavo rAjan shrutvA bhagavatoditam |
dR^iShTvAriShTAni ghorANi nityaM kR^iShNamanuvrataH || 40||
vivikta upasa~Ngamya jagatAmIshvareshvaram |
praNamya shirisA pAdau prA~njalistamabhAShata || 41||
uddhava uvAcha
devadevesha yogesha puNyashravaNakIrtana |
saMhR^ityaitatkulaM nUnaM lokaM santyakShyate bhavAn |
viprashApaM samartho.api pratyahanna yadIshvaraH || 42||
nAhaM tavA~NghrikamalaM kShaNArdhamapi keshava |
tyaktuM samutsahe nAtha svadhAma naya mAmapi || 43||
tava vikrIDitaM kR^iShNa nR^iNAM paramama~Ngalam |
karNapIyUShamAsvAdya tyajantyanyaspR^ihAM janAH || 44||
shayyAsanATanasthAnasnAnakrIDAshanAdiShu |
kathaM tvAM priyamAtmAnaM vayaM bhaktAstyajemahi || 45||
tvayopabhuktasraggandhavAso.ala~NkAracharchitAH |
uchChiShTabhojino dAsAstava mAyAM jayemahi || 46||
vAtarashanA ya R^iShayaH shramaNA UrdhvamanthinaH |
brahmAkhyaM dhAma te yAnti shAntAH sannyAsino.amalAH || 47||
vayaM tviha mahAyogin bhramantaH karmavartmasu |
tvadvArtayA tariShyAmastAvakairdustaraM tamaH || 48||
smarantaH kIrtayantaste kR^itAni gaditAni cha |
gatyutsmitekShaNakShveli yannR^ilokaviDambanam || 49||
shrIshuka uvAcha
evaM vij~nApito rAjan bhagavAn devakIsutaH |
ekAntinaM priyaM bhR^ityamuddhavaM samabhAShata || 50||
iti shrImadbhAgavate mahApurANe pAramahaMsyAM
saMhitAyAM ekAdashaskandhe ShaShTho.adhyAyaH || 6||
\iti
\section{.. OM namo bhagavate vAsudevAya ..}
\section{.. saptamo.adhyAyaH \- 7 ..}
shrIbhagavAnuvAcha
yadAttha mAM mahAbhAga tachchikIrShitameva me |
brahmA bhavo lokapAlAH svarvAsaM me.abhikA~NkShiNaH || 1||
mayA niShpAditaM hyatra devakAryamasheShataH |
yadarthamavatIrNo.ahamaMshena brahmaNArthitaH || 2||
kulaM vai shApanirdagdhaM na~NkShyatyanyonyavigrahAt |
samudraH saptame.ahnyetAM purIM cha plAvayiShyati || 3||
yarhyevAyaM mayA tyakto loko.ayaM naShTama~NgalaH |
bhaviShyatyachirAtsAdho kalinApi nirAkR^itaH || 4||
na vastavyaM tvayaiveha mayA tyakte mahItale |
jano.adharmaruchirbhadra bhaviShyati kalau yuge || 5||
tvaM tu sarvaM parityajya snehaM svajanabandhuShu |
mayyAveshya manaH saMyak samadR^igvicharasva gAm || 6||
yadidaM manasA vAchA chakShurbhyAM shravaNAdibhiH |
nashvaraM gR^ihyamANaM cha viddhi mAyAmanomayam || 7||
puMso.ayuktasya nAnArtho bhramaH sa guNadoShabhAk |
karmAkarmavikarmeti guNadoShadhiyo bhidA || 8||
tasmAdyuktendriyagrAmo yuktachitta idaM jagat |
AtmanIkShasva vitatamAtmAnaM mayyadhIshvare || 9||
j~nAnavij~nAnasaMyukta AtmabhUtaH sharIriNAm |
AtmAnubhavatuShTAtmA nAntarAyairvihanyase || 10||
doShabud.hdhyobhayAtIto niShedhAnna nivartate |
guNabud.hdhyA cha vihitaM na karoti yathArbhakaH || 11||
sarvabhUtasuhR^ichChAnto j~nAnavij~nAnanishchayaH |
pashyan madAtmakaM vishvaM na vipadyeta vai punaH || 12||
shrIshuka uvAcha
ityAdiShTo bhagavatA mahAbhAgavato nR^ipa |
uddhavaH praNipatyAha tattvajij~nAsurachyutam || 13||
uddhava uvAcha
yogesha yogavinyAsa yogAtman yogasambhava |
niHshreyasAya me proktastyAgaH sannyAsalakShaNaH || 14||
tyAgo.ayaM duShkaro bhUman kAmAnAM viShayAtmabhiH |
sutarAM tvayi sarvAtmannabhaktairiti me matiH || 15||
so.ahaM mamAhamiti mUDhamatirvigADhaH
tvanmAyayA virachitAtmani sAnubandhe |
tattva~njasA nigaditaM bhavatA yathAhaM
saMsAdhayAmi bhagavannanushAdhi bhR^ityam || 16||
satyasya te svadR^isha Atmana Atmano.anyaM
vaktAramIsha vibudheShvapi nAnuchakShe |
sarve vimohitadhiyastava mAyayeme
brahmAdayastanubhR^ito bahirarthabhAvAH || 17||
tasmAdbhavantamanavadyamanantapAraM
sarvaj~namIshvaramakuNThavikuNThadhiShNyam |
nirviNNadhIrahamu ha vR^ijinAbhitapto
nArAyaNaM narasakhaM sharaNaM prapadye || 18||
shrIbhagavAnuvAcha
prAyeNa manujA loke lokatattvavichakShaNAH |
samuddharanti hyAtmAnamAtmanaivAshubhAshayAt || 19||
Atmano gururAtmaiva puruShasya visheShataH |
yatpratyakShAnumAnAbhyAM shreyo.asAvanuvindate || 20||
puruShatve cha mAM dhIrAH sA~NkhyayogavishAradAH |
AvistarAM prapashyanti sarvashaktyupabR^iMhitam || 21||
ekadvitrichatuShpAdo bahupAdastathApadaH |
bahvyaH santi puraH sR^iShTAstAsAM me pauruShI priyA || 22||
atra mAM mArgayantyaddhA yuktA hetubhirIshvaram |
gR^ihyamANairguNairli~NgairagrAhyamanumAnataH || 23||
atrApyudAharantImamitihAsaM purAtanam |
avadhUtasya saMvAdaM yadoramitatejasaH || 24||
avadhUtaM dvijaM ka~nchichcharantamakutobhayam |
kaviM nirIkShya taruNaM yaduH paprachCha dharmavit || 25||
yaduruvAcha
kuto buddhiriyaM brahmannakartuH suvishAradA |
yAmAsAdya bhavA.NllokaM vidvAMshcharati bAlavat || 26||
prAyo dharmArthakAmeShu vivitsAyAM cha mAnavAH |
hetunaiva samIhante AyuSho yashasaH shriyaH || 27||
tvaM tu kalpaH kavirdakShaH subhago.amR^itabhAShaNaH |
na kartA nehase ki~nchijjaDonmattapishAchavat || 28||
janeShu dahyamAneShu kAmalobhadavAgninA |
na tapyase.agninA mukto ga~NgAmbhaHstha iva dvipaH || 29||
tvaM hi naH pR^ichChatAM brahmannAtmanyAnandakAraNam |
brUhi sparshavihInasya bhavataH kevalAtmanaH || 30||
shrIbhagavAnuvAcha
yadunaivaM mahAbhAgo brahmaNyena sumedhasA |
pR^iShTaH sabhAjitaH prAha prashrayAvanataM dvijaH || 31||
brAhmaNa uvAcha
santi me guravo rAjan bahavo bud.hdhyupAshritAH |
yato buddhimupAdAya mukto.aTAmIha tAn shR^iNu || 32||
pR^ithivI vAyurAkAshamApo.agnishchandramA raviH |
kapoto.ajagaraH sindhuH pata~Ngo madhukR^idgajaH || 33||
madhuhA hariNo mInaH pi~NgalA kuraro.arbhakaH |
kumArI sharakR^itsarpa UrNanAbhiH supeshakR^it || 34||
ete me guravo rAjan chaturviMshatirAshritAH |
shikShA vR^ittibhireteShAmanvashikShamihAtmanaH || 35||
yato yadanushikShAmi yathA vA nAhuShAtmaja |
tattathA puruShavyAghra nibodha kathayAmi te || 36||
bhUtairAkramyamANo.api dhIro daivavashAnugaiH |
tadvidvAnna chalenmArgAdanvashikShaM kShitervratam || 37||
shashvatparArthasarvehaH parArthaikAntasambhavaH |
sAdhuH shikSheta bhUbhR^itto nagashiShyaH parAtmatAm || 38||
prANavR^ittyaiva santuShyenmunirnaivendriyapriyaiH |
j~nAnaM yathA na nashyeta nAvakIryeta vA~NmanaH || 39||
viShayeShvAvishan yogI nAnAdharmeShu sarvataH |
guNadoShavyapetAtmA na viShajjeta vAyuvat || 40||
pArthiveShviha deheShu praviShTastadguNAshrayaH |
guNairna yujyate yogI gandhairvAyurivAtmadR^ik || 41||
antarhitashcha sthiraja~NgameShu
brahmAtmabhAvena samanvayena |
vyAptyAvyavachChedamasa~NgamAtmano
munirnabhastvaM vitatasya bhAvayet || 42||
tejo.abannamayairbhAvairmeghAdyairvAyuneritaiH |
na spR^ishyate nabhastadvatkAlasR^iShTairguNaiH pumAn || 43||
svachChaH prakR^ititaH snigdho mAdhuryastIrthabhUrnR^iNAm |
muniH punAtyapAM mitramIkShopasparshakIrtanaiH || 44||
tejasvI tapasA dIpto durdharShodarabhAjanaH |
sarvabhakSho.api yuktAtmA nAdatte malamagnivat || 45||
kvachichChannaH kvachitspaShTa upAsyaH shreya ichChatAm |
bhu~Nkte sarvatra dAtR^INAM dahan prAguttarAshubham || 46||
svamAyayA sR^iShTamidaM sadasallakShaNaM vibhuH |
praviShTa Iyate tattatsvarUpo.agnirivaidhasi || 47||
visargAdyAH shmashAnAntA bhAvA dehasya nAtmanaH |
kalAnAmiva chandrasya kAlenAvyaktavartmanA || 48||
kAlena hyoghavegena bhUtAnAM prabhavApyayau |
nityAvapi na dR^ishyete Atmano.agneryathArchiShAm || 49||
guNairguNAnupAdatte yathAkAlaM vimu~nchati |
na teShu yujyate yogI gobhirgA iva gopatiH || 50||
budhyate sve na bhedena vyaktistha iva tadgataH |
lakShyate sthUlamatibhirAtmA chAvasthito.arkavat || 51||
nAtisnehaH prasa~Ngo vA kartavyaH kvApi kenachit |
kurvan vindeta santApaM kapota iva dInadhIH || 52||
kapotaH kashchanAraNye kR^itanIDo vanaspatau |
kapotyA bhAryayA sArdhamuvAsa katichitsamAH || 53||
kapotau snehaguNitahR^idayau gR^ihadharmiNau |
dR^iShTiM dR^iShTyA~Ngama~Ngena buddhiM bud.hdhyA babandhatuH || 54||
shayyAsanATanasthAnavArtAkrIDAshanAdikam |
mithunIbhUya vishrabdhau cheraturvanarAjiShu || 55||
yaM yaM vA~nChati sA rAjan tarpayantyanukampitA |
taM taM samanayatkAmaM kR^ichChreNApyajitendriyaH || 56||
kapotI prathamaM garbhaM gR^ihNatI kAla Agate |
aNDAni suShuve nIDe svapatyuH sannidhau satI || 57||
teShu kAle vyajAyanta rachitAvayavA hareH |
shaktibhirdurvibhAvyAbhiH komalA~NgatanUruhAH || 58||
prajAH pupuShatuH prItau dampatI putravatsalau |
shR^iNvantau kUjitaM tAsAM nirvR^itau kalabhAShitaiH || 59||
tAsAM patatraiH susparshaiH kUjitairmugdhacheShTitaiH |
pratyudgamairadInAnAM pitarau mudamApatuH || 60||
snehAnubaddhahR^idayAvanyonyaM viShNumAyayA |
vimohitau dInadhiyau shishUn pupuShatuH prajAH || 61||
ekadA jagmatustAsAmannArthaM tau kuTumbinau |
paritaH kAnane tasminnarthinau cheratushchiram || 62||
dR^iShTvA tAn lubdhakaH kashchidyadR^ichChAto vanecharaH |
jagR^ihe jAlamAtatya charataH svAlayAntike || 63||
kapotashcha kapotI cha prajApoShe sadotsukau |
gatau poShaNamAdAya svanIDamupajagmatuH || 64||
kapotI svAtmajAn vIkShya bAlakAn jAlasaMvR^itAn |
tAnabhyadhAvatkroshantI kroshato bhR^ishaduHkhitA || 65||
sAsakR^itsnehaguNitA dInachittAjamAyayA |
svayaM chAbadhyata shichA baddhAn pashyantyapasmR^itiH || 66||
kapotashchAtmajAn baddhAnAtmano.apyadhikAn priyAn |
bhAryAM chAtmasamAM dIno vilalApAtiduHkhitaH || 67||
aho me pashyatApAyamalpapuNyasya durmateH |
atR^iptasyAkR^itArthasya gR^ihastraivargiko hataH || 68||
anurUpAnukUlA cha yasya me patidevatA |
shUnye gR^ihe mAM santyajya putraiH svaryAti sAdhubhiH || 69||
so.ahaM shUnye gR^ihe dIno mR^itadAro mR^itaprajaH |
jijIviShe kimarthaM vA vidhuro duHkhajIvitaH || 70||
tAMstathaivAvR^itAn shigbhirmR^ityugrastAn vicheShTataH |
svayaM cha kR^ipaNaH shikShu pashyannapyabudho.apatat || 71||
taM labdhvA lubdhakaH krUraH kapotaM gR^ihamedhinam |
kapotakAn kapotIM cha siddhArthaH prayayau gR^iham || 72||
evaM kuTumbyashAntAtmA dvandvArAmaH patatrivat |
puShNan kuTumbaM kR^ipaNaH sAnubandho.avasIdati || 73||
yaH prApya mAnuShaM lokaM muktidvAramapAvR^itam |
gR^iheShu khagavatsaktastamArUDhachyutaM viduH || 74||
iti shrImadbhAgavate mahApurANe pAramahaMsyAM
saMhitAyAM ekAdashaskandhe saptamo.adhyAyaH || 7||
\iti
\section{.. OM namo bhagavate vAsudevAya ..}
\section{.. aShTamo.adhyAyaH \- 8 ..}
brAhmaNa uvAcha
sukhamaindriyakaM rAjan svarge naraka eva cha |
dehinAM yadyathA duHkhaM tasmAnnechCheta tadbudhaH || 1||
grAsaM sumR^iShTaM virasaM mahAntaM stokameva vA |
yadR^ichChayaivApatitaM grasedAjagaro.akriyaH || 2||
shayItAhAni bhUrINi nirAhAro.anupakramaH |
yadi nopanamedgrAso mahAhiriva diShTabhuk || 3||
ojaH saho balayutaM bibhraddehamakarmakam |
shayAno vItanidrashcha nehetendriyavAnapi || 4||
muniH prasannagambhIro durvigAhyo duratyayaH |
anantapAro hyakShobhyaH stimitoda ivArNavaH || 5||
samR^iddhakAmo hIno vA nArAyaNaparo muniH |
notsarpeta na shuShyeta saridbhiriva sAgaraH || 6||
dR^iShTvA striyaM devamAyAM tadbhAvairajitendriyaH |
pralobhitaH patatyandhe tamasyagnau pata~Ngavat || 7||
yoShiddhiraNyAbharaNAmbarAdi\-
dravyeShu mAyArachiteShu mUDhaH |
pralobhitAtmA hyupabhogabud.hdhyA
pata~Ngavannashyati naShTadR^iShTiH || 8||
stokaM stokaM grasedgrAsaM deho varteta yAvatA |
gR^ihAnahiMsannAtiShThedvR^ittiM mAdhukarIM muniH || 9||
aNubhyashcha mahadbhyashcha shAstrebhyaH kushalo naraH |
sarvataH sAramAdadyAtpuShpebhya iva ShaTpadaH || 10||
sAyantanaM shvastanaM vA na sa~NgR^ihNIta bhikShitam |
pANipAtrodarAmatro makShikeva na sa~NgrahI || 11||
sAyantanaM shvastanaM vA na sa~NgR^ihNIta bhikShukaH |
makShikA iva sa~NgR^ihNan saha tena vinashyati || 12||
padApi yuvatIM bhikShurna spR^isheddAravImapi |
spR^ishan karIva badhyeta kariNyA a~Ngasa~NgataH || 13||
nAdhigachChetstriyaM prAj~naH karhichinmR^ityumAtmanaH |
balAdhikaiH sa hanyeta gajairanyairgajo yathA || 14||
na deyaM nopabhogyaM cha lubdhairyadduHkhasa~nchitam |
bhu~Nkte tadapi tachchAnyo madhuhevArthavinmadhu || 15||
suduHkhopArjitairvittairAshAsAnAM gR^ihAshiShaH |
madhuhevAgrato bhu~Nkte yatirvai gR^ihamedhinAm || 16||
grAmyagItaM na shR^iNuyAdyatirvanacharaH kvachit |
shikSheta hariNAdbaddhAnmR^igayorgItamohitAt || 17||
nR^ityavAditragItAni juShan grAmyANi yoShitAm |
AsAM krIDanako vashya R^iShyashR^i~Ngo mR^igIsutaH || 18||
jihvayAtipramAthinyA jano rasavimohitaH |
mR^ityumR^ichChatyasadbuddhirmInastu baDishairyathA || 19||
indriyANi jayantyAshu nirAhArA manIShiNaH |
varjayitvA tu rasanaM tannirannasya vardhate || 20||
tAvajjitendriyo na syAdvijitAnyendriyaH pumAn |
na jayedrasanaM yAvajjitaM sarvaM jite rase || 21||
pi~NgalA nAma veshyA.a.asIdvidehanagare purA |
tasyA me shikShitaM ki~nchinnibodha nR^ipanandana || 22||
sA svairiNyekadA kAntaM sa~Nketa upaneShyatI |
abhUtkAle bahirdvAri bibhratI rUpamuttamam || 23||
mArga AgachChato vIkShya puruShAn puruSharShabha |
tAn shulkadAn vittavataH kAntAn mene.arthakAmukA || 24||
AgateShvapayAteShu sA sa~NketopajIvinI |
apyanyo vittavAn ko.api mAmupaiShyati bhUridaH || 25||
evaM durAshayA dhvastanidrA dvAryavalambatI |
nirgachChantI pravishatI nishIthaM samapadyata || 26||
tasyA vittAshayA shuShyadvaktrAyA dInachetasaH |
nirvedaH paramo jaj~ne chintAhetuH sukhAvahaH || 27||
tasyA nirviNNachittAyA gItaM shR^iNu yathA mama |
nirveda AshApAshAnAM puruShasya yathA hyasiH || 28||
na hya~NgAjAtanirvedo dehabandhaM jihAsati |
yathA vij~nAnarahito manujo mamatAM nR^ipa || 29||
pi~NgalovAcha
aho me mohavitatiM pashyatAvijitAtmanaH |
yA kAntAdasataH kAmaM kAmaye yena bAlishA || 30||
santaM samIpe ramaNaM ratipradaM
vittapradaM nityamimaM vihAya |
akAmadaM duHkhabhayAdhishoka\-
mohapradaM tuchChamahaM bhaje.aj~nA || 31||
aho mayA.a.atmA paritApito vR^ithA
sA~NketyavR^ittyAtivigarhyavArtayA |
straiNAnnarAdyArthatR^iSho.anushochyAt
krItena vittaM ratimAtmanechChatI || 32||
yadasthibhirnirmitavaMshavaMshya\-
sthUNaM tvachA romanakhaiH pinaddham |
kSharannavadvAramagArameta\-
dviNmUtrapUrNaM madupaiti kAnyA || 33||
videhAnAM pure hyasminnahamekaiva mUDhadhIH |
yAnyamichChantyasatyasmAdAtmadAtkAmamachyutAt || 34||
suhR^itpreShThatamo nAtha AtmA chAyaM sharIriNAm |
taM vikrIyAtmanaivAhaM rame.anena yathA ramA || 35||
kiyatpriyaM te vyabhajan kAmA ye kAmadA narAH |
Adyantavanto bhAryAyA devA vA kAlavidrutAH || 36||
nUnaM me bhagavAn prIto viShNuH kenApi karmaNA |
nirvedo.ayaM durAshAyA yanme jAtaH sukhAvahaH || 37||
maivaM syurmandabhAgyAyAH kleshA nirvedahetavaH |
yenAnubandhaM nirhR^itya puruShaH shamamR^ichChati || 38||
tenopakR^itamAdAya shirasA grAmyasa~NgatAH |
tyaktvA durAshAH sharaNaM vrajAmi tamadhIshvaram || 39||
santuShTA shraddadhatyetadyathA lAbhena jIvatI |
viharAmyamunaivAhamAtmanA ramaNena vai || 40||
saMsArakUpe patitaM viShayairmuShitekShaNam |
grastaM kAlAhinA.a.atmAnaM ko.anyastrAtumadhIshvaraH || 41||
Atmaiva hyAtmano goptA nirvidyeta yadAkhilAt |
apramatta idaM pashyedgrastaM kAlAhinA jagat || 42||
brAhmaNa uvAcha
evaM vyavasitamatirdurAshAM kAntatarShajAm |
ChittvopashamamAsthAya shayyAmupavivesha sA || 43||
AshA hi paramaM duHkhaM nairAshyaM paramaM sukham |
yathA sa~nChidya kAntAshAM sukhaM suShvApa pi~NgalA || 44||
iti shrImadbhAgavate mahApurANe pAramahaMsyAM
saMhitAyAM ekAdashaskandhe aShTamo.adhyAyaH || 8||
\iti
\section{.. OM namo bhagavate vAsudevAya ..}
\section{.. navamo.adhyAyaH \- 9 ..}
brAhmaNa uvAcha
parigraho hi duHkhAya yadyatpriyatamaM nR^iNAm |
anantaM sukhamApnoti tadvidvAnyastvaki~nchanaH || 1||
sAmiShaM kuraraM jaghnurbalino ye nirAmiShAH |
tadAmiShaM parityajya sa sukhaM samavindata || 2||
na me mAnAvamAnau sto na chintA gehaputriNAm |
AtmakrIDa AtmaratirvicharAmIha bAlavat || 3||
dvAveva chintayA muktau paramAnanda Aplutau |
yo vimugdho jaDo bAlo yo guNebhyaH paraM gataH || 4||
kvachitkumArI tvAtmAnaM vR^iNAnAn gR^ihamAgatAn |
svayaM tAnarhayAmAsa kvApi yAteShu bandhuShu || 5||
teShAmabhyavahArArthaM shAlIn rahasi pArthiva |
avaghnantyAH prakoShThasthAshchakruH sha~NkhAH svanaM mahat || 6||
sA tajjugupsitaM matvA mahatI vR^iDitA tataH |
babha~njaikaikashaH sha~NkhAn dvau dvau pANyorasheShayat || 7||
ubhayorapyabhUdghoSho hyavaghnantyAH sma sha~NkhayoH |
tatrApyekaM nirabhidadekasmAnnAbhavaddhvaniH || 8||
anvashikShamimaM tasyA upadeshamarindama |
lokAnanucharannetAn lokatattvavivitsayA || 9||
vAse bahUnAM kalaho bhavedvArtA dvayorapi |
eka eva charettasmAtkumAryA iva ka~NkaNaH || 10||
mana ekatra saMyu~njyAjjitashvAso jitAsanaH |
vairAgyAbhyAsayogena dhriyamANamatandritaH || 11||
yasmin mano labdhapadaM yadeta\-
chChanaiH shanairmu~nchati karmareNUn |
sattvena vR^iddhena rajastamashcha
vidhUya nirvANamupaityanindhanam || 12||
tadaivamAtmanyavaruddhachitto
na veda ki~nchidbahirantaraM vA |
yatheShukAro nR^ipatiM vrajanta\-
miShau gatAtmA na dadarsha pArshve || 13||
ekachAryaniketaH syAdapramatto guhAshayaH |
alakShyamANa AchArairmunireko.alpabhAShaNaH || 14||
gR^ihArambho.ati duHkhAya viphalashchAdhruvAtmanaH |
sarpaH parakR^itaM veshma pravishya sukhamedhate || 15||
eko nArAyaNo devaH pUrvasR^iShTaM svamAyayA |
saMhR^itya kAlakalayA kalpAnta idamIshvaraH |
eka evAdvitIyo.abhUdAtmAdhAro.akhilAshrayaH || 16||
kAlenAtmAnubhAvena sAmyaM nItAsu shaktiShu |
sattvAdiShvAdipuruShaH pradhAnapuruSheshvaraH || 17||
parAvarANAM parama Aste kaivalyasa.nj~nitaH |
kevalAnubhavAnandasandoho nirupAdhikaH || 18||
kevalAtmAnubhAvena svamAyAM triguNAtmikAm |
sa~NkShobhayan sR^ijatyAdau tayA sUtramarindama || 19||
tAmAhustriguNavyaktiM sR^ijantIM vishvatomukham |
yasmin protamidaM vishvaM yena saMsarate pumAn || 20||
yathorNanAbhirhR^idayAdUrNAM santatya vaktrataH |
tayA vihR^itya bhUyastAM grasatyevaM maheshvaraH || 21||
yatra yatra mano dehI dhArayetsakalaM dhiyA |
snehAddveShAdbhayAdvApi yAti tattatsvarUpatAm || 22||
kITaH peshaskR^itaM dhyAyan kuDyAM tena praveshitaH |
yAti tatsAtmatAM rAjan pUrvarUpamasantyajan || 23||
evaM gurubhya etebhya eShA me shikShitA matiH |
svAtmopashikShitAM buddhiM shR^iNu me vadataH prabho || 24||
deho gururmama viraktivivekahetuH
bibhratsma sattvanidhanaM satatArtyudarkam |
tattvAnyanena vimR^ishAmi yathA tathApi
pArakyamityavasito vicharAmyasa~NgaH || 25||
jAyA.a.atmajArthapashubhR^ityagR^ihAptavargAn
puShNAti yatpriyachikIrShayA vitanvan |
svAnte sakR^ichChramavaruddhadhanaH sa dehaH
sR^iShTvAsya bIjamavasIdati vR^ikShadharmaH || 26||
jihvaikato.amumapakarShati karhi tarShA
shishno.anyatastvagudaraM shravaNaM kutashchit |
ghrANo.anyatashchapaladR^ik kva cha karmashaktiH
bahvyaH sapatnya iva gehapatiM lunanti || 27||
sR^iShTvA purANi vividhAnyajayA.a.atmashaktyA
vR^ikShAn sarIsR^ipapashUn khagadaMshamatsyAn |
taistairatuShTahR^idayaH puruShaM vidhAya
brahmAvalokadhiShaNaM mudamApa devaH || 28||
labdhvA sudurlabhamidaM bahusambhavAnte
mAnuShyamarthadamanityamapIha dhIraH |
tUrNaM yateta na patedanumR^ityu yAva\-
nniHshreyasAya viShayaH khalu sarvataH syAt || 29||
evaM sa~njAtavairAgyo vij~nAnAloka Atmani |
vicharAmi mahImetAM muktasa~Ngo.anaha~NkR^itiH || 30||
na hyekasmAdgurorj~nAnaM susthiraM syAtsupuShkalam |
brahmaitadadvitIyaM vai gIyate bahudharShibhiH || 31||
shrIbhagavAnuvAcha
ityuktvA sa yaduM viprastamAmantrya gabhIradhIH |
vandito.abhyarthito rAj~nA yayau prIto yathAgatam || 32||
avadhUtavachaH shrutvA pUrveShAM naH sa pUrvajaH |
sarvasa~NgavinirmuktaH samachitto babhUva ha || 33||
iti shrImadbhAgavate mahApurANe pAramahaMsyAM
saMhitAyAM ekAdashaskandhe navamo.adhyAyaH || 9||
\iti
\section{.. OM namo bhagavate vAsudevAya ..}
\section{.. dashamo.adhyAyaH \- 10 ..}
shrIbhagavAnuvAcha
mayoditeShvavahitaH svadharmeShu madAshrayaH |
varNAshramakulAchAramakAmAtmA samAcharet || 1||
anvIkSheta vishuddhAtmA dehinAM viShayAtmanAm |
guNeShu tattvadhyAnena sarvArambhaviparyayam || 2||
suptasya viShayAloko dhyAyato vA manorathaH |
nAnAtmakatvAdviphalastathA bhedAtmadhIrguNaiH || 3||
nivR^ittaM karma seveta pravR^ittaM matparastyajet |
jij~nAsAyAM sampravR^itto nAdriyetkarmachodanAm || 4||
yamAnabhIkShNaM seveta niyamAn matparaH kvachit |
madabhij~naM guruM shAntamupAsIta madAtmakam || 5||
amAnyamatsaro dakSho nirmamo dR^iDhasauhR^idaH |
asatvaro.arthajij~nAsuranasUyuramoghavAk || 6||
jAyApatyagR^ihakShetrasvajanadraviNAdiShu |
udAsInaH samaM pashyan sarveShvarthamivAtmanaH || 7||
vilakShaNaH sthUlasUkShmAddehAdAtmekShitA svadR^ik |
yathAgnirdAruNo dAhyAddAhako.anyaH prakAshakaH || 8||
nirodhotpattyaNubR^ihannAnAtvaM tatkR^itAn guNAn |
antaH praviShTa Adhatta evaM dehaguNAn paraH || 9||
yo.asau guNairvirachito deho.ayaM puruShasya hi |
saMsArastannibandho.ayaM puMso vidyAchChidAtmanaH || 10||
tasmAjjij~nAsayA.a.atmAnamAtmasthaM kevalaM param |
sa~Ngamya nirasedetadvastubuddhiM yathAkramam || 11||
AchAryo.araNirAdyaH syAdantevAsyuttarAraNiH |
tatsandhAnaM pravachanaM vidyAsandhiH sukhAvahaH || 12||
vaishAradI sAtivishuddhabuddhi\-
rdhunoti mAyAM guNasamprasUtAm |
guNAMshcha sandahya yadAtmametat
svayaM cha shAmyatyasamidyathAgniH || 13||
athaiShAM karmakartR^INAM bhoktR^INAM sukhaduHkhayoH |
nAnAtvamatha nityatvaM lokakAlAgamAtmanAm || 14||
manyase sarvabhAvAnAM saMsthA hyautpattikI yathA |
tattadAkR^itibhedena jAyate bhidyate cha dhIH || 15||
evamapya~Nga sarveShAM dehinAM dehayogataH |
kAlAvayavataH santi bhAvA janmAdayo.asakR^it || 16||
atrApi karmaNAM karturasvAtantryaM cha lakShyate |
bhoktushcha duHkhasukhayoH ko nvartho vivashaM bhajet || 17||
na dehinAM sukhaM ki~nchidvidyate viduShAmapi |
tathA cha duHkhaM mUDhAnAM vR^ithAha~NkaraNaM param || 18||
yadi prAptiM vighAtaM cha jAnanti sukhaduHkhayoH |
te.apyaddhA na viduryogaM mR^ityurna prabhavedyathA || 19||
ko nvarthaH sukhayatyenaM kAmo vA mR^ityurantike |
AghAtaM nIyamAnasya vadhyasyeva na tuShTidaH || 20||
shrutaM cha dR^iShTavadduShTaM spardhAsUyAtyayavyayaiH |
bahvantarAyakAmatvAtkR^iShivachchApi niShphalam || 21||
antarAyairavihato yadi dharmaH svanuShThitaH |
tenApi nirjitaM sthAnaM yathA gachChati tachChR^iNu || 22||
iShTveha devatA yaj~naiH svarlokaM yAti yAj~nikaH |
bhu~njIta devavattatra bhogAn divyAn nijArjitAn || 23||
svapuNyopachite shubhre vimAna upagIyate |
gandharvairviharan madhye devInAM hR^idyaveShadhR^ik || 24||
strIbhiH kAmagayAnena ki~NkiNIjAlamAlinA |
krIDan navedAtmapAtaM surAkrIDeShu nirvR^itaH || 25||
tAvatpramodate svarge yAvatpuNyaM samApyate |
kShINapuNyaH patatyarvAganichChan kAlachAlitaH || 26||
yadyadharmarataH sa~NgAdasatAM vAjitendriyaH |
kAmAtmA kR^ipaNo lubdhaH straiNo bhUtavihiMsakaH || 27||
pashUnavidhinA.a.alabhya pretabhUtagaNAn yajan |
narakAnavasho janturgatvA yAtyulbaNaM tamaH || 28||
karmANi duHkhodarkANi kurvan dehena taiH punaH |
dehamAbhajate tatra kiM sukhaM martyadharmiNaH || 29||
lokAnAM lokapAlAnAM madbhayaM kalpajIvinAm |
brahmaNo.api bhayaM matto dviparArdhaparAyuShaH || 30||
guNAH sR^ijanti karmANi guNo.anusR^ijate guNAn |
jIvastu guNasaMyukto bhu~Nkte karmaphalAnyasau || 31||
yAvatsyAdguNavaiShamyaM tAvannAnAtvamAtmanaH |
nAnAtvamAtmano yAvatpAratantryaM tadaiva hi || 32||
yAvadasyAsvatantratvaM tAvadIshvarato bhayam |
ya etatsamupAsIraMste muhyanti shuchArpitAH || 33||
kAla AtmAgamo lokaH svabhAvo dharma eva cha |
iti mAM bahudhA prAhurguNavyatikare sati || 34||
uddhava uvAcha
guNeShu vartamAno.api dehajeShvanapAvR^itaH |
guNairna badhyate dehI badhyate vA kathaM vibho || 35||
kathaM varteta viharetkairvA j~nAyeta lakShaNaiH |
kiM bhu~njIto.ata visR^ijechChayItAsIta yAti vA || 36||
etadachyuta me brUhi prashnaM prashnavidAM vara |
nityamukto nityabaddhaH eka eveti me bhramaH || 37||
iti shrImadbhAgavate mahApurANe pAramahaMsyAM
saMhitAyAM ekAdashaskandhe dashamo.adhyAyaH || 10||
\iti
\section{.. OM namo bhagavate vAsudevAya ..}
\section{.. ekAdasho.adhyAyaH \- 11 ..}
shrIbhagavAnuvAcha
baddho mukta iti vyAkhyA guNato me na vastutaH |
guNasya mAyAmUlatvAnna me mokSho na bandhanam || 1||
shokamohau sukhaM duHkhaM dehApattishcha mAyayA |
svapno yathA.a.atmanaH khyAtiH saMsR^itirna tu vAstavI || 2||
vidyAvidye mama tanU vid.hdhyuddhava sharIriNAm |
mokShabandhakarI Adye mAyayA me vinirmite || 3||
ekasyaiva mamAMshasya jIvasyaiva mahAmate |
bandho.asyAvidyayAnAdirvidyayA cha tathetaraH || 4||
atha baddhasya muktasya vailakShaNyaM vadAmi te |
viruddhadharmiNostAta sthitayorekadharmiNi || 5||
suparNAvetau sadR^ishau sakhAyau
yadR^ichChayaitau kR^itanIDau cha vR^ikShe |
ekastayoH khAdati pippalAnna\-
manyo niranno.api balena bhUyAn || 6||
AtmAnamanyaM cha sa veda vidvA\-
napippalAdo na tu pippalAdaH |
yo.avidyayA yuk sa tu nityabaddho
vidyAmayo yaH sa tu nityamuktaH || 7||
dehastho.api na dehastho vidvAn svapnAdyathotthitaH |
adehastho.api dehasthaH kumatiH svapnadR^igyathA || 8||
indriyairindriyArtheShu guNairapi guNeShu cha |
gR^ihyamANeShvahaM kuryAnna vidvAn yastvavikriyaH || 9||
daivAdhIne sharIre.asmin guNabhAvyena karmaNA |
vartamAno.abudhastatra kartAsmIti nibadhyate || 10||
evaM viraktaH shayana AsanATanamajjane |
darshanasparshanaghrANabhojanashravaNAdiShu || 11||
na tathA badhyate vidvAn tatra tatrAdayan guNAn |
prakR^itistho.apyasaMsakto yathA khaM savitAnilaH || 12||
vaishAradyekShayAsa~NgashitayA ChinnasaMshayaH |
pratibuddha iva svapnAnnAnAtvAdvinivartate || 13||
yasya syurvItasa~NkalpAH prANendriyamanodhiyAm |
vR^ittayaH sa vinirmukto dehastho.api hi tadguNaiH || 14||
yasyAtmA hiMsyate hiMsrairyena ki~nchidyadR^ichChayA |
archyate vA kvachittatra na vyatikriyate budhaH || 15||
na stuvIta na nindeta kurvataH sAdhvasAdhu vA |
vadato guNadoShAbhyAM varjitaH samadR^i~NmuniH || 16||
na kuryAnna vadetki~nchinna dhyAyetsAdhvasAdhu vA |
AtmArAmo.anayA vR^ittyA vicharejjaDavanmuniH || 17||
shabdabrahmaNi niShNAto na niShNAyAtpare yadi |
shramastasya shramaphalo hyadhenumiva rakShataH || 18||
gAM dugdhadohAmasatIM cha bhAryAM
dehaM parAdhInamasatprajAM cha |
vittaM tvatIrthIkR^itama~Nga vAchaM
hInAM mayA rakShati duHkhaduHkhI || 19||
yasyAM na me pAvanama~Nga karma
sthityudbhavaprANanirodhamasya |
lIlAvatArepsitajanma vA syA\-
dvandhyAM giraM tAM bibhR^iyAnna dhIraH || 20||
evaM jij~nAsayApohya nAnAtvabhramamAtmani |
upArameta virajaM mano mayyarpya sarvage || 21||
yadyanIsho dhArayituM mano brahmaNi nishchalam |
mayi sarvANi karmANi nirapekShaH samAchara || 22||
shraddhAlurme kathAH shR^iNvan subhadrA lokapAvanIH |
gAyannanusmaran karma janma chAbhinayan muhuH || 23||
madarthe dharmakAmArthAnAcharan madapAshrayaH |
labhate nishchalAM bhaktiM mayyuddhava sanAtane || 24||
satsa~NgalabdhayA bhaktyA mayi mAM ya upAsitA |
sa vai me darshitaM sadbhira~njasA vindate padam || 25||
uddhava uvAcha
sAdhustavottamashloka mataH kIdR^igvidhaH prabho |
bhaktistvayyupayujyeta kIdR^ishI sadbhirAdR^itA || 26||
etanme puruShAdhyakSha lokAdhyakSha jagatprabho |
praNatAyAnuraktAya prapannAya cha kathyatAm || 27||
tvaM brahma paramaM vyoma puruShaH prakR^iteH paraH |
avatIrNo.asi bhagavan svechChopAttapR^ithagvapuH || 28||
shrIbhagavAnuvAcha
kR^ipAlurakR^itadrohastitikShuH sarvadehinAm |
satyasAro.anavadyAtmA samaH sarvopakArakaH || 29||
kAmairahatadhIrdAnto mR^iduH shuchiraki~nchanaH |
anIho mitabhukshAntaH sthiro machCharaNo muniH || 30||
apramatto gabhIrAtmA dhR^itimA~njitaShaDguNaH |
amAnI mAnadaH kalpo maitraH kAruNikaH kaviH || 31||
Aj~nAyaivaM guNAn doShAn mayA.a.adiShTAnapi svakAn |
dharmAn santyajya yaH sarvAn mAM bhajeta sa sattamaH || 32||
j~nAtvAj~nAtvAtha ye vai mAM yAvAn yashchAsmi yAdR^ishaH |
bhajantyananyabhAvena te me bhaktatamA matAH || 33||
malli~NgamadbhaktajanadarshanasparshanArchanam |
paricharyA stutiH prahvaguNakarmAnukIrtanam || 34||
matkathAshravaNe shraddhA madanudhyAnamuddhava |
sarvalAbhopaharaNaM dAsyenAtmanivedanam || 35||
majjanmakarmakathanaM mama parvAnumodanam |
gItatANDavavAditragoShThIbhirmadgR^ihotsavaH || 36||
yAtrA balividhAnaM cha sarvavArShikaparvasu |
vaidikI tAntrikI dIkShA madIyavratadhAraNam || 37||
mamArchAsthApane shraddhA svataH saMhatya chodyamaH |
udyAnopavanAkrIDapuramandirakarmaNi || 38||
sammArjanopalepAbhyAM sekamaNDalavartanaiH |
gR^ihashushrUShaNaM mahyaM dAsavadyadamAyayA || 39||
amAnitvamadambhitvaM kR^itasyAparikIrtanam |
api dIpAvalokaM me nopayu~njyAnniveditam || 40||
yadyadiShTatamaM loke yachchAtipriyamAtmanaH |
tattannivedayenmahyaM tadAnantyAya kalpate || 41||
sUryo.agnirbrAhmaNo gAvo vaiShNavaH khaM marujjalam |
bhUrAtmA sarvabhUtAni bhadrapUjApadAni me || 42||
sUrye tu vidyayA trayyA haviShAgnau yajeta mAm |
Atithyena tu viprAgrye goShva~Nga yavasAdinA || 43||
vaiShNave bandhusatkR^ityA hR^idi khe dhyAnaniShThayA |
vAyau mukhyadhiyA toye dravyaistoyapuraskR^itaiH || 44||
sthaNDile mantrahR^idayairbhogairAtmAnamAtmani |
kShetraj~naM sarvabhUteShu samatvena yajeta mAm || 45||
dhiShNyeShveShviti madrUpaM sha~NkhachakragadAmbujaiH |
yuktaM chaturbhujaM shAntaM dhyAyannarchetsamAhitaH || 46||
iShTApUrtena mAmevaM yo yajeta samAhitaH |
labhate mayi sadbhaktiM matsmR^itiH sAdhusevayA || 47||
prAyeNa bhaktiyogena satsa~Ngena vinoddhava |
nopAyo vidyate sadhrya~N prAyaNaM hi satAmaham || 48||
athaitatparamaM guhyaM shR^iNvato yadunandana |
sugopyamapi vakShyAmi tvaM me bhR^ityaH suhR^itsakhA || 49||
iti shrImadbhAgavate mahApurANe pAramahaMsyAM
saMhitAyAM ekAdashaskandhe ekAdasho.adhyAyaH || 11||
\iti
\section{.. OM namo bhagavate vAsudevAya ..}
\section{.. dvAdasho.adhyAyaH \- 12 ..}
shrIbhagavAnuvAcha
na rodhayati mAM yogo na sA~NkhyaM dharma eva cha |
na svAdhyAyastapastyAgo neShTApUrtaM na dakShiNA || 1||
vratAni yaj~nashChAndAMsi tIrthAni niyamA yamAH |
yathAvarundhe satsa~NgaH sarvasa~NgApaho hi mAm || 2||
satsa~Ngena hi daiteyA yAtudhAnA mR^igAH khagAH |
gandharvApsaraso nAgAH siddhAshchAraNaguhyakAH || 3||
vidyAdharA manuShyeShu vaishyAH shUdrAH striyo.antyajAH |
rajastamaHprakR^itayastasmiMstasmin yuge.anagha || 4||
bahavo matpadaM prAptAstvAShTrakAyAdhavAdayaH |
vR^iShaparvA balirbANo mayashchAtha vibhIShaNaH || 5||
sugrIvo hanumAn R^ikSho gajo gR^idhro vaNikpathaH |
vyAdhaH kubjA vraje gopyo yaj~napatnyastathApare || 6||
te nAdhItashrutigaNA nopAsitamahattamAH |
avratA.ataptatapasaH satsa~NgAnmAmupAgatAH || 7||
kevalena hi bhAvena gopyo gAvo nagA mR^igAH |
ye.anye mUDhadhiyo nAgAH siddhA mAmIyura~njasA || 8||
yaM na yogena sA~Nkhyena dAnavratatapo.adhvaraiH |
vyAkhyAsvAdhyAyasannyAsaiH prApnuyAdyatnavAnapi || 9||
rAmeNa sArdhaM mathurAM praNIte
shvAphalkinA mayyanuraktachittAH |
vigADhabhAvena na me viyoga\-
tIvrAdhayo.anyaM dadR^ishuH sukhAya || 10||
tAstAH kShapAH preShThatamena nItA
mayaiva vR^indAvanagochareNa |
kShaNArdhavattAH punara~Nga tAsAM
hInA mayA kalpasamA babhUvuH || 11||
tA nAvidan mayyanuSha~Ngabaddha\-
dhiyaH svamAtmAnamadastathedam |
yathA samAdhau munayo.abdhitoye
nadyaH praviShTA iva nAmarUpe || 12||
matkAmA ramaNaM jAramasvarUpavido.abalAH |
brahma mAM paramaM prApuH sa~NgAchChatasahasrashaH || 13||
tasmAttvamuddhavotsR^ijya chodanAM pratichodanAm |
pravR^ittaM cha nivR^ittaM cha shrotavyaM shrutameva cha || 14||
mAmekameva sharaNamAtmAnaM sarvadehinAm |
yAhi sarvAtmabhAvena mayA syA hyakutobhayaH || 15||
uddhava uvAcha
saMshayaH shR^iNvato vAchaM tava yogeshvareshvara |
na nivartata Atmastho yena bhrAmyati me manaH || 16||
shrIbhagavAnuvAcha
sa eSha jIvo vivaraprasUtiH
prANena ghoSheNa guhAM praviShTaH |
manomayaM sUkShmamupetya rUpaM
mAtrA svaro varNa iti sthaviShThaH || 17||
yathAnalaH khe.anilabandhurUShmA
balena dAruNyadhimathyamAnaH |
aNuH prajAto haviShA samidhyate
tathaiva me vyaktiriyaM hi vANI || 18||
evaM gadiH karmagatirvisargo
ghrANo raso dR^iksparshaH shrutishcha |
sa~Nkalpavij~nAnamathAbhimAnaH
sUtraM rajaHsattvatamovikAraH || 19||
ayaM hi jIvastrivR^idabjayoni\-
ravyakta eko vayasA sa AdyaH |
vishliShTashaktirbahudheva bhAti
bIjAni yoniM pratipadya yadvat || 20||
yasminnidaM protamasheShamotaM
paTo yathA tantuvitAnasaMsthaH |
ya eSha saMsArataruH purANaH
karmAtmakaH puShpaphale prasUte || 21||
dve asya bIje shatamUlastrinAlaH
pa~nchaskandhaH pa~ncharasaprasUtiH |
dashaikashAkho dvisuparNanIDa\-
strivalkalo dviphalo.arkaM praviShTaH || 22||
adanti chaikaM phalamasya gR^idhrA
grAmecharA ekamaraNyavAsAH |
haMsA ya ekaM bahurUpamijyai\-
rmAyAmayaM veda sa veda vedam || 23||
evaM gurUpAsanayaikabhaktyA
vidyAkuThAreNa shitena dhIraH
vivR^ishchya jIvAshayamapramattaH
sampadya chAtmAnamatha tyajAstram || 24||
iti shrImadbhAgavate mahApurANe pAramahaMsyAM
saMhitAyAM ekAdashaskandhe dvAdasho.adhyAyaH || 12||
\iti
\section{.. OM namo bhagavate vAsudevAya ..}
\section{.. trayodasho.adhyAdashoyaH \- 13 ..}
shrIbhagavAnuvAcha
sattvaM rajastama iti guNA buddherna chAtmanaH |
sattvenAnyatamau hanyAtsattvaM sattvena chaiva hi || 1||
sattvAddharmo bhavedvR^iddhAtpuMso madbhaktilakShaNaH |
sAttvikopAsayA sattvaM tato dharmaH pravartate || 2||
dharmo rajastamo hanyAtsattvavR^iddhiranuttamaH |
Ashu nashyati tanmUlo hyadharma ubhaye hate || 3||
Agamo.apaH prajA deshaH kAlaH karma cha janma cha |
dhyAnaM mantro.atha saMskAro dashaite guNahetavaH || 4||
tattatsAttvikamevaiShAM yadyadvR^iddhAH prachakShate |
nindanti tAmasaM tattadrAjasaM tadupekShitam || 5||
sAttvikAnyeva seveta pumAn sattvavivR^iddhaye |
tato dharmastato j~nAnaM yAvatsmR^itirapohanam || 6||
veNusa~NgharShajo vahnirdagdhvA shAmyati tadvanam |
evaM guNavyatyayajo dehaH shAmyati tatkriyaH || 7||
uddhava uvAcha
vidanti martyAH prAyeNa viShayAn padamApadAm |
tathApi bhu~njate kR^iShNa tatkathaM shvakharAjavat || 8||
shrIbhagavAnuvAcha
ahamityanyathA buddhiH pramattasya yathA hR^idi |
utsarpati rajo ghoraM tato vaikArikaM manaH || 9||
rajoyuktasya manasaH sa~NkalpaH savikalpakaH |
tataH kAmo guNadhyAnAdduHsahaH syAddhi durmateH || 10||
karoti kAmavashagaH karmANyavijitendriyaH |
duHkhodarkANi sampashyan rajovegavimohitaH || 11||
rajastamobhyAM yadapi vidvAn vikShiptadhIH punaH |
atandrito mano yu~njan doShadR^iShTirna sajjate || 12||
apramatto.anuyu~njIta mano mayyarpaya~nChanaiH |
anirviNNo yathA kAlaM jitashvAso jitAsanaH || 13||
etAvAn yoga AdiShTo machChiShyaiH sanakAdibhiH |
sarvato mana AkR^iShya mayyaddhAveshyate yathA || 14||
uddhava uvAcha
yadA tvaM sanakAdibhyo yena rUpeNa keshava |
yogamAdiShTavAnetadrUpamichChAmi veditum || 15||
shrIbhagavAnuvAcha
putrA hiraNyagarbhasya mAnasAH sanakAdayaH |
paprachChuH pitaraM sUkShmAM yogasyaikAntikIM gatim || 16||
sanakAdaya UchuH
guNeShvAvishate cheto guNAshchetasi cha prabho |
kathamanyonyasantyAgo mumukShoratititIrShoH || 17||
shrIbhagavAnuvAcha
evaM pR^iShTo mahAdevaH svayambhUrbhUtabhAvanaH |
dhyAyamAnaH prashnabIjaM nAbhyapadyata karmadhIH || 18||
sa mAmachintayaddevaH prashnapAratitIrShayA |
tasyAhaM haMsarUpeNa sakAshamagamaM tadA || 19||
dR^iShTvA mAM ta upavrajya kR^itvA pAdAbhivandanam |
brahmANamagrataH kR^itvA paprachChuH ko bhavAniti || 20||
ityahaM munibhiH pR^iShTastattvajij~nAsubhistadA |
yadavochamahaM tebhyastaduddhava nibodha me || 21||
vastuno yadyanAnAtvamAtmanaH prashna IdR^ishaH |
kathaM ghaTeta vo viprA vakturvA me ka AshrayaH || 22||
pa~nchAtmakeShu bhUteShu samAneShu cha vastutaH |
ko bhavAniti vaH prashno vAchArambho hyanarthakaH || 23||
manasA vachasA dR^iShTyA gR^ihyate.anyairapIndriyaiH |
ahameva na matto.anyaditi budhyadhvama~njasA || 24||
guNeShvAvishate cheto guNAshchetasi cha prajAH |
jIvasya deha ubhayaM guNAshcheto madAtmanaH || 25||
guNeShu chAvishachchittamabhIkShNaM guNasevayA |
guNAshcha chittaprabhavA madrUpa ubhayaM tyajet || 26||
jAgratsvapnaH suShuptaM cha guNato buddhivR^ittayaH |
tAsAM vilakShaNo jIvaH sAkShitvena vinishchitaH || 27||
yarhi saMsR^itibandho.ayamAtmano guNavR^ittidaH |
mayi turye sthito jahyAttyAgastadguNachetasAm || 28||
aha~NkArakR^itaM bandhamAtmano.arthaviparyayam |
vidvAn nirvidya saMsArachintAM turye sthitastyajet || 29||
yAvannAnArthadhIH puMso na nivarteta yuktibhiH |
jAgartyapi svapannaj~naH svapne jAgaraNaM yathA || 30||
asattvAdAtmano.anyeShAM bhAvAnAM tatkR^itA bhidA |
gatayo hetavashchAsya mR^iShA svapnadR^isho yathA || 31||
yo jAgare bahiranukShaNadharmiNo.arthAn
bhu~Nkte samastakaraNairhR^idi tatsadR^ikShAn |
svapne suShupta upasaMharate sa ekaH
smR^ityanvayAttriguNavR^ittidR^igindriyeshaH || 32||
evaM vimR^ishya guNato manasastryavasthA
manmAyayA mayi kR^itA iti nishchitArthAH |
sa~nChidya hArdamanumAnasaduktitIkShNa\-
j~nAnAsinA bhajata mAkhilasaMshayAdhim || 33||
IkSheta vibhramamidaM manaso vilAsaM
dR^iShTaM vinaShTamatilolamalAtachakram |
vij~nAnamekamurudheva vibhAti mAyA
svapnastridhA guNavisargakR^ito vikalpaH || 34||
dR^iShTiM tataH pratinivartya nivR^ittatR^iShNa\-
stUShNIM bhavennijasukhAnubhavo nirIhaH |
sandR^ishyate kva cha yadIdamavastubud.hdhyA
tyaktaM bhramAya na bhavetsmR^itirAnipAtAt || 35||
dehaM cha nashvaramavasthitamutthitaM vA
siddho na pashyati yato.adhyagamatsvarUpam |
daivAdapetamuta daivavashAdupetaM
vAso yathA parikR^itaM madirAmadAndhaH || 36||
deho.api daivavashagaH khalu karma yAvat
svArambhakaM pratisamIkShata eva sAsuH |
taM sa prapa~nchamadhirUDhasamAdhiyogaH
svApnaM punarna bhajate pratibuddhavastuH || 37||
mayaitaduktaM vo viprA guhyaM yatsA~NkhyayogayoH |
jAnIta mA.a.agataM yaj~naM yuShmaddharmavivakShayA || 38||
ahaM yogasya sA~Nkhyasya satyasyartasya tejasaH |
parAyaNaM dvijashreShThAH shriyaHkIrterdamasya cha || 39||
mAM bhajanti guNAH sarve nirguNaM nirapekShakam |
suhR^idaM priyamAtmAnaM sAmyAsa~NgAdayoguNAH || 40||
iti me ChinnasandehA munayaH sanakAdayaH |
sabhAjayitvA parayA bhaktyAgR^iNata saMstavaiH || 41||
tairahaM pUjitaH samyak saMstutaH paramarShibhiH |
pratyeyAya svakaM dhAma pashyataH parameShThinaH || 42||
iti shrImadbhAgavate mahApurANe pAramahaMsyAM
saMhitAyAM ekAdashaskandhe trayodasho.adhyAyaH || 13||
\iti
\section{.. OM namo bhagavate vAsudevAya ..}
\section{.. chaturdasho.adhyAyaH \- 14 ..}
uddhava uvAcha
vadanti kR^iShNa shreyAMsi bahUni brahmavAdinaH |
teShAM vikalpaprAdhAnyamutAho ekamukhyatA || 1||
bhavatodAhR^itaH svAmin bhaktiyogo.anapekShitaH |
nirasya sarvataH sa~NgaM yena tvayyAvishenmanaH || 2||
shrIbhagavAnuvAcha
kAlena naShTA pralaye vANIyaM vedasa.nj~nitA |
mayA.a.adau brahmaNe proktA dharmo yasyAM madAtmakaH || 3||
tena proktA cha putrAya manave pUrvajAya sA |
tato bhR^igvAdayo.agR^ihNan sapta brahmamaharShayaH || 4||
tebhyaH pitR^ibhyastatputrA devadAnavaguhyakAH |
manuShyAH siddhagandharvAH savidyAdharachAraNAH || 5||
kindevAH kinnarA nAgA rakShaH kimpuruShAdayaH |
bahvyasteShAM prakR^itayo rajaHsattvatamobhuvaH || 6||
yAbhirbhUtAni bhidyante bhUtAnAM patayastathA |
yathAprakR^iti sarveShAM chitrA vAchaH sravanti hi || 7||
evaM prakR^itivaichitryAdbhidyante matayo nR^iNAm |
pAramparyeNa keShA~nchitpAkhaNDamatayo.apare || 8||
manmAyAmohitadhiyaH puruShAH puruSharShabha |
shreyo vadantyanekAntaM yathAkarma yathAruchi || 9||
dharmameke yashashchAnye kAmaM satyaM damaM shamam |
anye vadanti svArthaM vA aishvaryaM tyAgabhojanam |
kechidyaj~natapo dAnaM vratAni niyamAn yamAn || 10||
Adyantavanta evaiShAM lokAH karmavinirmitAH |
duHkhodarkAstamoniShThAH kShudrAnandAH shuchArpitAH || 11||
mayyarpitAtmanaH sabhya nirapekShasya sarvataH |
mayA.a.atmanA sukhaM yattatkutaH syAdviShayAtmanAm || 12||
aki~nchanasya dAntasya shAntasya samachetasaH |
mayA santuShTamanasaH sarvAH sukhamayA dishaH || 13||
na pArameShThyaM na mahendradhiShNyaM
na sArvabhaumaM na rasAdhipatyam |
na yogasiddhIrapunarbhavaM vA
mayyarpitAtmechChati madvinAnyat || 14||
na tathA me priyatama Atmayonirna sha~NkaraH |
na cha sa~NkarShaNo na shrIrnaivAtmA cha yathA bhavAn || 15||
nirapekShaM muniM shAntaM nirvairaM samadarshanam |
anuvrajAmyahaM nityaM pUyeyetya~NghrireNubhiH || 16||
niShki~nchanA mayyanuraktachetasaH
shAntA mahAnto.akhilajIvavatsalAH |
kAmairanAlabdhadhiyo juShanti yat
tannairapekShyaM na viduH sukhaM mama || 17||
bAdhyamAno.api madbhakto viShayairajitendriyaH |
prAyaH pragalbhayA bhaktyA viShayairnAbhibhUyate || 18||
yathAgniH susamR^iddhArchiH karotyedhAMsi bhasmasAt |
tathA madviShayA bhaktiruddhavainAMsi kR^itsnashaH || 19||
na sAdhayati mAM yogo na sA~NkhyaM dharma uddhava |
na svAdhyAyastapastyAgo yathA bhaktirmamorjitA || 20||
bhaktyAhamekayA grAhyaH shraddhayA.a.atmA priyaH satAm |
bhaktiH punAti manniShThA shvapAkAnapi sambhavAt || 21||
dharmaH satyadayopeto vidyA vA tapasAnvitA |
madbhaktyApetamAtmAnaM na samyak prapunAti hi || 22||
kathaM vinA romaharShaM dravatA chetasA vinA |
vinAnandAshrukalayA shudhyedbhaktyA vinA.a.ashayaH || 23||
vAggadgadA dravate yasya chittaM
rudatyabhIkShNaM hasati kvachichcha |
vilajja udgAyati nR^ityate cha
madbhaktiyukto bhuvanaM punAti || 24||
yathAgninA hema malaM jahAti
dhmAtaM punaH svaM bhajate cha rUpam |
AtmA cha karmAnushayaM vidhUya
madbhaktiyogena bhajatyatho mAm || 25||
yathA yathA.a.atmA parimR^ijyate.asau
matpuNyagAthAshravaNAbhidhAnaiH |
tathA tathA pashyati vastu sUkShmaM
chakShuryathaivA~njanasamprayuktam || 26||
viShayAn dhyAyatashchittaM viShayeShu viShajjate |
mAmanusmaratashchittaM mayyeva pravilIyate || 27||
tasmAdasadabhidhyAnaM yathA svapnamanoratham |
hitvA mayi samAdhatsva mano madbhAvabhAvitam || 28||
strINAM strIsa~NginAM sa~NgaM tyaktvA dUrata AtmavAn |
kSheme vivikta AsInashchintayenmAmatandritaH || 29||
na tathAsya bhavetklesho bandhashchAnyaprasa~NgataH |
yoShitsa~NgAdyathA puMso yathA tatsa~Ngisa~NgataH || 30||
uddhava uvAcha
yathA tvAmaravindAkSha yAdR^ishaM vA yadAtmakam |
dhyAyenmumukShuretanme dhyAnaM tvaM vaktumarhasi || 31||
shrIbhagavAnuvAcha
sama Asana AsInaH samakAyo yathAsukham |
hastAvutsa~Nga AdhAya svanAsAgrakR^itekShaNaH || 32||
prANasya shodhayenmArgaM pUrakumbhakarechakaiH |
viparyayeNApi shanairabhyasennirjitendriyaH || 33||
hR^idyavichChinnamo~NkAraM ghaNTAnAdaM bisorNavat |
prANenodIrya tatrAtha punaH saMveshayetsvaram || 34||
evaM praNavasaMyuktaM prANameva samabhyaset |
dashakR^itvastriShavaNaM mAsAdarvAgjitAnilaH || 35||
hR^itpuNDarIkamantaHsthamUrdhvanAlamadhomukham |
dhyAtvordhvamukhamunnidramaShTapatraM sakarNikam || 36||
karNikAyAM nyasetsUryasomAgnInuttarottaram |
vahnimadhye smaredrUpaM mamaitad.hdhyAnama~Ngalam || 37||
samaM prashAntaM sumukhaM dIrghachAruchaturbhujam |
suchArusundaragrIvaM sukapolaM shuchismitam || 38||
samAnakarNavinyastasphuranmakarakuNDalam |
hemAmbaraM ghanashyAmaM shrIvatsashrIniketanam || 39||
sha~NkhachakragadApadmavanamAlAvibhUShitam |
nUpurairvilasatpAdaM kaustubhaprabhayA yutam || 40||
dyumatkirITakaTakakaTisUtrA~NgadAyutam |
sarvA~NgasundaraM hR^idyaM prasAdasumukhekShaNam || 41||
sukumAramabhidhyAyetsarvA~NgeShu mano dadhat |
indriyANIndriyArthebhyo manasA.a.akR^iShya tanmanaH |
bud.hdhyA sArathinA dhIraH praNayenmayi sarvataH || 42||
tatsarvavyApakaM chittamAkR^iShyaikatra dhArayet |
nAnyAni chintayedbhUyaH susmitaM bhAvayenmukham || 43||
tatra labdhapadaM chittamAkR^iShya vyomni dhArayet |
tachcha tyaktvA madAroho na ki~nchidapi chintayet || 44||
evaM samAhitamatirmAmevAtmAnamAtmani |
vichaShTe mayi sarvAtman jyotirjyotiShi saMyutam || 45||
dhyAnenetthaM sutIvreNa yu~njato yogino manaH |
saMyAsyatyAshu nirvANaM dravyaj~nAnakriyAbhramaH || 46||
iti shrImadbhAgavate mahApurANe pAramahaMsyAM
saMhitAyAM ekAdashaskandhe chaturdasho.adhyAyaH || 14||
\iti
\section{.. OM namo bhagavate vAsudevAya ..}
\section{.. pa~nchadasho.adhyAyaH \- 15 ..}
shrIbhagavAnuvAcha
jitendriyasya yuktasya jitashvAsasya yoginaH |
mayi dhArayatashcheta upatiShThanti siddhayaH || 1||
uddhava uvAcha
kayA dhAraNayA kA svitkathaM vA siddhirachyuta |
kati vA siddhayo brUhi yoginAM siddhido bhavAn || 2||
shrIbhagavAnuvAcha
siddhayo.aShTAdasha proktA dhAraNAyogapAragaiH |
tAsAmaShTau matpradhAnA dashaiva guNahetavaH || 3||
aNimA mahimA mUrterlaghimA prAptirindriyaiH |
prAkAmyaM shrutadR^iShTeShu shaktipreraNamIshitA || 4||
guNeShvasa~Ngo vashitA yatkAmastadavasyati |
etA me siddhayaH saumya aShTAvautpattikA matAH || 5||
anUrmimattvaM dehe.asmin dUrashravaNadarshanam |
manojavaH kAmarUpaM parakAyapraveshanam || 6||
svachChandamR^ityurdevAnAM sahakrIDAnudarshanam |
yathAsa~NkalpasaMsiddhirAj~nApratihatAgatiH || 7||
trikAlaj~natvamadvandvaM parachittAdyabhij~natA |
agnyarkAmbuviShAdInAM pratiShTambho.aparAjayaH || 8||
etAshchoddeshataH proktA yogadhAraNasiddhayaH |
yayA dhAraNayA yA syAdyathA vA syAnnibodha me || 9||
bhUtasUkShmAtmani mayi tanmAtraM dhArayenmanaH |
aNimAnamavApnoti tanmAtropAsako mama || 10||
mahatyAtmanmayi pare yathAsaMsthaM mano dadhat |
mahimAnamavApnoti bhUtAnAM cha pR^ithak pR^ithak || 11||
paramANumaye chittaM bhUtAnAM mayi ra~njayan |
kAlasUkShmArthatAM yogI laghimAnamavApnuyAt || 12||
dhArayan mayyahaM tattve mano vaikArike.akhilam |
sarvendriyANAmAtmatvaM prAptiM prApnoti manmanAH || 13||
mahatyAtmani yaH sUtre dhArayenmayi mAnasam |
prAkAmyaM pArameShThyaM me vindate.avyaktajanmanaH || 14||
viShNau tryadhIshvare chittaM dhArayetkAlavigrahe |
sa IshitvamavApnoti kShetraj~nakShetrachodanAm || 15||
nArAyaNe turIyAkhye bhagavachChabdashabdite |
mano mayyAdadhadyogI maddharmA vashitAmiyAt || 16||
nirguNe brahmaNi mayi dhArayan vishadaM manaH |
paramAnandamApnoti yatra kAmo.avasIyate || 17||
shvetadvIpapatau chittaM shuddhe dharmamaye mayi |
dhAraya~nChvetatAM yAti ShaDUrmirahito naraH || 18||
mayyAkAshAtmani prANe manasA ghoShamudvahan |
tatropalabdhA bhUtAnAM haMso vAchaH shR^iNotyasau || 19||
chakShustvaShTari saMyojya tvaShTAramapi chakShuShi |
mAM tatra manasA dhyAyan vishvaM pashyati sUkShmadR^ik || 20||
mano mayi susaMyojya dehaM tadanuvAyunA |
maddhAraNAnubhAvena tatrAtmA yatra vai manaH || 21||
yadA mana upAdAya yadyadrUpaM bubhUShati |
tattadbhavenmanorUpaM madyogabalamAshrayaH || 22||
parakAyaM vishan siddha AtmAnaM tatra bhAvayet |
piNDaM hitvA vishetprANo vAyubhUtaH ShaDa~Nghrivat || 23||
pArShNyA.a.apIDya gudaM prANaM hR^iduraHkaNThamUrdhasu |
Aropya brahmarandhreNa brahma nItvotsR^ijettanum || 24||
vihariShyan surAkrIDe matsthaM sattvaM vibhAvayet |
vimAnenopatiShThanti sattvavR^ittIH surastriyaH || 25||
yathA sa~Nkalpayedbud.hdhyA yadA vA matparaH pumAn |
mayi satye mano yu~njaMstathA tatsamupAshnute || 26||
yo vai madbhAvamApanna IshiturvashituH pumAn |
kutashchinna vihanyeta tasya chAj~nA yathA mama || 27||
madbhaktyA shuddhasattvasya yogino dhAraNAvidaH |
tasya traikAlikI buddhirjanmamR^ityUpabR^iMhitA || 28||
agnyAdibhirna hanyeta muneryogamayaM vapuH |
madyogashrAntachittasya yAdasAmudakaM yathA || 29||
madvibhUtIrabhidhyAyan shrIvatsAstravibhUShitAH |
dhvajAtapatravyajanaiH sa bhavedaparAjitaH || 30||
upAsakasya mAmevaM yogadhAraNayA muneH |
siddhayaH pUrvakathitA upatiShThantyasheShataH || 31||
jitendriyasya dAntasya jitashvAsAtmano muneH |
maddhAraNAM dhArayataH kA sA siddhiH sudurlabhA || 32||
antarAyAn vadantyetA yu~njato yogamuttamam |
mayA sampadyamAnasya kAlakShapaNahetavaH || 33||
janmauShadhitapomantrairyAvatIriha siddhayaH |
yogenApnoti tAH sarvA nAnyairyogagatiM vrajet || 34||
sarvAsAmapi siddhInAM hetuH patirahaM prabhuH |
ahaM yogasya sA~Nkhyasya dharmasya brahmavAdinAm || 35||
ahamAtmAntaro bAhyo.anAvR^itaH sarvadehinAm |
yathA bhUtAni bhUteShu bahirantaH svayaM tathA || 36||
iti shrImadbhAgavate mahApurANe pAramahaMsyAM
saMhitAyAM ekAdashaskandhe pa~nchadasho.adhyAyaH || 15||
\iti
\section{.. OM namo bhagavate vAsudevAya ..}
\section{.. ShoDasho.adhyAyaH \- 16 ..}
uddhava uvAcha
tvaM brahma paramaM sAkShAdanAdyantamapAvR^itam |
sarveShAmapi bhAvAnAM trANasthityapyayodbhavaH || 1||
uchchAvacheShu bhUteShu durj~neyamakR^itAtmabhiH |
upAsate tvAM bhagavan yAthAtathyena brAhmaNAH || 2||
yeShu yeShu cha bhAveShu bhaktyA tvAM paramarShayaH |
upAsInAH prapadyante saMsiddhiM tadvadasva me || 3||
gUDhashcharasi bhUtAtmA bhUtAnAM bhUtabhAvana |
na tvAM pashyanti bhUtAni pashyantaM mohitAni te || 4||
yAH kAshcha bhUmau divi vai rasAyAM
vibhUtayo dikShu mahAvibhUte |
tA mahyamAkhyAhyanubhAvitAste
namAmi te tIrthapadA~Nghripadmam || 5||
shrIbhagavAnuvAcha
evametadahaM pR^iShTaH prashnaM prashnavidAM vara |
yuyutsunA vinashane sapatnairarjunena vai || 6||
j~nAtvA j~nAtivadhaM garhyamadharmaM rAjyahetukam |
tato nivR^itto hantAhaM hato.ayamiti laukikaH || 7||
sa tadA puruShavyAghro yuktyA me pratibodhitaH |
abhyabhAShata mAmevaM yathA tvaM raNamUrdhani || 8||
ahamAtmoddhavAmIShAM bhUtAnAM suhR^idIshvaraH |
ahaM sarvANi bhUtAni teShAM sthityudbhavApyayaH || 9||
ahaM gatirgatimatAM kAlaH kalayatAmaham |
guNAnAM chApyahaM sAmyaM guNinyautpattiko guNaH || 10||
guNinAmapyahaM sUtraM mahatAM cha mahAnaham |
sUkShmANAmapyahaM jIvo durjayAnAmahaM manaH || 11||
hiraNyagarbho vedAnAM mantrANAM praNavastrivR^it |
akSharANAmakAro.asmi padAni ChandasAmaham || 12||
indro.ahaM sarvadevAnAM vasUnAmasmi havyavAT |
AdityAnAmahaM viShNU rudrANAM nIlalohitaH || 13||
brahmarShINAM bhR^igurahaM rAjarShINAmahaM manuH |
devarShINAM nArado.ahaM havirdhAnyasmi dhenuShu || 14||
siddheshvarANAM kapilaH suparNo.ahaM patatriNAm |
prajApatInAM dakSho.ahaM pitR^INAmahamaryamA || 15||
mAM vid.hdhyuddhava daityAnAM prahlAdamasureshvaram |
somaM nakShatrauShadhInAM dhaneshaM yakSharakShasAm || 16||
airAvataM gajendrANAM yAdasAM varuNaM prabhum |
tapatAM dyumatAM sUryaM manuShyANAM cha bhUpatim || 17||
uchchaiHshravAstura~NgANAM dhAtUnAmasmi kA~nchanam |
yamaH saMyamatAM chAhaM sarpANAmasmi vAsukiH || 18||
nAgendrANAmananto.ahaM mR^igendraH shR^i~NgidaMShTriNAm |
AshramANAmahaM turyo varNAnAM prathamo.anagha || 19||
tIrthAnAM srotasAM ga~NgA samudraH sarasAmaham |
AyudhAnAM dhanurahaM tripuraghno dhanuShmatAm || 20||
dhiShNyAnAmasmyahaM merurgahanAnAM himAlayaH |
vanaspatInAmashvattha oShadhInAmahaM yavaH || 21||
purodhasAM vasiShTho.ahaM brahmiShThAnAM bR^ihaspatiH |
skando.ahaM sarvasenAnyAmagraNyAM bhagavAnajaH || 22||
yaj~nAnAM brahmayaj~no.ahaM vratAnAmavihiMsanam |
vAyvagnyarkAmbuvAgAtmA shuchInAmapyahaM shuchiH || 23||
yogAnAmAtmasaMrodho mantro.asmi vijigIShatAm |
AnvIkShikI kaushalAnAM vikalpaH khyAtivAdinAm || 24||
strINAM tu shatarUpAhaM puMsAM svAyambhuvo manuH |
nArAyaNo munInAM cha kumAro brahmachAriNAm || 25||
dharmANAmasmi sannyAsaH kShemANAmabahirmatiH |
guhyAnAM sUnR^itaM maunaM mithunAnAmajastvaham || 26||
saMvatsaro.asmyanimiShAM R^itUnAM madhumAdhavau |
mAsAnAM mArgashIrSho.ahaM nakShatrANAM tathAbhijit || 27||
ahaM yugAnAM cha kR^itaM dhIrANAM devalo.asitaH |
dvaipAyano.asmi vyAsAnAM kavInAM kAvya AtmavAn || 28||
vAsudevo bhagavatAM tvaM tu bhAgavateShvaham |
kimpuruShANAM hanumAn vidyAdhrANAM sudarshanaH || 29||
ratnAnAM padmarAgo.asmi padmakoshaH supeshasAm |
kusho.asmi darbhajAtInAM gavyamAjyaM haviHShvaham || 30||
vyavasAyinAmahaM lakShmIH kitavAnAM ChalagrahaH |
titikShAsmi titikShUNAM sattvaM sattvavatAmaham || 31||
ojaH saho balavatAM karmAhaM viddhi sAtvatAm |
sAtvatAM navamUrtInAmAdimUrtirahaM parA || 32||
vishvAvasuH pUrvachittirgandharvApsarasAmaham |
bhUdharANAmahaM sthairyaM gandhamAtramahaM bhuvaH || 33||
apAM rasashcha paramastejiShThAnAM vibhAvasuH |
prabhA sUryendutArANAM shabdo.ahaM nabhasaH paraH || 34||
brahmaNyAnAM balirahaM vIrANAmahamarjunaH |
bhUtAnAM sthitirutpattirahaM vai pratisa~NkramaH || 35||
gatyuktyutsargopAdAnamAnandasparshalakShaNam |
AsvAdashrutyavaghrANamahaM sarvendriyendriyam || 36||
pR^ithivI vAyurAkAsha Apo jyotirahaM mahAn |
vikAraH puruSho.avyaktaM rajaH sattvaM tamaH param |
ahametatprasa~NkhyAnaM j~nAnaM tattvavinishchayaH || 37||
mayeshvareNa jIvena guNena guNinA vinA |
sarvAtmanApi sarveNa na bhAvo vidyate kvachit || 38||
sa~NkhyAnaM paramANUnAM kAlena kriyate mayA |
na tathA me vibhUtInAM sR^ijato.aNDAni koTishaH || 39||
tejaH shrIH kIrtiraishvaryaM hrIstyAgaH saubhagaM bhagaH |
vIryaM titikShA vij~nAnaM yatra yatra sa meM.ashakaH || 40||
etAste kIrtitAH sarvAH sa~NkShepeNa vibhUtayaH |
manovikArA evaite yathA vAchAbhidhIyate || 41||
vAchaM yachCha mano yachCha prANAn yachChedriyANi cha |
AtmAnamAtmanA yachCha na bhUyaH kalpase.adhvane || 42||
yo vai vA~NmanasI saMyagasaMyachChan dhiyA yatiH |
tasya vrataM tapo dAnaM sravatyAmaghaTAmbuvat || 43||
tasmAdvacho manaH prANAn niyachChenmatparAyaNaH |
madbhaktiyuktayA bud.hdhyA tataH parisamApyate || 44||
iti shrImadbhAgavate mahApurANe pAramahaMsyAM
saMhitAyAM ekAdashaskandhe ShoDasho.adhyAyaH || 16||
\iti
\section{.. OM namo bhagavate vAsudevAya ..}
\section{.. saptadasho.adhyAyaH \- 17 ..}
uddhava uvAcha
yastvayAbhihitaH pUrvaM dharmastvadbhaktilakShaNaH |
varNAshramAchAravatAM sarveShAM dvipadAmapi || 1||
yathAnuShThIyamAnena tvayi bhaktirnR^iNAM bhavet |
svadharmeNAravindAkSha tatsamAkhyAtumarhasi || 2||
purA kila mahAbAho dharmaM paramakaM prabho |
yattena haMsarUpeNa brahmaNe.abhyAttha mAdhava || 3||
sa idAnIM sumahatA kAlenAmitrakarshana |
na prAyo bhavitA martyaloke prAganushAsitaH || 4||
vaktA kartAvitA nAnyo dharmasyAchyuta te bhuvi |
sabhAyAmapi vairi~nchyAM yatra mUrtidharAH kalAH || 5||
kartrAvitrA pravaktrA cha bhavatA madhusUdana |
tyakte mahItale deva vinaShTaM kaH pravakShyati || 6||
tattvaM naH sarvadharmaj~na dharmastvadbhaktilakShaNaH |
yathA yasya vidhIyeta tathA varNaya me prabho || 7||
shrIshuka uvAcha
itthaM svabhR^ityamukhyena pR^iShTaH sa bhagavAn hariH |
prItaH kShemAya martyAnAM dharmAnAha sanAtanAn || 8||
shrIbhagavAnuvAcha
dharmya eSha tava prashno naiHshreyasakaro nR^iNAm |
varNAshramAchAravatAM tamuddhava nibodha me || 9||
Adau kR^itayuge varNo nR^iNAM haMsa iti smR^itaH |
kR^itakR^ityAH prajA jAtyA tasmAtkR^itayugaM viduH || 10||
vedaH praNava evAgre dharmo.ahaM vR^iSharUpadhR^ik |
upAsate taponiShThA haMsaM mAM muktakilbiShAH || 11||
tretAmukhe mahAbhAga prANAn me hR^idayAttrayI |
vidyA prAdurabhUttasyA ahamAsaM trivR^inmakhaH || 12||
viprakShatriyaviT shUdrA mukhabAhUrupAdajAH |
vairAjAtpuruShAjjAtA ya AtmAcharalakShaNAH || 13||
gR^ihAshramo jaghanato brahmacharyaM hR^ido mama |
vakShaHsthalAdvane vAsaH nyAsaHshIrShaNi saMsthitaH || 14||
varNAnAmAshramANAM cha janmabhUmyanusAriNIH |
Asan prakR^itayo nR^INAM nIchairnIchottamottamAH || 15||
shamo damastapaH shauchaM santoShaH kShAntirArjavam |
madbhaktishcha dayA satyaM brahmaprakR^itayastvimAH || 16||
tejo balaM dhR^itiH shauryaM titikShaudAryamudyamaH |
sthairyaM brahmaNyamaishvaryaM kShatraprakR^itayastvimAH || 17||
AstikyaM dAnaniShThA cha adambho brahmasevanam |
atuShTirarthopachayairvaishyaprakR^itayastvimAH || 18||
shushrUShaNaM dvijagavAM devAnAM chApyamAyayA |
tatra labdhena santoShaH shUdraprakR^itayastvimAH || 19||
ashauchamanR^itaM steyaM nAstikyaM shuShkavigrahaH |
kAmaH krodhashcha tarShashcha svabhAvo.antevasAyinAm || 20||
ahiMsA satyamasteyamakAmakrodhalobhatA |
bhUtapriyahitehA cha dharmo.ayaM sArvavarNikaH || 21||
dvitIyaM prApyAnupUrvyAjjanmopanayanaM dvijaH |
vasan gurukule dAnto brahmAdhIyIta chAhutaH || 22||
mekhalAjinadaNDAkShabrahmasUtrakamaNDalUn |
jaTilo.adhautadadvAso.araktapIThaH kushAn dadhat || 23||
snAnabhojanahomeShu japochchAre cha vAgyataH |
nachChindyAnnakharomANi kakShopasthagatAnyapi || 24||
reto nAvakirejjAtu brahmavratadharaH svayam |
avakIrNe.avagAhyApsu yatAsustripadIM japet || 25||
agnyarkAchAryagovipraguruvR^iddhasurA~nshuchiH |
samAhita upAsIta sandhye cha yatavAgjapan || 26||
AchAryaM mAM vijAnIyAnnAvanmanyeta karhichit |
na martyabud.hdhyAsUyeta sarvadevamayo guruH || 27||
sAyaM prAtarupAnIya bhaikShyaM tasmai nivedayet |
yachchAnyadapyanuj~nAtamupayu~njIta saMyataH || 28||
shushrUShamANa AchAryaM sadopAsIta nIchavat |
yAnashayyAsanasthAnairnAtidUre kR^itA~njaliH || 29||
evaMvR^itto gurukule vasedbhogavivarjitaH |
vidyA samApyate yAvadbibhradvratamakhaNDitam || 30||
yadyasau ChandasAM lokamArokShyan brahmaviShTapam |
gurave vinyaseddehaM svAdhyAyArthaM bR^ihadvrataH || 31||
agnau gurAvAtmani cha sarvabhUteShu mAM param |
apR^ithagdhIrupAsIta brahmavarchasvyakalmaShaH || 32||
strINAM nirIkShaNasparshasaMlApakShvelanAdikam |
prANino mithunIbhUtAnagR^ihastho.agratastyajet || 33||
shauchamAchamanaM snAnaM sandhyopAsanamArjavam |
tIrthasevA japo.aspR^ishyAbhakShyAsambhAShyavarjanam || 34||
sarvAshramaprayukto.ayaM niyamaH kulanandana |
madbhAvaH sarvabhUteShu manovAkkAyasaMyamaH || 35||
evaM bR^ihadvratadharo brAhmaNo.agniriva jvalan |
madbhaktastIvratapasA dagdhakarmAshayo.amalaH || 36||
athAnantaramAvekShyan yathA jij~nAsitAgamaH |
gurave dakShiNAM dattvA snAyAdgurvanumoditaH || 37||
gR^ihaM vanaM vopavishetpravrajedvA dvijottamaH |
AshramAdAshramaM gachChennAnyathA matparashcharet || 38||
gR^ihArthI sadR^ishIM bhAryAmudvahedajugupsitAm |
yavIyasIM tu vayasA tAM savarNAmanukramAt || 39||
ijyAdhyayanadAnAni sarveShAM cha dvijanmanAm |
pratigraho.adhyApanaM cha brAhmaNasyaiva yAjanam || 40||
pratigrahaM manyamAnastapastejoyashonudam |
anyAbhyAmeva jIveta shilairvA doShadR^ik tayoH || 41||
brAhmaNasya hi deho.ayaM kShudrakAmAya neShyate |
kR^ichChrAya tapase cheha pretyAnantasukhAya cha || 42||
shilo~nChavR^ittyA parituShTachitto
dharmaM mahAntaM virajaM juShANaH |
mayyarpitAtmA gR^iha eva tiShThan
nAtiprasaktaH samupaiti shAntim || 43||
samuddharanti ye vipraM sIdantaM matparAyaNam |
tAnuddhariShye na chirAdApadbhyo naurivArNavAt || 44||
sarvAH samuddharedrAjA piteva vyasanAtprajAH |
AtmAnamAtmanA dhIro yathA gajapatirgajAn || 45||
evaMvidho narapatirvimAnenArkavarchasA |
vidhUyehAshubhaM kR^itsnamindreNa saha modate || 46||
sIdan vipro vaNigvR^ittyA paNyairevApadaM taret |
khaDgena vA.a.apadAkrAnto na shvavR^ittyA katha~nchana || 47||
vaishyavR^ittyA tu rAjanyo jIvenmR^igayayA.a.apadi |
charedvA viprarUpeNa na shvavR^ittyA katha~nchana || 48||
shUdravR^ittiM bhajedvaishyaH shUdraH kArukaTakriyAm |
kR^ichChrAnmukto na garhyeNa vR^ittiM lipseta karmaNA || 49||
vedAdhyAyasvadhAsvAhA balyannAdyairyathodayam |
devarShipitR^ibhUtAni madrUpANyanvahaM yajet || 50||
yadR^ichChayopapannena shuklenopArjitena vA |
dhanenApIDayan bhR^ityAn nyAyenaivAharetkratUn || 51||
kuTumbeShu na sajjeta na pramAdyetkuTumbyapi |
vipashchinnashvaraM pashyedadR^iShTamapi dR^iShTavat || 52||
putradArAptabandhUnAM sa~NgamaH pAnthasa~NgamaH |
anudehaM viyantyete svapno nidrAnugo yathA || 53||
itthaM parimR^ishan mukto gR^iheShvatithivadvasan |
na gR^ihairanubadhyeta nirmamo niraha~NkR^itaH || 54||
karmabhirgR^ihamedhIyairiShTvA mAmeva bhaktimAn |
tiShThedvanaM vopavishetprajAvAn vA parivrajet || 55||
yastvAsaktamatirgehe putravittaiShaNAturaH |
straiNaH kR^ipaNadhIrmUDho mamAhamiti badhyate || 56||
aho me pitarau vR^iddhau bhAryA bAlAtmajAtmajAH |
anAthA mAmR^ite dInAH kathaM jIvanti duHkhitAH || 57||
evaM gR^ihAshayAkShiptahR^idayo mUDhadhIrayam |
atR^iptastAnanudhyAyan mR^ito.andhaM vishate tamaH || 58||
iti shrImadbhAgavate mahApurANe pAramahaMsyAM
saMhitAyAM ekAdashaskandhe saptadasho.adhyAyaH || 17||
\iti
\section{.. OM namo bhagavate vAsudevAya ..}
\section{.. aShTAdasho.adhyAyaH \- 18 ..}
shrIbhagavAnuvAcha
vanaM vivikShuH putreShu bhAryAM nyasya sahaiva vA |
vana eva vasechChAntastR^itIyaM bhAgamAyuShaH || 1||
kandamUlaphalairvanyairmedhyairvR^ittiM prakalpayet |
vasIta valkalaM vAsastR^iNaparNAjinAni cha || 2||
kesharomanakhashmashrumalAni bibhR^iyAddataH |
na dhAvedapsu majjeta trikAlaM sthaNDileshayaH || 3||
grIShme tapyeta pa~nchAgnIn varShAsvAsAraShADjale |
AkaNThamagnaH shishira evaM vR^ittastapashcharet || 4||
agnipakvaM samashnIyAtkAlapakvamathApi vA |
ulUkhalAshmakuTTo vA dantolUkhala eva vA || 5||
svayaM sa~nchinuyAtsarvamAtmano vR^ittikAraNam |
deshakAlabalAbhij~no nAdadItAnyadAhR^itam || 6||
vanyaishcharupuroDAshairnirvapetkAlachoditAn |
na tu shrautena pashunA mAM yajeta vanAshramI || 7||
agnihotraM cha darshashcha pUrNamAsashcha pUrvavat |
chAturmAsyAni cha munerAmnAtAni cha naigamaiH || 8||
evaM chIrNena tapasA munirdhamanisantataH |
mAM tapomayamArAdhya R^iShilokAdupaiti mAm || 9||
yastvetatkR^ichChratashchIrNaM tapo niHshreyasaM mahat |
kAmAyAlpIyase yu~njyAdbAlishaH ko.aparastataH || 10||
yadAsau niyame.akalpo jarayA jAtavepathuH |
AtmanyagnIn samAropya machchitto.agniM samAvishet || 11||
yadA karmavipAkeShu lokeShu nirayAtmasu |
virAgo jAyate samya~N nyastAgniH pravrajettataH || 12||
iShTvA yathopadeshaM mAM dattvA sarvasvamR^itvije |
agnIn svaprANa Aveshya nirapekShaH parivrajet || 13||
viprasya vai sannyasato devA dArAdirUpiNaH |
vighnAn kurvantyayaM hyasmAnAkramya samiyAtparam || 14||
bibhR^iyAchchenmunirvAsaH kaupInAchChAdanaM param |
tyaktaM na daNDapAtrAbhyAmanyatki~nchidanApadi || 15||
dR^iShTipUtaM nyasetpAdaM vastrapUtaM pibejjalam |
satyapUtAM vadedvAchaM manaHpUtaM samAcharet || 16||
maunAnIhAnilAyAmA daNDA vAgdehachetasAm |
na hyete yasya santya~Nga veNubhirna bhavedyatiH || 17||
bhikShAM chaturShu varNeShu vigarhyAn varjayaMshcharet |
saptAgArAnasa~NkLLiptAMstuShyellabdhena tAvatA || 18||
bahirjalAshayaM gatvA tatropaspR^ishya vAgyataH |
vibhajya pAvitaM sheShaM bhu~njItAsheShamAhR^itam || 19||
ekashcharenmahImetAM niHsa~NgaH saMyatendriyaH |
AtmakrIDa Atmarata AtmavAn samadarshanaH || 20||
viviktakShemasharaNo madbhAvavimalAshayaH |
AtmAnaM chintayedekamabhedena mayA muniH || 21||
anvIkShetAtmano bandhaM mokShaM cha j~nAnaniShThayA |
bandha indriyavikShepo mokSha eShAM cha saMyamaH || 22||
tasmAnniyamya ShaDvargaM madbhAvena charenmuniH |
viraktaH kShudrakAmebhyo labdhvA.a.atmani sukhaM mahat || 23||
puragrAmavrajAn sArthAn bhikShArthaM pravishaMshcharet |
puNyadeshasarichChailavanAshramavatIM mahIm || 24||
vAnaprasthAshramapadeShvabhIkShNaM bhaikShyamAcharet |
saMsidhyatyAshvasammohaH shuddhasattvaH shilAndhasA || 25||
naitadvastutayA pashyeddR^ishyamAnaM vinashyati |
asaktachitto viramedihAmutra chikIrShitAt || 26||
yadetadAtmani jaganmanovAkprANasaMhatam |
sarvaM mAyeti tarkeNa svasthastyaktvA na tatsmaret || 27||
j~nAnaniShTho virakto vA madbhakto vAnapekShakaH |
sali~NgAnAshramAMstyaktvA charedavidhigocharaH || 28||
budho bAlakavatkrIDetkushalo jaDavachcharet |
vadedunmattavadvidvAn gocharyAM naigamashcharet || 29||
vedavAdarato na syAnna pAkhaNDI na haitukaH |
shuShkavAdavivAde na ka~nchitpakShaM samAshrayet || 30||
nodvijeta janAddhIro janaM chodvejayenna tu |
ativAdAMstitikSheta nAvamanyeta ka~nchana |
dehamuddishya pashuvadvairaM kuryAnna kenachit || 31||
eka eva paro hyAtmA bhUteShvAtmanyavasthitaH |
yathendurudapAtreShu bhUtAnyekAtmakAni cha || 32||
alabdhvA na viShIdeta kAle kAle.ashanaM kvachit |
labdhvA na hR^iShyeddhR^itimAnubhayaM daivatantritam || 33||
AhArArthaM samIheta yuktaM tatprANadhAraNam |
tattvaM vimR^ishyate tena tadvij~nAya vimuchyate || 34||
yadR^ichChayopapannAnnamadyAchChreShThamutAparam |
tathA vAsastathA shayyAM prAptaM prAptaM bhajenmuniH || 35||
shauchamAchamanaM snAnaM na tu chodanayA charet |
anyAMshcha niyamA~nj~nAnI yathAhaM lIlayeshvaraH || 36||
na hi tasya vikalpAkhyA yA cha madvIkShayA hatA |
AdehAntAtkvachitkhyAtistataH sampadyate mayA || 37||
duHkhodarkeShu kAmeShu jAtanirveda AtmavAn |
ajij~nAsitamaddharmo guruM munimupavrajet || 38||
tAvatparicharedbhaktaH shraddhAvAnanasUyakaH |
yAvadbrahma vijAnIyAnmAmeva gurumAdR^itaH || 39||
yastvasaMyataShaDvargaH prachaNDendriyasArathiH |
j~nAnavairAgyarahitastridaNDamupajIvati || 40||
surAnAtmAnamAtmasthaM nihnute mAM cha dharmahA |
avipakvakaShAyo.asmAdamuShmAchcha vihIyate || 41||
bhikShordharmaH shamo.ahiMsA tapa IkShA vanaukasaH |
gR^ihiNo bhUtarakShejyA dvijasyAchAryasevanam || 42||
brahmacharyaM tapaH shauchaM santoSho bhUtasauhR^idam |
gR^ihasthasyApyR^itau gantuH sarveShAM madupAsanam || 43||
iti mAM yaH svadharmeNa bhajennityamananyabhAk |
sarvabhUteShu madbhAvo madbhaktiM vindate dR^iDhAm || 44||
bhaktyoddhavAnapAyinyA sarvalokamaheshvaram |
sarvotpattyapyayaM brahma kAraNaM mopayAti saH || 45||
iti svadharmanirNiktasattvo nirj~nAtamadgatiH |
j~nAnavij~nAnasampanno na chirAtsamupaiti mAm || 46||
varNAshramavatAM dharma eSha AchAralakShaNaH |
sa eva madbhaktiyuto niHshreyasakaraH paraH || 47||
etatte.abhihitaM sAdho bhavAn pR^ichChati yachcha mAm |
yathA svadharmasaMyukto bhakto mAM samiyAtparam || 48||
iti shrImadbhAgavate mahApurANe pAramahaMsyAM
saMhitAyAM ekAdashaskandhe aShTAdasho.adhyAyaH || 18||
\iti
\section{.. OM namo bhagavate vAsudevAya ..}
\section{.. ekonaviMsho.adhyAyaH \- 19 ..}
shrIbhagavAnuvAcha
yo vidyAshrutasampannaH AtmavAn nAnumAnikaH |
mAyAmAtramidaM j~nAtvA j~nAnaM cha mayi sannyaset || 1||
j~nAninastvahameveShTaH svArtho hetushcha sammataH |
svargashchaivApavargashcha nAnyo.artho madR^ite priyaH || 2||
j~nAnavij~nAnasaMsiddhAH padaM shreShThaM vidurmama |
j~nAnI priyatamo.ato me j~nAnenAsau bibharti mAm || 3||
tapastIrthaM japo dAnaM pavitrANItarANi cha |
nAlaM kurvanti tAM siddhiM yA j~nAnakalayA kR^itA || 4||
tasmAjj~nAnena sahitaM j~nAtvA svAtmAnamuddhava |
j~nAnavij~nAnasampanno bhaja mAM bhaktibhAvataH || 5||
j~nAnavij~nAnayaj~nena mAmiShTvA.a.atmAnamAtmani |
sarvayaj~napatiM mAM vai saMsiddhiM munayo.agaman || 6||
tvayyuddhavAshrayati yastrividho vikAro
mAyAntarApatati nAdyapavargayoryat |
janmAdayo.asya yadamI tava tasya kiM syu\-
rAdyantayoryadasato.asti tadeva madhye || 7||
uddhava uvAcha
j~nAnaM vishuddhaM vipulaM yathaita\-
dvairAgyavij~nAnayutaM purANam |
AkhyAhi vishveshvara vishvamUrte
tvadbhaktiyogaM cha mahadvimR^igyam || 8||
tApatrayeNAbhihatasya ghore
santapyamAnasya bhavAdhvanIsha |
pashyAmi nAnyachCharaNaM tavA~Nghri\-
dvandvAtapatrAdamR^itAbhivarShAt || 9||
daShTaM janaM sampatitaM bile.asmin
kAlAhinA kShudrasukhorutarSham |
samuddharainaM kR^ipayA.a.apavargyai\-
rvachobhirAsi~ncha mahAnubhAva || 10||
shrIbhagavAnuvAcha
itthametatpurA rAjA bhIShmaM dharmabhR^itAM varam |
ajAtashatruH paprachCha sarveShAM no.anushR^iNvatAm || 11||
nivR^itte bhArate yuddhe suhR^innidhanavihvalaH |
shrutvA dharmAn bahUn pashchAnmokShadharmAnapR^ichChata || 12||
tAnahaM te.abhidhAsyAmi devavratamukhAchChrutAn |
j~nAnavairAgyavij~nAnashraddhAbhaktyupabR^iMhitAn || 13||
navaikAdashapa~nchatrIn bhAvAn bhUteShu yena vai |
IkShetAthaikamapyeShu tajj~nAnaM mama nishchitam || 14||
etadeva hi vij~nAnaM na tathaikena yena yat |
sthityutpattyapyayAn pashyedbhAvAnAM triguNAtmanAm || 15||
AdAvante cha madhye cha sR^ijyAtsR^ijyaM yadanviyAt |
punastatpratisa~NkrAme yachChiShyeta tadeva sat || 16||
shrutiH pratyakShamaitihyamanumAnaM chatuShTayam |
pramANeShvanavasthAnAdvikalpAtsa virajyate || 17||
karmaNAM pariNAmitvAdAviri~nchAdama~Ngalam |
vipashchinnashvaraM pashyedadR^iShTamapi dR^iShTavat || 18||
bhaktiyogaH puraivoktaH prIyamANAya te.anagha |
punashcha kathayiShyAmi madbhakteH kAraNaM param || 19||
shraddhAmR^itakathAyAM me shashvanmadanukIrtanam |
pariniShThA cha pUjAyAM stutibhiH stavanaM mama || 20||
AdaraH paricharyAyAM sarvA~Ngairabhivandanam |
madbhaktapUjAbhyadhikA sarvabhUteShu manmatiH || 21||
madartheShva~Nga cheShTA cha vachasA madguNeraNam |
mayyarpaNaM cha manasaH sarvakAmavivarjanam || 22||
madarthe.arthaparityAgo bhogasya cha sukhasya cha |
iShTaM dattaM hutaM japtaM madarthaM yadvrataM tapaH || 23||
evaM dharmairmanuShyANAmuddhavAtmanivedinAm |
mayi sa~njAyate bhaktiH ko.anyo.artho.asyAvashiShyate || 24||
yadAtmanyarpitaM chittaM shAntaM sattvopabR^iMhitam |
dharmaM j~nAnaM savairAgyamaishvaryaM chAbhipadyate || 25||
yadarpitaM tadvikalpe indriyaiH paridhAvati |
rajasvalaM chAsanniShThaM chittaM viddhi viparyayam || 26||
dharmo madbhaktikR^itprokto j~nAnaM chaikAtmyadarshanam |
guNeShvasa~Ngo vairAgyamaishvaryaM chANimAdayaH || 27||
uddhava uvAcha
yamaH kati vidhaH prokto niyamo vArikarshana |
kaH shamaH ko damaH kR^iShNa kA titikShA dhR^itiH prabho || 28||
kiM dAnaM kiM tapaH shauryaM kiM satyamR^itamuchyate |
kastyAgaH kiM dhanaM cheShTaM ko yaj~naH kA cha dakShiNA || 29||
puMsaH kiMsvidbalaM shrIman bhago lAbhashcha keshava |
kA vidyA hrIH parA kA shrIH kiM sukhaM duHkhameva cha || 30||
kaH paNDitaH kashcha mUrkhaH kaH panthA utpathashcha kaH |
kaH svargo narakaH kaH svitko bandhuruta kiM gR^iham || 31||
ka ADhyaH ko daridro vA kR^ipaNaH kaH ka IshvaraH |
etAn prashnAn mama brUhi viparItAMshcha satpate || 32||
shrIbhagavAnuvAcha
ahiMsA satyamasteyamasa~Ngo hrIrasa~nchayaH |
AstikyaM brahmacharyaM cha maunaM sthairyaM kShamAbhayam || 33||
shauchaM japastapo homaH shraddhA.a.atithyaM madarchanam |
tIrthATanaM parArthehA tuShTirAchAryasevanam || 34||
ete yamAH saniyamA ubhayordvAdasha smR^itAH |
puMsAmupAsitAstAta yathAkAmaM duhanti hi || 35||
shamo manniShThatA buddherdama indriyasaMyamaH |
titikShA duHkhasammarSho jihvopasthajayo dhR^itiH || 36||
daNDanyAsaH paraM dAnaM kAmatyAgastapaH smR^itam |
svabhAvavijayaH shauryaM satyaM cha samadarshanam || 37||
R^itaM cha sUnR^itA vANI kavibhiH parikIrtitA |
karmasvasa~NgamaH shauchaM tyAgaH sannyAsa uchyate || 38||
dharma iShTaM dhanaM nR^INAM yaj~no.ahaM bhagavattamaH |
dakShiNA j~nAnasandeshaH prANAyAmaH paraM balam || 39||
bhago ma aishvaro bhAvo lAbho madbhaktiruttamaH |
vidyA.a.atmani bhidAbAdho jugupsA hrIrakarmasu || 40||
shrIrguNA nairapekShyAdyAH sukhaM duHkhasukhAtyayaH |
duHkhaM kAmasukhApekShA paNDito bandhamokShavit || 41||
mUrkho dehAdyahaM buddhiH panthA mannigamaH smR^itaH |
utpathashchittavikShepaH svargaH sattvaguNodayaH || 42||
narakastama unnAho bandhurgururahaM sakhe |
gR^ihaM sharIraM mAnuShyaM guNADhyo hyADhya uchyate || 43||
daridro yastvasantuShTaH kR^ipaNo yo.ajitendriyaH |
guNeShvasaktadhIrIsho guNasa~Ngo viparyayaH || 44||
eta uddhava te prashnAH sarve sAdhu nirUpitAH |
kiM varNitena bahunA lakShaNaM guNadoShayoH |
guNadoShadR^ishirdoSho guNastUbhayavarjitaH || 45||
iti shrImadbhAgavate mahApurANe pAramahaMsyAM
saMhitAyAM ekAdashaskandhe ekonaviMsho.adhyAyaH || 19||
\iti
\section{.. OM namo bhagavate vAsudevAya ..}
\section{.. viMsho.adhyAyaH \- 20 ..}
uddhava uvAcha
vidhishcha pratiShedhashcha nigamo hIshvarasya te |
avekShate.aravindAkSha guNaM doShaM cha karmaNAm || 1||
varNAshramavikalpaM cha pratilomAnulomajam |
dravyadeshavayaHkAlAn svargaM narakameva cha || 2||
guNadoShabhidA dR^iShTimantareNa vachastava |
niHshreyasaM kathaM nR^INAM niShedhavidhilakShaNam || 3||
pitR^idevamanuShyANAM vedashchakShustaveshvara |
shreyastvanupalabdhe.arthe sAdhyasAdhanayorapi || 4||
guNadoShabhidAdR^iShTirnigamAtte na hi svataH |
nigamenApavAdashcha bhidAyA iti ha bhramaH || 5||
shrIbhagavAnuvAcha
yogAstrayo mayA proktA nR^INAM shreyovidhitsayA |
j~nAnaM karma cha bhaktishcha nopAyo.anyo.asti kutrachit || 6||
nirviNNAnAM j~nAnayogo nyAsinAmiha karmasu |
teShvanirviNNachittAnAM karmayogastu kAminAm || 7||
yadR^ichChayA matkathAdau jAtashraddhastu yaH pumAn |
na nirviNNo nAtisakto bhaktiyogo.asya siddhidaH || 8||
tAvatkarmANi kurvIta na nirvidyeta yAvatA |
matkathAshravaNAdau vA shraddhA yAvanna jAyate || 9||
svadharmastho yajan yaj~nairanAshIH kAma uddhava |
na yAti svarganarakau yadyanyanna samAcharet || 10||
asmiMlloke vartamAnaH svadharmastho.anaghaH shuchiH |
j~nAnaM vishuddhamApnoti madbhaktiM vA yadR^ichChayA || 11||
svargiNo.apyetamichChanti lokaM nirayiNastathA |
sAdhakaM j~nAnabhaktibhyAmubhayaM tadasAdhakam || 12||
na naraH svargatiM kA~NkShennArakIM vA vichakShaNaH |
nemaM lokaM cha kA~NkSheta dehAveshAtpramAdyati || 13||
etadvidvAn purA mR^ityorabhavAya ghaTeta saH |
apramatta idaM j~nAtvA martyamapyarthasiddhidam || 14||
ChidyamAnaM yamairetaiH kR^itanIDaM vanaspatim |
khagaH svaketamutsR^ijya kShemaM yAti hyalampaTaH || 15||
ahorAtraishChidyamAnaM buddhvA.a.ayurbhayavepathuH |
muktasa~NgaH paraM buddhvA nirIha upashAmyati || 16||
nR^idehamAdyaM sulabhaM sudurlabhaM
plavaM sukalpaM gurukarNadhAram |
mayAnukUlena nabhasvateritaM
pumAn bhavAbdhiM na taretsa AtmahA || 17||
yadA.a.arambheShu nirviNNo viraktaH saMyatendriyaH |
abhyAsenAtmano yogI dhArayedachalaM manaH || 18||
dhAryamANaM mano yarhi bhrAmyadAshvanavasthitam |
atandrito.anurodhena mArgeNAtmavashaM nayet || 19||
manogatiM na visR^ijejjitaprANo jitendriyaH |
sattvasampannayA bud.hdhyA mana AtmavashaM nayet || 20||
eSha vai paramo yogo manasaH sa~NgrahaH smR^itaH |
hR^idayaj~natvamanvichChan damyasyevArvato muhuH || 21||
sA~Nkhyena sarvabhAvAnAM pratilomAnulomataH |
bhavApyayAvanudhyAyenmano yAvatprasIdati || 22||
nirviNNasya viraktasya puruShasyoktavedinaH |
manastyajati daurAtmyaM chintitasyAnuchintayA || 23||
yamAdibhiryogapathairAnvIkShikyA cha vidyayA |
mamArchopAsanAbhirvA nAnyairyogyaM smarenmanaH || 24||
yadi kuryAtpramAdena yogI karma vigarhitam |
yogenaiva dahedaMho nAnyattatra kadAchana || 25||
sve sve.adhikAre yA niShThA sa guNaH parikIrtitaH |
karmaNAM jAtyashuddhAnAmanena niyamaH kR^itaH |
guNadoShavidhAnena sa~NgAnAM tyAjanechChayA || 26||
jAtashraddho matkathAsu nirviNNaH sarvakarmasu |
vedaduHkhAtmakAn kAmAn parityAge.apyanIshvaraH || 27||
tato bhajeta mAM prItaH shraddhAlurdR^iDhanishchayaH |
juShamANashcha tAn kAmAn duHkhodarkAMshcha garhayan || 28||
proktena bhaktiyogena bhajato mAsakR^inmuneH |
kAmA hR^idayyA nashyanti sarve mayi hR^idi sthite || 29||
bhidyate hR^idayagranthishChidyante sarvasaMshayAH |
kShIyante chAsya karmANi mayi dR^iShTe.akhilAtmani || 30||
tasmAnmadbhaktiyuktasya yogino vai madAtmanaH |
na j~nAnaM na cha vairAgyaM prAyaH shreyo bhavediha || 31||
yatkarmabhiryattapasA j~nAnavairAgyatashcha yat |
yogena dAnadharmeNa shreyobhiritarairapi || 32||
sarvaM madbhaktiyogena madbhakto labhate.a~njasA |
svargApavargaM maddhAma katha~nchidyadi vA~nChati || 33||
na ki~nchitsAdhavo dhIrA bhaktA hyekAntino mama |
vA~nChantyapi mayA dattaM kaivalyamapunarbhavam || 34||
nairapekShyaM paraM prAhurniHshreyasamanalpakam |
tasmAnnirAshiSho bhaktirnirapekShasya me bhavet || 35||
na mayyekAntabhaktAnAM guNadoShodbhavA guNAH |
sAdhUnAM samachittAnAM buddheH paramupeyuShAm || 36||
evametAn mayA.a.adiShTAnanutiShThanti me pathaH |
kShemaM vindanti matsthAnaM yadbrahma paramaM viduH || 37||
iti shrImadbhAgavate mahApurANe pAramahaMsyAM
saMhitAyAM ekAdashaskandhe viMsho.adhyAyaH || 20||
\iti
\section{.. OM namo bhagavate vAsudevAya ..}
\section{.. ekaviMsho.adhyAyaH \- 21 ..}
shrIbhagavAnuvAcha
ya etAn matpatho hitvA bhaktij~nAnakriyAtmakAn |
kShudrAn kAmAMshchalaiH prANairjuShantaH saMsaranti te || 1||
sve sve.adhikAre yA niShThA sa guNaH parikIrtitaH |
viparyayastu doShaH syAdubhayoreSha nishchayaH || 2||
shud.hdhyashuddhI vidhIyete samAneShvapi vastuShu |
dravyasya vichikitsArthaM guNadoShau shubhAshubhau || 3||
dharmArthaM vyavahArArthaM yAtrArthamiti chAnagha |
darshito.ayaM mayA.a.achAro dharmamudvahatAM dhuram || 4||
bhUmyambvagnyanilAkAshA bhUtAnAM pa~nchadhAtavaH |
AbrahmasthAvarAdInAM shArIrA AtmasaMyutAH || 5||
vedena nAma rUpANi viShamANi sameShvapi |
dhAtuShUddhava kalpyanta eteShAM svArthasiddhaye || 6||
deshakAlAdibhAvAnAM vastUnAM mama sattama |
guNadoShau vidhIyete niyamArthaM hi karmaNAm || 7||
akR^iShNasAro deshAnAmabrahmaNyo.ashuchirbhavet |
kR^iShNasAro.apyasauvIrakIkaTAsaMskR^iteriNam || 8||
karmaNyo guNavAn kAlo dravyataH svata eva vA |
yato nivartate karma sa doSho.akarmakaH smR^itaH || 9||
dravyasya shud.hdhyashuddhI cha dravyeNa vachanena cha |
saMskAreNAtha kAlena mahatvAlpatayAtha vA || 10||
shaktyAshaktyAtha vA bud.hdhyA samR^id.hdhyA cha yadAtmane |
aghaM kurvanti hi yathA deshAvasthAnusArataH || 11||
dhAnyadArvasthitantUnAM rasataijasacharmaNAm |
kAlavAyvagnimR^ittoyaiH pArthivAnAM yutAyutaiH || 12||
amedhyaliptaM yadyena gandhalepaM vyapohati |
bhajate prakR^itiM tasya tachChauchaM tAvadiShyate || 13||
snAnadAnatapo.avasthA vIryasaMskArakarmabhiH |
matsmR^ityA chAtmanaH shauchaM shuddhaH karmAchareddvijaH || 14||
mantrasya cha parij~nAnaM karmashuddhirmadarpaNam |
dharmaH sampadyate ShaDbhiradharmastu viparyayaH || 15||
kvachidguNo.api doShaH syAddoSho.api vidhinA guNaH |
guNadoShArthaniyamastadbhidAmeva bAdhate || 16||
samAnakarmAcharaNaM patitAnAM na pAtakam |
autpattiko guNaH sa~Ngo na shayAnaH patatyadhaH || 17||
yato yato nivarteta vimuchyeta tatastataH |
eSha dharmo nR^iNAM kShemaH shokamohabhayApahaH || 18||
viShayeShu guNAdhyAsAtpuMsaH sa~Ngastato bhavet |
sa~NgAttatra bhavetkAmaH kAmAdeva kalirnR^iNAm || 19||
kalerdurviShahaH krodhastamastamanuvartate |
tamasA grasyate puMsashchetanA vyApinI drutam || 20||
tayA virahitaH sAdho jantuH shUnyAya kalpate |
tato.asya svArthavibhraMsho mUrchChitasya mR^itasya cha || 21||
viShayAbhiniveshena nAtmAnaM veda nAparam |
vR^ikShajIvikayA jIvan vyarthaM bhastreva yaH shvasan || 22||
phalashrutiriyaM nR^INAM na shreyo rochanaM param |
shreyo vivakShayA proktaM yathA bhaiShajyarochanam || 23||
utpattyaiva hi kAmeShu prANeShu svajaneShu cha |
Asaktamanaso martyA Atmano.anarthahetuShu || 24||
na tAnaviduShaH svArthaM bhrAmyato vR^ijinAdhvani |
kathaM yu~njyAtpunasteShu tAMstamo vishato budhaH || 25||
evaM vyavasitaM kechidavij~nAya kubuddhayaH |
phalashrutiM kusumitAM na vedaj~nA vadanti hi || 26||
kAminaH kR^ipaNA lubdhAH puShpeShu phalabuddhayaH |
agnimugdhA dhUmatAntAH svaM lokaM na vidanti te || 27||
na te mAma~Nga jAnanti hR^idisthaM ya idaM yataH |
ukthashastrA hyasutR^ipo yathA nIhArachakShuShaH || 28||
te me matamavij~nAya parokShaM viShayAtmakAH |
hiMsAyAM yadi rAgaH syAdyaj~na eva na chodanA || 29||
hiMsAvihArA hyAlabdhaiH pashubhiH svasukhechChayA |
yajante devatA yaj~naiH pitR^ibhUtapatIn khalAH || 30||
svapnopamamamuM lokamasantaM shravaNapriyam |
AshiSho hR^idi sa~Nkalpya tyajantyarthAn yathA vaNik || 31||
rajaHsattvatamoniShThA rajaHsattvatamojuShaH |
upAsata indramukhyAn devAdInna yathaiva mAm || 32||
iShTveha devatA yaj~nairgatvA raMsyAmahe divi |
tasyAnta iha bhUyAsma mahAshAlA mahAkulAH || 33||
evaM puShpitayA vAchA vyAkShiptamanasAM nR^iNAm |
mAninAM chAtistabdhAnAM madvArtApi na rochate || 34||
vedA brahmAtmaviShayAstrikANDaviShayA ime |
parokShavAdA R^iShayaH parokShaM mama cha priyam || 35||
shabdabrahma sudurbodhaM prANendriyamanomayam |
anantapAraM gambhIraM durvigAhyaM samudravat || 36||
mayopabR^iMhitaM bhUmnA brahmaNAnantashaktinA |
bhUteShu ghoSharUpeNa biseShUrNeva lakShyate || 37||
yathorNanAbhirhR^idayAdUrNAmudvamate mukhAt |
AkAshAdghoShavAn prANo manasA sparsharUpiNA || 38||
Chandomayo.amR^itamayaH sahasrapadavIM prabhuH |
o~NkArAdvya~njitasparshasvaroShmAntasthabhUShitAm || 39||
vichitrabhAShAvitatAM ChandobhishchaturuttaraiH |
anantapArAM bR^ihatIM sR^ijatyAkShipate svayam || 40||
gAyatryuShNiganuShTup cha bR^ihatI pa~Nktireva cha |
triShTubjagatyatichChando hyatyaShTyatijagadvirAT || 41||
kiM vidhatte kimAchaShTe kimanUdya vikalpayet |
ityasyA hR^idayaM loke nAnyo madveda kashchana || 42||
mAM vidhatte.abhidhatte mAM vikalpyApohyate tvaham |
etAvAn sarvavedArthaH shabda AsthAya mAM bhidAm |
mAyAmAtramanUdyAnte pratiShidhya prasIdati || 43||
iti shrImadbhAgavate mahApurANe pAramahaMsyAM
saMhitAyAM ekAdashaskandhe ekaviMsho.adhyAyaH || 21||
\iti
\section{.. OM namo bhagavate vAsudevAya ..}
\section{.. dvAviMsho.adhyAyaH \- 22 ..}
uddhava uvAcha
kati tattvAni vishvesha sa~NkhyAtAnyR^iShibhiH prabho |
navaikAdasha pa~ncha trINyAttha tvamiha shushruma || 1||
kechitShaDviMshatiM prAhurapare pa~nchaviMshatim |
saptaike nava ShaTkechichchatvAryekAdashApare |
kechitsaptadasha prAhuH ShoDashaike trayodasha || 2||
etAvattvaM hi sa~NkhyAnAmR^iShayo yadvivakShayA |
gAyanti pR^ithagAyuShmannidaM no vaktumarhasi || 3||
shrIbhagavAnuvAcha
yuktaM cha santi sarvatra bhAShante brAhmaNA yathA |
mAyAM madIyAmudgR^ihya vadatAM kiM nu durghaTam || 4||
naitadevaM yathAttha tvaM yadahaM vachmi tattathA |
evaM vivadatAM hetuM shaktayo me duratyayAH || 5||
yAsAM vyatikarAdAsIdvikalpo vadatAM padam |
prApte shamadame.apyeti vAdastamanushAmyati || 6||
parasparAnupraveshAttattvAnAM puruSharShabha |
paurvAparyaprasa~NkhyAnaM yathA vakturvivakShitam || 7||
ekasminnapi dR^ishyante praviShTAnItarANi cha |
pUrvasmin vA parasmin vA tattve tattvAni sarvashaH || 8||
paurvAparyamato.amIShAM prasa~NkhyAnamabhIpsatAm |
yathA viviktaM yadvaktraM gR^ihNImo yuktisambhavAt || 9||
anAdyavidyAyuktasya puruShasyAtmavedanam |
svato na sambhavAdanyastattvaj~no j~nAnado bhavet || 10||
puruSheshvarayoratra na vailakShaNyamaNvapi |
tadanyakalpanApArthA j~nAnaM cha prakR^iterguNaH || 11||
prakR^itirguNasAmyaM vai prakR^iternAtmano guNAH |
sattvaM rajastama iti sthityutpattyantahetavaH || 12||
sattvaM j~nAnaM rajaH karma tamo.aj~nAnamihochyate |
guNavyatikaraH kAlaH svabhAvaH sUtrameva cha || 13||
puruShaH prakR^itirvyaktamaha~NkAro nabho.anilaH |
jyotirApaH kShitiriti tattvAnyuktAni me nava || 14||
shrotraM tvagdarshanaM ghrANo jihveti j~nAnashaktayaH |
vAkpANyupasthapAyva~NghriH karmANya~NgobhayaM manaH || 15||
shabdaH sparsho raso gandho rUpaM chetyarthajAtayaH |
gatyuktyutsargashilpAni karmAyatanasiddhayaH || 16||
sargAdau prakR^itirhyasya kAryakAraNarUpiNI |
sattvAdibhirguNairdhatte puruSho.avyakta IkShate || 17||
vyaktAdayo vikurvANA dhAtavaH puruShekShayA |
labdhavIryAH sR^ijantyaNDaM saMhatAH prakR^iterbalAt || 18||
saptaiva dhAtava iti tatrArthAH pa~ncha khAdayaH |
j~nAnamAtmobhayAdhArastato dehendriyAsavaH || 19||
ShaDityatrApi bhUtAni pa~ncha ShaShThaH paraH pumAn |
tairyukta AtmasambhUtaiH sR^iShTvedaM samupAvishat || 20||
chatvAryeveti tatrApi teja Apo.annamAtmanaH |
jAtAni tairidaM jAtaM janmAvayavinaH khalu || 21||
sa~NkhyAne saptadashake bhUtamAtrendriyANi cha |
pa~ncha pa~nchaikamanasA AtmA saptadashaH smR^itaH || 22||
tadvatShoDashasa~NkhyAne Atmaiva mana uchyate |
bhUtendriyANi pa~nchaiva mana AtmA trayodasha || 23||
ekAdashatva AtmAsau mahAbhUtendriyANi cha |
aShTau prakR^itayashchaiva puruShashcha navetyatha || 24||
iti nAnAprasa~NkhyAnaM tattvAnAmR^iShibhiH kR^itam |
sarvaM nyAyyaM yuktimattvAdviduShAM kimashobhanam || 25||
uddhava uvAcha
prakR^itiH puruShashchobhau yadyapyAtmavilakShaNau |
anyonyApAshrayAtkR^iShNa dR^ishyate na bhidA tayoH |
prakR^itau lakShyate hyAtmA prakR^itishcha tathA.a.atmani || 26||
evaM me puNDarIkAkSha mahAntaM saMshayaM hR^idi |
Chettumarhasi sarvaj~na vachobhirnayanaipuNaiH || 27||
tvatto j~nAnaM hi jIvAnAM pramoShaste.atra shaktitaH |
tvameva hyAtmamAyAyA gatiM vettha na chAparaH || 28||
shrIbhagavAnuvAcha
prakR^itiH puruShashcheti vikalpaH puruSharShabha |
eSha vaikArikaH sargo guNavyatikarAtmakaH || 29||
mamA~Nga mAyAguNamayyanekadhA
vikalpabuddhIshcha guNairvidhatte |
vaikArikastrividho.adhyAtmameka\-
mathAdhidaivamadhibhUtamanyat || 30||
dR^ig rUpamArkaM vapuratra randhre
parasparaM sidhyati yaH svataH khe |
AtmA yadeShAmaparo ya AdyaH
svayAnubhUtyAkhilasiddhasiddhiH |
evaM tvagAdi shravaNAdi chakShu\-
rjihvAdi nAsAdi cha chittayuktam || 31||
yo.asau guNakShobhakR^ito vikAraH
pradhAnamUlAnmahataH prasUtaH |
ahaM trivR^inmohavikalpahetu\-
rvaikArikastAmasa aindriyashcha || 32||
AtmA parij~nAnamayo vivAdo
hyastIti nAstIti bhidArthaniShThaH |
vyartho.api naivoparameta puMsAM
mattaH parAvR^ittadhiyAM svalokAt || 33||
uddhava uvAcha
tvattaH parAvR^ittadhiyaH svakR^itaiH karmabhiH prabho |
uchchAvachAn yathA dehAn gR^ihNanti visR^ijanti cha || 34||
tanmamAkhyAhi govinda durvibhAvyamanAtmabhiH |
na hyetatprAyasho loke vidvAMsaH santi va~nchitAH || 35||
shrIbhagavAnuvAcha
manaH karmamayaM nR^INAmindriyaiH pa~nchabhiryutam |
lokAllokaM prayAtyanya AtmA tadanuvartate || 36||
dhyAyan mano.anu viShayAn dR^iShTAn vAnushrutAnatha |
udyatsIdatkarmatantraM smR^itistadanu shAmyati || 37||
viShayAbhiniveshena nAtmAnaM yatsmaretpunaH |
jantorvai kasyachiddhetormR^ityuratyantavismR^itiH || 38||
janma tvAtmatayA puMsaH sarvabhAvena bhUrida |
viShayasvIkR^itiM prAhuryathA svapnamanorathaH || 39||
svapnaM manorathaM chetthaM prAktanaM na smaratyasau |
tatra pUrvamivAtmAnamapUrvaM chAnupashyati || 40||
indriyAyanasR^iShTyedaM traividhyaM bhAti vastuni |
bahirantarbhidA heturjano.asajjanakR^idyathA || 41||
nityadA hya~Nga bhUtAni bhavanti na bhavanti cha |
kAlenAlakShyavegena sUkShmatvAttanna dR^ishyate || 42||
yathArchiShAM srotasAM cha phalAnAM vA vanaspateH |
tathaiva sarvabhUtAnAM vayo.avasthAdayaH kR^itAH || 43||
so.ayaM dIpo.archiShAM yadvatsrotasAM tadidaM jalam |
so.ayaM pumAniti nR^iNAM mR^iShA gIrdhIrmR^iShAyuShAm || 44||
mA svasya karmabIjena jAyate so.apyayaM pumAn |
mriyate vAmaro bhrAntyA yathAgnirdArusaMyutaH || 45||
niShekagarbhajanmAni bAlyakaumArayauvanam |
vayomadhyaM jarAmR^ityurityavasthAstanornava || 46||
etA manorathamayIrhyanyasyochchAvachAstanUH |
guNasa~NgAdupAdatte kvachitkashchijjahAti cha || 47||
AtmanaH pitR^iputrAbhyAmanumeyau bhavApyayau |
na bhavApyayavastUnAmabhij~no dvayalakShaNaH || 48||
tarorbIjavipAkAbhyAM yo vidvA~njanmasaMyamau |
tarorvilakShaNo draShTA evaM draShTA tanoH pR^ithak || 49||
prakR^iterevamAtmAnamavivichyAbudhaH pumAn |
tattvena sparshasammUDhaH saMsAraM pratipadyate || 50||
sattvasa~NgAdR^iShIn devAn rajasAsuramAnuShAn |
tamasA bhUtatiryaktvaM bhrAmito yAti karmabhiH || 51||
nR^ityato gAyataH pashyan yathaivAnukaroti tAn |
evaM buddhiguNAn pashyannanIho.apyanukAryate || 52||
yathAmbhasA prachalatA taravo.api chalA iva |
chakShuShA bhrAmyamANena dR^ishyate bhramatIva bhUH || 53||
yathA manorathadhiyo viShayAnubhavo mR^iShA |
svapnadR^iShTAshcha dAshArha tathA saMsAra AtmanaH || 54||
arthe hyavidyamAne.api saMsR^itirna nivartate |
dhyAyato viShayAnasya svapne.anarthAgamo yathA || 55||
tasmAduddhava mA bhu~NkShva viShayAnasadindriyaiH |
AtmAgrahaNanirbhAtaM pashya vaikalpikaM bhramam || 56||
kShipto.avamAnito.asadbhiH pralabdho.asUyito.atha vA |
tADitaH sanniruddho vA vR^ittyA vA parihApitaH || 57||
niShThito mUtrito vAj~nairbahudhaivaM prakampitaH |
shreyaskAmaH kR^ichChragata AtmanA.a.atmAnamuddharet || 58||
uddhava uvAcha
yathaivamanubudhyeyaM vada no vadatAM vara |
suduHsahamimaM manya Atmanyasadatikramam || 59||
viduShAmapi vishvAtman prakR^itirhi balIyasI |
R^ite tvaddharmaniratAn shAntAMste charaNAlayAn || 60||
iti shrImadbhAgavate mahApurANe pAramahaMsyAM
saMhitAyAM ekAdashaskandhe dvAviMsho.adhyAyaH || 22||
\iti
\section{.. OM namo bhagavate vAsudevAya ..}
\section{.. trayoviMsho.adhyAyaH \- 23 ..}
bAdarAyaNiruvAcha
sa evamAshaMsita uddhavena
bhAgavatamukhyena dAshArhamukhyaH |
sabhAjayan bhR^ityavacho mukunda\-
stamAbabhAShe shravaNIyavIryaH || 1||
shrIbhagavAnuvAcha
bArhaspatya sa vai nAtra sAdhurvai durjaneritaiH |
duruktairbhinnamAtmAnaM yaH samAdhAtumIshvaraH || 2||
na tathA tapyate viddhaH pumAn bANaistu marmagaiH |
yathA tudanti marmasthA hyasatAM paruSheShavaH || 3||
kathayanti mahatpuNyamitihAsamihoddhava |
tamahaM varNayiShyAmi nibodha susamAhitaH || 4||
kenachidbhikShuNA gItaM paribhUtena durjanaiH |
smaratA dhR^itiyuktena vipAkaM nijakarmaNAm || 5||
avantiShu dvijaH kashchidAsIdADhyatamaH shriyA |
vArtAvR^ittiH kadaryastu kAmI lubdho.atikopanaH || 6||
j~nAtayo.atithayastasya vA~NmAtreNApi nArchitAH |
shUnyAvasatha AtmApi kAle kAmairanarchitaH || 7||
duHshIlasya kadaryasya druhyante putrabAndhavAH |
dArA duhitaro bhR^ityA viShaNNA nAcharan priyam || 8||
tasyaivaM yakShavittasya chyutasyobhayalokataH |
dharmakAmavihInasya chukrudhuH pa~nchabhAginaH || 9||
tadavadhyAnavisrastapuNyaskandhasya bhUrida |
artho.apyagachChannidhanaM bahvAyAsaparishramaH || 10||
j~nAtayo jagR^ihuH ki~nchitki~nchiddasyava uddhava |
daivataH kAlataH ki~nchidbrahmabandhornR^ipArthivAt || 11||
sa evaM draviNe naShTe dharmakAmavivarjitaH |
upekShitashcha svajanaishchintAmApa duratyayAm || 12||
tasyaivaM dhyAyato dIrghaM naShTarAyastapasvinaH |
khidyato bAShpakaNThasya nirvedaH sumahAnabhUt || 13||
sa chAhedamaho kaShTaM vR^ithA.a.atmA me.anutApitaH |
na dharmAya na kAmAya yasyArthAyAsa IdR^ishaH || 14||
prAyeNArthAH kadaryANAM na sukhAya kadAchana |
iha chAtmopatApAya mR^itasya narakAya cha || 15||
yasho yashasvinAM shuddhaM shlAghyA ye guNinAM guNAH |
lobhaH svalpo.api tAn hanti shvitro rUpamivepsitam || 16||
arthasya sAdhane siddhe utkarShe rakShaNe vyaye |
nAshopabhoga AyAsastrAsashchintA bhramo nR^iNAm || 17||
steyaM hiMsAnR^itaM dambhaH kAmaH krodhaH smayo madaH |
bhedo vairamavishvAsaH saMspardhA vyasanAni cha || 18||
ete pa~nchadashAnarthA hyarthamUlA matA nR^iNAm |
tasmAdanarthamarthAkhyaM shreyo.arthI dUratastyajet || 19||
bhidyante bhrAtaro dArAH pitaraH suhR^idastathA |
ekAsnigdhAH kAkiNinA sadyaH sarve.arayaH kR^itAH || 20||
arthenAlpIyasA hyete saMrabdhA dIptamanyavaH |
tyajantyAshu spR^idho ghnanti sahasotsR^ijya sauhR^idam || 21||
labdhvA janmAmaraprArthyaM mAnuShyaM taddvijAgryatAm |
tadanAdR^itya ye svArthaM ghnanti yAntyashubhAM gatim || 22||
svargApavargayordvAraM prApya lokamimaM pumAn |
draviNe ko.anuShajjeta martyo.anarthasya dhAmani || 23||
devarShipitR^ibhUtAni j~nAtIn bandhUMshcha bhAginaH |
asaMvibhajya chAtmAnaM yakShavittaH patatyadhaH || 24||
vyarthayArthehayA vittaM pramattasya vayobalam |
kushalA yena sidhyanti jaraThaH kiM nu sAdhaye || 25||
kasmAtsa~Nklishyate vidvAn vyarthayArthehayAsakR^it |
kasyachinmAyayA nUnaM loko.ayaM suvimohitaH || 26||
kiM dhanairdhanadairvA kiM kAmairvA kAmadairuta |
mR^ityunA grasyamAnasya karmabhirvota janmadaiH || 27||
nUnaM me bhagavAMstuShTaH sarvadevamayo hariH |
yena nIto dashAmetAM nirvedashchAtmanaH plavaH || 28||
so.ahaM kAlAvasheSheNa shoShayiShye.a~NgamAtmanaH |
apramatto.akhilasvArthe yadi syAtsiddha Atmani || 29||
tatra mAmanumoderan devAstribhuvaneshvarAH |
muhUrtena brahmalokaM khaTvA~NgaH samasAdhayat || 30||
shrIbhagavAnuvAcha
ityabhipretya manasA hyAvantyo dvijasattamaH |
unmuchya hR^idayagranthIn shAnto bhikShurabhUnmuniH || 31||
sa chachAra mahImetAM saMyatAtmendriyAnilaH |
bhikShArthaM nagaragrAmAnasa~Ngo.alakShito.avishat || 32||
taM vai pravayasaM bhikShumavadhUtamasajjanAH |
dR^iShTvA paryabhavan bhadra bahvIbhiH paribhUtibhiH || 33||
kechittriveNuM jagR^ihureke pAtraM kamaNDalum |
pIThaM chaike.akShasUtraM cha kanthAM chIrANi kechana || 34||
pradAya cha punastAni darshitAnyAdadurmuneH |
annaM cha bhaikShyasampannaM bhu~njAnasya sarittaTe || 35||
mUtrayanti cha pApiShThAH ShThIvantyasya cha mUrdhani |
yatavAchaM vAchayanti tADayanti na vakti chet || 36||
tarjayantyapare vAgbhiH steno.ayamiti vAdinaH |
badhnanti rajjvA taM kechidbadhyatAM badhyatAmiti || 37||
kShipantyeke.avajAnanta eSha dharmadhvajaH shaThaH |
kShINavitta imAM vR^ittimagrahItsvajanojjhitaH || 38||
aho eSha mahAsAro dhR^itimAn girirADiva |
maunena sAdhayatyarthaM bakavaddR^iDhanishchayaH || 39||
ityeke vihasantyenameke durvAtayanti cha |
taM babandhurnirurudhuryathA krIDanakaM dvijam || 40||
evaM sa bhautikaM duHkhaM daivikaM daihikaM cha yat |
bhoktavyamAtmano diShTaM prAptaM prAptamabudhyata || 41||
paribhUta imAM gAthAmagAyata narAdhamaiH |
pAtayadbhiH svadharmastho dhR^itimAsthAya sAttvikIm || 42||
dvija uvAcha
nAyaM jano me sukhaduHkha hetuH
na devatA.a.atmA grahakarmakAlAH |
manaH paraM kAraNamAmananti
saMsArachakraM parivartayedyat || 43||
mano guNAn vai sR^ijate balIya\-
statashcha karmANi vilakShaNAni |
shuklAni kR^iShNAnyatha lohitAni
tebhyaH savarNAH sR^itayo bhavanti || 44||
anIha AtmA manasA samIhatA
hiraNmayo matsakha udvichaShTe |
manaH svali~NgaM parigR^ihya kAmAn
juShan nibaddho guNasa~Ngato.asau || 45||
dAnaM svadharmo niyamo yamashcha
shrutaM cha karmANi cha sadvratAni |
sarve manonigrahalakShaNAntAH
paro hi yogo manasaH samAdhiH || 46||
samAhitaM yasya manaH prashAntaM
dAnAdibhiH kiM vada tasya kR^ityam |
asaMyataM yasya mano vinashya\-
ddAnAdibhishchedaparaM kimebhiH || 47||
mano vashe.anye hyabhavan sma devA
manashcha nAnyasya vashaM sameti |
bhIShmo hi devaH sahasaH sahIyAn
yu~njyAdvashe taM sa hi devadevaH || 48||
taM durjayaM shatrumasahyavega\-
maruntudaM tanna vijitya kechit |
kurvantyasadvigrahamatra martyai\-
rmitrANyudAsInaripUn vimUDhAH || 49||
dehaM manomAtramimaM gR^ihItvA
mamAhamityandhadhiyo manuShyAH |
eSho.ahamanyo.ayamiti bhrameNa
durantapAre tamasi bhramanti || 50||
janastu hetuH sukhaduHkhayoshche\-
tkimAtmanashchAtra hi bhaumayostat |
jihvAM kvachitsandashati svadadbhi\-
stadvedanAyAM katamAya kupyet || 51||
duHkhasya heturyadi devatAstu
kimAtmanastatra vikArayostat |
yada~Ngama~Ngena nihanyate kvachit
krudhyeta kasmai puruShaH svadehe || 52||
AtmA yadi syAtsukhaduHkhahetuH
kimanyatastatra nijasvabhAvaH |
na hyAtmano.anyadyadi tanmR^iShA syAt
krudhyeta kasmAnna sukhaM na duHkham || 53||
grahA nimittaM sukhaduHkhayoshche\-
tkimAtmano.ajasya janasya te vai |
grahairgrahasyaiva vadanti pIDAM
krudhyeta kasmai puruShastato.anyaH || 54||
karmAstu hetuH sukhaduHkhayoshche\-
tkimAtmanastaddhi jaDAjaDatve |
dehastvachitpuruSho.ayaM suparNaH
krudhyeta kasmai na hi karmamUlam || 55||
kAlastu hetuH sukhaduHkhayoshche\-
tkimAtmanastatra tadAtmako.asau |
nAgnerhi tApo na himasya tatsyAt
krudhyeta kasmai na parasya dvandvam || 56||
na kenachitkvApi katha~nchanAsya
dvandvoparAgaH parataH parasya |
yathAhamaH saMsR^itirUpiNaH syAt
evaM prabuddho na bibheti bhUtaiH || 57||
etAM sa AsthAya parAtmaniShThA\-
madhyAsitAM pUrvatamairmaharShibhiH |
ahaM tariShyAmi durantapAraM
tamo mukundA~NghriniShevayaiva || 58||
shrIbhagavAnuvAcha
nirvidya naShTadraviNo gataklamaH
pravrajya gAM paryaTamAna ittham |
nirAkR^ito.asadbhirapi svadharmA\-
dakampito.amUM munirAha gAthAm || 59||
sukhaduHkhaprado nAnyaH puruShasyAtmavibhramaH |
mitrodAsInaripavaH saMsArastamasaH kR^itaH || 60||
tasmAtsarvAtmanA tAta nigR^ihANa mano dhiyA |
mayyAveshitayA yukta etAvAn yogasa~NgrahaH || 61||
ya etAM bhikShuNA gItAM brahmaniShThAM samAhitaH |
dhAraya~nChrAvaya~nChR^iNvan dvandvairnaivAbhibhUyate || 62||
iti shrImadbhAgavate mahApurANe pAramahaMsyAM
saMhitAyAmekAdashaskandhe trayoviMsho.adhyAyaH || 23||
\iti
\section{.. OM namo bhagavate vAsudevAya ..}
\section{.. chaturviMsho.adhyAyaH \- 24 ..}
shrIbhagavAnuvAcha
atha te sampravakShyAmi sA~NkhyaM pUrvairvinishchitam |
yadvij~nAya pumAn sadyo jahyAdvaikalpikaM bhramam || 1||
AsIjj~nAnamatho hyartha ekamevAvikalpitam |
yadA vivekanipuNA Adau kR^itayuge.ayuge || 2||
tanmAyAphalarUpeNa kevalaM nirvikalpitam |
vA~NmanogocharaM satyaM dvidhA samabhavadbR^ihat || 3||
tayorekataro hyarthaH prakR^itiH sobhayAtmikA |
j~nAnaM tvanyatamo bhAvaH puruShaH so.abhidhIyate || 4||
tamo rajaH sattvamiti prakR^iterabhavan guNAH |
mayA prakShobhyamANAyAH puruShAnumatena cha || 5||
tebhyaH samabhavatsUtraM mahAn sUtreNa saMyutaH |
tato vikurvato jAto.aha~NkAro yo vimohanaH || 6||
vaikArikastaijasashcha tAmasashchetyahaM trivR^it |
tanmAtrendriyamanasAM kAraNaM chidachinmayaH || 7||
arthastanmAtrikAjjaj~ne tAmasAdindriyANi cha |
taijasAddevatA AsannekAdasha cha vaikR^itAt || 8||
mayA sa~nchoditA bhAvAH sarve saMhatyakAriNaH |
aNDamutpAdayAmAsurmamAyatanamuttamam || 9||
tasminnahaM samabhavamaNDe salilasaMsthitau |
mama nAbhyAmabhUtpadmaM vishvAkhyaM tatra chAtmabhUH || 10||
so.asR^ijattapasA yukto rajasA madanugrahAt |
lokAn sapAlAn vishvAtmA bhUrbhuvaHsvariti tridhA || 11||
devAnAmoka AsItsvarbhUtAnAM cha bhuvaH padam |
martyAdInAM cha bhUrlokaH siddhAnAM tritayAtparam || 12||
adho.asurANAM nAgAnAM bhUmeroko.asR^ijatprabhuH |
trilokyAM gatayaH sarvAH karmaNAM triguNAtmanAm || 13||
yogasya tapasashchaiva nyAsasya gatayo.amalAH |
maharjanastapaH satyaM bhaktiyogasya madgatiH || 14||
mayA kAlAtmanA dhAtrA karmayuktamidaM jagat |
guNapravAha etasminnunmajjati nimajjati || 15||
aNurbR^ihatkR^ishaH sthUlo yo yo bhAvaH prasidhyati |
sarvo.apyubhayasaMyuktaH prakR^ityA puruSheNa cha || 16||
yastu yasyAdirantashcha sa vai madhyaM cha tasya san |
vikAro vyavahArArtho yathA taijasapArthivAH || 17||
yadupAdAya pUrvastu bhAvo vikurute.aparam |
Adiranto yadA yasya tatsatyamabhidhIyate || 18||
prakR^itiryasyopAdAnamAdhAraH puruShaH paraH |
sato.abhivya~njakaH kAlo brahma tattritayaM tvaham || 19||
sargaH pravartate tAvatpaurvAparyeNa nityashaH |
mahAn guNavisargArthaH sthityanto yAvadIkShaNam || 20||
virANmayAsAdyamAno lokakalpavikalpakaH |
pa~nchatvAya visheShAya kalpate bhuvanaiH saha || 21||
anne pralIyate martyamannaM dhAnAsu lIyate |
dhAnA bhUmau pralIyante bhUmirgandhe pralIyate || 22||
apsu pralIyate gandha Apashcha svaguNe rase |
lIyate jyotiShi raso jyotI rUpe pralIyate || 23||
rUpaM vAyau sa cha sparshe lIyate so.api chAmbare |
ambaraM shabdatanmAtra indriyANi svayoniShu || 24||
yonirvaikArike saumya lIyate manasIshvare |
shabdo bhUtAdimapyeti bhUtAdirmahati prabhuH || 25||
sa lIyate mahAn sveShu guNesu guNavattamaH |
te.avyakte sampralIyante tatkAle lIyate.avyaye || 26||
kAlo mAyAmaye jIve jIva Atmani mayyaje |
AtmA kevala Atmastho vikalpApAyalakShaNaH || 27||
evamanvIkShamANasya kathaM vaikalpiko bhramaH |
manaso hR^idi tiShTheta vyomnIvArkodaye tamaH || 28||
eSha sA~NkhyavidhiH proktaH saMshayagranthibhedanaH |
pratilomAnulomAbhyAM parAvaradR^ishA mayA || 29||
iti shrImadbhAgavate mahApurANe pAramahaMsyAM
saMhitAyAmekAdashaskandhe chaturviMsho.adhyAyaH || 24||
\iti
\section{.. OM namo bhagavate vAsudevAya ..}
\section{.. pa~nchaviMsho.adhyAyaH \- 25 ..}
shrIbhagavAnuvAcha
guNAnAmasamishrANAM pumAn yena yathA bhavet |
tanme puruShavaryedamupadhAraya shaMsataH || 1||
shamo damastitikShekShA tapaH satyaM dayA smR^itiH |
tuShTistyAgo.aspR^ihA shraddhA hrIrdayAdiH svanirvR^itiH || 2||
kAma IhA madastR^iShNA stambha AshIrbhidA sukham |
madotsAho yashaH prItirhAsyaM vIryaM balodyamaH || 3||
krodho lobho.anR^itaM hiMsA yAch~nA dambhaH klamaH kaliH |
shokamohau viShAdArtI nidrA.a.ashA bhIranudyamaH || 4||
sattvasya rajasashchaitAstamasashchAnupUrvashaH |
vR^ittayo varNitaprAyAH sannipAtamatho shR^iNu || 5||
sannipAtastvahamiti mametyuddhava yA matiH |
vyavahAraH sannipAto mano mAtrendriyAsubhiH || 6||
dharme chArthe cha kAme cha yadAsau pariniShThitaH |
guNAnAM sannikarSho.ayaM shraddhAratidhanAvahaH || 7||
pravR^ittilakShaNe niShThA pumAn yarhi gR^ihAshrame |
svadharme chAnutiShTheta guNAnAM samitirhi sA || 8||
puruShaM sattvasaMyuktamanumIyAchChamAdibhiH |
kAmAdibhI rajoyuktaM krodhAdyaistamasA yutam || 9||
yadA bhajati mAM bhaktyA nirapekShaH svakarmabhiH |
taM sattvaprakR^itiM vidyAtpuruShaM striyameva vA || 10||
yadA AshiSha AshAsya mAM bhajeta svakarmabhiH |
taM rajaHprakR^itiM vidyAddhiMsAmAshAsya tAmasam || 11||
sattvaM rajastama iti guNA jIvasya naiva me |
chittajA yaistu bhUtAnAM sajjamAno nibadhyate || 12||
yadetarau jayetsattvaM bhAsvaraM vishadaM shivam |
tadA sukhena yujyeta dharmaj~nAnAdibhiH pumAn || 13||
yadA jayettamaH sattvaM rajaH sa~NgaM bhidA chalam |
tadA duHkhena yujyeta karmaNA yashasA shriyA || 14||
yadA jayedrajaH sattvaM tamo mUDhaM layaM jaDam |
yujyeta shokamohAbhyAM nidrayA hiMsayA.a.ashayA || 15||
yadA chittaM prasIdeta indriyANAM cha nirvR^itiH |
dehe.abhayaM mano.asa~NgaM tatsattvaM viddhi matpadam || 16||
vikurvan kriyayA chAdhIranivR^ittishcha chetasAm |
gAtrAsvAsthyaM manobhrAntaM raja etairnishAmaya || 17||
sIdachchittaM vilIyeta chetaso grahaNe.akShamam |
mano naShTaM tamo glAnistamastadupadhAraya || 18||
edhamAne guNe sattve devAnAM balamedhate |
asurANAM cha rajasi tamasyuddhava rakShasAm || 19||
sattvAjjAgaraNaM vidyAdrajasA svapnamAdishet |
prasvApaM tamasA jantosturIyaM triShu santatam || 20||
uparyupari gachChanti sattvena brAhmaNA janAH |
tamasAdho.adha AmukhyAdrajasAntarachAriNaH || 21||
sattve pralInAH svaryAnti naralokaM rajolayAH |
tamolayAstu nirayaM yAnti mAmeva nirguNAH || 22||
madarpaNaM niShphalaM vA sAttvikaM nijakarma tat |
rAjasaM phalasa~NkalpaM hiMsAprAyAdi tAmasam || 23||
kaivalyaM sAttvikaM j~nAnaM rajo vaikalpikaM cha yat |
prAkR^itaM tAmasaM j~nAnaM manniShThaM nirguNaM smR^itam || 24||
vanaM tu sAttviko vAso grAmo rAjasa uchyate |
tAmasaM dyUtasadanaM manniketaM tu nirguNam || 25||
sAttvikaH kArako.asa~NgI rAgAndho rAjasaH smR^itaH |
tAmasaH smR^itivibhraShTo nirguNo madapAshrayaH || 26||
sAttvikyAdhyAtmikI shraddhA karmashraddhA tu rAjasI |
tAmasyadharme yA shraddhA matsevAyAM tu nirguNA || 27||
pathyaM pUtamanAyastamAhAryaM sAttvikaM smR^itam |
rAjasaM chendriyapreShThaM tAmasaM chArtidA shuchi || 28||
sAttvikaM sukhamAtmotthaM viShayotthaM tu rAjasam |
tAmasaM mohadainyotthaM nirguNaM madapAshrayam || 29||
dravyaM deshaH phalaM kAlo j~nAnaM karma cha kArakaH |
shraddhAvasthAkR^itirniShThA traiguNyaH sarva eva hi || 30||
sarve guNamayA bhAvAH puruShAvyaktadhiShThitAH |
dR^iShTaM shrutamanudhyAtaM bud.hdhyA vA puruSharShabha || 31||
etAH saMsR^itayaH puMso guNakarmanibandhanAH |
yeneme nirjitAH saumya guNA jIvena chittajAH |
bhaktiyogena manniShTho madbhAvAya prapadyate || 32||
tasmAddehamimaM labdhvA j~nAnavij~nAnasambhavam |
guNasa~NgaM vinirdhUya mAM bhajantu vichakShaNAH || 33||
niHsa~Ngo mAM bhajedvidvAnapramatto jitendriyaH |
rajastamashchAbhijayetsattvasaMsevayA muniH || 34||
sattvaM chAbhijayedyukto nairapekShyeNa shAntadhIH |
sampadyate guNairmukto jIvo jIvaM vihAya mAm || 35||
jIvo jIvavinirmukto guNaishchAshayasambhavaiH |
mayaiva brahmaNA pUrNo na bahirnAntarashcharet || 36||
iti shrImadbhAgavate mahApurANe pAramahaMsyAM
saMhitAyAM ekAdashaskandhe pa~nchaviMsho.adhyAyaH || 25||
\iti
\section{.. OM namo bhagavate vAsudevAya ..}
\section{.. ShaDviMsho.adhyAyaH \- 26 ..}
shrIbhagavAnuvAcha
mallakShaNamimaM kAyaM labdhvA maddharma AsthitaH |
AnandaM paramAtmAnamAtmasthaM samupaiti mAm || 1||
guNamayyA jIvayonyA vimukto j~nAnaniShThayA |
guNeShu mAyAmAtreShu dR^ishyamAneShvavastutaH |
vartamAno.api na pumAn yujyate.avastubhirguNaiH || 2||
sa~NgaM na kuryAdasatAM shishnodaratR^ipAM kvachit |
tasyAnugastamasyandhe patatyandhAnugAndhavat || 3||
ailaH samrADimAM gAthAmagAyata bR^ihachChravAH |
urvashIvirahAnmuhyan nirviNNaH shokasaMyame || 4||
tyaktvA.a.atmAnaM vrajantIM tAM nagna unmattavannR^ipaH |
vilapannanvagAjjAye ghore tiShTheti viklavaH || 5||
kAmAnatR^ipto.anujuShan kShullakAn varShayAminIH |
na veda yAntIrnAyAntIrurvashyAkR^iShTachetanaH || 6||
aila uvAcha
aho me mohavistAraH kAmakashmalachetasaH |
devyA gR^ihItakaNThasya nAyuH khaNDA ime smR^itAH || 7||
nAhaM vedAbhinirmuktaH sUryo vAbhyudito.amuyA |
muShito varShapUgAnAM batAhAni gatAnyuta || 8||
aho me Atmasammoho yenAtmA yoShitAM kR^itaH |
krIDAmR^igashchakravartI naradevashikhAmaNiH || 9||
saparichChadamAtmAnaM hitvA tR^iNamiveshvaram |
yAntIM striyaM chAnvagamaM nagna unmattavadrudan || 10||
kutastasyAnubhAvaH syAtteja Ishatvameva vA |
yo.anvagachChaM striyaM yAntIM kharavatpAdatADitaH || 11||
kiM vidyayA kiM tapasA kiM tyAgena shrutena vA |
kiM viviktena maunena strIbhiryasya mano hR^itam || 12||
svArthasyAkovidaM dhi~NmAM mUrkhaM paNDitamAninam |
yo.ahamIshvaratAM prApya strIbhirgokharavajjitaH || 13||
sevato varShapUgAn me urvashyA adharAsavam |
na tR^ipyatyAtmabhUH kAmo vahnirAhutibhiryathA || 14||
puMshchalyApahR^itaM chittaM ko nvanyo mochituM prabhuH |
AtmArAmeshvaramR^ite bhagavantamadhokShajam || 15||
bodhitasyApi devyA me sUktavAkyena durmateH |
mano gato mahAmoho nApayAtyajitAtmanaH || 16||
kimetayA nopakR^itaM rajjvA vA sarpachetasaH |
rajjusvarUpAviduSho yo.ahaM yadajitendriyaH || 17||
kvAyaM malImasaH kAyo daurgandhyAdyAtmako.ashuchiH |
kva guNAH saumanasyAdyA hyadhyAso.avidyayA kR^itaH || 18||
pitroH kiM svaM nu bhAryAyAH svAmino.agneH shvagR^idhrayoH |
kimAtmanaH kiM suhR^idAmiti yo nAvasIyate || 19||
tasmin kalevare.amedhye tuchChaniShThe viShajjate |
aho subhadraM sunasaM susmitaM cha mukhaM striyAH || 20||
tva~NmAMsarudhirasnAyumedomajjAsthisaMhatau |
viNmUtrapUye ramatAM kR^imINAM kiyadantaram || 21||
athApi nopasajjeta strIShu straiNeShu chArthavit |
viShayendriyasaMyogAnmanaH kShubhyati nAnyathA || 22||
adR^iShTAdashrutAdbhAvAnna bhAva upajAyate |
asamprayu~njataH prANAn shAmyati stimitaM manaH || 23||
tasmAtsa~Ngo na kartavyaH strIShu straiNeShu chendriyaiH |
viduShAM chApyavisrabdhaH ShaDvargaH kimu mAdR^ishAm || 24||
shrIbhagavAnuvAcha
evaM pragAyan nR^ipadevadevaH
sa urvashIlokamatho vihAya |
AtmAnamAtmanyavagamya mAM vai
upAramajj~nAnavidhUtamohaH || 25||
tato duHsa~NgamutsR^ijya satsu sajjeta buddhimAn |
santa etasya Chindanti manovyAsa~NgamuktibhiH || 26||
santo.anapekShA machchittAH prashAntAH samadarshinaH |
nirmamA niraha~NkArA nirdvandvA niShparigrahAH || 27||
teShu nityaM mahAbhAga mahAbhAgeShu matkathAH |
sambhavanti hi tA nR^INAM juShatAM prapunantyagham || 28||
tA ye shR^iNvanti gAyanti hyanumodanti chAdR^itAH |
matparAH shraddadhAnAshcha bhaktiM vindanti te mayi || 29||
bhaktiM labdhavataH sAdhoH kimanyadavashiShyate |
mayyanantaguNe brahmaNyAnandAnubhavAtmani || 30||
yathopashrayamANasya bhagavantaM vibhAvasum |
shItaM bhayaM tamo.apyeti sAdhUn saMsevatastathA || 31||
nimajjyonmajjatAM ghore bhavAbdhau paramAyaNam |
santo brahmavidaH shAntA naurdR^iDhevApsu majjatAm || 32||
annaM hi prANinAM prANa ArtAnAM sharaNaM tvaham |
dharmo vittaM nR^iNAM pretya santo.arvAgbibhyato.araNam || 33||
santo dishanti chakShUMShi bahirarkaH samutthitaH |
devatA bAndhavAH santaH santa AtmAhameva cha || 34||
vaitasenastato.apyevamurvashyA lokanispR^ihaH |
muktasa~Ngo mahImetAmAtmArAmashchachAra ha || 35||
iti shrImadbhAgavate mahApurANe pAramahaMsyAM
saMhitAyAmekAdashaskandhe ShaDviMsho.adhyAyaH || 26||
\iti
\section{.. OM namo bhagavate vAsudevAya ..}
\section{.. saptaviMsho.adhyAyaH \- 27 ..}
uddhava uvAcha
kriyAyogaM samAchakShva bhavadArAdhanaM prabho |
yasmAttvAM ye yathArchanti sAtvatAH sAtvatarShabha || 1||
etadvadanti munayo muhurniHshreyasaM nR^iNAm |
nArado bhagavAn vyAsa AchAryo.a~NgirasaH sutaH || 2||
niHsR^itaM te mukhAmbhojAdyadAha bhagavAnajaH |
putrebhyo bhR^igumukhyebhyo devyai cha bhagavAn bhavaH || 3||
etadvai sarvavarNAnAmAshramANAM cha sammatam |
shreyasAmuttamaM manye strIshUdrANAM cha mAnada || 4||
etatkamalapatrAkSha karmabandhavimochanam |
bhaktAya chAnuraktAya brUhi vishveshvareshvara || 5||
shrIbhagavAnuvAcha
na hyanto.anantapArasya karmakANDasya choddhava |
sa~NkShiptaM varNayiShyAmi yathAvadanupUrvashaH || 6||
vaidikastAntriko mishra iti me trividho makhaH |
trayANAmIpsitenaiva vidhinA mAM samarchayet || 7||
yadA svanigamenoktaM dvijatvaM prApya pUruShaH |
yathA yajeta mAM bhaktyA shraddhayA tannibodha me || 8||
archAyAM sthaNDile.agnau vA sUrye vApsu hR^idi dvije |
dravyeNa bhaktiyukto.archetsvaguruM mAmamAyayA || 9||
pUrvaM snAnaM prakurvIta dhautadanto.a~Ngashuddhaye |
ubhayairapi cha snAnaM mantrairmR^idgrahaNAdinA || 10||
sandhyopAstyAdi karmANi vedenAchoditAni me |
pUjAM taiH kalpayetsamyak sa~NkalpaH karmapAvanIm || 11||
shailI dArumayI lauhI lepyA lekhyA cha saikatI |
manomayI maNimayI pratimAShTavidhA smR^itA || 12||
chalAchaleti dvividhA pratiShThA jIvamandiram |
udvAsAvAhane na staH sthirAyAmuddhavArchane || 13||
asthirAyAM vikalpaH syAtsthaNDile tu bhaveddvayam |
snapanaM tvavilepyAyAmanyatra parimArjanam || 14||
dravyaiH prasiddhairmadyAgaH pratimAdiShvamAyinaH |
bhaktasya cha yathA labdhairhR^idi bhAvena chaiva hi || 15||
snAnAla~NkaraNaM preShThamarchAyAmeva tUddhava |
sthaNDile tattvavinyAso vahnAvAjyaplutaM haviH || 16||
sUrye chAbhyarhaNaM preShThaM salile salilAdibhiH |
shraddhayopAhR^itaM preShThaM bhaktena mama vAryapi || 17||
bhUryapyabhaktopAhR^itaM na me toShAya kalpate |
gandho dhUpaH sumanaso dIpo.annAdyaM cha kiM punaH || 18||
shuchiH sambhR^itasambhAraH prAgdarbhaiH kalpitAsanaH |
AsInaH prAgudagvArchedarchAyAmatha sammukhaH || 19||
kR^itanyAsaH kR^itanyAsAM madarchAM pANinA mR^ijet |
kalashaM prokShaNIyaM cha yathAvadupasAdhayet || 20||
tadadbhirdevayajanaM dravyANyAtmAnameva cha |
prokShya pAtrANi trINyadbhistaistairdravyaishcha sAdhayet || 21||
pAdyArghyAchamanIyArthaM trINi pAtrANi daishikaH |
hR^idA shIrShNAtha shikhayA gAyatryA chAbhimantrayet || 22||
piNDe vAyvagnisaMshuddhe hR^itpadmasthAM parAM mama |
aNvIM jIvakalAM dhyAyennAdAnte siddhabhAvitAm || 23||
tayA.a.atmabhUtayA piNDe vyApte sampUjya tanmayaH |
AvAhyArchAdiShu sthApya nyastA~NgaM mAM prapUjayet || 24||
pAdyopasparshArhaNAdInupachArAn prakalpayet |
dharmAdibhishcha navabhiH kalpayitvA.a.asanaM mama || 25||
padmamaShTadalaM tatra karNikAkesarojjvalam |
ubhAbhyAM vedatantrAbhyAM mahyaM tUbhayasiddhaye || 26||
sudarshanaM pA~nchajanyaM gadAsIShudhanurhalAn |
musalaM kaustubhaM mAlAM shrIvatsaM chAnupUjayet || 27||
nandaM sunandaM garuDaM prachaNDaM chaNDameva cha |
mahAbalaM balaM chaiva kumudaM kamudekShaNam || 28||
durgAM vinAyakaM vyAsaM viShvaksenaM gurUn surAn |
sve sve sthAne tvabhimukhAn pUjayetprokShaNAdibhiH || 29||
chandanoshIrakarpUraku~NkumAguruvAsitaiH |
salilaiH snApayenmantrairnityadA vibhave sati || 30||
svarNagharmAnuvAkena mahApuruShavidyayA |
pauruSheNApi sUktena sAmabhI rAjanAdibhiH || 31||
vastropavItAbharaNapatrasraggandhalepanaiH |
ala~NkurvIta saprema madbhakto mAM yathochitam || 32||
pAdyamAchamanIyaM cha gandhaM sumanaso.akShatAn |
dhUpadIpopahAryANi dadyAnme shraddhayArchakaH || 33||
guDapAyasasarpIMShi shaShkulyApUpamodakAn |
saMyAvadadhisUpAMshcha naivedyaM sati kalpayet || 34||
abhya~NgonmardanAdarshadantadhAvAbhiShechanam |
annAdyagItanR^ityAdi parvaNi syurutAnvaham || 35||
vidhinA vihite kuNDe mekhalAgartavedibhiH |
agnimAdhAya paritaH samUhetpANinoditam || 36||
paristIryAtha paryukShedanvAdhAya yathAvidhi |
prokShaNyAsAdya dravyANi prokShyAgnau bhAvayeta mAm || 37||
taptajAmbUnadaprakhyaM sha~NkhachakragadAmbujaiH |
lasachchaturbhujaM shAntaM padmaki~njalkavAsasam || 38||
sphuratkirITakaTakakaTisUtravarA~Ngadam |
shrIvatsavakShasaM bhrAjatkaustubhaM vanamAlinam || 39||
dhyAyannabhyarchya dArUNi haviShAbhighR^itAni cha |
prAsyAjyabhAgAvAghArau dattvA chAjyaplutaM haviH || 40||
juhuyAnmUlamantreNa ShoDasharchAvadAnataH |
dharmAdibhyo yathA nyAyaM mantraiH sviShTikR^itaM budhaH || 41||
abhyarchyAtha namaskR^itya pArShadebhyo baliM haret |
mUlamantraM japedbrahma smaran nArAyaNAtmakam || 42||
dattvA.a.achamanamuchCheShaM viShvaksenAya kalpayet |
mukhavAsaM surabhimattAmbUlAdyamathArhayet || 43||
upagAyan gR^iNan nR^ityan karmANyabhinayan mama |
matkathAH shrAvayan shR^iNvan muhUrtaM kShaNiko bhavet || 44||
stavairuchchAvachaiH stotraiH paurANaiH prAkR^itairapi |
stutvA prasIda bhagavanniti vandeta daNDavat || 45||
shiro matpAdayoH kR^itvA bAhubhyAM cha parasparam |
prapannaM pAhi mAmIsha bhItaM mR^ityugrahArNavAt || 46||
iti sheShAM mayA dattAM shirasyAdhAya sAdaram |
udvAsayechchedudvAsyaM jyotirjyotiShi tatpunaH || 47||
archAdiShu yadA yatra shraddhA mAM tatra chArchayet |
sarvabhUteShvAtmani cha sarvAtmAhamavasthitaH || 48||
evaM kriyAyogapathaiH pumAn vaidikatAntrikaiH |
archannubhayataH siddhiM matto vindatyabhIpsitAm || 49||
madarchAM sampratiShThApya mandiraM kArayeddR^iDham |
puShpodyAnAni ramyANi pUjAyAtrotsavAshritAn || 50||
pUjAdInAM pravAhArthaM mahAparvasvathAnvaham |
kShetrApaNapuragrAmAn dattvA matsArShTitAmiyAt || 51||
pratiShThayA sArvabhaumaM sadmanA bhuvanatrayam |
pUjAdinA brahmalokaM tribhirmatsAmyatAmiyAt || 52||
mAmeva nairapekShyeNa bhaktiyogena vindati |
bhaktiyogaM sa labhata evaM yaH pUjayeta mAm || 53||
yaH svadattAM parairdattAM hareta suraviprayoH |
vR^ittiM sa jAyate viDbhug varShANAmayutAyutam || 54||
kartushcha sAratherhetoranumoditureva cha |
karmaNAM bhAginaH pretya bhUyo bhUyasi tatphalam || 55||
iti shrImadbhAgavate mahApurANe pAramahaMsyAM
saMhitAyAmekAdashaskandhe saptaviMsho.adhyAyaH || 27||
\iti
\section{.. OM namo bhagavate vAsudevAya ..}
\section{.. aShTAviMsho.adhyAyaH \- 28 ..}
shrIbhagavAnuvAcha
parasvabhAvakarmANi na prashaMsenna garhayet |
vishvamekAtmakaM pashyan prakR^ityA puruSheNa cha || 1||
parasvabhAvakarmANi yaH prashaMsati nindati |
sa Ashu bhrashyate svArthAdasatyabhiniveshataH || 2||
taijase nidrayA.a.apanne piNDastho naShTachetanaH |
mAyAM prApnoti mR^ityuM vA tadvannAnArthadR^ik pumAn || 3||
kiM bhadraM kimabhadraM vA dvaitasyAvastunaH kiyat |
vAchoditaM tadanR^itaM manasA dhyAtameva cha || 4||
ChAyA pratyAhvayAbhAsA hyasanto.apyarthakAriNaH |
evaM dehAdayo bhAvA yachChantyAmR^ityuto bhayam || 5||
Atmaiva tadidaM vishvaM sR^ijyate sR^ijati prabhuH |
trAyate trAti vishvAtmA hriyate haratIshvaraH || 6||
tasmAnna hyAtmano.anyasmAdanyo bhAvo nirUpitaH |
nirUpiteyaM trividhA nirmUlA bhAtirAtmani |
idaM guNamayaM viddhi trividhaM mAyayA kR^itam || 7||
etadvidvAn maduditaM j~nAnavij~nAnanaipuNam |
na nindati na cha stauti loke charati sUryavat || 8||
pratyakSheNAnumAnena nigamenAtmasaMvidA |
Adyantavadasajj~nAtvA niHsa~Ngo vicharediha || 9||
uddhava uvAcha
naivAtmano na dehasya saMsR^itirdraShTR^idR^ishyayoH |
anAtmasvadR^ishorIsha kasya syAdupalabhyate || 10||
AtmAvyayo.aguNaH shuddhaH svaya~njyotiranAvR^itaH |
agnivaddAruvadachiddehaH kasyeha saMsR^itiH || 11||
shrIbhagavAnuvAcha
yAvaddehendriyaprANairAtmanaH sannikarShaNam |
saMsAraH phalavAMstAvadapArtho.apyavivekinaH || 12||
arthe hyavidyamAne.api saMsR^itirna nivartate |
dhyAyato viShayAnasya svapne.anarthAgamo yathA || 13||
yathA hyapratibuddhasya prasvApo bahvanarthabhR^it |
sa eva pratibuddhasya na vai mohAya kalpate || 14||
shokaharShabhayakrodhalobhamohaspR^ihAdayaH |
aha~NkArasya dR^ishyante janmamR^ityushcha nAtmanaH || 15||
dehendriyaprANamano.abhimAno
jIvo.antarAtmA guNakarmamUrtiH |
sUtraM mahAnityurudheva gItaH
saMsAra AdhAvati kAlatantraH || 16||
amUlametadbahurUparUpitaM
manovachaHprANasharIrakarma |
j~nAnAsinopAsanayA shitena\-
chChittvA munirgAM vicharatyatR^iShNaH || 17||
j~nAnaM viveko nigamastapashcha
pratyakShamaitihyamathAnumAnam |
Adyantayorasya yadeva kevalaM
kAlashcha hetushcha tadeva madhye || 18||
yathA hiraNyaM svakR^itaM purastAt
pashchAchcha sarvasya hiraNmayasya |
tadeva madhye vyavahAryamANaM
nAnApadeshairahamasya tadvat || 19||
vij~nAnametattriyavasthama~Nga
guNatrayaM kAraNakAryakartR^i |
samanvayena vyatirekatashcha
yenaiva turyeNa tadeva satyam || 20||
na yatpurastAduta yanna pashchAt
madhye cha tanna vyapadeshamAtram |
bhUtaM prasiddhaM cha pareNa yadya\-
ttadeva tatsyAditi me manIShA || 21||
avidyamAno.apyavabhAsate yo
vaikAriko rAjasasarga eShaH |
brahma svaya~njyotirato vibhAti
brahmendriyArthAtmavikArachitram || 22||
evaM sphuTaM brahmavivekahetubhiH
parApavAdena vishAradena |
ChittvA.a.atmasandehamupArameta
svAnandatuShTo.akhilakAmukebhyaH || 23||
nAtmA vapuH pArthivamindriyANi
devA hyasurvAyurjalaM hutAshaH |
mano.annamAtraM dhiShaNA cha sattva\-
maha~NkR^itiH khaM kShitirarthasAmyam || 24||
samAhitaiH kaH karaNairguNAtmabhi\-
rguNo bhavenmatsuviviktadhAmnaH |
vikShipyamANairuta kiM nu dUShaNaM
ghanairupetairvigatai raveH kim || 25||
yathA nabho vAyvanalAmbubhUguNai\-
rgatAgatairvartuguNairna sajjate |
tathAkSharaM sattvarajastamomalai\-
rahammateH saMsR^itihetubhiH param || 26||
tathApi sa~NgaH parivarjanIyo
guNeShu mAyArachiteShu tAvat |
madbhaktiyogena dR^iDhena yAvad\-
rajo nirasyeta manaH kaShAyaH || 27||
yathA.a.amayo.asAdhuchikitsito nR^iNAM
punaH punaH santudati prarohan |
evaM manopakvakaShAyakarma
kuyoginaM vidhyati sarvasa~Ngam || 28||
kuyogino ye vihitAntarAyai\-
rmanuShyabhUtaistridashopasR^iShTaiH |
te prAktanAbhyAsabalena bhUyo
yu~njanti yogaM na tu karmatantram || 29||
karoti karma kriyate cha jantuH
kenApyasau chodita AnipatAt |
na tatra vidvAn prakR^itau sthito.api
nivR^ittatR^iShNaH svasukhAnubhUtyA || 30||
tiShThantamAsInamuta vrajantaM
shayAnamukShantamadantamannam |
svabhAvamanyatkimapIhamAna\-
mAtmAnamAtmasthamatirna veda || 31||
yadi sma pashyatyasadindriyArthaM
nAnAnumAnena viruddhamanyat |
na manyate vastutayA manIShI
svApnaM yathotthAya tirodadhAnam || 32||
pUrvaM gR^ihItaM guNakarmachitra\-
maj~nAnamAtmanyaviviktama~Nga |
nivartate tatpunarIkShayaiva
na gR^ihyate nApi visR^ijya AtmA || 33||
yathA hi bhAnorudayo nR^ichakShuShAM
tamo nihanyAnna tu sadvidhatte |
evaM samIkShA nipuNA satI me
hanyAttamisraM puruShasya buddheH || 34||
eSha svaya~njyotirajo.aprameyo
mahAnubhUtiH sakalAnubhUtiH |
eko.advitIyo vachasAM virAme
yeneShitA vAgasavashcharanti || 35||
etAvAnAtmasammoho yadvikalpastu kevale |
AtmannR^ite svamAtmAnamavalambo na yasya hi || 36||
yannAmAkR^itibhirgrAhyaM pa~nchavarNamabAdhitam |
vyarthenApyarthavAdo.ayaM dvayaM paNDitamAninAm || 37||
yogino.apakvayogasya yu~njataH kAya utthitaiH |
upasargairvihanyeta tatrAyaM vihito vidhiH || 38||
yogadhAraNayA kAMshchidAsanairdhAraNAnvitaiH |
tapomantrauShadhaiH kAMshchidupasargAn vinirdahet || 39||
kAMshchinmamAnudhyAnena nAmasa~NkIrtanAdibhiH |
yogeshvarAnuvR^ittyA vA hanyAdashubhadAn shanaiH || 40||
kechiddehamimaM dhIrAH sukalpaM vayasi sthiram |
vidhAya vividhopAyairatha yu~njanti siddhaye || 41||
na hi tatkushalAdR^ityaM tadAyAso hyapArthakaH |
antavattvAchCharIrasya phalasyeva vanaspateH || 42||
yogaM niShevato nityaM kAyashchetkalpatAmiyAt |
tachChraddadhyAnna matimAn yogamutsR^ijya matparaH || 43||
yogacharyAmimAM yogI vicharan madapAshrayaH |
nAntarAyairvihanyeta niHspR^ihaH svasukhAnubhUH || 44||
iti shrImadbhAgavate mahApurANe pAramahaMsyAM
saMhitAyAmekAdashaskandhe aShTAviMsho.adhyAyaH || 28||
\iti
\section{.. OM namo bhagavate vAsudevAya ..}
\section{.. ekonatriMsho.adhyAyaH \- 29 ..}
uddhava uvAcha
sudushcharAmimAM manye yogacharyAmanAtmanaH |
yathA~njasA pumAn sid.hdhyettanme brUhya~njasAchyuta || 1||
prAyashaH puNDarIkAkSha yu~njanto yogino manaH |
viShIdantyasamAdhAnAnmanonigrahakarshitAH || 2||
athAta AnandadughaM padAmbujaM
haMsAH shrayerannaravindalochana |
sukhaM nu vishveshvara yogakarmabhi\-
stvanmAyayAmI vihatA na mAninaH || 3||
kiM chitramachyuta tavaitadasheShabandho
dAseShvananyasharaNeShu yadAtmasAttvam |
yo.arochayatsaha mR^igaiH svayamIshvarANAM
shrImatkirITataTapIDitapAdapIThaH || 4||
taM tvAkhilAtmadayiteshvaramAshritAnAM
sarvArthadaM svakR^itavidvisR^ijeta ko nu |
ko vA bhajetkimapi vismR^itaye.anubhUtyai
kiM vA bhavenna tava pAdarajojuShAM naH || 5||
naivopayantyapachitiM kavayastavesha
brahmAyuShApi kR^itamR^iddhamudaH smarantaH |
yo.antarbahistanubhR^itAmashubhaM vidhunva\-
nnAchAryachaittyavapuShA svagatiM vyanakti || 6||
shrIshuka uvAcha
ityuddhavenAtyanuraktachetasA
pR^iShTo jagatkrIDanakaH svashaktibhiH |
gR^ihItamUrtitraya Ishvareshvaro
jagAda sapremamanoharasmitaH || 7||
shrIbhagavAnuvAcha
hanta te kathayiShyAmi mama dharmAn suma~NgalAn |
yAn shraddhayA.a.acharan martyo mR^ityuM jayati durjayam || 8||
kuryAtsarvANi karmANi madarthaM shanakaiH smaran |
mayyarpitamanashchitto maddharmAtmamanoratiH || 9||
deshAn puNyAnAshrayeta madbhaktaiH sAdhubhiH shritAn |
devAsuramanuShyeShu madbhaktAcharitAni cha || 10||
pR^ithak satreNa vA mahyaM parvayAtrAmahotsavAn |
kArayedgItanR^ityAdyairmahArAjavibhUtibhiH || 11||
mAmeva sarvabhUteShu bahirantarapAvR^itam |
IkShetAtmani chAtmAnaM yathA khamamalAshayaH || 12||
iti sarvANi bhUtAni madbhAvena mahAdyute |
sabhAjayan manyamAno j~nAnaM kevalamAshritaH || 13||
brAhmaNe pulkase stene brahmaNye.arke sphuli~Ngake |
akrUre krUrake chaiva samadR^ik paNDito mataH || 14||
nareShvabhIkShNaM madbhAvaM puMso bhAvayato.achirAt |
spardhAsUyAtiraskArAH sAha~NkArA viyanti hi || 15||
visR^ijya smayamAnAn svAn dR^ishaM vrIDAM cha daihikIm |
praNameddaNDavadbhUmAvAshvachANDAlagokharam || 16||
yAvatsarveShu bhUteShu madbhAvo nopajAyate |
tAvadevamupAsIta vA~NmanaHkAyavR^ittibhiH || 17||
sarvaM brahmAtmakaM tasya vidyayA.a.atmamanIShayA |
paripashyannuparametsarvato muktasaMshayaH || 18||
ayaM hi sarvakalpAnAM sadhrIchIno mato mama |
madbhAvaH sarvabhUteShu manovAkkAyavR^ittibhiH || 19||
na hya~Ngopakrame dhvaMso maddharmasyoddhavANvapi |
mayA vyavasitaH samya~NnirguNatvAdanAshiShaH || 20||
yo yo mayi pare dharmaH kalpyate niShphalAya chet |
tadAyAso nirarthaH syAdbhayAderiva sattama || 21||
eShA buddhimatAM buddhirmanIShA cha manIShiNAm |
yatsatyamanR^iteneha martyenApnoti mAmR^itam || 22||
eSha te.abhihitaH kR^itsno brahmavAdasya sa~NgrahaH |
samAsavyAsavidhinA devAnAmapi durgamaH || 23||
abhIkShNashaste gaditaM j~nAnaM vispaShTayuktimat |
etadvij~nAya muchyeta puruSho naShTasaMshayaH || 24||
suviviktaM tava prashnaM mayaitadapi dhArayet |
sanAtanaM brahmaguhyaM paraM brahmAdhigachChati || 25||
ya etanmama bhakteShu sampradadyAtsupuShkalam |
tasyAhaM brahmadAyasya dadAmyAtmAnamAtmanA || 26||
ya etatsamadhIyIta pavitraM paramaM shuchi |
sa pUyetAharaharmAM j~nAnadIpena darshayan || 27||
ya etachChraddhayA nityamavyagraH shR^iNuyAnnaraH |
mayi bhaktiM parAM kurvan karmabhirna sa badhyate || 28||
apyuddhava tvayA brahma sakhe samavadhAritam |
api te vigato mohaH shokashchAsau manobhavaH || 29||
naitattvayA dAmbhikAya nAstikAya shaThAya cha |
ashushrUShorabhaktAya durvinItAya dIyatAm || 30||
etairdoShairvihInAya brahmaNyAya priyAya cha |
sAdhave shuchaye brUyAdbhaktiH syAchChUdrayoShitAm || 31||
naitadvij~nAya jij~nAsorj~nAtavyamavashiShyate |
pItvA pIyUShamamR^itaM pAtavyaM nAvashiShyate || 32||
j~nAne karmaNi yoge cha vArtAyAM daNDadhAraNe |
yAvAnartho nR^iNAM tAta tAvAMste.ahaM chaturvidhaH || 33||
martyo yadA tyaktasamastakarmA
niveditAtmA vichikIrShito me |
tadAmR^itatvaM pratipadyamAno
mayA.a.atmabhUyAya cha kalpate vai || 34||
shrIshuka uvAcha
sa evamAdarshitayogamArga\-
stadottamashlokavacho nishamya |
baddhA~njaliH prItyuparuddhakaNTho
na ki~nchidUche.ashrupariplutAkShaH || 35||
viShTabhya chittaM praNayAvaghUrNaM
dhairyeNa rAjan bahumanyamAnaH |
kR^itA~njaliH prAha yadupravIraM
shIrShNA spR^ishaMstachcharaNAravindam || 36||
uddhava uvAcha
vidrAvito mohamahAndhakAro
ya Ashrito me tava sannidhAnAt |
vibhAvasoH kiM nu samIpagasya
shItaM tamo bhIH prabhavantyajAdya || 37||
pratyarpito me bhavatAnukampinA
bhR^ityAya vij~nAnamayaH pradIpaH |
hitvA kR^itaj~nastava pAdamUlaM
ko.anyaM samIyAchCharaNaM tvadIyam || 38||
vR^ikNashcha me sudR^iDhaH snehapAsho
dAshArhavR^iShNyandhakasAtvateShu |
prasAritaH sR^iShTivivR^iddhaye tvayA
svamAyayA hyAtmasubodhahetinA || 39||
namo.astu te mahAyogin prapannamanushAdhi mAm |
yathA tvachcharaNAmbhoje ratiH syAdanapAyinI || 40||
shrIbhagavAnuvAcha
gachChoddhava mayA.a.adiShTo badaryAkhyaM mamAshramam |
tatra matpAdatIrthode snAnopasparshanaiH shuchiH || 41||
IkShayAlakanandAyA vidhUtAsheShakalmaShaH |
vasAno valkalAnya~Nga vanyabhuk sukhaniHspR^ihaH || 42||
titikShurdvandvamAtrANAM sushIlaH saMyatendriyaH |
shAntaH samAhitadhiyA j~nAnavij~nAnasaMyutaH || 43||
matto.anushikShitaM yatte viviktamanubhAvayan |
mayyAveshitavAk chitto maddharmanirato bhava |
ativrajya gatIstisro mAmeShyasi tataH param || 44||
shrIshuka uvAcha
sa evamukto harimedhasoddhavaH
pradakShiNaM taM parisR^itya pAdayoH |
shiro nidhAyAshrukalAbhirArdradhI\-
rnyaShi~nchadadvandvaparo.apyapakrame || 45||
sudustyajasnehaviyogakAtaro
na shaknuvaMstaM parihAtumAturaH |
kR^ichChraM yayau mUrdhani bhartR^ipAduke
bibhrannamaskR^itya yayau punaH punaH || 46||
tatastamantarhR^idi sanniveshya
gato mahAbhAgavato vishAlAm |
yathopadiShTAM jagadekabandhunA
tapaH samAsthAya hareragAdgatim || 47||
ya etadAnandasamudrasambhR^itaM
j~nAnAmR^itaM bhAgavatAya bhAShitam |
kR^iShNena yogeshvarasevitA~NghriNA
sachChraddhayA.a.asevya jagadvimuchyate || 48||
bhavabhayamapahantuM j~nAnavij~nAnasAraM
nigamakR^idupajahre bhR^i~NgavadvedasAram |
amR^itamudadhitashchApAyayadbhR^ityavargAn
puruShamR^iShabhamAdyaM kR^iShNasa.nj~naM nato.asmi || 49||
iti shrImadbhAgavate mahApurANe pAramahaMsyAM
saMhitAyAmekAdashaskandhe ekonatriMsho.adhyAyaH || 29||
\iti
\section{.. OM namo bhagavate vAsudevAya ..}
\section{.. triMsho.adhyAyaH \- 30 ..}
rAjovAcha
tato mahAbhAgavate uddhave nirgate vanam |
dvAravatyAM kimakarodbhagavAn bhUtabhAvanaH || 1||
brahmashApopasaMsR^iShTe svakule yAdavarShabhaH |
preyasIM sarvanetrANAM tanuM sa kathamatyajat || 2||
pratyAkraShTuM nayanamabalA yatra lagnaM na shekuH
karNAviShTaM na sarati tato yatsatAmAtmalagnam |
yachChrIrvAchAM janayati ratiM kiM nu mAnaM kavInAM
dR^iShTvA jiShNoryudhi rathagataM yachcha tatsAmyamIyuH || 3||
R^iShiruvAcha
divi bhuvyantarikShe cha mahotpAtAn samutthitAn |
dR^iShTvA.a.asInAn sudharmAyAM kR^iShNaH prAha yadUnidam || 4||
ete ghorA mahotpAtA dvArvatyAM yamaketavaH |
muhUrtamapi na stheyamatra no yadupu~NgavAH || 5||
striyo bAlAshcha vR^iddhAshcha sha~NkhoddhAraM vrajantvitaH |
vayaM prabhAsaM yAsyAmo yatra pratyaksarasvatI || 6||
tatrAbhiShichya shuchaya upoShya susamAhitAH |
devatAH pUjayiShyAmaH snapanAlepanArhaNaiH || 7||
brAhmaNAMstu mahAbhAgAn kR^itasvastyayanA vayam |
gobhUhiraNyavAsobhirgajAshvarathaveshmabhiH || 8||
vidhireSha hyariShTaghno ma~NgalAyanamuttamam |
devadvijagavAM pUjA bhUteShu paramo bhavaH || 9||
iti sarve samAkarNya yaduvR^iddhA madhudviShaH |
tatheti naubhiruttIrya prabhAsaM prayayU rathaiH || 10||
tasmin bhagavatA.a.adiShTaM yadudevena yAdavAH |
chakruH paramayA bhaktyA sarvashreyopabR^iMhitam || 11||
tatastasmin mahApAnaM papurmaireyakaM madhu |
diShTavibhraMshitadhiyo yaddravairbhrashyate matiH || 12||
mahApAnAbhimattAnAM vIrANAM dR^iptachetasAm |
kR^iShNamAyAvimUDhAnAM sa~NgharShaH sumahAnabhUt || 13||
yuyudhuH krodhasaMrabdhA velAyAmAtatAyinaH |
dhanurbhirasibhirbhallairgadAbhistomararShTibhiH || 14||
patatpatAkai rathaku~njarAdibhiH
kharoShTragobhirmahiShairnarairapi |
mithaH sametyAshvataraiH sudurmadA
nyahan sharairdadbhiriva dvipA vane || 15||
pradyumnasAmbau yudhi rUDhamatsarA\-
vakrUrabhojAvaniruddhasAtyakI |
subhadrasa~NgrAmajitau sudAruNau
gadau sumitrAsurathau samIyatuH || 16||
anye cha ye vai nishaTholmukAdayaH
sahasrajichChatajidbhAnumukhyAH |
anyonyamAsAdya madAndhakAritA
jaghnurmukundena vimohitA bhR^isham || 17||
dAshArhavR^iShNyandhakabhojasAtvatA
madhvarbudA mAthurashUrasenAH |
visarjanAH kukurAH kuntayashcha
mithastataste.atha visR^ijya sauhR^idam || 18||
putrA ayudhyan pitR^ibhirbhrAtR^ibhishcha
svasrIyadauhitrapitR^ivyamAtulaiH |
mitrANi mitraiH suhR^idaH suhR^idbhi\-
rj~nAtIMstvahan j~nAtaya eva mUDhAH || 19||
shareShu hIyamAneShu bhajyamAneShu dhanvasu |
shastreShu kShIyamANeShu muShTibhirjahrurerakAH || 20||
tA vajrakalpA hyabhavan parighA muShTinA bhR^itAH |
jaghnurdviShastaiH kR^iShNena vAryamANAstu taM cha te || 21||
pratyanIkaM manyamAnA balabhadraM cha mohitAH |
hantuM kR^itadhiyo rAjannApannA AtatAyinaH || 22||
atha tAvapi sa~NkruddhAvudyamya kurunandana |
erakAmuShTiparighau charantau jaghnaturyudhi || 23||
brahmashApopasR^iShTAnAM kR^iShNamAyA.a.avR^itAtmanAm |
spardhA krodhaH kShayaM ninye vaiNavo.agniryathA vanam || 24||
evaM naShTeShu sarveShu kuleShu sveShu keshavaH |
avatArito bhuvo bhAra iti mene.avasheShitaH || 25||
rAmaH samudravelAyAM yogamAsthAya pauruSham |
tatyAja lokaM mAnuShyaM saMyojyAtmAnamAtmani || 26||
rAmaniryANamAlokya bhagavAn devakIsutaH |
niShasAda dharopasthe tUShNImAsAdya pippalam || 27||
bibhrachchaturbhujaM rUpaM bhrAjiShNu prabhayA svayA |
disho vitimirAH kurvan vidhUma iva pAvakaH || 28||
shrIvatsA~NkaM ghanashyAmaM taptahATakavarchasam |
kausheyAmbarayugmena parivItaM suma~Ngalam || 29||
sundarasmitavaktrAbjaM nIlakuntalamaNDitam |
puNDarIkAbhirAmAkShaM sphuranmakarakuNDalam || 30||
kaTisUtrabrahmasUtrakirITakaTakA~NgadaiH |
hAranUpuramudrAbhiH kaustubhena virAjitam || 31||
vanamAlAparItA~NgaM mUrtimadbhirnijAyudhaiH |
kR^itvorau dakShiNe pAdamAsInaM pa~NkajAruNam || 32||
musalAvasheShAyaHkhaNDakR^iteShurlubdhako jarA |
mR^igAsyAkAraM tachcharaNaM vivyAdha mR^igasha~NkayA || 33||
chaturbhujaM taM puruShaM dR^iShTvA sa kR^itakilbiShaH |
bhItaH papAta shirasA pAdayorasuradviShaH || 34||
ajAnatA kR^itamidaM pApena madhusUdana |
kShantumarhasi pApasya uttamashloka me.anagha || 35||
yasyAnusmaraNaM nR^INAmaj~nAnadhvAntanAshanam |
vadanti tasya te viShNo mayAsAdhu kR^itaM prabho || 36||
tanmA.a.ashu jahi vaikuNTha pApmAnaM mR^igalubdhakam |
yathA punarahaM tvevaM na kuryAM sadatikramam || 37||
yasyAtmayogarachitaM na vidurviri~ncho
rudrAdayo.asya tanayAH patayo girAM ye |
tvanmAyayA pihitadR^iShTaya etada~njaH
kiM tasya te vayamasadgatayo gR^iNImaH || 38||
shrIbhagavAnuvAcha
mA bhairjare tvamuttiShTha kAma eSha kR^ito hi me |
yAhi tvaM madanuj~nAtaH svargaM sukR^itinAM padam || 39||
ityAdiShTo bhagavatA kR^iShNenechChAsharIriNA |
triH parikramya taM natvA vimAnena divaM yayau || 40||
dArukaH kR^iShNapadavImanvichChannadhigamya tAm |
vAyuM tulasikAmodamAghrAyAbhimukhaM yayau || 41||
taM tatra tigmadyubhirAyudhairvR^itaM
hyashvatthamUle kR^itaketanaM patim |
snehaplutAtmA nipapAta pAdayo
rathAdavaplutya sabAShpalochanaH || 42||
apashyatastvachcharaNAmbujaM prabho
dR^iShTiH praNaShTA tamasi praviShTA |
disho na jAne na labhe cha shAntiM
yathA nishAyAmuDupe praNaShTe || 43||
iti bruvati sUte vai ratho garuDalA~nChanaH |
khamutpapAta rAjendra sAshvadhvaja udIkShataH || 44||
tamanvagachChan divyAni viShNupraharaNAni cha |
tenAtivismitAtmAnaM sUtamAha janArdanaH || 45||
gachCha dvAravatIM sUta j~nAtInAM nidhanaM mithaH |
sa~NkarShaNasya niryANaM bandhubhyo brUhi maddashAm || 46||
dvArakAyAM cha na stheyaM bhavadbhishcha svabandhubhiH |
mayA tyaktAM yadupurIM samudraH plAvayiShyati || 47||
svaM svaM parigrahaM sarve AdAya pitarau cha naH |
arjunenAvitAH sarva indraprasthaM gamiShyatha || 48||
tvaM tu maddharmamAsthAya j~nAnaniShTha upekShakaH |
manmAyArachanAmetAM vij~nAyopashamaM vraja || 49||
ityuktastaM parikramya namaskR^itya punaH punaH |
tatpAdau shIrShNyupAdhAya durmanAH prayayau purIm || 50||
iti shrImadbhAgavate mahApurANe pAramahaMsyAM
saMhitAyAmekAdashaskandhe triMsho.adhyAyaH || 30||
\iti
\section{.. OM namo bhagavate vAsudevAya ..}
\section{.. ekatriMsho.adhyAyaH \- 31 ..}
shrIshuka uvAcha
atha tatrAgamadbrahmA bhavAnyA cha samaM bhavaH |
mahendrapramukhA devA munayaH saprajeshvarAH || 1||
pitaraH siddhagandharvA vidyAdharamahoragAH |
chAraNA yakSharakShAMsi kinnarApsaraso dvijAH || 2||
draShTukAmA bhagavato niryANaM paramotsukAH |
gAyantashcha gR^iNantashcha shaureH karmANi janma cha || 3||
vavR^iShuH puShpavarShANi vimAnAvalibhirnabhaH |
kurvantaH sa~NkulaM rAjan bhaktyA paramayA yutAH || 4||
bhagavAn pitAmahaM vIkShya vibhUtIrAtmano vibhuH |
saMyojyAtmani chAtmAnaM padmanetre nyamIlayat || 5||
lokAbhirAmAM svatanuM dhAraNAdhyAnama~Ngalam |
yogadhAraNayA.a.agneyyAdagdhvA dhAmAvishatsvakam || 6||
divi dundubhayo neduH petuH sumanasashcha khAt |
satyaM dharmo dhR^itirbhUmeH kIrtiH shrIshchAnu taM yayuH || 7||
devAdayo brahmamukhyA na vishantaM svadhAmani |
avij~nAtagatiM kR^iShNaM dadR^ishushchAtivismitAH || 8||
saudAmanyA yathA.a.akAshe yAntyA hitvAbhramaNDalam |
gatirna lakShyate martyaistathA kR^iShNasya daivataiH || 9||
brahmarudrAdayaste tu dR^iShTvA yogagatiM hareH |
vismitAstAM prashaMsantaH svaM svaM lokaM yayustadA || 10||
rAjan parasya tanubhR^ijjananApyayehA
mAyA viDambanamavehi yathA naTasya |
sR^iShTvA.a.atmanedamanuvishya vihR^itya chAnte
saMhR^itya chAtmamahimoparataH sa Aste || 11||
martyena yo gurusutaM yamalokanItaM
tvAM chAnayachCharaNadaH paramAstradagdham |
jigye.antakAntakamapIshamasAvanIshaH
kiM svAvane svaranayanmR^igayuM sadeham || 12||
tathApyasheShasthitisambhavApyaye\-
ShvananyaheturyadasheShashaktidhR^ik |
naichChatpraNetuM vapuratra sheShitaM
martyena kiM svasthagatiM pradarshayan || 13||
ya etAM prAtarutthAya kR^iShNasya padavIM parAm |
prayataH kIrtayedbhaktyA tAmevApnotyanuttamAm || 14||
dAruko dvArakAmetya vasudevograsenayoH |
patitvA charaNAvasrairnyaShi~nchatkR^iShNavichyutaH || 15||
kathayAmAsa nidhanaM vR^iShNInAM kR^itsnasho nR^ipa |
tachChrutvodvignahR^idayA janAH shokavirmUrchChitAH || 16||
tatra sma tvaritA jagmuH kR^iShNavishleShavihvalAH |
vyasavaH sherate yatra j~nAtayo ghnanta Ananam || 17||
devakI rohiNI chaiva vasudevastathA sutau |
kR^iShNarAmAvapashyantaH shokArtA vijahuH smR^itim || 18||
prANAMshcha vijahustatra bhagavadvirahAturAH |
upaguhya patIMstAta chitAmAruruhuH striyaH || 19||
rAmapatnyashcha taddehamupaguhyAgnimAvishan |
vasudevapatnyastadgAtraM pradyumnAdIn hareH snuShAH |
kR^iShNapatnyo.avishannagniM rukmiNyAdyAstadAtmikAH || 20||
arjunaH preyasaH sakhyuH kR^iShNasya virahAturaH |
AtmAnaM sAntvayAmAsa kR^iShNagItaiH saduktibhiH || 21||
bandhUnAM naShTagotrANAmarjunaH sAmparAyikam |
hatAnAM kArayAmAsa yathAvadanupUrvashaH || 22||
dvArakAM hariNA tyaktAM samudro.aplAvayatkShaNAt |
varjayitvA mahArAja shrImadbhagavadAlayam || 23||
nityaM sannihitastatra bhagavAn madhusUdanaH |
smR^ityAsheShAshubhaharaM sarvama~Ngalama~Ngalam || 24||
strIbAlavR^iddhAnAdAya hatasheShAn dhana~njayaH |
indraprasthaM samAveshya vajraM tatrAbhyaShechayat || 25||
shrutvA suhR^idvadhaM rAjannarjunAtte pitAmahAH |
tvAM tu vaMshadharaM kR^itvA jagmuH sarve mahApatham || 26||
ya etaddevadevasya viShNoH karmANi janma cha |
kIrtayechChraddhayA martyaH sarvapApaiH pramuchyate || 27||
itthaM harerbhagavato ruchirAvatAra\-
vIryANi bAlacharitAni cha shantamAni |
anyatra cheha cha shrutAni gR^iNan manuShyo
bhaktiM parAM paramahaMsagatau labheta || 28||
iti shrImadbhAgavate mahApurANe vaiyAsakyAmaShTAdashasAhasryAM
pAramahaMsyAM saMhitAyAmekAdashaskandhe ekatriMsho.adhyAyaH || 31||
\section{.. samApto.ayamekAdashaskandhaH ..}
\section{.. OM tatsat ..}
\iti
##
Proofread by PSA Easwaran

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}