% Text title            : Devi Bhagavata Mahapurana Skandha 10
% File name             : devIbhAgavatam10.itx
% Category              : purana, devI, devii, devibhagavatam
% Location              : doc\_purana
% Transliterated by     : Vishwas Bhide, satsangdhara.net
% Proofread by          : Vishwas Bhide, satsangdhara.net
% Latest update         : March 30, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. 10. Shrimaddevibhagavatamahapurane  Dashamah Skandhah ..}##
\itxtitle{.. 10\. shrImaddevIbhAgavatamahApurANe  dashamaH skandhaH ..}##\endtitles ##
\section{10\.1 prathamo.adhyAyaH | manukR^itaM devIstavanam |}
nArada uvAcha |
nArAyaNa dharAdhAra sarvapAlanakAraNa |
bhavatodIritaM devIcharitaM pApanAshanam || 1||
manvantareShu sarveShu sA devI yatsvarUpiNI |
yadAkAreNa kurute prAdurbhAvaM maheshvarI || 2||
tAnnaH sarvAnsamAkhyAhi devImAhAtmyamishritAn |
yathA cha yena yeneha pUjitA saMstutApi hi || 3||
manorathAnpUrayati bhaktAnAM bhaktavatsalA |
tannaH shubhUShamANAnAM devIcharitamuttamam || 4||
varNayasva kR^ipAsindho yenApnoti sukhaM mahat |
shrInArAyaNa uvAcha |
AkarNaya maharShe tvaM charitaM pApanAshanam || 5||
bhaktAnAM bhaktijananaM mahAsampattikArakam |
jagadyonirmahAtejA brahmA lokapitAmahaH || 6||
AvirAsInnAbhipadmAddevadevasya chakriNaH |
sa chaturmukha AsAdya prAdurbhAvaM mahAmate || 7||
manuM svAyambhuvaM nAma janayAmAsa mAnasAt |
sa mAnaso manuH putro brahmaNaH parameShThinaH || 8||
shatarUpAM cha tatpatnIM jaj~ne dharmasvarUpiNIm |
sa manuH kShIrasindhoshcha tIre paramapAvane || 9||
devImArAdhayAmAsa mahAbhAgyaphalapradAm |
mUrtiM cha mR^iNmayIM tasyA vidhAya pR^ithivIpatiH || 10||
upAsate sma tAM devIM vAgbhavaM sa japan rahaH |
nirAhAro jitashvAso niyamavratakarshitaH || 11||
ekapAdena santiShThan dharAyAmanishaM sthiraH |
shatavarShaM jitaH kAmaH krodhastena mahAtmanA || 12||
bheje sthAvaratAM devyAshcharaNau chintayan hR^idi |
tasya tattapasA devI prAdurbhUtA jaganmayI || 13||
uvAcha vachanaM divyaM varaM varaya bhUmipa |
tata AnandajanakaM shrutvA vAkyaM mahIpatiH || 14||
varayAmAsa tAn hR^itsthAn varAnamaradurlabhAn |
manuruvAcha |
jaya devi vishAlAkShi jaya sarvAntarasthite || 15||
mAnye pUjye jagaddhAtri sarvama~Ngalama~Ngale |
tvatkaTAkShAvalokena padmabhUH sR^ijate jagat || 16||
vaikuNThaH pAlayatyeva haraH saMharate kShaNAt |
shachIpatistrilokyAshcha shAsako bhavadAj~nayA || 17||
prANinaH shikShayatyeva daNDena cha paretarAT |
yAdasAmadhipaH pAshI pAlanaM mAdR^ishAmapi || 18||
kurute sa kubero.api nidhInAM patiravyayaH |
hutabhu~NnairR^ito vAyurIshAnaH sheSha eva cha || 19||
tvadaMshasambhavA eva tvachChaktiparibR^iMhitAH |
athApi yadi me devi varo deyo.asti sAmpratam || 20||
tadA prahvAH sargakArye vighnA nashyantu me shive |
vAgbhavasyApi mantrasya ye kechidupasevinaH || 21||
teShAM siddhiH satvarApi kAryANAM jAyatAmapi |
ye saMvAdamimaM devi paThanti shrAvayanti cha || 22||
teShAM loke bhuktimuktI sulabhe bhavatAM shive |
jAtismaratvaM bhavatu vaktR^itvaM sauShThavaM tathA || 23||
j~nAnasiddhiH karmamArgasaMsiddhirapi chAstu hi |
putrapautrasamR^iddhishcha jAyedityeva me vachaH || 24||
iti shrImaddevIbhAgavate mahApurANe.aShTAdashasAhasryAM saMhitAyAM
dashamaskandhe manukR^itaM devIstavanaM nAma prathamo.adhyAyaH || 10\.1||
\section{10\.2 dvitIyo.adhyAyaH | vindhyopAkhyAnavarNanam |}
shrIdevyuvAcha |
bhUmipAla mahAbAho sarvametadbhaviShyati |
yattvayA prArthitaM tatte dadAmi manujAdhipa || 1||
ahaM prasannA daityendranAshanAmoghavikramA |
vAgbhavasya japenaiva tapasA te sunishchitam || 2||
rAjyaM niShkaNTakaM te.astu putrA vaMshakarA api |
mayi bhaktirdR^iDhA vatsa mokShAnte satpade bhavet || 3||
evaM varAnmahAdevI tasmai dattvA mahAtmane |
pashyatastu manoreva jagAma vindhyaparvatam || 4||
yo.asau vindhyAchalo ruddhaH kumbhodbhavamaharShiNA |
bhAnumArgAvarodhArthaM pravR^itto gaganaM spR^ishan || 5||
sA vindhyavAsinI viShNoranujA varadeshvarI |
babhUva pUjyA lokAnAM sarveShAM munisattama || 6||
R^iShaya UchuH |
ko.asau vindhyAchalaH sUta kimarthaM gaganaM spR^ishan |
bhAnumArgAvarodhaM cha kimarthaM kR^itavAnasau || 7||
kathaM cha maitrAvaruNiH parvataM taM mahonnatam |
prakR^itisthaM chakAreti sarvaM vistarato vada || 8||
na hi tR^ipyAmahe sAdho tvadAsyagalitAmR^itam |
devyAshcharitrarUpAkhyaM pItvA tR^iShNA pravardhate || 9||
sUta uvAcha |
AsIdvindhyAchalo nAma mAnyaH sarvadharAbhR^itAm |
mahAvanasamUhADhyo mahApAdapasaMvR^itaH || 10||
supuShpitairanekaishcha latAgulmaistu saMvR^itaH |
mR^igA varAhA mahiShA vyAghrAH shArdUlakA api || 11||
vAnarAH shashakA R^ikShAH shR^igAlAshcha samantataH |
vicharanti sadA hR^iShTA puShTA eva mahodyamAH || 12||
nadInadajalAkrAnto devagandharvakinnaraiH |
apsarobhiH kimpuruShaiH sarvakAmaphaladrumaiH || 13||
etAdR^ishe vindhyanage kadAchitparyaTan mahIm |
devarShiH paramaprIto jagAma svechChayA muniH || 14||
taM dR^iShTvA sa nago ma~NkShu tUrNamutthAya sambhramAt |
pAdyamarghyaM tathA dattvA varAsanamathArpayat || 15||
sukhopaviShTaM devarShiM prasannaM naga UchivAn |
vindhya uvAcha |
devarShe kathyatAM jAta AgamaH kuta uttamaH || 16||
tavAgamanato jAtamanarghyaM mama mandiram |
tava cha~NkramaNaM devAbhayArthaM hi yathA raveH || 17||
apUrvaM yanmanovR^ittaM tad brUhi mama nArada |
nArada uvAcha |
mamAgamanamindrAre jAtaM svarNagireratha || 18||
tatra dR^iShTA mayA lokAH shakrAgniyamapAshinAm |
sarveShAM lokapAlAnAM bhavanAni samantataH || 19||
mayA dR^iShTAni vindhyAga nAnAbhogapradAni cha |
iti choktvA brahmayoniH punaruchChvAsamAvishat || 20||
uchChvasantaM muniM dR^iShTvA punaH paprachCha shailarAT |
uchChvAsakAraNaM kiM tad brUhi devaR^iShe mama || 21||
ityAkarNya nagasyoktaM devarShiramitadyutiH |
abravIchChrUyatAM vatsa mamochChvAsasya kAraNam || 22||
gaurIgurustu himavA~nChivasya shvashuraH kila |
sambandhitvAtpashupateH pUjya AsItkShamAbhR^itAm || 23||
evameva cha kailAsaH shivasyAvasathaH prabhuH |
pUjyaH pR^ithvIbhR^itAM jAto loke pApaughadAraNaH || 24||
niShadhaH parvato nIlo gandhamAdana eva cha |
pUjyAH svasthAnamAsAdya sarva eva kShamAbhR^itaH || 25||
yaM paryeti cha vishvAtmA sahasrakiraNaH svarAT |
sagraharkShagaNopetaH so.ayaM kanakaparvataH || 26||
AtmAnaM manute shreShThaM variShThaM cha dharAbhR^itAm |
sarveShAmahamevAgryo nAsti lokeShu matsamaH || 27||
evammAnAbhimAnaM taM smR^itvochChvAso mayojjhitaH |
astu naitAvatA kR^ityaM tapobalavatAM naga |
prasa~Ngato mayoktaM te gamiShyAmi nijaM gR^iham || 28||
iti shrImaddevIbhAgavate mahApurANe.aShTAdashasAhasryAM saMhitAyAM
dashamaskandhe vindhyopAkhyAnavarNanaM nAma dvitIyo.adhyAyaH || 10\.2||
\section{10\.3 tR^itIyo.adhyAyaH | devImAhAtmye vindhyopAkhyAnavarNanam |}
sUta uvAcha |
evaM samupadishyAyaM devarShiH paramaH svarAT |
jagAma brahmaNo lokaM svairachArI mahAmuniH || 1||
gate munivare vindhyashchintAM lebhe.anapAyinIm |
naiva shAntiM sa lebhe cha sadAntaHkR^itashochanaH || 2||
kathaM kiM tvatra me kAryaM kathaM meruM jayAmyaham |
naiva shAntiM labhe nApi svAsthyaM me mAnase bhavet || 3||
(dhigutsAhaM cha mAnaM cha dhi~Nme kIrtiM cha dhikkulam)
dhigbalaM me pauruShaM dhik smR^itaM pUrvairmahAtmabhiH |
evaM chintayamAnasya vindhyasya manasi sphuTam || 4||
prAdurbhUtA matiH kArye kartavye doShakAriNI |
merupradakShiNAM kurvannityameva divAkaraH || 5||
sagraharkShagaNopetaH sadA dR^ipyatyayaM nagaH |
tasya mArgasya saMrodhaM kariShyAmi nijaiH karaiH || 6||
tadA niruddho dyumaNiH parikrAmetkathaM nagam |
evaM mArge niruddhe tu mayA dinakarasya cha || 7||
bhagnadarpo divyanago bhaviShyati vinishchayam |
evaM nishchitya vindhyAdriH khaM spR^ishan vavR^idhe bhujaiH || 8||
mahonnataiH shR^i~NgavaraiH sarvaM vyApya vyavasthitaH |
kadodeShyati bhAsvAMstaM rodhayiShyAmyahaM kadA || 9||
evaM sa~nchintayAnasya sA vyatIyAya sharvarI |
prabhAtaM vimalaM jaj~ne disho vitimirAH karaiH || 10||
kurvansa nirgato bhAnurudayAyodaye girau |
prakAshate sma vimalaM nabho bhAnukaraiH shubhaiH || 11||
vikAsaM nalinI bheje mIlanaM cha kumudvatI |
svAni kAryANi sarve cha lokAH samupatasthire || 12||
havyaM kavyaM bhUtabaliM devAnAM cha pravardhayan |
prAhNAparAhNamadhyAhnavibhAgena tviShAM patiH || 13||
evaM prAchIM tathAgneyIM samAshvAsya viyoginIm |
jvalantIM chirakAlInavirahAdiva kAminIm || 14||
bhAskaro.atha kR^ishAnoshcha dishaM nUnaM vihAya cha |
yAmyAM gantuM tatastUrNaM pratasthe kamalAkaraH || 15||
na shashAkAgrato gantuM tato.anUrurvyajij~napat |
anUruruvAcha |
bhAno mAnonnato vindhyo nirudhya gaganaM sthitaH || 16||
spardhate meruNA prepsustvaddattAM cha pradakShiNAm |
sUta uvAcha |
anUruvAkyamAkarNya savitA hyAsa chintayan || 17||
aho gaganamArgo.api rudhyate chAtivismayaH |
prAyaH shUro na kiM kuryAdutpathe vartmani sthitaH || 18||
niruddho no vAjimArgo daivaM hi balavattaram |
rAhubAhugrahavyagro yaH kShaNaM nAvatiShThate || 19||
sa chiraM ruddhamArgo.api kiM karoti vidhirbalI |
evaM cha mArge saMruddhe lokAH sarve cha seshvarAH || 20||
nAnvavindanta sharaNaM kartavyaM nAnvapadyata |
chitraguptAdayaH sarve kAlaM jAnanti sUryataH || 21||
saMruddho vindhyagiriNA aho daivaviparyayaH |
yadA niruddhaH savitA giriNA spardhayA tadA || 22||
naShTaH svAhAsvadhAkAro naShTaprAyamabhUjjagat |
evaM cha pAshchimA lokA dAkShiNAtyAstathaiva cha || 23||
nidrAmIlitachakShuShkA nishAmeva prapedire |
prA~nchastathottarAhAshcha tIkShNatApapratApitAH || 24||
mR^itA naShTAshcha bhagnAshcha vinAshamabhajan prajAH |
hAhAbhUtaM jagatsarvaM svadhAkavyavivarjitam |
devAH sendrAH samudvignAH kiM kurma itivAdinaH || 25||
iti shrImaddevIbhAgavate mahApurANe.aShTAdashasAhasryAM saMhitAyAM
dashamaskandhe devImAhAtmye vindhyopAkhyAnavarNanaM nAma tR^itIyo.adhyAyaH || 10\.3||
\section{10\.4 chaturtho.adhyAyaH | rudraprArthanam |}
sUta uvAcha |
tataH sarve suragaNA mahendrapramukhAstadA |
padmayoniM puraskR^itya rudraM sharaNamanvayuH || 1||
upatasthuH praNatibhiH stotraishchAruvibhUtibhiH |
devadevaM girishayaM shashilolitashekharam || 2||
devavA UchuH |
jaya deva gaNAdhyakSha umAlAlitapa~Nkaja |
aShTasiddhivibhUtInAM dAtre bhaktajanAya te || 3||
mahAmAyAvilasitasthAnAya paramAtmane |
vR^iShA~NkAyAmareshAya kailAsasthitishAline || 4||
ahirbudhnyAya mAnyAya manave mAnadAyine |
ajAya bahurUpAya svAtmArAmAya shambhave || 5||
gaNanAthAya devAya girishAya namo.astu te |
mahAvibhUtidAtre te mahAviShNustutAya cha || 6||
viShNuhR^itka~njavAsAya mahAyogaratAya cha |
yogagamyAya yogAya yoginAM pataye namaH || 7||
yogIshAya namastubhyaM yogAnAM phaladAyine |
dInadAnaparAyApi dayAsAgaramUrtaye || 8||
ArtiprashamanAyogravIryAya guNamUrtaye |
vR^iShadhvajAya kAlAya kAlakAlAya te namaH || 9||
sUta uvAcha |
evaM stutaH sa devesho yaj~nabhugbhirvR^iShadhvajaH |
prAha gambhIrayA vAchA prahasanvibudharShabhAn || 10||
shrIbhagavAnuvAcha |
prasanno.ahaM diviShadaH stotreNottamapUruShAH |
manorathaM pUrayAmi sarveShAM devatarShabhAH || 11||
devA UchuH |
sarvadevesha girisha shashimaulivirAjita |
ArtAnAM sha~NkarastvaM cha shaM vidhehi mahAbala || 12||
parvato vindhyanAmAsti merudveShTA mahonnataH |
bhAnumArganiroddhA hi sarveShAM duHkhado.anagha || 13||
tadavR^iddhiM stambhayeshAna sarvakalyANakR^idbhava |
bhAnusa~nchArarodhena kAlaj~nAnaM kathaM bhavet || 14||
naShTe svAhAsvadhAkAre loke kaH sharaNaM bhavet |
asmAkaM cha bhayArtAnAM bhavAneva hi dR^ishyate || 15||
duHkhanAshakaro deva prasIda girijApate |
shrIshiva uvAcha |
nAsmAkaM shaktirastIha tadvR^iddhistambhane surAH || 16||
imamevaM vadiShyAmo bhagavantaM ramAdhavam |
so.asmAkaM prabhurAtmA cha pUjyaH kAraNarUpadhR^ik || 17||
govindo bhagavAnviShNuH sarvakAraNakAraNaH |
taM gatvA kathayiShyAmaH sa duHkhAnto bhaviShyati || 18||
ityevamAkarNya girIshabhAShitaM
devAshcha sendrAH sapayojasambhavAH |
rudraM puraskR^itya cha vepamAnA
vaikuNThalokaM pratijagmura~njasA || 19||
iti shrImaddevIbhAgavate mahApurANe.aShTAdashasAhasryAM saMhitAyAM
dashamaskandhe rudraprArthanaM nAma chaturtho.adhyAyaH || 10\.4||
\section{10\.5 pa~nchamo.adhyAyaH | shrIviShNunA devebhyo varapradAnam |}
sUta uvAcha |
te gatvA devadeveshaM ramAnAthaM jagadgurum |
viShNuM kamalapatrAkShaM dadR^ishuH prabhayAnvitam || 1||
stotreNa tuShTuvurbhaktyA gadgadasvarasatkR^itAH |
devA UchuH |
jaya viShNo rameshAdya mahApuruSha pUrvaja || 2||
daityAre kAmajanaka sarvakAmaphalaprada |
mahAvarAha govinda mahAyaj~nasvarUpaka || 3||
mahAviShNo dhruveshAdya jagadutpattikAraNa |
matsyAvatAre vedAnAmuddhArAdhArarUpaka || 4||
satyavrata dharAdhIsha matsyarUpAya te namaH |
jayAkUpAra daityAre surakAryasamarpaka || 5||
amR^itAptikareshAna kUrmarUpAya te namaH |
jayAdidaityanAshArthamAdisUkararUpadhR^ik || 6||
mahyuddhArakR^itodyogakolarUpAya te namaH |
nArasiMhaM vapuH kR^itvA mahAdaityaM dadAra yaH || 7||
karajairvaradR^iptA~NgaM tasmai nR^iharaye namaH |
vAmanaM rUpamAsthAya trailokyaishvaryamohitam || 8||
baliM sa~nChalayAmAsa tasmai vAmanarUpiNe |
duShTakShatravinAshAya sahasrakarashatrave || 9||
reNukAgarbhajAtAya jAmadagnyAya te namaH |
duShTarAkShasapaulastyashirashChedapaTIyase || 10||
shrImaddAsharathe tubhyaM namo.anantakramAya cha |
kaMsaduryodhanAdyaishcha daityaiH pR^ithvIshalA~nChanaiH || 11||
bhArAkrAntAM mahIM yo.asAvujjahAra mahAvibhuH |
dharmaM saMsthApayAmAsa pApaM kR^itvA sudUrataH || 12||
tasmai kR^iShNAya devAya namo.astu bahudhA vibho |
duShTayaj~navighAtAya pashuhiMsAnivR^ittaye || 13||
bauddharUpaM dadhau yo.asau tasmai devAya te namaH |
mlechChaprAye.akhile loke duShTarAjanyapIDite || 14||
kalkirUpaM samAdadhyau devadevAya te namaH |
dashAvatArAste deva bhaktAnAM rakShaNAya vai || 15||
duShTadaityavighAtAya tasmAttvaM sarvaduHkhahR^it |
jaya bhaktArtinAshAya dhR^itaM nArIjalAtmasu || 16||
rUpaM yena tvayA deva ko.anyastvatto dayAnidhiH |
ityevaM devadeveshaM stutvA shrIpItavAsasam || 17||
praNemurbhaktisahitAH sAShTA~NgaM vibudharShabhAH |
teShAM stavaM samAkarNya devaH shrIpuruShottamaH || 18||
uvAcha vibudhAnsarvAn harShayachChrIgadAdharaH |
shrIbhagavAnuvAcha \-
prasanno.asmi stavenAhaM devAstApaM vimu~nchatha || 19||
bhavatAM nAshayiShyAmi duHkhaM paramaduHsaham |
vR^iNudhvaM cha varaM matto devAH paramadurlabham || 20||
dadAmi paramaprItaH stavasyAsya prasAdataH |
ya etatpaThate stotraM kalya utthAya mAnavaH || 21||
mayi bhaktiM parAM kR^itvA na taM shokaH spR^ishetkadA |
alakShmIH kAlakarNI cha nAkrAmettadgR^ihaM surAH || 22||
nopasargA na vetAlA na grahA brahmarAkShasAH |
na rogA vAtikAH paittAH shleShmasambhavinastathA || 23||
nAkAlamaraNaM tasya kadApi cha bhaviShyati |
santatishchirakAlasthA bhogAH sarve sukhAdayaH || 24||
sambhaviShyanti tanmartyagR^ihe yaH stotrapAThakaH |
kiM punarbahunoktena stotraM sarvArthasAdhakam || 25||
etasya paThanAnR^INAM bhuktimuktI na dUrataH |
devA bhavatsu yadduHkhaM kathyatAM tadasaMshayam || 26||
nAshayAmi na sandehashchAtra kAryo.aNureva cha |
evaM shrIbhagavadvAkyaM shrutvA sarve divaukasaH |
prasannamanasaH sarve punarUchurvR^iShAkapim || 27||
iti shrImaddevIbhAgavate mahApurANe.aShTAdashasAhasryAM saMhitAyAM
dashamaskandhe shrIviShNunA devebhyo varapradAnaM nAma pa~nchamo.adhyAyaH || 10\.5||
\section{10\.6 ShaShTho.adhyAyaH | agastyAshvAsanavarNanam |}
sUta uvAcha |
shrIshasya vachanAddevAH santuShTAH sarva eva hi |
prasannamanaso bhUtvA punarenaM samUchire || 1||
devA UchuH |
devadeva mahAviShNo sR^iShTisthityantakAraNa |
viShNo vindhyanago.arkasya mArgarodhaM karoti hi || 2||
tena bhAnuvirodhena sarva eva mahAvibho |
alabdhabhogabhAgA hi kiM kurmaH kutra yAma hi || 3||
shrIbhagavAnuvAcha |
yA kartrI sarvajagatAmAdyA cha kulavardhanI |
devI bhagavatI tasyAH pUjakaH paramadyutiH || 4||
agastyo munivaryo.asau vArANasyAM samAsate |
tattejova~nchako.agastyo bhaviShyati surottamAH || 5||
taM prasAdya dvijavaramagastyaM paramaujasam |
yAchadhvaM vibudhAH kAshIM gatvA niHshreyasaH padIm || 6||
sUta uvAcha |
evaM samupadiShTAste viShNunA vibudhottamAH |
pratItAH praNatAH sarve jagmurvArANasIM purIm || 7||
kShaNena vibudhashreShThA gatvA kAshIpurIM shubhAm |
maNikarNIM samAplutya sachailaM bhaktisaMyutAH || 8||
santarpya devAMshcha pitR^IndattvA dAnaM vidhAnataH |
Agatya munivaryasya chAshramaM paramaM mahat || 9||
prashAntashvApadAkIrNaM nAnApAdapasa~Nkulam |
mayUraiH sArasairhaMsaishchakravAkairupAshritam || 10||
mahAvarAhaiH kolaishcha vyAghraiH shArdUlakairapi |
mR^igai rurubhiratyarthaM khaDgaiH sharabhakairapi || 11||
samAshritaM paramayA lakShmyA munivaraM tadA |
daNDavatpatitAH sarve praNemushcha punaH punaH || 12||
devA UchuH |
jaya dvijagaNAdhIsha mAnya pUjya dharAsura |
vAtApIbalanAshAya namaste kumbhayonaye || 13||
lopAmudrApate shrImanmitrAvaruNasambhava |
sarvavidyAnidhe.agastya shAstrayone namo.astu te || 14||
yasyodaye prasannAni bhavantyujjvalabhA~njyapi |
toyAni toyarAshInAM tasmai tubhyaM namo.astu te || 15||
kAshapuShpavikAsAya la~NkAvAsapriyAya cha |
jaTAmaNDalayuktAya sashiShyAya namo.astu te || 16||
jaya sarvAmarastavya guNarAshe mahAmune |
variShThAya cha pUjyAya sastrIkAya namo.astu te || 17||
prasAdaH kriyatAM svAmin vayaM tvAM sharaNaM gatAH |
dustarAchChailajAdduHkhAtpIDitAH paramadyute || 18||
ityevaM saMstuto.agastyo muniH paramadhArmikaH |
prAha prasannayA vAchA vihasan dvijasattamaH || 19||
muniruvAcha |
bhavantaH paramashreShThA devAstribhuvaneshvarAH |
lokapAlA mahAtmAno nigrahAnugrahakShamAH || 20||
yo.amarAvatyadhIshAnaH kulishaM yasya chAyudham |
sid.hdhyaShTakaM cha yaddvAri sa shakro marutAM patiH || 21||
vaishvAnaraH kR^ishAnurhi havyakavyavaho.anisham |
mukhaM sarvAmarANAM hi so.agniH kiM tasya duShkaram || 22||
rakShogaNAdhipo bhImaH sarveShAM karmasAkShikaH |
daNDavyagrakaro devaH kiM tasyAsukaraM surAH || 23||
tathApi yadi deveshAH kAryaM machChaktisiddhibhR^it |
asti cheduchyatAM devAH kariShyAmi na saMshayaH || 24||
evaM munivareNoktaM nishamya vibudharShabhAH |
pratItAH praNayodvignAH kAryaM nijagadurnijam || 25||
maharShe vindhyagiriNA niruddho.arkavinirgamaH |
trailokyaM tena saMviShTaM hAhAbhUtamachetanam || 26||
tadvR^iddhiM stambhaya mune nijayA tapasaH shriyA |
bhavatastejasAgastya nUnaM namro bhaviShyati |
etadevAsmadIyaM cha kAryaM kartavyamasti hi || 27||
iti shrImaddevIbhAgavate mahApurANe.aShTAdashasAhasryAM saMhitAyAM
dashamaskandhe agastyAshvAsanavarNanaM nAma ShaShTho.adhyAyaH || 10\.6||
\section{10\.7 saptamo.adhyAyaH | vindhyavR^id.hdhyavarodhavarNanam |}
sUta uvAcha |
iti vAkyaM samAkarNya vibudhAnAM dvijottamaH |
kariShye kAryametadvaH pratyuvAcha tato muniH || 1||
a~NgIkR^ite tadA kArye muninA kumbhajanmanA |
devAH pramuditAH sarve babhUburdvijasattamAH || 2||
te devAH svAni dhiShNyAni bhejire munivAkyataH |
patnIM munivaraH shrImAnuvAcha nR^ipakanyakAm || 3||
aye nR^ipasute prApto vighno.anarthasya kArakaH |
bhAnumArganirodhena kR^ito vindhyamahIbhR^itA || 4||
Aj~nAtaM kAraNaM tachcha smR^itaM vAkyaM purAtanam |
kAshImuddishya yadgItaM munibhistattvadarshibhiH || 5||
avimuktaM na moktavyaM sarvathaiva mumukShubhiH |
kintu vighnA bhaviShyanti kAshyAM nivasatAM satAm || 6||
so.antarAyo mayA prAptaH kAshyAM nivasatA priye |
ityevamuktvA bhAryAM tAM muniH paramatApanaH || 7||
maNikarNyAM samAplutya dR^iShTvA vishveshvaraM vibhum |
daNDapANiM samabhyarchya kAlarAjaM samAgataH || 8||
kAlarAja mahAbAho bhaktAnAM bhayahAraka |
kathaM dUrayase puryAH kAshIpuryAstvamIshvaraH || 9||
tvaM kAshIvAsavighnAnAM nAshako bhaktarakShakaH |
mAM kiM dUrayase svAmin bhaktArtivinivAraka || 10||
parApavAdo nokto me na paishunyaM na chAnR^itam |
kena karmavipAkena kAshyA dUraM karoShi mAm || 11||
evaM prArthya cha taM kAlanAthaM kumbhodbhavo muniH |
jagAma sAkShivighneshaM sarvavighnanivAraNam || 12||
taM dR^iShTvAbhyarchya samprArthya tataH puryA vinirgataH |
lopAmudrApatiH shrImAnagastyo dakShiNAM disham || 13||
kAshIvirahasantapto mahAbhAgyanidhirmuniH |
saMsmR^ityAnukShaNaM kAshIM jagAma saha bhAryayA || 14||
tapoyAnamivAruhya nimiShArdhena vai muniH |
agre dadarsha taM vindhyaM ruddhAmbaramathonnatam || 15||
chakampe chAchalastUrNaM dR^iShTvaivAgre sthitaM munim |
giriH kharvataro bhUtvA vivakShuravanImiva || 16||
daNDavatpatito bhUmau sAShTA~NgaM bhaktibhAvitaH |
taM dR^iShTvA namrashikharaM vindhyaM nAma mahAgirim || 17||
prasannavadano.agastyo munirvindhyamathAbravIt |
vatsaivaM tiShTha tAvattvaM yAvadAgamyate mayA || 18||
ashakto.ahaM gaNDashailArohaNe tava putraka |
evamuktvA muniryAmyadishaM prati gamotsukaH || 19||
Aruhya tasya shikharANyavAruhadanukramAt |
gato yAmyadishaM chApi shrIshailaM prekShya vartmani || 20||
malayAchalamAsAdya tatrAshramaparo.abhavat |
sApi devI tatra vindhyamAgatA manupUjitA || 21||
lokeShu prathitA vindhyavAsinIti cha shaunaka |
sUta uvAcha |
etachcharitraM paramaM shatrunAshanamuttamam || 22||
agastyavindhyanagayorAkhyAnaM pApanAshanam |
rAj~nAM vijayadaM tachcha dvijAnAM j~nAnavardhanam || 23||
vaishyAnAM dhAnyadhanadaM shUdrANAM sukhadaM tathA |
dharmArthI dharmamApnoti dhanArthI dhanamApnuyAt || 24||
kAmAnavApnuyAtkAmI bhaktyA chAsya sakR^ichChravAt |
evaM svAyambhuvamanurdevImArAdhya bhaktitaH || 25||
lebhe rAjyaM dharAyAshcha nijamanvantarAshrayam |
ityetadvarNitaM saumya mayA manvantarAshritam |
AdyaM charitraM shrIdevyAH kiM punaH kathayAmi te || 26||
iti shrImaddevIbhAgavate mahApurANe.aShTAdashasAhasryAM saMhitAyAM
dashamaskandhe vindhyavR^id.hdhyavarodhavarNanaM nAma saptamo.adhyAyaH || 10\.7||
\section{10\.8 aShTamo.adhyAyaH | manUtpattivarNanam |}
shaunaka uvAcha |
Adyo manvantaraH prokto bhavatA chAyamuttamaH |
anyeShAmudbhavaM brUhi manUnAM divyatejasAm || 1||
sUta uvAcha |
evamAdyasya chotpattiM shrutvA svAyambhuvasya hi |
anyeShAM kramashasteShAM sambhUtiM paripR^ichChati || 2||
nAradaH paramo j~nAnI devItattvArthakovidaH |
nArada uvAcha |
manUnAM me samAkhyAhi sUtpattiM cha sanAtana || 3||
shrInArAyaNa uvAcha |
prathamo.ayaM manuH svAyambhuva ukto mahAmune |
devyArAdhanato yena prAptaM rAjyamakaNTakam || 4||
priyavratottAnapAdau manuputrau mahaujasau |
rAjyapAlanakartArau vikhyAtau vasudhAtale || 5||
dvitIyashcha manuH svArochiSha ukto manIShibhiH |
priyavratasutaH shrImAnaprameyaparAkramaH || 6||
sa svArochiShanAmApi kAlindIkUlato manuH |
nivAsaM kalpayAmAsa sarvasattvapriya~NkaraH || 7||
jIrNapatrAshano bhUtvA tapaH kartumanuvrataH |
devyA mUrtiM mR^iNmayIM cha pUjayAmAsa bhaktitaH || 8||
evaM dvAdasha varShANi vanasthasya tapasyataH |
devI prAdurabhUttAta sahasrArkasamadyutiH || 9||
tataH prasannA deveshI stavarAjena suvratA |
dadau svArochiShAyaiva sarvamanvantarAshrayam || 10||
AdhipatyaM jagaddhAtrI tAriNIti prathAmagAt |
evaM svArochiShamanustAriNyArAdhanAttataH || 11||
AdhipatyaM cha lebhe sa sarvArAtivivarjitam |
dharmaM saMsthApya vidhivadrAjyaM putraiH samaM vibhuH || 12||
bhuktvA jagAma svarlokaM nijamanvantarAshrayAt |
tR^itIya uttamo nAma priyavratasuto manuH || 13||
ga~NgAkUle tapastaptvA vAgbhavaM sa~njapan rahaH |
varShANi trINyupavasan devyanugrahamAvishat || 14||
stutvA devIM stotravarairbhaktibhAvitamAnasaH |
rAjyaM niShkaNTakaM lebhe santatiM chirakAlikIm || 15||
rAjyotthAnyAni saukhyAni bhuktvA dharmAnyugasya cha |
so.apyAjagAma padavIM rAjarShivarabhAvitAm || 16||
chaturthastAmaso nAma priyavratasuto manuH |
narmadAdakShiNe kUle samArAdhya jaganmayIm || 17||
maheshvarIM kAmarAjakUTajApaparAyaNaH |
vAsante shArade kAle navarAtrasaparyayA || 18||
toShayAmAsa deveshIM jalajAkShImanUpamAm |
tasyAH prasAdamAsAdya natvA stotrairanuttamaiH || 19||
akaNTakaM mahadrAjyaM bubhuje gatasAdhvasaH |
putrAnvaloddhatA~nChUrAndasha vIryaniketanAn || 20||
utpAdya nijabhAryAyAM jagAmAmbaramuttamam |
pa~nchamo manurAkhyAto raivatastAmasAnujaH || 21||
kAlindIkUlamAshritya jajApa kAmasa.nj~nakam |
bIjaM paramavAgdarpadAyakaM sAdhakAshrayam || 22||
etadArAdhanAdApa svArAjyarddhimanuttamAm |
balamaprahataM loke sarvasiddhividhAyakam || 23||
santatiM chirakAlInAM putrapautramayIM shubhAm |
dharmAnvyasya vyavasthApya viShayAnupabhujya cha |
jagAmApratimaH shUro mahendrAlayamuttamam || 24||
iti shrImaddevIbhAgavate mahApurANe.aShTAdashasAhasryAM saMhitAyAM
dashamaskandhe manUtpattivarNanaM nAma aShTamo.adhyAyaH || 10\.8||
\section{10\.9 navamo.adhyAyaH | chAkShuShamanuvR^ittavarNanam |}
shrInArAyaNa uvAcha |
athAtaH shrUyatAM chitraM devImAhAktyamuttamam |
a~NgaputreNa manunA yathA.a.aptaM rAjyamuttamam || 1||
a~Ngasya rAj~naH putro.abhUchchAkShuSho manuruttamaH |
ShaShThaH supulahaM nAma brahmarShiM sharaNaM gataH || 2||
brahmarShe tvAmahaM prAptaH sharaNaM praNatArtihan |
shAdhi mAM ki~NkaraMsvAmin yenAhaM prApnuyAM shriyam || 3||
medinyAshchAdhipatyaM me syAdyathAvadakhaNDitam |
avyAhataM bhujabalaM shastrAstranipuNaM kShamam || 4||
santatishchirakAlInApyakhaNDaM vaya uttamam |
ante.apavargalAbhashcha syAttathopadishAdya me || 5||
ityevaM vachanaM tasya manoH karNapathe.abhavat |
pratyuvAcha muniH shrImAn devyAH saMrAdhanaM param || 6||
rAjannAkarNaya vacho mama shrotrasukhaM mahat |
shivAmArAdhayAdya tvaM tatprasAdAdidaM bhavet || 7||
chAkShuSha uvAcha |
kIdR^igArAdhanaM devyAstasyAH paramapAvanam |
kenAkAreNa kartavyaM kAruNyAdvaktumarhasi || 8||
muniruvAcha |
rAjannAkarNyatAM devyAH pUjanaM paramavyayam |
vAgbhavaM bIjamavyaktaM sa~njapyamanishaM tathA || 9||
trikAlaM sa~njapanmartyo bhuktimuktI labhettu hi |
na bIjaM vAgbhavAdanyadasti rAjanyanandana || 10||
japAtsiddhikaraM vIryabalavR^iddhikaraM param |
etasya jApAtpAdmo.api sR^iShTikartA mahAbalaH || 11||
viShNuryajjapataH sR^iShTipAlakaH parikIrtitaH |
maheshvaro.api saMhartA yajjapAdabhavannR^ipa || 12||
lokapAlAstathAnye.api nigrahAnugrahakShamAH |
yadAshrayAdabhUvaMste balavIryamadoddhatAH || 13||
evaM tvamapi rAjanya maheshIM jagadambikAm |
samArAdhya maharddhiM cha lapsyase.achirakAlataH || 14||
evaM sa munivaryeNa pulahena prabodhitaH |
a~NgaputrastapastaptuM jagAma virajAM nadIm || 15||
sa cha tepe tapastIvraM vAgbhavasya jape rataH |
bIjasya pR^ithivIpAlaH shIrNaparNAshano vibhuH || 16||
prathame.abde pallavAsho dvitIye toyabhakShaNaH |
tR^itIye.abde pavanabhuk tasthau sthANurivAchalaH || 17||
evaM dvAdasha varShANi tyaktAhArasya bhUbhujaH |
vAgbhavaM japato nityaM matirAsIchChubhAnvitA || 18||
tathA cha devyAH paramaM mantraM sajjapato rahaH |
prAdurAsIjjaganmAtA sAkShAchChrIparameshvarI || 19||
tejomayI durAdharShA sarvadevamayIshvarI |
uvAchA~NgatanUjaM taM prasannA lalitAkSharam || 20||
devyuvAcha |
pR^ithivIpAla te yatsyAchchintitaM paramaM varam |
tad brUhi sampradAsyAmi tapasA te sutoShitA || 21||
chAkShuSha uvAcha |
jAnAsi devadeveshi yatprArthyaM manasepsitam |
antaryAmisvarUpeNa tatsarvaM devapUjite || 22||
tathApi mama bhAgyena jAtaM yattava darshanam |
bravImi devi me dehi rAjyaM manvantarAshritam || 23||
devyuvAcha |
dattaM manvantarasyAsya rAjyaM rAjanyasattama |
putrA mahAbalAste cha bhaviShyanti guNAdhikAH || 24||
rAjyaM niShkaNTakaM bhAvi mokSho.ante chApi nishchitaH |
evaM dattvA paraM devI manave varamuttamam || 25||
jagAmAdarshanaM sadyastena bhaktyA cha saMstutA |
so.api rAjA manuH ShaShThaH prasAdAttu tadAshrayAt || 26||
babhUva manumAnyo.asau sArvabhaumasukhairvR^itaH |
putrAstasya balodyuktAH kAryabhArasahAdR^itAH || 27||
devIbhaktAshcha shUrAshcha mahAbalaparAkramAH |
anyatra mAnanIyAshcha mahArAjyasukhAspadAH || 28||
evaM cha chAkShuShamanurdevyArAdhanataH prabhuH |
babhUva manuvaryo.asau jagAmAnte shivApadam || 29||
iti shrImaddevIbhAgavate mahApurANe.aShTAdashasAhasryAM saMhitAyAM
dashamaskandhe chAkShuShamanuvR^ittavarNanaM nAma navamo.adhyAyaH || 10\.9||
\section{10\.10 dashamo.adhyAyaH | surathanR^ipativR^imattavarNanam |}
shrInArAyaNa uvAcha |
saptamo manurAkhyAto manurvaivasvataH prabhuH |
shrAddhadevaH parAnandabhoktA mAnyastu bhUbhujAm || 1||
sa cha vaivasvatamanuH paradevyAH prasAdataH |
tathA tattapasA chaiva jAto manvantarAdhipaH || 2||
aShTamo manurAkhyAtaH sAvarNiH prathitaH kShitau |
sa janmAntara ArAdhya devIM tadvaralAbhataH || 3||
jAto manvantarapatiH sarvarAjanyapUjitaH |
mahAparAkramI dhIro devIbhaktiparAyaNaH || 4||
nArada uvAva
kathaM janmAntare tena manunArAdhanaM kR^itam |
devyAH pR^ithivyudbhavAyAstanmamAkhyAtumarhasi || 5||
shrInArAyaNa uvAcha |
chaitravaMshasamudbhUto rAjA svArochiShe.antare |
suratho nAma vikhyAto mahAbalaparAkramaH || 6||
guNagrAhI dhanurdhArI mAnyaH shreShThaH kaviH kR^itI |
dhanasa~NgrahakartA cha dAtA yAchakamaNDale || 7||
arINAM mardano mAnI sarvAstrakushalo balI |
tasyaikadA babhUvuste kolAvidhvaMsino nR^ipAH || 8||
shatravaH sainyasahitAH parivAryenamUrjitAH |
rurudhurnagarIM tasya rAj~no mAnadhanasya hi || 9||
tadA sa suratho nAma rAjA sainyasamAvR^itaH |
niryayau nagarAtsvIyAtsarvashatrunibarhaNaH || 10||
tadA sa samare rAjA surathaH shatrubhirjitaH |
amAtyairmantribhishchaiva tasya koshagataM dhanam || 11||
hR^itaM sarvamasheSheNa tadAtapyata bhUmipaH |
niShkAsitashcha nagarAtsa rAjA paramadyutiH || 12||
jagAmAshvamathAruhya mR^igayAmiShato vanam |
ekAkI vijane.araNye babhrAmodbhrAntamAnasaH || 13||
muneH kasyachidAgatya svAshramaM shAntamAnasaH |
prashAntajantusaMyuktaM munishiShyagaNairyutam || 14||
uvAsa ka~nchitkAlaM sa rAjA paramashobhane |
Ashrame munivaryasya dIrghadR^iShTeH sumedhasaH || 15||
ekadA sa mahIpAlo muniM pUjAvasAnake |
kAle gatvA praNamyAshu paprachCha vinayAnvitaH || 16||
mune mama manoduHkhaM bAdhate chAdhisambhavam |
j~nAtatattvasya bhUdeva niShpraj~nasya cha santatam || 17||
shatrubhirnirjitasyApi hR^itarAjyasya sarvashaH |
tathApi teShu manasi mamatvaM jAyate sphuTam || 18||
kiM karomi kva gachChAmi kathaM sharma labhe mune |
tvadanugrahamAshAse vada vedavidAM vara || 19||
muniruvAcha |
AkarNaya mahIpAla mahAshcharyakaraM param |
devImAhAtmyamatulaM sarvakAmapradaM param || 20||
jaganmayI mahAmAyA viShNubrahmaharodbhavA |
sA balAdapahR^ityaiva jantUnAM mAnasAni hi || 21||
mohAya pratisaMyachChediti jAnIhi bhUmipa |
sA sR^ijatyakhilaM vishvaM sA pAlayati sarvadA || 22||
saMhAre hararUpeNa saMharatyeva bhUmipa |
kAmadAtrI mahAmAyA kAlarAtrirduratyayA || 23||
vishvasaMhAriNI kAlI kamalA kamalAlayA |
tasyAM sarvaM jagajjAtaM tasyAM vishvaM pratiShThitam || 24||
layameShyati tasyAM cha tasmAtsaiva parAtparA |
tasyA devyAH prasAdashcha yasyopari bhavennR^ipa |
sa eva mohamatyeti nAnyathA dharaNIpate || 25||

iti shrImaddevIbhAgavate mahApurANe.aShTAdashasAhasryAM
saMhitAyAM dashamaskandhe
surathanR^ipativR^imattavarNanaM nAma dashamo.adhyAyaH || 10\.10||
\section{10\.11 ekAdasho.adhyAyaH | devImAhAtmye madhukaiTabhavadhavarNanam |}
rAjovAcha |
kA sA devI tvayA proktA brUhi kAlavidAM vara |
kA mohayati sattvAni kAraNaM kiM bhaved dvija || 1||
kasmAdutpadyate devI kiMrUpA sA kimAtmikA |
sarvamAkhyAhi bhUdeva kR^ipayA mama sarvataH || 2||
muniruvAcha |
rAjan devyAH svarUpaM te varNayAmi nishAmaya |
yathA chotpatitA devI yena vA sA jaganmayI || 3||
yadA nArAyaNo devo vishvaM saMhR^itya yogarAT |
AstIrya sheShaM bhagavAn samudre nidrito.abhavat || 4||
tadA prasvApavashago devadevo janArdanaH |
tatkarNamalasa~njAtau dAnavau madhukaiTabhau || 5||
brahmANaM hantumudyuktau dAnavau ghorarUpiNau |
tadA kamalajo devo dR^iShTvA tau madhukaiTabhau || 6||
nidritaM devadeveshaM chintAmApa duratyayAm |
nidrito bhagavAnIsho dAnavau cha durAsadau || 7||
kiM karomi kva gachChAmi kathaM sharma labhe hyaham |
evaM chintayatastasya padyayonermahAtmanaH || 8||
buddhiH prAdUrabhUttAta tadA kAryaprasAdhinI |
yasyA vashaM gato devo nidrito bhagavAn hariH || 9||
tAM devIM sharaNaM yAmi nidrAM sarvaprasUtikAm |
brahmovAcha |
devi devi jagaddhAtri bhaktAbhIShTaphalaprade || 10||
jaganmAye mahAmAye samudrashayane shive |
tvadAj~nAvashagAH sarve svasvakAryavidhAyinaH || 11||
kAlarAtrirmahArAtrirmoharAtrirmadotkaTA |
vyApinI vashagA mAnyA mahAnandaikashevadhiH || 12||
mahanIyA mahArAdhyA mAyA madhumatI mahI |
parAparANAM sarveShAM paramA tvaM prakIrtitA || 13||
lajjA puShTiH kShamA kIrtiH kAntiH kAruNyavigrahA |
kamanIyA jagadvandyA jAgradAdisvarUpiNI || 14||
paramA parameshAnI parAnandaparAyaNA |
ekApyekasvarUpA cha sadvitIyA dvayAtmikA || 15||
trayI trivarganilayA turyA turyapadAtmikA |
pa~nchamI pa~nchabhUteshI ShaShThI ShaShTheshvarIti cha || 16||
saptamI saptavAreshI saptasaptavarapradA |
aShTamI vasunAthA cha navagrahamayIshvarI || 17||
navarAgakalA ramyA navasa~NkhyA naveshvarI |
dashamI dashadikpUjyA dashAshAvyApinI ramA || 18||
ekAdashAtmikA chaikAdasharudraniShevitA |
ekAdashItithiprItA ekAdashagaNAdhipA || 19||
dvAdashI dvAdashabhujA dvAdashAdityajanmabhUH |
trayodashAtmikA devI trayodashagaNapriyA || 20||
trayodashAbhidhA bhinnA vishvedevAdhidevatA |
chaturdashendravaradA chaturdashamanuprasUH || 21||
pa~nchAdhikadashI vedyA pa~nchAdhikadashI tithiH |
ShoDashI ShoDashabhujA ShoDashendukalAmayI || 22||
ShoDashAtmakachandrAMshuvyAptadivyakalevarA |
evaMrUpAsi deveshi nirguNe tAmasodaye || 23||
tvayA gR^ihIto bhagavAndevadevo ramApatiH |
etau durAsadau daityau vikrAntau madhukaiTabhau || 24||
etayoshcha vadhArthAya deveshaM pratibodhaya |
muniruvAcha |
evaM stutA bhagavatI tAmasI bhagavatpriyA || 25||
devadevaM tadA tyaktvA mohayAmAsa dAnavau |
tadaiva bhagavAnviShNuH paramAtmA jagatpatiH || 26||
prabodhamApa devesho dadR^ishe dAnavottamau |
tadA tau dAnavau ghorau dR^iShTvA taM madhusUdanam || 27||
yuddhAya kR^itasa~Nkalpau jagmatuH sannidhiM hareH |
yuyudhe cha tatastAbhyAM bhagavAnmadhusUdanaH || 28||
pa~nchavarShasahasrANi bAhupraharaNo vibhuH |
tau tadAtibalonmattau jaganmAyAvimohitau || 29||
vriyatAM vara ityevamUchatuH parameshvaram |
evaM tayorvachaH shrutvA bhagavAnAdipUruShaH || 30||
vavre vadhyAbubhau me.adya bhavetAmiti nishchitam |
tau tadAtibalau devaM punarevochaturharim || 31||
AvAM jahi na yatrorvI payasA cha pariplutA |
tathetyuktvA bhagavatA gadAsha~NkhabhR^itA nR^ipa || 32||
kR^itvA chakreNa vai Chinne jaghane shirasI tayoH |
evaM devI samutpannA brahmaNA saMstutA nR^ipa || 33||
mahAkAlI mahArAja sarvayogeshvareshvarI |
mahAlakShmyAstathotpattiM nishAmaya mahIpate || 34||

iti shrImaddevIbhAgavate mahApurANe.aShTAdashasAhasryAM
saMhitAyAM dashamaskandhe devImAhAtmye
madhukaiTabhavadhavarNanaM nAma ekAdasho.adhyAyaH || 10\.11||
\section{10\.12 dvAdasho.adhyAyaH | devIcharitrasahitaM sAvarNimanuvR^itAntavarNanam |}
muniruvAcha |
mahiShIgarbhasambhUto mahAbalaparAkramaH |
devAnsarvAnparAjitya mahiSho.abhUjjagatprabhuH || 1
sarveShAM lokapAlAnAmadhikArAnmahAsuraH |
balAnirjitya bubhuje trailokyaishvaryamadbhutam || 2||
tataH parAjitAH sarve devAH svargaparichyutAH |
brahmANaM cha puraskR^itya te jagmurlokamuttamam || 3||
yatrottamau devadevau saMsthitau sha~NkarAchyutau |
vR^ittAntaM kathayAmAsurmahiShasya durAtmanaH || 4||
devAnAM chaiva sarveShAM sthAnAni tarasAsuraH |
vinirjitya svayaM bhu~Nkte balavIryamadoddhataH || 5||
mahiShAsuranAmAsau duShTadaityo.amareshvarau |
vadhopAyashcha tasyAshu chintyatAmasurArdanau || 6||
evaM shrutvA sa bhagavAndevAnAmArtiyugvachaH |
chakAra kopaM subahuM tathA sha~Nkarapadmajau || 7||
evaM kopayutasyAsya harerAsyAnmahIpate |
tejaH prAdurabhUddivyaM sahasrArkasamadyuti || 8||
athAnukramatastejaH sarveShAM tridivaukasAm |
sharIrAdudbhavaM prApa harShayadvibudhAdhipAn || 9||
yadabhUchChambhujaM tejo mukhamasyodapadyata |
keshA babhUvuryAmyena vaiShNavena cha bAhavaH || 10||
saumyena cha stanau jAtau mAhendreNa cha madhyamaH |
vAruNena tato bhUpa ja~NghorU sambabhUvatuH || 11||
nitambau tejasA bhUmeH pAdau brAhmeNa tejasA |
pAdA~Ngulyo bhAnavena vAsavena karA~NgulI || 12||
kaubereNa tathA nAsA dantAH sa~njaj~nire tadA |
prAjApatyenottamena tejasA vasudhAdhipa || 13||
pAvakena cha sa~njAtaM lochanatritayaM shubham |
sAndhyena tejasA jAte bhR^ikuTyau tejasAM nidhI || 14||
karNau vAyavyato jAtau tejaso manujAdhipa |
sarveShAM tejasA devI jAtA mahiShamardinI || 15||
shUlaM dadau shivo viShNushchakraM sha~NkhaM cha pAshabhR^it |
hutAshano dadau shaktiM mArutashchApasAyakau || 16||
vajraM mahendraH pradadau ghaNTAM chairAvatAd gajAt |
kAladaNDaM yamo brahmA chAkShamAlAkamaNDalU || 17||
divAkaro rashmimAlAM romakUpeShu sandadau |
kAlaH khaDgaM tathA charma nirmalaM vasudhAdhipa || 18||
samudro nirmalaM hAramajare chAmbare nR^ipa |
chUDAmaNiM kuNDale cha kaTakAni tathA~Ngade || 19||
ardhachandraM nirmalaM cha nUpurANi tathA dadau |
graiveyakaM bhUShaNaM cha tasyai devyai mudAnvitaH || 20||
vishvakarmA chormikAshcha dadau tasyai dharApate |
himavAnvAhanaM siMhaM ratnAni vividhAni cha || 21||
pAnapAtraM surApUrNaM dadau tasyai dhanAdhipaH |
sheShashcha bhagavAndevo nAgahAraM dadau vibhuH || 22||
anyairasheShavibudhairmAnitA sA jaganmayI |
tAM tuShTuvurmahAdevIM devA mahiShapIDitAH || 23||
nAnAstotrairmaheshAnIM jagadudbhavakAriNIm |
teShAM nishamya deveshI stotraM vibudhapUjitA || 24||
mahiShasya vadhArthAya mahAnAdaM chakAra ha |
tena nAdena mahiShashchakito.abhUddharApate || 25||
AsasAda jagaddhAtrIM sarvasainyasamAvR^itaH |
tataH sa yuyudhe devyA mahiShAkhyo mahAsuraH || 26||
shastrAstrairbahudhA kShiptaiH pUrayannambarAntaram |
chikShuro grAmaNIH senApatirdurdharadurmukhau || 27||
bAShkalastAmrakashchaiva biDAlavadano.aparaH |
etaishchAnyairasa~NkhyAtaiH sa~NgrAmAntakasannibhaiH || 28||
yodhaiH parivR^ito vIro mahiSho dAnavottamaH |
tataH sA kopatAmrAkShI devI lokavimohinI || 29||
jaghAna yodhAnsamare devI mahiShamAshritAn |
tatasteShu hateShveva sa daityo roShamUrchChitaH || 30||
AsasAda tadA devIM tUrNaM mAyAvishAradaH |
rUpAntarANi sambheje mAyayA dAnaveshvaraH || 31||
tAni tAnyasya rUpANi nAshayAmAsa sA tadA |
tato.ante mAhiShaM rUpaM bibhrANamamarArdanam || 32||
pAshena baddhvA sudR^iDhaM ChittvA khaDgena tachChiraH |
pAtayAmAsa mahiShaM devI devagaNAntakam || 33||
hAhAkR^itaM tataH sheShaM sainyaM bhagnaM disho dasha |
tuShTuvurdevadeveshIM sarve devAH pramoditAH || 34||
evaM lakShmIH samutpannA mahiShAsuramardinI |
rAja~nChR^iNu sarasvatyAH prAdurbhAvo yathAbhavat || 35||
ekadA shumbhanAmAsIddaityo madabalotkaTaH |
nishumbhashchApi tadbhrAtA mahAbalaparAkramaH || 36||
tena sampIDitA devAH sarve bhraShTashriyo nR^ipa |
himavantamathAsAdya devIM tuShTuvurAdarAt || 37||
devA UchuH |
jaya deveshi bhaktAnAmArtinAshanakovide |
dAnavAntakarUpe tvamajarAmaraNe.anaghe || 38||
deveshi bhaktisulabhe mahAbalaparAkrame |
viShNusha~NkarabrahmAdisvarUpe.anantavikrame || 39||
sR^iShTisthitikare nAshakArike kAntidAyini |
mahAtANDavasuprIte modadAyini mAdhavi || 40||
prasIda devadeveshi prasIda karuNAnidhe |
nishumbhashumbhasambhUtabhayApArAmbuvAridhe || 41||
uddharAsmAn prapannArtinAshike sharaNAgatAn |
evaM saMstuvatAM teShAM tridashAnAM dharApate || 42||
prasannA girijA prAha brUta stavanakAraNam |
etasminnantare yasyAH kosharUpAtsamutthitA || 43||
kaushikI sA jagatpUjyA devAnprItyedamabravIt |
prasannAhaM surashreShThAH stavenottamarUpiNI || 44||
vriyatAM vara ityukte devAH saMvavrire varam |
shumbhanAmAvaro bhrAtA nishumbhastasya vishrutaH || 45||
trailokyamojasAkrAntaM daityena balashAlinA |
tadvadhashchintyatAM devi durAtmA dAnaveshvaraH || 46||
bAdhate satataM devi tiraskR^itya nijaujasA |
devyuvAcha |
devashatruM pAtayiShye nishumbhaM shumbhameva cha || 47||
svasthAstiShThata bhadraM vaH kaNTakaM nAshayAmi vaH |
ityuktvA devadeveshI devAnsendrAndayAmayI || 48||
jagAmAdarshanaM sadyo miShatAM tridivaukasAm |
devAH samAgatA hR^iShTAH suvarNAdriguhAM shubhAm || 49||
chaNDamuNDau pashyataHsma bhR^ityau shumbhanishumbhayoH |
dR^iShTvA tAM chArusarvA~NgIM devIM lokavimohinIm || 50||
kathayAmAsatU rAj~ne bhR^ityau tau chaNDamuNDakau |
deva sarvAsurashreShTha ratnabhogArha mAnada || 51||
apUrvA kAminI dR^iShTA chAvAbhyAM ripumardana |
tasyAH sambhogayogyatvamastyeva tava sAmpratam || 52||
tAM samAnaya chArva~NgIM bhu~NkShva saukhyasamanvitaH |
tAdR^ishI nAsurI nArI na gandharvI na dAnavI || 53||
na mAnavI nApi devI yAdR^ishI sA manoharA |
evaM bhR^ityavachaH shrutvA shumbhaH parabalArdanaH || 54||
dUtaM sammeShayAmAsa sugrIvaM nAma dAnavam |
sa dUtastvaritaM gatvA devyAH savidhamAdarAt || 55||
vR^ittAntaM kathayAmAsa devyai shumbhasya yadvachaH |
devi shumbhAsuro nAma trailokyavijayI prabhuH || 56||
sarveShAM ratnavastUnAM bhoktA mAnyo divaukasAm |
taduktaM shR^iNu me devi ratnabhoktAhamavyayaH || 57||
tvaM chApi ratnabhUtAsi bhaja mAM chArulochane |
sarveShu yAni ratnAni devAsuranareShu cha || 58||
tAni mayyeva subhage bhaja mAM kAmajai rasaiH |
devyuvAcha |
satyaM vadasi he dUta daityarAjapriya~Nkaram || 59||
pratij~nA yA mayA pUrvaM kR^itA sApyanR^itA katham |
bhavettAM shR^iNu me dUta yA pratij~nA mayA kR^itA || 60||
yo me darpaM vidhunute yo me balamapohati |
yo me pratibalo bhUyAtsa eva mama bhogabhAk || 61||
tata enAM pratij~nAM me satyAM kR^itvAsureshvaraH |
gR^ihNAtu pANiM tarasA tasyAshakyaM kimatra hi || 62||
tasmAd gachCha mahAdUta svAminaM brUhi chAdR^itaH |
pratij~nAM chApi me satyAM vidhAsyati balAdhikaH || 63||
evaM vAkyaM mahAdevyAH samAkarNya sa dAnavaH |
kathayAmAsa shumbhAya devyA vR^ittAntamAditaH || 64||
tadApriyaM dUtavAkyaM shumbhaH shrutvA mahAbalaH |
kopamAhArayAmAsa mahAntaM danujAdhipaH || 65||
tato dhUmrAkShanAmAnaM daityaM daityapatiH prabhuH |
Adidesha shR^iNu vacho dhUmrAkSha mama chAdR^itaH || 66||
tAM duShTAM keshapAsheShu hatvApyAnIyatAM mama |
samIpamavilambena shIghraM gachChasva me puraH || 67||
ityAdeshaM samAsAdya daityesho dhUmralochanaH |
ShaShTyAsurANAM sahitaH sahasrANAM mahAbalaH || 68||
tuhinAchalamAsAdya devyAH savidhameva saH |
uchchairdevIM jagAdAshu bhaja daityapatiM shubhe || 69||
shumbhaM nAma mahAvIryaM sarvabhogAnavApnuhi |
nochetkeshAngR^ihItvA tvAM neShye daityapatiM prati || 70||
ityuktA sA tato devI daityena tridashAriNA |
uvAcha daitya yad brUShe tatsatyaM te mahAbala || 71||
rAjA shumbhAsurastvaM cha kiM kariShyasi tadvada |
ityukto daityapo.adhAvattUrNaM shastrasamanvitaH || 72||
bhasmasAttaM chakArAshu hu~NkAreNa maheshvarI |
tataH sainyaM vAhanena devyA bhagnaM mahIpate || 73||
disho dashAbhajachChIghraM hAhAbhUtamachetanam |
tadvR^ittAntaM samAshrutya sa shumbho daityarAD vibhuH || 74||
chukopa cha mahAkopAd bhrukuTIkuTilAnanaH |
tataH kopaparItAtmA daityarAjaH pratApavAn || 75||
chaNDaM muNDaM raktabIjaM kramataH praiShayadvibhuH |
te cha gatvA trayo daityA vikrAntA bahuvikramAH || 76||
devIM grahItumArabdhayatnAste hyabhavanbalAt |
tAnApatata evAsau jagaddhAtrI madotkaTA || 77||
shUlaM gahItvA vegena pAtayAmAsa bhUtale |
sasainyAnnihatA~nChrutvA daityAMstrIndAnaveshvarau || 78||
shumbhashchaiva nishumbhashcha samAjagmaturojasA |
nishumbhashchaiva shumbhashcha kR^itvA yuddhaM mahotkaTam || 79||
devyAshcha vashagau jAtau nihatau cha tayAsurau |
iti daityavaraM shumbhaM ghAtayitvA jaganmayI || 80||
vibudhaiH saMstutA tadvatsAkShAdvAgIshvarI parA |
evaM te varNito rAjan prAdurbhAvo.atiramyakaH || 81||
kAlyAshchaiva mahAlakShyAH sarasvatyAH krameNa cha |
parA pareshvarI devI jagatsargaM karoti cha || 82||
pAlanaM chaiva saMhAraM saiva devI dadhAti hi |
tAM samAshraya deveshIM jaganmohanivAriNIm || 83||
mahAmAyAM pUjyatamAM sA kAryaM te vidhAsyati |
shrInArAyaNa uvAcha |
iti rAjA vachaH shrutvA muneH paramashobhanam || 84||
devIM jagAma sharaNaM sarvakAmaphalapradAm |
nirAhAro yatAtmA cha tanmanAshcha samAhitaH || 85||
devImUrtiM mR^iNmayIM cha pUjayAmAsa bhaktitaH |
pUjanAnte baliM tasyai nijagAtrAsR^ijaM dadat || 86||
tadA prasannA deveshI jagadyoniH kR^ipAvatI |
prAdurbabhUva purato varaM brUhIti bhAShiNI || 87||
sa rAjA nijamohasya nAshanaM j~nAnamuttamam |
rAjyaM niShkaNTakaM chaiva yAchati sma maheshvarIm || 88||
devyuvAcha |
rAjanniShkaNTakaM rAjyaM j~nAnaM vai mohanAshanam |
bhaviShyati mayA dattamasminneva bhave tava || 89||
anyachcha shR^iNu bhUpAla janmAntaravicheShTitam |
bhAnorjanma samAsAdya sAvarNirbhavitA bhavAn || 90||
tatra manvantarasyApi patitvaM bahuvikramam |
santatiM bahulAM chApi prApsyate madvarAdbhavAn || 91||
evaM dattvA varaM devI jagAmAdarshanaM tadA |
so.api devyAH prasAdena jAto manvantarAdhipaH || 92||
evaM te varNitaM sAdho sAvarNerjanma karma cha |
etatpaThaMstathA shR^iNvandevyanugrahamApnuyAt || 93||

iti shrImaddevIbhAgavate mahApurANe.aShTAdashasAhasryAM
saMhitAyAM dashamaskandhe devIcharitrasahitaM
sAvarNimanuvR^itAntavarNanaM nAma dvAdasho.adhyAyaH || 10\.12||
\section{10\.13 trayodasho.adhyAyaH | bhrAmarIcharitravarNanam |}
shrInArAyaNa uvAcha |
athAtaH shrUyatAM sheShamanUnAM chitramudbhavam |
yasya smaraNamAtreNa devIbhaktiH prajAyate || 1||
AsanvaivasvatamanoH putrAH ShaD vimalodayAH |
karUShashcha pR^iShadhrashcha nAbhAgo diShTa eva cha || 2||
sharyAtishcha trisha~Nkushcha sarva eva mahAbalAH |
tataH ShaDeva te gatvA kAlindyAstIramuttamam || 3||
nirAhArA jitashvAsAH pUjAM chakrustataH sthitAH |
devyA mahImayIM mUrtiM vinirmAya pR^ithakpR^ithak || 4||
vividhairupachAraistAM pUjayAmAsurAdR^itAH |
tatashcha sarva evaite tapaHsArA mahAbalAH || 5||
jIrNaparNAshanA vAyubhakShaNAstoyajIvanAH |
dhUmrapAnA rashmipAnAH kramashashcha bahushramAH || 6||
tatasteShAmAdareNArAdhanaM kurvatAM sadA |
vimalA matirutpannA sarvamohavinAshinI || 7||
babhUvurmanuputrAste devIpAdaikachintanAH |
matyA vimalayA teShAmAtmanyevAkhilaM jagat || 8||
darshanaM sa~njagAmAshu tadadbhutamivAbhavat |
evaM dvAdashavarShAnte tapasA jagadIshvarI || 9||
prAdurbabhUva deveshI sahasrArkasamadyutiH |
tAM dR^iShTvA vimalAtmAno rAjaputrAH ShaDeva te || 10||
tuShTuvurbhaktinamrAntaHkaraNA bhAvasaMyutAH |
rAjaputrA UchuH |
maheshvari jayeshAni parame karuNAlaye || 11||
vAgbhavArAdhanaprIte vAgbhavapratipAdite |
klI~NkAravigrahe devi klI~NkAraprItidAyini || 12||
kAmarAjamanomodadAyinIshvaratoShiNi |
mahAmAye modapare mahAsAmrAjyadAyini || 13||
viShNvarkaharashakrAdisvarUpe bhogavardhini |
evaM stutA bhagavatI rAjaputrairmahAtmabhiH || 14||
prasAdasumukhI devI provAcha vachanaM shubham |
devyuvAcha |
rAjaputrA mahAtmAno bhavantastapasA yutAH || 15||
niShkalmaShAH shuddhadhiyo jAtA vai madupAsanAt |
varaM manogataM sarvaM yAchadhvamavilambitam || 16||
prasannAhaM pradAsyAmi yuShmAkaM manasi sthitam |
rAjaputrA UchuH |
devi niShkaNTakaM rAjyaM santatishchirajIvinI || 17||
bhogA avyAhatA kAmaM yashastejo matishcha ha |
akuNThitatvaM sarveShAmeSha eva varo hitaH || 18||
devyuvAcha |
evamastu cha sarveShAM bhavatAM yanmanogatam |
athAnyadapi me vAkyaM bhUyatAmAdarAdidam || 19||
bhavantaH sarva evaite manvantarapatIshvarAH |
santatyA dIrghayA bhogairanekairapi sa~NgamaH || 20||
akhaNDitabalaishvaryaM yashastejovibhUtayaH |
bhavitAro matprasAdAdrAjaputrAH krameNa tu || 21||
shrInArAyaNa uvAcha |
evaM tebhyo varAndattvA bhrAmarI jagadambikA |
antardhAnaM jagAmAshu bhaktyA taiH saMstutA satI || 22||
te rAjaputrAH sarve.api tasmi~njanmanyanuttamam |
rAjyaM mahIgatAnbhogAnbubhujushcha mahaujasaH || 23||
santatiM chAkhaNDitAM te samutpAdya mahItale |
vaMshaM saMsthApya sarve.api manUnAM patayo.abhavan || 24||
bhavAntare krameNaiva sAvarNipadabhAginaH |
prathamo dakShasAvarNirnavamo manurIritaH || 25||
avyAhatabalo devyAH prasAdAdabhavadvibhuH |
dvitIyo merusAvarNirdashamo manureva cha || 26||
babhUva manvantarapo mahAdevIprasAdataH |
tR^itIyo manurAkhyAtaH sUryasAvarNinAmakaH || 27||
ekAdasho mahotsAhastapasA svena bhAvitaH |
chaturthashchandrasAvarNirdvAdasho manurAD vibhuH || 28||
devIsamArAdhanena jAto manvantareshvaraH |
pa~nchamo rudrasAvarNistrayodashamanuH smR^itaH || 29||
mahAbalo mahAsattvo babhUva jagadIshvaraH |
ShaShThashcha viShNusAvarNishchaturdashamanuH kR^itI || 30||
babhUva devIvarato jagatAM prathitaH prabhuH |
chaturdashaite manavo mahAtejobalairyutAH || 31||
devyArAdhanataH pUjyA vandyA lokeShu nityashaH |
mahApratApinaH sarve bhrAmaryAstu prasAdataH || 32||
nArada uvAcha |
keyaM sA bhrAmarI devI kathaM jAtA kimAtmikA |
tadAkhyAnaM vada prAj~na vichitraM shokanAshakam || 33||
na tR^iptimadhigachChAmi pibandevIkathAmR^itam |
amR^itaM pibatAM mR^ityurnAsya shravaNato yataH || 34||
shrInArAyaNa uvAcha |
shR^iNu nArada vakShyAmi jaganmAturvicheShTitam |
achintyAvyaktarUpAyA vichitraM mokShadAyakam || 35||
yadyachcharitraM shrIdevyAstatsarvaM lokahetave |
nirvyAjayA karuNayA putre mAturyathA tathA || 36||
pUrvaM daityo mahAnAsIdaruNAkhyo mahAbalaH |
pAtAle daityasaMsthAne devadveShI mahAkhalaH || 37||
sa devA~njetukAmashcha chakAra paramaM tapaH |
padmasambhavamuddishya sa nastrAtA bhaviShyati || 38||
gatvA himavataH pArshve ga~NgAjalasushItale |
pakvaparNAshano yogI sannirudhya marudgaNam || 39||
gAyatrIjapasaMsaktaH sakAmastamasA yutaH |
dashavarShasahasrANi tato vArikaNAshanaH || 40||
dashavarShasahasrANi tataH pavanabhojanaH |
dashavarShasahasrANi nirAhAro.abhavattataH || 41||
evaM tapasyatastasya sharIrAdutthito.analaH |
dadAha jagatIM sarvAM tadadbhutamivAbhavat || 42||
kimidaM kimidaM cheti devAH sarve chakampire |
santrastAH sakalA lokA brahmANaM sharaNaM yayuH || 43||
vij~nApitaM devavaraiH shrutvA tatra chaturmukhaH |
gAyatrIsahito haMsasamArUDho yayau mudA || 44||
prANamAtrAvashiShTaM taM dhamanIshatasa~Nkulam |
shuShkodaraM kShAmagAtraM dhyAnamIlitalochanam || 45||
dadarsha tejasA dIptaM dvitIyamiva pAvakam |
varaM varaya bhadraM te vatsa yanmanasi sthitam || 46||
shrutimAtreNa santoShakArakaM vAkyamUchivAn |
shrutvA brahmamukhAdvANIM sudhAdhArAmivAruNaH || 47||
unmIlitAkShaH purato dadarsha jalajodbhavam |
gAyatrIsahitaM devaM chaturvedasamanvitam || 48||
akShasrakkuNDikAhastaM japantaM brahma shAshvatam |
dR^iShTvotthAya nanAmAtha stutvA cha vividhaiH stavaiH || 49||
varaM vavre svabuddhisthaM mA bhavenmR^ityurityapi |
shrutvAruNavacho brahmA bodhayAmAsa sAdaram || 50||
brahmaviShNumaheshAdyA mR^ityunA kavalIkR^itAH |
tadAnyeShAM tu kA vArtA maraNe dAnavottama || 51||
varaM yogyaM tato brUhi dAtuM yaH shakyate mayA |
nAtrAgrahaM prakurvanti buddhimanto janAH kvachit || 52||
iti brahmavachaH shrutvA punaH provAcha sAdaram |
na yuddhe na cha shastrAstrAnna pumbhyo nApi yoShitaH || 53||
dvipAdbhyo vA chatuShpAdbhyo nobhayAkAratastathA |
bhavenme mR^ityurityevaM deva dehi varaM prabho || 54||
balaM cha vipulaM dehi yena devajayo bhavet |
iti tasya vachaH shrutvA tathAstviti vacho.abravIt || 55||
dattvA varaM jagAmAshu padmajaH svaM niketanam |
tato.aruNAkhyo daityastu pAtAlAtsvAshrayasthitAn || 56||
daityAnAkArayAmAsa brahmaNo varadarpitaH |
Agatya te.asurAH sarve daityeshaM taM prachakrire || 57||
dUtaM cha preShayAmAsuryuddhArthamamarAvatIm |
dUtavAkyaM tadA shrutvA devarAD bhayakampitaH || 58||
devaiH sArdhaM jagAmAshu brahmaNaH sadanaM prati |
brahmaviShNU puraskR^itya jagmuste sha~NkarAlayam || 59||
vichAraM chakrire tatra vadhArthaM te suradruhAm |
etasminsamaye tatra daityasenAsamAvR^itaH || 60||
aruNAkhyo daityarAjo jagAmAshu triviShTapam |
sUryenduyamavahnInAmadhikArAnpR^ithakpR^ithak || 61||
svayaM chakAra tapasA nAnArUpadharo mune |
svasvasthAnachyutAH sarve jagmuH kailAsamaNDalam || 62||
shashaMsuH sha~NkaraM devAH svasvaduHkhaM pR^ithakpR^ithak |
mahAn vichArastatrAsItkiM kartavyamataH param || 63||
na yuddhena cha shastrAstrairna pumbhyo nApi yoShitaH |
dvipAdbhyo vA chatuShpAdbhyo nobhayAkArato.api vA || 64||
mR^ityurbhavediti brahmA provAcha vachanaM yataH |
iti chintAturAH sarve kartuM ki~nchinna cha kShamAH || 65||
etasminsamaye tatra vAgabhUdasharIriNI |
bhajadhvaM bhuvaneshAnIM sA vaH kAryaM vidhAsyati || 66||
gAyatrIjapasaMsakto daityarAD yadi tAM tyajet |
mR^ityuyogyastadA bhUyAdityuchchaistoShakAriNI || 67||
shrutvA daivIM tathA vANIM mantrayAmAsurAdR^itAH |
bR^ihaspatiM samAhUya vachanaM prAha devarAT || 68||
guro gachCha surANAM tu kAryArthamasuraM prati |
yathA bhavechcha gAyatrItyAgastasya tathA kuru || 69||
asmAbhiH parameshAnI sevyate dhyAnayogataH |
prasannA sA bhagavatI sAhAyyaM te kariShyati || 70||
ityAdishya guruM sarve jagmurjAmbUnadeshvarIm |
sAsmAndaityabhayatrastAn pAlayiShyati shobhanA || 71||
tatra gatvA tapashcharyAM chakruH sarve suniShThitAH |
mAyAbIjajapAsaktA devImakhaparAyaNAH || 72||
bR^ihaspatistadA shIghraM jagAmAsurasannidhau |
AgataM munivaryaM taM paprachChAtha sa daityarAT || 73||
mune kutrAgamaH kasmAtkimarthamiti me vada |
nAhaM yuShmatpakShapAtI pratyutArAtireva cha || 74||
iti tasya vachaH shrutvA provAcha muninAyakaH |
asmatsevyA cha yA devI sA tvayA pUjyate.anisham || 75||
tasmAdasmatpakShapAtI na bhavestvaM kathaM vada |
iti tasya vachaH shrutvA mohito devamAyayA || 76||
tatyAja paramaM mantramabhimAnena sattama |
gAyatrItyAgato daityo nistejasko babhUva ha || 77||
kR^itakAryo gurustasmAtsthAnAnnirgatavAnpunaH |
tato vR^ittAntamakhilaM kathayAmAsa vajriNe || 78||
santuShTAste surAH sarve bhejire parameshvarIm |
evaM bahugate kAle kasmiMshchitsamaye mune || 79||
prAdurAsIjjaganmAtA jaganma~NgalakAriNI |
koTisUryapratIkAshA koTikandarpasundarI || 80||
chitrAnulepanA devI chitravAsoyugAnvitA |
vichitramAlyAbharaNA chitrabhramaramuShTikA || 81||
varAbhayakarA shAntA karuNAmR^itasAgarA |
nAnAbhramarasaMyuktapuShpamAlAvirAjitA || 82||
bhrAmarIbhirvichitrAbhirasa~NkhyAbhiH samAvR^itA |
bhramarairgAyamAnaishcha hrI~NkAramanumanvaham || 83||
samantataH parivR^itA koTikoTibhirambikA |
sarvashR^i~NgAraveShADhyA sarvavedaprashaMsitA || 84||
sarvAtmikA sarvamayI sarvama~NgalarUpiNI |
sarvaj~nA sarvajananI sarvA sarveshvarI shivA || 85||
dR^iShTvA tAM taralAtmAno devA brahmapurogamAH |
tuShTuvurhR^iShTamanaso viShTarashravasAM shivAm || 86||
devA UchuH |
namo devi mahAvidye sR^iShTisthityantakAriNi |
namaH kamalapatrAkShi sarvAdhAre namo.astu te || 87||
savishvataijasaprAj~navirATsUtrAtmike namaH |
namo vyAkR^itarUpAyai kUTasthAyai namo namaH || 88||
durge sargAdirahite duShTasaMrodhanArgale |
nirargalapremagamye bharge devi namo.astu te || 89||
namaH shrIkAlike mAtarnamo nIlasarasvati |
ugratAre mahogre te nityameva namo namaH || 90||
namaH pItAmbare devi namastripurasundari |
namo bhairavi mAta~Ngi dhUmAvati namo namaH || 91||
Chinnamaste namaste.astu kShIrasAgarakanyake |
namaH shAkambhari shive namaste raktadantike || 92||
nishumbhashumbhadalani raktabIjavinAshini |
dhUmralochananirNAshe vR^itrAsuranibarhiNi || 93||
chaNDamuNDapramathini dAnavAntakare shive |
namaste vijaye ga~Nge shArade vikachAnane || 94||
pR^ithvIrUpe dayArUpe tejorUpe namo namaH |
prANarUpe mahArUpe bhUtarUpe namo.astu te || 95||
vishvamUrte dayAmUrte dharmamUrte namo namaH |
devamUrte jyotimUrte j~nAnamUrte namo.astu te || 96||
gAyatri varade devi sAvitri cha sarasvati |
namaH svAhe svadhe mAtardakShiNe te namo namaH || 97||
neti netIti vAkyairyA bodhyate sakalAgamaiH |
sarvapratyaksvarUpAM tAM bhajAmaH paradevatAm || 98||
bhramarairveShTitA yasmAd bhrAmarI yA tataH smR^itA |
tasyai devyai namo nityaM nityameva namo namaH || 99||
namaste pArshvayoH pR^iShThe namaste purato.ambike |
nama UrdhvaM namashchAdhaH sarvatraiva namo namaH || 100||
kR^ipAM kuru mahAdevi maNidvIpAdhivAsini |
anantakoTibrahmANDanAyike jagadambike || 101||
jaya devi jaganmAtarjaya devi parAtpare |
jaya shrIbhuvaneshAni jaya sarvottamottame || 102||
kalyANaguNaratnAnAmAkare bhuvaneshvari |
prasIda parameshAni prasIda jagatoraNe || 103||
shrInArAyaNa uvAcha |
iti devavachaH shrutvA pragalbhaM madhuraM vachaH |
uvAcha jagadambA sA mattakokilabhAShiNI || 104||
devyuvAcha |
prasannAhaM sadA devA varadeshashikhAmaNiH |
bruvantu vibudhAH sarve yadeva syAchchikIrShitam || 105||
devIvAkyaM surAH shrutvA prochurduHkhasya kAraNam |
duShTadaityasya charitaM jagadbAdhAkaraM param || 106||
devabrAhmaNavedAnAM helanaM nAshanaM tathA |
sthAnabhraMshaM surANAM cha kathayAmAsurAdR^itAH || 107||
brahmaNo varadAnaM cha yathAvatte samUchire |
shrutvA devamukhAdvANIM mahAbhagavatI tadA || 108||
prerayAmAsa hastasthAnbhramarAnbhrAmarI tadA |
pArshvasthAnagnabhAgasthAnnAnArUpadharAMstathA || 110||
janayAmAsa bahusho yairvyAptaM bhuvanatrayam |
maTachIyUthavatteShAM samudAyastu nirgataH || 110||
tadAntarikShaM tairvyAptamandhakAraH kShitAvabhUt |
divi parvatashR^i~NgeShu drumeShu vipineShvapi || 111||
bhramarA eva sa~njAtAstadadbhutamivAbhavat |
te sarve daityavakShAMsi dArayAmAsurudgatAH || 112||
naraM madhuharaM yadvanmakShikAH kopasaMyutAH |
upAyo na cha shastrANAM tathAstrANAM tadAbhavat || 113||
na yuddhaM na cha sambhAShA kevalaM maraNaM khalu |
yasminyasminsthale ye ye sthitA daityA yathA yathA || 114||
tatraiva cha tathA sarve maraNaM prApurutsmayAH |
parasparaM samAchAro na kasyApyabhavattadA || 115||
kShaNamAtreNa te sarve vinaShTA daityapu~NgavAH |
kR^itvetthaM bhramarAH kAryaM devInikaTamAyayuH || 116||
AshcharyametadAshcharyamiti lokAH samUchire |
kiM chitraM jagadambAyA yasyA mAyeyamIdR^ishI || 117||
tato devagaNAH sarve brahmaviShNupurogamAH |
nimagnA harShajaladhau pUjayAmAsurambikAm || 118||
nAnopachArairvividhairnAnopAyanapANayaH |
jayashabdaM prakurvANA mumuchuH sumanAMsi cha || 119||
divi dundubhayo nedurnanR^itushchApsarogaNAH |
peThurvedAnmunishreShThA gandharvAdyA jagustathA || 120||
mR^ida~NgamurajAvINADhakkADamaruniHsvanaiH |
ghaNTAsha~NkhaninAdaishcha vyAptamAsIjjagattrayam || 121||
nAnAstotraistadA stutvA mUrdhnyAdhAyAjjalIMstathA |
jaya mAtarjayeshAnItyevaM sarve samUchire || 122||
tatastuShTA mahAdevI varAndattvA pR^ithakpR^ithak |
svasmiMshcha vipulAM bhaktiM prArthitA tairdadau cha tAm || 123||
pashyatAmeva devAnAmantardhAnaM gatA tataH |
iti te sarvamAkhyAtaM bhrAmaryAshcharitaM mahat || 124||
paThatAM shR^iNvatAM chaiva sarvapApapraNAshanam |
shrutamAshcharyajanakaM saMsArArNavatArakam || 125||
evaM manUnAM sarveShAM charitaM pApanAshanam |
devImAhAtmyasaMyuktaM paTha~nshR^iNva~nshubhapradam || 126||
yashchaitatpaThate nityaM shR^iNuyAdyo.anishaM naraH |
sarvapApavinirmukto devIsAyujyamApnuyAt || 127||

iti shrImaddevIbhAgavate mahApurANe.aShTAdashasAhasryAM
saMhitAyAM dashamaskandhe
bhrAmarIcharitravarNanaM nAma trayodasho.adhyAyaH || 10\.13||

|| iti shrImaddevIbhAgavate mahApurANe dashamaskandhaH samAptaH ||
##

Encoded and proofread by Vishwas Bhide

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}