% Text title            : Shivapuranam 2.1 rudrasaMhitA sRiShTikhaNDaH
% File name             : shivapurANam2rudrasaMhitA1sRRiShTikhaNDaH.itx
% Category              : shiva, purANa, shivapurANa
% Location              : doc\_purana
% Proofread by          : Revathy Rajaraman and team members
% Latest update         : January 23, 2026
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Shiva Mahapuranam 2.1 Rudra Samhita Srishtikhandah ..}##
\itxtitle{.. shrIshivamahApurANam 2\.1 rudrasaMhitAyAM sR^iShTikhaNDaH ..}##\endtitles ##
|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || dvitIyAyAM rudrasaMhitA
prathamaH sR^iShTikhaNDaH
\section{2\.1\.1\. prathamo.adhyAyaH | muniprashnavarNanam |}
vishvodbhavasthitilayAdiShu hetumekaM
gaurIpatiM viditatattvamanantakIrtim |
mAyAshrayaM vigatamAyamachintyarUpaM
bodhasvarUpamamalaM hi shivaM namAmi || 1||
vande shivaM taM prakR^iteranAdiM
prashAntamekaM puruShottamaM hi |
svamAyayA kR^itsnamidaM hi sR^iShTvA
nabhovadantarbahirAsthito yaH || 2||
vande.antarasthaM nijagUDharUpaM
shivaM svataH sraShTumidaM vichaShTe |
jaganti nityaM parito bhramanti
yatsannidhau chumbakalohavattam || 3||
vyAsa uvAcha |
jagataH pitaraM shambhuM jagato mAtaraM shivAm |
tatputrashcha gaNAdhIshaM natvaitadvarNayAmahe || 4||
ekadA munayaH sarve naimiShAraNyavAsinaH |
paprachChurvarayA bhaktyA sUtaM te shaunakAdayaH || 5||
R^iShaya UchuH |
vidyeshvarasaMhitAyAH shrutA sA satkathA shubhA |
sAdhyasAdhanakhaNDAkhyA ramyAdyA bhaktavatsalA || 6||
sUta sUta mahAbhAga chira~njIva sukhI bhava |
yachChrAvayasi nastAta shA~NkarIM paramAM kathAm || 7||
pibantastvanmukhAmbhojachyutaM j~nAnAmR^itaM vayam |
avitR^iptAH punaH ki~nchitpraShTumichChAmahe.anagha || 8||
vyAsaprasAdAtsarvaj~no prApto.asi kR^itakR^ityatAm |
nAj~nAtaM vidyate ki~nchidbhUtaM bhavyaM bhavachcha yat || 9||
gurorvyAsasya sadbhaktyA samAsAdya kR^ipAM parAm |
sarvaM j~nAtaM visheSheNa sarvaM sArthaM kR^itaM januH || 10||
idAnIM kathaya prAj~na shivarUpamanuttamam |
divyAni vai charitrANi shivayorapyasheShataH || 11||
aguNo guNatAM yAti kathaM loke maheshvaraH |
shivatattvaM vayaM sarve na jAnImo vichArataH || 12||
sR^iShTeH pUrvaM kathaM shambhuH svarUpeNAvatiShThate |
sR^iShTimadhye sa hi kathaM krIDansaMvartate prabhuH || 13||
tadante cha kathaM devaH sa tiShThati maheshvaraH |
kathaM prasannatAM yAti sha~Nkaro lokasha~NkaraH || 14||
sa prasanno maheshAnaH kiM prayachChati satphalam |
svabhaktebhyaH parebhyashcha tatsarvaM kathayasva naH || 15||
sadyaH prasanno bhagavAnbhavatItyanushushruma |
bhaktaprayAsaM sa mahAnna pashyati dayAparaH || 16||
brahmA viShNurmaheshashcha trayo devAH shivA~NgajAH |
maheshastatra pUrNAMshaH svayameva shivo.aparaH || 17||
tasyAvirbhAvamAkhyAhi charitAni visheShataH |
umAvirbhAvamAkhyAhi tadvivAhaM tathA prabho || 18||
tadgArhasthyaM visheSheNa tathA lIlAH parA api |
etatsarvaM tadanyachcha kathanIyaM tvayAnagha || 19||
vyAsa uvAcha |
iti pR^iShTastadA taistu sUto harShasamanvitaH |
smR^itvA shambhupadAmbhojaM pratyuvAcha munIshvarAn || 20||
sUta uvAcha |
samyak pR^iShTaM bhavadbhishcha dhanyA yUyaM munIshvarAH |
sadAshivakathAyAM vo yajjAtA naiShThikI matiH || 21||
sadAshivakathAprashnaH puruShAMstrInpunAti hi |
vaktAraM pR^ichChakaM shrotR^I~njAhnavIsalilaM yathA || 22||
shambhorguNAnuvAdAtko virajyeta pumAndvijAH |
vinA pashughnaM trividhajanAnandakarAtsadA | 23||
gIyamAno vitR^iShNaishcha bhavarogauShadho.api hi |
manaHshrotrAbhirAmashcha yataH sarvArthadaH sa vai || 24||
kathayAmi yathAbuddhi bhavatprashnAnusArataH |
shivalIlAM prayatnena dvijAstAM shR^iNutAdarAt || 25||
bhavadbhiH pR^ichChyate yadvattattathA nAradena vai |
pR^iShTaM pitre preritena hariNA shivarUpiNA || 26||
brahmA shrutvA sutavachaH shivabhaktaH prasannadhIH |
jagau shivayashaH prItyA harShayanmunisattamam || 27||
vyAsa uvAcha |
sUtoktamiti tadvAkyamAkarNya dvijasattamAH |
paprachChustatsusaMvAdaM kutUhalasamanvitAH || 28||
R^iShaya UchuH |
sUta sUta mahAbhAga shaivottama mahAmate |
shrutvA tava vacho ramyaM cheto naH sakutUhalam || 29||
kadA babhUva sukhakR^idvidhinAradayormahAn |
saMvAdo yatra girishasulIlA bhavamochanI || 30||
vidhinAradasaMvAdapUrvakaM shA~NkaraM yashaH |
brUhi nastAta tatprItyA tattatprashnAnusArataH || 31||
ityAkarNya vachasteShAM munInAM bhAvitAtmanAm |
sUtaH provAcha suprItastatsaMvAdAnusArataH || 32||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne muniprashnavarNanaM nAma prathamo.adhyAyaH || 2\.1\.1||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.2\. dvitIyo.adhyAyaH | nAradatapovarNanam |}
sUta uvAcha |
ekasminsamaye viprA nArado munisattamaH |
brahmaputro vinItAtmA tapo.arthaM mana Adadhe || 1||
himashailaguhA kAchidekA paramashobhanA |
yatsamIpe suranadI sadA vahati vegataH || 2||
tatrAshramo mahAdivyo nAnAshobhAsamanvitaH |
tapo.arthaM sa yayau tatra nArado divyadarshanaH || 3||
tAM dR^iShTvA munishArdUlastepe sa suchiraM tapaH |
badhvAsanaM dR^iDhaM maunI prANAnAyamya shuddhadhIH || 4||
chakre muniH samAdhiM tamahambrahmeti yatra ha |
vij~nAnaM bhavati brahmasAkShAtkArakaraM dvijAH || 5||
itthaM tapati tasminvai nArade munisattame |
chakampe.atha shunAsIro manassantApavihvalaH || 6||
manasIti vichintyAsau munirme rAjyamichChati |
tadvighnakaraNArthaM hi hariryatnamiyeSha saH || 7||
sasmAra sa smaraM shakrashchetasA devanAyakaH |
AjagAma drutaM kAmaH samadhIrmahiShIyutaH || 8||
athAgataM smaraM dR^iShTvA sambodhya surarAT prabhuH |
uvAcha taM prapashyAshu svArthe kuTilashemuShiH || 9||
indra uvAcha |
mitravarya mahAvIra sarvadA hitakAraka |
shR^iNu prItyA vacho me tvaM kuru sAhAyyamAtmanA || 10||
tvadbalAnme bahUnA~ncha tapogarvo vinAshitaH |
madrAjyasthiratA mitra tvadanugrahataH sadA || 11||
himashailaguhAyAM hi munistapati nAradaH |
manasoddishya vishveshaM mahAsaMyamavAndR^iDhaH || 12||
yAchenna vidhito rAjyaM sa mameti visha~NkitaH |
adyaiva gachCha tatra tvaM tattapovighnamAchara || 13||
ityAj~napto mahendreNa sa kAmaH samadhupriyaH |
jagAma tatsthalaM garvAdupAyaM svaM chakAra ha || 14||
rachayAmAsa tatrAshu svakalAH sakalA api |
vasanto.api svaprabhAvaM chakAra vividhaM madAt || 15||
na babhUva muneshcheto vikR^itaM munisattamAH |
bhraShTo babhUva tadgarvo maheshAnugraheNa ha || 16||
shR^iNutAdaratastatra kAraNaM shaunakAdayaH |
IshvarAnugraheNAtra na prabhAvaH smarasya hi || 17||
atraiva shambhunAkAri sutapashcha smarAriNA |
atraiva dagdhastenAshu kAmo munitapopahaH || 18||
kAmajIvanahetorhi ratyA samprArthitaiH suraiH |
samprArthita uvAchedaM sha~Nkaro lokasha~NkaraH || 19||
ka~nchitsamayamAsAdya jIviShyati surAH smaraH |
parantviha smaropAyashchaliShyati na kashchana || 20||
iha yAvaddR^iShyate bhUrjanaiH sthitvAmarAH sadA |
kAmabANaprabhAvo.atra na chaliShyatyasaMshayam || 21||
iti shambhUktitaH kAmo mithyAtmagatikastadA |
nArade sa jagAmAshu divamindrasamIpataH || 22||
Achakhyau sarvavR^ittAntaM prabhAvaM cha muneH smaraH |
tadAj~nayA yayau sthAnaM svakIyaM samadhupriyaH || 23||
vismito.abhUtsurAdhIshaH prashashaMsAtha nAradam |
tadvR^ittAntAnabhij~no hi mohitaH shivamAyayA || 24||
durj~neyA shAmbhavI mAyA sarveShAM prANinAmiha |
bhaktaM vinArpitAtmAnaM tayA sammohyate jagat || 25||
nArado.api chiraM tasthau tatreshAnugraheNa ha |
pUrNaM matvA tapastatsvaM virarAma tato muniH || 26||
kAmAjjayaM nijaM matvA garvito.abhUnmunIshvaraH |
vR^ithaiva vigataj~nAnaH shivamAyAvimohitaH || 27||
dhanyA dhanyA mahAmAyA shAmbhavI munisattamAH |
tadgatiM na hi pashyanti viShNubrahmAdayo.api hi || 28||
tayA sammohito.atIva nArado munisattamaH |
kailAsaM prayayau shIghraM svavR^ittaM gadituM madI || 29||
rudraM natvAbravItsarvaM svavR^ittaM garvavAnmuniH |
mattvAtmAnaM mahAtmAnaM svaprabhu~ncha smara~njayam || 30||
tachChrutvA sha~NkaraH prAha nAradaM bhaktavatsalaH |
svamAyAmohitaM hetvanabhij~naM bhraShTachetasam || 31||
rudra uvAcha |
he tAta nArada prAj~na dhanyastvaM shR^iNu madvachaH |
vAchyamevaM na kutrApi hareragre visheShataH || 32||
pR^ichChamAno.api na brUyAH svavR^ittaM me yaduktavAn |
gopyaM gopyaM sarvathA hi naiva vAchyaM kadAchana || 33||
shAsmyahaM tvAM visheSheNa mama priyatamo bhavAn |
viShNubhakto yatastvaM hi tadbhakto.atIva me.anugaH || 34||
shAsti smettha~ncha bahusho rudraH sUtikaraH prabhuH |
nArado na hitaM mene shivamAyAvimohitaH | 35||
prabalA bhAvinI karmagatirj~neyA vichakShaNaiH |
na nivAryA janaiH kaishchidapIchChA saiva shA~NkarI || 36||
tataH sa munivaryo hi brahmalokaM jagAma ha |
vidhiM natvAbravItkAmajayaM svasya tapobalAt || 37||
tadAkarNya vidhiH so.atha smR^itvA shambhupadAmbujam |
vij~nAya kAraNaM sarvaM niShiShedha sutaM tadA || 38||
mene hitaM na vidhyuktaM nArado j~nAnisattamaH |
shivamAyAmohitashcha rUDhachittamadA~NkuraH || 39||
shivechChA yAdR^ishI loke bhavatyeva hi sA tadA |
tadadhInaM jagatsarvaM vachastantyAM sthitaM yataH || 40||
nArado.atha yayau shIghraM viShNulokaM vinaShTadhIH |
madA~NkuramanA vR^ittaM gadituM svaM tadagrataH || 41||
AgachChantaM muniM dR^iShTvA nAradaM viShNurAdarAt |
utthitvAgre gato.araM taM shishleSha j~nAtahetukaH || 42||
svAsane samupAveshya smR^itvA shivapadAmbujam |
hariH prAha vachastathyaM nAradaM madanAshanam || 43||
viShNuruvAcha |
kuta Agamyate tAta kimarthamiha chAgataH |
dhanyastvaM munishArdUla tIrtho.ahaM tu tavAgamAt || 44||
viShNuvAkyamiti shrutvA nArado garvito muniH |
svavR^ittaM sarvamAchaShTa samadaM madamohitaH || 45||
shrutvA munivacho viShNuH samadaM kAraNaM tataH |
j~nAtavAnakhilaM smR^itvA shivapAdAmbujaM hR^idi || 46||
tuShTAva girishaM bhaktyA shivAtmA shaivarADDhariH |
sA~njalirvisudhIrnamramastakaH parameshvaram || 47||
viShNuruvAcha |
deva deva mahAdeva prasIda parameshvara |
dhanyastvaM shiva dhanyA te mAyA sarvavimohinI || 48||
ityAdi sa stutiM kR^itvA shivasya paramAtmanaH |
nimIlya nayane dhyAtvA virarAma padAmbujam || 49||
yatkartavyaM sha~Nkarasya sa j~nAtvA vishvapAlakaH |
shivashAsanataH prAha hR^idAtha munisattamam || 50||
viShNuruvAcha |
dhanyastvaM munishArdUla taponidhirudAradhIH |
bhaktitrikaM na yasyAsti kAmamohAdayo mune || 51||
vikArAstasya sadyo vai bhavantyakhiladuHkhadAH |
naiShThiko brahmachArI tvaM j~nAnavairAgyavAnsadA || 52||
kathaM kAmavikArI syAjjanmanAvikR^itaH sudhIH |
ityAdyuktaM vacho bhUri shrutvA sa munisattamaH || 53||
vijahAsa hR^idA natvA pratyuvAcha vacho harim |
nArada uvAcha |
kimprabhAvaH smaraH svAminkR^ipA yadyasti te mayi || 54||
ityuktvA harimAnamya yayau yAdR^ichChiko muniH || 55||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne nAradatapovarNanaM nAma dvitIyo.adhyAyaH || 2\.1\.2||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.3\. tR^itIyo.adhyAyaH | nAradamohanaM varNanam |}
R^iShaya UchuH |
sUta sUta mahAbhAga vyAsashiShya namo.astu te |
adbhuteyaM kathA tAta varNitA kR^ipayA hi naH || 1||
munau gate haristAta ki~nchakAra tataH param |
nArado.api gataH kutra tanme vyAkhyAtumarhasi || 2||
vyAsa uvAcha |
ityAkarNya vachasteShAM sUtaH paurANikottamaH |
pratyuvAcha shivaM smR^itvA nAnAsUtikaraM budhaH || 3||
sUta uvAcha |
munau yadR^ichChayA viShNurgate tasminhi nArade |
shivechChayA chakArAshu mAyAM mAyAvishAradaH || 4||
munimArgasya madhye tu vireche nagaraM mahat |
shatayojanavistAramadbhutaM sumanoharam || 5||
svalokAdadhikaM ramyaM nAnAvastuvirAjitam |
naranArIvihArADhyaM chaturvarNAkulaM param || 6||
tatra rAjA shIlanidhirnAmaishvaryasamanvitaH |
sutAsvayamvarodyukto mahotsavasamanvitaH || 7||
chaturdigbhyaH samAyAtaiH saMyutaM nR^ipanandanaiH |
nAnAveShaiH sushobhaishcha tatkanyAvaraNotsukaiH || 8||
etAdR^ishaM puraM dR^iShTvA mohaM prApto.atha nAradaH |
kautukI tannR^ipadvAraM jagAma madanaidhitaH || 9||
AgataM munivaryaM taM dR^iShTvA shIlanidhirnR^ipaH |
upaveshyArchayA~nchakre ratnasiMhAsane vare || 10||
atha rAjA svatanayAM nAmataH shrImatIM varAm |
nAradasya samAnIya pAdayoH samapAtayat || 11||
tatkanyAM prekShya sa munirnAradaH prAha vismitaH |
keyaM rAjanmahAbhAgA kanyA surasutopamA || 12||
tasya tadvachanaM shrutvA rAjA prAha kR^itA~njaliH |
duhiteyaM mama mune shrImatI nAma nAmataH || 13||
pradAnasamayaM prAptA varamanveShatI shubham |
sA svayamvarasamprAptA sarvalakShaNalakShitA || 14||
asyA bhAgyaM vada mune sarvaM jAtakamAdarAt |
kIdR^ishaM tanayeyaM me varamApsyati tadvada || 15||
ityukto munishArdUlastAmichChuH kAmavihvalaH |
samAbhAShya sa rAjAnaM nArado vAkyamabravIt || 16||
suteyaM tava bhUpAla sarvalakShaNalakShitA |
mahAbhAgyavatI dhanyA lakShmIriva guNAlayA || 17||
sarveshvaro.ajito vIro girIshasadR^isho vibhuH |
asyAH patirdhruvaM bhAvI kAmajitsurasattamaH || 18||
ityuktvA nR^ipamAmantrya yayau yAdR^ichChiko muniH |
babhUva kAmavivashaH shivamAyAvimohitaH || 19||
chitte vichintya sa munirApnuyAM kanyakAM katham |
svayaMvare nR^ipAlAnAmekaM mAM vR^iNuyAtkatham || 20||
saundaryaM sarvanArINAM priyaM bhavati sarvathA |
tad dR^iShTvaiva prasannA sA svavashA nAtra saMshayaH || 21||
vidhAyetthaM viShNurUpaM grahItuM munisattamaH |
viShNulokaM jagAmAshu nAradaH smaravihvalaH || 22||
praNipatya hR^iShIkeshaM vAkyametaduvAcha ha |
rahasi tvAM pravakShyAmi svavR^ittAntamasheShataH || 23||
tathetyukte tathAbhUte shivechChAkAryakartari |
brUhItyuktavati shrIshe munirAha cha keshavam || 24||
nArada uvAcha |
tvadIyo bhUpatiH shIlanidhiH sa vR^iShatatparaH |
tasya kanyA vishAlAkShI shrImatI varavarNinI || 25||
jaganmohinyabhikhyAtA trailokye.apyatisundarI |
pariNetumahaM viShNo tAmichChAmyadya mA chiram || 26||
svayamvaraM chakArAsau bhUpatistanayechChayA |
chaturdigbhyaH samAyAtA rAjaputrAH sahasrashaH || 27||
yadi dAsyasi rUpaM me tadA tAM prApnuyAM dhruvam |
tvadrUpaM sA vinA kaNThe jayamAlAM na dhAsyati || 28||
svarUpaM dehi me nAtha sevako.ahaM priyastava |
vR^iNuyAnmAM yathA sA vai shrImatI kShitipAtmajA || 29||
sUta uvAcha |
vachaH shrutvA muneritthaM vihasya madhusUdanaH |
shA~NkarIM prabhutAM budhvA pratyuvAcha dayAparaH || 30||
viShNuruvAcha |
sveShTadeshaM mune gachCha kariShyAmi hitaM tava |
bhiShagvaro yathArtasya yataH priyataro.asi me || 31||
ityuktvA munaye tasmai dadau viShNurmukhaM hareH |
svarUpamanugR^ihyAsya tirodhAnaM jagAma saH || 32||
evamukto munirhR^iShTaH svarUpaM prApya vai hareH |
mene kR^itArthamAtmAnaM tadyatnaM na bubodha saH || 33||
atha tatra gataH shIghraM nArado munisattamaH |
chakre svayamvaraM yatra rAjaputraiH samAkulam || 34||
svayamvarasabhA divyA rAjaputrasamAvR^itA |
shushubhe.atIva viprendrA yathA shakrasabhAparA || 35||
tasyAM nR^ipasabhAyAM vai nAradaH samupAvishat |
sthitvA tatra vichintyeti prItiyuktena chetasA || 36||
mAM variShyati nAnyaM sA viShNurUpadharaM dhruvam |
Ananasya kurUpatvaM na veda munisattamaH || 37||
pUrvarUpaM muniM sarve dadR^ishustatra mAnavAH |
tadbhedaM bubudhuste na rAjaputrAdayo dvijAH | 38||
tatra rudragaNau dvau tadrakShaNArthaM samAgatau |
viprarUpadharau gUDhau tadbhedaM jaj~natuH param || 39||
mUDhaM matvA muniM tau tannikaTaM jagmaturgaNau |
kurutastatprahAsaM vai bhAShamANau parasparam || 40||
pashya nAradarUpaM hi viShNoriva mahottamam |
mukhaM tu vAnarasyeva vikaTaM cha bhaya~Nkaram || 41||
ichChatyayaM nR^ipasutAM vR^ithaiva smaramohitaH |
ityuktvA sachChalaM vAkyamupahAsaM prachakratuH || 42||
na shushrAva yathArthaM tu tadvAkyaM smaravihvalaH |
paryaikShachChrImatIM tAM vai tallipsurmohito muniH || 43||
etasminnantare bhUpakanyA chAntaHpurAttu sA |
strIbhiH samAvR^itA tatrAjagAma varavarNinI || 44||
mAlAM hiraNmayIM ramyAmAdAya shubhalakShaNA |
tatra svayamvare reje sthitA madhye rameva sA || 45||
babhrAma sA sabhAM sarvAM mAlAmAdAya suvratA |
varamanveShatI tatra svAtmAbhIShTaM nR^ipAtmajA || 46||
vAnarAsyaM viShNutanuM muniM dR^iShTvA chukopa sA |
dR^iShTiM nivArya cha tataH prasthitA prItamAnasA || 47||
na dR^iShTvA svavaraM tatra trastAsInmanepsitam |
antaHsabhAsthitA kasminnarpayAmAsa na srajam || 48||
etasminnantare viShNurAjagAma nR^ipAkR^itiH |
na dR^iShTaH kaishchidaparaiH kevalaM sA dadarsha hi || 49||
atha sA taM samAlokya prasannavadanAmbujA |
arpayAmAsa tatkaNThe tAM mAlAM varavarNinI || 50||
tAmAdAya tato viShNU rAjarUpadharaH prabhuH |
antardhAnamagAtsadyaH svasthAnaM prayayau kila || 51||
sarve rAjakumArAshcha nirAshAH shrImatIM prati |
munistu vihvalo.atIva babhUva madanAturaH || 52||
tadA tAvUchatuH sadyo nAradaM smaravihvalam |
viprarUpadharau rudragaNau j~nAnavishAradau || 53||
gaNAvUchatuH
he nArada mune tvaM hi vR^ithA madanamohitaH |
tallipsuH svamukhaM pashya vAnarasyeva garhitam || 54||
sUta uvAcha |
ityAkarNya tayorvAkyaM nArado vismito.abhavat |
mukhaM dadarsha mukure shivamAyAvimohitaH || 55||
svamukhaM vAnarasyeva dR^iShTvA chukrodha satvaram |
shApaM dadau tayostatra gaNayormohito muniH || 56||
yuvAM mamopahAsaM vai chakraturbrAhmaNasya hi |
bhavetAM rAkShasau vipravIryajau vai tadAkR^itI || 57||
shrutvA haragaNAvitthaM svashApaM j~nAnisattamau |
na ki~nchidUchatustau hi munimAj~nAya mohitam || 58||
svasthAnaM jagmaturviprA udAsInau shivastutim |
chakraturmanyamAnau vai shivechChAM sakalAM sadA || 59||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne nAradamohavarNanaM nAma tR^itIyo.adhyAyaH || 2\.1\.3||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.4\. chaturtho.adhyAyaH | nAradaya viShNUpadeshavarNanam |}
R^iShaya UchuH |
sUta sUta mahAprAj~na varNitA hyadbhutA kathA |
dhanyA tu shAmbhavI mAyA tadadhInaM charAcharam || 1||
gatayorgaNayoH shambhoH svayamAtmechChayA vibhoH |
ki~nchakAra muniH kruddho nAradaH smaravihvalaH || 2||
sUta uvAcha |
vimohito munirdattvA tayoH shApaM yathochitam |
jale mukhaM nirIkShyAtha svarUpaM girishechChayA || 3||
shivechChayA na prabuddhaH smR^itvA harikR^itachChalam |
krodhaM durviShahaM kR^itvA viShNulokaM jagAma ha || 4||
uvAcha vachanaM kruddhaH samiddha iva pAvakaH |
duruktigarbhitaM vya~NgaM naShTaj~nAnaH shivechChayA || 5||
nArada uvAcha |
he hare tvaM mahAduShTaH kapaTI vishvamohanaH |
parotsAhaM na sahase mAyAvI malinAshayaH || 6||
mohinIrUpamAdAya kapaTaM kR^itavAnpurA |
asurebhyo.apAyayastvaM vAruNImamR^itaM na hi || 7||
chetpibenna viShaM rudro dayAM kR^itvA maheshvaraH |
bhavennaShTAkhilA mAyA tava vyAjarate hare || 8||
gatiH sakapaTA te.atipriyA viShNo visheShataH |
sAdhusvabhAvo na bhavAnsvatantraH prabhuNA kR^itaH || 9||
kR^itaM samuchitaM naiva shivena paramAtmanA |
tatprabhAvabalaM dhyAtvA svatantrakR^itikArakaH || 10||
tvadgatiM susamAj~nAya pashchAttApamavApa saH |
vipraM sarvopari prAha svoktavedapramANakR^it || 11||
tajj~nAtvAhaM hare tvAdya shikShayiShyAmi tadbalAt |
yathA na kuryAH kutrApIdR^ishaM karma kadAchana || 12||
adyApi nirbhayastvaM hi sa~NgaM nApastarasvinA |
idAnIM lapsyase viShNo phalaM svakR^itakarmaNaH || 13||
itthamuktvA hariM so.atha munirmAyAvimohitaH |
shashApa krodhanirviNNo brahmatejaH pradarshayan || 14||
strIkR^ite vyAkulaM viShNo mAmakArShIrvimohakaH |
anvakArShIH svarUpeNa yena kApaTyakAryakR^it || 15||
tadrUpeNa manuShyastvaM bhava tadduHkhabhugghare |
yanmukhaM kR^itavAnme tvaM te bhavantu sahAyinaH || 16||
tvaM strIviyogajaM duHkhaM labhasva paraduHkhadaH |
manuShyagatikaH prAyo bhavAj~nAnavimohitaH || 17||
iti shaptvA hariM mohAnnArado.aj~nAnamohitaH |
viShNurjagrAha taM shApaM prashaMsan shAmbhavImajAm || 18||
atha shambhurmahAlIlo nishchakarSha vimohinIma |
svamAyAM mohito j~nAnI nArado.apyabhavadyayA || 19||
antarhitAyAM mAyAyAM pUrvavanmatimAnabhUt |
nArado vismitamanAH prAptabodho nirAkulaH || 20||
pashchAttApamavApyAti nininda svaM muhurmuhuH |
prashashaMsa tadA mAyAM shAmbhavIM j~nAnimohinIm || 21||
atha j~nAtvA muniHsarvaM mAyAvibhramamAtmanaH |
apatatpAdayorviShNornArado vaiShNavottamaH || 22||
haryupasthApitaH prAha vachanaM naShTadurmatiH |
mayA duruktayaH proktA mohitena kubuddhinA || 23||
dattaH shApo.api te nAtha vitathaM kuru taM prabho |
mahatpApamakArShaM hi yAsyAmi nirayaM dhruvam || 24||
kamupAyaM hare kuryAM dAso.ahaM te tamAdisha |
yena pApakulaM nashyennirayo na bhavenmama || 25||
ityuktvA sa punarviShNoH pAdayormunisattamaH |
papAta sumatirbhaktyA pashchAttApamupAgataH || 26||
atha viShNustamutthApya babhAShe sUnR^itaM vachaH |
viShNuruvAcha |
na khedaM kuru me bhaktavarastvaM nAtra saMshayaH || 27||
shR^iNu tAta pravakShyAmi suhitaM tava nishchayAt |
nirayaste na bhavitA shivaH shaM te vidhAsyati || 28||
yadakArShIH shivavacho vitathaM madamohitaH |
sa dattavAnIdR^ishaM te phalaM karmaphalapradaH || 29||
shivechChayAkhilaM jAtaM kurvitthaM nishchitAM matim |
garvApahartA sa svAmI sha~NkaraH parameshvaraH || 30||
paraM brahma parAtmA sa sachchidAnandabodhanaH |
nirguNo nirvikArI cha rajaHsattvatamaHparaH || 31||
sa evAdAya mAyAM svAM tridhA bhavati rUpataH |
brahmaviShNumaheshAtmA nirguNo.anirguNo.api saH || 32||
nirguNatve shivAhvo hi paramAtmA maheshvaraH |
paraM brahmAvyayo.ananto mahAdeveti gIyate || 33||
tatsevayA vidhiH sraShTA pAlako jagatAmaham |
svayaM sarvasya saMhArI rudrarUpeNa sarvadA || 34||
sAkShI shivasvarUpeNa mAyAbhinnaH sa nirguNaH |
svechChAchArI saMvihArI bhaktAnugrahakArakaH || 35||
shR^iNu tvaM nArada mune sadupAyaM sukhapradam |
sarvapApApahartAraM bhuktimuktipradaM sadA || 36||
tyaktvA svasaMshayaM sarvaM gAyan sha~NkarasadyashaH |
shatanAmashivastotraM sadAnanyamatirjapa || 37||
yajjapitvA drutaM sarvaM tava pApaM vinashyati |
ityuktvA nAradaM viShNuH punaH prAha dayAnvitaH || 38||
mune na kuru shokaM tvaM tvayA ki~nchitkR^itaM na hi |
svechChayA kR^itavAnshambhuridaM sarvaM na saMshayaH || 39||
ahArShittvanmatiM divyAM kAmakleshamadAtsa te |
tvanmukhAddApayA~nchakre shApaM me sa maheshvaraH || 40||
itthaM svacharitaM loke prakaTIkR^itavAn svayam |
mR^ityu~njayaH kAlakAlo bhaktoddhAraparAyaNaH || 41||
na me shivasamAno.asti priyaH svAmI sukhapradaH |
sarvashaktiprado me.asti sa eva parameshvaraH || 42||
tasyopAsyAM kuru mune tameva satataM bhaja |
tadyashaH shR^iNu gAya tvaM kuru nityaM tadarchanam || 43||
kAyena manasA vAchA yaH sha~Nkaramupaiti bhoH |
sa paNDita iti j~neyaH sa jIvanmukta uchyate || 44||
shiveti nAmadAvAgnermahApAtakaparvatAH |
bhasmIbhavantyanAyAsAtsatyaM satyaM na saMshayaH || 45||
pApamUlAni duHkhAni vividhAnyapi tAnyataH |
shivArchanaikanashyAni nAnyanashyAni sarvathA || 46||
sa vaidikaH sa puNyAtmA sa dhanyaH sa budho mune |
yaH sadA kAyavAk chittaiH sharaNaM yAti sha~Nkaram || 47||
bhavanti vividhA dharmA yeShAM sadyaH phalonmukhAH |
teShAM bhavati vishvAsastripurAntakapUjane || 48||
pAtakAni vinashyanti yAvanti shivapUjayA |
bhuvi tAvanti pApAni na santyeva mahAmune || 49||
brahmahatyAdipApAnAM rAshayo.apyamitA mune |
shivasmR^ityA vinashyanti satyaM satyaM vadAmyaham || 50||
shivanAmatarIM prApya saMsArAbdhiM taranti te |
saMsAramUlapApAni tasya nashyantyasaMshayam || 51||
saMsAramUlabhUtAnAM pAtakAnAM mahAmune |
shivanAmakuThAreNa vinAsho jAyate dhruvam || 52||
shivanAmAmR^itaM peyaM pApadAvAnalArditaiH |
pApadAvAgnitaptAnAM shAntistena vinA na hi || 53||
shiveti nAmapIyUShavarShadhArApariplutAH |
saMsAradavamadhye.api na shochanti na saMshayaH || 54||
na bhaktiH sha~Nkare puMsAM rAgadveSharatAtmanAm |
tadviruddhajanAnAM hi muktirbhavati sarvathA || 55||
anantajanmabhiryena tapastaptaM bhaviShyati |
tasyaiva bhaktirbhavati bhavAnIprANavallabhe || 56||
jAtApi sha~Nkare bhaktiranyasAdhAraNI vR^ithA |
paraM tvavyabhichAreNa shivabhaktirapekShitA || 57||
yasyAsAdhAraNI shambhau bhaktiravyabhichAriNI |
tasyaiva mokShaH sulabho nAnyasyeti matirmama || 58||
kR^itvApyanantapApAni yadi bhaktirmaheshvare |
sarvapApavinirmukto bhavatyeva na saMshayaH || 59||
bhavanti bhasmasAd vR^ikShA davadagdhA yathA vane |
tathA bhavanti dagdhAni shA~NkarANAmaghAnyapi || 60||
yo nityaM bhasmapUtA~Ngo shivapUjonmukho bhavet |
sa taratyeva saMsAramapAramatidAruNam || 61||
brahmasvaharaNaM kR^itvA hatvApi brAhmaNAnbahUn |
na lipyate naraH pApairvirUpAkShasya sevakaH || 62||
vilokya vedAnakhilAn shivasyaivArchanaM param |
saMsAranAshanopAya iti pUrvairvinishchitam || 63||
adyaprabhR^iti yatnena sAvadhAno yathAvidhi |
sAmbaM sadAshivaM bhaktyA bhaja nityaM maheshvaram || 64||
ApAdamastakaM samyagbhasmanoddhUlya sAdaram |
sarvashrutishrutaM shaivaM mantraM japa ShaDakSharam || 65||
sarvA~NgeShu prayatnena rudrAkShAn shivavallabhAn |
dhArayasvAtisadbhaktyA samantraM vidhipUrvakam || 66||
shR^iNu shaivIM kathAM nityaM vada shaivIM kathAM sadA |
pUjayasvAtiyatnena shivabhaktAnpunaH punaH || 67||
apramAdena satataM shivaikasharaNo bhava |
shivArchanena satatamAnandaH prApyate yataH || 68||
urasyAdhAya vishade shivasya charaNAmbujau |
shivatIrthAni vichara prathamaM munisattama || 69||
pashyanmAhAtmyamatulaM sha~Nkarasya parAtmanaH |
gachChAnandavanaM pashchAchChambhupriyatamaM mune || 70||
tatra vishveshvaraM dR^iShTvA pUjanaM kuru bhaktitaH |
natvA stutvA visheSheNa nirvikalpo bhaviShyasi || 71||
tatashcha bhavatA nUnaM vidheyaM gamanaM mune |
brahmaloke svakAmArthaM shAsanAnmama bhaktitaH || 72||
natvA stutvA visheSheNa vidhiM svajanakaM mune |
praShTavyaM shivamAhAtmyaM bahushaH prItachetasA || 73||
sa shaivapravaro brahmA mAhAtmyaM sha~Nkarasya te |
shrAvayiShyati suprItyA shatanAmastavaM cha hi || 74||
adyatastvaM bhava mune shaivaH shivaparAyaNaH |
muktibhAgI visheSheNa shivaste shaM vidhAsyati || 75||
itthaM viShNurmuniM prItyA hyupadishya prasannadhIH |
smR^itvA nutvA shivaM stutvA tatastvantaradhIyata || 76||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne nAradAya viShNUpadeshavarNanaM nAma chaturtho.adhyAyaH || 2\.1\.4||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.5\. pa~nchamo.adhyAyaH | nAradasya kAshIkShetragamanam |}
sUta uvAcha |
antarhite harau viprA nArado munisattamaH |
vichachAra mahIM pashyan shivali~NgAni bhaktitaH || 1||
pR^ithivyA aTanaM kR^itvA shivarUpANyanekashaH |
dadarsha prItito viprA bhuktimuktipradAni saH || 2||
atha taM vicharantaM kau nAradaM divyadarshanam |
j~nAtvA shambhugaNau tau tu suchittamupajagmatuH || 3||
shirasA supraNamyAshu gaNAvUchaturAdarAt |
gR^ihItvA charaNau tasya shApoddhArechChayA cha tau || 4||
shivagaNAvUchatuH
brahmaputra surarShe hi shR^iNu prItyAvayorvachaH |
tavAparAdhakartArAvAvAM viprau na vastutaH || 5||
AvAM haragaNau vipra tavAgaskAriNau mune |
svayamvare rAjaputryA mAyAmohitachetasA || 6||
tvayA dattashcha nau shApaH pareshapreritena ha |
j~nAtvA kusamayaM tatra maunameva hi jIvanam || 7||
svakarmaNaH phalaM prAptaM kasyApi na hi dUShaNam |
suprasanno bhava vibho kurvanugrahamadya nau || 8||
sUta uvAcha |
vacha AkarNya gaNayoriti bhaktyuktamAdarAt |
pratyuvAcha muniH prItyA pashchAttApamavApya saH || 9||
nArada uvAcha |
shR^iNutaM me mahAdevagaNau mAnyatamau satAm |
vachanaM sukhadaM mohanirmuktaM cha yathArthakam || 10||
purA mama matirbhraShTAsIchChivechChAvashAd dhruvam |
sarvathA mohamApannaH shaptavAnvAM kushemuShiH || 11||
yaduktaM tattathA bhAvi tathApi shR^iNutAM gaNau |
shApoddhAramahaM vachmi kShamethAmaghamadya me || 12||
vIryAnmunivarasyAptvA rAkShaseshatvamAdisham |
syAtAM vibhavasaMyuktau balinau supratApinau || 13||
sarvabrahmANDarAjAnau shivabhaktau jitendriyau |
shivAparatanormR^ityuM prApya svaM padamApsyathaH || 14||
sUta uvAcha |
ityAkarNya munervAkyaM nAradasya mahAtmanaH |
ubhau haragaNau prItau svaM padaM jagmaturmudA || 15||
nArado.api paraM prIto dhyAyan shivamananyadhIH |
vichachAra mahIM pashyan shivatIrthAnyabhIkShNashaH || 16||
kAshIM prApyAtha sa muniH sarvoparivirAjitAm |
shivapriyAM shambhusukhapradAM shambhusvarUpiNIm || 17||
dR^iShTvA kAshIM kR^itArtho.abhUtkAshInAthaM dadarsha ha |
Anarcha paramaprItyA paramAnandasaMyutaH || 18||
samudaH sevya tAM kAshIM kR^itArtho munisattamaH |
namansaMvarNayanbhaktyA saMsmaranpremavihvalaH || 19||
brahmalokaM jagAmAtha shivasmaraNasanmatiH |
shivatattvaM visheSheNa j~nAtumichChuH sa nAradaH || 20||
natvA tatra vidhiM bhaktyA stutvA cha vividhaistavaiH |
paprachCha shivasattattvaM shivasaMyuktamAnasaH || 21||
nArada uvAcha |
brahmanbrahmasvarUpaj~na pitAmaha jagatprabho |
tvatprasAdAnmayA sarvaM viShNormAhAtmyamuttamam || 22||
bhaktimArgaM j~nAnamArgaM tapomArgaM sudustaram |
dAnamArgaM cha tIrthAnAM mArgaM cha shrutavAnaham || 23||
na j~nAtaM shivatattvaM cha pUjAvidhimataH kramAt |
charitraM vividhaM tasya nivedaya mama prabho || 24||
nirguNo.api shivastAta saguNaH sha~NkaraH katham |
shivatattvaM na jAnAmi mohitaH shivamAyayA || 25||
sR^iShTeH pUrvaM kathaM shambhuH svarUpeNa pratiShThitaH |
sR^iShTimadhye sa hi kathaM krIDansaMvartate prabhuH || 26||
tadante cha kathaM devaH sa tiShThati maheshvaraH |
kathaM prasannatAM yAti sha~Nkaro lokasha~NkaraH || 27||
santuShTashcha svabhaktebhyaH parebhyashcha maheshvaraH |
kiM phalaM yachChati vidhe tatsarvaM kathayasva me || 28||
sadyaH prasanno bhagavAnbhavatItyanusaMshrutam |
bhaktaprayAsaM sa mahAnna pashyati dayAparaH || 29||
brahmA viShNurmaheshashcha trayo devAH shivAMshajAH |
maheshastatra pUrNAMshaH svayameva shivaH paraH || 30||
tasyAvirbhAvamAkhyAhi charitAni visheShataH |
umAvirbhAvamAkhyAhi tadvivAhaM tathA vibho || 31||
tadgArhasthyaM visheSheNa tathA lIlAH parA api |
etatsarvaM tathAnyachcha kathanIyaM tvayAnagha || 32||
tadutpattiM vivAhaM cha shivAyAstu visheShataH |
prabrUhi me prajAnAtha guhajanma tathaiva cha || 33||
bahubhyashcha shrutaM pUrvaM na tR^ipto.asmi jagatprabho |
atastvAM sharaNaM prAptaH kR^ipAM kuru mamopari || 34||
iti shrutvA vachastasya nAradasyA~Ngajasya hi |
uvAcha vachanaM tatra brahmA lokapitAmahaH || 35||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne nAradaprashnavarNanaM nAma pa~nchamo.adhyAyaH || 2\.1\.5||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.6\. ShaShTho.adhyAyaH | viShNUtpattivarNanam |}
brahmovAcha |
bho brahmansAdhu pR^iShTo.ahaM tvayA vibudhasattama |
lokopakAriNA nityaM lokAnAM hitakAmyayA || 1||
yachChrutvA sarvalokAnAM sarvapApakShayo bhavet |
tadahaM te pravakShyAmi shivatattvamanAmayam || 2||
shivatattvaM mayA naiva viShNunApi yathArthataH |
j~nAtaM cha paramaM rUpamadbhutaM cha pareNa na || 3||
mahApralayakAle cha naShTe sthAvaraja~Ngame |
AsIttamomayaM sarvamanarkagrahatArakam || 4||
achandramanahorAtramanagnyanilabhUjalam |
apradhAnaM viyachChUnyamanyatejovivarjitam || 2||
adR^iShTatvAdirahitaM shabdasparshasamujjhitam |
avyaktagandharUpaM cha rasatyaktamadi~Nmukham || 6||
itthaM satyandhatamase sUchIbhedye nirantare |
tatsadbrahmeti yachChrutvA sadekaM pratipadyate || 7||
itIdR^ishaM yadA nAsIdyattatsadasadAtmakam |
yogino.antarhitAkAshe yatpashyanti nirantaram || 8||
amanogocharaM vAchAM viShayaM na kadAchana |
anAmarUpavarNaM cha na cha sthUlaM na yatkR^isham || 9||
ahrasvadIrghamalaghu gurutvaparivarjitam |
na yatropachayaH kashchittathA nopachayo.api cha || 10||
abhidhatte sachakitaM yadastIti shrutiH punaH |
satyaM j~nAnamanantaM cha parAnandaM paraM mahaH || 11||
aprameyamanAdhAramavikAramanAkR^iti |
nirguNaM yogigamyaM cha sarvavyApyekakArakam || 12||
nirvikalpaM nirArambhaM nirmAyaM nirupadravam |
advitIyamanAdyantamavikAshaM chidAtmakam || 13||
yasyetthaM saMvikalpante sa.nj~nAsa.nj~noktitaH sma vai |
kiyatA chaiva kAlena dvitIyechChA.abhavatkila || 14||
amUrtena svamUrtishcha tenAkalpi svalIlayA |
sarvaishvaryaguNopetA sarvaj~nAnamayI shubhA || 15||
sarvagA sarvarUpA cha sarvadR^iksarvakAriNI |
sarvaikavandyA sarvAdyA sarvadA sarvasaMskR^itiH || 16||
parikalpyeti tAM mUrtimaishvarIM shuddharUpiNIm |
advitIyamanAdyantaM sarvAbhAsaM chidAtmakam |
antardadhe parAkhyaM yad brahma sarvagamavyayam || 17||
amUrte yatparAkhyaM vai tasya mUrtiH sadAshivaH |
arvAchInAH parAchInA IshvaraM taM jagurbudhAH || 18||
shaktistadaikalenApi svairaM viharatA tanuH |
svavigrahAtsvayaM sR^iShTA svasharIrAnapAyinI || 19||
pradhAnaM prakR^itiM tAM cha mAyAM guNavatIM parAm |
buddhitattvasya jananImAhurvikR^itivarjitAm || 20||
sA shaktirambikA proktA prakR^itiH sakaleshvarI |
tridevajananI nityA mUlakAraNamityuta || 21||
asyA aShTau bhujAshchAsanvichitravadanA shubhA |
rAkAchandrasahasrasya vadane bhAshcha nityashaH || 22||
nAnAbharaNasaMyuktA nAnAgatisamanvitA |
nAnAyudhadharA devI phullapa~NkajalochanA || 23||
achintyatejasA yuktA sarvayoniH samudyatA |
ekAkinI yadA mAyA saMyogAchchApyanekikA || 24||
paraH pumAnIshvaraH sa shivaH shambhuranIshvaraH |
shIrShe mandAkinIdhArI bhAlachandrastrilochanaH || 25||
pa~nchavaktraH prasannAtmA dashabAhustrishUladhR^ik |
karpUragaurasusito bhasmoddhUlitavigrahaH || 26||
yugapachcha tayA shaktyA sAkaM kAlasvarUpiNA |
shivalokAbhidhaM kShetraM nirmitaM tena brahmaNA || 27||
tadeva kAshiketyetatprochyate kShetramuttamam |
paraM nirvANasa~NkhyAnaM sarvopari virAjitam || 28||
tAbhyAM cha ramamANAbhyAM tasminkShetre manorame |
paramAnandarUpAbhyAM paramAnandarUpiNam || 29||
mune pralayakAle.api na tatkShetraM kadAchana |
vimuktaM hi shivAbhyAM yadavimuktaM tato viduH || 30||
asyAnandavanaM nAma purAkAri pinAkinA |
kShetrasyAnandahetutvAdavimuktamanantaram || 31||
athAnandavane tasmin shivayo ramamANayoH |
ichChetyabhUtsurarShe hi sR^ijyaH ko.apyaparaH kila || 32||
yasmin nyasya mahAbhAramAvAM svasvairachAriNau |
nirvANadhAraNaM kurvaH kevalaM kAshishAyinau || 33||
sa eva sarvaM kurutAM sa eva paripAtu cha |
sa eva saMvR^iNotvante madanugrahataHsadA || 34||
chetaH samudramAku~nchya chintAkallolalolitam |
sattvaratnaM tamogrAhaM rajovidrumavallitam || 35||
yasya prasAdAttiShThAvaH sukhamAnandakAnane |
parikShiptamanovR^ittau bahishchintAture sukham || 36||
sampradhAryeti sa vibhustayA shaktyA pareshvaraH |
savye vyApArayA~nchakre dashame.a~Nge sudhAsavam || 37||
tataH pumAnAvirAsIdekastrailokyasundaraH |
shAntaHsattvaguNodrikto gAmbhIryAmitasAgaraH || 38||
tathA cha kShamayA yukto mune.alabdhopamo.abhavat |
indranIladyutiH shrImAnpuNDarIkottamekShaNaH || 39||
suvarNakAntibhR^ichChreShThadukUlayugalAvR^itaH |
lasatprachaNDadordaNDayugalo hyaparAjitaH || 40||
tataH sa puruShaH shambhuM praNamya parameshvaram |
nAmAni kuru me svAminvada karma jagAvati || 41||
tachChrutvA vachanaM prAha sha~NkaraH prahasanprabhuH |
puruShaM taM maheshAno vAchA meghagabhIrayA || 42||
shiva uvAcha |
viShNviti vyApakatvAtte nAma khyAtaM bhaviShyati |
bahUnyanyAni nAmAni bhaktasaukhyakarANi ha || 43||
tapaH kuru dR^iDho bhUtvA paramaM kAryasAdhanam |
ityuktvA shvAsamArgeNa dadau cha nigamaM tataH || 44||
tato.achyutaH shivaM natvA chakAra vipulaM tapaH |
antardhAnaM gataH shaktyA salokaH parameshvaraH || 45||
divyaM dvAdashasAhasraM varShaM taptvApi chAchyutaH |
na prApa svAbhilaShitaM sarvadaM shambhudarshanam || 46||
tataH saMshayamApannashchintitaM hR^idi sAdaram |
mayAdya kiM prakartavyamiti viShNuH shivaM smaran || 47||
etasminnantare vANI samutpannA shivAchChubhA |
tapaH punaH prakartavyaM saMshayasyApanuttaye || 48||
tatastena cha tachChrutvA tapastaptaM sudAruNam |
bahukAlaM tadA brahmadhyAnamArgapareNa hi || 49||
tataH sa puruSho viShNuH prabuddho dhyAnamArgataH |
suprIto vismayaM prAptaH kiM yattattavamaho iti || 50||
parishramavatastasya viShNoH svA~Ngebhya eva cha |
jaladhArA hi saMyAtA vividhAH shivamAyayA || 51||
abhivyAptaM cha sakalaM shUnyaM yattanmahAmune |
brahmarUpaM jalamabhUtsparshanAtpApanAshanam || 52||
tadA shrAntashcha puruSho viShNustasmi~njale svayam |
suShvApa paramaprIto bahukAlaM vimohitaH || 53||
nArAyaNeti nAmApi tasyAsIchChrutisammatam |
nAnyatki~nchittadA hyAsItprAkR^itaM puruShaM vinA || 54||
etasminnantare kAle tattvAnyAsanmahAtmanaH |
tatprakAraM shR^iNu prAj~na gadato me mahAmate || 55||
prakR^iteshcha mahAnAsInmahatashcha guNAstrayaH |
aha~NkArastato jAtastrividho guNabhedataH || 56||
tanmAtrashcha tato jAtAH pa~ncha bhUtAni vai tataH |
tadaiva tAnIndriyANi j~nAnakarmamayAni cha || 57||
tattvAnAmiti sa~NkhyAnamuktaM te R^iShisattama |
jaDAtmakaM cha tatsarvaM prakR^iteH puruShaM vinA || 58||
tattadaikIkR^itaM tattvaM chaturviMshatisa~Nkhyakam |
shivechChayA gR^ihItvA sa suShvApa brahmarUpake || 59||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTivyAkhyAne viShNUtpattivarNanaM nAma ShaShTho.adhyAyaH || 2\.1\.6||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDeH
\section{2\.1\.7\. saptamo.adhyAyaH | viShNubrahmavivAdavarNanam |}
brahmovAcha |
supte nArAyaNe deve nAbhau pa~Nkajamuttamam |
AvirbabhUva sahasA bR^ihadvai sha~NkarechChayA || 1||
anantayaShTikAyuktaM karNikArasamaprabham |
anantayojanAyAmamanantochChrAyasaMyutam || 2||
koTisUryapratIkAshaM sundaraM tattvasaMyutam |
atyadbhutaM mahAramyaM darshanIyamanuttamam || 3||
kR^itvA yatnaM pUrvavatsa sha~NkaraH parameshvaraH |
dakShiNA~NgAnnijAnmAM vai sAmbaH shambhurajIjanat || 4||
sa mAyAmohitaM kR^itvA mAM mahesho drutaM mune |
tannAbhipa~NkajAdAvirbhAvayAmAsa lIlayA || 5||
evaM padmAttato jaj~ne putro.ahaM hemagarbhakaH |
chaturmukho raktavarNastripuNDrA~NkitamastakaH || 6||
tanmAyAmohitashchAhaM nAvidaM kamalaM vinA |
svadehajanakaM tAta pitaraM j~nAnadurbalaH || 7||
ko.ahaM vA kuta AyAtaH kiM kAryaM tu madIyakam |
kasya putro.ahamutpannaH kenaiva nirmito.adhunA || 8||
iti saMshayamApannaM buddhirmAM samapadyata |
kimarthaM mohamAyAmi tajj~nAnaM sukaraM khalu || 9||
etatkamalapuShpasya patrArohasthalaM hyadhaH |
matkartA cha sa vai tatra bhaviShyati na saMshayaH || 10||
iti buddhiM samAsthAya kamalAdavarohayam |
nAle nAle gatastatra varShANAM shatakaM mune || 11||
na labdhaM tu mayA tatra kamalasthAnamuttamam |
saMshayaM cha punaH prAptaH kamale gantumutsukaH || 12||
ArurohAtha kamalaM nAlamArgeNa vai mune |
kuDmalaM kamalasyAtha labdhavAnna vimohitaH || 13||
nAlamArgeNa bhramato gataM varShashataM punaH |
kShaNamAtraM tadA tatra tatastiShThanvimohitaH || 14||
tadA vANI samutpannA tapeti paramA shubhA |
shivechChayA parA vyomno mohavidhvaMsinI mune || 15||
tachChrutvA vyomavachanaM dvAdashAbdaM prayatnataH |
punastaptaM tapo ghoraM draShTuM svajanakaM tadA || 16||
tadA hi bhagavAnviShNushchaturbAhuH sulochanaH |
mayyevAnugrahaM kartuM drutamAvirbabhUva ha || 17||
sha~NkhachakrAyudhakaro gadApadmadharaH paraH |
ghanashyAmalasarvA~NgaH pItAmbaradharaH paraH || 18||
mukuTAdimahAbhUShaH prasannamukhapa~NkajaH |
koTikandarpasa~NkAshaHsandR^iShTo mohitena saH || 19||
tad dR^iShTvA sundaraM rUpaM vismayaM paramaM gataH |
kAlAbhaM kA~nchanAbhaM cha sarvAtmAnaM chaturbhujam || 20||
tathAbhUtamahaM dR^iShTvA sadasanmayamAtmanA |
nArAyaNaM mahAbAhuM harShito hyabhavaM tadA || 21||
mAyayA mohitaH shambhostadA lIlAtmanaH prabhoH |
avij~nAya svajanakaM tamavochaM praharShitaH || 22||
brahmovAcha |
kastvaM vadeti hastena samutthApya sanAtanam |
tadA hastaprahAreNa tIvreNa sudR^iDhena tu || 23||
prabuddhyotthAya shayanAtsamAsInaH kShaNaM vashI |
dadarsha nidrAviklinna nIrajAmalalochanaH || 24||
mAmatra saMsthitaM bhAsAdhyAsito bhagavAnhariH |
Aha chotthAya brahmANaM hasanmAM madhuraM sakR^it || 25||
viShNuruvAcha |
svAgataM svAgataM vatsa pitAmaha mahAdyute |
nirbhayo bhava dAsye.ahaM sarvAnkAmAnna saMshayaH || 26||
tasya tadvachanaM shrutvA smitapUrvaM surarShabhaH |
rajasA baddhavairashcha tamavochaM janArdanam || 27||
brahmovAcha |
bhAShase vatsa vatseti sarvasaMhArakAraNam |
mAmihAti smitaM kR^itvA guruH shiShyamivAnagha || 28||
kartAraM jagatAM sAkShAtprakR^iteshcha pravartakam |
sanAtanamajaM viShNuM viri~nchiM viShNusambhavam || 29||
vishvAtmAnaM vidhAtAraM dhAtAraM pa~NkajekShaNam |
kimarthaM bhAShase mohAdvaktumarhasi satvaram || 30||
vedo mAM vakti niyamAtsvayambhuvamajaM vibhum |
pitAmahaM svarAjaM cha parameShThinamuttamam || 31||
ityAkarNya harirvAkyaM mama kruddho ramApatiH |
so.api mAmAha jAne tvAM kartAramiti lokataH || 32||
viShNuruvAcha |
kartuM dhartuM bhavAna~NgAdavatIrNo mamAvyayAt |
vismR^ito.asi jagannAthaM nArAyaNamanAmayam || 33||
puruShaM paramAtmAnaM puruhUtaM puruShTutam |
viShNumachyutamIshAnaM vishvasya prabhavodbhavam || 34||
nArAyaNaM mahAbAhuM sarvavyApakamIshvaram |
mannAbhipadmatastvaM hi prasUto nAtra saMshayaH || 35||
tavAparAdho nAstyatra tvayi mAyAkR^itaM mama |
shR^iNu satyaM chaturvaktra sarvadeveshvaro hyaham || 36||
kartA hartA cha bhartA cha na mayAsti samo vibhuH |
ahameva paraM brahma paraM tattvaM pitAmaha || 37||
ahameva paraM jyotiH paramAtmA tvahaM vibhuH |
adya dR^iShTaM shrutaM sarvaM jagatyasmi~ncharAcharam || 38||
tattadviddhi chaturvaktra sarvaM manmayamityatha |
mayA sR^iShTaM purAvyaktaM chaturviMshatitattvakam || 39||
nityaM teShvaNavo baddhAH sR^iShTAH krodhabhayAdayaH |
prabhAvAchcha bhavAna~NgAnyanekAnIha lIlayA || 40||
sR^iShTA buddhirmayA tasyAmaha~NkArastridhA tataH |
tanmAtraM pa~nchakaM tasmAnmano dehendriyANi cha || 41||
AkAshAdIni bhUtAni bhautikAni cha lIlayA |
iti buddhvA prajAnAtha sharaNaM vraja me vidhe || 42||
ahaM tvAM sarvaduHkhebhyo rakShiShyAmi na saMshayaH |
brahmovAcha |
iti shrutvA vachastasya brahmA krodhasamanvitaH |
ko vA tvamiti sambhartsyAbruvaM mAyAvimohitaH || 43||
kimarthaM bhAShase bhUri bahvanarthakaraM vachaH |
neshvarastvaM paraM brahma kashchitkartA bhavettava || 44||
mAyayA mohitashchAhaM yuddhaM chakre sudAruNam |
hariNA tena vai sArdhaM sha~Nkarasya mahAprabhoH || 45||
evaM mama hareshchAsItsa~Ngaro romaharShaNaH |
pralayArNavamadhye tu rajasA baddhavairayoH || 46||
etasminnantare li~NgamabhavachchAvayoH puraH |
vivAdashamanArthaM hi prabodhArthaM tathAvayoH || 47||
jvAlAmAlAsahasrADhyaM kAlAnalashatopamam |
kShayavR^iddhivinirmuktamAdimadhyAntavarjitam || 48||
anaupamyamanirdeshyamavyaktaM vishvasambhavam |
tasya jvAlAsahasreNa mohito bhagavAnhariH || 49||
mohitaM chAha mAmatra kimarthaM spardhase.adhunA |
Agatastu tR^itIyo.atra tiShThatAM yuddhamAvayoH || 50||
kuta evAtra sambhUtaH parIkShAvo.agnisambhavam |
adho gamiShyAmyanalastambhasyAnupamasya cha || 51||
parIkShArthaM prajAnAtha tasya vai vAyuvegataH |
bhavAnUrdhvaM prayatnena gantumarhati satvaram || 52||
brahmovAcha |
evaM vyAhR^itya vishvAtmA svarUpamakarottadA |
vArAhamahamapyAshu haMsatvaM prAptavAnmune || 53||
tadAprabhR^iti mAmAhurhaMsahaMso virADiti |
haMsa haMseti yo brUyAtsa haMso.atha bhaviShyati || 54||
sushveto hyanalaprakhyo vishvataH pakShasaMyutaH |
mano.anilajavo bhUtvA gatordhvaM chordhvataH purA || 55||
nArAyaNo.api vishvAtmA sushveto hyabhavattadA |
dashayojanavistIrNaM shatayojanamAyatam || 56||
meruparvatavarShmANaM gauratIkShNogradaMShTriNam |
kAlAdityasamAbhAsaM dIrghaghoNaM mahAsvanam || 57||
hrasvapAdaM vichitrA~NgaM jaitraM dR^iDhamanaupamam |
vArAhAkAramAsthAya gatavAMstadadhau javAt || 58||
evaM varShasahasraM cha charanviShNuradho gataH |
tadAprabhR^iti lokeShu shvetavArAhasa.nj~nakaH || 59||
kalpo babhUva devarShe narANAM kAlasa.nj~nakaH |
babhrAma bahudhA viShNuH prabhaviShNuradhogataH || 60||
nApashyadalpamapyasya mUlaM li~Ngasya sUkaraH |
tAvatkAlaM gatashchordhvamahamapyarisUdana || 61||
satvaraM sarvayatnena tasyAntaM j~nAtumichChayA |
shrAnto na dR^iShTvA tasyAntamahaM kAlAdadhogataH || 62||
tathaiva bhagavAnviShNuH shrAntaH kamalalochanaH |
sarvadevanibhastUrNamutthitaH sa mahAvapuH || 63||
samAgato mayA sArdhaM praNipatya bhavaM muhuH |
mAyayA mohitaH shambhostasthau saMvignamAnasaH || 64||
pR^iShThataH pArshvatashchaiva hyagrataH parameshvaram |
praNipatya mayA sArdhaM sasmAra kimidaM tviti || 65||
anirdeshyaM cha tadrUpamanAma karmavarjitam |
ali~NgaM li~NgatAM prAptaM dhyAnamArge.apyagocharam || 66||
svasthaM chittaM tadA kR^itvA namaskAraparAyaNau |
babhUvaturubhAvAvAmahaM harirapi dhruvam || 67||
jAnIvo na hi te rUpaM yo.asi so.asi mahAprabho |
namo.astu te maheshAna rUpaM darshaya nau tvaram || 68||
evaM sharachChatAnyAsannamaskAraM prakurvatoH |
AvayormunishArdUla madamAsthitayostadA || 69||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne viShNubrahmavivAdavarNanaM nAma saptamo.adhyAyaH || 2\.1\.7||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.8\. aShTamo.adhyAyaH | shabdabrahmatanuvarNanam |}
brahmovAcha |
evaM tayormunishreShTha darshanaM kA~NkShamANayoH |
vigarvayoshcha surayoH sadA nau sthitayormune || 1||
dayAlurabhavachChambhurdInAnAM pratipAlakaH |
garviNAM garvahartA cha sarveShAM prabhuravyayaH || 2||
tadA samabhavattatra nAdo vai shabdalakShaNaH |
omomiti surashreShThAtsuvyaktaH plutalakShaNaH || 3||
kimidaM tviti sa~nchintya mayA tiShThanmahAsvanaH |
viShNuH sarvasurArAdhyo nirvairastuShTachetasA || 4||
li~Ngasya dakShiNe bhAge tathApashyatsanAtanam |
AdyaM varNamakArAkhyamukAraM chottare tataH || 5||
makAraM madhyatashchaiva nAdamante.asya chomiti |
sUryamaNDalavad dR^iShTvA varNamAdyaM tu dakShiNe || 6||
uttare pAvakaprakhyamukAramR^iShisattama |
shItAMshumaNDalaprakhyaM makAraM tasya madhyataH || 7||
tasyopari tadApashyachChuddhasphaTikasuprabham |
turIyAtItamamalaM niShkalaM nirupadravam || 8||
nirdvandvaM kevalaM shUnyaM bAhyAbhyantaravarjitam |
sabAhyAbhyantare chaiva bAhyAbhyantarasaMsthitam || 9||
AdimadhyAntarahitamAnandasyAdikAraNam |
satyamAnandamamR^itaM paraM brahmaparAyaNam || 10||
kuta evAtra sambhUtaH parIkShAvo.agnisambhavam |
adho gamiShyAmyanalastambhasyAnupamasya cha || 11||
vedashabdobhayAveshaM vishvAtmAnaM vyachintayat |
tadAbhavadR^iShistatra R^iSheH sAratamaH smR^itaH || 12||
tenaiva R^iShiNA viShNurj~nAtavAnparameshvaram |
mahAdevaM paraM brahma shabdabrahmatanuM param || 13||
chintayA rahito rudro vAcho yanmanasA saha |
aprApya tannivartante vAchyastvekAkShareNa saH || 14||
ekAkShareNa tadvAkyamR^itaM paramakAraNam |
satyamAnandamamR^itaM paraM brahma parAtparam || 15||
ekAkSharAdakArAkhyAdbhagavAnbIjako.aNDajaH |
ekAkSharAdukArAkhyAddhariH paramakAraNam || 16||
ekAkSharAnmakArAkhyAdbhagavAnnIlalohitaH |
sargakartA tvakArAkhyo hyukArAkhyastu mohakaH || 17||
makArAkhyastu yo nityamanugrahakaro.abhavat |
makArAkhyo vibhurbIjI hyakAro bIja uchyate || 18||
ukArAkhyo hariryoniH pradhAnapuruSheshvaraH |
bIjI cha bIjaM tadyonirnAdAkhyashcha maheshvaraH || 19||
bIjI vibhajya chAtmAnaM svechChayA tu vyavasthitaH |
asya li~NgAdabhUd bIjamakAro bIjinaH prabhoH || 20||
ukArayonau niHkShiptamavardhata samantataH |
sauvarNamabhavachchANDamAvedyaM tadalakShaNam || 21||
anekAbdaM tathA chApsu divyamaNDaM vyavasthitam |
tato varShasahasrAnte dvidhA kR^itamajodbhavam || 22||
aNDamapsu sthitaM sAkShAd vyAghAteneshvareNa tu |
tathAsya sushubhaM haimaM kapAlaM chordhvasaMsthitam || 23||
jaj~ne sA dyaustadaparaM pR^ithivI pa~nchalakShaNA |
tasmAdaNDAdbhavo jaj~ne kakArAkhyashchaturmukhaH || 24||
sa sraShTA sarvalokAnAM sa eva trividhaH prabhuH |
evamomomiti proktamityAhuryajuShAM varAH || 25||
yajuShAM vachanaM shrutvA R^ichaH sAmAni sAdaram |
evameva hare brahmannityAhushchAvayostadA || 26||
tato vij~nAya deveshaM yathAvachChaktisambhavaiH |
mantrairmaheshvaraM devaM tuShTAva sumahodayam || 27||
etasminnantare.anyachcha rUpamadbhutasundaram |
dadarsha cha mayA sArdhaM bhagavAnvishvapAlakaH || 28||
pa~nchavaktraM dashabhujaM gaurakarpUravanmune |
nAnAkAntisamAyuktaM nAnAbhUShaNabhUShitam || 29||
mahodAraM mahAvIryaM mahApuruShalakShaNam |
taM dR^iShTvA paramaM rUpaM kR^itArtho.abhUnmayA hariH || 30||
atha prasanno bhagavAnmaheshaH parameshvaraH |
divyaM shabdamayaM rUpamAkhyAya prahasansthitaH || 31||
akArastasya mUrdhA hi lalATo dIrgha uchyate |
ikAro dakShiNaM netramIkAro vAmalochanam || 32||
ukAro dakShiNaM shrotramUkAro vAma uchyate |
R^ikAro dakShiNaM tasya kapolaM parameShThinaH || 33||
vAmaM kapolamR^IkAro lR^i lR^I nAsApuTe ubhe |
ekArashchoShTha Urdhvashcha hyaikArastvadharo vibhoH || 34||
okArashcha tathaukAro dantapa~NktidvayaM kramAt |
amastu tAlunI tasya devadevasya shUlinaH || 35||
kAdipa~nchAkSharANyasya pa~ncha hastAshcha dakShiNe |
chAdipa~nchAkSharANyevaM pa~ncha hastAstu vAmataH || 36||
TAdipa~nchAkSharaM pAdAstAdi pa~nchAkSharaM tathA |
pakAra udaraM tasya phakAraH pArshva uchyate || 37||
bakAro vAmapArshvastu bhakAraH skandha uchyate |
makAro hR^idayaM shambhormahAdevasya yoginaH || 38||
yakArAdisakArAntA vibhorvai saptadhAtavaH |
hakAro nAbhirUpo hi kShakAro ghrANa uchyate || 39||
evaM shabdamayaM rUpamaguNasya guNAtmanaH |
dR^iShTvA tamumayA sArdhaM kR^itArtho.abhUnmayA hariH || 40||
evaM dR^iShTvA maheshAnaM shabdabrahmatanuM shivam |
praNamya cha mayA viShNuH punashchApashyadUrdhvataH || 41||
o~NkAraprabhavaM mantraM kalApa~nchakasaMyutam |
shuddhasphaTikasa~NkAshaM shubhAShTatriMshadakSharam || 42||
medhAkAramabhUdbhUyaH sarvadharmArthasAdhakam |
gAyatrIprabhavaM mantraM sahitaM vashyakArakam || 43||
chaturviMshativarNADhyaM chatuShkAlamanuttamam |
atha pa~nchasitaM mantraM kalAShTakasamAyutam || 44||
AbhichArikamatyarthaM prAyastriMshachChubhAkSharam |
yajurvedasamAyuktaM pa~nchaviMshachChubhAkSharam || 45||
kalAShTakasamAyuktaM sushvetaM shAntikaM tathA |
trayodashakalAyuktaM bAlAdyaiH saha lehitam || 46||
babhUvurasya chotpattivR^iddhisaMhArakAraNam |
varNA ekAdhikAH ShaShTirasya mantravarasya tu || 47||
punarmR^ityu~njayaM mantraM pa~nchAkSharamataH param |
chintAmaNiM tathA mantraM dakShiNAmUrtisa.nj~nakam || 48||
tatastattvamasItyuktaM mahAvAkyaM harasya cha |
pa~nchamantrAMstathA labdhvA jajApa bhagavAnhariH || 49||
atha dR^iShTvA kalAvarNamR^igyajuHsAmarUpiNam |
IshAnamIshamukuTaM puruShAkhyaM purAtanam || 50||
aghorahR^idayaM hR^idyaM sarvaguhyaM sadAshivam |
vAmapAdaM mahAdevaM mahAbhogIndrabhUShaNam || 51||
vishvataH pAdavantaM taM vishvato.akShikaraM shivam |
brahmaNo.adhipatiM sargasthitisaMhArakAraNam || 52||
tuShTAva vAgbhiriShTAbhiH sAmbaM varadamIshvaram |
mayA cha sahito viShNurbhagavAMstuShTachetasA || 53||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne shabdabrahmatanuvarNanaM nAmAShTamo.adhyAyaH || 2\.1\.8||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.9\. navamo.adhyAyaH | shivatattvavarNanam |}
brahmovAcha |
athAkarNya nutiM viShNukR^itAM svasya maheshvaraH |
prAdurbabhUva suprItaH savAmaH karuNAnidhiH || 1||
pa~nchavaktrastrinayano bhAlachandro jaTAdharaH |
gauravarNo vishAlAkSho bhasmoddhUlitavigrahaH || 2||
dashabAhurnIlagalaH sarvAbharaNabhUShitaH |
sarvA~Ngasundaro bhasmatripuNDrA~NkitamastakaH || 3||
taM dR^iShTvA tAdR^ishaM devaM savAmaM parameshvaram |
tuShTAva punariShTAbhirvAgbhirviShNurmayA saha || 4||
nigamaM shvAsarUpeNa dadau tasmai tato haraH |
viShNave cha prasannAtmA maheshaH karuNAkaraH || 5||
tato j~nAnamadAttasmai rahasyaM paramAtmane |
paramAtmA punarmahyaM dattavAnkR^ipayA mune || 6||
samprApya nigamaM viShNuH paprachCha punareva tam |
kR^itArthaH sA~njalirnatvA mayA saha maheshvaram || 7||
viShNuruvAcha |
kathaM cha tuShyase deva mayA pUjyaH kathaM prabho |
kathaM dhyAnaM prakartavyaM kathaM vrajasi vashyatAm | 8||
kiM kartavyaM mahAdeva hyAvAbhyAM tava shAsanAt |
sadA sadAj~nApaya nau prItyarthaM kuru sha~Nkara || 9||
etatsarvaM mahArAja kR^ipAM kR^itvAvayoH prabho |
kathanIyaM tathAnyachcha vij~nAya svAnugau shiva || 10||
brahmovAcha |
ityetadvachanaM shrutvA prasanno bhagavAnharaH |
uvAcha vachanaM prItyA suprasannaH kR^ipAnidhiH || 11||
shrIshiva uvAcha |
bhaktyA cha bhavatornUnaM prIto.ahaM surasattamau |
pashyantaM mAM mahAdevaM bhayaM sarvaM vimu~nchatAm || 12||
mama li~NgaM sadA pUjyaM dhyeyaM chaitAdR^ishaM mama |
idAnIM dR^ishyate yadvattathA kAryaM prayatnataH || 13||
pUjito li~NgarUpeNa prasanno vividhaM phalam |
dAsyAmi sarvalokebhyo mano.abhIShTAnyanekashaH || 14||
yadA duHkhaM bhavettatra yuvayoH surasattamau |
pUjite mama li~Nge cha tadA syAd duHkhanAshanam || 15||
yuvAM prasUtau prakR^itermadIyAyA mahAbalau |
savyApasavyAgAtrAbhyAM mama sarveshvarasya hi || 16||
ayaM me dakShiNAtpArshvAd brahmA lokapitAmahaH |
vAmapArshvAchcha viShNustvaM samutpannaH parAtmanaH || 17||
prIto.ahaM yuvayoH samyagvaraM dadyAM yathepsitam |
mayi bhaktirdR^iDhA bhUyAdyuvayorabhyanuj~nayA || 18||
pArthivIM chaiva manmUrtiM vidhAya kurutaM yuvAm |
sevAM cha vividhAM prAj~nau kR^itvA sukhamavApsyathaH || 19||
brahmansR^iShTiM kuru tvaM hi madAj~nAparipAlakaH |
vatsa vatsa hare tvaM cha pAlayaivaM charAcharam || 20||
brahmovAcha |
ityuktvA nau prabhustAbhyAM pUjAvidhimadAchChubhAm |
yenaiva pUjitaH shambhuH phalaM yachChatyanekashaH || 21||
ityAkarNya vachaH shambhormayA cha sahito hariH |
pratyuvAcha maheshAnaM praNipatya kR^itA~njaliH || 22||
viShNuruvAcha |
yadi prItiH samutpannA yadi deyo varashcha nau |
bhaktirbhavatu nau nityaM tvayi chAvyabhichAriNI || 23||
tvamapyavatarasvAdya lIlayA nirguNo.api hi |
sahAyaM kuru nau tAta tvaM paraH parameshvaraH || 24||
Avayordevadevesha vivAdamapi shobhanam |
ihAgato bhavAnyasmAdvivAdashamanAya nau || 25||
brahmovAcha |
tasya tadvachanaM shrutvA punaH prAha haro harim |
praNipatya sthitaM mUrdhnA kR^itA~njalipuTaH svayam || 26||
shrImahesha uvAcha |
pralayasthitisargANAM kartAhaM saguNo.aguNaH |
parabrahma nirvikArI sachchidAnandalakShaNaH || 27||
tridhA bhinno hyahaM viShNo brahmaviShNuharAkhyayA |
sargarakShAlayaguNairniShkalo.ahaM sadA hare || 28||
stuto.ahaM yattvayA viShNo brahmaNA me.avatAraNe |
prArthanAM tAM kariShyAmi satyAM yadbhaktavatsalaH || 29||
madrUpaM paramaM brahmannIdR^ishaM bhavada~NgataH |
prakaTIbhavitA loke nAmnA rudraH prakIrtitaH || 30||
madaMshAttasya sAmarthyaM nyUnaM naiva bhaviShyati |
yo.ahaM so.ahaM na bhedo.asti pUjAvidhividhAnataH || 31||
yathA cha jyotiShaH sa~NgAjjalAdeH sparshatA na vai |
tathA mamAguNasyApi saMyogAd bandhanaM na hi || 32||
shivarUpaM mamaitachcha rudro.api shivavattadA |
na tatra parabhedo vai kartavyashcha mahAmune || 33||
vastuto hyekarUpaM hi dvidhA bhinnaM jagatyuta |
ato bhedo na vij~neyaH shive rudre kadAchana || 34||
suvarNasya yathaikasya vastutvaM naiva gachChati |
ala~NkR^itikR^ite deva nAmabhedo na vastutaH || 35||
yathaikasyA mR^ido bhedo nAnApAtre na vastutaH |
kAraNasyaiva kArye na sannidhAnaM nidarshanam || 36||
j~nAtavyaM budhavaryaishcha nirmalaj~nAnibhiH surau |
evaM j~nAtvA bhavadbhyAM tu na dR^ishyaM bhedakAraNam || 37||
vastuvat sarvadR^ishyaM cha shivarUpaM mataM mama |
ahaM bhavAnajashchaiva rudro yo.ayaM bhaviShyati || 38||
ekarUpA na bhedastu bhede vai bandhanaM bhavet |
tathApi cha madIyaM hi shivarUpaM sanAtanam || 39||
mUlIbhUtaM sadoktaM cha satyaj~nAnamanantakam |
evaM j~nAtvA sadA dhyeyaM manasA chaiva tattvataH || 40||
shrUyatAM chaiva bho brahman yadgopyaM kathyate mayA |
bhavantau prakR^iteryAtau nAyaM vai prakR^iteH punaH || 41||
madAj~nA jAyate tatra brahmaNo bhrukuTeraham |
guNeShvapi yathA proktastAmasaH prakR^ito haraH || 42||
vaikArikashcha vij~neyo yo.aha~NkAra udAhR^itaH |
nAmato vastuto naiva tAmasaH parichakShyate || 43||
etasmAtkAraNAd bahmankaraNIyamidaM tvayA |
sR^iShTikartA bhava brahmansR^iShTeshcha pAlako hariH || 44||
madIyashcha tathAMsho yo layakartA bhaviShyati |
iyaM yA prakR^itirdevI hyumAkhyA parameshvarI || 45||
tasyAstu shaktirvAgdevI brahmANaM sA bhajiShyati |
anyA shaktiH punastatra prakR^iteH sambhaviShyati || 46||
samAshrayiShyate viShNuM lakShmIrUpeNa sA tadA |
punashcha kAlI nAmnA sA madaMshaM prApsyati dhruvam || 47||
jyotIrUpeNa sA tatra kAryArthe sambhaviShyati |
evaM devyAstathA proktAH shaktayaH paramAH shubhAH || 48||
sR^iShTisthitilayAnAM hi kAryaM tAsAM kramAda dhruvam |
etasyAH prakR^iteraMshA matpriyAyAH surottama || 49||
tvaM cha lakShmImupAshritya kAryaM kartumihArhasi |
brahmaMstvaM cha girAM devIM prakR^ityaMshAmavApya cha || 50||
sR^iShTikAryaM hR^idA kartuM mannirdeshAdihArhasi |
ahaM kAlIM samAshritya matpriyAMshAM parAtparAm || 51||
rudrarUpeNa pralayaM kariShye kAryamuttamam |
chaturvarNamayaM lokaM tatsarvairAshramairdhruvam || 52||
tadanyairvividhaiH kAryaiH kR^itvA sukhamavApsyathaH |
j~nAnavij~nAnasaMyukto lokAnAM hitakArakaH || 53||
muktido.atra bhavAnadya bhava loke madAj~nayA |
maddarshane phalaM yadvattadeva tava darshane || 54||
iti datto varaste.adya satyaM satyaM na saMshayaH |
mamaiva hR^idaye viShNurviShNoshcha hR^idaye hyaham || 55||
ubhayorantaraM yo vai na jAnAti mano mama |
vAmA~Ngajo mama harirdakShiNA~Ngodbhavo vidhiH || 56||
mahApralayakR^ida rudro vishvAtmA hR^idayodbhavaH |
tridhA bhinno hyahaM viShNo brahmaviShNubhavAkhyayA || 57||
sargarakShAlayakarastriguNai raja AdibhiH |
guNabhinnaH shivaH sAkShAtprakR^ite puruShAtparaH || 58||
paraM brahmAdvayo nityo.anantaH pUrNo nira~njanaH |
antastamo bahiHsattvastrijagatpAlako hariH || 59||
antaHsattvastamobAhyastrijagallayakR^iddharaH || 60||
antarbahirajashchaiva trijagatsR^iShTikR^idvidhiH |
evaM guNAstrideveShu guNabhinnaH shivaH smR^itaH || 61||
viShNo sR^iShTikaraM prItyA pAlayainaM pitAmaham |
sampUjyastriShu lokeShu bhaviShyasi madAj~nayA || 62||
tava sevyo vidheshchApi rudra eva bhaviShyati |
shivapUrNAvatAro hi trijagallayakArakaH || 63||
pAdme bhaviShyati sutaH kalpe tava pitAmahaH |
tadA drakShyasi mAM chaiva so.api drakShyati padmajaH || 64||
evamuktvA maheshAnaH kR^ipAM kR^itvAtulAM haraH |
punaH provAcha suprItyA viShNuM sarveshvaraH prabhuH || 65||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne shivatattvavarNanaM nAma navamo.adhyAyaH || 2\.1\.9||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.10\. dashamo.adhyAyaH | paramashivatattvavarNanam |}
parameshvara uvAcha |
anyachChR^iNu hare viShNo shAsanaM mama suvrata |
sadA sarveShu lokeShu mAnyaH pUjyo bhaviShyasi || 1||
brahmaNA nirmite loke yadA duHkhaM prajAyate |
tadA tvaM sarvaduHkhAnAM nAshAya tatparo bhava || 2||
sahAyaM te kariShyAmi sarvakArye cha duHsahe |
tava shatrUnhaniShyAmi duHsAdhyAnparamotkaTAn || 3||
vividhAnavatArAMshcha gR^ihItvA kIrtimuttamAm |
vistAraya hare loke tAraNAya paro bhava || 4||
guNarUpo hyahaM rudro hyanena vapuShA sadA |
kAryaM kariShye lokAnAM tavAshakyaM na saMshayaH || 5||
rudradhyeyo bhavAMshchaiva bhavaddhyeyo harastathA |
yuvayorantaraM naiva tava rudrasya ki~nchana || 6||
vastutashchApi chaikatvaM varato.api tathaiva cha |
lIlayApi mahAviShNo satyaM satyaM na saMshayaH || 7||
rudrabhakto naro yastu tava nindAM kariShyati |
tasya puNyaM cha nikhilaM drutaM bhasma bhaviShyati || 8||
narake patanaM tasya tvaddveShAtpuruShottama |
madAj~nayA bhavedviShNo satyaM satyaM na saMshayaH || 9||
loke.asminmuktido nR^iNAM bhuktidashcha visheShataH |
dhyeyaH pUjyashcha bhaktAnAM nigrahAnugrahau kuru || 10||
ityuktvA mAM cha dhAtAraM haste dhR^itvA svayaM harim |
kathayAmAsa duHkheShu sahAyo bhava sarvadA || 11||
sarvAdhyakShashcha sarveShu bhaktimuktipradAyakaH |
bhava tvaM sarvadA shreShThaH sarvakAmaprasAdhakaH || 12||
sarveShAM prANarUpashcha bhava tvaM cha mamAj~nayA |
sa~NkaTe bhajanIyo hi sa rudro mattanurhare || 13||
tvAM yaH samAshrito nUnaM mAmeva sa samAshritaH |
antaraM yashcha jAnAti niraye patati dhruvam || 14||
AyurbalaM shR^iNuShvAdya tridevAnAM visheShataH |
sandeho.atra na kartavyo brahmaviShNuharAtmanAm || 15||
chaturyugasahasrANi brahmaNo dinamuchyate |
rAtrishcha tAvatI tasya mAnametatkrameNa ha || 16||
teShAM triMshaddinairmAso dvAdashaistaishcha vatsaraH |
shatavarShapramANena brahmAyuH parikIrtitam || 17||
brahmaNo varShamAtreNa dinaM vaiShNavamuchyate |
so.api varShashataM yAvadAtmamAnena jIvati || 18||
vaiShNavena tu varSheNa dinaM raudraM bhaved dhruvam |
haro varShashate yAte nararUpeNa saMsthitaH || 19||
yAvaduchChvasitaM vaktre sadAshivasamudbhavam |
pashchAchChaktiM samabhyeti yAvanniHshvasitaM bhavet || 20||
niHshvAsochChvasitAnAM cha sarveShAmeva dehinAm |
brahmaviShNuharANAM cha gandharvoragarakShasAm || 21||
ekaviMshasahasrANi shataiH ShaDbhiH shatAni cha |
ahorAtrANi choktAni pramANaM surasattamau || 22||
ShaDbhiruchChvAsaniHshvAsaiH palamekaM pravartitam |
ghaTI ShaShTipalA proktA sA ShaShTyA cha dinaM nishA || 23||
niHshvAsochChvAsitAnAM cha parisa~NkhyA na vidyate |
sadAshivasamutthAnametasmAtso.akShayaH smR^itaH || 24||
itthaM rUpaM tvayA tAvadrakShaNIyaM mamAj~nayA |
tAvatsR^iShTeshcha kAryaM vai kartavyaM vividhairguNaiH || 25||
brahmovAcha |
ityAkarNya vachaH shambhormayA cha bhagavAnhariH |
praNipatya cha vishveshaM prAha mandataraM vashI || 26||
viShNuruvAcha |
sha~Nkara shrUyatAmetatkR^ipAsindho jagatpate |
sarvametatkariShyAmi bhavadAj~nAvashAnugaH || 27||
mama dhyeyaH sadA tvaM cha bhaviShyasi na chAnyathA |
bhavataH sarvasAmarthyaM labdhaM chaiva purA mayA || 28||
kShaNamAtramapi svAmiMstava dhyAnaM paraM mama |
chetaso dUrato naiva sa~NgachChatu kadAchana || 29||
mama bhaktashcha yaH svAmi.Nstava nindAM kariShyati |
tasya vai niraye vAsaM prayachCha niyataM dhruvam || 30||
tvadbhakto yo bhavet svAminmama priyataro hi saH |
evaM vai yo vijAnAti tasya muktirna durlabhA || 31||
mahimA cha madIyo.adya vardhito bhavatA dhruvam |
kadAchidaguNashchaiva jAyate kShamyatAmiti || 32||
brahmovAcha |
tadA shambhustadIyaM hi shrutvA vachanamuttamam |
uvAcha viShNuM suprItyA kShamyA te.aguNatA mayA || 33||
evamuktvA hariM nau sa karAbhyAM parameshvaraH |
pasparsha sakalA~NgeShu kR^ipayA tu kR^ipAnidhiH || 34||
Adishya vividhAndharmAnsarvaduHkhaharo haraH |
dadau varAnanekAMshchAvayorhitachikIrShayA || 35||
tataH sa bhagavAn shambhuH kR^ipayA bhaktavatsalaH |
dR^iShTyA sampashyatoH shIghraM tatraivAntaradhIyata || 36||
tadAprabhR^iti loke.asmi.Nlli~NgapUjAvidhiH smR^itaH |
li~Nge pratiShThitaH shambhurbhuktimuktipradAyakaH || 37||
li~NgavedirmahAdevI li~NgaM sAkShAnmaheshvaraH |
layanAlli~NgamityuktaM tatraiva nikhilaM jagat || 38||
yastu lai~NgaM paThennityamAkhyAnaM li~Ngasannidhau |
ShaNmAsAchChivarUpo vai nAtra kAryA vichAraNA || 39||
yastu li~NgasamIpe tu kAryaM ki~nchitkaroti cha |
tasya puNyaphalaM vaktuM na shaknomi mahAmune || 40||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne parama shivatattvavarNanaM nAma dashamo.adhyAyaH || 2\.1\.10||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.11\. ekAdasho.adhyAyaH | shivapUjAvidhivarNanam |}
R^iShaya UchuH |
sUta sUta mahAbhAga vyAsashiShya namo.astu te |
shrAvitAdyAdbhutA shaivI kathA paramapAvanI || 1||
tatrAdbhutA mahAdivyA li~NgotpattiH shrutA shubhA |
shrutvA yasyAH prabhAvaM cha duHkhanAsho bhavediha || 2||
brahmanAradasaMvAdamanusR^itya dayAnidhe |
shivArchanavidhiM brUhi yena tuShTo bhavechChivaH || 3||
brAhmaNaiH kShatriyairvaishyaiH shUdrairvA pUjyate shivaH |
kathaM kAryaM cha tad brUhi yathA vyAsamukhAchChrutam || 4||
tachChrutvA vachanaM teShAM sharmadaM shrutisammatam |
uvAcha sakalaM prItyA muniprashnAnusArataH || 5||
sUta uvAcha |
sAdhu pR^iShTaM bhavadbhishcha tadrahasyaM munIshvarAH |
tadahaM kathayAmyadya yathAbuddhi yathAshrutam || 6||
bhavadbhiH pR^ichChyate yadvattathA vyAsena vai purA |
pR^iShTaM sanatkumArAya tachChrutaM hyupamanyunA || 7||
tato vyAsena vai shrutvA shivapUjAdikaM cha yat |
mahyaM cha pAThitaM tena lokAnAM hitakAmyayA || 8||
tachChrutaM chaiva kR^iShNena hyupamanyormahAtmanaH |
tadahaM kathayiShyAmi yathA brahmAvadatpurA || 9||
brahmovAcha |
shR^iNu nArada vakShyAmi sa~NkShepAlli~NgapUjanam |
vaktuM varShashatenApi na shakyaM vistarAnmune || 10||
evaM tu shA~NkaraM rUpaM sukhaM svachChaM sanAtanam |
pUjayetparayA bhaktyA sarvakAmaphalAptaye || 11||
dAridryaM rogaduHkhaM cha pIDanaM shatrusambhavam |
pApaM chaturvidhaM tAvadyAvannArchayate shivam || 12||
sampUjite shive deve sarvaduHkhaM vilIyate |
sampadyate sukhaM sarvaM pashchAnmuktiravApyate || 13||
yo vai mAnuShyamAshritya mukhyaM santAnataH sukham |
tena pUjyo mahAdevaH sarvakAryArthasAdhakaH || 14||
brAhmaNAH kShatriyA vaishyAH shUdrAshcha vidhivatkramAt |
sha~NkarArchAM prakurvantu sarvakAmArthasiddhaye || 15||
prAtaHkAle samutthAya muhUrte brahmasa.nj~nake |
guroshcha smaraNaM kR^itvA shambhoshchaiva tathA punaH || 16||
tIrthAnAM smaraNaM kR^itvA dhyAnaM chaiva harerapi |
mamApi nirjarANAM vai munyAdInAM tathA mune || 17||
tataH stotraM shambhunAma gR^ihNIyAdvidhipUrvakam |
tatotthAya malotsargaM dakShiNasyAM chareddishi || 18||
ekAnte tu vidhiM kuryAnmalotsargasya yachChrutam |
tadeva kathayAmyadya shR^iNvAdhAya mano mune || 19||
shuddhAM mR^idaM dvijo lipyAtpa~nchavAraM vishuddhaye |
kShatriyashcha chaturvAraM vaishyo vAratrayaM tathA || 20||
shUdro dvivAraM cha mR^idaM gR^ihNIyAdvidhishuddhaye |
gude vAtha sakR^illi~Nge vAramekaM prayatnataH || 21||
dashavAraM vAmahaste saptavAraM dvayostathA |
pratyekaM pAdayostAta trivAraM karayoH punaH || 22||
strIbhishcha shUdravatkAryaM mR^idAgrahaNamuttamam |
hastau pAdau cha prakShAlya pUrvavanmR^idamAharet || 23||
dantakAShThaM tataH kuryAtsvavarNakramato naraH || 24||
vipraH kuryAddantakAShThaM dvAdashA~NgulamAnataH |
ekAdashA~NgulaM rAjA vaishyaH kuryAddashA~Ngulam || 25||
shUdro navA~NgulaM kuryAditi mAnamidaM smR^itam |
kAladoShaM vichAryeva mAnaduShTaM vivarjayet || 26||
ShaShTyAdyAmashcha navamI vratamastaM raverdinam |
tathA shrAddhadinaM tAta niShiddhaM radadhAvane || 27||
snAnaM tu vidhivatkAryaM tIrthAdiShu krameNa tu |
deshakAlavisheSheNa snAnaM kAryaM samantrakam || 28||
Achamya prathamaM tatra dhautavastrANi dhArayet |
ekAnte susthale sthitvA sandhyAvidhimathAcharet || 29||
yathAyogyaM vidhiM kR^itvA pUjAvidhimathArabhet |
manastu susthiraM kR^itvA pUjAgAraM pravishya cha || 30||
pUjAvidhiM samAdAya svAsane hyupavishya vai |
nyAsAdikaM vidhAyAdau pUjayet kramasho haram || 31||
prathamaM cha gaNAdhIshaM dvArapAlAMstathaiva cha |
dikpAlAMshcha susampUjya pashchAtpIThaM prakalpayet || 32||
athavAShTadalaM kR^itvA pUjAdravyaM samIpataH |
upavishya tatastatra upaveshya shivaM prabhum || 33||
AchamanatrayaM kR^itvA prakShAlya cha punaH karau |
prANAyAmatrayaM kR^itvA madhye dhyAyechcha tryambakam || 34||
pa~nchavaktraM dashabhujaM shuddhasphaTikasannibham |
sarvAbharaNasaMyuktaM vyAghracharmottarIyakam || 35||
tasya sArUpyatAM smR^itvA dahetpApaM naraH sadA |
shivaM tataH samutthApya pUjayetparameshvaram || 36||
dehashuddhiM tataH kR^itvA mUlamantraM nyasetkramAt |
sarvatra praNavenaiva ShaDa~NganyAsamAcharet || 37||
kR^itvA hR^idi prayogaM cha tataH pUjAM samArabhet |
pAdyArghAchamanArthaM cha pAtrANi cha prakalpayet || 38||
sthApayedvividhAnkumbhAnnava dhImAnyathAvidhi |
darbhairAchChAdya taireva saMsthApyAbhyukShya vAriNA || 39||
teShu teShu cha sarveShu kShipettoyaM sushItalam |
praNavena kShipetteShu dravyANyAlokya buddhimAn || 40||
ushIraM chandanaM chaiva pAdye tu parikalpayet |
jAtIka~NkolakarpUravaTamUlatamAlakam || 41||
chUrNayitvA yathAnyAyaM kShipedAchamanIyake |
etatsarveShu pAtreShu dApayechchandanAnvitam || 42||
pArshvayordevadevasya nandIshaM tu samarchayet |
gandhairdhUpaistathA dIpairvividhaiH pUjayechChivam || 43||
li~NgashuddhiM tataH kR^itvA mudA yukto narastadA |
yathochitaM tu mantraughaiH praNavAdirnamo.antakaiH || 44||
kalpayedAsanaM svastipadmAdi praNavena tu |
tasmAtpUrvadishaM sAkShAdaNimAmayamakSharam || 45||
laghimA dakShiNaM chaiva mahimA pashchimaM tathA |
prAptishchaivottaraM patraM prAkAmyaM pAvakasya cha || 46||
IshitvaM nairR^itaM patraM vashitvaM vAyugochare |
sarvaj~natvaM tathaishAnyaM karNikA soma uchyate || 47||
somasyAdhastathA sUryastasyAdhaH pAvakastvayam |
dharmAdInapi tasyAdho bhavataH kalpayet kramAt || 48||
avyaktAdi chaturdikShu somasyAnte guNatrayam |
sadyojAtaM prapadyAmItyAvAhya parameshvaram || 49||
vAmadevena mantreNa tiShThechchaivAsanopari |
sAnnidhyaM rudragAyatryA aghoreNa nirodhayet || 50||
IshAnaH sarvavidyAnAmiti mantreNa pUjayet |
pAdyamAchanIyaM cha vidhAyArghyaM pradApayet || 51||
sthApayedvidhinA rudraM gandhachandanavAriNA |
pa~nchagavyavidhAnena gR^ihyapAtre.abhimantrya cha |||| 52||
praNavenaiva gavyena snApayetpayasA cha tam |
dadhnA cha madhunA chaiva tathA chekShurasena tu || 53||
ghR^itena tu tathA pUjyaM sarvakAmahitAvaham |
puNyairdravyairmahAdevaM praNavenAbhiShechayet || 54||
pavitrajalabhANDeShu mantraiH toyaM kShipettataH |
shuddhIkR^itya yathAnyAyaM sitavastreNa sAdhakaH || 55||
tAvad dUraM na kartavyaM na yAvachchandanaM kShipet |
tandulaiH sundaraistatra pUjayechCha~NkaraM mudA || 56||
kushApAmArgakarpUrajAtichampakapATalaiH |
karavIraiH sitaishchaiva mallikAkamalotpalaiH || 57||
apUrvapuShpairvividhaishchandanAdyaistathaiva cha |
jalena jaladhArAM cha kalpayetparameshvare || 58||
pAtraishcha vividhairdevaM snApayechcha maheshvaram |
mantrapUrvaM prakartavyA pUjA sarvaphalapradA || 59||
mantrAMshcha tubhyaM tAMstAta sarvakAmArthasiddhaye |
pravakShyAmi samAsena sAvadhAnatayA shR^iNu || 60||
pavamAnena mantreNa tathA vA~Nmayakena cha |
rudreNa nIlarudreNa sushuklena shubhena cha || 61||
hotAreNa tathA shIrShNA shubhenAtharvaNena cha |
shAntyA vAtha punaH shAntyA bhAruNDenAruNena cha || 62||
arthAbhIShTena sAmnA cha tathA devavratena cha || 63||
rathantareNa puShpeNa sUktena puruSheNa cha |
mR^ityu~njayena mantreNa tathA pa~nchAkShareNa cha || 64||
jaladhArAH sahasreNa shatenaikottareNa vA |
kartavyA vedamArgeNa nAmabhirvAtha vA punaH || 65||
tatashchandanapuShpAdi ropaNIyaM shivopari |
dApayetpraNavenaiva mukhavAsAdikaM tathA || 66||
tataH sphaTikasa~NkAshaM devaM niShkalamakShayam |
kAraNaM sarvalokAnAM sarvalokamayaM param || 67||
brahmendropendraviShNvAdyairapi devairagocharam |
vedavidbhirhi vedAnte tvagocharamiti smR^itam || 68||
AdimadhyAntarahitaM bheShajaM sarvarogiNAm |
shivatattvamiti khyAtaM shivali~NgaM vyavasthitam || 69||
praNavenaiva mantreNa pUjayelli~NgamUrddhani |
dhUpairdIpaishcha naivedyaistAmbUlaiH sundaraistathA || 70||
nIrAjanena ramyeNa yathoktavidhinA tataH |
namaskAraiH stavaishchAnyairmantrairnAnAvidhairapi || 71||
arghyaM dattvA tu puShpANi pAdayoH suvikIrya cha |
praNipatya cha deveshamAtmanArAdhayechChivam || 72||
haste gR^ihItvA puShpANi samutthAya kR^itA~njaliH |
prArthayetpunarIshAnaM mantreNAnena sha~Nkaram || 73||
aj~nAnAdyadi vA j~nAnAjjapapUjAdikaM mayA |
kR^itaM tadastu saphalaM kR^ipayA tava sha~Nkara || 74||
paThitvaivaM cha puShpANi shivopari mudA nyaset |
tataH svastyayanaM kR^itvA hyAshiSho vividhAstathA || 75||
mArjanaM tu tataH kAryaM shivasyopari vai punaH |
namaskAraM tataH kShAntiM punarAgamanAya cha || 76||
aghoramantramuchchArya namaskAraM prakalpayet |
prArthayechcha punastatra sarvabhAvasamanvitaH || 77||
shive bhaktiH shive bhaktiH shive bhaktirbhave bhave |
anyathA sharaNaM nAsti tvameva sharaNaM mama || 78||
iti samprArthya deveshaM sarvasiddhipradAyakam |
pUjayetparayA bhaktyA galanAdairvisheShataH || 79||
namaskAraM tataH kR^itvA parivAragaNaiH saha |
praharShamatulaM labdhvA kAryaM kuryAdyathAsukham || 80||
evaM yaH pUjayennityaM shivabhaktiparAyaNaH |
tasya vai sakalA siddhirjAyate tu pade pade || 81||
vAgmI sa jAyate tasya mano.abhIShTaphalaM dhruvam |
rogaM duHkhaM cha shokaM cha hyudvegaM kR^itrimaM tathA || 82||
kauTilyaM cha garaM chaiva yadyaduHkhamupasthitam |
tadduHkhaM nAshayatyeva shivaH shivakaraH paraH || 83||
kalyANaM jAyate tasya shuklapakShe yathA shashI |
vardhate sadguNastatra dhruvaM sha~NkarapUjanAt || 84||
iti pUjAvidhiH shambhoH proktaste munisattama |
ataH paraM cha shushrUShuH kiM praShTAsi cha nArada || 85||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne shivapUjAvidhivarNanaM nAmaikAdasho.adhyAyaH || 2\.1\.11||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDeH
\section{2\.1\.12\. dvAdasho.adhyAyaH | pUjAvidhivarNane sArAsAravichAravarNanam |}
nArada uvAcha |
brahmanprajApate tAta dhanyastvaM shivasaktadhIH |
etadeva punaH samyagbrUhi me vistarAdvidhe || 1||
brahmovAcha |
ekasminsamaye tAta R^iShInAhUya sarvataH |
nirjarAMshchAvadaM prItyA suvachaH padmasambhavaH || 2||
yadi nityasukhe shraddhA yadi siddheshcha kAmukAH |
AgantavyaM mayA sArdhaM tIraM kShIrapayonidheH || 3||
ityetadvachanaM shrutvA gatAste hi mayA saha |
yatrAste bhagavAnviShNuH sarveShAM hitakArakaH || 4||
tatra gatvA jagannAthaM devadevaM janArdanam |
upatasthuH surA natvA sukR^itA~njalayo mune || 5||
tAndR^iShTvA cha tadA viShNurbrahmAdyAnamarAnsthitAn |
smaran shivapadAmbhojamabravItparamaM vachaH || 6||
viShNuruvAcha |
kimarthamAgatA yUyaM brahmAdyAshcha surarShayaH |
sarvaM vadata tatprItyA kiM kAryaM vidyate.adhunA || 7||
brahmovAcha |
iti pR^iShTAstadA tena viShNunA cha mayA surAH |
punaH praNamya taM prItyA kiM kAryaM vidyate.adhunA ||
vinivedayituM kAryaM hyabruvanvachanaM shubham || 8||
devA UchuH |
nityaM sevA tu kasyaiva kAryA duHkhApahAriNI || 9||
ityetadvachanaM shrutvA bhagavAnbhaktavatsalaH |
sAmarasya mama prItyA kR^ipayA vAkyamabravIt || 10||
shrIbhagavAnuvAcha |
brahman shR^iNu suraiH samyak shrutaM cha bhavatA purA |
tathApi kathyate tubhyaM devebhyashcha tathA punaH || 11||
dR^iShTaM cha dR^ishyate.adyaiva kiM punaH pR^ichChyate.adhunA |
brahmandevaiH samastaishcha bahudhA kAryatatparaiH || 12||
sevyaH sevyaH sadA devaH sha~NkaraH sarvaduHkhahA |
mamApi kathitaM tena brahmaNo.api visheShataH || 13||
prastutaM chaiva dR^iShTaM vaH sarvaM dR^iShTAntamadbhutam |
tyAjyaM tadarchanaM naiva kadApi sukhamIpsubhiH || 14||
santyajya devadeveshaM li~NgamUrtiM maheshvaram |
tAraputrAstathaivaite naShTAste.api sabAndhavAH || 15||
mayA cha mohitAste vai mAyayA dUrataH kR^itAH |
sarve vinaShTAH pradhvastAH shivena rahitA yadA || 16||
tasmAtsadA pUjanIyo li~NgamUrtidharo haraH |
sevanIyo visheSheNa shraddhayA devasattama || 17||
sharvali~NgArchanAdeva devA daityAshcha sattamAH |
ahaM tvaM cha tathA brahmankathaM tadvismR^itaM tvayA || 18||
talli~NgamarchayennityaM yena kenApi hetunA |
tasmAt brahmansuraiH sharvaH sarvakAmaphalepsayA || 19||
sA hAnistanmahAChidraM sAndhatA sA cha mugdhatA |
yanmuhUrtaM kShaNaM vApi shivaM naiva samarchayet || 20||
bhavabhaktiparA ye cha bhavapraNatachetasaH |
bhavasaMsmaraNA ye cha na te duHkhasya bhAjanAH || 21||
bhavanAni manoj~nAni manoj~nAbharaNAH striyaH |
dhanaM cha tuShTiparyantaM putrapautrAdisantatiH || 22||
ArogyaM cha sharIraM cha pratiShThAM chApyalaukikIm |
ye vA~nChanti mahAbhAgAH sukhaM vA tridashAlayam || 23||
ante muktiphalaM chaiva bhaktiM vA parameshituH |
pUrvapuNyAtirekeNa te.archayanti sadAshivam || 24||
yo.archayechChivali~NgaM vai nityaM bhaktiparAyaNaH |
tasya vai saphalA siddhirna sa pApaiH prayujyate || 25||
brahmovAcha |
ityuktAshcha tadA devAH praNipatya hariM svayam |
li~NgAni prArthayAmAsuH sarvakAmAptaye nR^iNAm || 26||
tachChrutvA cha tadA viShNurvishvakarmANamabravIt |
ahaM cha munishArdUla jIvoddhAraparAyaNaH || 27||
vishvakarmanyathA shambhoH kalpayitvA shubhAni cha |
li~NgAni sarvadevebhyo deyAni vachanAnmama || 28||
brahmovAcha |
li~NgAni kalpayitvaivamadhikArAnurUpataH |
vishvakarmA dadau tebhyo niyogAnmama vA hareH || 29||
tadeva kathayAmyadya shrUyatAmR^iShisattama |
padmarAgamayaM shakro haimaM vishravasaH sutaH || 30||
pItaM maNimayaM dharmo varuNaH shyAmalaM shivam |
indranIlamayaM viShNurbrahmA hemamayaM tathA || 31||
vishvedevAstathA raupyaM vasavashcha tathaiva cha |
ArakUTamayaM vApi pArthivaM hyashvinau mune || 32||
lakShmIshcha sphATikaM devI hyAdityAstAmranirmitam |
mauktikaM somarAjo vai vajrali~NgaM vibhAvasuH || 33||
mR^iNmayaM chaiva viprendrA viprapatnyastathaiva cha |
chAndanaM cha mayo nAgAH pravAlamayamAdarAt || 34||
navanItamayaM devI yogI bhasmamayaM tathA |
yakShA dadhimayaM li~NgaM ChAyA piShTamayaM tathA || 35||
shivali~NgaM cha brahmANI ratnaM pUjayati dhruvam |
pAradaM pArthivaM bANaH samarchati pare.api vA || 36||
evaMvidhAni li~NgAni dattAni vishvakarmaNA |
te pUjayanti sarve vai devA R^iShigaNAstathA || 37||
viShNurdattvA cha li~NgAni devebhyo hitakAmyayA |
pUjAvidhiM samAchaShTa brahmaNe me pinAkinaH || 38||
tachChrutvA vachanaM tasya brahmAhaM devasattamaiH |
AgachChaM cha svakaM dhAma harShanirbharamAnasaH || 39||
tatrAgatya R^iShInsarvAndevAMshchAhaM tathA mune |
shivapUjAvidhiM samyagabruvaM sakaleShTadam || 40||
brahmovAcha |
shrUyatAmR^iShayaH sarve sAmarAH prematatparAH |
shivapUjAvidhiM prItyA kathaye bhuktimuktidam || 41||
mAnuShaM janma samprApya durlabhaM sarvajantuShu |
tatrApi satkule devA duShprApyaM cha munIshvarAH || 42||
avya~NgaM chaiva vipreShu sAchAreShu sapuNyataH |
shivasantoShahetoshcha karma svoktaM samAcharet || 43||
yadyajjAtisamuddiShTaM tattatkarma na la~Nghayet |
yAvaddAnasya sampattistAvatkarma samAvahet || 44||
karmayaj~nasahasrebhyastapoyaj~no vishiShyate |
tapoyaj~nasahasrebhyo japayaj~no vishiShyate || 45||
dhyAnayaj~nAtparaM nAsti dhyAnaM j~nAnasya sAdhanam |
yataH samarasaM sveShTaM yogI dhyAnena pashyati || 46||
dhyAnayaj~naratasyAsya sadA sannihitaH shivaH |
nAsti vij~nAninAM ki~nchitprAyashchittAdishodhanam || 47||
vishuddhA vidyayA ye cha brahmanbrahmavido janAH |
nAsti kriyA cha teShAM vai sukhaM duHkhaM vichArataH || 48||
dharmAdharmau japo homo dhyAnaM dhyAnavidhistathA |
sarvadA nirvikArAste vidyayA cha tayAmarAH || 49||
parAnandakaraM li~NgaM vishuddhaM shivamakSharam |
niShkalaM sarvagaM j~neyaM yoginAM hR^idi saMsthitam || 50||
li~NgaM tu dvividhaM proktaM bAhyamAbhyantaraM dvijAH |
bAhyaM sthUlaM samuddiShTaM sUkShmamAbhyantaraM matam || 51||
karmayaj~naratA ye cha sthUlali~NgArchane ratAH |
asatAM bhAvanArthAya sUkShmeNa sthUlavigrahAH || 52||
AdhyAtmikaM tu yalli~NgaM pratyakShaM yasya no bhavet |
sa talli~Nge tathA sthUle kalpayechcha na chAnyathA || 53||
j~nAninAM sUkShmamamalaM bhAvAtpratyakShamavyayam |
yathA sthUlamayuktAnAmutkR^iShTAdau prakalpitam || 54||
aho vichArato nAsti hyanyattatvArthavAdinaH |
niShkalaM sakalaM chitte sarvaM shivamayaM jagat || 55||
evaM j~nAnavimuktAnAM nAsti doShavikalpanA |
vidhishchaiva tathA nAsti vihitAvihite tathA || 56||
yathA jaleShu kamalaM salilairnAvalipyate |
tathA j~nAnI gR^ihe tiShThankarmaNA nAvabadhyate || 57||
iti j~nAnaM samutpannaM yAvannaiva narasya vai |
tAvachcha karmaNA devaM shivamArAdhayennaraH || 58||
pratyayArthaM cha jagatAmekastho.api divAkaraH |
eko.api bahudhA dR^iShTo jalAdhArAdivastuShu || 59||
dR^ishyate shrUyate loke yadyatsadasadAtmakam |
tattatsarvaM surA vitta paraM brahma shivAtmakam || 60||
bhedo jalAnAM loke.asminpratibhAve.avichArataH |
evamAhustathA chAnye sarve vedArthatattvagAH || 61||
hR^idi saMsAriNaH sAkShAtsakalaH parameshvaraH |
iti vij~nAnayuktasya kiM tasya pratimAdibhiH || 62||
iti vij~nAnahInasya pratimAkalpanA shubhA |
padamuchchaiH samAroDhuM puMso hyAlambanaM smR^itam || 63||
AlambanaM vinA tasya padamuchchaiH suduShkaram |
nirguNaprAptaye nR^INAM pratimAlambanaM smR^itam || 64||
saguNAnnirguNaprAptirbhavatIti sunishchitam |
evaM cha sarvadevAnAM pratimA pratyayAvahA || 65||
devashchAyaM mahIyAnvai tasyArthe pUjanaM tvidam |
gandhachandanapuShpAdi kimarthaM pratimAM vinA || 66||
tAvachcha pratimA pUjyA yAvadvij~nAnasambhavaH |
j~nAnAbhAve na pUjyeta patanaM tasya nishchitam || 67||
etasmAtkAraNAdviprAH shrUyatAM paramArthataH |
svajAtyuktaM tu yatkarma kartavyaM tatprayatnataH || 68||
yatra yatra yathA bhaktiH kartavyaM pUjanAdikam |
vinA pUjanadAnAdi pAtakaM na cha dUrataH || 69||
yAvachcha pAtakaM dehe tAvatsiddhirna jAyate |
gate cha pAtake tasya sarvaM cha saphalaM bhavet || 70||
tathA cha maline vastre ra~NgaH shubhataro na hi |
kShAlane hi kR^ite shuddhe sarvo ra~NgaH prasajjate || 71||
tathA cha nirmale dehe devAnAM samyagarchayA |
j~nAnara~NgaH prajAyeta tadA vij~nAnasambhavaH || 72||
vij~nAnasya cha sanmUlaM bhaktiravyabhichAriNI |
j~nAnasyApi cha sanmUlaM bhaktirevA.abhidhIyate || 73||
bhaktermUlaM tu satkarma sveShTadevAdipUjanam |
tanmUlaM sadguruH proktastanmUlaM sa~NgatiH satAm || 74||
sa~NgatyA gururApyeta gurormantrAdipUjanam |
pUjanAjjAyate bhaktirbhaktyA j~nAnaM prajAyate || 74||
vij~nAnaM jAyate j~nAnAtparabrahmaprakAshakam |
vij~nAnaM cha yadA jAtaM tadA bhedo nivartate || 76||
bhede nivR^itte sakale dvandvaduHkhavihInatA |
dvandvaduHkhavihInastu shivarUpo bhavatyasau || 77||
dvandvAprAptau na jAyetAM sukhaduHkhe vijAnataH |
vihitAvihite tasya na syAtAM cha surarShayaH || 78||
IdR^isho viralo loke gR^ihAshramavivarjitaH |
yadi loke bhavatyasmindarshanAtpApahArakaH || 79||
tIrthAni shlAghayantIha tAdR^ishaM j~nAnavittamam |
devAshcha munayaH sarve parabrahmAtmakaM shivam || 80||
tAdR^ishAni na tIrthAni na devA mR^ichChilAmayAH |
te punantyurukAlena vij~nAnI darshanAdapi || 81||
yAvadgR^ihAshrame tiShThettAvadAkArapUjanam |
kuryAchChreShThasya suprItyA sureShu khalu pa~nchasu || 82||
athavA cha shivaH pUjyo mUlamekaM vishiShyate |
mUle sikte tathA shAkhAH tR^iptAH satyakhilAH surAH || 83||
shAkhAsu cha sutR^iptAsu mUlaM tR^iptaM na karhichit |
evaM sarveShu tR^ipteShu sureShu munisattamAH || 84||
sarvathA shivatR^iptirno vij~neyA sUkShmabuddhibhiH |
shive cha pUjite devAH pUjitAH sarva eva hi || 85||
tasmAchcha pUjayeddevaM sha~NkaraM lokasha~Nkaram |
sarvakAmaphalAvAptyai sarvabhUtahite rataH || 86||

iti shrIshivamahApurANe dvitIyAyAM rudra saMhitAyAM prathamakhaNDe sR^iShTyupAkhyAne pUjAvidhivarNane sArAsAravichAravarNanaM nAma dvAdasho.adhyAyaH || 2\.1\.12||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.13\. trayodasho.adhyAyaH | shivapUjanavarNanam |}
brahmovAcha |
ataH paraM pravakShyAmi pUjAvidhimanuttamam |
shrUyatAmR^iShayo devAHsarvakAmasukhAvaham || 1||
brAhme muhUrte chotthAya saMsmaretsAmbakaM shivam |
kuryAttatprArthanAM bhaktyA sA~njalirnatamastakaH || 2||
uttiShThottiShTha devesha uttiShTha hR^idayeshaya |
uttiShTha tvamumAsvAminbrahmANDe ma~NgalaM kuru || 3||
jAnAmi dharmaM na cha me pravR^itti\-
rjAnAmyadharmaM na cha me nivR^ittiH |
tvayA mahAdeva hR^idi sthitena
yathA niyukto.asmi tathA karomi || 4||
ityuktvA vachanaM bhaktyA smR^itvA cha gurupAdake |
bahirgachCheddakShiNAshAM tyAgArthaM malamUtrayoH || 5||
dehashuddhiM tataH kR^itvA sa mR^ijjalavishodhanaiH |
hastau pAdau cha prakShAlya dantadhAvanamAcharet || 6||
divAnAthe tvanudite kR^itvA vai dantadhAvanam |
mukhaM ShoDashavAraM tu prakShAlyA~njalibhistathA || 7||
ShaShThyAdyAmAshcha tithayo navamyarkadine tathA |
varjyAH surarShayo yatnAdbhaktena radadhAvane || 8||
yathAvakAshaM susnAyAnnadyAdiShvathavA gR^ihe |
deshakAlAviruddhaM cha snAnaM kAryaM nareNa cha || 9||
raverdine tathA shrAddhe sa~NkrAntau grahaNe tathA |
mahAdAne tathA tIrthe hyupavAsadine tathA || 10||
ashauche.apyathavA prApte na snAyAduShNavAriNA |
yathA sAbhimukhaM snAyAttIrthAdau bhaktimAnnaraH || 11||
tailAbhya~NgaM cha kurvIta vArAndR^iShTvA krameNa cha |
nityamabhya~Ngake chaiva vAsitaM vA na dUShitam || 12||
shrAddhe cha grahaNe chaivopavAse pratipaddine |
athavA sArShapaM tailaM na duShyed grahaNaM vinA || 13||
deshaM kAlaM vichAryyaivaM snAnaM kuryAdyathAvidhi |
uttarAbhimukhashchaiva prA~Nmukho.apyathavA punaH || 14||
uchChiShTenaiva vastreNa na snAyAtsa kadAchana |
shuddhavastreNa sa snAyAttaddevasmR^itipUrvakam || 15||
paradhAryyaM cha nochChiShTaM rAtrau cha vidhR^itaM cha yat |
tena snAnaM tathA kAryaM kShAlitaM cha parityajet || 16||
tarpaNaM cha tataH kAryaM devarShipitR^itR^iptidam |
dhautavastraM tato dhAryaM punarAchamanaM charet || 17||
shuchau deshe tato gatvA gomayAdyapamArjite |
AsanaM cha shubhaM tatra rachanIyaM dvijottamAH || 18||
shuddhakAShThasamutpannaM pUrNaM staritameva vA |
chitrAsanaM tathA kuryAtsarvakAmaphalapradam || 19||
yathAyogyaM punargrAhyaM mR^igacharmAdikaM cha yat |
tatropavishya kurvIta tripuNDraM bhasmanA sudhIH || 20||
japastapastathA dAnaM tripuNDrAtsaphalaM bhavet |
abhAve bhasmanastatra jalasyAdi prakIrtitam || 21||
evaM kR^itvA tripuNDraM cha rudrAkShAndhArayennaraH |
sampAdya cha svakaM karma punarArAdhayechChivam || 22||
punarAchamanaM kR^itvA trivAraM mantrapUrvakam |
ekaM vAtha prakuryAchcha ga~NgAbinduriti bruvan || 23||
annodakaM tathA tatra shivapUjArthamAharet |
anyadvastu cha yatki~nchidyathAshakti samIpagam || 24||
kR^itvA stheyaM cha tatraiva dhairyamAsthAya vai punaH |
arghapAtraM tathA chaikaM jalagandhAkShatairyutam || 25||
dakShiNAMse tathA sthApyamupachArasya klR^iptaye |
guroshcha smaraNaM kR^itvA tadanuj~nAmavApya cha || 26||
sa~NkalpaM vidhivatkR^itvA kAmanAM cha niyujya vai |
pUjayetparayA bhaktyA shivaM saparivArakam || 27||
mudrAmekAM pradarshyaiva pUjayedvighnahArakam |
sindurAdipadArthaishcha siddhibuddhisamanvitam || 28||
lakShalAbhayutaM tatra pUjayitvA nametpunaH |
chaturthyantairnAmapadairnamo.antaiH praNavAdibhiH || 29||
kShamApyainaM tadA devaM bhrAtrA chaiva samanvitam |
pUjayetparayA bhaktyA namaskuryAtpunaH punaH || 30||
dvArapAlaM sadA dvAri tiShThantaM cha mahodaram |
pUjayitvA tataH pashchAtpUjayedgirijAM satIm || 31||
chandanaiH ku~Nkumaishchaiva dhUpairdIpairanekashaH |
naivedyairvividhaishchaiva pUjayitvA tataH shivam || 32||
namaskR^itya punastatra gachChechcha shivasannidhau |
yadi gehe pArthivIM vA haimIM vA rAjatIM tathA || 33||
dhAtujanyAM tathaivAnyAM pAradAM vA prakalpayet |
namaskR^itya punastAM cha pUjayedbhaktitatparaH || 34||
tasyAM tu pUjitAyAM vai sarve syuH pUjitAstathA |
sthApayechcha mR^idA li~NgaM vidhAya vidhipUrvakam || 35||
kartavyaM sarvathA tatra niyamAH svagR^ihe sthitaiH |
prANapratiShThAM kurvIta bhUtashuddhiM vidhAya cha || 36||
dikpAlAnpUjayettatra sthApayitvA shivAlaye |
gR^ihe shivaH sadA pUjyo mUlamantrAbhiyogataH || 37||
tatra tu dvArapAlAnAM niyamo nAsti sarvathA |
gR^ihe li~NgaM cha yatpUjyaM tasminsarvaM pratiShThitam || 38||
pUjAkAle cha sA~NgaM vai parivAreNa saMyutam |
AvAhya pUjayeddevaM niyamo.atra na vidyate || 39||
shivasya sannidhiM kR^itvA svAsanaM parikalpayet |
uda~NmukhastadA sthitvA punarAchamanaM charet || 40||
prakShAlya hastau pashchAdvai prANAyAmaM prakalpayet |
mUlamantreNa tatraiva dashAvartaM nayennaraH || 41||
pa~nchamudrAH prakartavyAH pUjAvashyaM kare sthitA |
etA mudrAH pradarshyaiva charetpUjAvidhiM naraH || 42||
dIpaM kR^itvA tadA tatra namaskAraM guroratha |
badhvA padmAsanaM tatra bhadrAsanamathApi vA || 43||
uttAnAsanakaM kR^itvA parya~NkAsanakaM tathA |
yathAsukhaM tathA sthitvA prayogaM punareva cha || 44||
kR^itvA pUjAM purA jAtAM vaTTakenaiva tArayet |
yadi vA svayameveha gR^ihe na niyamo.asti cha || 45||
pashchAchchaivArghapAtreNa kShAlayelli~Ngamuttamam |
ananyamAnaso bhUtvA pUjAdravyaM nidhAya cha || 46||
pashchAchchAvAhayeddevaM mantreNAnena vai naraH |
kailAsashikharasthaM cha pArvatIpatimuttamam || 47||
yathoktarUpiNaM shambhuM nirguNaM guNarUpiNam |
pa~nchavaktraM dashabhujaM trinetraM vR^iShabhadhvajam || 48||
karpUragauraM divyA~NgaM chandramauliM kapardinam |
vyAghracharmottarIyaM cha gajacharmAmbaraM shubham || 49||
vAsukyAdiparItA~NgaM pinAkAdyAyudhAnvitam |
siddhayo.aShTau cha yasyAgre nR^ityantIha nirantaram || 50||
jayajayeti shabdaishcha sevitaM bhaktapu~njakaiH |
tejasA duHsahenaiva durlakShyaM devasevitam || 51||
sharaNyaM sarvasattvAnAM prasannamukhapa~Nkajam |
vedaiH shAstrairyathAgItaM viShNubrahmanutaM sadA || 52||
bhaktavatsalamAnandaM shivamAvAhayAmyaham |
evaM dhyAtvA shivaM sAmbamAsanaM parikalpayet || 53||
chaturthyantapadenaiva sarvaM kuryAdyathAkramam |
tataH pAdyaM pradadyAdvai tato.arghyaM sha~NkarAya cha || 54||
tatashchAchamanaM kR^itvA shambhave paramAtmane |
pashchAchcha pa~nchabhirdravyaiH snApayechCha~NkaraM mudA || 55||
vedamantrairyathAyogyaM nAmabhirvA samantrakaiH |
chaturthyantapadairbhaktyA dravyANyevArpayettadA || 56||
tathAbhilaShitaM dravyamarpayechCha~Nkaropari |
tatashcha vAruNaM snAnaM karaNIyaM shivAya vai || 57||
sugandhaM chandanaM dadyAdanyalepAni yatnataH |
sasugandhajalenaiva jaladhArAM prakalpayet || 58||
vedamantraiH ShaDa~NgairvA nAmabhI rudrasa~NkhyayA |
yathAvakAshaM tAM datvA vastreNa mArjayettataH || 59||
pashchAdAchamanaM dadyAttato vastraM samarpayeta |
tilAshchaiva yavA vApi godhUmA mudgamAShakAH || 60||
arpaNIyAH shivAyaivaM mantrairnAnAvidhairapi |
tataH puShpANi deyAni pa~nchAsyAya mahAtmane || 61||
prativaktraM yathAdhyAnaM yathAyogyAbhilAShataH |
kamalaiH shatapatraishcha sha~NkhapuShpaiH paraistathA || 62||
kushapuShpaishcha dhattUrairmandArairdroNasambhavaiH |
tathA cha tulasIpatrairbilvapatrairvisheShataH || 63||
pUjayetparayA bhaktyA sha~NkaraM bhaktavatsalam |
sarvAbhAve bilvapatramarpaNIyaM shivAya vai || 64||
bilvapatrArpaNenaiva sarvapUjA prasidhyati |
tataH sugandhachUrNaM vai vAsitaM tailamuttamam || 65||
arpaNIyaM cha vividhaM shivAya parayA mudA |
tato dhUpaH prakartavyo guggulAgurubhirmudA || 66||
dIpo deyastatastasmai sha~NkarAya ghR^itAplutaH |
arghaM dadyAtpunastasmai mantreNAnena bhaktitaH || 67||
kArayedbhAvato bhaktyA vastreNa mukhamArjanam |
rUpaM dehi yasho dehi bhogaM dehi cha sha~Nkara || 68||
bhuktimuktiphalaM dehi gR^ihItvArghaM namo.astu te |
tato deyaM shivAyaiva naivedyaM vividhaM shubham || 69||
tata AchamanaM prItyA kArayedvAvilambataH |
tataH shivAya tAmbUlaM sA~NgopA~NgaM vidhAya cha || 70||
kuryAdArArtikaM pa~nchavartikAmanusa~NkhyayA |
pAdayoshcha chaturvAraM dviHkR^itvo nAbhimaNDale || 71||
ekakR^itvo mukhe saptakR^itvaH sarvA~Nga eva hi |
tato dhyAnaM yathoktaM vai kR^itvA mantramudIrayet || 72||
yathAsa~NkhyaM yathAj~nAnaM kuryAnmantravidhiM naraH |
gurUpadiShTamArgeNa kR^itvA mantrajapaM sudhIH || 73||
gurUpadiShTamArgeNa kR^itvA mantramudIrayet |
yathAsa~NkhyaM yathAj~nAnaM kuryAnmantravidhiM naraH || 74||
stotrairnAnAvidhaiH prItyA stuvIta vR^iShabhadhvajam |
tataH pradakShiNAM kuryAchChivasya cha shanaiH shanaiH || 75||
namaskArAMstataH kuryAtsAShTA~NgaM vidhivatpumAn |
tataH puShpA~njalirdeyo mantreNAnena bhaktitaH || 76||
sha~NkarAya pareshAya shivasantoShahetave |
aj~nAnAdyadi vA j~nAnAdyadyatpUjAdikaM mayA || 77||
kR^itaM tadastu saphalaM kR^ipayA tava sha~Nkara |
tAvakastvadgataprANastvachchitto.ahaM sadA mR^iDa || 78||
iti vij~nAya gaurIsha bhUtanAtha prasIda me |
bhUmau skhalitapAdAnAM bhUmirevAvalambanam || 79||
tvayi jAtAparAdhAnAM tvameva sharaNaM prabho |
ityAdi bahuvij~naptiM kR^itvA samyagvidhAnataH || 80||
puShpA~njaliM samarpyaiva punaH kuryAnnatiM muhuH |
svasthAnaM gachCha devesha parivArayutaH prabho || 81||
pUjAkAle punarnAtha tvayAgantavyamAdarAt |
iti samprArthya bahushaH sha~NkaraM bhaktavatsalam || 82||
visarjayetsvahR^idaye tadapo mUrdhni vinyaset |
iti proktamasheSheNa munayaH shivapUjanam |
bhuktimuktipradaM chaiva kimanyachChrotumarhatha || 83||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne shivapUjanavarNanaM nAma trayodasho.adhyAyaH || 2\.1\.13||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDaH
\section{2\.1\.14\. chaturdasho.adhyAyaH | shivapUjAvidhAnavarNanam |}
R^iShaya UchuH |
vyAsashiShya mahAbhAga kathaya tvaM pramANataH |
kaiH puShpaiH pUjitaH shambhuH kiM kiM yachChati vai phalam || 1||
sUta uvAcha |
shaunakAdyAshcha R^iShayaH shR^iNutAdarato.akhilam ||
kathayAmyadya suprItyA puShpArpaNavinirNayam | 2||
eSha eva vidhiH pR^iShTo nAradena maharShiNA |
provAcha paramaprItyA puShpArpaNavinirNayam || 3||
brahmovAcha |
kamalairbilvapatraishcha shatapatraistathA punaH |
sha~NkhapuShpaistathA devaM lakShmIkAmo.archayechChivam || 4||
etaishcha lakShasa~NkhyAkaiH pUjitashchedbhavechChivaH |
pApahAnistathA vipra lakShmIH syAnnAtra saMshayaH || 5||
viMshatiH kamalAnAM tu prasthamekamudAhR^itam |
bilvo dalasahasreNa prasthArdhaM paribhAShitam || 6||
shatapatrasahasreNa prasthArdhaM paribhAShitam |
palaiH ShoDashabhiH prasthaH palaM Ta~NkadashasmR^itaH || 7||
anenaiva tu mAnena tulAmAropayedyadA |
sarvAnkAmAnavApnoti niShkAmashchechChivo bhavet || 8||
rAjyasya kAmuko yo vai pArthivAnAM cha pUjayA |
toShayechCha~NkaraM devaM dashakoTyA munIshvarAH || 9||
li~NgaM shivaM tathA puShpamakhaNDaM taNDulaM tathA |
charchitaM chandanenaiva jaladhArAM tathA punaH || 10||
pratirUpaM tathA mantraM bilvIdalamanuttamam |
athavA shatapatraM cha kamalaM vA tathA punaH || 11||
sha~NkhapuShpaistathA proktaM visheSheNa purAtanaiH |
sarvakAmaphalaM divyaM paratrehApi sarvathA || 12||
dhUpaM dIpaM cha naivedyamarghaM chArArtikaM tathA |
pradakShiNAM namaskAraM kShamApanavisarjane || 13||
kR^itvA sA~NgaM tathA bhojyaM kR^itaM yena bhavediha |
tasya vai sarvathA rAjyaM sha~NkaraH pradadAti cha || 14||
pradhAnyakAmuko yo vai tadardhenArchayetpumAn |
kArAgR^ihagato yo vai lakShenaivArchayeddharam || 15||
rogagrasto yadA syAdvai tadardhenArchayechChivam |
kanyAkAmo bhavedyo vai tadardhena shivaM punaH || 16||
vidyAkAmastathA yaH syAttadardhenArchayechChivam |
vANIkAmo bhavedyo vai ghR^itenaivArchayechChivam || 17||
uchchATanArthaM shatrUNAM tanmitenaiva pUjanam |
mAraNe vai tu lakSheNa mohane tu tadardhataH || 18||
sAmantAnAM jaye chaiva koTipUjA prashasyate |
rAj~nAmayutasa~NkhyaM cha vashIkaraNakarmaNi || 19||
yashase cha tathA sa~NkhyA vAhanAdyaiH sahasrikA |
muktikAmo.archayechChambhuM pa~nchakoTyA subhaktitaH || 20||
j~nAnArthI pUjayetkoTyA sha~NkaraM loka sha~Nkaram |
shivadarshanakAmo vai tadardhena prapUjayet || 21||
tathA mR^ityu~njayo jApyaH kAmanAphalarUpataH |
pa~nchalakShA japA yarhi pratyakShaM tu bhavechChivaH || 22||
lakSheNa bhajate kashchid dvitIye jAtisambhavaH |
tR^itIye kAmanAlAbhashchaturthe taM prapashyati || 23||
pa~nchamaM cha yadA lakShaM phalaM yachChatyasaMshayam |
anenaiva tu mantreNa dashalakShe phalaM bhavet || 24||
muktikAmo bhavedyo vai darbhaishcha pUjanaM charet |
lakShasa~NkhyA tu sarvatra j~nAtavyA R^iShisattama || 25||
AyuHkAmo bhavedyo vai dUrvAbhiH pUjanaM charet |
putrakAmo bhavedyo vai dhattUrakusumaishcharet || 26||
raktadaNDashcha dhattUraH pUjane shubhadaH smR^itaH |
agastyakusumaishchaiva pUjakasya mahadyashaH || 27||
bhuktimuktiphalaM tasya tulasyA pUjayedyadi |
arkapuShpaiH pratApashcha kubjakahlArakaistathA || 28||
japAkusumapUjA tu shatrUNAM mR^ityudA smR^itA |
rogochchATanakAnIha karavIrANi vai kramAt || 29||
bandhukairbhUShaNAvAptirjAtyA vAhAnna saMshayaH |
atasIpuShpakairdevaM viShNuvallabhatAmiyAt |||| 30||
shamIpatraistathA muktiH prApyate puruSheNa cha |
mallikAkusumairdattaiH striyaM shubhatarAM shivaH || 31||
yUthikAkusumaiH shastairgR^ihaM naiva vimuchyate |
karNikAraistathA vastrasampattirjAyate nR^iNAm || 32||
nirguNDIkusumairloke mano nirmalatAM vrajet |
vilvapatraistathA lakShaiH sarvAnkAmAnavApnuyAt || 33||
shR^i~NgArahArapuShpaistu vardhate sukhasampadA |
R^itujAtAni puShpANi muktidAni na saMshayaH || 34||
rAjikAkusumAnIha shatrUNAM mR^ityudAni cha |
eShAM lakShaM shive dadyAddadyAchcha vipulaM phalam || 35||
vidyate kusumaM tanna yannaiva shivavallabham |
champakaM ketakaM hitvA tvanyatsarvaM samarpayet || 36||
ataH paraM cha dhAnyAnAM pUjane sha~Nkarasya cha |
pramANaM cha phalaM sarvaM prItyA shR^iNu cha sattama || 37||
tandulAropaNe nR^iNAM lakShmI vR^iddhiH prajAyate |
akhaNDitavidhau vipra samyagbhaktyA shivopari || 38||
ShaTkenaiva tu prasthAnAM tadardhena tathA punaH |
paladvayaM tathA lakShamAnena samudAhR^itam || 39||
pUjAM rudrapradhAnena kR^itvA vastraM susundaram |
shivopari nyasettatra tandulArpaNamuttamam || 40||
upari shrIphalaM tvekaM gandhapuShpAdibhistathA |
ropayitvA cha dhUpAdi kR^itvA pUjAphalaM bhavet |||| 41||
prajApatyadvayaM raupyamAShasa~NkhyA cha dakShiNA |
deyA tadupadeShTre hi shaktyA vA dakShiNA matA || 42||
Adityasa~NkhyayA tatra brAhmaNAnbhojayettataH |
lakShapUjA tathA jAtA sA~Nga~ncha mantrapUrvakam || 43||
shatamaShTottaraM tatra mantre vidhirudAhR^itaH |
tilAnAM cha palaM lakShaM mahApAtakanAshanam || 44||
ekAdashapalaireva lakShamAnamudAhR^itam |
pUrvavatpUjanaM tatra kartavyaM hitakAmyayA || 45||
bhojyA vai brAhmaNAstasmAdatra kAryA nareNa hi |
mahApAtakajaM duHkhaM tatkShaNAnnashyati dhruvam || 46||
yavapUjA tathA proktA lakSheNa paramA shive |
prasthAnAmaShTakaM chaiva tathA prasthArdhakaM punaH || 47||
paladvayayutaM tatra mAnametatpurAtanam |
yavapUjA cha munibhiH svargasaukhyavivardhinI || 48||
prAjApatyaM brAhmaNAnAM kartavyaM cha phalepsubhiH |
godhUmAnnaistathA pUjA prashastA sha~Nkarasya vai || 49||
santatirvardhate tasya yadi lakShAvadhiH kR^itA |
droNArdhena bhavellakShaM vidhAnaM vidhipUrvakam || 50||
mudgAnAM pUjane devaH shivo yachChati vai sukham |
prasthAnAM saptakenaiva prasthArdhenAthavA punaH || 51||
paladvayayutenaiva lakShamuktaM purAtanaiH |
brAhmaNAshcha tathA bhojyA rudrasa~NkhyApramANataH || 52||
priya~NgupUjanAdeva dharmAdhyakShe parAtmani |
dharmArthakAmA vardhante pUjA sarvasukhAvahA || 53||
prasthaikena cha tasyoktaM lakShamekaM purAtanaiH |
brahmabhojaM tathA proktamarkasa~NkhyApramANataH || 54||
rAjikApUjanaM shambhoH shatrormR^ityukaraM smR^itam |
sarShapAnAM tathA lakShaM palairviMshatisa~NkhyayA || 55||
teShAM cha pUjanAdeva shatrormR^ityurudAhR^itaH |
ADhakInAM dalaishchaiva shobhayitvArchayechChivam || 56||
vR^itA gaushcha pradAtavyA balIvardastathaiva cha |
marIchisambhavA pUjA shatrornAshakarI smR^itA || 57||
ADhakInAM dalaishchaiva ra~njayitvArchayechChivam |
nAnAsukhakarI hyeShA pUjA sarvaphalapradA || 58||
dhAnyamAnamiti proktaM mayA te munisattama |
lakShamAnaM tu puShpANAM shR^iNu prItyA munIshvara || 59||
prasthAnAM cha tathA chaikaM sha~NkhapuShpasamudbhavam |
proktaM vyAsena lakShaM hi sUkShmamAnapradarshinA || 60||
prasthairekAdashairjAtilakShamAnaM prakIrtitam |
yUthikAyAstathA mAnaM rAjikAyAstadardhakam || 61||
prasthairviMshatikaishchaiva mallikAmAnamuttamam |
tilapuShpaistathA mAnaM prasthAnnyUnaM tathaiva cha || 62||
tatashcha triguNaM mAnaM karavIrabhave smR^itam |
nirguNDIkusume mAnaM tathaiva kathitaM budhaiH || 63||
karNikAre tathA mAnaM shirIShakusume punaH |
bandhujIve tathA mAnaM prasthAnaM dashakena cha || 64||
ityAdyairvividhairmAnaM dR^iShTvA kuryAchChivArchanam |
sarvakAmasamR^iddhyarthaM muktyarthaM kAmanojjhitaH || 65||
ataH paraM pravakShyAmi dhArApUjAphalaM mahat |
yasya shravaNamAtreNa kalyANaM jAyate nR^iNAm || 66||
vidhAnapUrvakaM pUjAM kR^itvA bhaktyA shivasya vai |
pashchAchcha jaladhArA hi kartavyA bhaktitatparaiH || 67||
jvarapralApashAntyarthaM jaladhArA shubhAvahA |
shatarudriyamantreNa rudrasyaikAdashena tu || 68||
rudrajApyena vA tatra sUktena pauruSheNa vA |
ShaDa~NgenAtha vA tatra mahAmR^ityu~njayena cha || 69||
gAyatryA vA namo.antaishcha nAmabhiH praNavAdibhiH |
mantrairvAthAgamoktaishcha jaladhArAdikaM tathA || 70||
sukhasantAnavR^iddhyarthaM dhArApUjanamuttamam |
nAnAdravyaiH shubhairdivyaiH prItyA sadbhasmadhAriNA || 71||
ghR^itadhArA shive kAryA yAvanmantrasahasrakam |
tadA vaMshasya vistAro jAyate nAtra saMshayaH || 72||
evamayutamantreNa kAryaM vai shivapUjanam |
prameharogashAntyarthaM prApnuyAchcha manepsitam |
ShaNDhatvaM yadAdAtastadA ghR^itasupUjanam |
brahmabhojyaM tathA proktaM prAjApatyaM munIshvaraiH || 73||
kevalaM dugdhadhArA cha tadA kAryA visheShataH |
sharkarAmishritA tatra yadA buddhijaDo bhavet || 74||
tasyA sa~njAyate jIvasadR^ishI buddhiruttamA |
yAvanmantrAyutaM na syAttAvaddhArAprapUjanam || 75||
yadA chochchATanaM dehe jAyate kAraNaM vinA |
yatra kutrApi vA prema duHkhaM cha parivardhitam || 76||
svagR^ihe kalaho nityaM yadA chaiva prajAyate |
taddhArAyAM kR^itAyAM vai sarvaM duHkhaM vilIyate || 77||
shatrUNAM tApanArthaM vai tailadhArA shivopari |
kartavyA suprayatnena kAryasiddhirdhruvaM bhavet || 78||
vAsitenaiva tailena bhogavR^iddhiH prajAyate |
sArShapeNaiva tailena shatrunAsho bhaved dhruvam || 79||
madhunA yakSharAjo vai gachChechcha shivapUjanAt |
dhArA chekShurasasyApi sarvAnandakarI shive || 80||
dhArA ga~NgAjalasyaiva bhuktimuktiphalapradA |
etAH sarvAshcha yAH proktA mR^itya~njayasamudbhavAH || 81||
tatrAyutapramANaM hi kartavyaM tadvidhAnataH |
kartavyaM brAhmaNAnAM cha bhojyaM vai rudrasa~NkhyayA || 82||
etatte sarvamAkhyAtaM yatpR^iShTo.ahaM munIshvara |
etadvai saphalaM loke sarvakAmahitAvaham || 83||
skandomAsahitaM shambhuM sampUjya vidhinA saha |
yatphalaM labhate bhaktyA tadvadAmi yathAshrutam || 84||
atra bhuktvAkhilaM saukhyaM putrapautrAdibhiH shubham |
tato yAti maheshasya lokaM sarvasukhAvaham || 85||
sUryakoTipratIkAshairvimAnaiH sarvakAmagaiH |
rudrakanyAsamAkIrNairgeyavAdyasamanvitaiH || 86||
krIDate shivabhUtashcha yAvadAbhUtasamplavam |
tato mokShamavApnoti vij~nAnaM prApya chAvyayam || 87||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne shivapUjAvidhAnavarNanaM nAma chaturdasho.adhyAyaH || 2\.1\.14||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDeH
\section{2\.1\.15\. pa~nchadasho.adhyAyaH | rudrAvatArAvirbhAvavarNanam |}
nArada uvAcha |
vidhe vidhe mahAbhAga dhanyastvaM surasattama |
shrAvitAdyAdbhutA shaivakathA paramapAvanI || 1||
tatrAdbhutA mahAdivyA li~NgotpattiH shrutA shubhA |
shrutvA yasyAH prabhAvaM cha duHkhanAsho bhavediha || 2||
anantaraM cha yajjAtaM mAhAtmyaM charitaM tathA |
sR^iShTeshchaiva prakAraM cha kathaya tvaM visheShataH || 3||
brahmovAcha |
samyak pR^iShTaM cha bhavatA yajjAtaM tadanantaram |
kathayiShyAmi sa~NkShepAdyathA pUrvaM shrutaM mayA || 4||
antarhite tadA deve shivarUpe sanAtane |
ahaM viShNushcha viprendra adhikaM sukhamAptavAn || 5||
mayA cha viShNunA rUpaM haMsavArAhayostadA |
saMvR^itaM tu tatastAbhyAM lokasargAvanechChayA || 6||
nArada uvAcha |
vidhe brahman mahAprAj~na saMshayo hR^idi me mahAn |
kR^ipAM kR^itvAtulAM shIghraM taM nAshayitumarhasi || 7||
haMsavArAhayo rUpaM yuvAbhyAM cha dhR^itaM katham |
anyadrUpaM vihAyaiva kimatra vada kAraNam || 8||
sUta uvAcha |
ityetadvachanaM shrutvA nAradasya mahAtmanaH |
smR^itvA shivapadAmbhojaM brahmA sAdaramabravIt || 9||
brahmovAcha |
haMsasya chordhvagamane gatirbhavati nishchalA |
tattvAtattvaviveko.asti jaladugdhavibhAgavat || 10||
aj~nAnaj~nAnayostattvaM vivechayati haMsakaH |
haMsarUpaM dhR^itaM tena brahmaNA sR^iShTikAriNA || 11||
viveko naiva labdhashcha yato haMso vyalIyata |
shivasvarUpatattvasya jyotirUpasya nArada || 12||
sR^iShTipravR^ittikAmasya kathaM j~nAnaM prajAyate |
yato labdho viveko.api na mayA haMsarUpiNA || 13||
gamane.adho varAhasya gatirbhavati nishchalA |
dhR^itaM vArAharUpaM hi viShNunA vanachAriNA || 14||
athavA bhavakalpArthaM tadrUpaM hi prakalpitam |
viShNunA cha varAhasya bhuvanAvanakAriNA || 15||
yaddinaM hi samArabhya tadrUpaM dhR^itavAnhariH |
taddinaM pratikalpo.asau kalpo vArAhasa.nj~nakaH || 16||
tadichChA vA yadA jAtA tasya rUpasya dhAraNe |
taddinaM pratikalpo.asau kalpo vArAhasa.nj~nakaH || 17||
iti prashnottaraM dattaM prastutaM shR^iNu nArada |
smR^itvA shivapadAmbhojaM vakShye sR^iShTividhiM mune || 18||
antarhite mahAdeve tvahaM lokapitAmahaH |
tadIyaM vachanaM kartumadhyAyandhyAnatatparaH || 19||
namaskR^itya tadA shambhuM j~nAnaM prApya harestadA |
AnandaM paramaM gatvA sR^iShTiM kartuM mano dadhe || 20||
viShNushchApi tadA tatra praNipatya sadAshivam |
upadishya cha mAM tAta hyantardhAnamupAgataH || 21||
brahmANDAchcha bahirgatvA prApya shambhoranugraham |
vaikuNThanagaraM gatvA tatrovAsa hariH sadA || 22||
ahaM smR^itvA shivaM tatra viShNuM vai sR^iShTikAmyayA |
pUrvaM sR^iShTaM jalaM yachcha tatrA~njalimudAkShipam || 23||
ato.aNDamabhavattatra chaturviMshatisa.nj~nakam |
virADrUpamabhUdvipra jalarUpamapashyataH || 24||
tataH saMshayamApannastapastepe sudAruNam |
dvAdashAbdamahaM tatra viShNudhyAnaparAyaNaH || 25||
tasmiMshcha samaye tAta prAdurbhUto hariH svayam |
mAmuvAcha mahAprItyA mada~NgaM saMspR^ishanmudA || 26||
viShNuruvAcha |
varaM brUhi prasanno.asmi nAdeyo vidyate tava |
brahman shambhuprasAdena sarvaM dAtuM samarthakaH || 27||
brahmovAcha |
yuktametanmahAbhAga datto.ahaM shambhunA cha te |
taduktaM yAchate me.adya dehi viShNo namo.astu te || 28||
virADrUpamidaM hyaNDaM chaturviMshatisa.nj~nakam |
na chaitanyaM bhavatyAdau jaDIbhUtaM pradR^ishyate || 29||
prAdurbhUto bhavAnadya shivAnugrahato hare |
prAptaM sha~NkarasambhUtyA hyaNDaM chaitanyamAvaha || 30||
ityukte cha mahAviShNuH shambhorAj~nAparAyaNaH |
anantarUpamAsthAya pravivesha tadaNDakam || 31||
sahasrashIrShA puruShaH sahasrAkShaH sahasrapAt |
sa bhUmiM sarvataH spR^ittvA tadaNDaM vyAptavAniti || 32||
praviShTe viShNunA tasminnaNDe samyakstutena me |
sachetanamabhUdaNDaM chaturviMshatisa.nj~nakam || 33||
pAtAlAdisamArabhya satyalokAdhipaH svayam |
rAjate sma haristatra vairAjaH puruShaH prabhuH || 34||
kailAsanagaraM ramyaM sarvoparivirAjitam |
nivAsArthaM nijasyaiva pa~nchavaktrashchakAra ha || 35||
brahmANDasya tathA nAshe vaikuNThasya cha tasya cha |
kadAchideva devarShe nAsho nAsti tayoriha || 36||
satyaM padamupAshritya sthito.ahaM munisattama |
sR^iShTikAmo.abhavaM tAta mahAdevAj~nayA hyaham || 37||
sisR^ikShoratha me prAdurabhavatpApasargakaH |
avidyApa~nchakastAta buddhipUrvastamopamaH | 38||
tataH prasannachitto.ahamasR^ijaM sthAvarAbhidham |
mukhyasargaM cha niHsa~NgamadhyAyaM shambhushAsanAt || 39||
taM dR^iShTvA me sisR^ikShoshcha j~nAtvA sAdhakamAtmanaH |
sargo.avartata duHkhADhyastiryaksrotA na sAdhakaH || 40||
taM chAsAdhakamAj~nAya punashchintayatashcha me |
abhavatsAttvikaH sarga UrdhvasrotA iti drutam || 41||
devasargaH pratikhyAtaH satyo.atIva sukhAvahaH |
tamapyasAdhakaM matvA.achintayaM prabhumAtmanaH || 42||
prAdurAsIttataH sargo rAjasaH sha~NkarAj~nayA |
arvAksrotA iti khyAto mAnuShaH parasAdhakaH || 43||
mahAdevAj~nayA sargastato bhUtAdiko.abhavat |
iti pa~nchavidhA sR^iShTiH pravR^ittA vai kR^itA mayA || 44||
trayaH sargAH prakR^ityAshcha brahmaNaH parikIrtitAH |
tatrAdyo mahataH sargo dvitIyaH sUkShmabhautikaH || 45||
vaikArikastR^itIyashcha ityete prAkR^itAstrayaH |
evaM chAShTavidhAH sargAH prAkR^itairvaikR^itaiH saha || 46||
kaumAro navamaH proktaH prAkR^ito vaikR^itashcha saH |
eShAmavAntaro bhedo mayA vaktuM na shakyate || 47||
alpatvAdupayogasya vachmi sargaM dvijAtmakam |
kaumAraH sanakAdInAM yatra sargo mahAnabhUt || 48||
sanakAdyAH sutA me hi mAnasA brahmasammitAH |
mahAvairAgyasampannA abhavanpa~ncha suvratAH || 49||
mayAj~naptA api cha te saMsAravimukhA budhAH |
shivadhyAnaikamanaso na sR^iShTau chakrire matim || 50||
pratyuttaraM cha tairdattaM shrutvAhaM munisattama |
akArShaM krodhamatyugraM mohamAptashcha nArada || 51||
kruddhasya mohitasyAtha vihvalasya mune mama |
krodhena khalu netrAbhyAM prApatannashrubindavaH |||| 52||
tasminnavasare tatra smR^itena manasA mayA |
prabodhito.ahaM tvaritamAgatena hi viShNunA || 53||
tapaH kuru shivasyeti hariNA shikShito.apyaham |
tapo.akArI mahad ghoraM paramaM munisattama || 54||
tapasyatashcha sR^iShTyarthaM bhruvorghrANasya madhyataH |
avimuktAbhidhAddeshAtsvakIyAnme visheShataH || 55||
trimUrtInAM maheshasya prAdurAsId ghR^iNAnidhiH |
arddhanArIshvaro bhUtvA pUrNAMshaH sakaleshvaraH || 56||
tamajaM sha~NkaraM sAkShAttejorAshimumApatim |
sarvaj~naM sarvakartAraM nIlalohitasa.nj~nakam || 57||
dR^iShTvA natvA mahAbhaktyA stutvAhaM tu praharShitaH |
avochaM devadeveshaM sR^ija tvaM vividhAH prajAH || 58||
shrutvA mama vachaH so.atha devadevo maheshvaraH |
sasarja svAtmanastulyAn rudro rudragaNAnbahUna || 59||
avochaM punareveshaM mahArudraM maheshvaram |
janmamR^ityubhayAviShTAH sR^ija deva prajA iti || 60||
evaM shrutvA mahAdevo madvachaH karuNAnidhiH |
prahasyovAcha mAM sadyaH prahasya munisattama || 61||
mahAdeva uvAcha |
janmamR^ityubhayAviShTA nAhaM srakShye prajA vidhe |
ashobhanAH karmavashA nimagnA duHkhavAridhau || 62||
ahaM duHkhodadhau magnA uddhariShyAmi cha prajAH |
samyag j~nAnapradAnena gurumUrtiparigrahaH || 63||
tvameva sR^ija duHkhADhyAH prajAH sarvAH prajApate |
madAj~nayA na baddhastvaM mAyayA sambhaviShyasi || 64||
brahmovAcha |
ityuktvA mAM sa bhagavAnsushrImAnnIlalohitaH |
sagaNaH pashyato me hi drutamantardadhe haraH || 65||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupakrame rudrAvatArAvirbhAvavarNanaM nAma pa~nchadasho.adhyAyaH || 2\.1\.15||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDeH
\section{2\.1\.16\. ShoDasho.adhyAyaH | brahmanAradasaMvAde sR^iShTivarNanam |}
brahmovAcha |
shabdAdIni cha bhUtAni pa~nchIkR^itvAhamAtmanA |
tebhyaH sthUlaM nabho vAyuM vahniM chaiva jalaM mahIm || 1||
parvatAMshcha samudrAMshcha vR^ikShAdInapi nArada |
kalAdiyugaparyantAnkAlAnanyAnavAsR^ijam || 2||
sR^iShTyantAnaparAMshchApi nAhaM tuShTo.abhavaM mune |
tato dhyAtvA shivaM sAmbaM sAdhakAnasR^ijaM mune || 3||
marIchiM cha svanetrAbhyAM hR^idayAd bhR^igumeva cha |
shiraso.a~NgirasaM vyAnAtpulahaM munisattamam || 4||
udAnAchcha pulastyaM hi vasiShThaM cha samAnataH |
kratuM tvapAnAchChrotrAbhyAmatriM dakShaM cha prANataH || 5||
asR^ijaM tvAM tadotsa~NgAchChAyAyAH kardamaM munim |
sa~NkalpAdasR^ijaM dharmaM sarvasAdhanasAdhanam || 6||
evametAnahaM sR^iShTvA kR^itArthaH sAdhakottamAn |
abhavaM munishArdUla mahAdevaprasAdataH || 7||
tato madAj~nayA tAta dharmaH sa~NkalpasambhavaH |
mAnavaM rUpamApannaH sAdhakaistu pravartitaH || 8||
tato.asR^ijaM svagAtrebhyo vividhebhyo.amitAnsutAn |
surAsurAdikAMstebhyo dattvA tAM tAM tanuM mune || 9||
tato.ahaM sha~NkareNAtha prerito.antargatena ha |
dvidhA kR^itvAtmano dehaM dvirUpashchAbhavaM mune || 10||
ardhena nArI puruShashchArdhena santato mune |
sa tasyAmasR^ijad dvandvaM sarvasAdhanamuttamam | 11||
svAyambhuvo manustatra puruShaH parasAdhanam |
shatarUpAbhidhA nArI yoginI sA tapasvinI || 12||
sA punarmanunA tena gR^ihItAtIva shobhanA |
vivAhavidhinA tAtAsR^ijatsargaM samaithunam || 13||
tasyAM tena samutpannastanayashcha priyavrataH |
tathaivottAnapAdashcha tathA kanyAtrayaM punaH || 14||
AkUtirdevahUtishcha prasUtiriti vishrutAH |
AkUtiM ruchaye prAdAtkardamAya tu madhyamAm || 15||
dadau prasUtiM dakShAyottAnapAdAnujAM sutAm |
tAsAM prasUtiprasavaiH sarvaM vyAptaM charAcharam || 16||
AkUtyAM cha rucheshchAbhUd dvandvaM yaj~nashcha dakShiNA |
yaj~nasya jaj~nire putrA dakShiNAyAM cha dvAdasha || 17||
devahUtyAM kardamAchcha bahvyo jAtAH sutA mune |
dakShAjjAtAshchatasrashcha tathA putryashcha viMshatiH || 18||
dharmAya dattA dakSheNa shraddhAdyAstu trayodasha |
shR^iNu tAsAM cha nAmAni dharmastrINAM munIshvara || 19||
shraddhA lakShmIrdhR^itistuShTiH puShTirmedhA tathA kriyA |
buddhirlajjA vasuH shAntiH siddhiH kIrtistrayodasha || 20||
tAbhyAM shiShTA yavIyasya ekAdasha sulochanAH |
khyAtiH satpathasambhUtiH smR^itiH prItiH kShamA tathA || 21||
sannatishchAnurUpA cha UrjA svAhA svadhA tathA |
bhR^igurbhavo marIchishcha tathA chaivA~NgirA muniH || 22||
pulastyaH pulahashchaiva kratushcharShivarastathA |
atrirvasiShTho vahnishcha pitarashcha yathAkramam || 23||
khyAtAstA jagR^ihuH kanyA bhR^igvAdyAH sAdhakA varAH |
tataHsampUritaM sarvaM trailokyaM sacharAcharam || 24||
evaM karmAnurUpeNa prANinAmambikApateH |
Aj~nayA bahavo jAtA asa~NkhyAtA dvijarShabhAH || 25||
kalpabhedena dakShasya ShaShTiH kanyAH prakIrtitAH |
tAsAM dasha cha dharmAya shashine saptaviMshatim || 26||
vidhinA dattavAndakShaH kashyapAya trayodasha |
chatasraH pararUpAya dadau tArkShyAya nArada || 27||
bhR^igva~NgiraH kR^ishAshvebhyo dve dve kanye cha dattavAn |
tAbhyastebhyastu sa~njAtA bahvI sR^iShTishcharAcharA || 28||
trayodashamitAstasmai kashyapAya mahAtmane |
dattA dakSheNa yAH kanyA vidhivanmunisattama || 29||
tAsAM prasUtibhirvyAptaM trailokyaM sacharAcharam |
sthAvaraM ja~NgamaM chaiva shUnyaM naiva tu ki~nchana || 30||
devAshcha R^iShayashchaiva daityAshchaiva prajaj~nire |
vR^ikShAshcha pakShiNashchaiva sarve parvatavIrudhaH || 31||
dakShakanyAprasUtaishcha vyAptamevaM charAcharam |
pAtAlatalamArabhya satyalokAvadhi dhruvam || 32||
brahmANDaM sakalaM vyAptaM shUnyaM naiva kadAchana |
evaM sR^iShTiH kR^itA samyagbrahmaNA shambhushAsanAt || 33||
satI nAma trishUlAgre sadA rudreNa rakShitA |
tapo.arthaM nirmitA pUrvaM shambhunA sarvaviShNunA || 34||
saiva dakShAtsamudbhUtA lokakAryArthameva cha |
lIlAM chakAra bahusho bhaktoddharaNahetave || 35||
vAmA~Ngo yasya vaikuNTho dakShiNA~Ngo.ahameva cha |
rudro hR^idayajo yasya trividhastu shivaH smR^itaH || 36||
ahaM viShNushcha rudrashcha guNAstraya udAhR^itAH |
svayaM sadA nirguNashcha parabrahmAvyayaH shivaH || 37||
viShNuH sattvaM rajo.ahaM cha tamo rudra udAhR^itaH |
lokAchArata ityevaM nAmato vastuto.anyathA || 38||
antastamo bahiH sattvo viShNU rudrastathA mataH |
antaH sattvastamo bAhyo rajo.ahaM sarvathA mune || 39||
rAjasI cha surA devI sattvarUpA tu sA satI |
lakShmIstamomayI j~neyA trirUpA cha shivA parA || 40||
evaM shivA satI bhUtvA sha~NkareNa vivAhitA |
pituryaj~ne tanuM tyaktvA nAdarAt svapadaM yayau || 41||
punashcha pArvatI jAtA devaprArthanayA shivA |
tapaH kR^itvA suvipulaM punaH shivamupAgatA || 42||
tasya nAmAnyanekAni jAtAni cha munIshvara |
kAlikA chaNDikA bhadrA chAmuNDA vijayA jayA || 43||
jayantI bhadrakAlI cha durgA bhagavatIti cha |
kAmAkhyA kAmadA hyambA mR^iDAnI sarvama~NgalA || 44||
nAmadheyAnyanekAni bhuktimuktipradAni cha |
guNakarmAnurUpANi prAyashastatra pArvatI || 45||
guNamayyastathA devyo devA guNamayAstrayaH |
militvA vividhaM sR^iShTeshchakruste kAryamuttamam || 46||
evaM sR^iShTiprakAraste varNito munisattama |
shivAj~nayA virachito brahmANDasya mayAkhilaH || 47||
paraM brahma shivaH proktastasya rUpAstrayaH surAH |
ahaM viShNushcha rudrashcha guNabhedAnurUpataH || 48||
shivayA ramate svairaM shivaloke manorame |
svatantraH paramAtmA hi nirguNaH saguNo.api vai || 49||
tasya pUrNAvatAro hi rudraH sAkShAchChivaH smR^itaH |
kailAse bhavanaM ramyaM pa~nchavaktrashchakAra ha |
brahmANDasya tathA nAshe tasya nAsho.asti vai na hi || 50||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupakrame brahmanAradasaMvAde sR^iShTivarNanaM nAma ShoDasho.adhyAyaH || 2\.1\.16||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDeH
\section{2\.1\.17\. saptadasho.adhyAyaH | guNanidhicharitravarNanam |}
sUta uvAcha |
ityAkarNya vachastasya brahmaNaH sa tu nAradaH |
punaH paprachCha taM natvA vinayena munIshvarAH || 1||
nArada uvAcha |
kadA gato hi kailAsaM sha~Nkaro bhaktavatsalaH |
kva vA sakhitvaM tasyAsIt kubereNa mahAtmanA || 2||
kiM chakAra harastatra paripUrNaH shivAkR^itiH |
etatsarvaM samAchakShva paraM kautUhalaM mama || 3||
brahmovAcha |
shR^iNu nArada vakShyAmi charitaM shashimaulinaH |
yathA jagAma kailAsaM sakhitvaM dhanadasya cha || 4||
asIt kAmpilyanagare somayAjikulodbhavaH |
dIkShito yaj~nadattAkhyo yaj~navidyAvishAradaH || 5||
vedavedA~NgavitprAj~no vedAntAdiShu dakShiNaH |
rAjamAnyo.atha bahudhA vadAnyaH kIrtibhAjanaH || 6||
agnishushrUShaNarato vedAdhyayanatatparaH |
sundaro ramaNIyA~NgashchandrabimbasamAkR^itiH || 7||
AsId guNanidhirnAma dIkShitasyAsya vai sutaH |
kR^itopanayanaH so.aShTau vidyAM jagrAha bhUrishaH ||
atha pitrAnabhij~nAto dyUtakarmarato.abhavat | 8||
AdAyAdAya bahusho dhanaM mAtuH sakAshataH |
samadAd dyUtakArebhyo maitrIM taishcha chakAra saH || 9||
santyaktabrAhmaNAchAraH sandhyAsnAnaparA~NmukhaH |
nindako vedashAstrANAM devabrAhmaNanindakaH || 10||
smR^ityAchAravihInastu gItavAdyavinodabhAk |
naTapAkhaNDabhANDaistu baddhapremaparamparaH || 11||
prerito.api jananyA sa na yayau piturantikam |
gR^ihakAryAntaravyApto dIkShito dIkShitAyinIm || 12||
yadA yadaiva tAM pR^ichChedaye guNanidhiH sutaH |
na dR^ishyate mayA gehe kalyANi vidadhAti kim || 13||
tadA tadeti sA brUyAdidAnIM sa bahirgataH |
snAtvA samarchya vai devAnetAvantamanehasam || 14||
adhItyAdhyayanArthaM sa dvitrairmitraiH samaM yayau |
ekaputreti tanmAtA pratArayati dIkShitam || 15||
na tatkarma cha tadvR^ittaM ki~nchidvetti sa dIkShitaH |
sarvaM keshAntakarmAsya chakre varShe.atha ShoDashe || 16||
atho sa dIkShito yaj~nadattaH putrasya tasya cha |
gR^ihyoktena vidhAnena pANigrAhamakArayam || 17||
pratyahaM tasya jananI sutaM guNanidhiM mR^idu |
shAsti snehArdrahR^idayA hyupaveshya sma nArada || 18||
krodhanaste.asti tanaya sa mahAtmA pitetyalam |
yadi j~nAsyati te vR^ittaM tvAM cha mAM tADayiShyati || 19||
AchChAdayAmi te nityaM pituragre kucheShTitam |
lokamAnyo.asti te tAtaH sadAchArairna vai dhanaiH || 20||
brAhmaNAnAM dhanaM tAta sadvidyA sAdhusa~NgamaH |
kimarthaM na karoShi tvaM svaruchiM prItamAnasaH || 21||
sachChrotriyAste.anUchAnA dIkShitAHsomayAjinaH |
iti rUDhimiha prAptAstava pUrvapitAmahAH || 22||
tyaktvA durvR^ittasaMsargaM sAdhusa~Ngarato bhava |
sadvidyAsu mano dhehi brAhmaNAchAramAchara || 23||
tAtAnurUpo rUpeNa yashasA kulashIlataH |
tato na trapase kiM naH tyaja durvR^ittatAM svakAm || 24||
UnaviMshatiko.asi tvameShA ShoDashavArShikI |
etAM saMvR^iNu sadvR^ittAM pitR^ibhaktiyuto bhava || 25||
shvashuro.api hi te mAnyaH sarvatra guNashIlataH |
tato na trapase kiM naH tyaja durvR^ittatAM suta || 26||
mAtulAste.atulAH putra vidyAshIlakulAdibhiH |
tebhyo.api na bibheShi tvaM shuddho.asyubhayavaMshataH || 27||
pashyaitAnprativeshmasthAnbrAhmaNAnAM kumArakAn |
gR^ihe.api shiShyAnpashyaitAnpituste vinayochitAn || 28||
rAjApi shroShyati yadA tava dushcheShTitaM suta |
shraddhAM vihAya te tAte vR^ittilopaM kariShyati || 29||
bAlacheShTitamevaitad vadantyadyApi te janAH |
anantaraM hariShyanti yuktAM dIkShitatAmiha || 30||
sarve.apyAkShArayiShyanti tava tAtaM cha mAmapi |
mAtushcharitraM tanayo dhatte durbhAShaNairiti || 31||
pitApi te na pApIyA~nChrutismR^itipathAnugaH |
tada~NghrilInamanaso mama sAkShI maheshvaraH || 32||
na chartusnAtayApIha mukhaM duShTasya vIkShitam |
aho balIyAnsa vidhiryena jAto bhavAniti || 33||
pratikShaNaM jananyeti shikShyamANo.atidurmatiH |
na tatyAja cha taddharmaM durbodho vyasanI yataH || 34||
mR^igayAmadyapaishunyAnR^itachauryadurodaraiH |
sa vAradArairvyasanairebhiH ko.atra na khaNDitaH || 35||
yadyanmadhyagR^ihe pashyettattannItvA sudurmatiH |
arpayed dyUtakArANAM sakupyaM vasanAdikam || 36||
nyastAM ratnamayIM gehe karasya piturUrmikAm |
chorayitvaikadAdAya durodarakare.arpayat || 37||
dIkShitena parij~nAto daivAd dyUtakR^itaH kare |
uvAcha dIkShitastaM cha kuto labdhA tvayormikA || 38||
pR^iShTastenAtha nirbandhAdasakR^ittamuvAcha saH |
mAmAkShipasi viprochchaiH kiM mayA chauryakarmaNA || 39||
labdhA mudrA tvadIyena putreNaiva samarpitA |
mama mAturhi pUrvedyurjitvA nIto hi shATakaH || 40||
na kevalaM mamaivaitada~NgulIyaM samarpitam |
anyeShAM dyUtakartR^INAM bhUri tenArpitaM vasu || 41||
ratnakupyadukUlAni bhR^i~NgAraprabhR^itIni cha |
bhAjanAni vichitrANi kAMsyatAmramayAni cha || 42||
nagnIkR^itya pratidinaM badhyate dyUtakAribhiH |
na tena sadR^ishaH kashchidAkShiko bhUmimaNDale || 43||
adyAvadhi tvayA vipra durodarashiromaNiH |
kathaM nAj~nAyi tanayo.avinayAnayakovidaH || 44||
iti shrutvA trapAbhAravinamratarakandharaH |
prAvR^itya vAsasA mauliM prAvishannijamandiram || 45||
mahApativratAmasya patnIM provAcha tAmatha |
sa dIkShito yaj~nadattaH shrautakarmaparAyaNaH || 46||
yaj~nadatta uvAcha |
dIkShitAyani kutrAsti dhUrto guNanidhiH sutaH |
atha tiShThatu kiM tena kva sA mama shubhormikA |||| 47||
a~NgodvartanakAle yA tvayA me.a~Ngulito hR^itA |
sA tvaM ratnamayIM shIghraM tAmAnIya prayachCha me || 48||
iti shrutvAtha tadvAkyaM bhItA sA dIkShitAyanI |
provAcha snAnamadhyAhnIM kriyAM niShpAdayantyatha || 49||
vyagrAsmi devapUjArthamupahArAdikarmaNi |
samayo.ayamatikrAmedatithInAM priyAtithe || 50||
idAnImeva pakvAnnakaraNavyagrayA mayA |
sthApitA bhAjane kvApi vismR^iteti na vedmyaham || 51||
dIkShita uvAcha |
haM he.asatputrajanani nityaM satyaprabhAShiNi |
yadA yadA tvAM sampR^ichChe tanayaH kva gatastviti || 52||
tadA tadeti tvaM brUyAnnAthedAnIM sa nirgataH |
adhItyAdhyayanArthaM cha dvitrairmitraiH sayugbahiH || 53||
kutaste shATakaH patni mA~njiShTho yo mayArpitaH |
lambate yo.anishaM dhAmni tathyaM brUhi bhayaM tyaja || 54||
sAmprataM nekShyate so.api bhR^i~NgAro maNimaNDitaH |
paTTasUtramayI sApi tripaTI yA mayArpitA || 55||
kva dAkShiNAtyaM tatkAMsyaM gauDI tAmraghaTI kva sA |
nAgadantamayI sA kva sukhakautukama~nchikA || 56||
kva sA parvatadeshIyA chandrakAntirivAdbhutA |
dIpakavyagrahastAgrAla~NkR^itA shAlabha~njikA || 57||
kiM bahUktena kulaje tubhyaM kupyAmyahaM vR^ithA |
tadAbhyavahariShye.ahamupayaMsyAmyahaM yadA || 58||
anapatyo.asmi tenAhaM duShTena kuladUShiNA |
uttiShThAnaya pAthastvaM tasmai dadyAM tilA~njalim || 59||
aputratvaM varaM nR^iNAM kuputrAtkulapAMsanAt |
tyajedekaM kulasyArthe nItireShA sanAtanI || 60||
snAtvA nityavidhiM kR^itvA tasminnevAhni kasyachit |
shrotriyasya sutAM prApya pANiM jagrAha dIkShitaH || 61||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne guNanidhicharitravarNanaM nAma saptadasho.adhyAyaH || 2\.1\.17||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDeH
\section{2\.1\.18\. aShTAdasho.adhyAyaH | kailAshagamanopAkhyAne guNanidhisadgativarNanam |}
brahmovAcha |
shrutvA tathA sa vR^ittAntaM prAktanaM svaM vinindya cha |
kA~nchiddishaM samAlokya niryayau dIkShitA~NgajaH || 1||
kiyachchiraM tato gatvA yaj~nadattAtmajaH sa hi |
duShTo guNanidhistasthau gatotsAho visarjitaH || 2||
chintAmavApa mahatIM kva yAmi karavANi kim |
nAhamabhyastavidyo.asmi na chaivAtidhano.asmyaham || 3||
deshAntare yasya dhanaM sa sadyaH sukhamedhate |
bhayamasti dhane chaurAtsa vighnaH sarvato bhavaH || 4||
yAjakasya kule janma kathaM me vyasanaM mahat |
aho balIyAnhi vidhirbhAvi karmAnusandhayet || 5||
bhikShituM nAdhigachChAmi na me parichitaH kvachit |
na cha pArshve dhanaM ki~nchitkimatra sharaNaM bhavet || 6||
sadAnabhyudite bhAnau prasUrme miShTabhojanam |
dadyAdadyAtra kaM yAche na cheha jananI mama || 7||
brahmovAcha |
iti chintayatastasya bahushastatra nArada |
atidInaM tarormUle bhAnurastAchalaM gataH || 8||
etasminneva samaye kashchinmAheshvaro naraH |
sahopahArAnAdAya nagarAd bahirabhyagAt || 9||
nAnAvidhAnmahAdivyAnsvajanaiH parivAritaH |
samabhyarchitumIshAnaM shivarAtrAvupoShitaH || 10||
shivAlayaM pravishyAtha sa bhaktaH shivasaktadhIH |
yathochitaM suchittena pUjayAmAsa sha~Nkaram || 11||
pakvAnnagandhamAghrAya yaj~nadattAtmajo dvijaH |
pitR^ityakto mAtR^ihInaH kShudhitaH sa tamanvagAt || 12||
idamannaM mayA grAhyaM shivAyopakR^itaM nishi |
supte shaivajane daivAtsarvasminvividhaM mahat || 13||
ityAshAmavalambyAtha dvAri shambhorupAvishat |
dadarsha cha mahApUjAM tena bhaktena nirmitAm || 14||
vidhAya nR^ityagItAdi bhaktAH suptAH kShaNe yadA |
naivedyaM sa tadAdAtuM bhargAgAraM vivesha ha || 15||
dIpaM mandaprabhaM dR^iShTvA pakvAnnavIkShaNAya saH |
nijachailA~nchalAdvartiM kR^itvA dIpaM prakAshya cha || 16||
yaj~nadattAtmajaH so.atha shivanaivedyamAdarAt |
jagrAha sahasA prItyA pakvAnnaM bahushastataH || 17||
tataH pakvAnnamAdAya tvaritaM gachChato bahiH |
tasya pAdatalAghAtAtprasuptaH ko.apyabudhyata || 18||
ko.ayaM ko.ayaM tvarApanno gR^ihyatAM gR^ihyatAmasau |
iti chukrosha sa jano girA bhayamahochchayA || 19||
yAvadbhayAtsamAgatya tAvatsa purarakShakaiH |
palAyamAno nihataH kShaNAdandhatvamAgataH || 20||
abhakShayachcha naivedyaM yaj~nadattAtmajo mune |
shivAnugrahato nUnaM bhAvipuNyabalAnna saH || 21||
mR^ito baddhaH samAgatya pAshamudgarapANibhiH |
ninIShubhiH saMyamanIM yAmyaiH sa vikaTairbhaTaiH || 22||
tAvatpAriShadAH prAptAH ki~NkiNIjAlamAlinaH |
divyaM vimAnamAdAya taM netuM shUlapANayaH || 23||
shivagaNA UchuH |
mu~nchatainaM dvijaM yAmyA gaNAH paramadhArmikam |
daNDayogyo na vipro.asau dagdhaH sarvAghasa~nchayaH || 24||
ityAkarNyavachaste hi yamarAjagaNAstataH |
mahAdevagaNAnAhurbabhUvushchakitA bhR^isham || 25||
shambhorgaNAnathAlokya bhItaistairyamaki~NkaraiH |
avAdi praNatairitthaM durvR^itto.ayaM gaNA dvijaH || 26||
yamagaNA UchuH |
kulAchAraM pratIryyaiSha pitrorvAkyaparA~NmukhaH |
satyashauchaparibhraShTaH sandhyAsnAnavivarjitaH || 27||
AstAM dUre.asya karmANi shivanirmAlyala~NghakaH |
pratyakShato.atra vIkShadhvamaspR^ishyo.ayaM bhavAdR^ishAm || 28||
shivanirmAlyabhoktAraH shivanirmAlyala~NghakAH |
shivanirmAlyadAtAraH sparshasteShAM hyapuNyakR^it || 29||
viShamAlokya vA peyaM shreyo vA sparshanaM param |
sevitavyaM shivasvaM na prANaiH kaNThagatairapi || 30||
yUyaM pramANaM dharmeShu yathA na cha tathA vayam |
asti cheddharmalesho.asya gaNAstaM shR^iNumo vayam || 31||
itthaM tadvAkyamAkarNya yAmyAnAM shivaki~NkarAH |
smR^itvA shivapadAmbhojaM prochuH pAriShadAstu tAn || 32||
shivaki~NkarA UchuH |
ki~NkarAH shivadharmA ye sUkShmAste tu bhavAdR^ishaiH |
sthUlalakShyaiH kathaM lakShyA lakShyA ye sUkShmadR^iShTibhiH || 33||
anenAnenasA karma yatkR^itaM shR^iNuteha tat |
yaj~nadattAtmajenAtha sAvadhAnatayA gaNAH || 34||
patantI li~Ngashirasi dIpachChAyA nivAritA |
svachailA~nchalato.anena dattvA dIpadashAM nishi || 35||
aparo.api paro dharmo jAtastatrAsya ki~NkarAH |
shR^iNvataH shivanAmAni prasa~NgAdapi gR^ihyatAm || 36||
bhaktena vidhinA pUjA kriyamANA nirIkShitA |
upoShitena bhUtAyAmanena sthirachetasA || 37||
shivalokamayaM hyadya gantAsmAbhiH sahaiva tu |
ka~nchitkAlaM mahAbhogAnkariShyati shivAnugaH || 38||
kali~NgarAjo bhavitA tato nirdhUtakalmaShaH |
eSha dvijavaro nUnaM shivapriyataro yataH || 39||
anyatki~nchinna vaktavyaM yUyaM yAta yathAgatam |
yamadUtAH svalokaM tu suprasannena chetasA || 40||
brahmovAcha |
ityAkarNya vachasteShAM yamadUtA munIshvara |
yathAgataM yayuH sarve yamalokaM parA~NmukhAH || 41||
sarvaM nivedayAmAsuH shamanAya gaNA mune |
tadvR^ittamAditaH proktaM shambhudUtaishcha dharmataH || 42||
dharmarAja uvAcha |
sarve shR^iNuta madvAkyaM sAvadhAnatayA gaNAH |
tadeva prItyA kuruta machChAsanapuraHsaram || 43||
ye tripuNDradharA loke vibhUtyA sitayA gaNAH |
te sarve parihartavyA nAnetavyAH kadAchana || 44||
uddhUlanakarA ye hi vibhUtyA sitayA gaNAH |
te sarve parihartavyA nAnetavyAH kadAchana || 45||
shivaveshatayA loke yena kenApi hetunA |
te sarve parihartavyA nAnetavyAH kadAchana || 46||
ye rudrAkShadharA loke jaTAdhAriNa eva ye |
te sarve parihartavyA nAnetavyAH kadAchana || 47||
upajIvanahetoshcha shivaveshadharA hi ye |
te sarve parihartavyA nAnetavyAH kadAchana |||| 48||
dambhenApi ChalenApi shivaveshadharA hi ye |
te sarve parihartavyA nAnetavyAH kadAchana || 49||
evamAj~nApayAmAsa sa yamo nijaki~NkarAn |
matvA tatheti te sarve tUShNImAsa~nChuchismitAH || 50||
brahmovAcha |
pArShadairyamadUtebhyo mochitastviti sa dvijaH |
shivalokaM jagAmAshu tairgaNaiH shuchimAnasaH || 51||
tatra bhuktvAkhilAnbhogAnsaMsevya cha shivAshivau |
arindamasya tanayaH kali~NgAdhipaterabhUt || 52||
dama ityabhidhAno.abhUchChivasevAparAyaNaH |
bAlo.api shishubhiH sAkaM shivabhaktiM chakAra saH || 53||
kramAdrAjyamavApAtha pitaryuparate yuvA |
prItyA pravartayAmAsa shivadharmAMshcha sarvashaH || 54||
nAnyaM dharmaM sa jAnAti durdamo bhUpatirdamaH |
shivAlayeShu sarveShu dIpadAnAdR^ite dvija || 55||
grAmAdhIshAnsamAhUya sarvAnsa viShayasthitAn |
itthamAj~nApayAmAsa dIpA deyAH shivAlaye || 56||
anyathA satyamevedaM sa me daNDyo bhaviShyati |
dIpadAnAchChivastuShTo bhavatIti shrutIritam || 57||
yasya yasyAbhito grAmaM yAvantashcha shivAlayAH |
tatra tatra sadA dIpo dyotanIyo.avichAritam || 58||
mamAj~nAbha~NgadoSheNa shirashChetsyAmyasaMshayam |
iti tadbhayato dIpA dIptAH pratishivAlayam || 59||
anenaiva sa dharmeNa yAvajjIvaM damo nR^ipaH |
dharmarddhiM mahatIM prApya kAladharmavashaM gataH || 60||
sa dIpavAsanAyogAd bahUndIpAnpradIpya vai |
alakAyAH patirabhUdratnadIpashikhAshrayaH || 61||
evaM phalati kAlena shive.alpamapi yatkR^itam |
iti j~nAtvA shive kAryaM bhajanaM susukhArthibhiH || 62||
kva sa dIkShitadAyAdaH sarvadharmAratiH sadA |
shivAlaye daivayogAdyAtashchorayituM vasu ||
svArthadIpadashodyotali~NgamaulitamoharaH | 63||
kali~NgaviShaye rAjyaM prApto dharmaratiM sadA |
shivAlaye samuddIpya dIpAnprAgvAsanodayAt || 64||
kvaiShA dikpAlapadavI munIshvara vilokaya |
manuShyadharmiNAnena sAmprataM yeha bhujyate || 65||
iti proktaM guNanidheryaj~nadattAtmajasya hi |
charitaM shivasantoShaM shR^iNvatAM sarvakAmadam || 66||
sarvadevashivenAsau sakhitvaM cha yatheyivAn |
tadapyekamanA bhUtvA shR^iNu tAta bravImi te || 67||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne kailAsagamanopAkhyAne guNanidhisadgativarNanaM nAmAShTAdasho.adhyAyaH || 2\.1\.18||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDeH
\section{2\.1\.19\. ekonaviMsho.adhyAyaH | kailAsagamanopAkhyAne kuberasya shivamitratvavarNanam |}
brahmovAcha |
pAdme kalpe mama purA brahmaNo mAnasAtsutAt |
pulastyAdvishravA jaj~ne tasya vaishravaNaH sutaH || 1||
teneyamalakA bhuktA purI vishvakR^itA kR^itA |
ArAdhya tryambakaM devamatyugratapasA purA || 2||
vyatIte tatra kalpe vai pravR^itte meghavAhane |
yAj~nadattirasau shrImAn tapastepe suduHsaham || 3||
bhaktiprabhAvaM vij~nAya shambhostaddIpamAtrataH |
purA purAreH samprApya kAshikAM chitprakAshikAm || 4||
shivaikAdashamudbodhya chittaratnapradIpakaiH |
ananyabhaktisnehADhyastanmayo dhyAnanishchalaH || 5||
shivaikyaM sumahApAtraM tapo.agniparibR^iMhitam |
kAmakrodhamahAvighnapata~NgAghAtavarjitam || 6||
prANasaMrodhanirvAtaM nirmalaM nirmalekShaNAt |
saMsthApya shAmbhavaM li~NgaM sadbhAvakusumArchitam || 7||
tAvattatApa sa tapastvagasthiparisheShitam |
yAvad babhUva tadvarShma varShANAmayutaM shatam || 8||
tataH saha vishAlAkShyA devo vishveshvaraH svayam |
alakApatimAlokya prasannenAntarAtmanA || 9||
li~Nge manaHsamAdhAya sthitaM sthANusvarUpiNam |
uvAcha varado.asmIti tadAchakShvAlakApate || 10||
unmIlya nayane yAvatsa pashyati tapodhanaH |
tAvadudyatsahasrAMshusahasrAdhikatejasam || 11||
puro dadarsha shrIkaNThaM chandrachUDamumAdhavam |
tattejaH paribhUtAkShitejAH sammIlya lochane || 12||
uvAcha devadeveshaM manorathapadAtigam |
nijA~Nghridarshane nAtha dR^iksAmarthyaM prayachCha me || 13||
ayameva varo nAtha yattvaM sAkShAnnirIkShyase |
kimanyena vareNesha namaste shashishekhara || 14||
iti tadvachanaM shrutvA devadeva umApatiH |
dadau darshanasAmarthyaM spR^iShTvA pANitalena tam || 15||
prasArya nayane pUrvamumAmeva vyalokayat |
tato.asau yAj~nadattistu tatsAmarthyamavApya cha || 16||
shambhoH samIpe kA yoShideShA sarvA~NgasundarI |
anayA kiM tapastaptaM mamApi tapaso.adhikam || 17||
aho rUpamaho prema saubhAgyaM shrIraho bhR^isham |
ityavAdIdasau putro muhurmuhuratIva hi || 18||
krUradR^igvIkShate yAvatpunaH punaridaM vadan |
tAvatpusphoTa tannetraM vAmaM vAmAvilokanAt || 19||
atha devyabravIddevaM kimasau duShTatApasaH |
asakR^idvIkShya mAM vakti vada tvaM me tapaHprabhAm || 20||
asakR^iddakShiNenAkShNA punarmAmeva pashyati |
asUyamAno me rUpapremasaubhAgyasampadaH || 21||
iti devIgiraM shrutvA prahasya prAha tAM prabhuH |
ume tvadIyaH putro.ayaM na cha krUreNa chakShuShA || 22||
sampashyati tapolakShmIM tava kiM tvadhivarNayet |
iti devIM samAbhAShya tamIshaH punarabravIt || 23||
varAndadAmi te vatsa tapasAnena toShitaH |
nidhInAmatha nAthastvaM guhyakAnAM bhaveshvaraH || 24||
yakShANAM kinnarANAM cha rAj~nAM rAjA cha suvrata |
patiH puNyajanAnAM cha sarveShAM dhanado bhava || 25||
mayA sakhyaM cha te nityaM vatsyAmi cha tavAntike |
alakAM nikaShA mitra tava prItivivR^iddhaye || 26||
AgachCha pAdayorasyAH pata te jananI tviyam |
yAj~nadatte mahAbhakta suprasannena chetasA || 27||
brahmovAcha |
iti dattvA varAndevaH punarAha shivAM shivaH |
prasAdaM kuru deveshi tapasvinya~Ngaje.atra vai || 28||
ityAkarNya vachaH shambhoH pArvatI jagadambikA |
abravIdyAj~nadattiM taM suprasannena chetasA || 29||
devyuvAcha |
vatsa te nirmalA bhaktirbhave bhavatu sarvadA |
bhavaikapi~Ngo netreNa vAmena sphuTitena ha || 30||
devena dattA ye tubhyaM varAH santu tathaiva te |
kubero bhava nAmnA tvaM mama rUperShyayA suta || 31||
iti dattvA varAndevo devyA saha maheshvaraH |
dhanadAyAviveshAtha dhAma vaishveshvarAbhidham || 32||
itthaM sakhitvaM shrIshambhoH prApaiSha dhanadaH puram |
alakAnnikaShA chAsItkailAsaH sha~NkarAlayaH || 33||

iti shrIshivamahApurANe dvitIyAyAM rudrasaMhitAyAM prathamakhaNDe kailAsagamanopAkhyAne kuberasya shivamitratvavarNanaM nAmaikonaviMsho.adhyAyaH || 2\.1\.19||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
|| dvitIyAyAM rudrasaMhitAyAM prathamaH sR^iShTikhaNDeH
\section{2\.1\.20\. viMsho.adhyAyaH | kailAsopAkhyAne shivasya kailAsagamanam |}
brahmovAcha |
nArada tvaM shR^iNu mune shivAgamanamuttamam |
kailAse parvatashreShThe kuberasya tapobalAt || 1||
nidhipatvavaraM dattvA gatvA svasthAnamuttamam |
vichintya hR^idi vishveshaH kuberavaradAyakaH || 2||
vidhya~NgajassvarUpo me pUrNaH pralayakAryakR^it |
tadrUpeNa gamiShyAmi kailAsaM guhyakAlayam || 3||
rudro hR^idayajo me hi pUrNAMsho brahma niShkalaH |
haribrahmAdibhiH sevyo madabhinno nira~njanaH || 4||
tatsvarUpeNa tatraiva suhR^idbhUtvA vilAsyaham |
kuberasya cha vatsyAmi kariShyAmi tapo mahat || 5||
iti sa~nchintya rudro.asau shivechChAM gantumutsukaH |
nanAda tatra DhakkAM svAM sugatiM nAdarUpiNIm || 6||
trailokyAmAnashe tasyA dhvanirutsAhakArakaH |
AhvAnagatisaMyukto vichitraH sAndrashabdakaH || 7||
tachChrutvA viShNubrahmAdyAH surAshcha munayastathA |
AgamA nigamA mUrtAH siddhA jagmushcha tatra vai || 8||
surAsurAdyAH sakalAstatra jagmushcha sotsavAH |
sarve.api pramathA jagmuryatra kutrApi saMsthitAH || 9||
gaNapAshcha mahAbhAgAH sarvalokanamaskR^itAH |
teShAM sa~NkhyAmahaM vachmi sAvadhAnatayA shR^iNu || 10||
abhyayAchCha~NkhakarNashcha gaNakoTyA gaNeshvaraH |
dashabhiH kekarAkShashcha vikR^ito.aShTAbhireva cha || 11||
chatuH ShaShTyA vishAkhashcha navabhiH pAriyAtrakaH |
ShaDbhiH sarvAntakaH shrImAndundubho.aShTAbhireva cha || 12||
jAla~Nko hi dvAdashabhiH koTibhirgaNapu~NgavaH |
saptabhiH samadaH shrImA.Nstathaiva vikR^itAnanaH || 13||
pa~nchabhishcha kapAlI hi ShaDbhiH sandArakaH shubhaH |
koTikoTibhireveha kaNDukaH kuNDakastathA || 14||
viShTambho.aShTAbhiragamadaShTabhishchandratApanaH | 15||
mahAkeshaH sahasreNa koTInAM gaNapo vR^itaH | 16||
kuNDI dvAdashabhirvAhastathA parvatakaH shubhaH |
kAlashcha kAlakashchaiva mahAkAlaH shatena vai || 17||
agnikaH shatakoTyA vai koTyAbhimukha eva cha |
AdityamUrdhA koTyA cha tathA chaiva dhanAvahaH || 18||
sannAhashcha shatenaiva kumudaH koTibhistathA |
amoghaH kokilashchaiva koTikoTyA sumantrakaH || 19||
kAkapAdo.aparaH ShaShTyA ShaShTyA santAnakaH prabhuH |
mahAbalashcha navabhirmadhupi~Ngashcha pi~NgalaH || 20||
nIlo navatyA deveshaM pUrNabhadrastathaiva cha |
koTInAM chaiva saptAnAM chaturvaktro mahAbalaH || 21||
koTikoTisahasrANAM shatairviMshatibhirvR^itaH |
tatrAjagAma sarveshaH kailAsagamanAya vai ||| 22||
kAShThAgUDhashchatuHShaShTyA sukesho vR^iShabhastathA |
koTibhiH saptabhishchaitro nakulIshassvayaM prabhuH || 23||
lokAntakashcha dIptAtmA tathA daityAntakaH prabhuH |
devo bhR^i~NgI riTiH shrImAndevadevapriyastathA || 24||
ashanirbhAnukashchaiva chatuHShaShTyA sanAtanaH |
nandIshvaro gaNAdhIshaH shatakoTyA mahAbalaH || 25||
ete chAnye cha gaNapA asa~NkhyAtA mahAbalAH |
sarve sahasrahastAshcha jaTAmukuTadhAriNaH || 26||
sarve chandrAvataMsAshcha nIlakaNThAstrilochanAH |
hArakuNDalakeyUramukuTAdyairala~NkR^itAH || 27||
brahmendraviShNusa~NkAshA aNimAdigaNairvR^itAH |
sUryakoTipratIkAshAstatrAjagmurgaNeshvarAH || 28||
ete gaNAdhipAshchAnye mahAtmAno.amalaprabhAH |
jagmustatra mahAprItyA shivadarshanalAlasAH || 29||
gatvA tatra shivaM dR^iShTvA natvA chakruH parAM nutim |
sarve sA~njalayo viShNupramukhA natamastakAH || 30||
iti viShNvAdibhiH sArdhaM maheshaH parameshvaraH |
kailAsamagamatprItyA kuberasya mahAtmanaH || 31||
kubero.apyAgataM shambhuM pUjayAmAsa sAdaram |
bhaktyA nAnopahAraishcha parivArasamanvitaH || 32||
tato viShNvAdikAndevAngaNAMshchAnyAnapi dhruvam |
shivAnugAnsamAnarcha shivatoShaNahetave || 33||
atha shambhuH samAli~Ngya kuberaM prItamAnasaH |
mUrdhniM chAghrAya santasthAvalakAM nikaShAkhilaiH || 34||
shashAsa vishvakarmANaM nirmANArthaM girau prabhuH |
nAnAbhaktanivAsAya svapareShAM yathochitam || 35||
vishvakarmA tato gatvA tatra nAnAvidhAM mune |
rachanAM rachayAmAsa drutaM shambhoranuj~nayA || 36||
atha shambhuH pramudito hariprArthanayA tadA || 37||
kuberAnugrahaM kR^itvA yayau kailAsaparvatam |
sumuhUrte pravishyAsau svasthAnaM parameshvaraH || 38||
akarodakhilAnprItyA sanAthAnbhaktavatsalaH |
atha sarve pramuditA viShNuprabhR^itayaH surAH |
munayashchApare siddhA abhyaShi~nchanmudA shivam | 39||
samAnarchuH kramAtsarve nAnopAyanapANayaH |
nIrAjanaM samAkArShurmahotsavapuraHsaram || 40||
tadAsItsumanovR^iShTirma~NgalAyatanA mune |
suprItA nanR^itustatrApsaraso gAnatatparAH || 41||
jayashabdo namaH shabdastatrAsItsarvasaMskR^itaH |
tadotsAho mahAnAsItsarveShAM sukhavardhanaH || 42||
sthitvA siMhAsane shambhurvirarAjAdhikaM tadA |
sarvaiH saMsevito.abhIkShNaM viShNvAdyaishcha yathochitam || 43||
atha sarve surAdyAshcha tuShTuvustaM pR^ithakpR^ithak |
arthyAbhirvAgbhiriShTAbhiH shakaraM lokasha~Nkaram || 44||
prasannAtmA stutiM shrutvA teShAM kAmAndadau shivaH |
manobhilaShitAnprItyA varAnsarveshvaraH prabhuH || 45||
shivAj~nayAtha te sarve svaM svaM dhAma yayurmune |
prAptakAmAH pramuditA ahaM cha viShNunA saha || 46||
upaveshyAsane viShNuM mAM cha shambhuruvAcha ha |
bahu sambodhya suprItyAnugR^ihya parameshvaraH || 47||
shiva uvAcha |
he hare he vidhe tAtau yuvAM priyatarau mama |
surottamau trijagato.avanasargakarau sadA || 48||
gachChataM nirbhayaM nityaM svasthAnaM cha madAj~nayA |
sukhapradAtAhaM vai vAM visheShAtprekShakaH sadA || 49||
ityAkarNya vachaH shambhoH supraNamya tadAj~nayA |
ahaM harishcha svaM dhAmAgamAva prItamAnasau || 50||
tadAnImeva suprItaH sha~Nkaro nidhipaM mudA |
upaveshya gR^ihItvA taM kara Aha shubhaM vachaH || 51||
tava premNA vashIbhUto mitratAmagamaM sakhe |
svasthAnaM gachCha vibhayaH sahAyo.ahaM sadAnagha || 52||
ityAkarNya vachaH shambhoH kuberaH prItamAnasaH |
tadAj~nayA svakaM dhAma jagAma pramudAnvitaH || 53||
sa uvAsa girau shambhuH kailAse parvatottame |
sagaNo yoganirataH svachChando dhyAnatatparaH || 54||
kvachiddadhyau svamAtmAnaM kvachidyogarato.abhavat |
itihAsaM gaNAnprItyAvAdItsvachChandamAnasaH || 55||
kvachitkailAsakudharasusthAneShu maheshvaraH |
vijahAra gaNaiH prItyA vividheShu vihAravit || 56||
itthaM rudrasvarUpo.asau sha~NkaraH parameshvaraH |
akArShItsvagirau lIlA nAnA yogivaro.api yaH || 57||
nItvA kAlaM kiyantaM so.apatnIkaH parameshvaraH |
pashchAdavApa svAM patnIM dakShapatnIsamudbhavAm || 58||
vijahAra tayA satyA dakShaputryA maheshvaraH |
sukhI babhUva devarShe lokAchAraparAyaNaH || 59||
itthaM rudrAvatAraste varNito.ayaM munIshvara |
kailAsAgamanaM chAsya sakhitvaM nidhipasya hi || 60||
tadantargatalIlApi varNitA j~nAnavardhinI |
ihAmutra cha yA nityaM sarvakAmaphalapradA || 61||
imAM kathAM paThedyastu shR^iNuyAdvA samAhitaH |
iha bhuktiM samAsAdya labhenmuktiM paratra saH || 62||

iti shrIshivamahApurANe dvitIyAyAM rudrasaMhitAyAM prathamakhaNDe sR^iShTyupAkhyAne kailAsopAkhyAne shivasya kailAsagamanaM nAma viMsho.adhyAyaH || 2\.1\.20||

|| iti shrIshivamahApurANe dvitIyarudrasaMhitAyAM prathamaH sR^iShTikhaNDaH samAptaH || 2\.1||
##

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}