% Text title            : Shivapuranam 2.4 rudrasaMhitA kumArakhaNDaH
% File name             : shivapurANam2rudrasaMhitA4kumArakhaNDaH.itx
% Category              : shiva, purANa, shivapurANa
% Location              : doc\_purana
% Proofread by          : Revathy Rajaraman and team members
% Latest update         : January 23, 2026
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Shiva Mahapuranam 2.4 Rudra Samhita Kumarakhandah ..}##
\itxtitle{.. shrIshivamahApurANam 2\.4 rudrasaMhitAyAM kumArakhaNDaH ..}##\endtitles ##
|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.1\. prathamo.adhyAyaH | tArakArditasurANAM sha~Nkarasannidhau duHkhanivedanam |}
vande vandanatuShTamAnasamatipremapriyaM premadaM
pUrNaM pUrNakaraM prapUrNanikhilaishvaryaikavAsaM shivam |
satyaM satyamayaM trisatyavibhavaM satyapriyaM satyadaM
viShNubrahmanutaM svakIyakR^ipayopAttAkR^itiM sha~Nkaram || 1||
nArada uvAcha |
vivAhayitvA girijAM sha~Nkaro lokasha~NkaraH |
gatvA svaparvataM brahman kimakArShIddhi tadvada || 2||
kathaM hi tanayo jaj~ne shivasya paramAtmanaH |
yadarthamAtmArAmo.api samuvAha shivAM prabhuH || 3||
tArakasya kathaM brahman vadho.abhUddevasha~Nkara |
etatsarvamasheSheNa vada kR^itvA dayAM mayi || 4||
sUta uvAcha |
ityAkarNya vachastasya nAradasya prajApatiH |
suprasannamanAH smR^itvA sha~NkaraM pratyuvAcha ha || 5||
brahmovAcha |
charitaM shR^iNu vakShyAmi shashimaulestu nArada |
guhajanmakathAM divyAM tArakAsurasadvadham || 6||
shrUyatAM kathayAmyadya kathAM pApapraNAshinIm |
yAM shrutvA sarvapApebhyo muchyate mAnavo dhruvam || 7||
idamAkhyAnamanaghaM rahasyaM paramAdbhutam |
pApasantApaharaNaM sarvavighnavinAshanam || 8||
sarvama~NgaladaM sAraM sarvashrutimanoharam |
sukhadaM mokShabIjaM cha karmamUlanikR^intanam || 9||
kailAsamAgatya shivAM vivAhya
shobhAM prapede nitarAM shivo.api |
vichArayAmAsa cha devakR^ityaM
pIDAM janasyApi cha devakR^itye || 10||
shivaHsa bhagavAn sAkShAtkailAsamagamadyadA |
saukhyaM cha vividhaM chakrurgaNAH sarve suharShitAH || 11||
mahotsavo mahAnAsIchChive kailAsamAgate |
devAH svaviShayaM prAptA harShanirbharamAnasAH || 12||
atha shambhurmahAdevo gR^ihItvA girijAM shivAm |
jagAma nirjanaM sthAnaM mahAdivyaM manoharam || 13||
shayyAM ratikarIM kR^itvA puShpachandanacharchitAm |
adbhutAM tatra paramAM bhogavastvanvitAM shubhAm || 14||
sa reme tatra bhagavAn shambhurgirijayA saha |
sahasravarShaparyantaM devamAnena mAnadaH || 15||
durgA~NgasparshamAtreNa lIlayA mUrchChitaH shivaH |
mUrchChitA sA shivasparshAdbubudhe na divAnisham || 16||
hare bhogapravR^itte tu lokadharmapravartini |
mahAn kAlo vyatIyAya tayoH kShaNa ivAnagha || 17||
atha sarve surAstAta ekatrIbhUya chaikadA |
mantrayA~nchakrurAgatya merau shakrapurogamAH || 18||
surA UchuH |
vivAhaM kR^itavA~nChambhurasmatkAryArthamIshvaraH |
yogIshvaro nirvikAro svAtmArAmo nira~njanaH || 19||
notpannastanayastasya na jAnImo.atra kAraNam |
vilambaH kriyate tena kathaM deveshvareNa ha || 20||
brahmovAcha |
etasminnantare devA nAradAddevadarshanAt |
bubudhustanmitaM bhogaM tayoshcha ramamANayoH || 21||
chiraM j~nAtvA tayorbhogaM chintAmApuH surAshcha te |
brahmANaM mAM puraskR^itya yayurnArAyaNAntikam || 22||
taM natvA kathitaM sarvaM mayA vR^ittAntamIpsitam |
santasthire sarvadevAH chitre puttalikA yathA || 23||
sahasravarShaparyantaM devamAnena sha~NkaraH |
ratau ratashcha nishcheShTo yogI viramate na hi || 24||
shrIbhagavAnuvAcha |
chintA nAsti jagaddhAtaH sarvaM bhadraM bhaviShyati |
sharaNaM vraja devesha sha~Nkarasya mahAprabhoH || 25||
maheshasharaNApannA ye janA manasA mudA |
teShAM prajesha bhaktAnAM na kutashchidbhayaM kvachit || 26||
shR^i~NgArabha~NgaH samaye bhavitA nAdhunA vidhe |
kAlaprayuktaM kAryaM cha siddhiM prApnoti nAnyathA || 27||
shambhoH sambhogamiShTaM ko bhadrAM kartumiheshvaraH |
pUrNe varShasahasre cha svechChayA hi viraMsyati || 28||
strIpuMso rativichChedamupAyena karoti yaH |
tasya strIputrayorbhedo bhavejjanmani janmani || 29||
bhraShTaj~nAno naShTakIrttiralakShmIko bhavediha |
prayAtyante kAlasUtraM varShalakShaM sa pAtakI || 30||
rambhAyuktaM shakramimaM chakAra virataM ratau |
mahAmunIndro durvAsAstatstrIbhedo babhUva ha || 31||
punaranyAM sa samprApya viShevya shubhapANikAm |
divyaM varShasahasraM cha vijahau virahajvaram || 32||
ghR^itAchyA saha saMshliShTaM kAmaM vAritavAn guruH |
ShaNmAsAbhyantare chandrastasya patnIM jahAra ha || 33||
punashshivaM samArAdhya kR^itvA tArAmayaM raNam |
tArAM sagarbhAM samprApya vijahau virahajvaram || 34||
mohinIsahitaM chandraM chakAra virataM ratau |
maharShirgautamastasya strIvichChedo babhUva ha || 35||
harishchandro hAlikaM cha vR^iShalyA saha saMyutam |
vArayAmAsa nishcheShTaM nirjane tatphalaM shR^iNu || 36||
bhraShTaH strIputrarAjyebhyo vishvAmitreNa tADitaH |
tataH shivaM samArAdhya mukto bhUto hi kashmalAt || 37||
ajAmilaM dvijashreShThaM vR^iShalyA saha saMyutam |
na bhiyA vArayAmAsuH surAstAM chApi kechana || 38||
sarvaM niShekasAdhyaM cha niSheko balavAn vidhe |
niShekaphalado vai sa niShekaH kena vAryate || 39||
divyaM varShasahasraM cha shambhoH sambhogakarma tat |
pUrNe varShasahasre cha gatvA tatra sureshvarAH || 40||
yena vIryaM patedbhUmau tat kariShyatha nishchitam |
tatra vIrye cha bhavitA skandanAmA prabhoH sutaH || 41||
adhunA svagR^ihaM gachCha vidhe suragaNaiH saha |
karotu shambhuH sambhogaM pArvatyA saha nirjane || 42||
brahmovAcha |
ityuktvA kamalAkAntaH shIghraM svAntaH puraM yayau |
svAlayaM prayayurdevA mayA saha munIshvara || 43||
shaktishaktimatoshchAtha vihAreNAti cha kShitiH |
bhArAkrAntA chakampe sA sasheShApi sakachChapA || 44||
kachChapasya hi bhAreNa sarvAdhAraH samIraNaH |
stambhito.atha trilokAshcha babhUvurbhayavihvalAH || 45||
atha sarve mayA devA hareshcha sharaNaM yayuH |
sarvaM nivedayA~nchakrustadvR^ittaM dInamAnasA || 46||
devA UchuH |
devadeva ramAnAtha sarvAvanakara prabho |
rakSha naH sharaNApannAn bhayavyAkulamAnasAn || 47||
stambhitastrijagatprANo na jAne kena hetunA |
vyAkulaM munibhirlekhaistrailokyaM sacharAcharam || 48||
brahmovAcha |
ityuktvA sakalA devA mayA saha munIshvara |
dInAstasthuH puro viShNormaunIbhUtAH suduHkhitAH || 49||
tadAkarNya samAdAya surAnnaH sakalAn hariH |
jagAma parvataM shIghraM kailAsaM shivavallabham || 50||
tatra gatvA harirdevairmayA cha suravallabhaH |
yayau shivavarasthAnaM sha~NkaraM draShTukAmyayA || 51||
tatra dR^iShTvA shivaM viShNurna surairvismito.abhavat |
tatra sthitAn shivagaNAn paprachCha vinayAnvitaH || 52||
viShNuruvAcha |
he sha~NkarAH shivaH kutra gataH sarvaprabhurgaNAH |
nivedayata naH prItyA duHkhitAnvai kR^ipAlavaH || 53||
brahmovAcha |
ityAkarNya vachastasya sAmarasya harergaNAH |
prochuH prItyA gaNAste hi sha~Nkarasya ramApatim || 54||
shivagaNA UchuH |
hare shR^iNu shivaprItyA yathArthaM brUmahe vayam |
brahmaNA nirjaraiH sArddhaM vR^ittAntamakhilaM cha yat || 55||
sarveshvaro mahAdevo jagAma girijAlayam |
saMsthApya no.atra suprItyA nAnAlIlAvishAradaH || 56||
tadguhAbhyantare shambhuH kiM karoti maheshvaraH |
na jAnImo ramAnAtha vyatIyurbahavaH samAH || 57||
brahmovAcha |
shrutveti vachanaM teShAM sa viShNuH sAmaro mayA |
vismito.ati munishreShTha shivadvAraM jagAma ha || 58||
tatra gatvA mayA devaiH sa harirdevavallabhaH |
ArtavANyA mune proche tArasvaratayA tadA || 59||
shambhumastaunmahAprItyA sAmaro hi mayA hariH |
tatra sthito munishreShTha sarvalokaprabhuM haram || 60||
viShNuruvAcha |
kiM karoShi mahAdevAbhyantare parameshvara |
tArakArtAnsurAnsarvAn pAhi naH sharaNAgatAn || 61||
ityAdi saMstuvan shambhuM bahudhA so.amarairmayA |
rurodAti haristatra tArakArtairmunIshvara || 62||
duHkhakolAhalastatra babhUva tridivaukasAm |
mishritashshiva saMstutyAsurArttAnAM munIshvara || 63||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe shivavihAravarNanaM nAma prathamo.adhyAyaH || 2\.4\.1||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.2\. dvitIyo.adhyAyaH | sharavaNe kArtikeyotpattivarNanam |}
brahmovAcha |
tadAkarNya mahAdevo yogaj~nAnavishAradaH |
tyaktakAmo na tatyAja sambhogaM pArvatIbhayAt || 1||
AjagAma gR^ihadvAri surANAM nikaTaM shivaH |
daityena pIDitAnAM cha sha~Nkaro bhaktavatsalaH || 2||
devAHsarve prabhuM dR^iShTvA hariNA cha mayA shivam |
babhUbuH sukhinashchAti tadA vai bhaktavatsalam || 3||
ityAkarNya vachasteShAM surANAM bhagavAnbhavaH |
pratyuvAcha viShaNNAtmA dUyamAnena chetasA || 4||
praNamya sumahAprItyA nataskandhAshcha nirjarAH |
tuShTuvuH sha~NkaraM sarve mayA cha hariNA mune || 5||
devA UchuH |
devadeva mahAdeva karuNAsAgara prabho |
antaryAmI hi sarveShAM sarvaM jAnAsi sha~Nkara || 6||
devakAryaM kuru vibho rakSha devAn maheshvara |
jahi daityAn kR^ipAM kR^itvA tArakAdIn mahAprabho || 7||
shiva uvAcha |
he viShNo he vidhe devAH sarveShAM vo manogatiH |
yadbhAvi tadbhavatyeva ko.api no tannivArakaH || 8||
yajjAtaM tajjAtameva prastutaM shR^iNutAmarAH |
shivaretaskhalitaM vIryaM ko grahIShyati me.adhunA || 9||
sa gR^ihNIyAditi prochya pAtayAmAsa tadbhuvi |
agnirbhUtvA kapoto hi preritaHsarvanirjaraiH || 10||
abhakShachChAmbhavaM vIryaM cha~nchvA tu nikhilaM tadA |
etasminnantare tatrAjagAma girijA mune || 11||
shivAgamavilambe cha dadarsha surapu~NgavAn ||
j~nAtvA tadvR^ittamakhilaM mahAkrodhayutA shivA || 12||
uvAcha tridashAn sarvAn hariprabhR^itikA.NstadA || 13||
devyuvAcha |
re re suragaNAHsarve yUyaM duShTA visheShataH |
svArthasaMsAdhakA nityaM tadarthaM paraduHkhadAH || 14||
svArthahetormaheshAnamArAdhya paramaM prabhum |
naShTaM chakrurmadvihAraM vandhyA.abhavamahaM surAH || 15||
mAM virodhya sukhaM naiva keShA~nchidapi nirjarAH |
tasmAdduHkhaM bhavedvo hi duShTAnAM tridivaukasAm || 16||
brahmovAcha |
ityuktvA viShNupramukhAn surAn sarvAn shashApa sA |
prajvalantI prakopena shailarAjasutA shivA || 17||
pArvatyuvAcha |
adyaprabhR^iti devAnAM vandhyA bhAryA bhavantviti |
devAshcha duHkhitAHsantu nikhilA madvirodhinaH || 18||
brahmovAcha |
iti shaptvAkhilAndevAn viShNvAdyAnsakaleshvarI |
uvAcha pAvakaM kruddhA bhakShakaM shivaretasaH || 19||
pArvatyuvAcha |
sarvabhakShI bhava shuche pIDitAtmeti nityashaH |
shivatattvaM na jAnAsi mUrkho.asi surakAryakR^it || 20||
re re shaTha mahAduShTa duShTAnAM duShTabodhavAn |
abhakShaH shivavIryaM yannAkArShIruchitaM hitam || 21||
brahmovAcha |
iti shaptvA shivA vahniM saheshena nagAtmajA |
jagAma svAlayaM shIghramasantuShTA tato mune || 22||
gatvA shivA shivaM samyak bodhayAmAsa yatnataH |
ajIjanatparaM putraM gaNeshAkhyaM munIshvara || 23||
tadvR^ittAntamasheShaM cha varNayiShye mune.agrataH |
idAnIM shR^iNu suprItyA guhotpattiM vadAmyaham || 24||
pAvakArpitamannAdi bhu~njate nirjarAH khalu |
vedavANyeti sarve te sagarbhA abhavansurAH || 25||
tato.asahantastadvIryaM pIDitA hyabhavan surAH |
viShNvAdyA nikhilAshchAti shivAj~nAnaShTabuddhayaH || 26||
atha viShNuprabhR^itikAHsarve devA vimohitAH |
dahyamAnA yayuH shIghraM sharaNaM pArvatIpateH || 27||
shivAlayasya te dvAri gatvA sarve vinamrakAH |
tuShTuvuHsashivaM shambhuM prItyA sA~njalayaHsurAH || 28||
devA UchuH |
devadeva mahAdeva girijesha mahAprabho |
kiM jAtamadhunA nAtha tava mAyA duratyayA || 29||
sagarbhAshcha vayaM jAtA dahyamAnAshcha retasA |
tava shambho kuru kR^ipAM nivAraya dashAmimAm || 30||
brahmovAcha |
ityAkarNyA.amaranutiM parameshaH shivApatiH |
AjagAma drutaM dvAri yatra devAH sthitA mune || 31||
AgataM sha~NkaraM dvAri sarve devAshcha sAchyutAH |
praNamya tuShTuvuH prItyA nartakA bhaktavatsalam || 32||
devA UchuH |
shambho shiva maheshAna tvAM natAH sma visheShataH |
rakSha naH sharaNApannAn dahyamAnAMshcha retasA || 33||
idaM duHkhaM hara hara bhavAmo hi mR^itA dhruvam |
tvAM vinA kaH samartho.adya devaduHkhanivAraNe || 34||
brahmovAcha |
iti dInataraM vAkyamAkarNya surarAT prabhuH |
pratyuvAcha vihasyAtha sa surAn bhaktavatsalaH || 35||
shiva uvAcha |
he hare he vidhe devAH sarve shR^iNuta madvachaH |
bhaviShyati sukhaM vo.adya sAvadhAnA bhavantu hi || 36||
etadvamata madvIryaM drutamevAkhilAHsurAH |
sukhinastadvisheSheNa shAsanAnmama suprabhoH || 37||
brahmovAcha |
ityAj~nAM shirasA.adhAya viShNvAdyAH sakalAH surAH |
akArShurvamanaM shIghraM smarantaH shivamavyayam || 38||
tachChambhuretaHsvarNAbhaM parvatAkAramadbhutam |
abhavatpatitaM bhUmau spR^ishad dyAmeva suprabham || 39||
abhavansukhinaHsarve surAH sarve.achyutAdayaH |
astuvan parameshAnaM sha~NkaraM bhaktavatsalam || 40||
pAvakastvabhavannaiva sukhI tatra munIshvara |
tasyAj~nAM paramo.adAdvai sha~NkaraH parameshvaraH || 41||
tataH savahnirvikalaH sA~njalirnatako mune |
astauchChivaM sukhI nAtmA vachanaM chedamabravIt || 42||
agniruvAcha |
devadeva maheshAna mUDho.ahaM tava sevakaH |
kShamasva me.aparAdhaM hi mama dAhaM nivAraya || 43||
tvaM dInavatsalaH svAmin sha~NkaraH parameshvaraH |
pratyuvAcha prasannAtmA pAvako dInavatsalam || 44||
brahmovAcha |
ityAkarNya shuchervANIM sa shambhuH parameshvaraH |
pratyuvAcha prasannAtmA pAvakaM dInavatsalaH || 45||
shiva uvAcha |
kR^itaM tvanuchitaM karma madreto bhakShitaM hi yat |
ato nivR^ittaste dAhaH pApAdhikyAnmadAj~nayA || 46||
idAnIM tvaM sukhI nAma shuche machCharaNAgataH |
ataH prasanno jAto.ahaM sarvaM duHkhaM vinashyati || 47||
kasyAshchitsustriyAM yonau madretastyaja yatnataH |
bhaviShyati sukhI tvaM hi nirdAhAtmA visheShataH || 48||
brahmovAcha |
shambhuvAkyaM nishamyeti pratyuvAcha shanaiH shuchiH |
sA~njalirnatakaH prItyA sha~NkaraM bhaktasha~Nkaram || 49||
durAsadamidaM tejastava nAtha maheshvara |
kAchinnAsti vinA shaktyA dhartuM yonau jagattraye || 50||
itthaM yadA.abravIdvahnistadA tvaM munisattama |
sha~NkarapreritaH prAttha hR^idAgnimupakArakaH || 51||
nArada uvAcha |
shR^iNu madvachanaM vahne tava dAhaharaM shubham |
paramAnandadaM ramyaM sarvakaShTanivArakam || 52||
kR^itvopAyamimaM vahne sukhI bhava vidAhakaH |
shivechChayA mayA samyaguktaM tAtedamAdarAt || 53||
tapomAsasnAnakartryaH striyo yAHsyuH prage shuche |
taddeheShu sthApaya tvaM shivaretastvidaM mahat || 54||
brahmovAcha |
tasminnavasare tatrAgatAH saptamunistriyaH |
tapomAsi snAnakAmAH prAtaH sanniyamA mune || 55||
snAnaM kR^itvA striyastA hi mahAshItArdditAshcha ShaT |
gantukAmA mune yAtA vahnijvAlAsamIpataH || 56||
vimohitAshcha tA dR^iShTvArundhatI girishAj~nayA |
niShiShedha visheSheNa sucharitrA subodhinI || 57||
tAH ShaD munistriyo mohAddhaThAttatra gatA mune |
svashItavinivR^ittyarthaM mohitAH shivamAyayA || 58||
tadretaHkaNikAH sadyastaddehAn vivishurmune |
romadvArA.akhilA vahnirabhUddAhavivarjitaH || 59||
antardhAya drutaM vahnirjvAlArUpo jagAma ha |
sukhI svalokaM manasA smaraMstvAM sha~NkaraM cha tam || 60||
sagarbhAstAH striyaH sAdho.abhavan dAhaprapIDitAH |
jagmuHsvabhavanaM tAtArundhatI duHkhitAgninA || 61||
dR^iShTvA svastrIgatiM tAta nAthAH krodhAkulA drutam |
tatyajustAH striyastAta susammantrya parasparam || 62||
atha tAH ShaT striyaHsarvA dR^iShTvA svavyabhichArakam |
mahAduHkhAnvitAstAtAbhavannAkulamAnasAH || 63||
tatyajushshivaretastadgarbharUpaM munistriyaH |
tA himAchalapR^iShThe.athAbhavan dAhavivarjitAH || 64||
asahan shivaretastaddhimAdriH kampamudvahan |
ga~NgAyAM prAkShipattUrNamasahyaM dAhapIDitaH || 65||
ga~NgayA.api cha tadvIryaM dussahaM paramAtmanaH |
niHkShiptaM hi sharastambe tara~NgaiH svairmunIshvara || 66||
patitaM tatra tadreto drutaM bAlo babhUva ha |
sundaraH subhagaH shrImAMstejasvI prItivarddhanaH || 67||
mArgamAse site pakShe tithau ShaShThyAM munIshvara |
prAdurbhAvo.abhavattasya shivaputrasya bhUtale || 68||
tasminnavasare brahmannakasmAddhimashailajA |
abhUtAM sukhinau tatra svagirau girisho.api cha || 69||
shivAkuchAbhyAM susrAva paya Anandasambhavam |
tatra gatvA cha sarveShAM sukhamAsInmune.adhikam || 70||
ma~NgalaM chA.abhavattAta trilokyAM sukhadaM satAm |
khalAnAmabhavadvighno daityAnAM cha visheShataH || 71||
akasmAdabhavad vyomni paramo dundubhidhvaniH |
puShpavR^iShTiH papAtA.ashu bAlakopari nArada || 72||
viShNvAdInAM samastAnAM devAnAM munisattama |
abhUdakasmAtparama AnandaH paramotsavaH || 73||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe shivaputrajananavarNanaM nAma dvitIyo.adhyAyaH || 2\.4\.2||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.3\. tR^itIyo.adhyAyaH | kArtikeyalIlAvarNanam |}
nArada uvAcha |
devadeva prajAnAtha brahman sR^iShTikara prabho |
tataH kimabhavattatra tadvadA.adya kR^ipAM kuru || 1||
brahmovAcha |
tasminnavasare tAta vishvAmitraH pratApavAn |
prerito vidhinA tatrAgachChatprIto yadR^ichChayA || 2||
sa dR^iShTvAlaukikaM dhAma tatsutasya sutejasaH |
abhavatpUrNakAmastu suprasanno nanAma cha || 3||
akarotsunutiM tasya suprasannena chetasA |
vidhipreritavAgbhishcha vishvAmitraH prabhAvavit || 4||
tataHso.abhUtsutastatra suprasanno mahotikR^it |
suprahasyAdbhutamaho vishvAmitramuvAcha cha || 5||
shivasuta uvAcha |
shivechChayA mahAj~nAninnakasmAttvamihAgataH |
saMskAraM kuru me tAta yathAvadvedasammitam || 6||
adyArabhya purodhAstvaM bhava me prItimAvahan |
bhaviShyasi sadA pUjyaH sarveShAM nAtra saMshayaH || 7||
brahmovAcha |
ityAkarNya vachastasya suprasanno hi gAdhijaH |
tamuvAchAnudAttena svareNa cha suvismitaH || 8||
vishvAmitra uvAcha |
shR^iNu tAta na vipro.ahaM gAdhikShatriyabAlakaH |
vishvAmitreti vikhyAtaH kShatriyo viprasevakaH || 9||
iti svacharitaM khyAtaM mayA te varabAlaka |
kastvaM svacharitaM brUhi vismitAyAkhilaM hi me || 10||
brahmovAcha |
ityAkarNya vachastasya tatsvavR^ittaM jagAda ha |
tatashchovAcha suprItyA gAdhijaM taM mahotikR^it || 11||
shivasuta uvAcha |
vishvAmitra varAnme tvaM brahmarShirnAtra saMshayaH |
vasiShThAdyAshcha nityaM tvAM prashaMsiShyanti chAdarAt || 12||
atastvamAj~nayA me hi saMskAraM kartumarhasi |
idaM sarvaM sugopyaM te kathanIyaM na kutrachit || 13||
brahmovAcha |
tato.akArShItsa saMskAraM tasya prItyA.akhilaM yathA |
shivabAlasya devarShe vedoktavidhinA param || 14||
shivabAlopi suprIto divyaj~nAnamadAtparam |
vishvAmitrAya munaye mahotikArakaH prabhuH || 15||
purohitaM chakArAsau vishvAmitraM shuchessutaH |
tadArabhya dvijavaro nAnAlIlAvishAradaH || 16||
itthaM lIlA kR^itA tena kathitA sA mayA mune |
tallIlAmaparAM tAta shR^iNu prItyA vadAmyaham || 17||
tasminnavasare tAta shvetanAmA cha samprati |
tatrA.apashyatsutaM divyaM nijaM paramapAvanam || 18||
tatastaM pAvako gatvA dR^iShTvAli~Ngya chuchumba cha |
putreti choktvA tasmai sa shastraM shaktiM dadau cha saH || 19||
guhastAM shaktimAdAya tachChR^i~NgaM chAruroha ha |
taM jaghAna tayA shaktyA shR^i~Ngo bhuvi papAta saH || 20||
dashapadmamitA vIrA rAkShasAH pUrvamAgatAH |
tadvadhArthaM drutaM naShTA babhUvustatprahArataH || 21||
hAhAkAro mahAnAsIchchakampe sAchalA mahI |
trailokyaM cha sureshAnaHsadevastatra chAgamat || 22||
dakShiNe tasya pArshve cha vajreNa sa jaghAna cha |
shAkhanAmA tato jAtaH pumAMshchaiko mahAbalaH || 23||
punashshakro jaghAnAshu vAmapArshve hi taM tadA |
vajreNA.anyaH pumA~njAto vishAkhAkhyo.aparo balI || 24||
tatastaddhR^idayaM shakro jaghAna pavinA tadA |
paro.abhUnnaigamopAkhyaH pumAMstadvanmahAbalaH || 25||
tadA skandAdichatvAro mahAvIrA mahAbalAH |
indraM hantuM drutaM jagmuH so.ayaM tachCharaNaM yayau || 26||
shakraH sasAmaragaNo bhayaM prApya gR^ihAttataH |
yayau svalokaM chakito na bhedaM j~nAtavAnmune || 27||
sa bAlakastu tatraiva tasthA.a.avAnandasaMyutaH |
pUrvavannirbhayastAta nAnAlIlAkaraH prabhuH || 28||
tasminnavasare tatra kR^ittikAkhyAshcha ShaT striyaH |
snAtuM samAgatA bAlaM dadR^ishustaM mahAprabhum || 29||
grahItuM taM manashchakruHsarvAstA kR^ittikAH striyaH |
vAdo babhUva tAsAM tadgrahaNechChAparo mune || 30||
tadvAdashamanArthaM sa ShaNmukhAni chakAra ha |
papau dugdhaM cha sarvAsAM tuShTAstA abhavanmune || 31||
tanmanogatimAj~nAya sarvAstAH kR^ittikAstadA |
tamAdAya yayurlokaM svakIyaM muditA mune || 32||
taM bAlakaM kumArAkhyaM stanaM dattvA stanArthine |
varddhayAmAsurIshasya sutaM sUryAdhikaprabham || 33||
na chakrurbAlakaM yAshcha lochanAnAmagocharam |
prANebhyo.api premapAtraM yaH poShTA tasya putrakaH || 34||
yAni yAni cha vastrANi trailokye durlabhAni cha |
dadustasmai cha tAH premNA bhUShaNAni varANi vai || 35||
dine dine tAH pupuShurbAlakaM taM mahAprabhum |
prashaMsitAni svAdUni bhojayitvA visheShataH || 36||
athaikasmin dine tAta sa bAlaH kR^ittikAtmajaH |
gatvA devasabhAM divyAM sucharitraM chakAra ha || 37||
svamaho darshayAmAsa devebhyo hi mahAdbhutam |
saviShNubhyo.akhilebhyashcha mahotikarabAlakaH || 38||
taM dR^iShTvA sakalAste vai sAchyutAHsarShayaH surAH |
vismayaM prApuratyantaM paprachChustaM cha bAlakam || 39||
ko bhavAniti tachChrutvA na ki~nchitsa jagAda ha |
svAlayaM sa jagAmAshu guptastasthau hi pUrvavat || 40||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe kArtikeyalIlAvarNanaM nAma tR^itIyo.adhyAyaH || 2\.4\.3||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.4\. chaturtho.adhyAyaH | kArtikeyAnveShaNanandisaMvAdavarNanam |}
nArada uvAcha |
devadeva prajAnAtha tataH kimabhavadvidhe |
vadedAnIM kR^ipAtastu shivalIlAsamanvitam || 1||
brahmovAcha |
kR^ittikAbhirgR^ihIte vai tasmin shambhusute mune |
kashchitkAlo vyatIyAya bubudhe na himAdrijA || 2||
tasminnavasare durgA smerAnanasaroruhA |
uvAcha svAminaM shambhuM devadeveshvaraM prabhum || 3||
pArvatyuvAcha |
devadeva mahAdeva shR^iNu me vachanaM shubham |
pUrvapuNyAtibhAreNa tvaM mayA prApta IshvaraH || 4||
kR^ipayA yogiShu shreShTho vihAraistatparo.abhavaH |
ratibha~NgaH kR^ito devaistatra me bhavatA bhava || 5||
bhUmau nipatitaM vIryaM nodare mama te vibho |
kutra yAtaM cha taddeva kena devena nihnutam || 6||
kathaM matsvAmino vIryamamoghaM te maheshvara |
moghaM yAtaM cha kiM kiM vA shishurjAtashcha kutrachit || 7||
brahmovAcha |
pArvatIvachanaM shrutvA prahasya jagadIshvaraH |
uvAcha devAnAhUya munIMshchApi munIshvara || 8||
maheshvara uvAcha |
devAH shR^iNuta madvAkyaM pArvatIvachanaM shrutam |
amoghaM kutra me vIryaM yAtaM kena cha nihnutam || 9||
sabhayaM nApa tatkShipraM sa cheddaNDaM na chArhati |
shaktau rAjA na shAstA yaH prajAbAdhyashcha bhakShakaH || 10||
brahmovAcha
shambhostadvachanaM shrutvA samAlochya parasparam |
UchuHsarve krameNaiva trastAstu purataH prabhoH || 11||
viShNuruvAcha |
te mithyAvAdinaHsantu bhArate gurudArikAH |
gurunindAratAH shashvattvadvIryaM yaishcha nihnutam || 12||
brahmovAcha |
tvadvIryaM nihnutaM yena puNyakShetre cha bhArate |
sa nA.anvito bhavettatra sevane pUjane tava || 13||
lokapAlA UchuH |
tvadavIryaM nihnutaM yena pApinA patitabhramAt |
bhAjanaM tasya sotyantaM tattApaM karma santatam || 14||
devA UchuH |
kR^itvA pratij~nAM yo mUDho nA.a.apAdayati pUrNatAm |
bhAjanaM tasya pApasya tvadvIryaM yena nihnutam || 15||
devapatnya UchuH |
yA nindati svabhartAraM paraM gachChati pUruSham |
mAtR^ibandhuvihInA cha tvadvIryaM nihnutaM yayA || 16||
brahmovAcha |
devAnAM vachanaM shrutvA devadeveshvaro haraH |
karmaNAM sAkShiNashchAha dharmAdInsabhayaM vachaH || 17||
shrIshiva uvAcha |
devairna nihnutaM kena tadvIryaM nihnutaM dhruvam |
tadamoghaM bhagavato maheshasya mama prabhoH || 18||
yUyaM cha sAkShiNo vishve satataM sarvakarmaNAm |
yuShmAkaM nihnutaM kiM vA kiM j~nAtuM vaktumarhatha || 19||
brahmovAcha |
Ishvarasya vachaH shrutvA sabhAyAM kampitAshcha te |
parasparaM samAlokya krameNochuH puraH prabhoH || 20||
brahmovAcha |
rate tu tiShThato vIryaM papAta vasudhAtale |
mayA j~nAtamamoghaM tachCha~Nkarasya prakopataH || 21||
kShitiruvAcha
vIryaM soDhumashaktAhaM tadvahnau nyakShipaM purA |
ato.atra durvahaM brahmannabalAM kShantumarhasi || 22||
vahniruvAcha
vIryaM soDhumashakto.ahaM tava sha~Nkara parvate |
kailAse nyakShipaM sadyaH kapotAtmA sudussaham || 23||
giriruvAcha
vIryaM soDhumashakto.ahaM tava sha~Nkara lokapa |
ga~NgAyAM prAkShipaM sadyo dussahaM parameshvara || 24||
ga~NgovAcha
vIryaM soDhumashaktAhaM tava sha~Nkara lokapa |
vyAkulA.ati prabho nAtha nyakShipaM sharakAnane || 25||
vAyuruvAcha
shareShu patitaM vIryaM sadyo bAlo babhUva ha |
atIva sundaraH shambho svarnadyAH pAvane taTe || 26||
sUrya uvAcha
rudantaM bAlakaM dR^iShTvAgamamastAchalaM prabho |
preritaH kAlachakreNa nishAyAM sthAtumakShamaH || 27||
chandra uvAcha
rudantaM bAlakaM prApya gR^ihItvA kR^ittikAgaNaH |
jagAma svAlayaM shambho gachChanbadarikAshramam || 28||
jalamuvAcha
amuM rudantamAnIya stanyapAnena tAH prabho |
varddhayAmAsurIshasya sutaM tava raviprabham || 29||
sandhyovAcha
adhunA kR^ittikAnAM cha vane taM poShya putrakam |
tannAma chakrustAH premNA kArttikashcheti kautukAt || 30||
rAtriruvAcha
na chakrurbAlakaM tAshcha lochanAnAmagocharam |
prANebhyo.api prItipAtraM yaH poShTA tasya putraka || 31||
dinamuvAcha
yAni yAni cha vastrANi bhUShaNAni varANi cha |
prashaMsitAni svAdUni bhojayAmAsureva tam || 32||
brahmovAcha
teShAM tadvachanaM shrutvA santuShTaH purasUdanaH |
mudaM prApya dadau prItyA viprebhyo bahudakShiNAm || 33||
putrasya vArttAM samprApya pArvatI hR^iShTamAnasA |
koTiratnAni viprebhyo dadau bahudhanAni cha || 34||
lakShmI sarasvatI menA sAvitrI sarvayoShitaH |
viShNuH sarve cha devAshcha brAhmaNebhyo dadurdhanam || 35||
preritaH sa prabhurdevairmunibhiH parvatairatha |
dUtAn prasthApayAmAsa svaputro yatra tAn gaNAn || 36||
vIrabhadraM vishAlAkShaM sha~NkukarNaM karAkramam |
nandIshvaraM mahAkAlaM vajradraMShTraM mahonmadam || 37||
gokarNAsyaM dadhimukhaM jvaladagnishikhopamam |
lakShaM cha kShetrapAlAnAM bhUtAnAM cha trilakShakam || 38||
rudrAMshcha bhairavAMshchaiva shivatulyaparAkramAn |
anyAMshcha vikR^itAkArAnasa~NkhyAnapi nArada || 39||
te sarve shivadUtAshcha nAnAshastrAstrapANayaH |
kR^ittikAnAM cha bhavanaM veShTayAmAsuruddhatAH || 40||
dR^iShTvA tAn kR^ittikAHsarvA bhayavihvalamAnasAH |
kArttikaM kathayAmAsurjvalantaM brahmatejasA || 41||
kR^ittikA UchuH |
vatsa sainyAnyasa~NkhyAni veShTayAmAsurAlayam |
kiM kartavyaM kva gantavyaM mahAbhayamupasthitam || 42||
kArtikeya uvAcha
bhayaM tyajata kalyANyo bhayaM kiM vA mayi sthite |
durnivAryo.asmi bAlashcha mAtaraH kena vAryate || 43||
brahmovAcha
etasminnantare tatra sainyendro nandikeshvaraH |
purataH kArtikeyasyopaviShTaH samuvAcha ha || 44||
nandIshvara uvAcha
bhrAtaH pravR^ittiM shR^iNu me mAtarashcha shubhAvahAm |
prerito.ahaM maheshena saMhartrA sha~NkareNa cha || 45||
kailAse sarvadevAshcha brahmaviShNushivAdayaH |
sabhAyAM saMsthitAstAta mahatyutsavama~Ngale || 46||
tadA shivA sabhAyAM vai sha~NkaraM sarva sha~Nkaram |
sambodhya kathayAmAsa tavAnveShaNahetukam || 47||
paprachCha tAn shivo devAn kramAttvatprAptihetave |
pratyuttaraM daduste tu pratyekaM cha yathochitam || 48||
tvAmatra kR^ittikAsthAne kathayAmAsurIshvaram |
sarve dharmAdayo dharmAdharmasya karmasAkShiNaH || 49||
prababhUva rahaH krIDA pArvatIshivayoH purA |
dR^iShTasya cha suraiH shambhorvIryaM bhUmau papAta ha || 50||
bhUmistadakShipadvahnau vahnishchAdrau sa bhUdharaH |
ga~NgAyAM so.akShipadvegAt tara~NgaiH sharakAnane || 51||
tatra bAlo.abhavastvaM hi devakAryakR^itiH prabhuH |
tatra labdhaH kR^ittikAbhistvaM bhUmiM gachCha sAmpratam || 52||
tavAbhiShekaM shambhustu kariShyati suraiH saha |
lapsyase sarvashastrANi tArakAkhyaM haniShyasi || 53||
putrastvaM vishvasaMharttustvAM prAptuM chA.akShamA imAH |
nAgniM goptuM yathA shaktaH shuShkavR^ikShaH svakoTare || 54||
dIptavAMstvaM cha vishveShu nAsAM geheShu shobhase |
yathA patanmahAkUpe dvijarAjo na rAjate || 55||
karoShi cha yathA.a.alokaM nA.a.achChanno.asmAsu tejasA |
yathA sUryaH kalAchChanno na bhavenmAnavasya cha || 56||
viShNustvaM jagatAM vyApI nAnyo jAto.asi shAmbhava |
yathA na keShAM vyApyaM cha tatsarvaM vyApakaM nabhaH || 57||
yogIndro nA.anuliptashcha bhAgI chetparipoShaNe |
naiva lipto yathAtmA cha karmayogeShu jIvinAm || 58||
vishvArambhastvamIshashcha nAsu te sambhavet sthitiH |
guNAnAM tejasAM rAshiryathAtmAnaM cha yoginaH || 59||
bhrAtarye tvAM na jAnanti te narA hatabuddhayaH |
nAdriyante yathA bhekAstvekavAsAshcha pa~NkajAn || 60||
kArttikeya uvAcha
bhrAtaHsarvaM vijAnAsi j~nAnaM traikAlikaM cha yat |
j~nAnI tvaM kA prashaMsA te yato mR^ityu~njayAshritaH || 61||
karmaNAM janma yeShAM vA yAsu yAsu cha yoniShu |
tAsu te nirvR^itiM bhrAtaH prApnuvantIha sAmpratam || 62||
kR^ittikAj~nAnavatyashcha yoginyaH prakR^iteH kalAH |
stanyenAsAM varddhito.ahamupakAreNa santatam || 63||
AsAmahaM poShyaputro madaMshA yoShitastvimAH |
tasyAshcha prakR^iteraMshAstatastatsvAmivIryajaH || 64||
na madbhavo he shailendrakanyayA nandikeshvara |
sA cha me dharmato mAtA yathemAH sarvasammatAH || 65||
shambhunA preShitastvaM cha shambhoH putrasamo mahAn |
AgachChAmi tvayA sArddhaM drakShyAmi devatAkulam || 66||
ityevamuktvA taM shIghraM sambodhya kR^ittikAgaNam |
kArttikeyaH pratasthe hi sArddhaM sha~NkarapArShadaiH || 67||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe kArttikeyAnveShaNanandisaMvAdavarNanaM nAma chaturtho.adhyAyaH || 2\.4\.4||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.5\. pa~nchamo.adhyAyaH | devakR^itakumArAbhiShekaH |}
brahmovAcha
etasminnantare tatra dadarsha rathamuttamam |
adbhutaM shobhitaM shashvadvishvakarmavinirmitam || 1||
shatachakraM suvistIrNaM manoyAyi manoharam |
prasthApitaM cha pArvatyA veShTitaM pArShadairvaraiH || 2||
samArohattato.ananto hR^idayena vidUyatA |
kArttikaH paramaj~nAnI parameshAnavIryajaH || 3||
tadaiva kR^ittikAH prApya muktakeshyaH shuchA.a.aturAH |
unmattA iva tatraiva vaktumArebhire vachaH || 4||
kR^ittikA UchuH |
vihAyA.asmAn kR^ipAsindho gachChasi tvaM hi nirdayaH |
nAyaM dharmo mAtR^ivargAn pAlito yat sutastyajet || 5||
snehena varddhito.asmAbhiH putro.asmAkaM cha dharmataH |
kiM kurmaH kva cha yAsyAmo vayaM kiM karavAma ha || 6||
ityuktvA kR^ittikAH sarvAH kR^itvA vakShasi kArttikam |
drutaM mUrchChAmavApustAHsutavichChedakAraNAt || 7||
tAH kumAro bodhayitvA adhyAtmavachanena vai |
tAbhishcha pArShadaiH sArddhamAruroha rathaM mune || 8||
dR^iShTvA shrutvA ma~NgalAni bahUni sukhadAni vai |
kumAraH pArShadaiH sArddhaM jagAma pitR^imandiram || 9||
dakSheNa nandiyuktashcha manoyAyirathena cha |
kumAraH prApa kailAsaM nyagrodhA.akShayamUlake || 10||
tatra tasthau kR^ittikAbhiH pArShadapravaraiH saha |
kumAraH shA~NkariH prIto nAnAlIlAvishAradaH || 11||
tadA sarve suragaNA R^iShayaH siddhachAraNAH |
viShNunA brahmaNA sArddhaM samAchakhyustadAgamam || 12||
tadA dR^iShTvA cha gA~NgeyaM yayau pramuditashshivaH |
anyaiH sameto hariNA brahmaNA cha surarShibhiH | 13||
sha~NkhAshcha bahavo nedurbherI tUryANyanekashaH |
utsavaH sumahAnAsIddevAnAM tuShTachetasAm || 14||
tadAnImeva taM sarve vIrabhadrAdayo gaNAH |
kurvantaH svanvayuH keliM nAnAtAladharasvarAH || 15||
stAvakAH stUyamAnAshcha chakruste guNakIrttanam |
jayashabdaM namashshabdaM kurvANAH prItamAnasAH || 16||
draShTuM yayustaM sharajaM shivAtmajamanuttamam | 17||
pArvatI ma~NgalaM chakre rAjamArgaM manoharam |
padmarAgAdimaNibhiH saMskR^itaM paritaH puram || 18||
patiputravatIbhishcha sAdhvIbhiH strIbhiranvitAH |
lakShmyAditriMshaddevIshcha puraH kR^itvA samAyayau || 19||
rambhAdyapsaraso divyAH sasmitA veShasaMyutAH |
sa~NgItanartanaparA babhUvushcha shivAj~nayA || 20||
ye taM samIkShayAmAsurgA~NgeyaM sha~Nkaropamam |
dadR^ishuste mahattejo vyAptamAsIjjagattraye || 21||
tattejasA vR^itaM bAlaM taptachAmIkaraprabham |
vavandire drutaM sarve kumAraM sUryavarchasam || 22||
jahR^iShurvinataskandhA namashshabdaratAstadA |
parivAryopatasthuste vAmadakShiNamAgatAH || 23||
ahaM viShNushcha shakrashcha tathA devAdayo.akhilAH |
daNDavatpatitA bhUmau parivArya kumArakam || 24||
etasminnantare shambhurgirijA cha mudAnvitA |
mahotsavaM samAgamya dadarsha tanayaM mudA || 25||
putraM nirIkShya cha tadA jagadekabandhuH
prItyAnvitaH paramayA parayA bhavAnyA |
snehAnvito bhujagabhogayuto hi sAkShAt
sarveshvaraH parivR^itaH pramathaiH pareshaH || 26||
atha shaktidharaH skando dR^iShTvA tau pArvatIshivau |
avaruhya rathAttUrNaM shirasA praNanAma ha || 27||
upaguhya shivaH prItyA kumAraM mUrdhni sha~NkaraH |
jaghrau premNA pareshAnaH prasannaH snehakartR^ikaH || 28||
upaguhya guhaM tatra pArvatI jAtasambhramA |
prasnutaM pAyayAmAsa stanaM snehapariplutA || 29||
tadA nIrAjito devaiHsakalatrairmudAnvitaiH |
jayashabdena mahatA vyAptamAsInnabhastalam || 30||
R^iShayo brahmaghoSheNa gItenaiva cha gAyakAH |
vAdyaishcha bahavastatropatasthushcha kumArakam || 31||
svama~NkamAropya tadA maheshaH
kumArakaM taM prabhayA samujjvalam |
babhau bhavAnIpatireva sAkShA\-
chChriyA.anvitaH putravatAM variShThaH || 32||
kumAraH svagaNaiH sArddhamAjagAma shivAlayam |
shivAj~nayA mahotsAhaissaha devairmahAsukhI || 33||
dampatI tau tadA tatraikapadyena virejatuH |
vivandyamAnAvR^iShibhirAvR^itau surasattamaiH || 34||
kumAraH krIDayAmAsa shivotsa~Nge mudAnvitaH |
vAsukiM shivakaNThasthaM pANibhyAM samapIDayat || 35||
prahasya bhagavAn shambhuH shashaMsa girijAM tadA |
nirIkShya kR^ipayA dR^iShTyA kR^ipAlurlIlayAkR^itim || 36||
madasmitena cha tadA bhagavAnmaheshaH
prApto mudaM cha paramAM girijAsametaH |
premNA sa gadgadagiro jagadekabandhu\-
rnovAcha ki~nchana vibhurbhuvanaikabharttA || 37||
atha shambhurjagannAtho hR^iShTo laukikavR^ittavAn |
ratnasiMhAsane ramye vAsayAmAsa kArttikam || 38||
vedamantrAbhipUtaishcha sarvatIrthodapUrNakaiH |
sadratnakumbhashatakaiH snApayAmAsa taM mudA || 39||
sadratnasArarachitakirITamukuTA~Ngadam |
vaijayantIM svamAlAM cha tasmai chakraM dadau hariH || 40||
shUlaM pinAkaM parashuM shaktiM pAshupataM sharam |
saMhArAstraM cha paramAM vidyAM tasmai dadau shivaH || 41||
adAmahaM yaj~nasUtraM vedAMshcha vedamAtaram |
kamaNDaluM cha brahmAstraM vidyAM chaivA.arimardinIm || 42||
gajendraM chaiva vajraM cha dadau tasmai sureshvaraH |
shvetachChatraM ratnamAlAM dadau pAshaM jaleshvaraH || 43||
manoyAyirathaM sUryaH sannAhaM cha mahAchayam |
yamadaNDaM yamashchaiva sudhAkumbhaM sudhAnidhiH || 44||
hutAshano dadau prItyA mahAshaktiM svasUnave |
dadau svashastraM nirR^itirvAyavyAstraM samIraNaH || 45||
gadAM dadau kuberashcha shUlamIsho dadau mudA |
nAnAshastrANyupAyAMshcha sarve devA dadurmudA || 46||
kAmAstraM kAmadevo.atha dadau tasmai mudAnvitaH |
gadAM dadau svavidyAshcha tasmai cha parayA mudA || 47||
kShIrodo.amUlyaratnAni vishiShTaM ratnanUpuram |
himAlayo hi divyAni bhUShaNAnyaMshukAni cha || 48||
chitrabarhaNanAmAnaM svaputraM garuDo dadau |
aruNastAmrachUDAkhyaM balinaM charaNAyudham || 49||
pArvatI sasmitA hR^iShTA paramaishvaryamuttamam |
dadau tasmai mahAprItyA chira~njIvitvameva cha || 50||
lakShmIshcha sampadaM divyAM mahAhAraM manoharam |
sAvitrI siddhavidyAM cha samastAM pradadau mudA || 51||
anyAshchApi mune devyo yA yAstatra samAgatAH |
svAtmavatsu dadustasmai tathaiva shishupAlikAH || 52||
mahAmahotsavastatra babhUva munisattama |
sarve prasannatAM yAtA visheShAchcha shivAshivau || 53||
etasminnantare kAle provAcha prahasan mudA |
mune brahmAdikAn devAn rudro bhargaH pratApavAn || 54||
shiva uvAcha
he hare he vidhe devAH sarve shR^iNuta madvachaH |
sarvathAhaM prasanno.asmi varAnvR^iNuta aichChikAn || 55||
brahmovAcha
tachChrutvA vachanaM shambhormune viShNvAdayaH surAH |
sarve prochuH prasannAsyA devaM pashupatiM prabhum || 56||
kumAreNa hato hyeSha tArako bhavitA prabho |
tadarthameva sa~njAtamidaM charitamuttamam || 57||
tasmAdadyaiva yAsyAmastArakaM hantumudyatAH |
Aj~nAM dehi kumArAya sa taM hanyAt sukhAya naH || 58||
tatheti matvA sa vibhurdattavAMstanayaM tadA |
devebhyastArakaM hantuM kR^ipayA paribhAvitaH || 59||
shivAj~nayA surAH sarve brahmaviShNumukhAstadA |
puraskR^itya guhaM sadyo nirjagmurmilitA gireH || 60||
bahirnissR^itya kailAsAttvaShTA shAsanato hareH |
vireche nagaraM ramyamadbhutaM nikaTe gireH || 61||
tatra ramyaM gR^ihaM divyamadbhutaM paramojjvalam |
guhArthaM nirmame tvaShTA tatra siMhAsanaM varam || 62||
tadA hariH sudhIrbhaktyA kArayAmAsa ma~Ngalam |
kArttikasyAbhiShekaM hi sarvatIrthajalaiH suraiH || 63||
sarvathA samala~NkR^itya vAsayAmAsa sa~Ngraham |
kArttikasya vidhiM prItyA kArayAmAsa chotsavam || 64||
brahmANDAdhipatitvaM hi dadau tasmai mudA hariH |
chakAra tilakaM tasya samAnarcha suraissaha || 65||
praNamya kArttikaM prItyA sarvadevarShibhiH saha |
tuShTAva vividhaiH stotraiH shivarUpaM sanAtanam || 66||
varasiMhAsanastho hi shushubhe.atIva kArttikaH |
svAmibhAvaM samApanno brahmANDasyApi pAlakaH || 67||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe kumArAbhiShekavarNanaM nAma pa~nchamo.adhyAyaH || 2\.4\.5||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.6\. ShaShTho.adhyAyaH | kumArAdbhutacharitravarNanam |}
brahmovAcha
atha tatra sa gA~Ngeyo darshayAmAsa sUtikAm |
tAmeva shR^iNu suprItyA nArada tvaM svabhaktidAm || 1||
dvija eko nAradAkhya AjagAma tadaiva hi |
tatrAdhvarakaraH shrImAn sharaNArthaM guhasya vai || 2||
sa vipraH prApya nikaTaM kArttikasya prasannadhIH |
svAbhiprAyaM samAchakhyau supraNamya shubhaiH stavaiH || 3||
vipra uvAcha
shR^iNu svAminvacho me.adya kaShTaM me vinivAraya |
sarvabrahmANDanAthastvamataste sharaNaM gataH || 4||
ajamedhAdhvaraM kartumArambhaM kR^itavAnaham |
so.ajo gato gR^ihAnme hi troTayitvA svabandhanam || 5||
na jAne sa gataH kutrA.anveShaNaM tatkR^itaM bahu |
na prApto.atassa balavAn bha~Ngo bhavati me kratoH || 6||
tvayi nAthe sati vibho yaj~nabha~NgaH kathaM bhavet |
vichAryyaivA.akhileshAna kAmaM pUrNaM kuruShva me || 7||
tvAM vihAya sharaNyaM kaM yAyAM shivasuta prabho |
sarvabrahmANDanAthaM hi sarvAmarasusevitam || 8||
dInabandhurdayAsindhuH susevyo bhaktavatsalaH |
haribrahmAdidevaishcha sustutaH parameshvaraH || 9||
pArvatInandanasskandaH paramekaH parantapaH |
paramAtmA.atmadaH svAmI satAM cha sharaNArthinAm || 10||
dInAnAtha mahesha sha~Nkarasuta trailokyanAtha prabho
mAyAdhIsha samAgato.asmi sharaNaM mAM pAhi viprapriya |
tvaM sarvaprabhurAnatA.akhilavidabrahmAdidevaiH stutaH
tvaM mAyAkR^itirAtmabhaktasukhado rakShAparo mAyikaH || 11||
bhaktaprANaguNAkarastriguNato bhinno.asi shambhupriyaH
shambhuH shambhusutaH prasannasukhadaH sachchitsvarUpo mahAn |
sarvaj~nastripuraghnasha~NkarasutaH satpremavashyaHsadA
ShaDvaktraH priyasAdhurAnatapriyaH sarveshvaraH sha~NkaraH |
sAdhudrohakaraghna sha~Nkaraguro brahmANDanAtho prabhuH
sarveShAmamarAdisevitapado mAM pAhi sevApriya || 12||
vairibhaya~Nkara sha~Nkara janasharaNasya
vande tava padapadmaM sukhakaraNasya |
vij~naptiM mama karNe skanda nidhehi
nijabhaktiM janachetasi sadA vidhehi || 13||
karoti kiM tasya balI vipakSho
dakSho.api pakShobhayapArshvaguptaH |
kiM takShako.apyAmiShabhakShako vA
tvaM rakShako yasya sadakShamAnaH || 14||
vibudhagururapi tvAM stotumIsho na hi syAt
kathaya kathamahaM syAM mandabuddhirvarArchyaH |
shuchirashuchiranAryo yAdR^ishastAdR^isho vA
padakamalaparAgaM skanda te prArthayAmi || 15||
he sarveshvara bhaktavatsala kR^ipA\-sindho tvadIyo.asmyahaM
bhR^ityaH svasya na sevakasya gaNapa\-syAgaHshataM satprabho |
bhaktiM kvApi kR^itAM manAgapi vibho jAnAsi bhR^ityArtihA
tvatto nAstyaparo.avitA na bhagavan matto naraH pAmaraH || 16||
kalyANakarttA kalikalmaShaghnaH
kuberabandhuH karuNArdrachittaH |
triShaTkanetro rasavaktrashobhI
yaj~naM prapUrNaM kuru me guha tvam || 17||
rakShakastvaM trilokasya sharaNAgatavatsalaH |
yaj~nakarttA yaj~nabharttA harase vighnakAriNAm || 18||
vighnavAraNa sAdhUnAM sarga kAraNa sarvataH |
pUrNaM kuru mameshAna sutayaj~na namostu te || 19||
sarvatrAtA skanda hi tvaM sarvaj~nAtA tvameva hi |
sarveshvarastvamIshAno niveshasakalA.avanaH || 20||
sa~NgItaj~nastvamevAsi vedavij~naH paraH prabhuH |
sarvasthAtA vidhAtA tvaM devadevaH satAM gatiH || 21||
bhavAnInandanaH shambhutanayo vayunaH svarAT |
dhyAtA dhyeyaH pitR^INAM hi pitA yoniH sadAtmanAm || 22||
brahmovAcha
ityAkarNya vachastasya devasamrAT shivAtmajaH |
svagaNaM vIrabAhvAkhyaM preShayAmAsa tatkR^ite || 23||
tadAj~nayA vIrabAhustadanveShaNahetave |
praNamya svAminaM bhaktyA mahAvIro drutaM yayau || 24||
anveShaNaM chakArAsau sarvabrahmANDagolake |
na prApa tamajaM kutra shushrAva tadupadravam || 25||
jagAmA.atha sa vaikuNThaM tatrA.ajaM pradadarsha tam |
upadravaM prakurvantaM galayUpaM mahAbalam || 26||
dhR^itvA taM shR^i~NgayorvIro dharShayitvAtivegataH |
AninAya svAmipuro vikurvantaM ravaM bahu || 27||
dR^iShTvA taM kArttikasso.aramAruroha sa taM prabhuH |
dhR^itabrahmANDagarimA mahAsUtikaro guhaH || 28||
muhUrtamAtratasso.ajo brahmANDaM sakalaM mune |
babhrAma shrama evAshu punastatsthAnamAgataH || 29||
tata uttIrya sa svAmI samuvAsa svamAsanam |
so.ajaH sthitastu tatraiva sa nArada uvAcha tam || 30||
nArada uvAcha
namaste deva devesha dehi me.ajaM kR^ipAnidhe |
kuryAmadhvaramAnandAtsakhAyaM kuru mAmaho || 31||
kArttika uvAcha
vadhayogyo na viprA.ajaH svagR^ihaM gachCha nArada |
pUrNo.astu te.adhvaraH sarvaH prasAdAdeva me kR^itaH || 32||
brahmovAcha
ityAkarNya dvijaHsvAmI vachanaM prItamAnasaH |
jagAma svAlayaM dattvA tasmA AshiShamuttamAm || 33||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe kumArAdbhutacharitavarNanaM nAma ShaShTho.adhyAyaH || 2\.4\.6||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.7\. saptamo.adhyAyaH | tArakeNa sahendrAdidevAnAM yuddhavarNanam |}
brahmovAcha
haryyAdayassurAste cha dR^iShTvA tachcharitaM vibhoH |
suprasannA babhUvurhi vishvAsAsaktamAnasAH || 1||
valgantaH kurvato nAdaM bhAvitAshshivatejasA |
kumArante puraskR^itya tArakaM hantumAyayuH || 2||
devAnAmudyamaM shrutvA tArako.api mahAbalaH |
sainyena mahatA sadyo yayau yoddhuM surAn prati || 3||
devA dR^iShTvA samAyAntaM tArakasya mahAbalam |
balena bahukurvantaH siMhanAdaM visismiyuH || 4||
tadA nabho.a~NganA vANIM jagAdopari satvaram |
sha~NkarapreritA sadyo haryAdInakhilAn surAn || 5||
vyomavANyuvAcha
kumAraM cha puraskR^itya surA yUyaM samudyatAH |
daityAnvijitya sa~NgrAme jayino.atha bhaviShyatha || 6||
brahmovAcha
vAchaM tu khecharIM shrutvA devAH sarve samutsukAH |
vIrashabdAn prakurvanto nirbhayA hyabhavaMstadA || 7||
kumAraM cha puraskR^itya sarve te gatasAdhvasAH |
yoddhukAmAH surA jagmurmahIsAgarasa~Ngamam || 8||
AjagAma drutaM tatra yatra devAH sa tArakaH |
sainyena mahatA sArddhaM asurairbahubhirvR^itaH || 9||
raNadundubhayo neduH pralayAmbudaniHsvanAH |
karkashAni cha vAdyAni parANi cha tadAgame || 10||
garjamAnAstadA daityAstArakeNAsureNa ha |
kampayanto bhuvaM pAdakramairvalgunakArakAH || 11||
tachChrutvA ravamatyugraM sarve devA vinirbhayAH |
aikapadyena chottasthuryoddhukAmAshcha tArakam || 12||
gajamAropya devendraH kumAraM hyagrato.abhavat |
surasainyena mahatA lokapAlaiH samAvR^itaH || 13||
tadA dundubhayo nedurbherItUryANyanekashaH |
vINAveNumR^ida~NgAni tathA gandharvanissvanAH || 14||
gajaM dattvA mahendrAya kumAro yAnamAruhat |
anekAshcharyasambhUtaM nAnAratnasamanvitam || 15||
vimAnamAruhya tadA mahAyashAH
sa shA~NkariHsarvaguNairupetaH |
shriyA sametaH parayA babhau mahAn
saMvIjyamAnashchamarairmahAprabhaiH || 16||
prAchetasaM ChatramatIvasuprabhaM
ratnairupetaM vividhairvirAjitam |
dhR^itaM tadA tachcha kumAramUrdhni vai
hyanantachAndraiH kiraNairmahAprabhaiH || 17||
militAste tadA sarve devAH shakrapurogamAH |
svaiH svairbalaiH parivR^itA yuddhakAmA mahAbalAH || 18||
evaM devAshcha daityAshcha yoddhukAmAH sthitA bhuvi |
sainyena mahatA tena vyUhaM kR^itvA pR^ithak pR^ithak || 19||
te sene suradaityAnAM shushubhAte parasparam |
hantukAme tadAnyonyaM stUyamAne cha bandibhiH || 20||
ubhe sene tadA teShAmagarjetAM vanopame |
bhaya~Nkare.atyavIrANAmitareShAM sukhAvahe || 21||
etasminnantare tatra balonmattAH parasparam |
daityA devA mahAvIrA yuyudhuH krodhavihvalAH || 22||
AsItsutumulaM yuddhaM devadaityasamAkulam |
ruNDamuNDA~NkitaM sarvaM kShaNena samapadyata || 23||
bhUmau nipatitAstatra shatasho.atha sahasrashaH |
nikR^ittA~NgA mahAshastrairnihatA vIrasammatAH || 24||
keShA~nchidbAhavashChinnAH khaDgapAtaiH sudAruNaiH |
keShA~nchidUravashChinnA vIrANAM mAninAM mR^idhe || 25||
kechinmathitasarvA~NgA gadAbhirmudgaraistathA |
kechinnirbhinnahR^idayAH pAshairbhallaishcha pAtitAH || 26||
kechidvidAritAH pR^iShThe kuntairR^iShTibhira~NkushaiH |
ChinnAnyapi shirAMsyeva patitAni cha bhUtale || 27||
bahUni cha kabandhAni nR^ityamAnAni tatra vai |
valgamAnAni shatasho udyatAstrakarANi cha || 28||
nadyaH pravartitAstatra shatasho.asR^i~NvahAstadA |
bhUtapretAdayastatra shatashashcha samAgatAH || 29||
gomAyavashshivAH tatra bhakShayantaH palaM bahu |
tathA gR^idhravaTA shyenA vAyasA mAMsabhakShakAH ||
bubhujuH patitAnAM cha palAni subahUni vai | 30||
etasminnantare tatra tArakAkhyo mahAbalaH |
sainyena mahatA sadyo yayau yoddhuM surAn prati || 31||
devA dR^iShTvA samAyAntaM tArakaM yuddhadurmadam |
yoddhukAmaM tadA sadyo yayuH shakrAdayastadA |
babhUvAtha mahonnAdaHsenayorubhayorapi || 32||
athAbhUd dvandvayuddhaM hi surAsuravimardanam |
yaM dR^iShTvA harShitA vIrAH klIbAshcha bhayamAgatAH || 33||
tArako yuyudhe yuddhe shakreNa ditijo balI |
agninA saha saMhrAdo jambhenaiva yamaH svayam || 34||
mahAprabhurnairR^itena pAshI saha balena cha |
suvIro vAyunA sArdhaM pavamAnena guhyarAT || 35||
IshAnena samaM shambhuryuyudhe raNavittamaH |
shumbhaH sheSheNa yuyudhe kumbhashchandreNa dAnavaH || 36||
ku~njaro mihireNAjau mahAbalaparAkramaH |
yuyudhe paramAstraishcha nAnAyuddhavishAradaH || 37||
evaM dvandvena yuddhena mahatA cha surAsurAH |
sa~Ngare yuyudhuHsarve balena kR^itanishchayAH || 38||
anyonyaM sparddhamAnAste.amarA daityA mahAbalAH |
tasmindevAsure yuddhe durjayA abhavanmune || 39||
tadA cha teShAM suradAnavAnAM
babhUva yuddhaM tumulaM jayaiShiNAm |
sukhAvahaM vIramanasvinAM vai
bhayAvahaM chaiva tathetareShAm || 40||
mahI mahAraudratarA vinaShTakaiH
surAsurairvai patitairanekashaH |
tasminnagamyAtibhayAnakA tadA
jAtA mahAsaukhyavahA manasvinAm || 41||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe yuddhaprArambhavarNanaM nAma saptamo.adhyAyaH || 2\.4\.7||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.8\. aShTamo.adhyAyaH | devadaityayuddhavarNanam |}
brahmovAcha
iti te varNitastAta devadAnava senayoH |
sa~NgrAmastumulo.atIva tatprabhvoH shR^iNu nArada || 1||
evaM yuddhe.atitumule devadAnavasa~NkShaye |
tArakeNaiva devendraH shaktyA paramayA saha || 2||
sadyaH papAta nAgAshcha dharaNyAM mUrchChito.abhavat |
paraM kashmalamApede vajradhArI sureshvaraH || 3||
tathaiva lokapAH sarve.asuraishcha balavattaraiH |
parAjitA raNe tAta mahAraNavishAradaiH || 4||
anye.api nirjarA daityairyuddhyamAnAH parAjitAH |
asahanto hi tattejaH palAyanaparAyaNAH || 5||
jagarjurasurAstatra jayinaH sukR^itodyamAH |
siMhanAdaM prakurvantaH kolAhalaparAyaNAH || 6||
etasminnantare tatra vIrabhadro ruShAnvitaH |
AsasAda gaNairvIraistArakaM vIramAninam || 7||
nirjarAn pR^iShThataH kR^itvA shivakopodbhavo balI |
tatsammukho babhUvAtha yoddhukAmo gaNAgraNIH || 8||
tadA te pramathAH sarve daityAshcha paramotsavAH |
yuyudhuH saMyuge.anyonyaM prasaktAshcha mahAraNe || 9||
trishUlairR^iShTibhiH pAshaiH khaDgaiH parashupaTTishaiH |
nijaghnuHsamare.anyo.anyaM raNe raNavishAradAH || 10||
tArako vIrabhadreNa sa trishUlAhato bhR^isham |
papAta sahasA bhUmau kShaNaM mUrChApariplutaH || 11||
utthAya sa drutaM vIrastArako daityasattamaH |
labdhasa.nj~no balAchChaktyA vIrabhadraM jaghAna ha || 12||
vIrabhadrastathA vIro mahAtejA hi tArakam |
jaghAna trishikhenAshu ghoreNa nishitena tam || 13||
so.api shaktyA vIrabhadraM jaghAna samare tataH |
tArako ditijAdhIshaH prabalo vIrasammataH || 14||
evaM saMyuddhyamAnau tau jaghnatushchetaretaram |
nAnAstrashastraiH samare raNavidyAvishAradau || 15||
tayormahAtmanostatra dvandvayuddhamabhUttadA |
sarveShAM pashyatAmeva tumulaM romaharShaNam || 16||
tato bherImR^ida~NgAshcha paTahAnakagomukhAH |
vinedurvihatA vIraiH shR^iNvatAM subhayAnakAH || 17||
yuyudhAtetisannaddhau prahArairjarjarIkR^itau |
anyo.anyamatisaMrabdhau tau budhA~NgArakAviva || 18||
evaM dR^iShTvA tadA yuddhaM vIrabhadrasya tena cha |
tatra gatvA vIrabhadramavochastvaM shivapriyaH || 19||
nArada uvAcha
vIrabhadra mahAvIra gaNAnAmagraNIrbhavAn |
nivartasva raNAdasmAdrochate na vadhastvayA || 20||
evaM nishamya tvadvAkyaM vIrabhadro gaNAgraNIH |
avadatsa ruShAviShTastvAM tadA tu kR^itA~njaliH || 21||
vIrabhadra uvAcha
munivarya mahAprAj~na shR^iNu me paramaM vachaH |
tArakaM cha vadhiShyAmi pashya me.adya parAkramam || 22||
Anayanti cha ye vIrAHsvAminaM raNasaMsadi |
te pApino mahAklIbA vinashyanti raNaM gatAH || 23||
asadgatiM prApnuvanti teShAM cha nirayo dhruvam |
vIrabhadro hi vij~neyo na vAchyaste kadAchana || 24||
shastrAstrairbhinnagAtrA ye raNaM kurvanti nirbhayAH |
ihAmutra prashaMsyAste labhante sukhamadbhutam || 25||
shR^iNvantu mama vAkyAni devA haripurogamAH |
atArakAM mahImadya kariShye svAmivarjitaH || 26||
ityuktvA pramarthaissArddhaM vIrabhadro hi shUladhR^ik |
vichintya manasA shambhuM yuyudhe tArakeNa hi || 27||
vR^iShArUDhairanekaishcha trishUlavaradhAribhiH |
mahAvIraiH trinetraishcha sa reje raNasa~NgataH || 28||
kolAhalaM prakurvanto nirbhayAH shatasho gaNAH |
vIrabhadraM puraskR^itya yuyudhurdAnavaiH saha || 29||
asurAste.api yuyudhuH tArakAsurajIvinaH |
balotkaTA mahAvIrA mardayanto gaNAn ruShA || 30||
punaH punashchaiva babhUva sa~Ngaro
mahotkaTo daityavarairgaNAnAm |
praharShamANAH paramAstrakovidAH
tadA gaNAste jayino babhUvuH || 31||
gaNairjitAste prabalairasurA vimukhA raNe |
palAyanaparA jAtA vyathitA vyagramAnasAH || 32||
evaM bhraShTaM svasainyaM tad dR^iShTvA tatpAlako.asuraH |
tArako hi ruShAviShTo hantuM devagaNAn yayau || 33||
bhujAnAmayutaM kR^itvA siMhamAruhya vegataH |
pAtayAmAsa tAndevAn gaNAMshcha raNamUrddhani || 34||
sa dR^iShTvA tasya tatkarma vIrabhadro gaNAgraNIH |
chakAra sumahatkopaM tadvadhAya mahAbalI || 358||
smR^itvA shivapadAmbhojaM jagrAha trishikhaM param |
jajvalustejasA tasya dishaH sarvA nabhastathA || 36||
etasminnantare svAmI vArayAmAsa taM raNAt |
vIrabAhumukhAnsadyo mahAkautukadarshakaH || 37||
tadAj~nayA vIrabhadro nivR^itto.abhUdraNAttadA |
kopaM chakre mahAvIrastArako.asuranAyakaH || 38||
chakAra bANavR^iShTiM cha suropari tadA.asuraH |
tapto.a.ahvAsItsurAnsadyo nAnAstraraNakovidaH || 39||
evaM kR^itvA mahatkarma tArako.asurapAlakaH |
sarveShAmapi devAnAmashakyo balinAM varaH || 40||
evaM nihanyamAnAMstAn dR^iShTvA devAn bhayAkulAn |
kopaM kR^itvA raNAyAshu sannaddho.abhavadachyutaH || 41||
chakraM sudarshanaM shAr~NgaM dhanurAdAya sAyudhaH |
abhyudyayau mahAdaityaM raNAya bhagavAn hariH || 42||
tataHsamabhavadyuddhaM haritArakayormahat |
lomaharShaNamatyugraM sarveShAM pashyatAM mune || 43||
gadAmudyamya sa harirjaghAnAsuramojasA |
dvidhA chakAra tAM daityastrishikhena mahAbalI || 44||
tataH sa kruddho bhagavAndevAnAmabhaya~NkaraH |
shAr~NgachyutaiH sharavyUhairjaghAnAsuranAyakam || 46||
so.api daityo mahAvIrastArakaH paravIrahA |
chichCheda sakalAnbANAnsvasharairnishitairdrutam || 46||
atha shaktyA jaghAnAshu murAriM tArakAsuraH |
bhUmau papAta sa haristatprahAreNa mUrchChitaH || 47||
jagrAha sa ruShA chakramutthitaH kShaNato.achyutaH |
siMhanAdaM mahatkR^itvA jvalajjvAlAsamAkulam || 48||
tena taM cha jaghAnAsau daityAnAmadhipaM hariH |
tatprahAreNa mahatA vyathito nyapatadbhuvi || 49||
punashchotthAya daityendrastArako.asuranAyakaH |
chichCheda tvaritaM chakraM svashaktyAtibalAnvitaH || 50||
punastayA mahAshaktyA jaghAnAmaravallabham |
achyuto.api mahAvIro nandakena jaghAna tam || 51||
evamanyo.anyamasuro viShNushcha balavAnubhau |
yuyudhAte raNe bhUri tatrAkShatabalau mune || 52||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe deva daityasAmAnyayuddhavarNanaM nAmAShTamo.adhyAyaH || 2\.4\.8||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.9\. navamo.adhyAyaH | tArakeNa saha vIrabhadraviShNorghorayuddhavarNanam |}
brahmovAcha
devadeva guha svAmin shA~Nkare pArvatIsuta |
na shobhate raNo viShNutArakAsurayorvR^ithA || 1||
viShNunA na hi vadhyo.asau tArako balavAnati |
mayA dattavarastasmAtsatyaM satyaM vadAmyaham || 2||
nAnyo hantAsya pApasya tvAM vinA pArvatIsuta |
tasmAttvayA hi kartavyaM vachanaM me mahAprabho || 3||
sannaddho bhava daityasya vadhAyAshu parantapa |
tadvadhArthaM samutpannaH sha~NkarAttvaM shivAsuta || 4||
rakSha rakSha mahAvIra tridashAn vyathitAn raNe |
na bAlastvaM yuvA naiva kiM tu sarveshvaraH prabhuH || 5||
shakraM pashya tathA viShNuM vyAkulaM cha surAn gaNAn |
enaM jahi mahAdaityaM trailokyaM sukhitaM kuru || 6||
anena vijitashchendro lokapAlaiH purA saha |
viShNushchApi mahAvIro tarjitastapaso balAt || 7||
trailokyaM nirjitaM sarvamasureNa durAtmanA |
idAnIM tava sAnnidhyAtpunaryuddhaM kR^itaM cha taiH || 8||
tasmAttvayA nihantavyastArakaH pApapUruShaH |
anyavadhyo na chaivAyaM madvarAchCha~NkarAtmaja || 9||
iti shrutvA mama vachaH kumAraH sha~NkarAtmajaH |
vijahAsa prasannAtmA tathAstviti vacho.abravIt || 10||
vinishchityAsuravadhaM shA~NkariHsa mahAprabhuH |
vimAnAdavatIryAtha padAtirabhavattadA || 11||
padbhyAM tadAsau paridhAvamAno
reje.ativIraH shivajaH kumAraH |
kare samAdAya mahAprabhAM tAM
shaktiM maholkAmiva dIptidIptAm || 12||
dR^iShTvA tamAyAntamatiprachaNDa\-
mavyAkulaM ShaNmukhamaprameyam |
daityo babhAShe surasattamAnsa
kumAra eSha dviShatAM prahantA || 13||
anena sAkaM hyahamekavIro
yotsye cha sarvAnahameva vIrAn |
gaNAMshcha sarvAnapi ghAtayAmi
salokapAlAn harinAyakAMshcha || 14||
ityevamuktvA sa tadA mahAbalaH
kumAramuddishya yayau cha yoddhum |
jagrAha shaktiM paramAdbhutAM cha
sa tArako devavarAn babhAShe || 15||
tAraka uvAcha
kumAro me.agratashchAdya bhavadbhishcha kathaM kR^itaH |
yUyaM gatatrapA devA visheShAchChakrakeshavau || 16||
puraitAbhyAM kR^itaM karma viruddhaM vedamArgataH |
tachChR^iNudhvaM mayA proktaM varNayAmi visheShataH || 17||
tatra viShNushChalI doShI hyavivekI visheShataH |
baliryena purA baddhashChalamAshritya pApataH || 18||
tenaiva yatnataH pUrvamasurau madhukaiTabhau |
shirohInau kR^itau dhaurtyAdvedamArgo vivarjitaH || 19||
mohinIrUpato.anena pa~NktibhedaH kR^ito hi vai |
devAsurasudhApAne vedamArgo vigarhitaH || 20||
rAmo bhUtvA hatA nArI vAlI vidhvaMsito hi saH |
punarvaishravaNo vipro hato nItirhatA shruteH || 21||
pApaM vinA svakIyA strI tyaktA pAparatena yat |
tatrApi shrutimArgashcha dhvaMsitaH svArthahetave || 22||
svajananyAH shirashChinnamavatAre rasAkhyake |
guruputrApamAnashcha kR^ito.anena durAtmanA || 23||
kR^iShNo bhUtvAnyanAryashcha dUShitAH kuladharmataH |
shrutimArgaM parityajya svavivAhAH kR^itAstathA || 24||
punashcha vedamArgo hi nindito navame bhave |
sthApitaM nAstikamataM vedamArgavirodhakR^it || 25||
evaM yena kR^itaM pApaM vedamArgaM visR^ijya vai |
sa kathaM vijayedyuddhe bhaveddharmavatAM varaH || 26||
bhrAtA jyeShThashcha yastasya shakraH pApI mahAnmataH |
tena pApAnyanekAni kR^itAni nijahetutaH || 27||
nikR^itto hi ditergarbhaH svArtha hetorvisheShataH |
dharShitA gautamastrI vai hato vR^itrashcha viprajaH || 28||
vishvarUpadvijAtervai bhAgineyasya yadguroH |
nikR^ittAni cha shIrShANi tadadhvAdhvaMsitaH shruteH || 29||
kR^itvA bahUni pApAni hariH shakraH punaHpunaH |
tejobhirvihatAveva naShTavIryau visheShataH || 30||
tayorbalena no yUyaM sa~NgrAme jayamApsyatha |
kimarthaM mUDhatAM prApya prANAMstyaktumihAgatAH || 31||
jAnantau dharmametau na svArthalampaTamAnasau |
dharmaM vinA.amarAH kR^ityaM niShphalaM sakalaM bhavet || 32||
mahAdhR^iShTAvimau me.adya kR^itavantau purashshishum |
ahaM bAlaM vadhiShyAmi tayoH so.api bhaviShyati || 33||
kiM tu bAla ito yAyAd dUraM prANaparIpsayA |
ityuktvoddishya cha harI vIrabhadramuvAcha saH || 34||
purA hatAstvayA viprA dakShayaj~ne hyanekashaH |
tatkarmaNaH phalaM chAdya darshayiShyAmi te.anagha || 35||
brahmovAcha
ityevamuktvA tu vidhUya puNyaM
nijaM sa tannindanakarmaNA vai |
jagrAha shaktiM paramAdbhutAM cha
sa tArako yuddhavatAM variShThaH || 36||
taM bAlAntikamAyAntaM tArakAsuramojasA |
AjaghAna cha vajreNa shakro guhapurassaraH || 37||
tena vajraprahAreNa tArako jarjarIkR^itaH |
bhUmau papAta sahasA nindAhatabalaH kShaNam || 38||
patito.api samutthAya shaktyA taM prAharadruShA |
purandaraM gajasthaM hi pAtayAmAsa bhUtale || 39||
hAhAkAro mahAnAsItpatite cha purandare |
senAyAM nirjarANAM hi tad dR^iShTvA klesha Avishat || 40||
tArakeNA.api tatraiva yatkR^itaM karma duHkhadam |
svanAshakAraNaM dharmaviruddhaM tannibodha me || 41||
patitaM cha padAkramya hastAdvajraM pragR^ihya vai |
punarudvajraghAtena shakramAtADayadbhR^isham | 42||
evaM tiraskR^itaM dR^iShTvA shakraM viShNuH pratApavAn |
chakramudyasya bhagavAMstArakaM sa jaghAna ha || 43||
chakraprahArAbhihato nipapAta kShitau hi saH |
punarutthAya daityendraH shaktyA viShNuM jaghAna tam || 44||
tena shaktiprahAreNa patito bhuvi chAchyutaH |
hAhAkaro mahAnAsIchchukrushushchA.atinirjarAH || 45||
nimeSheNa punarviShNuryAvaduttiShThate svayam |
tAvatsa vIrabhadro hi tatkShaNAdAgato.asuram || 46||
trishUlaM cha samudyamya vIrabhadraH pratApavAn |
tArakaM ditijAdhIshaM jaghAna prasabhaM balI || 47||
tattrishUlaprahAreNa sa papAta kShitau tadA |
patito.api mahAtejAstArakaH punarutthitaH || 48||
kR^itvA krodhaM mahAvIraHsakalAsuranAyakaH |
jaghAna parayA shaktyA vIrabhadraM tadorasi || 49||
vIrabhadro.api patito bhUtale mUrChitaH kShaNam |
tachChaktyA parayA krodhAnnihato vakShasi dhruvam || 50||
sagaNAshchaiva devAste gandharvoragarAkShasAH |
hAhAkAreNa mahatA chukrushushcha muhurmuhuH || 51||
nimeShamAtrAtsahasA mahaujAH
ssa vIrabhadro dviShatAM nihantA |
trishUlamudyamya taDitprakAshaM
jAjvalyamAnaM prabhayA vireje || 52||
svarochiShA bhAsitadigvitAnaM
sUryendubimbAgnisamAnamaNDalam |
mahAprabhaM vIrabhayAvahaM paraM
kAlAkhyamatyantakaraM mahojjvalam || 53||
yAvattrishUlena tadA hantukAmo mahAbalaH |
vIrabhadro.asuraM tAvatkumAreNa nivAritaH || 54||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe tArakavAkyashakraviShNuvIrabhadrayuddhavarNanaM nAma navamo.adhyAyaH || 2\.4\.9||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.10\. dashamo.adhyAyaH | tArakAsuravadhaH devotsavavarNana~ncha |}
brahmovAcha
nivArya vIrabhadraM taM kumAraH paravIrahA |
samaichChattArakavadhaM smR^itvA shivapadAmbujau || 1||
jagarjAtha mahAtejAH kArtikeyo mahAbalaH |
sannaddhaH so.abhavatkruddhaH sainyena mahatA vR^itaH || 2||
tadA jaya jayetyuktaM sarvairdevagaNaistathA |
saMstuto vAgbhiriShTAbhistadaiva cha surarShibhiH || 3||
tArakasya kumArasya sa~NgrAmo.atIva duHsahaH |
jAtastadA mahAghoraH sarvabhUta bhaya~NkaraH || 4||
shaktihastau cha tau vIrau yuyudhAte parasparam |
sarveShAM pashyatAM tatra mahAshcharyavatAM mune || 5||
shaktinirbhinnadehau tau mahAsAdhanasaMyutau |
parasparaM va~nchayantau siMhAviva mahAbalau || 6||
vaitAlikaM samAshritya tathA khecharakaM matam |
prApataM cha samAshritya shaktyA shaktiM vijaghnatuH || 7||
ebhirmantrairmahAvIrau chakraturyuddhamadbhutam |
anyo.anyaM sAdhakau bhUtvA mahAbalaparAkramau || 8||
mahAbalaM prakurvantau parasparavadhaiShiNau |
jaghnatuH shaktidhArAbhI raNe raNavishAradau || 9||
mUrdhni kaNThe tathA chorvorjAnvoshchaiva kaTItaTe |
vakShasyurasi pR^iShThe cha chichChidushcha parasparam || 10||
tadA tau yudhyamAnau cha hantukAmau mahAbalau |
valgantau vIrashabdaishcha nAnAyuddhavishAradau || 11||
abhavanprekShakAH sarve devA gandharvakinnarAH |
UchuH parasparaM tatra ko.asmin yuddhe vijeShyate || 12||
tadA nabhogatA vANI jagau devAMshcha sAntvayan |
asuraM tArakaM chAtra kumAro.ayaM haniShyati || 13||
mA shochyatAM suraiH sarvai sukhena sthIyatAmiti |
yuShmadarthaM sha~Nkaro hi putrarUpeNa saMsthitaH || 14||
shrutvA tadA tAM gagane samIritAM
vAchaM shubhAM sa pramathaiH samAvR^itaH |
nihantukAmaH sukhitaH kumArako
daityAdhipaM tArakamAshvabhUttadA || 15||
shaktyA tayA mahAbAhurAjaghAna stanAntare |
kumAraH sma ruShAviShTastArakAsuramojasA || 16||
taM prahAramanAdR^itya tArako daityapu~NgavaH |
kumAraM chApi sa~NkruddhaH svashaktyA sa~njaghAna saH || 17||
tena shaktiprahAreNa shA~NkarirmUrchChito.abhavat |
muhUrtAchchetanAM prApa stUyamAno maharShibhiH || 18||
yathA siMho madonmatto hantukAmastathAsuram |
kumArastArakaM shaktyA sa jaghAna pratApavAn || 19||
evaM parasparaM tau hi kumArashchApi tArakaH |
yuyudhAte.atisaMrabdhau shaktiyuddhavishAradau || 20||
abhyAsaparamAvAstAmanyonyaM vijigIShayA |
padAtinau yudhyamAnau chitrarUpau tarasvinau || 21||
vividhairghAtapu~njaistAvanyonyaM vinijaghnatuH |
nAnAmArgAnprakurvantau garjantau suparAkramau || 22||
avalokaparAH sarve devagandharvakinnarAH |
vismayaM paramaM jagmurnochuH ki~nchana tatra te || 23||
na vavau pavamAnashcha niShprabho.abhUddivAkaraH |
chachAla vasudhA sarvA sashailavanakAnanA || 24||
etasminnantare tatra himAlayamukhA dharAH |
snehArditAstadA jagmuH kumAraM cha parIpsavaH || 25||
tataH sa dR^iShTvA tAnsarvAnbhayabhItAMshcha shA~NkariH |
parvatAngirijAputro babhAShe paribodhayan || 26||
kumAra uvAcha
mA khidyatAM mahAbhAgA mA chintAM kurvatAM nagAH |
ghAtayAmyadya pApiShThaM sarveShAM vaH prapashyatAm || 27||
evaM samAshvAsya tadA parvatAn nirjarAn gaNAn |
praNamya girijAM shambhumAdade shaktimutprabhAm || 28||
taM tArakaM hantumanAH karashaktirmahAprabhuH |
virarAja mahAvIraH kumAraH shambhubAlakaH || 29||
shaktyA tayA jaghAnAtha kumArastArakAsuram |
tejasADhyaH sha~Nkarasya lokakleshakaraM cha tam || 30||
papAta sadyaH sahasA vishIrNA~Ngo.asuraH kShitau |
tArakAkhyo mahAvIraHsarvAsuragaNAdhipaH || 31||
kumAreNa hataH so.ativIraH sa khalu tArakaH |
layaM yayau cha tatraiva sarveShAM pashyatAM mune || 32||
tathA taM patitaM dR^iShTvA tArakaM balavattaram |
na jaghAna punarvIraH sa gatvA vyasumAhave || 33||
hate tasminmahAdaitye tArakAkhye mahAbale |
kShayaM praNItA bahavo.asurA devagaNaistadA || 34||
kechidbhItAH prA~njalayo babhUvustatra chAhave |
ChinnabhinnA~NgakAH kechinmR^itA daityAHsahasrashaH || 35||
kechijjAtAH kumArasya sharaNaM sharaNArthinaH |
vadantaH pAhi pAhIti daityAH sA~njalayastadA || 36||
kiyantashcha hatAstatra kiyantashcha palAyitAH |
palAyamAnA vyathitAstADitA nirjjarairgaNaiH || 37||
sahasrashaH praviShTAste pAtAle cha jijIShavaH |
palAyamAnAste sarve bhagnAshA dainyamAgatAH || 38||
evaM sarvaM daityasainyaM bhraShTaM jAtaM munIshvara |
na kechittatra santasthurgaNadevabhayAttadA || 39||
AsInniShkaNTakaM sarvaM hate tasmindurAtmani |
te devAH sukhamApannAH sarve shakrAdayastadA || 40||
evaM vijayamApannaM kumAraM nikhilAH surAH |
babhUvuryugapad hR^iShTAstrilokAshcha mahAsukhA || 41||
tadA shivo.api taM j~nAtvA vijayaM kArtikasya cha |
tatrAjagAma sa mudA sagaNaH priyayA saha || 42||
svAtmajaM svA~NkamAropya kumAraM sUryavarchasam |
lAlayAmAsa suprItyA shivA cha snehasa~NkulA || 43||
himAlayastadAgatya svaputraiH parivAritaH |
sabandhuHsAnugaH shambhuM tuShTAva cha shivAM guham || 44||
tato devagaNAH sarve munayaH siddhachAraNAH |
tuShTuvuH shA~NkariM shambhuM girijAM tuShitAM bhR^isham || 45||
puShpavR^iShTiM sumahatIM chakrushchopasurAstadA |
jagurgandharvapatayo nanR^itushchApsarogaNAH || 46||
vAditrANi tathA nedustadAnIM cha visheShataH |
jayashabdo namaH shabdo babhUvochchairmuhurmuhuH || 47||
tato mayAchyutashchApi santuShTo.abhUdvisheShataH |
shivaM shivAM kumAraM cha santuShTAva samAdarAt || 48||
kumAramagrataH kR^itvA harikendramukhAH surAH |
chakrurnIrAjanaM prItyA munayashchApare tathA || 49||
gItavAditraghoSheNa brahmaghoSheNa bhUyasA |
tadotsavo mahAnAsItkIrtanaM cha visheShataH || 50||
gItavAdyaiH suprasannaistathA sA~njalibhirmune |
stUyamAno jagannAthaH sarvairdevagaNairabhUt || 51||
tataHsa bhagavAn rudro bhavAnyA jagadambayA |
sarvaiH stuto jagAmAtha svagiriM svagaNairvR^itaH || 52||

iti shrI shivamahApurANe dvitIyAyAM rudrasaMhitAyAM chaturthe kumArakhaNDe tArakAtArakAsuravadhadevotsavavarNanaM nAma dashamo.adhyAyaH || 2\.4\.10||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.11\. ekAdasho.adhyAyaH | bANapralambavadhapUrvaka kumAravijayavarNanaM li~NgasthApana~ncha |}
brahmovAcha
etasminnantare tatra krau~nchanAmAchalo mune |
AjagAma kumArasya sharaNaM bANapIDitaH || 1||
palAyamAno yo yuddhAdasoDhA teja aishvaram |
tutodAtIva sa krau~nchaM koTyAyutabalAnvitaH || 2||
praNipatya kumArasya sa bhaktyA charaNAmbujam |
premanirbharayA vAchA tuShTAva guhamAdarAt || 3||
krau~ncha uvAcha
kumAra skanda devesha tArakAsuranAshaka |
pAhi mAM sharaNApannaM bANAsuranipIDitam || 4||
sa~NgarAtte mahAsena samuchChinnaH palAyitaH |
nyapIDayachcha mA.a.agatya hA nAtha karuNAkara || 5||
tatpIDitaste sharaNamAgato.ahaM suduHkhitaH |
palAyamAno devesha sharajanman dayAM kuru || 6||
daityaM taM nAshaya vibho bANAhvaM mAM sukhIkuru |
daityaghnastvaM visheSheNa devAvanakaraH svarAT || 7||
brahmovAcha
iti krau~nchastutaHskandaH prasanno bhaktapAlakaH |
gR^ihItvA shaktimatulAM svAM sasmAra shivo dhiyA || 8||
chikShepa tAM samuddishya sa bANaM sha~NkarAtmajaH |
mahAshabdo babhUvAtha jajvalushcha disho nabhaH || 9||
sabalaM bhasmasAtkR^itvAsuraM taM kShaNamAtrataH |
guhopakaNThaM shaktiH sA jagAma paramA mune || 10||
tataH kumAraH provAcha krau~nchaM girivaraM prabhuH |
nirbhayaH svagR^ihaM gachCha naShTaH sa sabalo.asuraH || 11||
tachChutvA svAmivachanaM mudito girirAT tadA |
stutvA guhaM tadArAtiM svadhAma pratyapadyata || 12||
tataH skando maheshasya mudA sthApitavAnmune |
trINi li~NgAni tatraiva pApaghnAni vidhAnataH || 13||
pratij~neshvaranAmAdau kapAleshvaramAdarAt |
kumAreshvaramevAtha sarvasiddhipradaM trayam || 14||
punaHsarveshvarastatra jayastambhasamIpataH |
stambheshvarAbhidhaM li~NgaM guhaH sthApitavAnmudA || 15||
tataH sarve surAstatra viShNuprabhR^itayo mudA |
li~NgaM sthApitavantaste devadevasya shUlinaH || 16||
sarveShAM shivali~NgAnAM mahimAbhUttadAdbhutaH |
sarvakAmapradashchApi muktido bhaktikAriNAm || 17||
tataH sarve surA viShNupramukhAH prItamAnasAH |
aichChangirivaraM gantuM puraskR^itya guhaM mudA || 18||
tasminnavasare sheShaputraH kumudanAmakaH |
AjagAma kumArasya sharaNaM daityapIDitaH || 19||
pralambAkhyo.asuro yo hi raNAdasmAtpalAyitaH |
sa tatropadravaM chakre prabalastArakAnugaH || 20||
so.atha sheShasya tanayaH kumudo.ahipatermahAn |
kumArasharaNaM prAptastuShTAva girijAtmajam || 21||
kumuda uvAcha
devadeva mahAdeva varatAta mahAprabho |
pIDito.ahaM pralambena tvA.ahaM sharaNamAgataH || 22||
pAhi mAM sharaNApannaM pralambAsurapIDitam |
kumAra skanda devesha tArakAre mahAprabho || 23||
tvaM dInabandhuH karuNAsindhurAnatavatsalaH |
khalanigrahakartA hi sharaNyashcha satAM gatiH || 24||
kumudenastutashchetthaM vij~naptastadvadhAya hi |
svAshcha shaktiM sa jagrAha smR^itvA shivapadAmbujau || 25||
chikShepa tAM samuddishya pralambaM girijAsutaH |
mahAshabdo babhUvAtha jajvalushcha disho nabhaH || 26||
taM sAyutabalaM shaktirdrutaM kR^itvA cha bhasmasAt |
guhopakaNThaM sahasAjagAmAkliShTakAriNI || 27||
tataH kumAraH provAcha kumudaM nAgabAlakam |
nirbhayaH svagR^ihaM gachCha naShTaH sa sabalo.asuraH || 28||
tachChutvA guhavAkyaM sa kumudo.ahipateH sutaH |
stutvA kumAraM natvA cha pAtAlaM mudito yayau || 29||
evaM kumAravijayaM varNitaM te munIshvara |
charitaM tArakavadhaM paramAshcharyakArakam || 30||
sarvapApaharaM divyaM sarvakAmapradaM nR^iNAm |
dhanyaM yashasyamAyuShyaM bhuktimuktipradaM satAm || 31||
ye kIrtayanti suyasho.amitabhAgyayutA narAH |
kumAracharitaM divyaM shivalokaM prayAnti te || 32||
shroShyanti ye cha tatkIrtiM bhaktyA shraddhAnvitA janAH |
muktiM prApsyanti te divyAmiha bhuktvA paraM sukham || 33||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe bANapralambavadha kumAravijayavarNanaM nAmaikAdasho.adhyAyaH || 2\.4\.11||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.12\. dvAdasho.adhyAyaH | tArakavadhAnantaraM devaiH kR^itAstutiH |}
brahmovAcha
nihataM tArakaM dR^iShTvA devA viShNupurogamAH |
tuShTuvuH shA~NkariM bhaktyA sarve.anye muditAnanAH || 1||
devA UchuH |
namaH kalyANarUpAya namaste vishvama~Ngala |
vishvabandho namaste.astu namaste vishvabhAvana || 2||
namostu te dAnavavaryahantre
bANAsuraprANaharAya deva |
pralambanAshAya pavitrarUpiNe
namonamaH sha~NkaratAta tubhyam || 3||
tvameva karttA jagatAM cha bharttA
tvameva harttA shuchija prasIda |
prapa~nchabhUtastava lokabimbaH
prasIda shambhvAtmaja dInabandho || 4||
devarakShAkara svAmin rakSha naH sarvadA prabho |
devaprANAvanakara prasIda karuNAkara || 5||
hatvA tvaM tArakaM daityaM parivArayutaM vibho |
mochitAH sakalA devA vipadbhyaH parameshvara || 6||
brahmovAcha
evaM stutaH kumAro.asau devairviShNumukhaiH prabhuH |
varAndadAvabhinavAnsarvebhyaH kramasho mune || 7||
shailAnnirIkShya stuvatastataHsa girishAtmajaH |
suprasannataro bhUtvA provAcha pradadadvarAn || 8||
skanda uvAcha
yUyaM sarve parvatA hi pUjanIyAstapasvibhiH |
karmibhirj~nAnibhishchaiva sevyamAnA bhaviShyatha || 9||
shambhorvishiShTarUpANi li~NgarUpANi chaiva hi |
bhaviShyatha na sandehaH parvatA vachanAnmama || 10||
yo.ayaM mAtAmaho me.adya himavAnparvatottamaH |
tapasvinAM mahAbhAgaH phalado hi bhaviShyati || 11||
devA UchuH |
evaM dattvA varAn hatvA tArakaM chAsurAdhipam |
tvayA kR^itAshcha sukhino vayaM sarve charAcharAH || 12||
idAnIM khalu suprItyA kailAsaM girishAlayam |
jananI janakau draShTuM shivAshambhU tvamarhasi || 13||
brahmovAcha
ityuktvA nikhilA devA viShNvAdyAH prAptashAsanAH |
kR^itvA mahotsavaM bhUri sakumArA yayurgirim || 14||
kumAre gachChati vibhau kailAsaM sha~NkarAlayam |
mahAma~Ngalamuttasthau jayashabdo babhUva ha || 15||
Aruroha kumAro.asau vimAnaM paramarddhimat |
sarvatola~NkR^itaM ramyaM sarvopari virAjitam || 16||
ahaM viShNushcha samudau tadA chAmaradhAriNau |
guha mUrdhni mahAprItyA mune.abhUvaM hyatandritau || 17||
indrAdyA amarAH sarve kurvanto guhasevanam |
yathochitaM chaturdikShu jagmushcha pramudAstadA || 18||
shambhorjayaM prabhAShantaH prApuste shambhuparvatam |
sAnandA vivishustatrochcharito ma~NgaladhvaniH || 19||
dR^iShTvA shivaM shivAM chaiva sarve viShNvAdayo drutam |
praNamya sha~NkaraM bhaktyA karau baddhvA vinamrakAH || 20||
kumAro.api vinItAtmA vimAnAdavatIrya cha |
praNanAma mudA shambhuM shivAM siMhAsanasthitAm || 21||
atha dR^iShTvA kumAraM taM tanayaM prANavallabham |
tau dampatI shivau devau mumudAte.ati nArada || 22||
mahAprabhuHsamutthApya tamutsa~Nge nyaveshayat |
mUrdhni jaghrau mudA snehAttaM pasparsha kareNa ha || 23||
mahAnandabharaH shambhushchakAra mukhachumbanam |
kumArasya mahAsnehAt tArakArermahAprabhoH || 24||
shivApi taM samutthApya svotsa~Nge sa.nnyaveshayat |
kR^itvA mUrdhni mahAsnehAt tanmukhAbjaM chuchumba hi || 25||
tayostadA mahAmodo vavR^idhe.atIva nArada |
dampatyoH shivayostAta bhavAchAraM prakurvatoH || 26||
tadotsavo mahAnAsInnAnAshcharyaH shivAlaye |
jayashabdo namashshabdo babhUvAtIva sarvataH || 27||
tataHsuragaNAH sarve viShNvAdyA munayastathA |
supraNamya mudA shambhuM tuShTuvuH sashivaM mune || 28||
devA UchuH |
devadeva mahAdeva bhaktAnAmabhayaprada |
namo namaste bahushaH kR^ipAkara maheshvara || 29||
adbhutA te mahAdeva mahAlIlA sukhapradA |
sarveShAM sha~Nkara satAM dInabandho mahAprabho || 30||
evaM mUDhadhiyashchAj~nAH pUjAyAM te sanAtanam |
AvAhanaM na jAnImo gatiM naiva prabhodbhutAm || 31||
ga~NgAsaliladhArAya hyAdhArAya guNAtmane |
namaste tridasheshAya sha~NkarAya namonamaH || 32||
vR^iShA~NkAya maheshAya gaNAnAM pataye namaH |
sarveshvarAya devAya trilokapataye namaH || 33||
saMhartre jagatAM nAtha sarveShAM te namo namaH |
bhartre kartre cha devesha triguNeshAya shAshvate || 34||
visa~NgAya pareshAya shivAya paramAtmane |
niShprapa~nchAya shuddhAya paramAyAvyayAya cha || 35||
daNDahastAya kAlAya pAshahastAya te namaH |
vedamantrapradhAnAya shatajihvAya te namaH || 36||
bhUtaM bhavyaM bhaviShyaM cha sthAvaraM ja~NgamaM cha yat |
tava dehAtsamutpannaM sarvathA parameshvara || 37||
pAhi naH sarvadA svAminprasIda bhagavanprabho |
vayaM te sharaNApannAH sarvathA parameshvara || 38||
shitikaNThAya rudrAya svAhAkArAya te namaH |
arUpAya sarUpAya vishvarUpAya te namaH || 39||
shivAya nIlakaNThAya chitAbhasmA~NgadhAriNe |
nityaM nIlashikhaNDAya shrIkaNThAya namonamaH || 40||
sarvapraNatadehAya saMyamapraNatAya cha |
mahAdevAya sharvAya sarvArchitapadAya cha || 41||
tvaM brahmA sarvadevAnAM rudrANAM nIlalohitaH |
AtmA cha sarvabhUtAnAM sA~NkhyaiH puruSha uchyase || 42||
parvatAnAM sumerustvaM nakShatrANAM cha chandramAH |
R^iShINAM cha vasiShThastvaM devAnAM vAsavastathA || 43||
OM~NkArassarvavedAnAM trAtA bhava maheshvara |
tvaM cha lokahitArthAya bhUtAni pariShi~nchasi || 44||
maheshvara mahAbhAga shubhAshubhanirIkShaka |
ApyAyAsmAnhi devesha kartR^Invai vachanaM tava || 45||
rUpakoTisahasreShu rUpakoTishateShu te |
antaM gantuM na shaktAH sma devadeva namo.astu te || 46||
brahmovAcha
iti stutvA.akhilA devA viShNvAdyAHpramukhasthitAH |
muhurmuhussupraNamya skandaM kR^itvA purassaram || 47||
devastutiM samAkarNya shivaHsarveshvaraH svarAT |
suprasanno babhUvAtha vijahAsa dayAparaH || 48||
uvAcha suprasannAtmA viShNvAdInsurasattamAn |
sha~NkaraH parameshAno dInabandhuHsatAM gatiH || 49||
shiva uvAcha
he hare he vidhe devA vAkyaM me shR^iNutAdarAt |
sarvathA.ahaM satAM trAtA devAnAM vaH kR^ipAnidhiH || 50||
duShTahantA trilokeshaH sha~Nkaro bhaktavatsalaH |
kartA bhartA cha hartA cha sarveShAM nirvikAravAn || 51||
yadA yadA bhavedduHkhaM yuShmAkaM devasattamAH |
tadA tadA mAM yUyaM vai bhajantu sukhahetave || 52||
brahmovAcha
ityAj~naptAstadA devA viShNvAdyAH samunIshvarAH |
shivAM praNamya sashivaM kumAraM cha mudAnvitAH || 53||
kathayanto yasho ramyaM shivayoH shA~Nkareshcha tat |
AnandaM paramaM prApya svadhAmAni yayurmune || 54||
shivo.api shivayA sArddhaM sagaNaH parameshvaraH |
kumAreNayutaH prItyovAsa tasmingirau mudA || 55||
ityevaM kathitaM sarvaM kaumAraM charitaM mune |
shaivaM cha sukhadaM divyaM kimanyachChrotumichChasi || 56||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe svAmikArtikacharitagarbhitashivAshivacharitavarNanaM nAma dvAdasho.adhyAyaH || 2\.4\.12||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.13\. trayodasho.adhyAyaH | gaNeshotpattiH |}
sUta uvAcha
tArakAreriti shrutvA vR^ittamadbhutamuttamam |
nAradaH suprasanno.atha paprachCha prItito vidhim || 1||
nArada uvAcha
devadeva prajAnAtha shivaj~nAnanidhe mayA |
shrutaM kArtikasadvR^ittamamR^itAdapi chottamam || 2||
adhunA shrotumichChAmi gANeshaM vR^ittamuttamam |
tajjanmacharitaM divyaM sarvama~Ngalama~Ngalam || 3||
sUta uvAcha
ityAkarNya vachastasya nAradasya mahAmuneH |
prasannamAnaso brahmA pratyuvAcha shivaM smaran || 4||
brahmovAcha
kalpabhedAdgaNeshasya janiH proktA vidheH parAt |
shanidR^iShTaM shirashChinnaM sa~nchitaM gAjamAnanam || 5||
idAnIM shvetakalpoktA gaNeshotpattiruchyate |
yatra chChinnaM shirastasya shivena cha kR^ipAlunA || 6||
sandeho nAtra kartavyaH sha~NkarassUtikR^inmune |
sa hi sarvAdhipaH shambhurnirguNaH saguNo.api hi || 7||
tallIlayAkhilaM vishvaM sR^ijyate pAlyate tathA |
vinAshyate munishreShTha prastutaM shR^iNu chAdarAt || 8||
udvAhite shive chAtra kailAsaM cha gate sati |
kiyatA chaiva kAlena jAto gaNapaterbhavaH || 9||
ekasminneva kAle cha jayA cha vijayA sakhI |
pArvatyA cha militvA vai vichAre tatparAbhavat || 10||
rudrasya cha gaNAHsarve shivasyAj~nAparAyaNAH |
te sarve.apyasmadIyAshcha nandibhR^i~NgipurassarAH || 11||
pramathAste hyasa~NkhyAtA asmadIyo na kashchana |
dvAri tiShThanti te sarve sha~NkarAj~nAparAyaNAH || 12||
te sarvepyasmadIyAMshcha tathApi na milenmanaH |
ekashchaivAsmadIyo hi rachanIyastvayAnaghe || 13||
brahmovAcha
ityuktvA pArvatI devI sakhIbhyAM sundaraM vachaH |
hitaM mene tadA tachcha kartuM smApyadhyavasyati || 14||
tataH kadAchinmajjatyAM pArvatyAM vai sadAshivaH |
nandinaM paribhartsyAtha hyAjagAma gR^ihAntaram || 15||
AyAntaM sha~NkaraM dR^iShTvA.asamaye jagadambikA |
uttasthau majjatI sA vai lajjitA sundarI tadA || 16||
tasminnavasare devI kautukenAtisaMyutA |
tadIyaM tadvachashchaiva hitaM mene sukhAvaham || 17||
evaM jAte tadA kAle kadAchitpArvatI shivA |
vichintya manasA cheti paramAyA pareshvarI || 18||
madIyaH sevakaH kashchidbhavechChubhataraH kR^itI |
madAj~nayA paraM nAnyadrekhAmAtraM chalediha || 19||
vichAryeti cha sA devI vapuSho malasambhavam |
puruShaM nirmamau sA tu sarvalakShaNasaMyutam || 20||
sarvAvayavanirdoShaM sarvAvayava sundaram |
vishAlaM sarvashobhADhyaM mahAbalaparAkramam || 21||
vastrANi cha tadA tasmai dattvA sA vividhAni hi |
nAnAla~NkaraNaM chaiva bahvAshiShamanuttamAm || 22||
matputrastvaM madIyo.asi nAnyaH kashchidihAsti me |
evamuktaH sa puruSho namaskR^itya shivAM jagau || 23||
gaNesha uvAcha
kiM kAryaM vidyate te.adya karavANi tavoditam |
ityuktA sA tadA tena pratyuvAcha sutaM shivA || 24||
shivovAcha
he tAta shR^iNu madvAkyaM dvArapAlo bhavAdya me |
matputrastvaM madIyo.asi nAnyathA kashchidasti me || 25||
vinA madAj~nAM satputra naivAyAnmadgR^ihAntaram |
ko.api kvApi haThAttAta satyametanmayoditam || 26||
brahmovAcha
ityuktvA cha dadau tasmai yaShTiM chAtidR^iDhAM mune |
tadIyaM rUpamAlokya sundaraM harShamAgatA || 27||
mukhamAchumbya suprItyAli~Ngya taM kR^ipayA sutam |
svadvAri sthApayAmAsa yaShTipANiM gaNAdhipam || 28||
atha devIsutastAta gR^ihadvAri sthito gaNaH |
yaShTipANirmahAvIraH pArvatIhitakAmyayA || 29||
svadvAri sthApayitvA taM gaNeshaM svasutaM shivA |
svayaM cha majjatI sA vai saMsthitAsItsakhIyutA || 30||
etasminneva kAle tu shivo dvAri samAgataH |
kautukI munirshAdUla nAnAlIlAvishAradaH || 31||
uvAcha cha shiveshaM tamavij~nAya gaNAdhipaH |
mAturAj~nAM vinA deva gamyatAM na tvayAdhunA || 32||
majjanArthaM sthitA mAtA kva yAsIto vrajAdhunA |
ityuktvA yaShTikAM tasya rodhanAya tadAgrahIt || 33||
taM dR^iShTvA tu shivaH prAha kaM niShedhasi mUDhadhIH |
mAM na jAnAsyasadbuddhe shivo.ahamiti nAnyathA || 34||
tADitastena yaShTyA hi gaNeshena maheshvaraH |
pratyuvAcha sa taM putraM bahulIlashcha kopitaH || 35||
shiva uvAcha
murkho.asi tvaM na jAnAsi shivo.ahaM girijApatiH |
svagR^ihaM yAmi re bAla niShedhasi kathaM hi mAm || 36||
brahmovAcha
ityuktvA pravishantaM taM maheshaM gaNanAyakaH |
krodhaM kR^itvA tato vipra daNDenAtADayatpunaH || 37||
tatashshivashcha sa~Nkruddho gaNAnAj~nApayannijAn |
ko vA.ayaM vartate kiM cha kriyate pashyatAM gaNAH || 38||
ityuktvA tu shivastatra sthitaH kruddho gR^ihAdbahiH |
bhavAchArarataHsvAmI bahvadbhutasulIlakaH || 39||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe gaNeshotpattivarNanaM nAma trayodasho.adhyAyaH || 2\.4\.13||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.14\. chaturdasho.adhyAyaH | gaNeshena saha shivagaNAnAM vivAdavarNanam |}
brahmovAcha
gaNAste krodhasampannAstatra gatvA shivAj~nayA |
paprachChurgirijAputraM taM tadA dvArapAlakam || 1||
shivagaNA UchuH
ko.asi tvaM kuta AyAtaH kiM vA tvaM cha chikIrShasi |
ito.adya gachCha dUraM vai yadi jIvitumichChasi || 2||
brahmovAcha
tadIyaM tadvachaH shrutvA girijAtanayaH sa vai |
nirbhayo daNDapANishcha dvArapAnabravIdidam || 3||
gaNesha uvAcha
yUyaM ke kuta AyAtA bhavantaH sundarA ime |
yAta dUraM kimarthaM vai sthitA atra virodhinaH || 4||
brahmovAcha
evaM shrutvA vachastasya hAsyaM kR^itvA parasparam |
UchuHsarve shivagaNA mahAvIrA gatasmayAH || 5||
parasparamiti prochya sarve te shivapArShadAH |
dvArapAlaM gaNeshaM taM pratyUchuH kruddhamAnasAH || 6||
shivagaNA UchuH
shrUyatAM dvArapAlA hi vayaM shivagaNA varAH |
tvAM nivArayituM prAptAH sha~NkarasyAj~nayA vibhoH || 7||
tvAmapIha gaNaM matvA na hanyAmo.anyathA hataH |
tiShTha dUre svataH tvaM cha kimarthaM mR^ityumIhase || 8||
brahmovAcha
ityukto.api gaNeshashcha girijAtanayo.abhayaH |
nirbhartsya sha~NkaragaNAnna dvAraM muktavAMstadA || 9||
te sarve.api gaNAH shaivAH tatratyA vachanaM tadA |
shrutvA tatra shivaM gatvA tadvR^ittAntamathAbruvan || 10||
tatashcha tadvachaH shrutvAdbhutalIlo maheshvaraH |
vinirbhartsya gaNAnUche nijA.Nllokagatirmune || 11||
maheshvara uvAcha
kashchAyaM vartate kiM cha bravItyarivaduchChritaH |
kiM kariShyatyasadbuddhiH svamR^ityuM vA~nChati dhruvam || 12||
dUrataH kriyatAM hyeSha dvArapAlo navInakaH |
klIbA iva sthitAstasya vR^ittaM vadatha me katham || 13||
svAminoktA gaNAste chAdbhutalIlena shambhunA |
punarAgatya tatraiva tamUchurdvArapAlakam || 14||
shivagaNA UchuH |
re re dvArapa kastvaM hi sthitashcha sthApitaH kutaH |
naivAsmAngaNayasyevaM kathaM jIvitumichChasi || 15||
dvArapAlA vayaM sarve sthitAH kiM paribhAShase |
siMhAsanagR^ihItashcha shR^igAlaH shivamIhate || 16||
tAvadgarjasi mUrkha tvaM yAvadgaNaparAkramaH |
nAnubhUtastvayAtraiva hyanubhUtaH patiShyasi || 17||
ityuktastaissusa~Nkruddho hastAbhyAM yaShTikAM tadA |
gR^ihItvA tADayAmAsa gaNAMstAnparibhAShiNaH || 18||
uvAchAtha shivAputraH paribhartsya gaNeshvarAn |
sha~Nkarasya mahAvIrAnnirbhayastAngaNeshvaraH || 19||
shivAputra uvAcha
yAta yAta ito dUre no chedvo darshayAmi ha |
svaparAkramamatyugraM yAsyathAtyupahAsyatAm || 20||
ityAkarNya vachastasya girijAtanayasya hi |
parasparamathochuste sha~Nkarasya gaNAstadA || 21||
shivagaNA UchuH |
kiM kartavyaM kva gantavyaM kriyate sa na kiM punaH |
maryAdA rakShyate.asmAbhiranyathA kiM bravIti cha || 22||
brahmovAcha
tataH shambhugaNAHsarve shivaM dUre vyavasthitam |
kroshamAtraM tu kailAsAdgatvA te cha tathA.abruvan || 23||
shivo vihasya tAnsarvAMstrishUlakara ugradhIH |
uvAcha paramesho hi svagaNAn vIrasammatAn || 24||
shiva uvAcha
re re gaNAH klIbamatA na vIrA vIramAninaH |
madagre nodituM yogyA bhartsitaH kiM punarvadet || 25||
gamyatAM tADyatAM chaiSha yaH kashchitprabhavediha |
bahunoktena kiM chAtra dUrIkartavya eva saH || 26||
brahmovAcha
iti sarve maheshena jagmustatra munIshvara |
bhartsitAstena devena prochushcha gaNasattamAH || 27||
shivagaNA UchuH |
rere tvaM shR^iNu vai bAla balAtkiM paribhAShase |
itastvaM dUrato yAhi no chenmR^ityurbhaviShyati || 28||
brahmovAcha
iti shrutvA vachasteShAM shivAj~nAkAriNAM dhruvam |
shivAsutastadAbhUtsa kiM karomIti duHkhitaH || 29||
etasminnantare devI teShAM tasya cha vai punaH |
shrutvA tu kalahaM dvAri sakhIM pashyeti sAbravIt || 30||
samAgatya sakhI tatra vR^ittAntaM samabudhyata |
kShaNamAtraM tadA dR^iShTvA gatA hR^iShTA shivAntikam || 31||
tatra gatvA tu tatsarvaM vR^ittaM tadyadabhUnmune |
asheSheNa tayA sakhyA kathitaM girijAgrataH || 32||
sakhyuvAcha
asmadIyo gaNo yo hi sthito dvAri maheshvari |
nirbhartsayanti taM vIrAH sha~Nkarasya gaNA dhruvam || 33||
shivashchaiva gaNAH sarve vinA te.avasaraM katham |
pravishanti haThAdgehe naitachChubhataraM tava || 34||
samyak kR^itaM hyanenaiva na hi ko.api praveshitaH |
duHkhaM chaivAnubhUyAtra tiraskArAdikaM tathA || 35||
ataH parantu vAgvAdaH kriyate cha parasparam |
vAgvAde cha kR^ite naiva tarhyAyAntu sukhena vai || 36||
kR^itashchaivAtra vAgvAdastaM jitvA vijayena cha |
pravishantu tathA sarve nAnyathA karhichitpriye || 37||
asminnevAsmadIye vai sarve sambhartsitA vayam |
tasmAddevi tvayA bhadre na tyAjyo mAna uttamaH || 38||
shivo markaTavatte.adya vartate sarvadA sati |
kiM kariShyatyaha~NkAramAnukUlyaM bhaviShyati || 39||
brahmovAcha
aho kShaNaM sthitA tatra shivechChA vashataHsatI | 40||
manasyuvAcha sA bhUtvA mAninI pArvatI tadA | 41||
shivovAcha
aho kShaNaM sthito naiva haThAtkAraH kathaM kR^itaH |
kathaM chaivAtra karttavyaM vinayenAtha vA punaH || 42||
bhaviShyati bhavatyeva kR^itaM naivAnyathA punaH |
ityuktvA tu sakhI tatra preShitA priyayA tadA || 43||
samAgatyA.abravItsA cha priyayA kathitaM hi yat |
samAchaShTa gaNeshaM taM girijAtanayaM tadA || 44||
sakhyuvAcha
samyakkR^itaM tvayA bhadra balAtte pravishantu na |
bhavadagre gaNA hyete kiM jayantu bhavAdR^isham || 45||
kR^itaM chedvAkR^itaM chaiva karttavyaM kriyatAM tvayA |
jito yastu punarvApi na vairamatha vA dhruvam || 46||
brahmovAcha
iti shrutvA vachastasyA mAtushchaiva gaNeshvaraH |
AnandaM paramaM prApa balaM bhUri mahonnatim || 47||
baddhakakShastathoShNIShaM baddhvA ja~Nghoru saMspR^ishan |
uvAcha tAn gaNAn sarvAn nirbhayaM vachanaM mudA || 48||
gaNesha uvAcha
ahaM cha girijAsUnuryUyaM shivagaNAstathA |
ubhaye samatAM prAptAH kartavyaM kriyatAM punaH || 49||
bhavanto dvArapAlAshcha dvArapo.ahaM kathaM na hi |
bhavantashcha sthitAstatrA.ahaM sthito.atreti nishchitam || 50||
bhavadbhishcha sthitaM hyatra yadA bhavati nishchitam |
tadA bhavadbhiH karttavyaM shivAj~nAparipAlanam || 51||
idAnIM tu mayA chAtra shivAj~nAparipAlanam |
satyaM cha kriyate vIrA nirNItaM me yathochitam || 52||
tasmAchChivagaNAHsarve vachanaM shR^iNutAdarAt |
haThAdvA vinayAdvA na gantavyaM mandire punaH || 53||
brahmovAcha
ityuktAste gaNenaiva sarve te lajjitA gaNAH |
yayuH shivAntikaM taM vai namaskR^itya puraH sthitAH || 54||
sthitvA nyavedayansarve vR^ittAntaM cha tadadbhutam |
karau baddhvA nataskandhAH shivaM stutvA puraH sthitAH || 55||
tatsarvaM tu tadA shrutvA vR^ittaM tatsvagaNoditam |
laukikIM vR^ittimAshritya sha~Nkaro vAkyamabravIt || 56||
sha~Nkara uvAcha
shrUyatAM cha gaNAHsarve yuddhaM yogyaM bhavenna hi |
yUyaM chAtrAsmadIyA vai sa cha gaurIgaNastathA || 57||
vinayaH kriyate chedvai vashyaH shambhuH striyA sadA |
iti khyAtirbhavelloke garhitA me gaNA dhruvam || 58||
kR^ite chaivAtra kartavyamiti nItirgarIyasI |
ekAkI sa gaNo bAlaH kiM kariShyati vikramam || 59||
bhavantashcha gaNA loke yuddhe chAti vishAradAH |
madIyAshcha kathaM yuddhaM hitvA yAsyatha lAghavam || 60||
striyA.a.agrahaH kathaM kAryo patyuragre visheShataH |
kR^itvA sA girijA tasya nUnaM phalamavApsyati || 61||
tasmAtsarve cha madvIrAH shR^iNutAdarato vachaH |
karttavyaM sarvathA yuddhaM bhAvi yattadbhavatviti || 62||
brahmovAcha
ityuktvA sha~Nkaro brahman nAnAlIlAvishAradaH |
virarAma munishreShTha darshaya.NllaukikIM gatim || 63||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe gaNavivAdavarNanaM nAma chaturdasho.adhyAyaH || 2\.4\.14||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.15\. pa~nchadasho.adhyAyaH | shivagaNaiH saha gaNeshayuddhavarNanam |}
brahmovAcha
ityuktA vibhunA tena nishchayaM paramaM gatAH |
sannaddhAstu tadA tatra jagmushcha shivamandiram || 1||
gaNesho.api tathA dR^iShTvA hyAyAtAngaNasattamAn |
yuddhA.a.aTopaM vidhAyaiva sthitAMshchaivAbravIdidam || 2||
gaNesha uvAcha
AyAntu gaNapAH sarve shivAj~nAparipAlakAH |
ahamekashcha bAlashcha shivAj~nAparipAlakaH || 3||
tathApi pashyatAM devI pArvatI sUnujaM balam |
shivashcha svagaNAnAM tu balaM pashyatu vai punaH || 4||
balavadbAlayuddhaM cha bhavAnIshivapakShayoH |
bhavadbhishcha kR^itaM yuddhaM pUrvaM yuddhavishAradaiH || 5||
mayA pUrvaM kR^itaM naiva bAlo.asmi kriyate.adhunA |
tathApi bhavatAM lajjA girijAshivayoriha || 6||
mamaivaM tu bhavennaiva vaiparItyaM bhaviShyati |
mamaiva bhavatAM lajjA girijAshivayoriha || 7||
evaM j~nAtvA cha karttavyaH samarashcha gaNeshvarAH |
bhavadbhiH svAminaM dR^iShTvA mayA cha mAtaraM tadA || 8||
kriyate kIdR^ishaM yuddhaM bhavitavyaM bhavatviti |
tasya vai vAraNe ko.api na samarthastrilokake || 9||
brahmovAcha
ityevaM bhartsitAste tu daNDabhUShitabAhavaH |
vividhAnyAyudhAnyevaM dhR^itvA te cha samAyayuH || 10||
gharShayantastathA dantAn hu~NkR^itya cha punaH punaH |
pashya pashya bruvantashcha gaNAste samupAgatAH || 11||
nandI prathamamAgatya dhR^itvA pAdaM vyakarShayat |
dhAvanbhR^i~NgI dvitIyaM cha pAdaM dhR^itvA gaNasya cha || 12||
yAvatpAde vikarShantau tAvaddhastena vai gaNaH |
Ahatya hastayostAbhyAmutkShiptau pAdakau svayam || 13||
atha devIsuto vIrassa~NgR^ihya parighaM bR^ihat |
dvArasthito gaNapatiH sarvAnApothayattadA || 14||
keShA~nchitpANayo bhinnAH keShA~nchitpR^iShThakAni cha |
keShA~nchichcha shirAMsyeva keShA~nchinmastakAni cha || 15||
keShA~nchijjAnunI tatra keShA~nchitskandhakAstathA |
keShA~nchijjAnunI tatra keShA~nchitskandhAstathA |
sammukhe chAgatA ye vai te sarve hR^idaye hatAH || 16||
kechichcha patitA bhUmau kechichcha vidisho gatAH |
keShA~nchichcharaNau Chinnau kechichCharvAntikaM gatAH || 17||
teShAM madhye tu kashchidvai sa~NgrAme sammukho na hi |
siMhaM dR^iShTvA yathA yAnti mR^igAshchaiva disho dasha || 18||
tathA te cha gaNAH sarve gatAshchaiva sahasrashaH |
parAvR^itya tathA so.api sudvAri samupasthitaH || 19||
kalpAntakaraNe kAlo dR^ishyate cha bhaya~NkaraH |
yathA tathaiva dR^iShTaH sa sarveShAM pralaya~NkaraH || 20||
etasminsamaye chaiva sarameshasureshvarAH |
preritA nAradeneha devAH sarve samAgaman || 21||
samabruvaMstadA sarve shivasya hitakAmyayA |
puraH sthitvA shivaM natvA hyAj~nAM dehi prabho iti || 22||
tvaM parabrahma sarveshaH sarve cha tava sevakAH |
sR^iShTeH kartA sadA bhartA saMhartA parameshvaraH || 23||
rajassattvatamorUpo lIlayA nirguNaH svataH |
kA lIlA rachitA chAdya tAmidAnIM vada prabho || 24||
brahmovAcha
ityAkarNya vachasteShAM munishreShTha maheshvaraH |
gaNAn bhinnA.NstadA dR^iShTvA tebhyassarvaM nyavedayat || 25||
atha sarveshvarastatra sha~Nkaro munisattama |
vihasya girijAnAtho brahmANaM mAmuvAcha ha || 26||
shiva uvAcha
brahma~nChR^iNu mama dvAri bAla ekaH samAsthitaH |
mahAbalo yaShTipANirgehAveshanivArakaH || 27||
mahAprahArakartA.asau matpArShadavighAtakaH |
parAjayaH kR^itastena madgaNAnAM balAdiha || 28||
brahman tvayaiva gantavyaM prasAdyo.ayaM mahAbalaH |
yathA brahmannayaH syAdvai tathA kAryaM tvayA vidhe || 29||
brahmovAcha
ityAkarNya prabhorvAkyamaj~nAtvA.aj~nAnamohitaH |
tadIyanikaTaM tAta sarvairR^iShivarairayAm || 30||
samAyAntaM cha mAM dR^iShTvA sa gaNesho mahAbalI |
krodhaM kR^itvA samabhyetya mama shmashrUNyavAkirat || 31||
kShamyatAM kShamyatAM deva na yuddhArthaM samAgataH |
brAhmaNo.ahamanugrAhyaH shAntikartAnupadravaH || 32||
ityevaM bruvati brahmaMstAvatparighamAdade |
sa gaNesho mahAvIro bAlo.abAlaparAkramaH || 33||
gR^ihItaparighaM dR^iShTvA taM gaNeshaM mahAbalam |
palAyanaparo yAtastvahaM drutataraM tadA || 34||
yAta yAta bruvantaste parighena hatAstadA |
svayaM cha patitAH kechitkechittena nipAtitAH || 35||
kechichcha shivasAmIpyaM gatvA tatkShaNamAtrataH |
shivaM vij~nApayA~nchakrustadvR^ittAntamasheShataH || 36||
tathAvidhAMshcha tAn dR^iShTvA tadvR^ittAntaM nishamya saH |
apAramAdadhe kopaM haro lIlAvishAradaH || 37||
indrAdikAndevagaNAn ShaNmukhapravarAn gaNAn |
bhUtapretapishAchAMshcha sarvAnAdeshayattadA || 38||
te sarve cha yathAyogyaM gatAste sarvato disham |
taM gaNaM hantukAmA hi shivAj~naptA udAyudhAH || 39||
yasya yasyAyudhaM yachcha tattatsarvaM visheShataH |
tad gaNeshopari balAtsamAgatya vimochitam || 40||
hAhAkAro mahAnAsIt trailokye sacharAchare |
trilokasthA janAH sarve saMshayaM paramaM gatAH || 41||
na yAtaM brahmaNo.apyAyurbrahmANDaM kShayameti hi |
akAle cha tathA nUnaM shivechChAvashataH svayam || 42||
te sarve chAgatAstatra ShaNmukhAdyAshcha ye punaH |
devA vyarthAyudhA jAtA AshcharyaM paramaM gatAH || 43||
etasminnantare devI jagadambA vibodhanA |
j~nAtvA tachcharitaM sarvamapAraM krodhamAdadhe || 44||
shaktidvayaM tadA tatra tayA devyA munIshvara |
nirmitaM svagaNasyaiva sarvasAhAyyahetave || 45||
ekA prachaNDarUpaM cha dhR^itvAtiShThanmahAmune |
shyAmaparvatasa~NkAshaM vistIrya mukhagahvaram || 46||
ekA vidyutsvarUpA cha bahuhastasamanvitA |
bhaya~NkarA mahAdevI duShTadaNDavidhAyinI || 47||
AyudhAni cha sarvANi mochitAni surairgaNaiH |
gR^ihItvA svamukhe tAni tAbhyAM shIghraM cha chikShipe || 48||
devAyudhaM na dR^ishyeta parighaH paritaH punaH |
evaM tAbhyAM kR^itaM tatra charitaM paramAdbhutam || 49||
eko bAlo.akhilaM sainyaM loDayAmAsa dustaram |
yathA girivareNaiva loDitaH sAgaraH purA || 50||
ekena nihatAH sarve shakrAdyA nirjarAstathA |
sha~Nkarasya gaNAshchaiva vyAkulA abhavaMstadA || 51||
atha sarve militvA te niHshvasya cha muhurmuhuH |
parasparaM samUchuste tatprahArasamAkulAH || 52||
devagaNA UchuH
kiM kartavyaM kva gantavyaM na j~nAyante disho dasha |
parighaM bhrAmayatyeSha savyApasavyameva cha || 53||
brahmovAcha
etatkAle.apsaraH shreShThAH puShpachandanapANayaH |
R^iShayashcha tvadAdyA hi ye.atiyuddhe.atilAlasAH || 54||
te sarve cha samAjagmuryuddhasandarshanAya vai |
pUrito vyoma sanmArgastaistadA munisattama || 55||
tAste dR^iShTvA raNaM taM vai mahAvismayamAgatAH |
IdR^ishaM paramaM yuddhaM na dR^iShTaM chaikadApi hi || 56||
pR^ithivI kampitA tatra samudrasahitA tadA |
parvatAH patitAshchaiva chakruH sa~NgrAmasambhavam || 57||
dyaurgraharkShagaNairghUrNNA sarve vyAkulatAM gatAH |
devAH palAyitAHsarve gaNAshcha sakalAstadA || 58||
kevalaM ShaNmukhastatra nApalAyata vikramI |
mahAvIrastadA sarvAnAvArya purataH sthitaH || 59||
shaktidvayena tadyuddhe sarve cha niShphalIkR^itAH |
sarvAstrANi nikR^ittAni sa~NkShiptAnyamarairgaNaiH || 60||
ye.avasthitAshcha te sarve shivasyAntikamAgatAH |
devAH palAyitAH sarve gaNAshcha sakalAstadA || 61||
te sarve militAshchaiva muhurnatvA shivaM tadA |
abruvanvachanaM kShipraM ko.ayaM gaNavaraH prabho || 62||
purA chaiva shrutaM yuddhamidAnIM bahudhA punaH |
dR^ishyate na shrutaM dR^iShTamIdR^ishaM tu kadAchana || 63||
ki~nchidvichAryatAM deva tvanyathA na jayo bhavet |
tvameva rakShakaH svAminbrahmANDasya na saMshayaH || 64||
brahmovAcha
ityevaM tadvachaH shrutvA rudraH paramakopanaH |
kopaM kR^itvA cha tatraiva jagAma svagaNaiH saha || 65||
devasainyaM cha tatsarvaM viShNunA chakriNA saha |
samutsavaM mahatkR^itvA shivasyAnujagAma ha || 66||
etasminnantare bhaktyA namaskR^itya maheshvaram |
abravInnArada tvaM vai devadevaM kR^itA~njaliH || 67||
nArada uvAcha
devadeva mahAdeva shR^iNu madvachanaM vibho |
tvameva sarvagassvAmI nAnAlIlAvishAradaH || 68||
tvayA kR^itvA mahAlIlAM gaNagarvo.apahAritaH |
asmai dattvA balaM bhUri devagarvashcha sha~Nkara || 69||
darshitaM bhuvane nAtha svameva balamadbhutam |
svatantreNa tvayA shambho sarvagarvaprahAriNA || 70||
idAnIM na kuruShvesha tAM lIlAM bhaktavatsalaH |
svagaNAnamarAMshchApi susanmAnyAbhivarddhaya || 71||
imaM na khelayedAnIM jahi brahmapadaprada |
ityuktvA nArada tvaM vai hyantarddhAnaM gatastadA || 72||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe gaNeshayuddhavarNanaM nAma pa~nchadasho.adhyAyaH || 2\.4\.15||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.16\. ShoDasho.adhyAyaH | gaNeshashirashchChedanavarNanam |}
brahmovAcha
iti shrutvA maheshAno bhaktAnugrahakArakaH |
tvadvAchA yudakAmo.abhUttena bAlena nArada || 1||
viShNumAhUya sammantrya balena mahatA yutaH |
sAmaraH sammukhastasyApyabhUddevastrilochanaH || 2||
devAshcha yuyudhustena smR^itvA shivapadAmbujam |
mahAbalA mahotsAhAshshivasaddR^iShTilokitAH || 3||
yuyudhe.atha haristena mahAbalaparAkramaH |
mahAdevyAyudho vIraH pravaNaH shivarUpakaH || 4||
yaShTyA gaNAdhipaH so.atha jaghAnAmarapu~NgavAn |
hariM cha sahasA vIraH shaktidattamahAbalaH || 5||
sarve.amaragaNAstatra vikuNThitabalA mune |
abhUvan viShNunA tena hatA yaShTyA parA~NmukhAH || 6||
shivo.api saha sainyena yuddhaM kR^itvA chiraM mune |
vikarAlaM cha taM dR^iShTvA vismayaM paramaM gataH || 7||
Chalenaiva cha hantavyo nAnyathA hanyate punaH |
iti buddhiM samAsthAya sainyamadhye vyavasthitaH || 8||
shive dR^iShTe tadA deve nirguNe guNarUpiNi |
viShNau chaivAtha sa~NgrAme AyAte sarvadevatAH || 9||
gaNAshchaiva maheshasya mahAharShaM tadA yayuH |
sarve parasparaM prItyA militvA chakrurutsavam || 10||
atha shaktisuto vIro vIragatyA svayaShTitaH |
prathamaM pUjayAmAsa viShNuM sarvasukhAvaham || 11||
ahaM cha mohayiShyAmi hanyatAM cha tvayA vibho |
ChalaM vinA na vadhyo.ayaM tAmaso.ayaM durAsadaH || 12||
iti kR^itvA matiM tatra susammantrya cha shambhunA |
Aj~nAM prApyA.abhavachChaivIM viShNurmohaparAyaNaH || 13||
shaktidvayaM tathA lInaM hariM dR^iShTvA tathAvidham |
dattvA shaktibalaM tasmai gaNeshAyAbhavanmune || 14||
shaktidvaye.atha saMlIne yatra viShNuH sthitaH svayam |
parighaM kShiptavAMstatra gaNesho balavattaraH || 15||
kR^itvA yatnaM kimapyatra va~nchayAmAsa tadgatim |
shivaM smR^itvA maheshAnaM svaprabhuM bhaktavatsalam || 16||
ekatastanmukhaM dR^iShTvA sha~Nkaro.apyAjagAma ha |
svatrishUlaM samAdAya sukruddho yuddhakAmyayA || 17||
sa dadarshAgataM shambhuM shUlahastaM maheshvaram |
hantukAmaM nijaM vIraH shivAputro mahAbalaH || 18||
shaktyA jaghAna taM haste smR^itvA mAtR^ipadAmbujam |
sa gaNasho mahAvIraH shivashaktipravarddhitaH || 19||
trishUlaM patitaM hastAchChivasya paramAtmanaH |
dR^iShTvA sadUtikastaM vai pinAkaM dhanurAdade || 20||
tamapyapAtayadbhUmau parigheNa gaNeshvaraH |
hatAH pa~ncha tathA hastAH pa~nchabhishshUlamAdade || 21||
aho duHkhataraM nUnaM sa~njAtamadhunA mama |
bhavetpunargaNAnAM kiM bhavAchAro jagAviti || 22||
etasminnantare vIraH parigheNa gaNeshvaraH |
jaghAna sagaNAn devAn shaktidattabalAnvitaH || 23||
gatA dashadisho devAH sagaNAH parighArditAH |
na tasthuHsamare ke.api tenAdbhutaprahAriNA || 24||
viShNustaM cha gaNaM dR^iShTvA dhanyo.ayamiti chAbravIt |
mahAbalo mahAvIro mahAshUro raNapriyaH || 25||
bahavo devatAshchaiva mayA dR^iShTAstathA punaH |
dAnavA bahavo daityA yakShagandharvarAkShasAH || 26||
naitena gaNanAthena samatAM yAnti ke.api cha |
trailokye.apyakhile tejo rUpashauryaguNAdibhiH || 27||
evaM sambruvate.amuShmai parighaM bhrAmayan sa cha |
chikShepa viShNave tatra shaktiputro gaNeshvaraH || 28||
chakraM gR^ihItvA hariNA smR^itvA shivapadAmbujam |
tena chakreNa parigho drutaM khaNDIkR^itastadA || 29||
khaNDaM tu parighasyApi haraye prAkShipadgaNaH |
gR^ihItvA garuDenApi pakShiNA viphalIkR^itaH || 30||
evaM vicharitaM kAlaM mahAvIrAvubhAvapi |
viShNushchApi gaNashchaiva yuyudhAte parasparam || 31||
punarvIravaraH shaktisutaHsmR^itashivo balI |
gR^ihItvA yaShTimatulAM tayA viShNuM jaghAna ha || 32||
aviShahya prahAraM taM sa bhUmau nipapAta ha |
drutamutthAya yuyudhe shivAputreNa tena vai || 33||
etadantaramAsAdya shUlapANistathottare |
Agatya cha trishUlena tachChiro nirakR^intata || 34||
Chinne shirasi tasyaiva gaNanAthasya nArada |
gaNasainyaM devasainyamabhavachcha sunishchalam || 35||
nAradena tvayA.a.agatya devyai sarvaM niveditam |
mAnini shrUyatAM mAnastyAjyo naiva tvayAdhunA || 36||
ityuktvA.antarhitastatra nArada tvaM kalipriyaH |
avikArI sadA shambhurmanogatikaro muniH || 37||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe gaNeshayuddhagaNeshashirashChedanavarNanaM nAma ShoDasho.adhyAyaH || 2\.4\.16||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.17\. saptadasho.adhyAyaH | gaNeshadehe gajamukhayojanavarNanam |}
nArada uvAcha
brahman vada mahAprAj~na tad vR^ittAnte.akhile shrute |
kimakArShInmahAdevI shrotumichChAmi tattvataH || 1||
brahmovAcha
shrUyatAM munishArdUla kathayAmyadya taddhruvam |
charitaM jagadambAyA yajjAtaM tadanantaram || 2||
mR^ida~NgAnpaTahAMshchaiva gaNAshchAvAdayaMstathA |
mahotsavaM tadA chakrurhate tasmingaNAdhipe || 3||
shivo.api tachChirashChitvA yAvadduHkhamupAdade |
tAvachcha girijA devI chukrodhAti munIshvara || 4||
kiM karomi kva gachChAmi hAhA duHkhamupAgatam |
kathaM duHkhaM vinashyetAsyA.atiduHkhaM mamAdhunA || 5||
matsuto nAshitashchAdya devaiH sarvairgaNaistathA |
sarvAMstAnnAshayiShyAmi pralayaM vA karomyaham || 6||
ityevaM duHkhitA sA cha shaktIH shatasahasrashaH |
nirmame tatkShaNaM kruddhA sarvalokamaheshvarI || 7||
nirmitAstA namaskR^itya jagadambAM shivAM tadA |
jAjvalyamAnA hyavadanmAtarAdishyatAmiti || 8||
tachChutvA shambhushaktiH sA prakR^itiH krodhatatparA |
pratyuvAcha tu tAH sarvA mahAmAyA munIshvara || 9||
devyuvAcha
he shaktayo.adhunA devyo yuShmAbhirmannideshataH |
pralayashchAtra karttavyo nAtra kAryA vichAraNA || 10||
devAMshchaiva R^iShIMshchaiva yakSharAkShasakAMstathA |
asmadIyAnparAMshchaiva sakhyo bhakShata vai haThAt || 11||
brahmovAcha
tadAj~naptAshcha tAH sarvAH shaktayaH krodhatatparAH |
devAdInAM cha sarveShAM saMhAraM kartumudyatAH || 12||
yathA cha tR^iNasaMhAramanalaH kurute tathA |
evaM tAH shaktayaH sarvAH saMhAraM kartumudyatAH || 13||
gaNapo vAtha viShNurvA brahmA vA sha~NkarastathA |
indro vA yakSharAjo vA skando vA sUrya eva vA || 14||
sarveShAM chaiva saMhAraM kurvanti sma nirantaram |
yatra yatra tu dR^ishyeta tatra tatrApi shaktayaH || 15||
karAlI kubjakA kha~njA lambashIrShA hyanekashaH |
haste dhR^itvA tu devAMshcha mukhe chaivAkShipaMstadA || 16||
taM saMhAraM tadA dR^iShTvA haro brahmA tathA hariH |
indrAdayo.akhilA devA gaNAshcha R^iShayastathA || 17||
kiM kariShyati sA devI saMhAraM vApyakAlataH |
iti saMshayamApannA jIvanAshA hatA.abhavat || 18||
sarve cha militAshcheme kiM karttavyaM vichintyatAm |
evaM vichArayantaste tUrNamUchuH parasparam || 19||
yadA cha girijA devI prasannA hi bhavediha |
tadA chaiva bhavetsvAsthyaM nAnyathA koTi yatnataH || 20||
shivo.api duHkhamApanno laukikIM gatimAshritaH |
mohayansakalAMstatra nAnAlIlAvishAradaH || 21||
sarveShAM chaiva devAnAM kaTirbhagnA yadA tadA |
shivA krodhamayI sAkShAd gantuM na pura utsahet ||| 22||
svIyo vA parakIyo vA devo vA dAnavo.api vA |
gaNo vApi cha dikpAlo yakSho vA kinnaro muniH || 23||
viShNurvApi tathA brahmA sha~Nkarashcha tathA prabhuH |
na kashchidgirijAgre cha sthAtuM shakto.abhavanmune || 24||
jAjvalyamAnaM tattejaHsarvato dAhi te.akhilAH |
dR^iShTvA bhItatarA Asan sarve dUrataraM sthitAH || 25||
etasminsamaye tatra nArado divyadarshanaH |
AgatastvaM mune devagaNAnAM sukhahetave || 26||
brahmANaM mAM bhavaM viShNuM sha~NkaraM cha praNamya saH |
samAgatya militvoche vichArya kAryameva vA || 27||
sarve sammantrayA~nchakrustvayA devA mahAtmanA |
duHkhashAntiH kathaM syAdvai samUchustata eva te || 28||
yAvachcha girijA devI kR^ipAM naiva kariShyati |
tAvannaiva sukhaM syAdvai nAtra kAryA vichAraNA || 29||
R^iShayo hi tvadAdyAshcha gatAste vai shivAntikam |
sarve prasAdayAmAsuH krodhashAntyai tadA shivAm || 30||
punaH punaH praNemushcha stutvA stotrairanekashaH |
sarve prasAdayanprItyA prochurdevagaNAj~nayA || 31||
surarShaya UchuH |
jagadamba namastubhyaM shivAyai te namo.astu te |
chaNDikAyai namastubhyaM kalyANyai cha namo.astu te || 32||
AdishaktistvamevAmba sarvasR^iShTikarI sadA |
tvameva pAlinI shaktistvameva pralaya~NkarI || 33||
prasannA bhava deveshi shAntiM kuru namo.astu te |
sarvaM hi vikalaM devi trijagattava kopataH || 34||
brahmovAcha
evaM stutA parA devI R^iShibhishcha tvadAdibhiH |
kruddhadR^iShTyA tadA tAMshcha ki~nchinnovAcha sA shivA || 35||
tadA cha R^iShayaH sarve natvA tachcharaNAmbujam |
punarUchushshivAM bhaktyA kR^itA~njalipuTAH shanaiH || 36||
kShamyatAM kShamyatAM devi saMhAro jAyate.adhunA |
tava svAmI sthitashchAtra pashya pashya tamambike || 37||
vayaM ke cha ime devA viShNubrahmAdayastathA |
prajAshcha bhavadIyAshcha kR^itA~njalipuTAH sthitAH || 38||
kShantavyashchAparAdho vai sarveShAM parameshvari |
sarve hi vikalAshchAdya shAntiM teShAM shive kuru || 39||
brahmovAcha
ityuktvA R^iShayaHsarve sudInataramAkulAH |
santasthire chaNDikAgre kR^itA~njalipuTAstadA || 40||
evaM shrutvA vachasteShAM prasannA chaNDikA.abhavat |
pratyuvAcha R^iShIMstAnvai karuNAviShTamAnasA || 41||
devyuvAcha
matputro yadi jIveta tadA saMharaNaM na hi |
yathA hi bhavatAM madhye pUjyo.ayaM cha bhaviShyati || 42||
sarvAdhyakSho bhavedadya yUyaM kuruta tadyadi |
tadA shAntirbhavelloke nAnyathA sukhamApsyatha || 43||
brahmovAcha
ityuktAste tadA sarve R^iShayo yuShmadAdayaH |
tebhyo devebhya Agatya sarvaM vR^ittaM nyavedayan || 44||
te cha sarve tathA shrutvA sha~NkarAya nyavedayan |
natvA prA~njalayo dInAH shakraprabhR^itayaH surAH || 45||
provAcheti surA~nChrutvA shivashchApi tathA punaH |
karttavyaM cha tathA sarvalokasvAsthyaM bhavediha || 46||
uttarasyAM punaryAta prathamaM yo milediha |
tachChirashcha samAhR^itya yojanIyaM kalevare || 47||
brahmovAcha
tatastaistatkR^itaM sarvaM shivAj~nApratipAlakaiH |
kalevaraM samAnIya prakShAlya vidhivachcha tat || 48||
pUjayitvA punaste vai gatAshchoda~NmukhAstadA |
prathamaM militastatra hastI chApyekadantakaH || 49||
tachChirashcha tadA nItvA tatra te.ayojayan dhruvam |
saMyojya devatAHsarvAH shivaM viShNuM vidhiM tadA || 50||
praNamya vachanaM prochurbhavaduktaM kR^itaM cha naH |
anantaraM cha tatkAryaM bhavatAdbhavasheShitam || 51||
tataste tu virejushcha pArShadAshcha surAH sukham |
atha tadvachanaM shrutvA shivoktaM paryapAlayan || 52||
Uchuste cha tadA tatra brahmaviShNusurAstathA |
praNamyeshaM shivaM devaM svaprabhuM guNavarjitam || 53||
yasmAttvattejasaHsarve vayaM jAtA mahAtmanaH |
tvattejastatsamAyAtu vedamantrAbhiyogataH || 54||
ityevamabhimantreNa mantritaM jalamuttamam |
smR^itvA shivaM sametAste chikShipustatkalevare || 95||
tajjalasparshamAtreNa chidyuto jIvito drutam |
tadottasthau supta iva sa bAlashcha shivechChayA || 56||
subhagaH sundarataro gajavaktraH suraktakaH |
prasannavadanashchAti suprabho lalitAkR^itiH || 57||
taM dR^iShTvA jIvitaM bAlaM shivAputraM munIshvara |
sarve mumudire tatra sarvaM duHkhaM kShayaM gatam || 58||
devyai sandarshayAmAsuH sarve harShasamanvitAH |
jIvitaM tanayaM dR^iShTvA devI hR^iShTatarAbhavat || 59||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe gaNeshajIvanavarNanaM nAma saptadasho.adhyAyaH || 2\.4\.17||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.18\. aShTadasho.adhyAyaH | gaNeshagaNAdhipapadavIprAptiH |}
nArada uvAcha
jIvite girijAputre devyA dR^iShTe prajeshvara |
tataH kimabhavattatra kR^ipayA tadvadAdhunA || 1||
brahmovAcha
jIvite girijAputre devyA dR^iShTe munIshvara |
yajjAtaM tachChR^iNuShvAdya vachmi taM mahadutsavam || 2||
jIvitaHsa shivAputro nirvyagro vikR^ito mune |
abhiShiktastadA devairgaNAdhyakShairgajAnanaH || 3||
dR^iShTvA svatanayaM devI shivA harShasamanvitA |
gR^ihItvA bAlakaM dorbhyAM pramudA pariShasvaje || 4||
vastrANi vividhAnIha nAnAla~NkaraNAni cha |
dadau prItyA gaNeshAya svaputrAya mudAmbikA || 5||
pUjayitvA tayA devyA siddhibhishchApyanekashaH |
kareNa sparshitaH so.atha sarvaduHkhahareNa vai || 6||
pUjayitvA sutaM devI mukhamAchumbya shA~NkarI |
varAndadau tadA prItyA jAtastvaM duHkhito.adhunA || 7||
dhanyo.asi kR^itakR^ityo.asi pUrvapUjyo bhavAdhunA |
sarveShAmamarANAM vai sarvadA duHkhavarjitaH || 8||
Anane tava sindUraM dR^ishyate sAmprataM yadi |
tasmAttvaM pUjanIyo.asi sindUreNa sadA naraiH || 9||
puShpairvA chandanairvApi gandhenaiva shubhena cha |
naivedyena suramyeNa nIrAjena vidhAnataH || 10||
tAmbUlairatha dAnaishcha tathA prakramaNairapi |
namaskAravidhAnena pUjAM yaste vidhAsyati || 11||
tasya vai sakalA siddhirbhaviShyati na saMshayaH |
vighnAnyanekarUpANi kShayaM yAsyantyasaMshayam || 12||
brahmovAcha
ityuktvA cha tadA devI svaputraM taM maheshvarI |
nAnAvastubhirutkR^iShTaiH punarapyarchayattathA || 13||
tataHsvAsthyaM cha devAnAM gaNAnAM cha visheShataH |
girijAkR^ipayA vipra jAtaM tatkShaNamAtrataH || 14||
etasmiMshcha kShaNe devA vAsavAdyAH shivaM mudA |
stutvA prasAdya taM devaM bhaktA ninyuH shivAntikam || 15||
saMsAdya girishaM pashchAdutsa~Nge sannyaveshayan |
bAlakaM taM maheshAnyAstrijagatsukhahetave || 16||
shivo.api tasya shirasi dattvA svakarapa~Nkajam |
uvAcha vachanaM devAn putro.ayamiti me.aparaH || 17||
gaNesho.api tadotthAya namaskR^itya shivAya vai |
pArvatyai cha namaskR^itya mahyaM vai viShNave tathA || 18||
nArAdAdyAnR^iShInsarvAnsa tvAsthAya puro.abravIt |
kShantavyashchAparAdho me mAnashchaivedR^isho nR^iNAm || 19||
ahaM cha sha~Nkarashchaiva viShNushchaite trayaH surAH |
pratyUchuryugapatprItyA dadato varamuttamam || 20||
trayo vayaM suravarA yathA pUjyA jagattraye |
tathAyaM gaNanAthashcha sakalaiH pratipUjyatAm || 21||
vayaM cha prAkR^itAshchAyaM prAkR^itaH pUjya eva cha |
gaNesho vighnaharttA hi sarvakAmaphalapradaH || 22||
etatpUjAM purA kR^itvA pashchAtpUjyA vayaM naraiH |
vayaM cha pUjitAH sarve nAyaM chApUjito yadA || 23||
asminnapUjite devAH parapUjAkR^itA yadi |
tadA tatphalahAniH syAnnAtra kAryA vichAraNA || 24||
brahmovAcha
ityuktvA sa gaNeshAno nAnAvastubhirAdarAt |
shivena pUjitaH pUrvaM viShNunA.anu prapUjitaH || 25||
brahmaNA cha mayA tatra pArvatyA cha prapUjitaH |
sarvairdevagaNaishchaiva pUjitaH parayA mudA || 26||
savairmilitvA tatraiva brahmaviShNuharAdibhiH |
sagaNeshashshivAtuShTyai sarvAdhyakSho niveditaH || 27||
punashchaiva shivenAsmai suprasannena chetasA |
sarvadA sukhadA loke varA dattA hyanekashaH || 28||
shiva uvAcha
he girIndrasutAputra santuShTo.ahaM na saMshayaH |
mayi tuShTe jagattuShTaM viruddhaH ko.api no bhavet || 29||
bAlarUpo.api yasmAttvaM mahAvikramakArakaH |
shaktiputraH sutejasvI tasmAdbhava sadA sukhI || 30||
tvannAma vighnahantR^itve shreShThaM chaiva bhavatviti |
mama sarvagaNAdhyakShaH sampUjyastvaM bhavAdhunA || 31||
evamuktvA sha~NkareNa pUjAvidhiranekashaH |
AshiShashchApyanekA hi kR^itAstasmiMstu tatkShaNAt || 32||
tato devagaNAshchaiva gItaM vAdyaM cha nR^ityakam |
mudA te kArayAmAsustathaivApsarasAM gaNAH || 33||
punashchaiva varo dattaH suprasannena shambhunA |
tasmai cha gaNanAthAya shivenaiva mahAtmanA || 34||
chaturthyAM tvaM samutpanno bhAdre mAsi gaNeshvara |
asite cha tathA pakShe chandrasyodayane shubhe || 35||
prathame cha tathA yAme girijAyAH suchetasaH |
AvirbabhUva te rUpaM yasmAtte vratamuttamam || 36||
tasmAttaddinamArabhya tasyAmeva tithau mudA |
vrataM kAryaM visheSheNa sarvasiddhyai sushobhanam || 37||
yAvatpunaH samAyAti varShAnte cha chaturthikA |
tAvadvrataM cha kartavyaM tava chaiva mamAj~nayA || 38||
saMsAre sukhamichChanti ye.atulaM chApyanekashaH |
tvAM pUjayantu te bhaktyA chaturthyAM vidhipUrvakam || 39||
mArgashIrShe tathA mAse ramA yA vai chaturthikA |
prAtaH snAnaM tadA kR^itvA vrataM viprAnnivedayet || 40||
dUrvAbhiH pUjanaM kAryamupavAsastathAvidhaH |
rAtreshcha prahare jAte snAtvA sampUjayennaraH || 41||
mUrtiM dhAtumayIM kR^itvA pravAlasambhavAM tathA |
shvetArkasambhavAM chApi mArddikAM nirmitAM tathA || 42||
pratiShThApya tadA tatra pUjayetprayataH pumAn |
gandhairnAnAvidhairdivyaishchandanaiH puShpakairiha || 43||
vitastimAtrA dUrvA cha trya~NgA vai mUlavarjitA |
IdR^ishAnAM shAdbalAnAM shatenaikottareNa ha || 44||
ekaviMshatikenaiva pUjayetpratimAM sthitAm |
dhUpairdIpaishcha naivedyairvividhairgaNanAyakam || 45||
tAmbUlAdyarghasaddravyaiH praNipatya stavaistathA |
tvAM tatra pUjayitvetthaM bAlachandraM cha pUjayet || 46||
pashchAdviprAMshcha sampUjya bhojayenmadhurairmudA |
svayaM chaiva tato bhu~njyAnmadhuraM lavaNaM vinA || 47||
visarjayettataH pashchAnniyamaM sarvamAtmanaH |
gaNeshasmaraNaM kuryAtsampUrNaM syAd vrataM shubham || 48||
evaM vratena sampUrNe varShe jAte narastadA |
udyApanavidhiM kuryAdvratasampUrttihetave || 49||
dvAdasha brAhmaNAstatra bhojanIyA madAj~nayA |
kumbhamekaM cha saMsthApya pUjyA mUrtistvadIyikA || 50||
sthaNDile.aShTadalaM kR^itvA tadA vedavidhAnataH |
homashchaivAtra kartavyo vittashAThyavivarjitaiH || 51||
strIdvayaM cha tathA chAtra baTukadvayamAdarAt |
bhojayetpUjayitvA vai mUrtyagre vidhipUrvakam || 52||
nishi jAgaraNaM kAryaM punaH prAtaH prapUjayet |
visarjanaM tatashchaiva punarAgamanAya cha || 53||
bAlakAchchAshiSho grAhyAHsvastivAchanameva cha |
puShpA~njaliM pradadyAchcha vratasampUrNahetave || 54||
namaskArAMstataH kR^itvA nAnAkAryaM prakalpayet |
evaM vrataM kR^itaM yena tasyepsitaphalaM bhavet || 55||
yo nityaM shraddhayA sArddhaM pUjAM chaiva svashaktitaH |
kuryyAttava gaNeshAna sarvakAmaphalAptaye || 56||
sindUraishchandanaishchaiva taNDulaiH ketakaistathA |
upachArairanekaishcha pUjayettvAM gaNeshvaram || 57||
evaM tvAM pUjayeyurye bhaktyA nAnopachArataH |
teShAM siddhirbhavennityaM vighnanAsho bhavediha || 58||
sarvairvarNaiH prakarttavyA strIbhishchaiva visheShataH |
udayAbhimukhaishchaiva rAjabhishcha visheShataH || 59||
yaM yaM kAmayate yo vai taM tamApnoti nishchitam |
ataH kAmayamAnena tena sevyaH sadA bhavAn || 60||
brahmovAcha
shivenaivaM tadA proktaM gaNeshAya mahAtmane |
tadAnIM daivataishchaiva sarvaishcha R^iShisattamaiH || 61||
tathetyuktvA tu taiHsarvairgaNaiH shambhupriyairmune |
pUjito hi gaNAdhIsho vidhinA parameNa saH || 62||
tatashchaiva gaNAH sarve praNemuste gaNeshvaram |
samAnarchurvisheSheNa nAnAvastubhirAdarAt || 63||
girijAyAssamutpanno yashcha harSho munIshvara |
chaturbhirvadanairvai tamavarNyaM cha kathaM bruve || 64||
devadundubhayo nedurnanR^itushchApsarogaNAH |
jagurgandharvamukhyAshcha puShpavarShaM papAta ha || 65||
jagatsvAsthyaM tadA prApa gaNAdhIshe pratiShThite |
mahotsavo mahAnAsItsarvaM duHkhaM kShayaM gatam || 66||
shivAshivau cha modetAM visheSheNAti nArada |
AsItsuma~NgalaM bhUri sarvatra sukhadAyakam || 67||
tato devagaNAH sarve R^iShINAM cha gaNAstathA |
samAgatAshcha ye tatra jagmuste tu shivAj~nayA || 68||
prashaMsantaH shivAM tatra gaNeshaM cha punaH punaH |
shivaM chaiva tathA stutvA kIdR^ishaM yuddhameva cha || 69||
yadA sA girijA devI kopahInA babhUva ha |
shivo.api girijAM tatra pUrvavatsamprapadya tAm || 70||
chakAra vividhaM saukhyaM lokAnAM hitakAmyayA |
svAtmArAmo.api paramo bhaktakAryodyataH sadA || 71||
viShNushcha shivamApR^ichChya brahmAhaM taM tathaiva hi |
AgachChAva svadhAmaM cha shivau saMsevya bhaktitaH || 72||
nArada tvaM cha bhagavansa~NgIya shivayoryashaH |
Agamo bhavanaM svaM cha shivau pR^iShTvA munIshvara || 73||
etatte sarvamAkhyAtaM mayA vai shivayoryashaH |
bhavatpR^iShTena vighneshayashaH sammishramAdarAt || 74||
idaM suma~NgalAkhyAnaM yaH shR^iNoti susaMyataH |
sarvama~NgalasaMyuktaH sa bhavenma~NgalAlayaH || 75||
aputro labhate putraM nirdhano labhate dhanam |
bhAryArthI labhate bhAryAM prajArthI labhate prajAm || 76||
ArogyaM labhate rogI saubhAgyaM durbhago labhet |
naShTaputraM naShTadhanaM proShitA cha patiM labhet |
shokAviShTaH shokahInaH sa bhavennAtra saMshayaH || 77||
idaM gANeshamAkhyAnaM yasya gehe cha tiShThati
sadA ma~NgalasaMyuktaH sa bhavennAtra saMshayaH || 78||
yAtrAkAle cha puNyAhe yaH shR^iNoti samAhitaH |
sarvAbhIShTaM sa labhate shrIgaNeshaprasAdataH || 79||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe gaNeshagaNAdhipapadavIprAptivarNanaM nAmAShTAdasho.adhyAyaH || 2\.4\.18||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.19\. ekonaviMsho.adhyAyaH | vivAhopakrame gaNeshasya prathamapUjyatvavarNanam |}
nArada uvAcha
gaNeshasya shrutA tAta samyagjaniranuttamA |
charitramapi divyaM vai suparAkramabhUShitam || 1||
tataH kimabhavattAta tattvaM vada sureshvara |
shivAshivayashassphItaM mahAnandapradAyakam || 2||
brahmovAcha
sAdhu pR^iShTaM munishreShTha bhavatA karuNAtmanA |
shrUyatAM dattakarNaM hi vakShye.ahaM R^iShisattama || 3||
shivA shivashcha viprendra dvayoshcha sutayoH param |
darshaM darshaM cha tallIlAM mahatprema samAvahat || 4||
pitrorlAlayatostatra sukhaM chAti vyavarddhata |
sadA prItyA mudA chAtikhelanaM chakratuH sutau || 5||
tAveva tanayau tatra mAtApitrormunIshvara |
mahAbhaktyA yadA yuktau paricharyAM prachakratuH || 6||
ShaNmukhe cha gaNeshe cha pitrostadadhikaM sadA |
sneho vyavarddhata mahAn shuklapakShe yathA shashI || 7||
kadAchittau sthitau tatra rahasi premasaMyutau |
shivA shivashcha devarShe suvichAraparAyaNau || 8||
shivAshivAvUchatuH
vivAhayogyau sa~njAtau sutAviti cha tAvubhau ||
vivAhashcha kathaM kAryaH putrayorubhayoH shubham | 9||
ShaNmukhashcha priyatamo gaNeshashcha tathaiva cha |
iti chintAsamudvignau lIlAnandau babhUvatuH || 10||
svapitrormatamAj~nAya tau sutAvapi saMspR^ihau |
tadichChayA vivAhArthaM babhUvaturatho mune || 11||
ahaM cha pariNeShyAmi hyahaM chaiva punaH punaH |
parasparaM cha nityaM vai vivAde tatparAvubhau || 12||
shrutvA tadvachanaM tau cha dampatI jagatAM prabhU |
laukikAchAramAshritya vismayaM paramaM gatau || 13||
kiM kartavyaM kathaM kAryo vivAhavidhiretayoH |
iti nishchitya tAbhyAM vai yuktishcha rachitAdbhutA || 14||
kadAchitsamaye sthitvA samAhUya svaputrakau |
kathayAmAsatustatra putrayoH pitarau tadA || 15||
asmAkaM niyamaH pUrvaM kR^itashcha sukhado hi vAm ||
shrUyatAM susutau prItyA kathayAvo yathArthakam | 16||
samau dvAvapi satputrau visheSho nAtra labhyate |
tasmAtpaNaH kR^itaH shandaH putrayorubhayorapi || 17||
yashchaiva pR^ithivIM sarvAM krAntvA pUrvamupAvrajet |
tasyaiva prathamaM kAryo vivAhaH shubhalakShaNaH || 18||
brahmovAcha
tayorevaM vachaH shrutvA sharajanmA mahAbalaH |
jagAma mandirAttUrNaM pR^ithivIkramaNAya vai || 19||
gaNanAthashcha tatraiva saMsthito buddhisattamaH |
subuddhyA saMvichAryeti chitta eva punaH punaH || 20||
kiM kartavyaM kva gantavyaM la~NghituM naiva shakyate |
kroshamAtraM gataH syAdvai gamyate na mayA punaH || 21||
kiM punaH pR^ithivImetAM krAntvA chopArjitaM sukham |
vichAryeti gaNeshastu yachchakAra shR^iNuShva tat || 22||
snAnaM kR^itvA yathAnyAyaM samAgatya svayaM gR^iham |
uvAcha pitaraM tatra mAtaraM punareva saH || 23||
gaNesha uvAcha
Asane sthApite hyatra pUjArthaM bhavatoriha |
bhavantau saMsthitau tAtau pUryyatAM me manorathaH || 24||
brahmovAcha
iti shrutvA vachastasya pArvatIparameshvarau |
asthAtAmAsane tatra tatpUjAgrahaNAya vai || 25||
tenAtha pUjitau tau cha prakrAntau cha punaH punaH |
evaM cha kR^itavAn sapta praNAmAMstu tathaiva saH || 26||
baddhA~njalirathovAcha gaNesho buddhisAgaraH |
stutvA bahutithastAta pitarau premavihvalau || 27||
gaNesha uvAcha
bho mAtarbho pitastvaM cha shR^iNu me paramaM vachaH |
shIghraM chaivAtra kartavyo vivAhaH shobhano mama || 28||
brahmovAcha
ityevaM vachanaM shrutvA gaNeshasya mahAtmanaH |
mahAbuddhinidhiM taM tau pitarAvUchatustadA || 29||
shivAshivAvUchatuH
prakrAmeta bhavAnsamyak pR^ithivIM cha sakAnanAm |
kumAro gatavAMstatra tvaM gachCha pura Avraja || 30||
brahmovAcha
ityevaM vachanaM shrutvA pitrorgaNapatirdrutam |
uvAcha niyatastatra vachanaM krodhasaMyutaH || 31||
gaNesha uvAcha
bho mAtarbho pitardharmarUpau prAj~nau yuvAM matau |
dharmataH shrUyatAM samyak vachanaM mama sattamau || 32||
mayA tu pR^ithivI krAntA saptavAraM punaH punaH |
evaM kathaM bruvAte vai punashcha pitarAviha || 33||
brahmovAcha
tadvachastu tadA shrutvA laukikIM gatimAshritau |
mahAlIlAkarau tatra pitarAvUchatushcha tam || 34||
pitarAvUchatuH
kadA krAntA tvayA putra pR^ithivI sumahattarA |
saptadvIpA samudrAntA mahadbhirgahanairyutA || 35||
brahmovAcha
tayorevaM vachaH shrutvA shivAsha~Nkarayormune |
mahAbuddhinidhiH putro gaNesho vAkyamabravIt || 36||
gaNesha uvAcha
bhavatoH pUjanaM kR^itvA shivAsha~Nkarayoraham |
svabuddhyA hi samudrAntapR^ithvIkR^itaparikramaH || 37||
ityevaM vachanaM vede shAstre vA dharmasa~nchaye |
varttate kiM cha tattathyaM nahi kiM tathyameva vA || 38||
pitroshcha pUjanaM kR^itvA prakrAntiM cha karoti yaH |
tasya vai pR^ithivIjanyaM phalaM bhavati nishchitam || 39||
apahAya gR^ihe yo vai pitarau tIrthamAvrajet |
tasya pApaM tathA proktaM hanane cha tayoryathA || 40||
putrasya cha mahattIrthaM pitroshcharaNapa~Nkajam |
anyatIrthaM tu dUre vai gatvA samprApyate punaH || 41||
idaM sannihitaM tIrthaM sulabhaM dharmasAdhanam |
putrasya cha striyAshchaiva tIrthaM gehe sushobhanam || 42||
iti shAstrANi vedAshcha bhAShante yannirantaram |
bhavadbhyAM tatprakarttavyamasatyaM punareva cha || 43||
bhavadIyaM tvidaM rUpamasatyaM cha bhavediha |
tadA vedo.apyasatyo vai bhavediti na saMshayaH || 44||
shIghraM cha bhavitavyo me vivAhaH kriyatAM shubhaH |
atha vA vedashAstraM cha vyalIkaM kathyatAmiti || 45||
dvayoH shreShThatamaM madhye yatsyAtsamyagvichArya tat |
kartavyaM cha prayatnena pitarau dharmarUpiNau || 46||
brahmovAcha
ityuktvA pArvatIputraH sa gaNeshaH prakR^iShTadhIH |
virarAma mahAj~nAnI tadA buddhimatAM varaH || 47||
tau dampatI cha vishveshau pArvatIsha~Nkarau tadA |
iti shrutvA vachastasya vismayaM paramaM gatau || 48||
tataH shivA shivashchaiva putraM buddhivichakShaNam |
samprashasyochatuH prItyA tau yathArthaprabhAShiNam || 49||
shivAshivAvUchatuH
putra te vimalA buddhiH samutpannA mahAtmanaH ||
tvayoktaM yadvachashchaiva tatashchaiva cha nAnyathA || 50||
samutpanne cha duHkhe cha yasya buddhirvishiShyate |
tasya dukhaM vinashyeta sUrye dR^iShTe yathA tamaH || 51||
buddhiryasya balaM tasya nirbuddhestu kuto balam |
kUpe siMho madonmattaH shashakena nipAtitaH || 52||
vedashAstrapurANeShu bAlakasya yathoditam |
tvayA kR^itaM tu tatsarvaM dharmasya paripAlanam || 53||
samyakkR^itaM tvayA yachcha tatkenApi bhavediha |
AvAbhyAM mAnitaM tachcha nAnyathA kriyate.adhunA || 54||
brahmovAcha
ityuktvA tau samAshvAsya gaNeshaM buddhisAgaram |
vivAhakaraNe chAsya matiM chakraturuttamAm || 55||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe gaNeshavivAhopakramo nAmaikonaviMsho.adhyAyaH || 2\.4\.19||

|| shrIgaNeshAya namaH || 
|| shrIgaurIsha~NkarAbhyAM namaH || 
|| shrIshivamahApurANam || 
dvitIyAyAM rudrasaMhitAyAM chaturthaH kumArakhaNDe
\section{2\.4\.20\. viMsho.adhyAyaH | gaNeshavivAhavarNanam |}
brahmovAcha
etasminnantare tatra vishvarUpaH prajApatiH |
tadudyogaM saMvichArya sukhamApa prasannadhIH || 1||
vishvarUpaprajeshasya divyarUpe sute ubhe |
siddhibuddhiriti khyAte shubhe sarvA~Ngashobhane || 2||
tAbhyAM chaiva gaNeshasya girijA sha~NkaraH prabhU |
mahotsavaM vivAhaM cha kArayAmAsaturmudA || 3||
santuShTA devatAH sarvAstadvivAhe samAgaman |
yathA chaiva shivasyaiva girijAyA manorathaH || 4||
tathA cha vishvakarmA.asau vivAhaM kR^itavAMstathA |
tathA cha R^iShayo devA lebhire paramAM mudam || 5||
gaNesho.api tadA tAbhyAM sukhaM paramadurlabham |
prAptavAMshcha mune tattu varNituM naiva shakyate || 6||
kiyatA chaiva kAlena gaNeshasya mahAtmanaH |
dvayoH patnyoshcha dvau divyau tasya putrau babhUvatuH || 7||
siddhergaNeshapatnyAstu kShemanAmA suto.abhavat |
buddherlAbhAbhidhaH putro hyAsItparamashobhanaH || 8||
evaM sukhamachintyaM vai bhu~njAne hi gaNeshvare |
AjagAma dvitIyashcha krAntvA pR^ithvIM sutastadA || 9||
tAvashcha nAradenaiva prApto gehe mahAtmanA |
yathArthaM vachmi no.asatyaM na Chalena na matsarAt || 10||
pitR^ibhyAM tu kR^itaM yachcha shivayA sha~NkareNa te |
tanna kuryAtparo loke satyaM satyaM bravImyaham || 11||
niShkAsya tvAM kukramaNaM miShamutpAdya yatnataH |
gaNeshasya varo.akAri vivAhaH parashobhanaH || 12||
gaNeshasya kR^itodvAho labdhavAMstrIdvayaM mudA |
vishvarUpaprajeshasya kanyAratnaM mahottamam || 13||
putradvayaM lalAbhAsau dvayoH patnyoH shubhA~NgayoH |
siddheH kShemaM tathA buddherlAbhaM sarvasukhapradam || 14||
patnyordvayorgaNesho.asau labdhvAputradvayaM shubham |
mAtApitrormatenaiva sukhaM bhu~Nkte nirantaram || 15||
bhavatA pR^ithivI krAntA sasamudrA sakAnanA |
tachChalAj~nAvashAttAta tasya jAtaM phalaM tvidam || 16||
pitR^ibhyAM hi kR^itaM yattu ChalaM tAta vichAryatAm |
svasvAmibhyAM visheSheNa hyanyaH kinna karoti vai || 17||
asamyakcha kR^itaM tAbhyAM tvatpitR^ibhyAM hi karma ha |
vichAryatAM tvayA.apIha machchitte na shubhaM matam || 18||
dadyAdyadi garaM mAtA vikrINIyAtpitA yadi |
rAjA harati sarvasvaM kasmai kiM cha bravItu vai || 19||
yenaivedaM kR^itaM syAdvai karmAnarthakaraM param |
shAntikAmassudhIstAta tanmukhaM na vilokayet || 20||
iti nItiH shrutau proktA smR^itau shAstreShu sarvataH |
niveditA cha sA te.adya yathechChasi tathA kuru || 21||
brahmovAcha
ityuktvA nArada tvaM tu maheshvaramanogatiH |
tasmai tathA kumArAya vAkyaM maunamupAgataH || 22||
skando.api pitaraM natvA kopAgnijvalitastadA |
jagAma parvataM krau~nchaM pitR^ibhyAM vArito.api san || 23||
vAraNe cha kR^ite tvadya gamyate cha kathaM tvayA |
ityevaM cha niShiddho.api prochya neti jagAma saH || 24||
na sthAtavyaM mayA tAtau kShaNamapyatra ki~nchana |
yadyevaM kapaTaM prItimapahAya kR^itaM mayi || 25||
evamuktvA gatastatra mune so.adyApi vartate |
darshanenaiva sarveShAM lokAnAM pApahArakaH || 26||
taddinaM hi samArabhya kArtikeyasya tasya vai |
shivaputrasya devarShe kumAratvaM pratiShThitam || 27||
tannAma shubhadaM loke prasiddhaM bhuvanatraye |
sarvapApaharaM puNyaM brahmacharyapradaM param || 28||
kArtikyAM cha sadA devA R^iShayashcha satIrthakAH |
darshanArthaM kumArasya gachChanti cha munIshvarAH || 29||
kArtikyAM kR^ittikAsa~Nge kuryAdyaH svAmidarshanam |
tasya pApaM dahetsarvaM chittepsitaphalaM labhet || 30||
umA.api duHkhamApannA skandasya virahe sati |
uvAcha svAminaM dInA tatra gachCha mayA prabho || 31||
tatsukhArthaM svayaM shambhurgataH svAMshena parvate |
mallikArjunanAmAsIjjyotirli~NgaM sukhAvaham || 32||
adyApi dR^ishyate tatra shivayA sahitashshivaH |
sarveShAM nijabhaktAnAM kAmapUraH satAM gatiH || 33||
tamAgataM sa vij~nAya kumAraH sashivAM shivam |
sa virajya tato.anyatra gantumAsItsamutsukaH || 34||
devaishcha munibhishchaiva prArthitaH so.api dUrataH |
yojanatrayamutsR^ijya sthitaH sthAne cha kArtikaH || 35||
putrasnehAturau tau vai shivau parvaNi parvaNi |
darshanArthaM kumArasya tasya nArada gachChataH || 36||
amAvAsyAdine shambhuH svayaM gachChati tatra ha |
pUrNamAsIdine tatra pArvatI gachChati dhruvam || 37||
yadyattasya cha vR^ittAntaM bhavatpR^iShTaM munIshvara |
kArtikasya gaNeshasya paramaM kathitaM mayA || 38||
etachChrutvA naro dhImAn sarvapApaiH pramuchyate |
shobhanAM labhate kAmAnIpsitAnsakalAnsadA || 39||
yaH paThetpAThayedvApi shR^iNuyAchChrAvayettathA |
sarvAnkAmAnavApnoti nAtra kAryA vichAraNA || 40||
brAhmaNo brahmavarchasvI kShatriyo vijayI bhavet |
vaishyo dhanasamR^iddhassyAchChUdrassattamatAmiyAt || 41||
rogI rogAtpramuchyeta bhayAnmuchyeta bhItiyuk |
bhUtapretAdibAdhAbhyaH pIDito na bhavennaraH || 42||
etadAkhyAnamanaghaM yashasyaM sukhavarddhanam |
AyuShyaM svargyamatulaM putrapautrAdikArakam || 43||
apavargapradaM chApi shivaj~nAnapradaM param |
shivAshivaprItikaraM shivabhaktivivarddhanam || 44||
shravaNIyaM sadA bhaktairniShkAmaishcha mumukShubhiH |
shivAdvaitapradaM chaitatsadAshivamayaM shivam || 45||

iti shrIshivamahApurANe dvitIyAyAM rudrasaMhitAyAM chaturthe kumArakhaNDe gaNeshavivAhavarNanaM nAma viMsho.adhyAyaH || 2\.4\.20||

|| iti shrIshivamahApurANe dvitIyarudrasaMhitAyAM chaturthaH kumArakhaNDaH samAptaH || 2\.4||

##Proofread by H Revathy Rajaraman/Uma Mahesh##
##


\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}