% Text title : ShivapurAna Mahatmyam % File name : shivapurANamAhAtmyam.itx % Category : shiva, purana, shivapurANa % Location : doc\_purana % Proofread by : Revathy Rajaraman % Latest update : July 4, 2024 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shri Shiva Mahapuranam Mahatmyam ..}## \itxtitle{.. shrIshivamahApurANaM mAhAtmyam ..}##\endtitles ## || shrIgaNeshAya namaH || || shrIgaurIsha~NkarAbhyAM namaH || \section{0\.1 prathamo.adhyAyaH tanmahimavarNanam} shaunaka uvAcha | he he sUta mahAprAj~na sarvasiddhAntavit prabho | AkhyAhi me kathAsAraM purANAnAM visheShataH || 1|| sadAchArashcha sadbhaktirviveko vardhate katham | svavikAranirAsashcha sajjanaiH kriyate katham || 2|| jIvAshchAsuratAM prAptAH prAyo ghore kalAviha | tasya saMshodhane kiM hi vidyate paramAyanam || 3|| yadasti vastu paramaM shreyasAM shreya uttamam | pAvanaM pAvanAnAM cha sAdhanaM tadvadAdhunA || 4|| yena tatsAdhanenAshu shudhyatyAtmA visheShataH | shivaprAptirbhavettAta sadA nirmalachetasaH || 5|| sUta uvAcha | dhanyastvaM munishArdUla shravaNaprItilAlasaH | ato vichArya sudhiyA vachmi shAstraM mahottamam || 6|| sarvasiddhAntaniShpannaM bhaktyAdikavivardhanam | shivatoShakaraM divyaM shR^iNu vatsa rasAyanam || 7|| kAlavyAlamahAtrAsavidhvaMsakaramuttamam | shaivaM purANaM paramaM shivenoktaM purA mune || 8|| sanatkumArasya munerupadeshAt parAdarAt | vyAsenoktaM tu sa~NkShepAt kalijAnAM hitAya cha || 9|| etasmAdaparaM ki~nchitpurANAchChaivato mune | na vidyate manaHshuddhyai kalijAnAM visheShataH || 10|| janmAntare bhavet puNyaM mahadyasya sudhImataH | tasya prItirbhavettatra mahAbhAgyavato mune || 11|| etachChivapurANaM hi paramaM shAstramuttamam | shivarUpaM kShitau j~neyaM sevanIyaM cha sarvathA || 12|| paThanAchChravaNAdasya bhaktimAnnarasattamaH | sadyaH shivapadaprAptiM labhate sarvasAdhanAt || 13|| tasmAt sarvaprayatnena kA~NkShitaM paThanaM nR^ibhiH | tathAsya shravaNaM premNA sarvakAmaphalapradam || 14|| purANashravaNAchChambhorniShpApo jAyate naraH | bhuktvA bhogAn suvipulAn shivalokamavApnuyAt || 15|| rAjasUyena yatpuNyamagniShTomashatena cha | tat puNyaM labhate shambhoH kathAshravaNamAtrataH || 16|| ye shR^iNvanti mune shaivaM purANaM shAstramuttamam | te manuShyA na mantavyA rudrA eva na saMshayaH || 17|| shR^iNvatAM tat purANaM hi tathA kIrtayatAM cha tat | pAdAmbujarajAMsyeva tIrthAni munayo viduH || 18|| gantuM niHshreyasaM sthAnaM ye.abhivA~nChanti dehinaH | shaivaM purANamamalaM bhaktyA shR^iNvantu te sadA || 19|| sadA shrotuM yadyashakto bhavet sa munisattama | niyatAtmA pratidinaM shR^iNuyAdvA muhUrtakam || 20|| yadi pratidinaM shrotumashakto mAnavo bhavet | puNyamAsAdiShu mune shR^iNuyAchChivapurANakam || 21|| muhUrtaM vA tadardhaM vA tadardhaM vA kShaNaM cha vA | ye shR^iNvanti purANaM tanna teShAM durgartirbhavet || 22|| tatpurANaM cha shR^iNvAnaH puruSho yo munIshvara | sa nistarati saMsAraM dagdhvA karmamahATavIm || 23|| yatpuNyaM sarvadAneShu sarvayaj~neShu vA mune | shambhoH purANashravaNAttatphalaM nishchalaM bhavet || 24|| visheShataH kalau shaivapurANashravaNAdR^ite | paro dharmo na puMsAM hi muktisAdhanakR^inmune || 25|| purANashravaNaM shambhornAmasa~NkIrtanaM tathA | kalpadrumaphalaM samya~N manuShyANAM na saMshayaH || 26|| kalau durmedhasAM puMsAM dharmAchArojjhitAtmanAm | hitAya vidadhe shambhuH purANAkhyaM sudhArasam || 27|| eko.ajarAmaraH syAdvai pibannevAmR^itaM pumAn | shambhoH kathAmR^itaM kuryAt kulamevAjarAmaram || 28|| sadA sevyA sadA sevyA sadA sevyA visheShataH | etachChivapurANasya kathA paramapAvani || 29|| etachChivapurANasya kathAshravaNamAtrataH | kiM bravImi phalaM tasya shivashchittaM samAshrayet || 30|| chaturviMshatisAhasro grantho.ayaM saptasaMhitaH | bhaktitrikasusampUrNaH shR^iNuyAttaM parAdarAt || 31|| vidyeshvarasaMhitAdyA dvitIyA rudrasaMhitA | tR^itIyA shatarudrAkhyA koTirudrA chaturthikA || 32|| pa~nchamyumAsaMhitoktA ShaShThI kailAsasaMhitA | saptamI vAyavIyAkhyA saptaivaM saMhitA iha || 33|| sasaptasaMhitaM divyaM purANaM shivasa.nj~nakam | varIvarti brahmatulyaM sarvopari gatipradam || 34|| etachChivapurANaM hi saptasaMhitamAdarAt | paripUrNaM paThedyastu sa jIvanmukta uchyate || 35|| pumAnaj~nAnatastAvad bhramate.asminbhave mune | yAvatkarNagataM nAsti purANaM shaivamuttamam || 36|| kiM shrutairbahubhiH shAstraiH purANaishcha bhramAvahaiH | shaivaM purANamekaM hi muktidAnena garjati || 37|| etachChivapurANasya kathA bhavati yadgR^ihe | tIrthabhUtaM hi tad gehaM vasatAM pApanAshanam || 38|| ashvamedhasahasrANi vAjapeyashatAni cha | kalAM shivapurANasya nArhanti khalu ShoDashIm || 39|| tAvat sa prochyate pApI pApakR^inmunisattama | yAvachChivapurANaM hi na shR^iNoti subhaktitaH || 40|| ga~NgAdyAH puNyanadyashcha saptapuryo gayA tathA | etachChivapurANasya samatAM yAnti na kvachit || 41|| nityaM shivapurANasya shlokaMshlokArdhameva cha | svamukhena paThedbhaktyA yadIchChet paramAM gatim || 42|| etachChivapurANaM yo vAchayedarthato.anisham | paThedvA prItito nityaM sa puNyAtmA na saMshayaH || 43|| antakAle hi yashchainaM shR^iNuyAdbhaktitaH sudhIH | suprasanno maheshAnastasmai yachChati svaM padam || 44|| etachChivapurANaM yaH pUjayennityamAdarAt | sa bhuktvehAkhilAn kAmAnante shivapadaM labhet || 45|| etachChivapurANasya kurvannityamatandritaH | paTTavastrAdinA samyak satkAraM sa sukhI sadA || 46|| shaivaM purANamamalaM shaivasarvasvamAdarAt | sevanIyaM prayatnena paratreha sukhepsunA || 47|| chaturvargapradaM shaivaM purANamamalaM param | shrotavyaM sarvadA prItyA paThitavyaM visheShataH || 48|| vedetihAsashAstreShu paraM shreyaskaraM mahat | shaivaM purANaM vij~neyaM sarvathA hi mumukShubhiH || 49|| shaivaM purANamidamAtmavidAM variShThaM sevyaM sadA paramavastu satA samarchyam | tApatrayAbhishamanaM sukhadaM sadaiva prANapriyaM vidhiharIshamukhAmarANAm || 50|| vande shivapurANaM hi sarvadAhaM prasannadhIH | shivaH prasannatAM yAyAd dadyAtsvapadayo ratim || 51|| iti shrIskAnde mahApurANe shivapurANamAhAtmye tanmahimavarNanaM nAma prathamo.adhyAyaH || 1|| \section{0\.2 dvitIyo.adhyAyaH devarAjamuktivarNanam} shaunaka uvAcha | sUta sUta mahAbhAga dhanyastvaM paramArthavit | adbhuteyaM kathA divyA shrAvitA kR^ipayA hi naH || 1|| aghaughavidhvaMsakarI manaHshuddhividhAyini | shivasantoShajananI katheyaM naH shrutAdbhutA || 2|| etatkathAsamAnaM na bhuvi ki~nchit parAtparam | nishchayeneti vij~nAtamasmAbhiH kR^ipayA tava || 3|| ke ke vishudhyantyanayA kathayA pApinaH kalau | vada tAn kR^ipayA sUta kR^itArthaM bhuvanaM kuru || 4|| sUta uvAcha | ye mAnavAH pApakR^ito durAchAraratAH khalAH | kAmAdiniratA nityaM te.api shudhyantyanena vai || 5|| j~nAnayaj~na: paro.ayaM vai bhuktimuktipradaH sadA | shodhanaH sarvapApAnAM shivasantoShakArakaH || 6|| tR^iShNAkulAH satyahInAH pitR^imAtR^ividUShakAH | dAmbhikA hiMsakA ye cha te.api shudhyantyanena vai || 7|| svavarNAshramadharmebhyo varjitA matsarAnvitAH | j~nAnayaj~nena te.anena sampunanti kalAvapi || 8|| ChalachChadmakarA ye cha ye cha krUrAH sunirdayAH | j~nAnayaj~nena te.anena sampunanti kalAvapi || 9|| brahmasvapuShTA: satataM vyabhichAraratAshcha ye | j~nAnayaj~nena te.anena sampunanti kalAvapi || 10|| sadA pAparatA ye cha ye shaThAshcha durAshayAH | j~nAnayaj~nena te.anena sampunanti kalAvapi || 11|| malinA durdhiyo.ashAntA devatAdravyabhojinaH | j~nAnayaj~nena te.anena sampunanti kalAvapi || 12|| purANasyAsya puNyaM sanmahApAtakanAshanam | bhuktimuktipradaM chaiva shivasantoShahetukam || 13|| atraivodAharantImamitihAsaM purAtanam | yasya shravaNamAtreNa pApahAnirbhavatyalam || 14|| AsIt kirAtanagare brAhmaNo j~nAnadurbalaH | daridro rasavikretA vedadharmaparA~NmukhaH || 15|| sandhyAsnAnaparibhraShTo vaishyavR^itiparAyaNaH | devarAja iti khyAto vishrvastajanava~nchakaH || 16|| sa viprAn kShatriyAn vaishyAn shUdrAMshchApi tathAparAn | hatvA nAnAmiSheNaiva tattaddhanamapAharat || 17|| adharmAd bahuvittAni pashchAttenArjitAni vai | na dharmAya dhanaM tasya svalpa~nchApIha pApinaH || 18|| ekadaikataDAge sa snAtuM yAto mahIsuraH | veshyAM shobhAvatIM nAma dR^iShTvA tatrAtivihvalaH || 19|| svavashaM dhaninaM vipraM j~nAtvA hR^iShTAtha sundarI | vArtAlApena tachchittaM prItimatsamajAyata || 20|| striyaM kartuM sa tAM mene patiM kartuM cha sA tathA | evaM kAmavashau bhUtvA bahukAlaM vijahratuH || 21|| Asane shayane pAne bhojane krIDane tathA | dampatIva sadA dvau tu vavR^itAte parasparam || 22|| mAtrA pitrA tathA patnyA vArito.api punaH punaH | nAmanyata vachasteShAM pApavR^ittiparAyaNaH || 23|| ekaderShyAvashAd rAtrau mAtaraM pitaraM vadhUm | prasuptAn nyavadhId duShTo dhanaM teShAM tathAharat || 24|| AtmanInaM dhanaM yachcha pitrAdInAM tathA dhanam | veshyAyai dattavAn sarvaM kAmI tadgatamAnasaH || 25|| so.abhakShyabhakShakaH pApI madirApAnalAlasaH | ekapAtre sadAbhaukShIt saveshyo brAhmaNAdhamaH || 26|| kadAchiddaivayogena pratiShThAnamupAgataH | shivAlayaM dadarshAsau tatra sAdhujanAvR^itam || 27|| sthitvA tatra cha vipro.asau jvareNAtiprapIDitaH | shushrAva satataM shaivIM kathAM vipramukhodgatAm || 28|| devarAjashcha mAsAnte jvareNApIDito mR^itaH | baddho yamabhaTaiH pAshairnIto yamapuraM balAt || 29|| tAvachChivagaNAH shubhrAstrishUlA~nchitapANayaH | bhasmabhAsitasarvA~NgA rudrAkShA~nchitavigrahAH || 30|| shivalokAt samAgatya kruddhA yamapurIM yayuH | tADayitvA tu taddUtAMstarjayitvA punaH punaH || 31|| devarAjaM samAmochya vimAne paramAdbhute | upaveshya yadA dUtAH kailAsaM gantumutsukAH || 32|| tadA yamapurImadhye mahAkolAhalo.abhavat | dharmarAjastu taM shrutvA svAlayAd bahirAgamat || 33|| dR^iShTvAthA chaturo dUtAn sAkShAd rudrAnivAparAn | pUjayAmAsa dharmaj~no dharmarAjo yathAvidhi || 34|| j~nAnena chakShuShA sarvaM vR^ittAntaM j~nAtavAn yamaH | na bhayAt pR^iShTavAn ki~nchichChambhordUtAn mahAtmanaH || 35|| pUjitAH prArthitAste vai kailAsamagamaMstadA | daduH shivAya sAmbAya taM dayAvArirAshaye || 36|| dhanyA shivapurANasya kathA paramapAvAnI | yasyAH shravaNamAtreNa pApIyAnapi muktibhAk || 37|| sadAshivamahAsthAnaM paraM dhAma paraM padam | yadAhurvedavidvAMsaH sarvalokopari sthitam || 38|| brAhmaNAH kShatriyA vaishyAH shUdrA anye.api prANinaH | hiMsitA dhanalobhena bahavo yena pApinA || 39|| mAtR^ipitR^ivadhUhantA veshyAgAmI cha madyapaH | devarAjo dvijastatra gatvA mukto.abhavat kShaNAt || 40|| iti shrIskAnde mahApurANe shivapurANamAhAtmye devarAjamuktivarNanaM nAma dvitIyo.adhyAyaH || 2|| \section{0\.3 tR^itIyo.adhyAyaH cha~nchulAvairAgyavarNanam} shaunaka uvAcha | sUta sUta mahAbhAga sarvaj~no.asi mahAmate | tvatprasAdAt kR^itArtho.ahaM kR^itArtho.ahaM punaH punaH || 1|| itihAsamimaM shrutvA mano me.atIva modate | anyAmapi kathAM shambhorvada premavivardhinIm || 2|| nAmR^itaM pibatAM loke muktiH kvApi sabhAjyate | shambhoH kathAsudhApAnaM pratyakShaM muktidAyakam || 3|| dhanyA dhanyA kathA shambhostvaM dhanyo dhanya eva cha | yadAkarNanamAtreNa shivalokaM vrajennaraH || 4|| sUta uvAcha | shR^iNu shaunaka vakShyAmi tvadagre guhyamapyuta | yatastvaM shivabhaktAnAmagraNIrvedavittamaH || 5|| samudranikaTe deshe grAmo bAShkalasa.nj~nakaH | vasanti yatra pApiShThA vedadharmojjhitA janAH || 6|| duShTA durviShayAtmAno nirdaivA jihmavR^ittayaH | kR^iShIvalAH shastradharAH parastrIbhoginaH khalAH || 7|| j~nAnavairAgyasaddharmaM na jAnanti paraM hi te | kukathAshravaNADhyeShu niratAH pashubuddhayaH || 8|| anye varNAshcha kudhiyaH svadharmavimukhAH khalAH | kukarmaniratA nityaM sadA viShayiNashcha te || 9|| striyaH sarvAshcha kuTilAH svairiNyaH pApalAlasAH | kudhiyo vyabhichAriNyaH sadvR^ittAchAravarjitAH || 10|| evaM kujanasaMvAse grAme bAShkalasa.nj~nite | tatraiko bindugo nAma vipra AsInmahAdhamaH || 11|| sa durAtmA mahApApI sudAro.api kumArgagaH | veshyApatirbabhUvAtha kAmAkulitamAnasaH || 12|| svapatnIM cha~nchulAM nAma hitvA nityaM sudharmiNIm | reme sa veshyayA duShTaH smarabANaprapIDitaH || 13|| evaM kAlo vyatIyAya mahAMstasya kukarmiNaH | sA svadharmabhayAt kleshAt smarArtApi cha cha~nchulA || 14|| atha tasyA~NganA sApi prarUDhanavayauvanA | aviShahyasmarAveshA svadharmAdvirarAma ha || 15|| jAreNa sa~NgatA rAtrau reme pApena guptataH | patidR^iShTiM va~nchayitvA bhraShTasattvA kumArgagA || 16|| kadAchittAM durAchArAM svapatniM cha~nchulAM mune | jAreNa sa~NgatAM rAtrau dadarsha smaravihvalAm || 17|| dR^iShTvA tAM dUShitAM patnIM kukarmAsaktamAnasAm | jAreNa sa~NgatAM rAtrau krodhAd dudrAva vegataH || 18|| tamAgataM gR^ihe duShTamAj~nAya bindugaM khalaH | palAyito drutaM jAro vegatashChadmavAn sa vai || 19|| atha sa bindugaH patnIM gR^ihItvA sudurAshayaH | muShTibandhena santarjya punaH punaratADayat || 20|| sA nArI tADitA bhartrA cha~nchulA svairiNI khalA | kupitA nirbhayA prAha svapatiM bindugaM khalam || 21|| cha~nchulovAcha | bhavAn pratidinaM kAmaM ramate veshyayA kudhIH | mAM vihAya svaptnIM cha yuvatIM patisevinIm || 22|| rUpavatyA yuvatyAshcha kAmAkulitachetasaH | vinA pativihAraM syAt kA gatirme bhavAn vadet || 23|| ahaM mahArUpavatI navayauvanavihvalA | kathaM sahe kAmaduHkhaM tava sa~NgaM vinArtadhIH || 24|| sUta uvAcha | ityuktaH sa tayA mUrkho mUDhadhIrbrAhmaNo.adhamaH | provAcha bindugaH pApI svadharmavimukhaH khalaH || 25|| binduga uvAcha | satyametattvayoktaM hi kAmavyAkulachetasA | hitaM vakShyAmi tasmAtte shR^iNu kAnte bhayaM tyaja || 26|| jArairvihara nityaM tvaM chetasA nirbhayena vai | dhanamAkarSha tebhyo hi dattvA tebhyaH parAM ratim || 27|| taddhanaM dehi sarvaM me veshyAsaMsaktachetasaH | mahatsvArthaM bhavennUnaM tavApi cha mamApi cha || 28|| sUta uvAcha | iti bhartR^ivachaH shrutvA cha~nchulA tadvadhUshcha sA | tatheti bhartR^ivachanaM pratijagrAha hR^iShTadhIH || 29|| kR^itvaivaM samayaM tau vai dampatI duShTamAnasau | kukarmaniratau jAtau nirbhayena kuchetasA || 30|| evaM tayostu dampatyordurAchArapravR^ittayoH | mahAn kAlo vyatIyAya niShphalo mUDhachetasoH || 31|| atha vipraH sa kumatirbindugo vR^iShalIpatiH | kAlena nidhanaM prApto jagAma narakaM khalaH || 32|| bhuktvA narakaduHkhAni bahvahAni sa mUDhadhIH | vindhye.abhavat pishAcho hi girau pApI bhaya~NkaraH || 33|| mR^ite bhartari tasminvai durAchAre.atha binduge | uvAsa svagR^ihe putraishchirakAlaM vimUDhadhIH || 34|| evaM viharatI jAraiH sA nArI cha~nchulAhvayA | AsIt kAmaratA prItA ki~nchidutkrAntayauvanA || 35|| ekadA daivayogena samprApte puNyaparvaNi | sA nArI bandhubhiH sArdhaM gokarNaM kShetramAyayau || 36|| prasa~NgAt sA tadA gatvA kasmiMshchit tIrthapAthasi | sasnau sAmAnyato yatra tatra babhrAma bandhubhi: || 37|| devAlaye.atha kasmiMshchiddaivaj~namukhataH shubhAm | shushrAva satkathAM shambho: puNyAM paurANikIM cha sA || 38|| yoShitAM jArasaktAnAM narake yamaki~NkarAH | santaptalohaparighaM kShipanti smaramandire || 39|| iti paurANikenoktAM shrutvA vairAgyavardhinIm | kathAmAsIdbhayodvignA chakampe tatra sA cha vai || 40|| kathA samAptau sA nArI nirgateShu janeShu cha | bhItA rahasi taM prAha shaivaM saMvAchakaM dvijam || 41|| cha~nchulovAcha | brahman tvaM shR^iNvasadvR^ittamajAnantyA svadharmakam | shrutvA mAmuddhara svAmin kR^ipAM kR^itvAtulAmapi || 42|| charitaM sUlbaNaM pApaM mayA mUDhadhiyA prabho | nItaM pauMshchalyataH sarvaM yauvanaM madanAndhayA || 43|| shrutvedaM vachanaM te.adya vairAgyarasajR^imbhitam | jAtA mahAbhayA sAhaM sakampAttaviyogikA || 44|| dhi~N mAM mUDhadhiyaM pApAM kAmamohitachetasam | nindyAM durviShayAsaktAM vimukhIM hi svadharmataH || 45|| yadalpasya sukhasyArthe svakAryasya vinAshinam | mahApApaM kR^itaM ghoramajAnantyAtikaShTadam || 46|| yAsyAmi durgatiM kAM kAM ghorAM hA kaShTadAyinIm | ko j~no yAsyati mAM tatra kumArgaratamAnasAm || 47|| maraNe yamadUtA.NstAn kathaM drakShye bhaya~NkarAn | kathaM pAshairbalAt kaNThe badhyamAnA dhR^itiM labhe || 48|| kathaM sahiShye narake khaNDasho dehakR^intanam | yAtanAM tatra mahatIM duHkhadAM cha visheShataH || 49|| divA cheShTAmindriyANAM kathaM prApsyAmi shochatI | rAtrau kathaM labhiShye.ahaM nidrAM duHkhapariplutA || 50|| hA hatAsmi cha dagdhAsmi vidIrNahR^idayAsmi cha | sarvathAhaM vinaShTAsmi pApinI sarvathApyaham || 51|| hA vidhe mAM mahApApe dattvA dushshemuShIM haThAt | apaiti yat svadharmAdvai sarvasaukhyakarAdaho || 52|| shUlaprotasya shailAgrAtpatatastu~Ngato dvija | yadduHkhaM dehino ghoraM tasmAt koTiguNaM mama || 53|| ashvamedhashataM kR^itvA ga~NgAM snAtvA shataM samAH | na shuddhirjAyate prAyo matpApasya garIyasaH || 54|| kiM karomi kva gachChAmi kaM vA sharaNamAshraye | kastrAyate mAM loke.asmin patantIM narakArNave || 55|| tvameva me gururbrahmaMstvaM mAtA tvaM pitAsi cha | uddharoddhara mAM dInAM tvAmeva sharaNaM gatAm || 56|| sUta uvAcha | iti sa~njAtanirvedAM patitAM charaNadvaye | utthApya kR^ipayA dhImAn babhAShe brAhmaNaH sa hi || 57|| iti shrIskAnde mahApurANe shivapurANamAhAtmye cha~nchulAvairAgyavarNanaM nAma tR^itIyo.adhyAyaH || 3|| \section{0\.4 chaturtho.adhyAyaH cha~nchulAsadgativarNanam} brAhmaNa uvAcha | diShTyA kAle prabuddhAsi shivAnugrahato varAm | imAM shivapurANasya shrutvA vairAgyavatkathAm || 1|| mA bhaiShIrdvijapatni tvaM shivasya sharaNaM vraja | shivAnugrahataH sarvaM pApaM sadyo vinashyati || 2|| vakShyAmi te paraM vastu shivakIrtisamanvitam | bhaviShyati gatiryena sarvadA te sukhAvahA || 3|| satkathAshravaNAdeva jAtA te matirIdR^ishI | pashchAttApAnvitA shuddhA vairAgyaM viShayeShu cha || 4|| pashchAttApaH pApakR^itAM pApAnAM niShkR^itiH parA | sarveShAM varNitaM sadbhiH sarvapApavishodhanam || 5|| pashchAttApenaiva shuddhiH prAyashchittaM karoti saH | yathopadiShTaM sadbhirhi sarvapApavishodhanam || 6|| prAyashchittamadhIkR^itya vidhivannirbhayaH pumAn | na yAti sugatiM prAyaH pashchAttApI na saMshayaH || 7|| etachChivapurANasya kathAshravaNato yathA | jAyate chittashuddhirhi na tathAnyairupAyataH || 8|| shodhyamAnaM darpaNaM hi yathA bhavati nirmalam | tathaitatkathayA cheto vishuddhiM yAtyasaMshayam || 9|| vishuddhe chetasi shivo nR^iNAM tiShThati sAmbikaH | tato yAti vishuddhAtmA sAmbashambhoH paraM padam || 10|| ataH sarvasya vargasyaitatkathAsAdhanaM matam | etadarthaM mahAdevo nirmame tvAgrahAdimAm || 11|| kathayA sidhyati dhyAnamanayA girijApateH | dhyAnAjj~nAnaM paraM tasmAt kaivalyaM bhavati dhruvam || 12|| asiddhasha~NkaradhyAnaH kathAmeva shR^iNoti yaH | sa prApyAnyabhave dhyAnaM shambhoryAti parAM gatim || 13|| etatkathAshravaNataH kR^itvA dhyAnamumApateH | te pashchAttApinaH pApA bahavaH siddhimAgatA: || 14|| sarveShAM shreyasAM bIjaM satkathAshravaNaM nR^iNAm | yathAvartma samArAdhyaM bhavabandhagadApaham || 15|| kathAshravaNataH shambhormananAchcha tato hR^idA | nididhyAsanatashchaiva chittashuddhirbhavatyalam || 16|| ato bhaktirmaheshasya putrAbhyAM bhavati dhruvam | tadanugrahato divyA tato muktirna saMshayaH || 17|| tadvihInaH pashurj~neyo mAyAbandhanasaktadhIH | saMsArabandhanAnnaiva mukto bhavati sa dhruvam || 18|| ato hi dvijapatni tvaM viShayebhyo nivR^ittadhIH | shR^iNu shambhoH kathAM chaitAM bhaktyA paramapAvanIm || 19|| shR^iNvantyAH satkathAmetAM sha~Nkarasya parAtmanaH | shuddhimeShyati chetaste tato muktimavApsyasi || 20|| dhyAyataH shivapAdAbjaM chetasA nirmalena vai | ekena janmanA muktiH satyaM satyaM vadAmyaham || 21|| sUta uvAcha | ityuktvA sa dvijavaro varaH shaivaH kR^ipArdradhIH | tUShNIM babhUva shuddhAtmA shivadhyAnaparAyaNaH || 22|| atha bindugapatni sA cha~nchulAhvA prasannadhIH | ityuktA tena vipreNa samAsIdbAShpalochanA || 23|| papAtAraM dvijendrasya pAdayostasya hR^iShTadhIH | cha~nchulA sA~njaliH sA cha kR^itArthAsmItyabhAShata || 24|| atha sotthAya sAta~NkA sA~njalirgadgadAkSharam | tamuvAcha mahAshaivaM dvijaM vairAgyayuk sudhIH || 25|| cha~nchulovAcha | brahman shaivavara svAmin dhanyastvaM paramArthadR^ik | paropakAranirato varNanIyaH susAdhuShu || 26|| uddharoddhara mAM sAdho patantIM narakArNave | shrutvA yAM sukathAM shaivIM purANArthavijR^imbhitAm || 27|| viraktadhIrahaM jAtA viShayebhyashcha sarvataH | sushraddhA mahatI hyetatpurANashravaNe.adhunA || 28|| sUta uvAcha | ityuktvA sA~njaliH sA vai samprApya tadanugraham | tatpurANaM shrotukAmAtiShThattatsevane ratA || 29|| atha shaivavaro viprastasminneva sthale sudhIH | satkathAM shrAvayAmAsa tatpurANasya tAM striyam || 30|| itthaM tasmin mahAkShetre tasmAdeva dvijottamAt | kathAM shivapurANasya sA shushrAva mahottamAm || 31|| bhaktij~nAnavirAgANAM vardhinIM muktidAyinIm | babhUva sukR^itArthA sA shrutvA tAM satkathAM parAm || 32|| sadgurostasya kR^ipayA shuddhachittA cha sA drutam | shivAnugrahataH shambhoH rUpadhyAnamavApa ha || 33|| itthaM sadgurumAshritya sA prAptashivasanmatiH | dadhyau muhurmuhuH shambhoshchidAnandamayaM vapuH || 34|| snAtvA tIrthajale nityaM jaTAvalkaladhAriNI | bhasmoddhUlitasarvA~NgI rudrAkShakR^itabhUShaNA || 35|| shivanAmajapAsaktA vAgyatA mitabhojanA | gurUpadiShTamArgeNa sA shivaM samatoShayat || 36|| evaM tasyAshcha~nchulAyAH kurvantyA dhyAnamuttamam | bahukAlo vyatIyAya shambhostatraiva shaunaka || 37|| atha kAlena pUrNena bhaktitrikasamanvitA | samutsasarja dehaM svamanAyAsena cha~nchulA || 38|| vimAnaM drutamAyAntaM preShitaM tripurAriNA | divyaM svagaNasaMyuktaM nAnAshobhAsamanvitam || 39|| atha tatra samArUDhA maheshAnucharairvaraiH | nItA shivapurIM sadyo dhvastasarvamalA cha sA || 40|| divyarUpadharA divyA divyAvayavashAlinI | chandrArdhashekharA gaurI vilasaddivyabhUShaNA || 41|| gatvA tatra mahAdevaM sA dadarsha trilochanam | viShNubrahmAdibhirdevaiH sevyamAnaM sanAtanam || 42|| gaNeshabhR^i~NginandIshavIrabhadreshvarAdibhi: | upAsyamAnaM sadbhaktyA koTisUryasamaprabham || 43|| nIlagrIvaM pa~nchavaktraM tryambakaM chandrashekharam | vAmA~Nge bibhrataM gaurIM vidyutpu~njasamaprabhAm || 44|| karpUragauraM gaurIshaM sarvAla~NkAradhAriNam | sitabhasmalasaddehaM sitavastraM mahojjvalam || 45|| dR^iShTvaivaM sha~NkaraM nArI sA mumodAti cha~nchulA | susambhramAnmahAprItA praNanAma punaH punaH || 46|| sA~njaliH sA mudA premNA santuShTA cha vinItakA | AnandAshrujalairyuktA romaharShasamanvitA || 47|| atha sA vai karuNayA pArvatyA sha~NkareNa cha | samAnItopakaNThaM hi sudR^iShTyA cha vilokitA || 48|| pArvatyA sA kR^itA prItyA svasakhI divyarUpiNI | divyasaukhyAnvitA tatra cha~nchulA bindugapriyA || 49|| tasmi.Nlloke parAnandaghanajyotiShi shAshvate | labdhvA nivAsamachalaM lebhe sukhamanAhatam || 50|| iti shrIskAnde mahApurANe shivapurANamAhAtmye cha~nchulAsadgativarNanaM nAma chaturtho.adhyAyaH || 4|| \section{0\.5 pa~ncham.adhyAyaH bindugasadgativarNanam} shaunaka uvAcha | sUta sUta mahAbhAga dhanyastvaM shivasaktadhIH | shrAviteyaM kathAsmAkamadbhutA bhaktivardhinI || 1|| tatra gatvA kiM chakAra cha~nchulA prAptasadgatiH | tat tvaM vada visheSheNa tatpateshcha mahAmate || 2|| sUta uvAcha | sA kadAchidumAM devImupagamya praNamya cha | sutuShTAva karau baddhvA paramAnandasamplutA || 3|| cha~nchulovAcha | girije skandamAtastvaM sevitA sarvadA naraiH | sarvAsaukhyaprade shambhupriye brahmasvarUpiNi || 4|| viShNubrahmAdibhissevyA saguNA nirguNApi cha | tvamAdyA prakR^itissUkShmA sachchidAnandarUpiNI || 5|| sR^iShTisthitilayakarI triguNA trisurAlayA | brahmaviShNumaheshAnAM supratiShThAkarA parA || 6|| sUta uvAcha | iti stutvA maheshIM tAM cha~nchulA prAptasadgatiH | virarAma nataskandhA premapUrNAshrulochanA || 7|| tataH sA karuNAviShTA pArvatI sha~NkarapriyA | tAmuvAcha mahAprItyA cha~nchulAM bhaktavatsalA || 8|| pArvatyuvAcha | cha~nchule sakhi suprItAnayA stutyAsmi sundari | kiM yAchase varaM brUhi nAdeyaM vidyate tava || 9|| sUta uvAcha | ityuktA sA girijayA cha~nchulA supraNamya tAm | paryapR^ichChata suprItyA sA~njalirnatamastakA || 10|| cha~nchulovAcha | mama bhartAdhunA kvAste naiva jAnAmi tadgatim | tena yuktA yathAhaM vai bhavAmi girije.anaghe || 11|| tathaiva kuru kalyANi kR^ipayA dInavatsale | mahAdevi maheshAni bhartA me vR^iShalIpatiH | mattaH pUrvaM mR^itaH pApI na jAne kAM gatiM gataH || 12|| sUta uvAcha | ityAkaNarya vachastasyAshcha~nchulAyA hi pArvatI | pratyuvAcha susamprItyA girijA nayavatsalA || 13|| girijovAcha | sUte bhartA bindugAhvo mahApApI durAshayaH | veshyAbhogI mahAmUDho mR^itvA sa narakaM gataH || 14|| bhuktvA narakaduHkhAni vividhAnyamitAH samAH | pApasheSheNa pApAtmA vindhye jAtaH pishAchakaH || 15|| idAnIM sa pishAcho.asti nAnAkleshasamanvitaH | tatraiva vAtabhugduShTaH sarvakaShTavahaH sadA || 16|| sUta uvAcha | iti gauryA vachaH shrutvA cha~nchulA sA shubhavratA | patiduHkhena mahatA duHkhitAsIttadA kila || 17|| samAdhAya tatashchittaM supraNamya maheshvarIm | punaH paprachCha sA nArI hR^idayena vidUyatA || 18|| cha~nchulovAcha | maheshvari mahAdevi kR^ipAM kuru mamopari | samuddhara patiM me.adya duShTakarmakaraM khalam || 19|| kenopAyena me bhartA pApAtmA sa kubuddhimAn | sadgatiM prApnuyAddevi tadvadAshu namo.astu te || 20|| sUta uvAcha | ityAkarNya vachastasyAH pArvatI bhaktavatsalA | pratyuvAcha prasannAtmA cha~nchulAM svasakhiM cha tAm || 21|| pArvatyuvAcha | shR^iNuyAdyadi te bhartA puNyAM shivakathAM parAm | nistIrya durgatiM sarvAM sadgatiM prApnuyAditi || 22|| iti gauryA vachaH shrutvAmR^itAkSharamathAdarAt | kR^itA~njAlirnataskandhA praNanAma punaH punaH || 23|| tatkathAshravaNaM bhartuH sarvapApavishuddhaye | sadgatiprAptaye chaiva prArthayAmAsa tAM tadA || 24|| sUta uvAcha | tayA muhurmuhurnAryA prArthyamAnA shivapriyA | gaurI kR^ipAnvitAsIt sA maheshI bhaktavatsalA || 25|| atha tumburumAhUya shivasatkIrtigAyakam | prItyA gandharvarAjaM hi girikanyedamabravIt || 26|| girijovAcha | he tumburo shivaprIta mama mAnasakAraka | sahAnayA vindhyashailaM bhadraM te gachCha satvaram || 27|| Aste tatra mahAghoraH pishAcho.atibhaya~NkaraH | tadvR^ittaM shR^iNu suprItyAditaH sarvaM bravImi te || 28|| purAbhave pishAchaH sa bindugAhvo.abhavad dvijaH | asyA nAryAH patirduShTo matsakhyA vR^iShalIpatiH || 29|| snAnasandhyAkriyAhIno.ashauchaH krodhavimUDhadhIH | durbhakShI sajjanadveShI duShparigrahakArakaH || 30|| hiMsakaH shastradhArI cha savyahastena bhojanI | dInAnAM pIDakaH krUraH paraveshmapradIpakaH || 31|| chANDAlAbhirato nityaM veshyAbhogI mahAkhalaH | svapatnityAgakR^it pApI duShTasa~NgaratastadA || 32|| tena veshyAkusa~Ngena sukR^itaM nAshitaM mahat | vittalobhena mahiShI nirbhayA jAriNI kR^itA || 33|| AmR^ityoH sa durAchArI kAlena nidhanaM gataH | yayau yamapuraM ghoraM bhogasthAnaM hi pApinAm || 34|| tatra bhuktvA sa duShTAtmA narakAni bahUni cha | idAnIM sa pishAcho.asti vindhye.adrau pApabhuk khalaH || 35|| tasyAgre paramAM puNyAM sarvapApavinAshinIm | divyAM shivapurANasya kathAM kathaya yatnataH || 36|| drutaM shivapurANasya kathAshravaNataH parAt | sarvapApavishuddhAtmA hAsyati pretatAM cha saH || 37|| muktaM cha durgatestaM vai bindugaM tvaM pishAchakam | madAj~nayA vimAnena samAnaya shivAntikam || 38|| sUta uvAcha | ityAdiShTo maheshAnyA gandharvendrashcha tumburuH | mumude.atIva manasi bhAgyaM nijamavarNayat || 39|| Aruhya suvimAnaM sa satyA tatpriyayA saha | yayau vindhyAchale so.araM yatrAste nAradapriyaH || 40|| tatrApashyat pishAchaM taM mahAkAyaM mahAhanum | prahasantaM rudantaM cha valgantaM vikaTAkR^itim || 41|| balAjjagrAha taM pAshaiH pishAchaM chAtibhIkaram | tumburushshivasatkIrtigAyakashcha mahAbalI || 42|| atho shivapurANasya vAchanArthaM sa tumburuH | nishchitya rachanAM chakre mahotsavasamanvitAm || 43|| pishAchaM tArituM devyAH shAsanAttumbururgataH | vindhyaM shivapurANaM sa hyadriM shrAvayituM param || 44|| iti kolAhalo jAtaH sarvalokeShu vai mahAn | tatra tachChravaNArthAya yayurdevarShayo drutam || 45|| samAjastatra paramo.adbhutashchAsIchChubhAvahaH | teShAM shivapurANasyAgatAnAM shrotumAdarAt || 46|| pishAchamatha taM pAshairbaddhvA samupaveshya cha | tumbururvallakIhasto jagau gaurIpateH kathAm || 47|| Arabhya saMhitAmAdyAM saptamIsaMhitAvadhi | spaShTaM shivapurANaM hi samAhAtmyaM samAvadat || 48|| shrutvA shivapurANaM tu saptasaMhitamAdarAt | babhUvuH sukR^itArthAste sarve shrotAra eva hi || 49|| sa pishAcho mahApuNyaM shrutvA shivapurANakam | vidhUya kaluShaM sarvaM jahau paishAchikaM vapuH || 50|| divyarUpo babhUvAshu gauravarNaH sitAMshukaH | sarvAla~NkAradIptA~NgastrinetrashchandrashekharaH || 51|| divyaM divyavapurbhUtvA tayA sa nijakAntayA | jagau svayamapi shrImAMshcharitaM pArvatIpateH || 52|| tadvadhUmiti sandR^iShTvA sarve devarShayashcha te | babhUvurvismitAshchitte paramAnandasamyutAH || 53|| sukR^itArthA maheshasya shrutvA charitamadbhutam | svaM svaM dhAma yayuH prItyA shaMsantaH shA~NkaraM yashaH || 54|| binduga: so.api divyAtmA suvimAnasthitaH sukhI | svakAntApArshvaga: shrImA~nChushubhe.atIva khasthitaH || 55|| atha gAyan maheshasya suguNAn sumanoharAn | satumbururjagAmAshu sakAntaH shA~NkaraM padam || 56|| susatkR^ito maheshena pArvatyA cha sa binduga: | svagaNashcha kR^itaH prItyA sAbhavadgirijAsakhI || 57|| tasmi.Nlloke parAnande ghanajyotiShi shAshvate | labdhvA nivAsamachalaM labhete paramaM sukham || 58|| ityetat kathitaM puNyamitihAsamaghApaham | shivAshivaparAnandaM nirmalaM bhaktivardhanam || 59|| ya idaM shR^iNuyAdbhaktyA kIrtayedvA samAhitaH | sa bhuktvA vipulAn bhogAnante muktimavApnuyAt || 60|| iti shrIskAnde mahApurANe shivapurANamAhAtmye bindugasadgativarNanaM nAma pa~nchamo.adhyAyaH || 5|| \section{0\.6 ShaShTho.adhyAyaH shravaNavidhivarNanam} shaunaka uvAcha | sUta sUta mahAprAj~na vyAsashiShya namo.astu te | dhanyastvaM shaivavaryo.asi varNanIyamahadguNaH || 1|| shrImachChivapurANasya shravaNasya vidhiM vada | yena sarvaM labhechChrotA sampUrNaM phalamuttamam || 2|| sUta uvAcha | atha te sampravakShyAmi sampUrNaphalahetave | vidhiM shivapurANasya shaunaka shravaNe mune || 3|| daivaj~naM cha samAhUya santoShya cha janAnvitaH | muhUrtaM shodhayechChuddhaM nirvighnena samAptaye || 4|| vArtA preShyA prayatnena deshe deshe cha sA shubhA | bhaviShyati kathA shaivI AgantavyaM shubhArthibhiH || 5|| dure harikathAH kechid dure sha~NkarakIrtanAH | striyaH shUdrAdayo ye cha bodhasteShAM bhavedyataH || 6|| deshe deshe shAmbhavA ye kIrtanashravaNotsukAH | teShAmAnayanaM kAryaM tatprakArArthamAdarAt || 7|| bhaviShyati samAjo.atra sAdhUnAM paramotsavaH | pArAyaNe purANasya shaivasya paramAdbhutaH || 8|| shrImachChivapurANAhvarasapAnAya chAdarAt | AyAntvaraM bhavantashcha kR^ipayA prematatparAH || 9|| nAvakAsho yadi premNAgantavyaM dinamekakam | sarvathAgamanaM kAryaM durlabhA cha kShaNasthitiH || 10|| teShAmAhvAnamevaM hi kAryaM savinayaM mudA | AgatAnAM cha teShAM hi sarvathA kArya AdaraH || 11|| shivAlaye cha tIrthe vA vane vApi gR^ihe.athavA | kAryaM shivapurANasya shravaNasthalamuttamam || 12|| kAryaM saMshodhanaM bhUmerlepanaM dhAtumaNDanam | vichitrA rachanA divyA mahotsavapurassaram || 13|| gR^ihopaskaramuddhR^itya nikhilaM tadayogyakam | ekAnte gR^ihakoNe chAdR^ishye yatnAnniveshayet || 14|| kartavyo maNDapo.atyuchchaiH kadalIstambhamaNDitaH | phalapuShpAdibhissamyagviShvagvaitAnarAjitaH || 15|| chaturddikShu dhvajAropassapatAkaH sushobhanaH | subhaktiH sarvathA kAryA sarvAnandavidhAyinI || 16|| sa~NkalpyamAsanaM divyaM sha~Nkarasya parAtmanaH | vaktushchApi tathA divyamAsanaM sukhasAdhanam || 17|| shrotR^INAM kalpanIyAni susthalAni yathArhataH | anyeShAM cha sthalAnyeva sAdhAraNatayA mune || 18|| vivAhe yAdR^ishaM chittaM tAdR^ishaM kAryameva hi | anyA chintA vinirvAryA sarvA shaunaka laukikI || 19|| uda~Nmukho bhavedvaktA shrotA prAgvadanastathA | vyutkramaH pAdayorj~neyo virodho nAsti kashchanaH || 20|| athavA pUrvadigj~neyA pUjyapUjakamadhyataH | athavA sammukhe vaktuH shrotR^INAmAnanaM smR^itam || 21|| vyAsAsanasamArUDho yadA paurANiko dvijaH | asamAptau prasa~Ngasya namaskuryAnna kasyachit || 22|| bAlo yuvAtha vR^iddho vA daridro vApi durbalaH | purANaj~naH sadA vandya: pUjyashcha sukR^itArthibhiH || 23|| nIchabuddhiM na kurvIta purANaj~ne kadAchana | yasya vaktrodgatA vANI kAmadhenuH sharIriNAm || 24|| guravaH santi bahavo janmato guNatashcha vai | paro guruH purANaj~nasteShAM madhye visheShataH || 25|| bhavakoTisahasreShu bhUtvA bhUtvAvasIdatAm | yo dadAti parAM muktiM ko.anyastasmAt paro guruH || 26|| purANaj~naH shuchirdakShaH shAnto vijitamatsaraH | sAdhuH kAruNyavAn vAgmI vadet puNyakathAmimAm || 27|| AsUryodayamArabhya sArdhatripraharAntakam | kathA shivapurANasya vAchyA samyak sudhImatA || 28|| ye dhUrtA ye cha durvR^ittA ye chAnye vijigIShavaH | teShAM kuTilavR^ittInAmagre naiva vadet kathAm || 29|| na durjanasamAkIrNe na tu dasyusamAvR^ite | deshe na dhUrtasadane vadet puNyakathAmimAm || 30|| kathAvirAmaH kartavyo madhyAnhe hi muhUrtakam | malamUtrotsarjanArthaM tatkathAkIrtanAnnaraiH || 31|| vaktrA kShauraM hi sa~NkAryaM dinAdarvAgvratAptaye | kAryaM sa~NkShepato nityakarma sarvaM prayatnataH || 32|| vaktuH pArshve sahAyArthamanyaH sthApyastathAvidhaH | paNDitaH saMshayachChettA lokabodhanatatparaH || 33|| kathAvighnavinAshArthaM gaNanAthaM prapUjayet | kathAdhIshaM shivaM bhaktyA pustakaM cha visheShataH || 34|| kathAM shivapurANasya shR^iNuyAdAdarAtsudhIH | shrotA suvidhinA shuddhaH shuddhachittaH prasannadhIH || 35|| anekakarmavibhrAntaH kAmAdiShaDvikAravAn | straiNa: pAkhaNDavAdI cha vaktA shrotA na puNyabhAk || 36|| lokachintAM dhanAgAraputrachintAM vyudasya cha | kathAchittaH shuddhamatiH sa labhet phalamuttamam || 37|| shraddhAbhaktisamAyuktA nAnyakAryeShu lAlasAH | vAgyatAH shuchayo.avyagrAH shrotAraH puNyabhAginaH || 38|| abhaktA ye kathAM puNyAM shR^iNvantImAM narAdhamAH | teShAM shravaNajaM nAsti phalaM duHkhaM bhave bhave || 39|| asampUjya purANaM ye yathAshaktyA hyupAyanaiH | shR^iNvantImAM kathAM mUDhAH syurdaridrA na pAvanAH || 40|| kathAyAM kathyamAnAyAM gachChantyanyatra ye narAH | bhogAntare praNashyanti teShAM dArAdisampadaH || 41|| soShNIShamastakA ye cha shR^iNvantImAM kathAM narAH | tatputrAshcha prajAyante pApinaH kuladUShakAH || 42|| tAmbUlaM bhakShayanto ye shR^iNvantImAM kathAM narAH | svaviShThAM khAdayantyetAnnarake yamaki~NkarAH || 43|| ye cha tu~NgAsanArUDhAH shR^iNvantImAM kathAM narAH | bhuktvA te narakAn sarvAMstataH kAkA bhavanti hi || 44|| ye vIrAdyAsanArUDhAH shR^iNvantImAM kathAM shubhAm | bhuktavA te narakAn sarvAnviShavR^ikShA bhavanti vai || 45|| asampraNamya vaktAraM kathAM shR^iNvanti ye narAH | bhuktvA te narakAn sarvAn bhavantyarjunapAdapAH || 46|| anAturAH shayAnA ye shR^iNvantImAM kathAM narAH | bhuktvA te narakAn sarvAn bhavantyajagarAdayaH || 47|| vaktuH samAsanArUDhA ye shR^iNvanti kathAmimAm | gurutalpasamaM pApaM prApyate nArakaiH sadA || 48|| ye nindanti cha vaktAraM kathAM chemAM supAvanIm | bhavanti shunakA bhuktvA duHkhaM janmashataM hi te || 49|| kathAyAM vartamAnAyAM durvAdaM ye vadanti hi | bhuktvA te narakAn ghorAn bhavanti gardabhAstataH || 50|| kadAchinnApi shR^iNvanti kathAmetAM supAvanIm | bhuktvA te narakAn ghorAn bhavanti vanasUkarAH || 51|| kathAyAM kIrtyamAnAyAM vighnaM kurvanti ye khalAH | koTyabdaM narakAn bhuktvA bhavanti grAmasUkarAH || 52|| evaM vichArya shuddhAtmA shrotA vaktR^isubhaktimAn | kathAshravaNahetorhi bhavet prItyodyataH sudhIH || 53|| kathAvighnavinAshArthaM gaNeshaM pUjayet purA | nityaM sampAdya sa~NkShepAt prAyashchittaM samAcharet || 54|| navagrahAMshcha sampUjya sarvatobhadradaivatam | shivapUjoktavidhinA pustakaM tatsamarchayet || 55|| pUjanAnte mahAbhaktyA karau baddhvA vinItakaH | sAkShAchChivasvarUpasya pustakasya stutiM charet || 56|| shrImachChivapurANAkhyaH pratyakShastvaM maheshvaraH | shravaNArthaM svIkR^ito.asi santuShTo bhava vai mayi || 57|| manoratho madIyo.ayaM kartavya: saphalastvayA | nirvighnena susampUrNaM kathAshravaNamastu me || 58|| bhavAbdhimagnaM dInaM mAM samuddhara bhavArNavAt | karmagrAhagR^ihItA~NgaM dAso.ahaM tava sha~Nkara || 59|| evaM shivapurANaM hi sAkShAchChivasvarUpakam | stutvA dInavachaH prochya vaktuH pUjAM samArabhet || 60|| shivapUjoktavidhinA vaktAraM cha samarchayet | sapuShpavastrabhUShAbhirdhUpadIpAdinArchayet || 61|| tadagre shuddhachittena kartavyo niyamastadA | AsamApti yathAshaktyA dhAraNIyaH suyatnataH || 62|| vyAsarUpa prabodhAgraya shivashAstravishArada | etatkathAprakAshena madaj~nAnaM vinAshaya || 63|| varaNaM pa~nchaviprANAM kAryaM vaikasya bhaktitaH | shivapa~nchArNamantrasya japaH kAryashcha taiH sadA || 64|| ityuktaste mune bhaktyA kathAshravaNasadvidhiH | shrotR^INAM chaiva bhaktAnAM kimanyachChrotumichChasi || 65|| iti shrIskAnde mahApurANe shivapurANamAhAtmye shravaNavidhivarNanaM nAma ShaShTho.adhyAyaH || 6|| \section{0\.7 saptamo.adhyAyaH vidhiniShedhapustakavaktR^ipUjanavarNanam} shaunaka uvAcha | sUta sUta mahAprAj~na dhanyastvaM shaivapu~Ngava | shrAviteyaM kathAsmAkamadbhuteyaM shubhAvahA || 1|| puMsAM shivapurANasya shravaNavratinAM mune | sarvalokahitArthAya dayayA niyamaM vada || 2|| sUta uvAcha | niyamaM shR^iNu sadbhaktyA puMsAM teShAM cha shaunaka | niyamAt satkathAM shrutvA nirvighnaphalamuttamam || 3|| puMsAM dIkShAvihInAnAM nAdhikAraH kathAshrave | shrotukAmairato vakturdIkShA grAhyA cha tairmune || 4|| brahmacharyamadhassuptiH patrAvalyAM cha bhojanam | kathAsamAptau bhuktiM cha kuryAnnityaM kathAvratI || 5|| AsamAptapurANaM hi samupoShya sushaktimAn | shR^iNuyAdbhaktitaH shuddhaH purANaM shaivamuttamam || 6|| ghR^itapAnaM payaHpAnaM kR^itvA vA shR^iNuyAt sukham | phalAhAreNa vA shrAvyamekabhuktaM na vA hi tat || 7|| ekavAraM haviShyAnnaM bhu~njyAdetatkathAvratI | sukhasAdhyaM yathA syAttachChravaNaM kAryameva cha || 8|| bhojanaM sukaraM manye kathAsu shravaNapradam | nopavAso varashchet syAt kathAshravaNavighnakR^it || 9|| gariShThaM dvidalaM dagdhaM niShpAvAMshcha masUrikAm | bhAvaduShTaM paryuShitaM jagdhvA nityaM kathAvratI || 10|| vArtAkaM cha kalindaM cha chichiNDaM mUlakaM tathA | kUShmANDaM nAlikeraM cha mUlaM jagdhvA kathAvratI || 11|| palANDuM lashunaM hi~NguM gR^i~njaM mAdakaM hi tat | vastUnyAmiShasa~Nj~nAni varjayedyaH kathAvratI || 12|| kAmAdiShaDvikAraM cha dvijAnAM cha vinindanam | pativratAsatAM nindAM varjayedyaH kathAvratI || 13|| rajasvalAM na pashyechcha patitAnna vadet kathAm | dvijadviSho vedavarjyAnna vadedyaH kathAvratI || 14|| satyaM shauchaM dayAM maunamArjavaM vinayaM tathA | audAryaM manasashchaiva kuryAnnityaM kathAvratI || 15|| niShkAmashcha sakAmashcha niyamAchChR^iNuyAt kathAm | sakAmaH kAmamApnoti niShkAmo mokShamApnuyAt || 16|| daridrashcha kShayI rogI pApI nirbhAgya eva cha | anapatyo.api puruShaH shR^iNuyAt satkathAmimAm || 17|| kAkavandhyAdayaH saptavidhA api khalastriyaH | sravadgarbhA cha yA nArI tAbhyAM shrAvyA kathA parA || 18|| sarveShAM shravaNaM kAryaM strIbhiH pumbhishcha yatnataH | etachChivapurANasya vidhinA cha kathAM mune || 19|| etachChivapurANasya pArAyaNadinAni vai | atyuttamAni bodhyAni koTiyaj~nasamAni cha || 20|| eteShu vidhinA dattaM yadalpamapi vastu hi | divaseShu variShTheShu tadakShayyaphalaM labhet || 21|| evaM kR^itvA vratavidhiM shrutvemAM paramAM kathAm | parAnandayutaH shrImAnudyApanamathAcharet || 22|| etadudyApanavidhishchaturdashyAH samo mataH | kAryastadvaddhanADhyaishcha taduktaphalakA~NkShibhiH || 23|| aki~nchaneShu bhakteShu prAyo nodyApanagrahaH | shravaNenaiva pUtAste niShkAmAH shAmbhavA matAH || 24|| evaM shivapurANasya pArAyaNamakhotsave | samApte shrotR^ibhirbhaktyA pUjA kAryA prayatnataH || 25|| shivapUjanavat samyak pustakasya puro mune | pUjA kAryA suvidhinA vaktushcha tadanantaram || 26|| pustakAchChAdanArthaM hi navInaM chAsanaM shubham | samarchayed dR^iDhaM divyaM bandhanArthaM cha sUtrakam || 27|| purANArthaM prayachChanti ye sUtraM vasanaM navam | bhogino j~nAnasampannAste bhavanti bhave bhave || 28|| vaktre dadyAnmahArhANi vastUni vividhAni cha | vastrabhUShaNapAtrANi divyaM bahu visheShataH || 29|| AsanArthaM prayachChanti purANasya cha ye narAH | kambalAjinavAsAMsi ma~nchaM phalakameva cha || 30|| svargalokaM samAsAdya bhuktvA bhogAn yathepsitAn | sthitvA brahmapade kalpaM yAnti shaivapadaM tataH || 31|| evaM kR^itvA vidhAnena pustakasya prapUjanam | vaktushcha munishArdUla mahotsavapurassaram || 32|| sahAyArthaM sthApitasya paNDitasya prapUjanam | kuryAttadanusAreNa ki~nchidUnaM dhanAdibhi: || 33|| samAgatebhyo viprebhyo dadyAdannaM dhanAdikam | mahotsavaH prakartavyo gItairvAdyaishcha nartanaiH || 34|| viraktashcha bhavechChrotA pare.ahani visheShataH | gItA vAchyA shivenoktA rAmachandrAya yA mune || 35|| gR^ihasthashchedbhavechChrotA kartavyastena dhImatA | homaH shuddhena haviShA karmaNastasya shAntaye || 36|| rudrasaMhitayA homaH pratishlokena vA mune | gAyatryAstanmayatvAchcha purANasyAsya tattvataH || 37|| athavA mUlamantreNa pa~nchavarNena shaivataH | homAshaktau budho haumyaM havirdadyAd dvijAya tat || 38|| doShayoH prashamArthaM cha nyUnatAdhikatAkhyayoH | paThechcha shR^iNuyAdbhaktyA shivanAmasahasrakam || 39|| tena syAt saphalaM sarvaM saphalaM nAtra saMshayaH | yato nAstyadhikaM tvasmAt trailokye vastu ki~nchana || 40|| ekAdashamitAn viprAn bhojayenmadhupAyasaiH | dadyAt tebhyo dakShiNAM cha vratapUrNatvasiddhaye || 41|| shaktau palatrayamitasvarNena sundaraM mune | siMhaM vidhAya tatrAsya purANasya shubhAkSharam || 42|| lekhitaM likhitaM vApi saMsthApya vidhinA pumAn | sampUjyAvAhanAdyaishcha hyupachAraiH sadakShiNam || 43|| vastrabhUShaNagandhAdyaiH pUjitAya yatAtmane | AchAryAya sudhIrdadyAchChivasantoShahetave || 44|| tena dAnaprabhAveNa purANasyAsya shaunaka | samprApyAnugrahaM shaivaM muktaH syAdbhavabandhanAt || 45|| evaM kR^ite vidhAne cha shrImachChivapurANakam | sampUrNaphaladaM syAdvai bhuktimuktipradAyakam || 46|| iti te kathitaM sarvaM kiM bhUyaH shrotumichChasi | shrImachChivapurANasya mAhAtmyaM sarvakAmadam || 47|| shrImachChivapurANaM tu purANatilakaM smR^itam | mahachChivapriyaM ramyaM bhavaroganivAraNam || 48|| te janmabhAjaH khalu jIvaloke ye vai sadA dhyAyanti vishvanAtham | vANI guNAn stauti kathAM shR^iNoti shrotradvayaM te bhavamuttaranti || 49|| sakalaguNavibhedairnityamaspaShTarUpaM jagati cha bahirantarbhAsamAnaM mahimnA | manasi cha bahirantarvA~NmanovR^ittirUpaM paramashivamanantAnandasAndraM prapadye || 50|| iti shrIskAnde mahApurANe sanatkumArasaMhitAyAM shrIshivapurANashravaNavratinAM vidhiniShedhapustakavaktR^ipUjanavarNanaM nAma saptamo.adhyAyaH || 7|| || shrIshivamahApurANamAhAtmya sampUrNam || ## \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}