% Text title            : AdinArAyaNakrita Sita StutiH
% File name             : AdinArAyaNakRitAshrIrAmastutiH.itx
% Category              : raama, stuti
% Location              : doc\_raama
% Transliterated by     : Mrityunjay Pandey
% Proofread by          : Mrityunjay Pandey
% Description/comments  : bhushuNDirAmAyaNam | pUrvakhaNDa | adhyAya 91/1-31||
% Latest update         : August 26, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shriramastuti by Adinarayana ..}##
\itxtitle{.. AdinArAyaNakR^itA shrIrAmastutiH ..}##\endtitles ##
AdinArAyaNa uvAcha |
vande tvAM rAmachandraM sakalaguNanidhiM nirguNaM brahma pUrNaM
satyArAmaM chidekaM svavimalamahasA dyotamAnaM samantAt |
yasyAMshA eva sarve vayamiha bhuvane brahmaviShNvIshamukhyAH
sR^iShTisthityantalIlAvirachanachaturA vartayantIha chakram || 1||
yo.ahaM viShNuH sa rAma tvayi paramatame sachchidAnandasindhau
varteyaM vindumAtraM vidhirapi cha bhavo bhAskaro vAsavashcha |
etAvAneva viShvag vilasati mahimA tAvakaH ko.api nityaM
nAbhUttena smayaste viharasi pashuvat bhUya AbhIradAraiH || 2||
etatte rUpamasmannayanaviShayatAM sachchidAnandamAtraM
yAtaM yAtaM svabhAgyairnigamashatashiro veditaM naiva ki~nchit |
ko jAnIte yadetadviharati sarayUtIrabhUmIniku~nje
mugdhairAbhIradAraiH pashugaNavibhavairdurlabhaM vai munInAm || 3||
lokAla~NkArasImAnigamanigadito rAghavaH kaushaleyaH
kalyANaikAntalokottaravimalaguNaH kAmakelInidhAnam |
sAkShAchchillokanAtho rasamayavilasaddivyalIlAvilAsaH
preyAn prANAdhikastvaM mama kimapi paraM rAma sarvasvameva || 4||
yathaiva tejasAM loke sarveShAM prANado raviH |
tathA chaitanyamAtrasya bhavAnekadhanaM prabho || 5||
shabdAtmakaM brahma tavaiva ghoShaH shvAsochChvAso nitya AkAsharUpaH |
tena brahmA visR^ijatyAdisarge labdhvA pUrNAM saMvidaM sR^ijya varge || 6||
idaM cha te rUpamakhaNDasaubhagaM netrotsavAnandakaraM janAnAm |
sadyo nijechChAprakaTaM satkR^ipADhyaM lokAtItaM kAlamAyAdyatItam || 7||
nAdirna madhyaM tava nAvasAnamasmAkamAdyantamathApi madhyam |
tvameva bhUman puruShottamesha na vA~NmanogocharatAM prayAsi || 8||
tvaM vai vidhirviShNurathApi rudrastva kAlapAlo nidhayastvameva |
tvaM vai digIsho vidigIshastvamevamAropamAtraM vitatho.asmAsu shabdaH || 9||
yadvAchyavAchakamayaM jagadetadIsha
pAdastavaiSha sakalo bhuvanAni vishvA
UrdhvaM tripAt punarudaidamR^itaM tavaiva
rUpaM paraM paramahaMsa guhAyanastham || 10||
namaste rAma ramaNIsahasrasuvilAsine |
nIlavaidUryavarNAya sachchidAnandavarchase || 11||
namaste sahajAlakShmIparamAnandamandira |
ashokavanaku~njAntaH shayyAmandirakeline || 12||
namaste rAmachandrAya chichchakorIsukhAtmane |
niHshreyasAmR^itaughAya brahmaNe paramAtmane || 13||
kimarthamIshena yatno vidheyaH smR^ito na tatraiva sukoshalAyAm |
anugraho vA mayi kashchit svakIye vinirmito nAtha yadAgataM mudA || 14||
punarnamo.asmai muhureva nAtha tavAmuShmai sachchidAnandadhAmne |
sItAvinodaikaniketanAya shrIvigrahAyAmR^itavarShaNAya || 15||
shrIrAma uvAcha |
tAtenopAsitA yaj~nA agnayashcha trayImayAH |
avichChedena yajanaM devAnAM pratyapadyata || 16||
tasyAgnitritayaM viShNo kuNDebhyo.apagatA iti |
bhrAntvA tribhuvanaM sarvamatrAnveShitumAyavam || 17||
atra dR^iShTAH sabhAyAM te agnayaH pitR^isevitAH |
neShyAmaH praNipatyaitAn piturmodAya koshale || 18||
nArAyaNa uvAcha |
ete.agnayastrayo nAtha tvatpitrA samupAsitAH |
mayA hR^itAH parIkShArthaM pUrNasya brahmaNastava || 19||
nIyatAM samprati gR^ihe rAma shrIkoshalApure |
agnayo.amI trayIrUpAH pituste.abhIShTadAyakAH || 20||
jAnAti kaste mAhAtmyaM vedAnAmapi durgamam |
tavaiva kR^ipayA nAtha vij~neyaM shubhajanmabhiH || 21||
[ bhagavAn puruShaH pUrNo rAma eva na saMshayaH |
bahUnAM ra~njanakaraH kAntAnAM bhUri shaktimAn ||
gopA~NganAstava vibho lalanAH samagrA
dikpAlakAshcha bhavate samaduH svakanyA |
anyA~ncha nAganarakinnara devavadhva
stvayyeva netrasukhade hi ratA babhUvuH ||
tasmAdetAH ki~NkarIstvaM mahiShyo
gAndharveNa prItiyuktA gR^ihANa |
yasmAdekastvaM sa rAmastrilokyAH
svechChAmAtrAt pUrNachittAbhilAShaH ||
ityAdhikaH pAThaH \- rIvA.N
evaM prasAdito rAmaH puruSheNAdiviShNunA |
namantaM taM visR^ijyAgnIn puraskR^itya trayImayAn || 22||
rathopasthamupAvishya muhurmuktAtmabhiH stutaH |
vaimAnikagaNairbhUyaH stUyamAnaH pade pade || 23||
akSharasyAntamatyetya nistIrya virajAM punaH |
kR^itvA cha tamasaH pAraM chakrajyotirvibhedinaH || 24||
lokAlokamatikramya rathavegena tatkShaNAt |
AjagAma javAd rAmaH sAketanagarIM prati || 25||
agnitrayaM purodhAya sAnujo ratharaMhasA |
ayodhyAnayanAnandavarddhanaH punarAgataH || 26||
Agate rathashArdUle agnInAdAya bhUpatiH |
atiprItamanA bhUtvA rAmaM bhUyo.abhyanandayat || 27||
agnIn kuNDeShu saMsthApya vidhivat punarAhitAn |
sAyaM prAtarupAsInaH pUrNArtho nR^ipaterabhUt || 28||
itthaM sthito yauvarAjye nandayan bhuvanatrayam |
koshalAdhipateshchittaM visheSheNa nananda saH || 29||
yauvarAjye sthite rAme sahastraM sharado yayuH |
shrImajjanakajApUrNatAruNyamadapoShikAH || 30||
prajAnetrotsavo bhUyAn prababhUva dine dine |
shrIrAmachandrapUrNendudarshanAmR^itavarShaNAt || 31||

iti shrImadAdirAmAyaNe brahmabhushuNDasaMvAde AdinArAyaNakR^itarAmastutau
vaikuNThAgnyAnayanaM nAma ekanavatitamo.adhyAyaH || 91||

bhushuNDirAmAyaNam | pUrvakhaNDa | adhyAya 91/1\-31||

##
bhushuNDirAmAyaNam . pUrvakhaNDa . adhyAya 91/1-31..
Encoded and proofread by Mrityunjay Rajkumar Pandey

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}