% Text title            : Bhushundi Ramayanam Purvakhanda 001-010
% File name             : bhushuNDirAmAyaNam\_pUrva\_001-010.itx
% Category              : raama, bhushuNDirAmAyaNam
% Location              : doc\_raama
% Transliterated by     : Vishal Pandey
% Proofread by          : Vishal Pandey
% Description/comments  : bhushuNDirAmAyaNam | pUrvakhaNDa | adhyAya 001-010||
% Latest update         : September 12, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Bhushundi Ramayanam Purvakhanda 001-010 ..}##
\itxtitle{.. bhushuNDirAmAyaNam pUrvakhaNDa 001\-010 ..}##\endtitles ##
\section{001\. brahmastutirnAma prathamo.adhyAyaH |}
OM AdirAmAyaNaM nAma shrIrAmacharitaM shubham |
ki~nchitsamAdhAvAlochya pravakShyAmi prayatnataH ||
OM namaH paramahaMsAsvAditachinmayamakarandAya
ruchiranakhashikhAnta ratnaprarohapallavitasiMhAsanaprAntapIThapradeshAya
munimAnasamadhukarapramodAya shrIrAmachandracharaNayugalAya |
brahmovAcha |
rAmaM lokAbhirAmaM raghuvaratanayaM koshalAmuktipuryAM
khelantaM kAmakeliM suvimalasarayUtIraku~nja naTantam |
jAnakyA chAruhAsachChavivishadasharachchandrikAkAntimatyA
saMyuktaM rAjaveShaM lalitarasamayaM brahma pUrNaM namAmi || 1||
bhaktAnAM prANanAthaM varadaparivR^iDhaM vaMshavaryaM vareNyaM shuddhaM
shyAmAvadAtaM haritamaNiruchiM sachchidAnandadeham |
AbhIrInetrapadmaprakaradinakaraM pUrNachandrAbhirAmaM
rAmaM shyAmaM prakAmaM nijahR^idi kalaye koTikAmAvatAram || 2||
muktAhArAbhirAmaM maNimukuTasamAbaddhasadratnaguchChaM
mandasvachChAmR^itAbdhi pratimavihasitaM chArubimboShThakAntim |
shR^i~NgAre kAntaveShaM paramatamarasAnandasAkShAtkR^itA~NgaM
gambhIrAvartanAbhiM trivalimadudaraM naumi rAmaM ramesham || 3||
ekaM nityaM svasAkShi svamahimani sadA saMsthitaM svAnubhAvaM
svAdhAraM brahmaNo.apyAshrayamamitaguNaM bhUri kalyANaveSham |
mahAMseshaM (taM rAseshaM ?)niraMshaM niravadhimavadhiM vastumAtrasya tattvaM
nistraiguNyaM mahastat smarasi na hR^idaye pUrNarAmAbhidhAnam || 4||
matsyaM kUrmaM varAhaM nR^iharimatha hariM vAmanaM haMsarUpaM
yaj~naM nArAyaNAkhyaM tribhuvanalalitaM bhArgavaM vai hayAsyam |
pradyumnaM vAsudevaM kaMsArikR^iShNaM revatIprANanAthaM
prasiddhameteM.ashA rAmasya shrIrAmaM parAtparaM smara || 5||
atra pa~nchamashlokArdhe pAThabhedaH
rAmaM kR^iShNaM cha buddhaM yavanavadhakaraM chakShate vedavedo
yasyAMshaM taM pareshaM smara yadi satataM sannidhiM vAchChase chet |
yA te nityaiva lIlA pramudavanamahAraNyavR^indAvanAdau
vedAnAM gocharatvaM vrajati na kathaM svAtmabhAShA sphurantI |
sA me sarvasvamAstAM ratimayasahajAnandakelInidhAnaM
nAnyA premNArthatA tvayyatishaya varadesha prabho rAmabhadra || 6||
raktAshokadrumAlIvirachita sumahAmaNDapAntarniShaNNAM
sItAsa~NketakelIpriyamata urasAkrAntagopIkadambam |
nIlAbhrashyAmalaM tajjayatu hR^idi sadA pUrNashR^i~NgAratattvaM
dhAma shrIrAmanAma tribhuvanasukhadaM koTikAmAvatAram || 7||
padbhyAM ma~njIravadbhyAM sulalitamavalI pallavashrImukhAbhyAM
krIDan kelIniku~nje vihasitasahajAnandinIshaktiyuktaH |
shuShkaM dAvAgnidagdhaM drumaviTapamahA (ho ?)vaMshikAnAdavR^iShTyA
pIyUShaughairnayantaM punarapi harita (tAM ?)rAmachandraM bhaje.aham || 8||
haMho mAdhurya lakShmIstava nayanasukhaM vardhayatvasmadIyaM
pUrNA te rAma dR^iShTirbhavatu sakaruNA nityameva prasannA |
tvatkIrtiH kaNThadeshe nivasatu nitarAmAdividvatpragItA
chitte.antarbhAtu nityaM tava padayugalaM vishvatApApahantR^i || 9||

iti shrImadAdirAmAyaNe brahmabhushuNDasaMvAde brahmastutirnAma prathamo.adhyAyaH || 1||
9/9
\section{002\. prashnarUpaM nAma dvitIyo.adhyAyaH |}
brahmaNo vipule satre sa~NgatA devatAgaNAH |
yajamAnaM paryapR^ichChan vR^iddhaM vishvapitAmaham || 1||
devA UchuH |
bhagavan devadevesha brahman lokapitAmaha |
tvameva jagataH kartA vedasya cha samAshrayaH || 2||
tvatto nAnyo.asya jagataH pravartanavidhikShamaH |
AdimUrtiH svayambhUstvaM svarAT chaiva virAT prabhuH || 3||
vetsi bhUtaM bhavad bhAvyaM divyena j~nAnachakShuShA |
ka Ashrayo.asya jagataH kiM nimittaM tathA prabho || 4||
kiM sAramatra vedyaM cha bahuvalgini chAgame |
bhavataH sammataM kiM cha lokeshasya vidhervada || 5||
ka Adau viniyoktA cha kaH svabhAvo.asya santatam |
kiM svarUpaM ka AkAro brahmApi vada kIdR^isham || 6||
kIdR^ishaM tasya saMsthAnaM kiM sthAnaM paramaM padam |
saguNaM nirguNaM chApi dhyeyaM j~neyaM cha kIdR^isham || 7||
etaduddeshataH pR^iShTaM viri~nche vada vistarAt |
tvatto.anyo nAsya prashnasya pratIkartA jagattraye || 8||
tasmAdvada vidhe sarva dIrghasatre.atra tAvake |
shrotuM cha sakShaNAnviddhi sabhyAn no vedavedinaH || 9||
bhavAMshcha dIkShito yaj~ne kaM devaM yajase punaH |
etachcha no vada brahman parAtparaviduttama || 10||
sarvavedAravindAnAM makarandarasaM param |
nityaM shrAvaya no brahman sadasyatra havirbhujAm || 11||
havIMShi bhu~njate devAH ka ekaH phaladAyakaH |
makheShu vApi yaj~neShu tadidaM cha vada prabho || 12||

iti shrImadAdirAmAyaNe brahmabhushuNDasaMvAde prashnarUpaM nAma dvitIyo.adhyAyaH || 2||
12/21
\section{003\. upadeshakathanaM nAma tR^itIyo.adhyAyaH |}
brahmovAcha |
sAdhu pR^iShTaM mahAbhAgA lokasyotpatti kAraNam |
bhaktAH paramahaMsAshcha kR^itArthAH syuryato.akhilAH || 1||
rAma evAsya jagatashchAshrayaH sarvabhUtabhR^it |
rAma eva nimittaM cha nijalIlArasAtmakaH || 2||
rAma eva paraM sAraM vedyaM nigamamUrddhasu |
mamApi sammataM (tattvaM ?)rAma eva na saMshayaH || 3||
mAmAdau sarvajagato rAma eva niyuktavAn |
rAmasya cha svabhAvo.asti vedAnAmapyagocharaH || 4||
nIlarUpaM chidAkAraH sachchidAnandavigrahaH |
pratiShThA brahmaNo.apyetat paraM brahma cha tAdR^isham || 5||
saguNaM nirguNaM chApi bhedAbhedavivarjitam |
ekarUpaM sadA dhyeyaM pUrNaM mAyAvivarjitam || 6||
chidAnando.asya saMsthAnaM sthAnamasya sanAtanam |
sItAlokaM paraM sthAnaM chinmayAnandalakShaNam || 7||
koshalAkhyaM puraM nityaM chilloka iti kIrtitam |
ahaM cha vividhairyaj~naiH koshalAdhipatiM yaje || 8||
havirbhujAM cha sarveShAM rAma eva parAyaNam |
havirbhujAmadhiShThAnaM rAma eva phalapradaH || 9||
kratuyaj~namaye satre sArabhug rAma eva hi |
AdirAmAyaNaM nAma shrIrAmacharitaM shubham || 10||
ki~nchinmUlacharitraM cha pavitraM ma~NgalAlayam |
janma karma cha rAmasya vakShye tribhuvaneshituH || 11||
ekaikaM vimalaM gItaM varNitaM chaiva sUribhiH || 12||
devA UchuH |
ko vA bhushuNDanAmAsau vaiShNavapravaro mataH |
tasmai cha kathamAkhyAtamAdirAmAyaNaM shubham || 13||
kA cha tatra kathA divyA shrIrAmacharitAtmikA |
avatAracharitraM kiM kiM vA mUlacharitrakam || 14||
etanno vada bho brahman sandihAnAn sabhAsadaH |
rAmachandrAmR^itakathAprashnasyotta ramadbhutam || 15||

iti shrImadAdirAmAyaNe brahmabhushuNDasaMvAde upadeshakathanaM nAma tR^itIyo.adhyAyaH || 3||
15/36
\section{004\. bhushuNDopashamo nAma chaturtho.adhyAyaH |}
brahmovAcha |
kAlasya bhaginI ghorA nAmnA yA kAlakaNTakA |
tasyAM jAtaH sUryayogAd bhushaNDo nAma vai dvijaH || 1||
kAkaveShadharaH shUro lohatuNDo.ashanichChadaH |
vidyudgAtro megharAvo pralayantAnalekShaNaH || 2||
mahAsattvo mahAvIro mahAbalaparAkramaH |
nIlameghasamAkAraH kAlakaNTakikAsutaH || 3||
trailokyaM sa vinirjitya vavR^idhe balasaMvR^itaH |
tuNDAghAtena nitarAmutkShipan kulaparvatAn || 4||
karAladashanaH shUro nakhodIrNamahodadhiH |
pakShatidvayashabdena brahmANDamapi bhedayan || 5||
garuDaM baladurdharShaM viShNuvAhanamadbhutam |
balAdraNe vinirjitya bhushuNDo vavR^idhetarAm || 6||
tataH sakopanaH kopAt kR^itvA shabdaM bhayAnakam |
utpatya pragato vyomni chAlayan sarvakhecharAn || 7||
pakShavAtAhatAstasya vimAnAvalayo patan |
tArAH praveshayAmAsa nijapakShAdiromasu || 8||
sUryaM prakampayAmAsa bhagavantaM divAkaram |
chandraM cha khaNDayAmAsa tuNDaghAtairmuhurmuhuH || 9||
atrAsayad devagaNAn mahAbalaparAkramaH |
pakShAnilahatAmbhodhiH samantAdudatiShThata || 10||
tato javAt samutpatya padbhyAM bhUmimakampayan |
sumerustadbalenochchairakampata surAlayaH || 11||
vichelurbhUrivegena saptapAtAlabhUmayaH |
itthaM tribhuvane bhItiM kurvan paramadarshanaH || 12||
svargaM martya cha pAtAlamatrAsayata bhIShaNaH |
brahmalabdhavaro vIraH kAkarUpI durAsadaH || 13||
devA UchuH |
tvayA dattavaro ghoraH kAkarUpadharaH kharaH || 14||
trailokyaM trAsayatyeSha bhushuNDo nAma vai dvijaH |
tatpratIkArakaraNe bhavAnekaH kShamo vidhe || 15||
no chedasau tribhuvanaM nijapakShamUle
sampUrNayiShyati balI varalAbhadR^iptaH |
na hyasya vIryabaladarppanivAraNAya
ko.api kShamastribhuvane naradevamadhye || 16||
ityuktastridashairbrahmA bhushuNDasyAlayaM yayau |
madhye madhu samudrasya dvIpavarye mahAgirau || 17||
mahAghore vane yatra na devA nApi mAnavAH |
brahmANamAgataM j~nAtvA vR^iddhaM lokapitAmaham || 18||
sadya evAsanAttUrNamudatiShThad dvijottamaH |
divyAsane taM saMsthApya kR^itvA pUjAM mahIyasIm || 19||
uvAcha prahasan prItyA pakShirAjo vichakShaNaH |
bhushuNDa uvAcha |
bhagavan bhavato dR^iShTvA sampUrNA me manorathAH || 20||
gR^ihAshrame pavitratvaM (tvamAgataM ?)bhavadAgamAt |
mahatAmAgamo loke kevalaM bhUtaye nR^iNAm || 21||
brahmovAcha |
bhavatA vatsa vIryeNa trAsitaM bhuvanatrayam |
naitattavochitaM dhIman yasmAttvaM vaiShNavAgraNIH || 22||
rAmeNa rachitaM vishvaM bhaktAnAM sukhahetave |
sAdhavo yadiduHsthAH syustadA rAmaH prakupyati || 23||
rAme prakupite deve kutaH kShemaM charAchare |
tasmAdupashamaM gachCha shAntireva satAM matA || 24||
shAnti vinA harerbhaktirviphalaiva bhaviShyati |
yasmAnnodvijate vishvaM sa vai bhAgavatottamaH || 25||
tvaM rAmasevakavaro vidvAn viditavedyakaH |
jagato hitamanvichChan sR^iShTireShA hareryataH || 26||

iti shrImadAdirAmAyaNe brahmabhushuNDasaMvAde bhushuNDopashamo nAma chaturtho.adhyAyaH || 4||
26/62
\section{005\. garuDAya darshanadAnaM nAma pa~nchamodhyAyaH |}
bhushuNDa uvAcha |
balakR^iShNAdirUpANi rAmasya syuH sahasrashaH |
teShAM mukhyatamaM ki~nchid brUhi mahyaM pitAmaha || 1||
brahmovAcha |
sarvANyeva svarUpANi shrIrAmasya shriyaH pateH |
dhyeyAni chaiva j~neyAni shAntAni prayatAtmabhiH || 2||
purA khalu khagendreNa garuDena manIShiNA |
dhAvan gachChan vAyuputro hanumAnidamIritaH || 3||
garuDa uvAcha |
hanuman kutra vegena yAsi tvaM dhAvanoddhataH |
atyAhitamidaM kAryaM kathamevaM bhaviShyati || 4||
hanumAnuvAcha |
nAgAntaka khagAdhIsha yAmyahaM koshalApure |
atikAlo bhavatyeSha tvaM na jAnAsi kiM sakhe || 5||
rAmadarshanaveleyaM madhyAhne koshalApure |
tatra gachChAmyahaM tUrNaM tena dhAvanavegataH || 6||
garuDa uvAcha |
ko.asau rAmastvayA proktashchAturvarNye.asti kashchana |
Ahosvit kopyasau devo daityo gandharva eva vA || 7||
hanumAnuvAcha |
trailokyAdhipatiH shyAmo nIlanIradavigrahaH |
rAmo dAsharathirdevo bhavato vidito na kim || 8||
Atmaiva va~nchitastena yena rAmo na vIkShitaH |
na shruto naiva cha dhyAto na premNA parikIrtitaH || 9||
rAmo.asya jagato hetuH sachchidAnandavigrahaH |
paramAtmA prabhuH sAkShI sa eva cha gatirnR^iNAm || 10||
na taM vinA muktido.anyo nAmR^itasyAshrayo.api cha |
sa eva cha paraM brahma vedamUrddhasu gIyate || 11||
eko rAmaH sarvabhUtAntarAtmA sarvAvAsaH sarvakalyANabhUmA |
sarvAMshAdyo pramodavanadhAmA yasyAMshAMshA bhAnti sarve.avatArAH || 12||
garuDa uvAcha |
evaM chettarhi hanuman prasAdAd bhavato mama |
taddarshanaM kiM na bhavet sarvakalyANadaM sakhe || 13||
hanumAnuvAcha |
AgachCha khagarAja tvaM koshalAdhipateH puram |
tatra shrIrAmachandrasya darshanaM te bhaviShyati || 14||
matsArthe te na nirvAhastvamAgachCha dinAntare |
ahamadya gamiShyAmi shIghradarshanalAlasaH || 15||
ityuktvA hanumAMstUrNaM koshalAM nagarIM yayau |
dinAntare cha garuDastatra yAtaH sakautukam || 16||
gatvA dadarsha raghupu~NgavamabhranIlaM
sItAyutaM kaTiniSha~NgadhanuHsharAdyam |
keyUraka~NkaNakirITa sukuNDalADhyaM
pItAmbaraM madhurahAsamukhAravindam || 17||
evaM vilokya garuDaH sumagno rUpasAgare |
tato hanumatA prokto rAma eSho.abhivandyatAm || 18||
garuDa uvAcha |
gu~njAstrajaH kekipichChAvataMsaH
kare rasAlA muralI yadA syAt |
gopA~NganAshchedvilasanti pArshrve
sItApate tvAM praNamAmi nityam || 19||
hanumAnuvAcha |
sarvasvarUpo bhagavAnayameva raghUttamaH |
yAdR^ishI bhAvanA yasya tAdR^ishastasya bhAsate || 20||
eSha eva punardevaH parivR^ityAvalokyatAm |
tataH sa garuDo bhUyaH parivR^itya vyalokayat || 21||
dadarsha rAmasya gu~njAkalApaM
mayUrapichChasphuritAvataMsam |
vaMshIkaraM gopadAraiH parItaM
kR^iShNaM tribha~NgIlalitaM khagendraH || 22||
vR^indAvanasthaM smitapIyUShavarSheH
si~nchantama~NgAni mR^igIdR^ishAM cha |
rAdhAnvitaM pItadukUlayugmaM
dR^iShTvA sa tuShTAva hR^idi prasannaH || 23||

iti shrImadAdirAmAyaNe brahmabhushuNDasaMvAde garuDAya darshanadAnaM nAma
                  pa~nchamo.adhyAyaH || 5||
23/85
\section{006\. hanumaddarshanaM nAma ShaShTho.adhyAyaH |}
garuDa uvAcha |
ShaShTho.adhyAyaH
tava svarUpaM bhagavannaprameyaM vedAnAmapyAdisargodbhavAnAm |
na cha bhramenmAdR^isha eSha jantuH kimadbhutaM nAtha dayAsamudra ! || 1||
tathApi te bhaktavaryo hanUmAn j~nAtvA samuddhAryatamaM shaThaM mAm |
pradarshayAmAsa bhavantamadbhutaM sarvAvatArAMsha samUhamUlam || 2||
dR^iShTvaiva te nAtha padAmbujadvayaM mAyAdidoShAtigamadvitIyam |
jAto.asmi bhAgyena vimuktamohaH samuddhR^ito.aj~nAnarayAttato.aham || 3||
athApi bhUyaH karuNAmR^itaM mayi pravarShataste dInavAtsalyametat |
vij~nAtameva vyApi vaikuNThalokAt paraM padaM te.asti vimuktabhedam || 4||
sarve.api te balakR^iShNAdisa.nj~nA aneka kAryaprabhavo.avatArAH |
tavAMshAMshA eva te tvaM cha pUrNa shchillokeshaH sahajAnandinIshaH || 5||
yA te shaktiH sahajAnandinIyaM sItetinAmnI jagatAM shokahantrI |
tasyA aMshA eva te satyabhAmA rAdhA rukmiNyAdayaH kR^iShNadArAH || 6||
sarve.ashAste pUrNashaktyA sametAH pUrNAnandAH pUrNachichChaktibhAjaH |
tathApi dR^iShTe tvayi mUlaikamUle mahodadhau patvalavat sphUranti || 7||
pramudvane tvaM sahajAkelirakto nityaM vibhAsi prabhurAbhIrikAbhiH |
sampratyabhij~nAya nijaM svarUpaM sarvAM lIlAM kR^itavAnatra bhUtAm || 8||
ataH paraM nAtha na me.asti moho bhavatsvarUpe sahajAnandinIsha |
tvameva sItApatiradbhutakriyaH sahajApatirvApi pramodadhAmni || 9||
sadAstu me rAma ratirhi vai tvayi svasachchidAnandarasaikasindhau |
tattvaM tava shrIhayashIrSha eva jAnAti vAgIsha udArachittaH || 10||
nAnyasya sAmarthyamihAsti rAma manovachobhyAmaparichChedyamUrtau || 11||
namaste rasikendrAya shR^i~NgArarasamUrttaye |
sItAkaTAkShasandohavijitAya  parAtmane || 12||
gosa~Ngha gopa gopIsha gokulesha rasAlaya |
karuNAmR^itapAthodhe rAmachandra namostu te || 13||
na te parichChittiranantavedairna yogadR^iShTiprasaraistapobhiH |
svechChaikamAtreNa chidekarUpo bhavAnparichChedyatamaH svabhaktaiH || 14||
akriyasyApite goShThe ri~NgaNaM bAlalIlayA |
jAnubhyAM bhUtalasthAyi daityamarddanahetave || 15||
tava godohanaM rAma na vai gopochitaM bhavet |
etA hi sadgirastAsAM sAraM bhaktiH samuddhR^itA || 16||
yadyatkaroShi naTaveShadharo vilAsI tattattavaiva paramArthata eva kAryam |
nAnyasya rAma ramaNIshatakAmarUpa gItaM sadaiva nigamatritayena nUnam || 17||
evaM kR^itvA garuDo rAghavasya stotraM muhustachcharaNAravinde |
apIpatat pulakitavigraho.aya mAnandajAshrUNi dR^igbhyAM vimu~nchan || 18||
shrIrAma uvAcha |
uttiShTha vatsa khagarAja paraM shubhaM te maddarshanena gata eva sa mohabhAvaH |
madbhaktimAMstribhuvane vichara prasanno nahyasti te.abhilaShitAcharaNe.antarAyaH || 19||
brahmovAcha |
itthaM shrIraghunAthasya prasAdamupalabhya saH |
kR^itabuddhiH kR^itArthAtmA babhUva bahunirvR^itaH || 20||
tasmAd bhushaNDa pakShIndra rAmaM bhajitumarhasi |
shrI rAmachandraM premNA vai na pashyati sa va~nchitaH || 21||
tasyaiva sarvarUpANi rAmasya paramAtmanaH |
AdinArAyaNeshasya sevyAni kR^itanishchayaiH || 22||
evaM sa garuDo dR^iShTvA rAghavendraM parAtparam |
mahApuryyAM hanumatA sevyamAnamaharnisham || 23||
hanumAnuvAcha |
pakShIndra tvaM hi dhanyo.asi rAghavendrasya darshanAt |
atyAhitaM hi devAnAM bhavato vai bhaviShyasi || 24||
garuDa uvAcha |
shrImato rAghaveshasya devadevasya shAr~NgiNaH |
darshanArthamAgato.ahamayodhyAM muktidAM purIm || 25||
adyaiva saphalaM janma sAketadarshanena me |
adyaiva saphalaM dhyAnaM pramodavanadarshanAt || 26||
dhig dhig janma cha teShAM vai ye na pashyanti sAdaram |
pramodavanamadhyasthAM kosalAM sarayUM tathA || 27||
koTayo brahmaNAmatra rudrANAM cha marutvatAm |
vasUnAM varuNAnAM cha stuvantaH purataH sthitAH || 28||
hanumAnuvAcha |
dhanyo.asi kR^itakR^ityo.asi garuDa tvaM hi samprati |
sakulastvaM punIto.asi rAghavendrasya darshanAt || 29||
shrIrAme devadeveshe koshalAyAM virAjati |
aMshAvatArAH kR^iShNAdyAH praNamanti hyasa~NkhyakAH || 30||
na tato.anyamahaM jAne devadevaM khageshvara |
sarvAvatAranidheshcha raghuvIrAd guNAkarAt || 31||
garuDa uvAcha |
rAmasya balakR^iShNAdyAH sarve.apyaMshAH sanAtanAH |
na tato.anyatkimapyasti sthUlaM sUkShmaM jagattraye || 32||
ityuktvA tArkShyaH kapIshaM gachChan karttuM parikramAm |
mahAvaikuNThasevyAyA ayodhyAyAshcha sarvataH || 33||
ayodhyAdakShiNe bhAge shrIkR^iShNaM rukmiNIyutam |
dadarsha garuDastaM cha nanAma vidhR^itA~njaliH || 34||
namantaM garuDaM dR^iShTvA rukmiNIvallabho hi saH |
uvAcha madhuraM vAkyaM prahasan garuDaM tadA || 35||
kR^iShNovAcha |
adya te saphalaM janma jIvitaM saphalaM sakhe |
garuDa tvaM hi dhanyo.asi ayodhyApuridarshanAt || 36||
ayodhyAM parito deshe koTiviShNvAdayo vayam |
vasAmaH satataM vatsa raghuvarAj~nAprapAlakAH || 37||
idameva vijAnanti te vai raghuvarapriyAH |
taditare.adhamA jIvAH nityaM svajanidUShakAH || 38||
evaM sAketamahimAnaM rahasyaM paramaM sadA |
stutvAtiharShitastArkShyo mumoda cha punaH punaH || 39||
uvAsa parayA bhaktyA maNiparvatasannidhau
gAyan shrIrAghavendrasya charitaM bhuktimuktidam || 40||
viShNvAdibhiH sadA sevyaM shrutismR^iti rasaM sukham || 41||
dR^iShTvA prabhAvamatulaM shrIrAghavasya tathaiva sAketapurasya nityam |
namAmi (nanAma ?)romA~nchitapremavihvalaH sa mArutI rAghavaratnamadbhutam || 42||
sItApatiM kaTiniSha~NgiNamAttachApaM rAmaM payodapaTalAdhikamechakA~Ngam |
keyUriNaM kanakaratnakirITajuShTaM shrIlakShmaNena yutamadbhutakoshalesham || 43||
tuShTAva hanumAn prItyA sAShTA~NganatavigrahaH |
sakurvan muhuratyantaM prema rAme pratikShaNam || 44||

iti shrImadAdirAmAyaNe brahmabhushuNDasaMvAde hanumaddarshanaM nAma ShaShTho.adhyAyaH || 6||
44/129
\section{007\. kathAvatAro nAma saptamo.adhyAyaH |}
shrI hanumAnuvAcha |
namAmi te nAtha padAravindaM viShNvAdisevyaM cha sukhaikahetum |
na yatra sadyaH pramitiH shrutInAM tatrAmite vAnaraH ko.asmi eShaH || 1||
tava prasAdo mayi nAtha jAtastathaiva dhAmeshvaripremadAyAH |
pramudvane nityatiku~njakelI lasanmahAma~njulavigrahAyAH || 2||
yadaMshamAtreNa bhavanti nityasho lakShmyAdayaH shaktivarAshcha sarvAH |
lIleshvarI nandananandinI sA mAM pAtu pAdAmbujanityabhaktam || 3||
nahi prabhAvAbhyudite ruchInAM tamobhave dR^iShTipathaM prayAti |
tathA tvayIshe koTisUryaprakAshe shrIrAghavendra bhakta~njanaikalabhye || 4||
yadi tvametattimiraM moharUpaM na saMharedIsha nijAshriteShu |
kathaM tadaiShAM gocharatvaM prayAti rUpaM tathaitat sachchidAnanda sAndram || 5||
gopAlarAjasya cha nandanasya gehe purA vasan saha lakShmaNena cha |
arIramadrAma bhavAn vrajA~NganA uddhArArthaM shrutiR^iShyAdirUpAH || 6||
tavaiva lIlA bhuvane rasAlA sudhAbdhivat pAlayatyeva bhaktAn |
no chet kadAchit tvayi santirohite vishuShyeyuH pAramahaMsyabhAjaH || 7||
evaM vichintya bhagavAn vyatanodbhavAMstaM lIlAmR^itodadhimudAramanantasAram |
yasyAntare paramahaMsavarAH sadaiva krIDanti kAlashirasi svapadaM nidhAya || 8||
tvaM bhaktilabhyo.asi hare janAnAM na j~nAnayogAditapobhirugraiH |
kathaM tavedR^ik prasAdo.api labhyaH kutastarAM sannidhau darshanaM te || 9||
tvaM rAmachandro nR^ipateH kumAro nityaM vilAso sarayUtIravAsI |
tavAMsha eShaH shrIkR^iShNo yashodA garbhe bhaviShyati vai dvAparAnte || 10||
ato hyanantaH shAshvatastvaM purANaH pUrNo nityaH sachchidAnanda ekaH |
vyomAkArastvaM svalIlAbhiruchchaiH vishvAnandaM janayan bhAsi rAmaH || 11||
namaste rAmachandrAya muktAhArAvataMsine |
pa~ncharatnAvataMsAya sItAnetravinodine || 12||
namo gopIdR^igArAma rAmanAma shubhAvaha |
vaMshIdhara ghanashyAma vanamAlin vrajendra te || 13||
kelinIkelikAntAya shrIkAntAya sukhAbdhaye |
guNagrAmasamudrAya sItAkAntAya te namaH || 14||
aparAdhasahastre.api sadya eva prasAdine |
rAmAya chaiva rAmAya nityameva namonamaH || 15||
evaM stutvA padAmbhojamagrahIt rasikeshituH |
premavihvalito bhUtvA hanUmAn rAmasevakaH || 16||
shrIraghunandanovAcha |
uttiShTha vatsa hanUman lIlopAsanayAnayA |
dR^iDhayA te prasanno.asmi bhakto.asi mama sarvadA || 17||
rAmo lIlAvishiShTo.ahaM tvAmAnandayituM kShamaH |
bAlakrIDAnucharitaiH pitarau nandayAmi cha || 18||
dR^iDhalIlopAsanAyAM mArute matirastu te |
mama sarvasvarUpeNa bhaktAnAM prakaTatvataH || 19||
lIlAmAdhuryamAtraM tu svamAsvAdyaM rasottaraiH |
bhaktaiH paramahaMsaishcha sAdhubhirhR^idayAlubhiH || 20||
rasAsvAdAya sAdhUnAM lIlA yA rAghavasya cha |
AsvAdyamAnA sA vuddhvA muktimeva prayachChati || 21||
sAmIpyaM tiShTha hanuman bhakto.asi mama sarvadA |
bhaja rAmaM rAghavendraM parAbhaktimavApnuhi || 22||
garuDa tvaM cha devAnAM kAryaM sAdhaya gachCha bhoH |
sAketasyottare kUle sarayUtIrayordvayoH || 23||
nR^iNAM sa~ncharatAM mR^ityau pashupakShyantyajAtmanAm |
bhR^i~NgakITapata~NgAnAM vatsa tvaM vAhano bhava || 24||
chaturbhujAMstAn madrUpAnAnayasveha yatnataH
itthaM visR^ijya bhagavAn garuDaM raghunandanaH |
rarAma paramaishvaryabhAvite sarayUtaTe || 25||
etad bhushuNDa te proktamAkhyAnaM paramAdbhutam |
rAmasya chApi sItAyAH mithastAdAtmyasUchakam || 26||
tasmAd vipratipattavyaM na kadAchinmanIShiNA |
yathA rAmastathA sItA tathA shrIsahajA matA || 27||
athAhi te pravakShyAmi rAmamAhAtmyamuttamam || 28||
yasmAttvaM rAmabhakto.asi vaiShNavAnAM tathAgraNIH |
AdirAmAyaNaM nAma shrIrAmacharitaM shubham || 29||
ki~nchitsamAdhAvAlokya pravakShyAmi prayatnataH |
avatAracharitraM cha mUlaM charitameva cha || 30||
ekIkR^itya labhedyatra pravakShyate mayA dvija |
evaM mayA bhushuNDAya proktaM tatsaMhitAmayam || 31||
AdirAmAyaNaM divyaM brAhme kalpe vinirmitam |
tachChrUyatAM surAH sarve shrIrAmacharitaM shubham || 32||

iti shrImadAdirAmAyaNe brahmabhushuNDasaMvAde kathAvatAro nAma saptamo.adhyAyaH || 7||
32/161
\section{008\. kathAvataraNaM nAma aShTamo.adhyAyaH |}
bhushuNDa uvAcha |
janma karma cha me divyaM vada rAmasya vistarAt |
tatkathAmR^itapAnena mama chittaM prasIdati || 1||
brahmovAcha |
purA dashAsyamukhyeShu rAkShaseShu jagattrayam |
vyAkulIkR^itamatyarthaM tadA vidhirachintayat || 2||
aho mayA kR^itaM vishvaM viShNunA pratipAlyate |
Ishena hriyate bhUyaH samprApte bhuvanakShaye || 3||
bhuvanasya kShayashchApi nAdhunaiva bhaviShyati |
kalpaM sArasvataM nAma yugaM tretAbhidhaM tathA || 4||
prAyeNaiShAM vinAshAya dvijadharmatrayIdruhAm |
bhaviShyati svayaM rAmaH prAdurbhUtaH kvachidbhavi || 5||
tataH samAdhau prababhUva vANI svayaM bhaviShyAmi kalAbhiranvitaH |
dharmasya saMsthApanahetave punaH svabhakta pakShapratipAlanAya cha || 6||
sarayU puline ramye koshalA nAma me purI |
sachchidAnandanavanI shAshvataM yatparaM padam || 7||
pR^ithivyAM bhArate varShe prakaTaM tanmadAj~nayA |
atraivAhaM svarUpeNa viharAmi parichChadaiH || 8||
lIlopakaraNairyukto nityairaprAkR^itaistathA |
surA api bhaviShyanti svAMshena prakaTA iha || 9||
iti shrutvA giraM sUkShmAM vedhAH provAcha vismitaH |
sarvAn devagaNAn bhUyo rAvaNAdyairupadrutAn || 10||

iti shrImadAdirAmAyaNe brahma bhushuNDasaMvAde kathAvataraNaM nAma aShTamo.adhyAyaH || 8||
10/171
\section{009\. mahimavarNanaM nAma navamo.adhyAyaH |}
brahmovAcha |
tatra kAkutsthavaMshe tu janitA vo hitapradaH |
tasya sevArthamamarA agrato yUyamAsatha || 1||
koTibrahmANDalakShmInAmaMshinI brahmarUpiNI |
AdyA shrIrbhavitA tasya toShaNArthaM tu jAnakI || 2||
sa jAto bhagavAn rAmo rAghavendro parAtparaH |
hariShyati bhuvo bhAraM dharmaM cha sthApayiShyati || 3||
AdidevyAshcha padmAyAH kariShyati sukhaM mahat |
devInAM mAnuShINAM cha kinnaroNAM tathaiva cha || 4||
nAgInAM cha nagInAM cha dR^i~NmodaM janayiShyati |
pramodavipine sthitvA samprayuktastadAj~nayA || 5||
tadaMshabhUtAH anyAshcha rAmAH sammodayiShyati |
paramA sA svayaM lakShmIH sItA sAketapattane |
pramodane tathA rAj~nI sahajAnandarUpiNI || 6||
bhushuNDa uvAcha |
shrIrAmacharitaM brUhi brahman saMshR^iNvato mama |
jAyate paramAnando romaharShashcha gadgadaH || 7||
yasyAMshA matsyakUrmAdyAH balakR^iShNAdayastathA |
taM rAmamapahAyAnyaM shrotumichChAmahe katham || 8||
yaH pashyato me dhR^itachApahasto bhrUbha~NgamAtre jaladhiM nivadhya |
chakAra la~NkAM nijadAsanAthAM nihatya vegena cha rAkShasendram || 9||
la~NkAdhipaH saMyati jiShNujaitro varorjito bhUritejA dashAsyaH |
yadvANavahneH sahasA pata~NgatAM jagAma sAkaM parivAravagaiH || 10||
tasya shrIraghuvIrasya charitaM me nishAmaya |
kalpe kalpe tu yajjAtaM viditaM chaiva yattava || 11||
brahmovAcha |
anantaM charitaM tasya vaktuM no pAraye dvija |
samAdhau tu sakR^idR^iShTvA vAlmIkiH kathayiShyati || 12||
mayApi bhavate vAchyaM samAdhAvupalabhya hi |
vinA samAdhisaMyogaM kathaM vaktuM kShamo.asmyaham || 13||
vAlmIkinoditaM divyaM rAmAyaNamudAhR^itam |
anyattu rAmAnukrIDaM tadrAmAyaNameva hi || 14||
matsyo.asya hR^idayaM viShNuryogarUpI janArdanaH |
kUrmo.asya dhAraNAshaktirvarAho bhujayorbalam || 15||
nArasiMho mahAn roSho vAmanaH kaTimekhalA |
bhArgavo.asya paro dharmo balarAmashcha sammadaH || 16||
buddhastu karuNA sAkShAt kalkI chaitasya saMsmR^itiH |
kR^iShNoM.ashAMsho ha evAsya vR^indAvanavibhUShaNaH || 17||
ete chAMshakalAshchaiva rAmastu bhagavAn svayam |
brahmA viShNushcha rudrashcha mahendraH shrIstathaiva cha || 18||
sanAtanastathA dharmo rAma eva svayaM dvija |
na rAmAt paratastattvaM vedairapi nichIyate || 19||
vedAntA brahmasUtrANi chatvAro nigamAstathA |
setihAsAni sarvANi purANAni tathA dvija || 20||
dharmaH sAM~NkhyaM tathA yogaH sarvaM rAmasya sUchakam |
tatsa~NkochavikAshAbhyAM rAma eva pratiShThitam || 21||
rakAreNa vikAshaH syAtsa~Nkochastu makArataH |
vedashAstrapurANaughairekaM tattvaM vinishchitam || 22||
paraM brahma svayaM rAmaH sachchidAnandavigrahaH |
aho rAmasya charitaM mahAnArAyaNeshituH || 23||
jihvAkoTishatenApi mayA vaktuM na shakyate |
yasya lokaH sadA bhAti golokAtparatastu saH || 24||
mahAvaikuNThametaddhi vyApi vaikuNThasa.nj~nakam |
tatra tasya padAmbhojadvayaM samyak pratiShThitam || 25||
tatparastasya vai rUpaM sotAvaikuNThasa.nj~nakam |
rAmavaikuNThasa.nj~naM tu pramodavanamudAhR^itam || 26||
yato vinirgatAshchAMshA visphuli~NgA ivAraNeH |
balakR^iShNAdayaH sarve.apyavatArapadaM matAH || 27||
avatArI svayaM rAmaH sarvAMshAnAM nidhiH paraH |
kastasya mahimAnaM cha vaktuM shaknoti daivataH || 28||
hayagrIveNa yatproktaM yachcha valmIkajena cha |
mayA tvayA cha yatproktaM vasiShThena tathoditam || 29||
tadaMshamAtrakaM viddhi rAmAyaNamanantakam |
yadi vAlukareNUnAM gaNanA syAnmahAmate || 30||
tadA shrIrAmavIryANAM gaNanA bhavati kvachit |
anyadevahi tadvIryaM kalpe kalpe yuge yuge || 31||
athAbhavaddasharathamandire pare pumAnasau bhuvanabharoddhR^itikShamaH |
mR^igIdR^ishAM nayanavimohanAkR^itiH sa rAghavaH kShapayatu vAkyachApalam || 32||

iti shrImadAdirAmAyaNe brahmabhushuNDasaMvAde mahimavarNanaM nAma navamo.adhyAyaH || 9||
32/203
\section{010\. janmastavo nAma dashamo.adhyAyaH |}
bhushuNDa uvAcha |
kIdR^igrUpadharo rAmo jAto dasharathAlaye |
kimAchAraH kathambhAvaH tadvadasva vidhe mama || 1||
brahmovAcha |
chaitrasya shuklapakShe tu navamyAM shrIpunarvasau |
abhijinnAmayoge.asau kausalyAnandano.abhavat || 2||
sa jAtamAtro niviDAmbudAkR^itiH pItAmbaraH susmitavakrapa~NkajaH |
bhujadvayo vANavarAdichihnitaH svavAmabhAge shriyamuttamAM dadhat || 3||
anarghyaratnAbharaNairvirAjitaH samullasatkuNDalashobhitAnanaH |
shrIvatsalakShmyArpitakaNThakaustubha stviShA svayaM rochitasUtikAgR^ihaH || 4||
ana~NgalAvaNyaparArdhasampadA saMspR^iShTasarvA~NgamanoharojjvalaH |
shR^i~NgArabha~NgIrasasUchakairdR^ishoH kaTAkShapAtaiH kamalAM pramodayan || 5||
AsannagarbhodbhavajAtanidrayA kaushalyayA lakShitajanmabhUShaNaH |
tatashcha sandeshaharairnivedito nR^ipAya dUrvAdalashobhipANibhiH || 6||
sa vAsudevAdibhirAtmajoM.ashaishchaturbhirAsevitadivyavigrahaH |
javAt samAgatya nR^ipeNa vIkShito dR^igbhyAmadR^iShTAshrutapUrvalakShaNaH || 7||
tamAdipuruShaM j~nAtvA paraM brahma svarUpiNam |
tuShTAva vaidikaiH shabdaiH svayaM dasharatho nR^ipaH || 8||
namo namaste raghunandanAya rAmAya rAmAchyutavikramAya |
rAmAya rAmAya cha rAghavAya svayambhuve shrIpataye parAya || 9||
namo hR^iShIkesha shivAya tubhyaM samastadaityAvalinigrahAya |
bhUbhArahartrAdivarAhamUrtaye nR^isiharUpAya cha vAmanAtmane || 10||
namo mahAmandarashailadhAriNe trivikramAyAtulavikramAya |
shrIvatsalakShmAya sakaustubhAya shrIrAmadevAya raghUdvahAya || 11||
tvamAdimUrtirbhagavAn sanAtana strayImayaH shAntarajastamomayaH |
bhakteShu kR^itvA karuNAM kadAchi dihAvatIrya kShapayasyadharmam || 12||
na te vidusteja udagrametad vishve bhavAdyA api daivattottamAH |
svarUpashaktyaiva sadAvadAtayA prakAshase santatasuprakAshaH || 13||
tvamAdidevo vidito.asi samprati shriyA yutaH shrIpuruShottamo hariH |
na chedidaM vishvavilakShaNaM mahaH kathaM prakAsheta madakShigocharam || 14||
dAseShu sAdhuShvamareShu satkriyAM kR^itvAvatIrNo.asi yadAdipUruShaH |
tadeva dR^ishyo.asi na chettu mAdR^ishai rmartyaiH sukhAd yo bhagavAn svayamprabhuH || 15||
namo namaste bhagavan svasAkShiNe svamAyayA saMvR^itavigrahAtmane |
trivR^itsvarUpAya parAtparAya sva eva dhAmanyanishaM vibhAsvate || 16||
rUpaM tavaitat kShayito.avanIbharaM chidAtmakaM bhaktadR^ishAM manoharam |
pashyanti naivAsurabhAvamAsthitAH kathaM chidevAviShayIkR^itaM suraiH || 17||
sthAne.asmadAnandakR^ite bhavajjanurna rAvaNAdyAsurahantave prabho |
tavodbhaTA akSharakAladharma svabhAvasa.nj~nA kati santi no bhaTAH || 18||
yadakSharaM brahma sanAtanaM svarAT sahasranetrAnanapAdabAhukam |
nira~njanaM niShpratimaM nirIhaM shrIrAma tattvachcharaNaM vadanti || 19||
yaH kAlasa.nj~naH paramo niyantA samastakartA bhagavAn mahograH |
bhUtaM bhaviShyadatha vartamAnaM vibhrattadIshAsti vapustvadIyam || 20||
yat karmarUpaM pratijIvamAtataM yathochitaM yachcha yAvachcha rUpam |
phalonmukhaM svavyatirekato.aphalaM tattvaM prabho iShTapUrttAdisAdhyam || 21||
yat svAtmabhakteShu dayAM vidhatse duShTeShu cha krUratayA nirIkShitam |
sR^iShTisthitikShayalIlAshcha kurvan jArgaShyasau te paramaH svabhAvaH || 22||
taM jAtamAtraM kaushalyA prasamIkShya bhujadvayam |
j~nAtvA sItApatiM sAkShAdabravInmadhuraiH stavaiH || 23||
aho dhanye dR^iShTI puruShavara te rUpamamR^itaM
pibantyau svAnandodadhirasanimagne.adya bhavataH |
nimeSho.asahyo me kimiti rachitaH kairavapate
panthA jyotsnAyA te nayanakarasammarshanamabhUt || 24||
aho aho dhanyatamaM kuladvayaM aho aho dhanyatame ubhe dR^ishau |
aho aho dhanyatamaM mahItalaM yatrAsti yogo bhavatA samaM hare || 25||
aho idaM rUpamatIvasundaraM na dR^iShTapUrvaM dharaNItalasthaiH |
anena li~Ngena ramA~Nkitena shrIrAmachandro.asi mato narottama || 26||
yato nivR^ittAH khalu vaidikIrgiro manastathA yadviShayAnudhAvanam |
achintyashaktiprabhavamatarkyaM tattvaM paraM brahma kule.avatIrya naH || 27||
kartA mahanma~NgalamIsha godvija dharmashrutInAM svamupAshritAnAm |
kulaM tathA sAdhu suvishrutaM raveH svapauruSheNaiva mahAyasho dadhat || 28||
evameva kadAchidvai dvAparAnte yadoH kule |
vasudevAchcha devakyAM tavAMsho vai bhaviShyati || 29||
kvachit sutapaso gehe pR^iShNigarbhe.apyajIjanaH |
tenaiva pR^iShNigarbheti tava nAmAnushushruma || 30||
purA bhUmeH sajIvAyA netA.adho vAridherbalAt |
varAhavapuShA deva hiraNyAkShastvayA hataH || 31||
evameva svabhaktasya pratij~nAM rakShatA tvayA |
nihantA shrutidharmANAM hiraNyakashipurhataH || 32||
pralayArNavamagnAnAM vedAnAmuddhR^itau kShamam |
mAtsyaM vapustvayA.a.asthAya hR^idayaM prakaTIkR^itam || 33||
purA pIyUShamathane manthadaNDastvayA dhR^itaH |
mandarAkhyo mahAshailaH kaurma vapurupAshritaH || 34||
purA valiM ChalayatA mahAmAninamIshvaram |
manye vapurvAmanasya tvayaiva prakaTIkR^itam || 35||
purA la~NkAdhipaH kashchidyathedAnIM mahAbalaH |
AsIt sa bhavatA deva rAvaNAkhyo nirAkR^itaH || 36||
sampratyapi balairvR^iddho rAkShasendro dashAnanaH |
tvayaiva vinihantavyaH steno devapatishriyAm || 37||
purA tvayaiva bhagavaMshcharatA dushcharaM tapaH |
nirAkR^itAH parashunA supuShTAH kShatriyAH prabho || 38||
atha vaidikajIveShu kR^ipAM santanvatA tvayA |
buddharUpeNa bhagavan pUraNIyo mahAmakhaH || 39||
jAtuchinmlechChabahule jagati trijagatprabho |
tvayA kalkisvarUpeNa pAlanIyAH shrutidvijAH || 40||
yau balakR^iShNAviti vishrutiM gatau svamAyayAttAtmaguNau narottamau |
vedeShu shAstreShu tathA purANe ShUdgIyamAnau khalu tau tvadaMshau || 41||
evaM bhavAn pUrNakalAbhirAtmanaH sa~NkrIDamAno.abhayado nijAnAm |
ihAvatIrNo.asi divAkarAnvaye svarochiShA rochitasarvavishvaH || 42||
idaM svarUpaM nijadarshanochita mamAnuShaM tAvakamIsha li~Ngam |
AvAM prapashyeva na chetare janA stvayA vidheyaM bhagavaMstathaiva || 43||
iyaM cha te shrIH kamalAlayA ramA vAmA~NgasaMsthA kamalAnapAyinI |
ambhojahastA nayanotsavapradA dhinoti no nayanayuge mR^idusmitaiH || 44||
evaM stavaM vidadhatoH kaushalyAdhipayordvija |
AyayuH sakalA devA brahmAdyAH sendrasha~NkarAH || 45||
te daNDavat sapadi nipatya sammukhe sagadgadAH pulakalasattanUruhAH |
hR^iShyanto dashamukhavepitAntarAH pathyAbhiH stutibhirathAbhirebhire || 46||
brahmAdaya UchuH |
namo namo bhuvanabhayArtihAriNe ripuchChide dvijanigamaugharakShiNe |
parAtparAmalavapuShe rajastamaH saMspR^iShTaprabahalasattvamUrtaye || 47||
namo namo bhavajanuShe.abhavAya cha namo namo khilavapuShe.akhilAya cha |
namo namo guNanidhaye.aguNAya cha namo namo.akhiladR^ishe.adR^ishAya cha || 48||
namo namo nijavibhavAptamUrttaye namo namo nijajanachittapaNyave |
namo namo nigamapathAtigAmine namo namo vitatabhavApavargada || 49||
namo namo naH kAryArthamavatIrNAya viShNave |
lakShmIshAyAkhiladveShTR^isaMharAya namo namaH || 50||
namo namaH puShkarapu~njamAline namo namaH puShkaralochanAya te |
namo namaH puShkaravaryapANaye namo namaH puShkaramadhyavAsase || 51||
yatprArthito.asmAbhirajastra duHkhitairdashAsyakArAgR^ihavAsavepitaiH |
tattvaM svayAch~nAM saphalAM vidhAtu mihAvatIrNo.asi namo namaste || 52||
kaste jano vetti vata pravR^ittiM guNAnuSha~NgavyatikaravarjitAtmanaH |
svamAyayAkhilajanamohanAkR^ite ramAyinaH svargabhavApavargada || 53||
kurmaH kimIsha bhavadekaparAyaNAtmA no vayaM kimaparaM samupAshrayAmaH |
abhyarthayAma udite.anuyugaM vipakShe govipravedapathadharmavivarddhanAya || 54||
tayApi te sakhyamihAchariShyantyete surAH ubhayataTAntavAsinaH |
ihApi te nAtha ramaiva sa~NginI bhUyAnmahAmodakalA vivarddhinI || 55||
eShA shrI bhavato nityA svAMshaiH krIDiShyati tvayA || 56||
rAsAdilIlA bhavato parAtparA vibhAtu no hR^idaye nAtha nityam |
ashokaku~nje bhavato ramesha ramAsahasreNa yathA vilAsaH || 57||
ihApi te deva tathaiva bhUyAt
sAketavallIvanavallarIbhiH |
imAH prabho surasarito.apare taTe
vanAshrayAH suravara gopakanyakAH |
ramAmayAstava janimAnamichChavaH
sasantatastava bhavitAra IshvarAH || 58||
evaM stuvatsu brahmAdiShvatra sammodasambhramAH |
tuShTuvuH shrutayo.apyenaM samAgatya tripR^iShTataH || 59||

iti shrImadAdirAmAyaNe brahmabhushuNDasaMvAde janmastavo nAma dashamo.adhyAyaH || 10||
59/262
##
Encoded and proofread by Vishal Pandey

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}